SAWININ LOH MK - Ahmangaihi violette khiangte (Completed)

Moderator: writers

Ngaia
Site Admin
Posts: 25813
Joined: April 30th, 2016, 4:07 pm

SAWININ LOH MK - Ahmangaihi violette khiangte (Completed)

Unread post by Ngaia » November 29th, 2020, 3:33 pm

ffzt62ps.jpg
ffzt62ps.jpg (35.56 KiB) Viewed 13950 times
SAWININ LOH MK - Ahmangaihi violette khiangte



Short story


********




Khuanu ruat an tih fo hi a awm ka ring ngailo a mahse, a awm a ni tih ka hriat rualin ka hmeichhe hmangaih kha ka tana khuanu ruat anilo tih ka hrezui bawk.









Kum 8 zet kan inzui a, inneih hial tuma rilru kan siam hnuah insiksawi fuhloh hun a lo thlenga, kum 8 chhunga inlaichinna kan lo siam tawh kha zankhat thilthu leka a chhe ta vek mai a ni.








July thla chawhnu lam a ni a, Damdawiin Corridor ah chuan ka ṭhianpa nen zialzuk na tur hmun remchang zawngin kan chhuak dun a, zanin tehreng chu khua a hnawm vang nge a reh vung vung mai, kan ṭhianpa ve tho Zorina Accident vangin Emergency in ICU ah an dahluta, zantir aṭangin kan awm tawh kha a nia, ka sana ka en chuan dar 2 a ri thuak tawh.









Damdawiin Building thlanglamah chuan kan chhukthla a, waiting shed ah chuan ṭhuin zial kan ṭan a, vei vak hmuhtur an awm meuhlo, security pahnih gate ah chuan an awm a, kan zial zu chu min en hrek hrek a, Smoking zone chu a ni hauhlo zan reh hnu a nia, min hau ngam chiahlo nge ni engmah phei chu an rawn sawilo a, keini lahin eng he hu ah kan ngai duh biklo.








"Kuva i duh em?" ṭhianpa Zo-an a tih chuan ka ah ve thu ka lo hrilh a, titi phungleng sawiin engemaw chen chu kan ṭhu dun a, rei pawh kan ṭhut hmain ruah mal lian pui puiin a rawn tla ta phuar phuar a.









"Thli a tleh duhhmel hle mai a" vanlam hawia ka ṭhianpa in a tih chuan Arsi engmah a langlo tih ka hmu ve chiah, na lo tein thli a thaw heuh heuh renga, vanlamah chuan chhum dum a chhah ṭha viau bawk.









"Tirawh, han inlan leh zet ila kan haw dawn nia, duhleh naktuk lamah kan kal leh anga" ka ti a, Damdawiin lampan chuan kan inzui chho a, Corridor eng ka thlenlai chuan thli pawh a na thawkhat viau tawh a ni.








"Mapui, hetah inlo awm a ni maw?" Step aṭanga lo chhuk pahin Zorina u, Uremrem-in a rawn ti a "Kan lo chho dawn chiah a" ka lo ti ve thuai a. "In ril a ṭam tawh awm si, va haw tawh rawh u veng danga kan unauteho an lokal a , kan lo châng lawk a nge" tih sawk sawk pahin min kalsan zui a, keini pawh ICU lampanin kan kal ve nghal a, ṭhutna remchang a awm mai loh vangin Step ah chuan kan ṭhu ṭhap a, mi 10 dawn chu kan awmin ka ring.









Doctor a lo chhuaka Ward pangngaiah a sawn theih tawh tur thu a rawn sawia, kan thaw huai hlawm mai, "A ngaihtuahawm tawh lo ve, va hawsan tawh rawh u" Zorina pa in a rawn tih takah chuan keini pawh haw turin kan inzuichhuak ve nghal a, Corridor a kan kal lai chuan ruah a lo han leh deuh tawh a, tlem a zawng chu a la tla siar siar tho nain Bike-in kan veng chu rei tlan anilo a, do pawh niila kan huh viau hman kherin ka ringlo.









Kan lampana mi pali vel lo inzui pheina lamah chuan kan kal ve zela, "Mapui inhaw tawh dawn maw, in van fel ṭhin tak" Uremrem-in a rawn ti lawng lawng a, ṭhianpa Zo-a nen za lo fêin kan lo nui a, chutihlaia hnunglama kal hmeichhia ka hmuh rual erawhin ka nui tawp riai riai thung.






Amah a ni, MKI!





"I dam maw?" zawi tein a ti sep a, kum 17 anih laia a hmel kha a la paihlo, ka mitah pheichuan tunhma aiin aṭha daih zawk, chhanna chang pawh hrelo a ka en reng vang chuan Zo an minlo nghawk zauh a, harsa takin "Aw" ka ti thei hram a.








Engtikah emaw chuan intawng lehin tuilo chunga kan inbiak a la ngai dawn tih hi ka hriat lawk sa a ni, kum 2 dawn chu a hmel ka hmu tawhlo a, tunah chuan kum 30 a pel ve ta der a, nula senior a ni ve ta reng mai, chupawh keimah vangin.






"Ti ru, i lut vat teh ang u" Uremremi chuan a lo ti leh thuai a, ruah a tla ser ser reng bawk nen indinchilh reng theih ni heklo le, hmanhmawh taka corridor lampana an kal chu ka enzui a, an thlen dawn ṭep chuan a rawn hawi let a, chiangtakin min rawn en a, tawi tein min seih bawk.









"Nangni pahnih tak hi chu âw" Zo-an a rawn tih chuan ka nui rohalh a, "A la hmelṭha a sin" ka ti zawi sup ringawt a. Chutah Zo-an "Pasal te hi neih ve a tum lo emaw ni?" a lo tih chuan ngaihtuahna a thui duh kher mai.









"A nei ve ṭep tawh ang chu, a hun ve tawh a lawm" ka lo ti hulhak a, tu mipa pawh nei sela a pasal chu mipa vannei tak a ni ngei ang. A hlim ka duhsaka, lungngaihna ka thlen zawng zawng te kha a theihnghilh vek theihna tur khawpa ṭha mipa tawng sela ka duh bawk.









"Pasal a neih theih pawh ka ringlo, a awmdan hi lentar a tum anih ka ring" Zo-an a ti leh a, chutiang chu thleng lul suhse, keimah ang hian kawppui neiin chhungkua din ve sela, hlimtakin awm sela ka duh a ni.










"A hrim hrimin mipa dang nei sela i thik a ngem? A ruk tak chuan i thik tho ang a?" nuih ruh ruh chungin ka ṭhianpa chuan min en a, "Thikna rilru pu thei dinhmunah pawh ka din tawhloh hi" ka lo ti hluk a, Mki pasal neih huntur hi ka ngaihtuah ve fo mai, ngaihtuah zawng ringawt pawhin ka thaw a ipik ṭhin, keimah ka indem a, a tihsual awm hauhlo a ka tawrhtir hi hrehawm ka ti bawk.



**




Kawng lakah ruah a rawn baw hawk a, veng inkar hla lo te mahnise kan huh zawr hneh ngang mai, in ka thlen chuan intihulin ka inthlak nghal thuaia, khuma ka nupui leh ka fapa te tui taka an muhil chu enin an kiangah chuan ka mu a, khua avawh vang nge ni mut a chhuaklo kher mai, mutthilh tumin ka mit ka chhing ngiala, ka harh chiang tulh tulh emaw tih mai tur a ni.










Tho chhuak lehin ka thawmhnaw bawma ka Whisky dahṭhat chu ka la chhuak a, Choka ah dawhkan kilin ka in a, mahni chauh pawn a intheih viau mai, ka lem sek hnu chuan ka lu a rawn kai ṭan a, ngaihtuahna pawh a kalkual thui sawt viau, ka lung a chhe deuh tlat lehnghal.







"Ava ho mai mai e aw" tih pahin ka no chu ka tlak leh pap a, ka rilru a thil awm chuan chungril lamah min hnawh tawt urh ringawt a, kum engemaw zat nupui ka neih hnu pawh hian he ka Uire rilru hi ka thlah hleithei meuhlo a chu a ni e.








Mitthla ah Mki a rawn langa , ngaihtuahloh tum pawhin a ngaihtuahloh theihloh, ka hmeichhe hmangaih hmasa ber leh ka hmangaih awm chhun a ni a, atan pawh chutiang tho chu ka ni, pasal a neih theihloh chhan ka ni a, ka tan lah ka nupui Thanpuii kan hmangaih theihloh chhan a ni ve bawk, hetiang dinhmun kan thleng tawh chung pawh hian kan la inhmangaih zia chu a tu ve ve pawn kan hailo, mahse, kan inkar chu tlangsang takin a daidang tawh a, se se thu han hrildun chu a rem tawhlo a tin a ni.










Kan tleirawl chhuah hlawt aṭanga inzui ṭan kan ni a, kum 8 tehmeuh kan inzui bawk, inhnial rap rap a, inṭhen thu hial sawi chang te pawh awm ve bawk mahse, inṭhen hleithei loin kan inkawp leh ṭhin a, ka chhungte pawn min duhpui viau mai, innei turah mi zawng zawngin min ngai tawh ang chu tih ah khatiang buaina kha kan tawng chho ta a ni.



****


Hun rei tak aliam ta.


Kan palai kalte rawn haw khan thu lawmawm loh tak an rawn hawn a, kal nawn leh pawh ngailo a kan inrem theih mai ka lo beisei laiin an In sak chhuanlamin In sak zawh hnu lama leng leh zawk turin thu an lo râwn a ni awm e, ka pa chuan "Ni e, In sak buai laia inneih thu lothlun chu a buaithlak ve bawk a lawm, keini chuan kan nghak thei lutuk e" a lo ti damthluam a, lungawi zanlo chungin ngawih ka chuh a, Mki hnenah pawh ka lungawilohna chu ka tilanglo.









Kum a liama keini pawh kan la inkawp tluang zela, an inah chuan ka leng fo a, ani college Lecturer a ni a khatih laikhan kei chuan Taxi ka khalh thung, chhungkaw harsa kan nihran lo, lehkha ka zir zawh hnuah hna ka hmuh mailoh vanga Taxi khalh ka ni bawk, Mki te erawh thlahtu a ṭanga lehkhathiam leh mi awmthei chhungkua an ni a, an vua leh vang chu Doctor, Professor leh Officer tih angreng an kat nuk mai, unau zinga hmeichhe awmchhun leh pang ber niin a u mipa pahnih te chuan Sawrkar hna sang tak an chelh ve ve bawk a.









Chu vang a ni In sak chhuanlama ka palai te an lo hnar pawh ka hriatthiamloh viau ni, tih emah chuan Building pakhat chauh an neilo a, an insak lai chuan kan inneih tur a ti buai pha hauhlo tih ka hre ve kar.









A dil tu zawk nih miau chuan dawhthei taka an rem hun nghah bak tih theih nei heklo le, an ni lamin min be chhelo bawk a, an in ka len chang pawn hmel hlim tak min lo hmuh thei zela, vuihmui han put len theih viau a ni biklo.









Chutih rualin Mki lah chhungte thuawih theitak a ni a, inruk tih ang reng chu a duh hauhlo bawk nen an insak zawh huna palai tirh leh chu kan rilruk ta zawk kha a nia.









Hun a liama reilo teah kum a vei thuai a, chutih laiin Mki pa chuan Cancer a vei ta hlauh mai a, damdawiin lampanin an buai ve zak zak mai, keipawh a pa damlo kan pah fawmin ka chuangkai awllo.









"Mapui, ka pa damlaia inneih hman loh ka hlau emai" a tih chu bawhzuiin palai chu ka tir nawn leh ta a, a hmasa aikhan beiseina pawh ka neisang zawk, ka hlehhawlh em vangin kan palai te lo haw hun nghak chuan ka room leh sitting room ka kartawn sek a, ka ṭhianpa Muansanga lo leng chuan min nuih kur kur reng a.







Ka ṭhianpa nen room ah kan awm a, kan palaiten an thu lo hawn chu kan ngaithla kar a, kan pa te zinga upa ber Pa Tluanga thu sawi vang chuan ka sa pup pup mai "Apa damlo enkawl a ngai bawk si a, kan hmeichhe awmchhun a ni bawk nen, min hrethiam rih rawh u, keini pawn midang kan tum biklo ang, nakin lamah iti leh zawk ang u, an ti a nih kha maw" Pa Tluanga chuan a ti dap dap a. "Min hnarna ṭawngkam anih mai mai chu" ka nuin a lo ti hlak a.









"A...an lung kan dum zo nganglo ania nge" ka pain a tih zuai raih laite chuan ka ṭhuthmunah ka lo inhumruh ngar ngar a, kum kha leh chen kan inzui a, ka tan pawh a tlawm thlak ve viau tawh a ni.









Muansanga hmel hmuh pawh ka zak lek lek mai, thinrim na leh mahni insitna in min hnawh tawt ṭeuh a, Mki nen lam lam chuan ka haw rum rum tawh. Ka call a alak theih lawkloh vang te chuan ka thinrim hlur a, vawi thum lai ka call hnuah a rawn la thei hram a.








"I chhungte khan a der mai maiin min lo lêm ṭhin anih hrep kha" ka ti nghal tawl mai.








"Mapui hrethiam rawh..ka pa hi tunlai chu.." a rawn ti dek dek chu "In chhuanlam kha enga tanmah ka ti hreplo, vawikhatmah kan rawn leng nawn leh tawh ngailo ang" tih pahin call chu ka titawp zui hmiah a, kei aimahin Muansanga a lungawilo a min vuipui bawk, chu chuan ka thinrim a ti zual sauh sauh a ni.








Ni thum zet chu inah ka inkhunga Mki call leh message te chu chhang duhloin ka ngaihthah zuia, chuti chung chuan message min thawn awllo, apa damṭhatloh thu a rawn sawi chamchi a, rei a daih a rin tawhloh thu leh hrethiam rih tura min ngenna thu hlir a ni, innei niila apa enkawl chu ka remtih loh an ring reng reng em mawni, hei chu hnar na chhuanlam mai mai a ni.







Ka chhungte chuan chiangtakin sawi dawtlo mahsela bansan mai tura min duhthu an ṭawngkamah a hriat theih thung. "Tum tawk leng an bo lo, a ni kher lo pawh hmeichhe ṭha tak i tawng em em ang" ka nu chuan a ti a, ka pa erawhin sawi a neilo thung.









Zu ka ina, pawn pawh chhuak loin ka tawm chawt reng a, nithum zet chu ka Service tawhlo. Zankhat Muansanga lo leng chuan "Inthing harh rawh, tlangvala pumpa, hetianga zawltlingvawnnat ringawt te chu a nep teih teih em mai" a rawn ti hlut a, leng chhuak tura min nghah tlat a vangin phurlo zetin ka insiam a.












