MY DILEMMA 18+ (completed) by paperrings

Episode nei ho a hlawm a dahkhawmna
Paperrings
Posts: 18
Joined: January 15th, 2020, 5:32 pm

Re: MY DILEMMA (completed) - by paperrings

Unread post by Paperrings » July 1st, 2020, 11:14 pm

CHAPTER - 9




#paperrings




Rilru mumal lo zetin in lam ka pan chhet chhet a. " A ngaihzawng khan nau a pai thei lova, chuvangin nang hi nupui atan a nei ta che tih vel. Fapa in neih huna then che a tum a tih ten a sawi a" tia Rubyin a sawi kha chiang em em mai hian ka beng bula ri ang maiin ka hre leh thut thut thin a, min ti â lo chauh!






In ka thlen huna Ruatdika lo awm tur leh, nui sanga min lo melh a min duat awm taka a awm leh dan tur te ka ngaihtuahin ka na zawk zawk hial. Engtin nge heng hun chhung zawng hian lem a lo chan char char theih zawk?






Ruatdika chu Liansanga nen living roomah an lo titi mawlh mawlh laiin in ka thleng a, ka thinrimna te chu insum hramin Liansanga chu ka be hram hram a. A lo kal khat em bawk a, inhmuh chhunah kan nupa inhau lai min hmuh ka duh lo.





Intifai tur anga insawiin room ah ka luh san a, Liansanga awm chhung chu ka chhuak ta lo. Rei vak lo hnuah Ruatdika chuan min rawn zui lut ve a, ka awmdan atangin dik lo a awm tih a hre thei ngeiin ka ring.







"Thil thalo thleng a awm em ni? " tiin ka bulah a rawn thu thla nghal a, min ngaihtuah hmel taka a awm thiam lutuk chu a mak ka ti.






"Lem chan i lo thiam lutuk hi i fakawm thlawt" ka nui lui hak a. "Eng nge i sawi awmzia " tia hrethiam lo hmel zeta min en ha te chuan ka nuih a ti za deuh tak tak. Min lo va han bum hnehsawh dawn tehlul em ! "Lem chan chu i lo thiam takzet anih dawn hi" ka ti leh sap a.







"I sawi tum tak kha sawi vat mai teh" a ti hrawk a.





"Eng vanga min nei nge i nih? "





"Chu chu tunah eng nge a pawimawhna? "





"Vawi khat chiah ka zawt nawn leh ang che. Engvanga min nei nge i nih ka tih chu ? ! " Ka au chhuak hi a ni ber tawh !





"Ka hre bik lo" tiin min chhang anih chu !





"Min neih chhan nang pawhin i hriat loh kha ka hre si a , a va mak awm ve tiraw" tiin ka nui lui leh chiam a, mi â ka ang ngawtin ka ring. "I thusawi hian awmzia a nei hlawl lo ania" a ti vin ve thak a, ni e , a thinrim ang chu! A thuruk ka hrechhuak miau si a !








Ka tawt up up a, he inneihna hi ka duh vang renga thleng ni lo mah se min duh ve tak taka ka hriat hmanna te, fa hial pawh neih dun ka lo suangtuah te chu â ka inti ngawih ngawih.








Ngawi rengin bag ka la a, ka thawmhnaw ka hmuh remchan ang ang chu ka khung mawp mawp a. Ka tawt lutuk leh ka thinrim sosang thut te kha ka in an thawl takah chuan reh hawkin, ka lung a chhe ta em em a . Tap lo turin ka insum fan fan thung.







"Engmah hi ka hrethiam lo tak zet a. Mahse thil pakhat chiah, Ruby nen in inhmu mial em? " beidawng aw deuh tak hian min rawn zawt leh hram a. Ruby hming a rawn sawi nghal ngawt thei chu mak ka ti deuh hlek nangin "I thil tihsualah midang puh tum suh" tiin ka lo chhang let hmak a.






Bag a leng tawk ka inkhung hnu chuan inkhai chhuakin pawn lam ka pan leh hlawk hlawk a. Kawngkhar ka pawt hawng tur chiah chu hnung lam atang hian min rawn kuah bet thlawp a "Puii, min then i tum tak tak maw? " a ti zawi raih ri chuan min fan rawih rawih thei!






Mahse hei pawh hi a lemchanna tho anih hi tiin ka insangmar a. "Min kal tir rawh. Duh duha in vau zam mai mai thin leh , in duh duh intih tir theih ka ni tawh lo" ka ti chang fak a.







