Love is in the Air BY Maveni Hmar (Completed)

Episode nei ho a hlawm a dahkhawmna
Ngaia
Site Admin
Posts: 25813
Joined: April 30th, 2016, 4:07 pm

Re: Love is in the Air BY Maveni Hmar (Completed)

Unread post by Ngaia » April 4th, 2021, 2:26 pm

Chapter : 7

LOVE BY CHANCE

Ka feh haw chu chau tak in i ka thleng a. Kan in chhe tawh tak kawt a car changkang leh nalh zet mai lo ding reng ka hmuh chuan ka chawhmeh phurh rit tak chu hre chang lo lek in mak ti zet in ka ding chawt a. Ka fanu kum 5 mi hmeltha biang tai tek mai chu in atang a rawn tlan chhuak in ka kut chu a rawn hum a."Anu,mipa pakhat Aizawl ami in a hmu duh che a." a rawn ti ta reuh a.

Ka thaw hak a,tu tak chu ni maw? In chhungah chuan ka fanu nen chuan kan in zui lut ta a. Mipa sang tak leh hmeltha tak chu rawn ding chhuak in ka phur chu min han chawi thlak sak a. " Eng thil a min hmu duh nge i nih a?" ka ti nghal zat a.

Ka fanu lah chu ka phur a fanghma tuai pakhat chu lek chhuak in," Anu,Kimkimi te in ah ka leng dawn nia." tih leh tlan chhuah a rual a. Sam phe leuh leuh a a tlan chu melh in ka nuih zui sak a.

Amah a sang in a palian bawk si kan in chhung te tak te chu a lang zim zual sauh hian a hriat a. A ha var rual thah mai lang chuan a nui suk a,a nui mawi phian leh nghal a. " Han in ti fai in hahdam phawt la kan la ti ti dawn nia." a tih chuan ka bu nghat a.


Hmanhmawh hauh lo hian ka in bual fai in thawmhnaw fai ka in thlak hnu chuan ka darthlalang neih chhun hlui leh khi rang ruak tawh ah chuan ka in bih zawk a. Thingtlang nula kum 24 mi hmel fel ran leh mitmeng fiah kal chu hmu in ka landan ah chuan ka lungawi thawkhat e.
Khum pindan kan zar hliahna puan hlui tawh tak chu keu in ka chhuak phei a," Awle,ka hman tawh e." ka ti sap a.

Chu mipa hmeltha tak chuan min melh vung vung a," Ka hming chu Zomuansanga ani a...Zonuntluanga u ka ni. I fanu papuia tur ka nih chu." a ti ta a.


Ka phu zawk a,ka tha te chu a khur nghal zawih zawih mai a.Mawimawii rawn hruai tum a rawn kal ani tih chu ka hrethiam ta nghal a. He ka fanu kum 5 chhung zet fa anga ka lo pawm seilen hi ka lak atang in min laksak hauh lo ang - chhechham in ka sawi ngam ani.


Ka nu leh pa in min boral san hma avang in ka nau Sangi nen chuan lo nei in ei kan zawng chawp ve thin a. Sangi chuan lo neih a hna hram thawh chu hrehawm a tih vang leh pawisa a thawhchhuah hnem zawk beisei in Aizawl ah mi in a awm in a inhlawh ta a. Kum khat zen zawn a awm hman ang tih chuan sawn pai chung in a rawn let leh a. Chutia sawn pai chunga a rawn haw chu ka thin hi a rim em em mai a. Mahni pawh fahrah tawh nen fahrah tur bawk fa han hrin leh chu ka lung hi a awi thei thlawt lo a. Mahse a fa paina pa chuan a nei duh miau siloh vanga rawn haw ani si a a rilru ka tih nat belh ka hlauh vang in ka lungawi loh thu pawh ka sawi ngam lo a. Fa hial pai tir a hnawl leh tu mipa chu ka haw ngawih ngawih a,ka dam chhung hian ka ngaidam leh tawh ngailo ang ka ti hial ani. Vanduai thlak tak in Sangi chu Mawimawii a neih hian a boral zui ta mai sia,ka fa ang chiah in ka pawm seilian a Sangi vanga ka khawhar lunglen pawh min chhawk em em ani. Tunah chuan amah chauh hi he khawvel a ka chhungkhat laina neih chhun ani tawh a,ka lak ata lak bo hi ka phal lo hulhual ani.


Thinrim tak chuan ka meng alh phat a. Hmeichhe thinchhia,mahni thu duh leh tawng ve thei tak ka ni bawk a khawpui mi hausa pawh nise ka zah bik lo ---Mahni thisen zawmpui thlauhthla thei chin ngat phei chu." A tir ah pawh in duh lo a in thlauhthla fel vek tawh a ,tina tak a rawn ngaihven a tulna ka hre lo. He naupang hi ka hlat ah a awm hauh lo ang." ka ti ta bawrh bawrh a.


Zomuansanga chuan mit ti zim san hian min melh ta reng a." A tir ah engmah kan lo hre lo a..nimin mai khan Zonuntluanga'n fa a lo nei ani tih kan hre ve chiah ani." a ti dam thluam a.


" Ka fanu hi min laksak theihna dan in nei lo reng reng. Zonuna chu rawn hruai ta che.Amah ngei anih kha thlauhthla tu chu."

" Zonuna chu kar kal ta khan accident in a boral a,a boral hnu ah a thiante ka atang in fa a neih thu kan hre chauh ani." a ti a.


" Pawi ka ti in ka tuar pui lutuk che. Mahse ka fanu hi ka enkawl thei a,ka kiangah a hlim in a him ani."ka ti vawt raih a.

Kan in chhung chep zet ah chuan a vei nghut nghut a,chutah ding chut in min zim san hian min rawn melh a," Nie,i enkawl thei ngei ang. Mahse zirna tha leh he khawvel thang chho zel in a ken tel changkanna leh nawmsakna chu i pe thei hauh lo ang. Chuvang in Mawimawii hi ka kutah dah rawh. I pek ve theih hauh loh tur thil tha ber ber kei chuan ka pe thei dawn ani. Alo than chhoh nan pawh he thingtlang chengker ai chuan khawpui nge nge chu a tha zawk ang." a ti vawt ruih a.

Ka thinrim chu ka ter at mai. Hmusit taka min rawn tawng khum tur in he pa hian dikna a neilo a in sawitheihna a sum.leh pai chu ka mamawh hek lo. Hmai zangthal ha a melh thip khai in," I hausakna sum leh pai chu kan mamawh lo e.He hmunah hian min hmusit tur leh i hausak.zia rawn in lantir tur in em ni i lo kal a. I sum tello pawn ka fanu hi kum nga chhung ka lo enkawl tawh. Khang hun lai khan ka mamawh che ka hre ngai lova tuna taka ka mamawh chhan tur che lah ka hre hek lo. Khawngaih in min kal san zawk teh." thamlo zet chuan ka tih khum a.


Thinrim taka min rawn ben sawk mai ka rin lai in ani chu za tak hian a nuinta hawk hawk a," I leili a tha par par hle mai maw !" tiin min melh vung vung a.

Zam map lo hian ka melh let khai a," Arpui tak ngial pawn a note te chu a hum thin. Ka fanu hi ka lak atang in tuman min lak bo sak hi ka rem ti ngailo ang." ka ti hmiah a.

A lu um nalh zet chu a thle bak a, "Awle,I fanu ka lak hran i phallo anih chuan i rawn zui ve thei ang." thupe aw tak hian a ti a.

" A teuh lo mai !"

" Ka pu in Mawimawii hi rawn hruai haw ngei tur in min ti a,kan thisen zawm hetia hmuh phak loh a awm tur hi a phallo ani. I fanu hmakhua i ngai tak zet anih chuan min hruai tir i phal ngei ang. Ka nu leh pa pawh in an tu neih chhun chu an duat em em ang tih a chiang bawk. I tan engmah hlauhthawn tur a awm reng reng lo."

"I hruai hauh lo ang ."

A sana a bih vung vung a," Zanah lo in ngaihtuah la Mawimawii nen chuan min rawn zui mai ula a tha ber zawk in ka ring. Naktukah ka i thu tlukna hre tur in ka rawn kal leh ang. Kan fanu nei let tur hian court hial pawh thlen ngai se a tawp thleng ka bei ang tih ilo hre dawn nia." tiin a chhuak ta vut a.

Ka hmai hup vawng vawng in ka thaw hawk a. Kum nga chhung ka lo enkawl ka fanu chu ka chan ngei dawn niin ka hria. Ka thinlung chu a na in a rum tak meuh ani. Court an thlen vaih chuan ka hrin anih loh avang in a lak ah chanvo engmah ka nei bawk silo...ka fanu ka neih hlen theihna tur anih phawt chuan eng pawh ka ti huam ani. Sangi ka chan tawh a Mawimawii leh zel hi chu ka chan thei tawh lo ang.


A tuk zing dar riat bawr ah Zomuansanga chu a rawn lang leh a ,a hmel ka hmuh ringawt pawh chuan ka thin a rim in ka haw hluah hluah mai ani. "Khawngaih in min kal san la ka fanu nen hian thlamuang tak in min awm tir rawh." ka lo ti chang fal a.

