☆A MAK!!!☆ - By Dingdi Pachuau (Completed)

[Ngaia]

☆A MAK!☆ - 37


By Dingdi Pachuau



"Ka kianga i awm vàng chauha insûm thei ka ni, ka kal duh loh chhan pawh anni kha hmuh ka duh loh vàng a nia."


Ka thil tihtîrah khân ka inchhîr viau a; tunah erawh ka inchhîr ta lo. Ani hi chuan an inkâr siam țhat tumin a bei a, a hlawhchhamah ka ngai lo, a tum tal alawm. Chu chu ka duh ber a ni, buainaah a fihlîm tawh, ngaihdam a dîl tawh a, a tâwk viau tawh e.


"I ti țha lutuk, i fel thlâwt!"


Min pawt țhen leh rih a, ka mitah ngun zeta min enin," Ka rilru lâk pèn i tum chiang, a ni tiraw?" a ti a, mit pawh khap lovin ka mit chu a en tawn chhên a.


"I rilru tihhlim ka tum, bâkah, thil țha lo titute avànga hlim lo tùrin ka duh lo bawk che a," ka tih chuan," I tidik chiah! Hlim lohna ngaihtuah ka duh lo. Ka hlimna ber ka bula i awm chhûng hi chuan ka hlim zêl ang," tiin min pawm kâng nawlh a, keiin tlâk hlauvin a kâwngah ka bawp pahnihin ka kherh nghâl vat a.


"I ke kha-"


"A dam tawh!"


A hmaiin ka âwmbâwr chu a rawn nawr a, nui hul hakin a nghâwngah ka kuah a, a tukkhum sam chu na lo têin ka țhamsak nghâl bawk a.


"I nuih dàn kha a sexy ka ti!"


Ka'n nui lui leh hak a, ka pasal sexy tih dàn ber chuan awm ka duh alawm, ani tihhlim hi ka tih tùr a ni a, chu chu kan inkâr tițhatu tùr pawh a ni.


Lungawina zawng zawng, hlimna leh nawmna zawng zawng min pe ka ti lo thei lo, khumlaizawlah ni se duhthusàm! Min dawhthei êm êm a, a zei a, min kaihruai thiam a, min duat thiam bawk si, ka tân chuan 'Mister Perfect' a ni chiang alawm.


"I period tawh em?"


"A mak! I hriat ve reng hi, la period lo. A hma aiin ka period har hret, ka tai leh ka âwmbâwr erawh a na țhûm tawh," ka lo ti a.


"I period lo dâwn pawh a ni maithei asin."


"A insawn hla ve țhìn tho alawm. Taka, keini hi kan invêng miah-"


Ka hmui a rawn hup a," Kha thu kha chu sawi tawh miah suh! Kan pahniha hmangaihna rah chhuak chu ka hmu châk tawh asin," a ti sup a.



'Kan pahniha hmangaihna rah chhuak'. Ka thinlung chu hlimna chhiar sèn loh hian a rawn tuam thar hlawp hlawp ni maiin ka hria, ka hlim takzet, tûn ang renga hlim hi ni thei ila...


"Ka rai hma viau chuan min iai mai si ang? Ka dul hi a'n lian chho dâwn a nia, ka mak ngawt ang chu!"


Ka dul chûl pah chuan," A lo len deuh hun ka nghâkhlel zâwk, naute a lo awm hunah chuan ni tin zan tin ka bia ang," a ti sup sup a, a kut lum thar thar chu a nghat vang vang a.


"Ni tin zan tin i biak chuan eng thu nge i sawi zozai ang?"



"Lian thuai thuaia lo chhuak thuai tùrin ka hrilh ziah ang."


Ka nui ringawt. Naute chu a lo awt takzet a nih hi, keia duh dàn veah chuan rai rih lawk lovin han awm rèn ráwn ila, a kalna leh zinnaahte ka zui ve zêl thei ang a ka ti a nia; mahse, thu kan nei lo êm mai, Pathian thu thu a ni e.


Kâr tàwpah Nunoi nèn kan nupain ka nute tlawhin kan han haw chho a, ka sawi chhuah a ni miah lo. Amah zâwkin zin chhoh lawk a sawi zâwk a ni. Ka lâwm hle, min ngaihtuahin ka chhûngte thlengin a ngaihtuah phâk bawk a, an thil tùr kan leisakte chu kan pe a, an lâwm thiam khawp mai.


"In insêng nasa àwm si a, a inthlahrunawm viau mai. A làwmawm bawk si a," ka pa chuan a ti a.


"Mâkpa fel leh hmelțha neih man a nih hi," Nunoi chuan a lo ti vat a, Muanzuala ka va en vat a, a lo nui ve suk mai.


Tlai lama ka nuin pangpâr tui a pêk chuan ka zui ve vat a, ka rose phun kha a lo chawr nasa tawh mai a, a kuhmùm pakhat a lo awm vá tawh nghe nghe a!



"E, a pâr ve dâwn! A va làwmawm tak! Nu, hei hi chu ka keng thla daih dâwn, ka phun ve liau liau kha a nia," ka tih chuan," Keng thla rawh, a pâr a mawi alawm, a țâwi hunah kan tan ang a, kan phun sawn leh dâwn nia," a lo ti a.


Ina ka luh chuan Muanzuala hnênah," Ka rose phun kha a pâr dâwn a, keng thla daih ang aw," ka ti a.


Ani chuan,"Min ngaihtuah loh phah nân i hman dâwn loh chuan," a lo ti a.


"Nang chu 'top' i ni alawm."


Ka room hlui, a mutna țhìnah chuan kan pahnihin kan mu a, mu chung chuan ka naupan deuh lai chanchin chu ka hrilh a, ngun deuhin a lo ngaithla ve a.


"Ka naupan lai chuan ka tê thei lutuk a, ka pu chuan 'Sînte' ti hlirin min ko țhìn. Ka pu leh pi hian ni tin min awm ziah a, ka nu erawh hna thawkin a chhuak ziah țhìn. Ka pute nèna awmho kha nuam ka ti, min duat thei bawk sia."


"I pi leh pute chu khawiah nge an awm tâk?"


"An boral ve ve tawh. Kan têt lai ngang kha a nia, khatih lai khân han ui viau ngaihna ka hre miah lo a nih chu," ka ti leh a.


Ka nghâwng rawn thâwk khum lum ham hamin," I la naupang ve dâwn êm asin," a ti phawt a, chutah," I naupan laia i sîn viau țhìn chu a mak àwm ka ti, ka mitthla thiam miah lo che," a ti leh sup a.



"A ni tak tak, ka tleiràwl chhoh ațang chauhin ka chum ta alawm. Ka chêr tawh ngai lo a nih tâk hi, chèr leh chhin chu ka châk angreng," ka tih lai chuan ani ve thung chuan," Tunah hian i mawi tâwk chiah. Hei aia chêr leh chum tùr hian ka duh lo che, ka duh tâwk chiah che," a ti leh sup a.


"Ka va lâwm!" A lam hawiin ka inlet a, khua a la vawh deuh vàngin ka kuah nghet sauh sauh a, ka ke chu a mal kârah ka rawlh lût bawk a.


"I lum nuam bîk e!"


"Mipa ka nih hi."


"Nang hi chu, mipa rau rauah pawh i mipa bîk alawm," ka tih chuan a nui huk.


"I lakah chuan mipa tak nih ka duh fo rêng a ni," tiin ka hmuiah chuan a rawn fâwp a, kei pawhin rang zetin ka lo fâwp lêt ve nghâl a. Kan duhthawh dùn telh telh a, kan mut tirh lama vawt ti viau si kha a hnuah erawh a vawt ka ti ta țhak lo!


Pathianniah kan inkhâwm a, inkhâwm bànah thingpui in pahin kan titi a, ka nu chu Zorinite inneihnaa kan kal thlalâk ka phone-a mi chu ka entîr a, ka pa leh Muanzuala erawh kan piah deuhah chuan eng eng emaw sawiin an lo titi a.


"A nih, a nu leh pa an rawn phei ve em? In inneih khân an lo kal ve mang si lo va, hmuh ve hrim hrim pawh an châkawm alawm le?" ka nu chuan a ti sar sar a.


"Ka phone-ah hi chuan an lan ka va ring lo ve! Ka'n en chhin ve hrim hrim ang e," ka ti a.



Ka han zawng kual a, Muanzuala ka hmehsakah chuan a hnung lamah hmalam rawn hawiin a pa chu a lo ding ve niin, Muanzuala chuan hmu se chuan a thin a rim ngawt ang chu! Kei pawhin a lo lang tel tih chu hria ila ka hmet hauh lo ang.


"Hei hi a pa chu a nih hi, a nu erawh a lang ve lo, a pa pawh hi a lo lang fuh ve mai mai a nih hmel," ka ti a, phone chu ka pe nghâl a.


Thingpui chu ka dût hlak a, ka nu chu a ngawih tâk deuh rengah chuan ka en phei a, ka phone chu a lo la bih reng.


"A nu chu i hmu thei ta lo a nih kha."


"A pa hi a hming i hria em?"


Ka lo hre hauh lo a nih chu! Pasal pa hming han hriat loh chuh, ka nêp ve hrim hrim a nih hi.


"I hriat hnu ang i ti em ni a?"


Min chhâng hran lo.


Kan chhuk thlâk hnuah tlai khat chu Tea a rawn lang nawlh mai a, school kan bànna pawh a la rei vak lo.


"Lo lêng rawh, teh tlat che chuan! Nupui neih i ngeih char char riau ka lo ti a," ka lo ti vat a.



"Duhtak, zanriah ei tùrin min sâwm tak asin, ka lo mangnghilh daih a ni," ka beng bulah chuan Muanzuala chuan a ti sup a.


Tea chuan," Chaw in rawn ei dâwn maw le! In pa ka hrilh tawh kha, in lo kal lo ang tih ka hlau a, ka rawn kalchilh che u," a ti a.


"E, ni dâwn tak e! Rawn kal chu kan tum reng, in kan thlenna a la rei lo êm alawm," ka lo ti a.


"In lo kal lo ang tih ka hlau a."


Kan insiam a, motor kan keng. Tea fapa ei tùr kan leisak nghe nghe a, Zorini hmuh pawh a châkawm, Tea fapa nen chuan an innêl ve ang em aw?


Mahse, Zorini chu a fel alawm. Nêl taka a biak chuan ani, naupang chuan a lo nêl vatin a ring.


Kan boruak chu a nuam reuh phian. Tea fapa pawh kan thlen țantirh chuan a zak ve deuh a; mahse, Zorini chuan a chhaih thiam khawp a, min nêl ve vat reuh, an inkàwm ngeih nufa dâwn khawp e.


Anni pahnih an inkawm laiin Zorini chuan an room-ah min hruai chho a, an lo tinuam reuh khawp mai. Teate hi an rethei lo hrim hrim a, an in pawh hi a nuam viau rêng a ni.


"En teh, slipper ka lei thar a; mahse, ka duh lo leh deuh a, nei daih ta che," tiin polythene hi a rawn khai chhuak a.


"Ânu chuan a lehpèl a."


Zorini chu ka en phei a, nui sâng hian a fapa chu enin min rawn en leh nghâl a.


"Nia, kei chu ka ke a lian a, ka lehpèl daih a tiraw? Nang lahin i lo la thâwl bawk sia, Àpitei hi pe mai ila tiraw?" tiin a fapa (Tea fapa) luah chuan duat takin a tuaisak a.


"Ânu hian a slipper chu a lehpèl maw?" Ka nuih a za bawk sia, a țawngkam hman chu ka làwm bawk si, ka nui var var.


"Aw, ânu nèn chuan school-ah pawh kan kal tawh asin," a lo ti leh daih a.


"Nia, Duata hi chu school-ah ka hruai zêl dâwn, thu a âwih thei bawk si a, ka duat teh a nia," tiin a mal chungah chuan a pawm a.


"In innêl àwm hle mai," ka lo ti sap a.


"A fel alawm, bâkah, ka pasal fa a nia, ka fapa a ni bawk. Ka u ațang hian thil ka zir chhuak nasa a, a țha lam zêla nun ka duh. Mihring kan ni a, Pathianin a duh taka a siam vek kan nia, tu mah inhmusit thei kan awm lo rêng rêng," a ti barh barh a.


"A dik chiah alawm, i ti țha lutuk aw. Ka chhuang lutuk che, i u pawhin a chhuang ngawt ang che," ka ti a.


"Ka siam țha thei lo a nih pawhin tih chhiat kher hi ka tum lo. Kan hlim poh leh keimahni tân vek a ni a, kan bul hnai têah hlimna leh hlim lohna a awm reng a, hlimna lam zâwk chu ka hawi tlat a ni, a harsa bawk si lo va," a ti leh a.


He nu nun hi chu aw! Ka tluk lo takzet a ni.


"Ka pa pawh hi haw viau mah ila huatna nun neih hi ka duh tawh lo a ni, ka pa min hringtu a ni reng si a, eng mah a thlâk danglam theih loh. Ka khawngaih tawh êm êm zâwk a ni, a nun hman dàn ka en hian ka khawngaih lo thei lo, ka nu leh ka u ka khawngaih bawk."


A u mipa, Muanzuala nau kha a ni ngei ang chu.


"I pa hming kha ka theihnghilh daih a," ka ti ve zaih, tlêm chuan nuam ka ti lo ve tho, ka pasal pa hming han theihnghilh theih chu a mak viau maithei ; mahse, ka hre lo miau si a.


"Nunsiama maw le, ka nu chu Hmingliani, ka u mipa kha Lza a ni ve thung."