Ka insiam laiin ka phone a rawn ri a, tunge min lo call tih chu ka hriatsa vangin ka phone pawh chhang duhlo chuan ka insiam zui mawlh mawlh a, "Zanin chu rui chhum hmawk ila a nimai alawm tiraw?" Muansangan a lo tih chuan ka lo bu ve nghat a.










Zu hi ka in ngai zen zenlo ti ila engemaw tih nikhua a han lem ve zauh chang ka nei a, rui tak phei chuan ka inngailo. Muansanga room ah kan in dun a, Zu inṭhanglo tih takah ka kai hma viau mai, a room bathlarah chuan ṭhuchhuakin Guiter kan perh a, chutihlaia ka phone lo ri ve sek reng chuan ka thinurna a rawn ko chhuak leh tlat tawh.









Ka no chu thlikhatin tuipawlh tawhlo chuan ka lem pawp pawp a, ka ṭhianpa pawn nuam a ti ṭan viau mai. Zan rei lamah chuan Muansanga chu a chatthla fel der tawh a, keipawh Bike han khalh haw thei ziazang ka ni tawh biklo, ka nu ka phone a Muansanga te ina ka riah tur thu ka hrilh chuan i he lovin a lo remti ve mai bawk a.









Zinga ka harh chuan ni a lo tlangsang hman viau tawh a, ka lu a rit luk a ka luak a chhuak nghulh mai bawk, Muansanga chu hnathawkin a lo chhuak daih tawh a, a penṭawng ve hauhlo em mawni!









"U mapuia chu hetah i riak a law?" room a ṭanga ka chhuah laichuan Muansanga farnu chuan phawk zetin min lo en a "Anih hi class i kal dawn nange?" ka lo tih chuan "Exam chawlhlai a nia" a lo ti var a.









"Nupui i nei leh dawnlo ka u in a tia, tak tak a mi?" a lo tih leh chuan za lo zetin ka nui a, hrechhuak zawkin ka phone chu ka bih zui nghalthuai a.








Mki call leh Message chu atam ngang mai, In ka thlen hnuah ka call lêt a "Khawiah nge nizanah i riah, in inah ka lo kala i awm bawk silo" lunghnur fêin a lo ti a, "Muana te inah ka riak" bung zetin ka ti thung.








"Mapui, thil thleng te hi ka duhdan a ni biklo tih i hriat kha, keichuan i nupui nih hlan ka ngahhlelhzia pawh i hria" ṭap ṭiau chunga a rawn tih chuan khumah bawk thlawpin thawk ka la ham ham a.








"I chhungte khan an ti mah mah tawh a ni, min nei duh takzet anih chuan kan inruk mai angai ang" ka ti a, ka rilru tak tak ka sawibawk.









"I nghak leh thei lawk mailo em ni?" ngenngawl zeta alo tih chuan "Theilo" ka lo ti chang bul thung. A kum tel tehmeuh ka nghak tawh a, nghah leh hi ka peih tawhlo, a nghaktu a ṭan reng pawh hi ka kham thawkhat tawh.








"Zanah hruai tur chein ka lo kal ang, i rilru lo siam rawh" ka tih chuan a ngawi vang vang a, min chhan lawkloh vang chuan thinrim ṭeuhin call chu ka titawp a. Zanah chuan an inlampanin ka kal ta tho a, inruk bak chu kawngdang kan nei tawhlo, ani pawn min duh tak tak anih chuan a inhuam ve turah ka ngai bawk. An kawt ka thlen rualin ka call a "Mapui min hrethiam rawh ka pa a zuala ka zui thei rihlo che" a rawn ti zuai raih a, "Anih chu" tih leh phone chu dah ka rual a.








Apa chu ngaihtuahlo bik pawh ka nilo, ka rilru a hel laklawh tlat a ni. An in lampan chuan ka pen zela, an kawngkhar bulah chuan ka ding ren rawn a, kik tuma kut ka lek chhuak uaih tawh chu ṭawngri ka hriat vang chuan ka tawp leh rih a.









"Lalmuankim, luhlul chhuah reng reng suh, khatiang Taxi driver satliah mai mai nei tur khan ka enkawl seilian lo che, i mit te kha tisang ve deuh rawh, i cousin te ho officer nupui an nih vek laiin Taxi driver neih ka tum e te itih, ṭhiante hmai eng hmuh pawh a zahthlak" a nu chuan a ti barh barh a, an thawm ngaithla chuan ka lo inhumruh ngar mai thung a.









"Ni e...Thu awih rawh, i tana ṭha tur kan ngaihtuah vang zawk a nih hi" a u mipa chuan a lo ti bawk, hrep taka heti khawpa min duhlo na na na chu engah nge ka han mawm sek reng bik ang ni, Mki ṭawng thawm hriattur awmlo te hlei hlei chuan ka thin a ti ur zual telh telh mai.









Ka bike dahna lampanin ka kal zui hlawk hlawk a, chak zetin Muansanga te inlam ka pan zui bawk. Ka va thlen chuan an lo reh ṭhiapa, Muansanga farnu chu Tv hmaah alo ṭhu a, ka va lut chu phawk hrain min lo en a "Khawnge i u?" ka va ti nghal tawl a.








"Vengthlangah mitthi lumen tur a awm a, a kalchhuak deuh chiah" a lo ti a, tunah tak hian zu inpui turin ka mamawh viau a sin mawle.









Let leh mai tuma ka inher laitak chuan "A khum hnuaiah a dah kha i duh chuan va in la" a rawn ti a, nelawm zetin min nuihsang bawk. "Ni dawn tak" tih leh Muansanga room lampan ka ruala.









A khum hnuaiah chuan a lo dah ran a, choka ah no lain ka ṭhianpa room ah chuan ka in a, ngaihtuahna mumallo zet nen thinrim ṭeuh chung chuan ka lem sek sek a, um chanve lai chu ka inzo der mai.









"U mapui, min lo pe ve teh" No rawn ken luh paha Thanpuiin a lo tih chuan phawk zetin ka lo en a, a no a rawn dawh chu sawibuailoin ka lo thlit khahsak ve mai bawk a. Ti ti pahin kan indun a, tam pawh a in hmain ani chu a ṭawng barh barh tawh.









"U mapui Mki i neilo chu a ṭha zawk ka ti in inhmehlo, in inkawprei ngaihtuah phei chuan innei tura ruat in nilo aniang" a tih chuan ka lo nuisuk a, "Nih pawh a nimahna" tihpahin ka no chu ka tlak leh pawp a.









"Zeplo ah chuan U mapui i chhelo ve thlawt ka ti che, Mki lo hmeichhe dang zawng daih rawh" nuih har har paha a tih chuan "Min zawnpui la" ka lo ti zauh chu a lo phur nasa mai, min rawn ṭhut hnaih talh talh pahin a ti ti siam siam a, a awmbawr kawhlah chuan awmze neizetin min rawn nek thuak thuak reng bawk a.








A awmdan chu ka haibiklo, Thanpuii hi chuan hman aṭangin min ngaizawng ru tawh tih chu ka hreve kar, mitmei hmu thiamlo tur khawp a mawl ka ni biklo.









"Enteh Thanpui zu ka pek che hi i u hrilh miahsuh ang che" khuma lehthawk pah chuan ka ti a, ka lu a rit leh ṭan viau tawh a ni. "Nangpawn ka zu in hi hrilhbik miahsuh" tihpahin ka bulah chuan a rawn let thla ve a, ka lama a rawn tawlh hnaih rualin ka lo kuah bet chial a, nuam ti tih hriat zetin a nui har har bawk a, min hnar hauhlo nia!








Fawh mai tuma ka thle hnai chu amah zawkin min rawn chetkhalh ta zui a, duhthawh zetin ka inkeih dun mial mial a ni ber e, kan thil in in hna a thawk ṭha dun bawk a, kan che buan buan mai, ngaihtuahna a fimlo a, tisa chakna erawh a sosang viau lawi thung.









Ka chet ve ngai hauhloin a thawmhnaw te chu a phelh sawt sawt a, ka lo hnarbiklo. Nula tituai nalh ve tawk tak ani a, keilah tlangval thisen lum ṭha tak ka ni bawk, ka huntawnin a zirlo laklawh bawk nen pawisak engmah ka nei bik tawh lo, Arpa mahin a tihtur a hria a lawm, inngaihtuah si se thei ka ni tawhlo, a chungah chuan lawn kaiin ka tihtur ang chu ka ti zui ta a ni.









CHUNZAWM ZEL TUR



Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » November 29th, 2020, 3:33 pm

SAWININLOH MK


CHAPTER - 2







'Inchhir' tih thu hian a sawifiah zo lo, rilru a fim telh telh a, chutih rualin phatsantu ka nih zia ka inhrechiang telh telh thung, mahni inthiamlohna in ka khata chubak tihtheih dang ka nei heklo, Sana ka en chuan zinglam dar 2 a lo ri thuak tawh.









"Umapui, kal mai i tum a mi?" ka thawmhnaw ka hak ṭhat mawlh mawlh laichuan thophang fein a rawn ti a, sawitur hrelo zetin a hmel chu ka en a "Pawi ka ti lutuk" ka ti zuai raih ringawt. "A pawilo a nia, ka duh che a nangpawn min duh ve a, kan thil tih kha ka inchhir miahlo" hmel hlim tak pu chunga atih chuan amah hnungchhawn zawng chuan ka inher a, thlanglam tukverh bulah chuan kalin hahzetin thawk ka la hawk a, engtin nge maw ka han hrilhfiah ang lé.









Ka hmangaihloh chu thuhran duhna rilru chhete pawh ka pu miahlo, kan inkar thilthleng chu tisa thil mai a ni a, a lehpek awm leh turin ka duh hauhlo bawk. "Puii nizan kha chu ka rui em a nih kha" am zeta thawk la hak chung chuan ka ti leh a, "Ka hria alawm, inthiamlo duh suh pawi ka tilo ka tih tawh khâ" mitnuai chat chat chunga rawn thawnchhuah pahin a ti a, pawi tilo eng ang mahse, kei erawhin pawi ka ti a ni. A pawi ka ti takzet, ka hmeichhe hmangaih em em ka phatsan miau si a.









"Tikhan kan pahnih thuruk a nimai a lawm" nuisanga a rawn tih leh chuan ka lo bu nghat a, chutianga a ngai thei a nih chuan a lawmawm khawp ang.









Haw kawngah te chuan ka inngaihtuah nasa mai a, Muansanga farnu ka chêtsual pui chu a ni sia, Mkin hria se min van haw dawn tehlul em, hetianga phatsan chung hian engtin nge a hmel ka hmuh leh ngam tawh ang ni, Thanpuii nen kan khawsak dan te chu ka ngaihtuah let a, chhungrilah ka hrehawm ṭeuh reng ringawt.








In ka thlen chuan inthlak tawhloin khumah ka bawk thlawp a, ka thilin in ka taksa a la fan hneh deuh aniang, reilo teah ka muhil nghalthuai a.







Ka harh chuan dar 8 a lo pel tawh a, tukṭhuan eitawh loin ka motor ka ti nunga, ka inkhalh chhuak nghalthuai a, kan Stand ah ṭhianpa Zo-a nen kan inhmu a "I va reh tlawk tlawk ve, nupui neih a tum an ti che a min sawm ve pawh i tum nange?" fiamthu titak zet hian a lo ti a, hmai a uang duhlo kher mai.








"Mapui, ka pa hi a hniam telh telh a, rei a daih tawh pawh ka ringlo hei Damdawiinah kan lut a, ka message i hmuh veleh minlo call rawh" tih hi Mki hnen aṭangin ka dawng a, tlailam Office ban hunlai tak a ni nain ka service kalsanin Damdawiin lam ka pan a, ka thlen hnua ka call chuan "Pawnah ka lo chhuak ang" a lo ti var a, reilo teah a rawn lang zui nghalthuai a.







A hmel chu a pawrfap a, mutmu tuah ṭhalo tih hriattakin ka meng bui deuh lak a, a landan vang chuan alaka ka inthiamlohna a zual ting mai. Nuisang chungin ka lam a rawnpan a, a zahawm ka tiin lo nuihlet ve pawh har ka ti ṭalh mai a ni.








An awmna Cabin lamah kan inzui chho a, an chhungte pawh an lo awm a, hawihhawm taka minlo biain hmelhlim min lo hmuh thei zel a. Khuma a pa mu chuan min lo hui a, ka va kal hnaih rual chuan a kut cher riak chuan min lo bana, rangtakin ka lo hum ve nghal a.







Mki pa nen hian innel tak kan ni a, College ka kal laia kan Principal a ni ṭhin ani a, a pention na pawh a la rei lutuklo, an chhungkaw zinga ka ngainat leh ka nel ve ber a ni.







"Palai chu rawn tir leh ta che, kan lo rem tawh ange" aw tham ṭiaka a tih chuan "Engtin maw?" ka lo ti hluaia, ka hriatsual emaw ni ka ti rum rum.








"Mapui kan lo inrawn ṭha a, ka pa hian a damlaia innei hman ngei turin min duh a" Mkin a lo tih chuan sawitur hrelo zetin ka ngawi renga, hlim viau tur ka nih laiin nizan thil thleng vanga mahni inthiamlohna hlirin ka khat lawi si.








"A pa heti hi a ni sia, ropui taka han tih phei chu a theih kherloh ang, midang hmuhah pawh a mawilo" anu chuan a lo ti deuh hmak a, "Chutiang a ngai hleinem" ka lo ti vat thung a.








Mki hmel ka en a min lo nuih var var a, a hmelah a hlim zia a lang reng mai, keipawh ka hlim takzet hunrei tak kan lo nghak tawh a, tunah chuan engkim a rem thei dawn ta. Ka thil tihsual erawh ka siamṭha thei tawhlo a, inchhirin awmzia a nei tawh hek lo, "Nupui neia uire ka la ni em hleinem" ti a mahni inthiam chawp chungin pawmzam ka tum ta ringawt mai a ni.








Ka pa hnena chanchin ka hrilh chuan a hma angin a lo phur tawh vak lo a, vawi hnih lai beidawnga min siam tawh hnuah an rawn rem leh si chu a lawm chiahlo a nih mai hmel, "Anih chuan kan han leng nawn leh pauh a niang chu" a ti hluk duhchauh a ni.







Palai chu a vawithumna atan kan tir leh ta a, beisei lawk ang ngeiin an rawn rem haw ta thlap mai, inneih hun tur ni leh thla te pawh an rawn ruat fel nghal thlap a. "Apa hrawk cancer an hem mek a, han hem zo te te phawt sela pa ber khi a telloh hlau ber a ni bawk nen inneih chu October ni 23 kan ti ta anih kha" Pa Tluanga chuan a ti a.







"A ṭhat mai chu, thla khat zen zawn a la awm bawk a, kan vawk pawh October ah chuan a talh tawk vel chiah dawn a" ka pa in a lo ti a. "Thla khat te chu a liam zung zung mai a sin, inbuatsaih ṭan vat kan ngai anih chu" min rawn melh pah a ka nuin a tih leh chuan tih tur ṭul ang te chu ka ngaihtuah kual a, ka room chei ṭhat leh khum siamtir te tihtur neuh neuh chu a awm nual mai.








