PEKSANGA BY Sbk Pachuau (Completed)

Episode nei ho a hlawm a dahkhawmna
Ngaia
Site Admin
Posts: 25813
Joined: April 30th, 2016, 4:07 pm

Re: PEKSANGA BY Sbk Pachuau (Completed)

Unread post by Ngaia » April 25th, 2021, 4:41 pm

Chapter 24-ah khan ka rawn zawm ang ka ti kha a ni a, ka rin aia a thui leh tak si avangin a hranin ka rawn dah ta mai zawk e.)


PEKSANGA 25
Sbk Pachuau


"A chhungte'n an hruai thei lo em ni?" ka lo ti hmuk a.

"A chhungte kan ni alawm! Chuan, a fapa-in i zu hruai dawn bawk a," ka nu bawkin min chhang a.

"Ka hna..."

"I hna lam chu dah țha rih rawh. Karleh nilaithawhțan leh zirtawpni khi chawlh a ni ve ve a, nilaithawhțanah i chhuk ang a, inrinni-ah in lo chho leh ang. A hun tawp a ni tawhah ngai la, i huatna kha dah bovin țha takin i enkawl dawn nia."

Ka pa thu hi ka hnial ngai loh avangin țawngkam dengkhawng takin min be ngai lo a, tun țum zet chu a țawngkam a nem lo ngei mai! Ti tura min hrilh ai mahin thupek a ni zawk mah a, hnial a duh miah lo tih a ti lang chiang tawk viau bawk.

Eng ang pawhin hrehin kal chak lo ni mah ila ka kal ngei a țul dawn tih ka hria; a chhan chu, ka nu leh pate mai bakah ka nupui ngei pawhin ka tih ngei tur thil a nih thu leh ka mawhphurhna sanzia, a fapa ka nih anga a hun tawp lam țha taka enkawl chu ka kuta tla a nih thu sawiin kal ngei turin min nawr miau a!

Keimaha ka kal tur chu min huphurhpui deuh nge ka nu leh Azuali chuan ka u pasal lo va biain kan unau-a kal turin an lo ti fel diam a, chutia ruahmanna an lo siam chu țha ka ti ta phian a. Ka u a tel ve chuan ka nu buaipui leh biak vel te pawh ama'n a ti thei vek anga tiin kal ka huphurh lutuk pawh a zia phah viau mai.

Buaina leh harsatna tawk lovin Mizoramah ngei ka nu chu a hun hnuhnung lam hmang turin kan hruai kir leh ta chu a ni a, a awmna hmun kan zu thlen tirha a hmel ka hmuh khan ka nu kha a ni ta lo emaw ka ti hial a ni!

A hmel țha tak leh mitmeng nung sarh țhin kha hmuh tur a lo awm tawh hauh lo a, a vun no tak leh mam nalh tak te pawh kha hmuh tur a awm tawh hek lo. Kan tan nu țha tak ni ngai lo mah se chutia a taksa chhe tak leh chau hmel ka hmuh chuan ka thinlung a dek hle a, ka pa leh kan unau laka a lo khawsak țhin dan chungchanga ngaihdam min dilna pawh ihe lovin ka pawm nghal hmak rêng a ni.

A pasalin ka nu chu țhen chuang lovin anmahni hnampui hmeichhia nupuiah a nei leh a lo nia, sum leh paia buai lo ta chu home nurse rawihsakin a mamawh phurukna tur sum tam tham tak a hmingin a dahsak bawk. Țhen kher lo mah se nupui angin a en tawh lo a, a ngaihsak zui êm êm bawk hek lo. Pa sual tak chu a nih hmel loh a, a in ațanga chhuahtir lova a la enkawl zui chu ti țha tak a la ni tho mai.

Ka nu leh ka nupui bakah ka u te chuan ka pute in lamah an hun tam zawk an hmang ti ila kan sawi sual hauh lo ang. Kei pawhin ka theih anga tam ka tlawh a, ka pa erawh kei ang êm chuan a kal zing ve lo thung.

Damdawi in lama karkhat vel a awm hnuin ina haw a duh tlat avangin in lama inenkawl zui turin kan inla chhuak a, amah enkawltu turin nurse awm reng mah se ka nute chuan an kal an țhulh phah chuang lo, anmahni enkawl vek chu a ni ber zawk a.