Hm, ka hre ta, ka nu khân a hriat zawng a ni maithei, a hming hi ka la hrilh ang e.


"Ti leh ta daih ila, Rose-i hi ka hmu khât ta riau, i u nèn hian an la thawk dùn reng tùrah chuan ka ngai a?" tiin ka zâwt. Muanzuala bulah chuan ka zâwt ngam lo, ka la thîk rengah a ngai palh ang, thîkthu chhia nih ka duh si lo.


"An thawk dùn tawh lo niin ka hria, eng nge a chhan phei chu ka hre hauh lo, eng emaw tak chu a awm a ni maithei. Rose-i khân in inneih hma khân vawi khat chu min rawn call ve ngei mai a, ka u hian an thawh dunna chu a titàwp a nih ka ring deuh mai mai a, ka u bula sawisak tùrin min ngèn a; mahse, ka u hi chu sawipui ve mah ila awmzia a awm hauh lo," a ti leh malh malh a.


"Eng thil nge thleng ang le?"


"Ka hre bîk miah lo, zâwt chhin la?"


Nia, ka la zâwt ang, a thinrim loh hrâm ka beisei bawk ang. Ka inrawlh lohna tùr pawh a lo ni maithei bawk a; mahse, ka hre châk zek zek.


Kan haw dâwnah chuan an fapa chu a muhìl tawh. Zorini'n a pawm a, nufa tak tak pawh an ang! Tea tân hi chuan nupui ţha tak chu a ni ngei ang, a nu leh pa leh chhûngte pawhin an ngaina ngei ngei ang, hetiang mo fel an nei hi an lawmpuiawm ka ti.


"An nufa hi hmuh an nuam asin," tiin Tea pawh chuan chhuang tih hriat tak hian Zorinite inpawm chu a melh zauh a.


"Nia, nupui i nei fuh a nia," ka ti ve zauh.


"Ka hria, a tâna tling tâwk thei tùr hian ka theihna zawng zawnga beih ka duh."


"Duat viau rawh."


Muanzuala toilet ațanga a lo chhuah chuan haw tumin ka ding ve nghâl, a tlai ve deuh tawh a, a hun tawh reng mai. Tea nu leh pate pawh an mu tawh a nia.


Haw kawngah chuan," Zorini'n slipper min pea, a fapa lah chuan ' Ânu chuan a lehpèl a' a ti mai a, ka nuih a za tak tak," ka ti a, slipper chu ka hmuh ve a.


"I va vànnei bîk!"


"Nia, ka duh chî tak a la ni zui; mahse, a dang ka la leisak ve ang. Min pe mah ni se leisak chu a phû ve tho alawm tiraw?"


"A phal a, a pe che a ni mai," a lo ti sup thung a.


"A nih, Rose-i nèn hian in la thawk dùn reng em?" ka ti ve daih.


A ngawi vung vung phawt a, ka lo zâwt ta kher kher chu ka inchhîr hman țêp. Min chhâng dâwn lo emaw ka tih hnuah chuan," Thawk dùn lo," a rawn ti thûm dût a.


"Engati maw?" Ka intihuaisen lui a, ka intiluhlul lui bawk.


"A tàwp vek tawh!"


Zawh zui zël chu ka ngam lo, sawi zui zêl a duh loh hmel si a. A duh hunah chuan min hrilh mai ang chu maw.





*A CHÂNG CHUAN CHANCHIN LÀWMAWM LAM I NEIHIN NANGMAH CHAUHIN HRE RAWH, MI DANG HRILH VE KHER SUH, A CHHAN CHU MI DANG HIAN I CHANCHIN LÀWMAWM KHA AN HLIMPUI VE KHER LO TIH HRIA ANG CHE*

[Ngaia]

☆A MAK!☆ - 38


By Dingdi Pachuau



Naupang an exam țan a, mahni tâwkah chuan ka buai ve phian. Answer paper ka en nghâl zêl, ka inhmakhua ve a ni, nakina ka buai loh nân.


"Dah tawh la?"


"Aw, pakhat chiah a ngai tawh a, ka'n tizo law law ang e aw."


Kan inneihna a la rei loh tehréng nèn, kan mut rual loh chuan 'Ka lung a lêng' zu ti tlat a! Zàna mut rual loh chu a duh ngai lo, khuma lo țhut rih pawh a duh chuang lo, answer paper ka en chhûng chuan ka bulah a lo țhu ve ngat ngat a ni mai.


"Engtikah nge an zawh dâwn?"


"Kârleh Nilainiah; mahse, matric hi an la exam lo thung a."


Kan mut hnuah chuan," I hna hi thawk lo ta la, pawi i ti ang em?" a tih chuan phâwk zet hian ka en hau a.



A thil sawi chuan ka ngaihtuahna a tikual thui nghâl khawp mai, ka hlawh hi tam lêm lo mah se khati chen kha ka lo thawk ve tawh a, nuam ka tih ve mai bâkah ka naute lehkha zir theih nân leh kei ngei pawhin intunnun nan ka lo hmang ve a, han thawh loh ringawt chu a dik thei dâwn em ni? Pasal neih țan dêk dêka hna han bànsan nghâl ringawt dâwn chuh...


"Engati nge? I lo ning em ni?" rilru nuam lo ru zet chuan ka ti sap a.


"Ning lo ve; mahse, nilênga inhmu thei lova awm hi ka duh lo a ni. I duh lo chung chu ka ti lui miah lo che, Nunoi a chhuak ve dâwn tawh tho sia, i aiah lût se, keiin hna ka thawh chhûng chuan thawk lo la ka duh a."


Nunoi chu a lût thei ngawt dâwn em ni? Tuna Principal hi a țhianpa ni tho mah se a tihchi dâwn em ni? Kei ka bâng laklawh tawh si ang a, Nunoi a thawk leh thei si lo ang a...



"Ngaihtuah kual duah lo teh, i duh lo chung chu ka phût lo che. Nang nèna awm dun tam hi ka duh chu a ni, keiin hna ka thawh theih chhûng chu thawk lo tùrin ka duh bawk che. Nang chu ka nupui i nih anga ina awma kan fate lo buaipui tùrin ka duh che a-"


"Mahse, fa kan la neih loh hi."


"Kan la nei thuai dâwn alawm."


Ka ngawi leh rih. Dik tak chuan han bànsan tawp kha ka hreh, ka naute ka châwm thei tawh dâwn lo tihna a ni dâwn asin, chu tak chu hrehawm ka ti dâwn.


"Ih maw, ngaih loh lamah lo ngai lo la, hetia pawisa tlêm tê ka lo lâk luh ve hian ka nauten lehkha an lo zir ve theih phah a, khawngaih takin chu chu hre thiam la ka duh-"


Ka kut chu a rawn chelh a," Ka ti lui lo che ka tih kha, i chhûngte i ngaihtuah tih ka hria. Tunah chuan ka chhûngte dik tak an ni ve tawh a, ka ngaihthah bîk a thiang hek lo. Lehkha an zir theih loh hlau miah suh, an zir thei dâwn. Anni bâk hi ngaihtuah tùr kan nei hlei nem, ka tih chhan ber chu ka bula i awm tam ka duh vàng a nia," a ti sup sup a.


Kei pawh a bula awm tam hi ka duh ber ve tho, hna thawk miah lova inawm heuh heuh mai theih ni se ka ti asin.



"Ngaihtuah țha leh ila tiraw? Tûn atân chuan theihnghilh rih ang."


A tûk ațangin ka ngaihtuah zui ta reng, ngaihtuah loh ka tum pawhin ka thei lo. Tuna a hna thawh ang hi a țha viau a ni ngei ang a, bâkah, a tuina a ni bawk a, a inkhâwl ve țeuh tawh ngei mai, chhûngkua pawh min châwm thei ngei dâwn. Ka naute mawlh chu, Muanzuala min chàwmsak vek chu a dik thei lo, a tihchi loh rêng rêng, ka pasal phurrit ka siamsak ringawt dâwn asin, a teuh lo mai.


Khami zàn bâk kha kan sawi leh tawh lo. A sawi chhuah leh tawh rih loh avàngin ka sawi duh bîk lo, a duh dàn ang chuan lo bânsan ta ila ka chhûngte pawh hi an awm thei tho ang; mahse, an harsa ve sawt dâwn asin, ka nu ka khawngaih. Ka pa lah hnahrâm vak a thawk thei si lo, Nunoi ber hian hna nei tawh se chuan ka bâng var var ang; mahse, a la chhuak bawk si lo.


"Naktûk chu Aizawla phei lawk ka ngai dâwn a."


A hna vàng a ni ngei ang, sawi mai tùr ka hre lo. A rualin ka phei thei dâwn lo chiang, naktûkah chuan ka subject an exam dâwn.


"Hna vàng a nia," a ti leh a.


"Ka phei ve i duh em?" tiin ka zâwt a.


Min en vang vang phawt a, chutah," I hman lo, school kal i ngai," a ti sup a.


Ka inthiam lo ringawt. Hetiang hi kan la tâwk zeuh zeuh dâwn, ani Aizawla phei a ngai țhìn ang a, kei lahin hna vàngin ka zui ve hman ngai lo ang, school chawlh laite a nih ngawt loh chuan.



"Nunoi ka hrilh tawh a, a riahpui ang che, min lo ngai viau ang tih chu ka hlau viau," a tih chuan ka nui sak, nia, ka ngai dâwn chiang sa.


"Nang pawhin min ngai ve tho ang."


Ka kâwnga kuahin ka beng bulah chuan," Dâwn chiang, phei loh ka duh a; mahse, a pawimawh viau si a," a ti thûm dût a, ka nghâwng chu a rawn nawr châk châk a.


"Zan khat chauh a niang tiraw?" Zan khat chauh pawh chu ka huphurh lâwk.


"Aw, ka thlen phei veleh ka ti nghal char char ang a, a tûk chhùn vêlah chuan ka zo thei mai ang chu," a ti leh sup a.


Ka khawngaih roh mang e. Motor-a tlàn chauh pawh sawi lovin a hna țûl chu a ti nghâl dâwn a ni sia, a bulah awm thei tal ila chuan a zia deuh maithei a...


"Kawngah tlân chak viau suh aw."


"Lo haw thuai ang che."


"Hmanhmawh tho siin muangchângin motor khalh ang che, i che sual palh hlauh ang tih ka hlau a nia."


"I lo haw hun ka lo thlîr reng ang."


Heng hi ka hrilh mawlh mawlh.


A tûk zîng hma takah a chhuak a, kan ințhen vawi khatna tùr a nih vàngin ka huphurh kher mai, eng mah ka sawi chhuak ngam lo nain ngaihtuahna thar hman ka ngai a ni, ani hi chuan a thil sawi kha 'aw' ka pawh loh vàngin a sawi lang duh tawh lo ang.


A awm lo chu ka ruak huai mai, mahnia tûkțhuan ei phei chu har tak a ni, a hmingin ka ei a ni mai. Ka ngaihtuah reng a, khawi lai nge a thlen tawh ang, min ngaihtuah ve tho ang em? A chêt sual loh hrâm ka beisei, tluang takin thleng se, a hna chu va thawk zo thuai teh se.



Ka call chàmchî. Ka rilruah a riak tlat a ni, a tlân chak lutuk ang tih ka hlau a, a hmanhmawh lutukna lamah a chet sual ka hlauhpui ru tlat a, ka rilru a nuam zân thei lo.


Tlaiah keimahin ka haw rak rak a, mal ngawih ngawih intihna ka nei a, ka ngai ngawih ngawih mai a nih chu. In thlen pawh chu ka huphurh ru hial mai, Nunoi rawn kal nghâl se chuan a zia deuh ngei ang, a bâng ve tawh ang chu maw.


Ka nuin min rawn call hlauh, ka rilru khawhar lai taka min rawn call chu ka lâwm kher mai. Muanzuala ka call ngam si lo a, a buai lai a nih hlauh chuan, bâkah, hna țûl awm thawh char char a duh dâwn si a, tihbuai loh ka duh a ni.


Muanzuala Aizawl phei thu chu ka hrilh ve a, Nunoi nèn kan riah dun dâwn thute chu ka hrilh ve luam a.


Ani chuan Muanzuala thil sawi kha hria niàwm hrimin," Bawihte, ani Aizawla hna a thawha nang heta i thawh si chuan in ințhen zauh zauh a ngai dâwn tihna a ni a, hetiang hi thil țha tak a ni lo asin. Lo sawisèl che u chu ka duh hauh lo nain hetiang chi-ah hian nupa inkârah neuh neuh a awm hma bîk, thil awm thei ka sawi a nih chu aw," a rawn ti a.


Ka nu thil sawi chu a dik ngeiin ka ring.


"I pasal kha duat la, hmangaih hle bawk rawh. I ngaihsak țhat kha a pawimawh, keini i chhûngte hi min rawn ngaihthah rawh chu ka ti miah lo; mahse, pasal i neih tawh chuan i pasal tâ i ni tawh a, amah kha a pawimawh hmasa ber. Pawimawh pakhatna a nih chu aw, chu chu nupui țha nihna a ni, i pasal i dah pawimawh thiam chuan ani pawhin a dah pawimawh ang che," a ti leh dap dap a.


"Nu, a nih leh, ka hna hi ka bànsan mai dâwn em ni? Tuna a bula ka kal ve theih loh chhan pawh hi ka hna vàng hi a nia," ka tih chuan ani chuan," E, puitling i ni tawh a, ngun takin ngaihtuah ang che. Ka thu hrilh che kha ngaihtuah lêt leh vek phawt la, thu tlûkna chu i siam chauh dâwn nia. 'Bànsan rawh', 'Bànsan suh' ka ti dâwn lo che, țha bera i hriat kha a pawimawh, chuan thu tlûkna i siamah chuan i inchhîr tùr a ni lo bawk ang aw," a ti leh dap dap a.


