FORGIVING LIES BY Puii Sailo (Completed)

Episode nei ho a hlawm a dahkhawmna
Ngaia
Site Admin
Posts: 25813
Joined: April 30th, 2016, 4:07 pm

Re: FORGIVING LIES BY Puii Sailo (Completed)

Unread post by Ngaia » February 28th, 2021, 12:42 pm

CHAPTER - 31

Blake chuan ka samah ṭhamin, inchhungah bawk chuan min hnuk lut leh a. Kash, khawnge i awm, lo thleng vat vat rawh!

“I chungah ka lungawi lo hle mai, bawihte.”
A banrekah chuan vuanin, “Khawngaihin, min thlah rawh!” Mahse awmzia a awm lo, khum lamah chuan min hnuk phei ta zel a.

“Khatiang khan awlsam takin ka kal tir mai che i lo beisei reng reng em ni? Mi â chu ka nilo a nia,” a ti sup a.

Ṭawng zawi viau mah se nelawmna reng a awm lo thung.

“Chanchinthar hi ka nuin a hriat hunah chuan a lungawi lo khawp ang. Tukin kha chuan an damchhuah vek theih ka lo beisei hman a sin. I ṭhianpa i chhân dante khan min lo inchhuan tir hman viau anih kha. Mahse engkim i tichhe ta vek anih hi. Tho rawh!” A vin tawh kher mai.

Rang zetin ka tho ve mai bawk a. ka sam pawh a thlah ve ta. Ka lo thaw huai a.
“Hei hi min hrilh teh, bawihte. I ṭhiante hi nungdama awm turin i duh em?”

“Aw!”

“I duh tak tak em? Ka mi tirhte hi inhnukdawk tura hrilh turin min duh em?”

“Engpawh ka ti ang, eng thil pawh. Khawngaihin tina suh. Eng pawh ti dawn ila an him ngei ang tih hriat ka duh.”

A ipte atang chuan remote a rawn phawrh a, engemaw a hmeh hnuah screen-ah chuan live feed chu a lo lang leh ta. Thil dang chu a pangngai ang vekin a lang a, car pathum lanna erawh kha chu a danglam tawh a, kawngpui niawm tak chu a lang tawh a.

“Khumah khan mu la, I ban kha chunglamah phar ang che.”

Chhang buai loin khumah chuan ka lawn a, ka ti thei, ka ti thei tur a ni. Kash leh Jenkins chhungkaw tan chuan eng thil pawh ka ti thei tur a ni. Ka huaisen a lawm, ka ti thei em em ang.

Zangthalin ka mu a, ka kut ka phar chhuah rual chuan Blake chuan hand cuff a rawn phawrh a. Ka banrek veilamah chuan min buntir a, khum luah lehlam chu a lock nghal hmiah. Ka ti thei, he thil hi ka ti thei. Hand cuff pakhat chu la lehin ka ngalrekah min buntir leh a, khum mawng lamah chuan a bat leh a.

Ka ti thei lo. Nilo,ka thei lo. Thawmhnaw phelh lo mah nise ka chunga a rawn bawh takah chuan ka khur nasa lutuk. Dimna tel hauh lo chuan min fawp zui nghal mawlh mawlh a.

“Ka nghak rei lutuk Rachel. I upat deuh hun ka nghak thin a, nangmah ang hmel pu zawng hian hmun tinreng ka fang thin a sin.” Ka samte chu a zut a, hmuh ngai loh hmu niawm tak chuan a en tlawk tlawk bawk a.

“Bawp sei thlarh, sam dum ngil sei zan mai, lunghlu ang maia mitmu rawng mawi leh fiah.” Thaw a lak leh kawk hnu chuan a chalin ka chalah a rawn nawr a. “Mahse nangmah ang hi an awm lo. I thinchhiat dante, I nungchang angte,…..i hmel anga ṭha neih phu hi tumah an awm lo.”

“Jenn pawh maw?” Ka thusawi chu ṭul lo viau mah se hun khawhralna tur ka zawn a ngai. A hmel pawh chu a danglam ve nghal a.

“Ka thil tih zawng zawngte leh ka tih thin zawng zawngte kha kan pahnih tana ti ka nia sin. Kan hmakhua tur ngaihtuah vanga ti ka ni.”

Ka hmuiah bawk chuan a rawn fawp leh a.
“Mahse a harsa zawng hlirin I che ve thung a.”

Ka chung atang chuan let thlain, khum bula nightstand chu a ban a. Ka ka hnawhna tur a pawh chhuah hnu chuan chemte chi hrang hrang in tel khawm chu a phawrh zui nghal a. A rapthlak lutuk, chung chemte te chu a len dan indawtin khumah chuan a rem a. A ipte atang chuan chahbi phawrhin, cabinet pakhat chu a hawng a. Screen-a ka hmuh ang chiah pangpar bawr kha a rawn la chhuak ta. Hlim hmel takin a nui sang a, Blake ka hriat thin ang kha a ni tawh lo. Tunah hi chuan mi â hmel a pu daih tawh.

“Hei hi I ta tur anih hi, bawihte. Hetiang pangpar keng chunga kan kawngkhara I lo din ni kha ka theihnghilh ngai lo a sin. Khami ni atang khan ka ta ni tura siam che ka duh ta a ni. Mahse ka nghah rei a ngai khawp mai.”

Ka lu ka thing nawk nawk a, Blake-te kawngkaa hetiang pawngpar keng chunga ka din awm hi ka hre hauh lo. Kan naupan lai pawh kha thil hriat sual a nei tihna a ni. Pangpar pakhat chu pawt chhuakin a dang zawng chu a khawina chawpin bangah chuan a vawm darh chuai a. A pangpar kenlai chuan ka hmai a rawn nul kual vel a, a chetdan engkim mai chu ka rap a, min tihlau lutuk vek tawh.

“Ka Rachel hian kan chhungkaw tan hetiang pangpar hi a rawn keng tih kha a theihnghilh thiang lo.”

Karei leh! Ka hrechhuak leh ta. Kan naupan laia ka hmangaih emaw ka tih lai khan a pi a thi a. Diktak chuan kha pangpar kha ka nu lei a ni a, mahse keiman pek ka duh ta anih kha. Engtin nge khatiang thil kha a lo hriat reng theih zawk? Kum tam fe a liam tawh.

Blake chu a nui hul hak a, a pangpar kenlai chuan ka hmai leh ban velte chu a la hrut kual ta reng a.

“Enteh, ka Rachel. I theihnghilh lo tih ka hria. Mahse hun hian a tidanglam ta che anih hi. Tunah chuan ka Rachel kha I ni tawh lo a. Hmeichhe dang ka lo tawn tawhte ang thoin Rachel lem chang tho I ni. Chuvang chuan pangpar bawr kha I phu lo a, a par pakhat hi I chan tawk a ni, bawihte.”

He mihring hian enge a hriat a, amahah hian eng thil diklo nge awm?

KASH :

Ka phone-ah chuan Mason hming chu ka hmet chhuak leh a. “Tlang hram rawh, tlang hram rawh,” ti mawlh mawlh chung chuan ka dial leh ta nge nge a. Rachel ṭe ri ka hriat rual khan a phone pawh a in off nghal hmak a, a call tlang theih tawh loh. Mason number ka call tluk tluk a, mahse a tlang thei der lo.

Meeting room-ah khan talbuai lo turin min ti a, mahse engtin nge pangngai takin ka awm theih ang? Serial killer hun rei tak kan zawn tawh chuan ka nupui hual leh ka hmeichhe hmangaih ber a kawl miau a lawm. Ngaihtuahna mumal pawh ka pu thei tawh lo. Engtin nge kan thawhpuite khan kal ve lo a, station-a lo nghak tur khan min tih theih zawk!!!!

“Enge, Kash?”

“Engatinge I phone kha I chhan theih miah loh?”

“Kan misual man tur khan kan inbuatsaih a lawm,” Beidawng aw riaua hriatna ka nei, a hnu deuhah chuan a thawh chhuak hak a.

“Hetah hian Rachel a awm lo, ṭhianpa.”
Ka thisen chu a khang mai dawnin ka hria.

“Aw, a awm a lawm. A awm tur a ni. Kan inbe zo chiah. In kalna hmun chu a dik maw?”

“Address chu a dik. Hei hi Blake West chenna hmun ngei a ni. Amah pawh a awm lo, kil tin kan dap chhuak vek tawh. A awmna chin kan hrechhuak thei lo. A car pawh kawtah a inhung a, kan hriat lohin car dang a lo nei reng anih loh chuan Rachel enthla thintu explorer truck kha ama ta pawh a ni maithei. Mahse chupawh chu hmuh tur a awm lo.”

“Blake truck chu anih ka ring lo. Rachel khan midang min zui ru turin a ruai a ti tlat.”

“I ti tak tak em ni?”

“Ti tak tak e, ṭhianpa. Candice leh a chhungte pawh an veh ang.”

Mason chu a rum nghut a. “Kan sawnchhepa chuh! Enteh, Kash, carnation killer kha anih I ring nghet bur tawh a, lo ni lo ta pawh nise….hepa hi kan man a ngai. Khawiah pawh Rachel thlalak a tar khat vek a ni ber mai. Thlalak bakah a thil tih turte leh a chanchin kimchang a awm vek a ni mai.”

Ka ngaihtuah ding lutuk chuan ka car khalh lai pawh chu min ngaihtuah tir thei lo. Ka car khalh chu ka herh kual zawk a, ka hnung leh a bul vela car tlan velte chuan horn an hmet tuar tuar a, ṭhenkhat chuan min au zui a, anchhia min lawh tawk lah bo lo.

“Tunah khan pindan dang dang a awm tih I sawi a, Rachel chuan a awmna hmunah chuan pindan hran a awm lo a ti. Hall lian deuh ang hi a ni mai a tia sin. Khalai hnaiah khan chutiang awm ang chu hmuh tur a awm em?”

Mason chuan Ryder chu a ko vat a, midangte hriat loh turin an kalsawn anih ka ring. A hnu deuh chuan an ṭawng ri pawh ka hre ve leh thei ta a. Ryder nena an thusawi pakhat chuan ka beng a verh zar mai!

“Mase, Mase, I hre thei em?”

“Aw.”

“Blake-a Lexus kha kawtah a awm I ti tiraw?” A ngawih leh vung vung hnu chuan, “Aw, hei hi a car kha a ni chiang a lawm. Ka hai thei lo ang. Kawtah hian car chu a awm reng.”

“Khawiah nge Rachel jeep?”

“Ka hre lo, ngati nge?”

“Nimina a rawn hruai chhuah dawn khan car pakhata chuang dun loin a hran ve vein an kal. Rachel jeep zawng hmu la, a awmna I hria a ni mai.”

Ka GPS chu ka melh zawk a, “Ka awm hla tawh lo, ka rawn thleng har lo ang,” ka ti leh a.

“Nilo, Kash…kir leh rawh. He case hi I buaipui chi a ni lo. I tan chuan a mimal thil tawh lutuk.”

“I tan a mimal thil ve lo em ni? I unaunu anga I en anih kha!”

“I tan chuan nupui hual a nia sin, inher la kir lehnghal rawh!”

Motor steering chu ka herh kual pawp a, a ri nghal tuarh bawk. Dan phal lohin che mah ila tuman min dang thei lo ang. Minute 10 lai tlan ka la ngai tlat. Kawng peng chep zawkah chuan ka tlan lut a.

“A thi a, kei hi ka dam anih chuan ka tan nun hian awmzia a nei dawn chuang lo. Mason, ka lo thleng har lo ang. A jeep emaw, guest house ang chi hrim hrim I hmuh chuan min rawn call nghal ang che.”

Min hnial leh hmain phone chu ka dah ta daih a. Ka mit tlin tawk chu hmuh hmaih neih hlau takin ka melh kual ruai bawk a. Ka hma lawkah chuan police car tlante pawh chu ka va hmu thei a, kan kal tumna hmun a thuhmun tih ka hrethiam nghal mai.

Ka piah deuha guest house niawm tak, var leh a bula liberty jeep ding ka hmuh rual chuan brake rap lo turin ka inthunun thei hram a ni. Ka speed a sang lutuk, brake ka rah thut chuan ka chetsual phah thei dawn tlat a ni. Liberty jeep ka hmuh vanga tun anga ka hlim hi a la awm lo hial ang. Kawng sira car ding tlar put hnungah chuan ka ding a, fimkhur takin ke chuan ka hnaih phei ta zawk a.

Mason chu ka call leh a. “Engmah hmasawnna kan la nei chuang lo, Kash. Mahse kan la bei mek zel e.”

“Ka hmu tawh,” tih sap pah chuan fimkhur lehzualin guest house chu ka pan hnai zel a.

“Tunah hian an awmna hmun chu ka lut thei ṭep a. Guest house phenah hian Rachel jeep pawh thukru deuh takin a lo dah anih hi. Ka hnaih tawh khawp mai.”

“Nilo, Kash. Engmah lo ti suh. Min lo nghak rawh! Inchhuga kan luh theih dan tur kha ngaihtuah a ngai. Chubakah, vest I ha lo a, I silai pawh an pe let leh che em ni?”

“Mason, a aw ka hriat hnuhnung ber kha a na tuar ri a ni a, minute khat pawh ka khawhral tawh dawn lo. Tunah hian I rawn thleng nghal lo anih chuan keimahin ka lut dawn a ni mai!” A thaw halh a, kei lah ka tum ram hnaih zawng chuan ka kal ve zel bawk a.

“Hrep tak hian! Ryder, Mackey, Barnes min rawn zui nghal rawh u!” Mason au lauh lauh chu ka hre thei a.

“Kan rawn kal nghal dawn. Khawiah tak nge I awm? A ngai leh lo, ka hmu che. Che sawn tawh suh.”

Ka phone chu dahin ka ipteah chuan ka ak nghal a. Din khaw muan ka tum teuh lo, hma lam pan chuan ka kal ta zel a. Ka thawhpuite an rawn thlen chuan min hmuh vanga hlim hmel pu hmuh tur an awm lo. Ryder phei chu a sen ṭul mai. Mahse Mason thinrim hmelah chuan Rachel a ngaihtuahzia chu hmuh hmaih chi a nilo. A eng zawk chuan nge hnehna chang erawh ka hrethiam mai bik lo.

