STORY OF MATTHEW BY BabyShy Hnamte (Completed)

Episode nei ho a hlawm a dahkhawmna
Ngaia
Site Admin
Posts: 25813
Joined: April 30th, 2016, 4:07 pm

STORY OF MATTHEW BY BabyShy Hnamte (Completed)

Unread post by Ngaia » January 5th, 2020, 3:40 pm

STORY OF MATTHEW;

Matthew Lalrinsanga ka ni a, Lawyer ka ni. Shillong ah ka nu leh pa enkawl na hnuai ah ka sei lian a, nimahsela ka duh vang pawh ni bik lo va ka nu leh pa hnam in an loh vang a ka thisen in luan pawlh vangin ka hmangaih ber nen kan in kawp a rem thei lo va, a thu ka hnial ngailoh ka nu ber in a hnampui nula chu ka tan a tha lo tiin min khap bawk a, mahse harsatna tam tak kar ah chu ka hmangaih ber chu nei let leh in thuruk tenawm ber thleng in ka hai chhuak thei ta hram ani!


Story of Matthew
Chapter-1




"Bawiha, khanu nen khan in in hmu leh miah lo tak tak maw?"


"Aw ka nu, khatiang ah buai a ngai lo, ka dah dawn nia."


Mi pawh a thlah fel hma hma in ka hang up zui vat a, ka seat atang a tho chhuak in ka birthday a tu tih hriat loh in ka office kawt a gift a lo dah, coffee mug lian tha nelh nawlh ah chuan coffee ka thli khat pam a, tukverh bul a ding in pawn lam a mipui zi mur mur chu ka thlir reng a,



Rilru na tak a ka awm min hmuh lai a ka nu min hnem thin na ' a rei ang a, i dam ve mai ang ' a tih thin dik zia ka hre chho ve mek in ka hria! Kha hmeichhia kha ka ngaihtuah let apiangin, mipa dang kiang a hlim tak a a nui lai ka ngaihtuah thleng nghal ziah a, khatiang hmeichhe sih hnip kha chuan ka hmangaihna leh ka rinawmna hi a phu hlawl lo a ni e!



Matthew Lalrinsanga ka ni a, tunah hian Mizoram sawrkar Lawyer ni in ka pa in Mizoram a a hotel sak, Blueberry hotel enkawl turin min dah bawk a, hna hnih kawp ka duh loh vang leh ka pa hausak na ring lo va mahni ke ngei a din ka duh vangin Hotel enkawl na chungchang ah erawh chuan kan Manager kut ah engkim ka dah a, thil fel hlel a awm erawh chuan ka hnen a report tur in ka ti thin thung! Ka hnapui ber Lawyer nihna ah hian ka lung a awi a, ka in pum pek hle bawk, Rorelna dawhkan hma a ding in mi dik, an thiamna thup bo a awm thin te chhan in an dikna leh thiamna vawi tam ka pho lan sak fo tawh a, kum rei lo te chhung in Mizoram ah pawh ka hming chu a tha zawngin ka chher ve der mai!



"Kan boruak a tha chiah em aw?" ka hnung atang chuan aw zang khai zet in Ropuia chuan min rawn be vat a,



Ropuia hi Advocate ni in kan in kawp deuh chawt a, ka nau ve deuh ber a ni mai ang chu!



"Tha vek e." hawi let lem lo chuan coffee chu ka lem zui khalh a,



Ka tukverh atang chuan Police in mi pakhat an chai laih laih lai chu ka thlir reng a, a hmel ka hmu chiang lutuk lo na chu Pawngsualna thleng chung chang a an rinhlelh ber kha a ang ka ti khawp mai! Hmeichhia tu pawh, zah tak a en tur a zirtir na dawng reng chung a sei lian ta chu, Hmeichhia te chak loh na rem chang a la a pawngsual thin tu te hi ka huat ber te an nih ka ring!




"Sir." a mi koh dan vang chuan ka hawi vut a,



"Khatiang a min ko lo tur a kan in hrilh hi kum engzat nge ni tawh le? tih i tum ka hre vek, kum 3 na chiah, Pawngsual tu pa kha an man in ka hria, ka buaipui dawn ka chhuak dawn nia."



Ka tawng ve hma hma in a sawi zo vek! Rang lutuk takin nui vun vun chung in a petek chhuak zui zat lehnghal a, a eng ber chu nge maw a buaipui dawn ni!



Tlai dar 3 thleng chu ka thu ve ren rawn a, ka case chin fel tawh sa record te chu ka laptop ah ka en let mai mai a, finna chhar belh tur hi chu a la awm ve reng tho!




"Ka lo let leh chiah, a ngaihnawm ang reng dawn in ka hria!" thlan tui vang a a chal bawl tek tek chu a rawmawl la chhuakin a hru zui mawlh mawlh a, a tlan kual nasat hmel ang reng khawp mai!




"I lo let tawh tho chuan, ka haw san ang che, in khar har lo la aw." haw tur a in khung fel in ka chhuak zui vat a,



Ka Verna Car ah chuan lut in a engine ka ti nung zui vat a, ka chenna in lam pan chuan khawpui chep tak ah chuan ka tlan ve zeuh zeuh a, tlan chhung aiin din chhung a rei zawk ang!



Mizoram ka awm tirh te ah hian kan Hotel ah ka riak ve mai zel a, mahse ka nu leh pa thu pek zawmin kan hnathawk thenkhat te a khat tawk a ka room an rawn kik tei vet vang in ka awm peih tawh lova, Electric Veng lam ah Ropuia puihna in in luah tur ka hmu ve hlauh a, chhungkaw pangai luah tham lawih khawp a zau tha ani a, ka luah zo lo ang reng khawp mai!



Mahni chauh a awm mah ni ila, in hnawk nei nuai in ka dah ngai lo, ka naupan lai atanga ka nu min zirtir ang in, engkim ka lak na hmun ah ka dah fel thlip thlep a, ka thil eina han sil fel nghal thlap erawh a harsa ka ti deuh thin!



Ka inthlak zawh hnu ah inbual faiin boxer leh tanktop dum ha in ka room chhung a ka dawhkan hma ah thu in ka lehkha bu chhiar lai Sherlock Holmes chu ka chhiar chhunzawm leh te te a,



"Matt, ka lo kal dawn aw." chhiar pawh ka chhiar tui tak tak hma in ka phone rawn ri ral ral chu ka en a, Sylvia-i text ani!



"I thu thu." ka phone chu charger vit lut zawm zat in ka lehkhabu kiang ah chuan ka dah thla a,



Sylvia-i hi ka thinlung a ser nung lian tak hnutchhiah tu hmeichhia tih loh ah chuan ka hnim hnaih leh ber ani a, ka indan hnu a intawng ni in kan in nei tu te fapa naupang ber chetsualna vangin Woodland hospital ah hmanhmawh tak in keiman ka kalpui a, chuta an nurse pakhat chu ni in kan inbe tlangnel zui viau a, ka tan a in phal bawk a, vawitam ka khum ka chuankai pui tawh bawk!




"Sir, ka thil lak khawm ho hi ka en chiang a, Police statement te zawng zawng nen, fel hlel a awm maithei, an mi man pa kha pawngsual tu a ni lo mai thei ani."


Ka phone call dawn ka pick up rual rual in Ropuia a rawn ri leh nghal zawt zawt a, chhiar pawh ka in chhiar tui hman meuh lo ve!




"I va ti tha ve, ka lehkha chhiar lai hi a ngaihnawm a sin, i hre ve duh em an awm dan vel?" ka aw ka thian zui kharh a,



"Ka thiamloh ani, nakin ah ka rawn hrilh tha leh ang che, Sir."



Lehkha ka chhiar lai a tih buai ka huat zia hrechiang tu te zing ami a ni! Sir min ti lui tlat thin erawh han tih vak ngaihna pawh ka hre tawh love!



Ka dar leh hnungzang kham thum khawp a Chapter 4 ka chhiar zo chiah chu ka zi mar talh talh a, khua in min thim hnan der tih ka hre chiah! Ka pum puiin hip tur mamawh vang a chaw rawn dil niawm fahranin a ri thla raih raih bawk a, cup noodles siam in apple pum khat nen ka ei a, ka awm a nuam tawk chiah thin!



"Pawn ah ka awm tawh."



Sylvia-i text chu ka chhiar zo a, kawngka ka hawn sak zui vat a, half neck dum leh cotton jeans dum rawn ha in flats a bun bawk a, a te rin ren na chu, mipa te ngaihtuahna hruai sual tur reng a duan emaw tih mai tur khawp a nalh leh mai, hmeltha tak zawng ani ve chiang!



"Matt ka ngai tawh lutuk che." nui var var chung in min rawn kuah thlawp a,



"I that zia sawi a kuah vawng vawng tu che kei ni lo midang vawiin ah i tawng mial em?" a dar a vuan chung in a mit meng mawi tak ah chuan chiang zet in ka en vang vang a,



"Aih, nangmah chiah." theih tawp a rawn dingdihlip in ka hmui ah a rawn fawp zauh a,



"Hospital atangin ka rawn tlang nghal daih a, ka inbual ang aw."



A nu leh pa te chungchang hi kei meuh pawh min hrilh tha duh lova, a duh duh hun a chhuak a mipa in a riak lut tawp thei chu, chhungkaw mumal tak an nih ka ring chiah lo a, condom hmang lovin sex ka hmanpui duh lo bawk!




Ka thil eizawh hnu ah ka in tih fai leh miah loh vangin Sylvia-i inbual fai chhungin choka lam ah ka hmai te phih in ka lo inti fai ve leh thuak thuak a,



Hmeichhia nge nge an inbual chhung a rei thin teh e! Table light on in bung thar kai nghakhlel zetin ka lehkhabu hma ah chuan ka thu fel leh der tawh a,



"Ava mak ziah e aw! Hello?" Tinge maw lehkhabu hma a ka awm veleh a rawn call ziah ni!



"A hun lo leh deuh hlek alaw Sir?" inthlahrun hmel tak in a rawn tawng chhuak a,



"Ka la tan lo, sawi la?" a inthlahrun lutuk vang chuan ka nui chhuak hak a,



"Englo ania sir, a case hi en chiang la ka duh a." a aw thian kharh in tlai a a thusawi bawk chu a rawn sawi tha leh a,



"Ka tihdan a ni lo tih i hriat kha, ka dah dawn nia."



"Sir....." ka hang up hman!



Mi pawh chu a rawn call zui ta lem lo va! Sylvia-i inbual zawh hma tiin Chapter 5 ka chhiar chhunzawm nghal mawlh mawlh a.




"Matt, ka zo ania, duhtawk tawh rih la?" Ka towel rawn bih chhuak in ka bul ah chuan a rawn ding chawt a, a rimtui veng veng ngei mai!



A kut hlei lutuk vang a buai zui nak in khum lam ah chuan kan chuangkai zui leh nge nge a! Zawi hnak chung a thlan hluam in kan in kuah zui vang vang a, a chau deuh nge ni a muhil zui nghal suk suk mai!



Ka alarm ri ral ral in min kai tho a, ka bul a mu hmeichhe tereuhtei min kuah na lak ata chu tih harh hlau zet in ka in la hrang a, ka hmai te phih a ka ha te ka nawh zawh hnu ah ka track suit ha in work out tur in thawm dim zet in ka chhuak zui vat a. Khawpui lam a tlan chho in Sikulpuikawn atang Khatla lam ah ka kual thla a, Nidang ang bawk in kawng hnuai lam atang chuan ka let leh a.



Zote Bakery ah cake ka lei kawi leh te te a, Kan in thlen thlak dawn a dawr te ah coffee lei leh in in lam ka pan ding nghal chat a, in chhung ka lut chu a lo la reh dak mai!




"Wow, i tho tawh reng sia, ti khan i thu char char a mi a?" khum ah a biang rang ruai in a lo thu tum bar ka hmuh chuan ka nuih a za ang reng ngei mai!



"Tinge engmah sawi lo a i chhuah a?" a meng bial ang kak leh nghal a, nitin chawl miah lo in zing harh hlim ah hmu ni ila chuan ngai ah ka nei ve maithei, mahse tun dinhmun ah rih chuan ka en nin theih loh te zing ami ani!




"I mutui sia, ka ti harh duh ta lo che a nih kha, ka inbual dawn, ilo tel ve dawn em?" ka track suit hak chu ka phelh zui nghal mawlh mawlh a, boxer nen chauh ka awm tawh!




"I lo tel ve nghal dawn em Pi ber?" Towel hum ran chung chuan mit tla lo chauh a khum atang a min lo thlir tu lam chu ka hawi let a,



"Mi thinrim tum lai lai in i in phelh kher a, khawi.." a mit mu ti che ralh in a kut a rawn phar chhuak a, a naupangchhia thin ang reng!



Ka kut hmawr a a taksa si reng chung in a mut kawr pan te chu ka hlih sak a, a ban mur sang sang ka hmuh chuan ka nui hak a, nizan lam ah kan tal na tawk tawh tho bawk a, thil dang tih zui tum lo chuan ka pawm nawlh a, washroom lam ah chuan ka luh pui zui vat a.




"Matt, ka mumang ah hmeichhe pakhat nen ka hmu che u a." Shower hnuai a ding chung in a rawn hawi chho ang ren rawn a, chiang zet in min melh kal a.




"Tu hmeichhia nen nge ni a?" a biang a nul zeuh chung chuan ka nuih sak a, ani erawh a thu tak hle thung!



"A hmel ka hmu chiang thei lo a, in sir ah hian ka lo awm a, nang chuan min hmu thei miah lo, a sir lam atang chuan chu nu chuan a mit bul ah hian khuavang a nei a, a ngo em em lehnghal, in duh hmel tawk hian in lo in kai a, ka ko vak vak che a, i hre thei bawk si lo a, a tak a ang lutuk!"




A mak ka ti zawk! A hmel a la hmuh ngai loh vang in a hre lo ani mai thei a, mahse a hmeichhe hmuh chu Lalduhsaki a nih ngei ka ring! Ngo tak, hmeltha tak, a mit bul a khuavang nei! a biang ka fawh zawh hnu a ka fawh leh kher thin a khuavang ka ngainat em em te, ka mitthla ah a rawn lang nghal zut zut mai! Kum 3 chhung zet chu ka pum pelh ru ngar ngar tawh a, kan in tawn hun a thlen ka duh lo takzet!



"Matt, tinge i awm dan hi a mak e?" ngen ngawl tak a min melh ngawih ngawih in a thluk fiak raih a,



"Engmah a ni lo, chutiang chiah chu ka hmu ve a, mak ka ti deuh mawle." engvang a dawt sawi ngawt nge maw ka nih pawh ka hre tawh nek lo ve!



"Kei ni lo hmeichhe dang an awm mial em le Matt?" he zawhna hi min zawh ka rin thin, ka chhan hreh em em tur ti a ka ngaihtuah thin ani!



"Tun ah te chuan awm lo ve!" ka kuah thlawp a, theihnghilh se ka ti ngawih ngawih bawk!



"Tunah i tih chu enge a awmzia? A hma in an awm ami?" zawhna pakhat in zawhna dang a hring zel dawn a ang!



"A hma thil alawm, tun hun ah cheng ang," shower herh tawp in towel in a taksa mawi tak chu ka hruk hul sak dap a,



Kan tih fo dan a ni bawk a ani pawn thei leh thei lo in phur loh hmel zetin ka taksa huh min hruk hul sak ve hnak hnak bawk a.




"Ngaihtuah zui suh aw." khua a vawh vur vang chuan ka jumper ka hak tir a, a mah ang pahnih pawh an leng ang tih tur khawp in thawl alawm le!




Kitchen lam a pawm chhuak leh in dawhkan ah chuan ka thut tir a, tarmawi te pawh a ang e a!



Coffee siam in ka cake hawn sak ka hmuh rual chuan a nui hmel hmuh tur pawh a awm zui ve mai!



"Hetiang a hmeichhe dang i duat loh nan hmeichhe dang mamawh lo tur in ka siam dawn che i hria em?" in ring tawk takin a rawn hawi chhuak lah a, a nui var var a, a sam la huh chep chu tuai sak zauh in a hma a chair ah chuan ka thu thla zui ve vat a,



"A tha lawm, engtin nge min siam dawn lo thlir ang hmiang."



A nui ve var var a, hriat chhuah nei niawm tak in a hawi vut a, bang a ka sana tar en in a chek zui tlak tlak a,



"Enge a?" ka no hum lai dah thla in ka zawt vat a,



"Vawiin day off ka nei reng reng lo! Naaa!" a chal ah a in beng ang thlawrh a!



"Ava buaithlak thin e aw! Engtik nge i shift?" a in ben na kut man sak in ka ding chhuak hluai a,



"7a.m to 5p.m" a tum bar a, sana ka en zui ve vat a, 7:10a.m chiah ani.



"Va in siam rawh, a la tlai chhe lo, i tlai tur thu midang hrilh la, ka thlah chho ang che, ka hna ka kal hma mai ang keipawh." a biang ah ka piai sak zauh a,



"Khawi min pawm thla la." a ban a rawn phar chhuak vat a,



"A buaithlak thin e aw." ka pawm thla lawk a, hmanhmawh zet in room lam ah a tlan lut zui leh nghal daih a,



Ka Coffee in lai in zo leh te te in ka haw hun a sil fel tur in mug chu ka dah tawp a, room lam ah chuan in siam tum in ka lut zui ve vat a.



Inhmeh ka tih em em a nurse form nen ngei mai sam huh chep a a lo awm ka hmuh rual rual in ka danglam vek thei! Keimah leh keimah in dan tum in ka kal pel lui a, a inthlak na sir ah chuan in thlak in ka coat suit ka la chhuak a, ka in bel zui ve mawlh mawlh bawk a.



"Matt i hman em?" ka hma ah awm pho lah in a rawn ding a, in hremna chi khat hi ani ringawt e!




"Kal ang aw" a kut a vuan in ka hnuk chhuak deuh dawr dawr a, in hrem rei tir ka duh lo!



Hmanhmawh tak in an Hospital lam chu ka pan pui a, kei a sawi kuak sak theih ni hek lo, ani pawn tul a tih lem loh vang in a chhung a lut lo chuan ka en liam ta ringawt a, ka car engine ti nung in ka office lam pan in ka tlan chhuak zui leh nghal a. Naupang school kal hun a ni chho bawk nen Shillong ang em em nilo mahse Traffic chu jam ve nasa thei tak ani!



Ka Office ka thlen meuh chuan Dar 8:30a.m a ri thuak tawh mai, ka nau-a dawhkan hnawk niaih chu ka seat lam pawh pan ding ta lo chuan ka en zuai zuai a, nimin lam a a thusawi te pawh ka ngaihtuah chhuak leh chauh mai! A result zawn chhuah sa te chu ka bih sak thuak thuak a, ka dawhkan lam a la phei in ka rem fel zui zat a, ka lehkha pawimawh tawh lem lo paih mai tur a ka dah ho ka chu ka naua dawhkan ah ka dah phei vek thung!



