☆24/7☆ By Dingdi Pachuau (Completed)

Episode nei ho a hlawm a dahkhawmna
Ngaia
Site Admin
Posts: 25813
Joined: April 30th, 2016, 4:07 pm

Re: ☆24/7☆ By Dingdi Pachuau (Completed)

Unread post by Ngaia » October 25th, 2020, 3:32 pm

☆24/7☆ - 31 By Dingdi Pachuau





Ka ngawi reng ringawt a, ka chaw ei châkna a tàwp chawpchilh nghâl vek. Mi dang ka melh kual ngam loh avàngin ka pa thu sawiin anmahniah nghawng a neih dàn ka hre lo, an lo sawi lâwk vek tawh pawh a ni maithei.



Ka pa vêk chuan," A fel lo ka ti pawh a ni lo, thu khuh leh zêp nei mi ni pawhin ka hre lo; mahse, Bawihte, han ngaihtuah ve la, inkhâwm leh țawngțai ngai miah lova nun han hman mai chuh! Ngaihtuahna a tithui i ti ve lo maw? A nunhlui chu lo dah țha ta ila, tuna a hun hman mêk hi a pawimawh ber chu a ni a," a ti leh charh charh a.



Sawi tùr ka nei chuang lo. Ka pa sawi hi a dik miau mai si a, ka lo rin lâwk thil a ni tho a, a hnial zâwnga lo țawng ka tum chuang lo.



Mahse, Rinfela chanchin engkim ka hriat hnu hian ka phatsan thei lo bur tih erawh ka hre chiang.



"In lo induh viau a nih pawhin, Bawihte, thil thui takin ngaihtuah la, kan duhsakna che hi hriat thiam i tum hrâm dâwn nia," a ti leh a, thil dang a sawi belh tawh lo.



Taitea chuan," Chaw kha ei rawh, eng tham mah i la ei lo a nia," a rawn ti zauh a.



Chhûngte hmaizahna avàng chuan ei luih ka tum ve ngial a; mahse, ka hlawhchham. Ka chawk let ka chawk let ringawt a, a hnua ka nu a kham tâkah chuan ka zui ve nghâl daih.



Inkhâwm tùra ka room-a ka insiam lai chuan Taitea a rawn lút a.



"Khatiang hmel kha pu nghâl ngawt teh suh, ka pa thil sawi kha ngun takin ngaihtuah la, dik lo i hre miah lo ang," a rawn ti a.



"Nupui i neih hma khân ka pain i bialnu a duh loh thu sawi ve ta se, i hlim thei bîk dâwn em ni?" ka lo ti ve thung a.



"I ho mai mai e a!" a tih chuan,"Ka ho bîk ngawt lo aw, ka rilru a nâin a hrehawm ve thei tho tih hria la," ka ti nang nang a.



"Ka hria e, ka hria e. Han insiam zo phawt mai teh le, kan la sawi leh dâwn nia," tia bân pharin, room ațang chuan a chhuak ta nghâl a.



Ka inkhâwm ve tak nain ka rilru erawh chu hmun dang daihah a awm. Rinfela nèn kan inhmuhna hmun Rose-ite in bul, kan school hlui kawng leh Rinfelate in chu ka mitthlaah an rawn inlan chhâwk zut zut mai a, a tàwpah erawh an inah chuan a châmbâng ta a.



"Kan chhûngkua kan kim lai chuan nuam ka ti thei asin, ka nu leh pain min duat a, patea pawhin min duat țhin. Ka pu erawh kha chu ka hre hman vuai a ni ber, a thih khân ka la tê lehzual a, ka nu khân țap chungin min pua niin ka hria. Ka pu thih hnu ațang khân patea chu kan in ațang chuan a chhuak bo deuh reng a, ka ngai thei a nia aw, min kàwm hlim peih ber si a."



"School ka kal ve a, ka nuin min hruai țhìn a, ka pa erawh chuan workshop a nei a, furniture workshop ang hi a nia, school bànah ka kal ve țhìn. Ka nu erawh chuan a remti lutuk lo, kawngpui bul mai a ni a, motor a tam thei si a, min chìl a hlau țhin."



"Ka nu min chhuahsan khân ka hre thiam lo a, a zin emaw ka ti tlat a, ka pa hnênah ka nu lo haw hun tùr ka zâwt țhìn. Ka pa chuan thu dik tak min hrilh mai a, ka hre thiam vak lo nain pasal dang a nei daih mai chu mak ka ti a nia aw. Hun a rei telh telh a, ka hre thiam chho ve ta thuai a, school kal pawh nuam ka ti thei tawh lo, ka pa bulah, a hna thawhna hmunah chuan awm ve ka châk ber țhìn. A hnuah phei chuan ka bâng ta daih nghe nghe a, ka pa bulah ka thawk ve mai mai a nih chu. Ka nu awm loh hnu ațang khân ka pa hlim hmel hmuh tùr a vâng ta a, amah lah upa lama nupui nei a nih vàng a ni ang, a tuar thu sawi ngai lo mah se, ka nu awm loh ațang chuan a lang upa sawtin ka hria. A chângin a țhu ngawi reng a, min hmu miah lovin min lo en leh char char țhìn bawk a, a â ta emaw ni ka ti hial țhin."



"Kan in chu a zauin a lian si a, ka nu a awm lo a, patea lah a awm khât nèn, ka pa nèn chauh chuan a reh thei lutuk! Mi an lo lêng ngai lo a, ka pa a damloh pawhin ka enkawl ve mai țhìn a, damdawi ina kal a duh ngai si lo nèn, ka mangang thei a nia aw. Kan țhenawmte an awm khât si, patea a lo haw khât bawk si, kan in chu chhuahsan vang vang ka châk țhin.



"Patea kan ina a rawn luh leh hmasak ber chuan nupui a rawn hruai haw a, motor a rawn hàwn tel bawk. A nupui chu a hmelțha ka ti lutuk! Min duat a, chutia chhûngkua kan pung leh ta chu hlim pawh ka hlim hle a ni, hun âwl ka neih veleh patea chuan motor khalh chu min zirtîr ve a, ka thiam thuai ta nghe nghe a, kum ka tlin ve tawh avàngin driving license pawh patea nèn chuan kan buaipui a, license ka neih tirh phei kha chuan ka hlim lutuk a, zànah pawh ka mu thei lo, ka duh duhnaah motor ka khalh chhuak ve thei tawh dâwn si a."



"Mahse, ka pa erawh chu ka hlim ang chuan a hlim lovin ka hria, ka nu min kalsan ațang khân a țawng tlêm êm êm a, pateate nupa pawh chu a be ngai mang lo, kei nèna kan awm dun țhin lai pawh khân a țawng zen zen lo. Patea nupui chu a țawng duh a, ka nu ang maia țawng duh leh nèlawm a ni; mahse, ka pa chuan a țawng chu a ning țhìn niin ka hre ber, ka nu kha a hre chhuak lo thei dâwn si lo a, a hlim thei lo pawh chu ka hre thiam ve ruak tho chuan ka hria."



"Kum khat țha hnuah chuan zan khat chu ka pain in danga insawn chhuah a rawt ta tlat mai a, ka hre thiam lo teh asin! Mahse, a tilui tlat si a, ka pateate nupa pawh chuan an phal lo a; mahse, ka pa thu chu hnial rual a ni lo, kan chhuak ta a, mi in hnuai zau vak lo kan luah ve ta a, chuta țang chuan ka pa chu a hna thawhnaah chuan a kal a, kei chuan taxi khalh tùr ka zawng ve ta a ni..."



Mazuali'n min rawn nghawk salh tâkah chuan ka ngaihtuahna ațang chuan ka harh chhuak ta hlawl mai, bànna hla sa tùrin an lo ding vek tawh niin, kei lah ka ngaihtuahna ramah ka lo chêng veng veng mai si a!



Inkhâwm bànah pawh chuan inah ka haw nghâl peih lo a, Mazualite inah ka pêng kawi rih. Inah ka chhûngte hriatah Rinfela biak ka inthlahrung dâwn si a, hetah hian biak mai ka duh.



"Engtikah nge tlawh tùr che chuan ka lo kal ang? I pa pawh kha kan a ngai hrim hrim a," a rawn tih chuan ka hlim kher mai.



"Lo kal i tum tak tak maw?!" ka ti leh ngat a.



"Aw, ka intiam tawh kha, kârleh khian a țha mai ang em? Inrinniah rawn kal ta ila, a nih loh pawhin Zirtàwpni tlaiah rawn riak chho ila, Inrinni zînga chhukthla leh ta ila?" a rawn ti duah a.



"I hman hun hun kha a țha ber mai, zaninah i chhuak leh em?" ka ti daih a.



"Umm..."



"A ngaiah khân maw?"



"Aw, hei, i room ni țhìn pawh kha a êng reng mai, tukverh hawnga i rawn hawi chhuah ka ring deuh tlat a nih chu, i awm lo tih ka hre reng tho si a," a rawn tih chuan khawngaihna rilru bawk khân thinglungah hna a rawn thawk leh ta.



"Kal tawh suh, ka rawn chhuk hunah kan pahnihin kan kal dùn zâwk dáwn nia, nangmah chauh chuan kal tawh suh aw, i țhiante zînga i awm loh pawhin i pa bulah awm daih la?" ka ti a.



"Kan pahnihin kan luahlum thei tawh rih si lo a, kei talin ka luahlum loh chuan a lo khawhar lutuk ang tih ka hlau alawm, bâkah, hmun dang ai chuan helai hmun hi ka ngaina hrim hrim tawh a, ka maimichhìn phei chuan ka bula awm ang rengin ka ngai che a," a ti leh sup sup a.



A thil sawi chuan ka mittui bawk chu a rawn kai harh leh ta. Ka khawngaih rualin keimah pawh ka inkhawngaih tel tho, ka pa thu sawi kha hre ve tehréng phei se chuan aw...



Chulam chu ka ngaihtuah chhunzawm duh lo.



"I lo kal hun tùr mawlh chu, ka nghâkhlel tawh! Ka hmu châk tawh che," ka ti ta daih a.



"Ka rawn kal hunah chuan ka haw lamah, ka hruai tel ve daih maithei che a ni," tiin a rawn nui hak a.



"I remti lo chung chung ka zui haw zâwk mai ang che aw? Chutin ti miah suh, i buai hlê záwk mai tùr a nia," tiin ka nui ve a.



Nuih luih ve pawh a ngai alawm, rilru tâwt a tithâwl ve deuh ang chu! A dera han nuih luih pawh hian țhatna a nei ve thoin ka ring.



Ina ka haw chuan ka pa chu a lo mu tawh a, ka nute chu an lo la mu lo thung a.



Filter-a tui chu in phawtin, dawhkàn chunga bowl lo inchhìn chu ka hawng nghâl zat a.



"Yess..." ka ti chhuak hliai a.



"Nichín khân an rawn zuar a, tui i ti ve thei si a, i pain a lei a nih kha. Naktûk chhùn thingpui hmeh atân kan kang sawr sawr dâwn nia," ka nu chuan a lo ti a.



Zochhangban hi ka ngaisáng ve a, keimahni hi chuan nei ve ngai lo mah ila, an rawn zawrh hi chuan kan lo lei ziah, mi dang pawh hian tui chu an ti ve tho, ka nu hian a kang thiam bawk a, a tui thei viau a ni.



Tûkțhuan kîl chu ka huphurh ru viau a nia; mahse, eng mah an sawi lo, ka pa pawhin thil dang daih a sawi a. Ka lâwm ru angreng, a chhan chu an sawi chhuah chuan ka inkhâwm tui lo leh vek dâwn si a.



Chhùn lamah inlêng kan nei ve nual a, Teruati a rài len ve tawh avàngin a hah ka hlau a, àwl theihna angah chuan ka àwl ve zêl a, ani lah a lo inthlahrung ve țhìn bawk nèn, tih tùr kan inchuh leh rawk rawk châng pawh a awm. Ka unaunu neih chhun ang a ni a, ka en hrang miah lo. Kei aiin upa lo mah se, ka u nupui a nihnaah chuan u angin ka zah der ve țhìn, amah hi a fel reuh a, țawng tam luam lo mah se a nèlawm ka ti viau bawk.



Tlaiah eirawng bâwl pahin Teruati chu Rinfela a hmuh dàn chu ka zâwt ve chhin mai mai a, ani leh Mazuali tih loh chu Rinfela chanchin sawipui ngam pawh ka nei lo. Ka pain min duhpui meuh bawk si lo a, ka nu pawhin a duh ka ring chuang lo, Taitea pawhin ka pa a țan tlat kha.



"A fel reng ka ti, a țawng tam lêm lo nain kan bulah khân a theihtâwp a chhuah ve niin ka hria," a ti sap sap a.



"A țawng tam lêm lo; mahse, ka bulah chuan an chanchin zawng zawng min hrilh ve asin, a thil lo paltlang tawh zawng zawngte hriat phei chuan phatsan leh ngam tùr hi ka ni miah lo, min ring ngam a, min rin avàng tak hian ka kalsan thei lo ang," ka ti ve a.



"Ka pain a duh loh chhan chu a inkhâwm ngai lo kha a ni ber a. Ani lah khân a zêp hauh si lo a, dik tak chuan ka pa tân pawh rin ngam chu a har ve dâwn êm asin, a nunhlui zawng zawng a hre ve vek bawk si a. Ka pa rilru tùr han ngaihtuah ve la, a fanu, a duat êm êm i ni a, i tâna chuan a țha ber a duh ngei ang a, Rinfela hi a țha ber ang em tih chu a ngaihtuah nasa viau ang," a ti leh dap dap a.



Teruati thil sawi chu dik ka ti lutuk. A dik vek; mahse, 'mahse' a awm tlat tho. Ka pain min duhpui loh vàng hian ka hmangaihna leh ka duhna kha a tàwp thei ringawt si lo, amah ka khawngaihna a zual sauh a, ka lainat a, ka inthiam lo pah deuh tho bawk. A chhan chu khati chen kan inkawp ve tawh a, engati nge Biak in lam hawi tùra ka lo sàwm ngai loh le tih ka ngaihtuah a ni, hei hi chu ka mawhphurhna liau liau a ni si a.



Ka chhûngte'n an duh loh kha ka ring sa reng tho kha a ni a, engati nge ring sa reng tho si khân ka chhûngte'n an duh ve theihna dàn tùra ka lo buaipui loh ni? Inkhâwm loh aia inkhâwm țhatnate kha lo hrilhin lo lantîr ila, țawngțai ngai miah lo aia țawngțai țhatna leh thil tihtheihziate kha lo hrilh hre ve ta ila, heti reng hi a ni bîk ang em?



Ngaihtuahna min va neih thuitîr êm!



********



Ka nu bulah chuan inthlahrung ru angreng tak hian Rinfela'n lo chhoh a tum thu, ka pa lo kan a tum thu chu ka hrilh a, min hmu tùra rawn kal a tum thu erawh ka sawi tel lo.



"A țha alawm, a țhiannu pa a ni ve a, lo kan pawh chu thil àwm tak a ni," a lo ti fel êt a.



Ka rin loh lam daihin min chháng!



"Nu, ka pa hi a thin a rim ang em?" tiin ka zâwt pah nghâl a.



"Engah nge a thinrim ang? Amah rawn kan tùra rawn kal ve na na na, lo thinrim khum thu va awm suh," a lo ti leh mai a.



"Min duhpui lo sia?" ka ti leh țâlh a.



"I pa hi mi â a ni bîk hleinem. Hlauthâwng suh, ka lo hrilh dâwn nia; mahse, Bawihte, i pa duh chu i hria a tiraw? Natna khirh tak nei lai a ni a, a rilru tihaha tihhrehawm zâwng chuan awm lo hrâm rawh aw. Nang pawhin i pa natna chungchâng chu i hriat chian tawh kha, hlim taka a awm hian a nunna kan chelh rei thei ber ang tih kan hriat kha," a ti dap dap a.



Hei tak hi, a buaithlâk ka ti. Ka pa hi ka hmangaih êm êm a, rei tak min dampui tùrin ka duh, chutih rualin a duh dàn zàwma ka hmangaih êm êm Rinfela țhen chu ka thei dáwn si lo. Ka pa tihnat ka duh lo a, Rinfela tihnat ka duh lo bawk. Ka awm dàn hi a buaithlâk, an pahnihah duh ka thlang thei lo, an pahnihin ka duh, ka hmangaih ve ve si a.



Rinfela chu a rawn kal ta ngei e. Ka chhûngte ka fak thlâwt, an lo be țha hûrh lo nain an lo be nêl hle a, a tân mitmei hmuh hrehawm ka hmu lo a, țawng hriat nuam lo lah an cheh hek lo. Ka pa pawhin a lo be țha, amah rawn kan a ni ve bawk a, a lo duat thiam khawpin ka hria.



Mahse, ka tehkhin deuh tlat chu, vawk, talh tùr a ruahman diam, talh hma kâr hnih khat vêla duat taka enkawl hi a ni. Min duhpui miah si lo a; mahse, an tilang miah si lo, over miah si lovin an lo duat thiam êm êm zâwk a; mahse, Rinfela hi ka khawngaih.



