☆24/7☆ By Dingdi Pachuau (Completed)

[Ngaia]

☆24/7☆ - 19 By Dingdi Pachuau




Ka hman hmasak berah phone man to tak ni lêm lo ka lei a, sim card nèn, pawisa a nei tho ang tih chu ka ring a; mahse, a lei hun ka nghah chuan a la rei dâwn lutuk, a chhan chu phone neih kha țûl a ti lo miau mai si a. Thilthlàwnpêk ang pawhin pe mah ila a lo pawm duh lo tlur ang tih chu ka hlau angreng.



Kan inhmuh hmasak berah chuan a pa ei tùr ka leisakte nèn polythene dumin ka pe a, a chhûng en pawh tum lêm lo mah se, "En miah suh aw, In i thlen hunah chauh en ang che, chuti lo chu i ei zo vek palh ang," ka ti tlat a.



"Ka vir hmel viau mi?"



"Aih...mahse, en chuang suh," ka tih leh chuan a nui suk a.



"Inah pawh ka pa hrilh lovin ka ei zo vek thei tho alawm le," a tih chuan," Chutin ti miah suh aw, ka lo lèn hun hunah i pa ka zâwt leh mai dâwn alawm," ti fuh inti tak chuan ka ti a.



"Ka en lo ang, inah pawh ka en lo ang," a tih chuan," Inah i pa nèn en ka phal alawm," ka ti a.



"Ka pa i ngaizâwng."



Ka nuih a za lutuk. A hnunglam ațanga kuah pah hian," A fapa zâwk hi le," ka ti a, ka nui kar kar a.



A number ka hriat sa vek avàngin in a thlen àwm vêlah ka call ta a, mak chu a ti ve viauin ka ring a ni.



A rawn 'Hello' chuan," I birthday ka lo hre lo va, min hre thiam dâwn n. Chuan, thinrim suh aw, i lei hun ka nghah dâwn chuan ka nghâk rei dâwn si che a, inbiak theih thuai ka duh si a," ka ti zung zung a.



"Țûl ka ti ber lo asin," a rawn ti. Nia, a rilru dik tak a ni a, ka hre tawh a ni; mahse, ka nghâk thei lo. Inbe zung zung thei lova awm hi hrehawm ka ti a ni, kan inhmu zut thei bawk si lo. Bâkah, inhmuh chhunah pawh thlâ a muang lo, miin min hre chhuak ang tih hlau rêng rêngin kan awm a, a hrehawm.



"Biak fo che ka duh alawm, i duh ve lo em ni?" ka ti a.



"A to em? A man zât min hrilh teh," a tih chuan," Birthday present a nih kha, chuan, a man sawi kher a ngai lo, hmang ve mai rawh," ka ti leh a.



"Hei kher hi chu-"



"A nih, ka hman lai hi i duh zâwk em ni? Inthleng i duh em? I duh zãwk chuan kan inhmuh hunah kan i thleng dâwn nia aw," ka ti leh zung zung a.



A ngawi ta vang vang mai.



A rúk tak chuan nuam lo ka ti, a thin a rim a ni ngei ang, a thin a rim kha chu ka ring sa tho; mahse, biak ka duh țhìn tho si a, tunah thinrim mah se nakinah a reh leh mai ang chu maw.



Ka beisei.



"I thin a rim a ni tiraw? Thinrim suh aw ka tih ve reng kha," hlauthâwng ru angreng deuh chuan ka ti dêk dêk a.



A rawn thaw hawk ringawt.



"Khawngaihin, i thin a rim chuan nuam ka ti miah lo a nia. Birthday present liau liau a nih kha, khatiangah an thinrim ngai lo," ka ti leh a.



"Ka thin i tirim lo."



Tlêmin ka rilru a nuam deuh a; mahse, nuam lo chu ka la ti tho.



"Pawisa i nei lo ang ka tihna a ni lo a nia aw, i lei hun ka nghah chuan ka nghâk rei dâwn êm a, biak zung zung theih che ka duh tawh vàng a nia," a hriat thiam beisei tak chuan ka ti leh a.



"A țha alawm," a ti ve ta a.



Hun a kal a, hman chu a hmang ve ngei a; mahse, a hmang khât a ni. A hna thawhnaah a keng ngai lo bawk a niang, chhùn lamah hi chuan ka message chhàn lêt a ni ngai lo, inhmuh duh ve pawh ni ila, a ngaihna a awm lo; mahse, zàn lamah kan in-text thei tal a, a zia ka ti tawh tho tho e.



School bàna in chhûng ka tihfel hnuah chuan zai rât rât pahin ka inbual a, ka hlim a, zàn hun lo thleng tùr hi ka nghâkhlel thei viau a ni.



Ka inbual zo ka chhuah chuan Rose-i a lo haw ve tawh niin, min lo en hâ pah hian," Riff-a tih khân a rawn call che a..." a lo tih chuan ka lo meng hrâ mai! An lo inbe hman em? Ka thin a phu rang zaih zaih kher mai!



"Mahse, ka chhâng hman lo chiah chiah a, a rawn tinawn leh ta bawk si lo va," a tih chuan ka thaw ta huai huai!



"A pawimawh vak lo a nih dâwn chu!" ka lo ti satliah; mahse, a rûka ka hlauhthàwnzia kha a hre hman tho chuan ka ring.



"Tu nge ni a? Hming a nei mak si," a tih chuan nui chung hian,"School lama kan thawhpui a nia," ka ti ta ringawt.



Dâwt sawi ka va awlsam tak!



Engtiziaa min rawn call ve teh tlat nge maw a nih le? A hnên ațanga phone call ka vawi khat dawnna a ni. A pawimawh viau em ni ang?



In chungah thawmhnaw pho pahin ka call a; mahse, min chhâng leh thei tawh miah lo. Min lo call hun chu ka en a, vawi hnih lai mai a lo ni nghe nghe, minute 15 vêl chauh a la liam a, a rei loh nèn, eng nge maw a lo tih hman ni?



A pawimawh viau chuan min rawn call leh mai ang chu maw; mahse, text message ka hnutchhiah tho. Pawimawh viau lo pawh a ni ve thei tho, bâkah, a lo hmet sual palh pawh a ni ve thei tho bawk.



Mahse, vawi hnih lai a ni si a.



Zànah Thlamuana a lo lêng a, phone call chu ka châng ru deuh reng tho. Min rawn biak loh pawhin nakinah mut dâwnah ka message kha min rawn chhâng mai ang chu a.



"Thlamuana hi ti ve mai teh, ani pawh hian a huat loh tawp che hi, ka bulah a sawi deuh reng tawh che a nia," mutnaah chuan Rose-i chuan a ti a.



"Ka phú lo êm mai, bâkah, min duh tak tak teuh lo mai! A ti ve mai mai a nih hi," ka lo ti a.



"Bialpa i neih chuan loh hi," a tih chuan," Ka nei alawm," ka lo ti mai a.



"I nei lo tih ka hria alawm, Thlamuana chu duh ve mai rawh," a ti leh a.



"Ka nei alawm, a rûkin a nia," nui deuh chung hian ka ti a.



"Daw lo mai teh, Thlamuana hi chu a țha asin, in inhmeh dâwn si, a châwm zo dâwn bawk si che a, hna i thawh ve pawh a ngai tawh dâwn lo asin, ani nei hi chu mi vànnei tak an ni mai, mi vànnei chu ni tùrin ka duh che a ni," a ti leh sauh sauh a.



"Ni zâwk mai rawh, ka kian ang che," ka ti lêt a.



Mi ang pângngai chin, ni leh lo, mi ang pângngai lutuk lo chin pawhin Rinfela ai chuan Thlamuana hi thlannahawm an ti vek ang; mahse, ka ti ve lo, Rinfela hi ka duh fê zâwk, mi â ka ni a nih ka ring, hemi kawngah kher hi chuan.



Ka text chu min la rawn chhâng chuang lo, engtizia nge ni? Zan dang anga min chhàn hun a ni tawh asin. A la lêng reng em ni zâwk le? Ninawm, a țhiante mai mai hi, an țhu khâwm leh mai mai tho àwm si a.



Ka huaisenna sâwm khâwmin ka text țha leh a, hmm, a hmu e.



Min rawn chhâng lêt chuang lo.



He pa hi a thin a rim em ni le? Min rawn call lai khân ka lo chhâng si lo va, kha vàng kha em ni ang? Hrehawm ka va ti tak! Ka message lah hmu rengin min chhâng si lo. Han call êm chu, zàn a rei ve deuh tawh si.



Ka duh lutuk hi min hnê ta a niang.



Rilru nuam lo zetin ka mu a, ngaihtuah loh tùr tùr ka ngaihtuah kual leh ta, muthilh a va har tak! Mahse, a thil min hrilh ang khân ka ti leh a, ka muhìl ve leh thei ta mai.



Phûr vak lovin school kal tùrin ka insiam a, Rose-i chuan," I tho fuh meuh nange?" tiin min fiam zauh nghe nghe a, ka chhâng tuitam lêm lo.



Vawi khat ka phone leh ang, message min chhàn loh tal pawhin phone call hi chu a chhâng duh maithei asin.



School gate bula dingin a number chu ka hmet chhuak a.



A ring ral țêp tihah chuan min rawn chhâng ta hrâm e.



"Min ngaidam rawh,"ka ti phawt a, chutah," Eng thil nge ni ta? I țha em? Thil thleng a awm em ni?" ka ti leh ta a.



"I school em?"



"Aw, hei gate ka thleng tawh a, eng nge ni ta?" ka ti leh a.



"Ka rawn call châk-" a sawi zawh hman hma chuan a uak țhat ri chu ka hre zawm nghâl a, ka meng phâwk chiang khawp mai!



He pa hi zîng țhang țhangah a rui em ni? A luak chiang alawm, engtizia nge?



Rilru na ru zet chuan ka ding reng a, nizàn pawh khân a ruih vàng a ni ngei ang min chhàn theih loh kha.



"Thil ei sual ka nei a nih ka ring," a rawn ti ta sup.



Chutah chiah chuan ka rilrua ka lo suangtuah thil chu paih bo vatin hlauthâwng ru zet hian," Eng nge i ei a?" ka lo ti vat a.



"Nimin hna thawhnaa an ei tùr siam kha a nih ka ring," tiin a uak leh țhat țhat chu ka hre chhunzawm leh nghâl vat a, kan inbiak lai reng pawhin a thup zi lo chu a ni si a, a luak nasa tawh àwm mang e!



Inher thutin," Inah i awm tiraw?" ka ti a, hmanhmawh zet chuan ka pên pâwk pâwk a.



Damdawi dàwr ka hmuh hmasak berah lûtin a ei tùr damdawi ka lei a, hmanhmawh zetin an in lam pan chuan ka kal leh dàwr dáwr. Step-ah pawh chuan ka zuang dâwrh dâwrh lo chauh a ni.



An in bul ka thleng har lo, thil ka ngaihtuah chhuak leh thut a, school-a thawhpuite ka phone ta vat a, pumna ka chhuanlam leh ta ringawt.



Dâwt ka sawi leh ta; mahse, hun tawnin zir lo miau hek le.



In chu a lo inkhâr țhiap a, kik pawh kik duh lo chuan ka hawng tawp ringawt. Kik mah ila, a pa khân a hre àwm chuang si lo va, ka peih vêl lo.



A pa chu țhutthlêngseiah a lo ţhu a, min hmuh chuan mak a tih ve hmel viau a ni, eng mah phei chu a lo sawi chuang lo, damdawi ni àwm tak hi a lo inchhawp nual a. Kei pawh chuan be ta'ng e ti lo chuan ka hawi kual a, a bulah Rinfela ka hmuh miau loh avàngin room lamah a awm a nih ringin ka lût tlang leh nghâl pawp mai.



Khumah chuan a lo țhu-mu deuh a, plastic chawhtawlhah tui a lo inchhawp ve ràn mai, a luak dawhna tùr a nih chiah hi.



A mitmengah chuan mak tihna leh làwmna inpawlh nawk chu ka hmu thiam ve mai a; mahse, a rawn țawng chhuak chu a dang daih thung.



"Eng nge i rawn tih?"



A aw chhuak chu a thâm lek lek mai. A chau tawh khawp a nih chiah hi, khawngaih zet chuan a bulah chuan ka țhu thla a.



"Damdawi ka rawn lei a, ei nghâl rawh aw," tiin ka phawrh nghâl vat a.



"Engati nge i rawn kal a?"



A chala thlanfîm bawl țek țek chu en pah hian," A țha a nia, kha, tui nèn hian ei rawh," tiin tui bottle, a khum kianga a chhawp chu hawngin ka pe nghâl a.



Ani pawh chuan a lo ban ve mai, ka làwmzia chu a.



A ei zawh chuan bottle chu ka lâksak leh vat a, țhut a tum chu khumah chuan ka nem mu ta nghâl bawk a.



"Țhut a ngai lo, mu rawh."



A mitmeng lang val deuh kulh leh dul raih mai ațang chuan a tuar nâ a nih ka ring a, ka khawngaih kher mai. Chauh pawh a chau tawh ngawt ang, a lang reng alawm.



"I lo kal-"



"Shhh...." tiin a hmui chu ka hupsak vat a, hnai zetah chuan kan inmelh ta ràn mai.



"Țawng tawh suh, mu vang vang la, i damdawi ei khân a rawn thawk thuai mai ang," ka ti sap a.



Ka thu a âwih ve tlat. Țawng a tum ta miah lo, a meng khup deuh lap maiin ka hria, ka khawngaih roh mang e!



Chutih lai chuan a pa chu a rawn lût a, kan bulah chuan rawn kalin,"Kan nei tawh lo a nih dâwn kha, ka hmu tawh miah lo," a rawn ti bul bul a.



"Eng nge ni a?" ka lo ti vat a.



"Damdawi maw le, ei sual damdawi a nia."



"Ka pu, a ngai tawh rih lo e, hei, a ei zo chiah a, a rawn zia thuai tawh mai ang," ka lo ti sawk sawk a.



"Damdawi chu i hmu maw?" a rawn tih chuan ka lu chu bu nghatin Rinfela damdawi ka pêk zawh chiah ang chu ka kâwk a.



"A țhat hlauh chu, nimin a rawn haw ațangin eng mah a ei thei tawh lo va, ka buai rilru khawp asin," a ti leh chuar chuar a.



"A țha thuai dâwn alawm," ka lo ti vat a. Nia, a țha thuai ngei ang, hetia a awm reng hi ka phal teuh lo mai.



A pa chhuah hnuah chuan a bulah țhu hnai sauh sauhin, a chala thlan bawl țiam țiam chu duat takin ka hrûksak a, ani pawh chuan eng mah sawi lovin a mitmeng dul raih chuan min lo en kual ve mai mai a.



"I zia thuai dâwn a nia, tuar hrâm hrâm rawh aw," ka ti sap sap a.



"Engati nge-"



"Shhh..." țawng tùrin ka duh rih lo, a dam har phah palh ang, kei pawh ka țawng tawh lo ang.



A kut chu chelhsakin a bulah chuan ka țhu ta reng a, kan țawng lo va, a chânga a pa khuh leh zauh zauh chu thâwm awmchhun a ni mai.



"Lo mu ve la?"



Ka châk viau rualin a pa ka zah, bâkah, ani dam țha lo bula ka mut chu a pum ka tawk palh ang a, a nat belhchhah palh ang.



Nuih sak pahin," I pum chu a la na viau em?" ka ti ta zâwk a.



"A reh țan."



A làwmawm lutuk. Reh thuai thuai teh se, nimin tlai ațangin eng mah a ei tawh lo va, ei tùr ngaihtuahsak a ngai ngei ang, pumna luak pah bawk chu a hrehawm dâwn lutuk si a.



"A reh fel hunah ei tùr ka siam dâwn che nia," ka ti a.



Kan ngawih vang vang hnuah chuan," Engati nge i tuar tlawk tlawk ringawt a?" ka ti chhuak ta phawng a.



"Ka tuar chhuak ziah alawm."



"Chutiangin ti ringawt tawh suh," ka ti a, damdawi in lama kal chu ka sawi chhuak duh ta lo, tuin nge kalpui ang? A lo tuar tlawk tlawk ţhin tih a hriat reng mai si a. Chutiang ka ngaihtuah phei chuan ka khawngaih takzet, ka lung a tichhia.



"I hlauthâwng mai mai a nih kha. Ka țha chhuak ziah alawm. A zia lo ngawt mai, School lah chu i chawlh phah ringawt mai si a," a ti duah a.



"I damna a pawimawh ber," tiin a chal leh a nghâwnga thlan chu ka hrûksak leh a.