Detective Ryder chuan aw a thian kharh a, ka lo en nghal vat. “Mason hian Rachel na tuar au ri I hriat thu a sawi a, eng thil nge thleng, hriat belh I nei em?” a ti nghut a.

“Line a in cut nghal a. Tlan chhuak tura ka hrilh hnuah a rawn man anih hmel. A sawi dan chuan pindan chhungah chuan monitor a inhung fur a, a mirawihte chuan enthlak hnathawkin helai atang hian live feed-in an lo en thin anih hmel. Chutia kan inbiak lai chuan live feed chu a tawp thut a, screen-ah chuan carnation pangpar bawr a rawn lang ta a ni.”
Ka sawi zawh rualin in lam pana kal leh nghal mai ka tum a, mahse Ryder chuan ka awmah dawmin min lo dang vat a.

“Kan kutah dah tawh rawh.”

A rawtna chu ka pawm lo tih lantir nan lu ka lo thin khum thung.

“Zah viau che mah ila, I rawtna chu ka hnawl a ngai. Ka nupui hual him taka saw in atanga la chhuak tur sawn tuman min dang thei lo ang. Ka hna hi ka chan phah dawn anih pawhin pawi ka ti lo. Rachel hi ka khawvel a ni a, helai hmuna a awm chhan pawh hi keimah vang a ni. Ka hna humhim duh vangin dawt ka hrilh a, chuvang chuan he thil hi keiman a hmawr ka bawk tur a ni.”

A kut chu nemsawnin, kal nghal mai ka tum a, Mason chuan ka hmaah engemaw a rawn lek chhuak tlat.

Silai a ni, ṭha lutuk. Station-ah khan ka silai min laksak a, kut ruaka rawn thawk chhuak ka ni. Ka ṭhianpa thil min pek chu ka hmang ṭangkai khawp ang le. Ka ṭhianṭha ber chu enin ka bu nghut a, a silai min pek pawh chu ka laksak nghal a. A silai pai lai chu phawiin in lam pan chuan kan inzui phei nghal a. Pawn lam atanga engmah hmuh theih loh turin parda a inzar phui vek a. Kan panga chuan kawngkhar chhuih hawng mai tumin chulam chu kan pan a, chhunglam atang chuan au thawm kan hre thei ta. Kei aiin Mason chu a che rang zawk tlat. Second khat pawh khawhral lo chuan kawngkhar chu a pet nghal bur mai a.

Awlsam tak chuan a intheh hawng ve mai bawk. Ka silai lek kawh va chung chuan ka pen lut a, midangte pawh chuan min rawn zui lut ve nghal.



Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » February 28th, 2021, 12:42 pm

CHAPTER - 32

“Austin Police Department. I kut phar nghal rawh,” tiin ka au tuar a.

Rachel chunga lo bawk Blake ka hmuh chuan ka thisen chu a so nghal bulh mai. Zawi muanga tho chhuakin chunglamah a ban a phar a. A kut lehlamah chuan chemte chi khat, tê deuh chi leh hriam zet mai chu a keng a, lehlamah chuan favah chikhat, mahse a pangngai aia tê deuh zawk a keng bawk a. A hmelah chuan hlau leh zamna hmuh tur a awm lo a, nuam tihmel zetin a la nui vur zui.

Silai hmawr 5 zetin a tin reng chung pawhin hahdam hmel tak a pu a. Khuma mu, Rachel chu ka en vat a, pindan chhung luahkhattu mangang au ri chu keima au thawm a ni. Rachel chu a che miah lo, thisenin a bual kawi nuai bawk a. Ranchel mutna lam chu ka pan phei nghal ruak a. A banah leh a ngalrekah chuan kawl buntir a ni a. A khupah chuan chemte niawm tak chu a la bur vu bawk.

“I hriamhrei ken kha paih nghal rawh,” ka thinrim lutuk chu ka sehchilh deuh rap rap tawh a. Blake chu a chet thut hlauin ngun takin ka melh kar reng bawk a. Hetiang hun hi a lawm police ka nihna ka huat thin. Ban phar tawh emaw, pawi khawih zawnga chet zui tum an nih loh chuan kut kan thlak thei tlat lo a ni.

A thluak darh vek khawpa kah mai chu ka chak a. Nilo, a awmah, a lung zawnah chuan ka tin leh ta zawk a. Ka silai ken lai chu hmeh per mai ka chak takzet. Mason khan a sawi dik chiah, he case hi ka buaipui tur a nilo. Ka tan chuan a mimal thil lutuk tlat. Mahse ka nupui hual chhanchhuak tur hian tumah ka ring tawk tlat lo, keimah ngei ka chet a ngai a ni.

Blake chu Rachel chunga bawk leh tur chuan a kunhniam leh ta!

“Che suh, anih loh chuan ka kap ang che!”

“Chu chu I ti ngam lo ang,” dam thlap chuan a ti a.

Min fiah ta che, hrep hian’ tih mai chu ka duh a.

“Ka nauten minute 15 dama ka aw an hre lo anih chuan an thah turte ṭheuh an that ang. Rachel nen in inbiakna kha ka lo ngaithla ve vek a, tute nge thi tur chu I hriat kha. Chuan, duh chu thlang rawh le. Min kap emaw, min that emaw anih chuan Rachel hmangaihte I thah sak tihna a ni ang. Chuan, min kaltir anih chuan, ambulance I call vat thei anga, kan Rachel khawngaihthlaki hi thisen luan kang vangin a ti lo hlauh thei bawk.”

Nikhaw hreloa mu Rachel chu ka melh vat a, a taksa leh khumte chu thisen vek a ni ringawt tawh. Amah lah chu a dang lap tawh a, tuemaw tal chuan ambulance call nachang hria se ka ti.

Ka silai dahsawnin, ka phone ah lai chu ban ka tum der lo. Ka kap chak lutuk chu ka che thei lo a ni zawk mah ang. Chutih lai chuan Rachel chu a rawn meng a, chemtea amah tin rengtu pawh chu en loin thei leh theiloin keimah zawk chu min rawn melh tlat. A mittui chu a luang nghal ngiai ngiai bawk a. Chu hun chu chatuan ang maia rei niin ka hria. A mitmeng â riai chuan tunge ka nih a hre hauh lo tih hai rual a ni lo.

Midangte chuan Blake chu a thil ken dah thla tur chuan an lo au tuar tuar bawk a, mahse thildang ngaihtuah thei ka nilo. Rachel chu ka en tlawk tlawk ringawt a. A laka ka thutiam ka hlen zo ta lo. Chu chuan mahni inhuatna min siam sak a, na ka ti ngawih ngawih.

Austin a kan lo kal chhan hi carnation killer zawng hmu tura tih kan ni a. Midang a thah leh hma ngeia man tum kan ni bawk. Rachel ka tawn hnu khan hna thar ka neih belh ta a, chu chu amah hmangaiha venhim a ni. Ka hnaah chuan ka hlawhchham a, ka mi man tur chuan ka venhim tur kha a that mek anih hi.

A mitmenga natna leh beidawnna ka hmuh mek hian min tihlum ve ta mek a nih hi. Ka âwm chu a na vawng vawng thei hial. Ka dawt hrilh chhan kha hrethiam se, min ngaidam thei hlauh se ka duh. Ka indemna leh mahni inhuatna chuan kil tin kil tang min ngaihtuah tir a ni ber e.

Ka mittui tla maitur chu duh loin Blake lam bawk chu ka hawi leh ta daih a. Midangin ti tura an hrilh pawh chu a ngaithla bik lo, a nui hmel la pu reng chung chuan min en ve reng a. Detective Ryder chuan a silai chu ak ṭhain taser zawk chu a phawi a, a thupek chu last warning a ni ta.

Blake pawh chuan a kut chu chunglamah a phar chhuak ve leh ta ṭual ṭual a. Kan kap emaw taser pawh chu hmang mah se a hmanrawn ken chu Rachel lu zawna awm a ni a, a him phah dawn chuang miah lo tihna a ni. Rachel hmai zawn chiaha tla tura lek chhuah a ni tlat. A hrawka zai tawk tur chiah pawhin a thlauh lui thei bawk.

Midangte chet hman hma chuan ka silai chu la thlain, khum lamah chuan ka zuang phei a. Blake chu bawh pheiin khum sir lamah chuan kan tla hlawm dun tawp mai, kawng dang a awm tlat lo a ni. A hmanraw ken chhuata tla ri bal tluka rimawi chu ka la hre ngai lo hialin ka ring.

Midangte pawh chu an rawn che nghal vat a, mahse Blake chu min sual let tum awm pawhin a awm lo. Keimah zawk chu insum thei loah ka ṭang ta zawk a, midangin min rawn dawm beh hma chuan ka hnek mial mial a ni ber mai.

Mackey leh Barnes-te chuan min pawt ṭhen thei hram a. Ryder chuan Blake chu hand cuff a lo buntir ve nghal bawk a. Ka inher leh takah chuan Mason chuan Rachel khupa chemte chu a lo phawi sak fel tawh a, thisen chhuak chu tih tawp tumin a lo hup sak mek a. A kut chu nemsawnin a hliam chu ka hup sak ta thung a.

“Mase, cuff hi phelh sak teh,” ka ti a.
Ka kut lehlam chuan a hmai dang lap leh a mittui luang ngiai ngiai chu ka chul sak a.

Chauh hmel zeta min rawn melh leh takah chuan ka thinlung chu a kehsawm ta a ni ber mai. Min en reng mah se min hmu lo tih ka hrethiam mai a, chu chuan min tina zual hle bawk. A mitmeng pawl ram leh pawisawi lo zetah chuan eng thil mah hmuh tur a awm lo a, natna emaw hlauhna emaw, hmangaihna pawh engmah a lang chhuak lo.

“Min ngaidam rawh, Rach. Min ngaidam rawh. Tunah chuan ka bulah I awm tawh a nia, bawihi. Hlauh tur a awm tawh lo, I him tawh a nia,” ka ti mawlh mawlh a.

A luah chuan fawh sakin a taksate chu ka enkual sak a. Thisen chhuak nasa lutuk vang chuan a vunte chu a dang var lap mai a. Chutiang zozai thisen chu khawi atanga chhuak nge anih pawh ka hre thei mai bik lo. A hliam ṭhenkhat atang chuan thisen chhuak chu ka hmu tho a, ka kawr pawtthlerin a hliamahte chuan ka nawr bet a.

“Ambulance kan mamawh a nia!’ ka ti tuar a.

“A lo kal mek. Pakhat chu kan rawn thawh chhuahpui sa a lawm.” Mackey chuan a lo ti vat a. A towel kenlai chu lain Mason chuan Rachel ban chu a tuam sak nghal mawlh mawlh a.

A puma hliamah chuan ka kawr chu a nem bet a. Towel dangin a awm zawna thi chhuak reng chu ka hruk sak pawk a. A awm chu hliam satliah nilo tlata hriatna ka nei, hming emaw ni, engemaw ker ni tlatin ka hria a, mahse thi a chhuah reng vangin ka hmu chiang thei bik lo. Towel chu ka nem bet leh ta zawk a. A beng bulah chuan ka inthiam lohzia leh a him tawh thute chu ka hrilh reng bawk a. Barnes chuan ambulance a lo thleng tawh tih chu min rawn hrilh a. Chutih lai tak chuan Rachel taksa chu a rawn khur dar dar a, nikhawhreloin a awm zui mai dawn.

“A thil tawn hian a shock em a ni.” Mason chuan a lo ti vat a.

“EMT kha rawn ko vat rawh u!” ka ṭe nghal tuar a. “Awle, bawihi, i ṭha a nia. Ka bulah i awm tlat tawh ang. I intihharh a ngai a nia, i hria em?” ka ti mawlh mawlh a. A hmui sen chek thinte kha a dang var vek tawh a, a mitmeng pawh a dik tawh lo.

“I harh a ngai, Rachel!” ka ti tuar a. Min rawn nemsawntu chu tunge anih ka hre lo, ka hawi chhuah rual chuan EMT pathum stretcher rawn zawn lut lai chu ka hmu a. A ṭul angte an tih zawh hnu chuan stretcher-ah chuan Rachel taksa dang var pap tawh chu an hlang a.

Ka kawr thisenin a chiah huh vek tawh chu Mason chuan min pe a, “Kan lo awm ve hian kan hnawk mai mai. Ṭha takin an enkawl dawn a lawm, kal phawt ang Kash.” A ti a.

“Ka kalsan thei lo.”

“Kalsan loh i duh tih ka hria, mahse keini chuan hnathawh tur kan la nei. He hna hi kan zawh hma leh Rachel bulah i awm hma thei dawn tihna a ni mai.”

He case hi kum engemaw zat an lo buaipui tawh a, keini pawhin thla tam tak kan chhuizui ve ta reng mai. Awlsam takin kan va chingfel mai dawn lo tih ka hre chiang. Chuvang chuan min mamawh anih chuan Rachel bulah min rawn zawng hmu mai ang. Tunah rih chuan ka nupui hual hi ka ngaih pawimawh ber a ni.

Detective Ryder bul kan thlen lai chuan Rachel chu an rawn nawr chhuak ve mek a. Zui ka tum ngei dawn tih an hriat vang nge, rang fe mai chuan min dawm bet a.

“Helai hmun hi chhuahsan ve nghal mai i duh tih ka hria Hendricks. Mahse tihfel tur kan nei. I ṭhiani bulah chuan i awm vat thei dawn a lawm,” a ti a.

Tih tur, tih hmasak tur. Ka bula dingte hnial tum chuan ka ang zuau a.

“Tu phiangsen tehhrep chuan nge phone lo pe a?!” ka ti tuar a.

Ka hawina lam chu Mason pawh chuan a en ve vat a. Blake an ṭhuttirna police car pan chuan kan tlan nghal a. Blake chu kutkawl buntir a ni tawh a, an hnung khirh tlat. Mahse a bengah chuan a dar hmangin phone a nawr bet a, tu emaw a be mek.

Kan thlen phei rual chuan, “A naute inhnukdawk turin a hrilh dawn,” Mackey chuan a lo ti vat a.

“A ṭawng hi ka ngaithla dawn, hrilh angin a sawi ngei em hriat ka duh,” tih pahin seat hnung lamah chuan ka phei a. Blake chuan nui sawng chungin min lo melh a, nawr nawk mai ka chak.