Hun âwl a neih lohzia leh in chhuahsan reng theih a nih lohzia hre chiangtu ka ni a, rei awm tùr pawhin ka beisei ngam lo. Zirtàwpni tlaiah a rawn chho a, zàn a riak ang a, naktúkah a chhuk leh ang. Hun rei lo tê tak tak chauh ni mah se, a thutiam a rawn tihlawhtling a, ka lâwm êm êm a ni.



Ka rin loh deuhin zànah chuan ka nu chuan," Hetah chuan inlëng kan nei leh nual àwm si a, Mazualite in lamah va lènpui la," a ti a.



"Nu, ka pain a remti dâwn em ni? A mawi lo viau lo'ng maw?" ka tih chuan," Naktûk zîngah a chhuk leh nghâl mai dâwn si a, inkawm pawh induh ang chu," a lo ti leh mai a.



Ka nu hian min duhpui leh deuh si tihna em ni le? Nge kan inhmuh tawpna tùr niin a ring zâwk le? Chu pawh chu lo ni se, kan inkawm a khap chuang si lo a, min khawngaih ve a ni ngei ang. Nute hi chu aw, nute an lo ni nge nge e.



Mazualite veranda thlang lamah chuan țhuin kan innghèng rial a, ka kuah thùl. Kan inah kha chuan ka melh ngam țâwk a ni a, tunah chuan ka kuah ngam ta e.



Mazuali chuan thingpui hâng no hnih min rawn pe a, kal sawn leh pah chuan," Hun in neih tlèm êm kha, ngawi lo khân sawi zung zung rawh u, in sawi tam hman lo ang," a ti a.



"Sawi kher lo pawh hian kan inhre tawn vek thei alawm," Rinfela chuan a lo ti ve khauh a, chutianga a chhâng lêt ve chu mak ka ti viau zâwk a ni.



"Kârleh khian Aizawla phei leh lawk ka tum a," a tih chuan," Eng nge i tih dáwn? A hla si, ka ngai leh dâwn che asin," ka lo ti hmanhmawh a.



Ka bân chûl hoh hoh chung hian,"Ka thil hrilh tùr che hi hrilh che ka châk tawh asin aw, hmaichhan ngeia hrilh che ka duh si a, phone-ah pawh khân ka hrilh duh lo che a," a ti a.



"Eng? A ni maw?! A làwmawm lam a ni chiang, a nuam dâwn lutuk!" ka lo ti vat a, ka bân a chùl lohna lam kut chu ka hmer vang vang a.



"Um, a làwmawm a ni ber ang chu. Aizawla kan in kha kan nei lêt leh tawh dâwn a, a hmain ka hrilh tawh che kha, ka pa nèn kan chhuahsan hnu khân patea'n a tidanglam nual a, sak belhin miin an luah ve a, patea ber a thih tâkah chuan nei tùr awm tawh hek lo, ka kutah a tla a nih tâk chu," a ti hul hak a.



"A va làwmawm tehlul êm! Mahse... Aizawlah chuan min awm pheisan daih lo ang tiraw?" ka ti leh zat a.



"San lo tawp ang!" tia min enin a nui suk a, chutah,"Nimin khân ka pain min hrilh ve chiah a, kan in kan chhuahsan chhan kha, ka patea nupui khân a rûkin ka patea hnênah kan pafaa min chhuahtîr tùrin a lo ti a, ka pa chuan an țawng a lo hre ru a, inngeih lova chènho ai leh a hnua mualpho taka inchhuahtîr ai chuan tiin a hma thei ang bera chhuah kha a thutlûkna chu a lo ni àwm e," a ti sup sup a.



"A nih tak chu, a hun laiin hrehawm tàwp ni mah se, in in nei lêt leh tho ta a, a làwmawm hle thoah ngai ang," ka lo ti a.



"A dik alawm. Kan in, kan chhûngkuaa hlim taka kan lo chènhona țhin in ngei kha kan in a lo ni leh dâwn ta a; mahse, ka pa hi chu a lût duh tawh kherin ka ring lo. A hun lai khân hrehawm a lo ti dâwn êm asin, kei lahin eng mah ka lo hre ve dèr si lo a, ka nutei duhàmzia kha lo hre ve phei ila chuan ka thin a rim ngawt ang! Min duat viau si a, mak ka ti ngawt mai," a ti leh a.



"Lan dàna țha duam ringawt hi an lo țha tak tak ĺo a lo nih dâwn hi, an rilru a ngêt tlat si chuan," ka lo ti a.



"Duhàmna hi a huatthlala ngawt mai! Ka nutei pawh kha duhâm lo se chuan chhûngkhat kan ințhen darh àwm tawp si lo a," a ti charh charh a.



"I nutei chu khawiah nge a awm tâk a?"ka tih chuan," Patea nèn khân an inngeih zui lutuk lo a ni chêk ang; mahse, an innei rei ve phian a. Fa an nei si lo a, nutei khân a chhuahsan leh ta ni àwm a ni, a awmna chin tak chu ka hre lo," a lo ti a.



"I hausa tawh àwm mang e! Aizawl phei chu in luah man a to thei si," tiin ka fiam hlak a.



"Pawisa hi thil țangkai tak a nih rualin nun a tichhe thei viau asin. Ka pa nèna kan mamawh tâwk ka thawh chhuah theih chhûng hi chuan tam tak ka mamawh lo a, ka hlim tâwk viau tho a ni; mahse, pawisa neih miah loh erawh a hrehawmzia ka tem tawh a, khatiang kha chu tawng nawn leh tawh lo ila ka ti khawp mai," a ti a.



Beisei nei deuh hian ka en chho hâ a, min rawn en chhuk ve a. Min en vang vang hnuah chuan thâwk la huaiin," Ka pain accident a tawh khán damdawi ina amah enkawlna sènso kha a ngai tam lutuk a, keiin hna ka thawk thei si lo, a furniture workshop kha ka hralh phah ringawt a. A enkawl man a sâng si, workshop ka hralh chung pawh khân a hnuah phei chuan pawisa naiasen pawh ka kawl tawh lo, ka pa a la dam bawk si lo, khatih laia ka manganzia kha, nun loh mai kha ka tân a țha berin ka hria a, mahni intihhlum ka tum ta nghe nghe a," a tih chuan a kut chu ka lo hmer ngawt ngawt a.



"I pateate i pùr ve mai lo'm ni?" ka tih chuan,"Ka mangan tàwpah kan in hluiah chuan ka va kal ve ngei a; mahse, an lo awm lo, bâkah, a hmain ka pain kan in hluia lêt leh tawh lo tùrin min ti a, a chhan lam kha chu ka nute nèna kan chènhona hmun a nih vànga ka ngaih tlat vàng khân zawh enah ka en miah lo a. Pateate an lo awm bawk si lo nèn, ka kal nawn ta lo a ni," a ti leh a.



"Dam thlâkhlelhna ka nei lo a, ka nun hman ve tawh chu zahna, manganna leh buaina hlîr mai niin ka hria a, ka thih chuan chutiang chu ka tâwk lo ang a, ka chàwl ve tawh ang ka ti a ni; mahse, hruihruala ka lu ka rawlh luh laiin ka pa ka mitthlaah chiang takin a lo lang a, kei ka thih chuan ka pa chuan enkawltu tu mah a nei dâwn lo tih ka ngaihtuah chhuak a, a fapa, a innghahna neihchhun takmeuh ka ni a, kei chauh hi a dam chhan chu ka ni tih ka thinlungah hian chiang zet hian a rawn lang a, ka pa vàng chauhin thihna chu ka pumpelh ta hrâm a ni," a ti leh malh malh a.








*Thil kal tawh chu kal liamtîr mai la, i tih tawh pawh tih tawhin; tih tùr hmabâk erawh i la nei, hnunglam hawi lêt lova kal zêl a ni*

💜💜 Ads i la click ve lo a ni maw? A hnuaia ads milem khu lo click ve rawh le 👇
💜💜 Ads i la click ve lo a ni maw? A hnuaia ads milem khu lo click ve rawh le 👇
💜💜 Ads i la click ve lo a ni maw? A hnuaia ads milem khu lo click ve rawh le 👇



Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » October 25th, 2020, 3:33 pm

☆24/7☆ - 32 By Dingdi Pachuau





Khawngaih rilru tak hian a kut chu ka hmer ngawt ngawt a, chutih hun lai chuan lo intihlum ta se, a pa hi a dam chhuak kher ang em? Tuna dam taka hun an hmang dùn ang hian an hmang dùn dáwn hauh lo, a pa hian engtin nge hun a hman chhoh ang le?



"Pathian hnênah làwmthu awm rawh se!" ka ti chhuak hliai a. Hei hi ka rilru tak tak pawh a ni, hun hrehawm tak ka tawh hnua hlimna min pe leh theitu a ni a, min ring ngamtu, min hmangaihtu a ni bawk a, phatsan ka tum hauh lo.



"Kan intawng dâwn hauh lo asin, ka remti teuh lo mai!" ka ti leh a.



"Ka tum tawh lo. Ka pa vàng pawh hian ka tum chhin tawh lo, nang ka tawn hnu phei hi chuan ngaihtuah chhuah pawh ka duh tawh lo hrim hrim," a ti nghat nghat a.



"Thingpui kha in zo rawh, ka in zo tawh a nia," ka tih chuan no chu a ban ve mai bawk a.



"Aizawla ka phei chuan eng nge ka lo hawn ang che?" a ti leh a.



"Nangmah," tiin en chhoin ka nuih sak a.



"Kei chu loh theih loh thil a nia, thil dang, bengbeh i duh ang em?" a tih chuan ka nuih a za khawp mai.



"A ngai lo, a ngai lo. Dam takin va kal la, dam tak vêkin lo haw leh la, chu chu ka duh ber," ti tak zet hian ka ti a.



Kan haw har lutuk lo. Haw har lutuk pawh chhûngte lakah inthlahrun a nâ, Rinfela chungah an duh lohna an tilang miah lo a, hun fâl min la pe zâwk a nia, an zahna thlentu nih ka duh lo.



Zàn mutnaah kan in-text leh tho; mahse, amah ka ngaihtuah avàngin rei tak erawh ka duh lo, naktûkah a haw ang a, hna a thawk leh nghâl emaw a ni ang a, a mut tam loh chuan a taksa a chau lutuk palh ang.



A haw thla a, a tûk inkhâwm bànah Rose-i leh Thlamuana an rawn lang ve leh hlawl bawk a! Min rawn hrilh lâwk hauh lo, min țhâwng viau; mahse, a țha lamin a ni thung. An fel ve êm asin, min hmangaiha min ngainatute an ni a, ka pa an rawn kan vang vang a ni. Thlamuana pawh hi ka haw hauh lo, a fel ka ti, kei akâr min ngaina ve a nia. Ka chhûngte pawhin an lo chiau-au țha khawp mai, lo ti huam pawh an ni chuang lo. Ka pa ei duh zâwng tùr nia an rin ei tùr țha leh hrisêl tih hriat ngawih ngawih an rawn leisak țeuh a, an insêng ve nual ngei dâwn tih a hriat.



"In insêng nasa àwm mang e! A làwmawm a, chutih rualin a zahthlâk deuh tho bawk. Rawn leisak țeuh kher a ngai lo asin le," ka nu chuan a ti dap dap a.



"Nia, in rawn kan vang vang a, petrol leh hun in rawn hmang tawh a, ei tùr lam kher hi chu a țûl ber lo asin, kan lâwm lutuk a; mahse, in insêng țeuh si a, rilru in tinuam lo," ka lo ti ve a.



"Chutiang sawi dyah lo chuan thingpui tui tâwk min siam la, a tâwk mai," Thlamuana chuan a lo ti zauh a.



Thingpui siam tùra thawh nghâl pahin,"Engati nge Tma bike-ah i rawn chuan ve mai loh a? Petrol a hek mai mai alawm le,"Rose-i en paha ka tih chuan Thlamuana chuan,"An pa a hlauhawm êm alawm," nui chung hian a lo ti vat a.



"Bsa'n a phal lo a," zawi deuh sap hian Rose-i chuan a ti phawt a, chutah," Min rawn thlah thlap, mipa dang lakah hian a hàm strict tawp a," a ti leh a.



"A țha alawm, inhauh phahna a thlen dâwn ai chuan mahni lìrtheia rawn chuan mai kha a fel mai," ka ti a, thingpui chu ka siam nghâl a.



Ka nu zochhangban kan nèn chuan thingpui chu ka pe a, kei pawh chuan ka ei ve leh a.



"Inkhâwm lovin in rawn kal tihna nge, in inkhâwm bâng in rawn kal?" ka tih chuan Rose-i chuan," Khâwm nâng, kan hmanhmawh duh lêm lo a. Inkhâwm bàna rawn kal tum kan ni lo ve hrim hrim a, inkhâwm tum ni ta ila, kan inkhâwm ve hman reng maw le," a lo ti a.



"Chu, inkhâwm țhulh țhakin in rawn kal tihna a ni a, in rawn ngai pawimawh a, a làwmawm ka ti takzet a ni," ka ti a.



"Pathianni hi kan hun âwl neih chhun a ni miau si a, rawn kal ngei kan duh bawk si nèn, inkhâwm hun chu kan la ngah alawm kan ti ta ringawt a nih kha," Thlamuana chuan a lo ti vat a.



"In fel ngawt mai," ka ti leh a.



Tlaia haw leh thuai an tum avàngin Taitea chuan broiler âr kan vulh chu a talh a, ka pain zanriah hma deuh taka ei a, chumi hnua haw chauh tùr chuan a ti bur mai si a, anni pawhin an hnial ngam bîk lo.



Zanriah chu hma takah kan ei a, ei khamah chuan anni pawh țhu muang tawh lovin, lo kal leh vat intiamin an haw ta nghâl a.



Zàn ka inkhâwm chu Mazuali'n min lo hmuh veleh min chhuahchhàl nghâl mawlh mawlh a.



"Rinfela nei reng siin mipa dang inlêng i nei leh tho si, 'A chhe lo lutuk' an ti lehnghâl a, i kawp êm chu ka ring si lo. Insawi fiah nghâl rawh," tiin.



Thil awmzia chu ka hrilh nghâl a, ani lah pek chuan," Awii, chutiangte chu min rawn hrilh ve tùr che alawm! Ka hmu ve duh a nia, chhe lo lutuk tak mai chu ka mit hian engtiklai pawhin a hmu châk reng tih lo hre ve tawh ang che," a ti nghâl a.



"Aw le, ka lo hre tawh dâwn nia," tiin ka nui a," An la rawn kal leh dâwn alawm, ka hrilh ngei ngei tawh ang che," ka tih chuan a nui hak a.



"A zah theih loh thlâk e tiraw? Ka râwp hmel tawp," a lo ti leh lawi a, a thil sawi chuan ka nuih a tihzat êm avàng chuan kan nui leh rih a.



*******



Rinfela Aizawl va kal chu ka rin aiin a va awm rei ta daih mai! Rawn phei leh thuai kha a tum sia, rin aiin tih tùr a va ngah ta a ni ngei mai.



Ka chhûngte pawhin sawi chhuak dawt tawh lo mah se Rinfela chu thlah tùrin min duh tih chu ka hre ru reng a, a rûk chuan hrehawm ka ti ve tho. An duh loh zâwng tak bialpa neih hi ka duh dàn a ni bîk lo; mahse, hmangaihnaah hian duh kan thlang thei em ni?



"Kan duh loh zâwng a ni ngei ang tih chu in inngaihzàwn hmain i hre àwm tho sia, inthiar fihlìmsan hrâm tùr che a nia," Taitea chuan a ti teh ngawt a!



Huanah kan pahnihin kan kal a, chawhmeh tùr eng eng emaw lain ka kal ve a, ani chuan min kalpui pahin hlo a vai mai mai thung q.



"A chanchin in hriat zawng zawng hi a dik tho a, a dik tluantling vek chuang lo, jail a tàn chhante kha a thil tihsual vàng a ni lo, mi thang kamah a âwk a nih kha," ka lo ti vat a.



"Mi thang kama âwk chut chut hmel chu a put si loh kha le, mi pângngai ve tak a niin ka hre sia," a tih chuan ka va melh hrãwk a.



"A pângngai bawk aw. A hun kal tawh zawng zawng hriat phei chuan a nun hman dàn hi a àwm ka tihpui asin, kei ni ve ta ila, ka thi daih tawh ang!" tiin ka chhâng a.



"Dik tak chuan mâkpa atân chuan a îtawm loh ve ém alawm le! A nunhlui kha chu thuhran ni se, khawtlâng leh kohhran lamahte inhmang ve deuh tal se, ka pa pawhin a hre thiam thei deuh mai tùr hi a nia, a thlahthlam lutuk a! Kan hausa a nih pawhin kohhran bèl ila, kan rethei viau a nih pawhin kohhran bèl tho ila, mi min hmuh dàn pawh hi a dik zaih mai țhin a ni," a ti duah a.



"Nia, a dik alawm. Ka thiam loh tak pawh a niin ka hria, inkhâwm ve tùr hian ka la sâwm chhin miah lo a, ka inthiam lo ru viau a ni," ka lo ti sap a.



