THANGNUNNEMI BY Harmachis Arman

[Ngaia]

THANGNUNNEMI I

Partei nen dil kam kawnga muangtea kal a kan titi dun lai chuan hmeichhe rak deuh chul ri chu kan hria a, chu lam chu kan en vat a. Tui tla an awm a ni tih an awmdan atang chuan kan hrethiam nghal mai a. Ka tlan vat a, thuamhnaw pawh inphelh hman lovin dilah chuan ka zuang lut a, li mawng lam pana tla mek hmeichhe pakhat chu ka hmu thuai a, a hnunglam atangin ka pawm chawt a. Theihtawp chhuahin tui dung chhir an tih ang hian ka hleuh pui a, reilote ah boruak hip theiin ka awm ta a. Ani erawh chu a zawi ngiai a. Dil kam lam panin ka hleuh pui vat a, dil kam ka thlen chuan ka mut tawp a, a piah deuh ah chuan ka hah lutuk chu ka mu zangthal nghal a, ka thaw chu ka ka ah a lenglo lam a ni. Ka va melh leh zawk a, an lo buaipui mek a ni tih ka hmu a. Tui tla ka chhan chhuah chu tunge a nih a, eng ang hmelpu nge a nih ka hre miah lo.

Minute hnih vel hnuah chuan ka zia awm ve mai a. Ka thu hlawl a, ka kiangah Partei leh Roberta an lokal a, “I ti tha hle mai. Ani pawh a zia awm tawh e,” an rawn ti a.

Mimal ta English medium school ah ka inhlawh ve a, zirtirtu hna hi nuam ka tih leh ka tuina a ni a, hlawh a tam vak lo na a, engemaw nghah nan a tha riauvin ka hria a. December ni 19 a ni a, ka thawhpui thenkhatten Tamdila kal an rawt a, kan tlawh a ni. Ka vawikhat kalna a ni a, nuam ka ti a. Dil tui fim hring deuh nghalh mai te chu hmuhnawm ka tiin a boruak hrim hrim chu a thianghlim riauvin ka hria a. Ei leh in tur te chu kan ken te chu Mawia leh Puitei ten an buaipui a, midang an mamawh vaklo bawk a,midang chu lawngah te an chuang a, Partei nen erawh chuan dil kama kal kual vel chu nuam kan tih zawk avangin kan kal kual a, kan titi dun a ni a. Mahse tui tla chuan kan titi kal lai chu a rawn ti tawp ta vek a ni. Tui tla ka chhar leh a thiante chu chumi nia picnic a lokal ve tho an niin ka hria a, an motor ken atangin hausa fa ho an nih ka ring a. Rei vak lovah anni chuan Tamdil chu an haw san ta a, an sawi dan chuan Saitual damdawiin an pan dawn ni awm tak a ni.

Dar thum ah kan inko khawm a,kan vaiin 10 kan ni a, tingtangte kan keng ve bawk a,Krismas hla, “Aw Bethlehem ka ngai a che, Berampute ram tuanna....” tih te leh a dangte kan sa a. Partei chuan zai turin Sir Mawia chu a sawm ta tlat mai a, midangte chuan mak an lo ti hle a. Kan hriatah a zai ngailo bawk nen, kan vaiin kut kan beng a, Partei chuan C.Vansanga’n nalh zet maia a sak thin, ka hla duh em em mai, “Buannel ramdai,” tih hla chu a thlan sak a. Tingtang chu a la a, a herh tha vel a. Chutah thinlung leh tih takzetin a zai ta a. A hla thu ah chuan ka thinlung leh rilru zawng zawngin ka lo cheng a, kan awmna hmun chuan a zir bawk si a. Pasaltha, a vanglaia sa pel a, sa tam tak kap a, ramhnuai hrut vel thin, a tar tak avanga a chak em em ti thei tawhlo chu ka mitthla ah hmu chung zelin ka lo ngaithla a.

Tunah zawng maw hai ang tarin,
Vanglainite an chuai ta;
Buannel ramdai kawlvalenchham,
Lai fei chulin ka thlir vawng vawng.

C.Vansanga ai chuan a aw chu a lian hret a, chhete hian a tham deuh bawk a, chu chuan engemawti tak hian min hneh a, zai thiam ka ti takzet mai. Ka lunglen a kai tho ta riau mai a. A zai zawh chuan kan chibai sap sap a.Tichuan, hlim takin ei tur kan ken te chu kan ei a. Zawlkhawpui lampanin kan haw leh ta a.

Sikul kan chawl a, kan khaw lamah ka haw vang vang a. Ka chhungte thuamhnaw tur te ka hawn ve a, an lawm tlang hle a. Kan khua ah chuan in 150 vel ka awm a, Aizawl atangin km 200 aia hla deuh hret a ni. Thian ka kawmte chu Biakthanga te, Vulmawia te leh Rothanga te an ni a, anni nen hian tette atanga inkawm, in ngaina, inthlah ngailo kan ni a, kan palia kan awm khawm tawh hi chuan tumah dang kan ngai lo. Kan inlungruallohna pakhat chiah a awm a, Vula leh Rova chu Presbyterian kohhran an ni a, kei leh Biaka chu UPC kan ni. Inhnial chang kan nei thin a, mahse kan in kawmngeihna chu a danglam phah chuang lo.

Krismas kan hmang zo va, kumthar ni 10 zan dar 9 ah Pi Lianzovi a boral a. Kan thianho chuan an in lam chu kan pan vat a. Kawtah thingpui lumna tur te kan buatsaih nghalin, YMA ta dekchi leh ketli leh no te kan lam khawm nghal a. Tlangval thenkhatin thutthlengsei an pu bawk a. Dar 11:30 ah chuan thingpui chu kan peih a, nula pathum kan ngam tlak deuhte kan ko chhuak a, anni chuan sem mai tura kan peih sa chu an sem ta a. Zai an chawl a, Pi Lianzovi fapa Pu Chawngthuama’n a nu nat dan leh thihdan te leh a chanchin tlangpui te a sawi a. Hla a thlang nghal a. Khuangputen an la a, an sa dup dup a. A kar laka tapri lo awm nen chuan a in chawih mawi hlein ka hria a.

No ruak la khawm turin bucket nen ka lut a, ruang kilho bulah chuan ka kal a. Chhuata no an lo dah khawm chu bucket ah chuan ka dah lut a. Ka dah lut zo chiah tihah chuan, “Hei pawh aw,” nu pakhat hian a rawn ti a. Ka hawi chhuak a, Pi Lianzovi ruang veilam sira hmeichhe pakhat lo thu, ngawi renga Pi Lianzovi lo en lai mek chu ka hmuh chuan ka nghing deuh dat hian ka hria a. Chutiang ang reng renga hmeltha chu ka la hmu ngai lo. Mikhual a ni ang tih ka hre sa a, a chhan chu kan khaw mi chu hriatloh ka nei lo a ni.

Khawfing chah hma lawkin thingpui chu kan sem leh a. Khua a lo var a, kawl a lo eng zual zel a. In lampanin kan haw ta a. Chawei kham veleh thlanmual lam kan pan a, thlan lai chu kan thahnem bawk a, kan lai zo hma hle a. Vui hun nghakin thlanmualah chuan kan awm zui nghal deuh vek a. Ka rilru ah chuan Pi Lianzovi ruang kil vetu kha a cham reng a, tunge a nih han zawh chian vel chu ka chak hle na a, ka zak deuh bawk si a. Tlangval leh pathlawiho chuan an sawi nasa hle hlawm a, hmeltha an lo ti ve hle hlawm a lo ni a.

Chawhnu dar hnih ah chuan mitthi chu an rawn zawn ta a. Hmeltha-i pawh chuan ruang chu a rawn zui ve a. Thlan chhunga kuang an dah luh a, upa in thlahna hnuhnung a sawi lai chuan a chhak thlan lung dawh zawlah chuan hmeltha-i chu a lo ding a, kawr dum a ha a, a inhmeh hle a. Ka en vang vang lai chuan ka rinloh deuh maiin min rawn en a, kan mit a intawng a, chumi rual chuan makti hmel hi a puin ka hria a, engemaw sawi tum ni awm tak hian a ka a ang ziau hman bawk a. Kei erawh chu chhungrilah ka hit deuh mam mam thung a.

Thlanmuala hun an hman zawh hnu chuan ruang zuitute chu khaw lam panin an kal ta a. Thlan vur zawh hnu chuan mahni in lam panin kan haw a, ka inbual zawh hnuah chuan kan kawmthlang huan pal thalo te chu ka siam tha a. Rei pawh ka la thawh hmain ka nu chuan min rawn ko va, in chhunga ka luh rual chuan ka rinloh leh beisei miahloh thil ka hmu a. Hmeltha-i ngei mai chu kan thutthlengseiah chuan tlangval pakhat nen an lo thu dun a. Min lo nuih sak a, thil awmzia chu ka hrethiamlo hle mai a.

A rawn kalpui tlangval ka tih mai chuan, “Kei hi Rinsanga ka ni a, hei hi ka nau Lalthangmawii a ni,” tiin min chibai a, hmeltha-i pawh chuan min chibai a, kei chuan, “Kei hi Lianhnuna ka ni a. Engtiziaa lo leng teh mial nge in nih?” ka ti a, a ngaihna ka hrelo viau mai a. Ka aw te chu a lai ti tih deuh va.

Rinsanga chuan, “ A,ka nau Thangtei hian a hmuh tawh hnu niin a hria che a, chuvang chuan zawt chiang turin kan rawn pan tawp mai che a ni,” a ti a. Thangtei nena kan inbiak dan chu hetiang deuh hi a ni :-

Thangtei : Aizawl ah i awm ngai em?
Kei : Awm ngai e. Krismas hma khan Aizawl atangin ka haw a.
Thangtei : Kumhlui December ni 19 khan Tamdilah i kal em?
Kei : Kal e, engatinge?
Thangtei : Tui tla chhartu kha i ni tiraw?
Kei : Aw ni e.
Thangtei : Khata tui tla i chhar kha keimah ka ni alawm.

Dil kam ka thlenpui khan ka chau lutuk a, ka mut tawp a, midangin an rawn buaipui nghal kha a ni a. A hmel ka hmu chiang lova, a pianzia erawh chu tui chhungah khan ka hmu vuaih hman a, mahse ka chiang hman chuang lo. Mak ka ti hle mai a.

A ding a, min chibai nawn leh a. “Ka thi ngei dawnin ka in hre tawh a. Khatia tuia ka tla kha ka tal buai nghal a, tui ka lem teuhva, ka hak zui bawk a, a thim mup a, a bak engmah ka hre ta lo a. Ka harh leh chuan Dil kamah khan ka thiante khan min lo buaipui a. Ka thaw kha a hah zui deuh bakah ka pum a na deuh va, Saitual damdawiin pan phei vat kha ka thiante khan an rawt a. Kan kal ta mai a. Kalkawnga kan kal laiin engtianga chhanchhuah nge ka nih ka thianten an sawi a. I hnena lawmthu engmah pawh sawi lovin kan awm a.....” a tih mek lai chuan a u Rinsanga chuan, “ Khawia awm nge i nih tih tal pawh an lo zawt si lo va, kan chhungkuain hmuh che kan duh thu kan sawi thin a. Tuna kan hmu che hi kan lawm takzet a ni. Ka nau thi mai tur chhanhimtu i ni Hnuna,” a ti a.

Kei chuan, “A lo nih chu. Lawmthu sawi a ngai miah lo. Chuan engnge i an zel?” ka ti a. Ani chuan, “Ka tha, engmah harsatna ka nei zuilo. I chungah ka lawm takzet zet a ni. Ka nunna chhanhimtu i ni si a,” a ti a. Kei chuan, “Ka lo awm remchang a, ka rawn chhar che a ni mai. Midang pawh awm remchang se, ka tih ang khan an ti ve tho ang,” ka ti a. Ka nu ho chuan kan titi zui a, tichuan min chhuahsan ta a.

“Ka fapa, i lo van ti ropui ve.”
“Eng chu maw Nu?”
“Tui tla, thi mai tur i chhanchhuak a lawm. Pathian hmanrua i ni.”
“Ka lawm e Nu.”

Pi Lianzovi thih atanga ni thumni ah chuan hmeltha-i ka tih mai, Lalthangmawii, ka thiante nen tlema a mizia kan hriat deuh hnua THANGNUNNEMI kan tih tak te chu Aizawl ah an haw ta a. Ka lung a leng a, ka khua a har a, mahse ka thiante chuan an hria ang tih ka hlau khawp mai si a. Kan inbul huan pal te ka thawm tha a, Aizawl ah kal a, class kal leh a hun tep tawh a. Ka awm chhung reilotea tih zawh hman ka duh a. Hna thawk chung chuan hun reilote kan khuaa Thangnunnemi awm chhung chu ka ngaihtuah let neuh neuh va.

Pi Lianzovi thlan nghahni ah chuan kan thian ho chuan thingpui lum leh chet tulna apianga che turin kan kim leh thap a. An chhungkhat hnai nula leh tlangval te pawh an awm bawk a. Thangtei chu a hawihhawmin a fel a, thingpui lum leh sem te chu kan ti ho va. Tlai lam a lo nih meuh chuan kan thianho nen chuan kan in nel hman viau tawh a. A tui tla ka chhar a ni tih erawh chu ka thiante ka hrilh lova, ani pawhin a hrilh bawk hek lo.A nun a nemin a tawng tam lova, thianpa Biaka’n, “Thangtei hi tun atang chuan Thangnunnemi ni tawh rawh se,” a ti a. A nuih a za a, kan ko fiam zui nghal vel a. Kan hlim tlang hle a ni.

Zana khawhar lenpuitu chu kan thahnem hle a. Kan zai thiam bawk a. Kan khuangputen an zir bawk. Ka hla duh em em mai pakhat kan sak phei hi chuan ka meng phal thin lo.

En teh Lalpa kan lenna ram lungngaihna hi,
Thlaler hrehawm a ni;
Thihna hian thian min then fo thin,
I ram thlen hma hi zawng.
Pathian hnena pangchang taka zualkona hla niin ka hria a. Tui tak leh nuamti taka ka zai lai chuan ka han meng a, Thangtei chuan min lo en a, kan mit a intawng a, a nui deuh hlek a. Kei chu ka maimichhing leh thuai a. Mahse hla thu ah ka cheng zui thei ta lo va. Ka mitthla ah chuan a hmel a lo lang a. Aizawl nula, hausa fanu lehnghal, duh tu a hmu hnem hle ang a, keini thingtlang tlangval tan chuan beisei phak rual a ni lo vang tih ka hria a, mahse, ka thinlung chu a hneh tial tial bawk si.

An hawn dawn zan, YMA hun hman zawha rem leh rem lova midang kara, “Hnuna, Aizawlah min rawn zawng chhuak ngei ang che aw.Ka nu leh pa ten an hmu duh che a nia,” a tih chu ka bengah a cham reng a. Tunah chuan Zawlkhawpui lam panin an tlan liam ta a, kan khua leh keini te chu hnutiang min chhawn a, min rawn hre tawh pawhin ka ring lo. Nula hleitling, te chhelo, hmai bial lam deuh, mitmeng mawi tak, ngo lam aia hang lam lek lek, he pan tak ni lo, chhah tak ni bawk si lo, hnar ngul pawh nalh leh dik tak, chapo lo, nunnem si, hawihhawm bawk si, tawngkam erawh thiam lutuk lo, zak zum lam deuh.....THANGNUNNEMI chu a ni.

THANGNUNNEMI II
Aizawl ah ka awm leh ta. Sikul kan lut a, kan tang bawk a, kan tulin kan buai thei hle a. Ka thinlungah chuan Thangtei te zawn chhuah chu ka chakna leh hrehna a inzat deuh reng a, ka hrehna chu a tam zawk deuh a niang, zawn chhuah tumna ka nei ta lo. A chhan chu, a tui tla ka chhar avangin an hnen ata beisei nei ang dawnin ka inhria a, chumi chu remchanga hmanga amah chu beisei ka ang dawn bawkin ka hria a, chubakah chuan mi hausa an ni a, keini thingtlang khuaa seilian, inhlawh chawpa lehkha zir a, BA zo ve hram hram tan chuan an ina lenluh chu thil ngamawm vakah ka ngai lo a ni.
Exam kan zo va, sikul kan chawl ta a. Kan tang bawk a, ka cher deuh sawtin ka hria a, ka rihna pawh kg 3 in a tlahniam hman a ni. Private sikula thawh a, a neitute thawh fuhloh deuh tuka hna atanga chawpchilha thlawn mai theia awm chu thalo riauvin ka hria a. Ka hlawh ka khawl chu la tam thamlo mah se peipun dan dap thain ka hria a. Vawk, tum khata pali panga khar (lei) duh tur ka be lawk a, Pu Rodenga ka be fuh hlauh mai a. Ani chuan 10 aia tam pawh nise a lei nghal vek duh thu leh kan phurh thlen huna dahna tur hmun thlengin min kawhhmuh nghal a. Kan khaw lam panin ka haw vang vang a. Ka thlen tlai atang chuan ka pa nen vawk lei tur kan zawng ta a. A tukah kan zawng chhunzawm a, tichuan ni thum chhungin 7 kan hmu thei a. A man ka pe fel nghal vek a. Aizawla ka inluah lehlam luahtu U Rina chu ka phone nghal a. A pik up nen a rawn tlan nghal a. Tichuan, tlaiah kan load fel vek a, zanah Aizawl lampanin kan tlan ta a. Pu Rodenga chuan a vaiin min lei sak a, a man pawh min pe fel nghal thlap a. A rang thei anga vawk tam zawk la leh thuai turin min ti a.
Ka pa nena vawk kan zawn khan pawisa chu nei ila, sawm chuang lai lei mai tur awm dawnin ka hria a. Chu chuan min tiphur ru ang reng hle a. Tichuan kan khaw lam pan chuan ka tlan leh ta vang vang a. Chumi tum chuan vawk 10 ka hmu thei a. Pu Rodenga chuan min lei sak leh vek bawk a. Nuam ka tiin ka hlim hle a. Ka pa chuan khaw thenawmah pawh lei tur a awm nual a rin thu min hrilh a. Kan chawlh chhunga vawi khat tal kal leh ka duh a. Ka kal leh ta nge nge a. Ka pain min pui a, kan khua leh kan khaw thenawm a mite nen 20 lai kan hmu ta a. U Rina chuan a thianpa a rawn hruai a, an pahnihin min phurh sak a. Tluang takin, pakhat mah sil awng pawh awm lovin ka thlen leh vek a, Pu Rodenga pawh a lawm hle a. Ani chuan, “Sikula i thawh ai chuan ti hian hmun hrang hrang ami la khawm la, keiin ka lo lei sak zel che ang a, i hlawk daih zawk ang,” min ti a. A dik tih ka hria a. Mahse thlatina hlawh lak tur awm chu thain ka hre bawk si a, ka bansan phal rih lova. Sikul luh hmain ni 5 ala awm a, vawi khat chauh kal leh ka duh a. Chumi tum chuan U Rina nen kan kal dun nghal a. Zemabawk dai, tawngtaina hmun kan pel a, Bung bangla kan pel deuh chauh tih ah U Rina chuan a car tape chu zai tir a tum a, a pen drive a hawlh lut dawn a, a hawlh fuh hlei thei lova, a zuk en zawk a, keipawhin ka en a, a motor tlan lai chu a ti zawi chuang si lova, kan han hawi chhuah meuh chuan kawng chin bak kan tlan hman der tawh a. Kan au vak a, thlang deuhva teak thing uipum tiat vel chu kan su dawn ngeiin ka hria a. Hma zawnga su chiah lovin a sir zawng deuhvin kan suin ka hria a. A ri bur a, a thim mup a. Engmah ka hre zui ta lo.
Ka han harh chuan damdawiinah ka awm a ni tih ka hrethiam nghal mai a. Ka in en vel a, ka zun an siak a, drip an khai bawk a. Ka lu chu an lo tuam bur mai a. Ka chal leh ka bek veilam chu a na deuh bik a. Ka awmna chu New Life Hospital a ni tih ka hre thuai a, bed no.406 a ni a, tukverh bul a ni. Ka piah lawkah chuan U Rina pawh a lo mu a, ani pawh a lu an lo tuam ve bawk a. A fanuin a lo awmpui a, a muhil niin ka hria a. Engtinnge kan tlan liam hnu atang khan kan awm tak a, engtinnge damdawiinah chuan kan awm tih chu a ngaihna ka hre lo va. Aizawlah mahnia inluah ve mai ka ni a, ka chhunge pawhin ka chanchin chu an hre miah lovang tih ka ring nghal a.
Nurse pakhat lokal chu ka dinhmun ka zawt a, ka chal leh bek veilamah kutphah bawk vel ve vein ka sawh kak a, an thui a. X-ray atanga a landan chuan ka luruh chhungah chuan engmah thil thalo a thleng lo va, ka taksa dangah pawh hliam ka tuarlo a, vanduai vannei ka ni tih min hrilh a. U Rina chanchin chu ka zawt a, ani chu a luruh a khi deuh ni awm takin a sawi a, kei ai chuan a na deuh a ni tih ka ring thei nghal a. Nurse chuan ka mawngtam veilamah min chiu a, reilote ah ka muhil ta a. Ka harh leh rual chuan perfume rim ka hriat hnu chu ka hnar chuan a hre nghal vat a. Ka men rual chuan ka khum bulah chuan Thangnunnemi ngei mai chu a lo thu a. Mak ka ti hle mai a. Lengzem a lo chhiar mek a. Engti tiha chutia ka bula awm thei nge a nih ka hre thiam lo va, ka zak deuh va, dik tak chuan damlo chung pawhin ka lai (nervous) a ni. Ka che mai ngam lova, mahse ka pang chu a kham bawk si a. Ka chelo thei ta lo va. Chu veleh a Lengzem chhiar lai chu a dah a, min rawn en a. Chuta a nui hmel chu ka mitthla ah a cham reh thei ngai tawh lo.
“Thangte, nang i ni maw?”
“Ni e. Ka lo awm hi i duh vaklo em ni?”
“Chutiang lam pawh a ni lo, mak ka ti em a ni.”
“Thi mai tur min chhanchhuaktu i ni a, ka tan i hlu em a ni.”
“Engtinnge........?”
Ka hmuiah a kut a rawn dah a, ka tawng zel a phal lo. A mitmeng te chu a mawi a, a de ser ser hian ka hria a. Ka khum bulah chuan ei tur leh ka mamawh tur ang thil tha leh manto tak tak tur hi a awm teuhva. Mak ka ti tawlh tawlh a.
“Selingah ka ni fanuin pasal a nei a. Zan khat kan riah hnuah kan zing hawn a, in tlan liam lai kha kan hmu hman chiah che u a, midang punin kan buaipui nghal che u a. Damdawiinah hian kan dah nghal che u a ni. In phone leh pawisa te pawh kan hmu a, i chuanpuipa thil chu a chhungte hnenah kan pe vek a. I thil erawh chu ka kawl a ni. In chuanna motor pawh a chhe vak lo. Ka u ten an buaipui a, nizan khan an hnuk chhuak a, workshop ah an dah nghal a, siam that ngai pawh a tamlo. Teak kung khan a lo dal che u a, in let zui ta lo a ni. I dam leh vat ang,” tiin chanchin min hrilh a.
“Ka va lawm ve Thangte.”
“Keipawh khatianga buaipui thei che u a kan awm kha ka lawm a ni. Ka nu leh pa pawhin an rawn tlawh tawh che a, i mamawh apiang chu tih vek an duh a ni.”
Mut chhuakin min rawn zem chiai chiai a. Thangnunnemi hmel duhawm tak en zel chung chuan ka muhil leh ta a. Ka harh leh chuan tlai lam dar 3 a lo ni tawh a, ka khum bulah chuan Thangtei u Rinsanga a lo thu a. Ka harh tih a hriat veleh min be nghal sawt sawt a. “ In tlan liam lai kha kan rawn hmu hman a. Tutenge in nih kan hre lo. Ka motor ka tiding a, Thangtei chu rang fahranin a chhuk a, a awih teh reng nen in awmna lampanin a tawlhin a tawlh thla a. I hmel a hmuh veleh min au a. Kan motorah kan dah lut che a, i chuanpuipa kha motor dangah kan dah a. Thangtei’n a malchungah i lu nghatin a kuah che a, a mittui a tla deuh reng a. ‘Mama, chak takin tlan rawh, chak takin....’ tiin min tur reng a. New Life Hospitalah hian kan dah lut nghal tawp mai che u a ni,” tiin chanchin min hrilh a.
Thangtei chu tunah khawiahnge a awm tih zawh ka chak a, ka hre duh a, mahse ka zawt ngam si lo. Chutia chanchin min hrilh lai chuan nu, la naupang tak, hmeltha leh piannalh tak hi a lokal a, Rinsanga bulah chuan a rawn thu a. A nupui Miriami a ni tih Rinsanga chuan min hrilh nghal a. Miriami chuan ka chal te chu a rawn khawih a, a kut chu a nel thep a, a lum deuh bawk a. “I khua pawh a sikloh hi. I dam leh vat ang,” min ti a. Eng eng emaw sawiin min fiam pah bawk a, Rinsanga te nupa chuan min tihlimin, ka inthlahrunloh nan boruak an siam thiam hle mai a.Mahse chhungrilah chuan ka inthlahrung tho a ni.
“ Kan haw san ang che aw. Riahpuitu tur i nei tha si a, kan awm ve a phal bawk si lo,” Miriami chuan a ti a, tunge min riahpui dawn ka hre lo va, ka thinlung erawh chuan beisei a nei a, a beisei ngam teuh si lo.
Rinsanga te nupain min haw san hnu rei vak lovah chuan Thangnunnemi ngei mai chu a lo lang a. Ka awmna rooma a lo lut ka hmuh rual chuan ka zak a, ka hlim a, ka lawm a, ka inthlahrung bawk si a. Ka duhthusam ngeiin min riahpui dawn a, aw....na chung hian ka van lawm si em. Mak tak a ni mak tak. Chutih lai ngat chuan accident hi malsawmna ah ka chhiar a, ka bek leh chala hliam awm te chu ka lawmna thlentu an ni hial a, zahpuiawm tak ka ni. Mahse hei erawh ka hre thar, thinlung leh rilrua kan ngaihsan em emte kianga awm hi a nawmna leh hrehawmna a inzat reng a ni tih hi. Mahni insitna a nasa a, kan mawilohna lai min hmuh sak ang tih kan hlau va, chetsual kan hlauva, nun hi a inveng tlat a, chu chuan min ti hrehawm a. Mahse, rilru leh thinlung berin a ngaihsan an nih miau avangin chhungril chu a hlim a, a kim bawk si a ni.
Damdawiin atanga ka chhuah hnuah kar hnih a liam leh ta a. U Rina pawh a chhuak ve tawh bawk a, an nuin kan pahnihin min hau thin a. “Pendrive vanga accident,” min ti deuh reng a. Chhan let ngaihna kan hre vak lo. A nupui Remi hi nu fel zet mai a ni a. Nu te lam, pian fel thlap mai leh hmel pawh chhelo tak a ni a. A pasal fanaute tan chuan NU tih tling tak niin ka hria.
Damdawiin atanga ka chhuah hnuah Thangnunnemi nen chuan sms in kan inbe zauh zauh va, an ina leng turin min sawm thin a, mahse ka hna chhuanlamin ka hawihhawm takin ka hnar thin a. Damdawiin atanga ka chhuah tuk tlaiah an inah chaw ka ei a. A pa Rinawma chu pa rilru tha leh zaidam tak a nih bakah titi a thiam a, a kianga awm a nuam hle a. A nu Kapmawii chu nu lian tawk tak leh taksa inphut mawi tawk tak, hmeltha tak a ni bawk a. Tawngkam a thiam vaklo thung a, mahse rilru tha tak a ni. An unau chu pahnih Rinsanga nen chiah an ni a, Rinsanga hian hmelah a pa a chhun a, mizia ah erawh chuan a nu a chhun thung, tawngkam a thiam vak lova, a mizia hre chianglo tan phei chuan chapo leh induh tih mai awl tak tur a ni. Hlawh neia an awmpui leh thingtlang lama an chhungte, lehkha zir lai an awmpui te nen chuan an thahnem ang reng khawpin ka hria. Rinsanga nupui Miriami a fel hle bawk a, fa pakhat an nei a, kum 3 a upa a ni tawh.
Pu Rinawma hi Class I Contractor a ni a. Mi hnen atanga a chanchin ka hriat dan chuan hna duh avanga a pe theitute tlawna che vel chi a ni lova, mahse hna thawh tur chu a hmu reng a. Central lam hna pawh aman a dil ni miah lovin a hmu fo bawk. A hna a duhtuiin a thawk tha thei hle thin a ni. A fapa Rinsanga hi M.Sc a ni a, ani pawhin hna dang thawk lovin a pa chu a thlawpin a pui a, an nei tawk hle a ni tih an in leh an thil neih atangin a hriat theih a ni.
Min ngaihsak a, min duhsakna chhan chu Thangnunnemi tui tla ka chhar vang a ni a. Thi hnu tho leh anga an ngaih thu an sawi bang thei lova, kei erawh chuan ngaihthlak hrehawm ka ti deuhva. Midang pawh ka dinhmunah khan ding se, an ti ve tho vang tih ka ring a. Ka damdawiin awm man te min pek sak an tum a, mahse ka rem ti lova, chuti chung pawhin damdawiina ka awm chhunga ka mamawh leh damdawi lei ngai te chu anmahni lei leh rawn dah vek a ni.
An inchhung chu a nuamin a fel fai a, chhawng thum a ni a, a chung ber chu khawchhak lam in ang deuhvin an sa a, a nalh hle lehnghal a. Keini thingtlanga seilian tan chuan chutiang in tha leh ropui leh furnniture tha tak tak te chu kan hmuh rualin kan zam chhe lo chauh a ni a. An chhungkua an fel a, an hawihhawm rualin ka chhungrilah nuam ka ti thei lo va. Ka lawi luh fo na tur chi ni pawhin ka hre lo. Hei hi a chhan engvangnge tih ka hrechiang thei lo. Ka insitna leh inngaihtlawm luat vang niin ka hre phawt a, mahse ka chapo vang nia hriatna ka nei tlat bawk. Engpawhnise chaw ka ei bak chu ka tlawh leh ta rihlo a ni.
Ka thawhna sikul neitu leh Principal ni bawk Pu James-a chu a fel hle nain, thawh fuhloh tuk a nei zeuh zeuh thin a. A ngaihdan nilo deuh thil a awm chuan tupawh, midang awm lai pawn a hau nghal mai zel a. Kei erawh chu vawikhat mah min la hau lo thung a, mahse engtikni ah emaw chuan ka la tawng ve ngei dawn tih ka hria a ni. Ka thawhpuite chu an fel hle hlawm a, an hawihhawmin an changkang a, an bula awm a nuam a. Pahnih khat tlema danglam deuh erawh chu an awm thung a.
Nguntakin ka ngaihtuah a. Sorkar hna thawh tur zawn nge tha ang a, eizawnna kawng dang ka dap ang nge, ka thawhnaah hian rilru nghet takin ka thawk ang tiin. Ka nu leh pa leh ka chhungte ka ngaihtuah a, pui theia awm ka duh a, mahse tuna ka hna thawh atang hi chuan an hahdamna turin ka pui tak tak thei dawnlo tih ka hria a. Sorkar hna chu hmuh a har a, beisei chi ah ka ngai vak lova, ka thawh meknaah chuan rilru nghet taka thawh zel chiah ka ngai lo bawk a. Tun hnaia vawk hmanga ka pawisa tlema ka peipun dan chu ka ngaihtuah a, vawk chauh pawh nilo, chawhmeh te pawh khatiang khan ti ta zel ila, tuna ka thawhna ai chuan ka zia awm hma zawkin ka ring a, chumi tur atan chuan ka rilru ka siam nghet ta a.
Sikul bana in lam ka pan lai leh sikul ka pan laiin Thangnunnemi chu ka hmu leh zauh thin a. Tum hnih chu Millenium Centre ah ka hmu bawk a, mahse min hmu ve lo. A thian kawm te chu mipa leh hmeichhia changkang leh neinung tak vek niin ka ring a. Ka mitin hmuhnawm a ti a, ka rilruin a theihnghilh lova, ka thinlungin a ngaiin a thlahlel na a, an ni ang kawm chi niin ka in hre lo. Sms ah pawh a rul tawkin leh hawihhawm takin ka chhang mai a, ka thinlunga amah ka veina lam phei chu chhete pawhin ka sawi ngai lo. Ani chuan a nunna chhanchhuaktu ah min ngai a, chumi avang chuan min ngaihsakin ka lakah hawihhawm a chhhuah a ni tih ka hria a, chutiang bak chu ka lakah rilru a puin ka hre lo a ni.
Sikul atanga ban hun atan kum tawp lam ka tin zawn a, mahse ka tum aia hmain ka bang ta a ni.
Miss Puitei a nuamsam lova, leave dil a hreh si a. An hming lam a, an tihtur a kawhhmuh zawhah zirtirtu room ah chawl hahdam rih tur leh, chumi chhung chu ka lo kawp mai tur thu ka hrilh a. Hetiang hian zirtirtu dang nen pawh kan ti zeuh zeuh thin a. Chumi ni chu Pu James-a thawh fuhloh ni a ni a niang, a rawn kal kual a, Miss Puitei class a ka lo awm mek chu a rawn hmu a, ka class lamah a kal kual zel tih ka hmu bawk a. Chhun chawlh ah chuan a room ah Miss Puitei nen chuan min ko va, thil awmzia min zawt a. A hmel chu a dur khup mai a, thil awmzia chu Puitei chuan a sawi a.
Pu James-a chuan, “ Hetiang angah te chuan min berawn tur a ni a, nangmahni thu thua lo in awl hi ka duh loh zawng a ni. I thua ti i ni a, chuvangin, mawh pawh i phur tur a ni ang. Vawiin thlenga i hlawh ka pe che ang a, naktuk atang chuan lokal tawhlo mai ang che,” min ti ta a. Puitei chuan, “Sir, keimah vang a nia, khawngaih takin min ngaidam rawh,” a ti a. Mahse a thu chu a sut duh ta lo va. Pawisa min pe a, chawhnu lamah class ka la leh a. Zirtirtute chuan an lo hre nghal thuai hlawm a. Puitei phei chuan nuamlo a tizual hle a, mahse ka hnem a. Ban ka lo tum lawk mek thute ka hrilh a. Tichuan, in thlahna engmah pawh awm lovin chumi ni class ka la zo chu ka bang ta a ni.

