2020 By Dingdi Pachuau (Completed)

[Ngaia]

☆2020☆ - 43 By Dingdi Pachuau





Kawng tluanin ka ngaihtuahnaah Essa a awm, ka thlen huna ka pa min tih dàn tùr chu ka enghelh peih lo, engtin pawh min ti se ka tuar mai ang. Chu zawng ai chuan Essa mawlh mai chu a ni ka ngaihtuah ni, ka khawngaih lâwk. Ka pain ka phone hi min chhuh ngeiin ka ring a, ka phone ka kawl loh huna min rawn biak a tum chuan...



Thâwk ka la hawk hawk. A thin a rim ngei àwm si a, chu chu hrehawm ka ti a ni. Ka hmangaih êm êm si a, a tân chuan tuar ka huam a, tihnat erawh ka phal lo. He hringnunah hian hrehawm a tuar tam tâwk tawh a, tawrhtîr leh kher hi ka duh tawh lo asin.



Mahse, kan duh ang hian kan va awm thei si lo êm! Hei hi hringnun chu a ni miau si.



Lunglei thlen ka va nghâkhlel lo tak! Ka thil nghahhlelh loh ber a ni àwm e; mahse, pumpelhna zawn erawh ka tum chuang lo. Ka nghahlelh loh avàngin Essa ka tibuai ringawt thei lo, ka hriat thiam a ngaih ém kha.



Kan in luah ka thlen hmain Essa chu ka phone, ka thlen thu ka hrilh. Ka hrilh ngei a ngai, nakinah ka phone ka hman theih tawh loh palh tâk thutah, lo inhmakhua a ngai.



Ka chunga thil thleng chu mangchhia dik tak a ni ringawt! Heti êm hian ka pa hian min lo huain Essa hi a lo duh lo a ni maw ka tih phah, râpthlâk tak a ni. A hmuh theih, a khawih phâk chin apiangin min vua a ni mai, țhelh dai tùrin Naua a lo la bâng si lo va, ka sepui ruah tuar tlawk tlawk mai.



Mahse, vawi khat tê mah nâ ka tih vangin ka awka ka chhuah lo, ka insehruh char char. Ka mittui erawh ka dang thei lo, heti êma ka pa ka chunga a thinrima kut min han thlâk nasa mai hi ka rilru a na êm a ni.



"Mi tenawm i ni, i tenawm takzet! I hna ațangin i bâng nghâl ang a, vawiinah hian kan haw nghâl bawk ang. I mittuite kha ti tla suh, hetiang mai mai tùr hian ka enkawl lo che, tu nge i chhuna i luhlul viau mai ni? Ka lakah hi chuan i luhlulna khân awmzia a nei lo ang, i zawr hnâp thleng ka vaw mai dâwn che a ni," a ti buan buan a.



Țawngkam khat tê mahin ka chhâng lo.



Ka phone a rawn ri a, chhàn pawh ka tum lo; mahse, rang zet hian ka kekawr pocket-a mi chu rawn phih chhuak lawpin chhuat chârah chuan na zet hian a vawm keh ta chhuai.



Ka phu nasa lutuk!



"I be tawh lo ang! I dam chhûng hian a hmel hmuh pawh inring tawh bawk suh, i awm dàn hi ka duh lo. Ka thu sawi engah mah i ngai lo hi ka duh lo hrim hrim, ka fanu i ni pawh hian ka ring lo hial zâwk a ni! Hetiang fanu neih hi duh pawh ka duh lo," a ti leh tùn tún a.



Ka awm dàn engkim hian a tithinrim vek tawh ni maiin ka hria, ka dinin," Ding suh," a ti a, ka kùn deuh leh," Kûn suh," a ti bawk si a, awm ngaihna ka hre lo, vuak remchànna lam apiangah min vua a ni mai.



Naua a rawn haw hma ta hlauh, a rawn chelh ta. Kei chu ka dinna ngaiah ka la ding char char, in ka luh tirh ațanga ka dinna ngaiah ka la ding alawm, ka bag erawh chhuatah a let bal thung.



"I farnu hi vuak hlum mai ka duh!"



Tunah tak hisn min vaw hlum daih mah se hlauhna rêng ka nei chuang lo, kei hian Essa zia hi ka kai ve deuh tawh a ni àwm e ka ti!



"A zahthlâk, a mualphothlâk êm mai!" Naua chuan a ti sap. Ka pain chuti taka kut min thlâk chu zahthlâk a ti nge, Aizawla Essa ka va pan chu zahthlâk a ti zâwk pawh ka hre thiam lo.



"Tlaiah hian ka haw pheipui nghâl ang, a hna ațangin bâng nghâl rawh se. I thawmhnaw siam rawh, ka hmuh phâk lohah i awm tawh dâwn lo," tiin min rawn melh khui a.



'Chu e kha e' ka ti lo, țawng lovin ka room lam chu ka pan, ka pên țan chiah chu ka ner deuh sak, ka tisa mai ni lo ka ruhte thlengin a na vek tih ka hre chiah.



Ka thawmhnaw ka ban tùr chu ka dinglam bân ruh a nâ tih ka hre leh bawk, ka veilamin ka ban ta tho. Hei hi ka chan tâwk a ni alawm, țapa vui tùr ka ni lo, a thu ka âwih lo miau a.



Ka thawmhnaw a vaiin ka khung lo, tlêm tê chauh ka khung. Nakinah Naua'n min rawn thawn leh thei tho ka ti a, bâkah, ka bân ruh chu a na lutuk a, ka khung tam thei lo bawk.



Naua'n khawngaih hmel taka min en chu ka hawisan. Hetiang hi tunah chuan ka mamawh rih lo, khawngaih ka duh lo, mahni inkhawngaihna ka nei ang a, ka buai vek a ni mai. Tumruhna, huaisenna leh luhlulna ka neih a ngai, chuvàngin, khawngaihna lam chu dah bo hmak ang, rilru paukhauh tak ka neih a ngai. Essa ka kalsan theih loh kha,ka thil tum kha a pawimawh ber.



Kawng tluanin ka țawng lo, ka pa pawhin min melh hek lo. Ka bân na chu a hria ang tih ka hlau, chawh min ti dâwn êm asin, min vuakna ka taksa na vek avànga țhut harsa ka tih viau pawh chu a hmuhah chuan tihlan ka duh lo, ka tuar ngar ngar.



In kan thlena ka luh chuan ka nuin makti takin min lo en hâ mai, ka pa hian ka chanchin hi a hrilh lo a nih ka ring nghâl. Hria ni se mak lo ti tùr a ni lo.



"Kha, i fanu tenawm zet kha room-ah kalh hnan ang che, khawiah mah a kal tùr a ni lo," tiin ka nu chu a be hluk a.



"Eng thil nge thleng a?" ka nu chuan dam diai hian a lo ti a, kei erawh chu ka room lam panin ka kal daih.



"Mi hur, mi lepchiah ang maiin zu khawsa a! Min tizak, min tithinur hle bawk," tia ka pain a chhàn chu ka hre pha.



Mi hur, lepchiah leh tenawm ka lo ni rêng em ni? Nia, ka pa ngaihah chuan ka ni a ni mahna, mi hurah tak chuan ka indah phal bîk lo.



Ka bag chu harsa ti zet hian ka dawhkànah chuan ka dah a, ka kut veilam chauh ka chêt ngam avàngin ka kut veilam hi a rim hle dâwn a ni. Ka pain min vuakna avànga ka taksa leh ruh nâte hi ka nuin a hriat ka duh lo, min khawngaih dâwn si a, chu chu ka duh lo.



Khumah țhuin ka kawr hâk chu ka hlîm a, ka taksa chu a vual sen nasa khawp mai, nakin deuhah chuan a duk thluahin ka ring.



Mahse, duk mai mai chu a reh leh hma tho, a pawi lo.



Chaw pawh ka ei lo, ka hmai erawh ka phih a, ka ha pawh ka nâwt nghâl, mu nghâl mai thei tùrin ka inpeih nghâl at.



Ka taksa a na a, a chau ngawih ngawih. Nizànah ka mu mang lo va, vawiin lamah sumo-ah ka chuang thui leh bawk nèn, ka chau. Ka rilru pawh a chau viau a; mahse, Essa ka ngaihtuah lui tlat, a hming ringawt ka ngaihtuahna chhuah pawh chuan chakna, chhelna leh tumruhna min pe thei, he pa hi ka tân damdawi țha ber a ni.



Ka mu tùr thawmhnaw ka inthlâk laiin ka nu a rawn lût, ka lo hre hauh lo.



"Engtizia nge i taksa kha?!! Ka rei leh!!"



Harsa ti zet hian ka kut hman theih lam chuan hmanhmawh tak hian ka kawr chu ka pawtthla thuai thuai, ka nuin ka taksa a hmu chu pawi ka ti kher mai, min hmu lo se ka duh asin.



"A na lo," ka ti sap ringawt.



"I ril a țâm lo em ni? Chaw i ei lo ringawt a?" tiin ka kiangah chuan a rawn țhu a.



"Aw, țâm lo."



Ka nu chu ka en duh lo tlat, a mitmeng ka hmu duh lo. Nu hmangaihna leh khawngaihna mitmeng ka hmuh chuan ka thinlung a nêp vek ang, chu chu khawvêla ka thil duh loh ber a ni



"A pawi ka ti êm mai!" ka nuin a tih chuan ka ngawi reng. Nia, an fanu hian thu ka âwih lo êm mai a, engkim ka tibuai vek a nih hi.



Ka mu țha thei hauh lo, ka taksa ka delhna lai apiang chu a na zêl a, chàu viau mah ila ka tho leh hlawl zêl. A hnuah chuan nachhâwkna ka ei ta tawp, mut ka mamawh a ni. Taksa a chauh tlat chuan rilru pawh a chàu ve mai zêl si, chàu hman ka ni lo, ka chak țhat a ngai nasa a ni.



Chèn ho miau chuan inthup a lo har a ni ang e, ka nu chuan min hre chhuak thuai. Ka bân chu min zùtsak a, min tuam lumsak bawk. Hna ka thawh a phal lo, keimah avàngin ka pa chuan a khak fo va, nuam lo ka ti hle mai; mahse, ka nu erawh chuan a thin tirim zâwngin a chhâng lêt ngai lo, țawngkam dam diaiin a chhâng mai zêl.



Ka nu ang hi khawvêlah tam tak awm se ka ti, nun an tinuam. Bâkah, an bulah chuan tu mah hi mi sual tak an awm theiin ka ring lo.



Mahse, ka pa hi?



Ni lo, a thu ka âwih loh vàng alawm. Ka pa a ni a, tumruhna nèn ka hneh a ngai. Chuti lo chu, Essa nèn hma hun kan nei thei nâng, chhûngte nèn intuithlàr phah nân pasal leh ngaihzáwng neih ka duh lo. Hlim takin, inhre thiam tawn leh inhmangaih tawn taka awm ka duh.



Kâr khat a liam ta. Essa chu a dam țha ang chu maw? A lo damlo leh palh ang tih ka hlau ngawih ngawih, ka kan thei tawh si lo, a chanchin tal hre thei ila aw... Ka phone lah kha, a keh darh hneh ropui si, sim card tal kha lo chhar ila a țha tur.



Ka rilruin ka țawngțai reng, ka pa rilru hnehsak tùrin ka dîl ngai lo thung. Chakna, huaisenna, damna leh tumruhna ka neih theih nân leh Essa tân damna ka dìl, chu chauh chu ka dîl ngam tawh, Pathian lakah pawh hian ka inthlahrung ve tawh êm êm, fanu thu âwih lo ka ni si a.



Ka kut chu a dam har reuh phian mai, a ruh a auh a nih loh pawhin a khi tal a ni ang, ka chêtpui țha thei si lo va, a inthlahrunawm duh khawp mai.



Ka pa pawh a la thinur reng a niang, min be ngai lo. Ka nu hi a lo fel êm a, zaidam tak takin a țawng reng a, kan in chhûng boruak uap churh lutuk tùr pawh a tiziaawm khawp.



Ka nu chuan thil awmzia min zâwt a, zêp nei hauh lovin ka hrilh. Ka hrilh zawha ka pa sawi ve dàn min hrilh hnu chuan," I pa lungawi lohna hi hriat thiam hrâm tum rawh aw, hetiang a nihna chhan chu i tãna țha ber a duh vàng a ni tih i hria ang tiraw?" a ti dap dap a.



"Ka hria alawm, a thu ka âwih loh vàng a nia," ka lo ti sap a.



"Engkim Pathian kutah kawltîr vek mai ila, a țha ber. Aniin a lo rêl fel vek mai ang, mihringin tihfel ve kan lo tum hian a buai zo vek zâwk țhìn a," a ti leh a.



Ka nu hi ka zah thar ngawih ngawih.



Tlai khat chu ka pa phone-ah Maremi'n min rawn be duh ta tlat mai! Ka pa phone-ah ber kher, eng tak chu rawn sawi dâwn ni maw?



"Hello?" Ka bulah ka pa a ding rùn a, nuam tak chu a ni lo ve chiang khawp mai, ka țawng a hre thei vek ang, Maremi țawng pawh a hre pha hial ang chu.



"Phone ka tum nasatzia che hi! I phone a chhia tih ka lo hre lo va, i dam țha em?" a rawn ti a.



"Aw, țha e, in dam țha zâwk maw?" ka ti lêt a.



"Aw, dam țha e. En teh, naute ka pai ve tawh a, min lawmpui dâwn tih ka hriat avàngin ka rawn hrilh châk tawh lutuk che a," a rawn ti leh.



Ka mittui a rawn tling ta kal kal. A awka chhuak hlim leh zângkhai bawk si chu ka awt lutuk! Bâkah, pasal țha tak neiin tunah naute a pai tawh lehnghâl, kan va inang lo tak!



"Ka lawmpui lutuk che u!" ka ti ve a.



"Kan lâwm e, rawn zin phei te i tum em? Member thar piang ve tùr lo lawmna pawh kan buatsaih ang chu?" a rawn tih leh chuan ka thinlung hi a rûm tlawk tlawk ni berin ka hria.



Ka kal châk, ka hmu châk; mahse, tún atân chuan thil theih loh a ni.



"Kan la làwm ang chu!"



Essa chungchâng a sawi chhuak hauh lo chu ka va lâwm tak! A sawi hlauh chuan ka pain a hre ngei dâwn si a, a thinrim a belhchhah ngei ang.



