CHHIMBAL... BY Sbk Pachuau (Completed)

[Sbk Pachuau]

CHHIMBAL...
Sbk Pachuau




"Mama, lo kal thuai teh!"

Mangan hmel taka ka pa au thawmah chuan ka vir nghal zawk a, hmanhmawh takin pawn lamah ka tlan chhuak nghal a.

Kan in hnuaiah hian ka patea te chhungkua an cheng a, kan kawt sir maiah an in pan thlakna step awmin chu step tawpah chuan ka nu tlu sawp niai chu ka pa leh ka patea nupuiin an lo buaipui mek a. Step-ah chuan tlan thla vatin thil awm dan ka zawt a.

"Engtia tlu nge a nih ka hre bik lo, i nutei(ka patea nupui hi 'nute' tiin kan ko a) nen hian a thawm hriain kan tlan chhuak a, heti hian a lo tlu der a, khawih sawn ngam a ni bawk si lo. Engtia han tih chi nge maw ni dawn le!" ka pa chuan a ti vang vang a.

Ka nu chu na tih hmel takin a țhen chak chak a, nu tuarchhel leh na sawi zen zen ngai lovin chutia a țhenpui sak sak tawh chu a na satliah lovang tih ka ring mai a. Chulai pawn lera awm reng thu chu awm hek lo le theih ang angin kan in lamah kan pawm chho ta a, khawih chet vel zawnga nâ a tih êm avangin rei ngial in chhung thlenna a tan hun kan hmang nghe nghe.

Ka nupui hi nurse niin Civil Hospital, Aizawlah a thawk a, ka u hi mipa tho niin kei aiin nupui a nei har zawk thung. Fa erawh keini aiin an nei hmasa zawk a, ka nupuiin thla thum a pai hnuah a chhiat hlauh mai a, kan la pai leh ta rih lo a ni. Nau mipa pakhat leh farnu pakhat ka nei a, kan farnu hi phai lamah lehkha zirin a awm bo rih a, kan unau mipa zinga naupang ber VL-a tia kan koh mai țhin, Vanlalmuana hi kan chhungkaw buaina pakhat a tling ve a, țhenawm khawvengte zingah pawh hawi țha ngam lova min siam fotu a ni.

Vanduaithlak tak maiin ka nu chuan a spinal cord sawh chhia-in khum leh wheelchair-ah ngawt a hun a hmang chho ta a, damdawi inah rei ngial awmin therapy te a'n la zak zak a, hmasawnna tlem tlem chu awm mah se han dampui hmak theih ni ta lo chu in lama inenkawl turin kan inhruai haw ta a. In lamah pawh therapist te kovin theih ang angin kan inenkawl zui reng tho a, he tih chhung zawng hian ka nu enkawlna kawngah ka nupui a fakawm hle; a thinlung chhungril țhatna lo lang chhuak chu ka nu leh pate tan pawh hai theih a ni mawlh lo. Ka nu-in eng emaw ngaihtuah nei ni awm taka ka nupui a thlir vawng vawng țhin hi ka phàwk fo a, kei pawhin ka nupui chu mak ka ti!


A HMA CHUAN...

Ka nupui Rintei nen hian hna kaihhnawihah thingtlang lama kan kal țumin kan intawng a, nurse ni tura a training lai niin chawlh hmanga an khaw lama a awm lai a lo ni a. Ka hmuh tirh ațangin a hmel mai piah lamah a hawiher engkim mai chuan min hip nghal a, ka ngaihzawng lo neih tawh te lakah a dang zar bawk. A thawmhnaw inbel țhin te a changkang falua lo naa zahpuiawm lo tawkin a inchei thiam a, hmai hnawih lam a uar miah lo bawk; țawng tam mi ni lo mah se a ngaihawm tawk leka titi thiam a ni reuh thung.

Chhuah ka tum miau loh avangin ka theihtawpin ka hèl zui a, a training lai pawhin ka theih ang angin ei tur tuihnai hmangte'n ka va duat ve bawk. Ka duhna a nasat êm avang leh ani pawhin min hnar theih bik loh avangin kan inngaizawng ta thuai a, a zirlai ti bahlahtu nih erawh ka hlau a, theih ang angin ka fuih ve țhin.

Rilru puitling tak pu mi a ni reuh a, theihtawp chhuaha a zirlai beiin exam-naah pawh a ti țha pathum zingah a tel pha ta hial rêng a, sorkar hnuaiah lut nghalin vanneihthlak tak maiin Aizawlah a awm hlauh mai lehnghal a, ka tan chuan chu tluka lawmawm a awm thei chuang lo.

He tih lai hian a țhiannu fanu, changkang leh lehkha thiam tak mai chu ka nu-in ka nupui atan a lo beisei hle a, chaw ei laite hian a sawi leh zauh țhin. Ka ngawihsan mai zel a, eng he-huah ka ngai lem lo. Ka nu țhiannu fanu hi ka hriat sa a ni a, a hmel a chhiat loh piah lamah an harsa lem lo bawk nen a nalh thei hle. Min duhin min ngaizawng a ni tih ka hriat rukna a rei tawh viau naa a mizia ka duh zawng a nih miau loh avangin mitmei ka hmuh ngai lo a, duh ila chuan ka duh duhin ka kuai thal thei ang tih ka hre naa intah luh loh law law ka duh avangin ka hnaih duh ngai lo a ni ber e.

Rintei'n training a zo a, a thawh zui nghal mai avangin mahnia in luah lovin a nutei te inah a khawsa ve a. A duty loh zan apiangin ka theih phawt chuan ka leng ziah a, a nutei te chhungkua nen pawh kan inpawh ve thawkhat hle. Hna lama kan buai ve ve avangin a hranpa taka han inhmuh leh chhuah dun te kan nei ngai lem lo a, hun remchang awm veleha len chhuahpui erawh ka tum ruh khawp mai.

Sorkar chawlh a ni a, Rintei'n duty a awllai a nih bawk avangin chu hun remchang chu chuhin ka len chhuahpui a; Aizawlah hian nula leh tlangval te tana zalen zawka inkawmna hmun leh han len khawthawnna tur hmun a lo vang phian a. Ka lehkha zirpui țhin hmeichhe pakhatin Falkland lamah restaurant changkang tak a siam tih ka ngaihtuah chhuak a, chu lam pan chuan kan inphur phei a.

A hmun kan va thlen chuan ka beisei ai daihin a lo changtlung phian a, Rintei chu kaiin a chhung lamah ka luhpui a, an ei siam a tui mai piah lamah anmahni dawrtute an dawngsawng țha êm êm a, chawlhna atana duhthusam a ni hawt e.

Kan ei man pe tura counter ka pan lai chuan restaurant neitunu, kan țhiannu Elty chu a lo lut ve chiah a, min hmuh rualin a phûl leh nghal hlut a, hei chu a zia ve rêng a ni. Rintei ka hmelhriattir chuan chibai lâwp lâwp pahin phaia kan awmho laia ka chet chhiatna vel te chu a sawi nghal mawlh mawlh a, Rintei pawh a nui ve hak hak mai.

"In lo kal dawn te chuan min lo hrilh hmasa ula, cabin ka lo dahsak tur che u a nia!"

"Cabin a awm tih pawh kan lo hre hleinem. A rêng rêng thuah i lo va bei pui ve hei, ka rin aiin i lo pangngai chho ve ta viau a ang khawp mai," ka tih chuan nui hawk hawk chungin ka banah na lo tê-in min hnek zauh a.

"Ngawi mai mai teh! I țhiannu hi i ngaihzawng hluite nena in chanchin ka hrilh vaih chuan i hawi lawl lawl mai tur a nia," ngeiawm zeta ner nâng chungin Rintei lama thlek deuh pah chuan a ti a, a mize chimawm zet kha a lo la thlah lo tih ka hre thei nghal mai a.

"I restaurant hming hi eng vanga 'Bon Apetite' ti nge i nih? Nang chu han 'bon apetite(tui takin ei rawh aw)' vak ngaiin i lang si lo a, midang tana i tih a ni ber ang chu maw!" a taksa lo thau ve ta deuh kâng en chung chuan ka ti kher a, a ner nasa teh e.

"I va'n chimawm tak! I sâwn thlak leh hnam dang nula i ngaihzawn kha Rintei hi ka hrilh chuan i lawm miah lovang aw," hnehtu chan chang inti zetin a ti leh a, ka lo nui mai a.

Kan inkawm tirh ațanga kan college kal tawp thleng khan he nu hi mi țha a ni tluan zak a, nawi leh ho taka awm chang nei ve bawk țhin mah se harsatna leh buaina kan tawh hun apianga min ngaihsaktu leh buaipuitu ber a ni ziah țhin. Kan țhian ho mipa pali bakah ani chiah hi hmeichhia 'țhian' tia kan sawi țhin awm chhun a ni ta rêng a, eizawnna avang leh khawsakna hmun a lo inan tàk loh avangin kan inkawm zui thei ta lo a ni mai a, biak erawh kan la inbe zui reng hlawm thung.

"Karaoke pawh kan nei a nia aw! I țawng thei hle naa Rintei vang liau liau hian a thlawnin ka lo hmantir ang che u," nui awr awr paha Rintei kai chung chuan a kal nghal vut a.

Karaoke room kan luh hnu chuan Elty'n "In duh tawk khan han bê vel teh u. Mamawh in neih chuan min lo call mai dâwn nia aw, counter lamah ka lo va țhu ang e," tiin chhuah mai tumin a kal nghal a.

Kawngka bul ațanga rawn hawi let lehin Rintei chu a en a, "Rinte, sâwn thlak leh bialnu neih chungchang vel kha chu ka fiamthu a nih kha aw. Vanlalruata hi bialnu neihna chang pawh hre lo khawpa michut a ni țhin a, engtin nge nang ang hmeichhe țha lutuk hi a lo chhai thluk ve theih che pawh ka hre lo. Zawlaidi a tat che a ni ngei ngei ang," a ti bawrh bawrh a, nui hawk hawk chungin biak leh hman miah lovin a chhuak nghal daih a.

Rimawi ri riai riai kârah zai pawh ngaihsak lem lo chuan insi rialin kan țhu dun a, eng eng emaw kan sawi dun sep sep a, a khat tawkin a hmui fawh nuam zet chu ka fawhsak reng bawk. Mipa hrisel țha, tha za rual leh mahni tawka in-fit țha ve tawk lo nih nen, duhtakte nena taksa innâwk ta reng chu thisen a lum phat mai. Kan awmna hmunin a zir bawk nen, tisa châkna chuan ngaihtuahna fim pawh min puttir thei dawn ta lo hial a, infawh mai duhtawk lovin ka kut pawh a hlei narawh e.

Tlema han nawr deuh ka tum pawhin a inla hrang thiam hle a, nelawmna hloh chuang miah si lovin a inveng thiam a, min thlahlel ve êm êm a ni tih ti lang chung siin min hnar thiam hle bawk.

