☆24/7☆ By Dingdi Pachuau (Completed)

Episode nei ho a hlawm a dahkhawmna
Ngaia
Site Admin
Posts: 25813
Joined: April 30th, 2016, 4:07 pm

Re: ☆24/7☆ By Dingdi Pachuau (Completed)

Unread post by Ngaia » October 25th, 2020, 3:36 pm

☆24/7☆ - 37 By Dingdi Pachuau




Ngawi vang vangin min en reng phawt a, a dâwt sawi dàn tùr a ngaihtuah rih pawh a ni mahna. 'Dâwt tel lo' kha kati kher bawk si a, ngaihtuah nasat a ngai ve dâwn ém asin, âwihawm taka sawi thiam a la ngai dáwn zui.



"A ngai leh lo. Min hrilh duh suh, thil thleng tùr a thleng vek tawh a, hriat kher a țùlna pawh a awm lo. I insawi fiahna chuan thil kal tawh kha siam țha leh vek thei se chu thu dang a nia, awmzia a awm tawh dâwn chuang si lo," ka lo tih khalh a.



Tunah tak hi chuan ka rilru hi a kha takzet a ni, ka țawngkam chhuak ngei pawh chu kei pawhin mak ka inti ve tho; mahse, ka insûm thei si lo.



"Insawi fiahna...!" a lo ti sup a, mit khap lo lêk chuan min melh ngur bawk a.



"Insawi fiah ngaia i awm a nih chuan thil dik lo i ti tihna a ni mai, mipa insawi fiah zut zut mi dik tak an awm ngai lo," ka ti leh a nih chu!



Min tina ve êm a, na ve rawh se. Ka pa nèn khân eng thil pawh sawi se, min hrilh ve tùr khân ka ti a, min hrilh duh lovin a ngawi hmak a, amah pawh hmu thei lo leh a chanchin pawh hre thei lovin min dah a nih kha, nupui hial pawh min neihsan a nia.



Tuna ka țawng khum dànte kha chu a nihna dik tak a nia, nâ ti tùr a ni hleinem.



"Pangpâr vàngin làwmthu ka sawi e; mahse, lo dah duh tawh suh. E, chuan, kan inhmuh tawh loh ka beisei," ka ti a, inher nghatin ka kalsan ta nghâl a.



A duh tak tak a nihte chuan tuna ka kal pawh hi min tidingin thil awmzia chu min hrilh vek thei alawm; mahse, a ti hauh lo a nih si hi.



In ka thlen hnuah erawh ka țawng khum dàn kha ka inchhîr leh deuh. Hmeichhe râpthlâk tak hmuhin min hmu ngei tawh ang chu, engati nge khati teh hrepa ka lo țawng ni? Lo insûm ve deuh hlek ni ila țha tùr a nia aw...



Zîng țawngțainaa kal țhin, inkhâwm pelh ngai lo leh nula fel tia fak der ve țhin țawng hmanah chuan a mak deuh mah mah chu a ni, hetiang hi ka ni ngai tawp si lo. A thil sawi tùr kha lo ngaithla ta mai mai ila...



Awmzia a awm tawh lo. "Thlarau rah zînga mi insùm theihna i tlachham a nih kha, țawngțaia dìl chiam chiam lam a ni lo, nangmahin tum ve bawk ta che, a hun taka i insùm leh si loh chuan eng nge awmzia awm?" tiin ka rilruin ka inhau mawlh mawlh a.



Mazuali hnênah thil thleng chu ka hrilh ve a, ani pawh chuan," Amah maw lo ni a?!! A va mak êm êm!!" a ti phawt a, chutah,"Engah nge maw chutia i lo tih aw? I pa nèn khân eng emaw thurúk an nei pawh a ni thei a, sawitîr ve phawt tùr che alawm. Engati nge keimah ang maia i chêt? I awm dàn leh i tih dàn țhin a ni si lo," tiin min zilh nghâl mawlh mawlh a.



"Amah ka hmuh khân ka thin a rim tlat alawm, ka insûm thei lo. Amah vànga ka natna zawng zawng kha a lo lêt leh tlat a ni," ka ti ve thung a.



"Ummm...ka hre thiam tho mai che; mahse, sawitîr ve phawt tùr a nia, eng emaw tak vàng a ni ngei ngei ang tih hi ka chiang a ni," a lo ti leh a.



"A ni tih chu sawi ngai lovin a chiang reng alawm. A, theihnghilh teh ang, ka buai peih tawh lo, kan inhmu tawh dâwn chuang lo," ka bek hmet nauh nauh pah chuan ka ti a, ka mamichhîng pah bawk a.



"Chutiang sawi ringawt suh, kan Mizoram hi chu a zîm êm asin," a lo ti leh a.



"Min hmu duh tawh bîk lo ang, bâkah, inhmuhna chhan tùr a awm lo bawk. Nupui nei tawh biak theiha awm awm pawh ka tum lo hrim hrim," ka ti leh țâlh a.



"Nupui a nei ngei tih pawh i chian loh kha."



"A inah hmeichhe la naupan hmel takin naute a pua ka hmu ngei a, kha bâka chiang kha a ngai hleinem," ka ti leh a.



"Kei, nupui a neih ka ring thei miah lo nia, a inlêng tu emaw pawh a lo ni thei tho a," a ti leh a.



"I hmuh loh vàng mai mai a nih kha," ka tih chuan bân rawn pharin," Aw le, ka tlâwm chiang e. A nih, nupui a neihsan che ni rawh se," a ti chùl a.



'Nupui neihsan' tia a sawi chuan ka rilru a tina thar leh deuh tlat. Nupui min neihsan, aw, ni e, min kalsanin nupui min neihsan a, kum khat leh a chanve hnu vêlah ka hmu a, ka àn khum ve ta a ni mai, ka lo up rei ve tawh a, cheziaa min tihnatna kha keiin țawngkamin ka rùl veah ngai mai ang.



Kan ințha-țhen thei tawhah ngai ang.



*******



Ka thil hrilh erawh chuan kawngro a su lêm lo, zawm a hlawh lêm lo a ni. Ka pa thlànah chuan pangpâr a lo la dah ziah tho a, Nilainiah zêl tho a dah a nih ka ring, Inrinnia thlàn kan kalin a lo awm hman ziah.



"Pa, Rinfela hnênah khân eng thil nge i hrilh? Engtin nge hetiang hian kan inkâr hi a awm tâk daih? A chhan i hre ber ang, min han hrilh teh," tiin a ngai têin ka pa thlànlung nghèng chuan ka pa thlarau chu ka be leh mawlh mawlh a.



He thu hi ka va zâwt zing tawh tak êm! Ka kal azât deuhthawin ka zâwt ang chu, chhànna lah a awm thei si lo, a reh vung vung zêl mai si.



"Pa, min hmu reng tiraw? Ka zawhna che hi khawngaihin, min chhâng tawh teh, i ngawi rei tawh êm mai. Ka hlimna i duh ber țhin kha, ka hlimna duh ber si chuan Rinfela hnênah khân min țhen tùrin i ti lul lo ang tiraw?" tiin ka phun leh mawlh mawlh a.



Rei mawi tâwk tak ka awm hnu chuan muangchânga thoin ka pa thlànlung nghènga dah pangpâr tharlâm zet chu ka en leh vang vang a, haw tùrin ka inher ve ta nghâl a.



In ka thlen dâwn chuan Mamuantea kawta lo awm chuan min lo hmu a, ka lam panin a rawn tlân vat a, a phûr lutuk avàng chuan a tlànna a en chiang lo a, a tlu ta hlauh mai.



Ka tlán phei a, ka pawm tho vat a, ani erawh chu uar zetin a țap ta nghâl a.



"Dam dam, tu nge bah bah lo ti a? Khu khuan maw? Bah bah, mai mai, Mamuantea lo bah bah tawh miah suh," ka ti pah mawlh mawlh a.



Ani pawh chuan țap deuh chung hian," Bah bah," tiin a tlûkna lai chu a lo hau ve bawk a, a na lutuk hran lo bawk a, a țap bâng har lo ve.



Veranda-a ka mi hmuh avàng chuan ka pên lai chu ka ding chawt a. He pa hian eng nge a lo tih? A va zak lo ve! Min lo la en reng zui, Mamuantea ka thlèm țantirh lai vêl pawh kha min lo en reng ang ka ti!



"Nau țap thlèm i thiam hle mai," tiin a lo nui suk a.



"Eng nge i lo tih?"



Leh hmak mai a. "Thina, insûm teh, insûm teh, mawi pawh a mawi lo e, i inhmeh lo a nia," tiin ka inzilh leh rih a.



"Ka hmu khât êm mai che a."



Hmm, ani pawh hi a ngeiawm khat tlat ve tho alawm, ka inrùl tâwk chiah a nih hi.



In chhûngah chuan ka nu leh Teruati lo awmin chawhmeh an lo siam a, Teruati chuan," A tlu a nih ka ring rêng a, a tlân chak thei lutuk a," a lo ti a.



"Min rawn hmu kha a phûr lutuk a, a tlu na lo hlauh," ka ti a.



Ka hnunga min rawn zui luh loh avàng chuan hmui phun hian,"Eng nge a lo tih a?" tiin Teruati chu biain kawngkhàr lam chu ka melh zauh bawk a.



A lu a lo thing ringawt.



A hnuah in chhûngah chuan a rawn lût a, ka biak loh avàngin ka nu chuan a lo bia a.



"Tuilum a awm asin, inbual la?" tiin.



Ani chuan," A ngai lo, ka rawn kal dâwnah ka inbual a, ka rawn hrilh lâwk lo che u a, ka tibuai vek che u a nih hi," a ti duah a.



"Tibuai lo e, pakhat chauh phei chu ni tin zan tin hian kan chhum kêpin kan siam kêp ziah ang a ni, Taitea pa khân khamkhawp táwk chiaha chaw leh chawhmeh siam kha a remti ngai lo. 'Mi tu emaw rilțâm tak a rawn kal thut thei' a ti țhìn a, ngãiah kan nei tawh a ni," ka nu pawh chuan a lo ti ve duah bawk a.



Ka ril a țàm deuh avàngin Mamuantea chu chhuata nghatin thingpui no ka la a, flask ațang chuan thingpui chu ka thli chhuak nghâl a.



"I ril a țâm tawh em? Bawihte, thingpui kha siam ve la?" ka nu chuan a rawn ti a.



"Ka in tawh kha, a țâm lo ve," a lo tih chuan ka nu chuan," A hâng chauh a nih kha, a rei leh deuh tawh alawm. A thlumin i in dáwn nia," a ti leh țâlh a, ka ngei reuh tak tak a ni.



Thingpui chu ka siamsak a, ka va pêk lai chuan phone a lo khawih a, thlalâk a lo en ni ngeiin ka hria.



"Hei aw."



Inneih thlalâk a lo en chiang alawm, ka thlêk ve a, ka hmu tih chu a hre kher lo maithei. A nupui ngei kha, ina ka hmuhnu ngei thlalâk kha, chu pawh inneih kawr vâr haa a ding lai ngei a ni.



A chiang ta viau e. Ka rilru ka thlâk, ka hmuh theih ngei tùrin a lo tilang zâwk a ni ngei ang, a ni ngei ngei ang, a loh theih loh. A ngeiawm ve asin.



"Eng chu maw i lo tih dâwn a?" tiin polite takin ka záwt leh ta zawk, ka nu leh Teruati hriat laia thinrim khum leh țawng khum chu ka tum teuh lo.



"I pa a rawn râl vang vang a nih kha. Zanin a riak ang a, naktûk lah Pathianni a lo ni leh bawk si a, a riak tlang leh bawk ang a, Thawhțanni lamah a haw chauh ang," tiin ka nuin min lo chhâng daih.



Pâwnah khân," Ka hmu khât êm mai che a," ti khân min chhâng a nih kha. He pa han dâwt theihzia hi, min ngainêp hle a ni. A la châm rei hle dáwn zui! Hei ha!



"I va ti țha ve!" a mawiah ka ti ve, ka rilru chhûngril lamah erawh chuan thinurna a rawn so leh barh barh țan tawh!



Zanriah ei khamah chuan inkhâwm tùrin ka insiam sawk sawk a, ka hmanhmawh chhuanlamin ka chhuak thuai. Hmuh tam loh ka duh, in khata awmpui phei chu ka duh lo, chhûngte hriat laia insùm theih loh ka duh lo bur, ka insûm thei lo ang tih ka hlau a ni.



Ka inkhâwm hi chu aw, ka va hláwk lo thei tak! Ka țhu ve tawp a ni ber mai, rilru tak tak a thleng phâk lo, hei hi a hming maia inkhâwm an tih ang ngei kha a nih ka ring.



Kan inkhâwm bâng kan chhuak chiah chu Mazuali chuan," Mikhual in nei em?" tiin min záwt nghâl vat a.



"Nei mai mai lo," tiin ka chhâng zui vat bawk a. Engtin nge maw a lo hriat hman ni?



"A lo inkhâwm ve kha, i hmu em?"



"Daw lo mai teh!" Khawvêlah ka âwih lo ber àwm e. A inkhâwm ngai lo a, a țawngțai ngai hek lo, ka pa duh loh chhan pawh hei ngei hi a ni. A inthlâk thut lo ang tih ka hria alawm. Min tihder chu tum lo mai teh se.



"Ka daw lo. Nulaho an inkheuh sep sep a, hnunglam an hawi zauh zauh kha, i hmu ve pek nange? I lo ngaihtuah ngut ngut leh tawh a ni maw? A àwm tho mai," a ti leh a.



"Ka ning, sawi tawh lo teh ang. Ina haw ka hreh phah a nia, ka pa râl tùr ni àwm takin a insawi a, ka nute bula han sawisèlsak ringawt kha a tihchi mang si loh a, a nawm lohzia hi a!" ka ti bal bal a.



"Lo lêng daih la, a nih loh pawhin lo riak daih la?"



Kan pahnih chuan kan in lam panin kan inzui leh ta nge nge a.



In kan luh chuan Taitea tih loh chu an lo awm kim țhap a, Mamuantea pawh a lo la meng!



"Kan tlangvâla chu, i la mu nange a?" tiin Mazuali chuan a chhaih nghâl a, kei erawh chu inthlâk tùrin room ka pan nghâl a.



Pângngai thei ang bera ka awm a ngai. Hetia thinrim khum leh titau deuh anga ka biak țhat duh loh tlat chuan ka duh lutuk angah a ngai ang, chuvàngin, engah mah ka ngai lo a ni tih lantír a ngai. Zãng vah leh hmel hlim taka ka hmachhawnin ka tifuh zâwk ang.



Hei hi a dik ang. Min zuam thei lo bawk ang.



Ka va chhuah chuan an lo titi mam mam tawh a, Mazuali pawh a lo nui leh nasa tawh, ani hi zawng a hlim thei a, a thil nuihpui lah hi a ho thei si.



"Thingpui duh ve in awm em?" tiin ka han zâwt kual a.



"Han thlî la; mahse, kei chuan ka duh lo aw, vawiina ka ni sa tuarna khán min tichau deuh tlat, mut mai ka duh," ka nu chuan a lo ti a.



Teruati pawh chuan," Bawihtea pawh a mut a hun tawh, ka'n mutpui ang e," a lo ti ve bawk a.



"A la hma e, a mut pawh a la chhuah loh kha," ka ti a.



"A mut loh chuan a meng leh vak mai ang, a mut a hun tawh hrim hrim bawk," a lo ti leh a.



Thingpui chu no thum ka thlî a, kan pathum chuan kan țhu ta ràn mai.



"Zanin khân i rawn inkhâwm ve tiraw? Ka hmu tlat chein ka hria," tiin Mazuali chuan Rinfela chu a bia a.



"Aw..."



A inkhâwm ve maw?!! Dâwt a sawi a niang, inkhâwm tùra ka chhuah lai pawhin TV bulah a țhut reng kha.



"Chuan, engtikah nge haw i tum ang?" tiin a zâwt leh a, kei erawh chuan ngawi rengin thingpui chu ka dút hlak hlak a.



"Thawhțanni zïngah a niang, han awm rei viau pawh in lam an ngaihtuahawm ve si a," a ti a.



