Love is in the Air BY Maveni Hmar (Completed)

Episode nei ho a hlawm a dahkhawmna
Ngaia
Site Admin
Posts: 25813
Joined: April 30th, 2016, 4:07 pm

Love is in the Air BY Maveni Hmar (Completed)

Unread post by Ngaia » April 4th, 2021, 2:24 pm

87555xtw.jpg
87555xtw.jpg (12.03 KiB) Viewed 11865 times
Chapter :1
TANGLED OF LOVE


Office chawlh ani a , RG Stadium_ah football khel ên tûr a awm a ,ka fapa kum 5 mi lek hmeltha lutuk biangtai têk mai Johny chuan inkhel en a ngen tlat a . Ka nu leh pa ten en pui tur in min lo nawr ve chhen bawk nen khaw lum leh traffic tawt tak kar ah chuan kan in khalh chhuak ve ta a. Kei football a mik amak pawh hre lo tan chuan han phur em em chhan tur hi a vang khawp mai .



Ka car chu stadium hlat tak ah ka hung a,ke in kan pan phei a. Johny chu ka ban vuan chung in phur zet hian a zuang euh euh a , " Ma, ka len hunah chuan ka inkhel ve thin dâwn ti raw ?" a ti siam siam a.



" Teh reng mai ,bawihte ."


Inkhel kan han en chu Johny chuan hmuhnawm a ti lutuk a a biang te chu a tai tek mai a. A hmeltha hi Ka ti ngawih ngawih a ,en min har ka ti ani. Inkhel en ai chuan ka fapa biang tai tek chu hmuhnawm ka ti zawk a. Kum 5 mi lek ni si hian a fing in thil hi a hre thei em em a ,naupang dang ang lo tak in cartoon vel ai chuan inkhel hi hmuhnawm a tiin a en peih em em a. Kei ai let in footballers ho hming leh an khelhna club te hi a hre fe ani .


Ṭang lutuk a Johny lo au vel chu kan bula ṭhu nu valai tak hmel zahawm leh changkang tak chuan a lo lawm em em mai a. A biang ah te piai in a fiam zauh zauh reng a. Johny pawh in a ngaina ve nghal hle ani tih chu a cheese ball ei lai a ei pui ngam dan ah ka hre mai a . Hmel hriat ngai loh _ kan chhung hnai te pawh tiam in tumah a vawi khat hmuhna ah a nel nghal ngai lo a,he nu a nel nghal mai hi thil mak tak niin ka hria .


Chu nu chuan ," I fapa hi a fel in a hmeltha hle mai
Dik tak chuan ka nau nen in ang ka ti lutuk a. A mitmeng , a hnar leh a hmui te hi ka nau naupan lai chiah chiah ni mai in ka hria ." tiin Johny hnar ah chuan a piai sak zauh a.


Ka nui mai a . Ka fapa sam fai ser chu chhuang tak in ka chûl a , " Ka lawm e." ka ti sap a.


Johny chuan , " Ama, a lum e...ice cream ka ei chak ." a ti a.


" Ka va lei ang aw.."ka ti a. Ka bula ṭhu hnênah chuan ," Ka pi...,ka fapa hi min lo enkawl sak lawk rawh aw...khawngaih in. Ice cream ka va lei sak lawk anga ka rei lo ang. " ka ti a.


" Aw teh reng mai . Va lei rawh."


" Bawihte ,fel deuh in thuawih tak in lo awm la khawi ah mah lo kal sawn suh ang che ." tiin ka kal san ta a. Ice cream ka lei hnu chuan ka office thawhpui nen kan in hmu a kan in be khawtlai bawk nen duh ai in ka rei ta zek a .


Ka fapa awmna ka va let leh chuan ka fapa chu mipa pakhat hian a malchungah a lo pawm a. Tui tih hmel tak in ice cream hi lo ei in eng emaw hi a sawi siam siam a. A hnung lam atang a hmu ka nih vang in ka fapa pawm tu chu tunge anih ka hre lo na in ka fapa min lo enkawl sak tur a ka chah nu in , " Han en mah teh ...in kut ,in mit ,hnar leh hmui te hi a in ang lutuk . Pafa ni mai awm in ni . I naupan lai hmel chiah chiah kha a pu ani ,Mama ."a ti ri ka hriat chuan 'ka nau ' atih kha ani tih ka hrethiam mai a. Ka nui sak a.


" Bawihte, hei ice cream chu..." amah pawm tu hmel ka hmu chu ka phu dawrh a . Ka ice cream ken lai chu ka thlauh tawp a,ka chiai chhe vek ani ber mai . Thei leh thei lo hian , " Nang.....!?!" ka ti tham tuak a. Ka thin chu a phu dawt dawt a ,a rawn per chhuak dawn ni hial in ka hria a.


" Hi ! My Baby gurl ! "


A aw dam duai chuan min ti harh zawk a . A malchunga a tang chuan ka fapa chu ka pawm sâwn dawrh a. Thinrim tak in Johny chu ka vin tuarh a. " Hmel hriat loh chu tumah nel suh ka tih che kha . Engah nge i in pawm tîr ? Enga ti nge hmel hriat loh thil i ei sak ? " Ka ti that that a . Ka biang te chu a sa hut hut a, ka buai nuaih mai ani .


Johny chu a tap deuh par a , " Maa, ti nge ti khan i awm a ? Ka tih palh aw ?" a ti tiau a.


Awka vin in kan be ngai si lova ka vin a vanga hrilhhai lutuk ka fapa chu ka kuah bet a," Tlangvâlte , tap suh aw...Amaa hian a fiam mai mai che a nih kha aw.." inthiamlo tak chuan ka ti a .


Zothansanga chuan kei leh ka fapa chu chik zet hian min en tawn chhen a , chutah a thaw hawk a . Thinrim lutuk tih hriat tâk hian a meng alh phat a. " Awle..Amelia ,ka fapa chungchang hre tur hian dikna ka nei a sin . Eng vang in nge fapa ka nei ani tih hi ka lak ah i zêp ?" a ti khui khui a. Min beng duh mai awm hmel hi a pu ani .


A unau nu leh Johny chuan ngaihna hriat loh hmel tak hian keini pahnih chu min melh tawn chhen a . Zan leh chi-ai chhe lutuk chuan ka kut phah chu ka hum ngawt ngawt a. " I fapa ani bawk lo. " ka ti chhuak thei hram a.



Zothansanga chuan min melh thip khui mai a," Ka fapa , ka thisen chu ka hai lo . " a ti hmuk a . Johny hma ah chuan ṭhingṭhi hniam in a kut tetakte chu a hum sak vang vang a. " Bawiha ,i hming chu Johny maw ?" tiin nelawm zet hian a nuih a.

"Aw. "


"I Birthday i hria em le ?"



"Aw...hria."


"November 2014 ah i piang ti raw ?"


"Aw...ni 15 ah. Mahse engtinnge i hriat zawk ?"


" I pa ka nih vang in ka hria lawm." tiin Johny chu a kuah vawng vawng a .


" Apa i ni maw ? Amaa,amah hi apa ani tak tak em ?"


Ka khur zawih zawih a ,ka fapa zawhna chu ka chhang thei lo . Zothansanga chuan min melh hrawk a, " I lo tenawm hle mai , Amelia . Kum 5 chhûng teh meuh ka lak ah ka fapa hi ilo zêp a nia. Ka fapa chungchang hre tlak lo khawp a tlaktlailo ah min lo ngai tihna ani maw ?" ka beng bul ah chuan a rawn ti a.


Johny chuan ," Apa chu hmun hla tak ah a zin bo i ti a...a rawn haw tawh a mi ? Amah hi apa tak tak ani em ?" tiin ka kut a rawn hmer a .


" Aw ,Bawihte, apa anih hi..."


A hmel a hlimna leh phûrna chu ka en a ka ṭah a ti chhuak lutuk a ka mittui chu ka khap per sak sak a. A pa kut chu vuan in " Apa ,ka ngai thei lutuk che a . Football kan khel dun ziah thei tawh ang ti raw ? Mawimawia pawh a pa nên an khel ziah ." a ti ta reuh a.


"Aw,kan khel dun ziah tawh ang ." tiin a fapa biang taitek ah chuan a chûl a ." Tûnah chuan maw Amaa nen thil sawi fel lawk tur kan nei a,Ani bulah khan lo awm la kan lo lêt leh thuai ang aw." ati a. A U bulah chuan ," U ,i vahpa hi lo awmpui lawk rawh . He nu hi biak fal lawk ka duh a ." a ti a.

∆∆∆∆∆∆∆∆∆∆∆∆∆∆∆∆∆∆∆∆∆∆∆∆

Nula kum 19 mi ka ni a,state pawn ah lehkha zir in ka awm a . Nula zakzum leh rual pawl tam lo tak ka ni a. Ngaihzawng lam phei chu ka rilru ah pawh a awm ngai lo . Ka ṭhian kawm ber te chu ka in luah pui ka cousins te pahnih ani leh mai a . Lehkha thiam thei leh zir peih tak ka nih avâng in social media lam han khawih a buaipui hunawl ka nei ngai lo .


Zan khat chu lehkha ka zir mawlh mawlh lai in ka hriat ngai loh mi hnên aṭang in message ka dawng a. " I dam ṭhin maw ? Eng nge i tih ṭhin a ?" tih hi a ni a.


Chhan en ah pawh ka en lova mahse a zâwn in ni thum chhûng chu zîng tin " Gud Morning, Ma Baby gurl." tih leh zan tin " Gud nyt ,chweet dreamz ,ma Baby gurl." tih a rawn thawn ziah tak ah chuan ka chhang let ve ta a. Kan in kawm ngeih ta phian in kan in be ta fo a.


Ka number a neih dan ka zawt a,a ṭhianpa pakhat in a lo pe ani awm a. Chutia kan in biak tak reng ah chuan ka ngaina ta hle a . A message ka hmuh loh chang te hian ka ngai ngawih ngawih ṭhin a . A aw dam thluam te chuan min hneh ngawih ngawih ani .


Amah chu Zothansanga a ni a ,kum 26 mi Aizawl a sorkar Department pakhat a accountant ani a. A message dawng lo leh a aw hre lo a ni khat awm pawh hrehawm ti khawp hial in ka ngaina hman a . Kum tam tak ka hriat than ang mai in ka nek a,ka hmangaih ni ber in ka hria .


Amah a zei in min chawk phur thiam em em mai a . A tak ah awm dûn lo mahila message leh phone call hmang in a bul ah zan tin ka riak a ,hmangaihna kan chen dun thin a ni . A tan ui hauh lo in ka taksa pum chu ka hlan nghal thlap a. Amah bak a duh hi khawvel ah hian ka nei lo ani. Ka first love chu ka phone chhass ani.


February thla chuan ka awmna ah a hna vang in a rawn zin a. Kan in hmu tur chu ka phur tak zet ani . A rawn thlen tuk tlai chuan Hotel Pinewood ah in hmu tur in kan in tiam a.



Kan in hmuh tirh chuan ka lai tawp hi ani.mai a ,ka khur ru der der a. Amah ka lo suangtuah dan leh a tak a hmel chu danglam tak ani . Tlangval lian vak lo kum 26 mi hâng ngaihnobei hmeltha tak hmuh ka lo in beisei a. Mahse mipa kum 37_45 in kar vel ,feet ruk bawr vel ,ngo vuah mai sa tha leh hmeltha eltiang hi alo ni a. Mahse a laka ka lo in pêkna leh ka hmangaihna chuan a kum upat lam chu ka ngai pawimawh phal lo ani ber mai . A hmelṭha sar vuah leh zahawm khup chuan min hip bet rawk rawk ani ber mai .


A bul ka thlen chuan a palian in a sang ropui si a ,te chem chem hian ka in hria a ,a dar pawh ka la chen pha lo zui a .ka kut chu la in a hmer chawt a,a kut lum thar thar chuan min ti mur uai uai a .


" Hello ! My Baby gurl ! I hmeltha lutuk. " a ti a. A aw chu phone a a aw ri ang chiah khan a ngaihawm dam ril raih mai a . A nelawm in a hmangaihawm hliah hliah khat tlat ani .


Lai tawk in ka melh a ,ka nuih sak a ," Hi !" ka ti sap a . Sawi tur pawh ka hre lo a, ani chu a tawng bawrh bawrh a, a ti ti lai chu ka lo en reng a , hmeltha ka va han ti fuh tak .


Ngun tak in min en a , " I cute a , i innocent a , i hmeltha bawk . Ka lo suangtuah thin dan che let in i hmeltha ani . Ka hmangaih che nupui ah ka duh che ani ." tiin ka malpui a rawn tawk zauh a , ka mur nghal uai uai a. A meng de sar sar a ,." Zan tin kan awm dân ang khân a tak a awm ka duh ani ." a ti sa sa a .


" Kei pawh.." ka sen awp awp a .


" Zak suh , ka naute. Phone ah pawh engmah tih hreh kan neih loh kha ...a tak anih vang a zahna chhan tur a awm lo ." a mitmeng fiah tak chuan min siai sak a . " Eng nge min hmuh ve dan ?"


" Ka ...ih..i hmeltha ..i palian ...i sang ropui si ..chuan I rimtui bawk . Mahse ka rin ai in i upa ."


A nui hawk a , " Min iai phah em ? "


" Aih..teuh lo.."


" Dik tak chuan kum 40 ka ni tawh ang..ka ṭhian pa lerh ve zet hian i number kha min pe a, ' nuthlawi lerh zet a nia fiam zak raih rawh ' min ti a.."


" Nia, ka phone ka ti bo a , mi sim card hlui ka hmang a.."


" Ka rawn be ta che a..ila naupan hmêl in i inno ropui si a , ka ngaina laklawh tawh si che nen i lak ah ka kum kha ka zêp ta mai ani.


Zaktheilo zet chuan ," Hmangaihna in kum a thliar lo an tih kha " ka tih tak ah chuan za em em hian min nuih hak hak a.


Chumi zan chuan a thlenna hotel ah kan riak dun a ,ka nula thianghlimna chu ka hlan ta ani . Kar khat chhûng a cham a ,ka class bang hi min lo hmuak ziah a. Kut in kai rial in kan lêng dûn ṭhin a . Teddy bear ,perfume leh tlereuh chi hrang hrang hi min lei sak reng a, engkim ah min duat in min care e em a. Ka hlim in a.bula awm chu nuam ka ti a, ka hmangaihna pawh a let eng emaw zât in a pung ani .


