KROSS BULAH CHUAN (ANGEL) by Notei Sailo Mk (Completed)

Episode nei ho a hlawm a dahkhawmna
Ngaia
Site Admin
Posts: 25813
Joined: April 30th, 2016, 4:07 pm

KROSS BULAH CHUAN (ANGEL) by Notei Sailo Mk (Completed)

Unread post by Ngaia » December 2nd, 2019, 8:51 pm

wp9uig1r.jpg
wp9uig1r.jpg (17.36 KiB) Viewed 10210 times
Chapter-1

“Ka rai a,” ka hmaa ding chu en ṭha ngam lovin ka kûn ngal a.



“Eng maw i sawi? I rai maw?” ka thusawi chuan a ṭhawng hle tih a awm dan aṭangin a hriat theih. A meng kawk a, ka lu han bu nghat a hmuh chuan a sam a tuai chho puat a.



“Damdawi i ei ziah ni lawm ni? Ka fa a ni tih i chiang maw?” ka sa zak mai. Amah lo mi dang kawp ka nei lo tih a hre vek. Min lo ring ngai miah lo tihna em ni?



“Damdawi ei pawh ni ila, a him vek lo tih hretu i ni; Doctor i nih kha, i fa ngei a ni. Nang lo mipa dang kawp ka nei lo tih i hriat vek kha,” intihuaisen luiin a mitah tak chuan ka melh lui kar a.



“Ni lo, a ni thei lo”



“Eng chu maw ni thei lo?”



“Ka fa a ni thei lo ang, titla mai rawh”. Tihtlak maw? Ka hresual em ni? A fa titla turin min duh maw? A va nunrawnthlak ve le(h)!



“Eng… Engmaw i sawi?”ka ti bah nawk a.




“I beng a ngawng a mi?Ka fa ni lo lakah mawhphurhna ka hlen a ṭulna ka hre lo,”a thusawi hi awih har ka ti; Duat taka min kuah ṭhintu kha a ni si a maw? Engtin nge a fa a ni lo a tih theih zawk? Ka rilru a nâin, ka thinlung chu thil hriam taka vih ang maiin a nâ a; Ka kut chuan ka âwm chu ka ṭham a, a nat loh phah chuang der si lo.




“Ka titla thei lo, tihsual a nei hleinem,” ka nâ lutuk chu ka ṭah chhuak ut ut a. Ka insûm hram hramna lamah ka âwm a tawt ṭun bawk. Ka mipa hmangaih, ka rin êm êm, ka engkim ka hlan hian min phatsan leh si maw? Ni lo! A ni thei lo... Ni lul suh se!





“Ka kalsan phawt ang che,” a inher tur chu a banah ka vuan bet nghal a, a ding chawt mai. A ban ka vawnna chu a en vut bawk.




“Ni lo… Min kalsan suh. I tel lovin engtin nge ka awm ang? Kan naute hi engtin nge keimah chauhin ka enkawl theih ang? Min ngaihtuah ve miah lo em ni? I theihngilh ta em ni? Kan pahnih fa a nih hi. Khawngaihin min kalsan suh... Aw… Min kalsan lo ang tiraw?” ka melh chho kar a. Ka rilru na lutuk leh thinrim bawk si chu ka khur der der mai. Ṭah chhuah mai hlauvin ka heh ka pet fan fan bawk.





“Ka sawi tawh kha, ka fa a ni thei lo. I titla nih loh chuan kan inkawp thei tawh lo ang.” A va na vawng vawng êm! I mipa hmangaih, engkim i hlanin a fa ngei pawm duh lovin, titla turin hrilh ta che se la; Engtin nge i awm ang? I â emaw i tih hial tur khawpin i thinlung chu a nâ ve ngei ang.





“Ka thisen ringin a nung asin! Ka titla ngai lo ang. A nu leh pa tihsual a tawrhna chhan tur ka hre lo. A pa berin i pawm duh loh chuan ka chelh lui lo ang che. Kal rawh, min kalsan la; I duh ang chuan nung ang che. Kei leh naute chu i rawn ngaihtuah ve kan ngai lo ang. I tan kan thi tawhah ngai rawh. Ka hring ang a, ṭha takin ka enkawl ang. A lo ṭhanlen hunah pawh a paa inchhalin min rawn chuh buai hauh suh ang che. Min rawn biak pawh tum buai duh suh, i thutlukna siamah hian inchhir suh ang che,” a kut ka vawn chu a paih thla a, min kalsan ta a. A tlan liam chu ka thlir vawng vawng mai.



Engtin nge hetiang mipa hi ka lo rin theih zawk?



Ka bianga mittui luang ngiai ngiai chung chuan in lam pan chuan ka haw hnak hnak a. In thlen erawh ka chak zawk zawk lo kher mai. Ka nuhrawnin min lo ânkhum leh ngei ang a, ka boruak tawnin a zir lo nen; ka hmachhawn chak thlawt lo a ni.




Kawng sira ṭhutna lo awmah chuan ka ṭhu thla a, fîm taka ka ngaihtuahna hman tumin ka mit ka chhing vang vang a. Ts-a’n min kalsan lai chu chiang takin ka mitthlaah a lo lang nghal zut zut a.





Mit ka meng a, rilru hahna hlirin ka khat nghal a. Engtin nge ka tih tak ang? Ka nuhrawnin hre ta se engtin nge min tih ang? Min hnawtchhuak mai ang em? Ka fa tel lo paw'n hnawk min ti a nia, ka fa nen chuan min chenpui thei hauh lo ang.




Ka pum la thep zai chu ka chul a, "Bawihte,eng pawh tâwk ila ka venghim tlat ang che. Nang chauh hi ka neih chhun i ni a, min kalsan ve ngai suh ang che aw," ti sap chungin ka ṭhutna aṭanga tho chhuakin kan in lam bawk chu ka pan leh a.




" LALHRUAITLUANG"




Inchhung ka lut chiah chu ka nuhrawnin thinrim tih hriat takin min ko vîn tûar a, min melh rûn chung chuan choka aṭangin a lo chhuak a.




“Khawiah nge i kal?” Min en reng chung chuan ka hmaah chuan a rawn ding a. Ka chhân mai loh vang chuan lungawi lo tih hriat takin a thaw hak a. Chhân tumna pawh ka nei lem lo. Ngawi rengin ka room lam panin ka kal pel a, a âng zui hlâk hlâk pawh chu ka ngaihven peih lo.




Khumah chuan bawk nghal thlawpin ka ṭap khur dâr dâr a, ka âwm zawn nâ lutuk vang chuan ka thaw ṭha hlei thei lo. Ka âwm chu ka chum a, a zia phah deuh chuang si lo. Ts-a thusawi kha ka bengah a ri nawn tluk tluk a, min chen dâk hnua min kalsan hi ka la ring phal lo fo...




Khum aṭang chuan ka tho a, bathroom-a ka hmai phih zo ka chhuak chu khumah bawk chuan ka thu thla a; Ka hma hun ka ngaihtuah a, a thim mûp mai bawk si. Chhum chhah pui, vai kian hlei theih loh khawpa chhah rawn zing lûk ang maiin, ka hma hunah chuan eng de vê vê takngial pawh ka hmu si lo.




Ni e, ka chhungte ka hrilh chuan hmalam hun êng tak ka nei dâwn lo tih ka chiang êm êm. Ka rai thu an hriat rualin min hnawtchhuak nghal dâwn tih lah ka hming ka chian tluk zetin ka chiang bawk si. Zep reng theih lah ni dawn si lo.




Chhungkaw pangngai tak neih ka châk thar phah em em bawk. Ka chenpuite hi ‘ka chhungkua-ah' ka ngai lem lo. Ni e, a sualthlak in ti mai thei; Mahse ka nuhrawn leh a fate pahnih hi ‘ka chhungte’ tiin ka sawi ngai lo. Anni paw’n chhungkaw mi angin min ngai hek lo. Pawi tihna ka nei lo a, ka vui hran lo bawk. Ka chunga ṭhatna, hmangaihna lantir ngai lo a, min deusawhtu te hi ‘ka chhungkuaah' ka ngai thei tlat lo a ni.





Ka nuhrawn hian fa hmasa pahnih neiin mipa leh hmeichhia an ni a. Kei ai chuan an upa hret. Babie-i zawk hi phaiah awmin, ani hi chu a nu ang lo takin a rilru te hi a ṭha zêk a. A u Ruata erawh, a nu siar a nu siar a ni hlauh thung. Ka chungah sual êm êm hran lo mah se, khawvel mi tak a ni a; Zu leh nula lamah a tlan nasa hle thung. Harh fim lai a nei meuh lo ti ila ka sawi sual tam lo hle ang.




Awmpui, chhiahhlawh ang lekin min ngai a, engkim ka kutah an dah ṭhin. Hrehawm ti hle mah ila ka pa ‘In’ a ni a, hei lo ‘In’ dang ka neih miau loh avangin ka chhuahsan thei bîk si lo. Anni nufa lakah hian chân ka tum awzawng lo.




Ka nuin min boralsan hnuin ka pain nupui dang a nei a, ka pa damlai kha chuan harsatna em em a awm lem lo. Mahse ka pa’n min boralsan hnuah erawh a ze tak lo chhuakin, min sawiselna tur a zawng reng ṭhin.




Ka pa kha officer a ni a, harsa lutukin kan awm ngai lo. A thih hnuah erawh a pension ka nuhrawnin a chang a, thil thar chu sawi loh; cheng khat pawh ka hmu ngai lo. Chhiahhlawh ang maiin inah min chhawr a; ka hahin ka chau thei em em a, ka taksa paw'n a tawrh phah hle nghe nghe. Unau pianpui ka nei lo a, ka nuhrawn fa hmasa te phaia awm tih loh chu ka pa nen fa an nei lo.




Kan chhungte an lo kal chuan min hmangaih ber âwm ziazângin a awm a. A kâ pawh zen ila min seh lo ang tih tur khawpin a nunnem thei ang berin a awm ṭhin; An haw hnuah erawh Kâwlkei Sa-hrâng ang hlauh a ni thung.




“Nu, pa! La dam ula ka va’n ti em! Keimah chauhin min hnutchhiah a, min han en teh u; He khawvela ka mal bîkzia hi! Min lo hmu em? Ti nge mal ngawih ngawih tura min kalsan?” Ka pum chu ka dawm vang vang a, “Tu in nei ve tawh dawn asin. Keimah mai chuan ka enkawl thiam dawn lo, in puihna ka mamawh asin. Ka ngaiin ka mamawh takzet che u...” Ka nu leh pa ka ngai thar takzet.





Chau tak chung chuan room ațanga chhuakin chokâ lam chu ka pan a, ka nuhrawn chuan min melh no lo khawp mai. Ka awm tâk avang chuan choka chu a chhuahsan ve nghal a. Rawng chu ka bawl chhunzawm a, ka zawh hnuah ka room-ah bawk chuan lut lehin ka mu a; Ka chau ngawih ngawih. Engmah ngaihtuah loh hrâm ka tum a, ka hlawhchham chiang kher mai. Rilru natnain min tuam leh nghal mûp mûp mai.




Chaw eikham chuan thleng ka seng fel leh vek a. Nau pai indim ngaih lai mah ni se, inchhung chet engkim chu ka tih vek tho a ngai si a. Chau tak chungin ka ti ve zel a. Rai no indim tih chu khawilam a ni ringawt, indim tur paw'n ka dinhmunin a zir si lo.




Ka chenpuite ka nau pai thu hrilh tumna ka nei lem lo a, an hriat hunah hre ve tawp mai rawh se. Vanneihthlak takin rai no ka haw lo hlauh a.Zingkar luak chhuak ka neih bak insawiselna dang ka nei lem lo nen; an tan chuan hriat ngaihna awm vak lo bawk a, a theih chhung chu zêp ka tum hrâm hrâm a ni. Zêp theih loh chin erawh ala awm ngei ang. Ka pum a lo puar lian anga, an la hre tho tho ang. Chutih huna ka dinhmun tur erawh ka ngaihtuah ngam lo. Chumi hma erawh a theih chhung zêp ka tum tlat thung.




Ka account-a pawisa chu la chhuakin, incheck-up turin damdawi in lam chu ka pan a.




Ka pa khan a dam laiin ka account-ah pawisa a lo dah nual mai a. A damlai khan mamawh em em ka neih vak loh avang khan ka la chhuak khat hlê a, a awmloh hnuah erawh ka la chhuak ve ta zeuh zeuh. Ka mamawh ngawih ngawih bak ka lei ngai lo.Sum țha hnem ve tak ni mah se, hma lam hun a hriat miau loh avangin ka ren thei hle. Naute mamawh neuh neuh lei ala ngai anga, ka inenkawlna tur nen; sum hmanna ala tam dawn chauh avanga private clinic pan lova Civil damdawiin Opd pan ka ni rêng bawk a.



Damdawi inah chuan ka hming an lam hun nghakin ka țhu ve rân a. Khaw lum kara mi zi hût hût nen; ka ning hluah hluah. Ṭhenkhat an pasal te'n an rawn kalpui a, duat taka an nupuite an han ngaihsak vel han hmuh chuan rilru a na tharin hmuh hrehawm ka ti lek lek. Chutih rual erawh chuan, ka awt ru ngawih ngawih lawi si.




An pasalte nen hlim tak leh nghakhlel takin an fa lo piang tur an hmuak bîk si a. Ka naute erawh a lo pian chhuah hma hauhin a pa ngei chuan duh lovin a hnawl si a. A lo piang chhuak anga, ‘pa’ ti-a koh tur a nei ve dawn si lo. Ka ngaihtuah zawng ringawt pawhin ka na vawng vawng chu a ni si a.




Ka hming an lam chuan ka țhutna ațanga tho vatin room chhungah chuan ka lut nghal a. Uluk fê-a min en zawh hnu chuan damdawi lei tur a ziak nghal a, indim tur leh rit chawi lo tur te, ei tur țha ei tur te’n min chah uar hle bawk. Check-up leh hun a sawi zawh hnu chuan room chu ka chhuahsan nghal a.




Damdawi ka lei zawh hnu chuan ala hma tho avangin ka Ni-te tlawh turin an in lam ka pan a. Muang changin ka kal chhêt chhêt a, ka rai vang nge, ka hah hmain ka chau hma em em a; Thil ka ei țha lo bawk nen ka cherin ka dawldang em em bawk.





Ka Ni-te in ka thlen chuan amah chauhin a lo awm a, a hmel ka hmu chu ka țap chhuak hawk mai. Hmangaih taka min kuah țhintu hmel han hmuh meuh chuan insum a har kher mai.




“Bawihi, engtizia nge? Harsatna i tawk em ni?” min kuah vawng vawng pah chuan a ti dam diai a. Mi zaidam tih takah a bula awm hi a hahdamthlak țhin a nia.




“Ni…ka insut hlawp hlawp a…”




“Eng nge sawi la? I cherin i dawldang bawk si a, i damlo em ni?” min kuahna tihthawl pah chuan min thlek kual a.




“Ni, engtin nge ka tih ang?” duh ang pawn ka țawng țha hlei thei lo.




“Ṭhu phawt ila,”tih leh sofa-ah chuan min ṭhutpui nghal a.




“Ih…eng lo a nia.. Ni, nau ka pai a,” hreh tak chung chuan ka sawi chhuak ta nge nge. A meng kawk dânah ka thusawi chuan a ṭhawng hle tih a hriat.





“Aw… a va pawi ve.. Bawihi.. tu nge a pa?”




“Ts-a kha, i hria ti raw?”a lu chu a bu nghat a.




“Ts-a chuan a hre tawh em?” a ti leh sup a, ka lu bu pah chuan..,.




“Ani chuan a fa a nih a ring lo a, titla turin min ti a,” ka sawi zawh rual .chuan ka Nî hmel chu thinrim hmelin a khat a. “Ni… a ni lo mipa dang an awm lo asin. A pain duh lo mah se, kei chuan ka duh asin. Ka ti tla thei lo, tihsual a nei ve hleinem; Kan tihsual rah ka tawrhtir ngawt thei lo. Ka thutlukna siam hi a dik ti raw?” ka Ni chu ka en rân a. Min khawngaihna leh lainatna chu a mitah chuan ka hmu thei.





“Thutlukna dik tak i siam a ni. Ka chhuang lutuk che. I nuin a hre tawh em? Lu ka thing nâ nâ a hmuh chuan a thaw hawk a, “Engtik nge hrilh i tum?”




“Ka hre lo, an hriat hun hunah hre ve tawp rawh se,” ka ti sap a.




“I thinrim lo mi?” ka’n ti leh hnuhnawh a




“Rilru chu na viau mah se, a nih tur ang a ni vek tawh a. Thinrimin awmzia a nei hleinem. I lakah phei chuan ka thinrim thei lo tih i hriat kha.” a tih chuan ka kuah vawng vawng mai. Ka Ni hi chuan ka tet lai aṭang tawhin thinrimin min hau ngai lo reng a ni.




