☆LTK☆ - By Dingdi Pachuau (Completed)

[Ngaia]

☆LTK☆ - 32 By Dingdi Pachuau




"Eng thil nge i tih hi han sawi fiah teh le?" Room-a kan awm hnu chuan ka ti a, room-a ka hruai chhan chu thil awmzia hi sawi fiah tùra ka duh vàng a ni.


"Hei i hmuh ang hi a ni mai, i fa ka pai a, ka rawn luhkhung che," buai map lo hian a ti a.


Ka ngaihtuah lêt a, Mami hian chiangkuan lohna a lo nei rêng em ni le? Mahse, kan inkawp lai pawh khán chutianga dik lohna a neih àwm ka hre ngai hauh lo a nih kha. Tuna a awm dàn hi hriat thiam a har ka ti, a ã thut zâwk em ni le?


"Tu fa nge?"


"I fa a nih lohin tu fa nge ni se i tih?"


Ka thin a la rim lo, hetianga a awm hi mak ka ti a, mak ka tihna hian ka thinrimna tùr a la hliahkhuh ni maiin ka hria.


"Thu dik sawi rawh, ka thin a rim hma hian," ka ti leh a.


Chiang zetin ka en reng a, hetianga dâwt hulhual a sawi thei hi a mak reuh ka ti ëm a ni. Hmana ka hriat ţhin Mami kha a ang lo ta lutuk a, a mak ka ti lo thei lo.


"I fa a nih hi."


A zâm bawk si lo va, min en lêt ve kal mai.


"I rai tak tak lo tiraw?"


"Rai e."


"Buaina i nei em?"


"Eng buaina?" tiin min zâwt há a.


"Dâwt i sawi chhan hi maw le."


A nui hak a," Kan video kha i nu leh pate ka hmuh a," a ti ta heu mai!


Mit khap hauh lovin ka en ta reng mai! Ka rin loh lam thil daih a ni bawk si a, mak ka tih piah lamah chutianga a lo hmuh duh chu ka thin a rim bawk.


"Engtin nge i tih theih zâwk?" Muang charh hian ka ti a.


"Ka hmangaih che alawm, Pui. I hriat kha-"


"Duhtâwk teh!" tiin ka bân ka lo phar vat a," Kha thil kha engvànga ka nu leh pate chu hmuh nge i nih?" ka ti leh a.


A hmui a pet fan fan a, a ngawi deuh reng bawk a.


"I lo rai a nih pawhin ka fa a ni lo tih i hre chiang ve tâwkin ka ring, min rawn puh mai duh tâwk lovin kha video chhuanawm lo zet kha ka chhûngte i hmuh a nia! Engtin nge i tih theih?!!"


"Kha video ka hmuhtîr ațang chiah khân nang nèn hian kan induh tih an ring hmiah maw le!" a la ti ta deuh deuh a.


A â deuh tawh a nih chiah hi.


"Ka fa a ni lo va, ka pawm thei hauh lo ang," ka ti a.


"He in hi ka chhuahsan bîk hauh lo ang," a ti ve leh hmiah mai.


Ka thaw hawk. Ka rilru a tibuai. Hmeichhe luhlul leh tihmawh tak a ni ngai lo asin le, engtin nge hetiang tak hian a lo awm theih tâk ni?


Room-a awm reng theih ni hek lo le, ka chhuah rualin a rawn chhuak ve nghâl zat a, ka nu lah chuan a lo pan vat a.


"Lo kal teh, Bawihi," a lo ti vat.


Ka pa pawh chuan," Kan inbe lawk thei ang em?" a lo ti ve bawk a. Dik tak chuan ka nu leh pa hmuh chu nuam ka ti miah lo, kha video țenghneng zet kha an en tawh si a, khatianga an fapa hmuh kha chu nuam an ti dâwn lo chiang mai si a, chu chu min sawipui ang tih ka hlau, a zahthlâk si.


An room-a kan luh veleh chuan ka pa chuan," Eng nge i rilru? Hetia a rawn luh râwih tâkah chuan i rilru i siam fel ngei ka duh, a rai tawh si a, ka tu tihfahrah hi ka duh miah lo a nia," a ti a.


"Pa, ka fa a ni lo."


"Ni lo, a rawn puh che chuan i ni tihna a ni mai. Insawi fihlìm tum a ngai miah lo, awm dùn miah lo ni ula chuan a rawn puh dâwn lo che," a ti leh tlat.


Video kha an en tawh chuan ka mutpui ngeiah an ring dâwn si a, nia, insawi fihlìm chu a har khawp ang.


"Pa, ka rilru ka siam fel vek tawh. Ka fa ni lo chu ka faah ka pawm thei lo ang," ka ti ve tlat a.


"I mawhphurhna i hria tiraw? Mipa i nih chuan chu mawhphurhna chu i hlen ngei a ngai. Tu hmeichhia mah hian an chêtsualpui loh chu an fate pa atân an puh ngawt ngai lo, chu chu hre thiam rual i nih ka ring asin," ka pa chuan a ti leh a.


Ani hi chuan ka fa a nih a ring nghet hmiah tih ka hria. Video ve kher kher kha, ka thin a rim tù tú mai.


"Ka fa a ni lo, kan chesual hek lo," ka la ti fan a.


"Ni lo tlatin i hria pawh a ni thei, mi dang puh miah lova a rawn puh dànah che hian in lo inhre ve tawh tih a lang mai a. Bâkah, nupui neih i hun lo pawh a ni lo va, hetiang boruak in neih tâkah chuan-"


"Pa, ka nei thei lo ang, ani hi chu hmana ka bialnu a nia, a hlui a ni tawh. Mi dang duh ka nei daih tawh a ni," ka ti a.


"Bawiha, mualpho pawh dâwn lovin a rawn pan che a nih hi, hmeichhia zâwk lehnghâl, a dinhmun tùr hi ngaihtuah ta che. I farnu hetiang hian awm ve ta se-"


"Ni lo, a awm lo ang. Pa, he nu hi ka hmangaih țhìn teh meuh mai; mahse, tunah chuan ani aia duh ka nei tawh a ni, ka fa chu ni se mawhphurhna ka la ngei ang; mahse, ka fa a ni lo va, ka nei thei lo ang," ka ti ve ta charh a.


Ka pa pawh chu a ngawi ve ta. Dik tak chuan ka pa hi ka zah, hetiang boruak a lo thleng ta mai hi zahthlâk ka ti a, ka thin a rim bawk.


Zanriah ei pawh ka peih lo viau a, han ei duh loh ringawt lah chu a ni meuh si lo va, hlim lo zetin ka kîl ve. Mami erawh chuan ka boruak chu a haider hmak. A titi siam siam a, ka nu leh pa chu a be seuh seuh a, an rilru chu hneh a tum khawpin ka hria. Ka nu nèn phei chuan an lo inkàwm nêl hman tawh viau a niang, an titi dàn ațangin a hriat mai.


Ina awm pawh chu nuam ka ti hlawl lo. Car ka la chhuak a, ka tlân chhuak ve tawp, kalna tùr pawh ka hre chuang lo. Ka boruak tawn hian min tithinrim a, ka rilru a tâwt. Tluangpuii ka ngai a, a bula awm ka châk phah sauh.


Ka va text, ka call duh lo, a buai ka hlauh vàng a nia.


Min rawn call, a aw thâm deuh țiak han hriat leh chuan min tiharh sawng sawngin ka hria.


"Kârleh ațangin zàn lamah ka duty ve tawh thung dâwn a," a rawn ti a.


"A va peihawm loh ve! Zànah kan inbe thei dâwn tawh lo tihna a nih chu," ka ti a.


"Thei tho ang, hun remchâng a awm chuan," nui hak hak pah chuan a rawn ti a.


"Ka ngai hle mai che!" Ka ti ta daih a.


"Kei pawh, ka ngai che, engtikah nge kan inhmuh theih leh ang le?"


Phei ka tum tih ka sawi duh miah lo. Mami hetiang hian rawn awm mah se phei loh ka tum hauh lo, phei ka tum sauh zâwk a ni.


"Inhmu thuai tùrah ngai ang," ka ti a.


"Nia, lo zin phei la, kei lah hi ka hman thei tawh miah si lo va," a ti chuai raih a.


"Lo ţawngțai fan fan la?" Nui deuh hlek chung hian ka ti a.


"Ka ţawngțai ziah. Ni tin vawi nga ngei ngeiin, i hming ka lam ziah bawk aw," a rawn ti a.


"I va fel tak! Mi felnu, hei vàng hi alawm ka duh em em chhan che ni."


A nui hak hak a," Min fak âr êk kher suh. Ka bialpa i nia, theihnghilh theih i ni lo alawm," a ti leh a.


Ka tân hi chuan a țha thlâwt, ka chân ang tih ka hlau hliah hliah.


"A nih, doctor chhe lo deuh, lo melhtàitu che an awm em? A nih loh pawhin damlo zîngah lo chhaih phêt tum che an awm em?" ka ti a.


"Hmm, awm mai mai lo, lo awm pawh ni se tu mah ka duh dâwn hlei nem, chûngho zawng zawng aia țha ka nei reng che a."


"Nang pawhin min fak âr êk tho kha."


Kan nui dùn leh rih a.


Ina hàw chu ka peih lo thlâwt. Riah bona tùr awm se ka ti hle a ni; mahse, a tisualtu zâwk ang ziazânga bosan chu ka duh mang meuh si lo.


Ka rilru tihahtu ber chu, Mami a hâw duh tlat lo chu a ni. Nawr hàw ringawt chi a ni mang si lo va, ka pate lah chuan an hawtîr hmel bawk si lo. Tihngaihna tak pawh ka hre lo, hâw tùrin ţha tê têin ka thlêm dâwn hauh lo, ka thin a rim tlat tawh, ka fa ni hauh lo paitu hi ka nupui a nihna tùr leh kan ina kan enkawlna chhan tùr hi ka hre tlat lo.


Ka nu chuan," Meng rei vak lo ang u, zàn hun hman pawh in âm duh palh ang, mu ang u," a ti a.


Ka va ngei tak! Rum takin ka melh. He nu hi ka room-a a riak a nih chuan kei chu ka riak ve hauh lo ang.


"Ka nu, a ngai kher lo. Titi hi a nuam alawm," Mami chuan a lo ti vat a.


"In pain min melh rum tawh teh a nia."


Nia, ka ngei êm avàngin ka melh rum viau a ni.


Mi â ber anga àn chiam a inchhûngkhura thinrim chiam ka tum lo; mahse, he nu hi a lo awm ve chuan kei chu ka awm ve lo ang. A chhuak duh lo a nih chuan kei ka chhuak mai ang, chhuah ka hreh miah lo, kan in ni mah se dâwta min puhtu bula awm hi ka peih miah lo. Ani tluka dâwt a ni tih hre chiangtu an awm lo va, dâwta a nung chho duh a nih chuan nung rawh se.


"Room-ah mu rawh, kei chu mikhual room-ah ka riak mai ang."


Tihhhrehawm chiam pawh ka tum chuang lo. A ngai ka ti lo, nakina hrehawm ti zâwk tùr chu amah a ni tho tho.


"Riak dùn mai ila? Engah nge mikhual room-ah kher?"


Ka chhâng peih lo. Chhàn pawh ka tum lo bawk.


Ka mu meng kar mai. Muthilh a har ve bawk a ni, Tluangpuii'n hre ve ta se engtin nge a ngaih ang le? Ka fa a nih a ring ve ang nge ring lo ang le? Min hnâwl phah ang em? Min kalsan phah mai lo ang maw? Mahse, ani hi chu min hre thiam bertu tùr zâwk a ni asin.


Min kalsan thei lo ang, ka phal lo ang a, ka chelh tlat ang.


A tûkah chuan meng thial ûrhin ka tho a, ka thawh ve meuh chuan an lo tho vek tawh niin. Tu mah pawh ka en lo, ka room-ah ka lût a, ka inbual nghâl sawk sawk. Inbual zawhah insiam ka duh dâwn si a, ka hmanhmawh ru deuh hlek.


Ka room-ah chuan ka nu a lo awm reng tawh a, bathroom ațanga ka chhuak chu," Hetiang thil i tih tawh hnuah hian eng nge room hrana riah kha a țùlna? Mipa i nih chuan mawhphurhna la ang che, i thlentîr a nih chuan i siam țha tùr a ni," a lo ti a.


Ka nu thu sawi hi a dik lohna pakhat mah a awm lo; mahse, he thil hi ka thlentîr a ni tlat lo.


"Ka fa a ni lo tlat."


Wardrobe chu hawngin ka thawmhnaw țhenkhat chu ka dah chhuak nghâl mawlh mawlh a.


"Kha kha sawi ve ziah suh, hmeichhia ka nih ve tho hi. Tel lo la a rawn puh dâwn lo che."


"Ka thu sawi aiin a thu sawi in ring zâwk miau a," ka ti ve ta khauh.


A ngawi ta rauh rauh a, kei pawh chu ka insiam mawlh mawlh reng tho.


"Khawiah nge kal i tum a?" a ti ta daih a.


"Ka zin dâwn."


"Khawiah maw?"


"Dâwta puh ka nih lohnaah."


"Kha nu kha pan i tum chu a ni lo ang maw?" Thinrim tih hriat tak hian a ti a.


"'Kha nu' a ni lo, Tluangpuii a nih kha," ka lo ti vat a.


"Ka beng hriatah a hming sawi ri tawh suh, a dâwi ã zo tawh che a nih àwm hi," a ti leh hmarh hmarh a.


"Ani chuan dâwtin min puh ve ngai lo," ka ti ve salh a.


"I va pan a nih chuan rawn hâw tawh suh ang che, awm hlen nghâl ang che."


Ka ngawi reng a, ka insiam mawlh mawlh tho, nihnih khat bâk ka awm hman dâwn chuang lo va, inken tam vak a ngai lo ang.


"Mi tenawm, Officers' Choice-i chuan engtiang fakauvin nge a lo dàwi tawh che ni? Mi inchhûngkhura harsatna thlentu hian malsàwmna a dawng hauh lo ang, a rilru a chhe êm mai," a ti leh a.


Ka nu hian Tluangpuii vàng hian min tihrehawm tam ve tâwk ta. Nizàn lamah nimin boruak vàngin ka lo mu tlêm bawk nèn, ka thin a ur ve ta thut, ka insûm hman lo.


"Ani chu angel thianghlim tak ang a ni asin, nang anga rilru kàwi leh bawlhhlawh hi a pu ve ngai lo. Ka nu ni mah la, i rilru a kàwi ka ti tho, hetiang chuan i hrisêl thei lo ang, rilru ţha lo tak i neih vàng hian mo fel tak neih inring bîk suh," ka ti ve ta phiar phiar a.


"Lalruatpui, i nu ka nih hi, nangmah hringtu ngei i nu ka nih hi, chutiang chuan min țawng khum ngam maw?" A thinrim tak zet a ni, a țawng khùr dar dar mai; mahse, ka insûm thei tawh bîk lo a ni.


"Ka nu i nih vàng tak hian alawm țha tùra ka duh che; mahse, i rilru a chhe êm a, mi pawh rilru chhia pu tùrah i ngai ringawt a nih kha-"


Ka hmai a rawn ben tâk sawkah chuan ka sawi chhunzawm ta lo.