A cham chhûng kar chuan zan tin kan riak dun a , min ti hlim in min ti lungawi hliah hliah a. Ka nun a ka hlim san ber lai ani bawk . Mahse ka hlimna chuan a daih rei lo . A haw dawn zan kan awm dûn leh a , mut hma inbual hi a duh ṭhin avâng in ka in bual hmasa te te a . Ka in bual zawh chuan ani chu a in bual ve thung a . A in bual hlan in a laptop check kual pah in khum ah ka bawk a , chutih lai chuan a.phone a rawn ri a .


" Hey...Daddy , i phone a ri ania.." tiin ka au lang lang a.


" Aw...lo pick mai rawh , Baby."


Ka pick ve mai a," Hello..?"


Nu tling aw hian , " Hello ? Ti nge i nih a ? Khawiah nge Zothansanga ?" aw nelawm loh theih tawp hian a rawn ti a .


" A in bual mek ."


"Tun ang zan dar 11 hnu lam ah a room ah eng nge i tih ? A call girl khawi chu i ni em lo maw ? " a rawn ti hlawi hlawi a .


" Eng a !? I vân zaktheilo tak ! Tu nge i nih a? " Ka ti vin ṭhat a .


" A nupui mawle , mambawih. "


" A nupui a ? He he he...U Zothansanga hian nupui a la nei lo aw, ka pi ."


" I awih loh leh amah kha zawt la...fanu pahnih kan nei tawh a . A fanu te rual lek i nih duh hmel hle mai . Eng atân mah a ti lo ang che . A cham chhûng a nawmchen nan bak a ti lo ang che ."


Ka thinrim lutuk chu ka khur zawih zawih a , ka sa nghal pup pup a ," Dawt i sawi , Zawngi ! " ka ti piap a . Ka dah nghal hmak a , ka rilru chu a na ngawih ngawih a . Ka hmangaih ber ka nula thianghlimna hial ka lo hlan hi mi pasal pawm lai maw lo ni ? Ka taksa pum pui chu a na chhuak vek ani ber mai . Hetiang reng reng a rilru nat hi kala nei lova ka tuar chuak zo pawh in ka in ring lo hial ani .


Mut dawn hian zu no hnih vel a in ṭhin avang in zu hi a kawl reng ṭhin a . Ni khat par chuan ka thli chhuak a tui pawlh miah lo chuan ka in nghal pawp pawp a. Zu hi ka la in chhin ngai hauh lova eng tin nge ka in theih zawk pawh ka in hre lo . Ka beng leh ka pumpui chu a sa nghal hut hut a, ka z*ng deuh huih hian ka hria a .


U Zothansanga in bual zo rawn chhuak chuan ka zu in lai chu min rawn hmu a . A rawn tlân phei a ,no chanve vel ka in hman ang tih chuan min rawn phih thlak sak lawp a . " Enga ti nge i lo in ve ringawt a ? Naute ,zu in tûr hian ka phallo che ani. Vawi khat i in chhin chuan in leh zêl i tum palh ang . Hnam dang kar a awm i ni a i nun i fimkhur a ngai a sin ." a ti a .


Pawr tawk hian ," Ka zu in chhan i hre duh a maw ? I nupui han zawt rawh ." ka ti tuarh a . A phone rit leng lawng chuan ka vawm ṭhuai a , a lo thle sawn zauh a cement bang char ah chuan a fuh sawk a , phone chu a chhe hneh duh khawp mai . Lo thle sawn hman lo se chuan a na ve ngawt ang .


Ka ṭap a , a awm ka chum zawt zawt a " Bum hmangpa ,ka hua che . Nupui i nei reng si a...min bum ani ." ka ti tuar tuar a .


A awm ah min kuah bet a , " Sshhh...! Baby , ti khan awm suh . Engkim ka hrilhfiah ang che . Min ring rawh ..ka hmangaih che . Kan innei dâwn nia . " a ti sa sa a.


" TENAWM ! I Baby pawh ka ni lo ...i dawt thu in sawifiahna hi ka ngaithla.ten ! "


" Thu dik engkim ka hrilh dawn che a lawm . "


" Sawifiah tur engmah a awm lo . Ka ten che ."


" Min ring rawh . Ka hmangaih che "


" Hremhmun ah kal rawh ." Hotel aṭang chuan ka tlân chhuak a . Min rawn ûm zui a min rawn kuah a tum a ,a.hmai ah chuan ka ham rin nuai a. " Ka dam chhûng hian hmuh leh che hi ka duh tawh lo , bumhmangpa !" ka ti ṭhat ṭhat a .


Hei hi kan in then tak dan chu ani . Thla hnih hnu ah chuan ka rai ani tih ka in hre chauh a . Ka rilru na leh mangang chu awm ngaihna pawh ka hre lo . Hlau chung chung in ka nu hnên ah phone in thil engkim ka hrilh ta vek a . An thinur ka rin teh lul nen an thinrim miah lo a . Min lainat a thu ṭha min hrilh mawlh mawlh zawk a. Tun hnu ka ngaihtuah leh hian ka rilru nat zia kha an hre si a ka in tih hlum an hlauh vâng in ka nu leh pa khan an thinurna an ti lang duh lo niin ka ring .


Ka nu chuan ," Bawihte, engmah tih sual i nei hlei nem . Rilru hahdam tak a awm tum hram ang che aw . Thil tha lo tih duhna rilru te kha ilo nei palh ang e ." awka zaidam tak chuan a ti a .


Ka ṭap hlawp hlawp a ," Nu , ka tih palh ani . Pawi ka ti lutuk ." ka ti mawlh mawlh a .


" I vanduai palh mai ani e ,bawihte . I thiam loh ni lo in ka thiam loh ani e . Mipa chet sual pui lo tur in ka zirtir che a . ..insum zawh loh hun alo thlen palh hlauh a rai lo tur a in ven dan ka lo zirtir tel lo che ani ."


Ni thum hnu ah chuan ka nu leh pa an rawn chhuk a . An hmel hmuh hrehawm ka ti in ka zak ngawih ngawih mai a . Lehkha zir zawm ka duh tawh loh thu leh an rual a haw ve ka duh thu ka sawi chuan an rem ti lo dun nasa hle a . Ka nu leh pa min hmangaih zia leh ka tan a an in pêkna hi ka hre chiang telh telh mai ani .


Ka nu chuan A hna ah a ai kal tîr in fa ka neih thleng in min awmpui a . Rai puar chunga class kal te kha hrehawm ka va ti thei tak ! Nau ka neih hnu chuan naute chu ka nu leh pa ten an enkawl a kei chu fa nei lo ang mai in lehkha ka zir zawm ta zel a . Zothansanga min bum vang in mipa rêng rêng ka ring tawh lo a ,ka haw hlur tawh mai ani .


Naute chung chang hi Zothansanga hrilh hriat ka tum lova theih chhung chu zêp hlen ka tum ani . Ka rilru a tih nat em avâng in a a fa chungchang pawh a hriat ve a phu lo niin ka ngai a , a laka ka phuba lâk ve theihna kawng awm chhun chu a fapa chungchang zêp bo hi niin ka hria a ni .

∆∆∆∆∆∆∆∆∆∆∆∆∆∆∆∆∆∆∆∆∆∆∆∆

Zothansanga chuan hneh zet hian min kai dawr dawr a . A car chhûng ah chuan min nem lut nawk a . Huat hmel em em hian min melh a , ka ṭi deuh dai mai a . Amah a palian in a hmel a nelawm lo in a lang vawt ruih mai a ka hlau ang reng hle ani


" I thil tih pawi zia hi i hria em ? I chapo leh luhlul luat ah ka fapa chungchang min hrilh duh miah lova , ka fapa chu pa nei lo ah i siam a . I thil tih rapthlak zia hi i hria em ? Thah mai che ka duh rum rum hial ani . "


" Ka ...ka.."


" Thiamthu sawi tûr pakhat mah i nei lo . Eng tikah nge ka fapa chungchang hi min hrilh i lo tum ? Zêp kumkhua i tum a maw ? A pa ka ni a , amah ah hian chanvo ka nei a sin ."


A mi bum dan leh kan nunhlui kha ka ngaihtuah let a ka thinrim ve ta phat mai a . " Aw,ka damchhung a zêp ka tum . Vanduai thlâk tak in tunah ilo hre chhuak palh ta hlauh a.ka zêp zo ta lo anih hi ." ka tih khum ve ta sak sak a .


In seh ruh teuh in ka hmai ah chuan min beng ta thuai a . " Min hrem hi bansan tawh rawh . Min tuar tur hnem tawk ta e . Ka fapa hi ka la dâwn. Pa enkawlna hnuai a ṭhan len a mamawh ani . I fapa hnên aṭang in a pa i lak bo sak chu kei in ka pe let dâwn ani ."


Ka tap par tawh a , " Nilo ...Johny hi min lâksak thei lo ang . Ka neih chhun liau liau ani a sin . Nang chuan fanu pahnih i nei a lawm . Johny hi chu ka ta liau liau ani ." ka ti lawm lawm a .


" Fa dang tumah ka nei lo ."


" I nupui nen in fanu te pahnih kha..."


" Ka fate an ni ve lo . Fa nei thei lo ah ka lo in ngai char char a, chi thlah pakhat mah nei lo a thi ral tur ah ka lo in ngai tawh a. Ka tan leh kan chhûngkaw tân Johny hlut zia hi i hre thiam pha lo ang ."


" I nupui khan fanu pahnih kan nei a ti si a"


" Kha tih lai khan engkim hrilh che ka tum a , i ngaithla duh lo a min kalsan lui anih kha . Ka nupui fa bik te an ni a ...kum sâwm zet kan innei a fa kan nei dun thei silo a , keima dikloh , fa ka neih theih loh vang ah mi zawng zawng in an ngai a . Kei pawh in chu chu ka ngaihdan ani ve tho _ Johny ka hmuh hma kha chuan . Tûnah hian fapa ka lo nei reng tih ka hriat a ka hlim zia leh ka lak a i zêp vang a ka thinurna hi a in zât reng ani ."


Nupui nei lai i ni a...i fa ka pai thu ka hrilh thei lo che ani . In chhungkua ka ti chhe vek dawn a sin ." thiam in ti hliah hliah hian ka ti a .


" Chhungkua tih chhiat leh chuang tur ka neilo . Kan chhe sa reng ani . Kum sâwm kan inneih chhung khan hlim lai leh in rem lai kan nei ngai lo . Ka chhungte tumah mil a nei lova ...nuthlawi mahni aia upa nupui a neih chu a fuh ber lo ani . " a ti a .


" Ka awih lo ...a bulah i hlim lo viau anih chuan eng ah nge i then mai loh ? "


Nang nen kan in hmuh hma thla rûk kal ta khan kan in then daih tawh . I bula ka riah lai te khan nupui pawm lai nei lo, pathlawi ka ni daih tawh . Tûnah pawh ka la pathlawi reng ."


" Ti nge...chung te chu kha tih lai khan min hrilh loh ? "


" I ngaithla duh lo anih kha..."


"Ha ! Ka ring lo che .."


" Min ring rawh , Baby. Ka hmangaih tak zet che a , ka la hmangaih reng che a. Ka ngai em em reng bawk che ani ."


" Min hmangaih tak tak a nupui nei lai i nih si loh chuan eng nga ti nge kha mi zan khan min kal tîr si .? Min lo dang tur i ni a sin ."


" Ka lak ah khan i thinrim in min haw em em ang ,ka dang lui ngam lo che ani . Ka thu sawi leh thil tih a piang khan i thinrim a belh chhah zel mai si a . In sawi fiahna hun pawh min pe duh lo anih kha . Ka hmangaih che ,Amelia bawihte "


A awm ah chuan min kuah bei in a lungphu dit dit ngaithla in ka bei hle hle a . He pa ka lo ngaih zia leh ka lo la hmangaih reng zia te chu ka hre thar uar uar a . Khur dar dar in " Kei pawn ka hmangaih che, Daddy ." ka ti sêp sep a.


A hmui lum hian chuan min fawp ta vawng vawng a . He pa hi ka kalsan ngai tawh lo ang . Ka hmangaih ani . ..ka hmangaih tak zet . Ka hmangaih hmasa ber leh hnuhnung ber ani kumkhua ang.



Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » April 4th, 2021, 2:25 pm

Chapter : 2

AN AFFAIRS TO REMEMBER



Ka hmangaih leh ka duh vang ni hauh lovin ka nu leh ka pa chuan tlangval upa lam hmel fai vang mai kan khua a sawrkar hna lian tak thawk chu nei tur in hun leh ni an lo ruat fel diam mai a. Ka duh loh zia chu hrilh mahila awmzia a nei tampui lo kher mai. U Hminga chu a fel in a hmelchhe lem lo bawk a ka pasal a la ni mai dawn nen ngainat tum in theih tawp ka chhuah a, amah in a zir bawk a ka ngaina ve ta mai bawk a.

Ka lak ah a tha in ka tan ui reng a neilo. Thawmhnaw, tlereuh, make up leh engkim mai hi min lei sak reng mai a. Thil min lei sak tawh lo tura ka hrilh lah in a ngai pawimawh hran lo. " Thla rei lo te ah ka nupui i ni tawh mai dawn a, eng pawh tih sak che ila mawilo ani hlei nem. Ka hmangaih che a, ka nupui hual lak a ka hmangaihna ka lantir ve theih dan kawng hriat chhun a ni ve mai a lawm. " min tih san mai a.

He ti khawp a min hmangaih tu leh ka hmel hmu lova ni khat pawh awm harsa ti tu chu ka khawngaih a, a tan a theih tawp a that chhuah let ve chu ka tum tlat a. Kan in pawh tan in kan in ngaina chho ve hman viau tawh a. Kan in upat hleih na chuan a ti tim ve deuh nge ni fa en tak a mi en in min duat thiam hle ani. Thenawm khawveng leh min hre chiang em em lo tute chuan a hausak vang chauh a nei tur ka nih thu leh sum um lutuk tia min sawi sep thawm te chu ka hre vek a. Ka hre lo der lui vel ta mai mai ani.

