FORGIVING LIES BY Puii Sailo (Completed)

Episode nei ho a hlawm a dahkhawmna
Ngaia
Site Admin
Posts: 25813
Joined: April 30th, 2016, 4:07 pm

Re: FORGIVING LIES BY Puii Sailo (Completed)

Unread post by Ngaia » February 28th, 2021, 12:44 pm

CHAPTER – 37

“I sawi dik, vawiin hi a nuamin engkim hi a dik thlap a ni.” Nuih hak hak pah chuan ka awmah a nem a. Nuih let sak pahin a hnarah chuan ka fawh sak zeuh a.

“A hma ang chiah kha a ni leh ta maiin ka hria,” tih pah chuan a hmuiah ka fawp leh a, ka fawp ning thei lo a ni. A sira mut ve pah chuan ka lam hawi turin ka pawt her a.

“Ka hming chu Logan Ryan a ni a, mahse Kash tiin min ko thin,” ka tih chuan a nui leh hak a. Bul tan that leh ka duh vanga sawi ka ni.

“Tampa Bay, Florida-a piang leh sei lian ka ni a. Law enforcement hnuaiah kum li leh a chanve ka thawk tawh. Kum 26 ka tling tep tawh a, unau pianpui ka nei lo. Pancake leh sour patch kids hlawh tur chuan eng thil pawh ka ti duh hial ang,” ka tih chuan a nui var var a, a kutzungpuiin ka khabe a tuai pah niap niap bawk a.

“Chuan, chan che hi ka duh tawh lo a, ka ta i nih reng theihna tur anih phawt chuan eng thil pawh ka ti mai ang. Ka nunna thleng pawhin ka hlan ang che.”

“Ka hming chu Rachel Lynn Masters a ni a, kum 21 ka ni tawh. Chuan, Yorba Linda, California-a piang ka ni a…West Texas ti pawhin an sawi thin.”

Khap sak sak pah chuan min rawn hnaih talh talh a, min en leh vang vang hnu chuan hahdam huai niawm tak chuan a thaw chhuak ham ham a. “Ka nun hi engtin nge ka hman zel dawn ka hre lo. Mahse eng thil pawh ti dawn ila i tello a tih ka duh lo a, i bulah hian ka him tih chiang takin ka hre thung.”

Min rawn hnaih lehin ka hmuiah chuan dimtein min fawp a. “Ka ngaidam tawh che, mahse dawt min hrilh tawh miah suh.”

“Ka hrilh tawh lo ang che, ka tiam che.”

Inla hrangin a kiu-a inbeng kang chung chuan min en leh a. “Ka ti tak tak a nia, Kash. Ka himna tur pawh nise dawt min hrilh thei tawh lo ang. Ka hmelchhia em, ka thauin ka mawng hi a lian lutuk em ka tih hunah pawh, ka lawmna tur leh hlimna tur anih rin vangin dawt min hrilh tawh miah suh.”

“Nula, mawng chu i nei mahse, tam a awm lo tih tur a ni a. I entirna siam kha thil awm ang lo lutuk anih kha.”

Rachel chu a ner nang a, tilui tih hriat zet chuan min delh bet nghal vat bawk. Kei lah chuan chu chu remchangah lain ka lo kuah bet vat a, duhthawh zet chuan ka fawp lehnghal. Tunah hian ka hmangaih leh ka ngaih em em, ka chan mai dawn emaw ka tih tawh kha ka kuahin ka fawp leh thei ta mai a nia. Ka mumang anih ka hlau ber. Ani nen hi chuan eng thil pawh ti ila a nuam em em vek thin. Ka ngai a, ka nunna hian a mamawh a ni. Hetianga ka bula a awm leh thei mai hi mak ka tiin awih harsa ka ti zawk hial. Mahse tih hlauh ka duh lo a, ka nawr lutuk chuan min kalsan leh daih ka hlau a ni.

Inla hrangin a kawnga ka vawnna pawh chu ka lasawn a, thil awlsam tak a ni hauh lo thung. Mahse beisei loh takin amah zawk chuan hma a la hmasa ve tlat. Ka kut chu lain a kawngah a nghat a, min fawh leh pah chuan, “Ka mamawh che, tunah hian ka mamawh che. Chuvang chuan insum duh suh,” a ti sap a.

Dawt sawi a ngai tawh lo, dawt hrilh leh tumna lah ka nei tawh hek lo. Inbeng kangin a kawr chu ka pawt phelh a, a kekawr kilhna ka phelh lai chuan ka kawr a lo phelh ve bawk a. A taksa mawi leh a vun mam hante chu ka thlek kual dan dan a. Ka tan chuan ani tluka duhawm hi an awm leh tawh lo ang. A taksa a ser awmte chu ka hmuh hmaih hauh lo, ka tan chuan a mawina leh duhawmna a tihnep phah chuang hauh lo nain, ka thinrimna erawh a hma zawng aiin a nasa tih ka hai hauh lo. A serte chu zut kual sak riai riai pah chuan, “Rach, min ngaidam rawh.”

