THLAWI VE VE (Short story) BY Notei Sailo Mk (Completed)

Episode nei ho a hlawm a dahkhawmna
Ngaia
Site Admin
Posts: 25813
Joined: April 30th, 2016, 4:07 pm

THLAWI VE VE (Short story) BY Notei Sailo Mk (Completed)

Unread post by Ngaia » November 3rd, 2019, 10:53 pm

cr4lg2k7.jpg
cr4lg2k7.jpg (26.31 KiB) Viewed 15272 times
THLAWI VE VE
(Short story)

Ziaktu – Notei Sailo Mk


Chapter-1

“Ânu, âpi-in ‘lo phei teh’a ti,” kan in piah lawk Green House-a ka awm chu ka fanu chuan min rawn au lâwng lâwng a. Ka phei tur thu ka hrilh hnu pawh chuan ka la awm ta reng; luh tawh hi chuan chhuah mai hi ka harsat ṭhin. Ka fanu leh ka chhungte tih lohah chuan ka nun tihlimtu ber a ni.


Thlai ka ching ve nual a, an rah ṭha thei phian lehnghal. Kan ei sen loh khawp ka thar ve ziah a, hralh ṭhen pawh ka nei ve hial ṭhin. In bul mai a nih vang hian tuk tin leh tlai tin ka lut ngei ngei ṭhin. Ka tleina leh hahdamna hmun a nih miau avangin kham emaw nin emaw ka nei ngai lo. Vawiin pawh office chawlh a nih vangin ka nileng hun chu ka hmang a ni leh deuhthaw tawh.


Ka khawih lai ka zawh hnu chuan in lam pan chuan ka phei ve ta chauh a. Inchhung ka luh chuan a ngai te bawkin ka nu chu a lo âng leh hlâk hlâk a; engah teh vak ka ngai lem lo. A tih ṭhin ve dan reng a nia, ngaiah ka nei tawh.


“Zanin tlai chaw lo ei ru aw,” ka nu chu ka en nghal vat a, lawm tur a awm âwm ka hre si lo a...


“Lawm tur a awm deuh em ni?” Nui deuh pah chuan ka zawt a, chaw kan eikhawm chhan tur ka hre lo miau a!


“Awm êm êm lo e, i chawhhmeh duh zawng ka siam a. Kan eikhawm khat si a, insuah ngawt aiah kan eikhawm ve ang chu,” ka fanu chu a pi mal chunga lawn pahin a lo ‘yes’ ring kher mai. A pi te ina chaw ei nuam ti miau hek! An bulah a awm tam nen, a ngai êm êm reng tho mai.


“Chaw eikhawm tur hian chhan a awm kher a ngai lo,” ka nu chuan a tih zawm zat a.


A sawi dik reng. Inchung inhnuai ni mah ila, chaw ei khawm kan harsat hle. Hman hun inrual hek lo le!


Ka pa dawrah kal in, ka u Mapuia hi Private Company-ah a thawk a; Zan thleng thlenga an thawh chang a tam a, chaw ei rual chu harsa tak a ni. Vawiin erawh ka u a chawlh ve vangin kan ei tlang thei dawn a nih hmel. Hei vang hi a ni mahna ka nu-in chaw ei-ah min sawm ni.


Ka inbual zo chu tukverh bula kan ṭhutthlengah chuan ṭhuin, ral leh lam chu ka thlir a; Eng emaw hian min mawlh tlat a. Mak tak maiin ka lung a leng tlat pek, ka ngaih erawh ka hre si lo.


Ka nunhlui ka chhui kîr a, hetiang nun nei tura ka beih nasatzia kha! Ka chhungte bak hian an hre kher lo ang.


Ka tleirawl chhuah tirh aṭangin hmangaih pakhat ka nei ve a, pasalah hial ka nei nghe nghe. Ka hlim em em a, vannei ka inti hle a nih kha. Ani pawhin min hmangaih a, min hmangaihna erawhin rei a daih lo mai pawh a.


‘I tel lo chuan’ titu khan, kan inneih aṭanga kum hnih hnu lawkah min chhuahsan a. A hunlai khan ka nâ-in ka zak a, hrehawm ka ti hle bawk. Chaw ei thei lovin, ka mu ṭha thei lo a, min chhuahsan chhan ka ngaihtuahin ka hre mai bawk si lo. Ka ngaihtuah ngial pawhin tihsual ka neih awm reng reng ka hre lo. Mahse, a lung ka dum zo miau si lo a. Lehkha, hneh tak a pawh sawm ang maiin ka keh sawm vek a nih kha! Mahse, ka fanu avang hian mahni chakna inpe chawpin, nitin chakna thar ka neih theih phah thung a. Ka fanu hi awm ta lo se, tuna ka nun ang hi ka nei thei kherin ka ring lo.


Chutia, ka pasalin min chhuahsan hnu chuan ka chhungte’n min hruai haw a, an kiangah kan cheng ve ta reng a. A hnuah erawh an remti vak lo chung ka ngen luih tlat avangin inhnuai chu kan nufa luah turin kan siam a; chutah chuan kan nufa chuan kan cheng ve ta a.


Chhungte ngai lo leh thlakhlel loh vanga in dan rawt ka ni lo a. Mahni intodelh duh mi ka ni a; Chhungte tibuai lova mahni ke-a din ve ngei ka duh a ni. Chu bakah fanu nei ka ni a, ka fanu hian ‘A nu hi amah enkawl turin ka chak ṭha tawk a ni’ tih hi hria se ka duh vang a ni.


Electric Department-ah ka thawk a. Ka Green House aṭangin ka la lut ve nual bawk a, harsa lutuk chuan kan awm bîk lo.


Ka fanu pawh kar lehah school a lut ṭan ve tawh dâwn a, a phûr ve khawp mai.


A pa-in a chhuahsan khan kum a la tling lo deuh a, chiang fakin a pa hi hre lo a; a sawi ngai lo. A pa pawhin tlawh chu sawi loh, a rawn ngaihsak zui tawh lo hrim hrim. Min chhuahsan aṭang khan ka hmu leh tawh ngai lo a. Hmeichhe pakhat nen an tlan dun thu ka hriat bak kha, a chanchin pawh ka hre zui tawh lo. A reh vang vang mai.


Ka fanu ṭap thawmah chuan harh chhuakin, inchung lam pan chuan ka chho nghal a. Kawtah a lo tlu chu niin. Min hmu chu a ṭap uar sauh a, ka pawm nghal vat; a hnu lawkah a ṭap pawh chu a bang ve mai a.


Zanriah kan ei kham chuan ṭhu khawmin thingpui hâng kan in ho leh a. Hetianga chhungkua awm khawm a, inkawm hona hun hi kan nei thei zen zen lem lo bawk.


Ka chhungte chuan an dan ngai tê-in Pa Rêla, kan veng pathlawi chu min dem fiam leh a; Kei lahin ka lo nuihpui uâr uâr. A chhan pawh, Pa Rêla hi kan inah lo chuang kai ve fo ṭhin mah se, inngaihzawnna lam kan sawi ngai hauh lo. Kan pahnih a kan awm tawh chuan, Green House chungchang bak sawi tur kan hre lo.


A nupuiin a boralsan a, fa neiin a fate pawh nupui pasal nei tawh an ni fur. A fa tlum ber erawh college zirlai la niin a awmpui thung. Green House a nei ve a, thlai a nei ṭha ve khawp mai. Kan tuina a inang a, kan ti ti a rual a, kan inkawm thei phian.


Kan in a lo chuang kai fo tâk ah chuan, ka chhungte mai pawh ni lo, kan ṭhenawmte thleng hian min demin min chhaih ṭhin. Thudik kan hriat chian dun miau vangte pawh a ni mahna, huat enah kan en lem lo.


Nuthlawi chu ka ni ve ta reng mai. Kan hma lam hun kan hriat lohzia hi! Hetiang dinhmuna ka din hi ka inring lo mai pawh ni lovin, ka suangtuahna-ah pawh a tel ngai hauh lo. Thlawi tur hian hun rei nghah kher a lo ngai lo tih ka chian phah viau bawk.


Mi te'n Nuthlawi ti a min hmuhsit emaw min deusawh emaw ka duh loh avangin ka nun pawh keima tawkah ka uluk ve hle a. Min zuam mawlh ka hlau ṭhin. Chuvanga inkharkhip tlat pawh ka ni rêng a.


Mi ṭhenkhat hian pangngai taka an en laiin; Țhenkhat ve thung chuan, chhaih nawmnah nan hmangin, hmusit takin fiamthu thawh nan te an hmang thin. Hei erawh an hre lo, ‘Duh reng vanga thlawi kan ni bîk lo’ tih hi. Thlawi nih hi kan duh vang leh châk vang a ni lo tih hre mawlh teh se.


Ka chhungte hian pasal nei leh turin min ti fo a, ka ûksak lem lo. Mipa hnaih tum lehna ka nei tawh lo hrim hrim. Nuthlawi ni mah ila, min hêl leh min beisei chu an awm ve nual a; Mahse, mit mei ka hmuh duh ngai lo. Mampuii nen kan ei khawp ka thawk chhuak a, kan hlim dun a, ka duh tawk viau mai.


Ka fanu pawh School a lut ve tawh a, nuam a ti kher mai. A ni hmasa ber aṭangin ṭhian a rawn chhar thar nghal a, School kal pawh a hreh loh phah a, a ṭha viau mai. An School leh a ṭhiannu chanchin sawi nuam a ti viau mai. Ka Office bang pawh School-a an hun hman dan report-in min lo hmuak ṭhin.


Zingah ka thlah a, banah erawh ka nu-in a hruai thung. Kan in ațangin School a hla lo bawk a, a zia phian.


Ka haw hnuah Home Work ka tihpui a. Mut hunah School-a an hla sak te sa-in, a lam pah âwt âwt zel a; Mut hmunah kan hlim dun phian zel.


Ni khat chu, office ka chawlh avangin a School bang chu ka va hruai a. A ṭhiannu nen chuan inkai rialin an rawn chhuak ve hnak hnak a; an duhawmin an lawmawm dun kher mai.


Ka fanu-in min rawn hmu chu nui ver ver pah hian a kut zungchal chuan min rawn kawk vâ vâ a. A ṭhiannu chuan min rawn en ve chiah a, a nui sêih mai. A ṭhiannu bulah a nu ka nih thu a hrilh ni ngei tur a ni; An pahnih chuan an rawn nui phei sên sên a. An va han duhawm dun tak em!


“Mampui, tu nge i ṭhiannu hi?” ka bul an lo thlen chuan ka lo zawt nghal a.


“Ânu, Hruaitei nih hi,” a ṭhiannu en pah chuan min chhang a


“Hruaitei chu i va hmelṭha ve,” a bianga piai zeuh pah chuan ka ti a, ka thusawi chuan a tihlim tih hriat zetin a nui var var a.


“Hruaite, khawi vengah nge in awm? Tu nge lo hruai dawn che?” A chhungte âwm ang ka hmuh mai loh vang chuan ka zawt a.


“Ihh... Mission vengah kan awm a, âpa Ruata a lo thleng ṭep ang,” ṭha takin min chhang a; a ṭawngkam fel fai tak aṭang hian naupang fel tak a ni tih a hriat mai.


“Ânu emaw âpa-in emaw engnge an tih?” Eng nge maw ka hriat a, ka dilchhut viau le!


