James Bond - The Man With The Golden Gun (Completed)

Episode nei ho a hlawm a dahkhawmna
Ngaia
Site Admin
Posts: 25813
Joined: April 30th, 2016, 4:07 pm

Re: James Bond - The Man With The Golden Gun (Completed)

Unread post by Ngaia » February 26th, 2020, 5:09 pm

UNREAL ESTATE

Zinchhuak nasa takte pawh hian zanthima an la kal ngailohna a hotel leh in mak danglam tak an hmuh hi chuan tourist satliah ang deuh hian an â deuh hû thin an ti. James Bond pawh hian Jamaica ram awmdan te chu a hre thawkhat ve viau tawh a. Hmalama car tlan a umna veilam hlirah chuan tuipui chu a awm tih a hria a. Reitawk an tlan hnu chuan tum thing ding thulh mai kara thira siam gate rinawm tlut mai hi an thleng ta a. Tuipui kama tui inchhawk ri te pawh chu car atang chuan a hriattheih a.

Bond chuan Thunderbird hotel ram chin bak chu fu hmunin a luah deuh vek ang tih pawh a hresa a. Dinglama chhum kal zut zut kara tlang hniamte te lang thei lam atang chuan dum rim a rawn nam leh huk thin a. Mahse Bond chuan a awmna lai tak chu a hriatthiam mai loh bakah a inbarh luhna chu a hriat chiangkuanloh avangin a rilru chu a nuam zanlo hle.

Secret agent te hian an zir hmasak thin pakhat chu khawi hmuna awm nge an nih hriatchian hmasak a ni a, kalkhan zawng zawng pawh hriat hmasak ngai a ni. Chibakah hmundang biakpawhna hmanrua enge awm tih hriat an tum hmasa bawk thin. Chuvangin James Bond pawh chuan a chinchang hriat miahlohna hmunah a inbarh thuk tawh hle tih leh pawnlam a biakpawhna tur hmun a hriatchhun chu mel 30-a hlaa nawhchizuar ho awmna in enkawltu nula ringawt kha a ni tih aa hrechiang hle.

Hla deuhva an la awmlai in an car mit eng chu an lo hmu ni ngei tur a ni; hotel bulhnaia thing leh gate vel chu a eng pup a, hotel pawh chu a langchiang ta hle. Hotel kawtah chuan Scaramanga car chu a ding ta a, Bond pawh chuan a hnungah chuan a dintir ve ta bawk a. Tukverh sang tak darthlalang phena hotel chhuat sailungvara siam leh electric khawnvar nalh tak tak inkhai chu a hmu thei nghal a. Waiter pahnih, uniform nalh tak ha hi bathlarah chuan an lo chhukthla a, Scaramanga chu zah deuh hian an lo dawngsawng a. A suitcase khailai chu lo khaisakin, hotel pindan zau takah chuan an inzui lut ta a. Register ah chuan Bond chuan Mark Hazard tiin a hming a ziak a, Transworld Consortium, Kensington angin a address chu a ziak bawk a.

Scaramanga chuan manager niawm taka nalh leh fai taka inchei, American niawm tak chu a dinchilh a, an inbe mawlh mawlh a. Bond lam chu hawiin, "West Wing a no 24 ah i awm dawn anih chu. Kei chu no 20 ah ka awm ang. I duh leh mamawh chu room service ah i lam mai dawn nia. Naktuk dar 10 velah kan inhmu dawn nia. Ka thawhpuite chu chhunlai velah an lo thleng ang," a ti a. A mitmeng nelawmlo tak chuan a thu chu Bond-a pawm zawng anih leh nih loh chu a ngaipawimawhlo hle tih a hriat a.

Bond cbuan waiter pakhat, a suitcase khaitu chu a zui a, veilamah an kal ta a. An pheina corridor chu a var zui mai a, chhuatah chian carpet dumpawl a inphah chhuak vek mai bawk a. Waiter chuan room no 24 kawngkhar chu hawngin, Bond chu lut hmasa turin a han zaizir a.

Pindan chhung chu air-conditioned a ni tih a hriattheih nghal mai. Pindan zau leh nuam tak, tunlai tak mai a ni a, bualin leh mut pindan pawh chu an nalh hle.

Waiter chhuah hnu chuan Bond chuan pindan chhung chu a endik ta a. Thil rinhlelhawm deuh nia a hriat pahnih chu khum chunga milem.intar leh telephone te chu an ni. Khum chhunga Jamaica bazar ni lem an tar chu a la thla a, mahse a hnung bang chu a rinhlelh ang ni lovin bang satliah ve mai chauh a lo ni a. Milem chi a tar tha leh a, telephone chu a enchik leh ta a.

A pocket knife a phawrh a, phone hnuai chu a han herhhawng ta a. A rin ruk ang chiah thil a lo awm avang chuan a kiaisak a. Telephone mawngah chuan thusawi ngaihthlak rukna microphone hi a lo inthlung chiah reng a. Fimkhur takin a chhin chu a kilh leh a, a hing tha leh ta a. A mut hmaa tawngtaina han chham vak mai te pawh chu a châk rum rum a, alo ngaithlatu te hmel han hmuh pawh a chak rilru hle zawk a.

Scaramanga chu a ngaihtuah zui ta nauh nauh va. Tumah hian enge a tih ang? Havana emaw US lam emaw te a be mek angem? A tuk lama an thiltih tur ruahmanna a siam vel em ni zawk ang le? Hotela chanpual nei anga a sawiho chu hmuh an chakawm hle hian a hria a. A ringsual hle anih loh chuan mi pangngai piahlam an nih ngei a ring bur mai. Batista lal hunlai vel pawh khan hotel vel chu chutiang mi deuh hlir chuan an enkawl thin tlat a ni.

A tho thut a, a lukham hnuaia Walther pistol a dah chu ava lachhuak a. A magazine chu phawiin a spring chu a han enchhin vel a. A sava kahhlum danah khan Scaramanga chu mi namai a nilo tih a hre tlat a ni.

A muthilh laiin Scaramanga chuan hotel chahbi spare in emaw kawngkhar chu a rawn hawng thut thei tih a hria a. A tuk lamah tal kawngkhar hnuailama hnawhtur thil engemaw chu ngaihtuah a tul tih a hria a. Lo lut tur an awm pawh a hriat ngei ngei turin kawngkhar ngheng chuan a suitcase chu a tung a, a chungah chuan no ruak pathum a hung tlar bawk a, tichuan kekawrbul nen chauh chuan a mu ta a.

Bond chu khum atang chuan a tho leh a, tuivawta a inbual leh hnu chuan a mu leh ta a: zinglam dar 7:30 thleng chuan. Chutia a thawhleh hnu chuan tuichenna kekawr hain, a kawngkhar dalna suitcase leh no vel chu a lasawn a, a chhuak ta a. Veilam kawngkhar pakhat inhawng atang chuan ni eng hi a rawn lut raih mai a. Hotel chu chhuahsanin tuipui lam pan chuan phaitual hnim chungah chuan a phei ta a.

Thui pawh a kal hmain a dinglam thinghmun atanga thawm mak tak lochhuak chu a hre ta a, ava pan phei ta a. Scaramanga kha trampoline ah hian inthazo deuh mai hian a lo invawrh vak vak mai hi a lo ni a. A bulah chuan negro pakhat hian a thawmhnaw chu a lo kensak a, a lo thlir ve reng bawk a. Scaramanga chu trampoline inphah duai maiah chuan a invawrh vak vak mai a, a hnute lehlam chunga a hnute hmur pawh chu a langchiang hle. Bond pawh chuan reilote a thlir hnu chuan tuipui lam chu a panding leh ta nghal a. Tuiah chuan a han hleuh pawp pawp a, Scaramanga vang khan a tum aia rei a hleuh ta nghe nghe a.

A duhtawk a hleuh hnu chuan a pindanah a kir leh a, zing chaw pawh tam lo tak a ei a. Khua a lum leh tawh em avangin a suit dum chu hreh tak chung chuan a ha leh ta nge nge a. Chutah hotel vel chu chian turin a chhuak leh ta a. A car an dahna a hriatchian duh avangin a kal kual leh ta zel a, West Wing hmun rehlaiah chuan ava hmu ta a. Nisa in a chhun nasat lutuk a hlauh avangin daihlim hnuaiah chuan a hungsawn leh ta nghal a. A petrol dinhmun te a endik hnu chuan a car chabi pawh chu a ak tha ta daih a. Chutianga baka tlachawpa khawsak mai loh chu han fimkhur lehzual ngaihna vak pawh a hrelo a ni. Car dahna velah phei chuan dum rim kha a na kher mai a. Boruak ala dai bawk a, vahkual deuh rih thain a hria a.

Rei pawh a kalkual hmain phul leh hnim hring pangngaiin a awhchin chu a thleng ta a. Chumi piahlam chu ram chhengchhe zet mai hi a ni tawh a, lui tui nu tak, luangkawi nguai nguai bakah dum hmun rimna tak tak a awm nual bawk a. Chung dumhmunah chuan Egrets te, Shrieks leh Louisiana Heron te an thlawk sup sup mai a. Lui pakhat nu deuh mai kam tawn tawnah chuan chakai kua niawm tak tak hi a kaw chek chuk mai bawk a. Bond chuan ava panhnai deuh va, vaukama awle nilum ai lai chu tuiah chuan a tawlhlut vat a. Hotel chu an siam hlawhtling hlauh anih chuan chulai hmun chu tourist te pawh pawisa tlem chawitir a 'Tropical Ngaw' anga chhalin an chhawr tangkai thei ngei ang tih pawh a ring a ni.

A sana a han bih a, a kir leh ta a. Veilam hnim zingah chuan hotel eirawngbawltu leh thawmhnaw sutu te chenna bik chu a lo awm a. Bond chuan hotel chu a hel a, kawngkharpui atang chuan a lut ta a. Scaramanga chuan manager chu alo be mawlh mawlh a, Bond-a ke pen thawm a hriat chuan a rawn hawi a, bung deuh hian a han bu nghut a. "Conference room iva en teh ang" tiin Bond chu a lo sawm nghal a.

Dinglama restaurant ah chuan an inzuilut a, kawngkhar pakhat kaltlangin thutkhawmna pindan chu an kalpel leh a. Chumi piah deuhvah chuan kawngkhar pakhat hi a lo awm leh a, an lut ta a. Pindan lai takah chuan dawhkan bial lian deuh hi a lo awm a, a hual vel chuan chair pasarih hi a lo inhung bawk a. Chair hmazawn dawhkan ah chuan lehkha leh pen a inchhawp sa vek bawk a. Pindan chhuat ah chuan carpet senduk nalh zet mai hi a lo inphah bawk a. Dawhkan chualtu chair zinga kawngkhar lam hawi sirah chuan telephone var hi a in hung nghe nghe a. Chu chu Scaramanga thutna tur niawm tak a ni. Bond chuan pindan chu a han hel pawp pawp a, tukverh leh puanzar bakah electric invuah dan vel chu a han endik a.

"Heng electric invuahna velah hian ngaihthlak rukna an lo dah thei a, telephone ah pawh sawn a awm thei ang. Ka enfiah dawn em ni?" a han ti a. Scaramanga chuan nelawmlo deuhva Bond-a en chung hian, "A ngai lovang. Chutiang chu vuahsa vek a ni. Kan thusawite hi record vek a ngai a ni," alo ti bak hluk a.

"Aw le. Chuti chu khawi laiah nge lo awm tura min duh?"

"Kawngkhar pawnah sawn lo thu la, lehkhabu emaw lo chhiar mai rawh. Vawiin chawhnu dar 4 vel hian General Meeting kan nei dawn a ni. Naktukah chu aia nep deuh chuan vawi hnih khat chu kan thukhawm leh mai thei bawk. Kei leh mi pahnih khat chauh kan ni ang. Hetia kan thutkhawm lai hian tuma tihbuai ka duhlo a ni, I hrethiam em?"

"A awlsam dawn khawp alawm. Mahse i mi hmuhtur te hi an hming leh tu aiawh nge an nih min hrilhloh te chuan tu ber nge buaina siam thei tur ka hre thei dawn em ni?"