"Aw le, nu, ka lo ngaihtuah ngun ang e."


Thil ka hre chhuak zawk.


"E, nu, Muanzuala pahrawn hming kha Pu Nunsiama a ni tak e, a nau Zorini ka zâwt alawm, a hming ka vawi khat hriatna a ni ve tho a," ka ti leh a.


"Nunsiama...maw? A ni tak tak tiraw?" a rawn ti vat a.



"Aw, ni chiang e, dâwt min hrilh thu a awm lo, a ni chiang e."


Nunoi chu ka lo nghâk a, a lo thleng thuai. Kan pahnihin eirawng kan bâwl a, vawiin lama Michael-a nèn an inbiaknate chu min hrilh pah a.


"A bialnu hlui kha ka chhaih țhìn a."


A va naupanchhiattthlâk tak! Inngaizawng lang chiah si lo, inngaizawng tho bawk si leh mi dang thîk hun lai vêl chho kha, ka hriat thiampui tho mai.


"U Michael-a chuan training zawh veleha inneih mai a sawimawi a, keiin hlawh neih ve phawt ka duh a, ka tithinrim deuh hlek a nih chu. A rilru hi maw, a naupangchhia roh lutuk! Hetia en ang hi a ni miah lo, a thîkthu a pe chhe thei ropui! Kan training-pui, kan CR Puia a thîk ziah a," tiin a ner nâng nâng a.


"Thîk tùr a awm tihna a niang chu?"


"Asst. CR ka ni bawk sia, kan inbe zauh zauh lo thei si lo va, chu chu a thîk ziah, a buaithlâk thei a nia aw, a number hi min block-sak ziah. Chuti khawp chuan a thîk țhìn. Thîkthu chhe roh lutuk , a hmel nèn hian a inhmeh hlawl lo," a ti leh malh malh.


"An thîkthu a chhiat viau hi chuan min duh ve viau tihna a ni ve châwk a nia," ka lo ti a.


"Ani hi chu maw, mipa ka biak hlek chu a thîk ni maiin ka hria, vawi khat pawh kan chhuah dunnaah ka hmel hriat hlui ka hmu a, kan inbiak lai chuan ka kutah a chelh tlat a nih chu," a ti a, kei ve thung chuan," A hauh ve hle che a nih chu," ka lo ti awlsam leh thën a.


"Ka hre tho a; mahse, a upat ve tawh nèn a naupangchhia ka ti țhìn alawm."


Zànah chuan Nunoi chu kan nupa khumah chuan a mu duh lo ve ngei, 'A zahawm ëm mai' a ti tlat a, ka hnial fê pawhin awmzia a awm chuang lo, sofa-ah a mu daih.


Ka bula mu a awm loh vàngin ka khua a har, ka ngai. Tunah hian a mu ve tawh ang em? Ani kha a mu har viau ţhìn a nih kha, tunah dâr 9:30 a nia, a la mu hauh lo ang.


Ka text ta ringawt, phone a en huna a hmuh atán.


Min rawn chhâng rang khawp mai. Ani chuan min rawn text lêt lo, video call ngatin a ni a rawn call ni.


"Ka hman ve deuh chiah, rawn call che ka tum lai tak a nia, i mu tawh elo?" a rawn ti dût dût a.


"Mu țêp, i mutna hi a ãwl sia, ka thâwl lutuk!" ka tih chuan," Nunoi a lo kal nange? Nangmah chauhin maw i riah a?!!" a rawn ti nghâl.


"Ni lo, ani chu sofa-ah a mu, kan khuma mut hi a duh tlat lo alawm. I chau em?"


"Aw...chau," tiin a inla chau der a, a aw a tidanglam bawk a.


"Ka va khawngaih che! I lo haw hunah ka lo duat viau ang che, naktûkah chuan i tizo thei ang tiraw?"


"Zo ang, zo lo pawh ni ila rawn phei ka tum hrim hrim. Min ngai tiraw?"


Rei zet kan inbia, tàwp ka tum lo va, ani lahin a tum bïk bawk si lo. Dârkâr 1 chuang hlek kan inbiak hnuah ka titàwp ta ringawt, ka ning dâwn chuang lo va; mahse, amah ka ngaihtuah, a chau lutuk palh ang.


Ka thu tlûkna tùr chu ka chiang ta, ka chiang ta khawp mai.


A lo thlen hunah chuan ka ngaih thu ka lo hrilh mawlh mawlh ang a, ka hmangaih thu nèn. Bâkah, ani nèna hna avànga awm dun theih loh ka duh loh thu ka hrilh bawk ang. Heti tak hian ka ngai a, hrehawm ka tiin mut pawh ka muhìl thei lo a ni a, a bulah zêl awm ka duh tawh. Ka pawisa thawh chhuah tlêm tham tak chu kan pahnih tân chuan ka dah țha mai ang, ka ngai êm êm a, ani pawhin min ngai ve tho. Solve dàn a awm, ka hna hi bànsan ila chu chu kawng awlsam ber a ni.


Ka men rei deuh vàng leh ka muthilh theih loh vàngin zîngah ka thawh har phah lehnghâl a, zia lo tak chu a ni.


School-ah pawh a lo haw hun tùr mawlh chu ka lo ngaihtuah leh veng veng, ka thu tlûkna siam tùrah hian ka inchhìr loh hrâm ka beisei.


Ka thlen hmaa ina lo awm chu a duh loh vàngin min rawn lam vang vang, car chhûnga ka țhut luh veleh chuan eng mah sawi lovin ka fâwp nghâl, mi dang an lo reh tawh hlauh a, min hmu an awm lo ang.


"Ka ngai lutuk che a."


Min en dàn chu ka duh ngawih ngawih, ka luang liam zawih zawih a ni ber.


"Kei pawh."


Min ngai tih a sawi zak ngai miah lo hi ka duh êm êm țhìn. Mipa ve tâwk tak ni mah se min duhin min thlahlel a, min ngai a, a sawi chhuak hreh ngai lo.


Haw kawngah chuan inah a lût miah lo tih a sawi sup sup a, mahni chauha ina luh chu a duh lo tih a sawi tel bawk.


Ka nu thil sawi kha ka hre reng a, ka theih tâwpin ka ngaihsak a, ka duat bawk. Ka tlawn a ni lo va, ka pasal ka ngaihsakna ka tilang zâwk a ni, ka piang thar tlat sia!


Hna ka bànsan tùr thu ka hrilh lai chu mit khap hauh lovin min en reng a, hmangaihna mitin min en niin ka hre ber.


"Ka thil sawi vàng kha a ni tiraw?"


Amah en ràn chung chuan," Ni tho; mahse, i tel lova zan khat chauh pawh kha hrehawm ka ti, ka duh tawh lo. I bula awm ka duh zãwk," ka tih chuan a mitah chuan hlimna ka hmu thei.


"Ka lâwm e, i inchhîr hauh lo ang tih ka tiam a che."


Zan dang zawng aiin nupa nun chen pawh kan duhthawh a, ka hmangaih thu chu uar zetin ka sawi pah bawk a, zan dang aiin a danglam zak ka ti ngam chiah mai.


Tûn thla ang chauh a nih chu school kaina hun ka neih tâk ni. Matric exam zawhah chuan ka bâng vang vang tawh dâwn; mahse, pawi tihna ka nei lo.


*******


"Bawihte, he thil hi zêp ka tum țàng țáng țhìn; mahse, i laka thup hlen ka tum poh leh hei, thu dik chu a rawn hnai ta kuar chu a nih si hi. I laka zêp ka tum țàng țáng chu a theih ta lo, ka inthiam thei ngai dâwn si lo va, theihnghilh hlen ka tum a; mahse, a theih loh."


"Nu...eng thil nge ni?"


"Min dem viau em? Tûn thlenga i pa chanchin ka la hrilh ngai miah loh che chungchângah hian?"


Ka thin a phu dawt dawt mai!


"Nu, ka dem ngai lo che, ka nu i ni alawm, hmangaih taka min enkawltu," tiin ka chhâng a, ka pa tak tak hriat châkna chuan min tur ut ut ni maiin ka hria.


"Thu dik tak chu maw...Muanzuala pahrawn kha i patea a nih kha, i pa chhang chiah..."


Ka khawng awt ni maiin ka hria!




*MI A NUNHLUI AVÀNGIN JUDGE SUH, A NUNHLUIAH KHÂN A CHÊNG RENG BÎK LO A NIA, NUN THARIN A LO NUNG VE DAIH TAWH THEI ASIN*

[Ngaia]

☆A MAK!☆ - 39


By Dingdi Pachuau



"Nu...!!"


"Bawihte, min dem viau ang tih ka ring. Nangmah hringtupa ngei mai chu tu nge a nih ka hrilh ngai lo che a, min ngaidam rawh."


Ka patea chu Muanzuala pahrawn, sual ve tak chu maw lo ni a?!! Ka pasal Muanzuala nèn chuan thisen inzawm miah lo mah se kei nèn chuan thisen inzawm kan ni si, engtin nge ni ta ang?


"Nu...engtin..." ka sawi zawm ngam lo, ka thil hriat hian min țhâwng lutuk a!! Ka pasal hi thisena inzawm lovin ka cousin a lo ni reng a, chutiangin a naute nen phei chuan thisena inzawm dik tak kan lo ni reng tihna a lo ni si!!!


Ka duh lo, a ni thei lo ang.


An hriat chhuah hunah engtin nge ni ta ang? Kan inkâr hi a dang dâwrh dâwn asin, a dang lo thei lo ang. Ka pasal hi ka hmangaih êm êm a, thisenah kan inzawm chuang lo va, kan inkâr hi chu a pângngai thei maiin ka ring a...


A pângngai thei ang em? Pângngai lo ta se engtin nge kan awm ang? Min țhen daih ang em? A huat êm êm chu ka patea lo ni rengin thisenah lah chuan inzawmna kan lo nei reng si.



"Tunah chuan engkim ka hrilh tawh ang che. I pa nèn khân kan innei lo va, dik tak chuan amah ka duh ang khân min lo duh ve lo a ni, ka thianghlimna chauh kha a lo duh a. Ka pai hnuah che khân bialnu nei reng chungin min lo kawp a ni tih ka hre chhuak a, ka rilru a nâ asin. Tihtlâk daih che kha ka rilrûk nghe nghe a; mahse, tihsual nei hauh lo i ni si a, kan thil tih avànga nangin i lo tuarna tùr kha a awm lo va, ka ti thei ta lo a ni."


"Ka thinrim avàng chuan i pa chanchin chu ka ngaihven zui duh lo va, a chanchin pawh ka hrilh duh hek lo che. A chhan chu i pian hma hret hian a boral ta hlauh mai sia, ka hrilh duh lo ta char char che a ni. Hetiang hun hi a la rawn her chhuah ka ring rêng a, a chhan chu i pa nèn khân kan inzui nasa ve a, an inah pawh kan chetla nasa a ni; mahse, nang ka pai hnu che khân kan khua (Haulawngah) ka haw ta daih a, i pa a boral tih ka hriatna pawh chanchinbu ațangin a nia, a pawi ka ti takzet a ni."


A ngawi ta vang vang a, ka thil hriat chuan ka rin aiin min țhâwng tawh lo zâwk! Ka ngaithla mawp mawp mai a ni, lo inrawlh pawh ka tum lo.



Mahse, a ngawih rei deuh hnu chuan," Nu, a nih ka patea tùr chuan min hmuh khân min hre chhuak ang em? A nih loh tal pawhin, i hming hriaa i fanu ka ni tih a hriat hnuah a u fa ka ni tih a hriain i ring em?" tiin ka zâwt a.


Min chhâng nghâl lo va, a ngawih leh deuh vang vang hnuah chuan," Hre ngeiin ka ring, a chhan chu i pa khân a sawi ngeiin ka ring tlat a ni. I pa i chhùn ve tho bawk si a, a hre ngei ang," a tih chuan ka thaw hak a.


Ka hlauthâwng a ni. A u fanu ka ni tih a hriat chuan eng thil nge ka chungah a tih duh ang le? A u fanu ka ni tih sawi chhuak ta se...


"Bawihte, a pawi ka ti khawp mai. Lo hrilh daih tawh tùr che ka ni a, ka thiam loh a ni, ngaihdam tlâk ni pawhin ka inhre ta lo hial mai," a tih sap sap chuan ka khawngaih takzet.


"Nu, a pawi lo, thu dik chu lan chhuah hun a awm țhìn alawm, ka thiam lo miah lo che, ka nu i ni a, min chawi liantu i ni bawk, ngaihdam tlâk lo thil lah i ti hek lo. Huaisen takin min hring chhuak a, țha takin min enkawl bawk. Nu, min enkawlna zawng zawngah làwmthu ka hrilh che, nu zawng zawngah i țha ber," ka ti duah. Indema awm tùrin ka duh lo, bâkah, min hrin chhuah leh min enkawlna kawngah làwmthu ka la hrilh ngai lo va, hun remchâng a rawn inher chhuakah ka ngai.


