2020 By Dingdi Pachuau (Completed)

Episode nei ho a hlawm a dahkhawmna
Ngaia
Site Admin
Posts: 25813
Joined: April 30th, 2016, 4:07 pm

2020 By Dingdi Pachuau (Completed)

Unread post by Ngaia » March 15th, 2020, 6:08 pm

gw51wfcu.jpg
gw51wfcu.jpg (28.92 KiB) Viewed 29642 times

☆2020☆ - By Dingdi Pachuau



"Thingtlâng nula tak hi chuh!"


Chu thu rawn sawitu chu rum zet hian ka melh ràn ringawt. Mahni lo maha zah ve nâklaia, ka thin tertek a chhuak leh hman țhelh a ni.


"Awi, a pawi ka ti lutuk! Ka thiam loh vek a ni," Maremi chuan a lo ti mawlh mawlh thung a, ka no chhar chu lo banin a rawmawl chu ka kutah a hmeh bel nghâl zat a, kei pawhin chu pa lak atang chuan ka mit ka la sawn ve ta nghâl bawk a.


"Engah mah ngai mah ta che!" tiin ka nuih sak a.


Restaurant-ah kan chàwl a. Maremi bag singsa kual chuan dawhkàna tui inna no a vai tlu palh hlauh mai a, chhuata a tla tùr ka lo ban ve vat nain ka man hman lo, plastic no a nih vàng erawh chuan a keh êm lo thung.


He pa 'Chimawmliana' hian min lo hmu fuh leh pek niin, a hmain kan college canteen-a ka che chhe lai min lo nuihsawh tawh bawk! Chumi țum chuan min nuihsawh dàn kha ka pâi dài thei țhak lo, ka vawi khat hmuhna mah ni se ka'n chhàn lêt ve hlak kha.


Mahse, tûn țum hi chu chhàn lêtna chi pawh a ni lo, chàwl ve an tam lutuk tlat, a vànnei lel lawl khawp mai. Rum tâwka melh chiah ka chhàn lêt theih chhun a ni rih, ka thinlung erawh a sa halh halh khawp mai.


Hostel kan thlen dâwn chuan," Vawiin zet chu, keimah vàngin zah i tuar leh sia, pawi ka ti tak tak a ni," a ti chhuak leh a.


"A ho lutuk! Theihnghilh rawh, naktûk test tùr kha i thiam chiang tawh em?" ka ti daih a.


"Aw, thiam ve tawh mai e."


"Sir Pêka a ni tho a, thiam vak lo pawh ni ila engtin mah min ti leh chuang lo ang," ngaihsam tak hian ka ti a.


"Mahse, i thiam tawh tho kha."


"Ni e." Kan inen a, kan nui dùn ta tlâwrh tlâwrh a.


Mizoram khawpui ber Aizawlah college kalin ka awm ve a, in luahpui tùr ka hriat loh vàngin private hostel-ah ka awm a, Lungleiah ka ute awm tho mah se hmân ațanga ka lo châk ve țhin Zâwlkhawpuiah ngei college kal ka duh tlat a, ka hlawhtling ve ta ngei bawk.


HBC-ah commerce ka la a, class țan nî ațangin Maremi nèn hian kan țhu dùn a, inhre sa pawh kan ni lo; mahse, kan inmil a ni chêk ang chu, inbe vak lo mah ila kan thu dùn a, kan inkàwm chho ta char char chu a nih hi. Ani chu Aizawla awm nghet a ni ve thung a, kan hostel chhak lawkah in an nei nghe nghe a, kan inkàwm ngeih tawh khawp mai. Class kal tùrin kan innghâk ziah a, bànah kan bâng rual a, kan hâw tlâng leh thei bawk a, ni tin kan inzui ti ila a dik ang.


Maremi nèn hian pâwn lam lan dànah chuan Chhim leh Hmàr ang hlauh kan ni. Ani chu a tê a, a ngo ver bawk. Kei chu ngo tak tia sawi tùr ka ni lêm lo, ka sam a sei a, ani a tãwi thung. Ka chêr hran lo va, thau ka ni hek lo. Maremi erawh a chêr a, a nù zêm reuh bawk. Kan pahniha kan inzui hi chu kan class țhiante hian min fiam peih a, 'nangni nupa hi' min ti țhìn, kan nuihpui nasa thei lutuk. Kei ka nù fahran lo va, Maremi a nù zêm thung a, kan inkàwm thei phian lawi si.


College mipaho hian chhài enah min en pawhin ka hre lo; mahse, pawi ka ti țhak nâng. Anni tel lo pawh hian ka tlei thei tih ka hre chiang, ka hlim ve thei lutuk tlat; mahse, hmana ka țhian kawm ve țhin Fîkea erawh kha chu ka ngai ve țhìn, ani kha chu mipa ang pawhin ka en ngai lo, ka țhian a ni, pâwl sarih ka zir laia ka kawm nasat ber kha a ni miau a.


Zanriah ei hmain ka inbual a, khua a lum lutuk lo nain chaw ei hmaa inbual hi ka chîng tlat a, ka sim hlei thei lo. Chaw ei hi a tui duh bîkin ka hre tlat tawh nia.


Devotion kan hman zawh hnuah chaw kan ei a, ka bul chiaha țhu Sangpuii chuan," Bt, i nute hmarcha tui zet kha chah leh tawh la?" a ti lar lar a, ani chuan," Kawng a țhat chuan le," a lo ti daih a.


"Engtiziaa kawng chungchâng chu rawn sawi daih nge i nih a?" Achawii'n a lo ti vat.


"Aw...tûnlai chu kawng chhia a tam em hi, kawng a chhiat chuan sumo a rawn tlân thei dâwn hlei nem, sumo-ah an rawn thawn leh àwm sia."


Kan nui ta dar dar a.


Fùr lai a ni a, hmun hrang hrangah kawng a chhia a, ruahtui tlâk hun lai a nih miau avàngin kawng chu a siam tak tak theih loh a, kawng dâl leimin paih fai deuh tawp loh chu siam dàn a awm rih lo a ni.


Zànah Sir Pêka paper test tùr chu ka en leh thuak thuak a, ka thiam chiang ve ngang mai a, ka huphurh hlawl lo. A strict leh dâwn bawk si lo va, entawn an tam leh ang chu!


Mut dâwn hnaihah chuan online ve zawk ka tum a, data ka on chiah chu notification rawn thleng nghâl țuk țuk mai.


WhatsApp Group noti ka mute vek tih ka hria a, mak ka ti khawp mai. Ka la en hman rih loh avàngin makti rilru tak chung chuan ka hmai chu ka phih a, ka rilruah erawh eng message tak dawng ang maw tih chauh ka ngaihtuah, a chhan chu ka chhûngte leh Maremi tih loh hnên ațang chuan message hi ka dawng khât ve êm a ni.


Mut ka inpeih chuan phone chu lain ka'n en chiang a, GHSS Lunglei Class xi kan batch khân whatsApp group thar an lo siam niin! Manuna'n min lo add ve a, an active char char khawp mai a lo ni a, group info ka en leh vat a, kan kim hmel khawp mai; noti erawh ka mute leh nghâl hmak thung.


An titi chu ka chhiar thla zêl a, lunghlui an tilêng reuh hlawm mang e! Manuna number tih loh mi dang number ka nei hauh lo. An titi chu chhiar pahin an hming ka en thla pah zêl a, C.Lallawmpuii tih hming ka hmu chiah chu, ka thinlung hi a rawn țêk sawkin ka hria!