"Ruat, min ti lui la chuan ka țang zo dawn bik hauh lo a, lo hlawhtling ta la min hnualsuata min kalsan mai lah ka ring hek lo. Mahse, tunah hian kan châk zawng leh tisa nawmna umin kan duh angin awm ta ila nupa kan nih huna min phuar nghettu tur ber kan palzut miau avangin kan hlim tur angin kan hlim pha zo tawh ngai lo ang. Thianghlim taka inngaihzawn hi a hlu a, hmeichhe tan inneih zana pasalte hnena thianghlimna hlan tluka hlu a awm lo bawk. Min hmangaiha min duh ve tak tak a nih chuan i nupui ka nih hunah chauh i tana ka inpumpek hi nang pawhin i duh zawk ngeiin ka ring!"

Lalrinzuali hi kei aia naupang mah ni se ka letin a puitling zawk tih ka hre nawn leh a; ka zah a, ka ngaisang a, ka hmangaih zual zel a ni tihah ka chiang viau bawk.

"Rinte, ka tihpalh a ni e. I bulah hi chuan insum har ka ti țhin a, ka la ti zel dawn pawh a nih hmel. Mahse, i duh lo chung leh i remtihna tel lo chuan har dawn viau mah se ka nawr lui tawh ngai lovang che. Ka duh êm vang che hian ka lo insum zo lo leh thin atin ni!" ka tih chuan min hrethiam tih lantirna'n min si chiala rawn țhu hnaiin min kuah a, duat takin ka lo kuah let ve a.

Haw tura kan intintuah laiin ka phone a ri a, ka nu a lo ni a.

"Mama, i lo haw dawn tawh em? Mi pawimawh zanriah kilpui tur kan nei dawn a, i theih anga hmain lo haw teh aw," a rawn ti a. A hmain eng mah sawi lawk a awm si lo a, ka nu phur thut thil tih a nih leh ngei ka ring!

In ka thlena ka nu 'mi pawimawh' sawmte ka hmuh chuan ka ner ru sawk a, a langah erawh ka inthup hram thung. Nei tura min nawr sek Hlimpuii chu a nu leh pate nen a sawm a lo ni a, anni an ni dawn tih hria ila Rintei kha la thlahlel tak chungin ka kalsan hauh lovang le! Chhungrila lungawi lo ru țunin ka awm a, tih lan a rem chiah si lo nen bet lo zetin ka awm ve ta mai mai a.

Zanriah ei kham hnua ka nuin, "Mama, Hlimpuii hi i room te va hmuhtir ve la," a tih chuan ka insum zo lo teuh kher mai!

Tunlai nu tak, rilru zau leh a hun leh hmun azira insiam rem thiam tak chu a ni nameuh mai; mahse, tuna a intih tunlaina hi chuan ka thin a ti rimin ka nu chu ka haw deuh hlur tawh a. Ka mitmei hmu miah lo chung pawha zahna hre hlek lova min si chêta țhu Hlimpuii pawh chu ka hne zual sauh bawk.

Tui lo ru zetin phurna mitmeng nena min en rengtu Hlimpuii chu ka room lamah chuan ka hruai a, a nu leh pate awm ve avang chauhin ka lungawi lohna ka thup hram hram a, anni chu awm lo se ka nu thu chu ka hnial chiang khawp ang maw le.

Han biak vel pawh ka phur loh êm avangin ka room-a chair ka hunah chuan ka țhu ngawi reng a, Hlimpuii chu ka khumah țhu-in a bawp sei thlarh chu a khawkherh a, a lang nalh hle a ni tih chu phat rual a ni lo! Itna leh han khawih vel châkna erawh ka nei hauh lo a, eng anga nalh leh hmelțha pawh ni se a nungchangin min hip miau lo a, ka tan chuan a pawnlam lan dan chuan awmzia a nei lem lo.

"I va'n cool êm êm! I nuamsam lo em ni?"

"ka lu hi a nuam lo deuh a, nasa erawh a ni lo e." Tlema ka lu rawn na deuh chu chhuanlamah ka hmang hmiah a.

"Ka lo hmehsak ang che," tih leh min pan a rual a, ka țawng ve hma hauhin ka bul a rawn thleng hman der bawk.

"Hmeh a ngai lo e, tihian a zia ve leh mai ang," tia ka lo hnialna chu ngai pawimawh lo zetin ka lu chu a rawn ban a, a hmet nghal a.

Nula fing leh changkang tak a ni a, Aizawla college pakhatah lecturer niin a khawsak pawh a sang hle. A nihna chhuang taka han țawng vel leh nalh tak taka incheia teihawi hi nuam a tih berte zinga mi a ni a, keiin chu tak chu amah ka ngaihtheih lohna lai a lo ni ve bawk si. Rintei nen inngaizawng lo ila chuan tlangval fit țha zet zawt ta chuan han bawh thluk mai pawh ka hreh bik kher lo ang; chutih rual erawh chuan ngaihzawng atana ka duh loh berte zinga mi a ni thung.

Duhtawk tawh tura ka hrilh chuan ka țhutna chair bânah rawn țhu thlain ka nghawngah min rawn kuah a, ka beng bulah a rawn thaw lum ham ham a.

"Ruata, i nu hian ka bulah inneih lam thu hi a sawi reng zel a, a nuam lo duh khawp mai. Chhan dan tur ka haihchham thei lutuk a, a hrehawm! Nangmah hi sawipui tur chein min ti a, a sawi leh hunah engtin nge ka chhan dawn?" hnung lam ațanga min rawn bawh hnai deuh pah chuan a ti sep sep a.

"Kan inngaizawng chuang lo a, chhan dan turte chu a hriat mai alawm. Țhian chauh kan ni a, ngaihzawng angin kan inen lo ve ve bawk tiin thil awm dan dik tak i sawi mai lo a nih chu!" ka tih chuan a thaw hak a.

"Sawi mah ila i nu hian a awih pawh ka ring lo! Chu bakah, innei mai tura min ngaih laia kan inngaizawng lo a ni tih lo sawi te chu ka duh teuh lo mai, a rilru ka ti na palh ang!"

Min kuahna chu la thlain ka ding chhuak nghal a, tlema kal sawn deuhin a lam chu ka hawi a. A mitah tak chiang taka melh chungin," A rilru natna chhan tur a awm hleinem. Kan inngaizawng lo miau a, chu chu kan pahnih hian kan hre chiang dun viau bawk. Ngaihzawng ka nei a, nang pawhin i nei ve ngeiin ka ring a, i tan pawh a hrehawm duh ngawt ang! Ka nu rilru nat i hlau chu a lawmawm lutuk; mahse, i tan pawh a thawpikthlak duh dawn êm a, thudik chu i lo hrilh tawp mai dâwn nia," a tana huatthla la ni miah si lo, amah hnarna ni bawk si chuan ka ti a, a meng ngui deuh lap mai.

Mahse, hmeichhe à a ni lo a, hlim hmel taka min enin min nuih sâng a, a mitmeng dul raih kha hmuh tur a awm leh tawh eih lo!

"Ni e, a rilru nat ka hlauh avangin ka hrilh duh lo țhin a, a sawi leh a nih chuan thu dik chu hrilh mai ila a țha zawk tak ang! I nu hi chu ka ngaina riau a, ani pawhin min ngaina a, a rilru tih natsak hi ka hlauh ber a nia. Nangmah berin pawi i tih loh chuan ka lo hrilh tawh dawn nia," zangkhai vaha tiin a la nui sâng bawk a, a mitmeng erawh a dur lam lek lek a ni. Hmeichhe dûai lo tak chu a ni ngei e!


************

Rintei nen harsatna êm êm tawk lovin kan la inzui ve zel a, hmeichhe leplerh leh rintlak loh a ni lo bawk a, kan inhmuh khat deuh pawhin ngaih a ngam sarh reng a, kan kârah thikna leh rinhlelhnain hmun a chan loh mai bakah kan inrin tawnna chuan kan thinlung chhûngah thuk takin inzawmna min siamsak a ni ber mai.

Hun remchang a awm theih țhin loh avangin kan inah pawh ka la hruai miah lo a, ka thawhna hi State Bank a nih avangin chawlh ka nei ngai mang lo a, ka chawlh neih niah ani'n duty a lo nei ve leh țhin bawk nen a la rem thei meuh lo a ni.

A tawp a tawpah remchang a awm ta hlauh a; mahse, chutia kan ina ka hruai chu ka nu vangin ka inchhir lek lek mai. Ka nu mitmeng ațangin Rintei chu a lawm lem lo a ni tih a lang reng a, hmeichhe à ni lo ta chuan a langah chuan țha takin a be ve mai a, a ze hre chiang lutuk kei chuan Rintei mitmei chu ka veng viau a. Mahse, a vawikhat hmuhna a nih bakah a zia eng mah la hre lo te a ni bawk a, ka nu awm dan chu a hre thiam lo niin a lang.

Ka pa hi pa țha tak, thu leh hla ngah lem lo tak leh rilru tluang purh mai a ni a, a țawng tam lem loh avang hian mi nel erawh a hlawh mawh deuh. Rintei chu ka beisei phak aia țhain a dawngsawng tehmial a, ka nu awm dan chu a man thiam ve ni tur a ni ka țhiante dang lo lêng lut ngawt ai chuan a besawm nasa a, rilru nawm lohna pawh a zia huai e.

Chumi tlai zanriah ei lai chuan ka nuin nupui zawn thiam turin leh kan khawsak milpui deuh nei tura min duh thu kan unau chuan min hrilh mawlh mawlh a, keimah min tih chhan taka a țawng deuh fak fak chu ngawi rengin ka ngaithla a. Rintei laka ka rilru thlak tumna ka neih loh avangin hnial buai enah ka en lem lo, ka nu lahin a tum dan sawh sawn a tum hmel bawk si lo nen, sawt lo tura inhnial ai chuan ngawih mai chu țha zawkin ka hria a ni.

Hlimpuii chu a rawn leng fo a ni tih ka hria, ka nu nen an inkawmngeih avanga lo lêngah ka ngai mai a. Ka nu lahin a fakin mo atana a itzia a sawi zing tawlh tawlh mai nen an inkawm hian eng thil chiah nge an sawi dun țhin hre lo mah ila ka chungchang an sawi tel ve ngei țhin chu a nih hmel.

Rintei mizia chu eng emaw lai ațang khan a dang ta deuh tlat a, ka lak ațanga hla ta riau hian ka hria a, a chhan ka hre thei si lo chu ka mangang ru viau mai. Ngaihzawng pahnih khat chu ka lo nei ve tawh țhin a, Rintei ang êm êma duh leh hmangaih hi ka la nei ngai lo; a mizia engkim, a rilru țhatna leh thianghlimna chuan min hnehin nupui ka nei ve ngai a nih chuan ani baka nupui atana ka thlan tur an awm chuang lo. Chutia min hlat ta tial tial nia ka hriatna chuan rilru nuam lo zetin min awm tir a, amah ka zawh lahin chutiang eng mah a awm loh thuin min chhang zel bawk si, rilru erawh a hlim mawh hle.

Mahlimi pa a hna ațanga a pension avangin chhungkhat hnai leh țhian țhate nen chawhlui kilhona hun an siam a, ka nu-in min tih luih tlat avangin peih lo tak chungin ka kal ve a. Chumi ni tàk chu Rintei'n a chhungte thil rawn thawn lampui tura min sawm ni tak a ni a, tlai lama lam chauh tur a nih avangin ka kalpui hman ta si lo nen rilru khingbâi ru țeuh chungin ka nu leh pate chu kan chaw eina tur lam pan chuan ka phur chhuak a.

