HOPELESS By: Cietei samte (Completed)

[Ngaia]

HOPELESS Chapter 7


Chhunah pawh kan in hmu a, a ṭhat tehreng nen.......

"Ka rawn kal ve dawn" tih leh motor a lawn chhoh ka rual nghal a. Eng vangin nge hetiang hian a awm ka hre lo. Mahse, ka tel lo a, damdawiin a pan tur chu, ka phal bik lo. Duh leh mi â pawh min ti mai rawh se.

"Kasa, thil ka ngen thei che ang em?" Bawihpuian, ngenngawl zet a, min tih chuan, ka bu vat. A hmel en reng reng pawn, a mangang tih mi â ber pawn an hre thei ang.

"Min zui lo in, inah ka naute pahnih chauh an awm dawn si a, min lo ngaihven sak zawk ta che. Rubyi duh dan pawh a ni ngeiin ka ring" a rawn tih chuan, hnial ka chak. Mahse, ka hrawk hnawhtu awm chuan, ṭawng thei lo in min siam a. An hmel mangang ka hmuh hian, ka mangang tel ve em em bawk.

"Zorammuan, rawn chhuk leh vat rawh. Kha mite hnaih lo tur che in vawi tam ka hrilh tawh che" ka kutah pawtin ka nu, ka pianna nu pawh ni lo chuan, min rawn tihkhum tuar tuar a, miin min en ṭhup vangin, bawihpuia hmel ka en a. Rilru nat hmel fe in min lo en kiau bawk. Hetiang a nih takah chuan, ka chhuk vat a. An mualpho ka phal lo, kei misual vangin pawisawi lo chhungkua an rilru a nat a, an zah ka duh hek lo.

An kal liam chu ka thlir reng a, hlauhthawnna thinrimna mangan na te chuan, min luah hneh lutuk mah mah. Bawihpuia thusawi erawh ka hre reng a, kei min ring ngam a nih chuan, rin ngamin ka awm ve tur a ni.

"Ka kut hi thlah rawh" zawi supin, ka kut vuantu eng tiklai mah a, ka lawmna tur ti ve ngai lo ka nuhrawn chu, ka melh rum hle bawk.

"In ah rawn haw tlang ang che. Khang hmeithai ve mai mai chhungkua nen inzawmna neih ka duh hauh lo a nia" leh hram chuan, a tluk zawh ve loh chhungkua an ni tih a hre lo em maw ni?

"Ilo buai ve na tur a awm lo" ti nghutin kan in lam pan in chak takin ka kal pawk pawk a.

"Nang fahrah ve mai mai, ka awm vang a nu leh pa nei i nih kha tikhan min ti hlek suh ang che" tia a au tawn tawn chu, ngaiah ka nei tawh. Chhan let tumna ka nei lo a, a thu zawm tumna pawh ka nei chuang lo.

A dik, ka nu hian ka pa kha ṭhen lo se, tuna mi hi ka nu a ni lo ang. Ka nu ka thiamlo lo a, ka pa thiam ka chan lo zawk a ni. Ka pa vangin, ka nu in kan in a chhuahsan a, ka pa bulah awmin sual theihna kawng zawng zawng ah ka sual a, tun thlengin a la in hmu chhuak ta chuang lo tho.

"Khawia kal nge i tum" ka pa aw chang leh bul zet chuan, ka thluak a lut pha lo.

"Ka chhuak dawn" ka sawi zawh rualin, ka bek dinglam a ri nghal chawrh. Na tih na ka nei lo, hei ai a na thinlungah hial an hnutchhiah miau tawh alawm.

"Khawiah mah i kal lo ang. I nu thu sawi hi zawm la, i tan a ṭha ang" tih nghut pah a, ka thuamhnaw dahna bag rawn ban a tum chu, ka lo tawlh a.

"Hei hi ka in a ni ve hleinem. Nang leh i nupui duhtak in alawm. Ka len lohna inah ka tawm reng chhan tur ka hre lo" tiin ka melh let nghal a.

"I pa hi min hnial reng suh. I tan aṭha tur bak tih ka nei ngai lo" a sawi lai ngeiin ka nui hak. Tunah khan, ka ṭhatna tur bak tih a nei ngai lo a ti a nih chu!

"Pa ka ni chu i inti ve sia maw" nui sukin ka ti leh a, a hmel chang ṭawlh ṭawlh chu hmuh nawm tak a ni. Mahse, vawiin hian khang kum 12 chhung ka lo pai tawh natna te kha a puak chhuak ve tawh dawn.

"Pa tia han koh ngam pawh i nih loh kha. Ka tan a ṭha tur bak ngaihtuah ngai lo tu i lo ni a nih chuan, vawiin hian min dang hlek suh ang che. A tawk tawh i ti ve lo em ni" ha pui ṭhial bap bapin ka ti leh sup.

"Min va zah lo ve Zorammuan" min rawn khawih leh tumin a kut a rawn vai fua a, ka lo man sak hmiah tawh.

"Zah tlak pa ni la, i fapa hi hetiang a sual a ni bik lo tur! I hria em? Nang ang hi pa atan ka duh lo. Ka nu khan tihsual a nei em ni? Eng vangin nge uire san leh tur khan nupuiah i neih. Ka nu chang ni lo, i fapa pawh ser nung reh thei ngai tawh lo tur i hnutchhiah tih i hre lo em ni" thinrim lutuk vangin, ka mit a sen vek ang.

"Min dan tum suh ang che. I nupui duhlai i fapa pawh pawngsual duhna thinlung neitu lakah rinawm la a tawk" sawi chhuah ka duh loh thlengin ka sawi ta vek. A hmel mak tihna leh thinrimna awihlohna leh min thah chakna a khat mitmeng chuan, min en run a, a ṭawng tawh miau loh vangin ka chhuak nghal nal nal. Kawngkhar ka namhawn pawp rual a, ṭe ri tuar thawm chu, ngaihtuah zui duh tawh loin, ka chhuak lui ta tho.

Rubyi awm dan teh tawp kha mak ka la ti tawp thei lo. Eng tin nge chhunah pawh inthlahlel takin kan in mangṭha a, zan an inah ka leng turin, motorin an rawn in phur ta mai chu hriatthiam har ka ti takzet!

Inah a naute pahnih chauh an lo awm tak tak a, zawhna zawh lahin an hre ve bawk si lo. Ka mangang takzet! A changin ka call a a la chhang thei miah lo zui.

Khumah a naute mutin, an muthilh takah chaun, keimahin kha ka nun hlui ngaihtuah zui tlak miah loh ah bawk ka cheng leh a.

Kha tihlai khan huaisenna chhete tal lo nei ila chuan, tun hun hi ka thleng lo mai tur. Kum 17 ka nihin, ka nuhrawnin min mutpui a, kha ta ṭang khan, ka nun pawh a buai chho vak ta a nih kha. Mahse, Rubyi hmeichhe nu leh no tak ka tawn aṭang khan, sim duhna thinlung ka nei a, tun thlengin zanlai ruih leh mi insualpui ka chin ṭhin pawh ka sim a, hmeichhe mamawh tak a, ka awm ṭhinna pawh a rei tial tial a, ka sim ṭan tial tial bawk. Mahse, vawiin a awm dan khan nasa takin hlauhna min pe a, tun ang reng hian ka la hlauthawng ngai lo. Ka ta ni lo tur a ka ngaihtuah ngam loh. Mi zawng zawngin ka chhiatna lai chauh an hmuh lai a, an nufa in a, ka ṭhatna sawi tur an hre zel te, ka sualna chhete mah min sawi khum ngai lo tu leh min ngaihtuah tak taktu te hian, dam chakna tam tak min pe a, nun hlutna min hmuh thiam tir bawk.

Rubyi hi kei ang a sual hian ka phu lo tih ka hai lo. Mahse, ka luhlul em vangin ka ta ni turin ka bei a, hetiang a a mah nawr ngam tur pawh ka ni lo. A ni chu mi zawng zawngin an ngainat a ni a, kei erawh mi zawng zawngin misual tia an hriat ka ni. Tun thlengin Rubyi hi tuman an la inhau pui ka hre ngai lo a, mi chanchin a sawi phei chu ka hre ve ngai lo.

Kei erawh sual kawngah tumah tluk phak ka ni lo. Misual ka ni a, ka chanchin an sawi hi huat ngam ka nei ngai hek lo.

Mahse, an bulah chuan, kha ka nun bawlhhlawh tak kha ka hlat a, a tel loin ka awm thei lo emaw ka tih te thlengin an hnena ka awm tawh chuan, mamawhna ka nei ngai hek lo. Mahni sual sual a, sual mite sawi zui reng ka ni chung pawh a, vawikhatmah ka thil sual tihte hian chhan a nei lo min tih sak ngailo tu nufa te hi ka tan chuan, hlu tih hian a sawifiah phak kher lo ang.

Ruby Lalhlumawii P. O. V

"Nu....." ka harh rual a, ka thusawi theih hmasa ber a ni a, ka kut vuanin a ṭap tih ka hria.

Chuan, ka awmna ka hre lo a, a var vek ni maiin ka hria, khumah ka mu tih pawh ka hria, mahse, khawi hmun nge ka mutna ka hre lo a, ka... Ka dam lo leh tihna em ni?

"Mambawih, i harh tawh maw? Eng nge i duh bawihte" ka meng chhuak nghal riai riai a, a en em vangin, ka chhing leh sawk a. Ka hmu chiang thei ta. Chuan, damdawiinah ka awm, drip lo inkhai vû ka hmuh chuan, ka meng bial nghal kawk!

"Nu, tui..." ka dang ro lutuk chu, ka ṭawng zawngin a thip hlur mai leh nghal.

Tui ka nu in min pek chu, ka lem nghal khawlh khawlh a, nizan lam ka ngaihtuah chhuak thut. Kei hi!

"Nu, ti nge hetah ka awm...?" mak tihna hlirin ka khat....

[Ngaia]

HAPPY NEWYEAR

HOPELESS 8

"Nu, ti nge hetah ka awm...?" mak tihna hlirin ka khat...

"Nu, khaw nge ka awm a" a tawpah ka zawhna ngah lutuk in zawh hmasak ber tur hre lo hial a, ka awm hnu ah ka zawt ta hram.

"Bawihte, damdawiin ah kan awm mek. Mamawh dang i nei em?" a mit ah ka en a, a sen râm tih pawh ka hmuh hmaih lo.

"Nu, eng natna nge" ringhlel zetin ka ti a. Chhanna ka dawng lo. Ka nu ṭap thawm bak chhanna ka dawng lo.

"Cancer a ni tiraw?" Mittui tling khat vekin ka zawt a, ka hre vek. Doctor nen an inbiakna kha ka hre vek. Mahse, ka.... Keimah ka nih ring ngam chiah loin ka zawt a, a buk tak nghauh ah chuan ka mang vek a, ka chhingril tawt lutuk leh mak ti, hreawm tihna te nen engmah ka ngaihtuah zui thei lo. Kum 18... Kum 18 chauh ka la ni asin! Eng nge ka tihsual a, he natna ṭhihbaiawm tak ka dawn bik?

Hei hi ka chan tawk em ni? Ka phak tawkin ka hnaih lo che em ni? Nge ni a, kei hi eng atan mah min ngai lo a, i siam i hmangaih ber mihring zingah ka tel ve ta lo zawk? I hmangaihna ka dawng phak lo em ni? Hlim ve ka phu lo em ni? Pathian lakah vuina tur chauh ka hmu, thawk leh khatin ka hma hun ka lo suangtuah tawh leh, ka hlimna, pasal neiin fa tam tak ka nei ang a, ka fate nen hlim takin nun kan hmang bawk ang a, ka ṭhiante, ka chhungkua ka hlimna. .. Engkim chu a tawp vek. Tunah chuan, mitthi mai tur suangtuahna ram beiseibo mai a ni.