THANGNUNNEMI III
Zanah chuan ka thawhpui thenkhatte chuan min rawn call a, a thenin msg min rawn thawn a. Min vuipui a, min hnem bawk a. A then phei chuan, “Private sikula thawktute tan hian security a awmlo lutuk hi a tha lo. Dan engemaw chu Association hian siam se a tha ,” an ti a. A then chuan, “Inthurualin kan vaiin banna thehlut vek mai ang,” an ti a. Mahse, a vui zawng emaw a thiltih ka duh loh thute engmah ka sawi lo va, ban ka lo tum mek thute ka hrilh hlawm a. Chutianga min ui thu leh min vuipuina te min rawn hrilh sap sap chuan min hnem ve ang reng viauva, mahse ka thinlung a na em em lem lo a ni. Hetiang thil tawn hi mahni tan puitlinna leh hmasawnna min thlentu atan hman tangkai thiam a pawimawh tih hi ka dawnsawn dan leh ka ngaihdan a ni.
Ka pawisa neih te ka chhiar a, engtinnge hma ka lak ang tih ka ngaihtuah a. Pu Rodenga chu ka tan a inhawng sa a, vawk chu lak leh mai tur em ni ang ti tein ka ngaihtuah a. Engpawhnise Bazar a chawhmeh zuar hlun deuh ho thil awmzia zawh phawt thain ka hria a, an hnen atangin thiltih tur ka dap fuh thei ngei ang tih ka ring a. Ka leng chhuak peih lova, chawei kham ah lehkhabu ka chhiar a. Dar 8 velah chuan mut zai ka rel ta a. Khumah a zangthala mu a, ka han maimichhin rual chuan Thangnunnemi hmel duhawm tak chu chiang takin ka hmu nghal a. Diktak chuan ka ngai a, hmuh leh ka chak a, mahse ka chanvo tur a ni lo tih ka hrechiang a, chuvang chuan amah ka ngaihna leh hmuh chakna te chu ka up bet lui a ni ber a. A mitmeng leh tawngkamah ka vei ang leh ka thlakhlelh anga min veina leh thlakhlelhna hmuh leh hriat tur a awm lo tih pawh ka hrechiang a, mahse chumi avang chuan ka chhungrilin a mamawhna leh thlakhlelhna chu ka paihbo thei si lo. Thinlung leh rilruin a beng var na na na hi chu engtin tin emaw chanchin hriatna hi a awm ve zel a. Thangnunnemi chu milian fate leh mithiam tak takin an duh hle hlawm a ni tih te ka hria a, chung mite zinga kei tehlul-in amah thlakhlelhna leh duhna lo sawi ve chu a tan engmah tham a ni dawn si lo.
Mahse ka ngai a ni. Min biak dan te ka ngaihtuah let neuh neuhva, min en hniam lo va, min thamlo zawnga khawsak leh tawng emaw pawh a nei lo mai ni lovin min dah hlu thiam em em zawk a. A mizia ah chapona ka hmu lova, hawihhawmna leh min ngaihsakna ka hmu zawk a. Thangnunnemi tia Biaka’n a hming a phuah chu inhmeh hle hian ka hria a ni. Chutiang velte ka chhut a, ka ngaihtuah neuh neuh lai chuan ka phone chu a rawn eng a, min rawn call tu chu ka number hriat ngai loh leh ka contact list a awm lo a ni tih ka hre thei nghal a.
“Hello.”
“Hnuna, i la mulo tiraw.” Miriami a ni.
“Ka mu zal mai mai. Engnge ni ta?”
“Kan pain, ‘Lo bia la, naktuk tuk leh ah kan hna thawh lai mek en a ngai a, chutah chuan a theih hram chuan min kalpui se, motor min khalh sak bawk se. A rem theih phei chuan hna vil turin awm zui thei hram se ka duh a, mahse ka ngen ngam chiah si lova, nangin lo be teh,’ min ti a. Engnge i ngaihdan? I hna atangin i bang em ni?” a rawn ti a.
“Aw, min ban alawm. Eng hna nge ni a?”
“Insak.”
“Ka vil thiam dawn em ni?”
“I thiam a ring tlat alawm. Bakah kan pa hi motor khalh chi a ni lo va, mutthluk a hrat lutuk a.”
“Engtinnge ni ang aw? Kan khaw lama hawn te ka lo rilruk a.”
“Min khawngaih la, min tihhlawhtlin sak hram mai rawh.”
“Ka lo in ngaihtuah ange aw.”
An chhungkua hi hlat ka duh a, ka hnaih a, an kianga ka awm tam chuan nakina ka tana nasa taka natna ala thleng dawn nia rinna ka nei tlat a. Mahse, tunah heti hi a ni leh ta si a, hna thawh tur ka mamawh lai tak a ni lehnghal. Miriami sawi dan atang khan an contract hnathawh mek endik bakah vil zui turin min duh a ni tih ka hria a, a nihna takah chuan an hnuaiah sub-contractor hna thawk turin min ti a ni berin ka hria a. Chu chu nge tha anga sumdawnna lam beih zawk chu tihte ka ngaihtuah neuh neuh laiin tui takin ka muhil ta a.
A tukah chuan Bazar ah ka kal a, chawhmeh zuarho te ka kawm kual a. An khar chhawnna te thlengin min hrilh a. An khar chhawnna te chu an induh tiin thenkhat chuan an sawi a. Kawng chu hmuin ka inhria a. Mahse Rinsanga te min ngenna chuan chhungrilah min kam tlat mai a, engvang nge tia ka chhut chian chuan Thangnunnemi vang a ni tih ka inhrechiang a. Ka ngai a, hmuh leh ka chak a, amah hnaihtu apiang chu ka ngaina a ni tih ka inhria a. Mahse, insitna nasa tak ka nei bawk si. Zanah Miriami chuan min rawn be leh a. Ka aw ta nge nge a. A tukah chuan Rinsanga chuan Bolero in min rawn lam a, kan veng a rawn thlen chuan kawngpuiah ka lo awm tawh a. Tichuan, motor chu khalhin hna thawhna tur lam chu kan pan ta a.
Rinsanga hi rilru dik leh tha tak a ni a, tawngkam a thiam lem lova, thil hi a nih ang angin a sawi mai a, zep tit tet a nei lo va, a mizia hriat chian chuan a ngainatawm hle a, hriat chian loh erawh chuan chapo leh induh tih mai awl tak tur a ni. Kan kal tumna chu tlai dar 3 ah kan thleng a, kan thlen rualin insak mek lam chu kan pan a, thil awmdan te chu Rinsanga chuan min hrilhfiah a.
Kan kal hmaa phone hmanga a lo biak lawk tawh angin PWD I.B ah kan thleng a. Ka cham chhung chu chutah chuan ka awm thei dawn tih Rinsanga chuan min hrilh a. Zanah chuan insak lai mek lem (a blueprint) chu min entirin a awmzia te chu min hrilhin min kawhhmuh leh a, cement leh hmanrua thalo hman a duh loh thute, tha taka sak ngei an duh thu te min hrilh a. Chawei khamah chuan mahni mutna tur khumah a hrang ve ve a mu chungin kan titi a. Thil a hre zau hle a, rampawn thlengin a zin nasa tawh tih a titi atangin ka hre thei a. Kan titi laklawh lai chuan, “Hnuna, min rualpui chei ve ringawt a, nang aiin ka upa a nia. Min u tur i ni,” a rawn ti thut a. Kan kum kan han inzawh chian chuan Thangnunnemi nen kan inrual a, mahse ni 1 in ka piang hmasa chauh a lo ni a. “I duh phawt chuan ka u ngei ang che,” ka ti a. A tukah chuan Aizawl panin a haw leh ta a. Kalkawngah a mut a chhuah deuh phawt chuan ding a, intiharh zel turin ka chah ve a. Kar tawpa hnathawkute hlawh pek tur leh mamawh leina turin pawisa tih tham tak min hnutchhiah a.
. Insak chu hmunli a thena hmun thum vel an lo khawih tawh a. Hnathawktu thenkhat zelthel deuhte chu ka ban a, a then kan lak belh bawk a, an vaiin 60 chuang lai an ni. Head mistiri Salam-a chu hna a thiam bakah ama thuihruai bik pahnihte nen chuan ka mit an tlung hle a. Anni hi hmun hrang hranga hna thawh tur an neih apianga Rinsanga ten an chhawr kual an ni a, hnamdang mah nise an intineitu hle a. Salama nen chuan kan in nel thuai a. Kan rilru pawh a inmil khawp mai. Khaw chhung mi rawih belh an ni a. An zingah chuan pa pakhat kum 50 chuang tawh tih hriat tak, cher lampang deuh, thing mistiri thiam tak Pu Enga a tel ve a. A hnathawk chu ka enin a kut a rang lem lova, mahse a kuthnu a tha hle a ni tih ka hmu a. Ka han be vel a, ani nen pawh chuan kan in mil ta phian ta bawk a. Kan han inbel chiang deuh deuhva, kohhran thuhmun kan ni tih kan hria a, chhungrilah engemawti taka inpawhna hi kan nei a.
Nili ka awm ni tlaia hna kan ban hnuah Bungalow ah ka haw a, ka inbual a, thuamhnaw ka thlak a. Pu Enga te ina chawei turin ka kal ta a. Nimin lamah chawhmeh leina tur ka hawn luih tir a, chuvang chuan an inah chaw ka ei dawn a ni. An in chu kawngpui atanga ka pen 145 chiaha hla mual pawng nuam ang reng takah a awm a. A chung rangva a ni a, a bang thumbawh kaihsawih a ni a, a chhuat chu thingphel a ni. An sakna a rei thawkhat tawh a ni tih ka hre thei nghal a. An ina ka luh rual chuan Pu Enga chuan min lo be nghal a. Eirawng lo bawl mek chu a fanu Maremi a nih thu te, thlanglam thingrem chunga thu chunga nau hnute pe mek chu a monu Peki a nih thu te leh a fapa chu hlo thlovin ramah a riak a ni tih thute min hrilh a.
Maremi chuan chaw ei a siam nghal a. Chawei hma chuan Pu Enga chuan thu tlem a sawi hnuah Pathian hnenah a tawngtai a. Ka rilruin a nupui a thi tawh em ni dawn chu aw tiin ka ngaihtuah a. Vawksa rep leh antam chhum pawlh kan hmeh a. A tuihang chu Maremi chuan eng hnah emaw ni nen a al thak a, a kha deuh fak a, tui ka ti hle mai a. “I zarah sa kan hmeh a, a lawmawm. Ei teuh rawh aw u Hnun,” min ti a. Nula te lam deuh, pian leh hmel fel tak mai, hmel pawh chhelo tak a ni a. Hlim hmel a pu seng reuhva. Peki erawhchu a ngawichawi hmel deuhvin ka hria a. A fa hnute a pek chu a muhil a, khumah a mut a, chaw khawrhtuah a tang a.
“Pu Eng, han inzawt ta phawng phawng zel ila, Maremi nu hi a boral tawh em ni?” ka ti a. Pu Enga chuan, “A ni dawn tak e, ka lo sawi lo a ni. Pumpui na a nei a, chaw a ei peih lo a ni. Tunlai chu a zual deuhva, chaw pawh a ei mumal lo,” a ti a. Ka chawei chu ka puar hle mai a. Chawei kham hnu rei vak lovah hawn mai ka tum lai chuan ka chhungrilah Maremi nu tawngtai tulna a lo awm ta tlat a. Ka zak khawp mai a, chutiang chuan ka la awm ngai si lo va. Hawn luih tumna rilru ka put rual rualin engtinemaw ka awm a, ka tlu mai dawn hian ka hria a. Ngam leh ngam lovin tawngtai ka duh thu ka sawi ta a. A lu chunga kut nghata ka tawngtai lai chuan ka tum loh tawpin thuchham tur a lo awm a, ka chham ta a, ka tawngtai zawh chuan an pafa ho chuan lawmthu min hrilh a. Kei chu zah avangin ka hmai a sen tan tan a, ka haw ta a. Ka thil tawn ngai loh ka tawng chu mak ka ti hle mai a.
Ka muhil dawn tep tawh tihah ka phone chu a rawn khur (nghing) dar dar a. Ka en a, Thangnunnemi a lo ni a.
“Hello.”
“I khua a har em?”
“Ummm.”
“A khawhar thlak duh ngawt ang. Ka ute ngenna i tihhlawhtlin sak a, ka lawm lutuk.”
“Ka zeilo lutuk a, kan ti khawlo zo vek ang tih a hlauhawm zawk.”
“Ka u in, ‘Hnuna hi ka mi rin zawng tak a ni,’ a ti che a. U Miriami lah hian ‘ngainatawm’ a ti bawk che a.”
“Ka va lawm ve. An rin ang ka nih loh a hlauhawm hle mai.”
“Keipawn ka ring che. Mahse i lakah ka inthlahrung.”
“Engnge chu chu a awmzia?”
“A...ti khan ka ute khan an ngen tawp che a, tihtur pawimawh tak tak i nei ngei awm si a.”
“Min rawn ngen duh kha ka lawm zawk. Inthlahrung duh suh.”
“I lung a leng ve thin em?”
“Leng ve thin e. A leng ve thin zawk em?”
“A leng lutuk tunlai chu.”
“A zin bo nge phai lamah a awm?”
“Thingtlangah hna vilin a awm mek a.”:
“Chu sorkar hnathawk lal tak em ni?”
“Ha ha....sorkar chhiahhlawh a ni ve lo.”
“Hausa thiltithei tak a nih dawn chu.”
“Chutiang a nih pawh ka hre lo. Ka rawn tibuai che a, min hrethiam rawh aw. Muttui mangtha le.”
“Muttui le.”
Kan inbiakna chu ka ngaihtuah let a, a awri te chu ka bengah a cham tlat a.A...ka bengah mai a ni lo, ka thinlung chhungah....ka thisen zung zam a fan vek ni hial hian ka hria a. “Thingtlangah hna vilin a awm mek a.” a tih chu tu tak ni ang maw tiin ka ngaihtuah a, inthlahrung tak chungin ka in ngaihbel lui a, ka hlim em em ta mai a, mahse.....mahse....
Ka mut chhuak tan tawh chu a reh vek a. Ka mitthla ah Thangnunnemi chu chiang takin a lo lang a. Mitmeng mawi tak , mit tlangkawm nei, mithmul buklo mahse pawt lo, hmai bial lam deuh, hnar ngul dik thlap, ka reh mawi.....mawilo a awm lo. Mahse ka phu phak mawlh si lo. Engtiziaa min rawn phone teh tlat nge a nih? A hmel ah leh nungchangah chapona a awm lova, ka lakah phei chuan a inphahhniam daih zel hian ka hria a, mak ka ti zawk hial thin. A tawngri mawi tak mai te chu....aw,, kei min duhin min hmangaih hlauh mai sela chuan...nitin mai hi hlimna ni ah ka chhiar ang a.....ti tein ka rilruin ka chham chhunzawm vel a. Mahse an dinhmun san zia te, an neihnun zia te, a thian kawmte leh amah hnim hnaitu te reng reng chu mi hausa fate leh milian fate vek an ni si a, kei atan chuan vana rah ang a ni si.
A tuk zing dar 5:30 ah ka harh a. Ka tho va, ka inbual nghal a. Hotel ah chaw ka ei a. Ka ei tui zek lehnghal a. Insakna lamah ka kal nghal a. Hnathawkte en mai mai thei ka ni lova, keiman a tul ang ang lo tih ve zel loh chu ka thiam lo. Pu Enga nen kan inhmu chu, “E Hnuna, nizana kan nu i tawngtai kha Pathianin a chhang a, tukinah a dam thu a puang a, chaw pawh tui ti takin a ei a. Vawiinah pawh Maremi nen thing phur turin an kal ta asin. Kan lawm tak tak a ni,” tih thu min hrilh a. Ka zak lutuk a, ka bing mup mup hian ka hria a. “A va mak ve,” ka ti ringawt a.
Tlaia hnathawktute an bang a, an hawn darh hnuah Pu Enga nen kan la en kual a. Chutih lai tak chuan Pu Enga nupui Pi Mawii chu kan lampanin a lokal kan hmu chu, kan pahnihin ngawi rengin, makti em emin kan lo thlir ringawt a. A lo thleng a, mittui tla chungin min chibai a. “Hnuna, min tawngtai lai khan ka taksa pumpui hi a hit chuaih chuaih a, kut chak tak hian min zut chhuak vek ni mai hian ka hria a. Chawpchilhin ka dam nghal vek a. Mahse ka ring zo lova, kan pa pawh ka hrilh ngam lo va. zinga ka han harh chu khum atangin ka tho va, ka dam em em ta mai a ni. Lalpa hmanraw ropui tak i ni,” a rawn ti a. Kan pathum chuan kan insak lai mek chhungah thingthiin Pathian hnenah lawmthu sawiin kan tawngtaiho ta a. Mak ka ti takzet a ni.
Hna chu kan zo fel ta a. Pu Enga te chhungkua chu ka ngainain Maremi phei chu ka farnu angin ka en a, Peki pawhin min nelin min be ve luam zel ta mai a. An pa Thanpuia lahin min pawh riau bawk a. Hna kan zawh tak avangin cham zel thei niin ka in hre lo va. Inrinni a haw ka tum a. Mahse Pu Enga’n, “Hnuna, pawisa i la neih chuan vawk ka zawn pui ang che, kut ruaka haw ringawt lovin pik up hire tur a awm tho si a,” a ti a. A ni dawn tak e ka ti a. Kan han zawng vel a, 9 kan hmu thei a. Pathianni ka cham leh a, thawhtanah ka haw ta a. Pu Rodenga ka phone lawk vek a, a vaiin man man takin min khar sak vek a. Pu Enga chu min zawn hahpui manah tiin cheng sanghnih ka thawn ve ta nghe nghe a.
Rinsanga hnenah ka pawisa hman bang te leh ka kuta a dah thil pawimawhte chu ka pe kir a, hna kan zawh tak dan te leh ka pawisa hmanna leh hman zat te ka chhinchhiahna chu ka entirin a kutah ka pe vek bawk a. Bill an la la lo na a, ka thawh hlawh chu min pe nghal a, ka rin ai daihin min pe tam a, a tam lutuk tia a then pek kir ka tum lahin a duh teuh si lova. Puitu a mamawhzia te, a buai zual huna pui leh tura min duhzia te a sawi a. Ka nui mai mai a. Chumi ni chuan a nu leh pa leh Thangnunnemi te chu an awm lova, ka khua chu a har ru ang reng khawp mai a. Ka hawn dawnah chuan ka beng bulah Miriami chuan, “I mit a ruak riauvin ka hria a, hmuh i tum i hmu lo a ni tiraw. Lungngai suh, ka lo sawipui ang che,” zawite hian a rawn ti a. Ka nui ringawt a, ka kal ta a. Hmeichhe mit hi a lo van fing em tiin ka ngaihtuah neuh neuh va. “I mit a ruak,” min ti te chu, a sawifiah thiam riau hian ka hria a.
Eizawnna tur ka ngaihtuah zui a. Ka uten pasal an nei tawh a, ka u, min chhangtu chiah Romawia te nupa leh an fate 2 nen ka nu leh pate chu in khatah an khawsa a. Ka u Romawia hi pawl ruk thleng chauh a zir a, a bak sikulah a kal duh ta miah lova. Hnathawh kawng engkimah a felin ka pa a puibawm a, tunah chuan kan chhungkua khaidingtu leh enkawltu a ni ta a. Ka puih a hun ve ta in ka hria a.
Eng ber nge ka thawh tak ang tiin ka ngaihtuah a. Vawk vulh chu fuh berin ka hria a. Ka pawisa neihte ka chhut a. Vawk in tha leh fel fai tak ka siam ang a, Pathianin mal min sawm phawt chuan kan chhungkua chu nuam sa ve deuhvin ka siam thei ang tih ka ring a. Chutiang tur chuan rilru ka siam ta a ni.
A tukah chuan Selesih farm ah te kalin an ran vulh te chu ka en vel a. Ka hlimpui khawp mai a. Ka haw leh lam chu Sihphir leh Aizawl inkara City bus service ah ka chuang a. Durtlang leitan kan chhuak thla chiah tihah hian kawngsir ah car changkang fe mai, a var hi a lo ding a, chumi sir ah chuan tlangval pakhat hian nula thla a lo lak sak mek a, ka zuk en chuan Thangnunnemi a lo ni reng mai a. Ka nghing deuh dat hian ka hria a. Ni chu a tla tep tawh a, ni tla tur lam chu a thlir a, chutia a dinglai tak chu tlangval chuan a phone in thla a lo laksak mek a. Ka thinlung luahtu, mahse a hnena engmah ka sawi ngam siloh chu midang ta tur a ni tih ka hria a, mahse ka phal si lo. Kan tlan zel a, ka thinlungah chuan engemawti tak hian min kam tlat a. Theihnghilh ka tum a, ngaihtuah loh ka tum a, mahse chhia leh tha hriatna thuhnuaiah thinlung hi a awm tha duh tlat si lo.

