☆24/7☆ By Dingdi Pachuau (Completed)

Episode nei ho a hlawm a dahkhawmna
Ngaia
Site Admin
Posts: 25813
Joined: April 30th, 2016, 4:07 pm

Re: ☆24/7☆ By Dingdi Pachuau (Completed)

Unread post by Ngaia » October 25th, 2020, 3:38 pm

☆24/7☆ - 43 By Dingdi Pachuau




Eng thil dang mah ka ngaihtuah thei lo, tunah hian Rinfela'n hliam tuarin nikhaw hre lovin a awm mëk a ni tih chiah ka ngaihtuah. A na lutuk ang em? A lu-ah a nih phei chuan a sawh na viau ang a, a thluak a sawh khawlo thei ang em? Nge a taksa dangah pawh hliam a tuar tho ang?



Taitea a rawn haw a, thil thleng chu ka nuin a lo hrilh vat avàng chuan chaw ei a rawt nghâl a; mahse, kei chu chaw ei thei ziazâng ka ni lo. Ani pawh chuan a bâr sawk sawk a, engtia rei nge ka awm dâwn ka hriat loh avàngin ka thawmhnaw ka nuin min siamsak a, kei chu ngawi rengin ka țhu tawp a ni ber. Ka rilru a zîng chûk a, ngaihtuah dang nei thei lovin Rinfela chauh ka rilruah a awm.



Thawmhnaw nèn ka bàwr dáwn avàng leh khaw vawh lai a nih vàngin car-in kan kal a, Taitea nèn kan kal. Kan awm dàn tùr kan hriat láwk loh vàngin zanin chu damdawi ina riak ngei ngei tùrah kan indah tawp. Kawngah chuan kan țawng lo tluk a ni, a khalh mawp mawp a, a hnuah erawh thil ka ngaihtuah chhuak thut a, ka phone la chhuakin Rinfela number chu ka call a.



An lo chhâng leh mai bawk a, khawi lai damdawi inah nge an luhpui tih chu ka zâwt a, civil lamah a nih ka rin tehlul nèn, Serkàwn lamah an lo chhohpui daih a.



Chhûngte a nei lo a, awmpuitu tùr ţhian kawm ngeih tak lah a nei hek lo, Kima kha chu a kàwm ve ngei a; mahse, kawm ngeih tak bîk ang, engkima buaipuitu tùr ang hi a nei lo a ni. Keini unau bâk innghahna a nei dâwn si lo a, kan rim deuh hlek a ngai dâwn a ni; mahse, Kima chu Rinfela'n accident a tâwk a ni tih ka hrilh ve tho.



Pa Hmingate pawh ka hre chhuak vawng vawng; mahse, a dinhmun dik tak ka hre chiang rih si lo a, ka hrilh duh rih lo. An rawn ngaihtuah lutuk palh ang, damdawi in thlen hnu lamah pawh ka hrilh thei tho alawm.



Damdawi in kan thlen chuan hmuh theih pawh a lo ni tawh lo, amah buaipuitute chu pahnih an lo la awm a, Kima pawh a thlenna a la rei lo a niang, min rawn hmuh chuan min rawn pan vat a, mittui tling pam chungin ka en reng ringawt, eng mah ka sawi lo.



Thil thleng chu Taitea chuan a záwt leh a; mahse, anni pawhin an lo hre chiang bîk lo, kawng kâwiah chuan a tlân liam tawp a ni ang an ti ringawt, accident a thleng a ni tih an hriat theih chhan pawh kawng sîr thlang lam hungna chhia ațangin a ni. A accident-na hmun an sawi chu keini pahnih chuan kan lo hmu pek lo, kan lo tlàn pèl mai mai a lo ni; mahse, hriat loh miau si chuan...



Kei chuan eng mah ka buaipui lo, ka țhu tawp a ni mai. Taitea ka ring vek tawp, ka rilru a mangang a, a vâk vêl ruai a ni ber. A chângin ka bîng leh mum mumin ka hria a, a nuam lêm lo, ka thinlung erawh Rinfela khawngaihna avàngin a na ngut ngut, tawrh hrehawm tak a ni.



Kima'n min rawn pan a.



"A chanchin i hre chiang tawh em?" ka lo ti sap a.



"A, a lu hliam kha a lo nasa deuh hlek a, thi a chhuak nasa bawk nèn; mahse, tunah chuan a thi a tàwp tawh ni àwm a ni. Páwnlama en mai chuan hliam dang a nei lêm lo a nih hmel; mahse, a taksa chhûnglam engti takin nge a sawh tih erawh test chi hrang hrang an neih leh hnuah a hriat chauh ang," a ti duah a.



"A nih tak chu, kan hmu thei lo tihna em ni?" ka ti leh sap a.



"Aw, an la phal lo a, naktúk lamah chuan an phal ve tawh ang chu," tiin min chhâng a.



Amah chauhin natna khumah na tak tuarin a let reng àwm si a, ka va khawngaih tak! A tán tih theih nei ila ka va ti tehlul êm! A natna tawrh chu tawrhsak țhen ve thei ta ila chuan a zia deuh mahna le.



Tih theih ka nei tak. A tân țawngțai ka ti thei alawm, chu chauh chu tuna ka tih theih awm chhun chu a ni. A thi lo ang, thih chungchâng hi chu ka ngaihtuah duh lo, a thi thei lo hi a ni tawp, Pathian pawhin a phal lo ang. Ka mamawh alawm, ka pasal tùra nia, min láksak thei lo ang.



Ka rilruin ka țawngțai mawlh mawlh a, ka hmu thei lo; mahse, ka țawngțai thei thung a ni. A bulah awmin hmu thei pawh ni ila, eng nge tihsak theih ka neih chuan ang? Țawngțai mawlh mawlh hi a țha ber. Mi fel țawngțaina chuan thil nasa takin a ti thei a, mi sual țawngțaina pawh hi Pathianin a lo ngaithla duh ngei ngei ang tih ka hria a ni. Miin rilru leh tih takzeta țawngțaia a dìl phawt chuan Kan Pathian hian a chhâng ngei ngei ang.



Ka țawngțai a, ka țawngțai leh țhìn, tih theih dang nei hek lo le, ka țawngțai reng mai.



Zîng dár 4: 15 chiahah thu dêngkháwng lutuk kan hre ta, Rinfela a boral ta tih chu! Ka la inpeih lo, kaltîr tùrin ka la inpeih lo, ka pasal tùr a nia, naktûk tûk lawkah kan innei dáwn asin.



Tunah a boral tih an sawi maw?! Thil ni thei lo a ni, a theih loh, a theih loh bur!



Ka che dâwn a, ka khawng vek. Mit khap hauh lovin ka hma záwna bang vár pup chu ka thlîr reng a, ka mittui pawh a tla lo. Ka mittui hi tla tùr a ni lo em ni? Ka hmangaih ber ka pasal tùr a thi a nih chuan țap hawm hawm tùr ka ni ang chu; mahse, ka mittui pawh a tlâk loh hi. A tlâk loh chuan Rinfela hi a la thi lo tihna a ni ngei ang.



A thi lo, ka ngaihtuahna kal sual mai mai a ni. Hei chu mangchhia a nih hi, ka lo muhìl reng a ni zâwk ang, harh chhuah ka va duh tak ém! Au nghek tum teh ang, mangchhia 'Rinfela a boral' tia an sawi pawh hi a bo daih mahna!



"Bawihi, Bawihi?" tiin ka nuin ka lu-ah chuan a rawn sáwi nawk nawk a.



Ka harh hlawl mai, chiang zetin ka han meng a, khawi laiah nge ka awm ni?



"Nu.."



"Engtizia nge? Mangchhia em ni a? I au ruai ruai a, i tãl nasa bawk si," ka nu chuan a ti leh a.



"Nu, Rinfela kha a thi em?"



Maktih hmel zeta min en hian,"Thi a?!! Thi nâng, 'A lo chho lawk dáwn' i tih kha, nang hi i mumangah Rinfela chu a lo boral a ni maw? Mai mai a, han inphih harh teh, a lo thleng țêp tawh maithei a nia," a lo ti a.



Ka mumang a ni maw? A lo chho dàwn maw?!! Engti tùrin maw?



Ka harh chhuak ta phut, ka tho nghâl vat bawk. Kitchen island bawhin ka lo muhìl niin, eirawng ka bàwl lai laiin maw ka lo mutthlûk a?!



Rinfela a thi lo tihna.. Ka mumang vek a lo nih chu..



"Yesss..." tiin ka lâm tawr tawr mai, ka mumang lek lo niin, ka làwmzia hi, țawngka hian a sawi fiah thiam phâk lo!