"Hey, do you love me?" ka phone rawn ri ral ral chu ka en zui vat a, ka nui suk ringawt!



"Maybe no, maybe yes." a rawn chhan let leh na pawh ngaihsak zui lem lo in dawhkan a phone dah tawp in ka nau a thil buaipui lai chu ka en zui vang vang a,



"I va hma ve Sir, i thlenna a rei tawh em?" a bag ah rawn dah thla in a dawhkan a lehkha awm chu en chiang mang lovin a rem fel nghal sawk sawk a,



"Rei hran love, khatiang khan office chhuah san tawh suh ang che." ka zung chet zauh chung chuan thutak mang kheng in ka en zui vang vang a,



"Yes sir, chuan sir, thil kha." inthlahrung tih hriat tak in a tawng ban chap tawh a,



"Eng thil maw?" ngaihsak lo ang hmak in a lehkha nichin lawk a ka lak ho chu ka en chhunzawm leh daih a,



"Nimin a ka sawi kha, Sir, lehkha hi vawikhat chiah en la?" a rawn thlen tirh atang in a la thu miah lo!



"Khawi maw lo la teh." ka kut dinglam dawh in ka phar chhuak a,



Phur fahran in a rem fel sa diam tawh chu min rawn pe vat a, a rin loh lutuk in ka pawt thler vek a, a thawng deuh nge ni a meng bial kawk kawk mai,



"Kha thil nei tur khan hun ka seng hnem ve a sin." a aw key a sang ve lek lek mai! Ka chung a a lawm loh zia a vawikhat tih lan na ani! Chuat a ka lehkha vawm darh chu muang chang in a chhar khawm hna hna a,



"Paih rawh, hei hi en la, i mi sawi pa chu hmu tur in va kal ang hmiang." a ma lehkha chu pe in ka ding chhuak hluai a,



"Enge hei hi a awmzia?" mak ti tak in a en kual zui nghal thuak thuak a,



"I thil tih ah i chet fimkhur zual na tur a nih kha, in siam la" a dar ah chuan ka ben sak thak a,



"Ka lawm lutuk Sir, Pu Davida kan be lawk hrim hrim ang e." a bag atanga phone la chhuak in Davida chu a be zui vat a,




"Khalh teh aw." Car chabi pe in car hnung lam ah chuan ka thu lut thak a,



"Min chhehchhawl ve e." khi sung chung chuan a phun ve nang nang a.



"Nuam i tih hle kha." pawn lam a ka mit len in ka nui suk a.



Chanmari Biakin zawn a kan tlan lai tak in pawn lam a ka thil hmuh vang chuan ka awm zawn a na tak a chum dawt ang mai hian chhunglam atang in mi hnawh tawt ap ap a, vawi tam helai bawr vel ah hian kan tlan fo va, engvang a a hma daih atang tawh a hmu lo nge ka nih thin le! Zawi muang in kan tlan pel a, ka awm zawn chu ka tham ngawt ngawt a, ka thaw halh halh a.



"Tinge a?" Front glass atang chuan Ropuia chuan mi lo en reng chu ni in!



"Ka tha, ka tih thin ve dan hrim hrim." ka tha ka thlah dul a, ka mit ka chhing zui vang vang a,



"Tih thin dan hrim hrim ni tur chuan, kum thum chhung a khatiang a i ti lai ka vawikhat hmuh na."



"Ka tha e, thleng vat ang." ka kamiz leh coat chu ka zut mam nghal thuak thuak a.



"Kum nga chhung a ka mihring hmuh chak ber i la ni fan a sin." ka ngaihtuahna ah ka hmeichhe hmuh zawh chiah chu lo lang in ka kawm mawlh mawlh a.



Na nawn leh tur pawh in, na tak a ka awm hma, kha hun ah khan ka cheng leh chak takzet!



"Kawngka hawn sak chu i phut em lo ang tiraw?" seat hma lam atang a rawn hawi let in Car chu a ti ding zui a, kan tum ram kan thleng tih ka hre chiah!




"Chhuk mai mai teh." tih leh kawngka hawn chu ka rual a, station lam ah kan in zui lut nghal a,




"In lo thleng thei maw?" S.P, Davida office ah chuan kan luh rual in mi a lo chhawn zui vat a,



"Kan khawpui tawt ta lutuk hi chu a ninawm ngawt mai, a darkar ang a chhut chuan hmuifang kan thleng daih hman ang chu mawle." Ropuia chuan Traffic jam a nin zia sawiin a ri lut bawrh bawrh a,



"Haha ni e tiraw, keipawh ka nin ber te zing a mi ani ang chu mawle, chuan eng ber maw in lo kal chhan?" a file lo en lai mek chu khup in a kut pahnih chu a suih zawm nghal zat a,



"Nia, englo ania, kan pawngsual case thar lam ber kha, kan bih chian hnu ah thil ni thei a nilo deuh tlat a, kan kawm chiang lawk duh a?" Ropuia leh Davida inbe lai chu ngawi reng in ka lo en kar a,


An ni pahnih hi in hmelhriat tha sa an nia, Davida case lak tam tak hi dawhkan hma ah ka lo chin fel sak nasa ve tawh a, vawi tam kan in hmu fo va, kan in kawm tam hran lo thung, Pa nelawm tak erawh a ni tih ka chiang, a hmel hmuh a nuam in client te tan a biak a nawm tur zia chu nui hmel a pu reng hian a ti chiang in ka hria!



"In hnuai lam ah chhuk ila, a thusawi te pawh chu kan ngaithla ve leh hrim hrim ang e." a rawn tho chhuak nghal hluai a, in hnuai lam ah chuan kan in zui thla nghal a,




Thil zawh vak ka tum lo va, a tawng lam hi chu a tul te lo ah chuan Ka nau-a kut ah ka dah thin, a mah a in zir nan.



"Hlima tiraw i hming kha?" kan mi tang-a chu cell pawn atang Ropuia chuan a be hmasa te te phawt a,



A chung a thil thlen dan ah a tuar viau a nih hmel! A hmel a bawr chhawr a, tawng pawh tawng chhuak peih meuh lo a nih hmel! Thenkhat thiam loh chang tawh, an dikna hai chhuah sak duh chuan min hmuh rual rual in ka puih na min ngen nghal chiam thin a, hei erawh hi chu a danglam riau. Keimah ngeiin ka be chak teh tlat!



"Tunge ka nih i hria tiraw?" cell chhung a lut in a bul ah chuan ka thu thla a, a lu a bu nghut ringawt!



"A nih chuan ka thu hriat duh min hrilh la, helai hmun ah hian i awm loh phah thei ania." a khum tereuhte ah chuan ka ke kan hlang chhunzawm ve leh thawr a, a ni pawn a hlang tho!



"Party na hmun ah khan ania, ka duh ai ka in hnem a, room pakhat ah ka kal pui te pawh ngaihsak lovin ka va mu tawp a, engmah pawh ka hre zui lo, ka luak tih loh chu!, Dar engzat ah nge ka harh pawh ka hrelo, ka phone leh wallet pawh ka ti bo vek, ka bul ah hmeichhia kha ruak vek in a lo mu a, engmah pawh ti lovin ka chhuah san nghal a, a bak chu ti hian thil thlen chhunzawm dan chu a ni mai." thu tawm at in a ngal kaihkuah in a khup ah a chal a nghat chhunzawm leh daih a,



"Ka hriat duh ka hria e, nang thildang zawh duh te i la nei em?" Ropuia chu ka melh zeuh a, a lu a lo thing vat bawk a,




"Hetiang a tang leh tho tur te chu lo nawm ve zuai law law tur a nia tiraw?" cell chhung a kan tlangvala chu ka au zui lang lang a, mak ti takin Ropuia leh Davida chuan min en haw a,




"Kal ang." ka nui suk a,



"Kan nu u te pawh mi hriatchhuah tir e a." Davida chu a rawn nui ve suk a. An nu u chu tu tak ni ang maw!




"Sir enge i ngaihdan ni hrim hrim a?" car seat hnung lam ah chuan a rawn thu lut ve ringawt a,




"Lalropui?" a dar a kut nghat in chiang tak in a mit ah tak ka en a,



"Aw Sir?" ka thusawi tur ngaichang in ani pawn mi en kar a,



"Car hi amah in tlan se iti ami?" rum tak a meng chung chuan ka nuih suk a,



"Va zia lo deuh ve." a phun sup a, rang lutuk in seat hma lam ah chuan a in sawn nghal vat a.



"Office ah ka hrilh dawn che nia, tlan phawt rawh." tukverh glass a chanve a down in ka mit ka chhing zui vang vang a,



Car engine a nun rual chuan a tlan chhuak nghal tih chu ka hre thei mai a, ka mit chhing chung in chawhma lam a ka hmeichhe hmuh kha ka ngaihtuah zui vang vang a, hlim tak leh in thlahlel tak a kan in pawm vawng vawng lai ka ngaihtuah let a, a sam buang thek te, a mit hmul chhah lam lek lek dum hlep te, a hmai bial kerh ti mawi zual tur a biang sum pahnih lang kelh a a nui sen sen thin te, a mit meng fiah kak mawi em em thin te ka ngaihtuah a, a hmui sen chek, chhah mawi tawk tak duhthawh tak a ka fawh lai te ka ngaihtuah chhuak a, ka taksa a thisen in sem darh te hi a buai phah vek emaw tih tur khawp in ka taksa a lum pup pup a, ka awm a rawn na ut ut thei hial bawk!



Ka kawr awm tham ngawt ngawt in boruak ka hip lut kawk kawk a, ka taksa thunun ka tum hram hram ani ber!



Traffic thawl lai tak ani bawk a, office kan thleng vat a,


"Sir, i lo chhuk dawn em?" pawn lam atanga glass rawn kik karh karh chung in a rawn kun hniam duk a.



Ka ngaihtuahna ka kawm nasa mah mah deuh ani ange! Ka kawr zut mam leh thuak thuak in car atang chuan ka chhuk a, office chhung a rawn lut mai lo chuan a cigrette ah phawrh chhuak in office pawn ah chuan a zu khu talh talh a, kei erawh office chhung ah ka lut nghal thung!




Ka ngaihtuahna tih thawl tumin ka coffee mug ka la chhuak a, machine atanga thli chhuak in ka dawhkan bul a tukverh atang chuan pawn lam ah ka mit ka len chhuah tir a, mipui zi mur mur kar ah chuan duh lo hle chungin ka hmangaihi chu hmuh ka in beisei tlat lawi a, chawhma lam a a thuam hak te mawlh mai khan a va chei mawi zual tak! Khawnge nimin lawk a amah ka huatna te kha an awm zawh tak vek ni!




"Nangpui hi, i lung te a leng ve deuh amawni le?" office a rawn lut in a rawn ri lut bawrh bawrh a,



"Mi va ngam sawt ve a." thu tak fahran a tawngchhuak in nui miah lovin ka melh run a,



"Aa, ka sawi ve mai mai Sir." inthlahrun hmel tak a meng kun lap in zawi muang in a dawhkan ah seat ah chuan a thu thla a, chhuanlam tur a dap deuh chung mai.



Tukverh lam hawi chung chuan ka nui suk a, tinge maw hetiang a midang han chhaih hi ka sim theih miah loh ni! Ka ngaihtuahna kal ding tur a rawn pawt kawi daih lehnghal a! Ka coffee pawh ka thlit khah that teh lul nen a zo leh der mai!




"Sir, kan tlangvala kha ka rin ai thu i zawt ho a!" a kut tang in sual tir nauh nauh chung chuan mi melh zuk zuk a, min tih thar riau nge mawni!




"I inpui te pawh ngaih sak zui peih lo, luak bawrh bawrh a chatthla zui hnawk tur khawp a tam zu i in tawh em? dawt sawi hlek suh ang che." a chhan na nghak in ka chair ah chuan ka in sawi che kual a,



"Vawi khat chu nei ve tawh e, sawi thui vak lo mai ang." a nui suk a,



"Chutiang a i awm lai chuan i rilru ah hmeichhe awm pui chak na te i nei em?" ka zawhna vang chuan keimah zawk pawh ka nui suk ringawt!



"Teuh lo lutuk! vir miah lo a mut ka duh ber, ka che peih lo, midang min khawih chet hlek pawh ka tuar thei lo." a tih hun lai vel ngaihtuah chhuak ni awm takin a nui hak hak a,




"Chu, i zawhna chhanna chu nangman i in pe mai lawm."



Keipawh a sawi ang chiah hian ka tleirawl chhuah, college ka kal laiin ka thiante nen bar ah kan ti ho a, ka duh ai ka lo khiat hnem deuh nge ni, thirban mahni a che thei te, bang puar pawp pawp thei te nen ka hmu nuai mai! Hmeichhe lam ngaihtuah hman ani tawh lo! Chutiang dinhmun a ding chung chuan tu mipa mah hian hmeichhia an pawngsual ka ring lo! Mipatna tho in chakna hi a chhuak hlawl thin tlat lo! Hei chu ka in chhiar zau na atang leh keima experience atang ngei pawh a ka hriat ani!




"Nia tiraw, ka sawi kha, thil in thup dang a awm ang ka tih kha." hre tha in tih hmel zet in a nui sang a.



"Thil pawimawh tih tur i hriat kha, lo in la khawm rawh aw, haw har lo la, vawiin chu duh leh i chawl hma dawn nia Saturday te a ni bawk a." Haw tum in ka in sang mar a, ka in siamtha zui mawlh mawlh a,




"Awle awle, ka chhuak zui ve mai ang keipawh." a in khung fel ve nghal sawk sawk a.



In chhung bungraw thenkhat lei thar ngai ka neih ka hrechuak thut a, Vishal a bazar tum in ka car ka her rem a, Chanmari lam ah bawk chuan ka tlan phei leh a, tlai lam school naupang ban hun nen kan in nang a, Motor ah kan thu hahdam hi a ni ringawt!



"Miss, Miss?" College naupang thenkhat in an miss ni awm tak, te ve rin ren, a fu ke in vuah rem zet lawi si an bial laih laih chu ka en reng a,



A hmel an hliah hneh ang reng viau na chu, a thuam in bel atangin ka hmeichhe hmangaihi ngei kha ani tih ka hre thei! Ka thluak in ka thil hmuh chu ka tan enge a ni tih a hriatthiam rual rual in ka lung a phu rang nghal dawt dawt a, a hnathawh dan tur ai chak a thawk in ka taksa pum pui chu ka kawchhung atang a in lum chhuak in a sa nghal vung vung thei hial! A mah ka en reng vang a ka hnung a Bus ding in horn a rawn tih rik tuar vang chuan ka lam ah a mit a rawn len zui vat a, kan mit leh kan mit a in tawng chiah chu ka thaw lak a buai vek tawh! Engtik ah mah kan in kawp a rem tawh lo chung a a tan rinawm tak a ka awm luih reng lai a, mipa dang hnen a in pumpek leh nghal thei hmeichhia, ka thinlung hliampui tuar tir tu, mahse a hmel ka hmuh leh rual hian khang zawng zawng kha chu ka pal zam leh vek lawi si!





"Lalduhsak!"



To be cont.

*** KAN WEBSITE A FAKNA LAM THIL MILEM LANG THIN I LO HMET ZEUH HIAN KAN WRITER TE HLAWH KAN TUMSAK ZEL TIH KAN HRE THEUH DAWN NIA, KAN LAWM E***

Website story link ho awlsam zawka in zawn hmuh zung zung theih nan STORY FB group siam a ni a. Whatsapp group pawh siam a ni e. Complete tawh ho zawng zawng leh story kallai kan dah vek avangin avangin in lo join theuh dawn nia..
Group link : https://www.facebook.com/groups/991354610918230/



Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » January 5th, 2020, 3:40 pm

Story of Matthew
Chapter-2



"Miss i haw ve chiah alaw?" Chanmari bus stand ah ka student thenkhat bus chang in mi an lo be luam a,



Kei hi Lalduhsaki ka ni a, Vanlahriata leh Lalmuansangi te fanu neih chhun ni in Aizawl Chanmari ah khawsa kan ni a, Tunah hian Zirtiri College ah Physics lecturer hna ka thawk ve mek a, hmeichhe sang leh lian tak ka ni tih hi min chhaih nan an hman bak tih loh ah chuan thu tak a min hrilh tu an awm ngai lo va, min hrilh ngai kher lovin keimah pawh hian ka in hre ve tho mai! Amaherawh chu, ka hmel, ka pian, ka san zawng engkim a in chawih mawi thu erawh chu ha hip a mi te sawi thin ani ve tlat thung!




"Nia hei haw ve deuh chiah a nih hi, in leng kawi hlawm ami a in ban na a rei tawh hlawm nen."



Institution ah tak hi chuan naupang hi ka kawm tlangnel duh hran lo va, pawn lam ah erawh lecturer induh, biak har, in la, ti a naupang in an address theih tur nih ka duh lo thung.



"Tawlh hma ve tawh em em la mawle?"



Motor horn hmet ri tuar chung a pawr zet a an rawn au thawt na lam chu ka zirlai te ho nen a kan lo in kawm malh malh lai chuan ka hawi phei zawk a, Car chhung atang a khawdang hawi lek lova min lo en reng tu ka hmuh rual rual chuan ka bing nghal mup mup thei hial!




Chiang tak in a mit ah ka en kalh a, ka tha khur thup tum in ka kut ka hum ruh ngawt ngawt a, vawi tam mi a tlanpel lai vel te leh News atang te in ka hmu fo va, mit in tawng a chiang tak a in en chung erawh chuan kum 5 hnu a kan vawikhat in tawn leh na a ni!



"Hey, Hey, Enge i hriat a? Tlan ta che?" a car hnung a Bus driver chuan horn hmet ri tuar tuar chung in a hrawk hrep hrep tak ah chuan a tlanchhuak zui leh mai a,




A tlan liam tur chu ka en zui vawng vawng a, ka thaw thlah in boruak ka hip lut nghal kawk kawk a, kha hun reilo te chhung khan thaw(k) la miah lo in ka lo ding char char tih ka hre chiah! Ka kut tin sei tak vang in ka kut ka hum na lam ah ka kut phah a thi ser ser a, ka tha khur erawh a reh thei lo thung! Amah ka tawn atang a engtik lai mah a ka thinlung atang a ka paih chhuah phal ngai loh ka mipa hmangaih em em, natna ka tawrh zawh loh tur khawp hial min thlentu ni bawk si vang chuan ka zirlai te zing ah chuan ngawi reng in ka ding reng a, min ko mawlh mawlh tih pawh ka hria, mak tih hmel tak in mi an melh hrek hrek tih pawh ka hria, mahse an ni chhang tur in chak na ka nei rih lo! Duhtawk a hmeh sawr luih ang mai hian ka kaw chhung a thil phu dep dep te hi a na ngut ngut thei!



