31 st JULY( UNCHAINED MELODY) BY M.LUSEI PALIAN (Completed)

Episode nei ho a hlawm a dahkhawmna
Ngaia
Site Admin
Posts: 25813
Joined: April 30th, 2016, 4:07 pm

Re: 31 st JULY( UNCHAINED MELODY) BY M.LUSEI PALIAN (Completed)

Unread post by Ngaia » July 28th, 2019, 4:20 pm

1st JULY( UNCHAINED MELODY)



M.LUSEI PALIAN



EPISODE-37




Sumo a chuangte chuan,

"A va ninawm e" an ti lang lang a.


Hruaia te kawt mai a ni a. Hruaia chuan a han thlir a, a hmeichhe phurh kha a han hmu ta a. Kawngka a hawng a. Ring tawka auh pah chuan,


" In chhungah hian rawn lut rawh u"


Ruahsur chu a nasa tial tial a. An ni ho passenger te pawh chu an tlan lut thla ta a. Chutih lai tak chuan Hruaia pa Pu Lala te pawh an rawn haw ve chiah a. Inchhungah chuan an zi hut hut ringawt a.


A lehlam zawng tak chuan a nuam phian lawi a. Seni chu a inthlahrung ru phian a. An hawi kual vel a. A rinai daihin Hruaia te In chu alo changtlungin alo nuam a.

A hrehawm a ti hle a. Hruaia nu lah chuan thingpui alo lum sak a. A thei thei in an lo pui a. An buai tlang hle a ni.




Hruaia pa Pu Lala mi zau leh khawtlang hruaitu tih takah an lo dawl zo hle a. An motor lah chu Ruah a sur nasat avangin an la siam mai thei si lo.



Seni chuan banga Certificate intar alo enkual a, Hruaia chu a ngaisang thar hle a. A lo be chhawhchhi lutuk kha a inthiam thei lo. An thlir chian phei chuan mi zahawm tak chhungkua anlo ni reng si a!



.........




Mahriati chuan tlawm leh zah pawh dawn lovin Hruaia chu a phone ta a. Ngaihdam a dil a ni.


Hruaia pawh chuan a hrethiam khawp mai....!



Mahriati thinlung hi a khawngaihthlak a ni. Hruaia lo chu a thinlungah midang reng an awm si lo. Mahse a hmangaih chuan a ring lo mai ni lovin, ngaihzawng dang nei ang hialah a ngai a. A na em a ni.


A ni lah chu a hmangaih tan rinawm takin a awm a, tlei dang tawnah thla a ngam lo mai piah lamah rilru a pe thei lo a ni.


A thinlung hmangaihna zawng zawng chu Hruaia a hlan tawh asin! Ngah nge a hlan loh tehlul ang ni? He Hruaia hian mahni hrehawm pawh pawisa lovin a piancham atan a inhlawhsak ṭauh ṭauh a.
Class pawh awm mumal lovin theihtawp aia nasa in a thawk a. A taksa ah a lang chhuak hial a. A durh pheng phung mai a ni. Heti taka nasa a hmangaihtu a tawng leh thei tawh dawn em ni?


Mahriati khan Hruaia kha a ngaihtuah em a, Ruah ten a nan hrep ang tih a hlau a. Tin, a thleng tluang em tih a hre ve duh hrim hrim bawk a. Zak leh awmlo ti chung chungin a phone ta a.


Nichin lawk khan an inbe ta a. A rin aia ṭha in Hruaia chuan alo chhang a a va lawm ngai em! A zangkhai vah mai a ni.


A ni alawm! Boruak ipik tak kan tawng a, hmangaihna ah lehnghal....

Mahse tlawm kan hreh ngawih ngawih a. Inthlahrung taka kan biak ten aw nem leh zaidam taka min lo chhan chuan thinlung hi a par vul a. Hlimna leh lawmna hian min hmuak si ṭhin a lo ni!



Mahse hmangaihna a tlawm zawka ṭan hi a har phian a. Hmangaihna inkara kan buai tawh hi chuan duh ai hian pakhat hian kan lo tamzawk hman ziah si ṭhin...




.......




Rinpuia a na ngang mai! A ruahmanna zawng zawng a thlawn a ni ta si!

Ruahmanna thar a ngaihtuah a ngai ta a. He Hruaia hi che thei lova a siam vat a ngai a. Chuti a nih loh chuan Mahriati hi a chang thei ngai dawn lo a ni.


Mahriati hi hman aṭanga a thinlung luahtu a hlan ngam si loh a ni a. A ruk hian a vei reng a. Tuna Mizorama aletna chhan pawh hi a mah Mahriati vang ngei hi a ni.


A hmangaih nei let tur hian theihtawpa a beih ve a ngai a ni.


Hmangaihnaah leh indona ah hian thiang lo a awm si lo..



.........



Janeti chuan in haw a hreh kher mai! A ṭhiannu Sangi te inah a leng kawi a, mahse an thlen ve leh chuan ruah a sur chiam a, duh hunah pawh a haw thei ta lova.


Sangi bulah hian engkim hrilh vek a chak a, mahse a ngam ngang si lo a ni.

Rianghlei atan hian biahthu di, hlan ve a rem mawlh si lo maw!
Lanu ṭhaleng zawngten a duhlai an hel rawn lai hian, A dawn lungruk a hlan ngam bik si lo a ni.



.........




Ruah a han ṭan a, Sumo Driver chuan Sumo chu a han siam leh ta a. Mipa chuang ve ho chuan an lo pui ve bawk a. A ke bawk a chhe leh a ni.


Mi ṭhenkhat chu In chhungah an lo awm thung a. An ti ti mar mar reng a. Rei lo deuh hnuah chuan an siam zo ta....


Seni chu Hruaia bulah ava kal a,

" In chungah lawmthu ka sawi duh a ni...."


" A ngai lo, i sawi duh ringawt a. I sawi hunah kan lo ngaithla ang"


A va ngeiawm thiam tak em aw...

" Ih....Kan lawm tak meuh meuh e..E....College khatah kan lo kal reng a, ka hming chu Seni a ni e."



Hruaia chuan a chibai ta a.

" Hruaia ka ni a, ka nu leh pate an ni a, sawta mi saw ka nau a ni." A ti ve ta a.


Seni chu alai hle mai! Mahse tihngaihna dang a awm tawh si lo. A heh a pet fan fan ringawt mai a ni.



Motor an siam zo ta a. Motor a chuangte chuan lawmthu an sawi liam liam a, an chuang leh ta a! Kolasib lam pan chuan an tlan ta a...



An chhungkua chauh chuan an awm ta a. Hruaia pawh a pa chuan an chibai ngei a...

" Khaw nge ka fapa i han inchibai teh ang! Mikhual chauh hi kan chibai zing hlur a.... Bawihi, Bawihi Nu...hei han chibai ve ula!" A ti zui a.


A ni reng lah tak a. Mizote hian mikhualte hi kan chibai zing hlur a, chhungkhat hi kan inchibai khat viau lawi si alo ni.


Hruaia pa pawh a inbualna tur a nupui duhtak chuan alo siam thlap a. Chhungkua ah hian nu berin an mawhphurna an hlen ṭhat chuan a nuam em em a. Pa tan lalram a ni a, vanram an tem lawk ṭhin hial a ni.



Chaw ei dawn chuan Pi Liani chuan ṭawngṭaina a hmang a. A chham dik kim ngei mai! Chu mi lai tak chuan Pu Lala chuan zinga a nupui thusawi kha a hrechhuak uaih uaih a.. A nupui hi zawng ṭhatna zawng zawng nei kimtu hi a ni ringawt mai a ni.



Nupui ṭha tak a nei hi vannei a inti a. A hlim ṭhin, a tizahawm a. Mi zingah chhuanawmin a awm tir thiam ṭhin.
Hmeichhe fing awm dan chiah chiah a ni.


An hlim tlang ngang mai!


........



Rinfeli pawh Serchhip lamah a haw chho ve a. A nu leh a unauten an lo lawm thiam ngei mai!


An chhungkaw tan thu lawmawm chiah lo a thleng ta tlat mai. A pa hi N.Vanlaiphai OC turin an sawn dawn a lo ni. An hreh ngang mai a! Mahse a pa chuan eng mah a sawi lo. Ti hian a ti ve tlat,


" Sawrkar in min dahna hmun apiangah hian kan awm mai tur a ni" a ti tlat thung a. Sawrkar hnathawk awm dan tur chiah a ni. Mi fakawm ava ni tehlul em aw...!
Hetiang mi hi zoram hian kan mamawh a ni.


A karlehah an chhungkua in an chho dawn a ni.
A lehlam takah chuan an chak ve tho, Mizorama hmun nuam ber, Mizoram Shillong ah khian an awm chak ve tho a, Tv vela an hmuh ṭhin bak chu anla hmu bik lova. Miten Vanram tlafual an tihna hmun chu an awm ve chak tho a ni.


............


Mahriati pawh thinlung hlimna in a tuam vel a, a tuam lo thei lo. A hmangaih awmchhun chuan ngaihngam taka awm turin a chah miau a.


Hmangaihten thinlung taka anka an hlanna aia hlu hi khawvelah a awm dawn chuang em ni?


Hlim leh lawmin ni chhun zankhua a hmang ral a. Hun hi kalmuang a ti a. A di tawn hun tur nghakhlel takin a thlir ve reng a ni.


