FORGIVING LIES BY Puii Sailo (Completed)

[Ngaia]

CHAPTER – 13

KASH :

A teuh lo mai, kawr ka ha dawn lo hrim hrim. A thusawi ang apiang zawm tur pawh ka ni hleinem. Kei hian ka hip hle tih chu hai rual a nilo, chu chu ka chiang ve tlat. Ka taksa a melh kual laia a hmai sen ṭan ṭan kha ka hmuh hmaih lo chiang khawp.

A awm nawm nan kawr hak ka tum reng reng lo. Ka room kawngka chu kharin ka silai leh badge-te chu ka thukru nghal a. Police ho nen meeting kan nei a, kan lo haw chiah vanga la indah fel hman lo ka ni. Lehkha pawimawh dangte pawh chu khumah chuan a la awm vek a. Lehkhate chu shelf chung ber, keipawhin ka hmuh phak lohah chuan ka dah a. Ka silai erawh chu nightstand-ah ka dah thung. Pindan ka chhuahsan leh hma chuan ka thlek kual leh thuak thuak a, engmah rinhlelh tur a awm tawh lo.

Kawr ha lo bawka ka chhuah leh vang chuan Rachel chu a lo sen leh ap ap tawh a, ka hawisawn duh bik teuh lo. Ka lo en reng tih a hriat chuan TV chu a hmet kual ta daih a. A hmaa ka va din pawh chuan TV chauh chu a melh lui tlat thung.

“Enteh, he movie hi i nei em?”

“The A-team maw? Neilo.”

A bulah chuan thatchhe zetin ka ṭhu thla ve a. “A hmuhnawm hmel khawp mai,” a ti a.

“Nang hi, i entawn a ni maw? I van ngeiawm tak,” a ti hlak a. Ka lo nui ringawt.

Movie list chu a enkual zut zut a. Ngawi rengin a che vel chu ka lo thlir ve thung.

“Awi, hei hi ka en dawn chiang lutuk. Bridesmaids hi.”

‘Um..i en duh zawng tak a ni ngei ngei ang. Vawikhat aia tam i en loh chuan dollar 100 ka chawi ang.”

The A-team a download zawh chuan kan en hmasa a, a hmuhnawm zek lehnghal. Kan movie en aia hmuhnawm ka tih zawk chu Rachel hmel kha a ni, ka en ning theilo chu a nih ber hi. Film dang kan en leh hmain Rachel chu chokaah eitur zawng turin a kal a.

“A van ho tak,” a ti hluk a.

“Engmaw ho chu?”

“Movie hmuhnawm pawh in hriat loh bakah, Ben & Jerry pawh in nei lo a nia. Ka awih thei lo, Kash. Engtin nge in dam khawchhuah theih zawk a?”

Ka lo rum nghut a. “Movie hmuhnawmte chu kan hre ve reng. Alien-te, Rocky leh Rambo bakah Die Hard-te pawh….”

“A dik chiah, chu reng chu a lawm ka sawi. A hlimawm loh hlawm si.”

“Office space, comedy pawh kan neih reng hi.”

“Nia, pakhat chu in nei ve. Chawimawina dawng tlak hial in ni.” Fridge chu kharin min melh kar a.

“In movie neih ho leh in en duhzawng kha a hmanlai tawh lutuk. Chuan ice cream pawh in nei lo bawk a. Kawr i hak a ngai tlat mai, vante hnenah khian lawmthu awm rawh se. Ice cream lei turin dawrah kan kal a ngai a nia.”

Kan thil lei turte ka en fel hnu chuan Rachel si chet tur chuan ka ding a. “Tinge i mit ka la tih hi i pawm ve mai loh a, Rachel?” tih pah chuan ka nek lui deuh salh a. A zam lutuk chu chil a lem ri khawlh a, aw a thian leh kharh a.

“A chhan chu ka mit i la tlat lo a lawm. Mipa nalh lutuk edit ang maite hian min hip lo. A bikin hmeichhe ṭhenkhatte aia hnute lian zawk phei chuan min hip hlawl lo,” a tih chuan ka insum theilo chu ka nui chhuak hawk hawk a.

“Dawt anih chu,” tih pah chuan ka inla hrang deuh a. Zah vanga a biang tai tek chu ka hmu duh tlat.

“Chuan, i tattoo te kha ka ngei zawng tak.”

“I ngei lo tih ka hria.”

“I hmui verh bakah i mit pawh. I sam tihdante hi ka ngei lutuk. I lu meh tir a ngai a nia. Khatianga i dah reng chuan i mutthilh laiin ka ziah kawlh sak vek ang che.”

Nuihsak pahin a khabeah chuan ka khawih sak zauh a, “I duhzawng min hrilh vangin a lawmawm e, nula. I hriat ve duh takin, i engkim mai hi ka duhzawng an ni vek.”

“A ni lo. I duhzawng ka ni bawk lo.”

“I muttui phahna a nih dawn phawt chuan chutiang chuan lo ngai phawt mai teh. Kan meeting khaikhawm nan hian min duh tih chu kan pawm tlang thei mai a ngem? Ka lan chhiat deuh theih nan ice crem ka ei ṭeuh a ngai a nia.”

Min melh nghal ram ram a, “Awi, i va han chimawm tak.”

“Chuan ka ice cream ei hun tur min tih khawtlai sak bawk a.”

“Keite chu ka hman tawh reng a lawm. Kawr pawh ila hak loh kha.”

“Ti hian kal mai ka tum deuh a sin. Nalh min ti ve bawk si lo, hmeichhe dang nalh min titu pawh ka tawng ve mahna.”

Min melh rum lutuk chuan ka nuih a tiza lutuk. “Pheikhawk bun lo, kawr pawh ha lo, no problem.”

Kenny Chesney hla sak pah chuan choka chu ka chhuahsan a. Rachel hi ka hnaih loh a ngai tih hre reng mah ila ka duh ang hian min duh ve turin ka mamawh tlat bawk si.

RACHEL :

Texas leh allergy teh hrep hi!

Texas-a ka awm hma khan allergy ka neih awm ka hre ngai lo. Mahse eng ber nge ka allergy pawh ka la hre chuang lo. A chhuah lai ve thung chuan ka hnar a pin vek ṭhin bakah ka aw a chhang ṭhin a, ka hmaite a vung ṭhin bawk a, ka mittui a tla reng bawk. Ṭap char char ang ka ni mai. Sexy lo ve tak ka ni.

Ka tissue paper hman ruahna bawm ruak paih pahin bathroom-ah, toilet paper la turin ka lut a. Nilengin sofa-ah ka ṭhu anga, ka inhru leh char char mai dawn anih hi.

Bedroom aṭanga ka chhuah rual chuan Kash lo lut mek chu ka hmu a, tukina Candice chhuah hnu khan kawngkhar hi ka kalh sia, engtin nge a lo luh theih le?

Min hmuh rual chuan a meng phawk deuh a, ka landan chu a ṭhalo viau anih ka ring.

“I ṭha em, Rach?”

“Um…..”

“Aih, i tihna angah ka ngai mai ang,” tih pahin ka toilet paper ken lai chu a melh a.

“I hritlang em ni?”

Ka lu ka lo thing mai a, sofa-ah chuan ṭhut leh pahin, “Enge i rawn tih dawn?” ka lo ti a. Ka bulah chuan rawn ṭhingṭhiin ka chal a dek a, ka khawsik leh sik loh hriat a tum anih hmel.

“Hritlang chauh em ni, khawsik i nei em?”

“Allergy mawle, eng ber nge pawh ka hre lo.”

“Damdawi i ei tawh em?”

“Aih, ka tho deuh chiah, i hmu thiam ve mai lo em ni?” tih pah chuan ka pyjama hak lai chu ka kawk a.

Hrep tak hian, ka mittui lah chu a lo tla ve sek lehnghal. Nuih sak pah chuan a ding a, “I lang nalh lutuk tho a nia, eitur kan lak sak ang che,” a ti a.

Ka lawm lutuk chu fak chiam duh viau mah ila ka hahchhiau chuan min tibuai leh tlat.

“Vawi ruk chauh ania ila hahchhiau Rach, ṭang rawh, vawi riat tal hahchhiau tur, choka aṭang chuan a rawn ti lang lang. Rum zet chuan ka melh nghek ringawt a, ka hnial dawn lai takin kawngkhar an rawn kik a, chhang tur a ka thawh chuan chhuata tissue paper them tla chu ka rap a, mawng sawh dawtin ka la tlui zui.

“Ka hringnun teh hrep hi,” ka ti chhuak hluk a.
Kash chuan nui hawk hawk chungin min rawn kai tho a, “Lo va ṭhu rawh, keiman ka va chhang ange,” a ti a.

“Aih, aih. Kan kawngkhar a nia, keiman ka chhang dawn.”

“Vawiin hi ningani anih bakah, dar 8:30 chiah ani. Mrs Adams anih hmel.”

A lo la hre reng maw? “Awi Lalpa! ningani a ni tih ka lo theihnghilh daih a lawm.”

“I theihnghilh anih ka ring reng a.”

Kash chu enin ka nui ve ta ringawt a. “Ngawi mai teh,” ka ti zui leh hram.

Kawngkhar pan tur chuan min kal khalh a, kawngkhar a hawn lai chuan a hnungah ka lo ding ve ringawt.

“Ra…oh, nang chu mipa i ni. Ih…..” Mrs Adams chuan a ti bah niai a. “Ih….Rachel a awm em? Min puih a ngai tlat. Ka zawhtete an kal bo vek a.”

“Chibai le, Mrs Adams.” Nui sang chungin Kash hnung aṭang chuan ka dak chhuak a.

“Rachel bawihte! An kal bo vek, min zawnpui vat a ngai. Lo tlan rawh!”

“Ih….ka dam vak lo a..” ka tih chuan a lu a thing a. “Ka zawhtete kha, bawihi.”

Ka hmui ka chip thei lo, ka hnap a tawlh mai dawn. Ka damlo tih hi a hmu theilo emaw ni le?

“Keiman ka lo zawnpui ang che, Mrs Adams.”
Nui sang chungin Kash chuan a lo ti a.

“Ka duatte khan mipa an ngaina lo a, i ko chhuak thei lo ang.”

Kash chu nemsawnin Mrs Adams chu ka en a, “Awle, anih chuan kan zawng dawn nia,” ka ti leh ta nge nge a.

“Awle,” tih pah chuan a inher a, a zawhtete chu a ko nghal a. “Ka duatte u, Butters!”

Hnar ping chung chungin, “Budders!” ka ti ve a. Ka chhuak tur chu Kash chuan ka banah a lo chelh a. “Kash, min dang suh, ka puihna a mamawh a lawm.”

“Inchhungah lut la, sofa-ah va ṭhu rawh. Ka sawi nawn tawh dawn lo a nia,” tih pah chuan kawngkhar lamah min pawt let a. Ka thu awih rawh tih melhin min melh ni maiin ka hria.

“Keiman ka zawnpui mai ang,” a ti leh hmuk a.

Kawngkhar bul aṭang chuan thil awm lo zawnga Kash kun zuk zuk leh Mrs Adams mak tihmel chu ka thlir reng a.

Inchhung ka luh hnu chuan damdawi dahna lam panin ka kal nghal a, ka duh ka hmuh hnu chuan ka in nghal bawrh a. Sofa-ah bawk chuan ka ṭhu leh a. Kash lo luh hnu chuan kan damdawi dahna lam chu a pan ding ve nghal a, a duh ang a hmu lo aniang.

“Rach, hetah hian i eitur awm chi engmah a awm lo. Dawrah ka va kal….enge i ken kha?” a tih chuan toilet paper tel chu ka lek chhuak a.

“I kut lehlam a mi zawk kha mawle?” Nyquil ka kenlai chu ka lek chhuak leh a.

“Tunah hian zing dar 8:30 chauh a nia, Nyquil i ei a maw?”

“Um.” Ka hnar ping lutuk chu ka ṭawng ṭha peih lo.

“Awle, kha kha min lo pe teh,” tih pahin ka thil ken lai chu min laksak a. “I damdawi eitur ka va lei ange, thil dang mamawh i nei em?”

“Aih.” Ka tih rual chuan toilet paper pawm chung chuan sofa-ah chuan kawm fein ka mu nghal a. Mutthilh leh daih ka duh, ka hnar hi a tla mai dawnin ka hria. A hnu deuhah chuan ka laptop chu on sain ka bulah a rawn dah a, lukham min kham tir bawk a. Ka lu a a fawh zeuh hnu chuan a chhuak zui nghal a.

Min ngaihsakna vang hian ka lawm a, naktuk zingah pancake tui tawkin ka siam sak ang.
Ka hahchhiau leh ṭhat ṭhat a, vawi nga chiah maw? Vawi riat hahchhiau turin min tih kha. Naktukah chuan pancake ka la siam sak thei lo maithei. Pawilo, inrinniah a ni mai.

Ka harh leh hnu chuan tumah an lo awm lo a. Mahse ka bula coffee dawhkanah chuan damdawi, tissue paper bawm khat, tui um khat leh lehkha them a lo awm a.

‘Rach,
Bar-ah thil pawimawh a awm thut vangin min rawn ko a, Mason pawh hna lamah a kal a ngai a. Min mamawhna i neih chuan min rawn call dawn nia. Thildang chu chokaah khan ka dah a, ka thil tur kha i lo ei vaih chuan damlo pawh nila ka ngaidam miah lo ang che.
Kash’

Ka chhiar zawh chuan ka ṭhen sak a. Ka thil a? Eng thil nge le? Chokaah chuan ka lut nghal a, ka nui chhuak hawk. Counter-ah chuan chicken noodle soup ṭin li, Gatorade bur riat, leh min koh fiam nana a hman ziah, sour patch bawm khat chu dah chhuakin a dang zawng chu ka khung ṭha vek a. Kash ang em em a damlo enkawl thiamlo hi an awm pawh ka ring lo.

