FORGIVING LIES BY Puii Sailo (Completed)

Episode nei ho a hlawm a dahkhawmna
Ngaia
Site Admin
Posts: 25813
Joined: April 30th, 2016, 4:07 pm

FORGIVING LIES BY Puii Sailo (Completed)

Unread post by Ngaia » February 28th, 2021, 12:29 pm

l71jajgp.jpg
FORGIVING LIES : ( MOLLY MC ADAMS)

Translated by Puii Sailo.

CHAPTER - 1

Rachel:
“Candice, rilru i pek a ngai a nia. Tun final year hi i pass loh chuan, nipuiah an leader tir miah lo ang che.”

Ner nang pah chuan a meng phawk chiam a, darthlalangah chuan in enin, a insiam chhe zui leh kher.

“Karei leh! Tinge hetianga ka tih hian ka hmelchhiat zia min hrilh vat loh a, mi bulah pawh ka ti ve ziah a sin.” Beidawng zetin lukham delh chuan ka bawk thlawp a.

“Awi leh. Hetiang mai mai ngaihtuah tur hi i ni lo. Khatianga hnar tih sawihte chu tunge inhmeh reng ang?”

“Mahse, ka hnar hiiii…”

“Final, Candice. I final exam tur atan i inpuahchah a ngai.”

“Ka nghak che a lawm” a la ti zui. “Min zir pui lohvin tunge min nawr kal ang?”

Candice hi ka hmangaih, ka hmangaih lutuk tlat. Mahse tunah tak hi chuan nawr nawk ka chak lutuk. Ka best friend a ni satliah lova, ka unaunu ang maia ka en a ni. Naupan lai aṭanga inkawm tawh kan ni a, Kindergarten kan luh ṭan ni hmasa berah, mipa naupang pakhatin min nam thlu a, Candice hian a tarmit laksakin, lei charah chuan a vawm chhiat sak vek a. Naupang mai mah ni ila khami ni aṭang khan kan la inkawm ta char char a ni.

College pawh hmun danga zir turin kan inbuatsaih ve a, kan phur dun khawp mai. Mahse high school kan zawh dawn kumah, ka nu leh pate an boral a, ka tan chuan engkim a tawp vek a ni mai. Ka pa leh Law firm-a a thawhpui pahnihte leh, an nupuite nen kartawp chawlh hmang turin an kal a, jet engine buai thut vangin accident a thleng ta a ni.

Kan chhungte neih ve chhun chu, ram pawna awm an nih vek bakah, hmel pawh kan in hre lo hrim hrim a. Candice nu leh pate hian an bula cheng ve turin min tuamhlawm ta a ni. Anni chhungkua hi awm lo se chuan ka tuar chhuak zo hauh lo ang tih ka hre chiang.

Zirna min chhunzawm tir a, hma pawh ka sawn viau bawk. Keipawhin pangngai taka nun hmang turin theihtawp ka chhuah ve ṭhin. Khatih lai khan zir chhunzawm emaw, college kal tumna pawh ka nei tawh lo a, mahse anni chhung puihna vang liau liauin college ka kal ve thei a. Kan duhthusam ang ngeiin hmun dangah kan awm ve thei ta a ani. Jenkins chhungkaw chungah hian ka lawm kumkhua tawh ang.

Candice rawtna angin college hrang hrangah kan apply a, chung zinga a duhna ber a thlang ta a ni. Ani hi chu cheer leader a ni a, college football lama lar a thlang pawh hi mak ka ti hran lo. Scholarship ṭha tawk tak a hmu bawk a, mahse Texas kher kher a thlang hi chu ka tui lo deuh. University of Texas, Austin a mi a thlang mauh mai sia. Tui chiah lo mah ila, in chhuahsan a zir zawm tur kan nih vang hrim hrim chuan ka phur viau tho.

Kan thlen ni kha ka la hre reng. A lum lutuk kha steambath-a pen lut ang ni maiin ka in hria. A lum uap churh a ni mai. Candice ve thung chuan engah mah a ngai ve lo anih hmel.

“Ka sam hi engtin nge ka tih danglam ang?” a ti nghal reng bawk a.

Khawiah pawh hian a thawveng em em reng mai anih hi. Mahse ka lo huphurh ruk ai daihin Texas chu nuam ka ti. Nuam ka ti lutuk tlat. A hmaa kan awmna chu tlang ram anih bakah, a hmun a ro a. Inhriatthiam dan tur chuan, cowboy ho chet tlatna ṭhin ang deuh kha a ni mai. Mahse Austin hi chu thing leh phul hring dup maite hmuh tur tam tak a awm a, an in sak dante hian Los Angeles min hriatchhuah tir tlat. Ṭhiante nena len kual mai maina tur hmun tam tak a awm bawk.

Tunah chuan final year kan lo ni ve ta der mai. Karhnih chiah hun kan nei tawh. Chawlh hun ka nghakhlel takzet. Nipui leh thlasik chawlh kan neih apiangin, California-ah Candice chhungte tlawh turin kan zin ṭhin. Mahse kumin chu elementary school ho cheer leading a zirtir dawn vangin apartment lain kan insawn luh a ngai dawn a ni.

Chuvang chuan Candice hian junior final year hi a zawh ngei ngei a ngai.

Zawhna dang zawt tura ka an zuai tawh lai chuan, Candice chu a rawn au chhuak thut a, “Awi, ka duh thei lo, ka hnara pores hi a zau lutuk.”

Min tiphu nasa bawk si leh kan ngaihtuah inang lo lutuk chuan ka thin a tirim. Ka lukham kham lai chu lain amah vawm nan ka hmang a, ka la vawm ṭhelh chiang em em zui. Mahse ka lam a rawn hawi phah tal a lawm. Hmui chip hmak chungin chhuata lukham let reng chu a en a, chutah muangchanga rawn inherin min en leh a. Engmah sawi tawh lovin a lehkha zirna dawhkan lam chu a pan ve mai bawk.

“A ṭha e. Enge…..?” ka ṭawng chu a rawn pawt chat leh ta.

“Blake kha len chhuahpui i tum lo tak tak em ni?”

“Candice!”

“Enge?” Pawi sawi lo hmel taka min en deuh ha pah chuan a ti a.

“Kum khat chhung a nghak tawh che. A la beidawng duh chuang lo a nia.”

“I lehkha zir lai…..ngaihtuah rawh….sawi lo zawk teh ang,” tih pah chuan ka lehkhabu chu ka khup tau a. Khumah ka mu nghal daih.

“I duh leh zir tawp suh. Kan sum deposit kha lak chhuah dan tur kan ngaihtuah anga, apartment-ah pawh kan awm lo ang. Hetiang chuan engtikah mah i zir chhuak dawn lo. Naupang kum 5 mi zirtir tum ang chauh i ni.” Ka ti zui nang nang a. Mahse engah mah a la ngai chuang lo.

“Ka zawhna i la chhang lo.”

“Eng i zawhna maw?”

“Blake kha i lenchhuahpui dawn em?”

Thawk hawk pahin ka khum bula chair-ah chuan ka ṭhu chhuak leh ta nge nge a.

“Pakhatna, i cousin a nih kha. Pahnihna, tunah chuan UT hnuaia thawk a ni tawh a, a tih chi loh lutuk. Pathumna, dawn lo.”

“I professor pawh a ni chuang lo a, professor a ni lo hrim hrim a buaina tur a awm lo. Chuan, in inneih phei chuan chhungkua kan ni dawn tihna a ni mai a sin.”

“Inneih a? Candice, enge maw… in ngaizawng pawh kan nilo a, engtin nge inneihte chu i lo ngaituah thlen zawk? I unaupa hi ka nei dawn lo, min hrethiam rawh. Professor anih leh nih loh lam ka ngaihtuah lo, kan university hnuaia thawk a ni tho tho. Chubakah ka duhzawng a nilo ve hrim hrim bawk.”

“I duhzawng a ni lo maw?” A mithmul buang mawi zet mai san ak pah chuan a ti a. Mak a ti tih hai rual a ni lo.

“Kan naupan lai zawng zawngin i star thin sia. Kan chhungte mah nise, tlangval hmelṭha tak a ni tih hai rual a ni lo. Nula zawng zawngte duhzawng a ni tih ka hria a lawm.”

Candice hian a sawi dik chiah. Blake West hi pa lian thelh thawlh, sam buang thar leh mitmu pawl ram a ni a. A piante lah chu hmanlai Greek ho pathian niawma nalh a ni. Calvin Klein ho model pawh nise, a nalh ber pawl a ni ngei ang.

“Kum 13 kan nih laia ka star a ni a, kum riat a liam tawh.”

“Mahse kum tam tak i star a lawm, a insawn pawhin i rilru a nat em kha.”

“Ka sawi tawh ang kha a ni mai, kum 13 chauh ka la ni. Engmah ka la hrethiam lo.”

Blake hi keini aiin kum 5-in a upa zawk a, kan inkawm nasa em em a. A unaupa Ely nen, hmeichhia mah ni ila, an kalna apiangah kan zui ve chawt ṭhin. Blake-in ka nunna min chhanhim sak hma kha chuan u mipa angin ka en ṭhin anih kha.

Awle, ka sawi uar mah mah maithei, nunna chhanhim sak chu a ni chiah lo.
Kum 9 ka nih lai a ni a, kan in bul maiah khan lui a awm a. Pipu ang deuh kan suih a, tah chuan uaiin tuiah kan zuang lut ṭhin. Vawikhat chu ka che sual a, ka zuangthla tur chu ka ke a tang ta tlat mai. A letling zawnga inkhai chungin hrui chuan min thển a, ka hlau lutuk chu ka ṭe chiam chiam bawk a. Lui kama ding Blake chuan min lo pawt ding thei hram.

Khami ni aṭang khan ka hero a ni a, ka hmangaih hial ṭhin. Kum 9 mi hmangaihna angin. Ka zep lo, kum engemaw zat chhung chu ka duh em em reng a. Mahse ani chuan a cousin best friend ang bakin min en ngai lo. Kei aia a upat vanga min nau en angah ka ngai lui tlat a, ka bansan duh ngai chuang lo. High school a zawh veleh air force-ah a lut a, min kalsan ta anih kha.

Ka ngai a, ka tuar bawk a. Mahse hun a liam zel a, ka hnutete a lo ȗm ve tầk bakah, hmeichhe naupang duhawmna kalsanin, kan taksa pawhin puitlin lam a pan ve zel a. Mipa ho mit pawh kan la ve ṭan ta. Blake ka veina pawh a reh tawh a, ka hre reng bik ta lo.

Tunah phei chuan Candice unaupa, Blake a ni ve ringawt tawh. Kum li chhung Air force hna a thawk a, nikum khan Austin-ah rawn insawn lut ve in kan university-ah a thawk ve ta a ni.

Kan naupan lai ṭhian leh a unaupa ni bawk a rawn awm ve chu Candice tan chuan a phurawm khawp ang. Mahse ka tan chuan a danglam ve chiam tawh lo. Mahse hmai chhana ka hmuh leh takah chuan a hmelṭhat ngaiin a lo la hmelṭhat reng bakah, a pian pawh a hma zawng ai khan a lo nalh lehzual tawh a. Nula, amah hmutute chuan an thlek zui ngei ngei pawh ti ila ka sawi sual ka ring lo. Chu chu amah pawh hian a hria a, nuam a ti tih pawh hai rual a ni lo. Chuvanga lenchhuah pui duh lo chu ka ni.

“Rachel.” Candice chu a thaw chhuak halh a.
Rang fein ka lo melh nghal vat. Ka ngaihtuahna khawvelah ka lo cheng daih a lawm le.

“Ka thusawi kha i hria em?”

“Blake i sawi leh dawn chuan ka ngaithla peih lo a nia.”

“Lenchhuah pui i remti dawn anih chuan ka sawi tawh lo ang.”

Ka lo meng kual ralh a. “Ani ka chhuahpui leh pui loh chu enge i lo buai ve em em a?”

“A chhan chu kumtluanin a sawm tawh che a, ka unaupa a nia, nang ka best friend. In inhmeh dawn bawk sia, hlim taka in awm dun lai hmuh ka duh a lawm.”

“Awi, nang leh Blake chauh hian khatiang ngaihdan kha in nei ang. Hmeichhia zawng zawngte duh rawn mipa hi chhuahpui tumna ka nei lo.”

A Air force khawvel khan mipa sexy lutuk leh hmeichhiate ngaihzawn rawnah a chhuah tlat a lawm.

Candice chu a tih ziah danin a hmui tipawrhin a insiam chhe leh a. “Rach, nang hian min hmangaih tak tak em?”

“Aih, nilo. Khatiang lam kha chu sawi tum hlek suh. Ka kal dawn chuang lo.”

“Anih chuan, min hmangaih lo tihna a ni maw?” Khawngaihthla la tur thei ang ber chuan a meng khup lap a, ka lu ka lo thin khum lui tlat.