Hmanhmawh lo zet hian thut hmun a rem a," In remsiam mai ila ..." a ti dam dup a.

" Eng in remsiamna maw ?"

" Kei in Mawimawii hi hruai ngei ka duh a,nang lah in i bula awm tir ngei i duh bawk si a. Pasal atan min nei la kan pahnih im Mawimawii chu kan enkawl dun thei dawn a lawm." a ti ta a.

Mak ti zet hian ka melh ta hau mai a. Ani ang tlangval hmeltha leh hausa hian kei, thingtlang nula mawl leh kut hnathawh chiah thiam nei hi a nupui atan min sawm anih chu. A tawng chu ka hre sual pawh ani zawk mai thei ani. " Ka...ka...".sawi tur ber pawh hre lo chuan ka riat ral ta vel mai mai a.

" Inneih tih lem ah a hming mai in Mawimawii vang chauh in kan innei anga i duh hun hun ah i zalen leh thei ang. Kan inthen anih chuan Mawimawii chu i chhuahpui tel thei lo thung ang."

Chumi hnu kar hnih ah chuan kan innei ta a. Ka nun chu a in thlakthleng chiang kher mai. Ka fanu chuan ngaihven leh duat a hlawh in nuam pawh a ti ngang mai a. A nuam ti hmel leh hlim hmel eng phet ka hmuh chuan duhthlanna ka siam sual.lo ani tih ka chiang hle ani. An tu neih chhun liau liau anih vangin Zomuansanga nu leh pa leh pi leh pu te chuan an atchilh hi ani ber a,lalfanu ang mai in an chei bawl in an duat ani.

Kei tak pawh min duat in min en mihrang lo em em a. Ka hmuh tirh phat atang in a chhungte chu ka ngaina nghal a,Zomuansanga ber hi ka ngaina thei ta tlat pek lo a. Kan in pawhlo in kan in be khat em em mai a,ka lak ah chuan a in la hrang in a nelawmlo in a vawt ruih mai a. Chuti chung chuan thawmhnaw thar leh make up ilo vel chu min leisak reng thin a. A hming in a nupui ka ni ve sia a thiante lakah ka thing bik lutuk ang tih a hlau in min zahpui vanga lei ah ka la ngai ta fan a.

Zan khat chu tlai tak ah rui deuh chhelh chhawlh hian a rawn haw a. Ka pindan ah rawn lut in ka khum tlangah chuan a rawn thu a," Rinpui, titi dun kan ngai ani." a ti sup a.

Khum atang chuan ka thu chhuak zawk a," Eng thil nge sawi dun tur kan neih a?" ham bai bai chung chuan ka ti a.

A kut lianpui mai chuan ka kut chu a rawn hum chawt a,kan taksa a in tawh chuan ka tek deuh sawk a ka khur ru nghal der der a. A mi uap a na in huhang a ngah si a ka thaw a pik ru in ka in sang mar ru teuh a. Rang tak in ka kut chu ka la sawn thuai a.

A nui suk a," Min hlau em ni?"a ti sup a.

"Aih..."

" Nia min hlau suh. Ka ti na ngai hauh lo ang che. Mawimawii nen hian ka theih tawp a venhim che u ka duh ani. Hlim taka in awm hi ka thil duh ber ani bawk." tiin ka sam chu a rawn chul a.

Ka lungphu chu a tlan zawt zawt hi ani ber a ,ka thaw te chu a chham dawn ni ta ber hian ka hria a. " Khawngaih in,enge sawi i duh chu sawi la..." ka ti tham chal a.

" Ka nupui ini a, Pathian leh mipui hma a ka damchhung kawppui ni tur a chhechham meuh a ka neih ini a,in pawhlo leh mi hrang daih anga awm dun hi hrehawm ka ti ani."


A hmeltha pa tak chu ka thlir tlawk tlawk a,he mipa hmeltha tak hian a nupui tak tak angah min lo ngai reng tihna em ni? Harsa ti tak chuan ka han thaw halh a. Ka thinlung chu nghing dawt in ka ti deuh nghulh a. Engtin nge ani ang hi pasal tak tak anga ka beisei phak teh lul ang ni,kan dinhmun a in thlau lutuk em mai. Chulo reng ah...Mawimawii nu diktak ka nilo tih hi hre ta se ka bum angah ngai in min haw viau mai lawng maw ?

Ka in sang mar a thaw ka la ham ham a," Diktak chuan...Mawimawii hi ka nau fanu ania...Ka nau a.."

" Ka hria a lawm."

" I hre sa maw?"

" In chanchin chhui chiang hmasa lova ka rawn pan tawp che i ring em ni?" tiin a nui hak a.

He mi ni atang hian Zomuansanga chuan min ngaihven sawt in a office chhung te hian thu ho te te sawi in ni khatah vawi hnih vawi thum min rawn call thin a. A mi ngaihven zia chu kawng eng kim in a ti lang a,hmangaih loh tum mahila ka hmangaih theihna chance a sang em ani.

Ni khat chu kan inneih atanga a vawi khat nan a room ah lut in ka ti fai a. A room chu a thianghlim in a fel thluam mai a,mak ka tih em em chu a khum bul drawer chungah chuan Mawimawii pian hma kum chrismas dawn a ka thlalak ngei mai chu alo tar vang mai a. Mak ka ti in eng tin nge chu ka thlalak chu a neih theih ang le tiin ka in ngaihtuah buai hle a. A khum ah thu in ka thlalak ka melh vang vang lai chuan amah chu a rawn lut ta a.

Chiai tak hian," A...i room ka lo ti fai a..." la ti niah niah a.

A nui suk a," He ka room hi keimah chauh a mut nan chuan a lian mah mah ani,min rawn tawmpui ve tawh la a tha ang." a ti a.


Ka zak chu ka sen awp awp a." He ka thlalak hi eng tin nge i kawl theih a?" ka ti lai rat a.


" Kan in a Sangi a rawn awm khan thlalak print sak tur in min ngen a...he i thlalak hi ka hmuh chuan en nin har ka ti in hmeltha ka ti em mai che a ka nei ta mai." a ti sam et a.

Ka thinphu chu a chawl deuh duk a,he mipa hmeltha tak hian hmeltha min lo ti anih chu ! Ka hlim veng veng a ka lungphu chu a rawn rang nghal zaih zaih hle mai a.

" I hmel ka hmuh hma atang tawh kha ka mut dawn a piang in i thlalak hi thlir in ka mangtha thin che ani."

" Mahse...chuti em em a hmeltha chu ka ni tawp silo a..."

" I hmeltha ani tih i in hriat lohna lai tak khan i thatna a ti zual ani."

" I sawi awmzia chu...ka hmel i hmuh hma atangin min lo duh tawh i tihna maw ?"


" Aw,ni chiang e. Duh lo che ni ila Mawimawii vang ringawt a ka neih duh che i ring em ni?" tiin ka bul set ah min si chet chuan a rawn thu a,ka dar tawn tawn ah vuan in ," Ka duh che..ka hmangaih che ani,Rinpui." aw ril raih leh thu tak zet chuan a ti ta a.


Thawk pawh ka thaw tha hlei thei lo,a hmelthatna leh a huhang chuan min ti aa chhuih mai a ka vai deuh ruai hian ka hria a. " Ka ring thei lo...nang hian kei hi min duh tak tak maw?" chhawt hmel zet chuan ka ti a.

" Aw,ka duh satliah che ani mai lo. Ka hmangaih che ani --nasa tak in."

Ka in ngaihtuah fim hman lo a awm ah chuan ka bei thlawp a,a cologne rimtui tak chu ka hip lut veng veng a.

Ka khabe ah chawi kang in ," Rinpui, khawngaih in ka mit ah tak hian min melh la i pasal tak ni tur a min pawm thu hi min hrilh teh." a ti sa sa a.


" Aw...ka...pawm che ..."

" Ka lawm e. Tunah min hmangaih rih lo mah la chance min pe la ka in hmangaih tir thei em em ang che tih ka tiam che ani."

Ka huaisenna zawng zawng sawm khawm in a mit ah tak chuan ka melh let sak a," Ka hmangaih che a lawm..."biang sen tawn tawn chung chuan ka ti a.

Hlim tih hriat tak hian a mitmeng chu a de sawr sawr a," Ka hmangaih reng ang che tunah leh kumkhua in." a ti sup a,ka hmui khur der der ah chuan min rawn fawp ta a.



Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » April 4th, 2021, 2:26 pm

Chapter : 8

JOLENE

Ka fanu kum khat pawh la tlinglo damlo pangsa vur mai chu damdawi pe in ka awi lawp lawp a. Tun thla thum kal ta atang khan ka fa neih chhun hian dam ni hmel a hmu ngai lova damdawiin pawh kan lut deuh zut reng mai ani. Ka fanu na tuar hmel zawi ngiai mai chu en in ka mittui chu ka khap per sak sak a," Bawihte,i na tuar ai hi tuar theih nise ka va ti tak em ! Na han tuar atan chuan ila naupang em mai." tiin keima hriat tawk chuan ka phun sep sep a.