THANGNUNNEMI IV

Kan khua ah ka haw a, ka chhungte hnenah ka thiltum chu ka sawi a. Min remtihpui a. Kan compound chu a zau tha viau nain khawchhunga vawk vulh chu midang tan a rimchhia ang tih ka hria a, chuvangin dai hnaia kan huan ah chuan vulh ka tum a. Ka pa nen, ka u Romawia nen, hlawhfate nen vawk in chu ka ruahman angin kan sa ta a. Kan huan ah chuan tuihna kanglo a awm hlauh bawk a. Tui dahkhawlna tur lian tha tak, chung neiiin kan siam a. Chuta tang chuan pipe in kan la ang a, vawk zun leh ek vel chu samtein kan tleuh fai theiin anmahni pawh kan bual fai thei thin dawn a. A bul tan nan chuan 20 vulh phawt mai kan rilruk a.

Kan sak zawh hnuah Aizawlah kalin vawk note tha leh hrisel ni ngeia ka hriat chu ka lei ta a. U Rina leh a thianpa te chuan min phurh sak ta a. Kan vawkina kan han dah chu kan hlim hle mai a. Kan chhungin tlaiah pawh hawn nachang kan hrelo lek lek a ni. Vawkin bulah chuan inte tha tawk tak kan sa a, chutah chuan ka riah chilh dawn a ni. Vawk enkawl dan inziahna lehkhabu te ka lei a, ka in zir chawp a. Pathianin mal min sawm a, ka tluang a nih ngat chuan kan chhungkaw dinhmun chu a zia awm ngei ang tih ka ring a ni.

Thla khat a liam chauh tihin panga lai mai nikhat ah an thi ta mai a. Eng vang nge ni ang tiin ka ngaihtuah a. Ka enkawl danah thil tih dikloh ka nei em ni ang ka ti a, kan khua ah vety lama thawk an awm bawk si lova. Ka nguai rawih mai a. Mahse, ka u Romawia nupui, Lalnundiki, u Manun tia ka koh chuan, “ Hnuna, inti hrehawm duh suh. I duh ang diak diaka thil a kal te chuan Pathian i mamawh nang,” min ti a, dik viau chuan ka hria a. Mahse, ka hahna leh ka senso te ka ngaihtuahin hrehawm ka ti a, Pathian chu ka dem ngam lo na a, ka thinlung chuan a dem si a ni. Ka in ngaihtuah vang vang a, ka duh ang zawnga thil a kalin Pathian hnenah ka lawm a, ka duh ang zawnga a kal lohvin Pathian ka dem a, anchhia lawh tak ka duh a. Nguntaka keimah ka in thlir chuan Pathian laka ka rilru puthmang chu a diklo a ni tih ka hria a.Bible chhunga Thuhriltu.9:2 ah chuan,, “ Mi zawng zawng chungah thil thuhmun a thleng a ni; khawrel thuhmun chu mi fel leh mi suaksual te, mi tha te, mi thianghlim leh thianghlim lo te, inthawi mi leh thawi lo mi te chungah pawh.....” tih thu chuan ka thinlung na chu engemawti takin min tidam a. An thih atanga zan thumnaah chuan rinloh leh beiseiloh takin msg ka dawng a.

“I dam em?”
“Dam tawk tawk e.”
“ I van reh ve. Min hre tawh lo a ni maw?”
“Hria e, ka hre reng thin che.”
“Chuan, vawk i vulh ta a mi?”
“Aw, ni e.”
“Ka lung a leng thin asin.”
“A ni maw? Tunge i ngaih?”
“Sawi mahila i awih chuang lovang.”
“Sawi mah la tunge a nih ka hre dawn chuang si lova tiraw.”
“Ngatinge msg pawh min rawn thawn ngai loh?”
“A....ka ...ngam chiahlo.”
“Engnge a awmzia?”
“Ka thawn ngam lo che a...”
“Thi mai tur min chhanhimtu i ni a, chutiang chuan engtinnge rilru i put theih?”
“Kan dinhmun a in thlau em a.....”
“Khawngaihin chutiang zawng chuan rilru pu lo hram rawh aw.”
“Ka tum thin a, mahse ka hlawhchham rih a nih hi.”
“I tluang em?”
“Tluang vaklo, nimin piah khan panga an thi a...”
“A van pawi. Mahse hnual phah miah suh aw.”
“Awle, ka tum ang e.”
“A nih mangtha le.”
“Mangtha le.”

Ka tum a, mahse ka hlawh chham. Ka hnual a ni, ka hnual rawih tak tak a ni. Ka nu leh pa leh ka u Romawia te pawn min hnem na a, an mitmeng atang chuan engemaw chu ka hmu a, chu chuan min tihrehawm a ni.

Thangnunnemi chuan engvanga msg min rawn thawn ve leh tlat nge a nih ti tein ka ngaihtuah a. Chutih rual chuan ka mitthla ah a hmel te chu a lo lang a, ka chhungrila amah ngaia ka lunglenna leh khawharna ka up beh luih tlat chu, spring nem beh luih thlah ang mai hian a rawn zual nghal a. Ka lung a leng a, ka ngai vawng vawng ta mai a.

Ka riahna inte awmna hi mual pawng rem lai tak pang deuh hleka sak a ni a. A chhuat dap, a bang dap, a chung rangva, a rel vel te chu thingzai a ni a. Kawngka chu thingphel a ni a. Namthlak pawh thingphel bawk a siam a ni a. Ka mu tawh chu ka tho va, namthlak chu ka hawng a, thlifim chuan min rawn chhem nghal a. Van lam ka thlir a, chhum tam vak lo a awm a, a bak chu a thiang hle a, arsi te chu an pe tuarh mai a.

Thangnunnemi chu ka ngaihtuahlo thei lo va. Tlangval hmeltha leh lehkhathiam tak tak mai bakah hausa fa tih hriat tak tak te leh officer lian tak tak te chuan a hmangaihna an beisei a, nupui atan an duh a ni tih ka hria a, ka mit pawhin ka hmu a ni. Chutiang ho zinga a hmaa inlan ve chu ka zuam lova, a lakah engmah chhuan tur ka nei lo va, ka tlawm ngawih ngawihin ka hria a. A tui tla ka chhar chu min ngaih ropui sakin min ngaih hlut sak a, chu mai te chu atan hriatreng ka nih theihna tur chu a ni tih ka hria a. Hawihhawm chhuaha a khat tawka min rawn be leh thinte chu ka tan chuan a lawmawmin a hlu hle na a, a bak beisei tur ka nei si lo.

Ka lunglenna leh khawharna chu a zual tial tial ta mai a. Msg thawn ka chak a, sana ka en a, zanlai dar 12:10 a lo ni tawh a, Thangnunnem tih chu ka chhu (type) a, send chu ka hmet dawn thin a, mahse ka ngam chiah si lo. A lo hmuh hun tur ka ngaihtuah a, ka zak bawk si a. Mahse engemawtiin tum loh tawpin ka khawih palh ta a, a in thawn a, a deliver nghal zat bawk a, a phone chu a lo la off lo a ni tih ka hre thei nghal a.

“Engnge ni ta? I la muhil lo a ni maw?”
“Umm, ka khua a har.”
“Keipawh, ka ngaihtuah che a, ka khawngaih bawk che.”
“Ngatinge?”
“ I vawk an thi hnem si a.”
“I khawngaihna ka dawng phak chu ka lawm e.”
“Hnual phah suh aw, pawisa hman tur i mamawh phei chuan min hrilh la, i mamawh zat ang ang ka ngaihtuah sak mai ang che.”
“A...ka lawm e.”
“Inthlahrung miah suh. A nih tunge i ngaiha, i khua a har?”
Ka chhang mai thei lo. Thudik ka hrilh ngam lo va, dawt ka hrilh ngam hek lo. Ka chhan lawk loh avangin amah vek chuan min rawn thawn leh ta zawk a.
“I khawhar chhan hi nih ka chak.....”
“Tak tak?”
“Takzet.”
“I ni asin.”
Min chhang ta mai lo. A reh ta daih a. A muhil ta nge ni ang a, ka chhanna chu a duh zawng a ni lo va, chhan zel tlakah min ngailo nge, a nuih ka ti za a, min hmusit ta zawk ni ang tiin ka ngaihtuah a. Zah zelah ka thawn ve leh ta thung a.
“I pawi ka sawi chuan min ngaidam rawh aw. Muttui mai le.”
“Ngai lo, la muhil bik suh.”
“Min chhang duh tawh dawnlo emaw ka ti a..”
“Ih...ka beisei loh lutukin min chhang a...”
“A ni maw, min ngaidam rawh.”
“Nilo, ka lawm lutuk vang zawk a ni a, ka mittui a tla asin.”
“Thangte.”
“Khawngaihin min rawn call hram teh. I aw ngei ka hre duh, mawh, khawngaihin.”

Ka call nghal a.

“Ka lawm lutuk e aw, min rawn call a.”
“Ka call i duh avangin ka lawm asin.”
“Chu bak sawi tur i nei lo em ni?”
Ka khur titih a, ka hnungzangah tang a vak cham cham a. Ka bing deuh chuk chuk a. Boruak hlimawm leh mak lutuk chuan min tuam a, ka ngaihtuahna chu a fim zo ta lo nge, ka thinlunga rei tak in up tawh chu ka dang zo lo tih pawh ka inhre chiang tawh lo.

“Ka hmangaih che a ni Thangte.”

Min chhang mai lo va, mahse insut ri faih ri ka hria a, ka ngaih a thalo hman a.
“Hnuna, min hmangaih tak tak maw?”
“Hmangaih takzet che, mahse ka phu lo che.”
“Min zawt ve dawn em?”
“Min hmangaih em Thangte.”
“Hmangaih takzet che.”
Zuan vak vak ka chak a, au vak vak ka chak a, min lawmpuitu ka mamawh a, mahse keimah chauhvin ka awm si. Thlifim lo thaw chuan min rawn chhem a, arsi te chu ka thlir a, min lawmpui ni ngei tur a ni, an eng zualin an mawi zual a. Ka piah lawka hlai kung lian tak pawh chuan min lawmpui ni hian ka hria a. Aw, khawvel ka tan a vul, a mawi, a thar vek. Vawk panga thihna avanga ka hnualna zawng zawng chu vawmbo ang maiin a reh nghal a, ka thinlung chu lawmnain a khat asin.

“Thangte, Thangnunnem.”
“Ka kiangah awm la ka ti, ka ngai che asin, ngatinge msg min thawn ngai lohva, ngatinge min biak ngai lohva, ngatinge min hel fo thin, mawh, ngatinge...?” a tah aw deuh a, ka bengah chuan a mawi zual a.
“Duhtu che leh rimtu che an tam a, mi hausa fa te leh officer lian tak tak te an ni hlawm si a, kei ve chu.....”
“An hausa emaw,officer an ni emaw min rimtu leh duhtu an awm chu ka khap theih an ni si lova. Mahse,tumah hmangaih ka nei lo va, duh ka nei hek lo. Hmangaih hi pakhat chiah ka la nei asin.”
“Chu chu tunge?”
“Lianhnuna.”
“Aw Thangte,Thangnunnem.”
“I mizia, i hmel, i pianzia, i engkim hi ka duhin ka hmangaih che asin.”
“Ka lawm, ka lawm takzet.”

A hnu lama kan sawi chu ho te te a ni na a, kan lawm em em thung si a. Kan in mangtha a, kan inbe zui zel bawk si a, a tawp a tawpah chuan kan in mangtha thei ta hram a. Mahse kei chu ka mut a chhuak lo, a chhuak mawlh lo.

Pawnah ka chhuak a, vawk in ka pan a, an lo muhil hlawm a. Ka en kual vek a, kan huan dung leh vang te chu arsi eng hnuaiah lang fiahlo mah se ka thlir vel ruai ruai a. “Thangtein min hmangaih asin,” ka thinlung chuan ka ti mawlh mawlh a. Zinglam dar 2 velah chuan ka mu leh ta a, mahse ka muhil tlem kher mai, hmangaihna vang a ni si a. Khawfing chah rual deuh thawin ka tho va, vawk chaw ka buatsaih nghal a. An zun leh ek te ka tleuh fai a, ka che reng reng chu ka tho thang a tha a, engkim mai chuan min tihlim a. Ka vawk zawng zawngte chu an hmeltha vel vek hian ka hria a, fawh ngawih ngawih tak ka nap a.

Tukthuan ka ei lai chuan ka phone chu a rawn ri tlang tlang a. Pu James-a a lo ni a.

“Hello, Sir Hnuna i ni em?”
“Aw ni e Sir James. Engnge ni ta?”
“A...i chunga ka thiltih ah khan ngaihdam ka rawn dil duh a ni, min ngaidam la, rawn thawk leh hram teh Hnuna.”
“Ngaihdam i ngai miahlo Sir Jame. Keipawh i dinhmunah khan ding ila, ka tih dan tur a ni ve tho vang tih ka ring. A....tunah chuan kan khuaah awmin hna ka thawk a, sikula han thawk leh chi pawh ka ni lo.”
“Mizo subject nang anga hneh leh thiam an awm thei lo va, min khawngaih la, rawn thawk leh hram teh. Khami tuk kha ka tho fuh lova, ngaihtuah chiang lovin ti khan ka ti mai che a,pawi ka ti takzet a ni.”
“Ka lawm e Sir James. Ngaihdam dil ngam khawpa huaisen hi ka ngaihsan zawng tak an ni. Tunah chuan vawk ka vulh a, han kalsan thei chi ka ni miah lo.”
“I lawmman pawh a letin ka tipung ang, lo thawk leh hram rawh. Kan nu pawhin min hau zing khawp mai a, a pawi tak tak a ni.”
“Ka lawm lutuk e Sir James. Mahse min hrethiam hram zawk rawh aw.”
“A va pawi dawn ve aw. A nih leh phawt le.”

Ka thawhpuite hnen atangin Sir James-a inchhir thu chu ka lo hre tawh a, ka dem lem lo. Mahse ka chhungrila chapona ka ti dawn nge induhna awm ve chuan engtikah mah Sir James-a sikulah chuan ka thawk leh tawh lovang tiin thutlukna ka siam tawh a, sut leh ka tum lo. Mimal emaw,Company emaw, sorkar emaw thuhnuaia awm a hnathawh ai chuan tuna ka hnathawh hi ka duh zawk tlat a ni. Thlabi a hlawh lak tur awm chu a thlamuan thlakin a nawmna chen a awm a, mahse, mahnia thahnemngai taka hna thawh tluk hi awmin ka hre lo. Mi hnuaiah tuna ka thawh mek hi thawk dawn ila, ka duh miah lovang tih ka hria a, mahse keimahni tan ngeia thawk ka ni a, engmah tih hreh ka nei lo va, chu tak chu a nawmna niin ka hria a ni.

Vawk ka vulhna kan huan hi a zau ang reng khawp mai a. Mual zam tha ang reng tak a ni a, a sirah sih a awm lehnghal a. Tuihna kangchat lo, fim leh vawt raih mai a awm bawk a. Terrace ka siam a, tah chuan thlai chi hrang hrang ka ching a, ka u Manuni’n a hun neih apiangin min pui bawk a. Vawk thli chu luankawr te siamin ka sem darh a, thlai chuan an ngeih a ni ang, an duah hliah hliah hlawm a.

Dam a, mahni hna ngei nuamti taka thawh bawk chuan hun a kal chak duh khawp mai a. A khat tawk ti ila, nitinin Thangnunnemi chuan msg leh a awka duhawm takin ka nun chhungril chu a rawn chawm bawk a, engdang mah hi thlakthlelh ka nei lo. October thla a lo thleng a, boruak pawh a vawt tan titih ta a. Vawk pawh an duhawmin an thang tha hlawm hle a. A in ka sak belh sauh sauh a. Kum tawpah panga tal chu ka lei belh ang a, chutah chuan a pui tur leh a pa chi thlahtu tur ka vulh tel ang tiin rilru ka siam a. Kan chhungkuaa kan awm khawm pawhin titi dang sawi tur ka hre lo. Ka u Manuni leh ka nu phei chuan, “A kianga awm tawh chuan vawk leh thlai chanchin ringawt kan ngaithla reng mai a nih hi,” tiin min fiam thin a ni.

Khua atangin km chanve ai chuan a hla hret ang a, motor pawhin a tlan luh theih a. Chhunah ka duh thalin hna ka thawk a, tlaia eirawngbawl paha namthlaka thu chunga ka han hawi vang vang a, chutih lai vel taka Thangtei msg hmuh emaw, a aw nem duhawm tak mai han hriat thin chu, ka tan hian a nuam a, ka thinlung hi Pathian hnenah pawh a lawm a ni. Jakoba ang mai khan mal min sawm phawt chuan sawmapakhat dik taka a hnena pek ka intiam hial a ni.

Tlai khat ka inbual zo eirawng ka bawl tan mek tihin ka lam pana motor rawn tlan ri ka hria a, mak ka ti ang reng hle mai a. A lo tlan zel a, u Rina a ni tlat mai a. Kan inhmu chu kan hlim dun hle a. Ka rinloh deuhvin vawk sum hnih vel aia lian hlir panga leh vawk chaw leh damdawi te a rawn phur a, “I vawk tur a nih hi,” a ti a. A awmzia zawh ka tum mek laiin Bolero lo tlan mek chu ka hmu leh ta a. Thangtei te motor, keipawhin vawihnih chu ka lo khalh ve tawh ngei a ni tih ka hria a. Ka lungphu a rang sawt a. Ka inte kawt zawlah chuan a rawn ding a, driver seat atang chuan ka mita khawvela hmeichhe hmeltha leh piannalh ber mai Thangtei chu a rawn chhuak a. A lehlam atangin tlangval pakhat a rawn chhuak bawk a. Durtlang leitan bula a thla laksaktu ngei kha a ni tih ka hria a, keimahah chuan thikna a rawn awm nghal a. Mahse ka inthup tlat a. Ka pan a, kan inchibai a. “Happy birthday aw Hnuna,” Thangtei chuan a ti a. A kalpuipa pawh chu ka chibai nghal a. Ka birthday a ni tih pawh ka lo hre lova, ani’n a rawn hre chat mai te chuan chhungrilah hlimna min pe a.

Mumang a ang hlein ka hria a, tukina kan inbiak pawhin engmah a rawn sawi si lova. A rawn kalpui chu Lalrema a ni a, Remrem tiin an ko thin a, Vety doctor a ni. U Rina vawk rawn phurh te chu ka birthday present atan Thangtei’n min rawn pek a ni a, a pui leh a pa tur an tel lehnghal a. Ka hlimzia leh mak ka tihzia chu...midang awm lo se Thangtei chu pawm vawng vawng mai ka chak a.

Vawk chu ka vawk in sak sa ah chuan kan dah lut a, Remrema chuan a en kual nghal a, a tawng chu a nem deuh hlai a, han thik chi a ni lo tih ka hre thiam nghal thuai a. U Rina chuan min fiam zoh zoh a. Thangtei chuan eirawng a bawl nghal a. Chawhmeh tur eng eng emaw an rawn keng teuh mai a. Chaw kan ei kham hnu chuan U Rina chu a thil phurh man Thang chuan a pe a, a haw leh ta nghal a.

Remrema chuan kan khuaah chhungte a lo nei a, middle sikul zirtirtu Pu Zauva chu a putea a lo ni reng a, chumi te ina riah duh thu a sawi a. Khua ah kan tlan chhova, Remrema chu kan thlah a, kan inah kan kal a, ka chhungte chu Thangtei chuan chibai a bukin amah chu a inhmelhriattir nghal a. A bag te chu kan dah nghal a. Huanah kan kal leh phawt ang a, mu turin kan let leh dawn tih kan hrilh a. Huan lamah chuan kan chhuk leh ta a. October thla bial zan tak mai a lo ni a, thla chu a eng em em mai lehnghal a.

THANGNUNNEMI V

Inte kan thleng chiah a, kawtah motor atangin a chhuk hmasa a. Ka chhuk ve chiah chu min lo pawm chawt a, kan infawp ta ngawih ngawih a.

“I van duhawm em Thangte.”
“Ka nunna hi i ta a ni Hnuna.”
“Min hmangaih tak tak maw?”
“Hei leh chen hmu tur chein ka lokal a, a chiang tawk a ni lawm ni?”
“Ka englai ber hian nge hip che?”
“Ka thinlung hian hmangaih che a thlang a, ka thinlung thutlukna chu ka mit hian a thlawp nghal bawk a. Lianhnuna hian min hip a ni tawp mai.”
A dar ah ka kuah a, ka kawngah a kuah a, thla eng hnuaiah huan chu kan fang kual dun vel ta a. Thlifim lo thaw in min rawn chhem heuh heuh va, ral lehlam tlang te chu an lang paw-var ruih vek a, engkim mai chuan hmangaihna boruakah min chentir niin ka hria a.