Chhun lamah ka service a, zan lamah chuan Mki te inah ka awm deuh chawt ṭhin, inleng lut chhuak an awm ve neuh neuh renga, apa a ṭhutchilh deuh chawt reng a vangin inkawm falna hun kan nei ngai meuhlo mahse, a bula ka awm chu ka hlim tawk em em, inleng dangte haw vek hnuah pawh rei tak tak ka leng ṭhina, a chhungte dang pawn min ngaimawh hranlo, apa muhil theilo chu anu nen kan pathumin kan menpui a, a nu chau tawngkhawng chu a muthlu lup lup ṭhin a ka menpui ṭhin chu a lawm viau bawk, ka thlen har hi chua apa hian ka kal dawn leh dawnloh hi a lo zawt hman ziah bawk a, a u mipa pawn mibulah minlo fak ve viau niawm tak a ni.








Zandang ang bawkin ka leng leh a, chhun lamah ka service hah deuh avangin rei tak men erawh ka tumlo thunh, veng danga an chhungte an lo awm ve nak nak a, ka va lut chu min lo fiam hlut mai, inneih hun tur te sawiin kan ri dar dar a, min phurpui hlawm viau a ni.







"Khum i siamtir tawh em?" nui ruh ruh chungin a rawn ti ru sar sar a, "Siamtir mek e, an zo ṭep tawh" ka lo tih chuan a phur nasa mai a. "Ka van hmu chak tak" a lo ti hap a, "Ka phone ah a awm a lawm mahse, ka hmuh rih dawnlo che" ka lo tih leh chuan na lo te hian ka banah min rawn chum taih a, "Kar tawpah bazar kan ngaih kha aw" a ti zui a.








"Unicky nen in bazar dun dawn emaw tih a" ka lo ti a, "Ani nen chuan kar leh lam kan tum a, kawr vel chu kan hual fel vek tawh, Tetei te dawrah pheikhawk a thlen thar veleh kan kal ang, kan nupa bungrua tur vel chu nangmah ngeiin min enpui angai a lawm" a lo ti a, "Kan kal dawn nia" ka tih chuan a nui leh var var a.







Apa pawh a zia viau a, ka awmchhung pawn a tho harh peih a, zing karah Lengpui lamah passenger dah ka ngaihthu sawiin haw ka rawt a, haw dawn chuan pawn thleng min rawn thlah a, kan inkuah lohna chen pawh a rei tawh, an kawta Sintex lianpui an dahna phenah chuan ka pawtlut a, duhthawh zetin a hmui chu ka fawp vang vang a, ani pawn ka kawngah min lo kuah chial a, ka ta ani tak tak tawh dawn tih hi ka la ringhlel rum rum mai.








Kan in mangṭha a, in ka thlen hnuah pawh kan inbe zuia, inneih chungchang mawlh chuan kan rilru a luah dun a ni, ti ti dang a leng hleithei meuhlo.








Kar tawpah chuan kan bazar dun ta ngei a, ka ṭhianpa min dinpuitu tur Zo-a pawn min rawn zui ve a, kan pheikhawk leh suit hak tur te pawh kan lei a, Dunlop ka lei chu "A van zau dawn ve" Mkin a lo ti hluai a, "In inhauh a i tihtauh hunah pawh hla deuha i tawlh sawn daih mai dawn a aṭha zawk daih a lawm" Zo an a lo ti chuan a nuih a za kher mai.







Ani chuan thil a en kuala thla te ala a "Mama'n a va lei mai ang, kan duh ho hi thla kan la anga, bungraw dang ho chu ka nuin a hmelhriat te hnenah a order a" a tih vang chuan reitak kan bazar lo.







A kar leh ah a ṭhiannu Unicky nen an bazar leh a, mo kawr an ha chhin lai te Pawh thlalak minlo thawn a, inhmeh ka tih ber min rawn thlantir a ni, a hmelṭhain a pian a dikthlup a, a vunin a chawi bawk nen a enga pawh chu a inhmeh vek maiin ka hria, ka mitah hi chuan a ṭhave chiang em asin.








Engkim mai chu a kaltluang chho a, ka room chu rawng te hnawih ṭhain Carpet thar te kan phah a, Muansanga pawn ni hnih lai chu min rawn pui ve nghe nghe, "Nula che tur in mamawh chuan Lalthani te pawh rawn ko lawp lawp ru" a tih chuan hnar a lian duh larh larh khawp mai.








Chawlhkar khat chiah a awm tawh ang tih ah, ka khum siamtir chu Pa Tluangan a thing aṭha tawklo a rawn ti ta tlat pek a, thing dang kan lei chawp leh chuk chuk a, kan ṭhenawma thing Mistiri hoin kan siam a, a thing lo nawh mam leh perek kilh beh tih vel bak thiam nei ve heklo, an siamlai chu ka thlir dauh dauh a, Ka pa Tluanga thil inti hre lutuk chuan a sawisel reng mai bawk a, a ninawmin a hlimawm ru viau bawk si.







"Lalmuanpui, i nupui tur chu man eitutur an tam viau e an tih kha, i lo hre ve em?" Pa Tluanga nupui Nu Maêngin a rawn ti a, "Hre nang, tam chu an tam ang an chhungkua an tam em alawm, bakah hmeichhe awmchhun a ni bawk si a" ka lo ti mai a, "200 chuang a lawm an nih, nangin 420 i pe anga, i pek zat chuan adaihlo nasa ve ngawt ang" nui hawk hawk chunga tih pahin a kal leh mai a, ka thing nawh mam laichuan tutu nge man eitur awm ang chu ka ngaihtuah kual a, kum 8 zet kan inkawp tawh a, a chhungte; an vua leh vang ho chu ka hre ve fur mai mahse, 200 chuang chu an tam ka ti viau a ni.







"Hmeichhe man te hi a tlawm leh lutuk a, hmanlai kha chuan tlangvalin hahthikula tuak ṭauh ṭauh kha a ngai ṭhin a, tun hnuah hi chuan nikhat pocket money zat lek a ni tawh si a, hmeichhe man te hi san daih chi a sin mawle, an innei zung zunga an inṭhen leh zung zunga, hmeichhe man tlawm lutuk vang te pawh hi a nih ka ring" kan Mistiri chuan a lo ti a, Pa Tluanga ngaihdan alo nilo nasa mai.








"Hmeichhia te hi bungrua anga hralh chi an ni hleinem, hmeichhe man 420 tih hi chu chhungkaw pahnih te inchhungkhatna thluthlung nemnghehna entirna daih a sin a tlawm te i tih, hlu deuh mai a nia, anih nang Pu Lian i nupui man i tlak tawh ngawt em ni?" a thiltih lai chawl meuhin Pu Liana chu a en a, "Tlak loh ten le...420 chengsawm Note Bank a lakchhuah hlim thar var ka pe alawm" nui hui chunga alo tih chuan "420 i pek khan ṭhutphah man cheng 20 an kir lêt lo che maw?" Pa Tluangan a lo ti leh khauh a.







"Kir e..ṭhutphah man te hlei hlei hi ania tlem chu ni, ṭhutphah man an tih hi chu maw Mapui ṭhu hmanloa kan tirh sek an hlauh vang mai mai mawle" uang zetin a rawn ti leh a, a rui phual bawk si a, ka lo nuih hawk hawk laiin amah lah chu a nui ṭha leh duh derlo a.








"I mawl hiang huang si ah, chu i nupui man pawh ila tlak tawp loh chu, keichuan ka fanu pathum ka hralh zo der tawh a, ka nupui man pawh ka tlakfel tawh, nangchu fanu i nei ve silo a, nupui man ba ralin ithi tual dawn a nih chu" Pa Tluangan a lo tih chuan "A engvang ngawt chuan maw, ka pe kim ve chiang emai a" a lo ti leh bul bul a.








"Mapui, ṭhutphah man an inpek let hi a awmzia i hria em?" tih paha Pa tluangan min rawn en chuan "Hre ve tho e" ka lo ti a "Engtiangin nge i hriat?" a lo ti leh kher a. "A....ka hriat dan chuan ṭhutphah man hi an kir letlo anih chuan inṭhen hunah thuam a la let theilo a, inṭhen pawh nise, a pasal leh fanau te chantur a nia, a lakduh chuan ṭhutphah man kha a pek angai a ni lawmni" ka lo ti a, ka sawi dik aniang chu a bu nghat nghat mai.









"Ni e, chutiang bawkin hmeichhe ṭhutphah nei chu a lo boral anih pawhin a chhungten a thuam an la lêt thei a, man dang zawng tlak anih a, thuam an la bawk anih chuan ṭhutphah man chu lak tur a nilo, tunlai mi tamzawk hian ṭhutphah man awmzia pawh an hre hlawmlo, nupui man ba rala thi ta mai mai te hi an tam a nia" a tih charh charh laichuan Pa Liana chuan phawk zetin a lo en he haw a. "Chuti chu ka puzawn te inah kal leh hunah ka pe ve teh ang" a lo ti thlarawk a "I pe ve thei ngawt lo, fanu i nei hleinem" Pa Tluangan a lo ti leh a, a hrethiamlo nasa mai.







"Nangpawh nupui i nei mai dawn a, hriat ngei ngei tur aw Mapui, ṭhutphahin a tum diktak chu entirnan, mi kan inanglo a, nupui kutthlak mai ching te an awm a 'ka nupui a lawm, ka thu thu in losawi ve tur a awmlo' ti ten pasalin ṭan a lo khawh ve thei a, khatah chiah khan dan hnuaiah hmeichhe lam chhungten a thlavang an lo hauhsak ve thei a 'A man ila tlak hleinem, ṭhutphah man kan kir let che alawm kan ta a la ni ve e, hetianga tih mai mai mai kan phallo" ti a thlavang an hauh theih nan ṭhutphah man hi an kir let ṭhin a nia.







Tin, hria la ka duh chu, nupa an han inei a, fanu pahnih thum an nei a, an fanu te zawng zawgin pasal an neih zawh hnuah khan mipa chuan a nupui man a tlak thei tawh a, a puzawnte hnenah ṭhutphah man kha a pe kir leh tur a ni, fanu neiloin ṭhutphah man a tlak theilo. Tunlaiah nu man te an han ti mai mai a, Nu man hi a awm ngailo, tunhnua an siam chawp mai mai a nia inneihna ṭhenkhatah phei chuan 20 dawn dawn Nu man eite hi zuk awm a mawle, Nupa inṭhen tawh fanu emaw, nulat fain pasal aneih hian a nuin man a eive thei a, dan diktakah chuan a hringtunu chauhin Nu man hi a ei thei" ati dap dap a, a sawi chhunzawm zela, a tawpah Dan leh hrai neuh neuh chu a hriat hmel nasa mai, "Mihur zawn' an tih hi i hre ngai em? Hmeichhe awmṭha duhlo tlangvalin an zawna daiah an keuh ṭhin tihvel kha, tunlai hian han ching se ṭha tur a nia" Pu Lianan a lo ti leh khauh a, thu tak lai laiin a nuihloh theihloh.








Nithum zet kan khawih leh hnuah khum chu kan peihfel thei a, a hma ami aichuan ṭha zawk turah ka ngai, ka Dunlop lei chu ka phah chhin a, a thlalak Mki ka thawn bawk.







Inneih hun ahnai telh telh a, ka helhhawlh deuh tlat tawh, Thawhṭan zanah man kan inhlan dawna, tunah inrinni chauh a la ni, an ina leng tura ka insiam mawlh mawlh chu "Han mawm sek lo la, chhungkuaa titi ho te pawh an duh ve ang chu" ka nuin a tih vang chuan chhuah ka tum uk chu ka ṭhulh leh a khumah muin ka text a, an chhungte hmundang a mite pawh mikhual an nei nual tawh niawm tak a ni.








Zankhuaa han inhmuhloh tawp mai chu ka ti hleithei derlo, ka leng tho dawn emaw ni ka tih ut ut laiin Zo-a a rawn lang hlawl a, Room ah Games kan khel laiin Mkin min lo call a "Unicky nen facial turin kan kal dawn a ilo kal ve duh em?" a rawn a ti a, Zo-an "Keini pawh Facial tir ve nghal ila" a tih vangin rang takin kan kalchhuak nghal a, an inleh kan in chu a inhlat vaklo bawk a, kan thleng thuai mai. Kawta an lo chhuak chiah nen kan intawk a, a ṭhiannu Lbi te inlamah Facial turin kan kal a, kan awm rei angreng viau.








Facial zawhah thingpui te in in kan ṭhukhawmuang leh zeta, kan haw chuan dar 10 a pelfel der tawh, an inlampana kan kal lai chuan inkuah rialin kan ṭhiante hnungah kal duna, ṭhiante hmuhloh lai chuan ka fawp ru zauh zauh renga, mi min hmuh hlau a a sen ṭan ṭan chu hmelṭha tak a ni.









Lut kawi hranloin kawtkaiah chuan kan inthlah a, Zo-a nen kan inlampanin kan haw zui a, Zial ṭana kan titi barh barh laiin kan inkawta Car dum ding vang chu ka va hmu a, "Zan zanah inleng kan nei ani maw?" ka tichhuak sup a, tutak ni maw.






"Naktuk zan ami Rehearsal?" ka ṭhianpain a lo tih chuan ka lo bu nghat a.








"Tinge Monday zan a tih mai loh le" ka ṭhianpa chuan a ti leh a "Monday chu man hlan zan kha ania" ka lo ti a, "Kan kal ve dawn a mi?" a lo tih leh chuan "Dawnlo, keini chu kan awm a ngai hleinem, hmeichhe lam kha an awm a ngai a. E..Unicky hnenah khan ṭhianman engzah nge ka pek ang che i ti dawn nia, a phut zat zat i pek angai aw, ngamtlak tih vang khan tlawm te kha ilo dil vei ngawt ange" nui ruh ruh chunga ka tih chuan "Ka hre ve reng" a lo ti hluk a, kan kawt kan thleng chawp chilh a, ka zial chu paihin ka rap hlum a, chutih laiin inchhung lamah chuan nutling ang bawrh bawrh ri ka hria a, Zo-a nen chuan kan in en phawk kher mai!








Ka nu aw a ni miahlo lehnghal a, hmanhmawh angreng zet chuan khawngkhar ka pawt hawnga, kan lut phei chu puitling ho lo ṭhu khawm ṭhup chuan min lo en phawk viau hlawm a, tute nge an nih ka hria, min ti hamhaih viau bawk!







Muansanga chhungte ho an ni!?





"Eh...in va tam ve" Zo an atihlai chuan Muansanga nu chu a rawn ding chhuak a, "Muanpui i va tenawm ve" min rawn ti tawl mai. "Zuali ṭhu phawt teh, puitling taka thil sawi ṭhin tur" Muansanga pu chuan a lo ti damthlup a, thilthleng mek chu rindan ka nei thiam riai ruai.