Kan inneih hun a thian atan hman ka tum ka thian tha ber, Becky chuan, " Enteh Tete, U Hminga te thenawm mai a mi mikhual kan nei a, u Hminga te chhungkaw hausak zia leh a nu sual rapthlak zia te a sawi teuh mai a. A nu chu tu man an hrawn theih loh thu leh nang ni pawh in inneih rei theih a rin loh thu a sawi nasa mai. " a ti a.

" Kan inneih rei theih loh pawn pawi pawh ka ti lo. Hmangaih vang a nei ka ni chuang hlei nem."

" In innei anga i hmangaih chhawm ve mai ang. "

Rilru dam zan lova innei tur nih nak lai in a nu sual thu ka hriat chuan min ti hnual rawih a. Nu sual tak hrawn chu ka thil peih loh ber ani hial ang chu. Kan khua a hna thawk ani tho a kan inneih zawh chuan kan khaw lamah kan awm daih anga a nu nen chuan kan in hrawn rei dawn chuang hlei nem tiin ka in hnem a.

Aizawl a innei tur kan nih vangin kan khaw lam a in thlahna hun kan hman hnu in kan inneih hma ni hnih ala awm tih ah chho ta a . U Hminga nu chu a hmeltha in a fin hmel hle mai a. Kan han in hmu chu a fel in that a chhuah ngang mai a. Kan inneih rehearsal te chu video a cover vek a duh a.

Kan inneih hma ni chuan inneih rehearsal nei tur in kan in siam a, biakin lam chu kan pan ta a. Car atang a ka chhuah chiah chuan angle tin atang in video in an lo la vek tih ka hmu ta a. Ka zam lek lek zawk a ni. " Wow.. An va bei urhsun ve a.. " ka ti sap a.

U Hminga nu chuan " Engkim hi a tha thei ang ber a tih ka duh ani. Kan camera men te pawh saw a tha ber vek an ni. Tiffany's Studio ho ngat an nih saw. An ni tluk a thlalak leh video editing thiam leh creative hi Mizoram ah an awm lo ang. Tunah tak phei chuan a nei tupa ber in a rawn ho leh nghal a. In inneih thlalak chu a nalh chung chuang ngawt ang. " chhuang tak chuan a ti a.

Tiffany... Chu hming chuan min ti phu deuh zawk a. Chu hming chuan ka thinlung mu hnu chu kaitho zawk in ka lung a ti leng thar riau ta pek a.

Ka thaw halh a biak in ah chuan pen luh mai ka tum lai chuan ka che tla vel uluk tak a thla min lo lak sak tu hmel ka hmuh chuan ka ding chawt a ka thin chu a phu rang nghal zawih zawih hle mai. Kan inneih thla min laksak tur in eng tin nge ani ber kher hi an hman theih? Kan mit leh mit chu in tawng sawk in kan in melh ta reng a.

U Hminga nu chuan " Malvyn, min rawn ho thei chu a lawmawm hle mai. Tete, hei hi Tiffany's neitupa Malvyn anih hi" tiin min in hmelhriat tir a.

Malvyn chuan a kut chu rawn phar chhuak in, " Hello... Ka hmu che chu ka lawm hle mai, T. " tiin ka mit ah tak chuan min melh lui ngat a.

Kan in chibai ta a, kan kut leh kut a han in tawk chiah chu electric current man ang mai hian ka taksa pum chu a tek chuai a. Kum thum kal ta a ka feeling a thi tawh emaw ka tih chu a lo la nung reng ani tih ka hre chhuak leh ta. Tawng na chang pawh hre lo in Malvyn chu ka melh ta vawng qavawng a. Tun hma kum thum kal ta ang mai khan a hmel te chu ala tha in a mitmeng pawh a la mawi em em reng ani. Ka hmangaih em em thin a... Tunah pawh ka lo la hmangaih reng a lo nih hi.
^^^^^^^^^^^^^^^^^^^^^^^^^^^^^^^^^^^
Malvyn nen hian Bangalore ah computer kan zir ho thin a. Ka hmuh tirh atang in hmeltha ka tiin ka duh nghal hliah hliah mai a. Zah pawh sawi lovin ka duh zia chu mitmeng leh chet zia ah ka lantir thin a. Kan in hmelhriat atanga thla rukna ah kan in date tan ta a, a bulah chuan ka hlim in ka famkim thlap ni mai hian ka hria a . Amah ang em em a mipa hmangaih leh duh hi ka la nei ngai lova ka neih leh theih pawh ka in ring hek lo.

Nu leh pa hmuh phak loh a awm kan ni bawk a kan zalen in hun awl zawng zawng ah kan awm dun a, inneih certificate kan nei lo tih mai loh ah chuan nupa kan nih lohna engmah a awm lo. Kan zirpui zawng zawng te pawh in kan chanchin chu an hre vek a entin pawh awm ila min dem ngai lo. Ka hming pawh in min ko ngai lova ka hmel nen inhmeh a tih em avang chuan 'Tiffany' tiin min ko thin.

Bangalore a ka awm lai kha ka nun a ka hlim san ber lai leh ka lungngaih ber lai in pawlh, ka theihnghilh tawh hauh loh tur ani.

Malvyn thianpa ve deuh roh Omega chuan min lo ngaizawng em em hi a lo ni awm a, kei chuan engmah ka lo hre ve miah lo a. Malvyn chuan, " Tiffany, Omega lakah hian fimkhur hle ang che. A melh dan che hi ka duh zawng ani lo tlat. " a ti a.

Fiamthu chuan, " A chhe hran lo bawk a ka lo flirt chhin dawn em ni? " tiin ka nui ar ar a.

Rum zet hian min melh hrawk a, " Ti chhin ta che _ i ngam anih chuan. " a ti nghut a.

" Ka fiamthu anih kha. "

" Fiamthu pawn kha tiang a i tawng kha ka duh lo. "

" Ok, Ok, Mr Overprotective lover! " tiin ka nui hawk hawk a.

" Ka hmangaih che a, mipa dang hian an ngaih melh ringawt che pawh hi ka duh lo in ka thik em em ani tih hi i hre reng dawn nia. "

" Kei pawn ka hmangaih che a lawm, Malvyn. "

Omega chuan ka thlalak leh ama thlalak chu in kuah lai ang in a lo edit kual vel a, a kut hnu a nalh in a tak emaw tih mai tur a ang hi ani reng bawk a. Malvyn hnenah alo thawn a kan in hauh phah hrep a. Keimah ka nih loh zia leh edit anih zia ka hrilh fe hnu chuan kan in rem leh thei ta hram a. Pangngai tak in kan awm leh thei ta mai bawk a.

Kan thiannu pakhat birthday lawm in Macy te nupa in luah ah kan in ti hlim hlawm a. Chutah chuan Omega pawh lo tel ve in a rui ang reng hle a. Makvyn_a bathroom a luh hlan chuan lam pui ah min sawm a ka hnial hnu pawh chuan min pawt lui hi ani ta ber a. Kan lam dun ta nge nge a. Chutia kan lam lai chuan ka inrin loh lai chuh in min rawn fawp ta mai a. Nam sawn tuma tha tawp ka chhuah lai chuan Malvyn chuan a rawn pawt sawn lawp a, a hmaiah chuan a hnek ta bur mai a.

Omega chu a nui sawng a, " I hmeichhe hmangaih hi i veng him zo lova i thinrim em ni, Malvyn? " a ti a.

Omega thu sawi pawh ngaihven lo in rum lutuk hian min melh a, pawnah chuan min kai chhuak ta dawr dawr a. Pawn kan thlen ve leh " Omega nen hian min kawp chian zia chu a lang chiang ta khawp mai. " a ti ta mai a.

" Thil i hre sual ani, Malvyn. I ngaih ang kha a ni hauh lo ania. "

" Ka mit ngei in in in fawp lai ka hmu chung pawn phat ila tum cheu a maw? Hmeichhe dawthei leh tenawm tak i lo nih hi. "

" Omega khan min fawp lui ani. "

" Ha! Ka ring hlawl lo. "

" Ani nen khan kan in kar ah engmah a awm lo. "

" A tawk! Min bum hnem tawk tawh e. Tun atang chuan kan in kar hi a tawp vek tawh. I duh tawk in Omega chu i hmangaih thei tawh ang. " tiin min kalsan ta hmak a.

Chumi ni atang chuan Malvyn chuan ka call a pick duh lova ka message a chhang duh hek lo. Hmuh ka tum pawn min hmu duh hek lo. Ka riru na lutuk chu Mizoram lamah ka haw ta a, kan in kar chu a tawp fel ta ani ta mai a. Amah vang in kum khat chhung rilru na in ka awm a. Amah ka ngaihna te lo reh ve telh telh in ka theihnghilh hmak tawh niin ka lo in ngaih lai in a hmeltha tak chu ka hmai hma ngei ah a lo lang leh ta si a ka lo la theihnghilh loh zia leh ka lo la hmangaih reng ani tih chu hriattir in ka awm ta ani.

U Hminga nu mitmeng fing tak chuan min melh tawn zak zak a,
" Nang ni pahnih hi in in hre tawh em ni? " a ti a.

Malvyn chu a nui sak a " Ah _ ka hmuh hnu ang ka ti deuh mai chauh anin. " a ti a.

Rehearsal kan neih chhung zawng chuan ka rilru ah eng dang mah a lang lo, Malvyn ringawt chu ka ngaihtuah a ka eng tih mah a tui thei lo. Rehearsal kan neih zawh chuan " I awm a nuam lo em ni? I hmel lan dan kha a dik lo reng reng " tiin Becky chuan min zawt a.

" Aih, ka tha a lawm. "

Malvyn chuan lehkha them hi min rawn pe zeuh a, a kal sawn leh ta mai a. Lehkha them chu ka en thuai a phone number hi a lo ni a.

Kan in nghahna ka Nutei te in kan let leh chuan pindanah lut tlang nghal in Makvyn _a no min pek chu ka dial ta a.

" Hello? "

" Tiffanny... A rei ta hle mai ti raw?"

" Malvyn! I dam thin maw? "

" Ka taksa chu a dam a lawm. Khang hun chhung zawng khan second khat lek pawh i hming hre chhuak lo hian ka awm ngailo a sin. Ka thinlungah i awm reng ani tih lantir nan ka studio pawh hi i hming chawi a phuah ka ni reng ani. "

" Nupui ila nei lo em ni? "

" Hmeichhe pakhat hmangaih nei reng chung hian midang chu nupui ah ka nei thei lo ani. "

Ka thaw hawk a, " Malvyn, pawi ka ti lutuk. " ka ti halh a.

" Kei pawn pawi ka ti. Omega khan thu dik min hrilh vek a, ngaihdam dil tur che in ka rawn pan che a ilo haw hman tawh si a. Ka rawn call che lah in i number ilo thlak leh daih bawk si nen ka â lo chauh ani. "

" Min hmu tur in engah nge ilo kal mai loh? "

" Ka ngam thlawt lo ani. "

" Oh Malvyn... "
.

" Tuna i pasal tur hi i hmangaih em? "

" Aih, teuh lo mai. "

" Anih enga ti nge i neih dawn si? "

" Ka chhung ten min neih luih tir ani. "

" Tiffany, min la hre ve reng thin em? "

" Aw.. Teh reng mai. "

" Kei chuan ka la hmangaih reng che a sin. ''

Ka mittui chu a tla zung zung a, " Engah nge chung te chu hman ah khan min hrilh loh. Makvyn, kei pawn ka hmangaih che. " ka ti a.

" Anih chuan i pasal hi neih i la tum cheu em? "

" Ka hre lo _ ka hrethiam lo tak zer ani. "

" Khawngaih in ka hnenah lo kal rawh, Tiffany. "

" Naktuk hi kan inneih ni ani tawh a chutia inneih ka thulh leh ngawt chuan ka chhungte rilru ka ti na lutuk ang. "

" Kan pahnih a kan in hmangaih chuan a tawk. Kan innei anga kan hlim dun em em ang tih ka tiam ngam che ani. Tiff, khawngaih in min ti na tawh lo hram rawh. "

" Malvyn, ka _ " Pindan kawngkhar bula U Hminga lo ding reng ka hmuh chuan ka phu zawk a " Ka rawn call leh ang che. " tiin phone chu ka dah nghal a.

U Hminga chuan rilru na ngawih ngawih tih hriat tak hian min en tlawk tlawk a, " Mipa dang hmangaih ilo nei reng ani maw, Tete? " a ti tham tuak a.

" Pawi ka ti lutuk, U Hming. "

" Kei min kal san in a bula kal i tum em ni? "

" Ka _ aw _ ka _"

Khum tlangah chuan a thu hnawk a, " Min ti na tak zet ani. " a ti tham chal a.

" Min ngaidam rawh... Pawi ka ti lutuk! "

" Ka dang lo ang che. Kal rawh. I mipa hmangaih bulah chuan i hlim lo emaw ka bula rawn let leh i duh anih chuan eng tik lai pawn ka lo pawm thei reng che tih i hre dawn nia. Ka hmangaih lutuk che a sin, Tete. "

Ka hmai chu ka hup vawng vawng a. Malvyn kiangah kal in innei ta ila ka chhungte chu zah luat vang in khawlai pawh an chhuak ngam lo anga an nun khua ka ti chhe vek mai dawn ani. Tin, u Hminga tan tak pawh a tlawm thlak dawn lutuk... Keima hma ka sial vanga min hmangaih em em tu ka chhungte leh ka pasal hual nunkhua ka tih chhiat sak tur chu ka in thiam thei dawn em ni?

Malvyn nen kan in hmangaihna chu hun kal tawh, hun in a her liam pui tawh ani a. Ka hmangaih ber che ti chung a min ring zo lo tu kei aia a thian satliah ring zawk tu kha ani a. A sawi ang khan min hmangaih tak tak ni se min rawn zawng chhuak em em ang. Kha ti khawp khan ka hmangaih a, a tel lovin kum thum chhung awm in amah vanga ka rilru na pawh ka lo tuar dam tawh a, nunhlui ah khan kir leh a din thar leh hi thil tha ber ani ang em?

Ka phone chu lek kang in Malvyn chu ka call ta a, loudspeaker ah ka dah nghal bawk a. " Hello, Tiffany?"

" Malvyn, ka _"

Phur hmel tak hian, " Ka rawn hruai dawn che em ni, Tiffanny? " a rawn ti a.

