BITTERSWEET REVENGE By Maveni Hmar (Completed)

Episode nei ho a hlawm a dahkhawmna
Ngaia
Site Admin
Posts: 25813
Joined: April 30th, 2016, 4:07 pm

Re: BITTERSWEET REVENGE By Maveni Hmar (Completed)

Unread post by Ngaia » April 25th, 2021, 8:16 pm

BITTERSWEET REVENGE

CHAPTER : 7

DEVIN :

Zampuii birthday ani a , kan pahnih chauh in hotel fianrial leh reh raih mai a zan riah ei dun kan tum a . Rei pawh ka nghah hma chuan a rawn thleng ve mai a ,a nalh in a hmeltha ngang mai. Ka tehkhin ber chu rose par senno lawh hlim hlawl ang vel hian a thar lam ser mai a. A chhungril nun dahtha in a pawn lam lan dan ngawt thlir chuan a tha thlawt ani. Ka bul alo thlen ve leh lo kuah in ," I nalh lutuk." ka ti sup a ,a hmui nalh zet leh nel thep ah chuan ka fawp zauh a .


" Ka lawm e , Devin." a ti sep a , a biang te chu a tai tek mai a.

" Birthday hriatreng tlak siam sak che ka duh ani." tiin gold chain chu ka awrh tir nghal a .


" Oh..Devin!" a ti halh a.


" Happy birthday,ka lalnu hmeltha Cleopatra!" tih pah chuan ka kuah vawng vawng a. Ka hmelma lian ber leh tih chhiat ka tum mek chu min si chet in ka pawm mek ani si a...ka lungphu te chu rawn rang in ka thisen zam te chuan 'phuba..phuba ' tiin an phu ut ut ni ber hian ka hria a .


Ei tur a rawn thlen takah chuan tui ti tak in birthday chaw chu kan ei dun ta a. Chaw ei pah chuan eng eng emaw sawi in a titi siam siam a ,hmuhnawm tham khawp in a hmeltha a ni. Luke_an kha ti khawp a alo atchilh leh hmangaih pawh kha thil mak ani lo.


Chaw te kan ei kham chuan boruak thiang dawn pah in kan in khalh kual mai mai a, ka kut dinglam a steering wheel hum in vei lam chuan a lu chu ka darah ka kuah mu hle hle a ," Devin, ka hlim tak zet ani. Ka nuna ka hlim san ber lai hi min zawt ta se , ' tun hun hi ' tiin ka chhang ngei ang . Heti hian awm reng thei ila..." a ti sep sep a.


A sam chul heuh heuh pah chuan ,"Min zui haw mai rawh. " ka ti sup a.


A mitmeng fiah kak chuan min rawn melh a ,"Dan khatna ngei a pasal neih hi ka duhthusam ani thin a sin..ka rawn zui haw ngawt thei lo ang che ." a ti a.


Huh ...He hmeichhe lepchiah mipa hrang hrang kawp kual thin tu hian dan thianghlim leh Biakin meuh hawng a pasal neih a tum anih chuan bawlhhlawh hi thianghlim alo ni ang. Ka thinrim thut chuan car chu ti ding chawt in ngawi reng in ka chhuak a, cigarette tan in ka hip kawk kawk a .


Rawn chhuak ve nghal in ka hnung lam atang chuan ka kawngah min rawn kuah in ka hnungzangah chuan a bei hle hle a. " Khawngaih in thinrim suh aw...ka hmangaih lutuk che ani." a ti sep sep a.


Ka then suk a ," Ka hmangaih che min ti tu hian min zui haw chu a duh silo...hei hi eng in hmangaihna nge ni ngai ? Khawngaih in dawt chu min hrilh lo zawk teh." ka ti vawt ruih a.


" Dev,ka hmangaih lutuk che."

" Min hmangaih la chuan min zui em em ang. Chuvang in i dawt thu hmang kha chuan min tih lawm tum teh suh. Min zui haw duh lo anih chuan kan in kar hi tawp hmak rawh se." tiin a mi kuahna kut chu phelh in ka kal sawn a car ah chuan ka luh san ta hmak a.



Min rawn umzui thuai a ,a mit ah chuan mittui hi a tling pam a ," Khawngaih in ti hi chuan min ti tawh suh." tiin ka bulah thu in min rawn kuah chawt a . " Ka hmangaih che tih i hre reng ani lawm ni? I tello chuan ka awm thei lo ang. I hlimna tur anih phawt chuan ka zui ang che." a ti ta a.



Ka nui suk a ,a hmui sen chekah chuan duhthawh leh am tak in ka fawp ta vawng vawng a , a ir ah te fawp in a taksa mam hen mai chu ka chul lawr dan dan a. Tisa chakna chuan min rawn tuam hlup hlup a, ka thaw hawk a ka nam sawn ta a.


" I thin ka ti rim leh tawh em ni?" a ti lawi rat a.


" Ka chawlh san loh che chuan car chhung chep zet ah hian hmangaihna ka chen pui che a ngai dawn tlat." ka ti tham tuak a , in sangmar in ka han thaw ham ham a , car chu ti nung in ka in lam pan chuan ka tlan pui ta a.


In kan thlen ve leh chuan inthlahlel taka in kuah in kan in fawp nghal bawrh bawrh a. A taksa hmun tin chu chul in ka fawp lawr a tunah chuan ka hmelma lian chu tih chhiat mai theih tur in ka kut phah ah a awm ta . A hmui a fawp reng chung chuan a thawmhnaw chu ka phelh sak a , a pian nalh zet leh a vun ngo haih chuan min hip hneh hle mai . A hnute pawng lah chu hup in ka hrawm kual vel a ,a hnute hmur kawh lah leh senno chek chu ka liak ner ner a. A mit chu meng si sep in a thawk chu a rang tan in tisa chakna in a tuihal ani tih phat rual ani ta lo. "Ka naute, i nalh lutuk !" ti tham tuak in a beng kawm chu ka seh sak ne ne a.


Ka nghawngah chuan min kuah in a thaw halh halh a, "Devin..." tia ka hming lam sep sep in a hnute poh lah chuan min nawk na na a .


Tisa chakna meipui chuan min hliau hlup hlup a , ka mipatna khawng kawh luah mai chu he hmeichhe te tak te hmangaihna chenpui chak hian a phu ut ut tawh mai ani." Tunah hian i mamawh chu min dil rawh baby...ka pe ang che..." tisa chakna vang a aw khur deuh dur dur chuan ka ti a .


" Oh...Devin, ka mamawh che.." tiin a ngik feih feih a . "Mahse , ka vawi khatna tur anih vang in min dimdawi rawh aw.." a ti sa sa a.


Nui chhuak lo tur chuan ka in sum hram hram ani . He hmeichhe lepchiah zet hi nula virgin chu a ni lo chiang bal ang . A thianghlim leh hlim loh ka finfiah dawn mek lai pawn dawt a la sawi hreh lo chu a nia. Kan kar boruak alh mai thei tura tang at tawh chu tih chhiat hlau lo ila chuan malpui beng meuh in ka nuih khum kiah kiah duh ngei ang ." Nuam thei ang ber in ...nawmna vawr tawp chu ka pe ang che ." tiin dimna tel hauh lo chuan ka hrawm nawk nawk a .


" Devin..."


" Ummm...baby ? Tunah i duh tawh em ni ?"


" Aw..tunah khawngaih in.."

Ka mipatna khawng kawh luah mai a taksa chhunga ka thun lai chuan a te chhuak thawt a. A hole tight leh lum hiam mai a ka luh chiah chu a sawi ang ngei in nula thianghlim ani tih ka hre ta a ,ka thaw hawk a in siam rem in dimdawi zawk chuan hma ka la tan ta a. Ka hnuaiah chuan ngik feih feih in sexy zet hian a rum leh hak thin chuan nasa tak in min ti zauthau ani. A awm bawr kawh lah mai han in sep lawp lawp te chu hmuhnawm tham khawp in a nalh ani. " Baby, ka hming lam rawh.." ka ti lawi rut a .


" Aw...Devin..."


" A tha ..hmangaihna ka chenpui lai che hian i mit min chhin san hi ka phal lo ani. I mitmeng a tisa chakna lo lang kha hmuh ka duh ani. A nalh in a sexy ropui sia kha mitmeng sexy zet khan min ti phur zual ani ." tiin ka thaw huam huam a.

" Devin..."


" Aw baby...ka hming lam zel rawh.."


Min kuah nghet zual sauh in a taksa chu a khur dar dar a, a vawrtawp a hnai tih ka hrethiam mai a. " Tunah aw,baby." tiin uar zawk leh rang zawk hian ka che ta zawt zawt a. A te that a ka hnuai ah chuan a khur ta ngat ngat a. Kei pawh chuan vawrtawp ka thleng rang khawp mai.


" Devin ,ka hmangaih che ."


££££££££££££££££££££££

ZAMPUII :

Ka rilru chu a hlim veng veng mai a ,tunah chuan ka mipa hmangaih ber ta ka ni tawh a a nupui atan min duh a kan in ru a inneih chiah kan hmabak ta . A taksa lian leh sek nalh tak ruak kung chu en nin har ka ti ani . A khabe ah chuan fawp zauh in ," Devin,ka hmangaih che ." ka ti sap a.


A taksa chu in lek khawng auh in a hmui chu a pet a, a mitmeng tisa chakna vanga de sawr sawr kha bo nghal in thinrimna leh tuarna hi lo lang in a meng dur khap mai a. Chutia thawk leh khata a mitmeng rawn in thlak danglam ta chu ka hrethiam lo in ka vawi khatna ani sia ka ti lawm zo tawk lo anih ka ring ringawt a .


Min tawlh hlat san in a thaw hawk a ,a thu chhuak a cigarette chu tan in a hip kawk kawk a , chutih pah chuan a thaw leh hawk thin a .


" Devin, kha ti khan awm teh suh...i lang nelawm lo teh mai ania ." ka ti a.


" Mipa eng zat hnenah nge i hmangaih thu i hrilh tawh.?" vur khawn ang mai a nelawmlo hian a ti ta a.

Ami chhan dan teh daih chu mak ka tih em avang in ka hawi phawk hra a." Enge i sawi awmzia ?" ka ti thei hram a .


" Ka zawhna awm zia chu i hre chiang khawp mai." a ti tuarh a . A tho a thawmhnaw chu a in bel nghal mawlh mawlh a .


" Dev, hun kal tawh ami chu thik a tulna a awm em ni? A pawimawh ber chu tun kan nun leh kan hmalam hun hi ani a sin."


" Chu chu ka ngaihdan ani ve lo. I hun kal tawh vanga in tawng kan ni a, i hun kal tawh hi ka hriat a tul ani. Luke nen in chanchin engkim min hrilh rawh."

Khum atang chuan thu chhuak in ka taksa ruak kung chu blanket chuan ka khuh tat tat a ," Luke chu ka theihnghilh tawh." ka ti sep a.


" Ka theihnghilh ve tlat lo."

" Thik tur pakhat mah a awm lo. Ka lo hmangaih thin kha ka in chhir in ka haw ngawih ngawih tawh zawk ani. Khawngaih in hun liam tawh chu nunhlui ani a liam tir rawh."


" Luke kha i hua maw ?"

" Aw.."

Mi a ang mai hian a nui hawk hawk a, " Luke, i lo hria em ? I hmeichhe hmangaih chuan a hua che anih chu." tiin van lam a hawi a . Chutah mitmeng vawt theih tawp leh huatna a khat hian min rawn melh a ," I thawmhnaw ha la i chhuak thei ang ." a ti nghut a.


" Enge i awmzia hi ? I nupui ni tur in min sawm a kan in ru ani lo em ni ?" tiin ka thinphu zawih zawih thunun tum chuan muangchang in thawk ka la raih raih a.


" Nupui atan ka sawm lai che ka hre lo. Min zui haw tur in ka sawm che anih zawk kha ."


" Devin,ka hmang..."

" Aih.. hmangaih tih tawngkam kha i ka atang khan chhuah tir suh. Kei chuan ka hmangaih hauh lo che a nupui atan leh lek phei chuan ka duh lo hul hual che ani.. I thawmhnaw ha la min chhuahsan nghal rawh." nunrawng tak chuan a ti ta a.


Ka thu hriat chu ka bengchhe ri ani si lo. Ka rilru na lutuk chu ka tawt up up a, ka mittui a luang zawih zawih mai a . " Ka nulat thianghlimna chu ka hlan che a..ka.."


" KS ka mutpui ah in ngai mai ta la...kha i thianghlimna ka tih chhiat man chu." tiin a wallet atang chuan pawisa tam tham tak hi rawn phawrh in khumah chuan a rawn theh thla a .

Ka rilru nat dan chu nasa tak ani , mihring tawng hian ka sawi fiah thiamlo zawk "Devin, min ti na..." sawi pawh sawi zawm thei lo chuan ka in sut hlawp hlawp a.


" I na maw ? I nat kha a lawm ka duh . Luke_ a i tih nat ang khan na ve tur in ka duh che ani. Thawm that leh theih rual loh khawp in keh sawm vek rawh se." tiin pindan ah chuan a vei tawn chhen a .


" Luke a ?"

" Aw..Luke kha...i mi huat em em ..i bum kual leh i nuna thil thleng i tih sual lian ber nia i ngaih Luke ngei kha ka nau a sin..ka nau neih chhun ka hmangaih em em ani asin."

Ka phu zawk mai a, mak ti em em in Devin chu ka melh ta tlawk tlawk a . Luke u maw a lo nih ? In anna pakhat mah an va nei si lo ve ..." Mahse , engmah tih sual ka nei hlei nem. Ka hmangaih em em a ,aman min..."


Nunrawn hmel tak hian a nui hul huk a ," I hmangaih maw ? I huat zia i sawi zo chiah emaw ti a !" elsen zet chuan min tih khum a . " A ni khan a hmangaih em em che a mipa dang vang in i then a ni lawm ni ? I then vanga rilru na lutuk chu Luke khan ama nunna la in a in awkhlum tih i hre vek tho ang ti raw ? Mahse chu pawh chu i hriat loh der leh tho ka ring." a ti bawih bawih a.


A thu sawi chuan min thawng tak zet ani . Luke kha a in awkhlum maw ? Aman min then zawk anih kha hmeichhe dang vang in ..eng emaw thil hriat sual palh a awm ani. Keimah vanga in ti hlum chu a ni lul lo. Engmah pawh ka sawi thei lo ka hrawkah chian min hnawhtu hi a awm tlat a thawk pawh min ti har hial ani.


" Ka nau thattu chu nupui atan ka neih che i in ring a maw ? Ka in chhung atang hian chuak nghal la vawi khat pawh hmuh leh che ka duh tawh lo."


Khur zawih zawih in ka thawmhnaw chu ka ha mawlh mawlh a ," Devin, eng emaw hriat sual i nei ani . Luke kha ka then lo asin. Aman a lawm min then zawk." mittui tla zawih zawih chung chuan ka ti a .


" I in sawifiahna ka ngaithla peih lo. Ka kut ngei a ka theh chhuah hma che hian chhuak rang rawh." a ti thawt a.

" I hriat leh rin dan kha thil thlen dan ani lo..."


" I thu sawi engmah ka ngaithla dawn lo. Chhuak rawh _ TUN AH! " tiin kawngkapui lam chu a kawk va a .


Eng pawh sawi ila a ngaithla dawn lo tih ka hre chiang ani . Mittui vanga khaw hmuh phe ruai in ka in pal chhuak nawk nawk a . Ka thinlung tawt lutuk sahal huam huam tih zia awm nan chuan ka aw rawl tawp a te chhuah rawng rawng tak hi ka nap a . Ka na lutuk chu ka nghilh deuh chhuih hian ka in hria a . Taxi phar in ka haw ta a .


In ka thlen chuan ka pindan ka pan ding nghal a . Ka rilru chu a na ani satliah lo a puak darh vek ni ber hian ka hria a . Devin hi tih tak zet in ka hmangaih a sin . Ka thu sawi a ngaihthlak hun ah chuan thil a hrethiam anga a in chhir em em ang tih ka ring tlat ani. Luke kha a thi a ti maw ? Mahni in ti hlum leh nghal in maw ?? A hmeichhe hmangaih chuan a fa a pai mek tiin min hrilh anih kha ? Luke, eng vang a in ti hlum nge i nih ? Khawngaih in min tanpui hram la i u hnenah khan keimah vanga inthen kan nih loh thu leh keimah vanga in ti hlum i nih loh Zia hi lo hrilh hre hram teh aw...


Devin_ an hnehsawh leh hmusit tak a min tih dan zawng zawng kha ka ngaihtuah kir a ka na vawng vawng mai a . Mahse ka huat phah thei chuang silo. Thu dik a hriat loh vang leh thil a hriat sual vang mai ah ka la puh talh a . Thu dik chu ka la hrilh fiah theih mai ka la in beisei fan ani . Tih dan tur vel ngaihtuah kual in ka rilru chua vak thui nasa kher mai a.