“Âpa chuan zingah min thlah a. Chhunah chuan office kal a ngai sia, a hman lo a, âpa Ruata’n min hruai ṭhin. Ânu chu (hnuai lam a bih tlat a) a thi tawh; Vanah a awm,”a ti chuai râih a, ka lo kuah nghal vat a. A nu chanchin a sawi lai khan, a ngaihzia a hmelah a lang miau a, ka lainatin ka khawngaih takzet.


“A nih chuan âpa Ruata chu kan lo nghahpui ang che aw,” boruak tih zangkhai tum chuan ka ti a, a thawk ṭha ngei mai. Lawm tih hriat takin a lu a bu nghat nghat a. Amah chauh a kalsan ringawt chu ka ngaih a ngam thlawt lo a ni.


A pa Ruata ni ngei tur chu a hnu lawkah chuan a rawn thleng ve nghal mai a. Traffic jam-a a tan avanga tlai a nih thu inthiam lo zeta sawiin thupha a chawi luam a. Kan lo awmpui a vang chuan lawmthu a sawi mawlh mawlh bawk. Rei kan nghah loh thu ka lo hrilh ve thung a.


Mut hmunah chuan Hruaitei chu ka ngaihtuahna a luah a. Nu tel lovin a seilian chu a ni a. A nu a mamawh tur zia te, a ngaih dan tur te ka ngaihtuah chuan ka lainatin ka khawngaih kher mai. A lo ṭhang lian zel ang a, a nu a la mamawh telh telh dawn si a. A chan chu ka fanu chanah ka’n dah a, ka tel lova ka fanu seilian tur anga ka chan ringawt pawhin ka hnuk a ulh ṭeuh mai.


“Nu, Hruaitei khan hmelṭha a ti lutuk che,” ka fanu thusawi vang chuan ka nui sak a. A pa-in min chhuahsan khan ka tuarin, ka taksa kha hmuh theih khawp khan a chhe hman a. Mahse, ka rilru siamin ka fanu-ah chauh ka rilru ka pe a, ani'n hlimna min thlen a; Chu chu ka taksa chuan lo duhin, a ngeih êm êm mai a. Ka nulat lai hre ho chuan ka nulatlai ai mah in ka nalh zawk thu an sawi ṭhin.


“Ani pawh a hmelṭha a lawm,” ka chhânna vang chuan a lo nui suk a.


“I nu ang nu ka duh ve a ti a,”a ti leh a. Ka nui tawp chiang kher mai.Nu awt ngawih ngawihin a awm si a, ka lainat zual sauh.


“Hruaitei chuan nu a nei lo a, kei chuan pa ka nei lo,” a thu sawi vang chuan ka en vat a, a pa chanchin a sawi vawi khatna a ni.


“I pute, I putea te'n an duat che lawm,”ka tih chuan a nui leh var var a, a thusawi kha a hre zawm lo tih ka hria. A pa chanchin ka sawi ngai lo a, a hre ngai lo. A pa chhungte khaw hranah an awm vangin an rawn ngaihsak hek lo. Ka phut lem lo bawk a, ka vui hran lo bawk.


Kan Department kan nawrh avangin office kan chawl a. Mampuii chu keimah hlirin ka hruai a. Hruaitei te pawh a pa Ruata te nen kan inhre ṭha ve tawh bawk a. Thingpui in te-in an rawn chawl ve zeuh zeuh ṭhin. A chanchin pawh ka hre ve nual tawh.


A pa chu Bank Manager niin, a nu-in kum hnih a nihin a boralsan a. A pa chuan a nupui boral chu a tuar hle nghe nghe. Hruaitei lo hi fa dang an nei lo a, a pi leh pu, a patea te nen cheng hovin, a patea hi doctor a ni thung. Pa Ruata hi an private driver a ni a, lângin a kal a, a thawhna a rei ve tawh hle tih a sawi. A pute chhungkaw ṭhatzia leh felzia a sawi nasain a fak ṭhin hle.


Ka nu, a dam ṭhat theih loh avangin Kolkata-ah in Check-up turin ka pa nen an kal a, ka nau tlawh pah an tum bawk. Ka u Mapuia chiah a awm dawn a vangin kan nufa chuan kan awm chho a. thla khat chawlh ka la bawk a. In lam rawn ngaihtuah lo turin ka chah ve mawlh mawlh a.


Mampuii school bang ka hruai a, Hruaitei nen an tih fo ṭhin angin inkai rialin an lo chhuak dun leh a. Chutah, Hruaitei chuan a ban chu rawn vai lauh lauhin ‘Âpa’ tih leh rawn tlan a rual a. Mampuii nen inkai an nih miau avangin Mampuii pawh chu a rawn tlan ve a.


Ka hnung ka’n lehhawi chuan, mipa sa ṭha nelh nawlh, sang lam, sunglass vuah, motor ngheng a ding chu ka hmu a. Nui sâng chung chuan a fanu lamah a kut a phar chhuak zeuh a; a chhelo kher mai. Engnge maw ka sawi le! A vawi khat nan mipa chhelo ka ti a nia, chu pawh, mi pa lehnghal; Pathlawi ngat!


Ka bul an lo thlen chuan Hruaitei chu ding ve ta lem lo chuan min tlan pelin a pa lam a pan nghal a. A pa chuan a sunglass vuah la thla-in a fanu lam pan chuan a rawn pen chhuak ve a. An intâwk chu, zo fahranin a fanu chu pawm kang nawlhin a biangah a chuk sak zeuh a; hmuhnawm ti zetin ka lo en reng.


Kan nufa chuan an lam pan chuan kan kal a. Hruaitein min hmuh chu “Ânu Muante, hei, keima pa chu,” a ti nghal a. A pa chu en lehin, “Mampuii te chu an nia,” a tih zawm zat a.

“Âpa, naktuk hi Mampuii birthday hi a nia, kan kal ve thei ang em?” ka ṭawng hma chuan, Hruaitei bawk chuan a pa en kar chung chuan a zawt a. A pa chuan mit san âk-in min rawn en a.


“A birthday lawmsak ve kan tum a, a lo kal… ni lo… aaa... in lo kal theih chuan kan lawm ngawt ang,” ka ti ve sap a. Engvanga ṭawng bah ta nuai nge maw ka nih teh hrep le!


“Âpa, kan kal ang ti raw?” beisei nei zet chuan a pa chu a en kar a. Lu bu nghut pah chuan, “I kal duh phawt te chuan le, Bawihte,”a tih chuan Hruaitei chu a lo ‘Yes’ rang kher mai.


Ka lam lo hawi chuan, “Kan lo kal dawn nia,” a tih chuan ka nui ver ver a. “Dar thum hunserh kan tia, kan in pawh a hriat kha,” Hruaitei melh zeuh pah chuan ka ti a; Ani pawh a lu chu bûk nghauh pah chuan “Ok” a ti ve sup a.


Kan fate an in-bye-bye hnu chuan kan kalsan ta a.


Mampuii piancham ni a lo thleng a. Zing kar atangin ka buai nghal char char. Tihtur neuh neuh lo awm ve bawk nen, ka indaih lo a ni ber. Kan ṭhenawm tleirawl pahnihin inchhung min cheisak hlauh zawk a. Ni lo se, hunserh hmain ka inpeih kher lo ang. An chei zawh hnuah pawh min pui zawm ta zel a, ka zangkhai phah viau.


Ṭhenawm hnai leh chhungte bak, mi hrang kan sawm vak lo bawk a. In pawh kan khat mawi tawk viau mai.


Hunserh hman zawh chuan Cake te zaiin, naupang lawm zawngin hun kan hmang zawm nghal a. Nuam an tiin an hlim hlawm khawp mai.


Hruaitei te pafa pawh an lo kal a. Zan thlengin an awm ve a; Hruaitein haw duh miau hek lo le!


Zan tirah mi nawlpui an haw hnu chuan, Mampuii te ṭhian dun chu present kan hawntir a, nuam an ti khawp mai. An nui leh har har ṭhin. An hmuhnawm dun takzet.



Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » November 3rd, 2019, 10:53 pm

Chapter-2

Hun a kal ve zel a, ka nu te pawh an lo haw tawh a. Kei pawhin ka hna ka zawm leh tawh bawk.


Kan fate vang chuan Ṭpa nen chuan kan inbe ve ta zeuh zeuh a. A tirah chuan a nelawm loh ka tiin a nui mawh ka’n ti khawp a(h)! Mahse, rin ai daihin a felin a ngainat awm phian a. A puitlingin belhchian a dawl bawk.


Kan innel ve tawh viau a, a fanu nen pawh an rawn leng fo mai. Ka chhungte lah chuan inngaihzawnna awm hawt si lo hian nei turin min ti leh ringawt tawh; Hahthlak hian!


An ina leng ve tura min phût tlat avangin, Mampuii nen chuan kan leng ve a. An in chu a nuam kher mai. In lian ṭha tak a ni a, inchhung pawh a faiin uluk taka enkawl a ni tih a hriat.


A nu leh pa chuan min lo chiau-au ṭha ang reng viau a. Ka tlangnel phah deuh sawt mai . Tar lutuk an la ni lo bawk a, an la chak ṭhat hmel viau. Chaw ei-ah min sawm a, ka lo hnial thung a. Vawi khat lennaa chaw ei nghal te chu; âwm ang lo em mai. Zak thei lo min lo ti viau thei, chi loh lutuk.


Chutia, nuthlawi leh pathlawi inkawm a; Inlenpawh fo ta chu, mi te'n an lo hre rang khawp mai; Min lo chhaih a, min dem fiam tawk lah bo lo. Chutah, kan chhungte chuan innei turin min duh a, kan inkarah lah inṭhian ṭhatna bak a awm si lo.


Tichuan, kan fate vang chauha inhria kha, kan chhungte inbe remin, innei tur chuan thu an ti tlu ta a. Han hnial ngial paw’n awmzia awm si lo. Ani lah chuan a hnial duh der bawk si lo. Tihngaihna ka hre lo kher mai. Ka chhungte ka la ngei ber ṭum a ni hial ang.


‘Kan fate'n nu leh pa an mamawh’ a ti a nih kha. A sawi chu a dik ve tho mai. Ka fanu-in, pa neih a chakzia hahipin a sawi ṭhin; Chhân ngaihna reng reng ka hre ngai lo. A ṭhiannu-in pa a neih miau avangin a awt ve te pawh a niang. A pa chanchin lah hrilh ngaihna ka hre si lo. A pa-in a kalsan thu ka hrilh thei ngawt si lo. Dawt hrilhin a pa a thih thu ka hrilh thei hek lo. Pa a neih thu hrilh ta ila, hmuh a duh ngei dawn si a! Chutih hunah chuan engtin nge ka tih ang? A pa chu a thi nge a dam, ka hre miau si lova!


“Kan inkarah hmangaihna chu sawi loh, induh tawnna tak ngial pawh a awm si lo,” ka ti chuai raih a. Dik tak chuan ka hrehin ka huphurh êm a ni! A hma anga ka tihsual leh ka hlau a, pasal nei leh tur hian ka la inpeih lo a ni ber.


“Khawngaihin, i ti tawp thei hrâm lo em ni?” ka ti leh sap a. Ka dinhmun anga ding hi chuan tihsual leh hlauvin pasal neih an chak bîkin ka ring lo.


