SAZUK PASALTHA Ziaktu - Simon da Gunner (Completed)

Episode nei ho a hlawm a dahkhawmna
Ngaia
Site Admin
Posts: 25813
Joined: April 30th, 2016, 4:07 pm

Re: SAZUK PASALTHA Ziaktu - Simon da Gunner 1 -12

Unread post by Ngaia » May 31st, 2020, 4:25 pm

Sazuk Pasaltha
Bung 7-na
Ziaktu - Simon Da Gunner
.
.
Chutia Sihal lian takin a rawn hnaih ruak ruak lai chuan, Nghalrualho lah an inhrosa kuk kuk tawh si avang chuan a tan pawh han awm mai maiaa chi a ni tawh bik lo.
A duh ber leh a thah tum ber chu sihal chu ni mah se, khawngaihna leh lainatna hlirin kma khat zawk chu a ni si a, mak pawh a inti zawk ngei mai."Pasalthate u, paruk leh pakhat chu a va nep thlak ve maw le. Pasaltha ti a chhal tlak pawh va ni hrep suh che u a," tih pahin Pabuanga chung atang chuan a tum thla chhak a, a thal chu a hum ran bawk a. Sihal chuan lo en pah chuan, a bulhnaihah chuan a lo ding nghal vat bawk a.
Mak a ti angreng zawk hle mai. Chutia sihal nena an han ding tlang chu sanghalho pawh chuan, rawn phin an tum nghal mai bawk a. Mahse an zinga lian fal nalh mai, dum run mai chu a lo rum chhur chhur a, rawn beih tumtute pawh chuan an thil tum chu thulhin, an khup nghal zul zul mai. Chu Sanghal lian zet mai dum run mai chu an hruaitu a ni ve chek ang chu, mak tak maiin hnunglamah an tawlh let ta daih mai a, rei lo teah an lo chhuahna lamah chuan an pilbo ta diak mai a. Chutia Sanghal ber an awm tawh tak loh ah chuan hniara leh sihal chiah chu an ni ta, sihal lama hawi pah chuan, a thal chu a lek kang nghal zawk a. Mahse thalfang erawh a thlah thei mai bik lo.
Chu Sihal chu engti tiin emaw a lainat riau mai, an ni sihal ho hlaua ramhnuai pilril tak a mahni chauha a vah lai kha a theihnghilh thei mawlh lo a ni.
Tunah pawh Sihal hian a sa himna a zawng ve tawk tawk a, Sanghal ho hlau khan a lo tlanchhia chu a ni si a. a hmelma ni mah se a ti na thei tlat lo. Sihal mit meng pawl deuh riai maiah chuan hlauhna a lang lo. Lungngaihna leh beidawnna, natna thuk tak a lang zawkin a hria."

Kal rawh, tunah kal nghal rawh. ka tawng hi i hrethiam a nih ngai chuan i chi puite hnenah hei hi va thlen ang che. Nangni ho that chi mit turin Sazuk Pasaltha ka lo let e, tih hi. Ka hmu leh che a nih chuan i tawpna tur a ni ngei ang. Kal nghal rawh," vin zet chuan ahan ti tuarh tuarh a. a tawng chu a hrethiam a ni ve mahna, a chik deuh nghur nghur a, a inher a ram lam pan chuan a tlan ta nal nal a, mual pawng a liam dawn chuan meng khup deuh lap chunga rawn lehhawi hramin chak takin a tlan liam ta nghal a.
A va mak ngai em, Sihal lian zet zet chu a lo hmu tawh thin a, mak a ti em em lo. Sihal tluk zet a lian, pakhat phei chu sihal ai a lian mah Sanghal an awm leh tlat mai te kha thil mak a tling a ni. Chumai ni lo in engvangin nge an mi um lai lo humtu kha anrawn beih miah loh, amah leh amah chu zawhna a inzawt mawlh mawlh a. Parvuli'n,"thil thleng thei pawh a i rin loh mak tak tak i la hmachhawn dawn." A tih te kha a hrechhuak thar uarh uarh a.
Ni e, a mak em bawk a ni. Khua a tlai lam deuh tawh a, hawn mai a tum deuh a, mahse Sanghal ho chu chhui zui a chak tlat mai. a pa khan that lo tur leh ti na ngai lo tur khan hrilh uluk hle mai a, chu bakah Sanghal sa hi vawikhatmah an la ei ngai lo bawk a. an khaw hmasa a, a nu leh pa tak tak te nena an chenna lam ah kha chuan an ei fo kha a ni si a.
Thil eng emaw tak chu zep ruk leh thuruk a awm a ni. Engpawh chu lo ni se, ka chhuichuak khawp ang ti rilru neuh neuh chungin Pabuanga nen chuan Sanghal ho liamna lam ah chuan an kal ve ta nghal a.
Ramhnuai ah mahni a khawsa thang tih takah, an hnu chhui chu a tan chuan a har lem lo khawp mai. Mahse an len ai mah in, an hnu chu chhui a har phian mai. Khatiang khawp a sanghal lian kha chu an vawikhat kal na pawh pe-vek-vuk awm asin maw le.
.
.
Thui fe an chhui hnu pawh chuan Sanghal chu in lam panin an kal zel mai a, a ngaih a tha lo tulh tulh mai. Mahse nikum chul mau mual lamah an peng ta vek a, a ngaih chu tha chiah lo mahse, tlem chuan a thawveng deuh hawk tho mai, khua a thim tep tawh avang chuan Sanghal hnu pawh chu a tuk lama chhui zawm leh tum rilru chungin a haw san ta rih a.
In a thlen chuan a pa leh a upa ho pawh chuan eng emaw sawi khawm an nei tih hriat takin an lo thu thap mai a, hniara lut an lo hmuh vel leh chuan, an mit meng chu thup viau mah se a danglam tih a hmuh hmaih hauh lo.
Mahse ngaihsak zui duh lem lo in, a intifai sawk sawk a, pawn bathlarah chuan a thu chhuak ta daih a.
Thla chu la bial chiah lo mah se a eng tha ut ut tawh khawp mai. Engtin emaw ni tak hian a fan raih mai, lunglen na rawn chawk tho-in, ngaihbik awm hauh si lo chuan a lung a leng ve em em ringawt mai bawk a!

A ngaihtuahnaah chuan Sihal var kha a lo lang vang vang a, a mit pawl raih mai te kha, a mitthlaah a la cham reng mai. Chutia ngaihtuah na a kawm melh melh lai chuan, a nau-in s lo biakna avang chuan suangtuahna ram atang chuan a harh zawk a, chaw ei an peih tawh thu a lo hrilh chu ni in. Khawnbawl upa ho pawh chu an lo chhuak sap sap a, an lo be vei luam hlawm bawk a. Zanriah puar elh euha a ei hnu chuan, a thian thar Kunga te in lam pan chuan a chhuak nghal daih a.
Kunga pawh lo awmin, leihkapui-ah chuan an thu chhuaka, eng eng emaw te sawiin an nui leh hak thin a, thian han kawm chu a lo nuam phian mai. Ngaihtuahna pawh an kawm hman lo deuh a, rilru pawh a hahdam angreng viau mai. Chutia Kunga nen chauha an thut lai chuan Thanchhinga chu a lo lang ve hlawl mai a."Nangni pahnih chu chhawrhthlapui eng hnuaiah biahthu in lo inhlan a ni maw, a va ril ngaih ngaih em!" Ti pah chuan a lo ri hlut a. Thian inchhar thar chauh mah ni sela, an inpawh tlang nghal em em hlawm a mah se duh ai chuan Thanchhinga fiamthu hi chu a na mah mah thin a ni.
Nula khartung sawn tur hre lo nanana chu leng len ar khuan hma chuan Zawlbuk lam an pan ta ringawt a, Zawlbukah chuan Val upa leh Pavalai deuhho chu an lo thu bial laih a, an sir ah chuan an mahni ang tho a len na tur hre lo leh leng ngam lo te pawh an ni ta ve ang, an lo thu thap mai a. Valupa Hranga ti ti ko tlangah an lo dak thap mai chu niin.
.
.
Val upa Hranga chuan heti hian a sawi ta a lawm." Vawikhat chu ka awmna khaw hmasa Lungpheng khuaah khan ka thian tha tak mai Zika nen ram en tumin kan chhuak a, Chumi kuma kan ram theh chu mau hmun ramchang a ni a, ram chang tih tak a'h a dur khup mai a. Ram han chuan vel tumin thingdawl lian zet mai kungah kan lawn a. Ka thianpa Zika chu a lawn hmasa thurh mai a, a hnungah chuan muangchangin ka lawn ve mai bawk a. Chutia thingdawl lian zet mai kan hlam chhoh tui tui lai chuan vawilehkhatah Zika pui chu a au thut a lee..!!
A hlau lutuk leh hmanhmawh bawk si khan,"Hrang-sawm-ban. Hrang- sawm-ban,"(a sawitu Val upa Hranga chu a nui huau mai lehnghal a) tih leh rang lutuk a rawn pit thlak a rual ta mai." A vaibel chu khawng ri karh karhin, vaihlo an beng leh te te a, chutah muangchangin thingthu vam tha hem hawm chu la-in, a ling chu a vaibel-ah chuan a han khawng thla kauh kauh a, a sawizawm leh hun nghakin amah chu an lo en thap mai a. Thanchhinga pawh hniara bulah chuan chilthli tla lo chauhin a lo thu ang phua mai a. Val upa chuan rawn sawi sawm lehin," Engtik laiin nge a hnuai zawka lawn kha min rawn chhuk khalh hman pawh ka hre lo, amah lah chu a tlan nghal nal nal mai bawk si. "Hrang-sawm-ban" tih ringawt te chu hrethiam hek lo i, kan lawnna thingdawl ler lam ri deuh hrawk ka hriat vang chuan ka'n hawi chho a le'h.. ani,,,, kan lawnna thingdawl chu a lo kawrawng chu ni in, Savawm lian lutuk tak mai a kawrawng atang chuan a lo chhuak tuih tuih mai le, Zikhnapa au vak kha a hria a ni chek ang chu. Kei pawh chu min lo hmu nghal vat a, rang takin ka pit thla ve nghal puat a. Hmanhmawh baklengin ka thianpa chu ka um a, a ni lah chuan, "min lo um suhhh." A la ti ta deuh deuh a. Savawm pawh chuan min um nghal a ni ngei ang ka mawng a rawn kawm zauh zauhin ka hria, vawi leh khatah ka ke a rawn phet thut mai a (a kut leh ban vel ser nuau mai chu a chul pah hliau hliau a) min bawh ta run mai. Ka hmai ber chu vengin, ka kut chuan ka indang tawk tawk a. " Zika min chhan rawhhh," ka tih lah chuan chhan chu a hnai lo e."Vawm lakah huai reng reng, vawm lakah huai reng reng." A ti a, a la tlan ang tuang tuang a. Mahse ka vanaeih asiamin Silai a rawn puak dur a, Pasaltha Thangnghilhlova chu rawn lang nghalin Savawm pawh chu a let tawp mai bawk a. A beka silai mu lut chu a tuar bik ta lo a ni.
Kha mi tuma ka thih teuh dan kha aw. Tlangval te pawn in hriat tur chu khawi hmun leh eng hunah pawh nise , thian te chu inthlahthlam ngai a ni lo, dam pawn tlang khatah, thih pawn ruam khatah ti a thian chhan thih ngam nun kha nun pui zel in tum dawn nia." Tiin a thusawi chu a rawn tlip ta a, tlangval lengi run kai mitmei hmu tha vak lo ho chuan a thu sawi tawp lam chu an lo ngaithla ve hman a. A dang sawitir leh an han tum viau na-in, zanrei lam te a lo ni tawh bawk nen mut zai kan rel ta hlawm a.
.
.
A tuk zing tukthuan ei khamah chuan nimin lama a Sanghal chhui lai kha chhuizawm a rilruk deuh avang chuan tuk thuan ei hma tiin thirdengpa hnenah thil eng emaw chher tir tumin a kal a,"Eng nge ni ngai. Chutiang chher mi pawh a ni dawn em mawni le. Mahse Lal fapa meuhin min rawn pan miau si-ah chuan kan han tum chhin poh a ni ang chu, hun erawh a duh deuh maithei a nia." Thirdeng Pu Liantawna chuan a lo ti chuar chuar a. Helai khaw chhehvelah nanana zawng Pu Tawna baka thirdeng thiam an awm a hre lo. Khaw dang dang atang pawha an lo pan vang vang thin kha a ni ve ngat alawm. " A va lawmawm dawn ve aw, a nih chuan naktip lam hian ka lo kal leh mai a ni ang chu, thil dang pawh chhertir che ka la duh a nia." a lo tih zawm ve zat a." E khai a,. Kan Lal fapa pui roh hi eng eng emaw hi i hre riau dawn mai a. Thil mak sak pui pui hi min chhertir ta fo mai a. Eng nge maw min chhertir i la tum le." Pu Tawna chuan a lo ti ve bawk a." Aa.. nidangah le, khaw nge tuk thuan ei a hun mai dawn, ka tinsan ang che." Tih leh thawh a rual a. Tuk thuan ei kham chuan Sihdarh lamah bawk kal tum chuan a insiam leh mawlh mawlh a, a thalfang suih khawl sa, rap pui chung sanga a rep ung khurh mai chu la thla-in, Thirdeng Pu Tawna a chhertir tawng chen vel, a hmawr lehlam ve ve a thirzai kual, a lai-ah hlai deuh hlapa Saza vun kaih mar at mai-ah chuan akhung mawlh mawlh a." Taite ram chhuah i tum leh em ni, khawi lamah nge i chhuah dawn." Tih pahin a pa chuan a thalfang ho chu a lo thlek deuh that that. hniara chhan hma chuan," i thal-fang hmawrah hian eng ngho emaw tih beh dan awm se a va tha ve mawle, a kah pawh a na deuh zawk ngei ang." A lo ti leh a." Nia, ka pa, sihdarh lamah ka chhuak leh mai mai ang chu ka lo tia, nimin lama ka sakhi chan kha zan lam chhuak a nih ka ring deuh a tlai pawh ka lo tlai mai thei." ahan ti a, mahse thalfang lam erawh a sawi lang lem lo a, pu Tawna hnenah chher turin a hrilh diam tawh alawm. Thil eng emaw ngho ai chuan thir ngei chu a rit ang a, a kal pawh a dingin a dik zawk ngei ang." E, lo kap hlauh la a va tha ve mawle. Mahse tlai chhiat lutuk loh tum hram la." Ti a apa chhanna pawh chu chhang tawh lem lo in, lungdawh lam chu a pan ta nghal a.
Sihdarh a sawi rik rual a a pa mitmeng a melh zawk khan thil danglam a awm tih a hre mai.