Kan inbiak zawh hnuah chuan ka ngaihtuahna a vâk kual nasa lutuk. Ka patea tùr chuan min hre chhuak tawh ngei àwm si a, a chhan chu a fahrawn nupui chanchin chu an chhûngkuaah pawh an lo sawi ve tawh ngei ang a, engati nge a la sawi chhuah miah loh le? Muanzuala chungah a sual hle si, remchânga hmangin sawi chhuak ta se, chhûngkua kan darhsarh vek thei dâwn si a, eng vànga a ka la chîp tlat nge a nih le?


"Thil i ngaihtuah nasa vung vung mang e."


Ka phu zawk, ka thil chhuan so bawrh bawrh pawh chu ka lo hrechang miah lo a lo ni!


"Ka thil sawi chhuah chungchâng kha a nih chuan i inchhîr leh deuh tihna a ni em? Theihnghilh daih rawh, i duh chuan i thawh zawm thei tho aw, min vêngthâwng suh," a rawn ti leh duah a, ka bulah dingin ngun zetin min rawn en a.



Nuih sakin," Ni lo ve, thil dang daih ka lo ngaihtuah kual mai mai a, i lo lêtna a rei tawh em?" tiin ka zâwt a.


"Hm, ka rawn luh pawh kha i hre lo maw? I thil ngaihtuah chu a namai lo tawp ang le, han sawi la?"


Ka chawhmeh chhuan chhìn chu ka hawng a," Sawi chhuah chi pawh a ni lo, a namai lo lutuk a," ka tih chuan a chal chuan ka lu rawn nawr datin," Thurûk neih awih loh," a ti thûm dût a.


"Tuna mi hi chu a ril lutuk a, kei ngei pawh hian hriat ka duh lo, hriat loh ka tum mêk."


Thu tak ni tho si fiamthu angin ka sawi chhuak. Ni e, hriat loh ka duh takzet, a mi huat ber mai fanu ang thàwthâwng ka ni si a, engtin nge ani hian a ngaih ang? Min țhen duh hial ang, ka ring. Chuvàngin, a bulah hian engtin nge ka sawi chhuah ngam ang le?


"A țha lo hle a nih dáwn chu, thil țha lo hi chu theihnghilh daih tùr."



Theihnghilh ka duh, theih ni se chuan; mahse, thil theih loh hulhual a nih si hi, tuin nge a pa thisen chu amah ațang nâwt reh thei ang le?


Mutnaah chuan hnung lam ațang hian ka zakah a bân rawn rawlhin duat zet hian min kuah a, ka nghâwng chu a biang hmul chuan a rawn nawr za mar mar a.


"I biang hmul leh khabe hmul hi i ning ve ngai em? A hrehawm i ti em?" ka ti sap a.


"A zâ i ti chiang."


"Ti e, thlasik a zo tawh ang a ni a, khawlum tak tak hunah chuan i mêtin ka ring tlat," ka ti a.


"Thu ka tiam kha."


"Nia, i thutiam chu eng nge a nih ka hre hauh lo nain mêt daih tawh la ka ti, vai putar a ti ang che ka ti deuh tlat. Tlangval hmel țha tak hmel kha ka hmu leh châk, tûn nipuiah chuan mêt hrâm la, chuan thlasikah i zuah leh ang a?"


Ka nghâwng rawn thâwk khum lum ham ham pah chuan," Tunah khân ka thutiam chu a tàwp ta chiah, nang hian mêt tùra min tih hunah chauh ka mêt ang tiin ka tiam a, i sawi ta chiah, naktûkah ka mêt nghâl ang," a ti sup a, a kut chuan ka dul a chûl pah ruai bawk a.


"Min ngei em?" ka ti sap a.


"Engah maw?"


"Mêt tùrin ka duh che sia?"


Ka beng seh zauh pah chuan," Ka lo nghâk char char zâwk maw le," a ti leh sup a, chutah ka nghâwng fâwp lehin," I rimtui thei chem chem mang e, taksa fai ser sawr rim hi ka ngaina," a ti leh sup sup a.


"Ka lâwm e."


A hnu daihah a âwm nghèng rial chuan ka mu dar dar a, a dul sek deuh țalh chu chûl hauh hauhin," Ih maw, thil ka zâwt ang che aw?" ka ti sep a.


"Um."


"I sawi duh loh chuan min chhâng lo mai la aw?"


"Um..."


"Engati nge Rose-i nèn khân in thawh dun tâk loh? Chuan, engati nge i pahrawn hian a mil loh êm êm che ni? A pahnihna hi chu min hrilh loh pawhin ka hre thiam tho ang che," ka ti leh a.


Ka lo hriat ve a țûl a ti lo maithei; mahse, hun kal tawh a nia, pawi a ti lo tùrah ngai ang.



"I zawhna pakhatna chhànna, min ngaihzàwn tlat vàngin. I zawhna pahnihna chhànna, Rose-i ka ngaizâwng emaw a tih vàngin. A tâwk em? Ka chhâng zo tawh chein ka hria," a ti sup a.


A chhànna min pêk avàng chuan ka melh chho há a, ani erawh chuan in chung lam hlîr a lo melh thung.


"Ka zâwt zêl ang che aw, Rose-i kha a chhe lo hle si a, engati nge i ngaihzàwn ve mai loh?" ka ti leh, ka hre châk êm alawm. Zorini lah khân a duhpui viau tih ka hre bawk a, min hrilh nghe nghe kha.


"A tìr têah a pa hnênah thu ka tiam thlap a ni. Kei chu eng mah lo mai ka ni a, mi hausa ka ni lo va, mi hausa fapa lah ka ni hek lo. Anni chu an hausa a, a tân chuan eng mah lo mai ka ni. A pa chuan a fanu chu a ngaihtuah êm êm a, ka dem hauh lo, a thil min tiamtîr chungchângah pawh ka thiam lo chuang lo."


Kei chuan mak ka ti. Chutiang chu ka hre ngai hauh lo, thil tih ngăi niah pawh ka ngai lo.


"A va timak ve!"


"A fanu hmakhua a ngaihtuah ve a ni mai, dem viau chi niin ka hre lo; mahse, a duh loh dàn anga thil a lo kal tâkah chuan thawh dun theih a ni ta lo a ni," a ti leh sup sup a.


Ka khawngaih roh mang e. A dyh dàn ni lovin thil a kal a, a hna lo thawh ve tawhna zawng zawng kha eng mah lo ang mai a ni tihna a ni si a, ka khawngaih lo thei lo.


"A pawi mang e!"


"Pawi pawh ka lo ti hlei nem, ka bulah i awm a, engkim a fel duak tawh ni maiin ka lo hria asin."


A âwm chu ka fawhsak zauh a, chutah," Mahse, a rûk tak chuan Rose-i chu i duh ve deuh tho ka ring, a ni em? Zêp awih loh," ka tih chuan a nui hawk a.



"A chhe lo, a fel, a bright bawk; mahse, hmeichhe huang chin a pèl leh zauh hrât, chu chu mipa hian kan ngaithei lo țhìn, hmeichhia chu hmeichhiain an awm ang, an huang chin an hre bawk ang," a ti ta daih a.


"A nih, ka huang chin ka pèl ve em?"


Rawn insiam remin a taksa chungah chuan min pawm nawlh a," Nang hi chu i huang chin chiah zél i dai, a tâwk chiah i hria," a tih chuan ka meng phar ãk a, hlim takin ka nui bawk.


Min fak derna mah ni se ka làwm táwk a tling êm êm tho.


"Ka lâwm e."


"Ka duh dàn tâwk chiahin i che țhìn."


Hei chuan kawh pahnih a nei thei tlat! Ka hmai ka hup a, ka kut chu rawn chelhin," Ka sawi dik chiah a nia," tiin ka kut chu a rawn chelh a, kan taksa sîrah chuan dah thlain," Chuan, ka duh ém êm bawk che," a ti leh sup a.


Nuam ka va han ti leh tawh tak êm! A thil sawi pakhat lek pawhin heti khawp hian min tihlim thei chu a ni tak si a, ka tân hian a va hlu tak êm!


Ka nu thil min hrilh kha ka ngaihtuah chhuak leh thut a, ka ngui leh deuh nghâl rawih thei, ka boruak danglam thut chu a hria ang tih hlauvin," A nih leh i pahrawn chuan Rose-i i ngaizâwng lo tih chu engtin nge a hriat loh theih a?" ka ti leh a.


"A bulah chuan ngaizâwng ang chiahin ka awm miau a."


Amah runluih nân a ti a ni ngei ang chu.


"A fapa dik tak ka nih loh vàng hian ka tân thil țha min duhpui thei lo a ni, Rose-i chu Bawihi u chiah tân hian a duh tlat a."


Thil ka hre thiam deuh țan chiah e.




*INRINTÂWK LUTUKNA HIAN THIL MIN TIHSUALTÎR VE THEI THO*



(Nizanah net signal a bo hmak, vawiin lamah lah ka buai nilêng ve zak bawk si a, ka hma thei ngang lo a ni e)

*** KAN WEBSITE A FAKNA LAM THIL MILEM LANG THIN I LO HMET ZEUH HIAN KAN WRITER TE HLAWH KAN TUMSAK ZEL TIH KAN HRE THEUH DAWN NIA, KAN LAWM E***

Website story link ho awlsam zawka in zawn hmuh zung zung theih nan STORY FB group siam a ni a. Whatsapp group pawh siam a ni e. Complete tawh ho zawng zawng leh story kallai kan dah vek avangin avangin in lo join theuh dawn nia..
Group link : https://www.facebook.com/groups/991354610918230/

[Ngaia]

☆A MAK!☆ - 40


By Dingdi Pachuau



"Thil țha min duhpui lo mah se thil țha ber ka nei chat tho che, a inrawlh thei miah lo bawk"


Thil țha berah min lo ngai a nih chu!


"Rose-i rilru chu a na dâwn hian ka hre êm mai, a khawngaihthlâk ka ti," ka ti sap a.


"Mihring nun chu hetiang hi a ni alawm."


Kan ngawih leh vang vang hnuah chuan," Rose-i nei lovin min nei ta daih sia, mak a ti àwm mang e!" ka ti leh a.


"Ka pahrawnin maw? Ti mahna. Ngaihdam ka dîl a, nupui neih ka tum tih ka hrilh nghâl bawk avàng khân alawm min ûm zui ni, ka nupui neih tùr hming kha ka sawi tel hauh si lo va."


A lo nih hrep tak chu a!


"Chuti chu, a rin loh deuhin kei min nei ta daih sia, a hlim tawh ngawt ang chu tiraw? A duhthusàm a thleng ta tihna a ni si a," ka ti a.


"Kan hria ang chu!"


A pahrawn (ka patea) hi chu a haw ve chiang a ni. A àwm ka ti tho, a dinhmunah hian ding ve ta ila amah ang tho hi ka nih ka ring, ani ai pawh hian ka nasa maithei asin.


"Bawihi pa a ni a, ka nu pasal a ni bawk a, ka inbengdai mai mai a ni," a tih leh chuan muangchâng hian ka en a," A nih leh, ka pa lo ni ve thut ta se?" nui chung hian ka ti a. Ka nui deuh nain ka ti tak tak tho.


"A ni lo ang," a ti deuh tlat.


Exam zawh hmain Aizawlah vawi khat a phei leh a, kei pawhin ka zui ve, off lai a ni a, ka hman ve tawh alawm.


Bàn kha chu ka tum ve tak tak. A bulah awm tam ka duh, ka pa tak tak hre chhuak tawh mah ila han hrilh ka tum hran chuang lo, a thi daih tawh bawk sia, bâkah, Pathian hmaah nupa ni tùrin kan intiam tawh a, ințhen mai mai ka duh lo.



Mahse, a rilru hi eng nge ni ve ang le? A pahrawn u fanu ka ni si a, min haw ve viau ang em?


"Kan in hi siam țhat ngai lai han tih deuhte i nei em?"


"Engti zawngin maw?"


"Fa neih huna an room tùrte?"


Ka nui ringawt a," Ngawi rih rawh, nakin deuhah le, tunah hi chuan siam țhat ngai tih deuh pawh ka nei lo, nakinah chuan...ka hre lo le," ka ti a.


Rei kan awm lo, kan haw phei leh thuai. Nipui a ni țan tawh a, khua pawh a lum leh țan tawh khawp mai a, chêt deuh hlek pawhin thlan a tla leh țan tawh; mahse, ani pawh tunah chuan a biang hmul leh khabe hmul zawng zawng a mêt vek tawh a, hmuh pawh a hahdam tawh.



A hmul a mehtîr nî chuan kan pahnihin dàwrah kan kal a, tlêma țawng nêm deuh tlangvâl fai ser sawr hian a hmul chu a meh faisak a, a țawng duh hle mai lehnghâl a, darthlalang lian zet ațang chuan Muanzuala hmel chu ka va en țhìn a, a lung a awi loh hmel ngawih ngawih hian ka hria. Chu pa lah chuan a be peih viau si a, a rùl tâwk bâkin a chhâng lo, a nui hauh lo bawk.


Dàwr ațanga kan chhuah hnuah chuan," Vawiin zet chuh!" tiin a khabe chu a tuai hoh hoh a.


"A nuam tiraw?"


A rûm nghut, min rawn en phei a," Chatuan tluka rei ni hialin ka hria!" a ti ta a.


Ka nui hak hak a.


"A fel ve êm kha maw, a țawng duh bawk si."


Kan tlàn hnuah chuan," Țawng duh nazawng hi ka ngaina lo," a ti leh sup a, a rûkin ka nuih zui char char.


"I inhmeh êm kha, a tifai thiam khawp mai lehnghâl a, bâkah, i țha tawp," tiin ka fak zauh, a lang fai sar tawh. A lâng naupang sawt a, a lan sual hmel tawh loh bawk.