"Mapui lo ṭhu phawt teh u" Muansang puin a rawn tih leh chuan Zo-a nen ṭhutna awl lam kan pan a, ka ngaihtuahna chu a tawi tup mai, ka hlauthawng a ka duhloh tawp thil thleng dawna hriatna ka nei, ka hlauh ang ngeiin "Hei sawn man an rawn ṭhing che anih hi" ka pain a lo ti changbul mai bawk a.








An vai chuan ka lam an rawn hawi ṭhup a, Zo-a takngial pawhin makti takin min en a, sawitur reng ka hrelo sâwn ka thlak, chu chu ka bengah a ri tluk tluk a ni.







"Lalmuanpui...nupui nei mai tur si engtin nge hetiang hian i khawsak theih a, zu in ilo hrai rui a, i ṭhianpa rilru pawh i tina lutuk, Thanpuii pawn a u ang hialin a en lai chein i rilru a va chhe em em ve" Muansanga nu chuan a ti hlak hlak a, a awki phei chu ring hranlo mahse, a thinur hle tih a hriat, ka rilru a buai tak zet a ni, Mki ka ngaihtuahna ah a rawn langa, hethil hi thil namai a ni dawnlo tlat.







"Mapui, i fa chu a ni a mi?" ka nuin a rawn tih chuan ngaihtuah buai map loin "Aih.." ka lo ti tawl a.







"Enge chu chu a awmzia?" ka pa a ni, a thinrim hle bawk.





"Ka fa anilo iti dawn a maw, nguntakin han ngaihtuah teh" Muansanga pu chuan a lo ti a, ka fa anih chu ka ring nghal mai theilo, ka khawihlai khan hmeichhe thianghlim a ni tawhlo a mahse, puh theihturin a awm bawk si a ni.








"Mipa chuan a thiltih ah mawhphurhna a la ngam tur a ni, i chetsualpui em?" ka pa chuan a rawn ti leh fak a, ka inhumruh ṭeuh mai.







"I hrai ruia a chhahthlak laiin i khawih a nilawmni" Muansanga nuin a lo tih leh chuan ka hawichhuak zawk a "Teuhlo lutuk" tih pahin thaw ka la hawk a. Hrai ruia mutpui te chu a awm anglo lulai lutuk.








"F.LALMUANPUI" ka pain a rawn ti chang leh fak a, ka hmingpuma min koh tawh hi chuan luhlul chhuah chi a ni tawhlo, "Vawikhat kan chesuala, ama duhthlanna ngei a ni" ka ti zawi ta sup a, midang ho chu an lo thaw ri hak bawk.







"I chetsualpui chuan i fa ngei chu a nih chu" Muansanga nuin a lo ti leh zat mai. Ka fa anilo ti a ṭan tlat tur em mawni, ka ngaihtuahna buai lutuk chu ka ngawng chhulh tawh mai in ka hria.







"Nupui nei mai tur i ni bawk si a, sawnman min pe ula keini chu kan inthiar fihlim zui mai ang" pa pakhat chuan a lo ti a "Nilo e...sawnman indil angailo, innei rawh se" ka pa in a lo ti leh hmiah thung.








"Enga...i â mi?" insum theilo zetin ka lo ti a, "Zo-a i ṭhianpa kha room ah lo va luhpui rawh" a lo ti leh nghut a, ka thin a sa zak mai "I duh duh sawi suh, Mki nen kan innei dawn" ka ti ve ngat a, kan inleng te chuan kan pafa chu min entawn sek ringawt.







"Lo kal teh" tih leh room lama min pawh phei a rual a, ka ṭang buailo ka pa a ni miau.







"Ngaithla rawh sawn i thlak tih an hriat rualin inneih an ṭulh nghaldawn, hetiang thil an hrelo chung pawn an pawm ṭawk ṭawk che ania ngaihtuah ta che, i duhthlanna in naute i siam a, alaka i mawhphurhna pawh i la tur a ni" khuma ka ṭhu chu min melh ngur chungin a ti a, Mki te chhungkuain min dawnsawn dan tur chu ka pa sawi mai aipawhin a chhe zawkin ka ring hial.








Sitting rooma min pheisan leh hnu chuan Zo-a nen kan ṭhu ngawirenga, sawi tur pawh ka hrelo, ani pawn min be biklo a, kan pahnih chuan min ṭhawng ve ve a ni. Chhuat dungah chuan ka veitawn sek a, hah zetin ka thawchhuak leh ṭhin.








Eng thutlukna nge an siam ang, ka chhungte chuan eng thutlukna pawh siam sela, keichuan Mki thutlukna chiah ka zawm ang, midang chu an pawimawhlo, angaihdan chiah ani ka ngaih pawimawh ni.






(Chhunzawm leh tur)

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » November 29th, 2020, 3:33 pm

CHAPTER - 3






In leng te haw hnu chuan ka nu leh ka pa chu ka room ah an lo lut nghal a, kan sawi ṭan hma hauhin kan boruak chu a rit churh mai. Ka ngaihtuahna a buai a, ka rilru a hah takzet bawk.







"Eng maw i sawi..!?" ka pa thilsawi chu awihlo zetin ka en a, hrep chuan!!... Thanpuii nei mai tur a min duh thu a sawi a nih chu!






"Karleh lawkah Mki nen kan innei dawn tih i hria a nilawm ni?" ring fahran chuan ka lo ti a, ka inhumruh nghal ṭeuh bawk. "An thutlukna te pawh kan nghak ve ang chu, an rem ta tho a nih chuan aṭha ani mai a mahse, chutiang nilo a an inlamlet anih chuan Thanpuii zawk i nei ang" a lo ti leh hmiah a.







Zan ka muhil theilo a ka â deuh ruai mai, engtin nge Mki hnenah ka sawi ang? A hriat hunah engtin nge a ngaih ang?







Kha zan kha ka nuna ka thiltih tawh zawng zawnga ka inchhir ber ṭum a ni hial ta ve ang, hun pawh leta siam danglam theih ni se ka van ti tehlul em, hetiang tur ani tih hre lawk ngat ila chuan Thanpuii kha ka hnaihlo anga, zu ka rui lo anga Muansanga te In pawh kha ka va pan hauhlo tur, hre lawk ila chuan kha zan kha ka nun aṭangin ka paihbo duh hial ang mahse, tunah chuan engkim a tlai zo tawh, zing khua a var anga engthil nge lo thleng ang? Tun a ka tihtheih chhun chu inchhir chauh a ni.







Keimah vanga Mki zak leh rilru na taka awmtur chu ka ngaihtuah a, inpet ruhin na zetin thawk ka la leh rih ṭhin. Khawvar rualin Mki te inlampanin ka chho a, kawngka alo la inkalh ṭhiap a, an kawt kawngpui hla deuh hlek aṭang chuan an In chu ka thlir reng a, tunah zet chuan a hmel hmuh pawh ka hupurh a ni, chutih rualin ka lak aṭangin a hla daih mai ang tih erawh ka hlau hle thung.








Kawtthler reh ṭhiap ah chuan ka vei tawn sek a, ka sa pup pup a, ka thlan hluam mai bawk. Zing ṭawngṭai inkhawm kal ho chuan min melh hrek hrek hlawm a, makti taka min en hlawm a vangin ka kalsawn nghal thuai a.






Nilengin room ah ka tawm chawt a, Mki message emaw call dawn hlau reng rengin ka awm a, a reh vung vung pawh chuan ka ngaih a ti ṭha chuanglo. "Zaninah ngaihdam dilturin kan kal dawnnia" Pa Tluangan choka lama a tih ri chu ka hrepha a, Mki te Inah nge Thanpuii te inah zawk an kal dawn ka hrelo, ka nu lo lut chu thil awmzia ka lo zawt a, In hnihah kal a ngaihthu a lo sawi mauh mai.







Tlaiah chuan Mki hnen aṭangin Call ka dawng ta ngei mai a, a hre tawh tihna a ni ngei ang, insehruh ṭeuh chungin Call chu ka la a "Vawiin chu ka buai lutuk a, kan kawr ṭhuitir kha kan va lama" zangkhai vah hian alo ti a, engmah a la hrelo, ka mit chhingin thawk ka la vang vang a, a awri a phurna lo lang te chuan rilru a ti hrehawm zual ting a ni.






"Mapui.."



"Aw..."



"Tinge i ngawih vung vunga...zanah Tetei te inah pheikhawk kan va thleng lawk dawna, i duh leh lo kal ve la" a ti a, chhan mai dan tur ka hrelo, mi ka aṭanga a hria anih chuan a rilru a na dawn lutuk tih ka hria, keimah ngeiin ka hrilh angai tih ka hre bawk a mahse, a harsa a ni.







"I peihloh chuan angai chuanglo, i lo leng ngam chiah tawh silo a, i duh tâkah ka ti mai mai a nia" inthlahrun lek lek hian a rawn ti leh a, na zetin thawk ka lo la hawk thung a.







"Inhmu lawk ila" ban charha ka tih chuan "Zanah maw?" a lo ti vat a "Aih, i hman veleh a theih anga rangin" ka ti a, midang ka aṭanga a hriat aichuan keimah ngeiin hrilh ka duh a ni, ngaihdam te pawh ka dil anga, tawrh angaih leh ka tuar mai ang.






"I lo chho dawn a mi?" a rawn tih leh chuan Zo-a te ina ka lo nghah tur thu hrilhin Call chu ka titawp zui a, Hmanhmawh takin Zo-a te inlam ka pana ka va thlen chuan a Nu nen chauh an lo awm a, Mki lo kal tur thu hrilh pahin a Room lamah kan inzuilut a, ani pawh a rilru a buai khawp mai.







"Nangman i hrilh chu aṭha zawk a lawm, midang ka aṭangin a hre ngei ngei dawn tho a" alo ti a, tukverh lam hawi chuan ka ding ngawi renga, beisei a sanglo tawpna kan hmachhawn dawn tih ka hria. Engthil pawh thleng sela Mki tana ṭha tur ang zel chauhin ka ti ang.







"Duhleh inhnuai room ah lo zuk nghak la, a lo thlen hunah ka lo chhuktir dawnnia" Zo an a tih chuan inhnuai room lam chu ka pan nghal a, khum chungah ṭhuin ngun zetin ka inngaihtuah a, han hrilh mai dan tur pawh ka hrethiam lo.







"I thlenna a rei tawh em?" tih ri ka hriat chuan ka hawichhuak vat a, Step ah a lo chhuk mek a, ka bul a rawn thlen chuan min nuih var var a, a biangah khuapin a hmuiah lungchim zetin ka han fawp vang vang phawtba, thawk a pik takzet.






"Thil hrilh duh che ka nei a" khuma nem ṭhut pahin ka ti a, tha a tho lo kher mai. "Sawila" phur zeta a lo tih te chuan ka rilrua thilawm a ngaihtuah thleng pha hauhlo.






"Ka pehhel lo ang, kei hian ka phatsan che a ni" ka ti tawl mai. Hriatthiam loh hmelzetin min en a, chuveleh a kut chu humin ka hmersak vang vang a, ngun zetin a nin min en thung. "I sawi awmzia ka hre lo" nuisangin a ti a, thawk avan sak tehreng em.







"Hman zan kha i la hria em, phone a kan in hnial zan kha" ka tih chuan a hria tih tihlan nan a lo bu nghat a. "Khami zana i nu leh i u ten an hauhlai che khan pawn ah ka awm a, an thil sawi te kha ka lo ngaithla a, khathil vanga ka rilru na kha ka rui zui chiam a, Muansanga room ah kalin zu ka in a" a hmel chu ka en a, ngunzetin minlo en ve a.








"Thanpuii nen khan zu kan indun a..."a thaw hak ri ka hriat rualin ka en vat a "Call i la thei silo a, ka mangang hman lutuk a" a lo ti ve sap a.






"Khami zan khan ka lo che tisa deuh hleka" ka tih chuan hriatthiam loh hmel takin min en a. "Thanpuii nen khan kan chesual a, ka rilru hah rui leh fim bawk silo kha, ka duhloh dan deuhin ka awm a ni" harsa zet chuan ka ti chhuak ta a, a hmel duhawm zet chu a nur nghal nang mai.







"Uan na chi loh e" ka ban puama rawn hnek salh pahin a nui zui hak a, ka hmel thutak zet a hmuh rualin a nui tawp riai riai thung. "I fiamthu ti raw?" za lo zeta nuihak chunga a tih leh chuan ka lu ka lo thinga, "Fiamthu mai mai nisela keipawn ka ti, pawi ka ti lutuk Mk...Tunah Thanpuii a rai mek a ni" ka tih chuan phawk zetin min en a, thudik ka sawi leh sawiloh hriatchian tumin ngun fahranin min en kal bawk.






"Fiamthu mai mai lo teh aw..." aw khur dar dar chunga tiin lunghnur tihhriat lutuk chuan min melh a, "Ka fiamthu lo" lu thin paha ka tih chuan "Enga....chutiang ka duhlo fiamthu zawk rawh" a ti leh ang lawi a, a ṭap nghal ṭiau mai.







"Ka tihpalh a ni pawi ka ti lutuk" a kut vawn ka tum chu a lo tawlh hnung dawrh a. "Tinge...mawhh?? I â zo tawh a nih hi" min rawn hnaihin ka awm leh ban ah te chuan a chum dawp dawp a, ṭap chhuak hleitheiloin a khur dar dar bawk.







Man betin ka awmah ka pawm beta, a ṭap chhuak nghal hawk a "Engtin nge hetiang thil hi ka chungah i tih theih le?!" ka awma hmaiphum chunga a tihlai chuan ka lo inpetruh ve ṭeuh a, ka tawt urh mai bawk.






Khumah chuan pawt ṭhuin ka kuah bet tlata, ka awm nghengin a rei fe a ṭap a, hrehawm ka ti lutuk chu ka chawmawlh zo vek mai. "Engtin nge kan awm dawn a?" aw tham chhelin a ti a "Ka hrelo" ka lo ti mawl tawp ringawt a.








"Engkim hi ka thiamloh vek a ni a pawi ka ti takzet, eng ang hun pawh tawng dawn ila, ka hmangaih chu nangmah chiah i ni reng tho ang" a sam uaithla hniang mai huikian sak paha ka tih chuan a hmai a kut pahniha hup chungin a insut zui hlawp hlawp a.






Ka kuahna aṭanga inlak hran a tum chu phalloin ka lo kuah nghet sauh a, a tal zui aih aih a, ka awmah pawmbetin ka kuah nghet sauh sauh thung. "Engkim i ti chhe zo vek tawh, kan hma hun te, keimah ngei pawh.." a ṭap ri chuan min ti na a ni, ka awmah hmaiphumin a khur dar dar a, rilru a tawt a ngaihtuahna mumal pawh ka pu hleithei biklo. "Min thlah rawh ka haw duh" a tih te chuan thlah phalloin ka kuah nghet zual sauh a.