Darkar chanve vel kan kal kual hnu chuan inte kawta kan tuilak chuan a hmai a phih a, min pen per sak sak a, a nui har har bawk a. Kei chuan hmuhnawm ti em emin ka lo thlir a. Mumang a nih mawlh chu ka hlau va. Inte ah chuan kan lut a, ei tur, ka birthday lawm nana a bika a rawn ken te chu ei dun chungin kan titi a. A changin kan nui dun a, a changin ngawi rengin kan in en a, a changin kan infawp a, a changin kan infiam a. Aw, ka thinlung hi a van hlim em.

Dar 11 a lo ri ta a. Thla lah chu a eng zual tial tial a. Lehkha pawh a chhiar theih hial a. Namthlakah bawk chungin kan titi a. Thinlunga inhmangaih ve ve na na na chu insi lo chuan kan awm hlei thei lo va. Kan inpawm a, a chungah chuan ka bawk ta a, kan infawp leh chu ka kut chuan a hnute chu a kawr chhanah ka chul a, a hmur te chu ka khawih a. A thaw bul hak a, ka duh thawh zel a, zen luh a, chul ka tum a. Ka danglam a, ka ngaihtuahna te chu a a ruai ni ber hian ka hria a. Ani pawhin ka hnung zangah min chul a, min chul na sawt ve hle a. Mahse a awma zen luh ka tum lai tak chuan ka kut chu a man chat a.

“Tuma khawih ka la phal ngai lo.”
“Keipawh maw?”
“Aw. I nupui ka nih huna i duhtawka i khawih atan ka ti a ni.”
“Ka nupui i nih loh chuan ka khawih ngai dawnlo tihna...?”
“Dik chiah. Mahse nih ngei ka duh.”
“Thangte, Thangnunnem.”
“Tiang ang renga hlim hi ka la nei ngailo. Mumang a ang.”
“En teh, thla leh arsite khi an va mawi zual em.”
“Engkim a mawi, nangmah vangin.”
“Ka sawi tum min sawi khalh.”
Ka biangah a piai a, a tho thut a, pawnah a tlan chhuak a, ka tho ve vat a, kawt zawlah chuan kan in um a. Ka man veleh hlim em em in kan nui dun a.
“Haw lova, i kianga awm nghal ka van chak.”
“Haw tawhlo mai ta che.”
“I ti tak tak em?”
“Aih...a tha rih si lo.”
“Kei chu, ka lung a lengin ka ngai thei lutuk che a, hawn leh ka huphurh takzet a ni.”
“Kei hian zuamlo chu.”

Chumi zana kan ina Thangtei, Thangnunnemi ngei mai a han riak chu....ka thinlung hi a lawm a, kan in te chu mawi zual leh nuam zual hian ka hria a. Engtiklaiin nge ka mutthilh ka hre lo. Ka bianga min rawn khawih avang chuan ka harh nghal a, ka han che deuh chu thutthlengseia mu ka ni bawk a, chhuatah ka tla ta nghal a. Za em emin min nuih a, ka u Manuni pawh chuan min rawn hmu a, an pahnih chuan min nuih dun a.

Min hawn san ta. Zan lama ka hlim a, engkim tih ka phur nen, ka tha a zawi vek a. Current tello bulb ang chauh ka ni, keimahah nunna a awm lo a ni ber mai. Vawk te pawh chu an lung len hmel vek hian ka hria a. Zan a kan kal kualna te chu ka fang leh vek a. Thangtei hniakte chu tih reh palh te ka hlau va. An tlan dawn tepa ka beng bula zawitea, “Remrema’n, ‘Nizan khan in in ti em?’ a ti,” tih a sawi chu ka ngaihtuah let a, a tlan nghal daih lehnghal a. Remrema hmel ka mitthla ah a lo lang bawk a, ka nuih chu a za ta em em a, keimah chuan ka nui ta chiam a.

Dar 11 pelh hretah ka pa leh ka u Romawia te nupa chu an lokal a, kan pali chuan tihtur tul apiang kan ti a, ka pa pawhin nuam a ti ve hle tih a hmel atang chuan ka hre thei a. Tlai dar 4 ah min hawnsan ta a. Duh chuan khua ah riakin, engkim a tih theih vek a, mahse ramhnuaia riah chu ka thlang zawk tlat a.

Tlai ni tla turin ral lehlam hla deuh taka tlang leh kham vel a han chhun eng ruih mai chuan ka lung a tileng zual a. Thangtei chuan an thlen chin atangin msg min rawn thawn zel a. A msg chuan ka lunglen a hnem lova, a tizual zawk mah a ni.

Sakhmel tawn chhung tawite ah pawn,
Suihlung i dum ngei e;
Lunglen tizual thlawn mai tura’n,
Ka tawn che ka hlau ber mai.

tih chu ka sa ka sa a. Namthlaka a bawhna lai te, eirawng a bawl laia a thutna leh a sulhnute chu ka en kual vel a. Tiang em em hian a lunglen theih ngai ang tih ka lo hre lo. Ka inte , ka huan, ka chenna ah chuan Thangnunnemi a rawn kal a, a awm chhung khan dawivaih thiamin engkim chawpchilha an timawi vek ang mai hian a rawn timawi vek a. Mahse a hawn rualin a chul zo va, a ruak zo ta vek ni hian ka hria a ni. Awithangpa hla te thleng thlengin ka rilru ah a lo lang a.

Muvanlaiin chhawl a bang ang hian,
Aitenawn par Lalhniang tangah;
Lunglen a inbang reng e.

Khua a lo tlai a, ni a tla a, khawvel a hnim riai a. Ka chaw ei kham chu namthlak hawngin chhuatah ka bawk a, zan lo thleng tur chu ka huphurh a. Thla a lo eng leh ang a, zan hmasaa kan sulhnute chu a ngaitein a rawn chhun eng leh ang a, engtinnge ka awm ang ti tein ka ngaihtuah lawk a. Thla lo chhuak tur chu ka dang thei lo va, khawchhak lamah chuan a rawn chhuak leh ta a.A tirah chuan a sen bial pup a, a rei tial tial a, a var no tial tial a. Ka lunglen leh khawharna a zual tial tial bawk a.

Ngatinge maw min va rawn call har? Msg tal pawh rawn thawn leh tawh awm. Aizawl khaw chhung kan lut tawh e a rawn tihna kha a rei tawh hle si a ti tein ka ngaihtuah a.

Ka inte ah chuan ka leng lo. Ka tho va, pawnah ka chhuak a. Zan hmasaa kan pahniha inkuah rial chunga kan kalna ah te chuan keimahin ka kal a. Boruak lah chu a thiang kak a, thlifim zawite tein a thaw heuh heuh bawk a.

Kan sulihnu mahten ka chhui,
Ka riang em e Thangnunnem i tello chuan;
I anka nem dam diai min hlan leh la,
Chutin awmkhawhar a nem mahna

ti tein ka chham vel a, ka taplo chauh a ni.

Dar 10 a pel ta hial mai. Msg ka thawn mai dawn em niang nge ka call mai ang ti tein ka ngaihtuah a, mahse engemaw rin lawk loh thil a awm a nih ka ring bawk si a. Phurlo zetin ka puan thuah ka kai pharh a, namthlak pawh khar chuanglo vin ka mu ta a. Ka mu fe chiah tihah ka phone chu a rawn ri ta a. Ka la rang kher mai.

“Hello,Thangte,”
“I la muhil lo a ni maw?”
“Muhil lo, ka lo nghak che a.”
“Ka pi, ka pa nutei damdawiinah a awm a, a chat thla tep an ti a, in kan thleng a, thuamhnaw kan indah fel a, damdawiinah kan kal leh ta nghal a,.Tlemin a zia awm deuh va, ka rawn call nghal che a nih hi.”
“A va pawi ve.”
“Civil Hospital Cabin kawtah ka ding a, thla a eng si a, kei chu Hnuna, awm ngaihna ka hre lo, ka ngai lutuk che.”
“Keipawh Thangte, awm ngaihna ka hrelo a ni ber. Nizana kan sulhnute kha ka chhui leh a.....”
“Ti ringawt chuan ka dam rei pawn ka ring lo, ka ngai lutuk che.”
“Hlim takin kan la inhmu leh thuai dawn alawm.”
“Inhmuh leh nghah ai chuan, awm dun, inthen tawh loh ka duh.”
“I chhungten min duh lovang.”
“Chutiang rilru an pu lo ang tih ka hrechiang.”
Kan ngawi dun a, a insut ri faih ri chu ka hria a.
“Chhel takin i awm ang Thangte, kan hlimna ni tur chu a lo her chhuak thuai ang.”
“Ni e...mahse...”
“Engnge mahse...?”
“A la rei awm si.....”
“Kan dinhmun heti hi a ni a, nang nei tur chuan.....”
“Tuna i dinhmuna i din lai ngei khan inneih ka duh. I kianga awm ka duh.”
“I hrehawmin i hah lutuk dawn asin.”
“I kianga ka awm phawt chuan eng tih mah ka hreh lo.”
“Aw...Thangte....”
“Min rawn ko tlat, min lo mutthilh san suh aw.”
“Ka lo nghak tlat ang che.”

Ka phone a zai ka dah te chu ka hmet chhuak a. Spi aw tliang ral mai chu ka in awih tir a.
Ka riang chuang bik em ni leng zawng zingah,
Sen lai nau ang tlei zai ka rel thei lo;
Suihlungrual lai ka dawn chang ni hian,
Nunhlui ngaiin tahkhua a sei mang e.

Chhawrthla kai zai rel la ka di tawnah chuan,
Hlan nang che a riang lungmawl biah thu;
Tui ang nem hmangaih biahthu min hlan leh la lungrun,
Tichuan maw duhlai nang ngaih ban zai ka rel mahna.

A leng a ni, a leng takzet. Ka thaw halh halh a. Tunhma zawngin tiang hian ka la awm ngai lo va, rawlthar chhuah hlim te chuan tlema hmel duh ve deuhte chu ka nei a, mahse kan in vei tawn em em lem lo. Thangnunnemi zuna uai zet chu....a nat hian a na vawng vawng mai a nih hi.

Dar 12:10 ah chuan min rawn call leh ta a.

“I la muhil lo maw, ka van lawm.”
“Ka mut a chhuak lo, ka ngai em si che a.”
“Ka inbual zo deuh chiah a ni. Ka pi pawh a zia awm e.”
“Ava lawmawm, lo tha zel rawh se. I hah awm si a, mu hahdam ta che.”
“Mu mahila, ka muhil thei chuang lovang. Tiang ang hian ka la awm ngai lo Hnuna.”
“Keipawh. Awm dan pawh ka thiam lo.”
“Naktukah rawn kal leh nghal mai ka duh.”
“Lokal leh mai ta che.”
“A mawi chiah bawk si lo va, bakah ni khat chiah chawlh ka nei a.”
“E...hnathawh i nei em ni, ka lo zawt miahlo che a.”
“Office ah hna chhete ka thawk ve alawm.”
“A that chu. Kan dam ang a, kan la inhmu leh thuai ang.”
“Taka, Remrema khan, ‘Ka ngai nat zawng tak a ni,’ a ti che a. Vawk pawh kha hri danna a tia mawni khan a chiau vek a, an hrisel tha hlawm khawp mai a ti asin.”
“Lawmthu ka hrilh mumal ta lo va, min lo hrilh sak rawh. Keipawh a bula awm nuam ka ti.”
“Ka hrilh daih tawh alawm.he he. Lokal leh a chak ve tlat asin.”
“Thla hi a eng si a Thangte.”
“Chhuatah khan nangmahin i mu a ni awm si a, ka van khawngaih che.”
“Nuam ka ti alawm, ka kiangah awm phei la chu....”
“Ka la awm thuai ang. A nih zingah i thawh hma te a ngai dawn si a, duh tawk tak tak a awm thei dawn chuang si lo.....”
“Ni e, muttui min ti la, ka muhil thei tawh mai ang.”
“Nizan leh nangmah ka ngai. Muttui aw duhtak.”
“Muttui le Thangnunnem.”

Thangtei nen kan inchhar atangin kum hnih a liam ta. Chumi inkar chhungah chuan thil tam tak a thleng a. Vawkpui pahnih kan vulh chuan note te a nei a, ka u Romawia pawhin lo neih lam hawi lovin, kan chhungkuain kan buaipui ta law law a, kan in pawh kan sa tha ta bawk a. Kan khua ah chuan in nalh leh tha ber tiin naupang chuan an sawi ve laih laih a ni. Thangtei chuan a khat tawkin min rawn tlawh reng a, Rinsanga te nupa pawhin vawi hnih min rawn tlawh a ni.

Tichuan, palai kan tir ta a. Kan palai ka ni pasal ka pa Lawma leh ka u Thani pasal u Liana ten an lo hawna report an pek chu a ngaihnawm ang reng khawp mai. Keiin thaw dep depin ka lo ngai thla a. An thang rei ta si a, phone in thil awmdan kan inhrilh zel na a, signal awmloh chang a awm thin a, ngaih a thalo duh khawp mai. Ka pa Lawma sawi dan tlem kan sawi chhawng lawk ang e.

“Thangtei pa chuan, ‘ Vawk vulh tur ringawta kan fanu han kal tir chu a chi dawn em ni Nu i?’ a ti a. An nu chuan, ‘Kan fanu hian a khum bulah pawh lehkhabu dang a kawl hlei nem, vawk vulh dan inziahna bu hlir a lawm a kawl tawh,’ a ti a. Kan nui dar dar a. Thangtei chuan, ‘Nu...i sual em mai,’ a lo ti a. Rinsanga chuan, ‘Nei vat vat rawh se, chutilo chuan lunglen vangin a a thei mai ang,’ a lo ti a. An chhungkaw rilru a tluangin mi ngil tak an ni ngei ang. Man eitu pawh Mizo dan anga ei tur chi bak ei tir an tum lo va, thil chhawm pawh eng teh vak tih an tum lo. ‘Kan fate an ni dawn a, kan ngaihsak zui tur tho tho an ni,’ an ti a. Thangtei kha ka han kheuh fal a. ‘Thangte, thingtlangah i awm peih tak tak ang maw? Nitinin vawk in buaipui reng mai dawn a nia,’ ka ti a. Ani chuan, ‘Hmangaihte ber kiangah chuan engkim a nuam vek zawk ang chu,’ a ti then a.” tiin, thildang nuihzatthlak deuh deuhte a sawi a. Kan hlim tlang khawp mai.

Ka van nghakhlel tawh em. Ka piancham October ni 15 ah kan inei dawn a. Thangtei chu October ni 16 a piang a lo ni a, kan pian kum lah a in ang chiah chiah lehnghal. Ka rilru ah ngaih thatlohna te a awm a, kan tluang leh lutuk a, engemaw hi lo thleng dawn tlata hriatna ka nei a. Ka hlau thawng a, Pathian hnenah ka thlen leh ringawt thin a. Eng thildanglam mah chu a thleng rih bawk si lo.

A lo thleng ta tak tak. Kan khua ah, kan biakinah ngei kan innei ta a. Kan inneih zan chuan Thangtei duh dan ang ngeiin huana kan inte ah chuan kan zan hmasa ber chu kan riakin kan hmang a. Khawi hotel nuam leh changkang mah kan awt lo va, kan mamawh hek lo. A thil rawn chhawm te, a thuamhnaw rim te, ama rimte, a engkim mai chuan min hneh vel vek a. Ka khawvel chu Lalthangmawii chuan a ti par vul a, damlai pialral ah min chenpui a. Kei anga hlim hi khawvelah an awm hian ka ring lo.

Kan han mu tur chu kan zeilo dun ang reng khawp mai. Thangtei chuan bati te a chhem hlum a, thuka meiling de deuh ringawt te chu vutin a vur bo vek a. Kan infawp a, kan inpawm a. Chutah thuamhnaw ka phelh sak tur te chu a zak deuh va, mahse a tang rei chuang lo.

Duat taka ka zut a, ka chul vel hnuah a zahna te chu a kiam ve ta deuh a niang, ka thuamhnaw min phelh sak ve ta a, min chul a, saisira muin insi thlapin kan inpawm a. A thaw bul hak hak a, keipawh ka thaw a rang a. Min pawm chaih chaih a, a hmaa ka khawih a phal loh te chu...engkim a phal a, ani pawhin ka engkim chu a duh lai lai a khawihin a chul a. Pathian remtihna nen ngeia nupa nun hman chu, rilru ah inthiamlohna engmah a awm lo va, a nawm dan leh a hlutdan a danglam bik ngei ang tih ka ring a ni. Ka ring ka tihna chhan chu, Thangtei chauh lo chu chutiang chuan ka la khawsakpui loh vang a ni.

Mipain hmeichhia an duat dan leh nupa nun an hman dawna an tih dan tur nia ka rin ang ang chuan ka khawsa a, a hmuia fawh ka tum chu tlemin a lo tawlh hniam deuh a, a hnarah ka fawp a, kan pahnih chuan kan han nui ta tak tak a. Aw....a van hlimawmin a van nuam em.

Zan laiah thovin huan te chu kan fang kual vel a. Vaki nupa thingzara fu dun an in chuk melh melh hi kan ang ber hian ka hria a. Mut ka rawt lahin a duh rih bawk si lo va. Kan vawk te chu a bia a, “Pi thar in nei tih in hria em. Inpu hi ka ta, ka ta liau liau a ni ta,” te a ti vel a. Thla eng no riai mai hnuaia Thangnunnemi nui her her ri tluka mawi chu engtikah mah ka la ngaithla ngai lo va, ani anga pian leh hmel duhawm chu ka la hmu ngai hek lo. Thla eng hnuaia thuamhnaw var thianghlim tak, pan tak a inbel a, a thuamhnaw thliin a han chhem leng delh delh laia duh tih hriat fahrana min en te chu....ka mita mawina zawng zawng famkimna chu ka ta, ka nupui a ni ta THANGNUNNEMI chu a ni. Ka lawm e Lalpa, i fel si a....

THANGNUNNEMI VI

(Nupa nun ziahlan a ngai si a, chhiar hrehawm tur ang chu pumpelh hram hram ka tum a, mahse pumpelh theihloh chin a awm si. Chhiartute leh Admin ten min lo hrethiam ru aw).

Pik up (Motor) leh Wagon R te kan nei ve ta. Huana kan inte te chu kan sa thain kan tilian a, khawchhak lam in pianhmang ang deuhvin kan siam a, a nalhin a nuam reuh khawp mai a. Thangtei chuan RUNMAWI tiin a hming a phuah a. Chu chu nalh takin Aizawl ah Omega Art Works te kan ziah tir a, kan tar kalh a.

Kan nupain huanah chuan kan awm deuh chawt a. Ka u Romawia te chu an fate pahnih nen huanah chuan nitinin an lokalin hna kan thawk ho a, Thangtei’n a phut tlat thin avangin ka nu leh pa pawh an rawn nileng ve deuh fo va, dik tak chuan Thangtei’n a phut te chu an lawm zawk mah a, nuam an tiin an hlim a ni. Ka u Manuni nen an inkawm ngeih a, kan chhungkua ah chuan inhmangaihna leh inpumkhatna tha lehzual a rawn thlen niin ka hria a. Kei lah pek hi Thangtei ka duh lutuk na lamah hian thik loh tur thleng hian ka thik a. Ka thianpa Biaka lo kal nena hlim taka an inbiak te hian ka lo thik a, ka nu leh pa leh ka ute kianga hlim deuhva a awm te hian ka thik bawk a, ka awmdan hi ka hrethiamlo.

Tlaiah kan chhungte khuaa an haw hnua kawta a han insil, han in hlim sang deuh ka hmuh ringawt te hian ka lo danglam leh thuai mai thin a. Inte chhung atangin ka lo thlir a, a lo luh veleh ka lo kuah a. Ka awmdan atangin thil awmzia a hrethiam nghal zel a. “Tiang tak hian min lo mamawh a ni maw?” a ti a, nupa nun chu kan hmang leh nge nge thin a, ka lung hi a awi em em thin na a, a ruk tak chuan ka inthlahrung deuh thin.

Chhunah vawk kan bual fai a, an zun leh ek kan ti fai vek thin a. Thangnunnemi hlim nuiri te chu ka ngaithla kham lo va, engmah tih hreh nei lo leh nuamti taka hna tul apiang a thawk te chuan min tilawm a. Kan vawkpui pakhatin no a neih dawn tumin Thangtei chuan ka nu leh pa chu khuaa an haw a phal lo va, ka ute chhungkua an haw thung a. Zan lai dar 12 hnu hretah note a nei ta a. Chumi zan chu kan tlaivar chiang kher mai. A hlim lah kan hlim bawk. A hrin hmasak apiang ka nu chuan a la a, a lo hru fai zel a, Thangtei chuan a dahna tura a lo ruahman lawkah a dah a. Ka pa chuan tih tur vak hre si lo hian a lo thlir a,a lo vei ve sek a. Keipawh chutiang tho chu a ni. Thangtei leh ka nu hlim nuiri te chu a van mawi tak em. No 14 ngawt mai a nei lehnghal a. A hirn apiangin thangtei chuan, “Ka nu, sangthum a rawn sang chhuak leh ta,” a ti thin a, ka phone in ka lo record a, rimawi tam tak aiin ngaihthlak nawn leh nuam ka ti a ni.

Zahthlak deuh mahse kan sawi tho tho teh ang. Thangtei hi a pian a nalh a, cher lam ai chuan tlema thau lam deuh hret a ni a, ka duhthusam chiah chiah a ni. Englaipawh hian ka it reng mai a. Nau a han pai a, a nau pai thlaruk vel a nih lai te chuan zana kan han mut a, ka han kuah hian ka inpeih leh nghal mai thin a. Thangtei chuan, “Hnute hi i lawm ve chiang ngawt mai tiraw. I ta a ni tawh a lawm,” tiin min fiam thin a. Lehkhabu ka chhiar pakhatah chuan, “Mipa hian an damchhungin hnute hi an lawm reng mai a, kham tih an nei lo,” tih hi a inziak a. A dik viau mai awm mange aw ka ti thin a ni.

“Duhtak, thlaruk na a ni tawh si a, nupa nun hman hi a thalo angem?” a han tih te hian ka chakna hi a sosang tial tial hian ka hria a, min hmangaih em avangin leh ka thinlung tihnat a hlauh avangin phur tak chungin min hmanpui ve leh thin a. A nau pai thla 7 a nih atang erawh chuan beisei chi ah ka ngai tawh lo va, thla 8 a nih chuan a nu leh pa hnena dah ka tum a, ka chhungte pawhin thain an hria a, mahse amah chuan, “Heta neih mai ka duh. In awmlohnaa awm chu ka zuam lo,” a ti tlat a. Mahse, ka nu nen kan tang dun a, tichuan, Aizawlah a nu leh pa te hnenah ka dah ta a. Ka haw dawn ni chuan hlim hmel a pu hlei thei lova, a hmel chu a ngui riai a. Miriami chuan min lo hrethiam a, “ Nau neih dawnah Hnuna pawh a lokal leh dawn alawm, Fa duhawm tak in nei ang,” tiin min hnem a. Ka haw san dawn lai chuan Thangtei chu a mittui a parawl kiang a. Keipawh eng ruai ka ang lo.

Keimaha kan khaw lam pana ka haw chu ka khua a har a, Thangnunnemi chu ka ngai ngawih ngawih a. Ngaihtuahna thalo tak tak te ka nei a. A nau nei hi a thi dawn a niang ti tein ka ngaihtuah a, ka tah te a chhuak teuh mai a. Huanah ka ute nen hna kan thawk a, tlaiah min haw san a. Zanriah ei khamah tihtur tulte ka tih zawh hnua ka han mut dawn lai hian Thangtei’n kan mutna a siam vel lai te ka mitthla ah a lo lang a.

Hlimtea kan zalna laikhum hi,
Ka bel ngam lul lo zan tlai nema’n;
Ka ngai em che aw, ka ngai em che,
Awmkhua a har e ka thai mampui.

tih hla te chu ka sa ka sa a. Kan inbiak lahin la innei lo ang maiin kan inthlahlelin tih tawp nachang kan hrelo lek lek thin a. Tiang em ema nupa inngai leh inthlahlel hi an awm ve a ngem, nge hetiang hi an ni ve zawk ti tein kan sawi dun thin.

Chutianga nau nei tur mah nise ka ngaihtuahna ah thil thalo tak tak a lo awm thin a. Amah duh ngawih ngawihtu a ngah si a, thenkhat phei chuan tih takmeuhvin, ‘I nu thlawi hun ka nghak dawn a ni,’ an ti a ni a. Chung mite nen chuan ka awmloh laiin hlim taka inkawm thin angtein ka suangtuah thin a, thikthuchhiatna hian min chen chilh a, a hnenah ka sawi ngam si lo va. Kan han inbiak erawh chuan chutiang ngaihtuahna chu a bo nghal vek a, ka thinlung leh taksa hi a dam sawng sawng thin a, engtinnge rilru thalo tak a lakah ka put theih ti tein ka ngaihtuah leh thin a ni.

Zan khat chu mumang thalo deuh mai ka nei a. Fel leh tha takin nau a lo nei a, hmeichhia a lo ni a, naute hmel chu ka lo hmu thei lova. Kan khaw lama hawnpui ka tum lai takin a chhungte chuan an lo phal ta lo va. A nu chuan, “Hah taka hna thawk a, nitin vawk ho kianga awm reng turin ka fanu leh ka tunu hi ka phal lo,” a lo ti tlat mai a. Rinsanga te nupa chu ka lamah an tan ka rin tehlul nen, tukhum chhah min chhawn a, min be duh tlat lo mai a. Tichuan police ruaiin an in atang chuan min nawr chhuak ta a. Thangtei chuan tap chungin, “Ka kal ve dawn, ka pasal Lianhnuna tellovin engtinnge ka dam theih ang? Khatin ka pasal kha ti suh u,” a lo ti lawm lawm a. Mahse min nawr zel a, kham sang zet maiah hian min nawr thla ta a. Ka tlak lai chuan Thangtein, “Hnunaaaaaaaa...” tia min koh ri hi ka hria a.