Scaramanga chuan pindan chhunga veikual reng pah chuan, "Thu la, lo chhinchhiah rawh. Pakhatna chu Mr. Hendriks Dutchman a ni a, Europe pawisa a buaipui hle a, a bikin Swiss pawisa a ngah leh zual. Ani chu mi hnial ngailo anih avangin enghelh buai a ngai lo. Pahnihna chu Detroit lam mi Sam Binion a ni," a ti charh charh a, Bond chuan, "Purple Gang a ni maw?" tiin a lo pawtchat a.

Scaramanga chu a ding chawt a, tur deuh hian Bond chu a han en a. "Mister, eng hming pawh pu la, chung mite chu mi zahawm tak tak vek an ni tih hre rawh," bul deuh hian a ti ta a.

"Ka hming chu Hazard a ni,"

"Aw le, Hazards. Mi pangngai leh zahawm tak tak vek an ni tih theihnghilh ngai suh ang che. Mahni hian ngaihdan eng engemaw te hi ilo nei ve ngawt ange. Sumdawng mi rinawm tak tak vek an ni a, tuna ka sawi Sam Binion pawh hi ram hralh leh leia sumdawng, Real Estate Agent a ni a, dollar maktaduai 20 vel chu a neih ka ring hial. Ka sawi awmzia chu i hrethiam tawh em? A pathumna chu Miami lam mi Leroy Gengerella a ni a, pa thiltithei tak, Gengerella Enterprises neitu a ni. A rothap viau mai thei. Tin, Vegas lam mi Ruby Rotkopf alo tel bawk ang. A lo experience tawhna atangin chhanna tam tak a hriatsa dawn avangin zawhna pawh a nei khirh viau mai thei. Chicago atangin Labour Relation lam mi Hal Garfinkel a rawn tel bawk ang. Ani hi pawl hrang engemaw zat aiawhtu a ni. Ani hi chuan buaina engmah a chawkchhuak lovang. Heng pawl, Union te hian pawisa an ngah lutuk a, dahna tur an hrelo hial zawk a ni. Tichuan mi 5 ka sawi tawh a, a hnuhnung ber chu Arizone Phoenix lam mi, Louis Paradise a ni. Pawisa khelhna chi khat One-Armed Bandit an tih mai Paradise Slot neitu a ni. Casino ah pawh chanpual a nei nual bawk. Eng rilru nge a put dawn erawh chu sawi har tak a ni. Chung zawng chu an ni e,"

"Anih nang hian eng ai nge i awh ve thung chu le,Mr.Scaramanga?"

"Caribbean aiawhtu ka ni."

"Cuban pawisa maw?"

"Cuban a,"

"Caribbean pawisa ka tia lawm. Cuba pawh Caribbean huamchhunga awm a ni lawm ni?"

"Castro nge Batista pawisa?" (Hemi te pahnih hi Cuba ram hruaitu an ni a, Batista paihthlak anih hnuah Castro hi a lal ve leh a ni)

Chal chuar nang hian Scaramanga chuan, "Min tithinur suh ka tih kha, Mister. Ka hmalak danah i dilchhut lutuk chuan i inchhir hle ang," a ti ta a. Chutah a inher vut a, pindan atang chuan a chhuak ta daih a.

James Bond chu a nuisak a, a hming list ho chu a han en leh a. A lehkha ziah chu a hnuaiah a thla a lan nual dawn avangin phek thum zet a pawtthla a, pindan pawn lamah chuan a chhuak ve ta a. Khua a lum bawk a, a suit hak avang chuan a thlan chu a tla lek lek mai a. Chulai tak chuan reception desk chu palian leh thau lam deuh, suit ha hian a rawn panphei a, a hmel atang chuan eng hnathawk nge ni ang tih rinhriat a harsa hle. Dawhkanah chuan briefcase rit deuh mai hi a han nghat dawt a, European aw phawi diktak mai hian, "Hendriks ka ni a, pindan luahtur ka neisa in ka hria, a dik em?" a han ti a.



Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » February 26th, 2020, 5:09 pm

8. PASS THE VANAPES

A indawtin car chu an rawn thleng tan ta a, hotel kawtah chuan Scaramanga chuan alo hmuak hlawm a. A nazawngah chuan nui hmel pawh a pu lo va, mi tharte nen chuan han in chibai leh intih tlangnel tumna pawh a awm hran chuanglo. Mr. Hendriks tihloh chuan Scaramanga chu 'Pistil' tiin emaw 'S' tih emaw ringawtin an be hlawm a ni.

An tawng hrephak turin Bond chu dawhkan bulah chuan a ding a, an hmel leh hmingte chu a lo hmehbel nghal zel hlawm a. An vai chuan a tlangpuiin hang lam deuh, inmet fai tak, feet 5 leh inches 6 emaw vela sang an ni tlangpui a. An kareh leh mitmeng a nelawm lo hlawm hle bawk. Hotel manager an biakna tawngkam pawh chu a bung hlawm hle a ni. An briefcase theuh chu waiter te khai pawh phal lovin mahni theuhvin an khai a, East Wing-a an pindan tur lamah chuan an bo ta diak hlawm a.

Zoram Online Store ah hian lo leng ve rawh
https://www.myshopprime.com/ruata.ralte

Bond chuan chung mikhual ho hming a ziahna tawpah chuan a hmuhdan theuh a ziak nghal zel a. Gangeralla kha 'Italian, kareh zau tak, zahngaihna neilo hmel tak' tiin a ziak a. 'Bengzum, biang veilam ser, kebai deuh' tiin Sam Binion chu a ziak thung a. Rotkopf chu 'Nghawng lian leh lukawlh, Juda mi' tiin. Garfinkel chu 'An zingah chuan a dehkhirh ber ang. Ha chhia, zakhnuai dinglama silai pai' tiin a lo ziak zel a.

Scaramanga chuan a rawn pan phei a, "Enge i ziah?" a rawn ti a.

"Anmahni ka chhinchhiahna tur ka han thai a nia"

"Khawi maw" tih pahin Scaramanga chuan a kut a rawn pharchhuak a, Bond pawh chuan a lo pe ve mai a.

Scaramanga chuan a han en thuak thuak a, a pelet leh a. "A awmkhat viau e Mahse i silai hmuh kha chu ziak lo mahla a pawi vak ka ring lo. Hendriks tihloh kha chuan vengtu an rawn nei vek ang. An cheena ram pawna an kal tawh hi chuan an ti riau zel," a han ti bauh a.

"Eng nge ni an hlauh a?"

"An va kalna ram a mite an ni mahna,"

"A rama cheng hlau sawi takah chuan a hlau hnuhnung ber chu kum 150 vel kalta a 'Redcoat' ho kha an nih ka ring," (Redcoat=Tunhma a Britain in a sipai te a thuam dan. ~ZTP)

"Chu chuan enge awmzia a neih a? Bar-ah khan dar 12 velah kan inhmu dawn nia. KA personal Assistant angin ka sawi mai ang che,"

"A tha alawm,"

Bond chu a pindan lam pan chuan a kal leh ta a. Chal chuar nung chung hian Scaramanga chuan a thlirzui a. Bond chuan Scaramanga chu a tawpa an inbeih theihna tur ngeia tih thinur a tum rilru tlat a. Ani, Scaramanga lah chuan ala mamawh avangin a inbengdai hram hram a ni bawk si. Mahse tawrhzawhloh hun ala nei ngei anga, chumi hun chu Bond chuan alo chang ran si a. A tithinur luitu anih dawn avangin hun remchang tlemte chu a neihhman hram a beisei ringawt mai a ni. Chuti zawng lo chuan atan pawh hma han lak ngawt ngaihna a awm biklo tlat a ni.

A pindan ava luh leh chuan a vahchhuah hlanin tuin emaw zwi takin a pindan chu an lo dap a ni tih a hrethei nghal mai. Inmehfai nan Gilette ho siam ang chiah Hoffritz Safety Razor chu a hmang thin a, hei hi CIA-a a thianpa Felix Leitera'n New York-a a leisak a ni nghe nghe a, a lo hmantlak em avangin a hmang zui ta reng a ni.

Secret Agent-te tan chuan Codes, Microdot Developers leh Cyanide dahnan te pawha tangkai deuh mai a ni a. Bond chuan zinga a chhuah dawn khan a mawng herhhawnna leh a fawng chu tlemin a thairang a, inmil chiah turin a herh leh kha a ni a. Tunah chuan chung rin te chu a inmil ta tlat lo mai. Hmun hrana pindan daptu ten an khawihchet pawha hriat maitheih tura a thangkam te erawh chu khawih danglam loh ang chiah hian an la awm thlup mai. A pindan daptu chu hotela chhiahhlawh satliah a ni lo tih pawh a hrethei nghal a. Zinga a chhuah hlana a pindan lo daptu chu mi satliah a ni miahlo tih chu a rindan a ni. Thil awmdan pawh chu Bond-a duhdan tak pawh a ni zawk mah. Amah chauhvin hmelma en a en lovin, midang pawhin thian ang ringawty chuan an en biklo tih pawh a hre ta a ni. Pindan N0 20-ah chuan lutthei se la chuan a a pindana an chetdan aia zei zawkin ava chettheih pawh a inring a ni.

Hmanhmawh vaklo chuan a inbual a, sam khuih paha darthlalanga a han inhmuh chuan a hma ni te ai chuan harhvar tawhin a inhria a. A mitmeng dul leh dava riai te pawh chuan fiah kak hian darthlalang atang chuan an rawn enlet thei tawh a ni.

Bond chuan a pindan chu chhuahsanin Bar lam chu a panphei ta a. Bar hi conference room leh thutkhawmna pindan lian epa awm a ni a, an lo chei uluk hle nghe nghe a ni. Bar phena beer herhhawnna te pawh chu a man a to tih a hriat hliah hliah a, gold rawng hian an lo dah tle vur hlawm a. Mikhual lo thlengtharte khan dawhkan bulah chuan no an lo dawm der tawh hlawm bawk a. Scaramanga chu bar nghengin a ding a, a kut dinglam chuan a .45 colt, rangkachak rawnga chei chu a lo vaivir mawp mawp a.

Bond-a va luhna kawngkhar a inkhar rual chuan Scaramanga silai kua chuan a lam a rawn hawi nghal zat a Chutah ani chuan inti hawihhawm tak hian, "Thiante u, hei hi ka personal assistant Mark Hazard, London lam mi a nih hi. Kan hmalam huna tluang taka kan kal theihna tura min puitu tur anih hi. Lo lut raw, Mark. Intur te kha rawn semkual la," a han tiluam a, a silai pawh chu a kawngah a zep leh ta a.

Bond chuan PA niawm thei ang bera nui chung hian bar lam chu a panphei a. Bar nghaktu kawrchung sen ha chuan a in duh zawng alo zawt vat a. Mr. Hendriks tihloh chuan Champagne an dawm vek a, ani chu fal deuh tak hian a ding a. Bond chuan va hnaih pheiin khaw awmdan te, Jamaica mawi a tih dante a va sawi mawlh mawlh a. An mikhualte chu an aw hriathran a duh avanga chutia be lumlam ta vak chu a ni nghe nghe. Hendriks bul ava thlen chuan, "Europe mi chu keini pahnih chauh hi kan va nih hmel ve. Holland lam mi i niin ka lo hria che a. In ram chu ka rawn tlawh zeuh zeuh va, ka chamrei ngai hlei lo va. Mahse ram mawi tak chu niin ka hria," a han ti a.

Phurlo tih hriat deuh hian Hendriks chuan a mitmu pawl dal zet mai chuan Bond chu a han en a. "A lawmawm anih chu," a lo ti satliah ringawt a.

"In ram khawilai atang chiahin nge i lokal?"

"Den Haag atangin,"

"I awm rei tawh em?"

"Kum tam tak ka awm tawh,"

"Khaw nuam tak niin ka hria,"

"A lawmawm anih chu,"

"Tun hi Jamaica i lokal hmasak berna em ni?"

"Nilo,"

"Engnge i hmuh dan?"

"Ram mawi leh nuam tak niin ka hria,"

Bond chuan, A lawmawm anih chu," a ti ve thelh a. Tawng ve tir tum deuh leh intinelawm tak hian a han nui a.