"Engtin nge a nih bik? A fair lo a fair lo takzet! Nu...." ṭap hlawp hlawpin ka au nghek nghek a, ka au rin vang a, ka natna hi bo thei ni se, ka aw neih zawng zawngin ka au vak ngei ang.

"Nu, eng vang nge? Hlim ve ka phu miah lo em ni?" Mangang lutuk in, ka au chiam a, a ni asin. Hriatthiam a har takzet! He nun hi ka duh lo... ka duh lo takzet! He natna ṭihbaiawm tak tel lo pawh hian ka nun hi a hahthlak tawh viau tawh asin. Eng vanga kei kherin tuar bik nge ka nih? Khawvelah kei lo he natna tuar tu tur an awm thlawt lo em ni? Kei leh ka hmangaihte chauh hi na tur kan awm em ni?

"Bawihte, insum hram hram rawh. Ka duatte, i mal lo a nia. Ṭha takin kan in enkawl ang a, i dam vat mai ang" nghet zetin ka nu in min kuah a, a ṭawng mawlh mawlh bawk. Mahse, min hnemna chuan, ka engah mah a thawk ve lo. Nun ka lo thlakhlel na ṭhin zawng zawngte, ka lo suangtuah ve ṭhin hlimna te chuan, minute rei lo te chhungin min kian san a, thihna tih chauh lo chuan, ka rilru a luah tawh hek lo. Keimah vang a na turte, keimah vang a an mittui luang turte, keimah vang a, khang zozai an tuar turte chuan, ka nun hi beiseina nei leh tur leh, hlutna nei turin min pui hek lo.

Tunah tak hi chuan, ka tlathla vawn vawn ringawt a ni. He natna hi kum upa ho chauhin an vei leh an neih theih ah ka lo dah ṭhin asin! Engtin nge he cancer a hming chauh ka hriat leh, an natna an dam pui ka la hriat loh natna rapthlak hi ka chungah kher eng vangin nge? He natna nei te hian engtin nge in dawn sawn ka hre lo! Kei erawh chuan, ka dawngsawng thiam loin, ka tuar thiamlo takzet! Ka ring chhin ngai lo asin! Eng tin nge ka lo risk ngam zawk! Eng vangin nge cancer a ni em ka lo tih kher kher?

"Nu...." sawi tur ka hre thlawt lo.. Ni lo, ka thu hriat hi ka mumang mai ni se ka ti takzet!

"Ruby....." rawn tlan a, kimbawihi min kuah chu, kuah letna chang pawh ka hre lo. Eng ang a awm tur nge ka hre lo. Ka mittui a tla tawh lo a, ṭawng tur pawh ka awm chuang lo. Ka mit chu a meng ngei alawm, mahse, ka khawhmuhte chu a tawiin, thim chhah mupin min hual vel vek zawk a ni.

"Nau, i chhel em kha. I tuar chhuak thei a nia" ka unaupa a ṭap ve! A ṭap hmu ngailo tu khan keimah vangin a ṭap tih ka hmu a! Na ka pe nasa takzet!

"Min chhuahsan ru" vin zetin ka ti tuar a, ka beng hupin ka au vak vak a, mit ka chhing a, ka mitthla ah kasa hmel a rawn lang a. Kan inngaizawng tih ka pawm ni a, a hlim hmel leh ka bulah chuan, a hlim tih thu a sawi lai a, a hmel êng phat leh beiseina a khat mitmeng te kha a rawn lang iar iar a. Keimah vang mai a, a ṭhatlai hun a hmang hman lo tur ka ngaihtuah a!! Eng nge ka tih ang?

"Chiû leh mai ang u a rilru a buai rih a nih hi ka pi" mipa aw ka hriat rualin, ka harh zawk! Mahse, ka tlai hret, min chiû hman tho.

Ka mut chu a rawn chhuak nghal em em a, men luih ngial ka tum pawn a thawk chak mah mah. Ka nu awmna lam ka hawi a, rilru na zet a, min melh tlawk tlawkna leh min khawngaihna a khat mitmeng en reng chungin ka muhil ta a.

He natna rapthlak hi kum upa tawh lam chauhin an neih emaw ka lo tih fo ṭhin chu, keimah kum 18 mi lekin ka vei ta si! Ni e, hringnun hian ngilneihna a nei lo a, dam khawchhuak chak a, theihtawp chhuah a kan lo beih ve ṭang ṭangna te hi khawvel chuan, min vei pui ve lo. Hlimna tluantling awmlohna khawvelah hian, hlimna zawng reng rengin kan hun kan hmang ral a. Neihloh hlau a, kan thawhrimna te kan lo beih vena te chu, khawvel nunrawng leh zahngaihna nei lo hian min ngaihhlut sak ve lo. Hmangaihtu in a hmangaihte tan a beihna te chu, khuarkhurumah thlakin, a hmangaihte tan a, theihtawp chhuahtu an hlim loh hlau reng reng a, nun hmangtu chu, a hmangaihte ṭah mittui tlak hlau em em tu leh theihtawp a, dawmtu ngei mai chu, khawvel chuan maw, a hmangaihte ṭah tirtu ah a chantir a, an na hmel hmuh hreawm ti ngawih ngawih ṭhin mihring chu, a mah vang a, a hmangaihte ṭap lai na lai hmel chu, nunrawnna leh rapthlakna hlir a khat khawvel chuan, a mit ngei a, a hmuh theihnan a beiseina chuai mek chu, a hmangaihte mittui tla nen a hmuh tir ta vek si.

Chunglam rorel tu pawh khian, a siam khawvel chhung a, chengte hmangaihin an nat hlau hle mahse, hringnun tur a a lo duan lawksa beidawnna thlentu leh khawvel tifamkimtu tur a, a lo ruat natna te chu, a dang thei bik lo a ni ang e.

Kei chang ni lo, ka hmangaihte thleng a, beidawng hmel ka hmu chu, ka thihpui lo chauh. An tan ka bei a, an tan ka tuar a, an hlim nan nat ka thlang ṭhin. Mahse, tunah chuan, kei... keimah vang liau liau in, an nat ka phal ngailoh ka hmangaihte chuan, mittui nen natna leh lainatna te nen min en ngawih ngawih tawh! Ka tuar ai tuar thei lo mahse, ka rilru nat ai hian an na nep dawn chuang lo.

Damdawiinah rei tak ka awm tawh a. Ka tan chuan nikhat lek pawh hi a rei lutuk mah mah. Eng vang a kei kher he natna dawng tur a, Pathian hian min thlang nge a nih ka hre lo. Ka chan tawkah hian ka lawm lo takzet.

Khumah ka mu reng a, thawh chhuah a inah haw daih ka chak. Mahse, min chiu a, thil dang tam tak pawh an ti reng zel. Ka taksa in a chauh puiin a chhiatpui tih bak hriat belh leh tur a awm chuang lo.

"Bawihte, muhil rawh aw naktuk khua a var ang a, hma i sawn ve sawt mai ang" ka lu chul hliau hliau a, ka nu thu sawi chuan, natna bak min thlen chuang lo. Ka ṭawng ngai lo a, chaw ka ei ngai hek lo. Mi â ang maiin ka melh ngai ka melh a, ka mut ve chhunah mangchhia bak ka man ngai hek lo.

Damdawi tel lo a, mut ka harsat vangin doctor chuan, min chiu leh a. A thawk rangin mut pawh a chhuak nghal vawn vawn ṭhin. Ka mumangah eng ang a rapthlak nge ka hmuh leh ang ka hriat loh vangin ka muhil duh lo lutuk. Mahse, mut ka mamawh miau si.


'Pa, nang hetah' ka hma ah khawi aṭanga, rawn kal nge a nih pawh hriatloh in ka pa chu a rawn ding a. Mak ti leh awih lo zetin ka en heu ringawt.

'Bawihte, ka ngai hle mai che' ka pa aw ngei a ni. Mahse, engtin! Ka la awih thei chuang lo.

'Pa nangmah i ni tak tak em' mittui tla zung zungin ka ti a. Chutah, rawn kal hnaiin min rawn kuah a, ka mitthla a ni lo tih ka hre chiang ngam ta chauh. Nghet zet a, kuah letin, a rim hman a ka hriat ṭhin rim la nam chem chem chu, ka hnim vang vang a.

'Bawihte, ka hmu reng che asin' nui var varin a ti a. Lawm luat vang a, ṭap pur chungin, ka nui ve seih a.

'Pa, kei pawn ka ngai lutuk che. Kan vaiin kan la ngai che. Kan bulah lo kal tawh la' a banah vuanin, ka nui deuh reng a. Ka pa pawh a hma a ka hmuh ang ai mahin a hmelṭha in ka ngai zual takzet.

'Bawihte, ka bulah i rawn kal dawn alawm. Ka lo nghak dawn che alawm' nui var varin a ti leh a. Lehlam hawiin ka tum nghal hmuk. 'I natna vangin i beidawng tih ka hria, mahse, bawihte, Pathian hian maw, a mi te hi harsatna a tawh tir phal reng ngai lo asin. I la hria em, ka sawi fo ṭhin kha? Mi fel apiangin thihna an hmachhawn hma ṭhin. Khawvelah hian thi turin kan piang a, nung turin kan thi leh ṭhin ka tih fo ṭhin kha' hmel eng leh hlim hmel tak nen min rawn ti leh a. Ka ngaihtuahna chu a vak thui ngei mai.

'Mahse, pa kei chuan, dam ka la duh. Ka hmangaihte bul a awm ka la kham lo asin' pangchang takin ka ti a. Ka darah kut rawn nghatin, ka chal a rawn fawp a. Lungchhe zetin ka lo ṭap hlawp hlawp reng.

'Ka hria alwm. Chuan, Pathian lakah pawh i vui mahse, ngaihtuah teh, mihring kan ni a, natna chu kan tuar tur reng a ni. Thi tur apiang kan ni a, chu vangin dam reng turah inngai ngai suh. Thihna tello chuan, nunna a neih theih loh. Nang i thi a nih chuan, i kal hmasa a ni ang a. Khawvel hreawm tak aṭangin Pathian chuan, lak chhuah che a duh tawh asin. I tuar lai hmel hi hmuh hreawm a ti takzet asin' a hmel ka en a, hla tak a tlang lo lang kulh lam hawiin, a mitin a hmuh phak chin chu, a enkim vek a nih ka ring. Vei nei hmel pawh a pu lo.

'Mahse, pa, nga ti nge ka len lai ka la chen lo asin' ka la inpeih lo a ni mahna.

'ila chen dawn alawm. Bawihte, i nu phur ti rittu nih ai chuan, chhawktu nih i thlang zawk dawn tih ka hria asin. A hunah ka rawn hruai ang che aw. Ka awm rei tawh e, nang pawh let tawh rawh. I u leh i nu mang i ti ang tawh dawn em mai' min kuahna a thlah a.

'pa...' ka hmuh lai ngeiin a bo daih a nih chu! ka ko nawn leh a, chhangtu ka nei tawh lo.

"Bawihte, harh teh bawihte, ai ka fanu" ka nu aw chu, hla tak aṭangin ka hre vuat vuat a.

"Ai, a thi lo. Doctor a la thi lo. A la thaw a nia" ka taksa chuan, tu emaw ni a dek a, ka nu ṭawng thawm chu a hnai tial tial bawk.