Ka thinlung min tih nat sak a min phatsan vanga ka thinrim a ka huat ngawih ngawih lai khan Luke chu amah leh mah a lo in ti hlum reng a lo nih chu . Mak ka ti in min thawng em em a , mahse Devin-an min tih natna hi a nat em vang in ka rilru a luah lo zawk ani . Thenna thu min hrilh laia a hmel lan dan te kha ka ngaihtuah let leh ,"Luke , eng vang nge ? Mawh eng vang nge i u bulah dawt i hrilh ? I damlai khan kha ti khawp khan min ti na a , i boral hnuah leh zel i dawt thu vang khan ka la na chhunzawm zel dawn em ni ?? Eng vang nge? Mawh eng vang nge ??" tiin ka phun mawlh mawlh a .


#####################


DEVIN :

Ka zu no chu ka tlak pawp a ,mi a ang mai chuan ka inchhung khawk rawih rawih khawp chuan ka nui ta hawk hawk a . Zampuii rilru na tawp khawk hmel leh a bianga mittui luang kha ka mitthla ah a lo lang nawn leh a ka thaw kawk a , hlim a hnek in min ti na tlat thung si. Ka duh leh tum ber Luke phuba chu ka la a ka va hlim chuang silo ve . " Luke, i phuba chu ka la tawh e . I hmeichhe hmangaih em em chu i tawrh ang ka rawn tuar tir ve ta e." tiin ka phun mawlh mawlh a .


Ka khum zau tak khum phah nichin maia Zampuii nen kan tal chuar chu ka melh tlawk tlawk a . A hmeltha tak leh a pian nalh tak te kha ka suangtuahna ata ka paih bo thei mai lo ..ka hnuai a a awm lai a a ngik feih feih leh a rum halh halh thawm te chu ka beng ah a ri awn awn reng a , "Tawp rawh ,Devin. I nau phuba chu i la tawh a lawm ,hlim la lawm la in ti harh rawh " tiin ka in fuih mawlh mawlh a .


Miriami chu ka call ta a ,"Miriam, Luke phuba chu ka la tawh a sin." ka ti halh a.


A thaw hak a, " I phuba chuan a ti hlim che em ? I thil tum i ti hlawhtling anih chuan lawm hle tur i nih lai in i awka ah chuan lawmna ka va hre lo ve a ..Devin, zu kha in lo la mu hahdam rawh. Naktuk ah ka rawn hmu ang che ." a ti a phone chu a dah ta hmak a .


Mal ngawih ngawih leh ruak huai hian ka in hria a . Luke rilru hah mangan lai a a tawrhna te chu zu hriatthiam pui ta riau hian ka in hria a . Tu emaw tal chu ka kiang hnai ah hian awm ni se ka ti riru ngawih ngawih a . Mipa ve si eng tik lai tang khan nge he ti khawp a rilru no hi ka lo put hman tiin ka han in fuih leh rih thin . " Luke ,nang tal chu ka bul ah awm la ka va ti em ." tia phun sup in zu chu ka lem leh khalh a . Unau pawh neilo mal taka min siamtu Zampuii huatna chuan ka rilru a rawn luah thar leh a ,ka hremna kha a tan a la nep mah mah lo maw ??

Zu chu ka in thlit leh a , tawrh harsa khawp a ka thinlung vawt lutuk tih lum nan chuan ka lem nghal pawp a , "Mission accomplished ! Devin, i mission chu i zo fel ta ! Hlim la nui rawh . Tunah chuan zalen takin nun bul i tan thar thei ta a lawm." tiin ka in be mawlh mawlh a

🧚🧚🧚🧚🧚🧚🧚🧚🧚🧚🧚🧚🧚🧚
HMUN AWL :

He khawvelah hian kumhlun tur engmah reng a awm lo..harsat manganna i tawh thinte pawh kha an kumhlun dawn lo __ an liam anga an ral leh mai dawn 💞💞💞



Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » April 25th, 2021, 8:16 pm

CHAPTER : 8


ZAMPUII :

Thu dik hrilhfiah tum in vawi tam tak Devin chu ka call a ,min chhang duh lo. Ka rilru na chu ka han thaw leh hawk ringawt thin a ,a sawt silo. A tuk chuan amah hmuh tum in vawi thum ngawt a in ah ka va kal a, a awmlo zel bawk si ka bei hi a dawng ngawih ngawih ani . Ka vawi thum kalna ah chuan a lo haw hun nghak in a gate bul step ah chuan thu in ka lo nghak tawp a . Ka hmuh ngei a ngai ani ,thu dik engkim hi a hriat fiah loh chuan min huat hlen phah mai ka hlau ani.


Darkar eng emaw zat ka nghah hnu chuan ka lam pana a car rawn tlan ka hmuh chuan ka thaw huai a ,ka ding chhuak vat a ka pan nghal ruak a . A car chu ti ding in a rawn chhuak a min rawn melh rum ul mai a , " Enge kha tah i tih a ?" a ti vawt ruih a .


" Ka lo nghak che ani. Khawngaih in ka thu sawi min ngaihthlak sak hram rawh." tiin a kutah chuan ka vuan tawk tawk a .


" Min kal san rawh..nang nen engmah sawi dun tur kan nei lo. Tunah chuan hei Miriami nen hian inneih kan tum a ,sawmna card pawh pathum lai ka rawn thawn thei ang che _ i duh phawt chuan ." nunrawng tak hian min tih khum sak a . Dimdawina tel hauh lo chuan ka vawnna kut chu a theh sawn lawp a .


" Dawt i sawi ani . Min tih nat i duh vanga sawi i ni ti raw.." mittui tla zawih zawih chuan ka ti a .

" Miriam, rawn chhuak la Zampuii nen hian ka lo in hmelhriat tir ang che u." tiin a car atang chuan Miriami chu a rawn kai chhuak a . " Hei ka nupui hual Miriami anih hi." tiin ka hmuh lai ngei mai chuan a hmui ah a fawp ta a. Ka va han na ngawih ngawih tak em .Ka hmai ka hup a ka tlan sawn ta chawn chawn a . Za em em hian min la rawn nuihsawh zui a.


Ka tuar chhuak zo dawn em ni ? He ti khawp a thinlung na tawrh ai chuan thih daih mai ka duh zawk ani. Ka mittui vang in ka khaw hmuh te chu a phe ruai a ,tu tu emaw chu ka su phei nawk nawk tih chu ka in hre chiang khawp mai. Ka rilru hi a na em a , mi in min rawn vaw thlu tawp pawh nise ka hrechang pawn ka in ring lo ani.


Eng tin nge in ka thlen pawh ka hre lo ,ka khumah chuan ka bawk thlawp a lukham ah hmai phum in ka tap ta hlawp hlawp a. Hmangaihna kawngah hian mi vanduai ber chu ka va ni em ! Devin khan Miriami chungchangah khan dawt min hrilh a niang. Inneih an tum hauh lo ang. Min tih nat a duh vang in dawt a sawi ani. Eng tih mah hi ka phur hlawl lo ..thih a hahchawlh veng veng chu ka chak ber ani.


Harsa ka tih lai ber chu ka nu laka ka rilru natna zep hi ani. Kei ai ai in a lo la na leh zawk dawn si a engmah hriat tir loh chu ka tum ber ani . Thinlung na ngawih ngawih thup nan a za ber anga nuih hawk hawk te a ngai thin hi harsa ka va ti ber em . Min hmangaihtu ka nu ka tih mangan loh nan chu chu ka tih a ngai bawk si.


Damien hnenah chuan a zep theih loh ka nun dan engkim hi a chik in ka mitmeng a eng emaw diklo chhete lo awm pawh a hmu thiam nghal zel mai si a zep buai a theih loh hul hual ani. Ka hrilh tirh chuan a ngawi hmak a ,nuamlo ka ti letling zawk ani. " I chawh..i tan a thalo ang tiin ka hrilh mawlh mawlh che a ka thu i zawmlo anih kha' tiin min an khum ta se ka awm a ti nuam zawk in ka ring ani.


" Ngawi reng lo khan eng emaw tal i sawi ve ka ring a sin ." ka ti a .

" Ka hriatthiam pui che a ,ka sawi pui che chuan i rilru na leh no kha a ti zual mai zawk ang . Engmah thlenglo ang in awm zawk ang. " a ti hmiah a .

Mahni in thiam lohna a khat chuan ka thu ngawi ran a . Tunah hian Sherlocks Holmes ka mamawh ani _ Luke in tih hlum chhan min chhui chhuah sak tur in . Eng vanga a u hnenah ka then anga a sawi mai le ? A mah zawk in a fa paitu a hmeichhe hmangaih hnen ah min kalsan zawk ani sia ...he thil ah hian keimah zawk hi a tuartu zawk ka ni a sin.


Luke kha keimah vanga in ti hlum ani lo tih ka chiang a ,Pathian pawn a hre vek ani. A bialnu thar zawk vang kha ani hrim hrim ang. A fa a pai emaw a tih kha midang fa alo ni leh zawk si anga a rilru na a in ti hlum ta ani zawk ang tih ka ngaihtuah chhuak a chu thu chu Devin ka hrilh ngei a ngai ani .

Devin lakah hian ka va tlawm vawng vawng tak em ! Huat a inchhuan khum ve chu ka duh a , mahse ka duhna chu ka puitlin zo leh silo . Keima duh dan pawn ka awm thei lova ka feelings lah ka thunun zo hek lo .


Ka thoh ve leh Devin in lam pan in ka tlan nghal a ,a door bell chu ka hmet chiau vawr vawr a . Tho phang tih hriat tak a sam thur phang hian a rawn hawng a , a sam thur te chuan a hmel chu a ti lang tha in a ti lang pa zawk hian ka lo hria a . A hmel ka hmuh chuan ka ngaih zia leh a kuah ka chak zia chu ka in hre thar uarh uarh a ." Khawngaih in kal bo teh." a ti hmuk a .


" Khawngaih in ka thu sawi hi min ngaihthlak sak hram teh ,Devin. "


" Nang nen hian sawi dun tur kan nei lo . Kan in kar hi a tawp vek tawh. I dawt thu hmang khan min thlem lungawi chu tum duh suh i thei chuanglo ang. A tir te atang khan Luke phuba lak ka duh vanga ngaizawng der che ka ni a ,i lakah hian feelings engmah ka nei lo." hmel vawt leh nelawmlo uluk tak chuan a ti a.

" Luke khan bialnu dang a neih vanga min then ani a sin. A bialnu chuan a fa a pai mek tiin min hrilh a ..."

" A TAWK ! Ka nau hming hi i hmui anchhe dawng khan lam ri tawh suh !" tiin kawngkhar chu min khar hnan thuai a .


Mittui tla zawih zawih in kawngkhar chu ka chum dawt dawt a, " Devin, khawngaih in min ngaithla teh. Luke kha ka hmangaih thin a sin. Keimah vanga thi ani lo tih Pathian pawn a hria ...Devin..khawngaih in..." tiin kawngkhar bulah chuan ka thu hnawk a .Devin ka hmangaih lutuk hi ka inhua a , a lakah ka tlawm ngawih ngawih hi ka in dem tak zet bawk . Ka rilru hi ka thunun zo silo a , ka duh leh tum ang pawn ka awm theilo anih hi .


££££££££££___££££££££££

DEVIN :

Zampuii mitmeng a tawrhna lo lang chu hmuh nuam ka ti thei thlawt lo. A hmel ka hmuh reng chuan ka in sum zo lovin ka kuah chawt duh dawn tih ka Chian em avang in kawngkhar chu ka khar hnan hmak a . Kawngkhar ngheng chuan ka ding vang vang a ka thaw hawk a. Enga ti nge ka nat em em ni ? Amah tih nat hi ka tum ber kha a ni si a lawm tur ka ni lo em ni ?


" Devin, Luke kha keimah vanga thi ani lo . Eng tik hunah emaw chuan thu dik chu hriattir in i la awm ngei ka beisei." ti a Zampuii au ri chu hriat loh der a har ngang mai . Ka beng hup chung in ka pindan lam ah ka tlan chho ta ngawt a.


Luke ngei in Zampuii nen an inthen vanga rilru na anih thu min hrilh a ,Zampuii sawi dan nen chuan a hran daih thung si. Hmeichhe dawt sawi thiam leh lemchan thiam tak chu a ni chiang ani . Amah vanga mi dang in nunna an Chan chu inthiamlohna chhete mah nei lovin pawi sawilo leh thiamlohna nei lo ang in ala in ngai thei cheu chu a nia . Hmeichhe hlauhawm tak chu ani chiang ani.


Ka in bual fai a office kal tur chuan ka in siam sawk sawk a hotel a tukthuan ei mai rilruk chung chuan ka chhuak ta a . Kawngkhar ka hawn chiah chuan Zampuii kawngka bula lo la thu reng ka hmuh chuan ka thawk a chawl deuh duk a . " Khawngaih thlak tak anga lan kha nuam i ti em ni ? Mahni in dahsanna pawh i nei hlawl lo em ni ?" keima hriat tham lek chuan ka ti sup a .


" Devin, minute rei lo te hun min pe teh...khawngaih in " tiin a rawn ding chhuak a .


" Kal bo rawh. " ka ti hluk a , ka car ah lut in ka tlansan ta nghal a . Min la rawn um zui ani tih ka hmuh chuan ka rilru chu ana vin tuk mai a . Ka car chu tih din a va kuah beh thlawp mai chu ka duh ut ut a . Amah vang in Luke kha a boral tih ka ngaihtuah chhuah leh rual rual chuan ka lu chu thing nawk in ka tlan chak sauh a . Ka hmuh phak tawh loh hnu chuan ka thaw huai a , ka rilru na lutuk tih zia awm tum chuan steering wheel ka vawn lohna lam kut chuan ka awm chu ka chum dawt dawt a .


Chumi ni leng chuan hna thawh reng reng ka rilru ah a awm lova ka mood hi a off hnehsawh tawk ani. Tu emaw tak hian min ti thinrim deuh se in sual pui ka inpeih nghal tih ang vel kha ka ni . Office ban hun hma in ka chhuak a , basketball khel tur in ka in siam ta nghal a . Tu mah ti na chuang si lo in thinrim hrikthlak nan leh in bunruah nan infiamna hi thil tha tak ani tih ka hre tawh ani.


A la hma bawk a keimah chauh chuan tlan kual in ball chu ka khalh kual a ,ka thin tawt lutuk reh thak thleng in thlan ta zawih zawih in ka tlan a . Midang an rawn thlen ve meuh chuan ka zia hman hle tawh ani .

££££££££££££££££££££££


DAMIEN :

Kha Devil_a khan kum tam ka lo nghah leh ka lo hmangaih tawh chu a thianghlimna ti chhia in rilru na tak in a kal san vei maw ? Ka thinrim lutuk chu ka in pet ruh ngawt ngawt a . Zampuii lak ah pawh ka thinrim lek lek hial a . Mahse ka hmangaih vang hian min hmangaih let ve hi a ba kher lo ani tih ka ngaihtuah chhuah takah chuan ka dem leh ta lo a . Mahse kha Devil kha chu ka la khawih dawn khawp mai , Zampuii rilru a tih nat vang in . A mittui far khat ai ah vawi khat ka hnek zel ang .


Luke vang in kha ti khawp khan rilru na leh keh chhia in a awm a, tunah a dam tan mek a ani khan a rawn ti na nawn leh sak a. Chu pawh Luke thih chhan a a puh vang in . Eng vanga Luke thih chhan a rawn puh ve ngawt nge anih ? Luke khan Zampuii hi hnawl in rilru na tak in a siam zawk ani si a. A enga pawh chu ni se hemi te unau hi Zampuii tan hian hri tha lo tak a pumpelh ngei ngei ngai an nih hi. An unau in a rilru an tih nat sak a ,nun beidawng ngawih ngawih in an siam sak ani.


A office ah ka va len chilh ta a,min lo hmu chu dar a san uk duh chauh a . " Zampuiin a rawn tir che anih chuan i thu sawi ka ngaithla hman lo . Hna ka nghah lutuk min chhuah san leh nghal rawh." nelawmlo zet hian a lo ti nghal a .


A dawhkan hma chair ah chuan ka thu a rum zet a melh pah chuan ," A mittui i tih tlak man hi i la tuar ang ." ka ti vawt raih a .


Naupangchhe melh taka min rawn melh in a hmui chu a ner zauh a ," Luke thisen man a tuar thung ani." a ti nghut a .


" Hei hi hre rawh. Luke kha Zampuii vanga thi ani lo tih hi. I duh phawt chuan i nau thih chhan chu i chhui chhuah tir thei ang chu."


Thirim meng sen rum hian min rawn melh a ," Ka theh chhuah hma che hian ka office atang hian chhuak rawh, naupang!" a ti thawt a.

" Ka hlau bik lo che . Nang ang rilru chhe lutuk, hmeichhe awm nem zawk thinlung chu infiam nan a hmang a ti keh sawm tu hi mipa ti pawh a koh i phu lo. Devin ni lovin Devil dik tak i ni." a office chhung chu ni lo se ka hnek thal tawp duh ngei ang .


Za hauh lo hian a nui hul huk a , " I hmeichhe hmangaih i chan tak loh vang a rilru na in hrikthlakna tur zawng i ni lo maw." a ti a.

" I office ah nilo hmun fal ah in hmu ang."

" Naupang mai ila nih kha kal bo teh. I lo in rawlh loh pawh in buaina hi ka ngah tawk ani." a ti a .