Hendriks chuan Bond-a hnunglam chu a en a, a ngawi tlat mai a. A ke kham chu a han insiamrem deuh va, a tawpah chuan, "Anih nang hi London atanga lokal maw inih kha?" a ti ve ta hram a.


"Ni e, i tlawh tawh em?"

Zoram Online Store ah hian lo leng ve rawh
https://www.myshopprime.com/ruata.ralte

"Aw, tlawh tawh e,"

"Khawiah nge i khawsak thin a?"

Hendrix chu a han tim deuh va, chutah, "Thiante bulah," a ti bung nghut a.

"A remchan viau dawn chu,"

"Chu chu eng i tihna nge?"

"Ramdanga thian neih hi a vanneihthlak e ka tihna mai a nia. Hotel te hi chu an inang thum a, hneawm chin a awm tlat zel,"

Hendriks chuan, "Kei chu hrehawm pawh ka ti lemlo. Min lo hrethiam lawk teh," a ti a, Bond chu kalsanin Scaramanga chu a panphei ta a. Hendrik chuan engemaw hi a han hrilh zeuh va, a kalsan leh ta a. A hnu lawk chuan Scaramanga pawh chuan a zui ve vat a. Zahder tih hriat tak hian midang hriatphak lohva Hendrix thusawi chu nguntak hian alo ngaihthlaksak a.

Bond pawh chuan midangte chu a fin phei ve leh ta nghal a.Scaramanga te pahnih thusawi chu hriat a chak hle mai a, chutianga Scaramanga ko hranga duhtawka a kawmfal thei chu pindan chhungah chuan ani lo chu an awm awm lo ve. Midangte pawh chuan chumi te pahnih inbe lai chu an melh leh zak zak thin a. Bond chuanScaramanga biakpa chu Mafia emaw, KGB emaw anih rinna a nei tlat a. Midang ho pawh chuan rindan engemaw tak chu an neih ce ngei a ring nghe nghe.

Chhunchaw ei hun a ni ta. Jamaican waiter ho chuan eitur tuihnai tak tak chu an rawn chhawp nghauh nghauh mai a. Mahse hotupa ber Scaramanga chu pa tawngduh lutuk a nilo bawk a, midang lah chuti tho. Scaramanga chuan engtin tak a mikhualte chu chawkhlim ang maw? tiin Bond chuan alo ngaihtuah nauh nauh a.

Chawei kham chuan an tho ta sang sang a, mahni pindan lamah chuan an lut bo leh ta diak a. Bond erawh chu hotel hnunglamah a kal kual a, bawlhhlawh paihna atang chuan thingbung ava chhar a. Ni lah chu a sa rum rut mai a, mahse tuipui lam atang chuan Doctors' Wind an tih mai chu a rawn tleh heuh heuh mai a, boruak lum lutuk tur pawh a tidai sawng sawng mai.

Bond chu a pindanah a kir leh a, chhun engah chuan a pindan chu air condition nimah se nuamlo riau hian a hre thar ta thut a. Reilote chauh a awm a, hotel bul vaukamah chuan a chhuak phei leh ta a. A kawrchung phelhin daihlim hnuaiah chuan a thu a, a pocket knife chuan a thingbung chhar chu a suih ta a. Mary Goodknight chu a han ngaihtuahchhuak a, Kingston khua khawilai in berah emaw chuan a chawei kham a mut chawlh ve ngei a ring a. Khua a lum em avangin Bond chuan thosilen hnuaia saruaka mu tur angin a han suangtuah a, thildang thlengin....

Zoram Online Store ah hian lo leng ve rawh
https://www.myshopprime.com/ruata.ralte

A inngaihtuah harh zawk a, a sana a han bih vat a. Dar 3:30 a lo ni reng tawh mai. A pindanah a kir leh a, a thingsuih chu a hmantheih dawn leh dawnloh a han endik phawt a. Chutah corridor ah chhuakin pindan lian lam chu a panphei ta a.

Manager chuan Bond alo hmuh chuan a dawhkan phen atang chuan alo chhuak vat a, "A, Mr. Hazard..." a lo ti a.

"Enge ni ta le?"

"Ka Assistant Mr. Travis ila hmu lovin ka hria a<"

"Ni e, la hmu lo,"

"Khawngaihin office ah hian min zuilut la, rawn chibai ta che,"

"Nakin lamah mawle, minute reilote ah conference kan nei dawn a,"

Manager chuan a rawn panhnai leh a, "A hmanhmawh khawp mai, Mr.errr.. Bond," a ti ta a.

Bond chuan thil chhutkimloh leh hmaih alo nei chu pawitiin a rilru te te chuan a ang bawrh bawrh a. Thil pakhat chauh zawn hi chuan kan bula mi thildang te hi hmuhhmaih a awl hle a ni tihte chu a hrechhuak vawng vawng a. Inveng rilru deuh hian, "Chuti chu i hmanhmawh deuh teh ang," a ti ta nghal zawk a.

Chupa chuan a dawhkan bul maia kawngkhar chu a hawng a. Bond chu a lut hmasa a, manager pawh chuan zuilut vein kawngkhar pawh chu a khar leh ta nghal a. Pindan chhunga thir almira bulah chuan pa sang leh airia deuh lampang hi a lo ding a. Bond-a lam chu a han hawi a, a hmel chu hriamlam deuh, Texas nisa em thar tih hriat deuh mai, sen char mai hi a ni a. Sambuang hnawk zet mai hi a pu a, a kut dinglam awmna thinah chuan thirkawm hi a vuah thung. Bond chu a ding chawt a, a han kiaisak a. Chutiang ang chuan kum 3 vel zet chu nui tawhlo hian a inhre hial nghe nghe a ni.

"Mi nikhualo pa, enge maw i rawn tih ve hrep le?" a han ti a, chupa banbul veilamah chuan na lo te hian a han hnek a.

Zoram Online Store ah hian lo leng ve rawh
https://www.myshopprime.com/ruata.ralte

Chupa pawh chuan nui tha chung hian, "Ka hming chu Felix Leiter a ni. Temporary a Morgan Guarantee Trust-in Thunderbird hotel hnena accountant an hawhtir ka ni. I bat theih zat kan rawn finfiah mai mai a ni e. Mr. Hazard, i kut kha khawngaihin lasawn la, i insawi ang chu ini ngei em tih fiahna min pe thei em?" a lo ti ve a.

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » February 26th, 2020, 5:09 pm

9. MINUTES OF THE MEETING

Bond chuan Travel Literature lam humin Gengerella chu a han vai a, Conference room lamah chuan an inzui phei ta a. A hnuhnung ber an lo ni nghe nghe a.

Kawngkhar bulah chuan Scaramanga chu a lo ding a, awmze nei deuh hian sana chu a han bih a. "Awle, kawngkhar hi pawnlamah kalh la, hotel hi alo kang palh ta a nih pawhin tumah rawn luhtir chuang suh ang che," a ti a. Eitur rawn nawrpheitu waiter lam chu hawiin, "Awle, Joe. Lo inthiarfihlim nghal mai rawh. Nakinah a tul chuan ka rawn ko mai ang che," a ti ta a. Conference Room ah chuan an inzui lut ta hlawm a.

Bond chuan kawngkhar atang chuan an thutdan chu a han thlithlai hmasa zuai a, kawngkhar chu khar in a kalh ta nghal a. Chair pakhat chu kawngkhar bul chetah chuan a hnukhnai a, zu no ruak pakhat chu lain kawngkhar insikna laiah chuan no rawng zau lam chu a nembet a, a mawnglam atang chuan beng dawhin a ngaithla ta a.

Fiah lutuk lo hian Mr. Hendriks aw ngei mai chuan, "...tunah Europe lama kan hotute thu kan sawi nghal ange..." a ti a.

Chair hnuhtawlh ri a hriat avangin Bond chuan chair chu piah deuhah a hnuksawn vat a, lehkha bih pahin zu inna no ruak keng niawm tak hian no chu a lo dawm a. Pindan kawngkhar chu a rawn inhawng a, Scaramanga chu chahbi vaivir chung a rawn dakin Bond chu a han enthuak a. "Ka rawn endik mai mai a ni," tiin a lut leh ta nghal a. Kawngkhar chu kharin a kalhzui leh ta nghal a. Bond pawh chuan rang takin a hnaihphei a, a ngaithla leh ta a.

Hendriks chuan, "Kan chairman hnen atangin thu pawimawh deuh ka dawng a, ani thudawn chu rintlak tak mai a ni. Helai ramah hian mi pakhat, James Bond an tih chu a awm a ni awm e. British Secret Service lam mi a ni a, a hmel leh pianhmang erawh hrilh ka ni lo. Mahse kan hotute chuan an dahsang khawp mai. Mr. Scaramanga, hepa chanchin hi ilo hre tawh em?" a han tileh a.

Scaramanga chuan a hnar a han tum dat a. "Teuh nang. Engah nge ka han engto vak ang? A khat atawkin an secret agent hmingthang tak tak te hi zing chawhmehah ka lo hmang mai thin asin. Ni 10 lek kalta khan an zinga pakhat min chhuizui tu chu ka lo dahtha tawh bawk asin. A hming pawh Ross an ti niin ka hria. Tunah hian a ruang chu Eastern Trinidad-a La Brea chirhdumah a pilfel daih tawng nghe nghe. Engtik ni ah emaw chuan chulai vela oil lachhuaktu The Trinidad Lake Asphalt Company te chuan thil danglam tak an la laichhuak ngei ang chu. Khawngaihin, zawhna dang i neih chuan han zawt teh le, Mr. Hendriks,"

"Fu huan halchhiat chungchanga kan policy hi hriat ka duh khawp mai. Thla 6 kalta a Havannah-a kan inhmuhkhawmna ah khan kei chuan dodal mah ila hlawkna thenkhat avanga Fidel Castro tanpui a, khawvela chini man tisang tura hmalak kha kan rel tlu a. Chumi hnu chuan Jamaica leh Trinidad ah vawi tam tak fu hmun tihkan a ni a. Hemi chungchangah hian kan hotute chuan kan pawla mi thenkhat Gengerella, Rotkopf leh Binion te chuan tuna kan Chairman te nen hian mahni mimal hlawkna atan thil an ti tih hriat a ni a..."

Midang chu thinurin an phun ta mar mar mai a. "...Engah nge kan tih lohvang..." "...engah nge an chan ringawt ang..." tihte chu a ri ta nawk mai.

Gengerella chuan midang aia awki sang zawk hian, "Tuin nge hlawkna kan neih ve chu sawisel ngawt thei a? Chu chu kan pawl dinchhan tak pawh a ni lawm ni? Thla 6 kalta a ka zawh che kha ka han zawtnawn leh ang che, Mr. Hendriks. 'Kan Hotute' i tih fo zinga tu ber chuan nge chini man tihhniam duh a? Kei chuan ka rindan chuan chutianga rawn inrawlh tur awmchhun chu Soviet Russia chauh a ni. Cuba ah thil tam tak an hralh a, kan ram (USA) kah nana missile an bun, an hnuhdawh leh takte pawh kha chini tam tham tak nena an inthleng ti pawh ni ila kan tisual hauh lovang. REDS (Russia) ho hi sumdawn thiam deuh an ni. An hmelma te chu sawiloh, an thiantha te lakah pawh an hlawkna tur anih dawn chuan engmah tihhreh an nei lo. Mr. Hendriks, kan hotute i tih fo thenkhat hi Kremlin an ni mial lo maw?" a ti ta bawrh bawrh mai a.

Midang tawng nuaih nuaih karah chuan Scaramanga chuan a aw in a han khap dai a, an thawm a reh deuh hnu chuan tihian a ti ta a.