“Engvangin nge i nuih a, Mawla? Tual vawithum i thah vang leh pawisawi lo thah i tum vanga man i nih hi.” Mason chuan rum tawka melh chungin a rawn ti a. A thinrimzia chu hai chi pawh a nilo.

“Mi pathum i thah takte vang khan hrehawm takin i damchhung hun i hmang tawh dawn a. Rachel chunga i thil tih vang khan hrehawm takin ka thih tir ang che.” Ka ti leh hram a.

Ka sawi zawh chuan kalsawnin Mason chuan kawngkhar chu a khar ta nghal a. Tuna ka thusawi kha ka sawi mai mai lo, ka thutiam anih kha. Blake nui hmel chu a ṭhen nasa zual sauh a.

“I thusawi kha thil ṭullo tak a nih kha. I chil per pawh i ui lo em ni? Achhan chu i duhthusam kha a thleng dawn tlat lo,” a la rawn ti zui.

Kan hawi let leh rualin silai ri kan hre nghal a, Blake chu a thle lawp a, thisen a per nghal chuai bawk. Mason nen chuan silai puahna lam hawiin kan au nghal ṭhawt a. Vawihnih ngawt a ri leh ta.

Mason chu kan bula car ding lai deng dawt chuan a tlu a, leiah a bawk thla leh thlawp a. Ka taksa rawn na chu ka hre ve nghal. Ka khup chu a zawi hnawk a, ka ṭhingṭhi nghal rawp mai. Ka awm atanga thisen rawn luang chhuak chu ka hup ta ringawt a, ka kut lehlamin ka innem kang hram hram. Ka hmuh hnuhnun ber chu Mason a ni. A bulletproof hak chu a en a, ka lam panin a rawn bawk vak zui a, ka khawhmuh a thim ta.

RACHEL :

“I ṭha maw, bawihte?”

Aw ka hriat rual chuan men mai ka tum a, mahse light eng lutuk chuan men a tiharsa tlat. Khap zak zak chung chuan aw lo chhuahna lam chu ka hawi a, Mason a lo ni a, ka bulah ṭhuin ka kut a lo chelh reng tawh. La dam lo viau mah ila ka lung a awi chuang lo. Ka kut a vawnna chu ka lasawn a, ka hma zawn chu ding takin ka melh ngar a.

“Enge i an, na i nei em?”

“Nangni pahnih hian dawt min hrilh,” ka ti sap a. Kawngkhar lam chauh ka la melh ta ngar a.

Thawk chhuah hawk pahin, “Rachel, thil engemaw i hriatthiam a ngai……….”

“Teuh lo. Chhuak vat la a ṭha ang.”

Engvangin nge hepa hi ka bulah a awm? Khawiah nge Kash? Nilo, Logan….a hming diktak pawh ka hre tawh lo. Ka khawhmuh a phe a, ka ṭah chhuak chuan min hnawh ut ut. Ka mipa hmangaih, pasal atana neih hial ka tum chuan min lo bum reng a ni si a. Tunge anih pawh ka hriat loh leh, a hming diktak pawh ka hriat loh kha pasalah ka nei lo chauh anih kha. Police anih bakah, dawt sawi hrat a ni tih bak engmah hriat ka nei lo.

“Thil hriat hmasak tur i nei………”

“Kalbo rawh.”

Kan ngawi dun ta ran mai a, a hnu deuhah chuan thaw a la leh hak a. “A ṭha a lawm,” tih pahin a ṭhutna atang chuan a tho a. Rawn kun hniamin, ka chalah a fawp a.

“Ka hmangaih che, bawihi. I harh tawh tih nurse ka lo hrilh dawn nia.”

Kawngkhar a thleng ṭep tihah chuan ka ko leh a. “I cousin, i ṭhianpa……a……tupawh chu nise, khapa kha rawn kal buai duh lo turin hrilh ang che. A hmel kha ka hmu peih lo a, a hnen atangin engmah hriat ka duh hek lo. Ka duh tawh ngai hek lo ang. I hrethiam em?”

“Rach, ka……..”

“Lo hrilh ang che, Mason.”

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » February 28th, 2021, 12:42 pm

CHAPTER - 33

Mason chuan engmah sawi loin min en reng ringawt a, a chhuak zui ve ta mai bawk.

Pawnlamah chuan ka aw hriat ṭhan em em leh Mason aw chu ka hre nghal a. Candice a rawn dak lut zui nghal heu mai.

Nui lui sang chungin, “I lo harh ta!” a ti hliai a, a nui rei lo kher mai.

A mittui chu a rawn luang a, a ṭap chu a ni nghal mai. “Rachel, min ngaidam rawh.”

“Candi, ka……” Ely leh a nu leh pate ka hmuh takah chuan ka sawi tur a bo nghal vek.

“In ṭha vek maw? Ka en reng che u asin. I car puak laite kha…….ka thiam loh a ni!”

He leia ka chhungte neihchhunin min din hual tak ṭaiah chuan ka insum thei tawh bik lo, ka ṭap chhuak ta nge nge a. Candice leh a nu chuan min kuah vat a.

“Nilo, i thiam loh a ni hleinem, bawihte. Engkim kan hre vek tawh. Mi á anih kha, engmah tih theih i nei bik hleinem.”

“George.” Candice pa en pah chuan ka ti sap a. “I thi lai min entir a tum emaw ka ti hman a sin.” Ka aw chu a zuih ral a ni deuh mai.

Engmah sawi lo chuan min rawn kuah veleh a. Ely chuan ngawi rengin min en tlawk tlawk a, a tihdan pangngaiin pachang takin a awm thei leh bik tawh. Mahse min lainat vanga a mittui tling pam chu hmuh hmaih theih a ni bik lo.

“Ka ṭha a lawm, Rachel. Kan vaiin kan ṭha vek a nia. Nangmah chauh hi inngaihtuah rawh. I ṭha em? Na i nei em?”

Ka hliamte leh Blake min zainate vang chuan ka taksa chu chil hrep ang maiin a na vek a, mahse chu ai ana zawk mah chu ka thinlung na chu a ni. Ka hliam tawrh lai aiin chu chu a na daih zawk. Kei hi ka ṭha em? Na ka nei em? Ka na ngawih ngawih anih hi!

“Ka…….ka hre lo,” tiin George zawhna chu ka chhang ta ringawt a.

“I chau ngawt ang,” tiin Candice nu chuan min lo pui vat a. “Doctor khan chawlh hahdam i mamawh a tih che kha, i harh tawh tih an hriat chuan nachhawkna an rawn pe leh vat mai ang che,” a tih zawm leh a.

Michhe sawi chu koh aiin a hnai tih ang chiah….nurse pakhat chu a rawn lut ve chiah a. Ka khum bula dingte chu a hnawt sawn nghal a. Ka hliamte enkual vat vatin, ka taksaa khawl invuah ṭupte chu a check thuak thuak a. Diklo a awm lo aniang, nui var var chungin a chhuak ve leh mai a.

Janet bawk chu a rawn ṭawng leh a. “Chawl hahdam rawh, bawihi. In kan hun pawh a tawp ṭep tawh a lawm. Airport atangin kan rawn tlang nghal a, hotel pawh kan la lut lo. Naktukah kan rawn kal leh dawn nia. Buaina dang a awm loh chuan naktukah i chhuak thei mai dawn a, inthlakna tur tih loh thil dang rawn ken sak tur chein min duh em?” a ti a.

Ka lu ka lo thing mai a, a mal te te chuan min kuah diat diat a, damtaka kan inhmu leh thei hi Pathian hnenah lawmthu ka sawi mawlh mawlh a ni.

“Ka hmangaih che u.”

“Keini pawhin kan hmangaih che, bawihi. Thil thleng kha pawi kan ti takzet.” George chu rawn kun hniamin min kuah leh a.

Midangte chhuah hnu chuan Ely chu a la ding ta reng a. Rawn kun hniamin a chalin ka chal chu a rawn nawr a. “Ka hmangaih che, ka nau. I chunga a thil tih vang hian thei ngat ila chuan ka that ngei ngei ang,” a ti sap a.

Ka lo bu nghat nghat ringawt a. Ka khum bul chaira ṭhut pahin ka kut chu a vuan nghal a.
“Nangpawh chawl hahdam rih turin hotel-ah kal ve phawt rawh, Ely.”

“Hetiang dinhmuna ding chung hian ka kalsan dawn lo che. Ka unaupa leh ka ngaihsan em em thin khan thah che a tum a nia. Khawiah mah kalsan che ka tum lo, muhil tawh rawh.” Kal tur chuan hrilh leh duh viau mah ila ka meng hlei thei tawh lo. Ka muhil chu a ni leh der tawh.

Ka harh leh chuan pindan thim khupah hian ka lo mu a, thawm awmchhun chu pindan chhunga khawl ri bakah, kawngkhar inkhar phui lo atanga pawnlam thawm chauh chu a ni mai. Na em em chu nei tawh lo mah ila, ka ban leh swmte, ka nghawng leh hmun danga ka hliam an tuamnate vang chuan helai hmuna ka awm chhan hi hai chi rual a nilo. Ka taksa chu delhtu awm ang maiin a rit luk a, ka lu pawh hawisawn harsa khawpin a rit luk bawk.

Ka lu chu ka ti che leh a, mahse ka bula ṭhu ka hmuh rual chuan bangte chu a chim mai dawnin ka hria. Inthunun tum sateh mah ila ka thinlung hian min phatsan mek a ni. Ka bula ṭhu chu tunge anih ka thinlung hian a hre tlat a ni. Kash, Logan, thluakthawl mimawl luliana pawh ni rawh se, ka bulah a awm. A hmelṭha tak pawh chu a la ṭha reng a, ka thinlung min ruksaktu mipa kha a ni tlat. A hmel atang chuan engmah a hriat theih loh a, mahse a mitmenga thinrimna erawh chu ka hmu thei. A khabe ruh kual leh a hmelte chu hrechiang viau mah ila, hepa hi tunge anih ka hre tawh lo.

“Tunge i nih?” Thophang aw, thinrimna leh mak tihnate vang chuan ka aw pawh chu a chang viau ang. Thei ila chuan ka au khum chiam duh ang chu. Ka bula ṭhu chu mak tih vangin a meng zau kawk a, pindan chhung chu a reh leh tlawk tlawk tawh.

“Rach, i………i…..tunge ka nih i hre lo maw? I hriatrengna i hloh tih min hrilh loh vang a ni.”

A ṭhutna atang chuan tho chhuakin ka khum mawnga chart chu a ban vat a, ka ke dahna bulah chuan pharhin a keu nghal buan buan a. A ban dinglam a awrh tih ka hmu ve chiah. A inhliam emaw nile? Min rawn chhanna lamah Blake khan a lo hliam ve hman tihna em ni?

Hlauhthawnna chuan min tuam nghal pup pup a, zam deuh tak chung chuan aw ka thian leh te te a. “Ka hria che a lawm. Engkim ka la hre vek.” Ka tih takah chuan a thil enlai chawl meuh chuan min rawn en a.

“Mahse tunge i nih ka hre lo che.”

Ka thusawi awmzia a hriat takah chuan a hmelah chuan natna ka hmu thei a.

“Rachel…..”

“Ka pasal ni tura ka inhualpui thin nen khan in in ang lutuk tlat. Mahse khapa kha chu………..” ka aw chu a lawi ṭan, ka mittui a lo hnai leh kuarh tawh.

“Enteh, thil nuihzathlak deuh chu maw…..amah kha milem vek a lo nia.”

“Rachel.” A awah chuan tawrhna a ri tel a, ka khum bula chair chu pawt hnaiin ka bulah chuan a rawn ṭhu leh a.

“Khatianga hrechhuak tur khan ka duh lo che a sin…..”

“Tunge i nih?”

“Bawihi, min hriat kha.”

“Aih, ka hre lo che. Chuan khatiang khan min ko tawh suh.” Ka mittui chu a rawn baw nghal zawih a. Ka thinlung chu a keh nawn leh ni maiin ka hria.

“Tunge i hming?”

“Hendricks ni loin, Logan Ryan ka ni. Kash kha chu ka middle name a nia, mahse Kash tih vekin min ko.”

“Chuan Mason ve thung?”

“Mason Gates. Chuan ka cousin a nilo. Kum 5 kal taah khan Police Academy-ah kan intawng.”

Buk nghat pahin ka hrawka hnawhtu awm tlat lem tum chuan chil ka lem khalh a.

“Chuan, police in ni bawk a.”

“Aw…..Mason nen hian partner kan ni. Helaia kan lo kal hma zawng kha chuan narcotic division-ah undercover-in kan thawk thin a. Helai hmun kan lo thlen dan hi chu thawnthu sei tak a ni, mahse kan lo kal chhan ber chu kha carnation tualthahnate zawn chhuah kha a nia. Kan thil chhui vang khan undercover anga kan thawh chhunzawm zel a ngai a. Chuan, Rachel……” a thusawi lai chu a chawl dat a.

Rawn kun hnaiin ka banah chuan a rawn vuan a, thin thlak sak tum teh mah ila min thlah duh chuang lo.

“Blake West kha a lo ni reng ang tih rin ngaihna ka hre bik lo a ni. A fing em em a, a hnu chu midang hnuah min chhui luhtir a. Lo hria chu ni ila, khatiang thil kha a thleng hauh lo ang, bawihi. Ka ti tak tak, min ngaidam rawh.” Min koh dan pawh chu ka hnial buai peih ta lo.

“Carnation tualthahnate maw? Ngawiteh…….pakhat aia tam tihna maw? Blake…..Blake khan midang pawh a that tawh tihna em ni?”

Blake thusawite kha ka hrechhuak leh ta uar uar mai. Tute mah kha Rachel anga hmelṭha leh duhawm an awm lo…..Rachel lemchang vek an ni…karei leh!

Kash chuan ngun zetin min lo en reng a, tawrhna leh mahni inthiam lohnate chu ka hmu thei hial.

“Tumah a tina leh tawh ngai lo ang, a thi tawh,” a ti sap a. Thil thlengte chu ka ngaihtuah let a, ka hlim nge ka lungngai tih pawh ka hrethiam lo. Ka ṭap chhuak leh ta ringawt a. Blake kha tualthah hmang a ni a, keipawh min thah a tum hial anih kha. Tunah chuan a thi tawh. Kash hi police undercover a thawk a ni a, ka inhungna bang min ṭhiahsaktu hi Kash a ni a, mahse ka tan chuan hmelhriat loh ang chauh a ni.

