Pu Tawma In (Uncle Tom's Cabin) (Completed)

[Ngaia]

dcrxthp7.jpg (24.59 KiB) Viewed 5362 times

Ziaktu : Herriet Beecher Stowe
Lettu : Kailuia Sailo
Retype : Ruata Ralte

Bung-1
PU TAWMA LEH HARIA AN HRALH

Hmanlai hian Amerika rama Mingo te’n hlawh neiin rawngbawltu an ruai ngai lo. An zinga mihang awm ve te chu hawih atan an lei a, rawngbawltuah an hmang zawk thin a ni. Hlawh an pe lo va, eitur leh silhfen chauh an pe a.

Mi thenkhat chuan sumdawn nan hmun hrang hranga mi hawih an leikhawm a, dawrpuiah an zuar thin. Bawih ho chuan hlim ni hmel an hmu ngai lo. Bawih neitute chu mi nunrawng, mite khawngaihna nei lo an ni deuh ziah a. An bawihte chu hria tinreng an thawhtir a. Bawih ho chuan an theih tawkin thawk mah sela, hauh an tuar lo chuang lo. tii thenkhat chuan an bawihte an vel an vel thin. hmel ngilnei hnena awmte erawh chuan hlim ni hmel an hmu deuh. Botu thate tan chuan tha takin hria an thawk a, rinawm takin an awm thin .

Bawihho chuan chhungkaw kima awm lai an nei mang bawk lo a ni. An pute’n an duh duhin an hralh thei a, chhungkaw kimin an hralh chuang lo va, chhung khata pakhat chuuh pawh an hralh thei a. Chhung khat zinga pakhat an hralh thin mawlh mai chu tuar har an ti a. An hralhte chu an mit hmuh ngei ah boral zawk se la an tan a tuarzia awm zawkin an ring hial a ni.

Pu Tawma hi bawih a ni a. Bawih rinawm tak, tha tak a nih avangin a Pu Selbia pawhin a titha hle a. A nupui chu Pi Khlawii a ni a. Chawchhum leh ei rawngbawl a thiam avangin an pute ei rawngbawltu ah a tang a. An pute in bul lawkah in te tak te an nei a, a velin pangpar an ching a, an inah chuan hlim takin rei an awm tawh a. Pu Tawma chu lovah a feh thin a, Pi Khlawii erawh chu ei rawng bawlin inah a awm thin. Pu Tawma feh hawnin an in lamah an haw dun a, an fate hlim takin an awm thin.

Pu Selbia chu mi tha tak a ni a, a bawihte chung ah pawh a tha hle a. Amaherawhchu pawisa hman a thiam mang lo va, indaihlo reng rengin a awm mai a. Bawiha sumdawng mi pakhat Helia tangka a puk a, A indaih phah chuang lo va, a tangka puk pawh chu a rul leh thei ta lo va. Helia lah chuan a thing chhen mai a, "Mi rulh theih loh chuan i in leh lo ka hralh sak mai che a ni ang chu” a ti khar khar a.

Pu Selbia chuan rulh a tum hram hram a. An bungraw hralh awm apiangte a hralh a, nimahsela a rul thei chuang lo va. Helia chuan, “Min pek theih ngang loh chuan i bawih pakhat Tawma i tih hi min pe ta mai che, cheng tam tak huah ka pawm ang chu” a ti a. Pu Selbia chuan, “Ni lo ve, ka bawihte hralh hi ka duh lo a ni, Tawma lek phei hi chu a tha em em a, a rinawm bawk si a. Chu a chhapah a naupan tet a ka hnena awm a ni a, ka hralh thei lo vang” a ti a. Heilia chuan, “A nih leh i in leh lo ka hralh sak che a ni ang chu,” a ti ta khar khar a.

Pu Selbia chu a mangang hle mai. A in leh lo han hralh em chu a ngai ngam lo va. Tawma chu a duh hle chungin hralh lo thei niin a inhre ta lo va. “Tawma chu I la mai a ni ang chu. Amaherawhchu ‘mi ngilnei tak hnenah chauh ka hralh chhawng ang’ tih min tiam hial rawh khai” a ti a. Heilia chu mi tha a ni lo tih a hria a. Tawma chu hralh leh chhawnah a duh a ni tih a hre reng bawk a. Helia chuan, “Tiam e maw le. Amaherawhchu Tawma mai chuan I leibat I tlak zo hlei nang. Midang pakhat min pek belh tur a ni” a ti a.

Chutih lai tak chuan mipa naupang te tak te hi a lo kal a. A hming chu Hari-a a ni a. Pu Selbia nupui rawngbawltu Elizi-I fapa a ni. Heila chuan, “He naupang leh Tawma hian i leibat chu tlak ta mai che," a ti a. Pu Selbia chuan, “He naupang hi zawng ka pe thei lo vang che. A nu hi ka nupuiin a duh em mai a, a fapa kan hralh sak chu a rem ti lo thuai ang” a ti a.

Helia chuan tifuh inti awm fahranin, “A nih I in leh lo ka hralh a ni ang chu,” a ti leh khar khar thin a.

Pu Selbia chuan a tihngaihna a hre lo hle a. A in leh lo chan em ai chuan a bawihte hralh chu a duh zawk a. Pu Tawma meuh pawh a hralh dawn ta si a. Haria hralh pawh chu a tithlu leh ta a

Helia chuan, “Naktuk zingah ka rawn lam ang e, lo inpeih diam rawh se” a ti a, a haw ta a.

[Ngaia]

Ziaktu : Herriet Beecher Stowe
Lettu : Kailuia Sailo
Retype : Ruata Rate

BUNG 2

ELIZI-IN A FAPA HARA A TLAN BOPUI

Pu Selbia rilru chu a nuam lo hle mai. Tawma leh Hari-a la turin zinglamah Helia a lo kal dawn si a, chu mi zan ngei chuan a nupuiin hre ve sela a ti a. Amaherawhchu pawi a ti em em ang tih a hriat avangin hrilh a hreh hle mai a.