“Thlawi ve ve inneih chu sawi neuh neuh a tam tih a nih kha,” ka tih chuan a nui ve suk mai.


“Sawi neuh neuh awm lo turin kan bei dawn a lawm. I huphurh mai mai a nih kha. Kan inkarah awm a awm kher a ngai em ni? I duh kher a nih chuan tun aṭangin kan inngaizawng anga a ni mai lawm. Inngaizawng hmasa a inneih pawh, inneih reina a ni lo tih i hriat kha. I tawn sual tawh vangin tihsual leh i hlau tih chu ka hria. Mahse, kan fate tan, an hmalam hun zel atan tih kha ngaihtuah la; I fanu hi miin ‘pa nei lo’ ti a an sawi i duhin ka ring lo,” a tih chuan sawi dik ka tiin ka pawmpui thlap mai. Ka fanu hi fahrah emaw pa nei lo ti a an sawi ka phal reng reng lo. Heti zawng hian ka lo ngaihtuah ngai miah lo. Anih chuan pasal chu ka nei ta poh a niang chu!


Innei tur chuan kan inbuatsaih ṭan a. A ho thei ang bera tih ka duh laiin, ani chuan a duh leh hauh lo mai. Kan han inhnial leh rih. A tawpah erawh ka duhna min zahsakin, simple thei ang bera tih kan titlu ta a. Mi pawh sawm zau lovin, chhungte hnai vai leh ṭhian ṭha te chauh sawm kan ti a.


Kan chhungte an phurin engkim an buaipui vek a. Mampuii leh Hruaitei an phur fal êm êm a, an phi cheng mai.


Harsatna em em awm lovin inneihna chu kan tlingtla ve hram a. Ka rin ai daihin mi an tam lehnghal. Ṭpa te chhung hi chhungkaw hung tâk mai an lo ni tih ka hriat leh meuh chuan, kan inneih ni a mi an tam pawh kha mak ka ti leh lo. In hriat chian loh theih ngei mai!


Pasal ka han nei leh ta chu a ni a. Ka hma hunah eng nge lo thleng dawn lah ka hre lo. “Min ring tawp rawh,” a ti a, ring tawp mai ang. Ka pasal hmasa anga min kalsan ve loh hram ka beisei. Nuthlawi nih nawn leh chu ka tan a zahthlak dawn lutuk tlat. Khaw eng ka hmu ngam lo ang.


Kan inneih zan chuan mut dawn lin ka lai deuh hûih mai. Khum khata mut chu ka hreh tlat pek a nih chu! Ka inbual hmasa a, a inbual lai chuhin ka lo mu fel ât mai. Zah zel tur ber kan fate lah room hrangah an mu daih bawk si, muhil der tawp mai ang.


A inbual zo lo chhuak chu ka hre lo der tlat a; mak chu min ti ve ngawt ang. Rizai hnuaiah rawn inthawlhin, ka kawnga min rawn kuah chiah chu, muhil der e ti lo chuan ka khawng awt mai. Ani pawh a nui nghawr dat mai.


“In thlah dul la, hahdam rawh. I inpeih hma chu ka khawih lo ang che; Mahse, ka insum rei theih ka ring lo,” ka beng bulah chuan a rawn ti sap a. Kei erawh mak tiin ka lo meng âk thung. A thusawi khan min ṭhawng kher mai. Kan inneih zan a ni a, lawiṭhat zan a ni lehnghal. Min khawih lo a min chhuah hi ka ring lo hrim hrim. Ka pasal hi ka la hre chiang lo takzet a nih hi!


Ka chau deuh bawk nen, ka lo muhil daih a niang chu! Ka harh leh meuh chuan, a âwm a bei chialin ka lo muhil chu ni in; Ka zak hnuhnawh kher mai.


Ka tho a, thingpui ka lum lai chuan, Mampuii leh Hruaitei chu an rawn tho ve a. ( Mampuii hi kan bulah a awm ve dawn a ni.) Hruaitei chu ka bulah lo kalin, “Ânu Muante, ânu tak tak i ni tawh dawn ti raw? ”


“Ni tawh dawn chiang e, i duh em?” ka tih chuan a lu a bu ve nghauh nghauh a. Ti khawp hian nu a lo awt chu a ni si a. Ka hnuk a tiulh zawk, khawngaithlak. A tan nu ṭha tak ni turin ka infuih mawlh mawlh a.


“Tun aṭang chuan ‘Ânu’ i tih a ngai tawh aw, Bawihte,” aw lo chhuahna lam chu kan hawi ṭhap a. Kut kuangkuah thâna lo dingin min lo en reng a, ka’n laih leh ringawt chu!


Hruaitei chuan a pa lam a pan nghal a, a pa chuan a lo pawm nghal vat a.


“I thei ang ti raw?” a fanu en pah chuan a zawt a, Hruaitei pawh chuan uar fahranin a lu a bu a, a sam thur nen a cute lutuk ringawt.


“A nih, han ko chhin teh,” a fanu en pah chuan a ti leh a. Hruaitei chuan tim dâi hian, “Ânu,” a rawn ti a, amah a lai deuh bawk nen a lei a chhuah zeuh a.


“Bawihte,” ka ko let ve a, a nui ver ver mai. A chhungte zawng zawngin ‘Bawihte’ an tih chuan ka ti ve mai a niang chu.


Kan inneihna pawh thla li a ni ve ta, harsatna engmah kan la nei lo. Thu inhmu lo a inhnial chang awm zeuh mah se; thinrimin kan inhau ngai lo. Ka hna pawh ka pasalin bang turin min duh viau mah se; Ka hnial thung. Ai kal ka lak takah chuan a sawisel zui lem lo.


Kan nupa kan hlim a, mak tak maiin nupa nunah pawh kan inmil phian mai. Ni e, nupa nun pawh kan hmang tawh a lawm. A insawi angin ka inpeih hun min nghak ngei a, min khawih ngai lo a, min nawrlui ngai hek lo. Mahse, kar hnih hnu kha chuan ka ngaihdan ka thlak ta a nih kha. Nupui nei reng siin ka pasal hi chaw bel bulah ṭam chhawlin ka awmtir thei lo a ni. Chutiang khawpa nunrawng chu ka ni tlat si lo a. Kha zan, kan zan hmasa bera a hmela hlimna leh lungawina awm kha, ka theihngilh leh tawh ngai lo ang.


Hmangaihna leh induhna piang lo mah se; Ka pasal zunah nitin hian ka uai thar zel a. A mi ngaihsakna leh duatna te hian a lakah pangchang lo thei lovin min siam a. Ka thlahlelin, a awm loh hlekin ka ngai em em zel a, amahah hian ka intulut telh telh mai zawng a nih hi!


Mampuii erawh ka nu te khua a har avangin an inah a awm thung a. Kar tawpah te a rawn riak zeuh zeuh ṭhin. A chang chuan Bawihtei (Hruaitei) pawh a riak phei ve ṭhin; Mampuii a ngai miau ṭhin si a. Kan chhungte ve ve hian tu mah mah hi en hranna an neih miau loh avangin kan fate pawh hian an ngai hle a, an kar tawn sek mai.


Ka muhil ka ṭhanharh chuan, ka pasal chu ka bulah a lo mu tawh hauh lo mai. Sana ka en a, zing dar 6:30 a lo ri tawh. Khaw nge a kal le? Enga ti nge min kaihthawh loh le? ti rilru neuh neuh chuan ka tho chhuak a. A morning walk ti dawn ila a lo haw a hun tawh bawk si, bakah tun lai chu walkout mumal lo hrim hrim.


Thingpui ka chhuan lai chuan, ka nu pawh a lo tho chhuak a. Ka nu nen chuan, eng eng emaw sawiin kan titi a. Chutah, hriat chhuah thut ka nei. Ka nu bulah ka sawi chuan, ṭha a tih thu leh a remtih thu min lo hrilh ve a, lawmthute a sawi luam a. A chhan pawh Bawihtei a nu thlan a hruai ka tum vang a ni. Inlak fel vang pawh ni lovin vawiin hi a nu thihcham a ni miau a. A nu thihni vel hi ka nu-in kan inneih tirh khan min hrilh tawh avanga hria ka ni.


Chaw ei hunah pawh, Ṭpa hmel reng reng a lang lo, kan ei san ta tawp a. Chaw ei kham chuan Bawihtei nen thlanmual lam pan chuan kan chhuak ta a.


Thlanmual kan thlen chuan Bawihtei nu thlan bulah chuan mi pakhat lo ṭhu a awm a. Ka han en chian chuan ka pasal ngei chu lo niin! Helai hmunah hian hmuh la inring lo hrim hrim. Chuan, mak tak maiin ka na tlat pek.


Kan thawm hriain a lo hawi chhuak a, min hmu chu min beisei bîk lo tih a hmelah a lang reng. A ṭhutna aṭang chuan rawn tho chhuak n eng emaw sawi tur nei ni awm tak hian a âng zuai a, a aw erawh chhuak tur a awm lo.



Bawihtei, a nu thlan bula chuan ka dinpui chu, thlan lung bulah chuan a va ṭhu a. A nu lung hi kan inneih dawn khan an phun chawp chûk chûk kha a ni a, a la thar khawp mai.



“Ânu, ânu nen kan lo kal a,” Bawihtei chuan a ti a. “Ânu hian min duat lutuk asin, Van aṭang khan min lo hmu ti raw?” a tih leh phei chuan kei, mi ṭahbelh tak hi ka mit chu mittuiin a tling pam mai. A pa pawh, a fanu thusawi vang chu nge ka bulah a ding khawng luah mai. Biak tumna ka nei lem lo, ka lung a awi lo a, ka lungawi loh chhan lah ka hre hek lo.



Bawihtei chu ka bulah lo pheiin ka ban a rawn vuan nghal a. Thlan lung chu enin, “Fanu ṭha tak min pe a, ka lawm e. Naupang fel leh duhawm tak a ni. I fanu leh i pasal hi ṭha takin ka lo enkawl ang, rawn ngaihtuah hauh suh,” ka tih chuan ka bula pa lianpui ding hian min rawn en vat a, ka lo hmuh lo der hmiah thung.



Bawihtei nen chuan kan haw a, kan hnunga min zuitu erawh biak tumna ka la nei chuang lo. Ani pawh ka lungawi lo tih a hria ni mahna! Min biak a tum chuang lo nge a inthiam lo a, min be hreh zawk pawh ka hre hrep lo e. Bawihtei chuan kan boruak hrethiam lo zetin min be tawn chhen lehnghal a, ṭha tak chuan kan chhâng ve zel a.



In kan thlen chuan ngawi rengin kan room-ah chuan ka lut a, min rawn zui lut ve zel a. Bathroom-ah lutin ka inngaihtuah a, ka lungawi loh chhan ka hre lo a, ka lungawi thei bawk si lo. A eng ber kha nge ka huat lah ka hre hek lo. Ngawi renga min thawhsan vang nge a nupui hlui thlana a kal vang khan ka lungawi lo pawh ka hre tawh lo e a; Mahse, ka thinlung erawh a na!



Bathroom aṭanga ka chhuah chuan khumah lo ṭhuin, ka thawm hriain a rawn hawi chhuak a. A ṭhutna aṭang thovin ka lam panin a rawn pen a, kei erawh ka dinna ngaiah ka lo ding reng thung.