Ka kut a lo man ta chat mai.



"Angel dik tak chu i ni."



Duh aiin kan țawng tam leh ta.



"Ka ngawi tawh ang, nang pawh aw, i dam thuai thuai hi a pawimawh," tiin ka țhutnaah chuan ka țhu thla leh a. Ka kut erawh a thlah chuang lo, kei pawhin tàl chhuah ka tum chuang lo.



A luak tawh lo va, a pum nâ pawh a zia ta zêl a niang, khumah chuan a rawn țhu chhuak a.



"Mu rih rawh, a dam chian bal thlengin," tiin nem mut ka tum a.



"A dam tawh," a lo ti a.



"Chu pawh ni se, țhut ai chuan mut kha a la țha zâwk tho tho," ka ti leh a.



Ka rin loh deuh chuan a mu ve leh mai a, thu âwih taka a mu chu nuih sak pah hian," Ka thu han âwih lo na lang chuan e, ka hawsan daih ang che," ka ti a.



"Ka phal hleinem."



Ka rawmawl chu tui chuan ka leih huh a, sâwr lehin a hmai chu duat tak hian ka hrûksak a.



"Ka bulah awm reng thei la ka ti," a rawn tih chuan a mitah tak chuan enin," I duh tak tak maw?" ka lo ti a.



"Ka têt lai ațang tawha chhiarin ka damlo min enkawltu ka neih awm chhun i ni."



Ka thil tih lai chàwl meuh chuan ka en ta reng mai!



"Enkawltu ka nei ngai lo, ka pa hmuhah phei chuan ka damloh pawhin damlo angin ka awm ngai lo, a chhan chu a rilru ka tihah mai mai dâwn tih ka hria a ni, ka tuar a, ka tuar chhuak ve mai zêl bawk. Tuna i kut dam takin duat taka min hrûk te kha ka tân chuan vàna rah ang a ni țhìn," a ti leh charh charh a.



"Nuam i ti em? Ka hru leh ang che aw," ka tih chuan,"I hah palh ang," a lo ti daih a.



Nilêngin ka awmpui a, a dam chian hnuah chuan ei tùr ka siam a, kan pathuma ei tùrin. A pa kha chuan damdawi chu a lo pe ve ngei mai a; mahse, chu chuan a lo chhâwk thei lo a lo ni, damdawi ka pêk kha a ngeih êm kher a, a làwmawm tak tak a ni.



Tlaia ka haw, thui pawh ka la kal hma chuan scooty hi a rawn tlân chho a, kawng ka lo kian mai a; mahse, a rawn ding ta tlat mai.



"Eng nge helai laiah hian i tih a?!!"



Rose-i a ni tlat mai!



Ka chhâng thei lawk lo, chhuanlam siam tùr ka ngaihtuah kual nasa.



"Ka school bâng ka lêng kual mai mai," ka ti ta ringawt a.



"Dâwt i sawi chiang!"



He nu hi chu aw...!!!



"Lo țhu rawh, haw ang."



Kawngah chuan kan țawng lo, in kan thlen hnuah erawh Rose-i chuan chîk zet hian min en reng a, ka inthlâk zo room ațanga ka chhuak tùr chu ka bânah chuan pawtin," Min hrilh țha ve mai la?" a ti leh a.



"Ka lêng kual ka tih chu."



Ka en duh tlat lo va, dâwt ka sawi tih a hre kher lo maithei.



"Khawiah?" a ti leh a.



"Țhiante inah," ka tih chuan," Țhian i nei lo. Rinfelate inah i kal em ni?" a rawn ti ta chiah mai!



"Aih..." ka chhâng rang mah mah, a âwihawm lo zo vek ang chu.



"Nang hi, eng thil nge thleng a?" a rawn tih leh chuan," A damlo a, ka kan a nih kha," ka ti ta nge nge.



Zêp reng hi ka ning, min zâwt chîk peih si, tikhân Thlamuana pawh min dem peih tawh lo ang a, a țha zâwk!



"In ni...!! Rinfela nèn maw?!!!"



A aw ațang chuan mak a tihzia a hriat theih mai.



"Aw, nangman min dem min dem a nih kha," ka ti sap a.



"Lalpa leh!! Engtin nge...a va mak tak!! Tuin nge...a, thil mak tak chu a ni!!" a ti leh ringawt a.



"Khatin țawng vak vak suh," tiin ka lo khap a.



"Riff-a kha amah a lo ni maw? In nihna a rei tawh em? I va inzêp thei tak! A zei viau lo maw?"



Chutiang lam bawk maw?





*KAWR PHELH ZÁWNGA I MIPA HNEH I TUM A NIH NGAI CHUAN I TLÂWM ȚAN RENG TAWH TIHNA, HNEHTU I NI NGAI LO ANG*

Ads i la click ve lo a ni maw? A hnuaia ads milem khu lo click ve rawh le
Ads i la click ve lo a ni maw? A hnuaia ads milem khu lo click ve rawh le
Ads i la click ve lo a ni maw? A hnuaia ads milem khu lo click ve rawh le

[Ngaia]

☆24/7☆ - 20 By Dingdi Pachuau




"Hmeichhe bulah a awm ngai si lo va, a zei pawh ka ring tehchiam lo ve a!" a ti leh a.



"A ho e, zei kher a ngai hleinem, bâkah zei deuh chu an hlauhawm duh," ka lo ti thung a.



"A zei vak lo tihna a ni maw? Rinawmlova vàng khân i tuar na si a, ani i han duh leh thuai theih mai dànah hian zei tak a nih ka'n ring deuh ngawt maw le," a ti leh a.



"Ka lêrh i ti tihna a ni maw?" ka tih chuan," Ti lo ve, i lêrh lohzia chu ka hre reng alawm, a țha; mahse, ka nuin a hre hlauh ang e, fîmkhur hlê rawh," a ti a.



"A nih, min duhpui lo hran lo tihna a ni thei em?" ka ti leh hrâm a.



"I duh phawt te chuan, keiin lo sawi ve tùr ka nei hleinem, a dinhmun ka en hniamin ka hmusit lo va; mahse, a awm dàn leh nungphung erawh hrilh i ngai tawh lo mai ni lovin i hre vek tawh ang, kei ai pawhin i hre chiang tawh hial zâwk ang chu. Mi dang ngaih dàn tùr erawh i ngaihtuah phâk ka ring tho a, chuvàng erawh chuan țhen tùrin ka ti lo che, hruai pawh i hruai țha thei hial maithei asin," a lo ti duah a.



Mi dang tân chuan mi suala ngaih a ni, jail tâng zauh zauh chu mi fel taka ngaih a ni thei lo hrim hrim tih chu ka hre ve bawk e; mahse, hei hi kei chuan ka hmuh kân daih tawh, mi suala an ngaih hi ka bialpa a ni tawh. Ka bialpa a nih hma khân a țhat riauna ka hmu chhuak tawh tlat si a, chu chu amah ka duhna chhan pawh hi a ni rêng a ni. Mi hmuhah chuan mi fel chu a ni lo ngêi rêng alawm; mahse, kei chuan țanpui, hmangaih leh duat ngawih ngawih ngai niin ka hre ve tlat thung. A chanchin hi ka la hre tam lutuk lo; mahse, kalsan thei lo tùr tâwk chuan ka hre tawh ka ti.



Damdawi kha a țha viau a ni, a dam hlen ta hmak tih min rawn hrilh chuan ka lâwm kher mai. Ei leh ina fîmkhur zual tùr khân ka hrilh ve ngial kha a ni a, a tân chuan a har viau ang tih chu ka hre reng, a hna thawhnate'n an hlui ang apiang kha a ei mai a ngai bawk si a, fîmkhur reng sèn a ni kher lo ang.



Zan khat chu Thlamuana rawn lèn laiin ka nuin min rawn bia a, zàn lama kan inbiak ngai lêm loh avàng chuan mak ka tiru deuh viau mai. Vawiin chawhma lam khân kan inbia a, an dam țhat leh țhat lohte pawh ka zawh luam nghe nghe kha. Tûn kâr tàwpah hian haw chhoh ve lawk ka duh thu ka hrilh a, ka pa phei chu a lo lãwm nasa a nih kha. Ka haw chho khât ve deuh tawh a, min ngai ve leh tawh a ni chiang mai.



Room-ah chuan lûtin," Aw, nu, eng nge ni ta?" ka ti nghâl a.



"E, naktûkah Aizawl lamah phei kan tum thut sia, kan awm dàn azirin i rawn haw chhoh hunah pawh hian kan rawn haw hman lo ang tih ka hlau deuh a," a ti a.



"Engati nge a? Eng nge ni tih in va tum deuh thut a?" ka tih chuan," A, i ute nupa Aizawla an awm lai a nih bâkah i pa hi va entîr pah kan duh deuh a," a ti mai a.



"Ka pa chu engtin nge a awm a?" ka tih leh chuan," Engtin awm lo ve, a pum lam hi a sawisêl ve deuh hlek a, hmunpui lam deuh nge nge chu kan han ti deuh a nia, lo ngaihtuah miah suh," a rawn ti dam leh diam a.



Ka pa nèn pawh chuan kan inbia a, a pum chu a sawisêl ve deuh mai mai a niang, a awka chhuak pawh a la pângngai reng, a la ring fiah țha khawp mai.



"Tluang deuhin in va kal ang a, doctor țha ber berah va inentîr la, in lo haw leh thuai dâwn nia, lo haw chhoh ve ka tum tehlul nèn!" ka ti a.



"Nia, i ute awm lai a lo ni ve bawk sia, a remchâng êm mai a kan ti maw le, min lo ngaihtuah lutuk ang e, ka țha reng a nia," ka pa chuan a ti a.



Kan inbiak zawh hnua ka va phei chuan Thlamuana chuan," A pawimawh àwm hle mai maw," tiin nui chung hian min lo fiam a, kei pawh chuan," Chhûngte tluka pawimawh a awm hleinem," nui chung vêk hian ka lo ti a.



"Pawimawh hi an tam thei a nia, chhûngte tluk zeta pawimawhte..." Rose-i pawh chuan a lo ti ve a, ani hi chuan Rinfela a nih a ring ngei ang chu, a ni dèr mai si lo.



Chutia ka chhûngte Aizawl an kal dâwn si chuan haw chhohna chhan tùr ka nei ta lo, Rinfela ka hmu zing leh thei deuh dâwn tihna.



*******



Amah hmuh tumin chhuanlam ka siam a, dàwr têa kal tùr ang chuan ka chhuak leh a; mahse, Rose-i'n," Ka lo kal ve lawk teh ang," a rawn ti ta tlat mai!



Hnial chi ni ringawt hek lo, kan pahnih chuan kan kal dùn a, eng eng emaw kan lei hnu chuan awm reng theih ni hek lo, kan haw leh ta a.



Ka chhuah chhan hrilh ka hreh deuh si, a rûka inhmu tùr liau liau kan ni ve bawk si a, ka rilru a tihah. Ina kan luh hnuah chhuah lehna hun a awm tawh dâwn si lo. Rinfela innghah thlawntîr tawp lah chu thih hrehin ka hreh bur bawk si.



"Rose, inhmuh kan tum a," ka ti chhuak ta sap a.



"Eng...Khawiah maw?!" a rawn ti hâ a.



"Țhenawmte veranda-ah,"nuam ti vak lo chuan ka ti phawt a, chutah," Kan chhuak dùn sia, i haw hmà bîk chuan-" ka tih lai chuan min lo țawng khalh vat a.



"Lungngai suh, pènna tùr ka hre mai ang, haw i duh hunah min lo call mai dâwn nia," tiin rem a ruat nghâl zat a, ka rin loh lam daih a nia, ka huphurh tehlul nèn, ka làwmzia mai chuh!



"Ka lãwm e aw," ka tih chuan," Ho mai mai, inah a rawn lêng ngam dâwn lo tih ka hria alawm; mahse, invêng fîmkhur la aw," tiin a nui hak a, a pènna tùr lamah chuan a pêng ta nghâl a.



Ka thaw huai mai. Ka dinhmun min hriat thiamsak avàng chuan ka lâwm hle a ni.



Fîmkhur taka kalin kan inhmuhna tùr hmun ka thlen chuan a lo awm reng tawh a, thil awm dàn chu ka hrilh ve zawk zawk a.



"Ka hmu reng che u."



"A ni maw?! In ațanga kan chhuah lai khân hetah hian i lo awm reng tawh maw?!" ka ti a.



"Aw."



"I va rang ve!"



"Ka phûr lutuk pawh a ni mahna!" a lo ti duh chauh a.



"A, kei pawh ka phûr ve tho aw. Tlai lamah kan inhmu thei tawh si lo va, zanin pawh hi ka nghakhlel viau asin," ka lo ti ve a.



Kan ngawi deuh vang vang a, chutah," Rawn lêng țhìn kha a va rawn lêng ngawrh ve a?" a rawn ti chhuak sup a.



"Tu...Thlamuana maw?"



"A hming chu ka hre ve hauh lo mai," a ti sup a.



"Rose-ite thawhpui a nia, a lo lêng ve mai mai a nih kha." Rose-i'n min sawipui deuh tih kha chu ka hrilh tel duh teuh lo mai, ka ngaizâwng lêt chuang lo va, hrilh kher a țùlna ka hre lo.



"Ani chuan bialpa a nei reng a ni lo'm ni?"



Engtin nge a lo hriat theih ni? Rose-i leh Bsa hi an inzui tam vak si lo va, a lo hre ve tlat mai chu mak ka ti ru viau mai.



"Nei e, a duh teuh lo mai," ka lo ti a.



""Chuan...?"



Rinfela chu ka en vat a, ani pawh chuan min lo en ngar reng a.



"Min beiseiin a lo lêng lo ang, i ngaih tițha lo duh suh, kei pawhin bialpa ka nei tawh reng che alawm," ka ti a.



Hnai zetah min rawn en a, thu dik ka sawi leh sawi loh hriat a tum a ni ngei ang.



Ka mit pahnihah chuan min en tawn chhên phawt a, chutah," Ka ring che," a ti ta sup a.



"Nang ka nei tawh che a, mi dang ka mamawh hleinem," ka lo ti vat a.



Ka rilru tak tak a ni ka sawi ni. Ani lo mipa dang ka mamawh lo, ani hi ka duh ber chu a ni.



"Ka ring tlat che hi mak ka inti asin, hmeichhe danglam tak chu i ni ngei mai," a tih chuan ka hlim rilru vang vang chiang asin.



"Ka lâwm e, min duh ve hi kei pawhin mak ka ti," ka ti ve a.



"Hmeichhe duhawm tàwp i ni alawm."



Zanina a thil sawiin min tihhlimzia hi, min fak der mai mai a nih chu ka ring bîk lo, min tih der mai mai ka ring phal lo bawk.



"Ka lâwm leh e aw," tiin dingdihlîp meuh chuan làwmthu sawi nân a hmuiah chuan ka han fawhsak zauh a. Ka zak chu ka sen ap ap ang, a lum ka ti up up mai.



Kan awm dùn rei thei si lo, Rose-i lakah inthlahrun a ná, kan ințhen dâwn chuan kan inkuah vang vang a.



"Kha pa kha a lo lèn leh hunah a bul hnaiah țhu miah suh aw, a lam hawi zâwng pawhin nui lo la. Nang chu ka tâ, ka bialnu i nih tawh kha."



Ka nui hak a, a thîkzia a tihlan ve dàn chu ka làwm a, min han hauh ve hlar mai chuan min tihlim riau bawk.



"I thu vek alawm."



*******



Ka pate chu an va rei fahran lo va, ni tin chanchin ka va zâwt ziah. A pumpui hnûn a lo lâwng nasa niin, damdawi pawh a rawn hawn nual hmel. A natna dik tak an va hre thei chu ka lâwm viau mai, damdawiin a tidam thei a, regular taka a ei chuan a dam leh thuai mai dâwn asin.



An rawn haw phei hnuah chuan kâr tàwpah ka han chho ve ta a, ka pa chu a lo chêr ve deuhin ka hria, ka khawngaih roh, min lo ngai nasa mai bawk si a.



"Ka fanu hi ka lo ngai ber mai a lo nih hi, tunah chuan pumna pawh ka nei tawh lo, amah ka hmuh chiah khân ka dam nghâl vek," a lo ti a.



"Pa, kei pawh ka hmuh chiah che khân ka hahna zawng zawng a reh vek mai," ka ti ve a.