Eng ang mi pawh chu lo nise, hepa hi ka hmangaih tawh ni berin ka hria. Lo ei suh a tih ngei mai chu bawm khat ka ei zo vek. A dang bawm hnih chu ka thukru daih bawk.

[Ngaia]

CHAPTER – 14

KASH :
Police department kawngkhar ka hawn rualin Mason chu a lo nui chhuak huk a.

“Chicken soup leh Gatorade maw? Hritlang ni lovin allergy a nei a lawm.”

“Engpawh chu ni rawh se, a damlo a lawm. A mamawh tur ni a ka rin zawng zawng ka lei sak vek.”

“I mutpui tawh pawh a ni si lo a, i va ngaihtuah ve.”

Mason chu hnek lo turin ka inthunun hram hram a ni. “Ngawi hmak rawh Mason.”

Ngawi rengin conference room lam chu kan pan nghal a. Pindan chhung kan pen luh rual chuan kan ding chawt a. Tampa Bay Chief hian hetah enge a rawn tih? A rawn kal tur thu hi engmah min hrilh lawh lo a, enge a rawn tih dawn lah kan hre hek lo.

Kan hma lak dan tur leh hnuchhuina kawng a kan hmasawn dante sawiin darker thum zet kan ṭhu khawm tawh a. Diktak chuan, a tawp lam phei chu ka hre mumal tawh lo, kan Chief hi engti turin nge a lo kal tih chu ka ngaihtuahna luahtu ber a ni. Mason chu ngun taka ngaithla angin lang mah se, keimah ang thovin rilru a pe biklo tih ka hre reng a. Chief meuh helai hmunah hian a lo kal anih chuan chanchin lawmawm leh thil ṭha lam a ni dawn lo tih kan hre tlat a ni.

Midangte an chhuah hnu chuan,” Pute u, hna inthawk ṭha tihte ka lo hria a, in lo thlen hma khan Detective Ryder nen kan lo inkawm tawh a, a lawmawm khawp mai.”

“Chuan, hetah hian min endik turin i rawn kal a maw?” Mason chuan lungawi lo zetin a ti a.
“Engtik aṭang khan nge i thupek pelin kan lo chet a, hetia umzui kan ngaih tak?”

Chief chuan mithmul a lo san khum ak a. “I ti dik khawp mai. I zawhna chhanna chu i hrechiang a lawm. Kan department-a in awmlaia i chet dan avanga helai hmuna awm ta hi in ni tih erawh chu i theihnghilh lo ang chu tiraw?”

Mason chu a ngawi nghal hmak a.

“In hnathawh ṭhat leh ṭhat loh en tura lo kal ka nilo. Nangni pahnih hi ka thawhpui tawhah chuan a ṭha ber inni tih hre lo ila chuan helaiah hian ka tir hauh lo ang che u. A bikin khatianga kawl bun tawh sa kut i thlak hnu phei kha chuan,” tih pahin Mason chu a melh zauh a.

“He ta tir lo che u hian ka suspend thei che u a sin,” a tih zawm leh a.

Hrep tak hian! Mason hian dawhkante hi a vaw chhe duh mai dawnin ka hria.

“An hekna che kha hnawl a ni tawh e. Chuan i lawmthu sawina pawh ka pawm e.”

“Ka lawm e, Chief.” Mason chuan a ti sap a.

“Min lo hrethiam la, Sir. Hetah hian engti turin nge i lo kal?” a thinrim hmain ka sawi zawh vat a ngai tih ka hria. Mahse ka ngaihtuahna luah tlattu chu ka sawi chhuah tho a ngai si.

“Ka sawi awmzia chu i lo lang thut bawk sia, ngaih i ti ṭha lo a lawm. Rin chhin ngaihna pawh ka hre lo, in lamah thil ṭhalo a thleng anih ka ring hman hial a nia. Engkim chu a ṭha vek maw?”

Ka zawhna chhang mai lo chuan a bula chair-ah chuan a ṭhu a, a nghawngawrh chu a siam ṭha leh te te a.

“Pute u, engmah ngaihṭhat lohna tur in nei lo. Kan nu nen Houston-ah chhungte tlawh turin kan rawn kal a, nimin zingah khan call ka dawng a, nangmahni that turin tu emaw ruaitu kha an man tawh a, tunah hian jail chhungah court-a a inlan hun tur a nghak mek anih hmel.”

“A…a ṭhat hlauh chu. Tunah chuan kan biruk a ngai tawh dawn lo tihna a ni maw?” tih pahin Mason chu ka melh vat a.

“Aih. Tuna in hna hi inzawh hma loh chuan hetah hian in awm rih anga, in hnathawh lai hi in chhunzawm ang. In chhungte bulah in awmna hmun in hrilh duh anih chuan in hrilh thei tawh thung ang.”

“Kan hrethiam e,” Mason chuan a lo ti vat a. Kei chu ka ngawi reng thung.

“Zanin hian hna in thawk dawn em?”

“Dawn lo, Sir.”

“Anih chuan beer in pahin in case khawih lai leh Tampa Bay-a in lo kir leh hun turte kan sawi dawn em ni ang Keipawh ka nupui chhungte bula awm ringawt chu ka chak bik hleinem.” A nui zui vur a.

“Mahse, he thil hi kan sawi dun a ngai a nia.”

“Eng chu maw?”

“In thup kan ngaih tawh loh chungchang hi.”
Mason chu a motor steering ben thak thak pahin a bu nghut nghut a. “Mahse kan awmna hi chu hrilh lo ila a ṭhat zawk ka ring.”

“Chu chu ka pawm e. Chuan, kan nulate pawh hi kan nihna diktak hrilh lo ila a ṭha ang.”

“Enga, engvangin maw?”

“Kan chhungte bula kan awmna hmun kan hrilh duh loh chhan ang tho kha mawle. An himna kan ngaihtuah a ngai. Kan nihna diktak kan hrilh chuan helaia kan awm chhan leh kan hnathawh kan hrilh a ngai dawn a. Florida-a kan thil tih ṭhinte pawh, an hriat loh kha an tan a him ber.”

“A dik tho mai. Mahse Rachel hi i kalsan thei dawn em ni?”

Ka lo meng kual ralh a. “Enge Rachel chu i sawi lan kher a, nangpawhin Candice kalsan i tum chuang em ni?”

“An in ang hleinem, i hriat kha.”

“Rachel hi dinhmun hlauhawma din tir ka tum lo. Chu chu nangpawhin i pawm a ngai. Min pawmpui thei dawn nge dawn lo?”

“Aw, a ṭha a lawm, ka pawm e. Mr. Chicken Noodle.”

“Hrep che hian.” Motor aṭanga ka chhuk hnu chuan kan nulate apartment lam pan chuan ka kal nghal a. Kawngkhar chu a lo inkalh vangin engemaw chen chu ka kik a. Chhangtu an awm lo, chahbi lem hmangin kawngkhar kalhna chu ka hawng a, tuman an hmuh loh ka beisei.

Rachel chu sofa-ah chuan a lo mu tawm kak a. Chhuatah chuan tissue paper hman hnu a thal pheng phung bawk a. Gatorade a chanve inzawh tawh chu a let ngat bawk a, ei suh ka tih ngei mai kha a bawm ruak ka hmuh takah chuan ka nui sak a.

A damdawi pawh a ei anih hmel. A khawsik leh sik loh hre turin a chal chu ka tawk zeuh a. A khua chu a siklo anih hmel. Rum ṭiah ṭiah pahin min rawn hnaih sat sat a.

“Rach, harh teh,” a beng bulah chuan ka phun sar sar a. Dimtein a hmaiah ka chul sak bawk. Zik mar ar ar pahin a rawn meng a, “Dar engzatnge ri tawh?”

“Dar 5 a ri ṭep tawh. I ril a ṭam em?” ka tih chuan a lu a lo thing a. A maimitchhing leh nghal daih. A hmuhnawm ka ti, nui hawkin a chalah chuan ka fawh sak a.

“Lo ei suh ka tih kha i ei vangin i ril a ṭam lo anih hmel.”

Ka thil sawi chu hria awm pawhin a awm lo, a muhil leh daihin ka hria. Thawm dim vaklo chuan ka nui leh a, “Tho la, tui lum sa deuhin inbual rawh. I zia sawt mai ang. I inbual chhungin soup ka lo siam sak ang che.”

A pindana a luh fel takah chuan kan apartment lam pan turin ka tlanchhuak ve nghal a. Ka pistol leh ka badge-te hi ka thuhruk leh phawt a ngai. Mason chuan dawt hrilh kher a ṭul a tih loh thute chu lo sawi ve bawk mah se ka ngaihthlak sak duh lo. Dawt ka hrilh vanga a him dawn anih chuan ka hrilh mai ang, a himna hi a pawimawh ber.

RACHEL :

Chokaa ka luh dawn lai takin kawngkhar kik ri ka hria a, sana ka melh nghal vat bawk. Dar 8:30 chiah, ningani a ni leh tawh emaw ni le? Mrs. Adams khawngaihthlaki bawk a niang.
Nui sang chungin kawngkhar chu ka hawng a, pawna lo ding ka hmuh rual chuan ka nui hmel chu a ral riau ria a, ka pumte chu a let nghal but butin hria. Nikhaw hrelo a ka tluk hmain kawngka hi ka khar vat a ngai. Mahse Blake chuan a lo vuan hman tlat, nem hawngin a rawn lut nghal a.

Nuih vur vur pahin, “Nangpawh Good Morning le.” A la ti zui.

“Chhuak nghal rawh!” ka ti ṭhat a.

“Aw…..hetiang hi chuan awm lo teh, bawihte,” tih pahin kawngkhar chu a kalh nghal hmiah a. Min kuah tumin, phar du chung chuan min rawn pawn a. Ka lo tawlh hnung ve zel bawk.

“Khatiang khan vawikhat mah min ko tawh suh.”

“Engtia koh nge i duh, lal fanu maw? Nge, ka duat ka ti zawk dawn che?”

“Engtia koh mah ka duh lo, chhuak rawh!”
Ka room-ah chuan ka tlan lut thut a, kawngkhar ka kalh nghal. Blake chuan a rawn chum bur bur a.

“Kawngka hi hawng rawh, Rachel.” A thinrim aw chuan min ti khur hial thei. Ka nightstand-a ka phone dah chu ka chuh vat a, Kash call ka tum a, mahse ka khur nasa lutuk chu ka pawssword ka hmet fuh thei lo. Kawngkhar chu a ri leh bur a, Blake thinrim hmel hlauhawm lutuk chu ka hmu lehnghal. Banga min nawr beh rual chuan ka ṭe tuar a, ka lu chu bangah chuan a tauh bur bawk a. Ka mit chu a vai nghal chum chum a, mahse in tihharh hram hram ka ngai tih ka hria.

“Tinge hetiang hian i awm luih tlat ṭhin, bawihte. Tihnat che hi ka duh lo a sin, mahse ka tan hian thil i ti harsa tlat ṭhin.”

Tawlhsawn ka tum chuan a keah ka in pal a, ka tlu dawn ta mai. Ka lu ka tauhna kha a la hai tlat. Blake chuan min lo man bet vat a, khumah chuan min hlangin min fawp tur chuan a rawn kun ta mai. Ka hmui chu hupin ka thle tawn sek a.

“Khawngaihin duhtawk rawh!” ka au chhuak leh a. Ka au ri hi tu emaw talin hria se ka van ti tak em!

“I hmui hi i chip thei lo anih chuan keiman ka chip tir ang che. Ka thusawi chu i hrethiam em?”

A mitah tak chuan chil ka chhak ṭhat a. Chu chu remchangah chuhin a vawnna aṭang chuan tal chhuah ka tum a, mahse ka hneh mawlh lo a ni. A hnung lam ipte aṭang chuan duct tape a rawn phawrh chhuak a, thil thleng tur chu ka hlau a ni. Hetianga a awm tlat chhan hi zawt duh viau mah ila ṭawng chhuak tur ka awm lo. Ka beidawng, ka ṭah chhuak lutuk chuan ka hrawk a hnawh tlat. Ka ṭap chhuak ta hlawp hlawp a, thawk pawh ka thaw ṭha thei lo.

“Hetianga tih kher hi a ngai lo tur a nia, bawihte. Mahse tinge a harsa zawnga i awm luih tlat ṭhin?”

Blake chuan ka nghawngah fawpin ka awm bawrah a fawp thla zel a. Ka kawr chu a hlim chho nghal hrawk bawk a. Ka awmbawr chu khuhtu a awm tawh lo. Bawkkhup ka tum chuan ka khelah manin khumah chuan min nam bet tlat a. Ka pyjama kekawr a pawh thlak leh takah chuan thawk pawh ka thaw ṭha thei tawh lo.

“Min duh tih ka hria a lawm, mahse hetianga ṭan der vak vak hi chu an uar tawh lo, a hmanlai tawh lutuk. Ka mutpui dawn tho tho che, chuvang chuan ṭang buai duh tawh suh.”
Ka benga a thaw lum huam huamte chuan ka luak a ti chhuak. Ka kawr a hlim chhoh khan ka hmai a khuh tlat vangin ka hmuiah chuan a fawp thei lo a.

“Hetiang thil hian a tiphur zawk che anih chuan ka ti hreh hleinem. Mahse engti zawng pawhin ka mutpui dawn tho tho che a, ka ta i nih angin ka duh angin ka che dawn a ni mai. Ka ta i nih hi.”

