2!3! BY Msi Miluhlulnui (Completed)

Episode nei ho a hlawm a dahkhawmna
Ngaia
Site Admin
Posts: 25813
Joined: April 30th, 2016, 4:07 pm

Re: 2!3! BY Msi Miluhlulnui (Completed)

Unread post by Ngaia » December 20th, 2020, 3:06 pm

2'3' #EP-13

By : Msi_Miluhlulnui 👩🏻
(Hmeichhe Naupang Tereuhtê🙃)





"Min chhang let rawh, min hmuh i hlau ani lawm ni" ka hmui bul chêtah chuan a rawn ti thâwp sup a, ke pên ri lah chu a hnai zel bawk si. Ka hlauhthawn lutuk na avang chuan keimah zawkin ka han fawp hmasa chawt a.





A nui ri suk a, a let ka dawng nghal zat bawk.
"Tenawm lutuk, hmun dangah in kal thei mai lo em ni. Mahni pawh rawn insawi ve tur alawm, tenawm dun lutuk" ti a sawi ri chu ka hre chhunzawm zata. Ke pên thawm chu a hla nghal tial tial bawk.





A reh deuh hnu chuan a âwmah chuan ka nem vak a, rum nghutin min thlah a, ka hmui hi a sa nghal ham ham mai. "A tawk a kal tawh" ka ti thâm chhal a. Ka thâwk ri a rang lutuk ringawt.





Ka hmuiah chuan a rawn fâwp leh zeuh a. Ka dar ah chuan a khabe a rawn nghat nghal bawk a. Ka tîm zui nghal châwih bawk. "Kalsawn tawh rawh" tih pahin a dar ah chuan ka nem a, mahse chhe te in a chesawn eih duh chauh.





"Kal tawh rawh ka tih chu" ka ti leh hlak a, ka kâwngah chuan a ban a rawn rawlh lut a, nghet lutukin min kuah nghal bawk a. Min kuahna kut chu tih thlaksak tumin ka vuan ve sek bawk a. Mahse ka thei lo, min kuah nghet lutuk mah mah a ni.





"Min thlah teh, ka kal a ngai tawh ania" ka ti leh a, a rûm zui nghut a, ka nghawngah chuan a rawn fâwp zeuh a, ka mur lehnghal chuai bawk. "Ka zawhna che ila chhang lo" a rawn ti thâwp sup a. Van hneawm tak.





"Zawhna chhang tur che in eng zawhna mah min zawt hauh lo" ka ti a, a rawn nui chhuak hawk mai.





"Takzet!?" a rawn ti chhuak deuh hawk a, ka sam chu a hnîm nghal veng veng bawk. "Takzet e, zawhna min zawt lo.. " ka sawi zawh hma hmaa a thu rawn sawi avang chuan ka tawp zui chut a. "Min ngai em? " a rawn ti nawn leh sup bawk.





"Eng thu nge maw i sawi le, i â tawh anih kha" ka ti a, huizz.. Ka țawng hi tinge a fuh theih miah lo le.





"Nia ka â tawh, nang hian kum tam tak chhung chu min bual â tawh. Chuan ka zawhna che kha nichinah pawh zawh i ni tawh. Mahse chhanna ka dawng lo a, zawhna min zawt lo ila ti zawk a" a rawn ti hluk a. Tlem in min kuahna chu a thlah dul deuh a, mahse tlem tê chauhin a ni.





"Ka chhan loh che chuan ka ngai lo che tihna a ni mai alawm" ka ti a, awm ngilin chiang zet hian min rawn en a, ka mitah tak min en hian chawp leh chilhin ka zâm na hi a rawn chhuak nghal țhin ni maiin ka hria. Tunah pawh ka ni leh chiah.





"Dawt.! I hmelah khan engkim chu a lang vek alawm, nang hian min ngai a ni tiraw? " a rawn ti leh a, "ka ngai lo che ka tih tawh chu mawle, enge min zawh seka, i âwih loh leh i thu ania" ka ti a. "Khawmaw ka kal duh tawh min thlah tawh rawh" ka tih zawm ta zat.





Hetia kan awm reng hi chuan ka in puang leh vat ang tih ka hlau tlat.





"I kal ang, mahse chhanna ka hmuh hma chu i kal thei lovang" tih pahin min kuahna chu a ti nghet sauh a, rum lutukin ka melh nghal bawk.





Ka ngei bawk si, ka thinrim bawk si. Ka dâwt sawi a hriat ka hlau bawk si. Diktak chuan vawiin khan ka ngaihtuahna a chhuahsan lo tluk a ni a, intih thawven nan hla te play in inchhung pawh ka tifai hrep a nih kha.





Engtik laiin nge hepa hian ka ngaihtuahna leh thinlungah hmun a chan ka hrelo. Ka hriatna ala rei lova, a awmdan hi chu haw tawh tur ka ni, midangin ti ta se, ka report daih tawhin ka ring. Mahse a ni erawh chu dan chu sawi loh, ka sawisel lova, ka lo dawngsawng țha em em zawk țhn si.





"Thudik tak sawi mai la, Duati. Vawiin khan min ngaihtuah a ni tiraw? Keimah ang chiahin, ka ngaihtuahna i chhuahsan loh tluk ang chiahin" a rawn ti leh sup a, ka chalah chuan a chal chu a rawn nghat a, a fawp nghal vang vang bawk.





Ka thin hi ring takin a phu dup dup a, ka zâm lutuk hi awm dan tur ka hrelo a ni. Hetiang em em hian mipa ka hnaih ngai lova. Kima kha chu a hming ve mai chauh a ni. Hnaih lutuk tih tur ang pawn kan awm ngai hauh lo.





"Duati" a rawn ti leh, mahse, kei hian ka ngaihtuah tih leh ka ngai tih ka sawi chu enge a pawi vakna tur awm ang, thudik sawi ila engkim chu a fel vek mai ang. Mahse ka vawikhat sawina tur a ni a, ka zâm a ni, chu pawh hepa hnenah kher hian ala ni zui.





Ngati nge maw ka ngaihtuahna ah te alo awm a, ka lo ngaih kher kher le, he thu hi sawi chhuah ka ngam lo asin mawle. Mahse sawi turin ka kawchhung lam hian min tur ut ut si. Zanin hi ka haw takzet a ni, lo kal lo ula țha tur ania.





"Duati" a rawn tih nawn leh a, ka thaw chhuak hak, ka zâm lutuk hi sawi ngaihna pawh ka hre lo. Ka kâ chu ka âng zuai tawh. Mahse ka chîp leh a. Ka sawi ngam thlâwt lo a ni.





Min kuah reng chung chuan "sawi chhuah a harsa viau em ni, i sawi anga, a zo a ni mai. Dâwt sawi i inhmeh ve hauh lo ania" a rawn ti thâwp sup a. Na zet hian ka thaw chhuak bawk.





Min kuahna a phelh dawna ka hriat rual leh ka kâ ka ân lai ka hre hauh lo. "Ka ngai che" tih chu ka kâ ațang hian a rawn ri chhuak ta phawng a. Keimah zawk zawk chu ka meng phâwk mawle, kha thu kha ka sawi chhuak, ka sawi chhuak chiang lutuk, awi! Ka zak leh hnuhnawh.





"Sawi nawn leh teh" nuih deuh reuh pah hian a rawn ti leh sup a, a nui ri zui nghal suk bawk. Ka zak lutuk hi ka sa pup pup a ka biang hi a sen țawn țawn in ka hria. Engtik laiin nge ka kâ atang khan a chhuah ka hrelo tak tak "Duati" a rawn ti leh hluk. Amah chu muangchang hian ka han melh a. A êng sût sût ni maiin ka hria.





Hmui phun chuan "sawi nawn leh rawh" a rawn ti a. A hmel ka hmuh ringawt pawh hian keimah ah inrintawkna min thlen thei.





"Ka ngai che, chuan ngaihtuah pawh ka ngaihtuah che" ka ti sap a, ka sawi zo chu ka kûn nghal daih bawk.





Mahse ka khabe ah chuan rawn vuanin min kuai dâk a, dîm zet hian ka hmuiah chuan a rawn fâwp ta vang vang a, ka thaw huai thei.





"Ka lawm e, nang ai nasa in ka ngai bawk che a chuan, sawi nawn leh la...." ka hmui bul chêt ah chuan a rawn phun sup a.





"A teuh lo lutuk!" ka ti nghal nghek a, a rawn nui chhuak hawk mai. "Ka sawi ngam loh ka sawi chhuak ania, nangmah vang vek. Enge ka ngaihtuahnaah te ilo awm ve, ka vawikhat sawina ala ni zui" ka zak lutuk chuan ka ti chhuak ta ringawt.





"I vawikhat sawina maw!? " mak tih hmel zet chuan a rawn ti a.





"I ninawm, khawmaw ka kal dawn, awmsawn rawh" ka ti a. Min kuahna ațang chuan awlsam zetin ka tal chhuak a, min man leh hlauh lutuk avang chuan rang lutukin ka tlanchhuak nghal bawk.





Ka zak lutuk hi engtia awm tur nge ka hrelo. Tinge kha thu kha ka lo sawi chhuah kher kher le, ka van zak tak, ka sawi tawh ngai lovang. Ni lo, ka sawi tawpna ni teh se. Ka zak lutuk ringawt. Hmeichhe dang te hian sawi te hi an zak ve ngailo amaw ni le ka ti ta rum rum.





Ka biang sa hut hut chu ka tuai vak a, ka biang chu dawmin zâwi lutukin ka au chhuak vak bawk. Khapa bulah khan ala ni kher zui lehnghal bawk si a, ngati nge maw ka lo sawi chhuah thawt thawt le.





Inchhungah chuan ka lut a, ka țhiante lo dinna lam chu ka pan nghal bawk. Nichin thil thleng avang khan ka awmdan hi ala pangngai thei lo, keimah hi ka ni deuh hûi mai. "Lalzual, ngati nge i biang kha?" Feli chuan rawn tih pah in ka biang chu chiang fahran hian a rawn en a, a ngaihna hrelo zetin ka melh chho.





"Engtin nge a awm? " ka ti nghal hû bawk.





Ka biang chu a rawn khawih a "helai tê hi a sen rapthlak, tinge a, an beng che ami? " a zawhna avang chuan ka nui ringawt a. "I mawl ami? Tu pawh party boruak avang hian an hlim em em a, chuta kara lo in ben te chu a...." ka ti zui hlak.





"Enge ania lawm, a tai têk bik lehnghala" tih pah chuan a rawn khawih leh kher a, a kut chu ka lo dahthlak sak nghal vat a. "I ho emai, a sen mai mai aniang" ka ti a, ka hmaa min en reng tu avang sawn ka awmdan a dik leh tawh lo reng reng.





Min en reng chung chuan a nui a, midangin an rawn be chhunzawm nghal daih bawk. Țha lutuk ti sawn be char char rawh se, duh ang pawn party boruak pawh ka feel ve thei lo.





Kima te kha an lo luh lai bak kha chu ka hmu tawh lo hrim hrim a, an awmna pawh ka ngaihven zui chiam lo bawk, tlem tlem in party boruak nawm na chu ka pawh ve deuh tawh bawk.





Kan haw dawn chuan kan thawhna pu ber chuan lawmthu min hrilh sap sap hlawma keini pawn nuam kan tih thu kan sawi ve leh chiam bawk. Kan pu ber hi fel viau lo sela chuan an dawrah pawh hian ka thawk thei bik hauh lovang.





Min thlah an duh thu an sawi chuan kan hnial vata, haw na tur kan nei ve reng tih thu kan sawi chuan an vui deuh ti tih bawk. Ramhluna nu chu thlalak ai pawhin a takah a hmelțha zawk daih bawk.





Kan chhuah dawn chuan Ramhluna te dinna chu kalpel a ngai bawk si, ka huphurh bawk si, uluk zet hian min melh lehnghala, min ti zâm lehnghal vek tawh. Hla tak ațang pawh hian keimahah nghawng a nei na takzet.





Kan kalphei țham țham lai chuan a zâwn a hmeichhe kal te chuan an be luam zel bawk a, engtin nge a bulah sawn panngai takin an țawng theih vek bik le. An zâm ve theilo amaw ni.





Engtin mah ti lo a kalpel ka tum chu amah zawk chuan ka kut chu a rawn vuan zawk a, nghet takin a hûm hmana, mahse a thlah lehnghal daih. Mak ti zet chuan ka en nghal hâw a, a lo bu nghut ringawt.





An haw na turah chuan an chuang nghal sap sap a, kei erawh Remruata min thlah bak ka duh lo khapa, Cv-a an tih teivet lah kha, min thlah tir phêt an tum a, ka duh teuh lo lutuk ringawt. A hmel te kha ka râp zawk e a.





Ka chuang tur chiah an in lam ka hawi phei leh chu bathlâra Kima lo ding reng chu ka hmu a, ka lam chu alo hawi char char bawk. Ka nuih sak a, a ke a rawn pên leh tur chiah chu a hnungah chuan hmeichhe pakhat a rawn ding a, a bânah chuan a vuan nghal chat bawk.





Chunu chu a en nghal vat a, kei erawh chu an pahnihin min rawn hmuh ka hlauh em avangin car chhungah chuan ka țhu lut vat a, tlan nghal turin ka hrilh nghal bawk.





Zingah chuan lu na burin ka tho chhuak a. Ka sira lo mu hlûn ka hmu chu ka au chhuak nghal chiam bawk. "Enge a?..." Feli aw ri in ka hriat rual chuan ka thaw chhuak hak a, ka âwm chu ka dawm nghal vat.





Tuna alo awmdan kha, a hmel a lang thei bawk si lo. A sam in a hmai a hliah veka a nghâwng chin hnuailam zawng chu puanin a khuh vek bawk a. Hlauhawm tak a ni ringawt. Thawh vela hmuh atan chuan a lawmawm teh chiam lo.





"Feli tho rawh, hna kan tlai dawn ania. Tho nghal rawh. Nakinah i rawn buai leh chung ange, mut dan i thiamlo ropui si" tih pah chuan ka sâwi a, a harh duh loh avang chuan ka tho zui nghal daih bawk.





Kan insiam pah chuan nizan chungchang kha kan sawi duna nuamlo a tih thu hlir ringawt a sawi lehnghal. Nizanah kha chuan a nuam ti ber ber ah a țang reng sia. Henu zet hi zawng ka hrethiam thei dawnlo a nih hi.





Nilengin hnaah kan buai leh a nizan kan thawh tur kha party boruak avangin kan thawk leh ta si lova, hna a inthuah a ni ringawt. Hrim hrim in tunlai chu hnaah kan buai thei hrim hrim.





U Saia pawhin hma a sâwn zel thu min rawn hrilh a, chu thil bak bak a ka tana lawmawm chu a awm lovang. Ka pa hmu ngat ila chuan ka huatna leh hlimna a inchawhpawlh nuaih in ka ring.





Thil lo thlendan kimchang ka hre chak a, ka nu nen engvanga awmdun lo nge an nih tih te, engvanga ka nu kalsan a ni tih te ka hre chak takzet a. Tin, pa ka nei tawh dawn bawk a. Ka hlim dan tur hi ka sawi thiamlo zawk.





"Zual, zanin kha Remruata'n thil ei chhuak ang u a tia eng emaw a tawng aniang" lunch kan ei lai chuan Feli chuan a rawn ti a.





"Thil eichhuah in ti reng a, ka hman lo ania, zan thum lai chu hnaah ka kal tawh lo, boss pawh hian min bân țep tawhin ka ring, zanin chu ka hman lo, zan dangah in sawn thei mai lo em ni? " ka ti chhuak hap a, tinge maw ka hman loh zan hian thil ei chhuah hi an tih ve ziah țhin ni.