Fapa pahnih a nei a, fanu a neih loh vang hian min duat a, ka nu awm loh aṭang phei chuan min duatin min ngaihsak leh zual a. Ka nuhrawn hin ngainat loh vang hian a lo kal khat ṭhin hle a. Phone erawh chuan kan inbe deuh reng thung. An ina awm tur paw’n min sawm nasa; Mahse, ka pate nena hlim taka kan chen hona in hi an kutah ka hlan phal bîk loh avangin hrehawm tuar chunga la awm ve fân fân mai chauh ka ni.




Ka Ni chuan sawn mante pawh dil a sawi nâin ka ûksak pui lem lo. A fa duh lo na na na chuan, pa nih a phu bîk lo ka ti ve tlat a. A pasal, pa Rina bula a lo thlen phawt tur thu a sawi a, ṭul leh ṭha an tih anga hma la turin ka haw san ta a. Upa zawk an ni a, thil kal hmang pawh an hre zawk a, an kut a dah kha a finthlak ber. In lama ka chenpuite thurawn lâk emaw an kuta dah ka tum kher lo. Anni an lo inrawlh buai ve a ngaihna ka hre lo.




In ka thleng a, rawng ka bawl sawk sawk a. Ka bawl zawh chuan inbual faiin khumah ka mu a. Ka naute hi a pain duh lo mah se, kei chuan thisen hlawm mai la ni mah se, ka hmangaih ngawih ngawih si a. Ka dul chu ka chûl ka chûl a, chakna thar ka neih phahin ka inhre tlat nia.




Kan phone a rawn rîk chuan ka phu nghek. Zan 10 a peih chiah. Eng nge maw ka lo ngaihtuah leh vung vung tâk ni?




"Hello," phone chu ka pick nghal vat a,





"LALHRUAITLUANG,” ka phu chiang lutuk, ka mut chhuak pawh a reh vek thei nia. A thinrim hle tih a aw aṭangin ka hre mai.





“Sawi la..”




“Eng vang a sawn man rawn diltir nge i nih? Ka fa a ni lo ka ti a ni lawm ni? I va ngam zawk ve! Hei hi hre rawh; Ka fa a ni lo a, sawn man ka pekna tur che u ka hre lo, min rawn tibuai suh,” tih leh dah a rual a. A duh a sawi zo a, a dah leh nghal chu ka run kher mai. Ka phone ka melh nghek ringawt.




A thusawi lah kha ka hrethiam lo takzet. Eng nge a sawi kha.? Sawn man maw ka diltir a maw?




Ni lo.. ka Ni number chu ka hmet chhuak nghal a, a in-ring hnu lawkah a rawn chhang a...




“Ni, sawn man in dil em ni?” ka ti nghal tawng a, a thaw halh tih ka hre thei...




“Bawihi, i pa Rina’n dil a ti tlat a, i nu te pawh râwn lovin an va kal anih kha! I chhungte hriat i duh si lo a, i pa Rina’n a hma lama tih a ṭha a tih vangin i pa Zoa nen an va kal a nih kha. Engtin nge i hriat a? An lo haw hunah rawn hrilh che ka tum tho a,” a ti dam thlap a.




“Ts-a’n min rawn bia a,” ka tih chuan “Eng nge a sawi?” A rawn ti nghal zat a.




Ts-a rawn ṭawng dan ka hrilh hnu chuan a ngaihdan a ni lo tih a aw aṭangin ka hre mai a, “Bawihi, i pa te thu lo hawn ngaihchan pahin naktuk chu lo phei rawh aw. Lo ngaihtuah hah duh suh, engkim a ṭha leh vat mai ang. Inenkawl ṭha la, chaw te i ei em.?” a tih chuan chaw ei lovin ka mu tlang tih ka hre chiah.




Ka Ni nen kan inbiak zawh hnu chuan chaw ei turin ka tho nghal a. 'Ti nge maw min kaithawh ve mai loh le?' ti nang nang chungin chaw ei tur chu ka insiam mawlh mawlh a. Ei châk lo viau mah ila ka naute vang tal pawhin tlem tal ka ei a ngai si a.




Tv ka en lai chuan, ka nuhrawn leh mipa pakhat an rawn inkuah lut a, an hmel aṭangin an harh fim lo tih a hriat reng. Khawi lam mi nge tih pawh hriat loh hi rawn hruai haw a ching a, a lo tih fo ṭhin a nih avangin min ṭhawng teh chiam lo.




“Hei, i pa tur a nih hi,” rawn ti buh deuh nuai chung chuan room lam panin a kal bu lûk lûk a. Chu pa lah chuan, chîk zêta ka taksa melh pahin a lo nui suk a, room lam chu a pan ve nghal a.




Eng nge maw awmzia ni? Mipa hrang hrang chu a rawn hruai lut ṭhin ngei a, tumah ‘I pa tur’ tih a nei ngai lo. Â ngaihtuah buai lo zawk teh ang. A duh duh chu nei ang hmiang.




Ni a ral ve bek bek a, thla a liam a, Ts-a lah a reh hian a reh vawng vawng mai. John-a, ka nuhrawn pasal pawh chu kan inah a cheng ve reng a, min en vung vung ṭhin vang hian ka ngaina lem lo. Ka hlau deuh tlat.




Ka nau pai pawh theih ang angin ka inenkawl ve a, ka Niin min pui bawk. Thla li a kai ve tawh a, ka thil ei a tui ṭan nen ka taksa pawh a êng ve ṭan.




Ka room kawngka inkik dat dat ka va hawn chuan, John-a chu kawngka bula lo ding reng ka hmuh chuan hlauhnain min tuam nghal a. Kawngka khar lehnghal ka tum chu hre lawk ni âwm fahranin a ke-a lo dangin a rawn pen lut nghal a.




Ka chhunglama khur dêr dêr chung chuan ka tawlh hnung nghal a. Ka lam a rawn pan zel avang chuan ka mangang lutuk chuan bang lam chu ka pan ta ringawt a.




Ka bul a lo thlen chuan hlau lo ang maiin ka lo melh let kar a. Ka lu zawnah a rawn innem khalh a; Chu veleh, che thutin a sirah chuan pheiin tlanchhiat tumin ka bei a, ka hlawhchham chiang hle.




Ka kawngah manin khumah chuan min theh thlu ṭhuai a, ka rak ṭhat. Ka au tur chu a kutin ka hmui rawn hupin, a taksa chuan min delh nghal a.





Ka tal laih laih a, thaah ka hneh si lo. Ka hlauvin ka mangang tak zet a, chêt ngaihna ka hre hlawl bawk si lo.




Ka kut man khawmin min en ran a, a mitmeng ka hmuh chuan ka ṭim ur ur thei.




“Khawngaihin min kaltir rawh,” ka ti ṭuau a.




“Ti khan awm ṭha hle hle rawh,” ti chauhin min chhang a. Ka mittui luang chu a kut chuan rawn tuai hulin, “Hlau suh, engtin mah ka ti dawn lo che. Mahse, ti hian kan awm lawk a ngai,” ti supin ka chalah a rawn fawp thuak a.




“Eng vangin maw hetia kan awm a ngaih kher?” ka hmui chu rawn hup nghalin, “ Ṭawng ring suh, tunah chuan engmah ka sawi thei rih lo, nakinah i hrethiam mai ang, min ring tawp la ni mai,” ti sup chuan kawngkhar lam chu melhin a tho nghal vut a.




Eng nge maw a awmzia ni? Khatia a rawn chet ringawt le? Eng nge ka hriatthiam tur awm chu ni ang le? Ka ngaihtuah ngial pawhin a ngaihna ka hre thlawt si lo. Ka rilru a buai map mai.!





John-a chu kan inah a la cheng reng a, kar a liam leh tawh. Kha zan bak kha ka room-ah a rawn lut leh tawh lo. Min en leh vung vung ṭhin a, hlau ru deuh viau mah ila ka chungah engmah a tih zawm tâk loh avangin tlem chuan ka inthlah dul deuh. Ka nuhrawn lakah pawh min chhan chang a nei thin. Engtin nge maw a tih ni? Ka nuhrawn hian a hlauin a thuhnuaiah a dah thei hauh si lo. Mak ve tak chu a ni. Mipa dang chu ni se, an chhuahsan leh daih tawh ang.





Ts-a nen pawh thinrima min rawn biak bak kha kan inbe leh ta lo. A reh char char a, engtin nge a awm tak pawh ka hre zui lo. Ka ngaihven lo, biak tumna pawh ka nei hek lo. Mahse, ka ngaih erawh a bang chuang si lo!



[nshima]



Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » December 2nd, 2019, 8:51 pm

Chapter-2




“HRUAITLUANG, LO CHHUAK TEH,” ka nuhrawn aw vin ṭhak ka hriat chuan room aṭang chuan ka chhuak nghal vat a; min melh no lo nasa mai.




Sofa-ah ṭhuin, a epah chiah ka ṭhu thla ve nghal a. A zung chala min kawk sawk chung chuan, “Mi hurnu, nang hian nau i pai a maw? Tu fa nge? I va zak lo ve, ” tih leh kut min thlak a rual a, ka hawi sawk mai. Chu chu duh tawk mai lovin ka samah rawn ṭhamin, “Sawi rawh, tu fa nge?" a ti tuarh a, sawi erawh ka tum lo.




A lo buai vena tur a awm lo. Tun hma kha zawng paw’n ka nunah a inrawlh ngai lo. Chhiahhlawh anga min chhawr theih chuan eng pawh ti ila a buai ngai lo kha a nia. Kum hnih dâwn Ts-a nen kan inzui chung paw’n, a hre lo hrim hrim a nia. Ka nuna a buai ngai lo ang bawk khan, tunah pawh hian buai lo se ka duh.




Ka chhân mai loh avang chuan a thinrim belh sauh tih ka hria. “Min tihzahzia hi, ka zêp ê i ti khanglang lehnghal a, zakthei lo lutuk mai,” ka hmaia ben leh ṭhuai pah chuan a ti hrawk a. Ka biang chu ka dawm nghal vat a, a thipin a sa ham ham mai.




“In siam la, he in hi chhuahsan nghal ang che, mi hur leh lepchiah lutuk ka chenpui peih lo,” tiin room lam min pan san a.





Chhuatah chuan ka ṭhu hnawk a, mi hur leh lepchiah ka nih lohzia hretu a ni.




Ni e, thil chu ka tisual ngei a lawm, ka neih hlu ber ka hmangaih hnenah ka hlan a. Ka hmangaih êm avang khan a tan ui ka nei ngai lo; Ka neih zawng zawng ka hlan hial a nia. Chu chu mi hur nihna a ni ngai dâwn em ni? Ni lûl suh se…





Hmangaihnaah tlu lutin, a par tlan dunin, a zu kan têm dun a ni si a. Ka vanneihnain min kiansanin, ka hmangaih khan fa a duh miau loh avangin min kalsan mah se, inchhirna ka nei chuang lo. Ka hmangaih miau a lawm!





Ka nuhrawnin chhuak tur min ti chu mak ka tiin awih har ka ti. Ṭah chhuak viau mah ila ka mittui ka dang hram hram. ‘Ka ṭap tur a ni lo, chak lohna lantirna a ni si a’ ti-a mahni infuih ru chung chuan ka tho zui nghal a, room lam panin ka pen chhet chhet a.




Darthlalanga ka inen chuan ka biang duk raih ka hmu nghal zat a, ka chûl a, a na phian lehnghal.




Kan in, ka nu leh pa te nen hlim taka kan lo chenna chhuahsan tura ka inngaihtuah rual chuan ka na nghal rawih rawih mai. A kut min thlakna ai mahin a na ka ti zawk.




Ka thawmhnaw tlem leh ka mamawh tur ho chu ka bag-ah chuan ka khung a. Ka chhuah dawn chuan pindan chu enin ka hawi kual a, ka hnuk a ulh ṭeuh mai. Naupanlai aṭanga ka pindan bîk kha ka chhuahsan dâwn chu a ni si a.





Kawngka bianga ka nuhrawn lo ding rân chu ngaihdam dil a, min hnawtchhuak lo tura ngen ka tum lo bur. Ka nau pai tan hian an zinga chen reng hi a ṭha si lo a. Duh ang paw’n ka inenkawl thei si lo. Mahse…




Khawi lam nge ka pan tâk ang? In luah tur ka hre mai bawk si lo. Tunah khua a thim titih tawh a, khawiah nge ka riah tâk ang? Thian ṭha belh tur ka nei bawk si lo. Ka nu leh pa te lama kan chhungte lah ka Ni tih loh chu Aizawl-a awm an awm si lo.




Ka Ni… ni tak.. ka Ni a awm tak a lawm. Engtin nge ka theihngilh theih zawk? Ka phone chu phawrhin ka Ni number chu ka hmet chhuak nghal a, ka call dawn chiah tihin ka phone chu a in switch off nghal hmak mai. Switch on ka tum a, ka hlawhchham dêr mai. A battery a low leh tawh aniang.




“Chhe lutuk,” ti sapin ka phone chu ka melh nghek ringawt. Mi phone hman dâwnin ka Nî number ka hre si lo. Ka pa Rina number phei chu ka hre lo leh zual.. huizz..





Kawng sirah chuan ka ṭhu hnak a, taxi ka châng a; a vâng hrep lehnghal. Ke a kal ralah chuan kan inhlat ang reng si. Ka ṭhut hmunah chuan ka indawm kun ngal a.




Ka bul lawk a car lo ding vang chuan ka hawi chhuak vût a, car aṭang a Ts-a lo chhuak chu melh zeuhin ka hawi sawn nghal vat a. Tun ang tlai tawhah helamah eng nge maw a tih ni? Ka hmuh lohna a rei ve bawk a, a tla ve kuam mai.




“Hetah eng nge i tih?” zawk zamah chuan! Ka zawhna tur zawk a ni sin le!




“Ti nge, ka ṭhu thei lo mi?” a rum nghut a, ka thusawi vang chuan a lungawi lo tih ka hre reng; chutih rualin biak ṭhat ka tum dêr lo.




“Lo chuang rawh, ka thlah ang che,” ka lo ner sawk mai.




“Thla li liam ta khan min thlah tawh kha, i la duh tawk nange? Kal rawh, tibuai lo tur chein min tih kha, bakah i lo buai vena tur a awm lo bawk,” ka chhanna vang chuan a mit meng a dûr tawh khawp mai.




“I lo chuang dawn nge ka pawm lut dawn che?”




“Ka mamawh lo che,” ka theih tawk chuan ka melh rum ve a




“Harsatna i tawk a nih kha. Tawk lo ni la khatiang bag nen khan helaiah i ṭhu lo ang,” amah pawh en duh lo chuan ka hawi sawn ta daih a.





Ka bula ka bag dah chu rawn la lawkin a motor-ah chuan a theh lut nghal a. Chutah min chawi lawp a, duh anga ka chet hmain Car seat-ah chuan min nghat fel ât mai.


A

Motor kal huala, a rawn ṭhut luh chuan ka lo melh nghal rawm rawm a... Engah vak a ngai lem hlei law! Ka thinrim ve teh reng nen.




Motor chu tinungin a tlan chhuak nghal a, “Khawi lam nge ka pan dawn?” a tih chuan “ITI,” rang lutukin ka lo chhang a. A nui suk chu ka mit sirin ka hmu.




ITI lam pan chuan a tlan a, kan inbe lem lo; ṭawng kan châk lo dun te pawh a niang. Glass down-in pawn lam chu ka hawi a, thlifimin min chhem heuh heuh chuan ka harh sawng sawng mai. Nuam ti taka thlifim ka dawn lai chuan glass a rawn up hmak a nih chu! Uikawm kir ker reuh lutuk.




“In ṭha zel em?” a zawhna vang chuan ka hawihai dawn viau nain ka pum a melh takah chuan naute nen kan chungchang a sawi tih ka hre chiah.




“Umm..,” ka lu ka bu pah nghut a.
Han biak a, han titi pui hluai ka châk hran lo. Tunah ka hun tawn nen ngat phei chuan ṭawng châkna pakhat mah ka nei lo; ṭawng dawn pawh ni ila sawi tur engmah ka hre lo. Ka hul a ni tawp mai.






Ka mit ka chhing vang vang a, ka hmaah chuan ka nuhrawnin min nuihsawh hmel chu chiang takin a lang a; ani khan ka rai hi pawi tihna pakhatmah a nei lo tih ka chiang. In aṭanga min hnawhchhuah theihna hun remchang a nih vangin a lawm zawk tih ka hriat loh hi a ring emaw ni reng reng le, engkim ka hre vek si a. Chu erawh hriattir kher ka tum lo.






