MY FAULT By Te-i Mrs Ambrose (Completed)

[Te-i Mrs Ambrose]

My Fault
By: Te-i Mrs Ambrose


Chapter 21



Damdawi in kawt kan thlen chuan Duke chu garrage lamah a tlan lut a, a din hnu pawhin kei chu ka la ṭhu reng. Ka ngaihtuahna a buai. A thusawi tawi te khan ka ngaihtuahna a la tibuai lutuk. Ani hian thil ṭha lo te a tih mai ka hlau.










Car aṭang Duke chu a chhuk a, ka ṭhutna lam kawngka chu rawn hawngin "Lo chhuak rawh le" tiin ka vawn theih turin a kut chu min pe a, amah en reng chung chuan "Eng thil ṭha lo mah tih i tum lo tiraw?" ka ti thlawt. A lu thingin "Ti lovang" a ti a, ka thla a muan phah chuang lo.










"Duati, ka kut hian a nghak reng che a nia" a tih leh takah chuan a kutah chuan ka chelh a, car aṭang chuan ka chhuk ve ta a. Damdawi in chheh vel hrim hrim pawh chuan ka lung an len a, ka hmuh lohna a lo rei ve tawh deuh bawk nen, ka thawh lai hun vel kha mitthlaah a lo lang nghal kuar kuar mai.










Damdawi in chhunga kan luh dawn takah chuan Duke chuan ka kut a kaihna chu zawi muangin a thlah a, min rawn enin "Min zui zel rawh aw" a ti a, ka buk nghat chuan a kal nghal. A hnungah ka zui ve nghal dat dat.










Ka lo sawi tawh ang khan damdawi in chuan lung a len khawp mai. Midang chuan damdawi in hi an hne a, a theih hram chuan damdawi ina awm loh hi an duh ṭhin. Keia tan ve thung chuan ka hun tam tak ka hman tawhna ṭhin a ni a, a rim te hi miin an hne viau laiin kei ve thung chuan ka ngai riau mai a ni. A damdawi in ringawt pawh chutianga ka ngaih chuan a chhunga thawkte phei chu ka ngaih ṭhin zia inhre ve kher lovang.










Duke chu inchung lama chhohna step bulah a ding a, rawn lehhawiin min en reng. A kut chu ka chelh turin a rawn dahchhuak leh a "Lo chelh rawh le" tiin pa zet chuan a kiai nghal suk, kei erawh ka ngaihtuahna a la buai viau. "Tun bak hi ka chelh tawh lovang" a tih phei chuan ṭah khum chiam mai chi emaw ni zawk ni?












A kut chu ka chelh a, nghet zet hian a rawn hum nghal. Min enin a nui leh suk a, he a nui hmel ka hmuh lohna rei tawh zia hi. Mahse a nui hmel hmu mah ila, chhung lam aṭanga nui a ni lo tih ka hria a, a hlim vanga nui lah a ni hek lo. A nui lui mai mai a ni.











Midang tan chuan he damdawi in chungzawl hi eng mah a ni lo maithei. Kei leh Duke tan erawh a danglam lutuk. He hmun aṭang hian alawm zawi zawia kan innel ve ṭan a, bul hial kan lo ṭan ve ni.










Inchung zawl kan thlen chuan ka thaw ham ham. Duke chuan min en reng a, a hmelah chuan lunglenna bak ka hmu lo. Ka hmuh dan ber chuan lunglenna thuk tak pai ang maiin a ni ka hmuh ni.









"Ka kuah thei che ang em?" tiin ngun zet hian min melh a, "a bak engmah ka ti lovang, ka kuah ringawt ang che, ka ngai lutuk che a" a tih zawm leh chuan ka ṭah mai loh nan heh ka pet fan fan. Kei pawhin ka ngai lutuk alawm.








"Ka hmuh lai reng pawhin ka ngai che, a hma anga awm leh kha ka chak a, inhnaih taka awm leh te kha ka chak, mahse chu lah chu a theih tawh dawn si lova, vawikhat chiah, nghet takin ka kuah ang che aw" tiin ka chhanna pawh nghak lo chuan min kuah nghal a.









Nghet zet mai chuan min kuah a, kei pawhin ka kuahlet ve ta nge nge. Kan inkuah hnuhnun ber kha engtik nge tih pawh ka hre tawh lo. A rim te chen hian ka ngai thar ngawih ngawih. "Ka kuah lai reng che pawh hian ka ngai che" zawi sup hian a ti a. A hnu chuan min thlah a, kan ṭhut ṭhinnaah khan a ṭhu thla a, kei pawh a bulah chuan ka ṭhu ve nghal.










"Kan nunhlui te kha ka theinghilh ngai lovang, hei hi lo hre ve reng ṭhin la, he Duke Rosangzuala hian a hmangaih reng dawn che a nia, min hmuh tawh loh hunah pawh min theinghilh suh aw" a tih chuan rang zetin a lam ka hawi a. "Eng thil ṭha lo mah tih i tum lo tiraw? Tinge kal bo tur ang maia i ṭawng, min ti hlauthawng a nia, eng thil ṭha lo mah i ti lovang tiraw?" aw khur deuh dar dar hian ka ti a.











Tumah he khawvelah hian chhungte a nei tawh lova, a nu leh a u zui tumna rilru a neih ka hlau ber. Duke chu rawn nuiin lu a thing a, "eng thil ṭha lo mah ka ti dawn lo" a ti a. "Anih tinge khatianga i ṭawng a?" ka tih leh chuan min rawn hnaih vut a, ka mittui a rawn hruk chuan ka mittui chu a tla a ni tih ka hre ve chiah.










"I nun aṭang ka kal bo tawh dawn miau alawm, ka lo â ngawt mai tiraw? Ka thil tihsual engmah ka hmu thei lova, ka mit tih var nan ka u hial laksak ka ni a" thawk ipik hmel zet hian a ti a.









"Kal thei ka la ni lo. Midang min mamawhtu an tam lutuk. Mi chanhai zawkte tan ka la dam ve ṭang ṭang a ngai, Doctor ka nih hi, mi tihdam hna thawk tur ber hian ka nunna chu lak ka tum lo, hlauthawng suh" tiin min nuih leh a, mahse a za hlawl lo tih a hriat.









"Harsa mah se, a hma aia nasa zawkin ka tum tawh ang. Ka theinghilh ngai dawn lo che a, ka hmangaihna che hi an bo ang em ka hre lo. Ka damchhung zawng pawhin ka hmangaih maithei che. Mahse, i nunah chuan ka rawn inlan leh tawh lovang.









Tunah chuan ka tihsual ka hre ve tawh. Nang chu a tir aṭang khan ka ta ni ngai lo tur i ni. Thil pawi tak tiin ka hnaih lui che a, hnaih ngai miah lo tur che ka ni. Mahse, ka thiltih avang khan ka inchhir ngai lova, ka inchhir dawn hek lo.








A chhan chu i ṭap lai thlem theitu che ka ni miau a, i hmangaihna changtu ka ni tih ka hre bawk. Kan rem lo mai pawh a, tunah chuan pawm thiam ka tum ve tawh. Min suih remtu an awm loh chuan keini chuan insuih rem tum sateh mah ila, kan thei dawn chuang lo. Keini aia thiltithei zawk rorel dan chu keini lo thlak theih a ni hleinem" tiin a vanvadak a.









"Ka lo pawm duh lo ṭhin, ka ta i ni ngai dawn lo a ni tih chu ka pawm theih nan ka u laksak ka ni, ka i kal tir pawh khan ka la harh phah chuang lo, mahse a hnua ka hriat tak chu maw. Ka ta tur ni lo kha ka ta nihtir che tumin Pathian duh loh zawng ka ti a, a rah chu ka seng a, ka neihchhun ka u laksak ka ni" a ṭang nghal ṭawlh ṭawlh mai.









A mit a chhing tlat a, a ngawi reng. Kei chuan engmah sawi ve tur ka hre lo. "Duati, ka chhuang lutuk che, kawng dik i zawh a ni. Tun aṭang chuan i rilru tihah zawngin ka awm tawh lovang. Hlim takin lo awm zel ang che.








Khang kan hun hman dun chhung rei loteah khan hriat tam tak ka nei hman. I pasal tan nupui tha tak ni ang che.









Hlim taka i awm phawt chuan kei chu ngaihtuahawm ka ni ngai lovang. I hlimna kha ka duh ber ṭhin a ni réng a, mahse ka lo hmangaih luatah che kawng dik thliar hrang thiam lovin rei tak chhung rilru hah takin ka awmtir ṭhin che a, tunah chuan ka thlah ve tawh ang che.









Mahse lo hlim thung ang che, i hlim loh ka phal miah lo ania, i ṭah chuan ka rawn pan leh duh mai ang che, chuvang chuan lo ṭap ngai suh, i ṭap lai hmel ka hmu thei lo tih i hriat kha, ani i pasal khan a tihṭah che emaw, a tihnat chuan, chu thu ka hriat ni la la chuan ka rawn nei let leh nghal ang che, chuvang chuan ṭap ngai suh ang che" a thilsawi ho zawng zawng chuan ka ṭah an tihchhuak a, ka lawm tho bawk.









Tunah chuan Duke pawhin a hrethiam ve ta alawm. Keini pahnih inkar kha chu a rem ve ngai dawn lova, famkim lo zetin kan inhmangaih ve a, mahse kha kan inhmangaihna kha chu par chhuang ve lo tur a ni a, par chhuah kan tum nasat poh leh kan chhel vela mi te leh he leilung ngei pawh hian min phalsak loh avangin min tina na ngun dawn.









"Ka hlim ang, mahse, keimah chauha hlim ka duh lo ania, nang pawh lo hlim rawh, hmeichhe ṭha tak tawng la, keini pahnih anga famkim lo taka inhmangaih lovin nangni chu famkim takin inhmangaih tawh ru aw. Kan pahnih kha chuan midang hriata kan induhna tihlan a rem lova, inthup kan ngai a, midang hmuha inkaih takngial pawh kha a theih ṭhin lo anih kha.










Mahse, tunah chuan khawi hmun pawha a kut i chelh theih tur, midang hmaah pawh i ta a ni tih i lantir theih tur hmeichhia tawng ngei ang che, hlimna zawng zawng ka duhsak che a nia" ka ti ve a, ka sawi ang hmeichhia hi tawng ngei se ka ti takzet.










"Ka nunah tumah lo lut leh turin ka duh tawh lo" Duke-a'n a tih chuan amah chu ka en nghal a, a awm dan ngaiin a la awm reng. "Hmangaih dang nei leh turin hmangaihna ka nei tawh lo. Ka lo hmangaih ṭhinte chu an kal vek tawh. Tuna ka nun chhan tur chu rethei leh chanhai te tan chiah a ni.











Hmangaih dang nei tur chuan min phut ve duh suh, ka damchhung zawngin ka hmangaih dawn che, mahse mi nupui i nih avangin ka hmangaihna che chu ka ngawih bopui tawh ang. Ka hmangaihna che ka lantir tawh lovang a, ka hmangaihna che chu tumah hriat loh turin ka thup tawh ang." tiin min en a.










"Duati, hmangaih dang nei tur chuan min tilui duh suh. I hriat chian kha, kan duh duh hi kan hmangaihin kan hmangaih lo thei lo. Hmangaihna chu amaha lo piang ve mai a ni. Keini duh leh tum vanga pang thei a ni lo" a ti leh.










Ni chu thlang lamah zawi zawiin a liam a, ni tla eng set phut chu kan en reng. Ni a tlak rual hian Duke pawh ka kal ve ang a, kawng hran ve ve kan zawh tawh ang.










Kan pahnih inkar chiah ngaihtuah hi chuan hringnun hi a fair mawlh lo alawm. Inkawp thei ngai lo tur kha intawntir kan ni a, kan inkarah hmangaihna a piang bawk. Rem thei lo tur si chu tinge min inhmangaih tir kher tia phunnawi leh Pathian dem mai tum hi a awlsam takzet.










Hmangaihna hrula kal kawp thei lo tur kher kha intawntira inhmangaih tir kan ni. Pathian hian chhan nei lovin thil a thlentir ngai lo kan ti ṭhin, anih chuan Duke nena kan inkar ve hi nge a chhan ni ang?











Duke chu a ding chhuak a, kei pawh chu min kaitho ve nghal zat. Ni tla mek en pah chuan "damlai pawha indi ve thei lo nafam chu thih hnu piah lamah hian kan indi ve thei ila tiraw?" a rawn ti hlawl a,










"Kawlkil mawiin nangnen inkawp ve thei ila tha tur a nia" ka ti ve sep a. Chu ni tla mek chuan lunglenna namen lo min neihtir a, lung a leng veng veng. Tuna inpawh taka kan din dun ang hian engtikah mah Duke leh Rinzuali hi kan ding dun thei tawh ngai dawn lo.












"Tunah chuan ka kar hi a rem ve thei ngai dawn lo a ni tih ka hre tawh bawk a, ka rawn beisei tawh lovang che, nang chu nupui fel tak ni zel ang che." a ti a, a hmel chu ka en ṭhin, ka ngaih tur zia ka hria. Kei pawhin chiang taka ka hriat chu, ka damchhung zawngin Duke ho ka theihghilh tawh ngai dawn lo.










Ka ngaihtuahna leh rilru te'n min phatsan hma chu ka theinghilh dawn lo. Ka nunah hmun pawimawh ber chu a chang reng kher lo maithei. Mahse mi pawimawh tak pakhat chu a ni reng tawh dawn.









"Ka va thlah tawh ang che" Duke-a'n a tih chuan lu ka bu nghat a. Damdawi in chung aṭang chuan kan chhuk thla a, a car-a kan luh hnu chuan tumah kan inbe tawh lo. Car chu tinungin kan in lamah a inkhalh nghal.