Khua a thim dawn ruai tawh a, Zo a khumah chuan chawmawlh zetin kan ṭhu ngawirenga, a ṭahna vanga a mit sen ram te chu hmuh hrehawm ka ti, min rawn enin "Engtia awm nge i tum?" tiin min zawt a chu zawhna chu chhan harsa tak a ni.






"Engtianga awm turin nge minduh sawila, i duh ang apiangin ka awm ang" ka lo ti a.






"Mapui, ka chhungten rem an ti tawh lo ang" aw ṭham ṭuak a atih chuan "Anih nangin?" ka lo ti leh vatna "Ka hre lo" ṭap ṭeuh chung chuan a ti zawi leh sap a, "Inru ila tlanbo daih mai ila" ka lo tih chuan phawk zeta min en pahin alu a thing a, "Ka chhungte ka kalsan thei lo, min phatsana hmeichhe dang laka inhnangfak thei mihring kianga cheng tur leh lek phei chuan" khabe sai dar dar chunga a tih chuan ka na vawng vawng a ni, hetiang reng renga a thinur hmel hi ka la hmu ngailo.








Khami zan khan kan inhnial zui chiam a, keiin ka ruia ka fim lohvang a ni, tihpalh thil a nia tiin ṭan ka khawh a, ani lahin ka duh reng vanga chesual ah leh amah ngaihtuahna nei hauhlo ah min puh ve thung, hmaisen ṭawn ṭawn khawpin kan in hniala chu erawhin engmah a thlak danglam thei tawhlo tih kan hrechiang viau si.







Zanah ngaihdam dilturin palai an kal a, Mki chhungte chu an thinur ngang mai, a u in min lo call a, vawikhatmah be leh tawhlo turin min rawn hrilh a, min rawn vau zui hial bawk. Inneih pawh zan khat thil thuah an ṭhulh fel nghal der a "Ka rin lawk dan chiah a ni" ka pain a lo tih chuan ka lo inhumruh ngar ngar reng.






Khata ṭang khan kan inhmu leh ta lo vang vang a, kan mualpho hle bawk, miten hnunglama min sawizui dantur chu ka ngaihruat thiam mai, Mki mualpho telve zel erawh ka inthiam theilo a ni.






A ṭhiannu Unicky nen kan inbe zeuh zeuh a, Mki chu Delhi ah achhangtu chiah a U in a hnena cheng turin a hruai daih a ni awm a, vengchhung titi kan luah hneh hle a, a sarhu laia awmbo chu atan pawh aṭha zawk ang, biak ka tum fo a ; a Number a thlak nge ni ka be tlang thei ngailo, Thanpuii nei mai turin ka pain min lo hrilh ve cham chi bawk a, neih kher chu tumna ka nei hauh lo, ka fa erawh dam tea a hring anih chuan ka mawhphurna ah lak ka tum thung a ni.








Mahse, tum angin engmah a kal reng biklo, Thanpuii naupai a lo hram a, a taksa a chakloin harsatna neuh neuh a tawk reng mai a, chutihlaiin Muansanga nen erawh kan inkawm ta vaklo a, Thanpuii chu ka nu leh pain tlawhin, naupailai tana ṭha tur thil hrang hrang an lei sak awllo a, an theihtawkin an bawihsawm a, kei erawhin vawikhat te pawh ka hmu zui leh tawhlo. Inhmuh aduh thu a rawn sawifo a, pehhel dan ngawt ka ngaihtuah thung.







Thingtlangah kan chhungte tlawha ka zin hlanin ka pa in a thuin Palai a lo tir ringawt mai a, ka haw hnua chanchin ka hria chu ka sa kher mai. Ka pa erawhin a thu a sut duhlo "Patlingin kan tih chu kan tih a nimai, mahni thu zuk leh hni hne mi ka nilo, kan tu a ni a kan thlahthlam theilo ang" a ti leh mauh mai a.







Ka ngawi mai mai thei biklo "Neih tumna ka neilo, nangin iti lo anih pawhin va kalin ka va hrilhfiah ang" ka ti ve ta nghat a, kan inhnial zui rap rap a, a hnu chuan ka chhang zel peih tawhlo "Fa te tih fahrah ka ngaihdan a nilo reng reng, Muankimi nena inneih tur lah îhe loin an rawn ṭhulhfel dera, chutih tawh a hnu kan tupa nu chu kan la lut mai tur a ni" a ti zui bawng bawnga, chhang tawhlo chuan ngawih ka chuh leh ta zawk a, ka rilru erawhin "Ka va nei awm hleilo" tiin ka inhumruh sauh sauh thung.







Thanpuii te ina ka va kal laichuan a nu nen an lo awma, a nu chuan minlo be ṭha ta kher mai "A room ah a awm anih kha han chho rawh, naupai a haw lutuka thil engmah pawh a eitheilo" a ti nghal barh barha, a room a han luh kher chu ka tum hauhlo, ka sawidan tur ka ngaihtuah lawk sa vek tawh a, han sawi nghal mai ka tumlai chuan room aṭangin Thanpuii a lo chhuak a a pum dawmin a rawn ṭap ṭuau a "Nu ka pum a na" tih leh ṭah a ruala, a nu chu a lo chiau nghal chul bawk a.








Rang lutukin Damdawiin lamah kan inphur chho a, naute chu a chhiat mai ang tih ka lo hlauthawng ve em em ringawt, a mak a ni awmlo tawp mahsela pawi ka tihloh tehlul nen, ka rilru puthmang chu ka hrethiam tawh bik hauhlo.







(Chhunzawm leh tur)

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » November 29th, 2020, 3:34 pm

SAWININ LOH MK - Ahmangaihi violette khiangte



CHAPTER - 4


Emergency in Casualty ah an nawr luta, reilo teah ka chhungte pawh an lo thlenga Thanpuii nu in a lo va hrilh hman hmawh chu niin.






Doctor Room a Thanpuii lut ta chu Room pawnah kan lo nghak ṭhapa, ṭhianpa Muansanga nen chuan kan in be zeuh zeuh chauh a ni, rei vaklo hnuah Nurse a lo chhuak a "Zothanpuii pasal a awm chuan lo lut lawk rawh se" a lo ti a, midang awm ve hoin min en ringawt chu ka duhlo kher mai.







"Mapui va lut rawh" ka nuin a lo tih chuan midang te pawh chuan min ngaichang ran hlawm a. "Va lut lawk mai rawh Doctor-in sawi duh anei aniang" Thanpuii nu chuan a lo ti bawk a.







"Keimah ka lo kal mai dawn a mi" Muansang-an a tih chuan ka ngawi lui tlata "Muana kha lut rawh se, Lalmuanpui kal vat ta che mawle" chang fek fawka ka pan a lo tih leh takah chuan a thawhloh theih ta loh, Nurse lah chuan min nghak renga, damlo awmpui tu dang chuta awmve ho lah chuan min bengkhawn nasa mai si.







Phurlo tak chung chuan Nurse chu ka zuilut ta a, Room chhunga Thanpuii lo mu bam chuan mittui tla par chungin min lo en a, a insut faih faih reng chu khawngaih tha a tho lo viau nain naute dinhmun hlauhthawn awma a awmtur chu ka ngaihtuah hle thung.






"Nau in chhiat ṭep anih hi, he thil hi nangin i hriatpui em?" Doctor in a lo tih chuan ka hrethiam hauhlo.






"Engthil maw?" ka lo ti he haw a.





"I nupui hian nau tihtlakna damdawi Mesoprostol a ei tih hi i hre miah lo maw?" phawk lek leka min enchungin Doctor chuan a han ti nawn leh a.






Chu zawng ka lo beiseiloh lam daih a ni, min ṭhawng kher mai!






Thanpuii lam ka va hawi leh chuan ṭap fap fap chungin a hmai a hup daih a, tih ngaihna tak pawh ka hrelo, ka â deuh chhulh maiin a nia ka hriat ni.






"Zothanpui enge thil awmzia?" ka ti hluai ringawt a, a awmzia chu ka hre tehmeuh mai, ani sawn nau tihtlak a tum a ni, enge maw kan chungah thleng teh nuai hi le?






"In nupa thutlukna anih ka ring chiahlo reng a ni mahse, naute chu a ṭha a eng em a ti hmanlo e, kha aikhan damdawi kha lo eitam deuh nisela chuan naute kha a thi ngei ang" Doctor in a tih chuan ka thaw huai a, thinurna in min hnawh tawt nghal urh thung.






Counselling class kan kal duh leh duh loh min zawta "Kan duhlo" ka lo ti chang bul a, mak min tih hmel viau, keilah na zet zetin thawk ka la sek sek a, Zothanpuii chu ka ve en leh ṭhin a, hnek hrep mai ka chak ber.






Ka phalna la loin ka fa a paia, tunah ka phalna la lo bawkin thah a lo tum leh a, amah vanga ka chân tawh zawng zawng ka ngaihtuaha ka lung a awi thei der lo.






Doctor chuan a Jection hnu ah nau tih tlak pawizia leh naute nu taksa a nghawng ṭhalo awm thei te chu uar deuh takin a hrilh a, chutih laiin kei chu min lo melh leh zawk ṭhin a, ka thinrim lutuk chu ka lo inhumruh ngawr ngawr a ni ber.







In lama kan inphurh haw leh hnu chuan kan chhungte chuan thil awmzia min zawt sap sap a, Damdawiin kawta min zawh khan ka chhang mumal duhlo a, tunah erawh zep ṭit ṭet ka tum hauhlo.






Zothanpuii hmel chu enin thip zetin ka melh a "Nau tih tlakna damdawi alo ei pek anih kha" ka ti bung nghut a, midang ho chu an phul nghal hlut mai.






A Nu leh a U chuan an hau mawlh mawlh a, ṭhutthlengah ṭhuin ṭap pur chungin hnuailam a bih a.






Ka nu leh pa chuan engmah an sawi ve lo a, an lung a awi biklo tih chu an hmelah a lang thei. "Ka haw dawn ania, hetiang mihring rilru chhe lutuk hi neih ka tum lo, naute erawh a hrin veleh ah ka la ang" ka tih laichuan Thanpuii chuan ṭap ṭiau chungin min lo en a, chhuah mai tuma ka inher chu "Mapui i ti mah mah tawh ania" Muansangan a lo tih vang chuan ka ding leh dat a.






"Lalmuanpui" min vau aw ka zetin ka pa chuan a lo ti ve bawk a, hahthlak hlawm chuan!






"Muanpui nau tih tlak duh phah hial khawpa a rilru siam sak tu chu nangmah i ni, inthlahrunna chhe te pawh i nei hauh nange?" thip fahrana min rawn en chunga Muansanga nuin a tih chuan thawk kan la hluai a, keimah min puh leh ta vek mai.







"Naute chu kan enkawl dawn thu kei leh ka chhungten kan sawi cham chi ani lawm ni, inlo buai ve angai hauh hleinem" ka tih leh chuan Thanpuii chu a lo ṭap chhuak hak a. A nuin a lo ngaihsak vata ala ṭap ring sauh zui mai lehnghal a.







"Naute hi thi daih mai rawh se, a lo pian ve chuan mi zawng zawngin min nuihzat ang, pa neilo a apian aichuan piang ve lo law law mai rawh se" a nu awma hmaiphum sauh sauh chunga a tih chuan ka sa leh phat tawh. "Tunah khan mi nuihzat pawi i ti amaw? Mi zawng zawngin min nuihzat mek zawk chu anih hi" ring fe mai hian ka lo ti a, za lo zeta ka nui deuh hak chu Muansangan min lo tei theilo hle.






"Duhtawk teh aw, ka en liam rei ve ta bawk che a nia, i khawloh vanga buai kan nih hi" Muansangan a lo tih chuan keipawh ka insum theilo lam mah a ni.







"Hrep che hian a...i farnu hi.." ka sawizo hmanlo "F.Lalmuanpui" ka piah a mi chuan a rawn ti chang leh fak a. "Ṭawng tawhlo khan lo va haw rawh" ka pa bawkin alo tih leh chuan ka hnial lo nasa. Haw chu ka tum mek reng a ni, ka awm rei chuan heng ho hian min ti â zo takngial dawn.






"Inneih chu lo ṭhulh fel ang che u" ka chhuah hma chuan ka ti leh ta hram a.







"Zawnga lo ding teh" tih paha Muansanga lo che zui chu inherin ka lo hmachhawn ve nghala, ka awm a rawn nam rualin a hrawkah ka lo rek bet chawt a, tha ah min hneh heklo bangah chuan ka nam bet ran a mahse, a reilo ka pa chuan min phih sawn dawrh a ni ber.







"Fapa laktlakloh, i thilsual tih vanga heti kan nih laia luhlul in chhuah chu le, haw vang vang rawh" pawn lama min nam chhuah dawt dawt paha ka pan a tih chuan inhumruh ṭeuh chungin ka pen chhuak a, ka lem ve sek bawk nen insum theihna ka tlachham viau a ni.







Ka pan Bike a ken tho a vangin Taxi chuan ka inkhalh haw nal nal a, in ka thlen hnu pawn ka la thinrim urh reng mai, a naupai vanga kan inneih tur zawng zawng kan ṭhulh laia tun ataka tihtlak a lo tum leh chu ka hriatthiam zawng a ni hauhlo, naute nu chu duhlo viau mahila ka fa thih kher chu ka remtilo a ni.






Zan dang ang bawkin Mki biak ka tum leh a, kan inhmuhloh na chin chu thla thum lai aliam tawh, ka ngai a, a lakah ka inthiamlo a, ngaihdam dil nawn leh te pawh ka duh, ka ruih lungpuam chang phei chuan ka ngaizual ṭhin, ka tih dikloh zia ka hre chiang telh telh a, mahni inthiamloh na hlirin ka khata, chu zawng zawng aia hrehawm chu tihtheih nei miahloa ka awm chu a ni.






Zinga ka tho chu ka lu a rit luk a, mut dawna ka lem belh leh hlek vang kha a ni ngei ang, sana ka en chuan dar 8 a lo pel fel der tawh a, ka chhungten chaw ei an lo siam mek bawk.






"Chaw eiloin ka kal dawn ania, min siam kep suh u" hmaiphih thuak thuak paha ka tih chuan "Nizan chung chang kha kan sawi angai a nia" ka pan a lo ti khauh a.






"Enge?" ka ti thawr a, a aw ah sawizui ka chakloh zia an hrethiam chuan ka ring.






"Thanpuii saw a khawngaihthlak lulai emai, nau tihtlakna a eichhan pawh nangmah vang ania, inneih i duh bawk silo a a rilru mangang tihngaihna hrelo anih hmel kha" ka nu chuan a ti dap dap a. Chu zawng ka ringlo, kei min puh mai mai a ni, a chhan chu ka va thlen khan engmah ka sawi hman reng renglo.