Phone a hmang leh ṭhin a, a nu te awm loh achang a, rei fe an inbe leh ṭhin! Duhtak te biak aia hlu a awm dawn chuang em ni!


..........



Hruaia pawh hian Mahriati hmuh hun tur nghakhlel takin a thlir ve reng tho a. A thinlungah chuan,

"An sawi zawlkhawpui lamphei duaian,

A leng e ka thinlai hnemtu,

A sakhmel mawi leh anka nem diai,

A chamreng ṭhin lairilah hian" tih hi a awm ve tlut tlut tho....


Nana-i phawk a chhuak a,

" Nu tun ṭum kan mikhualpa chu phone ah an rawn be zing ma nge ti raw" chhungkaw kim lai takin a ti phut a.


An ngawi tlang ṭhap mai! Hruaia han zah zia chu sawi mai ai hian a nasa a. A lai hmel lah chu a nau chuan alo la nuih zui a. A va melh rum vak ringawt a. A sawtna em em phei chu a awm lem lova.



A tuk maia haw chho tur a nih avangin zan lamah chuan a nu chuan a chawhmeh hawn tur leh buhfai ken chhoh turte a siam sak mawlh mawlh a.


Hruaia pawh lenchhuah lawk a tum a. Thil dang a leng tur ni lovin, an canteen nghaktu te ta tur Hmarcha ro te a lei kual sak dawn a ni. A chhuak ta a. Boxing a khel leh dawn tih hi anu leh a nau hian an la hre miah lova.


A pa nen chuan an thuruk a ni rih a ni.


Hruaia chhuak pawh chu hma takin a haw a, a pa chuan room-ah a ko ta a.


Thil eng emaw tak sawipui a tum a ni.....



Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » July 28th, 2019, 4:20 pm

31 st JULY ( UNCHAINED MELODY)


M.LUSEI PALIAN


EPISODE-38




Hruaia hi a pa in room a a koh tawh chuan thil pawimawh tawp a awm tihna a ni. Pi Liani leh Nana-i pawh chuan an hrethiam nghal a. Tin, amah Hruaia hi atuk lawka haw chho tur a ni bawk si!



Pi Liani hian a fapa awmdan hi a hrethiam mai bik lo. A lo haw aṭang khan ni tin mumal takin a taksa a sawizawi a, zing kar hma takah a thova....taksa sawizawi in a chhuak daih zel a ni.

Nana-i tak pawh hian mak a ti a. A u chu a hma aiin a pian a ṭha tawh zawk a, a chaw lak pawh a ṭha zawk a. A ṭawng tlem sawt thung a. Vei eng emaw tak chu a nei tih a hre thiam em em a, mahse a bulah eng mah a sawi si lo.

A u awm danah hi chuan a hma lam hun atan a inbuatsaih ru tih a hre chiang em em lawi thung a. A pa leh a u room-a an lut chu a lo thlir liam ve tawp ringawt a. A nu pawh chuti tho chu a ni.


........



Pu Lala chuan muang ban charh hian, " Naktuk ah maw in inbuk ṭan dawn a?"


" Aw ni e..."


" Umnn...a ṭha, kan khaw tihming ṭhatu tur i ni a, tin, i pa hming hi i ti ṭha tawh a, theihtawp chhuah ang che. Chuan Hnehtu dinhmuna i din pawhin midang tana mawi lo zawng a lawm chiam te hi tih loh tur a ni a. A hneh lohtu zawka i ṭang a nih pawhin a tawrh dan i thiam tur a ni. Mipa i ni a, huaisen tak leh chhel takin i awm ṭhin tur a ni" a ti dap dap a.



Hruaia chu a ngawi reng a. Uluk takin apa thusawi chu a ngaithla a. Chhan pawh a tum chuang lem lova...


" E...! Bawiha i mi ngen ang khan i nu leh i farnu pawh eng mah ka la hrilh lem lova.... inkhelh zawh hma chu ka lo zep ang. Fimkhur hle ang che" a ti a.


A sawi zawh rual chuan a nupui Pi Liani chu a ko vak a...


Pi Liani chu khumah chuan a rawn ṭhu ve nghal a, Pu Lala chuan," Hei Bawiha hi sum a mamawh dawn a, lo pe am deuh la, chuti lo zawng alo inhlawh leh chiam palh a nge!" A ti ta a.



Hruaia chuan a inhlawh ṭhin hi a pa in a hria tih a hriat chuan a lai chhe em em a, a zak bawk a ni. A inhlawh chhan hre phei se chuan a pa hian a nuihzat viau mahna le....!



Pi Liani chuan Steel almirah a hawng a, Hruaia rin aia tam chu pawisa a pe ta a. Hruaia chuan ala duh lo lek lek a ni.


Zan a hma vak tawh lova, mut zai rel an tum ta a.

Pu Lala chuan, " Bawiha, i chhohna kawng lamah ruah do loh hram i tum dawn nia..." tiin a thlah a.


Hruaia inpui lama a chhuah phei chuan Nana-i chuan, " Eng nge alo sawi a Williama chuan? Pawisa a pe hnem che em?" A lo ti chung chung a.


" Nana-i saw hruai chho la, ei rawngbawltu ah hmang ang che " a ti alawm!



" Heih...ka awih lo rapthlak"

" I awih kher a ngai em ni ?"


" Lal a U i sual e mai "


" Tak tak ana,fel takin han awm ang che min ti a..." a ti ta zawk a.



Nana-i chuan Wai Wai a chhum a, a chhum pah chuan Sleeping child tih hla chu a sa rat rat a.
A siam zawh chuan a thil siam ei pahin a u nen chuan Tv an endun mai mai a.


" U Janeti khian a ngaizawng che ti raw?"


Hruaia chu a ngawi dat a, " Ngaizawng lovang, U angin min en alawm!"


"A ni lo, a ngaizawng che, ka hrechiang lutuk...."


Hruaia chuan a sawi chhunzawm duh ta hauh lova,

" Bawihi, ka thawmhnaw ka va khung fel a nge" a ti a, a room lamah a luhsan ta daih a.


.........



Mahriati chuan chu chawlhni chu rei ava ti tehlul em aw! A tuk a nghahhlelh vang a ni mahna, hun te hi kalmuang riau hian a hre thar leh hnuhnawh a. Sana a bih sek a, hmanhmawh lo riau te hian a hria a ni.


Hmangaih leh duhber te hmuh dawn hi chuan hun hi a kalmuang duh riau chawk a ni. A demawm loh he nula hi, hmangaihnaah a luangliam a, hmangaih a nei a, a vei a. A hlim a, a lawm a ni.



Zan mut chhin har a ti a. Tawn huna sawi tur ngaihtuah in laikhumah chuan a tal a tal a.....

A tawpah zawng a muhil thei ta a.


......




Zan hun, thim thiltihtheihna chu a ral ṭan mek a. Khuavel a thiang ta e tiin ar an lo khuang ta thliah thliah a.


Hruaia pawh zing hma takah a tih ṭhin dan pangngaiin a tho leh ta a. A taksa sawizawiin kawngpuiah a tlan ṭauh ṭauh a.


In a thlen leh meuh chuan a chhungte pawh an lo tho tawh a. A intifai leh te te phawt a.

Tawng leh tura ṭhenna ram khawvel, khualzinna ramah hian chhungte nen hian in mang ṭha fo a ngai si ṭhin a.


Pi Liani te nupa pawh chuan an fapa chu an thlah liam a. Furpui hunlai ngang a nih avangin fimkhur turin an chah mawlh mawlh a. Hruaia pawh a bu ve nghauh nghauh a. Intawng leh vat tura intiamin an in mang ṭha ta a.


.......


Janeti zing tho pawh a zang vak mai! Nghakhlelh em em hi a nei ve tho si a. Chu a mi nghahhlelh em em chuan tukṭhuan ala rawn ei dawn zui nen, a thinlung a hlim veng veng reng mai a ni.


Hruaia nau Nana-i hian zan lamah A U in chaw a ei chhoh tur thu kha phone in a hrilh lawk tawh kha a ni a. A thlen chhoh har pawh a ring lem lova ni!


Ei rawngbawl pah chuan a zai rat rat a. A hlim veng veng a ni.


..........



Rinpuia pawhin a suangtuahna a thlak a thlak a, phuba lak ngei a duh si, hmalak mai ngaihna a hre si lo. A thinlung erawh chuan a tum ran reng tho si a. Hruaia chu lo haw har a ti ve hle a. Engkim chinfel a duh takzet a ni.


Tumruhna tam tak nen a hmalam huna a thil tihtur vei ranin a awm ve reng tho a. A hun a thlir a, a chang leh a huphurh ve viau a, a chang tihhlawhtlin vat vat a duh bawk si!


Thinlung khawngaihthlak takin a awm a ni.


.............




Hruaia pawh tluang tak chuan a thleng chho a, a vanneih asiamin ruahin a nan chho lova. Hma takah a thleng chho va. Inneitute chawhmeh tur pawh a mawi tawk a hawnsak a. An lo lawm thiam leh hle a.


Janeti pa chuan Janeti chu thingpui alo siam tir vat a. A lo lawm em em a.

Pakhat lah chuan phur tak chuan alo siam a.


" I nu leh pate an lo dam a maw? I pa kha ka ngainat zawng tak a ni a, a hmel ka en aṭang khan mi ṭha tak a ni tih ka hre thei mai, mi ṭha te hi chuan malsawmna an dawng nge nge a nia"



" Aw, an dam tlang e"


" Nana-i chuan thil min rawn thawn lo em ni U Hruai..." Janeti chuan alo ti ve thung a.