In kawta kan din chuan chhuk mai ka tum a, "Lawk" a tih avang chuan ka ṭhu leh rih. "Duati, lo hlim reng rawh aw," tiin thuk zet hian min melh a, lu ka bu nghat. "Kal tawh rawh le" a tih chuan car aṭang ka chhuk a, ka chhuk fel rualin ka biangah mittui a luang a. Car-ah chuan la lut leh nghal.










"Tinge?" a awah chuan min ngaihtuahna bak thildang engmah ka hre lo. Ṭah nui hak pahin "Nichin khan ka sawi theinghilh alawm, chaw lo ei ṭha tawh ang che, pindanah inkhalhkhung tawh lo bawk la" ka mittui hruk mawlh mawlh pahin ka ti a.










"Imm, ka pindanah ka tawm tawh lovang" aw nelawm zet hian a ti a. "Anih ka kalsan tawh ang che, i hriselna lo ngaipawimawh tawh ang che" ka tih leh chhan a bu nghat nghat. Ka chhuk hma chuan keimah zawkin ka kuah a "A tawp nan tak tak, hlimna chhiar sen loh nei ve mawlh ang che, i hlim loh chuan ka hlim famkim thei dawn bik lo a nia" ka ti a, Duke chuan engmah a sawi ve tawh lo.









Inchhunga ka luh chuan ka pa pawh a bang ve tawh. Ka nu pawh chuan min be leh nghal a, "Hmingmuana pawh pindanah a awm kha aw, chaw kan ei thei ṭep tawh" a ti nghal zung zung. Pindana ka luh chuan Hmingmuana chu a lo buai hmel khawp. A inchhawp hnawk nuaih mai.









A bulah chuan kalin, "in banna a rei tawh em?" tiin ka zawt a, "rei ve deuh tawh. Eng nge i va kalna lam te chu?" tiin min zawt let ve thung a. "Imm, a tṭa" tih chauhin ka chhang. Hmingmuana chuan min en vang vangin "Ka bula awm hi hrehawm I ti viau em?" a ti hlawl.








"Hrehawm love, tinge min zawh te thut a?" tiin ka chhang a, engmah sawi lo chuan min en leh vang vang. "hmangaih miah loh nena khum khat inṭawm te chu thil har lutuk tur mai a nia, vawiin lamah ka thawhpui te ti ti khan ka ngaihtuahna a tibuai" a ti a, a rilru chu a buai hmel viau bawk.





"Ṭhen tur che in min duh em?" a tih chuan ka meng bial nasa ngawtin ka ring!


(CHHUNZAWM LEH TUR)

[Te-i Mrs Ambrose]

Chapter 21

ZAWMNA



"Ṭhen thei che ila chu ka ti lutuk, mahse ka thei ngang si lo" tiin ka kut a rawn chelh a, a bulah chuan min pawt ṭhu nghal bawk. "Ka ṭhen che chuan tun ai hian i nun a hlim zawk ka ring. A chhan chu i mi duh tak kiangah zalen takin i awm thei dawn miau a, mahse ka atchilh em che a, ka ṭhen phal hlawl bawk si lo che.










Keimah ka inhmangaih avanga kal tir phal lovah che min ngai thei. Mahse nangmah ka hmangaih vang chea kaltir phal lo che ka ni zawk. A chhan chu tuna i mi hmangaih em em hian na takin a siam lovang che tih a sawi theih loh. Kei chuan ka tina ngai dawn lo che, chumi avanga ka kianga awmtir tlat che hi ka ni.










I na hmel hmuh a, tuam dam hna thawh ai chuan na miah lova siam che ka duh avangin ka kaltir phal lo che a ni" a ti dap dap a. "Tunah chuan Duke nen kawng hrang kan zawh tawh alawm, kei pawh i nupui ka ni a, nupui ṭha tak nih ngei ka tum bawk. Ka laka i rilru puthmang ka hria, i dawhtheih zia te chenin ka hre vek. Ka ring sual lovang che tih ka hria, ka ring tawk che a, kei pawhin min tina ngaiin ka ring lo." ka ti ve sep sep.










"Ka hmangaih lutuk che" tiin ka biang a rawn fawp a. "Oh, ka nu te'n chaw ei an lo duh tawh ang" tiin Hmingmuana chu ka thawhsan a. Choka lama ka luh chuan ka nuin chaw a lo khawrh mek tawh. "Min lo koh tur che alawm" tiin ka pui nghal a. Chaw ei kan peih hnu chuan ka pa leh Hmingmuana pawh an rawn lut a.










Chaw kan ei laiin ka pa chuan thingtlang lama a ṭhianpa fa a rawn awm tur thu a sawi a. Ka nu pawh chuan chanchin chu a zawt chiang nghal. Ka pa sawi dan hmangah chuan hmana a boral ta, a ruang pawh an va kil ve kha niin ka hria.










"An harsa a, an fanu college kal mek kha hetah rawn awm mai se ka lo tia, kan puih ve theihna kawng a nia, heta ṭangin college kal se la, a mamawh chu keimahni in tum sak mai ila ka lo tia" ka pa chuan a ti charh charh a, ka nu leh Hmingmuana chuan engmah an sawi lo nangin an pawm hmel khawp mai.











"College hostelah a awm a, mahse a hostel fee thawkchhuak tu ber a awm ta si lova, hostel aṭang a chhuah a ngai dawn a, keiniin lo awmpui mai ila a ṭha ang. A nu pawh khan min rawn râwn a, a fanu college kal lai chu a bang mai dawn em ni te hial kha a rawn tia, mahse chutia kal peih lo pawi ni hlei lova college han chawlhsan ngawt chu a dik theiin ka hre si lova, 'heta awm rawh se' ka lo ti ta mai" ka pa bawk chuan a ti leh charh charh.










"Engtikah nge he lama a rawn awm ang?" ka nu chuan a ti ve a. "Naktip hian a rawn kal ang" tiin ka pa chuan a chhang a. "Rintei pawh i awl deuh thei ang chu tiraw?" nuih pahin ka pa chuan a rawn ti daih, "ka buai ngai hran hleinem" nui chungin ka lo ti ve mai. "Tlaikhat lek thleng a sil chhawk theih che pawhin a ṭha hrim hrim" ka nu pawh chuan a lo ti ve a.










Kan ina lo awm thar tur chu vawiin hian a rawn kal dawn a, ka nu chuan "kan in a hre em ang chu maw?" te hi a ti leh ringawt zel. "I pa te hian an hman chuan an lam thei mai dawn asin maw le" a rawn tih chuan "A bo em nang, a rawn thleng ve mai ang" ka ti a. Ka nu chu a bu nghat nghat.










Tlai lam dar li bawr velah chuan a rawn thleng ta ngei a, ka nu nen rawng kan bawl laiin a ni a lo thlen ni. A inthlahrun hmel hle a, a hming pawh hi Ruatsaki ni tain ka hria. "I pindan turah ka hruai ang che" ka ti a, a bungraw ṭhenkhat chu ka laksak ve nghal a.










"Ruati, nuam ti deuhin i awm dawn nia, nu Mawi tiin min ko ṭhin bawk la" ka nu chuan a ti ve nghal zung zung bawk. "Rinte, lo inbuaipui mai ru aw, kei chuan rawng ka va bawl zawm ang e" min rawn en chungin ka nu chuan a ti leh nghal zat a. Ruatsaki nen chuan a pindan tur lamah kan inzui a, chhun lamah ka lo tifai tawh a, engtin em a awm lovang chu maw.










"Ruatsaki, i duh duhin i awm dawn nia, i duh leh lo inbual la" ka ti a, ka vawikhat hmuhna anih avangin ka khawr deuh riau. "Oh, Lalrinzuali ka nia, a ṭhenin Rinte min tia, a ṭhenin Duati, i duh dan zawk zawkin min ko mai dawn nia" ka ti leh hnuhnawh a. "Nangmaha awm i duh ang, ka va chhuahsan phawt ang che" ka ti leh. "Ka lawm e" a rawn tih sep chuan ka nuih var var.










Pindan aṭanga ka chhuah chuan ka thaw hak mai. Eng vanga zam em em nge maw ka nih le? Ka nu awmna lama ka let leh chuan "Ka rin aiin a inthlahrun hmel daih, a zahzum hmel bawk sia" ka ti niah niah. Ka nu chuan nui chunga "i rawn mo tirh phei kha chuan Ruati ai hian i inthlahrun hmel zawk" a tih chuan kan nui dun hak hak.










"I rawn mo tirh kha chuan i tlangnel har viauin ka lo ring a" ka nu bawk chuan a ti leh. Kei pawhin ka mo tirh lai ka ngaihtuah chhuak a, a lo rei ve pangai ta hle mai. Tunah chuan ka nu leh pate pawh keima nu leh pa ang tak takin ka en ve thei tawh a, he inah hi chuan ka thla a muang em em tawh.










Rawng kan bawl zawh dawn lamah ka pa a rawn haw a, a hnu lawkah Hmingmuana a rawn haw ve bawk. Pindan lamah ka zui lut ta lem lo. Ruatsaki pawh inthlak diamin a rawn chhuak a, "U Duat, ka lo pui ve ang che u" a rawn ti a, a kut hma lamah a suih a, a awmdan chu a la hrehawm viauin ka ring.










Engmah ti lo tura ka tih chuan a awm thiam loh mai ka hlauh avangin "Ka bulah hian lo ṭhu la" ka ti a, hmarcha rawt mawlh mawlh pah chuan "Engmah chu tih a ngai tawh chuang lova, nidanga i buai loh nan" tiin thil kan dahna te chu ka hrilh mawlh mawlh.










A changin ka kawk a, Ruatsaki pawh chuan ka kawh lam chu a en ve nghal thuai ṭhin. Thil awmna kan inhrilh kim thawkhata ka hriat hnu chuan "inthlahrung lo la, i duh duhin i tal mai dawn nia" nui chung hian ka ti a , a rawn nui ve sen sen. Ka hawi phei chuan Hmingmuana chu choka luhna bulah ban chu ngengin min lo en reng.










Ka nuih seih ringawt. Ani pawh a rawn kiai ve suk. "U Duat, i pasal ami?" Ruatsaki'n a rawn tih chuan lu ka bu nghat a. "Fa in nei tawh em?" a tih leh chuan lu ka thing leh nghat. "Kan college lamah mi ṭhenkhat hian a chanchin an sawi leh ṭhin a" a tih chuan a ngaihna hre lo zetin










"Tu chanchin maw?" ka ti a, "u Hmingmuana hi" a tih chuan ka nui ringawt. "Engtin nge a chanchin chu an sawi ṭhin a?" a hnu chuan ka ti a, "case lakna a neih tawh chuan an ti ti ber a ni ṭhin. Thiam an tih zia te, hna a tlin zia te an sawi ṭhin a" a ti a. "I vannei tawp" amah bawkin a tih leh chuan "Nia" ka ti sep ringawt.










"Chaw kan khawrh tawh mai dawn em ni?" ka nu rawn lut ina a tih chuan kan che nghal zung zung. Chaw kan ei naah ka nu leh pa chuan Ruatsaki chu an be mawlh mawlh reng a, ka rawn luhtirh kha min ti hrechhuak. Kei pawh min be reng ṭhin anih kha.










Zan lamah chuan "I thil tur ka rawn hawn che a" tiin Hmingmuana chuan bawm pakhat lian vak lo hi min pe a, ka hawn chuan sana (watch) a ni. A nalh kher lehnghal. "Tinge min pek a?" ka tih chuan "lawmthu sawi aiin zawhna maw ni dawn a" nui chung hian a rawn ti a, ka inthlahrung hnuhnawh viau.










"Ka ti mai mai anih kha" ka hmel a chhiar thiam nge Hmingmuana chuan a rawn ti nghal a. "Ka hmuh khan i inhmeh dawn riauvin ka hria a, sana hi i thlah phal mang lovin ka hria" a ti a, amah bawk chuan "i ban nena mil tawk turin ka tan tir nghal bawk, ka lo buntir ang che" tiin ka sana bun lai chu a phelh a.










"Ka sana pawh hi a la ṭha reng asin, mahse ka lawm lutuk, a mawi ka tih zawng tak" tiin ka sana bun lai chu ka en a. "I inhmehin ka ring reng a ni," tiin ka kut a fawp zeuh. "in la romantic thei viau suh" ka ti tawp. Sawi tur dang engmah ka hre miau lo.










"Ka romantic ang chu tih nak laiin 'inla' i rawn telh kher a" Hmingmuana chuan a ti a, ka nui tawp. "Ruatsaki kha a zahzum hmel i ti ve em?" ka tih daih chuan a ngawi vang vang a. "I nau ni awm tak a ni, a ngawichawi hmel emai" a rawn ti ve a, ka nui hak hak mai. "Ka ngawichawi em ni?" ka tih chuan "ka hmuh hmasak ber ṭum che chuan ngawichawi deuh angin ka hmu che" a ti a.










"Vawiinah ka nu khan ka rawn mo tirh lai kha a sawi chhuak a" ka sawi tum ber pawh hre chuang lovin ka ti sap. "khatih lai kha chuan ka inthlahrung ṭhin khawp mai, min ngei deuh bawk sia" nui deuh chung hian a rawn ti ve a. "ka rawn mo tukah i bo daih zui" ka tih ve chuan Hmingmuana pawh chuan a ngaihtuah let ve a ni ngei ang, a khabe a dawm vang vang mai. "Ka lo hre tawh hleinem" a ti a, a nuih danah a hria ti erawh ka hre thung.










"Duati, eng hna mah thawh tawh loh chu i duh takzet a maw?" min ti ta daih a, amah ka en chuan zawhna mitmeng a khatin min lo en ve reng. "Inah awm reng chu i nin ṭhin te ka hlau a, kei lahin i duh hun hunah ka chhuahpui thei lo che a" a rawn ti leh a. "Ka nu bulah ka awm thei a, a nuam lutuk alawm" ka ti ve ṭha mai.