Ka taksa khur nasa lutuk chu a tawp thut a, nihaw hre lovin ka awm leh dawn anih ka ring. Ka tha tawp chuan ka tal leh a, mahse awmzia a nei lo. Tinge min ṭanpui turin tumah an lo kal loh, ka au ri kha hria an awm lo tihna em ni? Hetiang em em hian kan mihring puite hi huat theih a ni tih pawh ka hre ngai lo, thi se ka duh.

Blake hi thi se, thlamuang takin ka awm thei chauh ang. Kash ka ngaihtuah chhuak a, ka mittui chu dan ruallohin a lo luang leh a. Kash hi khawiah nge a awm daih le, tinge ani tal hi min ṭanpui turin a lo rawn kal loh?

Duh tawk a ngah hnu chuan ka nghawngah a rawn fawp a, “Ka ta i ni Rachel. Engtikah mah ka kal tir ngai lo ang che.”

Ka harh leh chuan rang lutukin ka ṭhu chhuah a, keimah chauhin ka lo awm tawh a. Ka hmui a charhna duct tape pawh kha a lo awm tawh lo. Ka room chu a pangngai thlap. Khumah chuan ka let tawp a, ka thinphu rang lutuk chu thunun tumin thaw ka la ham ham a. Ka nighstand-a sana chu ka en a, dar 8 a ri ṭep tawh. Candice chhuah hnu khan ka lo muhil leh anih hmel. Ka mumang anih kha, Blake a lo kal lo, mangchhia mai mai a ni tiin ka inhrilh mawlh mawlh a.

Mahse a tak a ang lutuk a ka inringhlel lek lek zawk. Ka thlan leh mittuiin a tih huh ka bedsheet chu suk turin ka hlip nghal sawk sawk a, hmuh pawh ka hmu peih tawh lo. Ka taksa pawh ngai a la awh thei lo, tui sa ver vawrin inbual ila ka ṭha mai ang. Tun hi Blake vanga mangchhia ka neih vawikhatna a ni lo, mahse ngaiah ka neih thei lo. Ka ha chu vawihnih lai nawt tawh mah ila, a fai pawhin ka hre lo. Ngaiawh leh tur chuan hun rei fe ka mamawh leh dawn anih hmel.

Ka inbual zawh chuan kekawr thawl hek hawk leh tshirt ka ha a, ka pa rugby sweatshirt hlui ka ha leh tawp. Nipui lai mah nise, ka mumang vanga ka taksa khur hi a la reh thei lo.

Choka ka thleng ṭep tihah chuan kawngkhar kik ri ka hria a, ka phu nasa lutuk chu ka zuang dawrh thei hial. Ka mumang ang chiah! Hlauhna chuan min rawn man nghal a, sana ka en a, dar 8:30 chiah a ni. Kawngkhar bawk chu a ri leh a, chet ngaihna pawh ka hre lo, ka mittui vang chuan ka khawhmuh a phe nghal ruai a, ka khur leh nghal der tawh.

“Rachel bawihi, i awm em?”
Mrs. Adams aw ka hriat rual chuan ka thaw chhuak hawk a, ka mittui tuai puat pahin kawngkhar hawng tur chuan ka kal ta nghal a.

“Chibai..Mrs……….Mrs. Adams.”

“Oh! Rachel. I awm chu ka van lawm tak! Lo kal vat teh, ka zawhte an bo vek a nia, min zawnpui rawh.”

“Ka…..ka…vawiin chu ka pui thei lo ang che, Mrs….”

“Nilo, min puih a ngai. Lo kal vat rawh, an bo vek a nia.” Tih pahin ka banah chuan a rawn vuan a. Ka lo tawlh hnung hrat chu hria awm pawhin a awm lo, mangan hmel tak chuan a hawi kual ruai a.

Chutih lai chuan Kash-te kawngkhar chu a rawn in hawng a, Mason leh Kash-te chu an rawn pen chhuak nghal a. An inthuam dan aṭang chuan workout turte pawh an ang. Engemaw sawiin an nui a, Kash-in min hmuh takah chuan kan lam panin a rawn kal a. Mrs. Adams chu a melh zawk hnuah chiang fe chuan min en a.

“Rachel?” a ti deuh ṭhat a. Mason pawh chu a rawn hawi vat a. “Rachel, thil diklo a awm em ni?”

“Ka zawhte, bawihte,” tih pahin Mrs. Adams chuan Kash chu mangan hmel fein a lo melh vat a.

“An bo vek a, Rachel hian min zawnpui a ngai a lawm.”

Kash chuan ngun fe mai chuan min en leh a, hnuai lam ka lo melh vat thung a. Ka ban Mrs. Adams vawn lohna lamah chuan a rawn vuan a. Dam thlapin Mrs. Adams chu a be zui a, “Mrs. Adams, Rachel hi a damlo a, keiman ka zawnpui mai ang che.”

“Oh! Mahse mipa i ni sia, ka zawhtete hian mipa an ngaina tlat lo a lawm.”

“An ngaina a lawm, kar hmasa pawh khan ka zawnpui tawh che kha. I hre tawh lo em ni Mrs. Adams?”

“Anih chuan lo kal vat rawh, kan zawn hmuh vat an ngai a nia.”

Ka ban a vawnna chu thlahin a inher nghal a. “Smokey Bawihte, anu bulah lo kal rawh le,” a ti zui nghal lauh lauh a.

“Rachel, i ṭha……” a tih lai tak chuan ka in choka lamah buzzer chu a lo ri a, kawngkhar nek hawng rawk khawp chuan ka phu a, ka zuang zawk a ni mah ang chu. Kash chuan min lo vuan vat a, ka taksa khur der der chu a hria tih hriat takin ngaihṭhat loh hmel zet chuan min en leh a.

“Mase, Rachel hi kan apartment lamah lo va hruai teh, ka rawn kir leh vat ang,” a ti a.

“Aih, aih, a ngai lo ka ṭha.” Tih pah chuan ka tawlh hnung hrat a. Mahse ka banah bawk chuan kaiin Mason kutah chuan min hlan a. Ka kut chu la letin ka ṭap lo chauh tawh.

“Min khawih suh!” ka ti tuar a. Ka bula ding pahnihte chu an phu deuh zawkin ka hria, an kut chu rang takin an phar chhuak nghal bawk a. Mason chu dam thlapa rawn ṭawng chhuakin.

“Bawihi, kan khawih lo ang che. Lo kal rawh le. Kan apartment-ah kan hruai ringawt dawn che. I ṭha em, i damlo em ni? Candice call sak tur chein min duh em?”

“Aih, khawngaihin….khawngaihin call suh!”

“Awle, ka call lo ang. Lo kal rawh le, keimahni hian kan enkawl ang che.”

An apartment lam pana Mason ka zui lai chuan Kash beidawn hmel zeta ding chu ka en reng a. Min ngaihtuah hmel fein min thlir zui ve reng. Mrs. Adams zawhtete chu a zawnpui ve nghal a.

[Ngaia]

CHAPTER – 15

KASH:
Eng thil nge thleng tehhrep kha. Mrs Adams in lam ka pan lai chuan kan apartment lam chu ka en reng a.

“Hei le, Mrs Adams. Heta hi an awm vek a lawm.”

“Oh! Ka duatte u. Tinge hetiang hian min tih mangan ṭhin? Ka ngai lutuk che u a sin.” Chair-a ṭhut pah chuan a lukhamte chu a kuah khawm a.

“Thil dang mamawh i la nei em, Mrs Adams?” Khawngaih takin nei lo ti hram rawh. Kan apartment a kir vat vat ka duh.

“Nei lo e, tlangval. Ka fate min zawn hmuh sak tawh a lawm.” Ka nuih luih sak hnu chuan, “Thursday-ah kan inhmu leh dawn nia, Mrs Adams,” ka ti a. Thil dang a sawi leh hmain kan apartment lam pan turin ka tlan chhuak nghal.

Kawngka ka luh rual chuan Rachel zawngin ka hawi kual nghal a. Sofa-ah chuan khup tawm atin a lo ṭhu a. Ngaihtuah nei niawm takin a melh ngai a melh tlat bawk.

Rachel ṭhutna lam ka pan lai chuan Mason chuan aw a lo thian kharh a, ka va hawi chuan min lo buk khum zauh a Rachel chu ka en leh zet a, Mason chu a room lamah ka zui lut ta zawk a.

“Sawi a nei em ni?”

“Nei lo. Mahse ṭhianpa, ka ngaihdan chuan….Rachel hi…..sawi zo ta lo chuan a ngawi daih a.

“Enge, Mason? Hrep hian.. I sawi tum chu sawi mai teh.”

Rawn kun hnaiin, “Luis leh a naute kan beih ṭum kha i la hre reng em?” a ti sap a.
Chu chu under cover anga kan thawh hnua kan hna hmasa ber a ni. Engtinnge kha thil kha ka theihnghilh theih ang?

“Hria e, mahse Rachel hian crack a rui ngai lo.”

“Nilo, nilo. Chu chu ka sawi tum a ni lo. An hmeichhe khawite kha i la hria em? Nawhchizuar ho nilo kha.” Mason chuan a ti leh a.

“Aw,”tih pah chuan ka thaw chhuak hawk a. Kawngkhar inkhar chu melhin Mason chu ka en leh a.

“Rachel chungah hian khatiang thil kha………….”

“Kash, a pawi ka ti. Mahse khatiang hmeiche ho ang chiah khan a awm tlat a ni. Khawlum zual lai takin sawtiang sawn a khur a, thlan tuiin a bual huh vek tho. A khua a sik lo a, inbual zo chiah tih a hriat reng bawk. I khawih pawh a hlau anih kha, ngaihtuah ta che.”

“Nilo, a ni thei lo.” Tih pah chuan ka tawlh hnung hret a.

“Enteh, Rachel hi i tan enge anih ka hria. Engmah hrethiam lo turah chuan min ngai suh. Mahse a laka i rilru put dan hi i thlak vat a ngai. I lo luh ruala a taksa ṭang ru nghal ṭeuhte kha i hmu ve lo em ni? Hetiang thil hi i hmu hnem lutuk tawh. Chuvang chuan hriatthiam tum ta che.”

Beidawng zetin ka sam chu ka tuai puat a.
“Tupawh ni rawh se, a khawihtu chu ka that dawn a ni mai,” tih pah chuan ka inher a, room aṭang chuan ka pen chhuak nghal a. Mason chuan rang zetin min pawt leh nghal a.

“Keimah hian bia ila a ṭhat zawk ka ring, nang chu lo inrawlh rih suh," a ti leh sap a.

“Ka kal ang, ka inrawlh dawn lo,” tih pahin a kut chu ka thing thla a.

“Ka rindan hi a dik anih chuan amah thlamuan theitu tur a mamawh bakah, him ni a a inhriat phawt a ngai. I va inlan leh chuan a hlauhna i belhchhah sak dawn a, amah pawngsualtu lak aṭanga chhan theitu ni a a hriat a mamawh hmasa ber. Anih loh chuan a hlau tawlh tawlh ang che.”

Ka thinrimna thunun tum chuan thaw ka la kawk kawk a.

“He thil hi engtika thleng nge anih i rin? A bula kan awm loh laiin Candice a awm deuh reng bawk si.”

“Aih, kan awm reng lo a, Candice pawh a awm reng lo. Hna kan kal daih a, a chang chuan Candice pawh a haw tlai ṭhin a lawm. Eng hun pawh a ni thei. Mahse Kash, thil thleng hi kan la hrechiang lo a, chuvang chuan ka kutah dah phawt rawh.”

“Nilo, keiman ka buaipui ang. Rachel hi ka hmangaih a, a tana ka awm a ngai. Min mamawh hun apianga ṭanpui thei turin.”

“Chuvang tak chuan a lawm ka kutah dah rawh ka tih che.” Mason hian a sawi dik tih ka hria, ka pawm theilo mai a ni.

“Mase, kal rawh tunah.”

“I tibuai….”

“Kal rawh.”

Mason chu a thaw hawk a. “Buaina belh chhah miah suh, Kash.”

Mason chu a ding sawn a, inbengdaih tum taka thaw ka lak leh vang vang hnu chuan living room lam chu ka pan a, mahse a awm tawh lo! Living room chu a lo ruak huai a. Khawiah nge Rachel kha, khawiah nge a kal? Rang lutukin kawngkhar lam pan chuan ka tlan nghal a, mahse hmuh tur a awm chuang lo. Ka hawi kual ruai lai chuan ka pindan aṭangin a lo chhuak a, a sam chu a chhipah a lo zial tawm vek a. Min rawn melh pah chuan tilui tih hriat zetin min rawn nuih var var a.

“Breakfast i ei tawh em? Pancake ka lo siam sak ang che.”

“Eng thu nge maw a sawi le?

“Ka ril a ṭam lo, Rach. Inbiak kan ngai a nia.”

“Rilṭam loh lai i neih loh kha,” tih pahin choka lam chu a pan a.

“I ril a ṭam chuan eitur kan lei dawn nia. Mahse tunah chuan thil thleng chungchang kha sawi dun phawt kan ngai.”

Min chhang lo chuan chokaah chuan a lut a, eitur dahna chu hawngin a duhzawng a la chhuak a.

“Mrs. Adams lo kal hun kha a fuh lo lutuk a. Ka lo inbual zo chiah nen, ka zawnpui duh lo anih kha.”

“Dawt anih chu. Nang hian kha pitar sawmna kha chhan ṭha tawk tak vang lo chuan i hnawl lo ang tih ka hria. Engvangin nge i ṭah?”