"Ka hre bik lo, ama thu thu a ni mai, ka lo zawt chhin ang, i buai thei si. Thil ei chhuah pawh i hman tawh ngai lo" lungawi lo zet chuan a ti a, ka chhang lo, kei hi ka buai tih piahlam a ni, ma harsatna hi ka țiante hnenah ka thlen thei ngawt si lo.





Eitur kan nghah lai chuan phone chu ka lo khawih mial mial a, news chu ka en pah bawk. Ka thlalak download chu ka nghak a, a rawn lan a ka zoom rual chuan ka ni nghal nghulh mai. He thil hi nizan ami kha a ni lawm ni. Mahse tianga an awm lai hi ka van hmu lo ve.





Ramhluna chuan a bialnu ni ngei tur țap pur-i chu a kâwngah chuan a vawn sak a, amah hnaih zet chuan a kuah bawk a, a biangah chuan a fawh sak a, chumi lai tak thlalak chu tunah hian ka en mek bawk.





Nizan khan hetiang hian an awm pawn ka hrelo. Mahse tinge henu kâwngah te hian a vawn saka a biangah te hian a fawh le, bialnu ka nei lo a ti bawk si. Dawt min hrilh a ni chiang mai. Hepa hian tinge henu kâwngah hian a vawn le.





Thlalak chu ka zoom kual chhen a, ka ngaihtuahna ah ka kâwnga a vawn lai te, ka bianga a fawh lai te a rawn lang a, phone chu dawhkanah chuan ka thehthla nghal tawp a, Feli chu a phu zawk a. Mahse ka ngaihven lo.





Hepa hi! Bialnu ka nei lo a ti ve si a. Tinge dâwt min hrilh le, a biangah te a fawh sak vel a nih chu. Bialnu ka nei lo de dei dei te a ti vela, mahse a nei reng sia, an thu ziahah pawh an inhmangaih thu leh an inneih tep tawh thu an ziah hi, tenawm lutuk, dawt min hrilh vela.





Ka phone chu ka la leh lawk a, ka tho zui nghal bawk. "Khawnge i kal dawn? Eitur a lo thleng țep ania" Feli chuan a rawn ti nghala. "Ka ei lo mai ang, ka kal dawn, a man chu ka lo pe mai ang" ka ti a.





Hmanhmawh lutuk chuan ka tlanchhuak nghal bawk. Keimah min kuah angin a kuah ve a, a biangah te a fawh saka. Dawt te min hrilh vela, ava han châk dawn lo tak. Dawt mai mai min hrilh tur hi ka ni lo hrim hrim.





Hnathawhnaah pawh min be țawng zo mang lova, engvanga hetianga awm hi nge maw ka nih le, kei hian ka thîk em ni? Ni lo, ka thîk lo, ka thîk lo hrim hrim. Hepa hian dâwt min hrilh a chuvang chuan ka lungawi lo mai a ni.





Ka phone chu ka switch off hmak a, an thlalak a tam lutuka, ka en peih loh vang a ni mah zawk. Khawiah pawh an post vek ni maiin ka hria. Khatiang thlalak nalh lo tak tak kha post a țul vak lo asin mawle, țullo lutuk.





Zanah pawh hnaah ka kal lova room-ah ka tawm char char ringawt. Hetianga ka awm chhan lah hi ka hre hauh lo lehnghala, lo lungawi loh vak chhan tur pawh ka nei tawp si lova, mahse an thlalak kha nalh lo ka tih vang nge ka hmuh ngam loh vang zawk le hetianga ka awm nachhan.





Thîk turin inzawmna kan nei bawk si lova, ka thîk theilo hrim hrim bawk. Amah pawh kha ka duh reng reng hleinem, dawt min hrilh vang chauha lungawi lo ka nih hi, thîk te chu teuh lo lutuk ringawt.





"Fel, engtin nge mi i thîk hian i awm țhin?...ah!! Ka sawi awmzia tak chu i duh deuhin hmeichhe dang lo hnaih ta se, aaa ka sawi awmzia chu i hria in ka hria" lunch ei turin kan țhu leh tawh. Nizanah he thil avang hian ka mu miah lo lehnghal.





Ka awmdan chu mak a ti tih ka hria, mahse min zawt miah lova min hrilh mial mial bawk, a nih chuan kei hian khanu kha ka thîk tihna maw!? Teuh lo lutuk ringawt, ka thîk dawn reng reng lo, ka duh teuh lo.





Thîk tur pawn inzawmna kan nei lova enge ka lo thîk ve rikngawt a, thil țullo rapthlak lutuk a nih hi.





Lunch kan ei zawh chuan, hna kan țan lehnghala ka thawh mawlh mawlh laia ka dawhkan rawn ri kerh kerh ri ah chuan ka dâk chhuak a, ka mi hmuh avang chuan ka ner nghal nâwng bawk.





"Enge? " ka lo ti deuh hmuk a, "ka bialnu chu nimina ka hmuh loh avangin a lungawi lo em ni? " a rawn tih chuan a zaklo ka ti lutuk chu rum zet hian ka han melh chho a. Engtin nge kha thu kha a rawn sawi ngam zawk a.





"I bialnu ka ni teivet lo aw, i duh leh khanu bulah khan ka bialnu tih thu kha va sawi zawk rawh" ka ti hmak a. Thil chu ka ziak chhunzawm lehnghal mawlh mawlh.





"Oh! Ka hriat ve loh i hria a ni maw? " tih pah chuan ka bulah chuan a rawn kal nghala, ka lo inveng nghal deuh țun ringawt.





"Min tibuai reng suh, khanu bulah khan va kal rawh, in thlalak lah kha a darh nasa em em mai lehnghala" ka ti vak a, a nui chhuak hawk mai. Ka kâ zet zawt hi chu aw....





"Tunge i sawi ka hre hauh lo" a rawn tih chuan ka nui chhuak hak a. "Hre lo der vel lo mai rawh, party naa i rawn hruai nu bulah khan va kal zawk rawh heta lo kal lo hian" ka ti leh a, ka awmdan teh hrep pawh hi ah!.





"I thîk em ni? "





A thu rawn sawi avang chuan amah chu ka melh chho deuh hâ a, "i mawl ami? " ka ti zui nghek bawk.





"Ka sawi chu... i thîk a ni tiraw? " a rawn ti veleh a, ka banah vuanin ka țhutna ațang chuan min pawt tho nghal zat bawk.


\°•°/



Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » December 20th, 2020, 3:07 pm

2'3' #EP-14

By : Msi_Miluhlulnui 👩🏻
(Hmeichhe Naupang Tereuhtê🙃)





"Ka thîk lo" ka ti leh nghek, hna thawh tur ka la ngah asin mawle, hrim hrim in midang te hi an lo kal riau riau ang e, min hmuh vaih chuan a chi loh dawn lutuk. Min sawi zui mai dawn bakah. Aa.... Min sawi zui dawn a ni tawp mai.





"I thîk lo a nih si chuan tinge țha deuha min chhân ve mai loh a?" a rawn ti a, a nui tel deuh lek lek in ka hria.





"Ka chhang țha reng che alawm, nangmah zawk in i hrethiam lo a nih kha.... khawmaw, min thlah teh hna thawh tur ka la ngah ania" tih pah chuan ka kut a vawnna chu phelh tir tum in bei a, mahse a hûm nghet zual sauh.





"Tinge ka bula i awm hian min hlat thei ang ber a awm hi i tum țhin? Hetiang chiah hian ka nau bulah khan i awm ve țhin em ni? Hetiang chiah hian " a rawn ti deuh hrâwih a, a thusawi avang chuan amah chu ka melh chho leh deuh hâ bawk, uluk fê hian min lo en a, a mitmeng khi ka chhiar thiam lo.





"Chutiang lam chu ka sawi tum a ni lo" amah melh ve reng chung chuan ka ti sap a, thâwk zin hmel fe hian a thaw chhuak nghal hawk, "a nih chuan eng vangin nge kei hi min hlat i duh tlat țhin a? " zâwi si, fiah si, chuan a rawn ti leh deuh nghut.





"Chutiang lam a ni lo ka tih kha, nang hi hlat nachhan tur che ka nei hleinem, hna ka ngah ka ti mai alawm" ka ti a, tunah hian rilru fîm tak pu in kha thu kha min zawt leh ta se chhan dan tur ka hre leh chuang bik hauh lo ang. Hlat maw?! Kei hian chu thil chu ka duh em tih ka chiang chiah lo bawk.





"A nih chuan hna i ngah a, i thawh duh si chuan, ka lo kal khan tu emaw ni min lo sawi hmuh in ka hria. Sawi chhunzawm ngai tur tlat" nui deuh chung si a a rawn tih chuan ka kut chu ka pawt zui lebnghal vak a, mahse a che deuh eih chauh.





"Engmah a ni lo theihnghilh rawh, ka hai che aniang, bakah enge thîk leh thîk loh mai mai ah pawh chuan ilo buai ve chiam a, a tihtur hriat loh thlak lutuk" tih pahin ka kut chu pawh chhuah tumin ka chêt pui ve sek a, tunah hi chuan ka kut a chhuah hun a nghahhlelh awm tawh takzet a ni, a hmer na lek lek.





"Min hai hauh lo" a rawn ti a, ka kut chu rawn pawt veleh vakin ka kawngah chuan a rawn vuan lehnghal chawt bawk a. Amah hnaih thei ang ber chuan min pawt nghal phei nghal bawk. Ka kut kan inchuh mek chu ani sia, thâ a ngah thei bik lutuk hi ka haw takzet a ni.





"1 thîk a ni tiraw? Zêp buai lo in sawi mai rawh " chu zawhna bawk chuh! Enge maw min zawh sek le, ka sawi zak bawk si, ka sawi chuan ka thîkna chhan kha min zawt anga chhân dan tur ka hre leh dawn hauh si lo. A chhan pawh thîkna chhan tur ka nei miau lo a.





Ka țawng ve leh tur chiah chu "Azual" tia madam min au ri chu ka hre chhunzawm zat a. Kan va inthlah chiang kher ve mawle.





Rang lutukin ka sir ah chuan ka tawlhphei nghala, madam pawh chuan min en tawn ta sek ringawt.





"Sir, ilo awm tih ka hre hauh lo, tihpalh lutuk ania, Azuali hi hna dang pek tumin ania ka lo kal, mahse khatiang khan in lo awm sia, ah.. ka tum dan a ni miah lo ania" tiin thupha chu a châwi nghal mawlh mawlh a. Ramhluna hi an hlauh zia a takin ka hmu tawh a. A awmdan hi ka feel pui thei vek.





"Pawi love, tun ațang chuan khatiang kha hmuh ziah lo inring tawh ang che, a nih loh pawn Zualtei hi chu hmundangah ka lo sawn mai ang" min rawn en paha a tih chuan ka lo ner nghal nak a.





"Hmela, i mawl a mi? Enge khatiang thu te i sawi a? " zâwi tak si chuan a bulah chuan ka ti chang rat a. Madam hian ka thusawi a hriat ka hlau bawk êm bawk a ni.





"Ka hria lawm, Duati, tu vak mahin min hmu tawh lovang. Chuan Pi Sang, Duati hi chawhnu lam ah eng hna mah lo pe suh ang che " thupe aw taka tih pah chuan mit min rawn siai zeuh a, a chhuak zui nghal daih bawk.






"Hey!, nangpa kha! Engthu nge i sawi kha? I thusawi kha la let lehnghal rawh" ka ti tuarh a, mahse madam hmel ka hmu leh chiah chu ka hmui ka chîp lehnghal riai riai a, hnuailam chu ka bih nghal ngur bawk. Engtin nge a awm tih ka theihnghilh theih zawk.





"Azual, sir nen khan eng inzawmna nge in neih a? " madam chuan ka hmai bul chêta min rawn en pahin a rawn ti a, a țawng dam tâk lutuk avang chuan ka lo melh deuh heu a "eng inzawmna mah kan nei lo" ka ti țha ve leh mai bawk.





"In nei aniang chu, khatiang khan in lo awm vel" a rawn ti leh, ka ner nghal nâng bawk.





"Eng inzawmna mah kan nei lo tak tak alawm, ka sawi hi âwih rawh. Keipawn khatianga a rawn chêt thut nachhan kha ka hrethiam bik lo" a âwih loh ka hlau lutuk chuan ka ti chhuak vak a, a rawn nui ta hak a.





"In thup lo mai teh aw, engkim a chiang vek tawh. Sir chu ka lawmpui khawp mai, khanu sual leh thinchhe zet, mahni thu duh zet ai kha chuan nang hi ka duhpui fê zawk, in inhmeh lutuk ringawt" a rawn ti a. Ngati nge zaidam deuh hian a țawng ve le. Nidangah chuan min vîn phar âwrh âwrh zel kha ania.





"Madam...., ka ti tak tak ka sawi hi âwih rawh. Eng inzawmna mah kan nei lo tak tak" ka ti leh hram a, ka samah chuan a rawn chûl thuak a.





"Vawiin chu hna ka pek belh lo mai ang che, pu ber thu chhuah kha a na tlat. Ka hlawh min cut sak leh palh ang" a rawn ti a. Nui var var chung in kawngkhar lam a pan a, chhuak nghal daih bawk.





Tunah khan kan inngaizawng angah a ngai chiang lutuk. Rapthlak hian, a ngaihtuahna kha engtin nge khatiang khan a awm theih zawk. Khapa nen khan inzawmna kan nei lo asin mawle, tunah chuan thawhpui dang ten an hre leh vek tawh dawn a nih hi.





Khapa lah kha engvanga khatianga thusawi nge maw a nih hrep le, inzawmna kan nei hauh lo, a duh duh a sawi ve ringawt lehnghala zak thei lo lutuk. Inngaizawng angah min chhuah ringawt bawk a. A van over ve chiang tak e aw...






Ka lungawi lo thar leh lutuk chu au chhuak vakin ka chair-ah chuan ka țhu thla dawt a. Amah vang bawk khan ka mood a fuh lo leh dawn a nih hi, nilengin hun nuam deuh ka hmang ve dawn amaw tih nâk alaiin khapa khan min tihchhiat sak leh vek a hna ka ngah bawk si. Hneawm lutuk.





"Zual, Hlutei leh Miriam-i an lo kal a, ilo chhuak hman lawk em? " Feli chu ka awmna kawngkhar ah chuan a rawn dâk dê dê a, amah en chung chuan paper chu ka melh zeuh a. Ka tih awmzia a hria a ni ngei ang.





"Madam a awm lo, a chhuak daih alawm, hmanhmawh ang che" a rawn ti zui hlak a. Ka nui chhuak hak bawk. "Ka lo kal ang, pakhat hi kan ziak leh lawk ang a ka hman a ni mai" ka ti sap a. A bu nghat.





"Aw, mahse lo kal vat ang che, an pahnih sawn an awm rei hman lo in ka hria. Hmanhmawh la" a ti a, a kal zui nghal bawk. Ka ziah lai chu ka ziah chhunzawm lehnghal mawlh mawlh a, order chhuak tur leh lo lut te hi keimah berin ka lo record țhin a, ninawm tak a ni ringawt.





Chawhma lama record awm ka ziah zawh hnu chuan ka khup thak a, ka kamis hak chu ka siam țha nghal mawlh mawlh a. Kan dawr hnathawk te thawmhnaw hak hi black suit vek a ni a, a thawk te hian duhlo viau mah ila zawm loh theih loh a ni bawk si. Ka thawh tirh phei chuan eng dan nge ni ngai ka ti chhuak ringawt tawh bawk.