Chutih lai chuan amah hmu duhtu inleng a neih tur thu an rawn hrilh takah chuan thinrim tawt up up chung in ka in thiarfihlim ta zawk a . Eng tik ah emaw chuan a fal in ka la hmu mawlh ang.Kei aiin a upa zawk ani mahna mahse naupangchhia mai ka nih loh zia hi hriattir ngei ka duh ani.


MIRIAM :

Ka rin loh leh beisei loh dan ber a Devin a chet takah chuan mak ka ti in ka hamhaih lutuk a ka khawng lo chauh chu a ni . Ka hmui ah tak a hmui lum thur thurin min rawn fawh chuan ka tiril a fan chhuak hneh kher mai . Ka lungphu chu thunun zawh rual loh in a phu dawt dawt a , min fawh chhung chu rei lo te chhung mah ni se ka tan chuan awmzia a va nei thui si em.

Min thlah hnu chuan ka pai deuh nawk a , ka lungphu thunun tum in muang chang hian thawk ka la raih raih a . Zampuii rilru na taka tlan sawn chu ka thlir zui tlawk tlawk a . Ka lainat in ka khawngaih tak zet ani . A hmeltha in a la naupang si a Devin te ang mipa lerh leh hmeichhe zia engkim hre chiang em em tu bumna lakah hian a in veng zo lo pawh hi ka dem lo .


Tlem a pangngai ka awh leh hnu chuan aw ka thian kharh a , " Devin , kha hmeichhe lainatawm tak kha ti na tawh suh. A tawk tawh em em e. " ka ti vawt raih a .


A mitmeng dum muk ruih chuan min rawn melh a , " Ti na tur in ka intiam a chhia hial ka chham tawh a , mahni inbum in ka thu tiam hi ka bawhchhe thei lo a ni ." a ti nguai ruih a .


" Amah chauh ni lovin nangmah pawh kha i in ti na tih hi pawm teh . Ka hre chiang tawk viau che in ka in hria a __ Devin, phat rual loh in hmangaihna khur ah i tla lut mek niin ka hria ." ka ti leh hram pek a.


Chiang zet hian min melh kawk a , " Chu zawng thleng suh se. " a ti hmuk a .

Nie Devin hi ka hrechiang ve thawkhat chuan ka hria , Zampuii lakah phuba lak duh inti reng si hian a thinlungah nasa tak in hmun a luah tawh tih ka chiang ani . He phuba lakna hian namen lovin mi pahnihte thinlung hi a la ti kehchhe dawn anih hi . Devin te ang mipa luhlul leh mahni thu duh hi hi chu hrilh hrilh mah ila awmzia a awmlo nasa mai sia . Eng tiang pawn hrilh ila ama duh dan te bak in thil a ti ngai chuang lo .

Zampuii chan chu ka chanah ka han dah chhin vel a , a na ka ti tak zet a . Hmangaihna hian eng natna pawh a ti dam sawng sawng thei a . Mahse hmangaihna in a tih nat tawh tan chuan he khawvelah hian damdawi reng a awm tawh si lo. Khuarei nghah a tawrh tlawk tlawk ani tawh mai ani . Mahse khuarei chu maw rei tak ani __ rei tak .

*********



CHAPTER : 9

DEVIN :::::

Hmanhmawh hauh lo hian ka car chu ka khalh zal zal a, ruah a sur nasat em vang in kawng kal chil per hlau in ka khalh zawi reng bawk a . Ka hma lam a footpath a hmeichhe pakhat ruah sur hnuai a huh zawr vek a kal chu Zampuii ani tih ka hmuh chuan ka thin a phu nghal zawih zawih a . A bul ka thlen chuan ka car chu ka ti ding chawt a , " Mi a nu ,hritlang khawsik kai i duh anih loh chuan car chhungah hian lo lut rawh." ka ti khawl a.

Mak ti hmel tak chuan min rawn melh vai riai a , a mit khur te chu tla dek hian ka hmu a ka thinlung chu a khawih dawt mai a ." Hritlang khawsik pawh chu lo kai ni ta ila i tan a pawina a awm em ni ? I lawm zawk hle ang chu ti raw ?" a ti a .

" Rawn lut nghal rawh.!" ka ti tuarh a , meng val kal a min melh chung chuan a rawn lut ve ta mai bawk a .Kar eng emaw zat ka hmuh loh chhung hian a rihna te chu lo tla hniam in a lang te leh zual sawt hian a hriat a . Kuah a fawh mawlh mawlh mai duhna chuan min tur ut ut mai a , ka hmuh loh kar a ka ngaih zia te chu ka hrechhuak thar leh hnu hnawh a ." Kha in ha lum rawh." tiin ka jacket chu ka pe a." Tun lai ruah do hi a tha lo a sin." awka zaidam zawk chuan ka ti a .

" Ruah sur hnuai a ka kal chuan tu man ka mittui tla an hmu thei lova chuvanga do chu ka ni." a ti sap a.

" Mawl leh lutuk ! I damlo anga i thi mai anga sin."

Min melh ran a, " Dik tak chuan...min hmangaih ani ti raw ?? Ka nat hi i duh lo ani ti raw?" mittui luang ngiai ngiai chung chuan a ti a .

Ka nui chhuak hawk a , " I tawngvai ani lo maw ? Ka hmangaih lo che a ,ka nau phuba lak nan ka fiam kual mai che ani zawk . Fing ve deuh teh ,mi mawlnu." ka ti ta chiam a .

"Ka thinlung hian min hmangaih ani tiin min hrilh ani . "

" Thinlung khawngaihthlak leh thinlung dawthei i nei anih chu. Kei mah vanga rilru nat hmel taka i awm ka hmuh hian ka thil tum ka hlawhtling ani tih ka hre thei a ,chu chuan min ti hlim ani." ka ti vawt ruih a .

" Min tawrh tir hi i thil tum ber anih chuan i hlawhtling chiang bawk a , khawngaih tak in min tawrh tir hi ban san tawh teh."

A hmel pawh chu ka en ngam lo a , ding taka kawngpui chu melh in tuihawkte chu ka dai per chuai chuai a. " Mi aa ang mai a tawng hi bansan rawh. Hei in in chu kan thleng ta . Tui lum in in bual la in ti lum vat ang che . Chuti lo zawng i khua a sik mai ang ." tiin car kawngkhar chu ka hawn sak a .

" Devin, ka hmangaih tak zet che a sin.Luke kha keimah vanga thi ani lo tih hi ring hram teh."

" Chhuak rawh!"

A chhuah hnu chuan a thutna la huh dap chu ka thlir tlawk tlawk a ," Lalpa !" tiin ka rum kawk a . In lam pan chuan ka in khalh haw ta nghal a . In ka thlen ve leh zu um phawrh in ka in nghal pawp pawp a . Kha a mit khur tla dek leh a ruangam cher tak te kha ...keimah vang vek ani si. A nat rual khan keimah ka in ti na tel ani. Awle , mei hmang a infiam thin chu a in ti kang thin. A dik ani. Rui hnep khawp a in chu ka hahdamna ni mai hian ka hria a .

He hmeichhia hi ka hmangaih ani . Ka duhlo...Lalpa , khawngaih tak in he ka hmangaihna hi la let leh rawh. Ka hmangaih tur ani lo. Ka hmelma ,ka hrem tur ani a sin _ ka hmangaih tur ni lovin. A hmeichhe hmangaih leh a nunna la tu ka lo hmangaih chu Luke duh dan ani lo ang . Luke khan min ngaidam thei ngai lo ang . Ka thih ve hunah pawh eng tin nge Luke kha ka hmachhawn ngam ang ?

Ka thin tawt lutuk hrikthlak nan chuan ka te tuarh a ,ka zu um chu cement bang ah chuan ka vawm keh chuai a ,"Lalpa, he nu hmangaih hi ka dil ngai loh che kha ...a laka phuba ka lak theih nan min pui tur in ka dil thin che anih kha !" tiin chhuat ah thingthi in awrawl chhuah meuh in ka tap ta a.

A na ani ...a na lutuk..hei hi a lo ni maw hmangaihna chu ?? Luke , i nunna hial ilo la kha ka dem thin che a , tunah chuan ka hrethiam ta ..a lo na em ani. Miriami chu ka call ta ri ngawt a.

" Hello , Devin ?"

" Khawngaih in...lo kal teh...tunah ka mamawh che."


" Zu i in rui leh pek tawh ani maw ?"

" Khawngaih in..."

Zu um dang chu ka phawrh leh a , ka in thlit leh lai tak chuan Miriami chu a rawn thleng a . Ka zu no chu ka tlak pawp a ," Min nuihsawh rawh. Ka phu ani." ka ti bah nuai a .

Ka bulah lo thu ve in " Eng thil nge thleng a ?" a ti dam diai a .


Ka lung zawn chu chum dawt dawt in, " He lai hi a na lutuk a , a puak keh mai dawn in ka hria. Ka thinlung na hi hre chang lek lova rui chhum hmawk tur in min pui rawh." ka ti chhum nuaih a.

Awka zaidam tak hian, " In bual harh phawt la a that ka ring. Duh aiin i rui mah mah tawh ani." a ti a .

" He thinlung ...vur khawn ang mai a vawt tih lum nan hian zu ka mamawh ani."

" In sum rawh ...khawngaih in."

Miriami chu ka kuah chawt a , " Kha hmeichhe lepchiah kha ka hmangaih ani. Hmangaih kha ka tum ngai lo asin. Khawngaih in he hmangaihna hi min nawh reh sak rawh. " tiin a awm ngheng chuan ka tap ta hlawp hlawp a. Hmangaihna hian mipa rilru sak ber pawh hmeichhia ang mai in a lo tah tir thei alo nih hi .

Hmangaih lo anga awm in ka in bum reng thei tawh lo . A chanchin eng kim ka ngaih ven in ka vei em em a , Damien nen an kal dun ka hmuh ringawt pawh in ka thik im na ka ti em em ani si a . He phuba lakna hian ken tel alo va ngah ve le ...hmangaihna , rilru natna , thinlung keh chhia , khakna , huatna leh in elsenn thleng in .

££££££££££££££££££££££

MIRIAM :::

Devin hnungzangah chuan beng thak thak in ka hnem ve mawlh mawlh a, ka han en chiang chu naupang chumchiap ang mai hian alo tap muhil der tawh hi alo ni a . Rilru na tak chuan ka thaw hak a ," I thinlung na nghilh thak khawp in muhil rawh aw." tiin sofa ah chuan ka han mut rem tir a .

A hmeltha tak chu ka en vawng vawng a , " Zampuii i hmangaih ani tih i pawm ta chu a hahdam thlak huai e ." ka ti sap a . A zu um vawm keh te chu ti fai in chhuat huh zuih te chu ka hru hul bawk a . A rawn harh hunah a riltam tak in tiin rawng ka lo bawl sak bawk a .

A rilru hrehawmna zawng zawng te chu chhawk theih ni se ka ti ngawih ngawih a ni. Hmeichhe pakhat vanga tah hi a in hmehlo hul hual ani. Nula duh duh thing thei leh hmangaihna awmzia teh chiam hre lova kawp lawr em em kha ani thin sia . Pathian thil ruat dan hi alo va mak tak ..kei in ani ka hmangaih em em a, a nin mi dang..ani leh kei hi min in hmangaih tir zawk mai awm...


" A tir pawn ka hrilh lawk vek che a ,nangmah ila in ti na ang ka ti lo em ni ? In in ti na tawn mai mai anih hi . Hmangaihna hian natna te , tawrhna leh mittui te a keng tel thin reng a sin ." tiin ka phun sap a .


Rawng ka bawl zawh chuan , " I ril atam chuan rawng ka bawl sa vek a ,i ei duh chuan lo ti lum ve mai rawh aw." tiin lehkha ka hnutchhiah a ka haw san ta a .

In chhunga awm pawh thaw a pik mai mai a ka hriat vang chuan haw tlang nghal ta lo chuan coffee dawr pakhat ah ka chawl a . Coffee no khat lam in muangchang chuan kani hlek hlek a . Ka rilru chu a tawt in Devin leh Zampuii chunhchang ringawt chuan ka rilru chu a uai rit nulh mai a . Dik tak chuan Devin hian a chapona dah tha in Zampuii hnenah ngaihdam dil in a hmangaih thu hrilh ta se Zampuii chuan alo ngaidam nasa mai dawn si a , engkim hi a fel vek ni mai tur . Mahse Devin te ang mipa chapo leh luhlul chuan a ti duh hauh in ka ring lo . Mahni in phah hniam ai chuan tawrh a thlang zawk ngei ang .


££££££££££££££££££££££

DEVIN :

Zing ka harh chuan ka lu na tluk tluk mai chu tawrh har ka ti kher mai . Ka dangro lutuk leh tuihal huam huam ti reh tur chuan tui chu ka in khawlh khawlh a . Ka han in bual hnu pawh chuan ka la ni deuh ch$ in ka harh hlei thei tlat lo mai a . Nachhawkna ka hmawm hnu chuan zan lama Miriami rawng min bawl sak chu ka ti lum ta a .


Miriami chu ka call a ," Nizan ah rawng min lo bawl sak vek a ka lawm hle mai. " ka ti a .


A rawn nui ar ar a, " Teh chiam che chuan a ! Mi hran daih ang zia z*ng a lawmthu te min hrilh vel a . Thian tha te bulah lawmthu an sawi ngai em ni ? Nge hmangaihna a i tlak luh hnu hian ka hla ta sawt ?" a rawn ti a .


" Lawmthu ka hrilh ngai loh em che avang in ka rawn hrilh chhin che anih hi."

" Zampuii bulah chuan i hmangaih thu chu i hrilh tawh em ? A ni lah in a hmangaih em em che a ,i hmangaih thu i hrilh chuan engkim a fel thluam mai ang ." a ti a.


Ka thaw hawk a ," Ni lo e...he hmangaihna hi a rawn par chhuah tak tak hma in ka hmet mit tur ani. Luke nunna laksak tu ani a , kan in hmangaih hi a thiang lo . Luke _a thlarau ka ti lunghnur lutuk ang ." ka ti a .


" Enteh Devin, Zampuii hi ka en thin a dawt sawi hmel a pu hian ka hre thei lo ani. Nula lepchiah leh leplerh niin ka hre hek lo ."


Ka rum nghut a ," A lemchan thiamna in a bum hneh em che anih chu . A pawi sawilo hmel phen ah hian eng mize mak nge in phumru tih chu Pathian chauh in a hria ang chu ."


" Rin har ka ti. A mitmeng tlang takah hian eng ze thup mah awm in ka hre lo . Mahni in hrem hi bansan la i hmangaih thu hi hrilh zawk mai rawh." thu tak fe hian a ti a.


Chu zawng van a rah ang ani . Ka hrilh hauh lo ang . A ni hmangaih hi ka tih tur ani lo , huat hi ka tih tur dik tak zawk chu ani . A ni nen inzawmna kan neih chhun chu PHUBA chiah kha ani . Hun a lo kal zel anga ka theihnghilh chhawm ve em em ang _ ka chiang ani . Mahse mi dang za chuang pawh tawng leh mahila amah anga ka rilru khawihtu hi an awm leh tawh chu ka ring lo ani. Ni e, ka nunah hian Zampuii dang an awm leh tawh lo ang. " A nih i mipa hmangaih ve thung kha ?" nuih suk pah chuan ka han ti a .


" Hmeichhe dang hmangaih a nei a , theihnghilh tur in ka rilru ka siam fel tawh. "


" Theihnghilh duh kan nei ve ve a , in pui tawn ila ?"


" Eng tin ?"


" Min nei duh ang em?"


" Eng a !? I tho aa chu a ni em lo maw ?"


" Innei mai ang ..."


" Fiamthu thawhna hun a nih loh hi . Nge nizan i zu in kha ila kai tha hle zawk ?"


Ka nui kiah kiah a ," Pasal a tan chuan min duh lo chiang hle mai maw ? La thu tak lutuk suh ka uang mai mai anih kha ." ka tih chuan Miriami chu a thaw deuh huai a .


" Mi dang hmangaih i nei tih hre reng chung chuan tuman an nei duh lo ang che, Vallungleng !" tiin a rawn nui awr awr a.


" Nang tluka min hre chiangtu leh min enkawl thei hi tu mah an awm ka ring lo ani . " thu tak deuh hian ka han ti a .


" Awi...awi...Partinlawr, i best friend tal hi chu zuah teh." tiin hlim tih hriat tak hian a nui ri ar ar a .

🧚🧚🧚🧚🧚🧚🧚

HMUN AWL :

A tawi in ti thei sia ...chapter 9 ka rawn bonus tel. A sei deuh tawh ka beisei ...ahhh...tawi in la ti tho ang _ ka hria . Kei pawh ka chhiar hrat tak tak lai chuan maw ka tan lehkhabu chhah lua a awmlo . Thawnthubu sawi chuan ka thiannu Zampuii kha ka hre chhuak thin...fb te hi khawih ve tak ang maw ...

Cyclostyle hun lai a lehkhabu sei et ut , a bul leh tawp pawh awm lo..chhiar pawh chhiar hleih theih mang loh khawp a tet hrup leh a laia bung lek lek tawh te kha kan in hawh chhawn tir luai luai zel a ....