Chu hming chu ka en reng nain ka hmu chiang lo telh telh, ka mitthla suangtuahnaah hun kal tawh a rawn lang zut zut mai, nimin ang maia chiang leh fiahin ka hmu bawk.



~~~Flashback~~~



"A nuam reuh e! Hmel hriat pawh ka nei țeuh asin."


Ka țhiannu chhar thar Lawmi chu ka en phei nghâl a, a lo nui sâng mai, ka nui ve ringawt.


GHSS Lungleiah class xi commerce ka zir mêk, class kan țanna pawh kâr khat chauh a la ni. Hmel hriat ka nei hran lo va, class țan niah Lawmi hi ka bulah a rawn țhu ve a, chuta țang chuan kan inkàwm chho ve ta. A fel a, a țawng duh a, a hmel a țha bawk. Lungleia khawsa hlun an ni bawk a, hmel hriat pawh a ngah khawp mai. Ka first day-a ka hmel hriat hmasak ber a nih vàngin ka ngaina, a nui duh bawk a, kan inkàwm ta chawt.


"Kan senior-ah hian chhe lo tih deuh ka nei asin."


Hmeichhia nih chuan hetiang țawngkam hi chu kan hre fo, kei ngei pawhin ka țhian lo kawm tawhte lak ațangin ka hre fo. Chhe lo an tihho lah hi an chhe thei si, țha ka tih zawng an ni ngai lo.


"A ni maw?" Hetiang bâk hian chhàn ngaihna ka hre lo.


"Chhe lo tak a ni. Chuan, a luck viau bawk."


Ka ngaihven zawng pawh a ni lo, mipa lam hi ka la ngaihven ngai lo; mahse, a hriatah erawh chuan ka ngaihven lui ve rih zâwk.


"Hmuh ve a châkawm a nih chu."


"I la hmu mai ang."


Kâr khat hnuah ka hmu ve ta ngei, 'chhe lo' a tih kha a lo ti dik, a lo sawi uar lo daih zawk a ni! Mipa hmelțha ka hmuh vawi khatna! Ka mit ka la sawn thei lo lek lek a ni; mahse, ka en reng ngam lo, ka mit ațangin chhe lo ka ti lutuk tih a hria ang tih ka hlau.


Mahse, a hnu lamah erawh ka hmu leh tawh miah lo, Class a kal khât a niang, Lawmi erawh a chanchin ka zâwt ngam teuh lo, ani pawhin a sawi chuang lo.


Test leh exam neuh neuh kan neihah chuan ka ti țha ber zêl, lehkha zir ni lo thil dang ka rilruah ka dah duh lo ve tlat. Lehkha zir laia ngaihzawng neihte hi ka duh dàn a ni ve lo, a chhan chu kei chu ka thiam ve lo ang. Ka rilru ka pe tlur ang a, ka zirlaiah ka ti țha thei lo ang tih ka hlau a ni.


"Lehkha i thiam thei e! I zir peih bawk sia!"


Ka nuih ringawt phawt a, chutah," Nang deuh alawm(Lawmi hian mark tlêm tein min phâk lo) ka zir ang hian zir ve la chuan pakhatna i ni chiang ngawt ang! Ka rilru a chak lo va, ka hrât lâk a ngai alawm," ka ti a, ka sawi hreh chuang lo. Lehkha hi ka thiam thei lo, ka rilru a chak lo va; mahse, ka zir nasa thung.


"Bialpa i nei ngai nange?"


"Ngai lo."


"Engati why?"


Ka ngawi vang vang phawt a," Ka lehkha zirnaah ka buai ka hlau a," ka ti ta sap a.


"Awihawm loh e..!!! I buai lo tawp ang! A nuam ve teh asin, naktûk ațangin i bialpa tùr kan zawng nghâl ang," tiin a nui var var a.


"A, ka duh lo."


"Aih, kei pawhin ka nei tho a, nakina i buai loh nân i nei ve chhin tùr a ni. Tûn thleng thlenga bialpa la neih chhin loh chu, a fuh hian a fuh lo rêng rêng!" tiin uar zet hian a lu a thing nar nar a.


Mak deuh mai chu, he thu a sawi ațanga thla khat pawh a la ral hma chuan 'Chhe lo' tia a sawi khân min rawn be ve ta tlat a nih chu! Nuam ti deuh siin nuam ka ti lo tho. Engtin nge min hriat pawh ka hre lo, a hnuah erawh chuan Lawmite nèn chuan an lo inhria a, chhe lo min lo ti chu niin! Lawmi lakah ka inthlahrung sawt.


Lawmi'n min hrilh pawh chuan chhàn pawh ka chhâng lêt lo, ka awih lo lutuk!!! Bâkah, Lawmi ka zah, engah mah ka ngai duh lo tlat; mahse, chu pa chu kan classroom-ah a rawn kal ta ziah a nih chu! Chhe lo ka ti ropui mai si a, ka bula a țhut te chuan ka lài chhe vek thei nia. Bâkah, thua sawi dawt si lo chuan mi en reng a hrât si a, lài thei tak ka ni.


Lawmi khân chhe lo kha a ti viau si a, tunah lêm, a bulah chhe lo ti angin a awm ngai tawh si lo va, mak ka ti viau. Min thîk viau ang tih ka hlau bawk, a rûkin nuam lo ka ti.


"En teh Zo, a duh hmel che sia, nihpui ngei ngei rawh aw."


Ka nui ringawt.


"Nui ringawt suh, a tihchi viau ang. Kei chuan chhe lo ka ti ringawt a, min duh ve azeng pawh a ni lo va, ràlkhat star ang hi a ni mai. Tunah phei chuan ka bàn leh daih tawh, mi dang ka nei leh tawh," tiin a nui a.


"Tu nge chu chu?"


"I la hre lo ang, kan vênga mi a nia. Engtikah emaw ka la hmuh ve ang che, Sangzuala hi chhâng phawt la?"


Melh ralh pah chuan," Leh ringawt hian a," ka ti ringawt a.


"'Aw' ka lo tihsak dâwn che a nia, ni ngei ngei ang che u, khawvêl nun nawmzia hi han tem ve rêng rêng teh," a ti leh a.


"Ngaihzawng neih ka la duh lo alawm."


Ani lah chuan," Ho mai mai! A duh em che hi, a fel tho bawk si, an awmtheih bâkah-" a ti a, sawi zawm duh lo chuan a ngawi ta daih a.


"I star deuh lo nihpui daihte chu a..." ka lo ti thung a.


"A ho. Ka bàn daih tawh ka tih kha."


Hun âwl hlekah Sangzuala a lo lang ziah si a, mi dangte pawhin an lo hre lo thei lo. Lawmi tihpuina zârah kan han ni ta a, min han care lailêng khawp. Ngaihzawng ka la nei ngai si lo nèn, kei chuan han care dàn ka hre lo khawp thung.


A chhe lo mai ni lovin a fel hle bawk, min duh thiam bawk si a, min care bawk nèn, nuam ka ti lutuk ringawt. A ni têlin ka duh telh telh, ngaihzawng neih pawh chu ka inchhîr lo, a lo nuam êm a lo ni.


Ka rilru ka pêk êm avàng leh a bula awm ka nin theih loh vàng erawh chuan ka zirlai chu ka rilruah a lût thei lo khawp mai. Lehkha zir tùra ka zirlaibu ka han inchhawp ve pawhin ka rilru chu a hnênah chauh a awm. Ani pawhin min ngai, kan awm dun loh hlek chuan kan in bulah a rawn kal chhên a, kan inah tak hi chuan a rawn kal ngam chiah lo. Ka ute hian inlêng neih an phal lo tawp a, țhiante pawh ka hruai ngai lo. Bâkah, sikul naupang nih laia inlêng neih chu kei pawhin ka duh bîk lo.


Ka ngaihzawng nei chu ka zirlaiah ka tihchhiat phah ta rêng, ka rilruah lût thei mawlh hek lo le. Term exam leh test neuh neuhah pawh top 10-ah takngial pawh ka lang pha ta lo. Lawmi chu pakhatna a ni ta a, ka pâwlpuite chuan mak an tih thu an sawi sep sep, kei erawh chuan ka tihchhiat chhan ka hre reng mai; mahse, ka bànsan phal chuang lo, 'Ka la pass ve tho alawm le' tih rilru ka la pu tlat tho.


Kan inkawp chho zêl a, vawi khat chu chawhnu last period kal lovin Lawmite inah kan inhmu a, amah Lawmi pawh a awm tho; mahse, thingpui hmeh lei tùrin rei lo te hnuah a chhuak ta daih a, kan free leh ta khawp mai.


A țawng chhuah hmasak ber chu min duh thu a ni leh ta. Kan pahniha kan awm dun tawh chuan a sawi hmasa ber ziah, chumi hnuah erawh muangchângin exam-naah ka tichhia tih a hriat avàng chuan amah inpuhin inhmuh loh rih deuh a rawt a; kei ve thung chuan a thil sawi chu dâwt a ni tiin ka țang tlat a, inhmuh tlèm pawh chu hrehawm ka ti viau ang tih ka sawi ve thung a.


"Ni lo, i tihchhiat chhan hi keimah vàng a ni, zir thei lêk lovin ka siam che a, ka inthiam thei lo."


Chutiang thu a sawi chhuak te chuan amah chu min duhtîr sauh sauh ni maiin ka hria, ka duh hluah hluah a ni ber mai. Ka rilru zawng zawng ka pe a, a tân ui ka nei hauh lo. Ka hmangaih bur a nih ka ring, min mutpui pawh tum ta sela, ka inphal hialin a nia ka rin ni! A zùnah ka uai chiang lutuk ringawt.


"Ka hmuh loh rei che chuan ka khua a har dâwn asin," tiin ka inngaihtuah lungpuam a, ka mittui a parawl titih ta ringawt. Hmeiche zakzum ve deuh țhìn kha niin ka inhria a; mahse, a bulah chuan ka zak zo tawh lo a nih hi, inhmuh loh deuh pawh chu ka theiin ka ring lo.


A thaw hawk a, ngawi reng chuan min en ta rih a niang, ka en lêt ve lo va, ka hre thei lo. Ka mittui parawl a hmuh ka hlauh vàngin ka hawi chhuak ve ngam lo a ni.


Kan inhmu zut ta lo deuh, a thu ka hnial duh bîk lo, bâkah ka tâna țha tùr a hre zâwk. Lehkha zir tam tùrin min duhsak zâwk tihna a ni a, a thu a puitlin avàng chuan amah ka zah sawt bâkah ka duh sawt bawk.


Kum tàwp a lo ni a, Krismas pawh kan khuaah ka hmang lo. Sikul kal loh chhûnga amah hmuh tam theih ka duh a ni, a bula Krismas hmang tùrin min sâwm pawh a ni hran lo, haw ka peih lo ve tawp, ka ngai dâwn si a.


Kan vêng a inhlat avàng erawh chuan kan inhmu khât phian. Sikul kal lai aiin kan inhmu khât, ka ngai thei khawp mai. Ka ute chuan an bula Krismas ka hmang chu nuam an ti hle a, Kum thar lam erawh kan khuaah hman tlàn an sawi a, ka peih lo kher asin. Ka huphurh sa, Sangzuala ka ngai dâwn si a. Inhmu zut lo mah ila khuahmuna awm chuan zia ka la ti tho tho.


Ruaițheh zawhah Lawmite in lam bawk ka pan leh a, inhmuh kan tum. Min rawn hruai hman rih lo tlat, a bike kha a uin a hmang rih a ni àwm e.


Lawmite in ka thlen chuan a lo reh khawp mai a; mahse, Lawmi inah a awm tih ka hre ve tlat a, ka hawihai chuang lo. Doorbell erawh ka hmet tho, a reh deuh vang vang a, nichîna ka phone lai khân inah a awm thu min hrilh kha a ni a, a lo chhuak bo leh zawk pawh a ni maithei.


Ka nghâk deuh a, minute nga hnu vêlah ka hmet leh a, Lawmi chuan hmel phelh deuh leh sam rawn țâwn țha mawlh mawlh chung chuan kawng min rawn hawn a, nui lui tih hriat taka țhen deuh sak hian," Lo... lût rawh," tiin a en pawh min en lo chuan a hawi sawn leh nghâl daih a.


"I muhìl em ni a?"


A hmui tuai pah chuan," Muhìl chiah lo, i lo thlenna a rei tawh em?" zàwi deuh sap hian a ti leh a.


"Rei lo ve, i awm lo emaw ka ti deuh hman a."


Ka țhu fel deuh chiah tihah Sangzuala pawh a rawn lût ve mai. A sam chu a helmet khumna vàng a ni ngei ang, a thur siang mai; mahse, a inhmeh ka ti tho.


"A..i thlenna a rei tawh em?" tiin ka bulah chuan a rawn țhu a.


"Rei lo ve, ka thleng deuh chiah. Kha, i jacket-a kha thil sen a kai a nia," tiin a jacket buang lam deuha rawng sen kai chu ka lo kâwk a.


A en vat a, chek hlak pah chuan," Va chi loh tak!" a ti sap bawk a.


"Nula lipstick tihkài a ni lo maw?" fiamthu hian ka ti a.


A nui sak a, Lawmi ka va en a, ani chuan nuam lo tih hmel tak hian a țhutna ațanga tho vatin," Kawrlum ka'n ha lawk ang e," tiin a room lamah a lût ta daih a.


"Thil thleng a awm em ni le? Lawmi kha a nawm loh hmel riau mai," ka ti sap a.


"Chutiang hmel a lo pu a ni maw? Nangmah chauh ka lo en che a, ka lo hre ve miah lo."


A inla țawngkam thiam thei a nia.


Lawmi room-ah kan awm a, ani pawh chu a bialpa nèn inhnuai lamah an awm thung. A bialpa hi ka hmu vak ngai lo, hriat pawh ka hre chiang lo rêng.


"Kumthar hetah i hmang ang tiraw?"


"Aih, chhungkuain hman tlàn kan tum a."


Lehlam a hawi a, ka pawitih tluk zetin pawi a ti ve tho a ni maithei.


"Kan inhmu har viau dâwn tihna a ni maw?" tiin a rawn hawi a.


"Ka huphurh lutuk! Krismas ka hmang tawh sia, ka nu leh pate ka hnial ngam tawh lo a ni," ka lo ti a.


"A țha alawm."


A lung a awi lo ang tih ka va hlau tak!


"Eng nge țha chu?" tiin ka zâwt lêt a.


"Chhûngte thu zawm chu maw le. Ka lo ngai viau thung che ang a..."


Thil dang a sawi leh hmain ka kuah thlawp, kei deuh hian asin ngai dâwn ni. Theih ni se ka chhûngte hnial chu ka duh lutuk; mahse, Krismas ka hmang tawh si a, ka hnial thei tawh lo ang.


Kan infâwp a, kan duhthawh a, kei phei chu ka zei fahran lo si a, ka thaw a chham mai dâwnin ka hria. Ka lungphu a rang a, ka thaw hak hak tawh mai.


"I va duhawm tak! Ka duh dàn ang chiahin i zei bawk!"


Nuam ka va ti tak! A duh dàn ang chiahin ka zei bawk si.


"Ka zei loh êm hi."


Ka kut chu lain a awmah chuan a nghat a," Ka zirtîr ang che aw, i duh em?" tiin ka mitah chiang zet hian a rawn en chhuk ta ràn a.


Chhàn ngaihna ka hriat loh vàngin ka melh chho ràn ringawt.


Rawn kûn hniamin fet zet hian ka hmuiah chuan a rawn fâwp a, a thaw pah hawk bawk. Ka biang leh nghâwngte a fawh paha a thaw lum ham hamte chuan min tiphûr telh telh a, eng thil dang mah ka ngaihtuah thei lo.


"Ka nute...an lo haw!!" tia Lawmi țawng ri ka hriat tâkah chuan ka harh chhuak ve deuh zawk. Kan thil tih lai pawh kan tàwp ve ve. Țawng ri awmna lam ka en phei a, Lawmi makti hmel chu chiang lo ruai hian ka va hmu a, a kuta hmui hup chungin a tlân chhuak nghâl daih. Chutah, ka rilru chu a harh fîm ta deuh a, ka han inen a, Sangzuala nèn khumah chuan ruak deuhthawin kan lo mu dùn reng tawh niin!


"Ni lo, ni lo...!!!" tiin ka tho chhuak nghâl vat. Zahnain min rawn man nghâl, ruak deuhthawa ka bialpa nèn a khuma kan awm ka țhiannuin min rawn hmu chu ka zak ta ngawih ngawih.


Kumthar chu kan khuaah ka hmang ta ngei, ka lunglènzia chu pui tak a ni. Phone ka nei ve si lo va, vawi khat mah kan khuaa ka awm chhûng chuan kan inbe thei lo a nih ber chu. Ka ngai ngawih ngawih. Hlim takin hun kan hmang dùn a, ka hlim tehlul nèn, khawhar lunglêng takin ka awm leh ta rih chu a ni si a, hrehawm ka va ti tak!


Sikul țan hnuah erawh chuan kan inhmu leh thei ta, Lawmi erawh ka zah thar ta deuh, amah pawh chuan nuam lo a ti ve deuh a nih ka ring, ka awm dàn chu a hre thiam ve pawh a ni maithei, kan țawng vak lo. Kan țhut dun reng pawhin a lam ka hawi ngam lo. A mit taka en phei chu ka zak tawh!


Hrehawm ka tih êm avàngin Lawmite inah chuan inhmuh ka duh tawh lo va, hun thâwl kan nei khât ta. Ani pawhin min hre thiam a, min tilui lo. Ka ute ina a lo lèn ka phal si lo va, ngai viau mah ila ka ute lakah ka inthlahrung, bâkah, college êm pawh ka la rap si lo.


February thlaah kan exam dâwn avàngin lehkha zir nasat ka ngai, chu chu Sangzuala pawhin min duhpui a nih kha. Ka tihchhiat chuan a inpuh leh palh ang a, min țhen daih palh ang. Țha taka tih ka tum ve ang; mahse, ngaihtuah loh erawh a har ngawt ang, tunah pawh ka ngai vawng vawng a ni si.



*I HMELMA LIAN BER CHU NANGMAH KHA I NI*


*** KAN WEBSITE A FAKNA LAM THIL MILEM LANG THIN I LO HMET ZEUH HIAN KAN WRITER TE HLAWH KAN TUMSAK ZEL TIH KAN HRE THEUH DAWN NIA, KAN LAWM E***

Website story link ho awlsam zawka in zawn hmuh zung zung theih nan STORY FB group siam a ni a. Whatsapp group pawh siam a ni e. Complete tawh ho zawng zawng leh story kallai kan dah vek avangin avangin in lo join theuh dawn nia..
Group link : https://www.facebook.com/groups/991354610918230/



Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » March 15th, 2020, 6:09 pm

☆2020☆ - 2 By Dingdi Pachuau

Ni khat chu sikul inthiarna hmuna ka awm laiin kan senior hmeichhiate titi chu ka hre ru ta a.

"... lêrh ve zia hi chu aw!!"

"A luck ve êm bawk a nih hi."

"Hmm, nia, chhe lo leh hausa bawk si hi chu..." tiin pakhat chu a nui hã hã a.

Mi pakhat chanchin bâk a nih ka ring lo. Ngaihthlâk rûk duh lo viau mah ila beng hup ringawt thu awm bîk hek suh, an titi chu ka hre chho ta zêl. An sawi dik vek. Chhe lo, luck, hausa leh hmeichhe duh chi lutuk.

"An inhriat tawn lohte chuan a țha a ni mai alawm."

"A tih dàn hi a fair lo ve êm alawm."

"A duh zât zât chu lo nei mai mai teh se a."

"Tihian, a ti kual vêl mai mai alawm, a la che buai ve tho ang."

Ka thil hriat chuan ka rilru a tibuai deuh nak; mahse, a luck êm avàng leh a chhiat loh êm avàngin hetiang hi chu ka tawng fo ang tih kha ka hre sa a, a hma pawhin mi sawi deuh sep sep chu ka hre tawh tho a nih kha. Luck deuh leh chhe lo deuh hi chuan sawi sep an kài duh viau hi maw.

Chhùn chawlha kan inhmuh veleh ka thil hriat chu a thuphungin ka zâwt ve tho a; mahse, a phâ. Ka rin dàn a ni tho. Lo ngaizâwngtu an tam dâwn tih ka hre ve a, chu chu hre chiang mang lote chuan 'lêrh' an tihphah ngei ang. Hmeichhia a bula an awm apianga thîk leh rinhlelh ringawt tùr pawh a ni chuang lo.

"Min rin loh phah tihna em ni?"

Hmeichhe dangin an zar chu ka ring alawm, kei aia țha tak tak hlîr an ni ngei bawk. Kei min duh ve tlat mai hi mak deuh zâwk asin.

"Ka ring che alawm, mi sawi ka hriat ka zâwt mai mai che a nih kha."

"Inrinhlelh hi ka duh miah lo."

A lung chu a awi vak loh hmel nain țha tak chuan kan inthlahin ka hria; mahse, chumi tlai ka haw kawngah chuan hmeichhe pakhat sam sen thar mai phura chak zeta a tlãn chu ka hmu. Ka ringhlel ang em? Rilru na ru deuh takin ka en zui vang vang, ka rinhlelh hlauh chuan keimah ka intihrehawm dâwn tihna.

Ka ringhlel lo ang, hmeichhia chu a duh duh a phur ve thei tho alawm.

Mahse, a tûkah pawh chu nu bawk chu a phur ka hmu leh ta. Chu achhapah ka pâwlpui hmeichhiaten an sawi sap chu ka hre leh bawk, rinhlelh duh lo mah ila ka rilru a nuam ta lo. Nimin lah khân a lung kha a awi vak lo deuh a nih kha, ka ringhlel anga a hriat vàng khân. Thil awm dàn chu a sawi fiah ve ngei chu a ngai tawh ang, vawi hnih ka hmu ve ta tlat, a hmain ka hmu ngai si lo.

"Inrinhlelh ka duh lo ka tih tawh kha."

"Tu nge tih tal min hrilh la?" ka ti ve tlat a.

"I hre ve chuang lo ang, ka bialnu erawh a ni lo."

A hming chu a sawi ta tho, ka hriat zâwng a ni lo; mahse, ka rilru a nuam chuang lo. Amah lah chu a thin a rim deuh hlur a, 'ka bialnu a ni lo ka ti chung pawhin min ringhlel' a ti tlat a, lungawi vak lovin kan ințhen.

Chuta țang chuan kan inkâr a pângngai tawh lo, hrehawm ka ti lutuk ringawt. Ka duh êm êm tawh si a, kei akâr min duh vea min kawptu hi ka ringhlel chu a ni ta si, amah ka thlâkhlelh leh ka ngaih ang hian min ngaiin min thlahlel ve ngawih ngawih àwm dèr si lo.

Ka rinhlelh deuh vàng khân min be tawh miah lo, a thin a rim a ni ngei ang, mi dang dang a phur ka hmu ta rêng bawk. Min be duh lo ta chu va biakpawh ka hreh ta viau a, inhmu mah ila min hai der hmak tawh si. Ka hmuh apiangin hmeichhe hran hran a bulah ka hmu zêl bawk, hei hi kan tàwpna tùr chu a nih ka ring ta. Nia, a duh phawt chuan min țhen thei chiang alawm; mahse, kei ve thung hi?

Ka ngaihna leh thlâkhlelhna a reh thei si lo, ka hmuh khât deuh chuan ka ngai zual sauh. A rûkin ka tuar a, lehkha zir luih ka tum ve țàng țáng. A hahthlâk tak zet a ni. Hrehawm ka ti lutuk, min be duh lo ringawt mai pawh chu ka tân chuan a na thlâwt, bialpa ka neih ngai loh bâkah ka vawi khat neihna a nia, ka duh hlur tawh awk si. Bâkah, hetia min be duh lo lo hian țha takin min țhenna thu chu sawi mai ta se a zia zâwk ngeiin ka ring.

Exam hma kâr hnih la awmah chuan Lawmi nèn an inkawp nghet hle a ni tih ama sawi ngei ka hre ta, chu pawh ka hriat lai leh mi dang dang hriat lai ngeiin. A bulah Lawmi a ding nghe nghe. Ka thinlung hi a keh sawm vekin ka hria. Lawmi ka țhiannu leh ka kawm ve ber nèn lehnghâl, mak ka ti lutuk!! Thla khati chen kha kan inzui ve a, Lawmite inah hial kan inhmu țhìn a nih kha. Ka țhiannu ka kawm ve ber leh Sangzuala pawh min tihpui vektu, min sawi rempuitu ngei mai nèn an lo inkawp reng tih hriat chu, mak tak a ni!

Lawmi hmuh chu hrehawm ka ti zual sauh. Amah lah chu nuam tih hmel zet hian a țawng lar lar reng a, hrehawm ka tihzia chu, pui tak a ni. Kan class-a mite zawng zawngin kan ni tih an hria a, section dang pawhin an hre tho ang, amah a lãr ém mai a, hriat loh chi a ni lo ang.

Nâ ka ti lutuk a, class pawh kal chhunzawm lovin ka haw daih. Ka țap deuh pùr nghe nghe, hetia rilru na taka tàwp hi ka duh lo asin. Min țhen a duh chuan țha tê têin min țhen se, zak tak leh rilru hrehawm taka min siam kher lo hian.

Ka lu nat ka chhuanlam a, zanriah pawh ka kîl ve lo. A rûkin ka țap char char, ka zak a, ka rilru a na êm êm bawk. Amah Lawmi vàng liau liauin a bialpa lo ni reng chu ka nihpui a, ka hlim a ka duh êm êm hnuah rilru na takin min siam leh si, Lawmi chu ka ngei ngawih ngawih maiin ka hria.

Ka inngaihtuah kual nasa lutuk a, mut pawh ka muhìl thei lo. Lehkha zir phei chu, ka tum chhin lo law law. Lawmi chuan ka rilru a tina ngawih ngawih, min tihpui tê tê a, min neihsak leh daih si. Ka kawm ber leh ka țhian neih chhun, Sangzuala nèna kan inhmuh dàn tùr pawh min ruahmansak vektu a ni lehnghâl a, mak ka ti lo thei lo.

Class ka kal tawh lo, ka pâwlpuite ka hmu zak. Bâkah, Lawmi hmuh ka hreh, thih hrehin ka hreh tawh. Kan awm dàn engkim hretu a ni si a, ka zah hran lo nain ka zak thung.

Hrehawm ka tih zual deuh lai phei chuan hmeichhe dang laka ka lo ringhlel kha ka inchhîr rum rum. Lo ringhlel lo ila chuan tunah te hian kan la inkawp àwm sia, ka rilru pawh a la hrehawm lo tùr ti tein ka ngaihtuah a, ka han inchhîr leh rih a, awmzia lah chu a awm dèr si lo.

Lehkha zir chu, har tak a ni, har tak. Ka bei a dawng ngawih ngawih, final exam chu ni lo se chuan fail dâwn pawh ni ila a la zia deuh ang a; mahse, fail chi a ni tawh si lo. Ka zirlai ka han bih a, mitthlaah Sangzuala ka hmu nghâl zêl, ka hawina hmun tinah ka hmu zêl maiin ka hria.

Chaw ka ei thei lo va, zànah ka mu thei lo bawk, kan exam chhûng a rei lo nain ka rihna a tla hniam nasa hman hle.

Exam zawh niah sikul ațanga ka haw tùr chu Lawmi, min tâwk tùr takin a rawn kal phei a, hmuh loh theih a ni lo. Hrehawm ti rilru taka ka kal pelh dâwn lai chuan nui ar ar chung hian," I chhâng țha maw?" tiin min bia a, min biak tâkah chuan ka ding dat a.

"Aw...a zia mai..."

"La na vak duh mah ta che, ka ruahmanna vàng maia ngaizâwng 'der'che alawm a nih. A duh tak takah che i lo ngai a ni ang e, a kawp hma che khân kan ni daih tawh! Pakhatna dinhmun ațanga pawh thlâk che ka duh vàng a nih kha, a hlawhtling ta phian bawk a," tiin ngeiawm zet hian a nui leh a.

Mi dang a thu sawi hre pha tùr kan bula an awm lo hlauh chu ka lãwm khawp mai, ka inpet ruh ngar ngar thung.

Kalsan tuma ka pên leh chiah chu," Nang ang thingtlâng mi a ngaihzàwn duh tak tak che i ring pawh hi a mak ka ti! I phû tâwk hre ta che..."

Ka ngaithla duh tawh lo, ka kalsan ta hlawk hlawk.

A thil sawi kha râpthlâk ka ti lutuk, ka zak bawk si. Khatiang mize pu kha a lo ni ang tih ngaihna ka hre hauh lo, a inhmeh lo ka ti, ka chunga a țhat theih tehlul nèn. Lem a lo chang mai mai tihna a lo ni si a, ka thil ngaihtuah vànga lu thing nawk nawk chung chuan chak zet hian in lam panin ka kal ta hlawk hlawk a.

"Va hmanhmawh ve!"

Ka ding deuh dat. En lo mah ila tu nge tih ka hre chiang khawp mai. En pawh ka tum lo, chhàn pawh ka tum chuang lo, ka kal leh nghâl a.

"Lo ding teh," tiin ka bânah a rawn man ta chat a.

"Min thlah rawh!" Ka țawng a ring lo nain ka ti mai mai lo tih a hre ngei ang chu!

"I ngaihawm-"

Ka bân a chelhna chu ka kut lehlama phih thlâksak dâwrhin," Min thlah rawh ka tih chu!" ka ti vîn ta țhak a.

"I va thinchhe ta ve..."

Hawi lêt miah lovin chak zet hian ka kal ta dàwr dáwr. Biak ka duh lo, bâkah, ani min biak pawh chu ka duh chuang lo, ka chunga khatiang 'game țhing' khèl duh kha chu ka tân mi țha a ni thei lo.

Result a chhuak a, ka pass ve hrâm. Cl-xii chu sikul danga zir ka duh viau nain uniform thlâk leh vek a ngai dâwn si a, kum khat chauh ka ha àwm si a, ka chhûngte bulah ka sawi duh ta lo va. Vànneihthlâk takin Lawmi chuan a sikul kalna a sawn hlauh mai, ka thaw huai.

Mipa ka ngaihtuah leh chhin tawh lo. Ka zirlai chauh ka ngaihtuah a, ka pâwlpuite chuan ' I ât phah ang e' tiin min fiam fo, ka â dâwn lo tih ka hre kar a, țha taka pass ka tum tlat, chu chu Lawmi chunga ka phuba lâk theihna tih ka vawng reng, ka theihnghilh ngai lo.

Ka nungchang erawh a dang ta khawp mai. Ka thin a chhia a, mipa lakah hlauh phei chuan ka ti 'hrâk' mai, min nêl tehchiam lo, pawi pawh ka ti chuang lo, mipa hian min tibuai mai mai tawh lo ang tih rilru ka pu ta hial rêng a ni. Ka incheina ni se, hâk nuam ka tih leh ka inrintâwk theihna tùr ber, chêtpui nuam bawk si chauh ka inbel țhìn, mipa mit lâk tumin ka inthuam ngai tawh lo.

Ka zir țha bawk a, ka pass țha khawp mai. Top ten-ah ka lang pha hial, ka lâwm takzet a ni. Ka chhûngte pawh an lâwm, college chu ka duhna bera kal tùrin min ti, kan sumin a tlin tâwkna hmunah ka kal ta chiah rêng bawk.