"A chhuanlam a nih mai mai chu" ka lo ti hul hak a.






"Sawi buai buai a ngailo, a Pa Tluanga ko la, zaninah man hlanin kan kal ang" ka pan a lo ti leh mauh mai. "Engtin a, teuh lo lutuk, ka nei dawn reng renglo" ka lo tih chuan "Min hnial hauh suh" a lo ti bak leh hluk a.





"Mipa i nih ve ngai chuan i thil tihsualah mawhphurhna i la ngam tur a ni, Thanpuii leh naute chhawm dawl chu i tih turah ngai hmiah mai rawh" chaw bar paha a tih bul bul lai chuan inherin ring lutukin Room kawngkhar chu ka khar zui a.





Nilengin ka Service a , rilru a tawt urh reng mai si a ka Passenger te tan pawh ka lo nelawm loh lek lek ṭhin. Ruata leh Zo a ten thil awmzia min zawh chuan ka hrilh ve mai a, ka beiseiloh deuhin Zothanpuii nei tur chuan min lo ti leuh mai a, vui ka tum rilruk tehlul nen min tidang der mai.






Haw mailoin zan thleng ka Service a, ka haw meuh chuan dar 9 a ri thuak tawh a, in ka luh ruala ka mi hmuh vang chuan ka ka hawihai der a, Zothanpuii chu anlo va hruai tak tak chu niin. Hrep taka!





"Mapui hetah lo ṭhu teh" Pa Tluangan a lo tih chuan thinrim vangin ka inhumruh nghal ngar a, "Lo kal teh" zangkhai zeta a lo tih leh takah chuan ṭhutthlenga Thanpuii leh ka nu ṭhudun lam chu melh ngur chungin ka pan a.





Pindan aṭanga ka pa lochhuak nen kan intawk chiang hle bawk "I va haw har ve" tih zawngin min bia a. "In ti mah mah a nia aw" ka tih chuan a ngaih pawimawhloh hmel kher mai.






"Mapui, rilru tihsak tlat tur a ni ngailo e, karah naupang an awm tawh a, i tum hmasak a tlawlh ta bawk si a, châng dang kan thei pawh i nih tawhloh hi, tunah phei chuan naute nu a hriselloa naute pawh chân maithei dinhmunah in ding a, inngaihtuah fim la naute vang chauh tal pawhin chhungkua a insiam mai hi a ṭha ania" Pa Tluangan a tih charh charh laichuan "Duhlo eng ang mahse, man kan hlan tawh a lawm" ka nu in a lo ti hlar a.




"Ka duh hauhlo che tih i hre chung hian ka nupui nih chu i duh takzet amaw?" Thanpuii mitah tak enchung chuan ka han ti a, thinrima sawi ka nilo.





"Naute vang chauhin" a lo tih chuan a hmel chu ka en vang vang a, ni e naute vang chauh a ni ang, a bak a awmlo.





"Hmeichhe dang ka hmangaih tih i hria em?" a fala kan awm hnu chuan ka ti leh ta hram a. "Ka hria a pawi ka tilo" a lo ti leh zel a, tih ngaihna dang ka hre tawhlo chu a ni ber e.





Thanpuii nena inneih, tum lawk leh beisei hauhloin chu chu a thleng a ni. Man an hlana an rawn hruai haw mauh mai si a, lungawiloh hle mai bak chu tih theih ka nei ta lo, Mki laka beiseina chhe te ka la neih pawh beisei ngam tur ka awm tawhlo a, a chhan chu nupui pawmlai nei a nupuiin a fa a paisak mek ka ni tawh.






Rilru erawh a na a ni, nep ka in ti bawk, tumah hethilah hian dem thei ka nilo, keimah chiah a ni, ka tihsual rah ka tel a, kei chauh niloin ka chhungkua mai bakah Mki te chhungkua thlengin.





Inpawhloh na na na chuan nupa nun pawh kan hmang ngailo, a hmingin nupa mai kan ni, rilruah hmeichhe dang an awm tlat mai si a.





Thla 5 zet a vei hnuah Fapa Lalnunsanga kan nei a, mipa naupang hrisel lo tak a ni a, dimdawi angai em em reng bawk, Sawrkar Office lianvak lo ah Assistant Secretry hna ka hmu a, ka Taxi erawh kan ṭhenawm tlangval thingtlang aṭanga lo awm ve chu ka khalh tira, chhungkaw harsa tak zawng kan nilo a khawsak pangngai ve tawk tak kan ni.





Thanpuii nen chuan nupa inpawh tak kan nilo a, duhna rilru keimah ah a la awm hleithei meuhlo, chu chu amah pawn a hrechiang a min ṭih phah riau mai bawk a chu chuan kan pahnih inkar chu a ti hla lehzual a, kan inchhungkhur boruak pawh a zawi ruih reng mai, kan fapa Nsa chauh chu kan inkar min suihzawmtu awmchhun a ni deuh mai awm e.





Pasal ka nihna anga ka mawhphurhna zawng zawng hlen veklo mahila, nupui te ti rethei lutuk chi mipa chu ka nilo, ka be chhe ngai heklo a a bikin kan fapa hmuh ah, ei in leh silhfen thlengin ṭha tak chuan ka enkawl ve in ka hria. Nupa inhmangaih tak te inpawh taka an khawsak dun ang kha kan nupa ah chuan a awm velo mai chauh a ni.






Mki erawh a reh ta vawng vawng mai, Christmas ah apa hruaiin an lo haw zawka nithum chauh chamin a u mipa leh apa nen Delhi ah an chhuk leh tih chu a chanchin ka hriat chhun a ni, a lo haw anih chuan nupui ka nei tih te pawh a hre ve tawh ngei anga, chumai niloin fapa kan nei tawh tih te pawh.






Ka ngai ṭhin ani zep loah chuan, ka hmeichhe hmangaih ber leh ka hmangaih awmchhun a ni a, kan inkawp laikhan inṭhen zawk zawk nei ve ṭhin mahila chang dang kan loin kan inrem leh thei mai ṭhin a, kum 8 tal tawp a kiangah hun ka hmang a, tunah hetiang dinhmuna kan din tak hnu pawh hian zan khat pawh amah ngaihtuahlo a mutmu tuah hi ka nei ngai meuhlo, ka duh ve hluah hluah em a sin.





Office kan kal a, ṭhiante nena nunhlui kan sawi chhuah leh ngaihzawng hlui chanchin te kan sawi ho chang te hian Mki bak ngaihtuah chhuah tur ka nei ve ngai miahlo hi hrehawm ka ti ṭhin, tleirawl chhuah aṭanga inkawp chawt kan ni a, amah chiah chu ka ngaihtuah chhuah theih chhun a ni, chuvang tak chuan hrehawm ka ti zual ṭhin.





Unicky hnenah thu min lo chah a "Mapuia chu ka dem miahlo tih min lo hrilhsak rawh, a tihsualah mawhphurhna a la ngama, an innei kha ka lawmpuii lutuk tih pawh i lo hrilh dawn nia" tiin.





"A ngai thei ngawt ang che, a rilru pawh anat ka ring mahse, nangni chu khuanu samsuih inni lo aniang, kum 8 in nghah hnuah pawh in innei theilo a, chumai niloin inneih ni hnai tawh lutuk engkim tihfel tawh hnuah hetiang boruak hi intawnga, khuanu samsuih inni lo tih hi ring ve tawp ula, a tu ve ve pawn dam deuha pawm thiam tum mai rawh u" Unicky- in a tih chuan ka nui mai a, vawi tam tak dam deuha pawm chu ka lo tum tawh ṭhin a mahse, ka hlawhtling ngai lo.





(CHHUNZAWM LEH TUR)

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » November 29th, 2020, 3:34 pm

SAWININ LOH MK - BY Ahmangaihi violette khiangte


CHAPTER - 5




Zu in zeuh zeuh chu ka ching chho ta zela, a tirah chuan engemaw chang chang chauha in ṭhin kha tlaitin deuh thaw ka in ve ta, rui chhe tak zawng ka ni ngailo mahse, inthup vek sen ni heklo le chhungten min khak ta fo a, kei lahin sim tang nge ka ti bik lo, ka inhnem ve na ber a ni rih tlat.





Tlai khat ka Office bang chu hmanhmawh takin Zo-a a lo lut a, "Lo kal lawk teh" tiin pawn lamah chuan min ko chhuak a. "Mki pa boral thu kha i hria em?" tiin min zawt a, "Hre teh nang, engtik khan nge?" ka lo ti nghal thuai a.






"Tukin zinglam khan ania an lo hawpui nghal ang, zanin chu kan han tlaivar ve dawn em ni?"a ti leh thuai a, anmahni kher nilo mahse veng khat In inhlat lo taka awm kan ni a, kan kal ve ngei chu a ngai hrim hrima, Mki chu ka ngaihtuah khawp mai, apa nen khan pafa inngai tak an ni a, a tuar viauin ka ring.






Chaw eikhamah ka nu leh ka pa chu an kala, rei awmloin an lo haw leh thuai a, Zo a leh Ruata nen kan inzui chhuak ve thunga kan han thlen chhoh chuan ruang chu Lengpui a ṭangin an lo phur haw mek a, ka rilru a phili ruai ringawt a, ka ṭhu hle hle thei meuh lo.






Dar 10 dawnah an lo thlenga, inchhung chu nutling ṭap rawng rawng riin a luah khat a, midang kar aṭanga Mki hmel ka va hmu chu ka na vawng vawng a ni. A pa ruang kil chuan a ṭhu ngui lap a, a ṭah nasat vanga a mit bui lak te chu hmuh a hrehawm kher mai.






A hmel chu ka en a, ka en nawn leh ṭhin, hnem theih ka chak takzeta a, kuah vawng vawng pawh ka chak, chu erawh ka tih ve theihloh tawp tur a ni thung. Ka en reng laichuan nu pakhat nen inbia in inchung room lamah an inzui chho a, a lo chhuk leh ta mailo a a chawl hahdam ve rih a nih ka ring, a hmel hmuh tur awm ta lo erawh ka ruak huai a, ka ngaihtuahna a luah zui ta reng bawk.






Khawvar rualin ka ṭhiante chuan haw an rawt a, In ka thlen hnuah ka chhing sek a, Zo-a thlan laiturin minlo kaitho leh a, hna pawh ka kal ta lo, ka nawmloh chhuanlamin thlanlai tur chuan ka kal ve ta zawk a, vengchhung mihlun ṭhen leh rual ngah tak an ni bawka ruang thlah tura lo kal pawh an ṭhahnem ngang mai.






Mipui zingah Mki hmel ka zawn lai mek chuan ka ṭhianpa chuan min lo nghawk zauh a "Saw ta saw" tih paha kan thlan laih khur chhak lam a melh chuan ka en ve nghal thuai a, a hmel ka hmuh a piang hian ka thaw hi a ipik tet tet mai ṭhin, ka enlai tak chuan a U bana vuan chungin a ṭap rawih rawih a, ral aṭang ringawt pawhin a ṭap lai hmel hmuh chu a hrehawm a ni.






Ṭawngṭailai te chuan ka mit ka chhing phallo, a hmel chu ka en ngawih ngawih mai, ka duat em em ṭhin ka hmangaih Mki kha a nuna harsatna a tawh lai leh thinlung rum vawng vawng khawpa natna a tawhlai pawhin hnemna thu kamkhat pawh ka chhakchhuak lo a, a rilru ka lo hliam tawhna ka ngaihtuah leh lek phei chuan mahni inthiamlohna hlirin ka khat a ni, inthiamloh na chuan khawvela mipa nep ber ni hialin min inhriattir bawk.






"Mki pa chu ka ui reuh hle mai, an chhungkua ah chuan ka nel ve ber a sin mawle" in thlen hnuah Zo-a chuan a ti niah niah a, ka roomah lutin zu kan in duna, "Nang hi ila duh reng a ni tiraw?" a tih leh chuan ka nuisuk a, zep rual a nilo.





"Zanin kan kal dawn em?" a ti zui zat a. "Kal dawn e, a tawp zan thleng kan kal ang chu" ka lo ti var a, a hmel ral khat aṭanga hmuh ringawt pawh ka thlahlel miau si a lawm.





Zanah chuan kan kal leh ta ngei a, kan tlai deuh avangin kawngka bulah kan ṭhu a, thlanglam bangkil bula Mki leh a ṭhiante ṭhu chu chiangtakin kan ṭhutna aṭang chuan anlang thei a, ka en deuh reng a ni ber mai. "I en nasa lutuk, kan ṭhutna a lansarh em hi" ka bengbula ka ṭhianpa in a lo tih takah chuan ka hawisawn thuai a, pawn lam ka hawi zet a, en tawh loh turin ka insum viau bawk. Mahse, chuti chung chuan ka lo melh leh palh ṭhin.






Zai chawlh lai chuan khawhar chhungte lam aṭangin thusawina an rawn nei a, chutih laimeka thlanglam ka va hawi chu ani pawh alo hawi ve chiah a, kan mit intawng chiang ngang mai.






Mit la sawn miahloin min en reng a, a mitmeng dul riai a lungngaihna chu ka hmuhhmaihlo, kum 8 zet kan inzuia ka hrechiang ve a lawm tunah sawn ṭah a chak lutuk tih pawh ka hria, ka ngaih ang hian min ngai ve maithei bawk a ni chu erawh ka chiang ngamlo, min en vawng vawng a chumi hnuah tawi tein min seih a, a nui hmel chuan hrehawmna tam tak min pek belh a ni.





Kha a nui hmel tawi te khan ka muthmun thlengin min chen chilha, ka manglam thlengin ka hmu zui bawk, Hna ka kalna ah pawh amah lo chu thildang ka ngaihtuah hleithei meuhlo.





A tuk zanah chuan kan kal hma hle a, ṭhalai zingah chuan amah emaw a ṭhiante hmel ka hmu hauhlo, ka mitmeiin ka zawng ru a, Sitting room kawngkhar bul ṭhutthlenga a U leh a nu ṭhu chu an vua leh vang ka hmuh chhun a ni. Rei vaklo hnuah Unicky leh nula pahnih an lo inzuilut a, Mki u chuan a lo be nghal thuai a, chumi hnuah inchung lamah an inzui chho a, Mki pawh a awm ngeiin ka ring.





Hun hman chhung zawnga a hmel hmuhtur awm ta lo chuan minti hnual rawih mai, ka awmdan hi nupui fanau nei tawh tan chuan ṭhalo leh zahthlak tak a ni, Pathian ngaihah chuan uire ka ni der tih pawh ka hre ve kar a inthunun erawh a har ṭalh thung si.





Rilru helhkham nei ṭeuh chungin kar ka hmang liam a, Mki chanchin ka hriat leh hmasak ber chu College a ahna kha a bansana Delhi ah a U kianga awm turin a kal leh dawn tih a ni, chu thu ka hriat rual chuan ka chi ai kher a sin, hmuh ka chaka a hnena sawi tur phei chu ka hria a zeng pawh a nilo, hmuh chu ka chak et et a ni ringawt mai, a kal hmain vawi khat chauh chu hmuh ngei ngei ka tum bawk.