" E....thawn e aw..." Hruaia chuan a bag chu ava dap mawlh mawlh. Polythene a thil infun chu a rawn pe ta a.


" Eng thil nge ni leh ta a!? Hmeichhe ho tak hi chu aw...." Janeti pa chuan a rawn ti a.


" Ka hre bik miah lo mai!" Hruaia chuan alo ti a.


" E....khai Hruaia chu Bethsebi pasal Uria ang zetin eng mah hre lo in lo keng ve tawp a ni maw?"


An nui dun a.

"A ni deuh ber mai! Taka, chaw kha ka la ei rih dawn lo a nia, Nana-i khan a rawn sawi mai pawh a...."


" Eng ti zia leh si nge?"


" Ka va inbuk phawt loh chuan......ka rit lutuk ang..."


" A ni dawn tak maw? Ni dawn tak e.." Janeti pa chuan a ti ve ta a.


Janeti pa chu a bu nghauh nghauh a. A hrethiam ve hle a.


Hruaia pawh a inlamah a chhuk ta a! A rinai takin a in chu a lo fai a, a hlim hle a, mak a ti. Lo tifaitu an awm chiang tih a hre thiam mai a.


Muangchang chuan a insiam a, An inbukna tur lam chu a pan ta a.


A hmun ava thlen chuan mi an lo la awm mang lova, mahse Hruaia hian tlai hi a duh lo ve hrim hrim a. Thil tihna reng rengah tlai lo turin apa in a fuih ṭhin a ni.

Inbuk hun a lo thleng ta a. A practice pui ṭhin aṭhiante chu a buktu te an lo ni a.


College hrang hrang aiawh tur an ding tlar ta ṭhap mai...


Chawhnu lamah chuan an tumpui turte anhre thei nghal dawn a ni.


( Ka nawmsam loh avangin ka rawn dah thei lawk lova. Min ṭawngṭai pui ṭhintute in chungah ka va lawm tak em!

Lawmthu ka sawi mawlh mawlh e.)

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » July 28th, 2019, 4:21 pm

31st JULY(UNCHAINED MELODY)


M.LUSEI PALIAN



EPISODE-39



( Nawmsam loh laia duhsak taka min ṭawngṭai puitute in va hlu em aw! Hringnun hi dai sual chang ka va ngah em aw! In zarah ka awm ve hram hram a ni. Keia thuziak ve mai mai min chhiarsak ṭhin hi ka va lawm ṭhin em! In chungah ka lawm em em e.)



College hrang hrang aiawh turte an ding tlar ta ṭhap a, an inbuk ṭan ta a. Enga mah hma in boruak aṭang nghal pang a. Hruaia pawh chuan boruak a man thiam nghal a. College hrang hrangten an College aiawh turte an ṭawiawm ṭha hle a. Hruaia chuan ṭawiawmtu ala nei chiah lova, ngai pawh ala ti chiah lo a ni. A chhan pawh inbukni chauh ala a nia. Tlai lamah an tumpui turte an hre dawn chauh a, a tukah an inhnek ṭan dawn a, a tuk lama ṭawiawmtu a neih chuan a duhtawk viau a ni.


A inbuk zawh chuan a hma a aṭhiante a practice pui ṭhinte nen chuan an inbe nual a. Rei vaklo a awm hnu chuan haw zai rel a tum ta a. Chaw eia haw ve phawt a, chawhnu lama va kal leh a tum zawk a ni. Pawnah chuan a chhuak a, rei lote a hawi thawveng a, a hma a alo chettlatna a ni a. A rilru ah chuan Mahriati alang nghal a, an intawn ṭanna hmun a ni a. Hruaia tan chuan helai hmun vel hi hmun pawimawh ber a ni tlat a ni!


" Hruai, kan rawn ṭawiawm dawn che a" hnung lam aṭang chuan chu aw chu a hria a.

An lehhawi chuan an S.U hruaitute leh Puia te an lo thleng chiah a lo ni a.


" E khai! Ka lo inbuk zo tawh asin, chawhnu dar 2:00 velah kan tumpui turte a hriat theih dawn chauh a..." a lo ti a.


Puia chuan a ṭhianpa chu a rawn kuah nawk nawk a.


" I zuk tluang maw? An lo dam em midang!"



" E...an lo dam tlang e, an lo sawi an lo sawi che a"


" Ka va awih lem lo e aw!"

An nui tlang ta a!

" Chawhnu lamah chiah in tumpui turte a hriat dawn chuan college lamah kan phei leh rih mai dawn em ni ni ang!" S.U hruaitu pakhat chuan a rawn ti ta a.

An za chuan College lam chu an pan phei tlang ta a.


.......


Rinfeli te chhungkua pawh N.Vanlaiphai lam an pan ta a. Chu khua an tana an mikhualna hmun tur chu an thleng ṭep a. A hmun hma chu an rinaiin a lo nuam phian a. An hmanhmawh lem lova, hmun nuam lai apiangah an Camera ken chuan thla anla mawlh mawlh reng mai a ni.


Chhura farep te hlei hlei chu nuam an ti a, a ram awm dan Khuanu uluk taka aduan ni mai hian alang a. Leilet lang phei raih te chu an thlir ning lo. A hun hian a zir bawk a, Buh kung lo lang hring nghalh mawi em em te chu an thlir ning lo a ni.Leileta buh kung inchen ṭhap mai thliin a chhem fawn siau siau chuan Rinfeli thinlung a tihnim raih a. A nunkhaw harna chuan a zem thar a, chu ram nuam leh mawiah chuan chen vang vang a chak tak meuh meuh a ni.

A ni reng lah taka, a hmun hma hian a zir em a, pa khabe sep thiamin Mizoram Shillong ti hiala an lo phuah pawh hi a awm reng a ni.


Rinfeli te chu a pa thawhpuiten chaw ei an lo buatsaih sak dawn a. Chuvang taka hmanhmawh lo chu an ni reng a ni. Chawhnu her hretah chuan an thleng chho ta. ...


..........



Hruaia te ho pawh an phei tlang ta a. In lama haw phawt a duhthu chu Canteen ah chuan a sawi a. Puia chuan a haw duhchhan chu alo hrechiang ngang mai!


" Hruaia hian chaw ala ei miah lo a nia," ring lenglawng chuan a ti ta a.

Chu thu zet chuan S.U hruaitute beng averh ta zar mai a.


Canteen-ah chuan chaw order sak mai an tum a. Mahse Hruaia chuan a duhtlat lo thung a.


" Ka inluahna ten min chhum kep tawh si a" tiin a hnial ve tlat a.

Dan chi nia an hriat loh avangin an dang duh ta lova. Kal lama hmarcha rep a hawn adah avang chuan Canteen neitute pawh an lawm hle a, thingpui lo pek an tum sek lehnghal a. Mahse a hnar ve hram hram a.

In lam chu a pan ta a!

Hruaia aliam chiah tih chuan Mahriati te ṭhian ho an lo thleng ve chiah a, Hruaia an rawn nang hman lo chiah chiah a ni!


Puia chu an hmu nghal var a. A hnen lam chu an pan ta a.


" Khaw nge I ṭhianpa?"

" A haw lawk a, a rawn let har lovang"

" A rawn tluang meuh a maw?"


" Tluang a niang, a rawn thleng hma phian, a rawn khem neng nung lo ve"

Class ṭan a hun tawh a, chuvang chuan canteen-ah rei tak awmna chi a ni tawh lo tih an hria a. Puia chuan S.U hruaitute chu ava hrilh hre ve hrim hrim a.
Hruaia nghah pah chuan Dini te chu a zui chho ve ta a. Period hnih khat vel chu present ve a tum a ni.


Hruaia pawh a thleng thla ve ta a, In neitupa chauh chu a lo awm a. Janeti leh a naute ho School an lokal zo tawh a ni. Janeti pa chuan chawhmeh alo tihlum sak ve a, Hruaia chuan,

" A ngai love" tiin ava chhawk thuai a.


Amah chuan chaw ei chu a insiam ve ta zung zung a, janeti pa lah chuan a lo be ve reng a. Ṭha tak chuan a chhang ve ta zel a. Puarfan tak chuan a ei ta a,a chawhmeh duhzawng hlir an lo siam ve kher bawk atin ni.

Chaw eikham thingpui hang chu Janeti pa chuan alo thli a, Hruaia nen chuan an in leh te te a. An inbuk dan chanchin te, huphurh a neih leh neih loh te a zawt reng a. An inchhang malh malh malh reng mai a ni.



Hun chu aliam ve ta zel a, Hruaia chuan In a chhuk zawk a duhthu a sawi a, a chhuksan ta a.

In ah chuan a ṭhu vang vang a, a hmalam hun tur chu a ngaihtuah ve rauh rauh va. Rinfeli a ngaihna a bang ṭan a, mahse eng tin nge ni zel ang le?


A inphihfai a, chutih lai chuan Janeti pa chuan a rawn au vak vak a,

"Hruai....hei i phone! "

An ngaihtuah a, I phone arawn ti ringawt chu a nuih aza hle a, mahse a awmzia a hre tho a. Mizo ṭawng buaithlak zia a ngaihtuah a, awm a ti ve viau tho a. Hmanhmawh deuh chuan a chho ta a!

" Hello...."