"Lalpa, ka lâwm e," ka ti mawlh mawlh mai.



"Lâm lo khân i phone kha chhâng thuai mai teh!" ka nuin a rawn tih chuan ka phone a ri a ni tih ka hre ve chiah!



Phûr zet hian ka ban a, Rinfela a lo ni.



"Hey...i lo thleng dàwn tawh em?" ka phùrzia chu ka awah chuan a lang chhuak chiang khawp mai.



"Aw, chu chu ka rawn hrilh che, min lo hmuak la?" a rawn tih chuan," Aw le, ka rawn kal nghâl," tiin ka tlân chhuak ta nghâl bawk a.



Ka mumanga a thih miau avàng khân thil thleng tak tak a ni lo tih fiah vat vat ka duh, a taksa ngei khawihin kuah vawng vawng ka duh a ni.



Kan in ka chhuahsana kan kawt pheia ka kal lai chuan a motor pawh a rawn lang ta, ka ding chawt a, amah ngei a ni em tih ka lo thlêk vat.



Ka bulah chuan a rawn ding a, ngun zeta ka lo thlêk reng chu ani pawhin min rawn en ve vat.



"I ni tak tak!"



A rawn chhuak chu a lam pana tlânin ka pawm chawt mai. Ka mumang kha a tak ni ta se, tunah hian hetiang tak hian ka pawm thei tawh dáwn si lo...



"I thih ka remti thei ngai lo ang!" ka ti chhuak ta ringawt a.



"Eng maw?!" Ka thil sawi chu mak a ti ve a ni maithei; mahse, ani pawhin min pawm lêt ve tho.



"Ka mumangah i lo accident a, i lo thi a..."



Nui hawk pah chuan nghet lehzualin min pawm bet a, nuam ka va ti leh si êm! Tunah chuan ka thla a muang thei ta, a la dam, ka mangchhia mai mai kha...



"A mak hle mai tiraw?" a ti sup phawt a, chutah,"Motor lianin min hnâwl teuh asin aw...!! Min hnâwl lohna chu bete bawk tak tak a ni!" a ti leh sup a.



"Sawi suh!" ka lo ti vat a, hlauhthàwnnain min rawn man thar leh a, ka kuah châwih châwih a.



"Lût tawh ila, mi min hmuhah a mawi lo thei ang e?" a rawn tih chuan ka harh chhuak leh chiah. Kan kawt piah maiah kan inpawm reng tak alawm, miin min hmuh hlauh chuan 'over' min ti ngawt tak ang!



Ka hlim leh lutuk tawh; mahse, a bulah amah hnaih takah awm zél ka duh. Hmuh theih reng ka duh, ani hi ka dam chhan leh ka hlim leh làwmna ber a ni tih ka hre chhuak thar nawn awn awn ni berin ka hria.



Min thlâkhlelh leh min ngaih vàngin a rawn kal a, kei hi ani ai hian ka over ta hratin ka hria, ka chhûngte pawh ka zah zo tawh lo tak tak, amah si chêt leh hnaih thei ang bera awm ka duh tlat tawh.



*******



Kan inneihnî chuan ka tum loh deuhin kawrfual ka ha leh ta daih, Mazuali hâk tur pawh kan țhui chawptîr chûk chûk a, rin aiin an chhuah nalh phian lehnghâl a, kan mawi hlawm viauin ka hria. Kan hlimna chuan min timawi pah pawh a niang, kan hmêl leh mitmeng, chezia zawng zawngah pawh miin an hre vek thei hial ang chu.



Hmun dang ațanga lo kal tùr zawng zawng pawh an rawn kim viauin ka hria, min chibai dan dan a, a bîk liau liaua ka sàwmte ka thawhpui hluite pawh an rawn kal țha viau mai, an tiláwmawm, min tiphuisui tak tak a ni. Hlim takin min chibai zêl a, dik tak chuan Rinfela, ka pasal ni ta lak ațanga mit lâk sawn harsa ka ti, a thawmhnaw chu a inhmehin a hmelțha êm êm si a.



"Khatin en reng lo la, a mak thei!"



Ka mit chu Rinfela lak ațanga la sawnin Thlamuana chu ka melh ta râm a, chutah, a kut rawn phar chhuah chu vuanin," Ka chibai duh dâwn lo che em maw ni le..." nui chung hian ka ti sap a.



"Chutin min hmu hniamin induh nghâl ngawt suh, pasal i neih tãk avàng mai a...Kei pawhin nupui ka ru haw dáwn..." a rawn ti lêt ve a.



Rose-i a chhe lo pek. Bsa a rawn kal ve loh avàngin Thlamuana nèn an inkawp deuh chawt a nih hmel, an chhe lo dùn khawp mai, mi mit pawh an la dùn e.



Thla kan la chuai chuai a, in lamah programme hran kan siam tawh lêm loh avàngin ei leh in pawh Biak in lamah vek buatsaih a ni, ei leh ina sum hman vêlah Rinfela'n kan insènso a phal ve lo nain kan âwl duh bîk lo, a chanve ang ve vein kan tum a, mipui kan inneih min lawmpuia rawn inkhâwmte pawh an tlai ngeiin ka ring e.



Chawhnu lamah Lunglei lamah kan liam thla lehnghâl. Ruai tùr an lo buaipui mup mup a, kan zu thlen chuan an lo peih fel deuhthaw tawh a lo ni, min thlaha kalte zawng zawng leh Lunglei lama Rinfela sàwmte zawng zawngin ruai chu an țheh a, keini țhian li pawhin fatute'n cial taka min siamsak chawhlui chu kan kîl ve a, hlim vàng erawh chuan ei tam a har khawp mai thung.



Eng an hre hlawm chu ni maw, zànah chuan kan chhûngte chuan hmun dangah min riahsan vek! Ka nute leh Pa Hmingate nupa pawh an bo daih, kan pahnih chauhin kan riak ta a nih chu.



"An timak e, a inthlahrunawm," ka tih chuan,"An tih ve tùr alawm, nupui neih zàna mutna bul lawk lawka an lo mut ve zawngin..." a ti sup a, a sawi zawm duh lo a.



"A, chutiang ringawt te chu.." ka lo ti a, a thil sawi chuan ka hmai a tisa up up mai.



"Ho lutuk! Men rei viau a țha lo a nia, tui pawh ka siam vek tawh, intleuh dùn lawk ila?"



Ka hnial deuh a, keimah ka lût hmasa that a, kawng ka kalh avàngin a lo lût ve thei lo a.



"I châk lo dáwn nasa a nia,"pâwnlam ațanga a rawn tih chuan ka nui sak sak ringawt a.



Kan nupa khum tùr, Mazuali'n uluk tak leh mutphah mar zeta min phahsak chungah chuan ka țhu thân a, bathroom ațanga a rawn chhuak chu ka lo thlïr reng a.



"Khawi lamah nge ka mut dáwn kha?" tiin ka lo zâwt var a.



"I mut dâwn pawh ka hre lo," a lo ti thung a.



Ka melh sawr sawr a.



"Zanin chu muttîr che pawh ka lo tum hleinem," ti supa min rawn en lêt chuan rang zet hian ka hmui ka hup chat a.



He pa mai mai hi... min tizak dáwn alawm!



"Mut a ngai hleinem, kan tlaivâr ang chu," a la ti ta deuh deuh!



"Ka mut a chhuak tawh asin," ka tih chuan," Pasal neih zàna mut chhuak sawite chu a," a ti nghut a.



A sawi duh loh hmel deuh deuh a sawi țeuh tawh a nia!



"A chhuak tho sia," ka ti ve thung a.



"Chhuah lohtîr dàn ka hria asin," tia min rawn pan chuan,"Hey, i thil sawi dàn kha, kawh bîk riau a nei zêl a nia," ka lo ti a.



"I ngaih dàn a nih chu, lo tho la, mut chhuah loh dàn chu ka lo hrilh ang che," ani chuan a lo ti leh a.



"A, lo mu mai teh, ka mutna lam tùr kha khawi lam nge ni kha?" ka ti leh thung a.



"I mu dáwn lo ka tih kha."



A chimawm thiam roh asin.



"Inla zei viau suh aw," tiin ka nuih hak a.



Min rawn hnaih ruak nghâlin,"Inlâk zei a ngai hleinem, ka zei sa tho a," a rawn ti!



"Vawiina i hmelțhatzia kha," ka lo ti daih a.



"Thil dang sawi tum suh," tiin hnai zetah chuan a rawn kûn hniam a.