"Engah nge i hah viau a?" a tih chuan," Scooty-a ka rawn tlàn chhûng zawng khân ka rilruin ka ngaihtuah char char che a, a chàwl miah si lo va, a hah ve lutuk alawm," ka tih chuan ka nu chu a lo nui hak hak a.



"Zanin chu i rawn haw lawm nân arpui tui lai ngei mai i uin a talh a, a thau sia, buh nèn chhùmin anthûr hnah ka thlâk a, a tui khawp ang!" a lo ti a.



"I sawi zâwng ringawt pawhin ka chil a tipût thei hialin ka hria! Anthûr hnah tak chu," ka tih chuan Taitea rawn haw ve chiah chuan," A, ka âwih kher kher lo êm mai, anthûr hnah chiah i ei ang," a rawn ti lût a.



"Pa, Krismas laia Taitea nuam tihzia kha, mikhual nula kha a țhutpui ve nasa asin," ka tih chuan," Ngawi mai mai teh!" a rawn ti țhat a, a zak hmel avàng chuan ka lo nui uar uar thung a.



"I senior ve tawh, a zahthlâk loh lutuk! Nupui atân neihsak che ila a țha ang," ka ti leh a.



Ka pa pawh chuan," Nia, an sawi tak asin, ka lo hre hlawm lo va, chu nula chuan a lo duh ve a nih ngai chuan neih ngei tùr a nih chu," a lo ti ve a.



"Kan țhut dun avàngin kan inngaizâwng tihna a ni ngawt lo," Taitea vêk chuan a ti leh a.



"A nih loh tal pawhin, mikhual lo kal zînga lâm ve ngai lo ber kha, nula naupang ber kha-" ka tih lai phei chuan a zak chhe nasa a ni tih a hmel ațang chuan a hriat theih vek.



"I țawng tam lutuk aw," tih pahin a room lam pan chuan a kal nghâl ta daih a.



Zanriah sa chu ka ei tui ngei mai. Chaw ei pah chuan Taitea chu ka fiam zauh zauh a, thu dik deuh chu a awm a nih ka ring, a zak thei êm mai. Chaw pawh a ei rei lo, a kham thuai nghe nghe, ka fiam fuh vak lo deuh chu a ni.



Mazuali nèn kan han inhmuh leh meuh chuan sawi tùr hlîrin kan khat a, sawi hmasa nih kan inchuh a, chhum lo chat lovin kan țawng a ni ber mai.



Chutih lai chuan ka phone chu a rawn rì a, Thlamuana a nih ka ring deuh ngawt a, Rinfela a nih ka ring ngam lo, phone call hian min be ngai lo va, ka be hmasa a nih ngawt loh chuan.



A hming ka hmuh chuan ka au vak lo chauh a ni! Min rawn call ve tlat a nih hi!



"Hello?" ka tih chuan a thaw deuh hak ri chu ka hriat hmasak ber a ni.



"Kan inhmuhna țhinah khân ka awm a," a rawn ti sap a.



Mazuali hnênah chuan," Freezer-ah khân Dhoi a awm ang, kan pahniha ei tùr lo va la la," ka ti sap a, ani pawh chu a kal ve nghâl mai a.



"Ka haw daih alawm, ka hrilh che kha," tiin Rinfela chu ka be leh a.



"Ka hria alawm," a rawn ti bawk sia, min tihrilhhai țêp. Ka awm lo tih a hre reng bawk si a, eng nge chutah chuan a tih ni?



"I awm lo tih hre reng chungin ka nghâk tho che chu a nih hi, in in lam ka thlîr reng a."



Ka va khawngaih reuh tak!



"A va țûl lo mai mai tak! Haw-"



"Ka ngai che a ni," a rawn tih sup tâkah chuan ka țawng tàwp chiang lutuk ringawt! Min ngaih avàngin chutah chuan a kal a ni ngei ang.



"I awm lo tih hre reng chungin hnaih theih che inbeiseinain, ka kein helai hmun hi min hruai thleng miau mai a; mahse, in ațanga i rawn chhuah ka beisei tlat tho a nih chu," a rawn ti duah a.



"Ka rawn chhuk leh thuai dâwn alawm, ni hnih hnuah chuan ka awm tawh ngei ang a, in ațanga nangmah hmu tùra ka rawn chhuak lai min hmu leh ngei bawk ang," ka ti ve sap a, ka ngaihtuah a, ka khawngaih a, ka ngai sauh bawk.



"I pa chu a lo țha maw?"


Keimah mai ni lo ka pa a lo ngaihtuah tel ve leh zêl chuan min tilâwm, a ngaihtuah kim ka ti, ka duhna a zual sawtin ka hria.



"Um, țha e, min ngai ve lutuk a," ka tih chuan," Kan inang a ni maw?" tiin a nui hul hak a.



A nui ri chuan engtin emaw ni tak min awmtîr chiaiin ka hria.Min ngai a ni tih han hriat chu nuam ka ti a, chutih rualin kei pawhin ka ngai a, ka khawngaih bawk. Ka awm lo tih hre reng chung pawhin kan inhmuh dunna țhinah a lo han kal hrâm hrâm chu a ni tak si a.



"Eng nge ka lo hawn ang che?" tiin thil dang ka sawipui ta zâwk, khatiang lam a sawi kha chuan ka lungno a kai chhuak ang tih ka hlau. Ani ang, țawng tam lo lutuk leh hmeichhia ngaina lo lutyk tak maiin min ngaih thu a han sawi a, min phone ngai miah lovin min han phone ve hial a nia.



"Nangmah."



Min chhâng rang lutuk chuan ka nuih a tiza a, ka nui chhuak hak hak a.



"Ka ti tak tak aw," a la rawn ti zui a.




"Okay, ka hria e, nang pawh ka lo haw hma chu nula dang lo melh miah suh ang che," ka ti lët ve a.



"Ka angel thla nei lo bâk ka ngaihtuah lo ve," a ti deuh hmak a.



A sawi chu a dik ka ring thlap; mahse," Tak tak?" ka han ti ve leh rih a.



"Beiseina min petu i nia, ka rin leh hmasak ber i ni bawk."



Hriat nuam ka ti lutuk, nuam ka ti veng veng mai.



Kan inbe zo ka han hawi chhuak chuan Mazuali chu ka hmu thut a, ka lo hrechang tawh hauh lo tih ka hriat chuan ka inthiam lo hnuhnawh, bâkah, ka țawng zawng zawng kha a lo hre ve vek ngei ang, engtia rei nge a lo țhut tawh ang?



"Char char mai a! Zan khatna chauh a la nia..." a lo ti nang nang a.



"Khawi, ei tùr chu," ka tih chuan dawhkàn chu a kâwk a.



"A takah ka hmu châk ngawt mai, engtiang taka zùn ngah nge a nih ka hre châk a ni," a tih chuan," Zùn zawng zawng neitu a ni mai," ka lo ti a, dhoi chu ka ban pah nghâl bawk a.



"Over êm mai a!" a lo ti hlak a.



"Eng nge, sawi dik loh ka nei hleinem," ka lo ti thung a.



Zàn mutnaah chuan kan in-text a, a thla ka lâksak chu ka en pah reng bawk a. Kan inmangțha hnuah pawh chuan a thlalâk chu ka en chhunzawm zêl a, ka muthilh lai pawh ka hre lo, ka țhangharh pawhin ka phone chu ka lo la chelh reng niin!



Inrinniah chuan chaw ei khamah thawmhnaw ka su a, in ka tifel pah bawk a, han tihfel tehchiam tùr awm lo mah se han sîksàwi vêl hi a nuam ve hrim hrim ka ti.



"Sangbawihite in a ni em?" tih ri-ah chuan ka hawi chhuak vat a.



"E, i lo kal maw?!!" ka ti chûl mai. Ka rin loh lutuka Thlamuana ka hmu hlawl mai chu mak ka ti a, helaiah, kan khuaah hian hmuh ka inring hlawl lo a ni ber!



"Lo kal e, i haw daih sia," a rawn ti a.



"Lo lût rawh, lo lût rawh, engtin nge kan in awmna i hriat a? Motor ri pawh ka lo hre miah hleinem," ka ti leh zung zung a.



Țhutnaa țhut pah chuan," Khulai deuhah khuan ka dah a, in in awmna chu mi ka rawn zâwt a, ka rawn hre chat mai a ni," nui chung hian a ti a.



"Khawnge i kal? I rawn kal ve hrim hrim chu a ni lo tiraw?" ka ti leh a.



"Aw, Aizawlah ka kal lawk a, helamah hian ka rawn kual a nih hi, i awm tih ka hria a," a rawn tih chuan," I ti țha hle mai, min rawn kual chhan vang vang a," ka ti a.



Chutih lai chuan room ațangin ka pa a rawn chhuak a, ka pa hnênah chuan Thlamuana chu ka hmel hriattîr nghâl a, a Aizawl kal kan khaw lama a rawn kual vang vang thu chu ka hrilh pah bawk a.



"A ni maw? I fel hle mai," ka pa pawh chuan a ti a.



"I zia zêl em? Aizawlah inentîrin i kal tihte ka lo hria a," Thlamuana chuan a ti a.



"Aw, zia e, ka țha lutuk. Pumpui hnûn lâwng a nia, a reh thusi mai ang. Bawihtei hi ka ngai êm a, chu chuan a lo tizual mai mai a," a tih chuan ka lo khap vat a.



"Pa, thutak ve deuh la?" ka tih chuan Thlamuana chuan,"A awm tawh sia, i dam hawk dâwn chu," a lo ti ve a.



"Dam tawh lutuk! Damdawi ei ei pawh a ngai tawh lo," tiin ka pa pawh chuan a lo fiamthu ve zat a, kan nui țhâ hlawm a.



"Bawihte, thingpuite kha han ti la, hei, i țhianpa pawh a ril a țâm viau ang chu. A rawn tlawh vang vang che a nia, lo duat hle ta che," ka pain a tih chuan ka harh chhuak zawk.



"A va màwl theih ve aw! Ka'n chhuang nghâl ang e, hmanhmawh suh aw, in i thleng thuai tawh dâwn tho a," tiin Thlamuana chu ka en a.



"Hmanhmawh lo ve, nula hmelțha bulah hi chuan hmanhmawh a ngai lo," a lo ti ve ngei! A zei loh tehlul nèn, a inla zei ve tawh lutuk!

Ads i la click ve lo a ni maw? A hnuaia ads milem khu lo click ve rawh le
Ads i la click ve lo a ni maw? A hnuaia ads milem khu lo click ve rawh le
Ads i la click ve lo a ni maw? A hnuaia ads milem khu lo click ve rawh le


*THLÈMNA KAN TAWH HI A INANG VEK KHER LO VA; MAHSE, KAN CHÂK ZÂWNG LEH KAN CHAK LOHNA, KAN PANNA LAI ZÂWNAH TAK HIAN THLÈM KAN NI ȚHÌN*



https://chat.whatsapp.com/F5M6GiQvBic4qATfXaGwBc

Thil țha si, tlâwm si zawrhna hmun aw, lo join leh sap sap ula

[Ngaia]

☆24/7☆ - 21 By Dingdi Pachuau





Thingpui a in zawh hnuah pawh chuan a la awm ve reng rih a. Ka pa nèn chuan an titi a, an titi duh zâwng a inan hmel khawp mai, an titi tui dùn viau bawk, ka inrawlh ve tawh lo.



Ka nu leh Taitea huan kal rawn haw thlengin a awm a nih chu. Ka pa chuan zanriah ei ve nghâl tùrin a sâwm zui zat a; ani erawh tlangvâl mâwl a ni lo va, a haw thei ta țâwk a ni.



Zanriah ei laiin Taitea'n min fiam nghâl zat a, ka bialpa a nih loh thu ka sawi pawh chuan," I bialpa a ni ka ti rêng rêng lo, i lo inngaihbel mai mai a nih kha," a lo ti tlat a.



"Zaninah khawiah nge i lèn leh dâwn? Mikhual nula an awm leh tawh em?" ka tih chuan," Thil dang sawi a'n tum ngêi ah! A pawi lo, kan mâkpa 'țhelh' ai chuan kha kha chu a fel daih zâwk ngei ang chu maw, a nihna pawh a sâng alawm. A rilru pawh a puitlingin a châwm zo khawp ang che," a ti leh duah a.



"I ninawm! Kham thuai thuai teh, mikhual nula i ngaih luatah ka chungah i inluling vak ringawt a, lo kal leh tùrin chah ila a țha ang," ka lo ti ve a.



"Mikhual nula dei dei dei..." tiin a tho ta phat a, ka nuih zui var var a.



"Bawihte, i bialpa a ni lo maw?" tia ka pain min zawh chuan," Ni nâng, Rose-i thawhpui a nia, an inhriat avàngin kan inhre ve mai alawm," ka lo ti vat a.



Chaw ei kham hmun tihfel zawhah chuan inkhâwm tùrin kan insiam a, ka pa pawh na vawng vawng a nih loh avàngin a insiam ve a, ani pawh hian inkhâwm hi a țhulh mai mai khât viau.



Inkhâwm bànah țhalai hruaitute an inhmu khâwm dâwn a, Mazuali pawh a tel ve avàng chuan ka hawsan mai a țûl ang.



Mahse, min rawn koh avàng chuan ka ding leh rih a, ka beng bul sêtah chuan," Vawiinah tlangvâl chhe lo deuhin a rawn tlawh che a ni maw? Min hrilh duh lo vël ah!" a ti sap a.



"Tu nge ti?" ka tih chuan," An sawi ka hria, 'Car mawi deuh a nei' an ti lehnghâl a," a rawn tih leh chuan," Ka hmel hriat a nia, a Aizawl kal a rawn kual mai mai a nih kha, ka awm a ni tih a hria a," ka lo ti a.



"Rinfela chu a ni lo tiraw? I va luck tak!"



A dàra bensak pah chuan," Ngawi mai mai teh! Nang thleng thleng hi chuan min dem lo teh, ka bialpa a ni lo, engkim i hriat vek tawh kha," ka ti a.



"Nia, ka hre tho a; mahse, vawiina rawn kalpa chu ka hmu châk tho," a la ti ţâlh a, ka nuih a tiza mai mai mang e!



Mikhual nulate kha an lo kal leh tak tak a! Pathianni zîng inkhâwmah chuan ka hmu a; mahse, an kim tawh lo, hmeichhe pahnih chiah an rawn kal a, pakhat chu lâm peih deuh kha a nia, a lâm leh dârh dârh bawk. Pakhat ve thung kha chu a lâm ngai lo, a ding ve reng mai.



Inkhâwm bànah Taitea chu ka zawng ru char char a, mak tak maiin mikhual nula lâm lo zâwk bulah khân ka hmu, an indin hnaih ve viau nain an inbe lêm lo a niang, Laltaitea mai mai chuh! A hre khawp ang!



Ka en reng lai chuan Taitea chuan a bia tih ka va hmu thei a, a hmeichhia zâwk chuan lài tih hriat tak hian a lo en zawk a; mahse, a hawi sawn leh daih, a awm dàn ațang chuan thil ka hre thiam ve deuh.



Ina chhùn thingpui kan in lai chuan Mazuali hnênah chuan mikhual chanchin chu ka zâwt a, ani pawh chuan țha taka min chhângin,"Lâm-thiami ai chuan a nau kha a fel zâwkin ka ring, Taitea pawh hi a lêng ve peih riauin ka hria asin," a lo ti a.



"A lêng țhìn maw?!" ka tih chuan," Umm, an rawn innghahna Pu Lalate in leh kan in chu a indawn êm hi, kan inhnaihin an sitting room lah kan hmu ve thei vek a," a lo ti mai a.



A țhat hlauh chu. Nula inah a lêng ve ta a, nupui neih pawh a hnaih ve thei ta deuh alawm, nei ve thuai thuai teh se, nu leh pate an ngaihtuahawm lo deuh thei ang a.



Lungleia ka chhuk thlâk dâwn zîngah chuan ka nu leh pa hnênah chuan,"Taitea hian mikhual nula kha a duh ve deuhin ka hria, lo ngaihven deuh teh u," ka'n ti ve thâwr a.



"Chuti a ni maw? Kan lo hre hleinem," ka pain a tih chuan," A lêng ve țhin a ni àwm e, nula a lèn chilh ve deuh awm chhun a ni sia, a duh ve viau a niang ka tia," ka ti leh a.



"A țhat hlauh chu!" ka nuin atih chuan Taitea chu a rawn chhuak a.



"I phûr riau mai, mâkpa thar tùr kha i hmu châk leh tawh tih ka hre mai," a rawn ti a.