"I nu khatiang khân min țawng khum ngam maw? I têt lai ațanga chawi liantu che ka nih hi, eng mah i la tih theih loh lai ațang tawha hnute tuia châwmtu che ka nih hi, min zah lo hle mai," a ti khùr dar dar a.


Ka nu min benna chu nâ ka ti hauh lo; mahse, hmuh theih loh chhûngril lam a na thung a ni. Ka nu hi a demawm hran lo, ben ngai khawpa sual ka lo ni zâwk a ni ang e.


"I u chuan min chhâng lêt ngai lo, engtiziaa hetia awm ta tlat nge i nih hi? I hmeichhe kawp vàng vek a nih hi, mi țha a ni lo rêng a ni," a ti leh a.


"Nu, nang pawhin mi i sawisèl fo chuan i inen lêt a ngai ve tho. Ka bialnu hi i duhzâwng chauh nei tùr em ni ka nih? Duhzáwng ka nei ve thei lo em ni? Ni lo ve, a tâwk tawh. Ka duhzâwng ka nei ang," ka ti a.


"Khatiang mi dukdak lo kha kan inah hian rawn hruai tawh suh ang che."


Ka chhâng tawh lo, ka chhàn leh chuan ka duh loh thleng thleng ka sawi palh ang. Ani pawh chu a ding a, a chhuak ta vut a, kawngkhàr chu a khâr ri țhuai a.


Airbag-ah ka thawmhnaw ka khung mawlh mawlh a, tûkțhuan ei pawh ka peih lo, sikulah ka tlang nghâl mai ang. Bàn veleh Aizawl lam ka pan nghâl ang.


Kawngka ka thleng țêp tihah ka pa chuan," Khawiah nge i kal dâwn?" a lo ti a.


"Sikulah."


"Chaw kan ei hman tawh reng alawm."


"Ei r'u, ka ei peih lo."


Ka chhuak a, garage-a car ka dah chu hawngin thawmhnaw ka dahna airbag chu ka dah lût a, ka ka hnungah Mami'n min lo zui niin. A hmel pawh hi ka hmu peih lo, tunah hi chuan tu bulah mah ka awm peih lo.


"Puia, khawnge i kal dâwn tak tak a?" a ti a.


"Sikulah."


"Ka lo kal ve dâwn?"


Rum zet hian ka melh a, a meng khup deuh zàl zál.


"I lo kal loh a țha zâwk ang."


Ka thinrim hmel chu a hmu vak ngai lo ngei ang; mahse, tunah chuan a hmu ta alawm, tihluih vak chi ka ni lo tih a hre thiam ang chu.


"Min kal bosan i tum chuan engtin nge naute hi ni ang?" a la ti țâlh.


A la zak lo ham ham lutuk chu a mak!


"Ka mawhphurhna a ni lo ve, a pa i zawng dâwn nia."


"Ka intihhlum hlauh chuan naute hi a thi ve dâwn tihna asin, mawh i phur ngam dâwn em ni?"


A â tak tak tawh a nih hi.


"Mi â tak anga i chêt duh ka ring lo," tiin min nuih sak a, min kalsan ta nghâl.


A thil sawi râpthlâk tak avàng chuan ka ding reng.


Tunah khân min vau tihna em ni? A â tak tak a nih loh chuan mi sual kherek dik tak a ni ngei ang. Ka fa ni miah lo ka faah puhin min han vau zui a nia, thil thleng zen zen lo chu a ni ve chiang mai.


"Kan hria ang chu."




*CHAK LO TAK CHUNG PAWHA A THIL TUM TIHLAWHTLING TÙRA BEI HRÂM HRÂMTU CHUAN A TÀWPAH HLAWHTLINNA A CHANG CHÂWK*



( In lo dam maw? Ka phone chu a chhe leh ta rup mai si a, a êng thei tawh miah lo. A thar chu a ngai ve ngei dâwn ta e.


A story kalphung hi in lo theihnghilh țhen tawh lo maw? He story tluan lohzia hi a mak ka ti; mahse, tawpsan daih erawh ka tum bîk hauh lo. Min lo nghâk hrâm hrâmtute, in zahawm ka ti ngawih ngawih, ka zah ngawih ngawih che u a, ka inthlahrung bawk.


Rawn dah thei tùrah inngai zêl rih ila, rokhawlhna lian tak a awm a nih loh chuan.

Chuan, comments ka chhiar ziah aw, ka hman hunah ka rawn like leh tuar tuar ang. Comment-tute, ka lâwm vek e, hun a heh hle tih ka hre ve tho a nia, chuti chung chung pawha in lo comment țhin vangin ka lawm e.


E, chuan..zawhna pakhat chhanna: Pathian zârah,fahrah ka ni lo va, nu leh pa neiin tunah hian Pathian zârah min la dampui ve ve e. Ka story ziahah hian a hmeichhia emaw mipa emaw hi fahrahin ka ziak țhìn a, ka rilrua a lan țhin vàng a ni e aw chhiar tui u)

[Ngaia]

☆LTK☆ - 33 By Dingdi Pachuau




Airbag chu motor ațangin ka la chhuak leh nghâl vat a, khaiin inah ka lût nghâl bawk.


"I chhuak dâwn emaw ka ti?" ka nu chuan a lo ti a.


"Zin chhuah i tum em ni?" ka pa pawh chuan a lo ti vat a.


Ka pa chu enin," Chawhnu lamah chhuah ka tum," ka ti ringawt a.


"Thil tihchi a ni dâwn em ni?"


"Ka tum tawh!"


"Mami kha-"


"Ka rawn hàw hma ngeiin chhuak rawh se! A chhuah loh chuan keimah ngeiin ka nawr chhuak ang."


"I fa paitu chu i nawr chhuak hauh lo ang," ka nu chuan a lo ti a.


Muang ban charh, chiang kêk kâwk hian," Ka fa a pai lo va, kan mu dùn bawk hek lo. Kha video țenghneng zet kha en vek tawh mah ula, kan chesual lo. Ka fa pai hauh lotu hi mawhphurhnaah ka la thei ngai lo ang," ka ti a.


"Eng video maw?"


"Hriat loh der pawh a ngai lo. Eng vànga hetianga min rawn puh ngam nge a nih pawh ka hre hrep lo ve, ka thin a tihrim tak tak hma leh a inchhìr vawng vawng hma hian a inthiar fihlìm ran a țha ang," ka ti leh a, ka thin a rim ve tawh a, ka sehchilh deuh nak bawk.


Mami chu ka room ațangin a rawn chhuak a, ten zet hian ka lo melh a.


"I kal tawh emaw ka ti a."


"Ka chhuak lawk dâwn a, ka lo haw huna i lo la awm a nih chuan i thiam loh a ni ang, inchhîr hauh suh ang che," ka ti nghut a.


A rawn kal tirh ațanga a hmela inthiam lo hmel ka hmuh vawi khatna ni tùrin a kun deuh hlek a, nuam chu a ti vak bîk lo a ni ang.


"Kan chesual lo va, ka fa a ni thei bawk hek lo, i hriat vek kha. Dâwt i sawi ngam chuan a sawhkhâwk pawh i tuar ngam tùr a ni ang chu," tiin ka inher a, ka pên chhuak ta nghâl a.


"Kha hmeichhe lâk tlâk loh kha-"


"Aw, 'kha hmeichhia' i tih khân hming a nei! Eng nge a lâk tlâk lohna? Chuan, he khawvêla ka hmeichhe duh ber a ni bawk, eng vàngin nge ka duh ber chu i duh loh êm êm? I pawi a sawi em ni?" tiin ka nu chu ka chhâng lêt ve ta tuarh a, ka insûm thei tawh lo. Kan țhenawmte pawhin an lo hre maithei; mahse, ka pawisa tawh lo.


Sikul kal pawh chu phûr lo tak ka ni! Hetiang chuan naupang pawh ka zirtîr thei ngût lo ang, mood fuh loh nèn, rilțàm nèn ka thin a chhe lutuk ang.


Mahse, sikul kal loh ringawt lah chu, ka thin a rim vànga naupangin an lo tuar daihna tùr a awm lo.


Car chhûngah chuan ka thaw hawk hawk phawt a, ka inbengdaih phawt a ngai. Thin a rim țûn avàng chuan car steering chu ka chùm pawp pawp phawt a, vawi sàwm vêl ka chum hnuah chuan tlêmin ka thin tâwt pawh a zia deuh ta.


Class lâknaah pawh ka in-control nasa. A chhan chu tukin boruak kha ka ngaihtuah chhuak lo thei tlat lo a ni, thinrimna a lo kal zêl si a, hahthlâk ka ti tak zet.


Ni e, kha nu kha ka hàw huna a lo la awm a nih chuan a chungah eng pawh ka ti hreh lo ang, ka bialnu hlui a nihna ka dah bo hmak ang a, dâwt a sawi vàngin a inchhïr ve khawp ang chu!


Tunah chuan ka ngaihtuah tawh lo ang, ka duh ber hmu tùrin a awmna ka pan mêk tawh a, min tihlim lo theitu thil ka ngaihtuah tawh lo ang, hlim takin a bulah hun hman ka duh si a.


Mahni chauha tlàn vang vang mai chu, tlàn chak a awl khawp mai. Hla ka play a, amah mitthla rauh rauh pah chuan ka ngaithla a, min hmuh hunah chuan a lâwm ve ngawtin ka ring!


Ka thlen chuan a la hma viau chuan ka hria. Zanriah erawh an ei tawhin ka ring, ka call a, min rawn chhâng vat.


"U Pui, ka hman hun i va hre chat chat ve a!" a rawn ti nghâl a.


"Ka hria alawm. Pâwnah chhuak teh."


"Eng maw?!!"


"Pâwnah chhuak lawk teh."


"Eng atân maw? Hei, ka chhuak chiah e."


Ka hmu ta chiah. Ka thinlung chu hlimnain a rawn tuam hlawp hlawp ni maiin ka hria, ka en vawng vawng. Puan pâr chiai a veng hnalh a, a sam a thlah bawk, a hawi kual deuh a, min hmu kher lo ang.


"Gate hi min lo hawn la?"


"Nang hi! I rawn phei maw!! Tak tak a ni tiraw?!!" tiin Gate lam chu rawn hawiin a rawn tlân deuh titih nghâl a.


Horn hmet rìin," Lo tlân suh, i tlu palh ang," ka ti thung a, ka thinlung erawh a nui var var.


"I ni tak tak!!"


Gate chu hawngin ka tlân lût a, ka park fel chiah a, ka chhuak chu min rawn kuah vat.


"I rawn kal hi âwih a har!! Ka ring miah lo va," a ti hlap hlap a.


"Ka ngai tawh che a."


"Kei fé..."


Kan inkuah a, kan infâwp a, kan inthlah hlei thei lo. Ka boruak tawnin min tihchauhna zawng zawng kha ani hian min paih bosak vek, chakna min pe ta zâwk.


"I rawn kal a, ka lâwm e. I chhûngte an dam țha em? I pa a țha maw?"


Thil hi a ngaihtuah kim thei reuh a nia.


"Aw, an dam e."


Kut invuan rial chuan inah chuan kan lût a, a pateate nupa chuan TV an lo en a, inhnaih zet hian an lo țhu a.


"Pate, hei U Puia a rawn phei thut a."


Ani chuan nui vur vur chung hian," A ngaih thu che a rawn chhuanlam miau si a, hnial ngaihna ka hre lo a nih kha," a lo ti a.


Min en tawn ta sek a, hriat thiam loh hmel deuh hian," Patea hi i lo phone lâwk tihna em ni?!!" a ti hâ a.


"Aw..."


"Hmuh che ka phal leh phal loh min rawn dîl thlap maw le, i hmuh châk ve tho ka ring si a, ka hnial ngam lo va," a patea chuan a lo ti leh a.


"A rawn țap deuh pùr lo maw?" A nutei chuan a lo ti ve vat a, a nui sâng bawk a.


Tluangpuii hi ka duh tih an hre vek tawh a, an hriat loha inngaihzàwn ai chuan an phalna nèn thlapa inngaihzàwn ka duh miau a ni. An fel nupa êm avàngin an bulah chuan ka rilru tak tak ka sawi a ni, anni pawhin an fanuin min duh phawt chuan, a hlimna an duh vàngin min duhsak thiam hle.


"A rawn inhnît fuih fuih."


Fiamthu mah ni se tàwi zet zetin ka nuihpui, Tluangpuii lah chuan a làwm khawp mai a, mittui tla phungin a nui maw le!


"Bawihi, i U Puia chu a ril a țám tawh ang, chaw ei siam la? A rawn kal chhan vang vang che a nia, lâwm takin siam rawh khai," a patea chuan a ti a.


"Ka ril a țâm hran lo, kawngah ei tùr ka rawn ei ve nual a."


Choka lamah min kai lût vat.


"I rawn kal dâwn thu hi patea chuan min hrilh miah lo asin," a ti phawt a, chutah," Chawhmeh hi oven-ah hian ka'n tisâ ang e, a awlsamin hun a heh lo zâwk ang," a ti leh a.


"Buaipui vak ka ngai lo, chaw leh hmarcha a awm chuan a tâwk a nia," ka lo ti a.


"Tihchi nâng, i rawn phei vang vang si a, duat i phû alawm," nui sêih hian a ti a.


"Chuti kâr tàwpah rawn phei ziah ila a țha ang?"


"Haha, i peih ngût lo ang," a ti leh a.


"Peih lohna tùr a awm hlei nem, nang ka hmuh theihna tùr a nih dâwn phawt te chuan..."


A che vêl chu ngun takin ka en pah reng a, sawisèlna tùr ka hre mawlh lo. Ngaihla tak si, zuamawm hauh si lova awm dàn a thiam a, hei tak mai hi tawrh a har, a zùna min uai nghehtîrtu pawh a ni.


"Ka lo pui ve ang che?"


"Ngai miah lo, lo țhu hle hle rawh. I ei țeuh dâwn nia."


Ka chaw eina bulah chuan a lo țhu ve reng a, a lo titi barh barh. Chaw ka ei avàngin min be buai duh miah lo va, a thil tawn nuihzatthlâk lam deuh hlîr a sawi, a chângin ka lo nuihpui ve bawk a.


Ka kal hmasaka ka room luah tho ka luah leh. Tluangpuii room bul chiah a ni a, room awm dàn a inang vek.


"Inbual la? I balh hmel ka tih vàng a ni miah lo a nia."


A nui sêng a, thinrim laia hmuh reng atân ka ît ngawih ngawih.


"Nakin deuhah aw, ka puar rih si."


"Aw le, inthlâkna tùr pawh a awm sa vek kha."


Pateate bulah chuan kan va țhu ve rih a, nutei chuan," I chhûngte an dam maw? I rawn phei daih si a, an khua a har ngawt ang a?" a lo ti a.


"Har lo ang."


"Har ang, chhûngkaw naute i nih kha," Tluangpuii chuan a lo ti vat a.


"Ka ni lo aw."


"Ni deuh e, ka hriat ve tawh reng kha."


"Dâwt sawi hi ka ngaina vak lo a nia," nui chung hian ka lo ti a.


"Kei pawh," rang zet hian a lo ti a.


A hnu deuhah chuan pateate nupa chu room lamah an kal ta a," A la hma alawm," kan ti taknain an kal tho, ka inthlahrun an hlau a niang.


"Inbual tawh rawh aw?"


"Inbual dùn ang?"


"Tihchi nâng!" tiin min rawn melh rum ve deuh a, ka nuih a tiza reuh.


