BEISEINA IN BY Mpi Hmar Godfrey (Completed)

Episode nei ho a hlawm a dahkhawmna
Ngaia
Site Admin
Posts: 25813
Joined: April 30th, 2016, 4:07 pm

BEISEINA IN BY Mpi Hmar Godfrey (Completed)

Unread post by Ngaia » February 16th, 2020, 4:16 pm

Kumthar ah avawi khatna atan ka rawn lang ve leh ta hlawl mai.
Ka story MERCY leh MI PASAL ZUNAH tih min hlutsak tu te, he story hi min chhiarsak leh theuh turin ka sawm nghal che u a, ANGEL ka rawn dah zuai kha engemaw vangin ka delete a, tun a mi erawh kan complete ang. awihawm loh khawp hian mihring nunah hian thil thleng thei tam tak hi a awm a, mi then khat ten nun nuam leh pangai tak an hman lai in then khat erawh an kawng a bumboh hle ani tih kan hre thei ngei ang.

5763wsan.jpg
5763wsan.jpg (29.27 KiB) Viewed 21656 times

Hei le👇
******

BEISEINA IN
*************

Ka hming chu lalremruati ani a, maruat tiin min ko thin, nausen hnute hne lai ka nih atangin ka nu leh ka pa hi an in then tawh a, ka pa bulah ka awm thin a, a chang in ka nu bulah ka awm bawk thin, ka kual tawn sek hi ani ber mai.

Ka nu bula ka awm reng lai chuan, ka pa leh ka pi in min rawn hruai leh a, ka nu leh ka pa tan an fa neih chhun ve ve ka nih avangin ka hlu ve viau te pawh a ni mah na.

Ka pa bulah ka awm leh meuh chuan mithar an lo awm ve tawh a, ka pa nupui thar te nen kan cheng ho ta a, chuta tang chuan ka nu bulah ka let leh tawh lo, a hmel takngial pawh ka hre tawh lo.

Ka pa chuan a nupui thar lakah fa pathum a neih belh leh a, kan khawsa ho vek bawk a.

Ka mitthla ah hian ala cham reng thin, chhuat ah bial laihin chaw kan ei a, chawhmeh ka suah ve apianga rum fahran a min melh kawk thin kha.

Primary zirlai naupang mai mai mah ni ila, ka nu mitmeng avang khan ka van zam nasa thin teh lul em, a fa te nen a min thliar hran na erawh sawisen a ni lo ve.

Ka pa chu hnathawk in a chhuak nitin a, a chang chuan an riak bo vang vang thin, ka nu in min enkawl dan engmah a hre ve hauh lo.

Vau zam ka ni a, in thlahrung dekin nitin hun ka hmang ve zel a.

Kum riat ka nih kum chiah hian ka pa chuan min boral san a, chhungte in ah ka awm kual tan ta a.

Duh thlang thei ka nih loh avangin ka awmna apiang ah chuan ka lungawi a ngai a, ka len hun ah chuan ka nu ka zawng chhuak anga, a bulah ka awm ang ka ti ve fo thin.


Hun leh ni te pawh a ral ve zel a, high school ka rap chho ve a, kan lo tleirawl ve ta reng mai, mahni infak thu ni lo se ka vun a ngo em em a, ka pa sam ka chhun a, ka sam a kir nalh em em bawk, kan rualpui te ah min ngaizawng tu te kan han tawng chho ve a, mahse mahni insitna leh nuam tih lohna ka ngah em em reng a, ka inthlahrung viau thin.

Khang kum tam tak, ka lo thanlen chhoh lai khan hreawm tam tak ka tuar a, fahrah nun hreawm zia ka hrechiang viau bawk.

Ka nu chanchin reng reng ka hre zui lo a, engtin nge a awm a, khawnge a awm tih te chu ka ngaihtuah zui ve ta a, ka thu hriat chuan min thawng tak zet, ka pa boral kum ah vek chuan a ni pawh a lo boral tawh chu a lo ni, a hmel tal hriat ka van chak tak em.

Kum 17 ka nih kum ah chuan nasa taka kutthlak ka nih avangin leh tih duhdahna ka tawrh zozai chu ka tuar reng thei tawh lo a, in atangin ka tlan chhuak ta a.

belh leh pan tur dang ka nei chuang lo a, thiante in ah ka awm kual mai mai a, a chang chuan ka cousin te bulah ka awm bawk thin, chutiang chuan a awm reng theih si loh, a tawpah chuan pasal ka um ta hial ani.

Ka cousin te in a ka awm laiin ani pawh chawlh la a a rawn haw lai a ni a, hna thawkin ramdang ah a awm thin.

Kan thenawm lawk ah hian an thiandun in nula an rawn rim thin a, chutia rawn kal reng an nih avang chuan kan inhmelhriat ve ta vat reng a.

An rawn rim thin kan thenawm nula nen pawh chuan kan inkawm ve fo thin bawk a, tichuan kar lo ah kan pali chuan kan inkawp chu ani deuh der a.

Ka bialpa chu lalmuansanga ani a, ms tiin an ko mai thin, a pawnlam landan ah chuan mi zaidam leh nunnem ani, ka thu a awih em em a, min care em em bawk, a tawng tam lo a, a zeilo ve viau bawk, a lan dan ah chuan a nula mi lo ve khawp mai.

A cham chhung chuan zantin a rawn leng thin a, zu a in thin tih chu ka hria a, mahse buaipui ngai emaw, buaina chawk chhuak zawng emaw chuan a awm ngai miah lo thung.

Engemaw chen hnu ah chuan a kal a lo hun leh tawh dawn a, a kalna turin ni tam a awm tawh lo.

Zankhat chu a rawn leng a, ka u te erawh an mu vek tawh a.

Maruat, zanin chu ka rualin lo haw ve mai ta che, ka kal ahun leh mai tawh dawn a, ka nupui ni turin ka duh che ani tiin inthlahrung angreng tak hian min sawm a.

Ms.. A chi rih loh, kan inhriatna pawh ala rei lo a, inhrechiang tur pawhin hun kan nei tam lo a, inneih chu hmanhmawh suh tiin ka hnial ve tlat a.

Kei chu ka landan ang zawng hi ani mai, hriatchian leh tur chuang ka awm lo, nangman harsatna inei anih chuan ka hre lo a.

Ahmel atang chuan a lungawi hmel vak loh khawp mai, zanrei tak thleng chu a leng na in chumi zan chuan ka hnial fithla thei thung a.

A tuk zingah chuan ka u chu thil awmdan engkim ka hrilh vek a, ka u lah chuan min lo duhpui em em mai a, hna nei te anih bawk avangin kei fahrah, tu ma duh loh tan chuan athat thu min hrilh na sa hle bawk a.

Nileng mai chuan ka in ngaihtuah a, a ni lah chu a reh vawng vawng mai bawk si nen, a kal a hun tep tawh si avangin chhun lamah pawh chuan lo leng se ka duh avangin call ka tum ta a.

Ka phone pangai, tereuh te chu ka la chhuak a, midang hmuha phawrh vel pawh zahthlak tak ani, mahse ka neih chhun ani miau bawk si.

Ka call ta a, a in ring reng a, ala dawn tawh lo emaw ka tih hnu chuan a rawn pick up ta a.

Mahse amah ni lo in hmeichhe aw ani tlat mai.

Hello...

Ka bah deuh nak a, msa a awm em?

Awmlo tih pahin phone chu a dah ta nghal a, ka call nawn ngam chiah tawh lo a, rilru erawh anuam zan lo khawp mai.

Zanah pawh chuan a rawn lang ta reng reng lo a, min rawn be bawk hek lo, inhruai haw tura min sawmna kha ngun taka ka ngaihtuah hnu in ka rilru ka lo siam fel diam tawh kha ani a, enge thleng lah chu ka hre der mai silo.

A tuk ah chuan nupui a ru ani tih chu thuthang vel atangin ka hre ve ta nghal a, mak ka tih em avangin ka nui deuh tawp ringawt a, sawi vak tur ka nei lo, ka ta tur anilo ani tih pawh ka pawm thiam lutuk tlat.

Ka u te khua hi Aizawl atangin ahla vak lo a, khaw nuam leh lian pangai ve tak ani, an bula awm reng pawh nuam ka ti lo a, an pasal te mitmei ven angai ve bawk nen, amah nen chuan in ngaiin in mil viau mah ila Aizawl lam ah chuan ka chho leh ta zawk a.

Ka pu te bulah ka lut leh ta rawih phawt a, ka pu chuan min duat viau mai, nu leh pa nei tawhlo ka nih avangin theih tawpin min duat ve a, nuam pawh ka ti ve viau.

Engemaw chen chu an bulah chuan ka awm ve a, mo an nei a, mitmei ven ngai reng reng a awm chu a hahthlak ve thin khawp mai.

Ka pu chu kohhran upa anih avangin inkhawm angai pawimawh hle mai a, kei pawh chuan kohhran ka belh phah ve hle mai a, nuam ka tiin thalai ah te pawh ka in hmang chho ve ta zel a.

Ka pu te bula ka awm lai chuan zankhat chu ka phone a rawn ri teh nawlh a, ka number hriat hnu ang ka ti viau mai.

Inchung zawlah keimah chauhin ka thu a, khawlum vanglai anih avangin kan in bul mai tuikhura inbual mek te chu ka thlir pah reng a.

min rawn call tu chu ka chhang thuai a.

Hello.

Maruati ini tiraw?

A aw atang chuan Msa a ni tih ka hre nghal vat a.

Engvangin nge min rawn biak a, ka lo vin deuh nghal hlur a.

Ka ngai lutuk che a, ka rawn be tawp che, idam tha maw?

Aw dam tha e, ka tha lutuk tiin thawveng zetin ka chhang zung zung bawk a.

Khawnge i awm tih min zawhna erawh a hriat zel ngai ka ti lo.

Lo chhuk leh la!

Engvang ngawtin maw?

Ka thil tih sual hi siam that leh ka duh ani, nang nen bul tan thar ka duh takzet a rawn ti chuai raih a.

Awlsam taka phatsan ka nihna kha ka hre reng a, mahni tawka luhlul, fahrah nun leh hreawmna tam takin a tih luhlul tawh ka thinlung chuan a ngaidam mai mai thei tawh lo.

Mipa le lo tak ilo nih hi, ka lo zui lo che kha ka tihfuh zia ka hre thar telh telh, nang pawh nupui nei tawh ini a, min rawn biak fo hi ka duh lo ania, ka hmeichhiat pui te rilru tina tu ka ni duh lo bawk a, chuvangin min theihnghilh daih rawh, kei pawh nun bul thar ka tan tawh a, thil kal tawh leh liam tawh kha ka kokir thei tawh lo.

A ngawi deuh reng a.

Maruat, ka ngai takzet che, hlim taka inui ri te kha ka mitthla ah a cham reng a, kha zan anchhedawng kha ka hua, ka haw takzet a ti tlawk tlawk bawk a.

Ka unau dang ten min rawn fin tak avangin kan inbiakna pawh chu ka ti tawp ta nghal a.

Zan tin deuhthaw min rawn call a, mahse ka chhang ta ngai lo thung, awlsam tak mai a zankhat thil thu a min phatsan thut thei kha ka hre reng a, ka tlawm thei lo.

Ka pu te bulah chuan ka awm nghet ve ta viau a, lehkha thiam bawk silo ka nih avangin nakin zelah mahni ka in tun nun ve nan tiin puan thui te pawh ka zir ve a, ka pu in khawl te min leisak a, thui tur pawh ka nei ve ta neuh neuh reng bawk a.

Kum 25 ka nih kum hian kan kohhran thalai ah hruaitu ka ni ve a, mawhphurhna neuh neuh te pawh ka nei ve a, nula pangai tak, sual kawng dai bik lo chuan hun ka hmang chho ve zel a.

Hringnun chu a inher danglam a, zingah ni alo chhuak a, tlai ah a tla leh thin ang hian kei pawh ka nun chu a danglam ve ta zel a.

Kan kohhran upa pakhat fapa, kei aia kum nga zeta naupang nen hian kan inkawm nel viau a, zirlai ala ni a, afel em em bawk a, u maruat tiin min ko mai thin.

Thian ang chauhin kan inkawm emaw kan tih laiin kan inkar chu in ngaihzawn na in kan chhun zawm ta der mai.

Ka pu fanu nen hian kan inkawm ngeih viau mai a, kan mu dun a, thuruk engkim thlengin kan inhrilh tawn thin, chumi zan pawh chuan kan inkhawm bang chu hma takah kan mu a, a bialpa chung chang vel min hrilh melh melh reng a.

Ka phone ah msg a rawn thleng a, rang takin ka en thuai a, phone te reuh te kha ka hmang reng bik tawh lo a, ka puanthui hlawh tlem te te ka khawl atangin phone tha ve pangai tak ka lei ve tawh a, khawih vel pawh a nuam viau tawh.

Ka beisei em em loh sangtea msg chu ka dawng teh mial a.

I mu tawh em?

La mu chiah lo, nang zawk?

Ka mu zal mai mai, vawiin hnatlang chu i chau em?

Chau lo ve, ahlimawm khawp mai.

Tiang chuan kan inbe chho zel a, zan dar sawmpakhat bawr velah chuan kan thupui a dang ta viau a, a tawpah chuan kan insawirem chu ani ta reng mai.

Thalai inkhawm zan hmasa ber chu kan inhmuh leh vawi khatna a ni a, kum lama la nau deuh tih takah a lai tak zet.

Thawhlawm khawn tu ka nih avangin an thutna lamah ka kal lo thei silo, a kun tlat a, min en ngam meuh lo, mahse a la zia ve mahna.

U Maruat ti a min ko thin kha tunah chuan Maruat tiin min ko ta a, a naupan ngaihtuah erawh chuan a puitling em em a, min care em em a, a thuhnuaia min dah a thiam bawk a, ai a naupang mah nise a thu ka awih khawp mai.

College kal lai anih avangin nitin a chhuak a, kei erawh puan thuiin ka buai thei hle thin, class atang in min rawn be fo thin a, a chang chuan ka ngaihtuah neuh neuh thin a, a rualpui chhelo tak tak pawh a hmu ve awm tho si a, a u ai pawha upa zawk min han duh tlat mai chu mak ka ti ve fo thin.

Lehkha zir a duh thin avangin a rawn leng tam lo a, min care em em tho siin lungleng taka min dah dan a thiam a, ka mipa duhzawng tak ani chho ta tlat mai, a mizia zawng zawng nen chuan ka hmangaih bur tawh ani ber.

Inkhawm turin kan kal dun a, rei vak lo a rawn leng kawi a, a haw vat a, lehkha a zir nasat avangin min rawn be zen zen lo bawk.

Sunday erawh kan leng chhuak dun ve fo thin a, hun hlimawm tak kan hmang ve thin.

Kan chanchin chu miin an hre vek tawh a, a chhungte leh ka chhungte lam atangin harsatna em em kan nei rih lo bawk a, tluang takin kan inkawp chho ve zel a.

Mily&Sily tih thu hi a awmzia hrelo tan chuan thil ho tak a ni ngei ang le.

Keini chuan inbiak nan tak kan hmang fo thin, hming lem atan kan inphuahsak hial bawk.

Maruat, i love you.
Sangte, i love you.

He thu hi hming lem atan inkoh nan kan hmang thin.

Nikhat chu a class bang hi a rawn pengkawi a, chocolate, umbrella shape ngei mai hi min rawn hawn a, thil ho tak angin lang mahse khami ni a ka hlim si zia kha.

Inkhawm turin ka rawn sawm ang che aw, lo inpeih hma la, ka rawn kal hma ang a tih hnu chuan a haw ta hnak hnak a.

Chhungkaw awmthei tak anni bik lo a, zirna lamah phei chuan a mah chiah hi han thlengsang ve deuh ani a, a unau dangte erawh kut hna an thawk mai a, chuvangin a nu leh pa te in nghahna a nih thu hi a sawi fo thin.

Darthlalang hma ah chuan ka insiam mawlh mawlh a, ka mit te, ka hmui te pawh ka chei ve a, a rawn thlen hma chuan ka lo inpeih diam tawh a.

A ke pen ri atang chuan a rawn thleng ani tih ka hre nghal vat a, rang takin sitting room ah chuan ka phei vat a.

Ngun leh uluk fahran hian min en a, mak ka ti angreng viau mai.

Kan chhuak dun ta a, thui pawh kan kal hma chuan a ipte atangin a rawmawl a rawn phawrh a, min pek pah chuan imit kha hrufai rawh a ti bung deuh nghat a.

Uluk leh nalh loh hlau em em a ka lo inhnawih ve chu a duh ta hlek lo mai, a mah hi ka zah em avangin a duh ang chuan ka ti zel a, ka inhru fai mawlh mawlh a.

Pathian be tura kal kan ni a, mit dum huam a biakin a kal a ngai lo hrim hrim, fai takin ihmai phih la a tawk chiah.

Ka ngawireng a, mi mak tak chu ava ni em ka ti rilru vawng vawng a.

Kan inpiah mai ah hian thingpui dawr hi a awm a, kei pawh ka chawl ve fo thin, tum khat chu an mi chhawr te damlohna avangin an kal thei lo a, an buai em em bawk a, reilo te atan min pui lawk rawh an tih avangin kei pawh chuan ka lo hnial bik lem lo a.

Sangtea pawh chu ka hrilh vek a, a ni pawhin remtih lohna a nei hran lo.