~~~ end of flashback ~~~

"En teh, inhlawhna tùr tha deuh ka hria a nia," tiin class-a kan țhut lai chuan Maremi chuan min rawn hrilh ru sar sar a.

Chhùn chawlh lai a ni a, kan piah deuhah pawh mi dang dang an țhu ve nial. Ani hi chu a țawng hi a zàwi ve hrim hrim a, a țawng ve lùng lúng ngai lo, kan pahniha kan țhut dun reng pawh hian min hrilh ru emaw ni tih tùr khawpin a țawng zàwi țhìn.

"Ka duh ve?"nui chung hian amah en chung chuan ka lo ti vat a.

"I duh ve ka rin vàng a nia, kan inhlawhna tùr chu a dârkâr ang zâwngin a nia, lehkhabu dàwrah a nia. Hlawh phei chu a tam hran lo."

A pawi ka ti lo. Pawisa lo hlawh ve theih hlek hlek chu a țha, chhùn chawlhna tùr ka lo tum ve theih phei chuan a zia dâwn asin.

"Inrinniah i chhuak thei ang tiraw? Ka pateate dàwr a nia, zirlaite inhlawh ve theihna tùr atâna an tih a nia."

Thei ang, theih loh pawhin kan hostel neitu Madam ka dîl mai ang, min phalsak ngei pawh ka ring.

Hun remchâng hmasa berah class bàn veleh kan inhlawh țan ta nghâl. Kan college ațangin a hla lo va, kein minit thum vêl bâk kal a ni lo ang, a țha ka tiin remchâng hi ka ti khawp mai a, Maremi bulah pawh chuan ka sawi chàmchî mai.

Kan thawh dàn tùr chu fel takin kan ruahman thlap, mi dang thawk ve tùr pawh an lo awm nual. Insu buai lo tùrin kan thawh hun tùr chu kan siam fel thlap, hlawh tam lo mah se ka rilru a hlim tawp a ni mai, Maremi nèn kan la thawk dùn thei zui.

Min dàwr tùra lo kal nutling patlingte naupang chenin a ni ang chu, hlim hmel takin ka lo chiauau thiam ve mai a; mahse, hrehawm ka tih chu mipa tlangvâl an lo kal hian lo biak hi ka hreh tlat zêl a, lêrh hmel zet zet hlim hmel taka lo biak phei hi chu ka ti thei lo tak zet, a rûkin ka lo insehruh nasa thei lutuk.

Chawhnu dâr 3 ațanga dâr 4 thleng hi Thawhțanni ațanga Zirtàwpni thlengin kan inhlawh hman a, Inrinni erawh chu zîng dâr 10 ațangin tlai lam dâr 4 thleng kan nghâk thei thung.

Zan khat chu lehkha ka zir laiin ka phone ka lo silent theihnghilh a ni chêk ang chu, ka dawhkàna ka dah chu a rawn ri ta, mi dang lehkha zir ka tibuai ngei ngei ang ti rilruin ka ban ta vat a, ka en chuan number ringawt hi a lo ni a.

"Hello?"

A reh vang vang avàng chuan ka'n 'hello' nawn leh a, chutah chuan mut chhuak aw zet hian," Thingtlâng nula, min hria em?" a rawn ti thûm ta dût a.

He pa hi!!! Chimawmliana a ni chiang lutuk! Engtin nge ka number a lo neih a? Mak ka ti lutuk!!!

Ka ngawih deuh reng avàng chuan a thaw deuh hawk a, thatchhiat hmel zet hian," Ka hmel i ngaihtuah a ni chiang, a dik tiraw?" a rawn ti leh sup a.

A va zak lo tak! Tu nge a nih pawh ka hre tawp si lo.

"Tu nge i nih pawh ka hre lo ve," tiin ka hmet tàwp hmak. Zak lo lutuk! A hmeichhe lo hriat țhin angah min ngai a ni ang e, min hre sual a ni ang ti dâwn ila 'Thingtlâng nula' min rawn ti bawk si.

A hnu deuhah WhatsApp message a rawn thleng leh zat a, number ringawt ațangin. Ka han en a, ka han chhiar chuan amah bawk a lo ni.

*Nula thinchhe deuh hi ka lawm zâwng tak a nia*

Huh, a lawm zâwng chu ka ni kher lo ang. Lêrh hmel si, a hmel kha hmeichhe làwm chi hmel a nih kha. A mitmeng pawh a lêrh hmel, a awm dàn kha a eiawm loh hrim hrim.

Chhàn pawh ka chhâng lo, data ka off hmak.

Lehkha ka zir char char, ruah a sûr deuh cherh cherh a, mut a nuam viau ang chu; mahse, lehkha zir ka ngai, tlaiah ka zir hman tawh si lo.

Mut dâwnah erawh ka online leh zawk. Group lamah an lo titi nasa khawp a, ka chhiar chhuak vek peih lo, hun a hek.

Chu pa mawlh chu, message pathum ngawt a lo hnutchhiah!

Chhiar miah lova delete ka tum deuh ûk ûk a; mahse, êm a ka ti leh deuh, over deuha chêt chu ka duh bîk lo. Ka number a neia a la chîng chho zêl a nih chuan a chêt over viau chuan over takin ka la block ve mahna.

*Kat, Essa ka nia*

Kat pawh ka ni lo, a hre sual ve hle mai a...

*Ka kawm châk deuh i hre duh em?*

Hre duh mai mai lo.

*Engati nge...*

Eng nge min zawh a tum le?

Thâwk ka la huai. Ho mai mai, ani chungchângah hian hriat duh ka nei lo ve, ka mamawh hran lo bawk.

Ruah a tlâk deuh cherh cherh vàngin class kal ka phûr vak lo. Thawmhnaw huh a ro har si a, pheikhawk a huh duh bawk si, fùr hun hi chu ka ning lek lek țhìn; mahse, tlai ni tla hi a mawi ka ti êm êm thung. Hnah huh hliam mai a'n chhun tle sar sar mai țhìn hi a mawi ka ti, chhûm tlêm lang ngei bawk se.

Ka kawrlum hâk chu a lukhum ka pawt chho a, a vawh ve deuh vàngin ka kut chu ka kawtlum ipteah ka zen lût bawk a.

"Vawiin chu dàwr nghah zawhah thil min leipui lawk rawh aw?" Maremi chuan a ti sap a.

"Teh rêng mai."

College kan thlen thlâk chuan a la hma viau a, kan in pakhat ti mai ila college bul dàwr têah kan lût leh rih a.