"A chi lo chuang lo, min bual la?"


"Kal mai teh, i inbual zawhah titi kan duh leh àwm si," a ti ta a, dik ka tih vàngin sawi leh tawh lovin bathroom-ah ka lût ta nghâl a.


Khuma bawk pahin eng eng emaw min hrilh sep sep a, a hmel ka lo en reng avàngin a thil sawi pawh ka hre chiang lo!


"Ka ru phei dâwn che!" Ka ti chhuak ta phut a, a thil sawi lai a tàwp chiang kher mai!


"U Pui?!"


"Ka fa pai tùrin ka duh che a ni," ka ti leh a.


A hmui a hup a, makti zet hian min en a.


"Eng nge, thil dik lo ka sawi em ni?" Ka ti hû a.


"Nupui i duh tawh tihna a ni thei em?"


"A nih ka ring!" Pawi miah lo.


"Keimah nge mi dang?"


"Ka fa pai tùra ka duh chu nang chauh. Chuti a nih chuan nupui atân neih che ka duh tihna a nih chu," ka ti charh a.


Ka duh alawm, ka hmangaih a nih ka ring. Mami, ka hmangaih ka tih țhin pawh a làn hneh êm mai, inneiin ka fa ngei pawm se...


""U Pui, min nei duh tak tak maw?!"


A kuta chelh chung hian," Tehrêng mai, min nei ve duh ang em?" tiin ka zâwt lêt ve a.


A ngawih deuh dat avàng chuan tlêmin nuam lo tihna leh zàmna ka nei! A chhan chu min duh chuan ngaihtuah vak ngai tùrah ka lo ngai lo va!


"Min chhâng-"


"U Pui, ka nihna zawng zawng i hria a, chuti chung chung pawha min la duh hi ka lâwm êm êm a ni. Nangin min neih duh phawt chuan kei chuan hnialna tùr che ka nei miah lo, inchhuanna tùr lah ka nei hek lo," a ti sep sep a.


Zàmna ka lo neih hlek tawh chu a bo nghâl hmak!


"Ka lâwm e, min duh ve avàng hian ka lâwm e. Kan induh tawn hi chuan nghah reng ngaiin ka hre lo va, palai ka lo tîr tawh mai ang aw? Kan hmalam hun kan hre si lo," ka ti a, a kut chu ka hmer vang vang a.


"Mahse, U Pui, hna nghet pawh ka la nei si lo va?"


"Keiin ka nei alawm."


"Chutiang ringawt te chu, a tihchi loh. I sawi ang khân kan hmalam hun kan hre miah si lova, hna nghet ka neih hun tal min nghâk hrâm la, i chhûngte bulah pawh ka zahpuiawm lo deuh hlek thei ang a," a ti leh a.


"I zahpuiawm ngai lo. Inchhuang larh bawk la, inhmu hniam tawh ngai bawk suh," ka lo ti thung a.


"Ka lâwm e."


"Hna nghet neih tih lai tak kha, engtikah nge i neih theih ang? Nawr che chu ka duh hauh lo nain ka senior ve tawh a nia," ka ti a, senior tih ka sawi chuan a nui deuh nain ka nui ve duh hauh lo.


"Ka hre bîk lo, nia, innghahtîr che chu ka duh bîk hauh lo; mahse, tûn hnai têah chuan a theih rih loh ti ta ila i lung a awi lo viau ang em?" Ka zài ngai tak chuan a ti leh a.


"A rei berah kum khat ti ila, kum khat chhûng ka nghâk rih ang che a, chumi hnuah chuan palai tirh chu ka thu thu ni se?" ka ti ve a.


Dik tak chuan a la naupang ve a, a zir chhuah ve thlap, nuam a tih êm êm hna han kalsantîr ringawt chu ka duh bîk lo, mahni hma sial taka nawr chûk lah ka duh hek lo. Kan pahniha inpeih hun kha a pawimawh.


"Aw, a țha alawm. Chutih hunah chuan ka lo inngaihtuah lâwk ve thei tawh ang a, mite ang chu ni dâwn lo mah ila buaipui ngai lutuk leh rethei lutuk chuan ka rawn lût bîk lo ang," a ti a.


"I rethei lo nasa, i nun kha a pawimawh ber alâwm," ka lo ti thung a, duh tak chuan a hmai chu ka chùlsak a.


"Nangmah phû tâwka awm ve hi ka duh a."


Nichin lawk kha chuan puitling takin a țawng kha a ni a, tunah chuan a rawn naupang chhia leh tlat.


"Eng zât nge ka phû tâwk chu?"


"Heti chen hi," tiin min rawn fâwp zauh a, kei lah pek chuan," Khati chen lek kha maw?" ka lo ti zauh a.


"Ih...ka fawh rei che chuan kan tàwp thei lo ang a, kan duh belh zêl ang tih ka hlau a," a ti ta reuh a, a sawi zâwng pawh chuan a sen deuh tàn tán a.


"Pawi pawh ka ti lo."


"U Pui!! Thianghlim taka pasal neih ka duh asin."


"I thianghlim reng alawm."


"Ni lo, virgin ngeiin ka tihna a nia."


"I la virgin maw?!!"


A thaw hawk a," Ka thianghlim tawh loh i ring a ni maw?" a ti zàwi raih a.


Nia...ka hre chiah lo, a ni maithei, lo maithei bawk.


"Chuti, a hmasa ber ka ni dâwn tihna a nih chu, Wow!! A va làwmawm dâwn ve!" ka ti a.


"A hnuhnung ber pawh," a lo ti sap a.


Ka kuah vawng vawng. Ka nula thianghlim tê reuh hian min tihhlimzia hi a hre kher lo maithei a ni. A thianghlim emaw thianghlim lo emaw ka duh dàn a ngai tho, ka nupui a nih tùr thu a sawi tawh miau a!


"Engtiang pawh lo ni la, ka duh reng tho ang che."


Ka duhthawh leh ta deuh a, a âwm ka zen deuh rek rek chu ka kut a rawn man chat.


"Hetiang hi chu insùm theih lohna thlentu a nih hi," a ti sap a.


"A ho e, uikawm viau lo la?"


"Thil ho têa ngaih pawh hi a lo punlun chuan a ho lo viau țhìn. Mei sí te tak têin ram zau tak a tikàng hluah hluah thei."


Min zilh tâk zêk reuh chu a.


Kan meng rei dùn khawp mai. Mami chungchâng kha hrilh ka tum hran lo, dâwt a nih bâkah ka haw hunah inah a lo awm tawh dâwn bawk si lo va, ka nun ata a reh hmak tawh dâwn a ni.


"Ka bulah riak la?"


"Hett...pasal neih zànah chauh."


"I ngai eng emaw lutuk a nih kha. Sex kan hmang dâwn tihna a ni kher lo, LTK."


Ka hmui a rawn hup vat.


"I țawng ring lutuk!"


"Mi zawng zawng hian ka ta i ni tih hria se ka duh!"


A nui sêih a.


"Kan inneih hma chu," tiin min rawn nêk deuh salh a, a hmui chuan ka âwm a rawn nûl pah a," I lo tuar deuh rih a ngai a ni mai," nui sâng hian a ti ta a.


Ka va ngei reuh tak!




*MAHNI NUAM TIHZÂWNG THIL HIAN MI TIN MAI HI MIN HNÛK KAL RENG MAI ȚHÌN ZAWNG A LO NIH HI*

[Ngaia]

☆LTK☆ - 34 By Dingdi Pachuau




Aizawla ka awm chhûng chuan ka phone ka hmang lo, ka switch off hmak mai. Ka nu leh ka pa leh mi dangin min be buai tùr ka duh lo a ni.


Tluangpuii thawhna hospital pawh ka tlawh ve a, bâkah, a 'in' min tlawhpui bawk!.


In țha zet a lo nei reng a! Building lian tâwk tak niin an chhûngkuaa an chènna țhin a ni. A nu a awm loh tâk hnuah a pateate inah a awm ta daih si a, in chu a ruah tâk avàngin mi dangin an luah. Kawng àn ber chu dàwr atâna luah theihin an siam a, an siam hma ațangin be lâwktu an awm nghe nghe a ni awm e, a remchâng ve êm bawk a ni. Tichuan, thla tin dàwr leh in luah man chu a account-ah a lût zêl tihna a nih chu, nula hausa tak chu a ni chiang mai!


"Nurse ni miah lo pawh ni la, i inchâwm zo àwm hle si a."


A nui ringawt. Ka sawi dik chiah alawm, kei ai pawhin a hausa daih zâwk si a.


"Sum leh pai hi chu kan dam chuan kan thawk chhuak tùr alawm, mahni inchâwm zovin sum nei mah ila chhûngkua neih hi a hlû ka ti zâwk. Nang pawh hi ka awt thei lutuk che, i nu leh pa an la dam a, in la khawsaho thei si a," a ti sap a.


Zàn boruak nuam reih rawih leh a aw thâm chhelh chu a inhmeh ka tih rualin a thu sawi chuan ka rilru a tawk kher mai. Heti khawp hian chhûngkua a awt a ni si a, kei lahin kan in chhûngkhur boruak nuam ka ti miah si lo.


"Kan inneih hunah chhûngkaw țha tak kan din dâwn nia," ka ti ringawt, ka rilrua rawn awm hmasa ber ka sawi chhuak tawp a ni.


"Ka hria alawm, U Pui. Mi fel tak i ni ka tih tawh kha, kei min duh hi ka lâwm êm êm reng a ni. Min duha nupui atân min neih duh phawt chuan hnial thei che hi ka ni lo chiang, ka phal lo bawk; mahse, kan inneih hma hian in chhûngkaw fanu leh i nupui tlâk ni thei tùrin ka thawk sauh sauh ang," a ti sap sap a.


Ka fâwp vawng vawng.


Ani aia rilru thianghlim leh fel hi an awm thei tawh dâwn em ni? Mami ve kha, ka bialnu hlui chu a ni ngei mai si a, tenawm takin khatiang khân min rawn puh ngam a ni si a, an mize indanglam hleihzia chu ka ngaihtuah rauh rauh.


"...nge i ngaihtuah vawng vawng? Hmm, hmeichhe dang i ngaihtuah chiang mai," tiin lehlam a hawi ta nghauh a.


Ka harh chhuak chiah.


"I mize danglam lutuk hi ka lo ngaihtuah a."


Min chhàn loh vàng leh ka lam a rawn hawi loh vàng chuan a bân pahnihah chuan chelhin ka lam hawi tùrin ka kuai her a.


"Nang ka tawng che hi ka lâwm e."


Ka fâwp zauh a, min chhàn ve loh avang chuan ka fâwp nawn leh salh a, tun țumah phei hi chuan min chhàn lêt loh ka duh tawh lo, ka ti deuh ngar ngar.


"Luhlulpa!" Thâwk a la hak hak a, ka nuih suk.


"Min chhàn lêt duh loh vàng a nih kha."


"Ka titau der ve êm êm a."


"A țha alawm. Han ti leh chiah la?"


Hmui tipawrh zauh hian," Ka duh tawh lo, ka hmui a na vek," a ti sap a, a hmui chu a kut chuan a hup vat a.


"Ka lo en ang chu?"


"Aih." Min chhâng rang lutuk chu ka nuih a zâ.


*******


Thawhțanni class off ka duh loh vàngin a phal lo chungin Chawlhni zànah ka haw a, phal lo viau mah se class țhulh ka hrehzia a hre ve tho va, a phal loh chhan pawh min ngaihtuah vàng a ni. Kei chuan hmanhmawh phelênga haw ai chuan zàna hmanhmawh lutuk lova haw mai chu ka duh thung a.


"I thlen hunah min lo hrilh rawh aw, nangmah ngaihtuahin ka muhìl thei dâwn si lo."


"Yes, Miss."


"Uang suh, min lo hrilh ngei ngei ang che, eng tianga zàn rei pawh ni se," a ti leh a.


"Tehrêng, LTK."


"LTK hi eng nge a awmzia?"


"I hming maw le! Ka phuahsak che alawm."


"A awmzia tal chu?"


"Làwițhat zànah le!"


Meng phàr âwkin a hmui a hup vat a, chutianga a han awm vêl han hmuhte chu nuam ka ti, a che vêl leh hawiher hrim hrim hi a hmuhnawm vêl vek mai!


A tàwp nân ãm zetin ka han pedâk vawng vawng a, fet fahran hian ka kuah bawk a. Tu mahin min hmu dâwn lo tih ka hre ve kar bawk nèn, ka nghal ve phian.


"A naaaa!!!"


"A hek lo teih teih êm mai," ka tihsan a, ka la thlah duh hauh lo zui.


"A na lutuk! Thlah teh!"


A țawng ring vak ngam si lo va, ka nuih a tiza reuh a nia.


"Min fâwp la, ka thlah ang."


Kan tàwp hlei thei dâwn lo a; mahse, amah zâwk chuan zàwi tê hian min nam sawn ta a.


"I kal thuai loh chuan i thleng tlãi lutuk ang," a ti thâm sap a.


"Aw le, dam takin lo awm reng rawh aw."


"Tehrêng mai. Nang pawh le, ka ngaihtuahna chu i hnênah a awm reng ang."


Kalsan hreh viau mah ila nupa kan la nih miau loh avàng leh ramri ţhena awm kan la nih miau vàngin car-ah chuan ka lût ta a.


Zàn dâr 12: 30 pelh hretah kan in ka thleng, tlân chak ve tak chu ka ni, in ka luh hmain Tluangpuii chu ka va phone ta nghâl bawk a.


In chu chhûng lamah kalh mah se chahbi ka nei tho a, chuvàngin ka pate pawh ka hrilh lâwk duh lo a ni.


Boruak a uap nghâl churhin ka hria, kha nu kha a lo chhuah tawh chu ka ring tho nain ka room ka pan lo, mikhual room ka pan nghâl.


Ka luin khum a sîk rual deuhthawin ka muhìl nghál maiin ka hria! Ka taksa a chauh vànga mut theih loh chu ka nei lo ve khawp mai, mumang bo hmakin ka muhìl.


Zîngah erawh ka harh hun pângngaiah ka harh leh tho a, ka tho nghâl. Mi dang pawh an lo tho vek tawh, kan nula chuan min lo hmuh veleh," E, i lo haw tawh elo? Engtik khân nge i lo thlen a?" tiin min lo be vat a.


"Nizànah."


"Thingpui i duh em?"


"Tuilum zâwk le."


Ka pa chuan," Phone i chhâng thei lo va, min timangang hman țêp a ni, i zin chhuahin off chîng tawh miah suh," a rawn ti nghâl a.


Ka chhâng lêm lo. Nia, ka hun hman min tihbuai ka duh loh vàng mai kha a nia, ka phone ka off avànga an lo mangan lam ka lo ngaihtuah hauh lo.


"I hman hunah biak lawk che ka duh a nia."


Ka nu erawh chuan min be lo, biak ka tum bîk lo. Min be peih lo na na na, ka be peih bîk lo. Bia pawh ni ila min chhàn pawh ka ring nek lo ve.


Ka room-ah ka lût a, ka mutphah leh lukham kâwr leh rizai kâwr ka hlîp vek, nakinah kan nulain su fai vek rawh se, kha nu mutna hnuah khân ka mu duh hauh lo, a thar vek phaha sin ka duh.


Ka room parda pawh ka pawtthla vek, hawi kuala hmuh theih chin thawmhnaw/puan sûk theih zawng zawng chu sûk fai vek ka duh, ka mut hunah ka mu tui thei lo palh ang!