“Sawi tawh suh, i thiam loh a ni hleinem.”
A kut chu rawn lek kangin ka biang tawn tawnah chuan a vuan a, “I tha em?” a ti sap a.

Ka lu chu ka thing ta ringawt a, a kut phah chu fawpin a bana serte chu ka fawksak zel a. A ban lehlam chu lain chutiang bawk chuan ka ti leh a. “Rachel, i nalh lutuk. Khawvel hmeichhiaah hian nang aia nalh an awm lo,” tiin ka kun hniam a, a awm veilama ser chu ka fawp leh a.

“Chuan…..ka hmangaih che,” A ser dangte chu ka fawp kual ta zel a. “I taksaa ser awm zawng zawngte hi hmangaihnain ka tuam dam vek ang. Ka tiam a che.”

Zankhua mai chuan a taksa nalh tak hmang chuan hmangaihna kan chen a, kan hlim dun lutuk chu khawvel hi a tawp maite ka hlau hial a lawm le.

RACHEL:

Khum atang chuan dimtein ka tho a, dingdihlip chunga kal kualin ka thawmhnaw tla darh nuai chu ka chhar khawm a. Ka thawmhnaw chu ha loin chhuata a kawr tla chu ka ha ta zawk a. Tui taka a mu chu ka thlir vang vanga, a bianga ka fawk sak zauh hnu chuan living room lamah ka kalsan ta a.
Mason room-a ka purse dah chu lain ka phone ka lachuak a. Candice chuan message leh miss call a lo hnutchhiah tam hman kher mai. Message-a chhang ta lo chuan ka call zawk a.

“Mnn…..hello?”

Chokaa sana intar chu ka melh zauh a, California-ah chuan zing dar 8 a ri tep tawh ang.

“Ka rawn kaih thawh che vangin tihpalh, Candice.” Ka aw a hriat takah chuan, “Nilo, aih, aih, a pawilo. Min lo call hun ka nghak reng asin. Engkim hriat vek ka duh. Ngawi teh, dar engzat nge ri tawh?” a rawn ti nghal zung zung a. Dar zat a chhut tih hriat tak chuan a phun niah niah a.

“Dar 11 a ri tep tawh a ni maw? Anih chuan engkim a kal tluang tihna tiraw?”

Zah vanga ka biang sa deuh hat hat chu ka hre thei a. Nilo, phurna leh hlimna vang zawk aniang.

“Aw, chutiang pawh chuan i ngai thei ang.”

“Engkim a tha dawn tih ka hria a lawm!” phur fe chuan a ti leh sar sar a.

“Chuan in inngaizawng leh tawh tiraw? A bula insawn i duh tih kha i hrilh ta em?”

“Aih, aih, ka la sawi chiah lo. Mahse vawiin hian ka sawi ang. Nizana thil thlengte kha ngaihtuah chuan min hnial ka ring lo. Engkim a tha vek ang.”

Chokaah chuan lutin cabinet-te chu ka hawng kual a. Kan bel chu la chhuakin eitur siam ka tum a. Bel chu ka khawng ri ta rawl mai. “Hrep tak hian!” ka ti hluk a.

“Eng thil nge i tih a?” Candice chuan a rawn ti sar sar a. Thawm a dim ve ngai niawm tak chuan a tawng zawi ve hle ringawt.

“Pancake siam ka tum a, Kash chu a la mu…."

“Awii. A van chhe dawr dawr tak. Amah zawk khan a siam sak tur che a nia sin.”

Ka thil tih lai chawl meuh chuan nizan thil thlengte kha ka ngaihtuah a. “Hepa hi pancake siam sak a phu a lawm,” ka tih lai chuan ka nui var var a. Ka hlimzia chu ka awah pawh a lang chhuak hial anih ka ring.

“Min hrilh ve rawh, mawh….mawh….Engkim hriat ve vek ka duh a nia!”

“Ka phu tak tak maw?” ka hnunglama aw tham pa deuh tak ka hriat rual chuan ka nui leh sak a. A lam hawi tur chuan ka inher a, boxer chauh a ha. Amah anga mipa pian nalh leh sexy hi an pian leh theih pawh ka ring lo.

“Candice……………” ka tih chuan hrethiam takin, “Kal rawh, kalrawh! Nakinah min ren be leh ngei ngei ang che. Report kimchang ka hre duh ka tih kha. Ka hmangaih che,” a ti a.

“Keipawhin ka hmangaih che.” Ka phone ka hmeh tawp hma chuan Kash chuan counter-ah min nawr betin min fawp nghal a.

“Morning,” a hmui la si reng chuan chuan ka ti sap a. Min pawmkangin counter-ah chuan min thuttir a.

“Ka harh lai khan ka bulah i lo awm tawh lo a,” tih pahin ka mal chu a zut riak riak a.