Zep tumin thup tum teh mah se hniara hi mi bik a ni tlat, a lakah zep theih a ni lo. Nizan lamah lah khan thil eng emaw dik lo a awm ang maiin amah leh khawnbawlho en dan kha a dang tawh bawk a. Mahse hmangaih taka lo enkawl seiliantute hi a ringhlel ringawt thei lo. amahah hian dik lo a awm em ni chu aw, amah pawh chu a inthiam lo rum rum nghal mai. Kha chen an lo enkawl seilian in, an fapa ang tak taka enkawltute an ni miau si. Chutia rilru kawm melh melh paha a kal lai chuan lungdawh a lo thleng reng tawh mai.
.
.
Thil eng eng emaw a lo ngaihtuah ta langah khawnbawl upa fanu Chawngchhingi lo biakna pawh chu a lo hre lo a, Nui deuh ar ar pah chuan,"biak pawh hre chang lo khawp a Lal fapa meuh han siamtu ngaihtuahna chu eng thil nge ni ang aw." A lo ti a. Chawngi te hi hniara te aia rual u deuh niin, an khaw nula-ah chuan hmeltha ti a an sawi thin kha a ni ve ngat a, Chutia nula hmeltha tak maiin a a han ti chu a zak angreng hle mai. a lai khawlo zo leh tep a ni e." Kha khawi lamah nge." Chawngi thiannu Thuamthangi chuan a lo ti hlauh zawk a. Ni lo se chuan tawng ngaihna hre lo in Vala hi a zam chhe ngei ang le."
A.. Sihdarh lamah sakhi ka chang mai mai teh ang ka tia, nangni khawiah nge kal in tum a." a lo ti let vat a. Chul lama thlai rah eng-i-lo vel lak mai mai tum an nih thu an sawi chuan an kalho ta nghal a. Kawngah chuan sawi tur a vang duh angreng khawp mai. Mahse nula fing leh fel nanana chuan an be zung zung a, a zia ve viau e. Mau mual peng an thlen chuan an inthen ta hlawm a Chawngi chuan," Sakhi chal lian deuh lo kap rawh aw, zan lam te pawh lo leng ve ula." Awmze nei deuh tak chuan a lo ti a. hniara pawn a rul tawka chhangin, hmanhmawh angreng takin Sihdarh ngaw pui lam chu a pan ta nghal nal nal a,

A nihna takah chuan Chawngi pawh hi hmeltha ti lo a ni bik lo, mahse hmeichhia hi a ngaihtuahin a buaipui lo ve em mai bawk a, hmeltha tih vang ringawtin a vei thei hek lo. Parvuli'n a kalsan takna hmunah khan Pabuanga chu a lo bawk leh ran tawh mai a. Lui te tui te chu in-in a han insildai leh te te a, rei lo te chawl zawkin, Sanghal hnu an chhui tawpna lam chu an pan ta nghal a.

An hma mual hnihna velah chuan mu vanlai hian sang lutuk lo ah thlifim dawngin a lo dir ngar ngar mai a, a changin a hnuaia thing ro lian tak mai dingah chuan a fu leh chut thin a, A thla leh a mei hmul vel chu thalfang hmawr a dahah a that a ring tlat mai. Pabuanga chu chak taka tlan tir nghalin, rei lo te ah muvanlai awmna mual chu an thleng a, Pabuanga chung atang chuan chhukin muvanlai thing zar ro a fu vun mai chu a pel phei ta a, a hnuai zawn a thlen chuan Parvuli a pek zawk, a Thal thar ngei mai chuan uluk tak a tin in thal-fang chu a thlawh chhuah tir fua a. A fuh chiang ngang mai, a awm a thalfang bur vu chung chuan muvanlai chu a lo bir thla nghal nawk nawk a, rang takin a tlakna laiah chuan a tlan nghal vat a mahse hmanhmawh a lo ngai tawh reng reng lo. Ip te puiah ak-in Pabuanga nen chuan an hnu chhui chu an tan leh ta a.
.
.
Chul hmun an thleng tep tawh a, mual hnih vel chiah a awm tawh tihah chuan mak tak mai in Sanghal hnu chu an bo ta daih mai, an han let deuh a, an han chhui tha leh thin. A tawpna ngaiah bawk an tawp leh a, hmun dangah han penna hnu-hma hmuh tur a awm bawk si lo. A ngaihna hre lo tak chuan a hawi a hawi ringawt mai a. Ngaw hnuaiah mah ni se, ni a sat em avang chuan a lum hle mai a. an kal thui ve tawh deuh bawk nen, an tui a hal huam huam tawh mai a. a hnu chhui lah chu chhui zui ngaihna reng reng a hre tawh si lo. Beidawng angreng tak chuan "mihring hnu hma pawh a thar viau hi, vau hrul velah tui in tur a awm mahna" ti rilru deuh chungin Chul lam chu a pan phei ta ringawt a, Pabuanga pawn a hnungah lo zui ve zel in. Chutia a ngaihna hre lo leh beidawng angreng taka a kal lai chuan, thil eng emaw hriat chhuah thut a nei tlat, a ding nghal chawt a. a hnung lam atang chuan an vua nge nam nawk zawk nge pawh a hre lo, a inring lo lutuk bawk si leh rin lohna lam a nih bawk si avang chuan hma lamah chuan a bawk phei rawp a.



Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » May 31st, 2020, 4:26 pm

SAZUK PASALTHA

Bung 8
By. Simon Da gunner

Hniara chu a inring hman bawk si loh avang chuan a tlu chiang ngei mai. Rang lutuk in a tho leh a, tho pah in a thal chu a kuai kul nghal pawp a. a rang ngei mai. a thil hmuh chuan ati thinrim tak zet, nuihza deuh bawk si chuan" iva mawl tak e aww... min hmu lo em ni.." Tih pah chuan Pabuanga chu a chal ah a Thal chuan ka vaw ri fawk a. Khatia a kal lai a din thut a vang khan a hnung chiah a mah zui tu Pabuanga kha kal pah in a lo kun zuk chu ni in, a ding thut leh a kun kha in rual chiah in, a tum pawh ni bik miah lo in a lo su awk mai chu ni in, Pabuanga hrilh hai leh hawi tang hru mai chuan hniara nuih a ti za ngei mai, in thiam loh na chang te pawh a hre ve a ni chek ang chu a inthlahrun hmel dui lehnghal a.
In sum a har duh ngei mai, a hnu chhui lai pawh hre chang lo lek in a han nui leh rih thin. Chutia engmah ngaihtuah lem lo a Pabuanga a nuih lai chuan Nikum Chul lam a tang chuan hmeichhe thlabar au thawm a lo chhuak thut mai le. Chawngi te thian dun kha chul ah an kal a ni lawmni kha, enge thleng ta le. a hnu chhui lai lah hi Chul lam pan in a kal zel mai si a, chumai bakah thil dik lo eng emaw in phumru awm tlat in a hre bawksi.

Rang tak in Pabuanga chung ah chuan a lawn nghal zawk a, Pabuanga pawh hrilh hran a ngai lo a fing thin khawp mai. Hmeichhe au thawm an hriat na lam ah chuan an lim phei nghal puat puat a.
Nikum lam a Pu.Pachhunga te zau lam a tang a," min pui ru. Min tan pui ru." Ti a Hmeichhe thlabar au thawm lo chhuah na lam ah chuan hmanhmawh tak in an tlan phei lehnghal a, Chu au thawm lo chhuah na chu Vau kawr a tang in a ni tlat, hniara chu a thlen dawn tep ah chuan thil ngaihtuah chhuah thut a nei a, Pabuanga chu ram lam ah a kal tir leh ta a, midang in an hmuh ve a rem rih tlat lo.

Vau kawr a zuk thlen chuan a hlauh thawn ang a ni hauh lo. Chawngi te thiandun chu thingkung sang vak lo ah hian a kak ah an lo bet tai mai chu ni in, Thuami zawk chu a malpui leh a ban bul vel a lo thi nian mai a, an hnuai ah chuan Phivawk hrawl zet mai hi a lo vei kual thuak thuak mai bawk a. a nuih te lam lam a za zawk tlat, a han en thin an hlauh hmel ropui si. An hlauh lah chu Phivawk mai mai a ni bawk si. An lawn na chu hniam viau mahse Phivawk tan zawng tih ngaihna a awm thlawt bik lo a ni. Phivawk chuan no a lo hruai chu ni in, a no tih nat an tum emaw ti in a chhan ve te pawh a ni mahna. An bul ah chuan zuk chhuk in Phivawk chu han hnawh kian mai a tum a, a ni a lo kawlh nasa mai. A hnu deuh ah chuan a no te ho nen chuan an in saseng ve ta hram a.
Chawngi te chu rang zet a rawn chhuk nghal in an tap pur mai bawk a. Thlam ram tawh tak mai la ding ve teng teng ah chuan chho in an thil tawn chu a han zawt chiang a," Vau kawr ah khan in sil dai tur in kan kal a, lung nal ka rap palh a ka tawlh thlu a. Ka tluk pah in ka ke lam in Phivawk note kha ka zuk tlawh a. Hnim kar ah an lo awm sia kan hmu si lo va. A pui khan min rawn bei nghal ringawt a lawm. Mahse hei min hliam na lem lo, ka tluk na ah khan ka in sawh pilh deuh a ani mai." Thangi chuan a lo ti a. Chawngi lah nuih za in sum tih hriat tak in,"ke pali vawr suau a nula pumpa han thal huau mai kha zawng." A sawi zawm thei tawh lo a nui dir ngar ngar mai a. An hlauh zia pawh kha an hre chang tawh lo. A tlai lam deuh tawh nen Chawngi te thian dun nen an in tawng tak bawksi a vang chuan a hnuchhui pawh chu a chhui zawm duh ta lem lo a.

Haw kawngah chuan in fiam pah in kan haw a, an hlim phian mai. A ni tel hian midang zing a awm nawm zia a hre ve zel ni mai in a hria. Chutia an kal mawp mawp lai chuan Thanchhinga Silai pu vu chung a lo kal nen an in tawk thut mai. Hlauh ang ngei in arawn fiam leh zek a, tawngkam te hi a thiam rauh phian lehnghal a," Kha Chhingkhual khawi lam ah nge i khual leh dawn a." A tawng tam lutuk hma chuan a lo ti vat a. Sakhi chan a tum thu sawi in kal ve tur in an sawm ve nghal a. Peih lem lo viau mah ila Chawngi te a zui haw chuan a kap na leh dawn si, Chawngi te han kal san lah a hreh bawksi. Aw, han pawh mai ngaihna pawh a hre lo hle mai." Hniara va kal ve tak la, kei ni min chhan ta lang ah kut ruak in i haw ringawt dawn a sin. Kei ni chu ngaihtuah awm kan ni hlei nem." Thangi`n a lo tih chuan hreh rilru ang reng tak si in Thanchhinga chu a zui ve ta a. Pu.khama te chul mawng ah chhuk pui in, sunhlu rah zet mai bul ah an chhuak hlawl a,"hei hi a nia, zan thum ngawt ka chang tawh. A thlang ah khuan tawitaw a awm bawk a. Ka chan loh na lam ah hlir a chhuak a. Chuvang a nia i nula chhawm te pawh zahzo lo a ka han sawm che ni." Chhinga chuan sunhlu rah thial nuau nuau pah chuan a lo ti a." A chhuak har em, engtin nge ni dawn." A sawi thui leh hma chuan a ti vat a." I duh na lam lam ah thu rawh. Thangte pawh ka dawh ve ve tawh a, helam ah hi chuan Vau kawr lam a tang sawn a rawn chhuak a, tawitaw ah khu chuan thlanglam a tang in a rawn chho thin ni in ka hria." Chhinga chuan a lo ti a. " a nih chuan Tawitaw awm na ah chuan zuk chhuk tawh, helam ah hian ka lo awm ang. Heta i awm zawng in chhuk zawng in i rawn hawl palh ang. I kah thiam loh hmel si ka hlau riau che." Tih pah in Chhinga thangte dawh na lam ah chuan a chho ta nghal a."

I thal ve tingteng nen khan i kap hlum zo ngut dawn mawni a." Tih pah in Chhinga pawh chu Tawitaw awmna lam ah chuan a chhuk thla tuih tuih a.
Ni a tlak fel pawh chuan an Sakhi chan chuan thawm a rawn nei duh der lo mai. hniara chu a beidawng ti tih der tawh mai. Sakhi chan han ninawm theih zia hi chu aw. Tho mit chhaih leh ngalsang nen a infiam reng mai hi a kham awm thin a nia. Mit ah hian min lo chhaih ve chhen a, Sa a rinawm lai chuan chet ngam pawh a ni tawh thin si lo. a zun a chhuah ngang tawh avang chuan zun nan a a tih mau chang khat lek a sah ah chuan a zung a, ka thut na bul thing kak ah chuan tla lo tur in a phuar bet a, a thu fel leh chiah tih ah chuan chhungril a tang hian a khur der der mai le. Eng emaw ni tak lo thleng tur ang a hriat na a nei tlat leh nghal. Upa ten Sa sarhu an tih thin kha a ni chek ang chu, a khur a reh fel ta maw tih ah chuan a zawn phei vau kawr lam a tang chuan thawm a lo chhuak tan ta, khat deuh deuh in a ri chhat chhat a, vawi khat a rawn ri a, areh leh vang vang a, a reh hlen dawn emaw a tih tawh hnu ah te a rawn ri leh chhat thin a. a phur rilru ngei mai, a thawm a tang leh a fimkhur dan em em a tang chuan Sakhi chal a ni ngei mai. Khua a thim deuh chhalh tawh a mahse thla a en em a vang chuan, thil che hlek pawh a hmuh theih tho mai. Chu mai bakah a tan chuan zan hian awmzia a nei teh chiam tlat lo, Sakhi pawh chu a lo kal phei zel a, Sunhlu tlak na zawn vel a rawn thleng a, kah nuam tawk a ni ang, tih vel ah chuan muang chang in a thal chu a kuai kul pam a. a hmuh vel a kah nghal pawp mai chu a tum a ni.

Chutia in ring phen phawn tak mai a, a awm lai chuan athlang lam ah chuan Silai a puak dur mai le. Chu veleh a thal chu thlah nghal mai tum in, a in ring zual sauh a. Mahse a beisei ang in Sakhi thawm reng reng hriat tur a awm tawh hauh lo mai.