Chaw ei kham hnuah haw vat ka duh tehreng nen ka nu lah chu a hmanhmawh lo nasa mai si; lo va haw hmasaka anmahni hruai tura let leh mai ka tum lahin min hnial tlat a, ka pa zawkin min hrethiam takin kal mai turin leh an haw-na tur chu an lo ngaihtuah mai tur thu-in min thlah a, lawm takin ka chhuak nghal a.

Ka motor dahna lam ka panlai chuan min kotu an awm avangin ka hawi let a, ka hnung lama Hlimpuii lo kal phei ka hmuh chuan ka rilru hmanhmawh tawh deuh nen chutia min rawn pan chu ka lawm lo ru hle a, ka motor bulah chuan dingin tui lo zetin ka lo nghak a.

"Haw i tum em ni? A la hma hle sia, inchung lamah ka țhiante pawh an la awm a, lo chho ve rih la," tih pahin min si deuh thaw-in a rawn ding a.

"Kalna tur pawimawh ka nei a, ka lo va haw phawt ang e. Ka hman tàk hlauh leh ka lo let leh zawk dawn nia," tiin mawi hnai takin ka lo hnar a.

"I lo let leh hman tawh loh takin reilote tal la awm ve rih rawh. Ka țhiante paw'n an hmu ve chak che a, hruai tur chein ka lo kal ve bawk a, i kal daih chuan ka țhiante pawh an zahawm lutuk ang," min nek deuh pah chuan a ti leh a.

"Ni dangah inhmuhna hun a la awm turah ngai ang. I țhiante bulah chuan thupha min lo chawisak mai dâwn nia, ka va kal phawt ang e," motor kawngkhar hawn paha ka tih chuan ka kawngah a rawn kuah a, ka lo insangmar nghal țeuh a.

"khawngaihin reilote tal, ka țhiante i hmelhriat chhung tal awm rawh. Nang nena hmehriattir tur hian ka lo tiam hlawm tawh si a, an beisei ka tih hlawhtlin loh chuan ka tan a zahthlak dawn lutuk asin!"

Ka ngaihzawng a ni lo a, ka țhian tak tak lah a ni hek lo. Chutianga a țhiante hmelhriat tur mai maia ka awm khawtlaina chhan tur ka hre lo a, Rintei hmu tura kal thuai thuai chu tuna ka thil châk ber a ni rih tlat.

"Ka kal phawt zawk ang e, i țhiante bulah chuan thupha min lo chawisak mai dâwn nia," ka kawnga min kuahna kut lak thlaksak pahin ka ti a, motor-ah chuan lutin ka ti nung a, amah pawh melh zui tawh chuang lo chuan ka tlan chhuak ta nghal daih a.

A nutei te in ka thlen chuan Rintei chu a room lamah a lo awm a, a naute'n(a nutei fate) an koh hnuah pawh rawn chhuak mai lovin a la tawm deuh reng a. Ka kal dawn a ni tih message-a ka hrilh lawk vek tawh bakah an koh hnu pawha a la rawn chhuah mai loh avang chuan thil tih laklawh a nei a nih ringin ngaihțhat lohna pawh nei lem lo chuan ka lo nghak ve mai a. A rawn chhuah har tàk deuh avang chuan a nutei chuan va ko ve leh in a rawn chhuak ta hram a, ka hmu sual nge a mit chu țap zo hlim ang maia sen ni mai hian a lang a, ka bul hnaihah pawh țhu lovin hla deuh takah a țhu fel at a, a awm dan chu mak ka ti viau mai.

A nutei te nen kan titi bawrh bawrh a, naupang ho nen mu tura room lam an pan tàk diakah chuan ka țhutna chu sawnin Rintei bulah chuan ka țhu a, a lo tawlh sawn vat a.

"Lungawi lohna i nei em ni?" tia ka zawh chuan a ngawi reng a, min chhan tum awmin a lang lo.

A bulah tawlh pheiin a kawngah ka kuah a, ka kut chu laksawn tumin a lo che nghal phat a, ka lo rin lawk sa a nih avangin a nghet thei ang berin ka kuah bet zui hmak thung. A tal deuh laih laih a, ka kuah beh hneh êm avangin a duh angin a tal chhuak mai thei si lo nen thinur zetin min melh ta kal a.

"Tlaia ka kalpui theih loh vang che kha em ni i lung a awi loh? Kha vang kha a nih chuan ngaihdam ka dil e."

Eng mah sawi lovin min la melh ta reng a, a zia hrechiang ve tawh thawkhat tawh hlea ka inngaih avangin chuti êm êma a thinrimpui chu mak ka ti deuh a, ni dang angte chu ni se eng mah lungawi lohna pawh nei lovin kan induat leh hle tawh awm si a.

"Pawi ka ti lutuk! Kal tum pawh ka ni lo a, ka nu-in min tih luih vang chauha kal ka ni. Tunah pawh heta rawn kal ka duh avangin ka rawn kalsan daih a nih hi," ka tih pawh chuan țawng a la tum chuang lo.

Kun hniama a hmuia fawh ka tum chuan duh lo zetin a hawi sawn hmak a, fawh luih ka tum pawhin a tha tawpa țangin a theih ang angin a lo indang a, a mittui tla ka hmuh rualin ka tawp nghal hmak a.

"Khawngaihin min ngaidam la, i duh ang angin ka chungah phuba la bawk rawh. Mahse, i mittui hi hmuh leh ka duh tawh lo a nia," tih pahin a mittui luang chu ka hruksak a, ngaithei lo hmel zetin a thle sawn vat a.

A awm dan chu mak ka tih deuh avangin a lungawi loh chhan dik tak min hrilh turin ka nawr a, ngawi renga a phone min entir tàkah chuan ka thaw hawk ringawt.

An in kawta ka motor bula kan awm laia Hlimpuii'n min kuah chunga duh hmel zeta min en lai thlalak chu ka en vang vang a, kei pawhin ka en ve bawk avangin a lan dan maiah chuan ka kuah let ve lo naa inngaizawng ang mai kan ni. Khawia țanga a dawn nge tih ka zawh chuan whatsapp-ah lutin chat pakhat a hmet chhuak a, a phone chu min pein ka lak ațang chuan a inla hrang nghal a.

Hlimpuii hian engtin nge Rintei number a neih tih lam chu ka hre hauh lo naa a lo va be țhin ngei a ni tih chu ka hmu chiang khawp mai! A message thawnho ka chhiar chhung zawng thinur ip ru țeuhin ka awm tluan parh a ni ber e.

'Ruata hi ka bialpa a ni a, kan intih thiam loh laiin a rawn chhaih kual ve mai mai che a nih kha. Lo la thutak duh vak suh.' tih te...

'Ruata hian min runluihna'n a hmang che a, nakina ka bula a lo let leh hunah i nat lutuk lohna'n ka lo hrilh lawk che a nih chu.'

'Ruata nu hian keimah lo chu mo atan tumah a duh lo, lo kherh buai duh lo law law rawh.'... heti ang lam hawi deuh vek hi a ni hlawm.

Inngaizawng, eng emaw vanga inti thiam lova ințhen rih mai mai chauh ni angin a lo insawi vel a nih chu! Message tam tak a lo va thawn a, Rintei chhanna erawh a awm lo thung.

Rintei te thawhpui pakhat hi Hlimpuii hmelhriat a awm a, chumi hnen ațang chuan Rintei phone number pawh a nei a nih hmel. Rintei zia a dang nia ka hriat hma lawk ațang khan lo va be țhinin kan inkar tih chhiat tumin a bei ngat ngat a lo ni a, Rintei hian min rin ve êm avangin a tirah chuan engah tehvak a lo ngai lem lo.

Mahse, chutia a va biak tak fova message te a va thawn reng tàkah chuan a rilru a lo hneh ve tial tial a, min chân mai a hlauh avang leh min hmangaih ve êm avangin a ring phal chiah bawk si lo nen rilru khingbai zetin a lo awm reng tawh a lo ni.

Keiin a zia dang ka tih êm êm laite khan rilru hah takin a lo awm reng a, ka bum êm chu a ring bik si lo nen min zawh dawt kha a lo ngam chiah lo deuh a. Khatia kan ding dunlai thlalak a hmuh tàkah khan Hlimpuii sawi te kha dik vekah ngaiin kei hian ka bum niin a lo ngai fel hmiah tawh a; min biak emaw, min hmuh emaw pawh tum tawh lovin a nutei'n a va koh vang chauha lo chhuak a lo ni a.

Rei ngial thil awm dan dik sawia kan inthlem hnuah Rintei chu ka thlem lungawi thei ta hram a, a ngaih erawh a la ngam zán lo thung. Hlimpuii'n Rintei chu ka nuin mo atana a it loh thu a sawi te leh amah Hlimpuii nena innei tura min duhthu te a lo fah nasat êm avang chuan a rilru a hel hle a, lo inkawp chho zel ta pawh ni ila kan innei thei chuangin a ring lo a, a thu hriatte ngaihtuahin a ngaih dan chu ka hriat thiampui khawp mai. Mahse, țhen emaw, nupui dang neih emaw ka tum miau mai si lo a, rilru dam taka a awm theihna turin kan inkarah mi dang tlakzeh ka phal ngai loh tur thu ka hrilh a.



***********


Beisei phak baka Hlimpuii a lo inrawlh avang leh ka nu rilru ka hriat chian êm avangin buaina nasa zawk kan tawh hmaa a chinfel dan ngaihtuah vat chu țulin ka hria a, la inpeih lo hle mah se Rintei chu nupuia neih mai țhaa ka hriat avangin ka pa ka bia a. Hmanhmawh min ti deuh naa min hnial lo hlauh a, ka nu rilru erawh ka hneh thei ang em ka hre lo thung.

Ka nu leh ka pa bakah ka u Tluanga te chu thil pawimawha ka biak duh thu ka hrilh a, ka pate room-ah kan țhu țhap a. Ka pa hnena ka lo sawi tawh avangin ka zam lutuk tur pawh a zia deuh a, han sawi tlang tawp erawh ka huphurh ru viau mai.

Ka awm dan hrethiamin ka pa chuan, "Mama hian a u Tluanga khalhin nupui neih a rilruk deuh a nih hmel," a ti ta hlauh a, ka thaw huai mai.

"Hlimpuii em ni neih i tum?"

Ka nu lam chu ka hawi nghal vat a, a hmelah chuan amah pawhin Hlimpuii neih ka tum lohzia a hre chiang hle tih a lang reng a, min țawng el khum mai a ni tih chu a riin sawi kher lo mah se ka lo hrethiam ve nghal mai a.

"Ni lo e, Rintei a ni a, hetah pawh ka rawn hruai tawh kha," ka theih tawka pangngaiin ka chhang a.

"Hlimpuii te ang nula fel leh țha lutuk awm renga thingtlang nula satliah mai mai neih han tum chu le(h)!" chek tlak tlak chunga ka nuin a tih chuan ka sa deuh zak a.

"Ka nu, Hlimpuii nen sawn kan inngaizawng lo a, eng vangin nge ka neih ngawt ang?"

"I tana țha tur ka kawh hmuh che duh lovin i duhthlanna i hmang miau alawm. Ka thu awih ni la nupui changkang tak i nei mai tur a nia."