"Ka mutna tùr-" ka sawi zo hman lo, min rawn fâwp thut a, ka lo inring chiah lo nèn, khumah chuan kan tlu dùn nghâl hawl a.



Chinlêm nei lo lêk chuan kan infawp a, hun rei tak, nghâkhlel taka kan lo nghah, kan inneih zàn, nupui pasala kan insiam zàn a ni bawk a, insûm a tum tawh lo bawk a niang, kan tân thil sual ni tawh miau hek lo le.



A hnuah erawh muangcháng dam dapin min fâwp thung. Kan inhmangaih a, kan induh a, nupui pasalah hial kan innei a, kan induhna leh hmangaihna pawh kan lantîr ve ang chu.



Inhmangaiha induh takte, nupui pasala insiamte tih țhin kan ti ve a ni mai.






*ENGKIMAH HMANGAIHNA HI A ROPUI BER*




https://chat.whatsapp.com/DXMsyQQZ3Lp2ASRh50UCed


😊😊😊Join keuh



Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » October 25th, 2020, 3:39 pm

☆24/7☆ - 44 By Dingdi Pachuau




Pasal ka han nei ve ta mai chu a nia, ka mumang a ni mai em aw tih ka ngaihtuah a, ka han khap sak sak a, chutah, min kuah chialtu Rinfela chu ka han en leh a, tui taka muhìl tih hriat tak hian a thaw sâk sâk a, ka mumang chu a lo ni lo ngei a nih chiah hi.



Tihharh hlau ru tak chuan a hmel chiang taka hmu thei tùrin ka lu chu ka chêt sawn a, ka thlîr ta vang vang mai.



A mithmul dum chhah angreng tak hi a inhmeh ka ti a, a luhlul thawkhat ang tih pawh a hriat theih hliah hliah. Luhlul viau mah se, ka duhna a kiam phah lo mai ni lovin, a nasa sauh záwkin ka hria. Tunah phei chuan ka pasal a ni tawh lehnghál a, a țha lamah hi chuan luhlul hle mai se tih hi ka duh bur zâwk hial a ni. Kan inhmangaih a, ka thianghlimna, ka pasal tùr tân chauh tia ka lo vawn him ve char char kha amah, ka pasal tân ngei hian ka hlàn ta bawk a, ka làwm a kim hliah hliah tawh a ni.



"Min en reng hian nuam ka ti țhin tih ka hrilh tawh che em kha?"



He pa hi, a lo harh reng tawh a ni chiang mai. Ka en ulukin ka en rei bawk si a, engtia rei nge a lo harh tawh ang ni?



"Ka en reng lo che, hmun dang pawh ka en ve tho aw."



Meng chuang lo chuan a nui hawk a.



"Ka nupui hian dâwt sawi pawh a thiam lo. A pawi lo, hmun dang en tawh lovin i duh táwkin min en thei ang," a ti leh a, a aw chu a la mut chhuak aw ruih mai a, a thatchhiat hmel bawk sia, a sexy ruih maiin ka hria!



"Tho tawh záwk ang, a tlai tawh," ka ti a.



Ka kâwnga min rawn kuah ngheh sauh pah hian," A la hma, thawh a la hun rih lo,"tiin ka âwmah chuan a hmai a la rawn phûm tak sauh sauh a.



"Chutin ti ringawt suh, mut chu a nuam-"



"Nuam deuh asin," tiin ka țawng lai chu min lo pawt chat a, chutah,"Ka nupui tê hian min hnial a châk a ni maw? Min hnial miah lohna tùr tih tùr țha deuh ka hre ràn a nia aw," a ti leh zat a.



A thil sawi chuan min la tizak thei tho! Kan inneihna pawh kâr khat chuang zet a ni ve tawh a nia, a țawngkam eng emaw tê hian zahna min la thlen thei tho.



"Tlai lamah em ni Rose-ite ina chaw kan ei dáwn kha?" tiin thil dang daih chu ka záwt ta a.



"Chaw ei pawh a lang lo, hetia mut hi a nuam," a lo tih chuan," A mak thei!" ka ti sap a.



"Min duat tal la?"



Naupangchhia sia maw. Mahse, hriat thiamna thui tak ka nei, a nuin a kalsan ațang khân pangchanna tùr a nei tlat lo. A pa lakah a pangchang thei lo, enkawl ngai zâwk a ni si a, pangchan châk ve țhìn mah se, a thei lo, kei chauh hi a pangchan ve theihna chu ka ni.



"Ka duat che alawm, ka duat lutuk che," tiin ka kuah a.



"Engtin?" a tih leh chuan," Nang bâk duat tur ka nei lo, ka pasal duh tak leh ka hmangaih ber kha i ni miau a," ka ti lët ve a.



"Nih, tho rih lo ang," a tih leh chuan," I duh dàn dán le," ka ti leh a.



"Duat takin min kuah leh la?"



A sawi ang zêl chuan ka ti. Thil hrehawm a ni hleinem, a thu ka áwih hian ka duatzia ka lantîr a ni ve pakhat bawk a, ani pawhin ka thu a âwih ve tho bawk.



Kan thawh chhuah meuh chuan dâr 7:20 a ni vah tawh! Khua a vâwt a, tih tùr pawimawh kan nei lêm lo bawk nèn, thawh tlai pawh kha pawi ka ti tehchiam bîk lo a ni.



Kan pahnih chuan eirawng kan báwl dùn a, ka sîrah min si chêta a rawn din loh leh ka hnungah dingin ka kokiah a khabe a rawn nghat a, a chángin ka ngháwngah leh ka biangah a fâwp thùl, chutiang rêng rêng chuan hun a hmang a; mahse, ka sawisêl lo, nuam ka ti ve tho tlat a ni. Heti reng hian kan dam chhûng zawngin, kan inthlahlelin hun kan hmang dùn reng kher lo ang, kan inthlâkhlelh zual lai hun a la ni ve a, ka sawisël lo ang. Kum hnih thum a vei hunah meuh chuan ani pawh hian a peih tawh kher náng.



"Honeymoon hman i duh em?"



"Hei, kan hmang reng chu a ni lo'm ni?" nui chung hian ka ti a.



"Hmun dangah a nia ka tih," a tih chuan," A, ngai pawh ka ti lêm lo, hmun danga kal lo pawh hian nuam kan tih viau tho hi maw," ka ti leh a.



"I awmna hmun a nih phawt chuan khawilai hmun pawh hi nuam ka ti ang," ka kokia a khabe rawn nghah leh pah chuan a ti sup sup a.



"Chuti a nih chuan, hmun dangah zin kher lovin kan inah hian honeymoon chu hmang mai ang aw," ka ti a, hmun danga kal chuan pawisa a hek bâkah chêtsualna a thleng thei, kan fihlim theihna ber chu zin chhuah loh mai hi a ni. Motor-a kan chuan loh na na na chuan motor chêtsualnaah kan thi kher lo ang tih hi ka ngaih dàn a ni.



"I thu vek alawm, Ka lalnu."



Nilêngin inah kan awm a, Aizawl lam ațangin dàwr chungchângah phone call a chhâng a, a patea lo kalpui țhin dàn zûlzuiin a kalpui vek tho, manager ang deuh pakhat awmin chu chuan engkim a buaipui a ni mai, a va phei chângin a pui ve zauh bawk a.



Tlai dâr 3 vêlah pateate inah chuan kan chho a, nutei leh patea an lo awm a, Rose-i erawh a lo la haw lo. Nutei remti lo chungin eirawng ka bàwlpui leh dàwr dáwr a, patea leh Rinfela erawh mipa an nia, an lo titi thung a.



Rose-i rawn haw hnuah erawh kan ri ta chûl a, ei tùr eng eng emaw a rawn lei haw țeuh bawk nèn, chaw ei hmain kan han ei dun leh hlak kha! Mi eitîr dàn hi a thiam a nia, ka hnar thei lo țhìn, a ei tuam tuam a, a tui hmel thei si a, ka ei leh nge nge țhìn.



"Nangni pahnih hi, rei deuh innei ang che u, eng emaw hleka inhauh thinrima inhnial vànga lungawi loh leh tlàn tih vêlah khân buai miah lo ang che u, ka peih miah lo a nia," chaw kan ei lai chuan a ti sârh sârh a.



"Rei deuh chauh maw? Kan inneih thutiamah khân 'Thihnain min țhen hma loh zawng' kha kan ti bawk sia?" ka lo ti a.



"Thu țha ka hrilh cheah ngai mai rawh, tuna in inthlâkhlelh reng ang hian in awm dáwn lo, inthlâkhlelh tâwk loh hun a lo la thleng ngei ngei ang, chutih hunah chuan ka thu sawi hi hre reng ang che u," a ti leh a.