" Hruai, SAI lama phei a hun tawh em? Nge keimahni kan va kal zawk dawn?" S.U lam an lo ni a.


" Ka rawn kal ve a nge"


" Aw le...kan lo nghak ang che aw"


" Aw le"

Phone chu an dah ta a.

Janeti pa lam hawi chuan, " Ka kal a hun" tih ngawt a sawi a. A ni chu a lo bu nghut a.


A in a zuk kalh fel a, A chhuak chho ta a.

........



Canteen a an chawlh lai chuan S.U ho thusawi aṭang chuan Hruaia chuan College aiawhin Boxing a khel dawn tih Mahriati chuan a hre ta a. A rilru ava hah tehlul em! Thinphu zawih zawihin a awm leh dawn a ni tih a hria a.


An ngaihtuah let leh vang vang a, hei vang hian a ni maw College hruaitute nen an inhmuh fo tihte kha a ngaihtuah a. Thil a hrethiam ṭan ta a. A va han ngaihtuah tak em aw!


A thil ei pawh chu a tui thei mawlh lo a ni. Dini leh Muani pawh chuan an hrethiam ve nghal mai a. Mahse an ni chuan he Hruaia hi an ring em em thung lawi si a.


Rinpuia a rawn lut ve hlawl a, a ni hian vawiin aṭang hian College a rawn zawm ve leh chiah thung a. Mahriati te bulah chuan a rawn ṭhu leh ta chat a. An ngaihtuahnaah mipakhat a awm a, an ngaihtuah dan erawh a inang hauh lo thung a. Inpersan takin an awm thung a ni.

........



Hruaia chu Canteen kawt a rawn thleng a, S.U hruaitute an chhuak thuai a, Mahriati te chu ava hmu zuai a, mahse a bula ṭhu a hmuh chuan va pawh chu a duh ta bik hauh lova, a va melh ringawt a.


Inchhungah rei pawh awm lo chuan an chhuak leh ta a. Puia pawh a serh zinga a mei ang maiin a tel ve leh nghal chat a.


Mahriati chuan a thlir liam ringawt a, Thlir liam ngawt mai loh chu tihtheih dang nei rih miau hek lo le....!


......



A hmun an va thleng ta a. An tumpuitur ṭheuh an hre ṭan a, Hruaia chuan Johnya Aizawl College a mi a tum dawn alo ni. An boruak a ṭang khawp ang le!

Puia lah chuan innuai nghal miah miah se alo duh thung a. Tun ṭum chu Hruaia second man ah a awm dawn lo thung a. S.U hruaitu pakhat a awm thung dawn a ni. An boruak tur chu midang pawh chuan an hrethiam hle mai! A hun thleng tawh se, a boruak an tlirin an hmu chak a ni.


Hruaitute chuan Hruaia chu an fuih mawlh mawlh a. Amah erawh chu atuk a thil thleng tur a nih avangin an hawsan ta rih a.


............



Hruaia leh Puia chu pengkawi tawh lo chuan inlamah an tlang dun ta thung a. In an thlen chuan kawngkaah lehkha pakhat hi alo inzep a. Hruaia chuan ala a, a en thuak a, tu kutziak nge tih chu chiang takin a hre thei a ni. Puia chu a thaw ham ham a,

" Hiau.....kan va in luck hleih deuh ve...."

" Ba ṭhinna a nih ka ring mah mah zawk..."


" A ni awm lo e....khawi kan chhiar a nge aw..."


" Het..a chi lovang"


An inchuh ti tih a, Hruaia chuan pindan lamah a luhpui ta daih a.


...........



Mahriati te ṭhian ho chuan Hruaia an lo nghak reng a. Mahse a hmel reng an hmu si lo. Rinpuia pawhin a lo nghakhlel hle na a, tihvak ngaihna a awm si lo! College hruaitute lokir hnu pawh chuan alo la kir ve ta chuang lova. Zah theihloh chhuahin Dini chuan ava zawt ta tawp mai a. An rin ang ngeiin anlo haw tlang daih alo ni!



Mahriati chuan a chhan a hrereng a, pawi a ti vawng vawng mai.

Rinpuia vang bawk a ni!


Mahriati hian Hruaia awm dan aṭang hian Rinpuia a thik tih hi a hai miah lo. Amah run luih nan Rinfeli kha a hmang tih chiang takin a hria a, a rilru a hah hle, he Rinpuia hi a ngaizawng ve der si lo! Haw mai loh chu hmabak annei ta lo. Thinlunga vei em em hmaichhana be miah lova haw chu a tuartu tan chuan ana ve hle ang le!


....


Puia pawh haw zai a rel ve ta a. Zan lama leng leh tura inthlahin a haw ta a ni. Hruaia chuan a lehkhathawn dawn chu khuma ṭhu chung chuan a hawng ta a. Ti hian a lo inziak a....



Ngaih em em ṭhin Hruaia,


Khawngaihin chhiarchhuak hram ang che aw.....

I bulah hian ngaihdam dil mai loh che hi hmabak ka nei ta lo. Ka dawn kir hian thinlung ava na vawng vawng tak em! Mahse maw khawngaihin min dem lutuk lo hram la e, ih e hmana ka thusawi kha ila hrereng em! " Nang phatsan tur che hian ka chak tawk lova, ka hmangaihna che hian hrehawm tawrhtir che hi a duh lo a ni. Mualpho leh zak taka siam che ka tum ngai lova, lungngaihna khura hnuh luh che ka tum ngai lovang. Mahse chunga ka lo ti a nih chuan keima duhthlanna ni lovin eng emaw harsatna namen lovin min tlakbuak vang emaw, ka dan zawh rual loh harsatna ka chunga a thlen vang a ni ang" ka tih kha.....


Tunah chuan i hrethiam mai rih lovang, mahse i duh chuan ka ni fanu kha lo zawt mai la! I hmel hmu tawh lo tur hian ka inngai ṭhin a. Vawi tam tak lehkha ka thawn che a, mahse i hmu ngai lo nge min chhang duh lo hrim hrim ka hre lo!


Mahse hun liam tawhhnu kan pawt kir thei si lova ti raw? I hmel hmuh inring tawh lo viau in ka awm a, Aizawl ka rawn kal a, College Magazine a i thlalak ka hmuh chiah khan e.....Current man ang maiin ka awm a. Ka insum theihna khan a tlin ta ngang lova, kha chen ka nghah ṭhin kha i ni miau si a.....

Dik lo leh awm lo ti chung chungin hmeichhe tiha mawi lovin i in ka rawn pan ta mai che a ni.....

A bak chu i hriat kha....

Ka duhthlanna pasal nei tur ka ni miau si lova, ka na vawng vawng a ni.Mahse maw, ka hmangaih ṭhin che asin!

Kan tan hian Khuanu remruat sa hi Khuanu bawk hian min tihdanglam sak se ka va ti tak em!


Engvanga pasal hual nei nge ka nih tih hi i hriat hun chuan atthlak takin eng mah ti lo hram ang che aw.....chu chu ka ngen duh che a ni.

I bula hun reilo te ka hman leh avangin ka lawm a, ka hlim a ni. Nang zawng mi vannei i ni a, I tan Khuanu hian rem ṭha zawk a ruatsak ngei che hian ka ring tlat a ni. ...

A tawp ber atan ' Ka hmangaih ṭhin che' tih hi min hriatsak la, ka ni fanu bulah khan i thil tur ka dah a, i hman hunah ilo lam dawn nia aw.....


Hmangaihna zawng zawng nen,

Rinfeli



........



Chu lehkha chu A chhiar zawh chuan Hruaia chu a thaw hawk a. A ding ta thut a..... Bike chabi ala nghal a........

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » July 28th, 2019, 4:21 pm

[29/06, 3:23 PM] Michaela Khawlhring: 31st JULY(UNCHAINED MELODY)


M.LUSEI PALIAN


EPISODE-40


( Thawnthu thar tur hian min tur ta et et mai, JOSEPH pawh a rawn lang leh ang...! Khawngaihin in lo chhiar leh hram dawn nia...

Hei hi zo phawt ang aw)



Hruaia chuan Bike chabi chu ala ta nghal a, chhuah a tum chiah a, Sawmtea te unau an rawn lut a.

" U Hruai....ih homework kan ngah lutuk a...ih ilo va haw rei ve?"


Hruaia chu a thaw hawk ringawt a, anni unau lah bag nen an rawn in ak lut miau mai si! Bike chabi chu a ak leh phawt a. Chung naupang pahnihte lah chu dawhkanah chuan an lehkhabu an rawn phawrh nghal mial mial a. Lehkha zir tuma lokal an ni si!

A ngaihtuahnaah chuan atana ṭha tur zawk a nih a ring a, a ṭhu leh ta phawt a, an homework chu a enpui ta a. Tin, naupang beidawnga siam hi a duhngai lo a ni. Mathematics a chawhpui ta rih a, hmun an thiam lo lutuk chu a beidawn thlak a ni. Pahnih hmun aṭangin an han inzirtir leh te te a. Mahse Hruaia chu an tihlim phian lawi a. Atana ṭha tura Pathian ruat pawh a ni mahna le!


Eirel chu a tum ta zawk a, naupang chimawm ve tak tak pahnih lehkha zirpui pah chuan rawngbawl a ṭan ta zawk a. Tin, a ngaihtuahna pakhatah chuan Rinfeli ngaihtuah hi a tum tawh lova, a thei kher a ngem le aw!