Ka pa min vuakna avàng chuan ni tin kawr bântluan ka ha ziah a, ka taksa lang lo thei tùr ber thawmhnaw ka inbel țhin. A duk hi a reh chian phawt loh chuan ka inhâk deuh thûn reng a ngai, inlêng rawn kal zauh zauhte hian zawhna min zawh palh hlauh chuan chhàn a harsa duh àwm êm mai.



Kan khuaa ka awm ta ringawt chu zawhna ka dawng tam ta réng, Chawlhniin ka inkhâwm lo thei bîk si lo va, chutah chuan zawhna ka dawng țhìn, a rûk tak chuan hrehawm ka ti, ka zak ve tho bawk.



Zanriah kîl laiin ka pa chuan,"Ka thu zawm loh hrehawmzia chu i hre chiang tawhin ka ring, kha pa kha theihnghilh hmiah la, hmuh leh chhin pawh tum tawh miah suh ang che," a ti a.



"Ka pa, ka hmangaih a ni, min mamawh êm êm bawk," ka ti, ka inring hman lo, ka kâ ațangin a lo chhuak tawp.



"Ka sawi chu i hre lo em ni?!! Chutiang thu chu i la sawi ngam cheu maw?" tih leh min rawn ben chu a rual nghâl zat a. Ka lo indanna lamah ka bân dinglam bawk chu a rawn vai fuh leh ta, a na vawng vawng mai.



"Bawihi pa, inbengdai teh!" tiin ka nu chu ka bulah a rawn ding vat a, ka bân chu a rawn chawi kàn deuh chuan ka lo rûm chhuak hawk, ka insûm hman lo, a na lutuk ringawt!



"A zak lo êm mai, min zah bawk si lo!" ka pa chuan a ti leh a.



"Ka pa, ka hmangaih êm a ni. I rin ang khân ka awm lo asin, thil i hre sual a ni,"ka ti, heti taka ka huaisen ta mai hi mak ka ti! Ka pa thinrim hi ka hmu khât khawp mai a, thinrim taka min han melh rùn phei chu, nuam lo tak hi a ni ringawt.



Mahse, ka paltlang a ngai si.



"Țawng tawh suh!"



Thla khat zet a liam ve ta. Essa lah thehhmeh ang mai, a reh vung vung. Mak a ti ngawt ang chu! Ka phone ngai si lo va, aniin min rawn phone țhin pawh ni se ka phone a chhe daih tawh si, a beidawng tawh viau ang. A thin pawh a rim ngei ang le, tih theih ka va nei si lo êm!



Ka kut chu a dam țha thei tlat lo, ka hmang lui tho, ka khawr êm êm a, a dam lo chung ka hman luih vàng nge a kawih phahi deuhin ka hre nghe nghe.



Hmangaihna avàng chuan lo kawi mai mai teh se!



Ka pain Essa chungchâng a sawi chhuah apiangin ka thil sawi ngai kha ka lo sawi ve ziah a, a thin ka tiur thar ziah. Kut erawh min thlâk ta êm lo, ka nu vàng ka ti lo thei lo.



Ka kut dam thei ngang lo chu Lungleiah entîr tùrin ka kal, chutia min thlah fâl ta mai chu mak ka ti khawp mai. Hmasáwnna rahbi pakhat chu a ni ka ti lo thei lo, min chhuahtîr phal tlat.



Naua'n min kalpui, min khawngaih tih ka hre reng; mahse, eng mah a sawi chhuak lo.



Essa ka ngaihtuahnaah a lian khawp mai. Hmuh ka châk, biak ka châk bawk. A number kha ka vawng thei tlat lo va, biak ngaihna ka hre lo. Bia pawh ni ila thil sawi tùr a tam dâwn si a, biak pawh loh mai hi a țha zâwk hialin ka ring, tunah chuan a lakah thu dik ka zêp thei dâwn tawh si lo.



Ka kut chu engtin vak an lo ti lo, ka entîr tùr ber a lo zin daih a, a fuh vak lo. Damdawi min chawh deuh tawp ringawt.



"U, Essa kha a rawn phei asin."



Naua chu mak ti takin, ngun zetin ka en reng ringawt!



"Rawn kal a tum a, thil engkim ka hrilh fiah ta ringawt alawm. 'I kal a nih chuan ka u tawrh belhtîr i duh tihna a ni ang' ka ti a, chu chu a ngai ngam bîk lo a niang e, Aizawl lamah a phei ta a."



Thu dik a hre tawh maw? Eng angin nge a ngaih ang le?



"A dam țhat hmel em?"



"Dam țha a ti alawm, a hmel erawh a phelh deuh, a țawng tam lo khawp, ka khawngaih roh riau a," Naua chuan a ti leh a.



A hre thiam ang em? A hriat thiam hrâm ka beisei. A bulah awmin hrilh fiah vek thei zâwk ila...



"Phone keh chhiaa sim card kha ka la a, i duh em?" tiin min zâwt a.



"Duh hran lo ve, awmzia a awm chuang lo," ka ti sap a.



"Ka pa chu a zia deuh tawh em?"



"Ka hre chiah lo; mahse, hei Lunglei keimah chauha ka rawn kal a phal tawh chu a nih hi," ka ti sap a.



"Tuar fan fan rawh, i tuar chhuak mai ang."



Ka nau ngei pawhin min han fuih ve ta chu a nia! Ka ti thei ngei ang, ka thei tùr a ni.



Ka pa rilru hi ka hneh ngei ang.






*HRIAT CHIANNA NEI LOVA MI CHUNGCHÂNGA THU TLÛKNA I SIAM KHÀN AN NIHNA A TIFIAH LO VA, NANGMA NIHNA DIK TAK KHA A HAI LANG ZÂWK A NI*

[Ngaia]

☆2020☆ - 44 By Dingdi Pachuau





Sangzuala nèn kan inhmu hlawl lehnghâl, ka rin loh lutuka hmu ka ni bawk a, min tihlim ngei mai! Țhian hlui ka hmu a nia, hun hrehawm tak ka hmang a, nuihna tùr pawh ka thlahlel ve asin.



"I la dam maw?!" min ti.



"Dam ve țâwk țâwk. Tûnlai Lungleiah i awm nange?" ka ti a.



"Aw, ka zin deuh reng a."



A țhat hlauh chu, kan chanchin pawh a hre lo deuh ang, a tihzia lutuk ringawt.



Naua'n min kalsan.



"Engtizia nge i bân chu?"



"Ka tina palh maw le, ka entîr a."



"A va zia lo ve! Chuvàng em ni i hnaah i kal loh? Ka va khawngaih che ve aw..." a ti vang vang a, chutah," Kan inhmu khât sia, chàwl ila?" a ti leh zat a.



Pawi ka ti lo, hun ka la nei tho alawm le.



Restaurant kan luhnaah chuan mi pawh an lo tam khawp mai a, țhutna pawh a lo awm lo țêp a ni; mahse, vànneihthlâk takin, nula pahnih chu an țhutna ațangin an lo tho chiah, kan luah ve nghâl.



Sangzuala chuan thil dang min sawipui vak ka hlau deuh a, chuvàngin, a bialnu chanchin ka zâwt.



"Nang hi, i thîk deuh a ni lo maw?" nui sûng chung chuan a ti a.



Nui hawk chung chuan," I ti râpthlâk e a! Kan inhmu lo rei tawh sia, ka hre châk ve alawm," ka ti, a fiamthu a ni tih ka hre tho a, nuam lo ka ti hran lo.



Min hrilh ve mai bawk. A titi bawrh bawrh reng a, ka rilru ipik deuh pawh a zia deuh hawk. Sangzuala bula awm hi chu a hahdamthlâk, fiamthu a duh a, nuihna tùr a tam bawk.



Ka haw kawngah erawh Essa ka ngaihtuah leh vang vang. Ka chanchin chu a hre ta a, engtin nge a ngaih ang? Min khawngaih ve chuan ka ring phawt a, min hmuh tuma a rawn kal lui lo chu ka lâwm khawp a ni. Rawn kal ta se, buaina thui zâwk ka tâwk thei si a.



Zanriah ei laiin ka nu chuan,"I kut chu vêng tàwpa Pi Vuani saw kan zùttîr chhin dâwn nia, a thiam ve tih vawiina an sawi ka hre tlat," a ti a.



"Ka inentîr tawh tho kha, damdawi ka ei ang a, a țha vat mai ang," ka lo ti a.



Ka pa chu a ngawi reng.



"Ka va hruai dâwn che nia, a lo thiam tak tak phei chuan i pa dàr na deuh pawh hi zût se a țha ang," a ti leh a.



"Ka ring mai mai lo," a lo ti hluk a.



"Aw, zùttîr chhin chu a pawi hleinem, a lo dam hlauh chuan a tihzia dâwn êm asin," ka nu chuan a ti leh a.



Ka nu chuan min kalpui tak tak. Ka chhuak khât lutuk a, kan khuaah ka awm tam lo nèn, Pi Vuani chuan hriat pawh min lo hre țha lo. Kei erawh chuan ka hria, a tupa nèn an chêng dùn, a fate khaw danga mite'n an rawn kan țhìn.



Pi Vuani chuan ka bân chu a'n thlêk vang vang phawt a, a'n chûl chhin leh a, chutah, na lo tea hmetin," Engtia i tihnat nge a?" tiin min zâwt ta thut.



Ka âng zuau; mahse, ka hre chhuak leh thut a," Miin min vaw fuh palh a," ka ti ta ringawt. Dik lo deuha ka sawi chuan, a lo thiam tak tak a nih bawk chuan a hre thiam vek tho ang, dâwt ka sawi ringawt ngam lo a ni.



"Rin aiin a na reuh a nih hi, zùt vak chi pawh a ni lo, dimdâwih taka enkawl a ngai zâwk a ni, hei i bân pawh hi a tikàwi deuh tawh a nih hi tiraw?" a ti leh cherh cherh a.



"A dam thei ang tiraw, ka pi?" tiin ka zâwt vat a.



"Aw, dam thei e; mahse, hun erawh a duh rei deuh ang, chêtpui vak suh aw," a ti leh a.



Zùt dam chi a nih si lohah chuan kan haw hma ta mai, ka nu nèn rei vak lo chu an titi hman tho.



Kan haw chuan ka nuin ka pa hnênah chuan thil awmzia a hrilh chu ka hre reng.



Ani lah chuan," Thu âwih loh rah chu a țha lo rêng asin, ka thu chu âwih se chuan khatiang khân kut ka thlâk lo ang, tunah pawh miin an sawi dàn in hre hauh lo," a ti nghut nghut a.



"Mihring chuan chanchin țha lo lai sawi nuam kan ti zêl alawm, thu dik ni hauh lo pawh sawi kan duh zêl a," ka nu chuan a lo ti a.



"Eng chu maw thu dik ni lo chu?"



"Thu dik hre chiang lovin an thu tak sawi țhìn alawm."



"Sawi theihin a awm tihna a ni mai," ka pa chuan a lo ti leh hlur a.



"A dik alawm, sawi theihna tùr chu a awm țeuh ang, mihring chu famkim lo vek kan ni si a, a țha lama kan nun hrâm hrâm hi chu a pawimawh khawp mai," ka nu chuan a ti leh a.



An ngawi deuh vang vang a, ka nu vêk chuan,"Insiam țhat ngai lo mihring kan awm loh vàngin kan chhûngkua pawh insiam țhat kan ngai. Kei pawh insiam țhat ngaihna lai chu ka nei țeuh mai. Ka zaidam tâwk lo va, i rawngbàwlnaah ka tàwiawm tâwk lo che, ka thatchhe hle a ni. Kohhran upa nupui nunin ka nung zo tâwk lo, chutiangin nang pawh kohhran upa mai ni lovin Pathian mi, kohhran mite innghahna tlâk leh hruaitu, an nèl leh mi sual ber nia kan ngaihte pawhin an biakràwn a an rawn tlûk luh ngamna i nih ka duh. Chutiang ti thei tùr chuan kei pawh hian ka țanpui tâwk lo che tih ka hria, zanin chu ka inhmu chhuak uar uar mai, tlin lohna lam hlîr a ni," a ti barh barh a.



"Kan fanu thu âwih lohna hian min tichau zo a nih hi," ka pa chuan a ti leh a, ngawi rengin ka room bang nghèng chuan an titi chu ka lo ngaithla reng a.



"Nula a ni a, bialpa țha tak nei se, pasal țha tak nei bawk se tih chu kei pawhin ka duh, ka duh takzet. Chu chu Pathian hnênah pawh ka thlen ţhìn, hrilha zilh chauh hi kan tih theih chu a ni. A rilru kan thununsak thei si lo va, a rilru kan tihnat viau phei chuan kan inchhûng hian leng ve lo niah a inngai tlat thei a ni, țha tê tê, thinrim lovin sawi tlãng ila a țha maw le," ka nu chuan a ti leh dap dap.



Ka pa chuan min rawn ko ta, thinphu dup dup chungin an awmnaah chuan ka phei ta a.



"Eng vànga ka thu âwih lova kha pa kha la úm zui nge i nih?" min lo ti nghâl.



Ka ding deuh dat a; mahse, tûn hi ka tân hun țha a ni tih ka hria, bawhpelh ka duh lo.



"Ka pa, ka hmangaih a ni. A nun dàn zawng zawng pawh ka hria; mahse, ka kalsan thei lo, min mamawh êm asin," ka ti ta a.



"I zak miah nange-"



"Sawi zo ve phawt se?" ka nu chuan a lo ti vat a.



"Sawi zo mah se, awmzia a awm dâwn chuang lo. Khatiang mi tla hlang lutuk leh mi țha lo kha pasala a neih hi ka phal lo a ni tawp mai," a ti leh tùn tún a.



"A pasal tùr a ni kher nâng," ka nuin a lo tih chuan ka pa vêk chuan," Ni lo tùr phei chu țhen vang vang tùr, intihbuai a ngai lo," a ti leh a.



"Ka pa, pasal tùr atân pawh ka duh asin. Ka hmangaih a, Pathianin min ruatsak a nih ka ring hial, a nun a ho pawh a ni maithei, a i khâwm ngai lo pawh a niang; mahse, Pathianin nun ho deuh pawh hi a hmangaih tho alawm, mi țha kher hi a hmangaih bîk chuang hleinem," ka ti ve ta a.