"Nu..." ka nuin, min kuah chungin a ṭap tih ka hriat chuan, ka thaw kawk a.

"Bawihte! Doctor a thi lo. Doctor rawn kal vat rawh" ka nu hlim au thawm leh, ka u min rawn kuah tu chu ka en tawn zak zak a. A sirah kimbawihi mittui hru mawlh mawlh a, lo ding zum zui ka hmuh chuan, ka nuih nghal sen sen a.

Nga ti nge an ṭah vek ka hrethiam thei lo.....

[Ngaia]

HOPELESS 9


Nga ti nge an ṭah vek ka hrethiam thei lo.....

"Bawihte, awi ka va han lawm em! Min kalsan ta mai emaw ka ti hman alawm" ṭap hlawp hlawpin ka nuin a rawn ti a.

"Nu, hei ka ṭhat tawh hi. U khawnge kimbawihi" nui ver verin ka ti a. Nichina ka pa nen a kan inbiakna te kha ka mumang mai a ni tih ka hriat vangin, ka muhil tih ka hria.

Chuan, ka pa thu sawi khan, keimah ah thlamuanna leh huaisenna tam tak min pe bawk. Vuina thu hlir ka lo chhak chhuak a, mahse, vui thei ka nih loh zia ka hre chhuak a, ka tan beiseibo khawvel ni mahse, thinlungah ka thla a muang em em bawk.

"Khaw nge a awm a, hetah hian a awm reng sia" ka uin hawi vual vual pahin a ti a. A nui suk suk bawk nen, ṭah in hmeh lo tak kha, nuih a in hmeh em em lawi a. "Ka va zawng lawk ang" tiin a chhuak a.

Karhnih chuang damdawiinah ka awm tawh a. Ka naute pahnih pawh aizawlah an rawn kal a. Chhungkua kan kim ta. Christmas pawh karkhat chauhin a dal tawh bawk.

Ka pa in ka mumang a thil a sawi aṭangin, ka rilru chu a a fim a, ka ngaihtuahna te chu, a rawn pangngai chho a, ka natna hi ka pawm dam thiam in, a ṭul ang ang kan han ti ve luam bawk. Mahse, ka chau tih bak ka hre lo. Ngai awh aiin hniam lam ka pan tih pawh keimah hian ka inhre thei a ni. Mahse, tunah rih chuan, thil pakhat chauh duh ka nei. Kan inah ngei a tawp thleng a, awm ka duh a ni.

Pathian ka au nasa sauh a, Nitin kasa tan ṭawngṭai ka bang lo bawk. Hei tal hi chu, a hlawhtling ang tih ka ring tlat bawk.Bible ah pawh "I rinna ang zat pek i ni ang" tih ziak a nih kha. Ka ring hle bawk.

Keimah vang a, ṭha ni lo se, a duhthu ngei a ṭha nise, ka duh tak zet. Chuan, vawikhatmah ka be leh tawh hek lo. Kei min theihnghilhin hmalam pan se, kei ai a dam rei pui thei deuh tur nupui ṭha zawng in hmu ngei bawk se ka ti takzet. Ka u leh kimbawihi ka ngen tawh a, an pawm tawh. Ka nu ber hi ka la ngen lo a, a ni pawn ka dinhmun chu min hriatthiam pui ngeiin ka ring a ni.

"Nu, ka chanchin hi kasa hian a hria em?" Kan pahnih awm remchan laiin ka zawt a.

"Aw, damdawiin kan pan dawn tih a hria" ka kut rawn vuanin, a rawn ti a.

"A nih leh cancer ka ni tih a hria em?" Ka ti leh a.

"Ai, hre lo. Tinge chutiang zawhna min zawh a" ṭap mai tur hmel pu chung a a tih chuan, a kut vawn let sakin, mit ka chhing sawk a.

"Nu, cancer ka ni tih a hre tur a ni lo. Khawngaihin" ka nu mitah tak enin ka ti a. Ka rin ang ngeiin, ka chak loh na ber ka hmuh hreh ber mai, ka nu mittui chu, a rawn luang a.

"Bawihte, a hriatloh chhan tur tal sawi teh. Ti nge i hmangaih a ni lo em ni?" Ka nu zawhna chu, nui sangin ka chhang a.

"Kasa hi a sual a ni lo tiraw nu? A chhiatna lai an zawng a, a ṭhatna an hmuh sak thei tawh lo i tih kha" nui ver verin ka ti a. Hrethiam lo takin min en a, ka thaw ham ham bawk.

"Nu, tlangval fel tak a ni i tih kha. A ni chuan, hma hun êng tak a nei. Kei... Keimah vang hian, a ṭhatlai hun hi a lo thlawnin a hman ral ka phal lo" mitthi mai tur nun beiseibo um reng ai chuan, a damchhung a a kiang a awm reng tur. Chakna pe tu tur hmalam panpui thei keimah ai a, ṭha a phu a ni.

"Bawihte, nang pawh i dam dawn. Beisei ta che" ka mittui chu min hruk sakin a ti a. Mahse, kei beiseibo thi mai tur hian, ka hma ka sial vangin a ni chu ka chelh thiang lo asin.

"Nu, mitthi mai tur ka nih hi. I hre lo mai thei, ka pa nen kan inbia asin. Ka pa chuan, nakinah min la hruai dawn. A kiangah, chuan, a thu sawi ṭhin kha ila hria em? Mihring hi thi turin kan piang a, chuvangin dam reng turin in ring ngai suh. Nung turin thi tur a kan pianna chu kan la chhuahsan dawn. Kei mitthi mai tur vang a, tam tak in nat ka phal lo. Ka duh lo" ka nu chu a rawn ṭap chhuak hawk a. "Ka hre vek, doctor khan, kan tlai lutuk mah mah tawh tih a sawi ka hre hman alawm. Hei ai hian hma hret pawh ni ila, thlîng cancer hi a dam an la awm lo a ti a nih kha. Ka beiseina ṭul lo pui vang a, ka vui aiin, beiseibo ka nih zia sawi la, vui lo turin min fuih ta che nu. Beiseibo hringnun ah hian, siamtu theihnghilh lo turin min fuih la, khawngaihin inhnenah i dawm hlum ngei nih ka duh zawk" ka ngaihtuahna kal thui lutuk vangin, ka duh ang pawn ka nu ka ngen thei lo.

"Bawihte, a pawi em mai. Keimah zawkin lo tuar ila, ṭha zawk tur. Nang chuan, i nun i hmang ṭan dawn chauh asin" kun ngawih ngawihin a ti thlawt a. Ka ngaihdan a ni hauh lo tih a hre lo a ni ang e.

"Ni lo e, Nu, nang chu, ka unau ten an la mamawh zawk che. Kei chuan, pawi ka ti lo. In bulah inchhungah ngei ka hnuk hi chat se ka duh a ni. Damdawiin hi ka ngai na lo i hriat kha. In kiangah ka dam chhung hun tawite hi hman ral ka duh. Chuan, lungawi leh thla muang takin ka kal thei zawk ang" ṭah duh lo teh mah ila, rilru no tawh chinah chuan, insum a harsa takzet.

"Chuan, Kasa, chu ka duh tawh lo tih hrilh rawh. Keimah vangin, a nat ka phal lo. Chuan, tunah ka tawp lo a nih chuan, ka thih hunah a tuar chhuak zo in ka ring lo. Nu, hei chauh hi ka ngen tawh ang che. aw,, nu" ngen ngawl zetin ka nu chu ka melh kiau a. Mittui kar aṭangin, min melh ngawt ngawt ringawt.

"Tun bak chu, ka ngen tawh lo ang che. Nu, khawngaihin, ka natna hi hrilh suh aw" mittui tla zung zungin ka ti leh hram.

"Bawihte, i duh apiang min dil rawh. I nu ka nih hi i duh apiang chu ka tih sak zel ang che. Tun chauh ni lo, nidangah pawh thil tam tak min dil rawh. Aw, ka pe zel ang che. Chutiang chuan, ṭawng tawh lul suh aw. Kasa chu ka lo hrilh ngei ngei ang" ṭap zawih zawihin ka nu in a ti a. Tunah chuan, ka thaw ta huai e. Ka rilru luahtu ber chu, a kiang dawn ta. Mahse, kei hi a tel loin ka awm thei kher ang em?

"I thei nangmah chauh inngaihtuah thei i ni lo. I hma i sial tawktawh viau a ni" tiin ka in fuih mawlh mawlh a, ka mal loh zia min hriat tirtu ka kiang a awm reng ṭhin Pathian hnenah chuan, lawm thu sawi chungin ka mu a.

Zanlai a ni a, a ngaite bawkin ka ruh chu a na leh ngut ngut a. Ka khumah ka nu nen kan mut vangin a harh rang lutuk mah mah.

"Mambawih i ṭha em? Doctor kan ko ang e aw" a chhuak nghal a, a na lutuk chu, chet pawh ka che ngam lo. Ka thlîng chu, a in sâwr chhuak emaw tih mai turin a na ngawih ngawih a. Ka sawi thiam lo, a na tih bak chu, rei lo te ah Doctor a rawn thleng a. A na ka ti lutuk chu, a siam chhung ringawt pawh rei ka lo ti tawh. Kimbawihin ka kut vuanin, mittui nen min melh ngawt ngawt a, kil khatah ka nu leh ka u an inkuah a, ka nu chu hawi pawh a rawn hawi chhuak duh lo. Min chiuna te pawh na pawh ka hre tawh lo. Ka rum leh ngut ngut ṭhin tih mai loh chu, ka che thei lo a. Rei lo te ah, damdawi chuan, hna a rawn thawk a, ka mut chu a chhuak zui nghal mai.

"Nu, khua ah haw tawh ang aw.... Mass pawh kan inah ngei hman ka duh" ka muthilh hma in ka ti ṭawk. Ka nu chhanna ka hre hman tawh lo.

Zorammuana (Kasa) P. O. V

"Engtin maw?" Rubyi ṭhiannu nu thu sawi chu, mak ti leh awih lo lutukin ka melh tawp. Rubyi te rawn thleng har lutuk leh, a naute thleng a, aizawl an pan chhan hre lo miau chu, aizawl lam pan ka tum a. Ka chhuah hma chiahin kimbawihi, nu in min au ding a. A thu sawi vang chuan, ka nghing lawihin ka hria.

"A dik alawm. Nang hian ti buai lo tur chein a duh che. Naktukah an rawn haw dawn. Nang chu a hmu duh kher lo ang che" a aw chu, a vin hrim hrim tih ka hriat vangin a thinrim a ni lo tih ka hria. Mahse, kei erawh, mak tihna thinrimna leh tlawm intihna te in ka khat vek. Tibuai lo turin min duh maw? Eng nge a chhan?

Ka bike chu ka tlawh pawp a, a tlu nghal ṭhuai bawk. Kimbawihi nu chu a ṭe ṭhat a. "Eng vangin? Min chhang rawh. Eng nge a chhan?" kimbawihi nu chu pan hnaiin ka ti chhuak tuar a.

Tawlh dat datin, a meng phar awn awn a, min hlau lutuk nge mak a ti tih pawh ka hre lo. Ka hriat duh min hrilh hma erawh ka kal tir dawn chuang lo.

"Ka sawi ang. Mahse, min ti na suh" aw khur hlawk hlawk a, a rawn tih chuan, a ban ka hmerna ka thlah nghal a.

"Sawi vat rawh"

"I thinrim lo ang tih min tiam phawt rawh" leh hram chuan, min hlau viau chu ka hrethiam lutuk mah mah.