"In lo kal a" tih pahin an bulah chuan ka va țhu ve a, Hlutei leh Miriam-i hi chu ka kawm lutuk ngai lova, an khawsak a sang lutuk hi a ni berin ka hria. Feli nen erawh chuan kan in bâ dun viau thung.





"Lo kal ti ila, thil kan lo ei dawn a ni zawk mah, naktuk hian kan chhuk leh a ngai tawh a, chuvang mawle" an ti dun sap a, an bulah chuan ka va insawn phei zui a.





"In va chhuk leh hma dawn ve" ka ti sap bawk.





"Nia, exam kan la nei bawk sia, chuvang a ni pakhat, kar khat pawh kan châm țâwk in ka hria. Ka chhuk peih lo tak tak a ni" Miriam-i chuan a ti zui hlak a. Thildang kan sawi a kan nui ho leh dar dar țhin bawk.





"Enge in duh ang, juice nge thil dang" Fel'n a rawn tih chuan an duh an sawi dun a, Ramhluna vang vek khan ka țawng te hi a tuilo zo vek tawh. Ka mood a rawn ti fuh lo vek, ka va han ngei ber tak.





"Taka tunlai chu u Ramhluna hi ka try deuh a, mahse Evelyn-i hian a hauh bur mai bawk si a. Hma ka sawn hleithei lo" Miriam-i aw chu a vui deuh lek lek a, tunah khan Ramhluna chungchang a sawi in ka hria.





"Engmaw I sawi? " ka ti nghal vat. Ka beng chu ka chhi nghal kar mai. Engvanga ngaihsak thar leh ta viau nge maw ka nih le, a hming ka hriat tawh chua ka beng hi ka chhi nghal kar zel tihtur a ni.





"Aw... u Ramhluna mawle, tunlai chu ka try deuh hleka, mahse Evelyn-i sawn a hauh bur mai sia. Hma ka sawn hleithei lo" a rawn tih chuan ka lo inseh ru nghal țeuh ringawt pek a!.





"Bialnu a nei lo an ti amaw tia" ka ti deuh hû a, chu chu keima hnena a sawi dan kha a ni bawk.





"Nei lo ti ila, ah! Ka sawi thiam lo, u Tebawihi...oh! Evelyn-i ka tihna, amah sawn a zar buai hneh êm a, u Ramhluna lah sawn engvakah a ngaih hmel si lova inngaizawng angin an thang ta ni maiin ka hria, chu chu ka hriat dan ania, ka ngei tak tak a ni" a ti zui hlak.





Feli eitur la pawh a rawn thleng ve chiah a, kan sawi chu a mitmeiin min rawn zawt a, ka dar ka lo san khum ak ringawt.





"Sawnu saw ka ngei ania aw, a chapo si, u Ramhluna saw zar buai reng lo sela chuan keimah ta ani tawh hrim hrim ang, ka la sawisa ve dawn alawm" a ti zui leh hlak a. An thil sawi avang chuan ka awm a nuamlo lehzuala, ka âwm zâwn te hi a rawn tâwt ve nghal up up thei mai.





Feli a rawn țawng ve takah chuan thudang an sawi ta daih a, kei erawh ka țawng ve leh tawh lo hrim hrim, an thusawi kar lakah chuan ka lo nui ve leh zeuh țhin a. Ka eitur chu ka chawk kual ka chawk kual ringawt.





Kei hi engvanga hetia awm ve ringawt hi nge maw ka nih le. Ramhluna hming an sawi apiang hian ka beng ka lo chhi nghal kar zela, ka awmdan ni lo mak pui puiin ka awm lehnghal țhin bawk a. A chanchin ka hriat lah hian keimah hi ka ni nghal nghulh zel a, ka awmdan hi ka hrethiam tawh nei nuai lo e a.





"E, Zual, i zan hnathawhnaah khan ila thawk zel em? " Hlutei chuan a ti a, țawngkâ a chhang lovin ka bu nghat a. Ka kâ hian țawng a châklo ni maiin ka hria. Ka awmdan hi ka hne lutuk.





"Nia, hman zanah kan lo kala i awm miah lova" Hlutei zawk chuan a rawn ti leh a. "Zan thum chu ka kal tawh lo alawm, chumi lai tak chuan in lo kal aniang" ka ti a, ka țawng dan ațang chuan thil sawi ka peih loh zia an hre vekin ka ring.





"Ngati nge a, i hmel te kha ava thim ve" Feli chuan ka beng bulah a rawn ti sar sar a, ka thaw chhuak hak. "Ka hrelo, keipawh ka awmdan hi ka hrethiam lo, haw a mut hahdam ka duh takzet a ni" ka ti a, ka awmdan avang mai mai hian ka chau nghulh thei.





Hlutei leh Miriami chu an awm rei ta phian a, leh madam alo let tawh avangin hna lam ah ka phei san leh a, hna pawh ka thawk hleithei chuang lo, engvangin nge khapa ve chhen lah kha ka ngaihtuah teivet zel le. Nichin ațang tawh khan ka ngaihtuahna hi ala chhuahsan lo tluk a ni.





"Feli ka nghak lo mai ang che ka haw nghal dawn ania" ka bag ka siam fel mawlh mawlh a, ka bulah phone khawihin a ni alo ding reng bawk. "Aw, haw mai rawh i nawm loh hmel emai, zanah ka lo kal ang hnaah chuan i kal dawn em? " a rawn tih chhunzawm zata.





"Ka hrelo, in te han thleng phawt ila, ka intifai anga ka chauh viau loh chuan ka kal ang, I duh chuan lo leng tho rawh" ka ti ?a, a phone chu en reng chung in a rawn au hluai a min ti phu zawk ringawt.





"Enge a? " tih paha a phone en ka tum chu a dahsawn daih a, ka banah vuanin zawi te te in a rak vak vak ringawt a. Min ti hamhaih letling zawk.





"Enge sawi la, khatin awm vak zel suh, a ngaihna ka hrelo thei teh mai ania" ka ti hlak a, ka ban chu a rawn hmer vaka a au chhuak vak ringawt.





"Ui Lalzual, ka rawn leng leh hman lo Joseph'n dinner ei chhuak ang a rawn ti" a ti chûl a, ka melh rum vak ringawt.





"Enge chutiang vang mai maia khatianga i awm vak a, min mi ang lo amaw an ti che anga sin, ka ban lah chu i hmer na vek lehnghal" ka ti hlak a. "Sorry lutuk aw, ka hlim em a ni" tih pahin ka ban a rawn hmerna chu a chûl a chûl a.





"Chupawh nise ei chhuak ngai lo ang maiin alawm le i khawsak le" ka ti leh a.





"A ho emai, kan nihna ala rei lo a chu mahse min rawn sawm nghal ringawt ania. Hepa hi chu aw.. ka van duh chiang tak" ti chung in a nui leh vur vur tawh bawk.





"I ninawm sek, nang te chuan i bialpa apiang te chu i duh thei em em vek zel alawm, tuna mi pawh hi i țhen leh vat tho ang" ka ti a. Ka banah chuan a rawn beng nghal pawp a, thîp tak a ni thîp tak.





"Malsawmzual, chimawm viau zel suh aw" a rawn ti ve ta hlak a. Kha thil chiah kha a ni ka tum chu.





"A ninawm ka kal dawn. Zanin chu nuam deuhin i hmang dawn nia" ka ti sep a, lu min bûk khum nghat rual chuan kut vai zeuhin ka chhuak nghal daih bawk.





Taxi ka chân lai chuan ka phone hi a rawn ri ve sek a min lo call tu ka en chuan Remruata lek lo niin "enge a? " ka lak rual chuan ka ti nghal phawng a. Lehlam ațang chuan a rawn rûm nghal nghut mai.





"Ka call i chhân apiang hian i vîn nghal ziah mai, ka lo be tawh dawn lo che" a rawn ti deuh hmuk a, ka inrin hma in ka nui chhuak hak. Tuna a tihdan kha naupang tih dan chiah chiah "Sawi rawh ka ngaithla aw" ka ti nêm ta dap a, ka nui leh rih țhin bawk.





"Nakinah ka hrilh ang che" a tih rual chuan phone chu a off nghal daih a. Min be peih lo a nih chuan be lo tawp ila ni mai lawm, a pawina awm vak hleinem, amah zawkin min rawn be hmasa leh tho ang, Hlutei vangin min mamawhna a sang tlat.





Taxi a rawn tlân a, ka hmaa a rawn ding tur chiah chu car pakhat hian a rawn din khalh nghal hmiah a. A hnung lama motor lo kal tur te pawh an din dan a buai phah ta vek bawk a, horn an pe ri tuarh tuarh bawk.





Glass-a in down ruala tunge chuang ka hmuh rual chuan ka ner nghal nak a. "Engthil nge i rawn tih hi i hria em? En ta che, motor din dan zawng zawng i tibuai vek alawm" kûn thla in ka ti țhat a, a nui kiai suk a, a khabe chu ka tuai zeuh ringawt.





"Lo chuang rawh" a rawn ti sup a, ka lu ka thing nghal nghat.





"Teuh lo, chuan nachhan tur ka nei lo" ka ti a. A nui suk a "ilo chuang dawn nge keimah zawkin ka rawn pawm lut dawn che, ka hreh hauh lo ania" a ti a, ka ner nghal nâng.





"Lalramhlun" ka ti nghal vak. Ka sawi zawh rual rual chuan hnung lam pangah chuan motor horn a rawn ri lehnghal tuarh tuarh a, "Mami, chuang mai rawh. Keini min ti khawtlai zel ania" taxi driver pakhat ka chuanna tur pa chuan a rawn ti lûng lûng a.





"I hriatthiam ka ring, mi tana buaina thlensak tu i nih duh ka ring hauh lo" ngeiawm zet hian a ti leh kher a, ka thaw chhuak nghal hak a, motor dang lah chu horn ka nei bik e, ti âwm ang zia zângin an rawn ti ri vak vak a. Taxi driver pawn lut turin min rawn ti leh tawh, teh sek chuan.





"Ila chak lovang" tih pahin car chu ka kal hual a, ka țhu lut nghal vat bawk a, țhut that pah chuan "tlan chhuak nghal rawh" ka ti zui nghal hlak bawk. Nui ri sukin a tlânchhuak ve nghal mai bawk.





"Vawiin kha chu kan buai leh ta lutuka ka lo kal hman thlawt lo" inthiamloh hmel zet hian a rawn ti sup a, amah chu ka en nghal vat a. Hneh zet hian steering chu a herh kual nghal pawp a. "Ve ringawt a che, lo kal na chhan tur i nei lo" ka ti a, a nui ringawt?





"I lungawi lo tihna em ni? " tih pah chuan min rawn melh deuh hâ a, a rawn thle nghal bûk bawk, a lu chu ka nem sawn sak nghal vat a. "I duh duh hi min puh ringawt zel suh" ka ti hlak.





"Takzet" tih pahin a nui chhuak hawk a. Steering a vawn na kut pakhat zawk chuan ka kut chu a rawn vuan a.





"Min vuan suh, motor kha khalh rawh kan accident ang" ka ti țhat a. Keimah ah hlauhthawnna a rawn awm nghal tup tup bawk.





Ka sawi zawh rual rual chuan a kut lehlam chu a thlah leh a. "Hey! Thlah suh kan accident ange ka hlau ania vuan leh rawh, vatin, vatin, vuan rawh ka tih chu..." ka ti chhuak nghal vak a. Ka hlauthawng lutuk keimah zawk hi ka khur hialin ka hria.





Min melh zeuhin a kut chuan steering chu a vuan lehnghala, ma thaw chhuak nghal ham ham. "Vawikhat mah kha ti khan ti tawh suh ang che, min ti hlau lutuk. Ka thi tawh dawn amaw ka ti hman alawm" ka ti a, ka âwm chu ka dawm nghal a, ma sawi zawh rual rual chuan Motor chu a ti ding zui ta daih.





Ka hawi kual tur chiah chu ka ban rêkah chuan rawn vuan chawtin a lamah chuan min pawt phei nghal ti tih a, nghet lutukin min kuah nghal bawk. A chêtdan teh thut avang chuan ka lo inring lo bawk nen, ka âng phâm ringawt.





"Engthil nge i tih hi? " ka ti hliai a, min kuah ngheh dan em em hi a rapthlak zawk. "Ka tihpalh, mahse vawi khat mah thih chungchang kha sawi tawh hlek suh ang. I thi dawn lo keiman ka venghim dawn che alawm, engtin mah i awm ka phallo " a rawn ti zâwi sup a. A thusawi avang chuan ka meng buai nak mai.





"Enge maw i sawi le, i â mi?" ka ti leh, ka thin phu a normal lo.





"Thih chungchang kha sawi tawh hlek suh. Keiman ka venghim ang che, khatiang thil kha a thleng leh tawh ngai lovang" a rawn ti leh a. Ka nghawngah chuan a rawn fawp zeuh a, ka mur lehnghal chuai mai.





"Enge maw i hriat le?" ka ti leh hliai a, keimah ai chuan amah zawk hi a hlauthawng zawk ni maiin ka hria.





"Ka duh che. Ka venhim theih nan che ka ta chauh ni rawh, tu mipa mah in an tihbuai theih lohna tur che in" a rawn ti thâwp sup.





A thusawi chuan ka thinlung hi lung a den ang maiin a deng dawt dawt a. Ka awmdan tak pawh hi ka hrechiang lo.





"I â tawh em ni? " ka ti ringawt a, mahs ekeimah zawk hi ka â vek zawk in ka hria. Hetiang thu hi ka vawikhat dawnna a ni ten ka hre rum rum.





" Nia ka â tawh, nang hian min ti â vek tawh a nih hi. Ka venghim ang che kha tih kha ti mai mai lo ania, i nat ka phallo a, i țah ka phal hek lo, mipa dangin an lo melh ve che ka phallo a, ka nau ngei pawh tiam in, chuan thih chungchang kha sawi tawh hlek suh ang che" a ti zui nghut..





Engdang mah ka sawi ve leh hma hma chuan ka dar ah chuan vuanin tlemin min nawr hla leh deuh hlek a. Min țhawng lutuk hian sawi ber tur min ti hre lova, ka kâ te hi an chawmawlh vekin ka hre bawk. Keimah hi ka ni hûiin ka hria.





Vawiin khan kha thu kha keipawh ka vawitam ka inzawt a, mahse ka chhanna chu a ngai vek a ni. A ni hi ka duh a, mahse duh thei dinhmunah ka ding lo tih a ni a. Engtik laiin nge ka lo duh hman ka hrelo a. Engtik laiin nge ka ngaihtuahna ah te hmun alo luah ve tak tial tial tih lah ka hre hek lo.





Mahse ka hriat zawng chu hepa hi ka inrin hma in ka lo duh tawh lutuk tih hi a ni. Hmangaihna pawh alo thlen lai kan hriat ngai loh ang bawkin induhna pawh hi alo thlen hun kan hrelo ti a u Sai'n min hrilh kha a dik tih ka chiang ta chiah bawkin ka hria.





"Ramhlun" ka ti sep.





"Ka duh che tih ka hrilh che a, ka theihtawpin venghim bawk ang che tih ka hrilh bawk che a. Ka lawmna siam turin engtin nge min chhan hriat ka la mamawh zel bawk" a rawn ti a, a nui ri suk.




"Ka duh che Malsawmzual, engtin nge min chhân dawn?"

Ril zet hian a rawn ti sup a. Amah chu ka en nghal vat a, a mitmenga thil awm te khi ka chhiar thiam hauh lo.





Ka thin chu ring zet hian an phu dup dup a, amah pawh hian a hre vek ngei ang. An phu chhuak dawn hialin ka hria.





Chuan, engtin nge ka chhân ang?