Bang a sana tar chu ka han melh a,zan dar 11:00 a ri tep tawh. Bawihtei pa chu ala rawn haw lo cheu ,naute damlo nen ka thin a rim in ka tawt up up mai a. Hun eng emaw ti atang khan office lam an buai chhuanlam in tlai tak tak ah rawn haw in zan lam ah thleng thleng hna a thawk thin a . A mizia a dang in ka lak atang chuan a in la hrang deuh tlat mai a. Eng emaw thil diklo a awm ani tih chu ka hrethiam mai a. Ka fanu ka ngaihsak luat ah ka pasal tan hun ka nei lovin ka lo ngaihthah deuh emaw chu le tiin in siam that tum in tan ka la a,kawng eng kim ah ngaihsak in ka duat em em a mahse chu chuan engmah a ti danglam chuang lo


Ka thiannu Mahuni chuan fiamthu ti tak deuh chuan," Naupang an dam theih loh viau hi chuan an pa te an lerh an ti thin a nia aw. U Rosanga hian bialnu te hi a lo nei ani mai lo maw ?" a ti a.


A fiamthu mah nise chu thu chuan ka awm a ti nuam lo in ka pasal ,ka hmangaih em em chu ka ringhlel ru ta hial a. Han rinhlelh loh theih pawh ani lo,hman a min ngaihsak em em mizia kha a mah ah hmuh tur a awm tawh lo a,min thlakhlelhna pawh a nei tawh lo. Nupa nun kan hman loh na pawh thla tam a tling tawh ani.


A car ri ka hriat chuan lo hmuak tur in verandah ah ka chhuak a ," U Rosang,ilo va haw tlai em em ve a...hei Bawihtei lah a khawsik leh hluah mai a,a tlei thei lo nen hei nachhawkna in a chhawk a,a muhil ve deuh chiah anih hi." ka lo ti a.

Min kal pelh puat pah chuan ," A damlo anih chuan eng ah nge damdawiin ah i hruai mai loh. Ka chau lutuk mut ka duh." a ti a, bed room ah a lut tlang nghal a. Min kal pelh zawng a zu rim nam huam chu ka hriat chuan min ti ner sawk a. Rilru na tak chuan ka thaw hawk a . Hmangaih tak a ka neih ka pasal kha ani tak tak thei dawn em ni ? A hmel an pui ani hial zawk lo maw ? Eng tin nge heti em em hian mihring hian zia alo thlak hneh theih le ??

Ka rilru na lutuk chu ka rum hawk a," Lalpa,khawngaih in ka pasal hi min pe kir leh teh." tiin.

Bawihtei chu a mu tui ta bawk a ,khum ah chuan ka mut tir ta a. Tih harh hlau leh thawm dim taka ka chet them them lai chuan U Rosanga chu a rawn in let thawk a," Jolene, ka ngai lutuk che asin." tiin a rawn tawngvai ta a.

Ka nghing lawih a,ka thinlung chu chemte a vih ang mai hian a na ngawih ngawih a. Jolene chu tu nge anih tih ka hre chiang khawp mai. Ani nen khan an in ngaizawng thar leh tihna em ni ang le ? Awm ngaihna pawh ka hre lo ka aa mai dawn hian ka in hria a.


Jolene chu ka college kal pui thin nula hmeltha theih tawp leh college miss hial lo ni tawh ani a. U Rosanga nen hian an in ngaizawng thin a ,an hmeltha dun in an in hmeh em em mai ani. Mahse eng vang emaw in an in then a an inthen hnu chuan kan in kawp ta a. Ka thiante chuan rebound aniang kawp duh suh tiin min fuih hlawm a. Mahse amah ka duh hneh em avang chuan ka kawp lo phal lo ani. Kan in kawp hnu ah pawh chuan Jolene chu ka thik in ka ngaih hi ala ngam zan chuang thin lo ani


Jolene lakah min rinawm loh san anih chuan ka dinhmun chu a derthawng tih ka hria. Hmel leh pian ah pawh Jolene ne pawh ka ek silo. Mittui tling pam in ka pasal muhil hmel chu ka thlir vawng vawng a. Jolene hming lam a la rawn nui leh ta hawk hawk zui a. He thinlung hi a keh sawm vek a ,awm ngaihna reng ka hre lo ani. Hmangaih em em mahila min uire san tu hi ka chhuahsan mai dawn em ni ang ? Lo chhuak ta ila tu nge ka belh chuan ang ? Ka nu leh pa te chu ka pan ngam dawn teuh silo.

Inneih kan tum lai khan ka pa hian a phallo bur mai a," Rosangzela hi i neih ka rem ti kumkhua lo ang. An thlahte chhungkua saw han en teh nupui pasal pahih pathum nei vek an nih saw. In inneih atanga reilo te ah ani pawn nupui dang a neih san leh tho ang che. Lo nei ta la rilru hah leh nuthlawi bak chan i nei lo ang." a ti biai biai mai a.


" An lerh vanga nupui pasal thlak an ni lo ang,an vanduai vang mai mai aniang. Pa, khawngaih in...."

" Ka dam ve chhung chuan ani saw i neih ka rem ti ngai lo ang. Chu chu ka thu tlukna ani." a ti bur mai anih kha.


Ka nu leh pa phallo chung chu pasal ah ka nei lui ta a. An rin lawk ang ngei in thil alo thleng ta sia kan in lamah chuan ka kir ngam thlawt lo ang.Ka hmai hup in ka tap ru zawih zawih a...eng tin nge ka awm tak ang ?? U Rosanga hi ka hmangaih em em a, min rinawmloh san pawh nise ka then thei lo ang. Ani hi ka in nghahna awmchhun leh ka hmangaih ani a, a bulah ka awm loh chuan ka nun hi a chhe vek dawn ani.Chulo ah ka chhuahsan anih chuan ka fanu duat hi fahrah nun ka tem tir ani mai dawn si a..Ka hmangaih ka fanu hi nu leh pa dam reng chunga fahrah nih tir ka phal hlawl lo ani.

A phone chu la in ka check sak ta a. Phat rual loh in Jolene nen chuan an lo in hmu thin ngei ani tih ka hre chhuak ta a. Ka rilru na leh thinrim bawk si chuan min hnawh up up a,ka pasal muhil lai hmai ham lo tur chuan nasa tak in ka in thunun ani. Hei hi kei leh Jolene indona ani a,awlsam tak chuan hnehna ka chan tir bik hauh lo ang. Hmangaihna leh indona ah chuan engkim a thiang an ti ani lawm ni kha ? Eng game pawh ka khel mai ang - hnehna ka channa tur anih phawt chuan.

A tuk ah chuan ka pasal bulah chuan engmah thlenglo ang mai in hlim hmel ka pu lui tlat a. Alak a theih tawp a that chhuah in ka ti ti pui lui reng a. Bawihtei pawh clinic ah kan va hruai dun a hlim taka titi in ka nui lui hawk hawk reng a. Chu ka nui hmel phena lungngaihna leh manganna in phumru chu hmuh tir ka tum lo ani.

He mi ni atang hian eng kim ah tan ka la thar a ,ka taksa ka enkawl thianghlimna kawng leh inchei dan thleng in ka in uluk ta zawk a. Ka elpui ber Jolene hi a nalh in a hmeltha sia theih pa tawp a tan lak ka ngai ani. A rawng ka bawl sak ka rin Pathian hi ka lam ah atang anga ka pasal rilru hi ka neih let sak leh theih ngei ka ring ani.


Vanneih thlak tak in ka ti dawn nge tlai khat ka bazar chu Jolene nen kan in tawng fuh khiah mai a. Min hmuh loh der a min pumpelh chu a tum ngial na a ,ka va kuai her lawih a. A hmai ah tak ben chawrh mai ka duh rum rum a mahse insum hram hram in hlim hmel tak hian ka nuih lui var var a," Hey...Jolene,i dam maw ? In hmuh lohna khua a va rei ta ve ! Imphal ah khan pasal i nei emaw ka tia ..he lam ah in rawn awm leh tawh zawk em ni ?" ka ti chul a.

Nuam lo tih hmel tak hian a meng deuh zak zak a,dik tak chuan min biak a phur lo tih chu a hmelah chuan a hmuh theih ani. Za lo zet hian a nui lui a ," Nia...kan inhmuh lohna a rei ta hle mai. Kha ..i fanu em ni ? A va hmeltha em em ve a." tiin Bawihtei biang chu a tawn tawk zauh a.


" Hawh, saw lai thingpui dawrah sawn chawl teh ang ." tiin ka sawm ti ila ka kai hi ani ber zaw mah a. Hreh tak chuan min zui ve mai a. Thingpui in pah chuan ," Fa kha eng zat nge i neih ve tak ? He lam ah rawn awm nghet in tum tawh em ni?" a pasal nen an inthen tawh tih hre reng chung chuan ka ti a.


Nuamlo tih hmel tak chuan thingpui no chu a her kual chhen a," Fapa pakhat ka nei ve tawh a...mahse kan pa nen kan inthen a..." a ti a.