“Ka ṭap lo, ka mitah bawlhhlawh a lut anih kha.”

“Nula, choka aṭang khan lo chhuak la, thudik min hrilh rawh.”

Ka lam a rawn hawi takah chuan a taksa ṭang ru tlat chu ka hmuh hmaih lo chiang kher mai. A mitmeng buai nak pawh chu a thup vat a. Nui lui hak hak chungin eitur lam bawk chu min ngaihven san leh daih a.

“Khawvel awm tirh aṭanga a vawikhatna atan hmeichhia, choka chhuahsan tura thupek a ni,” tih pah chuan a nui leh a. Lemchan thiam ber pawh nise kei hi chu min bum hauh lovang.

“Hrep tak hian Rachel. Ka uang lo a nia. I chungah eng thil nge thleng ka hre duh. I invenna tur ai lemchan kha duhtawk teh.”

Insum rawh Kash, chu chu ka inhrilh a ngai hial. Rachel hi ka tihlau tur a nilo. Engkim min hrilh theih nan a rinngam ka nih a ngai a, ka venghim thei tih a hriat hmasak a ngai tlat a ni.

“Rach,” dam deuh zawkin ka ti leh a.
“Inbiak kan ngai a nia, sofa-ah hian ṭhuin titi dun teh ang, tunah.”

Engtin mah min chhang lo chuan living room lam chu a pan a, nichina a ṭhutnaah bawk khan a ṭhu veleh mai a. Thaw ka lak leh vang vang hnu chuan amah hmachhawn zawng chuan ka ṭhu ve a. Tunah tak hian amah hnem tura kuah vawng vawng chak viau mah ila thil ṭha ber a nilo tih ka hrechiang viau thung. Rachel chuan chhuat a melh ngar a, tun hi engkim ka sawi chhuah tir theih hun tur a ni tih ka hria. A inhung tlatna hi ka ṭhiah sak dawn a, kumkhuain a zalen tawh ang.

Mason nena kan ngaihdan kha thudik nilo hlauh se ka ti lutuk chu ka ṭawngṭai ve hial a lawm le. Midangte ka dawp tawh ṭhin dan thoin an thuruk leh thil zep tlat chu hre vek tawh angin zawhna ka zawt ṭan a.

“Khapa kha tunge min hrilh rawh, i chunga khatiang thil titu kha tunge min hrilh rawh." Ka tih chuan mak tih vanga meng phawk fe chung chuan a rawn hawi chhuak vat a, mahse a hawisawn leh vat thung.

“I thil sawi awmzia hi ka hre lo.” A khur leh dar dar tawh a, a hma ang bawk khan a khup chu tawmin, a kuah khawm leh tawh a.

Nilo, Rachel, hrep tak hian. Nilo, hetiang chuan awm miah suh tih mai chu ka duh a. Keimah zawk hi inthunun ka ngai nasa hle mai. Min chhanna chu ngai pawimawh duh lovin ka zawh chhunzawm leh a.

“Engtikah nge kha thil kha a thlen?”

“I thusawi awmzia hi ka hre lo,” a ti leh a.

“Tunge a hming?”

“Tu chu maw?”

“I hmelhriat a ni em?”

“I thusawi awmzia hi ka hrethiam lo tak tak, Kash.”

“Amah chu i hriat zawng a ni. He thil hi Candice hian a hre ve em?”

“Engvangin nge hetiang hi min zawh?” a ti leh sap a.

Karei, bawihte. Hetiang thil ka zawh che a ngai hi hrehawm ka ti lutuk tlat. Ka ngaihtuahna hi sawi chhuak thei ka ni lo.

“Engtik laia thleng nge?”

Chutiang chuan a ngaiah kan kual kan kual a, ka zawh dante chu thlak kual ve bawk mah ila chhanna ngai vek tur a ni tho. Minute 10 zet ka zawh kual hnu chuan a mittui a rawn luang ngiai ngiai a, hnem tura ka kuah chak lutuk chu ka sa pup pup thei hialin ka hria. Mahse a hmaah chuan pangngai taka lan ka tum lui hram hram a. Amah hian engkim a sawi chhuah vek a ngai tlat, a ngaihtuahna tibuai turin engmah ka ti tur a ni lo.

“Engtikah nge pawngsual i tawh, Rachel?”

“Tuman min pawngsual lo!” a ti ṭhat a. A hmai chu hupin a inhnit zui hlawp hlawp bawk. A ṭahna avanga a taksa khur hlawk hlawkte chu ngawi rengin ka lo thlir tawp a, a ṭah ban hun nghah loh hcu tih theih ka nei rih tlat lo.

“A ti lo…..a zo hman lo…Candice a lo haw vangin!” a ti bah nuai a. A la insut hlawp hlawp reng a. “Min sual a…min khawih hman…..mahse Candice lo haw vangin a zo hman lo. Theihtawpin ka sual let ve a, mahse ka nghawngah a rek tlat a, ka thaw thei lo.”

“Anih chuan, Candice pawhin a hria tihna a ni em?” ka tih chuan rang zetin a lu a thing a.

“Ka…ka…hrilh ka tum a, mahse min ngaithla duh lo. Ka thusawi kha a ring lo. Tumahin khatiang thil kha a tih duh an ring lo ang. Mahse ramhuai anih kha, Logan.” A tih lai chuan mittui luang ngiai ngiai chungin min melh kiau a. Ka thinlung na lutuk hi ka puakkeh lo chauh a ni. A thusawi chu rin sak turin min duh tih lah ka hai lo.

“Sawi chhuak mah ila tuman an ring dawn chuang lo che a ti a. A ta ka ni tawh a, tu midang mahin min khawih ve a phal dawn lo a ti bawk. Ramhuai anih kha, ka ti tak tak! Kan university-ah a thawk ve a, ka major vang hian nitin kan inhmuh a ngaih phah a. Sawi chhuak mah ila tuman min ring lo ang, Candice pawh tiamin. Mi zawng zawngin an ngaina vek.”

Chu mihring dam tlaklo chu Professor tihna em ni?

“A hming, tunge a hming?” ka zawhna chu min chhan loh vang chuan a hmaa ka zawh tawh kha ka zawt nawn leh a.

“Chu chu engtika thleng nge, nizanah em ni?”
Mak tihmel a pu lek lek.

“Nilo..nilo.. Thil thlen hnu khan ka la hmu leh lo. University kan chhuahsan hma, kar khat vel la awmlaia thleng kha a ni.”

“Anih tukina thil thleng kha?”

“Nizan khan ka mumangah ka hmu leh a. Kan apartment-ah hian a lo kal a, sawi zawm theilo chuan a ṭap leh a.

“Nizan kha chuan a zawh hmaa ti tawp turin tumah an lo kal lo.”

Rachel leh! Tunah hian amah kuah aia thildang tih chak engmah ka nei lo. Chutianga ka ti anih chuan a hlauhna ka belhchhah sak dawn a, boruak hi a tichhe vek dawn.

“Chuan, a tak tak a ang lutuk,” a tih leh chuan ka puakkeh mai dawnin ka hria. A ṭap leh a.
Hun tlem pe ila a ṭhat ka ring, keipawhin chu chu ka mamawh. Ka ṭhutna aṭang chuan thoin ka pindan lam ka pan a. Ka kekawr bul chungah chuan sweatpants hain, sweatshirt ka inthawlh nghal a. Engtin nge a la khurh reng theih le? Kei lah chu ka thlan nghal pup pup mai sia.

Ka kawng hriat ve chhun hian a thlamuan zo lo anih chuan ka duh angin ka che dawn tih chiah ka hria. Eng thil pawh ti turin atan hian ka awm reng tawh ang. Living room-a ka let leh chuan a lo ṭap tawh lo a, mahse inthunun a tum hle tih chu hai rual a ni lo. Chokaah lutin tui um hnih bakah fiante leh ice cream a ngainat em em Ben and Jerry chu ka la a, a bula coffee table-ah chuan ka chhawp sak a. Remote chu banin a movie duh em em Bridesmaid chu ka hmet chhuak nghal bawk a.

A hlimna tur anih chuan eng thil pawh ka ti mai ang. A bula ka ṭhut rual chuan TV volume chu ka ti ring a, ice cream pawh chu ka mal chungah ka dah bawk a. Ka chet dan chu mak tihhmel zetin a lo en reng a. Chutah mithmul san ak chungin min en leh a.

“Eng thil nge i hak kha?” a ṭah nasat vang khan a aw chu a la khur deuh a. Eng danga chhang lo chuan tui um khat chu ka pe a.

“Nang pawhin i ha a, hetia ka lo hak ve hian nuam i tih phah deuh ka ring a.”

TV chu melhin keimah bawk chu min rawn en leh a, nui var var chungin ka ice cream ken lai leh fiante chu min laksak a. Vawiin atan chuan zawhna dang zawh belh ka tum tawh lo, engkim hriat duh viau mah ila a tawrhna tur siam belh ka tum lo a, mahse a chunga khatiang thil titu kha ka zawng chhuak ngei ngei ang tih chu ka intiam sa a ni. Tunah chuan min ring thei tawh tih a hriatthiam tawh ka ring a, a duh phawt chuan engkim min hrilh thei tih hi hria se ka duh ber. Chumi hun chu ka nghah a ngai. TV en ang chuan awm mah ila, a che vel chauh chu ka thlir ṭhin. Ka rilruah pawh thil dang daih a awm.


In fel hlawm e mai, ka bonus pawp che u.....

[Ngaia]

CHAPTER – 16

A ice cream eina bawm ruak min pek pah chuan ka dar nghengin ṭhu zui a, ka lo kuah nghal vat. A hnu deuhah chuan, “Ka lawm e, Kash,” a ti sap a.

“I tan chuan eng thil pawh ka ti ang, Rach. Min mamawh hun apianga i biak theih turin ka awm reng bawk ang.”

A chalah chuan ka fawp vang vang a. “Chuan, ka venghim reng bawk ang che.” Ka thutiam ang chuan ka ti ngei ngei dawn tih ka chiang hle.

Mason walk zo a lo kir leh pawh chuan TV enin kan lo la ṭhu a. A inbual zo, a room aṭanga a lo chhuah leh chuan sweatpants leh sweatshirt a rawn ha chhuak ve a, lu min rawn buk khum zauh. Ice cream bawm khat chu lain Rachel bulah chuan a rawn inhnawh ve tawlh tawlh a. Rachel chu nui hawk hawk chungin ka lamah a rawn tawlh phei sat sat a.

“Nangni pahnih hi in fel ber msi,” a ti niah niah a.

“In pahnih chauh hian nuamsa taka ka ṭhuttir che u inring em ni?” Mason chuan a lo ti bawk a.

“Bawihi, engtin nge nipui vanglai tak hian hetiang thawmhnaw lum hi i hak theih zawk le?”

Rachel chu min ngheng ar ar chungin a ṭhu a, a ke chu Mason mal chungah chuan a hlang a. Mason chuan duat tih hriat takin a khupah a lo chul sak hauh hauh a. Rachel chu a TV en vang chuan a nui hak hak a, chu chu remchangah lain Mason chuan min rawn melh vat a. A mitmenga zawhna chu hrethiam takin ka lo buk khum zauh a. Lainat hmel zetin Rachel TV enlai chu a en reng a, engmah sawi lovin a kutah a chelh sak bawk. Rachel ngaihṭhat lohan turin eng thil mah tih lan a tum lo tih hriat tak chuan a thaw chhuak ham ham a. A hmela a thinrimna lang chhuak leh a titu thah a chakzia chu ka hai hauh lo thung. Min rawn melh leh a. Ka ṭhianpa nen hian engmah sawi chhuak lo mah ila, kan inhrethiam dun hle.

Diktak chuan engmah min hrilhfiah a ngai lo zawk a ni. Kan mihringa kha zawn chhuah ngei ngei kan tum dawn a ni tih hrethiam tur hian kan thawk dun rei tawk tawh. A thil tih man chu kan pek tir ngei bawk ang. Rinhlelh rual loha chiang a ni.

“Nula, Harh teh!” tih pah chuan a khum chu ka sawi a. Ka au ring bawk nen, Rachel chu a rawn ṭhu chhuak hluai a, hlauthawng zetin a room chu a melh kual ruai a. Min hmuh rual chuan a thaw chhuak hawk thung.

“Karei leh, Kash! Lir a nghing emaw ka ti hman a lawm.” Tih pah chuan a sam hnawk niai chu a huih mam a.

“Dar engzat nge? Dar 7 maw? Kash, engemaw i hriat le, dar 7 chauh a la rik hi?”

“Tho la, insiam rawh.”

“Aih,” tih pah chuan a mu leh a, a inkhuh ṭha zui nghal sat sat. Mut tir leh ka tum tawh lo.

“Last warning anih hi, Rachel. Tho vat rawh.”
Min chhang lo hcuan a bu nghat ringawt a.

“I van luhlul tak e aw!” tih pahin khum mawng lamah chuan ka kal a. A rizai sin lai chu ka pawh thlak sak hmiah.

“Hrep tak hian, Kash. Ruakin lo mu ta ila engtin nge i tih ang?” a ti ṭhawt a. Mithmul chhin akin a taksa chu ka melh kual a, ruaka a awmlai chu ka hmu hreh teuh silo.

Nilo! Ka ngaihtuahna avang chuan ka mipatna a danglam tlat. Ka jersey kekawr bul hak hian a khuhbo thei dawn hauh lo. Kash, Mrs Adams ngaihtuah vat rawh, a zawhte lemte pawh kha.... Ngaihtuah vat rawh!