"I sawi loh chuan, ka hreh lo tih i hriat kha" a meng hra a, chil lem khalin aw a han thian leh te chu ka thinrim pui leh lo chauh.

"Ih,,, A thlîng a cancer a" bangah ka nawr nawk a, a thusawi chu ka hriat sual a nih ringin ka zawt ṭha leh. Mahse, chhanna ngai a min chhangin a ṭap lo chauh tawh.

"Chuan" sawi tur ka hre lo. Min ṭhawng lutuk mah mah! Thlîng cancer maw? Eng tin nge a nih theih ang?

"A daih rei tawh dawn lo. A mah vang a, i nat luat a hlauh nalam ah, a mah pawh inngaihtuah hman loin, nangmah chauh a ngaihtuah che a, tunah hian, christmas pawh a daih tawh kher ang em ka hriat pui lo. A cancer chu a chak chi a ni an ti a. Treatnment lak pawh awmzia aawm tawh lo an ti. Chuan, he thu hi i bulah ka sawi tih hrilh suh ang che" a chhho nghal nal nal chu, ka en zui reng ringawt.

"Cancer vangin maw?" chuan, kei hian ka hre lo. Ka nep hle mai, ka hmangaih nat chhan pawh hre lo in, thinrimin min biak duh lohte kha ka lo nat pui em em a! Ka lo lungawihlohna leh thinrimna te chu mahni inthiamlohna in a rawn let a. Tih theih ka nei ve lo! Kei min hlat duh hialna tur khawpin a na hi a lo nasa tawh amaw? Ka tlai a ni.

Kei a lo thinrim leh natrukna te chu engmah a ni lo.

Zan pawh mu thei lo in, a tuk mawlh mai chu ka nghakhlel a, ka huphurh tel em em bawk.

Khua a var a, ni chhuak chuan, ka ṭah a ti chhuak takzet. Mipa mah ni ila, ka thu hriat hian, ka mittui a ko chhuak lo chauh tawh. Engmah hre lo in, zu te ka lo in vak vak a, ka lo zawng chhuak lo a ni.

Rawn thleng ta se, eng angin nge ka hmuh ang ka ngaihtuah thiam lo....

Ads i la click ve lo a ni maw? A hnuaia ads milem khu lo click ve rawh le

[Ngaia]

HOPELESS 10

(In lo dam em? Kei chu vawiinah ka leng chhuak peih chiah. Ka sam ka tan thut a ka damloh pui palh a. Hihi... che chukchu thei ti ru. Mahse, hei ka lo let leh tawh e. Ads min lo click sak turin ka ngen mawlh mawlh che u)


Rawn thleng ta se, eng angin nge ka hmuh ang ka ngaihtuah thiam lo....

"A rawn thleng nia, URuby a rawn thleng" kawng sirah meizial zuin ngaihtuahna ka kawm a, au thawm ka hriat rualin naupang ho tlan na lamah ka tlan ve nghal a. Motor chu dingin, mi in an bawr luai luai a. Kal hnaih belh chak viau mah ila, mi an tam em vangin, ka hnaih ve ta lo.

Heng mite hian a damloh an hre vek a nih chuan, keimah hian eng vangin nge niminah chauh ka lo hriat a. A chanchin ka ngaihven loh vang em ni?

Motor aṭanga rawn chhuak tur thlirin hmun sang lai ka pan a. Kimbawihi leh bawihpuia an rawn inkai chhuak a, a dawtah a naute, chuan a nu. motor lam an hawi a, damdawiin khum nawr kal theih an rawn zawn chhuak a, chutah ngei chuan, ka hmeichhe hmangaih em em chu a mu bâm a. Rang lutukin ka pan hnai nghal ruak.

An bul ka va thlen rualin Rubyi nu in min lo ṭah khum vak a, mittui tling khat vekin Rubyi mutna khum ngei mai chu, ka va bawh rawk. Ventilator an vuah a, inchiu hlau em em ṭhin kutah chuan, venflont an vuah vû bawk. Na a va ti dawn tak em! A taksa chu, rapthlak khawpin a cher chhia a, a sam sei siau ṭhin te kha a kawlh ta vek bawk. A hmui sen deuh hiam ṭhin pawh kha, a hil riap a, a duk vek bawk. A kut zungṭang ka en leh a, awi maw! Ruhro tiat lek a ni, sa tur reng a awm lo a, a biangsum awmna lai ka khawih a, a khuar deuh dak bawk.

Hetiang em em a, chhia hian ka hmu ang tih ka ngaihtuah pha ngai lo. Khum chu an nawr kal a, Bawihpuian min rawn kai hrang bawk. "A taksa a chakloh vangin chim tam vak loh a ṭha a" inthiam chiah lo a, a tih chuan, ka lo inthiamlo zawk. An mahni pawh ngaihvenna chang hre lekloin ka hmangaih em em mai chauh ka lo hmu a. An ni pawh an tla deuh kuam a, an hah ve hle a ni ang.

"Khawngaihin, Rubyi hi min hlat lo hram turin min ngen sak rawh" zah pawh ka dawn thei tawh lo. Hetiang dinhmun a, ding chung hian, min hlat luih hram a tum ang tih ka hlau takzet! Hmeichhe nu leh no tak ni mahse, a luhlul a chhuah tawh chinah chuan, a kal tlang hma chu ti ṭal ṭhin mi a ni tih ka hre miau a ni.

"A cancer tih i hriat a hnu, a dang tawh lo ang che. Nang pawh hian i enkawl thei ang" Bawihpuia min chhanna chuan lungngaihna karah hlimna tam tak min pe a ni.

In be tam loin, an in lamah kan kal ta nghal a, khumah an mut ṭhat tir a, ventilator an vuah tawh lo a, a hmel chau rau lutuk ka hmuh hian, keimah zawkin tawrh sak mai ka chak takzet! Ka chanchin tlangpui ka hrilh thuak a, in aṭang a ka chhuah thu chu mi ka aṭanga, an hriat tawh vangin thup buai ka tum duh lo law law.

"Tui..." ti a Rubyi ṭawng thawm ka hriat rualin, rang zetin tui chu ka suak vat a. Meng hlei lo hian, a in khawlh khawlh a, a lan dan chu midang tan chhe hle mahse ka hmangaih a nih miau vangin nidang zawng aiin ka thlahlel a, a bulah ka awm nghal chawt. A nu in, an chanchin inlengte bul a a sawi lai chuan khum bulah ṭhu in ka lo ngaithla ve a.

"Ka fanu mah ni se ka fak lo thei lo. Keini beidawng tak a kan awm laiin a ni chuan,
'Nu, mitthi mai tur ka nih hi. I hre lo mai thei, ka pa nen kan inbia asin. Ka pa chuan nakinah min la hruai dawn. A kiangah. Chuan, a thu sawi ṭhin kha ila hria em? Mihring hi thi turin kan piang a, chuvangin dam reng turin in ring ngai suh. Nung turin thi tur a kan pianna lei hi kan la chhuahsan dawn. Kei mitthi mai tur vang a tam tak in nat ka phal lo. Ka duh lo' tiin nui chungin he thu hi a sawi a. Zep miah loh chuan ka fanu hi ka tluk lo takzet. A mah a damlo berin min hnem ṭul a ka awm hi ka inthiam lo a. A mah thlamuan tur ka nih lai a keimah zawk min thlamuan mai hi ka ngaihtuah chian pawn a harsat tur zia ka hria. A chhel in, a rilru a tluang tak zet. Doctorin a daih rei tawh lo ang tia a sawi te kha a lo hre ve vek a"
sawi zawm mai thei loin a ṭap hlawp hlawp a.


chutah sawi zawm leh in, "kei Pathian lakah ka fanu vang a ka vui em em laiin a ni chuan tihian a ti a, 'Ka hre vek, doctor khan, kan tlai lutuk mah mah tawh tih a sawi ka hre hman alawm. Hei ai hian hma hret pawh ni ila, thlîng cancer hi a dam an la awm lo a ti a nih kha. Ka beiseina ṭul lo pui vang a, ka vui aiin beiseibo ka nih zia sawi la, vui lo turin min fuih ta che nu. Beiseibo hringnun ah hian, siamtu theihnghilh lo turin min fuih la, khawngaihin inhnenah awm a, i dawm hlum ngei nih ka duh zawk' tiin min la fuih a, ka fanu tuar ai tuar ka chak laiin a ni chuan, a unauten min mamawh thuin min chhang a, a ni chu a la nui reng. A tan a harsat dan tur ka ngaihtuah thiam pui lo a, ka tihsual chu, Pathian lakah ka lo vui leh ka fanu hnem ngai a ka awm hi a ni" a sawi zawh rualin an lo in hnit feih feih hlawm a.

Hetiang khawp a tuarchhel a lo ni tih ka hriat hian ka tlukloh zia leh chhete ngaihṭhat loh hlek a ka puakkeh a sual kawng ka zawh nghal mai te hian a chakna beiseina êng a neih ang ka neih phak loh zia ka hre chhuak. A kut chu la kangin ka fawp vang vang a, ka mittui hial ko chhuakin, a kutah a luang thla a. Hmeichhe entawn tlak leh chhuan tlak tak zawng a lo ni e.

"Kasa, mu tawh rawh. Zanlai ah kaihthawh i ngai dawn a nia, a na hi tun lai a chhuak zing deuh a mu hma la, chuan, kaihthawh i ngaih hun a kaih thawh thei mai turin lo awm zawk ta che" Nungaihin a rawn tih chuan ka bu vat. Tunah men pui mah ila awmzia vak ala awm dawn loh vangin, awlsam tak a koh mai theih tur a ka lo mu hi a ṭha zawkin ka hre ve tlat.

Khumah chuan ka mu meng kar a, beiseibo mai a ni tih ka ngaihtuah chhuah hian, a ai a thih daih ka chak takzet. Ka thi hmasa zawk ang a, a ni chuan, a tuar chhuak thei ang. Kei erawh chuan ka thei ve dawn lo tih ka hming ka hriatchian tluk zetin ka chiang a ni.

Nihnih chhung chu Ruby ka hlat ngam lo a, chhin khat pawh ka chhing ngam hek lo. A taksa a chak tawh lo in, a tla hniam sawt hle a, in be mang lo mah ila harh lo erawh a ni chuang lo.

Christmas kan hnaih telh telh a, he hunpui hi min la hman pui thei hram se ka ti takzet a ni. A na tuar hmel hmuh hreawm zia hi ka sawi thiam lo. Min melh ṭawk ṭawk ṭhinte, a na ti lutuk thlan tla zawih zawih chung pawh a a la nui lui hram hramte chuan mittui a ko chhuak lo thei lo a ni.

"Kasa i harh em?" engtiklaiin nge ka lo chhin hman ka hre lo. Rubyi nuin min ko thawm ka hriat rualin rang zetin ka ṭhu chhuak vut a. Hlauhthawnna in min tuam nghal hlup hlup bawk.

An room lamah a luh daih vangin rang zetin ka zui lut a. Ka thu hriat vangin ka tawp chiang kher mai.

"U Valpui, kei heti mai hi ka ni a, min neih i duh chu ka hrethiam lo. Ka daih rei dawn lo asin" Rubyi mahni insit leh min hre awm pawh a awm duh lo a, a bula mipa ṭhu kut vuan a a biakna chuan ka ruangphumna tur lei a lai ta mai ah ka ngai hmiah.

"Chutiang chu ka hre vek, mahse ka nei duh che" Valpuia chhanna chuan a mah thah min ti chak tak zet! Ka ngaihthlak reng chuan ka ti duh ngei ang.