"Duh tâwk teh! Khatiang nun tladah kha nang hian i chhanchhuak lul lo ang e, a zu in pawh i simtîr thei dâwn lo, ka hria alawm, buaina zakhua tùr mai mai!" ka pain a tih chuan," Kei chuan ka thei lo pawh a ni mahna; mahse, engkim ti thei Pathian kan nei alawm, kan ring tùr a ni dâwn lo'm ni? Chu chu nang pawhin min zirtîr țhin kha," ka lo ti ve thung.



Min melh rum nasa; mahse, ka hlau vak bîk lo, min vaw leh mah se a pawi lo, ka thu sawi hi a dik si a.



A țawng tawh lo, ka nu chuan," A dik alawm, Pathian hi kawng engkimah kan ring ang a, keini mihring hi Pathian hman theihin kan awm thung ang. Engkim Pathian hnêna hlana mahni àwl tum veng veng chu a fuh bîk lo, kan thawk ang a, kan bei ang a, chuan Pathianin kan thawhna chu mal a sàwm mai dâwn a ni," a lo ti ve a.



"Inngaihzàwn lai ațanga zu a in chuan pasalah nei pawh ni la a nghei chuang lo ang, an ngaih a ngam hnu phei chuan an ti nasa sauh duh tih hre ta che," a ti leh ta a.



Ka hnial hran lo, chutiang mi chu an awm tih ka hre ve tho si a.



"Engkim hi i tâna ti vek ka ni, ka fanu i ni a, nakina i buaina tùr ka hmuh lâwk vàng a nia he pa hi țhen tùraka duh che," ka pa chuan a ti leh a.



"A dik chiah i pa sawi chu. Kan fanu i ni a, pasal țha tak neia fa țha tak tak nei tùrin kan duh che. A huat vàng chea ti a ni lo tih i hria tiraw?" tiin ka nu chuan min rawn en a.



Ka lu ka bu nghat.



A dik, min haw lo, ka hmakhua a ngaih vàng a ni. Ka hmakhua a ngai, min hmangaih. Min hmangaih tih ka hriat vàng alawm ka huat loh, ka pa a ni a, ka haw thei lo. Min hmangaih avàng tak hian alawm ka hmakhua hrehawm tùr a lo dàwn lâwka min ngaihtuah êm êm. Min hmangaih takzeta keiin tumruh taka Essa neih ka dìl char char chuan a phal ngei ang tih ka ring tlat bawk.



*******



Ka lung a va lêng thei tak! Essa ka ngai ngawih ngawih, túnlai phei chuan keimah chauhin inah ka awm țhin a, ka khua a har ngawih ngawih. Ka bán a nat vàngin hna ka thawh ve an phal si lo va, thawh luih ve ka tum pawhin ka nu ai mah hian ka pa hi a lo pàwr a.



"A ngai lo, dim a ngaih kha! A dam fel hunah i thawk țeuh ang," a ti hlur ziah. Tlêm tlêm hi chuan a nêm ve deuh deuhin ka hria, ka suangtuahna mai a niin ka hre lo.



Kan khuaa ka awmna pawh thla thum chuang a lo ni ve ta. Maremi pawhin kan chanchin chu a hre vek tawh a, min khawngaih khawp mai; mahse, tih theih a nei bîk lo. Essa erawh ka bànsan lo tih a hria a, a chanchin lo ngaihven a tum thu a sawi, ka ngaih a țha deuh ringawt, ani hi chuan a tum phawt chuan a hre thei ang tih ka hria a ni.



Ka ngaihtuah thui khawp mai. Naute an han nei ang a, nupa hlim tak an ni bawk si a, an hlim a famkim ngawt ang! Kan inang lo dâwn teh e, keini ve hi, heti mai hi kan ni ta si.



Mahse, ka bei erawh a dawng hauh lo.



"Heti hi in ni ta si a, i pa chuan phal lo viau dâwn mah se naute kan neih hunah tal chuan rawn zin thei la ka ti, i pa ka lo dìlsak ang che," a rawn ti a.



"A, nia, a țha alawm, han dam țha phawt ila," ka ti ve a.



"Essa chu ka la hmu miah lo a nia, ka chhuak khât a, ka chhuah ve chhunah lah hian a workshop lamah khân ka kal khât tawp, ka kal ve chhunah lah amah a lo awm si lo, mi dang ka zawh khân 'A zin' an tia, ka zâwt thui lo va; mahse, lo lungngai suh, ka lo thlithlai tho ang," a ti leh a.



"Ka lãwm e."



Zin chhuaha vah harh pawh a ngai ve alawm, kei pawh hi thei ila chuan ka zin vang vang châk asin!



Kan pastor nèn pawh ka inhmu ta. Kan khuaah innei an awm a, chutah chuan pastor a nih angin inneite a rawn invawntîr. Inkhâwm ka duh lo khawp mai a; mahse, țhalai ka ni ve si a, phûr lo zetin ka kal.



Pastor fel tak a ni ang tih ka ring; mahse, ka duh lo. Bâkah, pastor nupui nih hi mumangah pawh ka la mang chhin lo hrim hrim! Ka nungchang pawhin a tlin hek lo, pastor leh a nupui dinhmun hi chu dah sâng tak ka ni. Pastor nupui ni tùr chuan ka nungchangah, ka țawngkamah leh nu leh pa thu âwih kawngah ka tla fel dèr, tunah pawh pa thu âwih loh vàngin hna pawh ka chawlhsan rap rap a nih hi maw le.



Essa ka hmangaih a, ani pawhin min duh. Hausa lo mah se ka hmangaih a ni, a eng lai ber hi nge ka hmangaih chhan ni ang aw ka ti țhìn. A famkim lo, kei pawh ka famkim lo; mahse, min mamawh êm êmtu nèn hian famkim lo ve ve chungin kan induh tawn miau a ni.



Ka pa kohhran upa a hmel hriat ber a nih vàng nge, kan inah ka pain a rawn pènpui. Ka pa idea chu ka hre thiam ru reng, țha takin ka lo be tho a; mahse, a mawi tâwk bâkin ka be lo, Essa rinawm lohsan ka tum lo.



Zanriah kîlnaah ka pa chuan,"Kan pastor felzia hi chu aw, pasal innghahna tlâk tling tak tùr a ni," a ti leh kher a.



"Fel khawp mai," ka nu chuan a lo ti ve mai a.



Ka ngawi reng.



"Pasal atân chuan ani tluk hi an awm lo ang, ngaih a țha veng veng dãwn asin, mi sual a ni lo tih a lang reng bawk si," ka pa chuan a ti leh a.



Pastor chu a sual tawp nâng, pastor tih leh mi sual tihte chu hmeh pawh a inhmeh lo. Pastor ber a sual te chuan a beràm enkawlte engtin nge kan awm ang?



Zanriah ei khamah ka pa phone-ah Maremi'n min rawn call a.



"Lo zin rawh, i pa pawh ka dîl tawh alawm."



Ka pa chu ka melh zauh.



"Chuan?"



"A phal vak lo va; mahse, ka dîl lui a, Essa nèn inhmuhtîr ka tum vàng che a ni lo tih ka hrilh hnuah a phal ta hrâm a," a rawn ti a.



Ka ngawi vang vang phawt.



"Lo zin rawh aw, hmuh i châkawm alawm, min hmu châk ve lo em ni? Ka rai puar nasa tawh a nia," a rawn ti leh a.



Ka nui hak a.



Ka hmu châk, ka pa phone ve hi chu video call pawh a theih ve si loh a, inbiak tawp hi a ni mai.



"Chuan, a rûk têin tu emaw pawh kan hmu maithei asin," a rawn ti sar sar a.



Ka kut tin ka seh nar nar.



"Ka hman hunah ka lo tum dâwn nia," ka ti ve ta a.



"Yess!! U Hruaia pawhin a hmu châk tawh lutuk che, kan ngaih thu che hi kan sawi fo asin, i lo zin chuan rei tâwk i chàm a ngai thung ang," a rawn ti leh sar sar a.



"Ka hman hun ka la rawn hrilh dâwn che nia," ka ti. Hman loh tak tak chu ka nei lo nain inngaihtuah phawt ka duh, zin chu ka châk asin! Châk tak ka ni; mahse, ka pa mitmei ka vêng.



Phone ka pêk chuan," Engtikah nge zin i tum ang?" a lo ti hmuk a.



"Rem in tih chuan thla tàwp lamah hian em niang ka ti deuh a," ka ti a.



"I remchàn hun kha a ni mai, ka duh loh zâwng erawh chuan i awm loh ka ring thung ang," a ti leh a.



"Ka pa, i duh loh zâwnga awm hi ka tum lo asin. In zahna thlentu nih hi ka duh miah lo, min hmangaihin min ngaihtuah tih ka hria. Chuvàng tak chuan in duh loh zâwnga awm hi ka duh bîk lo; mahse, Essa hi ka hmangaih lo thei lo si a ni," ka ti a.



A ngawi ngul a, ka nuin min rawn chhâng ta thung.



"Bawihte, i tâna țha tùr a nia i pain a hrilh țhin che, kan hmangaih che a, i nawmna tùr leh i hmakhua a ngaih vàng a nih kha," a lo ti ve a.



"Ka hria alawm, ka nu. Ka hmakhua in ngai a nih chuan khawngaih takin ka duh hi chu min pawmsak hrâm ula," ka ti lêt a.



Ka pa chuan," Tu hi nge i chhun a i luhlul êm êm mai ni?" a ti hluk a.



Ka nu chuan nui chung hian," Nangmah maw le, kei chu ka luhlul ve hleinem," a lo ti vat a.



"Hetiang êm êmin ka luhlul lo."



Ka zin a phal ve tawh hrim hrim a, hma ka sâwn zêl e. Ka tum hi ka tihlawhtling ngei ang.



Tlai khat chu eirawng ka bàwl laiin lehkhathawn ka dawng ve nawlh mai, dâkpu chuan min nuih var var pahin," Love letter a ni chiang mai," a ti sup a.



"Ni hlauh se ka ti hle mai," nui chungin ka ti ve thung.



Mak ka ti! Lehkhathawn tûnlai hun angah kan dawng tawh ngai si lo va, a mak ka ti lo thei lo.



Ka han hawng a, thlalâk a lo awm tel, kutziak hawrawp ai chuan thlalâk chuan ka mit a lâk hmasak vàngin ka en phawt.



Ka en chiah chu mak tiin ka meng kâwk mai!



Sangzuala nèn restaurant-a kan chawlh lai thlalâk kha a ni a, kan innuih lai tak a ni zui.



Tu min lo thawn nge? Ka en ta vat.



Essa.






*ZÀWI TÊ TÊA HMALAM PANA KAL HI HLAU SUH, HMASÂWN MIAH LOVA DIN RENG AIIN A ȚHA ZÂWK*

[Ngaia]

☆2020☆ - 45 By Dingdi Pachuau






Hlauthàwnna rilru ka pu nghâl, he thlalâk hi engtin nge a hnên ațanga ka dawn daih theih ni?



Kut khùr dar darin lehkhathawn chu ka han chhiar a.



Kat,



Kha pa nèna in thlalâk dun ka hmuh veleha ka awm dàn tùr i ngaihtuah thiam lo a nih ka ring. Kan inhmuh loh chhúng hi a rei tawh êm a ni tiraw? Mipa dang i lo nei reng si, mi pângngai awm dàn ka lo zir hi chu khawvêla thil pawi ber a lo nih hi.



Hlim rawh, nui zêl rawh. A țha, kei pawh ka duh dàn ang chiah zêlin ka awm tawh ang, vènthàwn ngai leh thil țha lo ka ti tùr min break-tu tùr i awm tawh lo bawk a.



Kat, i hming lam nuam ka tih êm êm țhin pawh hi ka tân lam a rem tawh lo ang, ka tâ i nih lai kha chuan ka lam ning ngai lo; mahse, tunah erawh hming pakhat ve mai a ni ta.



Thih hnu piah lam ram hi a awm a nih ngai chuan mi pângngai ka nih ve tawh ka beisei, kan inhmuh ngei pawh ka ring, ka lo la ko țâlh ang che, 'Kat' tiin...



He thinlung i kalsan tâk, pawisak nei lo leh râwvâ hian chhanchhuaktu a mamawh lo, a mamawh ngai tawh lo ang.



Damlo suh, hlim ang che.



Essa



Ka maimichhîng vang vang, thil dik lo hi engati nge ka chungah hian a thlen ziah mai ni? A thleng tam ve tawh alawm.



Lalpa, min pui teh, harsatna hi engtin nge ka pal tlang theih ang? Thil pawi tak a thlen hma hian min chhanchhuak hrâm teh. A nunna lâk bo phal suh aw, aw Lalpa, ka ngèn ngawih ngawih che, ka hmangaih êm asin!



A thil ziah inkahpah deuh nuaite chu, rilru buai takin a ziak ve ngei ang chu!



Ka mittui a tla zawih zawih a, ka âwm a rawn tâwt mup mup, thâwk harsa ka ti leh ta, ka buai leh ngêi dâwn tih ka hria.



Aw Lalpa, ka thih hmain Essa nunna la bo suh aw, a thi thei lo. A natna lak ata ka chhanchhuah a ngai asin, ka thi dâwn a nih rau rau chuan Essa natna hi ka chungah hian bel zâwk teh.



Ka thinlung chu a rûm. Ni lo, kei pawh hi thi thei ka la ni lo, Essa ka chhanchhuah a ngai, thu dik a hriat a ngai a ni, kei lo chhanchhuaktu tùr an awm lo, dik lo taka a chêt hmain ka tih tàwp vat a ngai.



Lalpa, chakna min pe rawh.



Mahse, ka che thei lo, ka khawng tlat, ka khaw hmuh a fiah lo deuh țan. Ni lo, hetiang hian ka awm thei lo, ka chêt chhuah a ngai.



Ka thaw kâwk kâwk rî chu ka nuin a lo hria a ni ngei ang, a rawn tlân chhuak vat a, ka hmu ruai ruai chauh a ni ta, ka che sawn thei si lo.



"Bawihi? Bawihte?!! Engtin nge i awm?!!! Bawihi..."



Hla tak ațanga min ko vau vau ang chauhin ka nu aw chu ka hria, ka mit sulh sulh, ka khaw hmuh a thim ta riai riai.



