MERCY by Mpi Hmar (Completed)

[Ngaia]

An boruak hre lo mah ila boruak chu a dik lo khawp mai a, ka nu lah chu alo thu tum vuau mai bawk si.


In fapa ber a awm tawh lo a, an nufa in tihbuai reng hi adik ber lo, matei a damlo a, in tunu takngial pawh sikul a kal thei lo a, in tih dan hi ka duh lo hrim hrim, arang lamin in suan chhuak vat ang che u.


Ka fapa in atanga min hnawtchhuak tur hian tunge in nih a?


Ka fapa a boral tawh a min hmusit hle mai maw?
Kan chhuak hauh lo ang, in fanu in chauh hi a ni bik lo, mai mai che u chuan!


Ka nu chu a duai lo viau mai, meizial a pak khu tual tual bawk a.


Zualtei thin a thawk thut, ani hi chu mize danglam tak nei ani reng bawk a.

Ka pi...
Ka hrilh ang che, vawiin ni thleng tur hian in fapa khan enge a tih a?
Rim taka ka u thawh zar zo mai in nih hi hre rawh, ka u in tih duhdah zia leh in tih retheih zia hi kan duh lo, kan phal bawk hek lo.


Enge kan tih duhdah a?
Engtin em em nge kan tih a? Hetianga min tawng reng hlawm a?


Sawmdawngi a rawn in rawlh a, a vin viau bawk a.


Nang kha lo in rawlh hlek suh, thatchhe ropui si, ka u in tihdan hi hrelo kan ni lo, a pawisa nise in ei ral sak a, in tihchhiat vek tawh hi, damlo thi lek lek a a awm pawhin in ngaihsak ami?


Kan ngaihsak lohna pakhat mah ka hre lo, ka nu pawh in thei leh theilo in a bual tawk tawk a, mi hi in haw ve hrim hrim anih hi.


Hua e...
Chhuak mai rawh u, anih loh chuan in thawmhnaw hi ka thehchhuak ani mai.


I ngam anih chuan han tum chhin la!


Ka ngam alawm tih pahin an room ah chuan a lut nghal a, sawmdawngi pawh a tlan lut nghal a, an ri ta rum rum mai bawk a.


Ka fanu mangang leh hlauthawng bawk si chu a tap chel chul mai a.


Davida a in rawlh vat a, Zualte duhtawk rawh, a mualpho thlak emai, thenawm khawveng te hriat ah pawh a zahthlak tiin zualtei zawk chu a rawn pawt chhuak nawk nawk a.



Rapthlak hlawm tak hian,
Kan inchhung ah leh zel pawh ka fate kut an thlak ngam nia, mi rapthlak chhungkua in lo nih hi.


Ka ni pawh a ngawireng bik lo.


Nangni baka rapthlak tunge awm chuang le?


Tih tak em ah chuan in fapa in a nupui fanau te duhlo in a kalsan a, rethei leh vakvaiin asiam a, dinhmun tha ah an ding ta maw tih veleh in rawn lut leh a, khang hun zawng zawng ah khan in tunu dam leh dam loh hre tur pawh hian vawi khat pawh in rawn ngaihven ami?


He in chhung ah hian in luling tur pakhat mah in awm lo, in ta leh in thawh chhuah pakhat mah hi a awm lo.



Chutianga tih kawngah chuan e, kan fapa nupui anih tawh chuan kan ta ani tawh a, kan in ah pawh mo duh lo in apasal akheuh hrang a, hetiang mo hi an tam lo khawp ang, ka fapa hi min enkawl tu tur ani tih pawh a hre reng, akheuh hrang a, kan awmna tur Diktak anih hi.


Awii!.
Ka sawi peih tawh lo ve, puia thlarau pawh in zah zo thlawt lo ani e, chhuak vat zawk ula atha ang, anih loh chuan kan thleng thui lutuk palh ang.

Davida erawh angawi reng a, ka kut leh ke vel chu a khawng avangin min hmeh sak reng bawk a.


Kan nula te pahnih pawh room ah an inkhung bo hmak a, ka nu pawh ngawireng in athu tum bur bawk a.


Ka khum puan te an thlak vek hnu chuan khum ah min muttir ta a, ka khum ah ngei chuan ka mu leh ta.


Ka ni!
Rei tak cham thei ka ni silo a, nang tal hian ka u hi lo awmpui teh, ka ngaihtuah emai, an kuta awm ngawt tur chuan ka ngaihtuah lutuk ani.


Zualte, lungngai suh, adam hma chu ka awmpui dawn alawm, kan nufa in kan awm chho rih mai ang, an kuta dah te chu achi loh lutuk, an sual bawk si a maw, an vawhlum duh mai ang, engpawh nise icham chhung chu in lamah ka awm anga, ihaw hnu ah kei ka awm chho thung ang.



Ka van lawm tak ka ni, nang hi chu ilo awm lo ang tih hi ka hlau hliah hliah, kan tan hian ivan tangkai tak em.


Davida pawh rei tak a awm ve a, ka taksa chu a khawng tlat avangin hmeh deuh reng ka ngai a, ka aw erawh zawi te in a ri chhuak ve tawh thung a.


Davida chu zanriah ei tura an sawm tlat avangin zanriah a ei nghal a, zualtei nen rawng an bawl mawlh mawlh a.


Awi, in tawp zia hi a rapthlak lutuk, ka u that lai kha chuan kil tin hi afaiin ahnum hlarh reng a, tunah chuan akhak kual vel vek anih hi.


Zualtei a ang bawrh bawrh a, in vel chu a tifai bawk a.


ka u chaw tlem tal ei rawh aw, i ei loh chuan itaksa a chhe si a tiin buhhawp leh bawnghnu te min rawn pe a.


David, ka u hi ilo eitir hman em? Chhuat te hi kan nawt fai ange.



A rawn phei vut a, ka khum bula chaw leh bawnghnu te chu min rawn barh a tum a.


Ka tlawmngai ve bawk a, keimah chuan ei talh ka tum a, ka ti hleithei silo.


mercy, ka eitir ang che, ila ti thei thlawt lo anih kha, idam anga ikut ngeiin ila ei dawn alawm.


Vawi hnih vel min barh hnu chuan ka lung achhe em em mai a.


Che thei reng reng lo a ka awm lai khan,
Inu chaw va pe rawh tiin ka fanu an rawn dah tir a, chaw rum leh chi, chawhmeh tlem a zawng min rawn pektir thin te chu ka ngaihtuah chhuak a, tunah chuan buhhawp nem leh bawnghnu te nen chaw min barh chu ani sia.


Ka mittui aluang zawih zawih a, ka lung achhia ani.


Mercy, hahdam rawh!
Ibulah kan awm reng ania, tuman an tina tawh lo ang che, chaw tha taka iei chuan idam leh vat dawn ania aw.
Ka mittui chu min hruk hul sak a, lungchhe tak chung chuan chaw pawh chu ka ei zo ve ta vek a.


Chawei kham hnu chuan ka mu hahdam a, davida leh ka ni pawh hma takah an haw a, zualtei chuan min awmpui thung a.


Kan inkarah ka fanu tui takin a muhil sek sek a, ka van lainat tak em, pa pawh nei tawh lo ani a, hmangaih taka dawm tu tur ani leh api te lah sakei hlauhin ahlau chu ani sia.



Zualtein an pa a be lai chu ka lo ngaithla ve reng a.


Pa a!
Ka lo haw vat thei dawn lo ania aw, kan dinhmun hi hria nila chuan a rapthlak lutuk, ka u hi kalsan mai chi pawh ani lo, athi lo chauh ani, apasal chhungte sual zia leh rapthlak zia chu maw, hawsan ila chuan an vawhlum duh mai ang, ka nu leh pa te pawh engkim lo hrilh la, ka cham deuh ang aw...


An pa chuan enge a rawn sawi erawh ka hriatpui lo a, mahse zualtei chhan dan atang chuan athlamuan thlak khawp mai.


Ka taksa kham chu hmeh reng a ngai a, zualtei pawh amu tam lo thin hle bawk.


Mate...
Zawi te te a vawi thum ka koh hnu chuan a rawn tho a, a beng a rawn dawh vat a.


Dawr lam chanchin hi ngaihven teh, engtin nge an awm zel tih hriat tum teh aw.


Ka phone a kan nulate hming ka save chu ka hrilh a, ava call ta a.


Rei tak an inbia a, an inbiak zawh hnu chuan enge chanchin tiin ka lo zawt vat a.



i nuten pawisa an va la thin a, idamloh chhuanlam in an la thin sia, an lo pe lo ngam lo a, nimin piah ah pawh an lo la ani awm e,


Awi an zaklo sia maw, dawr pawh hi titawp mai rawh an ei ral vek dawn che ati nuah nuah a.


Mahse an lak loh chuan eitur an neilo mai dawn si a, mahse pension an la ve tho si a, mi tihchhiat hi chu an chak ve ani.


Zan arei telh telh a, thla eng mawi tak chuan kan khum bul tukverh chu a rawn chhun eng viau mai.


Mate, akil lamah khan ka lo mu teh ang ka tih avangin ka nau chuan min sawn phei a, tukverh ka hawn tir a, parda ka hlim tir bawk a.


Tui takin ka mutpuite chu an muhil barh barh a, kei erawh chu ka meng kar a.


Van lam chu ka thlir reng a, ka lung a leng em em mai a.


Upui, en teh si ar leh chhawrhthlapui te pawh vanzawl mawi turin angai te bawkin an lo lang leh ta, arsi leh thla te pawhin an kawng an hai lo, lungrual takin tumah indip buai lo in an leng za a, enteh ka van riang bik tak em, tinge min kalsan daih le?


Ka ngai lutuk che, tunah hian ka bulah awm nila chuan maw, duat takin min enkawl anga, thlamuang takin ka awm mai tur, upui van zawla arsi te khi ka van awt tak em, an ni chu kawp ten an leng asin, theih nise lo kir leh la aw, mahse atheih tawh silo a ti raw?


Khawnge i awm? I rauthla tal khan min rawn kan ve thin angem?

Ka mittui aluang ngiai ngiai a, thla eng lutuk chuan ka lung ati leng em em bawk si.


Ka tap tlaivar deuh thaw hi ani ringawt, zan a rei telh telh a, ka lung lah chu aleng telh telh mai si.


Zing lam ah ka muhil ve ta chauh a.


Ka u!
Iharh peih em? Chaw ei rawh aw tiin zualtein min rawn sawi nawk nawk a, mut khamlo zet chuan ka meng diar diar a.


Mate, ka mut achhuak emai, ka harh hunah aw tiin ka muhil zui leh nghal a.


Ka bula titi mawlh mawlh ri chuan min ti harh hlawl a.


Ka mit ka han meng a, ka ni leh davida leh zualtei an lo thu khawm leh ran tawh a.


Ilo harh tawh maw?
Imutui khawp mai, itaksa pawh atha chak viau ang.


Chaw tlem tal ei rawh aw tiin ka ni chuan nui sang hian min lo be sawk sawk a.


Ka tui ahal!


Tui a rawn la vat a, ka lu an dawm kang a, tui chu ka in khawlh khawlh a, ka harh ta huai mai.


Engpawh nise phai lam kal chu rawt hmasa ber ila atha ang, kan neih ang ang pawh kan thawh khawm mai anga, hetia in a awm tawp chu atha ber dawn lo, zualtei haw hma hian kan zu kal anga tiraw Zualte?


Davida inpekna chu a ropui ka ti, mahse ka zak ani.


Apasal mitmu em pawh ala keh hma in an room ah mipa dang ngampa takin a awm ania.
Ka fapa thlarau pawh ka lainat e tia ka nu tawng ri chu kan hre pha vek a.


Zualtei phei atum chu ka niin akhap thuai a, engtin pawh tawng rawh se, an duh duh in lo tawng mai mai rawh se, aho lutuk tiin akhap bet vat a.


I ke vel hi ka lo hmet ang aw mercy, exer lak te, hmeh zawi te i mamawh em em a, itaksa hi control angai ani tih pahin ka Khum mawng lamah chuan a rawn lawn thuaia, ka ke fai lem lo tak chu muangchang in a rawn hmet a, anuam in a hahdam thlak riau.


Nileng in min awmpui a, ka ni leh ka nau in min bualfai bawk a, ka sam te pawh engmah tithei lo ka nih avangin ahnawk em em a, tawite in min tan san bawk a.


Engpawh nise, phai lam pan phawt chu atha ka ti khawp mai, tiang chuan hma a sawn dawn lo a, mahni hna lamah theuh kan buai a, englai pawhin kan enkawl hman dawn lo a, Chuvang in a dam hmasak ber angai ani, pawisa te chu Mihring vanga awm ani a, kan hmang a nga, a awm leh mai ang, enge in ngaihdan?


Davida zawhna chu ni e atha alawm han ti ngawt dawn se sum lam kan harsa ve theuh hlawm si a, chhan dan thiam ahar an ti ve pawh ani mahna, ka ni leh ka nau chu an ngawi deuh reng a.


A tha viau na in keini ang tan chuan phai lam pan hi ahar ve em ani ka ni chuan ati zuai raih a.


Lungngai suh u, ka awm alawm, ka neih ang ang ka thehchhuak ang, dam tluka thil hlu hi a awm lo, hmansen loh neiha damloh ai chuan kan neih ang ang seng a dam hram hram tum hi ahlu zawk, phai lam pan tur chuan rilru inpuahchah ang u tiin thutlukna asiam ta rup a.


Kan rilru erawh ahah tlang, phai lam pan chu sum sen a nat tur zia lah chu kan hre ve vek mai si a.

mahse davidan a rawt tlat si avang chuan a hun leh ni tur te chu an han duang chhin vel a.


Thlathar tir lama kal tur chuan kan inruahman chu a ni der mai.


Englai pawh in rilru tawngtaina ka nei reng thin a, heti em em a ka chunga vanduaina lo thleng bik hi engvang zozai nge anih tih hi pathian hnen ah ka zawt fo thin.




Thla alo thar a.....

Thlathar thawhlehni hmasa ber chu phai lam kan pan tur ni ani.