Thingpui dawrah chuan ka thawk ve ta a, fapa tlangval lian deuh mai hi an nei a, mi fiam a hratin mi kuah nawk nawk te hi a hrat viau a, fiamthu duh tak mai ani bawk a.

Mi kuah pahin, kan nu hi a hmeltha em?

Kan innei tep tawh a tih mai mai a dawra awm ho te fiam chu a hrat hle a, kan inchum thum dawt dawt fo thin.

Sangtea chu inkhawm ngaipawimawh mi tak anih avangin ka inkhawm lo zauh zauh chu a ngaithei vak lo tlat, kan buai theih em avangin inkhawm hman loh chang ka ngah ve bawk a.

Zankhat chu inkhawm hman ngei tumin tih tur tul ang ang chu ka ti sawk sawk a, dawr atanga kal tum in ka inpuahchah ve a.

Dawr kan khar fel tawh a, a chhung lamah chuan kei leh an fapa lian tak leh a thiante pahnih chu kan awm a, an ni thian thum chuan zu an in melh melh a, an ti ti bawrh bawrh a, zu in mahse buaina siam chi erawh an ni lo thung.

Inkhawm dar a ri tawh a, ka la inpeih chiah lo a, sangtea chuan min rawn sawm ka ring lemlo bawk a, mahni a kal tum ka ni bawk a.

An zu in lai chu an tibua a, dawr chhung zawng zawng chu zu rimin a khat nghal vek a, kawngpui bul mai anih avangin leh a nuten an hriat ka hlauh em avangin ka tihfai pui sawk sawk a.

Ka hau mawlh mawlh bawk a.

Chutih lai tak chuan sangtea chu a rawn lut hlawl a, engmah chu a sawi lo na in a lawm hmel tehchiam lo.

Biakin lam pan chuan kan inzui chhuak ta a, ka rilru a nuam chiahlo a, ani pawh a ngawi reng bawk a.

Exam a hnaih tawh avangin inkhawm ban rualin a haw nghal a, kei pawh ka mu hahdam nghal a.

Rei vaklo hnu ah msg a rawn thawn nghal a.

Miin zahlo taka an fiam che leh kutthawh meuha an fiam fo che hi izir loh vang nge, ka tan hian thil hmuh nuam pawh a ni chiah lo, mahni inti zahawm thiam lo khawp a ikhawsa hi amak ka ti ani tiin.

Chumi zan chuan kan inhnial nasa ve viau mai a.

Khu dawra ithawk duh anih chuan kan inkar hi tawp rawh se, mi zu tih buak tifai tur khawp a mahni zahawmna pawh ngaipawimawh theilo inih chuan iduh duhin awm rawh tiin thu tawp a rawn siam titih der mai a.

Diktak chuan ka chan phal lo, ka hmangaih em em a, a mizia, a nun zia zawng zawng hi ka duh ani, a ni ang mipa hi ka tawn leh ka ring tawh lo, ka chan thei lo.

Ka mizia ang lo takin tlawm takin ngaihdam ka dil a, kan inkar a chhiat ai chuan ka bansan mai ang ka ti ta hial bawk a.

A tuk atang chuan ka kal ta lo a, vawi tam min ko a, chhanna pek erawh thil har tak ani.

Kan inkar a nghet chho zel a, harsatna kan tawk chho tan ve ta.

Zirlai ani a, mahse kan inkawp ngheh tak em avangin ka bulah hun a hmang tam a, a zirlai ah a tih chhiat phah ta hial a, chu mi avang chuan a chhungte ngaihdan ani ta chiah lo a, an lo hau fo thin a, ka bula awm rem an ti ta meuh lo mai.

Ka pu te bulah pawh eng eng emawni chu an sawi ni ngeiin alang.

Zankhat chu ka pu in min ko a, kan thu dun ran a.

Mami, hei Sangtea nen in boruak hi kan hre vek a, sangtea hi tlangval fel tak ani tih chu kan hre vek a, huatna engmah kan nei lo, mahse zirlai ani a, an chhungkaw dinhmun ihre vek a, anu leh pa, unaute in nghahna ani a, kum lamah nise in in khan lo na sa a, an in ah khian i mo thei dawn mi? Kut hnathawk a eizawng an ni a, nang ang tha nep lutuk, hna thawh thiam bawk silo tan chuan mo ngaihna a awm lo, a duh pawh an duh lo ang che, an chhungkua a awm tur chuan hnathawk thei nih angai asin tiin min hrilh melh melh a, in then turin min duh ani tih ka hrethiam nghal a.

Ka chhang lem lo na in ka thlah thei dawn chuanglo ani tih ka hre chiang tawk viau.

Chumi ni atang chuan a chhung ten an khuah khirh ta viau a, kan inkhawm kal vel erawh an sawisel lemlo a, a zirlai bahlah an hlauh vang chauh anih avangin inhmuh tam loh chu pawi ka ti lo.

Kan lung a leng dun viau thin a, kan in be rei thin khawp mai.

Kan inthlah tak tak thei siloh avangin hreawm pawh kan tuar viau a, a nu in ka bulah a sawi takah phei chuan nuam lo tak ani tawh.

Maruat, lo tuar hram hram rawh aw, ka zirlai ka zo tep tawh a, hreawm kan tuar reng bik tawh lo ang tiin min hnem fo thin, hun lah chu akalmuang em em mai bawk si.

Ka awmna hmasa ka cousin kha ka pu fanu upa ber ani a, an pa hi IR niin hmun dangah an post thin a, chutianga kan boruak a awm lai vel chuan awmpui an ngai leh ta thut a, min rawn chah leh ta a.

Ka pu chuan kal ngei ngei turin min tur lui a, ka hreh takzet, sangtea hmun danga kalsan chu ka hreh ani.

Ka kal hma zan chuan a thianpa te in ah a rukin kan inhmu a.

Lehkha bu nen meuh a rawn thawk chhuak a, a chhungte abum ani tih ka hrethiam nghal bawk a.

A thianpa te nupa chuan min inthiarfihlim san thuai a.

Kan pahnih chuan kan thu dun a, ka sam kir sei tak chu a zut mawlh mawlh a.

Sangte, ka van hreh tak em, tlanbo daih mai ang tiin ka rikru ipik lutuk chu ka tawng chhuak hlawl a.

Kan tlanbo daih mai dawn mi a ti ve hial a, mahse ngun taka kan sawi dun hnu chuan rinawm taka in nghak turin kan intiam a, hreawm chhung a rei dawn lo, kan chhungten remti lo mahse kan innei tho ang tiin thu kan titlu a, reitak inhmu thei kan nih loh avangin ngai em em in kan in kuah vawng vawng a, ahrang ve ve in kan chhuak ru dun ta a.

Zankhua in chhin khat mah ka chhing lo, ka lung a leng lawk sa em em a, ka hmangaih em em hmu lo a ka han awm bo vang vang tur chu ka khua a har lawk hle mai.

A tuk ah chuan ka thuamhnaw nen kan in atang chuan ka chhuak ta a, sumo stand lam chu ka pan ta a.

Sangtea phone call ka dawng a,

Khawnge i awm?

Sumo stand lam ka pan mek a tiin ka chhang a.

Min lo nghak rawh, ka lo kal ang a rawn tih meuh chuan ka hlim kher mai.

Class kal lo in min rawn pan vang vang chu niin.

Kan han inhmuh takah chuan kal ka tum hun chu kan sawn thuai a, sumo chhuak tlai ber dar thum a chhuak tur ah chuan ticket kan hauh ta zawk a.

Darkar tlemte inhmuh pawh kan thlahlel tak zet si a.

A thian te in ah kan kal dun a, hneichhia naupawm hi alo awm a, an titi nghal luam a, kei erawh chu ka ngawi reng thung.

Chu nu chu a naute nen chuan an leng chhuak ta daih a, kan pahnih chauh chuan kan awm ta a.

Kan vanduai bik ti raw?
Mahse lo lungngai miah suh aw, engtik ni ah emaw chuan hlim takin kan la awmdun leh ngei ang, ka ngai dawn lutuk che tiin min kuah vawng vawng a, ka mittui tla mai tur chu dan hram ka tum a, ka mit ka khap deuh sak sak a.

Khum ah chuan in kuah rialin kan mudun a, kan inthlah thei meuh lo, a khat tawk in sana kan en deuh chhen a, hun lah chu akal pur pur mai bawk si a.

Ka kal hun a hnai zel a, ka lungphu te pawh a dik tawh lo, dar hnih a rawn ri a, counter lam pana ka kal angai tawh si a.

A tawp nan in thlahlel takin kan in kuah leh vawng vawng a, kan hun tawpna tur ani tih reng kan hre silo.

Sumo stand lamah chuan kan inzui phei leh ta a, kan thlen phei meuh chuan chhuah a hun dawn der mai, passenger dangte pawh an lo thu tawh a, kei pawh chu ka seat ah chuan ka thu ve ta a.

Kan kal hma chu tukverh pawnlamah a ding a, kan inbe reng a, a tawpah chuan kan kal a hun ta, motor chu a rum ta hlarh hlarh a, kan mit ah kan inen kar a, lungngaih na karah chuan hlim hmel kan pu lui hram a, nui sak chungin kan in mangtha ta a, kan tlan ta vang vang bawk a.

BEISEINA in kan hma lam hun tur kan thlir ve chauh tawh zawk ani.

Bus ah ka chuang mek, ka lung a leng lutuk, mipa mah ni ila mittui dan a va har si em tih thu min rawn thawn a, signal chhia in a zui nghal avangin ka chhang zui thei ta lo.



Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » February 16th, 2020, 4:17 pm

Signal that deuhna lai atang chuan ka chhang zel a, kan inbe reng a, kan thinlung chu inhnaih viau mahse kan taksa erawh a in hlat telh telh thung si a.

Kan sumo chuan na ah chuan hla lunglen thlak tak tak an play reng bawk a, tukverh ah chuan ka han hawi chhuak a, ram ngaw hring nghulh mai te, boruak thiang tak te chu ka thlir reng a, ka lung avan leng tak em, ka hmangaih sangtea kha engtin tak awm ve ang maw? In ah ahaw tawh ang nge tih te chu ka ngaihtuah pah zel a, ka ruak vek hian ka in hria a, ka tawp deuh tlat ni mai hian ka hria.

Zan dar riat bawr velah ka cousin te in chu ka thleng leh ta hlawl a, ka chau em em a, ka mut a chhuak viau bawk .

Taksa rawl them thum tur tih reh nan tui sa ver vawrin ka inbual a, ka hahdam huai mai.

Bawng kawchhung tui tak ka u in alo siam a, chawei ah min lo nghak bawk a, chawei lah chu a tui phian bawk si, mi lungleng te chu chaw an ei theilo ani thin a, chu zan kher kher chu ka ei tui ngang mai.

Atlai lam deuh tawh bawk a, ka mutna tur a alo siam sa khum te reuh te ah chuan ka mu ta nghal a, sangtea msg emaw call emaw ka dawng lo chu mak ka ti viau mai.

Min ngai pawimawh nge ngai pawimawh lo tih ka hriat duh avangin ka be hmasa duh ta bik lo a.
Muhil si lo chuan ka mutna khum ah chuan ka let tawn sek a.

Minute sawmhnih hnu vel ah chuan ka phone chu a ri nawn tluk tluk a, ka han en thuai a.

In thleng tawh em?

Tinge i ngawih reng?

Tinge min chhan duh miah loh a?

Thu tam tak min rawn thawnna chu a rawn lut ta zung zung a, ka nui sak a, ka chhang let ta nghal zung zung a.

Mily, ka lung a leng lutuk, biakin a i thutna ruak ta mai te chu ka en reng a, ka mitthla in i thu lai hmel te ka hmu a, ka ngai lutuk che, inkhawm pawh ka phur tawhlo, ka ngai takzet che ani.

Zanin inkhawm zan ami?

Ni love, kan hnatlang a, biakin chhung velah kan lut a, ka mitthla ah irawn lang nghal zut zut mai, ka ngai lutuk che.

Sily, kei pawhin ka ngai lutuk che, mahse kan sawidun tawh ang khan rinawm takin kan in nghak zel anga tiraw, engtik ni ah emaw chuan heng thil te hi thawnthu ah ala chang dawn lawm tiraw.

Tehreng mai, i chau awm si a, tui deuhin mu rawh aw, ka ngai che, ka hmangaih lutuk bawk che tiin min rawn mangtha a, kei pawh chu ka chauh deuh avangin ka phone ka dah thuai a, ka muhil nghal bawrh bawrh a.

Hun engemaw chen hnu ah ka let leh ta chu ania, Hmelhriat leh thian tha te pawh an rawn leng ve nak nak thin a, ahmingin nula te kan la ni bawk a, rimtu pawh ka nei ve deuh reng bawk a.

Ka u chuan eichawp dawr a siam ve a, chu chu ka nghak thin a, mihlim thei tak ka nih avangin ka awm thei mai zel a, lunglen chang ngah viau thin mah ila ka tuar thei mai zel.

Zanah inleng neih laia phone han khawih san daih te hi thil mawilo anih avangin sangtean min rawn biak tum pawh in chhan mai loh chang ka nei fo a, a ngaih a tha chiah thin lo hle.

Hun engemaw chen ka awm a, lunglen khawhar pawh ngaiah ka nei chho ve ta.

Ni khat chu ka sam sei lutuk tawh chu tan tir ka duh avangin bazar lamah ka chhuak vak ve a, beauty parlour lam pan ve ngei ka tum a, keimah in ke in ka kal hnak hnak a.

Horn a rawn ri tuar a, ka phu chiang kher mai, ka hawi chhuak vat a.

Ka hma lawk a bike leh a khaltu chu ka hmu chiang ngang mai, mak tih hmel zet hian min melh kawk a, kei pawh in mak ka ti, tum loh lutuk maiin kan intawng leh ta hlawl mai.

Ka bul maia ding anih avang chuan kei pawh chu ka ding deuh dat a.

Teh hlawl chuan

Khawnge ikal dawn?

Bazarah ka va kal lawk teh ang tih bakin ka chhang lo.

Engtik nge i rawn chhuk a?

A rei ve leh tawh, ka hmanhmawh deuh a ka kal aw tih pahin chak fahranin ka pen hlawk hlawk a, engemaw ti riau hian ka rap a, ka thau ah min man deuh tlat mai.

Kan in hmu chu ka duhlo viau mai, a rawn len mawlh chu ka hlau ani.

parlour chu ka thleng phei thuai a, ka sam te chu ka tan that tir vel a, in a tawm reng ka nin ve deuh avangin muangchangin bazar velah chuan ka tei hawi kual vel bawk a.

Zanriah kan ei mek lai chuan ka u chuan msa a rawn kal thu chu a sawi a, zanah rawn len a tum thu a sawi bawk a.

Ka hmu peih awzawng lo, ka leng bo daih dawn ka ti bung nghat a.

A lo kal hma ngei a lenbo daih chu ka duh tak tak bawk ani.

Rilru hmanhmawh tak chungin chawthleng vel chu ka seng fel sawk sawk a, thleng ka sil zo hman tep tih ah chuan kawngka a rawn kik karh karh a,

Ka u in alo chhawn vat a, ka hmuh peih loh ber mai leh ka huat em em msa chu a rawn lang ta hlawl mai.

A helmet a keng a, a mit a sen deuh ram a, ka rap angreng viau mai.

Ngawi rengin sitting room thutthleng ah chuan athu a, akhat tawk in ka u fapa chu a chhaih leh zauh thin.

Ka mood a in thlak nghal vek, ka lungphu te a rang a, ka sa pup pup bawk a.

Ka u chuan min rawn mitmei zauh reng a, kei lah chu muang chang thei ang berin ka che a, thil dang tih tur ka dap ta zel bawk a.

Ka u chuan min rawn kheuh zauh a, va thu phei rawh, khatia awm kha a mawilo a rawn ti ru sar sar a.

Lungawi lo zet chuan ka va thu ve ta a, biak hmasak pawh ka tum lo.

Ka thu tum deuh bar a, midang inleng ka neih a ka tih ngai loh ang takin ka phone chu ka khawih mawlh mawlh a.

Ka mamawh zan tak lah chuan sangtea lah chu YMA thilah a buai zan tak alo ni bawk nen, thinrim deuh tung chuan ka thu ve ta reng a.

Ka luhlul a chhuak bawk nen ka tawng duh ta reng reng lo a, ka u zawk chuan alo kawm ani deuh ber.

Mi pangai tan chuan thil awmdan hriat thiam loh rual ani lo, msa pawhin ka lawm vak lo ani tih a hre bawk a, rei tak pawh leng lo chuan a haw ve ta thuai a, ka thawveng huai mai.

Tinge a?

Khatianga i awm tlat a?
Mi an lo len tawh chuan tha taka lo biak tur, nula polite lo tak ani an ti mai tur che sin, zankhua a leng tur pawh an ni lo a, an len chhung chuan that chhuah hram hram tur tiin min hau mawlh mawlh a.

Ani kher kha chu nilo se ka polite viau ang, ani kher kha chu ka ti thei hlawl lo, alo kal leh vaih chuan ka nawr chhuak tawh ang tiin ka u chu ka chhang hmiah a.

Tlawm tum lo msa chuan min rawn birh leh ta tluk tluk mai, fing tak maiin a che a, ka u chu a titha em em mai a, a thil phal em em mai bawk si, ka u chuan min duhpui in nei ngei turin min duh em em bawk a.

Ka rilru hian a pawm thei tawh der silo.