Khumah chuan rawn ṭhuin, a ban na lo lam chu rawn phar chhuakin ka biangah a dawm a. A chal chuan ka chalah rawn nawrin min thlamuan tumin, min hnem a tum a ni.

“Engkim a ṭha vek tawh, Rachel. A khawih leh tawh ngai lo ang che. Min ngaidam rawh, khawngaih takin min ngaidam rawh. Ka thutiam ka hlen thei ta lo a ni. Ka venghim ta silo che a, khawngaih takin min ngaidam rawh. Ka hmangaih che, ka hmangaih lutuk che.” Ka biang a dawm chu duh loin ka hawisawn daih a.

Sehchilh deuh lek lek chung chuan, “Khawngaihin min khawih tawh suh,” ka ti a.

Hetiang hi chuan ka ṭap leh mai dawn. Thaw ka la kawk a, mahni inkhawngaihna vang a ni emaw, engvang pawhin hepa hmaa ṭah hi ka duh lo hrim hrim. Mahse ka taksa nate bakah ka thinlung na chuan min tur ut ut bawk si.

“Bawihi, vawi engzatnge thudik hrilh che ka tum i hrethiam lo zawk ang. I laka zep ka nei khan min tina a sin. Min ngaidam rawh. Mahse kan inkara thil thleng zawng zawng kha a tak vek a nia sin. Dawt leh inbumna thil a nilo.”

“Min chhuahsan rawh.”

“Khawngaihin khatiang zawng kha chuan min nawr suh. Ka hmangaih che asin, Rachel. Ka nunna ai pawhin ka hmangaih zawk che.”

“Ka hmangaih ve lo che. Ka suangtuahna leh thil tak tak nilo kha a ni ka hmangaih chu. Khawngaihin a harsa zawng chuan tih ṭalh tum suh, eng inzawmna mah neih ka duh tawh lo, Kash. Dawt min hrilh a, I dawt sawi kha thil holam tak a nilo. Ka dam loh laia ka lan duhawmzia I sawi ang mai mai kha a ni hleinem. I nihna diktak zepin dawt phuahchawp hlir min hrilh a, ngaihdam theih a nilo. Ka inven ve thinna bang zawng zawng min ṭhiahsak a, ka ring che a sin. Kan inkarah zep leh thuruk awm lo turin I duh a, mahse mihring hlimthla chauh leh a tak awm lo lakah chuan hmangaihnaah min tluk luhtir ta anih hi.”

“A tak a awm a sin, chu chu keimah hi ka ni. Amah chu ka ni, Rachel. Kan inkara thil thleng zawng zawng kha a tak vek a ni. Dawt ka hrilh lo che.”

“Ka harh hlim kha chuan I hming diktak pawh ka hre hleinem. Bartender emaw ka ti che a sin, Kash! Chuan, tun thlengin khawi lam mi nge I nih a, khawi atanga lo kal nge I nih pawh ka la hre hleinem.”

“Tampa Bay, Florida. I duh duh min zawt rawh, ka hrilh vek ang che. Mahse kei hi min hria, Rachel.”

Ka mittui tla mai tur dan kir tuma khap sak sak pah chuan lu ka thing mat mat a.
“I tlai mah mah a ni, Kash. Engtin nge I thusawite hi ka awih leh theih tawh ang?”

“Rachel……”

“Khawngaihin min kalsan tawh zawk rawh” ka tih chuan ṭawng tumin a ang zuau a, mahse ka lo khap vat thung a.

“Rawn kir tawh suh, Kash. I chanchin hriat emaw, hmuh zui che emaw pawh ka duh tawh lo.”

Ngawi reng chuan min en ta reng a. A mitmenga tawrhna lang chhuak chu ka hmuh hmaih bik lo. Kawngkhar lam pan tura a inher chiah chuan a mittui a tla tih pawh ka hmu reng. Kei hi ka na lo bik reng reng lo, a kal bo ta.

A chhuah rual chuan ka ṭap chhuak nghal hawk a. Ka kawchhungte chu a puak darh vek ni maiin ka hria. Chutiang chuan rei fe ka ṭap a, tuman min venghim thei lo. Hetiang natna tuar tawh lo tur hian ka inveng anga, ka neih chhun ka thinlung hi tuhnenah mah ka hlan leh tawh ngai lo ang. Mahse Kash ang mihring hi ka tawn pawh ka lo beisei ngai lo a, ka car kawngkhar a sut ṭep ni atang khan ka thinlung hi min lo neih sak daih tawh a sin. A neitu lo tan venhim ngaihna a awm lo a ni. Diktak chuan hetiang hian min tina ang tih ka ring ngai lo a, inven pawh ka lo tum ngai lo anih kha. Tuna ka thinlung na leh hmun tamtaka tikehsawmtu Kash……Logan Ryan hi huat tum em em mah ila, ka thinlung kawltu chu amah tho hi a la ni reng a sin.

KASH :

Mumal neilo tak chuan waiting room lam chu ka pan a, chair pakhata Mason lo ṭhu muhil chu ka hmu a, ka chhia leh ṭha hriatna chuan, Rachel rooma kir leh turin leh, ngaihdam dil turin min nawr sek sek a, mahse a rilru na hmel kha ka hmu ngam tawh silo. Ka nuna thil thleng tawh zinga a ṭha ber leh, ka phu loh malsawmna chu kei hian dawt hmangin ka tichhe ta ani tih ka hrechiang tawlh tawlh mai.

Rachel khan a sawi dik chiah, a invenna tura bang a insiam tlat thinte kha ka hua a, a inhung ping tlat kha ṭhiah sak tumin ka nawr thin anih kha. Tunah chuan ka tih dik loh vangin a inhung ping leh tlat tawh. A hma zawng aia chhah a ni tawh lehnghal. Ka su tlangin, ka ṭhiahsak mai mai tawh dawn lo tih ka hria.

Ka bula aw thian ri ka hriat takah chuan ka hawi chhuak vat a. Candice unaupa kha ka bulah chuan a lo ding reng tawh a. Ka vawn theih turin a kut chu a rawn phar chhuak a, a aw a then leh hnu chuan…..

“Ely Jenkins ka nia, I chhanchhuah vangin ka lawm e. Rachel hi ka nau ang chiah a ka en a ni,” a ti a.

Ka chhan mai loh vang chuan Mason chu a thlek leh te te a, chutah keimah bawk chu min en lehin, “A pasal hual kha I ni tiraw, ka ti dik em?” a ti leh a.

Ka inhumruh nghal ṭeuh a. Ex….pasal hual thin, mahse a ṭhen tak ka rilru chuan ka ti a.
A kut a laklet hnu chuan ka chibai tak loh bakah, engmah ka la sawi lo tih ka hre chhuak ta chauh.

“In thil tawnin a zir lo bawk nen, in chau ngawt ang. Nidangah kan la ti ti dawn nia. Lawmthu hrilh che ka duh vang a nia,” kal tura a inher takah chuan ka ṭawng chhuak veleh hnuhnawh a.

“Lawmthu min hrilh a ngai hleinem, a tan chuan eng thil pawh ka ti ang,” ka ti a. Amah kalsan tura min duh anih pawhin ka kalsan mai ang.

“Ngun deuhin I lo enkawl dawn nia, chu chu min tihsak thei ang tiraw?” ka tih leh chuan mak tihmel zetin min thlek ha a. A ngaihna hre chiah lo mah se a bu ta nghat a. Engmah sawi loin Rachel pindan pan tur chuan min kalsan ta daih a. Thawk hawk pah chuan ka hmai ka tuai puat a, awm ngaihna ka hre lo ni ta berin ka hria.

Ka ṭhut rual chuan Mason chu ka bulah chuan a rawn insawn a. A ngawih deuh vang vang hnu chuan, “Hun pe rawh, ṭhianpa. A hun tawn leh a thu hriatte khan a ṭhawng em a ni,” a ti sap a.

“Ka ring chiah lo. Min ring em em a, chu a rinna chu siamṭhat leh rual lohin ka tihchhiat sak a ni.”

“A thi lo chauh a, tunah chuan a rilru pawh a la fim lo ang. Hun a mamawh.”

“Ka thiam loh a ni, Mase! A vaiin, hetiang thil a thlen chhan hi keimah vang a ni. Darkar 48 chhung leka thil thlengte hi…..kan inhualna zungbun min pe let a, chu pawh a hmangaihte a venhim theihna anih beisei vangin. Thah a ni hman ṭep a, tunah mai khan min ṭhen leh ta a ni. Tuna min ṭhen chhan hi chu a duhthlanna vang a ni tawh a, dawt ka hrilh vangin. A hma ang kha a ni thei tawh dawn lo, min rin theih tawh loh tur thu a sawi a lawm. Rachel hi ka dem reng reng lo, hetiang dinhmuna dintirtu hi keimah ka ni a, keimah vanga thi ṭep a ni.”

Mason chu a ding hluai a.

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » February 28th, 2021, 12:43 pm

CHAPTER - 34

“Nilo, chutiang a nilo. Kha thil, Blake West ruahmanna leh a thil tih kha helai hmun kan thlen hma daiha in ṭan a ni tawh. Austin kan kal chhan pawh amah kha a ni. Rachel chunga thil thleng hi kan hna vang emaw, keimahni vang emaw a nilo. Nimina I chhanhim theih chhan pawh, police I nih vang zawk a sin. Ka sawi tawh ang khan hun pe rawh. A thil tawnte kha a rapthlak em a ni. Mahse Rachel hian a hmangaih che.”

Ka hmangaih lo che, suangtuahna leh thil tak tak nilo chu ka hmangaih a, mahse chu chuan natna chauh min thlen ta anih hi. Rachel ṭawngkamte chu ka hre chhuak leh ta uar uar a, ka thlarau thlengin a tina niin ka hria. Ka kawchhungte chu a ruak vek a, ka lungphu vang chauh chuan mitthi a puan ka la nilo ti ila a fiah ber ang.

“Min hmuh pawh a duh tawh lo, Mason. Kalbo turin min duh a lawm. Venghim tura ka intiam hnuah pawh ka venghim thei lo a, tunah chuan tihsak theih pakhat chiah ka nei tawh. A duh leh min ngen anga kalbosan a ni. Engkim a tawp vek tawh.”

“Kash…….”

“Duh tawk teh. Nun pangngaia nun a phu a, ka pek theih ang nilo hi. A hma khan ka venghim zo lo a, tunah hi chuan ka venghim tawh ang. A duh ang ngeiin leh a hlimna tur chauhin ka kalsan dawn a ni.”

Min hnial leh hmain waiting room atang chuan ka chhuak ta daih a, truck-ah chuan darkar chanve lai ka ṭhu tawh. Mason pawh chu a rawn lang ve ta nge nge a ni.

“Kan pate ve ve pawh vawiin hian an lo thleng ang,” a tih chuan ka phu deuh zawk a.

“Eng a?”

“Florida-ah kan kir leh tawh dawn a, kan bungrua leh thawmhnawte min rawn pack pui turin an lo kal dawn.”

Tih ngaihna hre lo zet chuan ka thaw chhuak hawk ringawt a, ka âwm, a dar lam hnaiha ka hliam pawh chu a na ta vang vang mai. Ka thurawn tur : silaiin tumah inkah tir tawh loh tur, a zat mer mer loh bakah seat belt hren a tiharsa tlat.

“Engtikah nge I biak?”

“Ka lo nghah lai che khan.”

“Kash,” thawk chhuah halh pahin driver seat-ah chuan a rawn ṭhu lut a.

“I thil tih dan hi ṭha ka ti lo. Hun pe rawh ka tih vang khan tlanchhiat san rawh ka tihna a nilo a nia. Hun a mamawh a lawm.”

Chau viau lo ila chuan ka ṭhianpa chu ka hnek chawrh duh ngei ang. Dawihzep vanga tlanchhe tur ang maia min ngai chu ka duh lo.

“Hrep tak che hian, ka tlanchhe reng reng lo.”

“Aw, I tlanchhia anih hi. Mi nep tak ang maiin I tlanchhe chiang a lawm. Tupawh hi I telloin an hlim zawk I ring a, midang tana harsatna thlentu ang maiin I inngai thin. A hma pawhin Megan lakah hetiang hian I ti tawh a, tunah Rachel lakah. I bula a awm hian a hlim a, a tan nang aia ṭha an awm lo. Tunah hun khirh tak a tawk a, thihna kotlangah a ding anih kha. A hlauthawngin, rilru fim pawh a la pu lo asin. Chu chu hrethiam ve tur chu I ni. Mahse chutianga ti ta lo chuan inthiar fihlim san I tum a, midawihzep tak I nih hi. Hrep tak che hian, Kash! I va han mawl tak em!!” a ti ta zek mai a.

“A thi ṭep asin, Mase! Keimah vanga thi ṭep anih kha!” ka au ve ṭhawt nghe nghe.

“Keini pawh kan thi ṭep tho a lawm! Kan tan chuan kha mi â leh kan hna vang a ni a. Rachel tan chuan kha misual thluakthawla vang kha a ni. Rachel damchhuah chhan hi kan hna kan thawh vang a ni bawk. I thluak bawm chhah lutuk chhunga I thluak kha hmang ta che.”

“He thil hi sawi nawn leh ka duh tawh lo. Ka dawihzep vanga tlansan tur ka nilo, Mase. A duh dan anih vang zawk a ni. I duh duh dan chuan ngai teh, ka buaina tur pawh a ni hrep lo e. Mahse amah kalsan turin min ngen a, helaia kan hna pawh kan thawk zo tawh. Helai hmuna cham hi………” sawi zo lo chuan ka ngawi ta daih a. Ka natna mai mai tur……..nilo, kan pahniha natna mai mai tur a ni.

“Helai awm chhan tur hi ka nei tawh lo.”

“I mawl takzet anih hi,” lungawi lo fe chuan a ti leh hmuk a. Truck chu a start zui nghal.
Ka ṭhianpa hian a hrethiam lo a ni, a hrethiam ngai lo ang. Tuna ka na tawrh hi min kah hliamna ai hian a na daih zawk. Rachel sawi kha a dik, ka tlai tawh lutuk, siam ṭhat theih a ni tawh lo.