Ka pa hmu tùr chuan an room chu ka pan ta a, an room-a ka luh veleh kawngkhàr chu kalh tùrin min ti nghâl a, a pawimawh viau dâwn a ni ngei mai, eng tak ni ang maw?


Amah hmachhawn chuan ka ding a, ani erawh a țhu thung.


"Mami chungchâng kha a nia-"


"Pa, kha nu chanchin kha sawi ka peih lo a nia," ka lo ti thung a.


"Ka rawn call nasa che a, min chhâng thei tlat lo alawm. He in chhuahsan a hrehzia kha, a khawngaihthlâk asin," a ti charh charh a.


"Sawi tùr ka nei lo."


"Ka sawi dâwn alawm, lo ngaithla la," a ti leh tê tê phawt a," I room-a a țap lai ka hmu fuh a, ka khawngaih lo thei lo a ni. Chhuah tumin a lo inbuatsaih mêk a lo ni a, chu chu nizàn zanriah ei kham hnu khân a nia."


"Ka hmu tih a hriat veleh a insûm vat a, nui lui sâng hian min lo be nghâl a. Min en țha ngam lo va, ka mitah tak phei chuan min en ngam lo nghe nghe."


"Mamawh a neih leh neih loh, buaina a neih leh neih loh ka zâwt a, chutiang eng mah a awm lo tih a sawi vat a; mahse, a sawi laia a țawng bah deuh nak avàng chuan eng emaw chu a awm ngei a nih ka ring a, ka zâwt nawn leh a."


"Hetiang thil a tih avànga a inchhìr thu a sawi ta keuh keuh a, a thu sawi chu ka ring hmiah. Thu dik tak a sawi ngei pawhin ka ring, i hmel hmuh a ngam tawh loh tùr thu a sawi lai phei chuan a mittui a tla zawih zawih nghe nghe asin," a ti a.


Ngam lo ang chu. Dâwt ngialngan lutukin min rawn puh miau alawm, a chan tùr chu kha kha a ni rêng a ni, mi ang pângngai a nih chuan inchhîr tùr a ni.


"A tih tùr dik tak a ti alawm, lo la awm ni se chuan a chungah eng emaw chu ka ti ngei ang a, nuam chu a ti lo ve khawp ang. A chhuak kha a tih tùr dik tak a ni a, mi pângngai tân chuan inchhìr kha a tih ngei ngei tùr a ni bawk," ka lo ti chang khalh thung a.


"Zàn a nih vàngin chhuak lo tùrin ka ti a, zîng lamah a chhuak duh a nih pawhin chhuak mai tùrin ka ti a; mahse, hmuh che a ngam tawh lo va, nizàna i rawn haw ngei kha a ring bawk a," a tih chuan kei chuan," A chhuak fuh e," ka lo ti thung a.


"Eng emaw thil dik lo a awm a nih ka ring deuh ringawt a."


"Eng thil maw?"


Min en vang vang a," Mi ang pângngai leh fel tak a ni si a, khatia hmeichhe nasa leh khaw hmu lêk lo ang maia a rawn lût kha a mak ka ti a ni, eng emaw tak ka hriat si loh thil a awm tlat nia hriatna ka nei tlat a," a ti a.


"Mihring hi a mak theih teh a nia," ka lo ti a.


"Làwmthu a sawi a, ngaihdam min dîl bawk. Ngaihdam min dîl leh tùr si, eng vanga khatiang rawn ti kha nge a nih tih chu ka zâwt a, a mitmengah a hlauthâwng tih ka hmu a, min chhàn tumin a âng zuau hman tawh a; mahse, a tihsual liau liau tih a sawi ta daih. Khawilam nge a pan ang tih ka zawh lah chuan tu ma hriat a duh loh thu a sawi a, ka bulah ngei pawh a sawi theih loh tùr thu a sawi leh bawk a, chuan, a fa pai kha i fa a nih loh thu a sawi bawk," a ti duah a.


"Ka fa a ni lo ka tih ka tih kha."


"Aniin i fa a ni a rawn ti tlat si a, kan tân chuan lo pawm loh ringawt theih a ni hlei nem, i bialnu hlui a lo ni bawk si a," ka pa chuan a lo ti a.


"Kan mu dùn lo miau si a ni."


"E taka, video i sawi ve chhên kha eng video nge ni a? I nu lah chuan a'n hmu châk khawp mai a, a sawi reng a, i nei ve mial em?" a ti ta thut!


"Eng...eng video maw?" ka ti hû a.


"'Video țenghneng, chhuanawm lo' i tih kha, eng lampang nge ni a?" tiin min zâwt leh a.


"A entîr lo che u em ni?"


"Eng video mah min hmuh lo, phone a neih àwm pawh ka hre lo," a ti leh a.


Kha nu khân video kha ka nu leh pate a hmuhtîr tih min hrilh ngei kha! Dâwt min lo hrilh leh tho tihna a ni maw? He nu zet hi chuh, a huaisàr mah mah a ni.


"Eng mah a ni lo, ka nei ve lo."


A thaw huai a," A țhat hlauh chu. I țhiannu hlui chu ka ngaihtuah reuh mang e, khawiah nge a awm ang le? A phone number i neih chuan a chanchin hriat ka duh viau a ni. Tihian ka ngaihtuah a, eng emaw harsatna tâwkin loh theih loh vàngin a rawn puh che a niang ka ti a, entîr nân ti lo thei lovin danchêp ni ta se la? A chhan chu a chhuak tùr khân a huphurh hmel lutuk a, a hmelah ka hre thei. Chuan, pâwna ka thlah khân hlauhthàwn hmel takin a hawi kual ruai ruai bawk, a lu a khuh tlat bawk a, a mit leh a hnâr vêl bâk a tilang pawhin ka hre lo. Eng emaw, tu emaw hlauh a nei a nih ka ring a," a ti leh charh charh a.


"Keimah a nih chiah chu!" ka lo ti hmuk a.


A lu a thing a," Ni lo, thinrim viau mah la a chungah thil țha lo tak i ti duh lo ang tih ka hria a ni, a chhan chu ka fapa i ni miau a. I rilruin thil țha lo tih ngaihtuah ve mah la tih dâwn tak takah chuan tìmna i nei ngei ngei ang, ka hre chiang che alawm," tiin a nui a, chutah thutak leh thutin," Tu emaw vautu leh enthlatu hi an awm a niang a tih ka ngaihtuah daih asin," a ti ta a.


Ka ngaihtuah loh lam tak a nih vàng chuan ka pa thil sawi chu ka nuih huk a.


"I ngaihtuah nasa lutuk a nih kha. A chhuak tawh a, a tâwk viau e. Min tihbuai tawh loh hrâm ka beisei," ka ti a.


"Bawiha, Mami kha i hre chiang viau em? Khatiang ti duh tùr kha a ni hrim hrim em?" a ti leh a.


"Ka lo hre chiang lo viau a nih ka ring," ka lo ti a.


"Vawi khat tal chu call tum ta che, i duh loh pawhin a number min pe la, keima'n ka call ang e, ka ngaihtuah reuh riau a ni," a tih chuan," Kei chuan call-na chhan tùr ka nei lo, a number erawh ka pe thei ang che," ka ti a.


Ka pa a nih vàng chauhin a duh chu ka tipuitling ang. A number chu ka pa ka send a, kei chuan ka delete nghâl, ka tân neih a țùlna ka hre tawh tlat lo.


*Morning, i tho thei em?*


Tluangpuii message-in min lo hmuak reng a nih hi, ka nui sak a.


*Morning, i va fel tak! Ka tho thei chu a nih hmel* tiin ka reply a.


*A țhat hlauh chu, sikul kal nuam le!* a rawn tih chuan ka lung a tihnûr tlat nia.


*I buai deuh em ni?* ka ti hrâm.


*Chaw kan ei dâwn chiah a*


*Oh, Sorry. Chaw ei tui le*


*Nang pawh le*


Duh khawp lo viau mah ila min rawn text a, ka lâwm tawh tho e. Min ngaihtuah tih ka hre tal alawm.


Chhùnah Hminga'n chawlhpuiah min sâwm a, ka țhianpa ber ni mah se ka rilru a bet tak tak thei tawh lo, Tluangpuii a sawi țhin dàn hi ka duh lo tlat a, a nuihsawh ni berin ka hre țhìn.


"Chawlh pawh ka lo tum hlei nem," hnial dawt duh lo chuan ka hnial ta tho.


"Thil sawipui tùr che ka nei a nia."


Mami chanchin bâk a ni leh lo ang, min suih zawm a tum phêt hi ka ning, bialnu dang ka nei tawh tih a hrereng chung pawh hian Mami a țan tlat.


Ka zui ta nge nge.


Ei tùr kan nghah lai chuan," Mami nén in chanchin kha ka lo hria a," a ti sap a.


"Ani nèn chanchin kan nei lo, hun kal tawh hmânlai thil a nih kha," ka lo ti thung a.


"Ni lo, tûn hnai têa thleng kha."


Min rawn luhkhung a tum, min vau tihte kha a hre ve emaw ni le.


"I hriatna a chak hle mai!"


A țhen sak a," A chhan chu amah khân min rawn phone hmasa miau a, pawisa pûkah min rawn dîl a," a tih chuan ka lo nui hawk.


"A che mawi hle mai!"


"A rawn luhkhung che tih pawh ka hria asin, mak ka tihzia mai chuh! Mami kha nula harhvâng tak leh fing ve tâwk tak a ni tih ka hria a; mahse, a bialpa hlui, bialnu dang pawh nei tawh lehnghâl luhkhung duh tùr êm chuan a zahtheih loh ka lo ring ngai miah lo!" a ti leh a.


"Kan lo hre chiang lo dùn hle a ni," ka lo ti leh a.


"Ni lo, a nih loh dàn angin a rawn chê a ni. Pawisa púk min dìl a rawn lam chuan rei pawh kan titi hman lo, kalna tùr a neih thu a sawi a, a in luahah a awm ngam tawh lo thu a sawi lang zauh nghe nghe, mak ka tih deuh vàngin eng vàng nge tih ka zawh chuan phâwk zet hian min en a, chutah chutiang a sawi àwm a hriat loh thu a sawi leh niah niah a, titi thui hlau zet hian làwmthu a sawi a, a chhuak nghâl dawr dáwr mai, ka ngaih a tițha lo deuh a," a ti a.


"Ngaihțhat lohna tùr ka hre lo, min hlau a ni mai alawm, min tihmualpho man a chunga ka țuan a hlau a nih dâwn chu," ka lo ti a.


Ei tùr a rawn thlen vàngin kan titi chu kan tàwp rih a, mi dang kan bul hnaiah an awm loh vàngin kan titi hre tùr an awm hran lo, a awm chhunte pawhin min lo ngaihthlâk rûk lah ka ring hek lo.


"Tu emaw hlauh nei angin ka hmu tlat a nih chu! A number-a ka call ngial pawhin switched off a ti zêl si a, biakpawh theihna pawh hi a tibo duh zêl a niang ka ti. Tukin lamah a in luahah chuan ka rawn pêng tawh a, a lo awm lo tak tak a! Hlauh nei nia ka rinhlelhna pawh a dik ngei niin ka ring nghet ta tlat a," a ti leh a.


"Nei lo ang, a zak ve a niang?" ka lo ti hrâm.


"A rai thu sawiin a rawn luhkhung che, i fa a ni lo tih i hre ngeiin ka ring. A chhan chu in mu dùn lo miau a, hei hi a sawi dàn a ni. Mahse, kha thil kha ti lo thei lo a nih thu a sawi, a hmanhmawh êm avangin leh amah a țawng char char avangin ka zâwt chiang hman lo, ka țawng ve hman lo a nih ber chu."


"'Ti lo thei lo' a tih tak khán ka ngaihtuahna a tithui a, vautu emaw tihluihtîrtu emaw an awm a niang ka tih phah a ni. Entîr nân, a luhkhung che a lo hlâwkpui êm êmtu tùr an awm thei em? A tihmualpho che a lo lâwm tùr te han ngaihtuah kual chhin la, ka ngaihtuah ve nain ka hre mai thei lo va," a ti leh dap dap a.


Chutiang ka hre hauh lo mai.


"Tuna i bialnu hian Mami chungchâng hi a hre ve em? A rawn luhkhung che chungchâng hi a nia ka tih?" a tih chuan," Hre lo, ka hrilh lo," ka lo ti vat a.


"Hre ta se engtin nge niang? In inkâr a buai ang em?"


"Buai lo ang, Mami a awm tawh hlei nem. Buaina a awm lo," ka ti a.


"In inrintâwk chuan a țha e, buaina a awm lo a nih chu."





*SUALNA RÊNG RÊNG SUALNAA THUNGRÙL LOVIN ȚHATNAIN THUNGRÙL ȚHIN LA, I NUN A HLIM RENG THEI ANG*

[Ngaia]

☆LTK☆ - 35 By Dingdi Pachuau



(In chhiar lohna a rei tawh awm sia, ka chawl rei bawk nèn, a hmalam thu tlêm ka rawn dah tel leh e)


Ei tùr a rawn thlen vàngin kan titi chu kan tàwp rih a, mi dang kan bul hnaiah an awm loh vàngin kan titi hre tùr an awm hran lo, a awm chhunte pawhin min lo ngaihthlâk rûk lah ka ring hek lo.


"Tu emaw hlauh nei angin ka hmu tlat a nih chu! A number-a ka call ngial pawhin switched off a ti zêl si a, biakpawh theihna pawh hi a tibo duh zêl a niang ka ti. Tukin lamah a in luahah chuan ka rawn pêng tawh a, a lo awm lo tak tak a! Hlauh nei nia ka rinhlelhna pawh a dik ngei niin ka ring nghet ta tlat a," a ti leh a.


"Nei lo ang, a zak ve a niang?" ka lo ti hrâm.


"A rai thu sawiin a rawn luhkhung che, i fa a ni lo tih i hre ngeiin ka ring. A chhan chu in mu dùn lo miau a, hei hi a sawi dàn a ni. Mahse, kha thil kha ti lo thei lo a nih thu a sawi, a hmanhmawh êm avangin leh amah a țawng char char avangin ka zâwt chiang hman lo, ka țawng ve hman lo a nih ber chu."


"'Ti lo thei lo' a tih tak khán ka ngaihtuahna a tithui a, vautu emaw tihluihtîrtu emaw an awm a niang ka tih phah a ni. Entîr nân, a luhkhung che a lo hlâwkpui êm êmtu tùr an awm thei em? A tihmualpho che a lo lâwm tùr te han ngaihtuah kual chhin la, ka ngaihtuah ve nain ka hre mai thei lo va," a ti leh dap dap a.


Chutiang ka hre hauh lo mai.


"Tuna i bialnu hian Mami chungchâng hi a hre ve em? A rawn luhkhung che chungchâng hi a nia ka tih?" a tih chuan," Hre lo, ka hrilh lo," ka lo ti vat a.


"Hre ta se engtin nge niang? In inkâr a buai ang em?"


"Buai lo ang, Mami a awm tawh hlei nem. Buaina a awm lo," ka ti a.


"In inrintâwk chuan a țha e, buaina a awm lo a nih chu."