Khawlai a ka mittui tlak tir loh tum in ka in seh ruh fan fan a, motor tlan lai pawh ngaihsak lovin ngawi reng in ka hma lam ka pan ding chawt a, horn ri tuar tuar ri pawh ka hria, mahse tuman min su bik lo e! Tunge ka tawh a, tunge ka bul ah kal tih pawh ka ngaihtuah lo, ka thinlung mai ni lo, ka taksa hnathawh dan thleng a thunun thei vek tur khawp a ka mipa hmangaih tak ngaihtuah reng chung chuan kan in chu ka thleng ve hlawl a, tunge kan inchhung ah awm pawh ka hre lo ve! Ka room lam chu ka pan ding nghal chawt a, zawi muang a ka khum a thu thla in ka khum tlang chu ka tham ngawt ngawt a.




"Nagti nge nang kher hi i nih le Matt." ka hriat phak tawk lekin ka phun sep sep a,



Hun rei tak ata ka lo chelh beh tlat thin ka mittui chu an bawm a leng tawh lo ang maiin an rawn sur nghal zung zung a, in phatsanna emaw, eng emaw in hmuh thiam loh na vang a in hau thinrim a in then te chu ni ila, a dan a dang deuh mah na! Duh reng chung a in thlah luih a ngai hi min chhun na reng tu tur a nih ka ring!



"Mate, ngatinge a?" ka nu chuan ka dar a vuan in hnai tak ah min rawn en ang haw a, a rawn luh lai pawh ka hre lo ve!



Ka mittui chu ka hru thuak a, khum tlang chu ka tham leh ngawt ngawt ringawt!



"Mate enge ni a, sawi rawh?" ka biang a mittui luang chu min hruk sak zung zung a,



A chhan erawh hrilh ka tum lo! Ka naupan lai atang tawh reng in ka duh ang leh thlakhlelh ang ngaihsak leh duat na ka nu leh pa lak atang in ka dawng ngai lo va, ka pian hma a ka pu a boral vang in ka pi hi min enkawl tu ber ani! Ka tah chhan hi sawi ni ila, rang tak a tho in min kal san nghal ka ring! Ka pa in ka mipa hmangaih em em hnawl a kut min thlak lai a, a sir atang a uar zet a ka pa lo fuih phur tu hmeichhia hi, ka nu tak tak a nih pawh ka ring lo hial zawk e a! "Hetiang tur hian ka en ka enkawl lo che" te chu min han ti ve tak na a, hetiang lo tur pawh hian min enkawl chuang lo, min enkawl lo hrim hrim!



"Ka tha, keimah in ka awm duh." ka flat bun tlawh thlawn in khum ah ka ke ka hlang vut a, tap zawih zawih chung chuan ka blanket thleh fel sa pawt pharh in ka in khuh zui hmak a,



"A nih leh le!" ka khup a rawn beng thek in a kal zui nghal daih tih ka khum a chet dat tak ah chuan ka hre zui mai a,



Khum ah chuan mu tha in ka saisir a, ka phone la chhuak in Matthew nen a kan thlalak ka la neih chhun chu ka hmet chhuak vat a, Wards Lake kan kal dun tum a kan thlalak dun chu ka en vawng vawng a,




"Matt, kan Sakhuana vawn pawh a in ang reng tho a sin mawle tiraw!" Dan sawm zing a pakhat bawhchhe si lovin milem chu ka be lui reng a,



"Ka ngai che, engkim, khang hun zawng zawng kha." ka phone a milem lang chu ka be chhunzawm mawlh mawlh a,



A thlalak in a zir bawk nen, ka tih thin fo ang in ka nun hlui chhui kir in ka suangtuahna khawvel ah ka in hruai thleng leh der a,




***(5YEARS EARLIER.......)***




"Mimz Private ah ka awm a ngai ania." Nehu a admission kan ti zo chiah chu hostel ka chan loh vangin Mimi-i ka call nghal vat a,



Mimi-i middle school atang tawh a ka thian kawm niin high school, higher, college zawng zawng nen kan in zui chawt a, tunah pawh Nehu ah admission ti dun leh in kan la in kawp zel dawn a ang! Thian hi chu ka nei lawr ve duah a, ka chak loh na leh ka hrehawm na zawng zawng te, ka hrilh thin awm chhun chu Mimi-i deuh chiah hi ka nei.



"Naa sad ve e, engtin nge ka awm ang a?" thaw hluam hluam chung in a rawn thluk fiak raih a,



"Hei Dankheti lam ah Hostel kan zawng dawn mek, lo chhuak ve la bungrua vel te lei ila?" a veng awmna hrechiang ang ber in ka tawng vei lang lang a, ka nute-i min hruai na lam lam bak han kal na tur ka hre der si lo a!




"Awi, thil ka ei ka let chiah a, naktuk ah law law ti ila?" a la tep ang chuap chuap zui a, a la ei pah mek amawni!



"Aw i tih dan dan ani mai, ka dah dawn a bengchheng si." Aizawl traffic jam tih te chu tih mai mai, han ding hlek se horn an pe nghal ang chuah chuah a, bengchheng tak ani!




Blueberry Girls Hostel kan thleng a, a neitute leh ka nutei te inbiak vel lai chuan an bul ah chuan ka lo thu ngawi kar a, a neitunu ni awm tak chu ka thlek vang vang thin a, a hmel a mizo ngei mai! Kan inbiak fel hnu ah pawn kan chhuah rual ruak in ka nute-i ka hrilh nghal a, Khasi leh mizo ho in an zia a sawi zui deuh hrep a, Hostel ber kan biak fel tak ah chuan kan vak kual ve nasa deuh bawk nen, Mizoram house lam chu kan pan leh ren rawn phawt a. Ka peih lo ru ngei mai, Mimi-i tel lo a hostel dang a han awm chu, roommate ka neih fuh loh mawlh te chu ka hlau em em ringawt!



"Duh sek." ka zan riah eikhamin ka phone ka en chu ka lawm hran lo ngei mai!



"Ti khan mi ko ziah suh," tawngka a inbia chu ni ila ka vin leh nghek ang!



"Haha, enge i bialpa a sek fip ting teng e nihkha, englo ania, Hostel ah ka awm leh dawn lo keipawh, i awm loh chuan ka peih lo, mahse Private a awm an phal lo a, hei ka chhungte bul ah hian ka awm dawn nih hi."



Ka ring reng ah, ka tel lova a awm peih bik hi ka ring lo reng reng!


"Aw a tha nihchu, enge maw thil a chhuah dun te pawh a rem zawk ang, hei kan pa in min lo call ,bye." Zothana call chu ka pick up zui zat a.




"I va reh thei tlek tlek ve a." a rawn phun deuh hluk a, a lo thinrim leh hman amawni!



"Ka buai lutuk a, nangpawn hei tun ah min rawn biak hman chauh tho hi, vawiin in chak em?" an inkhel result te ka zawt zui nghal luam a,



Zothansanga, Zothana hi footballer ani a, infiam mi tih tak ah a taksa a enkawl uluk bawk nen, a sek fip deuh tang a, LalMimi'n Duh sek min tih phah ziah!




"Kan chak hram, chakna goal ka thun a vawiin chu nuam dangdai tak ani, nang i thil tih tur te i ti fel thei em?"



Vawiin lam a kan thil tih chanchin vel te chu ka hrilh luam a, han inbiak tak ah chuan ka ngai ru ve veng veng mai!



Ka naupan tet lai atangin ka nu leh pa in min awm pui tam lo va, ka ngai hran ngai lo, ka nute-i leh ka pi ka ngai ber thin!


Zing ah ka nutei'n min rawn sawi dawt dawt ah chuan peih lo chung chung in ka in ti harh lui a, hetiang a tui tak a ka mut loh na chin pawh ka hre tawh lo ve a! Tuk thuan te ka ei zuai zuai a, ka intihfai zawh hnu ah hmanhmawh tak in ka in siam a,




"In ban hma chuan rawn haw vat la, Hostel luh kan ngaih kha aw." Step a ka tlan thlak dawt dawt lai chuan ka hnung lam atang ka nutei chuan min rawn au tawk tawk a, chhan pawh chhang lem hlei lovin ka tlan tlang nul nul a,


Nehu bus ah chuan ka chuang ve vang a, ka first day ani a, Earphone chu vuah in Taylor Swift hla, Spark Fly ngaithla in bus tukverh ah chuan ka dak chhuak vauh vauh a, a bengchheng thin deuh e tih loh ah chuan, an kawtthler vel hrim hrim te hi a nuam ka tih zawng tak ani! A boruak a nuam in tlang ram tho ni mahse, Mizoram boruak ai thlawt chuan a nuam fe zawk! A ram a mawi in a mi cheng a te changkang tak ni lo mahse sap tawng a han biak theih loh mang an awm lo va, a hahdam thlak vel vek mai! University ngat phei chu a nuam leh zual, 1st day a nih angin kan class room tur pawh kan zawn hrep hnua kan hmu thei hram a, University lian ve tak zawng a ni chiang a lawm!



Mizo pawh kan awm nual a, ka rin dan ah kha chuan hnamdang hlang kar ah Mimi-i nen kan in rawlh ve kawk dawn amaw ka tia, a nuam dawn e! Class a mumal nghal em em hran lo va, Mizo leh mizo lo a rukin ka zawng char char ani deuh mai!


Lunch break ah Mimi-i nen thianthar kan chhar der a, Ruatsanga leh Mamuani, in ngaizawng an ni em phei chu ka hrelo, an lo awm dun ve deuh chawt a, thla kan la ho nghal deuh chuai chuai a, an ni pawh an vawikhat na ve tho a nih hmel!


A ni khat na chu nuam ti tak chuan kan hmang zo nghal phawt chu ania! Bus bawk a let leh in Mimi chuan min chhuk san hmasa a, Mizoram house lam chu ka pan leh phawt a, ka thlen meuh chuan nutei'n engkim a lo pack fel leh diam tawh!



"Ka chawl phawt duh sin." pangchang chet a meng nur chung chuan a ban ah ka pawh sak vel a,



"Hey, khatiang a inti naute thar leh vel rual i ni tawh lo aw." Ka chal ah min pen fawk a, a na reuh tak tak! Nula senior tih tak ah a kut thlak chu a na teh e!



"Hostel ah i mu tawh law law mai dawn nia i duh chuan, kha bag kha lo ak rawh, Hostel ah lut phawt ila, kan bazar leh mai dawn nia." air bag lian zet chu min ah sak a, kan chhuak leh nghal daih!



Taxi a ko chawp a, Motor tam dan em em hi! a ngaihna a awm lo reng reng! Chhungkaw pakhat hian a lo ber ah motor pathum vel an nei vek ang a a rual in an khalh chhuak thup thup emaw tih mai tur hi a ni ringawt!


Darkar 1 hnu vel ah kan Hostel kan thleng a, Fee te in pe fel nghal in a neitunu ni awm tak, nimin lam a kan biak nu bawk khan ka room awm na tur thleng min hruai a, 2nd Floor, Room no. 18 ah chuan kan in dah lut a,



"Te, keimah in ka inti fel thei tawh mai ang, i chau awm si nangpawh, zanin a haw nghal i tum phei chuan awm hahdam dan tur ngaihtuah zawk rawh." Ka khum fel min phah fel pui nghal a tum chu ka dang lui a,




"Ka ngaih hi a ngam thlawt thin lo alawm, che puat puat lo la, i kum mil khan che ang che i hria em Lalduhsak." ka ban ah man in nghet tak in min chelh vang vang a,



"Mmmm," nui var var chung chuan ka lu ka bu nghat nghat a,



"Lawkin, kal turin mi ti teh ngawt a, i mamawh tur thil vel te pawh chu." kan sir a kan hostel neitunu ding ve reng chu a melh zeuh a,



"Aaa, Mimi-i a awm tho, min ngaihtuah lutuk a nih kha..."



"Ma'm, can i still go for shopping?" enge maw a lo la din ve reng ni! Mahse a hranpa a an in a zu dil leh kher a ngaih loh phah a, a zia viau tho!



"Kal thei e kal thei e, mahse dar 7p.m hma in lo let leh la." nui sang chung in vai ho style in kut zai zir nen zawng zawng min chhang a, a ngainat awm ru phian mai! A in chei dan lah hi a zahawm phian reuh bawk sia!



"Khawi kal ang, Mimi-i pawh kan bia ang e." Room atang chuan kan in zui chhuak nghal a,



Kan tawng hrethiam ni awm fahranin ka nutei'n min hauh lai vel te chuan kan hostel neitunu chu a lo nui ve vur vur zel a, ka awm te a ti nuam lo rum rum e a!



Gate pawn kan thleng a, ka nutei nen kan in thlah fel a, a kal liam tur chu ka en reng a, ka ngai ngei mai! A awm lo chiah chu ka ruak huai mai! Han kal ve mai ka tum a, khawi lam ah nge ka kal ang tih pawh ka hre der lo! A hmun hma hre chiang zawk leh ka chhuah pui tur ber Mimi-i bawk chu ka call leh ta ringawt a, kal tur a min tih na apiang ah chuan ke in ka kal ngat ngat mai! Taxi tih vel pawh ka la ko ngam ve chiah lo!




Police Bazar ah leh Vishal ah Plastic item lam leiin ka mamawh tur ka ziah chhuah ang ang chu kan lei kim in ka hre tawh, in khai bawr ve tak kan ni!



"Mimz, ka haw na tur lam ka hre tawh miah lo ania!" ka hawi kual ruai a, a khawi lai kawng peng ber hi nge ka kal na lam pawh ka hre tawh lo e!



"Oye, Uncle, Dhankheti?" Taxi ding lai chu Mimi-i chuan min biak sak a,




"I hlau ami?" engmah sawi lo a ka din reng dan ah chuan a hrethiam nge mawni!



"Hihi" za lo tak chuan ka nui lui vel mai mai ringawt!



"I va han hahthlak tak e aw! a hlauhawm loh, hmeichhe lalna ram a nih hi, nangmah khan han ngam em em phawt la a dik ani mai." a hah ve deuh tawh nge ni a vin vei hlak hlak a,



"Chhe hlik hlek reuh sia a, nihleh, ka lo be leh vat ang che." Taxi ah chuan ka luh san a,



Buai tak te in kan buai a, hun hmang dun reng e ti lo chuan a kawm pawh kan in kawm hman meuh lo! "Heti lam ah heti lam ah" ti reng reng in hun kan hmang ani deuh ber!




Dhankheti kan thleng a, hmeichhe Lalna ram a tih tak ah chuan ka ngampa ve deuh hlek a, kawng pawh ka hre ruai ruai a, Hostel chu ka thleng ve mai bawk a,




"Ahh!" ka room ka hai amaw ka tia ka chhuak leh zuk a, 18 tih a in tar tho bawk sia!



"Hello?" ka chhuah hlan in a lo lut ani ang!



Ka roommate tur ani ngei ang, a khum a lo siam mawlh mawlh a,



Eng dang mah sawi lo chuan ka in ti fel ve nghal mawlh mawlh a. A vawt deuh vur mai, ka intih fel zawh meuh chuan Dar 7 a ri thuak tawh mai! ka bucket khai chhuak in Bathroom lam ni a ka hriat ah chuan ka lut chawt a, ka hresual bik lo e!



Ka inbual fai ser sawr hnu ah chaw te la in ka room ah ka in hnawh puar a, ka roommate nen pawh kan ka in nuih suk suk ringawt!



Zothana nen kan in video call pah ve reng a, an inkhelh chanchin te ka zawt a, anin ka ni hman dan te min zawt ve niah niah reng bawk a, Zothana hi College kan kal lai a kan senior a ni a, a thinchhe deuh thin tih loh ah chuan sawisel na tur vak a awm hran lo! Mahse, kan in hriat tan tir te ngaihtuah chuan, a zia ve sawt khawp mai, Vanapa chanchin hi vawi engzat nge ka hrilh tawh pawh ka hrelo! Bei la bei nawn rawh tih thupui ah ka hmang a, a hlawhtlinna ka hmu chho ve mai!



"Hey Sis, tunge i hming?"



Zothana nen kan inbe zo chiah, chaw la ei mawlh mawlh chung chuan ka hma zawn a a chaw dawh ei ve mek ka roommate chu ka be deuh thawr a, hming te kan in hrilh a, Palei, Khasi mi tho ani.



A nui leh sen sen thin a, a sang tha zawi zawi viau lehnghal, a hmel pawh a chhe hran lo a, kum ah erawh kei ai a naupang thung! Kan zirlai te sawiin kan in kawm zui ve ta chiam a, a nui duh bawk sia, a fel hmel reuh tak tak!



Lehkha zir tur la awm hek lo, ka chaw ei na te ka sil fel hnu ah ka mu deuh thawr a, chhun lam a kan thlalak vel chu ka en mai mai, Atei thlalak te ka en a, ka ngai reuh ngei mai! Zothana lah naktuk lam ah match khelh tur an neih vang leh vawiin lam a a inkhelh chauh deuh vang nge a muhil leh hmiah tawh mai bawk si!



Ka khum bul ah tukverh atang a ni zung rawn lut chuan ka hmai ah a rawn chhun chiang kher mai! Mut hleihtheih pawh ani tawh lo!


"Ka khum hun dan ka thlak chiang ngawt ang!" keimah in ka phun hluk a, ka thiani khum lam ka en a, a lo tho daih tawh nge ni, a awm miah lo!



Inbual tur in pawr leh phak zet in ka tho chhuak a, a tu hi nge mizo a mizo lo pawh an tawng loh chuan ka hre hrang thei meuh lo e a!




To be cont.

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » January 5th, 2020, 3:40 pm

Story of Matthew
Chapter-3



Duhsaki P.o.v




A ni thum ni atang in class a mumal chho tan ta tak tak a, assignment leh project work a in chhawk in kan nei char char! Zan ah rei tak tak men a ngai a, Ka roommate in mut hma a duh thin si, inthlahrung ru tak chung in light ka on eng ut reng thin a, Zothana lah lo inkhel chau ve bawk thin nen, kan inbe tlem rih ang reng khawp mai!



Hun hman dan ngai a Thla thum zet ka hman hnu ah phei chuan kan inkar chu hla tawh tak ani!