A thawm hriat kha Sakhi thawm ngei chu a ni bawksi. Vawi tam Sakhi a lo chang chhuak ve tawh in, Sakhi thawm chu a hre hrang ve tawh khawp mai. Uluk lehzual in a han thlek thin, thawm ri hlek pawh hriat hmaih tum hauh lo in a beng ka chhi kar bawk, a mahse engmah hmuh leh hriat zui tur a awm bawk si lo. a beidawng chu hmanhmawh zet in a lawn na a tang chuan a pit thla puat a, sakhi thawm rik tawp na kha a va en fiah ngat a, Sakhi hnu thar tak mai chu a lo awm ngei e mahse Sakhi erawh hmuh tur a awm hauh lo.
Mak ti leh a ngaihna hre lo ang reng tak in a thianpa awm na lam ah chuan a chhuk a. Chhinga chu a lawn na thang te ah chuan lo la awm in thaw ven hmel zet mai hian Vaibel a lo pak khu tual tual mai a." Khawnge i sakhi kah chu, kha ta i lo la awm mai mai a. I rawn pu chho ang chu tih nak lai in, i rei hrep sia ka rawn chhuk thla a nih hi. Rawn chhuk vat tawh. I kap thlu lo a mi." a ti nghal bawrh bawrh a. Chhinga pawh muang chang a rawn chhuk in," a tlu chiang sia lo nghah pah che in vaibel ka lo zu khawmuang mai mai mawle." A lo ti ve bawk a. A sakhi kah na hmun an va thlen nak chuan sakhi reng reng hmuh tur a awm aw zawng lo mai. A hnu thar em em mai chiah a awm." A va mak ve, ka kap tlu chiang a sin mawle. Khu lai deuh a tang khuan a lo chhuak a, helai Thla eng in a rawn chhun na lai hi a lo thlen ka nghak a, thla en na lai a rawn thlen hian a mah pawh chiang tak in ka hmu a, ka kap nghal a lawm." A lo ti nghal zuah zuah a. Hniara pawh in mak a ti ang reng khawp mai.
Han sawi mai tur pawh a hre bik lo, Sakhi din na lai zawn vel hnim chu Chhinga chuan keu in a bih kut kut a." Eheu,. A va mak ve mawle. Khuailuai, lo kal vat teh." A tih chuan rang tak in a va kal hnai vat a. hniara pawn mak a ti ngei mai. Sakhi din na lai zawn vel ah chuan utawk hi a lo awm a, a mah tak fuh si lo in Chhinga silai mu chu Utawk hual chiah in a bul lei ah a lo lut vek chu ni in." E heu, kah thiang lo kan chang chhuak a ni ngat mai. Hawh teh i haw vat zawk teh ang." Tih pah chuan a in her a kal mai a tum a, Thanchhinga thinrim chuan," zan li ka chan na a ni tawh a, Sakhi pawh ni lo mahse ka that dawn hrim hrim tih pah chuan a bul a lung chu a chawi lawk a Utawk chu a deng per ta thlawp mai le.
"A va tul lo ve mawle, ram mi an ni tih a chiang reng tawh a, buai na kan tawh i hlau ve lo a mi." a aw-ki chu a vin lek lek. Han thah kher kha a tul lo em bawk a ni." Min ti hah hrep a nih vei kha, a chan tawk a nih kha. Eng mi pawh ni ang hmiang, va cho chi chu ni lo mahse ka tinther tiat pawn ka hlau hlei nem." Thanchhinga chuan a ti chher chher mai le. Buai na tawh hlau ang reng tak chuan meichher chhi in khaw lam an pan nghal nal nal a, Chhinga chu a hma ah a kal a, in lam a tang a kal a chawlh hmun hla ber an thlen chuan chawlh a rawt leh tlat pek a,"A tlai tawh ang reng sia muang chang in i kal zawk ang, kut ruak in kan haw lehnghal a tlai lutuk pawh a zahthlak." hniara an a tih pawh chuan engah teh vak a ngai chuang si lo.
He mihring han lunglen zia mai hi chu aw, luhlul ah hi chuan a ber a ni ta ve ang, fiamthu duh viau e ti lo hian a tih tawh loh ah chuan a ngeng ngulh zel mai a ni. Chutia Chawlh hmun a an thut vang vang lai chuan ram lam a tang in tu emaw lo kal awn awm tlat, hah hmel em em mai hian a rawn hei-ha leh pap pap thin a. "Kan Pasaltha ramchhuak an awm em ni aw, i lo nghak pah ang." hniara chuan a han ti a. Mahse a lan theih na tur chin a lo thleng dawn ta maw tih ah chuan a reh hmak a, a ngai te bawk in a rawn ti leh thin a. Vawi thum ngawt chutia a rawn thawm tak ah chuan an ngaih a tha tawh hauh lo mai.
Buai na an tawk ngei dawn ni a ahriat a vang in, hman a Parvuli a pek thil diak lam deuh "i thalfang hmawr ah i tat thin dawn nia" a tih chu hman tang kai na hun a nih ring in a thalfang hmawr ah chuan a tat zeuh zeuh a,"kan thiana chu a lo thleng har emai. Hawh teh i kal san mai teh ang," tih pah chuan hniara chu a ding hluai a, Thanchhinga ngaihdan a ni vak lo a niang, a rum deuh nghut a mahse tha tak chuan a zui ve leh mai bawk a.
an sir leh an hnung vel ah chuan rawnn zui tu awm ang hian a ri leh sal sal thin a.
Thanchhinga thin in a tuar ngang lo a niang chu," a ruk a min zui reng lo khan rawn in lan ta che u, enge in duh a." A ti ta chher chher mai. hniara duh ai chuan a at-huai mah mah thin a ni. Chhinga a tawng zawh chuan thawm chu a reh a rei vak lo an kal leh tih ah chuan Thanchhinga chu a eh thawt a, kawngthlang kangthai hmun ah a let thla nghal nawk ta mai. Thanchhinga en a hniara hawi rual chiah chuan ani pawh chu a hnunglam a tang in eng emaw hian arawn vawm awk ni mai in a hria, hma lam ah a bawk phei rawp a, a thal chu hma lam ah a theh phei dawrh a. Chu veleh an kawng sir vel a hnim te chu an che sung sung a, thawm mak tak tak a lo chhuak nghal chuah chuah mai le. a tluk rual khan Kawng thlang chu a rawn ri nghal buan buan a Thanchhinga a rawn lang hlawl mai a taksa te lah chu kangthai kan na tih hriat reng reng, thinrim mit sen rum chung chuan,"zawngchh
e luhruh bawk ho in ngam chuan ka in ring lai hi min lo hmachhawn rawh u." Tih pah in a chem pui hlai hlep hlawp tak mai chuan a bul thingtuai ngal rek tiat tiat chu a fik hmawk hmawk mai. hmiara a pawh rang zet a tho in a thal chu han chhar nghal mai a tum a, palian tak mai dum run mai hian zo zet in hnung lam ah arawn tlawh let nawk mai a, Thanchhinga pawh a ri chawrh a apai leh khut khut thin. hniara chuan a chempui chu phawrh ve vat in a hma a rawn lang hmasa a piang mai chu a vai ve pawp pawp a, a thal chu a va chhar a rang zet zet in vawi khat ah thalfang pahnih zel a kap chhuak pawp pawp a, na tuar rak ri leh thinrim in hrosa thawm nen chulai hmun chu a khat a ni ber e. a thalfang an han dawn meuh chuan tu te nge an hmachhawn tih an hria a niang chu, kawng thlang hnim chu a ri suau suau a a hnu lawk ah chuan a reh ta diak a, Thanchhinga lam a va hawi phei nak chuan a lo thu sawp nuai a, a mit ko leh biang vel te chu a bui luk a, a taksa lah kangthai kan na tih hriat tak in a vual tet-tut mai bawksi a van chhe teh reng em, han nuih chiam a chi si loh nuihza in sum chung chuan a va pan a. Mak tih hmel zet chuan min lo en ka ho mai a," i thal kah kha a va mak ve, engtin nge kah pawh i kah fuh chat chat theih zawk a. I hmu thei bik a mi." A lo ti ang he-hu a." Ka rin kah vel mai mai a nih kha, i mit bui luk vang khan ka thal kap pawh i hmu mak vek a niang chu." a ti ringawt a. an thut chawlh leh te te hnu chuan, muangchang in kal an siam ve leh ta a.

Leng len arkhuan bawr vel ah lungdawh an thleng a, an tlai ta sa sa ti in rei vak lo anhan thu chawl leh te te a, hlawh chham a han haw ngawt mai chu hmai a uang lo fahran khawp mai.

In an thlen chuan a in sil dai sawk sawk a, zan riah ei kham ah chuan apa in "eng emaw sawi pui duh che ka nei" a tih vang chuan lengchhuak nghal mai lo in a han thu khaw muang leh rih a." Taite hei vawin lam khan mikhual kan nei a, tudang ni lo in i ni(a farnu) pasal Lalkapvunga khua te an nia. An khua in Sapui an kawl tlat mai a, pahnih lai an ni bawksia. An Pasaltha ten an kap hlei thei tlat lo mai a. Kan tanpui na anrawn dil rawih mai a. Naktuk mai hian ipa Tlaia te i va zui ve dawn a mi niang. I ni te khua pawh i la hmu lo a, i tet lai a an hmuh bak che kha an la hmu leh tawh lo che a, a theih chuan lo zin ve se la anti anih hi mawle." apa chuan a lo ti chuar chuar a." Ni e, ka va kal ve pauh a niang chu. Han hawi khawthawn ve te pawh a chakawm a lawm mawle. Mahse ka pa khual khua a han zin chu ka chak rual rual in ka hreh ang reng hle mai." a lo ti ve a, dik tak chuan a hnu chhui lai kha chhui chhuah ngei a duh a ni.
Han ngaihruat tur deuh chuan a chhui ve tawh a mahse a nih na tak hai chhuak tur in a la chhui tlat lo a ni. "Mai mai thin a, rual i pawl lo lutuk hi a tha lo. Va kal tawh. Ram hnuai a awm reng ai chuan i fing var ve mahna, mahse an sa hual na vel ah kha chuan va kal ve hran lo la. I ni te tlawh tur chauh in va kal ngei ngei rawh.." a nu chuan a lo ti hlaih hlaih a, a pa pawh chuan a lo tui hnih ve bawk a. Chutia a nu leh pa ber in an tih tak tlat si ah chuan Aw a pawh tha ve ta nge nge a.

Mahse Thirdeng Pu.tawna hnen a a thil chher tir kha a la chher zo hman awm si lo a. Engtin nge a tih ang aw. Thianpa kunga te in ah a chhuk a, Pasaltha Tlailiana pawh a lo awm a." E a tih zia hlauh e, Hniara hei i thianpa Kunga pawh ka lo sawm a, in in lam ah pawh ka lo chuangkai ang chu ka lo tia. Naktuk lam ah hian i Ni te khua Thinglam ah kan va kal dawn emawni ka lo tia," Pasaltha Tlaia chuan a lo ti nghal bawrh bawrh a." Ni e, kha Kapa khan a lo sawi tawh a. Kan kal ve pauh a ni mai ang chu, mahse in kawng dip tu mai mai kan ni ang tih chu ka hlau viau mai." a lo ti ve bawk a.
Tichuan a tuk tukthuan ei kham lam ah muang chang a Thinglam pan tur chuan thu an rel tlu ta a.
A tuk ah chuan hma tak ah tho in, in lam a pan nghal vang vang a. a mamawh tur zual te a nu leh a nau in an siam mawh mawlh a. Hniara ve thung chuan a thal leh Thalfang te a en dik ve bawk a. a zawh hnu chuan Thirdeng Pu.Tawna te in ah kal in a Thalfang chher tir kha a zo hman mial em tih ahan en a. a beisei loh deuh in a lo chher zo hman a alawm ngei mai.

Hmanhnawh deuha in lam a let in, putawna chher Thalfang hmawr a dah tur thir zum vah mai kut phah chen vel a sei phek deuh thler mai chu a thalfang hmawr ah chuan dah in a thalfang ah chuan nghet tak in a chhu mum leh a, a nghet tha cherh chawrh khawp mai. a han kap chhin vel a rin ai deih in a kah a nat phah in a kah a dik bawk a, alawm ngei mai. Parvuli min pek a thal ah phei kha chuan a thawk na rem rem khawp ang le.
Tuk thuan te ei in apa chuan fuih in thu tha tin reng a fah mawlh mawlh a. Kawt chhuah a thlen chuan a thian te pahnih Kunga leh Thanchhinga an lo awm tawh a. A hnu rei vak lo ah Pasaltha Tlailiana leh Pasaltha Ramnghaka te bakah Thinglam tlangval pahnih te chu lo thleng in chawl khawmuang tawh lo in Thinglam lam chu an pan ta nghal a.

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » May 31st, 2020, 4:26 pm

SAZUK PASALTHA

Bung 9

Ziaktu : Simon da gunner

Thinglam khua hi an khua Nghalbual a tang chuan zan hnih vel riahin an thleng hman thin a, Thalai mipa hlang la chak vak rual an ni bawk a, kar kawng ah zan khat riah a, tlai lam ei rel hma ngei a ban hman an tum a ni. an hmanhmawh tlang bawka an kal chak par par ngei mai.

Kawr te a tui in pah a an chawl zawk tih loh chu chawlh pawh chawl tam lo in, an kal ngar ngar a, an hmanhmawh deuh tawh vang leh a hnaih zawk a vang chuan pumpelh lam Hriangmual ngaw dur leh cham put mai chu tlai ni tlak ruai ah chuan an lut tan a.