"Chu lovah, a chang chuan hnathawh hi a ninawm ve ṭhin a" ka tih chuan rawn nuiin ka biang a piai hlak. "Imm, hrehawm i tih ka hlauh vang a nia" a rawn ti let ve leh. "I duh hun hunah chhuak ṭhin rawh, inah tawm chawt kher a ngai lo ania" a ti a, ka bu nghat nghat.










Zinga ka harh chuan ka thochhuak nghal a, ka hmai te phihin pindan aṭang ka chhuak a, tumah an la tho lo. Thingpui ka chhuang a, a la hmat deuh avangin chaw erawh ka la chhum lo thung.










Ruatsaki lo lut ka hmuh chuan "i va tho hma ve, zan lam te i mu tui em?" tiin ka lo zawt nghal a. "Imm, ka mu tui lutuk" tiin min chhang a, ka bula chair chu pawtchhuakin a rawn ṭhu ve nghal. Ka thingpui chhuan a so avang chuan be chhunzawm lovin thingpui siam turin ka thawhsan leh rih.










Ka siam zawh chuan a hmaah thingpui no chu ka dah sak a, "dar engzatah nge class i neih ang" ka tih chuan, "10 leh a chanve aṭang ka nei ang" tiin min chhang leh. A college kalna te ka zawt a, kan awmna aṭang chuan thlemin a hla ve deuh. Zawhna ka zawh chin chiah min chhan ṭhin avangin kei pawhin a hnu chuan zawh tur ka hre ta bik lo.










"U Duat, i hmelṭha e" a rawn tih hlawl chuan phawk zetin Ruatsaki chu ka en a, a thingpui no a lo en char char. "Nang chu i hmel ṭha si a, i mi duh deuh te pawh i nei thei zelin ka ring" a tih chuan ka chhung lam a na zawk. Ka duh chu ka nei thei lo anih hi.










"Hmel ringawt hi a ni hleinem" ka ti a, amah en pah chuan "duh zawng i nei ami?" ka ti leh, lu a bu nghat. "Ani chuan hriat pawh mun hre ve kher lovang" hnual hmel deuh hian a ti a "i tana ruat anih chuan engtikah emaw i la nei mai ang, mahse i tana ruat pawh a ni lo thei tho va" ka ti niah niah.










"College i kal lai velin i luck ṭhin ngawt ang" a tih leh chuan ka nui ta hak hak. "Luck chuang bik nang, ka lowkey thei lutuk, ka ngawichawi a, mi tam takin min biak ngam loh phah a, a ṭhen lahin chapo te min ti daih zel" ka tih chuan a rawn nui ve a, "keipawh miin chapo hmel min ti daih zel.










A ṭhen phei chuan 'an retheih tehreng nen a induh khanglang' te hi min ti ṭhin a, ka induh lam pawh ni lovin ka ngawihchawih mai bakah mi biangbiak ka thiam lova, a chang chuan ka insit deuh bawk ṭhin a" a ti ve nuah nuah. "kan retheih leh hausakna hian awmzia a nei hleinem nem. Zan khata ral thei thil mai chauh alawm anih. Nangpawh mahni inthlahrun nan leh insit nan hmang suh. Ṭha takin zir la, i tihṭhat chuan tu mahin an hmusit ngam lovang che










Hausa deuh, engmah thiam neih nei lova chapo ve arh te ai chuan rethei tak leh dress pawh simple tak nena a thiam zinga i tel kha miin an ngai sang zawk ang che, i college kalpui te kha an chhungte avanga hausa mai mai alawm an nih. Nangmahin chu in intluk tlang vek" ka ti duah. Ruatsaki pawh chuan lu a bu nghat nghat a.










"Ṭha deuhin ka zir ang a, ka nu te leh nau te ka la chawm ang" a rawm ti ve a. Kei pawhin ka pawmpui khawp mai. "Nangni pahnih chu in va innel hmel tawh ve" ka nu rawn thochhuak chuan a ti a. A thingpui tur ka thlisak nghal.










Chhun lamah chuan ka nu hnenah kan in lama ka kal tur thu ka hrilh a. A lo remti khawp mai. Kan in lama ka kal hmain ka nu leh pate ta tur thil ka leikawi sak a, ka pa chuan a pawm duh ang em pawh ka hre lo. Phone aṭang hi chuan kan inbe ngai lo, ka nu nen pawh kan inbe khat khawp mai.










In ka thlen chuan ka hawi vang vang. A hmaa kan ina ka haw ṭum bak kha ka kal leh ta lo kha a nia. Ina ka lut hlawl chu ka nu chuan mak a tih hmel kher mai. "Duatte, i rawn kal tur thu engmah i sawi lova" a rawm ti hluai. "Rawn ṭhawn thut che ka duh a" ka lo ti ve mai.










Ka nu tana ka leisak chu ka pe a, ka pa ta tur ka lei pawh ka pe nghal bawk. "Duatte, engmah dik lo a awm lo tiraw?" ka nu ina a tih chuan lu ka bu nghat nghat. "Kan inbe khat sia, ka ngai tawh bawk che nen ka lo kal anih hi" ka ti a, ka nu pawh chuan ngaih hmel zetin min en ve reng.










"I pa pawhin a hmuh che chuan a lawm hle ang mawle" ka nu chuan a ti a, ka danglam nghal zawk mai. "A hmaa i hriat ṭhin ang kha a ni tawh lo" a tih leh chuan ka meng deuh awk. Hlim hmel zetin ka nu chuan "Pastor thar kan nei a, amah nen chuan an inkawm nasa a, tunah chuan i pa pawh a danglam tawh lutuk.










I chunga a chet dan avang te khan nuam lo a ti ṭhin lutuk. Tunah chuan a takin Pathian a nei ve tawh niin ka hria. A hma kha chuan a hming maiin Pathian a nei a, tunah chuan a nunah Pathian a nei tak tak tawh" lawm hmel zeta a tih chuan engmah sawi tur ka hre lo. Mahse thinlung lam a lawm viau a, ka hlim bawk.










Ka nu nen chuan rei tak kan ti ti a, kei pawhin ka pa avang chuan nuam ka ti a, ka hlim veng veng.










Kan in aṭanga ka chhuah hnu lawkah call ka dawng a, ka en chuan Sammy a lo ni . Eng tak chu ni ang maw tiin ka chhang a. "Duati i buai em?" a rawn tih chuan ka buai loh thuin ka chhang a. "Hrilh duh che a nei a" a tih chuan sawi turin ka lo ti ve nghal vat.










"Duke hi chuan hrilh che a duh lem lova, mahse i hriat ngei a ṭul in ka hria" a tih chuan a chhan hriat si lovin ka lungphu a rang dawt dawt. "Eng thil chu nge ni a?" hlauthawng aw ka tak hian ka ti a. "chutia hlauhthawnpui tur chi pawh a ni lo" a rawn tih chuan a chhan chu a sawi har ka lo ti hmanhmawh.










"Duke hian super specialist nih tumin a zir zawm dawn a, ram dangah" a tih chuan "Thu lawmawm anih chu" ka ti hliai, ka lawmpui a, mahse Mizorama a awm tawh lo tur chuan engtin emaw tak hian ka lung a tichhia. Inhmu ngai lo mah ila khaw khatah awm leh khaw hrana awm chu a dan a dang dawn takzet.










"Chu chauh chu a ni hleinem" Sammy chuan a rawn ti leh a, thaw hakin "a vaiin sawi ta che, tlem tlema sawi lovin" ka ti hap. Lehlam ami chu a thaw hawk. "Tunah a zir zawmna tur a buaipui mek a, a zirzawm theih dawn chuan Mizorama rawn let leh a tum tawh lo. Ram dangah awm hlen a tum tihna anih chu" a tih chuan ka nghing lawih mai.










Mizoram chhuah sanin ram dangah a awm ang a, vawikhat mah a rawn let tawh dawn lo maw! Eng vang nge? Ram dangah mahni Mizo pui pawh ni lo te awmna hmunah a damchhunga awm a tum a maw? Ka mittui a hnam sawk. Ka chheh vela thawm pawh a reh nghal diak maiin ka hria.










"I hre thei em?" Sammy-a'n a rawn tih chuan ka inthing harh a, "Aw, ka hre thei" ka ti chhuak sap. Ka hrawkah min hnawh ṭung mai, ka ṭah hi a chhuak em em ringawt bawk. "Lo biak ve tum hram teh. Hepa lung lian lutuk hi ka biak chi a ni pawhin ka hre lo. He lamah a nu leh u thlan a awm a, chu pawh enkawl thei lo tur anga ka ngaihtuah hian a dik thei lo... Lo be ve lawk mai rawh" a ti deuh hrawk, ka chhang em pawh ka hre lo.










"Tihbuai che ka inthlahrung ṭhin viau ania" dam deuh zawk hian a rawn ti a, a ṭhianpa chungchangah chuan a lung a awi lo viau a ni ang, nidanga a ṭawng dam ṭhin tehreng nen, tun ṭum chu a ṭawng dam thei meuh lo chu a ni. "I thu a ngaihpawimawh ṭhin avangin ka rawn be leh nge nge zel che anih hi" a rawn ti leh a.










"Biak ka lo tum ve chhin dawn nia" ka ti a, mitthlaah Duke a lang nghal zut zut. "Engtik vela chhuk nge a tum rilruk a?" ka tih zawm leh chuan "A zirna tur a tihfel theih dan a zir a nia, thla khat hnu lamah daih pawh a ni thei a, a aia hmaah pawh a ni maithei" tiin min chhang a, thla khat hi midang tan chuan a rei viau mai thei. Tunah tak hi chuan thlakhat pawh chu a rei dawn lo hlein ka hria.










"Imm, ka lo be ve chhin dawn nia" ka ti a, call chu kan titawp nghal a. A inzir zawm chuan tun aiin miin an ngaisang zawk ang a, mi pawh a pui hnem thei dawn tih ka hria, mahse Mizoram lama lo let leh a tum tawh lohna chuan rilru chu a tibuai ve takzet.










Kan inhmuh loh chu kan tan a ṭha ve ve tih ka hria, mahse ram danga a awm hlen tur chuan ngaih a tingam mawlh lo. Ka thinlung kil sir lam lah chuan 'keimah vang a ni' tiin a sawi reng a, keimah vang a nih theihna chance a tam lutuk. Keimah avanga ram dang hial a pan chuan awm nuamin ka awm thei ngaiin ka ring lo. Ka indem reng mai ang.










"Duke keimah vang anih chuan awm hlen suh aw" tiin ka phun sap. Taxi ka phar a, kan in lamah ka let chuan a tlai ve deuh duai tawh. In ka thlen chuan pindan lamah ka thlang nghal a, ka phone chu phawrhin Duke number chu ka dial chhuak leh nghal zat. A number rei tak chhung ka block tawh chu ka unblock a, number mai mai mah ni se ka en vang vang.










A number chu ka tin leh zuai zuai ṭhin. Ka call ang nge call lovang tihah chuan ka rilru leh thluak a thuhmun thei meuh lo. A chanchin ka ngaihven chuk chuk hi thil mawi a ni lo tih ka hria, mahse tih thumal hi a awm leh tlat ṭhin.










Heta a awm avang hian ka hnaih lehin kan thawnthu kan ziak tha dawn tihna pawh a ni lo. Mahse ram danga awm hlen tur chuan ka ngai ngam meuh lo a ni. A nu leh u te thlanlung kal sana ram dang a pan tur te, a nu leh u te thlanlung ina enkawltu nei lo ang maia an awm tur leh Duke ngei pawhin a hmu tawh ngai lo tura ka ngaihtuah chuan a dik theiin ka hre ve mawlh lo a ni.










Keimah vang a nih ka rin avang pakhatin a kal hi ka duh lo bawk. Keimah avang maia ram danga awm hlen tum anih chuan... ka ngaihtuah zawng ringawt pawhin hrehawm ka ti a, ka inthiam thei dawn hauh lo bawk.










A hnu chuan call tura min turtu a chak em avangin ka call ta nge nge. A ring ral ral a, phone ri mai mai hian lunglenna a kaitho thei a ni tih ka hre ve chiah. A hmaa kan inbiak ve ṭhin lai te mitthlaah an lo lang a, khang hun kha nunhlui an ni tawh a, an rawn let tawh ngai dawn lo. Khang hun laia Duke leh Rinzuali pawhin kawng hran kan zawh ve tawh bawk. Call chu a rawn chhang a, ama aw ngei ka hre leh ta.

[Te-i Mrs Ambrose]

My Fault
By: Te-i Mrs Ambrose


Chapter 22



NOTE: Story hi ka check hman ngang lo aw. Typing mistake a tam viau emaw, chhiar harsa a awm chuan min hriatthiamsak mai dawn nia


STORY lamah lut ang u le




"Hello" engmah ka sawi loh avang chuan a lo ti leh. "Duke" ka ti sep, "Duati, eng nge ni ta?" aw dam ruih hian a lo ti a, a awah chuan min ngaihtuahna ka hre tel thei. "I chanchin ka hriat hi a dik em? Awm bo hlen i tum em ni?" ka tih chuan lehlam ami chuan thawk a la vang vang.










"Hre ve lo la ka duh asin" a rawn tih sup chuan "keimah vang a ni em?" ka ti nghal. "Chutiangin ngai suh" a rawn ti a, ka chhanna duh min la pe lo. "Keimah vang a ni em ka tih chu?" ka tih nghek chuan "hahdam phawt rawh, i rilru a buai anih kha" dam thlup hian a rawn ti leh a, engtin nge hahdam tak chuan ka awm theih ang ni?










"Ka zawhna che chu" ka tih chuan a ngawi leh vang vang phawt a, "tuin nge hrilh che?" a tih daih chuan ka thawchhuak vak. "Chutiang a pawimawh lo" ka ti deuh hmak mai. Pangai tak pawhin ka be hlei thei meuh lo chu a nih hi.