Min kuahna chu ka phih thlak sak pawp a, kawngkhar hawnga pawna ka penchhuah lai chuan "I rilru fim hunah ka lo hruai leh ang che aw, kan inthen lo ania" a la rawn ti ngam anih chu ! Zakthei lo hi ka ti lutuk a !







"Ka ruang hmuh i duh anih loh chuan min tibuai tawh ngai suh " tiin ka kalsan ta a. Taxi lo tlan remchang chu pharin ka thut luh a, ka kalna tur ka sawi zawh rual chuan insum thei tawh lovin ka tap chhuak ta hlawp hlawp a.







Ka damchhung atana ka chhuahsan hlen tawh emaw ka tih in kawtah chuan ka ding ran mai a, duhthlan tur ka nei chuang hleinem tiin ka lut ta rawih a.







Daphne in kawngka min lo hawn a, bag ka khai bakah ka hmel lan dan tur zawng zawng ka ngaihtuaha mak tih hmel taka min en pawh chu awm ka ti viau mai.






Ka nu leh Pa Raman min rawn ngaihven thuai a, mahse engmah ka sawi chak rihlo tih ka hrilh a. Pa Rama chuan ka bag min khaisakin ka room lamah kan chho dun a , engmah sawi lovin min chhuahsan leh mai dawn emaw ka ti hman a. "Eng nge a chhan? Bawiha lo haw dawn vang em ni? " tiin min zawt hram !






"Kum khat a la tling lo deuh tih chu ka hre ve alawm. Mahse lungngai suh, i duh loh danin ka awm lo ang, ka hlauh vang che pawh a ni hran chuang lo ania, thih ka hkau tawh hek lo" ka ti hap a. Khumah ka let tawp a, min be buai zui tawh lo.






Hruaisanga chu a lo haw ta thuai a, tun tum chu amah chauhin a lo haw thung. Inbe lo hlawm tawp kan ni lova, a hranpaa han titi vel chiam ang kha kan nei lem hran lo bawk a.






Zan khat chu eng eng emaw tiin midang an chhuak vek a. Pa Rama nen chauh kan awm ran mai a, ka awm a nuam tehchiam lo . Tui in tur la tura inhnuai a ka chhuk chu choka ah Pa Rama hi a lo thu ngawi reng a, a inngaihtuah muk hmel em em a a bul lawkah ka ding tih pawh chu a hre miah lo niin a lang.





Pa Rama chu hnaihin, a darah ka zu khawih a, a phu deuh zawk. A rawn hawichhuah ruala a hmel lan dan khawngaihthlak lutuk chu awih awm loh hial zawk.





"I tha maw.? " tiin ka zawt ta ringawt a.





"Ka tha pawh ti ila dawt ka sawi tih i hre dawn tho sia" tiin min melh ran mai.






Fridge hawngin tui bottle pakhat ka la chhuak a, kal lehnghal mai ka tum lai chuan "Rinpui, lo thu ve lawk ta che sawi duh ka nei a" a rawn tih nghut takah chuan chair pawt chhuakin ka thu ve ta than a.





"I la hre lovang a, hmanni inentir tura phaia ka kal kha ka cancer hi a lo ni a"





Ka melh zawk a, inngaihtuah vang vang hmel hi a pu.






"I chunga ka thil tih avanga Pathian hremna anih ka ring" a ti sup a. Ka lo ngawi reng thung.






" Ka sual tih chu ka pha lo. Mahse i ngaih ang em em a rilru chhia hi chu ka ni bik lo asin" a ngawih dat hnu chuan a sawi chhunzawm leh a "I nu nen inneih mai kan rilruk tawh laia Bawihan min runluih nan a lo ngaizawng che tih ka hriat tirh kha chuan ka thinrim ve lutuk alawm . Ka vau ngei a, mahse ka rilru tak taka vau ka ni lem lo.






" Thuawih takin a awm bo ve mai bawk nen khan thil a pangngai chhoh ve mai ka ring a. Mahse zana ka hmuh dun tum cheu kha chuan ka mang a ang ve deuh det, a chhan chu in la naupangin thil ngaihtuah chiang lova in chet rum rum kha ka hlau si a. Mak tak maiin kha tih lai vel khan Ruatdika hian neih che a duh thu min hrilh ringawt mai bawk a.