Chutia ka tla thla chu changel hmunah hian ka tla a, ka hriatloh hlanin kan huanah chuan ka lo awm a. Bathlarah thu a ral lehlam ka thlir mek lai hian ka u Manuni chu hmanhmawh zet hian ka awmna lampanin a lo kal a, “Hnuna, Thangtei chuan tur a ei a, khawvel ata a chhuahsan ta che asin,” tih leh tah a rual a. Keipawh chu ka insum zo lova, “Aw Thangte, Thangnunnem, chutin min kalsan mai ang maw. Engtinnge i tellovin ka awm theih ang,” tiin chhuak em emin ka tap a. Ka harh hlawl mai a, ka mittui te chu ka biangah a lo luang hial a.

A tho tawha ka rin avangin ka call ta nghal a. A pick up rang khawp mai.

“Hello Thangte.”
“Hello, i tho dam em? Ka rawn ngaihtuah lutuk che asin.”
“Ka dam a, mahse mumang thalo deuh ka nei a, ka tah ala chhuak.”
“Eng lam nge ni?”
“Hmeichhia i lo nei a. In nufaa kan khuaa hawnpui che u ka tum laiin i chhungten an phal lova. Police te ruaiin in in atangin min nawr chhuak a. Tur eiin min lo thihsan bawk a.”
“A va mak ve. Mumang chu a letling duh an tih kha, rilru nuam takin awm rawh aw. Ka chhungte hian an makpa hi an chhuangin an duh em hi. Ka pa chuan, ‘Mahni ke a ding, taima, Pathian tihmi ni bawk si. Makpa rangkachak a ni,’ a ti che asin.”
“Ka va lawm ve Thangte.”
“Ih maw, ka nei har tawh lovang ka ring, nizan te khan ka pum a na deuh riai riai a.”
“Nei thuai thuai la ka ti, ka ngai lutuk tawh che si a. Ka chhungte pawhin an sawi reng mai che.”
“ I kiangah lo chuan hlimna tak tak ka nei lo va, ka kim theilo a ni.”
“A nih duh tawk rih ang aw.”
“A har thin mang e, a nih leh le. E, lehlawk, ka hmangaih che min ti miah lo.”
“Thangte,ka hmangaih che.”
“Keipawh ka duh lutuk che a, ka a mai dawnin ka hre thin.”
“A nih leh aw.”
“Awle.”

Kan inbiak hnu chuan ka rilru chu tlemin a nuam a. Chaw ka ei laiin ka ute nupa an lo thleng a. Ka u Manuni chuan ka chaweina te chu a sengin a sil a,Thingpui kan in zawh veleh hna kan thawk nghal a. Rei pawh kan thawh hmain khua a rawn hnim a, thli a rawn thaw vuk vuk a, ruah a rawn sur ta a. Khawpui a ri kal ruak ruak a.

Chung khua lo ri, khuangruah a sur chiar nghian e,
Zamualpui dana leng kei ka thai ngaih lai a ti zual mang e;
Min han dawn ve ang maw, min han ngai ve ang maw e,
Tawn leh ni ka nghakhlel mang e.

Inchhunga kan awm laiin Thangtei nu chuan min rawn phone a.

“Hello Hnuna,”
“Aw, engnge ka nu?”
“A..hei, tukin atangin a pum a na deuhva, Durtlang damdawiin kan pan mek a. ‘Lo kal vat rawh se’ a ti che a, a ngai deuh che a niang.”
“E...ka lo kal nghal ang e.”
“Fimkhur takin, hmanhmawh lovin lo tlan ang che aw. Khua a chhe bawk si a.”
“Awle.”

Ka ute chu thil awmzia ka hrilh nghal a. Thuamhnaw ka siam sawk sawk a, Aizawl panin ka kal ta nghal a. Kawng tluan chuan ka rilru a insual a. A changin ka ngaih a tha lova, a changin ka hlim a. Zan dar 11:10 ah Durtlang damdawiin chu ka thleng a. Phone in chanchin ka hrilh a. Lawmna ward kawngka bulah chuan Rinsanga te nupa an lo awm a, min hmuh veleh Miriami chuan min chibai pahin, “Dar 9:45 ah khan fel takin a nei a. Hmeichhia a ni,” a lo ti nghal a. Ka lawm takzet. Rinsanga te nupa hmelah chuan min lawmpuizia ka hmu thei a, an nufaa hmuh thuai thuai chu ka chak khawp mai.

Miriami chuan, “Thangtei’n, ‘A hming chu a pa in a phuah tur a ni,’ a ti a. Ti hian i phuah nghal mai dawn lawm ni?” nui chungin a ti a. Kei chuan, “ Kan chhandamna hming awm chhun hi a hlu em a, LALHMINGHLUI ni se tha ka ti mai,” ka ti nghal a. Rinsanga chuan, “E heu, Pastor tawngkam chhuak a van ang. Kawng lakah a rawn phuah fel der tawh a nih dawn hi,” tiin min fiam a. Miriami chuan, “A hming bulah saphming te i telh dawnlo em ni?” a ti a. Kei chuan, “Zawlpala leh Tualvungi te sulhnu awmna ramah hian hnamdang hming telh tul ka ti lo a ni,” ka ti a. Kan pathum chuan kan nui a. Chutih lai tak chuan ka nu (Thangtei nu Kapmawii) chu a lo chhuak a. Min chibai pahin, “Tluang tea i lo thleng chu a lawmawm e. Va lut la, va hmu rawh le,” a rawn ti a. A hmelah chuan hlimna leh lungawina ka hmu a, chu chuan min tilawm zual a. Engemawti tak hian ka awm a, ka lai deuh bawk a, ka hnuk te chu a ulh lek lek bawk a.

Ka lut a, veilam tlar tawp berah Thangtei chuan mu chungin min lo en a. Tlemin nui hmel a pu a, ka pan hnai tial tial a, a bianga mittui lo luang chu ka hmu a. A khum bul thutthlengah chuan thuin a ban veilamah chuan ka hmer chat a, ka chul a, “Thangte, ka van lawm em. Ka ngai takzet che a ni,” ka ti a. Ka kut lehlam chuan a mittui chu dimtein ka hruk sak a. A tawng mai thei lo.

Ka tho va, khum mawnga naute mutna bawm chu ka pan a, ka keu va, ka fanu hmel chu ka hmu a, a nu chiah chiah ni maiin ka hria a. Hnar leh khabe ah erawh chuan min chhun a ni tih ka hmu a. Tui takin a muhil a, ka en ngawih ngawih a. Mase hawn thawt reng chu a thatloh ka ring a, ka khuh leh a, Thangtei kiangah chuan ka thu leh ta a.

“Thangte, ka van lawm. Nangmah chiah chiah a ni.”
“A chhun zawk chein ka hria a, ka lawm asin.”
“I inhliam em?”
“Nasa vak lovin ka inhliam a. Mahse fatir nei si ah chuan nau i awl min ti. Ka hrin hmaa ka kawng a nat lai chuan ka ngai zual lutuk che a.”
“Ka rawn ngaihtuah lutuk che asin.”
“A hmingah tunge i phuah dawn?”
“Lalhminghlui.”
“A va nalh. Ka rilrua awm chiah chiah. Mipa chu nise Lianhnuna tih ka duh ang. Khawvel hi Lianhnuna hlirin khat se ka ti.”
A mitmeng chu hlim vang leh chhungrila min hmangaihna leh thlakhlelhna vang a ni ngei ang, a nung sar mai a. A hmel erawh chu tlemin a dang deuhva. Midang awm lo sela chuan ka pawm ang a, ka fawp ngawih ngawih ngei ang, mahse a rem si lo. Tichuan, kan nupain kan maimichhing a, tawitein Pathian hnenah lawm thu sawiin ka tawngtai a. Ka tawngtai zawh hnu rei vak lovah ka nu chu a rawn lut a, “Ti khan Mama te nupa nen haw ta ula, zuk mu hahdam la a tha ang,” a ti a. Thangtei chuan ka kut chu a hmer na deuh salh a, kan in en a, kan nui dun a, ka nu chu a lai lek lek a. Chu chuan kan nuih a tiza a, kan nui a, Thangtei chu a khuh zui a.

“Ka hriatthiamlohvin engemaw in sawi a ni. In chimawm lutuk. Kal vat teh,” min ti a. Tichuan ka chhuak a, Rinsanga te nupa nen chuan an in lampanin kan tlan ta nghal a. Ka nupui leh ka fanu hmel chu ka mitthla ah an cham reng a, hmuh leh thuai thuai ka chak a ni.

Kar khat hnuah ka haw a, anni nufa chu thla hnih vel tal awm rih se kan ti a, Thangtei erawh chuan hawn vat vat a duh thung a, mahse a chhungte nen kan tangrual a, kan hmin thei hram a. Ka mumang nen chuan a in anglo khawp mai. Ka rilru chhungrilah chuan engemaw danglamna hi a awm a, chu chu ka sawifiah thiam lo. Pa ni a inhriatna ka ti dawn nge, tunhmaa ka la ngaihtuah ngai loh hma lam hun tur te leh tun huna thil awmdan atanga hun lokal zela thil lo thleng thei ngaihtuah lawkna te ka nei ve tan a. A...ka patling ve tan niin ka hre ta ber mai. Chu nihna thar chuan min tilawm ang reng a, chutih rualin ka nupui fanaute leh ka chhungte tana ka tangkaina leh hlutna tur te, chhungkua ka enkawl dan turte chu ka ngaihtuah ve niap niap ta a ni kei Lalhminghlui Pa hian.

Thangtei rilru leh khawsazia hi ka chhut thin a, mi hausa tak an ni a, duh duh nei thei leh pawisa in a lei theih ang apiang chu lei thei deuh zel dinhmuna ding an ni a, chutichung chuan hnathawk lova awm mai mai duh lo, mahnia thawh chhuah neia awm duh tlat mi a ni a. Kut hnathawh te chu a thei mang dawnlo emaw ka ti a, kei ai ain a theiin a thiam zawk hialin ka hria a. Ka chhungte pawhin mak an ti hial reng a. Tunah chuan a sorkar hna pawh a bansan hmiah a. Kan hna ah a inpumpek a. Midang ngaih leh hmuha mawi tura hlim hmel pu lui a ni lova, a hlim tak tak tih a hmel ah a lang chiang a. Kan inchhungah chuan mo rilru pawnlang a pu lova, neitu rilru nghet a pu bawk a. A duhawmna chu nitin hian ka hmufiah deuh deuh ni hian ka hria a. Heng zawng zawng ka ngaihtuah hian Pathian hnena ka lawmzia ka sawi dan chu- Lalpa, i fel mang e tih hi a ni.

Nitin hian kan inbia a,a thupui ber chu lo hawn thuai thuai a chakzia leh a duh thu a ni. Ka nu leh pa leh ka u Manuni te nen an inbe reng reng bawk a. Anni chuan nau hrin hnu lawka hna thawh nghal mai thatlohzia an lo sawipui a, an beng dai hram hram a ni. Ka hnena a sawi dan chuan, “Hna thawh tur tul te ka ngaihtuah a, tih leh thuai thuai ka chak tih chu ka chhuanlam a ni ve mai, a chhan ber chu maw, ka ngai em che a ni. I kiangah hnathawk lovin Bawihtei nen hian kan awm thei tho alawm tih hi ka ngaihdan a ni. Chaw pawh ka ei tha thei tawh manglo a nia. Heti ringawt chuan ka cher chhe vek ang, min rawn hruai tawh mai rawh,” a ti a ni.

Kan taksa peng tinrengah hian a eng lai mah hi hmangaihna tia vuah tur a awm miah si lova, heti em ema Thangtei nen kan in ngai tlat thei mai si hi mak ka ti thin a, Pathian themthiamzia a tilangin ka hria a ni. Thla hnih pawh a pumhlum hmain leh hruai tura ka kal hmain a nu nen, an awmpui nula pakhat nen an nufain an rawn haw ta nge nge a. A nu chuan, “Hawn a ngen reng ringawt mai a, ka ning tawh lutuk a. Keini chhung chu ngaih pawh min ngai ve tawh lo. Keinin bawihtei han bual leh khawih vel kan la chak tehlul nen,” tiin ka nu leh pa bulah chuan a fanu awmdan chu a sawi a. Ka nu chuan, “Kan fanu, kan chhungkaw zinga mi a ni tlat tawh a, a thiamlohna a awm lo,” tiin a thlavang a lo hauh ve thung a. Kan van hlim tak em. An lo hawn zan chuan chhungkhat leh thenawmte an lo leng a, a nu chuan ei tur tuihnai tak tak an rawn ken te chu a theh chhuak a, man hla an ti hlawm hle a. Ni khat an cham a, ka nu nen huanah an nileng thak a. Tlaia an lo hawn chuan, “Keipawh rawn awm ve mai a ni ka duh,” a rawn ti haw a ni.

A nu te hawn tlaiah chuan Runmawi-a hawn nghal a rawt ta tlat mai a. Ka nu chuan a remtilo ang reng khawp mai a. Mahse ka nu hnenah chuan, “Nu, Runmawi ka ngai tawh em a, min hrethiam hram rawh. Naktukah ka u nen in lokal ngei ngei a ngai ang, Bawihtei hi i bual a ngai dawn si a,” a ti a. Ka nu chuan, “Ka lokal duh lo vang,” a ti a. Ka nu bulah thuin a kuah vel a, “Ka nu, i fel sia, mawh, phal la, naktukah pawh lokal ngei ang che aw,” tiin a dil vel a. Ka nu chuan nui chungin a remtilo thei ta biklo.

A duh ang chuan zanriah ei khamah kan chhungkua (ka ti tan tawh ang)in Runmawi chu kan pan ta a. Hemi zana ka khawsak dan hi a zahthlak deuh na a, nupa, chhungkaw din chho tan tir leh la din turte tan thil tangkai a awm takin a then chu kan sawi hram teh ang.

Zan kan mu chu kan inpawmin kan inchul a, lungchim takin kan infawp a. Chutah ka insum zo leh ta lo va, nupa nun hman chu ka duh ta a.

“Daktawr in thla thum a ral hma chuan hmang rih suh u a ti si a, engtinnge ni ang?”
A taksa ka chul lai chu ka chawl nghal a. Che lovin ka mu ta hle hle a.
“I ta ka ni a, i thu thu a ni. Keipawn ka chak alawm,” tiin min chulin min thlem a. Mahse ka phurna chu a bo nghal vek a.
“Daktawrin hman rih loh tur a tih chuan hman rih loh a tha.”
“I lung a awi lo em ni? I lungawina tur a nih phawt chuan hmang zawk mai ang.”
“Keia lungawina ringawt chu a pawimawh berlo. I thatloh phah ang.”
“A pawi em mai, ka sawi ta kher kher a.”
Kan inneih hnua a bula lungawi vakloa ka awm vawikhatna a ni. Min kuahna kut chu a la a, Bawihtei lam hawiin a mu ta a. Kei chu ka tho va, pawnah ka chhuak a. Zan thim hnuaiah chuan kawt zawlah ka vei ka vei a. Ka rilru puthmang chu a diklo a ni tih ka hria a. Ka inchhir a, Thangtei thinlung chu ka hliam a ni tih ka hria a. Zawi muangin ka lut a, a bulah muin hnunglam atangin ka kuah a. A insut deuh faihin ka hria a. A hmai ka chul a, a mit chu a lo hnawm deuhva, a tap a ni chiang mai.

“Mateinu, min ngaidam rawh. Ka thiamlo a ni.”
A rawn inher a, ka lam a rawn hawi a.
“I tello hian ka awm thei lova, chuvangin awm tura min tih chen pawh awm lovin, i thu ang lovin ka lo haw a. I lungawilo tih ka hriat hian na ka ti em a ni.”
“Ni e, ka thiamlo a ni. Ka ching leh tawh lovang.”
“Ka lawm e Mateipa.”
Dek ka huatzia a hria a, ka zakah min dek thut a, ka eu zawk a, ka dek let ve a, kan nui dun ta chiam mai a. A kut tlema a chet deuh pawhin ka zak chu za nghal chuai chuai hian ka hria a. Ka lungawilohna zawng zawng chu hmangaihna nen min chhem kian sak a. Thinlung dam takin min siam a, inkuah rial chungin tui takin kan muhil ta a.

THANGNUNNEMI VII

Thangtei fakawm ka tihna chu hnathawh lai ni lovah chuan tawp takin a inthuam ngai lo. “Ei siamtu hi felfai taka inchei tur a ni a, hmeichhia, fa nei tawhte hi ina kan inthuamna kan uluk tur a ni a. Kan pasalte lakah ngaihzawn tlak leh itawm takin kan awm reng tur a ni,” a ti a. Tlai lamah chawhmeh rim na lam hi hmeh a phal miah lova, ka hriselna chu min ngaih pawimawh sak bawk a. Ka thuamhnaw pawh a duh uluk em em thin.

Thangtei lakah chuan ngaihzawn awm lo taka awm ka hlau ve bawk a. RL Rina lehkhabu ziah Nupa Hlimna tih te leh hetiang lam inziahna lehkhabu te ka chhiar tam a. Nupa inpawlna chungchanga nuam kan tih dan te, kan chakna chawh thawh sam dan te engmah zep lovin kan inhrilh dun zel a. Rilru hahna deuh hlek ka neih a, ka hmel a dur deuh nia min hriatte hian midang an awm loh chuan min chul a, min zut a, nupa nun min hmanpui a, tichuan ka lu na deuhte chu a reh a, ka eng a thawl huai thin a. “Nupa inkara inpawh tak leh inhrethiam tawn taka sex hman hi Pathianin damdawi chi khat atan a ruat a ni tih lehkhabu ziaktu pakhatin a sawi a, ka awih zawng tak a ni. Keipawh ka dam phah thin,” tih thlengin min hrilh a.

Fa pathum kan nei ta a. A mi lai chu mipa a ni a, a pu Rinawma’n a hmingah Chhuanvawra a sa a. A naupang ber hmeichhia chu ka pain a hmingah Lungtiawii a phuah ve thung a. Tunah thla 7 a ni ve tawh a. A u chiah Chhuanvawra kum 4 a tlin kumah a piang ve chiah a ni. A ute pahnih chu Aizawlah a pi leh pute hnenah an awm a, sikul an kal ve ve tawh a.

Thangtei nu chu a hrisel lo ta riau mai a, a fanu chu a ngai zual hle thin tih ka hria a. Thangtei hriat lohah min rawn bia a. “Ka hri a tha lo ta riau mai a, in chhungkua hi kan kiang hnaiah awm ula ka duh a ni,” tiin inthlahrung deuh takin ka hnenah a sawi a. Ka ngaihtuah vang vangin ka khawngaih a. Ka nu leh pa kiangah ka sawi a. Ka nu leh pa pawh chuan Thangtei nu duhthusam chu tihpuitlin sak thain an hria a. Zan khat chu Thangtei hnenah ka sawi ta a.

“I nu hriselna a pan riau mai a, a kiang hnaiah kan chhungkua hi awm ila a duh a ni tih ka zin hnuhnun ber tum khan a lo sawi a. Engtinnge maw kan tih dawn le?”
“A tha ve leh mai ang chu. Keini kan awmloh chuan U Mawia te nupa an hah lutuk ang a, ka nu leh pa pawh an khawngaih thlak alawm.”
“A dik khawp mai. Mahse anni chu an ngaihtuahawmlo zawkin ka hria. I nu kiang hnaia kan awm a tha zawk ang.”
A nu leh pa leh a chhungte chu a ngaia, an kianga awm chu a chaklo tih rual a ni lo. Mahse, kan in leh lo leh engkim chu neituah a in ngai ve tawh a, ka ute leh ka nu leh pa te lah a ngainain a hmangaih a, anni pawhin an hmangaih bawk a. Vawk bakah ar kan vulh tawh a, englaipawhin ar lei tur kan neih reng bakah artui pawh kan ngah ve hle tawh a. Thlai lah kan thar reng bawk a. Nuam a ti em em a, chung zawng zawng han kalsan chu a hreh ngang a ni tih ka hria a ni.

“Ka nu leh pa te nen sawiho phawt a van tha ve.”
“Kan sawiho tawh a, a awm min tihpui vek tawh a. Kan nupa thutlukna ang ang chu tha an tih thu min hrilh tawh a ni.”
“E he, ka hriat lohvin hma i lo la fel diam tawh a ni maw?”
“Thangte, fa pahnih chiah ka nu hian a nei che u a, a naupang zawk leh hmeichhia zawk chu a ngaiin a thlahlel che a, a hriselna a tha lo bawk nen, a khawngaih thlak alawm.”
“Nangin tha i tih chuan ka hnial lo. Mahse ka nu leh pa, ka ute leh huan leh Runmawi te han kalsan chu ka van hreh.”
“Kan dam phawt chuan kan tlawh fo dawn tho alawm.”

Aizawl ah kan awm ta. Kan pem dawn lai boruak vel sawi tur tam tak a awm a, mahse ka sawi tello mai ang. Kei chu Thangtei pa te contract hna viltu ah ka tang ta a, a thente phei chu anmahni hming mah nise keima chanpual liau liau atan te min ruat sak a. U Rinsanga nen chuan kan zin deuh reng a ni ber mai. Thangtei chuan awm mai mai aiah tiin dawr hawngin second hand thuamhnaw a zuar ta a. Lungtiawii chu a pi in a chang chawt a. an awmpui te nen an hlimpui hle thin.

Ka u Romawia chu a khat tawkin Aizawlah a lokal reng reng a. Pik up chu aman a khalh mai a. A changin ka u Manuni a rawn hruai a, a changin ka nu leh pa te. An lo zin chang chuan kan hlim thin khawp mai a. Thangtei lakah hian ka chhungah te hi an lawmin an ngampa a, chu chuan a felzia a tilang hlein ka hre thin.

Hun a lokal zel a. Kan nupa in hmangaihna leh in thlakhlelhna chu a la pangngai reng ti ila, tlem chuan danglamna deuh a awm a, chu chu keima lam dikloh vang a ni. Engtiklai atangin nge Thangtei chu a thau tak riau mai ka hre lo va, a thau ta tial tial a. Zingah exer te la tur ten ka ti thin a, mahse a peih chiah lo a niang, ngaihdam min dil pahin, “Min hrethiam rawh Mateipa, ka peih rih ngang lo a ni,” a ti a. Ka hrethiam mai a. Mahse, a thau vin a pian nalhna te chu a bo zo ta a. A hmel thatna erawh chu ala pangngai reng a, ala chuai chuang lo.

Kan nupa in ngaihsaktawnna kawngah chuan ani chu a pangngai reng ti ila, min ngaihsak tial tial zawk ni hian ka hria a, kei erawh chu ka danglam hret hret a. A inbual tur inphelh ka hmuhte hian nidangah chuan ka it a, han kuah thuak thuak te hi ka ching a, a chang chuan kan inbual dun bawk thin a. Tunah erawh chuan chutianga han luah chakna chu ka nei ta mang lo va, Buddha lim hi ang riauvin ka hria a. A ruk tak chuan ka mang a ang a, min hmangaih em emtu leh min thlahleltu, keipawhin ka hmangaih, ka phu zo lova ka hriat thin kha a ni a, chutianga amah ka itna leh thlakhlelhna a kiam ta deuh chu ka inthiam lova, mahse a hnenah chuan ka sawi ngam si lo.

Min pui thei tur lehkhabu te ka dap a,Chicken soup for the couple tih te leh ka lehkhabu neih sa te chu ka chhiar ka chhiar a. Keimaha ka nupui hmangaihna chu tih pun leh tumin theihtawp ka chhuah a, mahse ka thinlung hian min thlawp tha duh tlat lo va, chu chuan min tihrehawm a. Engtik atang khan nge ka fawh tak ngai loh tihte ka chhut a, ka fawp chak ngang lo a ni.

Thau hian ken tel a nei a, chu chu tum miah lohva vawih hi a ni. A mu han tho tur te, a thu han tho tur te hi a vawih thin a, ka lakah chuan a inthlahrung hle thin tih ka hria a. Kei hi vawih thlahdah ngai thei miahlo ka ni si a. Mahse a awmdan ang ang chu pawm thiam turin ka inbuatsaih a, ka tum bawk a, mahse ka thei famkim si lo a ni. Ka thinlung hi arukin a rum a, “Aw,,,,Thangnunnemi, itawm, pian nalh, ria chum bat kha hmuh leh ka van chak em,” ka ti thin a. A thau hmaa a thlalak te chu lian deuh deuhvin ka siam tir a, kan bangah leh khum bulah te ka tar a. Mahse chu chuan a laka ka rilru puthmang chu a tidanglam thei chuang si lo.

Hna vilin khaw dangah rei tak tak awm chang ka nei a. Call emaw, msg thawn emaw pawh ka phur ta mang lo va. Anni erawh chuan min ngaihtuah a, min ngaihsak a, “Ngatinge Mateipa i van reh thin ve. Ka ngaihtuah thin tehlul che nen,” a ti thin a. Ka chhungrilah inthiamlohna a lian tial tial a. Ka mangang chuan, “Lalpa, Mateinu hi tlemin ticher leh deuh thei la ka van duh em,” tiin ka thlen ta hial a.