Zanriah ei khamin an nupa chauhvin an thu dun a. Chiang taka hrilh chu a lungngai deuh va, sawi chiang duh lovin, “Kan bawih thenkhat hi kan hralh lo thei dawnlo a nih hi” a ti a. A nupui chuan, “Bawih hralh te zawng fiamthu pawhin sawi teh suh khai. A nunchhiatthhlak em mai e,” a ti a. Pu Selbia chuan sawichian lohtheih a ni lo tih a hriatin, "Hari-a leh Tawma hralh ka lo remti diam tawh a, naktuk hian a leitu in a rawn lam dawn asin,” a ti a. A nupui chuan pawi a ti em em a, a thin pawh a ur hle a. “Hralh lo theilo pawh ni ta la, engtizia a Tawma leh Hari-a kher kher han hralh tum nge i nih? Tawma thatzia leh rinawmzia hi i hre reng si a. A tul chuan I aia thih pawh ngam ngei tur anih hi. Hari-a lah nu te tel lova tlahrang thei rual a la ni si lo va, i ti mak em mai,” a ti a. Pu Selbia chuan, “Mite pawhin mi tha chu hai bik hek lo. Tawma leh Hari-a lo chu a duh miau si lo va; a lei ka lo ba ta tlat si a, hralh lo thei ka ni lo a ni,” a ti a. An nupa chuan an lungngai dun hle mai a.

An inbiak lai chuan pindan leh lamah Elizi-i a lo awm reng a. Kawng a inkhar that mang loh avangin an tawng a hre thei a. A fapa hmingte an lam nual avangin hriat a chak a, a ngaithla ta a. A ngaihthlak lai chuan a hmel chu a dang sawp sawp a, lungngai tak hmel a pu a.

Elizi chuan fa pathum a nei a, a upate pahnih chu an sen laiin an thi a, Haria chu a fa neih chhun a ni a, a duat em em a. Hotu nunrawng tak tak hnenah a hralh lawr ang a, engtikah mah a hmu leh tawh kher lo a ni thei a. Chutiang zawng zawng chu a han ngaihtuahin a lungngai em em a, tuar theiin a in ring lo va.

Elizi-I pasal chu Zawra a ni a, ani pawh Pu Selbia te bawi a ni a. An hotute an hran avangin nupa angin an awm dun thei lo va. Zawra pu hi a nunrawng hle mai a, Ztwra chu a tinawmnah hle a, a nupui hnena a kal pawh a phal thin lo va. Zawra chuan a tuar ta ngang lo va, tlanbo a tum ta a. A tum dan chu a nupui hrilh turin chu mi ni ngei chuan a lo kal nghe nghe a.


A pi !eh a pu lnbiak zawh veleh chuan Elizii chu a pindan lamah a tlan thuai a. A fapa Haria chu tui takin a lo mu a, “Bawihte, ka neih chhun, midang hnenah an hralh dawn che a , nimahsela i nu’n a chhan ang che,” a ti a. A lungngai leh mangang lutuk chu a tap hlei thei lo va, lehkha a ziak ta a.

‘Ka pi, ka pi duhtak, i hnena lawm nacnang hre lovah min ngai suh ang che. Zanin ka pu nena in thusawi kha ka hre vek a. Ka fapa neihchhin hi chhan ka tum dawn a ni. Min dem suh ang che. I ngilneihna avangin Pathianin malsavm sak che rawh se,’ tiin.

Hari-a chu tlan bopui a tum a, a kawr leh puan-te a fun a. Kawrte a ha a, lukhum te a khum a, a inpeih diam hnuin Hari-a chu a kai tho va. Hari-a chu a tho thuai a, a nu chu inchei diam, lukhum te khuma a hmuh avangin mak a ti a, ''Ka nu, engtizia nge ni,” a ti a, a tap ta a. A nu chuan, “Bawihte, tap suh, an hria ang che. Misual takin rawn lak che a tum a, a lo kal dawn a ni. A lo kal hmain i tlanbosan daih ang. I kawrte ha la, i lukhum te khum rawh khai,” a ti a. Hari-a tap chu a bang thuai a, a nu chuan kawrte a haktir a, an lnpeih veleh a fa chu a pawm a, an in atang chuan an kalchhuak ta a.

Thlasik lai a ni a, a vawt hle a, thla a eng hle bawk a. Pu Tawma in lamah an tlan a, kawngkhar chu zawi tein an va kik a. Pi Khlawii chu a la muhil lo va. A lo tho va, kawng a va hawn thuai a. Pawnah chuan Elizii chu nau pawm hian a !o ding a. Pi Khlawii’n Elizii te nufa a hmuh chuan mak a ti hle a, zan laia inchei diama nau nena lokal ta chu chu engemaw tak a awm a ni ang tih a hria a. Pu Tawma pawh a lokal ve thuai a, ani pawh chuan, “Engtizia nga ni ang le” a ti rilru a.

Elizii chuan, “Pu Tavm, Pi Khlawi, ka fapa hi ka tlanbopui dawn. Kan pu’n a hralh a ni,” a ti a. Pu Tawma te nupa chu mak tiin ban an phar a. “An hralh a!” an ti rual thawt a. Elizi chuan, “Hralh e, kan pu’n kan pi a hrilh lai ka hria a ni. Pu Tawm, nang pawh an hralh che asin. Naktuk zingah an rawn lam dawn che u a ni," a ti a.