Zankhat thil thu a min phatsan thei tu chuan nakin zelah pawh min phatsan mai a awlsam dawn ani tih ka chiang em ani.

Zankhat chu sangtea chuan tihian msg min rawn thawn leh a.

Mily, lo haw chho mai rawh, ka ngaih hi atha thei lo, engpawh huamin rawn chho la, kan nih nih kan ni mai dawnnia, i chhuk atang hian kan in be khat si a, kan hman hun lah a in ang thin silo, ngaihtha takin ka awm thei lo, chuvangin rawn haw mai rawh a rawn ti ta hlawl a.

Sawmna duhawm tak ani, kei chu englai pawhin ka inpeih reng ani tawp.

Ka u bulah chuan chhuanlam eng eng emaw ka siam a, inkhawmpui hunlai anih bawk avangin khawmpui hman ve chu ka duh tiin chhuanlam ka siam ta zawk a.

Min ui bet ngam chiah lo a, khawmpui zawhah lo chhuk leh vat turin min chah mawlh mawlh a, ka aw liam ve mai a, mahse pasal ka nei daih dawn ani tih an hre der silo.

Atuk a haw chho tur chuan ka inpuahchah ta a, sangtea te final exam mai tur an ni tawh a,an zo tep tawh bawk a, hamlam hun a eng ve viau in ka hria.

Ka haw hma zan chuan ka u chuan msa chu nei turin min thlem leh ta a, hna nei ani a, chhungkaw khawsak lamah nise an harsa lo bawk nen, ka tan a that thu bawk chu a sawi leh ta mawlh mawlh reng a.

Ka chhang lo na in ka rilru ah chhete mahin a awm eih silo, ka nuih a tiza zawk hial ani.

Phur em em in ka insiam a, ka hmangaih em em hmu tur ka nih avangin ka helhhawlh ni ber in ka hria.

A tukah zingkar sumo ah chuan ka chhuak ta nghal vang vang a.

Ka lo nghak reng ang che, min titu lam chu ka pan mek ani.

Tluang takin Aizawl ka thleng a, chawhma ah ka thleng der a.

In ka lut a, tumah an lo awm lo a, ka han hawi kual vel a, ka pu chu kawmthlang huanah a chuktuah huan alo tifai vel mek a, midang erawh tumah an awm lo.

Ka inbualfai sar a, ka hmangaih em em in an in ah min lo nghak mek ani, ka ngaihtuah zawng ringawt pawh chuan ka nui sak reng a.

Ilo kal dawn tawh em? Ka hmu chak tawh lutuk che tiin min rawn tur ve sek bawk a.

Lan nalh loh hlau takin ka han inchei ve a, T-shirt ka ha a, kekawr tluan lian lampang ka ha bawk a, slipper pan te ka bun a, ka sam chu ka thlah bawk a, ka sam kir chiat hian min chawi ve em em a, ka inhmeh ve viau mai bawk nen, ka chhuang ve thin hle.

An in lam pan chuan ka kal hlawk hlawk a.

Ilo haw ani maw?

Kawng laka min lo be tu te pawh chu ka chhang liam puat ani ber.

An in leh kan in hi a inhlat ve angreng a, kal deuh vang vang hi angai ve thin.

Ka awmna atang chuan an in chu alang ta vang mai le.

In sak that an tum ani tih hriat takin a ban vel te chu an phun thar ve a, ka chho zel a, an in kawt chu ka thleng ta reng mai.

Kawngka a in hawng a, amah pawh ka va hmu ta nghal a.

Kawngkapui hnungchhawn zawngin a lo thu a, zawi te te in ka kal a, hnung lam atang chuan ka va kuah chawt a.

A rawn lehhawi thuai a, a rawn ding chhuak a, anui ver ver a, min rawn kuah a, awmah chuan ka bei hle hle a, za lemlo tak hian lawm avangin kan nui dun deuh hak reng a.

Ka ngai lutuk che ati deuh chhen reng bawk a, engemaw chen inkuah riala kan din hnu chuan thutthleng sei ah chuan kan thu dun a, a khi deuh reng bawk a, sawi tur tam hle mahse sawi mai tur avang ani.

I thau hle mai, i ngeih anih kha, ivun te pawh a eng leh zual alawm.

Lunglen ka ngeih anih hi, ka lunglen deuh chuan chaw ka ei teuh zel a, ka ngeih khawp mai.

Ava han awihawm loh tak, min ngai hlawl lo, ka tello in itlei khawp mai, biak ihar thei si, kei ka cher em em a, kan in ang lo khawp mai tiin kan infiam bawrh bawrh a.

Kan pahnih a kan in tur thingpui a lum a, kan indun hnu chuan ka chhuak thlak san ta a, ka liam hma zawng chu min thlir reng a, kei pawh ka leh hawi zauh zauh reng bawk a.

Zanriah kan ei a, ka pu chuktuah huan a athlai thar lam tak tak han ei chu a manhla thin viau mai.

Mami, i u in min rawn phone a, i pasal tur tha tak mai ahual ani awm a, afel viau ani awm a, hna nei ani leh nghal a, ivannei dawn khawp mai a rawn ti chhuak hlawl a.

Ka hriat miah loh in an lo sawi ho ani tih pawh ka hre nghal a.

Ka duh loh thu leh neih ka tum loh thu chu chiang takin ka hrilh nghal a, ka nupuii a awm ve bawk a, min tawngkhum na khawp mai.

Nang ang anei duh che chu lawm viau ta che, mi chhe fa kan nih hi hre reng rawh, i phu loh lutuk in nupuiah anei duh che chu hnial buai lo in nei mai rawh, itana tha tur anih chu kan rel, hetiang hian i awm kumkhua dawn lo, i pu hian a dampui reng dawn lo che, engtia awm zel nge itum a? sawrkar hnathawk mitha tak pasal tur ihmuh lai hian lawm takin nei la a tawk ani mai.

Ka rilru na lutuk chu ka chawthleng ka dah tau bur a, pindan ah chuan ka tlan lut nghal a.

Tu hi nge maw a chhun em em a, tiang em em a arilru hi a len mai ni?
Anu lah nu zaidam lutuk, a thinrim hmel pawh kan hmuh ngai loh khawp a zaidam ani a, apiang danglam ani henu hi chu ti a ka chanchin an sawi ri te chu ka hre reng a.

Ka beisei loh lutuk a thil thleng avang chuan ka so bulh bulh thei.

Ka thlen atanga ni reilo te hnuah chuan, ka duhdan leh
ka ngaihdan pawh min zawt hauh lo chuan ka u te ho nen chuan inbia in ro an rel ta hmiah a, ka pasal neihna tur atan ro an rel ta.

Ka tap tlaivar hi a ni deuh tawp mai, sangtea hmuh a thil awmdan hrilh chu ka hreh ani, exam turin a in puahchah lai ani a, chutih laia thudang lo hrilh chu ka ngam lo ani.

In chhung chu nuam ka ti lo a, ka chep em em a, kiltin atangin min hau a, min zilh bawk a, mu leh mal pawh ka hre lo, awmngaihna pawh ka hre tawh lo.

Khawmpui laite chuan a derin ka nui lui a, ka hlim der a, ka na em em a, ka hmangaih em em sangtea chuan engkim a hriat hunah chuan eng ang takin na ang maw?

A ni pawh chu exam a nei mek a, hlim em em hian lehkha a zir dawn te, a chawlh hahdam laite hian min rawn be thin a, mittui nen ka chhang thung thin.

Ka chhungte chuan thutlukna an siam fel ta, an thu ka zawm lo anih chuan ka lak ah an kut an sil tur thu an sawi ta Mauh mai si a, duhthlan tur dang ka nei ve ta lo,

Lukham ah ka hmai ka phum a, ka nu, ka pa, la dam ve ni ula chuan vawiin ah hian ka duhlo chung pasal min neih tir bik lo tur, ka van ngai tak che u em tiin ka tap tlawk tlawk reng a, chaw pawh ei lo in pindan ah ka inkhung deuh chawt reng a.

Ka in ngaihtuah lungpuam a, an tan hian ka hnawk em ani, kei fahrah fa hi tuman min duh lo, mi hnawk mai ka ni.

Ka pasal turte khaw lamah ka chhuk angai dawn a, dan angin nupui a neih theih rih loh avangin awlsam thei ang bera man in hlan tawp rih chu an reldan ani.

Sily... In hmuh kan ngai, a pawimawh lutuk.

Eng thil nge ni ta, naktuk chiah exam kan nei tawh a, naktuk kan tih tur hi a har deuh a, ka induh thawh deuh a, naktuk zan atang chuan ka free tawh dawn alawm..

I a deuh ami?
Pasal ka nei dawn.

Enga?
Fiamthu na chiloh emai a

Rawn chhuk teh, biakin ah ka lo awm ang, kan inhmuh ngei ngei angai, fiamthu a ni lo ania tiin ka nawr ta chiam a..

Kei pawh chu biakin lamah ka kal a, inkhawm ban hnu hian hla zir an awm hnufual thin a, chumi zan pawh chuan mi thenkhat chu an la zai a.

Biakin ah chuan ka awm deuh reng a, ka chhungten hla zirna ah ka kal ani tih an hriat chuan min ngaihtuah dawnlo tih ka hria a, chhuanlam kawng tinreng in ka zawng ve ani.

Sangtea chu ka rin aiin a rawn thleng har a, ka lo nghah chhung chuan keyboard nen kan lo zai mai mai a, kan zai tui viau lehnghal a.

A thianpa chhana, a thian tha ber chuan min rawn kheuh zauh a, lo chhuak lawk teh a rawn ti sar sar a.

Kan in ah a nghak che a, eng thil nge thleng a?

Chhan, ka rilru ahah lutuk.

Tinge a?
Iruak lo mi?

Chulam ani lo, in in ah kan sawi ho dawnnia.

An in lam pan chuan kan kal hlawk hlawk a, mi min hmuh hlau tak chung chuan ka lut ta a.

Hmel ngui ruai a lo thu ka hmangaih sangtea chu ka hmuh chuan ka insum thei lo, ka kuah chawt a, a thianpa chhana te nupa pawh ka zah zo tawh lo.

A ban leh lama min kuah chung chuan lehlamin a khabe a dawm a, a hui leh pap thin bawk a.

Kan chhuahsan dawn che u em?

A thianpa chhana chuan min han zawt te te a.

Chhuak lo ang, thil kan sawi ho angai tlat tiin awm ve turin ka hrilh ta a.

Kan han ngawi deuh ren rawn hlawm a.

Ka haw halh a, sawi ber tur leh bultan dan tur ber pawh chu ka hrethiam lo.

Chhana zawk chu a rawn tawng chhuak hmasa ber a.

Tlanbo tawp mai rawh u.
Motor chuan man leh ei leh in man vel tlem a zawng ka pe che u nga, kal bo tawp mai teh u, anih loh chuan kumkhua a in in then na tur hun a thleng dawn zawk a, tun hi in tan hun tha ani zawk tiin.

Sangtea chu a in ngaihtuah vang vang a, a lu a dawm vang vang a.

Kei chuan tlanbo daih chu pawi ka ti hauh lo mai, mahse sangtea zawk chu a rilru a buai ani.

Tum anei ve a, hmabak hun hlimawm tak athlir ve mek ani si a, a nih tum hi ka bulah vawi tam a sawi ve fo thin.

Maruat, khawiah emaw awmbo rih la, ka exam hi ka zo law law anga, chuan kawng dang kan dap mai dawn nia.

I a mi?
Khawiah nge ka awm anga, engtia rei nge ka awm bo theih anga?

Thinrim deuh takin ka chhang hluk a.

Tihngaihna dang ka hre lo ani, ka exam hi zawh hram ka duh ati zuai raih a.

Thu kan rel fel thei hlawl lo, engkim mai chu abuai zo a, in ru tawp tur lahin a chhungte ah harsatna kan nei ve nasa em em si a, rethei taka ka awm tur a ngaingam bik silo.

Ka thianpa te nupa ka bia anga, an bulah engemaw chen chu lo awm mai ta che.

Chuan engtin zel?

Engmah ti thei leh silo ta la, ka chhungten ka lakah an kut sil si sela, engtin nge min awmtir zel itum?

A thaw hak a, a van pawi tak em!

Kawng dang ka hre tawh lo ani, maruat kal mai rawh, hlim tak leh nuam takin ka siam thei dawn silo che a, engkim mai hi a thleng thut mai bawk si, kei aia tha leh fel zawk i chhungten an duhpui zawk che hi nei mai rawh a ti ta hlawl a.

Ka bei avan dawng chiang kher ve le.

Ka nui sak ringawt a, ka hnuk a ulh a, keini pahnih mai bakah athianpa Chhana te nupa pawh an ngui ve ruai mai.

Dar sawm a ri a, engmah sawifel theih kan nei ta lo, ka kal mai angai ta.

Ka haw phawt mai ang aw, ka chhungten min lo hau palh ang tiin ka thutna atang chuan ka tho chhuak a.

Ka banah min kai chawt a,

Ikal mai ang maw?
Min ngaidam rawh aw, ka nep em ani, itan tihtheih ka nei tlem em ani, hlim takin awm ang che a ti sap a,

Ka hnuk a ulh em avangin ka chhang thei lo, ka mittui a rawn hnam sak a, tap insum tak siin ka lu ka bu nghat a, ka hrethiam che alawm, itan pawh a har ani tiraw?

Itum ram chu lo thleng ngei ang che tiin duhsakna ka hlan a, ka chhuahsan ta a.

Kawngkhar atang chuan min thlir reng a, ana thlawt ani, Engvang in nge in hmangaih ngawih ngawih te hi then hran an nih thin le?

Khuanu pawh hian fel takin rem ruat ve se aw,

Ka ruak ta vek mai, tunah zet chuan mi nupui ka ni dawn ta.

Ngaihtuah na mang vek an tih ang hian ka awm a, muhil silo chuan khumah ka let ka let a, engtia awm tur nge, enge tih tur ka hre thiam lo.

Mily, hlim takin awm rawh aw, ihlim chuan ka hlim ani mai, itan tihtheih ka nei lo erawh min ngaidam ang che aw, ka hmangaih reng fo ang che tiin msg min rawn thawn pawh ka chhang let tawh lo, engmah ani tawh lo.

A tuk ah chuan ka u te in lam pan chuan min tir thla leh ta a, ka pu te pawh kartawp lamah rawn chhuk an tum bawk a.

Phur lo zet chuan ka insiam a, tumah ka be lo a, ka hlim lo ani tih pawh ka chhungte chuan an hrethiam ve ngei ang.

Mami, itan a tha tur lam chu lawm taka pan mai tur, nakin zelah itan a tha tur, I nawmsakna tur kan ngaihtuah vang zawk ani, kum hnih, thum a ral hnu ah chuan a lawm ber ila ni ang tiin thu tha tak tak chu min fah mawlh mawlh a.

Pawisa te min pek hnu chuan ka vahvaihna khawvel zau tak ah chuan ramtin a kual tawn sek turin chu in leh a chhunga cheng te, Ka tan chuan anchhedawng in mai chu ka chhuahsan leh ta a.

Tinge ka thih zawk mai loh le?

Eng atan a dam reng nge maw ka nih le?

Rilru leh ngaihtuah na tha lo tak tak chu ka pu kual a, vanduai ka inti em em bawk.

Dar thum a chhuak tur sumo chu an in load tan mek a, ka bag chu nghet taka kuahin ka thu ngawi reng a, ka melh ngai ka melh tlawk tlawk reng bawk a.

Ka dara min rawn vuantu lam chu muangchang in ka hawi a.

Hlim fahran bik lo tak a ka bula ding chu ka hmangaih sangtea ani.

Rawn thlah tur che in ka rawn kal a.

Ka ngawi reng a, min kaltir lo thei reng asin, huaisenna tlem tal nei nila chuan vawiin ah hian lungngai takin kan awm bik lo tur ka ti sap a.

Ka kutah nghet takin min chelh a, maruat nghet taka chelh thei dinhmun ah ding ila ka va ti em, ka chelh thei silo che a.

Hlim takin awm hram hram rawh aw.

Tawngkam khat mahin ka chhang lo.

Kan chhuah a hun dawn ta.

Kan thutna tur ah theuh chuan kan lawnkai ta sang sang a.

Tukverh bulah ding in ka kut avuan a, ka insum thei tawh thlawt lo.

Ka bag chu ka malchung ah ka dah a, ka bawk thlawp a, ka tap ta tlawk tlawk mai.

Motor chu a nung ta, kan tlan hma deuh chuan.

Min ngaidam rawh aw tih pahin a scarf hmanlai chu a rawn vawm lut a, kan tlan ta nghal a.


Side glass atang chuan ka en reng a, min thlir reng ani tih ka hmu a, kan inhlat zel a, kan in hmu thei ta lo.

Ka chuanpui te chuan thil awmzia te min zawt a, ka hrilh ve mai bawk a, min khawngaih angreng viau hlawm mai.

Zan dar riat velah bawk chuan ka thleng thla leh a.

Ka tah nasat avangin ka mit a bui luk a, motor ka rui na sa em em bawk a.

In ka lut chiah chu tawng pawh ka tawng peih tawh lo, chhuatah ka mu zangthal nghal der a.

Ka bawihtei alo thleng ta maw.

Puan huh in ka Hmai leh ka chal vel te chu a rawn dep a, ka luakchhuak tih ziaawm deuh nan thei thur tuite min rawn intir a.