In lamah chuan a nupui fanaute awm miau hek le. Ka pa râl tùra rawn kal hi a țúl lutuk lo asin le, a rawn ngai pawimawh mai mai a ni.



"I reh ta vang vang sia, i bo ta daih emaw ka ti a," Mazuali'n a tih chuan ka nuih a za deuh viau nain a thil zawh chu zawh àwm tak niin ka hre leh lawi a.



"Nia, tum aiin Aizawl lamah ka va tâl rei ta deuh alawm le," tiin a lo chhâng mai a.



"A nih chuan, nupui i nei tawh ang chu tiraw?" Hei zet chuh, ka thil hrilh chhànna tùr atân a zawh a ni ngei ang.



"Engah maw?" a lo ti mai a.



"A, i neih ka'n ring deuh ringawt a, i nei lo em ni?" Mazuali chuan a ti leh a.



"Pasal atân min duh an awm lo a niang," tiin a lo nui suk a.



"Nupui nei tawh ni àwmin an sawi che a," a ti ta! Ka lo îp zawr mai! Ani chuan a țawng sual tih a inhre tawp nâng. Kan inkàwm ngeih a, ka hnên ațanga hria a nih loh chuan chutiang ngaih dàn chu miin an nei lo tawp ang tih a ring thiam ngei ang.



"An ti mai mai a nih chu."



Nupui nei lo se kha nu kha tu nge ni ang? A nupui ni lovin a hmei emaw, a rûk emaw, a chènpui emaw tal a ni ngei ang. Dàn angin an la innei lo ang a, nupui angin a sawi lo mai a ni ngei ang.



Thingpui no chu ka tleuh a, Mazuali chuan,"Thingpui kan in zo chiah nain ka va phei tawh teh ang, i lo riak dâwn ta em?" tiin min rawn en a.



"A, naktúk zànah ti zâwk ila?" min hriat thiam beisei tak chuan ka ti a, ka riah chhuahsan daih chuan tunah ka nute an mu tawh lehnghâl si a, a fuh vak lo ang.



"Nia, i tih dàn dán le."



Mazuali haw hnu chuan," I mut a chhuak tawh em? Mutna tùr chu i hriat tawh tho ka ring," ka ti a.



"I mut a chhuak tawh em?" a rawn ti ve ta thung a.



"Chhuak hran lo, i duh hun hunah i mu thei a nia, kei chu-"



"Biak che ka duh," a rawn ti ta sup mai. Ka țawng laklawh lai laiin, eng thil nge sawi a duh? A insawi fiah ang maw?



"Sawi a ngai lo, sawi tùr ka nei lo," ka tih chuan," Sawi tùr ka nei," a lo ti tlat thung a.



Ka țawng ring ngam lo, tuna kan țhutna room hi TV kan dahna a ni a, ka nute room a hnaih ber a, kan țawng tu mahin hre lo se ka duh.



"I insawi fiah dâwn tihna a ni maw?" ka tih chuan a thaw deuh hak a.



"Insawi fiah ka tum lo, thil awmzia sawi ka tum mai a ni," a lo ti leh a.



Engah mah ngaih loh hmel zet hian," A țha alawm, sawi ta poh che," ka ti liam puat a.



"Ka kalsan ngai lo che a, ka țhen ngai bawk lo che-"



Ka lo nui hawk a, a thil sawi ka âwih loh lutuk vàng a ni pakhat a, chubâkah, chutia dâwt chiang lutuk hmaichhana min han hrilh duh mai chu ka inkhawngaih a ni!



"A lo ni maw? Ka lo hre hleinem," ngeiawm zet hian ka ti leh a.



"Sawi tùr i nei lo ni khân ka hre si a, ka hre dik em?" a rawn ti ta khauh mai.



Ka dang ve lek lek a ni.



Chutia ka ngawi ta hlauh chu ani chuan renchângah lain," Ka tum loh tawp dànin ka awm a ni, Aizawla ka phei kha ka pa ka hruai phei ve nghâl a..." tiin a ngawi zui ta daih a.



A pa kha, a pa chanchin rêng réng ka lo ngaihven lo. A dam țha em? Ani khân min ngaina der ve a, hetia a fapa nèn kan han awm hrang ta daih mai hi engtiangin nge a ngaih ve ang aw?



"A dam țha maw?" ka lo ti sap a.



Min rawn en vang vang a, min chhâng dâwn ta lo emaw ka tih hnuah chuan zàwi sap hian,"A kal tawh," a ti ta a.



A kal tawh. Eng nge a awmzia? A thi tawh tihna em ni? Ni lo, ka hmui ka hup vat a.



A ni thei lo!



"Ka hre sual tiraw?!!" ka tih chuan meng dul raih hian," I hre sual lo, a thi tawh a ni," a rawn ti chhuak leh sup a.



Lalpa leh!



"A pawi ka ti hle mai, a pawi ka ti takzet a ni," ka ti chhuak sep sep a. Ka mitthlaah chuan Lungleia an ina kan titi dun laite chu a rawn lang zut zut a, ka pa a boral tawh a, ani leh zêl a han boral chu, Rinfela tân hian a va na dâwn êm! Kei chuan mi dang, Taiteate nupa leh ka nu ka la nei a,ani erawh chuan mi dang a nei ve tawh hauh si lo.



"Ka pa chuan a sawi a sawi țhin che asin. A thâwk tàwp dáwn thleng pawhin i hming hi a la lam fan a ni," a tih chuan ka mittui a rawn tling leh kawl kawl tawh! Min lo la hre ve reng maw?! A tháwk tàwp dáwn thleng pawhin min lo la ngaihtuah ve tihna a ni si a.



"A pawi ka ti tih bâk sawi tùr ka hre lo."



A pa ka khawngaih a, Rinfela ka khawngaih bawk. A pa hnukchah dáwn ruai thlengin a bulah a awm ni ngeiin a lang bawk si a, hrehawm a tih dàn tùr leh a mangan dàn tùr chu, ka ngaihtuah thiam lo záwk!



"Vàn ram hi a awm takzet a nih chuan i pa nèn an inhmu tawh ngei ang a, kan pahniha chanchin pawh hi an sawi dùn ngeiin ka ring. I ring ve em?" a ti sup a.



"Nia, an inhmu ngei ang," ka ti ve ringawt a.



Chutah, min rawn enin," I pa nèn khán thu kan thlung asin, a boral hma chu ka sawi chhuah a thiang lo a, vànduaithlâk takin a boral hnuah helamah ka rawn phei thei ta bawk si lo a, engkim hi a buai ta vek a ni," a ti charh charh a.



Eng thu nge an thlun le? Engati nge min hrilh ve mai loh? Ni leh lo, ka pa boral hma chuan sawi chhuah a thiang leh si lo.



"I pasal tùr, i neih tâk loh Ațana chanchin pawh kha min hrilh a, nang chuan min hrilh hauh lo a nih kha tiraw?" tiin ngun zetin min rawn en pah a.



"Thil kal tawh, theihnghilh daih tùr thil a nih kha," ka lo ti a.



"I nat tawh avàngin i pa chuan i nat leh a phal tawh lo a, thu kan thlung ta chiah a, kalsan ngai lo tùr chein min ti bawk a ni. Ka rilru hian ka kalsan ngai lo che a; mahse, Aizawla ka va phei kha harsatna leh vanduaina chi hrang hrang ka va tâwk ta si a," sehchilh deuh nak hian a ti a.



Chutah," Chumi hma chuan, i pa boral hmaa ka sawi chhuah miah loh tùra ka tiam chu maw, ka nu kha i pa hian a lo hria asin," a rawn ti chhuak ta!



Makti zet hian ka en ta hau mai!







*BUAI TAKA I AWMA TIH TÙR I NEIH RENG PHAWT CHUAN MI RÈL NÂN LEH SAWICHHIAT NÂN HUN RÊNG I NEI THEI NGAI LO ANG*



Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » October 25th, 2020, 3:37 pm

☆24/7☆ - 38 By Dingdi Pachuau




A va mak dâwn ve!! Engtin nge an lo inhriat le? Ka pa bialnu hlui te hi a lo ni ang e? A mak ngawt ang!



Mahse, tunah hi chuan engtin nge an inhriat tih lam ka ngaihven hran lo, a pawimawh ber chu engati nge ka pa nèn an inbiak hnua min kalsan tâk daih tih lam kha a ni zâwk.



"Min kalsan tâk chhan kha ka hre duh ber," ka ti ta nge nge a.



A ngawi deuh vang vang a, min enin a mit chu a khap deuh sak a, chutah,"Ka kalsan lo che asin, i pa thil min hrilh kha mak ka ti lutuk a, kha thil vàng khân min biakna pawh kha ka chhâng țha lo che tih chu ka hria. Ka zak êm a ni, theihnghilh ka duh êm êm min kalsantu ka nu chanchin zawng zawng i pa chuan a lo hre vek a ni si a, engtiang takin nge a hriat chian tih pawh ka zâwt ngam lo. Chutiang mi fapa chuan a fanu duat êm êm, keh thei dawma a dawm kha ka han duh ta mai che a nia, kan dinhmun kha ka hre inthlau ta lutuk a," tiin a chàwl dat a, sawi zawm lehin," Khatih hunlai kha chuan zah avàng khân khûk ral theih se chuan ka khu ral chak khawpin ka ring! Chutah, i pasal ni mai tùr Ațana chanchin ka han hre leh a," tiin thâwk a la halh a.



"I zah avàng chuan min kalsan duhna rilru i pu a, ka biakpawh theih lohin awm i tum bawk a," ka lo ti hmanhmawh a.



"Chu chu ka rilrua ka ngaihtuah hmasak ber a ni, ka zêp lo; mahse, ka hmangaih che a, ka kalsan thei lo che tih ka hre chiang ngang mai; mahse, i pa ka zahna khân nangmah hi min hlattîr duhna kha min siamsak tlat a, rilru hrehawm takin ka inkhâp reng a, a tàwpah ka rilru hrehawm tireh tùrin Aizawlah ka phei ta ngei a," a ti leh a.



"Aizawlah i phei a, ka be pawp thei lo ta che a. Chuan, kum khat leh a chanve chuang zet i reh ta vang vang bawk a," ka lo ti ve thung a, ka awki leh sawi dàn chu a man thiam maiin ka ring.



A thil sawi chu ka la hre thiam chuang lo. Ka pa a zah avàng chuan Aizawlah min pheisan a, ka be pawp thei lo a, min rawn be miah lo bawk.



"Engkim kha ka tihsual vek a ni. Ka pa remti vak lo chung ka hruai phei a, kawng laka kan chawlhnaah ka phone ka tibo ta phawt a, kan motor ding lai chu motor dang rawn tlân brake fail-in a rawn su leh bawk. Chu mai a la ni lo, vànduainain min la ûm zêl, ka pa a dam thei lo a, damdawi inah ka awmpui zak zak a. Chutih laiin kei ngei pawh chu enkawl ngaiin ka awm leh bawk a, Krismas leh kumthar pawh Damdawi inah kan hmang a nih kha," a ti leh charh charh a.



A sawi hi thil thleng tak tak a nih chuan, a va buai dáwn tehlul êm!



"Biak che duh mah ila biak ngaihna che a awm lo. Lungleia rawn phei pawh ka duh alawm; mahse, ka pa a chak chhuak thei lo a, ka kalsan thei bawk si lo. Thih daih ka châk asin; min ngaih dàn tùr ka ngaihtuah a, ka chanchin eng mah i hre dâwn lo a, kan inhmuh tàwp bera ka awm dàn leh țawng dàn lah kha a fuh fahran bawk si lo; mahse, min hmangaih ve a ni tih ngaihtuahin ka inhnèm hrâm hrâm a, chu chuan chakna min pe leh țhìn," a ti leh a.



Ka rilru a nêm takzet tawh tih ka hria.



"Ka pa a chak chhuak thei lo a, damdawi in ațangin chhuak mah se, in lamah enkawl ngai rengin a awm a, ka kalsan thei lo. I hming a lam fo a, a ngai che a, hmuh che a châk thu a sawi fo bawk. Chu chuan ka rilru a tina thar ziah a, inthiam lohna rilru ka nei thar ziah bawk a," a ti leh a.



Ka lo inrawlh duh lo, sawi char char se, lo ngaithla ila tih ka duh zâwk.



"Ka pa chungah ka inthiam thei lo a, chutah, nangma chungah ngei pawh. Inthiam lohnain ka khat a, keimah vàngin ka pa enkawl ngaiin a awm a, chutih laiin kei ngei pawh enkawl ka ngai bawk a, Pathian ànchhia ka chungah a tla a nih ka ring țhin. Kei chu engtin pawh lo awm mah ila ka tuar thei mai ang a, thi dâwn pawh ni ila ka thi mai ang; mahse, ka pain a tuar ve zêl chu hrehawm ka tih ber a ni. Ka chanchin hrilh thei lo chein ka awm a, i chanchin lah ka hre hek lo, mipa ka ni tih chu ka hria; mahse, khatih laia ka rilru manganzia leh hrehawm ka tihzia kha, Pathian chauhin a hre thiam ang! Ka pa a han boral a, ka inthiam lohna a zual sauh a, nun kha a hrehawm asin. Hun ka neih veleh Lunglei lama rawn phei ka tum a, motor -in ka chesual leh ta zui a,"a ti leh a.



Vànduaina hlîr maiin a lo zui a nih tak chu. Amah ka huata ka ngei êm êm lai khân ani chuan hrehawm tak tak a lo tuar reng si a.



"Ka na viau a ni, ka dam chhuah theih kha an ring tawh lo a ni àwm e; mahse, doctor fel tak ka tawng ta hlauh mai a, ani chuan engkim huamin min buaipui ta vek a. Mizoramah min enkawl theih loh avàngin hmunpui lamah phurhthlâk ka ni a, ka harh chhuak har asin. Ka harh chhuah hnuah pawh che thei lovin ka awm reng a, ka rilru erawh a harh fîm vek thung. Kum chanve deuhthaw enkawl ka ni a, ka zia deuh hnuah Mizoramah rawn chhohpui ka ni leh a. Thi mai tùr, ka thih loh nâna engkim huamtu leh ka nunna ngaihlu êm êmtu doctor ka han hmu chu, ka mittui a tla zawih zawih mai a ni," tiin a chàwl leh rih phawt a, chutah, sawi zawm lehin," Ka chanchin min zâwt a, chuta țang phei chuan a fapa ang chiahin min en a, kea ka kal leh theih nân min buaipui zui leh char char bawk. Khatiang mihring an awm thei kha mak ka ti asin, an inah min awmtîr tlat a, a hnuah a fapa chanchin min hrilh ve ta a, keimah ang chiaha accident tâwk ve tho a lo nia; mahse, ani erawh vànduaithlâk takin a enkawltu doctor a beidawng a, a boral phah ta a ni àwm e, chu chuan a thinlung a tina lutuk a, a fapa anga accident tuar ve a kuta a rawn tlûk luh phawt chuan a theihtâwpa enkawl a lo intiam a, kei hian ka vànneih phah ta a ni," a ti leh sup sup a.



Ngaihnawm ti lutukin ka lo ngaithla a, a cháng chuan ka lo thaw țha ngam lo niin ka hria. Chutiang teh hrep chu a lo tuar a, eng mah ka hre lo mai ni lovin ka thin a lo rim êm êm zui a.



Chutih lai chuan Taitea'n kawngka a rawn hawng ri khap a, a lènna ațangin a lo haw tawh tihna a ni. Keini pahnih hi hun ngaihtuah miah lovin kan lo titi a, mut a hun tawh viau ngei ang chu.



Sana ka thlëk zauh a, dâr 10: 45 a lo kâwk vah tawh! A thil sawi ka lo ngaithla tui êm a, hun ka lo hrechang tawh lo a nih chiah hi.



"I mut a chhuak tawh em?" ka ti ta hliai a.



"Nangmah kha a chhuak tawh a ni maw? A țha alawm, hunte chu a la awm tho ang chu," a lo ti ve mai a.



"Nia..."



Țhutna ațangin kan tho a, intihfai nân bathroom ka kian phawt a, kei chu ka nute room lamah ka intifai mai ang chu.