“I breakfast tur siamsak che ka duh a lawm.”

“Chu chu ka hmu a lawm…Mu rawh Rachel,” a tih chuan mak tih vangin ka meng bial kawk a. Mahse hnial lo chuan counter-ah chuan zawitein ka mu thla a, ka ke erawh chu ka hlang thla thung. Ka bawp a nek kau lai chuan phurna avangin ka thin a phu dawt dawt a. Min khawihnate pawh chu ka taksa chuan a dawngsawng tha ngang mai.

“Kash!” ka rum chhuak hawk a. Rum hawk pah chuan ka chalah chuan a chalin a rawn nawr a, kan khur der der ni maiin ka hria.
Kan thaw a pangngai hma loh chuan chutiang chuan kan awm ta reng a. Min fawh leh vang vang hnu chuan, “Breakfast tui tak a ni, bawihi,” a ti leh sup a.

Ka nui chhuak hawk a, mahse nizan leh tukina kan thil tih vang chuan ka taksa na pawh ka hre nghal zawk a, ka sawi mai tur hre lo leh zahzel zawng chuan, “Phakarpa,” ka tih tak ringawt kha.

“Lo va insil rawh, counter hi ka lo tifai ang,” a tih chuan hnial buai loin bathroom lam chu ka pan ve nghal a.

Chokaa ka luh leh lai chuan ka pancake tur chawhkawi sa chu a lo kang mek a. Min hmuh rual chuan a lo nui var var a, min kuah pah chuan, “Thil dang sawi dun tur kan la nei,” a ti a. Inthunun tum viau mah ila ka mak tihmel leh hlauhthawng deuh hmel chu a hai ka ring bik lo.

“A ni maw?” ka ti chhuak thei hram a.

“Tunah chuan i nu leh pate i sunna bakah i thil tawnte pawh khan a bawhbet tawh lo che a, hmalam pan turin i inpeih tawh tih ka hria. Chuan, hetianga kan inkar buaina pawh kan chinfel takah chuan, California-ah hian awm ve dawn ta la i duh a ngem?” Chhang lo chuan ka en reng ringawt a.

“Hetah hian, ka bulah i awm ve duh a ngem?”
Ka thu hriat chuan min tihlim lutuk a, chhan mai ngaihna pawh ka hre lo.

“Ka…..ih….ka….chu chu keipawhin ka lo ngaihtuah ve tawh a.”

“A tha e,” a nui zui hak a. “Anih chuan kan pahniha kan awmna tur in zawn a ngai dawn anih chu. Mahse tun ṭum hi chu thil engemaw tihdanglam ka duh dawn a nia. Rach, a hma zawng ai khan ka hmangaih zawk che tih ka hre tawh a, mahse i inpeih takzet tih ka hriat hma loh chuan eng thilah mah ka nawr lui tawh lo ang che. A hma pawh khan nupui atan neih che ka tum tak tak a, chu chu eng thil mahin a tidanglam tawh lo ang. Ka ta ni turin leh ka nupui ni turin ka la duh reng che.”

“Awle, a tha a lawm,” tih pah chuan ka nui var var a.

“Ka nu leh pate min hmuhpui turin ka duh che a, vawiinah emaw naktukah pawh. I inpeih hun hunah a ni mai. Mahse inhmu vat ula ka ti, anni pawhin an ngaina ngawt ang che.”

A nu leh pate meuh hmu tura min sawm takah chuan ka thin chu a phu nghal dawt dawt a. Ka phurna leh zamna a inbuk tawk viau ang. Ka lu chu ka bu ve ta nghat a.

“Tun atanga chatuan thlengin, kan dam dun chhung zawng chuan zingkarah thawmhnaw dang inbel loin, ka kawr chauh hi ha thin ang che,” a tih leh chuan ka nui chhuak hawk hawk a. Ka kawngah nghet takin a kuah ve nghal chat bawk a.

“Chuan thil dang leh pakhat, indanna damdawi i ei anih ka ring deuh ringawt a. Nizan leh tukinah khan condom kan hmang miah lo a, mahse ka zawng chhang dawn tlat. Kan pahnih kara condom han hman ṭhat leh vel chu ka chak tawh miah lo a nia.”

“Mahse eng damdawi mah ka ei hleinem.”
Thlek deuh bak pah chuan amah en turin min kuai dak a. “Anih chuan tinge condom chu ka hman bik kher anga?” a tih chuan dar ka lo chhin khum ak a.

“Keini pahnih hi tisa tak pawhin kan inhip tawn em em a, kan awmdun tawh chuan kan insum thei ngai bawk si lo. Chuan, Candice hi mipa a mutpui dawn reng rengin condom hmang turin ka hrilh ziah thin. Achhan chu Candice tereuhtei a pian mai loh nana ti ka ni a, mahse keimah ka inhrilhnate pawh a ni tho ang chu.”

Thutak hmel zet chuan min melh kur a, “Rachel, min nei duh a ngem?” a ti a.