Unicky hnenah kan inhmuh theih dantur min ruahman pui turin ka ngen ta tawp maia, a lo duh i khaw lo leh nghal a "Mapui inhmuh leh hi aṭha tawhlo, i tan pawh, ama tan pawh in inhlat hi a ṭha zawk, sawi sep kai pawh a hlauhawm" a lo ti a, a sawi chu a dik teh meuh mai, mahse, ngaihzawng hlui ang niloin ṭhian ang tal pawha hmuh chu ka la duh ta fan a, Zo an min lo sawi pui ve bawk nen Unicky pawn min hnial zui ta biklo.






Zirtawp zana Unicky te ina kan kal chuan a nu leh pa an lo awmlo a, anau in room ah lehkha a zir a, kan luh rualin "Ka room ah lo va lut rawh a lo thleng ṭep ang" a lo ti nghal thuai a, "I hrilh lawk em?" Zo an a lo tih chuan "Hrilh lawk a chi hleihnem, a lo kal duh nang" a lo ti mai a, a pawi ka tilo min hmuh a lo duhlo thei a, hre lawk lo sela alo kal duh phah zawk ngei ang chu.





Rooma ka luhphei hnu chuan Unicky chuan min lo zuilut thuai a, "Mapui Mki hi a dam vaklo a, apa thi hi a tuar ve deuh aniang a rilru ti chiai miah suh, a hrim hrimin nupui i nei tawha hetia a ruk a rala inhmuh te hi angai miahlo mawle, inti ṭal sia ka pui hram che u anih hi, inngaihzawn thar leh te kha ngaihtuah miah suh, thil ṭhalo lutuk a nia aw" min vau awka zet hian a ti mawlh mawlh a, "Chutiang ka ngaihtuahlo, reilo te biak ka duh mai alawm" ka lo ti ve thung a.





"Chutiang te chu Phone ah pawh sawi ve mai tur ania, inhmuh kher kher.." a tih lai mekin ka lo pawt chat a, "Inhmuh kan ngai alawm, phone a sawi vek theihloh thil te a awm ve a" lawmlo zeta ka lo tih chuan a ngawi ta dak a.





"Chupawh ni reng reng se, inkawp ṭhat leh kha chu ngaihtuah miah suh, a duh ropui che sia a rilru te kha ilo tibuai vaih ange, nang chu mipa i nia, i mualpho ve tak tak dawnlo, tuna in inhmuh pawh hi midangin hria sela Mki mualphona tur ani dawn a, amah ngaihtuah chungin rilru fim hmang hram hram ang che" a tih leh zet hnuah a chhuak zuia, a thilsawi chu ka tum dan a ni hauhlo na chu ngaihtuah a tithui viau a ni.





Ka Phone biha ka ṭhut laimek chuan Sitting room lamah Zo-a leh Unicky chu an ti ti dun barh barha, rei pawh chutiang chuan ka ṭhu hmanlo kawngkhar kik ri a arawn awm a, Unicky'n a lo chhawn ri pawh a hre zui zat a, Mki a ni ngei ang.





Ka ṭhutna a ṭanga tho chhuakin chhuatah chuan ka ding ta ran a, a chhan ka hrethiam lo thinphu a rang dup dup mai. Zawi tea ṭawng sap sap ri ka hriat leh hnuah pindan kawngkhar chu a rawn innem hawng riai riai a, Mki hmel a rawn lang nghal zat bawk.





"Mapui, nangmah i nih ka ring renga" min nuihsak chungin a ti a, a landan chu ka lo enchik ngang mai. "I sam i tan elaw?" tih zawng ka sawi a, samtawi pu chungin ka la hmu ngai hauhlo. Samsei ka ngainat avangin kan inkawp laikhan tan ka phal ngailo a, a sam bu ṭha tak seisiau mai kha inhmeh ka ti em em ṭhin.





"Umm..tan a" laih hmel taka a sam zut thuak pahin a ti a, inhmeh ka tih em em ṭhin a samsei mawitak tello pawhin a la hmelṭha reng tho mai. "I inhmeh lutuk" ka lo tih chuan min en phawk deuh a, keipawn ka tumloh deuhin ka sawichhuak a ni. Mahse, a hmel landan chu a thlak leh thuai a, "Min biak duhna i nei a mi?" tiin min zawt ta zawk a.





"Nia, lo ṭhu la" khum bula ṭhutthleng kawh hmuh pah chuan ka han ti a, sawi hmasak ber tur pawh ka hrelo, kan boruak chu a rit churh maiin ka hria.





A ṭhutfel hnuah min rawn en a, nelawm takin min rawn seih leh chuan keimahah nghawng a nei nasa ngang mai bawk a, thawh lawka kuah vawng vawng ka van chak kher em.





"I hna i bang tih ka lo hria a" aw thian kharh chunga ka tih chuan a bu nghat a.




"Umm.. bang ta mai, thawk nghet kan la ni chuanglo a, ka pa damloh vangin ka chawl rei bawk si a, Delhi ah ka awm tawh ang" a ti a. "I va ngaihawm dawn ve" ka lo tih chuan min en vang vang a, chumi hnuah "Nang pawh" a lo ti ve sap a.





"Ih.....Mk...." thawk ka la halh chu a mitmeng mawi em em mai chuan min en reng a, ka talbuai chhia va a ni.





"Ka ngai ṭhin ngawt mai che" ka ti leh tawl mai, engtiangin nge a lo ngaih ang phei chu ka hrelo.





"Ka hria a lawm" a lo tih chuan ka beiseiloh deuhin min lo chhang a. "I hria maw?" ka ti leh kher a, "Umm...keipawn ka ngai ṭhin che" awlsam zetin a ti a, a mittui hnam chu ka hmu chiang hle bawk.





"Min ngaidam rawh aw" ka tih chuan a bu nghat nghat a "Ka ngaidam vek tawh che" aw tham chhelin a ti a, ka lung a ti chhe dawn dawn mai. Min haw zawk sela ka na zuallo zawk maithei, tuna a awmdan hian min ti na zual zawk tlat chu mak ka ti.





"Min haw miahlo em ni a?" ka tih rualin a lo nui var var a, "Mapui ka haw reng reng lo che, lo kal la reilo te ka lo kuah lawk ang che" tiin a ban a lo phar a, sawi leh chuan tur pawh ka hre tawhlo.





Ka chet hmain min lo pan a, ka ṭhutna a ṭanga ka lo dingchhuak chu ka awmah beiin min kuah vawng vawng a, "Engmah inthiamlo tawh suh, nangmah i inti hrehawm mai mai anih kha, keipawh ka ṭhat hi ka ngaihtuahawm miah hleinem, chuvangin maw i nupui tan leh i chhungkaw tan Pa ṭha tak nih tum tawh zawk rawh" zawi tea ka hnunga beng thak thak chung chuan a ti a, keiin ka lo kuah nghet sauh thung.





"Heng thil zawng zawng thlen hnu pawh hian ka la hmangaih reng che, ka ngaihtuah chhuak reng ṭhin che a, ka inchhir nitin a ni" thawk la hawk chungin ka ti leh a, mittui a hnai ruai mai.





"Ka hria a lawm, chutiang chuan i awm dawn tih ka hria a lawm mahse maw kan pahnih a kan awmdun vang hian engthil ṭha mah a chhuak tawh dawnlo, ka chhungte leh i chhungte tan pawh chuvangin hmalam pan tum ang aw" a ti leh sap sap a.






"Min la hmangaih ve reng em?" ka zawhna chu atthlak ka ti lutuk mahse ka zawt zo vek tawh, "Chutiang min zawt suh, a ṭangkai tawhlo" tiin min chhang a, ka kuahna aṭang chuan a inla hrang zui thuai bawk a, "Kan inhmuh leh hunah chuan hetiang lo deuh hian inhmuh kan tum tawh dawnnia" tawi tea nui chungin hnuailam a bih a, a mittui a luang a ni.






"Ka lo be thei che angem?" ka tih leh chuan min en chungin a lu a thing a, "Ih maw...Mapui, i nupui saw hmangaih tum rawh, i tum ngai miahlo tih ka hre thei mai, hetiang hian min hmuh emaw min biak tum tawhlo la, keichuan ka awmbo san daih dawn che a, hriat pawh ka rawn hre reng lo ang che, chuvangin ka tan i rilru seng duh tawh miah suh, chhungkaw duhawm tak i nei tawh a, an tan chauh i rilru seng tawh rawh, ka lakah inthiamlohna tur engmah a awmlo, keichuan ka demlo che tih i hriat tawh kha" ka mitah min en chunga a tih chuan a hmel chu ka en vawng vawng a, min ti ngawng chhulh maiin ka hria.






"Ka haw tawh mai ang" tiin a kut ka vawnna chu a thlah ta riai riai a. A chhuahnu chuan a reh vung vung a, chawmawlh zetin khumah chuan ka ṭhu a, kan awmdan hi hriatthiam a harsa a ni, min la duh ve reng tih ka hrechiang a, a awmdanah khan a hriat vek a ni, nupui ṭhen turin min ti sela chuan i he loin ka aw duh maiin ka ring a mahse, chutiang chuan a ti silo.






Kei pawn a tana ṭha tur ka ngaihtuah lo theilo a, a tan chuan kei hi ka ṭha tawk hlawl silo a, tunah leh lek phei chuan zahna leh mualphona bak pek theih ka nei lo. Chuvangin engmah sawi ve tur ka neilo a, hlat mai chu atan ka tih theih ṭhat ber a ni.





Min ngaihdam thu a sawi a, min demloh thu nen. Eng rilru puin nge khang thu te kha a sawi ang? Mahse, khang thu a sawi te vang khan ka awm a tih nawm phah huai thung a, engthil emaw min delh rit churh reng ṭhin tu kha lakkian ang huai a ni thung.





Ni hnih hnuah Mki chu Delhi ah akal a, kha mi zan bak kha a hmel ka hmu zui leh tawhlo, kan inbe ngailo a a chanchin pawh ka hre zui ta lo a ni.





Kan nun chu tluangtlam takin a kal chho a, nitin hna a kal, inlamah ka nupui leh fapa te nen zawi zawiin keipawh ka dam in ka hria, ngaihtuah chhuah chang chu a awm ṭhin ngei mai.





Thanpuii lakah pawh ka rilru ka pe a, nupa ni reng chunga hetiang ngawta awm chu ṭha ka ti biklo, amah a ngawi theiin a dawh thei em a, ka khawih duhlo chung pawhin kan nupa kar chu lungawi takin a pawm mai a, hmeichhe dang chu ni sela an in lamah an kir leh tawh ngei ang.





Ka ngaihsak tak hnuah chuan inchhung khur boruak pawh hmuh theihin a dang a, chhungkaw a nawm chuang engkim a lo nuam tih te pawh ka hriat phah a, chhungkaw hlim na chu thil ropui tak alo ni lo, tlem te a kan lo inngaihsak chauh pawh chu a lo tawk em em.






Kum hnih zet a liam hnuah Mki nen chuan kan intawng lehta hlawl a, a lo haw tih takngial pawh ka hrelo, Damdawiin kawtah khan reilo te kan in en a, mawi takin min seih bawk. Khatah chiah khan ka theihngilh ta emaw ka tih kha a rawn thar leh ta kuar kuar a ni.







(Lo comment ve ula)

Link:
BBcode:
HTML:
Hide post links
Show post links

Local Advertisement

MOBILE SIAM ZIR DUH TAN!!!

Tech-Inn Mobile Repairing Traning Centre, Bazar bungkawn

Kum tin mi za chuang eizawnna kan siamsak a, Eizawnna tlaka thiam turin kan zirtir thin

Mizorama mobile siam zirna hmasa ber changtlung ber kan ni. Hrechiang duh tan Contact : 9612099411 / 9862016122


Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » November 29th, 2020, 3:34 pm

SAWININ LOH MK - by Ahmangaihi violette khiangte


CHAPTER - 6


Ka Office kal turin an In kawt ka kaltlang laihian ka hmu zauh ṭhin a, chutih lohah chuan Biakin ah ka hmu ṭhin, biak erawh kan inbe ta ngailo a, kan mit a intawn fuh changa tawitea kan inseih bak chu a tu a mah mah chuan kan inkar hmangaihna meisi keimahni a la cham bang ve ve chu chhem alh leh tumna kan nei tawhlo a ni.






Ka zep lo, duh chu ka la duh tehmeuh mai mahse, ka duhna aizawngin a hmakhua tur chu ka ngaipawimawh ta zawk a, chuvanga alak aṭanga inlahrang chhunzawm thei chauh pawh ka ni. Langsar takin kan lo inkawp tawh ṭhin a, miten kan inkara thilthleng tak tak hre siloa ngaihdan an neih ka duh lo a, ka lo tih mualpho tawhna zawng zawngte kha siamṭhat theih lah a ni tawh heklo, a tana ka tih theih ṭha ber chu mualphona dang siam belh sak tawhloh chu a ni mai.






Biak chu ka chak ṭhin a lawm 'I dam maw?' han tih te pawh ka chak ṭhin, a cherin a dawl dang hle a inenkawl ṭha tur a tih te pawh ka duh. Mahse, chutiang takngial pawh zawt theilo tura phuar beh chu niin ka inhre tlat bawk si.






Kohhran ṭhalai pawlah kan inhmang ho a, mipa dang nena an kal dun leh an ṭhu dun ka hmuh ringawt pawhin ka chhungril lam hi a hreawm hluah hluah ṭhin, tun hma kha chuan ṭhalai thiltih ah pawh kei leh a ṭhiante nen chuan kan inzui chawt ṭhin a, amah lah hmeichhe fel em em mai tu pa te pawhin mo atana an it ngawih ngawih tur chi hmeichhia a ni a, hetiang kan nih tak hnu hian tlangval tam takin kawm an tum tih lah ka hre ve bawk.






Hmeichhe fel leh hawihhawm, ṭhenrual kawm thiam tak a ni a, ngaina tu pawh angah a lawm, midang zinga a nui hmel hmuh chu hrehawm tih chang ka nei ta fo a, lungngai sela hrehawm ka han tih nasat leh dawn tehlul nen ka awmdan chu ka inhrethiam hauhlo. Kohhrana inhman ve tawhloh mai tur em ni ka tih chang lah a tam, ka hmuh ngun poh leh keimah ah chuan danglamna a nasa telh telh a, a mi phuarna a pelh tawh a ka dam tawh emaw ka tih kha ka lo la damlo chhia va a ni.





Ka rilru a uire na lo lang leh ṭhin chu paihbo tumin ka nupui lamah rilru ka pe a, awmzia tak tak phei chu a neilo, kan chengdun rei ve viau tawh nain Thanpuii nen hi chuan kan mizia a inpersan lulai lutuka kan titi takngial pawh a rual thei ṭhin lo, hmeichhe harhvang leh luruh ring chi a ni a keilah a ngurchuai chi ka ni, inkawm ngeihloh chuan lungrual taka titi dun pawh a har a, inbe manglo a ni hman liam tak mai mai lah kan ngah.