“A dik, mahse ruakin i mu tlat lo. Chuvang chuan tho nghal rawh le.”

“Darkar chanve chiah min muttir leh rawh. Ka mut a la chhuak lutuk.”

“Chu chu ka thiam loh a ni hleinem. Mutna hun i nghah lutuk, i mu vat duh lo anih kha.”

“Khawngaihin, Kash.” A ti leh nang nang a.

“Khatin ner nung suh, a sexy lo teh mai a nia.”
A ṭawng leh hma chuan ka pu tho nawlh a, bathroom lam ka pan pui nghal. Ani lah chu a ṭe ṭhat a, a rem lai laiah chian min chum ve nghal miah miah bawk.

“Khawiah mah ka zui dawn chuang lo che, zing dar 7 chauh a la rik hi. Nang hi i a tawh nge, engemaw i hriat le? Leiah min nghat vat rawh…Aiah, a na a nia, i dar hi a van ruh em em ve. Dar ruh zet i nei tih i hria em?” Shower ka on lai chuan a tal leh laih laih a.

“Min dah thla vat rawh Logan Hendricks. Anih loh chuan kan ṭhenawma in lo insawn ta hi i inchhir dawn khawp mai.”

“A teuh lo mai, ka nau thur thlumte.”
Ka walk-na thawmhnaw chauh la ha ka nih vang chuan ka pheikhawk chu ka tlawh phelh a, bathtub lian zetah chuan ka luhpui a.

“Ramhuaipa, min thlah vat rawh.”

“I tho phang ṭawngkam chu a mawilo hle mai.”

“Ka that dawn che.”

Ka nui suk a, a thinrim pawh hian a duhawm tho anih hi.

“Chuan nang lemchan thiam i ni thung ang.”

“Tui hi a vawt lutuk,” a ti leh tuar a. Tunah chuan a thinrim pawh a zia ta anih hmel.

“Nang hi…..engtin nge ka tih dawn che le?”

“Ṭha taka tho turin hun ka pe che a, i tho duh lo lui tlat anih kha.”

“Ka mu ve chauh a lawm!”

“Rach, tunah hian zing dar 7 a ri tawh a, nizan dar 9 ah kan in aṭangin i haw a, engvangin nge i mut ve chauh, enge i tih?”

Min chhanglo, mi pawh a sual let tawh lo.

“Enge….i tlawm mai dawn em ni?”

Min la chhang chuang lo. A muhil leh zawk emaw nile…?

“Hey, nula. Ka darah hian i mutthilh vaih chuan……..” ka tih lai chuan engemaw a sawi zauh a.

“Engtin maw i tih?”

“Ka muhil ngam lo a lawm.” A ti sap a. Ka lo maimitchhing ringawt thung.

“Oh, Rach.” Muangchangin ka nghat a. Ka hmaah chuan dintirin shower hnuaiah chuan ka kut chu ka phar ta ringawt a. Hetianga ka tih chhan hi ka hre lo, mahse he tui lak aṭang pawh hian venhim theih ka duh ni berin ka hria.

“Tinge min rawn call loh?”

Thawk halh pahin lu a thing a.

“Eng atan maw, Kash? Thlan hluama ka bula ṭhu leh turin maw? Chuan thil engmah thleng lo ang maiin i awm leh dawn em ni? Khatianga min khawngaih tur khan ka duh lo che, atthlak taka ka khawsa lai kha hmu lo la ka duh a sin.”

“A atthlak reng reng lo.”

Thawk chhuah leh hawk pahin shower chu ka off a, towel chu lain ka tuam nghal a.

“Tikhan lo inthlak la, ka rawn kir leh vat ang.”
Tih pahin tub aṭang chuan ka kai chhuak a. Keipawh chu ka huh ve vek tho a, inthlak vat ka ngai. Ka pheikhawk chu lain kan apartment lam chu ka pan nghal a.

Nimin khan Rachel kha Mase nen kan bulah a awm nileng ṭhak a. Candice lo haw hnu pawhin kan apartment-ah a rawn tlang ve mai a. Kan thawmhnaw hak chu mak tizetin a melh kual a, zawhna chu min zawt bawk mah se kan chhang lo. Mason nen kan vaia eitur, zanriah lei turin an chhuak leh a. Kan eikham fel hnuah an haw ve ta chauh anih kha. Rachel hi amah chauha awmtir ka tum tawh lo a, a ṭhiannu awm loh chang pawhin kei emaw, Mase bulah emaw a awm zel tawh ang.

Rachel chu engemaw zawh belh leh theih ka inbeisei viau nain, a nui hmel tak tak ka hmu leh tawh a, a boruak tihchhiat sak ka duh leh ta lo zawk a. Kha, a professor emawni, sawnchhepa kha ka zawng chhuak dawn a, engkim ka hre vek dawn tho tho.

Ka inthlak zawk chuan Rachel-te apartment lam panin ka kir lehnghal a, kan tih ṭhin dan pangngaiin kik lem lo chuan ka lut leh mai a. Hmuhnawm ka tih em em danin Rachel chu a lo la tum deuh bar a, ka nuih let suk thung. Ka kaihthawh hmaa microwave ka set chu ka ngaihven san daih a.

“Engtin nge cinnamon rolls hi ka microwave-ah hian a in ur theih?”

“I tho phang kha chu i thinchhe leh dawn sia, min hauh hmain ka lo ur lawk diam anih hi. I hnar suk suk lai kha.” Ka tih chuan mak tih vangin a mithmul a san deuh ak a.

“Engtin nge i rawn luh theih?” Chahbi lem ka hmang tih chu hrilh chi a ni teuh lo.

“Candice hnenah kalh lo turin ka hrilh a lawm.”

“Anih tak chu.” Rachel chuan a ti leh sap a.
Sofa-a ṭhut pah chuan, “Chuan, min rawn kaihthawh hma chhan chu min hrilh thei tawh a ngem.”

“Breakfast ei zawhah le.” Oven aṭang chuan cinnamon rolla chu ka pawt chhuak a.

“Hey, Rach. Chawlh chhung hian hnathawh i tum ve lo em ni?” Rang fein a rawn hawi chhuak a.

“Hnathawh tumna ka nei lo, chu chuan a tibuai deuh che em ni?”

Dar chhin ak pahin, “Ka zawt mai mai che,” ka lo ti mai a.

“Apartment luah man hi i chhungten an tum sak che tihna em ni?”

“Ka…” A ngawih leh daih vang chuan a ṭhutna lam chu ka hawi vat a. A hmel chu a dang leh sawp sawp tawh. Ka thil tih lai chu dahin ka pan phei nghal vat a, mahse inthing harhin, chiang tak mai chuan min melh let kar a.

“I pa sumin in apartment cheina tur engkim i lei hnuah, nu leh pate sum ring loa intodelh tur chuan min zirtir tum miah suh.”
Ka ṭawng chhuah hmain ngun taka ka inngaihtuah a ngai tih ka hria. Inveng takin a ṭawng leh tawh tih ka hre mai a.

“Engvangin nge hetiang hian i inhung beh tlat hi ka la hrechhuak em em ang. Mahse tunah chuan a ni rih lo. Khatianga ngeiawm khan awm fo teh suh. Anih loh chuan i mawngtamah khan ka beng hrep mai ang, kar khat lai ṭhut pawh ṭhu thei lo turin.” Ka tih chuan mak tihmel zetin a mitmeng pawl rawm chuan min melh kal a. Engti zawng pawh hian a lang sexy em em reng mai anih hi. Ka kal lama thil danglam awm chu ka kekawr hian a khuhbo theih hram ka beisei.
Mrs. Adams ngaihtuah leh vat rawh, a zawhte lemte nen khan. Kash, Mrs Adams kha…..

Choka lamah bawk chuan ka kir leh a, cinnamon rolls ka siam kha ngaihtuah luih ka ngai.

“Zawhna khirh tak pawh anih loh kha, Rach. I chhungte chawm hlawm pawh ni la, kei hian engmah sawi theih ka nei lo. Zirlai i la ni a, thil pangngai ania lawm. Hnathawh duh loh chhan i nei anih chuan hriat ka duh dawn a. I duh phawt chuan hna chu ka hmuhsak thei ang che, ka thawhna bar-ah pawh hian waitress an mamawh belh reng a lawm. Nimin aṭang khan ngaihdan thar ka nei a, khapa vang khan hna pawh i thawk ngam lo anih ka hlau deuh a. Mahse hna i thawh chuan i rilru lak penna tur i nei anga a ṭhat zawk ka ring. Nangmah chauha i awm chuan i ngaihtuahna i kawm fo dawn tih ka hria.”

Rachel chu ka melh ru dek dek a, a hmui hnuailam pet chungin tukverh aṭang chuan pawn lam a lo thlir daih a. Ngaihtuah a nei chiang khawp mai.

“I thu thu a nia, mahse ka sawi tawh ang khan i tana ṭha tur ka ngaihtuah vang chauh a ni. Hma lam an zel tur a i rahbi hmasa ber leh pawimawh ber a ni dawn bawk a sin.”

“I sawi dik khawp mai. Hmalam pan zel tur ka ni,” a ti sap a.

“Kha mangchhia khan a la tibuai reng che anih chuan ila kalsan lo tihna a ni.”

Thlengin cinnamon rolls chu ka chawi phei a, a bulah chuan ka ṭhu ve nghal a. Kan inkarah ka eitur chawi phei chu ka dah a, ngawi rengin a ei mawlh mawlh a, min en duh miah lo. A melh ngai chu a melh leh veng veng ṭhin a, mahse engmah ka la sawi duh lo. Ei zo phawt rawh se.

“Thil thleng kha ka bulah nilo i sawi chhuak tawh em?” A lu a thing ringawt a. “I nu leh pate emaw, police hnenah pawh i la sawi chhuak miah lo maw?”

Muangchanga inherin min rawn en a, engemaw sawi tum niawm tak chuan a ang zuau a, mahse ka lo ṭawng khalh vat a.

“Ka bulah inven a ngai lo, thudik chauh aw, thlum thur.”

“Khatiang khan min ko tawh suh, ka ngei a nia,” tih pah chuan min melh ram ram a.

“Keipawhin mahni inveng reng renga i khawsak hian ka ngei ve tho.” A nuih luih sak hnu chuan a hawisawn leh daih a.

“Chin ṭhan anih hi,” tih pahin dar a chhin ak a. A khabeah chuan dawmin ka lam hawi tur chuan ka kuai her a.

“Ka ti tak tak a nia, Rachel. Ka bulah chuan inven a ngai lo, hahdam takin awm ka la duh.”

“I hrethiam lo a ni..”

“Ka hrethiam lutuk che. I natna leh i tawrhna hliahtu atan i hmang anih kha. Chu chu nangmah i invenna a ni bawk a. Mi ṭhenkhat lakah chuan a fuh maithei, mahse anihna takah chuan i hnawt bo zawk a sin. I na anih chuan min hrilh rawh, i tan ka awm reng dawn ka tih tawh kha. Mahse he i lemchanna hmang hi chuan min bum ve lo ang. A chhan chu ka tlanchhiat san ve dawn lo che. I hrethiam em?”

“Aw.”

“Ka zawt leh dawn che, i nu leh pate emaw police-te paw hi hrilh miah lo maw?”
A ang leh zuau a, a kun leh daih. A hnu deuhah chuan rawn hawi chhuakin ka mitah tak min en a.

“Tuman an hre lo,” a ti sap a.
Sofa ngheng chuan ka ṭhu rem te te a, ka sawi zawm leh a.

“Rachel, thil thlen dan kimchang min hrilh turin ka duh che.”

“Aih…Aih…”

“Rachel, a harsa tih ka hria. Mahse i sawi chhuah a ngai tlat. Tunah hian keimah chauhin ka hriatpui che a, min hrilh vek la a ṭha ber ang.” Ka tih pawh chuan a lu a la thing a.

“Hei hi hmalam i panna tura i tih tur hmasa ber a ni. Harsa mah se i hmachhawn a ngai. I pehhel thei lo.”

Min chhang lo, engemaw chen chu kan ṭhu ngawi reng a. A chunga thil thleng min hrilh duh laiin a mipa hming a sawi duh tlat lo hi ka hrethiam lo. Ka hna vang hian mi hrang hrang ka hmachhawn tawh a, thil rapthlak tak tak ka hmu tawh. Min ring rawh, i rin phak baka rapthlak pawh a ni hial ang. Mahse tuna ka hmaa nula ṭhu mek thusawi hi chuan min tidanglam tlat. Ka hmelah chuan engmah lang lo mah se, ka kut leh ka thazamte hi ka thunun thei lo. Ka in hum ruh ngawt ngawt ringawt mai a ni. Rachel hian pawngsual chu a tawk ngei a, mahse kha mihring tenawm khan a tum a puitlin hman lo a, a duhtawk a ngah hman lo kha ka lawm tih hian a sawifiah phak lo. Candice chungah pawh lawmthu sawi ka chak phah hial a. Engpawh chu nise thil thleng kha chu a danglam phah chuang hauh lo, ka that chak lutuk hi ka lungte pawh hian a ṭhatloh phah mai ka hlau a sin.

Thil thlen dan min hrilh zawh chuan ka hnem a ngai tih ka hria a, ka lamah pawt hnaiin ka kuah ta ringawt a. Nghet takak ka kuah tak rengah chuan a taksa ṭang ṭeuh pawh chu a inthlahdul ve ta deuh a.

“I chunga thil thleng rapthlakzia hi ka hrethiam a sin, Rach. Chuan, ka chhuang lutuk che,” tiin a luah chuan ka fawp vang vang a.