" Oh...a va zialo ve aw..i fapa chu i ngai thin ngawt ang a ? Nupa inthen hi a pawi in a tha lo a sin. Keini puitling chu ka khawsa ve thei mai a,a tuartu ber chu pawi sawi lo naupang te bawk hi an ni.." tiin a mit ah tak chuan ka melh a.

" A dik a lawm."

" Nu leh pa boral vanga fahrah mah tih lai in nu leh pa dam reng chunga fahrah an han ni ngawt mai tur hi ngaihtuah chuan a na ani."

" Kei pawh ka fapa ka ngaihtuah chhuah chang hi chuan hrehawm ka ti in ka in ngaihtuah nasa thei thin hle ani."


Ka nuih sak a," I fapa i hmangaih vang tal pawn in pa chu nei leh rawh." ka ti a. " Tak tak in ...in pa chu nei duh tawh lo mahla nang chu i hmeltha in i la nalh ropui mai sia tlangval tha lai pawh duh duh i thing thei em em ang." ka tih chuan za em em hian a nui hawk hawk a.

" Min fak mah mah ani.Ka chhiat tawh em hi.."

" A teuh lo mai. College kan kal lai hmel ang chiah kha ila pu a lawm. Kei hi min han en la...ka lang tar in ka nutling mah mah tawh ania. Kan pa nen pawh lo in then palh ta ila kei chuan tumah neih tur ka hmu zo tawh nang..aaa..hmu ta teh reng pawh ni ila kan pa aia hmangaih hi ka neih leh theih pawh ka in ring lo." ka ti mawlh mawlh a.

Phone number te in pe in chu ta tang chuan Jolene chu ka be ziah a thian tha takah ka chhuah thei ta a. Nupa inthen that loh zia leh fate tih fahrah pawi zia ka hrilh ber thin. Mak tak mai in kan in be thei in kan ti ti pawh a in hmu chho ta viau mai a. Hun eng emaw ti hnu ah chuan Imphal lam ah a pasal leh a fapa bulah a let leh ta a. A haw hnu pawh chuan la inbiak chhun zawm zel in thian in ngai tak kan lo ni ta zawk ani.

A pasal hnen a Jolene a kir leh hnu chuan kan pa lungleng chu hnem in a rilru nei let leh tur in theihpatawp in tan ka la a. Tlem chuan hma chu ka sawn ve hret hret a,kan inchhungah pawh nui ri a chhuak leh thei ta in a office kal pawh a hun tak ah a rawn haw thlap thlap thei tawh ani.

Ka pasal hi ka hmangaih em em a,vawi khat min lo rinawmloh san mah se ka ngaidam hmak a ,min rinawm loh san nawn leh tur in chance ka siam sak tawh lo ang . Hmeichhe dang reng reng a melh theih loh nan ka duat in ka ti lunghnur ngai lo ang.

££££££££££££££££££££££

Hun awl hnawh khah nan hmun awl :

He thawnthu i chhiar pah hian Dolly Parton sak ngei mai ' Jolene' tih hla kha ngaithla pah la i feel veng veng mai ang....

Pasal nei tawh inih chuan maw ...i pasal kha lal ber ang mai in dah la,a thu awih in han duat em em mai la i thu a awih in a duat ve mai ang che. Kan thlai chi tuh chiah hi a rah kan seng thin. Inkhel lam i tui hlawl lo ani thei,mahse in pa in a tuipui tlat si chuan lungrual taka in titi dun theih nan inkhel chungchang chhiar tam la ,thian dang a mamawh loh nan a thian tha ber nih tum tlat rawh.

Chutiang bawk in i fate tan pawh thian tha nih tum tlat rawh.An rilru mil a in siam rem ve zel hi a tha ngai. Zing thawh chhuah rual rual pawn Kpop emaw Kdramas pawh nise an sawi duh anih chuan sawi pui bawrh bawr mai rawh. I duh leh BTS V- a leh Jungkook hmelthat zia te Hwang Hyunjin hmui sexy zia te pawh sawi pui rawh - nu ber ka ni a lawm ti fahran a i hmuam up a nelawmlo taka awm ai chuan i fate i hnaih thei zawk ang.😁😁

A hming a 'NU' nih hi chu a har lo..mahse ' NUTLING' nih hi a va har ngang ngang em ! He khawvel ah hian fa enkawl tluk a harsa hi a awm ang em le ? Tuk tin deuh thaw thu buai rem tur in court hawn a ngai a, kei aia thu buai rem tur ngah hi an awm ang em le ? 😄 😄

Thangtawia thawnthu Mafaka Khiangte ziah kha pa ber in ngaihnawm a tih em vanga mahni pa te phone number ' Thangtawia' ti a save ngat thei fa in nei ve em ? Mahni nau te number ' Nau sual ka u emaw in ti' ti a save ta te , u te number ' Ramhuai pitar' tia save ta tlat ang chi fate in nei ve em🤣🤣🤣🤣 Hulhar thuau si hian Kan va chhangchhe nawi lawi tak😊

Chuan...thil pakhat leh chiah...in comments te comment back lova ka like ringawt tak avang hian ka lawm lo in ka ngaihven lo che u tihna ani lo ania aw. Ka rawn comment let leh vek che u chuan tu emaw khan " I thawnthu post comments lan tam tir i duh vang em ni an comments zawng zawng i reply zel a." min ti leh palh ang😄 Thawnthu ka vawi khat rawn post na anih vang in an tih dan te hi ka lo la hre ve vak lova min hrilh hriat zel ka ngai ang. Ka lawm em em ania aw ka thawnthu chhiartu te zawng zawng chung ah khan..chuan...chuan..love you all💖💖💖💖💖💖💖

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » April 4th, 2021, 2:27 pm

Chapter : 9

DON'T CRY ,ZAWNI

Kan khua hi thingtlang khua in zaruk vel zet chu kan ni ve a. Khaw thleng a nuam in boruak a thiang tha bawk a khaw nuam tak chu ani. Khawpui lam ah zirtirtu hna ka dil a, interview ka nei zo ka rawn haw hlim hlawl ani a. Ka nau tleirawl ve tan mek Matei leh a thiante pathum chu kan in ah awm in kpop leh kdrama vel sawi in an ri chel chul hlawm a.


Matei thian te zingah chuan tleirawl hmeltha tak mai Zawni hi a awm a,a hmel a fiah fai in ngaihno hi a bei hle reuh a. Min rawn melh leh zeuh zeuh danah chuan min star ani tih ka hrethiam mai a. An naupan lai atanga ka hriat leh naupangchhe en a ka la en anih avang chuan ka nuih hi a ti za ru ang reng hle a. Dik tak chuan thingtlang khua ah hi chuan hmeichhia te hi naupang te te in an in ti nula fir fer thin ani.

Ka zin chau deuh nen ka in tih fai zawh hnu chuan mu zal tur in mut pindan ah chuan ka lut ta a. Rei pawh ka la mut hma chuan Zawni hnen atang chuan massage ka dawng a ," U Jimmy, i hmeltha ka ti a, nupui dang tumah lo nei suh aw. Khawngaih in min lo nghak thei ang em ?'" tiin.

Ka nuih a za in zak theilo hi ka ti reuh bawk sia. A tawngkam hman duh dan vel chu a mak ka ti ani. Ani ang kum 15 mi lek tawngkam atan chuan a puitling mah mah niin ka hria a. Nge an kum en mai ai hian an lo puitling in an lo nula fe reuh tawh zawk le. Chhan pawh chhang let ta lo chuan ka muthilh san ta zawk a.

Ka chhang let lo chung chuan Zawni chuan min rawn bia in min rawn text ve ta fo a. Chhan let en ah ka en thin loh avang chuan ka chhiar liam puat duh chauh a. Min rawn text tak fo ah chuan ngawih bo san ringawt hian thil a ching fel dawn lo tih ka hrethiam ta a.


Saturday ani a, Zawni te in , kan thenawm mai ah chuan ka va leng lut ta a. A chhungte tumah an lo awmlo hlauh a. Min lo hmuh chuan hlim hmel tak in a lo nui ver ver a," I lo leng ve khiah elaw,U Jimmy." a lo ti dam diai a.

" Zawni, kar thar khian Aizawl ah ka hna thar thawk tan tur in ka chhuk tawh dawn a. Chumi hma chuan thil sawi fel pui che tha in ka hria a..."

A meng ngui lap a," I awm bo daih dawn a maw?" a ti sap a.

" Aw..."

"Mahse, eng tin nge ka awm ang ?" tiin a mit ah chuan mittui a tling pam mai a.

" Zawni, en teh..nang chu naupang kum 15 mi lek ila ni a. Kei lah kum 22 mi lai la ni tawh a . Kan kum a in thlauh chu thu hran nise , kei chuan Matei nen ka en dan che u hi a danglam lo ani." ka tih chuan Zawni chu a tap ta zawih zawih mai a.

A darah chuan kuah in ," Khawngaih in tap suh , Zawni. Kei aia tha leh i duh zawk i kum rualpui ila tawng anga kei chu min theihnghilh chhawm ve mai ang. Ka tan chuan naupang chhia ang mai ila ni a ngaihzawng en in ka en thei lo che ani." tiin ka hnem mawlh mawlh a.