Thawhleh ni tlai hma takah davida a rawn thleng a, keini pawh kan lo insiam peih diam tawh a.


Zualtei leh davidan min kalpui dawn a, keini lam pawh kan theih ang ang in kan lo inpuah chah ve a, dawr atanga kan hmuhchhuah pawisa te pawh tlem a zawng kan lo inring ve a.


ka fanu erawh hruai theih ani silo, ka ni bulah ka hnutchhiah a, a men deuh pur a, a nu lo haw leh vat rawh aw, min lo be rawh aw tih pah chuan a tap deuh par reng a.


Ka niin tawngtaina in min thlah a, in atang chuan kan chhuak ta.


Kal theilo ka nih avangin davidan step chho ah chuan min pawm a, kawngpui ah chuan a motor alo dah a, ka lo rindan chuan sumo velin kan kal ka lo ring a, ka lo huphurh viau mai a.


Mahse a motor, hmana ka lo chuanna thin ngei chu a rawn thawh chhuak bawk a, thla a muang huai mai.


A seat hnung ah chuan zualtei nen kan thu a, kei erawh chu ka thut rei theih loh avangin ka mu thung a.


Tlai dar 4:30 pelh velah chuan kan chhuak ta.


Zankhua in kan tlan a, ka harh zeuh zeuh tih loh ah chuan ka mutui khawp mai, zunram thiar vela chhuah ka harsat avangin diaper min hrentir bawk a, nausen ang maia sawngbawl ka ngai chu ka inthlahrung angreng hle.


Khawvar tan tirh ah chuan khua eng eng emaw kan tlanpel zut a, ka la hmuhngai loh te anih avangin thei leh theilo chuan ka thu a, ka en duhin hmuhnawm ka ti ngang mai.


Khua a rawn var a, reivak lo hnu ah chuan Shillong kan thleng ta.


Kawngpui nuam tak leh thing ding seng sung kara tlan te chu anuam in boruak lah chu a nuam em em mai bawk si, ka dam sawng sawng in ka hria.


Khawpui chhung tawntirh happy valley an tih ah chuan kan tlan lut a, davida lo kal thanna a ni tawh bawk a, chin chang a hre hle bawk a


Hotel pakhat alo awm a, a building alian hle a, a nawm hmel hle bawk.


A kawtah parking zau tak a awm a, tah chuan a motor te a han park fel ren rawn a, lo thu lawk rawh u tih pahin motor atang chuan a chhuak vut a


Minutes sawm hnu velah a rawn let leh a, hnathawk ni awm tak tlangval pakhat hian a rawn zui bawk a.


Kan bag vel te chu an thiar a, kei pawh chu davida chuan min rawn pawm tho bawk a.


Kan room chahbi nen kan room tur lam chu kan pan ta a.


Kan room ah chuan khum lian ve tak pakhat leh single khum a awm a, TV a awm bawk a, a faiin athianghlim hle.


Kan in dah luh fel hnu chuan zualtei leh davida chu an inbual fai a, kei pawh min bual turin bathroom ah chuan min chawi lut a, ka taksa ka control theih tlat loh avangin an pahnih chuan min bual vel a, nuam chu ka ti zan lo ani.


Kan intihfai zawh hnu chuan khum fai leh nuam takah chuan kan mu hahdam a, davidan thingpui a order te chu kan in bawk a.


A thian te ho a be kual zung zung a, doctor rawn tur tha deuh te a zawt kual bawk a.

[Ngaia]

Chawhma lam zawng chu kan mu hahdam a, zinkawng thui tak zawh kan nih avangin kan chau ve deuh bawk nen, kan let phung hlawm a.



An ni pahnih chu an chhing sek a, kan mutna bula tukverh ah chuan ka dak a, a faiin a thianghlim em em mai a, hmuh anuam lutuk.


Ka vawikhat kalna ani bawk nen ka helhhawlh deuh nge ka hre lo, kal chhuah vel chu ka chak em em a, ke a kal thei ni ila chuan ka kalpuite mut hlana han teihawi vel chu ka chak viau.


Ka hrechhuak thut a, ka ni chu ka han call vat a.


Ka aw chu aring thei ang bera chhuah ka tum na in a har hle mai, mahse kan thleng tawh ani tih ka hrilh chu ahre ve mai bawk a, ka fanu chanchin zawh ka chak viau na in ka tawng theihna in atlin silo.


Zankhat mah ka tello a la riak bo ngailo anih avangin ka ngaihtuah em em a, ka khawngaih bawk si.


Chawhnu pawh a rawn inher leh ta vut a, sana kan en a, dar thum lai a ri tawh a, inentir tur kan nih avangin kan tlai ka hlau a, ka nau chu kaihthawh tumin kan au thin a, ahre der silo, ka tawlh phei a, ka nawr nawk nawk hnu chuan a rawn harh ta a.


Sana a en vat a, insiam ahun der tawh ani tih hria in davida akaitho vat a, ani pawh chu mut khamlo tih hriat tak hian a rawn meng diar diar a.



David, dar thum a ri reng tawh mai, insiam tan ahun lo maw?


Dar nga hnu ah ania, mahse inti harh hrim hrim ila apawi lo, ril te pawh atam alawm tih pahin a tho a, ham bai bai bawk a.


Ka taksa a sil hle mai, kawng athui deuh bawk ani, eitur vel kan order ange tih pahin a chhuak nghal vut a.

Ka rilru te te chuan davida kan tana a inpekna ropui zia hi mak ka ti tawp thei lo.


Ka phone a rawn ri teh mial a.


Ka nau in alo la vat a,
Awi zonuna anih hi, teh mial a tih pah chuan achhang thuai a.


I mak e, ka u damlo thi lek lek in a awm a, ihmel pawh kan hmu lo ania, ivan thei em em ati nghal bawrh bawrh a, ka lo inthlahrung angreng khawp mai.



Ava zialo ve aw, chu enge in an tawh? Kan lo hre ve lo reng reng anih chu atih avang chuan zonuna te pawhin harsatna engemaw tak an tawk ani tih ka hrethiam mai a, han biak pawh ka chak hle nain ngawihreng bak tih theih ka nei silo.


Thingpui no thum leh ahmeh tui tak room service in a rawn dah a.


Ka ril atam tawh lutuk tih pahin ka nau pawh chuan a eiin a in nghal bawrh bawrh a, inthlahrung dek chuan ka lo ngawi reng a.


Zualtei hi iva ti mak thin tak, damlo zawk ei tir hmasak tur alawm.

A nui uar uar a, ani chu riltam mahse engmah a sawi tha thei chuang lo, damlo enkawltu zawk hi kan puar em em phawt anga, ani chu nakin ah.


Kan naute hi keiman kan eitir ange, zualtei hian a ti mak emai, aril te pawh alo tam ve anga sin tih pahin thingpui no chu ka hmui ah a rawn chuktuah vat a.



Zah ka sawi thei silo, barh reng ngai nih chu ka zak em em ani.


Ka thil ei leh in chhung pawh a rei viau mai, dawhthei takin min buaipui zel a, ning hmel an pu ngai lo.


Thingpui te kan in zawh hnu chuan ka nau chuan ka thawmhnaw velte chu min thlak sak a, an ni pawh an insiam ve nghal bawk a.


Angai te bawkin davida chuan min pawm thla leh hnak hnak a, motor seat hnung ah chuan min muttir a.


Ka thu duh...
Zawi sap hian ka lo hrilh a, khawpui vel chu hmuh ka chak ani.


Khawr deuh hlat chuan ka thu a, ka nau in min dawm bawk a, kan tlanchhuak a, ka han hawivel a, hmuhnawm ka tiin mit atlai duh ngei mai.



Thui fe kan tlan a, hmun lun lem lo tak ah hian damdawiin lian zet a awm a, chumi kawtah chuan kan ding a, a hmun ah erawh mi an tam ngang mai.


Motor te a dah fel a, kan inpawm chhuak leh ta a.


Min pawm chung chuan hma ahruai a, chu damdawiin lian zet chhungah chuan kan lut a, kal kual na tur lah chu atam si, kan kual fe hnu chuan kan tum ram kan thleng ta.


A thianpa nge ka hre lem lo, tlangval ni ngeiin a rinawm, min lo nghak ran a, chutia an han inhmuh hnu chuan chupa chuan min lo buaipui zung zung a.


Thutthleng ah te ka thut mai theih loh avangin seat dup nei naute nawrna bawm ang tak ah hian thu mu deuh hian min dah a.


Ka bulah chuan an thu a, an titi bawrh bawrh a, ka mitin a thlir phak tawk ah chuan kan mizopui ka hmu hnem ngang mai.



In chhung hnaivai te ami?
Min rawn hrilh lawk silo a, min thawng teh thut lutuk a.


Mercy kha ania, ila hria em?

Ngawi teh, hmana mi kha maw?
Chaw eikhawmna a i rawn hruai kha maw?


Aw ni e, a danglam tawh iti em? Hringnun hi chu a in thlak thut thut zel mai zawng anih hi.


A va mak ve, eng na nge?
Ka hre tawh reng reng hleinem, a danglam em bawk anih hi.


Nia, a chhe ta em alawm le, a na ber pawh kan hre mai lo a, nerve anih kan ring ve tawp a.


Chuan engti zia a nangin irawn hruai teh daih?


Nakin ah ka la hrilh dawn che nia.


Davida leh a thianpa titi chu mitchhing chungin ka ngaithla reng a, midang tan chuan tar chhia buaipui ngai ang mai ka ni reng a, hriatthiam pawh a har ve ang.


Mi tam tak karah chuan kan nghak rei khawp mai, ka taksa pawh a kham em em a, tih vak ngaihna a awm silo.



Khua pawh a thim hial a, ka awm ngai a awm reng ka nih avang chuan ka ning hle ani


Dar sarih dawn ah ka hming an rawn lam ve a, davida leh zualtei pawh phur fahran hian an tho zawk a, min rawn pawm chhuak leh ta a.


Doctor hmu tur chuan kan pathum chuan kan lut a,doctor bula chair awmah chuan min thuttir a, ka ban tawn tawn ah ka tluk loh nan min chelh a.


Ka natdan te ka sawi theih loh avangin ka nau chuan a hriat ang ang chu a sawi zung zung a.


Uluk takin alo ngaithla a, min han en vel a, ka kut te chu a han khawih kual vel a.


A dam leh ang, lungngai reng reng suh u, adam vat ang atih ri chu khawvela thil ngaihthlak nuam ber ani


Mahse ka admit ang che u, admit angai a, treatment kan pe anga, a dam leh vat ang tih pah chuan admit na lehkha chu a ziak mawlh mawlh a.



Lehkha thehluhna tur a ahrilh ah chuan zualtein a va thehlut a, pawn ah kan lo nghak ran a.


Davidan cabin a han dil ngial na in ruak remchang alo awm loh avangin general ward ah chuan kan awm leh ta a.


Chumi zan atang chuan treatment min pe ta nghal mawlh mawlh a, ka case a danglam deuh avangin pahnih in riahpui an phal a, pher te leichawpin kan awm leh ta nawk nawk a.


Drip leh vitamin min khai reng a, min jection reng bawk a, damdawi ei chi nen, ka dawng hnem mawlh mawlh khawp mai.



Mak tak maiin ni li na vel atangin ka chawei a tui tan a, ka ril atam deuh reng a, chumi ringawt avang pawh chuan an lawm hle.


Kar khat hnu velah chuan ka taksa ah a rawn lang tan a, ka khawng urh te pawh a rawn zia ta, ka kut ke chu exer reng tura min tih avangin ka ti che reng a.


Zualte...
Ka aw a la phui vek emaw ka tia.


A vawt ka tih deuh avangin rizai sin ka duh thu zualtei hrilh ka han tum chu ka aw te pawh a lo chhuak ve thei leh ta.


Mak ka ti lutuk, ka lawm bawk si chu ka nau chu kan ko nawn leh a, duhaiin ka lo ko ring ani mahna, kan bula mu te an rawn meng hra mai a.


Ka nau erawh aharh chuang lo.


Mi mutui lai chu tih harh ka hreh ve bawk si nen ka ke chuan rizai chu kan pir kang a, ka zang ta lutuk chu mak ka tia, rizai pawh chu harsa vaklo Chuan ka la ve thei mai bawk a.


Ka lawm e Lalpa.
Min tidam anih phawt chuan itan theihtawpin iram zau nan ke ka pen ang tiin lawmthu ka sawi mawlh mawlh a.


Karkhat hnu atang chuan ke a kal zir tura min tih avangin inchhung dungah chuan muang changin min kaikual thin a, ka hah hma in ka ke akham hma em em a, ka ti rei thei lo na in hma erawh ka sawn viau.


Chawlhkar hnih chuang zet kan awm a, ka tha tawh khawp mai, ka taksa ah pawh lang thei khawpin ka thau a, ka kut leh ke pawh ka hmang thei sawih sawih tawh bawk a.


Ka aw pawh pangaiin achhuak thei tawh a, hmasawn tak kan ni.


Angai ang chiah tur chuan hun ala duhrei ang tih chu doctor te min hrilh dan ani, chuvangin min chhuah ta a, damdawi ei zawm tur erawh kan lei hnem ngang mai.


Karhnih zet hnu ah kan thlenna hotel ah bawk kan let leh a, zan kan riak a, atuk ah bill te kan pek fel hnu in kan haw dawn ta.


Kan kal lam khan pawm ka ngai kha ani a, kan haw lam ah erawh muang changin step ah min kaithla thung.


Davida pawisa sen ral chu engemaw zat pek let ve kan tum a, a duh lo ngang mai, zualtein ape a, an in pelet leh a, chutiang reng reng chuan an awm a, kan pe thei ngang lo.


Hotel atang chuan zanah bawk kan chhuak leh a, kan tlan tlaivar thak a.


Dam tak leh tluang takin atukah aizawl kan thleng leh a, kan in step ah te chuan pawm ni tawh loin min kaithla a.


Ka ni leh ka fanu in kawngka atang in min lo thlir a, ka fanu zuang tawr tawr pawh chu ka zu hmu a.


Kan thlen rualin bawihtei chuan min lo kuah chawt a, a nu ka ngai tawh lutuk che alo ti vat a.