Thil hi amak thei khawp a, kan thinlung aṭanga paih bo kan duhte, kan hriatreng duhlohte hi kan hrereng zel a. Hriatreng kan duhte hi kan nghilh leh si ṭhin a, hringnun kalsiam khuanu duan dan makna lai a ni.


Naupang pahnih te pawhin Mathematics chu an chawk zo ta a. By heart chi chu an chhiar lauh lauh a, an au ring thei phian lawi si! Lunglenna hnawt bo tham an ni ve hrim hrim bawk a. Mahse Hruaia hi an ngaina em a. A ni pawh chuan a ngaina a ni. Naupangte hian mi rilru chhe tak hi an ngaina ngai lo hrim hrim ve bawk a.

........


Pi Liani chuan a fapa chu a tluang em tihte a hrechak hle a. Nilengin a Sikul kai naah te chuan a thinlungah a awm a. A demawm loh, nu in fate an hmangaihna aia nasa hi a awm thei lo a ni. Eng kim hi fate tan a ni a, fate hian ngaihsak letna chang an hre lo mai zawk ṭhin alo ni.Chutiang thil erawh chu nu dinhmun aṭang lo chuan a fiah pha awm lo ve. A tan hian ni tin zan tinin a ṭawngṭai ṭhin si a.


Sikul bana in haw vat a, han phone chu a duh hle a, hun hi kalmuang a ti em em bawk si! Mahse an ngaihtuah chian chuan mi phone a ni a, koh chawp a ngai a, han phone sek kha a hreh bawk si! A ngaihtuahna a kal phir si ṭhin a ni.


........



Hruaia chuan eirawng a bawl zo der mai, rem hi a hria a, chaw chhum pahin Cooker ah a dal saranga a fun chu a thlak tel nghal ṭhin a. A hmin ṭha duhin a tihchi phian a, mahse a lo keh palh ṭum chuan a ho der ve thung lawi a. Tlangval mahnia inluah nih chuan remchanna te hi zawn a ngai ve bawk si ṭhin a.
Naupang pahnihte chuan lehkha an la chhiar lauh lauh a, achang leh an ninhlei leh zauh ṭhin!
Chutihlai tak chuan Janeti chuan a rawn au ta a,

" U Hruai, phone ah an be duh che..."

Hruaia chuan Sawma te unau chu lo ninhlei miah lo turin a hrilh a, inchung lam chu a pan ta a. Phone chu an la a, A nu alo ni a. Rei tawk fang an inbiak hnu chuan Hruaia chuan Janeti chu a rawn hui a, Nana-i nen an inbe ve leh ta thung a.


Janeti phone hman lai chuan Hruaia chu a chhuk ta a. Janeti chuan a thlir liam ringawt a. Tihvak ngaihna awm hek lo!




In a thlen meuh chuan naupang pahnihte chuan lehkha an lo zir tawh hauh lo, an lo ninhlei leh chiam tawh a. Naupang dan hi a ni ve hrim hrim bawk a ni. Reitak lehkha zirpui hi tum ṭhin mahse an ning thuai mai zel si ṭhin a.


Hruaia chuan nawm hmel em em hian faifuk hlarh hlarh pahin chhuat a nawt ta daih a. A ngaihsak duh lo der a, mahse an hero berin chutia nawm hmel em em a, a thil tih chu tihve an chak a. Puih an tum a, A ni lahin a lo phal lo a, an chak telh telh mai si! A tawpah zawng an U Hruaia chhuat chu an nawt fai ta hliau va. An nawh zawh chuan chaw ei turin an hawsan ta a!



Rinfeli te pawh an han inhlang thla fel a, an Quarters' tur chu an lo tifel fai thlap a. An han ṭhu hahchawl vang vang a. Chutih lai tak chuan Lalnunmawia Helmet kengin a rawn lut hlawl mai!

Rinfeli pa hmaah chuan, " Sir" tih pahin a inkheng at a.

Rinfeli'n chu hmuna Nunmawia alo awmreng chu mak ava ti em! Thil mak tak a ni reng a ni.

" E khai a! Mawia...engti tiha heta ilo awm nawlh a...a rem lai laiah khan lo ṭhu rawh..."


" Sir, nimin khan keipawh hetah ka han zawm chiah a ni..."


" A va tihzia lehzel em aw, kan awmho dawn a"

" A va tihzia ve aw..hmelhriat loh karah kan awmdawn emaw kan ti a, ilo awm hlauh chu ava zia ve.." Rinfeli nu chuan a ti a.


An hlim tlang hle a, Nunmawia chuan Rinfeli chu ava melh leh zeuh ṭhin a, a hmel aṭang chuan a hlim hle tih a hriat theih a. A ni renga, a hlim a ni.Rinfeli pawh chuan a melh ve leh zeuh ṭhin a. A lai angreng hle a ni.A mak tehthut em reng a ni.


Nunmawia pawh a ṭhu mai mai bik lo, an bungrua chu a rem pui ve sawk sawk a, a theih tawpa ṭangkai hi a tum ve tlat a ni. A hunlai a ni tlat a, ṭangkai tur pawh a ni reng a ni.


..........



Zanriah han ei nan ala hma deuh a, Hruaia pawh a thlan titla turin a insawi zawi leh rih a. Tunah chuan a rilruah thildang dah thiang a ni lo. A pa hming, an khaw hming ti ṭha tura theihtawpa a beih a ngai a. Tin, chu mai a ni lo, an College tan a din nghet a ngai a ni. A rilru a ṭawngṭai mawlh mawlh a. A taksa a sawizawi pah reng a, a ma inluah ah chuan boruak a hnek thuak thuak reng mai a ni. A chang leh chhing chungten an ti vel thul....

A rilrua thildang awm chu paih chhuah a tum a ni. Chutah chuan, a ni thinlunga ṭawngṭai zet hnuah chuan thawvenna a awm si a. A thinlungah thil dang alang tam ta tial tial a, a rilru a thunun ṭan ta. Darkar khat vel zet alo insawizawi hman tawh a, a taksa pum chu thlanin a bual chhuak vek tawh a. A chawl hahdam ta a.


Fai veng vawngin a inbual a, an inbual zawh meuh chuan khua alo thim titih tawh a, zanriah ei zai rel a tum a.


Kawngka chu tu emaw hian a rawn kik karh karh a.

" Lo lut rawh..."

Janeti a rawn lang a, Hruaia chu chaw eitumin alo inbuatsaih mek a,

" A pa in hei hi zuk suah rawh a ti a" tih pahin Bawngsa chhum la khu vat vat chu a rawn chawi lut a. A sa a tih hmel hle a, Dekchi te mawngah chuan puanchhia a dawm hnan a. A hmel chu alai hle na a. Hruaia chu a rawn melh ngar mai si!

" E khai a! A ngai lo asin..! "

" Puar deuhin ei rawh, ka han chho phawt a nge.." a nui sak a.

" A nih chaw ei tui le..." a nuih let ve sak thung a.


" Chaw ei tui le" a chhuak leh nghal a.

Hruaia chu alawm hle mai, Janeti pa hian a tan Bawngsa alo han leisak a ni ngat mai! Taksa tihchak ngaih hunlai tak a ni tih a hriatpui a. Suah satliah pawh ni lo, dekchi te in a rawn dah tir thlap lehzel te chu ava lawmawm ngai em! Puarfan takin chaw a ei ta a. A puar hle tak mai!


Chaw eikham chuan a ngaihtuahna a kawm mai mai a, a tuk lo thleng tur chu a huphurh rualin a nghakhlel hle mai! A zirlaiah a rilru a pe lo hle tih a ngaihtuah chhuak a, a inthlahrung ru hle a. Mahse tunah tak chuan College aiawh tur a ni miau mai si a!


Puia a rawn tek lut ta nawlh a,

" Ka riak nghal dawn a nia, " a rawn ti a.

Hruaia alo bu nghauh a, an inkawm dun ta a. Thil chi hrang hrang an sawi kai a, a tuka thil thleng turte an sawi dun pah zel a. Puia chuan a ṭhianpa hi a ring hle a, tuma laka a tlawm theih hi a ring lo a ni.


An pahnih chuan an mu ta a, mut pah chuan an la ti ti dun zel a. Nakina an thil tum te sawi dunin a chang leh an nui dun leh ṭhin. An hlim dun hle a ni, tudang hi an ngai bik lo a ni.


........


Mahriati pawhin zan mu chhin har ava ti tak em! Mengreng in a mu a, mu reng chung chuan a hil thei si lo! Hruaia hian a ngaina tih a hria a, mahse a hnaih dawn apiang hian an karah Rinpuia a rawn tlazep hman ziah hi mak a ti a ni. A thinlung zawng zawngin a hmangaih a, amah Hruaia pawh hian a hria a. Mahse Rinpuia rawn lang thut hi a ni. Tin, Hruaia ṭhiannu a rawn lang ve chiah bawk si....


Chung thilte chu a ngaihtuah neuh neuh a, ti nge le Khuanu pawh hian tiang em a, a lo duan bik le! Van a duai a ni. A chang leh Hruaia hian a hmangaih em em khan a hre si ṭhin a! A chhan pawh Hruaia hian a piancham atan kut durh phung leh dal pilh phungin a inhlawh asin!

Tiang em te chu hmangaih lohte chungah lo chuan a tih theih ngai dawn em ni!? Chu zawhna chu a inzawt mawlh mawlh a. A chhing ta vang vang a, mitthla alang hun hlui liam hnu a suangtuah let a......