Kan in leh lo, kan ram, kan neih zawng zawng hi kei min hnawhchhuah vang ngawtin a nei thei dawn lo tih hi a hre hauh si lo. Eng ang paw'n kan engkim hi min chhuhsak tumin bei mah se, a hlawhtling hauh lo ang tih ka chiang hle. Chu ti maia awlsama neih chi ni nghal lo chuan!






Motor dingah chuan ka meng chhuak a, ka Ni te in kawt kan lo thleng der mai.






Car aṭanga chhuk tum chuan kawngkhar hawnna ka vuan chiah chuan ka ban leh lam chu rawn vuanin a aw a thian zui nghal zat a. A lam ka hawi chuan sawi duh nei ni awm takin a ka a âng zuai a, mahse, engmah sawi lo chuan min en reng a, a mit ah chuan khawharna leh inthiamlohna ka hmu thei.






Ka mit chu la sawnin chhuk tum chuan car khawngkhar chu ka hawng nghal a, ka ke ka pen chhuah rual chuan,






“In enkawl ṭha ang che, I cher viau ania,” ti supin min vawnna chu a thlah a. Engtinmah chhang lo chuan ka chhuak nghal a, a ni pawh engmah sawi lo chuan a tlan ve nghal a.



A tlan liam thleng chuan ka thlir vang vang a.




KUM 5 HNUAH




Ka fanu tui taka muhil thaw sêk sêk chu ka thlir reng a, hmuh hrehawm a ni lo chiang kher mai. Engkimah a pa a chhun fai vek ti ila ka sawi sual tam lo ang. A vun ngo veng erawh kei min chhunna awm ve chhun a ni. A sam tlem a kir beb chuan a tilang cute takzet a, ama tawkah a chumin, a tut el reuh a; duat pawh a hlawh hle nghe nghe.





A pian tirh aṭangin han sawiselna tur êm êm ka hre hran lo. A fel êm êm a, a ṭah belh bawk si lo. A ṭap ngai lo lutuk hi ka pa Rina’n a duat chhan ber pawh a ni. Han nawrh leh suakbak a ching bawk si lo. Ka tan chuan fanu ‘Rangkachak’ a ni tawp mai. Pathian zarah a hriselna pawh a ṭha a, tlang hri leng a dawng ṭhin tih loh chu han nat leh damloh êm êm a nei ngai lo hi a vanneihthlak hle.




Ka pai laia harsatna hrang hrang ka tawh te kha Duati lo pian khan ka theihnghilh fai vek emaw tih tur khawpin ka hlimin ka lawm a, tun thleng hian ka hlimna leh ka chakna a ni reng a ni.





Duati hming hi ka pa Rina’n phuah a hauh tlat avangin kan kian hlawm a, a hmingah ‘Angel Lalremruati’ a sa a, kan lungawiin kan pawm tlang hle.





Ka Ni-te chhungkua hi ka rai lai atang tawhin ka tihbuaia ka tihhah tehlul nen, ning leh chau angin an awm ngai lo a; hmel hmuh nuam lo an pu ngai miah lo. A chang chuan ka inthlahrung ve hle ṭhin a, tih theih dang ka nei chuang bawk si lo.





Ka nau neih thleng khan an bulah ka cheng ve ta reng a, ka fanu kum hnih a tlin hmain ka pa te khua Saitual-ah ka Ni puihnain ka awmpui ta daih a. Aizawl-a awm a, Ts-a chanchin ṭha lo leh min tihbuai phak loha awm kha ka duh vang a, ka Ni te remti vak lo chunga Aizawl chhuahsan ka ni. Ka fanu School kal a hun ve tawh avangin Aizawl lamah ka Ni-ten admission an lo tih fel tawh vangin naktuk hian Aizawl lam pan tum kan ni.





Ts-a khan Duati ka neih hnuah min tihbuai a ching a, rui chunga rawn kalin thei leh thei lovin nau mu tui lai pawm phet a tum a, keiin ka lo phal lo nen kan inhnial leh nge nge ṭhin.




Ka pai laia titla tura min ti a, naute duh lova kalsantu khan, fanu ka nei tih a hriat khan min chuhpui zu han tum tlat a; zakthei lo asin!




Ka fanu chu min chuhpui a tum thu a sawi fo tâkah chuan, Aizawl chhuahsan mai kha a finthlak berah ngaiin ka chhuahpui ta a ni. Dawihzep min ti mah ula ka dem lo che u. A hun lai kha chuan intichak turin chakna reng reng kha ka nei mawlh lo a tin ni.




Ts-a'n min tihbuai mai bakah, ka nuhrawnin kan ram neih tumin min tibuai ve sek bawk nen, ka boruak tawn rit lutuk khan min tichau a ni ber mai.





Sumo-ah chuan chuangin Aizawl lam pan chuan kan tlan a. Kawng lakah harsatna em em kan tawk lovin, thingpui ina kan chawlh zawk bak kan ding mang lo. Ṭhutpui te an fel a, kawng thui tak a ni lem lo bawk nen, kan thleng vat mai reng a. Chawhnu dar hnihah Aizawl kan lut a, counter-ah ka Ni-in min lo hmuak a, min hmu chu kan lam a rawn pan nghal vatin Duati chu a pawm nghal chat a, phone-a inbe deuh reng an ni bawk a, a lo duh ve mai bawk a.





In kan lut a, Duati chu a ṭawng barh barh a, ka Ni chuan amah en kar chuan a thusawi chu a lo ngaihthlak sak bawk a. An pitu-in tu dang an ngai lem lo khawp mai. Room-ah bag vel dah felin ka lut a, engkim mai chu a lo faisarh vek mai.





Ka pa Rina te an lo haw meuh chuan Duati nen kan inbual fai fel vek tawh.





Chaw eikham chuan Duati school kalna tur chungchang vel kan sawi a, a ṭhat hmel viau mai. School thar niin kumin-ah bul an ṭan ve chauh a, in aṭangin a hla lo bawk nen; a tihzia phian.




Kei erawh ka pa sum min khawlsak hmangin sumdawnna bul ṭan tumin ka pa Rina'n hma min lakpui a, kan la tifel thei chiah lo.




Duati school ṭan a hun avang chuan an school-ah chuan ka va thlah a, ani pawh rin aiin a phur viau mai. Eng nge maw a an dawn ni?




In dang luah an phal loh avang chuan ka Ni te bulah chuan kan cheng ve ta reng a. Duati an lo ngai ve bawk nen, hmun dang awm an remti thlawt lo a ni.




Duati school kal hruai leh thlah chu ka nitin hna a ni mai. A fingin a rilru a chak bawk a, an zirlai chu a hneh ve rih khawp mai. Naupang dangte angin harh viau lo mah se, ama tawkah chuan a active ṭha ve viau tho.




Ni khat chu, Duati school bang ka hruai chu, kan hmaa lo ding vang chuan ka pen tawp chiang kher mai; Ts-a! Inkaia kal kan nih vang chuan Duati pawh chu a ding lo thei lova, kan hma tak a mipa ding chu kan en ran a, en reng reng pawhin a harhfim lo tih a hriat. Engtin nge doctor inuluk tak ni ṭhin kha hetiang hian a lo bawrchhawr theih zawk ni?




Ani pawhin min hmu thut chu a beisei bîk lo a ni mah na, a meng kawk a, a hnuah erawh min melh run mai.




Harh chhuak thutin Duati chu chak takin ka kalpui hlawk hlawk a, ani pawh chu ngawi reng chuan a pen ve pawk pawk a.




"Tluangte," min kohna chu haiderin a aia chakin ka kal a, ka kal hlawk hlawk a ni ber.


.
"Ânu, ka hah tawh e," ka rilru buai nuai vang chuan Duati reng reng ka lo hrechang tawh lo.





Ts-a khan min umzui hlauvin chak takin ka lo kalpui chu niin. Âtthlak lutuk! Engtin nge a nuna a paih chhuahte hi min umzui duh teh lul ang ni. Engtin nge chutiang te ka ngaihtuah theih zawk ni? Mawl leh lutuk mai. Ka inkuk fawk lo chauh




Duati chu enin, a bulah chuan ṭhu hniamin ka kut pahnih chuan a biang ka khuap a. A hmel ka hmuh meuh chu ka inthiamlo ve det. Hah tih hriat takin a biang a tai tek a, a sam chu a bet thlap bawk.




A chalah chuan ka fawp zeuh a. Ani hi ka fanu chauh, keima fa bîk chiah a ni.Tuman min chuh buai thei lovang. A pa ni lo, a fa duh lotu hi pa hming put a phu ve love. Ts-a tak ngial pawhin min laksak hauh lovang.




"Ka tihpalh, muangchangin kan kal tawh dawn nia," ka tih chuan a nui ver ver mai. Seh nawk nawk mai ka va'n châk tak!




In kan thlen meuh chuan ka hah hle, ka lo insangmar viau ni tur a ni. Ts-a ka hmuh aṭang khan rilru pangngai pu thei hek lo i!




Chuta ṭang chuan rilru hahdam ni rêng ka nei meuh ta lo. Ts-a'n a hma anga Duati min chuhpui a, min tihbuai leh hlau reng rengin ka awm a, ka thla a muang lo a ni ber.




Ka beisei loh zawk ka nuhrawn a rawn lang thung. Ka Ni te inah chuan thawveng fahran hian a tei hah hah a, chapo hmel takin a dâk deuh vah lehnghal a; zakthei lo ka'n ti mai mai khawp a.




"In saw ka hralh dawn a, rawn sawi buai suh ang che," ka phu dawrh mai.


Eng thu nge a sawi hi!



"Eng....eng maw i sawi?" A thusawi ka hriat loh vanga zawt ni lovin, ka rin leh beisei loh lutuk a sawi vanga zawt nawn zawk ka ni.




"In saw ka tiral dawn a nih chu," ngeiawm fahranin a nui sak a


"I thei lo"




"Ka thei lutuk mah mah," a hawi 'champ' khawp mai




"Lehkha pawimawh zawng zawng ka kawl vek, Lsc pass nen lam ka kawl, chutin i tiral ngawt thei lo," ka ti ve sak. Ni e, engkim ka kawl alawm. Lsc pass-na tel lo chuan tuman an lei duh lo ang.




"Aw...pass-na i kawl a ni mai thei, mahse, kha pawh kha ka ta a nih kha," hnehtu inti zetin a ti fak a, a hawi vah leh, a hmel a min tham lo hmel lang chu, ngeiawm duh ve tak a ni.





"Pass-na hi ka hming a ni tih hre siin engtin nge i ta a nih theih ang a," ka ti let ve sak. Ni e, kan ram pass-na hi ka pa khan ka hmingin a dah tlat a ni.




"He thil hi i lo hre ve nange? Khawngaihthlakawmte! I hmel aṭang chuan i la hmu ngai lo a nih hmel? Intithei fahran chun a nui uar uar a.




Ka awih thei lo. Mak tih vangin ka meng kawk. He lehkha hi a lo awm reng a maw? Tun hmain a awm tih pawh ka hre lo hrim hrim. He lehkha thu hi tuman an sawi ngai lo hrim hrim.




Lehkha chu chhiar chiang tur chuan ka pawt thla dawn a, a lo lek kang daih a. A inziak erawh ka chhiar nual hman.




Ka pa pawh khan he lehkha hi min hrilh ngai lo hrim hrim. A hriatpui lo tihna em ni le?









Ka ngaihtuahna a buai map mai!



[nshima]

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » December 2nd, 2019, 8:51 pm

Chapter-3





Lehkha-ah khan 'kan ram, kan in leh lo dinna tih loh chu ka nuhrawnin a chang ang' tih a inziak a, chiang tak erawh chuan ka en hman lo. Kha lehkhaa inziak ṭhenkhatte, a ni leh thla te pawh ka enchiang hman lo a ni.





Ka nuhrawn chhuah hnu pawh chuan ka ngaihtuahna chu buai tak a ni. Engtin nge kha lehkha kha a awm tih ka hriat loh theih? A lem an siam te hi ni mai lo maw le? Nge ka hriat hlauvin an lo thukru zawk ni ang? Ka Ni-te lo haw se sawipui vat a ngai a ni. Kan ram saw, ani(ka nuhrawn) lakah hian chân ka tum bau lo. Teuh lo rapthlak lutuk!





Ka Ni-te an lo haw chuan engkim chu ka hrilh vek a, anni pawh chu a ṭhawng hle. Chuti maia ram tihral chu an remti bîk hauh lo, hmalak a, kan dan vat a ngaih thu an sawi a. A ṭul phawt chuan court thlen pawh an inhuam thu an sawi bawk.





Vanneihthlak takin Sangpuia (ka Ni fapa) a lo haw dawn a, a kutah kan dah fel hmak mai. Ukil a ni a, ani chuan hmalak dan a hre êm êm ang.





Duati pawh an school chu nuam a ti hle a, ṭhiante neiin an inkawm ve nak nak zel mai; an hmuhnawm thei phian.





Zan khat chu Ts-a rawn lang hlawl mai. Eng nge maw a hriat ni? Kan inhmuh bak kha a rawn lang leh ta miah lo kha a nia. Kei lah pek chuan a rawn lut chu ka lo en reng, a lai ve deuh emaw ni!





Hmana amah chiah kha ni leh tawh; a cher deuh tih mai lo chu. A rui lo a, zu rim a nam hek lo. A fresh em em mai bawk si. Chhelo tak a ni!🙈





Duati lah chuan a pa tih hre lek lovin a nel phian a. A malchung a ṭhu chung chuan zawhna a zawt reng a. Ho deuh deuh pawh zawt mah se, ṭha tak chuan a chhang zel a. Ning hmel a pu lo eih lo. Hlim hmel puin zu han chhang zel a. Hetiangin Duati'n mipa a nel ngai lo hrim hrim.





Kei erawh a rukin ka lo thinrim ṭun thung. Ka kut chu ka hum ruh ngawt ngawt a, tihtheih lah ka nei dêr si lo.





Ka Ni-in a biak chuan ṭha takin a chhang a, kei erawhin biak tumna ka nei lo. Ka pa Rina kohhran committee-ah kal a, ka Ni hovin kan awm a ni.





Thingpui ka pek chuan, "Ka lawm e," a ti sup a, kei erawh ka kalsawn vat thung. Duati chuan a toys te phawrhin a bulah chuan a rem ṭhât a. A naute hming chu a hrilh malh malh a.





A haw dawn chuan min melh pahin a haw tur thu a sawi nghal a, a awmzia chu thlah a phut tihna. Kan inngaihzawn laia a tihdan a ni miau a lawm. Mahse, ka thlah lo ang.





Duati chu pawmin a hrilhru a, eng nge a sawi pawh hriat ni suh.





"Ânu, Âpapa hi pawn thleng thlah ang," ka va'n ngei tak! Duati a hrilhruk khan sawi turin a ti a ni hrim hrim.





A tho a, Duati chu a pawm a, ani pawh chuan a kut pahnih chuan Ts-a nghawngah chuan a kuah ve ṭai a. Ka duh ai chuan a nel mah mah; mahse, sawisel erawh ka tum lo, a pa a ni miau si a. Ni e, a pa i ni lo pawh ti mah ila, a thisen a ni miau alawm. Bakah, Duati hian nakin lawkah pa ala mamawh dawn tho a, chuti hunah chuan ka hrilh ala ngai dawn tho tho. Chuvang chuan lo ngawih mai rih hi a ṭha ber. An inkar tichhetu nih ka duh lo.





Pawnah chuan ka va chhuak ve a, an pafa chuan an inchhaih nui ar ar a. Ka hmel an hmuh chuan an nui tawp hmak nia, ka va'n ngei tak.





Duati chu a chhuk tharh a, kan piah lawkah chuan a tlan nghal a, Ts-a nen chuan a che vel chu kan thlir reng a.





"Naupang duhawm tak a ni, min chhun hle bawk," a tih chuan ka sa zak.





"Kan hmaah rawh inlan tawh suh, i duh lova i kalsan a nih saw! Ni lo, piang ve tur pawha i duh loh kha a nih saw," thinrim bawk si aw khur der dera ka tih chuan a hmel chu hrehawm tihnain a inthlak chiang kher mai.





"Min ngaihdam dawn nia, thutlukna dik lo ka siam vang khan ka la inchhir reng asin," a hmel a inchhirna lang chu hmuhhmaih chi ni nghal lo chuan.





Ka ngawi ta reng sawi tur hre miau hek lo i.





"In lo let leh hi ka lawm hlr mai, ka zawng nasa teh che u sin," a sawi zo chu ka awih loh lutuk vangin ka lo nui hak thung.