A vanglai hun nuam ti takin a chen a, natna khuma a mut hma lawk thleng khan chapo leh mahni țha inti tawk takin a la hawi sang vah zel kha a ni a, chu chu ka nupui neiha a lo kal khan ka hria a ni. Natna khumah muin hun tam zawk inngaihtuahna leh thil kal rawh chhui kirna hun a nei ta a, a nundan țha lo țhin tak kha inhre chhuak vein inchhir takin a awm tih a lang reng a. Kha chen ka thinlungah amah huatna awm tawh mah se nute na nâ nâ chu ngaihdamna leh khawngaihna a lo sang hle a, lainatna thinlung nen ka thlir ta fo mai.

A taksa a chak lo tial tial a, oxygen tel lo chuan a awm thei ta mang lo a. Chutianga kan inenkawl ațanga kar khatna chiah zanah ka nu-in a va awmpui leh a, zanlai hnaih tawhah min rawn bia-in a mar an hmuh zawh loh thu min rawn hrilh a, hmanhmawh takin kan tlan phei nghal thuai a.

Kan va thlen chuan a lo chatthla fel tawh a, a hun tawp lamah a nunhlui vanga a inchhir mai bakah Pathianah lawmna a chhar a, a thla a muangin kal tura a inpeih tawh thu min hrilh avang khan a thlarau chu ka ngaihtuah lem lo. Mahse, nu hrisel țha leh hawi harh tak, nun nuam tak hmang țhin kha natna hrehawm tak tuarin a hun tawp a hmang kha a ni a, ka thinlung chhungrila amah ka lainatna erawh chuan min ti na deuh thung.

******


"Bawihi, Maziri u Faki kha a pum a nâ a, damdawi inah kalpuiin zai nghal a lo ngai a, a dinhmun a țha vak lo a ni awm e. Ka rawn haw mek a, lo insiam la, kan va kal ve dawn nia."

Motor khalh chungin Azuali chu ka bia a. Maziri u chu a ril a lo pawp a, in lamah na a tuar rei deuh avangin damdawi in an thlen chuan a chau hle tawh a ni awm e.

In ka thlen chuan ka nupui chu a lo inpeih thlap tawh a, hmanhmawh takin damdawi in lam pan chuan kan tlan leh ta nghal a.

Kan va thlen chuan țhiante ho chu operation theatre kawtah an lo țhu far hlawm a, na hmel ațangin chanchin țha lam a la awm lo tih a hriat mai a. Maziri hlauthawng leh mangang hmel chu ka en a, a lainatawm takzet a ni!

Nurse pakhat inzaina room ațanga an rawn chhuah chuan Maziri leh Freddy chuan an pan vat a.

"Eng nge kan dinhmun?" Freddy chuan a zawt a.

"Eng mah kan la sawi thei rih lo. Nakinah chanchin chiang zawk kan inhrilh dawn nia."

Thil dang eng mah zawh hman miah lohin a sawi zawh rual rual chuan hmanhmawh zetin a kal nghal dawr dawr a.

Ka nu-in chanchin ngaichangin min rawn bia a, mi zinga phone hman chu nuam ka tih chiah loh avangin ka țhutna ațanga thovin damdawi in tual lamah ka chhuak phei a, kan inbiak zawh hnu chuan ka let leh nghal mai a.

Ka let leh lam chuan palian țha thelhthawlh pahnih hi ka tawk a, kan intiat tlâng viauvin ka ring! Pakhat zawk chu doctor ni ngei tur a ni a nghawngah stethoscope a awrh a. rilrua vei nei runa awm ka nih avangin an hmel lam erawh ka en lem lo thung.

"Peksanga ni reng chuan! I dam maw, țhianpa?"

Doctor zawk chuan ka kutah rawn vuanin min chibai nghal a.

"Robert! E khai, inhmuh a va khat ve! I țha maw?" tiin ka chibai let a.

Robert-a hi Freddy cousin niin kan țhianho zingah a rawn tel ve leh zauh țhin a, a felin kawm a nuam a, doctor zir tura a kal hnuah pawh a rawn chawlh changin chaw kan eikhawm fo a, Lalhriata leh Freddy te ka kawm ang êm êmin kawm tam lo mah ila kan inpawh ve thawkhat hle a ni.

Robert-a bula mi chu ka en chiang a, ka hmelhriat tho a lo nia. Bangalore-a ka awmlai khan vawikhat chu building hlui vel enin an rawn kal a, chutih lai chuan ani pawh Architech ni tura a inzir mek lai a ni nghe nghe.

"Hriatzual, in țha zel maw?" tiin ka chibai ve nghal a.