__________\°•°/

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » December 20th, 2020, 3:07 pm

2'3' #EP-15

By : Msi_Miluhlulnui 👩🏻
(Hmeichhe Naupang Tereuhtê🙃)





Chhanna.





Eng chhanna nge ka pek ang.





Ka rilru a insual buai nuaih nuaih a eng ang chhanna nge ka pek ang tihah ka buai a ni. Hepa hi ka duh tih ka hria. Mahse chumi avang ringawt chuan ka pawm thei si lo. Paltlang tur tam tak ka la nei a, atan chuan ka țha tawk lo bawk.





"Bialnu i nei a ni lawm ni?" ka ti lêt ta hâ a, a rûm nghal nghut bawk.





"Bialnu ka nei tih ka lo hre reng reng hleinem, nangmah chiahin i hria a nih chu" a ti sup a, a ngaihna hrelo zetin ka melh a.





"Kha.....hman zana mi kha ih.. englo, enge a hming i tih kha...? " ka ti a, ahming ka hriat chhuah zawh tawh loh avang chuan ka ngawi ta daih a.





"Evelyn-i maw?" A rawn ti a, ka bu nghal nghat "a ni kha i bialnu a ni lawm ni?" ka ti a, a nui chhuak nghal hawk mai.





"Bialnu nei chu ni ila keiman ka hria ang chu" nuih insûm fê hian a ti a, ka ner nghal nâng bawk. "Enge ka bialnu te itih vel si, nangman dâwt i sawi a nih chu.." ka ti a, a nui ri suk a.





"Chutiang ka sawi lai ka hre hauh lo. Oh! Ka sawi lo zawk mahin ka hria, i thîk em ni? " a rawn ti sup a, ka mitah chiang fek fawkin min rawn en a ka zâm lehnghal der tawh. Ka thin lah hi phut hman loh hlau ni âwm fahranin a rawn phu chiam zel lehnghal.





"Hah..! Engvangin nge ka thîk ngawt anga" ka ti a, hawisawn ka tum chu phallo in a kut chuan ka khabe ah a rawn vuan a, amah en tur chuan min siam rem lehnghala, a kut chuan ka biang chu a rawn tawk zeuh a, a sa nghal ham ham mai.





"I thîk lo a nih si chuan engvangin nge khatiang khan i awm a? " a rawn ti leh a, a kut chu ti che sek in ka hmui hnuai chu a rawn tuai zeuh a "engtin nge ka awm a? " ka ti lêt nghal hâ bawk. Ka sawi zo chiah a rawn chêt leh dan avang chuan ka tîm nghal uaih a, ka țim uaih uaih thei.





Ka hmui hnuai chu pawt kau in muang dam ruih hian a rawn fawp dek dek a, ka kut chu ka phar chhuak hluai ringawt a, awmdan tur mai ka hrelo. Keimah zawk hi ka mur chuai chuai mai.


Ka hmui hnuai a pehna chu muangchangin a thlah riai riai a, a awm hla dawn amaw tih nak alaiin na zet hian a rawn fawp leh a, ka hmui a thîp nghal vawng vawng mai. Ka melh nghek a, a ni erawh chuan min nuih a.





"I thîk tih in pawm tawh mai rawh" a rawn ti a, ka hmui thîp vawng vawng chu a rawn tuai zeuh bawk a.





"A ninawm ka thîk lo ka tih chu, haw tawh ang" ka ti a, ka kut a vawnna chu phelh tir tum in ka vawn hnan ve leh nghal chat bawk.





"Min hrilh phawt rawh" a ti leh kher a, ka ner khum a.




"Enge ka sawi ang, kei hian ka thîk tih ka sawi ang maw? I ti mak e a, mahse ah... ka thîk lo ka tih chuan dawt ka sawi dawn si a, ka thik ka tih chuan dawt ka sawi dawn tho in ka hre bawk sia. A.... ka hrelo" ka ti deuh nuai a. Ngati nge thîk ang ah min ngaih tlat le.





A bialnu amaw ka tih avanga sawi mai chauh ka ni reng sia.





"Duati, duhawm viau suh" tih pah chuan ka hnar ah chuan a rawn piai vak a anâ ka ti lutuk chu ka au chhuak vak bawk. "Ngati nge ka hnar ah i piai? " ka ti hliai a hnara piai hi ka hua asin mawle.





"Chhanna min pe thei tawh angem? " a rawn ti daih a, nichina ka lungawi lohna kha chu an bo leh vek tawh.





"Min thlah phawt la" ka ti sap a.





"Chiah maw? Chumi zawh chuan min chhang ang tiraw? " a tih chuan ka bu nghat a, a thusawi dan hi a naupang chhia lutuk takzet.





"A nih, min chhan loh vaih chuan" tih pah chuan muangchangin min thlah a, zanina a che reng reng hi mipa naupang ang chiah a ni, ka nuih chuan a lungawi âwm sia. Chuvang chuan nuih ka insûm char char, tunah hian nuih vak ka chak takzet.





Motor seat-ah chuan ka țhu țha a, ka kut chu a rawn hum lehnghal ringawt tawh. "Min chhang tawh rawh" a rawn ti a, ka thaw chhuak hak.





"Naktukah ka hrilh ang che" ka ti ta daih a, ka sawi zawh rual rual chuan a rum nghal nghut. "Tunah sawi rawh" a ti nghal hluk a.





"Thuthlûkna te hi i ngaih ang ngawt hian siam a awlsam bik hleinem, min zawt chauh a chhanna min pe nghal rawh i ti leh a, enge ka ngaihtuah hmana i rin, engmah ka ngaihtuah hman hleinem" ka ti a, a thaw chhuak hawk a.





"Ni dawn tak e, mahse minute 5 chiah hun ka pe ang che anga chumi zawhah chuan min chhang nghal ang che" a rawn ti. Rapthlak ti lutukin ka melh a, enge maw a hriat le. "I mawl ami? " ka ti hliai ringawt, a nui a.





"Ka hre chak tawh alawm" a ti a nih chu! Ala nui tel zui, in ring lo lutukin ka nui chhuak a.





"Enge? " a rawn ti hluk, ka nui dir nghal char char ringawt.





"Tlangval inih tawh kha, ngatinge mipa naupang ang maia i țawng a? " tih pahin ka nui zui leh hak hak a.





"Enge, ka hre chak tawh a ni mai a, naktuk alo nih chuan i ngaihdan te kha i thlak leh vel emaw kha ania nga" a tih chuan amah chu ka en a, "ka thlak lo ang ka chhang ngei ngei ang che" ka ti a.





A thaw chhuak hawk a. "A nih chuan zaninah mu thei lovin min siam leh dawn a ni maw?" tih pah chuan a țhu țha a keimah chuan ka nui ringawt, ka kut chu a hûm bet tlat a. Kan accident ange ka tih pawn min ring rawh a ti mai zel lehnghal.





Inkawt thleng min thlah a, rawn luh ve ala tum tlat zui a, ka phallo ka ti chung pawn ala tum lui țalh a, harsa lutuk in ka hnar thei hram a. Mahse a chhuah dawnah ril zetin min fawp a, 'naktuk ni vat se' tih pahin min thlah a. Ka chalah a fawp leh vang vang a nih kha.





Ka inngaihtuah nasat ka hlauh lutuk avangin hla ngaithla chung in ka muhil a, ka inngaihtuah nasat lutuk chuan ka muhil leh theilo emaw kha ania nga. Naktuk zingah ka tho theilo ang tih ka hlau bawk.





Pathian hnenah ka thlen a, aman chhanna dik tak min pe mai turah ka ngai a, engmah ngaihtuah zui ka duh lo. Ka chian em em chu hepa hi ka inrin hma hauh in ka duh tawh lutuk tih hi a ni.





Zingah chuan U Sai'n thu thar a hriat thu min rawn hrilh avangin hnaah kal hmasa lovin a Office-ah ka tlang nghala. Dar 11-ah hna ka țan dawn chauh a dar 4 thleng hun ka nei bawk a, ka kal hma bawk a, tunah lah dar 10 chauh ala nia. U Saia pawh alo la thleng lo.





Nizanah pawh hnaah ka kal tawh loh avangin boss pawn min rawn hau hrep tawh a, insawifiahna tur țha tak ka hrelo. Zaninah ka kal lo a nih chuan ka kum khat hlawh min cut sak tawh dawna ka bang a nih loh chuan, chu thil chu ka thlentir theilo a ni. Sum ka mamawhna hi a sang takzet.





"E, kha ilo thlenna a rei tawh em? " Office kawta ka lo tei ka lo tei lai chuan u Saia țawng ri ka hriat avang chuan ka lehhawi a, hmeichhe pakhat nen hian an inrawn inzui phei a. "Rei ve tawh tho" tih pah chuan tunge anih ka mitmei zeuh a.





"E, Nu Hmingi a nih hi i nu thawhnaah a thawk ve a, i nu nen an lo in kawm țhin tih a sawi a" a tih chuan ka bu nghat a.





"Khawngaih takin min pui hram rawh aw, i hriat zawng zawng min hrilh vek dawn nia" ka ti sap a.





"Ka theih ang tawkin ka lo pui ang che u" a tih chuan ka bu nghat a, ka thaw nghal huai bawk.





"Zualte, Nu Hming'n i nu chanchin a sawi lai hian ka lo record vek dawna zawhna engmah lo siam suh aw" a tih chuan ka bu nghat a. Ka hmaah chuan nu Hmingi chu a țhu a ka sirah u Saia chu a țhu bawk a.





Nu Hming'n thil a sawi lai chuan uluk tak hian ka lo en ngar ngar a, a sawi zawng zawng kha ka âwih aiin ka awih loh a tam zawk mah. Mahse sawi theih ka nei silo, kei a fanu ngei pawh hian ka nu chanchin chu ka hre lo em em a.





A hria inti te ka hnial ve ngawt chuan țan chhan tur ka nei leh dawn hauh si lo a, ka nu chanchin ka hrelo lutuk hian keimah min tibuai zawk, engtikah nge ka pa chu ka zawn chhuah tak ang. Tunah pawh ka nu chanchin ah a nih hi kan la buai.





Nu Hmingi a chhuah hnu chuan "U Sai, a sawi kha pakhat mah ka âwih lo, ka nu chanchin hrechiang lo mah ila, khatiang em em kha chu ka âwih tawh lo, ka nu kha mipa hrang hrang mutpui țhinah a puh a nih kha" ka ti nghal hlak a.





"Ka hria lawm, keipawn ka âwih bik hleinem, mahse khang te kha i tan vek ania tangkai nakinah dawt a sawi leh sawi loh chu a hriat mai ang" a tih chuan ka bu ve nghat a. Hepa thil tihdan hi pakhat mah ka hrethiam tawh nei nuai lo e a.





Dar 11-a rîk țep avang chuan hmanhmawh lutuk tak maiin taxi ka phar a, dawr lam ka pan nghal bawk. Ka hmanhmawh em avang chuan ni lo lo ah ka kal kual tira pawisa ka chawi țeuh phah lehnghal.





Dawr ka thlen chuan rang lutukin ka lut nghala ka duty-na lam ka pan nghal bawk . Dawhkanah chuan ka hna in min lo hmuak leh der tawh, he hna hi ka ning takzet, takzet, he dawr hming tho hian hotel a awm a, chung ho order ziah chhuah chu ka chan vek ania, hotel leh midang order register-q chhut luh pawh ka hna vek tho, ka ning tawh takzet.





Ka dawhkan chu ka kal hual a, mahse ka chair-a lo țhu ka hmuh avang chuan ka ding nghal dat a, a ni pawh ka thâwm hriaiin a rawn hawi nghal vut a. A țhutna ațang chuan a ding chhuak nghal bawk.





"Enge ilo tih dawn? " ka ti hû a, a ke sei zet nen chuan ka lam pan chuan a rawn pen pawk a.





"Nizanah khan ka theihnghilh lo ang kha iti a, tunah hian i theihnghilh tih min hrilh hlek suh ang che" a ti nghut a, ka hmaah chuan a rawn ding fel der tawh.





"Ka theihnghilh aw zawng lo" ka ti nghal a, a nui ta suk mai.





"A nih chuan chhanna ka dawng thei tawh em? " tih pah chuan ka hmai zâwnah chuan a rawn kun hniam a, ka mitah tak min rawn en nghal chat a, ka zâm lehnghal der tawh.





"Sawi la Duati" a ti sup a, ka thaw chhuak hak a, ka kâ ka âng tur chu ka chîp leh rih a, ka sawi ngam thlâwt lo.





"Bawihi" a rawn ti leh hluk a, ka thaw chhuak vak.





"Min tina suh ang che" ka ti zâwi sapa, ka biang hi a sa zui nghal hat hat mai. "Engmaw?" Mak a ti tih hriat zet chuan a rawn ti a, amah chu ka han en chho a "Min tina suh ang che ka ti a nih chu i hre tawh em? " Ka ti a.





Amah chu ka kalpel nghala mahse rang lutukin ka dinna ngaiah chuan ka let lehnghal, amah chu a ngaihna hrelo zetin ka melh a "a nih chuan ka bialnu i ni tawh tihna" a rawn ti a, a aw ațanga hlimna leh lawmna rawn ri chhuak chuan min hneh ngawih ngawih.





Ka pawm tih hriat nan ka bu ta nghat a, lawm avangin a nui chhuak hawk thei. Chu chuan min ti nui ve ringawt bawk.





"Ka lawm lutuk" tih pah chuan ka kâwngah a ban a rawn rawlh lut a a lamah chuan min pawt hnaiin ka chal ah chuan a rawn fawp zui nghal vang vang a.





Hemi ni ațang hian hlimna leh thlamuanna ka dawng nasa dawn tih hria ila leh, natna, hreawmna, tuarna ka dawng nasa dawn tih hre lawk ila chuan duh reng chung in ka chhang hauh lo ang.





Mahse ka hma huna thil lo thleng tur ka hre lawk lo a, hre lawk thei ni ila chuan ka thlentir in ka ring lo.





Hemi ni ațang chiah hian a ni ka chhiatna, tawrhna chu alo in țn tak ni. Ka nun zawng zawng a chhiat vekna chu.


_________\°•°/

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » December 20th, 2020, 3:07 pm

2'3' #EP-16

By : Msi_Miluhlulnui 👩🏻
(Hmeichhe Naupang Tereuhtê🙃)





"Min thlah tawh rawh" min kuah rei tawh lutuk avang chuan ka ti a, hna ka thawk zo hman lo ang tih hlau. "Ka kuah duh tlat ta che ti ta ila" chimawm zeta a rawn tih chuan a hnungzângah chuan ka ben sak nghal thlawrh a.





"Over suh aw" ka ti nghal hlak bawk, a rawn nui chhuak hawk a. Muangchangin min kuahna chu a thlah a "thawhpui tur che in min duh em? " a ti sup a, ka inrin hma in ka nui chhuak nghal hak bawk.





"Eng vanga nui nge i nih? " a rawn ti nghal hluk a, ka nui chu hnai zetah min rawn en nghal bawk "Ngatinge i hman em em a, hnathawh tur i nei ve lo ami? " tih pah chuan ka nui zui hak a.





"Chuvang chu maw ni a ilo nuih na chhan chu" tih pah chuan ka nâkah chuan a rawn țhâm nghal zeuh a, ka zâ ti lutuk chu ka țe chhuak nghal țûng a.





"Ka tlawm, ka tlawm" ka ti ta chiam ringawt. Ka sa huat lai a hria hi chu ka ngei ber ala ni dawn chiang alawm.





"Duhawm lutuk" tih pah chuan ka hmuiah a rawn fawp zeuh a, ka nui lai chu ka tawp nghal chawt a, ka nui lai ka tawp zui nghal chawt bawk.