“Tunah chuan a la nilo maithei, mahse i hahdam phah sawt dawn a, thil ṭhenkhat chu kan sawichhuah hian kan dam phah ṭhin. I thil tawrh hi mahni chauha tawrh chhuah thei chi a nilo, tuman an thei lo. Tunah ti nghal rum rum rawh ka tilo che, mahse ka thawhna hmuna hnaruak awm kha lo ngaihtuah nawn leh la ka duh. A ṭha em?”

“Ka lo ngaihtuah dawn nia,” zawite chuan a ti sep a.

“Chuan, tuna min hrilh tak kha i nu leh pate hnenah pawh hrilh la ka duh,” ka tih chuan a taksa ṭang leh nghal at chu ka hre thei a. Rawn dak chhuakin, mittui tling pam chung chuan min en a.

“Ka thei lo,” a ti a. A ṭawng ri lo, mahse a hmui phun chu ka hrethiam mai a.

“Ngaihtuah nawn leh rawh, Rach.” A hmelah chuan a rilu natna chu ka hmu thei hial mai.
“Awle” a ti leh sap a.

“Mase nen engemaw tih tur kan nei a, ka kal a ngai tlat. Hnaruak kha i dil duh anih chuan a neitupa chu Rod a nia, manager a ni bawk. Dar 12 hmain bar a thleng ang. Amah chu i va biak tur a ni, a ṭha em?”

A buk leh nghat hnu chuan ding chhuakin a chalah ka fawh sak leh a.

“Hmeichhe huaisen tak i ni, Rach. Ka chhuang lutuk che a nia, chuan, engtikah mah khatiang thil kha i chungah ka thlen tir tawh lo ang tih ka tiam che.” Min chhan hmain apartment chu ka chhuahsan ta daih a.

[Ngaia]

CHAPTER – 17

Inchhung ka luh chuan Mason chuan min lo nghak reng tawh a.

“I tlai chhe lutuk lo e. Rachel hian ṭhian ang bakin a en lo che tih ka hria, eng thilmah inti dawn lo tih ka hre bawk a. Mahse i va awm rei ve, enge in tih a? Mi rel pahin nail polish i hnawih sak em ni? Kan tlai leh ngei dawn a, Detective Ryder zilhna tih vel kha ka ngaithla peih tawh miah lo a nia. Khapa kha ka ngainat zawng pawh a ni hrep lo ve.”

Ka wallet, ka phone leh ka chahbi ka lak kim hnu chuan amah en turin ka inher a.
“Detective Ryder chu ka hrilh dawn nia, i ni hman a tinuam leh khawp ang,” ka ti let ve kher a.

Pawn kan chhuah hnu chuan Rachel apartment chu ka thlir leh vang vang a.
“Rachel khan thil thlen dan kimchang min hrilh tak a sin.”

Mason chu a ding chawt, ka hawina lam rawn hawi ve pah chuan, “Rachel khawngaihthlak,” a ti hluk a.

“Ni e,” tih pah chuan parking lot lamah ka nawr phei a.

Zawhna atthlak tak ka zawt tih kan hre ve ve. A ṭha tlat lo a lawm. Mahse keimah ang thoin Rachel hi a ngaihtuah ve tih ka hria. Mason pawh hian a hmangaih a, mahse keiin ka hmangaih dan nen chuan a inang lo. Unau hmangaihin a hmangaih.

“A zia ve mai ang, mahse hun chu a mamawh deuh maithei. A vawikhat sawi chhuahna a ni tlat a lawm. A rilru la peng turin leh a lo ngaihtuah nawn turin hna chungchangte ka sawipui bawk a. Chulamah chuan a rilru a sen ngei ka beisei.” Parking lot aṭang chuan kan tlan chhuak nghal a.

“Ryder email lo thawn kha han chhiar ri teh, Camden chungchanga an thil hriat tharte kha ka hre duh tlat.”

“A chet leh hnaih tawh an ring a, tun ṭum chu tlemin a inthlahdah deuh anih hmel. Kar hmasa khan a card hmangin vawihnih thil a lei a, receipt-te pawh ka check tawh a, amah chauh chuan khatiang zat zat kha a ei ka ring lo.” Mason chuan a ti a.

“I thawhna restaurant-ah ve ve em ni?”

“Aw, mahse ka chawlh zanah ve ve a ni thung. Camera kan dah rukte pawh ka en nawn vek tawh, khami zana lut chhuak zawng zawngte pawh. Card hman theih loh a awm chauhin pawisa faiin kan pektir ṭhin. Mahse Camden ka hmu lo, engtin nge a tih theih ka hrethiam pha lo.”

“Waitress chu i be tawh em? Engemaw hriat chhuah theih an nei lo maw?”

“Ryder khan be lo turin min ti a, khami zan khan mikhual buaipui a ngah lutuk a. Hnathawkte zawhna ka zawh kual chuan min ringhlel thei ve bawk sia. In bar lam enge a an?"

“Ka thlen hma theih ka ring a, ka lo check leh vek ang. Kar khat aia tam mah kan bar-ah chuan a lo kal tawh lo anih hmel. Card kha a la rawn hmang leh tlat lo. Vawithum lai chu pawisa pe lo a chhuak chu an awm a, pakhat chu kutdawh, ka hmuh fo ṭhin a nia. Pakhat pitar zu duh ve deuh mai, nitina lo kal ṭhin a ni bawk a. Pawisa pe lovin a chhuak tih a hriat pawh ka ring lo, a chhan chu nidangah pe lovin a chhuak ngai tlat lo. A dang leh chu, sumdawng mi niawm tak suit nena induang thlap a nia. Phone be chungin a chhuak daih a, mahse a tukah a ba chu a rawn rul leh vek tho. A bak chu ni leh dar zat nen cash a pawisa pe ho chu record ka siam thlap. Nilaini apiangin kan camera-te ka check ziah a, Camden hmel awm ang hmuh tur a awm ngai lo.”

“Anih chuan mi pahnih eitur a chaw a lei kha kan ngaihven deuh a ngai dawn anih chu. Chuvang chuan anih ka ring Ryder pawh hian min rawn koh. Camden hian tuemaw veh a neih leh tawh hmel riau a, fimkhur zual turin min hrilh a tum anih ka ring ringawt a.”

“A ṭha a lawm, man anih hma loh chuan kan um tho tho a ngai.”

Mason chuan a kut veilam chu lek kangin a hum ruh a. “Hmela man tur hi chuan engpawh kan ti mai aniang chu, tiraw?” ṭhen ṭha chungin a ti a. He thil hi under cover-a kan thawh hnua kan tihziah dan a ni. A kut tum chu hnek sak zauh pahin, “Tehreng mai,” ka ti ve a.

RACHEL :

“Anih chuan a lawm nan kan leng chhuak thei anih chu.”

Candice chu a thawmhnaw hak tur ber thlangin darthlalangah chuan a in en a, a khuma mu chungin ka lo thlir ve reng thung.
“Tak tak maw? A eng chu nge kan lawm dawn a?”

“Awwww.. i hna thar chu mawle.”

“Candice,” tih pah chuan ka nui chhuak hawk a. “Chutia lawm tur khawp chuan a ropui lo e mai, a tihchi dawn em ni? Waitress hna a ni ve mai a. Hna nghet pawh a ni hleinem. Firm partner hmu pawh ka nih loh hi.”

Ka sawi zawh rual chuan ka ngawi daih a. Ka ṭhiannu chuan a thiltih lai chawlin darthlalang aṭang chuan min en nghal kar mai.

“A cham hmang turin California-ah kan kal dawn i tihna em ni?”

“Aih, ka ring chiah lo.” Ka nu leh pate thihcham apiangin Candice chhungte hi ka nu leh pate thlan tlawh turin an kal ziah ṭhin. Mahse kei chu ka kal ve ngai lo, ka thei ngang lo. An vui ni pawh khan ka tel ve lo anih kha. Ka hmangaih leh ka chhungkaw neih chhun, ka nu leh pate accident vangin a rualin ka sun a, lei hnuaia an phumbo tur kha ka hmu ngham thlawt lo a ni. A chang chuan tun thleng pawhin pawm har tih chang ka la nei ṭhin.

“An thlan tal hi chu tlawh i tum miah lo em ni, Rach?”

Ka ṭhiannu zawhna chu chhan har ka ti kher mai.

“Engtikah emaw chuan ka la tlawh ve ang chu, mahse tunah chuan ni rih lo. Thildang kan sawi thei a ngem?”

Min hrethiam takin, “Awle,” a ti sap a. “Chuan, i hna thar chu eng hna pawh nise kan lawm a ngai ang,” a tih zawm nghal zat a.

Ka ṭhiannu hi chu a thawven ang ang hian a rilru pawh a chak ṭhin a nia. Thil engmah hian a tibuai ve thei lo ni maiin ka ṭhin. Ka hmangaih em em bawk.

“Candice, duh duh hunah kan leng chhuak thei reng a lawm. Len chhuah chhan tur kan neih kher a ngai em ni?”

“Ầ lutuk teh suh, Rach. I hna vawikhat thawhna tur a nia, kan lawm dawn a ni mai. Kan ṭhiante pahnih hi inah an awm em?”

“Anni pawh………..” a tih lai mekin a phone a rawn ri a, a ngawi zui daih a.

“Ely anih hi,” tih pah chuan a phone chu lain loudspeaker-ah a dah nghal a.

“Hey, kan u duhtak!” nui hawk hawk chung chuan kan ti lang lang a.

“Ka hmeichhe duh pahnihte hi an dam em?”

“Kan ṭha, mahse Rachel i ầt a chhuak a. Hna thar a nei a, lawm ang ka tia mahse a ho e mai a ti tlat a nia.”

“Khai aw! Kan lawm ngei a ngai dawn anih chu.”

‘Kan’ a tih chu tute nge ni ang le?

“Mahse min mikhual thei dawn em tih pawh ka hre silo a. Helaia in thil dah hi in sil ngai miah na nge?” a rawn tih leh chuan kan chhang tawh lo. Candice chuan a thawmhnaw a chuh nghal a, kei chu ka tlanchhuak nghal thung. Pawna ka tlanchhuah chuan Kash-te apartment pawh melh lovin kan kawta Ely lo ding reng tawh chu ka hmu a.

“Ely!” tiin ka au chiam a, chak lutukin a dinna lamah chuan ka tlan phei nghal a. Nui huah huah chungin min lo pawm kang nawlh a, ka ngai tawh lutuk.

“Kan inhmu chu a lawmawm hle mai, Unaunu.”

“I lo kal hi ka awih thei lo. Ka mumang a ni ang tih ka hlau,” ka ti chul a.

Ka biangah chuan fawpin apartment lam pan chuan kan kal a, ka darah min kuah tlat bawk.

“Rawn surprise che u ka tum reng a lawm.”

“Engtia rei nge i cham dawn.”

“Naktuk tlaiah ka haw leh mai ang. Hna vanga rawn kal ka nia,” a tih chuan hmui ka lo tih pawrh khum a, engtin mah ka chhang lo thung.

Inchhung kan luh rual chuan Candice pawh keimah ang thovin a lo phusa ve chiam a, ka zawhna ngai bawk kha a lo zawt ve bawk. Candice nen hian mize in ang lo tak ni mah ila, thil ṭhenkhatah chuan kan inangin kan ngaihtuahna thlengin kan inhriat sak ni maiin ka hre ṭhin.

“Awle, tunah chuan hna thar kan lawm ngei ngei a ngai ta. Vawiinah meeting dang i la nei em?”

“Aih, vawiin atan chuan ka zo tawh. Naktukah ka nei leh chauh ang.” A dul nuai pah chuan a sana a bih zauh a.

“Ka ril a ṭam a nia. Helaia an Mexican food-te hi Calofornia-a mi nen a inang miah lo. Ka tui tih zawng pawh a ni chiah lo,” nui sang chung chuang a ti a.

“Mahse kan inthlak lawk a nge, a rei lo ang,” a tih zawm leh a.

Ely ka hmu leh chu ka z*ng hawkin ka hria. Ka nu leh pate ka sun laia ka buai pawh khan amah hi min be ṭawng thei awmchhun leh min hnem thiam ber kha a ni tlat a ni. A hma aṭang tawh khan a kum rualpuite zingah pawh a puitling bik a. Ngawi reng chung pawhin mi hnem theihna riau a nei tlat ni berin ka hre ṭhin. A dawhthei lutuk hi ka ngaihsan phah. Ka nu leh pate thih cham leh Blake vanga ka phurritte kha a bo duak ni maiin ka hria.

Thil ei tur chuan kan chhuak a, kan hlim tlangin sawi tur kan ngah hlawm khawp mai. Mahse Ely engmah hre lo chuan ka hlauh ber mai a sawi chhuak ta tlat.

“Blake pawh Austin-ah a awm ve tihte ka lo hria a,” a tih chuan ka thin a phu nghal dup dup mai.

Candice chuan min rawn melh vat a, a no chu banin a tlak nghal pawp a. Keipawh chu pangngai tak angin lan tum mah ila ka hlawh chham tih ka hria. Ka no chu ka ban ve ta ringawt a.

“Tlaiah khan kan inbia a, zanina inhmuh hi kan tum a. Ka naute pahnih pawh ka rawn hruai ve ang ka ti tak a sin.”

He thil hi a thleng thei lo ang. “Ka…..” ka tih lai mek chuan Candice chuan min ṭawng khalh a.

“Ṭha lutuk! Kan inhmuh lohna pawh a rei tawh khawp mai. Ka ngai tawh viau a sin.” A ti a.