Kha tih hun lai khan Ruati Fanai hian Peter Andre kha atchilh hneh thei thin...'Mysterious Girl' kha tenawm khawp in a duh thin in ka hria 🤣🤣

Thian zaho awm khawm te kha mipa hmeltha leh bialpa kha chu a ri lo ve chiang thin . Thawnthubu ngaihnawm leh kan chhiar thar te kha kan in share tawn thin a . Ruati a'n tawng tak tak kha chuan tawngna hun kan chang ve ngailo...a dak char char a...a thlun phelh ang par par kha ani tawh thin .🤣🤣🤣🤣🤣

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » April 25th, 2021, 8:17 pm

CHAPTER : 10

ZAMPUII :

Ka hritlang khawsik ser ser chan ka chaw ei chakna te ti bo in min ti zawi ngawih ngawih mai a . Damien lah in a lo la serious zek a ," In check up tir rawh." a ti deh chhen a .



Ka lu ka lo thin san mai a ,"Hritlang khawsik mai ania , hei hritlang damdawi ka ei bawk a a reh leh mai ang ." tih pah chuan kan hahchhiau leh thawt a . " Tun lai boruak in a ken tel ve mai a lawm.
Hmanni ka ruah do vang vek kha a ni ." ka ti nai nai a .


" I mitmeng kha a chau sia ka ngaih i ti nuam thei lo reng reng "


" Awle...awle..ka pu."


" Tlaiah ka rawn sawm ang che ...ka pa clinic ah."


" I pa bulah kher chuan nuam lo e...i bialnu emaw min ti a min fiam ziah leh nghal."


Damien chu a nui nasa ngang mai a ," Aw ...a monu atan a duh che tihna ani mai lawm. Ka pa mo nih chu i duh em ?" a ti fiam hlut a.

" I chhe mai e a." ka ti hlak a .


Chu mi tlai chuan ruah a tlak reng vang in clinic a kal pawh chu thulh leh mai ka duh a, mahse Damien ber in min nghak run tawh bawk si. Peih lo rilru tak chung chuan ka in siam ta tho a . A hma lam kan nih vang chuan nghah rei vak pawh ngai lovin ka in entir hun a thleng ta thuai a .


Damien pa chuan min lo nuih suk a," I eng nge i sawi sel ve a ?" a lo ti dam thluam a .


" Ka hritlang hi ...ka khua te a ti sik a ,ka chaw ei te a ti tui lo a...Chaw ka ngaihtuah ringawt pawh in ka luak a chhuak tlat zel a ."


Min han thlek vang vang a , " Lu hai leh luak chhuak te i nei thin em ?" a ti a.


" Aw..."

" A nih leh i period hnuhnung ber i la hre thei em ?"

Ka phu zawk a , ka lu te chu hai muai muai in ka ti deuh nghulh mai a. Aw..Lalpa, ka rai thei lo ang ..ka thin chu a phu dup dup mai a .

" I zun va test la min rawn hmu leh dawn nia..saw lai saw toilet ania. " tiin pregnancy test kit chu min pe in in thiarna chu min kawh hmuh a ,kit hman dan tur te chu min hrilh mawlh mawlh a . Hreh zet chuan ka la a ka kal sawn ta a .


A awmzia hre thiam ve hek lo ka test zawh chuan ka va hmuh tir leh a ," Awle, phat rual loh in i rai anih hi." tiin a thaw halh a. Damdawi ei tur min ziah sak mawlh mawlh a ." I in enkawl tha hle dawn nia ." tiin min chah zui a . Eng eng emaw chu a sawi mawlh mawlh a ,ka lu rit lutuk leh ka rilru buai nuaih vang chuan enge a sawi ber pawh ka hre tawh lo.

Eng mah pawh sawi lo in mi aa ang mai hian ka ding hluai a ka chhuak ta a. Damien chuan min lo kuah vat a ," I tha em ?" ngaihtuah tih hriat tak chuan min lo ti nghal vat a.

Ka lu ka thing nawk nawk a , "Min be hrih suh..ka a mai dawn in ka hria." ka ti hlur a .

Ka damdawi lehkha chu la in damdawi min chawh te chu a lei nghal zung zung a . Car a kan thut luh hnu chuan ka hmai hup in ka tap ta hlawp hlawp a . Damien chuan min rawn kuah in min hnem malh malh a .


" Damien, min hua a min hmusit em em tu fa hi ka pai thei lo ang . " tiin ka tah chhun zawm leh nghal a . Ka rilru chu a na in a puak keh nawn awn awn anih ber mai hi . Devin hnenah a fa ka pai thu hrilh ta ila min hmusit in min huat zual phah sauh dawn tih ka hre chiang si . Eng tin nge ka awm zel dawn pawh ka hre lo ..


Damien chu a thaw hawk a , "Rilru fim put tum hram rawh aw. Devin hnenah chuan a fa i pai thu i hrilh chuan a rilru pawh a lo danglam mai thei a sin." tiin ka sam chu a chul hliau hliau a .

" Min hmuhsitna ti zual tur in maw ? Nilo, ani hrilh ai chuan tih tlak pawh ka duh zawk." uar fe hian ka ti a .


Chiang em em chuan min melh tlawk tlawk a ," Nau tih thlak chu sawi pawh sawi ri suh . Tual thah nen eng nge danglamna a neih ?? " a ti halh a .

" Ka hre lo . Ka buai nuaih mai. Eng rilru mumal mah ka pu thei lo. Ka aa mai dawn in ka hria." ka ti mawlh mawlh a. Ka nu hnenah pawh eng tin nge ka sawi tak ang ? Ka thiam loh vek ani hmangaih loh tur ka lo hmangaih hi a pawi ta ber chu ani . Thawk la ham ham in ka mittui chu ka hru hul a ," Ka nu hnenah engmah hriattir ka duh hrih lo ania aw." ka ti sap a .


" Aw. Ka hrethiam e. Ka puihna i mamawh anih phawt chuan eng tik lai pawn i tan ka awm reng ania aw." thu tak zet hian a ti a . " Mahse hei chiah hi min tiam rawh _ naute hi i ti tla lo ang tih hi. " tiin ka mit ah tak chuan min melh ngar a .


" Ka tawng ve mai mai anih kha . Nau tih thlak te chu ka ngam teuh lo mai ."


" Ka rilru i ti hahdam huai mai. I tilru a mangang in a hah hle ani thei ,mahse thil thalo tih tumna rilru pu lo la ka duh ani . Harsatna leh manganna hian min awm chilh reng ngai lo kian hun a nei thin tih ka chhiar tawh a sin ." tiin a theih tawk chuan min tawng thlamuan a tum ve ngial a .


In kan thlen hnu pawh chuan Damien chuan min la awmpui reng a , thil tha lo ka tih a hlau anga min veng ni ber hian ka hria a . Ka rilru mangang leh hah lutuk chu khum bulah thingthi in Pathian hnenah ka tawngtai ta ngawt a ,ka thawl hawk phah pawn ka hre chuang lo.


Kan thian then khat nau ti tla ka hriat te khan ka dem ngawih ngawih thin a , tunah chuan eng vanga ti tla nge an nih tih chu zu hriatthiam pui ta in ka in hria . Nau tih tlak hi ka support ani lo , tih tlak duh hialna thinlung an put chhan leh an rilru mangan beidawn dan tur chu ka feel pui tak meuh ani .

Ka chungah eng thil pawh thleng se ka fa hi chu pai puitlin ka tum ani . Pa nei lovin ka seilian a ka fa lo piang tur pawh ka hniak hnung zui in pa neilo in a rawn piang chhuak ve dawn chu a ni si . Ka rilru na lutuk chu khum bawh in ka tap leh rih a .

Ka nu pawh in harsa em em chung in min pai puitling thei a , kei innghahna leh rinchhan tur nu tha tak nei hian ka fa chu ka ti tla hauh lo ang . Min pai laia ka nu rilru nat dan tur leh mangan dan tur ka ngaihtuah chuan ka khawngaih leh hnuhnawh thar ta vel a .

££££££££££££££££££££££


DAMIEN :

Chu mi tlai chu Zampuii te in ah chaw ka ei ve nghal a , a nu in thil diklo a awm tih a hriat loh nan fiamthu te thawh in ka nuih pui hawk hawk reng a . A langah nui hawk hawk mahila ka chhungril chu a na ngawih ngawih thung si ani. Ka hmeichhe hmangaih ber chuan mipa dang fa a pai ta chu ani a ..a nat dan chu ril ngaih ngaih tak ani .

Ka haw dawn chuan Zampuii hnenah chuan ," In enkawl tha nasa ang che aw. I rilru a hrehawm zual a i muhil theilo anih pawh in min rawn call mai dawn nia ." tiin ka chah mawlh mawlh a .

Ka haw tlai ang reng sia thawm dim thei ang ber in ka room lam ka pan tham tham a . Ka nun leh pa te room ka kal pelh lai chuan ka hming an sawi rik ka hriat avang chuan ka ding chat a an tawng chu chik zawk in ka nhaithla ru ta a.


Ka pa chuan , " Dawt ka sawi lo. Vawiin ah pawh ka clinic ah an rawn kal dun a lawm." ati a .

" Eng mah hria ang in lo awm miah suh ang che . Bawiha hian hrilh tul a tih hunah min hrilh mai ang ." ka nu chuan a ti a .

" Tu hmel kan hmu dawn chu ani ve ta der mai si a ..ka phur lutuk hi ka lam lo chauh anih hi." tiin ka pa chu a nui huah huah a .

Ka pa thu sawi ka hriat chuan ka nghing dawt a , dim thei ang ber in ka room lam ka pan ta a . Khumah chuan ka thu hnawk a ,ka thaw kawk kawk a . Ni e, Devil_a fa ni lovin ka fa ni zawk se ka ti ngawih ngawih ani. Kha pa ai kha chuan a hmangaihna pawh ka phu zawk a sin . Ka pa lah in ka fa emaw tiin a lo lawm ve em em mai si a ,ka fa anih loh thu hrilh chu ka huphurh ru ang reng hle ani.

Ka hmangaih em vang hian ka nupui ni in ka ta ni se ka ti a . Mahse a rilru na hmel leh a mitmeng ngui riai mai ka hmuh hi chuan Devil hi nei in hlim tak in awm se ka ti bawk si ..ka in hrethiam bik tawh lo . Amah vang hian rilru na ka tuar hnem tawh lutuk a eng ang pawn awm se ka tuar dam thei in ka pawm zam thei vek tawh zawk mai thei ani. Ka hmangaih vang hian min hmangaih let hi a ba kher lo nachung in Devil-a tan hian ka phal bik bawk silo . He khawvelah hian hremhmun ka tem lawk reng bik anih hi . Chhan let loh hmangaihna hi alo na ngang ngang em ani .


£££££££££££££££££££££

ZAMPUII :

Zan khua in mu thei lo in ka in let tlaivar thak ani ber mai . Ka rilru a hah in kg sang tam tak hian min uai rit nulh ni ber hian ka hria a . A fa ka pai lo chung pawh khan min hmusit in min elsen tawh teh reng nen a fa ka pai thu a hriat hunah phei chuan eng tin tak min hmusit ang maw ? Chawh min ti in a lawm ngawt ang chu _ min tawrh tir kha a thil tum ber ani si a .


Min hmusit ani tih hre reng chung hian ka ngai in ka hmu chak ngawih ngawih reng tho si a . A hmeltha pa tak kha vawi khat tal hmuh leh ka chak ani nupui a neih hma ngei in . Enga tinge he ti em em a Devin lakah hian ka tlawm in ka zawr le ? Ka hmangaih em ani . Tih tauh khum in lo induh khum ve ta ngawt ila vawi khat pawh rawn hawi kir lo in min kalsan hmak thei tih ka chiang si a , chu chu ngai ngam lovin ka in dahsang ngam thlawt lo ani ber mai .


Ka hritlang te a ziaawm deuh hnu chuan college pawh ka kal chhun zawm leh mai a. Thiante nen chhun ah thil ei in kan chhuak ho a , Devin leh Miriami hlim hmel taka rawn kal ka hmuh chuan ka na ngawih ngawih a, tah chhuah vak mai chakna chuan min rawn tur ut ut mai a. Mahse ,hlim taka a awm lai hian a mit hmuh ah khawngaihthlak tak ang in ka lang bik tur ani lo tiin ka in pet ruh a . Fiamthu thawh in eng thawk hmel zet hian ka nui lui hawk hawk a . Thiante pawh chuan rawn chhun zawm in fiamthu eng eng emaw nuihzatthlak tak tak hi an rawn thawh a kan nui ta bawk bawk a .


Eng vanga tuna taka an ni pahnih hi hmu nge ka nih ? Min rawn thlithlai tura rawn kal ani hrim hrim ang . Ni dang ah pawh kan chawlhna dawrah hian Devin a chawl ngai tawp lo . Min rawn thlithlai anih ngat chuan a hmuh ah hian ka tap bik reng lo ang . Ka thiannu fiamthu thawh chu uar uchuak tak leh za awm em em hian ka nuihpui chiam a .

££££££££££££££££££££££


DEVIN :

Zampuii leh a thiante za em em a nui bawk bawk ka hmuh chuan ka ding chawt a . He hmeichhia hian hlim hi a phu reng em ? Rilru na a tap tlawk tlawk tur ani lo em ni ? Ka la ti na tawk lo tihna em ni ? Ka tel lova hlim taka a nui thei chuan min ti na a ni . A nui hmel ni lovin a bianga mittui luang lai alawm ka hmuh duh . Hlim a phu lova nui hmel put hi a phu hek lo. Luke ang khan tap a indawm kun tlawk tlawk tur ani a sin .


Ka va pan ding nghal chat a , a bulah va ding in ," I hlim hle mai maw ? " ka va ti ri ngawt a .


Min rawn hmu chu a meng bial kal a , rawn tho chhuak vat in a thiante hlat lam ah chuan min kai phei dawt dawt a, tha te te chuan ka zui ve mai a . " Ka thiante bula ka nuih chu a thiang lo em ni ?" tiin min melh kal a.

Luke kha amah vang in a thi a , amah vang in rilru hrehawm in ka awm bawk a. Chitih lai chuan a lo hlim bik ang maw ? A teuh lo mai . Ka in sang mar a ," Rilru na a mitmeng ngui tak a awm reng kha i phu ani . Hlim hi i phu ve thlawt lo." ka ti ta khawl a .


" Devin, min ti na tam tawk tawh . Min tih nat hi bansan rawh _ khawngaih in ." a ti ngui raih a .


" Luke ang in mahni nunna lak duh hial khawp a rilru natna thuk i la nei ve hlei nem. I la na tawk lo ani ." tiin a hmai bul set ah chuan ka bih hnai a , " Kha i mitmeng a lungngaihna thuk tak in phumru kha keimah vang ani em ? .I na ani ti raw ? A tha e, i nat kha a lawm ka duh ber chu. "

" Luke kha ka then lo tak tak a sin . Keimah vanga thi ani lo tih hi ring hram teh."


" Nang ang bum hmang ring duh tur khawp a mawl ah min ngai suh ." ka ti nghut a .

Ka kut ah chuan min rawn vuan a , " A nih leh i nun atang hian bo hlen kumkhua tur in min duh tak tak em ? Tlem te tal chuan min hmangaihna leh min ngaihsakna chu i nei ve chiang ti raw ?" tiin min melh tlawk tlawk a .


" Ni e, i ti dik. Ka ngaihven che ani . Eng tiang a na in nge ka tawrh tir che tih hriat tum in ka ngaihven reng che ani ." ka ti vawt ruih a .


" Ka lak ah chuan eng rilru pawh pu la kei chuan ka la hmangaih reng che ani ,Devin."

Tuar har ka va tih teh reng em ! Lalpa, rilru sak tak ka put reng theih nan min pui hram teh . Tunah te hian kuah nawk nawk a ,fawh ngawih ngawih mai ka va han chak teh reng em . Mahse a hmeltha tak leh khawngaih thla la tak anga a lan derna hi ka in hneh tir tur ani lo. Harsa ti tak chuan ka chil ka lem khawlh a ," Kei chuan ka hua che ani ." ka ti chhuak thei tawk a .

Min rawn kuah a , min hmangaih thu min hrilh ka beisei teh reng nen chutianga ti ta lo chuan a dar a san ak a , za lo zet a nui in ka mit ah tak chuan fiah zet hian min melh kal a , " Devin , min ti na tam tawk ta . Ka tuar hnem ta in tuar belh leh zel hi ka duh tawh lo ani . " a ti a.


Ka rin loh dan taka min chhan vang chuan ka nuih ringawt a a , " Ka la ti na tawk lo che anih hi..kha i thinlung kha min pe la ka lo nuai sawm vek ange . Hmeichhia chu bumna ngaiah vawi tam tak a bum nawn theih an tih kha ." elsen tak hian ka ti a .


" I luah duh loh tur thinlung chu hawng lo la , chhuah leh mai i duhna tur thimlung ah lut hek suh . Nunrawn lutuk hian nghawng tha a thlen hauh lo ang che . Eng tik hunah emaw chuan min ngaih hun ila nei anga chu tih hunah chuan i tan ka awm tawh lo ang . " tiin a in her hmak a , a mit a mittui tling pam chu thup tum mah se ka hmu hman tho ani .


" Chu zawng a thleng ngai lo ang ." tiin ka nuih zui nghek a .