Haw leh mah ila ka tawng peih loh avangin ka ngawi reng a, engvang teh hrepa ka chhuk thlak zana lo awm ve kawr nge anih le?

Ka u pawh chu ka ngei ta riau mai a, ani pawh a hmangaih miah loh pasal neih tir tum se a duh awm der silo.

Sum leh pai ngah, duh duh lei theih ringawt hi hlimna ani lo a, rethei te pawh ni ila in hmangaih tawnna leh in hriatthiam tawnna hi ahlu ber a, in zau tak chhunga cheng te hi an hlim vek bik lo, in te tak te, a chhung nuam tam tak pawh a awm ve asin.

Kan duhthusam zawng zawng, kan lo suangtuah thin, hlim tak leh in kuah riala kan hma lam hun tur kan lo duan dun thin zawng zawng te chu athamral ta vek mai le, engtin tak ni zel ang maw?

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » February 16th, 2020, 4:17 pm

Ka thlen atanga ni thum na ah ka pu leh kan monu, ka nu u te chu an rawn thleng thla ve nghal bawk a.

Chu zan zet chu ka tan zan lungngaih thlak ani a, zan anchhedawng mai ani. Ka pasal ni mai tur hi hmana ka bialpa ve thin chu ani ngei mai a, mahse phatsan ka nih atang khan ka thinlung ah hmun a chang nawn tawh lo a, ka ring leh tawh ngai lo, mahse mak tak maiin ka pasal ani dawn ta mai si a.

Ka chhungte an rawn thlen hnu ah chuan an rorel tawh sa ang chuan thil chu akal ta zung zung a.
engkim mai chu ani thut ni ber in ka hria, mumang te pawh a ang ka ti em em zawk a.

22nd march ani a, zan dar ruk leh a chanve ah chuan ka pasal tur te lam atangin man hlantu leh min hruai tu tur te pawh kan in ah chuan an kim thap tawh mai.

Ka tah a chhuak a, khatih lai khan thih daih tluka chak ka nei lo, ka rilru ah ka hmangaih sangtea a cham reng a, rilru na taka a awm tur chu ka ngaihtuah a, kan na ve ve dawn si a.

Awlsam thei ang berin man kan inhlan a, tuma hriatpui lem loh in kan inhruai haw ta mai a.

Kan inhruai haw dawn chuan a tawp nan tak tak ka hmangaih sangtea chu ka bia a.

Sily, hun tlem te chiah ka nei ta, irilru ithlak anih chuan min hrilh ta che, engmah ala pawi mah hian ka rawn let leh ang tiin.

Mily, ka bula rethei leh hreawm taka i awm ai chuan kal rawh, ka zawk rawh, ka duhsak zawk che tiin athutawpna tak tak a sawi tawh ani.

Ka bei a dawng ta, BEISEINA in ka thlir a, BEISEINA chhete ka nei a, mahse engmah lotiin ani ta.

Ka pasal te in lam pan chuan kan chhuak ta hlawm a, ka chhung ten in thlengin min thlah bawk a, a na a ni, ka na ngawih ngawih.

A tawpna atan sangtea hnen atangin thu ka dawng leh a.

He lei damchhunga ka kawppui tur ti a ka lo suangtuah thin chuan khiangawiin min liam san ta, tih theih ka nei silo, ngai chung leh chhingmittui far chung zelin mangtha mai te tiin.

Ka thaw hak a, msg chu ka delete ta nghal a, mi ta ka ni tawh, man leh mual zawng zawng pek a, lei ka ni tawh, engmah tih theih ka nei tawh lo.

Chu zan zet chu ka tan zan anchhedawng ava ni teh lul em, ka pasal min kuah na kut chu ka paih kiang thei lo a, min fawhna hmui lah ka seh sak thei hek lo, mahni thu a awm thei ka ni lo a, mi ta ka ni tawh.

Zankhua in chhin khat mah ka chhing eih lo, ka mittui aluang zung zung a, aw pathian ka nunna hi la zawk mai teh, ka tuar chhuak thei lo ang,

Aw lalpa, ka hmangaih Sangtea kha veng ang che aw, a nat phal suh la, tawrh pui ang che tiin ka tawngtaisak mawlh mawlh bawk a.

Zing lam dar thum bawr velah chuan mutchhuakin min zem a, ka lo muhil ve ta a.

Mumang ka lo nei a, ka hmangaih maruata ngei chu ka mang lamah chuan ka lo hmu a, hlim em em hian kan lo inkawm a, pasal tha deuh inei a, lungngai miah suh aw, in pa hi ka hmelhriat tha lutuk ania, a duat viau ang che tiin min lo hrilh mawlh mawlh a.

A bag a ak a, ramhla taka kal turin min lo kalsan ta a.

Sangte min kalsan suh, i bulah ka lo kal ve dawn tiin a banah ka pawt a, atheih tawh loh alawm, inpa in a remti dawn lo, ka hman hmawh em mai ka kalsan phawt ang che tiin min lo kalsan ta daih a.

Tap chungin ka au a, ka um a, ka tah nasat em avangin ka harh hlawl mai a.

Kawl a eng tan det det chauh ani a, ka muthilh leh chuan thawh ka hai ka hlauh avangin mut khamlo teuh chung chuan ka tho chhuak a, ka inphih harh te te a, thingpui te ka lum ta a.

Dar nga leh a chanve bawr velah chuan ka nu pawh a rawn tho chhuak ve a, nulian zet mai hi a ni a, a hmel en pawhin nu hlauhawm ve tak a nih hmel.

Thingpui ka lo pe sawk sawk a, rawngbawl dan kalhmang te ka la hriat loh avangin ka zawt mawlh mawlh a.

Ka nu chaw hi no engzat nge ka chhum dawn?

A mihring a tang hian chhut la, i eikhawp nen ihrethiam mai lo mi tiin min chhang ta daih mai a, a ngaihna ka hre lo angreng hle mai, a nikhat ni atang pawh chuan thil chu a fuh lo tan riau mai.

Min hrilh duh tak siloh ah chuan ka duh ang ang chuan rawng chu ka bawl ta a, nu ber tum vuau reng lah chu a chhan ka hre bawk silo.

Dar riat pelh tawh ah chuan kan pa chu kaihthawh tumin pindan ah chuan ka lut a.

A lo harh tawh a, thawh a tum ve chiah hi alo ni a.

Ms, tinge i nu khi, tinge a thinrim a? A tum reng mai bawk si a, anuam lo duh khawp mai tiin ka zawt ta tawp a.

Hrethiam hram rawh, zunthlum nei ani a, hetianga awm chang hi a nei thin a, enkawl dan ithiam angai viau dawnnia tiin a nu dinhmun te chu min hrilh a.

Tukthuan kan han ei te chu ka chawhmeh siam tui a tih loh thu a sawi hreh lo khawp mai, ka ip zawk zawk thei hial.

Ka thian te, ka chhungte hian min rawn be ve fo a, pasal ka nei ani tih hre lem lo ka thian te pawhin min rawn be thin a, kan pa chuan a ngaithei vaklo ani mahna, ka sim card min thlak sak a, chuta tang chuan Sangtea number pawh chu ka nei ta lo a, a number nei lo mah ila,ka thinlung neitu a ni reng zawk ang.

Kan inneih atangin thla hial a vei ve ta.

Tumkhat chu ka nu ang hian ka thuam chhawm theuneu a tih zia hi a sawi chhuak ta a, an thenawm te fapa in nupui a neih tum a thil a chhawm thatzia te chu a sawi cham chi bawk a, puan sem tur ka chhawm tlem zia te pawh a sawi bawk a, kan pa pawhin a hre reng na in ka thlavang a hauh miah lo chu mak ka ti.

Ms, inu hi a sual hmel e, kan inrem pawh ka ring lo ka ti tawl mai a.

Tuman ka nu hi kan chhang ngailo a, natna nei anih avangin kan en liam mai zel, ngaiah in nei mai ang a ti sam et zel a.

Tuk tin mai hian a ang ani deuh ber a, a thinrim chang phei chuan thil hi a ti ri deuh bur bur a, ka phu zawk zel.

Kan pa pawh ahna lamah akal a hun leh tawh a, ngaihna chhete mah ka nei lo, kal vat vat se tih hi ka duhthusam ber ani zawk, a mitmei ven ngai reng te, tihlawm loh hlau a that der ngai reng te chu ka kham takzet.

Thla hnih zen zawn chauh innei kan la ni bawk a, a mizia leh awmdan ah han sawiselna tur vak ka nei rih lo, min duat thiam ve viau mai a, mahse ka thinlung erawh ata ala ni lo.

A kal ta chu hnara hlit phawi ang huai hi ani deuh mai, ka ngai lo reng reng.

Mahse a nu hrawn chu khawvela thil hreawm ber ani hial ang, tuk zan tha hi kan nei lo, ka fahrah em avangin leh thuam chhawm te ka neih tlem avang te chuan min hmusit em em reng a, tawngkam bawlhhlawh tak tak hian min an khum fo thin.

Ka ngawireng zel a, ka chhang ngai lo, a hnu lawkah a reh ve leh mai thin a, a chang chuan min duat ve em em thin tho mai.

Tumkhat chu ka dam lo a, chaw ka ei peih lo a, ka luak ngat ngat mai bawk si a, keimah in khumah chuan ka mu reng a, tuman min ngaihsak lo a, min en liam vel mai mai ani deuh ber.

Kan in a rawn chuang lut thenkhat te chuan damdawiin lam pan pui turin thurawn an lo pe ve thin a, ni e tih takngial pawh hian a chhang ngai lo.

Ka chauh tak zel si ah chuan loh theih loha inentir angai a, chumi ni a min tihdan zet chu a rapthlak ani.

Mahni pawh hrisel loh nak laiin, bur chhe ruak han lakluh leh chu, a rapthlak lutuk, han na hlek ila kei ni aiin an na zawk a, zawng khawro mai tiin min ankhum ta chiam mai a.

Ka chhang chak a, ka lung aphu zawih zawih a, ka sa pup pup thei hial.

Damdawiin ah zu kal rawh, rang takin tho la, zu inentir rawh.

Ka chauh em avangin ka tho peih lo a.

I tho dawn lo maw?

Ka puan sinlai chu a theh hlim lawp a.

Ka thu hi i hnial ngam maw?

Nang fahrah fa, i ek na ngaiah ka ek tir leh mai ang che,

Min nawr tak nawk nawk a, ka chauh teh lul nen,

Ka tawt lutuk chu engmah sawi lem lo in ka au chiam a, ka puan sin a pawhthlak te chu ka vawm darh a, ka almirah kawngkhar te chu ka pet ta chiam a.

Ehe...

Hmeichhe rapthlak tak ive ni em, pasal nu te hma ah pawh khatiang khan i awm ngam ania tiraw?

Thu tha hrilh ngai loh fa tih atan chuan i inhmeh tawh viau e tiin kan room atang chuan a chhuak ta a.

Peih lo tak chung chuan ka insiam a, khawi inentirna tur tiin ka dil ve ngat a.

Cheng 50 hian min rawn vawm a, ka thin a rim takzet.

Ngawi rengin ka dawh reng thei bik lo, chu pawisa bei tham tak chu a hma ah tak chuan ka vawm let ve a, ka mamawh lo ka ti ve ta ngat a.

Thian tha te leh thenawm khawveng te min hrilh angin ka ngawih reng chuan ks hreawm telh telh dawn, an hrechiang nasa mai si a, chuvangin ka tih ve deuh hrak a ngai ani.

Ka u te in lamah chuan chau zetin ka phei hnak hnak a, kawng lakah pawh tum thum zet ka chawl phei a, a tawpah chuan ka thleng ve thei ta a.

Thutthleng sei ah chuan ka thu hnawk a, ka thaw kawk kawk a.

Engti zia nge ni ta?

Ka u chuan ka awmdan chu dik zanlo in a hria a ni mahna, min bawihsawm thuai a.

Tui no khat pangin ka in zo a, ka luak chhuak leh nghal vek bawk a.

Ka chanchin chu Kimchang takin ka hrilh a, a lungawi lo hle mai a.

Engkim hi nangmah vang anih hi, ka nun i tichhe vek anih hi ka tih pawh chuan min chhang ngam lo, a ngawi ta reng a.

Damdawiin lamah chuan min hruai a, ka natna chu a lo zual deuh tawh avangin min admit ta hial a.

Awmpuitu ka nei lo a, ka u lah naupawm anih avangin a hman bik silo, mahni chuan ka awm ve ta ran a, kan pa chuan min rawn call reng na in thil awmdan zawng zawng a hnenah ka thlen ngam lo.

Achhan chu tum khat ka thlen tawh a, a nu a lo hrilh leh vek avangin kan buai tawh a, chuta tang chuan vawikhat mah ka hrilh leh tawh ngai lo.

Ni li lai ka awm hnu chuan ka chhuak ve leh ta a, ka lu te ala hai deuh bur a, mut hahdam ka chak ber.

Mahse mu thei pawh ka ni lo, mut pawh nuam lo khawp chuan hna a thawk a, tawngkam mei nei tak tak in min tawngkhum reng bawk nen, chau tak chung chuan ka che ve nghal a, ka hringnun bultanna chu avan hreawm tehlul em.

Thenawm khawveng ten an chanchin min hrilh tam telh telh a, an sual zia ka hre tam telh telh bawk.

Kan pa pawh chuan nupui a lo nei tawh ngei a, thla thum vel chauh an innei hman tih in an nu chu achhuak daih hi a lo nia, a kir leh tawh lo tih thu te pawh ka hre leh ta zel a.

Inchhirin awmzia a nei tawh silo a le, ka vanduai a ni ber mai.

Hun aliam a, ni aliam a, kan tih nek nek chhung chuan kum a vei ta der a.

Kei pawh pathian malsawmna dawngin nau ka keng ve a, kan pa pawh transfer a dil te a hlawhtlin avangin kan awm dun ta a.

Nau ka keng tih kan hriat chuan kan hlim kher mai, hmalam hun hlimawm takin min hmuak ve niin ka hria, kan pa a rawn awm chin ah chuan ka nu pawh tlemin a zia awm ta deuh.

Nikhat chu hna a a kal hlanin kan room vel chu ka chingfel a, a Bungrua kan dah khawm, kan la chinfel loh te chu ka tifai vel a.

Bag pakhat hi ka hmu a, achhung vel chu ka en thuak thuak a, engmah ka hmu lo, a peng vel te pawh ka en thuak thuak a, engmah ka hmu lem lo a, a balh em avangin suk turin ka vawm phei mai a, thil ri deuh rak a awm avangin ka la leh a, ka han check nawn leh vel a.

Bag chhunglam lining na hi tlem te a tet a, a tet lai chu ka zu zen a, engemaw ni hi ka dapfuh zauh a.

Ka zen ngar ngar a, ka lachhuak ta a, phone te reuhte, a pangai tawp ang chi a lo nireng mai.

A nung lo a, mahse mak ka tia, ka la hmu ngai hauh silo.

Ka han on a, a rawn nung ve nghal mai bawk a.

Sim card pawh a invuah sa vek a, a chhung vel chu kan en thuak thuak a.

Number pakhat nen hian an in call nasa hle tih ka hmu thiam nghal a, chu number chu tunge anih ka hre duh tlat.

A phone atang ngei chuan ka call ta a.

Vawihnih bak a in ring hman lo, hmeichhia hian alo la a.

chu veleh phone chu ka hmet tawp ta nghal a.

A rawn call nawn a, ka pickup duhlo zel a.

Tinge min biak duh miah loh a?

Min mutpui te te a, min thlauhthla nghal ani maw?

Chu thu ka han dawng ta mai chu ka nghilh dup thei, ka pasal hian tiang hian maw min lo awmsan a? A mah vangin ka hmangaih ka chan a, ani lah chu tiang hian maw alo khawsak?

Chu number chu ka la chhuak a, phone chu ka off leh ta thuai a, a bag pawh chu su ta lo chuan a dahna ngaiah thlap ka dah leh zawk a.

Nau te ka lo ken tak ah chuan ka pasal chu hmangaih taka pawm ka tum ve mek zel a, a hma ai thlawt chuan ka rilru pawh a dang lam ve tawh a, mahse eng vang nge mawni le vanduaina hian min hual tup tup reng mai le?

Chu number chu ka phone ah ka save ta a, whatsapp ah ka va be ta nghal a.

Ms-a nupui ka nih thu pawh ka hrilh a.

Min tham lo angreng viau a,

Haha.. A nupui maw i nih?
Kei a bialnu ka ni sia, tu bulah nge a awm tam zawk ang le?

Min chhan danah chuan thil tam tak alang ta reng mai.

Khawngaihin thlah tum rawh aw, fa nei mai tur kan ni a, naupang pawisawi lo fahraha siam chu iduh ka ring bik lo tiin a khawngaihna ka ngen hial a.

Ka thei lo, nula thianghlim ka nihna kha ka hlan tawh, ka neih theih hma chuan ka thlah ngai lo ang atih meuh chuan sawi tur a vang raih mai.

Engtia rei nge ni tawh?

Thla ruk.

A nih chuan kan inneih hnu lawk atangin an in ngaizawng a ni tih pawh a lang ta reng mai.

A bula thinrim ai chuan tiin ka nu leh a farnu bulah chuan thil awmdan chu ka hrilh a, ka lungawi loh na te chu ka thlen a.

A farnu chuan.