Kawngkhar chu dim lo lutuk in ka phih hawng pawp a, ka chhuk thla a, Nungaihi min auh tuar tuarna chu ka bengkhawn duh lo lui a.

Hei hi ka chan tawk a ni em ni? A na a chhuak a nih ringin mangang leh thlabarin ka pan a, mahse inneihna lam hawi zawngin kei hi vih ka ni ta zawk a! Ha... A tuarchhelna ka ṭawmpui ve thei dawn lo a nih hmel.

Ruby lalhlumawii P. O. V

"Ni lo e, U Valpui, kei chuan ka thei ve lo ang. Hmangaih ka nei a, a ni nen inkut suih thei dawn lo mah ila, ka hnukchah thleng a ka hmangaih awmchhun tur a ni. He thu i hnen a ka sawi hi min dem bik suh aw" sawi lo thei lo a min siam hi kei pawn pawi ka ti. Ka rilru a hmanhmawh in, ka hlauthawng takzet! Kasa thinrim hian tihhreh a nei ngai si lo nen. Hnar haw vat vat a Kasa umzui chauh ka rilru ah a awm tawh.

Ka damlo tih hre reng chung a min neih a duhthu min hrilh chu ka tan chuan a ropui lutuk. Mahse, mipakhat tan chauh ka thinlung ka hlan tawh miau si a. Mawihnai tak abhnar duh viau mah ila, rilru hmanhmawhna nen ka thei ta nang lo a ni.

"Khawngaihin..."

"Ni lo ve. U Valpui, khawngaihin min haw san tawh rawh" a thu sawi lai pawt chatin ka ti hmiah. Kasa, unaupa a ni a engtin nge a unaupa hi ka hmangaih a ni tih hre reng chung a min ngaihzawn hram chhan ka hre lo.

"Awle, ka haw san ang che. Mahse ka beidawng lo a nia" nui sangin a la ti leh hram a. Chhang buai duh tawh loin ka mit ka chhin san a, ka chhungte an awm tho vangin, an thlah a. Kimbawihi ni se min hlat ngai lo a, mamawh hunah koh theih reng turin ka bulah a ṭhu chawt ṭhin.

"Kasa bulah kal ka ngai a ni Kim" ka taksa chak lo pawh ka ngaihtuah thei tawh lo. A bul a awm ka chak a thil awmzia hrilh fiah vek ka chak a ni. Ka damlohna thup tum mah ila, ka thlen hma in a lo hre vek. Chu ti chung pawn min hlat phah lo a. Min thlakhlelhna a tilang reng zawk ṭhin. Heti chung hian ka kalsan theih min rin sak ka ring lo.

"Mahse Ruby, i taksa...." ṭawng tawh lo se ka duh tih ka ban vaiin ka hrilh a.

"Bawihte..." ka nu min ngaihtuah dan tur chu ka hrethiam a ni. Mahse, Kasa bak ka rilru ah a awm thei chuang lo.

"Nu, min kal tir hram ru. Tunah hian min mamawh tak zet a ni. A thinrim chuan tih hreh a nei lo tih i hriat kha. A beidawng tih a hmelah khan in hmu thiam lo em ni?" ka ṭawng zawng ringawt pawn ka chau a. A bulah kein ka kal thleng dawn em ni? Ni lo, ka thei a ni.

Ka tih luih tlat vangin ngaihṭha zan lo in min kal tir a, ka u in tlangah a awm ka rin vangin min paw chho a. Mahse, ka kal thlen theih tawh ka rin vangin lo haw a, min ngaihtuah lo turin ka ti a.

Pawm lo dawn viau mahse ka luhlul tih a hriat chian em vangin min kalsan ta a. Thei leh thei loin ka in ham kai ṭawk ṭawk a ni ber.

Tlangah chuan a lo awm tak tak a. Mahse, zuanthlak a tum a niin ka hria chak thei ang berin a awmna lam ka pan a.

"Khawvel hi ka hmachhawn ngam tawh lo a ni" ka thleng chho chiah chu, Kasa beidawng ṭawng thawm chuan, min ṭham hit sawk.

"Tisuh" ka aw neih zawng zawngin ka au a, amaherawh chu, ka chauh em vangin ka aw chu a zawi viau. A hriat tham loh tur khawp a, zawi a nih chu ka ring chuang lo.

"Ai, timiah suh kas khawngaihin" a rawn in her zawk a, mahse, a hnunglam bawk a hawi leh vangin, zuanthlak a tum tih ka hria. Eng nge ka tih ang?

"I zuangthla a nih chuan, ka zui ve ang che" ka thu sawi a ngaih pawimawh loh em vangin ka kal hnaih sauh. Mitmeng hriatthiam har zet a, min melh in a kiai suk a.

"Pasal i neih dawn kha, min tibuai suh" a hawi na lam a hawi leh zat bawk. Aw Lalpa! Eng nge ka tih ang?

"Ai,,, i hre lo ka..."

"A tawk. A tawk tawh Ruby, i thil tih zawng zawng kha ka ṭhat i duh luat vang a ni tiraw?" a mittui chu a luang a. A ṭap a nih chu! Thla engin a chhun fuh miau vangin a tle thla sawt sawt a. Ka mak ti lutuk chuan, chhanna chang pawh min ti hre lo.

Eng tin nge a ṭhat ka duh lutuk vangah a ngaih theih? A ni hi ka hmangaih a, a mah a nih vang chauhin a sin ka hmangaih. A ṭhat ka duh vang a hmangaih ka ni lo asin! Ka biang chu a rawn lum thla ve pap a
Chetna chang pawh ka la hre chuang lo.

"I hria em? Eng vangin nge kasa min tih tih hi" a thaw deuh hap a, ka lo ṭang ve em em ringawt. Eng nge sawi a tum ka hriat miau loh vangin ka ngawi nghal kar. "Kaisara ang a sual leh luhlul mahni thu duh leh, ka thu chhuak chu kal tlangpui ngei ngei duh mi ka nih vang a ni" a nui deuh hawk a, a mah ka en a, kaisara hming kaih tawiin an ko ang tih ka ring chhin ngai lo. Ka lo ngaihdan chuan, a chhungten an koh duatna ah ka lo ngai.

"Kum 17 ka nih in sex ka hmang ṭan a. Kum tling lo a, mutpui ka nih vangin, hmeichhia pawh ka mamawh ṭhin tak zet! Hei hi ka duh thu a ni lo. Nupuia neih dil tu che nu ngei khan min pawngsual a tih theih ang chu" a nui deuh suk a. Ka thu hriat ho in min ṭhawn dan chu ka sawi thiam lo. Pawngsual maw? Chu pawh a nuhrawn lehnghal?! Mak ti lutuk in ka en ngawi kar tawp.

"Chuan, chu chuan, ka nun a tichhe ṭan ta a. Kum 3 chhung chu enghelh nei loin, sual tinreng tiin ka awm a. Mahse, hmeichhe nu leh no hnap hmelṭha leh pawisawi lo ka ngaihsan em em chu ka tawng ta a. A ni kha chu tihlai chuan, kum naupangte chauh ala ni. A la naupan em vangin ka nghak a, kum 4 kal ta khan ka duh thu ka hrilh nghe nghe. Chuan, chhanna min pe phal lo a, ka hrethiam lo lutuk mah mah. A chhan chu a mitmengah khan min haw lo ve takzet tih ka hriat bang a ni. Mahse, nuthlawi in min bem a, kha tah khan kha tah chiah khan, chhanna min pek phal loh chhan ka hria asin. Min chan a hlauh lutuk vang leh a mah a insit em vang a ni tih ka hria asin" hmun hla tak a thlir a, kei chuan, maktihna bak ka la nei ta chuang lo. Ka duh tih a hre daih tawh maw? Mahse, eng tin?

"Chuan, zah pawh ka dawn zo tawh lo a, a nu kha ka dil a. A nu pawn mi phal sak. Kei chu misual tak tia khawtlang hriat ka ni. Mahse, a nu chuan, ka thil tih hian chhan ṭha tak a nei tih a rin thu min hrilh a, a fanu pawh ka tan chuan a lo phal lutuk mah mah. An pahnih bulah chuan, ka hlim a, ka nihna chhete mah min zahpui ngai lo bawk. Misual tak hmuhin mi zawng zawngin min hmu mahse, an ni nufa chuan, ka ṭhatna lai an hre thei zel a.
Chuan, tunah kha hmeichhia kha ka duh leh ka vei bur khan, cancer a vei tih ka hria a. A tel lo chuan he khawvel mal tak a ka lo hmachhawn ṭhin chu, a tel ve aṭang chiahin a ni tel lo chuan ka hmachhawn ngam leh ta lo va. Nupui a neih duhtu a nei a, chu chu tu dang a ni lo. Ka unaupa ngei a ni. An inkar ah ka inrawlh a, ka tel lohna turah ka tel niin ka hria, hmeichhia chu ka lo hmangaih hman tih pawh ka hre chhuak a, mahse, mi inkarah kei misual tak hi ka lo tla zep a ni" min melh deuh vang vangin a ti a. A thu sawi chhung zawng khan, ka thaw chhuak ve lo tih ka hria.

"Min hmangaih maw?" thu dangin ka rilru a luah thei lo. Min hmangaihthu a sawi chauh chu ka hria a. Mak ti mah ila, ka hmangaih ang tho in min hmangaih tih ka hriatna chuan, chakna thar min pe a. Mahse, ka taksa na ṭan riai riai erawh a la kiang ve tlat lo.

"Nang hi hmangaih lo che ila, ka nun hi a tawpna a rei tawh dawn asin. Mahse..."

"Sawi tawh suh. Ka ngen a che" a thu swi lai pawt chatin ka ti chhuak deuh vak. Ka tha a khur ṭan a, a na pawh a zual tawlh tawlh bawk.

"Ti suh..... Kei... kei pawn ka hmangaih che asin" thei leh thei lo in ka ti chhuak leh tawk a. Khang a hun kal tawhah khan, eng tiang takin nge a lo tuar ang ka hre lo. A chakin a huaisen takzet a, a chhel in a luhlul hle tih ka hriat belh a ni.


"Maw?" Ka thu sawi chuan, a ṭhawng ve takzet a nih ka ring min rawn pan hnai ruak a. Kei erawh, ka chakna sawm khawmin min tlin ve tawh lo. Zawi zawiin ka tlu riai riai a, mahse, ka rinchhan tur ka hmuh chuan, tluk ka hlau lo. Ka tlu tur chu chak lutukin min rawn pawm lawp a. Ka nui deuh sen sen ringawt. Ṭawng leh tur pawn ka na hian min thunun hneh lutuk. Ka nghilh dup a, ka awm dan apiang a na in a hreawm tih chauh ka hriat chhun a ni.

A ṭawng mawlh mawlh tih chu, ka taksa nghawr deuh dat dattu ah ka hre thei a, a sawi erawh ka hre ve thei ta lo.

Ka na chu, na viau mahse, a taksa ka nghen hian ka hahdam em em lawi a......

*** KAN WEBSITE A FAKNA LAM THIL MILEM LANG THIN I LO HMEH ZEUH HIAN KAN WRITER TE HLAWH KAN TUMSAK ZEL TIH KAN HRE THEUH DAWN NIA, KAN LAWM E***
Ads i la click ve lo a ni maw? A hnuaia ads milem khu lo click ve rawh le

[Ngaia]

HOPELESS 11

Ka na chu, na viau mahse, a taksa ka nghen hian ka hahdam em em lawi a......