******* *******

HMUN AWL :

Ti hian Zampuii chu a induh ve deuh tawh in ti em ?? In tih loh chuan Laltlansangi Khawlhring hau tawh mai r'u..🤣🤣🤣

Kan nulat lai khan...Diakkawn bazar bulah khuan Fazz-a hian Book Lending Library a siam thin a ...Lehkhabu chhiar kan duh si pawisa kan chi cut thei ve ropui sia...Awii ..kha tih laia Lalfazz-a han induh thin zia leh van san zia kha 🤣🤣 Ka ngaihtuah hian ka thin a rim thar tlat 🤣 Ka hmuh leh hmasak ber ah ka sik sawk ang mawle 🤣🤣 Fazz , i lehkhabu hlui ka rochun ho kha bu thum chiah ka nei tawh ( Shall We Tell The President , The Star Shine Down leh Mizo Pipute Sulhnu) _ a dang chu min hawhbo sak vek tawh!


Pasal ka neih hnuah man chawia lehkhabu hawh tir kha ka'n ti chho ve tan a ...ka va inchhir chiang tak ! Ka lehkhabu roh leh ngainat zawng zawng an hawh bo deuh vek a ..Ka sim chiang kher a sin .

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » April 25th, 2021, 8:17 pm

CHAPTER : 11

ZAMPUII :

" Naute chungchang chu i hrilh ta em ?"

Lu ka thing nak a ," Aih..ka hrilh duh lo. Hrilh loh kumkhua ka thlang zawk." mittui tling pam chuan ka ti a .


Damien chu a thaw halh a , "Naute pa anihna ang in naute chungchang hriat tir ve hi a dik a ni ." a ti a .


" Miriami nen an innei dawn a , an inneihna ti buai tur in ka hrilh duh lo . A fa ka pai lo chung pawh a ami hmuhsitna a nasat tawh nen belh chhah leh chu ka duh teuh lo mai."

" I fa hi pa neilo a pian tir i tum tihna em ni ?"

" Ka hre lo _ ka hre lo tak zet ."

Mit meng dum muk raih chuan min melh vang vang a ," Min nei mai rawh ,Zampui. I fa lo piang tur hi ka fa tak ang in ka pawm thlap anga ka hming ka pe ang ." a ti lawi rat a .


Mak ti lutuk chuan ka en hau a ." I ti tak tak thei lo ang ." ka ti sep a .


" Ka ti tak tak a lawm."


" Mahse ,i chhungte..."


" Ka nu leh pa pawh in ka fa i pai emaw an ti vek a sin ."

Mak ti tak hian ka melh ha a , " A ni maw !? " ka ti tawi tak a . Ka zak deuh bawk si chu ka bing mup mup mai a . "Mahse, enga ti nge ,Damien, ka lakah hian i that em em a ? Kei leh ka fa lo piang tur tan hian i nun pum leh i zalenna i hralh a ngai kher lo asin. Ka tan hian i tha in thil min tih sak hnem tawh lutuk mah mah ani." in thlahrung tak chuan ka ti a .


Min en vang vang a , " He tianga ka tih chhan hi i hrelo tak tak maw ?" a ti deuh hu a .


" Aw..ka hre lo."

" Ka hmangaih vang che a ti ka ni ."


" Eng maw ??!!" Ka ti hluai a . A thu sawi chu ka hre sual zawk nge ka bengchhe ri ?


" Aw...ka hmangaih che . Class IX kan nih atang khan ka hmangaih tawh che ani."

Vawiin ka thu hriat chu thil mak lawrkhawm hi ani ngawt a lawm le . Mak ti em em hian ka melh ta ngawt ngawt a . Pawl kua kan zir lai atang daih tawh khan maw ?? Chu vang chu em ni hmeichhia alo ngaihven loh em em thin ? Ka thaw hawk a...thil hi alo va hriat loh theih in mit hi alo va del thei ngai em . Kha tih chhung zawng khan ngawi reng in min lo hmangaih a , a lo tuar tlawk tlawk dawn alo nih chu. " Ka lo hre ngai miah lo a...." ka ti niah niah a .


"Min nei duh ang em,Zampui?"


Chhan ngaihna pawh hre lo in ka melh ngawih ngawih ri ngawt a . Diktak chuan ka hamhaih tak zet ani. Lawm tur nge thinrim tur ? Tah tur nge nuih tur tih pawh ka hre chang tawh lo .


" Mawh...khawngaih in min nei rawh..." tiin ka hma ah chuan a thingthi ta mai a .


Ka mittui chu a rawn hnam sawk a, " Kha ti khan awm suh _ khawngaih in . Min ti lai vek a lawm." ka ti tham tiak a.


" I mi chhanna ka hriat hma chuan ka thingthi reng mai ang ."


Dinhmun chhe theih tawp a ka din lai pawh a min iai lo tu lo hnar tur hian tu nge maw ka nih le ? Damien te ang mipa hmeltha leh fel hi ka phu hlawl lo ani. Mi dang fa pai reng chung hian min la iai chuang lo a nia...Mahse a mi sawmna hi lo pawm ta ila midang hmangaih reng chung hian a tan nupui tha tak ka ni thei dawn em ni ? "Damien, in ngaihtuahna hun min pe rawh...naktuk ah chhanna ka pe ang che ." ka ti ta ngawt a.


" Awle, ka lawm e. Min pawm ngei ka beisei tlat ani." tiin nalh zet hian a nui var var a.


Thu tlukna siam thiam har ka va ti tak . Devin hian nupui nei dawn pawh ni se thu tlukna ka siam hma in vawi khat chiah hmuh leh ka duh ani. Ka call chuan min chhang duh dawn chuang lo tih ka hre chiang em a ,hmu tur in ka va kal leh ta a.

Meng phelh phang hian kawngkhar min rawn hawn sak a," Eng thil nge ni a ?" a ti vawt ruih a. A hmel chu a nelawmlo in a hmeltha pa hliah hliah mai si a ...


" Nang hian min hmangaih lo tak zet em ?" ka ti deuh teh tawng a .


" Ka hmangaih lo che tih hi vawi eng zat nge hrilh i ngaih dawn ?" a ti kha fak mai a.


A tawngkam chhuak chuan min ti na ngawih ngawih mai ani. " Anih chuan...pasal dang nei ta ila pawi i ti lo tak tak ang maw ?" ka ti leh sep a.


Elsen zet hian min nuih a ," I duh leh a rual i pathum pawh nei la ka lakah awmzia a nei chuang lo ang . Kei pawn Miriami ka nei dawn tho a lawm. Kan in rul tawk ah ngai mai rawh." min tih khum sak a.

He pa lakah hian ka va tlawm chiang thin em. Ka hmangaih em avang in zah leh tlawm pawh dawn zo lo in ka pan ruak ruak a ni si a. Mahni in khawngaihna vang chuan ka mittui chu a rawn luang zung zung a. Ka mittui chu hru hul in ka in pet ruh a , awle , tunah chuan ka rilru ka siam fel ta . Damien chu ka nei ang . A fa pawh pai mah ila he Devin lam hi ka hawi tawh lo ang. Tun atang chuan ka nunhlui , Devin nen kan nunhlui chu leihnuai thuah thim tak hnuaiah hai chhuak leh ngai tawh lo tur in ka phum bo tawh dawn ani . Ka thei ang . Ka rilru chu na ngawih ngawih in ka mittui tla zawih zawih pawh nise ka thei tur ani . " Hlim tak in i nun i hmang tawh dawn nia. Tun chinah chuan i nun atang in ka bo hlen tawh anga i hma ah ka rawn in lan tawh lo ang .Ka rawn ti buai tawh lo ang che . Mahse , a tawp ber nan hei chauh hi ka ngen duh che ani __Luke kha keimah vanga thi ani lo tih hi min rin sak hram rawh aw." ka ti sep sep a. Rilru na vawng vawng chung chuan ka in her a ka kal sawn ta a.

Hun kal tawh leh liam tawh lam a let a siam that leh tum chu thil theih ani lo a , chu ai chuan hun lo la kal tur tan inpuahchah a in sawh ngheh hi a tul tak zet zawk tih ka chiang ta . Nunhlui , mangtha dam tak in le ..


Ka chhah luk a ni deuh muih hian ka in hria . Ka awmdan hrehawm lutuk ka tehkhin ber chu feet ruk hnuai lam lei chhungah phum bo a awma tanpui tu zawnga au tuarh tuarh a ka awrawl ri tuman min hriat sak silo ang vel hi ka ni .

#£££££££££££££££££££££


DEVIN :

Zampuii kal liam tur chu ka thlir zui vawng vawng a, va pawh her sawk a ," Min kalsan suh ,ka hmangaih che. Midang min neih san chuan ka thi mai ang" tia va kuah ngawih ngawih chu ka va chak si em . Mahse ka nau thattu a ni miau si a ,kan inkar ah hian daidanna bang chhah tak paltlang zawh rual loh a awm tlat si ani.


Ka mit chu chhing vang vang in ka thaw hawk a ," Nang leh kei hi in hmangaih tawn em em pawh ni ila he lei a awm dun lo tura Pathian ruat kan nih hi hrethiam ta che . Ka nau thattu i nihna hi eng tik ah mah ka theihnghilh in ka ngaidam ngai dawn si lo che a. Pathian in rem a tih chuan thlan thim piah lam ah emaw pian nawn lehna hi a awm ngai te anih chuan ka rawn pian nawn leh hunah zual zawk in ka la hmangaih ang che ." tiin ka keima hriat tham lek chuan ka phun sup sup a .

A kal liam hnu chuan ka tukhum thaklo pui chu ka hiat nawk nawk a . Ka theihnghilh thei ang ,ka tuar chhuak thei em em ang . Pathian hian kan tuar theih chin bak ai nasa min tuar tir ngai loh kha . Chuloah mipa ka ni a lawm eng aiah nge ka tuar theih loh teh lul ang ni ? Ka tuar zo ta nganglo anih tak leh ka thi mai ang .

*****************************

DAMIEN :

Zampuii hnen atanga call ka dawn chuan ka pick up rang kher mai . Phur sarh hian ,"Hello ?" ka ti nghal var a.


" Damien..."

" Aw...i chhanna ka hre thei tawh dawn em ?"

" Aw. Ka nei ang che . "


"Phone ka dah lawk anga ka rawn call leh nghal ang che." tiin phone chu ka dah a, hlim luat vang chuan " YES..! YESSSHH !!" tiin ka au tuarh tuarh a . Ka hlim luat ah ka thin te chu phu hlawp hlawp in a rawn pawk chhuak mai ang tih hlauhawm khawp in a phu nasa ani . Kum tam tak ka lo hmangaih leh ka lo nghah tawh chu a tawp a tawp ah chuan ka ta ani thei dawn ta ! Hei ngei hi anih hi ka tan a Pathian lo ruat chu .

Ka thinphu nasa lutuk a zia awm deuh hnu chuan Zampuii chu ka va call tha leh ta a. " Nichin khan enge i sawi kha ? Sawi nawn leh teh ." ka va ti tha leh a .


" Ka fa lo piang tur tan hian pa tha tak ni ang che aw." a ti sap sap a.


" Ka nupui nih chu i duh ta tihna em ni ?"

" Aw.."

" Ka lawm e..ka pian a hnu lam a ka hlim ber tum a la ni ang ." ka ti chul a .

Zampuii chu a thaw hak a ,"Mahse maw Damien,ka lakah hian i dawhtheih viau a ngai ang..Devin ka hmangaihna hi vawi leh khat ah a reh nghal mai thei dawn lo a ..." aw dam riai chuan a ti a .


A sawi zawh hma hma chuan, " Dawhthei tak in ka enkawl ang che . Kum tam tak chhung ka nghak tawh che a, ka la nghak leh thei cheu che a ni . Min hmangaih ngei theih nan ka theihtawp ka chhuah anga ka in hmangaih tir em em ang che tih ka tiam che ani . Kan fa lo piang tur tan pawh pa tha tak ka ni ngei ang ." ka ti nghal zung zung a .

Ka hlimna hi a sang lutuk a tuna ka awmdan hi America khaw mualpui nen pawn ka thleng phal lo ani . Ka phe sek a ka lam lo chauh hi ani ber in ka hria . Hlim luat vang hian thla neia thlawh theih nise chuan van sang takah hian ka leng phar nasa ngawt ta ve ang .

Ka nu leh pa hnenah chuan Zampuiin ka fa a pai thu leh nupui atan neih ka duh thu ka hrilh chuan an phur ngang mai a. Chawp leh chilh in palai an tir nghal rum rum a , in be rem in kan inneih hun leh ni chu an ruat nghal rum rum a .


Thil engkim thlen dan hi a rang teh thut lutuk a ka mumang ani anga ka thangharh leh palh ang tih ngawt ka hlau ani. Ka hmangaih ber chu ka ta anih pumhlum theih nan kar tlem te chauh in min dang ta .. Ni te chu a kal muang sawt ta riau hian ka hria a time machine neih a hun chu her danglam lawih mai ka va chak ber kher tak .

#####################

ZAMPUII :

Damien nen kan inneih hun tur an ruat fel meuh chuan thawveng hawk zawk awm tak ka nih lai in ka thaw a pik in ka huphurh ngawih ngawih a . Mahni in thiamlohna leh inthlahrunna chuan ka khat a , Damien nu leh pa chu ka bum ni a hriatna chuan min ti hrehawm em em bawk ani.

Damien hi ka tan a tha in a fel bawk sia a mi hmangaihna hi a hlu in a ropui a hmangaih let ve hi ka duh ani . Nie, hmangaih let ve tur in theih tawp ka chhuah anga ka la hmangaih thei em em ang . Theih nise Devin hi huat ngawih ngawih a , Damien hi hmangaih hluah hluah hi ka thlang a sin . Mahse kan duh duh chu kan va hmangaih in kan hmangaihna chu duh hun hun a tih tawp theih ani bawk si lo.

Pasal ka neih huna mo thian a hman ka lo tum ruk ka thian tha ber chu ka pasal tur a lo ni ta chu a ni mai sia ..nun in her dan hi a mak in hriatthiam a har anih hi . Ka nu lah in Damien ka nei tur chu a phur in a hlim em em mai a " Tunah chuan rilru hahdam tak in ka awm ve thei dawn ta anih hi . Mipa rin tlak leh puitling kut ah i awm dawn tawh bawk a ngaihngam tak in Damien kut ah ka hlan thei dawn che ani." a ti a.

" Min va ngaih loh hmel ! Pasal nei bo thuai thuai se min tih hmel e." ka ti a .

Hlim tak in ka nu chu a nui hawk hawk a ," Hmeichhia chuan nu te sulhnu an chhui duh an ti si a ...ka dinhmun ang kha rawn paltlang ve in rilru na reng reng in i hun i hman ral ve k hlau thin a . Tunah chuan chu ka hlauhthawnna chu a bo vek tawh a ka thawveng lo thei lo ani . Ka ngaih loh vang leh ui loh vang che ani lo. Ka ngai in ka ui em em che a,ka hmangaih em em che ani tih hi hre reng bawk ang che ." a ti malh malh a.

Ka nu hian a hlauhthawnna thlen dik teuh zia hi hria se chuan a phu zawk thei hial ang chu . Damien hi awm lo se chuan ka nu thil hlauhthawn ber chu a thleng dik ngei dawn sia...Damien lak ah hian bat ka va ngah tak em . Ka dam chhung pawn ka rul seng kher dawn em ni ?


Ka pum la thep zaih chu chul in ," Bawihte, i pa tan fa tha tak ni tur in rawn piang in rawn sei lian ang che aw . I pa ti hmingchhia a ti zak tu ni lovin i pa hming ti tha tu leh i pa chhuan em em nih tum tlat ang che aw . Kan nufa hian i pa lakah hian bat kan ngah teh mai ania ." tiin ka phun sep sep a .

Mihring hi hma lam pan a ke pen tur kan ni a . Kan nunhlui chu hun kal tawh ani a, hriat zui reng a tulna reng a awm lo . Theihnghilh hmak hi damdawi tha ber ani ...kan theih phawt chuan . Damien min puihna in ka nunhlui hriatreng tlak loh kha ka theihnghilh thei em em ang tih ka ring tlat ani . A tan nupui tha ber nih ka tum anga ka duat in ka ti vui vai ngai lo ang ...

Pasal ka han neih ve dawn takah chuan ka pa te lam pawh , a hminga ka pa anih miau vang in hrilh loh theih ni hek lo kan hrilh ve ta a . An lo phur in min rawn ngaihven em em ta mai a . Kan in pawh phah in kan in biak phah ta fo a . He inneihna hian pa leh fa in be ngai reng reng lo leh hmelhriatloh ang mai a awm thin te chu a zawm ta ani . Ka pa hian a fa ah min pawm in hnaih min lo chak em em thin a chance ka pek loh vang mai a min hnaih lo ani tih ka hre nawn thar awn awn a .

******************************

DEVIN :

Eng in nge min mawlh ka hre lo muhil thei lo in ka let chhen a,Luke chu ka ngai ngawih ngawih mai a . Muhil thei lo nen Luke roomah ka lut a a khumah chuan ka mu thlawp a . " Luke, i tha ang ti raw ,ka nau ? Tunah chuan natna reng reng in a tih buai phak lohna hmunah i awm tawh bawk a i hlim tawh ngei ang ." tiin ka phun sap sap a.


