2'3' BY Msi Miluhlulnui (Completed)
Posted: December 23rd, 2019, 11:35 pm
2'3'
EPISODE - 1
By Msti White Fox Renthlei
"Eng rilru pu a hetiang thil ti hi ti nge maw inih hrep le" ti hrâwk ri ka hriat pawh chuan che lovin ka ding ngawi reng a hmalam chu ka melh ngur bawk, ka thil hmuh avang sawn ka tha a zawiin ngaihtuahna fîm pawh ka pu in ka in hrelo.
"Ka sawi chu I hria em nula? " a tih leh hrâwk ri ah chuan ka phu zawk a, ka sira a lo ding chu ka melh nghal hâw a, mahse rei en lovin ka hmaa maia thu hlim tih hriat zeta nui chu ka en lehnghala, awmdan tur ka thiamlo ani.
Ka tha a zawi vek ruala ka kaihza a inthleh hnawk rual chuan ka sir lamah ka âwn nghal riai riai a, mahse kut tha chak tih hriat zetin ka kâwngah a rawn vuan nghal chawt a! Thaw ri hrawih ka hre chhunzawm nghal zat bawk.
"Hrep che chuan, ka pheikhawka wine I tihbuak hnuah pawh ka la buaipui zel dawn che em ni nula? " a tih leh hrâwih pawh chu ka hre reng, mahse ka â vekin ka hria ka ngaihtuahna te hi an thi dûk mai, tawng tur pawn ka hrawk hi bâwk lian tak ang maiin a hnawh phui vek ang hian a awm a, ka tâwt up up bawk.
"Khawngaihin pâwnah min hruai chhuak thei angem? " harsa ti zetin ka tawng chhuak a ka aw pawh a zâwiin a tial ruak mai, kan dinna lai hi a thim em avangin tuman min hmu lo mai pawha ni lo se chuan ka mualpho dêr tawh ang.
"I tha em? " a aia dam zawka a rawn tih leh rual chuan ka bu ve nghut a, mahse ka thalo tih hi ka hrechiang mah mah, tunah tak hi chuan he bâr hlat thei ang berah hian awm ka duh ani.
Engmah sawi tawh lovin na zet hian a thaw chhuak hawk a, ka bân chu a rawn la lawk a, ka kuttang karah chuan a kuttang a dawn rawlh lut a, nghet takin a hum a, EXIT lam pan chuan min kai phei zela, min tih ang ang in ka awm tawp. A thim lam zelah min kalpui a midangin min hmuh pawh a hlau deuh ani mahna.
Kan chhuah dawn chuan ka hawi lêt leh hram a mahse ani erawh lungawi hmel hliah hliaha a hmaa thu hmeichhia chu en in a nuih suk a, a hmuiah chuan a fawh sak zeuh a, ka ni nghal dawt thei! Na leh chuang tur ka awm tawh lo. Tunah hian ât daih ka duh takzet ani.
Pâwn kan chhuah chuan boruak ka hîp lut nghal kâwk a, min kaitu pa chakna hawn then lo Ila chu ka tlu tawp tawhin ka ring. Thlifim rawn thaw heuh heuh chuan min ti harh sawng sawng thei, mahse ka tâwt lutuk erawh a zia phah chuang lo.
"Dear, iva rei ve" hmeichhe aw tliang nalh zet ka hriat rual chuan ka meng kâwk! Hmanhmawh lutukin min kaihna chu ka phelh sawk sawk a, ka tawlhsawn nghal vat bawk. Ka harh chiang khawpin ka hria, ka chakna the kha chawp leh chilhin an rawn let leh nghal vek thei.
Min kaitu pa ka en chuan a ngaihna hrelo zetin min lo melh ngur a ka hawisawn rang mah mah bawk. Chupa bulah chuan hmeichhe pakhat hi a rawn ding nghala a kâwngah alo vuan nghal chat bawk.
"Kan in be rei leh ta deuh alawm, min lo nghak rei a, tihpalh" a tih zawm zata a biangah chuan a fawh sak zeuh a, kei erawh ka lo maimichhing daih thung. Ka awm ve tih hre lek lova an han khawsak chu le, tâwt up up lo ilang chuan eng emaw ka sawi hrim hrim ang.
"Henu hi tunge a? " tih ri ah chuan ka meng a, chunu chuan uluk fahranin min lo melh a, a nui suk mai, a mitmeng atang hian he hmun atang hian kalsawn nghal tura min duh zia a lang nghal vek.
A zawhna chhan tuma min kaitu pa âng zuai ka hmuh rual chuan rang lutukin ka lo chhân khalh a
"Englo" ka ti chiam a, an pahnih chuan an rawn hawi rual nghala "ih... Kei chu min ngai pawimawh duh suh tumah ka ni lo chuan min puih avangin ka lawm lutuk ania kha hmun atang khan min hruai chhuak lo la chu tih ber tur pawh ka hre lo ang chuan... Lo ngai kawi duh suh, I bialpa nge I pasal chungah hian la lawm takzet ka kal phawt mai ang ka lawm lutuk" ka tih khalh zung zung a, ka sawi zo chu ka inher a hmalam panin ka pên nghal hlawk hlawk bawk.
Ka kal hla tawh viau amaw ka tih hnu chuan muangchangin ka kal ta a, tap tur ka nih laiin tinge ka tah si loh, ka rilru ana lo ti dawn Ila ana bawk si, mahse tinge ka mittui hi tla tura ka duh chhan le.