Maruat, engah mah ngai suh, bialnu tih vel ai chuan an nupui te zawk chu an rilru ah atla na zawk, neih tir mai mai la, naute hmel te a hmuh hunah a reh mai ang tiin min chhang ta zawk a, mak ka ti kher mai.

Nang aiin a duh zawk ani mai lawm.

Bathroom luh ruala a nu phunsap chu ka hre pha reng a, bei hi avan dawng tak em.

Tlaia a hna bang a rawn haw chuan kan room ka lo tifel fai duak chu a hmu a.

Thil zawn a nei a, a hawi kual hrak hrak a.

Bawihi, ka bag dum kha ilo hmu em?

Almirah sira ka dah kha a mi?

Aw anih hi a ti ve mai a.

Thingpui min va lum teh a tih chhan pawh ka hailo nasa, thingpui hi a in ngai mang lo, mahse kha a phone kha lakchhuah a ngai miau si a lawm le.

Thingpui no chu ka chawi lut a, a in zo chuang lo a, inbual tura aluh hnu chuan a bag chu ka dap a, phone chu alo awm ta lo ngei mai.

Ngawih tlat ka tum, tawng chhuah ka tum eih lo.

Rei ngial a in bual hnu chuan a rawn chhuak ta a, a hmel landan atang chuan alawm hmel tehchiam loh.

Kei erawh chu pangai takin ka awm mai a, ka biak dan pangai rengin ka be bawk a, a mitmeng atang chuan engemaw chu a awm tih ka hai lo.

Khawi nge i phone idah a ti ram hmak a.

Ka phone chu ka pe a.

A bialnu nena kan inbiakna pawh chu ka delete lem lo, a hmu ve ta vek a.

Ka inrin loh laiin min beng hawi ta sawk mai a.

Tun hnu ah chuan ka thu lo in ka thil engmah hi lo khawih tawh ngai suh ang che, i tih tur hi ti la a tawk chiah tiin min kawk sawk sawk a.

Chhan loh theih ani ta bik lo.

Mi tenawm lutuk, nupui nei reng chungin engtin nge tiang hian i awm theih? Min van bum chiang ve le.

Ka sam ah chuan min kek nawk a, tawng tawh suh a tih tak avang chuan ka ngawi reng a.

Almirah a a dah asen chi chu ala chhuak a, a tlak deuh pap pap a.

Ngawirengin khum ah ka thu a, tih theih ka nei silo.

A phone chu a hmet melh melh a, ka hriat lai ngei chuan a bialnu nen chuan an inbe ta anih chu.

Enge itih a? Ka va ngai che ve, hmu tur che in ka rawn kal thuai ang.

A hmeichhe tawng erawh ka hre thei lem lo a.

Rei ngial an inbia a, rilru chu a dek ve zak mai, nau ka lo keng hman kher chu pawi ka ti vawng vawng mai.

A mizia tak tak pawh a rawn lang chho zel a, tlangval ang maiin zan tin a leng chhuak a, zu lah chu a heh em em mai bawk a, zan dar hnih, dar thum thak thleng a len chang a ngah khawp mai.

Kut min thlak fo bawk a, ka chhang ngam tawh ngai lo.

Zan dar khat ah pawh lo haw se, chawei siam rawh a tih chuan ka tho vat a, ka buaipui nghal mawlh mawlh mai thin.

Chutiang reng reng chuan hun leh ni chu ka hmang chho a, rilru hah nen, taksa hah nen ka hrisel lo chho viau mai.

Ka naupai a hram tawh hnu ah pawh chuan ka nu chuan exer lak atha tih chhuanlam in lo lamah min hruai fo a, em khat tlatin vawk chaw tur thingfanghma min phurh tir tawk mai thin.

Ka u pawh chuan pawi a tiin inchhirin awmzia a nei tawh silo, ka tawrhna zozai avang chuan min lainat hle a, a ngaihtuah pawh min ngaihtuah em em reng bawk a.

Tluang takin naute pawh ka nei ta, hmeichhia ka hring a, kg thum leh a chanve zeta lian ani a, s hmel lah chu a tha reuh em em mai bawk si.

Naute ka neih zan te chuan rui em em in a rawn kal a, nurse ten an lo hau hial reng a, naute a keu sek reng avang chuan a hrisel lo tiin an lo hau ani.

Fa kan neih hnu pawh chuan a zan len a thulh lo a, zan a rawn haw hun hun ah tui taka mu kan naute chu a rawn ti harh ngei ngei bawk a.

Naute tui taka mulai han kaih thawh ngawt chu tu naute mah an nui ver ver hauh bik lo ang.

A tah leh, ipa ka ni lo mi?
Engvangin nge itah ziah tih te chu a tawng duh dan ani.

Hlauthawng leh thlabar reng rengin nitin zantin mai hun kan hmang a ni deuh ber tawh.

Min tiduhdah telh telh a,min hnusit zual zel a, kei hian neilo che ila chuan ks ah bak ichhuak lo ang, broken family atanga chawr chhuak mai mai ka nei duh che hi lawm hle rawh, ka hlawh it a min hel hi an tam lutuk tih te chu min tawngkhum duh dan ani thin.

A hmeichhe mutpui tawh te, a mutpui dante zurui chunga uan nan taka min han hrilh thin te chu ngaihthlak a nuam lo khawp mai.

Tum khat chu an hna thil avangin chawlhkar khat zet an zinbo dawn a.

Mi chuan an pasalte zin tur an ui a ni ngai a, kei erawh zawng lawm avangin ka tap lo chauh a ni ber e.

A zin zan chuan tui takin ka mu thei dawn ani tih ka hria a, ka thla hi a muang hliah hliah.

Kan nufa thlalak chu naute hmeltha thlalak dahkhawmna tih group ah chuan ka va post ve mai mai a, kan pa awm lai chuan fb vel ka khawih ngam lo, ani erawh chuan duhtawkin a khawih thung.

Comments te ka hmu ve neuh neuh a, chumi zinga comments pakhat chuan ka mit ala deuh zar mai.

Ehe.... Mily

Hemi comment bik zet chuan ka thin a ti phu dup thei mai, he khawvel ah hian mily ti a min ko tu hi an awm lo, amah chu tunge anih ka chiang ngang mai.

Rang zetin ka inbox nghal a,

Sily, idam tha maw?

Aw dam tha e, nang idam tha zel em?

Aw dam tha ani mai e, enge ithawh tak zel?

Engmah ka thawk lo, hna ka zawng ve mek chauh a, tunah chuan a rem rem thawkin ka inhlawh mai mai.

Anih chu mawle, ka hmu teh thut che a, mak ka ti lutuk a tiin ka chhang zel a.

Nia tiraw, Kei pawh ka tum loh lutuk in ka hmu che a, mak ka ti lutuk a, naute pawh ahmeltha khawp mai, a chhun lutuk che.

Chuti maw?
Ka van lawm ve.

Tiang chuan zan rei tak thleng kan inbia a, lunglen a kaitho duh ngang mai.

Mahse mi nupui ka nih tawh avangin inbiak fo chu athat loh thu te min hrilh a, kei pawhin dik ka ti khawp mai.

A indah dan te ka hre ta bawk a, ka lunglen chang apiangin a thlalak tal ka en thei tawh dawn anih hi
tiin ka hlim em em bawk.

Kar khat chhung chu thawveng takin ka awm ve han ti ila, ka hah em em thung a, nau nen vawk chaw chhum angai a, in chhung chet leh insuk zawng zawng ka kut ani bawk si, ka hah thei thin khawp mai.

Rilru leh taksa ahah avangin ka cher, dang lap mai a, thenawm te leh ka thiante ho hian min lainat thin ngang mai.

Kan pa zin pawh a rawn haw ve leh tawh a, a rawn haw tirh chuan ka chungah pawh a tha a, kan naute pawh a ngaihsak em em a, tiang reng chuan awm thei ila aw ka ti rilru vawng vawng thin.

Hun aliam a, angai te bawk in kan awm leh thin, inhauh, kut inthlak, hmusit taka in tawngkhum, in hnawhchhuah chu ka thil tawn ngun ber ani.

Haw san daih rawh.
Fa pakhat mai mai chu i enkawl thei dawn lutuk tih thu chu min duhsak tu te hnen atanga ka thil dawn ani thin, mahse keimah ang bawka fahrah tur chuan ka fanu chu ka phal bik lo ani.

Zing lam dar thum vel ah chuan a kawta a bike inhung deuh dat chu ka hria a, ka tha chu a khur nghal zawih zawih a, hlauhna namen lo chuan min man nghal a.

Ka fanu chu kuahin ka lo muhil der ta tawp a.

A ke pen ri atang chuan a rui thawkhat viau tih chu ka hre thei.

Dim lo zetin room kawngka chu a rawn pawt hawng a.

Thosilen chu a rawn keu a, hei, chawei va siam teh a rawn ti vin hluk a.

Muhil tui lai harh chiah angin ka han zi mar te te a.

Ilo haw tawh ani maw tiin dam thlapin ka lo bia a.

Haw tawh, ka ril atam ania, chawei va siam vat rawh a tih rual chuan ka inperh tho vat a.

Chawhmeh vel te chu ka chhuang lum sawk sawk a.

Iva rei ve, ka ril atam tawh ania, ka hnek hrep mai ang che atih phei chuan mawng vawm ba ang maiin ka phe chak ngang mai.

Chawei chu ka siam sawk sawk a, a ei chhung chuan a bulah ka thu ve reng a, tha lah chu akhur ngat ngat mai bawk si.

sangha chhum a Hmarcha pum ka thlak chu a seh fuh ta hlauh mai, amit meng sen ram, pawng deuh par nen chuan min melh kawk a.

Chhah pangai pawha chhak tha lo chuan thuuuuuiiiii..... Thuuuuuiiiii tiin a chhak kual vel a, ka thin a phu zawih zawih mai, tui ka suah sak thuai a, ka pe nghal sawk sawk a.

Chumi zan chuan kut min thlak ta em lo, buaina siam chakin a rak a rak reng na in a ruih em avangin a chatthla ta vat a, a hnar nghal bawrh bawrh a, ka thawveng huai mai


Zan ka mu tlem a, ka rilru a hah a, ka hlauthawng, chuvangin ka taksa pawh a dang lep a, ka cher em em bawk, a tawpah phei chuan rilru lamah harsatna ka tawk ta hial a.

Kan awmna lamah chuan a chhan an hre thei silo, hlauthawng lutuka ka awm tawh chuan ka khawng ta thin a, ka thaw te a hah a, damdawiin kan thleng zut reng mai a.

Bur chhia, hman tlak loh ti a ka nu in min han ankhum ngat phei hi chuan rilru hi ana vawng vawng, ka chawmawlh zo tawh a, rilru na avangin ka mittui atla thei tawh lo.

Chau tak chunga hna ka thawh ve chuan khapdiau min tih loh leh changpat cheh chhum pawh tluklo min ti fo a, hnapkhawn ang lek ti a min tawng khum chang pawh a tam viau.

Damdawiin ka luh ngun tak em avang chuan hmunpui lam min refer ta hial a, chumi tum chuan kan pa in min hruai ve nghe nghe a.

Doctor kan hmu a, kan doctor chuan ka awmdan zawng zawng ah chuan rilru hahdam, ka mamawh thu min hrilh a, ka natna chu fight back turin min fuih na sa hle bawk.

Kan pa pawh engkim a hrilh vek tho na in awmzia a awm tam lo hle.

ka theih chen chen ka tuar anga, ka theih loh tawpah chuan ka fanu nen hian kutdawh pawh ngai se kan dawh mai ang tiin rilru ka siam ve ta a.

Tum khat chu min hmangaih em em tu ka pi hi a boral hlauh mai a, ani chiah hi kan chhungkaw zinga min la dampui tu awmchhun ani, awmdun thei erawh kan nilo, ani pawh mo te karah inthlahrung taka awm ve mai ani si a.

Chu thu chuan min thawng khawp mai, tunah zet chuan tumah ka nei tawh lo, ka chhungte zawng zawng an boral fai ta vek mai.

Ka u leh kan pa nu te nen chuan aizawl lam pan chuan kan chho ta a, ka nu chuan min tawiawm ve na in ka lawm lem lo khawp mai.

Tluang takin kan thleng a, ka pu te in ah kan in nghat a, mifing leh tawngkam thiam tih takah ka pu rilru chu a dek hneh ngang mai.

YMA lamin min lo nghah avangin kan phei ve thuai a, kuang chu min hawnsak a, ka tap ta hawk hawk a, rei tak pawh ka hmu thei ta lo, ka pi chu thlanmual lam panin an zawn ta a, ka thlir reng a, kal ve daih chu ka chak vawng vawng mai.

Ka han hawi vel a, sangtea hmel ka hmu lo a, tlangval tlawmngai, chhiat thata lang zat zat ani na in thlan lamah an awm anih dawn hi tiin hmu chak hle mah ila ka pute in lam chu kan pan leh ta zawk a.

Zanriah eikham chuan ka nu te leh ka pute ho chu thingpui hang dawm pahin an titi tui viau a,

Mipangai tak in ah kan tunu hi a rawn lawi lut a, ka lawm tak tak ani.

Ka pu lah chuan engmah lah chu ahre silo, lawmthu te chu ala hrilh ta deuh deuh chu ania.

Chutia an titi lai chuan ka naute chu ka hruai chhuak a, kan vak thawveng ta mai mai a, Khawhar in ah te kan va lang ve bawk a.

Khawhar in ah pawh chuan sangtea hmel reng reng ka hmu lo chu mak ka ti khawp mai.

Rei tak pawh awmlo chuan ka naute chu ka pua a, ka chhuahpui leh ta a.

Ka lam pan zawnga mi pathum lo phei chu ka hmu reng a, a thim angreng a, tu te nge an nih ka hre thei lo.

Kan inhnaih zel a, ahmel hmu lo mah ila, akal dan, a pian phung atang chuan tunge anih ka hai lo.

A ni pawh chuan min hai bik lo, kan intawhna laiah chuan kan ding chawt a, sawi tur erawh avang ani.

Naute chu a rawn piai a, ahmeltha kher mai, tihpahin a nui sak a.

Abula mite erawh ka hmelhriat an nilo thung, nula pakhat a tel ve a, a bialnu a ni thei mai angem?

Ka ngaihtuah chu a dik lo ani, tlangval a ni a, a duh leh anei thei, kei pawh mi nupui ka ni alawm.

Rei vak lo kan inbiak hnu chuan min kalsan ta a, hla thu in lamkawiah darang in tawn chang hian e, lunglen a thar leh thin a tih hi chu alo van dik tak em.

I dam thin maw? Tih bak inbiakna tur kan nei tawh meuh lo, min chibaina kut ka vuan leh thei chauh pawh kha ka tan chuan a hlu ani.

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » February 16th, 2020, 4:17 pm

Chu bak chu kan inhmu leh ta lo, nithum kan cham hnu chuan kan haw thla leh ta a.

Kan hawlam chu a phurawm tehchiam lo ngawt mai.

Haw tawh loh te chu ka chak rum rum tawh mai.

Tluang takin in kan thleng a, tlai thim thet thet ah kan thleng thla a, kan pa hmel hmuh tur erawh a awm lo.


Kum khat hnu ah chuan.

Ka fanu pawh a lo keikang ve deuh deuh zel a, a kal ve chhet chhet tawh a.

Nau pai leh mawlh chu ka hlau ani, a rapthlak lutuk em ani.

Zankhat chu zanrei tawh tak ah hian kan pa rawn haw thawm ka hria a, amah mai nilo in mi tu emaw rawn haw pui anei ani, an phur sep sep reng a, ka va en ngam chiah bawk silo.

Rei vaklo hnu ah chuan pindan ah rawn lutin min rawn kai tho a, ka la muhil miah lo na in muhil angin ka lo awm leh a.

Rizai sin tur min rawn dil a.

Eng tur nge ni?

Ka thiannu a rawn riak a, alaklawh deuh a.

Khawi a i thiannu maw?

I dilchhut reuh mange, rizai chu rawn la mai rawh.

Rang takin ka tho a, ka chhawm ve bak chu a chuang bang han pek tur ka nei silo, khawilam mi nge pawh hriat loh ka rizai han sintir chu ka tui lo khawp mai.

Lungawi lo zet chuan ka pe a, kan pa bulah chuan buaipui a ngaih leh ngaih loh te ka zawt a.

Angai lo, mu rawh a tih avangin ka mu leh ta zawk a.

engemaw chen chu chu nu bulah chuan a awm ani mahna, mikhual room ah daih an awm bawk si avangin enge an tih a, engtin nge an awm ka hre lo, pasal te chutianga an awm meuh chuan rilru chu ana ve deuh khawp mai.

Darkar chanve hnu vel ah a rawn let a.

Enge itih a? ivan rei em em ve?

A bulah khan riak law law ta che.

A ngawi reng a, lehlam hawiin a mu a, a muhil nghal a.

Natna tha lo te hi ka kai tawh hial anga tih te chu ka ngaihtuah neuh neuh a, rilru anuam lo khawp mai.

Ka harh leh meuh chuan kan pa chu alo awm tawh lo a, athawh lai reng reng ka hre lo.

Ka tho chhuak a, mikhual room lam chu ka en a, rizai pawh fel takin alo inthlep diam tawh a, an chhuak bo tawh.

Ka nu lah chu a tum na lamah a hmui a kawh zum zo tawh, chawhmeh bel chu a chawk ri rawk rawk a, thinrim vanga chawhmeh nasa deuha chawh hi tui bik viau ta sela chuan a chawhmeh siam chu a tui ngawt ang le.