A hnung lam ațangin a kal chu ka en zui ru a, a kal dàn chu a dikhlel deuhin ka hria. A kal lui nge, ka en ru tih hriain chutiang chuan a kal der mai mai zâwk?



Ka han mu tak nain ka rilru a harh tulh tulh mai. A thu sawi kha ka ngaihtuah lêt leh char char a, thu dik tak a sawi a nih ngai chuan kei hian lo inchhuan khumna tùr ka nei hauh lo.



A tûkah chuan mak deuh maiin a inkhâwm ve mai nia! Mak ka ti lo thei lo alawm, inkhâwm tùrin ka sàwm hauh lo, chhûngte pawhin an sâwm chuang lo, a inkhâqm ngai lo tih kha an hre ve tho miau alawm.



Mahse, a inkhâwm ve tlat. Inkháwm thawmhnaw pawhin a inthuam ve thlap, a la inhmeh êm êm zui a! Ka lo en reng a ni chêk ang chu, Mazuali pekin min rawn sik sawk a!



"En reng teh suh, i duhzia i mitmeng ațangin a chhiar theih vek a nia," a ti sar sar a.



"Inkhâwm thuama a inthuam ka hmuh vawi khatna a nia, a inhmeh ëm alawm. Bâkah, a inkháwm ve ta a nia, a làwmawm êm a ni, ka țawngțainain rah a rawn chhuah ve ta niin ka hria " ka lo ti a.



"I zïng țawngțai inkhâwm chhan kha a ni lo'm ni?" a tih chuan," Ni e, kha khán a lo véng him zêl a ni àwm si a," keima hriat tàwk lek chuan ka ti sap a.



"Nupui țha tak i ni ngei ang!"



"Eng thil nge maw i rawn sawi le? Țawng zàwi deuh teh," tiin ka khap vat a.



"Engkim sawi fel vek ang che u, tunah hi chuan thil ka záwt vak dáwn rih lo che. Ťha takin sawi felin inrem leh ula, chu chu ka duh ber chu a ni mai," a ti leh a.



Chhùnah thingpui in tùrin Mazuali a rawn péng a, ani a awm hian boruak hi a tiziaawm ve a, boruak uap churh tùr pawh a véng ve tlat a ni.



A titi bawrh bawrh reng a, Rinfela pawh a țawng zauh zauh, kei erawh chu ka lo inhmuam ûp deuh a, ka țawng ve mang lo.



"Ngawi reng lo khân sawi fel r'u, ka haw dáwn. Sawi fel vek ang che u, in inkârah eng nge thleng dik tak ka hre lo; mahse, hlim taka awm dùn tùrin ka duh che u, chuan, in inhmeh dùn ka ti viau bawk a ni," tiin a nui har har a, chutah, ding uaihin,"Buaina siam suh ang che u, sawi fel ula, tláwm tùr tlâwm ngam ula, sawi fel theih reng buai luih tlat tum loh tùr," tiin min rawn melh kher a.



"La haw suh, a la hma," ka lo ti vat a.



"In sawi fel hma leh in hlim hma a ni mai, in hlim loh chuan hrehawm ka tihzia kha hre reng la?" tiin min rawn melh zauh a, a kal sawn ta nghál a.



A haw hnu pawh chuan veranda thlang lamah chuan kan la awm reng a, țawng chhuak hmasa nih ka hreh avàng chuan ka la ngawi reng a.



"Min hua ang tih ka hria, i awm pawh ka tinuam lo viau ang; mahse, ka chunga thil thleng kha ka duh vàng leh ka tum vànga thlentîr ka ni lo," a rawn ti chhuak ta sup a.



"Ka hria alawm," ka lo ti mai a.



"I pa khân a fanu tân min duh lo tih ka hria a, kohhran lam ka belhbul loh vàng a ni. Nang pawhin i hriat kha, inkhâwm leh țawngțai ka ti ngai lo; mahse, natna khuma ka pa a mut lai, a hnuk a chah țêp lai khân ka mangang lutuk kha ka țawngțai ve tawp asin; mahse, min chhâng miah lo," a ti leh duah a.



"Kan duh dàn hi a hnênah kan thlen țhìn a, ani ve thung chuan a duh dànin min chhâng thung a," ka lo ti a.



"Chutiang a nih vàng tak chuan min chhâng lo, ka pa pawh a thi ta tho; mahse, mangangin ka țawngțai ve a, min chhâng duh chuang si lo a, ka tàwpsan leh ta a; mahse, Doctor Hmingate nupa khân ka tân bâng lovin min lo țawngțaisak țhin a, anni vàng liau liaua dam leh thei ka ni. An awm dàn leh khawsaziaah hian Pathian ringtu dik tak an ni tih ka hmu thei tlat a, anni khân inkhàwm lo thei lo leh țawngțai lo thei lovin min siam a ni," a ti charh charh a.



Ka țawngțaina pawh chhànin a awm ve tho asin. A tãn hian ka țawngțai ziah a, ka rin loh lam daihin Dr. Hmingate nupa kal tlangin a nun tihdanglam a ni ta a, ka țawngțaipui tih hrilh kher pawh a ngai lo, Pathianin a chhiahhlawh Dr. Hminga
hmangin a nu a tidanglam mêk a ni si a, accident kher lo ta se, tún dinhmun ang hi a ni pha ang em? A inkhâwm ve tawh tho ang em? Vànduaina pawh malsàwmnaa chantîr thei Pathian kha a ni miau a, a rûkin a hnênah làwmthu ka sawi mawlh mawlh a.



"I accident vàngin i la insawisêl em? I dam chiang vâk tawh em?" tiin ka zâwt a.



"Ka țha tawh khawp mai, ka pãngngai ti ila ka ke erawh pângngai tùr chuan hun a la duh tam deuh ang, exer lâk zauh zauh hi a la ngai a," tiin a mal chu a hmet nauh nauh a.



"Engtin nge a awm a?" ka tih chuan,"Hmun hnihah a tliak a, khua a vawh deuh hian a hrehawm ve deuh hlek; mshse, ka dam chhuak a, engah vak ka ngai lo, nunna hi alawm hlu ber le tiin ka inhnèm țhìn," a ti leh duah a.



Thil tam tak ka záwt duh lém lo. Zawhna tam tak zawh aiin a thil sawi lo ngaihthlâk hi ka duh, amah ang lo takin a țawng ve duah țhìn si a.



"Min la hmangaih reng em?"a rawn ti ta phut mai!



Ka lo en hau ringawt.



"Chutin a reh nghâl hmak lo tawp ang, kei pawhin ka ngaihtuah reng zêl che a, ka hmangaihna che lah a reh thei hek lo, min hmangaih thuin ka inhnèm țhin ka tih kha," a ti leh a.



Ni e, a reh lo. A reh lo mai ni lovin tunah phei chuan a hma aia a lêt sàwmin ka hmangaih belhin ka hria, a thil lo paltlang zawng zawng nèn phei chuan a lêt 30 zeta hmamgaih thar leh zual tùr a ni.



"Sangbawih, min hmangaih ve takzet tih ka hria asin. Khatia rethei leh harsa tak, nunhlui țha lo tak nei ka nih lai pawha min dawm tlattu i ni a, ka chhiat lai ber pawha min nghèng tlattu hian min hawisan ka ring lo, ka la ring chhin miah lo," a ti leh a.



A tidik alawm, ka hmangaih a nia, min kalsan loh chuan ka kalsan ngai lo ang.



Mahse," In in bul building thara nu, la naupang ve deuh nau pawm kha tu nge ?" tiin ka zàwt ta a.



"Ènpuii kha maw?" a tih chuan," Ka hre lo a, ka zâwt che alawm, kha kha i nupui a ni lo takzet maw?" ka ti leh a.



"Nupui ka la nei chhin miah lo," a lo ti mai a.



"Chuti, engati nge an inah khân i awm ve?" ka tih chuan," Ka awm lo, ka léng a ni zâwk. In ka nei ve reng a, engah nge an inah ka awm ang," a lo ti a.


"Kha building thar kha i sak a ni lo'm ni?" ka tih leh chuan," Ni nâng aw, țhenawmte sak kha a nih kha, Ènpuii kha țhenawmte mo a nia, an invawm luhna pawh a la rei vak lo ni tùr a ni," a lo ti a.



"I nupui emaw ka ti alawm," ka tih leh chuan a nui sak a.



"Nupui chu pakhat bâk neih ka tum lo asin," a ti ve a, fiamthu angin lang mah se a sawi dik ngeiin ka ring.



Kan inkár a fel tâk hnu chuan ka pa thlàna min hmuha ka țawngksm hmante chu a rawn sawi chhuak a. Kei pek chuan," Ka thin a rim ve êm alawm, a chhan sawi hauh lovin i bo vang vang a, i reh vang vang a, ka ngai chein ka pa boral lai phei chuan ka nu buaipui ngai ve tho bawk nèn, i sawi ang chiah khân thih daih mai pawh ka chãk ve rum rum a," ka ti a.



"Ka rawn ngaihtuah reng țhìn. Ka theih hnua Lungleia ka rawn phei hian ka inngaihtuah nasa asin, hmuh che ka inrin lohnaah ka hmu thut che a, i mitmeng ațangin thil dik lo a awm tih ka hre thei bawk. In khuaa rawn kala rawn hmuh chea thil thleng hrilh vek che ka duh a; mahse, ka biak chea min chhàn dàn ațang khân mi dang an lo awm tawh a nih ka ring a, khatih laia nã ka tihzia kha! Ka ngaihtuah ka ngaihtuah a, min hmangaih țhìn a ni tih kha ka ngaihtuah chhuak leh a, chu chuan tlëmin beiseina min siamsak leh thei ta a," a ti leh sup sup a.



*******



Tunah chuan ka rilru a hlim leh thei ta. Kan inkâr a țhat bãkah ka pa duh ang ngeiin a inkháwm ve tawh a, a va hlim lua lo a ni maithei; mahse, a hmasâwnna hi a làwmawm hrim hrim. Zawi têin a kal bek bek ang a, fîmkhur leh kawng en ràna a kal chuan a tlu lo ang a, him takin a tum ram chu a thleng mai dáwn a ni.



A pa thlàn hmuh ve ngei ka duh vàng in Aizawlah ka phei ve vang vang a, a inah ka innghat ve hmiah. A lo zau nuam khawp mai a, a pa room pawh a lo la awm thlap, a tidanglam phal lo a ni àwm e.



A pa thlàn kan tlawh chuan ka mittui ka dang zo lo leh a. Min hmu châk em êm chungin mual a liam tih kha ka ngaihtuah chhuak leh a, kei ve mai min ngaia min hmu châkin a thâwk tawp thlengin ka hming a lam tih hriat chu a nuamin kawng lehlamah chuan a hrehawm ém asin.



"Ka pu, ka lo kal asin, min hmu em? Min hmuh châk thu i sawi tiraw? Hei, Rinfela'n min rawn hruai tawh a, min ngai a ni lo'm ni? Kei paehin ka ngai che asin, hei ka lo kal vang vang a nia," tiin a thlànlung chu ka be mawlh mawlh a.



"Ka pa, Sangbawihi chu ka rawn hruai tawh a nia."



Kan rilru chu a inhmu chiang a ni. Ani pawhin ka ngaihtuah ang a lo ngaihtuah ve tho a, a pa, a hmangaih leh a neih chhun hi a ngai êm êm ang tih ka ring bawk a ni.



"Kan hlim tawh a nia aw, min lo ngaihtuah miah suh ang che; mahse, min hmu châk êm êm chunga min hmu hman lova min kalsan hi chu hrehawm ka ti, tunah i awmna hmun ațang khân min lo thlîr em? Ka pa nèn in awm dùn ang tiraw? Ka pa hnênah khân a duh ang takin Rinfela pawh a inkháwm tawh tih thu hi lo hrilh theihnghilh suh aw," tiin ka phun leh sap sap a.



Dr. Hmingate chuan chaw eiah min sâwm a, an nèlawm dùnin ngainat loh theih an ni lo. Rinfela'n anni pahnih a lo tawng hi chu a vànnei takzet a lo nih chiah hi, an bulah chuan nun a nuamin rilru a hlim lo thei lo ang. Làwmthu ka hrilh mawlh mawlh lo thei lo.



"Engtikah nge in inneih theih ang?" tiin Pa Hminga chuan min zâwt ta thut mai!



Hei chu kan la sawi dùn ngai miah lo. Chhàn ngaihna hre lo chuan ka en reng ringawt a!






*I RUAHMANNA CHU A ȚHAIN A FEL VIAU A NI THEI, I BEISEINA PAWH A SÂNG VIAU A NI THEI E; MAHSE, THAWHRIMNAIN A ZUI SI LOH CHUAN MUMANG ANG CHAUHA ROPUI A NI ANG*

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » October 25th, 2020, 3:37 pm

☆24/7☆ - 39 By Dingdi Pachuau




Rinfela a rawn inrawlh ta vat.



"Inneih lam chu kan la sawi ngai miah lo a; mahse, chutia i rawn sawi chhuah tâk zârah chuan, rei tak chu a nula tawh kher lo maithei a ni," a lo ti a.



A lam ka hawi vat a, nui hmel deuh lek lek hian min lo en a.



Pa Hminga chuan," A nih tak chu, induha inhmangaih chuan rei tak innghah kher hi a țûl lêm lo maithei a ni, nula tlangvâl naupang lutuk in ni tawh chuang lo a, Rintea lah in leh lo țha tak nei sa i ni a, nupui fanau chàwmna tùr lah ngaihtuah ngai tawh miah lo i ni bawk nèn, ngaihtuah dun thuai in ngai a ni," a lo ti charh charh a.



Pa Hminga nupui Nu Thangtei pawh chuan," Ni e, kan hma hun tùr kan hre lo a, tih tùr hi chu tih vat hi a țha țhìn a ni. Rintea pawh hrehawm tam tak i tuar tawh a, hlim i mamawh ve tawh alawm, mahni chauha awm i ni lehnghâl a, mipa mahni chauha awm reng hi a țha lo a nia," a lo ti ve a.



An nupa hian ka nêl êm êm ve tawp mai, Rinfela chunga an țhat lutuk vàng leh fapa ang chiaha an hmangaih theih vàng hian ngainat loh pawh tum mah ila ka thei lo ang. Anni hi ka țawngțai chhànna ngei an ni a, Pathian thil tum tihlawhtlingtute an ni.



Rinfela patea khân dàwr lian leh lùn ve tâwk tak Zàrkawtah a lo nei a, Rinfela damloh leh theih loh chhúng zawng khán a lo tlabal hman viau a; mahse, a țhat chhuah leh ták hnuah erawh chuan a pângngai leh viau tawh a, nimin lama kan kal pawhin a lo lùn phian a, bungrua pawh a muk țha viauin ka hria.



Zàn mutnaah chuan a khum min kian zêl a, ka bula mu ve mai tùra ka tih chuan a duh ngai lo. Khum bul deuh chiaha sofa inhûngah chuan a mu ve mai a, a nuam vak lo ang tih chu ka ring a; mahse, ani chuan,"I bul a nih phawt chuan khawilai pawh ni se, nuam lo a awm thei lo," a lo ti tlat thung a.



"Thil ka záwt mai mai ang che aw?" ka tih chuan," Eng pawh min zâwt thei ang," a lo ti sup a.



"Ka pa khân min kalsan mai tùrin a hrilh lo tak tak che maw?" ka ti a.



"Hrilh lo, i pa kha mi sual a ni hleinem, ka zah êm êm zâwk a ni," tiin min chhâng a.



"A nih, Lungleia in in kha sak țhat i tum em?" ka ti leh a.



"Tum rih lo, ka pa nèna kum khati chen kan lo chènna a nih vàngin ka sa țha rih lo ang," a ti leh a.



Ka ngawi vang vang phawt a, chutah," A nih leh, Lungleia chawhmeh zuara kan rawn kala kan inhmuh thut hnu khân engati nge min hmu tùr emaw tala i lo kal loh?" ka ti leh a.



"Rawn zin ka dìl che khân,' A ngai lo' i ti a nih kha," tiin min en vang vang a, chutah," Mi dang i lo nei hman tawh a niang tih ngaihtuahna ka nei ta a, nangmah duh êm êmtu mi dang an awm ve reng a ni tih ka hre reng bawk si a, mahni inrintâwkna ka hloh a ni ber ang chu," a ti leh duah a.