"Co-Operative kan dintirh khan a hmasa berah lungrual takin kan thawkho tur a ni kan tih diam tawh kha. Mr. Hendriks, thil awmdan chiang zawkin ka han hrilh ang che. Kan pawl sum lakluh thu ah chuan hmabak lawmawm tak mai kan nei a. Sum peipun tuma thilti kan nih avangin chetchhiat leh that deuh changte pawh a awm ve. Chini hi sum thap ngamna a ni a, kan pawl a mi thenkhatte hian duhlo deuh mah se kan inbarhlut dawn a ni. Ka sawi chu in hrethiam em? Tunah hian kan pawl hian lawng kan thunun mek a, chung lawngte chu New York leh US-a lawngchawlh hmun dangah te an awm mek a ni. Heng lawngte hian fu an phur khat tlat bawk. Mahse, Mr. Hendriks, heng lawngte hian fu man chu za a 10-a a san leh hma chuan an fu phurh chu an unload dawn lo. Hei hi Washington-a Department of Agriculture leh Sugar Lobby te chuan an hai lo. Kan dinhmun pawh a tha hle tih an hrechiang a ni. Chutih lai chuan fu atanga siam zu siamtu pawl chuan an lo nawr ve mek bawk a. RUM siamtu ho phei chuan harsatna lian lutuk a thlen hma ngei a fu chu dawn an duh dawn a ni. Mahse kan hriattel tur thil pawimawh a awm. Kan lawng hman leh thawktute hlawh tur kan pek a ngai reng a, Lawng ding mai mai chuan sum an hailuh belh bawk si lo."

"Chuvangin engemaw tak chu a thleng thuai ang. Tuna kan dinhmun sawi chu Floating Crop Game an ti a, tunah hian keini zinga mi 4 te chuan dollar maktaduai10 vel chu kan hloh emaw kan hlep emaw thewi dawn tihna a ni a, chubakah min thlawptute thlawpna pawh kan chan der thei bawk. Thunderbird lah hian chuti lutukin sum a lalut rih bawk si lo. Eng nge, chung ah chuan i ngaihdan, Mr. Hendriks? Fu chu kan theih hun hunah kan hal tih chu kan phalo. Rastafaris ho zingah hian ho ka nei nual a, chungho chu pawl kalsual deuh, khabe hmul zuah a Ganja zu zu reng mai chi an ni. Kingston khawpui pawn, Dunghill ah an khawsa deuh ber. Ethiopia lal hnuaia awmah an inngai tlat lehnghal a, an khawsakna lai chu anmahni ta liau liau ah an ngainghet tlat bawk. Chutiang mi chu an nih avangin Ganja ka thawnlut reng a, tichuan ka duhna laiah kangmei ka chhuahtir mai thin. Mr, Hendriks, in pute hnenah chuan chini man san leh hniam pawh kawng tam takah a innghat tih hrilh la ka duh a ni,"

Hendriks-a aw chuan, "I thusawi chu ka lo hrilh ange, Mr, Scaramanga. A tihhlim vak erawh ka ring lemlo. Hotel chungchang chu sawi leh ta ila; Thil awmdan tak tak hi kan zavaia hriat kan duh te pawh ka ring,? a han ti leh a. Midangte pawh chuan aw an lo pawh sap sap hlawm a.

Scaramanga chuan thu a sawi leh tan ta a, tam tak phei chu Bond-a tuipui lemloh thilte an ni hlawm. A engapawhchu nise, Felix Leiter chuan ngaihthlak rukna an dah atangin engkim an hre leh vek dawn tho bawk a, a ngaithla lliam vel ta mai mai a. CIA ho chuan Felix hi thil pawimawh hrilh vekin an lo thehchhuak hi a lo ni a. KGB ho hian kikawi taka thuneihna inchelhtir hi an ching hle a. Italy a KGB Resident Director chu Geneva-ah a awm daih a. Haque-a awm Mr. Hendrix pawh hi Caribbean vela Resident Director a ni daih bawk.

Bond leh Leiter-a inhmu khan thil awmdan an inhrilh zung zung a, an hnathawh chu in ang deuh thuak nimah se mahni a a hranga hmalak ve ve chu tha an ti zawk a. Thil tul dang tam tak bakah tul thuta inbiakpawh dan tur thlengin an inhrilh vek a ni. Nicholson (Manager) khan Bond chu a pindan luhna tur passkey a pe a, ti chuan Bond chuan hmanhmawh takin a chhuahsan ta a ni.

Lamtang a han hmu chuan Bond pawh chu a tiphur sawt a. Tunhmain hna thenkhat, hlauhawm tak takah Leiter nen hian an lo thawkdun tawh thin a. Harsatna leh hlauhawmah chuan a rintlakzia pawh a hrechiang tawh em em a ni. A kut lehlama thir a hmanchhan pawh kha an hnathawhna a a vanduai tak vang a ni a. Chuti chung pawhin veilama silai kahah chuan tluk tur an tam biklo hle ang.

Scaramanga chuan, "A khaikhawmna ah chuan gentlemen, dollar maktaduai 10 kan mamawh ta anih chu. A pung 30% chu kum 10 chhunga rulh ni se, ka chanpual a tam ber avangin chumi zat sum chu pek turin kan vaia kan lungrualna ka duh ang," tiin a thusawi chu a tlip ta a.

Thinur tih hriat deuh mai hian Rotkopf chuan, "Mai mai a!! Chutiang chu ka pawm ve hauhlo mai, Mister. Kum khat lek kalta a ka thiante nena 7% kan rawn thawhbelh ve te kha engtin nge ni dawn? I sawi ang chu pawm chung chuan Las Vegads ah haw leh chiah ila engtin nge min lo ti a i rin? Min hnawl a ni nghal mai. Chu aia dinhmun thalo chu ka ni mai thei bawk," a ti ve ta a.

"Ngawi teh, Ruby. Kutdawh tan chuan duhthlan vak theih a nilo a nia. Ka rawt ang in duhlo anih chuan inkhar a ni mai. Enge, midangte khan in ngaih ve dan?"


Hendriks chuan, "10% chu a tawk hlein ka hria. Kei leh ka kawppuite chuan dollar maktaduai khat chu kan lo tum ange," a ti ve thung a.

"A tha e. Anih leh nang, Sam?"

Sam Binion pawh chuan ban charh hian, "Awle, keini pawhin maktaduai khat chu kan tum ang. Mahse hei bak chu a beisei chi tawh lovang," a ti a.

"Anih nang, Mr. Gengerella?"

"A tha e, ka pawm ang. A bak zawng chu kan lo tum ang," Garfinkel leh Paradise te pawh chuan an rawn aw e ve vat a, Garfinkel phei chuan, "A vai chuan tum bik lo ve. Dollar maktaduai chu ka tum ve dawn," a lo ti a. Paradise pawh chuan, "Keipawh chan tur chu ka duh ve tho alawm. Mahse rual deuhvin thil i ti teh ang u. Ruby, nang hian i chan tur bik chu sawi hmasa ber tur i ni asin. Engzat nge i duh? Thlang hmasa ber la a tha ang," a lo ti ve leh bawk a.

Thinur tih hriat deuh hian Rotkopf chuan, "In pawisa aiawh lehkha chu engahmah ka ti hrep lo ve. Ka haw veleh dan hremi thiam ber ka ruai dawn. Thil dahkham sa, chuti maia nuaibo in tum anih chuan in tisual chiang hle ang," a ti ta a. An ngawi ta thap mai.

Chutah nelawmna reng reng neilo hian Scaramanga chuan, "Thutlukna thalo tak i nei dawn ta nih hi, Ruby. Chhiaha chawi ngai miah lovin kan pawisa sen hmasak atanga za a 7 chu i hui thei dawn a. Mahse chu chu i hnial a, he pawl kan dintirh khan thu i tiam bawk a, chu chu midangte tana hlawkna dal tura engmah tihloh anih kha. I tanna chu sawhsawn i tum hlawllo em ni?" a ti ta khawl mai a. "Tumlo chiang khawp mai," "Anih leh hei hian i rilru a thlaktir thei che angem? Cuba ah chuan RAPIDL! SEGURO! ECONOMICO! an ti thin a, an thiltih dan ber a ni bawk," Hlau mangang te ri chu thil puakri ring tak hian a zui nghal a. Chair pakhat hi a tlu thuai a, an han reh thap a.

Tu emaw hi a han khuh kharh kharh a, aw pangngai deuh hian Gengerella chuan, "Ngaihdan thuhmunlo tihfel nan chuan kha kha kawng dik leh awlsam ber a ni. Vegas-a Ruby thiante chuan nun hahdam hi an thlahlel a, an rawn bengchhen vak ka ringlo. Dama lehkha ziak neih chu thihhnu a thil dahkhamna neitu nih ai chuan a tha daih zawkin ka hria. Pistol, i chetdan kha a dik bakah a rang tawkin ka hria. Awle, hei hi a thenfai theih nghal mai em?" a rawn tih tak a vang chuan boruak tang lutuk pawh chu a dul leh ta deuh va.

Nuam tih hmel deuh hian Scaramanga chuan, "Theih tehreng mai. Ruby chu Vegas pan turin helai atang hian a chhuak a, tumahin a chanchin chu kan hre leh ta lo. Luiah sawn Awle riltam tak tak an awm nual mai. Zanin chu tanpui ka ngai maithei a, nangni khan min pui thei angem, Sam, Louie?" a han ti a. Mr. Paradsise chuan, "Ngawi teh, kei chu Catholic ka ni tlat mai. Pistol, min sawm tel velo hram rawh," a lo ti vat a. "Catholic ka ni ve lo bawk a, a ai ka lo awh mai ange," tiin Mr. Hendriks chu a lo inrawlh vat a.

Ngaih thalo tih hriat deuh mai hian Garfinkel chuan, "Ngawiteh, Pistol. Pawnlama British pa saw? Silai puak velah khan a lo dilchhut lutuk mai lovang maw?" a lo ti bauh va. Chek tlak tlak chung hian Scaramanga chuan, "Engto duh vak suh, Hal. Kartawpah ka buaipui mai ang. Mihang nula leh Ganja ka va leina thin khua a ka chharchawp a ni a, nuam leh thlamuang taka in awm theihna tura ka rawih satliah mai a nih saw. Ka kutah dah mai rawh, nge, hemi kutah hian dah zawk mai rawh ka ti zawk dawn em ni?"

Bond chuan Scaramanga thusawi tawpa a silai a han vaivir vel tur awm ang chu a han ngaihtuah a, a nuisak a. A thutna hnuksawnin a no kenlai tangkai zet mai ah chuan Champagne a thlichhuak a, a lehkha ken chu a chhiar ta a.

Kawngkhar kalhna chu chhunglam atangin a rawn ri rawk a, Scaramanga chu a hmuihmul zut chung chuan a rawn dakchhuak a. "Awle, Manager va hmu la, zan inah Ruby Rotkopf chu a haw leh nghal tur thu lo va hrilh rawh. Nakinah chiangkuang zawkin thil tihtur ka rawn hrilh ang che. Tin, electrict a fuse thut mai a, enfiah anih hma chuan helaiah tumah kal ka phallo bawk tih ilo hrilh bawk dawn nia. Chumi hnu chuan nula te pawh kan ngaihtuah dawn nia, i hrethiam em?" a rawn ti a.

Bond chuan a hriatthiam thu a lo hrilh a, pai lui deuh hlek hian a kalsawn ta a. Thil awmdan chu thui tak hre tawhin a inhria a, hotel pindan lian lamah chuan a phei ta a.

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » February 26th, 2020, 5:10 pm

10. BELLY LICK


Pindan hnunglamah chuan Bond chuan thil awmdan zawng zawng chu Leiter leh Nicholson chu a hrilh mial mial a. Anni pawh chuan tape-a an lo laksa leh Bond-a thilhriate belhkhawm chuan Scaramanga chu electric chair a thuttir theina hial a tling thei hialin an hria a. Chumi zan chuan a tu ber emawin Rotkopf-a ruang an thehthang lai chu enthlak a, Garfinkel leh Hendriks te pawh chu an inhnamhnawih chin chiah hriatchian a thain an hre nghe nghe a ni.


Mahse CIA Agent pahnihte chuan Bond-a hmabak chu an hriatchian em avangin an ngaihtuah hle a. Leiter phei chuan, "I silai pailo chuan inchi khat pawh kalsawn tawh suh. I thihthu hi The Times-a chhiarnawn leh ka duh hauhlo a nia. I chanchin leh i mizia thlenga an rawn tarlan ka han hmu phei chu min tiluhai ve thelh asin," a ti hial a. Bond pawh chu a nui hawk a. "Thian tha tak i nih hi, Felix. I entawn turin kum tam ka lo pharbuai tawh a, mi lah chu ila ringlo viau mai lehnghal a," a ti a, a pindan lamah chuan a pheisan ta nghal a.