*******


Tluangpuii ka duh êm avàng leh ani pawhin min duh ve êm avàngte, leh a aia duh dang ka neih loh miau vàngin kan inkârah hian buaina awm thei tùrah ka dah lo hrim hrim a, kan buai lah ka ring hek lo. Keima lama buaina a nih vang nge phei chu ka hre lo va, lo hria pawh ni se min rin ka ring ve bur tho. A laka rilru dang ka put loh lutuk vàng pawh a ni maithei, a lo hria a nih pawhin thil awm dàn ka hrilh fiah ang a, kan buai lo tùrah ka ngai.


Mutnaah chuan ka ngaihtuah cheuh cheuh a, hmeichhia ang deuh maiin Mami chu ka ngei ru viau mai. A sâwt tawh lo va, min tibuai tawh lo bawk ang tih hre mah ila khatiang thil a ti hrim hrim kha ka ngei tlat. Kan inzui lai kha chuan dâwta inpuh kual vêl kha chu kan ti ngai lo a nih kha, bâkah, dâwt kha kan inkârah a awm ngai lo hrim hrim bawk. Mihring lo danglam theihzia hi chu aw...


Boruak danglam a thleng zui lo.


POCSO Act zirchianna kan sikulah naupangho nèn kan nei a, zirtîrtuah a junior ber pâwl leh tlangvâl la nih chuan mawng zàn a ngai khawp mai. Miss Vèni nèn kan phusa deuh ber a, mi dang pawhin min pui vek tho nain a huaihawt leh buaipui deuh bertu kan ni.


Mahse, programme a boring lo thei ang bera buatsaih a ni a, naupang pawhin an ning lo, an awm țha viau mai. An ngaithla țha a, thusawituin naupang ngaihthlâk duhzâwngin a sawi ngaihnawm thiam bawk a, an bengchheng miah lo.


Nilênga ka buai vàngin phone pawh ka khawih hman lo, in ka thlen veleh chuan naupang test question tùr ka buaipui leh zung zung a, ka hman meuh chuan chaw ei a lo hun leh reng tawh mai. Tluangpuii pawh zîng dâr 8 vêla ka text bâk kha ka text leh tawh miah lo, vawiin chu ka buai ve êm a ni, phone ka khawih hman hlawl lo. Tunah lah chuan a duty leh daih tawh àwm si a.


Chaw ei lai chuan ka pa chuan Mami a call tlang theih loh thu chu a sawi zauh a, kei chuan chhàn pawh ka chhâng lo. Ka nu lahin min rawn melh zauh zauh tih ka hre bawk, Mami kha nei mai tùr khân min duh ve êm asin.


Rai ni khân a insawi ve tlat bawk sia, a rai tak tak ang em? Tu fa nge ni ang? Ka awih chiah lo deuh a; mahse, a hmel chêr deuh kuam, tla deuh dâk hmuh kha chuan a awihawm deuh bawk si.


Hm, ka fa a ni lo, lo rai pawh ni se, rai lo pawh ni se ka lo ngaihtuah a ngai tawh lo, dâwtin min puh lehnghâl.


Ka ngaihtuah a phû lo ve!


Ka phone ka en ve meuh chuan Tluangpuii message 5 lai a lo awm nia! Mahse, a delete leh deuh vek, pakhat chauh a lo awm tawh!


*U Pui, ka thil hriat hi a dik em?!*


Tûn tlai dâr 6: 13-a lo thleng a ni, tunah dâr 8 a ni vah tawh si.


Eng thil nge a hriat le? Mami chungchâng kha a ni thei ang em? Hminga hian a lo va hrilh tihna em ni? Țhiana chu leh, hrilh kher a ngai lo asin le.


Mahse, a hrilh a nih rau rau chuan ka sawi fiah a ni mai ang chu, ka huphurh chuang lo, ka bialnu hlui a ni tih a hre tho a, engkim ka hrilh vek tho, a harsa lo ang.


Call nghâl rum rum ka duh viau nain a duty avàngin ka be thei dâwn chuang lo, naktûkah ni mai teh se. Ka call ang, zaninah pawh ka text tho ang, naktûka a hmuh atân pawh a țha tho alawm le.