Ka chàu, ka chàu takzet. Ka mit pawh ka meng țha peih lo. Țawng ri leh mam mam țhìn chu ka hria a, ka ning takzet. Chauh nèn, țawng ri hriat pawh chu ka peih lo, hmun fianrial zetah țawng ri hriat theih lohnaah ka awm châk!



*******



Taksa dam țha varin damdawi in ațangin kan chhuak, ka rilru erawh a damlo nasa hle thung. Ka taksa dam mah se, thahrui a awm lo, ka chak lo ngawih ngawih. Ka țawng peih lo va, min biak pawhin ka țawng chang chang chauh a ni.



Essa hlîr ka ngaihtuah avàngin miin min biak pawh chuan ka lo hre lo țhìn a, min biak chhàn ka peih loh vàngin ka muhìl der ziah. Ka ngaihtuah ngut ngut a, chu chuan zàn min timuhìl thei lo. Thil ka ei thei lo va, chuvàng chuan ka chak chhuak thei lo bawk. In chhûng dunga kal ringawt pawhin ka hah chu a ni.



Ka nu ka timangang, ka chhûngte zawng zawng ka timangang tih ka hria; hrehawm ka ti hial zâwk, ka inthiam lo ve tawh lutuk; mahse, chuvàng mai chuan thil ei châkna ka nei chuang lo va, engkim mai chuan ka luak a tichhuak vek zâwk a ni.



Ka uin min ngaihtuah êm êm a, inah pawh an nupain min rawn kan zak zak mai. Min ngaihtuah êm êm si a, hrehawm ka va ti tak! Hrehawm tih avànga chak theih ni se chuan aw... ka lîm kual nasa tawh ngawt ang!



Thla khat zet ka pâwn ka chhuak lo. Essa chu engtin nge a awm tâk zêl ang, chanchin țha lo hian min rawn dêng ang tih ka hlau, tih theih ka neih loh vàng chuan ka țawngțai kûr dup mai a; mahse, chu chuan ngaihțhatna leh beiseina min pe chuang rêng rêng lo, ka thaw a ipik hluah hluah.



Zan khat chu ka ute nupa leh ka nu leh pa chu ka room chêp takah chuan an rawn lût a, kei chu khumah zangthal ât hian ka lo mu a. An rawn luh tâkah chuan muangchâng hian ka tho a.



"Thawh kher a ngai hleinem," ka u chuan a ti a; mahse, thoin khum lu lamah chuan ka țhu ta tho.



"Bawihi, hetia i awm chhan hi ka hria asin, a pawi ka ti takzet a ni," ka pa chuan a ti ta sap a.



Mit khap miah lo chuan ka pa chu ka en a, eng nge hetia ka awm chhan chu ni ta? Ka chak loh vàng a ni mai alawm, thil ka ei thei tlat lo va.



"Keimah vàng a ni tiraw?" a ti leh a.



Ka mit ka khap ta sak a.



"Nangmah vàng a ni lo," zàwi sap hian ka ti ve ta a.



"Ni lo, a bul ber chu keimah vàng a ni, min ngaidam rawh," a ti leh a.



Ka nu ka en a, khawngaih hmel tak hian min lo en a; mahse, hlim hmel tak erawh put tum a ang ka ti. Ka u ka en leh a, ani erawh chu a kûm deuh tlat a, a hmel ka hmu chiang thei lo.



"Fanu țha lo tak ka nih avàngin a pawi ka ti, buaipui ka ngai reng bawk si-"



"Ni lo, Bawihi, ka thiam loh vek a ni, ka duh dàn ka lo tilal lutuk a, ka fanu ka duat êm êm țhin kha kut hial ka thlâk a.." a tih lai chuan ka u chu a lo insût hraih a.



"I thu ka âwih loh vàng alawm, ka pa. Khami chungchângah kha chuan thiamthu sawi tùr ka nei lo, i duh loh zâwng anga ka awm vàng a nia," ka lo ti, thâwk ka la leh rih.



"Essa lehkha rawn thawn che leh thlalâk kha ka hmu asin," ka nu chuan a lo ti ve a.



"Thil țha lo a nih kha, hmuh pawh ka duh tawh lo," ka lo ti sap a.



Ka u chuan," Mahse, i hmangaih a ni lo'm ni?" a lo ti vat a.



Ka pa melh zauh pah chuan,"A dik alawm, a tân tih theih erawh ka nei tawh lo a ni," ka ti sap a, hnuai lam ka bih ta ngar a.



"Engah nge i neih loh ang? Inti chak ta che, i chak chhuah phawt loh erawh chuan a tân tih theih chu i nei hauh lo ang,"ka rin loh deuhin ka pa chuan a ti ta khauh a.



Ka en reng, a thil sawi chu a sawi ni awm lo tak a ni.



"Ni e, a tân thil tihsak thei tùr chuan chakna i mamawh alawm. A thinlung chhanchhuak tùr hlauh phei chuan harsatna eng emaw tal chu i pal tlang a ngai dâwn, chakna i mamawh. Chu chakna nei thei tùr chuan ei tùr țha ei țeuh țeuh la, Aizawlah kalin a bulah thil awmzia i sawi fiah mai dâwn alawm," ka u chuan a lo ti leh a.



Nguai raih hian," Awmzia a awm tawh chuang lo," ka ti sap a.



"Engati maw?" ka u chuan a ti leh a.



"A ziah vek kha."



"Thil ka ti pawi zo vek ta a nih hi," ka pa chuan a ti vang vang a.



"Inthiam lo suh, ka pa, i thiam loh a awm lo," ka ti ve thung.



"Engati nge min huat miah loh a? Ani nèna pawt țhentu che kha ka nih hi."



"Ka pa i ni miau alawm."



Engkim a nih dàn tùr a ni zo vek tawh, huatnain ka thinlungah hmun a chang zo tawh lo. Mi haw thei tùr pawhin chakna ka nei zo tawh lo a nih hi.



Maremite pawh ka chanchin hriain an rawn zin ta zâwk, zin phei tum kha ka ni ve reng a nia, kan hmalam hun hi kan lo hre lo êm a lo ni.



A puar ve tawh khawp mai. Ka hmuh tirh chuan ka nuih a za ve hle a, a hnu lamah erawh ka țah a chhuak ta thung. Mittui tla pûr chung hian ani pawhin min en ve reng, chhia min ti lutuk a nih ka ring. Thil ka ei țhat loh avàng leh zàn ka mut tlèm avàngin ka chhe hle si a.



"Engah nge in țahte a chhuah mai mai? Dam takin in inhmu tawh a, hlim taka hun hman zâwk tùr alawm," Hruaia chuan a lo ti vat a.



Zàn mutnaah pawh kan pahnih bawkin kan mu dùn leh. Kan mu deuh chauh tihah chuan ka țap chhuak ta hawk, ka thinlung tâwt lutuk hi ka mittui hian a dang zo tawh lo a ni.



"Min ngaidam rawh, i tân ka țangkai lohzia ka hriat hian i țhian ni tlâk pawhin ka inhre lo," a ti sep sep a.



Eng mah ka sawi thei lo, ka inhnît hlawp hlawp ringawt. Hetia ka țah chhuah loh hi chuan ka thinlung a na lutuk si a, țah chhuah hian a veng deuh mahna.



Duat takin min kuah a, ani pawh a lungchhe ve tho. Maremi ka hmuha a bula ka han titi leh thei te, a pasal nèn an inhmangaihna rah a dula lo lang chhuakte leh min ngaihtuah taka a han țawng ri ka han hre leh thei hi ka lung a chhe lo thei lo. Essa pawh khân mi dang ang ngawt chuan a en bîk lo chu a nih kha, ka aiawh tùr hialin hostel-ah pawh a lo awmtîr a nih kha.



Mahse, Essa min hriat chhuahtîrtu a ni leh tlat mai si, ka lung a tichhe lo thei lo a ni. Pasal hlim takin a nei a,a chhûngte remtihpui thlapin, kei ve hi? Tunah phei chuan ka bei a dawng ngawih ngawih tawh chu a nih hi.



Ka lungchhiat zualpui a reh hnu chuan ka thâwl deuh hawk chuan ka hria.



Zankhua deuhthawin kan titi. A chângin a thu sawi ka ngaithla a, a chângin dârkâr chanve deuhthaw ka thil sawi a ngaithla ve thung, inbunruahna ka mamawh êm a lo ni.



"Kan rualin phei ve la?"



"Ni lo ve, engkim a tàwp tawh. A bulah insawi fiah mah ila a âwih duh tawh lo ang, ngaihthlâk pawh a duh nâng, a rilru ka tina tâwk tawh êm asin," ka ti a, ka țap leh rih a.



"Mahse, chutiang a ni ringawt thei hleinem, thu dik a hriat a ngai alawm," a ti ve thung a.



"A ngaithla duh chuang lo ang, thu tàwp a sawi tawh alawm, ani thu tàwp sawi hi chuan a hlen ngeiin ka ring bawk. Marem, ka bei hi a dawng ngawih ngawih tawh asin. Tunah hi chuan dam thlâkhlelhna pawh ka nei tawh lo," ka ti leh sap sap a, ka mittui a hul thei rih lo.



"A duh viau chea i bulah danglamna a nei a nih chuan a ngaihthlâk duh ngei che ka ring a ni," a la ti fan a.



"A nei tawh lo ang, natna nei a nih kha hria la, a harsa lutuk tawh ang," țahna avànga hnâr ping țûp hian ka lo ti ve thung.



"Tih hma hauha harsat thu sawite chu, i inhmeh lo a nia. Chumi ti thei tùr chuan chakna i mamawh zâwk a ni. Ei tùr kan rawn ken che kha naktûk ațangin i ei char char ang a, i zia chho mai ang. Essa hmachhawn thei tùra i chak a ngai, chhanchhuah i duh țhin kha," a ti leh a.



"A duh tawh lo thung a."



"A duh ngei ang, a duh lo thei lo."



Âr a rawn khuan țhiai țhiai tâkah chuan," Muhìl tawh ang, i chau lutuk palh ang," ka ti a.



"Nang pawh, i țap nasa si a, i chau zual palh ang, naktûk lamah kan sawi țha dâwn nia," a ti a.



Ka pa nungchang inthlâk lutuk chu mak ka ti zâwk! Salvation camping-ah a lût a ni si lo, tuin nge a nungchang hi thlâksak ang le?



Ei tùr pawh tlêm tlêmin ka ei chho ve ta, regular taka ei leh in hun nei ka ni bawk a, ka taksa chhe lutuk tawh pawh tlëmin a zia phah ve ngeiin ka ring.



"Bawihte, i zin dâwn ta em?" Ka nuin a tih chuan ka la chhâng hman lo, ka pa chuan," Zin rawh se, vah khawthawn pawh a țha alawm," a lo ti thên mai.



Ka zia tawh khawp mai, zin tùr pawhin ka chak tâwk tawhin ka hria, ka zuam viau tawh bawk. Kumin chhûng ngeia Aizawl va zin pawh a châkawm alawm, Maremi pawhin naute a nei țêp tawh si a.





*HUN HI DAH KHÂWL THEIH A NI LO VA, HMAN RAL TÙR ZÂWK A NI. FING TAK LEH ȚHA TAKA I HMANG A NIH LOH CHUAN, ȚÛL LOVAH I KHAWH RAL MAI MAI TIHNA A NI*

[Ngaia]

☆2020☆ - 46 By Dingdi Pachuau





Phone ka neih loh vàngin zînglama Maremi ka phone bâk ka phone thei tawh lo, min lo hmuah ka ring ve tawp.



Kawng tluanin ka bula țhu putar lam ve tawh chuan fiamthu a thawh a, ka nui ka nui ve. A tìrah ka peih loh tehlul nèn, a chhuk tâk hnuah chuan khua a tihar sawt mai.



Maremi chuan min lo hmuak tak tak! A dul a puar luah tawh si a, ka khawngaih reuh mai mai. Kea kal kual vêl a harsat ve tawh dâwn tehlul nèn , ka inthiam lo nghâl.



Ani lah chu, min hmuh chuan a nui nghâl var var. A mitmeng ațang chuan a hlim tih a hriat theih mai, kei pawhin a hlim hmel ka hmuh chuan ka hlim, ka nui ve tho.



"I lo zin tùr hi kan lo inpuahchah lâwk nasa a nia," step-a kan kal lai chuan a ti a.



"A va ho mai mai aw...!!!"



"Ho lo ve, hlim taka siam che ka duh alawm," a ti thung a.



An lo inpuahchah dàn chu ka rin loh lam daih a ni! An gate-ah banner lian angreng deuh hi an lo târ a, chutah chuan 'Zopui, kan lo làwm a che' tih hi hawrawppui mawi zet hian a inziak a, Maremi nèn kan thlalâk, hlim taka kan nui lai chu lian zetin a chuang kalh bawk a.



Ka mit ka khap sak sak a. Thil tak tak chu a ni ngei si, engtin nge hetiang hian a tih theih? Min welcome dàn chuan min tilâwm hle, hetiang hi ka phû hauh lo.



"Engtin nge i tih theih?"



A nui sen sen a," Kan chhûngkuain kan inbuatsaih alawm, ka nu phei chu a phûr râp, a hot theihzia chu i hriat kha!" a ti sap a.



Kawngkaa ka lût chiah chu music a lo ri riai riai a, makti zet leh a ngaihna hre lo zet hian ka hawi ho mai!



Hruaia nu ngei mai chuan a hla phuahchawp ka ti mai, chumi sa chung chuan min rawn pan a, ka kutah kaiin," Kan lo lãwm a che," a ti sap a, a hla phuah bawk chu a sak chhunzawm leh nghâl a.



Hruaia'n nui sâng chungin," He in tlâwm takah hian kan lo làwm a che, i chhiahhlawh ka ni e," tiin kùn chung hian chibai min lo bûk bawk.



Nuih tùr nge țah tùr? An fiamthu leh mi an lo lawmna, an inpuahchahna chuan min tilungchhe țêp, hei hi ka beisei lo asin.



"Ka lâwm e, ka lâwm lutuk..." tih bák sawi tùr ka hre lo, min tihamhaih zo vek!



An bula awm a va hahdamthlâk tak! Ka dam sawng sawngin ka hria, ka hahdam a, chakna ka neih belh sauh bawkin ka hria.