Bourbon a han lem khawlh khawlh a, chutah tuivawta a inbual leh hnu chuan a mu hahdam ta a.


Dar 8:30 ah chaw ei turin a tho va, chhunchaw an eilai ai mahin tun tum chu an thu a inhmu hlawm a. Mr. Hendriks leh Scaramanga phei chuan zu an lemhnem deuh hlek ni hian alang nghe nghe a. Bond chuan an endan leh biak danah chuan boruak a dang daih tawh tih pawh a hre nghal a. An enthat duhloh danah leh an chhan mumal loh danah chuan an hotupa ber chuan thi tura a chungthu a reltluk tawh vang a ni ang tih a ringnghet ta tlat mai a.


An eitur chhawp te chu tuihnai leh manto hmel tak tak, chi hrang hrang hi a ni a; eitur piah lamah intur lam pawh chi hrang a tam hle. Rimawi tumtu ho chuan 'Linstead MArket' tih hi an han rem a. Chumi hnu chuan nula pakhat, thuam inbel chhah zet mai hian 'Belly Lick' tih hi a rawn sa zui a.


Bond chuan an boruak chu a nin tak deuh avangin a tho va, Scaramanga chu pan pheiin, "Ka lu a na deuh tlat mai, ka va mu lawk teh ang," a va ti a.


Scaramanga chuan mitmeng thip zet mai hian a lo en a. "Mu lovang. Boruak hi nuam i ti lo anih chuan nuam turin han siam danglam ta che. Hlawh pek inih chhan pawh anih kha. Jamaica chinchang i hriat hmel bawk a, han chawkharh hlawm ta che," a ti ta tlat mai a.


Bond chuan a chungah chuan midangte mit chu a fu vek tih a hre nghal a. Zu a lo lem ve nual tawh avangin fimkhurna pawh a nei tlem ta tlat mai leh nghal a. Engah maha ngailotu te chu an aia a nep bik lohzia entir chakna a nei ve ta tlat mai. Thui tak leh ngun tak pawh a ngaihtuah lemlo hian, "Awle, Mr. Scaramanga, dollar 100 leh i silai kha min han pe teh," a ti ta a.


Scaramanga chuan che lo, makti deuh leh a ngaihna hrelo hmel deuh hian Bond chu a han en a. Louie Paradise chuan zu lem hnem tawh avanga sehchilh deuh nak hian, "Pistol, pe teh! A chelai i en teh ang u. Tihtheih a mual mual te pawh a nei maithei asin," a rawn ti ve ta bawk a.


Scaramanga chuan a ipte atang chuan bag a han phawrhchhuak a, pawisa note pakhat chu lain, a kawnghren kar atang chuan a silai pawh chu muangchang hian a phawrhchhuak ta zal zal a. Electric eng dul tak hnuaiah chuan silai chu rangkachak ang mai hian a lang nghe nghe a. Chutah a silai leh pawisa chu dawhkanah chuan a dahthla ta a.


Bond chuan nula lam lai hnungchhawn zawng chuan silai chu a han lakang a. A han chawih chhin a, a mu a awm leh awmloh chu a han endik a. Chutah a inher thut a, silai chu lekkawh pahin a hmetpuak ta a. Silai ri chu a ring kher mai!! Rimawi ri chu a reh duak a, inchhung pawh a reh nghal duak a.


Nula lam laiin a chhipa lakhuihthei lem a tarchhuahte kha a hnung lamah chuan an tla darh ta phung mai a. Nula chuan a hmai a hup a, a lamna tualzawlah ngei chuan thidangin a tlu zui ta a. Scaramanga thiante chu an ri nghal ham ham mai.


Bond chuan dawhkana dollar 100 tlang chu a la a, stage lamah chuan pheiin nula tlu zawi reng chu ava kuah tho va. Pawisa chu a kawrhma chhunglamah chuan hnawhluhsak pahin, "Kan chetha dun khawp mai, Sweetheart. Hlauthawng duh suh, kahfuh palh che kha keitak hian ka hlau asin. Inthiar fihlim la, i tihleh tur chu tithei turin va in buatsaih teh khai," a ti a. Nula chuan rap hmel zet hian a han en a, thimtham lamah chuan a tlanphei ta vat a.


Bond chuan rimawi tumtu ho chu a panphei a, "Tunge a hotu ber?" a han ti a, an vai chuan mihang vek an ni. An guiterist cher sang deuh lampang chu a lo dingchhuak a, mitvar kal rawlh rawlh hian Bond-a silai hum chu a han en a. Nuamlo tih hmel zet hian, "Keimah, ka pu," a ti sup a.


"Tunge i hming?"


"King Tiger, ka pu,"


"Awle, chuti chu lo ngaithla rawh. King, helaia kalkhawm ho hi Salvation Army chaw eikhawm kan nilo va. Mr. Scaramanga thiante hian boruak tang deuh hlek an duh a, boruak tih danglam nan Rum ka rawn thawn phei dawn a. In duh leh ganja pawh zu rawh u. In awmdan tumahin an sawisel dawn chuanglo. Nula pawh kha ko leh ula, mahse thuam inbel vak tawh suh se. An zai tawpah nula chuan a zaipuite nen an thuam an phelh vek tur a ni. I hrethiam em? Awle, che vat vat rawh u le. Chutilo chuan tlai lamah hlawh in nei chau viau ang, che zung zung rawh u," a ti ta a.


King Tiger-a leh a thian te chu an han phun sap sap a, chutah an han innuih ta the thaw a. Nui hui chung hian Tiger pawh chuan, "Awle, kapu, Captain," a ti ve ta a. A thiante lam chu a han hawi a, Iron Bar kha aw. Mahse tang lutukin aw. Daisy leh a thiante pawh kha chetdan tur ka lo hrilh ang," a ti a, nula kalna lamah chuan a phei ve ta nghal a.


Bond chu a kir leh a, Pistol chu Scaramanga hma dawhkanah chuan a dah let a. Ani pawh chuan a hma aia ngun leh chik zawk hian Bond chu a lo en a. A silai chu laklet pahin a kawngah chuan a han zeplut leh ta a. Chang felfawl hian, "Remchang hmasa berah silai inkahsiak ila a tha ang, Mister. Pen 20 dan atangin inhliam mai mai awih lovin inhmachhawn ila," a han ti zui a.


Bond chuan, "A khai, ka nu in a remti lovang. Zaiho saw rum chu thawn phei ta che. Dangro chuan an zai thei lovang," a lo tiliam puat a, a thutna lam chu a panphei leh ta a. Midangte chuan Bond chu hreawm pawh hian an awm leh tawh hlawm lo. Hendriks phei chuan atir atanga hmel pangngai reng pu hian mi chetla vel chu alo thlir a.


Stage-a Band ho zai tang et awt rem chuan nula pali te hi thawmhnaw dahlau tak tak inbel hian an rawn lamchhuak ta a. Thawmhnaw inbel kan han ti tak na a, kekawrte leh hnute khuhna pante bak chu thawmhnaw an inbel miahlo ti ila a dik zawk ang. Louie Paradise leh Hal Garfinkel te chu an thlan a rawn bawl nghal tuam tuam a, nula te chu zai a tawp veleh an inthiarfihlim leh nghal a, stage chhuntu eng pawh chu a thim zui leh ta nghal a.


Mahse drummer chuan khuang chu rang zet hian a han vaw leh ta a, kilkhata kawngkhar chu rawn inhawngin savun duma siam mihring kutlem, feet 6 vel zeta sang hiba rawn tawlhlut ta a. Lei lama a innghahna lai chu a inhawng deuh va. Drummer chuan khuang chu a vaw rang telh telh a, kawngkhar chu rawn inhawng lehin thimthamah chuan tu emaw hi a rawn lut ta a. Electrict engin a chhunna kutlem bul hnaiah chuan zei lutuka inthing khur chung hian nula pakhat hi a rawn penlut ta a. Chu nula thisen ah chuan Chinese a kai ngei ni hian a rin theih a. Thawmhnaw pakhatmah a inbel lo va, kutlem dum hlak bulah chuan a taksa chu a lang var tle zuar mai a. Zei tak hian kutlem bulah chuan a lam a, kutphah lemah chuan lawnin a ding ta a. Kutzungtang lemte chu mipa thil niawm tak hian a indawt te tein a han 'englo' vel a. Nula taksa a hriak an hnawih chuan kutlem chu a title zuar mai bawk si a. Nula ham chetvel dan zei lutuk chuan mipa pangngai thisen chu a tilum thei hle mai.


Scaramanga pawh chuan mit la lo lek hian a en reng a. Khuang chu rang mangkheng hian a ri leh zawt zawt a, nula chuan kutzungpui chu thutin a mawng a han siksawi vel ta a. Khuang ccbu a rang lehzual sauh va. Nula chu kutlem atang chuan a tawlhthla a, thimthamah chuan a relhbo ta daih a.


Pindan chhung chu a eng leh ta uarh mai a, kut an beng ta dar dar a. Scaramanga chuan an hotupa ber chu a hui phei a, a ipte atang chuan engemaw ni hi phawrhin a pe nghal a. Scaramanga chuan zan lama mutpui tur a tifel nghal ni maiah Bond chuan a ngai a.


A hnu lehah chuan nula pakhat hi zei tak mai hian a rawn lamxhhuak leh ta a. A kekawrte hrenna chu Band Leader chuan ngunhnamin a han sahchah sak a, chumi hnu chuan beer um pahnih chunga mau inches tlemte a sanga kham chu tawk miahlo hian a eu zawngin a rawn tawlhchhuak ta a. A laibu chu a pawngtha alh alh kher mai.


A hma lama Bonda'n a lakhuih thei lem a chhipchhuan lai a kahthlaksak pawh kha a rawn lam veleh a, chumi hnu chuan anmahni thlirtute chu lampui turin nula ho chuan an rawn sawmzui ta a.


Scaramanga leh Hendriks te tih chauhlo chu an nam deuh tawh bawk a, phur takin lam tur cbuan an phei hlawm a. Nghet leh fet taka inkuah chung chuan an lam ta hlawm a.


Nula la bang pahnih, Mabel leh Pearl chu Bond xhuan Champagne a thlitsak a, inthiar duh niawma sawiin Scaramanga hmuhloh hlan chuan a putru ta a. Mahse Hendriks chuan chutia Bond-a putru lai chu alo hmu reng thung a.


Bonda'n a pindan a thlenlai chuan zanlai a ni tawh a. Rukverh a hawng a, air-condition chu a hmet hlum nghal a. A inbualfai phawt a, a mu ta a. A silai hmanthiam dan a han lantir ngawt kha a inchhir hnuhnawh lek lek a. Mahse tui baw hnu a ruh theihloh tih hriain a muthilhsan leh ta zawk a.


Bond a muhil lai chu a harh zawk a. A sana chu a han en a, zing dar 3:30 a ni. Tukverh pawn lamah chu a ri deuh rap rap mai a. A lukham hnuaia a pistol dah chu lain tukverh puanzar cbu fimkhur takin a pan phei ta a.


Vawilehkhatah tukverh puanzar chu a han thehhlim thut a, pawnlam a lo luh tum mek chu a sam thla eng hnuaia rangkachak rawng a hmuh chuan Mary Goodnight a ni tih a hre nghal a. Mary chuan, "James, hawng la, min pui vat teh," a lo ti a.


Bond chuan a silai chu carpet ah chuan a dah a, nula chu a pawtlut ta thuai a. Mahse a pheikhawk ke artui chuan tukverh biang chu a tai palh a, kawngkhar chu a ri ta thuai mai a. Bond chuan zawite hian anchhia a phuhchhuak ta bawrh bawrh mai a. Mary pawh chuan, "Ka tihpalh, James," a lo ti vat a.


Bond chuan bengchheng lo turin a han zaizir a. A silai chu lukham hnuaia dahin, bualin lamah Mary chu a kaiphei ta a. Electric a on a, fimkhur thu hla ah tui a herh haw nghal a. Amah chuan thawmhnaw pakhatmah a inbello tih a inhrechhuak nghal a. An bula hrukpuan chu a la vat a, a vengtha ta nghal a. Nula chu inthiarna ah chuan thu turin a han zaizir leh a, thinur insum tak hian, "Hetah eng ti turin nge i rawn kal a?" tiin a han zawt a.