"Ruatdika te hi mi pangngai tak chhungkua niin, amah pawh mipa fel leh innghahna tlak a ni tih ka hrechiang a. Chhungkaw ti mualpho zawnga in chet ai chuan tiin ka lo remti ta mai a, mipa sual tak chu ni se ka remti hauh lovang. Zana vau tur chea mi ka rawn tir erawh kha chu ka inthiam lo rei ve khawp mai, chem nen a vau che tih min hrilh phei chuan ka khawngaih vang chein zan ka mu tha thei lo hial asin"








Mak tih hmel tak hian ka melh reng a, a sawi leh tur hriat chak nain ka khat bawk! Awih tur nge tur loh erawh ka hre thiam teh nuaih lo lehnghal.







" Awih a har viau ang tih chu ka hria. Tin, insawi fel ka tumna ni loin ka hrilh ve duh hrim hrim che anih hi. Chuan maw, dawt ka hrilh chian em em che chu Ruatdikan tuna a hna saw a chelh theih nan pawisa ka inseng a, contract kan sign bawk ka tih kha.






"Chutiang engmah a awm lo, a pa in an chhungkaw sumdawnna enkawl tlang tura a duh avangin hna dil a phal ngai lova, mahse rei tak a pa a puih ve hnu pawh chuan a tui ngang loh avangin a chak em em thin teaching line zawh chu a pa in a phalsak ta a. A thiamna leh theihna in a tlin em mai pawh a, tuman hnial buai lovin kan dept zirtirtu thar atan khan amah saw kan duh tlang vek zawk a ni" a ti leh dap dap a, hei chu ka awih thlap. Ruatdikan contract chungchang engmah a hrelo tih a sawi pawh khan ka ring fel hmak anih kha.






" Dawt ka hrilh leh che chu, i pa chungchangah khan a ni. I pasal neih tur chungchang engmah i pain min hriatpui lova, ka be bawk hek lo"





Pa Rama thusawi mek chuan min thawng takzet! Hei kher chu a hunlai khan ka la na lutuk tlat a ni!





"Engvangin nge? I infiamna mai mai tur ka ni em ni? " ka ti fiak thak a.





"Engkim kha ka thiamloh a ni tih ka pawm e, i ngaihdamna dil tlak pawh ka ni lova min ngaihdam pawh ka beisei hek lo... Tunah hian ho mai mai vanga rawn haw i ni em chu ka hre lova, mahse Ruatdika hian a ngaihtuah tak zet zet che a, a hmangaih bawk che. Tha leh thuai ula ka duh" a hmelah chuan tihtakzetna ka hmu.






"Engmah i hre love" tiin ka chhohsan ta a.






Zanah chuan nasa zet hian ka inngaihtuah a, ka pa (dik tak) awmze awm lova rei tak ka lo huat ve ringawt na phei chuan min ti na ngut ngut a. Tun atang chuan ka haw lo thei tawh alawm tiin ka inhnem a, mahse a nupui vang sawn ka tlawh tam zui ka ring chuang lo.






Ruatdika ka ngaihtuah leh a, atthlak khawpin ka la ngai! Ka zep lo, ka ngai takzet ze. Ka haw lutuk a, mahse ka ngai tho. Keimah leh keimah ka inhuat phah hial khawpin ka ngai!





Pa Rama thil sawi te ka ngaihtuah let a, dawt a sawi chu ka ring tawh hauh lo. Ruatdikan min neih chhan dik tak a hriatpui lo erawh mak ka ti viau . Lo hre lawk vek ta nise min neihtir tho ang em le?






Chutianga a tih duh erawh ka ring lo chhunzawm lehnghal ringawt. A mitmenga inchhirna lo lang chhuak leh, ka ngaihdamna pawh a beisei ngam lo tih a sawi te kha a rilru takin a sawi niin ka hria. Ngaihdam nghal vek chu ka thei hauh lovang, mahse ka thinlung hian zawi muangin a hrethiam telh telh dawn tih chu ka hre reng tho!







Remruatdika! Min rawn biak a tum miah lo chu ka thawven huai laiin tlawmthlak ka ti takzet. Ka rilru fim huna min rawn hruai a tum thu a sawi te kha ka lo awih anih kha, atthlak lutuk! Ka zui haw duh chuang hauh lovang mahse a tum miah lohna hian ka thinlung a ti na tho, ka rilru put hmang chu keimah pawhin ka inhrethiam nek love.