......


Rinfeli te pawh chaw eikham aṭangin an la buai char char a, inrem fel reng rengin an buai a ni. An chaw ei lai te khan mi zingah Nunmawia khan a intineitu riau te khan a hre thar a. Nunmawia kiangah hian a thla a ngam thei ngang lo a ni. Hruaia nen inang lo riau in a hre leh hnuhnawh a, a inang mawlh lo a ni. A ni Hruaia kiangah chuan a thla hi a ngam zan thei a,Nunmawia kiangah erawh changela sawibel ang mai ni hialin a in hre lawi si. A thinlung hi a hrethiam lo a ni.


Zan mutna ah chuan a inngaihtuah a, tin, mutna sawna muhil hlei thei lo chi a ni ve hrim hrim bawk a. Hmana a nunhlui a chhui kir a, nimin maia thil thleng ang mai niin a hria a. A thinlungah Hruaia chiah alo lang a, a tan chuan engkimah a dinsak ngam ṭhin si a. An high School kal lai a ngaihtuah let a, a muhil thei lo a ni. Nunhlui khuarei an chang mai tur hi a dawnin a thinlai a hnim a, tukverh lam ava hawi a, thla alo eng a. Fur khawthiang chhawrthla eng chu a mawi a ti a. Thinlaiah ngaih ban theih loh a nei a ni. A album a la chhuak a, hmana an thlalak te chu a thlir ta a.

...........



Zing lam dar 11:00 a rik meuh chuan SAI hmunah chuan College zirlai te chu an leng tawh lova. Khelh khatna a zo chiah a, khel hnihna tur a ni dawn chiah a ni. Hrangbana College an pawr hle a, Aizawl College an thawm a ṭha viau bawk....
HBC tih leh GAC tih a inrik chhawk reng mai a ni. Boruak asang kher mai!


Dressing room-ah chuan Hruaia chu a ṭawngṭai zo chiah a. A kut a tuam ṭha a, Boxing Glove chu a bun ta a. Amah ah chuan phurna nasa a awm a, a Second man chuan a hnungah a zui a. Microphone ah chuan Hruaia hming an rawn lam ta.....

HBC tih ri a ring ngang mai...


A hmel leh a pian in a zir bawk a, a rawn kal te reng reng chu a dik thlap mai a. Tlangval pianthiam tak a ni ve bawk a ni. Thlir zui a hlawh kher mai...

Ring chhungah a lut ta, a che vel chu a zei thlap mai a. Mi mit a chungah a fu hle a.....


Microphone aṭang chuan Johny-a hming an rawn lam ve leh ta...

GAC tih a ri ring leh hle thung a.

A tlan in a rawn tlan lut a, a rawn hawi vel dan chuan mipui lawm a hlawh hle mai!

Boruak a ṭang ṭan a...

Blue Corner ban an phar tir a, Hruaia chuan ban a rawn phar ta.....an lo au dual dual a...

Thaw dep dep a thlirtu Mahriati a awm ve reng a. Mahse mi an tam lutuk a, Hruaia chuan a phek en vek thung a.

Red Corner ban a rawn phar ve leh a, an in au rinsiak ni berin alang a.

A hamtute an inpeih fel ta.

Entute lam an au nghal luai luai a...

A hamtupa chuan an pahnihin a hui a, a laiah an inen dun kal a,uluk takin eng emaw hi a hrilh a, an glove chu an insirtir a, an corner lamah an kal dun leh ta...

Dar a ri a, an ṭan ta....


An in pan hnai a, an inveh ni ber hian alang a, an inhnek fuh lo ve ve...

Hruaia chuan a chet dan thlak a ngai tih a hrethiam a, tin, hnekfuh hmasatu zawk nih a ngai tih kha a hre reng a. A kal kual ve duh ta hauh lo, A lo inher rem zel a, hun remchang a hmu a, chiang zetin a hnek fuh ta.....

BLUE CORNER ....tih ri a rin zia mai chu...(h)

Johnya a luhai ṭan a, mahse a tlu lo, a tuarchhel hle mai! Hruaia chuan a bawhzui duh rih lo. Din ṭhat tir leh phawt a duh a ni.

A ding ṭha chiah tih a hmuh chuan a pan phei nghal vat a...chiang zet zet chuan a hnek ta zawt zawt mai le....

Entute thawm ava ṭha tak em!

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » July 28th, 2019, 4:21 pm

31st JULY (UNCHAINED MELODY)


M.LUSEI PALIAN


EPISODE-41



( Zan mu chhin a har ngei e di,
Nang tawn nan kar ahla a hla lua e,
Tawn loh ni ava rei tawh tak em!
Nang ngai hian ni tam ka hmang thei dawn em ni le...)



Johny-a ading ṭha leh ṭan chiah tih a hmuh chuan Hruaia chuan ava pan phei nghal a. Peh hel tawh lovin a hnek tlir nghal zawt zawt ta mai a. Thapui thawh teh meuh a hnek a nih avangin ava na dawn ngai em!


Entute thawm a ṭha hle mai!

" BLUE CORNER HBC" tih ri chuan Hall chhung chu a khat ta tlat a. A awm a ni, an che ṭha tlat a.

Puia thawm ana, hauh hial ngaiin alo bengchheng ve leh hman a. Hruaia Second pawh a au nasa ngang mai!


Hruaia chuan a tumpuipa chu a en a, a inveng thei tawh lo tih a hria a. A duhtawk ta... A tawlh hnun san ta daih a. A ke a khai a, ala in warm up lauh lauh mai!

Johny-a chuan ring a vuan hram hram a, mahse rei a chelh thei ta lo. A tlu ta....!


Round khatna pawh ala zo si lo. A hamtupa chuan Red Corner chu a en a, khel chhunzawm chi a ni tawh lo tih a hria. A ka leh hnar aṭang chuan thi a rawn chhuak ta si...


A hamtupa chuan a ti tawp ta hmiah mai!

Hruaia achak ta!

Thawm ava na in ava ṭha tak em! A nihna takah chuan an inkhan lo em a ni. Kha mah mah Hruaia khan ahnek zawm lo mai mai, a tawlh hnun san zawk a ni si a.


Hruaia chu A hamtupa chuan ban a phartir a, chakzawk a ni ta. Aurinna ah chuan Hruaia hming an puang dum dum mai!

A hawi kual chiah chuan Mahriati a zuk hmu tlat! Inthlahrunna a khat mitmenga rawn thlir a ni tih a hre thei. Hruaia chu ala hah miah lo, a thlan chu a tla na a. Chu nula mitmeng inthlahrunna a khatah chuan Angel note hmel a zuk hmu a.

Khawngaihna thinlung leh hmangaihna thinlung chuan chu Boxer chu a tuam mup mup mai a. Khawdang a hawi hlei thei lo. A melh vawng vawng ringawt....
Hriatchhuah an nei chiang mai!

Johny-a chu an rawn buaipui laih laih a. Medical team te chuan an bawihsawm reng a.

Chakzawk zawnna a ni tlat a, chakzawk awm a ngai si a ni.


Hneh leh lutuka midang khawih hi duh lo viau ṭhin mahse chakzawk zawnna a ni miau mai si! Infiamna mah ni se, thahrui zawng zawng sen ngaihna a ni si a. Hruaia chuan Johny-a chu a zuk melh chuan hrehawm a ti viau mai!

Chu hnehna chiang em em mai chu lawmin Zirlai rualte chu an au hluah hluah mai a. Mahse Hruaia chuan mihring ve mai a ni tih a hrechiang hle a, Pathian hnenah chuan lawmthu a sawi mawlh mawlh mai a.


Ring aṭang chuan a chhuak ta a. Lawmpuitu a ngah hle a ni.

Vawi leh khatah College Student au rual in THE LEGEND an ti rual ṭhup ṭhup mai a. Hruaia pawh a nui sang mai! Hahdam lailawk turin Dressing room an pan leh ta a.Puia pawh chuan a rawn zui ve vat a. Nuam a ti in a hlim hle a ni.

Nikhat ni hian khelh hnih a khelh a ngai dawn a. A chhan pawh he Competition hi ni hnih chhunga zawh tura tih a ni si a. Tlai lamah a khel leh dawn a ni.

Dressing room a a inthlak zo chu Hall pawnah chuan awm hahdam turin an chhuak ta rih a. Hruaia chu chulai hmunah chuan a tlangnel tawh bawk a. Lo betu an tam hle a ni. Mi ṭhenkhat phei chuan Champion tur hialin an lo ngai a. A awm veng vawng reng a ni. A mah lo hi chu an Weight ah hian han Champion thei tur an awm dawn em ni?


Ei in turin dawr lam chu Puia nen chuan an pan ta rih a. College hruaitu lam chuan Students' tumah haw an phal lova. A chhan pawh tlai lamah an College aiawhtu khan a khel leh dawn tlat si a ni.


Mahriati te ho pawh pawnah an chhuak a, hemi ni hian Rinpuia akal tel ve lo tlat! A mit chuan Hruaia chu a zawng ruai a, mahse a hmu zo lo a ni.



Mahse Ring chhunga a awm lai khan Hruaia khan a rawn melh a, a thinlung zawng zawng hmu tlang thei hial khan a hre hial a ni. Awm ngaihna ava hre lo tak em! A hawi vela atawng si lo. An ṭhian ho chuan hmana Hruaia te nen a an ṭhutna ah chuan an lo ṭhu a.