Ka thlan tla deuh phung pawh chu, a rawmawl thianghlim zet var sarin a rawn hru a, tlemin ka khawhmuh te pawh chu a fiah ve ta deuh. Mahse, damdawi tel lo chuan, a na hi a reh tawh lo tih ka hria a, damdawi chauh chuan, ka rilru a luah khat tlat tawh.

Engtiklai in nge in min pan pui ka hre lo, mahse, in kan thlen rual a, ka u in min lo chiu chiah chu, ka zia sawng sawng ni maiin ka hria. Ka kut hum tlat chungin, min melh ngawih ngawih a. A mangangin a hlauthawng tak zet a ni tih a tha khur deuh dar dar leh a hmel chiai vekah chuan, ka hre thei. Thei leh thei loin ka nuih lui hram hram a, damdawi pawhin hna a thawk ṭan a ni ang. Ka mut chu a rawn chhuak deuh chem chem a, ka bulah a awm tawh miau vangin, ka thla a muang zual a, ngaihngam takin, ka chhing ta riai riai bawk.

"Lalpa ka ṭhatlai hun chu, min pe leh turin ka dil lo ang che. Mahse, khawngaihin he mipa bulah hian, tun ai a rei min la awm tir hram ang che aw. Ka nun hi min zuah sak tur chein ka dil lo ang che. Mahse, khawngaihin, tun ai hian min la pawh sei sak ang che aw. Ka tel lo a, khawvel hma chhawn tir lo tur in ka dil lo ang che. Mahse, ka tel lo a, hmachhawn dan erawh, i zirtir hram ka ngen ang che. Ka taksa chaurau tawh tak hian, dam a thlahlel lo a ni lo a, i bulah awm ka chak ang tho in, a ni pawh hi a bulah awm a, a ke pen rual a, pen ve a, chak tak a awm ka duh. Mahse, ka nun chu i ta a ni a, i thu thu in min ti ang che. I tih engkim hi kan tan a ṭha tur vek bak a ni ngai si lo. Hmalam pan a, ke a penna kawngah hian, a rual a ke pen a, nawr kal thei tu tur i pek erawh ka ngen leh ang che. A nun ang a nung ve mi tam takte chhanchhuaktu a nih theih nan nangin hruai la tun ai a a ṭha zawk kawngah hian i hruai ka ngen che a ni"

Zantin ṭawngṭaiin he thu hi ka sawi bang lo a, ka dil apiang min pe in min chhang lo mahse, ka dil ka chawl ngai lo a, ka ngen bang hek lo.

"Anu, dar 12:00 a ri tawh si a, a van harh har tawh ve au chu" kan teber aw ka hriat rualin ka nui deuh suk. Min ngaiin, ka damlo chu min lo khawngaih ve hle ni tur a ni.

Inleng hi kan ngah theiin min men pui ṭawk ṭawk a, an tlawmngaihna hi kan chhungkua chuan kan tluk lo takzet. Kan tan chuan, vanneihna lawmna tih bak a han sawi mawi dan ka thiam lo. Hah pawh sawi loin zanlamah kan inah an rawn lang a zingah hma takah thoin, an hna ṭul ṭul te an thawk leh tho a. Kei chuan, hetiang hi ka ti ve thei ang em ka hre hauh lo.

"A rawn harh ṭep ang bawihte, mu la naktukah i be dawn nia" ka nu in, a tih chuan, thu awih takin a mu ta a ni ang. A reh nghal vang vang mai.

Ka nu tan hian, chhel a va ngai dawn tak em! A fanu beiseibo mai ka ni tih hre reng chungin, a beiseina a la ti nung fan a. A der a hlim ve te nuih luih te hi a har dawn lutuk. Zanlai ah ka kut vuanin a ṭap ṭhin. Hria ang pawn ka awm ngam lo. Chhungril aṭanga, chhuak natna pai dam har tur zia hi ka ngaihtuah thiam lo zawk.

Min hmangaihtu apiangin min khawngaih a, ka nu pawh chutiang tho a ni. Ka bul hnaih a awm apiangin min khawngaih a, ka na a chhuah a, thi tur ang mai a ka awm te hi min khawngaih tak a min en tlawk tlawk bak tih theih an nei si lo. An mittui tla chu, hmuh hreawm viau mahse, ka en a ngai a, an mahni vang chauh pawhin chhel tak a ka awm a ngai tih ka hria. Mahse, eng tikah emaw ka la peih loh san hun a la awm dawn si a.

"Morning. I mutui em?" Kasa hlim hmel ka hmuh chuan, zing thawh hlim aṭangin ka nui nghal var var mai.

"Umm tui lutuk. Nang chu i mu ṭha ve lo" ka lo ti vat a. A mit khur thuk deuh leh a hnuai a, duk kual raih ah a chiang reng.

"Ka mu phal lo alawm. I hmelṭha tak hi ka en ning thei thlawt lo" tiin ka chal a fawp a
Ka nuih var var ringawt. Dik tak chuan, ka chhiat zia hi ka in hre ve vek. Mahse, ka tan a, hriatnuam tur a thu chhete an sawi hi ka lo hlim pui em em a. An sawi ang tak ni lo mah ila, ka hlim tho.

Chawlhni a ni a, inkhawm turin an chhuak deuh diak a ni ang. Inleng kan nei lo a, ka nu te pawh min inkhawm san turin ka ti a. Keimah berin ka ṭhat thu ka sawi miau vangin, lawm takin min inkhawm san a. Kasa erawh a duh lo bur mai. Inkhawm tur hian, ka ti ve zauh ṭhin a. Tun thlengin ka la hlawhtling thei ṭhak lo.

Inah kan pahnihin kan awm a, ka kut vuanin min kal hlat san ngam lo hrim hrim.

"I mut a chhuak miah lo em ni?" Khawngaih ru zetin ka ti a. Ka bulah ngawi rengin a ṭhu a, sawi duh tam tak nei hmel pu mahse, min en ngawih ngawih ringawt. A hmel a chauin, a cher deuh kuam a.

"Ka en reng duh zawk che" ti a min chhan chuan, ka nui hak. A chang hi chuan, a naupang chhia ṭhin ngawt mai.

"Nih ka bulah tal lo mu rawh" kan ti deuh ngei a. Rang lutukin a rawn inthawlh a, ka nui hak hak.

"Kha thu i sawi hun tur ka nghah rei zia kha" a ban min lukham tirin, a awmah min pawm bet a, a taksa lumna chuan, min ur lum ve nghal ham ham bawk.

"Sawi lo ila, i rilru a na dawn a ni maw" tiin ka fiam zauh a. Min nawr hla in, ka mitah tak min en kar a, ka en let ve bawk.

"I sawi ang tih ka hriat vangin alawm ka nghah" ka chhan hlau zetin min fawp nghal tawn tawn a. Ka thiam ang tawkin ka lo fawp let ve ngawng nawng bawk.

"Ka thi dawn" thaw kawk kawkin kan infawhna kan thlah rual chuan ka ti a. A nui hawk hawk zui.

"Thi mai lo ve, rei tak ka bulah i awm dawn" a ti a. A hmel chu hlim luih ngial tum mahse, ka hmu thei a ni. Keimah vangin a na takzet. Ka en ngawih ngawih a, hetiang khawp hian min hmangaih ang tih ka ring chhin ngai lo. Min hmangaih zia ka hmuh hian, ka inthiam thei thlawt lo, rei tak a bulah ka awm thei tawh dawn lo tih hre chungin, min la fuih hram a.

"Ṭap turin ka ti loh che kha" tih leh ka bek a mittui lo luang chu a rawn hru a. Nghet lutukin ka kuah tawp.

"Ni 31 ah chuan, ni tla tur i thlir dun ang aw" ngenna aw ni lo in tihloh theih loh thu chhuak a ang zawk.

"Min hruai duh phawt chuan, kum dang a kan la tih ngai loh kan ti dawn tihna a nia" a awm a hmai phum tlatin ka ti a. A tuar chhel bik leh mittui nei lo bik lutuk chu ka awt tak zet. Khum ka thawh san tawh lo tluk a ni a, nizan a ka chhuak bak khawiah mah ka chhuak ngai lo. Hetiang khawpin ka taksa a chau tawh a, beiseina nung min la pe zel chu a ni si a. Kei hmeichhia azawng a ṭah belh ber mai mittui chu a ko chhuak leh nge nge zel.

"Ka hruai ngei ngei ang che. Naktuk ah chuan, ar kan hem hmin ang a, mass kan lawm dawn nia" a tih chuan, hlim zetin ka bu nghauh a.

Ka taksa hian zir se, puan bih chung a, biakin pan ngei ka duh asin le. Ka bul a mi pawh hi a inkhawm ve thei bawk ang a.


Christmas zing chu tuk dang zawng aiin ka tho harh a, ka ṭhu chhuak peih hial mai. Hetiang a nih chuan, chhun ah pawh ka inkhawm ngei ngei ang. Lalkimbawihi te pawh ka ngenna vangin, kum thar niah an innei dawn bawk a, ka hun chu, hlimna hlirin a khat ṭha tawh tak zet.

Christmas ah hi chuan, ṭhiante nen in tinah kalin zing chibai kan sem ṭhin a. Mizo puan ngei bih chungin, christmas hmuah nan a kan den ṭhin. Mizo chhang ban ngei mai kha sweet angin banhla hnah in kan fun thlap a. Ṭhenawm khawvengte kan han sem kual ṭhin kha a nia. Kumin erawh ka tel ve ta lo a, kimbawihi pawh ka kal loh miau vangin a kal lo ve bawk nen.

Ûr lawk zanah te chuan, meipui chhepin kan ṭhut hual a, rimawi kan neih ang angte thawh khawmin zai thiam leh thiamlo thiar hrang loin kan zai ho a. Ar hemhmin kan hmaih ngai lo bawk. A lum thei ang ber a inthuamin kan pungkhawm a, Lal piang chu hmuakin leng dang kan ngai lo a. Mahni tawkah kan hmang nuam ve ṭhin asin. Tunah lah a ṭhen nupui pasal neiin fanau an nei a, a ṭhen chuan pialralah mass te an hmang tawh a, a ṭhen chu keimah angin damlohna vangin khum an thawhsan lo a, a ṭhen erawh nunhlui ngaih hre lo in he hun hlimawm hi an hmang bawk.

Khaw te tham a nih vangin khawtlangin christmas te chu, kan hmang ho a kohhran a ṭhen lai kan nei ve ngai lo. Mahni neih ang ang te thawh khawmin damlo leh ṭanpui ngai khawtlangin kan zawng a, kan thawhkhawm chhun chu kan pe ve ṭhin bawk. Kum in erawh an ti nge ti lo pawh ka hriatpui ve tawh lo reng reng.

"Nu, vawiin chu, mass te a ni bawk a, Kasa nen kan inkhawm ve dawn aw" nidang a khum thawh san thei lo khan, chu thu sawi tur ringawtin ka thawh san a.

Ka tho chhuak chu, mak ti leh lawm hmel zetin min lo en ṭhap a. Ka lai deuh reuh in ka hria. A mak ve em asin, hetiang a harh hian ka tho chhuak ang tih kei pawh ka ring bik hleinem. An chaw ei lai a lang ka nih miau vangin chaw bar pawh an hre chang lo hialin a nia ka hriat ni.

"Teh reng mai. I van ṭha tawh ve" ka nu in min lo pui vat a. Kei pawn ṭha sawt ka in ti ve takzet.

"Min inkhawm pui ang tiraw?" beisei zetin kasa ka melh let kiau a.........