Ely chu a nui hawk a. “Jenn nen an buai hnu khan ka la hmu leh miah lo. Air force hnuaiah a thawk zui ta daih bawk sia.”

Ka lungphu rang lutuk chuan ka thawk dan thlengin a tibuai tlat. A bialnu hlui an sawi chhuah takah chuan kan naupan laite ka ngaihtuah thleng a. An inkarah khan enge thleng tih leh engvanga inṭhen nge an nih ka hre miah lo. Blake bialnu anih vang khan ka ngei ve em em ṭhin. Kei aia khanu a thlang tlat kha ka hrethiam ngai lo, ka neih ve loh hnute a nei bik tih loh chu kei aia a ṭhatna bik ka hre lo. An titi chu ka zawm ve vat loh chuan ka talbuai mai ka hlau ru tlat.

“Tinge an inṭhen a? An induh viau ṭhin emaw ka tia,” ka tichhuak ve ta hram a.

Candice chuan min rawn en vat a, mahse ka hmu lo der tlat. Ely chu a ṭhu ngil a, a lu a tuai leh puat a.

“An hlim dun ṭhin a lawm. Mahse Jenn kha tu tih hriat lohten an lo khawih a. Nikhaw hrelovin damdawiinah an dah lut a, keipawh Blake thlamuan turin ka kal ve nghe nghe. Mahse Jenn rawn harh hnu khan Blake kha a be duh miah lo a, hmuh pawh a hmu duh lo. Blake phei chu a rilru a na lutuk a, mahse tihngaihna a awm ta si lo a, an inṭhen ta ringawt anih kha. Blake lah a hna vangin hmun dangah a awm zui ta daih bawk sia,” a tih chuan thawk pawh ka thaw tawh lo.

Jenn khawihtu chu Blake a ni thei a ngem? Chuvanga hmu zui duh tawh lo chu a ni em? Candice chuan a lu a lo thing na na a, lungawi lo hmel a pu deuh. Ka chunga thil thleng leh a thawnthu phuahchawp kha ka ngaihtuah tih a hrethiam anih ka ring. Ani tan chuan a cousin fel leh zaidam, khatiang thil sual rapthlak lutuk ti thei ngailo tur kha a la ni reng.

Ely chuan kan thil ei mante pe turin a card chu waiter a pe a, a kutzungṭangin dawhkan a tlir zu zat zat a.

“Chuan ka rawtna chu ṭha kan ti tlang em? Ka thlenna hotel bar-ah Blake chu a rawn kal dawn a. In riahna tur room pawh ka book sak vek ang che u.”

“Aih,” ka lo ti ṭhat a.

“Rach, in aprtmentah chuan ka thlah let leh thei dawn lo che u. Pawi in tih loh chuan Blake chu in apartmenta leng tur pawhin kan sawm thei tho a.”

“Aih,” ti bawkin ka chhang leh a, ka awki pawh a sang tawh kher mai. Kan bul vela ṭhute pawh chuan min melh ṭhap a.

“Khawiah mah ka kal duh lo, kan apartment a kir ka duh tawh.”

“Enga! Rachel enga tinge?”

Candice chu ṭhut ngil pahin aw a thian kharh a.

“Rachel hian Blake a hmu duh lo a,” a ti sap a.

Ely chu a nui hawk a. “Ni dawn tak, kan naupan lai khan i ngaizawng nasa thei em a lawm,” a ti ve mai a. Ely chu ka en vat a.

“Nang pawhin i hria maw?”

“Mi zawng zawngin an hria ang chu, i duhna kha thup pawh i tum ngai hleinem.”

Ely hmel chu a thutak thut a, “Ka that lo kha a vannei ngawt mai,” a ti leh hluk a.

Enga? “Engvang chuan nge i thah ringawt anga? Ka duh kha a thiam loh pawh a ni hleinem.”

Karei leh! Kei hian eng thil nge ka sawi hi? Blake West thlavang ka hauh anih hi!

“Nilo. Blake kha ka chhaih a, bialnu pawh i nei ngam lo ka tia. A ngaihzawn ve mai che kha ka hlau a lawm. Mahse, i upat deuh hun a nghak a, kan puitlin hunah nupui atan ka nei dawn a tia. A fiamthu emaw ka tia, kan insual phah a lawm. Hnar thi phunga kan insual kha in la hria em? Ka pa in min rawn ṭhelh kha.” A tih chuan Candice nen kan lo bu nghat a.

“Khami ṭuma kan insual chhan kha nangmah vang a nia.”

“Min neih a tum vang chuan i hnek a maw?”
Ely chu thil engkim hrilh mai ka chak takzet. Candice chuan min ring lo a, Ely hi chuan min ring em em ang.

“Ni e mawle. Ka unaunu leh ka nau ang i ni a, chu chauh pawh a nilo, naupang kum 12 mi chauh i la ni a, ani kum 17. Khatiang thlenga a lo ngaihtuah kha a tenawm em a ni.”

Blake khan ka upat hun a nghah vangin min lo ngaihven duh miah lo tihna anih chu. Ely nen an insual ni khan a hnar thi buaipui turin ka tlan vat a, mahse min lo nemsawn a. A hnu lawkah Jenn nen an inngaizawng ta daih anih kha.

Mipat hmeichhiatna min hmanpui theih huna min ngaihzawn chauh a tum tihna a nia. Ely thusawi vang chuan Blake ka huatna a zual a, ka hlauhna a pung bawk.

“Anih chu….mahse tunah chuan puitling kan ni tawh a. Ka duhzawng a ni tawh lo hrim hrim,” ka ti ve hmak a.

Candice chuan ning tih hriat zetin hnar a lo tum dat a. Mahse engmah sawi lovin a phone chu a bih ta daih a.

“Enge a awmzia? Ka duhzawng a ni tawh lo i tih chu enge a awmzia?” Ely zawhna chu chhang lovin ka phone ka phawrh a, min rawn hruai chhuak tura Kash hrilh a ngai tlat.

Candice chu a lo ṭawng vat a, “Tunah chuan a lerh tawh lutuk a, Rachel hian a duh tawh lo.” Ely chu a nui chhuak leh hawk hawk a.

“I duh tawh loh chuan a ṭha anih chu. In inpeih tawh em?” a ti zui a.

[Ngaia]

CHAPTER – 18

“Kei chu kan apartment-ah ka kir leh dawn, ka rawn kal ve duh lo.” Tih pahin ka purse ka la a.

“I ti tak tak em ni…i rawn kal ve lo ang maw?”

“Aw, mahse naktuk i haw hmain hun i neih chuan min rawn hrilh dawn nia. A ṭha em?” ka ti a.

Ka kuah leh a, Blake laka min rawn chhantu kha Candice ni lovin Ely zawk hi nise chuan engkim a ṭha vek tur a nia. Ka bekah a lo fawp zauh a, kan in zui chhuak nghal a.

“Anih chuan kan va thlah hmasa phawt ang che.”

“A ngai lo, kan ṭhianpa min rawn hruai turin a lo kal mek a lawm. In pahnihin Blake chu va hmu rawh u.”

“Oh…anih chuan a ṭha a lawm.” Min ngaihtuah tih ka hre reng. Mahse ka dem hauh lo. An bula hun hman hi ka hreh a ni reng reng lo, mahse Blake a tel dawn chuan khawiah mah ka zui lo ang. Ka thei lo.

Kash lo thlen hun chu min nghahpui a. Ely chu u mipa a nihna hre takin Kash chu a lo enchik kher mai.

“Hepa hi ka biak kher a ngai em, a rintlak ang maw?”

Candice nen chuan kan nui hawk a. A bianga ka fawh leh zauh hnuah Kash motor dinna lam pan tur chuan ka inher a.

“Ka him a lawm, Ely. Zingah min kaitho hma thei lutuk tih loh chu sawiselna tur a awm lo. Kan ṭhenawmpa chauh anih saw,” ka ti leh a. Min ngaihtuah tih ka hre reng a, hrilhfiah a phuin ka hria.

“Ṭhenawmpa chauh,” tih pahin Candice chu a nui var var a.

“Candice kha a cousin nena an inlaichinna i zawt zawk dawn nia.” Ka tih leh zauh hnu chuan Kash dinna lamah ka tlan ta daih a. Candice thinrim tur hmel ka hmu duh lo.

“Zawngi!” a rawn ti hram. Kash chu a lo nui sang a.

“I ṭhiannu chuan tlangval dang a kawpsan leh dawn che a ni maw?” Ngawi renga ka tlan hnu chuan a ti a.

“Engtin a?”

“Mahse i hlim hmel tlat hi mak ka ti daih zawk,” a ti leh a.

“Hlim loh chhan tur ka neih pawh ka hre hleinem.” Inkuangkuah deuh at pah chuan Kash hmachhawn turin ka inher a. A hma lawkin ka thuruk sawi chhuak turin min nawr a, tunah hetia min nuihzat hmel taka a ṭawng leh vel hi ka ngei tlat.

“Hna thar ka nei a lawm, chu chu i lo hriat duh anih takin,” ka ti ve deuh kher a.

Red light-a kan din lai chuan a chalin steering a nawr vang vang a. “I tling dawn tih ka hre sa a lawm. Chawhnu lamah khan Rod pawhin min rawn hrilh tak a sin. Naktuk zan aṭangin em ni i ṭan dawn?”

“Um…..chuan ka hlim loh chhan tur chu min hrilh thei tawh em?”

“A chhan chu kha tlangval khan nang ni lovin Candice a thlang ta zawk sia.” Ka thu hriat vang chuan ka ṭhu ngil nghal zawt a, ka ner zui nang bawk.

“Awi…engmaw i sawi?”
Kash chuan a ngaihna hriat loh hmel zetin min rawn thlek sek a.

“Khapa khan i bianga a fawp kha ka hmu reng a lawm. Tunah lah nang ni lovin Candice a hruai haw ta daih sia, a duh hmel tehlul che nen.”

Ka hmui chu ka hup ta ringawt a. “Karei leh! Kash. Ka luak thei takngial dawn a nia.”

“Hrep tak hian! Ding turin min duh em ni?”

“Aih, Aih. I sawi tenawm lutuk Kash. Nang leh Mase pawhin ka luahte chuan in fawp fo a lawm.”

“Chuan?”

“Chuan a? Chuan, chuan, Ely kha Candice u anih kha. Keipawhin u ang chiahin ka en. Candice hi ka ṭhianṭha ber a nia, a chhungte chu ka chhungte an ni mai. Chubakah, hunkhirh tak……” ka ṭawng chu ka tawp chawt a, thaw ka la leh halh a.

“Kan naupan laiin hun harsa tak tak ka paltlang ve a, min puitu ber anih kha. Unaupa ang bakin ka en ngai lo, amah pawhin unaunu tih hlirin min ko ṭhin. Chuan Candice kha a zui haw dawn bawk lo. An cousin pakhat hmu turin an kal dawn anih kha. Ka kal ve peih lo a.” Ka tih chuan Kash chu a hahdam hmel sawtin ka hria.

A ngaihdan diklo lutuk vang khan a zah ve deuh ka ring ania, zak hmel a pu miah lo.

“I duh lo maw?”

“Ka ti tak tak a nia, kan titi hian ka luak a tichhuak tlat.”

“Tinge an cousin hmu tur chuan i kal ve duh loh a?”

Rachel, khur suh. Ka seat belt chu ka hmer ngawt ngawt a, ka thin rawn phu nghal dup dup chu thunun ka duh.

“Kan inkarah thil ṭhalo deuh a thleng tawh a, chuvang chuan ka hmu duh lo.”

Karei, ka aw khur chu keipawhin ka hre thei hial. Kash ṭawng leh hma chuan pangngai taka awm tumin ka khap sak sak a, mahse a harsa lam hrat chu a ni. Kei hian engtikahmah lemchan thiam vangin Oscar ka dawng ngai lo ang.

“Logan Hendricks, Ely kha i thik tihna em ni?”

“Enga? Enteh Rachel, khatiang khan i ṭhiannu nen a fiam kual che u emaw ka tih vang a lawm. Hmeichhia infiamna anga hmang chi hi ka hua.” A hmui verh chu a pet zauh a, kei lah chuan ka lo en reng a. Parking lot kan thlen chuan ka seat belt phelhin a lamah ka kun hnai a, a cinnamon gum ṭhial rim pawh ka hre thei.

“Dawt sawi hrat,” ka ti sap a. Kawngkhar hawngin ka chhuak nghal daih. Ka bula rawn din pah chuan, “Ka thik bawk lo,” a ti ve bawk a. Naupang ang mai fiam, dawl lo lutuk.

“I ngaihdan dan ni rawh se. Movie en ila enge i ngaihdan? Kalh khum chu kan ni chuang lo nain, mahse keiman ka thlang ang.”

Min rawn en pahin, “Kal i la,” a ti a. Ka banah vuanin an apartment lam chu min panpui nghal a tum a. Mahse ka lo ṭang ve tlat.

“Ben and Jerry ice cream in neih tawh loh kha, kan apartment-ah en zawk mai ang,” ka ti a.

“Kan TV a lian zawk.”

“Mahse Rachel ka nih hi.”

Hriatthiam loh hmel zetin dar min chhin khum ak a. “I hming nen chuan enge inzawmna a neih?”

Zawhna ṭha tak a ni. “Ka hre bik chiah lo. A chhanna tur ngaihtuah turin hun min pe rawh. Mahse zaninah chuan ka duh angin kan ti ang.”

Kash chuan mit zim deuh san chungin min en a, a lu a thing a. “Thil engemaw sawi ka duh a, mahse min ben ngei ka ring bawk sia…Chuan….pancake min siamsak duh tawh loh phah dawn bawk a.” a ti leh a.