*******


TLUANGPUII
~~~~~~~~~


Mak ka ti lutuk ringawt!!!


Message chu ka en reng a, min rawn thawntu number chu ka save loh vàngin tu nge a nih ka hre lo.


U Mami a rai a, U Puia a luhkhung a nih chu!!!


Ka khawvêl chu a nghîng lawih lawih ni maiin ka hria, engtin nge a nih theih ang le? U Puia pawh nimin piah lawk maiah pawh ka bulah a rawn awm ve reng kha, hlim takin hun kan hmang dùn a nih nghe nghe kha.


Tunah chuan a bialnu hlui U Mami kha a rai a, a fa a pai miau si chuan a luhkhung pawh chu thil àwm lo a ni hran hauh lo ang, ka tân beisei a va bo dâwn êm!!!


Chawhnu dâr 2 vêlah he message hian min țhâwng țan a, ka awm a nuam thei rêng rêng lo. Dâwt a nih ka ring leh deuh a, message min rawn thawntu pawh ka hriat miah loh hi maw.


U Puia hi ka thinlung zawng zawngin ka lo duh tawh si a, ka ring êm êm bawk. Rin lohna tùr ka hmu ngai lo miau a ni, țanpui ka ngaihna zawng zawngah min pui ziah a, ka tân chuan innghahna tlâk dik tak a ni.


Ani pawhin min duh ve viau a, min thlahlel ve tho a nih kha. Ni hnih khat lek min hmu tùr pawhin a rawn phei vang vang duh a nia, min thlahlel lo chu a ni bîk lo chiang.


Mahse...engtin nge a nih theih?!!!


Engtik laiin nge a lo luhkhung le? Tukin lamah pawh a message chu ka la hmuh reng kha, min hrilh a tum miah lo tihna em ni? Nge ka lakah thup a tum? Ka hriat chhuah a ring lo zâwk nge ni ang?


Phone chu ka tuai ka tuai a, ka va call tawp dâwn em ni ang? A buai ang em? A kâ ngei ațang hriat chu a țha maithei asin, thu dik lo pawh a lo ni maithei a...mahse, thu dik a lo nih hlauh si chuan...ka hre ngam dâwn em ni?


Ka duty-naah pawh ka rilru ka pe țha lo khawp mai, ka ngaihtuah reng lo thei lo. A fa a lo pai a nih tak tak hlauh chuan kei hi ka inthiar fihlìm ngei a ngai ang. Chu tak chu harsa ka va ti dâwn êm!!! Nula leh tlangvâl induh tawn ve țhìn, fa hial lo pai tate inkârah chuan ka inrawlh thei lo ang, keimah ang maia fahrah an pung dâwn tihna asin, fahrah hi he khawvêlah hian piang tawh lo se ka tih țhin kha.


Tûkțhuan chu ka kîl ve hrâm. Pa Chhuana Lunglei ațangin a lo phei ve niin, U Puia'n a thîk theihzia kha, biak loh ka tum zet a; mahse, kan inah hial lo biak loh chu a zia lo deuh ang.


Za vak lova nuih sak chungin," Pa Chhuana chu, engtikin nge i lo phei a?" ka ti a.


"Nizàn khân ka lo thleng tawh, hna thilah zin lawk ka ngai a," a lo ti a.


"Nizànah hetah a riak tawh alawm. Bawihte, i mu țha thei em? I hna hi hahthlâk i ti viau lo maw?" Patea chuan a lo ti a.


"Ti lo ve, ka mu țha thei e."


"I nuam tih ber hna a ni bawk sia, kei chuan hah taka hna i thawh hi ka phal lo viau asin le."


"Min ngaihtuah suh, ka hah hlei nem."


Chaw chu ka châk lo tak zet. Nghei ngawt erawh ka tum lo, ni dangah ka nghei ngai lo bawk. Ka chungah thil dik lo eng emaw a thleng tih an hriat loh hrâm ka duh bawk si a, tlêm tal chu ka ei a ngai.


Ngawi rengin chaw chu ka ei a, mi dang chu an titi bawrh bawrh. U Puia'n min rawn phone miah lo chu mak ka ti a, min rawn phone loh tal pawhin message tal min rawn thawn ka ring ve a nia, thu dik a nih ngei ka ring ta.


Hmun ka tihfel hnu chuan sitting room thlang lam veranda-ah chuan ka chhuak a, pangpâr pâr mawi zet zet chu ka thlîr kual a, an mawizia chu, ka rilru hi thil țûl lo ngaihtuahin khat țûn lo phei se chuan mawi ka ti ngawt ang.


"In pa chanchin kha ka lo hre ve a, mak ka ti ngawt asin."


Ka phu zawk, ka bulah a lo awm ve reng tih ka lo hre miah lo!


"Eng chu maw?!" U Mami'n a luhkhung tih kha a lo hre ve em ni? Ni lul lo ve, a hre lo ang.


"A hrilh loh che ka ring rêng a ni. A tân chuan hrilh ngam chi i ni bawk lo va, a zahthlâk ve bawk sia."


Duh aiin Pa Chhuana hian thil a hre tam mah mah ka ti; mahse, a àwm ve tho mai. A lo lèn lai khân U Puia kha a lo lêng ve ziah tlat si a, kan inngaizâwng tih a hriat loh theih loh.


"Eng thil nge a?"


"A, i hriat loh kha a țha zâwk a niang; mahse, a chêt dàn hi mi rinawm tak chêt dàn tùr chu a ni lo maw le."


A sawi chhuak duh bîk miah lo.


"Nia, hriat loh hi a țha zâwk a niang, a thuhrimah, Pa Chhuan, eng thil nge ni rêng rêng? Engtin nge 'kan pa' chanchin chu i lo hriat ve theih zâwk a?" ka lo ti ve a.


"I bialpa a nih chuan i patea țhian ka nih angin i tân ka lo thlîthlâi lo thei lo a ni. Ka chîk ru ve reng a, min lawm loh hmelin min nèl loh hmel viau țhin mah se tlangvâl sual chu a nih ka ring miah lo, a tihhlim êm che hi," a ti leh duah a.


A dik chiah. U Puia hian min tihlim țhìn asin, tuna ka thil hriat hi a mak ta êm mai pawh a. Pa Chhuana pawh hian mi titi tlângkam ațangin a lo hre ve pawh a ni maithei a, a dik ngei a nih ka ring ta bawk. Ka patea țhianpa a nia, dâwt a sawi duh ka ring lo. U Puia'n a thîk țhìn tih hrilh ta ila mak a ti ngawt ang chu!


"A mak ngawt mai."


"Nia, ka rin a lo ang lo khawp asin, a duh viau che si a, eng emaw chêt sual palh liau liau vàng pawh a ni maithei a ni," a ti leh a.


"Eng záwngin maw?"


A aw a thian deuh kharh a, a ngawi leh deuh vang vang phawt a, chutah," Tihpalh thil thuah a râi a nih ka ring, hmeichhe zak thei lo phei hi chuan an duhzâwng mipaah hi chuan zahna an nei ngai hlei nem. Thangah tàl awhtîr an tum ran țhìn, chuan an taksa mawina an hmatheh țhìn bawk a," a ti leh duah a.


A sawi dik khawp ang. U Mami kha chuan a la duh chiang alawm, U Puia hi chu a țha ve thlâwt bawk a, duh loh chi rual a ni mawlh lo a ni. Ka thiam lo hran lo; mahse, ka bialpa a ni tih kha a hre ve reng tho sia.


"Ka rilru a buai tak zet a ni," ka ti sap a.


"A ni ngei ang; mahse, thu dik a ni miau si a, a rinawm lohna i tawrh hi a phû ka ti miah lo. Ka fanu ang thoa ka en i ni a, i tân chuan a țha ber zêl ka duhpui che tih i hriat tho ka ring, hetiang mi rinawm lo lak ațang hi chuan tâl chhuak thei la chu ka ti khawp mai, ka lo inrawlh vena tùr chu a awm miah lo va."


"A hrilh miah lo che maw?" a ti leh a.


"Aw."


"A timak hle mai; mahse, hmeichhe zak thei lo a tawng fuh ve pawh a niang, a fa pawh a lo ni lo thei tho a; mahse, a fa ni lo ta se a hmeichhia chuan a va luhkhung ngam kher dâwn em ni tihte chu ka ngaihtuah ve bawk a," a ti leh a.


Nia, a dik alawm. A fa ni lo pui paiin a fa pa ni lo chu a luhkhung ngam lo tawp ang, a theih loh a ni tawp.


"A dik tiraw? Naute pai ve ta la, i fa pa ni miah lo kha luhkhung tum teh, mak deuh tùr asin, a hmain an lo inhre sa tawh a ni ngei ang a, inhre miah lo inluhkhung thu a awm si lo, vawi khat chauh mut dunah pawh rài chu a rài theih tho mai bawk a," a ti leh chuar chuar a.


A bialnu hlui a ni tih a hre ve miah lo a ni chiang mai.


"A bialnu hlui alawm."


A chek ta tlak tlak a," A lo nih mai mai chu a; mahse, in inkawp daih tawh sia, bâkah, kâr tàwp ral taah pawh khân Puia chu a rawn phei a ni lo'm ni? Khatah pawh khân a luhkhung tawh sia, a va mak êm!" a ti leh a.


Heta a rawn phei khân U Mami chuan a lo luhkhung reng tawh a nih chu! A va mak leh zel ve aw! U Puia lah kha a awm dàn ngai rengin a awm bawk si, eng mah min hrilh hauh bawk si lo.


Ka lakah a zêp a ni.


Min hrilh duh lo va, a zêp a, ka hriat chhuah a ring lo tihna a ni. Ka bialpa, ka duh leh ka hmangaih êm êm ni mah se hmeichhe dangin a fa a pâi tlat, inthiar fihlîm tùr chu keimah. An inkârah fa hial a awm tawha an inkâra kei hi ka lo awm ve tlat chuan buaina chawk chhuaktu tùr mai ka ni, fahrah siam chhuaktu ka ni dâwn.


Ka message pawh kha a hmu ngei tawh àwm si a, min rawn call miah loh hi. Call chu sawi loh message takngial pawhin a rawn insawi fiah lo, hetiang tùr hi a ni lo asin. Ka hre chhuak ta si a, inthiar fihlìm dàn zawngin min rawn be pawh duh ta lo pawh a ni thei.


Ka dem hran chuang lo ve. Kei aia a ngaihzàwn hmasak kha a ni tlat a, U Mami'n a lo la duh ve bawk si a, a insûm zo lo a ni ve ta a ni ang e.


Mahse, ka va tlâwm vawng vawng tak êm! Ka bialpa kawplai chuan a bialnu hlui a rai mai bâkah, a luhkhung a ni si a. Kan chanchin hretu zawng zawngte chuan mak an ti ngawt ang chu, U Teite nupa pawh ka hrilh ngam dâwn em ni? Min ngeitu an lo awm hlauh phei chuan chawh min ti ngawt ang.


U Puia nu ka hre chhuak zawk mai.


A lâwm ngawt ang chu. Min duh lo nasa mai si a, tunah phei chuan kei lo mi dang lakah tû hmel a hmu thuai dâwn si a, inneihtîr a tum ngei ngei ang, ka kawng chu ping tak a ni.


Chu pawh ni se, U Puia rilru ka hre chák tho. U Mami nge a duh ang kei hi? Min duh ve êm kha, va phone tawp ila, va zâwt mai ila, rilru hrehawm deuha awm reng zawng, a hahthlâk êm mai.


Ka phone chu ka'n la kâng a, va phone loh tal pawhin message check ve hrim hrim pawh a țha alawm. Min rawn call loh pawhin message tal min rawn thawn mial thei asin.


A thim hmak reng mai.


A êng thei hauh lo nia!


A chhia tihna em ni? Nimin tlaia message ka thawn hnu khân ka khawih ta miah lo a nih kha. Ka thlauh hauh si lo, a chhe thei ringawt lo ang.


Tihèn tumin ka bei nasa.


Charger ka ban a, battery a low ral țhak pawh a lo ni maithei asin, ka battery a țhat tehchiam tawh loh kha.


A battery low vàngin a lo thi hmak a nih chiah hi, ka thaw huai mai. A thar lei vat ka ngai a ni, a rei ve deuh tawh a, a thar lei pawh a pawi tawh lo.


Engtik lai khân nge a lo thih hman ni ang aw? U Puia hian min rawn phone a tum ang em? Ka phone a thih daih si chuan min rawn call tlang lo tawp ang le.


Minute hnih hnuah chuan ka phone chu ka on a, ka nghâkhlel lutuk a ni maithei e.


Message a rawn lût zut zut mai. U Puia message pawh a rawn lût chiang e. Ka han en zai zai a; mahse, luhkhung lam chu a rawn sawi hauh lo mai. Min ngaih thu leh min hmuh leh châk tawh thu a rawn sawi, inenkawl țha tùrin min chah bâkah thu thlum zet zet nèn, hm, ka rilrua thil awm nèn hian a va inhmeh lo tak!


Ka va call lo ang, ka zâwt tawh a, min hrilh chu a bat a ni ve tawh e. Min hrilh duh loh chuan a thu, thurûk kan neih tawh si chuan kan inkârah ngêt a awm tawh tihna a ni mai.


Ka phone rawn ri thutah chuan ka phu chiang kher mai!


U Puia. Sikul a kal àwm sia, class a nei lo tihna a ni ang maw. Ka sawi chhuak lo ang, ka zâwt hek lo ang, min hrilh a nih loh chuan kan inkârah dik lo a awm ta ngei tihna a ni ang.


"Hello?"


"Lalpa leh! Engtizia nge i call tlang theih miah loh le!! Tukinah ringawt pawh vawi eng zât nge rawn biak che ka tum tawh hi?" a rawn ti a.


"Ka phone a thi daih a."


"A nih tak chu! I țha em? Nimin khân ka buai lutuk a, ka rawn call hman thlâwt lo che a ni, ka call che chuan rei lo tê biak che ka duh si lo va," a ti leh a.


Tunah hian kan awm dàn hi kan inthlâkthleng hlawk niin ka hria. Ni dangah chuan kei hi thu sawi thui zâwk ka ni ziah, tunah erawh ka hul dér.


"Dik lo a awm em ni?" a rawn ti ta, he pa hian ka message kha a hmu reng si a, haider a tum tihna em ni?


"Keima lamah chuan awm lo ve," ka ti ta ringawt.


"Keima lamah thung chuan, ka ngai leh tawh lutuk che hi thil dik lo awmchhun chu a ni ang. Hetiang chuan kum khat pawh hi ka nghâk zo lo mai ang che tih ka hlau, ka bula awmtîr reng che hi ka duh tawh mai."


U Mami'n a luhkhung tih chu hre lo ila chuan a thil sawi vàng chuan hlim takin ka nui var var ngei ngei dâwn tih ka hria; mahse, tunah chuan ka nui thei tlat lo.


"Mahse, nawr che ka tum miah lo a nia, kan pahniha kan sawi fel tawh a nia, ka nghâkhlel lutuk tawh atin ni."


Ka ngawih reng vàng chuan," Tluangpui, thil dik lo a awm tiraw? I ngawih reng chuan thil dik lo a awm tihna a nia, min han hrilh teh. Ka bulah eng mah zêp lo la ka duh a ni," te chu a la rawn ti tak deuh deuh a.


Amah zâwkin a zêp a ni si a.


Zawh chhuah ka duh lo asin le. Engkim min hrilh ve tùrah ka ngai a, min ring tâwk a nih chuan.


"Thil min hrilh tùr i nei zâwk lo maw?"


"Ka ngai che."


Ni lo, ka inseh ruh a, ka laka a zêp tlat hian min tina telh telhin ka hria.


Chawhnu lamah call ka dawng leh, U Puia nu ve thung. Hm, ka beisei tawh lo asin. Rilru nat leh buai nèn chuan a inhmeh lo tak zet, U Puia nu chu ni lo se chuan ka hmet tàwp hmak ang.


"Ka fapa hi lo beisei tawh suh, tunah chuan tu ka nei dâwn tawh a, ka tu pai mêktu nèn hian an innei ngei ang. Lo inthiar fihlîm ta che, ka tu fahrahtîr hi ka duh ngai lo bawk ang, nang pawhin fahrah nun hrehawmzia chu i hriat ve tho kha."


Ka mittui a tla zawih zawih a, ka kut ka hûm ruh tlawk tlawk bawk. Heti êm hian U Puia nu chuan min duh lo a ni a, kan inkârah U Mami rawn tla zep lo mah se hlim takin U Puia hi ka nei thei hauh lovin ka ring, a nu hi hrtianga ka chunga a țhat loh miau chuan chhûngkhur nun nuam kan nei thei miah lo ang.


"Ka sawi chiang tiraw? Ka fapa hian engti kawng mahin min hnial thei dáwn lo, ka fapaah hian beiseina nghat lo la, i inthiar fihlìm hma leh i na lo deuh thei ang. Mami hi ka monu tùr leh ka fanu tùr, ka tu tùr pai mêktu a ni bawk, lo be buai tawh suh ang che."


"E, chuan hei hi lo hre bawk la, i nu chanchinte kha ka hre lo emaw i ti a ni ang e, zak ve deuh la aw. Fanu chuan a nu pawh a lo chhùn chiang e, i nu hi hre lo tùrah min lo ngai a nih chuan i hre sual chhiava a ni, engkim ka hre vek. Ka tu hringtunu tùr atân chuan ka duh che hi ring ngai suh. Lo inthiar fihlîm hmak rawh, i zak ve thei a nih ngai chuan ka fapa hi lo beisei ngam tawh bawk hek suh."


Order a nih chu! A fapa be tawh lo tùr leh inthiar fihlîm tùra thu pêk ka ni. Fahrah ni lo ta ila hetiang hian min ti ngam kher bîkin ka ring lo, bâkah ka nu chanchinte kha a lo hre ve lehnghãl bawk si a, an fapa nupui atân leh an tu pai tùr atân chuan ka tling ngai lo ang.


Ka zak chem chem mai.


Ka âwm a rawn tâwt mup mup a, thâwk harsa ka ti, min hnawh tlat.


Thâwk a harsat vàng chuan ka thaw kâwk kâwk a, ka mittui a tla zawih zawih reng bawk nèn, ka aw a chhuah theih veleh ka nutei ka ko vak. Hmanhmawh zetin a rawn tlân lût a, ka thaw kâwk kâwk min rawn hmuh chuan a mangang tih ka hmu, ka patea a awm si lo va, a mangang khawp ang chu.


A âwmah nghet takin min kuah a, min hnem nân ka hnung a chûl mawlh mawlh. Ka thil tawn chu a hriat ka ring hauh lo; mahse, chutia duat taka min kuah chuan ka awm dàn dik lote chu a reh nghâl sawt sawtin ka hria.


Ka thâwk a dik deuh hnuah erawh ka insûm thei lo, chhuak zetin ka țap ta hawm hawm a, ka insûm rei tawh êm mai.


Ka țah hawk hawk hnuah chuan ka thinlung tâwt lutuk pawh a ziaawm ta hawk mai, ka țah chhuah loh vang khân ka lo ipik lutuk a lo ni ngei ang.


Ka nutei chuan min kuah reng a, ani pawh hian min țahpui ve hialin ka ring, a chhan chu a mit a sen ve ûrh mai.


Ka ziaawm hnu chuan thil awmzia chu min zâwt hauh lo nain ka hrilh vek. U Puia'n fa a neih dâwn thu leh a nu min țawng khum dàn zawng zawng pawh chu ka hrilh vek.


"Nute, U Puia hi ka țhen ang, a chhan chu nupui leh fa nei mai tùr a ni a, an inkârah ka awm thei lo ang, a fa lo piang tùr chu keimah anga fahrah tùrin ka duh hauh lo," ka ti sap sap a.


"Bawihte, thil awm dan hi a mak teh e tiraw?" a ti ringawt. Min hnèm thiam vak lo; mahse, ka bula a awm hi ka lâwm, țawngkain min hnèm thiam lo mah se ka bulah a awm a, ka thu sawi a ngaithla a, a tâwk viau e.


"Patea bulah pawh ka sawi vek ang, chuan ka hna hi bànsanin zin bo daih ka duh rih ang. A chhan chu U Puia nèna kan awm dunna țhin hmuna ka awm chuan amah ka hre chhuak ang a, ka theihnghilh thei lo palh ang. Zin bovin boruak dang hîp ila ka tân pawh a zia deuhin ka ring," ka ti a.


"I tih dàn dán le."


U Puia hmu tawh lo tùr leh be tawh miah lo tùr anga ka indah chhin pawhin ka mittui a rawn tla nghâl zél. Ka nun dàn rawn inlet thawk mai hi hrehawm ka ti lutuk, khûk ral daih theih se bo hmakin he khawvêl ata hi bo vang vang ila ka va ti tak!


Mahse, vawi khat tal chu ka la be leh ang. A chhan chu ka tân chuan ka thlahna tùr tak tak a ni tawh dâwn asin; mahse, eng mah ka hrilh lo ang, ani pawhin eng mah min hrilh hauh si lo. A tân leh an chhûngkaw tân, a fa lo piang tùr tân pawh ka kal bo ngei hi a ngai a ni.







*MIHRING HIAN AN THINRIM LAI LEH ZU AN RUIH LAI HIAN THU DIK TAK AN SAWI CHHUAK CHÂWK*


(In lo dam maw? Ka lo chhunzawm har in ti em? mahse, Pathian zârah ka dam țha tawh a, lo dah zat zat thei tawh tùrah inngai ang aw)

[Ngaia]

☆LTK☆ - 36 By Dingdi Pachuau



Ka patea chu U Puia chungchâng ka hrilh chuan a țawng chhuak nghâl mai lo. Ngawi rengin min en vang vang phawt a, chutah muangchâng hian," A ni tak tak tih i hre chiang meuh maw? Heta a lo phei khân a lo luhkhung ngei tawh maw?" a ti charh charh a.


"Aw; mahse, ka bulah chuan pakhat tê mahin a sawi chhuak hauh lo, min ngai êm êm reng a, nakkum lama inneih hialte kan sawi dùn nghe nghe a; mahse, hetiang mai hi a lo ni bawk si a," ka ti sap sap a.


"Zâwt chiang la?"


"Ka pate, min hrilh loh chuan zawh ka tum lo, bâkah, fa a neih dâwn chu. Fahrah a ni dâwn asin, chu tak chu ka inrawlh ngam lohna a ni, keimah ang maia awm tùrin ka phal thei lo ang. Nu leh pa kârah ngei piang tùrin ka duh a ni," ka ti leh a.


A thaw hawk a," A mak viau a ni tiraw? A duh hle che si a," a ti ve ta ringawt a.


"A bialnu hlui a nia, a hmangaih hmasak zâwk a ni bawk sia, kei aia a duh hmasak kha a ni tlat a ni," rilru na tak chung chuan ka ti a.


"Mahse, nangmah a nei tawh che a..."


"A, Puia hian a nêp zo lo a ni ang, bâkah a hmeichhiain a lo la duh ve viau tho bawk si chuan thil awm thei ve tho chu a ni, chutiang chu an dinhmun pawh chu a lo ni maithei a ni. Mipate hi chuan insùm hi harsa in ti țhìn a ni lo'm ni?" ka nutei chuan a lo ti a.


"Kan inang vek miah lo a nia. Bâkah, Puia pawhin a thlang tawh che a, in induh a, chutin mi dang a nei ngawt lo ang, duh pawh a duh nâng, a remtihna tel miah lovin a luhkhung ringawt pawh a ni thei asin," patea chuan a ti leh a.


"An inkâra naute a awm tawh chuan ka lo tlazep ve thei tawh lo ang, fahrah ka nihtîr thei lo tawp ang, a theih loh," ka lo ti tlat a.


"Chuti, i țhen ang a, i zin bo rih dâwn tihna maw?"


"Aw, țhen loh chi pawh a nih tawh loh chu. Nupui a nei a ni tawh mai si a. Pate, khawiah nge ka awm bo daih ang le?"


An nupa chuan inenin an ngawi vang vang a, a hnu daihah chuan nutei chuan," Chennai-ah i țhianpa Dingate an awm kha," a lo ti zauh a.


Patea chuan," Ni lo ve, a lum si, a boruak a țha lo. Shillong-ah awm zâwk rawh se, rei tak pawh awm a ngai nâng, a ni em?" tiin min rawn en a.


"Ka hre lo le."


"Aw, ka'n be nghâl ang e, i hmanhmawh àwm si a."


Ka awm dàn chu hrehawm ka ti tak zet. U Puia'n fa a nei mai tùr chu ka lawmpui a, nupui a nei mai tùr erawh ka lawmpui thei lo, ka rilru a tina tak zet a ni. Eng mah min hrilh ve duh lo chu hrehawm ka ti, kan inkâra thurûk a awm hi ka ring ngai lo asin, min hrilh duh miah lo hi ka hre thiam thei lo a ni.


Patea ka tibuai êm êm ziah hi hrehawm ka ti. Min enkawl chho a, hna min hmuhsak te te a, ka thawh zawm leh thei dâwn ta si lo, chuti chung chuan min khawngaihin engkim min tihfelsak vek a, ka pa a ni lo tih hi a hriat mawlh loh a ni. Fa pawh nei se kei min duat ai bâk hian a duatin ka ring lo.


U Puia pawhin min rawn be fo; mahse, U Mami nèn an chungchâng chu a sawi chhuak ngai lo. Rilru na deuhin a thil sawi chu ka lo ngaithla kar ziah, ka țawng ve vak ngai lo.


U Rsa pawhin min rawn call ve zauh zauh. U Puia nèn kan chungchâng chu min zâwt ngai lo nain mi fiam zuk a hrât a, nimina min rawn call phei chu," In inneih hunah chuan Lâwichal ka ni duh a nia," a ti zauh. Ka nuih a tiza bawk si a, rilru na ru tak si chuan ka nui hak hak, kan inkâr hi hria se chuan a sawi lang tawp dâwn si lo. Kan inbe rei lo, min rawn call hian kan inbe rei ngai lo, sawi tùr a haihchham ve țhìn a! A ngawi leh vung vung țhìn. Min rawn ngaihsak ve hrim hrim hi ka lâwm tâwk viau a ni, u nih a tlin viau ka ti a, min be rei ngai lo mah se min ngaihsak tih hriat hi nuam ka ti thlâwt; mahse, U Puia nèn kan chungchâng hi chu ka hrilh thei lo.


*******


Ka pa chuan Mami a biak tlang theih loh thu chu vawi thum lai a sawi tawh, chu pawh zîng thawh hlim ațanga chaw ei inkâr chhûng chauhin. A ngaihțhat loh thu a sawi ziah bawk, a rilru ang ka pu ve lo va; mahse, chuti taka ka pain a sawi zin vàng erawh chuan ka hre chhuak ve leh țhìn a ni mai, ka lo ngaihtuah chhuak ngai lo atin ni.


"Pa, sawi reng lo teh. Ngaihtuah pawh a phù loh kha," ka ti a.


"A, be pawh thei tal ila chuan ka ngaihtuah zui lo deuh tùr a nia," a lo ti boh a.


"Ngaihtuah suh, a duh dànin a awm alawm. Bo vang vang rawh se, hmuh leh pawh ka duh tawh lo," ka lo ti leh a.


Ka nu chuan," I bialnu ve ai kha chuan ka ngaina daih zâwk!" a lo ti leh kher bawk a, ka țawng zui peih ta lo.


"Khawiah nge a awm ang aw...?" Ka pa chuan a la ti zui vang vang a.


Sikul kal tùrin ka insiam mawlh mawlh a, room-a ka awm lai chuan ka pa chu a rawn lût a," Bawiha, Mami khân a tidik lo tih chu ka hre tho a; mahse, i huatna rilru kha paih bo thei la chu ka ti a ni. I tân chuan a huatawm ngawtin ka ring; mahse, huatna rilru kha tlêm tlêmin paih hret hret tum teh, i rilrua khâkna awm kha ka duhpui lo che a ni. I nu pawh hi han ngaihtuah la, huatna leh khâkna rilru a pu tlat reng a, hlimnî pawh a neih theih loh hi. Hetiang chuan a hrisèl theih loh, chuvangin nang tal hi chuan huatna rilru hi nei lo hrâm rawh aw, a rawn tibuai tawh lo bawk chein ka ring bawk a. I nu rilrua huatna awm tlat pawh hi tihrehsak ka lo tum țàng țáng a nia," a rawn ti duah a.


Ka chhâng lo nain ka pa rilru hi chu a țha ka ti, a tluang purh mai a, zah pawh ka zah țhìn. Ka nu erawh hi chuan Tluangpuii hi a duh lo ve thlâwt rih a ni mai a, nakinah erawh chuan a duh ngei ka ring, Tluangpuii rilru țhatna hian a rilru sak zet hi a la hmeh zal ngei ka ring tlat.


Kawnga tlân pah chuan Tluangpuii chu ka bia a, tûnlai tak hi a chauh deuh avàngin ka be rei vak ngai lo. A aw ațang hian a chau tih ka hre thei tlat a ni, zàn lamah a duty țhìn si a, ka khawngaih reuh viau nain a hna thawhnaah hi chuan inrawlh ka tum lo. Intihthù hun a la ni lo; mahse, ka nupui a nih hunah erawh chuan a thawh ka phal hauh lo ang le.


Ka biak loh hlek hi chuan ka ngai hman ziah maw le. Tunah phei chuan duh hun hunah ka hmu thei bawk si lo, kâr tawpa hmu tùra va kal leh ringawt țhin pawh hi a pateate lakah ka inthlahrung, ka nupui pawh a la ni si lo.


"I chau em?" A chau tih hriat hi hrehawm ka ti a ni, ka hmuh phâkah awm se duat taka kuah vawng vawng ka châk.


"Chau lo ve, sikul i kal dâwn em?" A aw chhuak chu leh...a mu tho chiah a ni maithei, kei hian a muhìl ka tiharh em ni zâwk le?


"Um, hei ka tlân mêk a. I muhìl ka rawn tihthawh loh hrâm che ka beisei."


A aw chu mu tho chiah aw a ang êm a ni.


"Titho lo ve. Chaw kan ei țêp a."


"A nih tak chu, i aw ațang khân i mutui lai ka rawn tiharh che a nih ka ring a," ka ti a.


A ngawi vang vang a, tûn hnai tê ațang hian ngawih deuh vang vang a chîng thar tlat.


"I chau a ni tiraw? Nge rilru hahna i nei zâwk? Min hrilh teh," ka ti ta a.


"Ni lo...chutiang a awm lo. Ka țha lutuk, i țha zâwk em? I buai viau ka ring zâwk a," a rawn ti thung a.


"Eng vàngin maw ka buai ang?"


"A, ka hre chuang nâng."


"Ka buai lo. Chuan, vawiin chu i mu nilêng dâwn em?" nui chung hian ka ti a, a mood on ka tum a ni.


"Haha, maithei a ni. Tak tak chuan, ka insu ang, insûk tùr ka ngah tawh a, room pawh ka tifai ang chu," a rawn ti ve ta a.


Tunah chuan a țawng thui ve ta deuh e.


"Ka lo pui dâwn che em niang?"


"A, sikul țha taka i kal khân min pui tihna a ni zâwk ang chu. I dam țhata sikul i kal hian hna țha tak i thawk tihna a nia, i hnaa rinawm taka i thawh hi a pawimawh ber a ni," a rawn ti leh a.


Deuh duah chuan.


"U Pui, naute neih i châk tawh em?" a rawn tih chuan ka phu zawk maw le. Motor ka khalh mêk a ni tih ka theihnghilh teuh viau bawk.


"Teh rêng mai!! Naute, a nu chhùn deuh ni se," tiin ka nui hak hak a.


"Nuam i ti àwm!" a rawn ti leh a.


"Ka hmangaih ngawt ang chu, engtia rawn sawi chhuak thut nge i nih a? Naute i pai châk tawh chu a ni êm lo maw?" tiin ka nui leh a.


"A, ka mumanga ka hmuh vàng mai mai maw le, chutiang eng mah a awm lo," a rawn ti niah niah a.


Tluangpuii chu ka fa paia rai tùr angin ka mitthla chhin a, ka nui sak. A inhmeh dâwn lutuk, ka duat ngawt ang chu. Eng mah a tih ka phal lo ang, ka duat hlum lo chauh tak tak ang!


"Chutiang chu kan pahnih inkârah hian ka suangtuah duh rih lo, rawn tlang phei ka tum ringawt mai ang. I chhungte mitmei vêng lêk lo hian leh i duh dàn pawh pawisa map lovin ka che palh ang tih a hlauhawm ang," ka ti a.


"U Pui, min ngai ve tho tiraw?" a rawn ti leh a.


"Ngai lutuk! I aw ka hre reng chung pawh hian ka ngai tho che!"


"Kei pawh chutiang tho chu. Chuan, ka hmangaih bawk che a, ka dam chhûngin ka hmangaih reng ang che, ka thih hnu thleng pawhin," uar zet hian a ti a.


Ka lâwm lutuk chu ka khi var var mai. Min duh a, min hmangaih tih hriat hi a hlu êm asin.


"Kei pawh chutiang chiah chuan. LTK, ka hmangaih che, tunah tak hian ka bulah awm la ka ti hle mai," ka ti sup a.


*** KAN WEBSITE A FAKNA LAM THIL MILEM LANG THIN I LO HMET ZEUH HIAN KAN WRITER TE HLAWH KAN TUMSAK ZEL TIH KAN HRE THEUH DAWN NIA, KAN LAWM E***

Website story link ho awlsam zawka in zawn hmuh zung zung theih nan STORY FB group siam a ni a. Whatsapp group pawh siam a ni e. Complete tawh ho zawng zawng leh story kallai kan dah vek avangin avangin in lo join theuh dawn nia..
Group link : https://www.facebook.com/groups/991354610918230/


"Ka hmangaih vàng che hian i hmalam hunah buaina tâwk miah lo la, hlim takin awm zêl bawk la ka duh. Mihringin kan hmalam hun kan hriat loh miau avàngin harsatna leh lungngaihna hian tibuai ve miah lo tùrin ka duh che a, a țha ber zel nei zêl la tih ka duhsak bawk che."


A remchâng laiah ka ding a, a thil sawi chu mak ka ti lo thei lo. Ani tê hi, eng nge maw a hriat ni, hetiangte a han sawi duah a nia, min tingaihțha lo lek lek hial mai ka ti.


"LTK, ka lâwm e; mahse, i thil sawi chuan min tingaihțha lo lek lek a nia, khawiah emaw kal bo daih tùrin, duhsak taka min thlahna țawngkam a ang ka ti. I kal bo dâwn chu a ni si lo tiraw?" ka ti a.


A nui hak a," Mai mai a, ka hmangaih che avàngin ka duhsak ve che a nih kha," a lo ti mai a.


Ka nui sak a," Ka lâwm e, i mi duhsakna ang chiah chu ka duhsak lêt ve a che. Engtikah nge kan inhmuh leh theih ang? Tûn kâr tàwp hian ka rawn phei leh mai dâwn em niang? Ka hmu leh châk tawh che a," ka ti a.


"Hmmmm, zànah ka duty leh daih dâwn asin, bákah, buai zual hun lai tak a nia, ka khawngaih che alawm. Hun remchâng hmasa berah i lo phei zâwk dâwn em ni ang?"


"I thu vek alawm, ka Lalnu."


A ngawi deuh dat a, chutah," Kan inbe rei tawh sia, sikul i thleng tawh hial lo maw?" a rawn ti leh a.


"Kawngah ka ding daih alawm."


"E, ka tikhawtlai rei che a nih chiah chu. Tlân leh tawh rawh, i tlai palh ang."


"Aw le, ka rawn be leh ang che aw."


"Aw le, a nih aw, ka hmangaih che."


"Kei pawhin ka hmangaih che."


******


TLUANGPUII
~~~~~~~~~