August thla lai hawl kan thleng ve der a, boruak inthlak dan hi a mak ang reng khawp a, khua hi lum up si in ruah a sur leh ang huk zel a, ka inchei sual fo mai! Kan department a mizo ho in len chhuah kan rawt a, phur hlawm fia fia tak kan ni! Ruatsanga hi Shillong a awm nghet sa ani bawk a, a motor rawn keng chhuak in Mimi-i nen Manutei te nen kan chuang ho a, Shillong a awm nghet sa an awm nual avangin thenkhatin 2 wheeler te an keng ve bawk a, kan in zui ve dam dam mai! Cherapunjee a kal kan rawt a, Crop Hoodie var leh mom Jeans ka ha a, converse nen ka sam ka thlah mawl tawp ringawt. Boruak a nuam ngei mai! Shillong atang darkar 2 vel kan tlan hnu ah kan thleng zui mai a, Sumdawng hausa fanu mah ni ila, ka nu leh pa hian an zin khawthawn na vel ah vawikhat mah min la hruai ngai lo va, ka thlen tawp na apiang hi ka tan chuan thil thar ani deuh zel mai! Ka phone kal tlang a khawvel tukverh a ka dah chhuah chuan hmun nuam leh mawi tak tak ka hmu fo va, ka la cheng ngai lo thung! Tun hun hi a tak ram a ka chen theih na ah chuan a nuam ka ti in a mawi ka la ti ber ang!



A hmei a pa in Beer an hum nghal fir fer a, ka tem ve chak viau na chu Mimi-i hian a duh ve si lo a, rawng kan bawl dun ta rinngawt! Kan bul ah Ruatsanga pawh a rawn tal ve chawt a, kan inngaizawng emaw an ti vek hlawm lehnghal a! Ani pawh hian ngaihzawng a nei ve tho a, Naga nula chhelo zet, kan hostel ami lehnghal nen an in lang vak lo hian an in zui ve a, engvang a min hrilh nge a nih phei chu ka hre chuang lo! MSU lam ah te a fawng vuantu a nih ve vang hian a bialnu nen an inkar hi mi hriat atan a mawi vak lem lo a, ka khawngaih reuh tak tak!



"Nang hi, tunlai in pa chanchin i va sawi khat ve a?" A thil in hian a lu a ti hai phah ve deuh nge ni, nichin atang tawh in a nui hui hui reng a, a tawng ring thei nasa mai bawk si!



"Kan inbe tha hman lo elawm, kei ka buai a, ani a buai bawk a, kan hman hun a in rual thei lo elawm!" Tomato chan mawlh mawlh chung chuan ka titi ve siam siam a,


Zingkar ah leh kan mut dawn ah text message chhiar tur kan la in hnutchhiah sak zui ve hram hram a, mahse nizan leh tukin zing lam ah min rawn be tawh miah lo!



"Then daih rawh, ball amaw a ti che nga, a la pet tuk tuk mai ang che." dang nal zet, aw per fahranin LalMimi-i chu a rawn tawng chhuak ve hlawl a, a nui zui nghal har har a,



"Nangkha, chutiang a nih dawn chuan in pa in khawl chhia emaw a ti che ang a herh hawn chhen che a tum mai tur a sin." ner nak chung in ka au deuh lang lang a,



"Hneh sawh ve thei sia maw, i phone i tih chhiat leh hun ah a man tlawm in siam sak tawh suh ka ti dawn." Kan nui dun hek hek a.




Eirawng kan bawl fel zawh hnu ah thla la in kan kal kual ve leh thuak thuak a, tah te hian kan University awm zawk se aw! Haw lo in class room a riah tawp tawp pawh ka ngam ang!



Dar 5 rik dawn ah kham lo zet in min haw luih pui ta hram a, khua a thim thet thet tawh a, hetiang em em a ni tla tur mawi tih te hi ka la nei ngai miah lo! Kal leh ka rawt nghal char char a, naupangchhia lutuk tiin mi an nuih zel bik lehnghal a!



Traffic jam nen dar 7:30 ah kan hostel ka thleng hram gate a lo in lock vek tawh a, deadline pel a ka tlai vawikhatna ani a, warden te ka hmu hreh ngang mai! Kan hostel neitu te in lam atang chuan ka lut kual a, an fanu a lo awm a, a hmel atang chuan kan in rual vel ang tih tur ani, zawhna min lo zawt deuh hrep a, ka ngei reuh tak tak! Mahse ver ther tak a min zawt a ni hran lova, A nu in a min zawh tur ang tho ani bawk a, nu ber hmachhawn ai chuan a zia tho tho e! Gate min hawn sak a, Hostel a lut chho zuiin ka room ah ka lut a, Palei-i chaw ei kham nen kan in tawk a, ka hun hman dan te min lo zawt deuh chiam mai!



Hnamdang roommate ka nei chu sap tawng ka hman tam phah a, in zir nan a hmang in keimah ka inrin tawk phah zel a, hrehawm han tih ngawih ngawihna tur hi tun thla thum chhung hian ka tawng lo ti ila, ka sawi sual lo lutuk hi keimah leh keimah hian Amen pek zui thuai thuai te ania ka duh ni!




"Aaaahh Palei ka chau lutuk." khum ah ka bawk thla zui thlawp a,



Ka phone ah in min kam run avang chuan ka la chhuak a, Missed Call a lo la awm zui, ka en vat a, Zothana'n vawi 4 lai a lo call, engtin nge maw ka hriat loh theih ni! Ka call let nghal vat a.




"Mmmm, i va la thei lo ve." a mut a lo chhuak leh hman tawh nge mawni a aw teh chhap chu! A tham leh chhelh tawh!



"Nia Hostel ka thleng chiah a, inbual pawh ka la inbual lo, ka bawk nghal thlawp mai." ka chhing siar siar a,



"Englo ania, Duhi, nangpawn i hriat ka ring tho a, kan inkar hi a hla sawt lutuk a." a thaw zui halh halh a,



"Mmm sawi rawh." keipawh ani ang tho in ka thaw ve halh a, chauh nen, boruak a rit duh viau mai!




"Kan inkar hian awm zia a nei tak tak tawh pawhin ka hre chiah lo a, ti reng hi chuan a dik thei lo, hun kan insiam thei lo ve ve a, han phun nawi tur pawh kan awm lo ve ve a, kan inkar hi,... ti tawp tawh mai ang." a tawng ban chap a,



"Ni e, awle, hlim deuhin awm rawh aw." ka thinrim vang pawh ni lo in ka hang up zui nghal daih a,



Ka rilru a na em pawh ka hre chiah lo! mumal tak a kan inbiak loh na a rei tawh bawk nen, chutih teh ual in ka la na hran lo pawh ani ang e!



"Huiha! Kan inti fai ang e." keimah leh keimah inbia in ka in beng kang a,



"Engmaw?"


A mah ka bia emaw ti in pakhat lah in ka thusawi hrethiam lo zet in min lo en haw a, kan han in hrilhfiah leh rih thin a, zing kar ka thawh hlim ah min wish nan nui sang in 'Ka mitmu a pawng lutuk' a rawn ti ziah a, a nuih loh theih loh thin! Nakin ah ka la hrilh tha ang! Thil nilo lo ka zirtir a, keimah zawk pawh ka inthlahrung e a!



Tui vawt a darkar 1 zen zawn uluk tak a ka inbual meuh chuan ka harh kawk mai, mahse mu lum chiah ila, rang lutuk tak a ka muthilh nghal ka ring!



Dryer in ka sam ka tih ro hnu ah ka blanket lian leh lum tha zet a inkhuh fel a, hla ngaithla chungin thlalak te ka en zui mai mai a, ka taksa a lum tan a, rin ang ngeiin ka ham nghal bai bai mai!



"Goodnight Palei." Light chu ka down zui nghal a.



Ka hun hman dan a danglam thei tak tak lo, zirna lam in min nawr nasa bawk nen, Class ah Ka hnampui te nen kan in kawm bak pawn lam ah kan in kawm zui hman meuh lo a, Mimi-i nen erawh kan chhuak dun zeuh zeuh a, Palei-i ani leh tawp bawk a, chaw pangai aiin Momo leh Pani Puri ka ei nasa tawh zawk bawk a, thau a pai tam vak lo a ni ang chu, ka cher ruak tawh tih keimah pawh ka inhmu thei!




"A ninawm e LalMimi phone kha dah ve em em teh, inbiak reng a ngai lo."



PB ah bazar turin kan chhuak a, a bialpa min biak san char char, third wheel nen danglam na a awmlo!



"A dang hmu zo si loin enge i then vei dawk dawk, min thik a nihkha." kut invuan in kawng kan kân dun a, kawng kan hi a hlau thin a, a kut thlah in ka tlan san thut a, a rawn te zui nasa!



"I va han sual ve tak e aw!" ka hnung a ri zui dawt a, ka nuih ngat ngat thung!



Test neuh neuh nen October kan chuang kai ve leh der a, Diwali lai ani a, a tu a te pawn an kawt leh in vel te pawh an chei nasa hle mai. Zanah phei chuan halpuah nen an ri nasa leh chuah chuah ang chu!



PB ah bawk kan bazar leh a, Deadline pel leh hram in tun thla a a vawihnhih nan owner te in lam ah bawk ka hel leh a, thil sual ti a leng chhuak ka ni thin lo bawk nen, ka hlauthawng lo ve em em tawp mai!



Rin lawk ang ngeiin chaw ka ei ka eikham hlim atang chuan hmun tin atang in ri a rawn chhuak tan a, kan naupan lai te pawh min hriat chhuah tir e a! Khawvat vur kar a zen rim a nam vung vung zel mai te kha a thlasik rim bik riau ka ti thin!




"Duhsak, rooftop ah chho ila, Fireworks vel a tam thei teh a nia a nuam thei lutuk." Kan naupan lai a kan hal ve thin halzit ang chu bawm 4 lai a la rawn keng zui lehnghal a!



Phur lutuk tak a zui chhuak nghal in roof top ah chuan kan chho nghal a, a lo eng pup pup mai! Hosteller zawng zawng kan in hmu khawm dawn emaw tih tur khawp in kan tam a, kan ri chel chul hlawm mai! Kan warden te hi Christian an ni a, mahse an hosteller tam zawk te hi sakhaw dang vuan an nih hlawm avang in an zah sak a, zan in ang ah chuan an duh dan ang ang a lawm an phal sak thin a ni awm e! Paleii hnen atang a ka hriat vek ani! Henu pui hi kei ai hostel ah hian a lo awm hmasa daih zawk a lawm le!



Kan Hostel nei tute in kawt atang chuan Fireworks nalh zet zet a rawn thlawk chho reng a,



"An fapa kha a lo haw leh tawh amawni le, aahh, ka hmu chak lutuk!" mipa chungchang a sawi ka vawikhat hriatna!



"Wow, kan Paleii hian duh alo nei ve reng a ni maw?" chhaih pah chuan ka nuih var var a,




"Hey, a hmelthat zia aw hosteller chuan kan star vek ang."


Hmeichhe 80 vel in an star vek tur mipa chu ka hmu ve chak ang reng ngei mai! Ka awih chiah lo zawk, hnamdang ho hi chu an sawi uar ve hrim hrim thin bawk nen!



Kan hun hman lai mek chu hriat reng nan tiin video in ka cover a, Thla hnih hnu a thawveng tak, engthawl zet a ka hun hman leh na hmasa ber a ni hial ang chu mawle! Hmun tin mai chu a eng chuau chuai reng a, ka naupan lai a AR Ground atang a 'Kah ên' an rawn kah thin lai te pawh min ti hrechhuak e a!



Dar 10 vel ah thawm a reh ve ta deuh a, ka hritlang vek! Pik lukin ka thiani pawh ngaihsak zui lo in ka chhuk thla a, ka kut hnawr leh ke lam vawt lutuk tih lum tumin ka in khum ah ka in khuh nghal hlun a, ka khua a sik er er mai! Ka pi ka rilru ah a rawn lang zawk a, mahse a mut a hun tawh bawk si! Nu kut dam tak aiin ka pi kut in min chul tam zawk vang te pawh ani mahna! Ka awm bo hnu ah ka nu leh pa te hi pawisa ka mamawh bakin ka be lem lova, ka nutei leh ka pi ka be nasa zawk!




"I tha em Sis." Zan lai ah nasa tak in ka tlun chiam vang chuan Paleii chu ka mut hmun atang chau tak chungin ka au tawk tawk a, min rawn hmuh rual rual in min buaipui zui vat a,



Ka damdawi dahna te hrihin min kuah rih tur in ka ngen tawp a, pawi tih loh hmel tak in nui sang in ka bul a lo mu in min kuah hlun a, kei ai a san mai bak ah a lian zawk a, min kuah hneh ve reuh lutuk!



Zing ah kan kawngka rawn kik dawt dawt an awm chuan min ti harh a, tho tur a ka chet rual rual in Paleii pawh a rawn harh ve nghal a,



"I tha em?" ka khua a la sik em tih hriat tum ni awm tak in ka chal chu a rawn dek a,



Nizan a min buaipui dan atang hrim hrim tawh khan ka thinlung tak hian ka pawh zual vek tawh! Ka pi ang maiin min duat alawm le!



"Ka tha tawh lutuk, ka lawm lutuk, enge i ei duh ka treat ang che." lawmthu sawi dan vak ka thiam lo a, eitur leisak ngei ngei ka duh!




"A ngai lo eng mah." kawngka lam ka pan a, ani in kan puan sin a lo thlep tha mek thung.



"Hey Palei, com come come." A thiannu niawm tak in phi cheng in a rawn kai chhuak dawr dawr a, ka sawi tawh kha, thenkhat hi chu an over ve mah mah thin!



Ka intih fai hnu ah ka ril atam ve teh tlat a, chaw dawh turin kitchen lam ah ka chhuk thla a, Paleii chu a bo zui daih! Khawnge a kal pawh ka hre lo e a!



Ground Floor atang hian kan hostel neitu te in hi chiang tak in a lang thei a, an kawt ah chuan a hmel ka la hmuh ngai miah loh, la thalai tak ngo ving veng hmeltha zet hian Bolero sil in a lo phuh kual nasa a,



"Hepa hi amawni le Paleii te sawi chu" ka rilru chuan ka inkawm mawlh mawlh a,



Hoodie dum ha in a sam a buk chhep tih chu ka hria a, a bak chu ka va hmu chiang thei em em lo! Kal hnai hran lo in ka din na hmun atang chuan hmuh chian tum in ka melh ngat ngat a, a motor sil lai chu an ui lian zet ka hlauh ruk deuh thin in infiampui duh tih hriat takin a lo tlan hual thuak thuak reng a, tui te chuan a phuh vel a,



"Hey, i ding rei tawh lutuk, kan star vek ka tih kha."


Engtik laiin nge Paleii ka bul ah a lo din pawh ka hre miah lo!



"A chhiat hran loh saw, mahse ka type lo." ka nui suk a, kitchen ah kan lut zui nghal daih!



Kut zai zir zawng zawng nen chaw ei laiin a duh thin zia, chhe lo a tih zia a sawi char char, hmeichhia hi chu kan lo heti vek anih dawn hi a, mipa ngaihsak miah lo emaw tih pawh hian duhzawng nei ru in an lo a ve vek anih hi!



Exam a hnai ta deuh a, lehkha zir lam ah ka in sawr bing tan a, class ban ah zan eitur nen ka in lei lawk a, tih loh ah chuan hostel ka chhuah san meuh tawh lo! A vawt tawh bawk nen, mawza nen lukhum nen a in thuam lum up reng a ngai tawh! Mahse nuam ka ti zawk! In chei a nuam zawk miau a.




"Hey Sis, fee i pe tawh em? zu pe ila?" a luggage atang a pawisa phawrh mawlh mawlh pah chuan min rawn sawm a,



"E Oh! Ka lo theihnghilh leh hman!" ka khum thawh san in ka pawisa ka la chhuak ve leh nghal a,



"Kal ila?"



Eng atan nge maw lipstick te chu a lo inhnawih ni! A over ve chiang e! A phur em em na chhan ka hre chhuak thut a, chhaih pahin ka nui tut tut a, a lai nghal em em ringawt!



An kawt kan thleng thla a, an ui lian zet pawn a lo bawk run chuan mi a lo ngur leh chhur chhur tawh, ninawm e! Min hmuh ngun tawh tehreng nen, kal apiang in min lo ngur ve ziah!



"Anu!" an ui chu rawn tho in a rawn bauh thut a! ka te thawt! ka thiani lah bang chuang lo! Gate ah chuan kan bet dun rawk rawk a,



Inchhung lam atang a khap tu an awm tak ah chuan a ngawi ve leh mai a, amah hel du du chung chuan inchhung chu kan lut a,



"Enge ni ta?" nui sang chung in kan mipa hmelthaa chuan min lo bia a,



"Fee kan lo pe dawn a," Paleii chuan a sam a chul thuak a, keipawh in ka la hmuh ngai reng reng loh khawp a mawi in an nuih let a!



"Ka nu a awm lo a, mahse ka dawng thei tho, receipt erawh nakin ah in lo lam leh mai dawn nia." Living room lam ah chuan kan in zui lut tham tham a,



Register la chhuak in kan in pe fel a, a hmeltha! A hmeltha thlawt! Mipa hi 'a van hmeltha tak' han tih ngawih ngawih hi ka nei ngai miah lo! Kan din ho lai khan ka lo en a, a dar ka chen vel tawk ang! A kut tang te hi, mipa kut tang atan chuan a no tep maithei! Mahse a nu chuang miah bawk si lo! a mit khur a thuk hran lo a, ka ngaihpawimawh em em thin, a hnar pawh nalh veh vawh tak ani! A hmui a sen chek reuh lehnghal a, ka seh hlawk chak lutuk! Thu thiam deuh hlek te chuan ziak chhuak dawn se a heh sen no chek tiin uar zetin an ziak chhuak ang mawle!




Kan thiandun chuan kan khi chhuak vur vur a, a hrehawm duh ngat ngat e! Kan room kan thleng chho a, dawhkan hma a thu in dawhkan ah ka lehkhabu ka chap darh nuai(h) a, ka rilru ah a lut thei tawh hlek lo lehnghal! A hming te, enge a tih thin ang tih reng reng ngaihtuah in ka hun ka hmang a, enge maw ti takin ka thiani lak ah ka inthlahrung ru tlat lehnghal a!




Kan Hostel a mizo awm ve dang te pawn an duh hlawm zia tukin ah khan ka hre thei! An sawi sap sap hlawm mai! Ka ning e exam dawn dawn ah! Hetiang te chuan engtin nge ni ang a! Ka lehkhabu keu lai chu la in khum ah ka bawh thlak pui rawk a, ka zir peih tawh loh sa nak lai a, vei tur thar lo awm kher kher bawk nen!



"Haaaa!" khum ah chuan ka let zui chiam a, ka roommate in min nuih tawp! "


"Hmelchhepa, enge tun ang hun ah te i rawn in lan dawk dawk le!" ka kut pahnih a in kek chung chuan ka au nghek a,



"Enge awmzia?"


"Engmah engmah." Huiha! a hrilh pawh ka hrilhfiah peih rih lo!



"I zir tawh em? engmah ka zir theilo, kan hostel neitu te fapa hi, ka thih chilh dawn." Mimi-i call in a pick up tih ka hriat rual rual in ka ri nghal chul a,




"I ninawm sia a, a sek leh em?" a rawn nui har har a,



"Sek lo, i ninzawm ve ziah."