"A chanchin dik tak a hriat zàn phei chuan ka pa kha kan be țawng thei mang hleinem. A thin a rim a, a zak a, țah erawh a tap chhuak lo chuan ka hria, a rilru kha a na lutuk a ni; mahse, tih ngaihna a awm si lo, a fanu duat, a chhuan êm êm bialpa chu rûk hmang, jail tâng zauh zauh, kohhran bèl ngai lo leh fahrah, rethei ve tê mai a ni si a," a ti duah a.



Ka pa rilru tùr chu ka hre thiam ve deuh hlek. A rilru chu a na dâwn tih ka hriat sa tho a nih laiin Taitea kâ ațanga hriat chuan min den dàn a dang leh deuh.



"Mahse, Taite, ka hmangaih êm asin. Mi sawisèlna ka hriat tam poh leh ka khawngaih a, amah ka hmangaihna hi a zual zêl niin ka hria. Min duhpui lo ang tih chu ka hre reng, kei pawhin ka duh bîk lo asin; mahse, hmangaihna chu tuin nge dang thei ang? Hetiang mi hi ka hmangaih a ni ang tih ka ngaihtuah ngai bîk lo," ka ti ve duah a.



Kan ngawi dùn vang vang a.



"I hlim em?" a rawn ti ta thut a.



"Aw, min tihlim alawm. Kan inhmangaih dùn miau a," tiin zah duh bîk lovin, dik takin ka chhâng mai a.



"Kei chuan i hlimna a nih phawt chuan ka dâl hlur lo ang che, ka nau i ni a, țha ber chu ka duhpui tho che rualin puitling i ni tawh a, i tâna țha hre rual i ni, țha i tiha i duh chu ka hnualsuat lo ang ; mahse, i tih tùr chu i hriat tawh ka ring," a ti ta a.



A thil sawi chu ka hre dik lo emaw ka ti hial mai!



"Rinfela chu min pawmpui tihna a ni em?" phûr zeta ka tih chuan,"I hlimna a nih phawt chuan," a lo ti leh a.



"Taite, ka lâwm lutuk! Ka pa lamah i țang emaw ka ti char char a! Rinfela hi mi sual a ni miah lo a, a țhian kawmte hi kan ngaiha mi sual ni mah se, chhûngril lamah hian an sual vek kher lo a nia. Biak in an rap kher lo a ni thei, khawtlângah an inhmang chhuak tehchiam lo pawh a ni thei; mahse, kan ngaih ang êma sual hi an ni lo," duhthawh zet chuan ka ti a.



"Chutia fak kher an ngai chuang lo. Khawtlângin an sawisep tawh chin hi chu eng emaw hi chu a awm ve țhin a ni tih hriat tùr. Rinfela kha mi sual tak a nih chu ka ring bîk lo; mahse, ka pa ngaihngamna tùr leh lungsi taka a pawm theihna tùr chu...i hriat tawh kha," a ti leh a.



Taitea'n min duhpui lo lêm lo tih ka hriat chuan ka zâng deuh huai mai. Ka nu pawh hi a rilru a dam a, ka duh tlat chuan min hnial vak lo ang tih chu ka ring a, ka pa ber hi a ni harsa tùr chu, natna nei mêk a ni bawk si a, a rîlrem loh zâwnga ka awm chuan a taksa bâkah a nunna thlengin a tuar thei ngei dâwn si a.



"Taite, ka pa bulah chuan min sawipui ve la?" inthlahrung ru tak, beisei ru deuh tho bawk si a ka tih chuan," Awmzia a awm tam lo ang tih ka hlauhpui che, nangmahin hneh tum la a țha ber," a lo ti thung a.



"A huphurhawm ve êm asin," ka tih chuan," Hmangaih ber tân eng mah huphurhawm a awm lo, harsa deuh mah se hmangaihna chuan engkim a hneh vek thei," a ti leh a.



A tidik leh viau mai. Nia, kei pawh hi ka beiseina ka timit hma lutuk ve bawk a ni. Beih ahmain ka beidawng deuh ringawt a, ka nêp deuh chu a ni.



*******



Taitea chu ka ngaina zual sawtin ka hria. Rilru hrehawm leh ipik deuh ang khân ka awm nêp phah sawt a, ka ngaihzâwng min pawmpui theitu unaupa ka nei a ni tih hriat chu nuam deuh mai asin.



Rinfela Aizawl phei lawk chu a awm rei ngar ngar ka ti tawh khawp mai. Zan tin chu min rawn biain thil thleng eng eng emaw min hrilh ve țhìn mah se kan inkâr hla lutuk chu ka ning, Lungleia a awm kha chuan inhlat ve tho mah ila kan inhlat vak lo a, tunah erawh chuan a hla lutuk a, min ngaihna a reh phah vek ang tih ka hlau.



"Sangbawih, ka lâwm asin aw!! Ka patea khân engkim ka tân a lo dah vek a, in mai bâkah motor leh in luah man zawng zawngte pawh ka hmingin a lo dah vek a ni! A làwmawm êm a, ka hrilh lo thei lo che,"a rawn ti a.



"Ka va lawmpui tehréng che êm! I bula awma lawmpui nân che kuah vawng vawng che ka châk kher mai," ka ti a, ka hlim avàng chuan zawi tê tê pawhin ka ţawng thei lo.



"Eng pawh ni se, naktûk hian rawn haw phei phawt chu ka tum tawh a ni. Lunglei thlena hmuh che erawh ka châk khawp mai," a tih chuan," Kei pawh," ka lo ti ve a.



"Buai chung chung pawh hian, ka ngai reng tho che a, kan inkâr a hlat poh leh ka ngaihna che a zual a, ka hmangaihna che a tipung bawkin ka hria!" a rawn ti sup sup a.



"Kâr hla lutuk hi ka ning!" ka ti sap a. A ni alawm, hetiang thu hi a sawi chhuak a ni a, hlim leh lâwm taka kuah vawng vawng ka duh tehlul nèn, kan awm dàn hian lung a tiawi thlâwt lo.



"Kan kâr a hlat poh leh kan inhmangaihna hi zualin i hre ve lo maw?" a rawn tih chuan," Ka lung a tiawi lo, ka lung a tilêng, ka ngai che alawm," ka lo ti thung a.



"Ka rawn haw dâwn, i thil tùr pawh ka dah țha zân tawh a nia," tiin a nui hak a.



"Eng nge ni min rawn hawn tùr chu?" tia ka zawh chuan," Naupang hriat chi loh, i hmuh hunah i hre mai ang," a ti a.



"Ka hre châk tawh!" ka tih țâlh pawh chuan,"I hmuh hunah chauh," a ti leh deuh tlat!



Pawi hleinem. Ka hmu dáwn tho a, lo hriat láwk pawh kha a țûl ber lêm lo, amah dam takin rawn haw se chu chu a țha ber.



*******



Zan khat chu zilhna ka dawng leh ta; mahse, zanin chu inkhâwm zàn a ni lo a, Taitea leh Teruati pawh an awm ve hek lo. An room-ah, ka nu nèn chauh kan awm, ka pa a inthiar thung.



"Bawihte, i pa thu sawi kha i la hre reng ang tiraw? I pa chu i hriat kha, pa țha tak ni mah se, a duh lohna lamah chuan pa luhlul tak a ni a, a duh loh pawh a hrilh tawh che kha. A rilru hi a sawhsawnin a thlâk ve mai mai ngai lo a, ngun taka i inngaihtuah a ngai a ni," ka nu chuan a ti sar sar a.



"Nu, ka hmangaih ém asin, ani pawhin min hmangaih a, ka țhen chuan a rilru ka tihchhiatsak vek dâwn tihna a ni asin," ka lo ti a.



"Bawihte, hriat thiam tum hrâm teh. I pa chu hun tam nei tawh lo tùr a nih hi, a dam lai hi chuan a rilru hi tihahin tihrehawm lo hrâm teh ang. A rilru hah vàng hi a ni ang, amah pawh hi a chak lo sâwt riauin ka hria," a ti leh sar sar a.



"Nu, ka hre thiam alawm; mahse, Rinfela hi ka țhen theiin ka ring lo a ni, min ring ëm êm a, min rinna tihchhiatsak hi ka thei lo ang, țhen ai chuan ka pa rilru hneh hi ka tum dâwn a ni," ka ti charh charh a.



Nia, ka sawi mai mai lo. Rinfela ka țhen thei lo. Ka pa rilru tihhrehawm ka duh lo bawk, chuvàngin, ka pain ka tân a pawm ngei theih nân țan ka la ang, ka theih dàn dánin.



"Bawihte, kei ngei pawh hian ka duhpui viau lo che asin. Mi hawihhâwm leh fel tak tak, nangmah beiseitu mi dang pawh an awm ve ngei àwm si a, ani ber kher i hmangaih tlat hi hriat thiam a har deuh chu a ni. I duhna kha hmangaihna emaw i ti a ni thei tho asin,"ka nu chuan a ti leh a.



Ka ngaih pawlh lo. Ka chiang, ka duh a, ka hmangaih bawk, nasa takin.



"Nu, ka thiam loh vek a ni. In duh zâwng a ni lo ang tih chu ka hre lâwk a, biak in lam hawia ke pên tùr hian ka la sâwm ngai miah lo, chu chu ka tih tùr ni àwm tak, ka la tih miah si loh a ni. Keimah chauha biak ina kal kha ka duh tâwk ringawt a, ka tân ka rawngbàwlna tùrin Pathianin min pêk ngei a nih ka ring ta tlat," ka ti a.



"I la sâwm chhin lo maw?" a tih chuan," Aw, mahni hma ka sial viauin ka hre ta mai, ka inkhâwm khân țha ka inti tâwk ve tawp a, mi dang ka lo ngaihtuah thleng pha lo a lo ni, hmangaih inti viauin ani pawh ka lo ngaihtuah thleng miah lo tihna a ni a!" ka ti leh vang vang a.








*HMANGAIHNA DIK HI CHATUAN DAIH THIL A NI A, A LAN CHHUAH DÀN A DANG A NI THEI; MAHSE, A LAIRIL TAK ERAWH A PÂNGNGAI RENG THUNG*




https://chat.whatsapp.com/DXMsyQQZ3Lp2ASRh50UCed


😊😊😊Join leh sap sap ang aw🙏

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » October 25th, 2020, 3:33 pm

☆24/7☆ - 33 By Dingdi Pachuau




Ka nu nèna kan inbiakna chu ka ngaihtuah chhunzawm char char a, tunah chuan ka tih tùr dik tak ka hre tawh. Engati nge a hma khân hetiang thil hi ka lo ngaihtuah chhuah ngai miah loh le? Tițha inti tak leh mahni 'țha tâwk' inti takin ka inkhâwm ziah a, zàn leh chawhnu inkhâwm thlengin ka hmaih ngai lo tluk a nih kha. Eng nge chu chuan rah țha a chhuah? Ka inkhâwm zat zat lai khân engati nge Rinfela inkhâwm ngai lo leh țawngțai ngai miah lo hi ka lo en liam mai mai theih? Ka kâ chauh hian ka lo hmangaih tihna em ni? A inkhâwm ngai lo leh a țawngțai ngai lo kha țha ka ti miah lo a; mahse, ka lo en liam mai mai a, țha ti miah si lo khân ka hmangaih ka tih ve chu a duh dàn angin ka awmtîr a, a tân pawh ka dìlsak ngai mang lo a nia! A tâna țha tùr leh ka chhûngte'n an ngaih dàn tùr kha ka lo chhût pha hauh lo em ni zâwk? Ni lo, ka chhût pha chiang, min duhpui lo ang tihte chu ka hriat lâwk ve reng kha.



Ka thiam loh liau liau a ni. A chanchin zawng zawng min hrilh laite khân ka thiam dàn dána lo sâwm ngar ngar tùr hi ka nia. Engati nge sàwm pawh ka lo sawm chhin miah loh le? A vawi khatnaah a duh lo a nih pawhin ka sàwm tlut tlut chuan min hnial pawh a hreh ve ang a...



Hmeichhe thu dàwn tak hi chuh!



Mahse, tunah chuan ka inngaihtuah harh tawh a, a tân thil țha ka duhpui a, ni lo, thil țha ber ka duhpui a, chuti a nih chuan thil țha ber chu tihpui ka tum tawh ang. Ani pawh hian a rûk tak chuan ka sàwm ve pawh a lo beisei reng maithei asin, ka nun dàn ațangin a rûkin min lo teh min lo teh ka ring ta. A nu pawh kohhrana inhmang tak a nih kha, ani lah kha a beisei angin a awm miah si lo, chuvànga inkhâwm leh țawngțai ngai tawh lo a nih kha.



Ka lakah beiseina sâng tak a nei ngei ngei ang.



*******



"Ka hmu châk ngawt mai che, engtikah nge Lungleiah i lo kal theih ang?" tiin min rawn bia a.



Aizawl ațanga a rawn pheina kâr khat a ni tawh a, thil min rawn hawn ve ngei chu a lo ni. Kan khuaa zin leh tùrin ka sâwm ngam tawh rih lo a, ani lahin lo kal a sawi ri bawk si lo nèn, thil min lo hawn pawh chu ka la hmu lo. 'Rawn thawn mai la' ka ti ngam dêr lo, min rawn hawn ve vang vang a, zuk lam ve kha chu ka bat liau liau niin ka hre tlat. Lungleia zuk kal lah chu, ka chhûngte bulah chhuanlam tùr ka hre lo, kal dîl ila, Rinfela ka hmu châkah an ngai awm si a, ka inkiltawihin ka inthlahrung zo vek tawh.



"Ka hre mai thei lo, lo zin zâwk la?" tiin ka sâwm fiam a.



"Ka châk viau nain ka pa hi ka kal bosan rei ta deuh a, ka khawngaih tawh a ni. Lo zin chu i bâin i hre deuh lo maw? I thil tùr pawh hi-" a tih lai chuan ka lo țawng khalh ta vat a.



"Aw, ka rawn lam ngei ngei ang, tu mah lo pe miah suh aw. Ka hmu châk tawh teh a nia, Inrinni hian ka hman chuan rawn kal ka tum ang aw, rokhawlhna dang a awm loh chuan," ka ti ta sawk sawk a.



"Hun i insiam ve a ngai alawm tiraw?" a rawn tih chuan dik ka ti lutuk! Kan buai lutuk phei chu a ni hauh lo, ka chhûngte ka hmaizah êm vàng zâwk a ni; mahse, Rinfela hrilh kher erawh ka tum teuh lo.



A dik alawm, han hawiharh ve pawh a țûl a, ka haw chhoh ațang khân ka zin chhuak leh tawh miah lo a nia, tawm churût ve tak chu ka ni.



"Hun insiamin ka rawn kal ngei ang, nang eng nge Inrinni chuan tih i tum ang?" ka ti a.



"I rawn kal chuan, nilêngin kan inawm ang chu!" a lo ti duh chauh a.



"Min awm dâwn tihna maw?" nui hak hak chunga ka tih chuan,"I duh phei chuan ka pua ang che," a lo ti leh a.



"Tlangvâl hausa puak chu a nuam ngawt ang chu," tiin ka fiam zui hlak a.



"A ngai reng kha ka la ni," ti tak tih hriat zeta a rawn tih chuan ka fiam zui ngam tawh lo.



A patea khân an in luahna man zawng zawngte kha bank-ah a lo dah țha vek zêl a, tlêm tlêm chu hmang ve bawk mah se kum tin a pung a lo awm ve zél lo thei lo a, chutah, thla tina lút a ni bawk nèn, a lo inkhâwl chak riau mai niin, chûng zawng zawng chu Rinfela hian a rochun ta vek a, a patea thihsan tâk car pawh a nei nghâl ta nghe nghe a ni, chuvànga 'Tlangvâl hausa' ti pawh kha ka ni rêng a.



"I pateate tlawh kher lovin kan in rawn direct nghâl mai la?" a rawn tih leh chuan,"A tihchi loh ang, Lunglei kal ve chhuna anni tlawh loh chu, an hriat chhuah hunah an lungawi lo lutuk ang asin," ka lo ti thung a.



"Mahse, chaw ka lo chhum kêp ang che, chawhmeh tui zet zetin ka lo siam bawk ang," a tih leh chuan,"Ka pateate ka tlawh chuan an ina ka ei ngei an phût si ang," ka ti leh a.



"I pateate inah chuan a hmingin tlêm tê i ei ang a, kan inah i ei țeuh thung ang a," a ti leh thung a.



Nia, chutia a tih tlat chuan ka hnialsak tawh lo ang.



Ka nute school hi kan in ațangin a hla vak lo a, a hmun hi tlâng ve deuha awm a nih vàng hian nipui lai pawhin a lum dàn a zia viau mai a, thing leh pangpâr phun an peih bawk a, thing ding țhuau chuan nasa takin khawlum tùr pawh chu a vêng niin ka hria.



"Naupangho lah chuan miss thar ho nuam an tih thu an sawi an sawi a, engtin vak nge maw i va ho țhin ni?" Pu Fíma, zirtîrtu senior zet tawh, a hmel en rêng rêng pawha kum 60 pèl tawh tih hriat reng mai chuan a ti churh churh a.