“Keimah vang tal pawhin i ti thei thlawt lo em ni, khawngaihtakin? Ka ṭhianṭha ber leh ka unaunu i ni ṭhin emaw ka tia.”

Hetiang taka min nawr chiam hi ka awih theilo hial zawk.

“Vawikhat chiah ka chhuahpui anga, kan dam chhungin i theihnghilh tawh ang tih min tiam dawn em?” ka tih chuan naupang ang maiin, kut beng chungin a lam kual a. “Ka lawm e. Ka hmangaih che. Khawvelah i fel ber,” a ti chiam a.

“Ka chhuahpui ang ka tih loh kha. Ka chhuahpui chuan ka ti chauh a lawm.”

“Mahse i chhuahpui dawn tih ka hria a lawm.”

“University hnuaia thawk a ni tih hre reng rawh,” ka ti hlak a.

Kan tihdan pangngaiin, inhnial kan ṭan leh dawn tih ka hria. Professor chu nilo mah se, infiam mite training a pe thin. Athletic training ka major anih vangin nitin kan in hmu thin. Chutiang chunga chhuah dun chu thil dik ni theiin ka hre lo, nuam ka ti dawn lo.

“Rachel.” Tih pah chuan a rawn inher leh a. “Tak takin, naupang chhia kan ni tawh lo. Ani pawh nupui neih hun a ni tawh. Nang pawhin i duh thin reng kha, hnial lui tlat tawh lo mai teh.”

“Ka duh hleinem. Tunge mipa inzuar ngaizawng duh anga?”

“A inzuar kher lo…ih….hmeichhe ho vang a nia….a dikna chen chu a awm tho.”

“A dik chiah.” Uar zetin ka lo ti a. Mi sawi danah pawh a hmeichhe train ho pawh a mutpui vek tawh ang an ti tlat a lawm. Thudik anih leh nih loh phei chu ka hre lo a, fiah tumna ka nei hek lo. Mahse en mai pawhin an sawi sual thei lutuk lo ang tih chu a hriat reng.

“Daniel hnuah khan ngaihzawng ila nei leh miah lo a nia, neih leh a hun tawh.”

“Aw, ka nei a lawm,Candi. Nangmah anga ka hmuh ve sek loh vang hian ngaihzawng nei lo ka ni tihna a ni chuang hleinem.”

Second year kan zirlai khan Daniel nen kan inkawp ve thin a, mahse mipat hmeichhiatna hmang turin thla 6 lai ka nghah tir. Rei a ti tawh mah mah aniang, hmeichhe dang min kawp san ta daih anih kha. Chu lah chu, a hnena ka thianghlimna ka hlan atanga nihnih hnuah chauh ka hrechhuak anih kha. Tenawm leh lutuk. A hnuah pawh mipa lenchhuahpui chu ka nei nual tawh a, mahse rei an daih ngai lo. Vawihnih khat lenpui an ni deuh ber.

‘Ṭhenkhat chu ka rawn bia ang che,’ tiin ka thlah ve bawk a, mahse biak leh tumna ka nei ngai lem lo. Mipa ho thiam loh pawh a ni chiah lo, ka zirlaiah rilru pek ka duh a, MRS degree neih ngei ka duh vang a ni. Natna ṭhalo kai ka hlauh vangte pawh a ni maithei. Ngaihzawng neih leh chakna pawh ka nei lem lo.

Youtube ah Darxika kheuhbeuh khan a chhiar a, 2 chapters zel a chhiar a, lo ngaithla vek ru aw..keiin chapter khat zel ka post thung anga... zantin han tum leh bawk ila...

Like and comment hmuh kha a nuam kan ti em em a nia....chhiar tui ule..****



Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » February 28th, 2021, 12:35 pm

CHAPTER - 2

Thawk chhuah hawk pahin, kawngkhar lam chu ka pan a. “Blake zawng turin i chhuak dawn em ni?” Candice chu phur tih hriat zetin a lo nui var var a.

“Eng a? Candice, teuh lo mai. Zanlai a pelh tawh hi! Ka titipui peih tawh lo che, ka hmai ka phih anga ka mu daih dawn. I unaupa kha ka zawng dawn bawk lo. Chhuah puia min sawm leh anih chuan ‘Aw’ ka tih sak ve chauh ang.” Tih pah chuan ka face wash chu ka la a, kawngkhar hawnna ka vawn rual chiah chuan an rawn kik tlat.

Tun ang hunah tunge kan kawngkhar rawn kik ang? Blake West anih ka ring ringawt a. Kawngka ka hawn chuan beisei lawk ang ngeiin, Blake chu kawngkhar biang vuanin a lo ṭhen vawr a. A nuih dan atang chuan ka thusawi tawp lam kha a rawn hre hman tih hriat reng reng.

Kan dorm-ah hian enge a rawn tih dawn? A hnung atang chuan rose par pakhat a rawn pawt chhuak a, a hmelṭha zet chu a thutak hmel phian lehnghal.

“Hey Candi, Rachel hi reilote a falin be lawk ila pawi i ti em?” a tih chuan ka ṭhiannu lam chu ka hawi vat a, tifuh intih hmel zetin a lo nui sawng lehnghal. Phatsantu tenawm.

Blake chu ka en leh a, ka mak tihmel a hmuh chuan a nui deuh hak a.

“I chhanna ka nghak e. I buai loh a kan inbiak lawk rem i tih chuan…khawiah emaw kal tum i ang khawp mai.” Tih pah chuan kawngkhar herhna ka vawnna kut chu a melh leh zauh a. Ka kut ka en ve chuan ka face wash kha ka lo la keng reng tih ka hrechhuak chiah.

“Oh….Aw…nilo. Ka sawi awmzia chu, ka buai, buai lo.” Ka tibuai nuai a. Hrep tak hian! Ka van che ṭhing thei tak. Blake chu a ṭhen leh suk a, tlemin a tawlh hnung zui nghal bawk. Mi ầ ang maia ka awm chu inthunun tumin thaw ka la halh a, sawi leh tur ka ngaihtuah mek bawk. Atthlak taka ṭawng chhuah leh ka duh tawh lo. Awle, vawili lai ka ngaihtuah chiang hman ta.

“Chuan, enge tih sak tur che a min beisei?” ka ṭawng sual bik tawh lo e.

“Reilote biak lawk che ka duh a.”

“Ih, tunah hian zing lam a ni tawh tih chu i hre ve ang chu tiraw?”

Dak deuh vahin a ding a, a inrintawk hmel ngawih ngawih. He mihring danglam bik lutuk hi a chhan ka hre bik lo, a thil sawi pawh chu chhần mai ngaihna ka hrelo tep a ni.

“Nia, min hrethiam dawn nia. Ka rawn be dawn nge dawn lo che tih ngaihtuahin ka buai rei deuh a, ka rilru ka siam fel meuh chuan hun a lo kal duai tawh anih hi.”

Rose par a ken lai chu a rawn lek chhuak a, “Chuan, hei hi i ta tur a nia.”

“Anih chuan rose par keng chung hian inhnuai lamah i tei kual sek aniang maw?” tih pahin a rose min pek chu ka la a, ka melh sak ve zauh.

“Chuan, Blake….” A mit takah chuan ka en a. A tawlh hnung leh hret hnuah, “Hetah hian reilote ka be lawk thei che angem? Reilote chauh tak tak a ni mai, ka tiam a che.”

‘Ni e, vawi tamtak ka lo hnar tawh che a, kan dorm kawngkhar bul maia reilote chauh kan inbiak dawnte chuan a ṭha a lawm. Ka rầi hman dawn tihna pawh a ni hleinem. Mahse zing darkhatah min be tura i rawn kal hian ka awm a tinuam hauh lo.’ Kawngka chu kharin, hall-ah chuan ka zui a.

Ka ngaihtuahna ka sawi chhuak nghal vek lo chu ka inchhuang ru hle zawk.

“Rachel……” a tih chuan a zam ve deuh anih hmel. A lu a tuai a, a ngawi leh vang vang. Sawi mai tur a hre lote pawh a ni mahna.

“Chawlh a hnai tawh sia, nipui chhung zawng chu California lamah in awm leh daih ka ring a. Ka hun ṭha neih chhun hi awmze nei lovin a liam leh mai dawnin ka hria. Chu chu ka duh lo. Kan naupan lai khan min duh thin tih ka hria. Mahse Rach, khatih lai kha chuan i la naupang em a ni.”

“Tunah pawh nang aiin kum 5-in ka la naupang reng, a la danglam chuang hleinem.”

A nui suk a, “Kum 13 leh kum 15, chuan kum 21 leh kum 23 kara inlaichinna danglam zia chu kan hre ve ve. Thil hrang daih a ni tawh.”

A thusawi hian ka ngaihdan a tidanglam teuh si lo. Ka naupan vanga min duh loh lai leh tuna kan inthlauhna hi a la pangngai reng.

“Ni e, nang leh keipawh hi kan danglam tawh. Kum riat zet a liam tawh a sin. Kan rilru leh thinlung pawh a danglam……” ka tih mek lai chu pawt chatin. “A dik chiah. A danglam tawh.”

A mitmeng pawl ramin min melhna avanga ka taksaa danglamna awm chu ka hria. Mahse diktaka sawi chuan, a hmaah hian tu hmeichhia pawh an danglam ang tih ka chiang a ni.

Ka sawi tawh ang khan, hmanlai Greek ho pathian pakhat Adonis ang mai a ni.

“Uh, Blake, helamah.” Ka tih chuan harh chhuak zawk niawm takin a nui suk a. Karei leh! He a nui hmel hi a lawm min tituiral thintu chu.

“Enteh, thudik i hre duh em? Hmeichhe ho duh rawn i ni a, khawiah pawh an bial tuau tuau reng che a ni ber a. Chu chu i thiam loh a ni ka ti hauh lo. Mahse ka chhuahpui fo che chuan hmeichhe dangin an fiam che leh, i hmaa ui nei hauh lo a an awm thinte hi ka ngaithei dawn lo. I duhzawng apiang i kawp theih laia kei min sawm lui tlat pawh hi a inzah loh thlak deuhin ka hria.”

Ka tih chuan a hmel chu a dur deuh khap a. Thlek deuh ha pahin, “Mipa dangte anga tupawh mutpui zel turah min ngai a ni maw?” a ti a.

Ah, aw. Chutiang chiah chu i nilo em ni? Tih mai chu ka chak kher mai.

“I lo ni anih pawhin kha chu i nun a nia, i thu thu. Sawi theih ka nei hleinem. Ka sawi loh tawp tur ka sawi anih kha, min hrethiam dawn nia. Mahse ka sawi ang chu i lo nilo anih pawhin nula ho hi i hnar ngai chuang hleinem. An chhaih leh fak vel hi nuam i ti. Helaia i lo awm tirh atang khan nula pahnih, pathum tal i bulah an awm reng zel. A zialo i ti ve deuh lo maw?” ka ti leh a.

Nge, keimah chauh hi zialo titu ka ni zawk le? Ka inrin hman hma chuan min rawn hnaihin, ka hnunga bangah chuan a innem khalh a. Ka phu nasa lutuk chu a la nui zui lehnghal.
A mitmu pawl ram thinte kha a thim ta riauin ka hria. Hepa hian min tibuai tlat. Heti taka hmeltha nilo se chuan a kapah hian ka pet sak pawp tawh ang mawle. Ka zalenna min rawn tihbuai sak hrim hrim pawh hi tuar tlak a ni. Mahse chutianga ti ta lo chuan, ka thawk dan danglam chu thunun ka tum a, ka kate chu a ro hulh hulh thei hial. Ka boruak hip luh tur min hip luh khalh vek ni maiin ka hria.

“Nilo, Rachel. Chu aia mak zawk chu maw…. Heng hmeichhe ho hi ka tan engmah an nilo. Kei chuan ka thlir liam satliah vek a, ka mit hian nangmah chauh a hmu a. Nitin hian hmuh che ka duh asin. Ka hnathawh laia ka hlimna leh phurna min petu i ni thin tih pawh i hre miah lo ang. Helaiah hian hna vanga lo awm ve ka ni a, Candice nen hetah hian in lut ve tih ka hre hauh lo. Mahse kum tamtak hnua ka hmu leh che hi maw..Karei, Rachel. I hmeltha tawh lutuk a, nangmah i ni tih pawh ka hre lo hial che asin. Ka hnathawk lai chawl meuhin ka thlir che a, khami ni atang khan ka thinlung hi ila chhuahsan leh lo hrim hrim. I hmelthatna chauh nilo, i mize ngaihawm lutuk hian mi tamtak i hip khawm a. Mahse chu chu i thiam loh a nilo, tu pawi mah i sawi hek lo.” Tih pah chuan a nui leh sak a, ngun fein min en reng bawk.