A hmel ka hmuh dan zawng zawng chu ka sawi thiam dan ang ang in ka sawi zui hrep a,



"Nakinah min hmuh la, ka tihpui dawn che nia,"



"Awi awi, nang khan sawi bum bak engmah i thiam lo." Ka lehkhabu chu dawhkan ah ka vawm chho rawk a,



"Ka mu dawn, ka mumang ah kan in muah tir mai mai te'ng"


Call kan hang up a, ka mut hmun ah tuma lawm loh in ka nui vur vur reng a, mak takin ka nui lai tawp chawtin ka harh zawk a! 'Hnam dang ani.' tih a rawn thangkhawk rum rum in ka hria!



Mahse ka ngaizawng in ka bialpa tur ang in ka ngaihtuah tak tak chuang hleinem tiin ka in hnem a, kan Society a hmeichhia, mahni hnampui ni lo ngaihzawng nei a pasal a nei te ngat phei chu an hmingchhiat thin zia ka hria a, ka lo ngaihtuah thui zui vak ngai lo na chu hmingchhiat hi ka thil hlauh ber te zing ami ani! Engvang pawh chu lo nise, a chhe zawng a mi te sawi rawn nih hi ka thil tawrh theih loh tur zing ami ani!



Zing ah thawh ka hai vangin hmanhmawh zetin ka intihfai hnu ah ka insiam sawk sawk a, Bus nan hman tum in ka sam khuih thuak thuak chungin ka tlan chhuak vut a, hmelchhepa vang vek! Kawt ka thleng thla a, a tlan hian ka tlan char char tawp!



"Hey Sis i purse i thlauh?" Hostel neitute in lam atang chuan aw a rawn chhuak a,



Ka hawi vut a, hmelchhepa khan min lo en reng a, Hoodie maroon color a lo la ha zui! A mah a ngo bawk si, a inhmeh uchuak lutuk! a lukhum a khum kher zel bawk si! A sam a kir chhep reuh bawk si!



"Hello? i purse?" ka purse thlauh chu a kawk zauh a,


Ninawm ka tlai tawh sa nak lai a, khaw dang hawi thei lek lo a mi siam le! Ka chhar lawk a, ka hawi phei leh thuak a, mi a lo la nuih var var zui a, a ha to thuah inhmeh zia mai chu!



"Ka lawm e." ka nui let seih a, ka sam ka chul thuak a,



"Hey Matt, i awm maw?" a thianpa ni awm tak chuan min rawn kal pel a, a au zui lang lang a,



Inchhung a lut turin an in her a, kawngka bul atang a rawn hawi let in nui var var chungin a ban a rawn vai vut a, ka thal tawp dawn in ka hria!



A hming kha ka hrechiang lo, a thiante koh thin dan ringawt pawh a ni thei a, mahse ka hriatsual loh chuan 'Matt' a ti tlat in ka hria!



"Matt" ka nui sak a!





To be cont.

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » January 5th, 2020, 3:40 pm

Story of Matthew
Chapter-4



Duhsaki P.O.V



"Matt." a inhmeh ka ti ngei mai!



"Aw hello?" Ka phone rawn ri ral ral chu ka pick up vat a,



"Tinge point ah i lo awm loh a, i kal tawh ami?"


Bus in min tlansan chiah aniang! A pawi lo, bus ka nang hman lo ringawt alawm, Taxi ka la tawh mai ang, ka nan hman loh chhan a tha tho emai! Ka biang sa het het chu ka kut vawt thler a dawm vang vang chung chuan hostel campus ka pel thei hram e! A van nuam tak!



Class ah pawh Mimi-i leh Ruatsanga bul ah ka sawi chhawk chhen a, Ruatsanga chuan min sawi phur pui viau a, Lalmimi-i erawh in thutak khuk in min khuk pui duh thak lo thung!



"Khasi thian hi ka nei nual a, ka pa in tih ai chuan ka nu in ti hi an tam ania, an nu te an hlau thin tlangpui ania, hmeichhia hian Mommys boy lutuk ang chi hi in duh lo tlangpui in ka hria." Ruatsanga'n break lai thil ei pah in min la hrilh ve sep sep a,



"Chutiang a ho emai, a hmelthatna a dal lo." thawveng zetin ka nui zui har har a,



"Huiha, i hahthlak mang e." beidawn hmel zet a a chal a dawm chung chuan a rice order lo thleng chu a hawp nghal mawlh mawlh a,



Ka thusawi engkim hi Matt-a chungchang vek hi a ni tawp mai! Ka roommate bul a ka sawi ngam loh zawng zawng ka sawi vek hi ani ringawt! Engvang a inthlahrung tlat nge maw ka nih le! An in ngaizawng pawh a ni chai si lo a!



Haw lam ah Bus in kan haw a, kan hostel thlen hma deuh hlek ah chhuk in Pani Puri leh Momo bawk ka pack tir leh a, Thla 4 chhung chu tlai tin deuh thaw ka ei thin a, ka hne chuang lo reng reng!



Gate a ka luh rual rual in ka vei lam pang chu ka melh ru zuk zuk a, an ui ka hlauh deuh bak thil nung hmuh tur a awm miah lo! Hnual ru tak chuan kan room lam pan in ka chho hna hna a!



"I lo haw tawh maw? keipawh ka thleng deuh chiah." Paleii chu a lo in ha tha mawlh mawlh a,




"Mmmm, ka chau lutuk mut ka kham lo si." khum ka thleng chiah chu ka ke te hi a kham thar ut ut in ka hria! ka kal tam loh teh reng nen.



"I ei ve duh em?" ka thil hawn chu khum chung ah ka ei nghal mawlh mawlh a,



"Aih, nakinah receipt kha zu lam ila?" a lo in hnawih tai leh hlar tawh! Ka tan thei chiang e!



"Tehreng mai!"


Ka lo theihnghilh leh hmiah tawh! Amah khan min han pe ngei bawk se la(h)! Mahse ka mut a chhuak nguai reng mai!



"Aaa, Palei, nangmah in kal mai la! Ka mut a chhuak lutuk." inthlak tur pawh in tha ka nei pawn ka hre tawh lo! ka thil ei zo chu khum ah ka let thla nghal tawp a!



"Ok, Fine." A mah pawhin phur surh surh tak ani, receipt lam tur ah chuan a rimtui ber awm e!



Ka taksa lum leh thlan hluam vang chuan ka harh ni berin ka hria! Ka mumang ah pangang lian lutuk tak mai in min um a, LalMimi-i lah chuan inchhung a in kalh hnan chungin min lo nuih sawh vel a! Ka haw tak tak ani! Ka te chhuak em lo ani ang chu kan receipt lam rimtui beri hian a sawi lo emai!



Chaw lak hma in ka inbual harh a, tui ka lum peih thin bawk si lo nen, ka vun chuar deuh lai te hi a mar awt awt in ka hre thin! Vawt tak ani vawt tak!



"Tlai ah chuan i zu che tha em?" a lehkha zir be buaiin ka zawt sek a, a tum bur lehnghal! A zu hmu lo nge mawni!



"Ma'am a lo awm a, an fapa kha chu hmuh tur a awm lo, an ui in min lo zuan thuak thuak a, ka hlauh zia chu a"!



Ka nui hek hek a, keimah ang tho in ui a hlau ve a, a awmdan tur zawng zawng nen a ka ngaihtuah chuan ka in sum thei thlawt lo! Mahse kei pawh hi keimah a ka kal a ngai maithei ani!




"Chaw ka ei ang a, min lam pui leh la, a lo awm tawh maithei a sin?" mahni chauh a an ui zu tawn tlang chu ka zuam ngang lo!




"Assignment ka nei sia, ka laklawh lutuk a." ka lam pawh a rawn hawi hran lo, a ziak mawlh mawlh mai.



Huiha, ka nuih chiam ringawt a, amah ang tho in ka zu awm ve dawn nih hi! Chaw chu ka ei a, mess hi ka hne tan, a tir ah kha chuan ka hostel awm tawh na te ai chuan an mess a tha ka tia ka phur viau a, thla li ngawt han rin deuh ngar ngar chuan, a rim vang ringawt pawh hian ka ei chak lo! Chaw ei loh lah in pawisa a hek bawk si, phur lo deuh in ka dawh ang ang chu ka eizo vek tho!



Chaw eikham ah ha te nawt fai ser sawr in ka chhuk thla a, Ma'am hi a strict piah lam ah a fair ve a, amah zawk in tih sual a nei lo tih chian nan receipt hi a en leh thlap duh thin a, lak ve ngei ngei a ngai thin!




"Hey, shew.." Gate pawn a ka din rual rual in min lo ngur leh chhur chhur e! Pawn ah hian thlun reng kher a ngai amawni!



Ti dak chungin gate chu ka hawng a, a hlat thei ang ber ah ka chakai kal phei zai zai a, kawngka zawn ah ka awm tawh! A rawn tho thut a, ring zet in mi bauh nghek a, ka let dawrh a, Fence ah chuan ka bet reng ringawt tawh! A bauh nasa tawlh tawlh bawk si! Ka mit pawh ka meng ngam tawh lo! Ka tlan vak chuan an thlunna hi tal chat in min um hrep dawn te hian ka hria! Ka tap tuau tawh!




"Hey Buddy a tawk." Khasi tawng ni ngei in ka hria, an ui chu rawn khap tu an awm tih ka hria!



"Hlau duh tawh suh, i na em?" kut lum ther ther in ka sam a rawn chul a, ka meng ngam ve chiah!



Tap tuau chungin ka lu ka thing nar nar a, hepa hi, a lerh ve hrim hrim nge mawni! In a awm mai mai tur a hetia rimtui chek hi a ngai kher amawni!



"Lo kal rawh," min kai tho a, engtik laiin nge ka tluk pawh ka hre lo ve!



An ui awm loh na lam a min kal tir in inchhung ah chuan min luh pui a, Living room ah an chhungkua in an lo awm vei thap a, a zahthlak duh ang reng! A vawikhat nan Ma'am pasal pawh ka hmu ve chiah, Khasi an ang lo e! Mizo tawng thiam in mizo tawng hmang se, tuman khasi an ni tih an hre miah lo ang!



Receipt chu la in hreh zet in ka chhuak a, pawn ka pen chhuah rual rual in an ui bawk chu ka buaina a ni lehnghal! Ka ke bul vel a rawn hnim that that a, ka te leh that a,



"Hey Buddy, ti suh!" a pu aw a hriat ve leh a thu tharh a, thuawih ber awm ang zia zangin a lei a chhuah hlai hlai bawk a, ka ten reuh tak tak!



"Kawngka atang min lo en reng a, a nui var var bawk,



"Ka lawm lutuk, Goodnight." tha khur zawih zawih chung chuan ka nui seih thei tho!



A nui suk a, a lut daih! Nichin lawk ah min care em em a! Mahse ka sam ah min chul tal alawm le! Hlauh vang leh zah vang a thin phu dawt dawt in hostel lam ah ka tlan zui dat dat a, ka lai chem chem mai!


"Hey i va rei ve!" room ka lut chiah nui sang in Paleii'n min lo be nghal a,



"An ui kha, a bauh ri te i lo hre phak lo ami?" ka kut la khur hlawk hlawk te chu ka hmuh a,



Zangkhua a bungbu hi a ni deuh mai, ka chaw ei hma a ka nuih sawh deuh khan min nuihsawh ve leh thung a, mahse ani ai ka chan a tha zawk tho tho! Ani chuan a hmu lo a, keichuan hmuh chu sawi loh, ka sam ah te min chul a, ka kal liam thleng min thlir ania! Hmeichhe in vei tir dan a hranpa liau liau in a zir emaw tih mai tur! A hmeltha lutuk hi, sawi chhiat tum pawh ni ila a theih thlawt loh! Hmelchhepa pawh ti eng ang mah ila, a chhiat loh zia ka mitthla nghal zel tho!



"Hmelchhepa teh hrep hi a!" ka nui ver ver reng mai! Paleii ang a mawi a nuih zir ve mai te pawh ka duh tawh!



Ka lehkhabu la chhuak in phur lo zet in ka bih ve leh ngar ngar a, ka chhiar loh hlek chuan suangtuahna ram ka thleng hman zel!




Lehkha hi tih tak zet a ka zir chuan ka thiam zung zung a, ka thiante hian ka rilru chak zia an sawi thin a, ka awih loh thu te'n ka chhang ve mai mai zel! Mahse a dik ka ring, vawn ngai a awm tawh chuan rei hi ka chhiar vak ngai lo, ka thiam deuh zung zung zel!



Weekend mah ni se ka chhuak peih lo a, Lalmimi'n a lo len tur thu a sawi bawk nen, kan rules pakhat ah chuan hostel hmalam kawt zau deuh ah hian pawn lam mi hruai lut in kan kawm thei a, hostel building chhung ah erawh chuan kan thei lo thung!



Dar 1p.m a pel thuak tawh tih ah Mimi-i a rawn thleng a, Momo ka chah a, a eitur nen rawn lei tel in a rawn khai bawr nasa mai, kawt zawl a chawlhbûk te an sak ah chuan thu dun in kan ei tuam tuam a, Lalhmelthaa'n Bolero sil in an in kawt ah chuan a awm ve reng bawk a, kan in hlat hran lo.



"Sawpa saw ami i sawi chu?" Momo hmuam pawng purh chung chuan Hmeltha-a lam hawiin a mit ko a san ak ak a,



"Ni chiang e, ka haw dawn ah ka hrai rui ang a ka hawn daih dawn lawm,... en reng suh, a thei lutuk." a mit a la la sawn chhin lo re re!



"I hawn chuan in kawl chhawk ang aw." ka nui nghal hak hak a, henu tak hi chu aw!



"Enteh sawpa mix siam saw a tui teh mai nia, lei ila i duh ve em?" a khat tawk a ka ei thin mix zuartupa chuan a dawr te a rawn pu phei leh luk luk a,




"Aih, ka duh ve lo tiang vel hi, nileng lengin an vak kual a, an zung ve ngei awm sia, an kut pawh sil hlei lo in chana te saw an tham leh ang bawrh bawrh zel a, ka ten tlat." a teh hrep chuan! A nih duh hmel tho bawk si! Ka pani puri ei thin zawng zawng te nen ka mitthla a,



"Haa, eki khatia sawi kher a ngai lo e, ninawm min ti ten zo vek!" ka ner nang a, kan thusawi hria niawm tak in ka piah lawk a motor lo sil ve tupa pawh chu a lo nui var var a, dawithiam si lo ah chuan min ti a vek thei tur khawp hian a nui hmel te hi a mawi zual bik bawk si!



"Min lo hrethiam ula, in buai loh chuan gate hi min lo hawn sak lawk thei ang em? Ka in khalh chhuak lawk duh a?" mi rawn pan hnai in min rawn be ve teh mial a! midang pawh an tam nen keini kher!



"Aw i lo let leh thleng kan lo nghak ang che." a bialpa nei zawk Mimii chuan alo chhang vat a!



"Em em a che, i za leh lutuk, keiman kan hawn sak ang e." phur lutuk tak a tho vut in Gate chu ka lo hawn sak a,



A bolero fai zet chu rawn khalh chhuak in a rawn nui phei var var a, gate a uai lawp lawp mai te chu ka nap e a!



"I chhe e, khatiang chuan lo in ngaizawng ta pawh ni ula a zah lo ngawt ang che, chhiahhlawh ang maiin a en dawn che a sin." A chek zui tlak tlak a, a zak thei lo e! A mah zawk zawk kha a phur ah a tang reng sia!



"Mi i thunun duh chuan i tlawm hmasa ngam tur ani, i luhlulna nen a i hmachhawn nghal ringawt chuan luhlul leh luhlul in in su reng mai ang, i tlawm theih zia hriattir la, i duhloh zawng ah erawh i tawh khirh zia i hriattir chauh dawn nia, a dik thlap mai ang." kan zilh let deuh hrep a, nui sang chungin a bul ah ka thu thla a,



"Love Guru-i ni mai rawh." a nui ve leh nghal sak tho!



Zirlai te leh an pa chanchin te kan sawi zui luam a, Darkar 2 dawn chu kan inkawm zui leh tho! Dar 3:30pm pelh hret ah min haw san a, a reh ruih mai!


A mah ngai miah si lo in ka khua hi a har ru em em a, ka ngaihtuahna ah lah ka pi emaw ka nutei an lang miah lo bawk! Tu mihring mah ka rilru ah an awm miah lo! Mahse mal riau hian ka in hria!



Hostel lam a lut chho in kan room a luh mai ka tum a, kawngka ka hawn zet hnu ah ka khar leh uk a, in chung zawl lam ah ka chho tlang leh daih a, Ni in tlak lam a hnaih a, a sen phut mai! a chei mawi zual tur ni awm takin chhum a zing paw chiai bawk a, thlifim in ka hmai a rawn chhem heuh heuh bawk nen, a vawikhat nan haw ka chak tak zet!



Ngaihtuahna ruak zet a ding reng chung chuan ni tla tur chu ka en liam a, mit chhing chung a thawk la halh halh in ka in her a, ka pik leh luk tawh mai! A vawt ve bawk em ani!



Ka room a lut in damdawi ka eikhalh hmiah a, mufler te bat in ka inthuam lum a, lehkha zir tur a in tintuahin ka dawhkan hma ah chuan ka thu ren rawn a,



Ka rilru ah a lut deuh nge ni, chapter hnih chu ka thiam zo rang ngang mai! Chaw ei a lo hun reng tawh a, chawhnu lam a thil ka eihnem deuh vang nge mawni, ka ril pawh a tam lo!




"Riltam hun a ei ah a ni tawh mai." keimah leh keimah inbe mawlh mawlh chung chuan ka container chu ka la a,



Ka thiani sawmin inhnuai lam ah kan chhuk a, ka mit hleiin Ma'am te in lam ka melh leh zuk a, hmuh tha hmuh tur a awm lem lo bawk a, Dining Hall ah kan lut tlang nghal a,



"Sis, ta'n ei ve law law ila, thleng sil leh vel pawh a awlsam zawk a." Mi thianho chaw ei lai hmuh chuan thiante nen a awm khawm a han ei ve te hi a chak awm rum rum zel!



"Ka ril pawh a la tam lo a, nakin a ei ka lo tum deuh a." ka bottle ah filter tui ka fill chhunzawm mawlh mawlh a,



"Awle nihleh." a bottle fill ve leh in kan in zui chho lehnghal a,



Bialpa nei ta lo ta chu phone pawh ka khalh tlem zual a, group message ka en zeuh zeuh tih loh ah chuan phone ka khawih tlem ngang mai, lehkha ka zir peih tawh rih bawk si lo, chaw la ei peih bawk si lo chu khum a bawk chung in hmangaihna thu thlum reng reng ka dawn tawh ngai loh na phone ngei mai chu ka khalh ve nuap nuap a, class group a Advance Christmass hman dan tur an lo rel ho lai tak ani kher kher bawk nen, an thil sawi ho en let thuak thuak in kan like thla zut zut pek a,




"I zai tur pawh chu i pawm thlap ani maw?" nui thaw lem nen Ruatsangan min rawn be zui zat a,



"Engtia zai tur maw?" mak ti zetin ka zawt let hu a,



"Aw, Mimi'n i zai thin a rawn tia, a tha ang kan tia kan ziak lut vek tawh!"