"Ni e, hriat rengsak ang che u," ka patea pawh chuan a lo ti a, ka va en a, a lo nuih deuh avàng chuan kei pawh chu ka nui ve a.



"Rosangpui, nui miah suh, thu țha ka hrilh che a nih hi aw, Chuan, lo rai miah suh ang che, Favàng lama ka pasal neihnaah min dinpui ka ngai dâwn a nia, a rai theih loh aw," thupe aw deuh tak hian a ti leh țhat a.



Ka nutei chu a lo inrawlh ta vat a.



"Chutin ti ringawt mah ta che, a rai leh rai loh chu Pathian thu thu a niang chu! I țawng malsâwm lo țhin ém mai," a lo ti kauh a.



"Nu, fa an neih nghâl ringawt chuan an induhna leh an inthlâkhlelhna hi a reh vat ang tih ka hlauhpui alawm, an la upa êm êm chuang lo a, an hmanhmawh chûk ka hlau a," ani chuan a lo ti leh a.



"Buai lohna tùrah i lo buai mai mai a nih kha, Bawihte. An inkâr a nia, fa neih thuai pawh an lo duh thei a," ka patea chuan a lo ti charh charh a.



"Nia, a niang; mahse, ani a rai puar pum si chuan kan inneih ve hunah kan mawi lo zo vek dâwn asin, pasal ka neih ve hma chu lo insûm hrâm hrâm mai teh u," a tih chuan ka nuih a za khawp mai.



"A lo rai ta hlauh a nih chuan kawr lian zet, puk deuh in ha mai ang a?" Rinfela'n a lo tih ve tâkah chuan kan nui zo ta vek a.



"Kan mawi àwm chhawng chhawng teh e," tiin a nui ring ber berah chuan a țang thei ta a.



Chaw ei kham hnuah chuan Rose-i chuan," In spot hlui kha in ngai lo'm ni? In haw hmain tlawh ngei ngei ang che u," a ti leh pek a.



"Ni dáwn tak, kan kal dâwn nia, kan kal khât tawh êm mai," tiin Rinfela chu ka en phei a.



Kan kal tak tak! Zanin phei chu thla a êng lo lehnghâl a, a thim khawp mai; mahse, a ngaihawm ve hrim hrim.



Ka hnungah dingin min kuah a, kan kut chu kan inchelh belhbawm chial a. A kut lum zet mai hi deh nuam ka tia, kei lah ka kut hmáwr a váwt thei ropui mai si a.



"A lunglènthlâk tiraw? Helaia kan inhmuh țhinna khân rah țha a chhuah tawh si a," ka ti sap a.



"Khatih lai kha chuan ka nupui i nih hi ka ring pha miah lo," tiin a rawn inpuang ta a.



"A ni maw?! Engati nge i rin loh?" ka lo ti vat a; mahse, kei pawhin ka ngaihtuah ngai lêm lo nain ka pasal a nih ka ring vak bîk chuang lo.



"Ka tân i sâng êm a ni. Ka awm dàn zawng zawng leh kan chhûngkhur, nunzia hre vektu i ni a, a châng phei chuan nang ka nei che hi ka mumang a niang ka ti rum rum țhìn," a ti leh a, ka bengah chuan a rawn fâwp zoh a.



Chutah, sawi zawm lehin," Mahse, kaltîr che kha chu ka tum lo bur. Ka duh che a, nang ka neih theihna tùr che a nih phawt chuan ka tih theih apiang tih zéla ka bula awmtîr tlat che kha ka tum bur a ni," a ti leh a.



Amah hmachhawn thei tùr chuan ka inher a," Ka tân chuan khawvêla mipa sexy ber i ni," ka ti ta sap a, ka en chho rân bawk a.



"Eng...maw?!"



Thutak deuh hian,"Chutiang mipa chu alawm sexy chu ni. A hmeichhe hmangaih tâna engkim huam ngam țhin mipa ngei chu," tiin a nghâwnga kuahin dingdihlîp hian a hmuiah chuan ka han fâwp a.



Kan țawng ta lo.



A hnu daihah chuan,"Nih, thil dang daih, ka pa khân engtin nge i nu chu a lo hriat daih theih?" ka ti ta a, hriat ka chãk a ni a, zawh ka la tum ve fan fan a ni.



"Ka hre bík lo, min hrilh lo a, ka zâwt ngam bawk si lo a," a ti sup a.



"I pà viau emaw ka ti?" nui hak chunga ka tih chuan,"Natna khirh tak tuar i pa bulah kha chuan pà khân awmzia a nei vak lo, nangmah vàng hian ka zah êm ém bawk si a," a ti leh a.



"Ka hmangaih bur che."



Ka pa khân kan pahniha inngaihzàwn kha min lo phalsak ta viau se, tûn dinhmun hi kan phâk ang em tih ka ngaihtuah a.



"Haw tawh ka duh!" a rawn ti chhuak hawk a.



"I ning deuh tawh a ni maw?" ka tih chuan," Ka nin lohzia che inah a taka lantîr ka duh a ni," ka beng bul chêta rawn kûn hniamin a ti sup a, ka beng pawh chu a tháwk khum lum ham ham thei hial.



"Aw le, Boss."



*******



Indanna ka ei miah lo a nia; mahse, ka la raichuang miah lo! A bulah ka sawi chhuak lo nain ka ngaih țhat loh a hlau a niang," Pathianin hun a la ti lo a niang," a ti ve mai țhìn a, nuam lo ka ti lek lek zâwk hial a ni.



Kan khuaah vawi khat chu kan han zin leh tawh a, kan zin chuan khua a lo lum leh viau tawh mai a, hrehawm a ti viau ang tih ka hlau khawp mai. Kan chàm chhûng chuan chaw eia min sâwmtu pawh an awm ve nial a, a làwmawm khawp mai. Kan innei dáwn tih an hriat ațanga min sawichhe char chartu Pi Mani kha a dam țha lo a, a chàu thut thut țhìn ni àwm tak a ni, Aizawl lama phurh phei ngai ang hial deuhin an lo sawi bawk a.



"Kan kan ve ang chu tiraw?" tiin Mazualite ina chaw kan ei kham kan ţhut khawmuan lai chuan Rinfela chu ka râwn a. Nizàn khân ka nu pawh a lêng a, a rawn haw har lutuk lo nghe nghe, a muhìl thei ni àwm tak a ni.



"A țha alawm," a lo ti mai a.



"Mahni sualna chu lo dah țha ila, Pi Mani hian inhmuh chhuah nân hmang se ka ti ngawt mai. Mihring siam țhat nán khawdur a ngai an tih țhin pawh hi hei hi a ni ngei ang," Mazuali chuan a lo ti sap a.



"A dikna chen a awm ve alawm, a țawng ve thei deuh e tih a ni mai lo'm ni? Chutin a sual viau hran hleinem," a nuin a lo tih chuan,"Sual ve e a, a rilru pawh a sual alawm. Kei chu ka zah dêr lo, dâwt tih hriat lutuk a sawi pawh hian dâwt a nihzia ka sawi khum hmiah zêl, aia upa niin nute rual zet mah ni se, in inneih dâwna a thil sawi duh dàn-" a tih lai mêk chuan ka lo ti tàwp vat a.



"Mazual, han insiam la, lêng ve ang u, damlo leh mangangte inlènpui hian lènpuite tân a thlamuanthlâk duh a nia, chini kg 1 min lo pûktîr rih bawk la?" ka lo ti vat. Ka pa damloh ațang khân inlènpui tel tel lo thlamuanthlâkzia ka hre chiang tawh viau a ni.



A thil sawi tùr erawh kha chu Rinfela hian hre ve lo se ka duh, bâkah hun kal tawh a nia, sawi chhuah kha a țûl ber lêm lo, sâwtna a nei lo bawk.



Lêng pawh an lo awm ve a; mahse, upa lam deuh an ni. Lo titi ve mah se, an țawng ring lo viau mai, bengchheng a ngai thei lo a ni maithei.



A fanu naupang ber chuan thingpui min lo pe vat reuh a, inlêng dangte hnênah chuan Pi Mani dinhmun chu Mazuali chuan a han záwt ru sar sar a, nichîn deuh khân a muhìl a rawn harh a, a rawn harh hnuah a chau leh deuh a ni àwm e.



"Aizawlah chuan engtikah nge pheipui an tum àwm deuh le, ka pu?" tiin Pu Siamliana, an țhenawm hnaivai tak chu ka zâwt zauh a.