“Aw.” Inngaihtuah buai pawh ngailo chuan ka chhang nghal hmiah a.

“Fa min hrinsak duh a ngem?”

“Aw, mahse tunah nilo.”

“Anih chuan indanna ei dawn la I hreh em?”

“Teuh lo mai.” Ka lo ti sap a.

A mitmu paw ram mai chu tisa chakna avang chuan a de leh sar tawh a. A taksa lum ham hamte chuan min ur thei hialin ka hria.

“Khumah, tunah. Tun atang chuan condom kan hmang tawh ngailo ang,” a tih chuan, “Pancake hi!” ka lo ti chul a. Gas chu off-in butter chu fridge-ah a dah leh hmiah mai. Bedroom lam chu kawkin a nui sang a, “Kha kha chu nakinah kan siam dawn nia, kal rawh le,” a ti a.

“Mahse…..”

“Nula, damdawi ei I hreh lo tih ka hre chhuak tawh a, tuna tang chuan ka dim tawh dawn miah lo che a nia. Ka sawi nawn tawh lo ang, pindanah lut nghal rawh.” Nuih insum tih hriat zet chuan a rawn kun hniam a.

“Khumah, Rachel. Tunah,” a ti leh a. A thupek chu lawm taka zawmin khum lam chu ka pan ve ta a. Keipawh chu ka danglam teh chiam bik lo, ka hmul thite chu a ding sung sung a. Step hnihna ka rap hman chauh tihah chuan a kawr ka hakin a khuh phak loh ka mawng lang chu a rawn beng thek a.

“Hey!” tih ṭhawt pah chuan ka mawng chu ka hup a, a lam hawiin ka inher nghal.

“A na lutuk, Mawla!” A hmaia ben tum chuan ka phar hluai a, mahse ka kut chu lo manin a fawp ta thung a. A la nui vur vur zui.

“Dawt sawi suh, Sour Patch. Nuam I tih hle kha.” Ka kawngah chuan kuahin min pawm kang a, keipawh chuan a kawngah ka lo kherh ve vat a. Pindan lamah chuan min pawm lut a.

“Pawm kher I phut vang hian I mawngah ka ben leh a ngai ang,” a tih chuan hnial ka tum buai ta bik lo, a fiamthu tih ka hre ve tlat. Hetianga thunei awm taka a chet hian ngei duh viau thin mah ila, ka duhzawng tak a ni tlat bawk si. A thil tih apiang hi ka duhzawng a ni nge, a titu ka hmangaih vang hian min tihlim zel pawh ka hrethiam tawh lo.

Kash hi ka hmangaih a, a thil tih apiang pawmpui turin ka thinlung hi a inhawng tlat a ni.



Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » February 28th, 2021, 12:44 pm

CHAPTER - 38

THLA 4 HNUAH CHUAN :

KASH :

“I ṭha em?” elevator kan pan lai chuan Mason chu ka zawt a. Dar chhin akin elevator button chu a hmet nghal a.

“Kawng dang zawh chu thil awlsam tak a ni dawn lo tih i hrechiang a lawm. A unaupa hniakhnung a zui ve dawn anih hi,” a ti mai a.

Nizan, zan rei tawh lamah khan homicide detective pakhat hnen atangin call kan dawng a, gang ho chetna tih hriat em em tualthahna a awm vang a ni. He thil hi gang thar ti mai ang, chung hi sulhnu chu a ni tih hai rual a ni lo a. Mitthi pahnih zinga pakhat zawk chu kan hriat chian em em, kum 23 mi lek, Mason pawhin vawi tamtak kawng dik kawhhmuh tuma a lo ṭanpui tawh thin kha a ni.

Lil Tay tiin kan ko mai thin a, Mason chu pangngai takin lan a tum tih ka hai lo, case dangte ang thoin a hna anih vang chauha bawhzui tum anga lan a tum ruh hle. Mahse a tan hian a awlsam dawn hauh lo. Tih sak theih ka nei lo tih ka hriat vang chuan a darah ka ben dak thak thak a, rilru fim tak a put theih nan hun pek ka duh a ni.

Ka phone chu phawrhin Rachel message ka hmuh rual chuan ka nui sak a.

Rachel : ‘I hria em……whipped cream hmanga indona hnuhma tihfai chu thil nuam tak a ni hauh lo. Lo haw vat i tum dawn nia, ka hmangaih che.’

: ‘Hna kan zo chiah e, kan lo haw vat ang, bawihi. Keipawhin ka hmangaih che.'

Rachel hi ka apartment-a a rawn kal hnu karkhat lekah khan Tampa Bay-ah a rawn pem lut ve a. Kei aia hlim hi an awm chuang bik lovang. Ka nu leh pate nen pawh an inngaina tawn hle a, kan chhungkaw mi ni tur pawhin harsatna a neih awm ka hre lo.
Mason nau hmeichhia nen pawh an inkawmngeih nghal thei mai a, an awm dun tawh chuan eng dang mah an ngaihtuah tawh ngai lo. An chhungkua pawh chuan fanu ang maiin an en a, keipawh hi an fapa ang thoin min en a ni.