"Eng anga changkang pawh ni se, ka duhzawng a ni tlat lo atin ni. Changkang satliah, zahna tlachham zet leh chapo tak ai chuan rilru țha leh fel an pawimawh zawk. Rintei hi ka hmangaih a, ani lo chu nupui atan ka nei dawn hek lo," ka tih chuan rum fahranin ka nu chuan min melh a.

"A rêng rêng thu-ah in va hmanhmawh teh thut ve! I u Tluanga pawhin nupui neih a la sawi loh laia nu leh pate rawn derna pawh nei hauh lova mahnia thutlukna i lo siam ve ngawt le!"

"Loh theih lohna avangin hmanhmawh a ngai ta tlat alawm maw le! Chuti ni lo se Rintei pawhin hmanhmawh lova hun rei zawk nghah a duh a, keima nawr luihna avang chauha remti a ni nghe nghe," ka tih chuan an hawi phawk deuh hrâ hlawm a.

"Rintei chuan nau a pai em ni?" ka u Tluanga'n min zawt a, ka lu ka lo thing vat a.

"Chutiang eng mah a awm lo, kan la thianghlim a, dan khatnaa inneih pawh kan la tlin e."

"Chuti a nih chuan hmanhmawh viau a ngaih loh tawp chu!" ka nu-in a lo ti hmak a.

"Puitling an ni ve tawh a, Mama'n nupui chawmna tur a thawk chhuak ve tawh bawk. Neih hun lo lutuk pawh an ni tawh lem lo bawk a, a innei turte an induh tawn phawt chuan innei mai se a pawi hleinem," ka pa'n a lo tih ve tàkah chuan ka thawl huai a.

Ka nu chu a lungawi lo ngang mai a, ka pa berin thutlukna a siam tawh miau mai si a, hnial ngam hek lo, tui lo zet chungin ka pa leh ka u Tluanga nen chuan palai tur atan tunge țha ang tih leh eng tikah nge kan tirh ang tih chu an relho ta a.

Harsatna leh buaina êm êm tawk lovin inneih ni kan thleng thei a, rin phak bakin lawmpuitu kan hmu țha a, duh ber neih nî lo ni bawk nen rilru a hlim duh ngei mai. Ka nu pawh a rilru a lamlet ta emaw tih mai turin a hmel a hlim a, min lawmpui tura lo kal te hnehsawh takin a lo dawngsawng hlawm a, boruak țha tak hnuaia kan awmho ngei ka beisei hial a ni.

Ka nupui nen kan zan hun hmasa ber kan han hmang dun a; a la thianghlim ang tih ka hre sa tho naa a tak ngeia han hriat tàkah chuan thinlung chhungril a hlim veng veng a, lung a awi ru hliah hliah mai a ni. Pasal tan nupui thianghlim(virgin) neih tluka hlu a awm lo a, chutiang bawkin nupui tan pawh hmeichhe dang laka vawikhat pawh la inti bawlhhlawh lo pasal chu an hlu viau bawkin ka ring.

Tui taka ka nupui muhil lai thlir pah chuan inngaihzawn laia mipat hmeichhiatna(sex) hman khawloh lo pawi theih turzia ka ngaihtuah ta a. Nun uluk tak chunga nulat tlangval lai hun hmang lote tan nupui pasal neih hnuah nupa nun hlimna tak tak a thleng mawh viauvin ka ring a, țhenkhatin 'hmangaihna lantirna' an tih leh 'inngaihzawnna ti nghettu' an tih hi ngaihtuah chian loh vangah ka ngai nghet ta hmiah bawk. Inngaizawng te inkar hi sex vangin a ngheh phah kher lo a, a derthawn phah zawk mai piah lamah kawppui te ngaihnepna a siam thei tlat a, nupui pasala innei zui ta hi an tam lo viau bawk.


**********


Ka nupui chu ka hre chiang telh telh a, ka duh tawlh tawlh mai! Ka unau te leh ka pa te nen an inpawhin fak pawh a hlawh viau a, ka nu erawh zawngin a thinlung takin a la pawm thei lo a ni ang e a țul tawpah bak a be ngai lo thung. A hna hi thlan tui sênga thawh ngai chi ni lem lo mah se a hahthlak ve thawkhat a ni tih ka hriat thiampui hle a, chuti chung chuan in chhunga a mawhphurhna a hlen țha hle tho a ni.

A țul țul khawih turin nula pakhat kan hnenah a cheng ve a, Rintei rawn awm ve hnu thla hnihnaah ka nu-in midang râwn lem lovin, ama thu-in a lo hawtir daih mai a; ka pa'n a khak naa awmzia a awm tawh lem lo. Rintei'n a ti vek thei a, mo neih man alawm tih țanin a țang tlat bawk si nen, a țawng tlem zawk ka pa bawkin ngawih a chuh leh a.

Rintei chuan lungawi lo hmel a pu chuang lo a, a tihtur nia a hriat chu felfai takin a ti a, zan lama duty a neih pawhin hah leh chau hmel a ti lang ngai lo. Hmangaihtu na nâ nâ chuan a chau ve țhin a ni tih a mitmeng ațangin ka lo man thiam ve vek a, thil zawng zawng tih tum vek lo tura ka hrilh țum a awm ta zeuh zeuh mai; awmzia erawh a awm falua lo.

Kan inneih ațanga thla lina-ah nau a pai ve ta a, kan lawm viau rualin naupai a haw riau mai chuan mang a ti ang ru hle. Eng mah a ei tui lo a, a luak reng mai bawk nen a dawldângin a zawi ngiai reng mai a, ka lainat takzet a ni.

Chawlh lak ngai khawp hiala a awm lai pawh chuan inchhung chet velah a awl thei lo a, ka nu lahin a ring lui tlat mai si nen ka theih ang angin ka pui ve țhin a. Eng mah khawih ngai lo leh siamsa ei țhang tih takah ka țangkai nep nasa mai si, ka nupui chu a chhel hrim hrim a, tih dan turte min hrilhin kei pawh ka inzir chho ve zel a. Hna avanga nilenga chhuahsan a ngai ziah chu hrehawm ka ti a, chawlh han lak ve ngawt a rem bawk si lo, hunawl ka neih apianga phone-a biak leh mai țhin loh chu tih theih dang a tlem viau a ni.

Luak danna a ei chuan awmzia a neih loh avangin doctor-in injection a chawh a, chuta țang chuan a zia chho ve ta hle a, a thil ei pawh tui chho ve țanin amah pawh a mam ve leh ta tial tial a, a hna pawh a zawm fel leh tawh a.

Chutia a zia chhoh leh tàk hnu lawkah chuan ka nu-in vawkte a'n la leh mauh mai pek a! Ka pa a hnaah a kaisang chho ve zel a, keini unauvin hlawh țha ve tawk tak kan han nei ve ta bawk nen kan khawsak a ziaawm chho a, vawk vulha buai em êm țhin ka nu pawhin vawk a vulh lohna a rei tawh hle a. Kum eng emaw zat a vulh tawh loh hnua vawkte a'n la leh ngawt chu a tirah chuan a vulh leh châk vanga la emaw ka tih avangin ka en liam mai a, Rintei enkawl atana a lak a nih thu a sawi chuan insum zo lovin ka țawng chhuak ve ta a.

"Eng vanga Rintei tha hi it êm êm mai nge i nih? Ka nu i nih avang hian ka sawisel duh ngai lo che a, hetiang reng a nih dawn chuan ka en liam tawh mai mai lo ang!" ka ti ve ta fak fak a.

"A tha ka it pawh ka hre lo e! Mo a ni a, a tih tur a ti a ni mai alawm. Khatia a thlavâng hauha i lo țawng vel khan i ti no mai mai, hah viauna tham khawih tur kan inah a awm hleinem, hah a inti deuha a lo vui a nih pawhin i laka a pangchan vang mai mai bak a ni lo tawp ang!" ka nu chuan a ti hmarh hmarh a.

" Ka nu, Rintei hi ka bulah vawikhat tê pawh a la vui lo! A laka i khawsak dan hi min hrilh kher ngai lovin ka hmu ve thei vek alawm, mi à ka ni hleinem! Heti khawpa a hah chung pawhin ka nupui kâ ațang hian vuivaina thu pakhat pawh a la chhuak lo tih hria la, a laka i rilru put dan hi thlak ve tawh ang che," ka ti ve ta hmiah a.

Ka nu mah ni se a thil tih dan a dik loh êm avangin khak a ngai tih ka hria a, zahin hreh viau mah ila ka nupui laka a khawsak duh dan chu nakinah amah ka nu tan tak pawh thil pawi a la ni thei tlat a, ka lung a lo awi bik vak tawh lo bawk nen ka khak ve ta fak mai a ni. Kan nufa chauha kan awm lai a ni a, midangin kan inhau tih an hre lem lo.

Chutia kan inkhak hnu chuan tlemin ka nu pawhin Rintei laka a rilru put dan a thlak ve deuh emaw tih mai turin a awm ve a, rei a daih ang em tih phei chu a hriat hauh loh thung. Ka nupui chu a ze ngai rengin a nung a, a duty zawh hnua in a thlen tawh chuan chau deuh mah se a kova a nghah tlat tawh avangin inchhung tih fai leh rawngbawl lam chu a khawih zawm nghal mai țhin a, a duty hun azirin rawngbawl hman loh țum erawh a nei fo mai; chutiang hunah chuan ka nu-in a bawl mai țhin.

Rintei nau paiin thla thum hmel a hmu ve ta a, insawiselna a neih tawh loh mai bakah a thil ei a tui chho êm êm bawk nen a taksa a inphut nalhin a vun a nung sar a, a lang hmelțha zual hle. Ka thlir ning thei meuh țhin lo a, ka lo en leh reng țhin.

Ni khat chu a tih ngai loh ang takin min rawn call ve teh mial a, zan lama a duty a zawh chiah avangin chu mi ni chu a day off(chawl) a, lo mu hahdam tura ka tih avangin vawikhat ka bia tih loh chu ka la be leh ta rih lo.

Khua a tlai lam tawh a, ruah a sûr cherh cherh bawk nen ka nupui bula awm thlahlelin haw ka châk zek zek tawh a, chutianga amah ka ngaihtuah rauh rauh lai taka min rawn be ta chu phur tak leh mak ti rilru deuh chung chuan ka chhang vat a.

"Hello..."

"Ruat..."

A aw chu a zawi hle a, ka'n nghak deuh naa eng mah sawi zawm lova a ngawih zui leh tàk daih avang chuan eng vanga min lo bia nge a nih tih chu ka zawt a.

"Ruat, khawngaihin..."

"Bawihte, thil țha lo a thleng em ni?" hlauthawnnain ka khat nghal a.

"Lo haw rawh..."

Thil dang a sawi tawh lo, ka biak pawha min chhan tàk miah loh avang leh a aw chauh hmel tak avang chuan ka ngaihtuah takzet a, hna pawimawh khawih laklawh ka neih tawh loh bakah kan inkhar tawh tho avangin Manger hnenah haw ka dil a, hmanhmawh ru tak chungin ka inkhalh haw nghal a.

In ka thlen chuan a lo reh hle a, tumah hmuh tur an awm lo. Rintei au chungin kan room-ah ka lut a, khuma ka nupui lo mu zawi ngiai ka hmuh chuan ka pan vat a, a mawng zawna thi kai ka hmuh chuan ka phu deuh zawk a. A thawmhnaw lah chu a huh deuh vek mai bawk si nen a ngaihna ka hre lo kher mai!