“Ni e…..kei hi ka mawl a ni,” ka ti ta nge nge a.

RACHEL :

Kawr ka hlip dawn chiah tihah chuan kawngkhar kik ri ka hria a, ka chhanna pawh a nghak ta chuang lo. Candice chu a rawn lang zui nghal a.

“Hey,” a ti sap a.

A aw a min lainatna ri tel chu ka huat em em thin a ni. Candice leh a chhungte hian ka nu leh pate an boral hnu khan hetiang lainatna aw ki hian min be reng thin.

Ka chunga khatiang a Blake a chetna pawh thla hial a liam ta, mahse hetiang aw ki hi ka lakah an la hmang reng hi ka duh lo.

Ţawngkam pangngaia min biak chuan ka ṭah mai an hlaute pawh a ni mahna. Blake kha a unaupa a ni a, kei tak pawh hian Candice leh a chhungte hi ka lainat a sin. Mahse a duh bik teuh lo mai.

“Hey,” ka ti let ve hram a.

“Enge I tih dawn?” tih pahin ka khumah chuan a rawn bawk a.

“Inbual ka lo tum deuh a.”

Hei hi ka ṭhiannu ze thar a ni leh der tawh. Enge I tih dawn, enge I ei dawn, tinge I mut dawn, tinge I lo kal ve dawn loh…..min zawh leh tur chu, inbual tum si tinge thawmhnaw ka la hak reng tih anih ka ring.

“Ka hre lo, ka mu ve tawh ang chu.”

“Awle, a ṭha a lawm.”

Tunah hian zanlai a ni ṭep tawh a, tinge maw chutiang chu min zawh duah le?

“Enge I tih dawn a, Candi?” A zawhna ang chiah hi zawt ve ila nuam a ti bik em hriat ka duh tlat.

“Ka rawn check mai mai che.”

“Ah, Candi, thla thum lai a liam tawh tih I hriat kha, ka ṭha vek tawh a nia.”

Ţhut chhuah pah chuan, “I ṭha tawh tih chu ka hria a lawm, mahse………”

“Mahse enge?” A nu min rawn angin therapy ka la dawn em ni? Diktak chuan a sawi zawm duh tak loh chu enge anih ka hrethiam lo a, ka lakah hian enge an beisei lah ka hre hek lo.

“Rachel, Mason nen hian ka inbe thin a…….”

“Aih, nilo. Nilo, nilo Candice. He thil hi kan sawifel vek tawh kha. Ka ngaihdan leh duh dan pawh chiang takin ka hrilh tawh che.”

“A khawngaihthlak lutuk, Rach, Mason pawh a mangang hial a sin. A nu leh pate pawh an mangang tawh. An pu pawhin chawlh a pe tawp a, a mize pangngai kha a pha tawh lo a ni.”

Ka awm tawt nghal up up vang chuan ka thaw chhuak hawk a. Ka mittui tling pam chu hmuh tir duh loin ka inher vat a, ka khap zui nghal sak sak bawk.

“Dawt vek min hrilh a, ka thei lo……..Engvangin nge tunah pawh hian ka la ngaihtuah zawk le?” Za lo fe a nuih chhuah pah chuan ka ti a.

“Ka tih tur a ni lo,” ka ti leh sap a. Diktak chuan vawikhat pawh min rawn biak a tum hleinem.

“Rachel, rawn be tawh lo tur chein I hrilh anih kha.”

Hrep tak hian! Ka ngaihtuahna emaw ka tih kha ka lo sawi chhuak em ni? Nge ka ṭhiannu hian ka ngaihtuahna a hre thei zawk?

“Ka hria, ka hrilh ngei a lawm. Mahse…..mahse…..kan inkar siamṭhat tum hian engmah tih a tum hleinem. Min kalsan hmak a, engkim a tawp tawh. Engemaw ka beisei le, hmeichhe naupang ang maiin ka ṭawng leh tak hi.”

Bang chu nghengin Candice lam chu ka hawi leh a, ka kuangkuah than bawk.

“A hnenah khan ka thinlung leh neih zawng zawng ka hlan a, infiamna satliah ang mai mai a nilo asin. Min kalsan tura ka hrilh pawh khan a lo kir leh beisei vanga hrilh ka nilo a, ka duhdan tak tak sawi chhuak ka nih kha. Mahse min kalbosan tak tak hi na ka ti a, nitin mai hian ka thi riai riai ni maiin ka hre thin.”

“I la hmangaih reng a ni tiraw?”

Ka nui chhhuak hawk a, ka nuihzat vang erawh a ni hauh lo, “Aw, ka la hmangaih reng a, ka hmangaih reng bawk ang.”

“Anih chuan call rawh, a number ka nei a lawm! In pahnih hian intuar lutuk, mi â pahnih in nih hi!” Nightstand a ka phone dah chu lain ka dinna lam chu a rawn pan a.

“Ka thei lo, chuti maia awlsam chu a nilo.”

“Aw, I thei a lawm, thil awlsam lutuk, I tih duh loh vanga ti lo mai mai I nih kha.”

Ka phone min rawn pekna kut chu ka lo namsawn a. “Candice, nilo. Ka chunga a thil tih kha ngaihdam theih a nilo. Ka hmangaih a, mahse chu chuan ka chunga a thil tih leh a la tih zel turte hi a tidanglam thei chuang lo. A hming diktak pawh hre loin ka nei hman ṭep anih kha. Engtin nge khatiang thil kha a tih theih zawk? A hming tawp kha Hendricks a ni tiin min bum hlum ṭhak a tum em ni?”
Ka rum chhuak zui nghat a, ka ṭap chhuak mai tur chu min chhawk huaiin ka hria.

“He thil hi sawi nawn ka duh tawh lo, a……….a chanchin pawh hi sawi rik leh ka duh tawh lo, Candice.”

Candice chuan min hnial chak viau mah se, engmah sawi loin a bu ve ta nghat a. Ka phone chu ka khumah dahin a chhuah hma chuan min kuah leh vang vang a. Kawngka a khar hnu pawh chuan ka nghak leh rih a, a unaupain ka taksa a ser a hnutchhiahte hi hmu lo se ka duh vang a ni. Anih loh chuan ṭap chungin ngaihdam min dil leh anga, ṭul loah boruak rit tak kan indelhbeh tir leh mai mai ang. Hun kal tawh a ni a, chutiang thil chu thleng tawh lo se ka duh.

Pawngsual ka nih dan ka hrilh laia a awih lo kha ka rilru a na a, khatiang thil rapthlak lutuk ti duh tur khan Blake kha a ring thei lo a ni. Mahse tunah chuan a thiam loh niawm ang takin engemaw hlekah ngaihdam min dil zel a, chuvang chuan ka taksaa ser awmte pawh hi hmu lo se ka duh a ni. Ţul lo leh awmze neilo a amah a indem zel hi ka duh lo.

Inhum ruh ṭeuh chung chuan ka hma darthlalanga ka thla lo lang chu ka en ta reng a. Ngaiah ka la nei thei meuh lo chu a ni, ka tiril a khur der der a, tih tawp tum chuan ka inseh ruh ṭeuh a. A tirah kha chuan a ser pawh awm loin a dam mai ka ring thin a, mahse a dam tawh dawn lo a, ka taksaa ser awmte hian ka nuna thil thleng rapthlak takte kha ka theihnghilh an phal lo a ni. Mahse tunah chuan mangchhia vanga ka harh fo thinte pawh kha a zia ve hret hret tawh thung.

Ka chhungte min nawrna vang chuan therapy pawh chu ka la ve ta hram a, a tirah chuan karkhatah vawihnih ka kal thin a, a thla thumna atang chuan karkhatah vawikhat chiah ka kal tawh. Kar hmasa mai khan Dr. Markowitz nen kan inhmuh tawpna tur kan hmang dun a. Kha doctor lakah khan lawmthu sawi tur tamtak ka nei a ni. Ka nu leh pate boral lai khan kal turin min nawr tawh a, ka chunga thil thleng vang khan min nawr leh a. Min ngaihtuah vang a ni tih ka hria, an lungawina anih beisei vang chauh a kal ka ni. Mahse ka chhungte hian ka tana tha tur hi an lo hre ber anih dawn hi, ka tan thil ṭangkai tak a ni bawk.

Doctor-I chuan ka hmasawn theih dan turte leh chak taka ka awm a ṭul ziate chu min hrilh thin a, ka hlawkpui takzet. Tunah chuan tutemah dem lo leh, kha misual Blake chetdan leh a thil tihte avanga keimah ka inthiam lohna leh hrehawm ka tih thinnate pawh chu zia tawh tak a ni. Kash leh Mason laka ka inthiam lohnate pawh chu a hma ngaihtuah chuan zia tawh tak a ni.

Khatih laia Kash enthla thintu chu Jason Ruiz a ni a, hrilh lawk anih angin khatianga Blake man anih tak hnu khan, amah Blake leh Kash bakah, Mason-te that tura tih nghal a ni. Chu chu an man hnua a sawi dan a ni. Blake kha mi â ang maia rawng taka che thin mah nise, a lo fing khawp mai. A thil tihsual man kha pek a tum lo bur a ni. Bulletproof vest an lo ha kha ka lawm leh hnuhnawh viau a ni. Kash chu kap fuh ve bawk mah se, pawi lutuk a khawih ta lo hlauh a.

Kan apartment chu camera leh thildang thawm ngaihthlak ruk theihna thil awm leh awm lohte an enfel vek hnu chuan, Jenkins chhungkua pawhin California lam pan turin min hawsan ve leh tawh a. Candice nen bawk chuan kan awm leh ta. Internet atangin carnation tualthahnate chu ka en vat a, engtin nge ka lo hriat loh theih pawh ka hrethiam lo. Keimah vangin khang nula pathumte khan nunna an chân tih ka ngaihtuah chhuah rual chuan ka pum a let nghal but but thei hial a. Ka hmel ang an put vang ringawta thi an ni.

Nileng mai chuan ka sûn a ni ber e. An vanduai zia ka ngaihtuah phei chuan pawi ka tiin, ka thinte chu a rim hlur thei a. Ka inthiam lohna bansan tur chuan rilru lam doctor, dr. Markowitz-i nen pawh vawi 5 lai kan inhmuh leh a ngaih phah ta hial a. Candice pawhin engemaw chen chu ka phone leh laptop-te min laksak a, a thuhruk a ngaih phah hial. Khatiang thil kha hmu tawh lo ila min duh vang a ni.

Mahse tunah chuan ka hrethiam ve ta. Blake kha mi pangngai nilo leh rilru kim lo kan tih thin ang kha a lo ni reng a. A tualthah chhan kha keimah vang a nilo a, khatiang thil kha ka chunga a tih chhan kha ka thiam loh a ni hek lo.

Darthlalangah chuan ka taksa leh ka ban serte chu ka en reng a. Ka awm veilam deuh a, ‘KA TA’ tih chemte hmanga a ziah ka en lai chuan ka khur leh nghal dar dar a, mahse ka mittui a tla hauh lo thung. Blake sulhnu ka taksaa min hnutchhiahte hi ka hmuh tirh kha chuan hun engemaw chen chu ka talbuai a, nikhaw hreloin ka awm phah hial thin anih kha. Ngaiah la nei thei miah lo mah ila a hma ang em em kha chuan ka danglam tawh bik lo e. Tunah chuan Blake kut atangin min chhanchhuaktu tur ka mamawh tawh dawn lo a, mangchhia pawh mang mai mai a ni zel tawh ang.

Inti huaisen lui tak chung chuan ka nui sak a, shower-ah chuan ka pen lut ta nghal a. Ka harh phah sawng sawng leh ngei ang.

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » February 28th, 2021, 12:43 pm

CHAPTER - 35

KASH :

“Lo lut rawh, Ryan,” ti ri ka hriat rual chuan ka lut ve nghal a, kawngkhar pawh ka pawt phui zui nghal bawk a. Chief dawhkan hmaah chuan amah ep chiah tur chuan ka ṭhu a.

“Good morning Sir,” tiin chibai ka buk zauh a.

“I ṭha zel em, Ryan?”

Ka ṭha hauh lo, ka ṭha lo takzet. Nuih vak maite chu ka chak a. “Umm…ka zia tawh e.”
A pen kenlai khawng keuh keuh chung chuan a bu nghut nghut a.

“I chawlh lakte chuan a tihahdam thei che em?”

“In ngaihtuahna hun ka neih phah a, chuvanga lo kal chu ka nia.” ṭhut ngil pah chuan thaw la halh a. Min en reng tih hre mah ila, hai der ka tum viau a ni.

“Banna thehluh ka duh a.”

A pen khawn lai chu a tawp chawt a. “Engtin a?” a ti ṭhat a.

“Ka hna hi chhunzawm tlak ka ni tawh loin ka hria, he hna hi thawk tlak ka nilo. Ka hna chauh ngaihtuah loin ka nunah hmeichhia ka seng lut a, ka hna ka dah hmasak loh vang a ni. Chuan, keimah vangin dinhmun hlauhawma ding a awm phah ta bawk si a.”

“I nupui hual,” a ti leh nghut a.

Ex…. “Aw, ka hna chauh ngaihtuah ni ila chuan khatiang thil kha a thleng hauh lo ang. Rilru zawng zawng pe ni ila chuan khatianga a chet hma khan West kha kan man daih tawh tur a nia.”

“Ngaithla teh, chawlh la tura ka tih hma che khan Gates nen kan inbia a, thil thlengah khan i indemin, i inthiamlo hle tih min hrilh a. Chuan, hei hi hria la ka duh, ban i tumna hi ka pawmsak dawn lo che.” Ka boss ngaihdan chu hnial duh viau mah ila hun min pe lo, a sawizawm leh nghal a.

“Detective Ryder nen pawh kan inbia a, in hnathawh danah a lawmin, a beisei phak bakin in hnaah i inpe tih min hrilh bawk a. In hna chu bara tualthattu zawn kha a ni a, mahse credit card list leh camera footage zawng zawng pawh in chhui nawn leh vek thin a. Ryder phei chuan ngaihzawng i nei tih pawh a lo hre lo a, in inhual tih phei chu a hre lo tawp. In hnathawh dan atang khan ngaihzawng nei hman turin a beisei miah loh vang che a ni. Tichuan, Blake West man tura inthawh chhuah dawn ṭepah khan a hre ve ta chauh a, ka ngaihdan chuan tu emaw hnaa rilru pe tawk lo chet dan chu a niloin ka hria,” a ti a.