Pu Khlawii chuan a awih lo lek lek a; a ngawi reng a. A thu a, a hmai hupin a kimki a ta reng a. Pi Khlawii chuan, “Lalpa'n min khawngaih rawh se. Tawma’n eng thil nge a tihsual a, kan pu’n a han hralh tak ni le?” a ti a. Elizii chuan, “Engmah a tisual lo, a thil tihsual avang a ni awkawng lo. Kan pu hian hralh chu a duh lo a, nimahsela a hralhna pa tangka a ba a, a rulhtheihloh vanngin a in leh lo hralh sak a tum a. A in leh lo a hralhsak chuan keini bawihho pawh hralh vek tur kan ni tho tho dawn a. Kan pu pawhin pawi ti em emin a insawi a. Kan pi tak phei chu a tha khawp mai a, a tawngte chu in hriat veah ka duh khawp asin. Chutiang pi tha han tlanbosan tak chu sual ka inti hle chungin, ka tlanbo lo theilo a ni e. Tlanbo pawh sualin ka hre lem lo. Sual anih tak leh Lalpa’n min ngaidam rawh se; tlano lo thei ka ni lo a ni,” a ti a.

Pi Khlawii chuan, '’Tawma, nang pawh eng nge I tlanbo loh ang? Hun a la awm alawm,” a ti a. Tawma chu a lo dakchhuak a, lungngai tak hmel puin a nupui chu a en a. “Kei chu tlanbo lo ve, Elizi-I te tlanbo rawh se. A fapa chhan a tum chu a tidik a ni. Keizawng, kan pu hian min ring em em f ova, ka tlanbosan thei lo vang. An in leh lo leh keini ho hralh vek ai chuan kei,ah chuan min hralh chu a tha zawk a ni. Khlawii, kan pu hi dem tur a ni lo ve. Ka awmloh pawhin kan fate a lo enkawl….” A sawizawm hlei thei ta lo va, a tapchhuak ta a. A nupui leh a fate a kalsan tur a han ngaihtuah chuan a lungngai ve hle a.

Elizii chuan, “Pi Khlawi, ka kal tang e. Vawiinah ka pasal ka hmu a, a pu'n a tihnawmnah avangin kalbo a tum ve bawk a. Kan fapa chhan turin ka tlanbo dawn tih lo hrilh hram ang che. A lo tlanbo ve chuan min rawn zawng rawh se. Dam takin aw, Pathianin mal a sawm sak ang che,” a ti a, pawnah chuan a chhuak leh ta a.

An chhuah hnu chuan Pi Khlawii chuan zawi tein kawng a khar a, mittui tla teuhvin anmahni chhung chauhvin an awm ta a.

[Ngaia]

Ziaktu : Herriet Beecher Stowe
Lettu : Kailuia Sailo
Retype : Ruata Rate

BUNG 3
Elizii An Um

Zing lamah chuan Elizi te nufa an tlanbo tih an hria a, an awmkhawm laih a. Pu Selbia nupui chu a lawm hle mai a. “Tlanbo nachang an hria chu a lawmawm mang e, an tlanbo hlen thei em ang chu. Mi nunrawng tak hnena Haria hralh zawng ka remti ngang lo asin maw,” a ti a. Pu Selbia erawh chuan pawi a deuh va, “Hari-a hralh ka duh lohzia Helia’n a hre si a , ka tlan bo tirah a ngai ngei ang a, min dem hle dawn a nih hi,” a ti a.

Chanchin hre awm ber Pi Khlawii chu a ngawi reng a, a kiang vela mite chu hmu lo ang mai leh an thawm hre lo ang hrimin a hriathawh lai chu a thawk mawlh mawlh a. Bawih naupangte huan palah an lawn a, an hlim hle hlawm a. Heili’an a rawn hriat huna a thinrim hmuh an chak a, an lo nghak reng a.

Heili’an a rawn hriat chuan a thinrim ngei lah tak a. A ang a, a ke a per tan tan a. Naupangho chuan an nuih a, an au nawmnah a, an chhiatsan a. Pu Selbia rin ang ngeiin tlanbotir ah a ngai a, a dem hle a. Pu Selbia chuan a umpui turin a bawihte pahnih Sama leh Andia a tir a.

Sama leh Andia chuan an pi rilru an hria a, Elizii te nufa chu an man duh tak tak lo va, tlanbo hlen thei se la a ti tih an hria a, Helia tihkhawtlai na ngawt an zawng a. An sakawr chuanna tur an zawng a , man tum tak tak lovin an tihthaih a, an um vak vak a. Helia sakawr thlun pawh an phelh a, an sakawr chuanna tur nen an kbalh ho va. An um a, an man dawn veleh Sama chuan a lukhum a phawk a, “Tunah man tawh rawh, man rawh,” tiin a au vak vak a. Lukhum a vai a, sakawrin a hlau va, an tlan chak lehzual sauh thin a. An han man meuh chuan ni a vanlaizawl tawh a. An um lai chuan Helia chu a lo tlan vel ve thin a, tawng tha lo pui puiin a ang hlaih hlaih a. Sama chuan sakawr a rawn kai a, manthei inti fahranin, “Ka man ta le, keima man a ni,” a rawn ti a.

Heilia chuan, “Min tikhawtlai nasa tawh hle a ni. Kan chhuak nghal mai tur a ni," a ti a. Sama chuan, ''Min tihhlum i tum em ni le? Kan sakawr umna lamah kan hah zo tawh a, chawfak a hun tawh nghe nghe si. Chaw ei lovin engtin nge kan kal theih ang. Sakawr pawh an hah lutuk alawm?” a ti a. An pi chuan an rilru a hriat pui a. Heilia hnenah chuan, “A ni tak e, chhun chaw ei a hun tawh a, ei leh rih rawh u khai. Rang takin ka lo siamtir ang e,” a ti a, an ei leh ta rih a. Chhunchaw ei khamah an chhuak ta a. Kawng peng a Io awm a, kawng dik lo zawk chu Sama’n a sawi hnawmpui a, thui tak an han bo leh riha. Heilia’n Elizii te man a beiseina khua an han thlen meuh chuan ni a tla lek lek tavh a.