"In zak thei lo lutuk, ka rawn kal nguar ang!" ka phone ka dah nghal hmak a!



A awm hian a ang lo lutuk! Naupan lai atang a nursery rhyme ringawt sak pawh a miss te nuih pui thin hian zai nuam ti viau mah ila ka thiam loh zia chu keimah leh keimah pawh hi ka in hrechiang, ka zaithiam tih hi tuman fiamthu pawn min hrilh ngai lo! A awm hian a ang lo lutuk!



Ka ngaihtuah zawng pawh in ka biang a sa nghal het het thei! Ka beng te hi a ling vut in a nia ka rin ni! a sa vet vet mai! Khum ah chuan duh lo eng ang mah ila, ka rilru ah a awm tlat pek a, ka tal sek ringawt!




"Ka be peih lo che min rawn be hlek suh." Mimi call ka pick up rual rual in a rawn nui nghek a, ka duh sawi zo in ka dah leh hmak.



Manutei leh Ruatsanga te nen an pathum in min rawn call sek hlawm a, tumah ka be peih lo! In phiar rukna a nih hi!



Lehkha zir leh ka tum teh reng nen! ka tui lo rawk tawh! Damlo, rei tak na tawh ang maiin ka mu bet thlawp a, chet pawh ka che thei tawh lo. Class ah ka sawi tha ang a ka hming ka thai chhiat tir leh tho ang! Khawvel a ka dam ve chhung hi chuan mipui hma a zai hi ka tum lo bur.



Ka muthilh lai pawh ka hrelo reng reng, kan room chhung chu a lo thim vek tawh a, ka phone hmet eng in dar zat ka en a, dar 1a.m a lo ri daih tawh! Ka va harh laklawh tak e aw! Ka pum lah chu a ri ruk ruk lehnghal a, ka khum bul a tui bottle ka dah chu ka la lawk a, tui ka lem nghal khawlh khawlh phawt a, ka chaw dawh sa ei turin ka tho chhuak a, puan ka tlawh hlim rual rual in vawt in min man a, ka mur sung sung mai!



A dai vek tawh bawk nen, a tui teh chiam lo ngei mak! Mahse ka ei zo leh vek tho! Inthlahrung deuh in light ka on leh a, ka facewash te la in ka in phih fai leh te te a, mut tih chhuah nan ti in Problem lam en in ka chawk deuh mawlh mawlh a, ka kut tang a khawng vek tawh!



Tuar thei tawh hek lo le! Ka khum ah bawk let leh in ka in tuam lum hlun a, rizai hnuai a ka kut nuai vut vut in ka taksa tih lum thuai thuai chu ka duh ber rih! Darkar chanve vel hret ka tal set set reng hnu ah ka taksa a lum tan a, ka mut pawh a chhuak ve leh siai siai mai, alarm set pah in sana ka en zuai a, 3:10 a.m chiah chiah, darkar 4 vel chu ka la mu leh thei!




Youtube a ka video en mut san in auto-play ka off si lo a, ka data a lo zo duak mai, mahse hmanna tur dang ka nei vak chuang lo bawk a, ka ngaizam viau na chu auto-play erawh ka off nghal hmak tho!



Ka mit lah zankhua thak a nuai ang maiin a thip hlur a, darthlalang ah ka in en a, ka meng sen ram mai! Ka mut a la chhuak bawk em ani!



Ka inbual harh a, class kal tur a insiam in half neck dum chung ah Jeans jacket ka ha a, cotton jeans dum ha in ka in pack mar tha ang reng! Falcon var ka bun leh bawk a,



"Sis, i pian a nalh bik e, i kawng a fek c i mawng a lian reuh si, i hria em, mipa ho hian mawng lian an duh teh mai nia." Paleii chuan a sam khuih mawlh mawlh chung in min en dauh dauh a,




Nuam ti deuh chung in ka lai ru tut mai, ka hmeichhe pui in khatiang em em a nasa khan ka pian, ka taksa hi min la fak sak ngai lo reng reng!



"Nangpawh i nalh alawm, i sang bawk si, mawng lian ai chuan sang deuh hi mipa in an duh daih zawk ang, nangmah ang chen hi ka ni ve chak teh mai nia." ka thiam ang ang in ka fak let ve chiam a, darthlalang hma ah chuan ka mawng ti poh in ka er kual vel a, ka in hmu nalh riau tawh mai!



"Teuh lo, sang deuh aiin te reuh te te an duh zawk mipa chuan, bak ah keichu ka mawng a phek." a ner zui deuh nang a, ka nuih tawp! A duh lo ve ngang aniang!




"Nangmah hi mawi inti em em la, inringtawk la, mipa in an duh che a ni mai, kan Ma'am fapa pawn a duh ang che."



Ma'am fapa sawi chuan a nui zui sak a, nuam tak a hun hmang tur a duhsakna in hlan chung in kan inthlah a, room ka chhuah san zui a, campus chhuah san a, Mimii te ho ka an khum dan tur ngaihtuah in ka in seh ruh lawk sauh sauh a, ka in ngaihtuah bing lai takin ka sir lam atang horn a rawn ri tuar a!



Ka te tuar a, Bolero pawh chu a ding chawt a,


"Fimkhur ta che." ka vin nghal nghek a, ka thin a phu dawt dawt mai!


"I na em?" Pa tling pui mai, putar lam hret tawh ani zawk mah ang! Bolero atang a rawn chhuk in inthlahrun hmel zetin min rawn buaipui vat a, ka inthlahrung let zawk daih!



"Aih ka tha e ka tha e, keimah zawk a nih kha." thiam loh te in chantir chawp leh in ka in beng fai thuak thuak a, thalai deuh hlek chu nise ka vin nghek ang!



Kawng ka kan fel a, ani pawh a tlan liam leh nghal a, Bus pawh a rawn thleng zui ve mai, Mimi-i bul ah chuan ka chung a a thil tih theihnghilh thak in an rawn thlen hma a thil thleng ka hrilh hrep a, kan sawi dun hrep laiin University pawh kan thleng ve nghal mai!



Class ah kan lut a, Ruatsanga ka hmuh rual rual in ka hrechhuak zawk a, Mimi-i pawh chu ka nam leh sawk sawk a,



"Lalruatsang ka hming kha thai chhia ang che, ka ti dawn chuang lo, zai ai chuan ka haw hmak ang!" rum zet in ka melh zui nghek a,



"I hming ka paih dawn chuan min nih pui a ngai ang." ka bul ah a rawn thu thla a,



"I chhe ve nihchu!" ka kiu in ka nghawk sawk a,



"Tak tak in, Duhsak, ka hmuh tirh atang khan ka duh tawh che, i ngainat zawng ka ni mial em le?" nui hmel pu miah lo in ka hma ah a rawn thing thi a, ka ham haih vek tawh!


"Enge awm zia?" chet pawh ka che chang thei lo! Ka en tlawk tlawk ringawt!



"Min duh em?"....



To be cont.

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » January 5th, 2020, 3:40 pm

Story of Matthew
Chapter-5



Duhsaki Pov



"Hey, tikhan ti lo teh min ti buai vek!" Hetiang hian tuman min la bem ngai thak lo! ka aw tawp duh bik bawk si lo! Classmate te lah an lo sahawk nasa tawh hlawm bawk si phone an lek chhuak sup sup tawh!




"Tinge chutiang i sawi, min duh lo ami?" ngen ngawl tak in min en tlawk tlawk a,



"Aih aih, chutiang a ni lo Ruat, hun min pe rawh." a kut ka vawn sak a,



"Ka ti mai mai a nihkha Eki, min duh ang tih hi alawm le ka hlauh le." kut beng chung in a nui chhuak hawk hawk a, midang pawh chuti tho! Hmelchhe ho hi!!



"Kal teh ka be peih hlawm lo che u." a ngal ah ka chhuih sak tawk a, tenawm hlawm lutuk mai!



Chawhma lam ah kan thinrim nen, zai tur list atang a min paih piah lam ah chhun eitur an pathum in min treat vel bawk nen, engmah hrelo ang maiin kan in kawm ho leh dial dial tho!



Class kan bang a, Momo chiah ka lei haw tawh, Pani Puri vel chu nimin a Mimii thil sawi atang khan ka ten tlat tawh! Gate a Paleii lut lai ka hmu a, ka au vak a, min lo nghak ve tho! Ka vei lam ka hawi thuak a, tukin atang ka hmu ta miah lo a, han hmuh loh chuan chuti teh ual in ka vei zui leh chuang thak lo!




Ka khum ah ka thiani nen ka thil hawn kan ei dun a, hmuh tur a awm zui tak si loh ah chuan henu pawh hian a sawi zui bik miah lo! ka nui ru tut tut a, a chhan min zawh lah chuan ka sawi tha duh der lo a, mahni pianpui tawng in hriatthiam pui lo ve ve ta chu, mahni tawng kan hman tawh hi chuan a rinhlelh awm duh thin teh e!



Mit khap kar lek ah exam kan zo der mai! Kawt ah kan in nghak khawm a, kan chhan that leh that loh pawh kan ngaihtuah vak lo! Ruatsanga motor ah kan lut khawm vat a, khawpui chhung kan fang kual mai mai a, a vawikhat nan LalMimi-i nen beer kan dawm ve ngei a, mahse ka ruih sual ka hlau a, Mimi-i nen kan in intawm mai mai, ka pum a sa het het tho!



Naktuk a haw nghal tut tut kan tum vang in Ruatsangan min khaw tlai luih pui tlat pek a! A khawngaih thlak zawk! Mi a ngai der em chu ka hrelo a, mahse kan haw tur hi a huphurh ve hmel takzet! Deadline ka thlen chuan Ma'am ka paltlang a ngai dawn a, ka rim a hriat ka hlau bawk nen ka tur sek a, min hrethiam tak in min thlah ta nge nge a, gate lo la in hawng ka hmuh chuan ka thaw huai huai mai!



Lu na bur chung in ka thawmhnaw te ka siam fel a, ka thil in vang nge mawni, ka tui lah a hal huam huam bawk si! A khat tawk in ka in khawlh khawlh reng a, khaw vawt nen zanin chu ka mut pawh ka ring lo, ka tai a puar luah tawh!



Mahni khum a mu ve ve chung in Paleii nen kan titi vei siam siam a, a khat tawkin 'Frankly' ti deuh chhen bawk a! Mahse a nuam ka ti zawk, dawt sawi lo a a rilru puthmang diktak a sawi chhuak hmiah hmiah mai zel hi kawm a nawm chhan ber pakhat ania, fel min tih zia te, a roommate neih tawh ah min ngainat ber thu leh min ngaih tur zia te a sawi vei siam siam a, a nuam ka ti ve veng veng mai! Kei deuh hian ka ngai ngawt ang! Ka haw ang a, thian mumal tak ka nei leh awm chai si lo, LalMimi-i te hi chu Krismas ah chuan an chhung kua in a pi leh pu te khaw lam ah an hmang daih zel! Thian ni lo in hmelhriat ka ngah hlur ringawt hi a buaithlak! Ka sum, tih lemah! Ka pa sum min pek min eipui tum rilru lutuk tak hi an tam bawk sia, tumah hi ka hnaih tha ngam hlawm lo!



Aizawl a ka awm leh kar khat na chiah ani a, tih tur a vang duh raih raih khawp mai! Pawn ka chhuak peih thak tawh lo! Shillong lam a inchei lem lo pawh a pawn chhuak teu teu ngam thin kha, helam ah chuan a tu a te pawh hi building lian leh tha tak chhung a cheng chung a ram zau tak chhung a rangkachak khur tha tak nei ang hrim a mawi leh changkang em em vek hian an inchei hlawm mai sia, kei hmeichhia, thawmhnaw lam lawm lo zet hi pawn chhuah ka zak der mai! An zin hma tiin Mimii pawn len chhuah pui ah min sawm fo a, engtik ah mah ka third wheel loh tur thu in ka chhang kher zel a, ka chak loh tur thu in mi vau zui hrep zel!




Lalpian ni champha dam takin kan thleng leh a, ka pi leh ka nutei te pawn dam takin an thleng leh thei a, hun pui lawmawm a lo thlen tak ah chuan ka nu leh pa in min la dam pui ve te pawh a lawmawm bik zia te ka hre thar uai uai mai! Kan naupan deuh lai kha chuan kawr thar neih te chak in kan nghakhlel em em a, kan nula tan a, a ho kan ti leh riau a, kan upa leh hlek a, kan hmangaih tak te nen dam tak a kan la hman theih vang a a hlut bik riau na te kan hre thar leh zel bawk a, a mak chho teh nuai ngawt mai!



Zan dar 9 vel ah ka room chhung vawt tak a, kum 6 ka tlinna lawm nan a ka pa min lei sak Teddy bear lian zet, ka duat em em, ka tet lai a hmuhnawm ka tih em em thin, tun thleng a ka ngaihsan leh duh em em Mr.Bean-a hming chawi ngat a ka phuah, Beanie chu ka kuah hlun a, a ban kham in ka mu kek zel!



"Hey, Merry Christmas Lalduhsaki." 'i' rawn tih tel hram! Tunge mawni le!


A hahthlak lem lo bawk a, wish let ve in ka phone chu dah thla leh in hla ka ngaithla chhunzawm daih a,



Lungleng a han kur chiam rual kan ni tawh bik lo nen, ka awm ang ang hian nuam ka ti ve em em tho!


Kum thar hmang turin Mimi-i te an rawn haw hlauh a, in a awm ka hne ve deuh tawh bawk nen, eng em em ti lo in kan in zui chhuak ve reng a, zan lam ah min fan chul vek tawh hnu kawn chei te kan han fang thar dun ve leh vel a, la kal lo an la tam nge tih tur nei lo an kal nawn leh zel pawh ka hre lo e a, mi an zi huai huai reng tho! Kan tan a Lal thar lo piang lawm fal bik riau, dul puar zui tur te pawh an awm leh nuk ka ring! Hmangaihna verther tak vang a ka thianghlimna hloh hi ka tum lo bur!



"Hey hey, enge i sawi kha? Ka 3rd wheel lo ang iti ve a!" deusawh zet in an pa bai kai chung chuan mi tawngkhum vei tan tan a, ka haw reuh tak tak!



Ani reng reng pawh hi, mi te khawngaih a chhuah pui loh ve mai tur ania! Hmun nuam leh kawn an chei nasat apiang a lun em em zel sia, zan khat ah spot khat te te a kal in kumhlui thlah ni kan thleng der a, Tlai ni tla tur thlir in Beraw tlang ah 3rd wheeler a tang chung in kan kal a, nikum a chhungkaw pakhat kan hmuh te tho kha an lo awm leh tawh! An fanu lah hi a cute em em lehnghal a, Nupa inhmeh ve tak chu an ni! An inngaihzawn laiin helai hmun ah hian an kal thin nge mawni! In hmangaih hmel em em Pa ber in an fanu pawm chung in Nu ber a kuah hnap zel a, an hmuhnawm ka ti lutuk hi an mahni zawk hi ka lo en dauh dauh zel!




"Hey, in pahnih khan tun kum tluan a dam tak leh hlim tak a in awm dun theih vang hian ka lawmpui che u, mahse ka mit in ti kham lek lek thin, kawppui nei lo in thiannu hi hre reng chungin in hmangaih ang che u." ka nui suk a, an ni pawh engmah sawi lo in an nui var var a, ka thusawi in an thinlung chu sawi loh, an bengdar tak ngial pawh a thleng pha lo tih hriat tak in an in kuah nghal hnap a! Ka tho lawk ang a ka pawt then nawk zawk dawn amawni!



Tun kum chhung a ka hlimna tawh zawng zawng te, ka natna leh khawhawrna tawrh zawng zawng te ngaihtuah let chung in tun kum a tan a ni hnuhnung ber chu ka thlah liam a, kan nupa tuak te nen a duhsak na in hlan chung chuan tlang atang a chhuk in mahni in lam hawiin kan kawh let pawt hlawm a, ka hmai a ro haw vek!




"Happy New Year in Advance."


Hman zan ami tho kha ani! Tunge mawni le! Zothana a nih ka ring ber a, mahse a hnu a ka hriat dan ah erawh mizo calender model pakhat nen an in ngaizawng in ka hria a, a chanchin ka ngaihsak zui vak lo nen, ka ring tak tak ngam chiah chuang bik lo! Tha tak in ka wish let ve leh mai a,



Kum hlui thlah zan ah ka pa in chhuah a rem tih tak si loh ah chuan ka room chhung a in kalh khum in mi status up thar apiang ka view zut zut a, keimah ang tho a mahni room chhung a hun hmang mek ka duhtak Paleii nen kan inbe vel mai mai a, hmeltha-a a hmuh chak thu a sawi deuh chiam a, a sawi uar thin bawk nen, inchung atang a alo click ruk thlalak te min rawn thawn a, chutia han hmuh tak ah chuan kei lah pek chuan kan hmu chak thar leh vel a! Nun hi a ho duh mang e aw!



"Duhi, Duhi, tho rawh i pi damdawi in a kal pui a ngai ania." nutei'n mangang tak in min rawn sawi nawk nawk a, ka harh kawk mai!



"Maw?" ka harh tih a hriat rual chuan a tlan chhuak leh daih a, rang lutuk a in perh tho in ka tlan chhuak ve nghal!



Kawngka a ka pa in ka pi a paw chhuak lai chu ka hmu hman a, ka crocs pawh vei lam tur ding lam a bun in ka tlan chhuak vei zut a,




"Lo awm ru, muangmar in bungraw rawn ken ngai te keng in in rawn kal zawk dawn nia." Ka pa chuan car ti nung in a tlan chhuak zui vut a, in kuah chial chungin nutei nen kan thlir liam a,




Ka thin a phu dawt dawt mai! Ka tha khur pawh a la reh lo!


"Te ngati nge a?" keimah ang tho a hamhaih in ka nutei chuan a melh ngai a melh tlawk tlawk a,



"Te, lut ang."



A kawr ban ah chuan ka pawt dat dat a, a ngaihtuah bing deuh nge ni! Harh chhuak hlawl ang a rawn hawi thut in min en vung vung a, min ti hlau let ling tep alawm! In chhung ah chuan kan in zui lut a, ka awm anuam thei reng reng lo! Enge thleng ber pawh ka hre bawk silo! Damdawiin lam an pan chhung te khan engemaw thleng ta se! Ka hriat miah loh in ka kut tang ka elh ri bap a! A na reuh tak tak!