Thinlungna in a awm a, a hliam a, hrehawm a ti a. A hawi vela engkim mai chuan nunhlui a ngaihtir si a. A thinlungin Rinpuia a ngei hlur ringawt mai a ni.



Hruaia te pawh ei in an zawh chuan SAI lam chu an pan leh ta a. Puia pawh a ri lang lang a, nuam hi a ti a. Hruaia thinlungah chuan Mahriati mitmeng, inthlahrunna a khat kha acham reng a, theih ni se kuah vawng vawng a chak ngei mai! Hnemtu a ngai tih a hria a, mahse a thinlung lehlam erawh Rinpuia avang chuan a hel ve tho si a. A ngaihtuahna chu a buai ve kher mai! Mahse 31st July chu lawmsak ngei a tumruh hle a. Mahriati tana inkhawl a ni a. Mahriati tan ngei chuan chu hah taka a inhlawhna ngei chu hman a tum a ni.


.........


Rinfeli te pawh a zual zapui chu an tifel ta a. Chhunah chuan Nunmawia arawn leng a, a nu nen chauhva an awm lai a ni a. Nunmawia hi a tlangnel phian a, Rinfeli nu Sangpuii pawh a nel hle tawh a.


" Nu Sangpui, hei Mafeli hi khua ka fanpui dawn em maw ni le?"


" E...a thu thu aniang chu...kha naktukah chhuk atum tawh lehnghal a.."


" Mafel, kan leng chhuak dawn em ni, ruah sur hma hian..."


" U Nunmawi, min hrethiam la ka chau rih em a ni..chu lovah ruahin min nan hrep ang tih a hlauhawm e..."


Nunmawia hian Rinfeli hian thinlung ape lo sawt hle tih a hria a. A chhan pawh hria in a inhria, mahse eng nge pawi vak ni, an thu tiam a pa nena an tiam ang ngeiin College a zawh hnuah nupui atan a nei dawn tho alawm!

Nunmawia hmel chu a nur hle a. Rinfeli chuan a hrereng a, mahse a hre lo der ve tlat thung a. A nupui pawh ala ni lova, a duh thala a tih tur a ni bik hleinem le!

Lungthlu lo zet hian khiangawiin mual a liam anga,
Lamkawiah di atawng anga ṭah a ṭul mai angem le aw....

Chhut tham ava ni si em!

Di tawngin di dang tawng leh mahse,

A thinlung luahtu bak thinlungah a awm si lo,

Lairil fantu zawng a mi deh hi ana ngai em a ni.


Nunmawia chu mitmeng nur deuh chuan,

" A nih leh le.." tih pah chuan a chhuak ta a.


N.Vanlaiphai khawchhung fan chu a chak em em a, mahse Nunmawia bula awm chu a chak rih mawlh si lo.


Nunmawia chhuah hnu chuan pawnah ava chhuak a, khua a hnim raih a, chhum kara ni lo lang chu mawi ava ti tehlul em! Khua chu Police Quarters tuizem chung aṭang chuan a thlir a,lunglenna chuan ava zem hneh tehreng em!


...........



Hruaia tum leh tur chu Pachhunga University college a mi Tluanga a ni thung a. Pakhat hneh ve ve tawh an ni. He mi ni atana khel hnuhnung ber tur an ni. A chak zawk zawk hi semi final an lut dawn a ni. Boruak aṭang leh tawh hle a.


Mahriati chu a ṭhu hnai hle a, Hruaia che vel hi a thlir ning lo a ni. Eng mah hmuh hmaih neih lo turin awm a tum a ni.


Hruaia chu Dressing room-ah chuan a ṭawngṭai mek a, Eng kim Pathian hnen thlen zel phawt hi a ṭhatzia a hrechiang em em si a. A ṭawngṭai lai chuan a pa hmel te, a nu hmel te a mitthlaah alang ta zut zut a....phurna namen lo chuan a tuam a. A Amen rual chuan a zang vawk in a inhria a.

A second man pawh hian heti em a Pathian ṭih mi a ni tih hi a hre ve chiah a. Mak a ti in a ngaisang hle a. Glove alo bun tir nghal a, Hruaia pawh a nui leh sang tawh.

A hun a thleng leh ta.....



Aurinna aṭang chuan Tluanga hming an puang dum dum mai a. Entute an lo au dual dual a, he pa hi mi mak tak a ni, chak dawn loh chuan fair vak lova chet pawi ti miah lo chi hi a ni a. Mahse an College chuan an ṭan hle a. A thiam phian a, a trick hi alang mang ngai lo hrim hrim bawk atin ni.

Ring chhung a thleng ta... entute an va au ring teh lul em!
.


Aurinna aṭang chuan Hruaia hming an rawn lam ta..... An va au ring ngai em! A kekawrbul leh kawrhak a rawn thlak tawh a. A pian mawlh mai chu hmeichhe thlir a ni. A pa riau, a che over ngai hauh lo, pangngai takin a rawn kal a, a hmel nuisang te chuan mi a hip hle ṭhin si a.


Ring chhung a rawn lut ta... Thawm ava han ṭha ngai em!

Red Corner a ni ve thung ta a! Entute thlir a hlawh hle a ni.

Boruak aṭang ṭan hle a, a hawi kual a, Mahriati chu a zuk hmufuh tlat mai! A ni chuan lungrun takin alo melh a, A thinlung chuan ' I tan ka awm reng ang' a ti a ni.


A hamtu tur chu SAI mi leh sa a ni a, Hruaia nena inhresa an nih avangin an innuih dun sang a. Mahse inbiak na chi a ni lo thung..

A hamtupa chuan Hruaia leh Tluanga chu a ko ta a, dan leh dun a hrilh ta a. An kal hrang leh ta...


Bell a ri ta....an ṭan ta...

An han ṭan chiah entute an au nasa ngang mai!

Hruaia lah a tumpuipa First Round a knock out ngat a ni a, Tluanga lah fair lem lo taka knock out ve tho a ni.

Tluanga chu a che hmasa char char a, Hruaia chuan alo bum char char thung a. A hmuhnawm ngei mai...
Tluanga chuan hnek ṭhelh pah chuan a kiu chuan a hnarah a nghawk lui tlat mai....
Hruaia pawh a pei nawk mai, chumi lai denchhen chuan a rawn hnek zui a, Hruaia hnar aṭang chuan thisen a chhuak ve ta zawih zawih mai le....

A hamtu chuan alo hmu hman tlat mai...!

Link:
BBcode:
HTML:
Hide post links
Show post links

Local Advertisement

MOBILE SIAM ZIR DUH TAN!!!

Tech-Inn Mobile Repairing Traning Centre, Bazar bungkawn

Kum tin mi za chuang eizawnna kan siamsak a, Eizawnna tlaka thiam turin kan zirtir thin

Mizorama mobile siam zirna hmasa ber changtlung ber kan ni. Hrechiang duh tan Contact : 9612099411 / 9862016122


Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » July 28th, 2019, 4:21 pm

31st JULY(UNCHAINED MELODY)


M.LUSEI PALIAN



EPISODE-42



A hamtupa chuan hun a titawp ta rih a,a hrem dawn a ni ngei ang.

Hruaia chu a buaipui hmasa ta zawk a.

Hruaia hnar aṭanga thisen chhuak chu a thawkna ngang mai, amah pawh a rilru a na a. A ding ngil leh at a, mahse a hnar aṭang chuan thisen chu ala chhuak a. A ngai pawimawh lo, chuti taka fair lo chu hnek a chak zek zek a. Mahse medical team lam chuan an rawn hrufai ta rih a. College naupang thawm ana ngang mai.


Mahriati chu a ṭhutna aṭang chuan a ding zawk a. A rilru ava na em, chu pa mai mai chu ava han fair lo em em ve le!

Theih nise, Hruaia hnar thi chu han hruk fai ava duhtak em! Mahse mi an tam lutuk a ni. Tin, tun dinhmunah chuan a ngam chiah lo bawk atin ni.

" CHEATER.....CHEATER" tiin an lo au rual ṭhup ṭhup mai a.


A hamtupa chuan Tluanga banah chuan kaiin a warning ta nge nge a. Amah lah chu a thinrim phian lawi zawk a.


Hruaia pawh a hnar thi a ziaawm ṭan ta!

A hamtupa chuan a ṭan tir leh ta a. Boruak asang ngei mai.

Tluanga chu a tlanchhe kual a ni ber a, chu tak chu Hruaia chuan a ngei hle a, duhtawk a dan chep a, hnek hrep a duh takzet a ni.

An inhnaih chhunah pawh an inhnek fuh hleithei lo. A lo inher kual hman ve zel a, an in um kual hi a ni ber mah awm e.

Hruaia chuan a rem lai laiah a hnek mawlh mawlh a ni ber a.

Hun a tawp ta... Bell a ri ta!


An chawl rih anga, minute khat hnu ah anzawm lehnghal dawn a ni.

Hruaia chu a second man chuan a fuih nasa ngang mai a, khatiang mai mai lakah inveng fimkhur turin a chah nasa hle a. Hruaia pawh a bu nghauh nghauh a. A tumpuipa hi tum har tak a ni ve hrim hrim bawk a ni.

Mahriati pawh a insum zo lo, Hruaia corner lamah a phei ta! Patling hlam nih vel lek aṭang chuan,

" Hruai, i hneh a ngai a nia, i ti thei tih ka hria.."