"Bawihte, engtin nge i awm?"

Chauh hmel zetin a rawn meng diar diar a, a chhing leh nghal daih a.

"Ruat, kan naute..."

Sawi zawm lovin a ngawi leh daih a, a mit sir ațang chuan mittui a rawn luang chhuak ngiai ngiai a.

"Bawihte, thil awm zia han sawi teh. Eng vanga i thi hi put nge a nih? I chungah eng nge thleng? Damdawi inah kal ang aw," a sama chulsak chungin ka ti a.

"Nau ka chhiat a niang!" a insût zui hlap hlap a, ka kuah vat a.

A chal dinglam sir deuh chu a thi ser ser a, a biang ki a pilh bawk. Step-ah tlu-in a lum zui a ni tih a sawi chu duhtawkin zawhna zawh belh tawh lovin a thawmhnaw huh chu theih ang angin ka thlaksak a, damdawi in lamah ka kalpui nghal a, kal pahin ka u Tluanga leh ka pa phone-in thil awmdan tlangpui ka hrilh a, damdawi in lama lo tlang ve nghal mai turin ka hrilh ve ve bawk. Inah khan ka nu ka hmu lo a, khawiah nge a awm tih zawng buai hman ka nih loh avangin ngaihsak zui lovin in kan chhuahsan a, Rintei thawhna hmun a nih avangin Civil hospital lam panin ka tlan tawp mai a ni.

Doctor-in Rintei a en vel chhungin ka pa leh ka u an lo thleng a, ka nau VL-a leh ka nu hnenah chanchin a hrilh tawh tih ka pa-in a sawi chuan ka nu awmna zawh ka tum zuau a, ka țhulh leh ta zawk a. Thil thleng eng emaw tak a awm ang tih chu ka ring a, Rintei dinhmunin a zir rih loh avangin ka zawt thui duh ta lo kha a ni a, hriat chian ka duh rualin hriat erawh ka nghakhlel fahran lem lo thung.

Nurse pakhatin min rawn koh chuan ka lut vat a, khuma ka nupui lo mu chu pan nghalin zawi tê-in ka au a, ka lam a rawn hawi ruala a mittui luang chu ka hmu chiang hle.

"Ruat, kan fa kha..."

"Shhh... Țap suh, Bawihte. I taksa a chak si lo a, i chauh zual phah ang e!"

"Mahse, naute kha ka chân phal lo asin!"

"Kan dam anga, Pathianin rem a tih chuan a dang min pe leh mai dâwn alawm. Tunah chuan muthilh tum phawt rawh, i dam țhat leh vat a ngai a nia," duat taka kuah chungin ka ti a, ka àwmah a hmai phumin a la inhnit faih faih a.

Doctor-in ka nupuiin nau a chhiat tih min hrilh khan a phuk a phak hre lo ta chuan chhiat lohtir hram dan a awm em tih ka lo zawt a, chhan ngaihna a awm tawh loh thu leh a chhul ziah a ngaih thu min hrilh ta kha a ni a, ka rin lawk ang ni mah se a taka han hriat tàkah chuan a mi den dan a dang zar mai. A chhul an ziat a, an tih fel hnuah nurse's sick room lamah an dah chho a; a thawhpui te an ni bawk nen kan buaipui ngai lovin a țhiante chuan an buaipui vek a, a thawmhnaw te an thlaksak vek hnuah an kalsan ta chauh hlawm a.

Ka pa leh ka u an lo lut a, Rintei muthilh hnu chuan khuate a thim tawh bawk nen lo va haw hmasa turin ka ti a, min hawsan chu an duh bik loh avangin mahni ngaihtuahna țheuh kawmin kan țhu ngawi ta kar hlawm a. A lumna lamah thil dang sawh pawi êm êm a nei lo a, a thi chhuak tam lutuk vanga a taksa chau deuh mai chu a nih avangin admit kher lova in lama inenkawl zawk kan thlang a, han mu hahdam phawt se, muangmara haw chu kan tum dan a ni.

Rintei muhil a lo harh a, haw thei tawh nia a inngaih avangin kan haw ta a. In kan thlena ka nu hmel ka hmuh chuan ka ngaihbel nge pha deuh dai hian ka hre pek a, kan chanchin pawh min zawt miah lovin ngawi rengin min lo en tawp mai a ni.

Inbual a duh avangin Rintei chu inbual nghalin a inbual zawh chuan mut leh mai a tum a, eng emaw tal ei phawt se ka tih avangin châk lo chungin thil tlem a ei a, a ei zawh chuan a mu leh nghal a, a bulah mu ve-in thil thlen dan chu ka zawt ta a.

"Ruah sur avang khan ka hmanhmawh deuh a, ka vawk chaw khai a rit deuh bawk nen ka kalna tur ka lo en chiang lo a, step huh nalah ka tawlh palh ta ni maiin ka hria. Ka tluk dan tak pawh ka chiang bik lo," a ti niah niah a.

Eng vanga ruah sur lai khera vawk chaw pe tura kal nge a nih tih ka zawh chuan min chhang mumal lo riau a, a mut chhuah thu sawiin a chhing zui daih a, ka zawt lui duh ta bik lo a. Zawt pawh ni ila a sawi leh duh dawn chuang lo tih ka hria; ka nu thil tih a tel tlata rinna ka nei tlat a, ani pawh zawt ila a sawi țha duhin ka ring lem lo. Zawh ve hrim hrim erawh ka tum tho a, min chhan dan azirin a inrawlh em tih ka hre thei maiin ka ring.

Rintei ka buaipui avangin inbual lovin ka la awm ta reng a, a muthilh chian hnu chuan tih harh hlau tak chungin inbual turin ka thawhsan a. Ka inbual zo, bathroom(kan room-ah hian bathroom a awm nghal) ațanga ka chhuah hnu chuan inhau thawm ni awm tak ka hriat avangin ka inha sawk sawk a, room ațang chuan ka chhuak ta nghal a.

"Ti lui lo la, ruahsur hnuaiah a kal bik miah lo ang! A rilru țhat êm avang hian eng mah a sawisel ngai lo a, i hmuhsitzia hi mimawl ber tan pawh hai theih a ni hleinem!" ka nau VL-a, thinur hmel taka a țawng ri chu ka hria a.

"Vanlalmuan, ngawi hmak rawh! Min va zah lo êm êm ve! I nu ka nih hi hre rawh. Khatianga i chachhuah mai mai tur kha ka ni lo," aw râwl vin taka ka nu-in a tih lai chuan ka va fin ve a, an bulah ka pa a lo țhu ngawi reng bawk.

"Ka nu chu i ni nameuh mai; mahse, ka nu i nih vang ringawt khan i tih dik loh kan hrilh thei lo che tihna a ni lo a nia. U Mama pawh hian sawi duh se chuan sawi tur a hre țeuh ang. U Rintei hi a fel êm a, kei ngei pawh hian u Mama thinur a khap dai lai hi ka hmu tawh a ni. Nang ang hi ni ve se chuan kan chhungkaw boruak hi a chhe tawh ngawt ang!" VL-a'n a ti leh fak fak a, ka nu-in a chhan let ve dawn lai tak chuan ka pa a rawn țawng chhuak ve ta a.

"A tawk tawh e. I nu a nih angin a dik lohnaa i sawisel a nih pawhin țawngkam vin hman loh hram a țha," tia VL-a a khap zawh rualin ka nu lam a hawi nghal zat a.

"Nang pawh Siami, i zia hi i thlak a ngai. Țul lem lova Rintei i khak ngawt țhin leh a tha chhawr i tum lutuk hi sim ang che. Hetianga mo țha hi an vâng teh mai a nia; a hnaa a buai êm êm chung pawhin a hunawl neih chhunah heti khawp hian inchhung a enkawl felfai thei a, lungawi lo hmel lah min hmuh ngai hek lo. I sim vat loh chuan i mo hmaa ka khak hun che a la awm ngei dawn a nia," a ti nghat nghat a, ka nu chuan a chhang ngam lo ni ngei tur a ni chhan châk hmel zeta ka pa melh chungin a tum buau a.

Țawng ve ka chak viau naa ka pa ber a țawng chhuak tawh a, thil awm dan kimchang ka la hre lo bawk nen ngawih ka chuh ta zawk a. VL-a len chhuah tum chu dangin ka nu leh ka pa an room lama an luh hnu chuan thil awm dan ka zawt chiang a, hemi zan tak hi kan boruak tawn vang nge a rui loh zan a ni hlauh a, a biak tlak ve fu mai.

Ka nu enkawl danin a zir loh luatah ruih theih thil a khawih nasa viau a, chutia a ruih hrat tàk viau hnu chuan a dil apiang pe țhintu ka nu nen ber chuan an inngeih hleithei ta der lo lehnghal. Chuti chung chuan a ruihna tur tam zawk hi chu ka nu rawlruk a ni tih kan hre ru tho a, a hlauh tlawn deuh tawh te pawh a ni mahna!

VL-a sawi hmangin ruah sur nasat zual lai takin Rintei chu ka nu-in vawk chaw pe turin a tîr a ni awm e! Ruah sur tlem deuh hun nghah deuh rih a rawt pawhin ka nu chuan pe nghal turin a ti tlat a, VL-a'n ruah sur banah pektir mai tura a lo hrilh ve tàkah chuan a tir lui ta bik lo a. A țhiante'n an rawn phone avangin VL-a chu a tlan chhuak leh ta daih si a, chu hun remchang chu chuhin ka nu chuan Rintei chu a lo tir leh ni awm tak a ni.

Vawk in hi inhnuai berah kan sa a, a in bulah a chaw chhumna pawh kan siam nghal a. Ka patea te awm lohna lamah kalna turin step kan siam a, vawk kan vulh lohna a rei deuh tawh avangin kan ngaihthah deuh a, kan step siam pawh a țawp hnawk tawh angreng viau mai. Ruah a sur nasat phei chuan a theh huh phak țhin avangin a nal thei hle a, kal fimkhur a ngai hle țhin.

Rintei chuan ka nu chu hnial tawh lovin vawk chaw pe tur chuan a kal ve mai a, a chaw siamna atan tuilum kan hman țhin avangin in ațangin tuilum khai chungin a chhuk a. Ruah sur vanga hmanhmawh bawk, thil a khai pah bawk si nen step nalah tawlh thlu-in a lum zui ta a, a lum thui lo naa a insawh nat deuh avangin naute pawh a chhiat ta hial a ni.

Harsa tak chungin inah a lut chho a, ka nu-in a lo hmuh chuan a hlauthawng leh si ni ngei tur a ni, Rintei chau taka thleng chho pawh puihna châng hre lovin kan kawmthlanga nurse pension ko turin a kal chhuahsan ta daih a. Thei leh thei lovin Rintei chu kan khumah a lo mu a, in ka thlen khan ka nu chu a lo la haw lo a, kan chhuah hnu lawkah kawmthlangnu nen chuan an lo haw ve ngei chu a ni awm e.