Ka hriatloh hlanin ka mit a rawpin a lerh tan ta deuh riau mai a. Hmeichhia, hmeltha leh pian nalh tak tak kekawr fan thei taksa rem zaih mai bawk si an han ha a, an kap zawn pawh khuh si lova an han awm te hi ka inrin hma hian ka lo melh leh thin a. An englo thla lo lang te chu hmuhnawm ka ti ta riau mai bawk a. Motor te, thil reng reng chu a chhuak hnuhnung apiang an nalh ang mai hian nula te lah chu an nalhin an ruangam an tilang chiang tial tial mai bawk si a.

District Capital pakhatah insak hna ka vil a. Mimal ina thlena mi tana phur rit nih ai chuan tiin Hotel ah ka innghat a. Ka puzawnte pafa hi an contract hna ah an duhtuiin an fimkhur em em a, an mizia chu keipawhin ka duh zawng tak a nih avangin hlep tam (hlawh tam) ringawt ai chuan nakin zela miten ‘a hna a tha’ tia min sawi tur chu hlu zawkin ka hria a. Chhunah nilengin hnathawhna hmunah ka awm ve a, tlaiah hnathawkho ban vek hnuah ka haw ve chauh thin a.

Tlai khat hotel-a ka haw chu a kawtah Car nalh leh changkang fe mai hi a lo ding a, mikhual thleng thar an nei a ni ang tih ka ring a, mahse ka engto lem lo. Ka tan engmah danglamna a awm chuang lo bawk a. Ka pindanah ka lut a, ka inbual nghal a. Ka inbual zawh ah chaw ka ei nghal a. Chawei khamah khumah bawk zalin lehkhabu ka chhiar leh nghal a. Lehkhabu hi ka thian kawm ngeih ber a ni a, a tello hian ka awm theilo a ni ber mai. A chang chuan Thangtei hian, “Kei aiin i lekhabu te hi i duh zawk a nih hi,” tiin min khak fiam thin a ni.

Ka lehkhabu chhiar chu ka lo muhil a. Ka pindan kawngka kik ri chuan min ti harh a. Hmeichhe aw hian, “Khawngaihin min lo hawn vat teh,” a ti a. Ka mangphan a, ka harh nghal thuai bawk a. Kawngka chu ka va hawng a, kawr pan fual tak hain hmeichhia kum 30 vel ttur hi a lo lut nghal a. Kawngka chu chhung lamah a kalh nghal a, ka khum bul chair ah chuan a thu nghal a. Engemaw hlauh nei niin a lang a.

“Engtizia nge?”
“Keimahin ka mu ngam lo. A rawn kal leh ngei ang.”
“Tu chu maw?”
“Ka hrelo.”
“Engnge a awmzia?”
“Vawiin ah Aizawl atangin ka lo thleng chiah a. Naktukah kan Department in meeting pawimawh tak kan nei dawn a, chutah chuan paper ka present dawn a. Ka hah avangin dar 6:30 ah khan ka mu a. Ka muhil nghal mai a. Dar 7 hnu lawkah khan ka harh a, engvangnge ka hre lo va. Ka zung a, ka mu leh nghal mai a. Chutah ka ke lamah hian a rawn zut chho va, ka tho zawk a, ka han en a, tumah ka hmu si lo. Khum hnuai te, Bathroom te ka en a, tumah an awm lova, kawngka lah chhung lamah ka kalh bawk si a. Ka ngaihtuahna mai mai a ni ang tiin ka mu leh ta a. Ka hnute ah hian a rawn chul leh a. Ka kutin a kut chu man ka tum a, mahse man tur a awm lo. A kut lah chu a lian hle mai a. Hotel neitute hrilh ka tum a, mahse min awih sak ka ring lova. Ka rawn pan tawp mai che a ni. Awi, ka rap lutuk,” a ti a, a khur deuh va, a dang var deuh pap bawk a.

A thil sawi lai chu ka a mit takah ka en a, phuah chawp sawi mai chu a ni lo ang tih ka ring a, mahse thlahrang tih vel hi ringlo pawl tak ka ni thung a. Amah chu rilru buai deuh emaw, rim neilo chi a rui emaw a nih ka ring nghal a.

“Hotel neitute kan hrilh mai dawn em niang?”
“Hrilh rih lovang. Min awih sak pawhin ka ring lo.”
“A nih chuan pindan kan in thleng mai dawn em ni?”
“Aih, keimahin ka awm ngam lo.”
“Eng mi nge ka nih pawh i hre si lova.”
“Hre lo. Mahse i lo haw lai khan ka hmu che a, mi sual i ni lo vang.”
“Thil hi a lan ang ngawt a ni lo fo asin.”
“A dik alawm. Mahse a lan anga ni hi a tam zawk a ni.”
“Kha...i inthuamna lah khati kha a ni a, mipa tan chuan rilru dang put a har viau asin.”
Chu veleh a in en a, a ban chuan a kawr chhana a hnute lo lang viai viai chu a hliah tat tat a. Hnuai lam pawh a hmuh theih lek lek a, kekawrte var a ha tih pawh a hriat theih a ni. A hmelah chuan zahna a lo lang a. “Min ngaidam rawh, ka ngaihtuah hman lo a ni. Khawngaihin i towel hi ka lo sin lawk mai aw,” tih leh buan bannaa ka towel inbang chu lak a rual a, a sin ta nghal a.

A pindana mu tura tih luih leh chi niin ka hre lo va, a pindana riahsan lah tihchi ah ka ngai bawk si lo. Tichuan, a pindana a thuamhnaw te leh puan thuah te chu ka la a,thutthlengseiah ka mu a, ani chu khumah muin puanin a intuam a. Chanchin te tlem tlem kan inhrilh a. Light chu off lo mai turin min ngen a. Kei hi light on chunga muhil hlei theilo ka ni a, mahse ani thlabar taka a awm ai chuan tiin ka off ta lova.

Lehkhabu ka chhiar leh a, ani chu a muhil ta niin ka hria a. Ka lehkhabu chhiar chu ka rilru ah a lut ta tlat lo mai a. A hmaa ka lo ngaihtuah loh chu ka rilruah a rawn lutin ka ngaihtuah ta a. A hmel chu a tha khawp mai a, ngo lampang deuh a ni a, a pian pawh a dik thlap mai, mahse nuthlawi emaw pasal nei tawh emaw chu a ni ang tih ka ring a. A kawr hak pan tak chhana a hnute lo liang thiang rual mai leh a hmur tlema hang deuh hlek te, a kekawrte var leh a mal te chu ka mitthla ah a lo lang leh a. Chu veleh Thangtei laka rinawm ta lova inhriatna ka nei ta nghal bawk a.

Ka mutna chu a nuam lem lo na a, hrehawm tak chu a ni lo. Chhuata mut mai tur em niang aw ka ti a, mahse chukchu a awm palh takin ka ti a. Ka muhil ve ta a, ka mutthilh hma lawkin banga sana intar chu ka en a, dar 12:10 a ri tawh a ni.

Rak thawt ri chuan min ti harh a, khum atanga lo thovin min rawn kuah thut a. “Ka hlau lutuk, hawh, i mu dun mai ang. Min rawn zut leh tawh,” a ti a, a taplo chauh tih ka hria a. Ka rilru a buai ta map mai a. Hmeichhia hlau leh thlabara awm a ni bawk si a, ka thin te a rim lek lek a.

“Engemaw ruih i nei a ni lo maw?” awka vin lek lekin ka ti a.
“Engmah ka rui lo. Zu chu tlem tlem ka in thin, mahse zaninah hian ka in lo.”
“Tak tak maw?”
“Pathian hmingin, tak tak a ni.”
Ka khawngaih bawk si a, khumah chuan ka insawn ta nge nge a. Ani lah a khur dar dar a, a hmel lah chu a dang bai mai bawk si a. Puan chu a hrangin ka sin a, mahse, “Hawh, ka ngam hlawl lo, min khawngaih hram rawh,” a ti a. Nuam ka ti lo hle mai na a, a duuh ang chuan kan inzawn ta nge nge a. “Muhil hmasa suh aw, awi, ka rap em mai,” a ti a. A zangthalin ka mu a, a ni chu ka lam hawiin a saisirin a mu a, a ban dinglamin min kuah a. Reiloteah tui takin a muhil ta a. A hmel chu ka han en thin a, hmeichhe lepchiah chu a nih ka ring lo va, a thil tawn chu mak ka ti hle a. Mu zangthal chung chuan engemaw rawn khawihtu a awm veleha hmu thei nghal mai turin ka inralring a. Mahse engmah ka hmu si lo. A hnute in min rawn nawk a, a mal dinglam chuan min rawn khan bawk a. Mahse ngaihtuahna thildang keimahah a awm lo va, amah rawn khawihtu chu hmuh tumin ka inralring reng chung chuan ka lo muhil ve ta daih a. Ka han harh chuan zing dar 6 a lo ri tawh a, ani chu a inbual zo a lo inthlak mek tawh a. Ka han harh chuan min lo nuih sen sen a.

“Ka lawm lutuk e aw.”
“I la hlau em?”
“Hlau tehreng mai.”
“A nih chuan i thlenna sawn daih la.”
“Ka paper present tur te ka la check lova, check vek ka ngai a, a...ka present zawh veleh kan hotute ka dil ang a, a rem chuan ka haw nghal mai ang.”

Hming te kan inhrilh a, a hming chu Mitcheli a ni. Chawei khamah kei chuan ka kalsan ta nghal a. Ka chhuahsan lai chuan a laptop chu a on a, a bag pakhat atangin lehkha tam fe mai hi a la chhuak a, a keu vel mek a ni. Tlaia ka hawn chuan Mitcheli chu Aizawl panin a hawn tawh ka ring a, mahse chabi ka lam a, duty chuan, “I nau khan a la tawh,” a lo ti a. A la haw lo a ni tih ka hre thei nghal a.

Kawngka ka hawng a, a inbual zo towel vengin lotion vel a lo inchulh mek a. A rim chu a tui hle a. Min lo nuih a. “I hah em? I pindanah ti hian ngampa takin ka khawsa ta ringawt si a, min hrethiam ang tiraw?”
“Hah lo ve. Hrethiam lutuk e. I haw dawn ta lo em ni?”
“Naktukah account vel enpui turin min ngen a, ka la cham leh a ngai si a...”
“A ni maw? I la hlau em?”
“Tehreng mai. Zan hi ka huphurh ngawih ngawih.”

Chaw te kan ei dun a, chawei khamah pindanah kan lut leh nghal a. Ka lehkhabu chhiar lai chu chhiar chhunzawm thuai thuai ka chak a. Ka lehkhabu chhiar chu Chicken soup for the Romantic soul tih a ni a. A letlingtu in a let thiam bawk a, ka hawn huna Thangtei laka ka awmdan tur te leh ka thiltih tur te ka ngaihtuah phah nasa viau a ni.

Khumah a bawk a, lehkha a phawrh chhuak a, a en vel a. Keipawh thutthlengseiah mu awn chungin lehkhabu ka chhiar a. Dar 9 ah chuan a in dah fel a. A bag atangin whiskey a rawn phawrh a.

“Zanin chu ka tibuai lovang che. Hei hi ka in ang a, ka chat thla hmiah dawn. Thlahrang emaw ramhuai emaw pawh engmah ngaihtuah thei lova awm ka duh. Min hrethiam rawh aw.”
“Hrethiam teh reng mai.”
“I duh ve em?”
“Duhlo mai ang.”
A in thlit a, a tlak pap a, vawithum lai chutiang chuan a in niin ka hria a. A chhin tha a, khum bulah chuan a hung a.
“Zanin chu mutpui ka ngai lovang, mahse i mutna a hrehawm deuh dawn a ni. Nang ang mitha leh fel ka tawng che hi ka lawm lutuk. Mangtha aw.”
“Mangtha le.”
Ka lehkhabu chhiar laiah chuan ka rilru a awm tlat avangin ka chhiar zawm leh nghal mai a. Dar 11 velah chuan a rawn rum tiah tiah a. Ka en zawk a, a puansin a tlawh hlim a, a zangthalin, bawk kauvin a mu ta a. Ka mit chu ka la sawn mai thei ta lo. A hnute funna var, awng sir siarin a tuam a hnute leh hnuai lam tuamtu a kekawrte var, awng sir siar bawk chuan a ti itawm zual a. A mal vum leh var hai mai te, a kekawrte in a tuam lang deuh lek lek te chu ka en ta reng a, chutih lai tak chuan ka phone chu a rawn ri a, Miriami a lo ni a.

“Hnuna, nichin deuh lawk khan Thangtei a chau thut a, hei, damdawiinah kan kalpui a. A buai deuh riau mai a. A lam a lam che a.”
“E he, engtinnge a awm a?”
“Vawiin a dawr nghak a lo haw hma a, a nuamsam vaklo niin ka nu hnenah chuan a sawi a. A mu a, chawei dawnah ka nuin a kai tho dawn a, a harh hlei thei lova, New Life Hospital ah kan tlanpui nghal a ni.”
“Ka lo haw nghal ang.”
“A...eng em a ti lovang, zingah rawn haw zawk mai la.”
“Ka muhil thei chuang lovang. Ka rawn haw nghal zawk ang e.”
“Fimkhur tak khan rawn tlan la aw. A ngai lutuk che a ni mai thei a ni.”
Ka rilru a nuamlo takzet. Ka in siam sawk sawk a, Mitcheli chu kaihthawh chi pawh niin ka hre lo va, puan ka sin that tir a, chabi a kawl tho va, ka nem kalh nghal a. Ka thlen man te ka pe fel vek a, a rem a, a theih chuan ka kal leh vat tur thu ka hrilh a. Tichuan Aizawl lampanin ka tlan ta vang vang a.
“Thangte, Thangnunnem, min liamsan suh aw.” ka ti mawlh mawlh a.

THANGNUNNEMI VIII
(Edit hman miah lovin ka rawn post, uluk takin min lo chhiar sak ru)

Thangtei nghawng dinglamah chuan kutzungpui tiat vel bawk a rawn awm a. Ka pa (Thangtei pa) chuan Mumbai ah kalpui turin min ti a, mahse Thangtei ber chuan a duh rih tlat lo va. Aizawlah chuan biopsy an la a, a result ka lak ni chuan keimahin ka kal a. “Cancer niin kan hria a, mahse ennawn leh kan duh a,” an ti a. Biopsy lak nawn a, en nawn leh an duh thu min lo hrilh a.

Chhungrilah hian ka tla hnawkin ka hria a, cancer hi midang ta, midang vei tur chauh ah ka lo dah a, ka nupui ngeiin a vei ta a ni tih chu pawm har ka ti a, mahse pawmloh theih a ni bawk si lo.Cancer tih hian mahni chhungkaw chunga a lo thlen chuan min den dan a lo danglamin, a lo na hle mai a. Rilru ah a chhe ber thleng tura indahna a awm nghal a. A chhungte nen kan sawi hova, thil awmzia chu zep lova hrilh tlang nghal vek tha zawkin an hria a, a u Rinsanga chuan a hrilh a, kei erawh chuan ka hrilh thei lo. Rin ai daihin Thangtei chuan a dawngsawng thiam a, a hmelah leh khawsazia ah danglam a neih phah pawhin a lang lo.

Phai lamah kan kal ta nge nge a. Mahse, cheng tam tak kan seng a, thla ruk vel kan thang hnuah pawh Thangtei natna chu engnge ni tih chiang kuang takin an sawi thei lo va, a tira cancer an tih pawh chu a ni e tiin a nemnghehna tur chiang tak a awm lo an ti bawk si a. Phai atanga kan haw rual rualin Civil Hospital Cabin C-4 ah kan indah lut nghal a. Kan fate chu a pu te hnenah awmin Thangtei nu leh Miriami chuan an lo enkawl vek a, damdawiinah chuan Thangtei nutei fanu fel zet mai Ramtei leh ka u Manuni nen kan awmpui ta chawt a. In lama awm hahdam ve tura min tih pawhin ka duh lo va, a tawp thlengin Thangtei kiangah chuan awm ka duh a, chuvangin ka kalsan thei lo a ni.

Tunah chuan Thangtei chu ruhkawl, vunin a tuam ang chauh a ni tawh a. A zun chu an siak reng a, biopsy an lakna chu nitin an dressing a, a thaw a hah deuh avangin oxygen pek char char a ni ta bawk a. A hnenah leh Pathian engkimhretu hnenah chuan thinlungin thupha ka chawi mawlh mawlh a, a hriatah erawh chuan ka sawi lo. A takin uire lo mahila, ka thinlungin Thangtei chu ka uire san ngei niin ka inhria a. Chu chuan ka rilru ah inthiamlohna thuk tak min pe a.

Zun leh ek inthiar turin a chak tawk tawh lova, chuvangin a zun siak a nih bakah diaper kan hren tir a. Chu chu keimah ngeiin thlak ka duh a. A tirah chuan ka luak te a chhuak deuhvin ka ten deuh va, mahse a hnu lamah erawh chuan tenna ka nei tawh lo. Thangtei zawk chu a inthlahrung thin a, inthlahrung lo turin ka ti thin a.

Tuk khat chu nurse in a rawn dressing leh a, min entir a, a biang chu kut zungchal leng vel hian a kua a, a ha a lo lang a. A awmzia chu a biang chu a pawp tlang tawh tihna a ni. Thil tuiril kan intir te chu a biang lamah te chuan a hnam chhuak ta fo mai a. Ka thinlung chu a na ngawih ngawih a, hetiang taka natna hrehawm hi engatinge Thangtei chungah a lo thlen le aw tiin ka ngaihtuah thin a. Chuta tang chuan min kalsan hun chu a hla tawh dawnlo niin ka hria a.

Zan khat chu ka u Manuni leh Ramtei chu an muhil a. Thangtei khum sirah chuan ka thu a, a kut dinglam chu chelhin ka chul a. Thangtei damlo hi a beng a chhet lova, a rilru a buai lova, a hriatna a fim tha a. Min rawn tlawhtute pawhin chu chu an hre thin lova, an tawngsual lek lek fo thin a. Engemaw ni hi rawn sawiin ka hria a.

“Min bia em ni Mateinu?”
“Aw, bia e. Heti mai hi ka ni ta si a, Mateipa, ka lainat takzet che.”
“Chutiang zawngin rilru pu suh. Kei leh i fate tan i hlut em hi.”
“Mahnia ek in pan thei lova ka awm hi hrehawm ka ti.”
“Ti reng reng suh, ka thianfai zel dawn che alawm.”
A biang te chu a khuar deuh dak tawh a, a mitkhur pawh chutiang bawk chu a ni. Chuti chung chung chuan nui hmelpu chungin min en a, a mitmengah chuan min hmangaihna leh thlakhlelhna chu chiang takin ka hmu a.
“Min hmangaih tiraw Mateipa.”
“Ka hmangaih takzet che Thangte.”
A mittui chu a rawn hnam a, a bekah a luang thla mek a. Keipawn ka mittui chu ka dang kir hman lo, ka biangah chuan a luang a, tichuan ka kun a, ka fawp ngawih ngawih a. Chumi hnu reilote ah chuan a muhil siai siai a. A pulse leh oxygen enna, a kung zungchala vuah chi chu vuahin ka en a, Oxygen chu 96 a ni a, pulse chu 115 a ni a, a tha thawkhat tih ka hmu a. Tukverh bulah ka thu a. Ka diary ah chuan ti hian ka ziak a:-

I kimtlang ka hmu a, i sakruang ka thlir a,
I chawnban ka chul a, i sakhmel ka en a.
I taksa mar na te kha tunge la bo va, tunge hlep thla le?
Chhawrthlapui a lo eng leh a, nang nen kan intawn hmasak ber,
Zante kha min ngaihtuah kir tir a.
Khami zana i hmel mawizia te tak kha aw.
Min hmangaih ve a ni tih ka hriat zan te khan,
Khawvel hi ka tan i ti parvul a nih kha tiraw.
Ruah a lo sur a, khawpui a ri kal ruak ruak a,
Chungte chuan keimaha i zun zam te chu an tipung a,
Kawl a lo phe a, khawpui a ri un un a,
Hlau chungin i beng i hup chaih chaih a,
Ka tangchhungah muanna beiseiin i rawn bei a,
Thlamuang takin i muhil thin kha a ni a.
Nipui lo thleng te, thlasik lo thleng leh, fur leh thal thenna,
Thal favang turnipui mawi tak mai te,
Nang nena kan inhmangaihna tizualtu an ni thina tiraw.
Tunah chuan damdawiin khuma, taksa mawina nei lovin,
Ruhkawl vunin a tuam ang chauhvin chham ang i zal ta a.
I thau lai khan cher la ka duh a, i han cher tak tak chuan,
Thau la ka duh leh si a nih hi.
Ih e, Mateinu,
I thinlung zawng zawngin keimahah rinna i nghah lai hian,
I lakah hian thinlungin ka uire a,
Ka mit hian midang mawi tiin a thlir asin.
Mahse hetiang dinhmuna i din tak hnu hian,
Ka mamawh, ka ngaih leh thlakhlelh chu tunge tiin,
Ka chhut a, ka ngaihtuah a, min hmangaih thintu leh,
Min thlahlel a, min ngai a, min mamawhtu Thangnunnemi kha,
Nangmaha NANGMAH, hmuh theihloh, mahse nangmaha awm si,
Chu a ni tih ka hrechiangin ka fiah tawh a,
A tuamtu i taksa hmanga ka mitin nangmaha lungawina leh mawina,
Hmuh a beiseina chu ka thlauhthla tawh a.
Hmuh theihloh, englaipawha min hmangaihtu zawk chu,
Ka thinlung mit hian a thlir tawh zawk ang.
Min ngaidam la, i laka ka tlinlohna hi min theihnghilh sak ang che.
Mateinu, ka hmangaih che a, ka hmangaih ber fovang che.

Pathian hnenah hian lawmthu ka sawi thin a, thil dil erawh chuan ka tawngtai ngai meuhlo a ni. A chhan chu a thlawna min pek hi a tam lutuk hian ka hria a, ka dil belh ngam lo va, a lakah ka inthlahrung a ni. Eng min pe a, chu chu taksa tan vitamin keng tel a ni leh nghal a. Oxygen bur lian lemlo tak chu pakhat Rs.300 te a ni a, kan mamawh zual chang chuan darkar 24 chhungin bur thum hman changte kan nei a. Chutiang chu a thlawnin ka pian atang khan min la pe char char a. Tui intur min pe a, ei leh in tur leh silhfen nei theiin min siam a, hna thawk theiin min awm tir bawk a. Chuvang chuan dil belh ka ngam thinlo. Mahse tunah chuan duh ngawih ngawih ka nei a, inthlahrunna pawhin min dang zo ta lo. Tukverh bulah chuan ka thingthi a, thlifim chuan min rawn chhem a. Ka maimichhing a, ka thinlungin chunglam chu ka thlir a.

“Ka Pathian Lalpa Isu,
Chibai ka buk a che,
Thangtei hi khawvel ata chawl tawh se i tih chuan, ni suh se ka ti ngam lo.
I rorelna chu ka tan a tha ber a ni tih ka hria a ni.
Mahse chutianga chawl tura i tih dawn chuan,
Nat hrehawm lutuk hi tuar tir lo hram turin a ngen che a ni.
Ka duh ber erawh chu hei hi a ni,
Min tihdam sak leh rawh Lalpa,
A tello hian ka awm thei lovang, ka awm thiam lovang.”

Ka lung a chhia a, ka hnuk a ulh a, ka chham zawm hlei thei ta lo va.

“Chung chu Lalpa Isu i hmingin ka rawn dil che a ni. Amen.”

Ka Amen hnu pawh chuan ka meng mai lova, rinna ban chu ka phar a, beiseina thingkung, tisa mita hmuh theih siloh Lalpan a phun, mithianghlim kal tawhten an lo vawn thin chu vawn fuh tumin ka dap ruai ruai a. Chutah dap fuh ta hian ka inhria a, mak tak maiin ka thinlungah lawmna a lo thleng a, ka men rual rualin thlarau khawvel lam ngaihna namenlo chuan min rawn chim ta nghal a. Khum lam ka va en a, Thangtei chuan ngawi rengin min lo en tih ka va hmu nghal a. A mitmeng chu a de sar hian ka hria a, a hmelah chuan chhungrila lawmna leh lungawina chu mawi takin a lo lang chhuak niin ka hria a. Hlim hmelpu chungin a hnen lam ka pan a, dimtein ka kuahin ka pawm a. “Ka hmangaih che Thangte, ka Thangnunnem,” ka ti a. “Keipawn ka hmangaih che. Ka kiangah awm reng ang che Mateipa,” a ti sap a.

A diaper te thlak a, a kum kar engkim keu leh hmu a, a tenawmna te ka thenfai fona atang chuan keimahah danglamna a lo awm a, a tisa leh hmelmawina ni lova, hmuh theihloh amaha AMAH hmuhfiahna chu a ni a, amah ka duhna leh hmangaihna pawh chutah chuan a innghat ta bawk a. Tisa mit hmuhah chuan ruhkawl vunin a tuam ang chauhva nalhlo leh tlawm ni mahse ka mitah erawh chuan a danglam ta lo, ka hmangaih Thangnunnemi chu a ni ta tlat a, a danglam ve ta lo chu a ni.