"Mikhual nula kha lo chhai thlu ngei ngei ang che, chuti lo chu pasal ka neih khalh tak tak tawh ang che," ka lo ti lêt ve a, țawngkam thlàwn chu ka ba duh bîk teuh nâng!



*******


Tunah chuan țhenawmte pawhin in chu an rawn luah ve ta, an rawn awm ve ta chu lâwm viau mah ila, Rinfela nèn chuan kan lâwm lutuk lo, kan inhmuh ve ziahna hmun kha a ni miau mai a, inhmu tùra mi veranda-a zàna va kal daw daw chu thil mawi pawh a ni tawh lo.



"Rawn lêng ve tawp tawh mai rawh, i huphurh em?" tiin ka zâwt a.



"Huphurh lamah chuan huphurh nâng, nangma lam ka vènthàwn vàng a nia," a lo ti mai a.



"Eng nge vènthàwn tùr awm?" ka tih chuan,"I chhûngte'n i chunga an rilru put tùr ka ngaihtuah tel a ngai a, " a ti sup a.



Ni ve tho mai, Rose-i pawhin kan chanchin chu a nuin a hriat min hlauhpui êm kha, fîmkhur tùrin min chah a nih nghe nghe kha.



"Hmuh che ka châk ve țhin tho bawk sia, khawiah nge kan inhmuh theih ang?" ka ti a.



"Ka lo ngaihtuah ang."



Kan in bul maiah hian thing buk a awm a, chumi bulah chuan tu mah an kal ngai lo, kan huan chhûng ang a ni miau mai a, chulai chu a remchâng viau maithei, la sawipui tùr a ni. Ka tân hla taka kal kha, zànah lehnghâl, a fuh dâwn si lo.



Kan inhmu dùn leh thei ta; mahse, zan tin chhuah tum chu a fuh lo ang, chhûngte lakah a inthlahrunawm lutuk. Ka tân pawhin a mawi lêm lo, Rose-i lahin a lo hre thiam ve tawh bawk si a.



"Naktûkah ka zin lawk dâwn a."



"Khawiah?" ka lo ti vat. A zin rei ang tih ka hlau, inhmu zut thei lo mah ila a zin chhuak lo a ni tih hriat kha a nuamin rilru a hahdam ve hrim hrim.



"Thingtlângah."



"I pa engtin nge a lo awm ang?" ka tih chuan," A awm thei mai ang," a lo yi mai a.



"A nih, i rei dâwn em? Eng nge i tih dâwn?" ka ti leh a.



Thaw deuh hak paha,"Hnà vàng a nia," a tih chuan," Ka lung a lêng ngawt ang, inbe ziah ang aw, i lo lêt hun tùr pawh ka hre duh dâwn a," ka ti a.



Kan in ațanga êng lo chhuak chu êng kan hmuh chhun a nih avàngin kan inhmu chiang thei lo hle a; mahse, chuti chung chung pawh chuan a hmel riruang chu chiang takin ka hmu a, ka lâwm tho tho.



"I lung a lêng hman lo ang, rawn lêng țhìn a awm kha," a lo ti sup a.



"Nangmah i ni hleinem," ka tih chuan," Kei chu ka lo lêng ve ngai hleinem," a lo ti thung a.



"Nia, i duh lo tlat a," ka tih chuan," Ka ngaihtuah vàng che," a lo ti sup thung a.



Kan inhmuh leh hun tùr kan hriat loh avàngin ka âm deuh hlek a, amah si chêt chuan ka țhu tlat bawk.



"Hetia inhmuh fàl hi i hlau em?" Kan ngawih vang vang hnuah chuan a rawn ti chhuak ta charh a.



"Hlauhna tùr a awm em ni?" ka tih chuan," Min hlau lo mi?" a lo ti a.



"Hlau ta che ila?"



Ka beng bul sêtah chuan,"I kal ka phal tawh lo maithei a," tiin a rawn thaw pah ham ham a!



Ka mûr chiai chiai mai, a aw chu a sexy viau lo pawh a ni maithei; mahse, a awka chhuak leh thil tih dàn chuan min nghâwng khawp mai.



Ka țawng chhuak thei lawk lo, a thil sawi chuan min tihlàwm rualin a ti tak tak lo ang tih ka hlau pah bawk a.



"I ti tak tak lo?" ka ti ta sap a.



"Kha pa kha a lo lêng leh a nih pawhin kàwm duh lovin mu daih rawh aw," a rawn tih leh chuan ka nuih chu a tiza khawp mai a; mahse, ka nui chhuak duh lo, a thîk ve miau si a.



"'Lo lêng tawh suh' tiin lehkha ka lo pe mai dâwn em niang?" ka tih chuan," Fiamthu-ah chuan la kher lo la," a ti bung nghut ta mai!



Ka inthiam lo hnuhnawh kher mai, chutia lo țawng chhuah kher kher chu, a thinrim hmain ka thawidam vat a ngai.



"Ka tihpalh, i thin tihrim ka tum miah lo a nia," ka ti sap phawt a, chutah," Mipa dang ka duh lo va, ka ngaihven lo bawk. Nangmah chiah ka duh che," ka ti leh ta sap a.



A ngawih rùn avàng chuan a lungawi lo a nih ringin,"Ka awm i tinuam lo a nia," ka ti leh sap a.



Min rawn kuah ta thlawp a, kei pawhin ka lo kuah lét rang khawp mai.



"Nang chauh hi beiseina min petu i ni a, beisei ka neih chhun pawh i ni," a ti ta sup a.



A va nuam vawng vawng tak!



*******



A zin ta chu, ka lung chu a lêng êm êm ringawt mai a ni. Zan tin kan inhmu țhin azeng pawh a ni si lo va, chutia a awm lo tih tâk avànga han lunglèn viau mai chu, nêp ka inti ru khawp mai.



Kan inbe reng reng a, ani erawh chu a lung a lêng ve hran lo a niang. Mipate hi chu an dang a, an awmna hmun apiangah hian an tlei thei zêl mai a, an awhawm hi ka ti țhìn.



A rawn haw theih hun tùr ka zawh chuan a hriat loh thuin min chhâng a, kâr khat deuhthaw a ni tawh sia, mak ka ti angreng. A hna lo zawh ve sek erawh ka duh bîk lo, a zawh hunah a lo haw ve mai ang chu.



Mahse, ka ngai tawh alawm.



Zirtàwpni zànah Thlamuana chu a rawn lêng leh a, fel ti viauin nèlawm ti viau mah ila Rinfela'n a thîk ve êm avàng hian kei pawhin hnaih ka duh hran lo. Mutsan êm chu a màwi bîk loh avàngin, a bul hnai deuhah pawh țhu duh lo chuan fál deuh hlekin ka țhu a.



"I va inla hrang ve a!" nui chunga a rawn tih chuan," social distancing ka zàwm a nih hi," fiamthu hian ka lo ti ve a.



"Min hlau ta a niang ka ti a," a tih leh chuan Rose-i chuan," Hre thiam rawh, hnai deuhah chuan mi a hmu chiang thei țhin lo alawm," a lo ti a, ka nui hak hak a.



"Tarmit lian tâwk ka mamawh tawh a," ka tih chuan," Valbawiha tarmit aia lian maw?" a tih chuan kan nui dar dar a.



Eng eng emaw sawi chuan kan meng rei phian a, fiamthu thawhin kan nui dar dar bawk a, a haw dâwnah chuan," Naktûkah in chhuak dâwn em?" a ti leh rih a.



"Aw, chhuak lawk ang," Rose-i chuan a lo ti vat a.



"Inhmuh kan tum dâwn u nia, restaurant thar ka hria a, ka hruai dâwn che u nia, an ei tùr a tuihnai teh a nia," a ti leh a.



"A châkawm tawh tawp! I sawi zâwng pawhin ka chil a lo pût sa," Rose-i'n a tih chuan âwih lo zet hian ka melh a.



"Ka hmel hriat an nia, 30% off -in kan ei thei dâwn a," a ti leh a.



Mut dâwnah chuan Rinfela chu ka text a, min rawn chhâng lêm lo. Ka message a en loh vàng pawh chu a ni manna, a buai a niang.



A tûkah chuan kan chhuak ta ngei a, Rose-i'n pheikhawk a lei a, ka kalpui manah ka duh lo chung T-shirt pink, hâk nuam zet mai min leisak ve bawk a. Thlamuana'n dàwra kan la awm laiin min rawn fin a, chumi hnuah chuan a sawi restaurant tharah chuan kan chàwl a, a sawi ang takin an ei siam chu a tui kher mai.



"A va'n tui tak! Ka lei ka lem țêp a ni," Rose-i chuan a ti leh pek a!



"A làwmawm a nih chu! Ni dangah pawh in hman hunah in rawn chàwl ve țhìn ang a, in hre tawh tho bawk a," a neitupa kan bula lo kal chuan a lo ti a.



"Tehrêng mai! Kan rawn pan vang vang peih ngei ang," Rose-i chuan a ti a.



Rinfela chawlhpui ka châk mang e! Han chàwl dùn ila, an ei siam tui tak tak hi ei ve se, ei man kha keimah ngeiin pe ve tawh ila...



"Eng nge ni leh ta vung vung a?" Thlauana'n a rawn tih chuan harh chhuakin," A tui lutuk a, a ril ngûih maiin ka lo hria alawm le!" ka tih chuan Rose-i chu a nui hak hak a.



"Ngûih ngûih mai dâwn a!" tiin a nui leh hak hak a.



"Ngaihtuahna a fan tlat alawm," ka lo ti leh. Rinfela ka ngaihtuah chhuak tih chu hriattîr ka tum hran lo.



Bsa a rawn lût ve nawlh mai, an lo inbe sa a ni ngei ang. Kan țhutna a rawn pan nghâl chat a.



"In va puar tawh àwm bîk ve!" tiin Rose-i bulah chuan a rawn țhu that a.



"A tui lutuk! Ei ve mah teh, i inchhîr hauh lo ang, kal i rawt zut tawh mai ang," Rose-i chuan a ti a.



An pahniha hmun danga kal an duh leh avàngin Thlamuana nèn chuan kan chhuahsan a, ani pawh chu a haw ve nghâl mai ka rin avàng chuan,"Kei pawh ka haw ve nghâl ang e, inah tih tùr ka la nei nual bawk a," ka ti a.



"Ka lo thlah ang che."



Ngai chu ka ti hran lo nain han hnial țùng chu mawia ka hriat loh vàngin kawngah chuan kan inzui haw ta hnak hnak a, kan kal chak lêm lo, a titi pah a.



Min rawn tâwk zâwnga mipa pahnih lo kal ka hmuh chuan ka phu zawk mai! He pa hi, engtik laiin nge a rawn haw le? Min hrilh hauh si lo, nizàna ka text pawh tún thlengin min la chhâng hauh lo a nia!



Min hmu chiang tih ka hria, inhai der theih ziazáng a ni tlat lo, ka bia ang ka ti rilru a; mahse, kan bul hnaih deuh an rawn thlen hmain dàwrah an pêng ta daih!



A thin a rim ang em? Thlamuana nèn kher min la hmu leh zui, a thîk tih ka hre reng a, a la rawn haw lo nia ka hriat vàngin a nia ka kalpui ni, bâkah, hmuh ka inring lo hrim hrim bawk.



A thin a rim hlauh chuan...insawi fiahna tùr ka va ngah dâwn tak!



Thlamuana chuan in bul thleng min thlah. Ka rilru a hria emaw ni ka ti hial, ina a rawn luh rih ka hlau lutuk a, ka ngaihtuahna a chhiar thiam a niang.



Room-ah lût nghâlin ka phone ka la chhuak a, ka call nghâl; mahse, a ring ral țhak.



Hmm, a thin a rim chiang, a lungawi lo khawp ang, ka dem lo. Kei pawh ni ta ngat ila ka lung chu a awi bîk hauh lo ang.



Ka text ta tho. Zàna inhmuhpuiah ka sâwm tawp, ka sawi fel thuai loh chuan buaina a punlun mai ang.



Ka message pawh a hmu thlap e, tlêm chuan ka ngaih a țha deuh, a rawn kal ngei ang chu maw.



Zanriah ei lai ațang tawhin ka helhhawlh a, kan inhmuh huna ka insawi fiah dàn tùr chu ka ngaihtuah char char, a thin arim a nih pawhin kei chu a rim ve thiang lo, tlâwm zâwkah ka țan char char a ngai.



Zanin chu a vawi khat nân keimahin ka nghâk ve ta, a nghâktuah ka țang tihna a nih chu. A rawn kal ngei ang tih ka hre hauh lo, ka message a hmu a, min chhâng lêt lo nain beiseinain a ni ka lo nghah ni.



A rawn kal ta. Ka thin a phu rang nghâl dat dat.



Țawng chhuak hmasaah țangin "Engtikah nge i rawn haw a?" ka ti a.



Min chhâng lo.



"Ka message min chhâng lo va; mahse, i rawn kal ka ring tho asin, min tibeidawng duh lo ang tih ka ring tlat a," ka ti leh a.



Chhànna a awm chuang lo, che lovin ngawi rengin a ding.



"Ka tihpalh aw, vawiin vàng khân min ngaidam rawh. Kan pahnih chauha chhuak kha kan ni lo a nia, Rose-i pawh a tel ve a nia, min rawn thlah haw mai a nih kha," ka ti leh a.



A rûm nghut ringawt.



Mahse, tlêm chuan ka ngaih a țha deuh. Ngawi reng lovin a la rûm nghut tal a.



"Mawh, hetiang hian awm lo teh, ka tihpalh ka tih tawh chu, min ngawihsan reng lovin i duh chuan min àn khum rawh, a nuam zâwk ang," ka ti leh mawlh mawlh a.



A ngawih reng chuan tihngaihna ka hre lo alawm, min huat thu tal sawi se, min vìn se; mahse, min țhen thu erawh sawi lo se...



"Nimin tlaiah ka rawn thleng tawh," a rawn ti chhuak ta sup a.



"Chuti chu, ka message kha min chhàn ve tal tùr a nia, ka zâwt ve lawm lawm che a, i hah viau lo maw?" ka ti leh a.



A ngawih leh rih avàng chuan nuam lo ti ru tak hian,"Vawiin khân kan i kâr boruak tichhe lul suh se, khawngaihin, ka tihpalh ka tih tawh kha. Min thlah haw mai a nia, han hnial chiam kha a nuam lovin a zahthlâk ve a," ka ti leh niap niap a.



"In inkal hnaih êm kha!"



Kan inhnaih lutuk lo, tuna kan din dàn ai pawh hian kan inkal hnaih lo asin, a thîk vàngin a hmu hnai a ni ang.



"Hnaih lo thei tùr ang ber chuan ka kal ve asin, ni dangah chuan inhlat tâwkin ka kalpui tawh dâwn nia," ka tih chuan," Ni dangah kalpui tawh suh," sehchilh deuh tak hian a lo ti nghut a.



"Ni dâwn tak. Ka kalpui tawh miah lo ang," tiin ka en chho a, hmu chiang viau lo mah ila min rawn en ve reng tho tih ka hriat avàngin," Eng atân mah ani kha ka ti lo, ka rilru luahtu ber chu i hriat tawh kha. Ka bulah kal mah se ka ngaihtuah chu nangmah chauh i ni," ka ti ta a.



Ka thu sawi chu ring se ka ti. Min ring viau tawh a, min rinna hi tihchhiat ka duh bîk lo. Amah aia duh ka nei lo tih hi hre chiang viau se ka duh a ni.



"Nizànah pawh a lo lèn kha, in nui ri pawh ka hria asin," a rawn ti leh a.



"I rawn kal maw?!" makti zeta ka tih chuan," Ngai êm êm chein ka rawn haw a, hmuh hlàn che ks nghâkhlel a, nang erawh chu..." tiin a sawi zo duh lo ngei a.



Sawi mai ai chuan thil tiha lantîr mai ka duh tawh zâwk.






*MIHLIM MI RÈL HMANG ZET LEH PATHIAN THU ÂWIH CHAPO SI HI THIL INHMEH LO BER A NI*

[Ngaia]

☆24/7☆ - 22 By Dingdi Pachuau




Kuah chawt pah chuan," Ka tihpalh, ka thiam loh a ni," ka ti phawt a, chutah chhunzawm lehin,"Kan inkâr tichhetu nih ka duh lo a, min rinna tihchhiat lah ka duh hek lo. Thlamuana hi ka ngaizâwng lo mai ni lovin ka rilru pawh a tiche chhin ngai lo," uar ru tak, min rin theih ngeina tùra uar chuan ka ti leh a.



A ngawih vang vang hnuah chuan," Amah avànga i hlim nui ri kha tuar hrehawm ka ti," a ti ta sup a, min rawn kuah lêt ve ta bawk a.