"Kal tawh la, hna ka thawk duh tawh" ka ti sep a, a rûm nghal nghut mai.





"Kal tur hian min ti reng bik suh aw Malsawmzual" a ti hluk a, ka nui chhuak hak.





"Ka ti reng bik hleinem che, hna ka thawk duh tawh ka ti mai alawm, nangpawn thawh tur i neih ve takin ka ti a nih kha" ka ti a "kal tur chuan min duh tak tak a mi? " a rawn ti a, hepa tak hi chu aw...





"Ka sawi zawh chiah kha i hrelo a mi?" ka ti ve leh kher a, a nui suk bawk.





"Ka hria, chuan ka kal bawk ang. Mahse chawhnu ah ka lo kal leh ang" tih pah chuan ka chalah a rawn fawp zeuh a, ka nui a, ka maimichhing nghal vat bawk.





"Lo thawk hah lutuk suh ang che, a nih loh chuan i duty-na hi ka sawn mai ang" ka chala hmui nghat reng chung si chuan a phun sup a, ka nui chhuak hak.





"Aw le, boss" ka ti sap a.





"Ka van kal chak lo tak! Duati, ngatinge kal tura min tih tlat țhin le" a ti ve nui nui a, a lungawi lohna rawn ri chhuak tel ve chu a duhawm khat tlat.





Min uap behna na zet ațang chuan ka tal chhuak a, a hnungah chuan ka nem a, a chesawn duh lo. "I lian si che ve eih la" ka ti hlak a. Ka thusawi ang chuan ka nemna lampang apiangah chuan a kal ve zela, hetia ka tih loh chuan a chhuak mai mai dawn teuhlo.





Kawngkaah chuan ka nawr chhuak a. "Tikhan i kal a ni mai lawm, i tih hma hma in peih lo nghal ringawt suh" ka ti a, ka thlah tur chu ka ban bulah a rawn hmer a. A lamah chuan min pawt phei leh.





"Vawiin nilenga tih ka chak tur a ni dawn sia" tih pahin ril zetin min fawp a, ka thiam ang tawkin ka lo chhang let ve bawk.





Tuna thil thleng mek hi a thleng theilo ti chung in hmuh turin a awm mek si, thil thleng theilo a ni ti ti mah ila dan theih a ni si lo. Ka hnathawh lai ten ka thil tih hi a dik em le tih ka inzawt fo a, mahse ka duh ang chhanna ka hmu chuang lo.





Mahse tun hun chiah hi ngaihtuah ila, alo thleng tur chu alo thleng tur a ni mai, sawi theih kan nei lo. A rawn thleng dawn tho tho chuvangin tuna kan hun hman mek hi hlu tak leh nuam takin hmang ila a tha a ni mai, ka hlim ve a hun tawh a ni mahna le.



Ramhluna a kal hnu chuan hnaah ka buai nghal char char a, ka hun tam tak pawt peng viau mahse ka hlim tlat thung si, ka pian a hnu lamah khatiang em em a ka nuih nasat kha ka la hrelo, ka thinlung takin ka hlim a ni.





Hnaa buai lai lai in min rawn call sek a, a chang leh ka thawh lai en a duh avangin video call hmangin a rawn ti țhin a, kei ka buai si hman hi ka van ti tak e aw, thawh tur i nei lo mi ka tih lah in ka nau te thawk tur an tam alawm ati sam êt zel lehnghal.





Min hrechiang tih thu a sawi tawh kha, tunah pawh "thawk nasa lutuk suh, i taksa te kha a awmna hmun sawn kual chhen lo la, i thâw a hah leh palh ang" a rawn tih hi, min hrechiang em em a, kei lah in ka hre ve hauh si lo, engmah a chanchin hriat ka nei lova, ka hre hma turah ngai ang.





"Duati" a rawn tih hluk rual chuan ka phone chu ka en nghal vat a, a țhutna atang chuan a ding uaih ni tur a ni a hmel pawh a lang thei tawh lo. "Engtin nge i awm? Hrep chuan" a ti nghal hrâwih a, tunah khan ka che sual amaw a ti ani maw, hepa mai mai chuh.





Ka nui chak lutuk chu ka nui chhuak vak vak a, a hmel a rawn lang thei chiah chu a ngaihna hrelo zetin min rawn melh a. "I van mawl tak aw, paper a tla a chhar ka tum na lamah ka inchhuih a nih kha" ka ti a, ka nui nasa lutuk chuan sawi pawh ka sawi țha thei lo. A ni pawh a tukhum hiat chungin a nui ve suk a.





"Chupawh nise, i chesual thei reng" a ti ta hluk a, nuih insûm zetin amah chu ka en a, ka hmui ka hup deuh reuh bawk "mahse ka țha tih i hmuh hi" tih pahin ka ding chhuak hluai a, ka ban ka phar nghal hluai bawk.





"Ka lo kal dawn" a tih chuan a ngai lo ka lo ti nghal vat a, ka chhang rang lutuk nge a nui kiai nghal suk mai.





"Tlaiah ka lo kal dawn itih kha" ka ti a, tunah chuan lo kal suh se, dawrah hian Kima leh a bialnu kha an awm mek a. Buaina a thleng ang tih ka hlau a ni, tunah pawh ka duty naa alo luh ka hlauh tawh mah nâk alaiin.





"Tlai a nih tawh hi" a rawn ti a, ka bu nghat "mahse ala tlai lutuk hleinem, bakah ka la buai a, ka ngaihsak hman dawn lo che a, lo kal lo mai rawh" ka ti leh țalh a, a rûm nghut a, a rûm ri te chu phone-ah chuan a ri chiang em em bawk.





Midangin an rawn tihbuai vang nge ni a reh vang vang a, phone-ah chuan phun nuah nuah ri a awm a, mahse ka hrechiang lo, call chu ka ti tawp ta tawp a, chair-ah chuan țhu in dawhkana ka paper chu ka lek kâng a.





"Ei theih ni la chu ei tur ka tlachham lovang mawle" ka ti chhuak sap a, ka hne tawh lutuk hi sawi ngaihna pawh ka hre tawh lo, nitin ziah luh tur tam tak a awm a, chuan an la rawn dah belh ziah lehnghal bawk a, heng ai chuan order la a tlankual ka thlang fê zawk.





Khuh kharh kharh hi ka hriat rual chuan ka hawi chhuak vat a, ka hlauh ang ngeiin Kima alo ding kur a, ka țhutna ațang chuan ka dawk chhuak nghal zawk!. "Enge ilo tih dawn? " ka ti nghal vat a, keimah ah hlauhna a rawn piang lehnghal der tawh.





"Hna i thawk țha em tih rawn en ka tum mai ania, i thawk țha e" a ti sup a.





"Ka lawm e" ka ti let ve nghal sap bawk.





"Hmalam i pan zel em? " ka zawh chak em em ka zawh ngam ngai loh chu ka kâ kaw lutukin a rawn sawi chhuak leh ta phawng a.





A dar min san khum ak a, ka rilru in 'i u nen inkawpin nun dang ka zawh leh mek asin' ka ti sep bawk a. "Pan a ni mai ang chu, kar leh hian Judy nen pawh inhualna kan nei ang, ka lo sawm ve che a nih chu" a ti a, paper pakhat chu en in lehlamah chhuan a dah nghal daih a.





"Ka lawmpui lutuk che u" ka ti a.





"Kan lawm e, mahse i lawmpuina hi chu kan mamawh kher in ka ring lo, Judy in a duh ka ring hauh lo" a ti a, a thusawi chuan min deng pawp ni bera ka hriat, tuna a thusawi hi ka hrechiang lutuk mah mah a ni, a bialnu sawi lang mahse keimah zawk min hmuhsitna ri chhuak a ni tlat.





"Oh! Mahse, a duh emaw duh lo emaw ka lawmpui tho ang che u, chuan hetah tihtur i nei a nih loh chuan kal tawh rawh" ka ti ve ta kher a, a bu ve nghut tho.





"Ka kal chiang ngawt ang" a ti a, ka thaw chhuak hak. Ka thil ziah lai chu khur det det chungin ka ziah chhunzawm mawlh mawlh a, ka hawi chhuak tawh lo hrim hrim, aduh hun hunah chhuak teh se.





'Hold on' - Chord Overstreet ho sak (lo ngaithla ve ru a nalh lutuk ania💜😘) play thawm ah chuan ka harh a, ka zi mar nghal țalh țalh a, ka zi mar min lo en reng tu ka hmuh avang chuan ka tawp nghal chat a, ka țhu ngil nghal awt bawk.





"Engtin nge hetah ka awm theih? " ka ti chhuak hliai a, Office-ah khan ka la awm amaw ka tia, mahse Car-ah ka lo awm leh der tawh "I muthlu a, Car-ah ka pawm lut che a nih kha" a rawn ti sup a.





"Kan thleng tawh ami? Khawiah nge kan awm? " ka ti leh a, a chhan pawh engmah ka hmu theilo miau a.





"No, i duh leh mu leh rawh, saw lai lawk ah sawn motor chhia a awm a, chuvang chuan ala rei deuh ang" a ti ve mai a, ka kut chu rawn hûm in ka kutțang karah chuan a kutțang a rawn rawlh lut a "Ka mut a chhuak tawh lo" ka ti zo chu ka hâm lehnghal bai bai.





A rawn nui chhuak hawk a "takzet" a rawn ti hluk, ka bu nghat a.





"Ania lawm, ka mut a chhuak tawh lo tak tak, kan tan na a rei tawh em? " ka ti leh sap a, amah chu ka en nghal vat bawk "minute 15 vel bak ala ni lo" a ti a, ka hawikual deuh nghal bawk.





"Hnaah min dah hmasa la, kal hmasak ka ngai a" ka ti sep a, ka kut chu la in a fawp zeuh a "Leave ka lak sak tawh che, in boss pawh a nuih leh theih tawh saw " a tih chuan 'enga!?' ka ti chhuak nghal vak.





"Amak, au vak țhin suh, hna kal țhalo ka hnena an rawn report chuan ka lo chingfel mai tur a ni, ka bialnu duhawm zet hian hna a thawk rih lovang" a rawn ti sup a, amah chu ka en nghal haw a.





"A nih chuan dawr neitu chhelo deuh an tih kha nangmah hi maw? " ka ti lehnghal vak, mawi ka tih ang deuh khan ala nui ang suk lehnghal, a bu nghut a "Chu, nangpawn chhelo min lo ti țhin em ni? " tih pah chuan hnai lutukah min rawn en a, ka mit chuan melh tur a zawng nghal ruai mai.





"Teuh lo lutuk!" ka ti chhuak nghal nghek a, a nui chhuak hawk bawk "takzet" a rawn ti hluk a, ka bu nghat.





"An sawi dan che ania kei chuan ka la hmu ve hleinem che" ka ti a "a nih chuan hei min hmu tawh alawm" a rawn ti a, ka nuk ringawt.





"Khatin min en reng suh" tih pahin ka hawisawn nghal daih a, mahse ka khabe ah vuanin amah en tur chuan min kuai phei lehnghala, ka biang hi a sa hut hut mai.





"Min thlah tawh la" ka ti leh sep, ka biang sa hat hat lai chu a rawn khawih a.





"Nilengin ka thluak hi i chhuahsan lo tih i hria em? " a ti sup a, chhang lovin ka melh reng ringawt a " nangmah avang hian hna pawh ka thawk theilo țan nghal der chu ania" a ti leh a ka biang chu a tuai heuh heuh a, ka lo ner nâng.





"I rapthlak lutuk aw... ngati... " tia ka sawi zawh hma hma chuan ka hmui chu a hmui sexy zetin a rawn khar chilh nghal hmiah a. Hnunglama motor-in horn a rawn pek rual chuan a rûm nghal nghut a, muangchangin min thlah nghal riai riai a, a chet zui nghal hluk bawk.



_________\°•°/

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » December 20th, 2020, 3:07 pm

2'3' #EP-17

By : Msi_Miluhlulnui 👩🏻
(Hmeichhe Naupang Tereuhtê🙃)





'Eng ang pawn ka lak ațang hian bihrûk tum in mipa dang kawp mah la, ka zui zel tho ang che. Ka hmangaih che ka ti a ni lawm ni, tunah ka u nen in inkawp leh si amaw!? Eng ang hmeichhia nge maw ilo nih hrep le' ti a thinrim in hrosa chunga au chhuak hrâwk avang chuan ka phu zawk a.





'Ka lak ațang hian kal bo han tum chhin la..., i thei ngai lovang, kei lo mipa dang i hmu thiang lo, a theih loh hrim hrim, ka ta i nih dawn loh chuan tuma tan ka phallo che. Ka duh chuan ka ru bo che anga, keiman nei che in ka thuhnuaiah hreawm ti takin i.awm mai tur asin' ti a Kim'n thinrim tih hriat zeta ka hmai zâwna au tuarh tuarh avang chuan ka tîm zui châwih a.





Thâwk leh khatah ka thaw chhuak nghal kâwk a, ka meng nghal kawk bawk. Ka thaw halh halh a, ka thin a phu rang dup dup bawk, ka thâwk a rang a, ka thlan alo tla hluam bawk , ka khur ru der der a. Tuna mi kha ka mumang ani em, ka mumang a nih loh chuan, ni lo ka mumang a ni tur a ni, khatiang thil kha a thleng thei lo.





Khur der der chungin ka țhuchhuak a, ka room chhung chu ka en kual nghal ruai a, tumah an awm lo, mahse tuna mi kha ka mumang a ni in ka hre si lo, tinge a tak angin ka ngaih tlat a.





Ka kut chu ka suih zawma ka thlan na avangin a huh ve dap bawk a, ka khum lu chu ka ngheng a, ka khur der der mai, thawm ri hlekah chuan 'tunge' tih pahin ka hawikual nghal vak zela, keimaha hlauhna nasa lutuk avang hian ka â thei mai dawnin ka hria.





Tuna mi kha ka mumang pawh lo ni ta tehreng se, eng vangin nge khatiang kha ka man kher, tinge Kima ka hmuh kher, chu pawh thinrim chung lehnghalin.





A thinrim tawh chuan engmah tih hreh a nei lo tih ka hria, a nih chuan kha thil kha ka mumang pawh ni mahse a thleng thei, tunah hian a thleng thei.





Ka hut ka hûm na pawh chu a khur nasa tual tual a, tuna a thusawi zawng zawng kha thleng vek ta se, ni lo, a ni chuan nupui a nei tawh dawn alawm kei min tihbuai nachhan tur a awm lo, a awm lo hrim hrim, a tan chuan engmah ka ni ve hleinem. A tan chuan lung ang bak ka ni lo tih min hrilh kha.





Mahse ngatinge ka man kher khatiang kha, ngatinge hlauhnaa ka khah a, a thleng dawn tlata hriatna ka neih. Mumang hlauhawm zet ka neih lohna hi a rei tawh asin, tunah tinge ilo lan leh, ka hlim ve dawn tawh amaw ka ti asin tiin ka rilru chu ka kawm mawlh mawlh a.





Ka kut chu hûm tai chungin ka mu thla leh riai riai a, rizai chuan inkhuh in ka maimichhing a, ka mit te chu hlauhma avanhin a khur ve dar dar reng bawk.





Ka lo chhing leh sek a ni ngei ang ka harh chuan khua alo êng uarh tawh a, men pawh a harsa lek lek, tukverh kar ațanga ni lo chhuak chuan ka mit a rawn chhun ser ser a.





Rang lutukin ka tho chhuak nghala, ka room chhung chu ka en kual lehnghal ruai a, thil engkim alo fel vek avang chuan ka thaw chhuak nghal huai bawk, mahse ka rilru a nuam thei chuang lo, nizana ka mumang kha ka hrechiang em em a, a thleng dawn tlata hriatna ka neih avang chuan ka hlauhna hian kiam lam aiin zual lam a pan zawk zel bawk.