"Ka rawn kal a ngai tlat a ni. Sawlai khua hmun bawlhhlawh taka nula kaltlang sawn i awmna ka rawn hrethei hram a ni. Ka car chu hla deuhvah ka dah a, kein ka rawn phei tawp mai a ni. Tukverh thenkhat chu ka ngaithla hmasa a..." tiin Mary chuan a thawm hriatte a han ngaihtuah let chuan zakin a hmai a sen ap ap a.


"Chung pindanah te chuan i awm ka ring lo va, helai thleng hian ka rawn phei ta a ni. I tukverh ilo hawnsa danah khan nanglo chu chutianga mu duh tur an awma ka hriatloh avangin ka rawn rin chet ta mai a ni," a han tihzawm leh a.


"A engapawh chu nise, helai atang hian a rang thei ang bera i chhuah leh a ngai a nia. Eng thil vanga lokal maw i nih reng reng," a la ti ta khu khu a.


"Vawiin tlai khan thu hmanhmawh lutuk, 'Most Immediate' chu Triple X in a lo thleng a. Nimin tlaiah anih zawk chu. I kut a thleng ngei tur a ni bawk. HQ lam chuan tunah hian Havannah a awmah a ngai che a, KGB hotu lawk tak Hendriks tia an hriat chuan he hotel hi a tlawh nia hriat a ni bawk. Hnaih miahlo tura hriattir i ni. HQ chuab Hendriks chu a hna pangngai bakah nangmah zawng hmua that tur che a tih a ni bawk tih an hria a ni. Tichuan thil awmdan chhutin, i thil min zawhte kha ka han ngaihtuah let a, chupa hnu chu i chhui hnai fe tawh maithei tih hriain an lambun mai che ka hlau va, ka rawn thawkchhuak ta a ni,"


Nula chuan thil tih dikloh hlau hmel zet hian Bond chu a han ban a, ani chuan a kut chu zawite hian a lo beng thep thep a. "I mi sawi chu helaiah hian a awm ngei alawm. Chubakah gunman an tih mai, Scaramanga kha a awm bawk. Mary, Scaramanga chuan i pu Ross kha a that tawh tih hre nghe nghe la a tha ang. Trinidad-ah," alo ti bauh va.


Mary chuan a hmui a hup chawt a.


Bond chuan, "Ka sawi ang chuan i duh leh report i ziak nghal thei ang. Mahse helai atanga ka thawnchhuak thei che anih chuan ka tihna anih chu. Hendriks i tih cbuan min la hrechhuak lo deuh niin alang a. HQ chuan ka hmel leh pianhmang a dawn leh dawn loh an hria em?" a lo ti leh a.


"Secret agent rothap tak, James Bond tih chauhvin i chanchin chu a hre rih ang. Mahse Hendriks chuan chu chauh chu a duhkhawplo a ni ngei ang; ni 2 kalta khan dilchhut takin i hmel leh pianzia te a zawt kual vel a ni. Ka lokal a tulna chhan chu i hrethiam tawh mai em, James?"


"Tehreng mai, ka lawm em em bawk a ni, Mary. Tunah chuan fimkhur takin tukverhah khan i tawlhchhuak leh anga, i inthiarfihlim vat a ngai. Kei chu min ngaihtuah suh. CIA mi leh sa pahnih an awm tih i lo sawi bawk dawn nia."


Nula chuan a han enchho vang vang a, "I fimkhur ang tiraw?" a han ti ngawt a.


Bond chuan a dara ben pah chuan, "Tehreng mai," a lo tisam mai a. Tui chu a herh tawp a, bualin kawngkhar chu hawngin, "Min rawn zui rawh. Kan vannei em ang chu maw!" a han ti leh a.


Khumsir thimtham.atang chuan aw nelawmlo zet mai hian, "In pahnih khan in kut tukkhuma suih chungin lokal rawh u," a rawn ti ta a.

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » February 26th, 2020, 5:10 pm

11. BALLCOCK AND OTHER TROUBLES

Thimtham atang chuan Scaramanga chuan kawngkhar bul chu a pan phei a, electric chu a han tieng nghal a. Ani pawh chuan kekawr bul chauh alo ha a, mahse a silai bawm chu a zakhnuaiah a pai a, a chetzawng chuan a rangkachak silai chuan Bond-a lam hlir chu a tin a.

Bond chuan a ngaihna hrelo deuh hian kawngkhar bul lam chu a en a, a hnuai lama thingbunga a kam chu a nih ang ang hian a lo la inkhai si a. Mahse a thawmhnaw dahna bawm inhawng hnunglama pindan dang lolang chu ava hmuthei a. Bond-a pindan wardrope chu kawngkhar ang deuhva nam hawn theih a ni tih a hriat theih mai. Mahse Bond-a pindan lam atang chuan chu chu a hriat miahlo a ni.

Scaramanga chu alo pheihnai leh a, an pahnih chuan a han en dun vang vang a, ngeiawm deuhva han ner sak pah hian, "He hmeichhia hi nimin khan ka hmu hauhlo mai a, khawiah nge ilo thuhruk a? Bualin kherah enge in tih? Inbual chunga han inkuah vel chu a nuam deuh bik em ni?" a han ti a.

Bind chuan thutak deuh hian, "Innei turin kan inhual lawk diam tawh. Kingston a British High Commissioner Office ah Cypher Clerk angin a thawk a, nang nena kan inhmuh atang khan ka riahna tur lai a rawn chhuichhuak a, London hospitala ka nu dah anih thu min hrilh turin a lokal vang vang a ni. A hming chu Mary Goodnight a ni. A reng reng thu ah engvang a zanlai laia ka pindana rawn lut nge i nih? Tin, i tawngkam mawilo deuh kha chu nangma tan khek hram hram rawh," a ti ta hmuk a.

Chutah Mary lam chu hawiin, "I kut kha thlakthla rawh, Mary. Mr. Scaramanga hian kawngkhar intauh ri ang khan rukru an rawn kal emaw a ti anih ka ring. Ka thuam ka inbel anga, i car dahna ah ka va hruai ang che. Kingston thleng leh tur pawhin rei tak tlan ila hmabak a nia. Heta riah mai chu i duh zawk lo tak tak maw? Mr. Scaramanga hian a tul chuan pindan dang a ngaihtuah theih mai ka ring a ni," tiin Scaramanga chu a hawi a. "A man chu ka chawi mai ang, Mr. Scaramanga," a tizui zat a.

Mary Goodknight pawh chuan a kut chu a lathla a, rang zet hian khum a a bag chu la in a hmai chu a han siam leh mawlh mawlh a. Bond-a tawngkam zul zui chuan zei deuh hian, "Darling, riak lova haw leh thuai a that zawk ka ring. Office ka tlai vaih chuan ka tan a tha lovang. Prime Minister chuan a kum 89-na lawmna nipah fawmin chaw a rawn ei dawn a, chumi nang hman a engkim ruahmana pangpar thlenga ka lo khawi diam a ngai a ni," a lo ti ve zung zung a. Scaramanga lam chu hawiin, "Vawiin chu ka buai khawp mai. An chawei tur chu mi 13 lai an nih dawn avangin tihtur a tam khawp mai. Kawng lah hi a chhe phian si a, Mr...err... Scramble, hetia ka rawn tibuai ta vak che hi khawngaihin min ngaidam a ni ang chu," a ti a a kut pharchhuah pah chuan, "Va mu leh daih rawh. Ka fiance hian min thlah mai ang. Good bye, Mr...err..." a han tileh a.

Mary chu a chetzei em avang chuan Bond chu a thawhuai a. Mahse Scaramanga chu chuti maia hmin chi a ni lo. Pen sawn paha a silai a Bond a la tinreng pah chuan, "In pahnih khan ding rawh u," a tileh ta a.

Mary chuan a kut chu a sirah a thlakthla a, mak tih hmel deuh hian Scaramanga chu a en han en a.

Ani Scaramanga chuan muangcharh hian, "Awle, in thusawi chu ka pawm ang. Ani kha tukverhah khan chhuahtir leh phawt la, i hnenah sawi duh ka nei a ni," a ti a. A silai chuwn nula lam chu kawkin, "Haw la, mi ramah phalna dil hmasa lovin kal ching tawh suh. Tin, in High Commissioner leh P.M. chu engah mah ka ngailo tih i hre dawn nia. Thunderbird Hotel ah hian thuneihna an nei miahlo, i hrethiam em? Helaiah hi chuan ka thu hi a tlang khawp mai, haw rang rawh," a han tileh a.

Mary pawh chuan thinur aw chang fal hian, "A tha anih chu. Mr.errr.... I thu min chah chu High Commissioner hnenah chuan ka hrilh mawlh ang. He thliarkara i awm ve chungchang hi tunhma zawng aiin an ngaipawimawh zual ngeiin ka ring. Jamaica sawrkar pawhin an ngaihven zui ngei ang che," a ti ve ta a.

Bond chuan a lemchan chu a uar lutukin a insawi-awk palh mai ang tih a hlauh avangin nula banah chuan ava chelh a. "Khai, Mary, haw teh. Ka nu hnenah chuan helaiah hian ni hnih khat bak ka cham tawhloh tur thu lo hrilh la. Chumi hnu chuan Kingston atangin ka rawn phone ang tih ilo hrilh dawn nia," a ti a. Tukverh lamah chuan a hruaiphei a, a lawmchhuak tur chu a va pui a. A chhuahfel hnu chuan nula chuan a ban a rawn vai a, a kalsawn ta a. Bond chu a han thaw huai a. An buaina tawh chu rinai taka a fel hma pawh chu mak a ti viau zawk a.

A khumah chuan a thu a, a lukham hnuaiah chuan a silai chu a awm reng tih a hre ran a. Scaramanga pawh chuan a silai chu a paiah chuan alo khungfel tawh a, wardrope bang ngheng a ding chungnchuan a khabe chu alo zût a. Ngaihtuah mûk tih hriat deuh mai hian, "High Commissioner Office saw in Secret Service ho hmunpui a ni a. Mr. Hazard, I hming tak hi James Bond te a ni mial lo maw? Zanin khan silai chelek i thiam hle a, khawilaiah emaw ni James Bond hian a silai kah a chhuang hle niawm in ka chhiar tawh tlat a ni. Chu mai bakah tunlai hian Carribean velah chuan min zawng mek niin ka hre bawk. A mak viau hlawm lo maw?" a ti bauh bauh va.

Nui chung hian Bond chuan, "Indo a tawp khan Secret Service chu an thiat fai ta vek emaw ka ti asin. Mahse ka nihna chu i duh ang ngawtin ka thlak thei biklo a nia. Min ringhlel deuh anih chuan zingah Tony Hugill va phone la, ka chanchin chu va finfiah mai rawh. I sawi Bond chuan enga tan nge a tih reeng reng che?" a han tilet a.

Ngawi rengin Scaramanga chuan Bond chu a han en vang vang a. "Silai inkahsiak a chak deuh a niang chu ka ti mai. Ka zirtir chak zawng tak a ni. Savannah La Mar a ka rawn hmu che kha mak ka tiin ka ngaihtuahna a tivak thui hle a ni. Ka la inngaihtuah tam tawklo pawh a ni ange. Atira ka sawi ang khan police lam rim i nam deuh tlat a ni. Tuna nula pawh kha i nupui hual a ni maithei a, a nilo maithei bawk. Bual inah kher in inkhung lehnghal a, kha kha mi tam tak trick a ni. Secret Service ho pawhin an ching ve a ni mai thei, i va pawl satliah mai te anih loh chuan," a ti charh charh a.

"Ka lo pawl ngei a, enge a pawina? Nang pawhin Chinese nula kha engtin nge i tih a?" tiin Bond chu a han ding hluai a. Thinur hmel tak hian, "Ngawi teh, Mr. Scaramanga, ka kham ta riau mai che. Mi nawr lutuk teh suh. I silai i lek khan pathian emaw inti hial khawpin i duh duh i sawi a, Secret Service mi leh sa angah te mi ngai thul. Thingthi a i pheikhawk liakfai turte hian min beisei ange. Ka thian, chutiang i beisei anih chuan i beisei thlawn hle ang. Ka hnathawh danah i lungawi lo anih chuan dollar 1000 chu min pe la, ka inthiar fihlim mai ang. Tumge maw ni a i inhriat reng reng le?" a ti ta hrep mai a.