Ka hnemna chuan a lung a ti chhe zual emaw tih mai tur in a tap zual sauh a. " Ka farnu ang chiah ini a ,naupang te in nih lai atang a Matei nen inkawm chho in ni bawk sia ka en mi hrang thei hlawl lo che ani . Nang pawh in i unaupa ang chiah in min en la Aizawl ka chhuk hnu pawn min la rawn be fo dawn nia aw." ka ti ta ngawt a.

Aizawl ka chhuk hnu chuan mahni a in luah in zirtirtu hna chu rim tak in ka thawk ta a. Sikul chawlh kan neih pawn kan khaw lam ah chuan ka haw ngai lo a . Kum hnih ka thawh hnu chuan ka chhungte pawh Aizawl ah min fin in an rawn pem thla a awm hmun kan beng bel ta a.

Eng emaw chang chuan kan khaw hlui chu ka ngai in zin leh hi ka chak thin. Kan khua ka ngaihtuah a piang a ka ngaihtuahna a lo lut ziah chu Zawni kha ani. Eng tin nge a awm tak zel ang le ? Tunah chuan a lo nula ve tawh anga a hmel pawh a tha leh zual tawh ngawt ang chu. Kha tih lai pawh khan a hmel te kha a tha em em reuh sia.

Ngaihzawng te a nei ve tawh ngei anga ,nge min la vei ve reng zawk ang? A...chu zawng ka ring chiah lo..Ka ngaihtuahna ah chuan Zawni hlir in a khat mai a hmuh ka chakna chuan min tur et et mai ani. Eng vang in nge a hun lai khan ' i nulat hun ka lo nghak ang ' ka lo tih mai loh le ? Kei mi mawl tak hi chu awww..ka va inchhir leh hnuhnawh tak.

Exam chawlh lai ani bawk a hawi khaw thawn pah in tiin kan khaw lam ah chuan kar khat cham tur in ka zin chhuak ta a. Ral khat a kan khua ka hmuh ngawt pawh chuan a chhung a cheng kha tleirawl hmeltha tak lo ni thin ka suangtuahna chuan ka lungphu a ti rang thei ani. Ka hmuh ve leh min la duh ve reng em tih ka zawt anga ka rilru a luah hneh zia ka hrilh bawk anga min lo la duh ve anih ngai chuan palai ka tir nghal ang tiin ka inngaihtuah rauh rauh a.

Kan khua ka thlen chuan ka pu te in ah ka in nghat a, ka in bual fai zo thingpui ka in khaw muan mek lai chuan Zawni ngei mai chu a rawn pen lut ta a. Kan in hmu chiah mai chu sawi tur a vang duh kher mai. A hmel lah chu a tha em em mai leh nghal. Lai deuh tut hian ka nuih a, " E...Zawni,i dam thin maw ?" tiin kan in chibai a.

A mit meng mawi tak a min melh zauh pah chuan," Dam a lawm . Nang zawk ?" a ti dam diai a.

" Umm..ka dam a lawm. I ngaihtuahna ka la luah ve thin em?" ka ti ta tawl mai a.

A hmai chu a sen ap ap a," U Jimmy, kan in hmuh loh na pawh kum nga lai a liam tawh a. Kha mi chhung khan thil tam tak a thleng hman a sin." a ti a.

" Eng thil nge thleng a ?"

" Kha tia min kal san ta kha ka lungleng in ka ngai thei em em che a, ka hnaih phah deuh sawt che nia ngai in i thian tha ber ni thin Joe kha ka kawm hnem in a ni chuan ka lunglenna te min hnem thin a. Hriat loh chhung in ka lo ngaina thuk hman ta hle mai a. Ngainatna chu hmangaihna ah lo chang in i thianpa Joe nen chuan kan innei a fa pawh pahnih lai kan nei tawh a sin."

Chu ka thu hriat chuan min thawng tak zet ani. Ka kut chu ka hum ruh ngawt ngawt a. Kum nga liam ta a a bul a ka tawngkam ngei chu rawn hmang nawn leh in," Jimmy ,tap suh..khawngaih in min theihnghilh chhawm ve mai ang." tiin ka beng bul ah chuan a rawn phun sep a.

Harsa ti tak chuan ka nui lui hram a, " Ka lawmpui lutuk che u. Fanau maltluan chawi in tar kun khup bih in dam ang che u aw." ka ti chhuak thei hram a.
£%%%%%%&&&&%%%%%%&&

Hmun awl :

Naktukah kan chungah eng thil nge thleng dawn tih hi tuman kan hre lo - minutes khat chhung lek pawn thil tam tak a thleng hman sia. Hmangaih i nei anih chuan hrilh rawh - tunah ngei hian. I naktuk hun emaw an naktuk hun emaw alo thlen loh palh tak hlauh chuan i hmangaih ani tih hre lovin an liam dawn a sin.

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » April 4th, 2021, 2:27 pm

Chapter : 10
UNTIL WE MEET AGAIN

Ka pa chu Champhai ah an transfer avang in kan chhungkua in kan Kolasib atang in kan pem chho a . In kan neih loh avang chuan department quarters hlui tawh tak ah chuan kan in vawm lut a. Kan quarters luah chu a lian ang reng in ka nu leh pa leh keimah chiah kan nih avang chuan thawl nuam tawk in kan khawsa ve thei naw naw a.


Champhai chu a boruak pawh a nuam in a zangkhai vah mai a nuam ka ti in college te kan han luh chuan thian thar pawh ka nei ta vat a. Kan khaw hlui lama ka thiante kha ka ngai hle tih loh ah chuan kan khaw hlui hrim hrim kha chu ka ngai lem lo.
Kan bungrua te a rawn thlen kim chuan hlawhfa ruai in kan in chhung chu kan ti fai a. Ka room tur chu mi dang chei ka duh loh avang in keiman muangchang in ka ti fai in ka chei ta a.

A hma a lo luahtu chu lehkha chhiar ngaina tak anih ngei ka ring a,chhuar vel ah chuan lehkhabu hlui hi a awm nual a. Chung lehkhabu hlui te chu paih tur in ka garbage bag ah ka khung hlawm a. Mak tak mai in lehkhabu hlui a kawm savun uk khak a siam chuan ka mit a la ta tlat pek a. Garbage bag atanga la chhuak in ka hru fai thuak thuak a,zan mut pah a en ah tiin ka dah tha ta a.

Nileng a kan in leh vel kan tih fai vang chuan ka chau in ka kawngte chu a kham thum mai a ,ka kawng nat dan em em leh ka chauh dan ah ka period tur in tham anih ka ring a. Zan ka mut dawn chuan vawiin a ka lehkhabu hmuh kha chhiar tum a ka keu chuan thlalak pakhat hi a rawn tla chhuak nawlh mai a. Ka en chiang thuai a,nula leh tlangval la naupang tak in kuah rial a thlalak hi a lo ni a. An hmel chu a tha dun in an hlim ani tih hriat tak hian an nui sang a. " An hmeltha dun hle mai. Tu te nge ni ang le ?" tiin ka phun sap a. Lehkhabu chu keu in ka chhiar ta a. Diary hi alo ni a, ngaihnawm ka tih em vang chuan ka chauh leh mut chhuak pawh hre chang lo lek in ka chhiar chhuak ta thak a. He diary hian min vel nasa ngang mai a, keimah chauh a hriat ah chuan ka ui si a, a ziak ang ang in ka tawn tarlan sak dawn che u ani.

Amber's Diary :

Ka hming chu Amber ani a. Unau pathum zinga naupang ber leh nu leh pa duat rawn ka ni a. Eng pawh ngen ila ka pa chuan min tih sak a tum zel thin ani. He thu ka ziah lai hian kum 19 leh thla 5 ka ni mek ani.

Min hmangaih em em tu nu leh pa ka nei a,khawvel a ka mipa hmangaih ber mai Vivian-a ka nei bawk a. Khawvel ah hian thlakhleh leh duh dang eng mah ka nei tawh lo. College kan zawh ve leh a innei tur in kan chhungte chuan thu an thlung a. Mipa hmeltha leh pian nalh zaih mai ,ka hmangaih ber leh min hmangaihtu ni bawk chu nakum khian pasal ah ka nei dawn ani tih ka ngaihtuahna ngawt pawh chuan min ti hlim ani. Amah ang a hmeltha leh pian nalh fa kan han nei bawk ang a...He khawvel ah hian mahni hmangaih ber te nei thei lo hi an tam a,mahni hmangaih ber te nei thei chu tlem te chauh ani. Chung mi tlemte chu khawvel mi vannei ber an ni bawk. Khawvel mi vannei ber tlemte zinga chhiar tel a ka awm thei chu ka lawm.ani.


Ka hrisel tha hle chung hian eng emaw chen atang khan ka lu hi a na thei lutuk a, a na a chhuah chang phei chuan ka thluak hi a puakkeh mai dawn ni te hian ka hre thin a. Na chhawkna ka hmawm a a reh ve leh mai thin bawk a. Min ngaihtuah thin em a vang chuan ka lu na pawh chu Vivian ka hrilh ngai lo a,damdawiin a ka in entir lah in nachhawkna min lo chawh leh tawp zel mai a.