"I hriat ka duh loh chhan chu tuna nangmah vang nia i ngaih a, i rilru a buai ang hian i buai ang tih ka hlauh vang alawm ka hrilh duh lo che" zawi sup hian a rawn ti a, ani hian awm ngaihna pawh min ti hre hlawl lo.










"Duati, ka dah lawk a ngai" a rawn tih chuan rang zetin "la dah suh" ka lo ti hliai. Ani ve thung chuan "Emergency a ni tlat, nakinah kan sawi ṭha dawn nia" tiin call chu a hang-up nghal a. Ka phone chu ka en reng ringawt. Amah chuan min rawn call ka ring tawh bawk si lo. Keia tan lah call reng a nuam bawk si lo. Ka thaw hak ringawt.










Keimah avang chuan awm hlen lo sela ka ti. A nu leh u Mali lakah pawh ka inthlahrung dawn lutuk. A mimal duhthlanna chu ka zahsak lutuk. A awm hlen duh chhanah hian ka tel lo anih chuan awm hlen pawh ni se a pawi lo, a ṭha vek, a hlim phah maithei a, a tan mithar an inlan maithei bawk, mahse chutiang a nih si lova keimah vang anih vaih chuan.. ka thaw hak mai.










Hmingmuana rawn haw chuan nidanga a tih ṭhin ang bawkin thil min lo hawn leh tawh a, thil ka tih hian ṭhi leh bengbeh (jewellery ) tih vel lam ai mah chuan chocolate lam te a rawn hawn tlangpui ṭhin. "Engmah hawn ka ngai lo ka tih kha" ka tih chuan "i ti ve ziah" a rawn ti deuh hmuk a.










"Ka lawm lutuk tho a" nuam lo ti deuh taka ka tih chuan "I tana thil lei hi nuam ka ti ṭhin a, pek hlan che ka nghakhlel ṭhin hle bawk. Naute duat taka duat che hi ka chak ṭhin" a tih chuan ka nuih ringawt tawh. "Aw le aw le, ka hria e, ka lawm lutuk ania" tiin a chocolate min leisak chu ka la a, hawng nghalin a hmuh laiin ka keih deuh hmawk, "a tui lutuk" ka tih chuan a rawn nui ve ta hram.










"Naktuk chu chawlh ka nei thei dawn a, kan chhuak dawn em ni ang?" min rawn titih deuha a tih chuan "khawiah nge kan chhuah ang a?" ka lo ti ve a. "ka hre lo, hmun nuam tawkah hruai ngei che erawh ka duh" a ti a, lu ka bu nghat. Hmingmuana chuan ka bana rawn chelhin a lamah min pawt hnai a, ka kawngah a chelh nghal bawk.










"Ka nupui duh em em nu, engtikah nge i thinlung hi ka neih ve theih ang le?" thum deuh chhak hian a ti a, mak tak mai chu Hmingmuana min khawihna hi ka feel thei ngai lo. Eng ang pawhin tum mah ila, tum loh ang hlauhin a lakah hian eng rilru mah ka pu thei lova, ka lungphu lah a la rang chhin miah lo bawk.










"I thinlung ka neih ve theih hunah chuan" tiin a kiai suk a, "khawvela mipa vannei ber ka ni ang" a tih zawm leh a, ka nuih seih ringawt. "Va inbual rawh, keipawh ka chhuak dawn" ka tih chuan ka bianga piai hlakin bual in lam chu a pan nghal a.










Ka chhuah chuan Ruatsaki pawh a lo haw ve tawh, dar thum lam pawha class a neih avangin a lo haw hma thei lova, tunah pawh a thawmhnaw a la inthlak lo. "Ruatsaki, chet vak pawh a ngai lo, i duh chuan va inthlak la" ka ti a, lu thin nghat pahin a che zawm mial mial.










A tuk lamah chuan Hmingmuana nen kan chhuak ta ngei a, hmun hrang hrangah min hruai a, a nuam ka ti viau. Mahse kan haw dawn hnaih lamah a hmelhriat te ina an zawhna vang khan ka awm a nuam thei der lo. A thawhpui ni ngei tur pakhat khan









"Engtikah tak thu lawmawm hi hre ve ang i maw? In inneih aṭang kum chanve hial a vei ve tawh a" a ti chuar chuar anih kha. Hmingmuana chuan nui chungin "kan la hmanhmawh hran lo" a ti mai kha a nia. Ka nu leh pa pawh hian a ruk tak chuan rai har min ti viau tawh maithei a ni.










Hmingmuana hian vawikhat mah min la nawr ngai lova, nupa nun tih lovah chuan pasalin a tihtur zawng zawng a ti vek. Mahse nupa nun kherah hi chuan ka inpeih hma chu min khawih chhin a tum ngai lo. A lakah ka lawm viau ṭhin a, a rilru puthmang tur ka ngaihtuah ngai mang lo. Fa neih te a lo chak ve viau mai thei. Kei lahin chutiang lam ka lo ngaihtuah ngai der si lo.









Ka nu leh pa tak pawh hian eng rilru nge an put ve ang le? An fapa fa hmuh an chak ve ang a, pi leh pu nih te pawh an chak viau tawh mai thei a ni. Keia tan tak pawh mawlsawmna ka dawn a, fa ka lo pai ve thei hlauh anih chuan Hmingmuana hi ka la hmangaih chhawm thei maithei a sin. Rilru fim taka inngaihtuah ka ngai a ni. Tun ang reng hi kan ni thei dawn lo. Nupa nun nghet tak nei tur hian a pakhat chauhin a tum avangin nupa nun a nghet thei lo. Ṭanrualna ṭha tak neih a ngai ve a ni.










Car-a kan chuan laiin Hmingmuana chuan "Eng nge i ngaihtuah?" tiin ka kut a rawn hum a, ṭhen deuh sakin "nichina i ṭhiante thilsawi kha ka lo ngaihtuah a" zep lem lovin ka ti ṭha ve mai. "An sawi ve mai mai anih kha. Kei chuan I inpeih hun ka nghak thei che alawm" tiin ka kut la kangin a fawp zeuh.










"Fa neih ve i chak ṭhin em?" ka tih chuan min rawn en zawk a, mahse hmalam a melh leh nghal. "I inpeih hunah chuan chak dawn lutuk e, nangmah ang tereuhte kha a ni ang a, a nu anga hmeltha leh zun ngah tur" tiin ka kut a chelhna chu a tinghet sauh. Kei pawhin ka ngaihtuah ve a, a nawm hmel ka ti a, fa neih lam hi ka lo ngaihtuah ngai lova, ngaihtuah takah chuan fa neih chu a chakawm ka ti thar riau.




__________________________________________________





Zan lamah pawh hna pawimawh avangin Hmingmuana chu a lo la haw lo. Tlaiah khan min rawn hrilh a, zanin chu a tlai viau dawn a ni awm e. Tun ang hun thleng thlenga hnathawh ngai chu a mak ka ti reuh hle.










Muani nen kan inbia a, Hmingmuana lo haw hun ka nghak bawk. "I awm lova, ka ning thei lutuk" a ti nang nang mai. "Zovani te ho lah hi an ṭawng seuh seuh reng a, mi rel an hrat reuh sia" a rawn ti leh a, "awi, kei pawhin tunah hian ka rel mek" tiin za zet hian a rawn nui nghal hawk hawk, kei pawh ka nui ve ringawt.










Ka rilrua thil awm te chu ka hrilh ve a, fa neih lam chungchang te pawh. "Fa neih theih chu malsawmna a nia, nang pawhin tunah Hmingmuana hi hmangaih lo mah la, i fate pa chu engtikah emaw i la hmangaih ve maithei asin tiraw? I pasal i thlang tawh a, a kawtawp thleng a i thlan tawh tur a ni.










In inkar pawh i kutah a awm ve tih hria la, Hmingmuana hian tunah a hmangaih viau che pawh a ni thei. Mahse tun ang reng hi a ni lo maithei. I lakah beidawn hun pawh a nei thei. Tuna a hmangaih em che avang hian thlamuan phah lutuk suh. Anih loh chuan i la chan thei.










Mipa thinlung let tawh vek vek hi chu engtikah mah a ngaiah an let tawh ngai lo a nia. Nang pawhin hlauhthawnna chang hre ve la ka ti. Mi tamtak chuan hmangaihtu an hmu thiam lo ṭhin a, an hmangaih tih an hria a, an dam chhungin an hmangaih dawn emaw an inti ṭhin.










An thla a muan luatah hmangaihtu an hmangaihna an lantir tawk lova, 'min hmangaih reng dawn' tih rilru puin an awm a. Mahse tupawh hian Hmangaih let ve kan phut ṭhin. Hmangaih miah lotu leh an hlutna pawh hrethiam lotu kiangah mi hi an hlim reng thei lova, an hlutna hmuhsaktu an tawn chinah chuan an hlutna hrethiamtu chu an pan ta mai ṭhin.










Nang pawhin i pasal kut vawn i thlang tawh a. Hmangaih let ve chu i hna a ni. Tunah khan a nghak thei che pawh a ni maithei. Mahse nakinah a hlutna hretu a lo lan chuan i lakah a beidawn avangin a hlutna hmuhsaktu chu a pan mai thei. Chuvang chuan nang pawhin hmangaih let tum rawh." a rawn ti duah.









"Nupa inkar hi mi pakhat chiahin a ven reng theih a ni lo. Pahniha thawh hona a ngai ania, tunah Hmingmuana hian a hmangaih em che a, nang pawhin hlauhthawnna chang pawh i hre lo. I hmangaihna let theih miah loh chuan midang lakah a rilru a pelhe ve thei reng ania. I pasal anih angin nang pawhin nupui tih tur chu i hriat ve kha.










Hmangaih let ve a phu a nia, a hnenah i let tawh a, i rilruah thildang dah tawh lovin i pasalah chiah khan rilru pe tawh rawh. Nunhlui ngaihtuah a lungleng hman i ni tawh lova, tunah chuan i pasal tan nupui ṭha tak nih kha i tih makmawh a ni" a rawn ti leh.










"Ka lawm e, I thusawi te hi hriat reng ka lo tum ang" ka ti let ve a. Muani sawi hi a dik vek chuan ka hria, Hmingmuana ka thlang tawh a, Duke ka thinlunga ka chamtir reng hi a dik tawh lo. Ani chu ka nunah mikhual angin a lo lut a, mikhual chuan let hun an nei nge nge ṭhin angin Duke pawh ka thinlungah a awm reng thiang lo. A chhan chu mikhual a ni miau.










Kei pawhin harsa ti takin a taksa ka kalsan a, ka thinlung lamah erawh amah ka vawng reng thung ṭhin. Tunah chuan chu pawh chu a rem leh tawh lo. Ka thinlung aṭanga ka haw tir ve tawh a ngai a ni. A harsa anih pawhin ka tum leh ang.









Muani nena kan inbiak laiin call a lo lut a, mahse ka chhang lo. Muani nena kan inbiak zawhah call let mai ka tum deuh a ni. Muani chuan min fuih pah reng a, ka tana ṭha tur nia a hriat apiang min hrilh a, ani ang ṭhian ka nei hi ka lawm takzet.









Muani nena kan inbiakna kan tihtawp meuh chuan a tlai duai tawh. Min lo call tu ka en chuan Sammy tho a ni. Ani hi ka call let chuan Duke chanchin bawk a rawn sawi leh dawn. A chanchin ka ngaihven reng chuan ka theinghilhin ka thinlung aṭang ka paih bo thei ngai dawn lo.










Sammy chu call let loh ka tum nangin amahin min rawn call leh tak si avangin ka chhang a. "Ka rawn tibuai ṭhin khawp mai che" inthlahrun hmel tak hian a rawn ti a, "Thupha ka chawi mawlh mawlh e" a tih zawm leh zat.










"I pasal a awm em?" a tih chuan a awm loh thuin ka chhang a. "Ka rawn call chhan tak che chu hei hi a nia. Pasal nei tawh chungin Duke vangin ka rawn call leh tawp mai ṭhin che a, ngaihdam dil che ka duh a ni. Hmaichhan ngeia ngaihdam dil che ka tum viau nangin hna i bansan tawh a, mo inih miau avangin i tan chhuah reng a mawi si lova, call kaltlangin ngaihdam ka dil tawp mai che anih hi" a rawn ti duah.










"Ngaihdam indil ngawtna chhan tur awm loh chu" zangkhai thei ang berin ka lo ti ve a. "Tun aṭang chuan ka ṭhianpa chungchang thu hla avangin ka rawn tibuai tawh lovang che. Hetia ka lo pawh buai ve reng che hian in nupa inkarah buaina thlen thei tu che u ka ni ve tlat" nuam loh tih hmel zet hian a ti a, chhan let ngaihna vak pawh ka hre lo.










"Duke-a'n I thusawi a ngaihthlak ṭhin avangin ka rawn be leh ngawt mai ṭhin che kha a ni a, min lo hrethiam hram hram dawn nia. Tunah chuan hei hi ka hre tawh. Duke chu mipa puitling a ni a, amaha thutlukna siam thei pawh a ni tawh. Aman a tana ṭha chu a hria, a ṭul atih chuan Mizoramah a rawn let leh em em ang, kei pawhin ka ṭhianpa avangin ka rawn tibuai tawh lovang che" a ti a.










Ṭha taka inbe zawmin kan inmangṭha a, Sammy nena kan inbiak zawh rual deuh thawin Hmingmuana a rawn haw a, a chauh hmel hle lehnghal. Min hmuh chuan nui chungin min rawn pan a. A bag aṭang chuan ka chocolate tur a rawn phawrh leh nawlh tawh.