Scaramanga chu nelawm lo deuh hian a han nui a. "Aw le, mahse hei hi hrereng ang che. Mister, i sawi ang hi ilo nihloh vaih chuan ka kapdarh vek ang che. Tunah chuan mutzai rel ila, naktuk dar 10 ah Mr. Hendriks nen conference room ah kan inhmu dawn a, tihbuai ka duh hauh lovang. Chumi hnu chuan kan vaiin rel ah excursion hmangin kan kal kual dawn a ni. Engkim lo ruahman fel vek ang che. A tul anih leh manager pawh berawn mai ang che," a ti a, wardrope phen kawngkhar ah chuan a lut leh ta a. Bond pawh chu a han inbual fai leh phawt a, a mu leh ta a.

Dar 5:39 chiahah a harh a. Zing thawh hun leh harh hun hi alo chin than tawh anih avangin a duh hun apiangah a harh mai thei thin a ni.

Tuichen kekawr a ha a, tuipui lam chu a pan leh ta a. Tui chu a han chengkual pawp pawp a, dar 7:15 ah hotel kawt a Scaramanga lo chhuak chu a hmu a. Mipa naupang pakhat hian inhrukpuan keng hian a zui a, Bond pawh chuan a pindan lam chu a pan phei ve nghal a. Pindan atang chuan Bond chuan trampoline a Scaramanga inperh pawp pawp ri chu a hre thei a. Nicholsona'n Master Key a pek kha a phawrh a, pindan no 20 na chu panin, rang takin a lut nghal a. Dawhkana rangkachak silai lo awm chu a pan phei a, silaimu thunna (cylinder)-a a mu puak leh hmasa ber tur chu a phawrh a, a hmaa a awmdan ang chiah chuan a dahleh ta a. Kawngkhar chu a pan phei a, fimkhur takin pawnlam thawm chu a han ngaithla hmasa a. Thawm engmah a hriatloh avangin fimkhur takin a chhuak a, a kalh leh nghal thlap a. Ama tukverh atang chuan thawm a han ngaithla leh a, Scaramanga chu trampoline ah chuan alo la inperh dum dum a.

Bond chuan a thil va tih chu ho riau mah se a thih leh dam hriltu tur second tlemte a tidanglam thei ni hian a hria a. A mitthla chuan a hminglem leh nihna lem chu an hrechhuak tawh ni te hian a hria a. Englai pawhin a nihna an hriatchhuah hun chu a walther PPK lrheh gunmen 6 te inhmachhawn hun a ni mai tih pawh a hai lo. Chuvangin atan chuan thil ho te anga lang pawh a pawimawh em em vek a ni.

Bond chuan zing chaw a chah a, a eikham chuan inthiar naah a lut zawk a, manager office lamah a phei ta a.

Felix Leiter chu duty in alo awm a, nui chung hian, "Chibai, Mr. Hazard. Puih theihna che ka nei em?" zangkhai vah hian alo ti a. Bond chuan a hnunglam a en vat a, a chhan hman hmain Mr. Hrndriks chu a rawn thleng chawpchilh ve nghal a.

Bond chuan, "Chibai," a lo ti vat a.

Hendriks chuan a lu a lo bu nghut a, Leiter-a lam chu hawiin, "Telephone operator chuan Havannah atanga min rawn biak suh an awm niawmin a sawi a, khawilai hmun nge fianrial ber ang?" tiin a han zawt a.

"I mut pindanah i duh lovem ni, ka pu?"

"Ka duh angin a tha tawklo,"

Hendriks pawh chuan ngaihthlak rukna a awm ngeia rinna a nei niin Bond chuan a hria a.

Leiter cbu dawhkan phen atang chuan alo chhuak a, telephone in-te chu kawhhmuhin, "Sawlaiah sawn va hmang rawh. Sound proof vek a nia," a han ti a.

Kalsawn mailo hian Hendriks chuan, "Anih khawlte saw sound proof an ni ve tho vem?" a han ti leh a.

Leiter chuan hriatthiamloh hmel zet hian, "I thusawi ka man hauhlo mai, ka pu. Operator nena thlunzawm vek a ni," a lo ti a.

"Min va kawhhmuh phawt teh," tiin Hendriks leh Leiter chu an inzui phei ta a. Hendriks chuan phonebooth kawngkhar chu uluk takin a khar phawt a, phone chu lakangin engemaw hi a han sawi a. Leiter chu a lokir phei leh a, hawihhawm deuh hian, "Enge ni harsatna i neih, ka pu?" tiin Bond chu a han melh a.

"Ka inthiarna chhungah chuan felhlel deuh a awm a, hman maitheih dang a awm em?"

"A va pawi ve, ka pu. House engineer ka rawn entir vat ang. Ni e, hman tur chu a dang a awm alawm," tiin Felix chuan a aw a han tihniam a. Inthiarna hmun a kawhhmuh chhunga kawngkhar chu a office nena a inpawh thu a hrilh a. "Ka va kir leh chhung minute 10 chhung vel chu lo tawi khawtlai la, kan sawnchhepa thusawi saw ka va rewind chhin ange. I tan phei chuan thu lawmawm lam anih ka beisei lem lo," a tihzawm leh a. A kun a, Bond chu inthiarna lam chu a kawhhmuh a.

Telephone booth ah chuan Hendriks chuan eng engemaw hi a sawi a. Bond chu ngun deuh mai hian a rawn thlir phei a, Bond chuan tim deuh sung sung hian a inhria a. A nihna an hrechhuak tawh ni ah a ngai hmiah mai. A bul dawhkan a Wall Street Journal chu a la a, chanchinbu bih pah chuan a mitsirin Hendriks chu a mitmei reng a.

Hendriks chuan Bond a chanchinbu bihlai chu ngun deuh mai chu thlir chung hian phone ah chuan mi a be mawlh mawlh reng a. A hmai chu thlantuiin a bawh nasa hle a. Rawmawl a inhru pawk pawk chung chuan a rawn chhuak ta a.

Nick Nicholson pawh chu inchei nalh zet hian a rawn chhuak phei a, Bond-a lama lu buka nuih pah chuan dawhkan phenah chuan alut phei a. Dar 8:30 vel a ni tawh a, minute 5 hnu chuan Felix pawh chu office atang chuan a lo chhuak a, Nicholson chu thil engemaw a han hrilh a. Bond-a hnenah chuan, "Ka pu, mi zui rawh le," a ti a, inthiarna lamah chuan an inzui phei ta a. An luhhnu chuan Leiter chuan kawngkhar chu kalhin, "I dinhmun chu a hlauhawm hle a ni, James. Russian tawngin an tawng na a, i hming leh number chu a ri zing khawp mai. I theih anga rangin inthiarfihlim la a that ka ring," a ti ta a.

Bond chu a kiai suk a.

"Hriatlawk chu ralthuama intam sa ang tho a nia lawm, Felix. Keipawhin ka lo ringsa reng a ni. Hendriks kha min that tura tirh a ni a. KGB hqtrs. a ka thian hluite chuan hnawksak min ti ta deuh a ni ang," tiin zing lama Mary Goodnight in a rawn tlawhdan te chu a hrilh a. "Chuvangin tunah chuan tlanchhuah tum pawhin awmzia a nei vak tawh lo. Vawiin dar 10-a an meeting neih turah hian an thubkhel leh min tih tumdan chu kan hre vek mai ang. Excursion neih zui te an rawt deuh bawk a, mita thilthleng hmutu awmlohna hmunfal deuhva kal an rawt niawm tak a ni. Nang leh Nick hian kan chhuah theihloh nana kawng indap thei anih chuan a bak chu keiman ka buaipui mai ang," tiin a thusawi chu a tlip ta a.

Zoram Online Store :
https://www.myshopprime.com/ruata.ralte

Leiter-a hmel dur tak pawh chu zawi zawiin a rawn danglam ta tial tial a. "An thil ruahman chu ka hresa mai. An kal tumna rel te chi hian fuhmun picnic na te tlanpelin Grand Harbour thlengin a kal a, a kalkawng hi ka lo va thlithlai hmasa vek tawh a ni," a ti charh charh a. A thirkut vaikual pah chuan, "Ni e, chet an tumdan chu a rin hriat theih mai. Vanneihna i neih nual a ngai ngei ang. I thianpa Hugill pawh ka han hmuhvat a ngai anih chu. I tawngkam ringawt sawiin ka mamawh thil min pe duh angem? A theihloh chuan a lehkha tur ziak la a tha ang," a tihzawm leh a. Kawngkhar ril zawk atang chuan a office ah chuan an inzui lut ta a.

Leiter-a duh angin Bond chuan Wisco Sugar Manager lehkha tur chu a ziak a, a pindan lamah chuan a pheisan leh ta a. Khuma thu chung chuan Bourbon chu tak zet zetin a han lem khawlh khawlh a.

Link:
BBcode:
HTML:
Hide post links
Show post links

Local Advertisement

MOBILE SIAM ZIR DUH TAN!!!

Tech-Inn Mobile Repairing Traning Centre, Bazar bungkawn

Kum tin mi za chuang eizawnna kan siamsak a, Eizawnna tlaka thiam turin kan zirtir thin

Mizorama mobile siam zirna hmasa ber changtlung ber kan ni. Hrechiang duh tan Contact : 9612099411 / 9862016122


Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » February 26th, 2020, 5:10 pm

IN A GLASS, VERY DARKLY

Conference room chhung leh thil awmdan chu a hma ang chiah khan a lo la pangngai reng a. Pawna Bond-a thutna a lehkha chhiar pawh kha a ngai ngaiin a lo la awm a.

Bond chu pindanah chuan a lut nghal a, hotel hnathawk tumah an la lutlo ni ngei hian a lang. Chair te pawh a awmdan pangngaiin an lo la awm thap a, ash tray a meizial bungte pawh paihfai lohvin an la awm reng mai. Amaherawhchu chhuatphah ah chuan thisen hnuhma erawh hmu tur a awm miahlo thung.

Bond chuan chair te chu a hungtha a, Scaramanga thutna ep a chair chu a ke pakhat a chhiat deuh avangin Ruby Rotkopf-a thutna kha anih a ring nghe nghe a.

Bond chuan tukverh leh puanzar te chu a endik leh vek a. Scaramanga leh Hendriks kha an rawn inzui lut ta a. Scaramanga chuan aw nelawm lo leh ram zet hian, "Aw le, Mr. Hazard, kawngkhar hi nimin ang khan kalh la, tumah an lo lut tur a ni lo," a han ti a.

"A dik alawm. Chibai, Mr. Hendriks, nizan party chu nuam iti bawk emaw chu?" a han ti a. Hendriks chuan nidang ang bawkin a lu a lo bu nghut ringawt a, engmah a sawi hek lo. A mitmeng chu a rumin a nelawm lo hle ringawt a.

Bond chu pawnah a chhuak a, kawngkhar chu kharin thuthmun a rem nghal a. Champagne zu no chu a chhawr tangkai zui nghal vat a. Mr. Hendriks chuan hmanhmawh deuh hian a saptawng thiam ang ang chuan report a han pe zung zung a.

"Mister S, thu lawmawm lo tak sawi ngai a awwm tlat mai. Tukin khan Havannah atangin min rawn bia a, anni chuan Moscow atangin chanchin an dawng zung zung a. Hepa Hazard hi British Secret Agent James Bond chu a ni ngei mai. A hmel leh pianhmang chiang takin min rawn hrilh a, rinhlelh rual a ni lo. Tukina tui a chenlai khan entlangin ka en a, a taksa a serte pawh chiang takin a lang vek a ni. A hmaisir a ser te hian a nihna a tinghet leh zual. Nizana a silai a kahthiam dan a entir khan a finloh zia a tilang chiang hle bawk. Kan organisation mi leh sa khatiang khan awm ve vaih se la chuan a chaklo viau ang. Ka kahhlumtir nghal hialin a nia ka rin ni,"

An han ngawi hlek a, chutah Hendriks chuan awki dang deuh zawk hian, "Mahse Mister S, hetiang thil hi engtia lo thleng thei nge anih? He thiltih sual lian tak hi kan hmunpui lam chuan mak an ti teh asin. Kan hotute hi finglo phei sela chuan hepa hian pawi tam tak a khawih thei a ni. Thil engkim ka report a ngaih avangin han sawifiah teh. Hepa nen hian engtia inchhar nge in nih? Khawngaih takin chipchiar takin han sawi teh. Hmelmate laka kan chetdan hi kan hotute chuan an lawm hauhlo a nia," a han tileh a.