Kan thawm hria in in neitu te nupa pawh an rawn lang thla vat a, kei pawh thutthleng ah chuan ka thu ve bawk a.


Mercy, a lawmawm hle mai, dam takin in rawn haw leh thei a, kan lo tawngtai pui reng che u a, zing tawngtai inkhawm ah te ka thawh hial a, ti reng reng mai a idam lo reng hi mang a ang ru riau a, mahse hei pathian zarah hmasawn na tam tak neiin irawn haw a, a lawmawm emai.


Kan innei tu nu chu a lawm ve takzet ani tih ka hre thiam mai.


Anu, ikut hmeh angai em?
Bawihtei chu ka bulah a thu chawt a, ka kut te chu alo hmet mawlh mawlh a.


Bawihte a nu hi a dam tawh alawm, hmeh ka ngai tawh lo tiin duat takin ka pawm hle hle a.


Ka nu te ka atang erawh chuan avan lawmawm ve tih tawngkam khat mah ka dawng lo, mahse ka vui lo ve, min hmangaih lo tlat alawm.


In kan thlen atang chuan nitin exer ka la a, ka taksa ka sawizawi reng a, damdawi ka thlah lo bawk a.


Zirtawp zan ani a.


Ka u, nangpawh that lam ipan zel bawk a, kan pa lakah pawh ka inthlahrung ve tawh a, Monday lamah chuan ka haw san tawh mai ang che aw, engemaw chen chu ka niin ala awmpui ang che nga, nang pawh itha chho zel mai ang.


Ni e, ainthlahrun awm tawh khawp mai, pasal fel tak inei hi ka tan vanneihna ani, haw tawh rawh, pathian zarah ka tha chho zel tawh ang.


Chu mi zan chuan kan unau chuan rei tak thleng kan titi a, ka fanu tui taka ka bula muhil chu ka kuah veng veng bawk a.



Inrinni chawhma ah phone ka hmang a.


Engkim in tifel tawh em? Zan in hian engkim ka titawp tawh dawn a, naktuk lamah chuan nangni pawh in lo kal ngai ang aw, ka lo ring dawn che u nia.


Awle, kan lo kal ang, kan tifel vek tawh e...


Davida ka be leh a,
David motor chu ilo bia em? Ka fiamthu lo ania aw, ka ti tak tak, lo be fel vek rawh aw......

[Ngaia]

Ka thil tih tur tumah ka hrilh lawk lo, ka ni ka phone chho bawk.

Zan tir ah chuan kan vaiin sitting room thutthleng ah kan thu thap a, kan innei tuten engkim min hriatpui se ka duh avangin anni pawh ka ko a, an bangbo hlawm viau ang.


Ka phone a rawn ri a....


Mercy, ithil tih kha iti tak tak em?
Motor chu ka rawn be tak tak dawn em ni?


Ka thil sawi tawh ka ti mai mai ngai lo tih ihriat kha, ila be lo zawk ami?


Anih chuan ka han kal nghal ange, kan rawn thleng har lo ang.


Hlawhfa tur chu aw... rawn theihnghilh lo la.


Kim tur ang ang kan kim hnu chuan ka thil tih tum chu ka sawi tan ta a.


In hriat theuh angin he in chhung boruak hi a hahtlak hle mai a, chhungkua nilo tur leh awmkhawm lo tur kan awmkhawm a, boruak a dik thei lo ani, ka pasal a nu leh farnute hi ka zah a, ka hnawhchhuah tur an nilo, chuvangin keini nufa hi kan bungrua nen kan chhuak dawn ani, hun rei tak ka ngaihtuah hnu ah he thutlukna hi siam ka ni.



Tawrh hram hram ka tum a, ka tuar reng bawk a, mahse ka thei tawh lo ani, chuvangin zanin hian inthiar chhuah ka duh a, chumi min hriatpui tur atan chuan ani ka koh khawm che u ni.


Phawk deuh hra hian min en hlawm a.


Kan in neitupa chu muang ban chat hian a rawn tawng chhuak a.


Chuti rum rum tur em ni?
In boruak pawh kan lo hre tam lo viau a, tha tak leh hlim takin in awm tlang reng emaw kan tia, eng ti zia a chutiang te rilruk ta rum rum nge maw inih le?


Chhungkua chu in ngaihdam tawnna te, inhriatthiam tawnna te tello chuan inngeih ahar em em a, nangni pawh boruak tha lam thlir in tun hun atang hian kalphung thar in kal ta ula, hetiang a tih rum rum hi atul ber lo asin.



Ka pu, ka tuar rei tawk tawh a, ka dawr zawng zawng, rim taka ka din nen lam achhe vek tawh a, damlo khum beta ka awm lai pawhin min ngaihsak hek lo, chhungkua angin kan in en lo a, in hmangaih tawnna pawh a awm lo a, damchhung in kan inmil dawn chuang lo, chuvangin thutlukna ka siam chhung pawh a rei a, ka awm thei tawh lo ani.


Engemaw chen chu boruak a reh dak a, tumah an tawng lo.

Chu tih lai chuan davida te ho pawh an rawn thleng chhun zawm ve nghal a.


Chutia puithu taka kan lo thut deuh laih avang chuan an lai khawp mai a,choka lam dawhkan kil chuan an thu bial laih a.


Kan vanduai anih hi...
Kan fapa aboral tawh a, hei hi kan chan tur anih chu ka hmuh lawkna a rei tawh, misual ber chan kan chang reng dawn a.
Sawi theih ka nei lo.


In la khawngaih thlak fahran in ka nu chu a rawn tawng chhuak a.


Mahse kan hriatchian em avangin kan chhang buai peih lo.


Zan a rei hma in bungrua vel chu pack ka rawt ta chuk chuk a.



Akhai aw, avan zia lo em, tihtheih lah kan nei silo a, in thutlukna ani miau si a.
Bawidawng angreng tak chuan kan in neitu pa chu a tei kual ruk ruk a.


Kan room ah ka lut a, che vak theilo mah ila ka theih ang ang chu ka pack fel ve a.


Anu!
Khawnge kan kal dawn?


Bawihte, kan in thar ah kan kal tawh dawn a, api leh ani te tello in aw, chuan tuman an hau tawh lo ang che. Iduh em?


Aw duh e, mahse anu api te lo kal tawh suh se aw.


Bawihte, an lo kal tawh dawn lo aw, kan pahnih chauhin kan awm dun tawh ang, ka fanu meuh pawh in a pi leh ani te ahlau em em mai hi zawng rilru ana ani.


Kan ri ta nghal rum rum mai a, bungrua te pawh kan in siam nghal rum rum bawk a.



Bungrua ka lo ngah angreng tawh avangin a hautak angreng hle, davida tlangval rawn hruai pathum te chuan an thiar tlauh tlauh bawk a.


Bungrua hi la vek suh u, ka fapa thawh tam tak hi a awm ve bawk ania.


Ka bungrua ah hian ifapa ta atel lo, kan inneih hma a ka lei vek anih hi, bakah ka pasal nena kan leidun hi in ta ani lo.


Engmah chu dah ka tum bik lo, ka chunga an chet dan a rawva bawk a, min tih ang chiahin ka ti ve dawn ani.


Zan dar sawm velah chuan kan in peih duak tawh a, kan inchhung pawh chu a ruak hawk tawh mai. Kan room phei chu a ruak vek tawh a.


Kan nupa room thin ah chuan ka va lut a.
Ka pasal dam lai a a hnathawk tur insiam almirah darthlalang a uluk taka a in en lai vel te chu ka mitthla ah alo lang uar uar a, kan pahnih a kan khum kan hun fel lai vel te nen chuan.


Ka lung aleng a, ka lung a chhia a, a sulhnu tam tak pawh ka kalsan dawn ta chu ani sia.


Kil tin maiah chuan a sulhnu a awm a, a thawmhnaw banna thin te nen lam chuan ka mitthla ah athar a.


Upui, min ngaidam rawh aw, ka lak ata ikal bo tawh a, isul hnu tal hi vawng tha reng tur ka ni asin, mahse atheih siloh, ka ngai lutuk che ka ti sap a, room chu ka chhuahsan ta a.


Sawm leh a chanve a rik meuh chuan kan inpeih thawkhat tawh viau mai, kan kal dawn chuan ka nu chu chibai ka tum a, lehlam a hawi tak hmak avang chuan ka ti lui duh ta bik lo.



Chu in, ka hmangaih ka pasal nen hlim taka kan lo chen ve na in chu ka chhuahsan ta, a tawp nan kawngpui atang chuan ka thlir thla leh vang vang a, ka thaw halh a, motor ah chuan ka lut ta a.


Kan nula te ka phone a, ahmun ah an lo awm tawh thu min hrilh a.


Kan dawr bul lawk ah inruak min hmuhsak a, kan luah hma atang in thla hnih luahman an lo pe tawh bawk a.


Kan thleng phei thuai a, in neitu te in ah han in report ka duh viau na in an lo reh thap tawh avangin ka tibuai duh ta lem lo.


Thawm dim angreng tak chuan kan inthiar lut ta a, in chu alian em em lo na in a thianghlim em em a, in tha ve pangai tak ani bawk.


Pindan pakhat lian ve pangai tak leh pindan te reuh te a awm a, bathroom a zau tha a, sitting room leh choka erawh inzawm vekin a awm thung, rawng hnawih thar vek ani tih ahriat a, a thianghlim bawk si.


Kawngpui an hnuai chiah anih avangin bungrua inthiar vel na pawh a harsa lem lo.


Ka laina te ho chuan bungrua chu an han thiar thla leh tauh tauh a, kan nulate pathum an tel ve tawh bawk a, hna a sawt khawp mai.



Zan dar khat vel thleng chuan kan ri nak nak a, inrem fel thak erawh kan taksa achau tawh bawk nen kan peih ta ngang lo a.


Thingpui te kan han in te te a, davida thiante ho chu an haw ta hlawm a, kan nulate ho nen chuan kan riakkhawm a, khum ah pawh mu lo in chhuatah te kan inphah a kan let tawp hlawm a.


Zan lama kan chauh deuh avangin thawh kan hai vek a, kan harh meuh chuan zing lam dar sawm alo ri reng tawh mai.


Thei leh thei lo chuan ka tho a, kan la indah hnawk na sa mai si a, duhtawk a chet theih chu ka chak em em mai.


Thingpui lum ka tum a, ka ri rek rek thawm ah chuan midang an rawn harh a, an rawn tho nghal thuai a, chelo tur in min rawn ti nghal a, atul tul ti chuan an phe nghal suau suau hlawm a.


Kan nulate pawh dawr lam kal loin nileng in min pui hlawm a, nileng a kan in chinfel hnu chuan kan felfai ta duak mai.


Tlai ah zanriah tui tak kan ei ho a, kan hlim em em a, davida pawhin min rawn telpui leh bawk a, kan kim leh hle mai.


Zonuna erawh an chanchin hriat duh pahin ka va bia a, anu cancer an buai ve thu min lo hrilh a, damdawiin te an lo lut ve ani awm a, ka tana awm reng ka thiantha ber in harsatna atawh laia ka lang thei lo chu ka inthiam lo em em a, kan ve ngei erawh ka tum ruh hle.


Hlim takin kan titi ho bawrh bawrh a, Sunday mah ni se tumah an inkhawm ta bik lo a, thingpui te in in kan nui bawk bawk hlawm a, in thar ah rilru thar nen a thaw a veng tlang khawp mai.


Dar kua vel thleng min lenpui hnu in an tin ta dial a, ka nau nen ka fanu nen chuan kan awm leh ta rek rek mai.


Zualtei pawh a tuk maia haw tawh tur ni a, ka khua ahar lawk em em mai a, kan nufa chauha han awm rek rek mai chu khua ahar leh dawn lutuk tlat.


monday zing ani a, kan in neitu te nupa an rawn lang thla ve hlawl a.


Kan han in chibai lawp lawp a, hming te kan han in hrilh tawn bawk a.


Kohhran thilah kan fehchhuah lai tak ania, naupang ho chauh an lo awm lai tak ania tumah lah rawn lanna chang an hre silo a, azia lo khawp mai a rawn ti luam a.


Kan innei tu pa chu pu duhawma ani a, an nu chu pi mabiaki ani bawk a, an fel hmel nupa khawp mai, nui huah huah tawng nem tak an ni.


Chawhnu lamah Zualtei pawh a pasal te khua serchhip lam pan turin a in peih fel at tawh a, kan nufa in kan va thlah a, ka ngai khawp mai, engemaw chen min awmpui tawh a, min han kalsan ta mai chu ka ngai takzet.


Ka pasal thih cham vawikhatna alo in her chhuak a, tumah min han lenpui tu em em an awm lo, mahni hna lama buai vek an nih avangin leh in thar a awm kan nih avangin lenpui tu pawh kan nei meuh lo a, kei erawh chuan ka theih tawkin a thlan te cheiin ka tifai a.


Awmpui tur nula kan zawng ru reng a, an vang angreng khawp mai, hna em em ka la thawk thei lo bawk a, in lamah ka fanu nen kan awm deuh chawt a, kan dawr leh kan in luah thar chu ain hlat lo bawk a, chhun lamah te chuan kan va leng harh ve thin a.


Ka dawr pakhat zawk a riral tawh a, puan thui na dawr erawh ala kal ve bek bek a, pathian zarah ka han dam tha anga, in tundin leh chu ka tum ber ani.


Awmpui ka zawn reng thu chu kan in neitunu pi mabiakin ahriat in thingtlang lampang ami nula pangai ve tawh tak mai hi min rawn hmuhsak hlauh mai a, ka lawm em em a, lawmthu te ka hrilh luam a.


Kar leh mai ah a rawn thleng thla dawn a, ka nghakhlel hle mai, inchhung chet lam ai mahin kan nufa a Khawhar taka kan awm chu ahreawm ka ti ber.


Ka nu te lam pawh a ruk tak chuan ka ngaihtuah ve viau mai, bungrua ka la vek si a, engtin zel nge an awm ang tih chu ka ngaihtuah reng thin.