Tunah chuan a ngaihzawng nen hmeichhe dang bum tur an zawng leh mek a ni mahna! Tun ang laiah thiamna a sang tawh a , surrogacy ( mipa / mipa leh hmeichhe chi lachhuaka, hmeichhe dang nau an paitir thin hi. Dan ang thlapa inremsiamna mumal tak nen tih a ni tlangpui) pawh an tih theih reng laia kei min hmang kual vel chu ka hrethiam lo in ka thin a tirim zual em em bawk.







Hruaisanga balcony-a a ding reng ka hmuh rual chhuan chhuak thla vein ka zu pawh a, thil ho te te sawiin kan nui dun hak hak a. Kimkimi nen an la tha zel em tih ka zawh chuan a bu nghat a.






"Ka pa tihbuai nana ka ngaihzawn che avanga tun thlenga harsatna i tawk tam ta lutuk hi ka inthiam thei hlawl lo a. Rawn haw theihna remchanga hmang mai mai turin Kimkimi ka ngaizawng leh kha a ni a, ka tihsual ngaiah bawk ka tisual leh a nih hi. Mahse tun tum chu ka inngaihtuah chiang a, Kimkimi hi thlah ka tum lo. Ka ngaihzawn chhan kha chu engpawh lo ni se tawpna tha tak kan nei dun ve thei tawhin ka ring" mahni inrintawk hmel taka chutianga sawi thei chu ka lawmpui takzet.





"I lo puitling ta hle mai" ka ti sap a.





"Nang deuh alawm. Chuan in pa hi i ngai lutuk tih ka hrethiam vek ania, a ni pawn a ngaihtuah lutuk ang che. Haw vat rawh“ a ti sup a, a thil sawi chu engmah min hriatpui loh miau avangin a awm viau a, hrilhfiah kher ka tum hran lo bawk.





" Umm ka mu dawn nia" tiin inchhung lam ka pan a, inher let leh zawkin "Chuan ka ngaidam tawh che ania" ka ti leh hap . "Ka lawm e" tiin min lo nuih var var a.



Link:
BBcode:
HTML:
Hide post links
Show post links

Paperrings
Posts: 18
Joined: January 15th, 2020, 5:32 pm

Unread post by Paperrings » July 2nd, 2020, 12:04 am

CHAPTER - 10







#paperrings






Ka haw atangin ni a liam ve ta nual .Rei lutuk erawh a la ni lo nain class ka la kal zawm miah loh avangin Zonuni mangangin min rawn bia a, kan inthen thu ka hrilh ve ta chiah a mak a ti tih ka hria.





Thil awmze diktak chu a tir atangin ka hrilh ta vek a, ka sawi laklawh lai chuan thinrim avanga lo chek tlak tlak chang te, lungchhe deuh taka lo inhnit feih feih chang te a nei bawk a.






Ka sawi chhunzawm mawp mawp a mak tak maiin ka lung a chhe eih lo . Thil thleng zawng zawng, tun hnai maia Hruaisanga nen kan titi dunna thleng chuan ka hrilh fai ta vek a. Ka sawi zawh rual chuan ka thaw chhuak ham ham a, ka thawl hawk mai.






Rei tak keimah chauh ina ka tawrh a, ka lo zep ve tang tang thin te chu ka sawichhuah takah chuan zang hawkin ka inhria a. Ka sawichhuah avang ringawtin engmahin that phah dawn lo mah se ka thinlung na lutuk leh chhungril tawt up up te kha a chhawk zangkhai thung.






"Nangmah chauhva chutiang zozai i lo paltlang chu hrehawm ka tih piahlamah i tana ka lo awm lo lutuk mawlh mai hian min ti na em mai" lungchhe aw tak hian a rawn ti a.






"I thiamloh a awm reng reng lo. I lakah chuan engmah zep tur kha ka ni lo zawk a. " ka lo ti ve thuai a, thil nihna dik tak a ni reng a ni. Pasal ka neih dawn pawh khan thil diklo a awm tih hriaa min zawt tu leh ka hlim lo tih hre chat tu kha a ni a, a lakah ka inhawng lo ve thin em mai pawh a.






"Umm. Mahse maw , sawi tur a ni em chu ka hre lova, thil dik lo hi awm tlatin ka hria" Zonuni thil sawi tum chu ka man hauh lo.






"Eng maw dik lo ang a? " tiin ka zawt let ha a.







"Ka hre bik chiah lo, aaa engah mah ngai suh. Class lo kal thei vat la nimai, attendance ah te khan i tla reu reu ang e buaithlak leh dawn ania" a rawn ti ta zawk a.