Nui var vara lak sakin lawmthu ka hrilh a. "Ka nupui hian thilṭha deuh a tawng em ni?" tia ka hnar a piai zeuh chuan "Eng thil ṭha chu nge ka tawn ang?" ka lo ti let ve a. "Nidanga a ngaih loh thua min chhan hmasak ṭhin laiin tunah thung chuan ṭha takin i la a" a ti a, ka nuih ringawt.










A coat a phelh lai chhan ka lo pui ve a, a chauh hmel hlein ka hre tlat. "I chau viau em ni?" ka tih chuan "Laptop hmaah ka ṭhu rei deuh a ni ang. Ka lu hi a na deuh a" a rawn ti mai. "Va inbual phawt la i inbual zawhah i lu chu ka hmehsak dawn che nia" ka ti a, a hmel a eng nghal vekin ka hria.










"Ka nupui in min duat dawn si a, hmanhmawh deuhin ka va inbual ang e" tiin bual in lamah a lut a, a hlim hmel chuan min ti hlim ve tho. Tunah chuan a hma aia rilru ka pek zawk a ngai tawh. Hrehawm dawn mah se, Duke chu ka thinlung aṭang ka chhuah tir a ngai a ni.










Hmingmuana a rawn chhuah leh chuan khumah ka ṭhu fel der tawh. Khum mawng lamah erawh a thawmhnaw hak tur ka dahsak thung a. Ka thawmhnaw dahsak chu lain a khi suk. A inhak zawh chuan khumah a rawn lawn a. Lukham pakhat chu lain ka mal chungah ka dah a.










"Tah hian lo mu la, i lu kha ka lo hmeh sak ang che" ka ti a, Hmingmuana pawh chu phur hmel zetin a rawn mu ve mai. A lu chu ka hmehsak a, "Zanin ang hian awm reng thei ila" a tih sup chuan amah chu ka en a.









"Hun tlem ka la mamawh a, nakinah chuan i tan hei aia nupui ṭha hi ka ni tawh ang" ka tih chuan rawn mengin chiang takin ka mitah a en a. "Duati, nangmah leh nangmah kha innawr lutuk duh suh, hun i mamawh zah apiang hmang rawh. Nangmah leh nangmah kha i innawr nasat lutuk chuan i tan a hrehawm mai mai ang. Kei chuan ka damchhungin ka nghak thei che alawm" a ti sup.









Mit a chhing leh nghal a, kei pawhin a lu chu ka la hmehsak reng. "Rei lote min nghak leh lawk la, chumi hun a ral hunah chuan i tan nupui ina a tih tur zawng zawng ka tihsak vek ang che" ka ti a, tihsak ngei ka tum bawk ang. Ka thlang ta rau rau, kei pawhin hei aia nasaa ka beih a ngai a ni mai.









Hmingmuana chu tui zetin a muhil tawh a. A hmel chu ka en reng. Ka tan theihtawp a chhuah a. Ani anga pasal dawhthei hi an awm tawh kher lovang. Min nghah a inpeih reng a, keiman hrehawm ka tih hlauhin min nawr lui ngai hek lo. Kei pawhin tunah chuan a hma aia nasain ka bei ang a, ka tum bawk ang.









Ka phone a rawn vibrate chuan message vang a ni tih ka hria. Ka phone dawhkana ka dah chu ka ban a, notification a Duke hming ka hmuh chuan ka lungphu a rang leh tawh. Hun ka mamawh ka tih tawh kha, a chhan chu Duke hi awlsam takin ka theinghilh thei dawn lo.










Duke-a'n Mizoram a chhuahsan rual hian ka thinlung aṭang chhuak ve nghal se tih ka duh. A message chu ka open a, *Nangmah indem turin ka duh lo che a nia* tih hi a ni a, *A hma kha chuan Mizoram chhuahsana ram danga awm daih mai kha ka duh ṭhin. Mahse ka nu leh u vangin ka awmbo ta lo a ni.










Mizoram hi nuam tihna pawh ka nei ngai lo. Ka nu leh u kha ka khawvel an ni a, ka kalsan phal lo. Mahse ka nunah nang i lo lang a, i rilru natna avanga I ṭah lai pawh khan ka tan chuan ni eng mawi tak lo chhuak ang i ni a, ka nunah i pawimawh nghal em em.










Ka nu ina min kalsan pawh khan ka u leh nang in awm a, mahse ka u pawhin min kalsan ve leh a. Nang chu awm ni la i kiangah awm reng ka duh ngei ang. Mahse nang pawh tunah chuan i awm tawh lo. Chumi avang chuan ka dem che tihna a ni lo. A hmaa ka lo chak tawh ṭhin kha ka tipuitling thei tihna a ni mai* rei tak a type hnuin a message a rawn thleng leh a.










*Engtikah nge i chhuk dawn?* tih ka thawn chuan *kar hnih hnu velah chuan ka chhuk thei tawh mai ang* tiin min rawn chhanglet a. Keimah indem tur chuan min duh lo, mahse, ka indem loh phah thei chuang si lo.









*Keimah avang chuan hrehawm ti duh suh ka tih kha aw. Ram danga awm hi ka duh ṭhin dan kha a ni reng a, tunah chuan a hmaa ka chak ṭhin kha ka tipuitling thei dawn a* tiin a rawn thawn leh.









*I rawn let tawh dawn lo em ni?* ka tih chuan *Ka hre lo* tih teh tawp hi a rawn thawn let a. *Ram danga awm chu i duh ṭhin ngei a, mahse awm hlen kha i duh dan i em?* ka tih chuan a seen nghal a, mahse a rawn reply lo.










Rei tak a message chu ka en a, a hnu chuan typing.. a rawn inti ta kulh. *I hlim ka duhsak ber che a, ka kianga i awm lai kha chuan venthawn i ngah a, i nun a hahdam pumhlum ngai lo. Kha kha ka hre ve alawm. Engtikah emaw chuan i pasal kiangah i hlim ngei ang tih ka hria. I hlim chu ka duhsak lutuk che a, hlim reng turin ka duh bawk che.










I ṭah lai hmuh ka duh ngai lo, i biangah chuan mittui a luan ve pawhin hlimna mittui chiah luang se tih hi ka duhdan a ni. Mahse I hlimna duhsak ber tu che hi Angel ni lovin mihring ve mai ka ni si a* tih a rawn thleng a, eng vanga chu chu rawn thawn nge anih ka hre der lo.










*I hlimna duhsak tu che i mihring ve tho ka nih miau avangin ka kiangah ni lo midang kianga i hlim hmel ka hmuhin keimahah hrehawm tihna a awm dawn tih ka hria. I kianga awm tur chu tunah pawh hian ka thik asin. I hlim duh viau mah ila, mihring ka nihna a lang lo thei lo.* tih a rawn thleng leh a.









*Chuvang chuan mihring dawizep tak ang maia kal bosan che ka thlang a ni. Hetia ka sawi avang hian hlim lo ngai suh, ka thinlung hi chuan englai pawhin hlim turin a duh reng che a nia. Ka duhsak lutuk che.









Keimah ka inngaihtuah ve a ngaih avangin ka awm bo ang. Nangmah indem suh. He mihring hian kawng dik a zawh theih nan i hmuh phak lova awm ka thlang ta mai a ni* tih a rawn thlen leh chuan ka thaw chhuak ta hak a.










*Hlim la, i hlim chuan keipawh ka ngaihtuahawm lovang. I hlimna ka duhsak ber che. Engtikah emaw, nang hmachhawn leh tur chea ka inpeih thei anih ngai chuan ka rawn let leh ang* tih a rawn thlen chuan ka mittui tla ringawt chu ka hru a.









*Hlimnaa khat nun nen lo let ngei ang che aw. Kei pawhin chutih hunah chuan hlim takin ka lo thlir ve ang che. Hmahun atan duhsakna ka hlan a che* tiin ka thawn a. *Keimah avang tehlul hi chuan hlim lo tawh suh, I hlimna ka duhsak ber ve tho che a nia* tiin ka thawn leh hram. Min rawn chhang tawh hran lo.









Kan inthlah danah hian lung dam lo mah se, kan inthlah a ngai miau. Engtikah emaw chuan tuna kan pahniha thawnthu hi tute emaw inzirna a ni mial mah na.










Mihring pahnih inkarah chuan hmangaihna a piang chhuak ṭhin a, lo dan theih ngawt lah a ni lo. Mahse hmangaihna nazawng hi bawhzui vek a rem lo. A entirna chu Duke leh Duati te hi kan ni.










Bawhzui rem lo hmangaihna kan bawh zui a, a tawpah kan na ta reng bawk. Midang pawhin bawhzui a rem loh chuan bawhzui lo ngam se tih hi ka duhsak. Hmangaihna hi sual a ni lo. Mahse inhmangaih dan dik lo a awm ve tlat si a ni. Hei hi midang pawhin hrethiam ngei se ka duh takzet.










Anih loh chuan an chan tur chu Duke leh keima chan ang hi a ni. Kan harh chhuah nan kan hmaah khawdur a rawn tir a, Duke phei chuan a u hial a chan phah anih kha. Vanduaina a ni nameuh mai. Mahse kha kha a harhna, kan thil tihsual a hriatna chhan pakhat a nih miau avangin Chung lam in a u kha a la a ni a tih loh theih loh.










Mi nupui emaw, mi pasal hmangaih tlat te hi thil dik a ni lova, an nupaa an lo inhmangaih lo emaw, chhungte nawr avanga an innei anih pawhin mi nupui pasal an nihna avang ringawt pawhin a hmangaihtu chuan a hmangaihna chu a bawhzui thiang lo. Thil mawi a ni lo bawk. Anih loh chuan a tawpah mualphona ruamah emaw, natna emaw, a nih loh vek pawhin a aia sual thuk zawka min hruatu a ni thei.










Kawng dik lo lam lo zawh ta anih pawhin Pathian hnenah thupha chawi a, kan tihsual te kan hriat a, siam ṭhat kan duh chuan Pathian hian ngaihdam theih loh a nei lo. Kan lo tihsual thuk viau tawh pawhin Pathian khian englai pawhin min ngaidam duh reng a ni.










Piannawn lehna hi awm se zawng. Kan pahnihin kan vul dun ve ngei tawh ang. Chung lam pawh khian min remtih sakin ka ring bawk. Chutah chuan midang laka inzep reng ngai lovin hlim takin kan leng ve tawh ang a, tu mitmei mah ven ruk kan ngai tawh lo bawk ang.










Tuna kan chenna khawvelah hi chuan Duke Rosangzuala hi ka thlah a ngai miau. Kan thawnthu ziah zawm rem lo hi khawvel tharah ziahzawm dan awm ngei se ka ti takzet. Chutih hunah chuan thawnthu hi thawnthu lungchhiatthlak ni tawh lovin thawnthu hlimawm a ni ve tawh mah na.



A TAWP TA..
Ti ngawt dawn ila, dawt ka sawi dawn sia, a la tawp lo aw

[Te-i Mrs Ambrose]

Chapter 22


ZAWMNA



Zing lama ka harh chuan ka rit deuh luk mai. Nimin lamah ka ngaihtuahna a lo kal thui bawk nen ka muhil thei mai lova, mut ngial ka tum pawha awmzia a awm loh avangin bathlar lamah ka chhuak ringawt a, arsi an lang chiang bawk nen arsi thlirin ka ṭhu zui ta reng, mut chhuah chu khawi lamah, ka harh telh telh mai si a, khum lama ka let leh pawhin ngaihtuahna a vak kual ruai reng a, a tawpah chuan mutchhuakin min zem ve ta hram a, ka mut meuh kha chuan zing lam dar thum a ni der tawhin ka hria.










Ka hmai te phihin ka phih zawhah kan pindan ka chhuahsan a, choka lam ka pan nghal. Ruatsaki a lo tho tawh a, min hmuh chuan nui var var chungin thingpui min pe a, a fel ka ti tak tak a ni. "Thawh hmat lutuk pawh a ngai hran lo a nia aw, zirlai i nia, i taksa in mut tam te pawh duh chang a awm ang, i duh duha rei i mu thei a nia" ka tih chuan a bu nghat nghat.










"U Duat, nimin lam i mu ṭha thei lo em ni?" tia min zawh chuan "Imm, ka mut a chhuak thei lova" ka lo ti ve mai. "Nidang i ang lo sawt reuh lutuk a, i chauh hmel sia" a lo ti ve leh mai. "Ka chauh hmel vak emaw ni le" nui hak hakin ka ti let ve a, Ruatsaki chu a bu nghat nghat.










Thingpui in pah chuan kan titi malh malh a, Ruatsaki hi chu a fing var ve a, biak a nuamin kawm pawh a nuam viau zel. A chang erawhin thil hi a sawi leh phawng phawng zel a, a naupanna a lang ka ti mai. Thingpui kan in zawh chuan "Anih nang he lamah i awm tho a, hmun ka va phiat ang" tiin ka chhuak zui a.










Hmun ka phiah laiin ka nu a lo tho ve a, zing tho hlim e ti lovin a nui nghal sang thei. "Rintei chu, hna zawng zawngah hi i kut emaw i ti ṭhin a, i nu hi min zuah ve ṭhin rawh" nui pah hian a ti a, "Nang te chuan engkim i thawk alawm, i thawh dan a nawm hmel thei em a, thawh ka chak ve vek zel" nui var var pahin ka ti let a, dawt muhlum ka sawi lo. Duh tawka ka nu a chet tawh hi chuan chet ve hi a chakawm em em zel.










Chhun lamah ka nu nen kan bazar dun a, ka nu hian thawmhnaw a ṭhui ve ṭhin nangin ama ta tur hi a ṭhui khat khawp mai. Tunah pawh puan ṭhuina dawrah a intehtir mek a ni. Dawr aṭanga kan chhuah chuan ka nu nen thil eiin kan inhnawh puar phawt a, kan ei tur kan ei zawh chuan kan haw ta nghal.