"Ani bula nuih ai chuan i bula hlim taka nuih nuam ka ti daih zâwk!" ka ti leh sap a, nghet leh zuala pawmin ka kuah châih châih a.



A âwma bei reng chung chuan,"A lo lèn chuan lo kawm loh theih loh a ni ve si a, chu erawh chu hre thiam hrâm la aw. Ka kawm avàng khân ka rilru a neiin ka va duh ta e tihna a ni chuang lo a nia. Tlangvâl lo lêng chu nula pângngai tân chuan lo kawm loh theih loh a ni si a," a hriat thiam beisei ru tak chuan ka ti a.



"A bulah erawh țhu lo la."



"Aw le," tiin ka nui sak a, tunah chuan a thin a rim tawh vak lo tih a hriat a, ka rilru pawh a zãng huai mai.



Dâk chhoin,"I lo haw thu min hrilh miah lo a, ka lo nghahhlelh che nen!" tiin vui ru deuh, vui lang ngam si lo chuan ka ti sap sap a.



"Rawn țhàwn thut che ka tum a."



"In thawk zo tawh tihna tiraw? I zin chhuak leh ang em?" ka tih chuan," Aw, zo; zin chhuak lo ang," a lo ti a.



"Min ngai ve tak tak em?" ka ti leh a.



"Nangmah ngaihtuah chungin ka muhìl țhin."



'Aw, ka ngai che' min tih tluk zetin a thil sawi chuan min tilâwm. Mipa a ni a, hmeichhia ang maia min ngaih thu han sawi kûr vak tùrin ka phût lo a, a sawi lah ka ring hek lo; mahse, min ngaihtuah chunga a muhìl țhìn chuan rilruah nuam tih veng vengna min siamsak thung.



"I pa a lo dam țha ang tiraw?" ka ti leh a.



"Umm..."



"A lo ngaiin a lo ngaihtuah-"



Ka sawi zawm thei ta lo, rawn kûn hniamin min rawn fâwp miau tawh si a, țawng tam min ti tawh pawh a ni ang e.



Inthlahlel takin kan infâwp a, kan inngaihna leh kan inkâr inhriat thiam lohna awm deuh, țawngkaa kan sawi fel tâk zawng zawng pawh kha tunah chuan a bo vek tawh, kan awm dùnin duh tâwkin kan inngaih thu, țawngka ni kher lovin kan inhrilh thei tawh si a.



"Hun hi ral thei lo se."



Min thlâkhlelh vànga sawi a nih ka ring a, min tilâwm viau bawk.



"Hmeichhia hian heti tak hian ka rilru hi a luah thei ang tih ka lo ring ngai lo asin, zîng, chhùn leh zànah hian ngaihtuah chhuah loh lai che ka nei ngai lo," a tih phei chuan ka hlim lutuk a, zah pawh dâwn lovin a hmeichhia zâwk chuan a nghâwnga kuahin dingdihlîpin ka han fâwp tak ngawr ngawr a.



Hmui inkalsantîr miah lovin min lo pawm kâng lawp thung.



Nuam hi ka va ti sî êm!!! Luhai deuh chhawlhin a nia inah pawh ka luh ni, a chìn tam vak chi loh maithei a ni; mahse, rilru erawh a hlim viau thung si.



"I rawn lût hmêl kha!"kan mut dâwn chuan Rose-i chuan a ti sap a, a chek zui tlak tlak a.



"Eng nge..." ka tih chuan,"In inhmu lo rei deuh tawh a, in uar hret a nih ka ring,"tiin a nui kar kar zui a, chutah," A àwm ve tho, ka hre thiam tho mai che," a ti leh a.



Zak ru viau mah ila Rose-i, ka cousin a ni tho a, bâkah, min hre thiam a, ka zak lo awm ta mai mai.



Kâr tàwpah chuan ka haw chho ta zauh zauh. Ka pa mawlh mai chuan min ngai ve țhìn si a, a hrisèlna a lo insawisêl ve deuh bawk nèn, ka kàr tawn ta deuh reng mai.



Thu làwmawm deuh mai chu, Taitea'n ngaihzâwng a lo nei ve tak tak chu a ni. Mikhual nula, lâm ve ngai lo ngei mai kha a lo nia, ka hriat tirha ka làwmzia mai chuh!



Krismas ațang khân an inhre chho a lo ni. Taitea, hmeichhe mi lo ve tak maiin chutia ngaihzâwng a han nei ve ta mai chu a chhûng buaiin kan buai a ni ber mai. Kan lâwm a, nupui atân nei ngei se kan ti. Mi sawi kan hriat leh zêl dànin kha nu tê kha chu a țawng tam lo nain a fel a, a lêrh lo a, eng mah sawisèl pawh nei lovin a hma tihtùr lum chu a thawk bawrh bawrh mai țhin ani àwm e.



Taitea chu ka han sawipui ve ngial a, min chhâng țha duh vak lo. Nupui atân nei mai se, a hmeichhiain a hnial loh phawt chuan. Ka nu leh pate erawh chuan chutiangin an ti ve lo, Taitea thu thu-ah an dah tawp, an sawi ve lêm lo. Kei erawh chuan ka haw chhoh azâtin ka sawi chhuak thung.



Ka rilruah a khat liam a ni ber ang chu, Rinfela bulah pawh ka sawi chhuak a, ani erawh chuan,"I nawr lutuk palh ang e," a lo ti thung a.



"Nei thuai tùrin ka duh a, ka nu leh pa dam țhat lai hian fate nei se ka duh alawm," ka ti a.



"An dam reng ang chu," a tih chuan," Hma hun kan hre hleinem, a ngaihzâwng neih ve chhun a nia, nei tawp mai se a țha alawm," ka ti leh a.



"I pa chu a țha chho zêl tiraw?"



"Aw, damdawi a ei țha a, a zia zêl ang. Ka chhoh leh hunah lo chho ve la, i lo kan pah ve pah ang a?" tiin ka han sâwm zui zat a, a duh phei chu ka ring hauh lo, a pa amah chauha lo awmtîr lah ka duh hran lo bawk.



"Châkawm khawp mai," a lo ti sup ringawt a.



"I châk tak tak lo a niang. Kan khua pawh i hmu châk ve lo'm ni? Kan in leh ka chhûngte pawh hmuin i hmêl hriat ang a, kei chuan in in ka hmu a, i pa pawh ka hre chiang tawh a," ka ti leh a.



Min chhâng lovin, ngawi rengin hma lam chu a melh vang vang ringawt a.



"I duh loh zâwng ka sawi lo tiraw?" ka inthiam lo hnuhnawh leh deuh a, kei hian ka nawr lutuk a niang ka ti.



Chutah, chiang zet hian min rawn en a, a țawng leh dâwn lo emaw ka tih hnuah chuan thâwk la hapin,"Hei hi a ni ka nu ka ngaihdam theih lohna chhan chu," a ti chhuak ta hawk a.



A bânah chuan ka lo vuan vat a.



"Ani khân min kalsan lo se hetiang hi kan ni bîk kher lo ang a, mi pawh ka ringin hmalam hun beiseina êng pawh ka nei ve thei ngêi ang; mahse, chu chu ka tân chuan thil theih loh tluk a ni," a ti leh a.



A rilru chhûngril natna zawng zawng hi phawrh fai vek se, inkiltawihna, mi rin lohna, beidawnna leh a hma huna beiseina neihtîr thei lotu thil hi paih bosak vek theih se ka ti.



"Nang ka tawn hma che hi chuan hmalam hun atân beiseina ka nei ngai lo va, neih pawh ka duh hek lo. Ka nung ve mawp mawp a, ka pa hi awm lo phei se chuan ka dam tawh kherin ka ring lo. Ka nu min chhuahsan hnu lawkah accident a tâwk a, chuta țang chuan hetiang hi a lo ni ta a ni. Ka dam chhan ve ber leh ka inngahna neih chhun hetiang a han nih hnuah phei kha chuan hruizên hi ka ngaihtuah ngun a nia aw..." a ti vang vang a.



Ka lo be buai phal lo, ka lo inrawlh duh lo. A chanchin zawng zawng chu sawi chhuak vek se, a rilrua a thil lo up zawng zawng chu puak chhuahpui vek rawh se, tichuan, a thâwl hawk ang a, thil dang, hmalam huna beiseinain a rilru chu a lo luah khat thei zâwk ang.



"Ka nu kha inkhâwm taima leh kohhrana inhmang tak a ni ka tih tawh kha, khatianga mi țha ni siin ka pa nèn min chhuahsana hmingchhe thei ang bera min kalsan hnu khân Biak ina inkhâwm hi a țangkaina leh a țhatna ka hre tawh lo. Ka nu țawngțainate khân amahah leh kan chhûngkuaah rah țha a chhuah lo mai ni lovin rah țha lo zâwk a chhuah si a, țawngțai țûlna ka hre lo a, ka țawngțai ngai tawh lo bawk. Ţawngțai ai chuan mahnia thawh chhuah mai kha a țha a, chhànna rang ber niin ka hre bawk."



Thaw dèp dépin ka lo ngaithla a, a thil sawi zawng zawng chu hriat hmaih neih ka duh lo, ngun lutukin ka lo ngaithla kar reng a.



"Ka pa nèn kan awm dun țantirha kan ina lo lêng țhin leh min țanpuitute chu miin zu ruih hmang an tih leh engah maha an ngaih loh mi vàntlâng hnuaia lêng vek an ni, ka pa nèna khawhar taka kan awm chu kohhran mite hian min rawn hnem ka ring țhin, ka la naupang ve êm a, ka lo beisei sâng lutuk a nih ka ring ta. Chutah, ka pa'n accident a han tâwk a, chutah pawh chuan kohhran mi leh upate hian min rawn kan ka la ring fan tho; mahse, mi nâwlpui hmuha mi țha lo nia kan hriatte bawk kha rawn lang zing leh min țanpuitu an ni leh ta. Kohhrana inhmang tak tak tân chuan keini pafa kha chu mi sual, ka nu thiltih sual zârzo kan ni a ni ngei ang."



A thil sawi chuan ka rilru a hneh kher mai. A rilru natna chu thup tum hle mah se a thup thei lo a ni ber, a sawi charh charh a, ni danga țawng tlêm thei zet kha zanin chu a țawng tam zâwkah a țang chiang ta khawp mai.



"Ka pa avàng chauhin ka la dam ve țàng țâng a, kan ina rawn lêng lût țhin min lainattu leh min țanpuitute chu ka tân chuan mi țha ber an ni, zu an inin an rui țhìn pawh a ni ang, damdawi an ruiin an inchiu țhin pawh a niang; mahse, anni aia kawm ngeih hi ka nei lo, mi țha leh mi felho chu keini ang mi sual tân chuan kawm phâk ni ve miau hek lo le," a ti leh a.



Chutah," Mahse, nang hian chu chu chu i rawn tidanglam ta a nih hi, min kàwm duh a, mi be ve duh a, min hmusitin min hmu hniam lo va, kan inah pawh rawn kalin ka pa pawh i țanpui a, Angel thla nei lo ang hialin ka hmu ta rêng che a ni," a ti leh a.



"Mi dang pawhin, kohhran țhalaite pawhin an rawn țanpui che u kha, i pa a damloh pawhin an rawn kan a ni lo'm ni?" ka lo ti pek a.



"Kha kha chu, hmingțhat tum vàng chauh a nih kha. Kohhranah ka pa hming hi a la awm ve si a, hmangaiha țanpui duh vàng ni lovin a langa mawi an zawn vàng mai a ni," a lo ti thung a.



A rilru sükthlêk dàn engkim hi a dik lo chho vek tawh a nih hi. A rilru hi siam dik leh tùr chuan hun a la duh ngawt ang; mahse, ka beidawng lo ang, ka thei lo, beiseina êng sêt sêt a neih tawh hi a bo leh ka phal tawh lo ang.



*******



Zan khat chu Thlamuana rawn lèn zànin, Rose-i pek chuan," Sangbawihite khuaah Sunday han hmang ve chhin ang hmiang," tiin a sâwm a.



"Engtikah?" phùr hmel zet hian a lo ti vat a.



"Tûn kâr tàwpah hian. Kâr tàwpah a haw deuh ziah alawm," a ti leh a.



"In peih ngút lo ang, thingtlâng te zawng a hrehawm asin," ka lo ti a.



"Ka châk zâwng tak a ni; mahse, tûn kãr tàwp hi chuan ka hman dâwn lo phawt mai a, a kâr lehpekah ti ila? Sangbawih, kan lo zin ve chu i phal tak tak ang maw?" Thlamuana chuan a ti leh a.



"In peih phawt chuan."



A haw hnuah chuan Rose-i chuan," A phùrzia kha, mâkpa tùr interview han neihpui lawk tùrah ka inchan," tiin a nui kar kar a.



"I ho êm mai a! I sawi hmuh mai mai a, Rinfela lahin a lo thîk ve tumhrang bawk si a, boruak a tidik lo vek palh ang tih ka hlau asin," ka lo ti a.



"A thîkthu a va chhe àwm ve ti ila a tân chuan i țha ve êm a, chàn che a hlau pawh chu a àwm ve reng a ni," a ti a.



"A tân ka țhatna a awm chuang lo, kan induh tawn chuan a țha a ni mai," ka lo ti thung a.



Mutnaah Rinfela'n min rawn text hmasa ve leh tlat mai!



*Zanin khân a bulah i țhu em?* tiin.



A lo lêng tih a lo hre reng a ni maw? Kan in bulah a rawn kal tih a ni ngei ang chu, ka khawngaih roh e a.



*Țhu nâng, a hrangin ka țhu daih* tiin ka chhâng lêt a.



*A țha, ka tâ chauh i nih kha, hre reng ang che* a rawn ti leh.



A tâ chauh ka ni. Ka nui sak a, chutiang țawngkam a rawn nei chu ka lâwm hrim hrim, min hauh hi han tina êm êm mai se nuam ka ti ve tlat.



*Nang pawh ka tâ i nih ve tho kha aw* ka ti leh a.



*Ka rilru, ka taksa, ka thlarau thlengin le* a rawn ti!



Țawngkam a thiam zêk mai ka ti. Hetiang thleng thleng chuan a rawn sawi ka ring miah lo a nia, mahniin hlim zetin ka nui sak sak mai! Min tihhlim dàn chu a thiam ve khawp mai.



Ka rin loh deuhin kâr tàwpa ka haw chhoh hunah chhoh a duh ve thu a sawi ta tlat mai! Rin loh deuh deuh hian min țhâwng a, chu pawh hlimna min thlen zâwng chiin, nuam ka va ti tak!



"Sunday-ah kan inkhâwm ziah asin, i inkhâwm ve ngei a ngai dâwn a nih chu," ka ti a.



"Engati maw?" zuai deuh raiha a tih chuan ka hre thiam khawp mai. A inkhâwm ngai si lo va, a tih ngai miah loh, a nunhlui hriat chhuahna tùr ka sawi chhuak miau si a.



"I thih phah miah lo ang, ka tân chauh ti hrâm la?" tiin ka thlêm a.



"Ka châkna a zuai vek!" a tih phei chuan ka khawngaih lutuk.



"Nuam lo i ti miah lo ang, ka u Taitea nèn khân in țhu dùn ang a."



A ngawi ta tlat mai.



Chutiang lam sawipui chu ka duh ta rih lo. Ka ruala chhoh a tum ve duhna rilru hrim hrim chu ka lâwm a, inkhâwm erawh tihluihna hmanga tih chi a ni lo.



"Ka ti ve mai mai a nih kha, i lo zin tùr hi ka phûr tawh teh a nia," ka ti ta zâwk a.



"Min bat tawh miau avàngin ka rawn zin ang, i chhûngte hmuh erawh a inthlahrunawm khawp ang," a ti ve leh a.



A pa chu ka ngaihtuahpui viau a; mahse, amah berin ngaihtuah a ngaih loh thu a sawi miau a, lo zin tùrin ka duh ve bawk si a, ka sawi thuipui lo.



Inrinni tûkțhuan ei khamah Scooty chuan ka inkhalh chhuak a, Rose-i scooty kha ka leisak a, ani erawh chuan car a nei tawh thung.



In ațang chuan keimahin ka tlân chhuak ngei a; mahse, keimah chauh chuan ka chuang rei lo khawp mai. Kan in chhak deuh lawkah min lo nghâk a, amahin a khalh nghe nghe a. Miin min hriat ka duh loh vàngin mask ka vuah a, sunglass ka vuah bawk a, ka hmel chu a lang lo kher ang chu.