Ka bul a lo thlen chuan ka ban tawn tawnah vuanin ka mitah min en reng a...


“Eng nge maw tal sawi teh,” rawn ti chhuak sapin, rilru hah ni awm takin a thaw chhuak halh a!


“Sawi tur ka nei lo,” teh thlawt a. A ni miau bawk si, sawi tur ka nei lo mai pawh ni lovin ka hre lo a ni.


“I ngawi reng a, a nuam lo a nia,” leh ngawt chuan... Ani paw'n min be bîk tawp si lo a.


“Nang pawh,” ka tih chuan a khi suk mai.

“I lungawi lo tih ka hria, thlan a ka kal i duh loh chuan ka kal tawh lo ang. Mahse, thinrim tawh lo la,” a ti leh sup a...


“Sawi theih ka nei hleinem, i hmangaih tih ka hria lawm, khap thei che dinhmunah ka ding em ni? I duh chuan i kal la; Mahse, i kal a nih paw’n mi te hriat loh tur in kal ang che. Chu ti lo chu, mi dangin an lo hriat chuan ka tan a nuam lo ve a. Lo dal che emaw tumna ka nei lo, i thu thu. Kan inkar te chu i hriat kha... fate vang chauh,” ka sawi hnem bawka thawk ka la halh a. Ani erawh ka thusawiah khan a lungawi lo deuh nge maw ni? a rum ngut thung. A lungawi lohna tur ka sawi âwm ka hre si lo a. A khawi lai ber kha nge a huat pawh ka hre lo min vawnna chu thlah thutin room aṭang chuan a chhuak nghal daih a.



[nshima]

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » November 3rd, 2019, 10:53 pm

Chapter-3




Chuta ṭang chuan, kan nupa inkar chu sawi thiam chiah si loh hian a zau a. Inah a awm tlemin kan inbe khat a, zanah ka mut hnuah lo hawin zingah ka harh hmain a lo chhuak leh daih ṭhin. A inthlakna a dah darh nuai ṭhin vangin a lo haw tih ka hre chauh ṭhin. Chhungte erawhin engmah min zawt lo, chu erawh ka lawm viau. Min zawt ta se, chhân dan tur ka hre dawn si lo.


Nikhat ka chhuak chu Puia, ka pasal hlui nen kan inhmu fuh hlauh mai. Hmuh ka beisei lo hrim hrim. A hmel chu hmân ang thovin a la ṭha a; Mahse, a cher deuh zawk. Kal pel mai ka tum chu ka banah manin Cafe-ah min luh pui a, eng ang paw'n duh lo eltiang mah ila; tha-ah hneh miau hek lo i!


“In ṭha em?”


“Ṭha mah mah?” a khi suk, ka luhlulzia leh sual thiam zia hre chiangtu kha ni miau hek.


“Mampuii ka hmu chak hle mai”


“I duh lo a, i kalsan hnu chu hmuh a ṭul lo, tum pawh tum suh” ka lo ti hmuk.


“Ka kalsan che u kha ka inchhir rêng asin,” a hmelah a inchhirzia a lang chiang hle.


Ka ngawi ta reng a, sawi tur ka hre hlawl lo a ni. In tur an rawn dah chu ka tem hlak a, ani pawh chuan a no chu a dawm ve a.


“Mamuan”


“Ti khan min ko suh,” ka lo ti hlar a; a nui suk mai. Min koh dan bîk a ni a; Mahse, min ko tawh lo se ka duh. A engmah ka ni tawh lo miau a.


“Khawngaihin min ngaidam hram rawh, lo kir leh ka duh a ni,” dawhkana ka kut ka dah chu rawn vuanin a ti sup a.


“A theih loh,” ka chhang rang kher mai. Ka kut chu a hmer salh a


“Eng vangin? Thil ka tisual tih chu ka hria, ka inpawm thlap. Thu thlukna dik lo ka siam vang khan tun thleng hian ka la inchhir reng asin. Khawngaihin, min ngaidam la, Mampuii nen in kiang a chen min phalsak rawh,” ka hmaa ṭhingṭhi mek chu ka en ngawt ngawt. Hetiang em ema inchhir hian ka la hmu ngai lo.


Ngen ngawl taka min dilna chu ka lu thingin, “A theih loh! Ka ngaidam che; Mahse, kan hnenah, kan kiangah erawh i cheng ve thei lo ang,” ka tih chuan a thaw chhuak ham ham a.


Ni e, ka ngaidam ngei a lawm! Ngaihdamna nei lo khawp a sual leh rilru chhia ka ni bîk hleinem. Mahse, pasal ka nei tawh miau a, ani nen a chen dun chu thil theih loh tawp a ni.


“Engvangin?” Beidawn hmel zet chuan min en a; Kei erawh chuan a hmel en reng duh lovin ka hawi sawn a. Kan bul vela mi te'n min en ṭhup tih ka hre ve chiah bawk. A hmel ka hmuh hian khawngaihnain ka khat a, hmâna ka lo hmangaih ṭhin vang pawh a ni mahna le!


“Pasal dang ka nei tawh,” ka thusawi chuan a ṭhawng a ni ang, ka kut a vawn chu a thlah riai riai a. A mita natna langin, a hmelah lungngaihna leh beidawnna, inchhirnain pawlh nuai chu ka hmu a, a nguai ruih bawk.


A ṭhutnaah ṭhuin a ngawi vang vang a. Kei paw'n sawi tur ka haihchham hle.


“Anih chuan ka tlai a ni maw? Tunah chuan dam chhungin ka inchhir reng tawh dawn a nih hi. Ka tihsual siam ṭhat nan hun ka nei tawh dawn si lo. Keimah vangin Mampuii chuan pahrawn a hrawn ta a nia,” a indawm kun tlat a, a ṭap nge ni a khur der der mai. He tiang khawpa mihring inchhir hi an awm thei ngai dawn em ni? Patling, mahni tawk a ‘pa’ inti ve ngat, a ṭap hial a ni si a.


“Umm… Amah vangin a ni ka neih ni! Pa a duhin a mamawh em em a, nang lah hmuh chu sawi loh i chanchin tak ngial pawh hriat tur a awm si lo. Pa a awt lutuk kha a ṭap hial ṭhin asin,” ka sawi zo chiah chu a rawn ṭap ri hawk a. Bawm tawt tak aṭanga rawn chhuak ang mai a ni, a aw chu!


“Ka bulah pawh a awm lo, a pi te'n an ngai a, an awmpui. A rawn riak zeuh zeuh a, a kar tawn chhen mai.” Ka tih zawm leh zat a. Engvanga hrilh hre kher nge ka nih pawh ka inhre teh hrep tawh lo e!


“Ka hmu thei ang em?” rawn hawi chhuak chunga a tih chuan, ka lu ka lo thing a.


“Hla tak aṭang chuan i thlir thei ang. A hnaihah erawh i awm thei lo ang, a pa i nih thu phei chu sawi reng reng suh. A rilru kan chawk buai lutuk palh ang; a ṭul hunah ka la hrilh mai ang, zep hlen ka tum lo. A duh a nih leh a la rawn zawng chhuak ang che, tunah chuan ni rih lo,” ka sawi a pawm tih hriat takin a lu chu a bu nghut a.


Ka ṭhutna aṭang thovin ka chhuahsan ta a.


In ka thlen chuan, ka pasal chu a lo awm ve teh tlat a. Mak chu ka ti ang reng, tun ang hunah a rawn haw ngai si lo. Zu rim a nam phei chu mak min tih zualtirtu a ni. Zu a in ngai miah si lo a.


“Khawnge i kal?” khuma ṭhuin min en reng a.


“Ka chhuak lawk,” ka thawmhnaw chu thlakin, awm hmun thawmhnaw chu ka inbel a. Dik tak chuan, keimah zawk hi thinrim a lungawi lo tur zawk chu ka ni asin. A hmeichhe kawp pawh hre lo ka ni bik lo, ka hre ve vek. Ka sawi chhuak duh lo mai chauh a ni.

“Khawiah,” a rawn ti hlur chuan min tiphu zawk nia.


“Bazarah,” chhân loh ka tum zet naa, a mit meng thinrim hmel ka hmuh chuan ka chhâng leh ta zawk a.


“Chuan?” ka lam pana a rawn kal chu a ding dat a.


“Chuan ka zawhin ka lo haw nghal,” min ringhlel ni âwm fahran a zawhna min zawt chu ka ngaithei dêr lo. Ka chhânna pek a duh khawp lo nge ni a kut hum ruhin a kekawr ip teah a zen lut daih a. Kei pawh lungawi bîk hek lo, thinrim tak chuan room chu ka chhuahsan ta daih a.


He mi hnu aṭang hi chuan kan inkar chu chhe tak a ni ringawt. Zu a rawn rui haw ziah a, thinrimna a zawng reng ṭhin. Kut êm chu min la thlak bîk lo.


Tlai tin a rawn rui haw a, zantin chhuakin, zan rei tak tak hnuah a rawn haw ṭhin. A awmdan chu zep reng theih ni hek lo, chhungte chuan kan inkar ṭha lo chu an man thiam ta rêng a. A chhan erawh min zawt lo; An hai der ni ber in ka hria. Ka nu erawh chuan siam ṭha vat turin min duh. Mahse, siam ṭha dâwn pawh ni ila, a thinrim chhan ka hre miau bawk si lo. Engtin nge hma ka lak ang?


Ka chhuah ve chhun lah hian Puia nen kan inhmu fuh thei phian lehnghal a. Be duh lo mah ila, min biak ziah ṭhin vang chuan ka chhang ve mai ṭhin. Huat theih turin min be ngai miau hek lo le! Amah huatna ka nei lo a, chuti rualin hnaih tumna ka nei lo bawk.


Tukin ka tho chu ka dik tlat lo, ka ni nghulh a, ka luak a chhuak em em bawk. Tunlai kan nupa boruak ṭha lo, ka mu tlem bawk si, thil ka ei thei bawk si lo hi ka pumin a tuar pawh a ni mahna. Ka taksa lah chu a chak lo em em leh nghal a.


Choka ah lutin fridge aṭanga sangha siam tur ka la chhuak chiah chu, ka pum in let butin ka uak ta vak vak a; ka luak thei der si lo. Ka nu chuan ka hnungah a lo chul a, ka thawm hriain a rawn tho chhuak a lo ni a. Nau ka pai a nih a rin thu a sawi chuan, ka pum ṭha lo a chhuak a, ka lo ti thung. Mu hahdam turin room-ah min hruai lut a. Khumah chuan min muttir hnuah min chhuahsan a.


Ka ngaihtuah a, tunthla ka la period miah lo. Nau ka pai a ni thei mai ang em? Keimah leh keimah chu ka inzawt a. Mahse, Mampuii ka pai tirh kha chuan ka khua te sikin ka zawi ngawih ngawih kha a nia. Ka pang ka dek, a sa bawk si lo, a awmzia chu ka khua sik lo tihna.


Ka tho a, a hma a test kit ka lei chu la -in, Bathroom-ah in test chu ka ti ta tho.


Ka kuta test kit chu enin ka pum chu ka chul a. He ka pum chhungah hian naute a lo insiam mek chu a ni si a. Darthlalangah ka inen a, ka nui sak, ka hlim em asin; hlim tak ka ni.