"Chutiang tu mah an awm lo," ka tih chuan," Thlamuana a awm reng kha," a lo ti zuk a.



Ka nui sak a," Anite chu ka țhian alawm a nih, ka pa boral pawh khân a rawn kal vang vang asin, mi fel tak a ni," ka ti a.



"Thîk loh ka tum pawhin ka thei ngai lo," a tih sup chuan," Țûl loah intihah duh tawh suh, mipa angin ka en lo, țhian ang chauhin ka en," ka lo ti a.



Kan ngawi leh deuh vang vang a.



"Inneih chu, i ngaihtuah ngai em?" a rawn ti ta daih a.



"Ngai lêm lo," tiin dik takin ka chhâng a.



"Ngaihtuah tawh la?"



"Min la sawipui ngai bîk miah loh kha aw," ka lo ti a.



"Zanin ațangin ka sawipui che ni rawh se, lo ngaihtuah rawh aw, i duh lo chung chu ka nawr lui-"



"Ngaihtuah ve ve ang, keima lam chu min vêngthâwng suh, hun a tih hun kha a ni mai," tiin ka lo pawt chat vat a.



"Chuti, nghah rei che ka tum dâwn miah lo a nia. I chhûngte lamah rem lohna a awm thei ang em?" mahni inrintâwk hmel vak loh hian a ti a.



"Chute chu palai i lo tirh phawt lohte chuan..." ka lo ti a.



"Lungleia kan phei veleh aw."



Leh tut tut mai a! Mahse, hnial ka tum chuang lo.



Kan haw phei a, boruak a vawh ve deuh sûk tawh avàng chuan motor dârthlalang pawh ka tihniam ngam lo.



"Ka rawn tîr thuai dáwn nia, i rilru pawhin lo inbuatsaih ru ve tho rawh aw," a ti a.



"Aw le; mahse, ka chhûngte thu thu a ni thung ang aw," ka tih chuan min rawn en a, motor pawh chu a timuang zui bawk a.



"An phal lovin i ring tihna a ni em?"



"Ni lo, chutiangin ka sawi lo. An remtih loh kher chu ka ring lo a; mahse, tún hnai têa tih kha an remti kher lo maithei tih lam zâwk a ni," ka tih chuan a thaw hak a, motor chu kawng sîrah a tiding bawk a.



"Chuti, inru mai ang?"



Ka thiam tâwk chuan ka hrilh fiah a, inrûk mai finthlâk lohzia leh kum tàwp a hnaih tawh thu leh inbuatsaihna hun takngial pawh a tlèm tawhzia thu chu ka hrilh ve ngial a.



"Kumin chhûnga kan inneih an remtih loh chuan...nghah chhûng a va la rei dàwn ve!" a ti nghut a.



"A, kum khat leh a chanve chhûng zet pawh min hmu lovin i awm thei alawm, han tuar leh hret ila, ni tin zan tin kan inhmu reng thei tawh dáwn zuk nia," ka lo ti a.



"Ka lamah i ţang dâwn miah nange?" lungawi loh hmel zet hian a ti ngul ngul a.



"Țang chiang e, ka țang chiang," ka tih chuan," Chuti, nakkum lam an tih daih dáwn chuan kumin chhûng ngeia ti tùrin lo nawr ve tal la?" a ti leh nghut a.



"Aw le, ka lo ti ang e; mahse, a rem thei nang lo a nih chuan hriat thiam i tum ve thung ang a, tiraw?" ka ti a.



"Inneih ka duh bawk si chuan hriat thiam loh ringawt theih pawh a nih dàwn loh chu!" a ti sup a.



Palai pawh la tirh hma hawta inneih hun chungchânga lo intih lungawi loh deuh ringawt chuh, kan thil sawi chu ka ngaihtuah a, ka nuih a za deuh tlat, a naupan chhiatthlâk angreng bawk si.


*******


Palai chu a rawn tîr ta chiah a, mite tih dàn angin 'Kan lo inráwn ve ang e' tiin ka chhûngte chuan an lo chhâng a.



Chhûngte inràwn kháwm a ngaih avàngin ka pateate nupa pawh an rawn kal a, ka ute chhûng erawh Mamit lam daiha an awm leh tawh avàngin kâr a hla si a, an rawn kal thei lo; mahse, thutlûkna an siam ang ang chu an pawm ang tiin an rawn sawi a.



Ka patea chuan," A neitu tùr berin a duh phawt chuan a țha a ni mai a, keini remtih loh theih rual pawh a ni lo. Kan fanu tân chuan mi țha ber kan duhpui a; mahse, mi țha ber kha a tán a lo țha ber lo thei a, pawimawh ber chu inhmangaihna a ni. An inhmangaih tawn chuan, chu chu a hlu ber a ni," a ti charh charh a.



An han sawi nak nak a, kei leh Mazuali'n room ațangin kan lo ngaithla ru reng bawk a.



Inneih chu an remti ngei; mahse, kumin chu hun a awm tawh lo tih lam an sawi ri ta ngei mai, Rinfela hlauhthàwn ang ngeiin.



"Inneih hun tùr thlengin tihfel nghâl an tum em maw ni le? Palai an rawn kal phawt ang a, remtih thu an inhrilh hnuah a hun tùr lamte chu an sawi leh chauh țhìnin ka hre sia?" Mazuali chuan a ti sar sar a.



Ka hre tawh bîk lo, an sawi ri mai mai a niang.



"Ih, inneih hunâh khân ka kawr tùr chu a dumpâwl lam ka duh ang aw, a pâwl dal lamte kha i lo melh ngawt ngawt ang e," Mazuali chuan a ti leh sar sar a.



"I sawi hma lutuk!" ka tih chuan," Kan ti nek nek ang a, a lo thleng phut ang. In innei dãwn tho tho a, lo sawi lâwk thlap hi a ţha. Chuan, pheikhawk kha, sâng ve táwk tak ka duh bawk ang," a ti leh a.



"Chapal i bun ang!" ka tih chuan," In innei lo a ni mai!" a lo ti deuh hmak a, kan inen a, kan nui chhuak ta a.



"Inneih loh i hlauh êm kha aw, chapal kha chu sawi lang tawh lo ang che. In pa tùr lah a hausa tih ka hre reng tawh mai sia e, tuna ka duh ang tak ka inleitîr loh chuan inleitîrna hun a awm tawh lo ang," a ti leh a.



"Inneih hnuah ka inhlawh char char a ngai dáwn tihna a nih chu!" ka tih chuan rum zeta min melh hian," Tenawm suh! Aizawlah awmin mi liannu i va ni dâwn a nia, pawisa chhiar leh awm àwl bâk hna i nei dáwn lo," a ti a, a sawi tàwp lamah chuan a insûm thei tawh lo a, a nui leh var var a.



"Pawisa chhiarna lamah kut a rawl vek dáwn a nih chu!"



Fiamthu hlîr kan sawi a, nuih rin viau chu a mawi lo deuh si a, kan han insûm leh rih bawk a, pum na ûrhin kan nui thei nia.



*******



Inneih hun tùr tih fel a ni a, nakkum January ni 15-ah a ni. Rinfela chu a lung a awi famkim lo a, inneih thuai a duh vàngin ka lakah a han vui ve a, ka hriat thiam avàngin ka thin ka tirim duh lo.



"A zia alawm, Aizawlah i pa thlàn kan tlawh dùn leh thei ang a, kan inneih tùr thu pawh kan hrilh hre hmasa thei dáwn tihna a ni a," ka ti a.



A ngawi reng a.



"Khawngaihin, hetia i awm hian a hrehawm ka ti a nia, nakkum January ni 15 hnu lamah chuan i nupui niin kan awm dùn char char tawh ang a, a hnu deuhah phei chuan min ning ru viau maithei a nia. Chuvàngin, hetia zalèn taka i tlangvàl hun i hman theih lai hian hlim takin, ãm takin chèn zâwk teh," tiin ka thlém leh a.



"Ka ning àwm lo che," a ti sup a.



"'Lêng suh, ka ke hi min lo hmeh teh' tih emaw 'Thawmhnaw kha lo su ve teh' emaw ka tih hunah chuan e, tûn ang hun hi i la ngai dâwn a nia," tiin ka nui var var a.



"Chutiang chuan min ti mah la, ka bula i awm reng dâwn phawt chuan ka hreh hauh lo, i chêt ka phal lo zâwk ang," a lo ti leh a.



Lungleia a awm reng hman bîk loh avàngin Aizawl lamah a phei leh rih a, Krismas bazàr nân a la hma ve deuh bawk si a, ka zui phei lo. Krismas bazâr tùra ka kal hunah a pa thlàn chu kan tlawh dùn ang chu. Rinfela nèn kan inneih tùr thu chu ka pa pawh ka hrilh daih tawh a, a remtih ngei pawh ka ring. A duh loh berna 'inkhâwm ngai lo leh ţawngțai ngai lo' nun kha a thlauhthla ve tawh si a.



Kan khuaa mite pawhin pasal ka nei tùr chu min lawmpui hlawm ve viau a, a țhenin min ui der ve viau bawk a. A bîkin kohhran țhalai lamte chuan min ui der zual a, kan khuaah ni lo, hmun dang daiha ka awm tùr chu min ui ve a ni. Kei pawhin ka ngai ve hlawm khawp ang chu, ka chhûngte mai bâkah, kan khua ngei pawh hi ka ngai ang. Lehkha zir leh hna thawka chhuahsan ang kha ka ni tawh dáwn tlat si lo a.



Nilaini zàn inkhâwm bàn chuan Mazualite inah ka pêng lawk a, a nu chuan min lo hmuh veleh," Mite thu sawi avàng khân i rilrute kha i tihrehawmin i tihnual ngawt ang e, mi thu sawi hi chu engah mah ngaih duh loh tùr," a lo ti vat a.



A ngaihna hre lo zet hian ka en a, Mazuali lam chu ka hawi leh a, ani chuan a mitmeiin a nu chu a lo khap ve mêk bawk a.



"Eng nge ni a?" tia ka zawh chuan," Eng mah a ni lo," a lo ti deuh tlat a.



Mahse, eng emaw chu a ni si a ni.



"Min hrilh țha ve mai la?" ka tih leh chuan," A ho mai mai!" a ti leh deuh tlat a.



"A nih chuan, ka hawsan daih dâwn che," nui chung hian ka ti a.



"Bawihi, a hriat a pawi chuang hleinem, a hre tho tho ang," a tih chuan Mazuali chuan," A mak thei e! Hawh, dàwrah kal lawk ang," tiin ka bânah chuan a rawn chelh a, min pawt chhuak ta nghâl a.



"Eng nge ni min hrilh ve mai la, thil țha lo deuh a nih phei chuan..." ka tih chuan," A, Pi Mani dak chak lutuk leh mi er lutuk saw alawm, Rinfela chanchin Lunglei lama an chhûngte a lo zawt pek a ni àwm a, khaw pum a khat vek tawh hial ang chu!" a ti sap sap a.



"A, a hun kal tawh vek a ni alawm," ka tih chuan," Ni e, a dik alawm; mahse, ani hi zawng, mi chhiatna lai sawi zar zar chi a nih saw, a tâna țangkai miah lo sawi châk zek zek chi a nia, mi nunhlui chhe lai theihnghilhsak aia sawi chhuah nuam ti tlat chi hi a ni ve a," ati leh hmarh hmarh a.



A pawi ka ti viau mai, a rûk tak chuan. Chutiang chuan kan khuaa mite'n an sawi a ni tih hre ta se, a inkiltawih phah zual ngawt ang chu! Ka chhûngte lakah a inthlahrun ve tawh nèn, miin a nunhlui a kalsan tawh, a hnuchhawn tawh kha an rawn tharthawh a ni tih hre ta se, hrehawm a ti ve ngawt ang chu!



"Mahni nute rual chu ni lo se chuan va àn khum phiar phiar hi a nia ka duh ni! A tâna thil țangkai ni bawk si lo, mi chanchin țha lam ni bawk si lo, dak peih lutuk mai!" lungawi lo tih hriat tak chuan Mazuali chuan a ti leh bawrh bawrh a.



"A pawi lo, lo sawi ve mai mai rawh se. A nih lohna pawh a ni chuang lo a, a nunhlui a ni ve mai a, mi chanchin a țha lo lam chu kan hre chak țhin alawm," ka lo ti a.



"Ani pawhin nunhlui duhawm lo deuh deuh pawh a nei ve tho ang chu, mi zawng zawng hi an nunhlui duhawm lo takah an chêng reng lo a, an kalsan ve tawh a ni tih hre lo rual pawh a ni tawh lo!" a ti leh hlak hlak a.



"A, hre thiam mai teh, i va àn khum rêu réu ang e, mualphona a tam phah ang! Ngawi mai mai ila, an sawi rei peih teuh lo," tiin a thinur chu bengdaih ka lo tum ve a.



Ka thiani hi chu, a duh lohnaah hi chuan a kawlh ve viau a ni, min chhan ve a, ka pasal ni mai tùr Rinfela chanchin țha lo lam miin an sawi chuan min lo natpui a, heti khawpa țhian țha ka nei hi ka vànnei viau a ni.



Ka chhûngte pawhin mi sawi chu an lo hre ve ngei mai a; mahse, anni hi chuan an hre daih tawh a, an tán thil mak a ni lo.



Ka nu chuan,"Mite hi dem viau loh tùr, khawvêl a la ni miau mai si a, mi chanchin țha lam aia chhe lam sawi nuam ti tlat mihring kan ni a, mite hlawhtlinna leh a țha lama lawmpui aia sawichhiat theihna tùr zawng tlat mihring kan ni miau si a ni, pum chhûng ațanga suala pai kha kan ni vek tlat a," a ti charh charh a.



Taitea pawh chuan,"Ni e, chanchin țha lo lam sawi peih deuhte hi a tak takah chuan an khawngaihthlâk a nia, a rûk tak chuan an awm dàn hi hrehawm an ti ve țhìn thoin a nia ka rin ni, hlâwkna awm miah loah an buai a, engtin mah tih lêt ve loh hi mi puitling zia a ni tih hriat tlat tùr aw," tiin min rawn melh a.



"Engtia tih mah ka tum lo, Mazuali'n min hrilh tawh a, pawiti ru visu mah ila a nunhlui a ni miau a, thu dik a ni tlat bawk si a," ka lo ti a.



Chutih lai chuan Teruatite nufa pawh chu an lo haw ve a, Teruati chuan," Ka dàwr kal chu ka tifuh lo tak tak a ni, tu nge a hming ks theihnghilh ta, nu upa lam ve deuh kha, kha khân,' In mâkpa tùr chu a lo ropui hle mai,' min lo tih khum kher a, mi an awm ve nual bawk si a, a zahthlâkin a thinrimthlâk ka ti bawk sia, ka ngawi tawp," a rawn ti lût barh barh a.



Ka thaw hawk mai. Chutia mi bul bula sawi leh ka u nupui ngei bul pawha a sawi hreh loh chuan mi zawng zawngin an hre vek tawh dâwn tihna a nih chu!



"Hlâwkna nei dâwnin a inhria a niang," nui deuh chung hian ka lo ti a.



"Nutling ve pui si, a buaina a ho ka ti khawp mai a," Teruati chuan a ti leh a, Mamuantea'n min rawn pan avàng chuan ka lo pawm a.



"Chutiangah chuan buai ve miah suh ang che u," Taitea chuan a lo ti a.



"A pawi ka ti, in tân zahna ka thlensak che u a-" ka tih lsi chuan Taitea chu a lo inrawlh vat a.



"Theihnghilh hmiah rawh. A nunhlui țha lo chu a kalsan tawh a, a insiam țha tawh a ni. Keini pawhin nunhlui țha lo kan nei ve vek ang, chutiangah chuan tu mah kan chêng tawh bïk lo, hetiang lam buaipui tlat țhìn mi hi țawngțaipui an ngai nasa a ni. Huat loh tùr, min tichaktuah hmang daih ila, mi fing kan ni mai," a ti leh malh malh a.