Ka room ah ka lut phei in ka phone ka la a, ka crocs pawh ka bun dik thlap tawh e, mi in min lo hmu em lo ang chu maw! Ka nu ka call a, a pick up thei lo!


"An buai viau amawni le." ka phun sup a, kum thar hman dan duhawm lo tak ani!



Filter tui thli in ka in zui khawlh khawlh a, engmah sawi lo a ngwi reng a thu ka nutei chu tui te chu ka zu pe ve a, a lo ban ve mai!



"Te, tinge a? engtin nge a awm a?" a hmui atang a no a lak hran rual rual chuan ka zawt nghal vat a,



"A zing rawn tho chhuak kha a lu hai riai riai thu a sawi reng a, thuthleng ah a tlu zal a, a muhil leh emaw kan tih kha engtin nge phei chu kan hmu hman lo, thuthleng atang a rawn tla thla tawp a, biak zui theih ani tawh lo a."




A sawi zawng te chuan ka thin phu a rang telh telh mai! Ka pi hian min la boral san ngawt thei lo ang! Ka thiamna hmang ngei a ka hlawh in thawmhnaw lei sak tur te pawh ka la nei a, chutin a lak a ba nei tun chung hian min kal san ngawt thei lo ang! Ka hlauthawng takzet tawh!



"Te, insiam ila, kal ve nghal ila?" thuthleng ah pawh thu ta lo chuan nutei hma ah chuan ka thu tung ut a,



"Blanket leh chaw te pawh kan ken a ngai maithei a, nghak phawt ang." rilru hah, tawt lutuk tih hriat tak in a thaw hluai mai!



Tun a ka pi dam lo hi ka pa nu ani a, ka pu erawh chu ka hmu ve hman lo! ka nutei hi kan in a alo awm chhan tak ka hre lo a, chutiang lam ka ngaihtuah vak lo bawk, Ka pi tih loh ah chuan min duat ber tu ania, a awm lo ang tih hi ka hlau takzet!




Chaw ken tur te chu buatsaih turin ka in sang phek a, ei siam vel chu ka nutei hnen atang a zirin ka thiam ve nual a, ka siam a nih vang nge chu ka hrelo a, a tui chu ka ti ve tho a, midang ka ah a tui ang em tih erawh ka hrelo a, a tui an tih thu an sawi vak ngai lo a, a tui loh thu pawh an sawi chuang lo! Ka siam ve reng zel ka hman chhun ah chuan.




Blanket te pawh thlep tha in a case ah ka thun thlap a, tui ti lum a ka inbual zawh leh meuh chuan kum thar lawmna inkhawm kal tur an chhuak deuh tak tak tawh hlawm! Keini erawh damdawiin lam a kal tur in kan in peih at tawh a, Kum thar ni a ni kher kher bawk nen Taxi koh mai tur an awm si lova, ka pa in thu min pek dan ang a awm in kawt ah bungrua nen kan lo nghak tawp a, ni lum ai pah a ni tawh mai!



Ka pa a lo thleng a, seat hnung lam ka chuh tharh a, nutei'n chanchin a zawh chuan ka beng ka chhi ru ve kar a, engmah a sawi tha duh hlek lo lehnghal a,



Damdawiin a kan luh ni bak chu ka kal an rem ti vak lo a, mahse ka luhlul na lam tak a lo ni ve bawk a, ka kal lui fo a, hmasawnna engmah hmuh tur a awm ngai lo, Dr. emaw nurse te zawh ka hreh dawn lo tih an hria nge ni, min veng ru reng bawk si! A na ka ti! A na takzet, min hmangaih a min duat em em tu nikhaw hre lo in a awm a, a duat thlahlel a, a mah ngai em em tu a tunu kohna pawh chhang theilo in a awm a, a awm chhan engmah ka hre ve bawk si lo! Rawl chhuah ngam si lo hian ka mittui a luang zawih zawih thin!




"Bawihi in class tan a la hun lo ami a?"



Kum thar atang a kar hnih zet a liam hnu ah tuk thuan kil laiin ka pa chuan ka kal hun te min zawt a, ka pi dam hma chu ka kal loh tur thu in ka chhang a, tih vak ngaihna min hre bik lo ania nge! A ngawi zui daih!



Nileng a damdawiin lam a ka nuteii nen ka pi kan awm pui hnu ah ka haw tur Mimi'n min rawn call a, MC lam ah in khalh pheiin Sumo ka nang hman chiah chiah a,



"Ka duat, tluang deuh in in thleng thla dawn nia, Lalruata te ho kha min lo biak la, ka rawn zawm ve vat ang che u." sumo chhung atang chuan kan in ban tawk tawk a,



"Nangmah te kha zu in enkawl tha la, ka rawn kal dawn ah khu lam ah min lo hmuak la aw."




Nui var var chung in kan in vai liam a, an tlan liam rual rual in ka nui lai pawh ka tawp zui hmiah bawk! Ka hlim lo! Ka hlim thlawt lo!



"Aw, Bawihi, tinge phone i va la thei lo ve." ka tlanchhuah le hma in dar zat en tur a ka phone ka la chhuak chu nutei call a lo awm reng a, ka pick up rual rual in hlim hmel tak hian a rawn ri nghal bawrh bawrh mai,



"Ka lo silent daih a, enge a?" Scooty ah chuan tlan chhuah in ring zet in ka thu ran a,



"I pi a lo harh a, Doctor ten tawng leh biak vel hrim hrim an la phal lutuk lo tih loh ah chuan, hei a lo harh tawh ania." aw dam dap, zangkhai deuh hian a rawn tawng hliai hliai a,



Ka bul vel a mi te mitmei veng hman lo in ka mittui a luang ngiai ngiai a, ka lawm lutuk vangin ka phone pawh ma beng bul ah ka la vuan bet reng ringawt!



"Lalpa, ka lawm e." ka rilru in ka tawngtai mawlh mawlh a!



Haw pawh ka chak lo! Ka pi hmuh leh ka chak lutuk chu damdawiin lam ah ka in khalh phei leh a, Security lo duty te bul ah chuan mittui tla pur in ka pi nen a kan inkar te chu ka hrilh chiam a,



"Aw, midang an awm lo bawk a lut mai teh!" a lukhum la thla in a tukhum a hiat nuah nuah a, gate min hawn sak a,



"Ka lawm lutuk, ka lawm lutuk ania." a kut ah ka vawn sak thuak a, ka tlan lut nghal vut a,



Ka pi awm na cabin chu ka nam hawng rawk rawk a, nutei'n khum a lo thut chilh in a hmai leh nghawng te chu puan in a lo hru hliau hliau a, min hmuh rual rualin chauh hmel tak chung in a lo nui ve sen sen a,



"Pi, ti hian awm tawh suh aw." ka chet dan in a natna a tizual ang em tih pawh ngaihtuah hman miah lo chuan a awm ah ka bawh thlawp a, ka kuah zui vawng vawng a.



Nuteii nen kan in riah chhawk char char a, ka nu leh ka pa chu sumdawnna lam thil buaipui in an buai bawk nen, thla a tawp meuh chuan ka pi pawh chaw pangai eiin a tawng ve leh bawrh bawrh thei tawh a, a that chhuah hnu ah pawh hetia a awm nachhan hi min la hrilh duh chuang lo!



Thla tawp ni ah damdawiin atang kan chhuak a, in kan thlen hnu a ka intihfai zawh meuh chuan zan riah ei a hun der mai!



"Bawihi pawh vawiin lam ah ticket ka ti fel tawh a, naktuk ah i zirna lam chhunzawm turin i kal dawn nia." ka pa chu a tawng bul hmuk a,



Ka pi a ngaihtuah awm lutuk tawh lo bawk a, ka hnial duh ta lo a, taksa zawi leh chau zet in zan riah ei kham ah ka thawmhnaw ka pack fel mawlh mawlh a, Paleii leh Mimi-i hrilh in min lo hmuah tur thu te chu an sawi ve luam a, kal leh ka chakna leh ka chak loh na a in chen reng in ka hria!



Chhung inkhawm hmangin ka nu in tawngtaina nen min thlah a, ka tlangnel tawh tho tiin tuman a hmun thleng a min thlah ka duh lo a, kan in kawt a sumo chang in kawt atang kan in vai liam a, taksa chak lo chung chung in ka pi in a min vai liam tawk tawk lai chuan ka mit a la ber! Ka ngai leh ngawt ang! Tun ah pawh ka ngai nghal der ania!




Ka mu hnem deuh nge ni! Bualpuia chaw kan ei lai leh Vairengte a kan awm lai bak hriat mumal ka nei reng reng lo! Ka nghawng, ka mawng leh ka kawng a kham ngut ngut bawk!



Zing dar 6:30am pelh hret ah counter kan thleng a, an intiam ang ngeiin ka thiante pahnih chuan an mi nghah thuhmun tih hre chuang miah lo chuan mi an lo nghak ngat ngat a, khua a vawh teh lul nen! Ka khawngaih let ling zawk! Mizoram ai a let in a vawt ang! An lo thu khur hlet hlet mai!



Chau hle mah ila, nui sang chung a chibai in buk in ka bungrua te chu min lo chawipui zung zung a,



An mi nghah a in ang tih an hriat tak ah chuan Mimi-i leh Paleii pawh chu an in be ve luam a, nikum lam ah khan ka in hmelhriat tir miah lo tih in hre miah lo a mi an lo nghah dun tak ah chuan ka hrechhhak ve chiah bawk!


Mimi'n hostel thleng min thlah thlap a, henu te reuh hi chu aw, momo ka leisak leh dawn chiang! tun ang zingkar khawvawt ah kei ni ila puanpui theih tawp a in vur chhah a ka mut ngheh dawn teh lul nen!



Ma'am bul a in report in fee te ka pe nghal a, an ui duat zet chu a lo awm miah lo a, ka lawm ah a tla a a vawikhat nan tha khur miah lo in Ma'am te in a lut in ka chhuak ve thei hram e!



Zan lam ah ka mu nasa viau na chu, ka taksa hian chawlh hahdam ai a mamawh thildang engmah a nei lo hi a ni tawp! Geyser on in tui ka tih lum hnu ah ka inbual fai a, thuam in bel a khum ka thleng leh chiah chu namen lo in ka mut a chhuak nghal!



Tlai dar 3 pelh hret ah ka harh a, ka la sil thum mai! Ka thiani class kal hi a la rawn bang lo emawni! Ka thawmhnaw ka la rem fel lo tih chuan ka rilru a kap tung a, peih lo zet a tho luiin ka in rem fel a,




"Naaa!!" chauh nen, ka tah a chhuak zawk! Towel, boiler, Istiri ka keng lo tih ka hre chiah!



A awm ang ang in rem fel in ka hmai ka phih sawk sawk a, lipstick in hnawih khawmawi ve in tlai khawhnu ah bazar turin ka chhuak a, Paleii nen gate a intawk in ka kal na tur ka hrilh a, ei duh a neih leh neih loh te chu ka zawt luam a, Momo ve tho ka treat mai ang a ni pawh!




Ka chau bawk nen ka che vut vu peih lo a, ka thil mamawh leh duh ka lei kim meuh chhuan khua a thim thet thet tawh a, motor tam vanglai a ni kher kher bawk nen, traffic jam nen zawng zawng ngaihtuah chuan ka tlai dawn chiang khawp mai! Mak lutuk tak maiin February thla ah ruah sur tum niawm takin chung lam lah a rum dur dur reng a! Ka tawt up up tawh! Ka chhungte tumah pawh ka chanchin ka la hrilh hman lo!



Hostel kan thleng a, rin ang ngei ngeiin ruah a sur seng seng a, a fang sin mahse rin ai tak in a tla tam a, khua a ti vawt zual bawk si! Inkhai bawr tup in Ma'am te in lam pan chuan ka tlan lut hnek hnek a,



"Anah!!" an kawt a bolero ding lai ka tlan pel tur chiah chu bolero kawngkhar an rawn hawng a, ka in su chawrh a, ka nghing dawt mai!




"Ka tihpalh lutuk i na em?" Ka dar a rawn dawm in ka dar leh lam ka tuai vut vut chu min rawn hmeh sak a,



"Ka tha e." chiang zet in kan mit leh mit a in tawng siah mai!



"I lo let ve tawh alaw? Kumthar chibai aw." a nui sen sen a,



"Kumthar chibai le." ka nuih let sen sen a,



"Matthew ka nia."



To be cont.

Link:
BBcode:
HTML:
Hide post links
Show post links

Local Advertisement

MOBILE SIAM ZIR DUH TAN!!!

Tech-Inn Mobile Repairing Traning Centre, Bazar bungkawn

Kum tin mi za chuang eizawnna kan siamsak a, Eizawnna tlaka thiam turin kan zirtir thin

Mizorama mobile siam zirna hmasa ber changtlung ber kan ni. Hrechiang duh tan Contact : 9612099411 / 9862016122


Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » January 5th, 2020, 3:41 pm

Story of Matthew
Chapter-6



Duhsaki P.o.v



"Matthew ka nia," Gate min hawn sak rual a ka chhuah hnu ah ka hnung lam atang in a hming a rawn sawi a, ka nui sak a, engmah hrelo ang maiin ka kal zui nal nal a,




Huh hnuang in room ka thleng a, a vawt ka ti pawn ka hre lo e a! Khatiang em em a hnai a hmeltha lutuk hmuh chuan vawt pawh ka hre chang tawh lo e a! Ka thiani'n a towel min lo pe vat a, ka ten vang ni lo in, thil hrim hrim han in hman pawlh chiam hi ka duh vak loh vang in ka pe let a, ngaihloh lam a a ngaih loh nan ka sawi fiah luam bawk a, ka towel lei thar phawrh in ka inhru mawlh mawlh a, inbual leh ngei a ngai dawn nih hi!




Huh lai lai in tui ka ti lum zawm vat a, fai ser sawr a inbual in ka thawmhnaw lum neih ang ang in ka inthuam mawlh mawlh a, ka nghawng chunglam deuh chiah hi lang tur a awm ang tih tur khawp a phuiin ka inthuam a, chu pawh la duhtawk lo in khum ah thu tung at chungin rizai in ka inkhuh leh hlun bawk!




Engvang a a hming min hrilh ve ringawt nge a nih le?! Hostel ah ka la awm lo tih te a lo hre bawk a, a nuam e! A hmelthat zia kha! A khabe ruh kual lai ah khuavang a nei a, a ti lang pa zual sauh lehnghal!



Ka ngaihtuahna ah engdang mah a lut thei lo! Ka thiani hi a hming te kha ka hrilh ve duh ang em aw! Keimah in khum ah ka nui vur vur a, Bialpa thar nei ang mai in ka hlim ru veng veng a, ka lai ru tlat bawk a, traffic te kha alo jam lo ang tih te ka hlau thar e a!



"Aw hello?" ka hlim bawk aniang ka nutei call ka pick up pah in ka nui hek hek a,



"Eheu, kan mood a va that hmel ve, min ngai lo hle mai maw!" a aw a zangkhai khawp mai a ni pawh.



"Haha engmah a ni lo, ka ngai lutuk cheu hi keimah hi in phel phawk ka duh a, lehlam in bul ah awm se, lehlam hetah." kan nui dun hak hak a,





Matthew P.o.v



"Lalduhsak, hre tawh che mah ila nangmah ngeiin i hming min hrilh kha a harsa amawni le!." shower hnuai a ding in tui in min phuh ser ser lai chuan ka suangtuahna in kha hmeichhia kha ka kawm zui a.



A ban ka hmeh sak lai a mak tih hmel zet a mit meng bial kak a min en dauh dauh lai te chu ka ngaihtuah let a, ka mit in a hmuh chak thin hmelthatna an tih chu ka hmu chiang ani!



A hmai a bial lek lek a, a no chek bawk, a nui hmel ti mawi zual tur in a ha a tawi rual hmarh a, var tha sar sar tak ani, a fresh ngawih ngawih, biangsum a la nei kher kher zui bawk a! A mit khur a thuk hran lo a, mihring siam chawp in cheimawina tel miah lo a a mit hmul dum hlep mai te, a hnar ngul in vuah dik lutuk te hian min hip zual in ka hria!



"Bawiha i duhtawk dawn tawh em, dinner ei a hun ania."



Ka room ah ka nu a rawn lut leh tawh ani maw! Nui sak chung a shower herh tawp in ka in hru hul zui mawlh mawlh a, hmeichhe tereuhte vang a ka thil tih lai pawh theihnghilh thak a kan awm chu le!



"Ka lo chhuak," ka au lang lang a,



Khum a ka thuam dah sa in bel in inhnuai lam ah chuan ka chhuk thla a, Duhsaki lo kal tur ang tlat te chuan ka hria a, kawngka lam ka melh leh zuk thin! Hostel room awm zawng zawng luah khat vek khawp a tam hmeichhe zing ah, khanu khan ka mit a la ngawih ngawih a, Hosteller atang a ka hmel duh ka vawikhat tawn na a ni hial bawk!



Ka course beih lai ka zo tawh bawk a, keima ke a din a, keimah ngeiin ka hmingthatna hi inchher chawp ve ka duh thin, ka tette atangin kawng engkim ah ka pa hmingthatna leh hausakna zar zo a puh ka ni thin a, zirna lam a ka tih that deuh leh tenawm tak leh bawlhhlawh tak a sum hmang a dinhmun sang a ding ang a sawi chhiat te pawh ka hlawh fova, a chang chuan ka pa lo hausa lutuk te, hmingtha lutuk te hi ka haw thin!




Ka duh engkim nei tawh in ka in hria a, mahse nikum kum tawp lam a kha hmeichhe tereuh te, Hostel fee pe tur a lo kal khan ka khawhar rukna thin min hai lan sak a, ka thinlung ruak tak hi a nui hmel hian a luah khat nghal vek!



A hming sawi a register a ka chhinchhiah rual in ka thinlung ah a hming hi ziah kai ve nghal ani a, a phone number pawh ka phone a chhut luh ani nghal bawk! Mahse ka nu hian Hosteller te hnim hnai lo tur in min chah thin a, hmingchhiatna nasa tak a thleng thei a ti thin! Chumi vang chuan ka be zui bik lo a, ka suangtuahna a ka khawvel siam chhung ah bak ka kawm thei lo a, sal ni si lo hian tu hriat loh in ka saltang a ni ber e!



Ka pa hotel enkawl pui rih in shillong ah ka awm ve leh ren rawn phawt dawn a, mahni pian leh murna tluk a nuam hi a lo awm chuang lo anih hi, tun ah ngat phei chuan helai campus chhung tereuhte hi vanram a chantir thei tu angel tereuhte a awm bawk a, hmun dang khawi ah mah kal ka chak tawh rih lo ve!