Naupang result a chhuah fel hnuah chuan ka bànna tùr pawh kan tifel a, thawhpuite hriattîr vak pawh ka duh lo, kan principal chauhin a hria. Min ui der ve êm êm a, ka lo thawk rei ve tawh bawk a, kei pawhin ka ngai ngawt ang.



Aizawl lama phei tak tak hmain kan khuaah kan haw chho leh phawt a, kan chanchinte chu kan hrilh ve a, anni chuan min pawmpui thu leh țha an tih thu an sawi. Kan chungchângah chuan inrawlh an tum loh hmel khawp mai, țha kan tih a kan tih tawh chu duh lo mah se awmzia a awm tawh lo tlat rêng a ni.


"I lung a lêng viau ang em?"


Ka lo ngaihtuah ve tak min rawn zâwt ta chat mai, ka lung chu a lêng viau ang. Ka chhûngte ka hlat tawh dâwn a, ka tlângnèlna khawpui Lunglei ka chhuahsanin ka hlat tawh dâwn bawk. Ka ngai ang; Aizawlah chuan hmel hriat ka nei dâwn si lo, chhûngte ka hlat lutuk tùr pawh chu ka lung a lêng lâwk.


"Lêng ve ang chu, ka lo țap ta a nih pawhin nang ka kiangah i awm dâwn a, min lo hnèm char char a ni ang chu!"


"Lungngai mah ta che, kan awm chawrh chawrh dâwn hlei nem, kan zin phei reng tho ang chu. Ka chhûngte neihchhun an nih tawh hi," tiin ka bân chu a chûl hliau hliau a.


"Chuan, i naute pawh ngaihtuah miah suh, an fel êm hi. Lehkha an zirna tùr sènso lam kha chu ka kutah dah rawh, an zir peih chhûng chu kan châwm ang," a ti leh dap dap.


Ka nu nèn kan pahniha kan awm dun țumin," I pa tak tak chanchin ka hrilh che kha i pasal hi i hrilh tawh em?" tiin min zâwt a.


"Aih, hrilh lo."


"Hrilh i tum lo em ni?"


"Tuna ka rilruah hi chuan hrilh loh mai hi țha zâwkin ka hria a, bâkah, ka pa ber a boral tawh a, han sawi chhuah thar leh kha a țûlin ka hre hran lo a ni," ka ti a. A hriat chhuah chuan min hua ang a, min kalsan daih ang tih ka hlau tih erawh ka sawi chhuak ngam lo.


"A dik tho mai; mahse, i patea hian sawi chhuak ta se, Muanzuala'n i lo hre chhuak tawh tih hre ta bawk se, dâwt i sawi ringawt dâwn em ni?" a ti leh a.



Ka thaw hak a, chu tak chuan ka rilru a tihah, chutiang thu a hriat hnua keiin dâwt ka hrilh leh hlauh phei chuan a thun chu a rim ve khawp ang le.


"A sawi chhuak kher bîk nâng! Bâkah, a tân sawi chhuah kher kha a țangkai tampui àwm lo êm mai," ka ti ta ringawt a.


"Aizawlah i awm dâwn sia ka ti mai mai maw le, nia, a hre chhuak kher lo maithei bawk che a."


Aizawl kan awm phei chu ka rin ai chuan ka khua a har lo, kan inzui reng mai a, kan pahnih zêlin kan chhuak. Kan chhuah loh leh inah kan inawm reng a ni mai, ka hmangaih ber leh ka duh ber ka pasal bula awm ka ni bawk a, ka lung a awi zo khawp mai.


Ina kan awm laiin Rose-i a lo lêng ve tlat mai! A hmel chu a țhat ngaiin a la țha reng; mahse, tlêmin a thû ta deuh, a chêr tawh bawk.


"Lo lêng rawh, lo țhu rawh," tiin ka lo chhàwn vat.


Min nuih sak a," In dam țha maw? Kan inhmuh lohna a rei tawh hle mai, in inneihnaah khân min sâwm ve mang si lo va, tunah hian lawmpuina thu rawn hrilh tùr che uin ka rawn kal a ni," a ti duah a, a mit sen râm chu a meng phî deuh hlekin ka hria.


Chhàn vak ngaihna ka hre si lo va," Kan lâwm e," ka ti ta ringawt. Muanzuala bathroom-ah a awm daih si a, keimah chauha lo chhawn a ngai chu nuam lo ka ti kher mai.


"Bangalore ka kal hlàn a nia, hetah Aizawlah lah in awm khât a niang, ka rawn kal ve ziah a, in lo awm lo ziah bawk a," a ti leh a.


"Aw, Lungleiah kan awm a."


"Zirtîrtu hna kha i la thawk reng em?" Thil chu a lo la hre rei ve riau a nih hi.


"Kâr hmasa deuh mai khân ka bànsan ta, in tùr i duh em? Ka lo lâk ang che aw," tiin ka ding a.



"A ngai lo, ka lâwm e. Khawnge in pa hi a awm a?" a ti zo chiah tihah chuan kan room ațang chuan ani chu a rawn chhuak ta nghâl a.


"Hei, a lo chhuak chiah e. Rose-i a lo lêng a," tiin Muanzuala chu ka lo be vat a.


Ani chu ka bulah a rawn țhu chat a, Rose-i hnênah chuan," Eng thil nge ni ta? I dam maw?" a ti sup a.


Muanzuala en vang vang pah chuan," Biak che hi ka duh theih tehlul nèn, i induh tlat a," a ti ta daih a!


Ka pasal a ni tawh a, ani hian Rose-i lakah rilru dang min putsan lah ka ring hek lo, chuvàng chuan thovin," Inbe rawh u, in ei tùr ka lo siam ang," nui sak chung chuan ka ti a.


Ka pên chiah chu," Kal suh, thil pawimawh leh thurûk sawi tùr kan nei lo, țhu rawh," Muanzuala chuan a rawn ti dût.


"Țhian inkârah chuan sawi tùr tam tak a awm thei alawm-"


"Kan thil sawi hre ve vek tùr hian ka duh che, Melo, lo țhu rawh. Rose, rui chung hi chuan i rawn kal duh ka ring lo asin," a ti ta chhak mai.



Rose-i hi a rui maw? Engtin nge Muanzuala hian a lo hriat bîk a? Tîm deuh dai hian ka țhu leh a, nuam lo erawh ka ti deuh khawp mai. Rose-i chu ka va en phei a, a mittui tla ka hmuh chuan makti zet hian ka melh ta tlawk tlawk a!


"I nun a râwng hle mai," Rose-i chuan a ti sap a.


"Hetiang hian awm suh, Rose. Bâkah, kan inkârah khân eng thil mah a awm ngai lo tih pawh i hriat chian viau kha."


A inhnît hraih a," Min ngaizawng lo tih chu ka hre ve tho; mahse, ka biak che chuan min chhàn hi ka ring țhìn, khati chen i thawhpuiah ka lo țang tawh a, țûlah pawh ka be duh thei che a," a ti leh.


Ka khawngaih reuh khawp mai.


"Ka thawhpui hlui i nihna anga min be duh a nih chuan min be thei alawm, nupui nei tawh ka nihna erawh i hriat chian ka ring e," a lo ti nghut a.


A mittui chu a hru hul tê tê a, a chil a lem leh dak phawt bawk a, chutah," Ka pa hnênah thu i lo tiam a ni tih ka hre chhuak tawh asin, i tân a lo hrehawm tùrzia leh zahthlâk tùrzia kha ka ngaihtuah reng bawk, i chunga ka lo awm dàn țhin zawng zawngah khân ngaihdam dìl che ka duh a, ka phone i chhâng duh ngai si lo va," a ti ta a.


"Chumi kawngah chuan ngaihdam ka dîl e. Chuan, ka chungah ngaihdam ngai tùr thil i ti lo-"


"Kha thutiam hre reng chung pawha țha taka min thawhpuinaah khân làwmthu ka sawi takzet. Kei lahin thutiam i nei tih hre miah lovin ka lo zui țhìn che a; mahse, ka duh thei êm che a, hria pawh ni ila ka inthiar fihlîm duh pawhin ka inring chuang lo," a ti leh a.


"Kha lam kha chu duh tâwk teh ang, in hnathawhna lam in tluang zël em?" Muanzuala chuan a ti ta daih a.


"Ka hre lo, ka thawk tawh lo va."


A haw hnuah chuan Rose-i chu khawngaihthlâk ka tih thu chu ka sawi sap sap a, ani chuan," Min țhen daih duh khawp chuan i khawngaih loh hrâm ka beisei," a lo ti thung a.


"Chutiang ka sawi loh chu. A dinhmunah khân ding ve ta ila hrehawm ka ti ve dãwn êm asin, a duh hle si che a," ka ti leh a.


"Duhna leh hmangaihna hi mi pahnih inkârah a nih loh chuan buaina, tawrhna leh țahna thlentu mai a ni."


A sawi dik hle mai, ka lo bu nghat a.


"I va hre êm êm!"


"Ka kum ang i kum ve hunah chuan i a hre vek mai ang."


A fiamthu thawh ve duh dàn tak hi chu aw...


Harsatna awm lêm lovin hun chu kan hmang chho ve zêl a, Rose-i pawh a rawn lang nawn leh tawh lo. A zak ve deuh pawh a ni maithei, a khawngaihthlâk ve bawk sia, a awm dàn kha a demawm viau ka ti bîk lo.


Kan chhuak a, Zotlang lamah kan kal a, kan kal kual țeuh mai. Nilêng deuhthawa chhuah chu a chauhthlâk ve duh lutuk, khua a lum bawk si a, in kan thleng chu ka mu dêr lo chauh. Ka period tai nuam lo bawk nèn, ka zawi lutuk.


"I chau viau a ni maw?"


"Chau ve deuh."


"Um, zâl vang vang phawt la, ka intleuh ang a, ei tùr ka lo siam ve tawh thung ang."


Chu pawh chu ka hnial phal lo.


Kan room bathroom-a inbual tùrin a kal ta nghâl a, kei erawh sofa-ah chuan ka bawk vang vang.


Ka phone a rawn rì ta rang rang mai, a rawn rîk hun chu a hun lo lulai lutuk a, ka thinte lam a rim țêp mai!


Peih lo zetin ka bag chu ka ban a, phone chu ka la chhuak a, number hriat loh, save loh a nih chu.


Sofa-ah bawk lehin thatchhe zet hian," Hello?" ka ti a.


"Melody maw? I patea ka nia, min hria ang chu maw?"


Ka tho awt mai!


Ka hre chiang lutuk! Ka pa nau, Zorini pa leh Muanzuala pahrawn, sual angreng deuh kha a ni chiang mai!


"Tu maw?" Ka fing phakar ve tlat, hria angin ka awm duh lo.


A rawn nui phawt, a nuih dàn chu a ngeiawm tawp.


"I nuin a hrilh tawh ngei che ka ring, i nu fanu i ni tih ka hriatna a la rei lo khawp mai. Lo hre tùr che ka nih tehlul nèn, min ngaidam rawh," a rawn ti vêl!


"Tu nge i nih a?" Kan țawng chu Muanzuala'n a hria ang tih ka hlauh vàngin choka bul toilet-ah ka lût nghâl daih.


"I pasal Muanzuala nu pasal kha ka nia, in inneihnaah khân rawn kal ila chuan ka hre hma thei ngei ang che; mahse, i pasal lâk tlâk loh zet khân min hrilh ve hauh lo a nih chu! Tunah chuan kan inhre ta bawk a, i patea ka ni tih theinghilh miah suh, engtikah nge kan inhmuh theih ang?" a tih chuan," Ka ring lo che, pa ka nei reng. Tunah pawh ka nu nèn an la innei mêk," ka ti thung a.


"Mahni inbum suh, i nuin kum heti chen a lo thukru bo che hi a timak ka ti khawp mai. Naktûkah inhmu ila?" a rawn tih chuan ka thin a phu dawt dawt, phone ka chelh kut pawh a khùr deuh dat dat.


"Ka hman lo ang."


"A nih leh, tûklehah?"


He pa hi dâwt ka hrilh zêl thei ang em? A âwih duh ngût ang em? Dâwt hrilh lovin insawi chhuak ta mai ila...?


"Ka hman chuang lo ang."


"A nih, hun dangah aw? Tun atân chuan bye bye rih le, ka rawn be leh ang che."


Kan inbe zo chu ka thâ a lo khùr zawih zawih tih ka hre chiah! Ka number a lo neih dàn chu ka hre châk ngawt mai, hetiang chuan min rawn chhaih buai reng mai ang, Muanzuala hriat lai ni phei se chuan...


Ka ngaihtuah thui duh lo.



*DUHNA LEH HMANGAIHNA HI MI PAHNIH INKÂRAH A NIH LOH CHUAN TAWRHNA THLENTU A NI*



(Net signal a țha thei lo nizàn lam pawh kha net signal ţhat loh vang a ni)

[Ngaia]

☆A MAK!☆ - 41


By Dingdi Pachuau





He pa hi patea atân ka duh bîk lo asin le.


Inah chuan min rawn kalchilh ang tih ka hlau ru ngawih ngawih, a nih loh pawhin min rawn call zut ang tih ka hlau, block ta ringawt ila a fuh vakin ka ring mang si lo, a duh lohna lamah chuan a hlauhawm hmel bawk si a, ka rilru a tinuam miah lo.


Rilru put dan tùr hriat a har, ka patea a ni tih hi ka hrilh tawp mai dáwn em ni? Hrilh ta ila engtin nge min ngaih ang, thinrimin min kalsan ang em? Nge a nupui ni tùrin min la duh tho ang?