Ka thaw hawk a, " Pawi ka ti lutuk, Makvyn. Ka pasal hual hi ka kalsan thei lo ani. Khawngaih in min theihnghilh la i hriatrengna atang khan min paih bo rawh. He khawvel ah hian i Tiffany kha a awm ve tawh lo ah ngai in kan in hmu anih pawn min hre ngai lo ang in awm ang che. "

" Tiffany ka hmangaih ngawih ngawih che tih i hriat vek kha. "

" Ka hria a lawm. Hmangaihna ai pawimawh zawk kei leh ka chhungkaw zahawmna vawng him tum in hmabak hlen tur ka nei ani. Dam tak in le, Malvyn. " ka ti a

" Tiff _ "

Ka phone chu ka dah hmak a. U Hminga chu rawn tlan phei in hmangaihna a khat mitmeng a min melh in min rawn kuah ta vawng vawng a. " Ka hmangaih che, Tete. " ka beng bulah chuan a rawn ti sa sa a.

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » April 4th, 2021, 2:25 pm

Chapter : 3
KAIDEN


Valentine's Day hma lawk ani a , kan ṭhian zaho class bang chu lunch ei in kan in hmu khawm a . Gift kan dawn te kan in sawi siak nak nak a .



Kan thian zînga mi bawl kual peih leh uang peih over Rin_Rini chuan , " Darla, i phone min lo hman tîr lawk teh...khawngaih in . Ka pack a zo daih mai ang mi text lawk tur ka nei a. " a ti a.



" Ka number aṭang ber kher hi chuan tumah bawl kual hlek suh ang che aw." tiin lo ner khum nang chung chuan ka phone chu ka pe ve mai bawk a.


A nui rah rah a , " Tumah ka bawl kual ngai tawh lo . Ka piangthar tawh aw. " tih pah chuan thil a type zât zât a .


Jane chuan , " Ka phone hi Lalrin_rini khawih ka phal lo reng reng kei chu . Tu tu emaw hi message mak sak pui pui alo thawn darh vak zel a . Tum loh deuh deuh in message mak deuh deuh kan dawng nulh nulh zêl mai ania. Darla ,i inchhîr ange aw.." a lo tih fiam chuan kan nui dar dar a.



Ka phone a hman zawh chuan min pe let leh thuai a . Ka lu a nat deuh avâng chuan chawhnu lam class chu ṭhulh a hostel lam a kîr leh mai ka duh thu ka sawi chuan ka thiante chuan min lo fiam nak nak a .



"LalDarla, i phakar mai anih chu a...i Nepali chhas Neeraj _a nen in date in tum vang mai anih kha aw...a Teddy Bear pêk che pawh kha amah ang mai ang cute anih kha ."



" Neeraj nen kan in break fe tawh ani ." tiin ka kal liam san ta daih hlawm a .



Hostel ka thlen chuan ka mu nghal tawp a , ka hritlang deuh chuan ka awm a ti nuam chiah lo a . Hritlang damdawi ka ei chuan ka mut a ti chhuak a ,muthilh bawrh bawrh mai chu ka duh a . Ka muhil dawn siar siar tih chuan message beep thawm chuan min ti harh a .



Neeraj_a message anih ring in phun nang nang chung chuan phone chu ka en vat a . Ka number hriat ngai loh hi a lo ni a ." Min hre sual a niang..Sangpuia ka ni lo tlat mai . Chuan ka lerh ve ngai lo bawk aw ." tih hi a rawn thawn a . A awmzia hre lo taka ka en lai chuan Rin_rini phone ka hman tîr kha ka hre chhuak zawk a .



Rin_rini chu ka call nghal a ," Hey ! Chimawmnu , nichin a i text kha tu nge a ? Hei a rawn reply a nia . Tumah bawl suh ka tih che kha . "ka ti hlar a.


Ani chu an nui hawr hawr a ," I duh dan dan in i bawl thiang ang . Tu nge anih pawh ka hre bik lo . A number kha ka phone book ah a lo awm ve ringawt a ." a rawn ti lar lar a . Chutah hmanhmawh zet hian , " Ka dah dawn ania ...ka FB laklawh...Sir Felix a rawn lut dawn...Bye ! " tiin an dah hmak a .



Message ngai bawk chu a rawn thawn nawn leh tak ah chuan ka muhil thei lo nen ka thin a rim ru hle tawh a .



" Sangpuia inih loh chuan tu nge i nih a ? " tiin ka text lêt ta a .



" I hre chak viau em ni a ???"



Min rawn text lêt dan chu ka ngei ang reng khawp mai a . " Chak hran lo e . Tihpalh anih kha ." tiin ka chhang a.



" Ngaihdam i ni e."


A tawngkam hman duh dan chu ka ngei ang reng hle a . Mi chapo tak anih loh vek pawn mi uangthuang ve thei tak chu a ni ngei ang . Eng tin mah chhang let ta lo chuan a DP ka en a, ama thlalak hmang lo in Liverpool Football Club logo hi a hmang a . A hming chu Kaiden Da Kop tiin an in dah bawk a.



Valentine's Day tuk zingah chuan Kaiden hnên atang chuan message ka dawng leh a ." WARNING : 14th February is Valentine's Day . Do whatever you wanna do with your love but dont cross the limit 'cause after nine months îts CHILDREN DAY....he he...Take care ! " tiin .



" Show your love and care to your loved ones on this Valentine's day . Happy V Day, Sangpuia nilo pa !" tiin ka thawn let ve a .



" Hey.. Valentine ,tu nge i nih ?"


"Darla..."


"Khawnge i awm ?"


"C'long ah . Nangtu nge i nih a , Valentino ? "


"Kaiden.....Da Kop ."


"Ha ! LiverPUL fan maw ? "


"POOL mawle ,mate . Nang ?"


"Red Devils..."


"Hahaha...ka velh i ba ..."


" Naaa....eng vang ngawt chuan maw ?"


"Red Devils i nih vang in ."


"Sual ! LiverPUL ....tun season chu PUL leh phuk phuk mai rawh u aw !"


" Nia..nia..kan PULL thla ang che u . YNWA !"


" Hahaha ! You Never Win Again !"


" Chimawm reuh hle mai ! Man Uih fan dik tak ni awm reng ini ."


" Huh ? Eng vang ?"


" I chimawm...i ṭawngthei !"


Kaiden nen chuan nitin kan in text a , zan rei tak tak thleng kan in be ṭhin a . Fiamthu a duh in a luhlul reuh phian a kan in kawm ngeih ta phian a . Mahse football chungchang kan sawi kai tawh hi chuan kan inhnial nasa thei hle a . EPL khelh zan hi chuan kan in ṭawng el khum ani ber ṭhin a . Anin Manchester United khelh pui a piang a tan a , kei in Liverpool khelh pui a piang ka tan thung a . Top up kan bet thin a nuam ve mai mai thin tak ani . Liverpool chak loh vang in ka tan top up 2000 man chuang a seng tawh tlat . Kop hi tak hi chu a !



A nui ri leh a aw tham mawi tak chuan amah min ngainat zual tîr a . A hmel hmuh ka chak ngawih ngawih a, a thlalak min thawn duh lo a, video call a duh bawk hek lo . FB lam ah tal a thlalak hmuh ka in beisei a ,FB ah account a nei bawk si lo. " I thlalak min rawn thawn la ka rawn thawn ve dâwn che a lawm " ka ti a .



A nui mai a . A aw tham mawi tak chuan " Ni hrih lo e...ka thlalak i hmuh chuan min âtchilh palh ang ." tiin a nui hak hak a . " Eng ang hmel nge i put tih hre chak hle mahila hmuh hrih loh che ka duh ."



" Naaa...eng vang in maw ? Mawh ? Mawh ? Mawh ?"


"Thlalak hian min bum thei sia ."


" Min hmu duh lo anih chu ." tiin ka thinrim a, kan in hnial vak a . Thinrim tak hian , " Misualpa , ka be duh tawh lo che . I number hi ka deleat dâwn . Nang pawn ka number kha deleat nghal rawh ." tiin phone chu ka dah tau hmak a .


Kar hnih chhûng chu a message dawng lo leh a call dawng lo in ka'n awm teh reng anih kha . Ka lung a leng in ka va ngai thei tak ! A hmel ka la hmuh miah loh lakah chuan ka rilru zawng zawng ka lo pe hman chu mak ka in ti ani . A hla duh em em Charlie Puth hla 'One Call Away ' leh 'See You Again ' ,Ed Sheran hla 'Thinking Out Loud ' leh 'Perfect' te chu lehkha zir pah in ka ngaithla tlut tlut a , amah hnaih deuh sawt a inhriatna ka neih phah a . Ka ngaithla ngun lutuk a ka sa thiam vek tawh hial ani.



A tawp ah chuan ka in sum buai peih tawh lo...ka ngai lutuk chuan message ka thawn ta ringawt a .



" Please Forgive Me ' _ Bryan Adams . " tih ringawt hi ka thawn a .



Min rawn chhang rang lutuk chu Ka nui hial a . " 'Want You Back '_ Cher Lloyd ." tih hi min rawn thawn vat

a .

" ' Here Without You '_3 Doors Down"


" ' You Are Not Alone '_ MJ"


"' Right Here Waiting For You ' _ Richard Marx"


" 'Far Away' _ Nickel Back"




Hla hmang hlir a kan in text hnu chuan min rawn call ta nge nge a . " I hla duh em em 'Stay With Me' kha ka ngaithla mek a....ka rilru ah i awm reng " a rawn ti a .



" Kei pawh i hla duh hlir ka ngaithla a ...ka ngai che."


" Eng tia nasa in ?"


" King size tiat in !"



" Kei chu khawvel tiat in ."




" I hmel ka hmu chak e...,Kaiden."


" Min la hmu dawn a lawm."



"I thlalak min rawn thawn dâwn em ni ?"



"Aih. A tak ah kan in hmu ang "



"Eng ang hmel nge i put ? "




" Min hmuh hun ah i hre mai ang ,Darla . Feet nga leh inches sâwm a sang ka ni a . Korean Boy Band EXO member Park Chanyeol nen in ang min ti thin. Hahaha !" tiin za tak hian a nui hawk hawk a. A nui ri chu a va nalh tak .


" I hmeltha ngawt ang ."


" Hmeltha chu a thlirtu mit a zir ani mai ."


" Ihhh....ka ngai che..."


" Kei pawn...nasa tawk in.."


" Eng tin nge kan awm dâwn ?"




"Ka hre lo...make up nge i duh break up ?"



" Make up !"




" Make up chu a ṭha a zawk daih. Hmel te pawh an ti tha phet phet thei a lawm !"



Kan nui dun ta hawk hawk a . A hmel la hmu lo mahila amah hian min hip ngawih ngawih ani . Eng ang hmel pawh pu se ka duh em em tho ka ring ani . Mak ka tih em em chu ka hmuh phâk leh ban phâk reng ah pawh mipa chhelo tak tak min duhtu an tam ve teh reng nen hmuh phâk loh leh a hmel vawi khat pawh ka la hmuh loh chu ka ngai em em ani si a.




Amah hi Delhi a lehkha zir mek ani a. Mizo hmeichhiate hnam dang lak a an nun dan in a mit a tih kham thu te min hrilh in nun dan mawi min hrilh thin a. Zu ka in ang tih hlau in min chah uluk thei hle a. A awm dan leh a tawngkam hrim hrim aṭang hian mi puitling tak ani tih a hriat mai a . Mahse a thlalak min rawn thawn duh loh dan ah a hmelthat vak chu ka ring lo na a, ka hmu chak ngawih ngawih tho ani.




Exam kan zawh chuan Mizoram lam ah haw chhoh nghal mai ka duh a. Mahse ka ṭhiante chu bazar nghal an duh avâng in scholarship nghah law law an tum a. A tuk a haw mai tum a ka thawmhnaw ka rem fel mek lai chuan ka phone alo ri a ,ka number hriat ngai loh ni mah se ka chhang ta tho a .




" Hello ?"



"Hey...Darla , chhumzinna ram vawt vur mai chu ka rawn thleng chiah e."




" Oh..., Kaiden !?"




" Umm..keimah ngei ka ni e. Ka Mizoram number anih hi lo save nghal rawh ."




" Okey , Kop ! Tûnah khawi ah maw i awm ?"




" I kiang mai ah ka awm tawh ! Ka va hmu teuh tawh tak che em."




" I ti tak tak em ?"



"Ti tak tak e. Tûnah hian Hotel Pegasus Crown , Ward's Lake Road ah ka awm mek . Ka room no chu 17 ani . Min hmu chak tak tak i nih chuan....nge in hostel ah ka rawn kal zâwk dâwn em ni ang ?"




"Aih...aih..ngai lo . Vawi khat in hmuhna ah i thlenna room a rawn luhchilh nghal che ka duh lo. Naktuk dar 10 ah Pegasus Restaurant ah ka lo nghak ang che . A ṭha em ?" ka ti a .




" Tha lu tuk e...ka hmu chak tawh khawp mai che ."




" Mahse eng tin nge ka hriat theih ang che ?"




" A harsa lo lu tuk . Liverpool scarf rawn awrh la...ka lehkhabu ngainat em em Mario Puzo ziah ' The God Father ' kha rawn keng bawk la ka lo hre mai ang che ."




" I vân ti buaithlâk tak ! Chutiang lehkhabu ka nei lo...chuan Liverpool scarf ka awrh duh ngai lo hrim hrim bak ah neih pawh ka nei lo. United scarf ka rawn awrh mai ang ."



" Aih...lei mai rawh."


" Lalkhirh ! Putar mahni thu duh deuh hi i ang !"




A tuk ah chuan hma tak ah tho in ka ṭhianpa bazar bul hnai a in luah chu ka va bia a , Liverpool scarf leh Mario Puzo lehkhabu ziak chu min lo lei sak tur in ka chah a. Ani pawh chuan a lo rem ti ve mai a,a chung ah ka lawm tak tak ani .




Nalh thei ang ber a inchei in Kaiden Da Kop hmu tur chuan helhhawlh leh thinphu in thum rawn tluk tluk in ka chhuak ta a . Ka ṭhianpa in min rawn lei sak Liverpool scarf chu awrh in Mario Puzo ziah lehkhabu chu keng in Pegasus Crown lam pan in ka chhuak ta a. A vawh em a vang in scarf chu ka awrh tha sauh sauh a,khur ru der der in restaurant chhung lum nuam tak ah chuan ka pen lût ta a.