Chhungkua ka awt em em a, ka nu, ka pa ti a koh tur ka mamawh em em a, tha takin awm tlang ni ila chuan nuam ka tih dawn teh lul nen.


Ni aliam a....


Kan nula thar rawn thlenni tur ani a, kan nufa chuan kan phur dun khawp mai, aizawl chinchang la hre vak lo anih avangin sumo counter a lo chhuk mai tur in kan inhrilh sa a, tah chuan kan lo nghak ran a.


Darkar chanve vel zet chu kan nghak tawh ang, sumo a rawn thleng tak tak hlawm a, kan ring kan lo fan ve na sa hle a, a rawn thleng mai thei silo.


A tawpah chuan sumo pakhat hi a rawn thleng leh a, beiseina sang tak nen kan lo thlir leh a.


An rawn chhuk tak tak hlawm a, seat hnung ber atanga rawn chhuk nula pakhat chu a hawi kual ruai a, amah ngei anih ring in ka va pan hnai a, mami ini em tiin ka va zawt pawp a.


Aw ni e, u mercy ini em?

Kan inchibai lawp lawp a, taxi ruak remchang kan au a, kan in lam panin kan haw ta a.


A room tur pawh kan lo peih fel diam tawh a, a thawmhnaw nen chauha rawn kal anih avangin a thawmhnaw dahna tur alimirah te pawh ka lo dah sa diam a.


A in bualfai zawh hnu chuan kan TV en chu min rawn zawm ve nghal a, an chhungkaw chanchin te pawh ka zawt ve bawk a.


Unau pathum hmeichhia vek an nih thu te a sawi a, apa aboral tawh a, a nu ho a an awm thu leh a u chiah hmeichhia in a nu chu awmpuiin an naupang ber nen inhlawhin an kual ve thu te pawh a sawi bawk a.


Khawvel ah hian ka anpui rethei ve tak tak hi an lo va tam em, hreawm ber emaw kan intih lai pawh hian keini aia tuar nasa hi an lo awm zel zawng anih hi.


Mami, engmah tih tur a awm lo, mu hahdam mai mai rawh, tih tur em em kan nei lo a, bawihtei sikul kal buaipui tur ber a khaihlak rih a, kei lah hna ka thawk mai thei rih lo a, engmah tih vak tur kan nei lo, chuvangin Inthlahrun angai lo, kan khua ahar a, nula kan mamawh a, kan chhungkaw zinga mi ang chiahin i awm dawnnia aw.


A nui sen sen reuh a, atawng tam hmel vak loh a, mahse a ngainatawm ru riau bawk.


Eng tin tin emaw ni chu kan hmangral ve mai a, tih tur em em kan neih loh avangin zanriah eikham hma takah kan mu diak hlawm a.


Anu.... A u thar hi chu a sual ve lo ang tiraw?

Ka fanu rilru a lian ber chu ka nu leh ani te sual lutuk ber kha alo ni.


Bawihte, a u chu a sual dawn miah lo ania aw, a duat dawn lutuk che a, nang pawh a u thu i awih dawn nia aw.

A bu nghat a, eng eng emaw zawhna min zawt chiam a, a hnu ah chuan alo muhil ta nge nge a.


Davidan min rawn call a...

Mercy in mu tawh em?
Aw, kan mu chiah e, tih tur kan nei lo lutuk a.

Ka rawn lang hman tawh mai lo a, itha zel em?

Aw ka tha zel e, duh ang takin ka la in fit lo a, hna pawh ka la thawk thei lo.

Ekhai, hna thawh lam kha chu la ngaihtuah suh, idam anga ila thawk dawn chauh alawm, dam kha a pawimawh hmasa ber mai.

Nia tiraw...

David, ka lawm khawp mai, ka chunga ithil tih zawng zawng hi ka damchhung pawhin ka rul seng lo ang che, ka tan chuan thian tha ber ini reng mai.


Mercy, harsatna itawh hunah itan ka awm reng ang tih ka sawi tawh kha, ka awm reng bawk ang.

In that tlan leh tlan loh rawn hriat ka duh a, hna tlem ka la nei a, ka dah phawt mai ang aw.


Kan in mangtha fel hnu chuan kei pawh ka muhil zui ve ta nghal a.


Mumang ka lo nei a, ka pasal ka lo hmu a, kan lo titi vak mai a, naute pasal dang nei miah suh aw, Engtik ni ah emaw ka la rawn haw leh dawn a, min lo nghak reng dawnnia aw, pasal dang ineih hi ka phal lo a, in tan ka lo let leh vat dawn ania.


Upui, pasal ka nei tawh a, engtin nge midang te chu ka neih theih ang?
Iti mak emai tiin kan lo titi dun bawrh bawrh a.

Zin chhuak tur ni awm tak hian a bag akhai a, akal bo ta a, ka lo en zui reng a, aliam thleng chuan ka thlir zui reng a.


Ka harh zawk a, khua alo eng tawh viau mai.

Ni a sang tawh a, ahma em em tawh lo tih a hriat a, bawihtei pawh alo tho tawh bawk a.

Ka ngaihtuahna akal thui kher mai, upuia hian midang neih hi aphal miah lo mai, ka mumang lamah pawh arawn in lar ani, athlarau hian min awmpui reng anih dawn hi, ka pasal duhtak hi a thlarau hahdam takin ka siam ngei angai ani.


Khum atang chuan kan inbeng tho a, zingkar ah chuan taksa a khawng urh mai zel a, room ah chuan exer kan la kual a, ka ke te chu ka khai kang bawk a, a taksa pawh a rawn zawi ve leh mai thin.


Damdawi lah chu ka hmawm mawlh mawlh reng mai bawk si.

Mami leh bawihtei chuan rawng an lo bawl dun mawlh mawlh a, an lo titi dun siam siam a.


Thingpui min lo pe vat a, ka beisei lo, keimah pawhin ka in thlit thei na in a nachang ahre khawp mai.


In va tho hma awm em em ve, mut te ikham lo ange.


Ka tih than ania, ka murei thei lo, kan khua ah phei chuan Khawvar rual in ka tho tlangpui, zan lam hi ka mengrei thei lo thung a.


Kei hi ka tho hma thei miah lo a, zan hi ka mengrei thung a, atha dawn khawp mai, nang tal itho hma a.


A bai siam rim chu a tui ram ram khawp mai, inchhung afan chhuak vek a, ril ati tam ruih thei.

Anu... A u in sikul ah min hruai thei tawh dawn a, sikul kal leh ka chak tawh e.


Bawihte, krismas zawh veleh ikal leh dawn alawm, a u in ahruai thin che anga, anuam awm.


Bawihtei chu ahlimin aphur em em a, kan nufa chauha Khawhar taka awm reng chu aning ve thin khawp ang.


Mami kalna lam apiang ah chuan azui ani deuh ber, an in hnuk kawi reng mai a, ka fanu hlim hmel ka han hmu leh chu nu tan chuan thil hmuh nuam tak ani.



Pathian zarah hma ka sawn chho em em a, chutia kan tih nek nek chhung chuan thlasik lam kan lo hnaih leh ta reng mai..


Keini pawh in duham a hun leh tan tawh dawn a, dam chian thuai thuai duh in exer pawh ka la nasa hle bawk.


Nitin dawrah ka kal ve leh tawh a, in thui em chu ka tan thil harsa ala ni a, mahse ka vil thei ringawt pawh chu ka tan thil hlu ani


November thla tawp lam atang chuan order pawh kan ngah leh ta khawp mai.


Chhun zan zawmin kan nula te pawh an inthui leh tlauh tlauh tawh a, kawr chei ngai ang ang te in lamah ka hawn a, mami nen kan lo chei ve bek bek thin.


Umercy, zawt ta mai mai ta che ila, in pa nen in inthen nge aboral tawh?

A boral tawh a, kan awmdun rei hman lo, ka ngai thin khawp mai.

Ava zialo ve aw, bawihtei pawhin a ngai thin ngawt ang.

Chumi zan chuan kan titi alo tui deuh bawk a, kan chanchin te chu ka hrilh ta teuh a.


Tum dan ka nei ve a, ka lakah sual em em mahse ka nu leh upuia farnu te chu krismas bazar na tur tlem tal pek ve chu ka duh a, ka tum bawk a, hmelma ang a han in chhuah tawp mai chu tha ka ti bik lo ani.


Pathian zarah kan inthui khawl hnem ve ta khawp mai, krismas lo thleng tur atan kan inpuahchah ve nasa khawp mai.


December ni 10 ani a...



Ka nu te in lam panin kan nufa in kan inzui hnak hnak a, kan va thlen chuan alo in kalh thap a.


Thenawm ah ka lut a, an chanchin chu ka zawt a.


An insawn chhuah tawh thu min lo hrilh a, an in luah na lai velte chu min kawh hmuh a.


Ral lehlam maia an awm avangin zawn buai vak ngailo in kan va hmu mai a.


Kawngka kan kik dat dat a, ka nu aw ngei chuan lo lut rawh u tiin min lo chhawn a.


Inchhung ah kan lut a, ka han hawi kual vel a, an tlaran angreng hle, an inluah pawh a lian lo khawp mai.


Enge iduh a?

Ram deuh hmak hian min zawt a.

Sawmdawngi te unau erawh min hmulo ang maiin an awm.


Ka nu, krismas bazarna tur tlem tal rawn pek che u ka tum a, awmhrang mah ila hmelma anga in en hi ka duh lo, ka pasal nu leh farnu te inni a, thlahthlam che u hi ka duh lo, chuvanga lo kal chu kan nia.


Ka bag a ka pawisa ah chu ka phawrh a, dawhkan ah chuan ka dah a.


That chhuah der kha a tul lo ang, i pawisa hi kan mamawh lo tih pahin ka pawisa pek ngei chuan min rawn vawm let a.


Rapthlak ka tiin mak pawh ka ti hle, pawisa tlem te chu ka chhar khawm a, ka bag ah ka ak a.


Mipa dang laka imualpho hma in ka fapa lung hi phun vat ang che, anih loh chuan ka nasa viau ang hre reng rawh.


Ka nu!
Mipa dang hi chu min hmeh bel tum talh suh, ka mualpho bawk lo ang, hetiang hian min ti fo tawh suh.


Chhuak vat rawh u, ka in chhung hi vawikhat mah rawn rap leh tawh suh ang che u.


Thinrim tun chungin an in atang chuan kan chhuak hnak hnak a.


A rilru te pawh alo danglam ka rin ve tawh tehlul nen a zia ala danglam lo kher mai.


Mipui tawt tak kara bazar ai chuan tiin mi tam tak tak hma chuan kan chhung kua chuan kan bazar a, thil eng eng emaw te kan lei ve a.



Chumi ni chuan sawmdawngi ka hmu a, a ni erawh chuan min hmu lo, mi hausa fanu ang mai ani, a chhelo in a nalh em em a, a bula kal mipa, helmet keng ka hmuh pawh a chhe lo, thil awmzia ka hrethiam mai.


Dec ni 22 ah ka pasal thlan mawi takin kan chei ve a, thlan vel hrim hrim chu a mawi em em vek a, kan hmangaih kan lungduh te zalna theuh chu a mawilo ang tih kan hlau hlawm hle.


Thlan la thar em em, leivung la tharlam tak ah hian nu pakhat, a fasen te pua hi alo tap keuh keuh a, kal san mai ka han tum na in ka khawngaih em avangin ka ding deuh dat a, ka thlir reng a, a pasal a sun ve ani tih a hriat theih a, a la reilo ani tih pawh ka hre thiam a, chu ai mah chuan a fasen te akalsan chu an lainatawm zualna ani, hunpui lo thleng tur nen ka khawngaih ve khawp mai.



Dec ni 24 zan ah chuan kan chhungkua te chuan kan thu khawm ve raih a, heater ai pahin tv en bak tih tur dang kan nei silo.


Ka khua a har vawng vawng mai, mami pawh an khua ah a haw bik lo a, a tih zia phian.


Mami hreawm iti em?
Vahchhuah duhna te inei ve em?

Har lo e, Khawiah mah chhuah ka peih lem lo, krismas vela han phur hluai lai vel kha a reh ve tawh a, kan khua ah chuan nise kan chhuak ve mahna.


Khawpui ah chuan chhuah na chhan tur avang em ani.


Nia tiraw!
Khawvel mi deuh nih loh phei chuan a peihawm lem loh em ani


Ka fanu in naupang krismas film chu a en duh tlat avangin peihlo zet chuan kan enpui a.


Blanket ka sin hlun a, thutthleng sei ah ka mu a, ka phone vel chu ka khawih mai mai a.


Zualtei ka han bia a...

an ni nupa pawh an thiante nen an chhuah thu a rawn sawi a, an len kual mai mai thu te a sawi a, ka Khawhar leh har loh te min zawt nual bawk a.


A reh hian a reh tlawk tlawk mai a, in chungten ar an hem hmin ei tura min rawn sawm hlauh erawh kan phur ve hle.


Dar 11 velah kan chho ve a, ka rin loh takin an fate nula leh tlangval te chu an chhuak ve hauh lo, anu leh pa ho chuan an lo awm thap a, mak ka ti angreng viau a, tun hunah te chuan in a an awm ka lo ring miah lo.


Lo thu rawh u, meilum hi rawn ai ve rawh u
Min lo welcome tha viau mai.


An fate lah chuan bawihtei chu an lawm angreng viau a, an fel chhungkua hle.


Nu mabiak, ka hmuh tum loh deuhin ka rawn hmu che u a, in nupa chauha in awm ka ring a.


Kan fate hi tiang hunah hian an chhuak ve ngai lo, kan vanneihna ani ve a, an chhuak ngai lo reng reng, tihian chhungkua hian kan awmkhawm a, ei leh inte kan siam ve a, a nuam ve thin khawp ania.


An chhungkua chu a nuam dawn tih ka hre thiam mai, kristian chhungkaw tha tak anni ngei ang.


An fapa te chuan eitur tuihnai tak tak an rawn chhawp a, ar bawp lian tak tak tuihnai em em maite an rawn chhawp a, ei a chakawm viau.


Ei teuh rawh u aw, keini chhungkaw hnih tana kan lo buatsaih ve anih hi, nubiaki chu anui huah huah bawk a.