“Anih chuan i hmui kha chip hmak la a finthlak ber dawn anih chu.”

“Anih hmel khawp mai,” tih pah chuan a thaw hawk a.

“Awle, ice cream awmna lamah chuan min hruai phawt mai teh. Hmelṭha min tih bakah nalh min ti lutuk a, edit chawp i angte min ti mai mai a. Mawng lianpui ka neih theih nan ice cream chu ei leh mai ang,” a tih chuan a hnungah ka chum ri nghal pawp a, a na viau ang.

Tu emaw nen in awm laiin hepa nen hian kan pahnih chauha awmdun tur kan nilo tih ngaihtuahna hi i pu ve tawh ngai em?

Aw, chutiang ngaihtuahna chu tunah hian ka pu mek. Ka thawk dan pangngai lo thunun tum chuan ka maimitchhing vang vang a. Ka men rual chuan ka khum tlanga ṭhuin Kash chuan mak tihmel zetin min lo en reng chu ka hmu a.

“Mamawh i nei em ni?” tiin ka phun sap a.

“Aw, ka ril a ṭam. Pancake min siamsak rawh.”

“Enga? Naupang pawh i nih tawh loh kha, i duh chuan siam ve mai ta che. Siam sa, kan mai theih chi pawh ka lei tawh kha. Tui tlem pawlha kan a ni mai.” Tih pah chuan ka inkhuh ṭha leh sat sat a.

“Dar 7:30 maw Kash, nizan dar 1 pelh hnu khan kan bang ve chauh. Hma lutuka min kaihthawh i ching hi chu sim teh. Engtin nge i rawn luh theih reng reng a?” Nui lui tih hriat zetin a lo ṭhen suk a.

“Candice chhuah rualin ka lo lut.” A thil en chu enge anih hre mah ila ka hmu lo der ve tlat. Ka sam pawh a hnawk viau ang. Ka sam ka huih kian pah chuan ka chala engemaw inbel chu ka khawih fuh zauh a, ka pawh thlak rualin Kash chuan silai lem a phawrh a keiin ka lo chuh ve nghal bawk a. Chhuatah mawng sawh dawpin a tlak phah a sin le. Rang lutukin bathroom lamah ka tlan a, ka mawngah a la rawn kap hman hram.

“Naupang ang chauh i nih hi, Kash!” ka ti ṭhat a.

Light chu on in darthlalangah chuan ka in en a, ka rum chhuak nghal hawk. Ka samah chuan silai mu dang pawh a lo la tang! Kash chu nui vur chungin ka hnungah a rawn ding a.

“A kah nat leh nat loh ka test anih kha. Mahse a na vak lo nge, i muttui lutuk pawh ka hre lo, i harh thei lo reng reng,” a la ti zui.

“Ka chal pawh a duk kulh hi.”

A nuihza lutuk chu vawm pawp ka chak kher mai.

“Nui suh, a nuihzathlak loh! Zanin hna kal hmaa a reh loh chuan i chak lo ngawt ang.”

“Hmelṭha an thinrim ngai lo,” tih pah chuan ka chhipah a khabe a rawn nghat a. Ka chal sam tuai thlak pahin, “Hei hian a hliah thei tho ang. Tunah chuan pancake kan ei thei tawh a ngem?” a la ti ham ham nia.

Mak tihmel zetin ka lo en hau ringawt a.
“Teuh lo mai! I duh chuan nangman siam ve mai rawh.” Rum nghut pahin a silai lem kenlai chu a rawn lekchhuak a.

“I lungawina tur anih dawn chuan min kap mai rawh,” a ti a.

Ka hmui chu ka pet zauh a, pancake chu ka ei chak ve tho mai. “Khawi, silai kha,” tih pahin ka kut ka dawh a. Ka silai mu pathum nen silai mu paruk ka nei ta. A chalah chuan ka tin ve ta vang mai. Kash chu nui ver chungin a maimitchhing a, mu ruk zet ka kah zawh takah chuan a chal pawh a sen ve tầt mai.

Ka chal aiin a duk nasa zawk maithei.

“I hlim tawh em?”

“Tlemte chauhin.” Silai chu pe letin kawngkhar lam ka pan nghal a.

“Lo kal rawh, pancake chu siam ang.” Choka ka thleng ṭep tawh tihah chuan min rawn zui lo tih ka hrechhuak thut a.

“Min kah leh vaih chuan breakfast i nghei a ni mai!” ka ti a. Ka hawilet chuan silai a dah thla lai ka hmu hman. Rum hawk pahin sofa-ah chuan a theh thla zui vat bawk.

Chokaa a che vel chu ngawi rengin rum fe mai chuan ka melh ram ram a. Tunah tak hi chuan ka thinrim pawh a ni lo, nilo, chu chu a dik chiah lo. Ka thin a rim, ka chal a kap duk duh hi ka awih thei lo. Tinge naupang chhia ang maia a awm ṭhin le? Mahse Kash chunga thinrim reng hi thil harsa ve tak a ni. Min tih nuih dan tur leh min tih phur dan a hre lutuk tlat. A hmui a liah apiangin ka pum hi engtin emaw tak a awm ṭhin bakah ka ka a ro hulh zel lehnghal. Ṭhian angin engtia rei nge ka en theih dawn tih pawh ka hriat tawh loh lai hian engtin nge ka thinrim reng theih tehlul ang?

“Khai aw! I chal chu a duk chiang hle mai.”

Duk reng ang chu’ tih nghek mai duh viau mah ila chhang lo chuan ka melh rum ta ringawt a. A chhang hmeh lai thleng laksak ka tum chuan ka ban phak loh turah a chawi kang daih a, ka kawngah a kuah nghal bawk. Tal chhuah ka tum chu chhuat lo nal nen kan tlu dun ta mai. Chhang phut pawh chu a baw ta vek a, kan tlu khu rum rum mai.

Rang zetin innem kangin vah sawn ka tum a, ani lah chuan ka ngalah manin min pawh let a tum bawk a. A sam leh a hmai paw vek ka hmuh chuan ka insum thei tawh lo, za lutuk chuan ka nui chhuak a. Chhuata chhangphut bua chu ṭhamin a hmaiah chuan ka theh leh a.

“I lungawi tawhbem?”

“Lungawi tawh khawp mai!”

“Ka phu tawk hmuah ka inngai mai ang.”

“A dik chiah,” tih pah chuan ka la nui ṭhu a.

“Rachel……” aw dam leh tham deuh chhal a a tih takah chuan kan awmdan chu ka hrechhuak chauh a. Ka chunga bawk a ni a, kan inhnaih lutuk vang nge, ka zam thar tlat. A kut lehlam chuan a innem khalh a, lehlamin ka biangah a vuan a. Chet mai ngaihna pawh hre lo chuan ka maimitchhing ringawt a. Ka hminga min koh leh lai chuan ka hmui zawna a thaw lum ham ham chu ka hre thei.

“I chal duk hi a mal e mai, a khua a har ang,” a tih chuan ka meng nghal a.

Eng a? Nilo. A chhang hmeh kawina kut berh chu ka hmaiah a tat anih chu!

“Mitenawmpa!” ka ti tuar a.

Kash chu a nui chhuak hawk hawk a, ka mita a luh loh nan ka lo hru nghal sawk sawk a.

“Ka that dawn che,” ka tih chuan a nuih a za zual sauh. “Ka haw lutuk che,” ka ti leh a.

“Dawt sawi suh, min hmangaih kha.”

A fiamthu a ni em? A fiamthu a ni. Mahse ka thin a tiphu rang tho. Ka hmel danglam chu a hria a ni maithei, a nui lai pawh chu a tawp daih a. A mitmeng chu a de sar mai.

“Rachel?”

“Ka….hei hi tihfai a ngai,” tih pahin a taksa hnuai aṭang chuan thawh chhuah ka tum a. Mahse min delh bet lui tlat. Ka bianga a rawn vawn leh takah chuan che lovin ka melh let ve kar a. Muangchangin a rawn kun hniam a, a thaw lum ham ham pawh chu ka hre thei tawh. Nemsawn chu duh viau mah ila ka che miah si lo. Mahse duhna leh mamawhna hi thil hrang daih a ni miau a ni.

Kash chuan ka hmuiah chuan a fawp a, chutih rual chuan ka awmna hmun tur diktaka awm ni maiin ka inhria. A taksa leh chhuat kara awm ka taksa chu a hahdam tlat. Ka hmui chu rawn nawr kauin zei lutuk chuan min fawp zel a, keipawhin ka lo chhang let ve mai bawk. A inla hrang det a, min nuih sak hnu chuan rawn kun hniamin min fawp leh a.

Kawngkhar chu a rawn intheh hawng ṭhuai a, rang lutukin kan inla hrang nghal. Mason chu a rawn pen lut a, min ko chul chungin ka room lam a pan nghal a. Choka chhuata mu reng kan nih vang chuan min hmu lo anih ka ring. Kash chu a thaw hawk a, insiam remin Mason chu a au nghal a.

“Mase?” Nichin maia thil thleng vang khan ka thaw bik miah lo anih ka ring, thaw ka la ve nghal ham ham a.

Khatiang thil kha a thleng tur a nilo, a thleng nawn tawh lo bawk ang. Chu chu kan pahnih hian kan hrechiang hle. Mason chu chokaah chuan a rawn lut a, silai lem a hum bakah cargo pants a ha a, a lu bandana-in a hreng bawk. Rambo te pawh a ang zawk a lawm le.

“Tinge khatianga i inthuam teh ṭup a?” tih pahin Kash chu a ṭhu chhuak a. Mason chuan a thawmhnaw hak chu a thlek zauh a.

“Ka rawn haw lai khan silai kengin helaia i kal hi ka hmu a, kan indo dawn emaw ka ti mai a sin,” a lo ti sam et a.

Karei leh! He mite pahnih hi an ầ tak tak tawh anih hi.

Kash nena kan thil tih khan ka awm tinuam lo ru viau mah se ka nui lo thei lo, za lutukin ka nui chhuak hawk hawk a. Ka la nui hnar zui!

Zanin chu hna kal ka chak lo kher mai, mahse nin pawh sawi hman loh khawpin kan buai leh a. Min dawrtute tamin buai viau ṭhin mah ila, tips kan hmuh ṭhat hun a ni ve leh tho ṭhin. Mahse ka nin ber chu naupang hruaia rawn kal ṭhinte hi an ni, eitur an vawm darh loh leh intur an tibaw fo ṭhin a. Eitur hi infiamna tur a nilo tih hrilh chu an nu leh pate mawhphurhna a niin ka hria. Keini tan lo hauh leh hrilh theih an ni silo a, hna tamtak min siam belh sak ṭhin.

Order sem tur chuan choka aṭangin ka chhuak a, chhungkaw pakhat dawhkan kil lai ka kal pel hman ṭep tihah chuan engemaw ka rap a, ka tawlhthlu ta zawt mai! Ka eitur ken chuan ka inleih bawk a, ka form kawr var hak pawh chu a sen eng ta nguai mai. Ka thleng thlauh kehte chu ka chhar khawm zung zung a, bathroom lam pan tur chuan ka tlan nghal a. Kash chuan min rawn zui a, uniform thar min pe a.

“Va inthlak rawh, Rach.”

“Enge? Ka kawr hak chu mawi i ti vak nange?” tih pah chuan nui lui sak chungin a kawr min pek chu ka laksak a. Ka beng bulah rawn kun hniamin, “ I lang……englo i………..” a ti sar sar a, a ṭawng pah chuan a hmuiin ka beng a nul tel tlat.

Aw then kharh pah chuan, “Engmaw ka an? Ei theih maw?” tih pah chuan ka tawlh sawn deuh a.

A hmui a peh zeuh hnu chuan, “Tenawm chu i ni hauh lo. Aw, eitheih tih chu i inhmeh zawk ang.”

“Anih chuan nangmah kha i tenawm,” tih hlak pahin bathroom-ah chuan ka luhsan ta daih a. A nui ri pawh ka hre thei.

Thil engmah thleng lo anga a awm leh mai thei chu ka hua. Tukin maiah kha chuan inhnaih takin kan awm anih kha. Mahse ka hmangaih emaw, amah ka duhna vanga kan inṭhian ṭhatna a chhe lo tur chu ka lawm viau thung. Ka kawr chu thlakin a bal zawk chu ka bag-ah ka khung a. Darthlalangah chuan in enin ka nui lui leh sak a, nui hmel hi kan uniform pakhat a ni tlat. Darkar thum chiah hun a awm tawh a, thil harsa a ni hleinem. Mahse chatuan ang maia rei a ni leh dawn.

Darkar hnih dang a liam leh ta, engmah buaina em em ka tawk tawh bik lo. Naupang eitur paih darh ching pawh an awm ta lo.
Dawhkan ka tihfai lai chuan guitar perh ri ka hria a, eng hla nge ka hrechiang lutuk tlat. Plate ruak keng chunga choka ka pan lai chuan ka thinlung chu chhun ang maiin a na thei hial.

Zanin hi live music play zan a ni tak a lawm, nuam ti viau ṭhin mah ila zan dangah chuan ka ngaihven lutuk ngai lo. Mahse tuna an hla sak tur hi chu ka ngaihven lo thei lo, engtikah mah ka beng hian a hai ngai dawn lo. Choka aṭanga ka chhuah leh lai chu chiang takin ka hre thei a. Chu aw chu ka hriat hnu a ang tlat lehnghal. Satge hmuh theihna turah chuan ka ding a, ka thinlung na vawng vawng chu ka dawm vanga dam thei nilo mah se ka awm chu ka dawm nghal a.