"Zopui, i number kha tu emawin min dîl a, ka pe a nia aw," Ruata chuan a lo ti hlawi hlawi a, a nui țhâ bawk a.

"Ka phalna tel lovin i lo pe ringawt maw?" ka ti ve thung, ka nui duh miah lo va.

"Sorry, sorry," tiin a beng chu a pawt zauh a," Ih mawm, min dîl ngawrh ve sia, bâkah a chhe lo êm alawm, ka duhpui tawp che," a ti leh hlawi hlawi a.

"Iau, hriat a va châkawm?!" Matemi chuan a lo ti vat a, a mitko a sàn ãk bawk a.

"Tu emaw mitkalh deuh a nih ka ring," nui chung hian ka lo ti a.

"A teuh lo! Chutiang chuan i number min dîl se ka pe teuh lo ang!" Ruata chuan a lo ti hlar a.

"A ho êm mai a!"

"Bawihi, ho lo aw...a lo biak hunah che țha takin lo be rawh aw," a ti leh hlawi hlawi a.

Class pana kan kal lai chuan Maremi chuan," Tu nge ni ang le? I luck e!" nui sen sen chung hian a ti sap a.

"Tu mah a ni lo ang, miin an dîl fiam tih hriat reng," ka ti thung a.

"A lo biak hlauh che chuan ka hre ve duh a nia."

"Ngaih eng emaw tlâk a ni nâng!"

Dàwr ka nghaha ka buai loh deuh lai tak chuan sikul naupang pahnih hi an rawn lût ve a, uniform chu ha lo se chuan sikul naupang an ni tih pawh ka hre lo ang.

"...chhiat lohzia kha i lo hmu em?" Pakhat chuan a ti a.

"Hmu e, awiii, a pà tawp!! Ka thi lo chauh!!"

"Chhuak leh thuai ang aw, a lo kal bo hman loh hrâm ka beisei."

An titi chu ner nak hian ka ngaithla a, ka lu ka thing nak nak. Sikul naupang mai an la ni si, an la nau deuh mah mah ka ti.

Eng mah an lei lo, an kual an kual a, an chhuak leh daih.

Lehkhabu ka dah fel lai chuan," Ka pi, hei hi eng zât man nge?" tih ri ka hriat vàngin ka inher vat a, kan inen ta ràn mai.

Chimawmliana. 'Ka pi' tiin min la ko zui, a chimawmzia hi. Lehkhabu pawh a chhiar ve ngai emaw ni le? A lan dànah hi chuan ho mai maia hun khawhral a hrât hmel nèn.

"150," ti ringawtin ka chhâng, ka nuih miah lo bawk.

"A pan nèn a va to reuh ve!"

Thil sawisèl a hrât hmel si.

A en kual dun dun a, ka customer a nih vàngin ka ngaihven a ngai si, Maremi lam ka va en chuan mi dang a lo buaipui ve bawk a. Ka maimichhîng vang vang a, he pa ber kher buaipui hi chu ka duh lo asin.

"A nih, hei hi?"

Ka en vat a, ngun zet hian min lo en kur tawh.

"Kha chu 200 man a nih kha."

Mit dinglam siai sak chung hian," Engati nge ka message kha min chhàn loh a?" a ti ta sup.

A thil sawi chu mi dangin an hria ang tih ka hlau lutuk, hlauthâwng anga lang lo tùr erawh chuan ka insûm hrâm hrâm.

Sawipui ka duh loh vàngin a lehkhabu ken lai chu melhin," Kha kha a ngaihnawm a nia," ka ti ta daih a. Ka la chhiar tawp si lo va.

"Hei hi maw?" Nuihzat hmel ang reng tak hian a lehkhabu ken lai chu a'n lek kual vêl a.

Ka chhâng tawh lo.

A en kual rei hrep. Thil dang ngaihvensan chi a ni mang si lo.

"Kan inkawm ngeih ka ring tlat."

Chutiang lam bawk chu.

"Ring duh suh."

A nui suk, a biangsum chu chiang zet hian a lang kalh bawk. Ngei lo ila chuan mawi ka ti mahna!

"Ka ring dik thei phian bawk."

Hmm, ring mai mai teh se,ngawihsan a țha ber ang.

"I danglam tlat."

Danglam. Danglam. Danglam. A hmeichhe lo hriat tawh țhinte lakah chuan ka danglam khawp ang, kei chuan hetiang mipa hi ka 'pâk' ve lo ang.

"I rin dàn a nih chu."

Ka chhâng leh ta. Ka ngawi tùr a ni asin.

"Kan la hria ang chu."

Lehkhabu pahnih lai a lei. Eng atân nge a tih hi? A bialnuteho a pe dâwn a ni ang chu. A nih loh pawhin a dah țha dâwn a niang, nge library-a dah tùr zâwk?

A va ho tak!

*EVERYTHING HAPPENS FOR A REASON*

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » March 15th, 2020, 6:09 pm

☆2020☆ - 3 By Dingdi Pachuau







Class xi WhatsApp group-ah chuan an pãwt zãwrh zãwrh hlawm a, ngawi rengin ka chhiar thla zêl a, kan class-a ngawichawi ber țhìn Kûri birthday a ni tih Manuna'n a rawn sawi chuan an wish liam liam a, kei pawhin group-a min add hnua a vawi khat nân ka duhsakna chu ka ziak ve ta a.


Ka lang ve ngai lo bawk a, chutia ka lang ve ta chu min rawn be ve ta tliar tliar hlawm a, Chhana leh Biaka phei chuan min rawn fiam chiam a.


Anni hi fiamthu duh ngang kha an nia, an thu sawi rêng rêng hi thinrimah pawh a lâk theih loh, thinrim lui mah ila a tàwpah kan nui leh nge nge țhìn.


College an kalna chu ka zâwt hlawm a, Lunglei lamah a ni deuh vek hlawm. Sawmi leh Lawmi chu Kolkatta lamah niin Biaka ve thung chu Serchhîpah a ni ve thung. Inhmuh khâwm an châkzia chu an rawn sawi sap sap, Kûri birthday a ni tih pawh an rawn theihnghilh zo ta hlawm a niang.


Group-ah chuan Lawmi a rawn lang ve miah lo, Kûri leh mi dang 2 nèn, an buai ve a ni ang e.


Chhana chuan thil hlui a rawn sawi chhuak pek, a va țûl lo tak!


*Lawmi hi a va reh ve!!! Tu emaw a hlau a ni lo maw?🙊🙊😂* tiin.


Ka lo inngaihbel nghâl zat. Mi dang pawh chu an lo nui nghâl zêl a, nuam lo ka ti țêp; mahse, an hriatah chuan inngaihbel duh lovin ka hai der lui ve tlat a, ka nui ve ta ringawt, hria anga awm ka duh bîk lo.


Number ringawt ațangin message a rawn thleng leh ta.


*Kat, lehkha i zir nange?* tih tê mai hi.


Kha pa 'Chimawmliana' kha a ni leh chiang mai. Kat. Kat hi eng nge a awmzia ni rêng rêng le? Amah zâwk hi Kat-a ni se a țha ang.


Nia, zanin chu ka inla free deuh hlek a, phone ka khawih rei ta. Lehkha pawh ka la zir mang lo, dah a hun tawh khawp mai.


*Inkàwm ila?* a rawn ti leh.


Teuh lo. Ka kàwm lo ang, mipa hi ka kàwm mai mai tawh lo ang.


Chhàn pawh ka tum lo, chhâng miah lo ila a beidawng ang a, a țha a ni mai.


Chhana'n min rawn be teh nawlh a, kani hi chu mipa ni mah se ka haw hran lo, kan class (cl xi zirlaiin) mipaa ka kawm ve ber a ni miau a.


"Ngaihzâwng i nei tawh em?" a rawn ti.


"Zak teh! Chutiang sawi suh," ka ti hlak a.


"Lawmi i hlauh êm kha!"


Kan inhre chiang bawk a, kan nui dùn hawk hawk a.


Favàng a lo ni a, boruak pawh a nuam țan ta. Test neuh neuhah a tițha ber ber pawl ka ni a, Maremi nèn kan mark hmuh a inang thei khawp mai. Ka chhar fuh reuh hi ka ti. A nun dàn leh nungchang hi ka phâk tâwkah ka chîk ve cheuh cheuh țhìn a, han sawisèl tùr ka hre lo, lem chang niin ka hre thei lo va, a rilru tak takin min kàwm ve ni hian ka hre tlat a ni.


"A lo be tawh che em?"


"Tuin maw?" ka ti hû a.


"Ruata'n i number a pêk kha," nui sen sen chung hian a ti a.


Ka thaw huai.


"Engah mah ngai suh, tu mah a ni lo-"


Keimahni tâwk zâwnga rawn kal ka hmuh chuan ka țawng tàwp chawt mai, hmuh pawh ka duh lo asin.


"Ka âwih chiah lo e."


Hmun dang ka hawi sawn nghâl daih a, intâwk mah ila ka en duh kher lo. Hria anga lan loh hi a țha, min chhaih buai hi duh tâwk bawk se a țha ang.


"I zêp chiang."


Maremi chu ena nui sak hian," Ka hrilh êm êm ang che, chutiang eng mah awm thlâwt hek lo maw le," ka ti a.


Kan inpelh hnu chuan ka thaw huai.


Zànah erawh min rawn phone leh ta, ka la block khawp ang le.


"Vawiin khân...biak i hlau hle mai."


Leh ringawt chuan.


"Min lo be tawh suh," ka ti ta ringawt a.


A ngawih deuh vang vang hnuah chuan,"Engati?" a rawn ti ta sup a.


A aw thatchhiat hmel zet, zuai ruih mai hriat chuan khawngaihna ka nei deuh thut a nih chu! Ka duh lo kher mai.


"Eng nge i duh?"


"Inkàwm ang?"


"Ka duh lo."


"Engati?"


Engati? Engati? Ka duh lo a ni mai. Min hmuhsitzia kha ka ngaihtuah chhuak thut a, thinrim deuh thut hian," Mi hmuhsit chîng ka kàwm ngai lo," ka ti ta phawng a.


Hei hi chu ka chhuanlam dawrâwm tak a ni, mipa hnaih hi ka duh tawh lo a ni zâwk.


A rûm hawk ri chu ka hre pha. Nia, min hmuhsitzia kha, mipa ngainat tawh loh nâklaiin min la hmusit zui a nia.


"Bâkah, mipa ka kàwm ngai lo, a pawi khawp mai."


Ka ngaihtuah zui lêm lo.


'Mipa pakhat tawn fuh loh vàng mai a' min ti a ni maithei, a dikna chen chu a awm ang; mahse, mihring kan inang vek lo va, kan rilru puthmang pawh a inang hek lo. Khatianga zah leh nat kha tuar ka duh tawh lo a ni mai, ka lo invêng lâwk a ni ve mai a, ka tih tùr dik tak ka ti a ni.


A reh ta vang vang, min rawn phone ngai tawh lo va, message pawh min thawn tawh ngai lo. A thawventhlâk ka ti khawp mai, a insawi dàn hmangah beidawn a tum loh hmel teh rèng nèn, ka nuih a tiza khawp mai.


*******


"Kumin chu hetah Krismas hmang ve la?"


Ka kut tuai nauh nauh pah chuan," Hostel-ah maw? Keimah chauhin?" ka ti a.


A chek hlak a," Kan inah i awm ang chu, bâkah, hetah pawh Krismas i la hmang tawp nâng, a nuam ngawt ang," a ti sap a.


"A châkawm khawp mai!"


"Hmm, châk la chuan i hmang hrim hrim ang," a ti leh a.


Nui chung hian," A nih, nang pawh kan khuaah lo hmang ve la?" ka ti ve ta thung a.


Thaw ham ham pah hian step-ah chuan a ding phawt a, chutah," Kumin heta i hman phawt chuan nakkum chu in khuaah ka hmang ve ngèi ngéi ang," a ti ta a.


Kei pawh ka ding ve rih. Kan thlangah chuan basket ball an khèl a, an ri niai niai a. Mipa an nih vàngin ka en lo hrim hrim, mi chhaih an hrât ropui si, vawiin erawh an reh deuh chuan ka hria.


"Lo hmang hmasa la?"


"Ka sâwm hmasa zâwk che," thu tak zet hian a ti a.


A thu takzia ka hmuh chuan ka nuih a za thut a, nui kar kar chung hian,"A la hla rih êm mai, hun a la tam lutuk, kan la ngaihtuah dâwn nia," ka ti a.


Thlang lam en vuang vuang pah chuan,"En chhuk miah lo la, basketball khèl zîngah khuan 'Thingtlâng nula' tia ko țhìntu che kha a tel ve a nih khu, a rawn hawi chho deuh reng lehnghâl," a ti sar sar a.


A va lêrh tak!


"Nang pawhin en suh!"


Nui chung hian,"A mak thei! Mipa sawi rîk dêk dêk hi chuan i thin hi a chhe ve ngawt mai, a bîkin khu pa khu chu i haw leh zualin ka hria," a ti sap a, a ner nâng nâng a.


"Mipa hi chu an inang vek alawm, dâwt hlâwm, mi bum hmang an nih hi," ka ti nghut a.


"A ni maw!!!"


"Ni chiang e," uar zet hian ka ti a.


"Min la hrilh miah lo aw?" Zawhna hlîr a mitmengah chuan a lang.


"Ka la hrilh ang che."


Zànah chuan lehkha zir hmain ka online zawk a, class xi whatsApp group-ah khân min lo mention avàngin ka lût zawk a ni.


Chhana'n min lo mention. Hmeichhe dang pawh a mention tel tho, a chhan chu Lawmi chuan group-a thu mu hnu a rawn thar thawh vàng a lo ni!


Lawmi'n *Group-ah hian maw, hlauh ka nei lo😃 mipaho lah in fel si, hmeichhe âwm nêmte khing duh in awm dáwn si lo😉* a rawn tih chu Chhana leh pek chuan kei, Sawmi leh Shanti min rawn mention-in *Hêngho hi i hlau a nih ka ring a?* a rawn ti!


Buaithlâk thei.


Ka chhâng dâwn lo ûk a; mahse, chhàn ka châk zek zek ta.


*Kei chuan ka hlau vek che u😀* ka ti ve ta a. Nia, ka ti tak tak alawm. Lawmi hi ka hlau, a râpthlâk ka ti, khatianga min țawng khum tawh hnuah phei kha chuan hmuh tawh miah loh ka duh.


Lalchhana hi chu a ngeiawm thiam ve a nia, min rawn chhâng leh.


*Hlauh chhante a awm em?* a rawn ti leh.


*Maithei* ka ti. Lawmi chuan a chhiar phawt chuan a hre chiang ve khawp ang chu, a inngaihbel duh kher lo thei tho bawk.


Tlai kan haw apiangin Chimawmliana chuan basketball chu a lo khèl ve ziah. Maremi chuan min hrilh ziah, a chhan chu basketball court chu kan pal tlang ziah a, ka hawi chhuak ve ngai si lo va, ka hmu ve ngai lo a ni. Ani tê hi chu hawi kual hi a peih ve a, thil hi a hmu thei bîk bawk.