Pu Tawma in atanga Elizii chhuak ta kha a khua a harin a lungngai em em a. A naupan tet atanga a lo seilenna hmun chu a thlahel hle a. A pi leh a puin an titha bawk a, nuam a ti viau thin a. Zan thla enga a han en chuan a lurg a leng em em a, a pi leh pu leh a thiante zawng zawng a tlanbosan dawn a ni si a, a mittui a tla zawih zawih a. A fapa a lainat em avangin tlan bo lo thei lah niin a inhre si lo va.

An chhuah tirh chuan Haria chuan a hlau hle a, a ngawi reng a. A mut a lo cbhuak ta a, “Ka nu, men reng a tul em ?” a ti a. A nu chuan, “Tul lo ve, Bawihte, i mut a chhuah chuan muhil rawh,” a ti a. Hari-a chuan, “Muhil mah ila, misual chu min mantir suh ang che aw,” a ti a. A nu chuan, “Mantir kawng lo ve,” a ti a, Haria chu a nu hnungah a bei a, a muhil ta a.

Elizii chu chawl lovin zankhuain a kal a, an khua atang chuan a kal thui hle tawh a. Chhunah pawh chawl lovin a kal zel a, kawng lakah Hari-a ei tur leiin a ding hlek a, a theih anga chakin a kal zel a. Ni tlak dawnin Ohio lui kam khaw pakhat an va thleng a. ‘Lui ral lehlam saw thleng thei phawt ila chuan kan him tur,’ a ti rilru a. In pakhatah a va kal a, nu pakhat hian rawng a lo bawl a. “Hemi luiah hian lawng kal vel a awm em aw?” a ti a. Nu chuan, “Awm lo vang. Luiah hian vur tlang lian pui pui a leng nuk ta mai a, ‘Lawng kal ngam a ni ta lo,’ an ti asin,” a ti a. Elizii chu a lungngai ta em em a, a hmelah a lang ohhuak a, nu chuan a khawngaih ta hle a. “Damlo te in awm em ni, tuna lui kai duh ta che u chu,” a ti a. Elizii chuan, “Hei, ka fapa hi mi’n mi laksak an tum a, tlanbopui ka duh a ni,” a ti a. Hari-a chuan puak a ning tawh khawp a, a tap ta a. Nu chuan, “Pindanah hian luhpui la, va mut rawh khai,” a ti a, pindan a hawnsak a. Haria chu khum-ah a mu a, a muhil zel a. Eiizii mangang chu tukverh ah a dak a, lui lam a thilr a, “Engtin nge ral lehlam ka thlen theih ang aw,” tiin a inngaihtuah a.

Chutiang a ngaihtuah lai chuan mi authawm a hria a. A han hawi a, Sama a hmu a. A hnung lawk ah Heilia leh Andia an lo kal bawk a. Elizii chu a mang a ang em em mai a, a awmna oindan lui lampangah chuan kawngkhar a awm a. A nau muttui lai chu a pawm lawk a, lui lam ah chuan a tlanpui ta a. Heilia chuan a lo hmu hlauh va, a sakawr atangin a chhuk a, Sama leh Andia a au vak vak a, a um ta a. Elizii chu a tlan zel a, mangan theihtawpa tlan a ni bawk a, a chak kher mai. Heilia te chuan an rawn um pha ve lek lek bawk a. Lui a zuk thleng a, reilo te oawh din ngam ni hek lo, vaukam hnaih ber vur tlang ah chuan tap chungin a zuangkai a. Vur tlang a pil dawn a, vurtlang dangah a zuangkai leh a. A han zuang kai chu a tlu thin a, rang takin a tho leh a, vur tlang dangah a zuang kai zel a. Heilia te chuan mak tiin an en reng mai a, han kal theihna awm niin an hre lo va. A pheikhawk leh mawza te chu vur hriamin a at thler zo tawh a, a chuanna vur tlang apiang chu a thi hne hnu zel a. Engmah a hre lo va, na pawh a hre chang tawh lo va. Lui ral lehlamah mi pakhat hian lo kai chhuakin a inhria a. Mi chuan, “Tu kher nge maw inih a? I va huaisen kher ve le?” a lo ti a. Elizii chuan, “Min chhan rawh, min chhan lul rawh,” a ti a, a tap ta a. A tanpuitu chuan, “Engtizia nge ni le?” a ti a. Elizii chuan, “Ka fapa hi ka pu'n a hralh a, saw ral leh lama mi saw a leitu a ni. Aw! min chhan ang che,” a ti a. A tanpuitu chuan, “Kei zawngin ka chhan thei lovang che. Sawta in var takah sawn kal la, mi ngilnei tak an ni a, an lo tanpui thei ang che,” a ti a. Elzii chuan, “Ka lawm e, ka llawm em em e,” a ti a, in var lam pan chuan a kal ta a. A tanpuitu chuan mak ti takin a en zui vawng vawng a.

Ral lehlam atangin Helia te khan an thlir reng a, Elizii kal chu a hmuh theih chhung zawng a thlir zui a, a hmuh theih loh chinah chuan Sama leh Andia chu thinur zetin a melh ram ram a. Elizii a tlanbo theih avangin Sama te pahnih chu an lawm a , an lawm lutuk chu mittui tla phungin an nui a. Heilia chuan thinur zet in, “Ka nuihtir ang che u,” a ti a, a sakawr vuaknain an lu a hawlh thiak thiak a. Sama te thian dun chu an tlan a, an sakawrah an chuang a. “Kan piin min lo ngaihtuah tawh ang. Min duhna i nei tawh lo’ng chu maw?" an ti a, a chhanna pawh nghak lovin an tlansan ta a.

In an thlen chuan mut hun a ni tawh a. An pi chuan a lo nghak reng a. An thawm a hriat veleh tukverhah a lo dak a, “Nangni in ni maw? Elizii te khawiah nge an awm?” a lo ti var a. Sama chuan, “Heilia chu a chau khawp mai a, saw lai khualbukah sawn a riak dawn a ni awm e,” a ti a. An pi chuan, “Elizii te khaw’nge an awm?” a ti leh a. Pu Selbia pawh a lo dak ve a. “Sama, hetah lo chho ula, i pi thu hriatduh chu han hrilh rawh,” a ti a. Sama chu a chho va, Elizii vurtlang chunga a zuankai a, ral lehlam a thlen tak thu a hrilh a. Mak an ti em em a, an awihlo lek lek zawk a. Sama chuan, “Mihring han tihtheih awm pawh a ni lo ; Lalpa'n a tanpui avang chauhva kal thei a ni," a ti a.