Nui chung hian,"Hmel thar deuh hi chu naupang pawh hian an làwm ve tho a," ka lo ti mai a.



"Pâwl hnih phei saw chuan ka chhuah dâwn apiangin 'Miss Sangbawihi lo luhtîr rawh' tiin min chah ziah lehnghâl a," a ti leh a.



Ka nu rual vêl zet tùr Madame Hruaii chuan,"Nula hmelțha ho chu nuam an ti ve bawk ang chu maw le, pitar putar ho ai ngawt chuan," a lo ti ve a.



An senior tawh hlawm a, an fel viau nain nuam ka ti fahran lo. Class âwl neih phei chu hrehawm ka ti tawp, office-a țhut reng ai chuan class lâk
nuam ka ti daih zâwk, a inthlahrunawm loh bâkah naupang bula awm chu nuam ka ti a ni, an bula ka awm chiah hian țhahnem ka ngai thar sauh țhin. Ka thawhna hlui school nèn inanna nei miah lo mah se, khawpui naupang thiam ang chu thingtlâng naupang pawh hian an thiam ve thei tùr a ni tih hi ka rilru a ni ve țhin; mahse, ka nu ai kal ve mai ka nia, țhahnem ngaih chiam pawh, a tâwk hriat a ngai dâwn riau, mi dang mitmei vèn a ngai ka ti, țhahnem ngaihna a inchen lo ve thei si a, țhahnem ngaih luatah mi pawi ka sawi thei tlat.



Vànneihthlâk takin, Inrinni chuan pawisa la chhuak tùra ka kal a ngai dâwn ta tlat mai. Ka pain Taitea leh Teruati kal tùrin a ti deuh a, Teruati chu damdawi lama in-checktîr pah tùrin a ti bawk a; mahse, Taitea chuan a lo hnial a.



"Inrinniah chuan a fuh lo ang, a remchàn chuan kârleh lamah kan nupa chuan kan kal zâwk mai dâwn nia, pawisa chu Sangbawihi'n zu la chhuak mai se, bâkah, a tawm reng a, Lungleiah pawh zu vâk harh ve teh se," a ti hlauh a.



Ka nu chuan," Chuti a nih chuan, ka damdawi ei lai pawh a zo tituai tawh a, lo lei nghâl se a țha ang," a lo ti a, thlèng ka sil lai a ni a, an țawng ka hre pha vek tho a, a rûkin ka lo țang tawp maw le.



"Kal rawh se; mahse, thil lei tùr kha thawn vak lo ula, scooty kha a keng duh àwm si a, thil phurh chiamna chi pawh a nih loh kha," ka pa chuan a lo ti ve chuar chuar a.



Ka rilruin ka lâm zawr zawr, ka hlim lutuk ringawt! A chhan chu an bulah Lunglei kal ka la sawi ri miah lo, dìl an ngai ngei dâwn si a, dìl ngai miah lova chutia a fel thên mai chu ka lâwm a ni.



Ka pian ahnu lama Inrinni ka nghahhlelh țum ber a la ni ngei ang chu!



A lo her chhuak ta ngei e. Tûkțhuan ei khama kal chuan hmanhmawh deuha chêt a ngai palh ang tih chhuanlamin zîngah ka chhuak a, pateate in lam ka pan kawngah, damdawi dàwrah lûtin ka nu damdawi tùr chu ka lei nghâl bawk a, nakina lei leh tho tùr a nia, lei nghâl mai kha a remchâng ka ti a ni.



Min lo hmuh chuan min lo làwm ve khawp mai a, ka kal tùr thu Rose-i ka hrilh láwk avàngin chaw pawh min lo chhum kêp thlap; mahse, ka ei tam thiang lo, ei lehna tùr ka la nei tlat.



Ka awm chhûng chuan Rinfela chungchâng vawi khat mah kan sawi chhuak lo. Rose-i'n a lo hrilh sa leh thlap tawh pawh a ni maithei a ni, a fel thei a nia. Ka rilru hrehawm dàn tùr a hre ve vek ngei ang , ka pain Rinfela a duh lo tih pawh a hre vek tawh miau a.



"Zànah ka hmu țhin, in inhmuhna țhinah khân," thlèng ka sil lai chuan ka beng bulah a rawn ti sap a.



"A rawn hmu ve che em?" ka lo ti vat a.



"Hmu lo ang, ka room tukverh inhawng ka khãr tùrin a țawng ri ka hria a, amah a ni tih ka hre nghâl mai. Ka en deuh reng a, awmpui a nei emaw ka ti nghe nghe a; mahse, amah chauha a haw ka hmu zui ta a," a ti sar sar a, chutah,"Vawiin hian in inhmu ang tiraw?" a ti leh a.



"Umm..."



"Chuti, i hman veleh chhuak ang che, in inhmu rei thei lo palh ang," a ti leh a.



A làwmawm thei asin.



Pawisa lâk chhuah thuai ka duh chhuanlamin ka chhuak ta thuai a, min en zui ve avàngin min rinhlelh loh nân in thlang lama tlân chhuk duh lovin, chhak lamah ka tlân chhuak chho a; mahse, min hmuh theih loh hnu lamah chuan ka tlân chho thui lo, kawng pêngah chuan tlânin Rinfelate in lam pan chuan ka tlân ta nghãl vat a.



An in kawtah chuan car a lo inhúng ve ta ngei. A la thar viau zui a, ka lawmpui khawp mai. Hetia han ngaihtuah mai chuan engtikah mah a nei thei lo ang tih tùr a ni ve a; mahse, mihring hriat phâk rual loh hian Pathian hian rem a lo ruat zêl țhìn a lo ni.



Ka scooty ri hriain Rinfela pawh a rawn chhuak vat a, a sam thar ka hmu nghâl. A bek leh a tukkhum lam kâwngin, a chhîpah erawh a sam ngîl tak chu a buk deuh chhap thung a.



Scooty chu tithîin ka húng rem phawt a, chutah, amah chu en leh nghâlin," Wow...Sam thar!! I inhmeh lutuk!"ka ti nghâl chûl a.



"Ka lâwm e," țhen sak hian a lo ti thung a.



"Chuan..." car chu kâwkin,"Hei pawh, ka lawmpui che," ka ti leh a.



"Vawiin chu, kan khalh chhuak chhin
dâwn em niang?" a lo ti ve a.



"Pawi tawp nâng! Ka chuang ve châk alawm," phûr zeta ka tih chuan min en vang vang a.



"Lût phawt teh ang, ka pa pawh a ril a țâm ve viau tawh ang," a tih chuan phâwk zet hian ka en chho a.



"I pa pawhin min lo nghâk ve maw?!! A va zia lo tak! Nangin min lo nghah duh pawhin ani tal chu chaw eitîr tur che a nia, ka khawngaih e a!" ka ti a.



"Amah chauh i khawngaih bîk maw?" Naupang titau țawng chiah chiah.



"Ka khawngaih ve ve che u. Nang chu țhalai i la ni a, i la tuar thei deuh ang a, ani chu a upa va tawh a...A, a ngai kher lo tak tak a ni, i pa hmel hmuh pawh min tihreh zo vek," ka ti a.



Țawng tawh lo chuan in chhûngah chuan kan lût a, a pa chu plastic chair-ah lo țhuin kan pahniha kan lût chu min lo en reng a.



"Kan inhmu leh thei ta maw? Min țih thar ta a niang ka lo ti a," a lo ti ve ngei a.



"Țih tehnâng! Kan khuaah ka awm char char tawh a, Lungleiah ka rawn kal ngai lo lutuk a, i lo dam țha tiraw?" tiin kan inchibai leh rih a.



Chaw ei chu kan siam nghâl a, Rinfela chawhmeh siam rim tuizia lah chu, pateate inah khán ka ei tam lo hlauh chu a tihzia e.



Rilru hlim takin chaw chu kan ei a, ka zak duh bîk lo. Rinfela pa chu sa, a ti țha lai nia ka hriatte chu ka suahsak a, Rinfela lo lungawi lo der hmel ka hmuh chuan ani pawh chu ka suahsak ve leh a.



Nuam tak a ni! Hetiang hian rilru engthâwl takin, hlim tak leh inpawh takin kan inhmu leh thei ang tih ka ring phâk lo, kei ngei pawhin ka pain ani hi min duhpui lo a ni tih pawh ka theihnghilh țhak thei a nia!



Puar taka chaw kan ei hnu chuan myangchângin a insiam a, ka scooty dah rihin a car-in kan chhuak dâwn a ni. Ka phûr over niin ka hria, a àwm ve tho mai. A motor ngei khalha ka chuang thei tùr chu ka phûr lutuk a ni.



A hmasa berin Lungleia ka kal chhan ber chu kan ti phawt a, chumi hnu lamah erawh engthâwl takin kan tlân kual a, a titi ve sup sup reng a, kei angin hlim nui hmel pu lêm lo mah se a hlim ve a ni tih ka hre tho a, ka thinlung chhûngril ber hi a hlim vawng vawng a ni.



"Khalh ve chhin ta che?" a tih chuan," Khawpui chhûngah chuan ka khalh duh lo, motor a tam si," ka ti tlat a.



"Ka vènpui dâwn che alawm," a tiha," I khalha chuan hi nuam ka tiin ka confi daih zâwk!" tia ka chhànna chuan a tinui ve suk mai. A inhmeh asin, a kutin steering wheel a'n tuai kual leh a mitmeng mawi zetin chiang taka hmalam a'n en vang vangte chu, a khalh atân motor hi an lo siamsak a ni ang tih mai pawh chu awlzate a ni.



"Ka hmu châk tawh!" ka ti chhuak hliai a.



"Hawng la," a lo ti sup a. Inah kan lêt leh tawh a, thil min hawnsak kha min pe a, hawn thuai thuai ka nghâkhlel a ni.



Couple t-shirt a lo ni. Ve ngei tak chuan! A lei vêl lai tùr ka mitthlà chhin a, inhmeh lo ka tih viau rualin hetiang rawn lei nachâng a hria chu mak ka ti viau bawk. Ka hâk tùr chu a hmaah sparkle-in cheimawi a ni a, a mawi reuh khawp. Ani hâk tùr erawh chu mipa hâk tùr tih takah cheimawi a awm ve lo.



"I inhmeh dâwn asin. Han ha chhin la?"



Ka inhmeh ve reuh khawp mai. Ani pawh chuan a ha ve a, thla pawh kan la dùn nasa, ka phone leh a phone-in kan la țeuh.



Chawlhnia bih tùr puan min rawn hawn bawk! Hei phei chu a mawi tih piah lam a ni! A lang simple viau nsin a pui ru riau a, a man pawh a tlâwm dâwn lo tih a hriat hliah hliah.



Kuah vawng vawng a phù êm avàngin ka kuah vawng vawng a, țawngka maia làwmthu sawi zawng, a famkim tak tak thei lo.



"A mawi lutuk! Ka rin aiin thil mawi i hre daih mai, ka duh zâwng tak a la ni zui," ka ti a.



"I inhmeh tùr chu ka hria alawm," a lo ti mai a.



"Puan min rawn hawn sia, ka bih lai min hmu tùra i inkhâwm ve ngei chu a ngai tawh ang," ka ti pah zaih a.



"Kawnga i kal pawh ka hmu thei tho ang chu," a tih chuan," Kawnga ka kal lai ai chuan biak in chhûng leh kawta ka din laiin ka nalhpui zâwk ang," nui deuh saka ka tih chuan ani pawh chu a nui ve deuh a.



"I birthday lo thlen veleh Chawlhni thawmhnaw ka pe ve thung ang che, kan inkhâwm dùn ang a, a nuam ngawt ang," phûr sârh hian ka ti a.



"Min pêk kher a ngai lo, nangmah ka nei tawh tho che a, thilpêk hlu ber i ni tawh tho tho," a tih chuan," Chutin ti bîk lo la, nang pawhin hei puan leh t-shirt min pêk tho hi," ka ti a.



"Rulh lêt ngaiin ka pe lo che."



"Ka rùl dáwn lo che, birthday present tùr alawm," ka lo ti ve tlat a.



Hlim taka hun kan hman dun avàngin hun chu a kal chak khawpin ka hria. Tlai taka haw ka duh lo a, chhûngte'n min ngaihtuah dâwn bâkah thil tih tùr tehchiam neia kal ka ni lo bawk a, haw hma turin min beisei bawk ang.



"Ka chhuak chho tawh mai dâwn em niang?" ka tih chuan,"A la hma rih, rei vak lo awm leh rih rawh. Engtikah emaw zàn riak tùr talin lo zin leh la tiraw? Lâng chuan hun a ral chak êm mai," a ti a.



"Nia, hun âwl ka neih hunah aw. Nang pawh i lo la zin leh ang chu, tunah phei chuan car i nei tawh a, i lo zin zauh zauh ka ring tlat tawh dâwn a ni," ka ti ve a.



"Loh theih nâng. I pa pawh ka rawn kan leh ang."



*******



Ka pa chu a zia chho viau a; mahse, a nâ a chhuah châng chuan hrehawm ka lo ti țhin. A tawrh ai hi tawrh țhensak thei ila ka ti, a nâ a chhuah laia a bula awm hi chuan ka rilru a ipik țhin.



Thlamuana pawhin a rawn ngaihtuah viau a, hun áwl a neih chuan a rawn kan ve ziah. Rose-i tel kher lo pawhin amah pawhin a rawn kal mai a, ka pa chu a hlim thei ang berin a rawn kàwm țhin, ka nute pawhin fel an ti khawp mai a, a hming hi kan chhûngkuash chuan a mikhual lo khawp mai. Rinfela pawhin ka sàwmna angin vawi hnih chu a rawn kan ve leh ta, ani rawn kan ve hi chuan sawi tùr hi a vàn thei khawp mai a, ka lo khawngaih zâwk țhin.



Zîng tin țawngțai inkhâwmah ka kal ta ziah a, hei hi ka pa tân leh Rinfela tân ka hlàn deuh bîk a ni. An pahnih tân ka țawngțai țhin a, thil dang pawh ka thlen țhin tho nain anni pahnih hi ka mutànna an ni miau mai a, ka pa chu damna ka dìlsak rualin a rilru min tihnemsak ka dil bawk a, Rinfela erawh Phoroa ang maia rilru sak a put loh nân leh a hnén ka hruai thlen theih nân ka dïl a, finna ka dîl țhin bawk. A chhan chu a rilru ka hnehsak a ngai si a, fing leh remhre taka ka thlèm pawh a la ngai dâwn si a.



Ka pa erawh chuan Rinfela chungchâng chu sawi chhuak tawh rih lo mah se, a rilru a la sawhsawn lo tih ka hria. Ka țawngțaina chu chhàna a awm ngei theih nân ka dîl tlut tlut mai a, beidawng lova ka dìl chuan min chhàn ka ring tlat a ni.



Mahse, ka pa damna lam hi a ni ka dìla ka rin ngam theih loh chu. Doctor lam lahin hun rei tak a nei lo ang tih a sawi tawh a, ni tinin a chak lo telh telh tih ka hre ve reng si, ka țawngțainahi rin ngam a har ka ti, ka pa damna tùrah hi chuan chhàn ka nih ka ring lo țhin.



Zan khat chu,"Bawihte, ka dama hun ka la hmanpui theih lai che hian pasal țha tak nei la ka duh a ni. Pasal țha tak i nei tih ka hmuh chuan lungmuang takin ka kalsan thei che ang a, rei tak ka dampui dâwn si lo che a," a ti chat chat a.



"Pa, chutiang sawi suh, rei tak min dampui ang chu, damdawi i ei țha a, ni tin i tân ka țawngțai ziah bawk a," ka lo ti thung a.



"Natnate hi a awm loh chuan Pathian kan hlatsan lutuk ang a, amah hre lo lêk hian khawvêlah hun kan hmang ang tih a hlau a, taksaah hlîng min pe țhin a ni. Pathian hnêna chu hlîng chu lâk kiansak tùra kan dìl a dik ber bîk lo ang. Tu mah kumhlun tùr kan awm lo a, upa deuhte'n naupang zâwkte hun kan ken ve a ngai țhìn a," a ti duah a, a hah deuh avàngin a chàwl leh rih a.



"Pa, țawng tam lo deuh rawh, i hah lutuk ang e," ka ti a.



"Bawihte, inngaihtuah hrâm rawh aw, min hmangaiha lungmuang taka ka kal i duh chuan ka duh dàn hi min zawmsak ngei rawh aw."



Hrehawm ka va ti tak êm! He hun hi a ni ka huphurh êm êm chu, min hringtupa, min hmangaiha min enkawltuin min han ngèn ta ngawih ngawih chu a ni si a, lehlamah lah Rinfela, ka bialpa atân pawha a duh loh chu ka ngaihtuah lo thei si lo.



"Thlamuana hian a duh che tih ka hria, pasal țha tak tùr pawh a ni tih a lang reng a ni, ani hi i neih hlauh chuan ka ngaihtuah i ngai lo ang a, lungmuang takin ka kalsan thei ngei ang che."