Waitress Assamese nula hawihhawm zet hian min lo chiau au a, ka thian ka nghah chhûng in beer ka lo in ang ka ti a . Minutes sâwm ka nghah hnu pawn Kaiden chu a la rawn lang ta lo cheu a . Min hmu duh leh lo anih te ka ring rum rum hman hial a . Zâm tak chuan beer no lian khat pum mai ka in zawh hnu chuan ka zia deuh huai hian ka in hria a .




Ka phone a rawn ri a,ka pick up thuai a, " Minutes sâwm chuang ka nghâk tawh che ..i rawn thleng tlai zawk . Kan ei leh in man i pêk vek a ngai ang ." ka ti a.



" I taksa kha a sil ṭhum em ?"



" Eng a ? Enge i sawi awmzia ?"




" Vân Angel hmeltha leh duhawm ber i ni sia...Lei a i rawn tlak thlakna lam ah i taksa kha a sil ṭhum in ka ring deuh a.." tiin a nui hawk hawk a .




" I vân chimawm tak ! Rawn kal vat mai teh !"




"Hmeltha , i ding lam pang dawhkan kha hawi phei teh . Minutes sawmhnih chuang nangmah nghak a lo ṭhu tawh , i rawn luh tirh aṭang a i chet zia engkim hmaih nei hauh lova lo thlîr rêng tu che i hmu ang ."




Mak ti zet in ka ding lam chu ka hawi phei thuai a . Tlangval fresh veng vawng ,hmelṭha tawk mai ...jeans kekawr pawh dal ha a, high neck chung a leather jacket dum ha , phone a mi be mek chu ka hmu ta a. Mit min rawn siai zauh in thump up sign hi min rawn hmuh a , a nui var var a. A nuih zawng chuan an biangsum khuar kalh leh a ha var rual thianghlim lu tuk te chuan min ti â chhuih thei hial ani . Ka thin a phu hlawp hlawp a , ka hau hian chu mipa hmelṭha lutuk chu ka thlîr ta reng a .



" Hi...Darla..."




Ka ding hluai a , " Oh...i vân sual chimawm thiam tak , Vanlalkop !" ka phone chu dah in ka thaw ham ham a.




Ani chuan nui var var chung hian min rawn pan hnai a , a rim te chu a tui chiai mai a . ' Ka phu hlawl lo che ' tia au tuarh a tlanchhuah san daih tak ka nap a.




Ka hma chair ah chuan ṭhu in a kiu chu dawhkan ah nghat in a kut chuan a khabe a dâwm a , zak map lo hian min melh ta veng veng mai a . " Hei hi a hlu ! Thlalak ai in live ngei hian a chiang zawk ! Ka lo suangtuah ang chiah a duhawm leh hmelṭha ini . Mahse sam dum hlap ni tur in ka suangtuah ṭhin che a _ sam colour buang ni lo in ." a ti a.




Sawi tur pawh ka hre mai hrih lo ,ka lai khat tlat ani mai a . Ka mit ka khap sak sak a ,ka biang te chu a sa hat hat mai a.




"I lai ani chiang mai ! Ani ti raw ? I biang pawh a sen ṭawn ṭawn a lawm ."




" Khatiang a i en char char chuan tu hmeichhia pawh an lai vek ang chu !"



" Ka ramhuai sente !" Gold chain ṭhu nalh zet hi rawn phawrh in ka lam rawn pan in.min awrh tîr ta a ." Ka Ramhuai Sen tetakte ...hmelṭha leh chimawm...ka thinlung neitu tan " tiin ka beng bul ah chuan a rawn thaw lum ham ham a.




" Oh,a nalh lutuk ! Ka lawm e , Kop."



A nui sak a ," I hmeltha tak zet ani ."


" Mahse...engmah pêk tur che ka nei ve si lova...."


" I nei a lawm."


" Eng ?"


"I thinlung..."


"Ka pe daih tawh che a lawm."



" Anih leh...i scarf awrh lai leh ' The God Father ' kha ani mai "




" Khawvel mipa chimawm ber ini." tih pah in scarf leh lehkhabu chu ka pe a.



" Ka lawm e ,ka Darla. "




Ei tur kan chah a ,thil ei pah chuan kan ti ti a . Sawi tur kan va ngah dun tak.




"I thlalak min rawn thawn duh loh vang khan hmelchhe tak i nih ka ring a . I hmeltha hle si a. Ti nge i thlalak min thawn duh miah loh a ?" ka ti nang nang a .



" Live ngei a in hmuh hi a hlu ka tih kha ."



" Chu pawh nise..."



" Dik tak chuan maw...thlalak ah hian ka lang chhe thei rapthlak lutuk a...thlalak hian mi a bum thei hial a. Chuvang chuan thlalak aṭang ringawt in i rilru ilo siam ka duh lo ani . " tiin chimawm zet hian a meng kal ralh a , dar a san ak zui a.




" Aw...alo ni maw.. Vanlalkop, khirhkhiap pa !"



" Aw..ni chiang e."



" Ka thlalak pawh ka thawn che i duh lo a ..."




" I thlalak ka mamawh lo...kei chuan ka hmu daih tawh che a lawm."



" Eng a !?!"




" January ni 12 khan ...Pine View Cottage ah emaw ni khân ...tu Birthday emaw in lawm a. Tlangval chhe lo tak hian in tih thu hmel tak in i kut ata vuan deuh reng a . Kha mi zan a i kawrfual olive hnah ang mai ang hring nghalh mai i hak kha i in hmeh tak zet ani. I sam dum hlap i thlah hnalh kha nalh ka ti in khawvel a hmeichhe hmeltha ber ni in ka hria che a . Kha ta tang khan ka rilru ah i awm reng a ....tun thleng hian ka la theihnghilh thei lo che ani ." Kaiden chuan a ti a.




" Lalpa leh ! I va sual em em...min lo hre sa reng sia ...ti nge min hrilh mai loh ?" tiin a kut ah chuan fork in ka va khawng fak a.




" In sawi eng ang mah ila min hre dâwn chuang lo a...kha tlangval in ti neitu tak ringawt kha i ngaihven em a..."



" Ka cousin anih khaaaa...."



" Tak tak a ka hria lawm...Rin_Rini'n min hrilh vek a lawm."


" Rin_ Rini maw ?"


" Aw...ka farnu a lawm."


"Eng a ?! Rin_rini hi i nau maw ?"


" Aw...ka chhang chiah !"


" Awiii....in va sual chimawm thiam unau tak !"


" Hehe...Sunhlu kungah thei dang..."



" A rah ngai lo...a dik lu tuk !"




" Delhi ka chhuk hnu ah pawh ka la vei zui zêl che si a.,Rin_rini hnênah i phone number ka dil ta ringawt a...chuan I phone a tang in min rawn text ta a.."




Hlim tak chuan ka nui har har a, " In phakar unau em mai a ! Lalrin_rini chu ka hmuh hun ah a chak lo ngawt ang ." ka ti a.




Thil kan ei zawh chuan kut in kai rial in pawn khaw vawt vur mai ah chuan kan chhuak ta a. Tun ang reng a ka hlim hi ka la hre ngai lo . Ka famkim thlap hian ka hria a. Kan vel boruak ah chuan Hmangaihna a zam chiai a , a zung zam chuan min hual vel ni ber hian ka hria a .

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » April 4th, 2021, 2:25 pm

Chapter : 4

BELOVED ENEMY

Thinrim zet chuan ka football boots chu phelh tha hle hle mai lo chuan ka tlawh phelh lawp a. Vawiin hi ka lucky day chu ani lo chiang bal. Kan club kan chaklo a,kum khat deuh thaw ka lo kawp tawh ka bialnu in min then bawk a ka thin a rim hlur mai ani. Darthlalang a ka thla lo lang chu ka bih zawk a, diktak chuan min then chhan awm hi ka hre lo ani. Tlangval hmeltha tak mitmeng mawi danglam tak,feet ruk leh inches khat a sang a ni a. Vincentzo Football Club a captain ka nih mai bak ah Mizoram aiawh pawh a lo chhuak ve zak zak tawh ka ni a. Kan College ah pawh ka lar in hmeichhia tu pawh bem ila ka hlawhchham lo ang tih tur khawp ka ni ve a.


Hmeichhe pakhat min kal san vang mai a rilru na a in dawm kun ka tum lo .Mahse ka thangtlawm in hnawl han nih ngawt mai chu ka tha ana tlat ani. Suzy nen hian kum khat dawn lo in kawp tawh mahila midang ka kawp kual san fo a,chu chu hre thin mah se min then phal ngai chuang lo a tuna tak a min han then chu a ngaihna ka hre lo hle ani.


Ka in bual zawh chuan ka Suzy thiannu chuan min rawn text a. " Suzy chuan a kal san ta tak tak che ani maw ?" tiin.

" Nia...eng vang nge ka hre lo."

" A chhan leh vang i hre lo tak tak maw ?"

" Aw."

" In inngaihzawn chhung zawng khan midang i kawp kual san reng a ,i tuh rah i seng ta anih kha."

" Midang a nei i tihna em ni?"

" Aw..."

Ka khi sak a. " Tu nge ?"ka thinlungah chuan thikna a rawn lut zawk a.

" Amah chu i hre lutuk ang...kan collage basketball captain kha..."

" Niko- a kha maw ?"

" Aw."

Ka thaw hak a,Nicholas chu ka hria. A hmel pawh a tha in kei ai mah in ala sang zui leh nghal a. A hmelthat leh pian nalh em vang in model ah pawh a tang nual tawh ani. Suzy alo ngaihzawn ve vang ani ngei ang min en chik thei ka lo ti thin reng a.

A tuk collage ka kal ka bike ka hung fel chiah tih chuan Manuni chuan min rawn pan nghal a. " Suzy nen in in then tih ka lo hria a,Jake." tiin no nalh fahran hian min rawn melh a. " I rilru na hnem tur che in ka awm reng ania." a ti zui sap a.

A sam ah chuan chul in ka nuih sak a ," Ka lo hre reng dawn nia,baby." ka ti zauh a.

Ka bulah chuan bike hi a rawn ding chat a,Suzy leh Niko chu ka hmuh chuan ka dar ka san ak a. Niko chuan chik zet hian min rawn melh ngar a. A pian fuh zet leh sang thlarh mai te ,a hnar ngul dik thlap leh a hmui sexy zet mai te chu hmeichhe tan chuan nep a har ngawt hian ka ring a. Ka thik luat vang nge ka hre lo ka thinphu chu a rang in a in thum rawn tluk tluk mai a.

" Hi,Jake!"

A aw ril raih mai chuan ka thisen zam a kal chak tir sauh a,va pan hnaih a a hmeltha ver vawr tak ah chuan va hnek bur mai hi ka chak ber ani. " Hi...Niko..."


Mit khap lek lo hian nuihzat hmel taka meng de sawr sawr in min la melh zui a. Ka bialnu min chhuhsak tu hian zam map lo in min la melh ngam chu ka thin a rim in ka alh phat mai a.

Suzy hnar ah chuan fawp zauh in," Babes,class ah lo va lut la Jake hi kan be lawk ang e." a ti sap a. Suzy chuan melh pawh min melh lo in Niko chu a nuih seih aa kal sawn ta a.

'Kha hmeichhia i fawh mek kha vawi za tam ka mutpui hnu ka ta anih kha.' tih mai hi ka duh rum rum a." Nang nen hian sawi dun tur kan neih ka hre lo,Niko." ka ti ram hmak a.


Niko chu mawi zet hian a vei nuih sak a," I hnenah hian sawi tur tam tak ka nei a sin." a ti nem raih a.

" E..ani maw?" tih pah chuan ka in her zawk a,a.hmeltha ver vawr ti chhe vek tur khawp a hnek bur mai tum cuan ka kuttum chu ka vai fua a.

Hneh zet hian ka kut chu alo man bet a,a lamah chuan min hnuk hnai dawrh a," Tu emaw tal hian i mitmeng nalh zia leh i bawp sexy zia hi an hrilh tawh che em?" tiin ka beng bulah chuan a rawn thaw lum ham ham a.


Mak ti leh thinrim zet chuan ka melh kawk a," Hmeichhia emaw min ti em ni ,Niko.?"ka ti bung nghut a.

Min tham lo zet hian a nui sawng a," Hmeichhia i nih loh zia chu ka hre chiang khawp mai." tiin ka hmui chu a kut chuan a rawn tawk zauh a.

Thinrim tak in a kut chu ka vai per lawp a,"Niko,eng hmuh in nge min hmuh a?" ka ti tuarh a.

A nui sak a," Khawvel mipa hmeltha ber leh sexy ber bawp nalh lutuk hmuh in."aw thawp sat hian ati a.

" Zawnga!!"

" I bialnu ka laksak hma che kha chuan a biak chu sawi loh melh pawh min melh duhlo ania. Tunah chuan hmaihma ngei ah i biak ka chang ve ta a lawm." tiin ka mit ah tak chuan min melh in a hmui sexy zet chu a liak huh hlap a. Ka thinphu chu a rawn rang sauh a,he mipa hmeltha uchuak tak hian min chhaih buai a tum anih ngai chuan a thil tum chu a hlawhtling chiang khawp mai..Ka thaw te chu rawn rang in ka lum pup pup thei hial ani.

Niko mitmeng de sawr sawr leh a hmui sexy zet chuan ka mitthla ah hmun a chang reng a,ka duh aiin ka ngaihtuahna a luah hneh chu ka in hua ani. Hmeichhia nilo in mipa dik tak..mipa ah pawh mipa luck leh hmeichhiate ngaihzawn rawn ka ni a. Eng vang a hmeichhia pawh nilo Niko chuan min hneh em em tih ka in hrethiam thei lo ani. Ka ngaihtuahna mai bakah ka mumang lam thleng in min chenchilh tlat a,Suzy ka thik lutuk vang nge amah Niko ka thik vang zawk pawh ka thliar hrang thiam tawh lo.


Chumi kar tluan chuan thil dang engmah ka ngaihtuah thei lo Niko...Niko...Niko...ani vek mai ani. Amah vang hian wet dreams ka la neih phah zui! Karei...Lalpa,kei hi gay ka ni ta em ni ? Niko ka duhna leh mamawhna chuan min ti na thei hial ani. Gay ka ni thei lo ang...mipa dang tumah duh leh mamawh ka nei lo Niko tih chiah lo chu. Ka aa dawn ni mai te hian ka in hria a,ka mangang in ka buai tak zet ani. psychiatrist ka rawn lah in min pui tam lo kher mai. Min pui thei tu awm chhun chu Niko chauh ani.