Pu Selbia nupui chu a lawm em em mai a, a a duh ang ngeiin Elizii te nufa an tlanbo hlen thei dawn niin a hria a. Pi Kkhlawii a ko va, "Sama leh Andia hi chaw tui tak lo pe ang che,” a ti a. Sama te thian dun chu an lalwm hle mai a, Elizii an man loh avang tak pawhin an lawm a

[Ngaia]

Typed : Ruata Ralte

BUNG 4

In Varah Elizii A Kal

Pindan nuam takah hian nupa an thu dun a, hlim takin an titi a. An titi lai chuan an rawngbawltu mihang pakhat a lo lut a. “Ka pi, chaw chhum inah lokal lawk the,” a ti a. Rei rial lovin ani chu a va kal thuai a, a pasal a va ko ve a.

Chaw chhum inah chuan thutthleng pahnih dawhzawm chungah hian Elizii chu an lo mut a. A ke te nasa takin a pem a, thi a chhuah nasat avangin a thidang a ni. In neitu nu leh rawngbawltu hmeichhia chuan tihharh an tum a, an bei vat vat a, In neitupa chuan ngawi rengin a lo en reng a. An rawngbawltu mipa chuan Hari-a a pawm a, a ke tihlum sak a tum a, a pheikhawk leh mawza te a phelhsak a. In neitu nu chuan, “Ka rei maw! I va khawngaihthlak tehlul em!” a ti a ti a.

Elizii chu a lo meng a,lungngai hmel hi a pu hliah hliah mai a. A tho thut a, ”Aw! ka enchim loh Hari-a an la ta maw?” a ti a. Hari-a chuan a nu aw a hriat veleh a pawmtu chu a tlansan a, a nu hnenah a tlan a, a va pawm a. A nu chuan, “An la man lo che maw, Bawihte?” a ti a. In neitunu lam chu a hawi a, tah aw in, “Ka pi, min hum ang che. Ka fapa hi laktir hauh suh ang che aw,”’ a ti a, In neitunu chuan, “Tuma’n engmah an tih lo vang che. Ka hum mawlh ang che, hlau duh laklawh suh khai,” a ti a. Elizii chuan a hmai a hup a, tah aw-in, “Pathianin malswm che rawh se,” a ti a. Hari-a chu a nu malchungah a thu a, a nu tap chu a thlem a. In neitu nu chuan, “He laia mite hi chu I thiante vek kan ni a, engmah hlauh tur a awm lo ve. Khawi atanga lokal nge I nih a, eng nge I duh min hrilh ang che,” a ti a Elizi chuan, “Lui ral lehlam atangin ka lo kal a ni,” a ti a. In neitupa chuan mak ti zetin, “Engtikah nge i lo kal?” a ti a Elizi chuan, “Zanah,” a ti a. In neitupa chuan, “Engtinnge I lo kal?” a ti a. Elizii chuan, “Vur tlangah ka lo zuaug kai a ni," a ti a.


A thu sawi ngaithlatute chuan, “Vur tlangah i lo zuang kai maw?” an ti rual thawt hlawm a. Elizii chuan, “Ni e, Pathiauin min tanpui a, ka lo kal thei a ni. Min umpha lek lek si a, tih dan dang awm hauh hek lo. Vur tlang hnai berah ka zuang kai a, a tlang dangah ka zuang kai leh zel a, he lam kam hi ka lo kai ta a ni. Kai theih pawh ka inring lo va, ka kai theih loh leh ka thi mai a ni ang chu tiin ka zuang mai a ni. Pathian tanpuina avang chauhvin ka lo kal thei a ni,” a ti a. In neitupa chuan, “Bawih I ni elo?” a ti a, Elizii chuan, “Ni e, ka pu” a ti a. “I pu in a tiduhdah che em ni?” a ti a Elizii chuan, “Tiduhdah lo,”a ti a. In neitu pa chuan,” A nih I pi in a tiduhdah che em ni?” a ti leh a. Elizii chuan, “Tiduhdah lo. Ka pu, ka pi chuan min titha khawp mai,” a ti a.In neitu pa chuan, “Anih leh engvangin nge pi leh pu tha tak I tlansan a, heng hlauhawm leh hrehawm hi tuar I huam le?” a ti a.


Elizii chuan, ''Ka fapa hi ram danga hralh tur a ni a, ka hmuh phak lohvah an hruai bo daih dawn a. Ka tel lova la tlahrang ngai hauh lo a ni a, amah maia ram hla taka a kal tur chu ka ngai ngam mawlh lo va, zanah ka rawn tlanbopui a ni. Min umtu ten min umpha lek lek a, tihngaihna ka hre tawh lo va, thih leh thih tiin vur tlang chungah ka zuang kai a, engtin nge ral lehlam ka kai pawh ka hre lo. Ka hriat hriattheih chianah chuan mi pakhatin min lo kai chhuak a ni,” a ti a.


A ngaithlatu te chuan an khawngaih em em a, an mittui a tla hial hlawm a. In neitu pa chuan, “Khawia kal nge i tum le?” a ti a. Elzii chuan, “Kanada rama kal ka tum a ni. Ka pi, Kanada ram chu a hla em?” a ti a. In neitunu chuan, “I va khawngaihthlak em ve le aw!” a ti leh ringawt a. Elizii chuan lungngai awm takin, “A la hla viau a ni maw, ka pi?” a ti a. In neitunu chuan, “Hla hle mai e. Mahse kan tanpui ang chia, i thlentheih na zia kan ngaihtuah ang che,” a ti a. Kanada ram chu Kumpinu ram a ni a, chumi ramah chuan bawih an nei lo va , bawih neih reng reng an phal lo va. Chuvang chuan Kanada rama kal a duh a ni. A pasal Zawra pawh khan Kanada rama kal a tum ve bawk a ni.