“I mizia ang nei hi an tam lo a sin. Chu chu i thup theih chi a nilo. I duhawmin, midangte i ngaihsak em em a. Hlim thei tak i nihna hian i bula awmte pawh a tihlim thin. I nui hmelte hlei hlei hi a sin hmuhnawm chu.”

He thil hi Blake West sawi chu nilo se ka nuih vak vak ka ring, mahse ani hi chuan ka thin a tiphu rang zaih zaih hle si.

“Hmeichhe dangte ang i ni ve lo. Kum tamtak liam tawh mah se, hmana hmeichhe naupang kha nangmahah hian a la awm reng a. I lakah hian nawmchenna leh engemaw beisei ka nilo a sin, chu chu ka tiam che. Hmeichhe dangte atanga ka hmuh loh hi nangmahah hian ka hmu tlat. Chu chu i hrethiam tawh em?”

Hrep tak hian! Hepa hian a ti tak tak em le?

“Rachel?” a tih leh chuan nui chungin ka lu ka bu ta ringawt a.

“Chuan, chawlhkar tawpah hian ka hruai chhuah che chu i remti thei tawh em?”

Kum tamtak hnuah ka nunah a lo kir leh a, tun ang reng renga a inringtawk lo hmel hi ka la hmu ngai lo. Keimah tak pawh hian mak ka ti a, ka chhan mai ngaihna hre lo chu ka bu leh nghut a.

“Awle, khawiah nge kal i duh a?” ka ti ve ta hram.

Hahdam huai tih hriat fein a nui leh var var a.
“Ka surprise dawn che,” a tih chuan ka rum deuh nghat a. A sawmna hi ka pawm dawn leh dawn loh pawh a hre lo a, ruahmanna a siam lawk thei tawp silo. Engtin nge min surprise te chu a tum ngawt theih le?

“Surprise i tih awmzia chu, min hruaina tur hmun pawh i la hre lo tihna aniang maw?”

“Nilo, chulam a nilo. Surprise a ni tawp mai.”

Min hruaina tur hmun a sawi duh bawk si lo a, eng thawmhnaw nge ka hak dawn pawh ka hrethiam lo. Ka mut chhuak chu ka ham bai bai a, ka van che ṭhing thei tak. Ka hmaah hian tlangval hmeltha lutuk, hmeichhiate duh rawn a ding a, engtin nge ka ham theih zawk. Ka zak lutuk chu ka hmai hup chungin ka nui ta ringawt a. Blake pawh chu a lo nui ve huk a.

“A tlai tawh a lawm, ka chelh tawh lo mai ang che. Engemaw vanga kan inhmuh leh tawh rih loh takin, zirtawp zan dar 7-ah ka rawn lam ang che. Chu chu a ṭha em?”

“A ṭha a lawm. Kan inhmu dawn nia. Ih… rose min pek vang hian ka lawm e.”

A ṭawng leh hmain kawngkhar chu ka hawng a, ka nuih leh sak hnu chuan ka luh san ta daih a. Kawngka ka khar thleng chuan mawi zetin min nuih var var a. “Hrep tak hian!” ka phun zui hlak.

“Engkim ka hre ve duh a nia, min hrilh vat rawh.” Candice phur lutuk chu ka melh rum nghek ringawt a. Kan inbiakna kha a ngaithla vek dawn tih ka hria, engmah hre lo anga a awm vel chu ka ngei lutuk.

“Zirtawp zanah kan chhuak dun dawn, chu zawng chu a ni mai.”

“Anih loh tawp kha, Rachel! Hmeichhe dangte hmuh kanin nangmah chauh a hmu che tih vel a sawi lai khan nikhaw hrelovin i awm hial lo maw?”

“Nikhaw hrelovin a? Candice, nang hi chu aw…! He thil hi i romance novel chhiar thinte ang kha a nilo.” Ti mah ila, ni e, chhan mai ngaihna ka hrelo anih kha. Nikhaw hrelo a awm chu ka ni ber e.

“I hetih vang hian a lawm ka hrilh peih loh che. I lo ngaithla vek dawn tih ka hre reng. I hriat sa sawi nawn leh kher chu enge a ṭulna?”

“Hre vek e. Mahse a melh dan che leh a awmdan velte ka hre vek duh a lawm. Chuan i awmdante pawh.”

Karei leh. Hetiang chuan kan tlaivar thei mai ang.
Tinge Blake khan kan inhmuh tawh loh takin a tih kher le?

A tuk chawhnu lam a athletic center-a ka kal chuan, ka hmuh hmasak ber a ni leh tho sia. Chuan, mak deuhin a bulah nula pali an lo awm lehnghal. Pali chauh. Pakhat, stretching a tih sak mek chu sawi tel lo ta ila. Chulai tihrawl bik stretching a pawimawh ziate a sawi lai chuan ka bula Candice titi mawlh mawlh pawh chu ka ngaithla thei tawh lo. Nula kap bawr chu a kut chuan a hnaih mah mah. Nula lah chuan engah mah ngailo ang maiin a awm lehnghal. A nula train mek chuan Blake chu a hrilhru sar sar a, enge a sawi ka hre thei lo.

A hnuah chuan, “Eng dang a nilo, Blake hian a kut hi a hmang thiam em a ni,” a ti a, nula pali-te pawh chu an lo nui har har hlawm a.

Ring deuha lo nuih chhuah nghek mai ka chak. Blake chu a rawn hawi chhuak a. Karei…ka ngaihtuahna emaw ka tih kha a nilo. Ka nui chhuak tak tak tih ka hre chiah. Kan inmelh chiang ngang mai. Inthing harh hmasaah tangin a bula nulate chu a enkual a, inthiamlo hmel pu deuh chunga min rawn en leh chuan lu ka lo thin khum a. Classroom chu ka chhuahsan zui nghal daih.

“Hey” Candice chuan min rawn um a. “Engah mah ngai suh. Khang hmeichhe ho khan zirtawp zanah an leh chhuahpui ve dawn hleinem.”

“Engah mah ka ngai lo, ka thinrim hleinem.” Ti ve bawk mah ila, ka thin chu a phu dut dut mek si.

Chhuah pui ka remtih vang ringawt khan engtin nge a insiamṭhat theih ka lo beisei mai le? Nge, nizana a thusawite kha kei hian ka lo awih tak tak zawk? Ninawm mai mai, tinge ani awmdan leh thil tih vang khan kei hi ka lo buai… Amah ka duh vanga len chhuahpui tur pawh ka ni hleinem. A teuh lo mai..

Darkar li dawn chu min en reng tih hre chungin ka melh let duh miah lo a. Mahse ka taksa hian engemaw hriatna a nei tlat si. Chu erawh chu ka thunun theih piah lam a ni tawh. Mahse bungruate ka dah fel lai chuan ka bulah a rawn ding a, hmuh loh der theih pawh a ni tawh lo.

Ka thil ken chu min laksak pahin, “I thinrim anih kha,” a ti a. Closet-ah chuan a dah lut zui nghal a.

“Um…a ni maw? Keimahin ka ti thei.”

“Rachel, heng hmeichhe ho hi enga tan mah ka ti lo ka tih tawh kha.”

“Nia, ka hria a lawm.” Ka tih turte ka tihfel zawh hnu chuan inherin a mit takah chuan ka melh ve kar a.

“En teh, Blake, Zirtawp zan chhuah dun kha a ṭhat ka ring lo.”

“Engvangin maw?”

“Ih…englo… a ṭha lo a ni tawp mai. Chuan min sawmna kha lawmawm ka ti a, mahse ka hrilh nawn leh ang che. Ka duh chi i nilo, nang nen hian kan inngaizawng dawn lo. Calofornia-ah i rawn kir leh a, chhungkaw chaw eikhawm kan neih hunah pawh, he thil vang hian eng harsatna mah a awm loh hram ka beisei.”

A hmel atang chuan a nuih a za tih ka hre reng.

“A tha a lawm. I tih turte i ti zo tawh em?” a ti daih a. Chutia ka rawtna a pawm ta mai chuan min tihamhaih lek lek zawk.

“Um…..aw.” ka ti bah niai a. “Anih chuan kal tawh ila.”

“Maw? Ding lawk teh. Khawiah chuan nge min kal pui i tum a? Vawiin hi zirtawpni a la nilo. Nilaini anih hi. Chuan zirtawpniah pawh kan chhuak dun lo ang.”

“Kan in date tur kha i duh loh thu min hrilh a, chu chu zirtawpniah a ni. Chuan kha kha chu ka ṭhulh leh mai ang. Vawiin hian date ni lovin, kan kal kual mai mai anga, khawiah emaw i duh duh kan ti ang. Mahse date a nilo a nia.”

Min din hnaih lutuk a, ka boruak hip luh turte chu min hip luh khalh vek tawh. A aw ki chu a hniamin, a tham deuh chhal bawk.

“A hming phuah kher i duh chuan exercise-te emaw, hawi khawthawngte pawh i ti thei a nia. Chutiang chu date nen chuan a in ang lo a ni lawm ni, Rachel?”

A mitmeng pawl ram melhna leh a aw ri chuan min fan tlat. Chet mai ngaihna pawh hre lo chuan ka en reng a. “Um…ih…” ka ngaihtuahna tihfim tum chuan hnuailam ka melh daih a, ka khap zui sak sak bawk.

“Helaiah hian kum thum dawn ka awm tawh a, hmun fan kual leh hawi thawven tih vel chu ka mamawh lo.”

“Tha lutuk. Hna ka kal tih lohah chuan ka chhuak tam lo a. Khawi hmun mah ka la fang ve hleinem, ka tour guide i ni thei tihna anih chu.”

“Blake….”

“Kal ang le, Rachel.”

Thlan tur dang ka nei lo, ka hnial leh hma chuan ka banah a vuan a, pawn lamah chuan min chhuahpui nghal daih a. Kan chhuah pah chuan Candice ka hmu a, ani pawh chuan engmah a sawi bik lo. Phur tih hriat zetin a lo ṭhen vur a, kan kal liam thleng chuan a ban a rawn vai zui lauh lauh bawk. Engtin nge ka thiannu kha a nuih theih zawk? Ka nuih a za ve hauh lo. Blake hian a pawhin min pawt lui anih hi. Hepa hi a chak lutuk, a duh chuan min pawt sawm vek thei hial ang chu. Ka taksa themte pawh vawk chaw atan a pe thei a sin. Candice ve lah kha mi ầ ang maiin a lo phur ve em em a, nui var chungin a bante lah kha a la vai lauh lauh lehnghal. Infiamna, hmangaihna leh best friend, tunah chuan a tawp vek tawh. Ka thin a rim lutuk tlat.
Ka ban a vawn tlat chu ka thing thla a, mahse Blake chu ka la zui ve zel tho. Campus kan chhuahsan tep tawh. Kalsan daih loh chhan pakhat ka nei. Chu chu date leh nula tlangval anga leng chhuak kan ni tlat lo. Tuna ka thawmhnaw hak nen hi chuan tumah ka date hauh lo ang.

“I thin a la rim reng em ni?” a tih chuan a nui deuh vur chu ka lo melh hraw ringawt a. A nui mawi ka tih em em thin kha tunah tak hi chuan ka ngei tlat.

“Engvangin nge ka thinrim ringawt ang? Ka len chhuah pui duh loh vangin, mi pakhat chuan college building atangin min hruai chhuak a, amah hawi thawven pui turin min tilui a ni ve mai a.”

Ka thusawi vang chuan a nui chhuak hawk a. “I la thinrim anih kha,” a tih leh pawh chuan hma lam ka melh tlat tho.

“I thinrim lai hian i duhawm ti viau mah ila, i lungawi hunah min hrilh dawn nia.”

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » February 28th, 2021, 12:35 pm

CHAPTER - 3

Darkar chanve zet kan inzui kual takah chuan ka hah hle tawh a. Tour guide nih hi nuam ka tih zawng pawh a ni nek love. Eng thil mah pawh a thlir kual lo. Diktak chuan a bul vela thil awmte chu hmu awm pawhin a awm lo zawk. Ka thinrim leh rim loh min zawh hnu khan mi pawh a en leh tawh chuang lo. Ka hmaah a kal a, chu chu ngawi rengin ka zui hmiah hmiah a ni mai.

“Awle, ka hun hman dan chu a nuam khawp mai. Mahse kan kalna tur tal chu min hrilh ve tawh dawn lawm ni?”

“I thinrim chhan hi min hrilh dawn em?”
“Ka thinrim lo.”

Blake chu a kal muang ta deuh a, tunah chuan kan kal rual thei ta. A hmel ka en chuan a thutak hmel viau a, nui hmel kha a pu tawh miah lo.

“Rachel, i sawi dik chiah. Zirtawp zanah min len chhuahpui duh leh dawn lo anih chuan, a tirah khan sawi nghal tur a nia. Chuan, tunah pawh hian min zui miah lo tur i ni.”