Chumi tuk chuan hma tak ah collage ka kal ka bike ka park fel hnu chuan Niko chu ka lo nghak ta ngawt a. Rei pawh ka nghah hma in a rawn thleng ve ta mai a. A bike a hun fel rual rual chuan a kawr awmah tham in toilet lam ah ka hnuk phei a. Engmah sawi lo in meng de sawr sawr a min melh in min zui tha ve mai bawk a.


Midang chim buai phak loh a hmun fal a kan awm hnu chuan a tukhum sam ah tham in a hmui sexy zet chu ka fawp ta bawrh bawrh a. " Zawnga, nang hian ka lak ah eng dawi nge i hman a ? Min ti aa vek tawh tih i hria em?" ka ti nghut a.


Meng phi chiai a min melh in ka biang tawn tawn chu a dawm a," Ka hmangaih che ani,Jake." tiin a lei hnawng chap chu ka ka chhungah rawlh lut in min fawp ta a. Ka thisen zam te chu khang vek ni mai hian ka hria a,ka lungphu chu thunun rual loh in a phu zawih zawih a,ka mipatna chu a rawn khawng tawlh tawlh a. He mipa hmeltha nalh lutuk hian min dawi aa zo in thunun zawh rual loh tisa chakna chuan min rawn tuam hlup hlup a.


" I mit ka lak beisei in i kiang hnai a ka awm pawn min ngaihven lova i bialnu hi chhuhsak che ila min ngaihsak ring in i Suzy hi ka bem ta ani. He collage ka rawn luh tirh a ka mit la hmasa ber tu chu hmeichhe hmeltha tak tak nilo in nangmah hi i ni a sin ,Jake. Football i khelh a i bawp sei thlarh mai sek tawlh tawlh a i tlan ka hmuh khan ka rilru hi i nei daih tawh ani." tiin min kuah vawng vawng a. Ka mipatna khawng luah chu tham in min melh si sap a.


Ka thaw hawk hawk a," God...Niko,min hrem suh...khawngaih in.." ka ti tham tuak a.

Niko chuan," Tun darkar atang hian ka ta chauh ini tawh ang. Tumah mipa pawh hmeichhia pawh i kawp thiang tawh lo ang - i hria maw ?" a ti sap a.

" Aw,Niko.i ta chiah nih ka duh." ka ti khur dur dur a.

" Mi dang lak ah min phatsan anih vaih chuan ...ka tiam a che - ka that duh khawp ang che ." tiin duhthawh zet chuan min fawp leh ta a.

He Niko hian min dawi aa zo tawh ani. Mahni an pui kawp hi ka ngaihtuah ngai lova ka duh zawng.lah ani ngai hek lo. Mahse hmangaihna hian kum leh hmel a thliar loh ang bawk in gender a lo thliar lo anih hi.


He mi ni atang hian Niko lo chu tumah ka melh ngai lo ,amah ah chuan ka mit a fu chat reng a . Mipa pawh hmeichhia pawh a biak hlek chuan ka thin a rim in ka mood a off phah nileng thin ani. Ani lah in min tih el khum emaw tih mai tur in hmeichhe dang a be kual peih em em mai leh nghal a. Suzy chu ka thu ang in a then fel hmak tawh na in hmeichhe dang hian an hual thup reng mai ani.


Ka hmuh lai ngei in hmeichhe pakhat hian a dar ah uai bet in,ui reng neilo hmel pu a melh chung hian " Niko,mawhhh...please..." a ti no hnap a.

Niko chu a nui sak a,a biang a piai zauh pah chuan," Awle,baby,zan ah ka rawn leng ang." a ti a.

Ka sa pup pup a,thikna meipui chuan min tuam nghal hlup hlup mai a. Niko chu va thin nawk nawk mai hi.ka duh hial a. Ka insum hram hram a, kut hum ruh teuh chung chuan ka kal sawn ta a.

Manuni chuan min rawn um zui thuai a,ka ban ah rawn kuah in min rawn melh chho ha a. " Canteen ah chawl ila ka treat ang che. " a ti sa sa a.

Nuih luih sak pah chuan kan in zui phei ta a. Niko an mitmeng thip ram a min rawn melh tih chu ka mit sir chuan ka hmu a,hlim tak chuan ka khi ta sak a.


Canteen a thil kan ei lai chuan vung fe mai hian Niko chu a rawn lut a, kei lah chuan run luih nan Manuni kut chu ka hum sak salh a,ani lah in min lo nuih ver ver a.

Thinrim meng thim khap in Niko chu ka bulah a rawn thu a,kan kut in vawnna chu rawn theh sawn lawp in," Jake, ka thu sawi kha hre reng rawh. Thih i duh loh chuan hmeichhe dang hi tawk tawh suh." a ti hriam hrak a.

Ka dar ka san ak a,ngaihna hriat loh hmel tak a Manuni meng buai ka hmuh chuan ka nuih sak a," Eng ah mah ngai suh,Ma'n. Niko fiamthu thawh thiam ve dan anih kha." ka tih sak mai a.

Niko chu a ding phat mai a," Ka fiamthu ah i ngai a maw ,Jake ?" tiin ka kawr awm ah chuan tham in min phih tho lawp a. " Fiamthu leh infiamna chi khat ang ah lek min lo ngai tihna ani maw?" tuarna a khat mitmeng a min melh chung chuan a ti a.

A mitmeng chuan min khei zak mai a,' ka tihpalh ' tih pah a kuah vawng vawng mai ka duh hman hial ani. A in her hmak a,a kal sawn ta nghal a.

Ka phone massage ri ka hriat chuan ka en vat a. Niko a ni a," Ka thinlung hi infiamna mual ani lo ania aw." tih hi a rawn thawn a.

" Ka fiam lo che."

" Anih kha hmeichhia kha i tan enge anih ?"

" Engmah..."

"Anih leh i tan enge ka nih?"

"Boruak!"

" F**k...i tan engmahlo boruak ang lek maw ka nih a?"

" Ka nunna tan thil pawimawh ber chu boruak ani. Boruak tel lovin thawk ka la thei lo."


"Ka hmangaih che,my Jake.Zan in chu rawn riak la...khawngaih in."

" Ka hre lo le..."

" I rawn riah duh loh chuan min hnar ah ka ngai ang."

" I mak thei."

"Dawn nge dawn lo ?"

Ka chhungte bulah chuan thianho in assignments tih tur kan ngah sia kan riak khawm dawn tiin ka hrilh a Niko te in zau leh nuam changkang tak ah chuan kan in zui haw ta a. An in kan thlen chuan nui var var chung hian," Ka chhungte hnenah chuan nupui ka ru tiin ka hrilh dawn em niang?" tiin min siai sak a.


A mawngtam a ben tawih pah chuan," Tu nge nupui zawk chu kan hria ang chu." k ti halh a.

A room kan thlen ve leh kawngkhar chu kalh in ka bialnu min chhuhsaktu ka hmelma ka hmangaih lo ni ta nen chuan duhthawh leh inthlahlel tak in kan in fawp ta bawrh bawrh a ,nawmna tuipui thim ruih mai chu daikai in kan hleuh a kan liluh dun zankhua ta a.

**********"**"***************

Ziaktu kam liam :

BL hi in ngaina em? Kei chu BL films leh series hi ka en nasa in a thawnthu pawh ka chhiar nasa khawp mai . In ngaina anih chuan ziah sa typed sa rawn dah mai tur ka nei a sin. In ngaina lo a in chhiar duhlo a nih chuan rawn dah in awmzia a nei dawn tawp silo a. Thawnthu hi a chhiartu awmlo chuan thlarau tel lo taksa leh sim card tello mobile phone ang lek ani dawn si a. Chhiartu te hi in hlu in in comments te hian ziak zel tur a phurna min pe a ..aa...ka tan a hlut zia hi ka sawi fiah thiam lo. Mahse, Mizo tawng hi a har in ziah zawm tur leh tur lo te hi ka hre fuh hlei thei thin lo a khawngaih in ka tih dikloh chu min lo hrilh hre zel teh u aw. Sawisel leh endik chu in hna --- ngaihthlak leh insiam that chu ka hna😄


BL novel ngaihnawm uchuak tak chhiar tur ka hrilh ang che u aw...Chai Jidan ziah ADDICTED tih kha wattpad ah chhiar chhin teh u. A ngaihnawm in a addictive reuh tawp. Mahse fanfic a tam avang in Chai Jidan ziah ngei kha aw..Series ang pawn an siam a hmuhnawm bawn biah biah tak ani. He film ADDICTED hian BL film leh story min addicted tir a lawm....

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » April 4th, 2021, 2:25 pm

Chapter :5
TWINS EFFECT

Sawmpuii's POV


Nalh thei ang ber a ka in chei zawh chuan dawhthei taka min lo nghaktu ka bialpa ,tlangval sang thlerh thlawrh leh hmeltha veh vawh tak mai Jordan lamah chuan hlim tak in ka chhuk a. Ani chuan meng de sawr sawr a min lo melh vawng vawng in a thaw halh a," Wow...i nalh kher mai ! I nalh tak zet ani ,Sawmpui !" ti hluai in a nui sak a.


Thawveng tak a hawi sang vah chung chuan," Ka hria a lawm,Jordan."uang thuang tak chuan ka ti a.


Vawiin hi thla thum kan in zuina champha anih avang in a chhungte min hmelhriat tir a tum vanga inchei uluk leh zual pawh ka ni a. Diktak chuan a chhungte va hmelhriat a an bula chaw ei chu ka huphurh in ka chak viau lo . Choka lam a awm mek ka nu chu au in ," Nu...,kan kal ania aw...byeee!"


" Awle, Mampui. Fimkhur ula aw."

Jordan bike nalh tak ah chuan in phur in kan tlan chhuak ta a. Jordan hi kan collage ah lecturer hna rawn thawk thar ani a,chu ta tanga a in hmelhriat leh in duh chho ta kan ni a. A mah a hmeltha in a nalh bawk sia a bialnu han nih chu thiante bulah pawh hawisan vahna tham a tling ani. A fel in fiamthu duh leh uangthuang tak mai ani a,min duat thiam in khawvel hmeichhe special ber ka ni ta mai emaw ka in tih chang a tam mai. A pian , a hmel ,a mizia....a engkim mai chu ka duh in ka hmangaih hluah hluah ani ber mai.


" Jordan,i tlan chak mah mah ka ti..tlan muang deuh teh.."

Nalh zet hian a nui ri hawk hawk a," Chak tak a bike a han tlan hi nuam ka ti in ka zalen hliah hliah hian ka hre thin." a ti lang lang a.

A tlan chak em avang chuan ka hlau deuh hial a,"Jo..."

" Sawmpui,lum ka ti tlat..ka helmet hi phelh in khum teh." a ti a. A aw ah chuan enge maw diklo awm tlat hian ka hria a. Thuawih tak in a helmet khum lai chu phelh in ka khum ve ta mai bawk a.

" Nghet tak khan ka kawng ah khan min kuah teh aw,baby. Ka hmangaih em em che tih hi nitin ,darkar tin leh minute tin hrilh theih che ka chak." a ti a.

Ka nui hak a," Kei pawn ka hmangaih che,Jordan." ka ti a.


" I sawi ka hre thei lo.A ai ring in sawi leh teh."

"Ka hmangaih che."

" Eng tin maw ?"


" KA HMANGAIH CHEEEEE"


" Eng anga nasa in...?"

"Van tiat in !" ka nui hawk hawk a.Jordan chu nghet tak a kuah in a hnungzangah chuan ka bei hle hle a. A taksa rimtui tak chu ka hip lut veng veng a. Min tawk zawng a truck lian chak taka rawn tlan ka hmuh chuan ka phu deuh zawk a,fimkhur tur a Jordan auh ka tum mek lai chuan thawklehkhatah thil ri bur hi ka hria a ka khaw hmuh chu a thim nghal mup a.


Mihring tawng ri nuaih nuaih chu hla tak a ri ang mai in ka hre rei ruai a,thei leh thei lo in ka lu chu ka thle a ka piah mai a thisen chiah piah zuih a ka hmangaih Jordan lo let reng ka hmuh chuan ka nghing lawih ." NI LO....NI LO... JORDAN..."ka aw rawl tawp chuan ka te rawng rawng a. Ka khaw hmuh chu a thim ta vek a.
&&&&----&&&&&&&&&&&&&&&

TRISTAN's POV

Ka unaupa,ka phirpui pa Jordan_a kan vui haw chu ka chau nghulh mai a,ka kawchhung chu phawrh chhuah vek ni mai awm hian ka kawrawng vek hi ani ber mai.Min ngaihven em em rengtu ka bialnu kum eng emaw zat ka lo kawp tawh Abawihi chuan ka tawrhna hrethiam tak in ka banah min kuah reng chuan min hnem tak zet ani.


Jordan hi kei aiin minutes sawm in a naupang zawk a,kan hmel leh pian engkim chu a in ang vek a mahse kan mizia leh thil duh zawng chu a dang hlak thung ani. Mi uangthuang leh fiamthu duh tak niin mi zawng zawng hian an ngainat laiin kei erawh chu mi tawng tam lo leh mahni mal tlat nuam ti mi ka ni thung.Ka tehkhin thiam dan ber chuan Jordan mi zawng zawng nuam ti taka an in tawllenna hmun beach ni ta se kei chu tuma tlawhpawh loh thliarkar ka ni ang. Ka nu pawh hian ," Nangni unau hi chu chhun leh zan ang in ni.Tristan ,i zia hi thlak ve tum teh. Midang lakah i in la hrang in i nelawmlo in i vawt ruih reng mai." min ti hial ani. Nie,Jordan rawng ngainat ber chu a var anih laiin kei chuan a rawng dum hi ka ngaina thung tlat si ani.

Kan mizia in anglo hle mah se kan in pawh in kan in ngaina em em tho ani. Ka phirpui, ka pianpui neih chhun chu he khawvelah hian vawi khat mah ka hmuh leh tawh dawn lo...a mizia thawveng leh hlim em em reng mai te kha hriat leh hmuh tur a awm tawh dawn lo.Tumah veng thawng lova hmeichhia ang mai a tah chhuah hawm hawm mai hi ka chak hial ani.