Ei tur tui tak tak te chu puar takin kan ei ho a, kan hlim dar dar hle mai.


Dar khat dawn thleng chuan kan leng ve a, meilum nuam tak chu kalsan ahar ve bawk nen, kan titi atui ve bawk si, kan leng ve deuh reng a.


Kan haw hnu chuan kan khum lam ah kan inthawlh than hlawm a, urlawk zan chu Khawhar em em bik loin kan hmang liam ve mai bawk a.


Krismas tukah pawh kan chhungin kan inkhawm ve a, ruai te pawh kan theh ve a.


Krismas leh kumthar inkarah zonuna nu tlawhin ka kal ve a, damdawiin an lut sek a, ka kan thei lo chu mahni inthiam lohna in ka khat, in lama an in enkawl lai tak ani bawk a, ka va kal ve a.


Zonunan ka hmel ahan hmu chu alo hlim ve ngang mai, min phut miah loh thu te pawh alo sawi luam a.


Anu chu acher em em a, a damrei a rinawm viau tawh lo bawk, ahnar atangin chaw an pe ani deuh ber tawh a, midang an lo awm ve nual bawk a.


Engemaw chen chu ka awm ve reng a, kanna pawisa te ka pe ve a, ka hawsan ta a.


Kumhlui thlah zanah erawh kan dawr a kan nula te pathum leh ka ni te nufa, davida te ka sawm ve a, ka sawmna ngaipawimawh in an rawn kim thap a, angai te te chuan Kumhlui kan thlah liam ve a, ka rin ai takin kan hlim angreng hlawm.




Kum nga hnu ah chuan....



Ka fanu pawh alian ve ta khawp mai, atleirawl ve uak tawh a, inchhung chet vel te pawh a theih ang ang in min pui ve thei tawh bawk a.


Pathian zarah ka dawr pawh akal tluang chho leh viau a, ahma ai chuan kan mukin kan lian ve ta hle, mahse upuia nen a kan lo lei ve kan ramah chuan in chhete sak chu ka la rilruk reng avangin ka inkhawl ve tauh tauh reng a.


Mercy...
Min duh tawh ngang lo ami?


Kum tam aliam ta a, ka nghak rei tawh viau che ani, ipasal thlarau pawh ka zah em avangin kum nga lai chu ka nghak tawh che a, tinge ka lam ihawi duh tak miah loh a?


David... Khawngaih in tiang zawng chuan ka en thei lo che ani, pasal neih leh emaw ngaihzawng neih lam hi ka rilruk tawh lo, bakah ka fanu pawh a lian ve tawh a, a remti dawn lo, chuvangin khawngaih in thian ang bak chuan min en lo hram rawh, nupui tha tak nei la ka duh pui che ani.


Nei duh ni ila kum hei leh chen hi ka nghak tlat lo ang che, engtia rei nge nghah iduh? Ka nghak zel mai ang che, kum sawm itih pawhin kum sawm chhung ka nghak mai ang che.


Ka thaw halh a....


David, ka sawi tawh kha, pasal nei leh tur hian englai mahin ka rilru ka lo siam ngai lo, upuia thlarau pawh ka zah a, tianga awm thei chu ka ni ve tawh lo


Mercy... I ngaihdan chu ka hrethiam lutuk, mahse iduh vanga hetiang thleng hi ani lo a, ivanduai vang liau liau ani, I nun ah hian i kawppui tur, engkima support tu tur che leh idamloh nikhua pawha buaipui tu tur che i mamawh asin, nangmah mai chuan damchhung in i awm thei dawn lo, chung zawng zawng ah chuan itan ka awm reng ania.


Min duh thlawt lo anih erawh chuan engmah sawi theih dang ka nei lo, irilru erawh chiang taka hriat ka duh a, kei pawhin ka kalsan theih nan che...


Ka kutin ka hmai ka hup a, sawi mai tur pawh ka hre lo, ni e, davida hi ka hmangaih kha ani thin alawm, mahse ani nena nunbul tan leh tur hian ka lo insuangtuah ngai lo, thil theih ni ah pawh ka ruat hek lo.


David, kan la sawi tha dawnnia, thutlukna hi awlsam taka siam mai theih pawh ani lo.


Ka kal phawt ang aw, kan inbe dawnnia tiin ka hnungah a beng thak a, akal ta a.


Ka pasal lung ka phunni te khan fatu zingah khan atang ve lawp lawp a, ka tan hi chuan ain pe zo ani tih hi zep rual ani lo, amah avanga vawiin thleng thei hi ka ni tih ka inhre chiang em em bawk.


Angai te bawkin min vir leh tluk tluk a, hman nen kha chuan adanglam ve ta, kan kum te alo tam ve ta bawk a, puitling takin engkim chu kan kalpui ve tawh a, han in hauh emaw, kut thawh a han in tih rum rum te pawh a awm tawh lo.


Chutia min vir tak tluk tluk ah chuan kei pawhin hnar reng har ka lo ti ve a, ka tana athat na zawng zawng te, min hmangaihna nasat zia ka ngaihtuah phei chuan ka tan hian ahlu em em si.


Inkawp ang chuan kan han awm chho leh ta nawk nawk a, mahse rilru erawh akim chiah lo, mahni inthiam lohna in ka khat a, ka rilru ah upuia athi thei bawk silo.

[Ngaia]

Mercy, ihlim loh hmel e ka ti.

I ngui ruai reng mai a, ihlim lo anih chuan tlang deuhin min hrilh mai rawh, kei pawhin nuam ka ti bik miah lo asin.



Dave chutiang engmah a awm lo, ka taksa a hah ve deuh a, ka chau deuh ani


A ni lo, mi a ka ni bik lo a, i mood off dan hi ka hre thei vek, hlim lo taka i awm hi ka duh bik miah lo ania.


A dik ani, tianga awm reng tur ka ni bik lo.


A kut ah ka chelh a, david, ka hlim a, engmah thil dang a awm lo, he i ngaihdan tha lo tak hi paih bo daih tawh rawh.


Ni khat chu upuia thlan ah ka kal a, ka tan engtik ah mah alo kir leh tawh dawnlo tih ka hria, chuvangin ka pasal thlan ah chuan ka ding vang vang a.


Upui, engtik ah mah ka hnenah ilo kir tawh dawn lo a, min ngaidam ang che aw, hahdam takin chawl ang che, min kalsan ta si a, ka hringnun hi mal leh khawhar, hreawm taka hmang reng tur chuan min phal bik lo ang tiraw?


In thiam lo deuhreuh si chuan upuia thlan ah chuan rei tak ka awm a, mahse enge sawt tawh chuang? Ka hnenah Damin a rawn kir leh tawh dawn chuang silo.


Chumi ni chuan thlahfel turin ani ka kal.

A thlan te chu hnim te in alo bawm leh fur tawh a, ka kutin ka pawt fai neuh neuh a, pangpar te pawh a khawro in a chuai zo tawh a, athlan pawh a chul ve ta rup mai.


Davida nen pawh pangai takin kan inkawp chho leh a, engkim ah min backup tha em em reng a, min pui nasa hle bawk.




Zankhat chu kan in ah a rawn leng a, midang chu an mu vek tawh a, a lengrei viau mai.


Dave, thil pakhat hrilh duh che ka nei a.


Enge ni, sawi ta che.


Kan pahnih hian ti hi ni mah ila, upuia thlan hi akhat tawka ka tlawh fo leh tihfai angaih pawhin tihfai hi min phalsak ka duh ani, ka fanu pa ani a, damchhung in alo kir tawh dawn lo, mahse a thlan erawh ka hluihlawn hi a thiang lo ani, itan chuan a ngaihnawm lo viau maithei, chuti anih loh chuan ka inthiam thei dawn lo ani.


Mercy, ivan a thin tak em, chutiang mai mai te engvang in nge ka phal loh ang, atul anih phawt chuan keimah pawhin ka kalpui zel mai ang che.


Maw? Min kalpui ang maw?


Enge i awih lo ami, i thil tih duh engmah ka phal loh sak lo ang che, mahse mipa dang tan erawh chuan ni lo in.


Kan nui dun hawk hawk a, kan infiam deuh chhen bawk a.



Alo tlai ta riau mai, ka va haw tawh ange aw, naktuk hna nei ve ve kan ni si a, chuvangin mut hahdam nang pawhin i mamawh tih pahin ka biangah min rawn fawp zauh a, ka thlah liam hnu chuan kei pawh ka mu vat a.


Ka mut hnu rei lo te ah zonun an min rawn bia a, a nu boral thu min rawn hrilh a.


Ka tho kang zawk a, ka hamhaih angreng hle.


Sana ka han en a, sawmpahnih a ri tep tawh si a, kal ve ngei chu ka duh bawk si, kalpui tur lah chu ka nei silo.


Davida chu in pawh ala thleng hman lo ang, ka call ta nghal a.


Zonuna nu boral thu pawh chu ka hrilh a, lo let leh turin ka ti nghal bawk a.


Mami ka kaitho a, bawihtei nen lo mudun turin ka hrilh a, ka insiam nghal sawk sawk a.


Rei lo te ah Davida pawh a rawn thleng leh a, kal ngei ngei ka bat thu ka hrilh nghal mawlh mawlh a, atan chuan thil nuam tak chu ani lo maithei, hmanah khan alo thik ve viau thin bawk nen.



Kan pahnih chuan kan inzui chhuak ve leh ta a, bike a kal kan ni bawk a, kan thleng phei thuai a.


A boralna ala reilo tih a hriat theih, in chhung pawh an la singsa fel chiah lo a, mi lo awm luih luih karah chuan tap thawm a rawn ri chhuak hawm hawm bawk a.


Kan va lut a, zonuna chuan min rawn hmu thuai a, kan lam pana rawn kalin min rawn chibai a.


David, ilo kal ve ani maw, iva fel ve tih pahin Davida pawh a rawn chibai bawk a.


Ruang chu kan kil ve ta ran a, reilo te hnu ah in pawh an singsa fel thuai a, mi pawh an rawn pung khawm hnem tawh hle.


Zonuna hi an fapa neih chhun ani ve a, ani pawhin a tuar na hle ani tih chu ka hrethiam mai, a nu chu akuah leh vawng vawng thin, towel te abat a, a mittui chu akhat tawkin a hru leh zauh thin.



Ka pasal boral lai vel te min tihre chhuak a, ka lo tawn tawh anih avangin ka lainat a, tah belh chi ka ni bawk nen ka lo tap ve titih zel bawk a.


An chhung leh khatte an rawn tam tak avangin keini chu pawn lamah kan thu thawveng ta zawk a.


Tinge itah ve ngawt a?


Ka beng bulah hian min rawn zawt ru sar sar a.


A nuih deuh suk bawk a.


Bible in tap te tahpui ula atih kha, ka Khawngaih a ka tah achhuak alawm.


Ivan fel thin tak em, ka chhuang lutuk che tih pahin a nui deuh chur chur reng a.


Khua avar chian hma deuh in kan in lam ah kan haw a, min thlah pah chuan a ni pawh khawvar thleng kan in ah a awm ve nghal a.


Dawr kal pawh ka tan tih chi anih loh avangin zonuna te in lam a kal leh chu ka rilruk a, Davida erawh a hman lo thung.


Zing chaw ei ve tura ka tih tlat avang chuan min hnial lem lo a.



A chawhmeh duh em em dal tak tawk takin ka kang hluah a, tui a tih theih zia ka hre tawh tlat ani.


Tukthuan eikham hnu chuan ka insiam sawk sawk a, min va thlah leh a, a ni pawh an in lam panin a haw ta nghal a.


Vuina programme zawh hnu ah pawh chuan engemaw chen chu ka thu ve reng a, ka ral ve nghal bawk a.




Nikhat chu davidan an in a kal turin leh a nu leh pa te Hmelhriat ve tura min sawm tlat avangin hreh tak chung chuan ka kal ve a, ka huphurh tak zet.


Uluk takin ka insiam a, a nu leh pa te mithmuh a pangai taka lan ka tum avang chuan ka hah takzet, kan dawrah ka lo nghak ran a, dar li bawr velah min rawn hruai a.


Dave, ka huphurh emai, min lo hau hrep ang tih ka hlau.


Eng vang in maw? hmeltha an ti viau angche


Uang reng lo teh, ka thin te hi a su dup dup in ka hria.


Hlau suh, engtin mah an tilo ang che.


A bike chuan kan inphur chhuak leh ta, ka huphurh zia chu nasa tak ani.


An in kawt ni awm takah chuan kan ding dat a.

Ngawi rawh, kan inti thawveng lawk tih pahin thawk kan la deuh halh halh a.

An building vel te chu ka en kual a, mi hausa lutuk a sawi tur nilo mahse in leh lo pawh an nei pangai viau.

Hma a hruai a, a hnung ah chuan ka zui ve a.


Sitting room ah hian a nu leh pa ni ngei a lang hi an lo thu a, an zahawm khap mai.


An thutna chu kan zu zawm ve nghal a.


Ka nu... Hei mercy ania,
Mercy, hei ka nu leh pa te.


Hawihhawm takin ka chibai hnu chuan ka thu ve ta a.

A nu chu a fel khawp mai, min lo be nghal siam siam a, a pa erawh a tawng tam lemlo a, a khat mawi tawkin a rawn tawng chhuak ve a.



Nu-i, thingpui han lum ta che, a hmeh tui tak kha han chhawp la aw.


An awmpui nu chuan thingpui leh chhang a rawn chhawp vat a, kan in ho a.


Tikhan lo inkawm ru aw, kan inbual lawk ange tih paha Davida kal vut chu ka ngei tak zet, mahni lo maha zah nak alaia.


Mercy, khawi vengah nge in awm ve? Eng tiangin nge in khawsak?


Chaltlang ah kan awm a, ka nu leh pa hian naupang te ka nih laiin min boral san a, kan nufa in kan awm ve a.

Chu pasal inei tawh tihna mi?

Aw nei a, min boral san veleh a.

Ava zialo ve aw, lu isun nasa hle mai, chuan engtin nge ei in zawn tak?