Mu vumthur hlawm ula, tar siamsa ei tur in rawn tho ula, zahna reng reng nei hlawm lo mai.

Sana ka en a, dar riat em pawh ala ri silo, tuk khat thawh tlai vang mai mai a chuti teh hrepa min han ankhum zel chu ni.

Naute chaw hrai ka tum a, bawnghnute a lo awm tawh silo.

Ka nu, bawnghnute a awm tawh lo a, bawihtei chawm tur hi kan ti dek dek a.

Apate ho naupan lai pawhin bawnghnute kan pe ngai lo, tuisik kha chawm rawh.

Ka thin rim lutuk chuan a Sawi ang ngei chuan plate khatin tuisik ka leih luau a, ei rawh tih pahin ka fanu hma ah chuan ka chhawp tawp a, ka nu erawh angawi reng thung.

An tunu hi an duat ve hle a, sawiselna em em ka nei lo, an fa te ber fa ani tawh a, an hmangaih lutuk, mahse thinrim avanga naupang chunga tuan zel ahrat lutuk hi ka haw riau.

Bawihtei chuan a ei duh lo chiang ngei mai, chaw pawh ei tir ta lo chuan ka dah lui ve ta ngat a, kan chhungkaw boruak chu hreawm tak ani.

Tumah kan inhauh miah loh pawhin boruak hi a rit em em a, tumah han inkawm emaw han titi ho kan nei ngai lo, mahni room lamah kan tawm thap zel.

Vawk chaw saw va chhum rawh, vawkin chaw an nei tawh lo,

Nau hi lo la la, nau paw chung chuan vawk chaw chan ahar emai.

Fa pali ka pawm a, tumah lakchhawk tu ka nei lo, vawk ka vulh a, lo ka nei a, buh ka deng a, tui ka chawi a.

Ka ning lutuk..... Ka beng ka hup a, ka fanu paw thle bawih bawih chung chuan dawl chu ka chan tau sawk sawk a, fanu, fapa pawh anei a, mo tha chhawr chak reng reng a mihring han awm mai chu a rapthlak deuh zawng ani.

Zan alo ni a, ka fanu chu hnute pe pahin ka lo ti mu a,

Kan pa pawh hma takah a rawn haw ve teh mial a.

Eng sawi set set lo chuan ka samah min tham tho nawk mai a.

Engvangin nge min tham ngawt a?

Ka nu hi vawikhat mah chhang tawh ngai suh ang che, i chhan zawt zawt tur ani lo, a fate pawh hian kan chhang ngai lo, ihria em?

Min tih dan zawng zawng hi ihria ami?

Engtin pawh a ti ang che, ka nu hi i mil dawn lo anih chuan chhuak mai rawh.

Tehreng mai, ka chhuak ang, he in hi chhuahsan ka chakna hi a rei tawh.

Chu veleh min hnek ta chawrh chawrh mai a, ka fanu hlau lutuk chuan tap chungin min kuah bet a, min pawt ve tawk tawk bawk a.

chhuah tak tak chu aphal leh silo a, duhtawka min khawih hnu chuan room pawn lamah kawngka min kalh hnan a, a chhuak ta nghal a.

Bawihte...

Ka fanu chuan insut hlawp hlawp chungin min kuah a, ka pawm bet a, kan tap dun kerh kerh a.

Min khawih na lamah ka chau te pawh ani mahna, hma takah ka muhil a, ka harh leh ta reng reng lo.

Kan mutna tukverh darthlalang chu niin a rawn en a, ka hmai zawn tak chu a en em avang in ka harh ta hlawl a.

Ka mit ka han meng dawn a, ka mit chu aphui deuh tlat mai, ka khawhmuh chu a zim ta riau mai bawk a.

Ka han inbeng kang dawn a, ka taksa chu ana em em a, na lo lai pawh hi a awm lo, muangchangin ka tho a, almirah darthlalang ah chuan ka in en a.

Ka chal chu a bawk lian kher mai, ka hmui a vung na sa em em bawk a, ka mit pawh chu ka meng tha hleithei lo a, ka vung khat tlat mai a.

Ka rilru ana kher mai, min vawhlum law law mai se tih chu ka duhthusam ani.

Chutia ka in ngaihtuah ngut ngut avang chuan ka lungphu a rawn rang a, ka kut ke zawng zawng a mur a, ka thawk a buai ta hial a, thaw tha thei lo, khawng titih chuan ka let ta reng mai.

Kan pa chu a rawn tho thuai a,

Bawihi, engtin nge i awm?

Min rawn sawi nawk nawk a, amitah tak ka en a, ka mittui aluang ngiai ngiai a, engmah ka sawi thei lo.

Ka kut, ka ke te akhawng avangin min hmet nawk nawk a, reivaklo hnu ah chuan ka pangai chho leh ta a.

Min pawmkang a, khumah chuan min muttir a, engti turin nge athawh ka hre lo a, atho deuh that a.

Fridge a tui vawt khal chu plate ah dahin puan a rawn keng bawk a, ka chal pawng te, ka hmui vung lak te chu vur tui chuan min dehsak ta a.

A hmel ah chuan inchhirna anei ani tih ka hria, zu a ruih loh chuan apangai viau a, mahse zu tello in a awm thei thin silo hi a buaithlak ani.

Bawihi, ka tihpalh takzet ani, min ngaidam rawh a ti sap a.

Min vawhlum law law zawk teh, tiang tawrh reng ai chuan ka tan thih anuam zawk ang.

Chutiang an sawi ngai lo, bawihtei engtin nge a awm ang?

Bawihtei hi ihmangaih tak tak lo, home ah te idah mai dawn lawm ka ti ve ta ngat a.

Min chhang zui lo, amah chu inthiam lo takin a awm reng a.

Mama... Innu ala tho lo mi?
Rawngbawl ahun tawh ania.

Kan pindan kawngka chu a rawn sawi nawk nawk a.

a damlo, atho peih lo tiin kan pa chuan ka nu chu alo chhang thuai a.

Duh hun hun ah hian in damlo a, in duh hunah in dam leh thei viau si.


Rei vaklo hnu ah chuan inleng kan nei a, kan kohhran upa te pahnih an ni nghe nghe a.

Kei pawh chu ka tho chhuak ve a, ka taksa anat em avangin kal pawh ka kal hleithei lo.

Ekhai, maruati chu eng ti zia nge ni ta?

Kha iva diklo nasa ve.

Kan upa pakhat pu hnuna chuan min lo zawt vat a.

Ka nu chu alo inrawlh thuai a.

a tlusual palh anih kha mawle tiin.

An awih hmel tehchiam lo na in mifing an ni a, an ngawi zui mai a.

Zunram te ka thiar zawh hnu chuan pindan ah ka lut leh a, ngawireng in ka thuamhnaw chu ka siam mawlh mawlh a.

Kan pa a rawn tho vat a.

Enge itih dawn a?

Ka chhuak dawn, he in ah hian ka awm thei tawh lo.

A tul lo, chhuah angai lo tiin ka thuamhnaw siam sa ho chu a dah let leh hlawm a.

A ruih loh lai tak chu hun tha ah hman ka tum vang ani, chhuah tak tak ka tum lo, ka ruang a chhuak te anih tawp loh chuan.

Hun rei tak ata, ka thinrim na, ka lungawi loh na in up zawng zawng chu ka sawi chhuak ta vek a, ngawi rengin min ngaihthlak sak a.

Ransa ka ni bik lo a, mihring ve tho ka ni, duh vang rengin ka fahrah bik lo, mi tupawh hi fahrah tur vek kan ni, nang pawh inu leh pa an boral hun chuan fahrah ve tur tho ini.

Ransa ang maia in nghaisak leh in diriam reng hi ka duh tawh lo, mi in hmuhsit zia te hi a rapthlak lutuk.

Inu in engtin nge min tih dan zawng zawng pawh hi ihre lo.

Nau ka neih dawn te khan buara in ituam ang min tih te kha ka theihnghilh thei tawh ngailo ang.

Tiang em em a min hmusit tur hian enge in nih bik vak le?

Ngawi rengin ka an hla chu a ngaithla reng a.

Kan inlengte an chhuah hnu lawk chuan.

A hma zawng a tho duh silo, mi tih mualpho athiam hlarh hlarh khawp mai, min khen thlak a tum apiangin a mah a tla zawk zel ang tiin min khei leh ta nghal a, tuk pum mai chuan a ang bawk a.

Duhtawk ve tawh em em rawh, englai pawhin ang reng ringawt mai tiin ka pa chuan alo khap a.

An nupa chuan an inhauh chhun zawm a, an ri ta bur bur mai, nu zawk chu duai duh hek lo, thenawm te ho an rawn dak sap sap hlawm reng a.

Chutiang chuan nitin deuhthaw hun kan hmang a ni ber e.

Thenawm khawveng te ho in min lainat a, haw daih rawh min ti chamchi a, tiang chuan kum li zet ka mo ve a.

Kan pa pawh chu a nun asim thei tak tak lo a, angai te bawkin kan awm leh thin.

Tum khat chu gospel camping ah alut ve hlauh mai a, a rawn hlim haw viau maia, kan chhungkua te chuan kan inkhawm thin a, tawngtai inkhawm te pawh kan kal thin.

Ka hlim em em mai a, zu a thlah ta daih bawk si nen, ka lawmzia chu sawifiah thiam chi pawh a ni lo hial zawk.

Thla thum vel lai chu hlim takin kan awm ho ve a.

Chutih lai chuan themna a hmachhawn a, a do zo ta lo, a thiante kawp lehin zu chu a in tan leh ta a.

Chu chu ka duh loh avangin a zan leng chu ka zawng a, a zu in na hmun ah ka va kalchilha, ka hruai haw ta a.

In kan thlen hnu rei vak lo ah chuan thinrimna a zawng leh a, kan inhau buai a, kut min thlak leh ta ngawt mai a.

Ks vakvel mai mai tur mi pangaiah ka siam che a tiin anchhe tinrengin min an khum leh ta, chutah zet zawng ka tuar thei tawh bik lo, inthen chu ka duh ta a.

Khamlo tawk leka zu in anih avangin a bike chabi leh helmet a la chhuak a, a chhuak leh ta nghal a.

Chu mi chu remchang ah ka la a, ka thawmhnaw nen chuan arukin ka chhuak ta a.

Thui ka kal hman lo, ka natna avang chuan ka tlu thlawp a, engmah ka hre zui tawh lo.

Ka harh leh meuh chuan damdawiin khumah ka lo mu a, oxygen min lo pe a, ka banah drip an khai bawk a, ka mit ka han meng diar diar a, ka khum bulah chuan kan pa chu ka hmu bawk a.

Ala rui hle mai a, a mit a sen ram mai bawk a.

Ka bulah ka fanu hi tui em em in amu bawk a.

Chutia ka harh hnu chuan zawi te si ngeiawm zet hian min phun khum a, damdawiin te ani bawk a, engtin mah min tih ka rin loh avangin ka dam veleh kan inthen ang ka tih avang chuan a thin a rim leh ta.

Min rek nawk nawk a, ka drip hrui te chu a pawt phelh a, chutia kan thawm ah chuan nurse te an rawn tlan lut thuai a, an nawr chhuak ta a.

Ka tan chuan kir lehna chi ani tawh lo, ka thian te ka call a, ka hawna tur pawisa ka dil a, an lo phal ngang mai, a tuk zingkar sumo ah chuan kan nufa in kan haw ta nal nal a.

Haklai chauh kan nei a, kan riang tak zet.

Aizawl chu tluang takin kan thleng na a, kan awm zel dan tur chu hriat thiam a har khawp mai.

Kan haw atanga nihnih a ral hnu in kan pa chuan min rawn call a.

Khawnge in awm?

Kan haw tawh.

Vawiin bazar ni ania, ka nu a nuamsam silo, rawn haw rawh, I awmna sawi la, ka rawn hruai ang che.

Ka nui hak a, in khua ah kan awm tawh lo, kan kal bo san vang vang tawh che.

Rawn haw rawh u a la ti hram a.

Phone chu ka dah ta hmak a.

Ka pute in ah chuan kan lut leh ta rawih a, nau nen ka nih tawh avangin inthlahrun ana ngang mai.

Thil awmdan zawng zawng chu ka pu bulah chuan ka hrilh fai ta vek a, ka tap bawk a.

Nangmah ni vang vek ani tiin ka lungawi lo tak zet.

Engtin mah min ti lo mahse ka inthlahrung a, an chhungkua an awm ve nual bawk nen, engmah hi nuam tak tak a awm lo.

Kan nufa chuan home ah te lut zawk ila tih te chu ka ngaihtuah neuh neuh thin.

Nikhat chu sangtea hi thawhlawm ip khawnin a rawn lut hlawl a.

Tumah an awm lo a, kan nufa in in kan lo nghak a.

Ka thlen atangin vawikhat mah ka la leng chhuak lo a, ka haw ani tih a hre bik lo, chutia min hmu thut chu mak a ti viau a.

Engtik nge in lo chhoh a?

Kar khat lai ani leh tawh,

In van inzep thei em em.

Nia kan la chhuak vak lo hrim hrim a.

Ivan cher em em ve, idamlo mi?

Ka thaw hak a, dam e, ka tha lutuk tiin ka chhang a.

Ka biang duk te, ka mit ko duk te, ka taksa cher em em dang lap te avang chuan a ngaih atha vak lo.

Naute chu a biangah a piai zauh a, rei pawh awm lo in akal leh nghal a.

Zanah chuan min rawn be ta nghal a.

Ka chanchin zawng zawng chu kim takin ka hrilh ta vek a, kan inthen thu pawh ka hrilh a.

Avan pawi tak em aw, ka khawngaih lutuk che tiin athiam ang tawkin min hnem ve a.

Kum tam aliam tawh a, an thalai pui ruthi nen an in ngaizawng mek tih te pawh mi tawngkam atangin ka hre ve leh zel a, ka lawmpui nge lawmpui chiah lo pawh ka inhre thiam lo.

Ka tan chuan beisei chi a ni tawh lo a, mahse ka thinlung ah erawh a thi thei tawh ngai lo ang.

Zankhat chu tum loh deuhin kan inhmu leh a, ka dawr kal tur leh a leng haw lam kan intawk a.

Kan han indin chilh ren rawn a, lunghlui a leng vawng vawng mai, chumi zan chuan kum nga hnu ah a vawikhat nan min kuah leh a, ani pawh a tum lawk em em vang ani chuanglo tih ka hria, kan intheihnghilh loh zia tih lanna mai chauh ani.

A bialnu nen an inzui ka hmuh chang te hian engemaw ni tak hian ka lo na ve thin, mahse ka in control hram thin.

Ka pu te bula awm reng chu nuam ka ti tawh lo a, ka fanu chu fahrah anih tak avangin ka lainat a, an hauh deuhin ka tahpui lo chauh ani zel mai si, kan nufaa awmhran mai chu ka duh ta zawk a.

Aizawlah in kan luah ve chawt a, kan nufa chuan hna kan thawk a, mi in tifai ten kan inhlawh a, achang chuan chawhmeh te kan zuar lawp lawp bawk thin.

Khawsak a har sa in tih mai mai ani hauh lo mai, engpawh thawk ila bawihtei chu ka hruai angai a, a hla emaw, a hnai emaw, a vawt emaw pawh nise ka hruai zel angai bawk si.

Nau nen chuan miin hnathawk ah min lo duh vak thin silo, rilru a hah duh hle mai.

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » February 16th, 2020, 4:17 pm

Nghei lek lek chuan kan awm ta fo mai a, thenawm khawveng te lah tumah ka pur ngam der silo.

Zankhat chu kan pa chuan min rawn bia a.

Ruilo hailo in felfai takin min rawn bia a, a thil tih tawh leh a awmdan ah a inchhir zia te, vawi khat chiah hun tha pe leh turin min ngen lawm lawm a.

Bawihi, tun chiah min ngaidam rawh, ka nun zawng zawng ka sim vek tawh ang.

A aw chu a dam em em a, kan in ngaihzawn tira a aw te pawh chu ka hre chhuak thar leh hial.

Ms, ngaihdam min dil ngun tawh lutuk a, ka sim tawh tiin ka lo chhang a.

Ka ti tak tak, in tello a awm hi a hreawm lutuk, in han awm lo chiah a, ka nun khua hi a har em em a, ka ruak vek ni hialin ka hria, lo haw leh rawh u, vawikhat mah kut pawh ka thlak tawh lo ang che.

Ms, ni love, ka thei tawh lo, a hlauhin ka hlau tawh che u, rethei te pawhin awm dawn mah ila rilru hahdam taka awm hi ka thlang zawk ani.

A ngawi vang vang a, anih keimah ka rawn chho ve mai ang aw, in tello chuan ka awm thei lo ani.

Atul lo, ka duh tawh lo che tih hrilh kher ngai lo hian i hrethiam thei lo em ni?

Chhete pawhin min hmangaih tawh miah lo maw?

Aw, hmangaih tawh lo, khang kum nga chhung khan i lak atangin hmangaihna leh duatna ka dawng ngai lo a, hmuhsit leh diriam sawisak bak hmuh ka nei lo, engtin nge ka hmangaih che irin theih zawk a?

Bawihtei vang tal pawhin lo haw leh rawh, nun bul tan tha leh ang tiin min ngen lawm lawm a.