In neitute nupa chu an in lamah an kal leh ta a. A pasal chuan, “Zanin ngeia hmundanga an kal a tul a ni. Heta an awm chuan an him lo vang. Hla deuh takah sawn an himna tur a awm e. A tanpui thei tur an awm, chu mite hnenah chuan an kal nghal tur a ni," a ti ta a.


Zan laiah sakawr tawlailirin a hruai a, mi pakhat hnenah a va dah a. Ani chuan tha taka lo enkawl a tiam a, Elizii te mamawh lei nan tangka a pe a, a hawsan leh ta a.

[Ngaia]

BUNG 5

PU TAWMA’N A CHHUNGTE A THEN

Elizii te nufa an um ni tuk leh lam chu Pu Tawma la tura Heilia lo kal ni a nih avangin Pu Tawma te chhung tan chuan lungngaih ni a ni a.


Pi Khlawii chu zing takah a tho va, Pu Tawma kawr leh puante a thlep tha a, thingremah a khung diam a. An tukthuan eiho bnuhnung ber a nih rih dawn avangin ngunthluk takin chaw a chhum a, chawhmeh a siam a. A mittui a tla zawih zawih reng a, a mit chu a sen teuh mai tawh a.

Pu Tawma chuan, “Kan chaw eiho hnuhnung ber a ni mai thei ale!” a ti a. Pi Khlawii chuan engmah a sawi hlei thei lo va, a hmai a hup a, a thu a, a tap ta a. “Tuar thiam hram hramah zawng a tha e. Mahse engtin nge maw ka tuar thiam hleih ang Ie aw! I kalna tur chin leh an lo tihdan tur che hi hria ila zawng a zia a awm deuh tur. Kan pi hian, ‘Kum hnih khat hnuah ka lei leh ang che’ zawng a ti tak a, mahse I kalna tur lama kal tawh hi zawng an lo kir leh ngai lo a ni,” a ti a. Pu Tawma chuan, “Ka kalna tur ah chuan heta Pathian bawk hi a awm anga sin, Khlawii!” a ti a. Pi Khlawii chuan, "Awm phei chu a awm ta ve ang. Mahse Lalpa pawh hian thil rapthlak takte a awmtir bawk thin a nih hi maw le. Ani awm mai chuan min hnem thei chuang lo ve,” a ti a. Pu Tawma chuan, “A khawngaihna ka dawn lam hi ngaihtuah tur asin,”’ a ti a. Pi Khlawii chuan, “Karei!! Tun tum angah te hi zawng a khawngaihna ka hmu thlawt Jo ve! A dik lo alawm maw le. Hetianga thil lo awm thei ta hi dik lo zawng a awm mawlh mai maw le. Leibat aia laktheih mai maia in awm lohna tur hi kan pu’n lo ngaihtuah awm a ni a, Tunah erawh hi chuan a hralh lo thei lo che u a ni thei e. Engemaw diklohna zawng a awm a ni. I nupui fanau ngaihsak hmanlo khawpin a chungah I rinawm si a, ka ngaithiam mawlh lo ve,” a ti a. Pu Tawma chuan, “Khlawii, kan inbiak hnuhnung ber pawh a ni maithei si a, min hmangaih zawngin chutiang lam zawng sawi teh suh aw,”a ti a Pi Khlawii chuan, “Engpawh nise, dik lo zawng a awm alawm mawle. Khawilai takah nge a dik loh phei chu ka hre lo va, diklo zawng a awm ngei a ni,” a ti tan tan a.

Pu Tawma leh Pi Khlawii chuan chaw an ei hlei thei lo va, an fate erawh chuan engmah hre ve hek lo, puar takin an ei a.

Chaw te an eikham hnu chuan Pu Selbia nupui a lo kal a, Pi Khlawii chuan a hmuh pawh a hmu tha duh mang lo va. Pu Tawma an hralh avangin a thin rim hmel pawh chu hmu awmin a lang lo va. Tawma chu a rawn pan a, “Tawma,” a ti chauh va, engmah sawi hleithei lovin lungchhe zetin a tap ta a. “Ka pi, tap the suh a,” tiin thlem a han tum a, a tap ve ta a, an pathum chuan an tap tlang ta a. A hnu deuh ah chuan Pu Selbia nupui chuan, “Tawma, tunah engmah ka ti thei lo va, ka theih arangin pawisa ka han khawl anga, ka khawl ngah hunah ka rawn lei leh ngei ngei ang.che,” a ti ta a.


Chutihlai tak chuan Heilia chu a lo thleng a. Pu Tawma chuan a nupui leh a fate chu chibai a buk a, Heilia tawlailirah a chuang ta a. A chuan veleh Heilia chuan khaidiat a phawrh a, Tawma chu a kerek khing hnihah a han hling a. Pu Selbia nupui chuan, “Khatia tih a ngai lo ve. Pu Tawma zavvng a tlanbo lovang" a lo ti a. Heilia chuan, “Ka pi, kan hre chauh hleinem, mi pakhat ka hloh tawh reng a ni. Tlanbo theiin ka awmtir ngam tawh hleinem,” a ti a. Pu Tawma chuan, “Zawra kha chibai min han buk sak ang che u. ‘A awm loh hlana ka kal bo dawn avangin pawi ka ti ngawt mai,’ a ti e, han ti ang che u,” a ti a. Zawra chu Pu Selbia fapa a ni a. Pu Tawma hi a duh hle mai a, lehkha ziakte a zirtir thin a, an inah a kal fo va, thingpuite an in thin a. A awm loh lai tak a ni a, Pu Tawma an hralh tih pawh a hre lo va.