Hriangmual ngaw hi a hlat tham deuh a vang leh sawi neuh neuh a awm thin a vang hian Pasaltha tam tak te pawn an lo tlawh serh leh tu vak mah an kal ngai loh na hmun a ni a, mak tak mai in he ngaw hi zau in chhah tha hle mahse Sa pawh an vang ang reng khawp mai a, sa hnu awm chhun pawh chu an thing deuh thiap reng a ni.
Riah buk rem chang zawng in Hriangmual ngaw dur khup thim deuh ruih tawh ah chuan an kal zel a, an van neih a siam in, thui lutuk pawh kal ngai lo in kawrte hmun nuam deuh mai an hmuh ah chuan in nghat nghal in, a then in buk tur an buaipui a, a then in thing an fawm a, then khat in ei rel pah in tui lak na tur an lo siam ve nawk nawk bawk a, zan khat lek riah na tur a ni bawk a uluk lutuk lo in buk pawh an zar fel thuai a, thing pawh zan khat daih tur lek chu an fawm zo thuai bawk a.
Pasaltha Tlaia chuan,' a tlai deuh tawh bawk nen sa an vang hrim hrim bawk a, zan riah tur pawh dap hran tawh lo mai ang u, zan khat lek te chu kan tlingtla ve mai ang." A tih a vang chuan Luite kam a tumbu leh Changlawng te chu la in Chakai tlem nen chuan an han siam sawk sawk a. Rei lo te hnu ah zanriah pawh an ei fel thuai a, zanriah an ei kham meuh chuan khua pawh a thim chiang ta khawp mai.
Mei pui chhep hluah in buk pawn ah chuan eng eng emaw sawi in ti-ti khawchang te sawi in an han nui leh hak thin a, Thinglam khaw tlangval upa zawk Rokima chu a tawng duh in a phawk phian lehnghal a, an in nel in an in pawh tha tawh hlawm khawp mai. Chutia Rokima ti-ti ngaithla a an nuih hak hak lai chuan, vawi leh khat ah Hriangmual ngaw chhip lam a tang chuan Sihal a lo U raih raih mai le, chu Sihal U ri chuan an nui lai pawh min ti tawp chiang hlawm teh e.
A hnu deuh lawk ah chuan a dang pawh an lo U chuah chuah mai a, Pasaltha Tlailiana chuan, 'zan in chu khual duhawm vak lo kan dawng dawn a va ang ve mawle." A lo ti chuar chuar a. 'Khual ni lo in a hmun nghak ten min lo dawngsawng dawn pawh a ni zawk mai thei. Ti teh u mei pui kha han vur belh hluah ula mut zai i rel vat teh ang u." Tih pah chuan Pasaltha Ramnghaka chu a tho thurh a zunram thiar in a mu nghal kuk mai a, an thian Thinglam ho pawh chuan,' an reh rei ta viau a sin le, an lo in lan loh na chin pawh a rei ve ta khawp mai." An tih dan ah chung Sihal ho chu an lo hmelhriat tawh a ni tih a hriat mai.
Mei pui te chu vur belh in mut zai an rel ta hlawm a. Thanchhinga pui chuan a lu zawn ah a talhtum lian tha telh tawlh tak mai chu a lo chhawp run mai a. 'Nang pui hi i tho â anga i talhtum lawk zet mai hian min khawng fawk a nge, dah chhuak vat rawh." hniara chuan alo ti hluk a. Pasaltha Tlailiana'n, 'Hniara nangpawn i hriam in chhawp ve zawk rawh, zan rei ah in leng kan nei mai thei a nia." A lo tih chuan a han hawi a midang ho chuan an hmanrua te chu chuh nghal vat theih tur in an lo in chhawp reng hlawm a. hniara pawh in engdang sawi tawh lem lo in, a Thal chu a han in chhawp ve a, a Thalfang pawh sawm tha vel zet a tung that mai bawk a. a rilru te te chuan "a tul lo mange aw an hlauhawm loh emai" a ti rauh rauh a, a chhan chu a Sihal var hmuh kha a hlauhawm loh em bawk a ni.
Zanlai a pel awrh ang tih ah chuan an chhak lam a hnahthel ri riap a vang chuan hniara chu a harh nghal zawk a. a han thu chhuak a Pasaltha Tlaia leh Pasaltha Nghaka te chu an hmanrua nen an lo in ring phan tawh mai a. hniara pawh chu thawm chhuah lo tur a lo hrilh in, midang chu kai tho tur in an han zaizir nghal a. a beisei loh ang tak in Sihal ho chu an lo kal tlat mai, a tlem ber ah Sawm tha zet chu an ni ang tih a chiang reng mai bawk.
Pasaltha Tlaia chu pawn lam ah chuan a dak dek dek a, rang tak a rawn pil lut lehnghal vat in, in ring tur chuan a han zaizir leh hlawm a. an Buk sir vel ah chuan thawm a lo chhuak leh deuh rak thin a.
A lan dan mai chuan Buk chu an hual tih a hriat reng mai. Chutia in ring phenphawna an awm lai chuan, an chhak lam hla lutuk lo a tang chuan Sihal a U leh ta raih raih mai.
Thawm pawh chu a reh nghal duk a, ngaih te lam lam a tha lo hial zawk. Rei tawk fang an han ngaihchan leh hnu pawh chuan thawm hriat tur a awm mai loh a vang chuan, Pasaltha Tlaia leh Pasaltha Nghaka te chu Buk pawn ah fimkhur tak in Silai tin kawh vah chung in an chhuak tham tham a.' Eng chu hria ni maw, enge maw a awmzia le." Pasaltha Nghaka'n a tih ri ah chuan boruak a ralmuang deuh tih hria in, hniara te pawh chu an in thlah dul deuh a.
Pawn ah chuan an va chhuak ve hlawm a, thawm engmah a awm tawh hauh lo a, an meipui chheh te chu an han chhawm tha leh te te a, khaw var a la hnaih loh deuh a vang chuan mut zai an rel leh ta hlawm a.

Mahse hniara chu amuhil thei reng reng lo mai. Eng emaw tak mawlh tu a awm tlat, Kha Sihal U hnuhnung zawk ri kha a beng ah a cham tlat mai. Sihal var a hmuh kha a nih rin na a nei tlat. An rawn hnaih tawh teh reng nen, Sihal lo U vel leh an reh leh hmak si kha chhan chu a awm a ni. Chutia eng eng emaw ngaihtuah a rilru a kawm melh melh lai chuan, a lo chhing ve sek a ni chek ang. Pawn a thawm ri hraih hriah a hriat chuan a harh hlawl a. Khua pawh a lo var tan tawh a, tho chhuak ve nghal vat in a in phih fai sawk sawk a, a thianpa Kunga ei rel chu a pui ve nghal mawp mawp a.

Nizan lam thil thlen dan mak an tih thu te sawi a an buai nak nak lai chuan, midang pawh rawn tho chhuak in, hma tak ah tuk thuan ei in an tum ram lam pan chuan an kal leh ta ngat ngat a, chaw hnu her dawn ruai an kal hnu chuan Hriangmual ngaw pui chu an chhuah san thei ta hram a.
Rei lo te chawl in an kal leh tang tang hlawm a, an tum dan ai a tlai hret in zanriah kil hun bawr ah chuan Thinglam kawt chhuah an chuang chhuak hlawl mai a.

Thinglam khua hi in zahnih nufa chu an ni ve a, mahse Pasaltha ti a chhal tur Pahnih khat chu awm ve bawk mahse khual ral kai phak erawh an nei meuh lo a, chuvang a an khaw Pasaltha te rawn pun an ni reng a ni. Kawtchhuah lungdawh ah chuan an han thu chawl leh te te a,' Hei khual khua a in vawikhat chuan kai na tur a ni a, ai a u te zai ngai thiam tak leh in phah hniam thiam tak a awm in tum dawn nia. Kan nungchang hian ka hma hun tur thui tak a hril thei a nia." Ti in Pasaltha Tlailiana chuan an thian Thum chuan a fuih mawlh mawlh a, Sakei zim tur an ni a huaisen leh chhel taka awm a ngaih zia te. an khaw tlangval te zing a chher tlak deuh ber a an ngaih te an nih hlawm avang a an ni ho hii hruai an nih te, Pasaltha nun zir chu an tan a pawimawh zia te Pasaltha Nghaka chuan a lo sawi ve mawlh mawlh bawk a.

Rei mawi Tawk fang an thut muan hnu chuan, Khawchhung lam ah lut in Lal in an pan ding nghal chat a.
Thinglam tlangval te chuan Lal in a luh chu an han dil te te a, Lal in chhung ah chuan Lal leh a Upa te chu an lo thu thap a, mikhual hmel an han hmuh chuan, lo lawm thiam in an lo chhawn tha khawp mai. hniara ni pawh chu a lo phul ve hlut bawk a, kawnga an tluan leh tluan loh te in zawt in an tlangval te chu hah zu an zuk zawh chuan rei mawi tawk thu in an mahni in lam an pan ve nghal bawk a.
Hniara te chu Lal in ah chuan zanriah kil nghal vek in, hniara chu Lal in ah chuan awm nghal in Kunga leh Chhinga chu Khawnbawl Upa Pu Chhumcheua in ah thleng in, Pasaltha Pahnih te chu Upa min Kapthiaua te in ah an thleng ve thung dawn a ni. Zanriah puar el-euh a an ei hnu chuan, Lalpa chuan a Pasaltha Tinthiama chu koh tir in, a ni pawh rei nghah ngai lo a alo thlen hnu chuan hma lak zel dan tur te sawi ho in, Pasaltha te leh Lal leh Upa ho chuan ro an rel nghal zung zung a.

A tuk zing tukthuan ei hma chuan an lo rel lawk tawh ang in Ngirtlu pang a Sakei chet na hnu hma vel chu belchiang a en vel tur in hniara te Panga leh Pasaltha Tinthiama chu an in zui chhuak ta hlawm a, Sakei hnu chu an sawi ang ngei in a hrawl ngei mai. Pahnih lai an nih bawksi a vang chuan chet lak pawh a buaithlak ve khawp ang le.
Chung Sakei koham leh huaisar tak tak tawn ah chuan an khaw nu pakhat leh rawlthar pakhat an lo chan tawh a, an Pasaltha Pakhat pawh natak in an hliam nghe nghe a, Pasaltha Tinthiama hian a theih tawpa a chhan ve a vang in Sakei te chuan zah an ngai a ala dam ve hram chauh a ni.
Pasaltha Tlailiana chuan ngaihdan rawn siam in Kar hmang a Sakei chu an that thei lo a nih pawh in chhe te pawh an hliam thei a nih chuan an tan beih an awl phah in a ring tlat mai a. Chutih rual chuan Sakei hliam han beih chu a hlauhawm zia hrechiang tu ber pawh amah tho a ni.
Tichuan tukthuan ei kham a, Pasaltha Tlailiana ruhman na bawhzui tur chuan an let san leh ta rih a.

Tukthuan chu hma tak ah ei in Kawtchhuah Lungdawh ah chuan an in nghak khawm ren rawn a, an kim hnu chuan Thinglam khaw ep chiah Ngirtlu pang per duai mai lam chu an pan leh ta a. Hmun ruk ah kar chu kam in Kar in a Sakei a hliam pawh a, lo hmachhawn nghal thei tur in an Kar kam na atang a hla ve deuh hlek Sakei kawngtum that na lai deuh ram lam si ah chuan Thangte dawh in Pakhat theuh in an chang dawn a ni.
an kar kam na hmun ah chuan Se ruang chaw chah a tan an dah thliah bawk a. Thangte dawh na hmun tur te an en a an siam fel hnu chuan Ni pawh a her bawih tawh a. An awm hmun tur theuh ah chuan an thu far hlawm tawh a, hniara leh Kunga chu in hlat deuh tak mahse in auh phak si in an awm ran bawk a, a bak chu an in au pha meuh lo a.
Khawi ah ber nge an rawn chhuah dawn tih an hriat miau loh a vang chuan an Kar kam na pawh a in hlat viau hlawm a.
Tlai ni tla tur chu thlang lenkawl ah a hnim ruih tawh mai a, Ngirtlu pang per chu rawn chhun sen phut in, a her liam ve tual tual a. Sirva te pawn riah run kai zai rel in, an rak ve nawk nawk a. hniara awm na hi Tlangdung in khawhthla zui tawp na chiah ah a ni a, chumi pang leh lam ah chuan Vazar rual in hnahthel hai ri in an hram nauh nauh bawk a, a Thangte dawh na Thing piah chiah a Belphuar kung ding vuah mar tha zet ler ah chuan Changkak a fu van mai bawk a, a chang leh a thlawk leh diai diai a, a chang in a rawn fu leh thin a.
Ni chu a tla fel der tawh a, mahse khua erawh a la thim chiah lo tih ah chuan, a chung a Changkak vir vir chu Ngirtlu piah mual ah chuan a thlawk sawn ta daih mai a. Vazar rual thawm reh tan tawh pawh chu hmuh leh hlauh an nei tih hriat tak in, an tik leh dial dial thin a, chu thil zet chuan in rin na dar a khawng ri tlat mai le. hniara chuan athal chu kuai kul nghal pawp thei tur in a hum tha sauh sauh a, Thalfang a hmawr a Parvuli thil min pek a tah sa diam chu Pahnih in a phawrh chhuak zal zal bawk a. a beisei ai hma in an Bengtawia te Pahnih chu an lo lang dawn a ang viau mai, a bul vel a khiang rah tlan Thehlei te pawh chu an tlak leh tak tak thin a, an khiangrah tlan tla ri leh tak thin pawh chu a bengchheng lam mah a ni tlat mai.
Chutia in ring phenphawn tak mai a, chet pawh che ngam lo a, a thut ngawih kar lai chuan, a thlanglam kawr kam a tang chuan Sairal ze tial thuk mai Pahnih chu an lo per chho thauh thauh mai le. Ngawi reng in a lo thlir kar a, ngen hmel zet chuan an kar kam na lam khawchhung lam ah chuan an phei thauh thauh a. Tun ah chuan chet lak a la hun tlat lo. hniara te Paruk chu an kar kam na ram lam ah an thu a, Pasaltha Thlengliana ho in tlangval sawmli bawr vel in dai ah an lo chang ve thung a ni.
Chung Sairal Pahnih te chu an liam dawn ruai ah chuan an in then tlat mai. Pakhat zawk chuan tlangdung chu her liam in khawchhung lam a pan a, pakhat zawk erawh chuan Tlangdung chu a zawh chho zel a, ram lam ah nge khawchhung lam ah a kal ang aw, a hmuh phak tawh loh a vang chuan rilru a ti buai map mai le.
A chhan chu an kar kam ah khan Pakhat kha va in awk ta se, a thi emaw thi lo emaw Pakhat zawk hi a ṭit phah in, a hlauhawm zual thei tlat a ni. Khua pawh a thim chiang ta khawp mai, Thla chu a rawn eng paw pheu mai a. Helai ram Ngirtlu pang vel hi a ngaw a chhah lem loh a vang in Thla eng ah chuan dip tu leh hliah tu awm em em lo in thui ve tak chu a lang ruak thei a. Chu zan thla eng zet chuan ngaihbik nei si lo in Vala lunglen na a kai tho tlat, an Sa chan ah pawh chuan rilru a pe meuh tawh lo.