Nui var var chung chuan bathroom chu ka chhuahsan a. Ka pasal hrilh hlan mawlh ka nghakhlel. A lawm ve viau ang; Mahse, hrilh rih lo ang. A lo haw hunah surprise zawk ang. Ka chhungte pawh hrilh rih lo ang, ka pasalin hre hmasa phawt rawh se. Test kit chu khum bul dawhkan tê kan hun chungah chuan ka dah a. Ka pasal surprise pe tur chuan ka inbuatsaih ṭan a.


Tunah chuan naute kan nei tawh dawn a, kan inkar siamṭhat nan pawh hmang ila a ṭha phian ang..


Ka nu bula ka chhuah lawk tur thu hrilhin bazar lam ka pan nghal a. Bazarah chuan naute kawr lei tur chuan ka chhuak a. Ka taksa chau ngawih ngawihte kha an bo vek mai. Naute kawr ka lei zawh chuan in lam pan chuan ka haw a. Puia nen kan inhmu leh hlawl mai. Ka mood a tichhe dawn a; Mahse, ka hlimna chuan min luah hneh em thung si a ni.


In ka thleng a, bawm te tak te chhungah naute kawr pahnih lek ka lei chu ka thun a, a bawm chu ka tuam mawi leh a. Sticker-ah ka pasal hming ziakin test kit chu bawm chungah chuan ka dah bawk a.


Ka inbual fai a, kawr fual ama min leisak ngat chu ka ha a. Ka hmai chu simple thei ang berin ka chei bawk. Hlim tak leh phur ru tak si chuan ka pasal lo haw hun chu ka lo nghak a.


“Naute, i pa hian a duat dawn lutuk che. I awm tih a hriat chuan a ṭhawng viau ang; A lawm hmel ka hmu châk tawh,” ka pum chulin ka be mawlh mawlh a. Ka nghahhlelh vang nge vawiin chu a lo haw har riau a ka hriat chu.


A rawn haw ta ngei e. Kawta motor thawm pawh a reh hmak mai, kan pindan chhungah chuan ka lo nghak ran a. A rawn pen lut chu nidang ang bawkin a rawn rui haw leh tih a rim aṭangin ka hre mai. Ka ner sawk a; Mahse, kan inkar siamṭhat ka tum miau avangin thinrim lo phawt ang.


Mahni pawh a kal ngil hlei thei lo khawpin a rui a. Engtin nge a rawn inkhalh thlen theih zawk ni? A banah vuanin ka va chelh vat a. Ka kut thin thlak a tum chu hre lo derin, a ban chu ka darah la-in ka vuan tlat a. Ka kut leh lamin a kawngah chuan ka vuan thung.


Ka chetdan chu a beisei lo a ni mahna! Meng phi chiai chungin min en a. Ka taksa chu a en thla zel a, a mit a rawn kan ak a, ka lo nuih ver ver thung.



A ruih êm avang chuan muttir mai ka tum a; Mahse, ka inbuatsaih vek tawh si avang chuan khumah chuan ka ṭhuttir ta zawk a. A bulah chuan ka ṭhu ve nghal a. A ṭhu mai mai pawh a bu lawp lawp mai. Heti chung hian la surprise ka tum chu a ni sia; Â… a nih nih kan ni tawh a niang chu!


A hmaah chuan ṭhu thlain ka aw ka thian kharh a. Meng ṭha thei mang lo chuan min rawn en ve mai bawk a.


“Thil hrilh tur che ka nei a,” ka ti hmasa te te a. Engmah sawi lovin min en reng a, a mitah erawh hlauh thawnna ka hmu.


“Mahse ka hrilh hma che in, kan inkar hi sawi ṭha ang,”a hmel chu tlemin a thim ṭan a. “He tiang hian awm tawh lo ang, a hrehawm em mai. Kan inkar zau tawhzia hi i hria em? Fa kan nei a, an entawn tur ber i ni a. Hetia i rawn ruih haw reng te chuan an hmuh a tan pawh a ṭha lo. Khawngaihin, rawn rui haw tawh lo la,” ka tih chuan min en kar a. Engmah a sawi tâk si lovah chuan ka surprise pe tur ka ban lai chuan a ṭawng chhuak a. A thusawi erawh ka beisei loh thil a ni.


“Ngaihzawng nei lo la, ka rui lo a ni mai,” a rawn ti nih chu. Ka ban lak let pah chuan, a hmel ka en chu min lo melh ve reng a.


“Ka nei hleinem,” ka tih chuan a hmel chu ṭo haw tur ang maiin a dur khup mai a.


“Dawt sawi suh,” a rawn au ṭhawt a, ka phu nghek zui.


“Dawt a ni lo,” ka tih chuan ka lam rawn panin ka hmaiah chuan min beng ṭhuai a, ka thle sawk. Ka kut chuan, ka biang chu ka dawm a, rilru na takin ka en a. Ani erawh a hmelah inchhirna hmuh tur a awm lo.


Ka samah chuan rawn ṭhamin min kek dak awrh a, “Kha, i pasal hlui nen khan in inzui a, in inhmu fo a ni lawm ni? Min bum lo ang,” ti chhur chhur chung chuan chhuatah min paih thlu tawp a. Ka pumah chuan min chhir zui nghal a. Ka pum na lutuk chu dawmin ka vial ngawt ngawt mai.


Chutah, la duh tawk lovin ka samah bawk chuan rawn ṭhamin amah en thei turin min kuai dak a. A hmelah chuan thinrimna bak hmuh tur a awm lo.


“Min chhang ta che,” ka hmai bul chêtah chuan a rawn au a. Kei erawh rilru nat vangin ka mittui a luang ngiai ngiai thung. Hetiang khawpa min puh chhia leh min rinna a nei miah lo hi a na ka ti takzet. Thudik hrilh lahin, a ngaithla duh bawk si lo. Intihuaisen luiin, a mitah tak chuan ka en ngar a.

“Ka bum lo che, i nihna min puh let tum suh. Ngaihzawng i neih vangin nei ve turah min ngai miah suh. Thudik ka hrilh che a, i awih duh miau loh te chuan i thu lawm,” ka ti let ve salh a. A hmel chu a aia nasa zawkin a rawn dur a. Ka thusawi khan a tithinrim tih chiang reng.


“Min chhang let ngam a maw? Min va zah lo ve, min zah lotu hi eng atan mah ka ti lo che. Pasal te zahna chang pawh hre lo, chhuak nghal rawh; He inchhung hi rawn rap leh tawh ngai suh,” chhuata min nghah chawrh pah chuan a tho zui a. Kei erawh a thu sawi vang khan ka na hle thung. ‘Chhuak rawh’ han intih thlawt chu tlawm thlak ka ti a, na tur chuang ka awm tawh lo. Min duh lo chuan ka chhuak ang a ni mai. Ngaihzawng a nei a, min ningin hnawk min ti a, chhuanlamah min puh let ta zawk tih lah chiang reng.


Ka tho tur chu, "I la chhuak na nge?" tih leh ka puma rawn chhir chu a rual leh ta mai a. A na lutuk chu ka vial ngawl ngawl mai. Ka kap rawn lum pup aṭang chuan thisen chhuakin, ka malah chuan a luang thla a. Ni lo, kei hian nau ka chhiat thei lo ang. Mangang takin ka hawi kual a, ka pasal bu luk luk chunga zu um kenga khum lam pan bak hmuh tur a awm lo.


Kan room kawngkhar a rawn inhawng a, ka nu-in, “ Engti zia nge?” a rawn ti chul a. Kan thawm kha a hria a ni mahna. Chutah mangang tâka ka pa leh Rema (Ṭpa nau) a koh chu ka hre vuai vuai a. Thisen a chhuah tam vang nge ka khaw hmuh chu a thim ta riai riai a.





[nshima]

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » November 3rd, 2019, 10:53 pm

Chapter - 4

Ka harh chhuah leh chuan, damdawi inah ka lo awm a. Ka nu te chu khum bulah an lo ṭhu a, ka pa te erawh ka hmu lo. Ka harh tih an hriat chuan, ka nu te chu lawm tih hriat takin an lo nui ver ver a. Ka nu (min hringtu) chuan ka sam chulin ka harh chhuak a lawmzia a sawi sep sep a. Ka nu (Ṭpa nu ) zawk chu pawn lamah a chhuak nghal a.


Ka naute kha! Ka pum ka dap rawk rawk a, ka nu chuan ka che vel chu min lo en reng a, “Nu, ka naute kha,” ka nu hmel ka hmuh chuan thil awm dan ka hrethiam nghal mai. Ni lo, ka naute kha, ka chân thei lo. Ka ṭap khur der der chu, ka nu chuan min rawn kuah nghal vat a.


Kawngkhar inhawngah chuan, inla hrangin kawngka lam chu ka en vat a. Ka nu leh Doctor rawn inzui lut ka hmu a. Ka nu khan, ka harh velah Doctor ko turin a lo chhuak chu niin. A hnungah ka pa te pahnihin an rawn zui lut a.

Doctor chuan min check zawh chuan ka ṭhat thu leh ka taksa a chak țhat hunah damdawi in ka chhuahsan theih tur thu a sawi a, a chhuak nghal a. Ti chuan, ka muhil leh chu a ni nghal mai bawk a.

Eng nge maw inhnial thawm ri-ah chuan ka muhil chu ka harh a, ka mit erawh ka la chhing reng. An aw-ah chuan Rema leh Ṭpa an ni tih ka hria. Kut an inthlak deuh nge ni? A ri leh chawrh ṭhin. Muangchangin ka meng a, thawm awmna lam ka han hawi chuan, an unau chuan kut inthlak tumin an lo intin uaih a, an inmelh rum dun hle bawk.

“Duh tawk ru,” ka aw teh hrep chu. Ka aw hria-in an lo hawi rual țhawt a. Ṭpa’n ka lam rawn pan a tum chu Rema chuan a lo dang a; Mahse, a rawn kal tlang ta tho a. Ka khum bul a ṭhuin, ka sam, ka hmai zartu chu hui kian tumin a kut a rawn lek chhuak a, ka lo thle sawn vat a. Amah hnungchhawn zawng chuan ka mu saisir nghal bawk.

Nizan lawkah duh tawkin min sawisa a. Min duat ber ni awm zia zânga a lo lang ngam hi, zakthei lo ka’n ti mai mai khawp a. Biak chu sawi loh, a hmel hmuh ringawt pawh ka peih lo.

Ka awmdan chu Rema chuan a lo man thiam a ni chêk a niang chu! Ka lama rawn ṭhu pahin a u chu no lo zetin a melh a, “I hmuh ang hian a be duh lo che nih hi! Haw rawh, i ti na tam tawk tawh,” a ti chang fak a. A u lah chu a rum nghut ringawt.


Rema hian a u chungchang hi a lo hre reng a ni maw? Engmah hre lo angin a awm vel a. Â...tu-in nge mahni u te dik lohna sawi sawi duh ang ni?


Kawngkhar inhawng ri-ah chuan ka hawi vat a. Ka nu a rawn lut zui a, a hnu lawkah Rema pawh a chhuak zui ve nghal a. Rema a awm avangin ka nu chu a chhuak lawk a lo ni a. Ṭp-a ber kher chu hmuh a inbeisei lo nge ni mak ti hmel a pu! Ka nu chuan a fapa chu biak en-ah a en lo nge ni keimah ngawt chu min bia a; Pakhat lah lo ṭhu ngawi reng a.