Hmeichhe tam tak chu an bialpa ten an then emaw an lo kawp chuan an tap a, an tuar a, kei erawh ka thil hmuh zawh chiah avang khan ka tap hauh si lo, ka rilru chu ana in a tâwt up up bawk si, mahse tinge ka mittui hi tla tura ka duh viau chhan, ka inhrethiamlo engvanga hetiang a awm hi nge ka nih.
Ka ring em em, ka lo ring sual zawk em ni? Nge ni a hmeichhia kha a bialnu ni lovin a unaunu alo ni zawk? Mahse a unaunu chu nise a hmuiah khan a kiss hauh lo ang. Kei hi bum in ka lo awm reng tawh zawk tihna em ni ang?
In chu ka thleng ve maia ka luh veleh room lam ka pan nghala khumah ka bawk nghal thlawp a, lukhamah ka hmai ka phum kâk bawk, kha hmunah khan ka kal mai mai lova ka zan hnathawhna ani. Chuan Kima kha hmuh ka in beisei miah lo, nilo, ka ring lo zawk, ka hna kal hmaa kan inbiak kha chuan apa nen hna thila an chhuah a ngaih thu a sawi si a.
Mahse kha hmunah khan ka hmu leh si chu pawn hmeichhia nen leh nghal, engtiang chiahin nge min nghawng ang tih hi in hrethiam kha angem chu ka hrelo, mahse keimah takngial pawn min nghawng dan hi ka hrethiam lo.
Mahse ka lo hmu sual pawh ani thei a ngaihdan ka siam nghal ngawt thei lo amah ngeiin min duh tawh loh thu leh min kalsan tur thu a sawi chauhin ka kalsan ang, ka vawikhat hmuhna ah ngawt thuthlukna ka siam tur ani lo. Kha thil kha hna avanga ti pawh alo ni thei, naktukah ka zawt chiang anga engkim chu a hriat vek mai ang. Mahni chuan ka phun nuah nuah a.
Kima nen hian kum 5 lai kan inkawp ve tawh, min ngaihsak thei em em a, a bikini tunlai hian ka tan hun a neih loh zia sawiin ngaihdam min dil chhên thin, an Hausa a an chhungkua an buai thin zia pawh ka hriatpui vek avangin engah mah ka ngaihsak ngai lo. Ka haw hran lo.
Hmuhsitna ka tawh thin lai zawng zawngin ka kiang ah a awm a min hnem a min tanpui thin, ani chuan en liam in ka nihna ang ang in min pawm a, heihi amah ka duh ve na pakhat ani. Ka zep lo fahrah ka ni, khawvel êng ka hmuh tirh phat atangin pa hmel la hmu lo nghala, ka nu in min enkawl seiliana, pa nei lo tiin mi ten ka hnung lamah min sawi thin.
Tiang hi movies velah chauh an ti thin amaw ka tia mahse mizo ngeiin an lo ti ve hi ka awih lo hial zawk chu pawh an mizo pui hnenah lehnghal.
Ka pa thlalak hmuh tur ka nei lova, a hmel, a chanchin engkim hriat a lêm ka nei lo, ka nu ka zawh lahin a thi tawh tiin min chhang thin a, a thlalak ka dil in ka nei lo a ti thina a hnuah pa i nei lo min ti leh thin, mahse ka nu hi amah ngawtin a rai thei lo tih ka hriat avangin pa ka nei ve tih ka ngaihtuah a ka hlim, mahse a chanchin leh a thlalak tak ngial pawh hriat tur leh hmuh tur ka neih loh avangin ka hlim hun Chhung a rei lo.
Ka nu in min kalsan leh hnu phei chuan keimah chiah ka ni tawh, ka mal em em a, tunge kan chhungte ni a, tute nge ka pi leh pu te pawh ka hrelo, a chhan chu ka nu khan min hrilh ngai miau lo, ka hmuh laiin phone a khawih ngai lova, a chhuak ngai lova tumah a be ngai lo bawk, ka biak pawn a rul tawk lek lek in min chhang thin a, ka biak loh chuan min be lo ani mai, ka pa chungchang ka zawhin min hau vak vak thin bawk.
College ah pawh hmuhsitna ka dawng nasa zual sauh a, fahrah inih kha, nu leh pa nei lo tiin, chu hmuhsitna tawngkam chuan college lei pawh min rah that tir ngam loh phah a. Ka chawlh phah ta reng bawk ani.
Tun thleng hian fahrah tih thumal hain keimah nghawng na tak ala siam thin a chuvangin he thu hi a huatin ka haw takzet ani.
Thil ka hriatchhuah zawk avangin ka phone chu ka phawrh chhuak a, zaninah hian bia ilang a tha ang, thudik chu a hriat vek mai dawn alawm, zinga ka bia anih chuan a dawtsawi ho lam te kha ka awih leh amaw kha ania nga.
A in ring chu thin phu dep dep leh hlauthawng tak Chung in ka ngaithla a, a tawp tawh dawn emaw ka tih hnuah a rawn hello ve ta hram a. "Khawnge I awm? " ka ti nghal vat a, phone atang chuan an thawm pawh ka hre thei veka, ka tawt lehnghal up up tawh mai.
"Hei., insaknaah ka awm mek a, thir an chhu ring bawk nen music an play ring bawk nen, kan chhuah hunah ka lo call ang che aw.. Babe" a sawi zawh rual rual chuan line a cut nghal daih a, tunah tak hian tui vawta theh ang thawt ka ni, ka hit nghal dûk mai.
Cont....