"Zawn kan ngai lo. Let tawh rawh, ka Ni-in rei min lo lutuk ang. Duati pawh hritlang a kai thei," ka sawi zo chu min chhân lêtna pawh nghak lo chuan Duati lam pan chuan ka phei a. A banah kaiin in lam chu ka panpui a.





"Âpapa, bye, nakinah lo leng leh rawh aw," a lehhawi a, a kut ka vawn lohna lam chu a vai lauh lauh a, kei erawh ka ngaihdan a ni lo viau thung. Kan bulah emaw kan hmaa rawn inlan lo se ka la duh ber.





Inchhung kan lut chu ka Ni-in zawhna mitmenga min en chu ka haider hmiah. Pawnah khan kan awm rei thawkhat ve êm bawk a ni.





Tuk khat chu, ka fanu school ka hruai haw lam chu tu emawin min ko ri ka hria a, ka hawi let chu ka hnung lama Lalzawma rawn pen pawk pawk chu ka hmu a.





"Ti khan min en vak suh," ka bul a rawn thlen chuan a tih zawm nghal zat a. Hmuh ka beisei loh lutuk vang nge ka lo en nasa deuh ni awm tak a ni.





"Engtikin nge i lo kal a," ka lo zawt thung.





"Niminah, in in a la hla em? Ka lo leng dawn nia," a tih chuan ka lo nui thung. A sawi ang takin kan in a hriat chuan a rawn leng leh tak tak dawn tih ka chiang viau.





Kan in chu a hlat tawh loh thu ka sawi chuan min zui ve zel a. Saitual chanchin te sawiin kan titi phei a, kan in pawh chu kan thleng ve vat a.





Lalzawma hi Saitual-a kan awm laia kan ina lo chuangkai peih ve ber a ni. Mipa fel tak a ni a, hna mumal erawh a nei lo. A rem rem a thawk ve mai zel, an chhungkua erawh khawsak harsa an ni lem lo. Min beisei deuh nâin mitmei erawh ka hmuh duh lo. Ti chung chuan, kan ina lo len a bansan chuang lo. A beidawng har zek.





Mi ṭawng duh leh fiamthu duh a ni a, a bulah chuan thinrim reng a har. Zu in ve zeuh chu a ching a, rui chhiain a awm ngai lo thung.





A leng ve ta reng. Duati ban a hun chuan zana lo len a tum thu a sawiin a haw ve ta hrâm.





Zanah chuan a lo leng ta ngei bawk. Ts-a lo lut chuan a'n melh rum nghal ngawt a. Hahthlak hian!





Duati chuan "Âpapa" tih leh ka malchung aṭang chuan a chhuk tharh a, Ts-a lam chu a pan nghal a.





Lalzawma nen chuan kan dân ngaite bawkin kan inhnialin kan infiam bawrh bawrh a. Ts-a erawh a ngawi ngul. Duati'n a biak erawh chuan ṭha takin a chhâng zel a.





Ka Ni te nupa chu ṭhenawm a damlo tlawhin an chhuak bawk si a, biak ngaihna ka hre thlawt lo.





Thingpui ka lumsak a, an in zawh hnu lawkah Zawma pawh chu a haw ve nghal a.





"Tu nge kha pa kha?" Nghal thawr chuan!





"I hre lovang," a lo buaina tur a awm lo.





"Hria ni ila ka zawt lo ang che," leh hmuk hmuk mai a.





"Kan khua a mi," ngawi ve mai mai ila aw...





"I eng nge a nih?" a va mak e aw, nge maw a dilchhut viau le.





"I hriat ve a ṭul lo," ka ti hmak. A lo rum nghut thung. A buai lohna turah a buai tam mah mah.





"Be tawh suh," leh tawp chuan.





"I thu lo," min melh rum tawh rap.





A ngawi a, Duati a infiampui ta daih.





"Mamawh te a nei em? A neih chuan sawi hreh lo la," a haw tur Duati'n thlah a tih tlat vangin kan thlah a. A thusawi vang erawh chuan ka thinur ṭeuh mai.




"Rawn ngaihtuah suh, i tel lo paw'n ka enkawl thei," ka ti ve hmak.





A mamawh chhuanlam hian a duh duh huna rawn hmuh a tum ang tih mawlh ka hlau. A ngaihtuah kan ngai lo hrim hrim.





"I enkawl ṭha tih ka hre mai, ka ngaihsak che u erawh phal hram la, a pa ka nih hi, ka thisena ka hrin a ni bawk. In tel lova nun hman ka tum hleinem," zahna te hi a nei ve lo emaw ni le!





"A pa-ah rawn inchhal hauh suh, titla tura min hrilh a, min kalsan ni khan kan lakah i thi tawh. Bakah, sâwn man pawh i pe duh hleinem. Ka fa chauh tihna nih chu," ka ti ve sak. Ni e, ka pa Rina te'n sâwn man an dil khan pek a remtih miau loh avangin an pe ta lo kha a nia. A fa-ah a pawm lo tihna ni mai.





"Ka fanu kha sâwn ni turin ka phal loh vang zawk alawm. A hunlai khan i hria anga, kan harsat êm kha, kan dinhmun sawh ngheh hnuah neih che ka tum vang a ni, khawngaihin hriatthiam tum hram rawh. Ka kut a rawn chelh a, chu chu duh lovin phelh tumin ka lo ṭang ve thung.





"Hun harsa ka tawh lai zawng zawngin min kalsan a, tun atakah rawn inlak 'Hero' a ngai lo," ka ti let ve salh.





"Kan inkar hi siamṭha ila; ni lo! bul ṭan ṭha zawk ang. Natna ka pek zawng zawng che kha tuam dam ka tum ang," a aw nghet churhah chuan amah ring turin min duh tih ka hai lo.





"Engtin nge i siam ṭhat ang? Kan inkar hi a zau lutuk tawh. Bul ṭan ṭhat maw? A teuh lo! A chhan chu maw, nang hi ka ring thei tawh lo che. Bumna ngaiah tluk nawn ka tum tawh lo," ka ti hmak mai. A hmela natna lang erawh ka haider hmiah.






A duh duh huna neih a, a kalsan theih ka ni bik lo tih hre ve mawlh rawh se. Min ngaihnepzia a tilang chiang hle bawk.






Inzawm maw? A teuh hian a hnai lo. Tunah phei chuan ruih a ching lehnghal. A rinawmna ka hmuh hma emaw, ka rin ngam tura a awm hma chu, engtin nge ka rin ngam ang ni? Tunah rih chuan ka ring zo hlawl lo a ni.





Engmah a sawi tâk lovah chuan In lam pan chuan ka let san ta daih. Duati erawh a la tlan kual nasa mai.





Kawngkhar ka thlen chuan Duati chu auvin let tur chuan ka hrilh a. A pa a mangṭha hnua a rawn tlan phei ve terh terh chu a lawmawm ngei mai.





Mak tak maiin Ts-a a rui nasa an tih ṭhin nen hian a rawn len erawh chuan a rui ngai hauh lo nia.





Zawma pawh a rawn lawr sek a, ka Ni lah hian a lo be ṭha thei bawk sia, pakhat lah hian ka Ni ṭawngkam ṭha um zel mai bawk si a; an pahniha an awm dun tawh chuan ṭawngna hun ka chang ve meuh ṭhin lo.





Ka Ni hian fiamthua mi dem a ching roh lehnghal a, ka duh vak lo. Mahse, Zawma hrim hrim hi chuan kan nufain min ngaihsak viau mai.





Zawma rawn lan ngun ang em em chuan Ts-a erawh a rawn lang zing ve lo. A hna vangte pawh a ni mahna. An inhman hleih ropui mai sia, rawn lawr zing na na na chu ka Ni te paw'n an ngaina thuai mai.





Zawma awmlaia Ts-a rawn len fuh erawh chuan a rûk tak hian boruak nuam lo, rit riau hi a awm ṭhin. Ts-a lah hian a ngaihnep hmel ropui mai sia(h), ka lo ngei ru thei lutuk.





Zan khat chu, ka Ni-in Ts-a nen kan inkar min zawt hlawl mai a. Ka beisei loh zawhna anih vang chuan ka hamhaih deuh nâin ṭha takin ka hrilh ve mai bawk. Kan inkarah engmah awm miau hek lo le!





Kan inkar a ṭhat ka rin loh thu ka hrilh chuan Zawma chu nei mai turin min duh thu a sawi ve mauh mai. Hei phei chu ka rin loh lam thil daih a ni. Zawma nei tur hian vawi khat tê mah ka la ngaihtuah chhin ngai lo hrim hrim.





Ka Ni bulah chuan ṭhian ṭha chauh kan nih thu ka sawi pawhin, "A en dan che hi ṭhian mai chauh chu a ni lo," a ti teh tlat a. He ti bak chuan sawifiah ngaihna ka hre bawk si lo, a va'n hahthlak tak!





Ka Ni thusawi vang chuan zan ka mu tlem hle a, ka tho rit lûk mai. Duati pawh ka Ni bulah a ṭawng leh siam siam tawh. A pa fel a tih thu leh hmelṭha a tih thute a sawi ve luam mai.





Ka Ni chu ka pui ve nghal vat a.





Duati school bang ka hruai chu khawi aṭang nge pawh ka hre lo Ts-a kan hma-ah rawn lang hau mai. Ka phu dawrh nia. Duati lah chuan a pa a hmu chu hlim tih hriat zetin a khek ang râih lehnghal a.





A leng ve ta reng, a hna a chawl a nih hmel. A haw dâwnah chuan zana a rawn len hman loh tur thu a sawi nghal bawk. A lo leng emaw leng lo emaw ka tan chuan awmzia awm tehchiam lo. Duati erawhin a lo len tawh chuan nuam a ti fal thei hle.





Zanah chuan Zawma a lo lang ve thung. Ka Ni te bulah min hruai chhuah a la dil zui. Eng nge maw a hriat ni? Nidangah hetiang hian a ti ngai dêr si lo. Ka Ni lah chuan, a lo phal êm êm mai lehnghal a. Duati pawh ngaihtuah lo a, duh chen chen mi hruai chhuah theih thu a la sawi tak deuh deuh a. Duati school bang pawh a hruai tur thu a sawi zawm zat a.





Ka Ni-in a remtih miau avangin ka tan han hnial ngaihna awm tawh si lo. Ka chhuanlam tur ber Duati lah, a kuta dah turin a ti vek bawk si. Peih lo leh phur vak lo chungin ka chhuahpui a ngaih hmel.





A tukah chuan kan chhuak dun ta ngei a, a haw dawn tawh vangin a chhungte thil chah vel leipui turin min duh hi a lo ni a. Ani, mipa ni ta chuan hmeichhe thil lei thiam hek lo. Sawi ṭhat ve mai âwm a nia. Kei pawh eng eng emaw chu min lei ve tâk kha. Duh lo viau mah ila ka la ta hrâm; hnial hneh hek lo i!





Zanah chuan rei lo te a lo lang zuai a, a haw lehnghal. Zing haw tur a nia, thawhhai a hlau te pawh a ni ang.




Ts-a thung a rawn nam lut chhâ mai. Rui ang chuan a awm chuang lo. A rawn kalin a nam ngai si lova. Ka Ni te hmaizah a na duh ngei mai.





Hemi zan aṭang hian a rawn lan tawh chuan zu rim a nam ta ziah. Engmah ka la sawi lo. Han hau dawn ila, hun a awm bawk si lo. Duati hmuha a rui ṭhin hi ka duh lo, sawisel tumin hun remchang erawh ka melh reng tho.





Zanin pawh a dan ngaitein a rawn rui leh. Ka Ni-te'n sawisel lo mah se, ka tan a nuam lo. Ka pa Rina lah Kohhranah Upa a ni a, ka tan a inthlahrunawm tur zia a ngaihtuah lo reng reng.





"Âpapa, ti nge i rim chu?" Duati pawn a rim chu lo hai bîk lo. A nui ringawt. Duati chu pawm a tum a, a lo duh hauh lo mai. "I rimchhe em mai," a ti ve hmak. Ani pawh chuan pawm luih a tum ta bîk lo.





"Duati i hmu duh anih chuan zu rim namin rawn kal tawh suh. A ngaina lo mai ang che, a hmuh atan pawh a ṭha lo hrim hrim, rui chunga rawn kal kha, i inti zahawm lo pah bawk," a haw dawn chuan hun remchang hmuin ka khak ta nge nge. A ngawi reng.





"Bakah ka Ni te pawh an zahawm. I rawn rui reng dawn a nih chuan lo kal tawh suh." ka tih paw'n, kam khat pawhin min chhang lo. Duati ringawt chu a en a.





"Âpapa, naktukah rimtui tawkin lo leng rawh aw," Duati'n a tih chuan nui zeuhin a lu a bu nghat nghat a. A fanu paw'n a zu rim nam chu a lo ngaina bîk lo a nih hmel.





Sangpuia a rawn thleng tawh a, hma a la zui bawk a, ka nuhrawn te paw'n thu leh hla an rawn nei zawm ta lo.





Zawma pawh a haw chho tawh a, mi a rawn be ngun malh malh thei khawp mai. Chhang tho mah ila,fiamthu bâkin ka chhang ngai lo.





"Zanin chu Duati lo riak se, naktuk chawlh a ni tho a," a tih chuan ka ngaihdan a ni hauh lo. A rawn rui lo ve teh tlat bawk.





"A chi loh lutuk, zanah min ngai ang"





"A awm thei ve mai ang"





"A ngai lo ka tih chu, hetia i rawn hmuh hi i duhtawk lo a nih chuan i hmuh hi ka remti tawh lo ang," ka ti hmak. Duati inneltir a, hman anga min chuhpui leh ka hlau. Duati'n a ngaina tawh mai si a, min kalsan mai hlauhnain ka khat.





"Ka nu te paw'n an hmu châk a," ta deuh deuh chuan.





"An duh chuan an rawn hmu thei, hruai kher a ṭul lo," ka ti bak hlar mai. Hmu chak tak tak ni se, an rawn kal daih tawh ang chu.





Lungawi vak lo chuan a haw a, a haw tur pawh kan thlah ta lo.






Kar a liam a, kha zan aṭang khan kan inhnial ta fo. Duati hruai haw phet a tum a, keiin ka remti bawk si lo, kan thu a inhmu thei lo. A hnuah phei chuan mi chuhpui a tum thu bawk a chhakchhuak leh ta nge nge.





Hlau lo mah ila, ka ngaihtuahna erawh a buai viau. Court thlen ngai ta se, naupang duhthlanna an ngai pawimawh tih an sawi ka hria. Mahse, Duati hian a pa a ngainain a kianga awm nuam a ti êm êm tawh mai si a. Kei min thlang lovin a pa hnenah min kalsan ang tih mawlh ka hlau. Min kalsan tur anga ka ngaihtuah ringawt pawhin ka na ut ut thei.





Dan angin kum nga a tlin hma chu ka kiangah a awm thei. Mahse, kum nga a tlin miau tawh avangin hmalak dan tur engmah ka hre bawk si lo. A pa lah khan court thlen a pawisa bawk si lo.





Ka harhchhuak thut, Sangpuia a awm tak alawm, la sawi pui ila ṭha ang. Min pui thei hrim hrim ang.



[nshima]

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » December 2nd, 2019, 8:51 pm

Chapter-4






Sangpuia chu a thuphung mai mai chuan ka sawipui a, harsatna ka tawk a nih chuan min puih a hnial loh thu a sawi nghal bawk.





Unau pianpui nei lo mah ila ka cousin-te ka kianga an awm chhung chuan unau dang ka awt bîk lo. Sangpuia-te unau phei hi chu ka cousin-te ho zinga ka ngainat leh min ngaina êm êm tute an ni. Anni nen hi chuan kan naupanlai pawh a inkawm a, inṭan êm êm mai kan ni a, tumahin min tibuai ngam ngai lo.






Ka nuhrawnte chunga hmalak dan tur pawh a sawi nual a, tihdan vak erawh ka thiam hlei law! A kutah nghat leh vek mai ang.





"Ânu, pa ka nei lo mi?" a zawhna vang chuan ka khawng awt thei nia.





A school bang ka hruai a, ka chhanna nghakin ka hmel en thei turin a rawn dak vâ a, a mitmeng mawi tak, pawisawi lo zet chuan min melh kiau a.





"Duati," engtin nge ka hrilhfiah ták ang?





"Ka ṭhiante'n pa nei lo min ti a, anni chuan pa an nei. Ânu, pa ka duh ve," ka ṭawng zawm tâk lohah chuan amah bawk chuan a rawn ti leh a. Ka mittui a hnam sawk nia. Duati'n pa a mamawh tih chu ka hria, mahse, a pa chanchin ka hrilh ngai lo, min zawt ngai hek lo. Min zawh miau loh avangin keiin hrilh ka tum bawk si lo. Ka fanu hian pa a lo duh ve chu a ni si a. Eng ang nu nge maw ka nih le!