Kawng lakah chuan ka chawlhpui zauh zauh a, a chhan chu tûn ang hun hi ka tawng tawh kher lo maithei a ni. Ka haw zauh zauh tho ang; mahse, ani hi a tel ve thei tawh kher àwm si lo va, chuvàngin, he hun hi ka ngaihlu a, ãm taka hman ka duh.



Thlate kan la a, ani pawh a nui ve suk suk tho. Ka hlimna hi min țâwmpuiin hlim ve se ka duh a, a nunhlui zawng zawng theihnghilh rih a, a hma hun tùr lam ngaihtuah buai lovin tûn boruakah chiah hian chêng se ka ti.



"Scooty nghèng khân țhu la, thla ka lo lâksak ang che," a tih chuan a thu chu zàwm nghâlin scooty chu ka nghèng nghâl zat a.



"Lo hawi lovin hmun dang en la?" a tih leh chuan," Nangmah en che ka duh alawm le," ka lo ti a.



A nui suk a.



"A rei dâwn hleinem," a tih leh chuan," Chu pawh ni se," ka tih leh avàng chuan a phone chu la sawn meuhin min rawn en hranpa ngat a.



"Luhlul dàn ka duh chi!" a ti sup a.



Ka nui sak a, chutah,"Thla chu min lâksak thuai thuai mai teh, ka mawng a kham a nia," ka tih chuan a insiam rem ve ta nghâl a.



Kawnga kan tlàn lai chuan motor kan tâwk tam lêm lo va, a hnungah bei chialin a kâwngah ka kuah a, ka maimichhîng vang vang a.



Nuam ka va ti tak êm!



"I muthlu ang e aw?" a rawn tih chuan ka kuah nghet sauh a.



"Ka muthlu phal teuh lo mai!" ka lo ti a, chutah, a hnungah chuan ka hmai thukruin," A nuam vawng vawng lutuk a, hun hi ral thei lo se ka ti a ni," ka ti leh a.



"Ka hnunga bei kha maw nuam i tih a?" a tih chuan," Ni chiang e, ka dam loh hunah min paw țhìn la a țha ang, i hnung hi dam sawng sawngna tham a ni tlat," ka lo ti ve a.



"I dam loh ka phal dâwn hleinem," a lo ti thung a.



Kan khaw thlen hmain kawng chhaka tui rawn khawhthla tar tarah chuan kan chàwl leh a, tui ka in lai chuan tui khawh chu rawn penin ka hmaiah chuan min rawn pen per sak sak a.



"Ninhlei suh aw."



A tàwp duh chuang lo, a naupan chhiatna a rawn langah ka ngaihsak a, a in ve hunah erawh a hre ve khawp ang.



"In rawh le," tiin ka kal sawn a.



A in țan chiah tihah chuan mau phel hmanga tui dawhna an siam chu ka dah sawn a, a bân chu khawh fuhin ka kuta tui chuan a hmaiah chuan ka theh huhsak bawk a.



"Phubâ i la mi?"



"Ka in laiin i ninhlei ve tho kha," ka ti a.



Chutah, a kut pahnihin tui chu a dawh a, min rawn theh ta. Ka lo țê tuar a, ka tlân chhe nghâl bawk a. Ani lah chuan tui chu a kut pahniha dawhin min rawn ûm leh a, țe tuar tuar chungin kei ka tlân chhia a, naupang infiam kan ang ka ti khawp mai.



Kan thawmhnaw pawh a huh nasa tawh, kan thlan lah a tla nasa a, chutia kan intihuh chu a nuam phian zâwk mai.



"A nuam tiraw?"



Chutiang mai mai chu nuam a ti a nih chu; mahse, kei pawhin nuam ka ti ve tho, ani nèn hian ni lo ta ila nuam ka ti kher lo maithei a ni.



Ram kal haw tùr ni àwm takte kan hmuh tâkah chuan keini pawhin kal zai kan rêl ve ta a, kham lo tak chungin scooty-ah chuan kan chuang leh ta a.



"Khalh ve tawh la?"



"I ning tawh a ni maw?" ka tih chuan," Ka kuah ve châk tawh che alawm," a rawn ti a.



"Aih, ninhlei a theih loh, khua kan hnaih tawh sia, mi kan tâwk kan tâwk thei tawh tlat," ka ti tlat a.



"Ka ninhlei dâwn hleinem."







*THIL RÊNG RÊNG HI HLEN CHHUAH A NIH HMA CHUAN HARSA TAK ANGIN A LANG ȚHÌN A, TIH THEIH RUAL LOH ANG PAWHIN A LANG FO ȚHÌN*

Ads i la click ve lo a ni maw? A hnuaia ads milem khu lo click ve rawh le
Ads i la click ve lo a ni maw? A hnuaia ads milem khu lo click ve rawh le

[Ngaia]

☆24/7☆ - 23 By Dingdi Pachuau





Ka khalh chuang lo.



Kan in kan thlen chuan ka chhûngte chu an lo awm ve țhap mai a, Taitea pawh a huan kal a haw hma a ni ngei ang, a lo inbual fai vang tawh tlat.



Țhian ka hruai tel dâwn tih ka hrilh sa tawh avàngin Rinfela chu an lo beisei ve sa a, an han inchibai liam liam a, ka chhûngte'n an biakna chu țha takin a chhâng a, ka lâwm rilru khawp mai. Kan thleng tlai lutuk lo bawk a, Mazuali pawh a rawn lang nghâl vat rêng a.



Chhûngte bulah chuan ka bialpa a ni tih hriattîr ka tum rih loh avàng chuan ka inthup viau a ngai dâwn a ni.



Thingpuite kan in zawh hnuah chuan Taitea'n broiler thau țha zet mai a talh a, Rinfela pawhin hrilh ngai miah lovin a pui ve nghâl bawk. Mazuali pawh chu chaw ei ve nghâl tùrin ka sâwm a, a nute ka phone hnuah eirawng chu kan bâwl dùn nghâl a.



"Ka rin aiin a sâng a," a rawn ti sar sar a.



"Chuti mi?" ka lo tih chuan," Intithei viau suh aw," a rawn ti leh nghâl zat a.



"Leh ringawt. Eng nge ka intihtheihna?"



Nui pût pût pah hian," Nuam i ti!" a ti leh ringawt a.



Zanriah ei hmain kan inbual ve ve phawt a, Rinfela chu mikhual room-ah awmin ka room dawt chiah a nih vàngin hrehawm a ti lo tùrah ka ngai.



Chaw ei dâwnah chuan ka nu a țawngțai a, Rinfela chuan eng rilru nge a put ang aw tih ka lo ngaihtuah. A țawngțai ngai lo mai ni lovin țawngțai a țùlna a hre lo miau mai si a.



Taitea chuan duhsak takin Rinfela chu a sa țha lai nia a hriatte chu a hrilh mawlh mawlh a, ka pa pawh chuan a ngùm ni àwm tak hi a suahsak bawk a.



"Tikhân, ti luai luai kher lo ula, mikhual chan in chantîr leh lutuk! A duh chuan a suak ve mai dâwn alawm," ka lo ti a.



"Bawihte, i țhianpa hi a rawn zin vawi khatna a ni a, lo duat hi kan tih tùr alawm. I beng lo chhu ngawng mai la," ka nu chuan a lo ti a, Mazuali hnênah chuan," Mazual, nang pawh ei țeuh rawh aw, i lo ri khàt êm hi," a ti leh a.



"Ka ei țeuh dâwn, dul hmul khât pharhin a nia ka ei dâwn ni," a lo tih chuan kan nui dar dar a.



Chaw eina kan seng fel lai chuan ka pa leh Rinfela chu an lo titi a, a nu leh pa hming leh a chanchin a lo zâwt ve ngei a ni ang, an titi chu hre vek lo mah ila chutiang lam chu an sawi tlat a ni.



"I inkhâwm dâwn em?" Mazuali'n a tih chuan," Khâwm àwm tak chu a nia, țhiana hi ka sâwm chhuak thei tak ang maw le?" ka ti a.



"Ka lo va haw phei rih ang e, inkhâwm tùra insiam ka duh dâwn si a," a ti a.


Hmun ka tifel zo, an bula ka va kal chuan ka pa chuan," Bawihte, thingpui hâng kha han thlî la, Rinfela nèn kan lo in ang e. Zanin chu ka inkhâwm peih lo mai ang, i țhianpa pawh hi a chau ang, inah inkhèl kan lo en mai mai ang e," a ti duah a.



"Inkhèl en duh vàngin i inkhâwm lo dâwn tihna maw?" ka tih chuan," Ni lo, zanin chauh a ni mai. I țhianpa nèn hian kan lo awm ang, in nufain inkhâwm ula," a ti leh a.



Rinfela chu a lâwm teh ang chu! Ka va melh lai chuan min lo en duh țhak lo, he pa hian inkhèl pawh a en ve ngai emaw ni le? Nuam ti lo deuhin ka pa bulah a lo awm ang tih chu ka hlau ru angreng.



Thingpui ka thlitsak hnu chuan room-ah lûtin inkhâwm tùr chuan ka insiam a, khua a lum avàngin kawr hâk nuam deuh hlek ka ha a, puan dum ka bih leh tawp bawk a.



Ka nu a lo la inpeih loh deuh avàng chuan ka pate bulah chuan ka țhu leh rih a.



"Inkhâwm lova ina lo awm chu i duh meuh ang maw?" ka ti a.



"Umm..." tiin min rawn en vang vang a, chutah, min rawn siai ta sak a.



Min tilài leh dêr tawh a nia!



Inkhâwm bàn veleh Mazuali nèn kan inah kan haw vat a, ka pate chuan inkhèl chu an lo en ve ngei a, inhlat deng dawngin an lo țhu.



"Tu nge chak tawh zâwk a?" ka tih chuan ka pa chuan," In va bâng hma ve! Khawnge i nu?" a lo ti nghâl a.



"Nuteite inah a kal lawk dâwn a."



Ka inthlâk hnuah chuan Mazuali nèn chuan Rinfela mutna tùr room chu kan en fel a.



"Zanlaiah hian a rawn tho â mai ang tih pawh ka hlau hlel lo ve!" Mazuali chuan a ti a.



Ka lo nui hak a.



"I țawngkam kha, i inla puitling vêl lutuk a," ka tih chuan," Kan puitling reng tawh alawm le," a lo ti thung a.



Zàn mut dâwnah chuan," Tui deuhin i mu dâwn nia,"tiin a mutna tùr room kawngkhàr ațang chuan ka bia a.



"Lo kal lawk teh!"



Ka lút ve mai a, khum ațanga lo tho vatin ka bânah chuan a rawn vuan chat a.



"Inkàwm rih ang," a ti sup a.



Ka nute an mu tawh a, Taitea erawh a la rawn haw lo. Zàn rei a la ni lo a, pawi lo tùrah ngai ang.



"A hrehawm lo ang tiraw?" tiin a mutna tùr khum chu ka melh zauh a.



"Ka khum chu i hmuh tawh kha," ti ringawtin min chhâng a.



Tukverh hawngin tukverh bulah chuan kan ding dùn a, thla a êng ruih nain êng kan chhit avàngin a lang chiang vak lo.



"A nuam ka ti!" a ti leh a.



"Kan khua hi maw? I la hmuh tlèm êm kha," ka ti phawt a, chutah,"Nia, mikhual hian nuam an ti ve țhìn a, a nuam ve a nih ka ring," nui chung hian ka ti leh a.



"In khua a nih vàng tih ka hria, i awmna a ni tlat a," a ti leh a.



"Awm lo ta ila, nuam i ti tho ang em?" ka ti leh a.



"Ti lo ang," a lo ti ve mai bawk a.



"Naktûkah ka lèn kualpui dâwn che nia, lènna tham tak tak phei chu tling lo mah se kan lêng tho dâwn nia," ka ti a, chutah," Ka pa khân zawhna khirhkhàn tak tak a zâwt che em? I rilru tihnawm loh phahna hial tùrte?" tiin ka zâwt zat a.



"Zâwt lo."



"Tak tak?"



Min chhâng tawh lo chuan ka kâwngah a rawn kuah ta thãn a," Zanin chu i bula awma hetia kuah reng mai che hi ka duh," a ti ta sup a.



Kan țawng ring lo, kan pahnih bâkin kan hre lo ang tih tùr khawpa zàwiin a nia kan țawng ni.



"Ka âwih lo, ka bulah pawh i lo inkhâwm duh loh kha," ka ti a.



"Inkhâwmnaah Taitea bula min țhuttîr i tum a nih kha."



Ka nuih a za khawp mai.



"Nula leh tlangvâl kan țhu tlâng ngai hleinem, nula chu tlar hmasa lamah kan țhu a, tlangvâl chu tlar hnung lamah an țhu a," ka ti a.



Rei pawh kan titi hman lo, Taitea a rawn haw a, kei pawhin a room chu ka chhuahsan ve deuh nghâl mai bawk a.



A tûk tlaia kan lêng chu nuam ka ti khawp mai. Car kan la chhuak a, ka pa phalna thlapin. Khawpui chhûng tih lohah chuan ka khalh ngam ve mai a, ka khalh ve zauh zauh; mahse, ka thiam tak tak thei lo ang, ka dâwih ém mai.



Motor khalh pawh a lo thiam leh zêl mai a, mak ka ti ru viau a ni. Khawi ațangin nge a lo thiam ve ni, scooty khalh kha chu a har lêm lo va, ka hre thiam mai; mahse, motor leh zêl a lo khalh thiam hi chu mak ka ti viau tawh a ni.



"Khawi ațangin nge i khalh thiam a?" ka ti ta nge nge a.



"Taxi ka khalh țhìn alawm."



A chanchin hriat loh ka la ngahzia ka hre chhuak vawng vawng mai.



Mazuali nèn chuan kawngpui bula phùl hmun cham duaiah chuan puan kan phah a, wai wai leh eng eng emaw ei tùr kan ken chu siamin kan chawhpawlh kual a. Kan bul lawkah chuan Thlado kung a ding luah a; mahse, ni a her hniam ve deuh tawh avàngin a hlim a awm thei lo thung.



"Lo kal rawh, kan siam zo a nia," tiin ka ko a.



A rawn kal ve mai bawk a.



Mahse," Naupanchhiatthlâk êm mai a!" a ti sup a, a inher leh nghâl daih a.



"Lo kal mai mai teh, a tuina lam ai mah chuan eiho a nuam ve alawm," ka ti a.



"Ei thuai ula, in ei zawhah car khalh ka zirtîr zâwk ang che," a lo ti thung a.



Min han zirtír ve ngei a, a bula awm chuan thlamuang hliah hliah tùr ka nih laiin ka nervous tlat mai a nih chu.



"Ka bulah i awm a, ka inring tâwk thei tlat lo, min dîp rùn mai zâwkin ka hria," ka ti a.



"Vèn che ka duh si alawm," a tih chuan," Min en reng lovin hmun dang daihte en ve tal la? Min en khãn ka zãm alawm," ka ti leh a.



*******



"Motor i khalh thiam tho sia, motor khalh tùrte hi zawng ve la?"



"Hlâwk tak tak tùr chuan ka pa ka chhuahsan reng a ngai dâwn asin, a upa ve tawh si a, kalsan reng chu ka thei lo a ni," a ti a.



"A, hetia mi hnuaia ni sensa hnuaia inhlawh ai chuan a zia ang chu ka tih vàng a nia," ka tih chuan," Ka hria alawm," a lo ti leh mai a.



Ka ngawi deuh vang vang phawt a, chutah," Taxi i khalh țhin lai chuan i hlâwk ve țhin em? Lungleiah hi chuan a ni lo ang tiraw?" ka ti a.



"Ni lo, Aizawlah a nia."



"Aizawlah chuan in awm tihna maw?" ka ti leh zêl. A chanchin hi zawh chhuah deuh loh chuan amah hi chuan min hrilh mai mai khât si a, zâwt deuh țeuh ang.



"Aizawla pianga sei lian alawm ka nih."



Chuti si, engtin nge Lungleiah an rawn awm daih theih? Khawpui zâwka awm an ning tihna nge, a nu vàngin Aizawl chu chhuahsan an duh ni ang le?



"Engati nge Lungleiah in lo awm daih a?" Dîlchhût ta rêng rêng hi ka ni ve a.



"Ka pa hian a duh tlat a."



A tâwi ve thei chiang a ni.



"Lo phei lo ta ula chuan kan intawng àwm tawp si lo," ka lo ti a.




"Ka tawn tho che ka ring," inrin tâwk hmel fê hian a ti a.