*** KAN WEBSITE A FAKNA LAM THIL MILEM LANG THIN I LO HMEH ZEUH HIAN KAN WRITER TE HLAWH KAN TUMSAK ZEL TIH KAN HRE THEUH DAWN NIA, KAN LAWM E***
Ads i la click ve lo a ni maw? A hnuaia ads milem khu lo click ve rawh le

[Ngaia]

HOPELESS 12 last

"Min inkhawm pui ang tiraw?" beisei zetin kasa ka melh let kiau a........

"I tih te chuan, khawm ang" nghet churhin a ti a. Ka nui nghal var var, he hun hi a lawm ka lo nghahhlelh em em chu.

Chaw ei kham chuan, kan insiam sap sap hlawm a, kimbawihi pawh kan monu tak tak angin a awm hmiah tawh. Ka nu nen an inngeih em em a, kawng engkimah an inthlawp thei zel bawk.

Ka ngaih hi a ngam em em ringawt mai a ni. Ka awm loh hunah pawh ka mi hriat chian sa ngei mai ka monu a ni dawn tih ka hriat hian, kei chu, ka thla a muangin, ka ai a awh hneh dawn tih ka chiang a ni.

Inkhawm chhung zawng chu, Kasa rinchhan tak meuhin ka ṭhu a, min ngaihven zetin, ka kut a hum reng bawk. Hma lam en in, thu sawi tu chu thutak zetin in a en ngur bawk. Chhete tal in hmu chhuak se ka duh takzet a ni.

Kan bang a, biakin kawtah min lo be tawk an awm reng vangin, rei fe chu kan han khawmuang a, zep loh chuan, ka chauh pui tawh takzet a ni. Kasa hi ka ke tluk a ni ringawt, min pawm deuh titih a, a nu ka hmuh chuan, a inthiamlo hmel chu hmuh hreawm tak a ni. Ka khawngaih lutuk chu, va biak a, va hnem mai ka chak takzet. Chu mi tur pawn ka kal thei tawh ṭhak lo.

"Kasa, i nu hi i hua em?" ka vei em vangin ka ti chhuak ta nge nge a. A kal lai tawpin, min en deuh run a, zawt sual inti zetin, "ka ti mai mai a nih kha. Theihnghilh daih rawh" ka ti leh hnuhnawh a. A hmel hriatthiam har zet chu, en pawh ka en ngam tawh lo.

"Haw turin min duh em?" Rei fe a ngawih hnu ah a rawn ti a. Ka hit chuai maiin ka hria, ka nu ka bulah a rawn ding a. Mitmeiin min kalsan dawn tih min hrilh a, ka u te nen an lo haw bawk.

"Maw... aih duh lo e, haw lo la, hmangaihna nen en leh zawk la ka duh" tia chhangin ka ngheng leh deuh bawk. Ka ti tak tak. Haw turin ka duh lo bur. Kei pawn ka huat ka rin nen, ka haw ve lo a, ka khawngaih takzet zawk a ni.

"Nia, kei pawh ka lo ngaihdan chiah a ni. I sawi ka rin vang a nia ka zawh che" tiin min nuih var var a. Ka nuih let ve var var bawk. He pa hi a inthlak danglam tawh takzet a ni. In hre lo mai thei, mahse, kei chuan, hma a sawn tawh takzet tih ka chiang a ni.

"I danglam tawh takzet tih i in hria em? Ka hmangaih zual sawt che" tiin ka nuih nghal var var a.

Ṭawngka a min chhang loin, min nuih a, ka kawng a a dawmna chu la thla vutin, ka tluk hma siin, min pawm nawlh a. Ka inring lo lutuk chu, ka au deuh ṭhat. Mi in min en ṭhup ka rin tehlul nen a, tuman min lo en lo tih ka hawi vual vual rualin ka hmu a. Ka chhuk duh pawh ka ti ve lo, ka chau tawh takzet em a ni.

Ni a liam a, hun pawh min nghah tum loin a liam ve zel bawk a. kumin a tan a, ni hnuhnung ber tur a lo her chhuak a. Kei erawh vawiin kher chu, ka na zingin damdawi a awm tawh lo tih an sawi thawm ka hria. A nat theih em vangin, ka thlanin min bual reng a damdawi chu awm se ka ti takzet bawk. Damdawi a awm lo tu nge la ang tia ṭhenawmpa in a rawn zawh laite chuan ka lo thinrim hlur tawh. Ni dang a na nen chuan, tehkhin rual a ni lo, a na chu a zual em em a, damdawi lak a ngaih vangin, "ka rawn thleng thuai ang. Lo tuar hram hram rawh aw" ka na tuar vial ngawih ngawih chu ka chal fawpin min rawn kuah a. Kasa chu tlawmngai takin, a la turin a chhuak a. A ni chu ni dang zawng aiin a hmel a hlim a a êng sar bawk. Kei erawhin inah nghakhlel zetin ka mit ka len ruai reng a.

Ka na chu a nat em vangin ni khua ka lo hre lo hman deuh a nih ka ring, kan inah mi an zi nuaih nuaih ni maiin ka hria, harh chiang mang loin, mi vei sup sup awm takte chu, an ṭawng hun nghakin ka beng ka lo chhi kar a. Tun a ka hriat dan chuan, tlailam dar 2:00 bawrvel a ni tawhin ka hria.

"Ruang a rawn thlen hunah hetah hian kan muttir mai dawn nia. Chuan, Rubyi hi a dam thei tur ang berin in hrilh hram dawn nia" tih thawm ka hriat chuan, ka harh kawkin ka hria. Tu nge thi a, ti nge ruangte an tih nachhan? Chuan, eng nge kei hi a dam thei ang ber tur a min hrilh an tum thu chu?

"Eng nge in sawi kha? Chuan kei hi eng thu nge a dam thei ang ber a min hrilh in tum?" hlauhna nasa takin min hual a, ka thin chu a phu dut dut bawk. Ka bul velah ka hawi kual ruai a, Kasa ka zawn ber a awm si lo. Chu te hlei hlei chuan, hlauhthawnna nasa tak min pe a. Kimbawihi rawn tlanin, min rawn kuah nghal rawk rawk a.

"Ruby, a pawi lutuk" ṭap hlawp hlawpin a ti a. Eng thil chiah nge thleng? Eng vangin nge hetiang hian tu pawh mai hi an phut sup sup? Ka hrethiam lo takzet!

"Eng nge thleng" hlauthawng lutukin ka ti a. Ni lo, hlauthawng mai ni lo in, Kasa, a thih rinna in ka khat tawh. Mahse, dik lo turah ka dah lui a, ka ngaihtuahna atthlak zet chu, paih bo hmak hram ka duh takzet a ni.

"Khaw nge Kasa a awm?" engmah a sawi duh loh vangin, mittui tling khat vekin ka ti leh tuar a. "Khawnge a awm ka tih chu?" Ka aw neih zawng zawngin ka au tawh. Min chhan a tum lo cheu a nih chuan, keiman ka zawng tho ang.

"Bawihte, a pawi lutuk. Kal kawngah a rawn chesual a, a hmunah a boral nghal an ti" ka nu in a rawn ti a. Ka ṭhu chhuak zawk! Eng tin nge a nih theih?

"Ka awihlo! Nu dawt min hrilh a ni tiraw?" dawt a nih beisei zetin ka ti leh sap a.

"Nau, Kasa a rawn thleng a nia" ka u in mit hnawm chapin a rawn ti a. Ka nghilh dup in ka hria. Ka bîng mup mup a, Ka hrawk a hnawhtu awm vangin ka aw pawh a chhuak thei lo. A thi! Ka awih lo ni lo, kei aiin a thi hmasa thei lo hrim hrim. Ka kut vuanin ka ruang chungah a ni chuan, thu a sawi ang a, a nun chu thlakin Pathianah thlamuanna a la nei ang a, a mah ang a sual sang tam takte a la chhan chhuak dawn asin. Zantin he thu hi ka suangtuah a, a ni talin dam hauh se a nun hian Pathian hre reng se tih hi ka la duh fan asin. Dawt a ni ka rilru in ka la ti fan a. Mahse, mipui rawn pung khawmah chuan, dawt a nih loh zia a chiang em em si. A hun lo, ni lo a inthlak chho a, a danglam chho hret hret tawh asin. Engtin nge he tiang tehthut hi a nih theih? Zingah pawh ka bulah awmin ka na tuar chu min khawngaih takin min la en a, chuan, tlaiah nitla tur kan thlir liam tur thu pawh a sawi alawm!

Kasa, ruang awmna engtiklai in nge ka va thlen ka hre lo. Kan chhuat lai a, nun na nei tawh lo a mu dâng bai mai chu ding chungin ka en a. A hliam a chal kak duaite, a mit bul vun pilh vek te, a kut kawi sawi zet a lo awm leh a nghawng ruh tliak tih hriat ngawih ngawih a, a sir lam hawi tlatte ka hmuh chuan, ka tliak hnawp a. Ṭhu sawp niai in, ka va pan leh hram. Ṭap thawm a ring in uitu a ngah hle a ni ang, tu pawh kan inchhung rawn lut apiang mai chuan a ruang bulah ṭah hla an rawn chham a.

A hliam ka en a, a chal a mi ringawt pawh a nat dawn tehlul nen eng tin nge hetiang zat a tam tuarin a awm ang? Na a tiin hreawm a va ti dawn em!

"Hey, harh teh ni tla tur min thlir liampui i tum kha. I hre tawh lo em ni? En teh ni a tla ṭep. Kan tlai dawn a nia, mut hun a la nih loh hi" a biang tawn tawnah dawmin ka sawi dat dat a. Mi â tak tak ka ni ka mittui a tla lo a, ka la nui reng. Eng tin nge heti mai hian min kalsan ka phal ang.

Tumah an ṭawng chhuak lo a, kan bul velah pawh midang an awm ve em ka hre lo. Keimah leh he ka mipa hmangaih ngawih ngawih chauh hi kan awm a, ka aw ri chhuak ṭawk ṭawk thawm bak chu, thawm dang reng a ri lo.

"Nga ti nge kha tah khan i va kal kher a? Kal lo pawh ni la ka thi dawn chuang lo asin. Eng vangin nge ka zawhna chhanna min pek duh miah loh a? I mu thei lo ka hmel pawh ṭha i tih em kha. I en nin theihloh thu i sawi a ni lawm ni? Min en leh rawh" ka thu sawi tir lam pang chu zawi viau mahse, a tawplam chu ka au vak vak a. Min chhan ka rin vang a ni. Mahse, min chhang lo min chhang miah lo!

Kan bul velah ṭap thawm a rawn ri nghal chuah chuah a, a thi tih ka la ring phal chuang lo. A lungphu awmna zawnah kut nghatin, a lungphu chu ka la zawng fan a. Mahse, phu tur a awm tawh lo, a taksa hit thler bak min chhawntu reng a awm tawh hek lo.

"Min chhang rawh Zorammuan! Ka zawhna pakhatmah chhan loh i neih ngai loh kha. Ngati nge tun a tak a, min chhan duh miah loh a. Chuan nga ti nge he i lungphu hi a phut tawh loh. Ka tan a phu reng dawn tiin i sawi kha. Ka tan phut tir leh rawh" tiin ka au vak a, ka beng a, ka sawi a, ka chum a, a chalah ka chal ka ngat a, mahse, thu mal pakhat tal chhakchhuah chu sawi loh, chet pawh a che ve lo.