"Pa te chu i nei reng alawm. Hei ka awm reng a, ni lawm ni?" chhân tuma ka kâ ka âng zuau hman tih chuan rawn lang thutin Duati chu a rawn pawm nghal a. Duati lah chu a hlim tih hriat takin a nui ver ver a; a lu a bu nghauh nghauh a. Tunah tak hi chuan Ts-a lo kal ka lawm ber ṭum a ni hial ang.





"Anih, ka school kal min hruai ziah thei. Ka ṭhiante pawh an pa ten an hruai ṭhin," a ti leh hmiah.





"Tehreng mai, ka hruai i duh te chuan," a tih chuan pakhat lah chu lawm tih hruat fahranin a lo khek raih a.





"Ânu nen kan bulah i lo awm ve tawh dawn mi?" Duati chu ka en vat, a pa chhânna ngai changin a pa chu a lo melh ve kiau a; min ngaihsak hmel a pu lo. A pa erawhin min melh zawkin a nui suk a, eng chhânna nge a pek ang tih ka lo ngaihtuah daih thung.





"Awm thei ṭep, rei lo te lo nghak lawk la," a fanu bianga piai zauh pah chuan zaidam takin a chhâng a.





"Ti nge nghah kher a ngaih a?" Ka fanu hi hetiang em em hian a dilchhut tih ka hre ngai lo.





"Ka duat, thiltih fel ngai tlem ka la nei a, ka chinfel hunah i bulah ka awm thei chauh dawn a," a tih chuan hlauhthawnnain ka khat nghal. 'Tih fel ngai' a tih chu Duati min laksak tumin hma a la tihna a ni thei mai ang em? Ni lul suh se!





Mahse, thil dang chinfel ngai a neih âwm ka hre mai bawk si lo.






In kan thlen thleng chuan ka be ta lo. Ka ngaihtuahna hi a buai vel vek maiin ka hria. Ka zawt tawp hreh bawk si.





Duati homework ka tih zawhpui pawh chuan a la ṭhu reng, biak ka châk lo zo vek. Ka Ni awm se ka ti khawp mai, a lo chhuak daih bawk si.





"Min laksak thei lovang," thingpui pek pah chuan ka ti sap. Ka sawi lo thei lo.





"Eng chu maw?" a la haider zui; ka va'n haw tak!






"I hre reng," hmuk mai a.





"Eng chu maw ka laksak theih loh tur che chu?" Thinrim hmel a pu lo, a nuih a za deuh zawk emaw ni. Chutiang hmel chu a pu.





"Duati, ka lak aṭangin min laksak thei lo ang," a hmel chu nuihza insum hmel a pu, fiamthu ka thawh si lo. Thawh lo tak ka ni, ka thin a rim ṭun zawk maw le.





"Kha i thluak te reuh tê-ah khan Duati ka laksak che hlauvin i lo inngaihtuah buai hle chu a ni awm si a," a nui ang sûk a, ka ngaituah buai ve tehreng nen, engtin nge ka ngaihtuahnate hi a hriat theih zawk le!





"Ngaihtuah ang chu, min laksak tumin i sawi chamchi reng si a lawm," dik inti fahran chuan ka ti sak a.





"Duati chauh lo pawh neih tumin ka bei mek, ka la hlawhtling vat bawk ang," mit ko a san pah âk âk a, a thusawiah a inring tawk hle tih a hriat; a aw rêng a nghet churh mai.





Engmah pawh sawi ta lo chuan ka ngawi reng. Ka lo buai vena tur a awm lo. A duh duh chu nei let ang hmiang, ka buai love. Duati ka kianga a awm chhung chuan a ṭha vek a ni mai.





Ka Ni a lo haw nen, an titi ka lo ngaithla ta vel mai mai. Duati erawh a pa malchung ṭhu-in, a pa phone a khalh leh mial mial tawh. Remti viau lo mah ila, ka sawisel duh lem lo. Chutianga en ngun emaw, khalh ngun emaw a ni lem lo bawk a, a pa lo kal tawh chuan a lo dil ziah thung a, an inpe leh nge nge ṭhin.







"Maw? A ni thei lovang," ka phone chu ka dah a, khumah chuan ka ṭhu hnawk a. Ka thu hriat kha awih har ka ti. U Ruata chu a room-ah thiin an chhar a, a OD a nih rin a ni.






Ka chungah ṭha lem lo mah se, thi tur êm chuan ka phal lo. Khawvel chênin, thil ṭha ti lo mah se, a nunna tawp tur khawp chuan ka ngaihtuah ngai lo. Kha chen in khata cheng ho kan ni a, khawngaihna leh lainatna a awm lo thei lo. A mi den pawh a na reng nghe nghe a , ka unaupa tak tak ka chan ang mai a ni. Ka ṭap chhuak lem lo nàin ka tawt up up thung.






Ka Ni te chanchin ka hrilh a, a ṭhawng ve khawp mai. A vuina a kal a duh ve thu a sawi chuan ka lo lawm ve tawp. Keimah chauhva kal kha chu ka zuam lo a ni.






Chaw ei kham chuan ka Ni nen chuan insiam in kan kal a, mi an la tam lo hle mai. In chhungah chuan kan ṭhu a, ka nuhrawnin min hmuh chuan a beisei lo nge ni mak ti hmel a pu.






Vui zawh chuan thlanmuala zui ta lo chuan ka Ni nen chuan kan haw tlang nghal a. Babie-i pawh a rawn haw a, a tuar ve khawp mai, a nuța neih chhun a ni si a, ka khawngaih ang reng.





In kan thlen chuan Duati pawh a lo haw tawh. Min hmu chu a puin a hruai chu nuam a tih thu a sawi nghal zat mai. Pa Rina'n ice-cream a lo leisak chu niin, nuam a ti ngang mai. Ei vak ka phal loh vang hian ka leisak ngai lo a, a pu bulah a lo ngen ni awm tak a ni, phakar ve reuh lutuk.





Ka dawr tur pawh kan tifel thawhkhat tawh a, kar tawp hi chuan kan peih fel hman ang. Pheikhawk leh bag brand ṭha tak tak zawrhna tur a ni a, kan uluk bawk a, dawr pawh changkang thei ang bera chei a ni a, chuvanga peih har chu kan ni bawk.





Kar leh aṭang chuan nitin ka chhuah a ngaih tawh hmel.





Duati school bang hruai turin ka Ni awm tho mah se, nula emaw tleirawl ka zawng ru deuh tho. Ka Ni te ka tibuai nasa si a, a inthlahrunawm. In lamah ka che hman tawh dawn bawk si lova, ka Ni chhawk tur tal ka zawn ve chu a ngai a ni.






Babie-i a rawn lang hlawl mai. U Ruata boral aṭangin kar a liam tawh, ka chanchin hriain a lo leng chu niin, a nu aiawhin ngaihdam te min dil tâk chu! Pawi a tih thu bak sawi tur a hriat loh laiin, a nu ve thung chuan ngaihdam dil chu sawi loh 'ṭik' pawh a rawn ti eih lo ania; Nufa inchhun lo ve tak chu an ni. A nu a chhun lo hi a vannei takzet.






A leng ve ta reng. U Ruata chungchangte sawiin a ṭap leh ṭhin. Han hnem vak ngaihna ka hre si lo.





U Ruata nen khan an inbe pawp reng a, mite tan chuan ngawlvei satliah mai mah ni se, a tan chuan nuța ṭha tak, farnu hmangaih em emtu a nih thu a sawi bang thei lo a ni ber. A thi thut mak a tihzia leh awih har a tihzia thlengin a sawi a, a inbun ruak a ni ber. Ka khawngaih takzet.





Dawr kan hawng tawh a, nau nula pahnih hnathawk ka nei ve a, an fel phian mai. Dawr lian ve tak mai a ni a, rin aiin customer pawh an tam a, Pathian zarah kan inhralh ṭha ve thei lutuk. A lawmawm tawp.





Nula pakhat langa rawn kal thei tur ka hmu hlauh a, a tihzia phian. In vel tifelin, Ts-a a hman loh chuan Duati school bang pawh a lo va hruai mai zel a.






A pa a hriat aṭang khan a intipangchang thar a, a pa hruai loh chu a duh tlat lo; mahse, a pa a buai chang chuan tihngaihna awm hek lo, mi dangin kan hruai a, haw kawng tluanin a tûm deuh bâr zel.





Phal lo viau mah ila a ngen tlat avangin a pa te inah pawh a riak ta zeuh zeuh. A pa a ngaina lutuk hi a chang chuan ka thik lek lek ṭhin. Mahse, min tihlungawi dan hi a thiam reuh fû mai a, ka lungawi lo deuha a hriat chuan min tihlungawi dan tur a zawng ve ruai zel.






Ts-a pawh a hman chuan a rawn lang ve ziah a, ruih erawh a nei tawh ngai lo. A taksa pawhin a ngeih a ni ang, a hmel a sar vâk mai.





Duati chungchang kan sawi ngai ta lo. A duh hunah erawh riak turin a hruai mai ṭhin. A pi leh puin an duat a, an hlimpui a, an rawn lam ve sek zel. School a kal avang hian ka remti vak lo a, a chawlh erawh chuan an la phei ngei ngei thung.






Zan khat chu Ts-a nen kan chhuak a, eng nge kan tih dawn a, khawiah nge min hruai dawn pawh ka hre lo; ka zui mawl ve tawp.





Tlangnuam lamah min tlanpuiin, a hnu lawkah chuan car chu a tiding a. Car aṭanga kan chhuah hnu chuan, ngawi rengin kein rei lo te kan kal a, a pen a tawp chat takah chuan kei pawh ka ding ve chat.





Kan hma mai-ah chuan Kross lian ve deuh ding hi a lo awm a, en a ka hawi chho voh voh lai chuan ka hma-ah chuan lo dingin a nui suk a.A hnua a chetdan erawh ka beisei loh thil a ni.





"Hun harsa leh hrehawm tam tak paltir chein, natna tamtak ka pe bawk che, i ngaihdamna phei chu beisei rual a ni lo. Mahse, ka kianga let turin ka duh tlat si che. Kan hun hmasaah ka ṭahtir hnem che pawh a ni thei, tunah erawh i ṭah ka phal ngai lovang. Fanu duhawm tak min pe a, in pahnihin hlim taka siam che u ka duh. Min ring nghal turin ka ti lo che; mahse, min fiah thei ang. Khawngaihin chance min pe leh rawh," ka hmaa ṭhingṭhi mek chu ka en tlawk tlawk. Sawi tur reng reng ka hre lo. Ka kha a chih a ni mah zawk.





Ni e, natna tamtak chu min pe ngei alawm; mahse, ka ring leh thei ang em tih erawh keimah ngei pawh hian ka chiang lo. A hnena kir leh tur hian ka ngaihtuahna pawh ka la seng ngai lo hrim hrim.





Engpawh chu nise, fiah ngam na na na chu kan fiah mai aniang chu!





Ka fanu pa a ni a, nakin lawkah pa ala mamawh dawn chauh.





A dara tawn tawna zuk vuan chuan ka ṭhu hniam ve a,





"Min phatsan tawh lo ang tih i chiang maw?" a lu chu a bu nghut a, a mit menga inchhirna kha hmuh tur a awm tawh lo. A thusawia a tihtak zia erawh a lang chiang hle thung.





"I thusawiah khian ding tlat ang che," ka ti leh hram. A hmel chu hlimnain a rawn thlak a.





"Ka lawm e," a ti sup a, ka kut pahnih chu lain a fawp zeuh bawk.





Kan ding a, kut insuih rialin kan hmaa Kross chu kan thlir dun a.





"Ka thutiam min hriatpuitu a nih hi," a tih chuan amah chu ka en vat a, eng thutiam tak ni maw?





"Thutiam maw?" Amah en a ka tih chuan "Nakinah i la hre mai ang", nui suk pah chuan ka biangah chuan a rawn fawp zauh a.





Mak tak maiin ka hlim veng veng nia.






"LALHRUAITLUANG, ka lakah thubuai i theh lut vel a maw?" ka nuhrawn chu thinrim hmaisenin kan ina rawn luh a rual a. Kan zanriah ei kham kan lo ṭhutkhawm lai lo ni nen, a lam hawiin kan en ṭhap a, zam hmel emaw zak hmel emaw a pu lo.


.

A thusawi danah Sangpuia hmalakna a ni tih ka hre mai. Ka va melh vat a, hahdam turin min lo mitmei nghal a. Eng nge a tih pawh engmah ka hriatpui ve si lova, ka hawi â hû mai.





Duati hlau chuan min lo kuah ve ran a, Duati hmuha hetianga a rawn che erawh ka duh lo viau.





"A va mak buan buan ve, lo ṭhu phawt la," ka nuhrawn duh tâwka a âng chu Pa Rina'n zaidam taka a tih chuan, mi rawn melh kar a, a zungchala mi rawn kawh sawk pah chuan "Hruaitluang, eng ang pawhin min khing mah la, i chak chuang lo ang tih hre rawh," a chhuak zui nghal a, kawngka khar ri kan hre zawm zat a.





"A va'n rapthlak em! Tluangte, i ṭha em? Mama thil awmzia han sawi chiang teh?" ka Ni-in a tih chuan Sangpuia lah chuan "Court-a inlan tura kohna a dawng a nih kha," a tih duh lek chauhva, a hmelah erawh ka nuhrawn chu a ngaina lo tih a lang chiang hle thung.





"Engah mah ngai suh, in saw i chân dawn hauh lo ania, min ring rawh," ka dara rawn vuan chuan a tih zawm nghal zat a, a room-ah a lut nghal daih a.





Duati hlauh pawh a reh hlei thei lo a niang, min kuah chial a, ka malchung aṭang chuan chhuk a tum lo reng reng.






Ka dawra John-a leh Babie-i rawn inkai lut ka hmuh chuan mak ti takin ka lo en reng a.





"Khatin, i inlengte lo melh vak suh, an dawr duh lo mai ang che," John-an a kut ka hmai zawna a rawn vai chuan ka harhchhuak thut. He mite pahnih hi eng nge maw an awmzia le? An inzui hi ka hmu leh zauh zauh ṭhin.





"A mak em alawm, in rawn lang thut bawk sia, ka beisei lo êm che u ni," ka tih chuan an nui sak mai. John-a nen hi chuan ṭhian ṭha tak kha kan ni ta daih a, amah hi Police (CID) niin, Aizawl ka chhuahsan hma khan ka nuhrawn kha a chhuahsan ve ta kha a nia.





Ka let leh hnuah erawh tun hi kan vawi khat inhmuhna chiah a ni thung.





An leng ve ta reng a, eng eng emaw kan sawi a, Babie-i nen an inmelh dan erawh an inhaw lo tih a hriat ngawih ngawih.





In ka thlen chuan khua a thim tawh. Tunlai chu christmas a lo hnai tawh nen inhralh pawh a nuam viau mai. Laklawh vangin duh ai rei kan inhawn phah fo a, a lehlam zawng tak chuan a lawmawm bawk si.





Inchhung ka luh chuan ka Ni leh Duati chu TV hma-ah an lo lam nasa mai. Duati'n min hmuh chuan min rawn pan vat a, ka lo pawm nghal a, lam ve tur chuan min sawma, chau viau mah ila rei lo te chu ka'n lam ve kha!






Zanriah eikhamah chuan Sangpuia nen kan titi malh malh lai chuan Ts-a a rawn lang hlawl, kan ṭawng laklawh êm avang chuan ka lo be mai lo. Ani pawh chu ka ep chiahah a rawn ṭhu ngawi ve reng mai bawk a, Duati leh a pi erawh an chhuak thung.






Sangpuia chuan court hmaa ka inlan huna ka tih tur vel a sawi mawlh mawlh a, chutia Court vel kan sawi takah chuan ka ep chiah a ṭhu chuan zawhna mitmengin min en a, engmah ka la hrilh lo tih ka hrechhuak chiah. Zanin hian kan inhrilh ngei chu a ngaih hmel.






Sangpuia kal hnu chuan ka bula rawn insawnin min zawt ta ngei a; a bul aṭang chuan chipchiar thei ang ber chuan ka hrilh ta vek a.





"Zam miah suh, i kiangah ka awm reng a nia," ka kut vuan chung chuan a ti sup a, ka kut chu la kangin a fawp nghal zeuh a. Ka thinlung a lo hlim veng veng nia. Ka nuhrawn kha a ngaina ngai lo reng a ni.





Dik tak chuan ka zam a ni. Court-ah vawi khat inlan chu sawi loh, a kal takngial pawh ka la kal ngai lo hrim hrim. Zamnain min tuam mup mup a ni ber. Ka zam tih hriain min thlamuante pawh a ni mah na, ani hi chuan min hrechiang hle si a.