Ka theihtawp chu kan nupa inkar siamṭhat tumin ka beive chuan ka hria, ṭhiante nena chawei khawm leh chuahvah neuh neuh angah a, kamkhat pawhin ka hau ngailo, Office aṭanga ka hawin a awm ngailo fo a, kan fapa lah ka nu kutah a tla chawt a, ka nu ala ṭhalaia tu te duatthiam tak anih vangin chu chu ngaihmawh ah ka la ngailo a, hetianga Thanpuii ka han ngaihsak tak hnu hian ka duhkhawp lohna chu a letin a pung ta zawk ni berin ka hria.






Engdang a nilo amah ah chuan ka beisei ang ka hmulo a ni, kei ka inthlak danglam anih chuan aṭha vek nimai turah ka lo ngaia mahse, alo nilo.






Ka hriat chhuah tak chu mihringin beiseina ka ngah lutuka kan beisei anga kan mi beisei te an lo awmloh leh siloh hian ka na ṭhin tih hi, kan nupa inkarah chuan keimah chiah niloin kan pahniha kan beihdun angai tih pawh ka hrechiang ta.






Amah chu bia in ka sawipuia, ka duat loh thu leh mihrang ang maia ka en ni a a inhriat thu sawiin min an khum hrep mai a, sawi ve tur reng ka hrelo, kan boruak siamṭhat tum khan ka ti punlun zawk ringawt a ni.






Chuta chin chu ka ngaihsak leh zuala, thawmhnaw leh a mamawh eng ilo pek lamah te ka ṭuan a, chu erawh rei ka tlin lo, zan rei tak tak thleng phone khawihin a menga, kan mut hun a inruallo a kan thawhhun lah chuti bawk, a awmdan chuan ka mit a ti kham em a ka dawh theihna in a tlin seng ta reng biklo.






Ka hau chu ala na ngang mai, Mki nena inhmu ru ṭhin a, inkawp ru leh ah min puh ta lel zawk a, chuvanga amah pawh ngaitheilo chhuahin min chhuah bawk, kei chu ka ngawi a ṭawng duah hi ka thiamlo ka tawrh theihloh china kut thawh mai chi ka nih a vangin ka insum hram hram a ni.





Sunday tuk a ni a, chumi ni chuan inkhawmloin a nu te inlamah Nsa hruaiin a kal a, tlaiah chaw an eidawn thu chu ka nu Phone call hmangin a lo hrilh a, ka laka a lungawiloh vang tih lah ka hailo.






Zanah chuan ka nu chuan Mki nena kan inkar chu min zawt ta reng a, diktakin ka chhanga engmah kan inkarah a awm tawhlo a Thanpuii laka rilru pek tuma ka beih thu te pawh ka hrilh a, sawi ngaihna a hre bik vaklo, "Puii chu keiman ka lo bia ange, nangpawh i diklo a ani pawh a dik biklo a, a tir aṭangin i ngaihsaklo a i lakah lawmlo pawh nise a âwm lutuk i ngaihthah ve lulai em bawk a ni" tiin keimah chu min mawhchhiat a, ka hnial zuilo a sawidik chiah, ka ngaihthah ngei alawm chu chu siamṭhat ka tum mek reng bawk a ni.





Chuta ṭang chuan a awmdan apiang dawhthei taka enliam ka tum leh a, tunhma khan a khawsak dan ka lo ngaihsak ngai lemlo a, ka han chik ta chu ka duhloh dan hlirin a lo khawsa tih ka hre ve chiah a, zan a mengreia zing a tho tlaia ka nu eirawng bawl a pui ngai meuhlo, inchei leh lenchhuah chu a hna deuh ber a ni.





"Thanpuii hi anu te inlamah a kal ngun mah mah a ni" ti a ka nu bula ka sawi chuan "A pawilo ala naupang ve em a chhungte ala thlahlel ve anih kha, Bawiha a hruai tel tho a amah chiahin a kal chuang hleinem" alo ti awlsam mai a.





Ka la duhtawk mailo "In chhungkhurah hian a pui tlem mah mah bawk che" ka ti leh a "A...zeploah chuan ania lawm mahse, in nupa kar vang hian ka hau duh ngailo a, nanglah in i ngaihthah nasa mai si a, keiin ka lo tih ve zel chuan a dik dawnin ka hrelo alawm, ala naupang ve bawk si a hau pung pung lo khan zawldawh takin be zawk rawh, a laka i ṭhat tlat chuan a rilru i hneh thei lutuk ang, tuman kan chunga ṭha tlat te chu kan haw reng thei hleinem" a lo ti dap dap a.





Keipawh hi ka diklo niin ka hria, a tlinlohna ngawt ka zawng te pawh a ni mahna.





Mut hmunah chuan zaidam zawkin ka be leh a "Inah i awm tlem riau a nia, ka nu hi ruhlam insawisel neuh neuh a neia, inchhungkhur chet hi chu awl tawh rawh, a phar buai lutuk emai, chuloah Bawiha pawh tlang hrileng a kaihma a chhuahvah pui sek chi anih loh hi" aw ki dam thei ang ber leh ngaihhuat theihloh tur ni a ka hriat dan ber chuan ka han ti a, a phone khawih lai daha tum bar chungin min en a.






"Ka nu ten Bawiha an ngai ve alawm, bakah mihrang inah kan leng kuallo a, kal kawnga kan thang chhung bak pawnah a awm hleinem" a lo ti hmak a, "Ina awm tam aṭha" ka lo ti leh hram chu min melh nghal ram a "Inah i awm ngai bik a mi, a hrim hrimin Muankimi lo haw leh aṭang hian min sawiselna tur ringawt i zawng a, enge i tum chu sawi tlang law law rawh, kohhran thiltiha in awmdan vel pawh ka ṭhiante ka aṭangin ka hre ve zel a nia" a ti leh hlak hlak a.






"He thil hi Mki chung chang a ni lo, kan nupa inkar zawk anih hi" chang fek fawka ka tih chuan "I rilru a Muankimi i vei chhung chu tum tum mahila engmah kan ni chuanglo ang" kei aia ring mah chuan a lo ti a, sawi tur ka hrelo min ti dang lel mai, sawidikloh lah anei hauh silo.





Ṭha tak pawh chuan kan sawidun thei ta chuanglo, kan in ṭha en lehta phawt mai chu a nia, ka nu erawh ka ngaihtuah ṭhin, mo te laka inla vung chi a nilo a, Thanpuiin nachang a hria anih ngawt loh chuan a phut buai dawn hauhlo tih ka hrechianga chutiang bawkin ka pa lah pa tihtam lo chi a ni bawk.


***


Sunday zan khat chu Inkhawm ban laiin ruah a sura, Biakin veranda ah chuan Zo -a nen dingin ruah han kan nghak a, nu leh nula ṭhenkhat te chu Biak inchhungah an ṭhu ṭhap a, Mki pawh an zingah chuan ka va hmu a, a sam seisiau mai thliin a chhem zawnga intheh kang lap lap ṭhin leh a nui hmel mawi tak chu mittla lo lekin ka lo thlir a, Zo-an min lo nghawklo sela chuan chutiang chuan ngun em emin ka lo thlek tih ka inhre kherlo ang.






Ruah a han tak deuh hnu chuan Zo-a chu afarnu Ropuiin nen nihliap inzawn in an haw a, keipawh kal mai tuma ka pen chu "Mapui" tih ri vang chuan ka ding leh dat a, tudang a nilo a hmel hmulo chung pawhin a aw a ṭang ringawt pawhin ka hailo.





"Ka lo zawn ve ang che chû" ka lam hawia nuisang chungin a ti a, thlem ka van ngailo nasa tehlul em, i he loin ka pan ruak a ni ber e.






Nihliap chu kan han inzawn dun ta a ka awmdan chu a mak ka ti, mikhual nula zahruk em em kalpui ang maiin a ni ka awm ni, kum 8 zet ka ngaihzawng a tawp em la thleng dun ngailo mahila ka lo chulnel ve hrep tawh amah Mki kha ani tih hre chung siin tinge mihrang ang maia ka ngaih tak tlat chu ka hrethiamlo, kan inkar a lo hla hle tawh a chuvang chu niber in ka hria.





Thui pawh kan kal hmain ruah chu a rawn baw leh hawk a, kan inkal hnaih loh chuan kan huh nasa mai dawn si a, in thlahrung rilru takin a darah chuan ka va kuah a, ka lama a rawn tawlh hnaih ve deuh vang chuan kei ka lo thaw huai a, "In Inkawt thleng ka thlah dawn che em ni?" a tih chuan a chak vaklo tih a aw ah a langa , kan In a lo kal chu a hreh tih ka hre thei mai.





Kan In lam kawng peng leh an Inpan na kawng peng i ṭhenna bulah chuan Primary school a awm a, chutah chuan ruahhan hun nghak mahila pawi ka tilo "Thlah chu ka ngailo ang, Schoolah khan ka peng lawk mai ang, a han har chuang lo ang" ka ti lo ti vat a, min hnial zui hranlo.





School kan thlen chuan ruah chu a sur tam zual a, min kalsan mai dawn emaw ka tih laiin hmel nur nangin min en a, "Ka thlah mai dawn che a mi, ngah ringawt chu i tang rei lutuk ange" a ti niah niah a, kei ka lo nui thung. "A sur nasa emai kan huh vek tho ang, va haw la va inti lum vat zawk rawh" nui lek leka ka tih chuan a inngaihtuah zui vang vang a.





"Hân deuh phawt rawh se, heti chuan ka huh vek tho ang" tiin ka bulah chuan a rawn ding a, a nuam ka ti, ka rilru chhungril hi a hlim veng veng a ni, zahthlak zawk chuan!






"I chhungte an damṭha maw?" ka tih chuan min en loin kawngpui lam chu a hawi vang vang a, a lu a bu nghat nghat a, ruah sur a bengchhen vangin a ṭawng ri chu ka hre chiang theilo.






Ṭawnglo in kan ding ngawi ta renga, ruah lah chu a sur tam telh telh maiin ka hria, reivakloah Current a thim hmuka khawpui riin kawl a rawn phe zawr zawr a, engtik laiin nge ka awma a rawn bei hman reng ka hrelo, khawpui a rik rual khan a rawn beithlawp niberin ka hria, thaw dep dep chungin min kuah bet ṭang a, ka lungphu rang lutuk chuan ka awmdan a ti danglam nasa ngang mai bawk.






"Hlau suh" tih pahin a hmel chu ka en a, a thim avangin ka hmu chiang theilo, enge maw a sawia chupawh chu ka hrechiang thei chuanglo. Ka kuah ve ta ringawt a, ani erawh inlakhran alo tum mek a mahse, ka kuah laklawh ve tlat tawh.






Kan taksa a han i deh rual chuan ka ngaihzia te ka thlakhlelh zia te pawh ka hrechhuak thar leh a ni.





Ka kuah nghet sauh a a ṭanglui ta bik lo, thim thamah chuan ka awm nghengin a bei hle hle a, kan lungphu chu a mumallo dun kher mai.






"A vawt i ti em" hnai angreng taka enchunga ka tih chuan a lo hawi chho ve chiah a, a thaw lum hak chu ka hrechiang hle, engtin emaw ka awm a ni, ka danglam hneh lutuk tlat.






"Vawt e.." a tihrualin ka kuah nghet leh sauh a, ka awma a bei tlat avangin ka lungphu rang zaih zaih chu a hre thei hialin ka ring, hetianga kan inkuah lohna hi engtia rei nge ni ta le, tun hun hi a tawpna tur a ni thei tawh maiin ka ring. A tawpna tur pawh nise a pawilo tun boruakah chiah hian chen rih ka duh. A sam rimtui tak te, ka awm bula a thaw lum leh hak ṭhin te, a taksa nem thepin min tawhna te chuan mipa ka ni tih a rawn ti langchiang hle bawk.






A insut hraih ri ka hriat rualin ka en nghalvat a, a hmel chiang takin ka hmu theilo a a ṭap ni chuan ka hre silo!





"Ti nge i hritlang a mi?" ka tih lahin min chhang lo a, a insut leh tak ah chuan a biangah dawmin ka kuai dak a, a lo ṭap chiang a ni, a biangah chuan mittui luanna a huh hliam mai, chutah hnuailam bih a tum zui chu ka chelh nghet sauh a "Ti ge i ṭah a?" tiin ka zawt zui a.






Min chhangloin a ngawireng a "Mk, ka lakah engmah i zep a ngai hleinem sawi tawp rawh" ka tih leh chuan a biang ka dawmna chu a rawn vuan a, "A hrehawm ê" tih zawng a sawi a, sawi chiang dawtlo mahse, ngaihdan chu ka nei thiam tho.






Ka kuah leh chuan ka awmah hmai phumin thawk ala ham ham a, a ṭah chhuak insum chu engtia han tih chi nge ka hrelo. "Ka tihpalh aw" ka ti leh ngawt a, min chhangloin ka kawngah min kuah a, keiin ka kuah nghet sauh bawk.






"Zanin hi raltheilo se tiraw?" a tih ri chu fiahlo viau mahse ka bengah chuan a ri nawn awn awn mai, "Ruah hi sur char char mai sela" nui hak chungin a ti leh a. Keini pahnih awmzia hi ka hrethiam tawhlo, inhmangaih tak chungin ral aṭangin kan lo inthlir dun ve ve ṭhin a nih ka ring.






"Hun hi chelh ding daih thei ila" ka lo tih ve chuan "Ni e" tiin min kuah nghet salh salh a "Ka tenawm ti raw, mi pasal i ni tih ka hrereng si a" ṭap ṭiau chunga atih chuan ka kuai dak rang kher mai.






"Mi pasal ka ni emaw hman aṭanga tun thlengin ka thinlung hi i ta a ni reng ṭhin a lawm" ti in a chalah chuan ka fawp vang vang a, "Ka rilru a ṭhalo anih hi, tunah pawh haw tawh tur ka ni mahse, ka awmlui tlat a, i rilru ka ti buai mai mai che anih hi" a tih leh chuan ka insum thei ta biklo, ṭawng leh a tum chiah chu kuaidakin ka fawp ta vawng vawng a, a tir chuan ṭang deuhin a tal phat a, mahse, a kawnga ka pawm beh tlat avangin a ṭang rei ta biklo, ka fawhna chu min chhang leta, lungchim leh duhthawh takin.






Ruahsur te, khawpui ri leh kawlphe te chuan kan ngaihtuahna a luahpha tawhlo, miten min ngaihdan tur chenin, tunah tak hi chuan ka hmangaih Mki rimtui tak leh a hmui tui tak chauh a ni ka hriat ni.






(Comment ru aw)

Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)