“Mahse Chief………”

“Chuan Gates nen kan inbiak khan kha kan misuala khan i nupui hual nen pawh a umzuiin, a tibuai che u tih min hrilh bawk a. Chuti chung pawhin i nupui hual himna tur anih ringin i hnathawh leh i nihna diktak pawh i zep a. Ryder leh Gates pawhin awm lo la chuan Rachel Masters kha a hun takah an chhanchhuak hman hauh lo ang an tia sin. Tichuan Blake West pawh kha thlarau leh ramhuai ang maiin kan la ngai zui ta reng anga. Awle, tunah chuan ban i tumna ka pawm loh chhan hi i hrethiam tawh ang chu,” a tih zawm leh ta mai a.

Tinge ka harsatna hi tuman an hriatthiam loh le?

“Keimah vangin……..”

“Ryan, hei hi min hrilh teh,” a tih zawh chuan a ngawi leh dat a. “I hna hi nuam i ti tak tak em?” a ti leh a.

Thawk halh pah chuan, “Nuam ti tehreng mai,” ka ti ve mai a.

“Chuan gang division a thawh hi I nuam tihzawng a ni em?”

“Ti lutuk.” Min zawhna chu dik takin ka chhang a.

“Anih chuan I banna hi ka pawm sak dawn lo che. I nupui hual thil tawn kha a rapthlak em em a, thil tamtak sual chhuah tur in nei ang tih pawh ka hria, mahse I chunga hetiang thil I ti hi ka duh lo. I hna hi I thiam em em a, Gates nena ka bula in thawk thei hi ka inchhuang viau asin. I hna hi I ning tawh a, a aia ṭha zawk thawh tur I neih hma loh chuan I ban ka remti lo.” A ti ta hmak mai.

Inseh ruh ṭalh ṭalh chung chuan ka bu ve ta nghat a.

“Sawi duh dang I la nei em?”

“Nei tawh lo, Chief.”

“Anih chuan ka office hi chhuahsan nghal rawh. Hetah tih tur I nei lo, nihnih chauh I la nei.”

Kan apartment ka thlen leh hnu chuan Mason awmdan chu a mak ka ti hial zawk. Mahse ngai pawimawh duh loin beer chu ka hawng nghal a. Coffee table a ka dah hnu chuan a bul sofa-ah chuan ka ṭhu ve nghal a, “Puih theihna che ka nei em? Engmah sawi loin minute 5 zet min en tawh a nia.”

“I pa khan engemaw sawi a nei em……englo…?”

“Phiangsen che hian, Mase! Rachel chungchang em ni? Rachel chungchang sawi a nei em I tihna em ni? Aw, nei e, ka nu pawhin a sawi a lawm, chuan ilo fuihpawrh vang a ni tih ka hre bawk. Mahse he thil hi I theihngilh a ngai. A duh ang ngeiin ka kalsan a lawm.” Ka beer um chu lain ka pindanah chuan ka luhsan ta daih a.

Thla thum leh a chanve a liam tawh, mahse a tir ai mah khan tawrh hrehawm ka ti zawk daih. Hmasawn aiin ka hnung tawlh zel ni maiin ka hria. Engkim mai chu ka hne em em a, thinrim reng ang hi ka ni mai. Darkar tam fe fe chu ngaihtuahna kawmin ka inngaihtuah a. Hun kal tawh siamṭha leh tura, hun liam tawhte kohkir leh theih chu ka chak a ni. A tirah kha chuan hun pek a ngai tiin ka inhnem a, ka hnena a lo kir leh hun ka nghak a ni. Mahse tunah chuan Mason pawh a beidawng ta aniang, Rachel chu lo kir leh tur ang pawhin a sawi ngai ta bik lo. Tunah chuan keimah zawk hma la turin min nawr ta sek mai anih hi. Enge ka tih anga, engtin nge ka awm dawn pawh ka hrethiam tawh bik hek lo.

Ka khuma thil awm chu chet nachang pawh hre loin ka melh ta reng a. Inthing harhin ka beer ken lai chu dawhkanah dahin, ka khum chu ka pan phei a. Chu velvet bawmte chu enge anih ka hrechiang lutuk tlat, a chhunga awm thin zungbun kha chu Mason ka pe daih tawh a, a bawm ruak hi ka lo la kawl ta reng anih hi. Bawmte chu la kangin ka hawng a, beisei loh zetin a chhungah chuan Rachel, ka nupui hual ni tura ka sawm ni a ka pek zungbun ngei kha a lo awm reng mai. Bawm chu chhinin ka hmai ka tuai puat a, khuma thlalak lo let reng chu la kangin ka en tlawk tlawk a.

Khami ni khan eng thil nge thleng ka hrethiam tawh lo, tunge kan thla lo la hman lah ka hre tawh hek lo. Thla chu Rachel-te apartment a lak a ni a, Rachel chuan alama min pawh hnaih tum niawm takin ka kawr âwmah a pawt a. Kei chuan a biang tawn tawnah vuanin duhthawh tak mai chuan ka lo fawp mek a. Ka thinlung na chuan lungawi lohna ruamah bawk chuan min hnuklut leh ta….Ka thlalak ken lai chu hmet khawr lo tura ka insum a ngai hial a ni. Mahse ka thisen so bulh bulh chu ka thunun thei chuang hauh lo, thawk chhuah vek tum niawm tak chuan ka thaw sek sek a. Living room-ah bak chuan ka tlan chhuak leh nghal. He thil hi Mason ka zawh vat a ngai.

“He thil phiangsen hi enge, khawi atangin nge I neih?” Mason chu a ṭhutna ngheng ar ar chungin leh kuangkuah than chung chuan a lo ṭhu a, “Candice min rawn thawn anih kha.”

“Engvangin?”

“Kash, hetiang hian in inhrem tawn reng thei lo ang.”

Ka buk khum nghut hnu chuan ka room a luh leh mai tumin ka inher vut a. Ka thlalak ken lai chu lek kang va chungin, “Min en ta che, a duhthusam ang ngeiin ka kal bosan ta anih hi!” ka ti vin hlur a.

“In chunga thil thleng mek hi inluhlul dun lutuk vanga in siam chawp mai mai anih hi. Khawvela thil atthlak ber a ni bawk. Puitling angin awm tawh la, I nupui hual chu hruai let leh rawh.”

Thlalak chu hmet khawrin, sofa-ah chuan ka vawm thla a. “Mase, he thil hi a tawp tawh. Tunah chuan a tawp tawh.” Luhlul zet chuan ka ti leh hram a.

RACHEL:

Ka ke mu deuh chuah chuah tawh chuan min dinpui nghet lo kher mai. Ka kutzungṭang chu fawpin ka hmaa thlan lung ding chu ka tawk zauh a. “Ka nu, ka pa mangṭha phawt ule,” tiin ka phun zui sap a. Ka mittui hruk hul leh puat pah chuan Candice min lo nghahna car lam chu ka pan ve ta nghal a.

Kum 4 leh a chanve hnuah ka nu leh pate thlan hi ka tlawh ve ngam chauh a, huphurhin hreh viau mah ila tunah chuan ka ti thei ta. Tunah chuan ka journal ziah kher ngai loin ṭawngka ngeiin ka be thei ta, nuam ka tiin ka hlim a ni. An bula awm ang maiin ka inngai a, he khawvelah hian awm ve tawh lo mah se, kan inhnaih leh ta sawt niin ka hre hial.

Ka ṭhutna bula ka journal chu ka zut riak riak a, ka nu leh pate ka biak theihna kawng awmchhun ni thin kha a ni a, ka nui lui sak a. Ka nu leh pate thlan chu tlawh ngam tawh mah ila, ka journal hi chu ka la mamawh reng dawn a ni. Kha leh chen kha ka nu leh pate nen inzawmna min siamsaktu a ni tlat.

Jenkins chhungkaw chenna hmun ka thlen leh hnu chuan ka jacket chu ka zip phui vat a. Vur tla ve lo mah se, January thla hi chu a vawt ve viau tho. Kei chu kawrlum leh kawrban tlawn hak a ngai hi ka lawm daih zawk a, Candice-te chhungkaw hmuh theih loh turin ka ban vela ser awmte a khuhbo theih vang a ni.

Ely-a chuan nui var var chungin kawngka min lo hawn sak a, “Candice-in in kalna tur min hrilh a,” tih pahin ka chalah chuan min fawp zauh a. A sawi duah dawn lo tih ka hre sa, ani hi chu a ṭawng tam loh bakah, thil sawi kual duah chi a nilo ve hrim hrim. Nuih let ve sang pahin inchhungah chuan kan inzui lut a.

“Nia, a nuam ka ti khawp mai. Ka veng deuh hawkin ka hria. Hetiang hi a ni dawn tih hria ila chuan a hma daih khan ka tlawh tawh ang. Paisley I lo hruai ve em?” ka tihzawm nghal zawt a.

A bialnu hming ka sawilan vang chuan Ely-a chu mak ti leh nuihza hmel a pu deuh a. Bialnu satliah leh ngaihzawngte chu nei ve duah thin mah se a tute mah kan la hmuhpui ngai lo. Mahse chhungkaw thil tih engemaw a awm chuan Paisley hi a rawn hruai ve ziah thin. An pahniha an awmdun lai hi hmuhnawm ka thin a, Ely pawhin a duhzia a tilang hreh ngai lem lo.

“Rawn hruai e, ka nuin rawngbawl a zirtir a. Kei chu choka lama chet hi ka tuina a ni ve lo,” a tih chuan ka nui chhuak hawk a. Ka jacket chu phelhin ka kawrban chuan ka banrek serte chu ka khuh ṭha nghal sat sat a.

“Thla tharah hian a zirlai a zo anga, chumi hnu chuan kan awm dun tawh ang.” Ely bawk chuan a ti leh a, lai hmel a pu deuhin ka hria.

“A ni maw? Ely, thil ṭha tak anih chu!” ka lo tihsak vat a. Choka lam melh pah chuan a nui var var a.

“Nia, anih ngei ka beisei. Enteh maw, midangin min neih khalh hma ngei hian ka taa siam ka duh a,midang ta ni tur anga ka ngaihtuah hian ka tuar thei ngang lo,” a tih chuan chal chuar nang chungin ka lo en a.

Paisley nen hian awmdun an tum tih ka hre tawh a, Paisley pawh hian a hmangaih tih ka hai lo. Ka unaupa zawk hian he nula hi a hmangaih a ni tih a hrechhuak har em a ni. Mahse tinge hetiang thil hi min hrilh tak thut le?

“Keimah hian ka hrechhuak har lutuk a, mahse ka ta ni lo tur ang leh, kan damchhung hun hmang dun thei lo tur anga ka inngaihtuah khan ka thei dawn lo tih ka hria a. A tello chuan ka nun hi a ruak a ni tih ka hriat hnu kha chuan chân mai ka hlau ta anih hi.”

“Ka hria a lawm, Ely. Keipawh…..” ka thusawi chu sawizawm duh loin ka ngawi dat a.

“Ka lawmpui takzet che,” ka ti ta zawk a.
Zawhna mitmeng nena min en reng vang chuan zahzelah kan titi chu a ho zawngin ka chhunzawm ta daih a.

“I thluak luhlul tak kha I thunun theih tak vangin ka lawmpui che,” nui chung chuan ka ti a.

“Chutianga I ngai thei chu a lawmawm hle mai, unaunu,” nui chung chuan min chhang ve mai a. Ka darah chuan vuanin, a hmaah chuan min dintir a. Ka inher rual chuan Candice beisei nei hmel zeta min lo melh kiau lai chu ka hmu nghal a. Ely chuan min nawr pheiin a bulah chuan min ṭhuttir a.

“Hey, Ely. Eng chu nge maw I hriat le?” ka lo ti hlar a, thinrim erawh ka ni lo.

Ka darah chuan a la vuan reng a, Candice chuan min rawn ṭhut hnaihin a laptop pawm lai chu a hawng a. Screen-a thil awm ka hmuh rual chuan din nghal mai ka tum a. Mahse Ely-a kut chuan min nem bet tlat. Tunah chuan min dim lutuk tawh lo.

“Hei hi eng thil nge?”

Ely-a leh Candice-te unau chu an rum rual nghut a, inthurual leh tum sate pawh an ang zawk a lawm. Skype-ah chuan Mason nui hmel a lo lang a, rum zetin ka melh ve reng ringawt. A nui hmelah erawh chuan lungngaihna a lang telin ka hria.

“Hello, bawihi,” a rawn tih chuan ka hrawkte chu a ro nghal hulh hulh a. Kei hian dik lohna ka nei emawni zawk le? Ka mit sa deuh vat vat chu ka khap sak sak a.

“Enge I duh, Mase?”

“Ka ṭhianṭha ber hi ila hmangaih em ka hre duh,” a rawn ti tawng.

“Hmangaih lo.”

“Dawt anih chu!” an pathum chuan an tirual ṭhawt a.

“Dawt sawi i thiamlo hle mai,” Ely-a chuan a tihzawm zat a. Candice lah chuan, “Thla hmasa mai khan i hmangaih reng tur thu min hrilh kha,” a lo ti ve bawk.

“Phatsantu,” tiin ka phun sap a. Mason erawh chu ka chhanna nghak niawm takin a lo ṭhu ngawi reng thung. Ka ṭawng tak mai loh vang chuan aw a thian kharh a.

“I mitmengah khan ka hmu thei a lawm, Rachel. Kash mitmenga ka hmuh ang chiah kha ka hmu. Engmah awm lo, ruak vek ang mai anih kha.”

“Laptop camera lens hi a diklo aniang,” ka ti ta ringawt a. Ely-a hian ka darah la vuan reng lo se chuan ka thlawk chhuak daih tawh hial ang. Ka zahzel chu ka che sek a, an la ngawih ṭhap vang chuan, “Midangte pawh hetiang vek hian an lang,” ka tihzawm leh a. Atthlak ti viau mah ila sawi mai tur ka hre tlat lo a ni.

“Dawt anih chu. Chuan zawhna pahnihna….”