Ni a ral ve bek bek zel a, ka ni hman dan a la ngai reng. Ina awm chu hahdamthlak viau mah se, hna ka thawh loh rei tawh lutuk vang nge a chang chuan a hrehawm lek lek thin. Inah tihtur awm ang ang kan tih zawh tawh chuan thildang han tih leh chuan tur vak a vang tawh a, tihian ka awm mai mai ta zel.










Duke pawhin khami nia min lo biak bak kha chu min lo be leh ta lova. Ka awm awl veng veng tawh chuan a thusawi ho kha ka ngaihtuah chhuak leh nge nge zel. A sawi ang ngei khan lo let leh se ka ti, chutih hunah chuan Duke Rosangzuala ang ngeiin lo let leh se tih ka duh.










Tunah chuan Duke Rosangzuala hi a hmaa mi nen an inthlau rih lutuk. A kehchhia a, a nun a chul rup mai a, a nunah hlimni eng hmuh tur a awm ve lo. A hmaa Duke kha chu a nat ber lai pawhin a inthup thei a, a nui thei tal a, a natna a hrikthlak hnuin pangai takin a awm leh mai thin.










Tuna Duke ve thung hi chu a nun a mumal hlei thei lova, a natna lantir dan takngial pawh a thiam tawh lo. A hmaa a natna thinrimna tala a lantir lai kha chhan a thinrimna a reh rualin a na te pawh an dam deuh thin anih kha. Khatiang mipa tal kha ni leh turin ka duh.











Zan khat chu ka pa in min lo call ve tehmial a, mak ti zetin ka phone chu ka en reng. Ka chhan chuan lehlam ami chu a reh veng veng a, "Pa i hre thei em?" ka tih chuan "Aw" tih te chiah a rawn sawi, a rawn call chhan tur awm ka ngaihtuah a, ka hre der lo.










A hnu chuan "I hman hunah i lo leng dawn em ni ang?" a rawn ti a, "A, awh, ka lo leng dawn nia" ka ti ban nak nak. "Umm, i lo len dawnah lo sawi la" a ti a, kei pawhin ka sawi tur thu chuan ka chhang ve leh mai.










"Tunlai chu i cher riau" Hmingmuana khuma rawn lawn mek chuan a ti a, a thutfel rualin uluk zetin min en nghal. "Ka cher emaw ni le?" ka ti ringawt. Ka cher awm pawh ka hre lo. "Vitamins I ei a ngai anih hi. A hma kha i ang lo lek lek" min thlek reng chung chuan a ti a, ka nuih ta ringawt.










A tuk chhun lamah chuan ka hman tho avangin kan in lamah chuan len ka tum a, ka nu ka hrilh a, ka pa ka hrilh ve leh chuan "A zia anih chu. Vawiin chu ka nuam lova, office pawh ka kal lo" tha tak hian a rawn ti ve mai. Sawi tur teh chiam pawh a awm loh avangin call chu kan titawp a.










In lama kal ka tum ka chhuah rualin ka hawi kual nghal a, taxi phar tur remchang ka zawng a ni. Ka hmaah car a rawn ding a, a car chu ka hmuh fo hnu a ni. Glass a rawn in-down leh a, Duke hmel ngei mai chu ka hmu leh ta.










"Khawi lamah nge i kal dawn?" tiin ka mitah tak a en a, ka zam leh titih der. "Ka nu leh pa tlawh ka tum a" ka lo ti tha ve mai. "Lo chuang rawh, ka va thlah ang che" a tih chuan ka meng deuh awk. "A, a ngai kher hleinem, taxi a tam alawm" ka tih chuan engmah sawi lovin min en reng ringawt.










"Ka nghak reng che ania" a tih leh takah chuan ka chuang ta nge nge a. A tu a mah chu kan tawng lo ve ve. Duke chuan a tih fo dan angin ngun takin kawng a en a, kut khat chiahin a khalh leh bawk. Hetia a khalh hian a inhmeh ka ti. Sawi hmaih theih miah lovin a kamiz var ban chu a thlep leh tawh a, a kut zungtang zawng zawng leh car steering nen chhan a inhmeh kual vel vek.










"A lo rei ta hle mai" a ti sup, engmah ka sawi hran lo. "Kar thar thawhtan ni hian ka chhuk dawn a" a tih chuan a lam chu ka hawi nghal. "I tifel vek tawh elo?" zawi tein ka ti sep. "Imm, fel vek tawh" a rawn ti ve a, engmah kan sawi leh tawh lo ve ve.










"Kan thleng e" a tih chuan ka harh zawk mai. Nui sangin "Ka lawm e aw" ka ti a, lu bu nghutin "I lo inenkawl tha dawn nia" a ti ve a. Car atanga ka chhuah hnu pawh chuan kan in lam chu ka pan mai lo. "Vawiin chu i tlanliam lai ka lo thlir ang che" ka ti a, nalh zet hian a rawn nui a. Hnehsawh zeta car chu turn in engmah sawi lo chuan a tlan let ta nghal a.










Tuna ka thlir liam theih ang hian ka nun atang hian awlsam takin liam thei se aw ka ti vawng vawng mai. "Mangtha le" ka ti sep. A hre dawn lo. Mahse thlah ve ngei ka duh bawk si a ni. Vawiin hi Ningani a ni tawh a, karleh thawhtana a chhuah dawn chuan.. Lu ka thing nghat nghat. Ngaihtuah zawm tawh lo teh ang.










In ka thlen chuan ka nu chiah ka hmu a, ka pa chu ka hmu ve lo thung. "I lo thleng elo? I pa a zual deuh a, pindan lamah a mu anih kha. Lo va lut rawh, thingpui ka siam zawhah ka lo lut ve ang" ka nu chuan a ti a, "Ka lo lum zawk ang" rang zeta ka tih chuan "i pa pawhin a falin a hmu duh ang che" nui chung hian a ti a, ka hnial leh ta lo.










Ka pa te pindan lamah chuan ka lut a, ka pa chuan min hmuh rualin min rawn ban nghal zat a, mak ti zetin a lam chu ka pan. A kut ka chelhsak chuan a mit a chhing vang vang. Ka nu khan a nun a inthlak nasatzia sawi mah se, keima lakah hetiang taka a danglam hi ka ring lo reng reng.










"Ka tihpalh a ni" ka pa ina a tih chuan amah chu ka en nghal a. "Pa ngaihdam min dil chhan tur i nei hleinem" ka ti ve thuai. "Engkim avang khan ka tihpalh a ni. I naupan lai aṭangin ka enhrang thin che a, nang chuan khati chung pawh khan min ngaina em em reng a" a tih chuan ka lung a chhe leh der tawh.










"Engkim avang khan ka tihpalh a ni. I duh loh chung nawr lui chein pasal ka neihtir che a, midang awm leh awm loh lai pawh ngaihtuah lovin ka lo tizak fo thin che tih ka hria, ka thiam lo takzet a ni. Hetiang ngaihdam ka dil che avang hian engmah a danglam phah dawn lo tih ka hria, I lung pawh a dam kher lovang. Mahse ngaihdam dil che ka duh" a tih chuan ka mittui tla ringawt chu ka hru zeuh a.










"Ka pa i ni alawm, tu pain nge mahni fate ngaihdam dil ngai, pa ngaihdam min dil tawh suh" ka tichhuak thei hram. Ka pa a ni a, ka ngaidam nghal vek. Hetia ngaihdam min dil tur hian ka duh lo, ngaihdam min dil tur pawhin ka la mitthla chhin ngai lo.










"Ka lo tluk lo thin hle mai che, Kristian tha inti siin ka nunah Pathian hmel a lo lang ngai lova, ka fanu ngei pawh ka dem tlat thin che a, khatiang rilru kha eng vanga pu nge ka nih pawh ka hre lo. Duati, i pa hi ka lo sual em a ni" harsa tih hmel zetin ka pa pawh chuan a ti ve a.










"Pa, chutiang sawi tawh suh, piang nawn leh thei dawn pawh ni ila, nang leh ka nu faa pian leh ngei tih ka thlang tho ang" ka ti a, ka rilru tak a ni bawk. Ka naupan lai atang ka pa khan ka u te ang khan min lo enkawl ve ni se, tun ang hian malsawmna ka dawng kher lo maithei. Ka pa min enhranna avangin malsawmna ka dawn phah a, ka nu Hmangaihna pawh ka dawng nasa zual bawk.










"Ka fanu" tiin ka pa chuan ka sam a rawn chul a, ka nuih var var. "Kei pawhin pasal ka neih tir chein ka nawr lo che ang a, i peih chen chen ka kiangah ka awmtir tawh ang che" ka pa pawh chuan a rawn ti leh. Tunah chuan ka nunah hian eng mawi tak a rawn awm leh tain ka hria.










Ka nu lo lut chuan thingpui a rawn chawi lut a, kan pathuma boruak chu a zangkhaiin a nuam hle. Hetiang reng hian awm theih ka chak. Ka lo thlakhlelh em em thin ka pa aw nem leh duatna awka ka dawng ve ta chu a nia. Mumang a ang lek lek mai.










In atanga ka haw hnu pawh chuan ka nui var var. In ka thlen chuan Hmingmuana pawh a lo haw ve reng tawh. A lo haw hma ka ti hle. "Ka nu te ka va kan a" ka tih chuan "i chhungte lakah hian ka inthlahrung tep, an fanu hi a pasal tel lovin a kal fo sia, i chhungte hi ka chungah an thinrim tawh em?" fiamthu deuh reuh hian a lo ti a.











"Tihpalh, nidangah chuan kan kal rual tawh dawn nia" ka tih sep chuan "Nangmah i indem nana sawi ka ni lo" rang zet hian a rawn ti a, ka bu nghat nghat. "In in lama i kal duh chang pawhin thlah tur chein ka awm hman ngai si lova" inthiam lo awka zeta a tih chuan "an hrethiam lutuk che alawm" ka lo ti thuai.










Zan mut hmunah Hmingmuana chuan "Vawiin lamah Doctor-a nen khan kan inhmu a" a tih chuan ka meng deuh awk. Eng tak chu sawi ve ang maw? "Ka hma ka sial ka tih thin rualin kalsan ngam tur khawp chein ka huaisen tlat lova" a sawi ring hran lo, mahse ka hrechiang em em thung.










"I duh hle tih ka hria, chutih ruala ka kianga i lo let leh hi a chhan awm pawh ka hre lo, mahse ka lawm a, vannei ka inti takzet" a ti leh sup. "I thinlung kawltu la ni lo mah ila, i taksa kawltu ka ni hi ka lawm a, i mi thlan zawk ka nih avang pawh hian ka lawm" a tih chuan thil sawi tumin ka ang zuai.










"Kha Doctor pa kha ka chhuang hle mai. Ani chuan ka theih loh a thei bik a, keiin kalsan che ka theih loh avanga manni hmasial taka ka chelh lai chein a ni chuan i hlim nan tiin i duhthlanna a zaksak che a" a aw a ring lo khawp mai. "Ram dangah a kal dawn tihte ka lo hria a, Duati i duh chuan thlah turin i kal thei a nia.










Ka dang lovang che, ka ring tawk che a, i duh duhin i nun i hmang thei. A tawk chin i hria tih ka hria, ka chhuang lutuk che, i duh phawt chuan i thlah dawn nia, ka lakah inthlahrunna tur pakhat mah i nei lo" a tih chuan sawi ka tum zawng zawng kha an bo nghal vek.










"I pasal ka ni a, ka ring ngam che a, rin tlak i ni tih lah ka chiang bawk. A tawp nan vawikhat tal chu i hmu ve dawn nia" a tih chuan Hmingmuana rilru puthmang awm pawh ka hre lo. Eng vanga hmu tura min duh nge a nih tih hi a chhan awm ka hre lo reng reng.










Inrinni chhunah Muani chuan min lo be ve a. "Zaninah damdawi in lama mi thenkhat ho nen Duke kan thlan dawn a" a ti a, ka lo aw liam ve mai. Sawi tur ka hre miau lo.










"Naktuk zanah i hmu ve dawn em ni ang?" a tih chuan "Ngati maw?" ka lo ti ha. Eng vanga Duke chu ka hmuh min duhsak em em nge an nih hlawm hle. "A lo let leh ang em tih a chian loh hi. A rawn let leh pawhin chutih hunah chuan tumah hi hetiang hian kan awm reng tawh dawn lo. Kan nun hman a danglam vek tawh dawn" a tih chuan lung a leng nghal veng veng.










"Engtikah emaw i inchhir loh nan hmu ve turin ka duh che. I inchhir huna 'khatih lai khan ka lo hmu lo a ni' i tih hun a thlen a hlauhawm. Tha takin nang pawhin i thlah dawn alawm" a rawn tih leh chuan ka ngaihtuahna a buai reuh khawp mai.










Hmu lova kaltir mai ka tum kha a ni a, ka hmuh chuan hrehawm ka tih hlau a, ani pawhin kan nunhlui a chhui kir a, a nat phah ka hlau kha a nia. Mahse hetia ka kaltir chuan ka la inchhir ka hlau ve ta viau mai. A kal dawnah takngial pawh hmuh ka tum lo a nia. Eng angin min lo ngaih ang le? Duke chu hmu ve ngei ila a tha ang. A tawpna tur a nih hmel a, a lo let leh pawhin kan nun hi a danglam tawh dawn lutuk a, tuna hetia kan awm lai hian vawikhat tal pawh hmuh ve chu ka duh a ni.


KA CHECK HMAN LO AW

[Te-i Mrs Ambrose]

My Fault
By: Te-i Mrs Ambrose

Chapter 23
LAST CHAPTER



Zanah rei tawhah Muani chuan thlalak min lo thawn ṭeuh mai a, Duke an thlahna thlalak te anih ka ring. Damdawi in piaha restaurant kha a ni tih ka hria. Kan doctor senior tak tak te pawh an awm ve a, an zinga langsar ber chu an mi thlah tur chu Duke a ni.