"Engah ngawt maw?" ka tih chuan," Ka ring nghet bur," a lo ti leh mai a.



Ka pa pawh a zia ve viau ta. Thlamuana leh Rose-i ka hruai chhoh ve hnuah khân vawi khat dang an lo zin leh tawh a, Thlamuana phei chu ka pate nèn an lo inhriat sa tawh avàngin a mikhual vak lo. Ka pa chuan fel hi a ti mai mai khawp a, ka hriatah pawh a sawi zauh zauh ta.



Taitea'n nupui a nei dâwn! Ka làwmzia mai chu, Taitea, ngaihzâwng nei ngai miah lovin hmeichhe pakhat a tawng ve a, chu pawh thla ruk êrh âwrh chauh an inzui hman tihah nupuia neih a tum ta mai si a.



Rinfela pawh ka hrilh ve a; mahse, ani chu a hman dâwn lo. An hna thawh a laklawh lutuk a, nikhat lek pawh pèn bosan theih a ni lo.



"Nuam takin hun i han hmang dâwn nia," tiin min thlah thlap.



Rose-ite chhûng leh Thlamuana erawh an rawn kal thei dâwn a, a zia viau. Hmeichhe lam chhûngte an rawn kal țeuh ang a, mipa lam kan mualpho lutuk dah ang e.



Chhúngkua kan han inhmu khâwm a, kan upa berte pawh an chhûngin an rawn kal, inhmuh khâwmna hun țha tak a ni.



Taitea chuan lawmpuitu a ngah ngang mai, mi lo felzia ka hriat thar phah. Thilpêk lah an dawng ţhahnem
a, dahna tùr kan nei lo zâwk a ni.



Kan thlalâk hrang hrang chu a hmuh ve duh avàngin ka thawn ve a, a duhthusàm rawng(pink) kawr ka ha a, khua a lum avàngin hmuh nuam ka ti a.



*I mawi thlâwt! Mo ai pawhin i nalh daih zâwk a nih hi," tiin min fak ve a, kei pawh chuan nuam ka ti ru, min fak ve a ni si a.



*Kha pa, in ina lo lêng țhìn kha a lo kal ve a ni maw?* a rawn tih chuan Thlamuana a sawina a ni tih ka hre nghâl.



Thlalâk ka thawnho chu ka en dan dan a, Thlamuana a lo kal ve a ni tih hriatna tùr chu ka dap kual a, ka hre mai lo tlat.



*Aw, Rose-i'n a sâwm ve a, kei chuan ka sâwm miah lo a nia, ngaih tihțhat loh nân hmang suh aw* ka ti a.



*I sàwm lohin a lo kal ve ngam ngawt dâwn mi?* a rawn ti leh..



A ni si lo; mahse, min rinhlelhna hi ràlkhat ațang chuan a àwm ve tho, Rose-i'n a sàwm khân keimah min rawn en a, lo kal a châk ve si a, hnial tùr ni àwm tak ka nih laiin ka thei ta bîk lo a ni.



*******


Taiteate inneih ațanga rei lo têah chuan an nu chu a ruak lo ta thuai a, kan chhûngkua kan hlim tlâng viau mai. Member kan pun belh dâwn si a.



Ka pa erawh ka rin aiin azia chak lo tlat. A damdawi ei a ngeih tehchiam lo emaw ni ka ti, Aizawlah kal leh se, va inentîr nawn leh se ka ti.



"Pa, va kal leh mai ţha i ti lo em ni? I damdawi kha i ngeih vak lo pawh a ni thei a," ka tih chuan ani chuan," Dam hi han hauh phawt ila, hun remchâng kan neih hunah kan la kal leh ang chu," a lo ti a.



Ka nawr lui duh ta bîk lo.



Chutah,"Bawihte, nang pawh hi pasal lam hi ngaihven thuai la a țha ka ti. I hun kal tawh kha theihnghilhin nun thar nei tawh la ka ti khawp mai. I nu nèn kan la dam țhat lai hian nei ve thuai la ka ti hle a ni," a ti leh a.



"Pa, pasal neih ka la duh rih lo," ka tih chuan," Ngaihzâwng nei phawt rawh. Mipa pakhat avàng hian mipa zawng zawng hi an rinawm lo tihna a ni lo a nia, mi țha an la tam lutuk. I țhianpa Thlamuana pawh kha mi fel tak a nih kha, sum leh pai lamah lah ngaihtuah a ngai si lo, mi țha tak nei tùrin ka duh che a ni, thlamuang taka ka awm theih nân," a ti leh a.



Ka pa hian Thlamuana hi a ngaina viau mai a, mâkpa atân pawh a hnial hauh lo tih ka hre thiam ve nghâl mai. Hetia pasal nei thuai tùra min han duh viau hi eng nge maw a awmzia le? Ațana nèna kan ințhen dàn kha a mawi fahran si lo va, amah avànga la na renga ngaihzawng nei lo angah min ngai a nih ka ring.



"Pa, ka hmanhmawh tawh rih lo, bâkah, duh chu ka nei tawh a, ani pawhin min duh a; mahse, inneih lam chu kan la sawi ri lo hrim hrim," ka ti chhuak ta a.



"Chu chu tu nge ni a?"



Ka sawi duh rih lo. Ka sawi loh avàngin harsatna a thlen loh erawh beisei ila, a theih chen chen chu sawi chhuah loh ka la duh si a. Ka zahpui lam ni lovin leh ka chhûngte hriattîr ka duh lo lam ni lovin a nuna harsatna hi a theih ang anga chin felpui hmasak phawt ka duh.



"I hre chuang lo ang," ka ti phawt a, chutah," A nunah harsatna tam tak a tâwk ve a, nupui neih êm chu ani pawhin a la inring lo ang," ka ti leh a.



"'Engtia harsatna nge ni a?" a ti leh a.



"Fahrah a ni ve a, a tân chuan khawvél hmachhawn hi a la harsa ve rih êm a, nupui nei tùr ngat phei chuan..." ka ti a, ka sawi zawm duh lo a.



"In induh tawn phawt chuan a țha alawm. Fahrah pawh ni se mi țha tak a nih chuan a țha a ni leh mai, kohhran bèl mi erawh ni se, sum leh pai lamah nei lua lo mah se hei, i pa ka la dam a, ka fanu hi i retheih ka phal dâwn rêng réng hleinem," a ti leh a.



"Ka lâwm e, Pa."



Mi țha, kohhran bèl mi. Hei tak hi alawm buaina. Rinfela a ni tih ka hrilh duh rih lohna pawh a chanchin engkim an chhui ve ang a, an fanu bialpa ve meuh chu. Mi lahin mi chanchin a țha lai aiin a chhe lai sawi nuam ka ti țhìn si a, an hnêna țha taka a chanchin ka thlen theih nân hun ka la mamawh rih a ni.



*******



Zàn kan inkhâwm bângin ka hmu leh ta. Ka hmu khât ve tawh riau a nia; mahse, tûnlai tê hian kan hmuhna hmunah khân an awm deuh laih laih leh tawh! Zanin phei chu hmeichhe țawng ri ka hre tel ve tlat. Chhùn lamah kha chuan hmuh tùr an awm lo kha a ni a, hmun dang ațangin an rawn kal khâwm ve pawh a ni maithei a ni.



In ka thlen veleh ka text a.



*Zanin khân țhu khâwm zîngah khân i tel ve em?* ka ti. A awm ka ring nghet tlat, anni țhianho awmna kha a ni ve tlat mai si a.



Min rawn chhâng lo. Phone hi a khawih khât a niang, call pawh hian min chhâng khât lutuk. Phone a chhàn theih loh miau chuan inhmuh pawh a khât, a chanchin lah ka hre tam lo si.



Hetia a awm țanna hi Taiteate inneih ațang khân niin ka hria. Ka thlalâk ka thawn zîngah khân ka sîr hnung deuhah fiah vak lovin a lo lang tel ve pek a, kei lahin chu chu ka lo chîk si lo. Min rawn zawh hnua thlalâk ka en ka en hnuah ka hre ve chauh rêng a ni. Kha kha ani chuan a rawn hre chat a, Thlamuana a rawn kal ve a ni tih a rawn hre ta chiah rêng a ni.



Zànah kan inhmuhnaah a rawn kal ringin ka kal zauh zauh a; mahse, a reh vung vung si. Ka phone a chhàn ve chhunah lah hna a thawk hah deuh a, a chauh thu a sawi mai a, chu erawh a chhuanlam ni berin ka hria.



Hetia a awm hun lai tak hi min mamawh hun lai tak nia ka rin a ni.



*Kan inhmuhnaah khân i lo kal ka ring țhìn a* tiin ka text leh a.


Min chhàn loh bâkah phone a khawih lo hrim hrim a niang, a 'seen' hauh lo.



*I hman hunah inhmu ang*



*I dam țha tiraw?*



*Kan inhmu khât tawh e, ka ngai tawh che a nia*



Taitea nupui neih hnua Lungleia ka chhuk thlâk hnu ațang khân hmaichhanah kan la inhmu miah lo, a rei ve deuh ta, thla khat chuang lai a ni tawh! Ka ngai lutuk tawh ringawt, a lungawi lo tih chu ka hre tho a; mahse, hetiang êm hian a awm ka ring phal lo, min thlahlelin a theih tâwk chuan min ngaihsak ve țhìn kha a ni si a.



Mahse, ka la puh chhe phal chuang lo.





*ȚAWNG TAM LEH LUTUK HIAN BUAINA NASA TAK A THLEN THEI A, ȚAWNG TLÈM LEH LUTUK PAWH HI BUAI LOHNA TÙRA BUAI HREPNA A NI VE THEI THO, A TÂWK HRIAT A NGAI A NIH CHU*

[Ngaia]

☆24/7☆ - 24 By Dingdi Pachuau





Han thinrima han biak duh loh tum ve ta ila chuan ka thei ve mai ang; mahse, ka khawngaih dâwn lutuk! A lungawi lohna lah ka hre chiang mai si, a thîk tih hi ka hre reng a; mahse, 'polite', mi ngaiha mawi leh phung ka thlûk vàng a ni tih ka hria. Amah hi ka lo dah pawimawh tâwk lo deuh niin ka inhre tlat a, keima lamah thiam lo intihna ka nei tlat a ni.



Bâkah, min ringin min dah 'cial' êm kha, keimah vàngin hmeichhia pawh a ring chho ve țan a ni a, ka tichhe thei lo. Kei pawh hian ka phal thei lo ang, a dam chhûng maia min han hmu 'rinawm lo' mai tùr chu ka ngai ngam hlawl lo.



Rose-i pawhin kan chanchin chu min zâwt ve zauh tawh, a chhan chu zànah ka chhuak khât ta deuh a, ka chhuah chhunah lah ka rei ngai si lo nèn, ka rinhlelhawm ve deuh a ni.



"A thîkthu a pe chhe ve hle mai maw? Biak i tum i tum a, biak theihin a awm duh lo tlat a. Hm, be tawh miah suh, induh khum ve rawh. Biakpawh i tum reng chuan i duh lutuk angah a ngai mai dâwn asin, inchhuan khum hun hi a awm ve a nia," a ti a.



"Mahse, ka duh êm asin, ani pawhin a hre tho alawm," ka ti a, Rose-i bulah hi chuan ka sawi chhe duh lo, tu bulah mah ka sawi chhe phal lo ang.



"Duh e, i duh a, i nihpui rêng a; mahse, a ni êm êm tawh lo, a rilru a tê a nih hi. A lungawi lohna a tilang a, nangin thu dik sawi fiah i tum nasa tawh a, chance a pe duh lo che a. Ve mai mai a! Be tawh miah suh," a ti leh hlaih hlaih a.



Min thinrimpui tih ka hria, min țan vàng a ni; mahse, ka hawisan thei lo ang, hrehawm ka ti dâwn êm asin. Ka biak loh chuan ani hian min rawn be hmasa dâwn lo a, min ngai pawh ni se tlâwm zâwkah a rawn țang hauh lo ang. Kan inkâr buaina chhan lah kan hre ve ve bawk, buaina tikiang theitu chu keimah chauh ka ni.



Vawi hnih khat tal chu biak leh ka tum tho ang, Rose-i hriat lai erawh chuan ni lovin. Ani hi chuan Rinfela dinhmun dik tak, a thil lo paltlang tawh zawng zawngte a hre ve lo, dawm hrâm hrâmtu ka nih a ngai asin. Min ring a, a chanchin pawh min hrilh a ni a, phatsantu ka nih leh si chuan...



An ina zu kalchilh chu ka ngam bîk lo, tlàwm thu-ah hrim hrim chuan ka ngam lutuk; mahse, ka zak tawh. A hmeichhia zâwk mipa ina kal ziah chu.



Ka text a, a en ngai chuang lo. Phone call pawh tunah chuan a tlang thei tawh lo, 'switch-off' a ti tlat tawh! Ka biakpawh hi a lo duh lo takzet tawh a ni ngei ang.



Mahse, ka beidawng thiang lo ang. Vawi khat tal hmaichhanah ka biak a ngai, heti maia kan inkâr titàwp tùr chuan kan hun hman tawh zawng zawng kha a pamhmai ka ti.



Thlamuana a lo la lêng zauh zauh a; mahse, mi pângngai chunglam a ni a, ninawm khawpin a lêng ngai lo. Rinfela'n thîk viau mah se, tlangvâl a ni a, lo lëng lo tùrin ka ti ngawt thei lo. Mi fel tak a ni a, ka be chhe thei ngawt lo a ni. Ka ngaizâwng lo tih hi chu ka chezia ațang hian a hre tawh ngei ang; mahse, lo lèn a țhulh phah chuang lo va, min beisei ang pawhin a awm chuang lo.



Zan khat chu thla a êng êm mai a, kan room light pawh on duh lo chuan tukverh ka hawng a, pâwnlam chu ka thlîr vang vang a.



Zanin chu Thlamuana a lo lêng lo va, Rose-i lah Kohhran țhalai lamah meeting an nei bawk a, thla a èn êm avàng chuan ka la mu peih rih lo a ni.



Eng nge tûnah tak hian a tih ve ang? Thla a êng nuam viau a ni tihte hi a hre ve ang em? Khawiah nge tunah tak hian a awm ve ang le?



Kan inhmuh rûkna țhin thing buk lam chu ka thlîr a, sawtah sâwn kan inhmu ru ve fo anih kha, tunah chuan a reh ta raih mai. Zànah dàwr tëa ka kal haw hi ka awm zauh zauh a; mahse, a hmêl hmuh tùr a awm ngai loh avàngin ka awm rei ngai lo thung.



Chë ka hmu tlatin ka hria!



Ngun leh zualin ka han en a, a chiang e. Mihring ngei a ni, sawlaiah sâwn Rinfela nèn kan pahnih tiam lohin, tu mah an kal ngai lo. Chhùn lamah chuan ka pateate nupa chu an kal ve maithei tih chauh a ni.



Chuti a nih chuan, a mah ngei a ni.



Ka hriat loh hian a lo kal reng reng țhìn tihna em niang? Ka kal laia kal lo hian ka kal loh veleh a kal ve a ni mai lo'ng maw? Kan intawng fuh lo țhìn a ni ngei ang.



Ka en reng a, a che sawn a, a awm ngaia rei angreng deuh a awm hnuah a che sawn leh a, chutiang chuan a insawn kual deuh chhên a.



Ka va kal ve mai dâwn em niang? Phone-a dâr zât ka en vat a, dàwr têa kal chhuanlam nân chuan a tlai mah mah tawh, dâr 9 a pèl tawh! Kei pawh room-ah ka awm daih tawh hi. Bâkah, pateate nupa an la meng a, an awmna ka kal tlang ngei a ngai dâwn zui, nula mahni chauha chhuah nân chuan a tlai tawh, a mawi lo bawk ang.



Ka en reng a, pateate bulah TV en khân lo țhu lo ila chuan...



Chutah, a ding hluai a, che sawnin a kal sawn ta. A lan theih chhûng chu ka thlîr reng a, auh mai châknain ka khat a; mahse, ka insûm thei hrâm a ni.



Engati nge phone-a ka biakin min chhàn țhat duh loh? Chhuanlam a siam zêl a nih kha; mahse, min hmuh tumin kan in bul, kan inhmuhna țhinah a rawn kal leh tho si, eng nge a awmzia?



A tûk zàna ka dàwr te kal haw ka pèn chuan tu mah an lo awm lo. A lo awm ka ring deuh ringawt a nia.



Ka țhu deuh rèn ráwn a, dârkâr chanve dâwn chu ka țhu ang; mahse, a hmel a rawn lang lo mai ni lovin thâwm pawh a rawn nei hek lo. Lunghnûr zetin in chhûngah ka lût leh ta a.