"Eng emaw hi chu a awm ti raw?"


A ngaihna hriat loh hmel deuh hian ka en a, ani basketball khelh avànga thil eng emaw awm tùra ngaih tlat chu a chhan ka hre lo.


"Ka hriat loh lam a nih chu."


"Ih maw, a en char char zêl che alawm."


"Nang pawhin amah i lo en țhìn tihna a nih chu, i hre thei êm mai!"


Za deuh hian a nui chhuak ta har har a, a ngaihna min tihre lo hial zâwk!


"A chhiat loh tehlul nèn, a luck ngawtin a nia ka rin ni!" a ti ta daih a.


Ei lo zet hian ka hmui chu ka ner nâwng a," I inhmeh lo lutuk! Chutiang sawi suh, mipa hi chu vawk ang chauh an ni, vawk ang chauh!" ka ti ta hrep a.


"Ngûk.. ngûk..."


Mittui tla phungin kan nuih tâk chiam kha.


Kan exam chhûng chuan phone ka khawih lo tluk a ni, ka in-control ve thei viau, phone chungchângah kher hi chuan. Bialpa chu nei ni ve ta ila chuan ka tlâkchhiat phah ngawt ang, phone tala inbiak reng mai ka duh àwm si a.


Ka tum miah lohin Chimawmliana chu ka hmu ve ta, a chhan chu court sîra kan kal laiin ball chu a rawn kal kãwi ta tlat sia, ball a rawn ûm nèn chuan kan intâwk chiang lutuk, hmuh loh der theih pawh a ni lo. Maremi lah chuan ball chu a lo la man chat zui.


Ball pawh lâk tum lo chuan min en ngur mai, ka en lêt ve kar a, zàm tum hauh lova ka melh lêt a ngai alawm, engtia rei nge kan inmelh tawn ni, boruak a reh duk maiin ka hria.


"Essa...Essa?"


"Hei ball chu?" tiin Maremi chuan a ball ken lai chu a theh phei ta a.


"Kan lãwm e," tih sup pahin a mit chu la sawnin Maremi chu a melh zauh a.


"Keini pawh le," tiin Maremi chuan a chhâng! Ka làwm ve pawh ka hre lo.


A țhiante lamah chuan a tlân phei ta a, Maremi chuan ka bâna chelhin," Kha maw, eng emaw chu a awm a ni," ti sar sarin kan kal țan nghâl a.


"Min melh rum a, ka melh rum ve a nih kha."


"In cute dùn e."


"Min chhaih hauh suh, tu nge a nih pawh ka hre hauh lo," ka ti tlat a.


"Essa a nih kha, a țhiante pawhin an ko alawm. Essa leh Zopuii, hmm..a fuh dâwn e," tiin a lu a bu nghat nghat reuh a.


"Duh tâwk teh!"


"Eng nge, a mitmeng i hmuh chian êm kha, a hriat theih vek alawm. Eng emaw chu a awm tih ka hre thei vek aw," a ti leh barh barh a.


Hmm, ngawi rih teh ang, a sâwt dâwn hauh lo tlat.


Ka mut hmunah erawh vawiina thil thleng kha ka ngaihtuah lêt ve ta tlat. Ka duh lo tak zet a ni, Maremi vàng vek. Ka maimichhîng a, a hmel ka hmu ta zêl mai. Ka mut lah a chhuak hlawl si lo, ka tho leh rih a, lehkha zir tùr ka la chhuak leh ringawt, rilruah a lút mawh khawp lehnghâl a.


Zîngah thawh ka hai deuh lehnghâl, a zia lo tak tak. Chhuah a ngai lo hlauh a, tlêm chuan a zia deuh. Exam lai a nih tawh vàngin dàwr kha kan nghâk tawh lo va, january thla laihawl ațang chuan kan nghâk leh thei tawh ang chu.


Chhùnah kan cook-in ' Tlawhtu i nei a nia' a rawn tih vàngin mak ti zet hian building chhakah chuan ka han chho a, visitor's room ka en phawt a, tu mah an lo awm loh avàng chuan min tih der a nih ka ring a, chhuk thlâk daih ka tum lai chuan hostel neitu Pi ber chuan," Garage chungah khân an awm kha," a lo ti zauh a.


Garage chung hual hian saron a zâm kual nuaih a, thing buk a zàm hnan nasat vàngin ka awmna ațangin ka hmu thei lo va; mahse, pi berin a sawi miau si a, min rawn tlawhtu awm lo se dâwt min hrilh chu a rinawm bîk si loh.


Maremi lo niin!


"Engati nge min lo tlawh ve nawlh a?" tiin âwih lo zet hian ka han au lùng lúng a.


"I zir nasa bîk lutuk ang a, i ât phah ang tih ka hlau a."


Ka nuih hak hak a; mahse, a țhutna piaha mi dang lo awm ve, ka lam hawia rawn inher ka hmuh tâkah chuan ka nui hmel chu a reh riai riai ngei ang chu.


Eng nge a rawn tih ve ni? Min hmuh tumin a lo kal ve tihna maw? A va zak lo tak! Zahna a nei thlâwt lo a nih hi, a kâwlhrâwng mah mah.


"Hei, ei tùr ka lo ken che a," Maremi chuan a lo ti a.


Chimawmliana chu rum zet hian ka melh phawt a, chutah, ka mit chu la sawnin Maremi chu ka en ta nghâl a.


"Eng ei tùr maw?"


"Hawng chhin phawt la?"


A țhutna bulah chuan țhu thla ve nghâlin a ei tùr rawn ken chu ka ban nghâl a, a beng bul sêtah chuan," Eng nge a rawn tih ve a?" ka ti sap a, ani erawh chuan a rawn hre pha lo tùrah ka ngai.


"Ka hre nâng!"


Ringhlel zet hian ka melh kar a," Dâwt sawi kher suh," ka tih chuan," Ka ti tak tak! Ka luh hnu lawkah a lo lût ve alawm," a ti leh sar sar a.


Chu pa chu a țawng lo va, chêt pawh a che sawn lo. Min rawn en nge en lo pawh ka hre lo, a lam ka melh duh tawh lo miau si a.


Slipper buna rawn kal ri a rawn ri chho thlak thlak a, ka lo ngaichang deuh reng a, dorm chung lama awm Lawngtlai khua Hmangaihi a rawn lang hlawl mai.


"Min lo nghahna a rei tawh em? I rawn kal tak tak pawh ka ring lo va."


Chimawmliana lam chu a pan ta nghâl. E khai, ka lo va ring sual ve! Min rawn hmuh tumin a rawn kal emaw te ka lo ti vêl, a lo ni bîk lo ve.


Kan țhutna chu a inhlat hran lo. Kan țawng erawh a rin lêm loh avàngin kan inhre tawn thei lo; mahse, chiang taka ka hriat erawh chu Hmangaihi chu a nui deuh har har reng tih chu a ni, a hlim thawkhat a ni ang e.


"An ni ve deuh em ni a?" tiin Maremi chuan min zâwt sà sá a.


"Ka hriatpui hauh lo mai."


"I thîk deuh em?"


Rum zet hian ka melh a, chhàn pawh ka chhâng peih lo. Ani bialnu neih leh neih loh chu keia lo hriat leh lo ngaihvena lo thîk tùr a nihna ka hre lo ve.


"Zir nasa lutuk lo la aw," tiin a nui sêng a.


"Nang deuh."


"Chuan, hetah Krismas chu i hmang dâwn tiraw?"


"Ka hre rih lo, ka chhûngte thu thu a ni mai." Ka la sawi miah lo, an phal chu ka ring vak lo, ka hãw khât ve bawk sia, min ngai ve tawh ang.


"En teh, kan lam a rawn en char char."


"Sawi tawh suh, chuan, en tawh lo bawk la?"


Hmangaihi nui ri har har reng chu thãwm hriat tùr awm chhun a ni, a nuih dàn chu a lêrh hmel ka ti khawp mai, hostel khata awm dùn e ti lo chuan kan dorm a hran avàngin kan inhre chiang vak lo, kan inkàwm lêm lo bawk a; mahse, hostel khata awm kan nih vàng erawh chuan kan inhre vek tho, chaw eina leh devotion-ah kan inhmu reng reng țhìn miau a.


Tlaia devotion kan hman dâwn chuan Hmangaihi tlawhtu neih chungchâng chu an lo sawi nasa mai. Tlangvâl chhe lo deuhin a rawn tlawh tiin an sawi a, amah lah chuan a zêp hran lo, nuam a tih hmel khawp zâwk mai.


Zànah message ka dawng leh ta nawlh mai.


*Ka tih tawh chu bànsan ka tum lo* tih tê mai hi a ni a, a number save lo mah ila tu nge tih ka hre chiang ngang mai.


Ka chhâng lo. A bialnu hostel awm a rawn tlawh a, chutah a bialnu ni lo kei min rawn text leh maw?


Ka nuih pawh a tiza lo, ka thin a tirim zâwk.


*Thil țha bîkah chuan...*


*Vawiina mi kha tu nge a hming?*


Thinrim vàngin ka nui hawk. Mi han bawl kual chiam a han tum mai mai chu le! Ka thin tertek a ti chhuak chiang khawp mai.


Ka block ta hmak. Zak chem chem teh se.


Exam kan zo a, ka ti țha ve thawkhat chuan ka hria. Krismas thawmhnaw ka bazâr nghâl a, a vawi khatnaah chuan Maremi nèn kan ni a, a vawi hnihnaah erawh min kalpui thei ta lo, a hritlâng áwmna lutuk chu a chhuak ngam tawh lo a ni.


Keimahin ka tei rak rak, mipui bazâr erawh an tam a, mal deuh angin ka lang bîk lo; mahse, Maremi erawh ka ngai khawp mai.


Ka tlai khawp mai; mahse, hostel pi ber hnênah ka sawi sâ tawh a, ka inthlahrung lutuk hran lo. Lêng mai mai ka ni lo va, bâkah mipa vànga tlai ka ni lo bawk a, ka inthiam tho. Ka haw tawh mai dâwn a, thingtlâng nula bazâr chu hunin min daih ngang lo a ni, ka duhâm a ni ve mai.


Khua a tlai ruih a, light pawh a êng chuai tawh mai. Zawi muangin step-ah chuan ka pên chho chhat chhat, ka hmanhmawh peih tawh lo, ka hah lutuk tawh.


Basketball court bulah Gov't P/S a awm a, step tàwpah chuan dingin ka chàwl vang vang, thâwk la ham hamin ka thlang lama in êng de chuai chu ka thlîr pah bawk a.


"Ka nghâk chhuak ta che."


Ka phu chiang lutuk, ka kutin ka âwm ka dawm nghâl vawng vawng! Ka thin phu ranzia mai chuh! Engtin nge min lo hriat rêng rêng ni? Eng atân nge min lo nghah bawk ni?


"Sorry..."


A rawn pên hnai chu," Min rawn hnaih suh!" ka lo ti țhat a.


A ding deuh dat a, thing lian deuh tak hnuaia ding ni mah ila, thla êng leh light êngah chuan kan inhmu thei ruau ruau.


"Min hlau a ni maw?"


Ka hlau hran lo, ka lo chàwl ta kher kher erawh ka inngei; mahse, ka hah ve tho bawk si.


"Ka hlauhna chhan tùr che-"


Chhak lam ațanga patling rawn țawng thla rî ka hriat rual chuan ka hmui chu a rawn hup nghâl, ka beng bul sêtah chuan," Min hlau suh. Chuan, min rinhlelh i duh loh chuan... vatin," ti supin thâwm dìm takin sikul hlim chin, êngin a chhun ve phâk loh chinah chuan min kai phei ta vat a. Kei lah chu eng nge ka hriat ni, mi min hmuh chu ka hlau viau ringawt mai a nih chu!


Ka thin a phu dèp dép mai! Ka hmui a hupna kut chu a la sawn mai lo. Sikul bang nghèng chatin min nawr bet a, a taksa chuan min hliah hneh kherin ka ring. Kawnga kalte chuan min rawn hmu thei kher lo ang, amah rawn hmu mah se kei chu min hmu kherin ka ring lo, min hliah bo vek ang.


Ka chhîp chu a rawn thâwk khum lum ham ham a, kei erawh chuan thin phu dèp dépin a âwm ka nghèng ràn thung. A rimtui khawp mai, ka maimichhîng vang vang, a rim a tui vawng vawng lutuk. A thin phu dap dap rì chu chiang takin ka hre thei, a lum nuam ka ti, a rimtui bawk si.


Kan thâwm hriat kha an rawn hnai zél a, an țawng dàn ațang chuan patling pahnih an nih duh hmel, meizial rim a nam nghâl rum rum mai.




*HARSATNA HI A HMANG THIAM TÂN CHUAN MALSÀWMNA A NI THEI*

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » March 15th, 2020, 6:10 pm

☆2020☆ - 4 By Dingdi Pachuau



Min hmu ang tih ka hlau lutuk! Min hmuh dun hlauh chuan rilru dik lo an pu nghâl ngei ang a, ka hriat ngai loh mipa nèna hmingchhiat chu ka duh hauh si lo, ka hriat țhin pawh lo ni ta teh rêng se ka duh chuang lo.


An țawng rîk dàn ațang chuan an ding rih a nih hmel.


An ding rei ang tih ka va hlau tak! Lalpa, min pui hrâm teh, tunah pawh hian ka thaw țha ngam tawh lo a nia. Chêt sawn ka duh, ka ngam si lo, ka chêt sawn chuan min hmu ngeiin ka ring si, a va hahthlâk tak!


"Zàn boruak chu a vawt ve deuh tawh a nih hi."


Pakhat ve thung chuan," Hei hi han pak ve chhin teh, a rù tui riau asin, a thar a nia," a ti thûm dût a.


Meizial chungchâng a nih chu.


A hnu deuhah chuan," A hnâng rim pawh a nam chiai chiai alawm, a tui khawp mai. I la ngah em? Min lo țhen ve teh, vaihlo tui a vâng lutuk a," pakhat chuan a ti a.


"Thingtlâng ațanga ka chah a nia, kan nu chhûngte hian an ngah thìn alawm. Ngawi tak rawh, ka lo chah kêp ang che, kg-ah an ti to hran hlei nem."


Ka thaw țha ngam lo, kal sawn theih tawh ka va duh tak! Ani lah chuan remchângah a la ka ti mai, min rawn si chêt mai a, a pangti lum chuan min ur ham ham. A rûk tak chuan nuam ka ti deuh tho a nih chu, zahthlâk hian!


"I muhìl ringawt ang e."


A phun sup ri chu an rawn hria ang tih ka hlau lutuk a, a bânah ka hmer vak, ka thin a phu nghâl dawt dawt bawk.


A la nui nghawr dat zui, ka va ngei tak! Chu mite chuan kan thâwm hriaa min rawn hmuh chu hlau hle lo ila chuan chùmin ka vìn vak ang a, ka kalsan dàwr dáwr chiang khawp ang chu; mahse, tunah rih chuan thil theih a ni lo, ka tâng laklawh tlat.