Dawr chhete ka nei ve a, puan thuina dawr, chu chu ka enkawl ve a, kan khawsa ve nawk nawk ani ber


Anih tak chu mawle,


Tlai chaw ei ve nghal tura min sawmna erawh ka hnar thung a.


Davida inbual zo kan zinga a rawn thu leh chu ka thawveng huai mai.


Rei lo te hnu ah ka haw a, interview hahthlak tak ani.


Davida nu te ngaihdan hriat chu ka chak em em a, in ka thlen rual rual chuan ka va text ta nghal a.


Bawiha, enge chanchin?

Inu leh pa ten engtin nge min sawi?

Ka msg lah chu a hmu mai silo, a chhanna chu ka nghakhlel em em a, ka phone ka en deuh sek reng a.


a hnu fe ah min rawn chhang a.


Engkim atha vek ania arawn tih chuan ka thawveng hawk mai.


Mahse nuthlawi mai ka ni a, chhuan tur engmah lah ka neilo, nakin ah hian enge lo thleng zel ang tih erawh ngaihtuah tham ani.


Davida erawh a hun awl zawng zawng hi ka bulah a hmang ani deuh ber, zan dar kaw hnu ah pawh a hna a zawh rualin a rawn kal mai thin, achang chuan em em a tih chang pawh ka nei ve thin, a chhungte lakah ka in thlahrung ve thin a, atlai tawh si lo kal lo mai rawh ka tih pawhin a thei thin silo.

Tiang chuan pangai takin kan awm chho ve zel a, nikhat chu Davida phone atang hian a nu chuan min rawn be teh nawlh a.


Mak ka tih em avang chuan ka tawng bah deuh niai a, kan dawr awmna min zawh chuan mak ka tihna azual, tha takin ka hrilh a, Chawhnu lama lo kal atum thu a sawi bawk a.


eng vanga min hmu duh nge ni ang aw tih ngawt chu ka ngaihtuah reng a

Davida ka va zawt a, a ni lah chuan thawveng zetin palai rawn tirh a tum thu a rawn sawi dawn aniang a ti sam et a.

Nghakhlel ru tak, huphurh ru tak si chuan ka lo nghak ran a, akhat tawkin ka sana ka en deuh reng bawk a.


Tlai dar thum pelh hnu velah hian a rawn lang hlawl a, ka phu deuh zawk nghe nghe a.

A nui sang a, chutiang hmela kan hmu chu engkim a tha ni ngeiin ka hria a, ka lawm angreng hle.

Kan thil thuisa vel te chu a enkual den den a, a hak tawk ni awm a a rin te pawh a inteh kual ve bawk a.


Hnathawk awm lohna lam thutthleng sei ah chuan a thu a.

A bulah chuan ka thu ve nghal a, zak deuh tut anga lan ka duh loh avangin ka be bawrh bawrh a.

Mercy, ka lo kal chhan ah lut ta mai ila, ka thil sawi tur hi ngun takin lo ngaithla la ka duh a tiin bul ahan tan a.

Ka lo bu nghat a.

Davida nen in inkar hi kan hre tho a, a hranpa in nangmah duh lohna che ka nei lo, ka haw miah lo che, i hun tawn tawh zawng zawng avang pawh khan ka lainat takzet che.


Fapa pahnih chauh kan nei a, a u zawk nupui neiin a indang tawh a, bawiha hi inpui nghak tur, min enkawl tu tur ani a, a puitling lo em em mai a, a maha inzira puitling taka awm turin kan duh a, eizawnna bul te harsa tak chungin kan tan sak ve a,


A hna bahlah khawpin a buaipui che hi tha ka tilo a, tianga a awm reng chuan a dik dawn lo tlat, mi puitling ah a chhuak dawn lo, chuvangin amah pawh han puitling ve deuh phawt se, in inkar lam erawh kan sawi theih ani lo a, chuvangin nang mah tal hian awmdan thiam turin ka duh che a, hlat turin ka duh che ani.


Ka sawi awmzia ihrethiam ang tiraw?

Aw hrethiam e tiin ka lo chhang vat a, mawi taka inhnarna ani tih ka hrethiam bawk, hreawm ka ti hle a, ka zak bawk.

Rei tak pawh a awm lo a, kan thawmhnaw zawh pawh min dawr a, nuisang chungin a haw a.

Davida lah chuan chanchin min rawn zawt deuh chhen bawk a.

Tawi te te bakin ka chhang lo, Davida nu rilru kha ka dem lo, tu in nge an fapa tlangval hnahkhat tan nuthlawi fa nei tawh chu duh reng ang le?


Zan a lo ni a, a rawn lang leh nghal vat a.

Ka hlim tehchiam lo, a mawiah ka nui lui mai mai.

Mahse mihring pangai chuan kan mitmeng atang hian an lo man ve leh zel thin.


Mercy, enge thleng min hrilh rawh, engemaw diklo a awm ani, zan dang i ang lo tlat tiin min zawt phawng a.


Chutiang engmah a awm lo, engkim atha vek ka tih pawh chuan min zawt nawn sek a.


Ngawihbo pui reng chi ani lo a, engkim ka hrilh ta zawk a

David, inu thusawi kha adik vek ani, inu leh pa duhlo chung chu kan innei thei lo ang, innei lui pawh ni ila ka nun hi a nuam dawn lo tlat, ka fanu ka kalsan thei dawn lo a, ka hruai ngei ngei angai dawn bawk si, thil tih chi ani dawn lo.


Anih min then iduh tihna mi?

Engkim tuar dun a, a hreawm emaw, anuam emaw tuar tur hian ka theih leh theih loh tal min zawt ve dawn lo maw?

Ka chhung ten chutiang chu ilakah an rilru ni mahse enge ka ngaihdan, engtin nge ka tih dawn tih pawh min zawt lo in thutawp siam hi itum zel mai a, hei leh chen ka nghak che a, pasal ineih thleng pawhin ka nghak char char che a, ipasal kha la dam se chuan kei chu nupui pawh nei lo in ka leng tar zawk ang, tiang khawp chuan ka hmangaih hi chan ka duh lo ani....


Tinge ka ngaihdan pawh pakhat mah min zawh itum loh?

Ka ngawi reng a, a dik viau mai, keima thu hian ka kal leh mai thin ani.

Dave, ka tan chuan a beidawn thlak ve em ani, ngaihdan pawh ka siam thiam lo alawm.


Mercy, ka hrethiam lutuk che, mahse atawp thleng ilamah ka tang zel ang, atul anih chuan kan in pawh ka chhuahsan mai ang.

[Ngaia]

Ka lam itan phawt chuan eng ang a hreawm leh khirh pawh ka paltlang zel ang, mahse mercy in then chu sawiri tawh suh aw.

A vawi hnih nan chan nawn che hi ka duh lo ani.

A thutak hle mai a, a ti mai mai lo tih ka hre thei.

Dave, kei pawh hian then che ka duh reng reng lo, Enteh ka hringnun ah hian hun khirh leh hreawm tam tak ka lo tuar tawh a, kei pawh hian nat nawn leh hi ka duh tawh lo ani.

I chhungte a tangin dodalna ka tawk dawn niin alang a, ka huphurh em ani, min hrethiam hram rawh.

Ka darah a vuan a, mercy min en teh tih pahin....

A mit ah tak ka en kar a.

Hmangaihna thil tih theih zia hre turin lo inpuahchah rawh aw, ka chan nawn leh ai che chuan ka engkim hi ka chan zawk mai ang, chu chu ka thutiam ani.

Ka hnuk a ulh hial zawk, chutiang em em a ka tan a inpe zo chu mak ka ti ngang mai.

Dave, kan in then lo ang, ka tiam a che.

Duhthawh takin kan inkuah vawng vawng a, kan kawng harsa leh khirh tak mai chu daidun turin kan inpuahchah ta zawk a

Kan kum pawh a lo tam ve deuh ta bawk a, kan puitling dun ve sawt khawp mai.

Ka dawrah, kan in ah a rawn kal ngun lutuk chu thenawm khawveng te pawhin an hre hneh tawh ngang mai.


Tum khat chu kan in luahna hlui a kan thenawm nu nen hian kan inhmu teh nawlh a, ka dawrah lutin thingpui te kan in dun a.

Mercy, pasal inei dawn mi?

Mak ka tih em avangin ka meng phawk deuh hra a.

Dawn nang, ti teh daih nge a?

Hman deuh tawh khan inu chawhmeh zuar kan in ah a rawn kal a, pasal nei mai tur ang che khan a sawi sia.

Ka nui chhuak hawk a.

A zia lo thei e, kei ai pawhin a hre hmasa zawk anih chu.

In pa boral hnu, a lung pawh iphun hma atanga inkawp ang hialin nia a sawi che, midang bulah pawh a sawi ngei ngei dawn sia, miin mak an ti ngawt ang che.


Nia, ka nu hi chu tihngaihna a awm lo, ngawih mai mai hi hna ah nei Ila kan fihlim ani mai.

Nia tiraw, kan khin zel chuan buaina a sosang mai mai.

Kan titi viau hnu chuan a haw ta a, ka thin a rim angreng hle, ka nu sual thiam zia ka ngaihtuah phei chuan, ka zak bawk si.

in lamah thawmhnaw ka chei mawlh mawlh a, bawihtein ka bulah lehkha a zir bawk a.

Ka msg dawn chu ka han en vat a.

Ka u, thu lawmawm deuh hrilh tur che ka nei asin.

Eng thil nge ni ta?

Nau ka pai ve a, kan hlim khawp mai, kan pa phei chuan min duat khawp a, engmah tih aphal lo, eitur tui leh tha tinreng min rawn hawn a, ka mu deuh tawp mai.

Zualtei msg chuan min tihlim em em a, ka lawmpui takzet thu ka thawn nghal bawk a.


Ka u, thil pakhat ka zawt chak che a.

Eng thil maw?

David a nen chuan in boruak atha tluang zel maw?

Chhan hreawm ka tih avangin ka ngawi reng a.

Amah zawk chuan tihian a rawn thawn leh a.

Ka u, David a hi thlah tawh suh aw, nun nuam takin awm ve tawh rawh, ihlim chuan ka hlim ani mai tiin.


Ka lawm e zualte, hna ka thawk laklawh a, naktuk ah kan in be dawnnia ka ti ta zawk a...


Ka ngaihtuah neuh neuh a, ka naupai lai nen chuan ava in ang lo tak em, upuia nen nun bul kan tan tirh lai kha chuan ei leh in pawh kan nei tuihnai lo thin hle a, sa te phei chu vana rah ang kha ania, Zualtei zawng a vannei takzet ani, hringnun hahthlak leh hreawm na reng reng a tem ve silo.

Ka phone a rawn ri zawm nghal a.

I mu tawh em?

Ka bawiha bawk chu niin.

La mu lo e, hna ka la thawk a.

Ka lo kal dawn ania aw, ka inbual zo chiah a, ka hman ve chiah.

Sana ka en a, dar kua a ri hnai thuak tawh a.

Awii... Bawiha, a tlai tawh e, mu hahdam zawk la.

Hmm, min van ngai lo thin tak, ni thum lai kan inhmu tawh lo a, ka ngaih tehreng che nen.

Chu lam pawh ani lo, ihah thin sia, ka khawngaih che lawm.

Ihmel ka hmu anga, ka hahdam vawng vawng mai ang, ka lo kal aw tih pahin phine chu a dah ta nghal a.


Darkar chanve hnu velah chuan kawngka a rawn Kik dat dat thawm ka hre ta a.

Ka tho thuai a, kawngka ka va hawng a, min hmuh rualin min kuah nghal chung chung a, mami a la mu bik silo, min hmu ang tih ka hlauh em avangin ka nem sawn thuai a.

T-shirt var a ha a, half pant dum nen, a sleeper lah chu a fai em em mai bawk, hmuh a nuamin a in hmeh ngawih ngawih.


Kei lah chu kawr lianpui ka ha hluai hluai a, puan ka lo bih bawk a, ka lo awm tawp hnek hnuk mai bawk si.


Bawihtei a mu tawh ami? Chocolate cial tawk ka lo ken sak asin.

Lehkha ala zir a, Khum ah a awm ka tih rual chuan a ding vut a, bedroom chu a pan nghal a.


Yes, atui dawn lutuk, ka lawm e aw a pa David a tih ri leh hlim nui awr awr ri chu ka hre reng a.

Miin fiamthua an lo sawi thin nuthlawi ngaihzawn chuan an fate tihlawm angai an tih te chu ka hrechhuak zawk a.


Remote ala a, channel vel chu a hmet Kuala.

Min hneng awr awr a, thawveng zet hian tv a zai chu alo zawm ve bawk a.

Ka thil thui lai ka thui mawlh mawlh chu aning deuh ani mahna.


Min rawn pawh thlak sak hmak a, mak em em lutuk, inleng te pawh kawm hman lo a inthui reng mai ati nuah nuah bawk a.

Insi rial in kan thu dun a, ka kut a khawih melh melh lai chuan room atangin Bawihtei a rawn chhuak thut a, ka phu na sa ngang mai, ka fanu pawh alian ve tawh a, ka zah ve deuh tlat.



Anu, ka mu tawh dawn aw, ka thiam vek tawh tiin a rawn in report a, a mu ta nghal a.

Thingpui te in in kan inkawm melh melh a, kan hma lam hun tur te pawh kan duang ve nasa mai a.

Mercy, inneih ka duh tawh.

Teh ngawt chuan, ka la inpeih awzawng lo.

Enge inpeih ngai a? Engtiang fakaua inbuatsaih nge itum a?

Ka hre chuang nang, mahse pasal nei leh tur hian ka rilru hi ala inpeih lo ani, bakah ichhung ten rem an ti dawn ami?

Tha takin ka sawi anga, palai tirh ka rawt anga, an remtih loh chuan keimah ka rawn lut ang.

Awi, chutiang ngawt chu a dik lo, hun te han kal se inu leh pate pawh an rilru ala hmin ve mai thei asin, mawihnai deuha inneih te pawh tum zawk ila tiraw.


Ka nghak rei tawh ngat ngat lutuk che a, achang chuan ka ta nilo tura khuanu duan inih hialte hi ka ring thin, tha taka kan inngaihzawn lai hian pasal dang inei dawn tlata hriatna te hi ka nei thin mawle.