*MI TU PAWH MAI HIAN ÂT PHAH HIAL KHAWPA VEI KAN NEIH CHUAN NGAWICHAWI BER BERA KAN HRIATTE PAWH HI AN ȚAWNG ȚEUH THEI ZÊL NIA*
💜💜 Ads i la click ve lo a ni maw? A hnuaia ads milem khu lo click ve rawh le 👇
💜💜 Ads i la click ve lo a ni maw? A hnuaia ads milem khu lo click ve rawh le 👇
💜💜 Ads i la click ve lo a ni maw? A hnuaia ads milem khu lo click ve rawh le 👇

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » October 25th, 2020, 3:33 pm

☆24/7☆ - 34 By Dingdi Pachuau




Thlamuana hi ka bialpa a ni lo a, a bialnu lah ka ni hek lo. Kâra induh tawnna leh inngaihzàwnna awm eih lo-ah chuan engtin nge inneihna a awm theih ang? Ka ngaizâwng lo a, ngaihzàwn tumna rilru lah ka nei hek lo, chutiang chu a ni kan inkâr chu.



"Pa, kan inngaizâwng hleinem, ngaihzáwng ka nei reng a, engtin nge inngaizâwng lo pui chu kan inneih ngawt ang? Ani pawh hian min ngaizâwng lo, duh pawh min duh hek lo ang, kei aia țha a hmu tam êm mai," a vawi khat nân ka ti ve ta a.



"Ngaihzâwng i nei tlat a, a sawi ngam lo tawp ang, mi pângngai a nih hi," a lo tih chuan," Nia, chu chu alawm ka sawi, mi pângngai a ni a, keiin bialpa ka nei tih a hre bawk a, i duh ang hi a puitlintîr thei lo ang. Bâkah, hetiang thila hnuh luh hi a zahthlâk dâwn lutuk asin. Pa, min ngaihtuah lutuk a ni, i rilru kha chawlhtîr rih la, eng dang mah ngaihtuah lovin awm rih phawt teh," ka ti duah a.



"I pa ka nia, ka ngaihtuah lo thei lo che a ni, ka dam reipui dáwn lo che. Chuvàng tak chuan, thlamuang taka ka chawlh theih nân ka duh ang mipa hi nei tùrin ka ti che a ni," ka pa chuan a lo ti leh a, a thu sawi chu a țang bawk a ni ang, a sawi zawh chuan a thaw deuh hap hap a.



"Nih leh, pa, hlim taka ka awm i duh em?" tiin ka zâwt lêt ve thung. Ka pa a ni a, ka zahin ka hmangaih êm êm a. A thil duh hi tihhlawhtlinsak ta ila, ka hlim dâwn lo, ka hlim ngai lo ang. Nghawng pawh a ngah dâwn lutuk, ka ngaihtuah ngam lo zâwk.



"Duh tehrêng mai. I hlimna ka duhpui vàng chein thil țha ber tùr ka ngaihtuahpui rêng che a ni, Bawihte," ka pa chuan a lo ti leh a.



"A nih, Rinfela hi kalsan ta ila, ka hlimin i ring em? Ka hmangaih tak chu kalsanin mi dang, ka hmangaih miah loh chu nei ta ila, ka dam chhúnga inchhîr chungin ka hlim thei dâwn em ni?" ka ti leh.



A mak ka ti, ka pa bulah hetiang hi ka sawi ngam leh ka sawi theih ka ring ngai miah lo, ka tum ngai miah lo bawk; mahse, ka ti tlat si. Inneihna hi dam chhûng daih thil a nih vàngin ka dah pawimawh a, ka pa thu hi hnial ka duh hrim hrim vàng pawh a ni lo, inneihna chu a thianghlim a, mi pahnih inhmangaih takte inkâra thleng tùrah ka ngai bawk. Chutiang chu Thlamuana nèn hian kan ni ngai dáwn si lo, min duh chu a ni maithei, min hmangaih kher lo ang.



"Tuna i bialpaah hi chuan ka ngaih a ngam thei lo a ni. Eng ang mi pawh lo ni se, kohhran bèl tlat mi a ni tùr asin. Tuna a awm dàn ang hi chuan ka fanu bialpa atãn pawh ka duh lo, pasal atân lek phei chuan..." a ti a, a sawi zawm duh lo nghe nghe a.



Nia, ka hre thiam, ka hriat thiampui lutuk tlat. Hre chiang vak lotu chuan an fanu bialpa atân pawh an duh lo ngei ang, ka pa pawh hi ka dem lo. A inkhâwm ngai lohna, kohhran a belh lohna hi a hmu lian êm a, hei hian kawng engkimah, a țha zâwnga a lan chhuah vena tùr pawh a dang vek niin a lang.



Ka pa hi ka dem rêng réng lo. Ka hmakhua min ngaihpui vàng leh min hmangaih vàng ani tih ka hria; mahse, chutih rual chuan, ka hlimna a duha ka hmakhua a ngai takzet a nih chuan ka hlimna lam ka pan chu a phal ve ngei tùrah ka ngai ve tlat.



"Pa, min hmangaih êm êmtu niin, min ngaihtuah êm vànga hetiang ngaihtuah hi i ni tih ka hria; mahse, inneihna kher hi chu, dam chhûng daih tùr a nih vàngin uluk taka ngaihtuah a țha ka ti, thutlûkna siam rum rum mai chu a fuhin ka ring thei lo a ni," ka thiam ang tâwka dam leh hriat nuam thei tùr ber țawngkam hmang chuan ka ti ve leh a.



Kan sawi zawm ta lo.



*******


Rinfela puan min lei khq ka bih chhuak phal zen zen lo, vawi khat chauh ka la bih nghe nghe. Chu pawh chu inneihnaah a nia, mi pawhin mawi an ti ve khawp chuan ka hria, an en vang vang hlawm.



Mazuali lo lêng chuan," Khawi maw, i puan thûlkhung kha, ka lo en leh lawk teh ang," a ti a, kei pawh chuan lo hnial lo chuan ka phawrh chhuak ve mai bawk a.



"Thénzâwl lamah a thlalâk hi thawn ila, an lo tah ve thiam ang em le? Hei, uikawm țûng teh suh, hetiang design chiah chiah hian tihtír ka tum lo a nia," țawng tuma ka lo âng zuau a hmuh chuan a ti a.



"Ni lo, chutiang sawi ka tum lo, engah nge an tah thiam loh ang tih ka lo tum mai a nia," ka lo ti a.



"Simple deuh anga lang si hian a mawiin a pui ru riau ka ti," a ti leh a.



"A thlâ chu i la dâwn em? Ka khung dâwn a nia," ka tih chuan," A mak chêk chúk. Leitu intih neih țhat thlâk êm mai a!" a lo ti hlak a.



"Leitu tùr i hmuh zawh loh kha aw," ka tih chuan," Tidik leh bawk si," a ti a, kan inen a, kan nui a.



Ani nèn hian zan tin kan inhmu ti ila a dik deuhthaw ang. Chhùn lamah school ka kal vàngin kan inhmu thei lo a, zàn lamah erawh ka pa kan pah hian a rawn lang ziah. Bialpa a nei lo a, han duh deuh leh han sawi ve deuh pawh a nei chuang lo, Thlamuana erawh hmelțha a ti thung.



Inlêng an awm ve leh țhin avàngin room-a awm reng chu a mawi lo a, thingpui lum leh no seng vêlah pawh a theih hrâm chuan Teruati àwl ka duh ve a ni, a rai lian ve tawh si a, a ke a vúng deuh bawk nèn, a tân chhuat dunga vei ringawt pawh a hahthlâk ve thei mai dáwn si a, zàn lamah tal hi chuan ka àwl ve hrâm hrâm țhin.



Ka pain kohhran mite țawngțaipuina a dawng nasa a, kan khua mai ni lo, a chanchin hria chuan min lo țawngțaipui reng bawk a, hei vàng hi a niang, nâ a tuar lutuk lo. A chak țha ve viau pawh hi mak ka ti țhìn, min țawngțaipuina rah chhuah liau liau niin ka hria.



"Kumin Krismas lo thleng tùr hi ka huphurh e," Mazuali'n a tih chuan," Engati maw?" ka lo ti vat a.



"Khua a vâwt àwm sia, bâkah, chhûngkuaah natna nei an awm hian rilru a hlim kim thei țhìn lo a, zaikhâwmnaah pawh rilru tak takin zài tui a har țhin alawm," a ti a.



Ani ai hian ka huphurh ka ring asin. Ka pa a lo dam țha lo nèn, Krismas chu chhûngkaw kimin kan hmang thei ang em tih pawh ngaihtuah tham tak a ni. Ka rilruah chuan beiseina ka nei sâng tho nain cancer lam hi chu a chin sawi theih hi a har țhìn si a, an țhat viau lai hian an țha lo thut a, an țha lo tih lai hian an țha leh deuh țhìn bawk a, hriat thiam a har êm a ni.



"Kei pawh ka nghákhlel lo khawp mai. Forward daih theih se ka ti, ka pa hi dam țha se chuan a zia deuh ang a," ka lo ti ve a.



"A pawi ngawt mai, thu lah kan nei dèr mai si lo a; mahse, kan țawngțaipui reng a, eng êm a ti bîk lo ang chu a," a ti vang vang a.



Ani pawh hian ka pa chanchin hi a hre vek; mahse, beidawng záwng hian min sawipui duh bîk lo, a langah hi chuan beiseina kan nei țheuh a ang a; mahse, chhûngril lamah hi chuan beiseina kan nei chàuràu viau.



A chhe chak ém a ni. Chemo pawh kha amahin beiseina a neih vànga khai kan ni a, doctor erawh kha chuan min beiseipui lo khawp mai. Tunah hian a chemo lâk chuan a taksaah hna rawn thawkin a sam a tla kawlh vek tawh a, ani pawh hian Aizawl lama kal leh chu a sawi ri tawh lo, hetia mahni ina chhûngte bula awm hi a thlang tawh a nih ber chu.



Khua a rawn váwt a, khua a ro nèn, vun pawh a rawn ro țan ta khawp mai. Vâwt hi tuar thei lêm lo mah ila tuilum ip leh rizai lum țha tak hnuaiah chuan ka huphurh lutuk lo, bâkah, mut a tui duhin mut a nuam țhìn ka ti a; mahse, kumin chu ka pa vàng hian a dàn a dang ta daih. Zànahte hian thinthi diaiin ka mu thei tawh lo a, ka nute room-ah chuan ka insawn ve ti ila a dik ang chu. Ka nu ka khawngaih a, ani pawh thinthiin a mu dâwn lo tih a hre chiang bertu ka ni ngei ang, ka pa hi lo boral ta chiah phei se chuan, eng tiang takin tuar ang maw ka ti țhin, ka ngaihtuah thui duh ngai lo.



Mi an bengvár a, an rawn lêng peih thei khawp mai. Sikul kan la chàwl lo a, ni tin ka la chhuak ve hnak hnak e. Zàn ka mut țhat theih loh vàngin ka mit hnuai a val deuh kalh tawh a; mahse, ka vui chuang lo. Pathian hnênah vui ka tum lo, tu pawhin vànduaina leh natna kan tâwk thei vek si a, ka pa pawh bãng bîk lovin natna chuan a man ve ta a ni mai, khawvëlah kumhlun tùr kan awm lo, he khawvêl hrehawm takah hian a châng chuan thi hmasa sa hi vànnei ni maiin ka hre țhìn, natna leh lunngaihnate hre tawh lovin an chàwl tawh si a. A la damate bawk hi a ni ngaihtuah ngai kan la nih, natna kan la tâwk thei a, hrehawm kan la tuar thei bawk a.



Mahse, thih chu kan la hreh vek chu a nih si hi.


*******


"Ka va khawngaih reuh tak che!"



Kan in-video call a, ka hmel chu chiang takin hmu kher lo mah se ka awm dàn a hre ve vek tho a, min khawngaih pawh chu àwm ka tihpui tho! Kei pawh, ani hi ka dinhmun angah ding ta se chuan ka khawngaih tho ang.



"I bula awm ka châk ber mai," tiin a bulah chuan ka'n pangchang ve leh rih a. Dik tak chuan ka pangchanna ber țhin ka pa heti hi a ni tawh a, tu lakah mah ka pangchang ngam tawh lo. Pachang thei ang ber leh manganna, lungngaihna hmela lan chhuahtîr lo tùra insûm hrâm hrâm ka ni zâwk a; mahse, Rinfela bulah hi chuan thup reng hi ka ning ve a ni, thu dik tak a hre tho a, ka insûm duh țhin lo.



"Ka rawn kal lawk dâwn em niang?"



Pawi lo khawp ang, a peih phawt chuan. Duhthusàmah chuan zàn pawh riak ve nghe nghe se ka ti, ani a awm chuan ka thlâ pawh a muang ve thei deuh ang chu.



Zànah a châng zeuhin Mazuali a rawn riak ve țhìn a, ka pa kana rawn lêngte pawh rei tak tak an meng ngai lêm lo, a nâ a chhuahin buai chûk chûk kan la nei lêm lo a, an ngaih a țha pawh a ni mahna; mahse, kei chuan a rûk tak hi chuan țhenkhat, pahnih thum tal hi chu lêng rei ve țhìn se ka ti, chhûngkua tawpa awm ai chuan kan thlâ a timuang ka ti bawk.



A rawn kal tak tak a! Ka chhûngte tân pawh ka pa kan tuma rawn kal na na na chu lo biak chhiat thu va awm suh, an lo be țha viau. Ka pa erawh a țawng tam peih meuh lo, min duhpui lo miau a, chutah, ani damlo chàu nèn, ka vui lêm lo.



Mite hi chuan ka bialpa a ni tih an hre kher lo ang, ka țhianpa ka kawmngeih deuhah an ngaiin ka ring, pawi pawh ka ti lo, thingtlâng a ni a, min sawi vak lo tùrin ka duh a ni, hming chhiatna a ho thei si a.



Ka nu chuan," I pa i rawn kalsan tawp țhìn a ni si a, a ngaihtuahawm ka ti țhìn ngawt mai," a ti sar sar a.



"Ngaihtuahawm lo e, a dam țha alawm," a lo ti mai a.



"I sawi dànin a upa ve tawh si a, eng emaw hlekah tlûksual bahpalh pawh a awm ve thei a, ngaihtuahawm ka ti lo thei lo a ni," ka nu chuan a ti leh a.



Ka nute room-ah kan țhu khâwm a, vawiin chu inlêng dang an awm lêm lo bawk a, ka pa bulah kan țhu țaih hlawm a. Kan titi pawhin kan țawng ring lêm lo, ka pa hian bengchheng deuh hlek a ngaithei lo țhìn a, bengchheng a tih ang chuan awm loh hrâm kan tum țhìn.



"Ti ta daih ila, túnlai hian eng nge i thawh deuh ber?" tiin Taitea chuan a titipui leh a.



"Kan in kan siam țha a, châng dang ka kân thei meuh lo," tia a lo chhàn chuan ka nuih a za deuh tlat pek a! A țawngkam hman inla puitling vél lutuk chuan ka nuih a tiza a ni ber ang chu.



"A ni maw? Buai a na ve duh alawm, i pa lahin a thawhpui thei tawh àwm si lo che a," ka nuin a lo tih chuan," Tha thawh lamah chuan min thawhpui thei lêm lo nain thil tih dàn tùr min ruahmanpui a, a țangkâi khawp mai," a lo ti a.



"In siam zo țêp tawh em? Khawi lai nge in la khawih a?" ka tih chuan," Partition kha chu kan khawih zo tawh a, bathroom kan zo țêp a, kan zawh chuan Krismas hma zawng chu kan chàwl tawh rih ang," a lo ti a.



Ka pa a rawn țawng chhuak ve ta, a thil rawn sawi chhuah lah chuan beng a verhin min tizak chem chem bawk!



"Rinfel, Bawihtei hi i duhin i hmangaih tak tak em?" tiin.



Kan ngawi ta țhap a, kan inmelh relh relh ngam chauh a ni.



A aw chu a thian kharh phawt a, chutah," Tehrêng mai, ka thinlung zawng zawngin," mahni inrin tâwk hmel fê hian a ti charh a.



A rûkin ka lo lâwm hle a, ka pa a chhànna chuan amah chu min hmangaihtîr zual sauh bawkin ka hria!



"A nih chuan, kei putar eng mah ti thei tawh lo duhthusàm hi i hria em?" a ti leh sap sap a.



"Min hrilh loh chuan ka pu, ka hre thei lo ang," Rinfela chuan a ti leh a.



"Bawihtei tân hian ngaihzâwng țha tak mai ni lovin pasal țha tak, amah hmangaih êm êmtu, a chhiat lai ber pawha a hmangaih taka dawm theitu, hlimna petu, leh hlim lai leh lungngaih lai pawha kohhran bèl tlat mi, Pathian țih mi ka duh a ni, i inkhâwm ngai em kha?" a ti leh sap sap a, a hah deuh avàng chuan a chàwl leh rih a.