VL-a'n chanchin a hriat rualin ka nu vangah a lo puh nghal hmiah a, kan haw hma pawh khan an lo inhau fê tawh a lo nia. Khatia Rintei ka mutpui hlan khan ka pa-in thil awm dan a zawt a, VL-a'n ka nu thil tih dan chu zep lovin a sawi hmiah mai si, ka nu a lo insawi thiam ve bawk si nen an inhau zui a, an thawm pawh a ring chho ta viau a nih kha.

Ka rilru chu a insual buai viau mai. Hetiang renga ka nupui laka ka nu a awm a nih chuan ka insum rei thei hauhvin ka ring lo. Ka nau sawi ang khan ka thinur hi ka țawng chhuah lohna turin ka nupui hian min khap dai zauh zauh tawh a, kan inkhap zawh loh hun a la thleng thuai dawn tih a lang reng a, engtia tih chi nge ni ang tih chuan ka ngaihtuahna a ti buai a ni.

Rintei a dam țha leh tawh viau a, ka nu pawh a la ip rih deuh nge insiam țhat a tum zawk ni, huatthla la takin a che ta rih lo. Boruak chhia nei lem lovin kan khawsa chho leh mawp mawp a, ka u Tluanga'n rin loh deuhin nupui a rawn ru haw ve nawlh mai a, nau a pai avangin an rawn inhruai haw ve tawp mai a lo ni. A hmeichhe lamin ka u chu makpa atan an lo iai lo ve bawk nen rei rial lovin an innei ta vat nghe nghe a, a naupai lan hmaa inneih fel mai kha a hmeichhe lam duh dan leh an hmanhmawhna chhan a ni pakhat bawk.

Ka u nupui, Ramengi te chu an khawsa thei bawk a, a thil rawn chhawm pawh a pui tham khawp mai. An dawr pakhat chu Ramengi pualin an dah a, a rawn chhawm tel a nih ber chu. Amah pawh mi hausa fanu duat tih takah a no hle a, inchhung chet leh sekrek khawih velah pawh beisei tur awm miah lo ang chi kha a ni a, Rintei ko a zan phah lem lo hle.

Chutiang tluka mo țha chu ka nu tan awm hek lo le, a rawn awm tirh ațangin a ti țha êm êm reng a, Rintei nen a en dan inpersan lutuk chu mi pangngai tan hai rual a ni lo. Ramengi a vannei a, naupai la na chi a ni lo hlauh a, a dawr lamah a peih changin a kal țhin tih loh chu tih êm êm dang a nei lem lo.

Inrinni a ni a, Ramengi chu a naupai a len ve deuh tawh avangin dawrah a kal lo a, Rintei duty loh ni a lo ni ve chiah bawk nen VL-a tih loh chu kan awm kim ve țhap mai. Choka lamah chhun eitur siamin Rintei a buai zak zak a, ka thiam ang anga puiin ka zei loh êm avang chuan kan han nui dun leh rih țhin, buai viau e ti lo chuan kan hlim dun phian a.

Ramengi'n min rawn pui ve leh a, kan zei lo dun lutuk chuan kan ti buai zawk emaw tih mai tur a ni. A momo siama telh tur iskut eng ilo leh a soup siama telh tur tomato leh bahkhawr velte kan lo chanpui a, chu ringawt pawh chu kan chai rei dun hle.

Chutia mahni tawka kan lo buai laih laih lai chuan ka nu chu choka-ah lo lut ve-in Ramengi thil lo ti ve chu a rawn khap a.

"Engah nge khatiang te i lo va tih ve! A ti tur an awm reng a, nang chu lo awm hahdam mai mai rawh. Naupai lai chuan intih palh te a hlauhawm a, chet tam loh hram a țha ngai," a rawn ti bawrh bawrh a.

Ramengi'n, "Intih palhna tur a awm hleinem. Chubakah, ka ti ve chak mai mai a," a lo ti awlsam then a.

Ramengi hi inchhung chet a thiam lo leh chet tumna a nei lo tih mai lohah chuan amah hrim hrim hi a rilru a tluang reuh riau a, Rintei nen pawh an inkawm thei viau mai. Rintei pawhin phut enin a en bik lo a, mo țheuh țheuh an dinhmun inang lo lutuk chu a ruk tak chuan a rilru erawh a na ve viau-in ka ring naa eng mah ka sawipui duh lem lo thung.

"Fimkhur tluk a awm lo, va mu hahdam rawh. Rintei'n a ti vek thei alawm. Nang pawh Mama, khatia i puih fo vang kha alawm a phut ziah tawh che ni! Ti khan amahin tih tir ula, a siam zo vat mai ang," ka nu-in a tih chuan a hma ațanga lungawi lohna lo neih sa bawk nen ka sa ta phat mai le!

"Ka nu, ka nupui hian vawikhat pawh min la phut ngai lo. Ka duh a, ka pui a ni mai! Mihring ve tho a ni a, hah hre thei lo a ni bik lo. Eng lai pawha che reng tura i phut tlat hi mak ka ti ngawt mai che!"

"A tih tur a ni alawm, fanu ni lovin mo a nih hi!"

Ka nu țawng duh dan chu mak ka tiin a rilru put hmang chu ka haw takzet a, ngawih liam mai chu ka tum tawh bik hauh lo.

"A nih leh Ramengi hi i fanu em ni a nih? Mo ve tho a ni lo'm ni? Ani hian inchhungah hian eng te nge a tih ve țhin? Thleng a sil hi vawikhat pawh ka la hmu lo e!" ka ti ve ta sak sak a.

"Inang hek lo maw le! I nupui hian eng thil ropui nge a rawn luhpui ve? Aizawl milian fanu leh thingtlang pa fanu hi an inang lo lulai lutuk! Duat tur leh duat loh tur chu ka hre ve bawk," ka nu-in a tih chuan rapthlak ti zetin ka thaw hawk a.

"Chutiang zawnga i mo te i thliar hrang dawn a nih chuan i thu thu le. Amaherawhchu, hei hi lo hria ang che. He inah hian rei kan awm tawh dawn lo, i tih duhdah leh hmuhsit mai mai turin he inchhungah hian ka nupui hi ka chenpui tawh dawn lo tih lo hre rawh!"

"Ruat, duhtawk rawh..." Mangan hmel zetin Rintei'n min lo khap a, a mitah mittui a tling pam bawk. Chuti chung chuan a thlavang hauha țawng chhuah ve hi a hun tawh lutuk tih ka hria a, ngawih ka la tum lo nasa mai.

"Duhtawk lo e, kan ngawih reng avang hian a duh duha a tih kual tur kan ni bik lo tih hi hre ve tawh rawh se! I dawhtheihna hi fak tàk aruangin ka theih tak emaw tiin i lakah lal a hrawt a, ka ngawi tawh dawn bik lo," ka ti tlat a, Rintei chu hlau lo turin mitmeiin ka khap pah bawk.

"I nu leh pate aia thingtlang mi i thlang zawk duh a nih chuan i thu alawm. Khawiah mah he inchhung aia nawmna i hmu dawn chuang lo," ka nu chuan a ti hmak hmak a.

"He inchhung boruak rit tak hnuaia awm reng ai chuan hmun dangah awm ila, kan hlimin kan hrisel zawk ang. A hma daih khan hetiang rilru hi lo pu ni ila kan naute pawh kha kan chân lo tur a nia, ka fin a tlai ta deuh a nih hi!"

"I fa thihnaah khan min mawhpuh rêng rêng suh aw!"

"Mawhpuh hran i ngai hleinem, nangmah vang tih a chiang sa vek alawm," ka ti ve ta ngat a.

"Eng nge keimah vang a nihna? I nupui hi step-ah khan ka nam lum tiin min puh chu a ni êm lo maw?"

"Puh lo e, i nam lum lo tih ka hria alawm. Mahse, khatiang khaw chhe hnuaiah khan vawk chaw pe turin tir lui țalh lo la chuan ka nupui hi a lum lovanga, naute pawh kan chân hek lo ang."

"Ka tirh luih a ni lo, ama thu ngeia kal a nih kha!" ka nu chu dawtin a la țang ta fan a.

"Ka nu, dawta insawi fihlim chu tum duho mai rawh! Thil awmdan hi hre lo ka ni bik lo a nia. Ka sawi chhuah loh avang hian ka nupui chunga i khawsak dan te hi ka hre lo emaw i ti a nih chuan i ti sual khawp ang," ka ti leh hmiah a.

"I nu ka ni a, a chhe thei ang bera min puh kha i tih tur a ni lo. Nu chuan in tana țha tur bak kan ngaihtuah lo tih hria la, a tir ațang khan ka thu awih ni la chu nupui țha tak nei i ni mai tur a nia," ka nu chuan zam hauh lovin zuk la ti a!

Chhan leh ka tum zuau naa choka ațanga Rintei a tlan chhuah tàkah chuan ka umzui ve ta zawk a, sitting room lam chu a lo ruak hiai a, ka pa leh ka ute chu an room lamah awmin kan inhau thawm pawh an hre lo ni awm tak a ni. Hria ni se chu an rawn kal ngei ka ring a, ka pa phei chuan chhungkua inhauh a phal țhin loh avangin min khap tur tal pawhin a rawn kal ngei a rinawm.

Kan room-a ka luh chuan Rintei chu tukverh bulah pawn lam thlir niawm takin a lo ding a, a bulah kal hnaiin a hnunglam ațanga kuahin a lu-ah ka khabe ka nghat a.

"Ruat, khatiang kha nute țawng khum dan tur a ni lo asin!" eng emaw chen ngawi renga kan awm hnu chuan a rawn ti chhuak sep a.

"Ka hria alawm. Chuvang a nia kha chen i thlavang hauh pawha ka țawng chhuah duh ngai loh ni! Mahse, tunah chuan i laka a awm dan hi ka thlir liam mai mai thei tawh bik lo a, i hmaah ka ding zat zat zel tawh dawn a ni," ka tih chuan rilru pik hmel takin thawk a la halh a.

"Tih lungawi loh hlauvin theih tawp hi chu ka chhuah ve asin! Awmzia a awm lo lutuk hi ka bei a dawng ve ta lek lek mai. Thiam lohna ka nei em tiin ka inen let fo a, tih sual ka neih awm ka hriat loh avangin keimah hrim hrim hi min hua-in min ngaithei lo niin ka hre ta."

"Engah mah ngai suh ti ngawt mah ila i tan a har dawn tih ka hria; mahse, pal lui tur erawh chuan ka duh che a ni. Hneh hun chu i la nei ngei dawn a, eng tikah nge tih erawh sawi theih a ni rih lo. Tuna kan tana țha ber nia lang chu he in ațanga chhuaha in hrana khawsak a ni."

"Ni lo e, ka nu nena kan inkar a țhat hma chu he in hi kan chhuahsan lo ang," tiin min hnial ta tlat reuh a!

"Ka nu hi a insiam țha mai mai lo tawp ang, i hrehawm rei lutuk dawn asin!" ka tih pawh chuan a țanna ngaiah a țang tlat a.

"I pian tirh ata hmangaih leh duat takin a lo enkawl tawh che a, kei min mil loh vang ngawt hian a hmangaihna che a dai dawn chuang lo. Inrem lo chunga kan chhuak a nih chuan keimah vangin in nufa in ințhen hrang dawn tihna a ni a, chu thil a thlen chu ka duh lo a ni. Duat taka a lo enkawl seilenin mi dang vanga a kalsan a nih chuan nu hmangaihna thinlung chu zawm leh harsa khawpin a keh sawm dawn asin!"