Ṭawng tum a ka ang zuau chu min ṭawng khalh leh a. “I duh chuan in dorm-ah i kir leh thei reng a lawm, i hmaah ka kal char char a, kei hi min duh lo tak tak ni la chuan i kir leh daih thei.”

“Hnial tur che pawhin remchang min siam sak reng reng hleinem.” Ka tih chuan mithmul a lo san ak a. “Aw, ni e, ka thinrim a lawm.”

“Chuan ka chungah i thinrim bawk a.”

“Aw, Blake. I chungah ka thinrim.”

“Mahse ka hruai chhuah luih vang che hi chu a ni lo.” A indah sang lutuk chu ka hua.

“Aw, ni chiang e. Min hnuh chhuah luih vanga thinrim ka ni chiang a lawm. Chutiang khawpa min hrechiang anih chuan, tunah hian ka ril a ṭam tawh bakah, ka chau tawh hle tih pawh i hre tel ang chu tiraw?”
Ka kal hmawk hmawk lai chu min pawt dingin, ka hma takah chuan a rawn ding a. Ka khabeah vuanin amah en tur chuan min kuai dak a.

“Chawhnu lama min rawn hmuh khan hmeichhe ho bula ka lo awm vangin i thinrim anih kha.”

“Ka…..ka…..”

“Ka hrilh tawh che kha, ka mit hian nangmah chauh a hmu. Chu chu i hriatthiam hma loh chuan ka hrilh nawn fo ang che. Ka tan engmah an ni lo. Zirlai naupang, training ka pekte ang bakin ka en lo.”

“I ngaihdan leh ka ngaihdan emaw i tih tlat lam hi ka ngaihtuah lo. Ka thil hmuh khan, a tir atanga chhuahpui ka duh loh chhan che min ti hrechhuak a. Chu chu tun thleng pawhin a la pangngai reng.”

“Dawt sawi suh, Rachel.” A chewing gum ṭhial rim hiar chu ka hre thei a, ka hmuite chu a vawt sung sung theiin ka hria. Kei hian dawt ka sawi em ni? Ka ngaihtuahna a tibuai thei hial mai. A thil ṭhialah hian ngaihtuahna tibuai thei thil a tel emawni zawk le?

“I thik anih chuan pawm ve mai rawh. A zahthlak hleinem. Keipawhin Aaron melh thin dan che hi ka duhzawng a ni lo. Nitin in inzui ziah lehnghal.”

Kei hian ka thik……..nilo, engtin maw? Aaron chu tuai anih kha. Ka ngaihtuahna chuan min tiharh zawk mai. Ka tawlh hnung nghal dawrh a. Ka dinna hi lei a ni a, kan bulah tute emaw ka hriat ngai loh an ding a, min en dan chu engemaw nghah nei an ang. Chu mite en pah chuan.

“Ih….kei hian engemaw hriatthiam loh ka nei em ni?”

Blake chuan dar chhin ak pahin, a sana chu a bih zauh a, “Aih, nghak lawk rawh. A hun takah kan thleng e,” a ti leh mai a.

Blake hian ka mipa ṭhian ka thik a tih kha tuai a ni a, hmeichhia a ngaizawng ngai lo. Van lam chu ka hawi a, helai hmunah hian eng thil danglam mah a thlen ka ring lo. Ka sana chu phawrhin dar zat ka en a. Khua a thim ṭep tawh, ni tla turin chhȗm a chhun sen phut a, a mawi tak zet. Mahse chu chu thil danglam a ni hleinem. Helai hmuna kan awm chhan hi ka hrethiam lo.

Kan bul vela awmte chu ka melh kual a, ka inher leh chuan kan awmna hmun chu ka hrechhuak chiah. Congree Avenue-ah kan awm mek.

“Oh, nilo, nilo, nilo, nilo.” Hnunglamah chuan ka tawlh nghal dawrh a. Mahse Blake taksa khauh leh nghet zet chu ka su a. Rang zetin min lo kuah nghal, a nui hawk pawh ka hre thei.

“Ka hruaina che hi i hrechhuak chiah a ni maw…. He thil hi i hmu tawh thin em?”

“Aih, ka hmu duh lo. Ka hlau lutuk…..” ka sawi zawh hmain lei hnuai atang chuan bầk, a maka maka tam an rawn thlawk chhuak a. Ka hmui ka hup vat a, ka thaw ri emaw, eng thawm pawh ka chhuah vaih chuan heng bak ho hian min rawn hnaih ka hlauh vang a ni.

Blake chu a nui leh a, min kuahna pawh a nghet tawh khawp mai. Hnial tur ka ni, mahse ka che ngam tlat si lo. Tunah tak hi chuan nghet taka kuah ka mamawh. Ka bul velah hian khawvela ka hlauh ber an thlawk sup sup tlat a ni. Mahse a ban tha chak leh a awm khauh ṭangte chu enga tan mah ka ngai lo ka tih chuan dawt ka sawi ngei ang. Hmeichhe diktak ka ni tlat, mihring hipna na takin nghet takin min kuah miau a lawm.
Hlau chung chungin chung bak thlawk kual pup pupte chu ka en reng a. Engzat nge maw awm le? A thlawk chhuak tawp thei dawn lo ni maiin ka hria, a rei ka ti tawh lutuk.

A hnu deuhah Blake chu rawn kun hniamin, ka beng bulah chuan, “An hlauhawm viau em ni?” a ti sap a. Ka hmui hupna kut chu lasawnin, thaw ka la ham ham a.

“Ka lo ngaihtuah ang em em chu a ni lo. Mahse an hmelchhiat bakah, an rapawm dan chu a ngai reng tho.”

“Mahse tunah chuan i thil hlauh ber thin i paltlang tawh a lawm.”

“Ka hlauh ber.”

“Ka tih reng kha, i hria maw?" Tih pah chuan a inher a, kan kalna lamah bawk chuan kan kir leh a.

“Eng emaw in tur i mamawh em?” ka la khur reng tih ka hrechhuak chiah. Eng danga chhang ta lo chuan lu ka lo buk khum ringawt a.

“No khat chauh ka in ang.” Darkar chanve zet kan kal leh takah chuan a hma ang em em kha chuan kan boruak pawh a rit tawh lo deuh a. Air force a zawm hnua ka hun hman dante min zawt a. Kan titi ve luam mai. Middle school leh high school kan kal laite ka hrilh a, mahse ka nu leh pate chunga thil thleng kha chu ka hrilh lo.

A hriat leh hriat loh phei chu ka hre hauh lo. Mahse ka thinlung na kaitho ṭha leh tura sawi chhuah thar kher tumna ka nei lo. Chubakah hria chu nise, an vuina hun hmang tur pawhin a rawn kal thei reng a lawm. University campus chu kan kal pel mek a, ka kutah chuan nghet takin a rawn vuan a.

“Rachel, hun rei tak min hnar hnuah engvanga min len chhuahpui duh ta thut nge i nih?” A hmel ka en chuan mak ka ti lek lek, a nuih ka ring a nia. Mahse a thutak hmel lutuk tlat.

“Thudik hrilh tur chein min duh em?”

“Thudik min hrilh chuan ka lawm ngawt ang. Hun rei tak ka nghak tawh che a, thla 9 a ni tawh. Engpawh sawi ila, i chhanna chu ‘Aih’ tih chauh a ni thin. Mahse nizan khan ‘Aw’ i ti a.”

“Englo…..” tih niah niah pah chuan hnuailam ka bih daih a.

“Min hrilh thei a nia, engpawh sawi la ka hrethiam lutuk ang. I ngaihdan zểp chi i nih loh kha. Min hua tih pawh ka hria a lawm. Chuvang chuan engpawh sawi la ka danglam teh chiam lo ang.”

“Ka hua che pawh a ni lo, ka duh lo satliah mai che a lawm…A hma ang khan.” Tih pah chuan ka en chho deuh ha a, ka kut chu nghet takin a la chelh reng thung.

A nui lui deuh tih chu ka hrethiam ve mai.

“Nia, ka hnial ziah che vang hian Candice nen kan in hauh phah fo a. Ka len chhuahpui che chuan engmah sawi tawh loh a intiam vang a lawm.”

Ka hria, ka hria. Hei aia mawi hnai deuh zawka phuah chawp ve mai tur hi ka nia, mahse ka sawi zo vek tawh. Ka kalna tur ka en loh vang chuan ka tlu tep nghe nghe.

“Ka ring rengah,” tih pah chuan ka lam hawiin a inher a.

“Ka len chhuahpui lo ang che.”

“A ni maw? Mahse aw ka tih vek tawh kha.” Blake chuan mithmul a san ak a, a nui leh var var tawh.

“Vawiinah pawh i sawi kha. Min len chhuahpui i tum loh kha. Engkim ka ti tawp vek ang, ka nawr lui tawh lo ang che, Candice pawh ka lo be dawn nia.”

“Blake….”

“Nilo, Rachel. He thil hi a hma daih khan ti tawp tawh tur ka ni. Nizana ka nawr luih che vang khan min ngaidam dawn nia. I duhthlanna vangin min len chhuahpui la, nula tlangval angin in date chu ka duh ngei a lawm. Mahse i ṭhiannuin a nawr luih sek tawh loh nan che a min chhuahpui tur chuan ka duh lo che. Engkim a tawp tawh ang.”

A rilru a na nge a zak tih pawh ka hrethiam lo. Mahse hnem theih ka duh tlat. Keimah zawk hi ka inhrethiam lo zawk anih hi.

“Chhuahpui che ka duh a lawm.”

“Aih, i duh lo.”

Ni e. Blake hian a sawi dik tho. Amah ka duh vanga chhuahpui duh ka ni tlat lo.

“Ka duh lo….. A hma kha chuan…”

Kei hi ka chiang chiah em? Dawt ka sawi tih chu a hre tho ang.

“En teh. Enge sawi tura min duh ka hre lo a, mahse ka duh loh che avang hian min dem ngawt thei lo ang.”

A mak tihmel chu ben chawrhte pawh a angin ka hria. Engemaw ka sawi leh vat a ngai.

“En teh, Blake…. Zirlaite bakah, i thawhpui hmeichhe ho zawng zawng mutpui vek tawh angin an sawi che a, nang lahin a dik leh dik loh engmah i sawi chhuak miah lo bawk a. Chubakah, kan naupan laia ka duh thinna che kha a bo vek tawh. Ka tan chuan ka hmel hriat thin leh mipa lerh tak ang chauh i ni tawh a, engvangin nge chutiang mihring chu ka chhuahpui duh teh lul ang?”

Ka ngaihdan dik tak ka sawi chhuak chu ka thawl huai mai, ka inthiam lo hran lo. Amah pawhin thudik hriat a duh kha.

“Eng thil pawh ti ila, mi min sawi dan hi siamthat theih a ni lo. Min sawi zui reng tho ang. Ka pha anih chuan min ringhlel telh telh dawn. Min ring rawh. I sawi anga mipa lerh tak anga lan mai hi a ṭha.”

A ṭawng zawi lutuk chu a thusawi tawp lam pawh ka hrechiang thei lo. A sam a tuai puat a.

“Ka dinhmun hi han ngaihtuah ve teh. Kum tamtak chhunga ka hmeichhe duh awmchhunin, tunah hian enga tan mah min ngai lo tih hriat zetin min hnawl mek a nia.”
Kum tamtak a tia mi?

Ka kut a vawnna chu thlahin, beidawn hmel zetin a lu chu a tuai leh a. Inherin, “Lo kal rawh. Ka thlah tawh ang che,” a ti zui a.

“In tur kan dawm dun dawn emaw ka tia?”

“Tunah chuan ni lo, Rachel.”

A kal hnu pawh chuan ka la ding reng a. Rilru nat hmel taka a awm hi ka duh kher lo. Ka au zui a, “Blake, zanin hian min tihah lutuk, chuvang chuan beer min lei chu i ba in ka hria.”

Ding chawt mah se a rawn hawi let chuang lo.

“Chuan, zirtawp zanah dinner min treat bawk ang.”

A rawn inher a, a nui hmel chuan ka thaw a ti tawp lo chauh.

Blake nena in tur dawm dun chu ka beisei ai daihin a nuam a, nilaithawhtan tlaiah pawh hun kan hmang dun leh a. Zirtawpni chawhnu lama athletic center-a kan inhmuh chuan, rose par sen pathum kengin min lo nuih var var a. Tlai hnih hun kan hmang dun tawh a, rose min pek loh vangin vawiin chhiar telin rose pathum min pe ta a ni.

Dawt ka sawi dawn lo, hetiang reng renga ka hlimna tur zawngtu chungah hian ka lawm lo thei lo. Rose chu lain a biangah ka fawp zauh. A hnu lawkah chuan Candice pawh a rawn lang ve nghal zat. Center atang chuan min pawt chhuakin, zanin Blake nena kan date neih tur atan inbuatsaih tura min duh vang a ni.