Chhungkuaah tu ber emaw natnain a tlakbuak a, chau taka an awm chuan hmuh theihloh hian inchhung boruak chu thimin a bawm mum mai ni hian a hriat a. Han nuiin ni te lo chhuakin khawvelah enna rawn pe mah se nun chhungrilah hlimna kawl hi a eng tak tak thei lova. Kan rilru leh thlarau lam hi chu boruak thim chuan a hrek a, kan taksa hi a lo hah em em mai a lo ni tihte ka hriat belh ta zel a. Mite tawrhna te hriatthiampuina ka nei tam telh telh a ni. Ka faten damdawiina a nu an rawn tlawh te hian a hlimawm rualin, thinlung hi a taplo thei thin lo va. “Mite chu innei tura an inbiak rem vek hnuah te an in thihsan a, an inneih atanga reilote ah te an in thihsan a, kei chu ka la vannei zawk e,” tiin ka inhnem thin a. Midang min hnemna hi hluin tangkai mah se, ka tawnhriatna atanga keimah ka inhnemna hi ka tan chuan a hlu berin ka hre thin.

Ni khat chu Office dawr a ngaih avangin ka chhuahsan a. Office ka dawr zawh hnuah inah ka haw a. Ka fate chu a pute in lamah an khawsak vek avangin kan in chu a ruak hiai hian ka hria a. Thangtei sulhnu chu hmuntinah hmuh tur a awm a. Ka inbual a, ka inbual zawh hnuah khumah ka bawk zal a. Thangtei lukham hnuaia note bu te tak te chu ka khawih fuh a, ka keu va.

“Kei anga hmangaih ngawih ngawih pasala nei hi,
An awm ve angem tiin ka ngaihtuah thin.
Vawiinah vawi hnih min fawp a,
‘Ka hmangaih che’ vawi thum min ti a.
Mateipa hi chu ka duh a, ka ngaizawng a,
Ka hmangaih a ni.”

tih hi a phek hmasa berah chuan a lo inziak a. Ka keu va, phek hnihna ah chuan:-

Min zin san leh ta.
Lunglenna leh khawharna tihreh nan
Hna ka thawk a, mahse engmah hian a ti reh zo lo.
A msg leh a call ka chang a, ka nghak a,
Mahse a buai a niang,
Tlai dar 4 thlengin ka dawnglo.
Ka ngai che asin Mateipa.
tiin a ziak a.Phek dang keu leh zel chu ka hreh a, ka keu chak tho bawk si a, phek 3-na ah chuan ti hian a lo ziak leh a.
I mitmeng atang hian min itna te chu a bo ta a,
Min mamawhna te pawh a kiam ta tih ka hai lo.
Ka thau leh cher ah hian thuneitu ka ni si lova,
theih nise i tana itawm leh ngaihzawn awm,
I mamawh nih reng hi ka duh asin Mateipa.
Ka tan chuan Pathian tih lohah chuan,
Engkima engkim i ni asin.
Thiin piang nawn leh dawn pawh ni ila,
A theih chhung chuan ka pasal ni zel la ka duh ang.
Ka van ngai che em. Inrin hmain mittui a lo hnam thin a,
Chhumin tlang a bawm ang hian,
Ka ngaih che avanga khawharna hian,
Min bawm reng thin asin.
Lianhnuna tih hi midang tan chuan engmah a ni lo mai thei a.
Ka tan erawh chuan hming duhawm leh mawi ber,
Ka thinlung leh rilru englaipawha luah khat thintu,
A ni reng thin asin.

Ka thinlung leh rilru alaka a uirena te leh a lerhna te chu ka ngaihtuah let a, ani chuan min hmangaih zual deuh deuh ni hian a lang a, kei erawh chu a hnen ata ka lo hla tial tial tawh a, chu chu ka mitmeng leh awmdan atangin a hai hauh lova, ka lakah insit leh inthlahrung takin a lo awm a ni tih ka hria a. Chumi avanga thinlung na lutuk chu hetiang hian a awm ta mai em ni ang ti tein ka ngaihtuah a, “Thangte, Thangnunnem, min ngaidam lul rawh aw,” ka ti vawng vawng a.

A dinhmun ka enin second tinin min kalsan mek a, min hlat tial tial a, mihring damlaite khawvel chu hnutiang a chhawn mek a, thihhnu piah lam khawvel chu a hnaih tial tial a ni tih ka hai si lo. Midang hmuhah chuan ka nui a, ka chhungril erawh amah ngaiin a tap reng a, min kalsan hun tur ka ngaihtuah a, ka zuam lova, ka huphurh ngawih ngawih a. Damdawiin lam chu kal leh thuai thuai chu ka duh na a, awmpuitu an thahnem tho va, len khawthawn ka mamawhin ka hria a. Car ka la chhuak a, Durtlang lamah ka tlan chhova, Sihphir ka tlanpel a, Sakawrhmuituaitlang ka thleng a. Kawngsira khawthlirna an siam bulah chuan motor ka hung a. Chu khawthlirna ah chuan ka thu chawt a.

Ral lehlam hla tak, Chalfilh tlang leh a hnuai pangper vel te chu ka thlir vawng vawng a. Pi Lianzovi ruang thlak zana kan hla sak chu ka thinlung chuan a sa a.

En teh Lalpa kan lenna ram lungngaihna hi,
Thlaler hrehawm a ni;
Thihna hian thian min then fo thin,
I ram thlen hma hi zawng.

Ruah a lo sur a, thlipui a tleh a, ramsa te chuan ding chungin emaw, bawk chungin emaw an tuar ngawt ngawt a, mihringte angin an tawmhulna tur in an sa thiam ve lo. Chutiang an mai chuan tahna te, lungngaihna leh lusunna te leh natna te lakah chuan theihtawpin zalenna kawng kan zawng a, kan dap na a, kan zalen zo chuang lova, thihna do zo kan awm lo va, mita hmuh thamloh natna te chu kan hneh zo lova, mual kan liam leh nge nge thin a, kan tuar tlawk tlawk mai nite hian ka hria a.

Thangtei nena kan sulhnu zawng zawngte chu rilruin ka fang kual ruai ruai a. Kan huana zan thlaeng hnuaia kan awm thin lai te, thim hnuaiah pawh kan hlim thinzia te ka ngaihtuah a. Pawnlam eng leh thim aiin, chhungril lam eng leh thim chuan kan nun a nghawng na zawk daih tih ka hria a. Ka thu hle hle thei lova, ka ding a, ka vei tawn chhen a, mahse eng thil mah a danglam thei chuang lo. Damdawiin lam ka ngaihtuah a, Thangtei chuan min lam kher lovang, mahse a thinlung chuan min ngai ang a, min au ang a, min lam nawn awn awn tawh ang tih ka ring a. Sidartha-an mihringte tawrhna tihbo dan emaw, tihnep dan emaw zawng tura lalthutthleng te leh a nupui hmeltha tak leh a fate a kalsan tak dan te ka ngaihtuah thleng hial a.
Mim ang piangin khuavel timawi turin,
Chun nun a chawi lian che;
Mawi zawng zawngte khum zo vekin,
I lo par chhuak enchimloh Thangnunnem.
Awmlai a lo hrang, i sakruang a lo danglam a,
Laitha a zam lo, chauvin laikhumah i zal maw?
Ka ngai thiamlo Thangte, aw Thangnunnem.
Ka ngen che chung khuanu,
Mau rua ang tuai thar tir leh la,
Damna hlan la, natna laikhum ata,
Kai tho lehin par ang vul tir leh rawh.

ka ti a. Lungdai lam panin ka tlan zel ang a, ramhnuaiah ka awm rih mai dawn em ni aw tiin ka ngaihtuah lai takin Ramtei’n min rawn phone a. “U Hnun, a dinhmun a tha vak lo,” a rawn ti a. Car ah ka lut a, Aizawl lam panin ka tlan leh ta a.

Ka thlen chuan Miriami chuan a hnungah thuin a lo pawm thu a, a lo chau hle mai a. Oxygen leh pulse enna pawh chu a mumal loh chang a awm a, oxygen chu 59 a ni a, pulse chu 150 a ni thung a. A dinhmun chu a thalo hle tih ka hria a.

“Thangte, tang fan fan rawh aw,” ka tih lai chuan khum sir lehlama ding a nu chuan rawmawlin a hmai a hup a, a in hru mawlh mawlh a. Daktawr leh nurse ten theihtawp an han chhuah a, tichuan 86 leh 125 a ni ta a, a pangngai leh ta deuhva. Mut a duh thu a sawi a, ka pawm a, Miriami chu a chhuk a, tichuan zawi tein ka mut riai riai a. A beng bulah chuan, “Thangte, ka hmangaih che asin. I tello chuan ka awm thei lo tih hria la, tang fan fan rawh aw,” ka ti a. A rawn meng a, a nui sak a. Ka kut dinglamin a chal ka khawih a, ka kut veilamin a kut chu ka vuan bawk a. Reilote ah tui takin a muhil ta siai siai a.

Mi lian leh hausa an ni a, chhung leh khat milian leh neinung tak tak an ngah a, minister pahnih pawhin an rawn tlawh tawh a. Phai lama in enkawl kan duh phawt chuan min ngaihtuah sak an inhuam thu te an sawi a. Mahse phaiah kan kal kual hrep tawh a, kal leh chu Thangtei chuan a duh tawh tlat lova, ka nih tur chu ka ni tho tho ang a ti tlat si a.

Chhun a ni a, ni a rei mang e kan ti a, zan a ni a, khua a var har mange kan ti a. Engemaw a lo thlen kan beisei a, mahse engemaw chu a thleng thei si lo. Ei leh in tur tha an tih ang ang chu kan lam rawk rawk a, kan pe zel a. Mahse, a taksa ah chuan danglamna lang a awm lova, a nunah danglamna a awm hek lo. Ka mangang chuan, “Lalpa, a cher ka dil che a, hei hi em ni min chhanna? Ka dil hi a awmzia leh a nghawng tur natzia ka lo hrelo a ni. Min ngaidam la, ka dilna kha ka sut leh a ni, ka sut leh takzet,” ka ti ka ti a.

Zing dar 3:10 velah hian ka kut chu a rawn hmer deuh salh hian ka hria a, ka lo muhil hlek a lo ni a. Ka harh vat a, ka en nghal a.

“Mateipa, i chau em?”
“Chau love, ngatinge?”
“Ka khawngaih em mai che. Mutthilh tum ta che.”
“Ka muhil deuh reng alawm.”
“Min ning lo tiraw?”
“Ka kham mawlh lo che Thangte.”
“Min ten lo tiraw?”
“Ten teh suh e.”
“Ka lawm e. Ka tan i hlu....”
“Thangte....”

Ka tawng chhunzawm thei lova, kan mit a intawng a, kan in en tlawk tlawk a. Chu mitmeng mawizia chu...chutiang ang renga mawi chu ka la hmu ngai lo...

THANGNUNNEMI IX

Ka thinlung leh rilru ngaihtuahna zawng zawngte ka sawi ni miah lova min hriat kim sak vek leh ka tlinlohna zawng zawngte pawh min hrethiam a, min ngaidam vek mitmeng a ni ka hmuh chu ni. Chutiang chu mihring mitmengah vawikhat mah ka la hmu ngai lo va, Thangtei mit pawh vawi tam ka en tawh a, mahse hetiang ang mitmeng mawi lutuk hi ka hmuh vawi khatna a ni. A mawizia chu khawvel thila khaikhin tur engmah a awmin ka hre lo va, a mawi ka tih hian a sawifiah zo lo. Ka nun chhungril leh kil ber pawh a hmu kim vek a, chutih rual chuan ka hahdam em em bawk si a. Amahah Tlantu Ropuia chu awmin, ani chuan Thangtei mit hmang chuan min rawn en a nih ka ring ta ber a ni.

Rei tawk kan in en hnuah a maimichhing a, a zawi ta riai riai hian ka hria a, min kalsan dawn ta ni ngeiin ka hria a, a awmah ka kut ka nghat a, mahse a lungphu a tha a, a mar ka dek a, a phu tha bawk a. A kutzungchalah tehna chu ka vuah thuai a, 96-102 a ni a, engkim a tha vek si. A muhil ta a ni ang tih ka ring a, ka ngaih chu a tha ta deuhva. A khum bawhin keipawh chu ka muhil a. Zing dar 5:55 a ka harh pawh chuan Thangtei chu a lo la harh lova, Miriami leh ka u Manuni leh Ramtei te erawh chu an lo tho daih tawh thung a.

Zirtawpni a ni a. Tlai dar 4 ah ka fate chu a pi leh an awmpui Lucy te nen an lo thleng a. Lungtiawii chu a nu bulah a pi chuan a thut a, a nu chuan thei leh thei lovin a lo kuah a. A nui ver ve a, a nu oxygen hipna hrui te chu khawih a tum a, an pawm sawn leh ta thuai a. Thangtei pawh a hmel a hlim hle a. Mahse kei chuan a hniam hret hret a ni tih ka hria a. A fate nen chuan an inbia a, eng eng emaw an sawi a. Engnge an sawi mumalin ka hre thei lo, a chhan chu ka ngaihtuahna a kal ding em atin ni.

Tlai dar 5:30 ah ka fate chu an haw pui ta a. U Rinsanga zin a lo haw a, a thian thenkhatte nen an rawn tlawh a. Ei tur an rawn ken te chu kan ei a. Zan dar 9 velah min hawn san ta a. Ka u Manuni chu a chau tawh riauvin ka hria a, chuvang chuan in lamah mu hahchawl se ka tih avangin a haw tel ve a. Kei leh Miriami leh Ramtei’n kan awm pui a. Zan dar 11 velah chuan a thaw a hah zual a, a lungphu a rang a, a kut zungchalah chuan a tehna chu ka vuah vat a, 55-145 a lo ni a, a tha lo hle tih ka hre thei nghal a. Miriami chu nurse kovin a tlan nghal vat a. A biangah ka kut lehlama chulin lehlamin a kutah ka vuan a, oxygen chu kan tisang bawk a. Nurse a lokal a, daktawr duty an ko vat bawk a. Darkar khat vel hnuah chuan a pangngai leh thei ta a.

Min kalsan dawn emaw ka ti thuai zel tawh a, mahse a lo kir leh ta ni berin ka hria a. Khua var thuai thuai se ka ti hle a, khawfing a chat a, kawl a lo eng a, ni a lo chhuak a. A pangngai te in kan awm leh ta a. Mahse kan tawpna chu kan hnaih hret hret a ni tih keimahah chuan hriatna a awm tlat a. Khawi dangah mah ka kalsan phal tawhlo a ni.

Inrinni chawhnu lamah chuan pawn bathlarah ka va dak lawk a, ka hawi vel lai chuan Cabin building kawta U Sapthlenga kal lai mek chu ka zuk hmu a. Kan tlangval tirh vel laia ka hmuh bak ka la hmu leh miah lova. Kan naupan laia min hruai vel thintu ber a ni a. Ka en mek lai chuan chunglam a rawn hawi chhova, min rawn hmu a, a nui suk a. “Hnuna i ni maw?” a rawn ti a. “Ni e, khawnge i kal dawn?” ka ti a. “Damlo ka tlawh lawk dawn a ni. Engtizia nge khatah i awm a?” a ti a. “Ka nupui a dam lova, ka awmpui a ni,” ka ti a. “E, a ni maw, ka rawn kal ang e,” a ti a. Kar lovah ka awmna chu a rawn thleng a. Chanchin min zawt a, ka hrilh nghal mawlh mawlh a. Civil Hospital ah chuan a lo thawk reng mai a lo ni a. Specialist a lo ni lehnghal. Thangtei chu a han en vel a, thiltih dan tur min hrilh mawlh mawlh a. Tichuan, a kal sawn leh ta nghal a.

Thangtei enkawl mektu daktawr chu ka zawng a, mahse a lo awm lo va. Nurse pakhat, Thangtei te chhung hnai deuh hnenah chuan thil awmzia ka sawi a. Ani chuan daktawr chu min phone sak ta nghal a. Kan inbia a. Ka nupui chu Dr.Sapthlenga entir (check tir) a rem leh remloh ka zawt a, min remtih sak turin ka ngen a ni ber mai. “Eng kan ang tawh dawn chuangin a lang lova, mahse ngaih that nan min remtih sak hram la ka van duh ve,” ka ti a. Ani chuan min remtih sak nghal a. U Sapthlenga chu chanchin ka hrilh nghal a.

Tlai thim dawnah U Sapthlenga chu a lokal a. Ngun takin a han check vel a. A hmanraw rawn ken pakhat chuan a hnungzang ruh thling a hip chhuak a. Eng damdawiin emaw ni a chiu nghal bawk a. Min kalsan dawnah chuan pawnah min kai chhuak a.

“I nupui hian darkar tam a daih tawh ka ring lo Hnuna. Mahse, chhel takin awm ang che aw. ka nau fel tak i nih thin kha. Tihian ka thil lak hi ka va endik tir nghal ang a, beisei tur engmah chu a awm tawhin ka hre lo va. Ka hmuh dan chuan cancer, a englai ber nge tih hriat theihloh ang chi hi a ni mai thei a. Mahse, thil pakhat rin deuh ka nei a, chu chu a nih leh nih loh enfiah ve ka duh a ni. A nih ka kal ang e aw,” a ti a. Min kalsan tur chu ka ui hle mai a, mahse chelh chi a ni si lo.

Zan dang zawng aiin a harh a, a oxygen leh pulse tehna ah pawh 96-98 a ni a, chuvang chuan Miriami leh Ramtei chu mu hahchawl turin ka ti a. Dar 11 ah chuan anni pahnih chu tui takin an muhil ta a. Engmah na emaw, pang kham emaw sawisel a nei lova, khumah chuan a bulah ka bawk a, kan inkawm a. Dar 1 ah chuan tui takin a muhil ta a. Tukverh bulah chuan ka va thu a. Thana ah chuan mi pakhat hian a phone emawni hi a zai tir a. Kenny Rogers leh Dolly Porton te zai a ni a, an hla sak chu We’ve got tonight tih a ni a. Thangtei mu lai chu ka va en a, chu hla chuan min vel lo thei ta lo. Kan pahniha zan kan hman dun hnuhnungber ni dawna hriatna ka neih vang a ni pakhat a, chuvang chuan min hneh zual a ni. Van hla taka arsi de neuh neuh te chu ka thlir vawng vawng a, awrawl ka chhuah lova, mahse ka taplo thei lo a ni. An zai ka ngaihthlak atanga hla thu nia ka hriat angin kan ziak hram teh ang.

I know it's late,I know you're weary
I know your plans don't include me
Still here we are both of us lonely
Longing for shelter from all that we see
Why should we worry no one will care girl
Look at the stars now so far away.

We've got tonight
Who needs tomorrow
We've got tonight, babe
Why don't you stay
(He lai thu bik hi ti hian ka thinlung chuan ka lo let ve a: A thianga len nan hun tam zawk mamawh hle mahila Thangnunnem, zanin hi nang nena kan neih chhun a ni dawn ta si a, chuvang chuan hringnun hnuchhawnin thihna Jordan pelin min la liam san bik lul suh aw, tiin)

Deep in my soul I've been so lonely
All of my hopes fading away
I've longed for love like everyone else does
I know I'll keep searching after today

So there it is girl I've said it all now
And here we are, babe What do you say

We've got tonight
Who needs tomorrow
We've got tonight, babe
Why don't you stay.

Ka mittui chu hruk sen rual loh hian a luang zawih zawih a, hruk zai pawh ka rel lo. Tukverh ah chuan ka dak chhuak a. U Sapthlenga’n, “I nupui hian darkar tam a daih tawh ka ring lo,” a tih chu ka bengah a rawn ri nawn leh a. Thangtei awmna lam ka pan a, ka han dek vel a, a lo dai riai a. A mar ka dek a, ka hmu lova. U Sapthlenga chu ka phone ta ringawt mai a. Reilote ah a rawn thleng a. A han check vel a. “A la chat thla lo, hei hian risk lain ka jection dawn a, mual a lo liam ta a nih pawhin tumah i hrilh tur a ni lova, mahse a lo that phah mial thei bawk. Ka rindan chuan thling TB niin ka hre tlat a, mahse ka la nemnghet chiah theilo,” a ti a. Reilote ah min kalsan leh ta nghal a.

In lam chu phone tur em ni ang? Miriami leh Ramtei chu kaih thawh tur em ni ang? Ka rilru a insual nasa hle mai a. Amah chu ka han khawih vel a, a zawi ngiai a, a dai vek hian ka hre bawk a. Mahse a marphu nichina ka hmuh tawh loh chu ka hmu leh a, a lungphu pawh a rawn phu leh tawh a. A kut zungchala vuaha kan tehna thin chu ka vuah vat a. 68-125 a lo ni a. Oxygen chu tlemin ka tisang hret a. Minute 10 tal chu thinlunga Lalpa auva Thangtei bula mahni chauhva hun hman rih duhna ka nei ta tlat a.

Ka kut pahniha a kut veilam chu vuanin ka maimichhing a. Ka thinlung ngaihtuahna zawng zawng chu
ka sawm khawm a. Rinna mit-in Kalvari tlanga khawhar taka maldin Kraws chu fiah takin ka hmu a, a hmaah chuan ka thingthi a.
“Ka Lalpa duhtak,
I hnena i la dawn a nih pawhin ka vui lo.
Mi lo tawh tawh chu ka tawk ve dawn tihna a ni si a.
Chatuan ata nung reng leh Pathian ropui,
I lakah chuan te tak te mai, engmah thamlo ka ni a,
I rorelna sawisel phak tur ka ni mawlh lo.
Mahse hei chauh hi ka dil a che.
Kei aiin ani hi kan faten an mamawh zawk si a,
Chuvangin ka nunna hi la la, a ni hi hring lamah,
Rawn kir tir leh hram la ka duh a ni.”

tiin ka thlen a.

“Thangte, min kalsan dawn ta em ni? Ti hian hnutiang min chhawn mai ang maw? Runmawi ah kalin kan riak dun leh dawn lawm ni? I hmangaihna leh ngaihsakna ka la kham lo va, ka mamawh a, ka thlahlel asin.” ti chung zelin a ban chu ka chul ka chul a. Khawvel chu a reh ngawih ngawih a. Police Thana atanga zairi pawh chu a reh tawh a. Engkim hi chawl deuh dukin ka hria a. Chu pindanah chuan boruak insual mek hi awmin ka hre bawk a -thlarau khawvel leh hringlam khawvel boruak chu. Ka nun chu chhungrilah a hah a. Thangtei chu ka en a, a thlarau chuan a taksa chu chhuahsan a tum mekin ka hmu a, mahse amaha engemaw hian la chelh ding rih ni hian ka hre bawk a. Chutiang anga boruak awm chu a rei hle mai a, darkar hnih vel lai a ni. Ka tawngtai thuchham ngai bawk chu chhamin a khum bulah chuan ka thingthi a, chutiang chuan vawithum ka ti a. A vawithumna zawh chiah ah chuan dil tul tihna chu keimah ata lak bovin a awm ta hmiah a. A nih tur ang ang hmachhawn turin ka inpeih ta a.

“A tawk ta e Lalpa, i thu ni rawh se,” tiin a rorelna hnuaiah chuan ka inpumpek ta thlawp mai a. Hei hi keima rilru thutlukna a ni lo va, keimahah chuan thawktu egemaw tak a awm a ni tih ka hria a ni. A tehna chu ka en leh a, 96-98 a ni ta tlat a. Mak ka ti em em a. Mahse ani chu a che miah lova, nunna a la nei a ni tih hriat theihna turin amahah che a awm lo, tehna chuan a teh dik thei tawh lo nge ni a, ka thlamuanna turin chunglamin chu number pahnih chu a rawn tilang zawk ni ang?

Mihringin thihna lui a daikai lai boruak hi a lo van khawharthlak dawn em aw. Kei chuan ka la dai lo va, mahse dai mektu chu a awm niin ka hria a, chu chu ka chhungril chuan a tawmpui tlat si a. A taksa engkim chu ka chul a, a thaw a tawp atang chuan minute nga a liam ta a. Zinglam dar 5 a lo ri ta bawk a. Miriami leh Ramtei chu kaih thawh a, inlam pawh hrilh a, “Thangnunnemi chu mual a liam ta, mihring a tling zo ta lo a ni,” tia hrilh ka tum ta a. Ka inher dawn lai tak chuan ka kutah chuan a rawn man ta tlat a. Makti em em chungin ka inher a, fiah tak leh zawite si hian, “Ti rih suh,” a ti a. A meng chuang lova, a taksa che reng reng a awm bawk si lo. Ka hriat sual em niang aw tiin ka ngaihtuah a, mahse a chiang hle bawk si a. Ka banah pawh chuan ala hmer reng bawk si. Ka bianga mittui luang chu ka hru thuak thuak a, a biangah ka chul a. “Min kalsan ta emaw ka ti asin Thangte,” ka ti a. Min chhang lo va, min vawnna chu a thlah a.

A thaw a tha a, a mar leh lungphu a tha a. Tunah chuan tui taka muhil ni maiin ka hria a. Keimahah chuan min mawlhtu engemaw a awm a, chu hmun atanga kal chhuah chu ka chak ta em em mai a. Miriami leh Ramtei lo thawh hnu chuan bathlarah ka chhuak a, ka vei ka vei a. Midang an lo kal ta zel bawk a. Nurse chuan a rawn check a, a BP te pawh tha vekin a hria a.