“Haha….A tawk. Pakhat kha a tawk. Sawi belh tawh suh, Mase,” tih pah chuan thawh mai ka tum a, mahse Ely-a chuan min la dawmbet tlat. Ka tih ngaihna hre lo chuan laptop chu chhin tumin ka ban a, mahse Candice ka chet khalh leh hman ta chuang lo. Ka kut chu nemsawnin, ka ban phak loh turah laptop chu a nawr sawn daih.

“Engvangin nge hetiang hian hrehawm takin in insiam luih tlat. Ka ṭhianpa hi i tello chuan mitthi ang mai a ni. A hna atangin ban a tum tihte kha i lo hria em? Chutiang khawp chuan a dinhmun a chhe tawh asin, Rachel.”

“Chu chu ka lo buaina tur a ni hleinem,” tih pah chuan ka thaw halh a. “Dawt min hrilh a, dawt vekin in chanchin phuahchawp min hrilh a, kei chuan ka ring vek a sin. Chuan, i hria em, Mase? I chungah pawh hian ka lungawi lo khawp mai. A chanchin leh nihna diktak engmah hrelo chung khan engtinnge i ṭhianpa kha min neih tir i tum theih zawk? I unaunu angin min en a ni lawm ni, khatiang kha i unaunu chunga a thlen i remti dawn em ni? Ngawi teh, unaunu i neih tak tak pawh hi ka ring tawh lo e a!”

“Ka nei a lawm, nang ai chuan tlemin a upa deuh. A theih chin chinah chuan thudik kan hrilh zel che a sin, Rachel. In inhual tih ka hriat khan ka lungawi lo em em a, in awmdun ka duh loh vang lam a nilo. Mahse kan hnathawh vang khan kan nihna diktak kan hrilh theih rih loh vang zawk che a ni a. Ka ṭhianpa pawh kha a beisei aia hmain hmangaihnaah a tlu lut a, khatiang thil kha a thleng ta anih kha. A ta i nih hma loh chuan a lungawi thei lo a, a inthunun zo ta ngang lo a ni. Thudik i hriat hma loh chuan neih che a tum lo a, a duh chuan in inneih ni thleng pawhin dawt kha a hrilh thei che a sin. Mahse a zah em em che a, chu chu a hrechiang bertu ka ni. Hei hi chiang takin hria la ka duh, i tan chuan eng thil pawh a ti anga, a nunna hial pawh a hlan phal che asin.”

Ka thu hriat chu hnial khan tha deuh hmanga hnial thlak ka duh, mahse sawi tur reng reng ka hre lo. Kash vanga ka tawrhna hi ka hua a, rilru na takin a awm tih ka hriat hian min tina a. Keimah vangin hrehawm a tuar mek tih ka hriatna hian min tina lehzual.

“Mahse i hrethiam lo a ni, Rach. Austin a kan lo kal khan Florida a kan hnathawh vanga rawn biru kan ni a, thi tura min duh leh min vehtu an awm vang a ni. Hming lem invuah mai loh kha chu thlan tur dang kan nei lo a, tichuan undercover-a thawk chhunzawmin, carnation tualthattu kha kan zawng ta a ni. Kan hming leh hnathawh tur kha kan thlan a nilo a, mahse he hna hi kum 4 dawn kan lo thawh tawh vangin keini tan chuan thil thar a ni hauh lo thung. Nangni hi kan tawng ang che u tih rin leh beisei ngaihna lah kan hre hek lo. Tichuan, in himna tur zawk anih beiseiin inlakah pawh thudik chu ka zep tlang ta anih kha. Diktak chuan kan chhungte pawhin kan awmna hmun kha an hre reng reng lo, Rachel,” thawk a lak hap hnu chuan a ngawi vang vang a, chutah sawizawm leh in.

“A tirah chuan Kash pawhin hmangaih loh che a tum ve thin a sin, amah zawk khan bialnu nghet kan neih theih loh dan min hrilh nawn fo thin a. Khatih lai khan keimah min hrilh loin amah a inhrilhna leh a infuihna a ni tih ka hre daih tawh. Mahse nangmah ang hi a tawng ngai lo a, a hlat thei ta lo che anih kha. Nang chuan engkim kha dawt leh inbumna ang vekah i ngai tih ka hria, mahse thudik a hrilh theih loh che avanga a tawrhnate kha i hmu thiam ta tlat lo a ni. Ni e, nang chuan dawt a ni tih i hre tlat lo a lawm. A dinhmun atang hian han thlir ve teh…kan hnathawh leh dante avang hian thihna tamtak kan hmuin kan hmachhawn tawh a. Nunna tawizia kan hria a, chuvang chuan holam taka khawhral kan duh ngai lo,” a ti a.

“Mahse, khatiang khan……” ka tih lai mek chu pawt chatin. “Lo ngaithla leh lawk teh, Rachel. Ka’n sawi zo phawt a nge. Kash hian bialnu, bialnu nghet a nei ve tawh thin a, an inkawp rei ve viau bawk. Undercover-a kan hna hmasa ber kan thawh zawh veleh nupuia neih a tum a, mahse kan hna kan thawh zawh meuh chuan mipa dang nupui hual a lo ni der tawh. Megan nen an inkawp lai khan nangmah a en thin dan che hian a en ngai reng reng lo asin. Pasal hual a nei tawh tih a hriat ni khan lawmpuina leh duhsakna a hlan a, a pasal hual chuan a pek ve theih loh tur hlimna a pe thei dawn tih a hre tlat a ni. Ni e, a lung chu a awi bik lo, mahse, vawinna a thil tawn mek nen hi chuan khaikhin chi pawh a nilo. Hetiang zawng zawng hi hrilh chhan che ka nei a, a dinhmunah dingin a thlirna atang hian thlirpui tur chein ka duh che a ni. Hmeichhe pakhat, a khawvel leh a nunna hial ni thei mai tur a tawng tih ka hriatpui a, i puma neih che a duh a, i thinlung thlengin. Chuvang chuan a nghak thei ta lo a, thudik pawh hrilh hman lo chein a nupui ni turin a sawm ta che anih kha. A ta ni tura a duh leh chân che a hlauh em em chu, midangin an neih khalh a hlau a, a thil tih kha a diklo viau em ni? Ni e, thudik hrilh che kha a tih makmawh a ni ngei mai, mahse a hmangaihna che khan a bual â vek a, i kalsan mai a hlauh vangin a hrilh ngam leh ta lo che a ni. Vawi tamtak hrilh che a tum a, i hlim hmel leh i nui hmel a tireh dawn tih a hria a, a sawi ngam ta thin lo a ni.”

Ka biangah chuan ka mittui chu a rawn luang ngiai ngiai a, hruk hul tumin ka kut chuan ka tuai a, mahse a hul thei lo. Rawl chhuahin ṭap lo mah ila, dan rual lohin ka mittui chu a luang thung.

Link:
BBcode:
HTML:
Hide post links
Show post links

Local Advertisement

MOBILE SIAM ZIR DUH TAN!!!

Tech-Inn Mobile Repairing Traning Centre, Bazar bungkawn

Kum tin mi za chuang eizawnna kan siamsak a, Eizawnna tlaka thiam turin kan zirtir thin

Mizorama mobile siam zirna hmasa ber changtlung ber kan ni. Hrechiang duh tan Contact : 9612099411 / 9862016122


Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » February 28th, 2021, 12:43 pm

CHAPTER – 36

Ka aw chu thianin chil ka lem leh khalh a. “Engmah hi ka hrethiam tawh lo, Mason. A dawt min hrilh kha ka chunga thil thleng tawhah chuan a rapthlak ber a ni hial ang. Mahse ka ngaidam anih chuan, awlsam takin dawt hmangin min bum leh thei asin.”

A kut chu rawn phar chhuakin, screen-a ka hmel lang chu a khawih niin ka hria.

“Rachel, hei hi ka hming ka hriat chian tluk zeta chiangin ka hria a ni. Ka ṭhianpa hian a bum tawh ngai lo ang che, a dawt hrilh chhan che pawh ka sawifiah vek tawh kha. Mahse i rin tur leh tur loha thutlukna siamtu tur chu nangmah i ni a, i rilru a na tih ka hria a sin, bawihi. Ani pawh a dang chuang lo, a tuar na lutuk tlat. Tute mah hian intuar lai hmel hi hmuh nuam kan tilo. I hnena kir leh turin ka hrilh fo thin a, mahse ama thu chuan a lo kir tawh lo ang. Achhan chu a tina tawk tawh che a, tin, a hna hi i tan a hlauhawm lutuk a tih vang a ni. Diktak chuan hlim taka awm turin a duh che a, chutiang chu a pek theih loh che a hlau a ni zawk mah. I chunga thil thlengte avang khan tun thlengin amah ala indem em em asin.”

A ṭawng tawp lam chu a zuih ral a ni deuh ber tawh a, mipa chu nilo se a ṭah ve hial ka ring. A hnuk a ulh tih ka hre tlat a ni. Kei ve thung chu ka insum zo tawh lo, ka hmai hupin ka insut hlawp hlawp a.

“Rach, he thil hi tu emaw zawk zawkin in tih tawp a ngai. Ani chuan i duhthusam tihsak che angah a inngai a, a hlat che hian i him zawkah a ngai nghet hmiah tawh.”

Ka thinlung na avang chuan ka awmte chu a tawt ṭun tawh a, lungngaihna leh natna chuan min tuam hlup hlup ni maiin ka hria. He natna hi ka tan thil thar a ni hauh lo, thla engemaw zat chu min chenchilh tawh zawk anih hi. Chutiang chu ni mah se, ka tawrh thiam phah reng reng lo a, ngaiah ka nei thei chuang hauh lo. A na a zual a, tawrh a har tial tial zawk anih hi.

Thinlung na leh kehsawm vang hian mihring hi a thi thei a ngem le? Ka ring chiah lo, mahse chu a natna chu a up bet a, a tinatu chuan a tidam lo anih si chuan kumkhaw chawr lohna chu a thlen thei chiang ang tih ka hria a ni.

Sofa-ah chuan ka ke hlangin nghet zet chuan ka inkuah khawm ta ringawt a, chutianga ka ṭhut reng hnu chuan Ely-a chuan min pawt thoin a malah chuan min ṭhuttir ta ringawt a. A lakah hi chuan hmeichhe naupang ka ni reng dawn anih hi.

“Rach,” a ti sap a. “Keipawhin ka thluak luhlul zet hi ka thunun tawh a….chutianga ti ve tur chuan i inpeih ve em?”

KASH :

“Mase, ka lo thleng a nia,” tih pahin ka tie awrh lai chu ka pawt thawl a, kawrkilh pawh ka phelh nghal a.

“Balhla cake kha ka duh leh tih i nu chu i lo hrilh ta em?”

Fridge chu hawngin, tuium ka la chhuak a. “Hrilh e mawle, i duh chuan i lo kal a ngai a ti.”

“A ṭhat hlauh chu, ka chhuak lawk dawn,” tih pah chuan chahbi chu banin kawngkhar lam chu ka pan nghal a.

“Hey, lo ding teh. Enge i hriat a? Zaninah a siam nghal dawn hleinem. Chuan, lo haw vat turin min tia, tunah min chhuahsan lehnghal i tum bawk sia. Karkhatah ka chhungte hmuhna hun vawikhat chiah ka nei a, rei pawh ka awm hman hmain min ko haw nghal a.”

“Nia, a dik a lawm……..mahse ka chhuah lawk a ngai. Naktukah kan inhmu leh dawn nia.”

Mak tih vanga ka deuh hau chung chuan a chhuak lai chu ka en ta ringawt a. Nilengin court-ah hun ka hmang a, chumi hnuah ka nu rawngbawl eiturin ka kal a, ei pawh ka ei hmain min ko haw sauh sauh a, min chhuahsan leh daih anga maw? Hrep tak hian! Ka inthlak anga, keipawh ka chhuak leh daih ang. Hetiang vang mai mai hian ka nu eitur siam ka chân dawn teuh lo mai.

Ka room-ah chuan lutin ka tie leh kamis hakte chu ka pawt phelh nghal zung zung a. Ka kawnga ka zeh, silai leh badge-te chu phelhin dawhkanah chuan dah mai ka tum a, dawhkana thil awm chu ka hmu chiah. Ka lungphu chu second rei vak lo a tawp a, chumi hnu chuan tlanchhuah tum ni mai awma rang chuan a phu leh zawt zawt a. Ka thil ken chu dahin sour patch kids, a hring chi hlir lehnghal a ni. Rachel nena kan inchuh thin leh amah ngei pawh ka koh fiamna ang chi ngei mai kha. Nghet fe chuan ka maimitchhing ta ringawt a. Ka pindanah chuan pen thawm ka hria a, Mason anih vaih chuan ka kap zawt ang ka ti rilu hman hial a.

Thawk chhuah ham ham pah chuan ka inher a, ka hmaa ding ka hmuh rual chuan ka lungphu chu a tawp leh tawh. Rachel hmeltha tak leh meng biak kawl chuan min lo melh kiau a. Beiseina sang tak ka neih hma chuan kan inbiak hnuhnun ber ṭuma a thusawi kha ka hrechhuak leh ta uar uar a. Ka thinlung chu chhun ang maiin a na leh ta. Thla li chhung kan inhmu tawh lo a, nikhat lek pawh ani hi ka la theihnghilh ngai loh bakah, a hnena kir leha engkim siamṭhat leh vek theih hi ka duhthusam a la ni reng a sin.

Tumah mah ṭawng ta lo chuan kan inmelh tlawk tlawk ringawt a, a mittui a bianga a luan tak ngiai ngiaiah chuan ka insum thei tawh lo. A hlata awma amah khawih lo tura inthunun chu ka thei ta lo a ni. Hetah hian enge a rawn tih ka hre lo a, ka lak atang hian enge a beisei lah ka hre hek lo. Ka hriat chhun chu, a hma zawng ai khan ka hmangaih zual sauh a ni. Tichuan ka hmangaih chu tunah hian ka hmaah a ṭap mek bawk.