Class ka join atangin kar khat a liam ve leh tawh a. Midang chuan min sawi sap sap thin tih ka hria. "Pasal a nei hma ve lulai em a tin ni, inthen leh vat pawh hi a awm reng" tih tein ka hriat phak ngei tura sawi te pawh an awm a . Rilru ti paukhauh luia , engah mah ngai lo awm anga awm ka tum ngial nain a harsa ve thin khawp mai.






Zonuni birthday a ni a, Bracelet ka chahsak chu kan inhmuh veleh ka pe nghal a. "Awi a mawi lutuk" tiin a bun nghal zat a. Zan lam chhuah ka peih ngang loh avangin off period ah ka treat mai ang che ka ti a. A duh thak lo zui. "Intihthawven ve te pawh i mamawh alawm , bakah i lo kal loh chuan ka lungawi lo viau ang. Ka ngaih pawimawh zual tlemte bak ka sawm lo , nang phei chu ka best friend i la ni zui a " tia titau lek leka min thlem takah chuan ka aw ta nge nge a.






Zanah chuan Daphne a hman remchang lova, Pa Rama chuan Hruaisanga hnenah Zonuni te ina min va dah turin a ti ve ngial a, ka awih lo lek lek hial. Hruaisanga nen chuan kan inphur chhuak ve ta poh a, rei tak hnua zana kan chhuah dun leh awmchhun a ni a hun kal tawhte ka ngaihtuah let ve reuh reuh va.






Zonuni te inkawtah min drop a, a tum dan chuan let leh nghal maia ka haw duh huna amah call turin min chah a. Kal a tum leh lai taka ka mi hmuhte pahnih chuan min tikhawng awt thei ; Ruatdika leh Ruby te an ni !






Hruaisanga banah va vuan chawtin ka hmer salh a, ka insum zo lo thelh a ni. A chhan pawh Ruatdika te pahnih chu rawn kaldun satliah ni lovin inngeih hmel takin Ruby in a bana a kuah deuh hnap vang chu a ni!






Let leh nghal mai duhna in min tur ut ut a, mahse Hruaisanga chuan thil awmzia hrethiam nghalin a bana ka hmerna chu a la chhuak a, min kai chungin inchhung lam min pan pui ta dawr dawr a.






In chhung kan lut chiah chu ka chau nghulh thei. An ni pahnih kha inzawmna an lo nei tak tak em ni ?! Ngaihtuah zawng ringawt pawhin ka na ngut ngut hial. Ka pasal leh ka thian tha lutuk maw?





"Haw ka duh zawk" ka ti chhuak sap a.





Hruaisanga chuan "Eng nge thil awmzia kha. In pa leh i thiannu te kha eng nge awmzia, khavang khan em ni in inthen" a ti tuar .





"Ni lo e" tiin ka lu ka lo thing chiam a.





Zonuni a rawn tlan phei hlawk hlawk "Eng nge ni in rik tehlut a ? " a ti chul a. Ruatdika te pahnih an rawn inzui lut ve mek bawk.





"Saw mi te pahnih saw zawt la" Hruaisanga chuan lo ti hmakin min kai sawn leh dawr dawr a.






Chokaah min kai lut a, chair ah thu thla hnawkin boruak ka hip lut kawk kawk a. "Thil awmzia saw i hre lo tak tak nge i hre lo der ?" tiin min zawt hrawk a, ka ngawi reng thung.





"Awle a tha e. Haw ang" tih leh ka bana rawn vawn a rual a.






"Puii kha ka lo be lawk ang chu" Hruaisanga nen chuan kan hawi phei rual thawt a, a aw kha ka hai mawlh lo ka pasal aw a ni miau a! Ani chiahin Puii tiin min ko thin bawk.






"Ka be duh lawk , a falin" a ti leh nghut a.






"Kan inbiak chhan tur ka hre lo" ka lo ti ve hmak thung. "Kal ila" tiin Hruaia chu ka melh zeuh a, ngaipawimawh lo anga lan tum taka kal pelh ka tum lai chuan Zonuni leh Ruby an rawn lut ve chiah a. "Thil sawi ho lawk ang u, ka roomah" tih pahin Zonunin chuan min melh kual a, boruak chu a tang tha kher mai .






Kan thu thap a, tawng hmasak ber kan chak lo tlang a ni ang e rei tak chu kan ngawi ren rawn hlawm a.






"Sawi tur nei khan sawi ta che u, haw kan duh tawh ania" Hruaisanga'n a rawn ti ta nge nge a.