Ka room tùr lah chu an lo chei nuam lutuk ringawt! Ka rilru chuan' Heti tak hian ka zin phei tùr an lo inbuatsaih chu a ni si a, an tân hian eng nge ka nih? Hetiang thil zozai min tihsak tùr hian an chungah eng thil nge ka tihsak ni?' tih ka ngaihtuah a, ka hre hauh lo. Ka chunga an felna leh an țhatna hi a lêt tam takin Pathianin a rùl ngei ang tih ka ring.



Min tihhlim chu an tum khawpin ka hria, nge an chêt dàn phung ve rêng? Hruaia leh a nu an hot leh tawh a, music țang et awt play-in an han lâm leh âwt âwt phawt a, Hruaia chuan inla zei zet hian Maremi chu a rawn kai ngei a, ani pawh chu rai puar pung tawh e ti lo chuan a lâm ve ngalh ngalh tho nia! Ka nuih an va tiza tak!



Ka nui nasa a, ka mittui a tla phung mai. Zàna ka mu pawh ka mu tui kher mai, ka nuih nasat vàngin ka chau a, ka rilru erawh a chhâwk zãngkhai khawp mai.



Zîngah nui riin min tiharh a, ka tho deuh vut. Ka mutna chu ka hai lek lek zui, nui rî ka hriatna lam chu ka panin tukverhah ka dâk, tualah exer an lo la a, Hruaia'n Maremi chu nau neih a awlsam theih nân exer a lâkpui a ni ngei ang. Hahthlâk vak lovin a tihpui zêl a, tukverh ațangin ka thlîr deuh reng, an hmuhnawm ka ti, an nui dùn leh hawk hawk țhìn, an thil sawi erawh ka hre pha lo thung.



Nupa inngeih tak chu an ni chiang alawm. Essa nèn khân hetianga awm lo hian lo innei ve ta ila, kan inngeih ve tho ang em le? Nge zu a rawn in haw țhìn ang a, ka lo tihtauh khum țhìn ang?



Ka lu ka thing nak, ngaihtuah loh tùr túr ka ngaihtuah tlat, a hrisêl lo.



Nilêngin inah kan awm, Maremi pum chhûnga naute rawn che țhìn chu ka ngaithla a, ka dek pah reng bawk. Ka làwm lutuk, a mak reuh ka tia, a hlimawm ka ti bawk.



"Nakinah naute i pai ve hunah chuan i la ning khawp ang! Pakhat chauh mah ni se amah hian a insual țhìn a niang ka ti mai, a rawn pêt dawt dawt ziah mai a. Ka hlauthâwng țhìn zâwk, a lo pian hunah hian ninhlei zet hi a ni reyh mai angah..." tiin a nui sen sen a.



"Kan awm luai luai țhin dâwn tihna a ni mai a," ka lo ti a.



"U Hruaia hian a làwm lutuk a,'mipa a ni dâwn a niang, a harh êm mai' a ti ziah. Mipa a awt zâwk a nih ka ring," a tih chuan," A àwm ve reng alawm, mipa hi chuan mipa vêk hi an awt tlângpui a, mipa ka ni lo nângin kei pawhin fa atân chuan mipa ka awt ve tho," ka lo ti a.



"I rai ve hunah mipa nei ngei ang che."



Kan thil sawi mai mai chu a.



"A hming tùr kan hual sa tawh a, mipa a nih chuan Malsawmdawngkima, hmeichhia a nih chuan Zothangpuii," a tih chuan ka melh hrâ a.



"Khati khân min melh kawr suh, ka ti tak tak a nia, kan sawi fel vek tawh!"



"A làwmawm nasat chu!"



"I va làwm hmel loh si ve!"



A hnuah chuan kan nui ta hawk hawk a.



Zanriah kîl laiin Hruaia chuan,"Naute nei hnai viau tawh lo ila chuan kan han zin tùr a nia, zinna hmun tùr lah ka hual țha si a," a ti vang vang a.



"A nih chu, naute leikàn hunah ti ila?" Maremi chuan a lo ti vat a.



"Nia, kan tum dâwn u nia. Zopuii pawh a hman ngei ang a, hmun nuam zet zet fanpui tùr che u ka ngah mai. Pathian zârah kan dam ang a, kan la zin ngei ang," a ti charh charh a.



Kan ei kham hnuah chuan TV room-ah kan țhu khâwm tel tel a, Hruaia nuin apple zaiin min sem diat diat a.



"Duhtak, Zopuii hi i video siam kha entîr tawh la?" tiin a bânah chuan a chùlsak hoh hoh a.



"E, ni dâwn tak! Ka lo theihnghilh țêp alawm le! Min remind avàngin ka lâwm e aw," tiin Maremi chuan a nuih sak a, a tho ta țuih țuih a.



"I dahna sawi la, ka lo la mai dâwn alawm," Hruaia chuan a lo ti leh vat a.



Eng video tak ni ang maw? A ngaihna ka hre lo khawp mai!



"Mahse, țah âwih miah loh!" Maremi chuan a ti sap a.



Meng phar âk hian," Eng nge țahna tùr? Thil lungchhiatthlâk lam em ni a?" ka lo ti hâ a.



"Țah loh tùr a ni tawp mai."



College kan kal laia thlalâk chi hrang hrang a lo dah khâwm a lo ni! Hla nalh tak tak a zep tel zêl bawk. Thla kan la dùn a ni tih ka hriat ngai rêng rêng loh pawh a lo nei nual a nih hi, a lunglènthlâk ka ti.



Kan insiam chhiatna thlalâk a rawn lan lai erawh chuan kan nui nasa mai, a lo rei ve ta hle mai tih ka lo ngaihtuah, khatih hunlaia kan hlim theihzia kha...



Nui sâng chunga ka en reng lai chuan Essa hmel a rawn lang tel ve ta! Hei zet chu, ka rin loh lam daih a ni thung!



A camera-a min lo hmeh rûksak a ni hlawm chiang, hlim taka ka nui lai te, Essa nèn inkai riala kan kal dùn laite leh Essa bike-a ka lâwn laite a ni nawk mai.



Engtin nge a lo neih theih ni?



Video chu ka en reng nain ka rilru chuan Essa ka ngaihtuah vang vang. Tunah hian Aizawlah a awm ve ang em? Eng nge a tih mêk ang? Chaw a ei tawh ang em? Chaw nghei mai kha a awlsam viau mai a, tunah pawh hian a nghei leh mai lo ang maw? Nge nula dang nèn an ei dùn zâwk ang?



Ka ner deuh sak. Nula dang nèn an awm dùn tùr chu ngaihtuah ka duh lo, mi dang tân ka phal thei lo a ni. Ka tâ ni se, a tâ chauh ni bawk ila...mahse, chu thil chu a thleng thei tawh lo, kan tàwp vek tawh.



Ka maimichhîng a, chhúngrilah ka rúm vawng vawng. Ka ngai a ni, ka ngai thar takzet, hmuh leh ka châk.



"Țah âwih loh ka tih kha."



Ka mittui a tla tih ka lo hre hauh lo, ka ngaihtuahnaa ka lo chèn veng veng vàng a ni.



Nui lui sakin," Ka țap lo, ka mittui a tla ringawt alawm," ka ti sap, an hmuh loh tùrin sîr lam hawiin ka mittui chu ka hru pah a.



Hruaia nu chuan," A țha, țah miah loh tùr, mittui erawh tla tùra siam a nia, a tla ve bawk ang chu, mittui tihtlâkte hi a hrisêl ve tho a nia," a lo ti a,



Chutia a tih tâkah chuan Hruaia chuan," Mittui a tlâk hian mita bawlhhlawh awmte a ti chhuak a, țha tak a ni, mit a tihrisêl," a lo ti ve a, hetia an tih vàng hian kei pawh ka zah tùr ang aiin ka zak lo.



Phone ka nei lo tih an hriat vàngin Hruaia'n min lo lei haw a, a tìrah chuan ka la duh lo, zahthlâk ka ti a, țûl lo ka ti bawk; mahse, Maremi'n," Biak che ka duh țhìn si a, i pa leh i nute phone-a rawn biak reng che ai chuan hetia i neih hi ka duh zâwk, rawn biak che ka inthlahrung lo sawt dâwn a," a tih chuan nuam lo ka ti ve ta deuh a.



"La rawh, kan naute lo piang tùr hi hmeichhia a nih hlauh chuan i hming ang kan lo hauh láwk ringawt si a, chumi lawmna chu ni pah mai se," Hruaia chuan a ti sap a.



A tàwpah chuan ka lâksak hrâm.



Kâr khat ka awm hnuah chuan haw ka tum hnai ve ta, awm reng ringawt chu a fuh ber lo. Min duat, min ngaihsak, ka chungah an fel thlâwt; mahse, awm reng thei ka ni ringawt lo.



"Haw i tum hma e... kan la ngai che alawm."



Ka en a, nuih sakin," Hma tawh hlei nem, in bula awm nuam ka ti lutuk ang a, haw nachâng rêng rêng ka hre lo ang tih a hlauhawm zâwk a ni," ka ti a.



"Chuti, i haw teuh tawh si a, kan lêng chhuak tam lo nèn, naktûk lam chu kan round ang," nui chung hian a ti a.



"A pawi miah lo!"



*******



Lèn nuam ka tih vak ngai loh nèn, vawiin zet chu a nuam a ni. Ani rai puar țeuh tawh chuan khalh lo phei se chuan nuam ka ti ngawt ang!



Mahse, ani chu hrilh chi miah loh.



Kan tlân kual nasa khawp a, Essa workshop pawh kan thleng, hawi loh ka tum viau nain ka ring leh ka mit ka thunun zo lo, ka en hrâm.



Essa erawh ka hmu miah lo.



"A workshop hi a tilian tawh asin, ka rin aiin rilru a nei roh a," Maremi chuan a ti barh barh a.



"Kan han lût chhin dâwn em niang?" fiamthu ti tak hian ka ti, amah ber a awm lo bawk a, hrehawm tih viauna chhan tùr a awm nâng.



Workshop-a thawkte chuan min hre lo, țha ka ti daih zâwk. Min lo hriat chuan buaina neuh neuh ka tawh phah ang, ka insûm thei lo si. Essa, an boss hnênah an hrilh palh ang a, ani lahin engah mah min ngai tawh dâwn lo mah se ka chanchin a han hre thar leh tùr chu ka ngai ngam lo.



Ka sawi chhuah a nia, nuam lo erawh ka ti khawp mai. Essa lo awm phei se engtin nge ni ang?



"A lo kal khât; mahse, min vil hneh tho. A ai awhtu ka nia," tiin tlangvâl chhe vak lo, hàng lam deuh chuan min lo hrilh var a.



"E, a ni maw? Hna țûl tak a nei a nih dâwn chu," Maremi chuan a ti sap a.



"Aw, a zin deuh reng bawk a."



Hmm, a bialnu thar nèn chuan an zin dùn țhìn a ni ngei ang, a nuam ngawt ang chu! Bialnu dang a nei tawh ngei ang, ani a hlim chuan a țha, kei pawhin hlim se tih ka duhpui alawm, ka hmangaih ber a hlim tlat chuan...



"Ladies, tihsak theih che u ka nei em?"



Ka phu nasa lutuk! Ka kutin ka âwm ka dawm a, ka lungphu hi a rawn phu chhuak mai ang tih ka hlau. Min hmu ang tih hlau zetin ka ding khawng reng mai!



A thil sawi kha a inhmeh lo ê...!



"Ess, i dam em? Inhmuh loh chhûng a rei hle mai," Maremi chian a ti a.



"Ni e, a dik alawm," a ti sup, chuti ringawt chuan a chhâng.



"Ka rawn tlân kual mai mai, a remchâng êm a," Maremi chuan a ti leh.



A chhâng tawh chuang lo. Kei chu min hmu ang tih ka hlau lutuk ringawt, ka che sawn ngam lo, a hmel hmuh châk viau mah ila ka en ngam teuh lo, min haw dâwn si.



"Kan kal tawh ang e,"Maremi chuan a ti sap a, a kal chu ka zui ve nghâl vat. Ka hawi sawn hauh lo.



"Engtikah nge naute i neih dâwn?"



Essa'n a rawn biak leh tâkah chuan a ding leh rih, kei erawh chu ding lovin car-ah chuan ka lût.



"Ka nei țêp, ni tam a ni tawh lo ang."



"Ka lawmpui che."



A thil sawi chuan ka thinlung a dek zawk mai. Maremi hi a la hre reng a, a naute nei tùr pawh a lawmpui thu a hrilh ve a nia, a inhmeh lo viau nain chutiang a sawi chhuak ve chu ka lo lâwm ve viau ringawt!



"Ka lâwm e, nang pawhin țha tak i la nei dâwn nia."



Ka kûn hniam deuh a, ka sam kâr ațangin ka va en phei hrâm. Essa hmel chu ka hmu ve thei ta, a hma ang chiah thoa țha a la ni, tlêmin a lu a buk deuh tih mai loh chu, chuan a lang chêr deuh bawk.



Ka en reng lai chuan ka lam a rawn en ta thung, ka mit ka la lêt rang lutuk! Min hre chhuak ang em? Ka en ve reng tih a lo hre reng em ni? Ka thinphu a su dup dup mai.



"Kat..."



Ka khawng nghâl awt maiin ka hria!






*BUL I ȚANNAAH CHUAN KÎRIN THIL I THLÂK DANGLAM THEI TAWH LO A NI THEI E; MAHSE, TUNA I AWMNA AȚANG KHÂN ȚAN ȚHAIN A HNU KHARNA ERAWH I THLÂK DANGLAM THEI THUNG*

[Ngaia]

☆2020☆ - 47 By Dingdi Pachuau






Khumah chuan mut tum lo chuan ngawi rengin, che map lovin ka țhu. Ka en ngai ka en reng a; mahse, eng mah ka hmu lo, ka ngaihtuahnaah chuan vawiin chawhnua thil thleng kha a awm reng, ngaihtuah loh ka tum pawhin ka thei lo, ka maimichhìn hlekin fiah êm êmin a lo lang nghâl zél.



Hei hi ka chan tùr a ni, ka pawm thiam a ngai; mahse, a va har si êm! A nâ ka ti thar leh lo thei lo, lo hmu miah lo ila țha tùr a nia.