Ka nu hian min ngaihsak êm êm a. Nu-in a fanu a duat ang maiin min duat a, fanu a neih loh vang pawh a ni mahna; Ka chunga a ṭhat êm êm ni! Fanu pawh nei se, hetiang bak chuan a duat chuangin ka ring lo. Ka vannei takzet!

“Haw rawh, rên rûn mai,” ka nu chuan a fapa chu a be ta nge nge. Ka chunga a chet dan hi a lawm vak bik lo te pawh a ni ang.

“I thiltih pawi zia hi i hria em? Nangmah vangin ka tû ka chân phah asin. Rui thle bûk bûk lo la, hetiang hi kan tawk lo tur. A pawi teh zawng a nih hi!” ka nu’n thawk la halh paha a tih chuan a ṭhu ngawi ngul a. Min en reng a, a ngaihtuahna awm ang ka hre lo nain; a hmelah erawh inchhirna leh pawi tihna a lang chiang hle thung.


“Ka tihpalh, ngaihdam tlak ka ni lo tih ka hria. Mahse, khawngaihin min ngaidam hrâm rawh,” ka kut vuan min a ti sap a. A hmelah hrehawm ti tak tak hmel a pu bawk. Ka nu chu damdawi lei ngai a awm vangin a chhuak lawk a, kan pahnih chauhin kan awm a. a vawi khat nan a ṭawng chhuak ve ta nge nge bawk.


Ka taksa mai ni lo ka rilru, ka thinlung thlengin a tina a. Hliam mai bakah thinlung ser min siamsak bawk. Ka tisa na aiin ka chhungril na hian min fân ngawih ngawih bawk. Ani lah chuan ‘ka tihpalh’ tih bak sawi tur a hre si lo. Amah vangin ka fa ka chân a, chu pawh a tihpalh vang maw? Awih awm loh lutuk Lalmuanawm, a thu sawi i awih chuan i â hlawm tawp a ni ang.


Ngaihdam min dil maw? Eng tianga nasa-in nge min hliam tih hi a hre lo tak zet emaw ni le? Ngaihdam te min la dil ngam zawk? Ka fa ka chân a, ka ngaihdam avangin ka fa kha a lo dam leh dawn a nih phawt chuan îhe lovin ka ngaidam hmak ang. Mahse, a lo kir tawh dawn lo.

Ka ngawi ta reng, sawi tur hre miau hek lo i!


Ka ngaihdam theih leh theih loh lah ka hre lo. Ka ngaihtuahna hi a blank a ni tawp mai. Ka suangtuahna, duhthu ka lo sam ve zawng zawng bo miau hek!


Fa kan nei ang a, kan fate nen infiamin; chhungkua hlim taka awm khawmin kan leng ho ang a. Hmun hrang hrangte tlawh kualin kan hruai chhuak ṭhin ang a. Thil engkim kan pahniha zirtirin, an tan theih tawp kan chhuah ang a. A ṭha ber zel kan tihsak ang chu tih nakalaiin ka suangtuahna chu mitkhap kar lekin boruakah a thamral ta daih si!


“Eng nge maw tal sawi la,” eng mah ka la sawi chuang lo. Ka ngawih reng tâkah chuan a indap ruk ruk a. Eng emaw hi a rawn phawrh a. Ka hma zawna a rawn lek chhuah chuan eng nge a nih ka hre chiang kher mai! Ka test kit ngei kha a ni.


“Hei hi tukin khan ka hmu a, ka hmuh tirh a ka hlimzia kha engmahin thleng ka phal kher lo ang; Mahse, hmuh tur i awm si lo. Ka zawng che a, ka pa-in damdawi inah i awm thu min hrilh chuan a ngaihna ka hre lo kher mai; Na i neih âwm ka hre bawk si lo. Ka pa-in keimah vang a nih thu a sawi phei chuan ka bo tulh tulh. Kut ka thlak che tih a sawi phei chuan mak ka ti tawp thei lo. A chhan chu, kut ka thlak lai che ka hre tlat lo atin ni! Kut thlak chu sawi loh kan inhau tih pawh ka hre lo a nia. Ka ngaihtuah ngial pawhin ka hre chhuak zo lo. Ina ka rawn inkhalh haw kha chu ka hre vuai vuai, a hnu-ah eng nge thleng engmah ka hre chhuak zo lo. Ka rui hle tih chu ka hria... Hon’ eng nge thleng? Eng thu-ah nge kan inhnial tih tal min hrilh la?” A sawi hnem bawk a ni ang, thaw a la halh a. Kha zan kha ngaihtuah chhuakin ka lu ka thing vak a. Ngaihtuah chhuah pawh ka duh lo, a rapthlak ka ti êm a ni.


“Damdawiin ka lo thleng a, naute kan chân thu ka hre leh zel a, hrehawm ka ti lutuk. Ka inchhir a, ka inthiam lo bawk. Awmzia awm tawh si lo, a thlen tur ang a thleng vek tawh si! Ka chhungte'n min huat phah bawk. Ka nuna ka la inchhir ber ṭum a ni hial ang. Hon’ khawngaihin, min ngaidam hram rawh aw,” ka ngawih reng avang chuan a rawn sawi chhunzawm leh a. Test kit chu ka ban a, ka en reng; Ka rai tih ka hriat tirha ka hlimzia kha... Ka biang a rawn lum pup a, ka mittui a tla tih ka hria. Ka naute kha ka venghim zo ta si lo a, a awm tih ka hriat ațang khan ka hmangaih ngawih ngawih kha a ni si a! Amah vanga hlimna ka tawn chhung a rei lo lua a ni e.


“He thil ka hmuh tirh khan ka hlim lutuk asin. Kan inkar siam ṭhat nan Pathian min pekah ka ngai hmiah. I hlim ve ringin surprise che tumin ka inbuatsaih a, chhungte pawh ka hrilh lo. A chhan chu, hre hmasa ber la ka duh vang a ni. Mahse, rui takin i lo haw a, ngaihzawng neiah min puhin kut hial min thlak a. Chu pawh duh tawk lovin in aṭangin min hnawtchhuak bawk. Surprise che ka tumna lamah min surprise zawk a ni,” ka tih chuan hmel buai nak hian min en a.


“Ka hnawtchhuak che maw?” A aw-ah mak tihna a lang chhuak hial mai. Ka lu ka buk nghut tâkah chuan a hmel chu a buai nghal nak mai; Hlauthawng hmel a ni a put ni!


“A pawi ka ti, ka ruih êm vang a ni. Min chhuahsan lo ang ti raw? Ni lo, min chhuahsan thei lo ang, a theih loh,” a ti hmuk. Mahni leh mahni inbia te pawh a ang zawk. Engtinmah ka chhâng lo, let erawh ka tum lo bur.

“Haw rawh, ka hmu peih lo che,” ka ti ta ringawt. Ka hmuh hian ka rilru na miau hek.


“Ka nupui damlo ka awmpui a lawm,” a tih chuan ka run kher mai. Ka melh rum nghek mai.


“Hon’… ti khan min melh suh, hrehawm ka tihzia hi i hmu lo em ni?" a tih chuan ka inthiam lo ve deuh. A hmelah a lang tlat si a. A hreawm tihna, inthiam lohna leh inchhirna te a lang zut a. Tlem chuan ka inthiam chiah bîk lo na-in ka ti lang duh kher lo.


Ka nu a rawn lut a, engmah ka sawi zui leh ta lo. Naktukah damdawiin ka chhuahsan theih tawh tur thu a rawn sawi chuan ka lo hlim hle! He hmun hi chhuahsan vat vat ka châk tawh takzet.


Kan bulah chuan a awm ve ta reng. Engmah phei chu a ti law. Ka nu paw’n haw turin a ti nasa, a duh der lo leh nghal.


Zanah pawh a la awm reng, ka nu pawh a beidawng a niang, a en liam ve ta ngawt. A fapa luhlulzia a hria a ni mahna le!


Haw a tum tâk si lovah chuan, ka nu chu haw a turin a insiam a. A chhan pawh Bawihtei a ngaihtuah vang a ni. A pa haw tum miau hek lo.


Ka nu a haw hnu pawh chuan kan inbe zui ta lo. Ka be châk lo tih a hria a ni chêk ang chu, min biak a tum bîk lo. Bakah, ka hnungchhawn miau a, min be hreh te pawh a ni ang.


Nurse-te damdawi min pek a thawk a, ka meng hlei thei der lo. Mutchhuakin min zêm chiai chiai a, kar lovah ka muhil ta reng a.



A tuk ka harh chuan, ka nu (min hring tu) nen an lo insiam malh malh a. Bathroom ka pan tur chu ka mi huat êm êm pa chuan min lo pui vat a. Ka nu a lo awm ve bawk nen, han hnial chi ni hek lo! Tur tawkin ka melh nghek a nih kha.


Bill an tih fel chuan chhuak tur chuan kan inthiar chhuak a. Ka chhuah ve meuh chuan, bungrua chu a motor-ah a lo dah vek chu niin. Ka nu lah, u Mapuia’n a rawn hruai dawn a, a nghak mek si a. A bulah engtin nge ka sawi tak ang? An makpa hian min hnawtchhuak tih hi an hre der si lo.


Pakhat lah chuan motor bulah min nghak reng mai si, zui ka tum lo bur.


Tawi khawmuang hret hret chungin ka nu bul chu ka thleng a, min lo be vat.


“Nu, i rualin ka lo haw ve thei ang em?” inthlahrung tak chuan ka dil sep a. Min rawn en chuan ka lo hawi sawn daih. A mit a zawhna awm kha ka chhân duh loh vang a ni.


“In pa-in a remti dawn em ni?” uar tawka ka lu bu a hmuh chuan a phal ve ta hram. Ka lawmna hian van a tawng hialin ka ring; lawm tak ka ni, lawm tak! A phal lo ang tih hlau reng rengin ka thin a phu dut dut kha a ni a. A remtih thu hriat meuh chuan hmui chip a har hle mai. Kan ṭhen ṭha mai lawm!


U Mapuia a rawn thleng a, motor-a ka luh chuan Ṭpa chu kan lam panin a rawn pen pawk pawk a. A lo thlen hmain ka u hi tlan vat vat se ka ti kher mai. Mahse, min rawn nang hman tho.


“Hei min zui phei a tum a. I remti tho bawk a, kan rual hian phei ve nghal mai se; I duh hunah i rawn hruai mai dawn nia,” a bul a rawn thlen chuan ka nu chuan a lo ti vat a. Min rawn thlek a, ka lo en duh loh deuh tlat vang nge ni, a thaw chhuak hak chu ka hre thei.


“A pawi hleinem, han awm dam se ka lo hruai dawn nia,” a ti ve mai bawk a. Haw ka tum lohzia hi chu hria se, he thu hi a sawi miah lo ang.

Kan tlan ta a, min en zui chu en duh lovin mit ka chhing ta tlat a.

In kan thleng a, khumah chuan ka mu nghal a. Ka taksa ala chak loh vang nge ni? Ka mut chhuak a la reh hlei thei tlat lo. A hnu rei vak lovah chuan ka muhil zui ta rêng a.


Ka harh leh chuan, Mampuii pawh a school a lo bang tawh. Min hmu chu a hlim ve kher mai, min lo ngai ve hle a niang ka bulah a tâp chawt mai. An school chanchin chu min hrilh leh malh malh a, a school bang chu mi pakhatin a biak ziah thu a sawi bawk. Tu nge ka zawh chian chuan, Puia a nih ka ring mai, ka nu la zawt chiang ila a ṭha ang.