"A tha e, kan sawi ang e. Sir Ruatdika nen hian inneih kan tum a" Ruby in a rawn ti chiah chu ka nghing dawt thei !






"Mi tenawm ho" tia Hruaisanga inhum ruh chu Zonunin a rawn khap thuai a, thil awmzia ka hrethiam lo. Zonuni pawh hian min lo bum ve tihna em ni ang !Theih ni se rang thei ang bera chu hmun chhuahsan chu ka duh takzet, mahse thil thleng chuan min thawn lutuk vang nge tawng chhuah pawh ka thei hauh lo thung.






"Rinpui , i lakah ka inthiam lo lutuk. Mahse Sir nen hian mak tak maiin kan lo inhmangaih ta mai si a" Ruby chu mak ti lutuk hian ka melh tlawk tlawk. Ruatdikan min bum kha chu thuhran lo nise, a hmaa ka thuhriat pawh khan min tina lutuk a ka kehsawm vekin ka inhre hial kha a ni a. Tunah Ruby lehzelin maw?






Ruatdika chu a rawn nui chhuak hak a, kan hun hman mek nen eng rilru pua la nui thei nge anih pawh ka hre hrep love.





Hruaisangan Ruatdika a hnek pawp lai chuan Ruby leh Zonuni an lo te thawt a, ka la che chang eih lo thung. Zonuni chuan Hruaisanga chu dan tumin a pawt bet tang tang a, Ruby'n tawngkam chhe tinrengin a lo an khum ve bawk a. Ruatdika erawh a awm ngaia awm tawpin in dan pawh a tum miahlo.






"Duhtawk ula, ngawi vek ru" Zonuni chu a te chhuak thawt a.






"Nang nen hian kan innei ang maw? Ka hmangaih che maw? " Ruatdika chuan ti rum chhur chhurin Ruby a pan hnai chhet chhet a, a nui hmel te chu thawk leh khatah rawn inthlak thutin a hmel lan dan chu a rapawm lek lek hial zawk.






Ruby chu a tawlh hnung hret hret a, Ruatdikan banga a nawr beh meuh chuan thil awmzia hrethiam lo zet hian ka lo hawi â ruai tawh thung.






Ruatdika chuan bang chu na zet hian a hnek pawp a, rei lo te chhung chu Ruby hnek a tum emaw ka lo ti hman. "Kut em chu ka thlak lo ang che, mahse tha te tein kan zavaia hriatah hian inpuang thung ang che" tiin a vin hrawk a.







" Eng inpuanna maw? " a lo tih khur dar dar lai chuan "Engkim kan hrechhuak vek tawh, sawi mai rawh" Zonunin a lo ti ve hmak bawk a, thil awmzia chu ka hrethiam lo takzet tawh .






Ruby chu a tap chhuak ta hawk a "Aw ka sawi ang, ka sawi vek ang" tiin a te chiam.






"A bul atang kan sawi vek law law ang e, thil engkim intanna chu nang hi i ni Lalrinpui" tiin min rawn kawk sawk a, ka lo ka hau mai.






"School-a kan inhmuh hmasak ber ni atang khan ka ngaina lo nghal che, a chhan chu maw i hmelthain i pian a nalh lutuk tlat. Mak tak maiin keini pathum hi kan inkawm ho ta mai si a, ka ngaina der ta vel mai mai che a.






" Hruaisanga hi nang aiin ka duh hmasa daih zawk a, ka sawi lang ngam lo thung. A star che tih ka hriat khan ka haw lutuk che mahse rilru tha tak put ka tum ve ngial a, in inngaizawng chho ve ta mai bawk a. Ka rilru ka tina duh lo lui a, in hlimzui ta bik lo erawh kha chu ka lawm ve reng






"College kan kal dawn khan in luhna a luh ve kha ka tum tawh lo hrim hrim. Ka tan i hnawk mai mai ziah tlat a. Tichuan kan college ah Sir Ruatdika a rawn thawk ta a, student tam takin an duh rawn a, kei ngei pawh tiamin. Mahse maw, ka thuhriat leh chu nang leh Sir Ruatdika inneih tur thu kha a ni a, min thawn nat dan tur chu i hrethiam mai em? " Ruby chuan huatnaa khat mitmengin min melh ram ram mai. "Chhunzawm vat mai teh" tiin Ruatdikan a lo nawr a.