Bond chuan nawalh nawt ri phar phar hi a hria a, Scaramanga chuan sikret a pan phawt ni turah a ngai a. Chutah hlauh neilo tih hriat deuh mai hian Scaramanga chuan heti hian a chhang ta a.

"Mr. Hendriks, in hotu ten hetianga min rawn vei hi lawmawm ka ti a, an hriatna ril tak avang pawhin ka ngaisang a ni. Mahse in hotute chu heti hian lo hrilh teh. Hepa hi tihpalh tak taka ka tawn a ni a, chu chu khatih hunlaia ka ngaihdan tak pawh a ni. Chulam chu ngaihtuaha intih hah vak erawh a tul hran lo ve. He conference buatsaih hi thil awlai a ni lo tih i hria alawm. Hotela thawkte tanpui tur hian New York atangin manager pawh pahnih ka chah hial reng a, hna pawh an thawk tha viauvin ka hria. Midangte hi chu Kingston atanga ka chahkhawm an ni deuh ber. Mahse thil a felfai em tih enthlithlai tur PA ka mamawh ta tlat mai a, keimah ringawt chuan engkim ka buaipui hmanlo. Hepa hi ka han tawn tak thutah khan rintlak dawna ka hriat avangin ka chhawr ta a ni. Mahse mi â nileng chu ka ni bik lo va, a hriatloh tur a lo hriat palh venthawn thu ah hna kan zawh veleh a dahthat nghal tur a ni. Tunah khan Secret Service mi leh sa a ni e i ti a, kan conference tirhah khan anni ho hi chu tukthuan chawhmehah ka hmang mai mai thin a ni ka tih tawh kha. Mahse i thil min hrilh avang chuan naktuka that lovin vawiin ah ka that dawn a ni. Ka chetdan tur chu....."

Scaramanga chuan a thusawi chu a hma aia zawi hlira a sawi tak avang chuan Bond chuan an thusawi chu a hre mumal thei ta lo. Chhumbung deuh rum hian Scaramanga chuan, "Relah... fu hmunah sazu alo awm a... vanduaina oawi tak a thleng..mahse ka chet hma in... barakhaih.. ka ruatfel vek mai ang... in nuih pawh a za viau ang.." a tih te chu a hrethei a.

Chumi hnu chuan aw pangngai zawk hian, "Chuvangin hahdam takin awm tawh teh. Tlai lamah chuan sawpa saw a ruang pawh hmuhtur a awmlo deng reng ang. Tunah pawh hian kawngkhar saw hawngin ka chingfel nghal thei a, mahse ni hnih lek chhunga electrict vawihnih tihchhiat chu a awihawm lo deuh hlek a ni. Titi lengvel awm lo se ka duh ber. Ka rawt danah chuan picnic na ah intihhlimna chidang deuh hlek kan nei dawn a ni," a han tihzawm leh a.

Hendriks pawh chuan a tihtur tul a tihfel tawh thu leh, midang tan pawh rang taka thupek kenkawh vat chu a tih chi bera a rinthu a lo sawi ve bawk a. "I sawi chu a dik alawm. Thil kalhmang ka lo thlir reng ang. Taka, Plan Omega chungchangah engkim a fel em tih kan hotuten an hre duh a ni," a ti ta a.

"Ni e. Reynolds Metal, Kaiser Bauxite leh Alumina of Jamaics a thil ruahmante chu a tluang vek rih e. Mahse in 'thil' kha khawih fimkhur a ngai riau mai a, anih dan takah phei chuan dahthat pawhni se kum 5 dan zelah thlak ngei ngei tur an ni. A dahna bawm sira a hmandan tur African tawnga inziak ka hmu chu ka nuih a za khawp a sin. Helna chawhchhuah chu in tum hle a ni maw? A hun tur ni diktak kha min hrilh ngei ngei ang che u; Wall Street a ka stock chanpual khan a tuar hlauh dah ange,"

"Chuti zawng, pawisa i chan teuh dawn anih chu. A hun tak hi chu min hrilh an tum loh hmel khawp mai. Kei chuan Wall Street ah chanpual ka neih veloh avangin pawi ka ti lo. I pawisa chu stick lam ni lovin rangkachak, lunghlu emaw postage stamp hluiin emaw nei ta la i tifuh zawk mai thei. Awle, sawizawm ta zel ila. Kan hotuten damdawi ruihhlo tam tawk tak mai neih an duh hle a; nang hian ganja, marijuana kan tih chu tam tham deuh zawk i ngaihtuah thei a. Tuna pound bi lek lek a i lak thin hi tam thamin i ngaihtuah thei em tih ka hre duh a ni. I theih chuan Petro Cays panpui la, chuta tangin anni chuan an lo buaipui zawm tawh mai ang,"

An han ngawidun vang vang a, chutah Scaramanga chuan, "Thil harsa lutuk chu a ni lovang. Mahse tunlaiah ganja thehdarh chungchangah hian dan an zam khauh thar hle mai a, man palh hlauh chuan rei tak jail bang zut a ngai dawn. Tunlai tak hian a man pawh Ounce 16 a ni a, hundred weight chu pound sang engemaw zat a ni ang. Chubakah vawikhata tam tham tak buaipui hi a hnawk tham riau mai a. Ka sangha manna lawng pawhin vawikhatah in duh anga tam a phur thei bik lovang. A enga pawh chu nise khawia mi tur nge ni reng reng a! Chutiang zat zat him taka inthiar vel theih chuan in vannei hle tihna a ni ang. Pound 2/1 pawh ken vel a buaithlakin a hlauhawm a nia," a han ti bauh va.

"A thawnna tur chu ka hrelo na a, America ah a niang chu ka ti mai. Tunah hian a dawngsawngtu turte pawh ruatfel vek an ni tawh a, chumi hnuah Georgia tuipui kamah dawnsawn zui zel a ni ang. Helai hmun hi smuggler ho chettlatna hmun a ni a, pawisa lamah chuan harsatna a awm lovang. Fekfawn taka dollar maktaduai khat hmang thei tura phalsak ka ni. Nang pawhin i buai manah nidang ang bawkin 10 percent lawmman i dawng bawk ang. I beng a verh emaw chu?"

"Pawisa te chuan ka beng a verh reng alawm. Ganja chingtu ho ka biak a ngai anih chu. Maroon County ah an ching deuh ber a, a hlat tham deuh avangin hun pawh a duh deuh ngei ang. Karhnih hnuah thil awmdan ka hrilh chiang thei ang che,"

"A ni tak i ruat thei ang chu maw? Pedro Cays saw hmum pharh zau deuh mai a ni a, engmah dah rei chi a ni lovang, i hrethiam mai em?"

"Tehreng mai. Helh deuh mai ka la nei. Casino chungchang sawi ta ila. Sawrkar lam pawhin a ngaihven hle a, tourist an rawn pun zual deuh an ring a ni. Mahse Havannah atanga pawl an hnawhchhuah tak Vegas Machine, Miami Jokers te khan helai ram mite zia diktak hi an hrechianglo niin ka hria. Pawisa a mi tlawn vel chungchangah pawh an thiam tawklo bawk. Jamaica hi map ah hian alang te deuh va, an zuamsual pawh a ni mai thei..." tiin uar leh thiam tak hian Scaramanga chuan chulai ram vel politics bakah pawisa khelhna chungchanga gang hrang hrang a hmalak dan turte chu a sawi chho va.

Bond chuan a beng chhu a han nuai a, thah an tum thu te, KGB ho inrawlh dan te leh Bauxite Industry tihbuai dan turte leh USA a drugs tawlhruk an tumdan te chu a hriatbelh ta a. Intelligence te tan chuan thil hlu lutuk a ni a, mahse mumala thu thlen turin a dam kha2chhuak angem? Ngun takin a no hmang chuan inchhunga an thusawite chu a ngaithlak chhunzawm leh ta a.

Hendriks chuan, "Kan hotute chuan sum lqma hlawkna chu an ngaipawimawh tho nâin, political lam an ngaipawimawh zawk a. Hei vang hian a nia, in pawla tel tura min tih nachhan chu. Pawisa lamah kan buai lo, mahse Jamaica a casino hawn chu engtin nge an tana hlawkna tur a ni tih ka hrilhfiah tak ang?" a ti boh boh va.

"Buaina chu a awm phah ngei dawn alawm. Jamaican ho hi pawisa khelh hrât deuh mai an ni a. Mihang an nih avangin puhmawh tur thil a awm chho ngei dawn. Chu chu opposition hruaituten remchangah an la ngei bawk ang. Pawisa leng vel a tam dawn avangin Union hrang hrangin hlawh an lo san chho bawk anga, boruak a buai nuaih mai dawn a ni. Chu chu buaina siamdan, sum ngai si lo a ni. Chu chu a ni lawmni in duh ber chu?"

An han ngawidun leh vang vang a, Hendriks chuan, "I thusawi chuqn beng a verh khawp mai, S. Mahse buaina chhuak mai thei i sawi chuan kan sum leh dinhmun a tichhe mai lovang maw? Engpawh nise i thil ruahman dan chu kan hotute ka han hriattir hmasa anga, an ngaihdan ka rawn hrilh leh ang che. An thlawp viau mai thei bawk che a ni. Tunah chuan kan pawl zinga mi No.6 thlaktu tur mithar kan mamawh ta anih hi. Lo ruatlawk deuh te i nei em?" a han ti leh a.

"South America lam mi nei thei ila a that ka ring. British Guiana a kan chetdan thlithlai tur kan mamawh a ni. Venezuela ah pawh kan inhrek deuh a ngaih tawh ka ring. Engtin nge maw Maracaibo bar danbeh chungchangah khan kan hlawhchham ringawt le? Lawng tha chu nei ila, mitdel rawk tluk zeta thil awlsam a ni ang chu. Mexico a Mr. Arasio khu hmang ta ila a tha mai lovang maw?"

"I mi sawi chu ka hre tlat lo,"

"Pa ngaihsanawm tak a ni. Greenlight Transportatiin System neitu a ni a, Los Angeles ah drugs leh hmeicbhia a tawlhlut reng a, vawikhat mah man ala tawk lo. In hotute chu zawt la, an lo hria anih phei chuan thil a fel a ni mai alawm."

"A that chu, S. Tunah hian nangmah ruaitu chungchang sawi duh i nei em? Tunhnai maia Moscow a tlawh khan helai vela i chetdan ah a lungawi nasa mai. A hmalakna leh keini oawl chetdan a inmil thlao mai hi a tihzia ngawt mai. Mafia ho nena kan inzawmna ah hian nakimah kan lak atangin beiseina lian tak kan hotute chuan an nei a ni. Mahse kei chu ka ngaih a tha chiahlo. Mr. Gengerella hi kan tan chuan a pawimawh takzet a, mahse anni ho ang mihring hi chu pawisa vang chauhva rin chi an niin ka hria. I zawm ve zawng a ni emaw chu?"

"I sawi dik chiah e, Mr. Hendriks. Kan hotupa ngaihdan pawhin Mafia ho ngaihpawimawh leh dah lal ber chu anmahni Mafia tho an ni a, hei hi thil ni thin leh ni zui zel tur pawh a ni."

"Awle, kan thiante chu chhuak turin an inpeih tawh em tih iva en teh ang. Dar 11:30 a ni a, Bloody Bay Belly chu dar 12:00 a tlanchhuak tura tih a ni a. Vawiin chu a nuam dawn hle anih hi. Kan British pa pialral a kan tirliam lai chu kan hotuten an hmu ve theilo tur chu a pawi ngawt zawk mai,"

Hendriks chu alo rum nghut a.

Bond pawh chuan a no chu a dah a, a thusawn nghal vat a. Kawngkhar chu chhunglam atangin Scaramanga chuan a rawn hawng rawk a, an lo chhuak lai en chung chuan Bond chu a ka hup chungin a lo ham bai bai a.

Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)