Naktuk mai a ni tawh si a, ka lo la inpeih lo hle tih ka inhrechhuak bawk. Mahse, theihtawp ka chhuah ang. Ka nu leh pa in saw ka chân tur a ni lo hrim hrim. A tawp thlengin ka bei ang, ka neih zawng zawng hlan ngai pawh ni se, ka pa In ka neih let lehna tur a ni phawt chuan ka hlan mai aniang chu!






Court kawta kan din ṭhup lai chuan ka nuhrawn chu thinrim hmaisenin a rawn phei a, a zungchala mi rawn kawk sawkin "I thil tih man hi i la tel dawn khawp mai. Min khing ngam a maw? tu nge ka nih hi ka la hmuhtir ang che," a sawi zo chu inherin, dak vahin a kal lehnghal nal nal.





A thusawi erawh hlauhna chhete mah ka nei lo. Case-a a chak loh hlau, inhrosa-ah kan ngai. A mitmenga hlauhna leh zamna kha hmuh hmaih bik hek lo i!





Court chhungah chuan Sangpuia chuan thubuai thehluh chhan te, thil dik tawk lo awm zawng zawng te a sawi vek a. Lehlamin an hnialna chu evidence nen a chhang thla hmak hmak mai bawk si. Keipawh thu eng eng emaw chu min zawt ve ngei a, dik takin ka chhang mai.





Ka nuhrawn ka va en chuan huatna mitmengin min lo melh kar a, a lehlam zawng tak chuan ka khawngaih angreng zawk. Kha a lehkha, intithei fahrana kan ina a rawn lek chhuah kha lehkha lem a ni tih finfiahna kan theh lut miau a. Case-ah chuan a tan chak ngaihna a awm ta lo a ni.





Sangpuia khan engtin nge kha lehkha kha a lem a ni tih a finfiah theih zawk ni? Ka nau hi a lo theuneu lo e!





Case-ah chuan kan chak ta ngei a, ka pa In pawh ka thu lo chuan tihral theih a ni dawn ta lo. Engkim ka hming vek a awm a nih miau si a.





Ka nuhrawn hremna erawh nidanga puan tura tih a ni.





"I châk lovang," ka nuhrawn chu ka hmaah dingin a rawn ti chang fak mai a.





Ka lo nui suk thung. A chak lo chung pawhin zah nachang a hre lo a nia.





"I la inchhir khawp ang," ka chhân hma chuan amah bawk chuan a ti a. Mi pakhat hian a kalsawn pui ta daih a.





Case-a chak lawm nan ka Ni te nen chuan restaurant lam kan pan a. Ts-a pawh a rawn kal ve a, min lawmpui ve hle. Ka nuhrawn ka chhâng let ve ta lo erawh a ngaihdan a ni vak lo.






"Khatiang khan a ṭawngkhum tur che a ni lo," a ti hmuk mai.





[nshima]

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » December 2nd, 2019, 8:52 pm

Chapter 5






Ts-a nen kan chungchang ka Ni ka hrilh chuan min lawmpui ve hle... Duati fahrahtir reng chu țha a ti vak bîk lo a nih hmel.






"U Tluangte, Duati school-ah a awm miah lo," Awmtei'n a rawn tih chuan mak ka ti kher mai. A pa khan zingah khan a school kal tur a thlah si a. Nge, ani hian school...ni lo...ka ngaihtuahna chu duh lo zetin ka lu ka thing a, ka phone lain Ts-a number ka hmet chhuak nghal a.







Ka bing chûk chûk mai. A in-ring chhung ringawt pawh rei tiin dawr chhungah ka vei tawn sek a.








"Duati i hruai chhuak em?" Phone a rawn chhân rual chuan ka lo ti nghal tâwng a.







"Hruai chhuak lo, school-a kal a ngai alawm," a rawn tih chuan mangannain min tuam mup mup mai. Hlauhthawnnain ka khat a, ka buai zo vek a ni ber.







"School-ah a awm lo. Awmtei a va kal a, a awm loh thu a sawi, ka fanu chu khawiah nge a awm tâk ang?" ka ṭah a chhuak ut ut mai.







"Eng nge i sawi awmzia?" A aw-ah chuan mangang aw a ri tel nawk mai. "Lo awm rawh, ka rawn phei nghal," ka chhân hma chuan amah bawk chuan a rawn ti leh a.







Dawrah chuan ka vei tawn sek a, ka naute pahnih lah chuan min melh leh zeuh ṭhin. Dawr pawh an kuta ka dah rih mai a ngai ang.







Ts-a lo thlen chuan a mangan hmel khawp mai. Ka naute bulah chuan dawr chu an kuta ka dah thu hrilhin kan chhuak nghal a. Car-a kan luh hnu chuan thil awmzia ka sawi a, ani pawhin school thleng a thlah ngei thu a sawi ve bawk. Kan thinphu rang lutuk chu a la reh hleithei lo.






In kan thlen chuan ka chhungte chu an lo awmkim ṭhap mai. Ka Ni chuan min rawn ban vatin min kuah nghal a, ani pawh a mangang tih a hriat reng mai.






An zirtirtute an biak tawh thu leh Duati chu school ban pawha a la awm thu ka pa Rina chuan a lo sawi ve nghal a. Ts-a leh Sangpuiate nen an ṭhukhawm nghal a, ka Ni nen chuan hmeichhia tih tak kan laktlak lem loh khawp mai. Rilru mangan vangin kan buai nuai a ni ber. Awmtei lah inthlahrung takin kan kiangah a lo ding ve ran a, hnem tur chuang ka awm bik der lo.







"I fanu hi i hmu leh duh a nih chuan i pain i tana a dah zawng zawng kha lo keng ang che. A hmun tur ka rawn hrilh ang che, police pun buai tum duh suh. Police-in an hria emaw i lo hruai emaw a nih chuan i fanu hi i chân a ni mai," tih leh phone dah a rual a. Ts-a leh Sangpuia, Duati zawnga chhuah an tum pawh chu ka thu dawn avang chuan an ṭhu leh rih a.







"Engtin nge kan tih ang? Kei chuan Duati chiah ka duh," ka ti a. Ka ṭap deuh pur tawh. Ka Duati a thi nge a dam, tih pawh ka hre si lo. An lo tihreawm viau thei bawk. Ka ngaihtuah zawng ringawt pawhin ka khur der der mai.







"Lo mangang lo la, dam takin kan hruaikir leh ngei ang," ka pa Rina chuan a ti sup a. "I pa thil ho chu ila kawl ṭha em? a tih zawm zat a. Ka lu bu nghut a hmuh chuan "A ṭhat chu va la la, Bawiha te nen hian kan lo ngaihtuah dawn nia," a ti a.







Room-ah lutin ka file chu ka la chhuak a. Hmun hrang hranga kan ram neihna lehkha pawimawh ho zawng zawng chu la chhuak lin file pakhatah ka dah hrang nghal a. Heng ram ai hian ka Duati nunna a hlu zawk si a. Ui lo erawh ka ni bîk lo, ka pa min rochun ve liau liau kha ania, lehlamah Duati lo ni bawk si; duhthlan tur ka nei miau si lova.






"Engkim a ṭha leh vat mai ang, kan fanu chu kan hmu let leh ngei ang. Lo mangang lo la, zam suh aw," Ts-a room-a a rawn lut chuan min kuah pahin a ti sup a. A aw nghet churhah chuan a tumruhzia a lang.








Ka phone-ah chuan file kan pekna tur hmun leh zan dar 8-ah chu mi hmuna awm tur chuan thu an rawn thawn a. Keimah chiaha kal tura min tih chuan Ts-a ngaihdan ni lo chu a phun hluk. Ka pa Rina leh Sangpuia te ngaihdan pawh a ni lo hle a, ka Ni-in min ngaihtuah takzet bawk.







Duati kan hmu let duh a nih chuan an thu ang chuan kan tih ngei a ngai dawn si a.







File chu kengin an sawina hmun lam pan chuan ka chhuak a, ka tha khur erawh a reh fel thei lo. Khua thim tawh a, zan dar 8 a ri ṭep tawh, khua lah chu a vawt surh bawk si, Duati ka ngaihtuah takzet.








Taxi hmangin an hmun sawina, Mission vengthlang thlanmual lam pan chuan kan tlan a. Thlanmual thlang lawkah chuan field lian vak lo a awm a, field-ah chuan chhukin, taxi pawh chu a let lehnghal a.







Ka hawi kual a engmah ka hmu lo. Thawm ka ngaichang a, engmah a awm chuang lo. Ka phone chu hmet engin a flashlight chu ka on a, ka dinna leh ka chhehvel chu ka en a, ka piah lawka thingkung a ṭhutna an lo siam chu ka va hmu fuh ta a. Chumi lam pan chuan ka phei ta a.







Rannung hram thawm tih loh chu mihring thawm engmah a awm lo. Minute nga ka awm hnu-ah pawh tumah hmuhtur an awm chuang lo. Duati ka ngaihtuah êm avang chuan chu ka ngaihtuahna zawng zawng a luah a. A chungah eng nge an tih pawh ka hre si lo. Ka ngaihtuahna a luah hneh êm avang chuan hlauhna châng pawh ka hre lo.







'Ka kalna hi a dik ngei si a' ka ti sup a. Thawm reh leh hmuh tur awm loh vang chuan ka kal dik lo hiala ngaihna ka nei tawh. Ka phone ka en a, dar 8 pel tawh si.






Min rawn biakna number-ah lah a tlang thei si lo. Manganna leh hlauhthawnnain min tuam ṭan. Ka tha khur der der mai. Kei hi bumin ka awm em ni? tih chu ka inzawt reng mai.






Car pakhat a rawn tlan phei a, field lai takah chuan dingin car a thi chiah chu, a hma ang bawkin a reh leh duk mai. Ka en reng lai chuan ka phone chu a rawn ri a, tlaia min rawn biakna number kha a ni.






Ka chhang nghal vat.







"Nangmahin maw?"






"Aw, keimah chiahin"





"I lo keng em?"






"Aw, keng, mahse Duati..."






"Ani chu ngaihtuah suh, i file chu min rawn pe la, i fanu hi i la nghal thei ang," ka sawi zawh hma chuan a rawn ṭawng zawm zat a.






Car lam pan chuan ka phei a, a bul ka thlen chuan a thim êm avangin tu nge a nih ka hre thei mai lo. A hmel ka hmu thei bawk si lo.






File chu ka pe a, a phone flashlight on-in a ka file pek chu a en thuak thuak a.






"Khawiah nge Duati chu?"






"Car chhungah" a ti hmuk a






Car chhung ka bih chu a thim êm vang chuan engmah ka hmu thei lo. Ka phone chu tiengin motor chhung chu ka ên a, car hnung seat-a Duati mu chu ka hmu a.






Ka file ken ena a buailai chuan car kawngkhar chu pawt hawngin Duati chu ka pawm a. Ka pawm chhuak chiah tih chuan ka lu chu a hit nghal chhuai a, Duati chu leiah chuan ka ṭhutpui hnawk a.






"Min bum tum lo ni la hetiang ka tih hi a ngai lo tur," a ti chhur chhur a. Chutah insual, kut inthlak thawm ka hre zui nghal zat a. Ka lu na vang chuan ka khaw hmu a fiah lo telh telh bawk nen che thei ziazang ka awm lo. Tu emawin min ko thawm chu ka hre vuai vuai a.






"Bawihi, i harh em?" hei chu ka Ni aw a ni. Ka mit chu men ka tum a, êng lutuk avang chuan ka maimitchhing leh a. A hnuah chuan muangchangin ka meng a, ka thei ta. Damdawi inah ka awm tih ka hre chawp nghal.





"I rawn harh chu ka lawm hle mai," a ti leh sap a. Kei erawh ka dang ro hulh vang chuan ka ṭawng thei mai lo, ka lo nui suk ringawt. Ka Ni chuan hrethiamin tui min rawn pe vat rêng a. Tui ka in hnu chuan ka dang ro lutuk pawh a ziaawm ta.





Ka Ni chu tlan chhuakin, doctor leh nurse te nen an rawn lut a. Na ka neih leh neih loh min zawh chuan ka neih lem loh thu leh ka lu a hai deuh thu ka hrilh a. Doctor-in min en fel hnu chuan an chhuak nghal a.





"Ni, Duati.."





"Bawihi, inti chak phawt la," ka sawi zawh hma chuan ka Ni chuan min lo ti a, mahse ka ngaih a ṭha hauh lo.





"Ni, ka ṭha lutuk... Duati chu...?" ka ti nawn leh ngat. Ka Ni erawh chuan a sawi hreh tih a hmelah a lang reng mai, chu chuan ngaihṭhat lohna lian tak min pe bawk.






"ICU-ah a awm a..." a ti ban charh a. Hlauhthawnna nasa takin min tuam nghal hlup hlup.





"A la rawn harh chhuak lo, in lo harh hun kan nghak reng a.bSangpuia leh Tsa chu police station lamah, an rawn koh avangin an kal a, i pa Rina chu Doctor be turin a chhuak lawk a nih kha, a lo let ṭep ang," a tih chuan nizan thil thleng kha hriat mumal ka nei hauh lo tih ka hrechhuak.





"Eng nge thleng a?" ka ti sap a...





" I nuhrawn leh a bialpa inthurualin an tih vek a ni âwm e. Nizan khan a bialpa kha an man a, tukinah a inpuang a. I nuhrawn chu tlanbo a lo tum a, nichin lawk khan airport-ah an man a. Chuvang chu a nia, Bawiha te pawh police station lama an kal ni. I chau lutuk ang, muhil phawt rawh," a tih zawm zat a.





Zawh duh ngah viau mah ila ka mut chhuah êm vang chuan mutthilh ka tum ta a. Duati pawh ngaihtuah viau mah ila che thei ka ni rih si lova, tih vak ngaihna ka hre chuang lo. Ka harh leh hun chuan a kiangah ka awm ve thei êm ang chu!






Ka muhil ka harh leh chuan a hma aiin ka zia tawh a... luhai pawh ka nei tawh lo. Ka lu a min vuakna pawh tlem a kak tih loh chuan a ṭha vek bawk.





Tsa te pawh an lo kir tawh a; ka nuhrawn pawh, tunah rih chuan ala inpuang duh lova, a tel ve loh thu ṭhahnem ngai takin a sawi chamchî ni âwm tak a ni. Chuti maia awlsam chuan a inpuang hauh lo ang; nu luhlul tak kha a ni ve tlat a.






ICU kawtah ka ding ran a, ka fanu khuma mu chu ka en reng. Chet pawh a che eih lo. Ka bianga ka mittui luang ngiai ngiai chu Tsa chuan a kut chuan rawn hru hulin min rawn kuah nghal a. Kan pahnih chuan chu ICU lam en chuan kan ding ta reng a.






Ni thum a ni ta; Duati ICU awm pawh ala ngai reng. Ventilator hmangin an thawktir a, nizan khan a rawn hniam thut a, kan mangan hle a nih kha. Mahse, Pathian zarah a rawn ṭha leh hlauh a, amah la harh chhuak lo mah se a thawk a rawn pangngai ringawt pawh kha kan lawm tawk em em tawh.






An man khan, damdawiin an lo chiu a, an damdawi hman a lo sang bawk nen a zo lo a ni ber. Eng damdawi tak nge an hman tih erawh an sawi lang lo.





Ka Ni sawi danin khatia min vuak thluk hnu khan, John-a leh police ṭhenkhat lo kalin min rawn pui a lo nia. Misualpa nen pawh khan an insual hrep a ni âwm a; mahse, an man thei ta hrâm. Engtin nge khati laiah khan ka awm tih an hriat, ka zawh chhuah ngei a ngaih hmel.






Kan nufa chuan Tsa'n damdawiin lam panin min lo phur a, Duati phei chu damdawiin thlenin a mar an hmu mumal lo a ni awm e. Doctor te'n an beih fê hnuah a rawn awm leh a, amah erawh ala harh chhuak ta lo reng a ni hi. Tsa khan keimah chauhva kal kha min ngaihtuah avangin min lo zui ru reng a lo ni a, chu erawh ka hre hauh lo.






Ts-a nen Duati chu kan kalsan lo a tih theih. Ka Ni te erawh intifai turin kan tir haw lui thei hram a, ei tur min rawn pe turin a rawn kal leh ṭhin.





"Eng nge kan an zel," ka hmaa ding chu ka melh chho hâ a, John-a a ni. Ani hi awm lo se kan nufa nunna derthawnzia kha ka hrechhuak uar uar mai.





"A la ngai reng, lo ṭhu rawh, i..oh in va fel ve," Babie-i nen an ni miau a.