Candice pawh tun thlaah hian a graduate ve tawh dawn a. Candice chawlh hunah keini pawh chawlh hmang turin California lamah karhnih chhung zin kan tum a ni. Tichuan Candice pawh kan bulah a rawn zin ve thung anga, chu chu kan ruahman dan a ni a. Rachel pawh a phur tawh kher mai. Diktak chuan Mason nula kawp thin kha a lo kir leh tawh dawn tlat a lawm.

Hna lam pawh kan tluang viau a, Mase leh keipawh kan ṭha, chuan kan nu leh pate pawh an dam ṭha a. Tunah chuan narcotics hnuaiah kan thawk tawh lo a, sawi lang chiah lo mah ila kan hlim dun viau a ni. Kha hna kha tuman an thlang ngai lo a, mahse drugs tawlh lut thinte han man meuh chu chawimawina sang tak dawng ang mai niin kan inhre thin.

Kan tan chuan gang ho nena inhmachhawn pawh thil pangngai a ni ta zel mai. Gang pawl hrang hrang hriat lah kan ngah tawh a, an member min hretute lah an tam tawh viau bawk. Chuvang chuan undercover anga thawh reng pawh thil theih a ni tawh hek lo. Kan hna leh thil tihah hian kan ṭha ve em em a, nuam kan ti viau bawk. Chu aia pawimawh ber mai chu, Rachel hian za-ah-za in min thlawp tlat a ni.

Rachel nen kan chen dun atanga thlakhat hnuah a vawihnihna atan ka nupui ni turin ka sawm leh a, tun ṭum chu a dang ta. Kan inkarah thuruk leh zep a awm tawh lo a, engkim chu a danglam a ni ber mai……a dik thlap tawh. Sawi tur awm leh ṭul apiangte chu kan sawi dun mai thin a, zep leh thuruk engmah a awm tawh loh bakah, dawt kan inhrilh tawh ngai lo.

Ka chhungte leh Mason chhungte pawhin Texas-a thil thlen dan kha an zawt thin a, mahse ka hmingchhiatna tur engmah a sawi chhuak duh bik lo. Hun kal tawh theihnghilh huamin leh siamṭha turin a lo kal a, a sawi chhuak leh tawh ngai lo. Thil thleng avanga a indemna hi a la reh hleithei lo a, mahse sawi chhuah ka tum apiangin min fawp a, sawi chhuah a phal ngai lo.

Tichuan hun a lian ve zel a, June thla a innei turin kan inbuatsaih ve ta. A ni tur kan ruat fel tuk atang khan Rachel leh ka nu chu a ṭul angte buaipuiin an phar nghal sek a ni deuh ber a. Hetiang taka a phur hi nuam ka ti a, ropui taka pasal a nei thei tur hian min tihlim a ni. Mahse hmeichhe pahnihte buaipui ber pawh hi ka hrethiam ve lutuk lo. Ṭullo ka tih thil tamtak an sawi thin tlat. Ka duh ber chu, dan anga ka taa siam a ni mai a, thlakhat leh a chanve hnuah chuan ka ta a ni tak tak tawh dawn a ni.

Elevator chu rawn inhawngin Mason nen chuan kan pen lut nghal a. Kawngkhar a inkhar dawn chiah tihah chuan kan hminga min rawn au tuar tuar ri ka hria. Mason chuan kawngkhar chu a lo dawmbet vat a.

“Ryan! Gates!” Sergeant Ramirex chu kan lam panin a rawn tlan dawr dawr a. Thaw hlawi hlawi chung chuan kawngkhar a chum dawt a. Kei lah chu dawhthei lo zetin ka lo rum chhuak nghut bawk a. Ka chauh bakah ka nupui hmel hmuh vat vat ka chak.

“A hmunah unit thum an awm tawh a, keipawh ka rawn kal ve nghal ang.”

Engatan nge Ramirez hian police uifing K-9 chu a mamawh? He ui hi Crush tiin kan ko mai thin a, a hmun a tih pawh chu khawi lai nge le?

“Enge…….?”

“Kal vat vat in duh tih ka hria, mahse he thilah hian theih tawp kan chhuah mek tih hria la ka duh,” Ramirez chuan mak tih hmel takin min thlek leh he haw a. Kei lah chuan hrethiam lo zet chuan ka lo en ve reng bawk a.

“Engtin nge hahdam deuh hian i awm theih zawk, a ṭhawng ve miah lo che em ni? Motor pawh nangman khalh loin Gates hi khalh tir la a ṭhat ka ring.” A la ti ta deuh deuh.

Mason chu inthing harh hmasaah ṭangin, “Engvang chuan nge motor chu ka khalh ngawt anga?” a ti a.