"Motor hire tawp hi chu chàwi a sâng dâwn sia, remchâng an melh ve deuh ni àwm a ni. Lunglei lama an inentîrna lamah an insêng ve nual tawh bawk sia, a natna tak an hre chhuak thei mai bawk si lo a," a ti duah a.



Titi tak tak theih pawh a ni hran lo a, kan țhu deuh tlawk tlawk a ni mai. Mazuali'n min rawn bekbàwr leh zauh zâwk a, chuti ni lo phei se chuan a reh ngawt ang!



Zàna mu tùra khum ka làwn chuan khuma țhuin a en ngai a lo en rùn rún a, eng emaw ngaihtuah mûk deuh nei a ang, kuah pawh min lo kuah miah lo a nia!



"Eng thilin nge i ngaihtuahna tibuai a?" tiin ka kuah hmasa ta zâwk a.



Min rawn en nghãlin,"Zanina kan lènna damlo kha ka ngaihtuah tlat, Aizawl kan phei veleh phur phei ve ila tiraw? Motor chuan phei man an châwi lo tùr pawh an tân chuan sum save-na țha tak a ni thei ang a, bâkah, kan motor-ah chuan mi dang mitmei vèn a ngai lo ang a, hrehawm ti vak lovin an thleng thei ang tih ka lo ngaihtuah a," a ti sup sup a.



Ka pasal hi, mi sual a ni lo ka tih tawh kha, a rilru pawh hi a țha asin.



"I tih dàn dán a ni mai, ka pawmpui thlap che," tiin a khabeah chuan ka fawhsak zoh a, fawh hi a phû hliah hliah a ni.



"A fate tân khân a hrehawm duh dâwn êm mai, a rang thei ang bera phei tum ila, Lungleia kan chhuk leh lawk hlànin ka nu emaw Taitea emaw lêngin thil awmzia va hrilh se tiraw? Anni pawhin an hnial ka ring miah lo," a ti leh a.



Ka nu hi a ko hreh thei asin! A ko hreh lutuk hi a koh ngei ngeina tùrin ka nu bulah thil lam tùrin ka tîr țhìn hial, chuti chung pawh chuan a ko ri ka la hre miah lo!



Mahse, tunah khân 'Ka nu' a ti ve ta tlat!



"Mi felpa! Ka pasal i ni hi chu Pathian hnênah làwmthu awm mawlh teh se!" ka ti chhuak. A ngaihtuah ang hi ka lo ngaihtuah pha hauh hleinem!



A chala ka chal zàwi têa rawn tauhtîr zauh pah chuan," I țhatna hian min hmet zawr hneh êm a ni. Hmeichhia engah mah ngai tawh lo kha hmeichhe hmangaihna ropuizia leh hlutzia min hmuhtîr a, thîr hipthei ang maiin min hîp bet tlat a, mite sawisèl leh thinhrik kha mi ang pângngaiah min chhuah bawk a," a ti duah a.



"Phû lo viau mah ila, i sawi a nih vàngin ka ring thlap, chuan, ka lâwm bawk. I mize duhawm zet, thup tlat nia i inhriat kha ka hmu ru khiau alawm," nuih sak chung hian ka ti a.



"Mize duhawm..." a ti sup phawt a, chutah," Chutiang ka lo nei a nih ngai chuan mize țha chungchuang nei, miin 'Mi sual ber, thil rûk chîng, Jail tàn hrât' tia an sawi pawh a țhatna lai hmuhsak tum tlat mi nupuiah ka nei che a, chutiang mize duhawm neih ngei tum chuan ka bei zêl ang," a ti ve leh a.



Lungleiah kan chhukthla leh a, ka nu pawhin Pi Manite chu a lo be fel tawh a, Aizawla kan phei rualin an phei ve dâwn a ni. Kan khaw lamah kan tlân kual dáwn tihna a nih chu.



Kalkawngah kan tlân chak lo a, a nuam thei tùr ang berin kan chuantîr bawk. Din a duh hunah inthlahrung lo tùrin Rinfela chuan a hrilh thlap a, a fanu tê ber khân a kalpui a, a țawng tam lêm lo nain a fel reuh khawp. A nula ve tawh a, an unauah lehkha zir sâng ve ber, hawi zau ber a ni bawk a, an tîr niin ka ring. A nui ve sak sak nain a thaw leh hak țhìn, a rilru a hah viau a nih ka ring.



"I rilru tihah miah suh, engkimah ka buaipui vek ang che u, damna hi a hlu ber a nia," Rinfela chuan a ti sauh sauh a.



"Ni e, rilru hahna tùr a awm miah lo. Damdawi ina admit in nih loh pawhin kan inah in innghat ang a, kan in ațangin engkim kan buaipui vek dâwn nia," tiin ka lo țawng thlamuan ve bawk a.



Kan tlàn muan avàngin kan thleng har ta phian a, kan thlen chuan kan inah kan lût phawt a, thingpui kan in hnuah eirawng bàwl ka ngaih avàngin kei chu ka chhuak ve thei ta lo, Rinfela'n a tlàn chhuahpui leh nghál a, ka ngaihtuah lo, engkim a tihfelpui vek thei ang tih ka hria a ni.



A rawn haw tlai deuh hlek. Amah chauh a nih vàngin an lo admit a nih ka ring nghâl bawk.



"I hah em? I ril a țâm tawh àwm mang e?" ka lo ti vat a.



"I ril a lo țâm tawh ngawt zâwk lo maw? Ka intleuh zawk ang a, kan ei dâwn nia aw," a ti a.



Chaw kan ineisan ngai lo a, ka lo ei bîk lo ang tih chu a hre chiang ve ngang a ni.



Chaw ei laiin thil awm dàn chu zawh ngai lovin a sawi nghâl a, engkim fel taka a tihpui thei chu ka chhuang takzet a ni.



"I va fel tak aw! Kan khaw mâkpa fel ber leh hmelțha ber i ni chiang," ka tih chuan a nui hawk a.



"A neitunuin a zir êm alawm," a lo ti fiamthu ve a.



"Ka tifiam lo aw, i fel ber a, i hmelțha ber bawk. Mi dang chu an lo fel a nih pawhin an hmel a țha tel ve tlat lo a," ka ti leh a.



"Mi tihphùr dàn hi thiam viau suh aw!" a ti hlak a.



"Ka bâwl che emaw i ti a ni maw? Ka pasal hi ka bâwl phal hleinem che, thu dik tak alawm ka sawi, i fel ber," uar zet hian ka ti leh a.



"Um..ka tlâwm, chaw kha tam deuhin ei rawh le," a ti ta daih a.



Chaw hi ka ei tam lo țhìn khawp a, ei tlêm min ti thei lutuk a, ei tam tùrin min hrilh fo a ni.



"Thau deuh hlek tùrin min duh a ni maw?" ka ti leh a.



"Ni lo, chak deuh deuh i mamawh alawm, fa kan neih hunah phei chuan... Chuan, fa nei tùr chuan kan pahniha țan lâk a ngai bawk a," a ti a.



Zànah chuan motor kan chuan thui vàng a ni ang, kan mu hmain ka mut a tui khawp mai. Min rawn kuaha ka chal a rawn fawh pawh ka hre riai ruai chauh a ni!



A tûk lamah chuan uluk ve deuh taka incheiin inhmeh min tih ang rawng ngei kawr ka ha a; mahse, a chungah kawr bántlâwn dang ka ha leh a, dàwr kal hmain Pi Mani chu kan nupain kan tlawh a, a thisente test-in a result a țhat thu chu a fanu Lawmtei chuan min lo hrilh a, Pi Mani pawh a lo harh țha, nizàn lamah pawh buai lovin an mu țha thei bawk a, min hmuh veleh chuan làwmthu a lo sawi nghál mawlh mawlh mai.



Damdawi lei ngai leh thil țûl chu Rinfela chuan Lawmtei chu a záwt a, ani pawh chuan a lei tawh damdawite chu hmuhin a la lei loh damdawi inziahna lehkha erawh chu Rinfela chuan a lâksak a, a chhuak a, rei vak lo hnuah chuan a damdawi lei keng chuan a rawn lût leh thuai a.



Rei vak lo hnuah chuan kan chhuahsan ta a, thil țûl leh pawimawh a awm chuan Lawmtei hnênah chuan min phone mai tùrin ka hrilh a, phone number chu kan inpe nghâl bawk a.



"Nupui fel tak hi chu i va ni ém!" tiin min fak ve ngei a.



"Pasal fel tak i ni záwk!" ka lo ti a, ka rilru erawh a hlim vàngin a nui var var thung.



Dàwr kan thlen dâwn chuan," Engtikah nge ka pa thlàn kan tlawh theih ang?" tiin ka zâwt a.