Thinrima min kalsan hi ka hlau ngawih ngawih, a rilru put dàn tùr ka hriat lâwk loh vànga hrilh ngam lo ka ni rêng bawk. Tihian, a lakah thil zêp ka nei chu a ni ta rih si a, hrehawm ka ti ru khawp mai.


"Thil ngaihtuah vung vung hi i chîng thar tlat."


Ka ngaihtuahna ațangin ka harh chhuak thut, ni e, ka lo ngaihtuah leh vung vung țhìn, min ringhlel vat mai ang.


"Naktûkah thil țha deuh kan lei dâwn nia," a tih chuan ka rilru lâk pèn a tum tih ka hria, rang zet hian," Eng thil?" ka lo ti vat a.


"Sawi rih lo ang, i duh tak thil a ni ngei ang."


Min hrilh duh loh avàng tak chuan ka hre châk khawp telh telh; mahse, ka zâwt chhuak thei chuang lo.


A tûkah chuan Rose senduk hlîr pot 10 kan lei! A pâr tawh bawk si a, a mawi lutuk! Lungleia ka neih ve kha chu a pâr a tê deuh hlek a, tuna kan lei hi chu a lianin a mawi takzet.



Ka patea nèn kan inbiakna pawh kha min theihnghilhtîr titih ta hial mai, ka tân chuan a țha takzet. Min tihlim a, a pâr a mawi si a, hun âwlah chuan ka en reng mai.


"Ka nuin hmu se mawi a ti ve ngawt ang chu!"


Ani chuan," Kan phei hunah pot 5 vêl chu kan ken pheisak ve dâwn nia, pangpâr a buaipui peih ve si a," a lo ti a.


"A hralh ve țhìn miau a."


"A hlâwk ve em?"


Ka nui a," Ka hre bîk lo le, a tuina a ni miau mai si a, bâkah, tlêm tlêmin sum a lo la lût ve thei a, a țha viau ka lo ti mai a," ka ti a.


"Chuti a nih chuan pangpâr chî chahsak ila a țhat dâwn chu."



Ka lung a lêng ta lo, pangpâr enkawl tùr ka nei ta si a, ka nu pawh whatsapp lamah Rose thlalâkte chu ka thawn ve a, ani pawhin mawi a ti kher mai.


Nunoi chu a naute pahnihin an awmpui ve rih. Exam an zo tawh sia, an zin thla ve rih a ni. Ani lah a lo khawhar ve bawk sia, a nuam reuh phian ang chu.


Zan khat chu ka patea chuan min rawn call leh ta, chhàn loh ka tum zet a; mahse, ka chhâng leh ta záwk.


"Engtikah nge ka hmuh theih ang che? Chiangkuang tak pawhin kan la inhmu lo va, bâkah, ka u fanu hi ka chhûngte pawh hmel hriattîr ka duh a ni," a tih chuan ka hlauthâwng rilru khawp mai a, a hriatah ka tilang ang tih erawh ka hlau viau.


"A pawi ka ti, kan buai ve a, bâkah, ka pasal tel lo chuan khawiah mah ka kal thei lo a ni," ka ti ta ringawt.


"I unaute pawh ka la hrilh lo, naktûkah chiangkuang takin ka hrilh ang. An hriat hunah chuan mak an ti ve ngawt ang tiraw? Anni ai mah chuan i pasalin a hriat hunah mak a ti leh zual ngei ang," a ti leh a.


Ka ngawih reng avàngin," In pa chu hrilh i huphurh deuh em? A nupui kha a cousin a lo ni reng dâwn si a, a barakhaih ve ngawt ang, hrilh i hreh deuh pawhin ka hrilh thei tho a nia. I pa dik tak chu ka u kha a ni tih hi thu dik a ni miau si a, zêp hlen theih a ni dâwn tlat lo a ni," a tih chuan," Pa chu ka nei reng, Haulawngah a awm mêk, ani chu ka pa dik tak a ni," ka ti ve leh tlat a.



Kawngka a rawn ri a," Melo? I țha em? I rei tawh mah mah a ni," pâwn lam ațangin Muanzuala chuan a rawn ti a.


"Aw, ka lo chhuak țêp e."


Phone-ah chuan a rawn nui kur kur a," I la hrilh lo tih ka hre mai e, i huphurh chuan ka lo hrilh thei ang ka tih kha aw," atih chuan thinrim rilru zet hian," Ka hrilh ve thei," ka ti nghat a.


"A țhat nasat chu! Ani biak kha ka phûr tehchiam lo a nia. Tunah chuan fanu ka chhar chhuak thar ta si che a, chawhlui han kîlho pawh a chawh riauin ka hria, i duh zâwng a ni ve emaw chu?"


Teuh lo mai! Muanzuala pahrawn chu ni lo se chuan a zia deuh mahna! He pa hian ka thin a tirim telh telh mai.


"Ka patea tak tak i ni thei lo ang!"


A nui hul huk a," I pa nau ka nih chuan i patea ka ni lo ang em ni? Min pawm duh lo nge min pawm ngam lo? I pa khân fanu a nei tih i nuin a hrilh miah lo kha ka dem takzet a ni, hrilh kha chu a phû ve tho asin," a rawn ti leh a.


Ka nu a dem tel kher chu ka duh lo kher mai. Khatiang boruakah kha chuan hrilh chi pawh a ni em ni? Ka pa kha hrilh tlâk pawh a ni chiah em? Hrilh pawh ni ta tehrêng se a fanu atân pawh min pawm duh dâwn chuang em ni?


"Ka nu chu dem hauh suh."


"A tidik lo miau si alawm, ka u khân a pawm àwm tehlul che nèn, i nu hi a dem loh theih loh," a tih leh chuan ka thin a tirim zual kher mai.


"Min rawn phone tawh suh ang che, ka patea tak tak pawh i ni lo," tiin thinrim zet hian ka phone chu ka hmet thi hmak mai a, thâwk la hawk hawkin bathroom ațang chuan ka chhuak ta nghâl a.


"Thil dik lo thleng a awm em?" a lo ti vat a.


"Ih, thil hrilh tùr che ka nei a." Ka sawi huphurh takzet; mahse, a laka zêp neih hi hrehawm ka ti êm mai, bâkah, he pa' ka patea' hian min rawn phone chhên tùr hi ka duh lo.


"Eng thil nge ni ta?"


Ka huphurh a ni, ka huphurh tak meuh meuh a ni.


Ka vànneih asiam ka ti dâwn em niang, a phone a rawn ri ta hlauh mai.


A phone chu la chhuakin a en phawt a, chutah,"Ngawi lawk aw, ka chhàn zawh veleh kan inbe leh dâwn nia," tiin a phone chu a chhâng ta, mi pawimawhin a rawn call a nih ka ring, a ngaih pawimawh dànah leh a kal sawn nghâl dànah. Ka hriat ve chi loh pawh a nih ngei ka ring.



Kei pawh ka phone chu a rawn ri leh a, ka'n en a, chu pa bawk chuh... ka va ning tak êm! Nichin khân phone kha ka hmet hlum hmak si a, a thin a rim a ni ngei ang.


Ka chhàn loh chuan min rawn tihbuai leh tho ka rin avàngin," Eng nge ni leh ta pek?" thinrim rilru tak hian ka ti a.


"Țha takin min bia ang che, nichina min biak ang khân min be tawh suh, țha takin min chhâng rawh. I pasal kha engkim ka hrilh mai tùr a nia, in ințhen vang vang mai ang. Ngun takin ka thil sawi hi lo ngaithla ang che, ka u fanu i nihna hi a bo dâwn lo, eng ang pawhin duh lo mah la. Sawi chhuah i duh loh chuan ka thil sawi ang hian ti ang che, i pasal khân a bialnu hlui Rose-i kha kan inah rawn kaltîr rawh se, i pasal chu rawn kaltîr thei ngei tùrin thlém thiam ang che," a ti chang fak a.


"Min vau a ni maw?"


"Vau lo, i tih ngei erawh a ngai ang. I pasal hian a țhen che i duh lo a nih chuan Rose-i chu kan inah a rawn kal ngei tùr a ni, i mawhphurhna a nih chu," a rawn ti leh a.


"Ka patea i nih tak tak chuan chutiang chuan min ti phal hauh lo ang," ka ti leh, phone-ah chuan ka hlau lutuk bîk lo. Bâkah, hetianga min vau hi ka duh lo, invauna hi chu ka duh loh ber zînga mi a ni bawk.


"Ti ngei la a țha a ni mai, i pasal ka hrilh i duh loh chuan. Kei chuan in chungchâng hi engah vak ka ngai ve lo a nia. In ințhen emaw țhen lo emaw ka thêngthâwngah pawh a thawk lo ang. Rose-i chu kan ina rawn kaltîr ngei tùra i pasal i hmin thiam erawh ka duhsak a che, naktûkah ngei ngeiin," a ti kalh kalh a, phone chu a hmet thi ta hmak mai.


Kan in-draw chiah.


Muanzuala hi ka hrilh ngei a ngai a ni. Ka hrilh loh chuan he pa hian a duh duhin min vau a tum dâwn tlat, bâkah, kan nupa kârah thurûk a awm tih a hriat ve hi ka duh lo bur bawk.


Muanzuala phone chhâng chu ka lo nghâk a, a rei lutuk bîk lo ve; mahse, han hrilh tawp chu ka va huphurh tak!


"Le, min hrilh tawh rawh le."


Ka ding reng rih a, hrilh tùrin huaisenna neih ka va duh tak êm! Aw Lalpa, min pui lul teh!


Ka huphurhzia a hria a ni ngei ang, ka kutah chelhin min țhutpui phawt a," I rai chu a ni lo tiraw?" a ti sup a.



"Ni lo, ka rai lo," ka ti sap a, amah pawh ka en ngam lo.


"A nih chuan, eng thil nge ni ta? Ka lakah zêp nei tùrin ka duh lo che a ni, kei pawhin a pawimawh chin chu ka hrilh vek che a nia," a ti sup sup a.


"Ih maw, ka duh vàng a ni miah lo a nia aw," ka ti leh phawt a," Ih, ka pa chungchâng a nia," ka ti leh a.


"A chanchin i hre thar em ni?"


"Aw...a la rei lutuk lo a nia."


Ka kut chûl hoh hoh pah chuan," A làwmawm lo lam a nih loh hrâm ka beisei," a ti leh sup a.


"Ka hrilh huphurh vàng chein a nia i lakah ka la zêp ni; mahse, hrilh loh che hi hrehawm ka ti bawk si a," ka tih chuan," Min han hrilh teh le," a lo ti a.


"Ih, ka pa dik tak chu a thi tawh a."


"A ni maw? Sorry," tiin ka kut chu nghet zet hian a hûm a; mahse, ka la en ngam chuang lo.


"Ka pa nau chu..." ka ti phawt a, ka ngawi leh rih a, chutah, thih leh thih tiin," I pahrawn hi ka pa nau chu a nia," ka ti ta nge nge a.



Ka kut nghet leh zuala a hmer tâkah chuan a hmel ka en ta chauh. Ngun zet awih loh hmel zet bawk hian min lo en kur a.


"A pawi ka ti, ka duh dàn a ni bîk miah lo; mahse, thu dik a ni tlat si a," ka ti leh sap.


A hmel ațangin a rilru dik tak hre thei lo mah ila rin harsa a ti ngawt ang, hrehawm pawh a ti ve tho ang chu, kei ang thi hian.


"Chu chu...i hre chiang chiah maw?"


"Aw, dik tak chuan min hringtu ka pa fanu chu nih loh ka duh ngawih ngawih; mahse, ka duha ka duh loh theih a ni bawk si lo," ka ti leh a.


Rei fê kan ngawih hnuah chuan," I nuin a hrilh che em ni?" a ti a.


"Aw, chuan, i pahrawn pawhin min rawn phone a."


"Engtin a?!! A rawn phone che maw? A va huaisen ve!"


A thinrim hmel insûm chu ka hmu thiam mai, a thin chu tihtak zetin a rim ang tih erawh ka hlau khawp mai.


"Ka hrilh hreh lutuk che a; mahse, tunah chuan ka thâwl huai mai," tiin ka thaw huai a.


"Thil dang sawi a nei em?"


A hmel chu ka en vang vang a," Ih maw, Rose-i, naktûka an ina kaltîr tùra hrilh tùr chein min hrilh bawk a. Chuti lo a nih chuan ka pa nau a ni tih nangmah hrilhah min vau bawk," ka ti leh a.


Eng mah a sawi tawh lo. A ngawi rùn mai a, a thâwk lâk danah erawh a thin a rim hle tih chu ka hre mai.


A hnu daihah chuan,"Min hrilh chu ka lâwm e, i nuin min hrilh tawh a," a tih chuan phâwk zet hian ka en, mak ka ti lutuk ringawt!


"I lo hre tawh maw?!!!"


"Hre tawh e, min hrilh hun ka nghâk reng tawh zâwk a ni."


Mak ka ti takzet a ni, a lo hre vek tawh si a.


"Chuan, min kalsan dâwn em?"


Min rawn en chhuk ta rùn thung.


"Ka nupui hi eng vàngin nge ka kalsan ang che? I pa fanu i nih vàng chuan maw? Teuh lo mai! Nang pawhin min kalsan tùrin rilru pu ngai hauh suh ang che," a ti ta nghut nghut a.


"I thin a rim lo em ni?"


"Nang nèn hian thisenah inzawmna kan nei hauh lo, Bawihi nèn erawh cousin in lo ni reng a! Inanna in nei ka ti fo, in țawng duh bawrh bawrh dànah hian a nia ka tih ni," a ti leh a.