Ka ban ka vaina lam ah a khum hnuai a pawhdawh chu ka vai fuh a . Ka han enchiang vat a alo in kalh tlat mai a . Enge awm tih hriat chian chakna chuan min tur et et mai a . Screwdriver la chhuak in ka kar chhe ta a . A chhung ah chuan Luke sana , thlalak eng eng emaw ,thi leh phone a lo awm a . Phone chu ka la vat a , battery a awm tawh loh vang in a lo thi tawh a . Ka charge ta a ,ka charge chhung Chuan ka lo muhil ve ta mai bawk a .


A tuk ka harh rual rual chuan Luke phone chu ka ban nghal vat a . A lo in charged full pap tawh a . A phone chu a lock lo hlauh a , ka check kual vel pah chuan ka khawhar chu ka hnuk a ulh lo chauh ani .

Message chhiar loh eng emaw zat Zampuii hnen atanga a dawn lo awm ka hmuh chuan ka hawng nghal a .

" Luke, khawngaih in call pick up hram teh ." tih hi a lo ni a. Thin phu zawih zawih in voice messages te chu hawng in ka ngaithla ta a . Zampuii aw ngei mai ka hriat chuan ka thawk a chham lo chauh hi ani ber a .

"Luke, i awmdan hi ka hrethiam thei thlawt lo ani . Khawngaih in lo let leh hram rawh. Ka hmangaih che a sin . I lo che sual palh anih pawn ka ngaidam vek ang che . He tia inthen leh mai tur chuan ka lo hmangaih thuk hman tawh lutuk che ani ."

" Khawngaih tak in lo let leh la i tel lova nun dan min zirtir thiam phawt la min kal san dawn nia."

" Luke, min hmangaih tawh lo in min then mahla kei chuan ka la hmangaih reng che ani . Ka hmangaih ber che min ti tu ngei hian hmelma in min tih nat theih ai nasa in min ti na anih hi . I fa pai tu hmeichhia chu nei la hlim tak in awm kumkhua ang che u . Kei mi tih nat ang hian tumah ti na tawh lo hram ang che "


Ka ngaithla zo chu chhuat ah ka thu hnawk a , ka thinphu chu a tawp ta emaw tih mai tir in a zawi rawih rawih mai a. Ka thinlung chu a na ngawt ngawt a . Zampuii ka lo tih dan zawng zawng leh ka tawng khum dan te kha ka ngaihtuah let leh a awm ngaihna pawh ka hre lo ,ka sam chu kek tawn tawn in ka thaw kawk kawk a . Eng thil pawi lian tham nge ka khawih tak le ?


Devin, mi sualpa , anchhedawng i ni ! Zampuii thu sawi ," Luke kha keimah vanga thi ani lo a sin . Aman min then zawk.." a ti ngawih ngawih lai te kha ka ngaihtuah kir a ,ka zak a ka na bawk . Ngaihdam tlak loh khawp hial a pawi lian tham ka khawih ani . Anih ..Luke kha eng vang a in ti hlum nge a nih tak ang ?

Luke_a voice record chu ka hmu fuh a , ka ngaithla ta a :


" Vawiin hian ICTC ah ka thisen ka test a , HIV+ ka lo ni reng tih ka hre chhuak a . Ka ruih hlo tih man ka tuh rah ka seng ta anih hi .Nun hi a bul atanga tan that leh theih nise tiin inchhir tlawk tlawk mahila awmzia a awm silo. Nu, pa..ka U , ka hmangaih lutuk che u . In tan zahna leh tuarna thlentu mai ka lo ni ta anih hi . In bula awm hi chak teh mahila he ka natna hrik pai hi ka kai darh ang che u tih ka hlau si . In beisei ang ka ni pha lo h min ngaidam mawlh rawh u .Ka hmangaih vek che u.


Zampui, ka nunna ai pawn ka hmangaih che ani . Vawiin a thenna thu ka hrilh lai che a i mittui tla zawih zawih te kha hmuh hrehawm ka ti tak zet ani . Ka natna kai laka i him nan ka nunna ka lak a ngai ani. I kianga ka awm ve reng chuan ka kai tir ve ngei dawn si che a . Dam reng chunga thih ai chuan thih hlen law law ka thlang ta ani . Ka thawk tawp thleng pawh in i hming hi ka lam fan ang . Mangtha dam tak in aw..ka hmangaih che . Hmangaih tlak loh hi min theihnghilh hram ang che ."


Ka ngaithla zo chu ka zawi hnawk a, ka thaw hrawk hrawk a . "Lalpa !" tiin ka rum kawk a .

Luke_an venhim a duh vanga ama nunna hial alo lak phah chhan chu kei lah in na theih tawp in ka lo hliam a , hmusit leh elsen em em in ka tawng khum a. Luke thlarau chu a rilru ka lo va ti na dawn em . Luke, HIV+ i lo ni reng a maw ? Drugs i lo khawih ve a maw ? Thil hi ka lo va hre.lo tak em . Ka awm chu ka chum dawp dawp a ngaidam suh u...min ngaidam suh u...ngaihdam ka phu hlawl lo .Mi suaksual dik tak chu ka nih hi .


Zampuii ka tih dan zawng zawng vang khan ka in chhir tlawk tlawk a , awm ngaihna reng ka hre lo . Ka aa mai dawn hian ka in hria a. Ka in hum ruh a ka aw rawl tawp chuan ka te ta rawng rawng a .


Hun hi her let leh thei in a bul atanga tan that leh theih ni se chuan Zampuii thu sawi kha ka awih anga ka ti na hauh lo ang...tihnat chu sawi loh ka duat em em zawk ang mawle . Lalpa , ka pawi khawih lian tham lutuk kha eng tin nge ka nawhreh leh theih ang ? A thiamlohna pakhat mah awm lovah ka hmeichhe hmangaih chu ka lo tuar tir ani . Kei zawk hi hrem tlak leh tuar tlak chu ka ni .


🧚🧚🧚🧚


HMUN AWLS :


Ka thih hunah chuan min phum suh ula ,

Ka ruang ei chhetu ruangtawihlung zingah chuan,

Ka rau-vi-thla a tlei zo chuang hlei lawng e.

Ka thinlunga a cham reng dan ka rawn ziak chhuak , a dik tawk lo mai thei . THELMA , Marie Corelli ziah a ka rilru a cham reng thin anih khi .


THELMA bu kha naupangté ka nih laiin ka pa khan min chhiar rik sak thin a , ngaihnawm ti tak in ka ngaithla thin . Ka pa khan ka thinlungah lehkhabu ngainatna hi thuk takin min tuh sak a , amah vanga lehkhabu atchilh hi ka ni thin . Ka chhiar thiam hma atang in min chhiar rik sak thin a , ka chhiar thiam hnuah ka'n chhiar ve ta tak tak kha min buaipui leh si...ka chhiar nasa lutuk kha min hau ngun teh ania . .Pa , min hauhna ri te kha theih nise hriat leh ka va chak em !!😭😭 Pa te hmangaihna leh duatna mamawh tur hian upat luat tih alo awm thei dawnlo anih hi .


Mittui hmang hian lei leh van inkar in kal pawhna tur leilawn dawh theih ni tehreng sela...ni khat chauh tal ka kianga awm leh tur hian ka hruai ngei ang che. I number kha ka phone ah ka la save tha a , ka ngaih zual chang che hian ka dial thin a maw , pa ...mahse '' the number you have dial is currently switch off " !! Fa pathum ka nei tawh a , nutling phanchang ka nih hnu ah pawh i tan chuan i fanu kum 7 mi lek kha ka la nih reng thin kha ti raw....😭😭😭

Ka inhnem ve na awm chhun chu maw ..vanram pana ke i pen dawn a mihring tawng i hriat hnuhnung ber kha , " Pa , ka hmangaih che . Thlamuang tak in kal rawh aw. " tia ka thlahna che ani tih ka hria a . Hmangaih i ni tih hre chunga khawvel i chhuahsan khan min ti hlim a sin . He khawvelah awm tawh lo mahla ka thinlungah i awm reng ani. Pa , ka ngai che , ka hmangaih che .

Nizan ka mumangah ka pa ka hmu a , ka lungleng em a ...in bulah ka rawn inbun ruak ani .

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » April 25th, 2021, 8:17 pm

CHAPTER : 12

DEVIN :

Mahni in thiamlohna leh in tenna chuan ka khat a , ngaihdam tlak loh khawp a sual ni mahila ngaihdam dil lova ngawih bo mai chu thil dik niin ka hriat loh mai bakah ka in thiam chiah bawk si lo . Rilru hah leh buai nuaih chuan chhuat dungah chuan ka vei tawn chhen a , ka thaw leh hawk thin . Zampuii hmuh chu ka chak rual rual in ka hreh ngawih ngawih bawk si.

Thawk ka han la leh kawk a , Zampuii chu ka call ta tawp a . A pick up dawn tawh lo emaw ka tih hnu ah a pick up ta hram a ." Zampui , kan in hmuh a ngai ani ." ka ti tawng mai a .


" Ka hmuh hman che ka va ring lo ve aw."

" Khawngaih in..."


" Ka buai lutuk a..."

" Hman tum hram teh.."


" Eng thil pawimawh nge awm a ?"

" Luke chungchang ania...a in tihhlum chhan ka hre tawh a."


" A ni maw !?? Eng vang nge?"

" Kan chawlh thinna hotel ah khan zanriah ei dun ila ka hrilh vek ang che . "


" Ummm... awle."

Ka thaw huai a , min hmu duh tawh lo in ka sawmna chu a lo hnar hlau in ka khur ru der der kha ani a . Min lo hnar fithla thak pawh nise ka dem hauh lo ang , a laka ka lo chet dan kha ngaihdam rual a ni silo . A lo rem tih takah chuan ka thawveng hawk hian ka hria a .

Zanriah ei tur chuan hma deuh takah hotel lam chu ka pan a . Ka nghahhlelh lutuk vang nge ni Zampuii chu rawn thleng har hi ka ti mai mai khawp a . Ka lo nghah chhung chuan beer bur hnih ka in zo hman hial ani . A rilru thlak in a rawn kal duh leh lo anih te ka ring hman rum rum hial a . Ka sana chu ka bih deuh chhen tawh mai a .

Rei mawi tawk , ka tan chuan darkar sawm chuang ni maia ka hriat ka nghah hnu chuan amah Zampuii ngei mai chu a rawn thleng ta hlawl a . " Ka rawn tlai deuh vang in pawi ka ti khawp mai . In lamah kan buai lutuk a ." inthiamloh hmel tak chuan a ti sap a .

A hmeltha nu hnep mai chu ka thlir vawng vawng a , tlem in a hmel a dang deuh lep a tih loh ah chuan a tha thlawt ani . " A nghaktu tan chuan a rei duh khawp mai ." ka ti zauh a .

Thut hmun te rem fel in tui sik chu a in khalh a , " Luke chu eng vanga thi nge anih a ?" a ti nghal chat a . Melh pawh min melh eih lo chuan dawhkan chu a melh ngar a .

Min hmangaih leh min ngaih zia thu a sawi chu ka lo beisei ruk nen ka beisei ang chu ka hmu lo kher mai . Ngawi reng in ka Bluetooth earphone chu a bengah ka va vuah sak a , Luke-a voice record chu ka ngaihthlak tir ta a. A ngaihthlak chhung chuan a hmel chu chik tak in ka lo en reng a , a hmel chu a dang zual sauh a , thidang mai tur hmel hi pu in a mit atang chuan mittui chu a rawn luang ngiai ngiai a . A kut te chu a khur hlak hlak a .


A thaw hawk a , earphone chu phawi in min pe let leh a ," A pawi ka ti lutuk ...Luke zawng a vanduai ani ." a ti sap a . " Damdawi a ti thin tih ka lo hre ngai miah lo a...lo hria ni ila chuan thil kal dan a dang daih mai thei ani ." tiin a mittui chu a hru hul a .


Ka aw ka thian khurh a, dawhkana a kut a nghah chu ka va hum sak vawng vawng a , " I chunga ka thil tih zawng zawng kha min ngaidam thei ang em ? Ngaihdam tlak loh khawp a sual ni mahila i ngaihdam ka dil ani ." ka ti sup a .

Chiang leh fiah em em hian ka mitah chuan min rawn melh a , " Ka ngaidam che ." a tu sap a , lawm luat vangin ka lo thaw hawk a . "Mahse ka theihnghilh ngailo ang . Luke kha keimah vanga in ti hlum anih loh zia vawi tam ka hrilh che a min ring duh lo anih kha . Luke chu eng tiang pawn kan ko kir thei tawh dawnlo a , a in tihhlum chhan kha keimah ni lovin HIV+ anih vang tih hriat chu a thawven thlak huai a lawm. " a tih chhunzawm leh nghal zat a .

Min ngaidam a , mahse a theihnghilh thei tawh lo ang . Nie , a laka ka nunrawnna leh ka chet dan tenawm tak kha atan chuan theihnghilh leh mai mai rual loh a rapthlak ani dawn si .Kan ei tur chah te a rawn thlen takah chuan phur lo zet in kan ei dun a . A tu a mah ve ve chuan chaw ei chakna kan nei lo tih a lang reng mai a . Kan order laklawh tawh si a paih mai aiah tia ei ve mai mai hi kan ni ber in ka hria .


Ka chaw thial lai chu harsa ti tak in ka lem thla awl awl a , "Zampui, khawngaih in ka hnenah ilo let leh thei ang em? Ka lo tih nat tawhna zawng zawng che kha ka thawi dam leh vek ang . A tul anih phawt chuan i hma ah hian thingthi leh bawkkhup pawn lo let leh tur in ka ngen mai ang che ." ka ti chhuak ta phawng a .

Ka hmangaih a , ka nau thattu anih loh chuan zalen tak leh Luke mitmei veng hauhlo in ka hmangaih thei tawh dawn ani . Ka hnenah a rawn kir leh phawt chuan ka theih tawp chhuah in tih hlim ka tum anga , ka lo hliamna hmuamhma ser te kha a reh fel hma chuan tih dam tum in ka bei char char ang .

A chaw thleng chu nawr sawn in min nuih seih a , "Devin , thingthi a tap chunga ngaihdam min dil pawh nila ngaihdam tlak i ni lo chung pawh in ka ngaidam che a . Ka ngaihdam vang che hian ka laka i chet dan kha ka theihnghilh vek ka tihna ani lo . Kha tiang khawp a min ti na duhtu hnenah hian kir leh tumna rilru ka pu tawh reng reng lo ani ." a ti vawt ta raih a .

Ka thu hriat chuan min nghawng em avang chuan ka thu ngil zawt a . Ka rilru chu nat tak te in a na ani . Kha ti khawp a min hmangaih a min atchilh thintu kha ani si a , ka lamah a rawn let leh duh mai rinna sang tak ka lo nei ve a sin mawle . Sawi mai tur pawh hre lo in ka melh tlawk tlawk a ..tun anga rilru natna hi ka lo tawng ngailo , ana ngawt ngawt mai ani . Chiang taka hnawl nih in hriat hi alo na hle alo nih hi .


" Nang hi ka nun a mi pawimawh ber i ni a , kha tih lai khan chu chu ka lo hrethiam lova i laka ka lo chet dan zawng zawng vang khan ka in ngaidam thei ngai lo ang .."


" Khawngaih in Devin , tawp rawh . Miriami chu nupui ah nei la kei pawn...."

" Miriami nen khan inneih kan tum hauh hlei nem . Ani kha ka thian tha ber leh ka farnu ang chiah a ka en ani a sin ." tiin a thu sawi laklawh lai chu ka lo pawtchat vat a .


" In innei dawn ti khan min hrilh sia..."


" Tih nat che ka tumna hmanrua mai anih kha ."

" Ka damchhung daih natna min siam sak kha ka duh tawk viau e . I bulah hian rawn let leh thei ka ni tawh lo , i bula ka awm a piang in ka tawrhna nasa tak kha ka hrechhuak reng dawn ani. Chuvang in ka piang ve ani tih hi i theihnghilh hmak dawn nia."


" Zampui , ka hmangaih che a sin ."


" Dam chhunga hmangaih theih loh tur hnenah ' ka hmangaih che ' ti suh . Thinlung hliam avang hian a duhloh ram a dai phah thei ani . "


" Ka hnena rawn kir chu i tum tawh lo tak zet em ni ?" ka ti lawi rut a . " Ka dam chhung in ka hmangaih ang che ka tiam a che min ring rawh ." ka tih zawm zat a .


" Nang nena kan nunhlui zawng zawng kha lei hnuai thuk takah ka phum bo tawh a , a hai chhuah leh theih tawh loh ani . "

" Min ti na tak zet ani ."


A dar a san ak a , nunrawn hmel tak hian a nui sak a , "Min tih nat chanve pawn ka la ti na ve hlei nem che ." a ti halh a .

" Chuan ka tih nat ang che khan min tih nat ve a ka laka phuba lak i duh ta tihna em ni ?"


Zawi te chuan a lu a thing na na a , " Phuba lak in a nghawng that loh zia hre chiang ber tu ka ni a , phuba lak tumna rilru ka pu hauh lo ang ."