Heilia chuan a tawlailir chu a khalh a, an kal ta a. Pu Tawma chuan a lantheih chhung chu an in lam chu a thlir vawng vawng a.

Heilia chuan tawlailir chu chak takin a khalh a, mel khat lai an kal hnuin a tiding a. Khaidiat siamtha turin thirdeng inah a kal a. Chutia a awm lai chuan Pu Selbia fapa Zawra kha a lo kal a, Tawma chu a rawn pan a, a tap a. ''Puitling ni ve tawh ila chu hetiangin an ti tawp lovang che, a pawi em mai a” a ti a. Tawma chuan, “Kan lnhmu hlauh chu a va tihzia em ve le! I hmel hmu lovin ka kal dawn emaw ka ti a, tunah chuan ka rilru a dam sawt mai,” a lo ti a. A han che deuh va, a kea khaidiat kawl a bun chu Zawra’n a hmu a. “Ava tihzia loh em! He mihringpa hi tihsawkah a nia ka hmuh ni,” a ti a. Tawma chuan, “Tisawk lo ve. A thin kan tihrimin ka tan a thalo ve,” a ti a. Zawra chuan, “I tan a that dawnloh vang chauhvin ka ti lo vang. An hralh che hi min hrilh ve hauh lo va, mi dangin min hrilh lo se la chu ka hre dawn hleinem. Ka hawn hunah ka hau nek hlawm ang maw le!”a ti a. Pu Tawma chuan, “Hau lo ve, an hau ngai lo ve,” a ti a.

Zawra chuan, '’Pu Tawm, en the. Ka tangka ka rawn ken che asin,” a ti a. Tawma chuan, “Zawra, ka la thei lo vang,” a ti a. Zawra chuan, “Pi Khlawii hnenah pawh ka pe dawn che tih ka hrilh tawh a ni. ‘Verh la, lain thil la, a tha ang e,’ a ti a. Ka verh a, ka rawn thil nghe nghe asin. I kawr hnuaiah awrh ang che. Chuti lo chu he misualpa hian a laksak ang che. He mi i en chang apiangin ka la rawn lam leh dawn che tih hria ang che. Pi Khlawii pawh ka hrilh a, ‘Hlau suh la, beidawng suh. Pu Tawma ka la zawng chhuak leh ang,' ka ti a ni. Ka pa'n a ngaihtuah loh chuan ka tur buai hle ang,” a ti a. “Zawra, mahni pate chutiangin an ti ngai lo ve. Naupang tha tak ni ang che. Mi tam takte rin pui tur i ni a, i nu mawlh mai hi bel bul ang che. Naupang sual tih danin i nu zah loh ching suh ang che. Lalpa hian thil tha tam tak hi tum hnih tum thurn hi min pe thin a, nu te erawh chu tumkhat mai chauh min pe a ni. Kum za pawh dam la, I nu ang hi i hmu tawh lovang. I nu hi hmangaih la, thlamuan la, kawng tinrengah tilawm ang che,” a ti a. Zawra chuan, “Pu Tawm, mi hrilh ang chuan awm ka tum a ni,” a ti a.

Pu Tawma chuan, Tawng danah te pawh hian fimkhur a tul a ni. Naupang thenkhat hi an nu leh pa pawisa lo tak leh zah lo takin an tawng thin. Mi tha chuan nu leh pate zah lohna lam thu reng reng an sawi ngai lo. Mi tha tak i nih ka beisei a ni. Ka thusawi hi I ngaithiam alawm maw, Zawra?” a ti a. Zawra chuan, “Ngaithiam e, Pu Tawm. Thu tha tak min hrilh thin alawm,” a ti a. Tawma chuan, "Engkim I nei a, engkim i hria a, lehkhate pawh i thiam a, lehkha thiam mi tak i la ni ang. I nu leh pa leh i awmna a mite zawng zawngin an la chhuang ang che. I pa anga hotu tha ni la, i nu anga Kristian tha ni ang che,’’ a ti a. Zawra chuan, “Mi tha tak nih ka tum ang, Pu Tawm. Lo beidawng hauh suh. Ka la rawn lam leh ngei ngei ang che. I in tur tha tak kan sa ang a, nuam takin in la awm leh ang," a ti a.

Chutih lai tak chuan Heilia a lo kal a, Zawra chuan, “Pu Tawma i tih dan hi ka nu leh ka pa ka hrilh ngei ngei ang maw le," a ti a. Heilia chuan, "Hrilh teh ta lul che,” a ti a. Zawra chuan, “Mihringte leia ran anga thlun zel mai chu zah pawh i zak lawm ni? I inhmusit sawt lawm ni?” a ti a. Heilia chuan, “Nangni mi thahovina in lei ve duh chhung chu in aia ka sualna bik ka hre lo ve,” a ti a. Zawra chuan, “Ka puitlin hun chuan ka lei hek lovang a, ka hralh hek lo vang. Vawiin atang hian a mawi lohna ka hrechiang a ni. Pu Tawm, dam takin aw. Lo lungngai hauh suh ang che,” a ti a. Pu Tawma chuan, “Dam takin Zawra, Pathianin mal a sawm ang che, ’’ a ti a, a thlirzui vawng vawng a. A tangka awrhtir kha a khawih reng a. Zawra chu mi tha tak a la ni ang tih a beisei avangin a rilru a nuam hle a.

Nilengin an kal a, tlaiah Washington khua an thleng a. Seilia chu khualbuk nuam takah a thleng a. Tawma erawh chu lunginah a dah a. Thil a tihsual vang ni lovin mihang a ni a, bawih anih avang chauhvin lunginah a dah a ni.

[Ngaia]

Typed : Ruata Ralte

BUNG 6

PU TAWMA LEH IVI

Seilia chu Washington khuaah a cham deuh reng a. Ni tin dawr puiah a kal a, bawih a lei belh zel a. An kut leh ke-ah kawl a buntir zel a, Tawma awmna lung lnah a dah zel a. A lei ngah hnuin a hruaikhawm a, an lawng chuan na turah chuan ranrual ang maiin a khalh lut a.