"Mahse, cousin nih chu ka duh lo asin, thisenah inzawm miah lo mah ila nang nèn pawh hian cousin kan ni ang tho chu a nia...miin engtin nge min ngaih ang le?" ka ti leh a.


"Mi min ngaih dànah ka buai lo."


Leh hmak mai a!


"A nih leh, Rose-i chu in in hluiah chuan i kaltîr ang em?" tiin tîm deuh dai hian ka zâwt a.


"Kaltîrna chhan tùr ka nei lo. A rawn phone leh che a nih chuan min chhàntîr dâwn nia, vau ngam tùr che a ni lo bawk," a ti leh hmuk mai.


"Thil țha lo tak a chungah i ti lo ang tiraw?" Ka hlauthâwng deuh tlat.


"Ka chungah a ti tawh zâwk a ni, a ti leh a nih chuan ka dawh mai mai tawh lo ang," a ti leh nghut a.


Zànah TV kan en dùn a, thatchhe zet hian a mal chungah ka lu nghatin ka mu a.


"I club-te an inkhelh dâwn kha," a ti sup a.


"Eng ka club...i hre ve em ni?" ka ti hú a.


"Engkim ka hre vek alawm, i khuavàng awmna chenin."


Hmâna kan nih țan hma daiha ka thil sawi kha ka ngaihtuah chhuak a.


"Ka awih lo-"


"Helaiah hian," tiin ka kawr chhûngah chuan a kut a rawn zen ta mai, ka lo râk țhat. A chhan chu zâ ka ti țhìn.


Ka nâk dinglamah chuan khuavàng dum vak lo hi a awm a, chu chu a rawn khawih chat nia!


"A nih leh, ka nghâwng achin chunglamah hian a dang awmna han sawi teh," tiin ka țhu chhuak a.


A sawi dik chat chat zêl, ka bengkâwm hnung biru deuha awm pawh chu a sawi dik chat tho, a hmuh ka ring hauh lo a nia.


"Kei ve thung, i hre ve em?"


A hnungzângah leh a nghâwngah a awm a, a bân dinglamah pawh pathum lai a awm, hêngho hi ka hmuh chiante chu an ni.


"Ka malah pawh a awm asin."


"Chu kher chu ka lo en chîk lo a nih chu."


"I en duh em?" nui chunga a tih chuan," A ngai lo, inkhèl chu en zâwk ang," ka ti ta vat a. Khum ni lêm lova inphelh chu ka duh lo, a zahthlâk ve deuh.


Ka mumangah ka patea chu ka lo hmu a, Muanzuala'n Rose-i an ina a kaltîr loh avàng chuan thinrim mitmeng sen rûm hian min lo àn khum nasa mai a, ka hlau lutuk a,ka lo țap lo chauh!


"Ka fanu mah ni la tihnat che hi ka hreh hauh lo, eng pawh ka ti thei tih hria ang che, min hlau lo riau mai. Khaw'nge, ka'n sawisa hlak ang che," tiin ka samah chuan min phih dâwrh a. Ka lo țê tuarh mai a, a takah ka lo țê chhuak niin.


"Melo, duhtak, harh teh!" tiin min lo sâwi nawk nawk a.


"Mangchhia i mang a ni maw?"


Ka harh chhuak chu ka lâwm takzet, a hlauhawm êm asin.


Thil awmzia ka sawi hnuah chuan," Eng emaw tak ka chungah a ti duhin i ring em?" tiin ka zâwt a.


"Teuh lo! Thil țha lo i chunga a thlentîr hi ka phal ngai lo ang. Hlau miah suh, min ring hmiah rawh."


A va thlamuanthlâk si ém!




*HMANGAIHNA FAMKIM THLAP TAWNG TÙRIN INBEISEI LO LA, DIK TAK NI TÙRIN BEISEI ZÂWK RAWH*


(Nizan khân ka type laiin ka lo muthilhsan daih a pawi ka ti tak zet, zaninah ka lo dah zuai, ka regu lo tak zet tih ka hria, ka hman lo nasa viau rih mai si a, a buaithlâk khawp mai; mahse, lo dawh hrâm hrâm r'u, a hmâwr kan bâwk thei țêp e)

[Ngaia]

☆A MAK!☆ - 42


By Dingdi Pachuau



A tûkah chuan eng thil mah a thleng lo, tlêmin ka ngaih a țha lo deuh hlek kha a nia; mahse, tlai thleng pawh chuan thil eng emaw pawh a thleng lo, ka lâwm khawp mai.


Zanriah ei dâwnin Zorini'n min rawn phone ta. Muanzuala'n min rawn en vat a, a pahrawn a nih a ring a ni ngei ang; mahse, Zorini hming ka hmuh avàngin ka ûksàk lo, a pa chuan a va hrilh ta vek a nih ka ring nghâl ringawt a.


"Hello, Zorin?"


"In va reh ve! In dam țha em?" a rawn ti nghâl var a.


"Nangni pawh in reh ve tho a nia, kan dam țha, nangni lam in țha em?" ka ti ve nghâl, nia, ka phone lo khawp mai, ka inthiam lo deuh hlek.



"Aw, țha e. Naktûkah lo phei ve kan tum asin," a tih chuan," A ni maw? A țhat hlauh chu, kan inhmu thei ang chu," hlim rilru zet hian ka ti a.


"Nia, kan nupain kan ni ang, a in luah țhinah khân kan awm dâwn a, in lo lêng dâwn nia," a ti ve sar sar a.


"A nuam ngawt ang, chawte kan eiho ang a," ka tih chuan," Nia, i sawi zâwng ringawt pawh chuan ka phûr tawp maw le," a lo ti ve a.


Zanriah ei khamah chuan kan pangpâr neih ve Rose pâr kha ka en kual leh a, tuiin kan châwm țha bawk a, pâr tùr a tam viau mai, an mawi ngawt ang chu!



Bathlàr ațang chuan doorbell ri ral chu ka hre thei a, inlêng kan nei ngai mang si lo va, mak ka ti rilru khawp. Rose-i kha em ni ang? Mahse, ka ring lo deuh bawk si.


"Ka'n chhàwn ang e," tiin kawngka lam pan chuan ka kal nghâl a, ani erawh chuan Motogp live pawh ni lo chu a en mai mai a.


Kawngka ka hawna Muanzuala pahrawn ka hmuh tâkah chuan mak ka ti lutuk chu, țawngna châng pawh hre lo chuan ka en hau ringawt!


Min hmuh veleh chuan, "Engati nge ka thu i awih loh?" chher chhuai hian a ti nghâl a. Rum zet hian min melh kul mai a, a meng sen rùm bawk si a, a lang hlauhawm kher mai.


"Ka thu i awih lo ngam maw? I hre dâwn khawp mai," a ti ngul ngul. A rùi tih ka hre mai, a țawng a sehchilh nak a, a thin a rim viau a ni ngei ang.


"Tu nge ni-" Ka hnung lawkah chuan Muanzuala a lo ding tawh niin! Ka hawi lêt vat a, a âwmah ka intauh dawt lo chauh a ni!


"Engtin nge khatiang khân ka nupui i rawn țawng khum ngam zâwk a?!!" A aw chhuak hlauhawm zet chuan ka tiril a țhãm ar ar thei hial! A chhan chu thihna rim a nam hialin ka hria atin ni.


"Nang kha, lo țawng ve suh, ka be lo che!"


Ka hlauthâwng lutuk ringawt! Muanzuala chuan a hnungah min dintîr vat a, a pahrawn hnênah chuan," Zu rui thinrim chungin ka nupui hi rawn be suh, ka inah hian rawn tih tùr lah i nei hek lo," a ti leh.


A țawng a ring miah lo va, a vîn hek lo; mahse, a hlauhawm ngawih ngawih thung.


"Ka u fanu a ni ka biak ni, lo inrawlh suh."


"Ka nupui a nih hi!"


A vîn ta țhak mai! Ka tirîlah ka khùr zawih zawih, boruak țha lo zâwk a thleng ang tih mawlh ka hlau.


"Ka thu a awih loh chuan a pa ka nihna angin hremna ka pe thei a ni," a lo ti ngul ngul thung a.



"Ka nupui a nih chhûng chuan a sam zai khat pawh i tih țilh ka phal ngai lo ang!"


An inhmachhawn ràn mai si a, pakhat a thle deuh lâk lâk tawh a, pakhat lah chu thinrim zet hian a ding luah mai bawk si a, ka va hlauthâwng tak!


"Duhtak, a rui â a nih kha, a chungah eng thil mah ti suh aw," tiin a kawr hnung lamah chuan ka lo pawt dàr dár a.


"Lo inrawlh suh, a phu tâwk hremna pêk a hun tawh a ni."


"Ni lo, khawngaih takin? Zorini pa a nih hi," ka ti leh vat. A nau hmangaih tak Zorini hming ka sawi rîk chuan a thinrimna a kian theih deuh ka beisei a ni.



"Rose-i nei tùr ang deuhin i'n awm vêl a, ka thin tihrim nân ka hmuhah i ngaizawng der a. Ka huatzia che hi i hria em? Khatiang nula hausa kha chu i phû lo ka ti țhìn rêng a ni, i tân chuan a sâng mah mah, ka fapa ka thisen zawmpui ngei tâna ka lo hual a ni asin, nang fahrah lu bâwk hian i phû hauh lo."


Muanzuala chu hnung lam ațangin ka pawm bet nghâl thlawp, chuti lo chu engtianga nasain nge a chêt duh ang ka hre lo a ni. Chu pa țawngkam chhuak ngeiawm zet chuan a thinrimna chu a belhchhah nasa dâwn si a.


"Ni lo, nang chuan engtin mah ti ve suh aw, chhûngkua anga buai chu a mualphothlâk dâwn êm mai," ka ti mawlh mawlh a.


Muanzuala taksa chu a la insang mar tlat a, a thinrim a insûm nasa viau a ni, a thaw a rang viau a, a thaw sawk sawk bawk.


"Ka khawih nat hma che hian kal bo rang rawh! Ka mit hmuhah rawn inlan tawh suh," a ti chheu chheu mai a.


Ani lah zu rui tih takah, Muanzuala thu sawi chu engah vak a ngaih hmel loh, hriat țhat theih loh hian a phun bul bul reng a, kal sawn se ka ti ngawih ngawih.


"Rose-i kha ka monu tùr a ni asin, i lo awm ve hian engkim a tibuai zo vek..." a țawng nâwi ral a ni ber.


"Duhtak, a ruihchilh a nih ber kha, khin tlâk a ni lo tiraw?"



"Ka fapa chuan...a phû tùr a ni, mo fel...hmel pawh...țha tak...." a âwn ta ruai ruai mai, a tlu na lo hlauh, a insawh lo.


"A chatthla em ni?"


A thaw hawk a," Vawi khat tal han hnek ka duh asin le!" a ti sup a, a taksa insang mar viau pawh a inthlah dul hret hret ta e.


"Ka ngaisang tawp che, i insûm thei a," tiin ka fak zauh. Insûm thei lo se chuan thisen a chhuak ngei àwm si a.


"Engtin nge ka insùm theih zâwk pawh ka hre lo," a ti nghut a, amah ka kuahna pawh chu ka thlah ta nghâl a.


"Engtin nge niang?"


A phone a la chhuak a, tu nge a phone dâwn le? Police a nih loh hrâm ka beisei e.


"I pa hi rawn ngaihven rawh, ka inah hian buaina zawngin rawn kal tawh bawk suh se," a ti a, a phone chu a hmet tàwp nghâl hmak bawk.



Ni a ral a, Zorini hnênah a pa khân a la hrilh lo a nih hmel. Hria ang pawhin a awm lo va, a awm dàn ngai rengin a la awm tho, hria ni se a sawi chhuak daih tawhin ka ring si a.


Zorinite nèn pawh kan inlèn pawh țha viau. A pa boruak kha a unaupa khân a sawi chhuak lo a niang, eng mah sawi lan a awm lo. Min rawn be tawh lo va, zu ruiin a hmel a rawn lan tawh hek lo.


Ka nau mipa pahnih pawh tha takin an pass e. Ka nuin min rawn hrilh a, ka lawmpui kher mai, Lungleiah zirna chu chhunzawm an tum, an admission tùr chu Taia'n a tumsak dâwn a nih chu.


A naute zirna sènsosak tùr nau ka han nei ta a nia, ka lungawi viau a ni. Mite angin neih nei lo mah ila kan mamawh tâwk kan nei ve thei a, zirna ni se kan chàwl vek bîk lo va, tunah phei chuan Taia'n a naute a châwm thei tawh a, ka lâwm hliah hliah mai a ni.


Muanzuala ngaih dàn erawh a dang daih. Mâkpa awmchhun a ni a, zirna sènso kher chu tum tùrah a inngai hmiah. A chhan chu Tea nèna kan ințhen chhan kha a hre ve kar, chhûngte ka dah pawimawhzia a hre bawk. Chuvàngin, an duhna berah admission tihpui a intiam a, sènso pawh Taia buaipui 'a ngai lo' a ti tlat.


Tlai khat chu Tea'n mangang zet hian min rawn phone a, Zorini awm dàn chu dik lo a ti a, ani lahin inentîr a ngai lo a lo ti bawk si a, chu chu sawipui tùrin min duh a lo ni a.


"Engtin nge a awm a?"


"A khawngaihthlâk a ni tawp mai, ka thu sawi a âwih si lo, pawisa a hek mai mai a ti tlat a," a rawn ti a.