“Chuan, eng thil nge min ṭhawng tur awm?”

A ngaihna hre lo viau mah ila hetiang hi fiamthu thawhna chi a ni tlat lo. Ka thin chu a phu deuh zaih zaih tawh a, mahse rindan leh beisei tur pawh ka ngaihruat thiam lo.
Elevator din rual chuan Ramirez chuan lainat hmel pu lek lekin min thlek tawn leh zak zak a.

“In la hre miah lo em ni?”

“Eng thilah chuan maw?” ka aw ki pawh a ring ve ta deuh. Kei hi chiai tur zawka ngaih ka nih chuan…..ka nu leh pate chungah thil thleng a awm em ni…..ka nupui hual….Nilo.

“Eng thil nge thleng a?” ka ti leh ṭhat a. Ka hriat lohna chuan min tichiai zawk tlat tawh.

“Min hrethiam rawh u, in hre tawh emaw ka tih vang a nia. Helaia ka la hmu che u kha ka hrethiam lo a, in pahnih hi chuan in thlen daih tawh ka lo beisei asin.” Parking lot lam pana kal zel pawh chuan a phun deuh nang nang a.

“Mahse he thil hi ka hrilh che a ngai hi a pawi ka ti,” rawn inher pah chuan a ti leh a.

A hmel landan chu lo hmu fo tawh thin mah ila, keimah min en paha chutiang hmel a pu chu ka duhzawng a ni hauh lo thung. A nihna takah chuan ka thu hriat tur chu enge anih hre miah lo mah ila, ka hlimpui dawn lo tih ka hrechiang tawh tlat.

“Darkar khat liam taah khan dispatch call a lo kal a, i nupui hual a ni, Ryan. Thu tam a sawi hman lo a, i hming a sawi bakah, in inah tutu emaw an lut tih thleng chauh a sawi hman…..”

A sawi leh tur chu ka hre duh tawh lo. Ka truck awmna lam panin ka tlan nghal a, driver seata ka ṭhu lut tur chu Mason chuan min nemsawnin passenger seta a ṭhu tur chuan min au zui ṭhat a. Hnial turin hun ka nei tawh lo. Kan thut luh rual chuan kan thlawk chhuak zui a ni nghal mai.

“A ni thei lo, he thil hi a thleng thei lo. Mase, min hrilh rawh, hei hi mangchhia a ni tiraw? He thil hi a thleng thei lo!”

“Kash…”

“Hrep tak hian!” Ka ṭe chhuak nghek a, dashboard ka hnek zui pawp bawk.

“A ṭha em pawh ka hre hleinem, Mason! Ramirez khan engtin nge a sawi… Rachel chu a ṭha em? A ṭha……..Lalpa leh……Rach, bawihte. Khawngaih takin thi suh aw. I dam a ngai a nia.”

Ka phun mawlh mawlh a, awm ngaihna ka hre lo a ni ber mai. Ka che sek a, ka hmai ka tuai puat puat bawk a.

Mason chuan dispatch a lo call ve mek a, thil thlen dan kimchang a zawt anih hmel. Mahse a zawhna emaw, an rawn chhanna emaw pawh chu ka ngaihsak thei lo. A thih lohna turin ka tawngtai mawlh mawlh a, ka hlauthawng a ni. Kan in chu tichhe vek mah se pawi ka ti lo, ka siamtha leh mai ang. Siamthat theih loh khawpa an tichhia nih pawhin in dang ka zawng mai ang. Mahse Rachel hi a thi anih chuan a thlakna tur a awm dawn lo a, thi thei a ni hek lo.

Ramirez pawh chuan min rawn umpha ve mai bawk a, kan hmaah chuan tlanin siren chu a pawt ri nghal a. Kan himna tur a ngaihtuah vang a ni. Kan tlan chak thawkhat bawk a, mipuite kan warning a ngai.

Mason chuan ka banah rawn vuanin, ka lu chu a rawn chul thuak a. “Ka tihpalh. Ka bia che a, mahse min chhang mai silo a,” a ti sap a. Engtin mah ka chhang lo.

“A la dam leh dam loh an hre thei bik tlat lo.” Ka lo thaw kawk ringawt a, Mason chuan a chhunzawm leh a. “Mahse thisen a chhuak lo anih hmel. Beidawng lutuk lo phawt teh, Kash.”

“Enga?! Nilo…enge i sawi awmzia?”
Mason chuan thaw a lo la ve hak a, a sawi chu a sawi chak bik lo a ni ngei ang.

“Unit, a hmuna awm mekte….in ina awm mekte sawi dan chuan, in ina lut kha tupawh nise, Rachel a rubo anih chu.”