Ka rilru na lutuk chu ti lang lo tur in ka in thunun hram hram a ," Ka hmeichhe hmangaih hmasak ber i ni asin . Ka tan hian Zampuii dang hi an awm leh tawh lo ang ." ka ti hrawk a.

" I hnen atanga ka thil zir chhuah chu maw _ I nunah hian tumah hi hmangaih hlum lo chauh suh . Eng tikah nge tihnata i awm dawn i hre silo ' tih hi ani ."


Min hmangaih em em tu , tap chung a ka hmangaihna ngen thin tu Zampuii kha a ang ta hauh lo mai . Ka natna siam sak khan a lo ti puitling in a lo ti ngeng zo ta ani ang e . Ka dem lo...engkim a thiamlo leh mawh puh tur chu misual Devin Ramhmachhuana hi a lo ni . Tunah chuan ka tuh rah ka seng ta anih hi vui thei ka ni lo . Sawi leh chuan tur eng mah ka neih tak loh ah chuan ka ngawi ta rauh rauh a .

Zampuii chu a thutna atang chuan a tho a , " Ka kal tawh mai ang... Damien-an min lo nghak reng si a , rei min ti lutuk palh ang . Dam tak in aw...kan in hmuh tawh loh hram ka beisei ." tiin min hnungchhawn in a kal ta a .

A kal liam tur chu a lan theih chhung ka thlir zui vawng vawng a . Ka hlimna, ka nunna leh ka engkim mai chu a kal liampui ni mai hian ka hria a . Ka zawi nghal hnawk a , nunna nei lo ruang che thei ang mai hi ni hian ka in hria . Ka mit a mittui rawn tling chu ka khap per sawk a , ka thaw hawk a , " Mangtha , ka lalnu hmeltha , ka Cleopatra !'" ti chuan ka phun zui sup a .

*********

ZAMPUII :

Devin-an min hmuh phak lohna hmun ka thlen chuan ka in thunun theihna chu a keh chhe nghal vek a . Ka thinlung na lutuk chu a puak keh vek mai dawn ni hian ka in hria a , dan rual loh in ka mittui chu ka biangah a luang zawih zawih a . Hmangaih em em chunga hmangaih tawh hauh lo anga lan chu a va harsa chung chuang si em .

A nuna let leh hi ka la duh cheu em ni le ? Natna nasa tak min tawrh tir hnu ah pawh ka la duh cheu ang maw ? A tir te atang khan lo hmangaih lo tawp tur ka ni a sin . He ka hriatrengna ata hi chhui let tur awm hauh lova nawhreh hmak theih ni teh sela...Ka chunga a thil tih vang leh min tawrh tir nasat em vang hian ka haw ngawih ngawih tur ani tiin ka in fuih mawlh mawlh a . A ni chu history ani tawh a , Damien chu ka future ani tawh ani...


Mittui vanga khaw hmuh phe ruai chung in Damien-a min lo nghahna lam ah chuan ka tlan dawr dawr a . A car ngheng a kut kuangkuah than hian min lo nghak reng a . Min hmuh ve leh chuan min rawn pan a , min rawn kuah nghal chawt a ," Sshh..tap suh...engkim a tha vek dawn a lawm." a ti sa sa a .

A awmah bei in ka inhnip hlawp hlawp a , " Damien, a tana ka mittui hnuhnung ber ani tawh ang . " ka ti sap a .

" Eng tin nge a tih che ? A lo ti na che em ni ?"

" Aih, min ti na lo ." tiin ka mittui ka hru hul a ." A hnenah kir leh tur in min ngen a ..."


" I let leh dawn tihna em ni ?" a hmel a hlauhthawnna lo lang chuan min ti na dawt a .


" Aih..ka let thei tawh lo . Tun atang chuan nangmah chiah ka ngaihtuah tawh ang . "

" Ka lawm e..ka hmangaih em em che ani . Khawvel hmeichhe hlim ber ah ka siam ang che nga eng harsatna mah i tawk ngai lo ang ti chuan ka tiam thei lo che a . Mahse hei erawh ka tiam a che _ eng harsatna pawh tawk la ka sut kian pui zel ang che . A nih Luke chu eng vanga lo intihlum nge a nih reng a ? "


He pa hmangaihna hi ka phu hlawl lo ani...ka kuah nghet zual sauh a , " Luke khan drugs a lo ti thin a , HIV+ a lo ni bawk a ..chu vanga mahni intihlum a lo ni a..." tiin ka mittui chu ka hru hul a , tun atang chuan Devin emaw Luke emaw tan hian mittui ka seng tawh lo ang .


A thaw hawk a, " A va lainatawm ve aw...HIV+ nih vanga mahni han in tihhlum mai chu a zialo lam mah ani . Thlamuang tak in a chawlh hahdam ngei ka beisei ." a ti a.

" Luke kha chu Devin nen danglam tak an ni .."

" Hawh...an ni unau chanchin ngawt sawi lo in kan hma lam hun tur sawi zawk ang." tiin min nuih sak a .


" Min neih chuan thikthu chhiatloh i zir hmasak a ngai dawn nia aw.."


" Heyyy , ka thik vang ani miah lo ania aw... "


" I thik ka tih miah loh kha . Hun kal tawh hnu thik chu thil sawngsawhlawtlo leh tullo ber ani ang chu ti raw. Kar reilote hnuah i nupui ka ni tawh mai dawn a ..."

" Ka nupui i nih hun chuan ka duat ngawt ang che ."


Ka nui hak a , " Tun aia in duat leh chuan dan a awm dawn em ni ? Ka thian tha ber i ni a , ka pasal leh ka fa pa tur i ni bawk a..." ka ti a .


" I hmangaih ber ka la ni ngei bawk ang ."


" Loh theih loh ."

Hlim tak in in lam pan chuan kan in khalh haw ta a . Nunhlui hnuchhawn in hmalam pan in hlim tak in ka kal tawh dawn ani .


DEVIN :

Muangchang in ka zu no chu chawi kangin ka thawkkhat pawp a , Luke-a voice record chu ka ngaithla nawn tlut tlut a . Ka nu leh pa hnenah hrilh ve nge tha ang hrilh ve loh tih ngaihtuah in ka rilru a in sual buai hle mai a . Lo hrilh ta ila an rilru natna kha kai chhuak thar leh in Luke kha ka sun nawn tir ani ngawt dawn tihna ani a . Hrilh hriat loh chu tha zawk a ka hriat vang chuan ka delete ta hmiah a .

" Luke , Zampuii khan a ti na che a i haw ngawih ngawih emaw ka lo ti a , nangman i lo ti na zawk a , i natna kha a kai ve loh nan i inthiarfihlim san alo ni zawk si a. " phun sup sup chung chuan zu chu ka in thlit leh nghal zat a .


Eng nga ti nge hmanah khan ka hmangaih ngawih ngawih che ani tih hi ka lo hriatthiam duh loh ? A hma a min hmangaih thin ang khan min hmangaih leh thei dawn lo em ni . Thinlung lungchhia leh sim chung in i lam ka rawn hawi kir a min lo ngaidam ta che ,Zampui ..Ka thil lo tih sual tawh te kha min hriatreng sak lo la nun bul tan that leh hi a theih hlawl loh em ni ?


Ka rilru na chu ka thaw hawk hawk a , hmangaihna vanga hliam tuar tan chuan damdawi engmah a awm lo an lo tih hi a dik ani . Paracetamol ei a dam thei nise ka hmawm mawlh mawlh ang chu . Zu chu ka in leh pawp pawp a , ka thinlung na lutuk hre changlo lek a nikhua ka hriat loh thleng chuan rui chhum hmawk khawp in ka in ta a.

*****************

HMUN AWL :

Next chapter ah a tawp anga Devin , Damien leh Zampuii te chu kan bye bye leh thei tawh ang . Bittersweet Revenge hi a tawp rual rual in NGHILH HAR DI rawn dah leh nghal mai ka'n tum deuh uk na a ..thla thar atang law law a rawn dah ka titlu leh ta zawk ani .

Ka 'regu' lutuk a min lo hne palh ka hlau..Min hne loh nan leh min 'miss' ve deuh theih nan hun ka pe ve duh che u ...te han ti vel ilah🤣 Hmun awl hnawhkhahna hre lo rak mai mai ah lo ngai teh u.


In comments te hi chhiar a nuam a , keimah chauh pawh hian ka lo chhiar nui vur vur zel !! Hmel vawi khat pawh la inhmu lo leh hriat pawh hriat ngai loh kha comment section atang hian ka lo ngaina che u in kum tam tak ka lo hriat than tawh ang mai a nel te ka neih phah che u a , ka van lawm em . A hming hmerh in ka sawi seng lo che u a , hei erawh in hriat ka duh ani __ ka ngaina vek che u a , nangni vang hian thawnthu ziah hi nuam ka ti leh zual ani. In duhthusam anga sei leh ngaihnawm te hi ziah chhuah sak che u ka chak ..


Comments-na ah i duhdan leh thawnthu kal hmang tur in suangtuahna in rawn thai chhuah te hi chhiar a nuam thin . Chhiar liam puat lo in , in lo tui pui ve ani tih ka hriat phah a . Ka tih dikloh leh in duhkhawp tlinglo lai te a awm anih chuan sawi bawrh bawrh ula min hau hrep pawh ni ula ka vun hi a chhah in thau in a hnawh chhah leh zual bawk a hauhte hi ka dawl phian ania🤣🤣

Ka rak leh ta duah a....min nin hma in duh tawk ang . Bye bye vek u ( 'Good bye' ka ti lo ania aw ..good bye tia in thlah chu in hmu leh tawh ngailo tur a in mangthana tawngkam a ang ka ti thin.) Kei ni chu kan dam a Pathian in rem a tih chuan next chapter leh NGHILH LOH DI in kan la in tawng leh dawn sia..ka kam a kal ka tlak leh duah thin🤣 Bye tak tak ule🖐️🖐️🖐️

Link:
BBcode:
HTML:
Hide post links
Show post links

Local Advertisement

MOBILE SIAM ZIR DUH TAN!!!

Tech-Inn Mobile Repairing Traning Centre, Bazar bungkawn

Kum tin mi za chuang eizawnna kan siamsak a, Eizawnna tlaka thiam turin kan zirtir thin

Mizorama mobile siam zirna hmasa ber changtlung ber kan ni. Hrechiang duh tan Contact : 9612099411 / 9862016122


Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » April 25th, 2021, 8:17 pm

CHAPTER : 13

( LAST CHAPTER )

DEVIN :

Zampuii vang in mittui far eng zat fakau nge ka sen ka hre seng tawh lo , ka rilru leh ngaihtuahna ah a cham reng a , theihnghilh ka tum pawh in ka thei si lo . Vawi khat chiah a hnenah ngaihdam va dil nawn leh ila ka lamah lo let leh tur in ngen ila min lo la pawm duh mai thei a sin. Hnawl nawn ka nih a nat belhchhah leh ka hlauh vang hian ka tim tur ani lo . Nakinah ' ka lo ti ta lova' tia ka inchhir khua a sei loh nan hnawl nih pawh huam in ka ti tur ani .


An in lam pan chuan muangchang in ka in khalh phei a . An in bul ka thlen chuan mi an lo tam em em mai chu mak ka ti hle mai a . Mi pakhat rawn kal chu lo ko ding in ," Ka pu, Zampuii te in ah hian enge an tih a mi an va tam em em ve ." tiin ka lo zawt ta chawt mai a.


Chupa chuan min melh deuh hu a , " Awhaw...i lo la hre nange . Zampuiin pasal a nei dawn a lawm." a ti ta a.


Van atanga tek tla in min rawn deng dawt ang mai hian min shock hneh ani . " Tu nge a neih dawn a ?" ka ti chhuak thei hram a .


" Damien Vanlalchhanhima nen an innei dawn lawm.."


Ka lu chu a hai muai muai a , ka pai deuh dawrh a ,ka tluk mai loh nan ka car chu ka vuan thuai a . " Ka lawm e,ka pu." tiin ka car ah chuan ka thu lut a boruak tlachham ang mai chuan ka thaw kawk kawk a . A va han na vawng vawng tak em...ka thinlung hi zai sawm vek sela a na lo zawk ang.


Chutih lai tak chuan an in chhung atang hian mo thuam famkim nen a in thuam in Zampuii leh a thiante chu an rawn in zui chhuak a .A lang nalh in a hmel chu a tha tak zet ani . An mahni rawn hruai tu tur car a an luh thleng chuan ka thlir zui ta vawng vawng a ..Ka hmangaih ber chu kumkhua a mi nupui ni tur in inneihna thu tiam an chhamna hmun tur Biak in pan chuan a tlan liam ta vuah vuah a .

Ka hmangaih ber ka nei thei lo chu tumah mawhpuh tur ka nei lo . Ka thiam loh leh ka thil tih sual vang liau liau ani e . Ka chawh..tuar tlak pawh ka ni a lawm. Mittui tla zawih zawih a min hmangaih thu min hrilh lai leh Luke chu amah vanga in ti hlum anih loh thu min hrilh lai te khan lo ngaithla in lo ring ila thil engkim hi a dik vek mai tur .

" Kir leh ngai tawhlo tur a hmangaih then nge na anga , lamkawia in tawng leh thin tur a inthen ? Hawilopar thliak tur a min liam san nge na zawk anga , leng dang tang bel tura min liam san ? A thlanlung in ziak chhiar nge hrehawm anga , a fate pawma a kawppui nen an kal lai hmuh ???

Ka car chu her in ka tana eng tik lai pawha awm reng leh ka lungngaih lai pawha min hnem thintu Miriami te in lam pan chuan ka tlan ta nghal a . An in ka thlen chuan a nu chuan a room a a awm thu min hrilh rual rual chuan a room lam pan ka rual nghal a . A room kawngkhar chu ka pawt hawng rawk a , darthlalang hmaa Miriami lo ding chu ka kuah chawt a . "Miriam , min hnemrawh khawngaih in . Min hnemlo anih chuan ka thi mai ang ." ka ti nghal chawt a .


Mak tih hmel tak hian min melh kawk a , " Eng thil nge i chungah thleng a ?" a ti ha a .


" Zampuii' n pasal min neih san ta . Tunah hian inneih thu tiam an chham vel mek ang ...ka aa mai dawn in ka hria..." ka ti ruai a .


Min lo kuah let in min thlamuan nan ka hnungzang chu a beng thap thap a , " In sum suh...i tap chak anih kha . I theih chuan tap rawh , a zahthlak loh . I tah theih chuan i z*ng hawk mai ang ." a ti malh malh a .

Ka thinlung tawt leh na lutuk chu ka tap thei lo , ka mittui a hul a ka kawchhungah min hnawh awlh awlh thung si . "Nang leh zel in min hrethiamlo anih chuan ka aa zo vek mai ang . Ka beidawng in ka nun hi a chhe ta vek anih hi .." ka ti mawlh mawlh a .

A thaw halh a , " Kei a hnem theih inih phawt chuan i thinlung natna te chu chhawk che ka duh che a lawm , eng tih lai pawn ." a ti ta a .

Ka thaw huai a , Zampuii vanga ka rilru na min chhawk thei tu ber tur chu Miriami ngei hi ani . " Ka lawm e ." ka ti halh a . " He ka rilru na hi keimah mai chuan ka tuar chhuak zo in ka in ringlo ani . Keimah maia ka awm chuan ka aa thei mai ang ." ka ti mawlh mawlh a . Mahni inbia hi ka ang zawk mah a .


Miriami chu a nui var var a , "Aa mai love , i aat ka phal hlei nem . Zampuii theihnghilh tur in ka pui hreh reng reng hlei nem che . Chutih rual chuan nang pawh i rilru ti paukhauh la , nunhlui a cheng reng lovin hmasawn a hma lam pan a ke i pen ve tho a ngai ang." a ti a .


Ni e, naupang kal zir tir ang mai in Miriami kut vuan chung in Zampuii tello hringnun kawng zawh chu ka zir chho dawn ani . Naupan tet atanga ka thian tha ber , ka hlim leh lawm ni leh ka lungngaih leh tah ni pawh a ka tan awm reng thin hi ka thian tha ber nge nge hi alo hlu ber anih hi . Mi zawng zawng hian an hmangaih ber te hi nupui pasal ah an nei vek kher hlei nem mawle .

Ka hmangaih ber chu nei theilo mahila ka dam khawchhuak em em ang . Devin -,a , mahni thil tum leh thu tiam tawh chu ti hlawhtling thin ka nih kha . Zampuii nei theilo mahila ka thi bik hauh lo ang.



💕💕💕💕💕💕💕💕💕💕💕💕💕



DAMIEN :

Tun minutes reilote hnuah hian khawvela ka hmeichhe hmangaih ber chu ka nupui ani mai tawh dawn si a ..ka hlim lutuk chu ka ni deuh hui hian ka hria a , ka tha te chu ala khur ru ang dur dur a . Ka mumang hi a lo ni anga mumang hlimawm tak ata chu ka harhchhuak thut ang tih mawlh mai chu ka hlau ru zek zek a . Tin, Devil kha a rawn kal anga ' he inneihna hi rem ka dodal e . Zampuii hian ka fa a pai mek ani .' tiin Zampuii chu a rawn hruai daih mai ang tih hlauhna chuan ka khat tlat a , ka ngaih a la ngam famkim thei lo ani .