A bialnu-in thisen cancer a vei a, thi lek lekin a awm fo bawk. Hriatzuala'n thlah duh lovin a buaipui zui zel a, a hmeichhia zawkin kalsan tura a tih pawhin engah mah ngai duh lovin a vuan tlat a, nupui atan a nei ta hial a. An inneih hnuah pawh vawi duai lo damdawi inah lutin an inenkawl chho zel a, an beidawng viau tawh a, beiseina pawh an nei tawh lo a ni.

Chutia beidawng taka an awmlai chuan an beisei loh thil mak a lo thleng a, dam chhuak zo tawh lo tura an inngaih hnuah Pathian hnena an țawngțaina chu chhana awmin doctor-te pawhin beiseina an neih tawh loh hnuah damna a chang ta hlauh a, fa nei thei tur khawpa țha-in a dam chhuak leh tih chin zawng kha ka hriat a ni a. Tuna Hriatzuala ka'n hmuh leh tàkah chuan ka ngaihtuahnaah a rawn lut nghal zut zut a, chuvanga an țha zel em tih pawh zawt ka ni.

An țha zel tih leh fa pawh pahnih an neih tawh thu hlim hmel takin min hrilh a, ka lo lawmpui rilru ve hle.

(Hriatzuala te chanchin ka ziahna 'BEISEINA' tih kha a țhen chuan in chhiar tawh maithei a, a bu-a tih chhuah turin kan buaipui mek a, lei theihin a awm thuai dawn tih ka'n zep tel zuai ang e😊)

"An la zai zo lo em ni?" tiin Robert-a chuan OT lam chu a kawk zauh a.

"Zo lo a nih hmel. Ka rin aiin an khawih rei a!"

"A serious hmel riau mai a, eng tak ang ang maw!"

"Ka hre thiam chiah lo, a nat dan tak ka hre ve si lo a," ka ti a.

"Freddy a rawn mangang nasa mai si a, duty zawh rualin ka rawn phei nghal a nih hi. Hriatzuala nen hian kan inhmu remchang êm a, ka rawn hruai ve zel a nih hi," Robert-a'n a ti a, OT lam pan chuan kan inzui phei ta nghal a.

Rei pawh kan la țhut hma chuan an zai zo ve ta hram a, an zai hlawhtling hmel viau a, rilru a dam huai thei.

Cabin-a an indah luh fel hnu chuan kan fapa kan ngaihtuah deuh tawh avangin kan hawsan ta rih a, kan haw dawn chuan Maziri chu mamawh a nei a nih phawt chuan rawn sawi zel turin Azuali'n a chah a.

Beisei phak bakin Faki a țha chho chak viau mai. Maziri leh Freddy te pahnihin an awmpui chawt a, Freddy chu a hnaa a kal bak damdawi inah chuan a awm ve reng ang a ni a, innei mai tawh tur an nih avangin a chhungte pawhin an sawisel bik lem lo.


*****'*


"Apa, nanau-in min rawn pet leh tawh a nia!"

Phur zeta ka fapa Remruatkima au lang lang ri ka hriat chuan ka nui sak a, ka laptop chu khupin ka nupui leh kan fapa mutna lam pan chuan ka phei ve ta nghal a.

"Apa, min rawn pet leh tak tak maw le! A lo pian hunah pawh min la pet tho ang em?"

An awmna lam pana ka kal min hmuh rual chuan a nu dul puar lah tawh zut kual chungin min zawt nghal zat a.

Ka nupui bulah chuan bawkin a dulah ka kut ka nghat ve zat a, Remruatkima nen chuan kan tih fo tawh angin a nu dul khawih chu kan inchuh leh nghal chat bawk.

"Hmeichhia i awt ve tawh em?" tiin ka nupui chuan min zawt a.

"Awt ve tho e."

"Mipa tho nei leh ta ila i lungawi lo viau ang em?"

"Mipa a ni emaw, hmeichhia pawh ni se kut ke kim, himdamin lo piang se tih hi ka duhthusam ber a ni. Rilru-in awh zawng chu nei mah ila Pathian thu thu a ni a, min pek ang apiang lawm taka lo pawm bak tih theih kan nei chuang lo. Chuvangin, nang leh keiin 'kan fa' tia kan koh tur chu, kan inkara piang a nih phawt chuan eng ang mi pawh ni se ka pawm vek ang," ka ti deuh duah a.

" I va sermon nasa tak!" tiin min chhaih leh pek a, a biangah ka piaisak ta ngawt a.

Ka țawng tam êm êm lem loh avang hian thil ka sawi thui ve deuh țum hi chuan 'sermon' chhuahin min chhuah a, min sawisa zui ziah țhin.

"Apa, Ruatkima biang i la piai ve lo."