"In ina kalin Sir in ngaihzawng nghet a neih thu te ka rawn hrilh ta chiam che a. Mi in an sawi dan che , gold digger tia social media ah an beih thu che te. Dawt vek anih kha" a nui chhuak hak a, a rapawm lek lek zawk! "Zak taka i awm ve te ka ring a , engah mah i la ngai lo zui. Sir zawk hi ka va hmu ve leh a, ngaihzawng i neih thu leh amah i hmangaih miah loh thu te ka hrilh a , min lo chhan dan i hre duh em? 'Ka hre vek alawm, mahse min la hmangaih dawn' tiin min lo chhang anih chu" Ruby thusawi avanga mak ti tak chungin Ruatdika ka va melh a, min lo en ve reng bawk a. Engtin nge chutiang chuan Ruby a lo chhan theih zawk le? Ka zak lek lek bawk!







"Tichuan ka nghak leh hret a, Sir hi ka ta anih theih loh pawhin in hlim bik tur a ni lo tiin. Tlaia lo kal tura ka tih tum che a, Sir in a neih chhan che ka saw zawng zawng kha dawt vek anih kha! Chutiang engmah a awm lo, ka phuahchawp mai mai anih kha. Ka rin phak bakin thil a kal tluang a, in inthen nghal ta ringawt anih kha.





"Ka rin loh lutuk maiin Sir hian in inthen atanga rei lo teah min rawn pan a. A rilru nat thu leh nangin i hmangaih ve mai a inbeisei avanga â a intih zia te a rawn sawi a. A lungngaih lai chuan ka lo hnem a, rei lo te chhungin min ngaina hman ve ta lutukin ka hria a. Zanin helai kan rawn pan dawn thleng khan min fawpin min neih a duh thu min la hrilh asin. Mahse lemchanna vek a lo ni si a" Ruby chu a tap chhuak hlawp hlawp a, ka thil ngaihthlak zozai avang chuan ka â vek dawnin ka inhre hial!






"Keimaha awm ka duh" ti hlutin ka tho a, ka tlan chhuak ta nghal a. Zonuni birthday lawm tura lo kal tlem a zawng lo awm ho chuan min lo melh hlawm ha a, pawn lam panin ka tlan tlang ta ringawt a. Party boruak kan tichhe vek tih in hriain ka inthiam lo hle bawk.






Pawnah chuan boruak hip lut kawk kawkin, ka thaw chhuak leh ham ham bawk a. Ruatdikan min lo bum lo tih ka hriat avang chuan lawm tur ka nih laiin engkim phena ka mi rin em em Ruby lo awm chuan min ti na ngawih ngawih thung.






Hnung lam atanga min rawn kuah bet thlawp tu chu Ruatdika a ni tih ka feel thei , mahse ka lo tal lui phat a.





"Khawngaihtakin che lo teh . Ka ngai tawh lutuk che " a ti ri chuan min fan raih raih a, keimah zawk hian ka ngaih tawh zia ka hre chhuak uarh uarh .





A lam hawiin min kuai her a "Ka insawi fiah vat loh vang leh, thil awmze diktak ka hriattir vat theih loh che avangin min ngaidam rawh aw" ti lehin min chul heuh heuh a, ka lung a chhe nghal em em thung.





"Ruby in kan inneih hmaa i chanchin min rawn hrilh tum khan mak ka ti a, ka mi rin zawng a ni lo nghal. Tin min ngaizawng tih a chezia ah ka hrethiam nghal vek nen. Kan inthen tlaia mak tak taka i tawng vang khan Ruby ka ringhlel nghal chat a, ka tisual lo bawk . Fiahna nei lovin rawn hruai che tum ila i lo haw duh dawn chuang bawk si lova, Ruby dawp tumin ka hnaih ta a.






"Zonuni nen in inbiak tlai khan Zonunin thil awmzia min rawn zawt nghal a, a chhan chu ka bum che kha a lo ring miah lo va. Ruby chu ka lo ringhlel dik ngei a, tichuan a inpuan theih nan amah nei duh angin lem ka chang ta ringawt a ni. Zanin pawn amah nen inneih kan duh thu nang leh Zonuni hnena sawi chhuak turin ka hrilh a , min rin ngei theih nan ka han fawp ve vel anih kha. Tenawm hian..! " a ti hmuk a.





Chutiang anih chuan min neih duh chhan dik tak i sawi thei tawh ang em? " ka ti chhuak ta sap a.





"Min zawh hmasak pawh khan dawt ka sawi hleinem, a chhan ka hre lo tak tak " a tih lai chuan rum zet hian ka lo melh a .