Blake hian hmeichhe duhzawng a hre takzet. Min ngaihsakin, ka chungah a tha em em a, mahse ninawm khawpin min rawn tibuai leh hauh silo. Kan pahnih chauha kan awm chang pawhin min kuah leh fawh pawh a tum ngai lo a. Candice ve thung chuan vanduaina angah a ngai a, ka hnial buai duh lem lo.
Zanin hian vawi tamtak min sawm tawhna chu chhangin, Blake ka len chhuahpui dawn a, date pangngai angin. Heti taka ka laka a dawhthei hi ka lawm a, hnial reng pawh thil theih a nilo ve bawk a ni.

Blake chuan a car Lexus, silver rawng chuan min rawn lam a. Restaurant pakhat, luikama awm, Oasis an tih maiah chuan min hruai a. A hmun a nuamin a thawveng bawk a, hun nuam tak kan hman ngei ka beisei. Kan thil eite chu a tuiin, engkim mai chu a nuam vek a ni mai. Mahse a mizia hi a dang tlat. A ṭawng tam loh bakah a thutak hmel lutuk. Kan ei leh in mante a pek zawh chuan car-ah kan let leh a.

“In tur dawm dun leh i duh em?”

Blake chuan a tichhuak hluai a. Diktak chuan nula tlangval pangngai anga kan chhuah dun takah chuan kan lai deuhte pawh a ni maithei. Kan ṭawng tam lutuk lo ve ve.

“Margarita no hnih lai ka in tawh kha, ka duh belh tawh lo,” ka lo ti mai a. Nuih hawk pah chuan ka malah a rawn vuan a.

“Awle, in tur chu i duh lo a. Anih eng thil dang nge tih i duh?”

“Umm…….”

“Sakawr i ngaina em?”

“Sakawr maw?” ka thil beisei loh tawp min zawt tlat. “Sakawr chu ka ngaina lutuk.”

“Anih chuan ka thlah hma chein sakawr tawlailirah kan chuang dawn em ni? Enge i ngaihdan?”

“Ka hre lo le.”

“Rachel, tihsual ka nei em ni? Nuam i tih loh chuan min hrilh rawh.”

“Nilo, ka tihpalh…ka chau deuh a. Vawiin chu ka awm a nuam chiah lo. Pawi i tih loh chuan min thlah haw tawh mai la?”

“Tehreng mai, hun dang a la tam a lawm.”

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » February 28th, 2021, 12:35 pm

CHAPTER - 4

Kawng tluanin ka mal chu a vuan tlat a, a kutzungtangin a nuai ne ne lehnghal. Kei lah a kil thei ang berah ka thu tlat bawk. Campus kan thlen hnu chuan kan room thlengin min thlah a. Kawngkhar kan thlen chuan ka kawngah kuahin, a lamah min pawt hnai a, ka lo ip chawih. Min fawp dawn emaw ka tia, mahse min fawp miah lo. Ka nghawngah chuan a hmuiin a nul thuak a, ka sam rim a hnim chiang mai, ka nui chhuak lo chauh.

“Blake, khawngaihin. Hetiang hi chu kan ti thei lo ang.”

Ka tih chuan a inla hrang vat a, a mitmeng chu engtin emaw tak a danglam. A de sar mai.

“A tha a lawm.” Min melh dan chuan ka awm a tinuam lo tlat. Min tihlau ni maiin ka hria.
“Kan inhmu leh dawn nia,” a tih hnu chuan a inher vut a, a kal nghal daih.

“Rach, harh teh. Engkim ka hre ve vek duh. Min hrilh vat vat teh.” A tuk zingah Candice chuan min rawn kai tho a. Ka men rual chuan a phur nui hmel ka hmu hmasa ber.

“Nizan ka lo haw lai khan khawnge i awm daih?”

“Jeff bulah.” Tih pah chuan ban a vai liam puat a.

“Chuan nizan thil thleng chu min hrilh tawh rawh le.”

“Wow, Jeff pawh i lo kawp leh tawh a maw? I che ropui hle mai, Candice.”

“Sawi lo mai teh!” Ka kiu chuan ka innem kang a. Nizan kan hun hmandan kha sawi pawh ka chak lo. Sawi em em tur a awm lo bawk nen.

“A nuam lo lutuk,” ka ti ta ringawt a.
Ka thiannu chu mak tihmel fe chuan a lo mengphawk vak a.

“Enge a awmzia? Eng thil nge i tih?”

Hmeli mai mai thin hi chuh! “Eng thil nge ka tih vak anga?”

“Um, ngawi lawk teh. Pakhatnaah chuan, a tir atangin i len chhuahpui duh ngai lo a. Pahnihnaah chuan, tlai hnih hun in hman duh hnuah, nizan thil thleng min hrilh turin Blake pawhin min rawn text miah lo a. Pathumnaah chuan, a tir atangin i len chhuahpui duh ngai lo a.”

“Pathumna kha pakhatnaah i sawi tawh.”

“Ka hria a lawm. I duh loh chhung kha a rei lutuk a, vawihnih lai sawi chhuah a ngai a lawm. Chuan enge thleng?”

Thawk hawk pahin khumah chuan ka let thla leh tawp a.

“A nuam lo a ni tawp mai, sawi tur a vang bawk si. A hma nihnih hun kan hman dun kha chuan kan titi dun bawrh bawrh a, mahse pangngai taka kan chhuah dun meuh chuan sawi tur pawh kan hre lo. Menu pawh min pe lo, aman eitur pawh a order vek. A tui tho a, mahse a nuam ka tilo.”

“Chu zawng chu maw?”

“Ni deuh mai e. E, chuan kan rawn haw lamah chuan pangngai deuhin a awm leh lawi sia. Chuan kan room kan thlen hnuah ka nghawngah fawpin ka sam a hnim leh a. Tawp tura ka hrilh hnu khan a tawp ve mai a, mahse a hmel, a mitmeng kha a mak lutuk. A hlauhawm. Aaaa……ka hrethiam lo. Engkim kha a diklo vel vek a ni mai.”

Candice chuan engtin mah min chhang lo, min en tawp ringawt.

“Enge?”

“I mawl a mi a? A fawhna che chu tawp turin i hrilh a maw?”

Hrep tak hian! Chu chauh chu em ni henu hian a lo ngaihtuah a?

“Aw, date nuam lo tak a ni a. Engvang chuan nge ka infawh tir kher anga?”

“Nilo, nilo, Rachel. Karei leh! He thil hi kan siam that vat a ngai. Nimina ka thil tih zozai ka ngaihtuah khan hetiang hian engkim i tihchhiat vek ka ring thei lo.”

“Wow!” ka ti sap ringawt a. Ka thiannu hi ka hrethiam tawh lo. Ka chal dawm chungin, lukham delh chuan ka mu hle hle a.

Pawnlamah breakfast eitur chuan kan chhuak a, Candice chuan min zilh char char a ni deuh mai. A duhtawk a sawi hnuah zirlai lamah rilru kan pek theih tawh hram ka beisei. Kan room-a kan kir leh hnu lawkah chuan kan kawngkhar chu an rawn kik dat dat a.

Blake West ngei mai chu rose par sen pali keng chungin a lo ding anih chu!

“Tunah hian zing dar 9 pawh a la ri lo tih i hria em?”

Ka mak tihna leh lawm lohna chu thup pawh ka tum buai peih lo. Blake lah chuan engah mah ngailo niawm takin, dar chhin ak pahin a lo nui suk duh chauh.

“Morning Rach. Breakfast eiturin ka hruai chhuak thei che a ngem?”

“Oh! Kan lo ei fel chiah a.” ka lo ti ram deuh hmak a.

Candice chuan min rawn melh tih ka hria, mahse ka hmu lo der ve tlat.

“Anih chuan a tha a lawm.” A nui hmelah chuan a inrintawk zia a lang reng a. "Coffee tal chu kan in dun thei ang chu tiraw?”

“Final exam a hnai tawh a, lehkha zir ka duh.”

“Chuti anih chuan coffee chu i mamawh dawn anih chu. A tiharh dawn che a sin.”

Karei! Hepa leh Candice hian enge maw an hriat le? Ka hnarna hi an hrethiam lo tak tak nge, an hrethiam lo der? An nute lama an inthlahchhawn, rilru kim lohna engemaw tak an nei a ni ngei ang.

“A tha a lawm. Kan vaiin kal i la. Candice, coffee i duh em?”

“Aih, ka in chak lo. Eric ka text chiah a, a lo kal dawn. Ih…lehkha min zirtir turin a nia.”
Min phatsan leh ta. Blake hnehtu in tihmel zet chu ka en leh a.

“Min lo nghak lawk thei a ngem?” ka tih chuan, “Inhnuaiah ka lo nghak ang che,” tih pahin rose pali chu min pe a, mit min siai khum leh zauh hnu chuan a kalsawn ve nghal a.

“Nizanah Jeff, tunah Eric maw? Zir tur in ngah dun ngawt ang chu. Kei hi chhuak lovin zirpui zawk che ila a that ka ring. Kumin hi i fail thei miah lo ania aw.”

“Kal vat mai teh!” tih pah chuan nin hmel zetin mithmul min san khum ak a.

“Khawngaihin i nungchang hi i thlak ang tih min tiam rawh.” Tih pah chuan ka yoga pants hak leh Iron maiden tshirt chu ka melh vang vang a.

“Ha ha ha! Tunah hian zingkar chauh a la nia, inchei a ngai lo. Ti khan kal mai mai rawh,” a lo ti hlar a. Henu hi a cousin ngaizawng tura min duh lutuk hi a â vek tawh ni berin ka hria. Ka sam sei dum hlap chu ka chhipah ka zial tawm leh tawp a. Ka purse chu lain, “Ka kal a nia, nakinah kan in hmu leh dawn nia,” tih pah chuan ka chhuak nghal a.

Blake chuan engmah a sawi lo, a car-ah chuan ka thu lut a. Campus bul maia Starbucks kan thlen thleng chuan kan in be chuang lo. Ka awm ve tih a hria tih a lanna awmchhun chu, ka mala a kut a rawn dah chu a ni mai. A hmer nghet mah mah lehnghal. Dawr chhung kan luh hnu pawh chuan eng vak mah kan sawi chuang lo.
Ngawi rengin ka mal bawk chu a vuan leh a. Tukin chu coffee min order tir ve tlat. Tuna thil thleng mekah hian thil tha awmchhun a ni hial ang. Ka phone a rawn rik takah chuan ka thaw chhuak hawk a, zahzel tur ka nei chu ka lawm a ni mai.

“Tunge?” A hmel chu a hma zawng aiin a thutak a, ning hmel a pu deuhin ka hria. Ka phone hmaia message lo lang chu ka en zawk a.

“Ka thianpa anih hi. Zaninah study group inhmuhkhawm tur a ti anih hi.” Tih pah chuan ka phone chu ka purse-ah dah leh mai ka tum a, rang lutukin ka banah chuan a rawn man a. Ka beisei loh lutuka a chet vang chuan ka lo phu deuh zawk lehnghal.

“Oh! Khatia nghah tir reng chu a tha lo ang, i chhang dawn lo em ni?”

A chet dan chu inthiam lo hmel a pu deuh a, inthunun a tum hle tih pawh ka hria. Ka ban chu laksawn ka tum a, ani pawhin a thlah ve mai bawk. Hepa hian enge maw a hriat le? Text satliah mai mai a ni sia.

“Nia, kan chhang a nge.”

“I kal theih loh tur thu hrilh rawh.”

“Engtin a?”

Rawn kun hniamin mit zim deuh san chuan min en a. “Candice nen zir dun ula tha ka ti.”

Ka thin a rim ve deuh tlat. Hepa ta hi ka nilo a, ka bialpa pawh a ni lo. Min rawn text-tu lah kha Aaron kha a ni, ka thianpa tuai kha.

“Engtik atang khan nge ka thian kawm tur min thlan sak thei ni a ilo inhriat a? En teh, i laka ka awmdan hi a diklo a ni maithei, mahse inngaizawng kan ni lo. Ka thil tih turah chuan ilo inrawlh a ngai lo ang.”

A hmel chu a inthlak leh daih. Sexy leh ngainatawm deuh hmel kha a pu leh tawh a.

“I sawi dik a lawm, Candice nen zir dun mai ula a that ka rin vang a nia. Ani nen chuan in inkarah engmah a thleng dawn lo tih ka hre chiang a.”

Enga? Ngawi teh.. A awmdan dang leh thut chuan ka thluak a tibuai tlat. Ka hmaa thu hi tunge anih pawh ka hre tawh nek love.
Thawk chhuah hawk pahin lu ka thing ta ringawt a.