Mason ṭawng chu ka ngaithla zui tawh lo. Ka lungphu ri lo chu engmah hriat ka nei tawh lo. He thil hi a thleng thei lo ang, mangchhia a ni ngei tur a ni. Hetiang thil hi a vawihnihna atan a thleng nawn leh mek chu anih hi! Ka phone chu phawrhin, Rachel number chu ka dial a, thil engemaw hriatsual mai mai a ni tiin min rawn hrilh se ka duh. Voice maih zawng zawng nen chuan ka ngaithla a, ka dah a, ka call nawn leh thin.

A voice mail ka ngaithlak mek lai chuan kan apartment kawt kan thleng ve chiah a. Motor din chian hun pawh chu ka nghak hman lo, ka zuangthla nghal a. Crime scene tape an zamna chinah chuan thenawmte leh mipuite chu an lo pungkhawm nasa tawh mai a.

Kawngkhar chu tihchhiat a ni a, hetiang khawpa an tichhia anih chuan thawm an hre ngei tur a ni. Tute mah ka nupui hual ṭanpui tur chuan an rawn chhuak ngam lo em ni?

Zinglam dar 8 vela thil thleng anih hmel a, tute emaw tal chu an tho tawh ngei ngei ang.
Chulai hmuna police lo awmte chuan min biak tum viau mah se ka ngaithla thei lo. Kawngkhar an tihchhiat chauh chu ka en a, a kalhna chu a la pangngai thlap. Ka darah chuan tu emaw rawn vuantu an awm, mahse ka ngaihsak thei lo. Inchhungah chuan ka lut a, kan bedroom chu thlipui nuai hrep hnu niawm takin a lo darh nuai mai. Bathroom-ah chuan lut tlangin, closet-te chu ka en kual leh a. Closet bang hnunglam hi thil dang kan dah hnan a, thawmhnaw dangin a zar hliah leh vek vangin hre sa lo tan chuan thil danglam leh bihruk theihna tur chu a ni tih hriat mai theih pawh a ni lo.

Rachel hi a chang chuan helaiah hian a biru thin a, ka zawn hmuh hma loh chuan a tawm tlat thin. Khatianga kawngkhar hial pawh an tichhia anih si chuan thawm pawh an dim lo hle tihna a ni dawn a, Rachel hlau hi helaiah hian a lo biru reng maithei a. Nidang ang thoin ka zawn hmuh hun nghakin a lo tawm leh reng maithei asin.

Closet light ka on lai chuan ka thin a phu dep dep a, chhuata hamna niawm tak ka hmuh rual chuan officer pakhat chu auin thla la turin ka hrilh a. Ka hrilh anga a tih hnu chuan dimtein ka pen lut ta nghal a.

“Rach?” zawite chuan ka ti sap a. Khawngaih takin helaiah hian lo biru hram teh.

“Rach?” ka ti leh sap a. Thawk pawh ka thaw ngam tawh lo. Chulai hmuna biru tur chuan duh viau mah ila, diktak chuan ka beisei ngam lo a ni. Bang danna chu ka lasawn a. Chhuatah chuan ka ṭhingṭhi thla hnawk a, ka thinlung na chuan ka thaw hial a tichham dawn tak tak. Bang ngheng chuan ka thu a, hmai hupin ka tap chhuak ta ringawt a. Rachel a awm lo, a awm lo tak tak! Ka hmangaih, ka nupui hual an rubo a ni! Ka awm na vawng vawng dawm chung chuan ka mittui chu ka tuai puat puat a.

“Kash, he thil hi i hmuh a ngai,” Mason chu closet kawngkharah chuan a lo ding reng tawh a, engmah sawi lo chuan ka en reng a. Harh zawk niawm tak chuan ka tho hluai a, Mason nen chuan kan inzui chhuak ta.
Ka darah vuanin, “Rilru fim pu turin ka mamawh che. Bedroom bang saw va en teh, kan zawng hmu ang, kan zawng hmu ngei ngei ang, i hria em?”

Chhang loin bedroom-ah chuan ka tlan lut a, banga thil inziak ka hmuh rual chuan ka meng zau kawk a. Pindan chhung khawk rum rum khawp chuan ka au chhuak ta, ka thinrim a, ka thaw a pik bawk. Officer pahnihte chuan min rawn dawmbet vat a, khumah chuan min ṭhuttir a.

Bangah chuan spray paint hmanga thu inziak a lo awm a. ‘KAN THEIHNGHILH I RING EM NI?” tih a ni. A hnuaiah chuan symbol pakhat, Mason nen pawh undercover-a kan thawh lai khan kan banah tattoo-in kan chhut tir ang kha an lo ziak tel bawk a. Juarez gang pawl symbol a ni. Anni undercover narcotic hnuaia kan hna hnuhnung ber kha an ni a, Austin-a kan bihruk chhan kha an ni bawk.

“Engtin nge a thlen theih?” Mason chuan officer pakhat chu a zawt a, zawhna ṭha tak a ni. Juarez leh a naute kha an tualthah vangin jail-ah kan khung a, tunah pawh an la tâng reng. Engtin nge he thil hi an tih theih tih chu ka hriat duh ber a ni.