Mahse, Maremi thil sawi kha, ka tih ngei chu a ngaih hmel, ka va huphurh sî êm! Min hmu duh tawh lo tawp ang, a thin ka tirim si a. Min rin ve tehlul nèn, tunah chuan a lakah mi rinawm lo, mi kawp chîng ka ni ta si a.



Vawiin chawhnu thil thleng kha ka mitthlà lêt a.



"Kat..."



Ka maimichhîng zawk, ka thin a va phu nasa kher êm!



"Khatianga min koh khân nuam ka ti țhìn," tia hmeichhe nui har har riin a rawn zawm nghâl.



Ka thinphu a tàwp dâwnin ka hria! Tu nge?!! Hmeichhe aw mawi tak a ni, a nuih dàn pawh a sexy. Keimah min ko emaw ka tih khân he nu hi a lo ko tihna a ni maw?!!



En loh ka tum țàng țáng; mahse,en châkna chuan min hneh zâwk, ka en phei ta hrâm. Chu hmeichhe nui sexy zet chu a nui a sexy ang thovin amah pawh a sexy, a khal țha khawp.



A kekawr hâk chu a mar viau, a nalh hle thung. A sam sei deuh tak chu a kir deuh a, chu chuan a tilang sexy zual, a hmel erawh makeup a hmang nasa deuh a, ka hmu thiam chiah lo; mahse, a țha ngawtin ka ring tho. En rêng rêng pawhin mi rethei tak fanu chu a ni lo chiang tih a hriat, a inthuamna leh a hmêl, a chezia engkim maiah chuan a lang nghâl vek.



A pâwnlam lan dànah chauh teh mah ila ka tidik tho ang tih ka hria. Essa lam hlîr ka lo ngaihtuah avàng khân kan bul maia car nalh zet lo ding reng tawh chu ka lo hmu miah lo a lo ni!



"Hetah ka hmuh che ka ring miah lo va, ina i awm ka ring a," chu nu chuan a ti leh a, Essa hnaih zetah chuan dingin a bânah a vawnsak nghe nghe.



"Car endik a ngai em?" ani chuan a lo ti sup thung.



"Chhuanlam ka siam tawh lo ang!" tiin mit siai sakin a nuih sak a.



Rilru na zetin ka lo en reng, ka thinlung chu na tak a ni. Hmeichhe dang a lo nei tawh reng a nih hi, a la rei loh tehlul nèn, kei pawhin mi dang ka la kawp hauh si lo.



"Kal tawh ila?" Ka bula Maremi lo țhut lai pawh ka lo hre hauh lo, ka rilru Essate lama a awm tlat vàng a ni.



"A bialnu a ni tiraw? 'Kat' tiin a ko a nia?"



Ka rilru natzia chu ka awah chuan a lang chhuak chiang ngawt ang, ka inthunun thei lo, ka aw pawh a khùr deuh bawk.



"Ka hre lo le."



Kawng tluanin a țawng bawrh bawrh reng a, kei pawh ka țawng zauh zauh. Ka ngaihtuahnaah erawh ka thil hmuh hlîr mai a awm, a chângin Maremi min biakna, zawhna min zawh pawh ka lo hrechang lo.



A langah chuan a pângngai thei ang berin ka awm lui ve tlat, min tihhlim an tumna tihhlawhchham ka duh lo a ni. An theihtâwp an chhuah ve si a, tihbeidawn ka duh lo, Maremi erawh chuan ka awm dan chu min hre thiamin ka ring.



Kan pahnih chauha kan awm laiin Maremi chuan," Ngaihtuah vak lo hrâm teh, a bialnu pawh a ni kher nâng," a ti sap a.



"Ka ngaihtuah hleinem," tiin ka nui lui sak, min âwihsak kher chu ks ring chuang lo.



"Hetiang a nih chuan la châm leh rih ang che, bialnu a nei emaw nei lo emaw thu dik tak i hrilh a ngai, thu dik chu hre ve rawh se, rilru na taka a dah che hi ka duh lo," a ti leh sap sap a.



"Keiman ka tina hmasa alawm, ka hrilh che kha."



"Thu dik a nih loh kha, chu tak chu i sawi fiah ang. Thil pawi zâwk a thlen loh nân, in ințhen vang vang hnua thu dik in hriat chhuah leh si chuan in inchhîr ang a, inchhìr a sâwt tawh dâwn si lo," a ti leh sar sar a.



"A âwih duh lo ang, bâkah, min hmu duh tawh kher lo ang, biak phei chu..
." ka ti sap a.



"I tum phawt dâwn alawm."



Nia...ka tum phawt ang chu, ka biak avàngin ka thih phah êm lo ang, thu dik hrilh miàh lova ințhen vang vang ringawt mai chu... a dam chhûnga min ngai dik lo tùr ringawt pawh chu ka duh bík lo, ka tum ve phawt ang chu! Ka tum ang a, awmzia a awm loh tâk leh tihngaihna a awm lo a ni mai. Sáp țawng takin 'Try' a ngai ve alawm.



Ka muhìl mang lo.



Ka han châm leh rih ta poh chu a ni a; mahse, hmalâk dàn tùr a vâng. A workshop-a va pan chilh tawp kha ka duh meuh lo deuh, ka thil sawi tùr lah a hnuaia thawkte hriata sawi ka duh hauh lo, hetiang mimal thil hi chu hmun reh leh fianrial deuha sawi ka duh.



Maremi'n rem min ruatpui ve a, a ina kal chilh tawp tùrin min ti. A in chu a fianrial deuh bawk a, a awm lai nan fuh a awl zâwk bawk ang.



A in veranda-ah chuan ka țhu reng, lo chàn tawp mai chu ka zak deuh nain hei bâk chu tih vak ngaihna ka hre lo. Ka vànneih viau chuan a bialnu kha a rawn hruai haw lo ang a, ka vànduaina a kal tluan erawh chuan a rawn hruai haw tel ngei ang.



Maremi'n min ngaihtuah deuh avàngin min rawn phone sek, dârkâr hnih chhûngin vawi nga lai min rawn phone tawh! Ka nghaha lah hi haw a lo hmanmawh lo viau bawk si, kan rilru a inang lo teh e!



Motor a rawn ri ta. Ka vànneih ngei theihna tùrin ka țawngțai ru mawlh mawlh.



Ka vànnei lo chiang, Sexy-i kha a rawn tel ve tlat! Ka țawngțaina chu chhàn a ni lo chiang, heti a nih chuan thil awmzia pawh ka sawi thei nâng, sawi pawh ni ila awmzia a awmin ka ring lo.



Lo nghah mâklêk tùr a niah!



Mahse, lêt leh dâwn pawh ni ila awmzia a awm lo, min hmu dâwn tho tho, bihrûk ngaihna a awm tawh lo.



Sexy-i chu a rawn nui chhuak har har a, min hmuh veleh chuan a nui tàwp ta deuh.



"Khawngaihin ka lo tibuai lawk che u, Essa hi ka be lawk thei ang em?" ka lo ti ta ringawt a.



A ngaihna hriat loh hmèl zet hian Sexy-i chuan min en reng, kei pawhin nuam lo ti ru zet hian ka en lêt ve, Essa erawh ka en țha ngam lo.



"Eng thil nge?"



A rawn țawng chhuah tâkah chuan,"Khawngaihin a fâlin ka be thei che ang em?" ka ti, ka huaisenna zawng zawng ka sâwm khâwm a ni. A mitah ka en chho a, a rilru put dàn tùr ka hre thei lo, a mitmeng ațangin eng mah ka hre thei lo.



A ngawih vung vung hnuah,"Eng thil nge?" a ti leh sup.



"Thlalâk chungchâng kha a nia," ka ti ta nge nge, ka sawi loh chuan ka biak a duh loh ka hlau a ni.



"Min hawsan mai ta che," tiin Sexy-i chu a be sup.



"A nih chuan zanin chu aw, ka lo beisei ang che," tiin chu nu chuan a nuih sak a, chumi pah chuan a biangah a han tuaisak zoh bawk a.



"Ka rawn phone ang che."



Ka rilru tihnat loh hrâm hrâm ka tum, a har êm a ni. Ka thin zâwn hi a na leh ngut ngut tawh; mahse, na hman ka ni rih lo.



Inah pawh lút lovin bathlàrah chuan kan ding, hmel hriat ngai loh enin min enin ka hria!



"I sawi duh chu?"



Ka rilru natzia chuh, na tak a ni!



A thil sawi dàn chu ka haider lui a, ka kut hûm ruh tlatin," Kha thlalâk kha engtin nge i neih theih ka hre lo; mahse, Sangzuala nèn hian ka kawp lo che u," ka ti a, ka thu sawi chu âwih se tih ka duh êm avàngin a mitah chuan ka en ràn a.



"Hlim takin a bulah i nui a, kha thlalâk khân dâwt a sawi thei hleinem. Edit a ni lo va, khami ni pawh kha ka la theihnghilh hleinem."



He pa hian min lo enthla ru reng tihna em ni? Khatih lai khân Lungleiah a awm ve em ni?



"Kha restaurant-ah khân i awm ve em ni?" ka ti ta hâ a.



"Tu pa mah hian an fanu bialpa atân chuan min duh dâwn lo tih ka hria, chuvàng erawh chuan ka chanchin dik tak hi khawiah mah ka zêp ngai lo," a ti nghut nghut a.



"Ka bialpa a ni lo tak tak. Khami ni khân Lungleiah ka kal a, kan inhmu fuh a, chawlhpuiah min sâwm a, ka țhian a nia, ka hnial thei lo a ni," ka ti ve thung.



"Hmeichhia chu in inang vek!"



A thin a rim hle a nih dâwn hi.



"Kan inang vek lo-"



"In inang vek! Ka mitah chuan in inang vek! Pakhata rinawm hmak ka la hmu lo," a ti leh nghut nghut.



"Nichina i bialnu pawh kha maw?" ka ti ve leh a.



"Hmeichhia a ni. Ka mamawh min phuhrûksak chuan a tâwk, a dang chu ka beisei tawh ngai lo," a ti leh.



A mamawh a phuhrûksak. An mu dùn tawh tihna a nih chu!



"Ka tâ ni duh tawh lo chu ka hnêna lêt tùrin ka ngèn ngai lo bawk!"



A va tàwp si ve!! Kei hian beisei tùr rêng ka nei tawh lo tihna a ni mai lo maw? Mahse, chutin ka bànsan ringawt thei lo ang, ka la tum nasa tâwk lo a ni.



"Sangzuala hi ka bialpa a ni lo, ka kawp bawk hek lo," ka ti țha leh a.



"I bialpa chu a nih kha. Kha thlalâk khân dáwt a sawi lo bawk, in hlim dùn viau a ni lo'm ni?" a ti leh nghut.



"Ka bialpa a ni lo, bialnu nei lai a ni nghe nghe. A bialnu min hmuhpui pawh a tum nghe nghe asin," ka tih chuan a nui ta huk.



"A remchâng khawp ang chu! A bialnu lah a hmaah a țhu reng a!" tiin a maimichhîng sawk a, a rawn men leh chuan a thinrim tih ka hre mai.



"Ka lak ațangin inthiarfihlîm tùrin hrilh ang che, ka hmuh veleh khawi hmunah pawh ni se ka hnek chiang khawp ang!" a ti leh ta.



Mi kutthlâk a hreh leh tawh lo tihna em ni? Ni lo, a ni thei lo ang.



"Mi kut i thlâk thei lo ang."



"Engah maw? I bialpa a nih vàngin maw? Ka hlau hauh lo, Jail tàn maw? Thih maw? Eng mah ka hlau lo," a ti leh ta nghut nghut mai.



Ka thaw hawk. Kan sawi fel thei dâwn lo a nih hmel.



"Vawi khat chauh ka'n sawi leh ang e. Sangzuala hi ka bialpa a ni lo, ka țhian a ni. Ni e, ka bialpa hlui chu a ni ngei mai-" ka tih lai chuan a kut a hûm tlat chu ka hmu, a mit meng pawh a hlauhawm khawp.



"Kan ințhen hnuah a lam hawi ka tum tawh lo hrim hrim, eng thil mah pawh a thleng hek lo. Thu dik tak a ni ka sawi ni," ka ti dap dap, awih se ka ti lutuk ringawt.



Thil dang daihin min chhâng.



"I pa vuakna che chu nâ i ti em?"



Mak ti zet hian ka en hau mai.



"I pa kha ka hua, ka pa ang chiah a ni!"



*******



Ka room tukverah dâkin kan kawmthlang lama Vaube pâr, sava tê tak têin a tlàn chu ka thlîr reng, a hmuhnawm reuh ka ti, a che rang reuh sia, ãwn tâwk tâwkin thingah chuan a sawt zeuh zeuh reng, a tla hauh lo.



Essa nèn khân eng mah kan sawi fel thei lo a nih kha. A thin kha a rim țûn mai si a, keima lam ațang chuan a hnêna sawi tùr zawng zawng ka sawi vek, amah lamin ka pa a sawi chhuah ațang khân kan boruak a dik thei ta tlat lo.



A chanchin ka hre zauh zauh. Mi kutthlâk vàngin lockup-ah a riak zeuh zeuh tih thlengin ka hria. Pawi ka ti lutuk, hetiang hi a ni ngai tawh lo asin le! A bula awm a mi kut a thlâk tùr dan theih ka va duh tehlul êm!



Mahse, thil theih a ni tawh lo, a bialnu ka ni tawh lo va, ka bialpa pawh a nih tawh lo, ama sawi dàn a nia.



Ka phone rî chuan min tiphu zawk. Ka han en chuan Maremi a lo ni a, video call ngat, naute hmelțha ka hmu leh thei dâwn tihna.



"Aw, naute nu, eng thil nge ni ta?" ka ti vat a.



Naute chu hnute a lo pe niin, a lo hne dawk dawk mai, tui a tih hmel lutuk!



"I hnute pe lai kher," ka tih chuan a nui hak hak a.



"Nu i nih huna i pêk dan tùr lo zir lâwk rawh," a ti phawt a, chutah," I ngaihawm êm a, lo zin leh tawh la ka tia," a ti leh a.



"Naute kha lo tilang chiang teh."



Mipa niin a duhawm lutuk ringawt. Naute hmelțha tak tia sawi tùr ni lo mah se tu mahin chhia an ti lo ang. A duhawm êm êm zui, a sam a tamin a dum țha hle, a ngo bawk si.