Min hnial hma chuan ka ding a, “Campus-ah kir leh tawh ka duh.” Ka ti a. Ani pawh chuan min rawn zui chhuak ve mai. Engmah sawi lo bawk chuan kan inphur let leh a, ka malah chuan a kut a la rawn dah tho.

Car a tih din ruala chhuah nghal mai ka tum a, ka malah chuan a hmer nghet zual sauh. Mak ti zetin ka melh hau ringawt a, ani lah chu engmah ti lo niawm takin hahdam hmel fe chuan a thu a.

“Kawngkhar kha ka rawn hawn sak ang che, lo nghak lawk rawh.”

Hepa hian kan room thleng chu min zui a tum loh hram ka beisei. Candice leh Eric pawh an buai buaiin an lo buai dawn a, kawngka pawh chhung lamah an kalh leh ngei ang. Ka mal a hmerna kha a duk hial ka ring bawk. Kawngkhar a hawn rual chuan amah pawh melh lovin ka chhuak a, kan room lam panin ka kal nghal. Ngawi rengin min rawn zui tih ka hria, hawi let ka tum hran lo.

Kawngkharpui kan luh dawn chuan, “Coffee vang khan ka lawm e…” ka ti hman chauh a. Ka kawngah vuanin, bangah min nambet a. Duhthawh takin min fawp nghal bawrh bawrh anih chu. Chet ngaihna pawh ka hre lo. A inla hrang thut a, engmah sawi lovin car dinna lam a pan leh daih.

Rawn hawi letin, mit min siai zauh pah chuan, “Kan inhmu leh dawn nia,’ a la ti zui. Tunah hian eng hmel nge ka put ang pawh ka hrethiam lo. Ka thinrim a, a ngaihna ka hrelo bawk a, ka buai nuai a ni ber mai.

Blake hi mipa nalh leh hmeltha tak a ni tih chu ka pha bik hauh lo, mahse ka ngaizawng miah lo. Thlan tur awm lek lo a min nek chep thin avanga zui chhuak leh mai thin ka ni. Candice unaupa anih bakah, naupan lai thian kan nih vangin huat kher chu ka duh bik lo a, thian anga kan awm mai theih ka beisei thin.
In thing harhin, kan room lam pan chuan ka chho nghal a. Thil thleng kha Candice ka hrilh dawn em, hre turin ka duh em? Ka thiannu hi ka hrechiang a, a nilo zawngin a ngai leh tho ang. Infawh ka thiam loh vangah emaw a puh leh dawn. Diktak chuan a hmel hmuh ringawt pawh ka hreh.

Eric a la awm anih ka ring, kawngkhar a la inkalh tlat. Kawngkharah chuan Candice kutziak tih hriat zet chu a lo in tar a, “LO LUT SUH,” tih a ni. Candice chu ka text ta ringawt a, ka laptop leh lehkhabu rawn dah chhuak turin. An pahniha an awmlai chuan ka lut duh bik chuang lo.

Ka mamawh angte a rawn dah chhuah hnu chuan, common room-ah ka kal ta daih a. Aaron message chhang tur chuan ka phone ka phawrh a. ‘A tha a lawm, dar engzatah, khawiah?’

Aaron : ‘Dar 7, Starbucks.”

Khalai hmunah khan ka kal peih tawh lo a sin mawle. Ka lehkhabu chu ka keu a, Blake ngaihtuah loh ka duh.

Darkar 5 zet group study kan neih hnu chuan ka thawveng hawk mai. Final exam pawh chu ka cho ta viau mai. Monday atanga tan tawh tur kan ni. Chumi zawhah chuan kumin chhunga kan zirlai chu ka zo ve tawh dawn tihna a ni. Ka coffee in hnem lutuk chuan ka mut a tichhuak lo a, café-ah chuan thuin, ka journal chu ziah zawm leh ka tum ta zawk a.
Ka nu leh pate thih hnu khan ṭawng nachang pawh hre lovin ka awm a, Candice nu leh pate khan theihtawp chhuahin min enkawl a.

Depression kha ka thihpui mai ang tih hlauhawm khawpin ka awm anih kha. Ka thiannu u, Ely chauh khan min be ṭawng thei a, ani pawh khan min ngaihtuah lutuk vangin chawlh a neih apiangin in lamah a rawn haw thin. Melh ngai ka melh reng tawh chuan, engmah sawi lovin min kuah tawp thin a, kha khan nasa takin min hnem thin. Khatianga min ti reng tur khan ka bulah a awm reng dawn lo tih erawh ka hrechiang hle thung.

Nikhat chu school atanga ka haw chuan ka khumah journal bu ka hmu a, lehkha them a lo awm tel bawk. Candice pa, George hnen atangin a ni. A lehkhabu min pek chu ka rilru leh ngaihtuahnate ka ziah chhuahna tur a ni. A tirah chuan ka hrethiam lo a, mahse a bulah chuan ka lo tum dawn nia, ka ti ta tho a. Khatiang tih nachang a hria kha ka lawm a, nasa takin ka hlawkpui bawk. Nitin ka nu leh pate chanchin ka ziak thin a, a chang chuan tlar hnih khat leh ziah chang pawh ka nei. Mahse ka chhungte nen hun kan hman ho theih dan awmchhun niin ka ngaih phah ta hial a ni.

Zanriah eikhamah thukhawmin, kan hun hman dante kan sawi liam liam thin a, khatiang huna awm leh angah khan ka inngaih phah hial thin. Ka lehkhabuah chuan ka hun hman dante ziakin, ka nu leh pate kha ka titipui thin tihna a nih chu.

Café-ah chuan darker fe ka thut leh hnu chuan inkhung felin, dorm lam pan tur chuan ka chhuak a. Zan a rei tawh deuh vang chuan a thim mup tawh a, vei vak hmuh tur pawh an awm tawh lo. Ka phone message tone chu a ri karh a. Ka en chuan ka mak ti chu ka khawng lo chauhin ka hria. Blake a ni.

‘Zanin chu i lang nalh hle mai.’

Ka car dahna lama tlan ta mai lo chuan ka hawi kual ruai a. Blake hian min hmu reng tih a chiang reng. A awmna ka hre lo a, ka car dahna lamah chuan lo tlan ta chiam pawh ni ila a sawt lutuk lo maithei. A chhan chu ka car bul chiahah chuan a car nghengin a lo ding reng tawh tlat. Engtin nge ka awmna a hriat theih. Lo hre ta pawh nise, engvangin nge helaiah hian a lo kal ve?

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » February 28th, 2021, 12:35 pm

CHAPTER - 5

Zing lam dar 2 a ri tawh. Nilo, min zui ru tihna a ni thei mai em?! Nilo, nilo, chutiang thil chu a ti thei lo ang. Rachel, harh teh, inti pachang hram hram ang che, tiin ka inhrilh mawlh mawlh. Min zui ru hauh lo ang. Chutiang mi chu a nilo. Blake hi ka hriatna a rei tawh lutuk. Ka car a hmuh takah chuan min lo nghak mai mai a niang. Chu chu a dik ang tiraw? Dik ngei se ka ti. Ka car dahna lam pan chuan ka kal ve zel a, inthlahdul tum takin thaw ka la bawk.

“Hi, Blake.”

“Café-ah khan ṭhut tlaivar i tum emaw ka ti hman hial a lawm. Ka nghahna che a rei tawh lutuk.”

Karei! Hetah hian min lo nghak char char a maw?! A thil tih dan hian min tihlau ru tlat. Pawisawi lo taka a nui hmel chuan min rap tel deuh tlat lehnghal. Ka hlauhna thup tur chuan inthunun tum viau mah ila, ka aw chu a zawi kher mai.

“Tinge min rawn zui a?”

“Zui che a? Ka zui reng reng lo che. Candice min hrilh angin rawn lam tur chein ka rawn kal anih hi. Min nghak tih a rawn sawi a. Hrep hian Rachel! Thlahrang hmu ang mai a lawm i nih, i tha em?”

“Candice chuan engtin maw a tih? Teuh lo, ka lo nghak reng reng lo che. Car ka keng ve reng a lawm. Nang pawhin i hmuh reng kha, ka car bulah chiah i car i dah kha.”

Thil thlen dan hi ka hrethiam lo, mahse helai hmun hi chhuahsan vat ka duh. Blake hi kalsan vat vat ka duh.

“Nia, mahse i car hi a nung thei tlat lo. Chuvang chuan ka lo nghak ta che anih hi.”
Naupang, thil hrilhfiah tum niawm tak chuan muangchangin a tawng lehnghal.

“I hre tawh lo em ni, Rachel? Darkar thum dawn liam tawhah khan i call kha. Mahse a rawn kal hman lo a, chuan keimah min rawn be mai turin i hrilh anih kha. I tha em? Lo kal la, car-ah hian lut phawt teh. In room-ah ka hruai ang che.”

“I car-ah hian ka chuang dawn lo. Keimahin ka inkhalh haw ve mai ang,” ka tih zawh rual chuan ka car lam chu ka pan hlawk hlawk a. Ka thu lut nghal. Thawk chhuah hawk pahin kawngkharte chu ka lock nghal vek a. Chabi chu rawlh lutin ka herh a, mahse engtin mah a awm lo. Ri det pawh a awm lo tawp a ni mai.

Ka car hi enge a awmzia? Zanin hian Candice nen kan la inbe hauh lo tih ka chiang. Blake hi min rawn lam turin duh ni ila, Candice ka va hrilh tir chhan tur a awm lo, keiman ka call ve mai ang. Darthlalang kik karh ri ka hriat chuan ka phu zawk a, Blake a ni dawn tih hre mah ila, ka zamna chu ka thup thei lo.

“Ent eh, Rach. I thil tih hi a atthlak lutuk a nia. Rawn chhuak la ka thlah ang che. I car pawh siam turin ka lo dah ang.”

Tunah hian thian dangte call hun pawh a ni tawh lo, zing dar 2 a ri tawh a, an mu vek tawh ang. Thlan tur dang ka neih loh vang chuan kawngkhar chu ka hawng ta nge nge a.

“Fel lutuk, kal ang le.” A car chu min hawn sak a, ka bulah chuan a rawn thu lut ve nghal. Mahse ka malah a vuan tawh lo hlauh.

Kan dorm chu hla lo hle mah se, chatuan ang hial ni maiin ka hria. Ka that leh that loh min zawt zeuh zeuh tih loh chu kan in be lo. Min ngaihtuah tak tak vanga min zawtte pawh a ang deuh. Candice kha ka call tak tak emaw ni le, ka nu leh pa ka ngai lutuk khan ka theihnghilh zawk a ni thei mai a ngem?
Blake ka lo nghah pahin, ka journal kha ka lo ziak a ni zawk em? Coffee ka inhnem lutuk khan ka rilru a tibuai deuh a ni maithei. Blake lah hian a sawi chiang viau mai bawk sia, engmah ka hrethiam tawh lo. Ka theihnghilh anih ka ring ta rum rum mai. Mahse keimahah hian thil enge maw dik lo a awm tih min hrilhtu a awm tlat.

Dorm kan thlen chuan khua a var tep tawh hial ang. Car chu tidingin, “I tha em?” min ti leh a. Tun hi car ka luh hnuah vawi 5 min zawhna a ni tawh.

“Min hmuh khan i hlauh hmel lutuk a,” a ti leh a.

“Ka tha, ka tha tak tak. Min ngaihtuah suh. Dar zat ngaihtuah miah lovin ka lo inziak anih bawk kha.”

Nuih luih chu duh viau mah ila, kan room thlenga min thlah tura ka sawmna emaw a tih ka hlau bawk si. Car atang chuan ka chhuak nghal a, lawmthu sawi tura ka dah luh leh lai chuan a lo chhuak ve mek chu ka hmu a. Phiangsen hian!

“Tun ang hunah hian nangmah chauhin in room ka pan tir che chu i ring lo tawp ang tiraw?”

“Nia, mahse ka tibuai nasa tawh che sia, min lo nghak reng bawk nen…. Chuvang chuan……” ka tih lai chuan nui hawk hawk chungin min rawn pan a, ka kawngah a rawn kuah nghal.

Kan room kan thlen chuan, kawngka chu min hawn sak a, min chelh muan a tum dawn lo anih hmel, a zia phian dawn e. Mahse kan room a a pen luh rual chuan ka hlimna chu a thlawk bo ve nghal. Candice a awm miah lo. Blake chuan kawngkhar chu a kalh zui hmiah.


“Khawnge Candice?” ka aw khur dar dar chu ka thunun thei lo. Kar hmasa nilaithawhtanni khan kan pindanah hian kan pahnih chauhin movie kan en dun a, nuamlo tihna ka nei miah lo kha a nia. Mahse tunah hi chuan a dang tlat. Ka hlau. Thil diklo a awm tih chu hai theih a ni lo.

“In inbiak khan a hrilh lo che em ni? A buai tih chiah min hrilh a, eneg a tih ka hre bik lo.” Pawi sawi lo hmel a la pu reng.