"I tih hun hun a ni mai, engati nge? I duh chuan chawhnu lamah pawh hian kan tlawh hman ang chu," tiin min rawn en zoh a.



"Pangpâr ka la lei si lo a," ka lo ti a.



"Pangpâr a ngai hleinem, i ngaihtuahna leh i ngaihsakna kha a hlu ber," a lo ti thung a.



"Kut lâwng ringawtin ka pa ka hmu duh hleinem," ka ti tlat thung a.



"Kan lei dâwn nia," a lo tih chuan nui sen sen chung hian ka en a.



"Mi felpa, ka hmangaih che," ka ti sap a.



"Ka hmangaih nasa daih záwk che, ni tin, dârkâr tin, minute tin leh second tina ka lungphu pawh hi i tân vek a phû," a ti duah a.



Motor a dintîr hnuah pawh chuan chhuk ta mai lo chuan," Kei pawh ka thisen luang zawng zawng hi i tân vek an luang," ka ti lêt ve a, lum deuh ka tih avàngin ka kawr hâk chung zàwk chu ka hlïp bawk a.



Min rawn en vang vang a, chutah, rawn âwn pheiin," I kawr hâk nèna i lan duhawmzia kha! Ina tlàn haw lehnghâl hial a nia ka duh ni," a rawn ti sup a.








*I THINRIM VIAU LAIIN ȚAWNGKAM CHHE DEUH DEUH HMANG LO TÙRIN INSÛM HRÂM HRÂM ȚHIN ANG CHE, NANG CHUAN I THEIHNGHILH THUAI THEI A NI MAITHEI; MAHSE, A LO DAWNGTU TÂN CHUAN DAM CHHÛNG A DAIH THEI TLAT, THIN A UR VIAU PAWHIN NGAWIH TLAT THEIH HI A FINTHLÂK*





https://chat.whatsapp.com/F5M6GiQvBic4qATfXaGwBc

Join leh keuh ang u aw, la join lo tân chauh😊






☆24/7☆ - By Dingdi Pachuau


#Bonus



Aizawla kan la awm rei loh tehlul nèn, Pa Hmingate chuan chaw eiah vawi hnih lai min sâwm leh hman tawh! Anni hi chhûngte kan neih chhun an nih vàng leh Rinfela tân nu leh pa ang chiah an nih avàngin kei pawhin ka ngaina takzet, an fel bawk si. Thu țha tinrêng min hrilhin min zilh bawk a, nupa awm dàn tùr leh inngaihsak tawn a țulzia leh nupa inkâra thil zêp neih a țhat lohziate chu min hrilh dap dap ţhìn.



Pi Mani pawh a natna dik tak an hre chhuak tawh a, damdawi a ei țha bawk nèn, a zia viau tawh a ni. Anni pawhin Aizawlah chhûngte an nei lêm lo a, Rinfela nèn kan kan zut a, a ei theih tùr ei tùr eng eng emaw kan kensak fo a, ka remchàn loh pawhin amahin a han kan zawk zawk a, Lawmtei phei chu kan lakah a inthlahrung lutuk tawh tlat.



"Inthlahrunna tùr a awm lo, kan lo awm remchâng hlauh a, in tân pawh vànneihna a ni ve mai," Rinfela chuan a ti mai a.



Kan haw hnua eirawng ka bàwl laiin Lawmtei chuan min rawn phone a.



"U Sangbawih, in chungah hian làwmthu sawi dàn pawh ka thiam lo. Ka nuin in chungchâng a sawi dàn zawng zawng kha in hre ve vek àwm si a, chuti chung chung chuan min huatna emaw thinrimna emaw lantîr miah lovin kan mangan ber lai pawhin min la țanpui duh a nia. Ka zak a, ka lâwm bawk si, Pathianin a lêt tam takin malsàwmnain a vûr mawlh mawlh ang che u tih hi ka țawngțaina a ni," a rawn ti keuh keuh reuh a!



"Kan lâwm e aw, Lawmte. Pathianin mal min sàwm a, nangni ngei pawh țanpui thei tùrin mal min sàwm a, a làwmawm lamah ngai ang," ka ti ve a.



"U Sangbawih, ka nu pawh a lâwm ngang a ni, a sawi reng mai che u a. A thil sual tih man hmuhtîr lova țhatna zâwka in rùlh lêt avàng hian a rilru pawh a danglam ngeiin ka ring a, in nun dàn ațang hian ringtu dik tak nun ka hmu a, ka lâwm takzet zet a ni, kan chunga in thiltih hi engtikah mah kan theihnghilh tawh ngai lo ang," a rawn ti leh a.



Lawmtei thil sawi chuan ka ngaihtuahna a tikal thui khawp mai. Ani tê hi a kum a la tlèm ang aiin a rilru a puitling daih mai, a ute ka rualpui leh u deuhte ai pawhin a puitling zâwkin ka ring ta. A thil sawi dàn leh a rilru sûkthlêk hrim hrim pawh hi a puitling reuh tlat.



Keini nupa ve mai chutianga min lo hmu țha chu ka láwm takzet bawk. Nia, kei ngei pawh, ka rin dàn aiin Rinfela hian a ngaihsak a, kan khaw mi an nih vàng a nih ngei ka ring, a chungchâng Pi Mani'n a sawi dàn kha hre ve ta se, hetiang hian a țanpui tho ang em le?



Zanriah kan ei lai chuan min en leh vung vung țhìn a, eng thil nge maw a hriat ni? Mi en vung vung hi chu a hrât khawp a, min thlâkhlelh vàngah ka ngai mai țhìn.



"I țha tiraw?"



En hâ hian," Um, engati nge ka țhat loh ang?" tiin ka zâwt lêt vat a.



"Engtiklai pawhin i țha reng tak alawm," a ti leh mai a.



Min fakna vàng chuan ka nui sak a, chutah," Lawmtei'n min rawn bia a, làwmthu a rawn sawi a," ka ti ta a.



"I fel êm alawm," a lo ti sup thung a!



"Engati maw?! Eng nge ka felna? Nangmah a nih kha," ka ti vat a.



"I fel. Kan inneih hma thil ngaihtuah mai rawh," a lo ti leh mai a.



Min sawina kha a lo hre ve em ni? Engtin nge a hriat ang? Tuin nge hrilh? Ka âwih chiah lo, engtin mah a hre thei lo. Makti ru deuh hian ka en a.



"Eng nge kan inneih hma thil...min hrilh ve mai la?" tiin a keah chuan ka va tlawhsak zauh a.



"Ngaihtuah lo mai rawh, i felna leh țhatnain min hneh vàng a ni mai," a lo ti leh tlat a.



"Ka hriat thiam theih tùrin sawi ve mai la?" ka ti nang nang a.



"Mi felnu kha i ni tlat mai a, i sawi chhuak duh tawp nâng," tiin a tho ta daih a.



He pa hian a hre ve chiang a ni. Khawi ațangin nge maw a lo hriat ni? Ka chhûngte chuan an hrilh dáwn lo chiang mai si a, Mazuali'n a lo hrilh pek em ni? Ani tak hi chu aw...țûl lo thei mang e!



Chaw ei khamah chuan thei ei pahin TV kan en mai mai a, chanchin thar a en pah a, kei erawh chuan Mazuali ka va text pek, Rinfela a lo hrilh thawt thawt vàngin ka hau dâwn bawk.



Mahse, a rawn țang nasa.



*Eng mah ka hrilh lo, engah nge ka hrilh ngawt ang le? Thil kal tawh a nih bâkah theihnghilh daih duh nâklaiin, engtin emaw an ti leh che u em ni?* a rawn ti!



Mazuali hnên ațang chuan a hre lo a nih hi. Tu hnên ațangin nge ni ta ang? Ka ngaihtuah tlut tlut avàng chuan hriat chhuah ka duh.



A bul chêta țhut hnaih pah chuan," Duhtak, thil ka lo zâwt che aw?" ka ti sap a.



"Duhtak!" ti supin a rawn inher nghâl vut a, inhnaih zet chuan kan inen dùn ta ràn mai.



"Nichîna inneih hma thil chungchâng i tih kha, eng nge ni? Tuin nge hrilh che a?" ka ti ta a.



Min en vang vang hnuah chuan ka sam ka benga rawn zeh pah chuan," Vawiin chawhnu khân Pi Mani'n min hrilh a ni, ka bulah chuan eng mah i sawi duh miah lo a, ka hriat miah lohin rilru natna leh sawichhiatna tinrêng i lo tuar reng si a," a ti sup sup a.