Parvuli chu a rilru leh mitthla ah a lo lang a, suangtuah na in, a tih tur hai lo in Tlang leh mual cham dup mai te chu a lo fan pui ve bawk a. A nui hmel leh a thinrim vel lai a, a tum deuh bar mai hmel han duhawm zia te kha,. Engtik ah nge an in hmuh leh theih ang aw.
Khawlam a tang a an kar kam rawn ri dur mai chuan a suangtuah na chu pawt ding chawt in, kar a rik rual chiah khan Sakei huk dum ri in a zui zat bawk a. Kah chu a kap fuh ngei e. Mahse han in thlah dul mai chi a ni tlat lo, a thi nge a la dam tih pawh hriat a nih miau loh a vang chuan hniara chu athut na Thangte ah chuan a la thu ran a.
Pasaltha Tlaia remruat na chu a mawlmang in a hlauhawm a ti hnuhnawh hle mai. Rei tawk fang che chang lo a a thut vang vang hnu chuan, thla eng ah chuan a piah deuh a thil dum che zeuh chu a hmu vuai a, uluk deuha a en chian chuan a tan zan hian awmzia a nei teh chiam lo bawk nen, Hnahkiah buk hnuai a Sakei lo bawk run mai chu a va hmu nghal mai a. A dar bawr vel ah chuan Silai mu khan a fuh a ni chek ang chu, a liak deuh hlup hlup reng mai a, a dinga a lam ah a rawn kal dawn emaw hniara'n a tih lai chuan, Chho zawng deuh a kal in Kunga awm na zawn ah chuan a chho tlat mai , a hliam en in a awm ve reng e, a vei lam dar ah silai mu a lut a chu chuan kawngchhuk a kal chu a tih hreawm phah ngei anga, kawngchho lutuk kal pawh a hreawm ang, mahse chhak lam ah khan a kawp pui kha a kal si a, a zui dawn pawh a ni mahna le.
Sakei chu muang chang in a kal liam a mahse hniara tan chet han lak mai na chi a la ni tlat lo. "Fimkhur hian tawp chin a nei tur a ni lo" ti a Pasaltha Tlailiana'n a hrilh kha a la hre reng mai.
Sakei kal liam hnu lawk chuan Sakei kal chhoh na lam a tang ngei chuan Silai a puak leh dur mai le. Kunga'n a thal a thlah a ni ngat mai, A rawn ri thla buan buan a Sakei ze tial ruk mai chu a lo lang leh hlawl mai, a dul a tang chuan Thisen a chhuak ngiai ngiai a Kunga chuan a taksa khawih pawi tur in a kap lo a ni ngei ang. a Thal hrui ah chuan Thalfang Pahnih chu hmeh bel in a kuai kul pan pan a, kah nuam tawk vel a arawn hnaih hnu chuan Sakei chal dam ah tak mai chuan a Thalfang chu a han thiat vah mai le. A hliam tawrh tawh leh Thalfang hmawr a Lasi te Dawi tel na a lubur a lut tlum hmawk a vang chuan chu Sairal koham leh huaisar tak pawh chu a rawn lum thla tup tup mai a, a thlang zawl lai a alum tawp meuh chuan che-chang tur a awm tawh lo chiang kher mai. Kunga pawh a rawn ri thla ve san san a,' i lo hmu em." A rawn ti nghal tawng mai a". hniara lah a uang chak tlat pek a,' enge hmuh tur awm a." a lo ti hu a.
Kunga hrilh hai hmel leh ti deuh dui mai chuan a nuih a ti za ngei mai.' Enge i kah a. Sanghar te hi i lo kap vel mai mai a nge, Keipui zim tum in kan kal a Sanghar vel mai mai i kah chuan Keipui khan min lo zim let ve mai thei a nia." a tih zauh phei chuan a hawi tang hra tawh mai a. hniara nuih za chu a in sum thei ngang tawh lo, vawi lehkhat ah a nui chhuak huk a.' Hmel varung ka pawh thlak hma che hian rawn chhuk rawh. Khawi ah nge kan Bengtawia chu." A huai thar ve leh tawh ngei mai. hniara nuih a za telh telh mai bawk si.' Hmel vahrit i nep nep nen, Bengtawia mai mai pawh kap tlu zo lo khan min pawt thla hlei lo a nge. I dawih zep em vang a nih kha i Ngen-mu pawn a ngen nat loh." a lo ti ve nghal zat zat a.
Mahse chutia engmah ngaihtuah hlek lo a an awm chu a pawi ta, fimkhur na an lo tlachham hlek a ni. Chhak lam a tang chuan Sairal lian zet mai pakhat chu a rawn in khawh chhuak zawk a, Kunga chu a rang that that bawk a tlem in a lo in her hman hram a Sairal chuan a hap thelh fua a, mahse a tin hriam tak erawh a pumpelh hman bik lo. Thlang lam ah chuan an bawk thla rawp mai a. "hmiara chet vat a ngai, in thup tit tet na hun a ni tawh lo. a thianpa nun na hian a tuar thei tlat" Chutia kunga leh Sairal an lehthlak tawp rual deuh thaw chuan a thal hruai ah thalfang pahnih hmet bei in a kuai kul nghal pawp a, Sakei rawn ding chhuak leh chiah chu, a in her nghal zawk a vang in a tum na ah tak fuh lo hlauh in A khel ah chua a Thalfang Pahnih chu a bur vu mai a. Rangtaka a lawn na Thangte a tang a zuangthla nghal in Kunga bul ah chuan a tlan thla nghal vat a. Kunga dar chu a lo thler hnuang mai chu ni in. Chu thil a hmu zet chu a thinrim na a sosang nghal zawk mai le. a taksa chu a lum pup pup a a mar awt awt ni mai in a hria. a thinrim na chuan chak na ah pe thar tlat. Sakei chu a dingtha hlei thei meuh tawh lo, a han en chian chuan a dar ah Silai mu luh na a lo awm tlat mai. A nih chuan nachina a kah hlum tak kha Kar a tla lo zawk kha a ni tih na a nia.
Tun a mi hi Kar a tla Hnahkiah buk hnuaia a hmuh kha a ni tih na a nia. A awmzia chu Kar a hliam lo zawk kha Kunga'n a lo kap a chu mi rawn tlan thla chu hniaran thal in a lo kap ve leh a. Kar a hliam zawk kha Kunga hian a lo hmu lo tih na a ni maw. Chu Sairal chuan in saseng a tlawm mai a tum hauh lo, hniara pawh in kah nawn a tum hauh lo, a thinrim na a kai tho laklawh tlat. A rawn ding mar te te a, a awp hniam sut a athil tum chu a hai hauh lo mai. A rawn zuang dawn chiah tih ah chuan rang lutuk a tlankawi dawk zawk pah chuan a hnaih chilh nghal ruak a. A ni rawn zuang chhuak laklawh chu a thalfang hmawr thir chin zawng tlum pawk khawp in a mit ah tak a lo chhun siah mai a, a ni pawh a awm mai mai bik lo a mit a Thalfang lut vang a, a huk thawt rual chuan a rawn beng ve pawp mai a. Mahse Sakei hliam tuar nual tawh tuan fum lutuk tawh tan zawng han khin phak a ni meuh lo a ni ta ve ang. A ben thelh rual chiah chuan a dar hliam Silai mu luh na ah chuan a Thal ngul hmawr zum chuan a chhun sak leh zawk mai a. A bek ah tak a tlawh nghal chawrh bawk a. Chutiang thlen nan chuan hun tam a ngai lo khawp mai.

a thinrim na chuan a ti chak a a thunun thei meuh lo, a rilru pawh a dik tawh lo. Thisen chhuah chak na hlir in a khat a ni ber.
a chak dan leh chet ran zia te chu a mak hial zawk. Sakei chu thlanglam ah a paithla chawn chawn a, a ngam loh Val a tawng a ni tih a hria a ni chek ang chu, tlan chhiat mai a tum a, mahse a kal hlei thei tlat lo. A dar leh a khel hliam vang chuan kal a harsat tlat tawh. Zawi muang a hniara'n a pan thlak lai chuan chhak lam a tang in Silai a rawn ri dur a. Rang tak in a hawi chho nghal vat a, a rilru fim tawh lo nu but mai a tang pawh chuan Silai ri a vang chuan a harh nghal zawk mai bawk a.
Pasaltha Tlailiana leh midang ho chu an lo ding thap a, Pasaltha Thlengliana Silai hmawr chu a khu hlat hlat bawk a. an piah ram lam a tang chuan Thanchhinga chu a lo tlan ve buan buan a an awm na a rawn thleng a thil awm dan a han hmuh zet chuan a thinrim ve ngei mai. Kunga chu an han buaipui nghal zung zung a, a hliam chu a zau in a lo thuk phian mai a mahse a ruh erawh a khawi lo a nih hmel. A thisen erawh a chhuak hnem hman viau a a chau ve khawp mai. A hliam a han buaipuia a bul a a thut lai te chuan phawk fahran hian ngawi reng in alo en tlawk tlawk mai a. a awm te lam lam a ti nuam lo zawk, a chet dan engkim kha a hmu tlat a lawm.
Kunga chu zawn an han tum a mahse a duh bik tlat loh a vang chuan muangchang a kal pui in an in kuah chhawk zak zak a. Chhinga chu khaw lam ah chin chang va thlen tur in an kal hmasak tir a. A hnu rei lutuk lo ah chuan khawchhung lam a tang a meichher rawn de chuah chuah chuan a rawn hnaih nghal ruak a. Thinglam khaw tlangval te chu an rawn phul phei hlut hlawm a. Sakei ruang te chu hlawm in Kunga pawh a duh lo chung an zawn lui ta tho a.
Hniara ni Pasal Lalkapvunga chu a lawm thiam in Kunga in hliam pawh chu pawi a ti hle mai a, hniara pawh a chhuang in ka tupa a nih hi a ti deuh reng mai a anuam lo ati lam hial zawk a ni.
Sakei lu aih te buatsaih in, hniara te pawh chu Kunga inhliam a vang chuan hun eng emaw ti chhung chu Thinglam khua ah chuan an han cham ve ren rawn a. Hun leh ni a ral a, Kunga pawn zia lam a pan chhoh tak ah chuan haw zai rel te pawh an han tum tan a.

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » May 31st, 2020, 4:26 pm

SAZUK PASALTHA

Bung 10

Ziaktu ; Simon da gunner

A tuk maia hawn an tum avang chuan, eng han tih zai mah chu rel lem lo in, Kunga te thlenna upa Chhumcheua te in-ah chuan Kunga chu a tha zel em tih hriat tum pahin hniara chu azuk kal a.

Upa Chhumcheua chuan kaiten-ah hnang a lo hlai hliau hliau a,' Ka pu, kha
eng tur nge ni ngai. I va duang uluk ve mawle." a han tih chuan, lo hawi chhuah paha a tuibur hmuam pik puat pah chuan,' aa.. eng vak ni lo e, neihfaka ril bawmah ka'n ti deuh mai mai mawle." Upa chhuma chuan a ti ve mai a.
A tuk maia hawn an tum tih a hriat avang chuan la cham rih tura a duh thu te sawiin, Kunga te pawh lo chhuakin an ti ti dal dal hlawm a.

Chutia eng eng emaw sawia an ti ti lai chuan upa Chhuma tupa se en rual vel tur Lalliana chu lawm fahranin a lo haw a. Tlaiberh a lo khai va va bawk a.' A pu, hei Tlaiberh ka awk ve asin." Tiin a rawn inti thei vel khawp mai a. Pu Chhuma lah chuan en pawh en mang lo hian,' a va lawmawm ve, khuanu zarah i awk ve hlauh a nih chu, a dang pawh i la awk zel mai ang." A lo ti liam puat a. Chutia a pu in a chhan chuan Lalliana chu a lawm vak lo a ni ngei ang,' khuanu zarah a ni reng reng lo. Kelbuh zarah a lawm ka awh." Fel then a rawn ti in, in chhung lam ah a lut tau deuh bar bar a. Pu.chhuma lah a tupa chhanna avang chuan hrilh hai hmel ang reng tak mai hian a lo dak chhuak ka-ho mai a. Lalliana'n a pu a chhanna aaang a nuih zat tawh sa nen chutia Pu.chhuma hmel hrilh hai ka ho mai, sawi tur hre tawh bawk si lo hmel han hmuh leh zet zawng, in sum theih a ni mawlh lo; vawi lehkhatah Chhinga chu rawn nui chhuak thawtin, an vai nuih zo ta vek mai, hniara te thian thum(3) nuih za lak lawh insum thei tawh bawk si lo Pu.chhuma leh a tupa Lalliana hmel an han en thin, nuih a za telh telh tawh mai si. Chutah in chhung atangin Nu ber in, Ar hlei lutuk a lo hnawt,' sik, sik, sikk.. ar nghal lutuk mai. He Arpa hi tu te Arpui nge ni reng reng ni." A lo ti bawk nen tuk thuan ei kham puar lai lo ni bawk nen dul vun na vek khawp in an nui kiah kiah ta mai .
Chumi ni zet chu theihnghilh har tak tur leh hriat reng tawh tur. Nakin hun thlenga an sawi tur a tling ve khawp mai.

Thinglam khua an chhuahsan ni tur chu kawlah a lo eng det det a. Vartianah chhuakin, khaw thim hma ngei a Hriangmual Ngawpui luh hman tum in an kal fat fat a. Ni a van lai zawl vel tih ah chuan kawrte pakhat ah chaw te fak in, hah te kan han dam te te hnu ah, mawng hawlh ba ang mai a kal leh fat fat in Tlai ni tlak dawn ruai ah Hriangmual Ngaw dur khup mai chu an lut tan a, kal lam a an riah buk sual na an thlen meuh chuan khua pawh a thim tha tawh khawp mai. Kal paha an thing fawm te chu an han nun a. Ram ar leh Vahrit hniara'n Thal hmanga a kah te chu an han siam sawk sawk a, an buk te chu thuam tha leh thuak thuak in, leng len hun ai tlai hret ah chuan ei an peih fel hman hram a.
Zan riah puar peng pawnga an ei hnu chuan an chau tlang bawk aniang tu mah pawh thu rei peih lo in an mu nghal mai hlawm a.
Zan lai vel ah chuan hniara mutui lai chu a harh hlawl mai le. Eng emaw thil tha lo a lo thleng dawn ang in a hre tlat lehnghal. a ngaih that loh na avang chuan mut pawh a muhil thei lo a, chutia ngawi renga a mut hmun a nghate rep ang kara a mut lai chuan, an Buk chhak deuhah chuan hmawlh tang a tliak ri rap mai a, chu veleh rang tak a tho in a Thal leh a fang chu a chuh nghal thuai a. Thawm chu a han ngaithla vang vang a. A khat tawk in thawm chu a lo chhuak leh rak thin a. a thian te tih harh hlau zet chuan Buk kawngka lam chu pan in a dak de de a.
Pasaltha Tlailiana pawh rawn tho chhuak ve tham tham in a silai chu a hum ve nghal chat bawk a, thawm dim te a midang kai tho in Buk chhung ah chuan an thu leh ta thap mai le. Eng nge lo thleng dawn tih chu an hre chiang hlawm khawp mai, an mei pui chheh rem lam tawh chu tlem tlem in a la alh ve teng teng a. Chhak lam a tang chuan thawm a lo ri leh rak thin a, mahse rei fe hnu ah pawh chuan an buk chu a rawn thleng thei reng reng lo mai. hniara ngaihdan a pel tlat, pawn ah chuan chhuak in uluk tak in a han hawi vel a, hmuh tur erawh a awm mai lo, uluk taka thawm a ngaihthlak hnu pawh chuan thehmeh ang hmak in a reh vang vang mai bawk si. Mei pui te chu vur belh in, a din chhuah leh rual chiah chuan sir zawng in a tlu nghal rawk a. Chu Sihal dum lian lutuk mai lo zuan tu pawh chuan a tum a thelh ve bawk a.