A phone ken leh ken loh hre turin pindan chhung chu ka melh kual a, a ken chuan call nghal ka duh vang a ni. Mahse ka thil zawn chu ka hmuh hmain, ka hnungah Blake chu a rawn ding a. Min kuahin ka nghawngah a fawp a.

“Hey, Blake. Khatiang thil kha chu ti rih teh suh. Candice awmna ka hriat vat a ngai.” Pangngai thei ang bera lan ka tum hram hram. Ka hma lamah chuan rawn dingin, ka wardrobe ngheng chuan min nam bet a. Nem sawn tum ve viau mah ila awmzia a awm lo. Hepa hi lungtum ang maia nghet a ni, ka nem sawn zo lo.

“A hman hunah a lo haw ve mai ang.” Ka nghawnga la fawh reng pah chuan a ti a, a seh tel deuh lehnghal. Ngawi rengin thil thleng zel tur hi ka nghak dawn teuh lo. Kan room atang hian chhuak nghal turin ka duh.

“Awle, ka chau lutuk….." ka tih lai chuan rang zetin ka hmui chu a rawn khar a, min fawp duhthawh tial tial lehnghal. Tal thut ila, kawngkharah hian ka tlanchhuak hman maithei, kan hlat lo bawk a. Mahse ka ngaihtuahna hria niawm takin ka chet hma chuan khum lamah min pawt phei a. Theihtawpin ka sual let ve bawk nain, ka hneh ngang lo a ni.

Ani lah chu a ṭang nasa zual sauh bawk a. Ka khum chu a san deuh vangin, min nawr tlu mai thei bik lo a, khum tlang ka ngheng lui ve tlat. Ka samah kekin, amah en tur chuan min pawt dak a. Tawng chhuahna remchang ka nei ve chiah.

“Chhuak nghal rawh, tunah!” Ka ban chu a pawm beh tel tlat vangin ka che thei lo. Ka chet theih rual chuan a awmah ka nem leh a, engah mah ngailo tih hriat zetin a nui suk duh chauh. A nui hmel chuan hlauhna vangin ka tha a ti zawi vek, tisa chakna avanga thluak fim tawh lo hmel a pu.

“Chhuak tur chuan min duh tak tak loh kha,” tih pah chuan min kuai dak leh lawp a.

Hepa hian ka duh lo tak tak tih hi a la hrethiam miah lo emaw nile? Ka duh lo tak tak a, ka duh ngai hek lo. A khawih nih pawh ka duh lo. Ka kawnga a vawnna chu thlahin, ka kawr kilh chu phelh a tum a, ka la che thei chuang lo. A taksa lian leh rit zet mai chuan khumah min nek bet tlat. A phelh rual chuan ka awm bawr chu dimna tel hauh lovin a ṭham nghal bawrh bawrh a. A phur lutuk leh a mipatna che tual tual chuan ka luak a tichhuak lutuk tlat. Ka nghawngahte chuan a fawp ruai ruai a.

“Khawngaihin, tawp teh.” Ka aw ri zawi lutuk chu ka hua.

“Tha deuh khan dawh hle hle la ka zo vat mai ang.” Ka kawngah chuan manin, khumah min theh thlu tawp a. Ka chungah a rawn lawn ve nghal. Tawp tura hrilh chu duh viau mah ila, ka tawng chhuak thei lo, ka thaw hlawp hlawp ri chauh chu hriat tur a awm. Ka khur hlawk hlawk a, nikhaw hrelovin ka awm mai dawnin ka hria.

A leia ka ka chhung a hawl vel tur chu duh lovin, theihtawpa nghet chuan ka hmui ka chip tlat bawk. Ka ke lam a delh beh tlat vang chuan ka che thei lo a, mahse a darah chuan namin ka chum bawk a. A tawp duh chuang lo. Ka banrek pahnihah chuan manin, ka lu chungah a nawr bet ta daih a. Ka mittui a hnai tih ka hre thei. Ka beidawngin ka mangang takzet tawh. Ka lu chu thlek sawn ka tum a, engpawh tawk dawn ila ka pawisa tawh lo. Tanpuitu tur auh mai ka tum a, ka ka ka an vaih chuan, ka ka chhungah a lei a rawn rawlh dawn a, ka au thei dawn chuang lo. Chutah ka tih dan thlakin, ka ka chu ka ang a, a lei a rawn rawlh luh rual chuan ka lo seh nghek. Te thawt chungin a inla hrang nghal a, ka ka chhunga thisen rim nam huk chu ka hre thei. Ka luak chu chhuak viau mah se ka au a ngai. Rang zetin ka nghawngah a rawn rek a. A mitmengah chuan khawngaihna leh lainatna hmuh tur a awm tawh lo. Ka thaw a chham lo chauh tawh.

“I thil tih vang khan i la inchhir dawn khawp mai, Bawihte.”

Ka mittui vang chuan ka khawhmuh a phe vek tawh. Nikhaw hrelo a ka awm mai chu ka hlau ber. Ngaihtuahna fim put hram hram ka mamawh. Ka thaw thei tawh lo, ka bante pawh chu a zawi vek tawh a. Sual let tur pawhin chakna ka nei tawh lo. Tu emaw tal lo kal tur chuan ka tawngtai ta ringawt a.

Ka kekawr a pawh thlak lai pawh chuan che tur ka awm tawh lo. Ka mittui chu a luang zawih zawih a. Ka beng bula a rawn thaw lum huam huam chu ka hre thei.

“Min sual let thei tawh lo turin ka siam dawn che, Rachel.”

Ka panty a pawh thlak leh takah chuan, ka hrawka a rehna pawh chu a thlah zui a. Ka lo thaw nghal kawk kawk. Sual let leh chu duh viau mah ila chakna ka nei tlat tawh lo. Ka lute chu a hai chum chum tawh a. A kekawr zipper inhawng ri ka hriat chuan ka in sut hlawp hlawp tawh.

Ka nghawnga a rawn rek leh tur chu lo namsawn ka tum a, ka kut chu a lo beng per lawp a. Ka taksa chhunga a rawn luh takah chuan nikhaw hrelo a awm daih theih ka duh takzet. He thil thleng mek hi hriat loh ka duh.

Ka khawhmuh chu a thim riai riai a, ka hriatnate chu an ral riai riai ni maiin ka hria. Mahse, kan room kawngkhar pawnlamah chuan ri a zawnga ri mawi ber mai ka hre ta!
Candice aw ngei a ni. Blake chu a tho nghal a, a kekawr a hak that mawlh mawlh laiin, ka boruak tlachham chu ka lo thaw kawk kawk thung a. A kekawr a ha fel hman awrh tihah chuan, kawngkhar chu chahbi hmanga hawn tum tih hriat takin a ri rak rak a. Blake chuan rang lutukin light a on a, ka khum bulah a rawn ding lehnghal.

Kawngkhar a inhawn takah chuan rawn kun hniamin, a kutzungtang chuan ka nghawng chu a zut riak riak a, warning a ni tih ka hrechiang hle. Kei lah chu boruak a tam thei ang ber hip luh tum chuan ka lo la thaw kawk kawk a. Candice chuan tu emaw a mangtha ri chu ka hre thei a. Kawngka khar riin a zui nghal.

“Oh! Hey, unaupa. Rawn tihbuai che u……” a tih lai chuan Blake chu Candice en tur chuan a inher a. Min hmuh rual chuan a meng bial pawp pawp a ni ber mai.

“Awi karei, Rachel, i tha em?” ka bula rawn tlan phei a tum chuan Blake chuan a banah a lo man a.

“Nichin deuh kha Starbucks bulah tlangval thenkhatin an lo tibuai a, min rawn call nachang a hre hlauh hi a vannei khawp mai. Tunah chuan hlauhthawn tur a awm tawh lo, a la shock deuh anih hi.” A ti zui a.

“Enga?” Candice chu a te that a, a mittui tla mai tur pawh chu ka hmu thei. Enga? Nilo, nilo, nilo. Thudik ka sawi a ngai. Mahse ka tawng chhuak thei lo, ka mittui luang zawih zawih chung chuan ka lu chu ka thing ringawt a. Ka hrawkah chuan hnawhtu a awm tlat, ka la thaw kawk kawk thei chauh a nib er. Candice leh Blake-te hmui phun chu ka hmu thei a, mahse enge an sawi ka hre thei lo. A thim riai riai a, Candice khawih tum chuan ka phar chhuak niin ka hria. Mahse thim chu a chhah tial tial a, engmah ka hre zui tawh lo.

Link:
BBcode:
HTML:
Hide post links
Show post links

Local Advertisement

MOBILE SIAM ZIR DUH TAN!!!

Tech-Inn Mobile Repairing Traning Centre, Bazar bungkawn

Kum tin mi za chuang eizawnna kan siamsak a, Eizawnna tlaka thiam turin kan zirtir thin

Mizorama mobile siam zirna hmasa ber changtlung ber kan ni. Hrechiang duh tan Contact : 9612099411 / 9862016122


Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » February 28th, 2021, 12:36 pm

CHAPTER - 6

KASH:
“He thila koh kan nih chhan hi I hria ang chu tiraw?” Mason chu ka en ringawt a, a room-a sai lem lianpui hi a ngai ngawt ang.

“Oh, hre nang. Juarez kha hnek lo la chuan….” Ka riat nawi zui ta mai mai a.

“Kha nau rui khan chil min chhak ve khanglang anih kha. Ngawihsan tur chuan min beisei lo ang tiraw?”

“Vawikhat chil chhak khum I tawrhna pawh a ni chuang hleinem.”

“Damdawi a ruih vang anih kha. Ka hre reng a lawm.”
“Mason” tih pah chuan lu ka thin khum ta ringawt a.

Locker room kan luh theih nan ka badge chu ka tilang zauh a.

“Kha pa kha a rui lutuk, kawl I bun tir tawh a, eng pawi mah a khawih lo ang.”

Darthlalang bang lehlama nula thu chu ka nuih leh sak hnuah, kan Chief Office lam pan chuan kan kal nghal a.

“A hmel en mai pawh khan eng tharum mah a nei lo tih a hriat reng, a lakah chuan steroid hmanga chiu puam ang maia lian I ni.”

“Eng pawh chu nise, amah leh a naute kha thlaruk chhung zet kan veh tawh a, hnek kha chu a phu ve hrim hrim.”

“I chet dan vang khan koh kan nih ka ring. Hrep tak hian! Mahse nangmah vanga office a thu mai mai tura min tih vaih chuan ka damchhungin ka haw tawh ang che.”

Engah mah ngailo niawm takin hnar a tum dat a, mahse misual veh tura khawlaia chhuak theilo leh paper work khawih chu keimah ang thoin a chak hauh loh ang tih ka hria.

“Nang hian nikhat pawh min haw thei lo. Tunge chawm ang che?”

“Oh! Nangmah ngei hian min chawm ang. Mahse ka haw tho ang che.”

Chief office kawngkhar kan thlen chuan inthunun tum takin thaw kan la dun vang vang a. Ka thiantha ber leh hnaa ka partner ni bawk, Mason darah chuan ka beng thak thak a.

“I thiltih vanga buaina kan tawh tur hmachhawn tur hian I inpeih em?”

“Hrep che hian! Kash” Lo ti nghut mah se a nuihza insum chu ka hmuh hmaih bik lo.

Mason nen hian police academy-a in tawng kan ni a. Tampa Bay Police Department kan luh hnu lawkah, engvang teh hrep nge ka hre lo, kan pahnih hian partner turin min dah ta a ni. Partner kan nih hmain training hrang hrang kan paltlang tawh a, tunah hian narcotic division-ah undercover-in kan thawk dun ta a ni.

Mi sawi dan leh TV vela inhmuh thin anga nuam leh phurawm kha a ni hauh lo tih erawh min hriat sak ula ka duh.

Ka ban bul lam atanga ka kiu thlengin tattoo a khat vek a. Mason pawh drug zuar leh mi hlauhawm tak anga lang a ni ve bawk. Kan landan vangte pawh anih ka ring, kan Chief chuan he hna thawk tur hian min thlang chhuak ta a ni. Chief ruahmanna chu hnial duh viau thin mah ila, ka thianpa nen hian nuam kan tih ber a ni tlat si. Kan chhungte ngaihdan anih loh chang pawh a tam a, mahse kan hna a ni a. Police tam zawkin an tih duh loh anih ve bawk vangin kan koah a tla ta anih hi.

Undercover anga kum thum leh a chanve kan thawh tak hnu hian Tampa Bay area a drugs-a sumdawnna lian tham deuh deuh pathum lai kan man tawh a. SWAT team leh midangte puihna tel miah lovin Mason nena kan thawhrimna leh kan inpekna vang liau liau a ni.