Abawihi chuan ka hnungzangah min beng thap thap in," Tristan,i tuarna hi ka hriatthiam pui che in ana ngawt ang tih ka hria ani. I tah theih chuan tap tawp rawh." a ti dam thliam a.

" Ka tha a lawm."

Jordan tel lo chuan kan inchhung chu a ruak huai hian a hriat a. A boral san a bialnu lah biak theih loh a kar khat a awm hnu in a rawn harh chhuak a, mahse a hriatrengna a hloh tlat mai a. Jordan nen an accident pawh kha a hre tawh lo a .Jordan boral thu pawh an hrilh ngam lova Delhi ah zin ang in an hrilh ringawt mai ani awm a. Doctor chuan thudik engmah la hrilh lo tur in leh a hriatrengna chu zawi zawi in rawn la kir leh mai tur niin a sawi a,thu thin thawng leh a lungphu nghawng thei thil engmah hrilh lo tur in a ti ani. Ka lainat in hmuh chu duh ve mahila ka nu leh pa ten eng tik lai pawn an ngaihven reng tho mai bak ah Jordan min ngaih zual tir ka hlauh avang in ka hmu ngam ngang lo ani.

Tlai khat ka office bang chu Abawihi nen thingpui dawr ah chawl in kan in hnawh puar a. Chutia thil kan ei mawlh mawlh lai chuan hmeichhe te thawt ri hi ka hria a,ka hawi chhuah chuan kan lam pan a nula hmeltha leh pian nalh zet mai lo tlan phei chu ngaihna hrelo leh mit zim san hian ka lo en ringawt a.


Chu hmeichhe hmelah chuan hlimna leh phurna hi a lang chiang hle a. A mitmeng chu de sar sar in a biang a tai tek bawk a.Ka bul a rawn thlen chuan ka malchungah thu in min rawn kuah chawt a,"Jordan,ka ngai lutuk che. I zin i rawn haw chuan min rawn biak ve mai awm. Ti nge min rawn biak duh loh? Min ngai ve lo em ni?" a ti chul a.

Abawihi meng dur khap chu melh in lu ka thing na na a. Jordan ka nih loh thu hrilh tum a ka ka an ziau lai chuan doctor thu sawi kha hre chhuak zawk in ka thaw halh a. Ka nau hmeichhe hmangaih leh nupui a neih a tum kha ani tih ka hrethiam nghal mai a. Ka khawngaih in ka nau vanga hetia awm hi ani tih ka ngaihtuah thlen phei chuan amah chhawmdawl chu ka tih tur ni tlat a hriatna hi ka nei a.

" Ka tihpalh ani,Sawmpui. Hei ka rawn thleng ve chiah a." ka ti ban charh a.

" Tihpalh chu a dam leh hma ." tiin a nui her her a. " Ka ngai lutuk che hi ka aa mai dawn in ka in hria." a ti sa sa a.

Abawihi chu a ner nang a eng emaw sawi tuma a an ziau lai chuan lu thing nar nar in engmah sawi lo tur in ka va mit mei a.

Chumi zan chuan Abawihi nen chuan kan in hnial nasa hle a." Eng vang in nge thu dik i hrilh mai loh. Kha nu bulah khan i unaupa boral ta lem a chan kha a tulna ka hre lo." a ti hlaih hlaih a.

" Doctor in thu dik hrilh hrih lo tur in min tih kha.Jordan boral thu a hriat chuan a nghawng lutuk anga a at hlen phah thei ani. A hriatrengna chu eng tik ah emaw chuan a rawn kir leh dawn a,naktuk ah pawh ani thut thei. Chu vang in lo dawh hram hram rawh_ khawngaih in." aw dam thei ang ber chuan ka ti a.

" Nakum ah daih pawh a hriatrengna chu a rawn kir thei ani. Chutih chhung chu a bialpa lem ah i chang anga kut kuangkuah in ka lo thlir mai mai dawn che tihna em ni ?"

" Hei hi Jordan tana ka tih theih hnuhnung ber ani sia a,ka tih ngei a ngai ani. Abawih,khawngaih in min hrethiam hram rawh aw."

" Hmeichhe dang nen intawm che hi ka duh lo ani."

" Ka hmangaih che a." tiin ka awm ah ka kuah bei a,a sam chu chul hliau hliau in a khabe chawi dak in a hmui ah chuan ka fawp ta vawng vawng a.
&&&&&&&&&&&&&&&&&&&&

SAWMPUII

Jordan chu a zin rawn haw atang chuan a mizia a dang ta daih mai chu hriatthiam har ka ti in ka hriat thin Jordan kha nilo in mi hran hlak hi a ang ka ti ber a,mahse amah ngei chu ala ni bawk si. Hmana min thlakhlelh thinna te kha a bo ta in ka lak ah a in la hrang a,a nelawmlo in a vawt ruih mai a. Bike ngaina em em thin khan car a ngaina thar ta in artui ei duh ngailo khan artui a ngaina thar bawk a...a zia engkim chu a thlak vek hi ani ber mai a. Mahse chu a mize thar chuan min hip in ka duhna a ti zual sauh a. Eng ang pawn a mizia chu thlak mah se amah hi amah anih chhung chuan ka hmangaih reng tho ang.

Mahse kan in hmuh tum a eng emaw chang a Abawihi ,a best friend ni a a sawi rawn tel ve thin chu ka hne deuh tlat thin. Amah ka hne nilovin a mitmeng thip tak leh min huatna a khat chu ka hmuh hmaih silo a chu chuan ka awm ati nuam thei lo ani.
&&&&&&-&-&&&&&&&&&&&

TRISTAN :

Khum ah mu in ceiling chu ka melh vang vang a,ka thin tawt up up chu ka chum dat dat a,ka thaw leh hawk thin a. Kum eng emaw zat ka lo kawp tawh Abawihi chuan ka rilru ngaihtuahna ah hmun a chang tawh lo a Sawmpuii ringawt chuan ka thluak a luh ngut ngut tawh mai a. A hmeltha tak leh a nui hmel mawi lutuk kha ka mitthla ah a cham reng a,ka hmangaih ni ber hian ka in hria ani.

A hmeichhe hmangaih em em ka lo hmangaih ve ngawt hi Jordan duh dan ani thei dawn em ni ? Sawmpuii hi hmangaih ka tum hauh lo..mahse ka thinlung hi ka thunun zawh rual ani silo. " Tristan, harh chhuak rawh. Sawmpuii hian nang nilo in Jordan lawm a hmangaih." tiin ka phun sup a. A hriatrengna a rawn let leh hun chuan min huat hle ka ring ani.

Kan pahnih a kan awm dun a ka kuah chang te hian ka hming lam lo in Jordan hming a lam thin te chuan min ti na a ,ka thik ngawih ngawih thin. Mitthi hnu thik chu ka inthiamlo leh thin mahse ka thik lo thei silo. Eng tik ah nge "Tristan,ka hmangaih che. Ka ngai lutuk che." tia ka beng bul ah a phun se se ang??


Ka awm dan chu Abawihi chuan a hailo chiang kher mai a. Thinrim tak a min melh hriam hrak in ,"Tris,ban san rawh. He nu hian nang nilo in i unaupa kha a sin a hmangaih chu. A tir ah khan he lemchan hi bansan nghal la chuan tun hun hi i thleng lo ni mai tur." a ti a.

" Nia...pawi ka ti lutuk.Ka tihpalh ani...ka thinlung hi ka thunun zo thlawt lo ani." ka ti chuai raih a.

" Chuan...Sawmpuii chu i hmangaih tih i pha ta lo maw ?"

" Ka hmangaih ani. Min hmangaih lo ani tih hre reng chung hian ka hmangaih lo thei silo. Min ngaidam rawh,Abawih."


Thimrim tak chuan a meng alh phat a," Kei in ka neih loh che chuan he i unaupa bialnu thihsan hian a nei bik lo ang che. Kha nu ta nilo khan ka ta ini." tiin a chhuak tau ta nghawng nghawng a.
&&&&&-&&&&&&&&&&&&&

SAWMPUII :

Ka lam pan a Abawihi rawn kal ka hmuh chuan ka ner deuh nang a. He nu hi ka ngaina thei ngailo ang. A mawi ah ka lo nuih sak a," I va hmanhmawh hmel ve a." ka lo ti a.

Ka bula thu ka thiannu Mami chu melh in chutah huatna a khat mitmeng hian min rawn melh leh a. " Tristan hi bansan rawh."aw nelawmlo tak chuan a ti a.

" Tu Tristan maw ??!"

" Jordan emaw tia i kawp hi Jordan ani lo .A phir pui Tristan,ka mipa hmangaih leh ka pasal tur anih hi."

Chek tlak tlak in ka melh vawt raih a," I hre sual anih chu. Jordan hi ka ta ani." ka ti ve ngat a.

" I jordan chu maw thla bike accident in a thi tawh. Tun a mi hi Jordan phir Tristan ani. A hmangaih lo che a i hriatrengna lo kir leh hma chu a unaupa lem a lo chang mai ani."

Ka te tuarh a," Dawt sawi suh. Nangman i duh vang in dawt i sawi ani." ka to thawt a. Ka phone chu phawrh in Jordan chu ka call a" Jordan,hei i thiannu Abawihi hi a aa deuh niin ka hria. Jordan nilovin Tristan ini te a rawn ti anih chu." ka ti nghal a.

" A thu sawi kha engmah lo ngaithla suh aw..khawngaih in. Ka rawn kal nghal ang khawiah nge i awm?" a rawn ti a.

Abawihi chuan hneh zet in min kuai her lawp a," Jordan nen accident in tawh vang in nang pawn i hriatrengna i hloh ani. Dawt ka sawi loh zia ka finfiah ang." tiin ka ban ah min kai a." Jordan thlan ah ka hruai ang che." tiin a car ah chuan min hnuk lut hi ani ber a.

Thlanmual kan thlen chuan Jordan thlan la thar vur mai lamah chuan min hnuk dawt dawt a."Hei,en rawh. I mipa hmangaih chu hetah hian phum ani." a ti a.

Thin phu hlawp hlawp in thlan chu ka en chiang a ...dawt a sawi lo. Jordan chu a thi ngei ani...ka thin chu a phu nghal zawih zawih a Jordan nen accident kan tawh dan te kha ka mitthla ah a rawn lang zut zut a. " Awii...ka duh thei lo." tiin ka te tuarh a. Ka mit sulh a,lei ah chuan ka tlu hnawk a ka thil hriat leh hmuh hnuhnun ber chu ka hming a min ko tuarh tuarh chunga ka lam pan a hmanhmawh zet a Tristan rawn tlan chu ani.

Ka harhchhuah leh meuh chuan hospital ah ka lo mu reng tawh a. Ka chhungte leh Jordan nu leh pa hi ka bulah an lo awm thap a.An hmelah chuan min ngaihtuah zia chu a lang vek a.

Tristan khan min lo bum ani. Min hmangaih hauh silo in Jordan lem chang in min hmangaih ang in alo lang der mai mai thin alo ni. Khang hun chhung zawng khan min lo va nuihzat thin awm. Jordan thihna vang leh Tristan min bumna vang chuan ka thinlung chu a na in a puakkeh lo chauh ani. He ka thinlung na hi tuman min hnem thei lo ang. Ka na ngawih ngawih a thih daih mai te ka duh rum rum hial ani.

Ka chhungte leh Jordan nu leh pa chuan Tristan khan Jordan lem a chan chhan kha amah an ngaihtuah vanga an tih tir anih thu leh Tristan thiam loh a awm loh thu min hrilh nghal mawlh mawlh a. " Khawngaih in a hming kha lam ri lo teh u...ka hre chak lo. Hmuh pawh ka hmu duh lo."ka ti hmak a.

Jordan thihna chuan min nghawng in ka rilru ana em em a amah ka ngaihtuah chhuah apiang in ka mittui a tla nghal zawih zawih zel a. Chutih rual chuan Tristan chu ka ngai in ka hmu chak ngawih ngawih bawk si. " Jordan,min ngaidam rawh aw. Ka phatsan che ani. I tan ka lo rinawm zo lova i unaupa ka lo hmangaih hman ta si a.."tiin ka tap hlawp hlawp a,ka lo tap muhil ta a.


Ka mumangah chuan Jordan kha ka lo hmu a,thlarau tam tak kawr var em em ha a khawnvar khai a kal zingah hian alo tel ve a. A kawr chu a lo uk bik in a khawnvar chu alo alh ve lo a. A chhan ka zawh chuan min lo nuih var var a," Keimah min sun a i mittui vang khan ani. I mittui khan ka kawr var hi a luan huh reng a,a var tha ve thei lo a,i mittui tla khan ka khawnvar hi a nan zawp vek a a alh ve thei lo ani. Ka thiante zingah hlim taka ka awm i duh chuan min sun hi bansan in i mittui kha hru hul rawh. Kei chu hmun nuam takah ka awm tawh a ngaihtuah ka ngai lo."a lo ti a.

" Mahse,Jordan,Tristan lakah ka phatsan che ani."

" Baby,min phatsan ani lo. Kha khawvel a ka duty ka tih hlawhtlin theih loh chu Tristan hmang khan ka ti hlawhtling dawn ani. Ka phirpuipa nen hian kan thinlung a in zawm a,min ngaih chuan amah kha en la min hmu ang." ti a nui var var in a lo ral ta riai riai a.


Ka thanharh chuan ka mumang chu mak ka ti in ka ngaihtuah zawm nghal char char a. Nie,mipa dang hmangaih lova a phirpui pa ka hmangaih chu Jordan chuan a hrethiam em em ang. Ka mittui chu hru hul in Tristan number chu ka dial ta a.

" Hell...Sawmpui?"

""Tris....tan, ka..."

" I tha em? Enge i an?"

" Umm,ka tha...mahse ka rilru ah i awm reng a...min hmu duh em?"

Tristan chu a thaw hawk a," Ka hmu duh che. Min hmuh kha i duh loh vang in ngai em em chung che in ka in sum ani. Ka ngai lutuk che."


"Kei pawn ka ngai lutuk che."

" Tu maw i ngaih?"

" Nangmah...."

" Keimah chu tu nge ?"

" Tristan.."


" Ka hmangaih lutuk che...nun bul tan tha leh ang aw...a bul ret atang in..."