Ka kut chu a rawn hmer nghet ve ta thung. "Hetiang hun hi kan tawn dun ka la ring rêng a ni," a ti leh sup, a hmui han hupsak lo tùrin ka insûm țang țang. Țawng tawh lo se ka ti tak zet, phun sup ri mah ni se an rawn hria ang tih ka hlau.


Vànneihthlâk takin an ding rei lo hlauh e. An țawng a zawi thla ve deuh hlek ta tihah chuan min hmuha kan thâwm an hriat theih tawh loh ringin ka che ta a, a taksa min hliahtu chu ka nam. Ani lah chu a'n hmanhmawh lo mai mai khawp a," Min la hmu thei a nia," a la ti deuh tlat.


A hnu deuha min thlah hnuah chuan," Ding rei deuh se ka ti asin le," a la ti zui nia. Chhàn enah pawh ka en lo, haw thuai ka duh, he pa 'tlangvâl' lak ațanga kal sawn thuai hi ka duh.


"Ka lo thlah ang che."


"A ngai lo."


Mahse, ka thu sawi chu a ngaithla miah lo, ka kal chu min rawn zui ve nghâl. Hmanhmawh deuh chuan ka kal sawk sawk a, hetia hriat chian loh mipa nèna khaw thim hnuah lehnghâl inzui chu ka duh zâwng a ni lo chiang.


"Min rawn zui tawh suh," ding chuang lo chuan ka ti a.


"Thingtlâng nula nge nge, i kal chak thei hle mai," a lo ti daih thung.


Ka kal chak bawk a, ka hah khawp mai. Thup tum teh mah ila ka thaw ham ham lo thei lo, ka hah ve êm a ni.


"Kan thleng țêp tawh a nia, min hmu dùn rêu rêu ang, haw tawh rawh," ka ti a, ka ding ta a.


"Min hmuh dun pawh chu i hlau hle mai maw?"


"Ka hlau lo, ka duh lo mai a ni," ka ti a, kal thuai mai se ka ti, ding hle hle thei lo chuan ka che sek a.


"A nih, ka hmu leh thei ang che tiraw?"


A rûkin ka nui sak, kan inhmu tawh lo ang, ka haw tawh dâwn, hrilh erawh ka tum lo chiang.


"Maithei."


A la ding vung vung, min en reng tih ka hriat avàngin ka en duh lo lui tlat.


"Engati nge hetiang hian i awm tlat a?" a ti ta daih mai.


A zawhna awmzia chu ka hre chiang ngang; mahse, ka hre thiam lo der tlat.


Ka kut dinglama ka kut veilam hmerin," Engtin nge ka awm vak a?" ka ti a.


"I hria."


"Haw tawh mai teh."


Che lova min en leh reng hnuah chuan,"Ka message chhâng ang che," tiin a inher nghut a, kan chhohna kawngah chuan rawn hawi lêt map lo chuan a chhuk ta nghâl a.


Ka thaw huai. Chutia a kal ve ta mai chu ka nuih a tiza zawk, mipa naupang thu âwih deuh te pawh a ang ve deuh ta alawm.


Gate-a ka luh hma chuan ka hawi kual phawt, tu mahin min hmu lo tih ka hriat chuan ngaihngam takin ka lût a, pi ber hnênah ni lovin kan warden Miss Nutei hnênah ka haw tawh thu chu ka hrilh nghâl vat, chaw erawh an ei vek tawh avàngin ka ei peih tawh lo.


Ka inbual a, vâwt hle mah se vawiinah ka kal kual nasa si a, mut a hrehawm dâwn tlat.


Ka insiam peih rih lo, naktûkah hun a la awm tho. Zanin chu hma takah mu ila a ni mai, naktûkah motor ka chuang thui dâwn si.


Muthilh hma ka online zawk, Chimawmliana message a lo awm reng tawh!


*Thingtlâng nula kawm nuam* a rawn ti leh pek!


Ka chhâng lo, chhàn chi pawh ni hek lo le.


A tûkah chuan zîng kârah ka insiam ve a, chaw ei khamah Maremite inah ka kal zawk a, ani pawh a lo zia ve deuh tawh, rei pawh kan titi hman lo, haw tùrin ka chhuak ta.


Ka ute hmel hriat motor-ah a nia ka haw phei dâwn ni, an nu nèn an lo phei niàwm a ni. An thlenna thleng taxi ka la a, ka thlen chuan an lo la inpeih lo deuh a, motor-ah chuan ka airbag chu ka dah lût a, kawnga ei tùr leiin ka kal sawn leh rih a.


Dàwr ațanga ka chhuak chuan Chimawmliana ka hmu thut mai, kan intâwk chiang lutuk a, hmuh loh der theih pawh a ni lo. Nula nèn an ni lehnghâl a, min biak loh hrâm ka beisei.


"Helaiah eng nge i tih?"


Min be lo ve mai se aw.


"Ka haw dâwn."


"Khawiah?"


"Kan khuaah."


Nula chuan a bân a rawn chelh pahin," Darling, office-ah min lo luhpui leh lawk teh, ka thil lei ka theihnghilh daih a nia," no zet hian a ti sap a.


Chu nu chu ka en chiang deuh a, a hmui sen mawi zet leh a mit dum lian kul mai chu a inhmeh phian mai, a mithmul chu a sei deuh mah mah a ni, chuti chu ni lo se chuan kei ngei pawhin a tak tak emaw ka ti ngei ang. A sam chu a sen deuh thar a, mawi ka tih dàn chi takin a tikawi kual vêl a, a inhmeh kher asin.


"Engin nge i haw dâwn?"


"Motor-in."


A hmeichhe hruaiin min nin hmel êm avàng chuan ka kal sawn ta a, nuih pawh ka nuih chuang lo,' A nih leh aw' pawh ka ti chuang lo.


"Engtin nge kha nu kha i hriat a?" tia a hmeichhe hruaiin a zawh chu ka hre pha a, ka nui sak. Lêrha chu buai rawh se, engah nge a bialnu a kalpui laia min biak âwt âwt ni? Min biakte hi tàwp phah se a țha ang.


Ka haw pheinate nupa chu an țawng duh khawp mai a, an titi chu ka ngaithla phei char char a ni mai. An pa chuan sawi tùr a hre khawp mai, ka bengvàr phah sawtin ka hria.


An bengvârin an fel khawp, dàwrah kan chàwlho a, ka ei mante chu min pêksak an tum a, an tilàwmawm ka tih rualin ka zak lek lek zâwk.


Ka ute inah ka awm rih phawt, naktûkah kan khuaah chuan ka haw ang.


Ka rin aiin ka chàu lo, tuilum sa ver vawrin ka intleuh zawk a, ka harh sawt mai. Ka ute nupa chuan TV an en a, kei chuan ka en peih lo, mu mai mai pahin phone ka khawih thung.


Maremi nèn kan in-text lai chuan phone call a lo kal a, ka phu zawk lehnghâl. Chu pa teivet chuh, min la rawn call ngam ka ti! Bialnu a nei reng lehnghâl, mi biak te chu a la rawn tum a nia, tenawm lutuk!


"I thleng tluang maw?"


Phone-ah hian engati nge mut chhuak aw ka hriat ziah ni? Tunah dâr 8:30 chauh a la ni a, ani tlangvâl țhalai chu a la mu àwm hauh si lo.


"Aw."


Ka polite lo hi chu ka ti ve tho; mahse...


"A țhat chu. In khaw hming eng nge?"


A rùi a ni hial lo maw ka ti, a țawng phelh deuh phang maiin ka hria, a sehchilh deuh bawk.


"Țhaizawl."


"Chu chu khawiah nge a awm?"


"Map-ah en mai rawh."


A nui huk. Ka bengdâr a nghawr datin ka hria, ka sawi thiam chiah lo, eng emawti zâwng takin a sexy riaua ka hriat tlat chu!


"I lawmawm ngawt mai!"


E khai! Tlangvâlin nula 'lawmawm' han tih chu, a làwmawm fahran lovin ka hria. Bâkah, a rui deuhin ka hre lehnghâl a, ani hian min zuam riauin ka hre ta deuh thut.


"I rui a ni maw?" ka ti ta nge nge.


"Vawiinah ka țhianpa nèn kan insual a."


Lalpa leh! A va râpthlâk êm! Sawi tùr pawh ka hre lo, ka ngawi reng ringawt.


"Min hlau em?" te chu a la rawn ti!


Ka la ngawi reng.


"Kawm che ka duh a." Ka la chhâng chuang lo, mipa ngainat loh nâklaia insual chîng hlauh phei chu, a zia hlawl lo, a 'den' tlat.


"A nih loh leh, ka message tal chhâng ve la?"


A pianhmang ka mitthla a, rui chunga a țhianpa nèn an insual tùr chu ka ngaihtuah leh a, a inhmeh lo dâwn riauin ka hria a, ka nuih a tiza deuh tlat a nih chu.


"A vawt ve em?" A thil sawi inkahpahzia chu!


"A vawt țha khawp mai."


He pa hi, inah a awm lo em ni le? Kei chu khumah ka mu lum kãk tawh a nia. A aw sehchilh deuh nia ka hriat chhan pawh kha hei vàng hi a ni ngei ang.


"Inah i awm nange?"


A thaw hawk ri chu ka hria, chutah," Awm lo," a ti leh sup a.


"Inthuam lum ta che." Ka ngaihtuah ve deuh tihna em ni? Ka khawngaih a ni ngei ang.


Mi ang pangngai chin chuan ka chhàn dàn khân an chhâng ngeiin ka ring, mi khawngaihna nei lo ang hiala țawng chu a mawi lo hrim hrim.


"T-shirt chauh ka ha a."


Tûn ang thlasik khaw vâwtah kawrlum hâk lohte chu a, a vawt ngawt ang chu.


"Haw la, mu lum rawh."


"Min ngaihtuah ve tihna em ni?"


Kha maw, a rawn man ta chat e. He pa hian a fin phakar a rawn chhuah a ni ngei ang. Min rawn test tih hriat reng reng.


"Haw la, kawrlum ha la, mu lum rawh. Chuan, rui chung chuan min rawn phone tawh suh. Ni lo, min rawn phone tawh lo hrâm rawh," ka ti ta phawng a.


"Kat, engvàngin maw? Ka țhianpa nèn kan insual vàngin maw?"


Ni lo, ani chuan a hre thiam hauh lo ang. Mipa laka inhnamhnawih ka duh tawh lo; mahse, hrilh kher a țùlna ka hre hran lo.


"'Kat' ti pawhin min ko tawh suh,ka hming pawh a ni lo."


Ka hriat țhin leh ka kawm țhin pawh a ni lo va, a lakah inthiam lo deuh mah ila a pawi lo. Mipa a ni ve tho, ka thiam loh hmasak pawh a lo ni maithei; mahse, kawm loh biak loh hi a țha ber, ka tân.


Kan inhmuin kan inbe tam mah mah ta e.


Mahse, he pa hi a luhlul ve chu ka ti. Hmeichhe laka tlâwm nih a hreh nge ni ang a, ka hre lo le, message chu min la rawn thawn zauh zauh tho. 'Message min rawn thawn tawh syh' kha ka ti tel tlat lo va, chuvàng pawh chu a ni mahna; mahse, ka chhâng ngai hlei lo va, tihian a nin hunah a tàwp ve mai ang.


Zan khat chu group-ah kan nawi hlawm viau mai, kei pawh fiamthu group ka awmna pakhatah ka nawi ve lutuk. Class xi (L) group-a an titina chu ka chhiar thla dan dan a, Lawmi chuan bialpa thar a lo nei deuh nge ni, an kâp liam liam a. An thlalâk nèn lam an lo post niin, a chhiat vak loh hmel; mahse, mizo a ang lo deuhin ka hria.


*In va'n chhe lo*


*Nei chhe lo hle mai*


*A dang lo ti leh teh u* tiin hmeichheho chuan an comment liam liam a, mipa lam ve thung chuan


*Het, hnam pawi i khawih pha a nia*


*Tu emawniin a hriat chuan a țha lo ang a?*


*Damlai lusûn thar an awm dâwn a ni maw?* tiin fiamthu ni pah deyh hian an kâp tliar tliar a.


Lawmi - Manuna a lo che pek a ni maw? Lalmanun, i hre hlui êm mai a, hmânlai a nih tawh kha😃😃😃


Ka chhiar vek; mahse, ka comment ve lo.


Manuna - Kumin Krismas i lo haw theih loh chhan pawh hei vàng hi a lo ni maw?


Chhana - A ni chiang.


Lawmi - In hre hlui êm mai


Sawmi - Kei chuan ka hre khiau😄


Lawmi - Sawm🙊🙊🙊😷


Sawmi - 😂😂


Nia, anni chu college an kal tlâng a, chanchin an inhre vek ang chu.


Biaka - Hnam dang kha chu nei lul lo teh u


Ani hi chuan hnam dang ngaihzawng neih hi a tei thei bau lo. A sual thiam ve a, kan class-a hnam dang awm vete pawh kàwm duh țhak lo kha a ni ve a.


Mut hnuah chuan ka ngaihtuah kual a, Lawmi chu Sangzuala nèn an ni tawh lo tihna a ni ngei ang, nge a rúkin an inkawp tho le? An awm dùn thei tawh si lo va, mi dang pawh kawp ve ve mah se an inhre tawn lo tawp ang chu. Lo la inkawp reng ta se Lawmi bialpa neih hi a hria ang em le?


Hmm, lo ngaihtuah tùr pawh ka ni lo ve, ka ngaihtuah an phû lo. An inngaihtuah ve thei alawm.





*ȚAWNG TLÈM ZIR RAWH, ȚAWNG TAM AIIN ȚAWNG TLÊM CHUAN MI PAWI AN SAWI TAM LO NGE NGE*

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » March 15th, 2020, 6:10 pm

☆2020☆ - 5 By Dingdi Pachuau





Krismas leh kum thar chu hlim leh dam takin kan hmang a, YMA lamin kan khuaa țhalai awm kim lai tiin intihhlimna hun an buatsaih a, kei pawhin volleyball ka bêng lâwp lâwp mai.


A hnuah musical chair-ah kan section aiawhin ka tel leh ta a, ka nui nasa lutuk ringawt. Ka fing phakar thiam viau nain Taitesena section-a mi Siami ka hneh ta lo va, min nêk per dâwrh mai, mi dang pawhin min lo nuih nasa.


Kan President chuan," Zopui, Siami chuan a nêk sil vek lo che maw?" tiin nui chung hian min fiam a.


"Sil deuhin ka hria, min nêk per ve chiang si a, damdawi ei lâwk pawh ka ngai maithei a ni," ka ti ve a.


Siami hi nula lian tak a ni a, chak pawh a chak. Hna thawh pawh a chak khawp mai, mipa tam tak aiin hlawhfaah pawh an duh zâwk!


Zànah inlêng ka nei ve zauh zauh; mahse, zaikhawmna lamah ka hruai daih zêl. Hmun danga lehkha zira awm țhinte leh khawtual mi pawh an rawn lêng, ka nau țhiante pawh an rawn kal khâwm țhìn, kan ri deuh luih luih reng mai.