"Chapchàr àwllèn lai a nih tho kha, lo zin lawk rawh. Thla ruk a tlin kan làwm dâwn alawm," a ti leh a.



"Thla tin lawm ziah a ngai lo, in duat lutuk mai!" ka ti hlak a.



"A pi hian a tilui zêl, sawi pawhin awmzia a awm lo. Lo phei rawh aw, thil hrilh tùr che pawh ka nei țeuh tawh a nia, phone-a sawi chi a ni si lo," a tih chuan ka nui vur vur.



"Ka châk! Naute hmu tùr ringawt pawhin ka lo phei châk, a duhawm ropui si!"



*******



Naute ka pua a, ani lah chu tui zet hian a mu reng mai. Chum loh ngaihna a awm lo, a men chhûng a rei lo lulai ém asin, Maremi'n mut tùra min tih pawhin puak ka châk tlat a, ka mut phal lo a ni ber.



"I haw hnuah a sual ngei ngei ang!"



"A fel êm hi, a sual tâk leh i hah ve deuh a ni mai a," ka ti a, ka nui ve pah.



"A pa nèn in inang chiah!" a ti hlak hlak a.



"Ang nâng, kei hi i pasal ka ni ve lo a nia," ka tih chuan a nui chhuak ta hawk hawk a.



"Naute i neih hunah i hre ve khawp ang! Naute sual takah ka chhuahsak ang che," a ti ve ta a.



"Ka la nei har dâwn lutuk!"



"Har lo ang, ka zawnpui dâwn che alawm. E taka, Essa khân 'nupui a nei dâwn' an ti tak asin," a tih chuan ka nui lai chu ka tàwp riai riai.



Nupui neih a lo duh tawh a ni maw? A nupui tur chu a duh viau emaw a hmangaih viau emaw a ni ngei ang.



Nia, a tân a țha ang, a nun kawng zawh pawh a rualrem phah maithei asin.



Mahse, a nupui neih tùr chu tu pawh ni se lawmpuina hlan ka thei kherin ka ring lo, ka hmangaih êm êm hi min lâk sawnsak dâwn ka ti lo thei lo.



"Tu nge...a neih dâwn?" ka ti sap a.



"Ka hre chiang lo, a workshop-a thawkte sawi ka hriat a nia. Hmalama a kal theih chuan nang pawh i kal thei ve tùr a ni, vawilehkhata thui tak kal a ngai lo, step khat tê têin a tâwk aw," a ti leh sap sap a.



"A tân a țha zâwk thei ngei ang."



Mahse, ka thinlung hian a lawmpui thei ngai lo ang.



*******



"Nupui i nei dâwn niin ka lo hria a?"



Ngun zet hian min rawn en a, a mitmeng cool tak țhin chu a lang sen deuh râm. Zànah a mu țha vak lo a ni maithei, nge zu a in leh tawh zâwk?



"Dâwn e."



Ka kut ka hûm ruh sauh sauh. Amah ngei pawhin a zêp lo ve, a lo nei dâwn chiang a nih hi.



"Ka lawmpui...che."



Mit khap hauh lo hian min en char char, ka dang âwk deuh chuan ka lawmpui tak tak lo tih a lantîr ni hialin ka hria, hrehawm ka ti.



"Ka ti tak tak, ka lawmpui che," ka ti leh a.



"Ka nupui tùr chu i hmu châk em?"



Châk lo; mahse, chutianga chhàn chi chu a ni si lo.



"Tehréng mai," ka ti ta zâwk.



"Naktûkah in inhmu dâwn nia, i haw phei hma ngeia hmuhtîr che ka duh a ni."



Ka rilru a tihnatzia hi hria se chuan aw...



Naute en tùrin a rawn kal niin a sawi, mak ka ti. Thla ruk hnua rawn en daih chu, a hma pawh khân en daih tawh àwm tak! Naute enna thil lah chu a rawn keng nual lehnghâl, engtin nge hêng hi nautein a mamawh ang tih a hriat theih zâwk ni? A bialnu, ni lo, a nupui tur chu a fel hle a nih ka ring.



"Naktûkah chuan ka rawn lam ang che, i duh zâwng a ni em tih hriat ka duh a," tiin naute ka puak lai chu a biangah a rawn chúl a, chutah dingin," Maremi chu ka hmu tawh lo mai ang, ka haw mai ang e," a ti ta nghâl a.



Naktûk hun lo thleng tùr chuan ka ngaihtuahna a luah lâwk nghâl.



Maremi leh Hruaia erawh an phûr angreng. A chhan ka hre lo, ka huphurh deuh țùng mai. Kei aia a duh zâwk leh nupui hial atâna duh hi ka thîk lâwk vàng a ni maithei a ni.



"Nang ai chuan a chhe hrim hrim ang."



"Inchhîr tùr zâwk chu amah a ni, hmangaihtu a kalsan dâwn avangin."



"I hmangaih tak Pathianin a pe leh êm êm ang che."



"Hmangaihna kawng hi a tluang purh hleinem."



"Hrehawm tam tak kâra hmangaih neih hi a nghet duh bîk."



"A nupui tùr chu i rawn vèl țap dâwn nia."



A hnuah phei chuan kan nuihpui ta mai mai. Fiamthuah an la zêl a, a nuih loh theih loh.



A tûkah chuan min rawn lam ta ngei. Ka lo inpeih ve bawk, ka hmuh tàwpna tùr a nih vàngin ka inchei uluk ve khawp. A nupui tùr hmuha țawp deuha awm kha ka duh lo bawk.



Hmâna huan kan lènna, ka thianghlimna ka hlanna hmunah ngei khân kan kal leh; mahse, a lo danglam nasa tawh hle mai. Rilru mitthlaah nunhlui a rawn lang nghâl uar uar, eng mah sawi lo mah se ani pawhin a hriat chhuah ve tho ka ring.



"Helai hmun hi a nuam ngawt mai!" ka ti ta ringawt, sawi tùr a vâng êm a ni.



"Nuam i tih chuan i duh chen chen i awm thei ang, ka lei vek tawh alawm."










*RING TAKA SAWI VAK VAK AI CHUAN NUNAH HIAN LANTÍR ILA, HNA A THAWK CHAK ZÂWK*

[Ngaia]

☆2020☆ - 48 By Dingdi Pachuau





Ani pawh hian nuam a ti ve viau a nih ka ring, a lei hial a nia! A hmun hi a zau hmel si a, chutia han lei ngawt mai chuh, a workshop ațang hian a la lút hnem ve reuh phian a niang!



"A lo danglam tawh hle mai," ka ti leh a.



"Danglam vak lo, in ka sa a, kawng ka siam țha leh ringawt," a lo ti thung a.



Ka hawi vêl chuan in chu ka hmu ve ta, a lo sa biru reuh êm a lo ni. A nuam reuh ngawt ang chu! Sawtah sâwn a nupui tùr chuan min lo nghâk a ni ngei ang.



"In nu chu engtikah nge kan hmuh dâwn?"



"Hmanhmawh suh, i hmu ngei ang."



Mau hmanga siam țhutna, ka thianghlimna ka hloh tâkna hmunah ngei chuan kan țhu leh ta, tlêm chuan nuam lo ka ti deuh. A hre chhuak ve ngei àwm si a, khatih lai kha chuan kan hlim hle a nih kha; tunah erawh nupui min neihsan dâwn ta si. Kan hmalam hun hi kan va hre lo tak!



"Naktûkah maw i haw phei dâwn?"



Ka ngaihtuah ang hi a ngaihtuah ve miah lo a nih hmèl. Nia, a ngaihtuah lo ang, ka chungah a thinrim viau kha.



"Aw..."



"Ka thu i âwih lo hle mai."



Makti takin ka en hâ! Eng laiah nge a thu ka lo âwih loh? Ka hre thiam lo, eng a sawi tumna nge ni? Hre thiam lo zet hian mit khap miah lovin ka en reng.



"Eng...thil..." ka lu ka thing deuh nak a,"Ka va hre thiam lo...engah chuan nge...thu ka âwih lo maw!" ka ti ta nawk nawk a.



Ka mit takah min rawn en ve vang vang a, chutah, thûm deuh dût hian," 'Damlo suh' ka tih kha," a ti ta sup a.



Ka thaw deuh huai. Hei, ka dam reng alawm. Tunah pawh damlo ila chuan amah pawh hi ka hmu lo ang, Aizawlah pawh hian ka kal lo ang.



"Ka dam hi."



Min en leh vang vang hnuah hawi sawnin," I pa kha i hua em?" a ti ta daih a.



A thil sawi hi, a inkahpah lutuk a, rilru a vâk kual zung zung mai.



"Haw lo ve, engtizia nge a?" ka ti, hetiang thil min han zâwt thut mai hi mak ka ti lo thei lo.



"A vua che a..."



Engtin nge a lo hriat? Ni lo, Naua'n a hrilh tak alawm. A hre vek tak ang chu maw le.



"Ka pa a ni alawm, min vaw mah se ka haw chuang lo," tiin ka chhâng a.



"Kei chuan ka pa kha ka hua asin."



Chhàn ngaihna ka hre lo, a pa kha a haw takzet tih ka hre si a, lo sawi ve tùr ka hre thlâwt lo.



"Naupang tê chauh ka la ni a, khatiang ka chunga a ti duh kha ka ngaihdam thei ve lo," a ti leh sup a.



"A...nia, a ti dik bîk lo alawm," ka lo ti ve ringawt.



"A ti dik lo hulhual!"



Kan ngawih deuh reng hnuah chuan tho vutin," Inah sâwn lût tawh ang," a ti ta daih a.



Ka hnial lo. A nupui tùr pawhin min lo nghâkhlel tawh viau ang, ka thaw huai a.



Inah chuan tu mah an lo awm lo, pâwn lamah a inkalh. A nupui tùr chu a lo la thleng lo tihna a nih hi.



In chhûng a tihphuisuizia reuh chu! In chu a lian lutuk pawh a ni lo; mahse, thil awm tùr engkim a awm ve thlap, a fel fai thlap reuh lehnghal, a nuam lutuk!



"A va nuam reuh ve!" Ka ti chhuak hliai a.



"Honeymoon kan hmanna tùr a nih hi."



Ka nghilh deuh dupin ka hria. He in nuam reuh tak, fâl deuh raih bawk si, boruak nuam êm êm bawk si-ah hian a nupui nèn chuan honeymoon an hmang dâwn chu a ni si a.



Ka va thîk tak!



Pindan hrang awm thliah thliah chu hawngin ka en zêl a, thil engkim a awm ve thlap reuh si a, duhthusàm hi a ni tawp mai.



Tui lah chu duhthusàm. In piah hla vak loah chuan tui a awm, chuta mi chu pipe-in a la tih a sawi, min kawhhmuh ve nasa.



Bathroom lian zetah chuan ka lût dêk dêk chhin a, pâwnlam en aiin a chhûng chu a zau. Bathtub, shower leh inthiarna a lo awm vek, dârthlalang lian zet, hlau duai mai hian bang a lo awh duai bawk a.



"Wow..!!"



"Eng nge ang i tih?"



"A ropui tawp!"



A nui suk.



"A làwmawm e!" a ti sup a, bathroom chhûngah chuan a rawn lût ve a.



Dârthlalang hmaah chuan ka ding rèn râwn a, ka bulah chuan rawn dingin dârthlalangah chuan min rawn en a.



"Ka nupui tùr a lo thleng tawh a."



He hun hi ka huphurh êm êm si; mahse, ka thlen châk tho si chu a ni. Ka phûr viau a, ka phûr lo viau bawk. Nupui neih hial a lo duh tâkna nula erawh ka hmu châk, ka nih theih ngai loh tùr nihna nei tùr chu.



"Kal ila?" ka ti ta vat a.



"Hmanhmawh kher lo la."



"A lo thlen tawh chu."



"Dârthlalangah khân inen teh!"



Hre thiam vak lo hian dârthlalanga a hmel chu ka en a, ani pawhin min rawn en, kan mit chu a intawng sak.



"Dârthlalanga ka hmuh hi ka nupui tùr chu a ni."



Ka en ràn ringawt, ka beng a dik lo em ni! A thil sawi kha, dârthlalanga a hmuh chu tu nge? Keimah maw?!!



"Eng thil nge?!!!"



"Dârthlalangah khân inen la, i hmeichhe hmuh chu ka nupui tùr tihna."



Min fiam suh, min fiam lul suh. Thil ni thei a ni lo!



"Fiamthu thawhna chi a ni lo!" ka ti ta vat a.



"Fiamthu ka thawh lo."



"Eng nge i sawi?"



"Ka nupui ni rawh, i pasal nih ka duh."



A hnu lama thil thleng chu ka mang hriat vek maiin ka htia! Ka hlim lutuk avàngin ka ngaihtuah lêt thiam lo, ka nun a hlim lutuk a, engkim mai chu a thar sur vek maiin ka hria.



Mahse, rin a har ka la ti cheu. Inneih duh miah lo kha a ni a, eng thilin nge a rilru hi thlâktîr ni ang? Hêng thil hi dâwt vek niin ka mumang mai a ni ang a, ka harh thut ang a, a tàwp vek ang tih ka hlau.



Mahse, a taksa lum thar tharin min dek renga min kuah reng avàng chuan ka mumang mai a ni lo thil thleng tak tak a ni tiin ka inhrilh mawlh mawlh bawk.



"Ka tân vuak leh hun hrehawm tak i tâwk tih Maremi'n min hrilh hnuah ka pângngai thei tawh lo, i tawrhna hian min tina a, i tuar leh ka phal tawh lo. Naua khân i pain a vua che tih chu min hrilh tho a; mahse, chhûngkaw thil a nih vàngin inrawlh lo tùrin min ngèn, bâkah, nghâk rih tùrin min ti tlat bawk. Ka zah êm avàngin ka inrawlh duh lo va, i pa kha ka haw êm êm mai a ni. Rawn kal chuan i tawrh phah leh ngei dâwn si a, ka nghâk țàng țáng. Chumi chhûng chuan rim takin hna ka thawk a, doctor ka pan reng bawk. Ka rilrua ka thil ngaihtuah dàn leh nangmaha feelings ka nei tlat mai chu doctor pawhin mak a ti, hma ka sâwn viau tih min hrilh bawk. Nangmah vàng chauh a ni, tihian mi pângngai rilru ka pu ve ta vuai vuai chu a ni si a," a ti sup sup a.