Side table a ka phone awm rawn vibrate chur chur chu ka ban vat a, number lawng a ni, tunge mawni le tun ang zing kar kar ah ti rilru pahin call chu ka chhang a "Tunge aw? " ka ti nghal sap bawk.





Phone ațanga rawn rûm nghut ri ka hriat rual chuan tunge a nih tih ka hre nghal thei, ka phone chu ka en leh zawk a, a number ka lo la save lo tih ka hre chiah, engtin tak min ti leh ang maw.





"Duati, ka number ila save loh tih sawi miah suh" a tih hluk rual chuan ka țhen nghal sak a.





"Ka la save hman lo alawm, ka phone pawh nimin ațang khan tunah ka khawih ve chiah" ka ti a, phone atang chuan a rawn thaw chhuak nghal ham ham a.





"Aw ka hrethiam e, nizanah i mu thei em? " a rawn tih rual chuan nizan thil thleng kha ka mitthla lehnghala, ka mur nghal chuai mai, mahse engmah ka hrilh tur a ni lo.





"Aw, muttui lutuk, nang zawk? " ti let in ka ke chu khum ațangin ka hlâng thla nghala "Duati, dawt sawi i thiamlo ka tih tawh kha, thudik sawi nghal țhin la" a rawn ti a. Tinge hepa hian min hriatchian em em theih le.





"Dawt ka sawi hleinem ka muttui lutuk ringawt, bakah tunlai chu ka thil ei a tui a, mut pawh ka duh tel bawk a" ka tih chuan a rawn thaw chhuak hawk a. Khum ațang chuan tho chhuak in bathroom lam ka pan nghal bawk a, harsatna lian tham ka tawk a nih loh chuan ka hrilh mai mai lo ang che ka ti rilru nghal sep bawk.





"Ka hmu chak tawh che tih i hria em? Nizanah in ah khan luh i phal lova, ka hmuh chak tawh che avangin mut pawh ka mu theilo" a rawn ti deuh nghut a, tunah hian ka thin phu dep dep ri chiah hriat ka nei.





"Duati" ka chhân loh avang chuan a rawn ti leh hluk, hepa bula sawitur ka hrelo thei lutuk hi ka hrethiam lo takzet a ni. Midang bulah chuan ka țawng zawt zawt zela, mahse hepa bulah erawh chuan sawi tur mang ka hre ngai miah lo.





"Ka hming in min ko la, khatianga in koh kha chu...' ka ti nang nang a, a rawn nui ri a.





"Ka koh dan che ah hian buaina i nei deuh em ni? " a rawn ti let zawk za mah a, zing kar ațanga inhnial ka duh bawk si lo, ka va han ning tak.





"Nei e, ka awm thiamlo alawm, a special bik tih a chiang reng a mahse kei chuan ka inhmeh ve lo" ka ti sap a, toothbrush-ah chuan toothpaste ka tât pah zeuh bawk a. Darthlalang hmaah chuan ka in en leh vang vang phawt.





"Special, ni e.... i tidik chiah. A special takzet a, ka tana mi hlu lutuk tak i nih avanga ko che ka ni 'Duati' ka tih hian ka ti mai mai lo ania, he thu hian ka tana i pawimawh zia a ti lang a, ka nunna ai pawha i hlutzia a ti lang bawk. Kei lo chuan an koh che ka phallo, chuan 'Bawihi' ka tih che hian ka ta chauh, keima ta chauh, tu ma min chuhpui theih loh i nih zia a ti lang a.... " a sawi zawh hma hma chuan.





"Zing kar kar ațang rawn thlum vak suh" ka lo tih khalh hlak a, ri meuhin a rawn nui chhuak hawk bawk.





"Ka insiam dawn ka dah ania, duh leh chhunah i thlum chhunzawm leh dawn nia aw" nui ker ker pah chuan ka ti a, min chhanna pawh nghak ngam tawh lo chuan phone chu ka off nghal daih bawk.





Nui vur vur chungin darthlalang hmaah chuan ka in en a, hetiang hian hlim reng thei ila ka van ti tak em! Hetiang anga ka hlim lohna pawh hi a rei tawh takzet, hlim reng ka duh ve tawh takzet a ni. Mahse keimaha hian eng emaw ni hian min mawlh tlata, hlauhna in ka khat a, thil thleng tur a awm tlata hriatna ka nei bawk a, chung ka ngaihtuah chang chuan min ti hlau leh țhin.





"Zual, vawiin kha Miriam-i leh Hlutei chhuk ni kha ania" Feli chuan ka duty-na room-a rawn luh pahin a rawn ti nghal a, ka pen chu ka dahthla a "Thla tawpah kan chhuk dawn an ti emaw tia" ka ti sap a, a dar min san khum ak a.





"Ka hre bik lo keipawh, an tum leh thut aniang, nizanah min rawn hrilh a, ka lo call che a, mahse ila thei lo a" a ti a, ka bulah chuan a rawn țhu thla ve nghal bawk.





"Call ka la theilo maw!? " ka ti nghal vak a, a bu nghat.





"Aw, vawitam tak ka lo call che a, mahse i la theilo" tih pahin dawhkana paper chu a la a, a en zeuh bawk.





"Missed call pawh a awm miah lo, chuan a ri pawh ka hre miah si lova avan mak em em" ka ti hliai a, zinga phone ka en khan Feli missed call pakhat mah ka hmu miah lo.





"I thawh ang hi ka thawk ve chak, order lak kual a, sem chhuah leh tih vel ai chuan a hahdam zawk daih ang" kan thusawi lai chu sawi chhunzawm tawh lovin a dangah a pakai daih a, vawiin a mizia hi a dang riau mai, nidang angin a țawng bawrh bawrh miah lo.





"Chak duh suh, hneawm lutuk" ka ti hlak a, a rawn nui chhuak vak vak a "Nang hi chuan hne loh pawh hi i nei lo in ka hria" a rawn ti a, a banah chuan ka ben sak nghal pawp a "I thlah dawn em? " ka ti nghal sap bawk.





"Ka hre bik lo, madam sawn vawiin chu hna min pek belh veka, ka kal theilo ang, nang phei chu a double leh dawn ania" tih pah chuan chimawm zet hian min rawn melh a, lei ka chhuah khum vak ringawt, henu chimawm lutuk hi chu aw...





"Nih chuan keipawh ka kal hman lovang, thlah lo mai ang, thlahtu an ngah leh dawn tho" ka ti a, ka hmaa lehkha tam zet inchhawp hnûr chu en in ka thaw chhuak hak a. Engtikah nge maw ka kalsan ve theih ang ni, ka hne tawh lutuk ringawt.





Feli nen rei fê kan titi hnuah hna kan thawk ve leh chauh a, kan pahniha kan awm tawh hi chuan sawi tur kan hre mah mah thei lutuk a, hun hian min daihlo a ni mah zawk. Kan titi na hun hi hnathawh nan hmang ta ila, kan thawk țeuh hman țhin hrim hrim ang.





Chawhnu lama Hospital lama kal ka ngaih avangin ka hna pawh thawk zo lo in ka kal nghala, ka nu sam zai u Sai'n a thih dawna a lak leh leh amah ațanga kan thil hmuh chhuah zawng zawng test tir vek a ngai a. U Saia min hrilh ang ang hian ka ti ve tawp a, engmah hi ka hrethiam tawh nei nuai lo.





Mahse ka nu chanchin zawng zawng kan chhui chhuahna tur leh ka pa kan hmuh chhuahna tur a nih dawn phawt chuan engpawh tih ka huam, ti hian engmah hrethiam lovin an tih ang ang hian ka awm ve tawp a. U Saia hian min bum dawn lo tih ka hriat êm vang a ni.





"Naktukah result chu i rawn lam nghal dawn nia aw" Doctor chuan ka nu sam chu en vang vang in min bia tih pawh hriat lek lovin a ti a, ka bu nghat a, lawmthu ka hrilh nghal vat bawk.





"Malsawmzuali maw? " a tih chuan 'aw' tiin ka chhang a, ka hming chu paper pakhatah hian a ziak thla bawk a "I hmeltha hle mai" a rawn ti lehnghal bawk a, ka nui ringawt a "ka lawm lutuk e" ka ti nghal sap bawk.





"Mizo hmeichhia ah pawh a langsar pawl i ni nalh ang chu" a rawn tih chhunzawm lehnghal zata.





"Chutiang em em chu ni lo ve" ka ti a.





"Ka va âwih loh deuh ve a" a rawn ti leh, min en pahin a nui deuh suka. A râp awm reuh lutuk ringawt.





"Ka kal thei tawh angem?" Ka ti daih a, min chhang lovin a bu nghut ringawt a, ka tho chhuak a, biak tlangnel chi pawh a ni lo. A hmel hi chu hahdamin nelawm reuh viau mahse, eng emaw ti takin a hlauhawm reuh phianin ka hria, misual lo inphumru te pawh a ang zawk mah e a.





Damdawiin kawtah chuan ka ding vâng tawh a. Ramhlun'n ka lo lam ang che a tih avangin ka la nghak a. U Sai'n min rawn call ve leh chiah bawk, thil engkim ka tih tawh thu leh result chu naktuka a lam theih tur thu ka hrilh nghal bawk a.





Ka sawi mawlh mawlh lai chuan ka hmaah tak car pakhat hi a rawn ding a, glass a in down rual a Ramhluna hmel hahdam zet ka hmuh rual chuan ka thaw chhuak nghal ham ham a, keimaha muanna a rawn awm chawpchilh nghal bawk.





Min en pa chuan a nui a, rawn chhuah a tum chu ka kutin țhu turin ka ti a, keimah chuan car chu ka hualin ka țhu lut nghal vat a. U Saia pawh a țawng tui a chhuak leh tawh a, mahse naktuka kan pahniha result lam naa kal dun tura in tiamin phone chu a dah nghala, kan la tlanchhuak miah lo.





Phone dah țha mawlh mawlh chunga ka hawichhuak chu min lo melh ngur a, ka zâm lehnghal der tawh. "Ngati nge ila tlanchhuah loh a? " ka ti a, tinge maw in en ringawt pawh hian ka zâm em em nghal theih le.





"Min ngai miah lo" lungawi lo tih hriat zet chuan a rawn ti hluk a, ka nui chhuak hak.





"Chutiang ka sawi loh kha" ka ti nghal vat a "I sawi lo, mahse min ngaihsak lo alawm, i phone biak lai chiah I ngaihtuah a nih kha" a ti leh deuh hmuk a, a palian si a, a aw a thûm si, hetianga țawng te hi a inhmeh ve thlâwt lo.





"Thil pawimawh lutuk ania".. ka ti sap a, engah tak chuan lungawi lo ang maw "A nih chuan ngaihdam dil nan eng emaw min tihsak ngei chu a ngai ang" ti sup in a biang chu a rawn dawh hnaia, ka lo meng phâwk hra mai.





"Engthil nge maw itih le!? " ka ti nghal țhat a.





"Ka bianga i fawh hmasak loh chuan kan tlan lovang" a rawn ti a "Ka hmanhmawh ania" ka ti nghal vak.





"I know, but you have to kiss me first" a ti leh sup a, ka ner zui nghal nâng bawk, English kher a han sawi te chu a.... "Bawihi" a rawn ti leh hluk.





Thaw chhuak hawk in a biangah chuan ka fawh sak vang vang a, ka fawhna ka thlah chiah chu ka hmuiah a rawn bur ve leh nghal chat bawk.





Kham lo tih hriat zeta min thlah riai riai chungin a rawn fawp leh zeuh țhin a "Nakinah kan chhunzawm ang tunah chuan damdawiin kawtah kan la awm tlat" tiin rei tâwk fâng a rawn fawp leh vang vang a, ui tih hriat zeta chet zui hluk in min thlah a. Ka hmui hi a sa ham ham thei nia, ka hup tawp ringawt.





Traffic jâm-a kan tân lai chuan ka kut chu steering a hûm lohna lam chuan a rawn hûm a, "Office-ah min tlangpui phawt la, chuan hruai duhna che ka nei a" a rawn ti a.





"Aw, mahse rei lo ang, hnathawh tur ka la ngah lutuk" ka ti a "Hna thawk nasa lutuk țhin suh ka tih che kha, i hah chuan i thâwk a buai leh ang" a rawn ti a, amah chu ka en nghal vat a.





"Min hrechiang viau a chu mahse engtin nge ka thâwk a buai țhin tih i hriat a? " mak ka ti tawh lutuk chuan ka ti ta phawng a.





Nui ri suk in min rawn en a.





"I rin aiin ka hrechiang ang che min hrelo mahla kei chuan ka hriatna che a rei tawh" a ti leh a, ka kut chu la kângin a fawp zeuh a. A khabe a hmul tlemtê rawn to siar siar chuan ka kut chu a nul thuak a, a za nghal mer mer mai.





Kan tlan leh theih tawh avangin a ni pawh a tlanchhuak ve lehnghala, ka kut erawh a hûm bet tlat thung a, tunlaia ka nundan inthlak ta hlawk te, ka lo danglam tak zia te ka ngaihtuah a, mak ka in ti a ni, hetiang thil te hi a rawn thleng zung zung mai si a.





Dan lo tum ve ringawt pawh ni ila, dan theih a ni bawk si lo, thleng tur chu a thleng vek dawn tho a keini lo sawi theih pakhat mah a awm lo, mahse a kar a mahse tih lo awm ve leh țhin hian rilru nawm lohna min siamsak țhin





Motor a dah fel chhung chuan Building kawtah ka lo nghak a, Feli'n min rawn call sek tawh a, ka la ang em la lo ang em tih ah ka la buai, a rawn call nawn leh chiah rual chuan ka pick nghala.





"Hmeli, eng vangin nge u Ramhluna nen in ni tih min hrilh ve miah lova" a rawn ti nghal hlak.





"Hrilh che ka tum reng alawm" ka ti a.





"Chupawh nise a tirah khan min hrilh ve ta che, ka lungawi lo khawp mai, ka lawmpui ang che ka tia mahse ka hau zawk mai ang che, min hrilh pawh i tum si lova" a rawn ti lehnghal hlak a, a duh duh a sawi anga a dah leh țep tawh ang. Hrim hrim in engtin nge maw alo hriat theih le.





"Fel, hrilh che ka tum alawm, mahse hrilh tur che in ka la inring lo a, khawi ațangin nge i hriat reng reng a? " ka ti let ve lehghal a.





"Chu chu a pawimawh lo, ka lung a awi lo, tikhan ka hre tlai leh ber awm sia nga" a ti leh hram a.





"Ka lo be leh ang che chuan insawifiahna țha deuh ka duh ania" a rawn ti leh a, a sawi zo chu a off nghal daih bawk.





Ka thaw chhuak hawk a, Ramhluna lo let lai pawh ka hrelo, ka awmdan chu chîk zet hian min lo en reng a "Kan kal thei tawh em?" A rawn ti a, ka lo bu ringawt bawk.





"Reilo ang aw" ka ti leh a, ka kut ah chuan rawn vuanin ka kutțang karah chuan a kutțang a rawn rawlh lut nghala, building lam pan chuan min kai phei nghal bawk.





A chhunga mi te chuan chibai an lo bûk sap sap hlawm a, hnathawk pathum vel a hmaah chuan an kal bawk a, kei erawh chu ka kal ngawi reng a, ka bana vuantu chu ka rinchhan a ni mah zawk, hnathawk hmeichhe țhenkhat chuan kei min en in an in hrilh ru sep sep hlawm a.