"A nih chu, ka lo bia ang e."


Kâr khat chuang kan inhmu tawh lo va, kan awmna a inhlat bâkah an in awmna lamah kan chhuah pawhin kan chhuak chho lo tlat a, a lo dam țha lo tih pawh ka lo hre miah lo.


*******


Zorini chu a lo rai tawh bîk a nih chu! Ka lawmpui êm êm rualin ka rilru ngaihtuahna erawh a kal thui, kei aiin nau a pai hmasa ta tlat mai si a, an inneihna kha a hnuhnung daih zâwk sia.


"Pu i ni dâwn tawh sia?"


Min rawn en a, ka ngaihtuahna rawn hriat a tum a niang.


"Pa pawh ka la ni dâwn alawm."


"Mahse, ka la rai ve mang si lo va?"


Min rawn hnaih a, duat zetin min kuah a, a fa ka la pai lo tlat hi hrehawm ka ti ru a ni. Zorini rai thu kan hria a, kan lâwm êm êm a, chutih rualin keini lahin chanchin lawmawm kan la hre thei si lo.


"Thu kan nei hlei nem, Pathianin hun a tih hunah chuan fa țha tak tak min la pe ve ngei ang, fa nei rih loh pawhin nang duatna hun ka nei tam ting a ni mai."


A thil sawi chuan min hneh takzet. A dik vek bawk, Pathian thu thu a ni a, bâkah, min la duat bîk thei rih bawk a.


Min duat alawm, a thiam ang tâwk chuan min duat, kei pawhin ka duat lêt ve bawk. Ka pasal a ni a, fak a țùlnaah ka fak hreh lo va, zilh a țùlnaah lah ka zilh hreh hek lo; mahse, zilh a ngai lo êm a, fak hi ka uar viau a ni. A chhan chu sawisèlna hian mi siam țhat a hnêkin luhlulna leh runluihna a siam chhuak duh tih ka hre ve tlat, ka pa (tuna ka nu pasal) hian min fak thiam a, kan thil tih țhat ho tê nia kan hriatah pawh min fak phûr thiam a, hei vang hian kan inlaichìnna pawh a țha ni hian ka hre ve tlat a, chuvàngin fak derna ni lovin fak tak takna hi ka uar zâwk.


Lungleiah kan phei leh rih bawk a, ka nu pangpâr tùr kan phurh pheisak a, min lo hmuh chuan a lâwm kher asin. A hlim hmel hmuh chu a nuam ka ti, tunah phei chuan an bulah ka naute an awm tawh bawk si lo va, min hmu a lâwm viau pawh chu a àwm ka ti.


"Nu, i lung a lêng ve viau ang chu tiraw?"


A nui a," An tel lovin ka awm khât a, an ngaihawm khawp mai," a ti a.


"Nia, in pahnih chauh in ni sia, khua a har duh khawp ang; mahse, pangpâr i ngah tawh a, lunglèn hun pawh i nei tawh lovin ka ring," nui chung hian ka ti a.


"Nia, in zârah hei ka nei leh ta țeuh si a, nangni ka fate ka enkawl tluka țhain a nia ka lo enkawl dâwn ni," nui chung ve tho hian a ti a.


Haulawngah chuan zan khat chauh kan riak, Lungleiah kan chhuk a, naute kan hmain kan inah kan lût phawt. Tlai lamah chauh ka in hlui lo ni taah chuan kan phei, anni pawh an lo haw kim tawh a, kan inhmu khâwm chu kan ri nak nak mai.


Nunoi pawh thlalehah a exam dâwn, a training chhuak ve teuh tawh si a, a hlawhtlin ngei pawh ka ring, țha takin chhuak se, hlawh tlêm azawng thawk chhuak se ka ngaihtuah lo ve deuh zual tawh ang.


Zanriah eiho kan rawt a, naktûk tlaiah ni se tiin. A chhan chu kan inhmu khâwm khât a, innèlna hun țha a ni. Taia lah hmuh theihin a awm thei ngai si lo va, Aizawlah awm ve reng mah se kan țuanna mual leh hna a inang lo lutuk a, a inhmuh theih bîk loh.


Zîng ka tho chu ka awm dàn a dik chiah lo, ka khua a sik deuhin ka hria! Peih lo ru zetin ka tho a, nizàna tlai deuh taka ka inbual vàng kha a ni thei ang em?


Ka pum pawh a dik chiah lovin ka hria. Tuilum ka in pawh chuan ka ni nghulh mai, ka luak pawh a chhuak deuhin ka hria, nizàn lama ka thil ei ka ngaihtuah a, ka haw deuh em ni aw ka ti.


Ni a rawn tlâng sàn hnu chuan ka zia ta deuh. Muanzuala chuan min hria ang tih ka hlau khawp ang, a pângngai thei ang berin ka awm lui tlat.


Nilêngin ka awm a nuam lo; mahse, ka tilang lo hrâm hrâm. Muanzuala'n chawhmeh bazàr huna min phût lo erawh chu ka lâwm takzet, ka awm dàn chu hre sa ang ka ti zâwk mah!


Eirawng bàwlna lamah erawh ka buai chhe lo chauh! Chawhmeh bàwlhlo rim chu ka ngai thei țhak lo, ka insûm viau nain bathroom-ah ka tlân lût deuh chhên mai, a hnu lamah erawh ka hnârin ka thaw lo tawp.


Mahse, Muanzuala chuan min lo chîk ngang mai a, haw hnuah ka awm dàn chu min zâwt a, thil awm dàn ka hrilh fiah hnuah chuan ngun zet hian min en a.


"Melo, i rai a ni lo maw?"


Chu chu ka duhthusàm a ni, ka ho hian ka en lêt ve a.


*******


Ka dul puar lang ve âk tawh chu ka chûl hauh hauh a, tunah hian ka pum chhûngah hian naute a awm ve țan tawh chu a ni reng sia, mak ka ti! Tihian ka rai chu a ni ve ta mai si a.


"Duhtak, eng nge nautein ei châk deuhte a nei em?"


Ka nui tawp ringawt. Ka rai țantirh ațangin min ngaihtuah over a, Lungleiah khân ka rai tih kha kan hre chiang kha a ni a, khata țang khân motor-a chuan thui a phal lo va, Lungleiah kan awm chawrh chawrh. Naute insiam chhoh lai a ni si a, chêt sawn a phal lo hi a ni tawp.


Tunah erawh Aizawlah kan awm leh tawh. Thla 5 hnuah chauh a nia kan phei ni! Ei tùr țha țha min leisak a, ka tâna țha tùr engkim min ngaihtuahsak. Ka ei peih loh pawhin 'nautein a ei châk a, min ngèn alawm' a ti ziah, ka hnial thei ngai lo.


Zànah Zorini'n min rawn phone a, muang deuh raih hian a pa damdawi ina a luh thu chu min rawn hrilh a, a ngaihtuahawm viau tih a sawi, a u chu a hrilh ngam lo tih ka hre mai. A u chu lo hrilh ka tiam a, ani hi a rai lian tawh a, thlaleh maiah naute a nei tawh dâwn.


Mutnaah chuan ka hrilh a, engtin mah min chhâng lo, ka pum chu a chûl hoh hoh ringawt. Sawipui vak dàn pawh ka hre chuang lo, hrilh kha ka tih tùr a ni a, ka hrilh a, a țha a ni mai.


A tûk chhùnah Zorini chuan min rawn call leh a, tunah erawh chuan a dang ta zak, a rawn țap țiau tawh!


"Melo, ka pa hian rei a tlin dâwn lo, Mama hming leh i hming a rawn lam chhên mai a, khawngaih takin in nupain rawn lang hrâm ta che u, ka pa hi a sual tih chu ka hria; mahse, a hun tàwp lam tal hi chu rawn hmu ve thei hrâm ula ka ti takzet. Melo, ka u kha khawngaih takin ka pa hmu tùrin rawn sâwm chhuak hrâm tawh aw," a rawn ti ngawih ngawih a.


Damdawi in kan han thlena kan han hmuh chuan a hmel ațangin rei a daih dâwn lo tih ka hre ve nghâl mai, chau takin min lo melh hrâm hrâm. Hman deuha a hmel kha a ang tawh lo, thih dâwn hnaih hian hmel a lo dang țhìn a niang.


A kut a rawn phar a, tîm zet hian Muanzuala chu ka en chho a, ani erawh chu a pângngai reng, a ngawi ngul tak rùn mai. Zorini chuan ka kut chu lain a pa kut chu min vawntîr a, a kut vawt thlar mai ka vawn tâkah chuan khawngaihna ka nei nghâl vat.


A țawng rin theih loh avàngin a hmui bulah ka zu kûn hniam a, harsat hmel tak hian,"Melo, ngaihdam ka dîl..duh che u. Hun rei ka...nei lo, i patea tak tak ka ni lo, i pa nèn khân unau pianghmun kan ni lo va, i pi leh pute'n.. fahrah min enkawl a ni zâwk mah..." a chàwl leh rih a, makti zet hian che map lo hian ka awm ngai chuan ka awm reng a.


"I chunga ka ...chêt dànah khân min ngaidam...rawh, i pasal chungah pawh hian...ngaihdam sên loh thil...ka ti a, ka inchhîr... lutuk, a sâwt tawh...si lo. Nangmah tal hi...chuan min hriat thiam... ka dîl duh che a," a ti a, a hah lutuk chu a khuh leh rih a.


"Min ngaidam...rawh...u..aw, khaw...ngaihin...a pawi..ka...ti..." a țawng țha thei lo, ka kut a vawnna pawh chu a zàwi tial tial a, a dek ang chauh a ni tawh.


A țawng thei ta lo, Zorini a țap nghâl hawk a, a pa chuan mi nung hmel a pu tawh lo, a mit chu a chhîng a, vawi khat a thaw kâwk a, a chatthla nghâl a nih ka ring.


A thi ta.


A thih hmain thu dik a sawi chhuak a, ngaihdam pawh a dîl e, vàn ram chuan lo ngaidam mawlh teh se.





Thla ruk hnuah chuan



"Lo chêt ve tum lo la aw, keimàn ka buaipui thei alawm."


Eng mah sawisèl nei lovin kan naute chu a buaipui. Nunoi'n min awmpui nain a chêt a phal lo, amah vekin naute chu a buaipui, ka pasal hi ka chhuang asin, hetianga a fanu a buaipui hi a mak asin, mipa pà ve tâwk a ni a; mahse, pa țha tak leh pasal țha tak a ni dâwn bawk!


Naute ka neihnaah min hliam nasa lutuk a, ka che thei lo. A che reng chu ka khawngaih si a, chêt ve deuh ka tum lahin a phal si lo, naute a țahin amahin a buaipui a, Nunoi pawh ka bulah a vui deuh lek lek țhìn nia, ka nuih an tizâ a nia!


"I hah tawh àwm mang e!"


Nui suk chung hian," Hahna tham pawh a nih loh hi, ka hah lo, ka hlim zâwk," a ti sup a.


"Mipa ka hrinsak si lo che-"


"Sawi tawh suh, mipa leh hmeichhiaah ka buai lo, ka duh ber naute min hrinsak a, nang i dam bawk, chu chu ka tân thil hlu ber a ni," tiin min en vung vung a.


"Ka hmangaih zual sauh che."


Makti zet hian ka en a, kan inen dùn ràn mai.


"Naute ka hrinsak vàng chein maw?"


Min rawn hnaih sauhin," Ka nupui leh ka fa nu i nih vàngin leh khawvêla ka hmeichhe hmangaih ber i nih vàngin," a ti thûm dût a.


A mak ka ti, chutiang a sawi chhuak ve chu. Ka hlim bawk si, ka țahte lam a chhuakin ka hria.


"A mak hle mai!"


"Ka hmangaih che chu maw mak i tih?"


Khap sak sak chung hian," Aw, min tihlim êm êm bawk. Kha thu kha hriat nuam ka ti viau bawk, hriat nawn fo ka duh ang. Kei pawhin ka hmangaih che," ka ti ve hnâp a.


"Naktûkah Tea làwmthu ka hrilh leh mawlh mawlh ang! Nang hi ka nun thlâk thleng hlawktu, ngaihdamna thinlung min pe theitu leh malsawmna tinrêng chu i lo ni!"


A chhûngte nèn an inpawh tawh miau tlat a! Ka ti lui ve țàng țáng a, harsa chu a ti thlâwt; mahse, ka fuih ve nasa, amah vàng hian kei pawh ka insiam țha nasa!


Min hmangaihna hi a mak ka ti, ka ngaihtuah ngun poh leh a mak ka ti tawlh tawlh.


Kan inhmangaihna hi a mak a ni deuh tawp mai, ka sawi fiah thiam lo.


A MAK!!!...tih bâk chuan.







*HMANGAIHNA CHUAN ENGKIM A BEISEI A, ENGKIM A RING A, THÎKTHU LEH BUAINATE LO AWM VE ȚHÌNIN HARSATNA LO THLENG ȚHÌN MAH SE, ENGKIM A TUAR CHHUAK ȚHÌN*



*******A TÀWP TA*******



(Ka story tlâwm tak 'A MAK!' min lo chhiarsaktu zawng zawngte chungah thinlung takin làwmthu ka sawi mawlh mawlh, a phuailuai, dik lo phelh phawlh laite a tam tih ka hria, min lo chhiar màmsak țhìn a, ka lâwm takzet zet e


Dam takin kan awm vek ang a, hrisêl țha takin, hlim takin inhmuh leh thuai kan tum dâwn u nia, LOVE YOU ALL)