Keimah vàng a ni lo, ka țawngțaina rah chhuah kha a ni chiang mai, ka rilruin Pathian hnênah làwmthu ka sawi mawlh mawlh.



"Keimah vàngin i hna ațangin i bâng a,vuak i tuar bawk. Keimah vàng vêka vuak i tuar leh tùr kha ka duh tawh lo. Keimah vàng chauha damdawi ina i lût leh tùr leh i damlo tùr pawh ka duh lo, ka remti thei tawh ngai lo ang."



Ngaihthlâk nuam ka va ti si êm!



"Kha pa nèna in thlalâk ka hmuh kha chuan ka thin a rim kher asin."



A dàra nghen țhat sauh pah chuan," Engtin nge i neih theih a?" tiin ka zâwt, a mak ve êm alawm.



"Whatsapp ațangin a nia. Ka number hriat ngai pawh a ni lo, ka âwih thei lo va; mahse, a chiang hle si a," a ti sup sup a.



"Tu nge ni ang le? A hming i zâwt lo em ni?" ka tih chuan," Amah a rawn insawi zâwk a, ka hre reng ta lo, i țhian niin a insawi," a tih chuan ka phâwk ta deuh hrâ.



"A number chu i la nei em?" tiin ka zâwt a.



"Nei tawh nâng, ka thin kha a rim lutuk a, ka phone pawh ka vawm chhe vek alawm!"



Hmm...hmmm...a la tluang zêl e.



"Ka chêt țhin dàn kha a țha lo tih ka hre chhuak ve tawh a, vawm chhiat loh chu ka tum ve lutuk; mahse, ka thin a rim lutuk a, rilru fîm ka pu hman lo a ni ber."



A pawi lo, thil kal tawh a ni a, tunah chuan a bulah ka awm tawh alawm. Thil țha lo a ni tih a hre ve tawh tho alawm, hma a sâwn zêl mai ang.



"Engtikah nge kan inneih dâwn?" nui chung hian ka ti a.



"Tunah pawh a theih reng."



"Hetah hian honeymoon ka hmang châk tawh a," tiin ka nui leh a.



Ani erawh chuan thu tak zet hian,"Helai hmun ka ngainat êm êm chhan i hre duh em? I thianghlimna min hlanna hmun, hmangaihna kan chenna hmun a nih vàng a ni," a ti ta dap dap a.



Ka zak ka sen leh nasa tawh ang chu.



"Kha mau ațanga siam țhutna phei kha chu a hlû ka tih êm vàngin tûn thlengin ka la siam țha phal lo, a ngai ang thlapin ka dah. A chhia ang tih hlauin ruah a sùr laiin khuhna ka siam țhìn."



Chuti khawp chuan kha kan chêtsualna hmun kha a tân a lo pawimawh maw? Chutiang tùrah chuan ka ngai pha lo asin.



"Engati ?"



"I thianghlimna min hlan kha ka tân chuan a hlu êm a ni. I tâna hlu ber a ni tih ka hria a ni," a ti sup a.



A sawi dik reng mai. Ka thil neiha hlu ber ka thianghlimna kha ka hmangaih ber hnênah ka hlàn rêng a ni.



Tlai takah kan haw.



"Zanin chu ka bulah riak rawh aw?"min rawn en zauh a, kawng lam a en leh nghâl vat.



"A, ka hre lo le. Ka duh dâwn tih chu i hriat reng kha; mahse, mi dang mitmei vèn a ngai alawm," ka tih sar sar chuan," Kan chesual lo ang tih hŕilh mai la," a lo ti.



Ka nui chhuak hawk hawk.



"I va sweet tak! Hei vàng hian alawm ka duh zual sauh țhin che ni! Thil kan tisual tawh a, tihsual nawn leh kha Pathianin a phal lo rêng a ni," tiin ka en vang vang a.



"Eng nge?" a rawn ti sup a.



"Ka hmangaih lutuk che."



Ka zak lo, ka hmangaih êm rêng a ni. Ani lo hi chuan ka rilru an luah lo va, ka duh thei ngai lo bawk. Essa chauh hi ka thinlung chahbi kawltu a ni a, amah chauhin a hawngin a khâr thei bawk a ni.



"Min nei a nih chuan inchhîr turin ka siam ngai lo ang che."



Maremite nupain min lawmpui takzet. A nu erawh a zin a lo la haw thei lo va, awm ve se min lawmpui viau tho ang ka ring.



Zànah an remtihpuina thlapin Essa inah chuan ka riak. Min ring a, an rin ang ngeiin ka awm ang.



Essa khum ațangin a tho ngun, ka hre thiam reng mai. Kan insi chêt lo thei bawk si lo va, inkal hlatsan kan duh lo a ni ber; mahse, chu chuan Essa chungah harsatna a siam leh tlat țhìn si.



"Kan ințhen chhûng khán min ngai ve tho em?" tiin thu holam deuh nia ka hriat chu ka zâwt chho a.



"Ngai."



"I thin a rim kha, min ngai lutuk lo deuhin ka ring," ka tih chuan," Hna ka thawk nasa a, ka zin nasa bawk. Chu chu ka tân damdawi țha tak zînga mi a ni, nangmah vànga rilru nat loh leh ngaih loh che ka tum nasa; mahse, ka hlawhchham țhak," a lo ti a.



"Mahse, tu emaw kha chu 'Kat' ti khân i ko chiang alawm, ka hming atân chauh i hmang niah ka lo ngai a," tia ka'n chhuahchhalh chuan," Ka hmu che kha nangmah i ni ngeiin ka hria a; mahse, i lo chêr ta si a, ring ngam chiah lo chein 'Kat' ka rawn ti ta a, Mimi khán min lo chhâng daih a," a ti a.



"I nupui tùr a nih ka lo ring a?"



A nui hawk.



"Nupui neih ka duh ngai lo. Tuna ka rilru thlâk danglamtu chu nangmah i ni, ka bul hnaia awm reng tùr chein ka duh si che a."



Rilru hlim takin mumang nei miah lovin ka muhìl, ka muhìl phal vak lo a nia, amahin," Muhìl tawh rawh, i meng rei tawh," tia min kuah tlat avàngin ka muhìl ta.



Sumo-ah ka chuang phei lo. Amahin min thlah phei a, Lungleiah pawh ding hran lovin kan khaw lamah kan tlân nghál.



Essa an hmuh avàngin ka nu leh pa hmêlah chuan lungawi lohna leh thinurna ka hmu lo, țha takin an bia. Ka pa pawh a dik thlap tawh, over ni chuang lovin țha theihtàwpin a lo bia.



Zanriah kîl hmain ka pa hnênah nupuia neih atân min dîl ta tehrêng a nih chu! Ka zak ve deuh chem chem; mahse, huaisen ka ti lutuk thung! An thu sawi, an țawngkam hriat châk deuh si, hre ngam chiah lo bawk siin ka awm, a va hahthlâk tak!



Zanriah ei laiin eng mah an sawi chhuak si lo va, a rûkin ka melh tawn chhên, ka pa chuan ngaih loh lamah a lo ngaih loh hrâm ka beisei.



A awm rei hman lo, workshop kalsan rei viau lah a tih chi loh a, a tûk tûkțhuan ei khamah a haw phei leh.



A haw zànah ka pain min fiam zuk zuk.



"Amah kha a rawn inpalai a nih deuh kha maw?!! Mâkpa huaisen tak kan nei dâwn e," tiin a nui suk suk a.



Mâkpa. Mâkpa huaisen.



Kan inneih a remti tihna. Ka rilruin ka zuang tawr tawr, ka thlâwk dawng dawng lo chauh a ni!



"A rintlâk dâwn em ni?" ka nu chuan a lo ti, hlauthâwng fêin ka nu chu ka en vat a; mahse, a lo nui sâng ka hmuh chuan ka thaw ta huai huai.



"A neitu tùr berin a duh chuan le."



Dàn thianghlim kher ngai ka ti lo a nia; mahse, ka chhûngte hian an ti tlat a. Kei chuan awlsam thei ang berin a rang thei ang ber bawkin inneih ka duh, nghah leh reng hi hrehawm ka ti.



A tàwpa tàwpah chuan kan khuaah Dàn thianghlimin kan innei ta. Mi pawh kan tam ve khawp mai, min lawmpuitute vek an ni. Maremite an chhûngin a rawn kal, an tițha asin.



Kan inneih hnu a tûkah Aizâwlah kan phei. Maremite nèn kan phei tlâng a, naute ka pawm reng mai.



"Nu nih i inhmeh ngawt ang!"



"Engah ngawt?"



"I duat hmel êm kha, i fa tak ni phei se..."



Nia, naute hi ka lâwm, an khabe te tak tê hi ka lâwm, an hnâr nèn.



"Kan neih thuai ka beisei," a tih chuan a kutah dawmsakin," Tehrêng mai, Pathianin min pe thuai mai ang," ka ti a.



Nizàn khân kan che dùn lo hrim hrim, a chauhthlâk bâkah mi dangin min hual țhup si a, ka khawngaih roh asin. Nupui neih zànah nupa nun kan chèn thei lo a nia.



Mahse, hun kan ngah êm mai.



Maremite inah zanriah kan ei a, chumi hnuah kan honeymoon hmanna tùr lam kan pan ta nghâl.



Motor chuanna avànga kan taksa rawl deuh țhûmte chu tuiluma kan inchiah vang vang hnuah chuan a reh ve mai.



"Zanin chu i muthilh ka phal lo maithei a ni."



A pawi lo, ani pawh a meng ve reng dâwn tho tihna a nia, bâkah, naktúk lamah tihtùr kan nei hran hleinem le.



*******



Thla 10 hnuah chuan



"Kat, harh teh, kan fanu hi a duhawm lutuk!"



Ka meng siar siar, nau ka neihnaah ka chau lutuk ringawt! Ka muhìl nghâl zêl, ka meng thei lo.



Naute chu a lo pawm, ka meng min hmuh chuan a rawn kûn hnai a, ka chalah a rawn fâwp. Ka hmaia lum deuh pap rawn far chu eng nge ni ta?


Men fiah tumin ka mit ka khap sak sak, Essa chu a mittui a lo tla maw?!! Eng vang nge? Naute vang maw? A fanu a hmu hian a hnuk a tiulh maw?!



"I țap elo?"



"Mittui tlâk hi a phû êm asin. A duhawm sì, nang nèna kan fa ngei naute hi ka pawm a ni tih pawh ka la ring thei lo rum rum asin," a ti sup a.



Ka nui sak a.



"A hmelțha tiraw?"



"Aw, a chhùn che a nih hi. A mak e! Ka la ringhlel rum rum, ka fa ngei ka han pawm a nia! Pathian hi a lo awm tak tak a nih ka ring ve hial tawh a ni, fanu duhawm ber min pe bawk si a."



Kan fanu lo piang chuan kan nupa nun a tifamkim. Chhûngkaw dik tak kan ni ve ta, a han duat êm êm khawp mai a, ka rai chhûng zawnga min duatzia ka hriat reng avàngin keh thei dawm meuhin a dawm ang tih ka hria.



A hming tak pawhin kan ko phal lo, "Duatberi" a ni tawp mai.



"Kat, naktûk lam chu 2020(Ţwanți ţwanți a ti deuh kher) lamah kan phei dâwn em niang? A pite pawhin an hmu châk leh tawh ang," a tih chuan ka tûm lui deuh hlek a.



"I sawi dàn kher kha!" Ka ti hlak a.



"Eng?" tiin min rawn en a, chutah nui hukin," Ţwanți țwanți ka tih kha maw i tih?" a ti a.



Tüm lui deuh bârin," Lunglei lamah ti ve mai la," ka ti deuh hmak.



"Aw, Lunglei lamah, chuan in khaw lamah pawh. Țwanți țwanți hi lam a lo nuam ber mai, a hming pawh a mawi," a ti leh deuh kher.



"Ka ngei tawp!" ka lo ti.



Hnung lam ațanga min rawn kuahin," I tùm deuh khân i sexy zual a nia aw, nu i nih hnu hian ka hmu sexy sawt bawk che," ka beng bulah chuan a rawn ti sar sar a.



"Sî bawk lo, ka chhiat hnek hnukzia hi-"



Ka hmui a rawn khàr tâk avangin ka țawng zawm tawh lo. Insit taka ka țawng hi a duh ngai lo va, sexy min ti ziah. A bulah hi chuan țha ber ang hian inngai ila min duh ni berin ka hria.



Kan thâwk a dik loh țan deuh lai tak chuan Duatberi a rawn țê ta țhat, kan thil tih lai kan tàwp chiang kher mai.



"A va hun lo tak!"



Nuih sakin," A pa pawi a sawi chiang mai," tiin ka tál chhuak ta vat a.



Tunah chuan hlim takin kan damchhûngni kan chhiar chho mêk a ni. Ani pawhin nunphung pângngai a zir chho zêl a, ka pa pawh a haw tawh bîk lo. A nunah thil tam tak tâwk tawh mah se ser reh thei lo tam tak kha tih reh a ni nual tawh tih ka hria. Hlim takin thinlung takin a nui ve hawk hawk thei tawh a, Biak in ni se Sunday-ah kan kal ziah, kan țhulh ngai lo. Pasal țha tak leh a fanu duat êm êmtu a ni a, ka rai chhûng zawnga min duat theihzia ka ngaihtuahin a fanu pawh hi a duat êm êm dâwn tih ka hria. Chhûngkaw hlim tak kan ni, hetiang bâka hlimna nei hi an tam vak bîkin ka ring lo.



"A pian ahnu lama ka ngei ber țum a la ni ngei ngei ang," a ti bul bul a.



"Het, a hria ang e."



"A harh kha a hun lo êm alawm!"



Ka nui hak hak. Pa chu a ni ve tawh si a, amah chawp hian thlèm ngai an ni si.



"Țwanți țwanți a nih mai chu!"





THE END






*INNGAITLÂWM TAKIN NUNG RAWH, MI FINGIN ' KA FING' AN TI NGAI LO, INNGAIHTLÀWM HI FINNA PAKHAT A NI; MAHSE, INNGAITLÂWM OVER SUH, MIIN AN RAP BET PALH HLAUH ANG CHE*