Mason chuan kawngkhar chu a kik a, lehlam atang chuan phun deuh hluk thawm kan hriat leh hnuah lut turin min ti a. Kan thut fel rual chuan drugs hmanga sumdawngte chu kan veh zui thei tawh dawn lo tih ka hrethiam mai. Chief hmelah chuan a lang vek a lawm.

“Kut kawl bun tawh anih kha, Gates.” Chief chuan Mason melh run pahin a tithum chhur a. Mason chuan chhân loh a tha tih a hai bik lo.

“Kawl a bun tawh hnua I hnek vang khan I undercover hna chauh niloin, Ryan hming pawh I tichhia a sin.” Tih pah chuan min rawn melh ve thung a.

“Thiam thu sawi tur in nei em, Pute u?”

“Undercover police kan ni tih an hriat tawh vang a lawm silaia min tin. Narcotic team-te an rawn tlan luh lai pawh khan kan luah silaiin min tin reng tihte chu an hmu vek ang chu.”

Mason chuan a ti a. Ka thianpa thusawi chu ka pawmpui tih lantir nan lu ka lo bu ve nghut nghut. Kan thih teuh zia ka ngaihtuah chhuak a, ka thin pawh a phu rang sawt mai.

Kan hnaah hian ruihhlo leh sum tam tak a tel a, nitina kan um thinte leh kan veh thinte hi, dam thlahlel tawh chuang lo, thih pawh hlau chuang lote an ni thin. Mahse a vawikhatna atan nimina kan hnathawh khan min tihlauthawng a, ka nunna tihtawpa a awm teuh zia kha ka hrechiang em a ni. Kan naute khan kei leh ka thianpa nunna chhanhim tur khan theihtawp an chhuah ngei ang. Chu chu ka ringhlel hauh lo. Mahse kan lu a silai dawt nawr bettu mi pangate kha meth rui â bual leh kan thih duh ngawih ngawihte an ni tlat a ni.

“Chuan in nihna diktak hailan anih takah chuan kut kawl bun tawh chu hnek thei taah I inngai a. A lawyer rawih khan Police department min vau let a sin, Gates.”
Mason chu a thaw chhuak hawk a.

“Khawngaihin……” a tih lai mek chu sawizawm duh lovin a ngawi ta daih a. Chief hmel atang chuan tawng zawm loh atan a tha tih a chhiar thiam tlat.

Ngawi reng chuan kan inmelh tawn ran a, boruak chu a nuam lo kher mai. A tawp a tawpah chuan Chief chu a thaw chhuak ta halh a, ka thianpa nen chuan file min pe zui a.

“En teh u, police chet dan mawi lo tih vel hekna kha chu kan lo buaipui mai ang. Mahse under cover narcotic division-ah in thawh zawm theilo nghal tur hi chu keimah ang thovin mak in tih ve ka ring.”

“Tun tum hi chu a serious tlat. Thuhretu venhimna ang chu ni chiah lo mah se, boruak sosan zual chhung chu hmun dangah in awm a ngai. Thil dang I sawi leh hma in… hna chu in thawh chhunzawm reng dawn tho. Mahse narcotic kaihhnawih erawh chu a ni tawh lo thung ang a, undercover angin inla thawk tho ang.”

File pakhat zawk chu a keu a, “Kum hnih liam ta a college zirlai hmeichhe pakhat, rukbo a nih dan leh a ruang an chhar tak kha inla hre reng em?”

File-a chanchinbu chehthlak inbel tel chu ka bih vat a. Kan hnaah hian rilru zawng zawng ka pek thin vangin, chutiang thil thleng pawh chu ka lo hre reng reng lo. Diktak chuan pawi khawihna dangte chu thleng ve reng thin mah se, kan ngaihven hman thin lo. Ka rin ai daihin a case a lian dawn tlat. He nula hi hmeichhe pathum an rukbona anih bakah, rawng taka thah vek an ni a, ‘Carnation tualthahna’ tiin a hming an phuah hial anih hi.
Heng nulate hi an sawisak dan leh thah an nih dan a in ang vek a, an awmah carnation pangpar, a sendang leh a var tial dah sak vek an ni.

“Kan detective thenkhatte khan eng eng emaw chu an hmuh chhuah belh a, mahse bawhzui vak ngaihna an hre tawh lo anih hmel. A titu hi an man ngam lo nge, an hre lo tak tak tih pawh hriat va ni suh. Chhui zui reng ang chuan la insawi bawk mah se, midang tirh luh a hun tawhin ka hria.”

“A tha a lawm. Chuan…..?”

“Chuan, nangni pahnih hian inluhchilh dawn a ni.”

Ka ID thar chu ka en a, Mason driver license-a a hming tawp pawh chu Hendricks tho a ni tih ka hmu thei a.

“Min lo hrethiam la, hriatthiam loh ka nei tlat. Kan nunna humhim duh vangin hmun dangah min thukru dawn a, Texas ID nen engkim tihfel sa min pe a. Mahse tinge cowboy khuaah kher kher?”

“Kan naute zingah chuan I che rang ber a lawm, Ryan. Nge, Hendricks ka ti tawh zawk dawn che?” then suk pah chuan a ti a.

“He thil titu hi Texas chhungah I man anih chuan, kan thuneihna piah lam a ni dawn a, Texas dan hmanga rorelna lek kawh a ni thung ang.”

“Austin detective-te pawhin an thil hmuhchhuah ang ang chu an rawn thawn vek a, Monday-a inlan hman turin an beisei che u.”

“Monday a?”

Chief lah chuan kan thusawi a ngaithla duh der lo lehnghal.

“In hriat tur chu, tunah hian rinhlelh leh chhui zawn tur tak tak pawh an la nei lo a. James Camden an tih mai kha chu a awm a, mahse tute mahin an hriat loh bakah, an la hmu ngai lo. Mitthi chhungte hnenah pawh a thlalak thlengin an hmuhtir a, mahse an hmuh ngai loh thu an sawi a niawm e. Amah lah chhui zui tur a awm bawk silo a, hminglem leh thlalak lem a hmang pawh a ni maithei.”

James Camden an tih, kum 40 bawr vel tur, lukawlh tul mai chuan ka luak a tichhuak thei hial. Thawnthu vela naupang pawngsual hmang an tih thin hmelte pawh ang dawn dawnin ka hria. Chupa thlalak ka en reng lai chuan Mason leh Chief-te chu an inhnial ve mek bawk a. Kan hnathawh tur leh kan nihna thar bakah, kan awmna hmun tur pawh kan chhungte hnena sawi chhuak lo tura tih kan ni. Kan kalbo chhung zawng hian kan chhungte leh kan nihna hria, tumah biak pawh phalsak kan ni lo bawk. Chu chu tuna an inhnial mek chhan pawh hi a ni. Eng venhimna nge ka hrethiam nek love. Mason vang vek a ni.

“Bartender angin hna in thawk dawn a,paper-a inhmuh theih chin bak kha chu engmah hriat belh tur kan nei lo. I sum mamawh tur chu in bank account tharah khan kan dah vek tawh a, in apartment tur pawh tihfel a ni tawh.”

“Chutiang ringawtin…..” Mason tawng lai chu Chief chuan a pawt chat a.

“Bartending inthiam lo tih ka hria, in thawhna tur neitupa pawhin a hre sa vek. A hriat tur ang chin chu kan hrilhfiah vek tawh a, mahse thawk ve dangte chuan engmah an hre ve lo thung. Camden zawng hmu tur chuan a tul ang ang ti ula a ni mai. College lian tak awmna hmun a ni dawn a, tunah hian kan misualpa chuan a mi thah tur a zawng leh mek tawh maithei. Austin police department-ah in in report anga, helai ang thovin under cover a thawk tur in ni. An hnuaia thawk in ni rih dawn tihna anih chu. Tun atang chuan unau, cousin in ni tawh a. In thawnthu dang kha chu in duh angin phuah belh tawh mai rawh u. Ka sawi tawh ang khan, in awmna tur hi inchhungte bulah pawh in sawi tur a ni lo. Hna vangin in zin chhuak dawn tih erawh chu in hrilh thei ang. Tunah hian ka office atang hian chhuak nghal ula, Texas pan turin inbuatsaih nghal ang che u.”

Hall kan thlen rualin Mason chu ka melh nghek a, hnek chawrh mai ka chak viau a ni.

“Texas-ah maw? Hrep tak hian, Mason.

Nangmah vang a ni tih I hria em?”

“Khatin min dem ngawt thei lo ang, Kash. Juarez khan engkim a ruahman sa vek tawh tih I hriat kha. Thil thleng hi ka hnek vang kha a ni lo.”

“Ka nu a thinrim dawn lutuk tlat. Ka kalna tur hi hriat tumin a phi leh ruai dawn.”

“I nu chauh maw?” Ka nu leh pate bakah, ka nau hnenah a graduation hun ka telpui ang tiin ka intiam vek tawh. Mahse ka thei dawn ta lo anih hi. A chhan leh vang ka hrilh thei dawn bawk si lo. Ka nu mizia chu I hriat kha, a thinrim a puakkeh leh nasa ngawt ang.”
A dik, a puakkeh ngei ang.

Ngawi rengin building chu kan chhuahsan a, rinhlelh kai lo thei bera kan chhuah dan tur ka ngaihtuah a ni. Parking lot kan thlen rual chuan, ka ruahmanna chu ka sawi chhuak a.

“Bag lian vak lo ve ve chiah kan keng ang. A tul tak tak chin chiah. Nidanga kan chhuah thin ang thoin apartment kan chhuahsan ang a. Juarez mihringa nauten min lo enthla anih pawhin, min rinhlelh loh theihna turin.

"Hmundanga kal tur anga min ngaih chuan engkim a buai vek ang. Ka nu leh pate nen dinner kan ei dawn a, dar 10-ah ka rawn chhuak ang. In kan thlen hunah ka lut hmasa dawn a, engkim a tha vek em tih hmasak a ngai. Chuan, truck-a petrol thun turin ka chhuak leh dawn a, ka bike ka siam tir kha ka lam leh hnuah ka chhungte hmu turin ka kal chauh ang. Ka chhuah hnuah ka rawn hrilh che anga, I lut ve chauh ang. Chutianga kan tih loh chuan min ringhlel thei tlat. Dinner ei tura ka chhuah hma chu I nute thuthleng velah lova mu mai mai rawh. Zanin chu a tam thei ang ber inkhalh kual ka duh.”

Tih pah chuan Texas license plate thar kan dawn chu ka lek chhuak va bawk a, ka Florida number plate chu lekin, “Hei hi chu naktukah thlak chauh ila a that ka ring. Anih loh chuan hmelmate mit a tiza thei dawn tlat,” ka ti leh a.

Mason chu a truck bulah chuan a ding a, chahbi khalh nauh nauh pahin, “Kan hna chungchang hi I chhungte chu I hrilh dawn em?” a ti a.

“Dawn lo.”

“Awle, dar 10-ah ka rawn bia ang che. Keipawh petrol thun chu ka duh a lawm,” tih pah chuan a bu nghat a.

“Anih phawt,” tiin ka truck-a lut pah chuan ka number plate thar chu passenger seat-ah ka theh thla a, ka thaw zui hawk. Kum thum leh a chanve kan lo buaipui tawh thin ang tho kha a ni a, huphurh chhan tur a awm lo, tiin ka infuih mawlh mawlh a. He hna hi ka hlau a ni hauh lo, mahse ka awmna tur hmun leh ka thiltih tur hi ka chhungte bula ka hrilh theih loh bakah, eng chen nge kan inhmuh theih dawn loh pawh hre lo chunga ka kalsan tur chu hrehawm ka ti a ni.

Truck atanga ka chhuah hnu chuan Mason pawh a rawn chhuak ve nghal a. “Chahbi leh engkim I keng vek maw?”

“Aw, helam atanga kal tur hi anih hmel. 2104, chhawng khatna.”

Mason chuan thawm a awm leh awm loh a ngaithla leh phawt a. A reh khawp mai. Mason chuan kawngkhar vawnna chu a lo bih chiang ve mek a, thil danglam engmah a hmuh loh bakah a la inkalh tha vek bawk. Thenawmte tih phawklek kan hlauh vangin kan silai pawh kan phawrh duh lo a, mahse, kan thil tawn mekte ngaihtuah chuan inral ring sa lo a apartment pen luh chawt chu thil atthlak ber a ni hial ang. Kawngkhar kalhna ka hawn rual chuan thawm dim thei ang berin ka lut a, ka hnungah Mason pawhin min rawn zui ve zel a. Kan luh fel hnu chuan kawngkhar chu dimtein a khar leh a. Kan silai chu phawrhin inchhung chu kan enkual nghal zung zung a. Thil danglam engmah hmuh tur a awm lo. Kan bag-te la tur chuan inhnuai lamah kan chhuk thla leh a.

Kawngkhar tha taka kharin kan apartment chu kan chhuahsan a.

Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)