Ka mittui a tla zawih zawih, kan inbiak chhûnga ka insûm thei erawh ka lâwm viau. Nia, kan inbe khât tawh dâwn si a, ka hmangaih thu leh duhsakna thu kha ka hrilh hman lo ang tih ka hlau êm a ni. Ka tân chuan amah thlahna a ni zêl tawh si a, ka kal bo a nih chuan min bepawh thei tawh dâwn si lo. Min biakpawh hi ka duh tawh dâwn miah lo, ka natna belhchhahtu tùr mai mai a ni tawh dâwn a, bâkah, U Mami nèn an inkâr tibuaitu nih ka tum lo bur.


Ka insiam tawh a, patea khân Shillong kha a ti tak naa, Shillong chu a hnai lutuk a, ka duh lo. A hnuah erawh Goa lama kal tùrin thutlûkna kan siam ta zâwk, a hla zâwk a, bâkah, ka la kal ngai lo va, nun thar hlaka bul țan ka duh zâwk a ni.


U Puia hmu tawh lo tùr anga ka indah chhin pawhin hrehawm ka ti tak zet. Ka hmuh loh tal pawhin a aw tal chu hre thei ila ka ti; mahse, chu chu thil tih chi a ni lo. Kal bo kha awmzia a awm dâwn lo asin, a aw ri ka hre châk a nih chuan nakinah ka biak leh hunah kan inbiakna chu ka record tawh ang.


Ka pateate chuan min thlah dâwn a ni, kal rih lo tùrin min ti zet na a, keiin kal thuai ka duh tih ka hrilh thung. A chhan chu U Puia hi ka hmangaih a, hmangaih viau mah ila min bumtu a nihna lai a awm ve tho; mahse, min bum hi nâ ka ti phal lo. U Mami'n a thlêm thiam dâwn êm asin, a chhe lo bawk si a, ani chu mipa a ni a, insûm tak chung pawhin a hmeichhiain a thlèm tlat chuan, a tlu lo thei lo ang. Fa a nei thuai ang a, min duhin min thlahlel viau mah se min theihnghilh ve vat mai ang, naute a pian hunah meuh chuan a hmangaih hle dâwn tih a sawi kha.


Motor-a kan chuan hnuah ka bia a, class a àwl lai a ni hlauh zui, ka tifuh lutuk. Kan inbiakna zawng zawng ka record vek a, ka țah a chhuah țhin avàngin ka rawmawl ken lai chuan ka ka ka hup vat țhìn. Tûn bâk hi ka be thei tawh dâwn si lo, ka tân chuan ka mangțhana dik tak a ni.


"Motor-ah i chuang a ni maw?"


A hre thei bawk si.


"Aw, i va hre thei tak!"


"Inah i awm dâwn emaw ka ti."


"Nia, ka chhuak leh ta zâwk a. Ka khua a har reuh tawp, ka ngaihtuah reng che a," ka ti ve zaih.


"Chuvàng a nih chu ka hlim viau ni. Min lo ngaihtuah vàng a nih chiah chu, haw har lutuk lo la aw, zanah duty i ngai leh dâwn si, i chau lutuk ang."


Min ngaihtuah tih hriat chu nuam ka ti a, țawngkam mai maia sawi a nih ka ring phal bîk lo.


"Aw le, Boss."


A nui hawk hawk ri chu hriat nuam viau mah se ka thinlung chhûngril chu a rûm vawng vawng thung. A nui ri ka hre tawh lo tùr ringawt pawh chuan min tinâ a ni, ka kal bosan dâwn si a, a tâna țha tùr leh a fa lo piang tùr tân a ni si a.


"Ka hmangaih che."


"Kei pawhin ka hmangaih che."


"A nih, kan inhmuh leh hma zawng atân ka mangțha rih ang che aw."


"I tih dàn vêl hi, kan inhmu leh thuai dâwn alawm, hmu tùr chein ka rawn phei leh vat dâwn," a rawn ti hrâm a.


Ka hria alawm. A rawn phei ang, chutih hunah chuan kei chu hla te khuaah ka lo awm bo tawh dâwn si a ni.


"Mangțha min ti ve mai la?" ka ti sap a.


"Ka duh lo, mangțha chu ințhenna țawngkam a ni asin."


A dik lutuk. Ka țhen dâwn si a ni.


"A nih, dam takin ti tal rawh," ka ti leh a.


"Kan inhmuh leh hma atân, lo inenkawl țha la, lo dam țha ang che, kan inhmu thuai dâwn nia, ka Lalnu."


'Dam takin' tih leh 'Mangțha' tih chu a sawi duh miah lo.


"Mangțha ngawih ngawih, ka biak tawpna che a ni tawh dâwn si a," ka ti rilru mawlh mawlh a.




*HMANGAIH VÀNGA KALSAN NIH NGE HREHAWM ANG HMANGAIH VÀNGA KALSANTU NIH?*

[Ngaia]

☆LTK☆ - 37 By Dingdi Pachuau



Ka naute tak hi chuh, ngai viau mah ila kan inhmuh lohna a la rei fahran lo va, phei leh mai pawh ka inthlahrung tawh asin; mahse, min ngai ve tih ka hriatin ka awm a nuam sawt a, ka hmu châk leh sawt bawk. Tûn kâr tàwp chu ka phei ngei ang; mahse, phei lo tùr ang deuhin ka awm phawt ang a, ka surprise ang maw le.




'Dam takin' tih leh 'Mangțha' tih hi chu inhmu tawh lo tùra inthlahna țawngkam bîk riau ni hian ka hre tlat a, chuvàngin țawngkamah hi chuan ka hmang khât, mut dâwna in-text-naah erawh 'Mangțha' tih tak hi chu ka hmang ve tawh maithei, Tluangpuii hi ka 'Dam takin' phal teuh lo mai, mut dâwn chu ni se ka 'Mangțha' mahna le!




Tlaiah biak ka tum deuh nain ka țhulh leh, ka tibuai ang tih ka hlau leh deuh a. A chhan chu vawiin lamah a chhuak si a, mut hahdam pawh a duh palh ang, zanah a duty leh dâwn si a.