Mi min sawina chu hmaichhanah hre ve dawt lêm lo mah ila, nuam ka ti hran lo khawp mai. Dàwr kal pawh ka hreh phah deuh a, inkhâwm erawh ka la inkhâwm zar zar, Taitea sawi ang deuhin ka țawngțai tam phah a, mi min sawichhiatnate chu chakna hmanrua atân hman ka tum a ni.



"Ka tuar thei tawh thlâwt lo! Niminah dàwra ka awm ve lai ngeiin,' A pasal tùr pawh chutiang mi a nih chuan amah pawh hian felhlelhna chin a nei a niang, hetah țha àwm takin a awm a, chhûngte hmuh phâk lohah hian a lo tãl hiar viau a nih ka ring ta,' a ti leh kher pek a, i chanchin a ni tih hai rual a ni lo. A bulah kalin,' Ka pi, thu chiang taka i hria a i hmu a nih loh chuan i rin thu thutak sawi hmiah hmiah tawh suh,' ka tih khum kha, a inhre ve rauh rauh ang chu!" sehchilh deuh nak hian Mazuali chuan a ti a.



A va buaithlâk țhìn tak êm!



"Ngaidam rawh, chutia i ti chu a lawmawm, min țan vàng a ni tih ka hria e; mahse, thu dik a nih chuan loh chuan a pawi hleinem. Engtin pawhin min lo ring chhiain min lo sawi mah se, a sawi leh rin angin ka awm chuang lo a, a hah thlàwn mai mai a ni," ka lo ti a.



"Pitar ve tawh si, a mak lulai êm a ni. A dáwt sawi pawh hi amah hian a âwih zëlin a nia ka rin ni! Kan chhûngte a ni ang tih ka hlau ngawih ngawih," a ti leh a.



"A hlimna a ni veah ngaihsak mai mai ang, hetianga kan inham buai ve zêl zawngin buaina tùr kan ngah lutuk palh ang!" ka ti leh a.





*BIBLE I CHHIAR A, I INKHÂWM ȚHÌN A, I TI ȚHA LUTUK E; MAHSE, CHUTIANG I TIH ȚHIN AVÀNGA TI VE NGAI LOTE DIRIAM ZÂWNG LEH AN PÀWL THEIH LOHA I AWM ZAWNGIN I FELNA LEH I THIL TIH ȚHAT CHU A ZIKTLUAK BÎK LO TIH HRIA ANG CHE*

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » October 25th, 2020, 3:37 pm

☆24/7☆ - 40 By Dingdi Pachuau




"Hetiang hian ti ve ziah suh, a lutuk êm ém tawh! Pitar mah ni se dáwt chungchángah kher kher chuan ka zah bîk dáwn lo rêng rêng, kan ngawih reng avàng hian alawm an pàwng tual tual le!" a ti leh hmak hmak a.



"Zahngai! Zahngai!" tiin ka lo nui a.



"Ka nuih pawh a za lo! Țawng peih lutuk mai! Mi chanchin a sawi peih lutuk vàng leh thil a hriat theih lutuk vàng hi a niang Manzaui tia s hming an lo phuah ni, a inhmeh ngawt mai! A fate leh a chhûngte pawhin hetiang hi chu zilh ve țhin tùr a nia! Arrrgggghhh...! Ka ning, ka thin a va tirim tak!" tiin thâwk a la leh halh halh a.



A thinrim takzet a ni tih hriain ka nui duh tawh lo a, a kutah chelhsakin a nghâwngah chuan ka kuah a, a hnung chu ka bensak thap thap a.



"Mazual, insûm la, duh táwk bawk teh ang aw. Miin min lo sawi leh a nih chuan maw, beng hup chungin i kalsan daih tawh dáwn nia. Dâwt mai mai a nia an sawi ni, an thil sawi chu anmahni ang chiahte bâkin an âwih chuang lo, an chungah rilru chhiate kha i lo pu ngawt ngawt ang e, rilru ngaihtuahna a tihrisél lo tih hriat reng tùr a ni. Kan hlimna kawng dãltu atân phei chuan hman duh miah loh tùr," ka ti dap dap a, a thinrimna chu bengdaih ka tum a ni.



"Engtin nge i thinrim loh theih záwk a?" a tih chuan," Thu dik lo an sawi miau mai a, bâkah, mi chanchin a chhe lai chiah an sawi hian hlâwk ve ta riau hian an inhria a, chu chu an tân chhiatna leh thang hlauhawm tak niin an thinlung chhûngrilah khâkna an tuh tih an hre miah lo. Mi khawngaihthlâk ber an ni a, an thang kamah hian awh duh miah loh tùr, a tàwpah anmahni bawk an ãwk mai țhin a ni," ka ti duah a.



"Nang angin ka insûm ve thei hleinem, han tih lêt ve hmiah hmiah mai hi ka duh zâwng a ni, an zah ve deuh ram ram theih nân," a tih leh chuan," Insùm theih viau a ngai chuang lo, țawng ve loha ngawih mai kha insùm theihna chu a ni mai," ka ti leh a.



"Umm; mahse, hriat ve kur si chuan hmui hi thunun a har êm a ni, lei lah hi a che châk nasa thei si a," tiin a nui deuh hak a, ka kuahna chu ka thlah ta nghâl a.



"I nui thei tawh a nia, i ti țha lutuk! Han thinrim phat hi chu a awm ve a nia, ngaihtuah chiang lo va han chêt deuh phat pawh hi a châkawm fo; mahse, a hnua inchhìrna thlentu mai a ni țhin," ka tih chuan a bu nghat a.



"Ka insùm theihna tur ber chu a bul hnaia a țawng hre phaa awm loh a niang," a tih chuan," Nia, inthiar fihlîm vang vang ila a țha ber," ka ti ve leh a.



Kâr hnih thum chhûng chu kan chanchin chu an sawi nasa tih ka hria. Mi lah hian min hrilh nawlh nawlh bawk a, hriat tum lovin hrist châk lo mah ila min hrilh miau chuan ka hre lo thei lo.



"Sum vàngin alawm a hmeichhia hian a neih dáwn. A hma chuan a rethei a, neih atân a duh teuh lo! Mipa pakhat, amah lo beisei vetu Thlamuana kha a chhûngte chuan an duhpui a, ani pawhin a haw bîk lo; mahse, Rinfela lo hausak thut hnu hian a chân ang tih a hlau leh sia, palai pawh a tirhtîr chûk chûk alawm," tiin thu an zêldin a, thu dik ni àwm takin an sawi a, a nih ve duh hmel ka ti lutuk.



"A rai tawh hial maithei; mahse, a rai duh kher lo thei bawk. Aizawlah pawh an va zin dun reng kha, hun tháwl an ngah lutuk, mut pawh an mu dun tawh hial ang," ti tein min lo sawi bawk, dâwt mah ni se a rûk tak chuan rilru chu a na ve duh reng mai, han insawi thàwl ve pawh a châkawm rum rum; mahse, kan chhûngkua erawh chuan 'Eng mah sawi ve loh tur' tiin thu kan pass tlat a, kan sawi chhuak ngai lo.



Krismas bazâr turin Aizawlah kan phei leh kan tum a, kan khaw lama rawn kal kual pawh a tân chuan a remchâng reng mai; mahse, mi min sawina tùr a remchâng leh dâwn si a, Lungleiah Rose-ite inah ka riak thla ta daih.



An chhûngkua chuan min fiam ve nasa mai a, ka nutei erawh chu a țawng tam lêm lo, min pawmpui zân lo a nih ka ring; mahse, thu tihtlûk vek a ni tawh a, awmzia aawm tawh chuang lo.



Rose-i chuan," I hlim tawh àwm! Mahse, a la hla leh deuh sia, ka khawngaih che," tiin min fiam phawt a, chutah, thutak deuh zâwk hian," In inneihni chuan nalh tâwkin ka inchei ang, mo aia nalh tùrin," a ti leh a.



"Pasal tùr pawh i hmuh zawh ve loh kha aw," ka tih lêt chuan," Ka hmu chiang, ka la peih lo mai mai a ni, Rinfela ang hi chu duh ni ila chuan, an intlar pût thei ang chu," tiin a lo țang ve nasa, hmu zo lo tih chu a pãi dài thei bîk lo a ni ngei ang.



"Ti ve tawh mai ula?" thutak deuh záwka ka tih leh chuan," Nia, dam chuan nakkum favàng lamah kan ti ve tawh ang chu a. Ka inkhâwl ve nual tawh a, bâkah, min tur ve țan tawh bawk a," a lo ti ve mai a.



"Nuam ngawt ang! Fa erawh ka la pawm hman loh hrâm ka beisei, nalh deuha inchei ka duh dâwn si a," ka lo ti a.



"Het! Pai nghâl duh rih suh, a buaithlâk! In pahnihin hun thâwl hek hawk neiin kum khat zên zâwn han inlàwm phawt ula, chumi hnu lamah chuan fa pài lam chu in ngaihtuah chauh dâwn nia, a hmanhmawhthlâk loh," a lo ti deuh tlat a.



"Fa awt tak mi a lo nih hlauh chuan..," ka ti a, ka ngaihtuah zui nghâl vang vang. Hetiang lam hi kan sawi ngai lo a, inneih pawh kha a han rawt deuh chûk chûk kha a nia, inneih hnu lam phei chu kan la sawi lo rêng rêng.



"Chu pawh ni se, pai nghâl duh suh, in pahnih chauhin hun thâwl tak nei phawt rawh u, a hmanhmawhthlâk loh ka tih kha, upa dùn tawh taka innei tùr in ni lo bawk a," a lo ti leh a.



Ka pateate inah a vawi khat nán lèn tak takin zànah a rawn lêng ve ta. A nungchang hi ti phawr phawr chi a nih loh avàngin a inthlahrun hmel viau mai a, a țawng tam lo viau bawk; mahse, Rose-i'n a be tam hrim hrim a, tlêm chuan a zia deuh. Thlamuana pawh rawn lèn a duh viau nain țûl dang remchâng lutuk a nei hlauh mai a, a rawn lang thei lo.



A túk zîng chaw ei khama Aizawl pana kan tlàn lai chuan,"Nizàn khân i va inthlahrung ve a?" tiin ka zâwt ta nghe nghe a.



"Chuti mi?" a lo ti mai a.



"Ka chhûngte an nia, an lakah inthlahrung viau duh suh. Mamawh thilah kan pùr dáwn pawh a ni lo a," ka tih chuan," An zahawm alawm, ka awm dàn leh nunhlui zawng zawng hretu an ni a, khatiang mi kha an fanu duh tak chuan pasalah min han nei dâwn a nia," a lo ti a.



"A, i nunhlui chu i kalsan vek tawh a, i thlauhthla vek tawh alawm. Nunhlui duhawm lo tak tak nei vek alawm kan nih, nunhlui ațanga kan inteh zêlte chuan tu mah tling kan awm thei náng," ka ti thung a.



"Nangmah i tling alawm," a lo ti vut a.



"Hmmm..." ka lo ti ner nâng a.



"Nang chuan mi pawh i teh i teh thei ang, nunhlui duhawm lo i nei ve tlat lo, mi fel tak i ni reng si a," a tih leh chuan," Ni nâng. Tlin lohna kan nei vek, mi teh thei kan awm lo, kan tlinna kawng a inang lo va, kan tlin lohna kawng lah a inang hek lo," ka ti leh a.



"Hei vàng tak hian alawm ka duh êm êm che!" a rawn tih chuan ka thinlung chu hlimna hian a rawn tuam hlap hlap ni hian ka hria.



"Kei chu nangmah i nih vàng hian ka duh che," ka lo ti a, ka zak duh bîk lo a.



Thaw hak hian," Kawnga tlàn lai chuan biahthu di chu inhrilh lo teh ang," a rawn ti chhuak halh a.



Ka nui hak hak a," A nuam ve alawm, i bulah chuan rilru engthâwl takin ka awm thei a, ka duh duh ka sawiin nangin i lo ngaithla thei bawk a. Chuan, a hmasa ber atân, kan inneih hunah chuan fa eng zât nge neih i duh ang?" tiin ka zâwt nghãl a.



"Tam tâwk!" a lo ti vat a.



"Chutiang ringawt chu, a fair lo! Panga, paruk, sàwm tih vël talin sawi la?" ka ti leh a.



"I neih theih chhûng a ni mai!" a lo ti leh a.



"Kan nei zut zut dâwn tihna a ni maw?" ka tih chuan," A pâitu tùrin i tlin phawt chuan ni mai ang chu," a lo ti leh a.



"Ka pài peih loh hnuah i pâi ve thung ang a?" ka tih chuan a nui hawk hawk a.



"Tehréng mai!"



A hnu deuhah chuan Krismas hla a play a, Krismas a lo hnai ve tawh tho nèn, a boruak a nuam kher mai. Zai chu ka lo zàwm ve bawk a.



"I zâi thiam hle mai!" a tih chuan ka en phei a.



"I thiam ve lo em ni?" ka ti a.



"Zâi thiam a, a nalh lêm lo thung," a lo ti sup a.



"Ka zirtîr ve ang che, chu hla chu i thiam hrim hrim em?" tiin ka zâwt a. Tetei Raltein 'Krismas leh kumhlui zùn' tih hla a sak kha a in-play mêk a.



"Thiam deuh, a hlathu erawh ka hre lo," a ti a.



Tetei Ralte zâi chu ka lo sakpui ve a, ani pawh chuan motor steering vuan reng pah chuan a kutțang chu music rem chuan a phûttîr ve tlat tlat a.



Kawng lakah pawh kan chàwl lêm lo. Thil hi a lo ngaihtuah kim roh hi ka tia, kawng laka kan ei tùr motor-ah a lo dah sa vek a, chawlh muan pawh kan ngaih loh phah.



"I țhiannu kha i lo sáwm ve lo a ni tiraw?"



"Tu? Mazuali maw?" ka tih chuan," Umm.." a lo ti a.



"Nia, tiraw? Ka va mâwl tak! A hman lo a nih pawhin lo sàwm ve chhin hrim hrim tùr a nia aw.. !" ka ti vang vang a.



"Eng emaw kan inneih tùr chungchângah sawi a awm em? Ka chanchin emaw i chanchin emaw lampangte?"



Ka en phei chiang lutuk! Mi min sawina chu a lo hre ve em maw ni ka ti hman hial a; mahse, a hriat ka ring leh lo.



"Eng chungchâng mah an sawi lo, lo sawi pawh ni se eng nge pawi? Kan innei dâwn tho a, dâwt thu bâk sawi tùr an hre chuang lo ang," ka ti a.



"Pawi lo e, kei chuan eng mah ka hre ve lo a; mahse, nangmah hian rilru na deuh hian i lo tuar keuh keuh ang tih ka hlau deuh a, ka chanchin an sawi duh chuan sawi tùr an ngah dâwn a, a țha lam sawi tùr a vâng dâwn bawk si nèn, ka chungchângah kher chuan thu dik tak vek a nia an sawi dàwn ni," a ti charh charh a.



"An duh leh lo sawi mai mai ang hmiang, min tibuai pha lo e tiraw? Kâ an nei a, an tã a nia, kan va thununsak thei bawk si lo a," nui chung hian ka ti a.



"Nang hi chu i fel ngawt mai!" a tih leh chuan," Chuti, nupui fel tak i nei dáwn zuk nia! Láwm hle rawh aw," fiamthu hian ka ti a.



Ani erawh chuan thutak zet hian," Ka lâwm asin, kei tluka láwm hi an awm tam kher lo ang, ka phû loh lutuk nupuiah ka nei dáwn che a nia," a lo ti daih a.



"Chutiangin ka sawi lo a nia aw. A, a nuam lo, thil dang sawi daih ang, thlàna pangpâr dah tùr kha ka siam a, keima kutkawih ve liau liau a ni, a mawi reuh lutuk asin," ka ti a.



"A ni maw?! Min hmuh ve phal ang em?" a lo ti a.



"Kan dah hunah chauh en ka phal ang, ka roh tawp a. Ka chhûngte dang hmuh pawh ka phal lo," ka ti a.



"A mawi ngawt ang!"



Aizawl kan thleng hma viau a; mahse, intih fai leh eirawng bàwl a ngaih vàngin kan chhuak zui lo. Pa Hmingate'n chaw ei tùrin min ti nain Rinfela'n a hnial a, hun danga ei a ti zâwk a ni.