"Duh angin kan rawn kal theiblo zawk. Hei, hmuh che a duh lutuk a, min tur sek a. Vawiin chu kan hman ve hram e," Babie-i melh pah chuan a ti leh sap a.





"Eng thilah nge ni ta?" Babie-i inthlahrung taka ding chu melh pah chuan ka ti a. Ani hi chu a rilru a ṭhain a tluangtlam a, huatna ka nei lem lo. A nu sual viau mah se, ani chuan tihsual a nei lo tlat.






"Thil kan zuk ei lawk dawn em niang?" a tih chuan Duati kalsan ka huphurh hle, chutih rualin thil ka ei mumal loh vang erawh chuan ka ril a ṭam ve hle.





Ka Ni te nupa an awm tho avang chuan Tsa nen chuan kan zui thla a. Tsa leh John-a pawh ṭhian ṭha tak ang maiin an titi thla mawlh mawlh a. Dawr chhungah chuan kan lut a, eitur kan lam a. Kan nghah chhung chuan John-a zawhna ka neih kha zawhna remchang a niin ka hria.





"John, engtin nge khati laia khan ka awm dawn tih i hriat?" amah en kal chung chuan ka zawt a, a lo nui ang suk a.





A âw then kharh pah chuan, "Kan chhui ru reng a lawm," mak tih vangin ka meng phar awk mai.





"Maw? Ngati nge? Ka beisei loh deuha min chhân tâkah chuan ka zawt let nghal a.





"I u Ruata thattu ni-a rinhlelh a nia," a tih leh phei chuan ka mak ka ti tawlh tawlh.





"Eng nge a awmzia? U Ruata te chu..."





"Thah a ni. Damdawi, a taksa mamawh aia tam pek a ni." ka sawi zawh hma chuan a lo ti leh sup a. Mak ka ti tih hian a sawifiah zo lovang.





"Ka u kha, a rilru a hah thei lutuk a, a thih hma khan kan inbe fo. A rilru hah thu a sawi ṭhin a, a chhan erawh a sawi duh ngai lo. Khawvel mi tak ni mah se, anau ka nih angin min duatin min hmangaih hle a, ka nat a phal ngai lo. Chuvanga min hrilh duh lo pawh chu a ni. A thi tih ka hriat khan mak ka ti a, ka awih lo zawk. A chhan chu, kan inbe fova, rilru hah viau mah se mahni intihhlum erawh a duh loh thu a sawi kha ka ring tlat. Ka nu ṭhat lohzia chu kan hriat kha. Ka u thi kha tuar ang pawhin a awm ngai lo. Ka ringhlel ṭan a, ka enthla zui ta a." Babie-i chuan lo tiin, a sawi hnem bawka thâwk la-in a bula tui chu a in zui nghal a.





Sawi ve tur reng reng ka hre lo. Ka thuhriat hi mak ka ti tawp thei lo a ni.





"Babie-i hian a nu a rinhlelh thu min hrilh a, a rukin kan chhuizui ta a ni. I u Ruata kha thah ngei a ni tih kan chiang ta a ni." John-a chuan a lo ti ve thung a.





"Eng vangin nge an thah ngawt ang?" ka lo ti vat a.





"Chu erawh a inpuan hunah ala hriat ang chu. I nuhrawn hian hmeichhiate a hralh ṭhin tih i hria em? Hre kher lovang. Hmeichhe tleirawl a bîkin thingtlang lam mi an bum a, phaiah an hralh ṭhin lawm. In ramah khan hotel sak a; chu chu inphen nan hman a tum a ni. In ina ka rawn awmvchhan pawh kha, ka chhui duh vang a ni a. Kha zan pawh khan hralh che a tum asin. Mahse, khatia i chunga mawi lo taka ka che a a ngaih takah khan a ṭhulh leh ta a ni." Ka kâ ka âng pam a, ka kutin ka kâ ka hup bawk. Kha zan khan min lo hralh a tum maw? A va rapthlak em!






Ts-a chuan ka kut lehlam chu a rawn vuan vat a, hahdam turin min duh tih a mitmengah a langchhuak.





"A nu leh a bialpa inbiakna Babie-in a lo hriat ruk vangin i awmna pawh kha kan hre thei a ni. Tlema tlemah kan lo tlai ṭhelh mai pawh a," John-a chuan a tih zawm zat a.






Ka thu hriat chu awih a va har si em!





"In chunga ka nu chetdan zawng zawngah khan min ngaidam ru aw," Babie-i chuan inthlahrung takin a ti sap a.





"Ngaihdam i ngai hleinem. Tihsual i nei lova, inthiam lo reng reng suh," ka tih chuan a hmel a hlim ve deuh.





"Nang lo laizawn ka nei hleinem... Huatna che ka nei miah lo. Ka hriat lohvin ka nunna min lo chhanhim sak reng a nih zawk chu! Ka lawm lutuk aw," dawhkana a kut a dah chu ka hum sak a. John-a lam hawi chuan," John, i chungah ka lawm lutuk aw..." ka tih chuan nui var varin a lu a bu nghut a.





Kan eitur chah lo thleng kan ei zawh hnu chuan, ICU lam pan chuan kan kal leh a. Rei vak lo an awm hnuah chuan an haw ve ta a.





Ts-a chuan fel a tih thu a sawi ve sup a. Ani paw'n Babie-i chu a vawi khat hmuhna a ni hial ang chu. Phaiah a awm char char a, a rawn haw ngai meuh si lova.







ICU chhungah chuan luh hun an siam apiangin kan inluh chhawk ṭhin a. Ka luh ve chhun chuan a taksa, a kut leh ke te ka khawih ṭhin a, vur ang maiin a vawt ṭhin. Chuti rualin, a taksa peng lehlamah erawh lumna a awm lawi si. Beidawng deuhin chhuak ṭhin mah ila, kaltir mai tur chuan ka phal bîk si lo.






Dawr lam pawh ka naute kutah ka dah a. Damdawi in ka pel lo a tih theih ang chu. Inbual thlengin damdawiinah ka ti vek a, Duati kalsan ka thei lo a ni ber.





"Ka pi, i fanu a harh ania," nurse-in min rawn hrilh chuan ka mumang emaw ka ti hial. Ni li ngawt a harh chhuak tawh lo a ni si a, awih a va har si em! Tukin zing maiah khan Pathian hnenah ka hlan fel vek tawh kha a nia. Duati ka duh lo lam ni lovin, a tuar rei tawh êm a, hmasawnna hmuhtur a awm bawk si lo. Ventilator-in a nunna a chelh ṭawk ṭawk a ni mai si a. Ventilator phawi chuan kal thei mai dinhmuna ding kha a ni a.






Ui viau mah ila, a tan a nawmna turin kaltir mai kha ka ngaihdan kha a ni tawh a. Ts-a chhuak rawn let se ka lo hrilh ang a, a remtih chuan phawitir ka lo rilruk kha a ni a. Mahse, beisei loh deuhvin lawm avangin biangah mittui a luang ta zawk si a.




[nshima]

Link:
BBcode:
HTML:
Hide post links
Show post links

Local Advertisement

MOBILE SIAM ZIR DUH TAN!!!

Tech-Inn Mobile Repairing Traning Centre, Bazar bungkawn

Kum tin mi za chuang eizawnna kan siamsak a, Eizawnna tlaka thiam turin kan zirtir thin

Mizorama mobile siam zirna hmasa ber changtlung ber kan ni. Hrechiang duh tan Contact : 9612099411 / 9862016122


Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » December 2nd, 2019, 8:52 pm

Last Chapter





Ka lawm êm avang chuan ka hamhaih vel vek a, ka chhungte hrilh nachang pawh ka hre lo. ICU-ah chuan ka lut nghal hmawk hmawk a, duty-te pawh chuan min hrethiam takin min lo nuih ver ver mai.





"Duati," mi rawn en nghal vat a, a la nui seih zui a. Ka va'n lawm tak em! Ka bia a, ṭha takin min chhang. A hriatna a bo miah lo chu ka lawmna tizualtu a ni. Awm rei an phal loh avang chuan ka chhuak lehnghal vat a.





Pawn ka chhuak chu ka hlim êm vangin ka inthup zo meuh lo aniang chu lawmin ka nui ver ver mai.






"Thu lawmawm a awm chiang, i hmel hmuh a nuam tlat," Pa Rina'n a tih chuan pawmpui takin ka lu ka bu nghauh nghauh a.







"A lo harh chhuak tawh a," ka sawi zo chiah chu ani pawh a lawm ve lutuk. Nurse te'n min koh lai khan eitur lama a chhuah lai a ni a, engmah a la hre ve lem lo. Ka Ni leh Sangpuia an la rawn thleng lo deuh bawk. Ts-a pawh... Oh! Ni lo... He thu lawmawm hi ka hrilh ngei chu a ngai ang.






Ka phone chu ka phawrh sawk sawk a, a number chu ka hmetchhuak nghal a. Ka pa Rina paw'n ka Ni te chu kan chanchin a hrilh ve mêk a ni ang, ka Ni a rawn au chul mai.






"Te, sawi la," min koh dan vang chuan ka lo ner sak. Kan inkar a ṭhat leh aṭang khan hetia mi koh hi a ching riau a, ka duh lo tih hre reng mah se, min koh lui zel tho.






"A lo harh tawh a," ka hlimzia chu ka aw-ah pawh a hre thei hial ang chu!






"Tak tak em?" Ka lu ka bu nghut a, min hmu thei lo tih hriain, â inti lutukin ka inkuk leh fawk a.






"Umm...Tak tak... Ka hlim lutuk... Kan Pathian hi a ṭha tiraw?" ka ti nghal chul a.






"Pathian ṭha tak a ni. Ka lo phei nghal," tih leh phone dah a rual a.






Tuna ka hlimna hi tuma'n min laksak thei lovang. Sum tam tak nen thleng min dil pawh ni se ka phal teuh lo mai.







Chhungkua kan kim ṭhap a, ICU luh hlan kan nghakhlel tawh hlawm khawp mai. A hun a rawn thlen erawh chuan luh kan inchuh titih, kan han nui leh rih. Ka pa Rina lah chuan, "A harh hma zawngin, 'Nang lut rawh, nang doctor va hmu rawh,' min tia. Tunah lem, luh inchuhin in awm a, ka luh hmasak in phal mang silo," tiin an titau der deuh ngei a. Nu ka nih angin ka lut hmasa ber ta a. A hnuah chuan a indawtin an lut ve ta a.







Pathianin a tidam tih hriat zetin a rawn harh hnuah pawh a fel êm êm a, a ṭha chak hle bawk. Tlai lamah chuan ventilator pawh an phawi tawh a, a kut velin khawl a vai palh hlauin an ṭawn behsak thung.







ICU aṭang chuan a tukah ward-ah kan insawn ta a. Mak tak maiin a ṭha chakin a thil ei a tui êm êm a, ei tur a lam deuh reng zel. Mut dawn erawh chuan a pa nen kan inawih chhawk zak zak thung. Lian ve ur tawh mah se, awih loh chuan muhil duh tlat hek lo le... kan awih zel mai aniang chu.







Rin ai taka a ṭhat chak leh tâk siah chuan damdawiin pawh kan chhuahsan thuai a. Ni li liam hnuah a rawn harh chhuah miau avangin, mi rawn kal apiangin 'Lazar' tiin an ko fiam ṭhin. Ani lah chuan chibai a lo sem zel thung.






Sawi hmaih chi miah lo chu khatia nikhaw hre lova a awm lai khan kohhran mite'n min ṭawngṭaipui nasa êm êm kha a ni. Kan hriat ngai mi ni miah lo te khan," Kan lo ṭawngṭaipui che u nia," an rawn ti nawlh zel. Keini kohhranah pawh kan inhman tam loh nen. Ka Ni te nupa erawh hi chu an inhmang hle thung.






Ts-a pawh a rawn lang zut a, Duati chu a hma ai mahin a duatin, a ngaihsak nasa leh zual a. A duty chhung tih loh chu kan kiangah a awm a tih theih ang.






Chhungkua-in Duati thla hualna neiin ar kan talh a, sa dang kan lei nual bawk. Ts-a te chhung pawh an rawn tel ve. Damdawiin kan awm chhung khan min thlahthlam lovin kan kiangah an awm ve reng zel. Hawtir tum mah ila an duh bîk ṭhak lo. Ka Duati hian hmangaihtu a lo ngah hle tih ka hriatchian phah thung.






John-a leh Babie-i te pawh kan sawm angin an rawn kal thei a, anni pahnih pawh hi an inkawp fuh phian a nih hmel.






Chaw ei kham buai reh deuh hnu chuan Babie-i chu room-ah ka hruai lut a.






"I rawn kal ve a, ka lawm lutuk," a nu vangin ka lakah a inthlahrung a, ka khawngaih takzet. Inthlahrung lo se ka duh.






"Kei deuh hi ka lawm asin, min sawm ve duh a" a ti sap a.






"Nang ber ka sawm loh chein, Nangte chu ka laizawn neih chhun i ni alawm, i ni reng bawk ang," a hmel chu hmuh nuam tak a ni. Hlimnain khat miau hek!





"Nang pawh ka unaunu i ni reng bawk ang," min rawn kuah thlawp pah chuan a ti a. Ka lo kuah let ve vat a.






Room aṭanga kan chhuah chuan John-a chuan mit ko kan âk âkin, 'eng nge kan tih?' min zawt a, "I laka inthiar fihlim turin ka hrilh," fiamthu paha ka tih chuan a lo chek deuh hlak a, ka hmel a hmuh hnu erawh chuan ka fiamthu tih hriain a nui ve suk thung.






Mi dang an haw zawh hnu chuan Ts-a chu ala awm reng. Ani hi haw a tum lo nge ni? Duati a ti mu a, khumah a mu ve tlat bawk si.





"I haw dawn lo em ni?" mut ka duh tawh bawk si chuan ka kaitho ta ngawt. A la ngawi ang vung vung zui a.





"Riak ila a pawi em?" a hmel chu a chauh hmel kher mai. Duati damlo nen, a hna lam lo buai ve bawk nen a chau ve ngawt ang. Duatin a lo tibuai ve chhen bawk si a.





"Ka Ni te'n an remti lovang," a ner sak. A ngaihdan a nih loh hmel viau.





"An hre lovang, ka chau deuh em mai," a ti sup a, sawi lo mah se a chau tih chu a hmelah a lang reng.





"Anih chuan, mikhual room-ah va phei rawh, ka mu duh tawh," ka Ni te'n ka ṭawng hriat an hriat hlauvin zawi deuh hlek chuan ka ti a. Ani erawh chuan engah mah a ngai lo tih hriat fahranin a la mu ṭha sauh sauh thung.






"Tho teh," thawh a tum miau loh avangin a rizai sin chu ka pawt hlim vek a. Rum mangkhengin mi rawn melh zui.






"Hetiang em em hian a ni maw ilo nunrawng tak!" ka ner sak. Ka nuih erawh a za ru viau. Rizai pawh hlîm chu nunrawnna a nih pawh ka hre ngai lo. A duh lo viau tih erawh ka hriat phah thung.






"I hnen aṭanga ka zirchhuah vek," ngeiawm tak chuan ka ti ve sak. A lo rum nghut thung.






"Sawi chhuak lo teh," a ti hmuk mai. Ka sawi tum a lo man nghal mai.





"Anih chuan insawn rawh," ve hmak mai a. A hmaah chuan kut inkuangkuah âtin ka ding a. Ani chu ala mu zangthal der mai.






"Hetah lo mut ka tum hleinem," chimawm tak chuan min en a, ka thinrim ru ṭun thung.






"Mu la ti nia," tih leh ka inhersan hmak. Mikhual room-ah chuan ka mu ang a ni mai lawm. Ka pen tur chiah chu ka banah a rawn vuan a, a lamah min pawt let nawk mai. Khuma a mu chu ka zuk bawh rawk rawk a, min lo kuah let vat thung.






"A va mak rawk rawk ve, ka bula mut loh pawh chu i va hlau ve," a âw a nuihzatna lang si chuan min la fiam zui a. A âwmah chuan ka chum a, na erawh a ni lo. Thawh ka tum chuan a ai nghetin min kuah a. Engmah pawh sawi tawh lem lo chuan naupang fel ang maiin a chungah chuan ka bawk ta hle hle a.





Thawh phal miau hek lo le, khum khatah chuan kan pathum chuan kan mu ta ṭham a. Chep ve tak chu kan ni. Khum a lo zau lem lo bawk nen, zingah chuan kan na úrhin ka ring.





Duati mangchhe lutuk chu a nuih leh suk ṭhin.





Engtin mah min ti lo mah se, ka kawnga min kuahna vang chuan ka muhil thei dêr lo lehnghal. An pafa erawh chuan an muttui phian.