Ka thinphu hi a tàwp dâwnin ka hria, hrehawm ka lo ti lutuk! Rinfela hmel chu ka en ngam lo. Engtiang takin nge a nghawng ang tih hriat pawh ka duh lo, khúk chem chema khûk ral daih ka va châk tak!



A reh vawng vawng hnuah chuan Rinfela chuan muang ban deuh cherh chawrh hian," Ka pu, ka inkhâwm ngai loh bákah, kohhran pawh ka bèl ngai lo," a lo ti sup a.



"Khawvéla kan dam chhûng hian thil dangah hlim viau țhìn mah ila, hlimna tluantling tak tak hi a awm lo. Țhalai in la nih vàngin Pathian ngai lo leh a tel lova awm theiin, chak țha tâwkin in inhria pawh a ni maithei; mahse, damlo thei, natna leh lungngaihna tâwk thei mihring vek kan ni a, a tàwpah a hnêna kan tlûk luh a ngai tho tho," ka pa chuan a ti leh a, a țawng thui deuh bawk a, a chàwl deuh vang vang a.



Chutah, ka pa vêk chuan,"Bawihtei hi i hmangaiha i duh takzet a nih chuan nakin lawka boral mai tùr thu hi min ngaihchànsak la ka ti khawp mai, intithu min ti pawh a ni maithei; mahse, a hmakhua ka ngaih vàng leh ka hmangaih êm vàng a ni,"tiin a chàwl dat a, chutah sawi zawm lehin,"Nangmah chauh khân ka be thei che ang em? Mi dang kha chuan min lo chhuahsan rih teh u," a ti leh a.



Rinfela chu ka en a, a ngawi reng a, min en ve lo. Ka pa chu a en reng a, a rilruah eng nge awm ang aw tih ka ngaihtuah lai chuan ka nu chuan,"I hreh lo ang chu tiraw?" tiin Rinfela chu a bia a, ani pawh chu a lo bu nghat a.



Eng thil tak nge ka pa chuan a sawipui ang le? Kohhran a belh loh chuan min țhen mai tùrin a ti ang nge, min kalsan tùrin a ngèn dâwn?
Thlamuana ka pasal atân a duh zàwk thute hi a lo sawipui rêu rêu ang ka ti, a fuh lo ngawt ang!



Rilru hah takin, an thil sawi hre châk zet chuan veranda-ah chuan ka țhu a, ka țhu rei thei lo, ka ding a, ka țhi leh a, chutiang chuan ka vei tawn sek.



"Mi â emaw an ti ang che, khatin vei sek suh," Taitea chuan min rawn ti a.



"An rei tawh alawm, ka pa hian eng thil nge a hrilh pawh ka hre lo a, a duh loh zâwng tak pawh a lo hrilh thei asin," ka ti a, ka kut tin chu ka seh nauh nauh pah a.



"I kut kha, khatin seh ziah suh. I rilru a hah tih chu ka hria alawm; mahse, thil țûl lo a nih kha. Thu țha lo leh huatthlala a hrilh bîk nâng, in tâna țha tùr hlîr bâk a hrilh lo ang," a ti leh a.



"Kan hriat laia sawi ve mai tùr kha a nia, min chhuahtîr kher a," ka ti nang nang a.



"I tâna țha tùr a ngaihtuah tih hre ta che," a tih leh chuan ka ngawi ta a; mahse, ka rilru erawh a chawlh phah chuang lo. Ka pa thil sawi tùr chu ka ngaihtuah kual a, thil țha lo leh a huat záwng tak a hrilh loh hrâm ka beisei a; mahse, ka hlauthâwng êm êm tho si.







*THIL KAN THLÌR DÀN LEH KAN PAWM DÀN HIAN KEIMAHNIAH HIAN HMÊLMA A NEI ȚHÌN A LO NI*





https://chat.whatsapp.com/F5M6GiQvBic4qATfXaGwBc


Hei leh aw, join leh suau suau ang u😊🙏

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » October 25th, 2020, 3:33 pm