Ka nupui hi hre chiang viau tawhah ka lo inngai a, a thusawi ka ngaihthlak zawh rualin ka lo la hriat chian tawk lohzia ka inhre nghal a. Nasa taka a duh lohna lantirtu ka nu laka a rilru put dan chu mak ka ti a, ka theih ve miah loh tur thil a ni tih pawh ka hre chiang khawp mai.

"Bawihi, he in chhungah hian ka nu vanga i hrehawmzia hi ka hria a, chhuah hi chak zek zek zawk tur i ni asin le!" mak ka tihzia chu ka thup seng ngang lo a ni e.

"Ka châk alawm! Mahse, châk ang apianga awm hi thil țha ber a ni lem lo a, kan chhuah avangin thil awm dan a țha lam zawngin a inher phah dawn te a nih ngawt si loh chuan heta awm hi ka la duh zawk e," a tih chuan ka tluk loh hmeichhe huaisen chu chhuang takin ka en ngawih ngawih a.

Rintei berin in dan a duh tàk tlat si lovah chuan chhuah lam pawh chu kan sawi zui leh ta lo a, a hma ang bawkin kan han khawsa chho leh ta chu a ni a, keimah zawk hian kan boruak chu ka kham takzet a ni.



***********


Chutia buaina dang êm êm tawk lova kan khawsak chhoh lai chuan chanchin ngaihnawm lem lo takin min rawn deng a, ka nu-in chhuang taka thenawm khawvengte hnena a chanchin a lo sawi țhin kan farnu, Delhi-a lehkha zira awm mek chu vai tlangval nena khawsa dun angin Delhi Mizo Zirlai Pawlin ka pa an rawn hrilh a. Pa azawnga hnam chhan ti na ber mai ka pa chuan a zirlai chu eng anga laklawh pawh ni se haw nghal turin a zu hrilh nghal hmiah a.

Mizo mipate hi Mizo hmeichhiate'n hnam dang mipa an kawp chungchangah kan thikthu a chhe êm êm a; taksa intawk hauh lo pawh ni se, hnam dang mipa bula Mizo hmeichhia hlim taka a nui ringawt pawh kan hmu tui lovin en hrehawm kan ti a, an nawm an màka khawih theiha an awm ngat phei chuan rilru a na-in thin a rim duh ngawih ngawih mai a ni. Kan farnu pawh chu țha takin Delhi Mizo Welfare leh Zirlai Pawlte'n hnam dang mipa kawp lo turin an hrilh a, an thu ngai pawimawh lova in khata a chenpui tàk hialah chuan ka pa beng a lo thleng ta a ni.

Ka nu bawk a buaithlak leh pek dawn! Hnam dang ngaihzawn chu changkannaa ngai tlat, an induh tawn phawt chuan a pawina a awm lo tih ngaih dan nei chi a ni a, Mizo thil aia hnam dang thil ngaisang zawk ta rêng rêng mi lo ni bawk nen, kan farnu Rempuii pawh hi ka dem lutuk lo e.

Rempuii a rawn thleng chho a, pa zaidam leh insum thei tih takah ka pa chuan hau nghal mai lovin a rilru lamletna'n țha taka titipuiin a thlem heuh heuh a, lehlamah ka nu-in hnam tih vel vang mai maia hmangaih leh duh berte hnawl a țul lohzia sawiin a țha lo zawngin a lo fuih ru ve reng bawk a, a tih dik loh mah ni se Rempuii rilru hah mangang chu a lainatawm letling hle.

Ofice chawlh a ni a, Ramengi chhungte zinga mi boral an awm avangin ka u te nupa chu ka nu leh pate nen an kal a, Rintei'n chawhma lam duty a nei bawk. VL-a chu a dan pangngaiin a room-ah music ring taka play-in a ri leh bur bur tawh a, Rempuii a room-ah a awm daih bawk si nen ka tih tur hre lo chu kan room-ah lehkhabu chhiarin ka awm a, ka lo muthilhsan daih lehnghal.

Kut vawt thlerin ka hmai a rawn khawih chuan ka harh a, ka nupui lo nui var var ka hmuh chuan ka pawt hnai rawk a, ka bulah muttir vein duat takin ka kuah a.

"Ruat, nau hi ka pai leh har tawh e! Ka pai leh thei tawh lovang tih ka hlau!" a ti sep sep a.

"Pathian thu thu a ni e. Țul a tih hunah chuan min la pe ve leh mai ang, lo hlauthawng lutuk lo la."

"Ruat, nau hi pai leh thei miah lo ta ila min țhen ang em?"

"Ka hmangaih che avanga nupui atana nei che ka ni! Fa min hrinsak lo pawh ni la, ka hmangaih reng tho che anga, ka țhen ngai bawk lovang che. Ka tana hmeichhe awm chhun i ni a, i ni reng bawk ang," ka ti a, a khabe-ah kuai dakin a hmuiah ka fawhsak zauh a.

Kei pawhin ka ngaihtuah ruk rauh rauh fo țhin a ni a, nau a chhiat hnuah kum a vei leh dawn tawh a, ka beisei aia a pai har tàk avangin check-up neih țha-in ka hre naa hunawl kan neih loh dun țhin êm avangin Rintei bulah pawh ka la sawi ri lem lo. Remchang hmasa bera hruai chu ka rilruk a, Pathianah innghat tho mah ila pâwngtâwng nghah ngawt lova lo in-check-up ve hrim hrim chu țulin ka hria a ni.

Kan unaupa pakhat hi hmeichhe lam doctor a awm tih ka ngaihtuah chhuak hlawl a, clinic neiin pantu pawh a ngah țhin viau a ni awm e. Tun hnaia kan inbiak ngai loh avangin ka lo mangnghilh daih mai a, chutia ka hriat chhuah tàkah chuan a phone number hmet chhuakin ka call ta nghal a. Tlai dar 4-a kan thlen theih chuan mi dang a en hmaa min en theih tur thu a lo sawi hlauh a, Rintei chu hrilhin kan insiam a, Rempuii hnenah thil awmdan sawiin a theih ang anga ei rawngbawl lo ngaihtuah turin ka chah bawk a.

Clinic kan thlen chuan doctor sawi ang takin mi dang luh hmain min luhtir a, test ngai ang angte ti nghal zung zungin uluk takin Rintei chu a en bawk a. Kan inchhun dan hi a kual deuh tawh naa kan inpawh țha-in kan inkawm nasa ve țhin a, unau hnai zawk țhenkhat ai pawhin kan inngaina mah zawk a ni.

Test result pahnih khat, ni hnih hnua lam tur tih loh chu a chhuak nghal a, amah Rintei-ah dik lohna a hmuh loh bakah result chhuakho a țhat vek avangin kan la pai leh mai tura a ngaih thu sawiin min țawng thlamuan luam bawk. Result dang rawn chhuah huna chanchin inhrilh leh turin kan chhuahsan a, a nutei te kan tlawh khat deuh avangin tlawh kawi ka rawt a, in lamah Rempuii a awm tho avangin hmanhmawh lutuk lovin kan leng khawmuang a.

"Ka fanu hi engtin nge rawngbawl tura i rin theih zawk le! Nanga chhungte tlawh duh vang mai maia i chet ai i pasal farnu che tura i ti hi i la inchhir khawp ang!"

Ka inbual zo, kan room ațanga ka chhuak chiah chuan ka nu țawng ri fiak țhak ka hre nghal a, hmanhmawh zetin an awmna lam panin ka kal a. In kan thlenin khua a thim tawh a, Rintei chu inbual hmasain Rempuii a la buai takin tiin puih tumin choka lamah a lo va phei hmasa a, muang chânga inbual ve nghalin ka va chhuah ve meuh chuan ka nupui chuan ka nu thinrim hmai sâ a lo hmachhawn leh ran tawh a.

"Ka nu, ka tih palh a ni e. Chawhmeh chu ka'n siam vat vat anga, a hmin har lo ang," tiin fridge awmna lam pan tumin a inher a.

"Tunah chaw ei a hun tawh a, chawhmeh siam hun pawh a ni tawh lo. Nangni leng puar rilțam lo vang khan kan inhrek rilțam reng peih hleinem! Inchhung chet vel hi i peih lo a nih chuan sawi la, awmpui kan la mai dâwn alawm," ka nu-in a ti leh hmarh hmarh a.

"Awmpui chu la ta che, Rintei'n hun awl a neih theih phah anga, a hahdam ve deuh tawh bawk anga, a țha khawp ang chu!" ka tih chuan ka nu leh Rintei chuan min en rual țhawt a.

"A tih hman tho te chuan pawisa heka awmpui neih a țul ka ti lo, a duty loh laiin tih tur eng mah a nei hleinem, mo a nih angin a tihtur chu ti mai rawh se!"

"Ka nu, mak ka ti khawp mai che. Mo i lo ni ve tawh țhin a, ka pi laka i vuivaina leh mo nih hrehawmzia i sawi fo a, i mo chu duat viau tur i nih laiin hrehawm taka awm turin i siam zawk tlat a, Rintei tana a hrehawm turzia hi i ngaihtuah ve ngai em?"

"Nu ber ka ni a, ka awm dan hi sawisel fo lo mai rawh u. Ka duh dan danin ka awm ang!"

"I duh dana i awm vang alawm midangin hrehawm an tawrh rêng ni! Rintei dinhmun hi i dinhmun ni ta se, nang chuan i tuar peih tawhin ka ring lo," ka ti ve ta hmak a.

"I nupui hi i lo țan ve hman ziah mai! Nangmah vang a nih hi zah pawh min zah loh zawh vek tawh ni!"

"Ka nupui hian a zah lutuk che asin! I sawisel hian vawikhat pawh a chhang let tawh che em? I thu hniala i chanchin a chhe zawnga vawikhat a sawi pawh i hre tawh em ni? Ngaihtuah chiang rawh, ka nu. Nangmah vang hian he inchhunga awm hi ka peih tawh lo; Rintei hian min hnial lo se chuan kan chhuahsan daih tawh ang che u," ka tih chuan rum zetin min melh a.

"Awm peih lo na nâ nâ chu chhuak daih ula a ni mai alawm. Hetiang mi changkang lo lutuk nena khawsak ai chuan keini pawhin nuam kan ti zawk daih ang!"

"Ka nupui hi hahdam tak leh nuamsa taka a awm theihna hmunah ka awmpui dawn khawp mai! Kan chhuak ang a, i inchhir hun erawh a la awm ngei dawn tih kha lo hre reng bawk ang che."

"Eng thil nge ni leh ta hluai țhin a, țawngkam vin in hman leh tàk vak mai ni?" ka pa chu chokaa rawn lut vein dawhkan bula chair-ah chuan a țhu nghal a.

"I fapa hian zah lo taka min țawng khum hi a ching thar a, zilh deuh a ngai a ni," ka nu'n a lo ti hmak a.

"Siami, i fate hian zah lo taka an țawng khum che hi a tam lo viauvin ka hria! I fate bula sawi ngai lo tura fimkhur tur hian a hma pawhin ka hrilh tawh che a, tun bak hi sawi ngai tawh lo rawh se," tia ka nu hnena a sawi zawh chuan ka lam a lo hawi a.