"A hrilh che maw?!!" Mak ka ti lutuk ringawt! Eng rilru puin nge a lo hrilh le?



"Aw, engkim min hrilh vek. Hun kal tawh mah ni se, nangmah chauha i lo tuar kha ka khawngaih lutuk che a," ti supin a kut pahnih chuan ka bek tawn tawnah a rawn dawm a.



"Khatiang kha chu theihnghilh vek ang, ka theihnghilh tawh alawm," ka lo ti sap a.



"Mi felnu, nang ang mi fel nupuia ka nei che hi chu mipa vànnei ber ka lo ni e tiraw? Ka nun thlâkthleng-" a hmui chu ka hupsak ta vat a.



"Ka lâwm e, Pathianin nang pasal atâna min pe hi ka lâwm ngawih ngawih, mi fel tak, min hmangaih êm êmtu leh ka hmangaih êm êm i ni si a," ka ti lêt ve a.



Mutnaah chuan min kuahna bân kham chung chuan," Ti ta daih ila, ka nu, nangmah hringtu che kha hmu leh ta la, i la hria ang em?" tiin ka zâwt chhin a.



"Hria ang; mahse, ka hre kher lo ang," a ti sup a.



A thil sawi awmzia chu ka man rang lutuk. A nu chu a la hre ngei ang; mahse, hria angin a awm duh kher lo ang tihna a ni.



A âwm ruak kâng chùlsak pah chuan," Ka hre thiam e, nangmah hringtu che a nih vàng hrim hrim pawhin hmuh ve chhin ka châk ngawt mai, nu hmelțha tak a ni dàwn bawk si a, " ka ti sap a.



"Hmelțha mah se, a hmel a țha thei lo," a ti leh a.



"I la haw reng a ni tiraw?" tiin ka kuah a.



Min chhàn duh lohna chuan a la huatzia min hrilh chiang khawpin ka hria. A rilru hi a luhlul ve bawk si a, ka thiam lo hran chuang lo. A tawrh ang leh a hringnun lo paltlang tawh zawng zawng kha ka paltlang ve tlat si lo va, 'Ngaidam la, haw tawh suh' tih chiam pawh awmzia a awm lo ang,; amaherawhchu, ka puih viau chu a ngai niin ka hria. Mihring thinlunga huatna awm reng zawng, 'A pawi tak tak lo ang' pawh ti țhìn mah ila, kha huatna bu khuar reng khán thinlung țha laiah ram a lo zauh hlek hlek thei tlat. A hlauhawm a ni, huatna pai tùrin ka duh lo bawk.



Pi Manite nufa chu an inthlahrung tawh deuh nge ni, damdawi in ațanga an chhuah hnuah chuan sumo-in an haw phei ta daih. Dik tak chuan anmahni vàngin Aizawlah pawh kan awm rei phah ve deuh a, ni danga kan kal chuan ni hnih thum bâk kan châm ngai lo; mahse, a țha vek mai e, kan khuaa kan zin leh hunah kan la tlawh ve leh ang chu.



*******



Ka rai!



Rai leh rai loh test-na chu ka en ràn a, ka inringhlel ru deuh hlek tawh rêng a ni, phûr tha khùr deuh dar darin ka en chiang țha leh a; mahse, rìn lang chu a ngai reng.



Rinfela chu a lâwm ve ngawt ang!



Bathroom ațang chuan ka chhuak ta vat a, ruah sûr chuan bàn mai zai rêl lo mah se ka rilru hlimna avàng chuan rimawi tak ni maiin ka hre tawh hial! Pâwna va tlàn chhuaha va au vak vak hial a nia ka duh ni.Kan inneihna a rei ve tawh a, indang hauh si lovin ka la rai mai thei si lo a, min hnèm țhìn mah se hrehawm ka ti ru viau tawh a nih hi; mahse, tunah chuan...



Zanin tlai chu surprise teh ang.



A chawhmeh duh zâwng hlîr ka siam a, ka theih táwpin ka siam uluk bawk. Tui takin, puar takin chaw ei se, a ei khamah chanchin hlimawm hi ka hrilh bawk ang.



Ina a rawn luh chuan ruah pawh a bâng tawh a, parcel lian vak lo hi a rawn khai lût bawk a.



"I tluang maw? I ril a țâm tawh em?" ka lo ti vat a.



"Tluang meuh lo, dàwrah buaina a awm deuh lehnghâl a," a tih chuan ka khawngaih roh hnûp hnûp asin.



"A zia lo hle mai; mahse, harsa tak a nih loh ka beisei," ka lo ti a, a parcel khai chu ka lo ban a.



"Um, ngaihtuah ve duh suh, a fel thuai ang," tiin parcel chu min pe lo chuan dawhkànah chuan nghatin a hawng ta nghâl a.



Chini, chi leh chhûngkhur mamawh eng eng emaw a ni hlawm. A lâk chhuah apiang chu lo lain a dahna tùrah ka lo dah zêl a.



"I inbual dâwn em? Tuilum pawh a awm a," ka ti leh a.



"Nakinah mut dáwnah le. Nghah kan neih loh chuan chaw ei nghâl mai ka duh, vawiinah eng mah ka ei lo va," a tih chuan ka lo chek tlak a.



"Ti tawh miah suh, i taksa kha ngaihtuah hmasak phawt tùr aw, rilțâmin awm tawh miah suh, ka remti miah lo a nia," ka ti hlak hlak a.



"I inhmeh reuh lutuk!"



Chaw ei tura dawhkàn kan kîl dun chuan," Wow! Ka duh chi hlîr! A va tui dâwn êm!" tia nui chung hian min rawn en a.



"Ei țeuh rawh, i ril țàm kha. Chuan, ka suah chhuahho hi chu ei zawh vek tùr aw, chaw ei khamah eng emaw hrilh tùr che ka nei a nia," ka lo ti a.



"I thû ber alawm, mi felnu," a ti phawt a, min rawn en țha lehin," Eng lam nge ni min hrilh tùr chu?" a ti leh a.



"Ei zo vek phawt rawh," ka lo ti thung a.



"Ahhh, mi felnu chu a va phakar thiam reuh tak!" tiin a nui hawk a.



Chaw ei khama kan chaw eina min tihfelpui vek hnu pawha ka la sawi loh avàng chuan kal sawn lovin ka bulah a awm zêl a.



"Min hrilh tawh la?"



Ti tak zeta a mit taka en chung chuan," Tu mah hrilh miah lo tùrin min tiam phawt rawh," ka ti phawt a.



"Eng thil nge ni?! Thil pawi i ti em? Ni lo, a theih loh! Han sawi phawt teh, min tihlauthâwng ru deuh tlat a nia," a ti nawk nawk a.



Ka insûm hrâm hrâm a ni.



"Min tiam phawt rawh," ka ti leh rih, ka ngeiawm thiam mai mai asin.



"Min tihlauthâwng lo teh, min hrilh la?" a lo ti thung a, a ngaih chu a țhat hmel tehchiam tawh loh a ni.



Ka en leh vang vang hnuah chuan zàwi sap hian,"Ka rai!" ka ti ta sap a.



Chechàng lovin, mit pawh khap hauh lo chuan min en reng rùn reng a, a thil hriat chuan a țhâwng viau a ni mahna!



"Ka rai ka tih chu, i lâwm lo em ni?" ka tih leh chuan rang zeta min rawn pawm kâng lawpin," Tak tak maw?!!! Lalpa, ka lâwm e, ka lâwm takzet a ni, ka lâwm..." sawi zawm lo chuan ka âwmah chuan a hmai chu a phûm ta tlat a.



"Chawhma lam khân ka hre ve chiah a, surprise che ka duh vàngin phone-ah pawh ka rawn hrilh duh lo che a nih kha, i lâwm ve dâwn tih ka hre reng a," ka ti sap sap a.



A taksa khùr deuh datah chuan a țap emaw ka ti hial, a țah erawh ka ring ngam chiah si lo. Ani ang mipa hi chu an țap mai mai lo ang tih ka hre si a.



"Ka lâwm e aw, fa min pêk avàngin."



A rawn hawi chhuah hnuah chuan a mittui a tla a ni tih ka hre ta chiah, nichina a khùr deuh dat dat pawh kha a țah vàng a lo nih chiah hi.



"Ka hmangaih lutuk che," tiin min fáwp vang vang a, a mittui tlâkna avàng chuan a mit bul vêl chu a hnáwng chap thei nghe nghe a.



Kan inthlah hnu chuan duat takin a mittui pherh ve niai chu ka hrûksak a, ka mipa hmangaih ber mai chu ka rai ve tâk avàngin a lâwm lutuk a mittui hial a tla a nia.