Ka lu na chu a zin tak telh telh tak ah leh ka lu te hi a hai in ka luak leh ri ngawt thin a, ka kut leh ke hi a zawi huai i ka pang khing leh lam hi a mu chuah chuah mai thin fo tak ah chuan ka ngaih atha thei ta hauh lo mai a. Ka pa chu ka hrilh a,a lo ngai serious nasa mai a phai lam ah in entir tur a min hruai a tum ta a. Kan kal dawn zan chuan thian te ho an lo leng khawm a, ka nu in cake te min ur sak a kan hlim in kan ti laih laih hlawm a.

" I lo rai ru reng ani lo maw?" Lalpapuii chuan a rawn tih sa sa chuan kan nui nasa hlawm ngang mai a.

Vivian chuan," A rai anih ngat chuan thlarau thianghlim fa ani chiang ang." a ti a.

Ka nu cake ur tui tak chu kan ei hnu chuan min tin san ta hlawm a,Vivian chu midang rual a haw lo in ala awm khaw muang a. Kan pahnih chauh a ka room a kan awm dun hnu chuan min kuah vawng vawng a," Min zin san chuan ka ngai ngawt ang che. Dam viah leh hrisel tha tak in rawn haw leh vat ang che ." a ti a.

" Teh reng mai. Lu na benvawn mai chu anih ka ring a mahse Delhi a awm ka Ni te tlawh pah in a rem em a kan in entir pah dawn ka tih tawh kha ngaih lo ti tha lo suh aw." tiin a awm ah chuan ka bei hle hle a.

Ka sam chul hliau hliau pah chuan ," Rawn haw leh vat ang che aw. I cham rei viau chuan ka thi ani mai. I tel lo hian ka dam chhuah theih pawh ka in ring lo." a ti a.

A lungphu ri ngaihthlak vang vang pah chuan ka nui hak a," Ka tello hian maw i dam zo lutuk ang...high school kan luh tirh a ka ngaihzawng thin pawh kha ka tello a dam zo lo tur a in sawi kha ania. Kan in thenna pawh kum sarih a tling tep, ala dam sen tul tho saw." ka tih chuan a nui hul hak a.

" Ka ti tak tak a lawm. Hmanlai in hmangaihte thawnthu lar deuh deuh te kha ngaihtuah teh...Romeo kha Juliet tan a piang a, Zawlpala kha Tualvungi tan kei pawh Amber Lalhmangaihsangi tan ka piang ani. Nang nen hian thinlung leh taksa hi pum khat kan ni ani. I lungngaih chang te hian ka hlim thei lo a,i hlim hmel ka hmuh hian ka hlim veng veng a, na i tawrh te hian ka lo na ve thin ani." thu tak zet hian a ti a.

" Awle..awle..ka zin rei lo ang tih ka tiam a che,ka Zawlpal !" tiin a mit meng nalh tak chu ka melh chho ran a. " Ka zin chhung khan lo lungleng lutuk lo la,lunglen hnem nan nula dang lo kawp bawk lo la itan ka rawn haw leh thuai dawn a lawm."

" Hmeichhe dang kawp tih te chu fiamthu pawn sawi teh suh,ka atchilh che a pathian biak in ka be lo chauh che anih hi." tiin min fawp ta vawng vawng a.

Nia, Viv hian ka hmangaih ang bawk in min hmangaih ani tih ka hria. A ni nen hian khuanu samsuih dik tak kan ni a,thihna chauh lo chuan min pawt then hauh lo ang.

Delhi kan thlen chuan kan in entir a test ngai chi hrang hrang ,ka sawi sen loh leh damdawi tawng sawi pawh ka sawi thiam loh chi tam tak kan test a. Ka Ni chuan min lo duat in min ngaihsak bawk a an bula chen chu nuam hi ka ti phian a. Ka ni fapa Kian-a nen chuan kan in kawm thei in ani chuan kawng engkim ah min buaipui in min ngaihsak a,ka tan hian a va han tangkai tak.

Doctor nen a kan appointment neih hun alo thlen chuan ka tha te khur in ka zam tak zet a,vawi za chuang Pathian hnen ah ka tawngtai hial ani. Doctor chuan aw dam thluam hian brain cancer ka neih thu leh rang thei ang ber a treatment lak ka ngaih thu min hrilh chuan ka nghing lawih a,ka pa chu ka kuah nghal chawt a.

A thu hriat chuan ka pa pawh chu a nghawng hle tih ka hria a min hnem ngaihna hre bik silo hian min kuah ngawih ngawih a. " Thil tih sual leh hriat sual a awm ani ang. Ka fanu hian ruih theih thil engmah a ti ngai lova taksa tan a tha lo tur thil engmah a ti ngai hek lo. Chuvang in Cancer chu a vei thei lo ang. False posetive aniang...a result en tha leh rawh." tiin doctor chu a vin tuarh tuarh a.

Doctor chuan kan dinhmun hrethiam tak hian aw dam duai hian tih sual an neih loh thu leh vawi tam tak an en nawn thu min hrilh a. Kan chhungkaw zing ah cancer vei kan awm leh awm loh te min zawt a.

Ka pa chu a thaw hawk a," Ka nu leh pa hi cancer vang in an boral a,ka farnu pawh chuap cancer in a boral tawh bawk. Mahse an ni natna leh ka fanu natna chuan enge in zawmna a neih ?" a ti a.

" Cancer hi genes atanga in kai chhawn theih nia sawi ani a sin. In chhungkaw history thlir pawn cancer vei pathum ngawt i hriat theih chin ah pawh an awm ania. Zuk leh hmuam hian cancer chu a thlen thei na meuh mai. Mahse zuk leh hmuam ti hauh lo pawh thlahtu te atanga an kai hi thil awm thei ani ve ani."

Doctor leh ka pa chu in biak fal an duh avang in lounge a min lo nghaktu ka cousin Kian leh ka Ni bulah chuan ka kal ta a. Ka ni chuan min lo kuah vat a min hnem nghal mawlh mawlh a. Ka hrilh hauh si lova ka hmel ah a lo hre nghal ani ngei ang. Kian chuan ka darah a rawn beng thak thak bawk a.

Eng tin nge Viv hnenah ka hrilh tak ang ? A nghawng dawn lutuk a hrilh loh zawk ka thlang ani. Chu mi zan a ka pa leh ka ni titi chu Kian nen kan ngaithla ru a ,ka pa sawi dan chuan doctor pawh in beisei a nei sang lo hle a mahse ka pa min hmangaihna leh beisei tlatna a vang zawk in treatment chu ka la dawn zawk alo ni awm a. Kian chuan mittui tling pam in ka kut chu a hmer ngawt ngawt a. Ka kut ah kai in min kal sawn pui ta a.

Terrace ah chho in boruak uap churh hnuaiah chuan kan thu ngawi dun ta rauh rauh a." Kian, eng tin nge ka awm zel ang le ? Ka bei a dawng tak tak ani. Ka dam chhuak dawn lo tih hriatna lian tak ka nei ani. Ka lo boral anih chuan eng tin nge ka tello in Vivian a awm ang ? A rilru ana in a keh chhe vek ang." tiin ka tap hlawp hlawp a.

Kian chuan min rawn kuah a," Unaunu, beidawng mai teh suh. Pathian a awm a, thil mak pawh a thlen tir thei tih i hriat kha." tiin min hnem ve ngial a.

Thih chu ka hlau ani lo Vivian kal san ber chu ka hlau in ka hreh ani. A ni lah in min rawn call loh leh min rawn text reng a min ngaih thu leh lo haw har min tih thu min rawn hrilh reng a. Kei lah in doctor schedule a tawt lutuk a thla thar kan la nghah a la ngaih dawn thu hrilh in ka natna pawh chu ka la zep tlat a.

Test eng eng emaw ka paltlang leh leh hnu chuan chemotherepy chu ka la ta a. Vawi li ngawt la tur in min la ti zui a . Anglo Indian nurse hmel nelawm tak chuan ," Kan in enkawlna hi beiseina nen bul kan tan thin a , i rilru ah that chhuah leh beiseina i neih loh chuan hmasawn a har thin." tiin min hrilh malh malh a.

Chemo ka lak zawh chuan a nghawng chu na tak ani. Ka sam a tla tan a,ka ka chhung hi a na in a thur tuau mai bawk a. Ka thil ei chakna a bo in ka cher chak hle mai a ka taksa te hi a duk hma em em mai leh nghal. Keimah vang hian ka pa hi a va in seng so nasa in ka pa lakah hian bat ka va ngah em. Chemo khai mai a la tawk tawp lo mai a, ka khaw hmuh a la pangngai em tih check tur in opthalmologist in min enkawl a, ka ri hriatna check tur in audiologist, ka nervous system enkawl tur in neurologist leh ka hriatrengna a la tha em tih leh ka mental skill min check reng tur in psychologist kan hmu reng bawk a. Sum chu ka hmang hek hiau hiau tak ani.