Chaw tlem te ka ei a. Lenkhawthawn ka duh a ni ka ti a. Tichuan ka chhuak ta vang vang a. Kein ka kal ka kal a. Khawlaia mi kal vel te chu ka thlir a, ‘Nakin lawka mithi ni mai tur vek in ni si a,” ti tein ka ngaihtuah a.A changin kawngpui sirah ka ding a. Thenkhat chu chak deuhvin an kal a, a then erawh chu an kal hne hne a. A then hlim hmel tak pu an awm a, a then lungngaih hmel deuh te, a then chu engemaw sawia titi pahin an kal a. Motor leh two wheeler tlan vel lah chu a rik hian a ri hem hem mai bawk a. Ka kal zel a, ka chhungrilah chuan min nawrtu hi a a awm tlat a, ka awmna ngaiah rei ka awm thei lo va. Ka rilru chu a harh fim lo ti dawn ila, thil engkim chu hre vekin ka inhre bawk si a, ka kalna chin chu khawi lai nge a nih tih erawh chu ka hrechiang bawk si lo va. Ka kal ka kal ringawt mai a.

Tlai lamah chuan hmun pakhatah hian ka thu a, ka hawi ka hawi a. Ka hma lama tlang awm chu ATC awmna tlang a ni tih ka hrechiang ta a, ka awmna chu Chaltlang thlanmual a lo ni reng mai a. Ka thut mekna chu Liandailova Chhangte thlan a lo ni a. Tawngtai ri hi ka hria a, thlang lam ka en a, thlanmual thlang lawk chu tawngtaina hmun atana an serh thianghlim ni ngei tur a ni. Chutah chuan Kraws inphun hmaah hian hmeichhia kum 14 vel tur hi thingthia tawngtaiin, lungchhe em emin a tap a.

“Lalpa, nu leh pa pawh ka nei tawh lo va, ka putea’n zu a rui reng a, kut min thlak a, min sawisa thin a. Ka pite-i lahin a hau ngam bawk si lova, a hau deuh in ka putea’n a khawih zel bawk si. Khawvelah hian ka mal lutuk asin.......”

Vanduai hlea inngaih pawh hian vanduai zawk an lo la awm zel a ni tih min ngaihtuah tir a. Thangtei nena kan intawn dan te, kan inhmangaih dan te, kan inkarah engmah harsatna awm lova tluang taka kan inneih tak dan zawng zawngte chu ka ngaihtuah a. Keini anga hmangaihna kawng tluang tlam taka zawh hi mi an tam pawhin ka ring lo va. Mahse, chhungkua kan din a, fanau malsawmna duhawm tak tak pathum min pe chauh va, ti hian Thangtei chu a awm leh ta si a. Engatinge, engvangnge?

Ka thuthmun atangin ka tho va. Liandailova Chhangte zai, radio atanga ka ngaihthlak thin te kha ka bengah a lo ri nawn leh a. Tunah ani pawh a taksa chu he laiah hian a zal ta chu a ni si a. Thlan lung chu ka en kual a, thuziak te ka chhiar a, an kum zat ka en zel a. Mithite chu kum khat pawh tlinglo atanga kum 98 inkar vek an ni a, ka chhut dan chuan kum 45 hnuai lam an thahnem zawk niin ka hria a. Mak ka ti hle mai a. A chhe ber lo tawk ta pawh ni ila, vui tur ka ni lo tih ka inhria a. Mahse chutichung chuan ka lawm dawn miahlo tih leh ka tuar thiam dawn miahlo tih chu ka inhrechiang hle bawk si.

Ni a tla a, thlang lamah a her liam ta a. Khawvel a hnim riai a, Durtlang kham velte pawh chu khawhar takin an awm ta niin ka hria a. Thlanmual chu kalsanin khawchhungah ka lut ta a. Indoor stadium bula ka kal mek lai chuan ka bulah Taxi a rawn ding a, “I lo chuang ve duh em? Chanmari lamah kan chhuk dawn a,” a ti a. Lawmthu ka hrilh a, mahse ka chuang ta lo. Chaltlang chhukah muang changin ka kal a. Lengpui lam te, Reiek tlang te, Chawlhhmun te, Rangvamual leh Phunchawng te chu ka thlir pah zel a. Ka chhungrilah chuan lungngai leh khawhara tap vawng vawng a awm reng a ni tih tuman min hriatthiampui lo. Damdawiin thlen hlan ka nghahhlelh rualin huphurh ngawih ngawihna ka nei bawk a. Kawngsir a vawn chhan an siam chu nghengin Lengpui airport chu ka thlir a, zawite tein he hla hi ka sa a.

Ngai zual ila tlangza awm har leng hnehin,
Rual khum ila lunglam lenah thang mawi maw e;
Ka bang lawnge khuarei kum sang ral mah se,
Tawn leh har lungrunzual aw i hming sawi chu.

Min kal peltute chuan mak min ti tih ka hria a, mahse an mitmei ka veng seng lo a ni. Ka tawrh hi a na em a, ka hmabak hi a ritin a rapthlak em a ni ka ti a ni.

Damdawiin ka thlen chuan khua a thim tawh a. Kawngka chu a lo inhawng a, nuiri ka hria a, ka luh rual chuan ka fanu Lalhminghlui leh ka fapa Chhuanvawra te chu ka hmu nghal a. A pu hovin an lo awm a, an lo infiam a lo ni. Khuma ka thinlung zawng zawng innghahna chu ka en a, ka kal san lai ang chiah khan ala mu a ni tih ka hre thei nghal a. A khum bulah chuan Miriami a lo thu a. Chutih lai tak chuan U Sapthlenga chu daktawr kawrfual var hain a lo lut a. Thangtei chu uluk fein a check a, damdawi lei tur a ziak mawlh mawlh a. Eng damdawiin emawni a chiu nghal a. A ei lai zawng zawng chu a thlak ta vek a. A en zawh chuan zui chhuak turin a mitmeiin min hrilh a. Ka zui chhuak a.

“Thangtei hi thling TB a ni. A natna hi a lo nasa tawh em a, kan chhan thei tawhlo mai thei. Ka rindan chuan vawiin hi a tuar chhuak a nih chuan beisei tur kan nei tihna a ni ang. Tun atang chuan ka case ah a awm tawh dawn a, keiman ka rawn enkawl tawh dawn a ni. Chhel takin lo awm la, lo tawngtai zel rawh aw,” a ti a. Min kalsan ta a.

Zan a lo thleng a, a ngaite bawkin kan awm leh ta a. A ngaite ka ti tak nain zan danga kan buaina angah kan buai lem lo va, kan awmpui ber damlo chu a mu hle hle a, engmah thawm a nei hek lo.U Sapthlenga thil sawi chuan keimahah beiseina min pe a, kawl chhete lo eng chu hmuin ka inhria a. Ka chhungte chu ka hrilh ve ta nghal a.

Zan dar 11:45 ah chuan a rawn harh a. Min rawn en a.
“I muhil miah lo em ni Mateipa?” tiin fiah deuhvin min rawn bia a.
“Zanin ah chuan ka la muhil lo, a chhuaklo alawm. I engnge na ber Thangte?”
“Ka hnung zang leh mawngtam a kham a, a bak na ka nei lo.”
A tawng a fiah a, a mitmeng a fiah bawk a, ka thinlung chu lawmnain a khat a. Miriami chu a lokal vat a. Saisirin kan muttir ta a.

“Ka ril a tam U Miriam. Engnge ei tur awm?”
Miriami lawm lutuk chu a hamhaih a, chhan mai nachang a hre lova, thil engemaw zawng ni awm takin a hawi kual ruai ruai ringawt a.Dik tak chuan a lawm lutuk a hnuk a ulh a, awm ngaihna a hre biklo a ni zawk.
“Engnge i chak ber Thangte?”
“Uncle Chipps.”
Miriami en ni awm takin lehlam ka hawi a, diktak chuan lawm avangin ka mittui chu ka dang zo lova, ka mittui chu hmulo se ka duh vang a ni. Thil engmah a ei vak tawh lova, sorazo tlem tlem leh ORS te a ni mai a. Ei tur han sawi hmuh ila, engmah a chak lova. Drip kan khai char char a, chu chu a nun chelhtu awm chhun a ni deuh berin a lang a. Tunah erawh chuan a ril a tam a, ei a chak a. A naupan lai atanga a duh ber thin chu a rawn lam ta a ni. A hun takah U Sapthlenga chu a lo lang a, a natna vawrtawp chu a tuar chhuak tan mek ta a ni ang tih ka ring a. Ramtei chu damdawiin canteen bula Uncle Chipps lei turin a tlan vat a. Miriami chuan in lam a phone a, tah aw deuh tiau-in, “Thangtei’n Uncle Chipps a.... ei..... chak......a,” tiin a hrilh mek lai chuan Thangtei chuan, “Ka lam lo hawi ta che Mateipa,” a rawn ti a. Chuta kan in en leh chu a boruak a danglam ta daih hian ka hria a, a nui sak a, keipawh chhungril tak atanga hlimna nei chungin ka nui ve ta bawk a.

THANGNUNNEMI X

A biang chu na a ti deuh na a, a duh tak Uncle Chipps chu a mal te tein a hmawmin a ei ri hmiar hmiar a. Miriami chuan phone-in thla a lak sak a, tutu emaw hnenah a thawn darh nghal a. Amah aiin a awmpuitute chu kan hlim zawk ni hialin ka hria a. Sorazo ka siam sak a, ka siam chu a ei zo vek a. A duhtawk ta rih a. Zing dar 2 velah chuan Miriami leh Ramtei chu mu hahchawl turin ka ti a, rilru ah hlauhthawnna a zia awm ta deuh va, reilote ah tui takin an muhil ta a.

A rim atangin diaper thlak a ngai tih ka hria a.

“I diaper thlak ang aw Thangte.”
“Keimaha inthiar theih ka van chak tawh.”
“Hetia i diaper thlak hi nuam ka ti rih a lawm.”

A mitmengah chuan inthlahrunna leh zahna a lo lang a.

“Khatiang mitmeng kha min hmuhtir tawh suh aw Thangte. Ka hmangaih che a, i engmah hi ka ten lo va, i tan ka tih theih ang chu tih vek ka duh a ni.”
“Ka tan i hlu Mateipa.”

Diaper ka thlak zo va, a zangthalin ka muttir a. A khum sirah thuin a ban chu vuanin dimtein ka chul a. A kutzungchal ah chuan tehna chu vuahin ka teh a, 96-101 a ni a, ka rilru chu a hahdam deuh na a, ka thla erawh chu ala muang tak tak thei lo.

Tunhma deuh chuan damlo chau tawh tak an rawn harh a, chaw emaw te an ei teuh hian an vankai chaw a ni an ti thin a, mual an liam dawn a lo ni thin a. An beng hnuailam te hi chhung lamah a kum lut deuh a nih chuan an daih rei tawh dawn lo tihna a ni te an ti a. A beng te chu tifai ni awm takin ka khawihin ka en vel a, ka ngaihbelh deuh vang nge tlemin a kum lut deuhten ka hria a. Mahse delh ngun na na na chu a kum lut thei tho vang ti tein keimah leh keimah ka in hnem a. A la muhil lo tih ka hria a, mahse a maimichhing a, engemaw a ngaihtuah a ni ang tih ka ring a. Chutih lai tak chuan police thana atang chuan zan hmasaa zai bawk chu a rawn zai tir leh ta a. Kenny Rogers leh Dolly Porton bawk chu.

Khum bawhin ka chhip chuan Thangtei taksa chu chhete in a si a, a ban chu ka vuan a. Maimichhing chungin chu hla chu ka ngaithla a. Insut deuh faih ri hi ka hria a, ka hawi chhuak vat a. Thangtei mit atang chuan mittui a rawn chhuak a, a bekah chuan a lo luang mek a.

“Ngatinge Thangte?” Min chhang mai lo va, a mittui chu dimtein ka hruk sak a.
“Ka ngai em che a ni Mateipa.”
“I kiangah ka awm a, ka kalsan dawn miahlo che asin.”
“Keimah vanga i rilru leh taksa retheihna te hi....”
“Chutiang zawngin ngaihtuah reng reng suh. A nih hetia ka enkawl che hi i duh ber a ni lawm ni?”
“Duh ber, englaipawhin...”
“Chuti a nih te chuan ka taksa leh rlru retheihna lam chu engahnge i ngaihtuah?”
“Ka hmangaih che a, ka khawngaih bawk che atin ni.”
Miriami leh Ramtei ka en a, tui takin an muhil tih ka hria a. Dimtein ka kun hniam a, a taksa chu ka taksaa sik tirin ka pawm a, a taksa, ruhkawl ang chauh ni tawh chu duat takin ka chul a.
“Mateinu,ka lawm e. I dam ang a, Runmawi-ah i riak dun leh ang aw.”
“Kan fate nen....awi...ka chak. Ih, saw laia tape emaw phone emawa an zai tir hla chu.....”
“Ngatinge?”
“Ka duh, mawi ka ti. Tun hun nen a inhmeh.”
“Keipawh mawi ka ti asin.”

Zawite tea tawng chung zelin a muhil ta siai siai a. A taksa te danglam, a hmelte danglam mahse, amaha danglam miahlo, min hmangaih a, min thlahleltu THANGNUNNEMI chu a awm a, a pangngai reng a ni tih ka hrechiang zual a, ka mitin ka hmu lova, ka thinlung mit erawh chuan fiah takin ka hmu a ni.

Tumkhat chu ka zin haw hlimin a khawhar hnemah Facebook ah te lut a, account te siam turin ka ti a. Mahse ani chuan min hnial a. “I msg ka hmuh theih a, ka biak theih bawk che chuan ka tan engnge facebook a tangkaina? Ka engkim i ni alawm Mateipa,” tiin min chhang a.Chungte chu ka ngaihtuah neuh neuhva. Ani chu englaipawhin ka tan a rinawm a, chhete mahin ka lakah a rilru emaw thinlung emawin a uire ve ngailo ni hial hian ka hria a. Kei erawh chu ka zinna leh ka len velnaa ka thil hmuh avangin vawi tam tak ka thinlung leh rilruin ka uire si a. A lo thau va, ka itna leh thlakhlelhna a kiam a, ka kuah peih lova, ka fawp ngai lo va, ‘Ka hmangaih che,” pawh ka ti phur hek lo. Thangtei chanpual leh a pasal keimaha KEIMAH chu ka thlir chiang a, ka zak neuh neuh va. Tunah erawh chuan a pawnlam landan chu eng ang pawh nise, amaha AMAH, min hmangaihtu chu a pangngai reng a ni tih hriain, chu ngei chu ka mit ni lovin, ka thinlung mitin ka thlirin ka en thin tawh ang tiin rilru ka siam sauh sauh va.

Zing dar 4:32 chiah ah kawngka kik ri ka hria a, nurse a nih ka ring a. Kawngka ka hawng vat a, U Sapthlenga nen kan inhmachhawn ta nghal a.

“Nau-a, engnge chanchin?”
“A rawn harh a, thil te a ei a, tunah chuan a muhil leh tawh. A danglam riauvin ka hria.”
“Na a sawi em?”

“Sawi lo.”
Thangtei chu kan pahnihin kan pan dun a. Ngaihthlaknain uluk takin a han ngaithla kual vel a, a mit te keuvin chik takin a en a. A pang a dek a, a mar te a dek bawk a. A kutzungchalah tehna chu a vuah a, a en bawk a. Kei chuan ngawi rengin ka lo en a.

“Hmmm, i nupui hian dam lam a pan dawn niin ka hria Nau-a.”
“Tak tak maw?”
“Tak tak. A lungphu leh marphu te, a thawri te pawh a dik. Thil a ei theih chuan reilote ah oxygen pek reng pawh hi a ngailo thuai dawn a ni,” a ti a. Ei tur tha te min ziah sak a. “Hengte hi a ei duh phawt chuan lo pe zel ang che u aw. Ka kal leh tange.”
“Ka lawm hle mai U Sapthleng.”
“Ka nau kha i ni tlat a. Keipawh ka lawm asin. Diktak chuan a chatthla vel mek tawh a nih ringin thlamuan tur che a lokal ka ni mah mah a. Mahse....ka lawmpui a che.”
“Kal mai teh boss.”
Kan naupan laia min tih danin ka beng dinglamah a man a, na vak lovin a herh a. Min chhuahsan ta a.

Khawfing a chat a, kawl a eng tan mek a. Arsi te pawh hmuh tur an tlem pharh tawh a. Bathlarah dingin ka hawi kual ruai ruai a. Tichuan in chhungah ka lut leh ta a. Thangtei kiangah ka thu a, a chal te, a awm te, a ke te, a kut te chu ka chulin ka en vek a,a zun te chu a fim tha hle tih ka hmu a. “Lalpa, i fel mange,” tiin lawm takzetin Tlantu Ropuia hnenah chuan lawmthu ka sawi ta a.

U Sapthlenga’n a enkawl atangin kar khat a liam ta a. Oxygen pek a ngai tawh lova, diaper vuah a ngai tawh lova, a inthiar duh chuan kuah chungin kan hruai thin a. A zun pawh siak a ngai tawh lo. A vun chu zawi zawiin a rawn mar tan a, chhung lamah a tisa a insiam mar chho mek a ni tih hai rual a ni ta lo. Hawn a, kan ina awm a ngen tlut tlut ta mai a.

“Kan inah, ka fate kiangah awm ila ka dam chak zawk ang.” a ti a. Tichuan, hlim tak leh rilru zangkhai takin kan inla chhuak ta a. Kan motor ah, a thutna thin front seat ah ngei a thu a, keiin zawi muangin ka khalh ta a.U Rinsanga te nupa chuan kan hnungah min rawn zui bawk a. Ka thinlung chuan, “Aw mi zawng zawngte u, ka hmangaih Thangnunnemi chu damdawiin atangin a chhuak ta a, en teh mah u, hei, hringmite khawvelah a inlar leh mek tawh asin,” ka ti a. Engkim mai chu ka hmu mawi a, Aizawl khawpui, krismas lo thleng tur atana inbuatsaih mek pawh chuan min lawmpui ni hian ka hria a ni.

“Thangtei hi a thi a, a lo nung leh ta a nih hi.”

Ka nu leh pa te chu u Romawia hovin an lo kal nghal a. Ka nu nen an inhmu chu an inkuah a. Ka nu chuan, “Thaangte ka fanu, thi hnu tho leh ang i ni. Tianga i dam leh hi ka van lawm em,” tiin a tah khum a, Thangtei pawh ka nu awmah a hmai phumin a insut faih faih a. Midang awm ve te chu kan mittui tla tur dan nan tul lo kan en kual vak vak hlawm a. Ka nu leh Thangtei inpawm chu mawi hi ka ti a, thla ka lo la a. A hnuah lian takin ka print a, kan bangah ka tar ta nghe nghe a ni.

Damdawiin kan chhuahsan atanga thla 7 na tura ni khatna ni ah chuan kan fate sikul chawlh tanna ni a ni bawk a, kan khaw lam panin Ramtei hovin kan kal ta a. Kan fanu Lalhminghlui chu a nauvin a ko thiam lova,Hming hming tia koh a tum chuan Mimi a ti thin a, tichuan Mimi ti hlirin kan ko ta a. Kan fapa Chhuanvawra thung chu Mama tiin kan ko va, a naupangber Lungtiawii chu Awite kan ti ta thung a. A naupang ber chu rei vak lovah a muhil a. A ute pahnih erawh chu seat hnungah Ramtei hovin an thu a, eng eng emaw inkawhhmuh leh sawiin an ri deuh hlat reng a.
Tlai lutuk lovah kan thleng a. Ka u Manuni hi tlema a zia awm tak deuhah khan a haw ta kha a ni a. An han inhmu chu an inkuah a, an tap dun a. Chaw ei hmain ka pain thu tlem sawiin Pathian hnena lawmthu sawina te a nei a. Chawhmeh chi hrang hrangte siamin ka ute pahnih pasal nei tawhte chhungkua te nen hlim takin chaw kan ei ho ta a.

Kan khua kan thlen atanga nithumna ah ka nu leh pa leh u Romawia te chhungkua nen kan vaiin chuan huanah kan kal ta a. Vawk chu 34 an ni a, broiler leh layer engemaw zat an awm bawk a, artui te chu u Romawia chuan ka fate chu a lakkhawm pui a, nuam an ti em em mai a. Kawtzawl ah chuan Awitei leh u Romawia fa naupangber Tetea kan tih maite chu a pi leh pu te nen an awm ho va, Ramtei leh ka u Manuni chuan vawk in te chu an tifai vel a. Keini erawh chu kan huan piah mual, a changa zanah pawh kan fan thin, thing lian tak tak dinna, a hnuai thelh hun mai si ah chuan kan kal dun a.

Thangtei chuan kawrvar fual ban bul a ha a,nihliap dum lian tak, Kolkota kan kal tuma ka lei chu a hawl a. Ngaw chhungah chuan a nghawngah ka kuah a, ani’n ka kawngah min kuah a. A taksa chun cher lam aiin thau lam mah mah a ni a, a kawr hak chuan a tilang mawi zualin a itawm zual ti ila, a hatu chuan a kawr chu a timawi zual zawk a ni.

“Ka duhzia leh hmangaihzia che chu maw Thangte, ka kianga i awm pawh hian ka ngai che a. Kan taksa ve ve hi chan sawmin chawhpawlh vek se, chutah chuan ka lung a awi chauh mai thei a ni,” ka ti a. Ani chuan, “An chan sawm te chuan kan thi daih anga sin,” a ti a. “Thi si lovin mawle,” ka ti a. Kan pahnih chuan za em em in kan nui dun ta a. Ngaw chhunga Thangnunnemi nuiri her her tluka mawi chu he khawvel hian ka tan rimawi dang an siam thei hian ka ring lo.

Ni eng chuan thing karah min rawn chhun thin a. Ei tur a ken chu kan ei dun a. “Saw laiah sawn sairil a awm a, ka va la lawk ang e. Ka u in lukhuma tah atan a duh si a,” ka ti a. Ka kalsan ta a. Sairil ka sah mek lai chuan ruah tam vak lovin a rawn sur a, min rawn au vau vau a, ka lo chhang thuai a. A awmna lampanin ka kal ta thuai a. Barakhaih tumin, dimtein ka pan a, mahse ka lam hawiin a lo thu a. Nihliap hnuaiah leiah chuan a lo thuthluang diai a, a malchungah a kut lehlam lehlam chu a dah a,leia tui chhete tlingte chu a pawisa lo. Barakhaih a, tih thlabar chu ka phal lo va.

Zawitein ka pan a, nihliap hnuaiah chuan ka lut a, min lo pawm nghal a, min fawp nghal chat bawk a. A awn riai riai a, chu lai hmun reh leh nuam takah chuan thildang zawng zawng hnuchhawnin, hlimna leh lawmna leh nawmna sawi hleih theihlohah chuan kan cheng dun a. Kan zawh hnu chuan kan thaw dun hiam hiam a. Chutih lai tak chuan kan fanu Mimi chuan min ko vau vau a.
“Mateipa, thil pakhat hrilh tur che ka nei.”
“Engnge ni?”
“Ka ruaklo.”
“Maw...tak tak maw Thangte.”
“Tak tak, kan kal hma khan ka sawi duh lova, ka sawi chuan ka nuin motora chuan kha a phal loh ka hlau va. Ka u Miriami pawh a ruaklo tih a hriat veleh thla khat chhung motor chuan a khap hmiah asin. Ka nu style a ni tlat si a.”
Ka pawm kang a, ka vir kual pui a. Ka thlah rual chuan, “Ka faten min au tlat,” tih leh tlan a rual a. A tlan liam mek chu ka thlir a, ka dinna ngaiah chuan ka la ding a. Ka thinlungah chuan, “Thangtei nena kan thil tawn tak zawng zawng atang khan hmangaih leh duh taka ka thlan tawh chu a pawnlam landan eng ang pawhin lo danglam se emaw, a rilru te lo buaiin mi a hial pawh nise min mamawhna a zual zawk dawn a ni tih hriain hmangaihna nen ka en kawl tur a ni a, chu chu vawikhat dam mana ka nun chhungril lawmna ber tur a ni,” tiin thutlukna thar ka siam ta a. Ka chung zawnah chuan koro rual an fu a, an hram nawk nawk bawk a. Chu lai boruak thiang kak mai chu am takin ka hip vang vang a. “Thangnunnem, ka hmangaih che,” ka ti a. Zawi muangin a tlan liamna lamah chuan ka kal ta a.

Kawngah chuan hnah thel a tam hle a, ka nupui leh fate ngaihtuah zel chunga ka kal lai chuan engemaw ka pal a, ka bawkkhup thlawrh a. Chu veleh ka nupui leh fate chu ka chungah an rawn thu nghal a. Ka fapa chuan, “Ka tlawm ti vat rawh,” tiin min vau vel a. Ka chawn hnung lamah Bawihtei (Mimi) chuan min thut a, ka kawngah a nuin, ka dar zawnah ka fapain.

“Ka tlawm dawn miahlo Bawiha.”
“Chutichu kan thut bet reng dawn che tiraw A Nu.”
“Dik chiah. Bawiha, ‘ka tlawm’ a tih loh chuan a zakah khan dek ang che aw.”
“Hei, Lalthangmawi, i van sual ve.” Ka tih lai tak chuan Thangtei chuan ka zakah a rawn dek ta a.
“Ka thi ka thi, ka tlawm ka tlawm.” ka ti ta chul a.
Chu veleh an tho ta a. Anu chu ka dek ve ta thut a,a za ti chu a eu zawk a, a tlanchhe nghal a, tichuan tumah intan bik awm lovin indek tumin kan in um a, za em em in kan nui ta a. Kan mittui te chu a tla phung hlawm a.
A TAWP TA