Chu chu a hria ni ngei tur a ni, ka kawngah chuan a ban rawn rawlh lut in a taksa si chêt chuan min pawt phei a, ka sam ah chuan rawn fawp nghal vang vang in.





"Engah mah ngai suh, ka kutah dah rawh, hahdam deuh in awm tum la" a rawn ti a, hnathawk pakhat chu a mitmei zeuh a, chu pa chu a kal nghal daih bawk, ka ngaih hi a țha zân lo.





Lift-ah chuan kan chuang a, kan hmaah chuan hmeichhe pahnih an ding bawk a, hnunglama kan chevel chu min hmu thei lo hrim hrim. Ramhluna lah chuan a khât tawkin min rawn fawp leh zeuh zeuh zela, a nâkah ka nghawk sak pawp zel.





Office kan luh dawn meuh chuan ka tîm deuh tlat a, ka lut huphurh tlat a nih chu! Mahse Ramhluna zawkin min kuah bet tlata, muangchangin min luhpui a, ka awmdan hi a ni chuan a hrethiam dawn tawp si lo.





A chhungah chuan țhu an lo awm țeuh a, ka hriat loh te hlir an ni, pakhat chu Evelyn-i an ti amaw ni kha ania midang chu ka hre lo, Chuan Kima bialnu pawh kha a awm ve bawk a, ka meng phâwk teh e.





"Rs, Gabriel, J-a, David, hei ka sawi ziah Duati chu a nih hi. Judy leh Evelyn-i kha chuan in hre tawh tho a" Ramhluna chuan a ti a, chumi te a sawina lam min hawi tir chuan min lo nuih vur vur hlawm a keipawh chu ka nui ve ta tawp bawk. Mahse hmeichhe pahnih te erawh chuan min melh rum mang tara.





"I van hmelțha ve, Boss sawi ang ai chuan i hmelțha lehzual, i a vannei takzet e" pakhat chuan a rawn ti hluai a, Ramhluna chuan "Gabriel" a ti nghal hluk, chupa erawh chu a nui zui hawk hawk bawk.





An hnunga kawngkhar awm rawn ri khepah chuan kan vaiin kan hawirual nghal țhup a, rawn chhuak ka hmuh chuan hlauhna in ka khat nghal, ka meng phâwk hra bawk, a ni pawn min hmu chu mak a ti ve ngei aniang, a meng buai ve nak a.





Hetah hian Kima a awm ve a nih chu! Nizan ka mumang te kha chawp leh chilhin ka hre chhuak nghala, hlauhna in min rawn țham nghal er er thei, ka thâ te hi a khur nghal der der thei nia, engtin nge hetah a awm ve theih.





A ni pawh chuan Ramhlun'n ka kâwng a vawnna chu a rawn hmu chhunzawm zat a, a kut hûm ruhin a insehru nghal țeuh tih ka hmu thei. A hmel pawh a chang nghal țawlh țawlh a ni ber, Ramhluna chu insehruh țeuh chungin a en a.





"U.." a rawn ti chang nghal hrâwih a, ka phu nghal zawk thei.


__________\°•°/

Link:
BBcode:
HTML:
Hide post links
Show post links

Local Advertisement

MOBILE SIAM ZIR DUH TAN!!!

Tech-Inn Mobile Repairing Traning Centre, Bazar bungkawn

Kum tin mi za chuang eizawnna kan siamsak a, Eizawnna tlaka thiam turin kan zirtir thin

Mizorama mobile siam zirna hmasa ber changtlung ber kan ni. Hrechiang duh tan Contact : 9612099411 / 9862016122


Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » December 20th, 2020, 3:08 pm

2'3' #EP-18

By : Msi_Miluhlulnui 👩🏻
(Hmeichhe Naupang Tereuhte)





"Ka sawi chiang viau tawhin ka hria" Ramhluna chuan a ti nghut duh chauh.





"Zualtei i rawn hruai dawn tih i sawi hauh lo" Kima chuan a ti let hrâwih a. Ramhluna chu rum zet hian a melh bawk a, an unau inkarah hian buaina a thlen ka hlau takzet.





"Ka sawi kher a ngai em ni? Engkim kan sawifel tawh, i sawisel dawn a nih chuan nizana i thusawi kha ngaihtuah let hmasa ang che" Ramhluna chuan a ti leh nghut a. Kima chuan min rawn en a, a ner nghal nak a, kei erawh ka ding ngawi reng a, sawi ve tur reng ka hrelo. Ramhluna lah chuan amah hnaih chêtin min la kuah ta deuh deuh lehnghal.





"Rs, Bawihi hi ka chhuahpui lawk dawn a hna lam kha chu tlai ah kan sawi mai dawn nia" a ti leh sup a, Rsa a tih erawh chuan kan pahnih min en chung chuan a nui vur vur a.





"Sawi lo pawh ni la ka tih tho ava ngaih hmel ve" min nuih vur vur pah chuan a ti a, chutia a rawn awm avang chuan ka lo nui lui ve ringawt bawk. Heng ho karah hian han awmdan vak tur ka thiam lo.





"Duat, thil thleng hi i sawifiah ngei chu a ngai ang" hmeichhe aw ka hriat țhan deuh lo chhuahna lam chu ka en nghal vat a. Chunu chuan rum mangkheng hian min lo melh bawk a, Ramhluna chuan ka banah rawn kaiin an lam pan chuan min kalphei pui a, ka kal te hi a sak țalh thei mai, engtin emaw tak hian boruak hi a awm ka sawi thiamlo, a uap deuh churh thei.





"Sawifiah tur a awm em ni? I hmuh ang hi a ni mai" a ti duh lêk chauh a, chunu a chhan pawh chuan melh pawh a melh eih lova, keimah ringawt min buaipui a ni ber.





"Mahse tinge henu bawk chu i buaipui leh a, buaina a tawh chu ka va ring tawh chiah lo ve, nge ni a nang hi alo zar buai zawk che" ti chang ta rat in keimah chu min rawn melh zeuh a, min ner khum nghal nak bawk.





"Evelyn!" Ramhluna chuan a ti fiak țhawt! A aw ri te chu kan awmna chhungah hian a khâwk rum rum thei, a țhiante lah chuan tuna thil thleng mek hi an ngaihsak teh vak lem hlei lo bawk a, thil an sawi a an awm awm in an lo awm ve a ni ber.





"Khatiang thu kha i kâ ațang a chhuak leh a nih chuan ka tihtur chu i hriat kha" a aia dam zawk chuan a ti leh a, mahse a dam zawk ka tih pawh hi ka tan chuan khurhna tham a tling thei hial.





Mahse chunu erawh chu ala hawi vah tho, a lu chu sang takah dahin "nang hian i duh chu ti ang che, kei erawh chuan ka kalsan ve dawn lo che, hetiang hmeichhe hnenah lehnghal hian" a ti deuh pah kher a, a sawi pah chuan ka thawmhnaw hak chu en in a ner nghal nâwng bawk.





Ramhluna chuan Sofa-ah chuan min țhuttir a ka chalah chuan a rawn fawp vang vang.





"Duati, hetah hian lo awm lawk rawh aw, ka rei lovang" ka chal a a hmui nghat reng chung chuan a phun sup a, ka chhang lo. Ka hmaa țhu pa chu a mitmei zeuh a chupa chu alo bu nghal nghut bawk.





"Kan rei lovang" ti sup in ka chalah chuan a rawn fawp leh zeuh a, amah chu ka melh chho hâ a, dik tak chuan tunah tak hi chuan ka bulah hian awm se ka ti takzet, tumah ka hriat loh mai bakah, min haw tute hlir an awm ni maiin ka hria.





"Rei suh aw" zâwi tê in ka ti hram a, ka huphurh tih a hria a ni ngei ang ka chalah a hmui nghat reng chungin min tiam leh thlap a. Room lam pan chuan a mitmei pa nen khan kal nghal daih bawk.





"Duat, min ngaithla teh" tih lûng lûng pah in ka hma maia hmeichhe țhu chu a rawn ding chhuak zawk a. Ramhluna te kalna lam chu a pan tumin a in siam rem a, a kalna tura ka ke ka lo dah avang chuan rum zeta min melh pah in a rum nghal nghat a, ka va han dahsawn chiang tak.





Kima pawh a bialnu bulah a rawn țhu ve nghala, a chang chuan min en leh vung vung țhin a, ka rap lek lek țhin. Amah ka en apiangin nizan ka mumang kha ka hre chhuak ve ziah a, ka hlauh lutuk avang chuan rang lutukin ka hawisawn a ka thaw chhuak vak zel bawk.





Ramhluna lo let tawh se ka ti ngawt mai.





"Zualte, ini tiraw? " ka bul maia rawn țhut pah chuan mipa pakhat hian a rawn ti a.





"Aw" ka lo ti sep a, ka mit sir hian Kim'n min en reng tih a hmu thei a, ngaihngam tak pawn ka țhu thei lo.





"Aw.... Rsa ka nia, Ramhluna țhian țha lutuk lutuk" tih pah chuan a kut a rawn phar chhuak a ka lo vuan ve nghal vat bawk. Țawng tuma ka âng zuai tawh chu "nang chu ka hriatna che a rei tawh alawm. Ramhluna hian a sawi reng zel che a, a sawi ang ai chuan ilo hmelțha daih zawk tak tak a nih hi" a tih chuan a ngaihna hrelo zetin amah chu ka en a.





"Min hriatna a rei tawh maw? " ka ti nghal hû bawk.





"Rei tawh e, kan țhianpa hian a sawi reng zel che alawm" țhut țhat pah chuan Rsa sira țhu pa chuan a rawn ti leh a, amah chu ka en zui vat a. Hemi te hian min lo hre daih tawh a nih chu....! Mahse kei erawh chuan anni chu ka hre ve hauh lo.





"Chuan saw saw David, kan țhianpa tho ania, chuan hei Gabriel-a, i bialpa tana mi rinawm em em te an nih hi" a tih chuan ka nui ringawt a, a thu han sawi dan vel mai mai chu ah!.





"Enge i tih țhin a?" a rawn tih chhunzawm leh zat a.





"An dawr ah hian ka thawk a" ka ti țha ve mai a, a bu zui nghut nghut bawk.





Kei hi ka hmelhriat loh leh ka la hmuh ngai reng reng loh lakah chuan țawng tlem tak ka ni a, min biak pawh hian a rul tawk bak lek lek in ka chhang ngai lova chuvang chuan tam tak hian min ngainat loh phah țhin bawk.





Mahse hepa nen erawh chuan inkawm hrep tawh ang maiin kan in be thei a, a nêl awm a, ka biak loh pawhin min biak țawng phêt a tum a, i van țawng duh lo tak tih pahin zawhna min zawt chhunzawm lehnghal char char tho.





Kima pawh awm ve lek lova ngaiin kan pathum chuan kan nui ta char char a, fiamthu ho te te a thawh a, kan nui dar dar zel bawk.





"Rs, bawihi hi i hmuh peih loh thu kha i sawi si a" Ramhluna aw ka hriat rual rual chuan a taksa lum zet chuan ka taksa a rawn hnaih nghal der a.





Amah chu nui var var chungin ka melh chho a, nui ve sukin ka chalah chuan a rawn fawp zeuh bawk.





"Chutiang pawh ka sawi loh kha, i I sawi ngun lutuk ka ti ringawt a nih kha, țan hlek suh" a ti ve hluk a. David-a erawh a rawn nui chhuak huk thung.





"Kan kal phawt ang. Bawihi hi a hmanhmawh deuh sia" a ti sup a, ka kutah chuan a rawn hum nghal vat a "Hauh tlat suh, kan kawm ve duh tho ania " David-a chuan a rawn ti deuh hmuk a, ka lo nui chhuak hak a, khawiah nge Kima te kha an lo awm hman le, ka hre hauh lo.






"Rs, chanchin a awm chuan min rawn call nghal rawh aw. Elizabeth-i kha biak ngei ngei kan ngai ania, vawiin a tihfel a nih loh chuan naktuk nghak thei kan ni tawh lo" Ramhluna chuan ti nghut.





"Mahse amah ka la be pawp thei lo va Gabriel-a khan biak a tum mek a, chanchin a awm vat turah ngai ang"





An inbiak lai chuan an bulah ka lo ding ngawi ve reng a, khawiah nge Evelyn-i pawh kha a awm tak daih le. Kima te pawh an kalsawn lai reng reng ka hrelo. Thawm pawh an nei miah lo a nih chu! Nge keini kha kan nuih bengchheng vak zawk nge ni, a ho lutuk, ngaihsak a țulna a awm lo.





"Kal vat mai teh u, Zualte ka sawi kha hre reng ang che" Rs'n a rawn tih chuan nui vur vur chungin ka bu nghat a. Mit min rawn siai nghal zeuh bawk a, Ramhluna chuan kan pahnih chuan min melh tawn zak zak.





Lift-a kan chuan lai chuan nichina hmeichhe pahnih kha an awm tawh lova a ni pawn ka hnute hnuaiah a kut nghatin hnunglam ațang chuan nghet zet hian min kuah a. Keipawn ka ngheng let ve ar ar bawk, hman ațang tawh a hahdamna ka zawn țhin kha ka hmu ni maiin ka hria.





Car-a kan țhut luh hnu chuan kan tlan chhuak zui nghal mai a "Rsa khan in la naupan lai chanchin te alo sawi a, kan lo nui char char a" ka ti a, Rsa thusawi ka ngaihtuah zawng ringawt pawh hian ka la khi țhû thei.





"Ava han țullo ve mawle" a ti nghal hluk a, kei erawh ka lo nui hak a "Rsa bialnu in rim laiin i che chhia a ni maw?" nuih insûm zeta ka tih rual chuan a rawn rum nghal nghut a.





"Bawihi, eng chen nge alo hrilh che a" a rawn ti lehnghal hluk, ka nui a.





"Min hrilh țeuh mai, i chêt chhiat na te, i in tih pâ lai vel te, a sawi țeuh mai" ka ti a, Rsa thusawi ka mitthlaah a rawn lang nghal a, ka nui chhuak nghal vak bawk.





"Hrep chuan, Lalremsanga mai mai chuh! Ava han țullo ve mawle" a ti hluk a, steering chu a herh lehnghal pawp a.





"A bialnu in rim naah i ruih avangin a nu chu i bialnu amaw ilo ti a ni maw? " tih pah chuan ka nui chhuak hak hak a "Bawihi" a rawn ti nghal nghut bawk.





"Chuan i hmangaih thu te ilo hrilh vela" ka tih chuan "Malsawmzual" a rawn ti nghal hrâwk!. Nuih ruh ruh pah chuan "a nih chuan ka sawi tawh lovang" ka ti nghal a, mahse ka nui chak lutuk chu ka maimichhing a ka hmui ka pet ringawt.





Motor seat-ah chuan țhu țha in ka nui ker ker a.





" I hmui kha motor khalh laia ka fawh i duh loh chuan nui tawh suh" a rawn ti lehnghal nghut, ka nui lai chu ka tawp chiang mah mah. Steering a vawn lohna lam a kut chuan ka kut chu a rawn hûm a, a la kâng a, a fawp nghal zeuh bawk.





"Jam-a kan tan lai hian nichina ka sawi kha ka ti mai dawn em ni? " a rawn ti sup.





"Khalh mai mai rawh" ka lo ti nghal hlak a, a nui chhuak hawk mai.





"Keimah ai ka țhiante saw i hnaih dawn tlat ka duh lo, chutiang a nih dawn chuan i kawm ka phal miah lovang" a aw a lungawi lohna rawn ri chhuak tel ve chu a inhmeh bik ngawih ngawih.