Nidanga a hak ngai loh ang takin kamiz dum a ha a, kekawr pawh a dum tho. A kamiz nghawng chu a kilh lova, a tih fo dan angin a kawr ban a thlep chho leh bawk. A sana gold rawng chu a langsar viau. A kawr leh a thawmhnaw zawng zawng nen chuan inhmeh tak a ni tawp. A hmeichhe duh zawng nih chu vanneihna chikhat a ni. Hmeichhe ṭha em em, amah nena inhmeh tak tur tawng ngei se tih hi ka duhsak hle.










*Tunah chuan Ani pawh a pangai hmel tawh lutuk, ṭha takin in inthlah ve dawn nia* tih chu Muani chuan a rawn thawn a. Emoji in ka reply let ve mai. A kal ni a hnaih zel takah chuan lung te pawh a leng tawh khawp mai, tum vang reng ni lovin nunhlui ka chhui kir nasa a, khang hun lai khan na mah ila, tunah chuan khang hun laia thilthleng ka natpui em em te khan lung an len ta zawk a, nunhlui ah khan thil duhawm ka tawnna atana na ka ni tih tunah hian ka hrethiam ta bawk.










Chhan leh vang awm lovin Pathian hian thil a lo ruat ngai lo takzet anih hi. Kei pawhin khatih lai khan engmah ka hrethiam lova, Pathian ka dem lek lek ṭhin. Mahse Ani chuan ka tan thil a lo ruatlawk sa diam a, ka nat hlen a, ka tluksawp loh nan ka nunah Duke a rawn lantir a, ani nen khan hmahun nei ve lo mah ila, nunhlui ka chhui kir changa ka chhui let fo tawh tur a ni.

















Chawlhni a ni a, kan chhungkhua chuan inkhawm turin Biak In lam kan pan a, ka nun chu a hma zawng ai khan a nuam tawh a, keimahah hian hahdam ta riauva inhriatna a awm tlat a, chu chuan ka nun hman mek chu a tihnawm phah sawt ṭhin.










Inkhawm banah kan haw leh mai a, zan lama chhuah ai chuan tihin chawhnu lam inkhawm lovin Duke hmuh ka tum a, Hmingmuana pawhin a lo rem ti hle. "Ka thlah phawt che ang a, ka letsan ang che" a ti a, ka hnial hran lo.










Ka inthlak zawhah Duke ka call a, a chhang har hran lo. "Eng nge ni ta?" dam thlup hian a ti a, tunah chuan Duke ka biak hian a hmaa hrehawm ka tih ngawih ngawih ṭhinna kha a reh ve deuh tawh. "Chawhnu lam I inkhawm dawn em?" ka zawh tum tak ka zawt nghal.










"Ka la insiam peih chiah lova, ka inkhawm loh hmel" tia min chhan chuan "Ka rawn kal dawn aw" ka ti sep, min hnial mawlh ka hlau. "Imm" ani pawh a hma zawng aiin a aw a zawi. "Midang awm an awm dawn em?" ka tih leh chuan an awm loh tur thuin min chhang a, phone call pawh chu kan titawp zui a.










Hmingmuana chuan ka inthlak zawhin Duke te in lamah min thlah a, "Ka lawm e" ka tih chuan a rawn nui suk. "Lawmthu sawi tur kan awm anih chuan keimah zawk ka ni tih kan chian duh kha" a ti a, "Lam leh i ngaih chuan lo sawi la" a tih zawm leh zat.










"Tinge Duke ka hmuh hi rem i tih em em a, kan inkara thil thleng tawhte hre ve vektu i ni sia" ka ngaihtuahna kam reng ṭhintu chu ka zawt ta ringawt. "In inkarah chuan eng pawh lo thleng tawh mah se, in kawng thlanah in chiang ve ve tih ka hria alawm. Ka ring ngam che u.










Ni lo se chuan nang pawh a hnena i letna a rei tawh ang, mahse chuti chuan i ti lo. A chhan chu i thlan tawh kawngah I chian vang a ni. Chutiang bawkin Duke pawhin a chiang ve bawk. A duh anih ngat chuan i rilru a let rat thlengin a rawn hel chein a rawn be ṭhin ang che, ani pawhin chutiang chuan a ti chuang lo." a ti dap dap.










Duke te in kawt kan thlen chuan "Tluang deuha kal turin leh hmahun atan ka duhsakna ka hlan tih min lo hrilhsak dawn nia" Hmingmuana chuan ka kuta chelh chungin a ti a. Lu ka bu nghat nghat.










Car aṭang chuan ka chhuk a, Hmingmuana pawh chu in-turn in a let a, kei chuan Duke te in chu ka en reng. He inah hian vawi li vel chiah ka la kal. Ka kal ṭum te khan hlim takin an in hi ka chhuahsan ngai mang lo. A chhan chu natna ten min zui chhuak ṭhin miau.










Kawngka chu ka kik a, an rawn hawn mai theih loh avangin doorbell ka hmet leh, a hnuah Duke ngei mai chuan kawngka chu a rawn hawng a, min hmuh chuan a nui suk. "Ka pindan lamah min zui nghal mai dawn em ni ang?" a ti a, lu ka bu nghat, kan pahnih chuan a pindan lamah kan inzui a.










Duke pindan chu a lo hnawk khawp mai. A insiam buai hle anih ka ring. Chhuatah luggage a let reng a, khumah a thawmhnaw a awm ṭeuh bawk. Nui hakin "Ka lo pui dawn che em ni?" ka ti a, a dar kan akin "A pawi lo khawp ang" a lo ti ve bawk, a thawmhnaw te chu ka khung sak a.










Dar khat bawr velah an in ka thleng kha a nia, dar thum dawn velah a bungrua kan siamfel thei hram a ni. Ka hahdam viau emaw ka tih laiin Duke an ka hmuh loh theih ang ber tura thlalak a luggage-a a thun lai kha ka hmu ve reng a, ka ṭah a chhuak deuh ṭun mai.










A nu leh u thlalak a dah hnuin ka thlalak pakhat pawh a dah tel leh hram anih kha! A kal tawh dawnah chuan tinge kei min hriat theihna tur zawng zawng a hnutchhiah vek mai loh. Tinge a kalna tur lehzela kei min hriat theihna tur ken ṭal a tum.










"Dik lo a awm em ni?" ka dara rawn khawih pah hian Duke chuan a ti a, lu ka lo thing nghat. "Ka awm tawh lo hnuah pawh lo ṭap ngai suh, Duke hi ka danglam ta anih pawhin ka danglam pumhlum thei ngai dawn lo . I ṭah phal lo tu Duke kha chu ka dam chhungin a dam ve reng dawn, chuvang chuan lo ṭap ngai suh ang che" chiang zeta min en chung hian a ti a.










"Ka kal tawh dawn tho a, ka rilru a ka vei te ka sawi ang aw" a tih chuan ka lu ka bu nghat. Ka ṭhutna khumah chuan a rawn ṭhu thla ve a.










"Englai pawhin ka ngai ṭhin che, kawng dik lo zawhin ka chelh leh neih ngai loh tur hmeichhia chu chelh tumin leh neih ngei che tumin theihtawp ka chhuah ṭhin a, ka dik lo a ni tih ka pawm hnu pawh khan maw, ka ngai ṭhin lutuk che" zawi sup hian a ti a.










"Engmah hrilh lo chea kalsan che ka duh. Mahse tuna ka sawi loh chuan ka damchhung zawngin he ka thinlunga awm te hi ka sawi thei tawh ngai dawn lo a ni tih ka hriat avangin ka sawi ta nge nge anih hi. I lung tihlen tum vang leh nunhluia letpui leh che ka tum vanga sawi ka ni lo tih erawh min hriatsak la" a tih chuan amah chu ka en a, nunhluiin a chenchilh a ni tih hriat zetin a mitah lunglenna ka hmu a, keipawh amah ang tho hi ka nih ka ring.










Bul kan ṭan lai te, a ruka hlim taka kan awm ve lai te leh midang laka inthup ngai reng chung si a kan hlim dun ve ṭhin zia te kha. Khatih lai kha chuan hmahun kan nei emaw kan ti ṭhin a, Hmingmuana in ka chhuahsan pawh khan a hma aia eng zawk hmahunin min hmuak emaw kan ti anih kha. Mahse a hnu deuh lawkah eng hmahun mah kan nei lo tih ka hrechhuak a. Khang hun ngaihtuah let kha chuan lung a lengin chhung lamah hian na veng veng a awm leh ṭhin.










"Kan intawn tlai avang khan pawi ka ti a, Pathian ka dem fo mai" a tih chuan a kutah ka chelh vat a, Pathian dem turin ka duh lo. Mitmeng lunglennaa khata min la en reng chung hian "Midang te hnawla ka ta chauh ni tura ka duh ṭhin kha mi ta, mi nupui i ni a, nang nen lendun kha ka duh ṭhin, ka duhthusam pakhat a ni bawk. Mahse duhthusam hi a thleng khat si a le" a tih chuan engmah sawi tur ka hre ve lo.











"Kan intawn hun kha tlai lo sela chuan ka beiseina te kha beiseibo an ni kher lo mai thei. Mahse hun herlet thei tumah kan awm si lova, khati khan khua a tlai tawh hnuah kan intawng a, zawhna ka neih fo ṭhin chu 'eng ngati nge hmanah kan intawn lohva, eng vangin nge kan intawn hun aia hma deuhah khan kan intawn loh' tih kha ka zawhna neih fo ṭhin a ni.










Hmangaih hle che mah ila, kan pahniha awmdun a rem ve thei si lo. Pathian hnenah pawh kan pahniha kan lendun theihna turin ka dil ngai lo. A chhan chu ka ngam miau lo, a harsa ṭhin asin" a taksa a ṭang nghal ṭawlh ṭawlh mai.











"Ka tun dinhmun aṭanga thlir hi chuan ka hmangaih reng dawn che, mahse a hma pawhin ka sawi tawh kha, hlauhthawn pah nan hmang suh. Ka rawn tibuai dawn lo che. Pathian pawh khian ka hmangaih reng che avang hian min hrem ka ring lo.










A chhan chu maw, Hmangaihna hi Amah aṭanga chhuak a ni a, ka hmangaihna che hi a hrethiam dawn tih ka hria, tu pawi mah khawih lo leh pawisawi lo zawnga a ruka ka hmangaih che avang hian min hrem lovang" a ti nghet charh.










"Duke, hmalam pan turin ka duh che alawm" ṭahchhuak insum zeta ka tih chuan "A harsa rih anih hi. Hmahun ka hre lo, i duh ang chuan tih ka tum ang, mahse ka lo hlawhchham tak erawh chuan min lo dem lo hram ang che" a ti nghet leh charh.










Duke nen chuan kan ngawi vang vang a, a pindan ruak deuh ta huai te chuan eng emaw ti zawng takin lung a tileng thar a, naktuk aṭang chuan he pindan hi luahtu nei lo pindan a ni tawh dawn si a. Ka ngaihtuah zawng te chuan ka hnim ruih thei.










"Ka mit ka men lai hian meng reng chung siin i hmel ka mitthlaah a lo lang ṭhin a, ka mit ka chhinin a chiang lehzual ṭhin. Ka duhthusam ka puitlin zawh tak loh te kha ka suangthuahna an ni a, he ka thinlunga la cham ve rengte pawh hi nunhlui duhawm an ni, mahse ka ngaihtuah a, ka chhui let chang chuan lung tilengtu lek an ni ṭhin thung" a awah pawh chuan lunglenna ka hre tel thei.










"I ngaihtuah ve ngai em? Hmana nang nena kan lawm ṭhin thla te, ni te, boruak engkim, kha hmun, damdawi in chung zawl aṭanga kan thlir ṭhinnate kha an la danglam lova, kan awm dunna ṭhin te pawh an danglam tawh ngai dawn lo, mahse nang leh kei erawh kan hrang ta sia" ka ti ve sep sep. Kei pawhin tun hun bak hi sawina tur hun ka nei tawh dawn bik lo. A hnuah chuan sawichhuah a rem ve tawh ngai dawn lo.










"Nang hian ka hriat ngai loh hmangaihna awmzia min hriat tir a, hmangaihna awmzia ka hriat tak hnua hriat ka duh ngai loh, kalsan nih natzia min hriattir leh a" tiin a thaw zui hawk. "Theinghilh che ka tum ngun poh leh ka hrechhuak ngun che a, theinghilh che ka tum nasat lai ber hi ka hriatchhuah ngunna ber lai hun che a ni.
Theinghilh i lo har hrep a" ti chhuak leh hrawkin a lamah min pawt hnai a, min kuah zui vang vang.










"Tal lo la, rei lote chiah, inthlana angah i ngai thei ang" a ti a, tal zui ka tum ta bik lo. Duke hian ka inchhir lehna tur engmah a ti dawn lo tih ka chiang a, ka ring hle bawk.










Ni a tla ṭan tawh a, a tlai ve deuh tawh anih hmel e. Duke tukverh aṭang chuan ni tla chu a lang chiang ngang mai. Duke pawh chuan min kuahna chu a thlah har hran lo, tukverh lam chu a hawi a. Chutah zawi sup, hriat reng tawh tur si chuan










"Nang nena kan thawnthu tawp danah hian duhthu chu dam lo mah se, kan ziah lai tal khan kan hlim alawm tiraw?" a rawn ti sup.










"Imm, awm lo la chuan tun dinhmun hi ka thleng thei lovang. Nang chu maw, ka tluk hlen lohna atana chung lamin ka tana Vantirhkoh a lo tirh i ni" ka ti ve sep. Hei hi Duke ka hmuh dan diktak a ni bawk. A hmel nelawmna tel lo phena ṭhatna te hi ka hmu miau.