Mampuiin a hriat loh danah, Puia hian a fanu bulah a pa a nih thu a la sawi lo tihna nia; Ka thawveng huai mai. A pa hre lo se ka tihna ni lovin, a rilru tih buai ka duh loh vang a ni. Zep hlen ka tum lo a; Tlemin han lian leh deuh se, thil hrethiam rual a nih hunah ka la hrilh em em ang.


Pasal pahnih ka nei tawh a, pakhatin min chhuahsan a, pakhatin min hnawtchhuak thung. A awmzia chu ka nuna mi pahnihte hnawl ka ni. Thlawi hnihna dinhmuna din hi ka hlauh ber ni mah se; Ka chungah a thleng mek si!


Nuthlawi nih ringawt ai chuan ‘thlawi hnihna’ dinhmuna han din chu, mi te min hmuh dan tur chu i hrethiam maiin ka ring. Eng tiang pawhin ka nun ulukin fimkhur pawh ni ila, ka mawi zo kher tawhin ka ring lo.


Thawk ka la halh a, Mampuii chuan min rawn en vat bawk. Ka lo nuih let tâkah chuan a nui ve sen sen a, a va’n duhawm chiangkuang tak!


Zanah chuan, Ṭpa chu Bawihtei hruaiin an lo kal a. Bawihtei chu ka bulah rawn ṭhuin eng eng emaw a sawi ve sap sap a. A hnu-ah Mampuii nen inkawmin room lamah an awm a.


Ka pa nen an titi chu ka lo ngaithla ve reng a, sawi ve tur ka hrie ve hlawl lo.


Min sawi dat dattu awm ah chuan ka harh a, Bawihtei'n min lo kai tho chu niin. Engtik laiin nge ka lo mutthih hman ni? Ka sawi tawh kha, mutthilh ka awlsamin ka mut a chhuak reng a, mut kham ka nei thei lo. Ka damdawi hnathawh te hi a nih ka ring, tiang em ema han men theih loh mai chu!


An haw dawn tawh chu lo niin; Bawihtei'n thlah a ngen tlat vangin kan inkai chhuak a. A pa chuan car bula dingin a lo nghak reng tawh. Ka ṭhut feltir hnu chuan kan inmangṭha a, an tlan chhuak ve nghal bawk.


Ka zing tho chhuak chu sitting room-a lo ṭhu kur vang chuan ka ding dat a. Min lo en reng tih ka hriat chuan Bathroom lam ka pan ta daih a.


Ni thum chhung chu nitin a rawn kal a, kan inbe ngai lo. Min biak a tum pawhin ka hel ngat ngat ṭhin. Ka chhungte hmuhah erawh ṭha takin ka chhang ṭhin.


'Chhuak rawh, he in hi rawn rap leh tawh suh' min tih min ṭhen ah ka ngai hmiah a, a ni erawh in a ngai ve lo nge, min koh tum angin a awm dêr lo. Min lo haw viau pawh a niang. Chutih rualin nitin a rawn kal lawi si.


Eng rilru nge a put ka hre nek lo e!





[nshima]

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » November 3rd, 2019, 10:54 pm

Last chapter


Kar khat a liam a, ka nu a rawn kal zawk tih loh chu tu hmel mah hmuh tur a awm lo. Ka pa erawhin chanchin min rawn zawt ve zeuh ṭhin.

Min hua tih hre reng chungin min hruaikir te ka beisei a nia, kei hi ka â takzet tawh a nih hi!


Bungrua la dâwn ila ka nu te’n engmah an hre bawk si lo; Keiin ka hrilh hreh ting tang tawh bawk si. Â... la hrilh ngei chu a ngaih hmel.

Ka dam ṭha tawh a, ka taksa pawh a chak ṭha tawh khawp mai.


'Tukin chu, tûkṭhuan ei laiin kan inṭhen thu hi ka hrilh ngêi a ngai ang.' Mahse, ka nu thleng sil ka hmuh chuan tûkṭhuan min eisan tih ka hre chiah. Min kaih thawh ve mai âwm a nia. Rilru-a vui nuah nuah chung chuan ṭhutthlengah chuan ka ṭhu a.

Ka piah a ṭhu pa lah hi biak châkna ka nei map lo. Kar khat lai a rawn lang tawh lo. Engtia tukin ber kher a lo kal nge maw a nih le?


“Chaw ei la, i inah chhuk ang,” a ti thum dût a


“Eng vangin,” ka ina kan chhukna chhan tur hi ka hre lo hrim hrim.


“Bawihtei nen kan awmpui tawh dawn che. I nute kan tibuai tam tawk tawh, ka enkawl che a hun ve tawh a lawm,” ka lo ner sak. Zak thei lo hi ka’n ti mai mai khawp a!


“In awmpuina leh enkawlna ka mamawh lo,” ka tih chuan a lo khi suk mai; Ka thu sawiah khan nuihzat tur a awm pawh ka hre lo.


“I mamawh emaw mamawh lo emaw pawh ni se; I nute nen kan sawi fel vek tawh. Chaw chu va ei phawt teh,” a tih chuan ka thinrim kher mai. Min râwn hauh lova engkim an lo tifel chu ka haw tak zet. Ka chhungte bulah min ṭhen thu ka sawi lo kha inchhirna-in ka khat. Hrilh ka tum veleh, rawn awm a tum leh lawi si. Ka hrethiam tawh bîk nek lo e!


Chaw eikham chuan ka inah kan chhuk thla a, a lo fai ṭha khawp mai. Ka nu-in a lo enkawl ṭha viau tih a hriat mai.


“Hon’… min la ngaidam thei thlawt lo em ni?” ka ngawih reng tâkah chuan a rawn ṭawng chhuak a.


“Haw rawh u,” ka ti hmuk. A zawhna chhânna nei miau hek lo i! Ka ngaihdam leh ngaihdam loh pawh ka inhre lo a ni a, hre tur pawhin ka la ngaihtuah chhin eih lo bawk.


“Min ngaihdam hma chu kan haw lo ang. Chu bâkah Bawihtei hian i awmna lo-a awm a duh hauh lo. Nangmah ngaitu naupang chu i tir haw mai anga maw?” Tifuh inti zet chuan min melh a.


‘Ka fa pawh ni lo; Ka buaipui a ṭulna ka hre lo, pa a nei che lawm’ tih ka châk kher mai! Mahse, ka ngawi leh ta zawk. Chutiang ti duh tur khawpin ka rilru a chhe tlat lo. Naupang, nu mamawh ngawih ngawihtu hian tihsual a nei lo a, tawrhtir ve kher chu țul ka ti lo.


“Nangmah kha haw rawh,” ka la ti fan.


“Hon’... i chunga ka chet dan kha a dik lo tih ka hria, hrehawm ka tiin ka inchhir takzet. Tunah min ngaidam mai thei lo anih pawhin ka dem lo che. Mahse, min ṭhen suh; Ni lo! Min kalsan suh, Khawngaihin! Min kalsan a nih chuan ka nun hian awmzia a nei hauh lo ang. A chhan chu, KA HMANGAIH LUTUK tawh che,” ka lo nui hak. Ka awih thei lo. Min hmangaih thu a sawi maw? Awihawm loh lutuk! A hnena ka kir nan a ti ve mai mai nih hi! Ani te chuan a nupui hmasa chauh a lawm a hmangaih.


“Hmangaih a? Awihawm loh lutuk! I nupui hmasa kha a lawm i hmangaih chu; kei ni lo in. Kan inzawmna te chu i hriat kha, fate vang chauh; Chu pawh a chat leh tawh!” ka ti let ve siah. A hmela natna chu ka hmu chiang kher mai.


“Kha thu kha sawi chhuak tei vet lo teh. Fate vang chuan kan inzawm ngei tih ka hria. Mahse, engtik laiin tih ka sawi thei kher lo, ka hmangaih che ni. Fate vang chauh a inzawm kan ni i tih khan ka na a; kan inkar pawh a zau phah a nih kha. Fate vang ni lovin min hmangaih ve la ka duh a. Mahse, i pasal hlui a lo lan tâkah khan, ka beiseina chu beisei bo mai a ni tih ka hria. I pasal hlui nen café-ah ka hmuh dun che u a; A hnena let tura a sawm che khan, a kiangah min kalsan mai hlauhnain ka khat a. A hnu-ah pawh ka hmu dun fo che u nen; tih theih ka nei si lo kha zu-ah ka ṭuan ta a ni. Mahse, a ṭhat loh zia chu hei, ka hre mek a nih hi!” a sawi hnem bawk a, thaw a la halh a. Ka ṭawng leh hma chuan a rawn sawi zawm leh a,


“Ka nupui kha ka hmangaih ngei a. Mahse, i lo langa, tunah chuan i tel lova awm ka zuam lo! Ka hmangaih hmasain thihna vangin min kalsan a. Nang leh zel chuan min kalsan ve suh. Ka hmangaih hi chân ka duh tawh lo a ni. Hmangaihte chân natzia ka hre tawh a, ka hmangaih nei let tur che hian eng pawh ka ti ang” a tih takzia a hmelah a lang chhuak hial.


“Puia chu ka nunhlui a ni tawh, i nupui ni reng chungin engtin nge a hnenah ka kal theih ang? Min rinna chhete tal nei ni la, hetiang hi a thleng lo tur! Tunah chuan ka duh loh leh ka hlauh ‘Thlawi hnihna’ dinhmunah ka din tâk hi! Mite chuan engtin tak min ngai ang maw?” ti sapin a hmel ka en chu hlauhthawng hmel a pu.


“Thawi hnihna dinhmuna ding turin, nang nen hian kan inṭhen reng reng lo. Kha! I ngaihtuahna aṭang khan ‘inṭhen’ tih leh ‘thlawi hnihna’ tih kha paih chhuak nghal ang che; ka ṭhen miau loh che vangin. Thawi thu-ah chuan, thlawi sawmna pawh ni la, ka hmangaih tho ang che. Ka ruih vangin thil ni lo lo ka sawi tih ka hria, ka hlata i awm ka phal ngai lo ang. I dam ṭha ang a, kan inah kan let leh ang. Inṭhen tih vel kha chu a ngaihtuah pawh ngaihtuah suh, ka ṭhen dawn lo che,” ka dar tawn tawna min vuan chung chuan a ti a.


“Ai… Ni lo, ka let thei lo... Ka kir thei lo. Saw in saw, rap tawh lo turin min tih kha; ka rap ngai lo ang. Hma lam hun chu ka sawi thei lo tunah chuan ka thei lo,” ka lu thing na na chuan ka chhâng let a.


“Chutiangte ka sawi maw?” Ka lu ka bu nghat a hmuh chuan pawi a tih hmel kher mai.


“Hon’ min ngaidam rawh, ka tihpalh a ni. Ka ruih vang vek, tun hnuah chuan ka rui leh tawh ngai lo ang,” min kuah nghal vawng vawng a. Kei pawh chuan tal emaw inlak hran ka tum lem lo.


“Hun tlem min pe rawh aw?” kan inkuahna aṭanga min nawr hlat deuh pah chuan a ti sup a, a sawi tum hrethiam lo zetin ka lo melh let kar a.