Zànah erawh naktûk zîng lama a chhiar tùr message ka thawn țeuh. Thu thlum ka hriat ve ang ang leh ka rilru chhûngril puak chhuak ka ziak chhuak ve a ni, a chhiar hun chu a hlimpui viau ang, a nui nasa ngawt ang. A nih loh vêk leh, a hnuk a ulh hial maithei zâwk. Thu ka thiam lo va; mahse, ka rilru chhûngril ațanga chhuak liau liau a nih vàng erawh chuan kei chuan ka duh viau a ni.




Zînga ka harh veleh chuan tho chhuak lovin ka phone ka ban vat a, ka text kha a hmuh huna amah a khawih dàn tùr ka hre châk a ni.




Nûr zetin hian ka phone chu ka dah leh daih. A message a awm lo, bâkah ka message pawh a en hek lo. Engtizia nge ni le?




Phûr lo zet hian ka tho chhuak a, tukin chu ka thâ a tho lo tlat. Zîng tin deuhthaw a message-in min lo hmuak țhìn a, zîng thawh veleha han chhiar chu a nawm duh bîk bâkah nilêngin rilru a hlim a, tukin erawh ka lunghnûr deuh tlat.




Chaw ei lai lahin ka pain Mami a lo sawi chhuak leh bawk a, lunghnùr sa nèn, vawiin chu ka mood a off vek dâwn a nih hi. Dik tak chuan Mami chanchin sawi ri hriat hi ka ning ngawih ngawih a, bâkah khatiang kha ka chungah a tiduh a nia. Ka thin a tihrim êm avàngin a chanchin hi ka sawi peih lo, Tluangpuii pawh kha ka hrilh vek ang ka ti kha a ni a; mahse, ka țhulh leh daih, min chhuahsan ta bawk nèn, thil țûlah ka ngai duh ta lo a ni.




Kawnga ka tlàn lai chuan ka call a, switched off a ti tlat, ani hi a battery a low leh lutuk ang a, a thi leh daih a ni ngei ang. Ka nui sak a, hun hi ral thuai thuai se ka va ti tak êm! Ka thu chu ni se hun hi thla 11 vêl ka forward dâwrh ang!




Tlai lamah ka try leh a, switched off a ti leh tho nia. A ni êm êm tawh lo deuh chu ka ti. A muhìl ang a, a lo theihnghilh palh thei tho mai; mahse, ka ngaih erawh a țha lo deuh hlek tawh. Ka message a check bawk si lo, mak ka ti lo thei lo.




Ni khat lek be lo pawhin hrehawm ka ti tawh kha a ni a, tunah pawh ni khat chu a ni dâwn ta reng mai. A phone a chhia em ni le? A chhiat pawhin phone dang ațang talin min rawn hrilh àwm tak a nia, engtizia nge ni ang le?




A tûkah ka call leh a, a ngai tê bawk, switched off a ti leh tho. A patea number kha ka la nei ve ràn asin; mahse, a patea va call ringawt lah chu, a tihchi loh ka ti bawk si.




Ni hnih ka be thei ta lo, a phone a chhia a ni ngei ang; mahse, engtizia nge a chhiat thu tal pawh min rawn hrilh loh le? Ka ngaih a țha lo tawh tak tak, hetiang hian kan la awm ngai loh kha.




Ni thum a ni tawh! Eng thil nge thleng le aw? A damlo em ni le? A phone khawih theiin a awm lo em ni zâwk? Ngaihtuah țha lo pui pui ka nei a, ani hi an ru bo daih em ni ang? Ni lo, a theih loh!




A phone a chhia a nih loh chuan biakpawh theihin a awm lo tihna. Ka biakpawh a duh lo tihna a ni thei ang em? Eng vàng nge ni ang?




A chhan ka ngaihtuah țhìn, ka hre tlat lo. Ka ngaihtuah nasat poh leh ka bo tulh tulh, kan inbiak hnuhnun berah lah kan intithiam lo bawk si lo, ţha takin kan inbiak kha.




Ka ngaihtuah lêt a, 'Dam takin' tih leh 'Mangțha' tih sawi tùrin min duh a nih kha.




Ni lo! A ni thei lo ang! Ani hian min kal bosan a tum tihna em ni lo ni? Khatiang thu kha a hmain sawi tùrin min ti ngai lo, eng vàng nge ni ang? Engati teh thut nge ni ang?




Ka rilru a chàwl thei ta miah lo. Thil dik lo a awm a ni, hetiang thil hi eng vàng nge ni ang? A duh loh zâwngin ka lo awm em ni? Țawngkam țha lo ka phuh chhuak lo tih ka hre chiang bawk si a, eng thil nge thleng tih ka ngaihtuah lo thei lo.




Nge a Aizawl awm hian duh dang a lo nei zâwk? Ni lo, a ni lo ang. Hei kher hi chu ka ring thei lo, mi dang a melh bîk lo tih ka hria, min bum lo ang, min bum duh tùr nungchang a pu lo.




Eng vàng nge tih chauh chu ka ngaihtuah chhuah theih chu a ni.




Kâr tàwpah chuan ka va kal ta nge nge, ka be thei si lo va, hmun dangah ka innghat phawt. Ka va țhàwn thuta ka chungah lungawi lohna a lo neih si chuan a nuam lo duh àwm êm mai.




Zànah ka lêng lût a, a patea ka hmu miah lo. A nutei chauh a lo awm a, min hmuh chuan mak a tih hmel deuh nain a hnu lawkah erawh a reh leh vat.




Min lo be vat a, engtikah nge Aizawla ka rawn phei tih leh eng nge ka tih dâwn tih min zâwt a. Kei chuan thu dik takin ka chhâng, Tluangpuii awmna ka zâwt a, ka biakpawh theih loh thu chu ka sawi bawk a, hmuh ka duh thu nèn.




A nutei chuan min en kal pah chuan," Hetah a awm lo va, a zin bo a ni," tiin min chhâng ta daih a.




A zin bo! Khawiah? Engti tùrin maw? Zawhna hlîr mai.




"Khawiah nge tih tal min hrilh thei ang em? Chuan, biakpawh theihna ka duh hle bawk a, a chanchin ka hriat loh chuan ka ngaihtuah lo thei lo, a phone a chhia a nih ka ring bawk a," ka ti a.




"Puia, a pawi ka ti khawp mai, ka hrilh thei lo che a ni, thurûk a nia," a lo ti ta tlat!




Thurûk! Thurûk chu ka hriat ve chi loh a ni ngei ang. Mi thurûk hriat tum phêt rual ka ni tawh lo bawk. Min hrilh a nih chuan thurûk a ni nâng.




"Amah chu a țha maw? Ka ngaihtuah hle mai. Engtikah nge a lo haw ang?"




"Ka hre lo le."




Engati nge le? Eng nge a chungah thleng ni ang? Ka bo tulh tulh mai. Ani hi a lo rai te hi a ni ang a!!!




"Puia, thil tam ka sawi lo ang, haw leh ta la, lo kal buai tum tawh suh. In chhûngkua hlim takin awm rawh u, Tluangpuii hi rawn ngaihtuah lo la, a nat belhna tùrin biakpawh tum lo hrâm rawh aw, ka ngèn tak zet che a ni," a ti charh charh a.




Tluangpuii a ná maw?!! Eng vàngin maw? Thil thleng hi ka va hre ve si lo ve!! Eng vàngin nge a nat? Keimah vangin maw?!!!




"Ka va hre thiam lo! Eng thil nge thleng a?" ka ti sup a.




"A thinlung a keh chhe vek a ni, i țhatna tùrin kalsan che kha a thlang ta a nih kha."




Ka bo tulh tulh.




"Eng vàngin maw?"




"I hre zâwk ang chu."




A nutei hi a hma kha chuan a fel tehlul nén, tunah tak hi chuan a tawh a khirh ka ti. A thu sawi hriat thiam a har si, ka ngaihtuah ngun poh leh min kalsan chhan chu ka hre thei lo tulh tulh.




"Ka nute, i thu sawi chu ka la hre thiam miah lo!" ka ti leh hlawl a.




Thâwk a la huai a," Ngun takin i ngaihtuah dâwn nia. Amah anga fahrah an rawn pian chhuah loh nân a kalsan che a ni, nang pawh pakhatah rinawm tum rawh. Tunah phei chuan ngaihtuah tùr pahnih i nei tawh a, lo kal pawh hi i tih tùr a ni lo. Kan fanu hi chu theihnghilh hmak la, hlim takin i hma lam hun hmang tùrin ka duhsak a che," a ti leh charh charh a, a ngawi ta daih a.




Rilru buai zetin ngun takin ka en reng ringawt.




Sawi tùr a nei tawh lo a ni ang, a ngawi reng tawh si a, kei atân pawh țawng leh chu inthlahrunawm tak a ni.




Nutlingin chutianga min țawng khum chuan sawi tùr a vànzia mai chuh! Ka nu chu ni se, sawi túr ka la hre țeuh ang; mahse, mi dang a ni tlat. Ka ngaihtuahna a buai nuai mai a, ngun tak pawhin ngaihtuahna ka hmang thei lo, rilru fîm put ka tum hrâm hrâm, a har khawp mai.




"A tàwp nân, ka nute, Tluangpuii hi ka duh tak zet a, i thil sawi awmzia hre rih lo mah ila engtiklai mahin ka phatsan ngai lo tih tal i lo hre dâwn nia. Fahrah angin ka en ngai lo va, nu leh pa duat taka enkawltu che u a neih reng lai hian fahrah hmuhin ka hmu ngai lo bawk. Min kal bosan chhan hi ka la hre thiam chuang miah lo va, a chhan hriat chu ka phû ve lo maw? Mi sual khaihlum tùr pawhin insawi fiahna hun a neih ve țhin kha, khawngaih takin min kal bosan chhan chu ka hre thei ang em?" tiin ka ngènngawl leh hrâm a, zak lo min tih loh hrâm ka beisei. Ka zak zo tawh lo, ka ngaihtuahna a buai êm asin.




"I țhatna tùrin a kalsan che, in chhûngkaw humhimna tùrin."




Bangbo takin ka chhuak. Ka la hre thiam hlawl lo, kan chhûngkaw humhimna tùrin maw min kalsan? Eng nge chu chu a awmzia le? Ka nu hian a duh vak si lo va, chu chu a sawina em ni? Mahse, ka bulah pakhat tê mah a sawi bawk si lo.




Ka muhìl thei lo, khumah chuan ka mu meng kar mai a. Vawiina a nutei nèn kan inbiakna chu ka ngaihtuah lêt a, rilruin ar bo a zawng tak meuh a ni.




"...amah anga fahrah an rawn pian chhuah loh nân..."




Fahrah angin ka en ngai lo, ka duh lutuk vàng hian a nihna hi ka en ngai lo, amah chauh hi ka en țhìn asin.




"Nang pawh pakhatah rinawm tum rawh."




Eng nge Tluangpuii chungah hian ka rinawm reng si a, mi dang ka melh hauh lo va, kawp dang lah ka nei hek lo.




"Tunah phei chuan ngaihtuah tùr pahnih i nei tawh a..."




Eng nge a awmzia? Ka nu leh pate chu ka nei sa reng a, ka ngaihtuah ngai lovin min ngaihtuah zâwk a nih hi. 'Tunah chuan' a tih tak kha eng a sawi tumna nge ni?




E khai! Mami min rawn luhkhung chanchin kha an lo hria a ni maw?!! Lalpa leh! Buaina lo thleng lo tùra ka ngaihah khân buaina chuan zung a lo kaih reng a lo nih hi, tunah phei chuan buaina lian tak a ni ringawt.




Ka phone chu la chhuakin Tluangpuii message min rawn thawn chu ka en lêt vat vat a, ka hmu ta e.




*U Pui, ka thil hriat hi a dik em?* message dang chu a delete leh a nih kha.




Hetah hian a lo hre daih tawh tihna a ni ngei mai. Ka han ngaihtuah lêt a, kan in-phone pawhin a țawng tam vak ngai ta lo a nih nghe nghe kha, kei lah khân chutiang lama ngai lo khán ngaihțha takin, hrilh ka tum pawh kha ka țhulh leh ta daih si a, thil a buarchuar zo ta. Ka thiam loh liau liau a ni.




Engtin nge ka tih tâk ang?




Amah lah chuan min kalsan tawh si, a pawi tùr ang a pawi zo ta. Engtin nge ka hmuh ang a, a bulah ka insawi fiah theih tâk ang? Biakpawh theihna ka nei lo va, a awmna lah ka hre hek lo.




Ka bumah a ngai ngei ang, hrehawm a va ti dâwn tak! Tunah te hian engtin nge a awm ang? A rilru a na dâwn lutuk! Eng thilin nge ka hrilh tum kha min țhulhtîr reng reng ni? Ka mut hmunah chuan ka insawh ka insawh mai.




Ka insawi fiah ngei ang, a awmna hre lo mah ila a nutei bulah tal khân ka insawi fiah ang. An fanu awmna kha a hre ngei ang, min hrilh lo mah se chanchin an inhrilh tawn thei vek ang tih ka chiang. A nutei bula ka sawi chuan a nutei chuan a hnênah a thlen vek thei ngei ang.




Naktûk zîng inkháwm bànah an inah va kal leh ila, ka va insawi fiah vek ang.




Túkțhuan ei khamah chuan ka mu ar ar phawt a, ka va kal leh ta ngei a; mahse, an lo awm lo. Ka nghâk deuh reng a, thâwm an rawn nei thei lo.




Ka phone chu phawrhin ka on a, Tluangpuii number chu hmet chhuakin ka call leh chhin a, switched off a ti leh tho.




Hm, a nutei bula ka insawi fiah ngei ngei chu a ngai. Ka insawi fiah loh chuan haw ka tum lo. A chhan chu a nutei khân kal tawh lo tùr khân min ti si a, anmahni ka hmu thei lo a nih erawh chuan kal nawn leh mai a ngai dâwn a ni.




Ka phone a rawn ri, ka on lai ka lo hre miah lo. Ka switch off ziah sia. E, nichin khân Tluangpuii phone ka tum kha, ka lo off leh theihnghilh a ni chiah hi.




"Aw, pa?"




"Bawiha, lo haw phei thuai teh."




Hm, a va hun lo thei tak êm!!




"Pa, ka la hman lo asin, hei mi ka nghâk mêk a."




"Mami ruang an hmu a nia."




"Engtin a!!"




"I hman chuan lo phei vat teh."




Mami ruang maw!! A thi tihna a ni ngei mai. Engati nge? Amah a intihlum tihna em niang? Ani hi ka chungah khatiang thil a tih vàng khân a i thiam lo hi a intihlum tihna em ni?




Ka rilru a buai zual sauh mai.




Zawhna hlîr.




Ka mi nghahte lah hi an rawn haw thei si lo. Ka pa lah kha a aw ațang khân a hmanhmawh hmel bawk si, ka thil tawn hi a va buaithlâk tehlul êm!




Kawng lakah ka chàwl miah lo. Ka tlân par par, Sunday a ni bawk a, motor tlân a vâng pharh mai a, tlàn pawh a nuam. Ka rilruah thil ngaihtuah tam lutuk lo ila chuan ka tlân muang deuh ngeiin ka ring; mahse, zawhna hlîrin a khat liam zawih zawih a, thil hriat chian châkna nèn, min tur ut ut tlat a ni.




Eng buaina nge ka hmachhawn tâk hi?





*HMANGAIHNAAH HIAN FAMKIMNA AIIN DIKNA A HLU ZÂWK*