Dam chhuak leh tur ni silo hian pawisa ka hmang nasa chu ka in thlahrung in hrehawm ka ti em em a. Vivian lah in haw tur in min rawn ti chhen nen ." Viv, ka rawn haw tawh lo mai thei. He lam ah hian mipa duh leh hmangaih ka nei thar a, khawngaih in min theihnghilh rawh." tiin ka text a,min rawn biak pawh leh theih tawh loh nan ka phone chu ka switch off hmak a.

Kian chu a chek tlak a," I sual em mai . Enga ti nge kha tia i tih kher a ? A rilru i ti na in a huat phah dawn che anih kha."a ti hluk a.

" Min hua se ka duh ani. Ka boral san hun ah chuan a tuar zo lo ang. Min hua anih chuan min huatna thinlung nen chuan a tuar chhuak thei mahna " tiin ka mittui chu ka hru a.

Min lainat hmel tak hian Kian chuan min melh vawng vawng a," I dam em em ang ,mate." a ti sap a.

Chemo course ka lak zawh meuh chuan ka cher in ka chau em em a, that lam aiin chhiat lam ka pan zawk ani.
Viv chu ka ngai in ka be chak ngawih ngawih a, mahse ka tel lova awm dan lo zir hmasa se ka duh vang chuan ka in sum fan fan a ngai si. Ka dinhmun hi a chhia in ka va mangang tak.

Doctor chuan," In haw hun ah chuan thawk lam harsatna i emaw seizure i nei anih chuan doctor ko vat ang che u. Zun harsa a ti emaw a lu na a zin viau te ,a khawsik hi 100.5 F anih ten doctor ko thuai ang che u." tiin min chah a. Duhsakna tin reng min hlan chung in kan in then ta a.

Kian chuan min rawn zui haw ve bawk a, ani hi awm lo se chuan Viv vanga ka khawhar manganna te chu ka tuar chhuak thei dawn lo tih ka chiang ani. Ka tan hian a in pe zo in ka thian tha tak leh nuta fel ber ava ni tak.

Kan khua kan thlen chuan ka chau hlum lo chauh ani tawh. Lehkha ziak tur pawn chakna ka nei lo thuai dawn ani tih ka in hria a. Min hmuh chuan ka nu leh ka u te chuan min lo kuah a min tah khum hawm hawm hlawm a. Vivian hnen ah ka natna hi engmah hrilh lo tur in ka hrilh nawn leh mawlh mawlh a.

Tunah chuan ka chau ta tak zet ta... a tawp ber nan tiin Kian hnen ah chuan rih dil ah min hruai tur in ka ti a. Ka sam kawlh vek tawh thup nan sam lem ka vuah a,make up in bel mahila ka dawldang in ka mit khur thuk tak te chu ka thup zo lo.

Rih dil kam ah chuan Kian-a dar ngheng in ka thu peih hram hram a," Kian, ka kal san mai tawh dawn sia ka hmun nuam tih ber hi a tawp nan tlawh leh ka duh ani. Hman lai kan pi pu te rin dan kha chuan mitthi thlarau te hian rih dil hi an kal pel thin an ti sia...ka thih hunah chuan ...."

" Thih thu ngawt sawi teh suh..." tap lo chauh hian a ti a. " Thil mak pawh a lo la thleng thut thei a sin. I dam chhuah leh hi ka beisei tlat ani."


" LALHMANGAIHSANG !"

Vivian aw ka hriat chuan ka lung chu a phu rang nghal zawih zawih a, " Aw..Lalpa, nilo...khawngaih in ...Vivian ngei ani ." tiin ka phun sep sep a. " Kian, khawngaih in min pui hram rawh..." ka ti tlawk tlawk a.

Vivian chu kan bul a rawn thlen chuan min phih tho lawp a,ka hmaiah chuan min beng ta thuai mai a," Phatsantu, ilo tenawm hle mai. Min tih nat zia hi i hria em? " a ti tuarh tuarh a.

Kian chu rawn ding chhuak in Viv chu a lo dang a. Viv thinrim lutuk chu a khur thei hial a," Nang hi maw ka hmeichhe hmangaih min ruk sak tu chu !" tih leh a hmai a hnek bur chu a rual ta a.

" Kian, khawngaih in khawih let suh aw..." ka ti tawk tawk a.

Samu-a leh Mangheta chu rawn tlan phei in an thianpa chu an kai hrang ta a. Viv chuan ," Amber,ka hua che ani. Min phatsan man hi ka la rul khawp ang che. Kei aia hmangaihtu che hi hmu leh tawh chuang lo ang. Min then vang hian i la inchhir khawp ang" tiin min au zui tuarh tuarh a.

Mittui tla zawih zawih in ka thlir zui tlawk tlawk a. Kian chu kuah in ka tap hlawp hlawp a, " Kian , khawvel a ka hmangaih ber leh min hmangaihtu chu ka ti na ani. Ka tih nat loh chuan min haw thei dawn silo. Min huat phawt loh chuan ka thih hunah a tuar chhuak zo dawn bawk silo." ka ti mawlh mawlh a.

Kian chuan Viv-a hnekna a hmui thi chu a hru fai a," A hmangaih tak zet che ani. I kal san dawn ni a i rin chuan a bulah awm tam zawk ta che. A hriatrengna a cham hlen tur i hmangaihna aw kha hriat tir zawk rawh." tiin min kuah let a.

" Ka thei lo...a na dawn lutuk. Min huat ngei a ngai ani."

%%%%%%%%%%&%&%%%%%

VIVIAN'S :

Ka thinlung hi a na ani mai lo, a keh chhe sawm vek hi ani ber mai. Dam thlakhlelhna pawh ka nei tawh lova ka nun chu a ruak ngawih ngawih a ka hmangaih ber in min phatsan ani tih hi rin har ka la ti cheu ani. Kum nga chhung ka lo kawp tawh leh ka nupui la ni mai tur in mipa dang min han neih san ta mai chu a mak ani. Kan hma lam hun tur thlir in boruak ah in chhawng ka lo sak ve thin chu thawklehkhat ah tih chhiat sak ka lo ni ta . Min phatsan vang chuan Amber chu huat ka tum nasat poh leh ka hmangaihna chu a zual sauh zawk ani si a.

Delhi a chhuk tur kha phallo in lo dang ta ila engkim ala tha vek hi ni mai tur. Ka rilru na chuan zu ka in phah a ka nun chu a chhe vek ani mai. Ka nu leh pa pawh chuan min hrethiam ani teh chek aniang chu min sawisel lova min tha en vel mai mai hi ani ber .

Amber a rawn haw tih ka hriat rual rual in amah hmu tur in an in lam ka pan nghal a. Min hmu duh kher chuan ka ring lo na in ka ngaih em a vang in hmuh ka chak ngawih ngawih a. An in ka thlen chuan an awmpui nula chuan " Kian nen rih dil ah an kal a, an liam deuh chiah." a lo ti a.

Hmanhmawh em em in ka car chu ka khalh a, Samu-a leh Mangheta chuan mak tih hmel tak hian min lo melh hu a. " Rih dil ah a kal kan kal ve nghal a ngai." ka ti a.

Mipa pakhat nen in si rial a an thu dun ka hmuh chuan ka na ngawih ngawih a, ka in sum hman ngang lo Amber chu phih tho lawp in a hmai ah chuan ka beng ta thuai a. Ka rilru a tih nat dan nen a buk chuan chu tia ben chu la nep tak ani. A bialpa thar pawh chu ka hnek nghal bur mai a, Samu ten min rawn pawt sawn lo se chuan ka nawp hrep ang mawle.


In ka thlen chuan mipa tih a mawi lo in ka tap ta hial a. He thinlung hi a na ani. Pathian hian eng ah nge na thei lo thinlung min lo pek zawk loh le ? He tiang khawp a na tuar tur hian eng ah nge min lo pian chhuah tir kher kher ? Lo piang lo law law ila tha zawk tur. Rui hnep khawp in zu ka in a ka muhil ve thei ta hram a.

A tuk ni leng pawh chuan zu in in ka pindan ah ka tawm char char a. Tlai dar li bawr vel ah chuan ka nu hi a rawn lut a , ka dar ah rawn kuah in , " Vivian , thu sawi dun a ngai ani. Khawngaih in va in ti harh in va in bual fai la khunkhan tak in ka ti ti dawn nia. Pathian hming in ka ngen a che - khawngaih in." a ti a.


Pathian hming meuh a lam tak ah chuan ka hnial ngam ta lova ka in bual fai ta a, tlem chuan ka harh phah deuh e. Ka in bual fai zawh chuan ka nu chuan thei tui in tur min pe a, " I rilru natna hi ka hriatthiam pui em wm che a , hnem che duh mahila ka hnem thei si lo che a.." a ti a.

" Min hnem tum duh suh , nu. I thei chuang lo ang ."

" Tun mai khan Amber chu damdawiin ah an hruai a..."

" Eng vang in nge an hruai a ? A bialpa thar fa a pai in a raino tihna em ni ?"