Awi, hahthlak thin e, ingaihtuahna vak rawlai mai mai anih chu, ka nuih a za khawp a, ka nui uar uar bawk a.


Ani tak tak alawm, ahma pawh khan in pa nen in in nei leh daih a, hlauhthawnna in Ka khat zo tawh.

I puitling thei lo anih hi tiraw, ikum atam ve tawh nen puitling ve tawh rawh.


Ka patling lutuk tawh zawk, Ka tar tep tawh zawk anih hi.

A reng reng ah ivan inthuam mak ve, hnawk hnawk che chuan.

Anuam alawm, in ah chuan tawp deuha awm hi anuam ber.

Mahse Ka mitah chuan i mawi vek, kan inneih hnu ah chuan mawi taka awm reng turin Ka duh che a, ihna chu eitui leh awmhmuna nalh chiah ani tawh ang.

Hmm.. Hna Ka thawk reng dawn, thawk loa awm Ka thiam lo, awm mai mai Ka Peih teuh lo.

I thawk tawh dawn lo, Ka chawm tawh ang che u, Ka ti tak tak mercy, hah taka ithawh hi Ka phal tawh dawn miah lo, hahdam taka siam che hi ka tum ber ani.


Naute kan nei anga, an unauin tha taka i enkawl kha ka duh tawk, abak angai lo.

Kan titi alo tui deuh nge kan mengrei ta phian a.


A nu in a rawn call a, a pick up duh thak lo, chhang tura ka tih pawh chuan a chhang duh lo a, a ring ral tir thak thak reng a.


Dave, keimah vang hian in inchhung boruak te hi a nawm loh ka hlau takzet, mi chhungkaw ti darhtu leh tibuaitu ang hian ka thang ang tih hi ka hlau ani.

Bawihte, chu chu thil awmdan dik tak ani, ka nu hian min hau fo thin, nang mah thlah tur in leh ka hna chauh ngaihtuah turin min ti fo, mahse mipa ka ni a, ka tum tawh chu ka sut tawh dawn lo ani tawp, Engtik ni ah emaw chuan an monu duat leh an duh em em ila ni dawn khawp.

Va haw tawh mai rawh, inu a rilru ahah lutuk ang, an thuawih te hi angai ania, nang pawh an phal lo chung chu rawn kal tluk tluk lo la, akhat mawi tawkin ilo kal anga atawk mai lawm.


Teuh lo mai, hna vanga ka buai anih loh chuan ka lo kal lo thei lo, nia atlai tawh tlat ka va haw phei ange, nang pawh mu hahdam rawh.


Pawn thleng ka thlah a, mi thlahlel tih hriat takin min kuah vawng vawng a, aliam thleng chuan ka thlir zui reng a.


Dar khat a ri lek lek tawh a, ka hna ka khaihlak vek bawk a, ka khum lam ka pan ve ta nghal a.


A tuk tuk leh ah chuan zing karah min rawn bia a.


Mercy, vawiin ah inhmuh ngei ngei kan ngai, thil pawimawh lutuk hrilh duh che ka nei a rawn ti a, a aw ka chhuak atang chuan a pawimawh hmel takzet.


Vawiin chu dawr kallo turin lo in puahchah rawh aw, in hmuh ngei ngei kan ngai ania, dar sawm velah ka rawn hruai ang che.

A chhan ka zawh leh hma chuan adah ta daih a, mak ka ti viau mai.

A sawi ang chuan dawr kal lo in in ah ka lo awm a, ka inbual fai a, ka lo insiam diam a.

Nalh taka ka inchei lohna pawh a rei ta bawk a, almirah darthlalang hma ah chuan ka thu a, uluk takin ka hmai leh ka sam te chu ka chei bawk a.


Hman hun te min ti hrechhuak uar uar mai, duhtawka ka han inchei leh chuan ka lo la tha ve reng mai.

Jeans kekawr tight ve tak ka ha a, sneakers ka bun bawk a, T-shirt dum a ban tluan body fit ka ha a, ka sam ka thlah bawk a, perfume pawh ka inkap rimtui khawp mai.


Mami... Ka chhuak lawk dawn a, bawihtei alo ban hunah lo bualfai la, lo in eipuar tir la, khawlaiah lo chhuah tir suh aw tiin kan nula pawh ka chah uluk hle.


Dar sawmpakhat velah min rawn call a, kawngpuiah min nghah thu a rawn sawi a.

Kawngpui ah ka chhuak chho a, alo awm vang tawh mai a

Min lo en uluk hle, ka lai ve takzet.

Eng thil teh thut nge a, min ti hrilhhai lutuk, khawnge kan kal dawn a?


Chuang phawt mai rawh atih avangin a bike hnungah chuan ka chuang kai ve leh ta a


Kan tlan phei a, zarkawt a hotel pakhat zawnah kan ding a.

Ka bangbo zual telh telh mai, hotel ah enge kan tih dawn le? A birthday lah ani silo, ka birthday ani bawk silo.

Hotel ah kan lut a, engkim alo tifel diam tawh chu niin, chahbi ala a, kan room turah chuan kan kal nghal a.


Anuam ka ti lo takzet, chutia chhun pachanga room book tak chu, mi min ngaihdan pawh a dik dawnlo na sa ani.


Kawngka a hawng a, room te fel tak nuam leh thianghlim em em mai alo ni a, kan lut ta a.


Bangbo tak chung chuan ka thu ta ringawt a.

Tui a in khawlh khawlh a, ka bulah a rawn thu nghal a.

Min rawn kuah a, a serious em em mai si.

Dave, eng thil nge a?

Bawihte, ka kalbo angai dawn a, vawiin chiah hi kan inhmuh tawpna ani tawh dawn.


Eng maw? Khawiah maw ikal bo dawn?

Kolkata ah instructor turin min sawm a, ka nutei te an nia, ka nu leh paten pui turin min tia, ka hnial nasa khawp mai, mahse ka nutein zantin a rawn phone a, reilo te tal rawn chhuk turin min ngen na sa si a, ka nu leh pa te thu awih loh lah chu ka hreh ve bawk si.


A hui pap a, a khabe a dawm vang vang a, athaw leh hak thin.

Bawiha.... Ikal anga ani mai lawm, thil harsa pawh anih loh chu, enge ilungngaih em em a?
Izu kal anga, ilo haw leh mai dawn alawm.


Mercy, kum hnih chhung asin, a rei lutuk, ka thei lo ang, ka rilru ahah teh mai nia.


Dam taka kan awm chuan kum hnih chhung hi a rei miah lo asin, akal duak duak mai ania, kum hnih hnu ah ilo let leh mai dawn alawm.

Itello in engtin nge ka awm ang? Karkhat lek pawh hmulo che in ka awm thei lo ania, kum hnih chhung ka hmu dawnlo che ania, ka huphurh tak zet ani.


Ka awm loh chhungin midang ilo nei ang tih pawh ka hlau.

Ka khawngaih lutuk chu ka kuah hial a, Dave rilru thlamuang deuhin zu kal rawh, ka lo nghak reng ang che, kei pawh theihtawpin ka lo intuak ve anga, kan inbe reng anga, ilo chhuah leh hunah kan innei tawh dawnnia tiin ka hnem mawlh mawlh a.


A ngawi reng a,

Hetah pawh thawh tur atam teh lul nen, ka haw ngawt mai ati vin hlur a.

Dave, thuawih hi malsawm dawnna ani a, zu kal phawt zawk rawh, dam takin ilo haw leh dawn alawm.


Bawihi, anih min tiam rawh, pathian hming chhal ngeiin ka duh ani, ka thangbo chhungin rinawm takin min lo nghak reng ang tih hi.


Dave, ka tiam ache, rinawm takin ka lo nghak reng dawn che alawm, lunggai reng reng suh, nitin zantin kan inbe reng thin dawnnia.

Min ngai dawn em?

A chang chuan anaupang chhia ka ti ve fo thin.

Ngai dawn lutuk, mahse engkim atha vek mai ang, nang pawh a rei hnu chuan ngaiah inei ve mai ang.

Hetiang sawi tur hian hotel book kher angai ami? A zahthlak e dave.

Zahthlak lo ve bawihte, ka thiante hotel ania, engmah zah tur a awm lo,


Vawiin chu ka bulah awm reng la ka duh ani, ka ngai dawn lutuk che a, kuah reng che hi ka duh ani.

Ivan ho thin tak, kan la innei dawn a, ka bulah ila awm kumkhua dawn alawm.

Nileng deuhthaw chuan kan awm a, thu tam tak kan sawi bawk a, atuk a kal mai tur anih avangin kei mah tak pawhin ka huphurh viau.


Thim thet thet ah min thlah haw a, rei vaklo alen hnu chuan a haw ta a.

Zan rei tak thleng kan inbe leh a, min mutsan suh atih ve ngawih ngawih avang chuan mutchhuak ham bai bai chung chuan ka menpui reng a.


Ka mut achhuak ngang aniang ka lo mutthluk san hial a.

A tuk tlai ah chuan akal ta a, akal dawnah min rawn hrilh a, dawrah ka awm lai ani a, thlah ka chak viau na in anu in athlah avangin ka lang ngam der silo.

Tluang taka kal turin duhsakna ka hlan hnu chuan a reh ta vang vang a.

Ka khua ahar ve viau mai, zan tin deuhthaw rawn kal anih avangin a reh ta vang vang mai tur chu ka khua har lawk angreng hle.


akhat tawkin an thlenna chin min rawn hrilh zauh zel a, min rawn hrilh zatin ka ngai lutuk che bawihi a rawn ti hram thin.

Tiang chuan hun chu kan hmang chho ve ta zel a, thla lai aliam a, nitin min rawn bia a, zantin min rawn be bawk thin, Khawhar pawh ngaiah kan nei tawh a, mahni hna ve ve ah chuan kan bur chawt a.


Phone ka lak theih loh chang chuan athin a rim thei viau mai a, kan inhauh chang lah atam.


Nikhat chu upuia nu chawhmeh zuar vak vel hi ka hmu nawlh mai a, a thau si a, a in fit lo viau mai a, em khat deuhthaw in chawhmeh a phur bawk a, muang changin akal bek bek bawk a, ka lainat angreng hle.


Ka fanu pi ani a, ka rilru tak chuan ka khawngaih em em a, han puih ve pawh ka chak viau mai, mahse kan boruak a dik thei silo.

Ka thlir reng a, engmah leisak ta lemlo chuan ka kaltir ve mai bawk a.


Anu, apa davida hi avan rawn kal khat em em, ahua che mi?

Ka fanu pawhin alo vei ve viau mai.

Bawihte, azin daih a, a zin haw hun ah a rawn kal leh mai ang.


Anu in innei daih dawn ami?

Bawihte kan inneih iduh em?

A ngawi vang vang a.

Anu, api te, ani te ang khan asual leh angem?

Ka fanu rilru ah hian tihhreawm a alo awm tawhna chu a in phum nghet tlat a, ahlau thawng zo tawh ani ber.


Bawihte, apa davida chuan aduat em che kha, ahauh ngai loh che kha.

Nia, a ni chu afel, min hau ngai lo, anih chuan in inneih chu ka phal.

Bawihte va mu tawh rawh le, naktuk sikul kal ingai si a, mu hma rawh aw.

Thuawih thei tak ka fanu chu khum lam apan nghal a, kei chu TV en pahin thutthleng ah ka mu zal thung a, mami pawh amu thei bik meuh lo aniang, ka bulah a rawn thu ve bawk a.

[Ngaia]

Davida awm lo chu a reh hian a reh tlawk tlawk mai, zantin deuh thaw rawn leng lut ani bawk nen, a khawhar thlak tak zet.

Kan hma lam hun atan tiin thahnem ngai takin kei pawh ka lo thawk tlauh tlauh a, hmalam hun hlimawm tak suangtuahna nen ka hlim thin hle.

Happy birthday ka naute...
Piancham chibai min lo buk sak mawlh mawlh dawnnia aw, in nufa in ka hmangaih che u.

Zing ka harh chiah a, chu thuthawn duhawm tak ka han chhiar meuh chuan mood a chhe thei meuh lo.

Kan lawm e apa david, keini pawhin ka hmangaih che tiin ka chhang let thuai a.

Umm, a pa Davida nih reng ka duh lo a, a pa tih nan hun rei a ngai tawh lo ang tiin min rawn chhang leh a.

Ka nui sak a, kan zing tho phang tak thlalak chu ka zu thawn a.

In hmeltha lutuk ka duat te u, dam reng ang che u ka ngai lutuk che u.

Zingkar atang chuan ka nui seih reng mai, ka fanu piancham chu pangai taka ka lawm sak vawikhatna anih dawn avangin Davida chu awm ve se ka ti khawp mai.

Tello thei lo ka ni te nufa ka sawm a, a pi leh a nite pawh ka sawm na in beisei a sang lo hle.


Zonuna ka hre reng a, mahse hna tul avangin a pha thung a, a ni nen pawh hian kan inkawm tam tawh lo, bialnu nghet te anei ve bawk nen, ka lo inrawlh reng kha a rem loh na chin a awm tlat.

Ka naute hi a van mawi tak em aw, lo hawi teh Bawihte...

Nalh inti takin a kawr nen chuan a han vir kual vel a.


A piancham atan bik liau liau a ka design sak kawr sen puk laih chu a ha a, asam ka bawk a, bakilh nalh tak ka kilh tir bawk a.

Thla ka laksak mawlh mawlh a, ka fanu hi apian tirh ata a hlimni ber ala ni hial ang.

A nu... Apa in van atangin min lo en reng ang tiraw?
Nalh min ti viau angem?

Ka inchei mawlh mawlh lai chu ka chawl hlawl a, ka fanu thinlung ah hian apa hi a thi thei thlawt lo ani, pa neih a chakna chuan min ti na vawng vawng thin.

Bawihte, apa chuan alo thlir reng che a, nalh a ti viau ang che tih bakin chhan ngaihna ka hre lo.

Mami nen chuan kan in en tawp a, fate hian zawhna chhan har tak min zawt thin a, chhanna pek thiam avan har si em.