"Nu a sual tiraw? Min chhang duh lo a titau mai mai a ni tiraw nakinah a rawn lungawi mai ang ka nghak ang. Ka duh lo nu min kal sawn pui suh" ka nu ten ka kut leh lam ve ve a, vuanin min pawh hran an tum a. Ka ṭang tlat mahse, ka chak tawk lo a ni mahna min pawt hrang a ka hmangaih chu a hmel ṭha em em mai kha puan var thianghlim takin an khuh bo daih!

"Ka duh lo nu ti suh u" ka tal vak vak a, min thlah rualin ka theih ang a chakin Kasa awmna lam ka pan leh.

Na zetin an khuhna puan var chu ka pawt hlip sawk a. "Kaisar harh rawh i luhlul in i thu i duh em kha! Thihna pawh i luhlulna vangin i hneh ang tho rawh" ka aw rawl neih zawng zawngin ka au chiam a, ka mittui chu a rawn baw zawih. Aw rawl chhuah meuhin ka ṭap thei ta. Mittui nen thlan fim nen ka na a rawn chhuah leh vangin ka aw pawh a ri chhuak thei leh ta lo. Keimah vang a ni! Ka damdawi kha lo nghakhlel lo ila, lo tuar chhel hret ila, a kal a ngai lo ang a a thi lo mai tur. Engkim hi ka thiamloh vek a ni.

Ka na a chhuak chu, ka chetpui thei tawh lo a, Kasa ruang chu bawhin ka mittui a tla zung zung reng ringawt. Sawi chhuah duh tam tak ka la nei a, mahse, tuna ka na nen hi chuan, rei tak ka thaw reng thei kher lo ang.

Thawk chu ka harsat tial tial ta reng bawk. Ka chakna chu ka sawm khawm duh mahse, sawm khawm tur chhete mah ka nei tawh lo. Ka nui lui a, ka hmangaih em em Kasa bulah a rualin ka kal ve dawn tih ka hre thei a ni. Min lo nghak ang em le?

Chutih hunah chuan ngaihdamte ka dil ang a. Min nghak hram se ka ti.

~~~~~~~~~×××××××××~~~~~~~~~~~

Mipakhat a hmangaih em em hmeichhe nu leh no tak vang a, nun danglam vek tawh chu Bike accident in a boral ta. Mi tamtak in a nun a inthlak chho mek tih pawh an hmu thei a, a mah pawh a thar sur tawh mahse, a hun a thleng ta a ni ang e. Mipui chuan ui em em a, an sûn laiin, an zing a nunnem leh zaidam tak hmeichhe hmelṭha tak pawh cancer vangin an chân dawn tih reng an hre si lo.

Rubyi nu chuan, a fanu awmdan chu hrethiamin, rang takin a pan hnai vat a. A lo na tawh hle tih a hriat chuan, rang takin midang a ko khawm a. Rubyi hmeichhe khawngaihthlak em em mai a nunna beiseibo mai ni mahse, a hmangaih em em nun thlak danglam sak duh a, Pathian fa a nih zia hriat tir tumtu chu khumah mutin damdawiin an chiû leh a. A chhawk theih loh vangin vawithum lai an chiû nawn leh. Mahse, awmzia a awm tawh lo. Rubyi taksa chau tawh tak chu, rawn meng chhuak diar diarin, a nu a kut vuan tlat chung a ṭap hawm hawm chu thei leh thei loin a nuih lui a. A mitmengin chelh tawh lo turin a ngen bawk.

Mahse, "ni lo ka fanu a la hma em mai ka la phal lo che. Ka la enkawl ning lo che ai i kal thei lo ang" tiin a nu chuan, a rawn ṭah khum nasa sauh.

Hmeichhe no tak tuar tur chuan, a na hi a nasa tawh mah mah a ni.

"Ka nu, kal tir tawh mai rawh. A na tawk tawh viau a lawm" a phirpuiin a rawn tih chuan, a nu chuan a la phal chuang lo. Mahse, a ngaihtuah chiang a, a na a chhuah apiang a a nat dan tur hrethiam pha ve lo a nu chuan, ui em emin a buk khum nghauh a.

Chutah, Rubyi chuan thawk harsa a ti tawh takzet. A awm chu a sep dawrh dawrh a, a thaw hrawih hrawih bawk. Mahse, a la nui thei nia. Mi danglam tak chu a ni. A hun tawp dawn tak takah pawh a hmangaihte chu a la nuih thei hram.

Lei hreawm ram a ta zalenna tur hmun pan a kal liam chu hmangaihna mittui nen a thlah ve ta.

Chu inchhung nui thawm reh ngailohna in chu, lungchhe vankai te inbun ruahna in a ta mai emaw tih tur khawpin, ṭap thawm chu a ring a. Mipahnih ngawt a ruala sun ta te chhungkua chu eng tiang takin nge an rilru a nat ang kan hriatthiam pui phak ve lo. Khawtlangin nula fel tak a an hriat leh, pitar putar naupang nutling patling chen a, an ngainat rawn an hlim pui em em ṭhin chuan, ui tu sang tam tak zingah a nu ṭap lai hmel mawlh mai chu la hmu ve se chuan, thinlung kehsawm tawh a nu a hmangaih em em mai chu a lainat ve ngawt ang.

Kumhlui nun hlui thlah liam nan leh kumthar duhawm hmuahnan a ruang pahnih ngawt han phum dawn mai chu a man a to mah mah a ni. I ngaihtuah chhin ngai em? I mi hmangaih takin he ni ah hian kalsan dawn ta che se i tuar thiam ang em? Beiseina nen hmalam hun i thlir laiin beidawnna in thla a zar ang a, dam tlang tak a awm a kum thar hun pui hman ho loh pawh hreawm tih lai a, thihna meuhin a a ṭhen tak chhungkua hi a harsa dawn asin.

Ui tu an tam ang bawkin uina chhete mah nei lo tu pawh an awm lo thei lo. Kasa u Valpuia chuan a nau thi chu engah mah a ngai lo. A ṭah chhan ber chu Rubyi a ni a ni hian a lo duh ve em em na kha hnar sak mahse, a duhna a reh lo miau a ni. Kasa nu chuan mahni inthiam lohna nen a fapa ruang chu a ṭah hawm hawm a. Khatiang rilru chhia a fapa lakah pu tur a nih loh laiin sex a mamawhna chuan a fapa chungah rawng takin a chet tir a.

A ruang chungah inchhirin ngaihdam dil eng ang mahse a sawt tawh si lo. A dam chhung a awh tawh ngei dawn si a. A fapa erawh chuan a hre chang tawh awm si lo.

Tunah chuan, mipahnih inkar a hmangaihna piang chhuak hnukchah thleng a hmangaihna chhawm nungtu pahnih te chuan, pialral ah, he khawvel nunrawng tak a an hlen theih loh chu an hlen ve thei ang em? Chutah chuan, chîmbuaitu natna leh hreawmna mangan leh lusûn awm tawh loin, karah hmelma hrang tawh hek loin, an inhmangaihna par chu, Pathian pawh hian, an tlan ve a phal sak tawh ngei ang.

Leiah hian natna hlauhawm tak tak leh enkawl hman loh khawp a rangin thihna chuan a ṭhen a. Mahse, an sawi pial ral hmunte a awm ve ngai a nih chuan, chutah chuan, hmangaihtu lal chuan, an inhmangaihna nasat zia hriatpuiin hlimna kawl chu a en tir ve ngei tawh ngei ang.

Thi tura kan pianna lei ah hian, thihna in min ṭhenin, ṭah leh haṭhialna ten thlazar mahse, nung turin lei nunrawng kan chhuahsan ang a. Thihna awm tawh ngailohna ramah hmangaihte nen kan la leng za dawn si a.

An khawvel nun chu, beiseibo mai mah nise, an thlarau nun erawh beiseina in a khat tlat turah ngai ang.

An nunkhua sei lo mahse, an rauthlâ tal in 'D' reng rawh se.

Kum thar ni chawhnu lam chuan, Rubyi Lalhlumawii leh Zorammuana (Kaisara)te ruang chu kuangkhatah mut tirin, mipahnih lenna tur tawk lek a an laih khurah chuan, an nghat thla riai riai a. Bawihpuia (Rubyi phirpui) chuan, a nu kuah chungin, a kutah rose sen duk la par chhuak chiah lo hum vang chungin a mittui a khap per sak sak a. Mipa mah nise, a nau a pawh em em leh thuruk engkim a hrilh ngamna khawp a fel a nau in a kalsan chu tuar har a ti ve takzet. Chu mai ni loin a nau in a hmangaih em em a ni pawhin a ngainat em em mai chuan a nau a zui ve a nia tuar har tak tur chu a ni alawm.

"Awii, Ruby ka ṭhian ka hmangaih thlamuang takin i hmangaih nen chuan, pialralah min lo nghak ang che u aw. Dam takin le. A pawi emai" ṭap hawm hawmin kimbawihi chuan, a bul a a nu lo insut ve feih feih chu a ngheng rawk a. A harsa dawn em asin, an tette aṭanga inkawm tawh eng pawh ti dun a sawi dun ṭhin an ni a, in hmu tawh ngai lo tur a in ṭhen zawng a va na dawn em!

"Ka nau dam takin le. Min lo ngaihtuah suh aw. Ka theih tawp chhuahin ka lo enkawl ang. Mangṭha nawn fo le" Bawihpuia pawhin pangpar thlak pahin a nau a mangṭha nawn leh a. "Kasa, ka nau kha min lo duat sak ang che aw. He khawvela in tihpuitlin ve theih loh thilte i lo tihpuitlin pui vek dawn nia. Nang pawh mangṭha, mangṭha nawn fo le" tih zawm leh in a nu chau tak chu a pawm kang lawp a. A naute pahnih pawh an ûnaunu fel tak ui chuan, an ṭap chiam chiam a. Inhnem leh chuang tur an awm lo.

Thlanmual chu an kal san ta. Kumthar lawm nan mite chuan, chhungkaw kimin ruai an ṭheh a, an hmangaihte nen he ni hi an lawm a. An ni chhungkua erawh chuan, an hmangaihte thlahliamni leh lungngaihna nen kumthar chu an lawm a, hetiang hi an nih dan tur reng erawh a ni lo. Lungngaihna in thlazar ṭhin mahse, an tan hlimna kawng in hawn hun a la awm ve ang a.

Khuarei hian an lusûnna chu a hnem ve ang a, he lungngaih hun hi kum hlui a la chang bawk ang.

Chutih hunah chuan, hlim leh lawmin christmas leh kum thar chu an la hmuak ve ngei ang.


A TAWP TA

(Pathian khawngaihna zarah kan story kal lai HOPELESS chu a hmawr kan lo bawk leh ta reng mai. Pathian chu fakin awm rawh se! Ka thawnthu min hlut sak a min lo chhiar sak tute. Advertisement min lo click sak thlap thlap thin tute inchungah thinlung leh tih takzetin ka lawm nawn mawlh mawlh e. He tia min lo click sakna vang hian kei tlinglo tlak lo leh phulo ber mai hian lawmthu sawi loh chu tih theih ka nei lo
Min lo click sak zel turin ka ngen che u a ni, min tlawmngaih sak hian kei nin kan top-up man tur kan lo hlawh phak ve thin a, kan lawm takzet a ni)

*** KAN WEBSITE A FAKNA LAM THIL MILEM LANG THIN I LO HMEH ZEUH HIAN KAN WRITER TE HLAWH KAN TUMSAK ZEL TIH KAN HRE THEUH DAWN NIA, KAN LAWM E***
Ads i la click ve lo a ni maw? A hnuaia ads milem khu lo click ve rawh le