Zànah a hma ang chiahin kan mu leh a, room chhúng a phui țha a, a váwt hran lo.



Zînga ka harh chuan a lo tho daih tawh! Ka tho ve vat a, tih tùr a lo ti zo thawkhat tawh a, in tùr ka duh leh duh loh min lo zâwt vat a.



"A, duh lo mai ang, chaw kan ei har vak tawh hmel si loh a," ka ti a.



"I tih hun hunah a ni mai."



Thlànah kan kal hmasa ber a, pangpâr ka siam ve liau liau chu uluk zet hian thlànlung nghèng chuan ka dah a.



"Ka pu, kan lo kal har i ti em? I khua a lo har viau lo maw? En teh, pangpâr ka siamsak che hi mawi i ti em? I tân liau liau ka siam che a nia, i làwm ve tho ka ring?" tiin ka phun sap sap a, Rinfela lam hawiin," Thu làwmawm hrilh tùr che kan nei a, i fapa duh takin a hrilh ang che aw?" ka ti leh a.



Ani pawh chuan a lo hre thiam ve thuai a.



"Ka pa, Sangbawihi nèn kan innei dáwn asin, nakkum January ni 15 khian. Min lawmpui viau ang tih ka ring a, ka ring dik tiraw? Fapa mai ni lovin fanu pawh i nei tawh dáwn tihna a nih chu. Vàn ațangin min lo thlîr reng rawh aw," a ti ve sup sup a.



"Ka pu, ka pa i ni tawh dáwn tihna a nih chu. I fanua min pawm ngei ka beisei, fanu țha tak, i fapa tân a nghenchhan theih mi țha tak nih ka tum ngei ang, lo ngaihtuah miah suh aw, hlim taka siam ka lo tum ngei ang, ka tiam a che," ka ti a.



"Ka pa, i zahna thlentu lo ni țhìn mah ila ani hi ka bula a awm phawt chuan a tân zahna ka thlen ngai lo ang, engkim pawh hmachhawn ka huam vek a ni. Ka hmaah eng harsatna pawh táwkin sawichhiatna pawh táwk dáwn ila, ani'n min puiha nangin min lo thlìr reng bawk chuan ka tuar chhuak thei vek ang," Rinfela chuan a ti leh a.



Chuti khawpa min ring ngam chu ka láwm takmeuh a ni. Min rinna hi tihchhiat ka duh ngai lo ang a, ka tihngheh belh sauh sauh záwk ang.



Haw kawngah chuan," Pangpár chu a mawi khawp mai, ka pa pawhin mawi a ti viau ang," a ti a.



"Nia, a ti ngeiin ka ring. Chuan, tihian dàwr lamah kan tlang dâwn tiraw?" ka ti leh daih a.



"Aw, kal zawk ila, rei pawh awm a ngai nâng," a lo ti a.



Dàwrah hian electric bungrua ațangin ei tùr thlengin a awm a, a awm kim khawpin ka hria. Lun pawh a lùn ve rêng bawk a, thawktu pawh pathum lai an awm.



Rei pawh kan awm hma, chhuah leh mai kan tum tawh lai chuan ka hmel hriat hlui ka hmu nawlh mai! Ani pawhin min rawn hmuin min rawn hre nghâl vat mai rêng a.



"Sangbawih..?!!"



"Ațan...inhmuh a va khât ve tiraw?" ka ti hliai a.



Ațana hming ka lam rîk chuan Rinfela chuan min rawn hnaih nghâl dâwrh mai a, min si chêtin a rawn ding nghâl a ni.



"Nia...i dam țha em? Kan va inhmu khât êm!!"



A kut a rawn phar chhuah avàngin ka phar chhuak ve lo thei lo, kan inchibai a, min hmer deuh vang vang a; mahse, ka kut chu ka pawt lêt ta thuai a.



"Ka dam alawm, i chhûngte pawh an dam ang chu maw?" ka ti phawt a, ani chu a lu a lo bu nghat a, kan inhmuh chu remchângah la nghâlin Rinfela lam chu en zauh pah hian," Pasal ka nei ve tawh dâwn asin, ani hi ka pasal tùr Rinfela a nih hi," ka ti nghâl zaih a.



Ațana chuan makti hmel a pu deuh a; mahse, a inngaihtuah harh thuai a niang," A ni maw? Ka lawmpui hle mai che, i pasal tùr chu mi vànnei tak a ni ngei mai," a ti duah a.



Rinfela chuan," Mi vànnei ber zâwk maw le," a lo ti nghut a, an inchibai ve dáwn emaw ka tia; mahse, a tu ve ve mah chuan kut an phar chhuak lo.



"Kan kal mai ang e, tih tùr kan nei a," ka ti ta ringawt. Rinfela'n nuam a ti lo ngei ang a, Ațana lahin nuam a ti lo bawk ang a, chutiang boruak chu a theih anga ranga tlànsan vat ka duh.



"Aw le, kan la inhmu leh ang chu maw?" a tih chuan," Nia, la inhmu leh ang," ka ti ve a. Rinfela chuan ka kut a rawn vawn chat avàngin inkài chung chuan kan chhuak ta nghâl a.



Motor-a kan luh veleh chuan," Kha pa kha, hmâna ka hnek tawh kha. Na deuh tak khân lo hnek ila țha tùr!" a ti ngul ngul a.



"Zahngai! Zahngai!" tiin a bân chu ka va chùlsak a.



"A mitmeng kha, ka duh miah lo!" a ti leh nghut a.



"Engtin nge a awm a?" ka lo ti sap a.



"A la duh reng che tih a lang reng alawm, ka tel lo phei chuan hmu miah suh ang che, ka remti hauh lo," a ti leh nghut nghut a.



"Aw le, aw le, ka hmu hauh lo ang. Kan kal thei tawh ang em? Ani avànga buai kha ka duh hauh lo, ka theihnghilh vek tawh bawk! Nangmah chauh a ni ka en tawh ni," ka ti a.



Min rawn en vang vang a, a mitmeng mawi ka tih êm êm leh min hîp êm ém țhintu, min la hîp rengtu chuan ngun zet hian ka rilrua ka ngaihtuahna chu a rawn en dik ni berin ka hria.



"Ka hmangaih che, ka hmangaih che avàngin tu mipa tân mah ka phal thei lo che," a ti chhuak hrawih a.



"Mipa dang tân ka inphal hauh lo, ka pasal tùr nangma tân chauh lo chuan," ka ti lêt ve hnâp a.



A bân ka chùlna ka kut chu manin a hûm lum vang vang phawt a, chutah, min rawn en lehin," Mipa vànnei ber ka ni a, hmeichhe vànnei berah siam che ka tum ve ngei ang," a ti leh ta sup a.



Ka nui var var mai. Tunah pawh hian hmeichhe vànnei ber chu ka ni reng tawh, a chhan chu ka hmangaih êm êm leh min hmangaih êm êmtu nupui ka ni thuai tawh dáwn si a, ka hlim hle bawk a ni.



"Le, tlán chhuak tawh ang le."






*LÀWMNA FÎM BER CHU KAN ÎTSÎKTE VÀNDUAINA CHUNGA KAN LÀWMNA HI A NI*




https://chat.whatsapp.com/F5M6GiQvBic4qATfXaGwBc


Join leh keuh ang u aw😘

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » October 25th, 2020, 3:38 pm

☆24/7☆ - 41 By Dingdi Pachuau





Kan tlàn chhuah hnu chuan ka titi char char a, nichina thil thleng kha theihnghilhtîr ka duh, ani hi a lo ngaihtuah leh ngur ngur ang tih ka hlau a ni.



Kan kal duhna kan thlena motor ațanga kan chhuk dáwn chuan," Kan inneih hnuah pawh Aizawlah kan awm lo ang, kan tlawh zauh zauh chauh ang," a rawn ti chhuak sup a.



"Engati maw?!" ka lo ti hâ a.



"Kha pa khân a hmuh leh che ka duh tawh lo," a ti ta nghut a.



A lo la ngaihtuah char char a nih chiah hi! A va buaithlâk tak aw! Engah mah ka ngai tawh lo asin le; mahse, amahin a ngaih thutak tlat si chuan a thu angin kan awm ang, a, buaina tùr a awm lo tihna. Lungleia awm phei chuan ka chhûngte kan hnaih ting a ni mai a.q



"I tih dàn dán le, Boss."



A nui ta suk mai.



Ka thawmhnaw tùr chu ka en vak lo, a thawmhnaw ka enpui mah zâwk. Mamuantea thawmhnaw tùr pawh ka melh pah reng a, pawisa hman tam vak loh ka duh, kumthar maiah pasal ka nei dâwn tawh si a, thawmhnaw chu hâk sèn loh ka nei alawm. Ka mamawh loh thila insèn vak ai chuan dah țhata mamawh hun taka hman ka duh zàwk a ni. Inneih sènso lama hman mai kha a finthlâk, ropui lua pawh a ngai lo, a thianghlima kan hlim phawt chuan a táwk mai.



A hriat miah lohin a birthday pheikhawk tùr ka leisak tel a, a inkháwm ve tawh miau avàngin inkhàwm thawmhnaw lam ka enpui ber bawk. Ani erawh chuan," A ngai hran hleinem, ka nei reng a," tiin a țang a; mahse, ka leisak tho.



Ka ril a țâm viau tawh nain dawra chawlh a phal tlat lo a, ina ei a ti tlat mai si a, ka hnial duh lo. Eng tak chu kan ei dâwn ni maw ka ti rilru a, ka záwt duh chuang hlei lo a.



In kan thlen veleh chuan tui a lum a, ka inbual nàn a ti a ni. Ani erawh chu ei tùr siamin a vir nghâl vat a, puih ka tumin a phal si lo,"I tui lum chauh ngaihtuah rawh," min ti tlat a, ka thlîr vung vung ringawt!



Ka inbual zawk, ka bàl lêm lo bawk nèn, rei lo tê tak tak chauh a ni ka inbual ni. Ka inthlâk hnua choka lam ka pan chuan a ei tùr siam chu a lo siam zo chiah nghe nghe a, dawhkàn chunga plate-ah chuan a lo suak chhuak mêk a.



Chow a lo siam ve ngei a ni, a rim a la tui hrep zui, ka pum a ri nghâl rawk rawk mai!



Ka pum ri chu a hria a ni chiang,"A țâm lutuk tawh a ni maw?"tiin min nuih suk phawt a, chutah," A ei theih nghâl aw, ei rawh, coffee ka lo siam nghâl bawk ang," a ti leh a.



Ka eisan duh bîk lo, coffee no hnih a siam a, min hmachhawn zâwng chiahin a rawn țhu ve nghál a.



"Tui dâwn lutuk!" tiin a chow siam rim chu ka hîp lût vang vang a.



"Ei rawh le, i ril a țàm kha."



A rim a tui ang chiahin a tak pawh chu a lo tui a, ka ril a țâm bawk a, ka ei zo vek. Coffee lah chu a siam tui êm êm bawk a, ka lei ka lem lo chauh a ni!



"I siam tui kher mai!" tiin ka fak a.



"A ni maw?" a lo ti mai a.



"Tehrêng mai! A tui lutuk! Kâr khat chhûng i ei siam hi ei ta ila, ka rih phah belh nasa ngawt ang!" ka ti leh a.



"Nakkum January ni 16 ațang chuan i ei char char thei tawh ang," a lo ti charh a.



"Ka thau duh àwm mang e!" ka tih chuan,"I nih dàn dán kha ka duh vek, i chêr a nih pawhin, i thau a nih pawhin ka hmangaih zêl ang che," a lo ti duah a.



"Ka lâwm e."



Zanriah chu Pa Hmingate ina kan ei dáwn avàngin bàwl buai a ngai lo a, kan hman rih bawk a, thil kan ei zawh chuan țhutthlènga țhuin kan titi mai mai a.



"I thawmhnaw kha an țhui zo tawh em?" tia min zawh chuan,"Țhui zo a ni deuh tawh mai, tlêma chei leh hlek a la ngai a," ka lo ti a.



"Kawrfual vâr i ha lai ka hmu châk che asin le!" a tih leh chuan," Ka ha chhin dâwn em niang? Naktûkah kal ila?" ka lo ti vat a.



A țha viau tak ang. Inneih thawmhnawah kawrfual ka ha dáwn si lo a, puanchei bihin kawr vâr ka țhuitîr ka ha mai dâwn a ni. Hei hi ka duh dàn a nia, awlsam leh mawi tho si, simple tak ka duh vàng a ni.



"Thla kan la bawk ang a," a tih chuan," Nia...ka châk tawh e a," ka lo ti ve vat a.



A inbual a, chumi hnuah chuan muangchâng tawh lovin Pa Hmingate in lam pan chuan kan chhuak zui ta nghâl a.



Anni hian engkimah an buaipui a tih theih, an fapa ang riakah an ngai ni berin ka hria. An fapa boral ta thlalâk ka hmuh ve hnu phei kha chuan fa ang maia an lo en leh an lo duat pawh hi àwm tihna chen ka nei tawh, an lo inang ve êm a ni.



Chaw ei pah chuan kan inneih hnua kan awm dàn tùr chu Pa Hmingate nupa chuan min hrilh malh malh a, kan hmakhua an ngaih vàng a ni tih hriain ngun takin ka lo ngaithla a.



"Pa Hming, kan inneih hnuah chuan Lungleia awm ngheh kan tum asin, a pawi ang em?" tiin Rinfela chuan a râwn ve a.



"E, i duh dàn kha a țha ber alawm," a lo ti phawt a, chutah," Chuti a nih chuan in rawn phei zawk zawk chu a ngai dáwn tihna a ni maw?" a ti leh charh a.



"A ni mai ang chu. Lunglei kha ani tân pawh an khaw hnaih deuh a nia, han zin lawk duh châng pawhin a hnai deuh a, a lung a lèn deuh phei chuan zin zut kha a duh àwm si a," Rinfela chuan nui duh hauh lo hian a ti leh a.



"A, ka lung a lêng lo tawp ang," ka lo ti vat a, Nu Thangtei a lo nui var var a.



"Lunglènna chhan tùr ber i bulah a awm reng tawh dáwn miau a, tiraw?" a lo ti a.



"Ni ang chu!" nui chung hian ka ti ve a.



Pa Hminga chuan," Zanlai laiah 'Ka nu ka ngai' tia a inhnît fuih fuih chuan Rintea tân tihngaihna a vâng duh dâwn êm asin," a lo ti ve a.



"Chu chiah chu, chuvàng alawm Aizawla awm ka duh loh," ani chuan a lo ti a.



"Chhan dang a awm lo maw?!" tiin a malah chuan ka va sik zauh a.



Nu Thangtei chuan,"A ni tak ang! Eng emaw chhan dang vàng a nih ka ring zâwk," a lo ti ve vat a.



"Aizawl chu ka têt deuh laia ka tualchaina hmun țhìn a nia, Lunglei erawh ka pa nèn nuamti taka kan chènna, sûlhnu tam tak a hnutchhiahna hmun a ni thung a, chuvàng chuan, chhuahsan ka duh rih lo a ni," thutak zet hian Rinfela chuan a lo ti a. Chutia a tih tâkah chuan fiamthu pawh kan thawh ta lo.



A tûkah chuan kan lo ruahman tawh angin mo kawrfual ha tùr chuan kan chhuak a, TV lamah, faknaahte kan lo hmu ve nasa tawh nain a hmunah chuan a mawi hlawm kher mai! Mit pawh a tlai khawpin ka hria.



Kan en dan dan a, hawh theih leh lei theihte pawh chu kan en tawn zak zak a, Rinfela'n mawi a tih deuh chu ka inthawlh chhin zêl bawk a.



Chiffon kawrfual pakhat, simple angreng tak hi min kawhhmuh a, a țhui dàn simple tak chuan mit a la zak mai, kawr dangin a lo hliah vàngin ka lo hmu lo a lo ni.



Ka ha chhin a, ka tâwk vél vek mai. A fual hnalh a, ka taksa chu a rem zaih mai a, min phuar bawk si lo, hâk a nawm bâkah inhmeh a la awl êm êm zui!



"Kha kha chu i hâk tùr liau liaua an țhui ni tùr a ni!" min en vang vang hnu chuan a lo ti sup a.