Chu aw chu mipui sang tam zingah pawh Hruaia hian a thur chhuak nalh thei ang. Chu aw chu a hrechiang em a ni. Hruaia chu a lehhawi zawk a, chu aw neitu chu a melh vang vang a. Melh reina hun a ni lova, mahse an ni pahnih tan chuan hlimna par chhuan lai a ni si.

Tumruhna nasa tak a neih phah a. Chak tura duhna leh chhelna nasa zawk a neih phah ta!

Hruaia chu a ding leh at tawh a, thisen chhuahtu chu thisen vek a thungrulh a duh a ni. A leh lam takah chuan a ṭha ti chiah lo mahse a hun tawn chuan ngai a ti tlat si a ni.

Bell a ri leh ta...


An inpan leh ta chheu chheu mai.... Hruaia chuan a khelh dan a thlak ta daih a, a hma a a khelh dan ang lo takin a chhaih kual nasa zawk ta tlat.

Tluanga a talbuai ṭan ta...
Hei tak hi Hruaia chan a ni. A kilah a dang bet thei ta... Entute an va phur teh lul em, au ri a ring ta ngang mai. HBC lam chuan " THE LEGEND COME ON" tih chu ava ri ring tak em!

Hruaia chuan A tumpuipa Tluanga chu a duat ta mawlh mawlh mai! Duhtawkin a hnek ta mawlh mawlh mai a, a lu a nak thawl, a rem lai laiah a ri nghal miah miah mai! Tawrh tham fe a ni ve ang le....

Tluanga a inveng seng ta lo! Hruaia chuan tawlh hnun zai a rel lo. A la duhtawk thei lo, a hnek mial mial mai a. A hnu ah chuan A hamtupa chuan a rawn ṭhelh ta hial a, Hruaia chu a ding ta chheu mai. A mitmeng chu nelawmna reng a nei lo!

A hamtupa chuan Tluanga chu a lo dawm vat a, A hamtu kawrah te chuan thisen a kai nasa mai. Tluanga chu han khel chhunzawm chi ziazang a ni tawh lo. A ding thei tawh lo.

HBC thawm a ṭha ngei mai!

" LEGEND...LEGEND..." tih thawm chu a va ri ring tehlul em!

Hruaia chuan adar ala ti che lauh lauh a, a melh ngai a melh ran thung.

A hamtu chuan Tluanga chu an en ṭhin a. Khel chhunzawm tlakah a ngai ta lo!

Chu inkhel chu a titawp ta! Inhnek entute chuan an va kham lo tak em!

Second round chu hmuhnawm tak a ni reng a, Hruaia THE LEGEND dik tak a lang ta! An va kham lo rua em!

HBC au thawm chu a ring hle a, lehlam College tan chuan ngeiawm tham a ni...


Hruaia chu a hamtu chuan ban a phar tir ta a! Lawmna thangkhawk chu ava nasa tehlul em!


Ti hian Hruaia hi Semi final a lut ta a, a tukah a khel lehnghal dawn a ni.


HBC tan chuan lawmna nasa tak a ni, semi final a inhlan kai pawh hi a harsa em em a, Champion an nih phei chuan an lawm ngei an tum a ni.

A tukah chuan chawhma lamah Semi final an khel anga, Semi final lut tawh Kima, T.Romana College a mi nen an intum anga, lehlamah in tum an awm ve bawk ang a. Tichuan, Final chu chawhnu lamah chuan an khel dawn a ni.

HBC chuan Hruaia chu zawn an duh hial a. Mahse Hruaia chu a Corner ah a ṭhingṭhi a, a ṭawngṭai ta. Chu thil chuan Entute thinlung ava hneh tak em!


Ring aṭang chuan a chhuak ta a. Entute chuan chibai loh an hlau takzet a...an lo ri hulh hulh a, chung zingah pawh chuan Mahriati ala tel ve zui a.


An lo intlar a, an kut an lo phar a, a zut phei diat diat a... A hnungah Puia akal a, " Ka ṭhianpa a nih hi..." a rawn ti phei reng a. A sawi ngai a sawi nawn tlut tlut mai. A demawm loh, a hlimna hian van a tawng lo chauh a ni.

Mahriati zawn a thlen chuan a bulah a pawt hnai ta daih a. A lai ngei mai, mahse Hruaia chuan a ruala kal tur chuan a kai tlat mai si. A va han zak tak em! A lai em em a, mahse chutih rual erawh chuan a hlim em em thung a.

Dressing room ah chuan an lut ta a.

Hruaia chu a chau ve ngang mai. Mut zalna remchangah chuan a mu ta. Puia chuan,

" Malis i ngai em ṭhianpa.."

" Ngai lo, ka lawm e"

A second man nen chuan an inkheuh zeuh a, an chhuak dawn ta..

" Hei damdawi mum lian a awm tho a, pawnah kan lova hawi thawveng a nge" an ti a.

An chhuak ta a.


Mahriati chu ava lai tak em! Hruaia lah chu a la mu zal a,

" I chau viau em ni?"

" Chau lo ve..."

" Ti nge mi zingah lehnghal...an hmuh laiin min kaih luh ve daih a..."

" A pawi viau em ni? I duh chuan....min ngaihtuah i tum loh chuan i kal thei a nia.."

Chu ṭawngkam chu a va na tehlul em! Hmeichhe awm nem tuar atan chuan a na mai thei a ni.


" Hruai, ka thinlung i hriat chian em kha..."


Hruaia chu a rawn tho hluai a,

" I thinlung hi ka hrechiang miah lo asin... hriatchian tur hian i awm ngai em ni, kei ai chuan i ṭhianpa kha i ngaihsak zawk a ni lawm ni"


Hruaia mitmengah chuan natna tam tak a hmuh theih a, Mahriati chuan eng tin nge a chhan tak ang le?



Chhan mai ngaihna ava vang tak em! Eng tin nge Hruaia hmaah hian a insawi tak ang le.

Hruaia lah chu a rawn tho tawh a, a inkhung mawlh mawlh a. Eng mah a sawi zui tawh lo, a insiam mawlh mawlh mai a, haw chu a hun ṭan tawh reng a ni.


"Hruai.... Eng tik lai.... pawhin ka ngaihtuah che a, ka thinlungah hian i awm reng asin....mahse min rin loh chuan i thu le!" Chu aw chu thinlung chhungril ber aṭanga chhuak a ni a. Hmangaihna tam tak chu aw ah chuan a inphum tel a. Miten an sawi induhna satliah ni lo, hmangaihna dik chu alang chhuak dawn a ni mahna!

Hruaia chuan Mahriati mitmeng chu chiang zet chuan a rawn en a, derna leh dawtsawina reng hi a hmu lo, a hmu mawlh lo a ni.


" Hawh....ih...Inah kan sawi dawn nia, a tlai dawn a tlai tawh lutuk....kan tlai lutuk dawn" Hruaia chuan a ti a.

Pawnah chuan a kaichhuak ta a.



Pawn an chhuak chiah chu Hruaia chibai tum an lo la awm nual mai...

Seni pawh alo awm tel ve teh mial a, Hruaia lah chuan Mahriati kut chu alo la chelh ran a, an rawn chibai nak nak a.


Seni chuan, " Chhura....ilo va thiam ve...i chhur mai pawh a" tih pah chuan a biangah a rawn piai vak a. A hlim hmel hle a, chu nula lah chu tuman an hriat hmel bawk si lova.

Mahriati chu ava lai tehlul em! A zak ngawih ngawih Hruaia lah chuan a kai bet tlat mai si a.
Awmngaihna reng a hre ta lo.A ke chu a insual nawk nawk a. Mahse a thinlung erawh a hlim thung si.

A nawlpui an ṭin hnu chuan, Puia chu an bulah chuan ala ding reng a. An piah deuhah chuan Muani leh Dini pawh an la awm a. An va pawh phei ta a.


" Zanin tlai chu ka chau em a, Mahriati hian eirawng min bawlpui se.... "


" A chi bik loh, kan vai lo te chuan...." Dini chuan alo ti a.


" Min ban in tum ngawt elo?" Puia chuan a rawm ti ve nghal zat a.


Hruaia pawh abuai ta nak mai....


"Umnnn....kan lo va phei anga, chawhmeh in rawn lei phei mai dawn nia"


Puia chuan, " Chawhmeh leina tur ka ngah mai kei chu...S.U in min pe a.." arawn ti ve ta....


Hmeichhe ho chuan, " Yessss" an lo ti a..


Hruaia chuan Mahriati chu a phur phei a, an lo va kal hmasa ta a.


In an thlen chuan Hruaia chu a inphelh thawl a. A pian fuh em em mai te chu Mahriati chuan a thlir ning lo.

Khumah chuan a ṭhu a...


" Hruai..i chau em?"

"Aih....i mit meng kha ka mitthlaah a cham reng a, ka chau thei lo a ni" a thinlung diktak asawi ta..


Hruaia chu Mahriati chuan a ban vel a rawn chul sak a,

" Mahriati, ka la ban chuap asin..."


" Ka ban ve anga a ni mai lawm"


An hmui chu a inchar mai ang tih hlauhawm khawpin a insi nasa a...
An lungphu a rang tual tual a, an duhthaw ta telh telh a...

.....


( Rek bung teh ang, ka la nuam thei chiah lo a ni. A sei loh deuh pawhin min lo hrethiam dawn nia aw.)

Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)