☆24/7☆ - 35 By Dingdi Pachuau




~~~Kum khat leh a chanve hnuah chuan~~~




"Nu, chaw ka chhuan kha suan a hun tawh ang."



Mamuantea ka pawm a, kea kal duh ve viau mah se, ruah sûr vàngin kawng a huh deuh a, ka kaltîr phal lo. Kan țhenawmte in kawta sumo ding chu kâwkin a thiam dàn dánin a râk ve nawk nawk a, lìrthei hi hmuhnawm a ti a, ka enpui ziah.



Taitea fapa hian min tihlimin ka nun khawhar tùr pawh min chhâwktu ber a ni, ka nu nèn kan inchuh țhìn, a nu ber pawhin a pawm chang hman meuh lo chu a ni. A sèntêt lai ațangin ka nu nèn hian kan buaipui nasa a, chhùn lama ka hman loh chuan aniin a buaipui a, tlai leh zànah, a muthilh hma zawng chu keiin ka chang deuh thung.



"Nangni nîvah hi chu aw...! A nu pawm pawh hi ka hmuh àwm ka la hre lo, in inpawm deuh reng maiin ka hria," tiin țhenawmnu U Saitei chuan min lo fiam a.



"Fa pawm tùr la neih ve si loh chuan," tiin ka nui a, Mamuantea chu enin,"Drun drun-ah i chuang châk em? Chuang ang aw," ka ti a, sumo bang chu ka khawihtîr a, ani lah chu a lo phúr nasa, awrâwl chhuah meuhin a bân chu pharin, a hlim chu a au rai rai a.



"Fa i neih ve hunah pawh tûn ai hian i duat bîk ka ring miah lo," U Saitei chuan a ti leh a.



"Ka hre lo le, ka lo duat viau em ni a? Ka duat viau pawhin ka lo hre hleinem,"ka ti a.



"Teruati hi chu a vànnei ngawt mai ka lo ti ka lo ti țhìn. Heti khawp hian in àwlin a fa in duatpui a nia, kei ve kha, sawi pawh ka sawi peih lo, theihnghilh daih ka duh," U Saitei bawk chuan a ti leh bawrh bawrh a.



U Saitei hi mi sual tak chu a ni lo. A pasal neih chhûngte hi an fuh vak bîk lo a, a pasal nu leh a farnute nèn an inhrawn fuh tehchiam lo a, kum khat chuang chu a pasalte inah hian an awm. Miin an sawi ka hre ve zauh zauh, nau a neih khân a inhliam nasain chêt pawh a che țha thei lo a ni a; mahse, naute bual leh a thawmhnaw sûkah takngial pawh an àwl thei lo niin an sawi a, mak ka lo tiru thei viau rêng a ni. U Saitei pasal U Hminga nu leh a farnute hi mi sual tiin an sawi ngai hauh lo, mi zîngah phei chuan fiamthu thawh an peihin an nui duh viau țhin nghe nghe a; mahse, mi sawi dànin an in chhûngah an lal lutuk an ti țhin. An in chhûngah mipa an lal lo a, U Hminga nu phei chuan a pasal a be thiam si a, a fak thiamin a tilâwm thiam a, a pasal chu a thu thuin a dah thei an ti țhìn a ni.



U Saitei sawi pawh chu a dik ka ring tho; mahse, mi chungchânga inrawlh hi ka duh ve tehchiam lo. A pasala chhûngte an ni a, fak lo viau mah se a chhûngte an ni tawh tho tho. Ani chuan a duh duh dànin sawi mah se, a chhûngte an nia, a sawi thiang vekah ka ngaihsak, sawipui ka tum lo.



"Mamuantea hi chu duat loh theih pawh a ni lo, min duh ve êm a ni. Min ngèn lawm lawmtu na na na hi chu ngainat loh pawh tum mah ila a theih loh tluk a ni," ka ti ve a, Mamuantea chuan sumo bang chu a lo la chûl hoh hoh reng a.



"In duatpui êm a, a duh lo thei lo che u a ni. Bawiha(a fapa) sèn laite kha ngaihawm viau mah se ka hun tawn kha, ka ngai mang hauh lo. A nîte kha a ngèn ve nasa țhìn a, chuti chung chuan pawm leh puak pawh kha a hlawh ngai mang lo kha a ni a, ka han ngaihtuah lêt hi chuan ka thin hi a rim thar leh țhìn. Thil kal tawh leh thil sâwt lo a ni a, theihnghilh pawh ka duh țhìn; mahse, ka hriat chhuah hun hi a lo awm lo thei lo dâwn chu a nih hi. Kum sarih zet a vei hnu pawh hian nimin ang mai kha niin ka hre țhìn," a ti leh bawrh bawrh a.



"Mo nih hi a lo hrehawm dâwn a nih hi maw, pasal nei tawhho hian an sawi deuh ziah," nui chunga ka tih chuan," Hrehawm vak lo ve, pasala chhûngte an fel phawt chuan a hrehawm hran lo ang. Nang chu i fel a, pasal țha tak i nei ang a, nang anga mi fel chungah chuan tu mah an sual thei tak tak lo ang. Kei chu ka kawlh ve deuh a, ka duh lohnaah min tilui thei bîk si lo nèn, inngur renga awm ai chuan tiin ințhen mai kha ka duh a, Hminga ngai ngam lo khân in ațang chhuah mai kha a rawt ta a, khângte kha Hminga ka rawttîr angah a nu leh a farnute'n min lo sawi tih ka hre leh vek tho; mahse, ka tih a ni chuang lo a, ka ngawi ta mai mai a ni," a ti leh bawrh bawrh a. A luang liam ve ngang a ni e, han insawi thâwl mawlh teh se.



"Kan chhuakte kha, bungbêl pawh kan nei lo a, min theh chhuah duh bawk si lo nèn, ka pazawnte ka pùr ta ringawt a. Mutpuan erawh ka chhawm ve nasa tiin ka chhawm zawng zawng ka la chhuak vek. Rizai pakhat erawh an sin lai a nih vangin ka chhuhsak duh ta êm lo a ni, kan inneiha kan thil dawn vete pawh pakhat mah ka la chhuak lo, lâk tuma ka kalin an lo dah thukru bo vek niin, râpthlâk ka ti lutuk a, an inah pawh ka kal duh tawh lo char char a; mahse, ka pa damloh khán kan nupain zan khat chu kan kan ve a, țha tak chuan kan inbe tho. Min biak țhat chuan ka be țha thei vek a, min biak duh loh leh ka be peih bîk chuang lo a," tiin a nui a.



"Mahse, tunah chuan hunte a lo ral tam ve tawh a, Bawihtea pi leh pu leh nîte an ni bawk a, an ina kal ka phal lo ngai lo. A lo lian ve deuh tawhin, buaipui hrep a ngai tawh lo bawk a, a va kal châng hian an lo duat ve tawh a niang, nuam a ti țhìn êm mai," a ti leh a.



Zanin tlai chu U Saitei luan liamna ka ngaithla char char a ni mai e.



Ina ka haw chuan a la tlai chhe lutuk lo a, Teruati chuan min lo hmuh chuan,"Bawihtea hi chuan a tihah țhìn ngawt mai che, nilêngin sikulah naupang bulah i awm a, inah lah Bawihtea awm leh bawk i ngai țhin si a," a lo ti a.



"Awm tùr a lo awm hi chu a tihzia ngawt alawm. Awm lo ta se kan khawhar dàn tùrzia hi," uar fahran chuan ka lo ti a.



Ka uar a, a dik bawk. kKa uar lo thei lo. Ani hi awm lo se, kan chhûngkhur khawhar dàn tùrzia hi, ka ngaihtuah thiam lo záwk! Ka pa khân a hmu hman ve ngei a; mahse, a làwm ve tak tak thei tawh lo a, pawm pawh a pawm thei tawh lo, a bulah vawi khat erawh chu rei lo tê an mut ve zawk. A hming Lalmuanthanga tih pawh hi chu a phuah liau liau a ni, a hming a phuah tê tê a, rei pawh a dampui hman ta si lo.



Ka pa boral kha chu ka nu nèn kan tuar thlâwt a, Mamuantea hi lo awm lo phei se chuan hlimnî kan hmu har ngawt ang! Ani hian min tihlim ta êm a, a pu vànga kan mittui tla pawh a tihul thuai ta rêng a ni.



"A rit ve bawk si a, i pawm reng a, kal tamtîr teh," a tih leh chuan," A ho mai mai, nakin lawkah chuan pawm luih pawh tum mah ila a duh lo thuai dâwn, pawm theih lai hi chuan pawm char char ka duh," ka lo ti leh tlat a.



"Ka nu nèn hian in duat khawlo tak tak ang ka ti!" a ti leh a.



"A fel lutuk a, duat khawloh theih pawh a ni lo ang. Pasal ka neih hma hi chu min duattîr phal mai mai teh, chutih hunah chuan ka rawn duat thei tawh dâwn miah lo a nia," nui chung hian ka ti a.



"Nang hi chuan engtikah tak pasal nei ve ang che maw?" Taitea lo lút chuan a rawn ti lût nghâl a.



"In khawhar ka hlauh vàng mai mai a nih hi," tiin ka lo chhâng a, a pa a hmuh chuan Mamuantea chuan a lo ban vat a.



Pawm pah chuan,"Ànî nèn khawiah nge in lèn a?" tiin a zâwt nghâl a, ani pawh chuan U Saiteiite in lam chu a kâwk ve mai bawk a, țawng thiam rih lo mah se, kan țawng awmzia hi chu a man thiam ve lutuk.



"Drun drun kha tuin nge khalh kha?" ka tih chuan a kut chu motor khalh ang deuha her kualin "vun ..vun.." tiin a hmui chu a tipawrh kual vêl a, hei tak hi kan làwm țhin a ni. Kum khat leh thla 5 thuak a ni ve tawh a, țawng a zir nasain a lawmawm rual a ni a, kan be nasa thei viau a ni.



Chaw ei khamah chuan inkhâwm turin ka nu nèn chuan kan insiam a, khua a nuam lo êm a, Teruatite nufa chu inah an lo awm ang.



Inkhâwm bànah chuan Mazualite inah kan group kan inhmu khâwm nghâl a, kan kohhran țhalai hi group hrang hrangah kan ințhen a, sum tuak leh infiam hlim nikhua atân hetia kan ințhen hi a țha khawp mai. Pawisa pawh kan thawk chhuak nasa záwk, a chhan chu group tinte'n group thawk chhuak tlêm ber nih kan duh lo vek a, kan inel nasa thei viau a ni. Zanin pawh sum tuak dàn kan rêl dâwn a ni, sawi rîk deuh chu kan nei tawh a; mahse, thutlûkna mumal kan la nei lo.



Sawi ve tùr ka hre lo a, an sawi chhuah apiang chu țha ka lo ti thei viau a ni. Mite'n an rilru an lo hman nasatzia an thil rawn sawi chhuah ațang chuan ka lo ngaihtuah a, nêp ka intiru khawp mai.



Kan group hian leipui ang deuh kan siam a, thlai kan chîng ve nual a, rin aiin a țhain a rah nasa ve bawk. Chuta thlai kan thar chhuah ve chu Lunglei lama kalpuia in tina zawrh chu an rawt deuh a, chutiang kan ti thei a nih chuan tlêma man man deuhin kan hralh thei dáwn a ni; mahse, ka lo huphurh ru sa tawp. Thil zawrh hi ka tih ngai loh a nih vàng leh mi ina va lûta va zawrh kher chu ka thlâwp lo khawp mai a; mahse, an rilru tihhnual ka hlauh vàngin ka sawi chhuak lo thung.



"Sangbawihi Lungleiah a awm reng tawh a, ani hian hmel hriat a ngah tawh viau ang, min kalpui thei se," Zami'n a tih chuan," Ka nei tho a; mahse, ka ngah tehchiam lo," ka lo ti a.



"Bazàr lohnîin kan kal ang a, țhalai ang zâwna kan zawrh chuan mi pawhin min lo khawngaih thei deuh ang a, kan hralh zo thuai theiin ka ring," kan leader U Vala chuan a ti a.



Nilaithawhțannîah thlai chu kan lo ang a, Zirtàwpníah kan kalpui ang. U Vala Lunglei kal a ngai tho a, a motor-ah chuan kan phur ve ang a, zuar tùr pawh kan kal nual dáwn. Kei hi ka hman ve lo maithei, sikul kal a ngai awm si a; mahse, min phût ru khawp mai tih ka hria.



Ka kal ve thei a nih chuan ka kal ve poh a niang chu. Ka nu ai ka kal tâk char char vàng hian Lunglei pawh ka kal khát asin, khatia Rinfela a reh tâk vang vang hnu phei kha chuan kan khua hi ka chhuahsan khât lutuk a, ka pa awm lo, naute kan nei leh ka nu khawhar buaipui a ngai bawk nèn, ka chhuak thei lo a ni e. Bâkah, ka peih lo a, ka phûr lo bawk.



Lunglei chu ka kal hman ve ta tlat. Zirtàwpnî ber kherah chuan class room chhuat khawk tawhte plaster țhat an rêl a, chu chu U Valtea'n hriain kan head hnênah ka kal loh a lo dîl pek a, a lo phal ve mai bawk sia, Lunglei chu ka kal dâwn ta a ni.



Zànah kan zawrh tùr chu polythêne tê deuhah kan dah sa vek a, bag kan ahna tùr leh èm kan phurhna tùr pawh kan ngaihtuah sa vek bawk a, kal thei kan awm nial dâwn a, a tihzia ka ti khawp mai; mahse, Rinfela nèna kan țuanna mual hlui ka zu fang leh dâwn ta chu a ni si a, tlêm tlêm chuan ka huphurh ve deuh.



Chaw ei kham hma takah kan chhuak a, ka pateate inah ka innghahpui leh ta phawt. Chu lo hmun dang pan mai tùr an lo hre bîk bawk si lo a ni, anni lah chuan min lo làwm der êm êm a,'Naktûkah bazàr a ngai dâwn lo tihna a ni mai' tiin kan thil zawrh pawh chu min leisak nual nghâl bawk a.



Kan thil zawrh tùr chu kan insem a, kan kalna lam tùrte chu inhrilhin inhralh zo hmasa sa chu pateate in lam pan hmasak tiin kan ințhen a. Ka kalpuite nèn chuan ka pateate in thlang lam chu kan pan a, țhenawmte erawh chu ka nutei'n a lo zawrh thung dáwn a nì awm e, min lo zawrhsak dâwn a nih ber chu.



Ka rin aiin kan hralh thei. Thingtlâng lam ațangin kohhran țhalai sum tuakna a ni tih kan sawi pah zêl vàng chu a ni mahna, min lo leisak zêl a, bazâra an lei țhin aiin a lo tlâwmin a thar țha bawk nèn, kan hralh zo thuai, ka huphurh rûk tehlul nèn.



U Valtea'n a motor chuan kan zawrh leh tùr chu min rawn pe a, in tinah chuan kan lût leh zak zak mai. A țhen chuan min lo la hria a, min lo la hretute phei chuan min dàwr țeuh hlawm, an fel hi ka tia, nizàn leh tukin lama ka țawngțaina chhànna a ni ka ti lo thei lo.



Kan țhiante chu ka be chhin a, anni pawh chuan an lo hralh zo ve duak tawh a, motor-a hralh tùr la awm pawh chu a tam vak tawh lo.



Rinfelate in lam pawh chu kan zu thleng dâwrh dâwrh mai a, lung hlui a lêngin nunhlui pawh thinlungah a rawn thar vawng vawng mai. An in erawh páwn lamah tala lian angreng takin a lo inkalh bâm mai a, hmâna ka hmuh ang tho kha a la ni. Hmânah kha chuan hlim takin he in chhûngah ngei hian ka léng țhìn a nih kha, mitthla suangtuahnaah chuan tum loh deuhin hun kal tawh chu a rawn inlâr zut zut mai.



"Sangbawih, nang, lo khawsa silawng deuh tawhah, sawlai inah sâwn lût hmasa leh la?" Mali'n a tih chuan ka inthing harh a, Rinfelate in piahah chuan building lian vak lo, fel rèn rawn hi a lo ding reng tawh niin, ka lo hmu miah lo. Sak thar a ni tih a lan dàn ațang chuan a chiang khawp mai, rawng hnawih pawh a la thar e.



Min nawr ve deuh țhin avàngin ka hmasa leh nge nge țhìn. Tuna mi phei hi chu ka hriat ngai an nih bîk ka ring lo, tlêm chuan ka zak thar ve leh deuh a; mahse, zak ang tak chuan ka awm duh bîk lo a.



In luh dâwna step lo awmah chuan kan pên chho a, step chho kal hi ka nin avàngin he step pawh hi a rûk tak chuan ka haw deuh tawp, a hahthlâk êm alawm, thâ a heh bîk.



Doorbell hmeh kher a ngai lo, kawngka a lo inhawng huau sa a, nu pakhat la naupan ve hmel deuh hian nau a lo àwi dârh dârh a, a piah deuhah chuan nula tleirâwl lek lek tawh hian lehkha a lo zir bawk a, chu chu an in kan luh hmain kan hmu thei vek, an veranda a zau reuh êm a.



"In awm maw, ka pi? Chawhmeh kan zuar a, in mamawh zâwngte a awm em, en ve ula?" nui sâng chung hian ka ti a.



Chu nu pawh chu a rawn hawi nghâl vat a, a hmelţha reuh phian, a la naupan hmel tak tak a nih hi.



"Eng chawhmeh nge ni a?"



A han en dan dan a, a en chhûng chuan an in chu ka en kual a, an luahna chu a la rei lutuk lo ang, an bungrua leh in chhûngkhur thil chu a la thar hlawm riau, a changkâng hlawm riau bawk.



"Naktûkah bazàr vak a ngai dâwn lo a nih hi, a tihzia hle mai," tiin a leina man chu min pe a, a lei tam khawp mai.



"Kan lâwm lutuk e," ka ti a, kan bag a thàwl phah hawk si a, kan ah zàn theih phah mai bâkah min dàwr tam angreng si a, kan hláwk ta phian a nih hi.



Kan chhuah dâwn chuan," A nih, kan lâwm lutuk e, min dàwr țeuh a," tiin ka han thlah leh hrâm a.



Kawngkaah kan chhuak hman tawh tihah chuan," Lo ding leh lawk teh u," tia min betu aw ka hriat chuan ka ding chat mai!



He aw hi, ka hriat lohna a va rei tawh êm! Amah ngei a ni, min kalsantupa aw ngei mai chu.



Mi dang chu an inher vek tawh a, kei erawh chu ka din ngaiin ka la ding reng.



He inah hian eng nge a tih? Tuna mite kha a nupui fanaute em ni an nih? Chuti a nih chuan, hei hi a in sak thar a ni ngei ang chu.



"A vaiin ka lo leisak ang che u."



Țhiante thaw hak leh lâwm phun sap ri chu ka hre reng; mahse, kei chu ka lâwm em ka hre lo, he pa hi kum khat leh a chanve vêl zet chu a hmel ka hmu tawh lo a, a hmel hmuh chu sawi loh, a aw ri takngial pawh ka hre lo.



Mahse, tunah ka hre leh ta, a lo la ngai reng a nih hi.



Mahse, hmana mi kha chu a ni thei tawh lo, tuna mi hi chu 'mi dang' aw a ni tawh. Hmâna mi kha chu min hmangaihtu aw, ka hmangaih aw a ni țhìn, tuna mi erawh chu mi dang aw, 'bumtu' aw chauh a ni tawh!



Ka inher ve ta nge nge.



A hmel chu a lo țhat belh ta sawtin ka hria! Ka va duh lo ve! A sam pawh fai tih hriat takin a tle sar a, a mithmul buk leh dum zet pawh kha a la ngai reng, tlëm têin hmuihmul erawh a lo nei tawh thung!



Min rawn en ve reng a, mit khap lo lêkin kei pawhin ka lo en ve a.



"A vaiin maw i lák ang?" U Valtea'n a tih chuan a mit pawh la sawn chuang lo chuan," Aw," a lo ti mai a.



Mi dang an chêt tâk sang sangah chuan kei pawhin ah ka la nei nual a ni tih ka hre chhuak thut a, inngaihtuah harhin ka mit pawh chu ka la sawn ta nghâl vat a.



Ka en nawn tawh lo.



A patea motor a rochun ngei maiah khân a leiho chu kan dah luhsak a, eng atân zozai nge a tih ang aw ka ti rilru a, a ei vek tùr a ni dâwn lo tih a chiang nasa bawk si a. Khawiah emaw a phur chhuak dâwn tih chu a hriat reng mai a, khawiah tak ni ang maw?



Lo ngaihtuahpui chiam a ngai hleinem le. A duh duhin a ti ang chu, duh leh mi a pe ang a, a lei tawh ber ahnu, a duh leh a paih thei alawm.



A thil leina man an inpêk fel hnu chuan mi dang chuan làwmthu an sawi tliar tliar a, kei erawh chu ka lo ding màwl tawp thung.



Tunah zawng ani chu ka biak theih leh ka biak phâk pawh a ni tawh lo a, inhria anga lan pawh a duh tawh lo ang. Kei chu thingtlânga awm, hna thawh pawh nei tawh lo ka ni a, ani zawng vànneihnain a ûm a, nupui fanau nei tawhin in thar țha tak a nei tawh bawk a, hmel hriat hlui leh inhria anga inbiak kher pawh ka phût lo e, chubâkah, min biak pawh a châk lêm lo bawk ang a, kei pawhin ka be châk hran lo e.



U Valtea motor dahna thleng chu kein kan kal a, ka kal chak bawk a, ka hah viau mai. Thaw deuh hlap hlapa Mali'n," Eng i hria chu ni maw? Min kal chakpui lutuk a, ka dang a ro huam huam mai," a tih chuan ka hawi lêt vat a, mi dang pawh chu an hmel ațangin an hah ve tho tih a hriat khawp mai.



"Sangbawihi chu, i lo infit hle mai ka ti," U Valtea'n nui chunga a tih chuan ka țhen sak a.



Tui an in tliar tliar hnu chuan ka in ve a, U Valtea'n țhiante a biak chuan anni pawhin an lo hralh zo ve tawh tho a lo ni a, rilru a nuam duh khawp mai. Kan chaawhmeh ken kha a tam ve êm asin, kan hlawh țeuh thei dâwn e.



Motor-a kan luha kan tlàn chhuah hnu chuan," In ril a țâm tawh hlawm em? Kan chàwl dâwn nia, kan inhralh țha bawk a, puar tâwkin kan ei vek ang " phûr tak hian U Valtea chuan a ti a, kei erawh chu ka awm dàn tihdanglamin a awm leh ta si a, ka ngawi ràn rán reng mai.



Țhiante nèn kan inhmu khâwm leh ta vek a, pateate tihbuai an duh loh vàngin kan chhuak hma leh ta a, restaurant pãngngai ve takah chuan ka luhpui a, a neitunu chu U Valtea nèn an lo inhre pek a, an titi luam mai.



A tihzia e, kan thil ei man pawh min discount ngeiin ka ring.



Ka ei zawh hnu, mi dang la ei zawh ve si loh lai chuan kan piaha damdawi dàwrah chuan ka va lût rih a, ka nu damdawi tùr ka va leisak lawk a ni.



"I lo dam țhìn maw?"



Kan inhmachhawn chiang lutuk, kal sawn ngaihna a awm lo va, biak loh tum pawhin biak loh theih pawh a ni ta lo.



"Min zui ru a ni maw?"