Ka kut lukham chung a ka tukverh pawn lam a arsi pe un thlir reng pah chuan suangtuahna khawvel ka siam chawp ah chuan ka leng delh delh a, a pianpui, a hnam tawng ka thiam thu te, 'Ma'am' ti a no zet a a koh thin ka nu hi a hnampui ngei a ni tih te hi hria se, mak a ti ang em? A tawng hriat chian ber, a hnam tawng ngei hian bia ila, ka lam ah ka hip thei ang em tih te chu ka ngaihtuah a, zan hi a rei duh ngei mai! Khawvar hian khanu hmel kha min hmuh tir leh mawlh teh se!



"Ka ei chak lo emai, sawtah ka ei mai ang." Hostel groundfloor, kawngpui an a hostel nen a in kawp, restaurant a thil ei turin ka chhuak phei a,



Nizan lam ah ka ngaihtuah nasa deuh nge ni ka mang ram thleng in ka nu tih loh a ka hmeichhe ngaihtuah awm chhun Duhsaki ka hmu zawm zat a, mahse ka chan erawh a chhe viau thung a! A pawi lo ve, mumang mai mai alawm!




Happy Valley lam a kan hotel vil turin ka pa in min tir a, Hostel ground floor, kawngpui an a restaurant ah eitur ka lam pah a, Ka nu thluak vawrhna pakhat tho ani a, order tam zawk hi hosteller te hnen atang vek ani! A hlawk phian mai.



"Uncle, chicken soup aw." hostel chhung lam a counter ah zawk chuan a rawn kun vei dak dak a,



Lo ti sang deuh hlek ila dak iak iak zawk se a hmuhnawm dawn nen aw! A thil order nghah pah a a thiannu nen an titi siam siam lai te chu ka en reng a, Buddy-a'n a bauh lai tih loh ah chuan nui hmel a pu reng emaw tih mai tur! Ka nileng hun hman ti nuam tur hian minute 10 lek hi a lo tawk khawp a nih hi!




Kan Hotel lam ah chuan ka in khalh phei a, College ka kal lai te anih loh chuan thian hi ka kawm zui lo ni lo in, ka kawm hman thin lo! Zan a len chhuah leh zeuh te anih ngawt loh chuan, In lam a awm awl mai mai hi ka pa hian a remti lo a, amah pawh a hlawhtlinna chhan ber pakhat ani! Amah ang a min chher a tum ni ber in ka hria.



Hotel ka thleng a, mi an lo wish liam liam a, hetiang a thu tak ren run a awm reng hi ka ning tawh! Ka pa hian uangthuang tak a awm lo turin min tih reng thin a, ka in sum ve hle thin! Ka rilru chhung ril a ka awm chak dan ang a ka awm theih na hmun a awm daih mai te hi ka chak chang a tam ve ta mai!



Ka kal dawn ah hmuh tha ka hmu tih a hriat deuh nge ni, Hotel a kan staff te ho, kei min nel deuh hlek tu te ho chuan mi an chhaih zuk zuk reng a, a pawi ka ti hran lo bawk a, ka en liam vel mai mai!



Customer te lo lawm a Hotel an awm chhung a nuam ti tak awm tur leh harsatna leh buaina an neih chuan sawi vat tur a lo hrilh hriat chu ka hna ber ani a, Lungngai emaw thinrim hmelpu a lo lawm chi ni hek lo le, rilru pawh a hrisel duh phian mai! Mahse, ka chau thin!



Chawhnu lam ah chhuanlam ka siam lui ta nge nge a, vawiin pawh ka pa lawmna siamin Hotel ah ka hun ka hmang zo ang ka ti ania! Ka tlin ngang bik lo ani e! Rohita leh Chris-a te nen chhuak tur in kan inbia a, an ni pawh hi Dawrkai hlun, sumdawng hausa pahnih an ni a, Len chhuah an sawi tawh chuan hmeichhia an chhawm ziah a, ka ta ve tur ti niawm takin an hmeichhe chhuahpui te pakhat tal hian thian an rawn nei ziah a, thenkhat chu duhawm leh hmeltha tak tak te pawh an awm ve chawk tawh a, mahse ka duhzawng ka la tawng ngai lo a, hemi te pahnih hmuh ah hian Tereuhtei ka chhuah pui chak khawp mai!



"Kawt ah kan awm." text ka hmuh rual rual in ka chhuak zui vut a,



Rin lawk ang ngeiin a hran ve ve in hmeichhia an rawn phur leh e! Hmeichhe dang an awm ve em tih lam phei chu ka ngaihtuah chuang lo a, ka motor a lut in engine ka start ve leh nghal a, hma ka hruai tir a, plan an rawn nei lawk leh vek tawh tho ang! An mahni man pha tawk lek a chak in ka um ve dat dat a, Barapani kan thleng tep ang! Khua pawh a thim lek lek tawh, Ka awm dan ka nu ka hrilh a, lem harsa tih hmel zetin a lem lui a, ti kha chuan eng hun ah pawh haw ila, ka him thei tawh e! Hotel an lo be fel tawh a, heti lam ah hian ka pa hian hotel nei ve se a awlsam mai tur ania! Hotel hnung lam a kawtzawl nuam zet ah chuan beer an lo dawm far a, hmeichhia pawh pathum an lo ni leh nghe nghe bawk a!



"Huh, a ngai te bawkin maw?" nui var var chung in an bul ah chuan ka thu thla a,



"Kha, i ti khat tawh si." ka dawm tur Chrisa'n min rawn pe ve leh nghal chat bawk a,



An hmeichhe rawn hruai pakhat hi ka hmuh hnu a ang ngei mai! Ka hmuh tawhna hriat chhuah tum in ka en leh vung vung thin a, kan hostel ami chu a ni in ka hre chiah lo! Ni maithei bawk!




Zanriah kan eikham a, a neilo pahnih chu chaw ei hma lam a kan in kawm ho na ah kan thu dun ve ran a, a rui deuh nge a mut a chhuak ve hrim hrim pawh ka hrelo, dawhkan ah a bawk nguih ringawt!




Hotel a thleng ve midang te pawh an rawn chhuak nak nak a, a hmun a nuam in khua a thiang bawk nen, ngaihzawng te nen a kal nan chuan hmun nuam tak ani ngei ang!



Richie-a call in kan inbia a, Law ka zir pui niin ka thil inpui ber thin ani a, hepa hi thil ka in apiang in ka hriat chhuah phah ziah, ani pawn min rawn be ziah a, ka hmeichhe tawn thar chungchang chu uar zet in ka hrilh a,



"Hey hey, ka haw ang a ka be nghal dawn, nang ang a dawihzep ka ni ve lo ania." ka lu a hai ve deuh hlek atin ni! ka tawng huai pang pang khawp mai!



"Lawk lawk, ka record ang, sawi tha leh teh! ka dahtha thlap ang, tu zawk nge nep chu." a nui zui hak hak a,



"Le ka record ania, sawi rawh le." a khuh zui kharh kharh a,


"Lawk aw Bawiha."


"Thiannu, i tha em?"ka kut a an dah hmeichhia chu a rum tuah tuah reng vang chuan a dar a khawih in ka va sawi dat dat a,



"Min khawih suh mi tenawmpa, i va zakthei lo ve a!" ka kut beng per lawpin min vin nghek a!



A tih ngaihna tak pawh ka hrelo e a! Patling leh nutling pui pui ho chuan mi an en thup a, ka zak ru chem chem tawh!



"Ka rui miah lo ania, ka rui emaw ti a min khawih i tum a nih chuan i inchhir hle ang aw."


Enge a hriat teh hrep le! Zak thei lo lutuk! Kan bul vel a mi te pawh chuan mi tenawm tak hmuh in min hmuh phah vek tawh in ka hria! A hmai paw tak a ben hrep chu ka chak a, kut ka thlak leh lek a nih phei chuan thiamloh nasa tak ka chang dawn tih ka hria!



Upa ho in mi an rawn khap dai a, mi an zilh nek hlawm lehnghal a! Ka rilru ana lutuk! Ka pa in hmeichhia reng reng chu i nu ang in ngai ang che, i nu hi hmeichhia ani tih hre reng la, hmeichhe chung ah rilru sual pu suh ang che ti a min zilh thin na te ka ngaihtuah chhuak a, ka kut ka hum ruh ngawt ngawt ringawt!



Engmah sawi chhuah loh ka tum a, duh ai he thil vang hian mualphona a thleng nasa dawn in ka hria!



"Chuti tak a mi in ngai khawlo hlawm a nih chuan khi CCTV a awm alawm, record en ila?" kei ai a kum upa te pawh zah zo lo chuan ka au chhuak nghek nghek a,



"Nangkha tho rawh, engtin chiah nge ka khawih che, khati tak a tenawm a mi puhchhiat na tur in engtin nge ka tih che en ila, rawn tho rawh i ruih loh chuan, rawn tho rawh," thinrim takin ka kut chuan ka hui zauh zauh a, counter lam ah chuan ka lut phei nghal vut vut a,



Awmdan mawi leh hmeichhe zah tur a min zilh luai luai tu te ho kha khawnge an awm ni, an zing a patling pahnih lek in min zui lut a, buaina thleng chungchang chu duty te bul ah keimah ngeiin ka sawi a, mi pali in record chu kan en a, an nui suk hlawm mai!



"A copy ka duh ang aw." ka thinrimna vang in ka lu te chu rit luk mahse, in beng daih tum in aw dam tak chuan ka dil a, an siam zui ve mai an ni pawn.



Hotel hnung lam ah chuan kan chhuak phei leh a, ka thiamna min hriatpui tu ten an sawi nak nak a,



"Tenawm tak a biak kher kha a ngai hleinem, a taksa pawimawh lai ah i khawih lo pawh a ni maithei, mahse i thusawi erawh a tenawm ani, tu hmeichhe hrin nge maw i nih le?" Nutling zet pakhat chuan tawngkam chhe tin reng nen chuan mi lo an khum leh hrep a!



"What?" tu tu emaw chuan video in an la tih pawh ka hria, min ti mualpho rawh se, ka dikna hai chhuah dan tur hre tur in alawm mawle keipawn Law ka zir!




Ka thiante ngaihsak hauh lovin ka Bolero lam ah thinrim tak in ka pen chho pawk pawk a, CCTV record ka nei a, ka thusawi min hriatpui tu tur chiah ka mamawh tawh! Ka thinrim lutuk chuan motor khawngkhar te chu ka khar deuh bur a,



"Hrep hian, kha nutling thau per pur chhe zeti khan ka nu te a sawi chhe vel a, a la hre khawp ang!" steering chu ka chum zui pawp a,



Ka thinrim rilru tawt vangin ka speed a lo sang deuh nge ni! In ka thleng har lo! Buddy'n a tih thin dan pangaiin motor atang a ka chhuk rual rual in mi lo zuan thauh thauh a, mahse ka chhaih peih ngang lo! Inchhung ka lut a, ka nu min biakna pawh ngaithla lo in ka room ah ka chho tlang a, khum ah let thla tawp in ka mit ka hup vang vang a, tiang hun hi rilru fim put pawimawh ber hun lai ani tih chu ka in hrilh mawlh mawlh a, mahse a harsa khawp mai!



"Matthew, hei hi enge? I pa in a hmuh hun ah engtin nge i chhan dawn?" reilo te hnu ah ka nu chu thinrim deuh in a phone a video play chung in a rawn lut a,



"A chin fel na tur pawh ka nei, lungngaih tur a awm lo, khatiang a ti tu zawk kha hrem in a awm ang." ka nu rawn thinrimna vang zawk chuan ka thinrimna a reh let hlauh a, hriatchhuah ka nei zawk bawk!




"Bawiha call kha i record ta em?" Richie-a ka phone vat a,



"Record e, ka thil record zing a la tangkai ber tur a nih ka ring, ka rawn thawn ang che." a nui hak a, keipawh ka nui nghal var var a,



"Lungngai suh ka nu, i duh chuan ka awm loh na tur a ka awm vang khan min hau tho la," ka nuih vur vur a,



"Khatiang ver vur chuan hauh pawh i chakawm loh ve, i thil neih te nen chuan i pa va hmu vat rawh, amah zawk hmu tur che a alo haw hma in." a nui let ve suk a,




"Khawnge a awm?" khum atang chuan ka tho nghal a,



"Hotel ah ala awm, va kal rawh." ka ban a vuan in a hmer salh a,



"Ka lo let vat ang." a biang ah ka piai sak a, ka kut a beng thla rang teh e!



Ka pa bul a kal in ani pawn ka nu zawhna min zawh ang chiah min lo zawt nghal a, video leh audio pe in ka ngaihthlak tir a,



"A tha e, mahse ka thu awih in Hotel ah awm ni la, hetiang a kan dikna hai chhuah kher hi a ngai lo tur ania, fimkhur ang che." dam thlup in min zilh hau a, ka pawm kher mai!



Police station lam a kal tur in kan in zui chhuak nghal a, intih hmingchhiatna vang a F.I.R theh lut in evidence kan neih te nen thlap chuan Police lam kan hriattir a, ngaihtha takin kan haw a, khang audio leh video en a ngaithla chung pawh khan thenkhat chuan, a lem ti a mi puhchhia in an la tang tlat tho ang! Thudik hmu duhlo lui a sualna haw em em mihring vekin khawvel hi an luahkhat tep tawh ang!




In kan thleng a, nichin a ka lawm ve duh loh vang nge Buddy pawh a lo chik nghar nghar a, a duh hun ah hi chuan a pangchang thiam ve ania!



A lu ah te tuai sak in a lungawi dan ber, a chal dar ah chuan ka fawh sak zeuh a, mei thing tarh tarh in inchhung ah chuan min um lut ve leh nghal a, he ui duhawm zet hi a awm loh hun ah chuan ka khua a la har ngawt ang!



Ka room ah lut in ka thuam hak ka phelh a, inbual tur in washroom ah ka lut tlang nghal a, ka zawh meuh chuan dar 10 a lo pel vuh tawh mai!



Ka lu na te pawh a zia deuh huai mai! Richie bawk chuan mi a rawn call leh pek a!



"Aw enge?" loudspeaker a dah in ka in hru hul mawlh mawlh a,


"Tunge zan a i biak tur kha?"


A va han hre rei mai mai tak! Ka tawng huai hret ani! Mahse ani pawh a at laiin a tawng huai pang pang bawk a, nep nih duh ta bik lo chuan a sawi ang ngeiin a zin chilh a, mahse a hmu thei ta lo in ka hria! A sawi zel dan ah chuan pasal pawh a nei zui har lo ani awm e! A duh thu a hrilh ngam lo a, sawi tur a a zin chilh ve meuh hnu ah chuan a lo tlai der tawh a, hmeichhe dang tumah a la melh leh miah lo!



"Ka be dawn, i hre mai ang." sweatshirt dum ha in Joggy dum ka ha bawk a, min ti lum ve deuh em ang chu!



Call kan hang up a, ka rin ai tak in ka chau hrep mai! Ka mu der der a, Richie-a min cho na piah lam a ka in sawi bat tlak tum chuan ka phone chu ka hum ran a, Christmas ah leh kumthar chibai buk nan chuan ka be ve ngei a, min wish let ve tho a, mahse ka in sawi duh lo! ka be zawm lo bawk! Mahse ka duh na hi a lo thlawn a liam tir ka phal bik si lo! A pawi lo ve, ka duh thu ka hrilh ang ka ti hleinem, ka bia ang ka ti mai alawm!



"Duhsak, i tha em?" an hnam tawng ngeiin ka bia a, kei ka nih rin ngaihna a hre miah lo ang!



"Tha." wow, va bei tawi thiam ang reng ve,


"Hmel chauh lo pawh a tha ti ta che." ka nui suk a,



"I duh duh a i tih tur ka ni lo, min rawn be tawh suh!"



Ka nui chhuak hak hak a, tu emaw ni tak a huat deuh emaw min ti anih dawn hi!


"Naktuk ah ka hmu dawn che." ka ti lui leh hram a,




Min chhang let tawh lo! A ngainatawm teh reng nen! a mi huat te tan chuan a te na vang vang a a tawh a khirh talh dawn nih hi! A biangsum tereuhte chiang zet a lang kelh thin ngaihtuah reng chung chuan ka mit ka chhing zui veng veng a.




"Naaa, Buddy tunge rawn luh tir che a." ka khum a rawn lawnin ka thawh hma chu ka beng leh hmai vel chu a rawn liak hlup hlup a,



"Huiha, aw ka tho dawn ka tho dawn." ka thu chhuak hluai a!


Ka hauh hlau zetin thuawih hmel zet a thu chungin a meng kun vei lap a, han huat theih pawh hi ani lo! Phakar reuh lutuk mai!



Intifai turin washroom lam ah ka lut a, ka rei dawn lo tih hria ni awm fahranin khum a min nghak ni awm hrimin thu vei ran a,



"Kal ang le," ka track suit ka ha zo chiah tih ah chuan ka ko a, phur lutuk tak in a rawn zuang thla nghal a,



"Leash lo zu zawng la." ka be nasa thei bawk a, tawng chu hre tak ani, a tlan thla nghal thurh thurh a,



"Good Boy." kawngka bul ah chuan a leash pet vung chungin a lo thu at a, laksak in ka thlung zui mawlh mawlh a,



"Hey, humpty dumpty, i va tho hma ve." ka rin loh deuh a tun ang zing kar ah kan hmuh chu le! Zingkar ah hian a hmeltha zual bik amawni!



"Maw, keimah maw?" hawi kual ruai chung chuan a in kawk a,



"Aw nangmah kha, ka hming ka hrilh che a, i hming min hrilh ve duh si lo a, i inhmeh ka tih ber hming in humpty dumpty ka ti mai ang ang che." ka nuih suk a,



"A tul lo aw." a ner nung mai, mi te chu an ner chhe vek zel a, ani chu a ner tha zual!



"Nihphawt Humpty Dumpty." Gate hawng a chhuah ka zui nghal ka tum a, ka thiana hi a phur tawh bawk nen, mi hnuk det det tawh bawk sia,,



"Duhsaki." a nui sen sen a,



"Ka hre phak lo Humpty Dumpty." ka thiana nen chuan kan tlan chhuak nghal a,



"Heeeyyy Duhsaki ka tih chu!".....



To be cont.

*** KAN WEBSITE A FAKNA LAM THIL MILEM LANG THIN I LO HMET ZEUH HIAN KAN WRITER TE HLAWH KAN TUMSAK ZEL TIH KAN HRE THEUH DAWN NIA, KAN LAWM E***

Website story link ho awlsam zawka in zawn hmuh zung zung theih nan STORY FB group siam a ni a. Whatsapp group pawh siam a ni e. Complete tawh ho zawng zawng leh story kallai kan dah vek avangin avangin in lo join theuh dawn nia..
Group link : https://www.facebook.com/groups/991354610918230/

Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)