“Rachel,” thawk halh pahin ka kuah ta ringawt a. Inhnit hlawp hlawp chungin ka nghawngah chuan a hmai a phum tlat a. A lu a fawh sak pahin nghet zetin a kawngah ka kuah tlat a. A sam rimtui tak chu ka hip lut vang vang, ka va han hmangaih tak em. A rimte chuan ka thluak a tifim kawk kawk ni maiin ka hria. Ka hlim lutuk chu Pathian hnena lawmthu sawi a, au chhuah vak vak mai ka chak a. Khum lamah chuan kai pheiin, ka mal chungah ka ṭhuttir a, a kawngah bawk chuan ka kuah leh nghal vat a. Diktak chuan ka ngaihtuahna mai mai anih ka hlau a ni.

Sawi mai tur pawh ka hre lo, ṭawng sual ka hlau a ni zawk mah. Tunah hian lungawi takin ka kuah thei a, ka ṭawng sual vaih chuan min kalsan leh mai ka hlau. A duh chen chen ṭap se, ka ta ni thin leh ka ngaih em em thin kha kuah hle hle ka duh. Ka ngai a ni, Rachel hi ka ngai lutuk, ka ât phah lo chauh anih kha. Tunah hian ka kuah a, ka taksa si rengin a awm mek a, he thil hi engmahin ka thleng phal lo.

La insut hlap hlap chung chuan, “Min ngaidam rawh,” a ti sap a. A inla hrang zui nghal. Ka ta ang maiin ka lo pawm a, mahse tunah chuan a ni leh tawh lo. Ka lak atangin a inla hrang leh daih tawh. Khum sir lehlama a ṭhut lai chuan ka lo insehruh ṭeuh ringawt a.

“Ka…….ka…….ṭap tur ka nilo a sin. Biak che ka duh a, he thil hi ruahman lawk a ni a, ka tih theih mai ka lo inring a sin. Mahse ka hmuh che khan………ka……..ka……min hrethiam rawh. Khatianga awm tur kha ka nilo.”

A thusawi chu chhan mai ngaihna ka la hre ta chuang lo. Ka bulah Rachel a awm a, Florida-ah min hmu turin a lo kal a ni. Thil ṭhalo lam a sawi dawn anih chuan helaia lo kal kher lo pawhin a sawi thei a ni lo’m ni? Min rawn call thei a, nilo…..a hma ang khan min be lo tawp zawk ang.

“I ṭha em?” Hrep tak hian! Chu lo chu sawi mai tur ka la hre chuang miah lo. Ka thluak hian hna a thawk ta lo zawk emaw nile? Mahse thil tamtak sawi tur leh zawh duh ka nei a, a kam keu nan chuan a ṭha ve thoin ka hria. Engemaw sawi tum niawm tak chuan a ang zuau a, mahse a chip leh daih.

En tur ber hre lo niawm tak chuan pindan chhung chu a melh kual ruai a.

“Thudik i hre duh anih chuan……ka ṭha hauh lo,” a ti mai a. Ka thiam loh a ni, a ṭhat loh chhan hi keimah vang a ni. Ka pum let but but chuan ka awm a tinuam lo thei hial a, mahse min thlamuan theitu ber thlamuanna hi ka beisei ngam silo. A vawikhat kuah pawh hian min tidam thei a sin.

“Ka chunga Blake thiltih kha chu a nilo, kha kha chu…….ka ṭha tawh. Mangchhia vangin ka harh fo thin hi a ni deuh tawh mai. Mahse zantin chuan ka mang tawh lo. Class kal pahin hna pawh ka chhunzawm leh a, mahse zirna pawh chhunzawm ka tum tawh lo. Admission pawh ka ti ta lo mai. Ka major kha ka tuina pawh a ni lo a, hna zawn nan lah hman ka tum chuang lo a.”

Nui lui tih hriat zet chuan a ṭhen sak a, min melh pah ralh bawk.

“Chuan, ka nu leh pate thlan pawh ka tlawh ve tawh a sin.”

“A ṭha lutuk. Ka chhuang takzet che, Rachel.”

“Ka hua che,” a lo ti bauh a. A thusawi chuan min deng na lutuk, ka nghing lawih thei hialin ka hria.

“Phone call hmanga ka nu leh pate chetsual thu ka sawi bak kha chu tu hnenah mah ka sawi chhuak leh ngai tawh lo. Sawi chhuah fo pawh ka duh hek lo. Tichuan, min nawr luih tlat vangin ka hrilh ta che anih kha, mahse keimah pawh khan hria la ka duh vanga sawi ka ni. Ka chanchin engkim hre turin ka duh che asin. Ka chhuanlam siam i pawm ve ngai lo a, min hmu tlang vek ni maiin ka hre thin. Kha khan min tihlim thin asin, i laka thuruk leh zep nei theilo a min siam thin kha.”

Hun kal tawh a sawi lai chuan ka lo thaw hawk a, ka maimitchhing zui daih bawk.

“Khatih lai khan min chhan chhuak tur a i rawn kal beiseina khan huaisenna min pe a sin,” a tih chuan a aw a lawi deuh ṭiau a, a khuh lui leh deuh kharh kharh bawk a.

“Inchhung i rawn luh khan…Ni e, ka beisei ang ngeiin min chhanchhuak turin ilo kal tak tak. Mahse….mahse tute nge ilo kalpui kha. Ka bula Blake awm reng pawh chu ka ngaihtuah thei lo, dawt min hrilh tih ka hriat rual khan ka hlauhna a bo a, ka thinlung chu a kehsawm ta a ni. Ka harh chhuah leh hnu khan dawt leh suangtuahna mai mai ka hmangaih a ni tih ka hrechhuak hmasa ber a, ka inven ve thinna leh ka ralthuam neih chhun bang kha min ṭhiahsak tawh a, kei chuan ka neih zawng zawng ka hlan che a, ka thuruk thlengin ka hrilh che asin. Mahse tunge i nih ka hre tawh lo che, Kash,” a tih leh sap hnu chuan a mittui a hru leh a. Ṭawng zawi viau mah se a thusawi chu ka hrechiang hle thung.

“Rachel, ka hrilh thei lo che………” ka tih lai chu pawt chatin,

“Ka hria, Mason leh Candice-ten engkim min hrilh vek tawh. In hna leh undercover anga inthawh dante pawh ka hre tawh. Mahse, khatiang thil lian tham zep ngai chung kha chuan i nupui ni turin min sawm lo la, inlaichinna nghet min siampui lo tur i nia sin. I nihna leh i thinlung zawng zawng min hlan theilo anih chuan khatiang thil hlan tur che khan min beisei lo la ṭha tur. A fair lo lutuk a lawm.”

“Engmah ka hrilh theih loh che vang khan min ngaidam rawh. Mahse khatih lai khan ka hmangaih che a, tunah pawh ka la hmangaih reng che. Min nei tura ka sawm che khan ka ti tak tak a, ka inchhir ngai lo asin.”

Rachel chu a maimitchhing vang vang a, thaw a la leh halh a. A thil tawnte kha a rapthlak tehlul nen, a tawrhna belhchhahtu mai ka nih hi.

A thusawi tur a sawi zawm leh hma chuan ka ṭawng khalh vat a. He thil hi vawi tamtak sawi chhuah ka duh tawh thin. Tun hi hun remchang a ni.

“Ka venhim theih loh che vang khan min ngaidam rawh, Rachel.” Thinlung na taka sawi ka ni.

A rawn men rual chuan, “I…….I……” a ti hman chauh a.

“Khatiang thil i chunga ka thlen tir vang khan ka inhua a, kha mihring khan a khawih miah lo tur che a nia sin. Tu mihring mahin an khawih leh tawh ngai lo ang che. Mahse he ka thutiam pawh hi ka hlen leh thei dawn ta lo anih hi.”

“Kash, ṭawng tawh suh.” A mitmeng pawisawilo leh duhawm lutuk chuan min melh kiau a.

“Engtin nge khatiang kha i sawi theih? Ka nunna min chhanhim sak a, i lakah hian bat tamtak ka nei. Engtikah mah ka rul seng lo ang che….”

Lu ka lo thing thung a. “Engmah bat i nei lo.”

“Aw, ka nei a lawm. Chu chu tuna ka lo kal chhan pawh a ni.”

Ka thin chu a na leh vang vang a. Ka laka bat nei nia a inhriat vang chauha lo kal a ni. Engvangin nge a lo kal, ka thinlung ti kehsawm turin a rawn inlan nawn leh tihna em ni? Ka ṭhutna atang chuan thoin, rum chhuah hawk pahin ka lu chu ka tuai puat a.

“Ka laka bat nei angin inngai lo la ka duh. Ka hna ka thawk satliah mai anih kha, Rachel. Midang a tihnat leh hmaa man hman tur ka ni a, mahse a fing lutuk a, i nunna kan rawn chhan hman hram anih kha! Khalai hmuna awm miah lo tur kha i nia sin! Kha tualthah hmang nena in kalbo lai kha ka thlir liam che anih kha. Phiangsen hian!”

Ka thinrim thar leh chu ka hmui thlengin a khur thei hial a. Ka hmui tuai puat pah chuan a lam hawi turin ka inher a.

“Ka hmangaih che a ni tih ka hriat rual khan, ka dam chhan chu tihdanglam sak ka ni ta a……nangmah venhim che leh hmangaih che hi ka dam chhan a lo ni ta a ni. Chu lah chu ka hlen chhuak zo lo ṭhelh a, ka hna pawh tiamin. Chuvang chuan Rachel, ka lakah hian engmah bat i nei lo. Bat nei nia i inngaih vang chauha helai thleng thleng i rawn kal hi a pawi ka ti.”

“Kash,” a lo ti sap a. “Bat nei nia ka inhriat vang chauha lo kal ka ni hleinem. Ni e, ka nunna i chhanhim vanga helai hmuna lo kal thei hi ka ni, nangmah vang chauhin. I lakah hian bat tamtak ka nei, mahse chu chauh chu Florida-a ka lo kal chhan hi a nilo. I in, i pindan ngeia ka lo kal chhan hi…………ka chau a ni. Ka nun hi a chau, hrehawm ka ti lutuk.”

Lalpa leh! A tawrhna hi ka hrethiam tlat a ni.

“Ka sawi tawh ang khan, ka thil tawn leh ka hliamte bakah ka nu leh pate ka sunna kha chu a zia tawh. Hma pawh ka sawn zel ang. Mahse keimahah hian kimlo a awm, ruak ni maiin ka inhria. Ka chakna tur nia ngaiin, nang leh kei hi intawng lo tur intawng palh kan ni a, i dâwt min hrilhte kha ka ngaidam thei lo che tiin ka inhrilh nawn fo thin. Hunin a liampui anga, ka tawrhnate pawh hi a zia ve mai ang tiin vawi tamtak ka inhrilh nawn thin asin. Nang pawhin min hmangaih lo a, vawikhat pawh min rawn biak i tum ngai lo. Chuvang chuan keipawhin ka tuar chhuak ve thei tur a ni tiin vawiin thlenga ka inhrilh nawn a ngai thin.”

A ngaihdan dikloh zia chu hrilh paha va kuah nghal ruak mai chu ka duh a. Mahse a sawizawm leh tak avangin ka din ngai chuan ka ding ta zawk a.

“Mahse khatiang khan dawt min hrilhin min bum mah la, kan inkara thil thlengte kha ka la tawn ngai loh leh, ka damchhunga ka hriatreng tawh turte an ni tih ka hrechiang a ni. Theihtawp chhuahin ṭan la ve bawk mah ila, engtikah mah ka thinlung hi ka hneh thei ngai dawn lo tih ka hria a ni.”

A hmui chu a liak zauh a, min rawn melh zauh hnu chuan a kun leh ta daih a.

“Inngaizawng anga hun kan hman dun hmasak ber zana ka hrilh che, ka hmangaih che niin ka hria, mahse chu chuan min tihlau bawk, ka tih kha tun thleng pawhin a la pangngai reng asin. Ka hlau a, ka hmangaihna che hian min tihlau thin. Dawt min hrilh leh anga, awlsam takin min tina leh ang tih ka hlau a ni. Mahse i tello a damchhung hun hmang tura ka inngaihtuah chuan ka hlauhna chu a zual bawk si. Ka pawnlam landanah chuan hmasawn viau mah ila, ka hlata i awm vang hian ka chhungril hi a thi mek asin.”

Ka thawte chu a sak deuh riau hian ka hria a, Rachel chu ngawirengin ka en tlawk tlawk ringawt a. Ani chu a la kun reng a, amah hi hmuh ka duh, chiang taka ena engkim hmuh vek ka duh. Thil thleng mek hi hriatthiam ka duh a, keini pahnih hi enge kan nih hriat ka duh, hriat vek ka duh. A hmaah chuan ṭhu hniamin a kawngah ka vuan a, a mitmeng mawi leh pawl riai mai chuan min lo en let vat a.

“Rachel, eng thu nge i sawi kha?”

“Ka sawi chu……….i tello chuan ka dam chhuak zo lo, ka la hmangaih reng che.”

A aw chu a zawiin a hriat theih chang chang chauh a ni. Mahse ka hre lo phal silo, ka hre sual lo a, chiang takin ka hria. Chu chu ka hriat duh leh mamawh ber a ni tlat a ni.

Hun rei tak ka tih chak em em thin leh ka ngaihtuahna atanga ka paih bo theih miah loh chu ka ti ta…A hmuiah chuan fawpin khumah chuan dimtein ka muttir a. Ani pawh chu a inzêp thei bik lo. Min thlahlel tih hriat zetin ka fawhna chu a lo chhang let a, ka hming a lam pah sep sep bawk.

Ka fawhna chu thlahin a hmui la si reng chung chuan, “Ka ngai lutuk che. Min ngaidam rawh, Rachel,” ka ti sek sek a. A hmuiah bawk chuan ka fawp leh a, mahse a hmui khur dar dar vang chuan inla hrangin ka en vat a.

“Bawihi, ngatinge i ṭah?” a mittui luang ngiai ngiai chu ka kutin ka tuai fai sak a.

“Ka hre bik lo,” tih pah chuan a nui chhuak hawk a. A ṭah nuih a ni zawk mah.

“Ka awmdan hi a atthlak ngawt mai, mahse ka hlim em a ni. Engkim hi a nihna tur ang thlap leh dik thlap ni maiin ka hria. Min nuihzat ngawt ang.”

“A teuh lo mai, ka nuihzat ngai lo che.” A mittui vanga a hmai hnawm chap chu ka fawp kual dan dan a.

Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)