Chumi tlai chuan Tristan nen kan in tiamna hmun lam pan chuan ka kal a. Car bang ngheng a tlangval hmeltha leh sang tak lo ding ka hmuh chuan tlan in ka pan phei dawr dawr a. Thaw hlawp hlawp in a bul ka thlen chuan ," Hi...Malsawmpuii ka nia..." tiin ka kut ka lek chhuak a.


Hlim tak a min lo nuih var var in ka kut chu a hmer salh a," Tristan ka nia...ka hmelhriat thei che hi ka lawm tak zet ani." a ti a.

Nunhlui liam hnu chu phum bo in nun chu a bul ret atang a tan tha leh in ka hma lam hun duhawm tak chu ka hmachhawn ta zawk a.

Link:
BBcode:
HTML:
Hide post links
Show post links

Local Advertisement

MOBILE SIAM ZIR DUH TAN!!!

Tech-Inn Mobile Repairing Traning Centre, Bazar bungkawn

Kum tin mi za chuang eizawnna kan siamsak a, Eizawnna tlaka thiam turin kan zirtir thin

Mizorama mobile siam zirna hmasa ber changtlung ber kan ni. Hrechiang duh tan Contact : 9612099411 / 9862016122


Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » April 4th, 2021, 2:26 pm

Chapter : 6

RINZINLY YOURS


Holiday anih vang in class kan chawl a , ka thian te ho chu an len chhuah vek avang in keimah chauh in hostel ah chuan ka awm a. Ka khum ah bawk in ka FB a, ka thian kawm ngeih tumah an online si loh vang chuan log out leh mai ka tum lai chuan 'Rinzin' tih hming pu hnen atang in message ka dawng a.

" Hi! I tha maw? "

" Umm.. Tha lawm. Nang zawk? "

"Tha lutuk. Vawiin enge i tih dawn a? "

" Class kan chawl a tih tur em em ka nei hran lo. "

Rinzin_a profile chu ka check thuai a. Tibetan tlangval, Shillong khua a awm, tuna Bangalore a awm mek a lo ni a. A thlalak a a lan dan chuan ngo veh vawh leh bawp sei thlarh mai hi a ni a. Han en mai chuan Korean hmel hi a pu a, a hmeltha em em mai leh nghal a. A thlalak chu ka comment sak a, ani pawn uar zet in ka thlalakte chu a rawn comment ve bawk a.

Tunlai ah chuan thlalak ah hian a in edit hmelthat theih nasa tawh sia a thlalak a a landan hi a hmel tak tak nge ni ang a in lan hmelthat chawp tir ni ang le ? A hmel dik tak anih chuan a hmeltha tih chu phat rual a ni lo ang.

" Lunch ei a hun tawh sia ka out mai ang e. " Ka ti a.

" Ok. Puar deuh in aw! Mahse i phal chuan i out hma in i contact number min lo pe la? "

Ka in ngaihtuah vang vang a, ani ang tlangval hmeltha ngenna chu hnar phal lovin ka phone number chu ka pe a, ka out san ta a.

A tuk ah chuan hma tak ah tho in lehkha ka zir nghal a. Ka phone ah chuan message a rawn thleng a, ka en thuai a.

" Hi! Rinzin ka nia... Nga tu delek! "

Ka ner nang a. A thu sawi awmzia ka hriat loh em avang chuan, " Nga tu delek?? " tiin ka zawt ha a.


" Kan tawng a ' good morning' tihna"

" Oh... Nga tu delek, Rinzin! . "

" Vawiin i class dawn em? "

" Umm.. dawn. Bangalore ah chuan enge i tih a? "ka ti a.

" BCA ka zir mek a, ka final kum ani tawh. Nang Shillong khua awm nghet i ni em? Eng hnam nge i nih?" a rawn ti a.

" Mizo ka nia. Mizoram atang in college kal in ka awm a. "

" Mizo i ni maw?! Ka room mate hi mizo ania. Mahse Mizo hmel i va pu lo ve a. Nepali emaw i ang zawk. " a rawn ti a.

" Ha! Ha! Pure Mizo ka ni e. Mizo ah pawh Lal hnam Sailo thlah ka ni a sin. " ka ti deuh kher a.

"Princess i nih vang anih chu i hmelthat em em. A tak ah ka hmu chak che. "

" Ka lawm e. Kei pawh ka hmu chak che. Nang pawh Tibetan ni lovin Korean i ang ka ti. Korean ah pawh Boy band pakhat an disband tawh ZE:A member Park Hyung-Sik nen in in ang ka ti thlawt. "

"Wow.. Wow.. Ka phu lo! Min fak mah mah ni in ka hria. "

" In in ang em a lawm. "

Hun awl a piang ah kan in text loh leh kan in call a, mak tak mai in ka ngai veng veng mai thin a. A tak ah eng ang hmel nge a put ka hriat chak rual in video call rawt hmasa tu nih ka duh bik si lo a. An hostel leh institution chanchin sawi tur a ngah in nuihzatthlak tak tak hi min hrilh thin a in pawh tak in kan nui bawk bawk thin.

Tum khat chu a thiante nen bar ah kal in zu an in a. A rui phur chuan min rawn video call ta hlauh a. Ka thaw hi a tawp mai dawn in ka hria! A hmeltha lutuk chu ka buai chhe lo chauh ani, ka english thiam sa pawh ka theihnghilh then phung in ka bah nawk nawk mai a.

" Ka princess hnenah hian ka ngaih zia hi hrilh ta ila a thinrim ang em?" a rawn tih chuan ka thin chu a su dup dup tawh mai a.

" Aih... Thinrim lul love. " ka ti thei hram a.

" Ka ngai che, lalfanu. Ka ngai lutuk che _ nasa tak in"

" Rinzin, i rui deuh hlek niin ka hria... Ti nge i ruih a? " ka ti a.

" Ka dawihzep lutuk a, huaisen nan ka mamawh ani. "

" Eng vanga huaisenna mamawh nge i nih? "

" Ka ngaih zia che hrilh tur che in. Princess, ka bialnu i ni duh em? " tiin a mitmeng buang thak chu a phi chiai a.

Ka nui sak a, " I harhfim hunah kan sawi dun dawn nia. " tiin ka chhang tak na in 'aw duh e.. ka duh lutuk' tia au chhuah mai chu ka chak et et mai ani. Mahse awlsam lutuk anga min ngaih ka hlauh vang in ka insum thei hram zawk ani.

" In hostel ah ka nau ka rawn tir ang. Ka duh che tih hi ka ti mai mai lo tih i hriat nan ka chhungte ka hmelhriat tir dawn che ani. " a ti a.

A rui tawng kam mai ah ka ngaih sak a. Mahse a tuk tlai thim dawnnah chuan kan warden in tlawhtu ka neih thu min rawn hrilh chuan mak ka ti ang reng hle a. Ka chhungten min rawn tlawh dawn ni se min rawn hrilh lawk ngei awm si a. Warden office ka luh chiah chuan hmeichhe hmeltha tak ngo paw veu mai hian min lo nuih ver ver a.

" Hello... Rinzin-a nau Maria ka nia. Saihmingmawii i ni ang chu maw? " a ti a.

" Aw, ni e. Ka hmu che chu ka lawm hle mai. " tiin kan in chibai lawp lawp a.

" Ka u hian a sawi nasa thei lutuk a che a. Rawn hmu tur che a min rawn tirh vang hrim hrim pawh ni lovin ka hmuh chak vang zawk che a lo kal ka ni. "nelawm tak a nuih ver ver pah hian a ti a.

Eng eng emaw sawi in kan ti ti luam a. A haw dawn chuan thei chi hrang hrang thar lam tak tak percel khat ngawt hi min pe a. Kan in mangtha ta a.

Maria chuan a hun awl ah min rawn tlawh zauh zauh thin a. A pa hi sipai niin Delhi lam ah a awm daih a, an in ah chuan a nu nen chauh an awm a. Kan class chawlh tum hian an in ah chaw ei tur leh riak tur in min rawn hruai thin a. A nu nen pawh chuan kan in nel tawh tak zet a. Ka ngaina in an bula awm chu nuam ka ti a, an in chu ka in ang mai ah ka ngai hial ani.

A nu leh a farnu te nen kan in kawm nel ta chu Rinzin chuan nuam hi a lo ti em em mai a. " Ka zir zawh ve leh an hnen a thawk tur in Bengalore a firm pakhat in min book nghal a. I lakah pawh mawhphurhna la in ka enkawl thei ang che. " phur tak hian a ti a.

" Nu leh pa enkawl tu tur ka la nei a lawm. " Ka ti a.

" I nu leh pa te mawhphurhna chu ka ko ah nghah ka duh ani. Khawngaih in min nei rawh, ka lalfanu. "a ti a.

" Kei chuan neih che duh mahila ka chhungte phalna lo chuan pasal ka neih a thiang hlei nem. "

" Anih chuan i chhungte hnenah chuan keimah ngei in ka dil ang. Thla leh ni 5 khian exam kan zo dawn a. Ni 15 velah ka rawn haw ang. Min lo nghak rawh aw.. Khawngaih in. "

Rinzin rawn haw chuan an in ah chaw kan ei khawm a. Vawi khat in hmuhna ni mahse kan in biakna a rei ve tawh em avang chuan kan in pawh in vawi tam tak lo awm dun tawh thin ang mai in kan in nel a. A chhungte lah in min be tha in ka lakah an fel em em a. A pa chhuti lo haw hunah ka chhungte hnenah kal a min neih phalna dil an rawt a.

Rinzin hi ka hmangaih ngawih ngawih a, a tan ka in pum pek thlap a, ka chhung ten inneih phal lo pawh ni se ka nei lui tho ang. A pa chhuti lo haw dawn vang in an in ah chaw ei tur in min rawn hruai leh a. A nu leh Maria nen chuan choka ah kan buai nak nak a. Rinzin chu thlai hring lei tur in a in khalh chhuak a. A chhuah atang a minutes sawm vel ah chuan Rinzin nu phone a lo ri a. Chhang tur in sitting room lam ah a phei thuai a. Maria nen chuan fiamthu thawh in kan nui dun hawk hawk a.

A nu phone chhang tur chu thawk leh khat ah a te tuarh a. Maria nen chuan hmanhmawh tak in kan tlan phei thuai a. A nu chu chhuat ah hian phone hum in nikhaw hrelo in a lo let reng mai a. Maria chuan a nu chu sawi in a au tuarh tuarh a. A nu kut a phone atang chuan tawng ri ka hriat vang chuan ka la a.

" Hello? Tu nge ni? Ka nu nikhaw hrelo a tlu tur khawp in eng thu nge i hrilh a? " ka ti khaw khaw a.


" Hello.. Inspector Vivan ka nia.. Rinzin chu car accident a tawk a, hospital ah pan pui nghal niin a nunna chhan hman a ni ta lo. "

Ka bing mup mup a, ka lu chuba hai muah muah a ka mit khaw hmuh chu a thin nghal mup a, engmah reng ka hre ta lo.

Ka harh leh meuh chuan hospital ah ka lo mu reng a. Ka bulah chuan Maria leh a cousin an lo awm a. An sawi dan chuan ni hnih ngawt ni khaw hre lo in ka awm a, Rinzin fa ka pai mek bawk anih chu. Ka thinlung chu a na ngawih ngawih a, awm ngaihna reng ka hre lo. Thih ve daih mai ka duh ve rum rum a.

Ka rilru chu hria ni awm tak in Maria chuan, " Mawimawi, Rinzin awm tawh lo mahla tunah i pum chhungah a fa awm kha i tan dam chhan tlak ni rawh se. Khawngaih in in ti pachang hram rawh aw. " tiin mittui tla zawih zawih in min kuah a.

Ka thinlung na lutuk chu ka mittui a hul vek a, ka kawchhungah min hnawh in ka thin chu a tawt up up mai a. Mittui tla zawih zawih in tap hawm hawm thei ila ka zia huai zawk in ka ring ani. Thinlung na lutuk tap chhuak thei silo hi a lo va hrehawm tak em.

" Lalpa, ka Rinzin kha mi tha tak ani a sin. Khawngaih tak in i van ram nuam ah chuan hruai ang che aw. Lalpa, he khawvel ka chhuah san ve hun chuan Rinzin awmna hmun hmun ah min dah ve ang che. Van ah a awm anih chuan he khawvel a kan in hmangaihna chhun zawm tur in a bulah min dah la. Hremhmunah a awm anih pawh in hremhmun meipui alh sa lutuk a tuar zia awm deuh theih nan a hnem tur tal in a kiangah min hruai ve rawh. " tiin ka phun sap sap a.

Maria chuan min kuah nghet sauh a. " Khawngaih in... Ti khan tawng suh. Ka u khan a hmangaih em em che a. Amah sun a nun hrehawm taka i awm hi a duh hauh lo ang. I pum chhunga naute kha Rinzin bawk a rawn pian nawn leh ka ring tlat ani. " tiin min hnem ngial a tum a, amah ber lah a tap bang thei silo.

Mangtha aw, Rinz. Khawi hmun ah pawh awm la i bulah ka la rawn kal ve em em ang, khawhar a i awm ka phal ngai lo ang. Ka hmangaih che.. Ka hmangaih che.. I ta.. I ta chauh ka ni kumkhua ang. Good bye, Rinz.

*****************************

Ziaktu kam liam :

Mi thenkhat hian ," I lehkhabu ziah ah hian eng nge i hlawkna ? Chhungkaw chawmna khawp pawh tling siloh ah hian i hun leh tha i seng thlawn peih." min ti thin. Ni e, sap ram ah kan awm a JK Rowling te kan ni anih ngawt loh chuan kan ram ang ah hi chuan lehkhabu ziah hi ei zawnna ala tling mawlh lo ani.

Amaherawhchu, mahni nuam tih zawng ber tih tluk a hlu hi a awm chuang em ni ? Ka suangtuahna vak vel rem khawm a ziah chhuah hi nuam ka ti ve em ani. Pawisa chu hlawh chhuak lo mahila ka nuam tihna hian a man tawk ani. Ka rilru hah lai te hian lehkha ka ziak a,ka z*ng hawk thin. Chulo liam a hlu a awm chuang dawn em ni ??? Ka tan a lawmman hlu ber chu kei a thu ziak ve mai ngaihnawm ti taka an lo chhiar thin hi ani. Awle...chute mai chu..ka lawm e.

Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)