Rang tak a insiam rem in a thal chuan a tin nghal zat bawk a, mahse thim chin ah chuan lut in hnim leh thing ding lian pui pui kar ah chuan a pil bo leh hman daih mai. Chutia a hawi hu hu lai chuan silai rawn puak ri dur in, a sir thim chin ah chuan hniara rawn zuan tu Sihal pakhat chu a hlawm thla nawk mai a.
Rang tak a Pasaltha tlailiana leh midang te chu rawn chhuak in,' Pasaltha Tlaia chuan awm khawm rawh u, in sir lam in veng tawn theuh in a hnung puak zawng in inhawi tawn theuh ula." Pasaltha Tlailiana chuan thum deuh bel bul ring lutuk si lo chuan a lo ti nghal vat a.
Kil tin leh hmun tin mai ah chuan rang tak tak in Sihal ho chu an tlan kawi zawk zawk a, vawi lehkhat ah rang lutuk in thim chin a tang chuan an mei pui chheh eng ah chuan an rawn lawr leh zawk zawk thin bawk a. Pasaltha Nghaka ṭe that rual chuan hniara Thalfang pawh thlawk chhuak nghal fur in, Sihal Pakhat chu a zakdawh a Thalfang lut thaih a vang chuan meipui eng chin ah chuan a tawm nghal chawih chawih mai a.

Chutia Sihal tal vel chu Chhinga talhtum lian tha telh tawlh chuan a thluak a vaw per nghal chuai mai le. Chu velah chuan Sihal Pakhat a rawn U nghal rawng rawng mai a. Thim chin ah chuan thinrim tih hriat tak mai in Sihal ho chu an ngur chhur chhur hlawm a, Pasaltha Tlaia Silai leh Kunga silai chu puak nghal thawt in, chumi rual deuh thaw chuan Kunga kut a tang chuan fei a thlawk chhuak nghal fur mai bawk a, Sihal Pakhat thim chin a tang a rawn lawr zawk chu a dul a fei bur vu a vang chuan rak deuh nghur pah chuan thei leh thei lo in a insa seng ve hram hram a, thim chin a awm tawh a vang chuan midang chuan an hmu lo a ni ngei ang, mahse hniara tan erawh awmzia a awm ve lo. a thalfang chu thlawk chhuak zawk in chu Sihal nghawng ah tak chuan a lut tlum thawih a, a let nghal ngat bawk a. an Buk chhak deuh ah chuan Sihal rawn U ruah ruah in thawm pawh a reh ve nghal mai bawk a.

Chhak lam ah chuan Chung Sihal ho chu an in khawh chho zawk zawk a. Chutia Sihal ho an in sa seng a thawm a reh tak duak ah chuan hniara te ho pawh mut zai rel in buk ah chuan an lut leh ta hlawm a.
Pasaltha Nghaka chu a dar ah an lo hliam hman tlat mai a, sil fai sak in damdawi an neih ang ang te hnawih in, an tuam fel hnu chuan "rei lo te pawh mut a tha lawm" ti in an chhing ve leh ta hlawm a.

A tuk zing hma tak ah tho in tuk thuan pawh ei lo in kawng a ei tur in an fun a, thui thei ang ber thlen hman tum in an kal leh ta ngat2 a. Mahse an duh ang erawh in an kal hlei thei tlat lo Pasaltha Nghaka chuan a hliam chu a kal pui hlei thei tlat lo mai a, a khua lah chu a sik hlut hlut mai bawksi, a khat tawk in an han chawlh pui leh thin bawk a. Chutiang reng reng a an kal lai chuan Ngaw chhung ah chuan chhum lei vak a lo zing muai muai a, Sava leh rannung hram te Thehlei thawm te pawh a reh nghal duak bawk a.
Chhum chu a zing na sa telh telh mai bawksi, hniars te ho ngei pawh an in hmu tha hlei thei lo chu a ni ber e, chutiang em em a chhum a zing na sa mai chuan ngaih te pawh a ti tha lo rum rum mai. Mahse hetiang Ngaw chhah lutuk ah hi chuan dan pangngai lo chu a ni hauh bawk si lo. Huihchhuk thli a rawn thaw a ahit chem chem mai bawk a.'Ruah a sur dawn em mawni le, thli thaw a va vawt raih raih ve le aw." Kunga chuan a rawn ti chhuak phawng mai a.' Ni e. Tawm hul na tur melh pah a ngai ang, chhum a zing na sa bawksi. Hei Nghaka a khua a sik bawksi a. A tul a nih leh zan in chu he Ngaw ah hian kan riak leh mai a niang chu." Ti in Pasaltha Tlaia chuan ruahman na a han siam nghal zung zung a. Mahse Pasaltha Nghaka erawh a tlawm la ngang mai, kal zel mai chu a rawt tlat mai a. A tul a nih leh a mah chu kal san mai tur in a han ti bawk a. Mahse chutiang em em chu tumah hian an duh dawn lo tih chu a chiang reng mai.
Mahse a kal hlei thei lo chu a ni bawksi, Thanchhinga a rawn thawk lawk a Pasaltha Nghaka chu a paw ta nawlh mai le, chak tak in a kal pui nghal nawl nawl mai a. Pasaltha Nghaka lah a tal hlei thei bawk si lo. Chutia an in chai nak nak lai chuan, midang ho chuan an lo nuih ham ham mai a.
Chutia an rik nak nak lai chuan Pasaltha Nghaka chu thanchhinga hnung a tang in a hlawm thla nghal nawk mai le.
Chhum lah chu a zing muai muai mai bawksi. Pasaltha Nghaka au that chu a tawp nghal chawt bawk a. an vai a tan thui a hmuh theih miau loh a vang in han in puih vak ngaih na lah a awm bawksi lo. Khatia Pasaltha Nghaka Thangchhinga hnung a tang a Sihal lian zet in a rawn zuan thlak nawlh khan amah Chhinga pawh chu a hma lam a tang a Sihal rawn zuang chuan a rawn bawh thal nghal tawp mai a. Chu veleh Kunga fei thlawk chhuak nghal zawk in, chu Sihal, Thanchhinga bawh mek tu hrawk ah tak chuan lut thaih in, a hnung lam ah a tlang zawk mai a. an sir leh hnung vel ah te chuan Sihal hrawl pui pui an tlan tlang fuau fuau ta mai a..

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » May 31st, 2020, 4:27 pm

Sazuk Pasaltha

Bung 11-na

Ziaktu - Simon Da Gunner
.
.
.
Kunga fei thlawk chhuakin Thanchhinga bawh mektu Sihal hrawk a phil tlang rual chuan, Chhinga pawn amah bawh runtu Sihal chu paih sawn nawkin a rawn tho chhuak nghal a. Chuta a rawn tho chhuak leh mitmeng chu rapthlak leh tihbaiawm tak a ni. Chhum zing muai muai karah chuan a pawl rum mai a. A khur chawr chawr a, a taksa te chu rawn marin a pianhmang chu a lo inthlak a. Chhum zing chhah tak atang a an lam pan a rawn pen chhuah chuan Thanchhinga hmel nelawm leh dam thluam mai kha a pu tawh mawlh lo. A taksa chu a hma ai in a len belh tih a hriat a, a taksa chu a hmul deuh thur in, Ngho sei leh hriam hmel zet mai a lawr vun mai bawk a. an hmaah chuan rawn bawk rawp in, thawk lehkhat ah Sanghal hrawl leh lian em em mai ah a chang ta mai le. Hei ngei hi a ni Sihal var rawn um tute zing a mi lian em em mai leh Sanghal ho hruaitu ni ve awm tak kha, a hnu chhui lai a tawp san tak kha chhui zawm ngai tawh lo in, a lo rinhlelh ruk ang ngei in mihring Sanghal an lo ni chiang e. Mahse, a thianpa Thanchhinga ber kher hi chu a nih a lo ring ngai lo a sin mawle. Chutia Thanchhinga Sanghal lian zet mai a a rawn in thlak rual chuan an chhak lam a tang in Sihal lian zet mai a lo dawk chhuak zawk mai a Kunga a rawn la hman tep tih ah chuan Thanchhinga/Sanghal lian zet mai chuan hawk dut pah in a rawn phin phei a, fei khawh ang mai a rang in chu Sihal, Kunga lam pan a rawn tlan mek chu a phin phei buai mai a. A ngho sei leh zum tak mai chu a hmang thiam hle a ni tih hriat tak in chu Sihal dul vel chu a thler nghal hnuang mai a, chutia Thanchhinga leh Sihal in bei lai mak ti zet a hniara'n a en reng lai chuan,'i hnunglam en rawh." Pasaltha Tlaia'n a lo tih tuarh ri ah chuan harhchhuak thut ni awm hrim in, a phu deuh zuk a. Chumi rual deuh thaw chuan a Thal kuai kul pawp in, a hnung lam a Sihal rawn duk phei pur pur zuang tur chiah mit ah tak a Hniara Thalfang chu a lut hrawih a. Chu Sihal chuan a tum a thulh chiang teh e, Pasaltha Tlaia chu Pasaltha Nghaka, Sihal in a hnuh na lam ah khan tlan nghal thuai in, Hniara pawh chuan a hnung ah a zui ve nghal a, mahse Kunga au that thawm a hriat vang chuan rang tak a hawi let in, a Thal chu a kuai kul leh nghal pawm mai a. Mahse a rin ang in Kunga chuan hliam a lo tuar aw zawng lo mai, a bawk rawp a a mit rawng leh a taksa vel chu lo danglam in, Sanghal lian zet mai ah a chang ve leh ta mai. a mak ati lutuk chuan Kunga chu a en reng mai a, a ni pawh chuan a lam lo hawi zawk in, a kun deuh lap a. Mahse an hun tawn mek hi thih leh dam in kar a nih tlat a vang in, a hma lam a Thanchhinga Sihal Pathum in an hual lai chu a phin phei nghal buan buan mai a. Hniara pawh in zawh na in zawh hun a ni lo tih hria in Pasaltha Tlaia tlan liam na ah chuan a tlan thla ve nghal thuai a, thui vak lo a tlan chhuk hnu chuan, kawrte pakhat lo awm in Sihal pakhat chu a thi tawh a ni tih hriat zet in, a ril pawrh hnuang in a lo let reng mai a.
.
.
.
Kawrte kam lehlam ah chuan Pasaltha Tlaia chu a in hrosa nasa khawp mai a, chu mi thawm rual chuan Sihal rum chher chher mai hriat tur a awm bawk a. Rangtak a thawm lo chhuah na lam chu pan in, Hniara chu a tlan phei puat puat a, a va thlen chuan Pasaltha Tlaia hnung lam ah chuan a chhuak hlawl mai a, a ke bul ah chuan Sanghal Pakhat thi hnuang in a lo let ngat mai bawk a, mahse a thawk zawng a apum in sep det det a vang chuan a la thi bik lo a nih hmel Sihal Panga(5) vel lai hmachhawn zawng in Pasaltha Tlaia chu a lo ding kak hah mai a,'enge in duh a. Engvang in nge min lo tih buai. Nangni ho nen hian kan in rem thlap tawh emaw kan ti a sin. Mahse tun a in chet dan hi chuan a nghawng thui khawp ang tih hre rawh u. A nghawng chhuah pawh a duhawm fahran lo ang, in duh a in cho chhuah a ni tih hria ang che u." Thinrim aw khur der der thawp sat a tih pah in Pasaltha Tlaia chuan a Silai leh chempui chu a paih thla thak a. Hniara lam rawn hawi in,' He hmun hi chhuah san rawh. Tun ah chuan engkim i hre ta." A tih zawh chuan a mit chu a lo sen nghal rum mai le. Chung Sihal Panga(5) te lam chu hawi leh in,'a tawp thleng law law i la ani mai alawm, kei hi A BUL ka nih hi" A tih rual chuan rum ngul ngul in Sanghal dum lian zet mai ah chang in, a tuang a din ur mai a. A lu chu a thing ngulh ngulh a, a ke in lei a phiat surh surh mai bawk a, a ngho te lah chu a kual kawm zum vun mai a.. Chung Sihal ho pawh chu an khup nghal dui mai le, mahse an ni Panga(5) tan chuan an mahni ai lian pawh ni se han khin phak ve tur chu a ni. Chu Sanghal Pasaltha Tlailiana ngei mai chuan hawk dawt pah in chung Sihal ho chu a phin phei buan buan mai le. A han tal tak tak mai chu pui riap riap tak a ni. Hnim leh thingkung mal tiat vel mai mai chu an fai duak duak a ni ber mai. A len phu loh in a tuan lah chu a tha em em mai lehnghal a, fei khawh ai pawh a rang tur khawp in hawk dawt pah in a khawh hian a in khawh zawk zawk mai a. A tum chu thelh a nei bar lo tih hriat zet in a in khawh chhuah tawh na hmun ah chuan Sihal lian zet zet mai chu an thal phung mai a.
.
.
.
Chu ngaw, Hriangmual Ngaw dur khup mai chuan chi hrang leh chi hrang Sihal te leh Sanghal Mihring te in beih na chu a lo mikhual mek chu a ni si a. Thil nung tu te tan mah han hnaih chi ziazang a ni lo tih hriat zet in Sava hram thawm leh thehlei thingchang rah tlan thawm fahran pawh hriat tur a awm tawh lo a. Chung te ai chuan Sanghal thinrim hawk dawt dawt leh Sihal ngur chher chher bak hriat tur a awm meuh lo. A khat tawk in Sihal an rak leh thawt thin bawk a. Pasaltha Tlaia'n Sihal ho a phin buan buan lai chuan a bul mai a Sanghal let reng chu zawi muanga a taksa pian hmang lo danglam in mihring ah a lo chang a, hniaran han en chian nak chuan Pasaltha Nghaka a lo ni reng mai. Pasaltha Nghaka pawh a thiante an vai hian Sanghal mihring an ni vek tih na a ni maw. A nih chuan kawrte bul a Sihal lo let reng kha Pasaltha Nghaka hnuk thla tu Sihal ngei kha a ni tih na a nia, Pasaltha Nghaka hian a lo that zawk a ni ngei ang le. Pasaltha Nghaka mihring a rawn in let mek melh zawk pah chuan a rem dan dan in Sihal ho lam ah chuan a Thalfang chu vawikhat ah Pahnih zel in a thlawh chhuak fur fur a. Chung a kah hliam ho chu tuan rang leh hrawl em em mai, a ngho hmang thiam bawksi Pasaltha Tlailiana chuan a ngho sei zet chuan a lo phin buai buai mai a. Rei vak lo hnu ah chuan Sihal Pakua(9) vel chu Kawrte kam zawl ah chuan an thal phung mai a. Pasaltha Tlaia chuan mit meng sen rum chung a Hniara lam rawn pan chhut chhut in a phit dut dut bawk a. Thlang lam a tang a chhum rawn zing muai muai chuan a rawn khuh deuh cham cham mai bawksi. A mah a hrawl in a dum runa a mit sen rum mai nen phei chuan a va han rapawm ngai ve le. a zawn a rawn thlen chuan Pasaltha Nghaka chuan thei leh thei lo a, Hniara lo ban in a rawn mit mei zauh a, chu chu hrethiam vat in Pasaltha Nghaka chu Sanghal hrawl zet mai Pasaltha Tlailiana chung ah chuan a lawn tir nghal thuai a. Hniara pawh chu chuang tur in a han ti a mahse,' kal ru in hnung ka lo veng ang." a tih tlat a vang chuan an thian te Kunga leh Chhinga awm na lam ah chuan a tlan chho nul nul a. Muang chang leh fimkhur tak a kal in a chho ve bek bek a.
.
.
.
A thian te a han fin hma chuan thawm a hre leh tlat mai. Engdang ni lo in a thiante awm na lam a tang a Sanghal leh Sihal te thinrim in hrosa thawm chu a ni. Hmanhmawh taka a thiante awm na lam pan a tum mek lai chuan, a thlang lam Kawr sir a tang si chuan thawm a lo ri phei buan buan a, rang tak a hawi in a Thal chuan thawm lo chhuah na lam chu a tin nghal vah a. Chu thawm chu rawn hnai zel in Hnahthial buk kar a tang chuan kawrte rawn zuan kan zawk in, a Sazuk Pabuanga ngei mai kha a rawn in khawh chhuak zawk mai le. Chutia rin loh leh beisei loh lutuk mai a Pabuanga a hmu thut chu a lawm ngei mai, nui deuh sak pah in a Thal chu a la thla a, Pabuanga pawh chuan a rawn pan nghal var bawk a.' Thiana leh ka van ngai che ve le. A hun tak ah i rawn thleng a ni." Tih pah in Pabuanga dar a puan in bat chu la thla in a Thal Parvuli pek ngei mai leh Thalfang sawmnga(50) vel a dah sa chu a la chhuak a, a thal hman lai zawk chu tel tha leh in a bat leh a. Thalfang chu a hnung lam a apai ah chuan a khung sawk sawk a, ruahman na thar leh hmanraw thar nen heng Sihal mak leh koham zet zet hi phin darh vek tum in Pabuanga chung ah chuan a lawn nghal thuai a.
a thian te awm na chu sir zawng a hel in a awm na mual a tang chuan tlang dung tan zawng in Pabuanga chu a tlan tir zel a, thui ve deuh tak an tlan hnu chuan a thiante pawh an hlat tawh ang reng viau mai. Mahse muangchan chi a ni bawk si lo, hmanhmawh ang reng tak chuan a thiante awm na lam chu kualkawi deuh hlek in an pan leh a, rilru a hmanhmawh tawh bawk a Pabuanga chu a tlan chak par par ngei mai. Ramhrui hnawk leh thing zar hniam deuh te chu an su mai dawn a a hriat lai in, a kar ah te chuan engtin emaw ni Pabuanga chu a leu lut zek zek mai a. A ki hreu bum mai te chu hruizam hnawk a a tan mai a lo hlau thin a, mahse a ki te chuan buai na pakhat mah an thlen pha hauh lo. A ke chak tak hmang chuan rei lo te ah a thiante thawm hriat phak na chin ah an ding vang tawh a.
.
.
.
Fimkhur tak si chak tak si chuan Pabuanga chu a in khawh zawk zawk a. a mit chuan hmun tin a melh a, a beng chuan thawm danglam deuh hlek chu a thliar hrang nghal zung zung bawk a. Chutia an thiante awm na lam an hnaih zel lai chuan Sanghal Pakhat ngek rawng rawng thawm a lo chhuak a, chu veleh Sihal be-leuh deuh tuar ri in a zui leh nghal zat bawk a. Chutah zet chuan a ai chak a tlan in, a thiante chu an hnaih nghal ruak a, Chutia chak zet a an tlan puat puat lai chuan a mit chak tak hmang chuan an sir chhak lam a tang a Sihal rawn zuang zawk chu a hmu vuai a, chumi rual chuan kun nghal zawk in, a thal chu a kuai kul pawp a, a kun zeuh avangin a rawn zuan thelh tu Sihal rawn hawi let leh chiah chal ah tak a thalfang chu a thiat vah a.
a Thalfang bur rik chhak rual chuan, chu Sihal chu hniak pawh phawi eih lo in a let nghal tawp mai le, a Thal thar a han hmang leh zet chu a nuam danglam ngei mai. Lasi tena an duh thal a abik tak an lo siam kha a ni tlat a, a kah pawh a na narawh e. Sihal pakhat a kah tluk tawp rual chuan a Thal hrui ah chuan Thalfang Pahnih(2) hmet bei leh nghal in kuai kul zawk pah a a hnung lam hawi a tin chu a rual nghal zat a,
an hnunglam a tang a rawn um tu Sihal pakhat chu a awm leh a mit ko a Thalfang bur vuh chuan a tlan lai chu a tawp tir chiang khawp mai. a thiante chu an lo che hlei thei meuh tawh lo a, tlan kual zawk zawk pah in, a Thalfang chu a thlah zawk zawk a. Chutia tlan kual pah chuan Sihal thi tawh taksa a a Thalfang bur vu ho chu a rem rem a phawi pah zawk zawk bawk a. Sihal ho chuan an tam hneh bawk a an tan han chet vak ngaihna a awm lo tan hle mai a, a thiante lah an hliam nasa tawh in an thi phung tawh mai a, an chau tan hle tih pawh a hre mai.