"Khatin min melh suh aw , thudik anih chu ka sawi. In ina kan rawn kal hmasak bera kan mit leh mit a intawn rual khan maw mak lutukin ka tek ve chhawk asin. Ka rilru i luah ta reng a. Tlai khat kan college bang hi ka jeep chabi ka theihnghilh vangin staff roomah ka han let a, a lo reh thiap tawh a tah chuan Sir Rama phone hmang hi tum loh deuhin ka han hre fuh ta a.





"Nang leh Hruaisangan in tih mangan zia leh engtia hmalak tur nge ni ang tih vel a sawi lai ka han hre fuh a, thil awmzia ka hrethiam kuar a a phone hman zawh chu nghakin, call a dah veleh nang ka neih duh thu che ka va hrilh ta ringawt a! Kha thil kha engvanga ti nge ka ni tih ka la inhre thiam bik hauh lo. Ka hmangaih ta hial che anih hi "





A thu sawi mek vang chuan thil engkim mai chu a reh duk hian ka hre hial! "Min hmangaih maw? " ka ti chhuak ta sap a.




"Engtik hunlai atang khan nge ka hre lo. Mahse kei hian ka hmangaih lutuk che Lalrinpui" a ti hrawk a.





"Remruatdik kei pawhin ka hmangaih che" ka sawi rual rual chuan duhthawh zet hian min rawn fawp a , a kut chu ka tukhumah rawlh chhoin ka samah a tham tawk a, thil thleng mek chu mumang a ang rum rum mai.




Ka mittui luang ngiai ngiai chu ka lungngaih vang a ni lo tih ka chiang !




Kan inthlah meuh chuan ka thaw a chham hman lo chauh, boruak ka hip lut nghal hrawk a.





"I awih lo maithei a, ngaihzawng chu ka lo nei ve tawh thin mahse kan inneih zan kha sex ka hman hmasak berna a ni ve tho asin" Ruatdikan a rawn tih takah chuan mak ti zet hian ka melh reng a . "Awihawm loh e. Khati em em in vawi khat naah a zei theih loh " zak deuh tak chung hian ka lo ti hliai a.



"Aww... Mipa te chu p0rn kan en nasa alawm" tiin a nui suk a , hepa thin tak hi chu aw.!! Dawt a sawi lo ang tih ka ring ta thlap thung.






* * * *


EPILOGUE






Five years later :






Zotei kawrfual var puk haa phur tak maia a tlan kual vel chu hmuhnawm ti zet hian ka thlir dauh dauh a. Ka zawn a rawn tlan thlen leh chuan a ding chawt a "Anu ka kawr ang hi anu Kimkimin a ha va dawn maw?" a mitmenga phurna lang chhuak sar sar hian min zawt a.




"Umm ha ve dawn e, pawna a lo chhuah hunah pangpar i lo pe bawk ang a in mawi dawn lutuk" ka lo ti hliai a.




"Anu Kimkimi chu a hmeltha sia kawr inang te kan ha dawn a a nuam e" tiin a zuang tawr tawr a, ka lo nuih hak hak thung a.




Room kawngka a rawn ri rak a "Ka hmangaih te pahnih kha in inpeih tawh maw? " tia ka pasal lo lut mek chu hmuhnawm ti zet hian ka lo thlir reng a, a pian nalh lutuk mai chu a suit pawl hak nen chuan a inrem tak zet.



"Aw kan hman tawh e" ka lo ti var a, min rawn hnaihin "Lalthafamkimchiangkuang" tia nuih suk pahin min rawn fawp zeuh a. "Heyy, Zotei a awm ve reng hi" ka lo ti chiam tak naa ka rilru tak chuan nuam ka ti ru ve reng!




An pafaa pawn lama an inpawm chhuak chu hmuhnawm ti taka thlir chungin ka zui chhuak ve nghal a. Hruaisanga leh Kimkimi te inneihna tur Biak in lam chu ka jeep ngainat em em a chuangin kan chhungkua chuan kan pan ta a.



IMG_20200701_210445_compress75.jpg
IMG_20200701_210445_compress75.jpg (46.15 KiB) Viewed 15178 times

T H E E N D





( Ka lung a leng nghal 🤣 😭 Chutin, min lo chhiarsak tu te zawng zawng chungah ka lawm vek e aw ❤ . Fb lamah comment min pe thintu te phei chu ka hmangaih lutuk che u ania 😭 😍 )

Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)