Ka fapa-in a biang ka piai tura a rawn dawh chu piaisak zauhin ka fawp zui nghal zeuh a, hlim taka nui ver ver chungin a pi leh pute room lama kal turin a tlan chhuak nghal zat a.

"Nau neih fel hunah law law innei se ka tih tehreng nen Freddy-a a hmanhmawh lutuk a, ka ngei a nia. Ka nalh dawn lo lutuk a, kal pawh ka phur lo zo vek!" tiin a phun nang nang a.

Naktuk hi an inneih ni tur a ni a, kan țhianho zinga la nei lo awm chhun a ni bawk a, kan phurpui tlang viau mai. Maziri lah kan rilru-in a dah hrang lo mai ni lovin ka nupui phei chuan raipuar luah chungin a theih chin chinah a buaipui nasa viau a, a mipa lam ai mahin a hmeichhe lam chan kan chang zaw mah nghe nghe a ni.

"A nghak rei ve tawh bawk a, a awm ve viau alawm. Nau neih zawh nghah chu a tan a harsa dawn lutuk tlat! Kei pawh ni ila ka thei dawn lo a," a dul zut kual riak riak chungin ka ti a.

"Mi zinga raipuar luah chunga awm chu a chakawm loh êm alawm. Ka nalh lo bik dawn lutuk!"

"Ka mitah chuan i nalh ber dawn tho. Chutiang mai mai phur loh phahna atan hmang mah ta che. Ka fa i pai kha i inzahpui a nih loh chuan..."

"Teuh lo, inzahpui lam a ni lo. Raipuar hi a nalh lo êm a, chuvang chu alawm."

"Chuti a nih leh min han fawp lawk teh," ka tih chuan ka biangah a rawn fawp a.

"Hetah zawk hian," ka hmui chu ka khawih zauh a.

Insiam remin min rawn fawp a, ka rin aiin a duhthawh zek lehnghal.

"Nau hi nei fel vat la a țha ang," inlak hran pahin ka ti hmuk a, a lo nui hak thung.

"Ka raipuar hi min hmu ning tawh em ni?" ka sawi chhan hre lo derin a ti a, a nui zui har har bawk.

"Infawh chauha tawp ringawt hi ka ning tawh! Insum ngai renga awm ziah pawh hi ka tlin lo lek lek tawh. Nei fel vat la, duhtawka chet ka..."

Ka sawi zawh hmain ka hmui a rawn hup vat a, "I sawi thui thei si, a tawk rih," la nui har har chungin a ti a, ka lo rum nghut thung.

"Naute pian hun chu rei tawk i indang tawh ang."

Za lutukin a nui ta har har a, kei pawh chu insum zo lovin ka nui ve ta hawk hawk a.

Duat zetin ka kuah a, a rim tui tak chu ka hip pah vang vang bawk.

Thu inhmuh fuh loh chânga han inhnial zauhte chu nei țhin mah ila thinur hmai sena inhauh kan la nei ngai lo a, vannei ka inti takzet a ni. Ka nupui hi sawisel ngaiin a awm ka la hre lo a, ka tan nupui țha tak a nih piah lamah ka chhungte tan mo fel tak a ni bawk. A nihna chu 'mo' ni mah se ka nu leh pate tan chuan 'fanu' a ni a, ka unaute tan pawh farnu/laizawn țha lutuk a ni.

"Bawihi..."

"Umm..." mutchhuah hmel zeta meng phi chiai chungin min en a.

"Ka hmangaih che."

"Kei pawhin ka hmangaih che," tih pahin min ngheng hnai talh talh a, duat zetin ka lo kuah a, a biangah ka fawhsak zauh bawk.

"Ka'n muhil lawk aw?"

"Umm... Muhil rawh."

Ka nupui muhil hmel chu lungawi takin ka thlir a, eng emaw chen ka thlir hnu chuan dim taka thovin ka fapa ngaihven turin ka chhuahsan ta a.

A TAWP TA E...

*** KAN WEBSITE A FAKNA LAM THIL MILEM LANG THIN I LO HMEH ZEUH HIAN KAN WRITER TE HLAWH KAN TUMSAK ZEL TIH KAN HRE THEUH DAWN NIA, KAN LAWM E***

Website story link ho awlsam zawka in zawn hmuh zung zung theih nan STORY FB group siam a ni a. Whatsapp group pawh siam a ni e. Complete tawh ho zawng zawng leh story kallai kan dah vek avangin avangin in lo join theuh dawn nia..
Group link : https://www.facebook.com/groups/991354610918230/



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)