Kunga chu Mihring a in let in, thi hnuang chung chuan a silai chu a kap puak ve dur dur bawk a. Pasaltha Nghaka pawh a khingkhang ruh auh vang in leh a kaiza tha pawrh tuam vang chuan Sanghal ah pawh a chang thei bik tawh lo tih hriat zet in midang te thlazar hnuai ah chuan a mu dang bal mai a.

Rei lo te hnu ah phei chuan nikhaw hre lo in a let reng tawh mai a. hniara pawh chu a rawn zuan fuau fuau a, an Ngho hriam tak chu la tawng lo mahse la, an tin hriam tak lak ah erawh chuan a him reng thei bik lo. a dar leh a mal vel chu a thi ve hneng hnuang tho mai. Mahse Sazuk liantha zet chak tha em em mai tlan kual zawk zawk chung a chuang chu an rawn zuan fuh hlei thei bik tlat lo. Hniara lah in a Thalfang chu vawikhat ah Pahnih zel in a thlah awl bik bawk si lo. Ni pawh a hniam tawh hle mai a Sihal ho lah chu an tam telh telh emaw tih mai tur an ni si. Sihal ho chuan lo ngur chhur chhur pah in, an din hual thap a. hniara te ho chu a lai ah an theih ang ang in an in hrosa ve bawk a.

Pasaltha Nghaka lah biak theih a ni tawh si lo, Kunga lah chu sanghal ah pawh chang thei tawh lo in Silai a hum thei tawk tawk chauh a ni tawh mai si. Pasaltha Tlailiana leh Thanchhinga chu an la zam lo nasa tih hriat zet in an la phit dut dut a, an tep chuap chuap mai bawk a, mahse tun ah chuan Sihal ho in an tam hneh bawksi a vang leh an in hliam nual tawh bawksi a vang chuan thingzik bul a zawng dan ang chauh an ni tawh. Sihal ho chu thal ve pheng phung mahse sawmpanga(15) tha zet chu an la ni ngei ang, an tan chuan beisei na a chau rau tawh hle mai. Pabuanga pawh a himpial tawh bik chuang si lo.
.
.
.
Chutia bei nge sei run dung, thih pawn ruam khat ah, dam pawn tlang khat ah ti a an hmelma, an luruh sehkeh chak tak te, in ring tak a an hma chhawn ran lai chuan Ni tla tur eng sen phut thing lian tak tak kar a chulai ngaw a rawn in khawh lut nen a in hmeh em em mai chuan Hriangmual Ngaw chhip lam ah chuan Sihal a rawn U ta raih mai le. Chu thawm lo chhuah na lam chu beng khawn deuh hra in Sihal ho chu an tim deuh nghal dui mai a. Chutia Sihal U na lam a tang chuan an lam pan in thawm a rawn hnai zel a a ri erawh a ring hauh lo. Sihal rawn hual tu te pawn an beih tum lo a thawm lo hnai zel an ngaihchan thap lai chuan hnim pik kar a tang chuan Sihal Var nalh zet mai liantha thelh thawlh tak mai a lo chhuak zan zan a, a sir leh lam ve ve ah chuan Sihal dum lian zet mai meng sen rum Pahnih hian kun deuh chhar chung in an lo zui zal zal bawk a. Chung Sihal rawn hual tu te chuan an zah na lan tir ni awm tak in, chu Sihal var lam hawi chuan khup deuh zul chung in an kun chhal hlawm a.
.
.
.NB.....He thawnthu hi...Youtube lam ah, afull in dah tawh a ni a, ngaithla duh tan ngaithlak theih in a awm e....
.
.
Thil awm ang lo tak tak leh mak pui pui hi a lawm thawnthu ti thawnthu tu, kan bengkhawn hru thin chu. Sihal te, Sanghal mihring tih vel hi awm ang lo in ti mai thei a mahse Sakei mihring(keimi) te pawh an awm ang khan Sanghal mihring ka awm tir ve tawp mai a. Awihawm loh leh ngaihnawm loh phah a nih chuan min hrethiam dawn nia.

Link:
BBcode:
HTML:
Hide post links
Show post links

Local Advertisement

MOBILE SIAM ZIR DUH TAN!!!

Tech-Inn Mobile Repairing Traning Centre, Bazar bungkawn

Kum tin mi za chuang eizawnna kan siamsak a, Eizawnna tlaka thiam turin kan zirtir thin

Mizorama mobile siam zirna hmasa ber changtlung ber kan ni. Hrechiang duh tan Contact : 9612099411 / 9862016122


Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » May 31st, 2020, 4:27 pm

Sazuk Pasaltha

Bung 12-na

Ziaktu - Simon Da Gunner
.
.
Chutia Sihal Var a lo lan a, Sihal rawn bei tu te an in thlah dul tak ah chuan, Pasaltha Tlaia te pawh chu an in thlah dul ve ta a, mihring ah lo chang in, Thanchhinga nen chuan an la thinrim hle a ni tih hriat tak in an la in hum ruh tau mai a.

Chung Sihal dum Pahnih te chuan Sihal dang ho chu an ngur chhur chhur lai chuan hlauh hmel tak in Sihal dang ho chu an tawm im chawih chawih mai a. Mahse an zing a lian fal tak mai a dang ho hruai tu ni awm tak dum run ve tho pakhat chuan chung Sihal dum te rum chu engahmah a ngai ve tlat lo.
Sihal dang te ngur chhur chhur pah chuan, rang zet a an hma lam a rawn zuan phei chu a rual a, Hniara te ho pawh chu an lo in ring nghal thap a, mahse chutia Sihal dum an lam a arawn zuan phei zawk rual chuan, an in kar ah tak Sihal dum pahnih mit sen rum te chu an lo tla zep nghal vat in.
In hma tawn chuan an in ngur chher chher a, mahse Sihal dum a dang ho hruai tu chuan, a hlau miah lo mai, rum khum ngul ngul in, a mit dum chu a rawn sen phat mai a. midang ho chuan mak ti tak in an en thap mai a, chutia an mahni chipui te ngei that tu te, a han hum tlat mai chu Hniara chuan a ngaih na a hre lo hle mai, Pasaltha Tlaia te a han en a, an hmel lan dan a tang in an ni pawn an hrethiam bik lo tih a hre mai.
Sihal dum pathum te chu in hma tawn in an ding ran a, Pahnih chuan an thlavang hauh in, an hma ah ding in Sihal dum lian zet mai, mit sen phut mai chu an hma chhawn ran a. Mahse an hlau nge an zah vang zawk tih pawh an hre lo, an hma chhawn mek Sihal dum chu a rum ngul ngul a, amit a rawn sen ram khan chung sihal dum pahnih(2) te chu an khup deuh tlat, mahse kal sawn erawh an tum chuang hauh lo a. Chutia in hma tawn a an din ren rawn lai chuan, Sihal var chu zawi muang in a lo phei zan zan a, chu Sihal dum pakhat chu ngur chhur chhur in, a mit chu a rawn hring pup mai a. Chu tah zet chuan Sihal dum lian tak mai chu a khup zul zul tawh mai, a thuih hruai ho te nen chuan tlang chhip lam pan chuan an lim chho nghal zut zut a, rei lo te ah an pil bo nghal duak mai a. Chutia Sihal dang ho an pil bo zawh tak ah chuan, Sihal var nalh zet mai chu Hniara lam hawi in muang chang in a rawn hawi a, amit hring pup chu muang chang in a reh raih raih bawk a, Sanghal ho laka hniara'n chhan Sihal var kha chu, tuna kla hma a ding mek hi a ni lo tih a hria, tun a a hma a ding hi chu a lian zawk tlat, bak ah an lu awm dawn leh an mit men dan tlem in a dang lam bawk.
Sihal var in an lam a rawn hawi chuan Pasaltha Tlailiana chu a rum nghut a, 'tun ah chuan engkim a nih tur ang a ni zo tawh, engmah hi siam that theih a ni tawh lo ang." ti ram hmak in Pasaltha Tlaia chuan thawk a han la hawk a.
Chutia Pasaltha Tlaia'n Sihal tawng thei hlei lo a bia chu mak ti tak in hniara chuan a lo en renga a, a thu sawi te lah chu enge a awmzia a hre hek lo.
Sihal te chuan an hre thiam ve ani chek ang chu an kun lap a, pawi ti tak hmel an pu lehnghal. Chutia Sihal ten Pasaltha Tlaia tawng hrethiam ni awm tak a an awm te hlei hlei chuan hniara mak tih a ti zual hle mai.
.
.
.
Kunga rum deuh hak a hriat rual chuan hawi phei pah in, Pabuanga chung a tang a chhuk leh Kunga lam pan chu a rual nghal a. Kunga chuan thei leh thei lo in, mut rem a lo tum a, kunga bul a thlen chuan rang taka pui nghal in, a thisen chhuak te chu tih tawp sak a han tum a. Chutia Kunga a buaipui lai chuan,'Engmah a sawt tawh lo. Se bo hnu a se kawng khar tum ang vel chauh a ni. Hei kan thian te an hliam nual a he lai hmun a kan awm rih deuh a ngai a nih pawn buai na dang min siam belh tawh loh ka beisei. Mahse chutiang thil thleng tur i dang thei lo a nih chuan, zan in la la hian a tawp kan thlen a ngai ang, mahse chu chuan hrin chhuah a nei ngei bawk ang." Pasaltha Tlaia'n a tih zawh chuan Sihal var chuan hrethiam ni awm tak in a mit a chhing sak a. Tlang chhip lam pan chuan a dawk chho nghal zawk a, Sihal dum pahnih(2) te pawh chuan zui nghal in, an liam dawn chuan Sihal var chu Hniara lam rawn hawi zawk in, Tlang chhip lam pan chuan an lim chho nghal zawk a, rei lo te ah an pil bo nghal zat bawk a.
Chutia Sihal ho an pil bo tak ah chuan Pasaltha Tlaia te pawh in thlah dul in, Kunga leh Pasaltha Nghaka te chu an han buaipui nghal zung zung a, mahse Pasaltha Nghaka erawh chu a harh thei tlat lo. A hliam chu a na em bawk a ni, an din hmun in zir miau hek lo le, Pabuanga chung ah chuan thu in Kunga chu a hma ah Hniara'n a pawm a, Pasaltha Nghaka chu Thanchhinga chung ah Pasaltha Tlaia'n a pawm a, an piah ruam ah chuan tui te pawh a awm ring in chu lam chu riah nan ti in an pan ta hlawm a.

an thlen phei chuan an rin ang ngei leh an beisei ang chiah, in Kawr a lo awm a chutah chuan tui a lo luang ri her her a. Pasaltha Nghaka leh Kunga chu rem tak a mut tir in, an hliam leh thisen khar eu-uang te chu an han sil fai sak sawk sawk a. Tumah han awl theih ni hek lo le, khua lah chu a thim tawh bawksi, Pasaltha Tlaia'n mei te nun in Chhinga chuan changel hnah sat teuh in an Panga(5) leng tur tawk vel a thing sawh phun sawk sawk in changel hnah chu a ban leh a, achung ah te a phah zung zung a. Changel hnah ro te chu la khawm in buk chhung ah chuan a chap darh nuaih bawk a, Pasaltha Tlaia'n a rem dan dan a pui pah bawk in, rei lo te ah an Panga(5) leng tur tawk vel buk chu an zar peih thuai a.