Dar khat bawr velah in atangin kan chhuak a, castle park lam chu kan pan ta nghal a.

He lai hmun hi park thar ani a, birthday lawm, picnic, function engkim a tih theih a, mi hausa te tamna hmun ani.


Mi hausa ni velo mah ila ka fanu hlimna atan tihsak ve ngei ka duh avangin ka book ve rawih ani.

Kan thlen chuan mi an lo tam khawp mai, picnic an awm nual a, eng eng emaw function tenau nei te pawh an awm.

A thawk ten min lo welcome tha em em a, birthday lawmna atana kan book na lamah chuan min hruai bawk a

An chei nalh em em a, thutna nuam tak a awm bawk a, ka fanu hlim hmel hmuh chu thil nuam tak ani.

Ka ni te nufa leh kan nula te pathum pawh an rawn thleng ve thuai a, thilpek eng eng emaw an rawn keng bawk a.

Bawiha, vawiin hian kan nuna a vawikhat nan ka fanu hi ahlim em em a, kei pawh ka hlim lutuk, i awmlo erawh kan kim lo tak zet, awm ve la ka van ti tak em.


Ka msg thawn chu a hmu mai lo a, an buai viau te pawh a ni mahna.

Darkar chanve zet hnu ah chuan...

Bawihte, ka taksa in hnen ah awm lo mahse, ka rilru ngaihtuahna te hi in hnen ah a awm reng ania aw, hlim takin lo hmang ula, ka duhsakna zawng zawng ka hlan che u.

Keimah chuan ka nui ver ver a.

Ava thlum awm ve aw.

Mahni a han nuih ver ver mai chu tiin min fiam hlawm a.

Puitling tan chuan tih vak tur awm hek lo, kan thu a, kan titi a, bawihtei erawh a zai a, in tihhlimna awm ang ang ah te chuan hlim takin a kal kual a.

Ka pi, hei in cake order chu aw, tui in tih ngei ka beisei..

Tlangval fel tak, inchei fai tak hian bawm mawi tak a khung in cake a rawn dah a.

Happy birthday tih hla te sa in ka naute chuan a vawikhat nan a birthday cake a zai ve ta.

Ka mittui hi a tling deuh piau a, nu thinlung atang chuan fate an hlim pauh leh hnuk hi a ulh mai thin.


Zanriah kan ei hma deuh chuan pawnlam ah ka va thu thawveng a, ka vak kual vel a, kan piah deuh lawk a naupang tuicheng nuam ti em em a au thler duai duai ho chu ka thlir reng a.

An nu leh pa te nen an hlim em em a, an hmuhnawm takzet.

Ka rilru ka sawrbing em em a, ka bul maia rawn thu chu tunge anih pawh ka hre lo a, ka en bawk hek lo.

Iva thlir tui em em ve a, naupang leh pangpar hi chu hmuh an nuam ani tiraw?

Chutia min rawn biak takah chuan chupa lam chu ka hawi thuai a.

Ni e tiraw, naupang pawisawi lo rilru thianghlim tak te hi chu hmuh an nuam em ani tiin ka nuih sak a.

Pa valai tak, a hmel en chuan nupui fanau nei tawh chu ani ngei ang, a inchei dan atang chuan khawilai emaw a tu emaw inhnuai luaha khawsa chu ani hauh lo bawk ang.

A sir vuah mai a, a fai em em a, thawmhnaw zahawm tak a inbel bawk.

Han inzawt ta mai ila, enge in tih ve?

Aaaa, ka fanu birthday ania, naupang tan a hmun velte anawm em avangin kan han lawmsak ve mai mai mawle.

Anih chu a, in chhungkua in em ni?

Aw, chhungkua han ti ila ka ni te leh ka naute ho nen.

In pa a tel ve nange chu?

Ka nui sak a, kan pa hian min boral san tawh a, ka fanu hi ka enkawl ve a.

Ani maw..

Avan zialo ve aw, nu fel tak inih dawn chu a.

Ni bik lo e, nang ni zawk enge in tih?

Party lam thil ania, ani luih luih deuh a, ka lu te ahai deuh reuh a, kan hawi thawveng anih hi.

Kan khawsakna veng te chu min zawt a, eizawnna lam te pawh kan sawi kai bawk a.


An rawn call tak avangin inchhung lama luh pah chuan kan la in hmu leh dawnnia a rawn ti hram a.

Pa fel tak leh titi pui nuam tak ani, pa in ngaitlawm tak anih hmel bawk.

Zanriah tui tak kan kil a, tam lem lo mah ila kan hlim khawp mai.

Haw mai turin kan inpuah chah a, kan chhuak phei a.

Gate pawn kan chhuah chuan kha pa bawk kha kan inhmu leh nawlh a.

Engin nge in haw dawn?

Hei taxi te kan be kual chhin anga, a vang angreng viau mai tiin ka chhang a.

Kan rualin lo haw ve mai ta che u, driver nen chiah kan ni dawn a tiin min han sawm na in kan tam angreng a, ka inthlahrung deuh a.

In leng vek ang tiin min sawm tlat avang chuan an bolero ah chuan kan chuang kai ve ta a.

I fanu chu nuam ati maw? In puar bawk em?

Ekhai, hei nuam ati khawp mai, haw a duh lo chung kan hawpui a, atum bur reng mai.

Pa titi duh tih takah kan titi ho bawrh bawrh a.

Kan hawna lam tur in ang lo mahse kan awmna bul thleng chuan a driver nen chuan min thlah a, kan in mangtha hnu chuan anni pawh an haw leh ta a.

Pa titi thiam tak ka kawm duh zawng tak ani tiin ka ni pawhin fel ati khawp mai.

Kan in ah kan lut khawm a, rei vaklo hnu ah min hawsan ta hlawm a.

Kan chau deuh ani mahna kan mu nghal diak a, muthilh pawh tum lem lo in ka lo muhil ve ta daih a, dar kaw bawr velah hian davida hian min rawn be ziah a, chumi hma chu ka mutsan ngai lo.

Ka phone ri ta ral ral chuan min ti phu Chiang lutuk, tui taka mulai harh thut ka nih avangin ka thin aphu deuh dup dup a.

Davida anih ngei ka ring a, mahse alo ni hauh lo mai.

Siama call ka dawng teh thut chu mak ka ti em em a, kan inbiak lohna a rei tawh a, zan rei tawh ah lehnghal chutia min rawn call ta mai chu mak ka ti hle.

Hello...

Mercy, in dam tha maw?

Aw dam tha e, tehmial chuan, eng thil nge ni ta?

Nia, ka rawn call chhan che chu karhmasa zirtawp ni khan ka fapa upa ber kha a boral a, khatih hun lai khan kan hamhaih lutuk a, rawn hrilh nachang che ka hre mai lo a, ka hrechhuak che a ka rawn hrilh ve hrim hrim che anih hi aw.

Awii.. Eng na nge a? avan zialo ve aw, tinge maw min hrilh loh le aw, rawn kal hi ka ba asin.

Kar te ahla a, rawn kal kher kha ka phut hran lo a, mahse lo hre ve hrim hrim la ka duh a, ni e nat lawk em em pawh awm lo in a boral deuh thut ani mai, kan tuar ve khawp mai a, anu phei chu ala tap reng mai.

Azia lo hle mai siam, aruang hmu hman tawh lo mah ila ral tura rawn kal hi ka bat ani, remchang hmasa ber ah ka rawn kal dawnnia tiin kan inbe deuh reng a.

Kan inbiak zawh hnu chuan ka thu deuh reng a, ka fanu aiin a u a, atleirawl ve uak tawh dawn a, anu leh pa enkawl tu tur ani ve bawk nen tawrh thiam ahar dan tur te chu ka chhut neuh neuh a.

Ka msg dawn chu ka chhiar thuak a.

Biak theih loh, theih chhun ah pawh busy rei ngat ngat hle mai tih thu chu.

Ka rilru in siama te ngawt a ngaihtuah avang chuan ka chhang lem lo.

Ka khawngaih ve em avang chuan ka tuarpui takzet a, ka fanu chan ang ah te ka inchan chhin a, ana ngawih ngawih thei.

Hello...

Tunge ibiak em em a? Ivan busy rei ngat ngat ve.

Siam an min rawn call a.

Tu siama maw?

Kan thian ania, a fapa boral thu vel min rawn hrilh a.

Ava rei si ve, chu chauh chu ani lo aniang a.

Ka thin a rim deuh thut a.

David, achhe zawng chuan min ring reng reng suh, nang ang ka ni lo tih hre rawh ka ti vin tuar a.

A ngawi vang vang a,
Ithin a rim ami?

Thiante chhiat tawh laia Khatiang a min rawn tih ngawt le, zak lo lutuk mai tih pahin phone chu ka dah tau hmak a.

Vawi tam a rawn call a, ka mood off nen ka chhang peih lo.

Ka phone ka switch off hmak a, ka muhil leh ta daih a.

Atuk nileng in min rawn be ta bik lo a, ka luhlul na lam tak ani bawk a, ka tuar thei khawp mai.

Siama te ral tura kal chu ka duh a, ka rilru ah a awm tluk tluk mai a, kal lo thei niin ka inhre lo, ka bat ani tlat.

Min rawn hrilh tuk tuk leh chuan kal chu ka rawt deuh thut a, kan insiam chawp chuk chuk bawk a, ni hnih thum vel cham a kal tum kan ni.

Darkhat chhuak ah lunglei sumo in kan kal a, zankhat kan riak a, atukah siama te khaw lam kan pan leh a.

Chawhnu her velah siama khua kan thleng a, kawtchhuah te pawh ala ngai reng mai, danglam ve deuh tawh mahse thil tam tak erawh ala danglam lo.

Siama te kawt thleng sumo in kan kal a, kan chhuk ta a.

Inchhung kan va luh chuan mi thenkhat hi an lo awm a, chutia kan lang thut chu mak an tiin an phawk em em a, min beisei lo te pawh ani mahna.

Awi, mercy... Avan mak teh hlawl em, mumang te pawh a ang zawk alawm le, min rawn chibai nawk nawk a, siama nupui chu alo nu hnuk tawh a, hnathawk mi an ni bawk nen alang upa hle.

hei hi bawihtei kha maw?
Avan hmeltha em em ve aw, anula ve tep tawh anih hi, lo thu rawh u, thingpui kan lum ange a ti nghal bawrh bawrh a.

Siama erawh in ah alo awm lo thung.

Thingpui te in in kan titi a, an fapa boral chungchang te pawh kan sawi bawk a, ka tawrhpui zia leh ka lainat zia te pawh ka sawi ve bawk a.

Zanriah atan ar min talh leh a, khual tha cheiin min chei ani ber.

Ka hawi kual vel a, thil thenkhat chuan nunhlui min hriatchhuah tir, siama te kan fin ve rawih laia kan mutna thin pindan te ka hmuh chuan hun liam tawh hnu mitthla ah alang zung zung mai.

Chhuat ah mutna min phah sak a, mut pah chuan kan titi reng a, upuia chanchin te pawh kan sawi kai a, an khua a kan awm lai a kan awmdan te thleng in, hun liam tawh leh sulhnu te kan phawrh ani ber.

A tuk tlai lam ah chuan bawihtei leh mami chu len harh an duh leh duh loh ka zawt a.

Anni lah chuan an lo chak na sa mai si a, ka vah chhuah pui ta a.

Siama te kawmthlang kawng lam ah chuan ka chhuk pui a, tun hma a metal road pawh la nilo te kha metal road alo ni ve tawh a, akhua azawl in a rem em em a, mami phei chuan ka awm chak ati hial bawk.

Ka kalpui zel a, kan inluah hlui pawh alo lang ve leh ta.

In pawh sak that ani tawh a, ahmun hma erawh ala pangai reng.

Ka chuktuah huan siamna thin ah chuan ar in niawm tak ading a, alunglen thlak hle mai.

In kawt zawn kan thleng a, kan ding vang vang a.

Mami helai in ah hian kan lo cheng ve reng tawh a, bawihtei tet laiin, alunglen thlak mange aw tiin ka hrilh mawlh mawlh a, thla te ka la bawk a.

Zan thla eng hnuaia fanghma kan bawl lai te, tual laia upuia thingek lai te ka mitthla ah alo lang zung zung a, ka fanu kawngka biang dawma pawn lam athlir lai te nen chuan.

Bul kan lo tanna in ngei kum tam tak hnu a ka han hmu leh chu aw, lung te achhe dawn dawn mai.

Thlahlel tak chung chuan kan kalsan leh ta a.

Ni reitak cham thei kan nih loh avangin zan hnih kan riah hnu chuan aizawl lam panin kan haw leh ta a.

Ka tihtur ka ngaih pawimawh em em ka tlingtla fel a, thaw aveng huai mai.

Zan thim hlim ah aizawl kan lut a, siama te khua ah khan signal ka neih loh avangin call reng reng ka dawng lo a, aizawl kan han lut chiah chu a rawn lut nghal zung zung a, davida msg atam dawn tih hre reng chungin ka chau deuh bawk nen ka en peih lem lo


Rawng kan bawl sawk sawk a, kan inbual fai a, kan mut achhuak der a.

Kan mu diak a, zankhua in ka harh tawh lo, mutui tak ka ni.


Ni eng in ka hmai tak a rawn chhun a, a harh loh theih loh, taksa sil them thum Chung chuan ka han inbeng kang a, ka fanu erawh alo awm tawh lo.

Ka tho a, mami leh bawihtei an awm lo, sikul kal tur an inthlah ani tih ka hre thiam mai.

Thingpui in pah chuan ka phone chu kan en thuak thuak a, davida msg zozai chu ka chhiar duh lo, atawngkam ka hre duh lo, a thinrim tawngkam chhiar ka peih lo, ka clear pawp pawp a.

Keimah zawk chuan ka zu call a, a reject hmak hmak reng a, nuihza tak chungin ka runluih zel a, a reject zel bawk a, athei lo zawk ani dawn tih ka hriat avangin ka na eih lo.

Chaw kan ei kham a, dawr lam kal turin ka insiam sawk sawk a, ka chhuak ve nghal a.