“Nakinah i hre mai ang, ngaihtuahna thar ka nei thut a. Mahse, surprise a ni rih aw!” Kka bianga piai zeuh pah chuan a nui var var a.


“Dik tak chuan ka ring leh thei che ang em ka hre lo a ni,” ti sapin hnuai lam ka bih nghal a. Thinrim khum reng a, biak duh lohte pawh ka duh. Mahse, he a hmela inchhirna hi hmuh nuam zawk zawk a ni lo a; hmuh a hrehawm takzet!


“Min rin leh na turin theihtawp ka chhuah ang. Min kalsan lo la, kan kiangah awm reng la a ni mai,” a hmel a inchhirna kha tumruhnain thlakin, amah ring tura min duhzia leh kalsan lo tura min duhzia a lang zut mai.


Min hmangaihtu, ka kalsan hlau a min chelh bet tlat chu kalsan lovin kan cheng ho ta pauh aniang chu! Min hmangaihtu kalsan duh tur khawp a nunrawng ka ni tlat lo.


Kar a liam a, kan la cheng ta ho zel chu a nia(h). A sawi angin ka natna turin engtin mah a awm ngai lo. A hma aia nasain min duatin min ngaihsak zawk. Amah ka rinna hlawh chhuah tumin theihtawp a chhuah a, a hlawh chhuak ṭan dêr chu a nih si hi.


Ka thinrimna leh ka huatna a dal tial tial a, a rukin a zûnah ka uai fel leh dêr tawh mai! Chu erawh, hrilh kher ka tum lo. Min hmangaihtu huat reng chu thil har tak a ni. Amah ka duhna lo pung telh telh erawh ka duh lovin, a hriat ka hlau fû. Zep reng thei ang i maw!


Chawlh a la a; Mahse, nitin eng emaw tiin a chhuak ziah. Rei erawh a ni ngai lo. Eng nge a tih lah hriat va ni suh!


Ka dam chiang tawh a,bin sekrek bak ka khawih a phal lo bur. Green house phei chu sawi ngam chi pawh a ni lo. A awm loh hlan chuhin a rûkin ka kal hrâm ṭhin.



Nikhat chu, Mampuii te school kal hlanin min hruai chhuak a. Veng pakhatah min tlan puiin, in pakhat kawtah chuan a ding a.


In chu hawngin a chhungah kan lut nghal a, a chhung chu a puiin a lian ṭha khawp mai. Bungrua engkim a awm sa thlap bawk.


Ka rilru-in “Tu in nge ni ang?” tih zawhna pai reng chuan ka hawi kual a, ka hma zawna in chahbi rawn khai va chung chuan “Welcome home” a tih chuan ka meng kawk; mak tihnain ka khat nghal. He in hi kan in tur maw?

“Awi Lalpa,” ti chûl chung chuan ka va kuah nghal thlawp.


“Lalpa chu ka ni lo deuh; Mahse, i thinlung lalpa nih erawh ka duh,” nui sukin, ril râih si-a min chhân chuan ka lai kher mai.


“Lai hma; Mahse, duhawm bawk si, zakzum em em si hian i luhlul zêk bawk si,” min kuah pahin a tih chuan a âwmah ka lo chum dat thung.


“Hon’ min kalsan loh avangin ka lawm e,” ka sama fawh pah chuan a ti sup a.


“Hei hi kan in tur a ni tak tak em? Min tihder lo ti raw?” a âwma bei hlân chung chuan ka ti thâm tiak a, ka hnuk a ulh tlat pek.


“Kan in liau liau a nih hi. I rawn let ka duh a nih chuan in thar ka ngaihtuah a ngai a ni lawm ni?” Min chhaih titih pah chuan a mit a kân âk âk a.


“Hei hi min surprise-na chu maw? Ka hrechhuak thut chuan ka zawt a, a lu bu nghut nghut n, “Eng nge ang i tih?” Min zawt let hlauh.


“Perfect,” nui ver verin, kut zungpui tipir vâ chuan ka chhâng a.


“Takzet em?”


“Umm… Surprise chiang e, in pawh duhthusam a ni. Engtin nge i hmuh mai theih zawk?” ka zawt lo thei lo. Hetiang in thar leh lian ṭha chu a man pawh a hniam chhe lo khawp ang tih ka ring thiam mai.


Ṭhutthlengah chuan insi rialin kan ṭhu a, a in lei dan velte a sawi ve sup sup a. A khat tawkin min fawp leh zeuh ṭhin.

An in pakhat erawh, “Rema’n nupui te a la nei ve duh ang a, keini chu kan chhuah tho tho a ngai dâwn a. Hetia in dan nghal hi a ṭha mai,” a tih chuan ka pawmpui leh thlap. In khata chênho chu neuh neuh a tamin, chhungkaw innghirnghona a thleng chawk ṭhin. Chu tah chuan, mo te bawkin mawh kan phur tlangpui bawk. In hrang chan hian in hmangaih a awl zawk miau a ni.


Mampuii school bang hruai a hun dâwn vang chuan kan haw ta a. Ka rilru a hlim veng veng mai.


Kar a vei leh meuh chuan in thar ah kan insawn lut fel der mai. Ka nu te’n in hrang chan an remti chiah lo nain Ṭp-a'n a hrilhfiah chuan ṭha an ti tho bawk si, an hnial ngam chiah bawk si lo.


Ṭp-a pawh a hna a zawm leh tawh a. Ka ngaiin ka thlahlel êm êm reng hi mak ka inti hial zawk. Ka natna turin a awm ngai lo a, min hmangaihna leh duatna, ngaihsakna bak hmuh tur a awm ngai lo. Min hmangaihzia a takin a lantir a, engkimah a dawhtheiin a zawldawh em em bawk. A zûnah uai loh chu thil har tak a ni.

Inah eng eng emaw ei tur ka siam ṭhin a. Mampuii leh Bawihtein nuam an ti leh pek, an pa erawh chuan tui ti deuh siin ṭul a ti tlat lo. “I hah mai mai, awm mai mai rawh,” ti deuh tlat nia.


Nula pakhat kan nei a, ka awl viau. Ka tuina Green House siam a remti lo a, ei ka siam mai loh nâkah; Awm awl tawp thiam hek lo i!


Ka hna pawh ai kal kha kan la chhawr ta reng.


Kum thum hnuah...

Mampuii leh Bawihtei pawh kum riat an ni ve tawh. Chhâng an neih hnu phei hi chuan an fel leh zual, school an chawlh hlek chuan an pi te inah riah an ngen ngei ngei. Kan chhungte pahnih lah hian an ngai a, riak turin an inchuh hial ṭhin. Anni unau lah hian an riahna tur zawk lehkhain an pawt ṭhin; fair an inti ve viau.


Fapa kum khat mi, harh zet mai kan nei a, ka hah pui ve phian. Ka nu te pahnihin min pui chung pawhin ka chau êm êm tho zel. A pa bulah chuan phone ngawt a ngen ṭhin. Phal lo viau mah ila, a ngen tak tak chuan an inpe leh nge nge ṭhin.


Mampuii pawh a pa (Puia) chanchin ka hrilh a, a la nau bawk nen engtin nge a dawnsawn ka hre chiah lo nain, a haw lo tih chu ka hria. A chang chuan a pa bulah riah zeuh pawh a nei a; Mahse, a khat viau. Puia pawhin a duatin a ngaihsak ve khawp mai.


Rema pawhin nupui a nei tawh a, ka nute nen an la cheng ho ta reng. Keini pawh kan leng phei deuh reng mai. ‘Ka rap tawh lo ang’ ka tih in chu ka tihchhan ber ka kiangah a awm miau avangin ka rap leh ta nge nge a nih chu.


“Ka nun a i lo luh vangin ka lawm e,” ka pasal duhtak chuan min fawp vang vang a.


“Kei deuh”

“Ka hmangaih che,” a mitmeng a hmangaihna lang chhuak chuan min en a.


“Nang aia nasain ka hmangaih che”


“Hmmm… Maw?.... Eng maw i sawi kha?” awih lo, lawm si, ring ngam chiah lo, mak tihna a hmelah a lang nûk mai. Ni e, ka hmangaih thu ka hrilh miau a lawm, chu pawh kum thum hnu-ah.


“Ka.... Hmangaih….. che,” chiang fek fawkin a mi a en kar chunga ka sawi chuan, a hmel chu hmuh theih khawp in a hlim a. A rawn nui chhuak hawk reng a!


“Ka nghah reizia i hria em?” hahdam hmel zet chuan min zawt a. Nui ver ver chuan ka lo bu nghat thung.


“Ka lawm e,” ti sup chuan min fawp a, ka lo chhang let vat a.



Ka pasal, na taka min siamtu, amah ka rinna hial min hlohtirtu kha tunah chuan a tel lovin ka awm thei lo a. A hmangaihna chuan min phuar a; A zûnzâmin min hipin ka uai dêlh dêlh a, amah ka rinna chu hlawh chhuak lehin; amahah rinna ka nghat nghet bur tawh mai.


Thlawi ve ve mah ni ila, nunhlui vang a buai kan nei ta lo.


“Thlawi mah ni la, ka tan chuan i ṭha ber,” min pawm kang lawp a, ka lo rak ṭhat thung.


“Nuthlawi ve mai min hmangaih vangin ka lawm e,” a nghawng a kuah pah chuan ka ti let thung.


“Kei pathlawi sual zet min pawm vang hian ka lawm fê zawk,” ka samah a rawn chuk zeuh a, sawi zawmin,


“Thlawi ve ve pawh a lo inrem theihin, a inhmangaih theih viau hi,” a nui suk a, khum lam pan chuan min pawm phei a, tlak hlau lvin a nghawngah ka uai ve ṭai a.


Ni e, thlawi ve ve mah ni ila, kan inhmangaih hnu chuan engkim a tluang purh a, harsatna kan nei tawh ngai lo. Fate chungchang ah pawh ‘I fa,’ ‘ka fa’ kan ti hek lo. A ṭul chuan kan hau-in kan zilh mai a, an ṭhatna tur a nih vangin kan ṭan in kan natpui ngai lo. ‘Ka fa’ a nih loh vangin kan duat lo bîk chuang lo. Ang khat vekin a ni kan en ni.


Tu pawhin, kan fahrin loh pawh mahni fahrin ang maia kan hmangaih theih chuan buaina tam tak a kiang ti ila kan sawi sual tam lo ang. Naupang chuan a tuar tam tawk tawh. Chuvangin, kan fahrin loh pawh ni se kan hmangaih tlat tur a ni.


‘Thawi ve ve innei chu sawi neuh neuh a tam’ tih pawh a dik lohzia kan chhungkua ka en hian ka hre bawk.



Nuthlawi emaw pathlawi emaw i nih vang khan indah hniam ngawt suh. Chutih rualin, i nun thlahdah chuang suh.


A TAWP TA





[nshima]




Ka story min lo chhiarsak a, likes and comments min pe tute zawng zawng chungah thinglung takin lawmthu ka sawi mawlh mawlh e.😘

Nangmahni vang liau liau in long story tih chhuah kan tum dawn nia. Kan dam a, Pathianin rem a tih chuan thla thar lamah tih chhuah theih beisei ila, chutih hunah chuan min lo chhiar sak leh vek dawn nia.

Ka tan hian in va hlu êm! Ka hmangaih vek che u😘❤️❤️❤️❤️

Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)