Hniara pawh Pasaltha Tlaia tirh ang in, an awm na bul kawrte chu zawh thla in "thalteh kung hi vahrit in kai nan an hmang duh sia" ti in a ding lam sir Thalteh hmun ah chuan a kai phei ta a. Rei zawn pawh ngai lo in, a rin ang ngei chuan Thalteh kung sang vak lo a Vahrit nu lo kai vang mai chu a hmu nghal mai a.
a Thalchu kuai kul fan fan in, chu Vahrit nghawng ah tak chuan a Thalfang chuan a thil tlang zawk a, chu Vahrit pawh chu rawn vir thla nawk nawk in, a lo bawh thuai a, lei ah vawi hnih(2) vel a vawm thum dup dup hnu chuan a zal ta riai riai a, an thawm vel ah chuan a piah lawk a Vahrit nu leh pa lo kai chu an thlawk phurh mai a, a nu zawk chu thlawk thui lo in a piah lawk zapanhlo bawn luk chhung ah chuan a thlawk lut a, Hniara pawh chuan a veh phei leh nghal thuai a. Zapanhlo lah chu a buk tha bawksia hmuh a har zek mai, rei ngial a thlek kual hnu chuan, a mawng lam a hmu thei hram a, a taksa dang hmuh theih miau hek lo le. A mawng a chuan a han kap leh zawt a a ngum lam ah tlang chho in a rawn vir thla leh nghal nawk nawk a, rang tak a lo man nghal vat in, Vahrit pa pawh chu zawng buai duh tawh lo in, a thian te chu fin tur in a kal na ngai ah chuan a let chho leh thuai a.
.
.
.
Vahrit pakhat zawk chu hem hmin in, pakhat mau thei ah an chhum a, buhfai chhum tur nei hek lo le. Vahrit sa chu an tam hnem vel ta mai mai a. Kunga pawh chu Vahrit tui hang te an in tira a muhil nghal bawrh bawrh a, Pasaltha Nghaka erawh mihring an in chan lo mai ang tih hlauhawm khawp in a chau telh telh mai a. Pasaltha Tlaia chuan chutia a thian tha ber mai khawi kip a lo thurual pui thin, nikhaw hre lo leh mihringa in chan loh mai hlauhawm khawpa a awm chu a thinrim in a in hrosa leh tun tun thin bawk vei nen, khang thil thleng te khan rah duhawm tak a chhuah dawn lo tih chu a hre chiang khawp mai, Pasaltha Tlaia chu a thianpa bul ah chuan a thu run a, a ma hriat tawk lek lek in a phun leh bul bul thin a. Chhinga nen chuan an mei chheh eng teng teng bul ah chuan thu in, thilawm zia leh thil kal vel dan te chu Hniara chuan a zawt sep sep a.'

Kan khaw mihring tam zawk hi chu Sanghal mihring kan ni a, hun rei tak chhung chu Mihring ang chauh in kan lo khawsa tawh thin. Kei ni hriat phak ve chin ah pawh ral hmachhawn tur ang zawng chuan kan hnung deuh a Sihal te an lo lan kha, Sanghal a kan inleh awm chhun a ni. Nang pawn i la hria a nga Sihal var i lo hum tum kha ral hmachhawn a Sanghal a kan in leh hmasak ber a ni. Ka pu min hrilh dan chuan Sihal te nen hian hun rei tak thulai la in kan lo in rem tawh a ni awm e. Tumah in tlawh pawh lo tur leh kan ram hauh chin ah pawh a tul tawp a nih loh chuan tla lut lo tawn ve ve tur in thu an lo thlung a, mahse chu thu an lo thlun tawh chu Sihal ho khan an bawh chhia a." Chutia Thanchhinga'n thil awm zia a sawi lai chuan lo pawt chat in,' a nih chuan Vawin ah khan Sihal ho khan in thu lo thlun tawh chu bawh chhia in kei ni kha min lo bei a ni maw. Pasaltha Tlaia'n Sihal var bul a a thil han sawi vel dan a tang khan ka hrethiam ve uarh uarh mai." a lo ti a.

Thanchhinga chuan a lu thing deuh mut mut in.' Ni lo e, vawiin kha a ni lo. Sihal var i lo hum tum ah tawh khan a lawm. Kha Sihal var khan kan thu thlung chu bawh chhia in, a Saza um lai kan ram chhung ah a rawn zim lut a chu chu midang in lo hmu in min rawn pun hlawm a, a hnu chhui in kan um nghal char char a, chuan kan in tawng ta kha a nia." Thanchhinga thusawi chu ngaihtuah zui vang vang in thil kal dan vel chu a hrethiam ve zel a.' Khatia Sihal var i lo hum tum a Sazuk chung a i chuang ka hmu kha mak ka ti lutuk a sin. Nangni ang ho hi in rem zo tawh ni in ka hria a," Thanchhinga'n a tih chuan a beng a verh deuh zak mai." Kei ni ang ho itih chuan awmzia a nei em. Kei ni lo Sazuk chung a chuang thin i hria a mi. A awmzia chu ka chipui te khawilai ah emaw chuan an la awm ve a niang maw." Chhinga en pah chuan a lo ti vat a, 'Hre chuang lo e, ka pu in a sawi thin a lawm.

Khatia rem na thuthlung an siam tak ah khan tu te mah in run leh in beih awm tawh lo in, mihring pangngai ang tak in, mihring kan nihna ang chauh a khawsa chho in kan awm vek a ni awm e. Ka pu sawi dan chuan nangni ho hi chi tlem te in ni a, mahse ral beih leh indo in thiam in inchak hle ni in a sawi." A nih chuan ka chipui te chu an la dam ve hlawm a ngem le, khawi lai ah tak emaw chuan an la awm ve ngei ang "engtik ah emaw chuan ka la zawng chhuak ngei ngei ang" ti in Chhinga thu sawi lai ngaithla pah chuan a rilru a siam sauh sauh a.' A nih leh Sihal var khan a sa um lai a rawn zim lut palh a ni mai a. Engmah pawi khawih a neihawm ka hre hek lo, a hma ang a in rem tak leh tha tak a khawsak ho chu a la theih mai lo emawni le, a hrim hrim in engtin nge Pasaltha Tlaia tawng kha Sihal khan a hre thiam a va ang ve." Thanchhinga en pah chuan Hniara chuan ati a. Chhinga'n chhan tum a, a kâ a an zuau lai chuan.
.
.
"A theih loh engtik ah mah khang Sihal vervek leh rinawm lo ho nen khan kan in rem tawh ngai lo ang. Tumah in Mai leng an um ngai lo, tihpalh vang a kan ram a rawn lut a ni lo. Tihpalh vang a min rawn bei an ni hek lo, tun ah chuan mit ai ah mit kan ti tawh ang. Ka Thian tha ber, ka unaupa ang tluk hial a ka lo en thin Nghaka thisen hi a thlawn in a luang lo a nga, a thisen mawh hi heng Sihal ho hian an phur ang." Pasaltha Tlaia chuan an hnung a ding tau chung chuan a rawn chhang a.
Rang tak in Thanchhinga nen chuan Buk ah an tlan lut nghal vat a, Pasaltha Nghaka chu nun na nei tawh lo tih hriat tak in a lo mu dang bal mai a. A awm lo hran lo e, Pasaltha tu tan pawh hetiang khawp a hliam nasa leh thisen chhuak chu dam chhuah pui chi a ni mawlh lo a ni.
Chutih rual in Pasaltha Tlaia thinrim na pawh chu thil awm lo a ni hauh lo. Pasaltha Nghaka nen hian A tak leh a mei ang mai in an in zui chawt thin kha a ni si a. Pasaltha Nghaka ruang mu zawi reng mai chu Ngawi reng in an thlir tlawk tlawk ringawt mai a, an thawm vel ah Kunga pawh rawn harh in chutia Pasaltha Nghaka bula an ding ngawi thap chu a ngaihna hre lo zet in a rawn thlek hu hu a, thil awm zia a han hriat meuh chuan Kunga mi ngawi chawi leh mi in thlahrung tak, luhlul em em mai ni thin kha inseh ruh teuh chung in, a mit tui a khap per ve sak sak ta mai.
Pasaltha Tlailiana chung ah Pasaltha Nghaka ruang chu a vang zawng a bawhkhup tir in Chhinga chuan a tlak mai loh nan a veng bawk a, hniara'n Pabuanga chung ah Kunga chu a phur bawk a, a zan a zan in Pasaltha Nghaka ruang chu thinrim in seh ruh teuh chung in khaw lam an pan pui nghal nal nal a. A khat tawk in Pasaltha Tlaia leh Chhinga chu an han in thlak leh thin bawk a, chutia zan khua a hmanhmawh taka an tlan tak ah chuan a tuk chaw hma her vel ah chuan an khua Nghalbual khaw lungdawh chu an chuang chhuak ve ta hlawl mai. Pasaltha Tlaia te chu mihring ah an in let leh in, Lungdawh ah chuan an han thu vang vang a, tu a mah chuan tawng zai reng an rel lo.
Ngawi reng a an thup thap lai chuan, 'Chhinga nang han tlawm ngai la, kan chanchin hi Lalpa hnen ah han thlen hmasa la a va tha awm ve." Pasaltha Tlaia'n muang ban charh a atih zawh chuan Chhinga chu tho nulh in, Khaw lam pan chuan a kal nghal nul nul a, Hniara pawh in Pabuanga chu ram lam a tirh let tum in a Thal Parvuli min pek zawk chu puan in a tel tha mawlh mawlh a.' Hniara ka lo ngaihdan ang a tih i tum a nih chuan a tul kher tawh lo a nia. A hma a tang in i chanchin leh i nih na hi chu kan hre tawh a lawm, kei phei chuan ramhnuai a thi chhawng a ka hmuh lai a tang tawh khan ka hre tawh che a sin. Nang pawh in kan nihna dik tak i hre ta bawk a tu a mah in thup buai ngai lo in inpawh tlang tak in kan awm thei tawh a ni lawm ni." Pasaltha Tlaia'n a lo tih chuan, a ngaihtuah vang vang a "hetia in thup buai reng ai chuan a hahdam thlak ta ve ang, kei pawn engkim ka hre ve tawh bawk a lawm" ti in, a Pabuanga pawh chu ram lam a tir liam duh tawh lem lo in khaw chhung ah chuan hruai luh a tum ve ta a.
.
.
.
Khaw chhung lam a tang chuan Lungdawh lam pan in thawm a lo ri phei mam mam a Tlangval leh pa, khawchhung a mi thil awmzia leh thil chin chang hre duh hawk dak zual deuh te chu an lo lang nghal mai bawk a. Chutia an chanchin khaw mi ten an han hriat meuh chuan Nghalbual khaw pum mai chu a deng chhuak rang narawh e, An Pasaltha Tlawmngai, zaidam leh an thlamuan pui thin Pasaltha Nghaka'n mual a liam a ni a, mipui te lungngai leh a then lo in sut hlawp hlawp mai te chu an dem awm hran loh e. A tu a te mai pawh chuan an sun in an ui em em mai a, Chu mi kar ah chuan, an Lalfapa in Sazuk lian zet mai a han kai chu an en hrek hrek hlawm mai a. Lal leika pui a aruang tlangval ten an nghah pawh chuan a pa leh a Upa ho te pawh chu thinrim na leh lusun hmel in pawlh niai chung in Pasaltha Nghaka ruang hma ah chuan an ding thap a. lalpa in rilru na leh thinrim in sum tih hriat zet a thu tlem a sawi zawh chuan, Hniara te pawh chu Leikapui ah chuan lawn chho in, a pa leh a Upa te nen chuan in chhung lam ah an in zui lut ta hlawm a.
Pasaltha Nghaka ruang pawh chu an mah ni in lam ah an la thla ve nghal bawk a. Pasaltha Tlaia chuan thil thlen dan kim chang chu, lalpa leh a Upa te hma ah chuan thinrim in seh ruh tun chung in a han sawi dap dap a, a thu sawi kar lak a thawk a han la leh pap pap thin te chuan a rilru nat zia leh a tawrh zia chu a ti lang chiang viau mai, mahse Pasaltha ngang a ni a, Pasaltha Nghaka nen a an in hrawn nasat ngaihtuah in rin ai tak chuan a tuar thiam viau mai. 'Tun ah zet chuan an lo pawr ngam ve ta a ni maw, ka vanglai pel tawh mahse nangni ka Pasaltha te zar ah hian ka la thlamuang in, tun hma ai in kan mi dip a na ang tih ka ringhlel lo e. Pasaltha Nghaka thih sarhu lai em a ralpui rel zawng kan Pasaltha Thlarau pawh a zah awm e, hun han kal deuh se la engtiang tak in nge kan er let ang tih chu kan rel tha leh zawk dawn nia." Ti a lalpa in a sawi zawh chuan thu dang em em sawi tawh lo in a Upa te nen meuh chuan Pasaltha Nghaka ruang awm na an in lam ah chuan an in zui chhuak ta hlawm a

Hniara'n apa thu sawi te chu a ngaihtuah let neuh neuh a 'ka vanglai' a tih te leh a thu sawi lai a a mit rawn sen deuh ram ram mai te chuan, a thil ngaihtuah chu a nem nghet thaw khat viau in a hria.

Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)