"Ka Duhthusam zawng zawng te kha a tak ram chang ve ta lo mah se, i mangan chhawktu tal nih ka duh" a ti ril ruih. "I ti ang tiraw? I nat changin, i tana tumah an awm lo nia i ngaih hun chuan min lo hrechhuak la, hnem tur chein i kiangah ka rawn kal nghal ang. Kan karah mual tam tak awm mah se, chung zawng zawng thlawh khum chuan i kiangah ka rawn kal ngei ang"











"Kawng dik lo i zawh nana min rawn hrechhuak tura chah che ka ni lo. I kianga awm tur an awm loh chang chiahin anih chu min hrechhuak tur leh min rawn be tura ka beisei ngam che. Hnem theitu tur che i pasal a awm chhung chu rawn inrawlh ka tum lo. Mahse i tana tumah an awm loh chang erawh chuan hnem ngei che ka duh thung" a ti leh charh charh. Eng ngati nge ka tan hian a ṭhat em em mai le.










"Kei chuan ka rawn be ngai dawn lo che, i nun hman tibuaitu nih ka tum lo. Chumi avang chuan 'i lakah ka kut ka sil e' tihna a ni lo, keia tan chuan lo biak reng che leh rawn ngaihven reng che a rem ve lo. I nat chang leh i kianga awmtur i mamawh chang chuan rawn sawi la, ka lakah inthlahrun a ngai lova, inthlahrung turin ka duh ngai lo che. I kianga tumah an awm loh chang chuan i tan ka lo awm reng ṭhin ang, i hlimthla ang tal pawha i kianga awm ka duh.










I hlimthla min nihtir la, min mamawh hunah min hriattir la, tichuan ka rawn penchhuak ang a, i kiangah ka awm ṭhin ang, mahse min hriattir loh thung chuan kei chuan ka duh thuin ka hnaih ve thei tawh dawn lo che ania. I tan chuan ka rawn let leh em em ang, min mamawh hun apiangin ka rawn pan ang che" a aw a nghet ṭha tlet tlawt hle.










"Haw tawh rawh, i lung ka tileng zo dawn" nuih pah hian a ti a, a mitmengah erawh kal lo tura min duh zia ka hmu thei. Mahse ka kalsan tho a ngai dawn a, tunah ka kalsan leh mai a ni ang chu. "Lo inenkawl ṭha la, lo hlim reng ang che" ka ti a, Hmingmuana'n min hrilh te pawh kha ka hrilh ve bawk a.










Ka inhersan rual chuan min pawtlet leh a, ka mitah a en reng. Sawi tur nei, sawi hreh si hmel hi a pu. "Duke, i sawi duh chu sawi tawp rawh" ka tih chuan a thawchhuak hawk phawt a










"Hmangaihna hrulah hian kan kalkawp ve thei ngai dawn lo a ni tih ka hre tawh.
Mahse eng tik niah maw, i pasal in a thlahthlam palh hlauh che chuan min lo pan ang che aw, chutia ka sawi avang chuan kalsan che se tih hi ka duh dan lo. A kalsan loh nan che ka dil ve reng ṭhin zawk ang. I tan a ṭha ber ka duhsak reng ṭhin che, mahni hma chiah sial a, nangmah nen hmahun neih ka duh avangin Pathian hnenah khian engmah ka dil ngai dawn lo. Mahni hmasial taka chelh che emaw ka tum ngai lo. Nangmah avang hian hmasial dan pawh ka thiam lo. I tun nun anga i nun reng theih nan leh hei aia hlimna nasa zawk i tawn theih nan Pathian hnenah ka lo dil ṭhin ang. Mahse tih a awm tak thut thuah










I nunah midang an awm leh thei dawn anih ngai chuan, chu hunah ngei chuan keimah nen Hmangaihna kawng zawh dun leh ngei ang aw, a rem chuan." a tih sup chuan lu ka bu nghat. Ka tum loh tawp khawkin Hmingmuana nen ka la khaikhin zui.










"Anih ka mangṭha tawh ang che, tluang deuhin kal la, hmahun eng tak nei ang che, ka duhsakna sang ber ka hlan che a, hmahun atan ka duhsakna zawng zawng ka hlan bawk che" ka tih chuan lu a bu nghat a, Duke pindan chu ka chhuahsan ta a.









3 YEARS LATER





"Naute, i pa hian a nghakhlel tawh lutuk che a nia" ka dul fawh zeuh pahin Hmingmuana chuan a ti a, tunah hian kan fa pakhatna tur ka pai mek a ni.










Ka rai mai theih loh avang khan ka mangang hman hle a, hmeichhia inneih hnua rai mai thei lote chuan ka manganna hi an hrethiam hle ngei ang. Nupa nih hnua nau pai theih lohte hi hmeichhe tan chuan a hrehawm a, mahni insit a awl bawk a, chhungte hmai zah a na em em bawk.











Ka lo tihsual tawh avanga hremna a ni mai ang tih thlengin ka ngaihtuah hman a, hrehawm ka ti hle ṭhin. Ching tur anga ka inngaihtuah zawng te hian ka ṭah a chhuak ṭun zel.











Hmingmuana chuan min hnem nasa zhin viau a, nau ka pai emaw, pai lo emaw, min hmangaih dan a ngai reng dawn thu te min hrilh fo. Kan inentir ṭum chuan ka ṭhat vek thu min hrilh a, Hmingmuana pawh a chuti tho chu.










Tunah vanneih thlak tak maiin nau ka pai ve ta hlauh a, ka nu leh pa te pawh an hlim khawp mai. Ka nau pai chu min lawmpui em em hlawm a, rai laia huat tih ang vel kha ka nei ve lova, a hma zawng aiin ka vun a nung a, Muani lah chuan










"Rai i ngeih emai, rai ve mai ka chak tawh" hi a ti leh ngawt zel a, Nunsanga nen lah inneih lam hi an hlat hmel si. "Innei tawh rawh u" ka tih chuan "Kan inkhawl mek, kum hnih vel chu a la ngai ang" a ti mauh mai.










Ka naute pai lai hi thla sarih a ni ve tawh a, ka puar lah tawh. Hmingmuana hlimzia chu tu mahin an hai mawlh lo. Nitin eitur ṭha min rawn hawn a, a rawn haw apiangin ka dul a naute awm hi a be ziah a, a inbual dawnah a fawp ngei ngei ṭhin bawk.










"Duati, ka hmangaih lutuk che, ka nupui i nih avang leh ka fa tur nu inih avang pawh hian ka hmangaih lehzual che" zana kan mut lai chuan a ti sup sup. Kei pawhin ka duh ve tawh alawm, mahse hmangaih tih ṭawngkam hi chu hmang turin ka la inpeih chiah lo. Ka hriat erawh chu Hmingmuana hmangaihna hi a chak tawk a, kan nupa inkar chu a chhe mai mai lovang.










"Naute hi mipa nge a nih i rin hmeichhia?" ka tih chuan ka pum puar lah tawh chu tuai hauh hauh pahin "ka hre lo, a enga pawh ni se ka en dang a ngai reng dawn tho" a ti a, ka dul a rawn fawp zeuh. Tunah chuan ka nunah lungngaihna leh natna tih velin hmun a chang ve ta ngai meuh lo.










"Naktuk i birthday a ni tawh sia, eng tin nge kan lawm ang aw" a ti vang vang, "lawm a ngai emaw ni le? Kan chhungkua a kan ṭawngṭai ho chuan a tawk a ni mai" ka ti a, Hmingmuana chuan a pawm loh hmel nasa mai. "Chhungkaw pumin restaurant ah tal chaw kan ei a ngai ang" a ti deuh tlat.










Hmingmuana chu hna lamah a kal leh a, kawngka an lo kik chuan ka kawng a, delivery guy a ni. Box lian lutuk lo hi min pe a, ka hming ka sign nghal bawk. He thil ka dawn hmasak ber ṭum kha chuan mak ka ti hle anih kha.










Delivery guy hnenah pawh an thawn sual anih ka rin thu ka sawi a, min rawn thawntu leh kan in address te ka hmuh takah chuan ka hrethiam a, kub tih ka birthday niah thil min lo thawn ziah a, a bak eng thil mah a rawn ti ngai lo hran lo thung, a sawi ang ngei khan min be ngai lo bawk .










A awmna hmun lamah chuan mi ngaihsan leh hriat a hlawh hle tawh a. A nunah hmeichhe dang an luh thu erawh hriat tur a la awm lo thung . Ka duh ber chu hmeichhe ṭha tak tawng se tih hi a ni.










Box chhungah chuan box dang pakhat leh card hi a lo awm a, card chu ka hawng hmasa a, "Happy Birthday, i hlim zel em?" tih chu ama kutziak ngei a ni. Ka nui sak mai. "Ka hlim lutuk, nang i hlim ve em?" ka ti sep. Hepa hi chuan ka tana ni pawimawh a theinghilh ngai lo anih hi.










Box ka hawn chuan ṭhi a lo ni. Thi ah chuan infinity chhinchhiahna a chuang kalh mai. Chu mai chu ni lovin bracelet pahnih a tel bawk a, chutah chuan love phel a awm ve ve, card tereuhte a awm bawk. "Nang leh I fanu ta tur" tih hi nalh fahran hian a ziak a.










Ka nau pai lai hi mipa nge hmeichhia tih kan hre lo, hriat hmasak tih vel kha ka duh loh avangin kan inentir ṭum pawhin chulam hawi kan zawt ngai lo.










Ni chu kawlah a her liam mek a, he hun a lo thlen hian alawm Duke kha ngaih loh a har em em ṭhin. A kal dawn tlaia a thusawi zawng zawngte kha ni tlak dawn hian ka bengah an rawn thar leh ṭhin a, ni a tlak rualin a thusawi te kha an herliam ve ṭhin bawk.





_______________________________________





Doctor te chuan sang leh turin min ti a, thlanin min bual hun vek tawh. Hei bak baka na hi mihring hian a tawrh leh theih pawh ka ring tawh lo. Ka han sang ve ṭhin tak nain ka tha a zawi deuh vek tawh a, han sang thei dinhmunah pawh ka ding tawh mang lo.










A tawp nan tiin leh infuih chungin ka sang leh vak a, naute ṭap ngak ngak ri ka hriat takah chuan keimaha na awmte kha chawp leh chilhin a dam nghal sawng sawng. Mahse ka chauh lutuk avang chuan ka chhing ta siar siar.










Ka harh leh chhan ka bulah Hmingmuana chu a ṭhu a, a hmela hlimna lang pawh chu ka hmu chiang ngang mai. "Fanu duhawm tak min pek avangin ka lawm e" tiin ka chal a fawp a, 'fanu' tiin ka phun ve sep. Ka fanu chu ka bulah an rawn muttir a, a duhawm takzet.










Ka fanu chu a pu (Duati pa) in a hming atan "Immanuel Rochanhlui" a sa a, ni e 'Kan hnehah Pathian awm' tih chu a dik chiang alawm. Kan fanu chu a chhungte zawng zawngin an lawm a. Ani hi chuan eng hrehawmna mah a tawrh ka phal ve ngai lovang.










Ka fanu kutah chuan bracelet khing lehlam chu ka buntir a, keiin a lehlam ka bun bawk. Hmingmuana pawhin a hmu ve vek a, ka nun aṭang Duke a chhuak tawh tih a hre bawk a, a tan thik ngai a ni lo bawk a, "Ka fanu chuan a phelh ngai lovang" a ti ve sup. "Bawihte, hei hi bun reng rawh aw, i nu hmangaihna zawng zawng kawltu i ni tawh a nia" tiin a kutah ka fawp vang vang.










Kan fanu lmma chuan kan chhungkaw hlimna ni turin he khawvel hi a hmu ve tawh a, a hlimna tur anih chuan a chhungte hian eng pawh kan tihsak ang. Mahse a tana ṭha lo tur erawh chu engmah kan tisak dawn lo thung. Ṭha takin kan enkawl ang a, a puitlin hunah pawh a mipa duh ngei pasalah a nei bawk ang.










"Kan fanu hi a hmelṭha tiraw?" Hmingmuana chuan lmma en reng chung hian a ti a, "a nu a chhun che a, a puitlin hunah pawh zun ngah em em a la ni ngei ang, mipa duhtu a ngah dawn si a, a pa hian ka veng tlat ang" a fanu fawh pan hian a ti a, chutah kei min rawn awm hnaihin "fanu hmelṭha tak, nangmah ang min pek avangin ka lawm e" a ti sup a.


Duke nen khan rem leh rem lovin kan inkawp ve a, mahse inkawp hlen a rem lo. Chu thil chu Pathian ruat a ni. Ka nunah zirtirna min pek a duh avangin Duke kha a rawn lantir a ni, thuthiam pawimawh zia te, amah kan Pathian ngei laka kan thu lo tiam tawh phei chu thutiam naran aiin a pawimawh zawk a ni tih ka hriat theih nan tikhan ka nunah harsatna te leh natna te a rawn tir anih kha. Khang natna leh hrehawmna te kha tawk ta lo ila, Pathian rorel thiam zia ka hre lovang a, Thuthiam pawimawhna pawh ka hrefiah tawk hek lovang.
Kan Pathian hi remruattu dik tak a ni a, Ani in a ruat sa kawngah kan kal mai a, a tirin hrethiam lo ṭhin mah ila, a hnua kan hriatthiam theih nan kawng a ruat fel sa diam ṭhin. Kan nunah a tlai ngai lova, a hun takah rawn chein kan nunin a zir tur a zir chhuah theih nan hmanraw hrang hrang a hmang a, kan zirtur kan zir zawha hlim leh lawm ber ṭhin chu a hunlaia hriatthiam loh avanga vui ṭhin keimahni tho hi kan ni. Kan Pathian hi a tlai ve ngai lo.




A TAWP TA.


(Ka story a tir aṭanga min chhiarsak ṭhin tu te chungchang thinlung takin lawmthu ka sawi e.

Ka story tharah kan inhmu leh ṭheuh dawn nia.
Mangtha muttui vek ule)