"Chu, ka tih leh tih loh tur min hrilh i tum em ni? " ka ti a, a thaw chhuak hawk a.





"Chutiang lam in ka sawi lo, kei aia ka țhiante i hnaih dawn a nih chuan i kawm miah lovang, keimah chiah min ngaihsak tur a ni" lungawilo tih hriat zet chuan a rawn ti leh a.





"A nih chuan nangmah chiah ngaihsak ang che" ka ti sap a, a rawn nui kiai suk a.





"Chutiang tur chu a ni, ka ta chauh inih kha, tuma ta ini lo" ti sup in ka kut chu a fawp zeuh a. Rei pawh kan tâng lo, kan tlanchhuak lehnghal.





"Enge hetah hian kan tih dawn? " Thlanmual bulah chuan motor chu a ti ding dat a, mak ka tih lutuk avang chuan ka zawt nghal vat bawk.





"Aw... ka nu thih cham ania, min hman pui turin ka duh che a" a ti sup a.





"Enge chungte chu i sawi loh, a tir khan min hrilh la chu pangpar emaw ka ken sak ve mai tur ania" ka ti nghal hlak a, ka biangah chuan rawn dawm in a rawn tuai zeuh a.





"A ngai hleinem, nitin pangpar chu dah ziah a ni alawm, țha taka enkawl a ni bawk a, a bulah chuan a pangpar ngainat ber ber ten an awmpui a, tunah chuan pangpar ai mahin nangmah hi a hmu chak tawh zawk ngei ang che" a ti a, a mitmengah chuan khawharna thûk tak ka hmu thei.





Ka biangah chuan a rawn fawp zeuh a "Kal ila, alo nghakhlel tawh ngawt ang che" a ti leh a, ka bu nghat a. Amah chu chhuk in car chu a kal hual a, kawngkhar chu min hawnsak nghal thlap bawk, ka chhuah rual chuan ka kutțang karah a kutțang chu a rawn rawlh lut nghal zat a, thlanmual lam pan chuan min kai phei a.





A nu a Hmangaih hle tih a hriat takzet, a thlan pawh a thianghlim thei ang ber leh uluk thei ang bera enkawl a ni a, hung vek a ni a, a sawi ang tak tak chuan pangpar alo awm țeuh bawk a, thlan dang tam tak lakah pawh a langsar fal nalh bawk.





Thlan hmaah chuan kan ding a, ka kut chu a hûm nghal vat a. "Nu, hei ka sawi ziah Zualtei kha ania, tunah chuan ka ta chauh a ni tawh asin, i hmuh ve chak theih em kha, hei tunah alo kal a, lo tho leh la, i fanu ang maia ngaiin rawn buaipui la" a ti sup a, a aw chu a zâwiin a țial ve deuh ruak bawk.





"Ka hriatna che a rei tawh ka tih kha, ka nu pawh hian a hmu chak che a. Mahse nangmah a hmuh hma hma che in a boral a, ka zawn rei lutuk na lamah che ka tlai zo ta vek a nih hi" mahni inthiamlo tih hriat ngawih ngawih hian a phun chhuak sup a.





"Min lo zawng reng tawh maw? " ka ti hû a, engtin nge min hriat theih a, a hma te pawn min lo zawn theih tawh le, he chhanna hi țha takin engmah ka la dawng lo a, engmah ka hrethiam lo bawk. Min hriat em em theih dan hi ka hre chak zek zek a. Kei erawh chuan amah chu hriat chu sawi loh, hmuh pawh ka hmu ngai lo ania. Mahse a ni erawh chuan min hrechiang em em thung si.


Thlan a rei tak kan awm hnu chuan dawr lam panin kan kal lehnghal a. Thlan bula kan awm lai khan anu chanchin tam tak min hrilh a, an chhungkaw chanchin nen lam. Ka tawrh ang chiah tuar ve lo mahse a nat tur zia ka hriatthiam pui a, chhungkua ala nei tal a. Kei erawh chuan chhungkua han tih tur pawh ka nei lo.





"Zanah ka lo kal ang, tlai lam chu ka hman lo maithei. Elizabeth-i hmuh ka ngai a, naktuk zan hi a puala hun hman hun tur kha ania. Mahse amah hi kan be pawp thei lova" dawr kawtah kan awm tawh. Hnung lam atang chuan min kuah hlu hlu a ma dar ah chuan a khabe a nghat bawk.





"I hna thawh dan hi ka hrethiam miah lo" ka ti sap a, a nui ri suk a. "Ka la hrilh ang che. Sawi kual vak a ngai maithei" a ti leh a. "Kal tawh rawh, kei pawh hna ka thawk tawh dawn a tlai zel" tih pah chuan min kuahna atang chuan a tal chhuak a a rûm nghal nghut mai.





"Nilengin i taksa dek a awm ka duh, mahse a theih si loh, hna ka thawk vat vat ang a, ka rawn kal vat ang" a tih chuan nuih pah in ka bu nghat a, a lamah chuan min pawt pheiin min fawp nghal vang vang a. "Kal tawh rawh, a nih loh chuan ka kalna apiangah ka hruai mai ang che" ka hmui bul chêtah chuan a phun sup a, ka nui chhuak hak ringawt bawk.





A aia na zawk leh ril zawkin uar zet hian min rawn fawp leh a, ka lo chhang let ve nghal vat bawk. A tawp dawn lo emaw tih hnuah ui hmel fe hian min thlah a, rûm nghut pah a min fawp leh zeuhin "kal vat rawh, a nih loh chuan ka sawi kha ka ti tak tak dawn ania" ti hluk in ka mawng ah chuan a tham nghal tâwk a, ka tawlhsawn rang asin aw... amah pawh a nui tawp.





"Ka kal dawn" tih vak pah chuan dawr lam pan chuan ka tlan nghal a, a nui ri pawh dawr luh dawn thlengin ka la hre thei vek. Dawr chhung ka luh dawn chuan hawi let in ka kut ka vai zeuh a, nui sukin a rawn vai let ve nghal a. Car a luh thleng chuan ka en zui a, keipawh dawrah chuan ka lut ve nghal vat bawk.





"Madam, khawnge Lalruatfeli hi?" ka zawnna a rei tawh êm avang chuan madam chu ka zawt ta tawp. "Chhuahna tur a neih thu a rawn sawi a. Mipa pakhatin alo lam bawk a chuan a hmanhmawh ang reng sia ka chhuahtir a nih kha" a rawn ti a, a ni pawn a hre bik vak lo a ni ngei ang.





Ka zawt chhunzawm tawh lem lova, Joseph'an alo lam ani ngei ang. Call dawn pawh ni ila ka call a chhang hauh lovang, zing ațang khan ka lak ațang a lungawi tawh lova. A thinrim hi chuan ka call hi a la duh ngai lo hrim hrim mahse amah zawkin min ngai leh hmasa zel tho.





Ka hna tur an lo chhawp leh tak hnûr avang chuan peihlo zetin chair-ah chuan ka țhu thla a, Ramhlun'an min rawn call avangin ka be leh te te phawt a. A bula ka awm lo hlek chu ka ngai nghal veng veng zel, ka taksa a si reng zel kha ania, a awm lo chu ka hit nghal dûk thei țhin pangtilum a ngah bik êm a tin ni.





"Boss, zanin chu hna ka lo kal tawh dawn?" Phone ațang chuan boss chu bia in ka ti thawr a, a ân hla tur hi ka ngaithla peih lo lawk. Ka hlawh te hi a cut tawh hrim hrim ang zan engzah nge ka kal ang ka tih a ka kal tawh loh pawh hi ka hre tawh lo e a.





"Zualte, rawn kal a ngai rih love kan mamawh hunah chuan kan lo bia ang che. I duh chen chen i chawl thei ang, k hlawh pawh cut a ni dawn love" a thu rawn sawi avang chuan ka meng phâwk teh e. "E... Enge i sawi awmzia chu? " ka ti bah nawk a, țum khat nan min vîn miah lo, eng harh tharna nge a chan tak le?.





"I duh chen chen i chawl thei ang, kan mamawh hunah che kan lo ko dawn che nia" a rawn ti leh a, ka la âwih chuang lo. Kan in ngam tlak ve hrim hrim avangin "boss, i rui ami? " kan ti ringawt.





Phone ațang chuan a rawn nui hawk hawk a. A mize mak lutuk avang chuan ka phone chu ka en leh rih a "Zualte, i boss hi ka rui ngai em ni? Ka ruih lai pawh ila hmuh loh kha. I duh chen chen i chawl thei ang ka tih kha i âwih lo a ni maw? " a rawn ti deuh hawk a.





"Âwih vak nang" ka ti lêt sep "nakinah ka lo call ang che order rawn lut a tam deuh hlek a kan en zuai zuai ange" a ti a "aw le" tih pahin keimah zawk chuan phone chu ka off hmasa a.





Eng emaw chu a tawng chiang alawm, kum tam tak hnuah ka hna kal loh vanga min vin loh vawikhatna a ni a, mak ka ti lutuk hi ka sawi thiam lo zawk. Chu lo ah ka hlawh ala cut lo zui bawk ania, a piangthar amaw ni reuh le.





Feli ka call sek a mahse ala duh țhak lo, a tawp nan tiin ka call leh a, Remruat'an a rawn chhang daih lehnghal. Chaw an ei ho thu a sawi a, egmah min hrilh ve lo chu ka lungawi lo lek lek a, mahse ka buaizia a hnenah khan ka sawi tawh a, chuvang chuan min sawm lo pawh a ni maithei.





Hrim hrim in vawiin a awmdan hi a mak hrim hrim, nidang angin ka bulah a țawng siam siam lova, ka lakah a lungawi lo a ni mah zawk. A lungawi lohna turin engthil mah tih ka neiin ka hre bawk si lo.





"Zualte, khang kha chu naktuka tih ah dah tawh mai ta che, naktuk lam ațangin nangmah puitu tur an awm tawh ang, tunah chuan saw pawn lama nghak reng tu che saw pan phawt mai teh" madam chuan a rawn ti sar sar a. A sawi chu ka hrethiam nghal mai.





"Lo va kal rawh ka lo chhuak a ni mai" amah pawh en lo chuan ka ti a, lehkha chu ka rem fel mawlh mawlh a, pakhat lek pawh a buai a nih chuan keiman ka tuar dawn si a, dawhtheihna nena tih țau țau a ngai.





Pawn ka chhuah chuan kawt a lo ding ka hmuh chuan ka nui nghal ver ver a, a bulah chuan rang lutukin ka tlanphei nghala, a bul ka thlen chuan min lo kuah nghal hlu hlu a, min fawp leh te te phawt a. Ka lo ngai hman takzet a ni tih ka hre chiang takzet.





"Vawiin i hna chu enge a an? " ka ti sep a, a thaw chhuak hawk a "A pangngai a ni mai, amah kan la be tlang thei lova, chu ber chu ni buaithlak. Rsa lah chuan nangmah hruai tur che in min ti teivet lehnghala. Engtiang fa kau in nge maw in lo innêl hman le" a ti nghal hluk.





"Naaa... ka chau emai, ka kal peih lo. Hrim hrim in engtia tih zel nge in tum a? " ka ti leh a, amah pawh a rilru a hah tih a hmel ațangin a hriat vek theih.





"Zanin hian kan buaipui lehin ka ring, amah kha kan biak ngei ngei a ngai a, a tello chuan engmah kan ti theilo. Chuvang chuan in thleng ka thlah che anga, ka let leh nghal ang" a ti a, ka bu nghat a ka mut a chhuak tawh lutuk ringawt.





"A nih chuan tlan vat vat rawh ka mut a chhuak tawh ania" ka ti vak a, vawiin a ka chauh em em chhan hi ka hrethiam hauh lo.





In kawtah kan ding tawh "Ka bulah lo kal ve la chu ka tia mahse i chau tih i sawi bawk si a, ka tilui lo mai ang che. Ka ngai dawn che" a ti leh sup a, a âwm ah chuan min kuah bet nghal hlu hlu a, keipawn ka ngai dawn tih ka chiang.





"Nia ka mut a chhuak tawh" a âwm a hmai phum kâk chung chuan ka ti sap a, a rawn nui chhuak hawk a "Min ngai dawn em? " a rawn ti leh sup. "Aih" ka ti a rûm nghutin "What! " a ti nghal hluk bawk.





Ka nui chhuak hak hak a "ka sawi âwm teuh lo, ka sawi ngam lo" ka ti a, a kuahna ațang chuan tal chhuah ka tum a, mahse a aia nghet lehzual chuan min kuah a, ka tal thei tawh lo.





"Sawi la, Bawihi" a rawn ti a, ka lu ka thing nar nar a.





"Ka sawi ngam lo" ka ti leh, ka tal vak bawk. Ka dar ah chuan rawn vuanin tlemin min nawr hla deuh hlek a.





"I sawi ngei hriat ka duh" a ti sup a, a kutțang chuan ka hmui chu a rawn nul thuak a. "Vawikhat ka sawi tawh kha" ka ti sep, a nui chhuak hawk a. "Ka hre leh duh alawm, i sawi lo a nih chuan ka ti ngei ngei ang" ti sup in ka hmui zawnah chuan a rawn thaw lum nghal ham ham a, ka za nghal chuai chuai mai.





"Sawi la Bawihi" a ti leh a, ka hmui chu a rawn tawk zeuh zeuh a "Ka ngai dawn che, hmelțhapa. A tawk em?" Ka ti nghal vak a, a nui chhuak hawk hawk
"Duhawm viau suh " ti sup in ka hmuiah chuan a rawn fawp nghal vang vang a. Ka chhang let ve nghal bawk.





"Lut tawh la" a rawn ti a, ka hmuiah chuan a rawn fawp leh zeuh a "Ka khamlo" a ti nghal hluk bawk "Ka lut dawn, ka mut chhuak te hi an reh thei tak ngial dawn" tih pah chuan in lam pan chuan ka tlan nghal vat a. In chhung ka luh dawn chuan ka hawi let a, chunglamah ban ka vai khum zeuh bawk.





Voice hnutchhiahin ka mu dawn tih ka dah tel a, khumah chuan mu in thil thleng te chu ka ngaihtuah lêt a, lawm loh in mahni in ka khi ver ver mai.





"Henu hi leih rawh u, mi bialpa ngaihzawn ching a nih hi, rethei tak hian hausa tak te hi ka ngaizawng e a tia, zak theilo lutuk. Tunah pawh amah avang hian kan in țhen phah lehnghala, rethei a nih tih hi in hre rawh se" tih ruala ka lu chunga tui rawn luangthla chu ka feel nghala, a vawt lutuk ringawt.





Rang lutukin ka ding chhuak nghala, a vawt lutuk chu ka in kuahkhawm țai a. Engvanga hetia rawn ti hi nge an nih? Enge maw tihsual ka neih le?




Hhlauthawng fê chung chuan ka hawikual a, mi chuan min lo en țhup tawh.





"Zak theilo nu heti lamah" tih ri ka hriat rual chuan hnunglam chu ka hawi nghala. Ka hnung maiah chuan Evelyn-i chu alo ding a, a kut chuan bucket chu a khai bawk a.





"Mi rethei zah nachang hrelo" a ti chhuak nghal fak bawk, chu thu chuan min deng zui nghal dawt thei. Evelyn-i chu en in mi â ang maiin ka hawi ruai a, tu mai pawh chuan min huat hmel zetin min lo en baw.





"Fahrah te te si, nangmah avangin Ramhluna nen kan ințhen tih i hria em? " a ti leh tuarh a, amah chu ka en nghal dâwrh thei. Ka thin zâwn hi ana ngut ngut a tuna a thusawi zawng zawng te kha engtin nge khatiang a awlsam khan a sawi chhuah theih?.

Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)