Kan țhenawmte in piah hla deuh hlekah chuan an chhûngte Champhai lam mi, tlangvâl leh a nau hmeichhiain Kum thar an rawn hmang ve a, Champhai lam mi tih takah an ngo dùn hle mai a, kan khaw tlangvâlho pawhin a nula zâwk chu an rìm ve nasa. A mipa pawh chu a chhe hran lo va, tleirâwl lamah a tla na phian.


Zan khat chu an rawn lêng ve ngei a, zaikhâwm tùra ka lo insiam lai takin an rawn lût a, room lama ka awm lai a nih vàng chuan ka nuin a lo chhàwn a.


Ka va chhuah chuan rawn lènpuitu Dawnga chuan," Zopui, lêngkhâwm tùrin kan rawn sâwm che a," a lo ti a.


"In va fel ve! Ka hman chu a ni deuh mai a; mahse, thingpui in phawt ula tiraw?" tiin flask awmna lam chu ka pan nghâl a.


"Nia, a làwmawm ngawt ang chu, i thingpui lum lah kan in khât tawh si a," nui chung hian a lo ti a.


Thingpui an in chhûng chuan kan titi mai mai a, Dawnga chuan a kârlakah fiamthu a thawh a, kan nui nasa, ka nu phei chuan a pum a dawm a,a nui țha hlei thei lo zâwk.


A lo lènpuipa erawh a țawng tam lo hle a, a nui ve suk suk ringawt. Titi chu a pai tam lo ve hle a ni; mahse, mipa țawng zuah zuah ai chuan hetiang hi anmahni duhtu tân chuan an ngaihawmin an duhawm zâwk ang ka ring.


Zaikhâwmnaah chuan an lo tam ve deuh tawh a, tlar hmalam deuh chauh a lo ãwl tawh a. Kan inzui lût ve țhâm țhâm a, a laiah min țhuttîr ve ngei. Mi chuan min en duh viauin ka hria, a chhan chu mikhual tlangvâl ka kalpui miau mai si a, thingtlângah chuan mikhual an langsàr viau si a ni.


Zai thiam viau lo mah ila ka zai peih a, tlangvâlin min laitat mah se ka zai nasa tho. Hetiang hun hi kan tawng khât si a, Aizawlah phei chuan Sunday-ah bâk ka inkhâwm ngai si lo, ka ãm ve a ni.


Thingpui in chawlh laiin Dawnga chuan," I lo va zai thiam êm êm! I aw a ring țha bawk si," tiin min fiam hlak a, ka zak ve țêp.


A țhianpa chuan," A țha alawm, zai tùrin alawm kan kal le," a lo ti ve sap a.


"Ni e, zai ve vak vak r'u."


Zàn dâr 9:30 vêlah kan bâng. In thleng min thlah leh thlap a, lêng rih tùrin a thuphungin ka han sâwm ve a; mahse, an hnial, an haw zui ta nghâl a.


Mu tùra ka țawngțai lai chuan ka phone chu a rawn vibrate ta char char a, ka țawngțai tàwp hnua ka han en chuan Chimawmliana a lo ni a. Tûn ang zàn rei tawhah engati nge min rawn phone le? A rui a ni ngei ngei ang. Min rawn phone tawh lo tùr khân ka hrilh tawh reng si a...


A rawn tinawn leh. A ri lova ka lo dah chu ka lâwm hle mai, ka chhûngte an harh phah lo va.


Ka la duh lo leh ngat, zan rei tawha min rawn phone ngam hi ka hre thiam lo, a àwm lo ka ti lutuk, a bialnu pawh ka ni lo va, ințhian lah kan ni hek lo.


He pa hi, a beidawng duh chuang lo nia.


"Min rawn be tawh suh ka tih kha," ka țawng ring ngam lo, ka thin a tirim pah bawk si, ka sehchilh nasa.


"Kat, a tàwpah chuan min chhâng ve ta."


"Eng nge i duh?"ka ti nghat a.


"Biak che ka duh."


Kan inchhâng tâwk viau.


"Zàn a rei tawh, mu tawh rawh," ka tihngaihna hre lo chuan ka ti ta ringawt a.


"Ka țhiante ka nghâk mék a."


Engti tùrin maw? Mu tùrin țhiante nghah a ngai em ni?


"Kan in-race dâwn a."


Hm, thil țûl lo tak a ni. Zan khaw vâwtah lehnghâl, chêtsual pawh a hlauhawm.


"A va țûl lo tak!" tiin ka ngaihtuahna chu ka phun chhuak sap a.


A rawn nui hawk, he pa hian a lo hria a ni chiang.


"A nawmzia chu a, engtikah emaw ka la hruai ve ang che."


Ta deuh deuh chuan. Engtikah mah chu hun chu thleng lul suh se, ani hnaih hi ka duh zâwng a ni lo sa rêng a, zan rei lama in-race-na hmuna kal phei chu, 'kahase' a ni mai!


"Mumang ramah le," tia ka chhàn chuan a nui leh hawk.


"I va lawmawm tak! Hmeichhia pawh an lo kal ve țhin alawm, ka hruai châk tawh khawp mai che," te chu a la ti deuh deuh a.


"Râpthlâk!"


"Zanin chu pakhatna ka nih ngei ka ring."


Thâwm dang, bike leh motor leh țawng ri deuh nuai nuai a rawn awm tâkah chuan,"An lo thleng ta," a ti sup a, a hminga hmeichhiain an rawn ko vak ri pawh chu ka hria.


Ka tih theih ve tâwk," Fîmkhur rawh," tiin ka han chah ve ngial a, a fîmkhur phei chu ka ring hlei lo va.


"Kat, wish me luck."


Ka muhìl thei lawk lo, a hun hman dàn tùr chu ka ngaihtuah a, tlangvâl țhalai ve si, nu leh pa uapna hnuaiah a awm ve ngei àwm si a, chutiang mai maia hun hman chu ho ka ti lutuk, a chhûngte tân lah ngaihtuah a na dâwn si.


Ka ngaihtuah kual zêl a, mi hausa fapa awm țha duh lo a ni ngei ang chu, a chhûngten a khawsak dàn hi an hriatpui pawhin ka ring ta lo.


*******


Aizawla ka phei hmain ka ute in, Lungleiah ka riak thla leh rih a, min lo làwm thiam khawp mai. Ka u pasal chuan," Zobawihi hi chu MCS tùra ka hual i nia," min ti deuh reng a, kei lah chuan chutiang lam ka ngaihtuah ngai hauh lo, Lecturer nih ka tum ve ber thung.


Ka u chu bazârah ka kalpui a, bazâr pawh a lo thâwl khawp mai. Chawhmeh kan lei a, keiin ka lo khai zêl a, a duh khirh si a, kan va kual ngun tak!


Kan kual ngun êm avàng chuan ka chau zo vekin ka hria. Kea haw a rawt a; mahse, ka hnial ve ta tlat, a tàwpah rickshaw kan la ta nge nge.


Rickshaw-a kan lût tùr chuan chiang zet hian Sangzuala ka hmu thut! Ani pawhin min rawn hmu ve nghâl, bike-a a lâwn tùr a ni nghe nghe.


Ka hawi sawn vat, ka thin a rawn phu dawt dawt a, ka awm dàn chu ka duh lo kher mai. He pa lakah hian eng feelings mah ka nei tawh lo, ka ngei leh huat vàngin ka hmuh thut khân ka thisen a rawn sâng thut a nih ka ring.


Lungleiah a lo la awm reng a nih dâwn hi. Hmun dangah college kala a awm daih ka ring a nia, kan ințhen hnu khân a chanchin hi pakhat mah ka hre ta lo va, Lawmi nèn an ni tih ka hriat hnu phei kha chuan ka thinlung ata hi ķa paih chhuak ta hmak a nih kha.


Mahse, a hmel kha chu a țhat ngai rengin a la țha chu a nih kha.


Zanriah kan ei kham hnu lawkah kawngka a rawn ri a, thlèng ka sil zo deuh chiah a, ka u chuan," Lo lût rawh u," tiin a lo chhàwn vat a, lo lút ka hmuh chuan ka khawng vek ni maiin ka hria!


A rawn lêng ngam a nih chu!


"Zopuii a awm em aw?" a la rawn ti zui.


"Aw, lo kal rawh. Bawihte, hei inlêng i nei a nia."


Zak lo hi ka va ti tak!


Biak ngaihna pawh ka hre lo hial. Engtin nge a rawn kal ngam le? Kum 2 chuang kan inbe lovin kan inhmu ta lo va, a chunga ka thinrimna kha reh tawhah a ngai a ni ngei ang.


A teuh lo ropui si!


Thil eng mah thleng lo ang maiin a titi thei a nih chu! Ka țawng ve mang lo, thil min zawh erawh chuan ka u a awm ve avàngin a mawi tâwk chauhin ka chhâng. Ani beisei theih tùr hian awm ka tum tawh lo hrim hrim, ka chunga an thil tih kha ka theihnghilh thei ngai bawk lo ang.


"Naktûkah maw i phei dâwn?"


"Aw."


"Eng sumo-ah maw?"


"Ka hre tawh lo."


Ani hriat kher a ngai lo, hre mah ila ka hrilh chuang lo ang.


"Kei pawh ka chhuk țêp tawh, ka chhuk hmain ka rawn tlawh ang che aw."


A zak lo sia maw.


"Min rawn tlawh buai duh suh," ka ti deuh tlat. Lawmi nèn an nih tâk loh avànga min rawn ngaihtuah leh tâk viau, ka tei thei țhak lo.


"I ngaihawm ve alawm."


Zahna chu a tlachham ve teh e.


A tûkah chuan ka uin ka pheina tùr Sumo dinna thleng min thlah a, Sangzuala a rawn lang thut ang tih ka hlau zek zek, ka hmu duh tawh lo.


Ka vànnei hlauh, a lo kal lo e.


Engati nge a lo kal ka rin tlat le? Kei hian ka lo la beisei deuh a ni zâwk lo maw? Ni lul lo ve, kha pa kha ka beisei tawh lul lo mai, hmuh leh pawh ka duh tawh lo.


Tluang takin Aizawl ka thleng, driver chuan min khawngaih a, hostel bul thleng min thlah, làwmthu ka hrilh luam nghe nghe, a làwmawm êm asin.


Maremi'n min lo hmuak a, kan nui dùn var var. Kan inngai ve tawh a, thei ei tùr ka hawn pawh chu an ina keng haw nghâl tùrin ka ti a, naktûk lamah an ina lèn chu ka tiam nghâl bawk a.


Hostel-a lût pawh an lo awm nual tawh, a chanve zet an lo lût tawh niin, la thleng lo pawh naktûk lamah an lo thleng dâwn a ni àwm e.


Zànah kan floor-ah chuan ka thil hawn chu kan ei liam liam hlawm a, sèr ka hawn chu tui an ti tliar tliar khawp mai. An hlim hmel leh tui ti hmel chu hmuh an nuam, fiamthu an thawh pah a, kan nui dar dar a.


"A va han tui tak!" Sangpuii chuan a ti vang vang a, thak a ti pah bawk nèn, a sî pah hlarh hlarh a.


"I tenawm hliam hliam reuh e!" Rbi chuan a lo ti a, kan nui hak a.


"Enge, a thak viau ni, a tui bawk si!"


Fiamthu hi tu mahin thinrimah kan la ngai lo. Na deuh taka kan infiam pawhin tu mahin kan haw ngai lo, fiamthu a ni tih kan hria a, intihthinrimna pawh a thleng ngai lo, hei tak hi nuam ka ti.


A tûkah chuan Maremite inah chuan ka han lêng a,naktûkah class kan țan dâwn chauh a, vawiin chu ka la lêng mai mai thei tlat.


A room-a ei tùr kan ei lai chuan," Ti leh ta daih ila, tu emaw ni chuan a rawn phone tawh che em?"a ti thut a, min zawh thut avàng chuan ka hamhaih deuh a, ka en reng lehnghâl.


"Kha, Ruata'n i number tu emaw a pêk kha."


Ka thaw huai phawt a, dâwt hrilh ka tum peih tawh lo.


"Chimawmliana kha alawm lo ni mai mai le."


A meng phar ãk. Nia, mak a ti ngei ang, kei pawhin mak ka ti ve tho.


"A va mak! Chuan, a rawn be tawh che a ni ngei mai a, eng nge a rawn sawi? Awii, ka hre châk tawp!"


"Eng mah."


Awih lo tih hriat zet hian min melh râng a," Eng emaw chu a awm ka ring deuh rêng a ni," a ti leh sap a.


"Eng mah a awm lo."


"Daw suh, vawi eng zât nge a lo biak tawh che?" a ti leh a.


"Ka chhiar sîsê lo," ka tih chuan a nui pût pût a.


"A fuh dâwn e, a chhe lo phian bawk si."


"Ngawi mai teh, mipa a nih kha mipa. An inang vek ka tih tawh kha," ka lo ti thung a.


"Ang vek chuang lo, i thil thlìr dàn hi sawh sawntîr i ngai," a ti ve ngial a, kei lah chuan ka nuih mai mai.


"Mi hmuhsit chîng a la ni zui, ka tei thei miah lo a nia, min chhaih hauh suh ang che," tiin ka vau khar khar a.


"Engah nge ka chhaih ngawt ang che le? Ka țhiannu hmusittu chu kei pawhin ka ngai thei bîk miah hlei nem," a lo ti ve a.


Kan inen a, kan nui chhuak hawk hawk a.






*BEI HRÂM HRÂMTUTE'N HLAWHTLINNA AN CHANG CHÂWK*

Link:
BBcode:
HTML:
Hide post links
Show post links

Local Advertisement

MOBILE SIAM ZIR DUH TAN!!!

Tech-Inn Mobile Repairing Traning Centre, Bazar bungkawn

Kum tin mi za chuang eizawnna kan siamsak a, Eizawnna tlaka thiam turin kan zirtir thin

Mizorama mobile siam zirna hmasa ber changtlung ber kan ni. Hrechiang duh tan Contact : 9612099411 / 9862016122


Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » March 15th, 2020, 6:10 pm

☆2020☆ - 6 By Dingdi Pachuau




Class kan han țan leh ta a, kan result pawh a chhuak har lo. Kan pass țha ve leh khawp mai a, a làwmawm tak zet a ni. A lawm nân Maremi nu leh pate'n Maremi nèn bag inang min leisak nghe nghe, ka phû lo ka ti a, làwmthu sawi dàn pawh ka hre lo hial.


Lehkhabu dàwr kha kan la nghâk rih lo, an dàwr an siam țha a, thlaleh ațang chauhin kan inhlawh thei ang, pawisa ren leh deuh hlek a ngai rih a ni.


Sangzuala chuan min rawn tlawh tak tak a nih chu! Engtin nge min rawn zawn chhuah theih zâwk ni! A zak lo ve chiang ngawt mai.


Hostel-a awm ve mi dangte pawhin an hmu, a chhan chu an chhuah leh haw lamah min rawn hmu thei tlat a. Garage chungah kan țhu sia, hmuh loh theih pawh kan ni lo.


"I thin a la rim reng tiraw?"


Sawi pawh ka sawi peih lo zâwk! Ka chhàn loh avàng chuan amah bawk chuan," Nia, ka thil tih kha a dik lo chiang, kan inkârah eng emaw a awm ka lo ring miah lo va. Inngaizawng pânngngaite angin kan ințhen ve leh mai ang ka lo ti a," a ti a.