Kâr tàwpa kan khuaa haw pawh ka phûr zar tawh lo khawp mai. Kan pahniha hlim taka kan inphurhna kawng kha a ni tawh si a, mahni chauh chuan a khawharthlâk a, ngaihtuahna a kal ding duh viau bawk. Amah ka ngaih a zual a, ka biak theih leh hmuh theihin a inlâr duh tawh si lo.



Ka pa lah chuan," Bawihte, i bialpa chu rawn zinpui ve chhin hrim hrim la, hmuh pawh a châkawm alawm," ka haw azâtin a lo ti ziah; mahse, ka chhâng țha ngai lo. Tunah chuan Taitea nupui a awm tawh a, ka awm loh a lang vak tawh lo, min ngai lutuk tawh lo deuh bawk ang, haw chhoh loh zauh pawh a theih deuh tawh bawk.



Inrinni zàn inkhâwm bàna kan haw chu Rinfelate țhianho ni awm tak kha an lo awm leh țaih a, thla a èn avàng chuan a țhente phei chu an hmuh chian theih viau mai.



Hmeichhe țawng ri ka hre leh ta. Mipa hlîr chu ni se an țhu khâwm chu àwm lo ka ti hran lo; mahse, hmeichhia awm tel ve tlat chuan ka rilru a la tlat, mak ka ti a, chutiang mai maia hun a hmang leh mipa awmnaa a awm ve tlat chu ka khawngaih viau bawk.



An țawng deuh bul bul reng a, keini inkhâwm bâng erawh kan ngawi țhap a, kan pelh dâwn chuan hmeichhia chuan,"Min thlah haw tawh ula, chaw pawh ka la ei lo bawk si lo," a ti
niah niah ri chu ka hria a.



Aw thûm zetin a chhànna chu chiang takin ka hre thei lo; mahse, hmeichhiain nui hak paha," Rinfel, tak tak tiraw? Hawh, min thlah rawh aw," sehchilh tih hriat taka a tih chuan min dêng dawt mai!



Rinfela chu a lo awm ve ngei a, hmeichhia pawh chuan a hmingin a ko ngei, amah thlah tùrin a la ti zui.



Ka thinlung chu thîkna meipui hian a alh nghâl hluah hluah maiin ka hria! Nula an awmpui a, zu an inpui a ni ngei ang, a rui ngei a ni tih pawh a țawng sehchilh dàn ațang khân a hriat theih kha. Chuan, chu nula chu Rinfela chuan a thlah haw ngeiin ka ring bawk.



A ruih viau phei chuan kuah a ngai ang a, a kuah ngei ang. Kuah mai lo deuh pawhin, pawm pawh a ngai hial maithei. Nula dang a fâla a han kalpui tùr chu ka ngaihtuah zâwng ringawt pawhin hrehawm ka ti, ka thîk ngawih ngawih!



"An zak hlawl lo! Zahna hi an pianpui ve lo a niang," kan hawpuinu chuan a ti hlaih hlaih a.



Rose-i piaha kal ve thung chuan,"Khawvêl hi a mak tawh khawp a, hêngte pawh hian khawvêl hi a tàwp hnai tawh tih a entîr alawm, hun hnuhnung a ni tawh miau mai a," a lo ti a.



Pu Liana chuan," Țawngțaipui an ngai asin, hêngho hi chhûngkaw keh chhia ațanga rawn sei lian an ni duh tlângpui a, hmangaih taka enkawltu leh dawm kãngtu, zilhtu an neih loh vàng pawh a ni thei a nia," a lo ti thung a.


"Mipa hi chu hruat thiamna chin ka la nei thei a, hmeichhia leh zêl hi chu a mawi lo mai ni lovin hming chhiat a awl a, mi ngaihah pawh a mawi hek lo," pakhat chuan a ti leh hmarh hmarh a.



Rose-i nèn erawh chuan kan ngawi reng thung. Ka ngawih chhan erawh a dang daihin ka ring, Rinfela hming hmeichhiain a rawn lam ațang khân țawng chãkna ka nei tawh lo, kawnga an thu sawi pawh chu ka ngaihtuah zui peih vak lo.



Ina kan luh dâwn chuan Rose-i chuan,"Kha mite thil sawi kha i hriat kha, Rinfela hian duh ni se chuan a rawn be daih tawh ang che, zaninah pawh a lêng chhuak reng a, rawn hmuh chea titipui che a tum chuang lo tih hriat reng, hmeichhia an la awmpui zui, theihnghilh hmak tum ang che," a ti sar sar a.



Thâwk ka la hawk ringawt.



"Mi pângngai tak a ni dâwn lo, kha hmeichhia kha. Chuvàng chuan, Rinfela pawh hi a hlauhawm tawh lo ang tih a sawi theih loh, tûnlaiah chuan fîmkhur hi a ngai tawh teh a nia, a țhian kawmte lah hi biak in dai ngai rêng rêng lo hlîr an nih hi, engkim ti thei vek tùr chi," a ti leh a.



Rose-i lah hian min hnem ahnêkin ka pûnah chì a rawn hnawih belh zêl mai si, rilru buai tawh sa nèn, hrehawm ka ti vawng vawng a ni.



Heti ringawt hi chuan ka tuar thei lo, ka hmuh a ngai. Min hmuh duh lo mah se keiin hmuh ka duh miau si chuan ka hmu thei ngei ang. Hmuh a ngai, engti kawng zãwng pawhin ka hmuh a ngai.



Min hriat thiam duh tlat loh leh a nih nih kan ni mai ang chu, nakina ka inchhìr loh nân tûn hi hun țha a ni. 'Chuti chuan ka lo ti lo a' emaw 'khati khân lo ti ta ila, a dik zâwk àwm sia' tih anga inchhìr tawh hnua thil sâwt tawh si lo ngaihtuahna neih ang kha ka duh lo, hun țha hi ka bawh chat mai ang.



Ka phone theih tawh loh avàngin phone hmanga biakpawh chu ka tum tawh lo, a tlâwm thei ang berin, a tàwp nân chauh, an inah ka kal chilh mai ang, zah pawh a sawi theih tawh loh. Ka va tlâwm chiang dâwn tak!



Pathianni-ah chuan ani pawhin hna a thawk bîk nâng. Ina a awm loh leh a haw hun ka nghâk mai ang, chaw ei tùr chuan a haw ve êm ang chu maw.



Inkhâwm bànah Scooty ka la chhuak a, Rose-i bulah chuan thu dik ka hrilh, Rinfela hmuh ka tum thu chu. Ani erawh chuan a hmel ațangin rem a ti lêm lo tih ka hria; mahse, min hnial lo a, 'kal rawh, kal suh' pawh a ti chuang lo, min en liam tawp ringawt. Ka pateate bulah erawh chuan thu dik chiah lo ka hrilh thung.



An inah chuan a lo awm lo ngei a, a pa erawh a lo awm a. Ka hmu khât ta deuh a, a lo tar ve leh deuh sawtin ka hriat chu; mahse, a bulah erawh chuan ka sawi lo. A dam țhat leh țhat lohte chu ka zâwt a, ei tùr ka ken pawh chu ka phawrh nghâl bawk a.



"I lo lêng duh tawh lo a niang ka lo ti a, Bawiha hnênah i chanchin ka zâwt fo asin," a tih chuan ka rilru chuan engtin tak Rinfela chuan chhâng țhìn ang maw tih ka lo ngaihtuah hman.



"Kan khuaah ka haw țhìn a, ka lo lêng hman lo alawm," tiin ka chhâng a, dâwt ka sawi bîk hleinem le.



"I chhûngte pawhin an ngai ve țhin khawp tak ang che chu, nula fel tak i ni si a," min tih chuan min fakna avàng chuan ka nui sak a.



Ka awm ve reng. A rûk tak chuan ka zak ve tho; mahse, ka kal ta sa sa, amah hmu lo chuan haw ka tum lo. Zah ka tuar tawh a, engkim huamin ka kal tawh a, he ka zah paltlangna hian rah țha a chhuah loh ka duh lo.



Rawn haw har chu ka ti ve thlâwt alawm, khawiah nge heti chen chen a lèn peih ni. Ni tin hna thawkin a chhuak a, Chawlhni-ah tal chuan inah awm ve tùr a ni asin le.



Tlai dâr 4 rîk dâwnah a rawn haw ta. Kawngkaa a rawn luha chair-a ka țhu min rawn hmuh chuan makti hmel pawh a pu duh lo!



"Eng nge i lo tih a?" pawh min ti lo chuan room lamah a lût tlang nghâl a, tlâwm ka inti vawng vawng lutuk! Thawh lawka an in hi chhuahsan nghâl vang vang ka duh thut thut a; mahse, ka kal chhan ber a lo haw tawh a, chutia ka tih leh si chuan ka kal chhan kha awmzia a awm dâwn si lo.



A pa chuan," Bawiha pawh a lo haw tawh kha, ka'n zâl ve lawk ang e," tiin a tho țaih țaih a, chance min pe ve deuh nge pawh ka hre thiam lo, kan inkâr buaina hi a hre ve lo tawp pawh a ni mahna.



Room ațanga a rawn chhuah chuan thingpui a va insiam ni maiin ka hria, ka en zui tawh lo tlat a, ka hre tawh bîk lo a ni.



Chutah, ka hmaa dawhkànah chuan thingpui no rawn hûngin," In rawh," a ti nghut a, ani erawh chu a kal sawn leh ta nghâl a.



A pa khân thingpui min siam a tum khân 'A ngai lo' ka ti tlat a, ani ve thung hi chuan min râwn hauh lovin min rawn siam mai a, ka lâwm lo viau nain ka lâwm ru viau tho, ka ril a țâm ve deuh tawh a, chhùnah khân ka helhhawlh avàngin eng mah ka ei thei lo a ni.



"Inbia ang,"zak duh bîk lo chuan ka ti a.



"Hei, kan inbiak hi."



A lo ngeiawm thiam tho a nih hi. A nungchang pakhat ka hre chhuak leh e.



"Kan inkâr buaina chungchângah hian alawm inbia ang ka tih," ka tih leh chuan," Buaina a lo awm a ni maw?" a ti leh sup a.



Ka inhûm ruh ta.



Ngeiawm chhuah mah se ka sawi duh chu ka sawi tho ang.



"Thlamuana hi ka eng mah a ni lo, Rose-i thawhpui, țhian ang chauha ka kawm a ni. I thîk tih hre reng chungin eng vàngin nge ka biak țhat viau ang? Ka be chhe lo a, chu pawh țhian ang chauha ka en vàng a ni, ani pawhin min ngaizâwng lo, țhian ang thovin min en," ka ti duah a.



"Dâwt sawi i inhmeh lo a nia," a rawn tih chuan," Dâwt ka sawi lo, țhian ang bâkin ka be lo. Taiteate inneihni pawh khân kan khuaah kei lo hmel hriat nei hek lo, min zui mai loh chuan. Thlalâka a lan tel deuhna kher ka lo thawn che kha ka tihsual a ni, a lang tih pawh ka lo hre hauh lo. A lang tih chu hria ila, ka lo thawn tawp lo ang che, i thin a rim ang tih chu ka hre lâwk ve tho alawm," kati leh a.



Țawngkam ka thiam loh avàngin ka thil sawi chu a inlehluh nawk nawkin ka hria.



"Nuam i ti viau lo'm ni?"




A țawngkam hian min va tina tak! Nuam ka tih viau a lo ring a ni maw? Ani nèna kawpah hian min ngai a ni ngei mai a, ka kawp lohzia hi hrilh fiah dàn awm se ka ti takzet.



"Hetiang hian awm suh, ka rilru i tinâ a nia."



Min rawn enin a hmui chu a tisàwi a.



"Engah nge a nat ve ngawt?" a tih chuan," Ka thil sawi chu ngaihtuah chiang teh, ani Taiteate inneihnaa a lo kal avàng khân kan inngaizâwng tihna a ni lo, Rose-i sàwi hmuh avànga lo kal ve zâwk a ni. Ka sâwm lo, nangmah bâk sàwm ka nei lo," ka ti leh a.



Kan ngawi vang vang a, a rilru erawh ka la hneh thlâwt lo tih a mitmeng ațang chuan ka hre thei a.



"Sawipui che ka duh a, hre thiam tùrin ngaihtuah la ka duh hle bawk a ni. Thlamuana hi kan inkâr tichhetuah hman ka duh lo, khawngaihin, hriat thiam tum teh, ka rilru tak tak ni lo i hnênah hian ka sawi ngai lo a nia, nangmah chiah ka duh che a, mipa dang ka melh ngai lo, min biak erawh chuan ka be ve mai chauh a ni, chu pawh țhian ang chauhin," ka ti leh tlawk tlawk a.



Ring se ka duh si, ani lah hi a luhlul ngut bawk si, hahthlâk ka ti.



A ngawih reng avàng chuan," Nizàn khân kha nu kha i thlah haw ta em?" tiin ka zâwt ta daih a, ka rilrua awm reng a ni a, ka zâwt lo ang chu ka ti ve reng; mahse, ka invêng sêng tawh lo. Ka hriat châknain min tur nasa tawh lutuk.



"Aw..."



Ka rin dàn chiah. Ka ring phal meuh lo a ni zâwk, ka ngaihtuah thui duh lo.



"A rui viau em?" ka ti leh a.



"Aw..."



A ruih viau chuan...a chêtsualpui kher lo maithei, ti ila hmeichhe rui tawh hi chuan insùm theihna hi an tlachham ve tawh a, an harhfìm laia an tih ngam lêm loh pawh hi an ti ve fo asin.



"I chêtsualpui em?"



Ka en ngam lo, chhuat lam ka bih ràn mai.



"Eng maw?!!"



A hre reng sia, min han zâwt lui leh sak a.



Din uaih pah chuan," Ka sawi tam ta, ka sawi duh ka sawi tawh bawk a, ka haw tawh ang e," ka ti a.



A ngawih rengna chuan ka rilru a tina zual. 'Haw rih suh' emaw 'Kal suh, ka ring che alawm' emaw a tih ka ring a nia; mahse, a ti si lo. Min ring thei lo a nih hi, min rinna kha ka tichhe tak tak ta a nih hi.



A va na vawng vawng tak êm! Ka insawi fiah chung pawha min ring thei lo a nih chuan tih ngaihna dang a awm tawh lo, sawi fiah leh ngaihna ka hre tawh hlawl lo.



"I pa chu min lo mangțhasak mai rawh," tiin ka bag chu ka la a, kawngkhàr lam chu panin," A pawi ka ti takzet," ka ti leh sap a, țawng chiam pawh a ngai tawh lo, a tàwp vek tawh.



A tàwp tawh tak tak.



He in hi ka dai ngai tawh dâwn lo a ni, a chhûnga chêngte erawh hi chu hmuh châng a la awm zauh ngei ang, chutih hunah pawh chuan hmel hriat loh ang mai a ni tawh dâwn si, min be duh tawh lo ang a, keiin biak châk viau mah ila ka be ngam tawh lo ang...



Ka mittui lo tla mai tùr chu ka dang kîr hrâm hrâm a, ka khap deuh sak sak bawk a.



Kawngkhàr ka hawng tùr a chelhna ka vuan chiah tihah chuan,"Ding lawk teh," tiin ka bânah chuan a rawn vuan nghâl a.



Ka mittui chu ka khap per sak mai.



"Eng nge?" ka ti sap a.



"I sawi duh i sawi tawh a, keiin ka la sawi ve lo," a ti sup a.






*VAWIIN, TÛN HUN NGEI HI NI PAWIMAWH LEH HUN PAWIMAWH BER A NI A, NAKTÛK ATÂNA INBUATSAIHNA ȚHA BER PAWH TÛN HUN, VAWIIN THO HI A NI*



(A tawi lutuk tawh bik lo ang chu maw?

In hmel hriatte, in țhiante bula 'min lo biak rawh' tia in rawn chahte khân min hrilh a, ka lâwm khawp mai, tlangvâl ni kher lo mah ula A làwmawm dàn a ril raih a ni🥰

Chuan, ka lo biak vek che u aw)





https://chat.whatsapp.com/F5M6GiQvBic4qATfXaGwBc


Han join leh chur chur teh u, eng lam nge pawh ka hre lo

Ads i la click ve lo a ni maw? A hnuaia ads milem khu lo click ve rawh le
Ads i la click ve lo a ni maw? A hnuaia ads milem khu lo click ve rawh le
Ads i la click ve lo a ni maw? A hnuaia ads milem khu lo click ve rawh le