“Jail chhung atangin pawnlam mi an ruai nge, tâng chhuak hlimte nen inthurualin he hna hi an thawk zawk? A mal malin zawhna zawh vek ka duh. Lo buaipui ang che,” Mason bawk chuan a ti leh a. Ka ngaihtuahna vak darh lutuk chu sawi mai tur pawh ka hre lo.

Detective Byson phone ri chuan ka ngaihtuahna khawvel atang chuan min tiharh zawk a, ka hawi chhuak ve thei ta. A phone atang chuan, “Byson,” a ti nghut a. Tunge rawn betu leh an thil sawi chu hre lo mah ila, ka chanchin an sawi tih hai rual a nilo. Byson chuan min en tlat a lawm.

“Mm…Awle. Romero Juarez leh a attorney-te kha biak ka duh a, ruahmanna lo siam ang che. Tunah ka rawn kal nghal ang.” A phone chu dahin ka lam hawi tur chuan a rawn inher a.

“Rachel chu a la dam anih chu.”

“Lalpa ka lawm e,” tiin ka thaw chhuak hawk a. Ka thutna atang chuan thawh mai ka tum a, mahse officer pakhat chuan min lo dawmbet vat a.

“Minute 15 kal taah khan call a rawn lut a, Rachel chu an kawl ngei a, an thil phut pawh an rawn sawi nghal anih chu. Juarez gang hote hekna lut kha hnukdawk turin an phut a. Nihnih hnuah an rawn call leh anga, hmasawnna leh thuthar hriat an beisei dawn anih chu. An pawlte chu an zalen kim hma loh chuan nihnih danah an rawn call zel ang tih an sawi bawk. An thil phut angte kan tih putlin sak loh a, thlakhat chhunga an zalen hman lo anih chuan Rachel pawh a thi ang an ti bawk.”

“Kash, Kash, Kash….Inbengdai teh. Thianpa, inbengdai teh. Thluak fim i put a ngai a nia. Ka hrethiam lutuk che, mahse i inbengdaih phawt a ngai.”

Mason chu ka hmaah rawn ṭhu hniamin, ka darah chuan a vuan a. Amah en tur chuan min duh a ni. Ka thinrim tal thut khan a hmaa officer pahnih min dawmbettute kha ka hnek hrep tih chiah ka hria. Ka kal a ngai, ka hmangaih an kawl a lawm. Tute nge an nih ka hriat chhuah a ngai a, ka nupui hual ka chhanchhuah vat a ngai.

“He thil hi tawrh thiam a harin, i thinrim tih ka hria. Mahse damtakin kan hruai haw ngei ngei ang. Ka tiam che ka tih kha.”

Mason pawh chu a mangang tih hai rual a nilo, mahse tun dinhmunah hi chuan min khapdaitu anih a ngai tlat. Keipawh chu inbengdaiin ṭha tak chuan ka ṭhu veleh mai bawk a. Mason hrilh ang chuan officer pahnihte pawh chuan min dawmbet reng ta bik lo. Mahse khumah chuan min la ṭhuttir ta reng tho a.

“Ka hruai haw vat a ngai, Mason. Chu chu tuna ka tih ngei tur a ni.”

“Kan hruai haw ang.”

“A ṭul apiang chu ka ti mai ang.”

A hmelah chuan tumruhna ka hmu a, a ti mai mai hauh lo tih ka hrechiang bawk. Ka ṭhianpa, ka unau ang maia ka en hi ka hrechiang viau a ni.

Zawite, mahse fiah zet chuan, “Heng misual ho nuai chimit tur hian eng thil pawh ka ti ang,” a ti sap a.

A thusawi chu tuman an hre ve hauh lo ang. Kan pahniha kan hriat chuan a tawk. A kut nghet taka a hum chu vawn sakin, “Chutiang chuan kan ti ngei ang,” ka ti ve ta sap a.

Youtube ah khan kan channel RAP HAK kha lo like and subscribe hram ru awww.....

……….THE END……..
Tawp laklawh hle mai a……Min hau miah su aw...kan thiam loh a ni miah lo a nia......
Thiam lo taka kan thawnthu lehlin Forgiving Lies chu Pathian zarah kan zo leh thei ta a. Min chhiarsaktute, comment-tute, like-tute zawng zawng chungah thinlung takin lawmthu kan sawi mawlh mawlh e….

*** KAN WEBSITE A FAKNA LAM THIL MILEM LANG THIN I LO HMEH ZEUH HIAN KAN WRITER TE HLAWH KAN TUMSAK ZEL TIH KAN HRE THEUH DAWN NIA, KAN LAWM E***

Website story link ho awlsam zawka in zawn hmuh zung zung theih nan STORY FB group siam a ni a. Whatsapp group pawh siam a ni e. Complete tawh ho zawng zawng leh story kallai kan dah vek avangin avangin in lo join theuh dawn nia..
Group link : https://www.facebook.com/groups/991354610918230/

Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)