"Mama, ka thu lo chuan he in ațang hian in chhuah ka phal dawn lo. Nula kan hnena awm tur ngaihtuah la, Rintei hian a hna bak thil dang ngaihtuah tawh lo se, hahdam ve tawh rawh se. I nu inhmuh chhuah hun ka nghak a, ka nghak chhuak zo ta lo a nih hi!" a tih zawm zat a.

Ka pa aw chu vin lo mah se a lung a awi lo ve hle tih a hriat mai a, ka nu pawh a ngawi ta dâk mai. Rintei a hmuhsitna hi a reh nghal mai lovang tih erawh ka hria a, eng tikah emaw chuan a la inchhir ngei ang tih erawh ka chiang thung.

Chuta țang chuan ka nu pawh Rintei lakah a inluling ngam lutuk ta lo a, nula kan nei ta bawk nen Rintei pawh a hahdam ve ta viau a.

Rempuii zirlai a laklawh avangin chhuk leh a hun tawh hle a, ka pa lah chuan hnam dang mipa kawp tura chhuk leh ai chuan a zirlai pawh zir zawm lo mai turin a ti hmiah mai si a, Rempuii a mangang viau mai.

Rintei nen an inkawm ngei phian a, a ngaihzawng chungchang pawh mi dang hnena a sawi duh loh țha țha Rintei chu a hrilh vek zel a, Rintei pawhin kawm dan tawk thiamin a ngaihzawng bansan tura zawi zawia a rilru hneh tumin a bei ru ve reng bawk. Hnam dang pasala neih pawizia a sawipui fo a, mahni hnam phatsanna dik tak a nih thu te hrilhin amah leh a fate pawh Mizo anga en an nih tawh dawn loh thu te chu a hrilh ve malh malh țhin a, Rempuii rilru pawh a hneh chho ve hret hret niin a lang.

Chutia Rintei nen muk taka an titi fo tàkah chuan Mizo hmeichhia, hnam dang pasala neite dinhmun chu hre chiang telh telhin a fate nena Mizo an ni ve tawh lo tur chu rapthlak a ti a; a ngaihtuah chiang a, hnam phatsantu anga a indah chhin ringawt pawhin a ngaingam lo a, a hnam dang bialpa chu kawp leh tawh miah lo turin thutlukna țha tak a siam ta mai rêng a.

Ka pa hnenah rilru thar pu chunga a zirlai chhunzawmtir leh tura a dil chuan ka pa ngaih a la ngam zan lo deuh a, Rintei'n rin ngam a nih tur thu leh kaltir mai tura a lo ngenpui ve tàkah chuan ka pa chuan a remti ta hram a, Rempuii chu a lawm kher mai. A intiamna ang ngeiin a bialpa chu a kawp leh ta miah lo bawk a, țha taka a zirlai a zawm leh theih thu a rawn sawi chuan ka pa pawh a lawm ve vur vur viau a.

Ramengi nau neih a hun a, a vei tirh ațanga a neih thlengin Rintei'n a vil chawt a, damdawi in ațanga a rawn chhuah hnuah pawh a buaipuitu ber a ni zui a, ka pa pawhin a riin ka nupui chu a fak ve ta fo mai. VL-a lah engtin nge a tih pawh ka hre bik lo, Rintei nen an inkawm tak fo hnu chuan a rui ngai ta lo mai ni lovin in lamah a tawm tam ta zawk a. Rintei'n ka pa hnenah a hunawl hnawh khahna atan a tuina ber studio siamsak turin a sawipui a, Rintei sawi a nih vang nge ka pa chuan hnial hauh lovin a siamsak a, VL-a nungchang hmuh theiha danglamin a hnaah a tui bawk a, pantu pawh a nei tam chho hle a ni.

Ka nu pawh a danglam chho ve hret hret a, Rintei laka țhat han chhuah erawh a la hreh hle thung. Amah Rintei berin hmanhmawh lova nghah a ngai a tih miau avangin ka ngawihsan ta mai mai a, țawngkam dengkhawng leh tawrh hrehawm lutuk ang khan a țawng khum ngai ta lo bawk nen boruak pawh a zia chho viau mai.

Kan inentirna result kha a țha vek a, kan la inhamtang fuh rih lo mai mai a nih ringin ngaihțha takin kan awm leh ta rih a. Chunglam thiltih theihna nghah tawp mai chu țha berin kan hria a, țawngțaina nen kan dilna mal a sawm hun kan nghak ta tawp mai a ni.



TUNAH CHUAN...

Che thei lovin ka nu a awm ta chiah a, Rintei felzia leh dawhtheihzia chu ka nu tan pawh haider luih chi a ni ta lo. Mamawh nei hlek se Rintei hming a lam hmasa ber zel a, a duty a lo haw har deuhte hian a lo lam hman ziah bawk.

"Rinte, khati khawpa i laka ka nunrawng chung khan engtin nge hetiang hian ka chungah i la tih theih? Min hua-in min buaipui duh miah lo pawh ni la ka dem hauh lovang che," ka nu-in a tih chuan Rintei chu a lo nui mai a.

"Ka nu, ka hmangaih min hrinsaktu i ni a, ka tan hian i hlu êm a, ka haw phal lo che alawm!" Rintei'n a tih chuan ka nu hnuk a ulh a.

"Hetiang êm êma mihring rilru țha leh tluang hi hre reng chung si khan engtin nge ka lo haider luih reng theih chu le! Ka lo va han nunrawng tehlul em!" mittui tla zawih zawih chunga ka nuin a tih chuan Rintei'n a kuah vat a.

"Thil kal tawh chu sawi tawh lovang, ka nu. Tun hun hi a pawimawh ber a, tuna kan hlim tlan chuan a tawk mai alawm. Inthiam lohna rilru pua i awm kha ka duh miah lo a, hlim leh inpawh tawn taka duh ka nei lo a nia," Rintei'n a tih chuan ka nu hmelah nui hmel a lo lang a, a mitah lawmna mittui a lo luang ngiai ngiai bawk.

Ka nupui hi ka nupui a ni lovang tih ka hlau a, a pasal ka ni lovang tih ka hlau hle bawk. Tawrhna leh chhelna phenah hnehna a awm tih min hriattir a, hmangaihna hlutzia mai bakah nu leh pa leh fate inkara inpawhna awm pawimawhzia min hmuhtir bawk a; rei tak khaw chhiat hnua khaw țha chho tawh tur lantirna atana chhimbal a rawn zâm ang maia mawiin kan in chhung chu a kap eng a ni ber e. Țawngkam chapo leh dengkhawng aiin țawngkam nem leh hriatthiamna tawngkamin mi fel lote hnenah thu a sawi ring zawk a ni tih a taka min hmuhtirtu a ni a, fate tana nu leh pa zahawmna min hmuh fiahtirtu a ni bawk.

Ni khat a hna kal lo haw chu ani leh ni lo ang takin a rawn chau haw hle a, chawhnu lam duty a neih avangin thim hnuah in a rawn thleng chauh a, room-ah lutin a intih fai hnua lo chhuak leh mai tura ka ngai chu a reh ta vang vang mai si, ka ngaih țha lo chu ka va lut ve ta a.

Khumah chuan a thawmhnaw ngai nen a lo mu zawi reng a, ka koh chuan chauh hmel zetin a rawn meng chhuak a, engtin nge a awm tih ka zawh chuan a chau satliah mai a niang a ti tlat a, kei erawh chutianga a awm ngai loh avang chuan ka ngaih a țha lo ang reng hle thung.

Zan lamah chuan rinai takin a harh țha leh ta phian a, ka u te naute a tlei țhat duh loh avangin kan meng rei ta phian lehnghal. Zinga ka harh chuan a lo tho tawh a, la mu reng chung chuan bathroom-a a thawm chu ka ngaithla pah a. Pawr fapa a rawn chhuak ka hmuh chuan inperh tho vatin ka pan hnai nghal a.

"Nimin lama ka thil ei kha ngeih loh ka nei nge ni nimin tlai ațang khan ka dik thei lo rêng rêng, tunah lah ka luak leh nghek bawk sia, thingpui dawra an thil siam hâng lutuk țhin hi ka zo lo deuh a nih ka ring," a ti niah niah a.

Khum lamah hruai pheiin ka mutpui leh a, rei pawh a la mut hma chuan a luak chhuak chuan rawn nawr lehin bathroom-ah a tlan lut leh ta nghal a.

"Tun thla i period tawh em?" ka tih chuan phawk zetin min en a.

"Aih, la period miah lo! Awi.. Engtin nge inrinhlelhna chang ka lo hriat miah loh theih le!" tih pahin khum sira drawer chu a pawt hawng nghal a, test kit chu la chhuakin bathroom-ah bawk chuan a lut leh a.

Hlim hmel pu chunga a lo chhuak chu zawhna zawt mitmeng nen ka lo en reng a, a lu a buk tàk nghatah chuan hlim zeta inkuahin kan nui dun hawk hawk a.

Kan chhungte pawh chanchin kan han hrilh chuan an hlim ve ngei mai. Malsawmna petu hnenah lawmthu te sawiin kan ri ve hlut a, Rintei hlim hmel mawlh mai chu thlir nin har ka ti a ni.

A nau pai hmasak leh tuna a nau pai chu inang lo tak a ni! Ka nu-in ei tur țha a ei kim loh mawlh a hlau a, eng ti thei si lovin ka pa leh ka ute kal chhuak chu thei leh eitur țha nia a hriat a chah leh țawk mai țhin a, ei sen lohin kan room-ah a dahtir leh nghek mai țhin. A hma ang lo takin tun țum a nau pai chu a la na lo hle a, thil a ei țha-in amah pawh a thau mum kâng reuh a, a hmel pawh a hma zawng aiin a țha emaw tih mai tur a ni.

Harsatna leh buaina êm êm tawk lovin tluang takin nau neih hun kan thleng a, Lalpa'n fapa duhawm zet min pek chu ka nu-in a hmingah 'MALSAWMHLUA' tiin a phuah a, Rintei vanga malsawmna kan dawn zawng zawng leh chhungkaw inpawhna hlutzia min hmuhtir avangin chumi chang chawi chuan a phuah a ni a, kan pawm tlang hle mai.

Hlimna hi hawiher changkang leh hausakah te, zir san leh nihna sang tak chelhah te a innghat lo a, chhungril ațanga țhatna lo chhuak leh hmangaihna dikah te, dawhtheihnaah leh midang hriatthiamnaah zawk hlimna tluantling a awm a ni tih ka hre thar zel a, nun awmzia min hmuh chiantirtu ka nupui chu ka hmangaih zual zel bawk.

Thinlung inpawh tlâng tak leh inhmangaih tawn taka awmna inchhungah sual leh thil țha lovin hmun a chang mai mai thei lo tih a takin ka hmu chho zel a, rilru thianghlim tak pu chunga khawvel hmachhawn dan pawh ka zir chho ve mek zel a ni.

"Bawihtea pa, lo mu ve tawh la," tia ka nupui min ko ri ka hriat chuan ka ngaihtuahna ațanga harh chhuakin ka nupui leh ka fapa bulah chuan ka va mu a, ka nupui sira kan fapa tui taka muhil lai biangah chuan fawhsak leh zauhin ka nupui chu ka kuah a, inhmangaih tawnnaa khat liam chungin zan mu kan chhing ta siai siai a.



**************