Ka va polite lo kher em! Kum khat leh a chanve zet inhmuh loh hnua inbiak lehna hmasa ber țawngkam atân chuan a fuh lo mah mah chu a ni.



Mahse, ka sawi zo vek tawh! A phû ve tho alawm, chhan leh vàng sawi hauh lova min kalsantu kha a ni miau a.






*HMÊLMA NEIH I DUH CHUAN I ȚHIANTE KHÛM LA, ȚHIAN NEIH I DUH ERAWH CHUAN I ȚHIANTE PHA LO RAWH*





https://chat.whatsapp.com/DXMsyQQZ3Lp2ASRh50UCed


Hei leh aw, lo join keuh la😊

Link:
BBcode:
HTML:
Hide post links
Show post links

Local Advertisement

MOBILE SIAM ZIR DUH TAN!!!

Tech-Inn Mobile Repairing Traning Centre, Bazar bungkawn

Kum tin mi za chuang eizawnna kan siamsak a, Eizawnna tlaka thiam turin kan zirtir thin

Mizorama mobile siam zirna hmasa ber changtlung ber kan ni. Hrechiang duh tan Contact : 9612099411 / 9862016122


Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » October 25th, 2020, 3:36 pm

☆24/7☆ - 36 By Dingdi Pachuau





Ka zawhna chu chhàn ngaiah a ngai lo nge," In haw tawh dâwn em?" tiin min be leh daih a.



"Aw... Țhiante thil ei zawh veleh kan haw nghâlin ka ring, ka hmu thut che a, biak dàn tùr che pawh ka hre lo alawm," tia han chhàn duah pawh chu rilruah rawn lang zawr zawr mah se," Aw..." ti bâkin ka chhâng lo.



"Engtikah nge i lo kal leh ang?" a tih leh chuan," Ka hre lo," tiin ka'n chhâng leh hmuk pek a! Engati nge maw ka duh loh dàn hlîra ka țawng chhuah ziah le? A bul têah țawngkam mawihnai tak a awm reng si a, mak ka intiru viau a ni. Dàwr neitute pawh chuan kan inbiak dàn chu an lo hre ngeiin ka ring a, mak min ti ngawt ang!



"Ka hman hmasak berah rawn zin ka tum ang," a tih leh chuan min dîl nge min hrilh tih ka hre thiam chiah lo nãngin," A ngai lo," tiin min biak leh hma chuan ka inher vat a, dàwr chu ka chhuahsan ta nghâl a.



Nupui a neih tawh kha. A lo zinna chhan tùr ka hre lo, nupui nei reng chungin min beisei a tum ang maw? A teuh lo lutuk! A laka polite viau pawh kha a țûl viau ka ti ta lo.



A inngaihtuah zui ve rauh rauh ang chu. Kha kha a chan tâwk a ni, kei pawhin ka chan tâwk chu sawisêl lovin ka nunpui hmiah hmiah mai alawm. Ka pa nèn khân eng nge an sawi tak hre lo mah ila, kum khat leh a chanve zet min bîkbosan phah a, a chanchin hriat zui tùr awm hauh lovin a reh vang vang a nih kha. Min kalsan dáwn a ni tih pawhin mipa a nihna ang takin huaisen takin min hrilh mai se, hrilhhriat hi chu ka phû ve ka ti tlat a ni.



Mipa pahnih bumin ka awm tawh a, tunah hi chuan bum nih ka duh tawh bîk lo. Rinawm loh vànga ințhen leh kalsan nih vànga hrehawmna nasa tak ka tuar tawh a, tuar leh ka zuam tawh lo.



Kan haw lam chu ka ngawichawi ta khawp mai. Ruah a rawn tla fuap fuap a, a hnuah a rawn sûr ta vak a, ka ngaihtuahna ka kawm avàngin ka țawng ve lo a ni. Mi dang erawh chu an titi tui hlawm khawp mai a, an sawi hre vek lo mah ila kan thil zawrh kan hralh vek thei làwmawm an tih thu lam chu an sawi tui ber niin a lang, a bîk takin Rinfela chungchâng chu an sawi duh a, kei pawhin a chdng chuan an thil sawichu ka ngsihthlâksak tho. An lo hre tawh hlawm lo a ni ngei ang, a chanchin leh a hming pawh min zâwt miah lo. Kan khuaah vawi 4 vêl lai a lo kal tawh a nia; mahse, an hre chhuak lo a ni ngei ang.



A pawi miah lo.



Mamuantea ei tùr ka hawnsak hlek a; mahse, thil han hawnsak ve pawh hi a vir lo lulai êm a, a phùrawm loh zâwk a ni. Naute ve si, thil thlum lamte hi a ngaina ve vak lo a, thil háng lam, vaimim no deuh deuh chhum leh fanghma tih vêl hi a ngaina daih zâwk, khel pawh a khel rei peih, naute danglam ve tak chu a niin ka hria.



U Valtea chuan kan in kawtah min thlah diat diat a, motor ațanga ka chhuk chiah tihah chuab Mamuantea chu in ațangin a rawn tlãn chhuak a, fiah vak lo hian," Ni..ni.." a rawn ti ve a, ka lam panin a rawn tlân bawk a, a hnungah ka nu a lo lang vat bawk.



Ka lo pawm kãng vat a, a biangah fawh pahin," Min lo ngai em? Aní kha min lo ngai chiang mai. Tu nge drun drun-ah chuang ve duh?" tiin ka be nghâl mawlh mawlh a.



Zàn lamah kan group chu kan inhmu khâwm leh a, vawiina kan thil zawrh hralh dàn leh pawisa kan hmuh chhuah zât chu kan chhût bawk a, kan ri ve laih laih mai.



"An in awmna lai vêlah in zu kal em?" tiin Mazuali chuan min bekbàwr sar sar a. Ani hi vawiin khân a lo kal ve hman ta lo a, hman ve ta se, Rinfela kha a hmu ve ngei àwm si a, eng thil nge thleng ang le?



"Aw, kal e," ka ti sap a.



"An in chu a lo la inkalh leh bar tihna a ni maw?" a tih leh chuan melh ralhin," Aw; mahse, an in bulah khân building thar a lo awm tawh a, amah pawh ka hmu nghe-" ka la sawi zawh hma chuan," A ni maw? Chuan, engtin? A va mak!" a lo ti chùl a.



Mi dang an rawn hawi ta țhap mai.



Mazuali chuan nui deuh sûng hian,"In thil hralh dàn kha chipchiar zâwkin ka lo zâwt chiang leh a," a ti zaih a, min rawn bekbàwr nawn ta rih lo, mi dang pawh chuan an ring ve mai a niang, an sawi zawm leh mai a.



"Nakinah, min hrilh vek ang che, a bo a bãng awm lovin," min rawn melh râm râm pah chuan a rawn ti a.



"I rawn riah a ngai ang," ka ti thung a.



"Ka rawn riak ang."



Khatiang kha a ni kan pahniha awm dàn chu. Kn pahnih inkârah hi chuan thup leh zêp hi a awm thei lo a, a duh duh hunah a rawn riak a, a rawn riah apiangin toothbrush thar ka pe ziah. Mut dâwnah ha nawh a duh ve bawk si a, min rawn ring tawp a ni ber mai, keini lahin stock hi kan lo nei ziah bawk a, kan inkârah hi chuan han inzahna a awm lêm lo a, țhian ai mahin unaunu angin ka en deuh zâwkin ka hria.



A rawn riak ta ngei a, ka khumah mu dùnin vawiina thil thleng zawng zawng chu chipchiar zet hian ka hrilh a.



"A be ngam che chu mak ka ti! A zak lo ngawt mai, kei chu awm ve na ila chuan aw...ka melh rum nasa ang," a ti nghat nghat a.



"A hmel kha chu a hma ai chuan a lo țha zualin ka hria. Bâkah, mi hnuaiah hna hrâm thawk tawh lovin a awm thei tawh ngei ang a, chuvàng pawh chu a ni ve ang," chunglam melh vang vang pah chuan ka ti a.



"Sum a neih tâk viau avànga a kalsan daih che kha chu a timak rêng rêng! Lo hausain, a vun pawh lo nungin lo hmelțha sângsàwm mah se la, ka ngaih dàn chu a ngai reng, ka ngei tho tho," a ti leh barh barh a.



"Ka pa boral hmaa ka pa nèna an thil sawi kha ka hre châk telh telh. Engtin nge ka pa khân a țawng khum ang aw tih ka ngaihtuah țhin, eng mah sawi fiah lova min kalsan daih dànah khân a duh loh zâwng tak ka pa khân a hrilh a nih ngei ka ring, ka pa zawh lah kha, lungtum biak ang hlauh. Natna khuma mu reng chu ni lo se chuan ka zâwt chhuak thei ngeiin ka ring," ka ti duah a.



Thil țûl lo, ngaihtuah loh theih si loh hlîr a ni kan sawi ni.



"Nupui a nei i ti maw kha?" a tih leh chuan," A nupui a nih ngei ka ring, a nupui ni lo se a in tharah khân a awmpui tawp nâng, fa pawh an nei tawh nghe nghe alawm, a nupui pawh chu a la upat hmel fahran loh, kei ai pawhin a naupang daih zâwk ang, a hmel pawh a chhe vak lo," ka ti leh duah a.



"Nang ai chuan a chhiat ka ring tho tho."



Kan nui leh rih a. Mazuali hi chuan min tihlim țhin, a nungchang frank tak, sawi hreh leh ì nei ve vak lo hi a châng chuan lo ìppui zauh zauh mah ila thu dik tak hi a sawi khurh zël a, mite pawh hian an haw ngai lêm lo niin ka hria. A chãng chuan a frank thei lutuk hi ka han hau ve bawrh bawrh bawk a, zàwm tâ'ng e ti chuang hlei lo hian," Thu dik alawm ka sawi, dâwt a ni hleinem," tiin a nui liam mai mai țhìn.



"Lo zin chhin se, khawiah nge a innghah tâk ang le?" a ti lehpek a!



"I ninawm! A lo zin àwm lo e, lo zinna chhan tùr a nei tawh hleinem. A lo zin ta hlauh a nih leh in inahte pawh a rawn innghat ve mai a niang chu," ka tih chuan," A teuh lo! Ka lo back-kick chhuak nghâl ang," a lo ti pek a, mut hmun e ti lo chuan kan nui vak vak a.



Fùr lai ngang a nih vàngin ruahtui a tam a, ka pa thlàn pawh kan tlawh ngun deuh, a lo hnim ang tih kan hlau a ni. Bâkah, a lo bàl viau ang tih kan hlau bawk, enkawl ngai loh a ang ang tih kan hlau, ka nu nèn hun âwl kan neihin kan kal ngun bîk.



Inrinniah ka nu a hman loh deuh avàngin Mazuali ka hruai a, ani lah pek chuan," Țap miah suh ang che," tiin min vau lâwk thlap bawk, a hahthlâk thei a nia.



Kan khua hian thlànmual hi hmun hnihah kan nei a, pakhat chu a hlui a ni a, mitthi pawh kan phùm belh tawh lo. A tharah chuan 20 vêl bâk kan la inphûm lo a, Pathian zârah kan dam thei viau a, mihring chêng kan la tam vak loh vàng pawh a ni mahna, kum khata pakhat boral loh châng pawh kan nei.



"A la fai êm khu."



"Fai tho e; mahse, tlawh ve hrim hrim ka duh alawm, lo kal mai mai teh," tiin a kutah chuan ka pawt a, ka pa thlàn lam chu ka panpui a.



Ka ding ta chat mai!



Ka pa thlànah chuan kan pangpâr dah ni miah lo, pangpâr danglam tak, mawi 'cial' tak hi a lo awm a, kâr hmasaa kan kal kha chuan a la awm lo ngei tih ka hrechiang ngang mai!



Khawia mi nge ni ang? A la tharlâm viau mai a, ka pa boral hnua boral ve lah kha ka pa an phùmna bulah phûm lovin a piah lane-ah chuan an phûm daih bawk si a, a chhûngte'n an dah sual palh a ni thei ang em? Nge miin an lo dah sawnsak ni ang?



"Kha pangpâr chu a va mawi 'cial' ve a!" Mazuali pawh chuan a rawn ti ve ta chiah a.



"Kan pangpâr dah a ni miah lo, tu emawin a dah sual palh a ni ang," ka lo ti a.



Mazuali chu a ngawi ta vang vang a, chutah," E, kâr hmasa lama mikhual lo kalte dah kha a nih dawn chu. Pu Zika chhûngte an lo kal tak alawm," a lo ti a.



A nih chiah dâwn chu.



Ni leh lo, kâr hmasaa kan kal khân a la awm lo a nih si kha. Chuti a nih si chuan anni dah chu a ni thei lo tihna.



"Naupang kuthleiin an dah sawn a nih dâwn hi," ka ti a, ka pa thlàn chu ka chûl pah a.



"I pa thi hi chu a pawi ngawt mai! Rinfela nèn in ințhen phah ka ti lo thei lo a ni," a ti leh a.



"Ni lo e, kan chunga thleng tùra Pathian ruat vek alawm, mihring hian tum viau mah ila a remruatnaah min telh ve tawp si lo a, min telh loh mai bâkah min râwn der miah lo bawk," ka tih chuan a nui hak a.



"Tlêm chuan min râwn der ve țhin se tiraw? Kei chu ka țang na ve thei khawpin ka ring," a lo ti lehpek a.



"Mei kawh tâuh tâuhin i țang ang chu le!" ka tihsak a, kan nui dùn hak hak a.



A kárleh Inrinnia kan kal leh pawh chuan pangpâr dang a lo awm leh hman tawh! A hmaa mi pawh kha a lo la awm reng tho a, mak ka ti ta riau. Tu dah chu nge ni ang? Keini anga thlàn tlawh zing lah hi an awm vak lo lehnghâl a, a hrâng deuh em maw ni le?



Chu ngaihtuahna chu ka dah bo vat. Tu emaw, ka pa ngainatu leh hmel hriat țha takin a lo dah a niang, pangpâr lah chu a man a tlâwm lo ang tih en ringawt pawhin a hriat ngawih ngawih si a, a insêng ve hlek ang chu.



Tu dah pawh chu lo ni se, a làwmawm hrim hrim e. Keini pawhin kan dah belh theih loh laia duhsakna ka pain a dawng chu ka lawmpui khawp mai. Pathianin eng kim a hria alawm, a malsàwmnain vûr mawlh teh se, chu chu ka țawngțaina, làwmthu ka sawi dàn chu a ni.



*******



"Hmãnni, ti mai ila kâr hmasa Nilaini tawh khân hmâna i țhianpa, i lo lènpui tawh kha, a hming chu ka hre ta lo, kha pa kha ka hmu nawlh a nih chu. Chawhmeh pawh min leisak nual nghe nghe a," Nu Kimi, Mazuali nu chuan a ti a.



"Tu maw?!" Mazuali nèn chuan kan lo ti rual țhat a.



"Kan ina i rawn kalpui tawh kha," a tih leh chuan," Thlamuana maw?" Mazuali chuan a lo ti hmanhmawh a.



"Chutiang hming a ni chuan ka va hre lo. Mi hming hi ka hre rei thei lo lutuk a, a buaithlâk. Ngawi teh, car dum a nei tih ka hre chhuak; mahse, a car pawh chu a lo ni lo thei tho bawk a," a ti leh barh barh a.



Thlamuana car chu silver rawng a ni si, ami hmuh chu Thlamuana a ni lo a niang, tu nge maw ni le?



Chutah, thil ngaihtuah chhuak thutin," Eng nge a hmel lan dàn? A biangah khuavàng a awm em?" tiin ka zâwt a.



"Ka hre chiang ta chiah lo, thil a hre rei thei viau a nih ka ring, ka hming ngeiin min ko thei alawm, mak ka ti rilru khawp a, nang leh Bawihtei pawh hi a hria che u a, i țhianpa niin a insawi tlat a ni," a ti leh a.



Chutiang chu, pakhat chauh a awm. Rinfela, a car pawh a dum, a patea tâ a rochun ngei kha.



"Eng ti turin nge a lo kal a sawi em? I zâwt tal em?" ka ti leh a.



"Ka zâwt lo a; mahse, khawi emaw mitthi-ah kal a tum a niang, pangpâr a keng tlat a ni," a ti leh a.



Hei hi thil ni thei a ni ang em? Ani hi ka pa thlàna pangpâr lo dahtu kha a ni thei mai lo maw?



"Kan lo chu kàwn deuh lai tak a nih saw, min rawn be hmasa a, thlai lei tùr ka neih leh neih loh min zâwt a. Ka hrilh ang che ka tia, ka lo theihnghilh hmin dèr tawh a ni, rilru ka neih loh dàn êm êm hi chu aw..." a ti leh vang vang a.



Mut hmunah chuan ka ngaihtuah a, Rinfela ngei a nih ka ringhlel ta lo. Ani lo mipa țhian kawm ka nei lo va, Thlamuana chu a ni thei lul lo ang, ani zawng min la rawn biain min la rawn tlawh zauh zauh a, ka pa thih lai pawhin a rawn kal ngei kha. Ani chu a ni lo ang.



Nu Kimi khân 'Nilaini' niin a sawi a, chuti a nih chuan Nilaini chuan ka pa thlànah chuan kal ve chhin tùr a ni. Amah ngei a nih leh nih loh fiah ka duh, Inrinni vawi li lai pangpâr a lo dah tawh si a, châng teh ang. Vawiin Thawhțanni a ni a, naktip mai a ni alawm, ka hre chhuak ngei ang.



Mahse, ka rilru a buai. Nilaini chawhma chu sikul kal a ngai a, chawhnuah hna kan thawk maithei zui, ka hman thei ngût ang em?



Vànneihthlâk takin chawhnu kan off ta daih. Kan head-in," Naupang kan thawhtîr nasa ve tawh a, vawiin chu off ve rawh se, sikul bul pawh a fai êm tho mai," a ti a, ka láwm lutuk ringawt.



Chhùn thingpui ka in sawk sawk a, Mazuali ka text a, ka thil tum chu ka hrilh ve lém lo nain min kalpui hman se chu ka ti khawp mai.



Hna thawkin a lo chhuak daih zui. Pawi lo, keimah pawhin ka kal thei alawm, ka hlau lo.



Thlànmual ka thlen chuan ka thâwm ka dìm deuh a, ka hawi kual a, tu mah ka hmu lo. Ka pa thlàn lam ka en chhuk a, pangpâr tharlám ka la hmu lo.



A la dah lo a ni ngei ang.



Ka țhu vang vang a, tháwm rîvâ hriat tùr a vâng. Ràl lehlama kan khawchhûng thâwm chu hriat tùr ka neih chhun chu a ni deuh mai.



Dârkâr chanve a pèl ta. Thâwm lah chu a awm dèr lo a, mihring rawn kal hmuh tùr lah a awm bawk hek lo. Kei hi ka tisual dâwn a ni ang, a rawn kal dáwn lo a ni ngei ang.



Ka beidawng țan tihah chuan kawngpui thlanglam ațanga rawn kal chho thâwm hi ka hre ta a, thing phènah ka biru ta vat. A rawn thâwm chho zêl a, ka pa thlàn zàwnah chuan a ding ta chiah mai le!



Ka phùr lutuk vàng ka ti dáwn nge, ka thin a phu dut dut mai! A tihziaawm nân muangchângin thâwk ka la a, ka âwm chu ka dawm pah bawk a.



Phun deuh bul bul ri ka hria a, a thil sawi erawh a hriat theih loh. Ka bih dêk dêk chhin a, a hmai hmuh chian theih loh mah se a sam tih dàn ațang chuan Rinfela ngei a ni tih rinhlelh rual a ni lo.



A chiang ta e.



Ka bihrûkna ațang chuan ka pên chhuak ta nghâl a, ka kal tháwm chu a rawn hre rang kher mai, rawn ding chhuakin a rawn hawi chhuak a, kei pawhin ka en ve chiah bawk a.



Ngawi rengin kan inen tlawk tlawk mai.



Engtia rei nge kan inen ka hre lo, ka mit chu la sawn hmasain a kuta pangpâr a ken chu enin," Nangmah hi a ni maw ka pa thlàna pangpâr lo dah țhin hi?" ka ti chhuak a.



"Aw..." a lo ti ve mai bawk a.



Sual chhuah ka châk leh tlat pek a nih chu.



"Eng atân nge i dah? Ka chunga i thil tihsual thupha chàwi nán maw?" ka ti leh kher a.



"Ka tih theih táwk a ni rih si a," a lo ti ringawt a, ngeiawm tak pawhin min chhâng lêt ve lo.



"A ngai hleinem, inthiam lo duh suh. A làwmawm viau nain thil hriat sual palhte a thleng thei a nia," ka ti a.



A ngawi rùn rún phawt a, chutah,"Eng kawngah?" a rawn ti ta sup a.



Nupui a nei tawh a, a chhûngte pawh ni, hmun dang daiha mi lehnghâl thlàna pangpâr rawn dah ziah chu, a hriat chhuah hunah an inkârah eng emaw thil kal sual a awm thei alawm.



"I hre zâwk ang chu," ka lo ti ve thung a.



"I țawngkam a lo danglam ta hle mai," a rawn ti chhuak ta chiah e.



Ka lo nui hak a.



"Kan pângngai reng thei hleinem, hun a inthlâk a, nang pawh i danglam a, kei pawh ka danglam a ni ve mai alawm," engah vak ngaih loh hmel tak hian ka ti leh a.



"Hmâna Sangbawihi kha chu fel, nunnêm leh zaidam, mi hriat thiamna ngah tak kha a ni țhin a-" a tih lai chuan," Kha kha chu mi hlui a ni tawh a, a bo tawh bawk," ka lo ti hmanhmawh a.



"Hetia i awm chhan hi ka kalsan vàng che a ni em?" a rawn tih leh sup chuan ka ngawi rih phawt, fîmkhur taka chhànna tùr ngaihtuah phawt ka duh.



Ka chhàn rih loh vàng chuan pangpár chu ka pa thlàn lung nghèng chuan a dah thla phawt a, chutah, rawn ding lehin," Lo kal hnai teh," a rawn ti sup a.



"Min kalsantu hi ka pan hmasa ngai lo ang," ka lo ti khauh a.



Min kalsan nia ka hriat laia an ina ka zuk kal lai kha ka ngaihtuah chhuak a, an in a lo inkalh țhap si, an țhenawmte pawh zah zo lo chuan an awmna chin chu ka zâwt a, anni lah chuan an lo hre mang bawk si lo, ka manganzia kha...



Thinrimna, natna leh mahni inkhawngaihnain ka khat leh ta.



"Ințhenna chhan tak sawi ngam lova hmeichhiate kalsan ringawt hi mipa inti tân chuan tihchi-ah ka ngai lo," sehchilh deuh hlek hian ka ti chhuak nghat a.



A rilru a dek ve zar maithei, mipa-ah a inngai a nih ngai chuan.



"Ka kalsan lo che, i hre sual-"



Ka nui hawk, a za lo takzet, a thu sawi âwih loh lutuk vànga thinlung na lutuk nui a ni zàwk ang chu. Heti hian min la tina thei tho chu a ni sia.



"Dâwt sawi tawh lo teh, kan hun kal tawha nangmah ka hriat rengna che kha i thai chhe vek palh ang," ka lo ti a.



"Ka kal bo chhan kha i hre duh em?"



Hre duh. Ka hre duh a, min hrilh miah lovin a kal bo ta daih a nih kha.



"Dáwt tel miah lovin ka hre duh."







*KAN HRIAT ZUIA KAN HUAT ZUI LOH CHUAN MI MIN SAWICHHIATNATE HIAN AWMZIA A NEI LO*




https://chat.whatsapp.com/F5M6GiQvBic4qATfXaGwBc


Join leh keuh ang aw😊

Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)