An chuanna lawng chu lawng tha tak a ni a. A chung sang lamah chuan mi thaho an awm a, a hnuaiah chuan bawihte leh bungruate an awm a. Lawnga mi tha thenkhatte chuan an bawihho chu an khawngaih hle a , thenkhat erawh chuan an ngaihtuah lo reng reng a. “Bawih an ni a, hrehawm tuar tur reng an ni alawm” ti maite pawh an awm a.

Chung mi tha zingah chuan hmeichhe naupang duhawm tak, kum ruk mi vel hi a awm ve a. Hlim takin hmun tinah a kal a. Amah chuan puan var hlir a inbel a. A kal vel chu vantirhkoh ang awm hlein Pu Tawma chuan a hria a. Bawihho awm naah pawh chuan a kal thin a. Chungho zing a kal chuan ngui takin, lungngai avm takin a kal thin a. An kawlbun te chu a en vawng vawng a, a changing chithlumte a sem thin a.

Tawma chuan kawmngeih a tum a, a kawr ipte ah a pu fate a lawmna tur eng ilo a lo ak teuh mai a, chung chu a lo hmuh thin a. Naupang zakzum deuh tak a ni na a, reilo te ah an inkawmngeih ta mai a. Tawma chuan„ “Tunge i hming,” a ti a, ani chuan, “Ka hming chu Evangeline St Kler a ni a; ka pa te leh mi thenkhat chuan IVI min ti mai a ni. Nang tunge I hming?” a ti a. Tawma chuan, “Ka hming chu Tawma a ni a, ka awmna hluia naupangte chuan, ‘Pu Tawma' min ti thin,” a ti a. Ivi chuan, ‘'Kei pawhin Pu Tawma ka ti ang che. Ka duh viau che a nia. Pu Tawm, khaw’nge I kal dawn le?” a ti a. Pu Tawma chuan, “Ka hre lo,” a ti a. Ivi chuan, ‘'Ka hre lo a?” a ti a. Pu Tawma chuan, “Hre lo. Min hralh dawn chu a ni phawt mai a, tu hnenah nge min hralh dawn ka hre hauhlo mai!” a ti a. Ivi chuan, “Ka pa’n a lei thei ang che. A lei che chuan nuam i ti hle ang. Vawiin ngeia lei tur chein ka ngen ang” a ti a. Tawma chuan, “Ka lawm e, ka pite,” a ti a.

Chutih lai tak chuan thingtuah la turin lavng chu a ding ta a. Ivi chuan apa aw a hria a, a pa hnen lamah chuan a tlan ta a. Tawma pawh chu lawng hmawr lamah a kal a. Tawma chu tlanbo tum mi awmin Heilia chuan hmu ta lo va, a kawl bun pawh a hiihsak tawh a. Tawma chu a chak si a, lawng mite chu thing a put pui a, lawng mite chu an lawm hle nghe nghe a.

Ivi leh a pa chu lawng sir hungna bulah an ding a. Lawng chu a kal leh chauh va, engemaw tiin Ivi chu tuiah a tla ta a. Tawma chu lawng pindan hnuaihnung, lvi te awmna zawn takah chuan a lo ding a. A lo tla a hmuh veleh chuan tuiah a zuang thla ve thuai a. A chhar a, lawng lamah a rawn hleuhpui a. Lawng mite chu an phi ruai hlawm a. Ivi chu tanpui chu an tum theuh va. Tawma chu tukhaw ngaihsak leh hriat lohvin ama hmunah a kal ta a. Pu St Klera erawh chuan a theihnghilh hauh lo va. A tuk leh lamah chuan Heilia a bia a, an inbe lai chu Tawma chuan ral atangin a lo en reng a. Ivi pa chu mitha tak a ni a. A fanu nen an inang hle a. Mi nui duh tak, fiamthu duh tak a ni a, Tawma chu lei a tum tlat a, mahse Heilia chu a nep fiam a. Invi chuan, “Ka pa, engzat pawh chhiar se la, lei mai rawh. Tangka lah I nei si a, Tavma hi ka duh a ni, lei mai rawh," a ti a. A pa chuan, “Enga hmanah nge maw i duh le, sakawr lem atan em ni?" a ti a. Ivi chuan,”Hlim taka siam atan ka duh a ni,” a ti a. A pa chu a nui a. Heilia chu a’n fiam leh te te a, a lei ta a.

Tawma chuan hotu thar a nei ta a ni. Tawma awmna lamah chuan a lokal a, “Tawma, i hotu thar hi min duh awm emaw, min han en teh khai,” a ti a. Tawma chuan a han en a. A hmel a tha a, mi hlim thei tak a nih avangin Tawma chu a lawm hle a, “Pathianin malsawm che rawh se, ka pu,” a ti a, a lawm lutuk chu a mittui a tla zawih zawih a. A pu thar chuan, “Tawma, sakawr tawlailir i khalh thiam em?” a ti a, Tawma chuan, “Sakawr tawlailir khalh chu ka hna ber a ni thin asin,” a lo ti a. A pu thar chuan, ''Chuti chu sakawr tawlailir khalhtuah ka hmang ang che. Amaherawchu zu i rui tur a ni lo,” a ti a. Tawma rilru chu a na deuh hle a, “Zu ka in ngai lo, ka pu," a ti a. A pu chuan a ngaih thutak zia a hmuh chuan, “A tha e, tha taka awm i tum ka ring e,” a ti a. Tawma chuan, “Ka tum asin, ka pu,” a ti a. Ivi chuan, “Nuam I ti hle ta ve ang. Ka pa zawng a nui mai mai thin na a, mitin chungah hian a tha a nia,” a ti a. Pu St. Klera chuan kal pahin, “I chungah I pa a lawm e,” a ti a.