Zan mut hmun ah te pawh chuan ka in ngaihtuah nasa hle a, mahse ka fanu vang pawh chuan let leh duh na ka nei tawh lo.

Zan tin min rawn call a, a chang chuan zurui chungin min rawn vau a, thah ah te min vau bawk a, min rawn zawn chhuah hun chu ka thih ni ani dawn tih thu te pawh vawi tam min hrilh bawk.

Ka hlau a, ka zam ani, rilru lamah harsatna nasa tak, hlauh ngawih ngawihna, thawpikna leh mangan na in min tuam khat vek tawh a, chutiang kara vauna ka han dawng leh phei chu ka mangang a, zan ka muhil ngam lo a, thawm ri hlek ah ka phu zawk reng mai.

Mahse min vau ang em em chuan a rawn che zui lem lo.

Tichuan dan ang in kan inthen fel ta a, bungrua te pawh kan la fel a, ka fanu erawh min chuh na sa khawp mai.

Kan nufa chuan kan awm chho ve nawk nawk zel a, hnathawh tur ka zawng na sa ngang mai.

A tawpah chuan min khawngaih tu mifel tak kq tawng ta hlauh mai.

Nau nen chuan an dawr nghah chu min phalsak ta a, an fel nupa em em a, ka dinhmun te kimchang takin ka hrilh bawk a.

Ka ni hmasa ber ah chuan tlai ka hlauh em avangin hma takah kan kal a, inren taka khawsak angaih avangin bus ah pawh kan chuang ngam lo a, ke hlirin kan thleng thak ani.

Kan in leh dawr inkar chu ahla hle mai a, darkar chanve aia rei kan kal ani.

Kan thlen phei chuan dawr pawh ala in hawng lo a, dawr kawt step ah chuan kan nufa in phur em em in kan lo thu ta ran a.

Rei vak lo hnu ah chuan kan thutna hma ah chuan motor a rawn in hung dat a, dawr neitu te nupa chu an rawn chhuak a.

In va hma ve.

An nui ver ver a, ka zam riau lehnghal.

Dawr chu kan hawng ta a, hmunphiah ka la vat a, dawr chhung vel chu ka phiat fai nghal sawk sawk a.

Thil tihdan kalhmang te, engkim mai chu min hrilh fiah a, ka fanu, naupang harh rual lekin eng eng emaw alo khawih te chu ka inthlahrung em em a, ka fanu chu ka veng deuh chawt a.

Tiang chuan nitin kan kal ve tlauh tlauh a, kawng athui tham si a, ka hah thin ngei mai, hlawh atam em em silo a, indaih a ahar ngang mai.

Chutiang anih avang chuan thildang tih tur ka dap pah reng a.

Kan pa te khua a ka hmelhriat te atangin sachek ka la ta a, sumo ah an rawn thawn a, dawr kawtah ka lo chang mai thin a, kg sawm te ka chah ve a, dawr khar hnu ah ka vahpui ta thin a, ka hah thin tak zet, ka hralh zawh hma chu ka zuar ngat ngat zel a, achang chuan zan dar kua ah te in thlen chang kan nei fo thin.

Rawng kan han bawl chawp nawk nawk a, ka fanu chu ka Khawngaih thin hle, chawei hman lo a amut chang a awm fo a, nu thinlung hi ana vawng vawng thin.

December thla ani a, dan ngai te bawkin sachek chu ka khai kual a, avawt em em mai bawk si.

Ka thil khai rit bawk, ka nau puak rit bawk, tah te pawh a chhuak hial mai.

Ama, avawt ka ti....

Ka naute chu puanin ka khuh a, bawihte kan haw tep tawh aw tiin ka hnem ve a.

Ka hralh zawh loh chuan dahthatna tur fridge kan nei silo, ka loss dawn bawk si, chuvang chuan hralh zawh ngei ngei ka ngai thin a, ka hralh zawh hma leh kan haw hma ani mai.

Kan pa in min rawn biak pawp theih tawh loh nan ka sim card ka thlak tawh a, kan inbe tawh ngai lo.

Damtakin krismas pawh kan lo thleng ve ta a, theihtawpa ka khawl ve keuh keuh sum tlem tham tak chuan ka fanu thawmhnaw leh toys vel te ka leisak ve a, ka tan erawh engmah ka lei thei lo thung.

December thla tawp lamah chuan khumbetin ka na ta a, ka thawhrim lutuk vang te pawh ani mahna, tha leh mai tura in ngaiin ka han mu deuh tlauh tlauh a, mahse ka tha hleithei lo tlat.

Ka pumah engmah ka pai thei lo, tuisik pawh in ila ka luak chhuak ta vek zel a, ka cher em em a, ka lu te ahai muai muai reng bawk a, dawr kal ngaihna a awm ta lo.

Dawr nei tu ten min rawn zawt thin a, ka dam theih mai siloh avang chuan min ban ta a, tih theih dang nei hek lo le,

Pawisa kan nei ta lo, engmah ka thawk thei silo, rilru hah lutuk avang chuan zan pawh ka mu thei lo a, ka thawmhnaw thenkhat te chu ka hralh a, ka puan neih ve ang ang te chu ka tiral bawk a, ka fanu in chaw a nghei ai chuan engmah ka ui lo.

Pathian hnenah ka tawngtai tawp a, abak tih theih dang ka nei lo, min tanpui tu tur tumah koh ngam ka nei lo a, thenawm khawveng te bulah ka sawi ngam silo.

Chutia ka buai em em lai chuan kan pa te khua a ka hmelhriat satliah ve hi a rawn nuthlawi ve a, kan kawmchhak ah nilum aia kan lo thut lai hian inluah tur zawngin an vak ve a, kan inhmu fuh ta hlauh mai.

Inluah tur an zawn thu te, avan thu te chu a sawi ve a, a u te afin ve thu leh a inthlahrun thu te chu a sawi ve siam siam a, keini pawhin kan mamawh ve em avang chuan kan inluah chu min rawn tawm mai turin ka lo sawm a.

Ani lah chu alo lawm em em a, tlaiah rawn insuan luh a duh nghal thu te chu a sawi a.

A ruk tak chuan ka lawm ani, ka thla pawh amuang viau mai.

Tlai thim hlimah hian a thawmhnaw tam vak lo nen chuan a rawn lut ta nghal a, a mah avengva bawk a, buhfai leh chawhmeh te a rawn lei nghal zung zung bawk a.

Ka tawngtai chhanna ni ngeiin ka hria a, ka lawm hliah hliah.

Ka dam loh thu te a hria a, pum damdawi leh vitamin te min leisak a, kei pawh chuan ka lo ngeih angreng a, ka changkang chho sawt viau.

Mahse ani pawh hnathawh nei anih bik loh avang in aneihsa chuan reitak a daih bik lo a, muthmun ah kan ti ti a, enge kan thawh ang aw tih te chu kan sawi dun thin.

Ka dam fel deuh chauh a, ka fanu chu kawthalo leh luak in a man ve leh ta a, dam tha leh mai turah ka ngai a, ngaihthat lohna em em pawh ka nei lo.

Ani pawh chu dam lam aiin zual lam apan zel a, ni thum hnu ah chuan a che peih tawh lo, damdawi leina tur lah chu chengkhat mah ka nei der silo, thaw avan pik tak em.

Zan li na zan ah chuan a mu tawp a, muchungin a kua a put reng a, dah ang ang in a awm deuh chawt tawh a.

Khum mawngah mittui nen ka thu a, ka vil tawp a,

Bawihte tiin ka ko a.

Peih leh peih lo in a rawn meng diar diar a.

Tui bak pek theih ka neih loh avangin tui ka intir a.

A pum na chu a te leh that thin.

Chumi zan chuan zah pawh ka dawn zo ta lo.

Ka hmelhriat ang ang te puihna chu ka dil a, tumah reng remchang an awm lo, fb lamah pawh tanpuina ka dil hial anih kha, mahse tumah puitu ka hmu lo.

Ka fanu thi mek chu ka en tlawk tlawk a, bawihte min ngaidam rawh aw, khawvela nu laktlak loh ber ka nih avangin,

A hmai leh a sam te ka chul a, a cher in a mit khur a thuk dak a, a dang a ro zung zung a, a tep chiap chiap bawk a.

Mahse pathianin amah chu rinchhan a, a kut chaka min hruai zia tihlan a duh niber in ka hria, belh hmasak leh koh hmasak tur zawk ko lo in mihring te puihna ka dil hmasa a, chung zawng zawng chu min pheh thlak sak alo ni.

Ka beidawng lutuk chuan thing thi in tih tak zetin ka tawngtai ta a, khawvar a hnai tawh bawk a, ka thu tlaivar ta law law a.

Kawl a eng ta tih ah chuan mutchhuakin min zem a, ka lo muthlu sek a.

Kawngka ri rak thawmah chuan ka harh a.

Ka thiannu chu a thawh lai ka hre lo a, a rawn haw leh tawh zawk hi alo nia.

Bawnghnute tlem leh ors siamchawp chi hi a rawn khai haw a, a u te in ah alo va la chu niin.

Chu chiah chu ka fanu tan pek theih kan neih anih avangin chu thil chu atan damdawi alo nih theih nan pathian hnenah ka hlan a, ka tawngtai leh a.

Bawnghnute ah chuan ors chu kan telh a, ka fanu chu kan intir ta a, a riltam vangte pawh ani mahna a in zo ta vek a.

Ka ngaichang reng a, a in zawh atang chuan a dam ta tlat mai, a e chhunzawm ta reng reng lo mai.

Kan pathian thatzia, chak zia a tak ngeiin ka hmu ta, a ni pawh a rawn harh chho a, a toys te pawh a khalh leh peih ta.

A cher viau a, a ring a rek rat bawk, hna bawk chu kan zawn leh angai a, ka hmuh ho lah chu nau nen thawh chi ani der silo.

Ka hun tawn avang hian thil tam tak ka hrechhuak ta ani.

Engpawh thawk dawn ila, bultanna angai a, chawhmeh zuar tur chuan a kharna sum aneih angai a, thutna tur a hmun a neih angai, aduh apiang tan a tih theih ngawt loh ani tih hi.

Ka thiannu thu min rawn fo angin ka fanu chu apa bula dah ka rilruk ta a.

Ka bulah zawng a rethei emai, a sur, asa hnuai ah, avawt emaw alum emaw, atlai emaw ka kiangah hun a hman ve angai zel bawk si, a duh ang leh a ei chak zawng ka pe thei hek lo, a dam loh in damdawi ka pe thei hek lo, ka hmnagaih leh ka khawngaih zawk avangin apa te chu ka call ta a.

A tuk ah chuan an rawn kal nghal tur thu min hrilh a.

Zankhat chiah ka fanu nen awmdunna hun kan nei ta, ka en tlawk tlawk a, engmah lah chu ahre silo, ahlim em em mai bawk si.

Kan mu te chu ka kuah ngawih ngawih a, ka thlir vawng vawng a, ka fawp ngawih ngawih ani ber.

Bawihte, ka thu hi sut leh thei ila ka va ti em, mahse irethei emai, ka phal tawh lo ani tiin ka mittui luang ngiai ngiai chu ka hru a, ka muhil lo chiang hle, ka lunglen changa ka thir atan tiin kan nufa chuan thla kan la mawlh mawlh reng a.

ani tur chu a rawn inher chhuak a.

Bawihte enge i ei chak?

Frooty.

Kan kawmchhak dawrah chuan ba in athil ei tur ka han laksak a, tui ti em em in a ei anih kha.

Fai takin ka bual a, a thawmhnaw tha ber ber te chu ka haktir a, ahlim nui ri kha engtikah mah ka theihnghilh tawh ngai lo ang.

Ahmuh hlau takin ka mittui ka hru a, ka fawp leh mawlh mawlh a, thla te kan la dun leh a.

Dar sawm velah a ni te a rawn thleng a.

Motor lem lei tur angin an hruai chhuak ta.

Ama, lo tap suh aw, ka lo haw leh vat ang.

Khumah ka bawk thlawp a, ka tap hawm hawm a, aw lalpa engvang nge ni le, ti em em a ka nun hi a hreawm bik le? Enge tihsual ka neih a, ipawi ka sawi tak le tiin ka pathian ngei chu ka dem lek lek zawk ani.

Tlaiah ka zu call a, alo hlim em em a, an lo ri deuh laih laih a.

Kan pa chuan, bawihtei vang talin rawn haw leh rawh tiin min la ngen a, mahse kir thei ka ni tawh lo.

Ka zu biak chang chuan atah thin avangin biak fo chu ka duh ta lo a, chhel taka ka awm angai ani tih ka hria a, ka be duh ta lo, a chanchin erawh chu ka thiante ka zawt fo a, an duat thu leh an duatsual ahlauhawm zawk thu te pawh ka hre ta zel a, ka thla amuang viau mai.

Keimah mai ka nih tawh avangin hna pawh ka thawk leh thei ta a, mahse ka kim lo riau thin, ka ruala tel ve thin ka naute a tel ve ta silo, ka tum ber chu theihtawpa hna thawh a, ka fanu ka hmangaih ani tih hriat nan a mamawh te chu leisak a thawn fo chu ka duh ani.

Link:
BBcode:
HTML:
Hide post links
Show post links

Local Advertisement

MOBILE SIAM ZIR DUH TAN!!!

Tech-Inn Mobile Repairing Traning Centre, Bazar bungkawn

Kum tin mi za chuang eizawnna kan siamsak a, Eizawnna tlaka thiam turin kan zirtir thin

Mizorama mobile siam zirna hmasa ber changtlung ber kan ni. Hrechiang duh tan Contact : 9612099411 / 9862016122


Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » February 16th, 2020, 4:18 pm

Hun aliam a, ni aliam a, kum hial avei ta,

Lunglen leh khawhar te pawh ngaiah ka nei chho ve ta zel a, ka rilru chhungril ah chuan ka fanu chu thi lo mahse tawrh dan ka thiam chho ve ta zel a.

BEISEINA in ka fanu ka hmuh leh hun tur leh, ka kianga a awm hun tur te, hmangaih taka ka kuah leh hun tur te chu ka thlir ve mek zel ani.


Ka hmangaih sangtea pawh nupui neih a tum thu te min la rawn hrilh ve zel a, lawmpuina leh duhsakna bak hlan theih ka nei lo a, atan duhsakna zawng zawng ka hlan ve anih kha.

A nupui neih ni erawh chuan engemaw ti tak hian ka awm a, ka sawi thiam chiah lo, ka pasal neih ni a a awmdan tur te pawh ka hriatthiam pui khawp mai, ani nen chuan kan khawvel a hran ta, a thinlungah erawh min hriat ve reng fo ka ring.

Kei pawh pangai takin nun ka hmang chho ve ta zel a, chutia nuthlawi tlawngawl ta chu thiante pawh ka nei chho ta zel a.

Thian tha leh tha lo te pawh ka tawng chho ve ta zel a, thlemna hrang hrang te pawh ka tawng chho ve a, mahse nun uluk taka hman chu ka tum ve tlat a, diktak chuan khawvel lamah chuan tlan ta ila nuam takin ka awm anga, rilru te pawh a hahdam ngei ang, mahse ka tawpna tur lah chu ka hrechiang nasa mai si.

Chuvang chuan tha takin ka nun ka hmang chho ve hram hram zel bawk a.

Chutia tlawngawl ta chu mahni tawkah ka han intuai hnum thar ve leh tan ta a, fa pakhat chauh nei ka la ni bawk a, ka hmel pangai te pawh ka rawn pu chho leh ta a.

Ka chhuan em em leh mi pawhin an chhuan ve thin ka sam sei kir tak te pawh chu hun engemaw chen enkawl tawh loh avanga thi bul tawh te pawh chuan ngai an rawn awh leh ta bawk a, nun pawh a harh a, ka thar leh ta vak mai.

Thawmhnaw dawr ka nghak thin a, rual te ka pawl zau ve zel a, hmelhriat leh thiantha te atangin eizawn na dang pawh ka hre chho ve leh ta zel bawk a.

Zahna kalpel tawk leka nuthlawi senior ka ni ta bawk a, sum pawh ka lalut ve ta zel a, ka inluah te reuh te, chhe ve tawh tak pawh chu chhuahsan in indang ah ka insuan lut ve ta a.

Ka thiannu pawh ka bulah ala cheng ve ta zel a, ani erawh anun a uluk em em lo a, ngaihzawng te neiin han riahbo mai te pawh a ching zauh zauh a, zu han in mai te pawh a harsat lem lo, mahse buaina ka nei lem lo, amah vanga ka fanu damlo na tak, dam ta kha ka hre reng a, kha thil avang khan alakah rilru thalo tak ka pu thei bik lo.


Kan pa nen kan inthen atanga kum li hnu ah chuan.

fb kaltlangin thian ka chhar thar a.

Ani chu ka thian tha mai chauh ani, min rawn be ve fo thin a, Bangalore ah hna thawkin a awm bawk a.

A hming chu benjamin lalhmingsanga ani a.

Bena tiin an ko mai thin, a takah kan la inhmu lo a, fb leh phone call chu kan in hriat pawpna awm chhun ani.

A ni pawhin thian ang chauhin min en a, akhat mawi tawk hian min rawn be ve thin.

A rawn haw hun ah inhmuh pui ah te min sawm ve na a, ka hmuh tak tak erawh ka ring lem lo.

Tlangval hleitling tak ani a, gym kal nasa ani tih hriat takin a taksa a mawi em em a, a chhuang ve hle ni te pawhin ka hria, a post reng reng a taksa mawi tak lang tam thei tur ang zel hi a ni deuh vek a.