"Ka inhmeh i ti ve em?" ka tih chuan," Tehrêng mai, i inhmeh lutuk! Khawi, thla la ang," a ti a, ka ding lai chu thla min lâksak a.



"Selfie ang aw," ti lehin min rawn kuah a, kan hmet mawlh mawlh mai. Kawr chu inhmeh ti ve viau mah ila inneihnaa ka hâk tùr ka țhuitîr tawh a, leiin awmzia a nei lo, pawisa sènna mai mai a ni.



Hmun dangah kan kal leh a, mo thuam lam kha chu a ni tawh lo. Ka thawmhnaw tùr min enpui ve a, keiin ngai ka tih loh thu ka sawi ve bawk a.



"I Krismas kawr tùr i nulat chhûng hian ka la lei miah lo che, remti ve mai rawh," a ti tlat a, ka hnial rei duh ta lo. Nia, ka nulât hun a tàwp țêp tawh a, hei bâk hun a nei tawh bîk dâwn lo.



Kawrlum sendâng min lei. Rawng sendâng hi inhmeh min ti tlat mai si a, dàwr neitunu lah chuan a lo fak thiam bawk si nèn, ka nu kawrlum tùr nèn kan lei tâk nghe nghe kha.



Kan haw hmain a pa thlàn kan tlawh leh a, kan inneih hmain ka kal ve tawh àwm si lo a, tlawh leh ka duh tlat a ni.



"Ka pu, 'Ka pa' tiin ka ko ve tawh mai ang che aw, ka pa i ni dáwn tawh tho bawk a. Ka pa, pasal tùr țha tak min pêk avàngin ka làwm e, lo ngaihtuah lo la, nupui țha tak niin ka lo enkawl țha viau ang a, hlim taka siam ka lo tum bawk ang. Kan inneih hma chu vàn ațangin lo vênghim char char rawh aw," tiin ka be sap sap a, ka thil sawi chu Rinfela chuan a hre kher lo ang, ka țawng zàwi viau mai si a.



Haw kawngah chuan a váwt ka tih deuh avàngin motor seat-ah chuan ka ke ka hlâng chho ve ve a, shawl-in ka inkhuh hlãn bawk a.



"A vâwt i ti hlê a ni maw?" tiin AC chu a on nghâl a.



"On duh suh, tukverh hi ka hawng duh tho bawk sia, awmzia a awm àwm lo êm mai," ka lo ti a.



"I kut kha a hnaihah khân zu dah la, a zia deuh ang, ka jacket hi i ha dâwn em niang?" a tih chuan," A ngai lo, hei ka intuam lum tawh alawm," ka lo ti vat a.



"Ni lan țhat deuhnaah kan chàwl dáwn nia," a ti a, chak vak lo chuan motor chu a khalh zêl a.



Mahse, chawlh a tum chuan ka phal lo, ka intuam lum țha a, chawlh phah nân êm chuan ho ka ti a ni.



"Kan inneih hunah chuan vâwt i ti ngai miah lo ang," a ti teh ngawt a, ka en vat a, ka ke ka hláng kãng ãt chu min rawn en zauh tih ka hmuh chuan ka nuih a za deuh a; mahse, min hnem dàn a hriat ve chhun a ni miau a, ka nuih phal lo.



"A váwt tehchiam lo, ka inhlâng kãng mai mai alawm, a nuam zâwk a," ka ti phawt a, chutah," Kan inneih hunah chuan i dinglamah ka mu ang," ka ti leh a.



Min rawn en zawk a, kawng en leh nghâlin," Engati maw?!" a ti sup a.



"Ka duh maw le," ka lo ti mai a.



"I lam hawiin ka mu ziah dâwn sia, ka dinglam leh veilam i hre thei nâng," a ti leh a.



"Hre thei mai ang, ka mu hmasa ziah ang a, i lo mu lai ka lo en ru dêk dêk țhin che ang a," ka tih chuan a nui hawk hawk a.



A nui hawk hawk ri hi hriat a khàt bâkah a nui hmel hi hmuh zen zen tùr a awm lo bawk a, hmuh nuam ka tiin hriat nuam ka ti kher mai.



"I thil sawi reuh chu, ka nuih a za hle mai," tiin a tlân muang deuh a, chutah, rawn hawiin," I hmelțhatzia hi an hrilh ngai tawh che em?" a rawn ti ta daih a!



Min tizak leh si, min tihlim tho bawk si, chutianga min han fak ve ta chu hlim loh rual ni hek lo le.



"Heii, min tihzah tum bîk kher suh," ka ti a, ka hmai chu ka hup pah a.



Motor ding ta datah chuan ka hmai hupna kut chu la sawnin ka en phei a, min lo en reng tawh niin!



"Ka nupui tùr i ni na vàng vàng hian hmelțha ka ti êm che a ni, zêp tlat thu a awm hleinem. Nichina i awm dàn phei kha chu...ka sawi thiam lo, vènhim tlat che duhna rilru min pe hial a ni," a ti sup a.



Hmai sa deuh hat hat hian," ka lâwm e," nui deuh sâng hian ka ti a, a lamah chuan ka va âwn hnai deuh a, hnai zetah chuan ka va en a.



"Thil dang zawng zawng aiin, i hmelțha. Chuan, ka hmangaih che," ka ti sap a, mit khap duh hauh lo chuan ka en ràn a.



Min rawn hnaih ve nghâl bawk a, kan tih tùr chu ka hre sa vek; mahse, dan emaw tihtàwp emaw ka tum teuh lo, kan inhmangaihna leh kan induhna kan lantîr ve dáwn a ni mai a.



Kan infáwp vawng vawng a, ka rilru a hlimin nuam ka ti veng veng bawk. Motor rawn tlân a awm lo bawk a, kan duhthawh dùn khawp mai.



Tunah chuan vâwt pawh ka ti ta lo, ka taksa a lum chhuak nghâl vek mai. Min tilumtu atân a lo țha takzet a nih hi.



"Kan inneih hun ka nghâkhlel tawh takzet a ni, theih ni se naktûkah hian sawn theih se..." a ti sup a.



"Tunah hian ni zâwk se i ti lo maw?" tiin ka nuih a.



Ka bianga piai pah chuan," Kei aia nghâkhlel angin sawi miah suh, ka ngaihtuah deuh cheuh cheuh phei chuan i chhûngte hian min hrem an tum a niang ka ti hial a ni," tih pah chuan a thaw halh a.



"Teuh lo lutuk! Min kaltîr thuai thuai an duh tawh nâklaiin!" tiin ka nui a, chutah, thutak leh deuh zâwk hian," Inbuatsaihna țha an duh vàng zâwk a nia, ka pa a awm tawh bawk si lo nèn, kan unauah nei hnuhnung ber tùr ka nih vàngin theih anga inpuahchah țha an tih vàng a ni, i hriat thiam hrâm ka beisei," ka ti leh ta záwk a.



"Ka nupui i nih hun ka nghahhlelh êm vàng a ni e," a lo ti sup a.



*******



Krismas chu hlim takin kan hmang tlingtla ve leh mai a, Rinfela pawh a rawn lawr deuh zut mai. Lunglei lamah chhûngte tak tak a neih loh vàngte pawh a ni mahna, kan khuaa a rawn lawr zut pawh hi àwm ka tihpui viau, ka lâwm bawk. Zàn lamah kan inkhâwm loh leh kan zaikhâwm leh mai a, ani tân pawh kohhrana tàl tamna hun a lo ni leh zêl a, țha ka ti viau a ni.



Kumthar erawh Lungleiah a hmang ve ta thung a. Kan inneih huna a dinpui ve tùr Kima nèn in lam pawh an buaipui zo deuh vek tawh a, ani Kima hi a țhian kawmte zîngah pawh khân țawng tam lêm lo,a chânga in ve zeuh zeuh thei a ni a, tunah hetia Rinfela a nungchang a danglam tâk hnu hian ani pawh hian a nun dàn chu bànsanin a inkhâwm ve hial tawh a ni.



Keini lam pawh kan inbuatsaih ve nasa tawh a, kan in leh a bul vêl pawh kan tuaihnûm thar a, in chhûng lam rawng kan hnawih țha a, mahni tâwkah kan buai ve hle a ni. Ka ute chhûng, Mamit lama awmte erawh chuan kan inneih dâwn hnaih tak takah lo chuan an rawn kal hman dâwn lo, thuphâ an rawn chawi ve luam a; mahse, kan hriat thiam thu kan hrilh ve mai a. An awmna a hlat bâkah an pa hnà vàngin an rawn hman hma thei lo tih kan hriatpui ve tho a ni.



A birthday ni-ah tak Lungleiah ka kal a, hemi ni hi chuan Ka pateate ka tlawh tawh lo, a in lamah ka tlang nghâl. Puitling pui tawh, nupui nei mai tùr a nih tawh vàngin Birthday lawm tih vêl chu țûl a ti lo a; mahse, keiin țûl ka ti miau bawk si a, min hnial duh ta bîk lo a ni.



"Ka thil pêk tùr che hi i duh ang em aw?" ka ti vang vang a.



"Min pêk a nih phawt chuan duh loh ka nei lo ang," a lo ti a.



Krismas bazâra Aizawla kan kal țuma ka leisak pheikhawk chu ka pe ta a, makti deuh hian min en a.



"Engtin nge i lo lei hman a?" a ti a.



"Ka rang alawm " nui chunga ka tih chuan min pawm vang vang a.



"Ka lâwm e, ka duh zâwng tak a nih bâkah a thil min pêk hian min tihlim takzet a ni," a ti a, ka chalah a fáwp zauh bawk a.



"A làwmawm e, i duh zâwng a ni hlauh chu," ka lo ti ve a.



"I hnên ațang chauhin piancham thilpêk ka la dawng a, ka dawn ve hi ka ring ngai lo. Ka pianni hi lo awm lo se ka tih rilruk fo kha tunah chuan ka paih bo vang vang tawh, nangmah vàng liau liau hian ka lo piang lo ang a, pianni hi ka lo nei lo ang tih ka hlau ngawih ngawih tawh a ni," a ti malh malh a.



A thil sawi vàng chuan nghet takin ka kuah a.



"Happy Birthday. I lo piang hi ka lâwm takzet a ni, hlimna tam tak min petu i ni si a. Kan inneih hnuah pawh kum tam tak dam dùn zêl ila, he khawvêla ka pasal ni tùr i lo piang hi ka làwmzia entîr nân i piancham lo thlen apiangin thilpêk ka pe ziah bawk ang che," ka ti hnâp a.






*MI DANG PHEIKHAWKA KÂR HNIH KHAT TAL I INRAWLH VE HMA CHU, TU MAH SAWISÊL MAI MAI LO ANG CHE*




(Zanin chu ramri buaina hian ka rilru a hneh lutuk a, thil dang ka ngaihtuah hlei thei lo a ni, ka thil ziah pawh hi eng ruai a ang lo ang tih ka hlau khawp mai, hriat thiamna nèn min lo chhiarsak hrâm mai r'u aw.



Kan ram tân vawi khat tal i lo țawngțai ve hrâm dâwn lo'm ni?
🙏🙏🙏

Link:
BBcode:
HTML:
Hide post links
Show post links

Local Advertisement

MOBILE SIAM ZIR DUH TAN!!!

Tech-Inn Mobile Repairing Traning Centre, Bazar bungkawn

Kum tin mi za chuang eizawnna kan siamsak a, Eizawnna tlaka thiam turin kan zirtir thin

Mizorama mobile siam zirna hmasa ber changtlung ber kan ni. Hrechiang duh tan Contact : 9612099411 / 9862016122


Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » October 25th, 2020, 3:38 pm

☆24/7☆ - 42 By Dingdi Pachuau




Kan pahnih chauhin a birthday chu kan làwm a, mi dang kan ngai lém lo, kan hlim tâwk viau tho a ni.



Chawhnu lamah chuan,"Zanin chu riak rawh aw," a tih chuan," A tihchi loh ang, riah tum pawhin ka rawn kal lo," ka ti a.



"Riah tum loh pawhin a tum chawp leh theih tho," a lo ti mai a.



"An lo buai viau ang tih ka hlau alawm, chêtna tùr neuh neuh hi a tam ve a," ka tih pawh chuan," Zan khatah eng vak i ti hman lo ang," a lo ti leh mai a.



Riah chu châkin duh viau mah ila ka chhûngte ka zah. Pateate ka tlawh mang bawk si lo, ka kal tih hre phei se chuan an lungawi lo ngawt ang chu, Rose-i phei phei chuan min tihtauh khum leh ngei ang.



"Hun remchâng dangah ni zâwk mai se..." ka tih pawh chuan," Zanin hi a remchâng ber, ka birthday a ni bawk a, bâkah, ka thlahlel êm êm che a, riak ve mai rawh," a lo ti leh tlat mai a.



"Ka tihek lutuk ang che," nui chunga ka tih chuan ka kut chu a rawn hmer vang vang a.



"Ka nupui tùr i nih kha."



"Nang pawh ka pasal tùr i ni ve tho."



"I riak thei tihna a nih chu," a lo tih leh sup chuan," Luhlul ve bawk si," ka ti nang nang a.



"Min hnialna tùr zawng reng lo teh, i chhûngte hrilh i hreh deuh a nih leh keiman ka hrilh mai ang," a lo ti nghut a.



Ka hnial duh tawh lo, riak tùrin min duh ve a ni mai, aniin min thlahlel viau a nih te chuan lãwm viau tùr ka ni záwk alawm le.



"Hreh lo e, ka'n hrilh ang e," ka ti a, ka phone ka phawrh ta nghâl a.



"Kalpuina tur che ka nei a," a tih chuan ka en hâ a.



A birthday pualin Serkawna hnuchham enkawlna hmun tlawhin pawisa tam tham ve tak kan han pe a, nu leh pa enkawl miah loh leh 'nu leh pa, min enkawltu ka nei ve lo' tih pawh la hre thiam lo naute, mit ngeia a hmuna han hmuh chuan rilru a khawih dàn a dang bîk kher mai.



Motor-a kan luha kan țhut fel hnu chuan tlân chhuak ta mai lo chuan kan țhu vang vang a, a hnuah erawh rilru inhmu tak hian kan inen dùn vang vang a.



"Fa kan neih ve hunah chuan khatianga an awm kha ka phal hauh lo ang," a ti ta sup a.



"Nang an pa i nih chhûng chuan an awm lo tawp ang, țah an tichhuak i ti ve em?" ka ti a.



"Umm...An khawngaihthlâk ka ti, an duh vàng rênga rawn piang an ni tawp si lo a," a ti leh a.



"A nih, keini hi, duh vàngin em ni kan pian?" nui deuh chunga ka tih chuan,"Ni lo ve; mahse, ka piang chhuak hi ka inchhîr miah lo," a lo ti sup a.



"Kei pawh chutiang chiah chu. Chuan, kan fate tân chuan pa țha tak i ni ngei ang tih ka ring bawk," ka tih chuan," I ring tak tak maw?!" a rawn ti vat a.



"Ring e a, ring mai pawh ni lovin ka hria a ni," uar fê hian ka ti a.



Lâwm tih hriat tak hian min enin a nui suk a," Ka lâwm e, i rin ang chuan nih ka tum ngei bawk ang," a ti sup a, ka kut lain a hûm vang vang a, chutah, a fâwp ta zoh a.



"He khawvêla ka lo piang chhuak hi nangmah vàng chauh hian nuam ka ti a, tunah phei chuan mipa hlim ber ka ni ka la ti dawt ngam lo nain a dawttu tal chu ka niin ka ring, ka nupui i nih hunah chiah khawvêla mipa hlim ber chu ka ni thei chauh ang. Ka tân i lo piang hi Pathian hnënah pawh làwmthu ka sawi țhìn asin," a ti ta duah a.



A thil sawi chuan min tilâwm takzet. Min duhin min hmangaih ve takzet si a, sawi chhuah pawh hi a hreh bîk hek lo, thiam lo taka a sawi chhuah lah hian ka thinlung a dek thei êm êm zui bawk a.



"Kei pawh ka lâwm e, hmeichhe hlim takah min siam si a, ka hmangaih che, Rinfel," ka ti ve sap a.