"Sawi chhuak tawh lo teh!" ka lo ti hlak a.


Kan ngawih dun deuh reng hnuah chuan,"Thil thleng kha theihnghilh vek tum teh ang, țhian ang emaw inhre pângngai angin emaw awm zâwk ila, hun kal tawh chu hun kal tawhin liamtîr a țha i ti ve lo maw?"a ti ta a.


Nia, ani tân chuan a harsa tawp nâng, a rilru mi pe dâwn hauh si lo va, engah vak a ngai lo ang chu; mahse, ka tân chuan a ni ve lo. Kha thil thleng kha ka theihnghilh thei lo ang, tûn thlengin mipa pawh biak hrehawm ka tih phah a nia.


"I tân chuan a awlsam ngawt ang chu!"


Min en reng tih ka hria, ka en duh hauh lo.


"Zopui, a pawi ka ti tak tak a ni, thiamthu sawi tùr ka nei hauh lo. I ngaihdamna pawh dîl ngam tùr che ka ni lo; mahse, nang chu mi fel tak i nih kha. Keimah avàng maiin khâng i nungchang mawi tak țhìn kha paih bo miah suh."


A haw hnuah chuan țhiante chuan min fiam nasa, min hmu dùn hlawm si a, engtin vak ka chhâng hlawm lo, ka nuih vél mai mai.


Kan dorm lamah chuan Bti chuan," A neih chhiat lohzia mai chuh, a lo inthup thei tak zet a ni," a ti lar lar a.


Rbi chuan," Tuin nge 'Bialpa chhe lo tâwk ka nei asin' tia tlângau luau luau duh ang le? Fing deuhho hi chuan a rûk tê hian țha deuh an hûng fur ang chu," nui chung hian a lo ti bawk a.


Sangpuii ve thung chuan," In sawi ho êm mai a. Nula a nia, a nei ve bawk ang chu, nangni pawhin chhe lo tâwk tâwk in hûng ve tho ang chu," a lo ti a.


"Kei chu ka hûng țha fahran lo."


Kan nui dar dar a.


Zànah Chimawmliana'n min rawn text, min rawn call lo chu ka lãwm kher mai.


*Ka rawn lêng châk*


A tih chi hauh loh ang! Kan warden hi strict over lo mah se tlangvâl inlêng neih te zawng, ka thî a ni mai!


*Châk kha a tâwk*


A haw ngawt ang, fiam kha ka châk thut atin a ni. Ka duh aiin min nêl ta mah mah, kei hian ka lo hope deuh hi a ni zâwk lo maw?


Teuh lo mai.


Ka message chu a run ve ngang a niang,


*Ka rawn lêng nghâl* a rawn ti.


A rawn lêng tak tak ang tih ka hlau leh deuh si, ka text leh nghâl vat.


*Inlêng neih phal a ni lo* tiin; mahse, min chhâng tawh miah lo, en pawh a en lo.


A rawn lêng thei dâwn chuang lo va, ngaihțhat lohna tùr a awm lo ve. Pi ber a rawn dîl țâlh a nih ngawt loh chuan, pi ber lahin a phal dâwn lo chiang.


A hnuah min rawn call ta, ka lo silent lo chu ka inngei lutuk.


"Ka rawn thleng tawh a nia."


Ka țhiante'n ka țawng an hriat ka hlau si, toilet-ah ka kal ta ringawt.


"Inlêng neih phal a ni lo," ka ti sap, dâwt tlêm chu ka belh nain a pawi ka ti lo, gate a inkalh hnuah chuan inlêng a neih theih loh, mipa hlauh phei chu.


"Ka rawn hmu zawk ang che."


"A theih loh."


"Hostel chhak chiaha in bathlàrah khân ka awm."


A lo kal tak tak a nih hi, a va țûl lo tak! A thuhrimin ka bialpa pawh a ni lo va, ka țhian lah a ni bawk si lo. Ka bialpa ang ziazâng a rawn chêt mai mai, a va zak lo tak!


"Haw leh rawh."


"Ka hmu duh che. Ka hmuh hma loh che chuan ka lo nghâk mai ang che," a ti tlat.


"Engah nge min hmuh i duh a?"


"Lo kal mai rawh, nge ka lo kal dâwn? Luh rûkna tùr ka hmu reng a nia," a rawn ti leh.


He pa luhlulzia leh tihmawhzia hi, min tibuai. Țûl loah ka buai phah dâwn a nih hi.


"Zànah chhuah phal pawh a ni lo."


"A nih, ka lo kal dâwn-"


"Ni lo...!!" ka ti țhat, ka insûm thei tawh lo," Lo kal suh," ka ti hrãwk a, ka au chhuak lo chauh tawh a ni. Thâwk ka la hawk hawk a, tlêm chuan ka zia deuh.


"I awmna ka rawn hre thei-"


"Khawngaihin, lo kal suh. Ka ngèn che, buaina tawh ka duh lo a nia," tiin ka ngèn ta thung. Ka hlauthâwng lutuk a, ka thâwk pawh a sak vekin ka hria, ka lung lah a phu rang ropui.


A ngawi ta vang vang a, kei chuan remchângah lain," Khawngaihin?" ka lo ti chhên bawk a.


"Zanina ka hmu thei lo che a nih chuan...naktûkah chuan kan inhmu thei ang, a dik tiraw?"


Ka thaw ta huai huai.


"Aw...mahse, class kal ka ngai."


"Ka rawn bia ang che."


Bike ri ka hre deuh nghâl mai, chak zeta tlân rîin a chhunzawm nghâl bawk. Țhiante inthiar tùr an rawn kal ve a, tlêma tlêmah min man chhuak lo chauh a ni.


Room ka thlen chuan thâwk ka la țha leh, Chimawmliana min tihhlauhthàwn dàn êm êm chuh, min man chhuak lo chauh chu a nih kha, hmingchhiatna tùr ka pumpelh ta rih e.


A thuhrimin he pa hian engtizia nge ni min ngam êm êm mai le? Mitmei ka hmuh em ni? Ka be țhain ka hre si lo, ka mitah amah beiseina a hmu em ni zâwk? Kei hian heti êm êma min ngam tùr hian eng thil nge ka tih?


A tûk class kal tùra kan chhuah chuan Maremi chuan,"Vawiin chu class bànah khûtah min kalpui rawh aw," a ti a.


"Khawi khûtah maw?"


"Kan kal hunah i hre mai ang."


Class chhûnga ka țhu chu ka awm a nuam thei lo, nizànah khân 'Ka rawn bia ang che' kha min ti si a, ka tang deuh hrû reng maiin ka hria. Min rawn call ang a, ka lo hre si lo ang a, a rawn kal rêu rêu ang tih ka hlau!


Chawhma chhûng chu ka phone a ri lo, break tùra kan chhuak chu ka thaw huai huai, tunah chuan min rawn phone pawh ni se ka hre thei tawh dâwn a, a zia deuh.


In hnuai kan thlen thlaâk chuan ka phone a rawn ri ta chiah, amah ngei a lo ni, Maremi bulah chuan ka inthlahrung deuh tlat a nih chu, nuam lo ka ti. Kan pahnih bâkin kan inkàwm ngai si lo va, he pa chungchâng hi ka hrilh ngai si lo.


"Ruata dàwrah ka lo nghâk che a, in chàwl thei tawh maw?"


Maremi hnênah chuan," Chimawmliana kha a nia, min hmuh a duh a," ka ti sap. Mak pawh a ti hman lo, a chhan chu kan sawi-mêka chu kan bulah a rawn ding ve chawpchilh nghâl mai si a.


Polite zet hian Maremi hnênah chuan," Essa ka nia," a ti nghâl a, ani pawh chuan nui sâng hian a hming chu a hrilh ve nghâl a, Essa hmuh loh lai erawh chuan min rawn melh 'eng emaw' hrâm a.


"Ei tùr tui deuh siamna ka hria."


Hnial duh mah ila ka thei rih lo, Maremi lah chuan a lo châk hle emaw tih tùr a ni, a lo yes vat a. A car hùnna lamah chuan rilru nuam fahran lo chuan kan kal ta a.


Maremi chu a chanchin a zâwt a, Aizawl mi ve tho a ni tih leh an in awmnate a hrilh chuan," A zia hlauh chu!" a ti sup a, zia a tih chhan erawh a sawi chuang lo.


Kan chawlh chhúng chuan ka țawng ve mang lo, sawi tùr ka hre lo, bâkah he pa hi ka nêl teh chiam lo. Ka sawi thiam chiah lo, a bulah hian ka țang țùng reng maiin ka hria. Maremi a fel hlauh, a țawng barh barh reng a, a zia ka ti tak tak a ni.


"Naktûkah chàwl leh ila?"


"A țha viau ang chu!" Maremi chuan a lo ti hliai a, a inthiam lo leh deuh a niang, min rawn en a," Tak tak chuan, ka țhiani tih dàn dán hi a ni mai," a ti leh a.


"Tih tùr, ni lo, hna thawh tùr zâwk, i nei lo em ni?" ka ti ve thung.


"Ka break lai ve tho a nia."


Eng hna nge a thawh le? College/ university kal rual ve tho a ni sia, class kal hmel a pu bawk si lo.


Kan ințhen tùr chu ka làwm viau laiin ka huphurh tho, a chhan chu Maremi hmachhawn chu ka huphurh a ni, min dem ngawt ang chu.


"In lo inhmu tawh țhìn tih tal chu min hrilh ve tùr a nia," a ti țan ta pang.


"Tihpalh thilthuah chauh."


"Min hrilh vek thei," hriat châk hmel tak hian a ti leh a.


"Hrilh tùr che pawh a awm lo."


Mahse, ka hrilh pawr pawr tho Krismas hmaa ka bazar haw min lo chàn thu erawh kha chu ka hrilh lo.


"A țha dâwn e."


"Țha dâwn tùr a awm lo, mipa a nia,mipa ka ngaih dàn chu i hriat tawh kha," ka ti thung a.


"Chu pawh ni se-"


"Engah mah ka ngai lo," ka lo ti tlat thung a.


"A duh hmel viau che kha."


Ka nui hawk, ka țhiannu chu ni lo se chuan min hmusit ka ti ngawt ang chu. Ani khân engti duhin nge min duh teh lul ang? Kei hi tu tlangvâl mahin hmeichhe en pawhin min en lo, ka duh hek lo bawk.


"I suangtuahna a nih chu."


"Kan la hria ang chu," tiin a nui sen sen a. Rum deuhin ka melh.


Engtik ațang khân nge he pa lakah hian ka lo nèm țan le? Nêm lo ila hetiang hian min biain min rawn hmu ngam hauh lo ang, mipa ka hmel hriat țhate tih loh chu be ngai hauh lo kha ka ni si a, tunah lêm hmeichhe nunnêm ber ang ziazângin, a thu ka hnial theih tâk miah loh hi. Engtizia nge le?


Chawhnu class chu lecture pawh ka ngaihtuah thei lo, class chu ka ning hluah hluah. Hun lah chu a kal muang ka ti lutuk, class ka nin ber țum a ni hial ang,fuh lo tak a ni.


Bànah Maremi chu Chanmari west lamah ka kalpui a, a titi barh barh a, tlêm chuan ka zia deuh. Ka vawiin hun hman khân min tichau a niang, ngaihtuah loh tùr túr ka ngaihtuah vàng vek.


Kan ințhen dâwn chuan," Ngaihtuah lutuk lo la aw, vawiin chawhnu lam pawh i ngaihtuahna i kàwm nasa mah mah a nia," a ti zauh a, lei sei fêin ka chhuah khum ringawt.


Zànah lehkha zir tùrin ka inbuatsaih a, ka phone chu a hma daihin ka silent tawh a, data pawh ka off hmak. Ka phone-in min tibuai tawh tùr a ni lo. Hostel-a ka awm chhan chu ka ngaihtuah pah reng a, țha taka ka zir a ngai tih ka hria.


Mut hnuah erawh ka khawih ve leh zawk. Vànneihthlâk takin ka ti dâwn nge, a message a lo awm hauh lo. Thaw huai tùr ka niin ka hria a; mahse, kim lo deuh húih leh hnual deuh ruihin ka inhre deuh tlat a nih chu!


A va mak!


Kha pa kha ka beisei em ni? Teuh lo. Keimah hian ka lo duh reng em ni zâwk? Ni lo, thil theih a ni lo, ka duh thei lo ang. A message dawn loh chu lãwm viau tùr ka nih laia engtiziaa hnual deuh ruih nge ka nih?


"Inthing harh rawh, eng rilru nge i put?" tiin keimah chu ka inzilh mawlh mawlh a, mipa hriat chian hleih lohin min bia a, a message ka dawn tâk loh vànga eng emaw riaua ka inhriat tâk mai chu le, insiam țhat ka ngai, ka rilru ka sawh sawn tùr a ni lo, bâkah, zirlai ka nih hi, ka zirlai hi ka dah pawimawh hmasa ber tùr a ni.


A tûkah chuan break-ah chhuah ka duh lo tlat a, Maremi chuan mak a tih hmel viau nain min ti lui bîk lo. Ka phone chu a ri hauh lo va, message pawh ka dawng hek lo. Nimin lamah kha chuan vawiin chhùna chawlhho leh kha a rawt kha a nia.


Mipa hi chu an inang vek ka tih kha, a dik chiah.


A message ka dawng lo va, a call pawh ka dawng lo. A țha daih zâwk, buai lohna tùrah ka buai a hlauhawm alawm, buai lohna tùra ka buai laia ka tlâkchhiatzia kha, ka theihnghilh tùr a ni lo.


"Min lo tlawh khât tawh e," Ruata chuan a ti leh hlawi hlawi a.


"Chuti em ni? Kan lo lawr zut zâwk a nih hi," Maremi chuan a ti a.


"In reh lutuk a, in hming paeh ka theihnghilh țêp tawh alawm," tiin a nui țhaw a.


Chutia an inbiak lai chuan nula chhe lo zet mai hi a rawn dâk ve zawk a," Ruat, a lo kal tawh em?" a rawn ti a.


"Nichin deuh khân a lo kal a, in inhmu tawh ang chu ka lo ti asin."


Chu nu chuan," A ni maw? Ka'n call chhun ang e," tiin a phone chu a kheuh nghâl a.


Ka lo en reng nain ka inthiam lo leh deuh a, ka hawi sawn. A kut tin hnawih mawi zet chu ka mitthlaah a lo lang nghâl, 'mi fate hi chuan an tin hnawihte hi an mawipui mang tak e' tiin ka ngaihtuah neuh neuh a, kei ve hi chuan ka tin pawh hi ka hnawih ngai lo, ka hnawih ve chhin pawhin ka lérh hmel ngawih ngawihin ka hre țhìn.


"Ess, khawiah nge i awm?"


Ka phu deuh zawk!




*A HMUH THEIH RENG A ȚHENAWM PAWH HMANGAIH THEI LOTU CHUAN A HMUH THEIH LOH PATHIAN CHU A HMANGAIH KHER ANG EM?*

Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)