" A bialpa emaw i tih kha a bialpa ni lovin a Ni fapa anih kha."

" Ka thinlung hi a ti keh sawm vek ani."

" Amber-i ber in i huat nih kha a thlang miau mai si a..."

" Chu chu enge awmzia ?"

" Amber hian thluak cancer a vei mek ani ..."

" ENG MAW ?!!"

" AW...Thluak cancer a vei a, ila hmangaih reng chuan a thih san hunah che i tuar chhuah zawh a rin loh a vang in mipa dang nei ang in dawt hrilh che in in huat tir a tum che a,i huat chuan lo thih san pawh ni la i tuar chhuah theih mai a beisei a. A natna pawh i lak ah zep tlat tur in min tiam tir vek a. .."

Eng tin nge ka awm ka hre lo ka vir mup mup ni ber hian ka hria a. Ka khur zawih zawih a ," LALPA !! A NI THEI LO !' tiin ka rum kawk a. Ka thinlung na lutuk chu ka aa mai dawn ni hian ka hria a.

Ka hmangaih chuan min phatsan lo . Min hmangaih leh ka nat a hlauh vang in dawt min lo hrilh zawk ani .Amber chu cancer maw ? Cancer vei tur chuan ala naupang lulai em mai.. A tawrh ai hi ka tuar duh ani a thih ai thih pawh ka huam a sin. Ka thingthi hnawk a ka aw rawl tawp chuan Pathian chu ka au ta a. " Lalpa, ka Amber hi kjawngaih tak in min tih dam sak rawh. Khawngaih in ka ngen a che . I ti dam anih chuan damchhung in i rawng ka bawl ang. Aw Pathian , i awm tak tak anih ngai chuan ka hmangaih hi min tih dam sak ang che ." tiin ka tap zawih zawih a.

Hmanhmawh em em in hospital lam chu ka pan nghal a, a awmna cabin ah chuan ka lut tlang nghal a. Ka hmangaih ka Amber chu natna khum ah chuan a lo mu bem a. A sam dum sei tle siau te kha a bo tawh sam pakhat mah a nei tawh lo ! A hmeltha tak ,tai tek thin tw kha a bo vek . A hmai chu a cher in a mit meng te chu a thuk kak mai a. Mittui vanga khaw hmuh phe ruai in a khum bulah chuan ka thingthi rawp a, " Amber, ka hmangaih lutuk che a sin ." tiin ka kuah thlawp a.

Aw zawi riai hian," Viv, he tia ka awm hi i hmuh ka duh lo a sin, hmuh tlak ka awm lo." a ti se se a.

" Aih , i hmeltha lutuk asin." tiin ka mittui chu a luang zawih zawih a.

" Tap suh,Viv, khawngaih in. Hetia i nat hi ka hlauh vang a lawm....engmah hrilh che ka phal loh."

" Cancer pawh nise kan do dun anga kan do hneh em em ang. Hmangaihna chu a chak a thil a ti thei a lawm ."

" Viv.. , ka dinhmun hi ka chiang a sin...ka kal san hun ah che pawh chhel tak in i awm ang tih min tiam rawh."

" Aih...aih..AIH ! Ka kal tir dawn lo che."

" Ka tawrh hi a na lutuk a, na tak tuar a ka dam reng i phal em ni ? Thih hi ka tan chuan hahchawlhna a ni zawk."

" I tawrh ai ka tuar duh. Ka hmangaih che."

" Kei pawn ka hmangaih che a lawm..thlamuang taka min kal tir loh chuan ka na tawrh hi i pawt sei ani mai."

Lalpa, mihring tawng a sawi thiam phak rual loh khawp in ka na ani. " Awle...i na tawrh chu ka duh lo...Sakhaw dang rinna ang in pian nawn leh na hi a lo awm tak tak anih chuan ka nupui ni tur in rawn piang nawn leh la ka lo nghak reng ang che aw..." ka ti a.

Ka Amber chu a nui sei a, "Thlaraute chawlh khawmna paradise ah ka lo nghak dawn che ania.."

Chumi zan chuan ICU ah dah luh a ni a, a tuk zing dar li ah min boral san ta. He khawvel ah hian keimah chauh a awm tur in min hnutchhiah ani. Ka thinlung hi a puak keh darh vek a eng ti kawng mah in a dam leh dawn tawh lo tih ka chiang ani. Paradise ah ka lo nghak ang che min ti maw kha, ka naute? Min nghak rei lo ang ka rawn zawm ve nghal ang che.

He ka thu ziah hi i chhiar mek anih chuan Amber nen pialral ah hlim tak in kan leng dun tawh ngei ang..A tel lova awm hi ka zuam hlawl lo ani.

@@@@@@@@@@@@@@

Amber leh Vivian thu ziah ka chhiar zawh chuan ka tap ta hlawp hlawp a ,in hmangaih te pahnih chu van ah hlim tak in lei a an la chen zawh loh hmangaihna chu an chen chhun zawm ngei ka beisei ani. An thlalak chu ka thlir tlawk tlawk a, " In hlim dun ngei ang tih ka ring ,Amber Vivian." tiin ka in sut hlawp hlawp a.

Room leh lam a awm ka nu chuan ka thawm a hria ani ngei ang , ka room ah chuan rawn dak in ," Bawihte, eng nga ti nge i tah ? " a rawn ti a.

Ka lu ka thing nawk a, ka lehkhabu chhiar lai chu pe in, " Kha chhiar rawh." tiin ka in sut hlap hlap a.

Ka nu chu a nui sak a, " Zan lai dar 2 vel ah i lehkhabu chhiar vang mai in maw i lo tah ni ?" a ti ta a.

*******###******###********

Hmun awl :

Long story " TAMING OF THE BAD BOY " ka rawn dah ve ang...min lo chhiar sak ve leh dawn nia aw.


Ka thawnthu ziah hi a tawi in ti tlangpui thin a. Ni e...ka pawm. Sei deuh ka ziah chuan in chhiar ning anga hneawm lam ah te a kal palh ka hlau thin ani. Chu lovah thawnthu ka ziah hian a tawp lam ah hian ziah tur dang hi ka rilru ah a rawn lang zut zut a, duh aiin ka lo ti tawi leh thin 😂


Gay i ni em? I thau viau em ? I cher viau em ? A enga pawh khi lo ni mahla i rilru ti hrehawm suh aw. I nihna kha pawm la ,nangmah kha in hmangaih viau phawt rawh. Mahni leh mahni nihna pawh kan in pawm theih loh a kan in hmangaih theih tlat loh chuan tu hmangaih nge i phut ngam ang ? Tu teh lul in nge pawm ang che. Mahni nihna kan pawm ngam loh vanga mahni nunna lak hi a thing...mi dawihzep ber hna ani. Hmangaih nih i duh chuan in hmangaih hmasa zet rawh , nangmah leh nangmah pawh i in hmangaih theih loh chuan mi dang hmangaih chu a la hla viau ang . Hmangaihtu neilo ah in ngai in i beidawng ngawih ngawih em ni ? Duh tak a siam tu che Pathian in a hmangaih che a sin.


Rilru na leh beidawng ngawih ngawih a i awm chang te hian mahni nunna lak mai duh chang i nei thin ang ti raw ? TI MIAH SUH ! Khawvar eng a rawn lan hma hian thim a zual thin...ruah tel lovin chhimbal mawi tak a lang thei lo. I rilru a nat viau chuan hlimna in a hmuak hnai che ani tih hre fo rawh aw. Kawngkapui a in kalh anih pawh in beidawng suh ...chhuahna tur leh luhna tur tukverh tam tak a awm a sin. Thinlung na a kan rum chang hian mahni mai a tuar tlawk tlawk lovin i nu emaw i thian tha ber emaw tal hrilh la i z*ng hawk mai ang.

Thil pakhat leh...mi zawng zawng hi kan ti lawm vek seng lo tih ka hre chhuak thar (leh hnuhnawh🤣) Mi in ti rawh an tih vang ni lovin i thinlung in ti tur a a duh che chu ti thin rawh. Thawnthu ka rawn post leh hunah chuan in comments zawng zawng reply in in bulah ka in bun ruak thin ang. Ziaktu leh chhiartu te in pawh taka an titi ho theihna chance tha ber chu comment section hi a lo ni reng ani. Kan duh zawng te duh loh zawng te rilru in hmu tak in kan sawi khawm anga duh leh kan in hau bawrh bawrh anga...in haw tak tak lo in.

Mangtha phawt mai...UNTIL WE MEET AGAIN

ENDENDENDENDENDENDEN

*** KAN WEBSITE A FAKNA LAM THIL MILEM LANG THIN I LO HMEH ZEUH HIAN KAN WRITER TE HLAWH KAN TUMSAK ZEL TIH KAN HRE THEUH DAWN NIA, KAN LAWM E***

Website story link ho awlsam zawka in zawn hmuh zung zung theih nan STORY FB group siam a ni a. Whatsapp group pawh siam a ni e. Complete tawh ho zawng zawng leh story kallai kan dah vek avangin avangin in lo join theuh dawn nia..
Group link : https://www.facebook.com/groups/991354610918230/

Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)