Zànah a țhianpa Kima a rawn lêng a, kan pathum chuan kan titi nasa. Kan inneih huna kan thu chham dàn tùrte chu kan sawi chhin a, Kima pek chuan fiamthu thawh nán a hmang a, Rinfela pawh a nui suk suk reng mai.



A haw hnuah chuan mutna tùr kan siam a, khum a siamtîr diam tawh a, chutah chuan mu tùrin min ti a, ani erawh chu khum bul mai chhuatah chuan Dunlop phahin a mu mai dâwn a ni.



"Ka la mu dâwn rih lo," tiin khumah chuan a rawn lâwn a, ka bulah min nghèng chêtin a rawn țhu ve a.



"Ka bulah mu ve mai la, rizai hran kan sin mai dáwn alawm," tiin ka thlêm fiam a.



"Min thlêm suh!"



"Ka thlêm lo che, ka khawngaih che alawm, chhuatah i mu dâwn bîk a nia," ka ti leh a.



A ngawih rùn rún hnuah chuan," Ka thei alawm, a harsa lo. Nakin lawkah chuan ka bulah i mu reng tawh dáwn a, zanin chauh chu ka tuar chhuak thei ang," a ti sup a.



He pa tak hi chu aw...! Ka va duh tak êm! Ka duh thlâwt, ka hmangaih êm êm bawk.



Țawng tawh lêm lo chuan insi rialin kan țhu dùn a, a hnuah erawh chuan ka hnunga țhuin min kuah a, ka ngháwng chu a rawn tháwk khum lum leh ham ham țhìn a.



"Kan inneih zàn ni tawh se ka va ti tak!" a ti sup a.



"Rei lo tê chauh nghah kan ngai tawh alawm," ka tih chuan,"Min kalsan leh rih tùr hi hrehawm ka ti lâwk alawm," tiin min kuah nghet sauh a.



"Ka phal lo, hetia kuah reng mai che hi ka duh," a ti leh a.




"Hmmmmm, zanin chu naute lian duat tùr ka nei a ni maw?" tiin a tukkhum sam chu ka chùlsak a.



"Min thlahlelin min ngai ve miah lo a ni maw?" a ti ta nghut a.



"Ngai e, ka ngaih vàng che a nih hi ka riah ni," ka lo ti a.



"Ka tur luih vàng che a nih kha," a tih leh chuan a tidik ka ti bawk si a, sawi tùr ka hre lo chu ka ngawi ta daih a.



"Ka thlah phal tawh lo che, thlah che ka duh lo, ka kuah loh che chuan engtin emaw tak awm tùr niin ka inngai tlat," a ti leh a.



"I suangtuahna țha lo mai mai a nih chu," ka lo ti a.



"Kan inneih hun a hnai viau tawh a; mahse, eng emaw ngaihțhat lohna ka nei leh thut țhìn. Chân thut dáwn chein ka inhre tlat," a ti chhuak leh sup sup a.



"Chutiang ngaihtuah suh, khawngaihin, min chân dâwn lo. Khawiah mah ka kalsan dâwn lo che, hlim takin kan innei dâwn alawm,"tiin ka theih ang ang chuan ka kuah ve a.



"Ngaihtuahna țha lo a ni tih ka hria; mahse, ka mut dâwn apiangin chutiang chu ka rilruah a rawn awm ziah, thil dang ngaihtuah ka tum pawhin ka thei țhìn lo," a ti leh a.



Inherin inhmatawnin kan inkuah ta a, a suangtuahna țha lo chu paih bosak ka va duh tak êm! Ka kalsan ngai dáwn lo a, 'Min kalsan rawh' pawh ti ta se, kalsan ka tum hauh lo ang maw le.



"Ka kalsan ngai dâwn lo che, chutiang lam chu ngaihtuah tawh suh aw," tiin a hnung chu ka chùlsak hoh hoh a.



"Hetia ka kuah che hi chuan min kalsan ka ring lo; mahse, ka hmuh phâk loha i awm chiah hian hmu tawh lo tùr che angin suangtuahna ka nei ziah alawm, ka mumangah pawh ka mang fo," a ti leh sup sup a.



"I ngaihtuah tlat chuan i mumangah pawh i hmu mai ang, ngaihtuah loh tum tlat rawh, min han en la, ka kalsan dáwn lo che, i nupui niin i kiangah ka awm țêp tawh tih ngaihtuah tum tlat ang che aw," tiin a mit taka enin ka hrilh malh malh a.



Mitmeng dul deuh raih hian," Zànah hian ka ngaihtuah zêl alawm; mahse, zanin chu ka ngaihtuah lo thei maithei, ka bulah i awm miau a," a ti a, ka sam chu a khawih pah nap nap a.



"Ka bulah mu rawh aw."



A thaw hawk a.



"Ni lo, ka thei ang, ka thei ngei ang," a ti leh lawi a.



"A țha alawm, tihian ka kuah leh mai ang che aw. Ka kuah che chuan ngaihtuahna țha lo kha i paih bo thei zâwk ang," tiin ka kuah a.



Kan meng rei phian mai.



Kan mut dâwn tak takah chuan a steel almirah chu a va hawng rawk rawk a, eng thil emaw ni hi a rawn khai chhuak a, lehkhabu lian pui ni àwm tak a ni.



Ka lo en reng a, a phelh zêl a, photo frame a niin ka hre leh si.



A lo ni tak tak. Mo kawrfual ka hâk chhinna thlalâk kha a lo ni a, lian táwk takin a lo siamtîr a nih hi.



"I mawi asin, ka la tár chhuak phal lo nain, ka mut dáwnah ka en ziah țhìn thung a," a ti a.



"Engati nge kan pahniha kan lâk kha i tih záwk loh a?" ka tih chuan," Ka tel lohnaah hian i chhe lo ém a, bákah, i taksa pum a lang thei a, ka duh alawm," a ti leh tlat a.



Chutah, steel almirah chu va hawng lehin thil dang a rawn keng chhuak leh ta.



Hei chu thawmhnaw a ni ve thung. Mo kawrfual ka hâk chhin, Chiffon kawrfual mawi leh hâk nuam zet, ka inhmeh ve deuh ngei mai kha, tuna thlalâk a rawn ken chhuaha ka hâk ngei mai kha niin!



"Engtin...engati nge...i lo lei hman a ni maw?!!" ka ti bah nawk nawk a.



"Lei e, i inhmeh ang khân tu mahin an inhmeh ve dâwn si lo a, ka ui alawm," a lo ti thung a.



Zîng lam dâr 1:30 vêlah kan mu ta chauh. Chutah pawh chuan kei, khum sîr chêtah muin, ani chhuatah, khum rawn hnaih thei ang berin a rawn mu bawk a, kut invuan chungin a nia kan mut ni, inthlah a duh tlat lo.



Zínga ka harh chuan khua a lo êng tawh a, meng suar suarin a mutna chu ka en a, a lo harh tawh niin, a mutnaa țhu reng chung chuan ka che vél chu min lo thlîr reng a.



"I harhna a rei tawh em?" tiin ka nuih sak a, ka rizai sin chuan ka invûr țha leh sauh a.



"Rei lutuk lo," tiin a rawn ding a, chutah," Ka lo mu ve," tih leh khuma rawn làwn chu a rual nghâl zat a.



Ka rizai sin chu a rawn kêu sawt sawt a, a thawmhnaw hâk pâwnlam a lo vawh deuh thlur tawh avàng chuan ka lo țê țhat a.



"Bengchheng suh, ka kuah lum nghâl dâwn che alawm," tiin min rawn kuah nghâl zat bawk a.



"A va nuam ve! Hetiang hian a nuam ang tih chu hria ila chuan nizàn khân chhuatah khuan ka mu lo tawp ang," a ti sar sar a.



"Ka sâwm reng che a," intithei zeta ka tih chuan,"Ka insûm thei lo ang tih ka hlauhpui che alawm," a lo ti a.



Min tizak leh si, chêt pawh ka che ngam ta lo.



Tlai deuh takah kan tho a, chawhmeh siam a ngai lêm lo bawk a, kan hmanhmawh lêm lo khawp mai. Tlai taka tho e ti lo chuan coffee siam a ti tlat a, a siam a, kan han in leh rih bawk a.



"Ka coffee siam i in reng teuh tawh viau a ni," tiin a nui suk a.



"Ka châk tawh!" ka lo ti thuai a.



"Hun hi pawt hnai thei ila tiraw?" a ti leh.



A va naupang chhia tak!



"Ummm..." erawh chu ka lo ti ve tho.



Tûkțhuan kan ei tlai a, tih tùr ka nei lo bawk nèn, nilênga ina inawm leh chu a ni mai, tlaiah ka haw chauh dáwn si a.



"I pa a ngaihawm reuh-"



Min en rùn rún phawt a, chutah," I pa maw?" a ti ta sup a.



Ka thil sawi sual hre chhuak nghâlin," Oh, ka tih sual! Ka pa maw le, a ngaihawm reuh, la dam ve se, a hlim dâwn si a, hlim takin kan han inkàwm leh ang a " ka ti a.



"A upa ve tawh a, naupang leh țhalai zâwkte hun min kian ve tawh a nih hi. Chutiang chuan ngai ila, rilru a dam mai," a lo ti daih a.



"I ngaih dàn chu a țha hle mai ka ti, chutianga ngaih theih ve chu ka châk e a!" ka ti a.



"Mitthi chu ngaih an ngai lo, a la damate hi inngaiin inthlahlel ila, intihlim tawnin inhmangaih bawk ila," a ti leh duah a.



"A dik chiah!"



Chaw ei khamah chuan a bêlbawm chu ka rem felsak zuai zuai a, ani pawh ka bulah lo dingin min lo en ve reng a.



"Ka che fel lo i ti àwm mang e!" a tih chuan," Fel e, i rem dàn hi tlêmin a inang lo deuh mai alawm, hmeichhia leh mipa kan inan lohna chu hêngahte hian a lang ve bawk a nia, mipa chuan eng vaka an ngaih loh kha hmeichhia chuan kan ngaimawh țhìn a," ka lo ti a.



"Nia, khatiangah khân hmeichhia chu in pawimawh alawm, i lo awm tak tak hunah chuan engkim hi i duh dàn ang takin i rem, hûng sawn kual thei ang," a ti leh a.



"A, chutiang a ngai lo, helai tê chauh hi a ni mai, a dang chu a fel fai vek alawm," tiin ka nuih sak a.



Tlai lam a lo niha ka haw dâwn chuan haw a phal lo lutuk chuan ka bânah min chelh leh tlat pek a. A awm dàn hi a mak ka ti ru angreng khawp mai, nizàn lamah ni se min thlahlel lutuk a, kut inchelh rengin kan mu a, tunah ka haw a phal lo leh a.



"Kan inneih hma chu haw tawh lo mai rawh, kan inneih dâwnah kan chho dùn mai ang a," a ti a.



"Chutiangte chu duhthusâm a ni alawm; mahse, a ni thei ngawt bîk si lo a," ka ti a.



"Ka ngai dâwn êm che a ni."



Teh thlâwt a! Ka khawngaih záwk.



"Kan awm dun theih teuh tawhzia hi ngaihtuah la..Chuan, min ngaihtuah rùn lovin thil dang ngaihtuah tum rawh aw, zànahte khân thil țha lo lam kha lo ngaihtuah tawh lo la?" tiin ka hnèm malh malh a.



"Ka lo zui chho ve nghâl tawh mai dâwn che em maw ni le?" tiin keimah min bia ni lo àwm tak hian a phun sup a.



"A theih tho alawm," tiin ka lo chhâng a.



"A, a tihchi loh. I chhûngte'n engtin nge min lo ngaih ang? A zahthlâk," a ti leh lawi a.



Ka tlân chhuak tùr pawh chu ka tlàn theih lawk loh phah.



In ka thlen chuan Mamuantea'n min lo làwm khawp mai a, scooty chuan ka phur kual leh rih a, ei tùr ka hawnsak ka pêk hnuah erawh room-ah ka luhsan thei ta chauh a.



Rinfela ka phone a, ka thlen tawh thu chu hrilhin engnge a tih tih ka zawh chuan," Ka awm mai mai," tiin min chhâng a.



"Min ngaihtuah chiang mai," fiamthu deuha ka tih chuan," Loh theih nâng, tukina kan mut dunna khum kha ka va en leh țhìn a, i awm tawh bawk si lo," a ti a.



"Ka thlalâk i neih kha," ka tih chuan," Nia, ka en leh reng tawh," a ti leh mai bawk a.



*******



Rawn chhoh zawk a tum thu min hrilh chuan lo hnial duh lovin," Lo chho rawh, țûl tùr zawng zawng pawh rawn keng tawh la," tiin ka lo chhâng a.



"A zahthlâk rih, Kima tel lovin ka ni rih dáwn si a, ka lo kal zawk tak tak rih ang," a ti ve thung a.



"Pa Hmingate kha engtikah nge an rawn phei dâwn kha? Naktûkah nge, a tûklehah zâwk?" ka tih chuan," Naktûkah," a ti a.



Kan inneih nân ni 5 chauh a ngai ta.



A rawn chhuah hmain min rawn hrilh leh thlap. Ka lo phûr, ka lo nghâkhlel. Min hmuh châk êm vàng leh min ngaih êm avànga rawn chhoh zawk tum a ni, ka hnial phal teuh lo, min ngaia min thlahlel ngawih ngawihtu lo hnial chu, ka ngaihtuah ringawt pawhin ka khawngaih.



Phûr zetin eirawng ka bâwl a, naktûk lamah hi chuan chhûngteho, hmun danga awmte pawh an rawn kal țan tawh ang, kan buai ve nak tawh ang chu.



Sana ka en deuh chhên mai, motor khalh a nih avàngin ka be duh lo, ka tibuai ang tih ka hlau a ni.



A lo thlen a hun vêl tawh ang tihah pawh chuan a la rawn thleng lo, tlêmin ka ngaih a țha lo deuh hlek a, ani hi kawng lakah a rawn pêng khawmuang tihna em ni le?



Ka phone chu ka tuai ka tuai a, han biak chu ka duh a; mahse, a rawn hmanhmawh lo ve deuh pawh a ni thei tiin ka ngaihtuah leh a.



A rawn chhuah kha dâr hnih vêl a ni a, tunah dâr 4 a ri vang tawh, a lo thlen chu a hun tawh a ni. Motor khalh a thiam hle a, amah chauh phei chuan dârkâr 1 leh tlêm bâk hun a hmang ngai hleinem.



A tàwpah chuan ka phone ta nge nge a.



A ring e.



"Hello, Sangbawihi maw-"



"I va lo thleng har-"



"Hello? Sangbawih, he phone neitu hian accident a tâwk tlat mai, hei damdawi in kan panpui mêk aw," mipa aw chuan a rawn ti ta!



"Eng...maw?!!!" Ka khùr nghâl daawt dawt.



"I hmel hriat a nih chuan khawngaihin i lo kal ve thei ang em? Mi dang han hrilh tùr kan hre mai lo, phone hi a lock tlat lehnghâl a," a rawn tih leh chuan ka kaihza thâ chu a sài dar dar a, chutah, ka țhu ta hnawk a.



"Ni lo, a na viau em? A țha em? A biak theih em?" zawhna hlîr mai.



"Nikhaw hre lovin a awm, a lu-ah hliam a nei, chubâk chu kan hre thei mai rih lo."



Kan inbiak zawh hma chuan ka țap chhuak ta hawk mai. Ka nu a rawn tlân vat a, min rawn kuahin thil awmzia min rawn zàwt a, ka chhâng lo.



A accident. A nâ a ni ngei ang, nikhaw hre lovin a awm a nia.



Lalpa, pui rawh aw, na lutuk tawrhtîr lo hrâm ang che.








*LEHKHATHIAM, MI FING LEH THIL HRE ZAU TAK I NI A NI MAITHEI; MAHSE, LEHKHATHIAM LO LEH MI MÂWL TÊ TÊIN I BULA AWM HREHAWM AN TIH TLAT CHUAN I THIAMNA LEH FINNA CHU A KHINGBAI TIHNA A NI NGEI ANG*




https://chat.whatsapp.com/DXMsyQQZ3Lp2ASRh50UCed
Join leh chur chur ang u le🤗

Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)