Engtik laiin nge ka lo mutthilh hman ka hre lo, ka harh chuan ni a lo eng ut tawh. Khumah chuan keimah chauhvin ka lo mu a, Duati a tho tih hriat zetin sitting room-a a ṭawng lau lau chu ka hria a. Ts-a erawh khaw nge a awm pawh ka hre nek love.






Ka tho chhuak nghal a. Duati te school an chawlh tawh vangin zinglam chu buaina vak a awm lo. Awmtei'n thingpui min lum a tum chu ka lo hnar thung. Ka tho tlai êm a, chaw ka ei thei lo palh ang.






Ts-a hmuh tur a awm miau loh avangin bathroom atanga ka chhuah chuan phone ka ban nghal a.
"Khaw nge i awm?" Ka thawn nghal.
"Inah..min ngai deuh em ni?" rei pawh ka nghah hmain a rawn chhang nghal a. Ngawi renga a haw daih avang erawh chuan ka lunghnur hle thung.





"Engmah i sawi lova," ka la ti hrâm. Ka Ni te hmuh hlauvin zing karah a haw ve êm êm a, eng nge maw lungawi lohna pawh chu ka zawng reng le?






"I mutui lutuk a, ka kaitho duh ta lo che nih kha. I lungawi lo deuh anih chuan ka tihpalh. Khatia khum khata mut ho kha anuam dangdai khawp mai," a tih chuan ka lo lai ringawt nia.






Chhân dan tur ka hriat miau loh avangin mitchhinga lei chhuah lai lem emoji chu ka thawn ta ngawt.





"I lai leh tawh ni maw? Nu nih hnu paw'n ila zakzum reng hi a mak ve ngawt," a rawn la thawn hram. Ka chhânglet ta lo.





Christmas a hnaih tawh avangin ni dang ang bawk in dawrah chuan kan buai leh kher mai. Tunlai phei chu zan dar kua thleng kan inhawng bawk nen, a chauhthlak theih takzet. Mahse, Pathian malsawmna a ni tih hriain chau angin ka lang ngai 6lo. Tu pawh mai chu hlim hmel pu sârhin ka lo chhawn hrâm hrâm ṭhin.





Christmas bazar pawh kan nei ve hman meuh lo. Duati thawmhnaw tur pawh a pa in "Ka lo tum ang, kha chen i lo tihsak tawh a, ka hun a ve tawh," a tih tlat vangin lungsi zân lo chuan a kutah ka dah ta tho. Eng tak chu tihsak ang maw!





Kartawp hi Duati piancham a ni a, lawm erawh kan tum viau. Hall kan book a, hei pawh hi Ts-a ruahman vek. Dawr chauh ngaihtuah rawh, heti lam chu ka lo ngaihtuah a tih miau avangin ka inrawlh duh ta vak lo. Duati tan erawh present ṭha tawk ka leisak tawh thung.
Mi tam tak erawh sawm kan tum lem lo nain, kan inbuatsaih nasa hle thung. A pa hian engmah sawi chhuak lo mah se, ropui taka lawmsak a tum tih erawh a lang reng.





A piancham ni a lo thlen chuan dawrah ka kal lo. Ka naute kutah ka dah a. Engkimah an rintlak em em a, christmas bawra min pui turin tleirawl pakhat kan lak belh a, a tihzia phian. Christmas bazarna tur intuak a duh vangin thawh min rawn dil a, keini'n kan mamawh tho avang chuan ka thawhtir nghal. Ni 23 thleng a thawk thung ang. A felin a mawng a zang a, ka inchhir lo hle.






Tunlai chhanah mahni mamawh leina tur tuaka inhlawhna a zawng hi a fakawm ka ti. Nu leh pa tih buai a duh lo tih a sawi ve nasa, tleirawl fel tak a ni ka ti ve tlat.






Duati nen kan insiam zo room aṭanga kan chhuah chuan Ts-a chuan min lo en vang vang a, ka lai leh ringawt nia. Min en ngun êm avang chuan dik lo a awm ringin ka kawrfual hak chu ka bih nghal a.






"In nalh lutuk," a ṭhutna aṭanga rawn tho chhuakin kan lam pan chuan a rawn pen nghal a. Ka nui seih thung. Ka confi phah sawtin ka hre bawk.





"Ka lawm e," ka bula a rawn din chuan ka ti sup a






"Ka kiangah awm reng ang che," ti supin a ban chu ka vawn theih tur chuan a dah rem nghal a. Ka vuan vat a, Duatin a pa kutah kaiin kan chhuak nghal a.





A hmun kan thlen chuan mi an lo awm nual tawh. Ka rin aiin kan tam daih mai. Kan chhungte hnaivai leh ṭhianṭha hnai vai chauh emaw kan nih dawn tih laiin Ts-a thawhpui te an lo kal nual bawk. An felin an polite hlawm hle a. Ts-a'n min hmelhriattir zel a, biak an nuam hlawm khawp mai.






Programme kan ṭan a, ka pa Rina'n Bible chhiar leh ṭawngṭainain a hlan thlap. Cake zaina hunte hmangin zaithiam zaite kan ngaithla a. Chhungkaw aiawh thusawiah ka pa Rina'n thu a sawi nual a, a sawi zawh chuan Ts-a chu tho nawlhin dawhsan lam pan chuan a pen chhuak ve a. A aw a thian kharh a,







"Kan fanu piancham lawm tura, in hun hlu tak senga lo kal zawng zawngte in chungah kan lawm takzet. Kan fanu Angel Lalremruati hi ka tan chuan ka fanu mai ni lovin ka Vantirhkoh a ni a. A chhan chu amah avang hian nun thar ka neih phah si a. A tet laiin eng emaw vangin ka kalsan a, ka tisual takzet. Kha thutlukna ka siam kha ka nuna ka la inchhir ber a ni hial ang. Tichuan, kum nga hnuah ka hmu leh hi ka lawm takzet. A chhan chu sual khur thuk bera ka tlukluh lai paw'n a hmel pawisawi lo zet hian min en kiau a, 'Apa, i rim a chhia,' min tih tawh chuan pawm chak viau ṭhin mah ila, ka pawm a duh ngai lo. Zu rim kha rimchhia a ti tlat a, ka bulah a awm duh ngai lo. Ka fanu kianga ka awm duh anih chuan zu ka in loh a ngai tih ka hria a, amah avang hian ka in leh ta lo. Natna khumah a awm lai khan kei chu ka zam êm êm a. A chhan pawh, doctor ka ni a, mihring lam aṭang chuan beisei tur a awm tawh lo tih ka hre miau a. Ka rilru tawt ipik lutuk chu hmun pakhatah kalin ka ṭawngṭai ta ringawt a. Kum engzat nge ka ṭawngṭai tawh loh pawh ka hre lo; mahse, ka fanu natna khuma tuar mek tan chuan damna dil tuma ṭawngṭai khan 'I thu ang zelin le' ka ti ta daih. Ka ṭawngṭai zawh hnu lawk chuan a harh thu ka hre zawm zat a. A mak ka ti a, ka lawm bawk si a. Ka sawi duh tak zawk chu ka fanu hian kawngdik min kawhhmuh a, amah avang hian Pathian ka hnaih phah si a." a thusawi tlip nan kal khawm zawng zawngte chu chaw ei tur chuan a sawm vek a.






A sawi zo chu kut an beng dur dur a, kei erawh ka hnuk a ulh tlat pek. Kan ṭhutna lam a lo pan chu mit la lek lovin ka lo en a, ni dang ai mahin a ṭha lehzuala ka hriat chu!
A hnu lam hun erawh tlemin a light ta deuh.






Chaw kan ei zawh chuan kan awm khaw tlai hlek a, chhungte hnaivai tih loh chu awm vak kan awm tawh lo.






In lam kan pan mai dawn emaw ka tih laiin kan inkawng kan zawh hauh lo mai. Khawi hmunah nge min hruai dawn ka zawh lahin a sawi ṭha duh der lo.





Duati chu ka Ni te rualin a haw a, nuam a ti bawk a, a chau ve viau ang.





Car a dinfel hnu chuan kan kalna chu ka hre ta chauh... Kha Kross bulah khan a ni.





"Eng nge hetah kan tih dawn?" amah en chho hâ chung chuan ka zawt a. A chetdan erawh chuan min barakhaih takzet.






Ka hmaah tak chuan rawn ṭhingṭhiin ka kut pahnih chu a vuan a. Ka mita en chung chuan,





"Natna tam tak ka pe che, chutih rualin ka fanu nena in tel lova nun hman hi ka duh tawh lo. Hmalam hun chu ka sawi thei lo; mahse, hei erawh ka chiang; natna emaw ṭahna ka thlen ngai lovang che." sawi mai tur ka hre lo.





"T....."





"Khawngaihin min nei rawh, hlim takin ka siam ang che," ka ṭawng tur chu amah bawk chuan lo pawtchat a. Ka beisei phak lo a, ka lawm bawk si. Ka lu ka bu ta nghut a.





"Aw nge aih?" ka bu nghut chu a lo duhtawk lo khawp mai.





"Aw, ka nei ang che," rawn tho nghalin min kuah nghal thlawp a. "Ka lawm e" a ti sup bawk.





Min kuahna chu thlahin,a kut pahnih chuan ka biang tawn tawnah vuanin min fawp a, ka lo chhanglet ṭha kher mai.






Ka fanu pa a ni a, ka fanu vang tal pawhin ka nei mai a niang chu. Inchhirin a insiam ṭha a, buai viau mah se kan nufa tan hun a insiam hrâm hrâm ṭhin. Chung zawng zawng ai chuan ka la hmangaih ve miau a ni. Haider tum sateh mah ila ka thei si lo. Ka lo thup ṭang ṭang kha tunah chuan ka lanchhuahtir ve ta...





"Ka nun bul inṭan ṭhatna nih hi," amah ka en chu kan hmaa Kross ding chu a lo en ran a. Ka kut a vawn chu nghet takin a hum a.






"He lai hmunah hian zu ka in leh tawh lovang tih ka tiam a, tun thlengin ka la in leh lo. Duati vang khan helai hmunah bawk hian kalin ka ṭawngṭai a, a hnu lawkah a chhanna ka hmu nghal bawk. Tin, nang nen bul kan ṭhatna hmun a ni a, min nei tura thutlukna i siamna hmun a ni bawk. He Kross hi kan inhmangaihna min hriatpuitu a ni. Ka tan chuan a hluin, ka nuna hmun pawimawh tawpkhawk a ni."





Ka kut a vawn chu la thlain ka kawngah chuan nghet takin min kuah a. A darah kuah let ve nghal vat bawk.





Christmas pawh hlim takin kan hmang hova kumthar erawh Ts-a nen kan inneihna tur buaipuiin chhungkua kan buai mup mup thung.






Kha zan aṭang khan rei rial lovin palai a rawn tir nghal a nih kha. Inneih hunah kumthar tirte ruat miau hek.






Ka Ni-in min lawmpui êm êm a, ka pa Rina leh Duati pawh an phur surh surh khawp mai.






Ka nuhrawn pawh a inpuang tawh a, u Ruata kha a bialpa nena an thah ngei a lo ni a. Ka hriat tirh chuan mak ka ti ang reng. U Ruata khan min tibuai tawh lo turin a lo hrilh a, min tibuai leh a nih chuan an thil tih puanchhuahah a lo vau a ni awm e. Kha vanga that ta an ni tih a sawi. Ka nuhrawn hian tleirawl te te te bum chhuakin phai lamah a hralh ta ṭhin a ni. Kan inhmun pakhatah khan hotel sak a, chuchu inphenna atan hman an tum chu lo niin. An dawp fe hnuah a sawi ta chauh a. A thiltih te vangin a bialpa nen chuan jail bang an zut mek a ni.





Kan inneih ni chuan rin aiin mi an tam zek. Biakin an khat vek mai. Min lawmpuitute an ṭhathnem êm avang ka lawm lutuk chu ka hnuk a ulh ṭeuh mai.





"I nalh lutuk," ka pasal mitmengah chuan min hmangaihzia ka hmu.





"Nang pawh i chhe hran lo," a nui suk. Ka beng bula rawn kun hniamin," Mi fak hi chu i hreh ve ngawt mai," ti supin ka bekah chuan a fawp zeuh a.





Duati pawh a pi te bulah awmin a ṭawng ve zat zat a. A pi leh pute chuan an nuih leh hak ṭhin. Inneih tuk mah nise nizan kan mutmang loh avang chuan thawh ka hai nasa hle. Ka zak lutuk chu Ts-a kai thovin min thawhpui ta hrâm.





Ka nu leh pa te erawh chuan min hrethiam takin min lo be luam a. Ṭha tak chuan ka chhang ve mai a. Thingpui an duh leh duh loh ka zawh erawh chuan, an in tawh thuin min chhang thung.





Tukṭhuan ei kham chuan ka thawmhnaw vel rem ṭhain kan buai hle a. Babie-in min pui a, kan zo hma hle thung. Ṭhian mumal ka neih loh avangin Babie-i ṭhianah hmang kha ka nia. A tihchi phian mai.






Chawhnu lam erawh thlalakna hun nei turin kan inbuatsaih leh a, ṭul ti lo hle mah ila, ka pasalin ṭul a ti miau si a, kan la poh aniang chu!





Nupa inkawp rem tak niin, a sawi ang ngeiin hlimna tam tak min pe a, thinrima inhauh kan nei ngai meuh lo. Pasal ṭha tak niin a fanu tan pa ṭha tak a ni bawk a. Chhungkua min enkawl danah sawiselna tur a awm meuh lo.





Ka dawr pawh ka naute kutah dahin kan la hawng ve zel a. Kei chuan ka tlawh zeuh zeuh thung. In lamah Duati leh ka nu leh pa te ka lo enkawl a, chu chu ka pasal duhdan a ni miau si a. Inchhungkhur erawh nula kan nei a, ka khawih tam lutuk lo. Ka lo pui ve zeuh tih loh chu hahthlak em em thawh tur a awm lo. Kan room erawh keimah ngeiin tihfai a, enkawl ka duh thung.







Lalzawma pawh nupui a nei dawn a, min sawm nasa viau nachungin ka raino avangin kan kal thei ta lo a nih kha.







"Kan inhmangaihna min hriatpui a, chhungkaw duhawm tak min pek avangin kan lawm e," kan hmaa Kross ding chu enin a ti sup a, ka lo nui ver ver a.






Mi sual ber paw'n thil tisual mah se, inchhira a sim phawt chuan mi fel ber leh ṭha ber a ni thei a ni.





Ka pasal ngei pawhin natna min pek hnuah hlimna chhiarsen loh min pe a, a kuta ka chelh nawn leh kha ka tisual lo takzet tih nitin ka hre thar zel si a.






"Let tawh ang hmiang, hritlang i kai palh hlauh ang," ti supin ka dul puar ve ṭan êk êk chu a rawn chul a.






"Ka hmangaih che," a biangah chuan ka han fawp zeuh a.





"A aia nasain ka hmangaih che, ka nunna, ka chakna in ni," ti supin ka hmuiah chuan a rawn fawp zeuh a. Car dahna lam pan chuan kan kal ta a.





Duati pawhin a pi leh pu khawhar a hnemin, an hlimpui khawp mai. An duat bawk a, an bulah a tal hret hret zel. Ka Ni te chhung pawh an rawn leng ve zeuh ṭhin. Anni vang hian tun hi ka thpeng tih ka hria, ka lawm hle bawk.





Fahrah engmah nei lo kha, pasal neiin engkim ka nei thung si a. Ka hringnun inthlakthlengdan te ngaihtuahin, ka pasal, min kual chial chunga muhil chu ka thlir vang vang hnuah ka muhil zui ve ta a.


A TAWP TA


[nshima]



🌷Nizanah ka post thei lova a pawi ka ti..rawn sawi turin ka net a muang si a, ka rawn sawi thei ta lova, a pawi ka ti takzet. Exam ka neih dawn vangin tihian hmanhmawh takin ka ti tawp ta thuta, min lo hrethiam hrâm dawn nia. Kan dam Pathianin rem a tih chuan exam zawhah inhmuh leh thuai kan tum dawn nia.

Tun ṭum ka story chu a nawi ka ti a, a boring ka hlauh luatah a plot ringawt pawh ṭum thum ngawt ka thlak phah hial a. A tawp thleng hian ka duh khawp lo em em bawk.😅 A nawi ang anga min chhiarsaktute chungah k lawm tak meuh meuh e. 😊

Sawisel ngai emaw duh khawploh lai in neih chuan sawi hreh lo ula, inzir mek zel ka ni a, ka lo in siam rem zel ang, chuvang chuan diklo emaw a awm chuan rawn sawi bawrh bawrh ru aw😁


Min chhiarsak tute chungah ka lawm tak meuh meuh e, tih ka'n sawi leh hrâm ang e. Ka lawm e.😁😘

Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)