Zingkarah min rawn wish hmasa ngei ngei a, zanah a mu dawn anih chuan min mangtha ngei ngei bawk thin.

A active vak lo a, ka lo chang ve thin a, biak a har angreng viau thin.

Chutiang chuan thla li vel zet chu hmel inhmu lem lo in kan in kawm ve a, a tawng tam vak lo nge, tawngkam bungrua a nei tawi thei angreng hle thin.

a laka rilru engemaw deuh ka put chang chuan ka inthiam lo leh vat thin a, fa ngaihtuah tur nei tawh ka nih thu hi ka hre nawn leh thin.

Thla li hnu ah chuan.

Zankhat chu min rawn call hlawl mai a.

Bawngkawn police station ani em aw?

Ka phu deuh zawk a, a number lah chu ka la hriat ngai loh avang chuan min thawng deuh lek lek a.

Ka ngawi deuh vang vang a.

A rawn nui chhuak hawk a, tah chuan Bena ani tih ka man chhuak vat a.

Ivan mawl reuh tak, ka thin a phu hman alawm le, number thar in min rawn be bawk sia.

Nia, rawn surprise che ka tum a, vawiin ah ka rawn haw a,

Anih chu mawle, in tluang maw?

Aw tluang ani mai e, in ah i awm em?

Aw awm e, ka mu dawn chiah a.

Hehe... Ka lo len chu ihlau maw? mu rawh tih pahin a nui deuh hawk hawk a.

Diktak chuan ka hmangaih ka chan tawh a, pasal then tawh, fa nei tawh ka ni a, tlangval pangai inleng han neih that leh chu ka zuam chiah lo ani, mahni insitna in ka khat ve tawh bawk a.

Lo len a tum apiang chuan chhuanlam ka siam zel a, min rawn biak ka hlauh avangin ka phone te ka off hial thin.

A rawn haw atanga Chawlhkar khat hnu ah pawh chuan kan la inhmu ta miah lo.

Nikhat chu suitcase lian deuh hlek, thil dahkhawmna tur ka mamawh em avangin lei turin dawr atang in ka chhuak a, kan buai loh lai tak chuha chhuak ka ni a.

MC kawt ka thleng a, tumah en lem lo in ka kal mawp mawp a.

Ka phone a rawn ri ral ral a, tunge anih hriat tumin ka han en thuai a.

Bena chu lo ni rengin.

Biak loh zawk chu tha a ka hriat avangin ka chhang ta lo a.

Ka kal phei mawp mawp a, ka hnung lam atangin ka banah min rawn man nawlh a.

Ka lehhawi rang kher mai.

Ka beisei loh lutuk ka hmuh tak avang chuan ka ding khawng reng a.

Ivan in duh em em ve a, tinge min biak duh miah loh a?

Ka in duh vang pawh ani lo, ka buai thei lutuk a.

Anih dawn chu, ibuai lutuk a call pawh i pickup theilo tihna a ni maw?

Khawnge kal itum hrim hrim?

Bazar ah, engemaw lei ka tur ka nei a.

Ka lo kalpui ang che a ti sam et a.

A ngai lo, ka kal thei alawm tiin ka hnial tlat a, mahse min zui lui ta tlat a.

Tunhma atangin kawng cross hi ka hlau thin a, ka ngam hlawl lo, ka ding reng thin,

Kawng kan han cross dawn a, ka ding deuh chut zel a.

Ka hlau ani tih a hrethiam vat a, ka banah min kai a, kan cross dun ta a, mizo hmeichhia ah chuan hleitling ve tak ka ni na in bena lakah chuan ka te raih mai.

A inchei simple tak zet, T-shirt plain a ha a, haft pant simple tak a ha bawk a, slipper a bun tawp a, a slipper lah chu a fai em em mai bawk si.

A helmet a keng a, kan inzui ta hnak hnak a, tum loh lutuk a inhmu kan nih avangin sawi tur a vang duh khawp mai.

Ka suitcase lei chu min ken sak a, min zui pawh chu a tihzia phian, ka thil lei alian si a, ka tan ken ngaihna a awm lo.

Loh theih loh in ka dawr thawhna thleng chuan min thlah a, tunah chuan ka thawhna dawr a hre ta.

Rei a awm lo a, a chhuak leh vat a.

Kha!
Khawilam tlangval nge i rawn hruai a, a hmelchhe lo em em lehnghal a tiin kan pu chuan min lo fiam zauh a.

Ka nau anih kha tia chhan pahin chhuanlam ka zawng a, thawmhnaw te ka thlep tha ta vel a.

Rilru ah a cham nghal ringawt, zun a nei deuh reuh tlat mai.

A hnu zela ka hriat dan chuan kan dawr thawhna piah mai a electronics dawr hi an ta a lo ni a, chumi ni pawh chuan an dawrah akal anih ngei ka ring.

Tlai dar nga bawr vel ah chuan.

Thlah ingai em?

A msg chu ka dawng leh ta a.

Ngai lo ve, bus in ka haw thei alawm tiin ka chhang a.

Min lo nghak rawh, ka va thlah ang che atih tlat avangin ka lo nghak ta a.

Nga leh a chanve velah ka chhuak a, rei vak lo hnu ah ani pawh a rawn thleng a, lai deuh run chung chuan a bike hnungah ka chuangkai a, kan veng chu a hre tawh a, kan veng lam pan chuan kan tlan ta a.

Tihngaihna a awm tawh lo, kan in chu a tawpah chuan ahre ta nghe nghe a.

In in va luah nuam ve, a felfai at mai si a.

Chutia mi, lo thu la Ka va inthlak lawk ang aw tiin pindan ah ka lut nghal a.

Ka thiannu chuan rawng alo bawl mek a, mi tawng duh tih takah bena pawh chu a lo be luam a.

Ka zak chu ka sen deuh ap ap in ka hria, darthlalang ah ka in en a, maruat, hun tha tam tak ila nei, zam suh tiin ka phun sap a.


Ka let leh chu min lo en ngun viau mai, khawlum lai anih avangin kekawr bul ka ha a, tawnzau bah ka ha bawk a, sangtakah ka sam ka bawk khawm a, a bulah chuan ka va thu ve ta a.

Thingpui iduh em?

Duh lo ve, alum emai, bakah ka in lutuk lo a.

Thingpui dai chi ami i in thin?

A ner sawng a, a duhin ka duh lo hrim hrim a ti sap a.

Chawei te ahun tawh avangin ani pawh chu achhuak ta vat a.

I chhass thar ami?

Ka thiannu chuan phur fahran hian min lo zawt a.

anih iring em?

Ka nui thaw a.

Iduh loh chuan ka hauh ania aw, a chhelo bawn tawp.

Kan nui dun bak bak a, chaw kan ei zui nghal a.

Chawei kham ah ka inbual fai a, ka mu hahdam ta nghal a.

Darkar chanve vel chu ka mu tawh ang.

Ka rawn kal ania aw tiin msg min rawn thawn leh a, ka awih lo khawp mai.

Ka awih lo emai tiin ka chhang let vat a.

In in ka rawn thleng tep.

Ka la awih chiah chuang lo, ka muthmun ka remtha sauh sauh a.

Kawngka a rawn kik dat dat takah chuan a rawn kal tak tak anih ka ring ta a.

Ka va hawng thuai a, a lo nui heu mai a.

Chumi zan pawh chuan a inchei ho leh viau mai, nuthlawi rim turte chu nalh deuh taka rawn kal ve awm, T-shirt leh kekawr bul nen chauh a rawn kal leh a, incheina ngaisang vaklo ani tih a hriat.

Boxer nen chauha mu ka nih avangin puan ka veng thuai a, a bulah chuan ka va thu ve a.

Cigarette zuk in phal em?

Inthlahrun hmel tak chuan min zawt a.

Tehreng mai, mahse ash tray kan nei miahlo nia tiin ka nuih hak a.

Cigarette a pak khu tual tual a, a pa len em avangin a thu te chu a lang lian bik hle.

Khawnge ithiannu kha?

A leng chhuak a.

Awm ve se tha tur.

Nia, ilo len leh hun chuan awm turin ka lo hrilh dawnnia.

Deuh kher a, a tawng duh reuh lutuk a, kawm a nawm hmel reuh em a.

A hmel pawh a tha lawm ka lo ti vat a.

I tha daih zawk, mahse i tawng tlem lutuk a, kawm ihar.

Ka nuih a za tawp, ka tawng duh zia ala hre ve lo a, a awm tho e..

Fb ah hian i in la chhelo thei sia, pa leh tlangval i hipkhawm hneh khawp mai, keini chu lan pawh kan lang ve ngam hleinem, a nui suk a, a tawng muang deuh charh bawk a.

Awihawm loh ber awm e tih pahin ka tho that a, fridge a thei tui ka dah chu no hnih ah ka thli a, kan indun ta a.

Ka phone a rawn ri a, msa number alo ni a.

Engemaw pawimawh te anih takin tiin ka pickup thuai a.

Bawihtei zawk chuan min rawn be hlauh mai.

Anu... Idam em?

Aw dam e, bawihte, idam zawk em?

Aw, vawiin ah apu ten naute lem lian tawk min leisak a, keimah ang tiat ania.

Awi, ka van hmu ve chak em em, nakin ah a thlalak min rawn thawn rawh aw.

Anu, lo zin ve la, ka hmu chak tawh che a.

Bawihte, ka rawn zin vat ang, ka hmu chak lutuk che kei pawhin tiin kan in mangtha ta a.

I fanu chu mi?

Aw ni e.

Ava lian tawh awm ve, a thlalak inei em?

Ka phone a bawihtei thlalak te chu ka entir a, a tluk chiah lo che anih hi.

Kan titi chho ve zel a, ahma ai chuan ka nel ve tawh lutuk, a mizia belhchian phei chuan fel tak ani.

Dar sawm bawr velah a haw ta a, pawn thleng ka thlah a, kan in mangtha ta a.

Zantin deuhthaw a rawn leng a, mahse mak tak maiin in ngaihzawn na lam kan sawi ngai lo, min biak dan erawh ngaihzawng chei ang hian min be bawk si, ka hrethiam chiahlo.

Ka thlalak comments tu te a duh vak loh hi chu a rawn like kauh zel a, ka chhan dan a rilrem vak loh te nen hian, thil dang erawh a sawi zui em em lo.

Zankhat chu a thlalak ka check a,

Comments ka en thla diat diat a.

Angela tih hming pu in a comment reng reng chu inhmelhriat tha tak an ni tih ka hre nghal a, bawiha tih te, Duata tih te pawh a awm nawk mai.

A ho e, engemaw ka buai vak le, in ngaizawng pawh kan ni lo a, tlangval ani a, duh duh akawp thei tiin ka enzui duh ta lo zawk a.

Rinhlelhna erawh ka nei lian viau tho mai.

Nikhat chu chu nu nen ngei chuan an in phur chhuak ka hmu a, ani chuan min hmu lo thung, chumi ni chuan damdawiin ah ka nutei ka awmpui dawn a tih ni ani bawk.

Zanah chuan angela i wall vel chu ka check kual ta a, bena te ho nen a an picnic na thlalak ngei chu a upload ta teuh mai, ka nuih a za, Benjamin a dawt theih zia chu mak ka ti zawk.

Ka va text ta nghal vat a.

Inutei chu enge a an tawh a?

A tha e, angaihtuah awm loh tiin dawt min la hrilh ta fan a.

A lawmawm anih chu.

Zanin chu ka rawn kal hman lo a, naktuk zanah ka rawn kal dawnnia aw.

Awle mangtha le tiin ka chhang a, ka mu ta nghal a.

Ka fimkhur angai hle mai, ka tawn sual leh hi ka hlau takzet tawh ani, bena pawh dawt in min bum nghal der chu ania, hmangaihna khura ka luh hma a ka hrechhuak erawh ka lawm ani.

Mahse mak tak maiin ka rilru ah a cham reng a, ka ngai tlat mai a, hmuh ka chak viau bawk.

Engemaw ti taka elhsen chu ka chak a, a rilru ka hre chak ani.

Thian mipa tam tak ka nei ve a, ka thian tha ber te zinga mi, kan dawr piah lawk ami, amah chu apa vak lo, hmeichhe kawm nuam ti chi hi ania, ahmel en ringawt chuan a hriat loh thung, a hmeltha em em a, a ngo vang mai bawk si, chupa nen chuan thla kan la dun chiam a, in ngaizawng ang maiin ka kawnga kuah chung te chuan thla kan la ta a.

A mal chungah ka thu a, a darah ka kuah a, abianga ka kiss lai te chu ka click tir a.

Zantirah chuan ka upload ta a, alandan ah chuan in ngaizawng kan ang chiang hle.

In inhmeh lutuk.

Ka van thik tih te chu ka dawng ta nawk a.

Bena rawn lan hun ka nghak reng a, a reh vung vung mai si.

Beidawn tawpah a rawn lang ve a,

Ava nuam awm ve a rawn ti kauh a.

Ka chhang duh bik ta miah lo thung, chu chu ka nghah ber kha ani reng bawk a.

Rei vak lo hnu ah min rawn WhatsApp ta nghal a.

Ava nuam awm ve.

Eng chu maw? Hrelo ang deuh chuan ka lo zawt let a.

Hre lo der lo la.

Ka hre tlat silo a.

Thlalak a screenshot chu min rawn thawn ta a,

Ka lalthiana malchunga ka thu lai leh a bianga ka kiss lai ngei mai chu.

Ka chhang duh ta miah lo a.

Ka phone a rawn ri leh tleng a.

A dik em?

Chu thu chauh chu a rawn sawi a, a ruk tak chuan ka nui ver ver a.

A chhe lo ve tho tiraw?
Kan inhmeh iti em?

Hmeh lutuk, duhsakna ka hlan che.

Kan reh dun ta vang vang a, kei hi ka tisual zawk anga ka ti rilru ta deuh a.

Dar sawmpakhat velah min rawn be leh a.

Tinge tiang leh mai mai tur si chuan beiseina min Siam a?

Ka single itih te kha dawt vek alo ni maw? Ka lo ringsual teuh hle mai che tiin.

Ka chhang duh miah lo a, a rilru chu enzel ka duh ani.

Min rawn call a, thinphu dawt dawt in ka lo la a.

Nangmah vangin mut pawh ka mu thei lo, dawheh nu a rawn ti nghal ngawt a.

Tinge imut theih loh a, tui deuhin lo mu rawh aw,

I va han ngeiawm tak, ka lo kal dawn.

Atlai tawh, angai lo, mut ka duh tiin ka hnial a.

Ka rawn kal dawn tih pahin phone chu a dah ta a.

Kei hi thil nilo lo ka ti ani, tih loh tawp tur ani ka tih.

Rei vaklo hnu ah pawn atangin min rawn call a, a rawn thlen tawh thu a sawi a.

Kawngka ka va hawng a, min lo en ran a, a thinrim hmel viau lehnghal.

A rawn lut chhet chhet a, a helmet chu dawhkan ah a dah a, thutthleng sei ah tukhum a kut pahnih suihin a thu ar ar a.

Iva ngaihtuah muk awm ve tiin kal pahin alu ah ka tuai zauh a.

A nui sak a, lo thu teh tiin ka banah min kai a, current man ang mai hian engtin mawni ka awm deuh sawk a.

Ka thiannu chu a bialpa nen an zin dun daih thung a, kan free hle mai a, zanin chu duhtawk in thil kan sawi thei ani.

I bialpa ani tak tak em?

Mipa thian zawng zawng hi kan bialpa an ni vek ngai ami?

An ni vek chu ka ti lo, mahse in awmdan ah khan a hriat alawm, thian chauh nise tikhan thla in la lo ang.

Tlang takin min hrilh law law rawh, chuan ka beisei lo law law ang che, mi inkara inrawlh vel hi ka duh miah lo ania.

Engmah chutiang a awm lo.

Tak tak ani em? Nakina nat leh kha ka duh miah lo ania.

Engtia nat maw? Engvang in?

A chhan ihre duh maw?

Ka duh che a, hrilh nawn kher ngai loin ihriat ka ring.

Dawta bul tan ka duh lo ati deuh nghat a.

Ben, anih leh thil pakhat ka zawt ang che aw.

Enge sawi la.

Tinge nang pawhin dawt min hrilh?

Eng thil ah maw?

Damdawiin ah ka nutei ka awmpui dawn itih ni khan I kal ta em?

Kallo tiraw? I bialnu te nen in picnic ani lawm ni? Khata tang khan ka ring tawh miah lo che, thian tha chauh kan ni thei ang.

Kal e, ka kal alawm, ka bialnu tumah an awm lo, chawpchilh deuhin thian ho picnic ah min rawn sawm a, kan haw khawm hi chuan kan picnic fo thin a, khami ni pawh khan ka nutei kan kan hmasa reng alawm.

Elhsen zetin ka nui a, hnar hnuaiah phatna a bo lo chiang maw.

Kha, angela khan bawiha, bawih duat a tih dan che atang khan engemaw ni chu a awm alawm.

Teuh lo e, call ang aw, loud speaker ah ka dah anga, ngaithla rawh aw tih pahin a phone chu a lek kang nghal a, ka chuh vat a, ka laksak ta daih a.

Ka thian tha te vek an nih kha, bialpa nei lai an nih kha.

Dawt a sawi chu ka ring ta chiah lo deuh a, tha tak chuan ka ngawi zui ve mai bawk a.

Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)