"A hlimawm tiraw? Naute, kan pahniha fa ngei ka han pai ve ta a nia," hlim avànga nui sâng hian ka han ti a.



"Làwmawm lutuk! Chanchin ropui tak a ni, min tihhlimzia hi i hre phâk lo záwk ang," ka chal fáwp zauh chung chuan a ti a.



Mutnaah ka pum chu a chûl hoh hoh reng a, min chêtpui tum àwm pawhin a awm lo.



"Rose-i pasal neihnaah pawh i dinpui thei dâwn lo ta a nih hi," a ti sup a.



"Engati maw? Thlaleh mai a nia, ka pum a la puar dâwn hleinem," ka lo ti a.



"A rem lo ang, kawr tight i hâk a ngai ang a, pheikhawk sâng nèn, ni lo, dinpui lo mai rawh, nautein a tuar phah ang," a ti ta tlat mai!



"Tuar phah dâwn em ni? A la insiam-" ka tih lai chuan min rawn fâwp zoh a, ka țawng pawh a tawp chat bawk.



"Keimahin ka hrilh mai ang, a hre thiam ve lutuk ang che," a ti leh tlat a. Ka hnial zawm duh rih lo, a ngaih dàn ang hi zàwm rih phawt mai ang.



Ka rai lawm nân leh Pathian hnêna làwmthu sawina ni pah fâwmin inah țhenrual a neihte sâwm khâwmin ruai angreng deuh kan buatsaih a, a tlangvàl laia a kawm țhìn, zan tin deuhthawa thim hnuaia a zui țhinte pawh kha a sâwm vek. Anni pawh chuan an nunhlui chu an lo kalsan ve hlawm nual tawh a, pahnih khat erawh chuan an la thlah hlei thei bîk lo, anni zawng zu ngawlvei dik tak an ni tawh a, in lama an in tùr leina tùr pawh Rinfela chuan a pe hial a ni.



Chu mai a la ni lo, addict enkawlna hmun hrang hrangah tam lutuk lovin pawisa a pe bawk. Nia, a țhian kawm ţhinte kha addict leh mite thinhrik kha an ni hlawm nual mai si a, a rilruah a thar leh țhin ve bawk a ni ang, țha chhuak tùrin a duhsak ve hlawm êm asin.



*******



Rose-i chu ka dinpui ta tho. A remti lo viau nain Rose-i chuan doctor a biaktîr thlap a, doctor-in ka naupai tân a hlauhawm loh thu a hrilh hnuah pawh pheikhawk sâng chu a la phal thei chuang lo, ka tlûk palh a hlau tlat, tlêm tê chauha sâng hlek tak tak ka bun ta ringawt a ni.



Thlamuana pawh a rawn inla nalh khawp mai. Rose-i chuan hmel hriat a ngah bawk a, inneih inkhâwmah pawh an tam khawp mai, a zahthlâk ve lek lek.



An inneih dàn hi ka duhpui dàn leh rilrem zâwng chu a ni hauh lo, chesual dùnin fa hial a pai tawh a nih kha; mahse, an inpuang chuang bawk si lo a, khalai kâra lo inrawlh kha chu ka duh bîk chuang lo. Pathian chu a zahawm ka ti thlâwt, phuba rawn la lovin ngaidam lul teh se.



Rinfela'n min vil reng, ka tlu palh ang tih a hlau a niang, ka hlatah a awm lo hrim hrim bawk. Ka bodyguard rinawm lutuk a ni mai.



Ka rai a lan chian hnuah phei chuan min duat hlum lo chauh a ni, ina a awm ve phei chuan chêt a phal miah lo a, ka ei duh zâwng leh ka ei châk apiang a lei zêl bawk. Damdawi ni se a țha țha a lei a, 'Naute hrisêl tak nei tùr chuan a nu a hrisêl a ngai' a ti tlat a, a ti dik bawk si nèn, ka ei țûn țûn a ni ber.



Ka pum puar nghèng chuan a beng a dawh a, a chângin a fâwp a, a be bawk a, nuih a tiza țhìnin a tihlimawm phian bawk a, tu dang kan ngai lêm lo. Ka nu pawhin min rawn tlawh ve fo, ka zin chhuah a phal meuh si lo a, ka nuin a tawrh phah ta deuh a ni. Motor ka chuan remti lo miau hek le, min ngaihtuah vàng a ni tih hriain ka hnial duh bîk lo a ni.



"Fa pawh kan nei ve țêp tawh sia, tunah hian nangmah hringtunu kha hmu leh thut ta ang la, i la haw reng ang em?" tiin ka zâwt zauh zauh.



Ani lah chuan ka zawh apiangin," Kan fa lo piang tùr hriatah thil țha lo ka sawi duh lo, a lo ngaithla ve reng dâwn asin," a ti ziah.



"A hmelțha dâwn si a, lo chhuak thuai thuai se ka ti ngawt mai. Ka duat nasa dâwn bawk si," tiin ka pum chu a chûl a.



"Naute, Bawihte, lo chhuak thuai rawh aw, âpa leh ânu hian kan nghâkhlel tawh teh che a nia, i pa hian ka duat dâwn lutuk che, țha deuhin ânu tina vak lovin lo pian i tum dâwn nia," tiin ka pum chhûnga naute chu a be zui ziah bawk. Thlaleh lehpekah ka nei dâwn a, a puan tùr leh a mamawh tùrah pawh kan inbuatsaih țha viau tawh a ni.



Aizawl lamah dàwr chungchâng leh in luah tùr chungchângah thil sawi fel tùr a awm avàngin a remti vak lo chung chuan kan inphur phei a, motor pawh a khalh chak lo khawp mai, min dìm leh lutuk chuan ka nuih a tiza zâwk.



Kan in hnuai luahtute an chhuah avàngin luah tùr duh mi dangin min rawn be dâwn a, chhuah a remchàn loh avangin ani pawh chu ka bulah a țhu ve reng a, ka ke vûng deuh ûl chu min hmehsak nauh nauh a. Motor ka chuan vàng a ni pakhat a, ka chuan loh kha chuan a vûng mang lo.



Kawngkhàr a rawn ri karh karh a. Min rawn betu tùrte an ni ngei tawh ang chu.



"Lo lût rawh u," tiin ka lo chhàwn vat a.



Nutling ve tawh tak, hmelchhe lo deuh leh a fapa ni ngei tùr hi an rawn lût a, an hmêl en pawhin hna an thawk nasa ang tih a hriat thiam theih ruak mai.



"Lo țhu r'u, in luah tùr chungchâng vànga rawn kal tùr kha in ni ang chu tiraw?" tiin ka lo be sawk sawk a.



Țhutnaa țhu ta mai lo chuan Chu nu chuan Rinfela chu a en tlawk tlawk a, Rinfela lahin chuti tho. Che map lo leh mitkhap lêk lovin a nia a en ni.



"Duhtak..." zàwi deuh tak hian ka ti sà sá a.



"Ka nu...!" a ti chhuak sup a.






*KAN CHUNG THLA KHI A LIAN TELH TELH A NIH LOH CHUAN A TÊ TELH TELH THIN. HMANGAIHNA NÈN HIAN A INANG DEUH REUH A, HMANGAIHNA PAWH HI A PUNG DEUH DEUH A NIH LOH CHUAN A ZUIH TELH TELH A, A ZUIH RAL MAI ȚHIN*




(A tàwp ta e🥰 24/7 chhiara min lo hlutsaktute, in chungah ka làwm takzet zet e😘 Comments-tute zawng zawng, ka hmangaih tláwrh tláwrh che u❤ in fel lutuk.

LO DAM ULA, LO INENKAWL ȚHA ULA, Story thar nèn inhmuh leh vat kan tum dáwn u nia, LOVE YOU ALL😘)


*** KAN WEBSITE A FAKNA LAM THIL MILEM LANG THIN I LO HMET ZEUH HIAN KAN WRITER TE HLAWH KAN TUMSAK ZEL TIH KAN HRE THEUH DAWN NIA, KAN LAWM E***

Website story link ho awlsam zawka in zawn hmuh zung zung theih nan STORY FB group siam a ni a. Whatsapp group pawh siam a ni e. Complete tawh ho zawng zawng leh story kallai kan dah vek avangin avangin in lo join theuh dawn nia..
Group link : https://www.facebook.com/groups/991354610918230/




💜
ADS HI A CHUNG LEH A HNUAIAH DAH VE VE A NI A
A chung leh a hnuai a mi hi vawi khat ve ve click tur a ni e, in lo hre dawn nia 👇👇

Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)