Maicham lam pan in mo thuam famkim nen nalh chung chuang zet hian Zampuii chu a pa hian a rawn kai lut ta a . Ka hlim lutuk chu ka thawk te hi a chham mai dawn in ka hria a , a ke pen tin chuan min rawn hnaih zel in ka nupui anih hun a hnaih tir zel ani si . Ka lam pana a rawn kal chu mit pawh la sawn phal lo in ka lo thlir vawng vawng a . Ka lungphu in thum rawn ri dup dup chuan ka hmangaih thu an au chhuah pui ni mai hian a lang .


Pathian hnenah Zampuii ka neih theih nan ka tawngtai thinna chu tunah hian chhan in a awm ta a nih hi . A hma te khan Pathian hi ka lo dem thin a , ka tawngtaina pawh min ngaihthlak sak duh lo ah ka puh thin . Mahse tawngtaina chhangtu leh tlai ve ngailo Pathian hian kan dilna te hi a lo ngaithla teh meuh mai , dawhtheihna kan neih leh neih loh min fiah hmasa zet a min chhang chauh thin alo nih hi . Kan hmanhmawh ang hian alo hmanhmawh ve tut tut ngai lo .

Inneih hunserh chu kan tan ta a . Pastor in min inneih tir a , inneihna thu tiam ka chham te chu ka lo phur fal deuh nge ni ka lo sawi ring lutuk ni ngei tur ani ka thianpa Khuma chuan min rawn nghawk zauh a . Mipui lam lah an lo la nui thaw zui a . Tlem chuan ka zak ve deuh hlek a , ka hmai te chu a sa hut hut mai a . Zampuii lah chu a hmeltha in a cool raih mai a , zam chhia leh helhhawlh hmel reng a pu ve lo . Inneih thutiam te chu fiah fel fak hian a chham thei thei bik anih chu ...ka van tluklo in ka van awt tak .

Ka nuna ni chhinchhiah tlak leh ka hlim ber ni chu a va ni tak . Ka nupui hmel chu ka en a , ka hlim veng veng mai ani . Tunah chuan ka duhthusam a thleng dik tawh a , ka famkim ta . Pathian leh kohhran mipui hma ah inneih thu tiam chham in nupa pumkhat kan nih thu puan ani tawh a , Zampuii leh a fa lo piang tur chu ka ta liau liau an ni ta . Kha Devil khan min rawn chhuhsak theihna dan a nei tawh lo , thlamuang takin ka awm thei ta a lawm .


Kan inneih zan hmasa ber chu ka thianpa Khuma te farm house ah kan hmang dawn a . Kan kal hma chuan ka pa chu ka bekbawrh ru a , " Pa , nau a pai sia ...sex hman hi naute tan a pawi dawn lo em ni ?" ka ti ta tawp a .


Hlim tak hian min nuih vur vur a , ka darah beng thuk in ,"Hlauhthawn tur engmah a awm lo e . Hlim tak in hun in hmang dun thei ang." ti amin chhan chuan ka thaw huai a .


Tun darkar atang hian kha Devil kha a theihnghilh theih nan theih tawp chhuah a , a hriatrengna atanga thai reh sak hmiah hi ka tum ber tur ani . Tunah mai chuan ka ti hlawhtling nghal rum rum thei dawnlo tih ka hria . Mahse dawhtheihna ngah leh thil nghah thei mi ka ni bawk a Devil a theihnghilh hun chu ka nghak chhuak em em ang .


Devila phuba lakna kha fiak thak chu Zampuii tan na in tawrhhlelhawm viau mahse ka lam hawi tirtu leh ka nupui anih theih chhan anih miau vang in ka tan erawh malsawmna tih loh rual niin ka hre lo .

Fakna hla siamtu in , " Kei nin vanduaina a kan ruat , a hmangaihna lantirtu " a lo tih kha kei hian a tak in ka tawng ta bik hliah hliah anih ber hi . Zampuii ,Luke leh Devil te vanduaina leh tawrhna chu ka tan vanneihna leh ka hmangaih ber min neih tir tu alo ni hlauh thung si anih hi .


💃💃💃 💝 💃💃💃


ZAMPUII :

Ka chau in mipui huhang chu ka zo lo ni ber in ka hria , ka lu te chu hai luk in ka chau nghulh mai a . Kan inneih min lawmpui tute lakah hlim hmel put reng a tul bawk nen ka nuih luihna lamah ka biangki te chu kham deuh thum hian ka hria. Mipui ri mur mur chu tlansan a hmun reh raih mai a awm tluka chak ka nei lo .


Zanriah chu hma takah kan ei a , kan nupa hun hmanna hmun tur Khuma te farm lam pana kan tlan hnu chuan ka in thlahdul in thawk ka la ve thei ta a . Damien chuan ka hla duh em em mai Ed Sheeran hla ' Perfect' chu a play a , ka hah a dam sawng sawng mai ani . Motor seat nghencchhan chu ngheng in ka chhing diar diar a .


Tunah chuan min hmangaih em em tu pasal ka nei tawh a , min nei hi a inchhir loh nan theih tawp chhuah chu ka bat ani . Pathian leh kohhran mipui hma ah ngei dam chhunga ka kawppui ni turin chhechham meuh in ka intiam a ni a , chu ka thu tiam chu ka bawhchhe hauh lo ang. Ka hmalam hun chu Damien leh ka fa lo piang tur tan hian ka hlan a , nupui tha tak leh nu tha tak ni tur in ka bei zel dawn ani . Hmeichhe tan chuan kan hmangaih te aiin min hmangaihtu te pasal a neih hi a tha zawk an lo tih tak kha mawle .


Damien bulah hian ka him a , ka hlim bawk ang tih ka chiang ani . Ka chan chhiat leh chauh ber lai pawh a min hmangaih theitu hi an hlu a tu pawh in an duh theuh ang chu . Ni e ,Damien ang hmangaihtu hi tu pawh in an duh theuh aniang chu Pink Sweat$ hla AT MY WORST pawh kha a lar vul chuk a , an duh em em vek ni .

I Need Somebody Who Can Love Me At My Worst ,
Know I'm Not Perfect But I Hope You See My Worth.


💃💃🧚💃💃

(EPILOQUE)

(💞 Hriatrengna Nung Reng 💞)
ZAMPUII :

Ka fapa kum riat mi Danyal chu ka chei mawlh mawlh a , a mitmeng a hmel engkim mai chu Devin chiah chiah kha ani mai si a , eng tik lai pawh a Devin hmu ang hi ka ni mai si a Devin chu ka tan theihnghilh theih loh tluk ani . A sam dun hlap chu chul in ," Kal ang le , bawihte ." ka ti sap a .

" Amma , apa chu kan tlawh khat sia a thin a rim ang a ..."

" I pa kha maw mihring zawng zawnga mi fel ber leh mi hriatthiamna ngah ber ani a . Kan tlawh hman renglo tih a hrethiam em em anga a thinrim hauh lo ang ." ka ti sap a .


Carah chuan lut in thlanmual lam pan chuan kan in khalh chhuak ta a . Damien thlanlung chungah chuan thingthi in ka pangpar ken chu ka dah a , " Damien , u tha em ? Hei Danyal nen kan lo kal a ..." tiin ka phun sep sep a .


Danyal chuan , " Apa , kan lo kal khat sia thinrim suh aw
Amma nen hian kan ngai lutuk che a ." tih pah chuan a pangpar chu a pa thlan chungah chuan a dah ve a .

Ka fapa darah chuan ka kuah a , " I pa hi chutiang mai maiah a thinrim ngailo ka tih kha ." tiin hnem nan ka nuih sak a .

Ka mitthla ah chuan ka dinhmun chhiat ber lai pawh a min hmangaih tlattu ka pasal Damien kha a rawn lang zut zut a , ani ang mi tha tawp thang khan thih hi a phu lo a sin mawle . Kan nunhlui te chhui kir in a thlanlung ngheng chuan ka thu ngawt ngawt a .

KUM 8 LIAM HNU :

Kan inneih ni atang reng in duat theih tawp hian min duat a , ka tan chuan heti khawp a duat hi phu pawn ka in hre lo a . A chhungte lah an fel in kawng engkim ah ka tan an tha thlawt ani . Min hmangaih a , ka nihna ang anga min pawm theitu pasal atan neih lo hlut zia ka hre zual thin .

Raino thil huat pawh nei ila kawng engkimah min hrethiam thei lutuk chu ka inthlahrung thin zawk ani . Kri pawh in theih tawp chhuah in ka ngaihsak a , ka duat bawk a nupui tha tak nih tum reng reng in ka hmanhlelh ti ila ka ti sual hauh lo ang .

Nau ka han vei tan ta chu Damien phur leh hlauthawng bawk si a phi cheng mai a . Kei ni lovin aman nau a vei ta zawk emaw tih mai tur hian a awm hle hle thei lo a , a vei tawn chhen a ,a thaw leh hawk thin a . Keia nau vei na tuar nen a awmdan teh chawng chuan ka thin a ti ur ru teuh a lukham a va bawm chawrh mai chu ka chak hial ani .

Nau ka nei fel chu labour room ah rawn lut in ka chal ah a rawn fawp zauh a ," Ka hmangaih che ,Zampui . Fapa hmeltha tak kan nei ta e !" a ti a . Nurse kut atanga naute chu la in , " A hmingah Danyal..ka phuah e . Daniel ni lovin D-A-N-Y-A-L Vanlalmalsawma . Ka fapa , pa ten fate hnena an hlan theih malsawmna zawng zawng chu ka hlan a che ." tiin ka fapa chalah chuan a fawp a .

Danyal chu naute vannei ber ani chhung leh khat zawng zawng te duat leh hmangaih rawn a hlawh a . Nikhua a rawn hriat tirh atang in kei aiin apa chu a ngai in apa pawm te chu a duh zawk a . An pafa in pawm lai ka en te hian mahni inthiamlohna in ka khat thin . Danyal chuan Damien chhunna chhete mah a nei lova Devin-a carbon copy hi ani ringawt bawk sia .
Chutiang rilru chu Damien chuan alo pu ve anih pawh in a ti lang chhuak ngai lo .

Danyal kum hmih a tlin kum chuan Damien pawh in Mizoram Rural Bank hnuaiah hna a hmu ve ta bawk a in hrang te chang in chhungkua kan in bawl hrang ve ta a . A hnathawk rawn haw te hi Danyal chuan a lo nghakhlel thin in a pa awm loh chuan hrehawm a ti thei em em a , a pa chu ngaih tak te hian a ngai thin ani . Damien lah in ,"Danyal hi ka hmangaihna zawng zawng pek ka duh a , kum nga a tlin hma loh chuan chhang pawh a nei rih lo ang ." a ti a , fa neih rih loh a duh vang chuan kan kan indang ve a .

He ti khawp a pasal tha leh pa tha hi Pathian pawh hian a bula awmah alo duh ve ani ang e Danyal-a kum thum leh thla nga anih thla chiah chuan car accident in min boral san ta a .

Kha mi ni kha kha ka theihnghilh leh thei tawh lo ang . Danyal nen in ah kan awm a , ka mal bawh in phone a nursery rhymes en pah in a zawi ngiai a , "Amma , apa hi a lo haw har tawh ." vawi thum ngawt a rawn ti chhuak a .


" A lo haw tep tawh ang ."

" A lo haw tawh dawn lo aniang ."

" I pa i ngai lutuk hi a tha lo zawk anih hi . Ka va phone ang e aw ." tiin a phone ken lai chu ka laksak a , Damien chu ka call ta a , Danyal hriat theih tur in loud speaker ah ka dah a , " Hello...Damien , ilo haw tep tawh em ? Bawihtea hian a lam chhen che a ." ka tia a .

" Aw..ka lo haw mek e. Khawi Bawihtea chu ka lo bia ang e ."

" Apaaa..."


" Aw , Bawihte , hei ka lo haw mek ania aw..apa kha ilo ngai tawh a maw ? "

" Aw..."

" Apa pawn Bawihtea leh anu kha a ngai em em a , a hmangaih em em bawk a nia aw . Ice cream i tui tih ber chi kha ka lo hawn ang aw."


" Aw, apa , lo haw vat vat rawh aw."

Damien chu a nui hawk hawk a , " Ka fapa hi chu ka va hmangaih tak em ! Apa kha a rawn thleng tep tawh aw ." a ti a , chutah thil eng emaw ri bur hi ka hria a , Damien chu a te thawt a .

Ka thinlungah chuan hlauhthawnna nasa tak lo lut nghal in ka khur chhe lo chauh ani . Danyal kut atang chuan phone chu ka phih thla thuai a , " Damien ? Damien ? DAMIEN ? KHAWNGAIH IN PATHIAN HMING IN MIN CHHANG RAWH !" tiin ka au tuarh tuarh a . Lehlam atang chuan mihring tawng ri nuai nuai chu chiang lo tak in a hriat theih a , phat rual loh in accident a tawk tih ka hre thei nghal a . Ka lungphu chu a rawn rang nghal zawt zawt a , ka lu te chu hai muai muai in ka khaw hmuh a thim ta mup a .

Ka thanharh leh meuh chuan ka chhungte leh thian tha te chuan min lo hual tuau a . " Khawi ah nge Damien ? " ti a ka zawhna chu tuman min chhanglo na in an hmel leh mitmeng atang chuan thil duhawmlo tak a thleng tih ka hrethiam nghal vek a . " A ni thei lo...Damien bulah min hruai r'u . A damloh leh na a neih te hian ka bulah lo chuan a awm duh ngai hlei nem ." ka ti chul a .


Ka thiannu Puii chuan min rawn kuah bet chawt a mittui sur zung zung hian , " Zams , I Damien chu mihring a tling zo ta lo ..."

Ka te tuarh a , " A ni thei lo...dawt i sawi ani ...dawt...dawt..Damien khan Danyal nen hian min hmangaih a min kalsan ngawt thei lo ang . " ka ti a , ka tap ta hlawp hlawp a .

Ka mawl chhuih a , ka awm dan te chu mumang ang deuh ruai hian ka hria a , ka mang a ang in ka thla hi a phang ngawih ngawih mai ani . Bawihtea pawn a pa awm lo chu tuar tak te in a tuar a , thil ei loh ah te tlak in a pa hming a lam reng mai a . Naupang ta nanana chu kum te alo vei meuh chuan a pa a ngaih pawh a ziaawm ve ta a .

Chhungkaw kim a hlim taka kan lo awmna anih vang in kan in chu ka chhuahsan phal lova Danyal nen chuan kan nufa chauh in kan cheng dun ta a , khua chu a har duh ngei mai . Damien ai chu ka thawk zawm a , hna te ka neih ve takah chuan lunglen pawh a zia ve deuh e . Mitthi ngaih hi awmzia a awmlo in mahni kan in ti na thlawn mai a lo ni ..a rawn haw leh mai beisei in ka nghak a , nghah chhuah tur awm silo hian. Lawmna pakhat ka neih ve chu Damien khan ka lakah lungawilohna leh vuina a nei hauh in ka ring lo , ka theih tawp kha a lakah ka chhuah ve chiang em ani . Ka pasal leh ka thian tha ber ani a , tih hlim kha ka tum ber ani thin ani .

Tunah chuan Damien min boral sanna pawh kum nga a tling tawh a , a lung pawh mawi tak in kan phun tawh ani . Mipa eng emaw zat chuan min rawn biak tum teh mahse mipa reng reng ka ngaihtuah ngai tawh lo a , ngaihzawng ang lek phei chuan hnailo tak ani .

Hmangaih tak pawh lo tawng leh ni ila ka nei ngam kher dawn em ni ? Min hmangaihtu a piang hian min kal san zel mai si a . Luke , chutah Damien....sap ho in black widow an tih ang chi hi ka ni mai lo maw ? Min hmangaih hi thihna anih chuan tuma hmangaih nih ka duh tawh lo .

**************

Eng tia rei nge thlanlung nghenga ka thut pawh ka hrelo ka fapa kut tetakte chuan ka darah a rawn vuan a , " Amma , ka ril a tam tawh ..haw tawh ang ." a rawn tih chuan ka harh chhuak zawk a . Ka mittui te hru hul in ka fapa kut chu ka kai a ," Awle , haw ang aw ." ka ti ta a . " Damien , mangtha aw." ka ti sap a .


" Apa , bye bye !"

Damien tello in kum nga chhung teh meuh chu ka fapa hi ka lo enkawl tawh a , ka hlim ni leh lungngaih ni te hian ka hrechhuak awn awn zel a ...ani kha la dam se hi ka ti ngawih ngawih thin . Damien nu leh pa pawn , "Zampui , Danyal pawh pa hmangaihna leh pa enkawlna mamawh em em hun lai ani a , i duh anih phawt chuan pasal dang pawh nei leh rawh . Kan dal hauh lo ang che . Pasal nei lova i fa tul pui tur chuan ila naupang em mai . " tiin min hrilh thin a .


Pasal neih leh tumna reng ka nei lo . Min hmangaihtu a piang an thih zel si chuan tu fa mah keimah vanga thi tur in ka phallo ani .


Restaurant hnai ber ah chuan Danyal chu ka luh pui a , a ei tur ngainat ber ber chu lam sak in riltam leh tui ti taka a ei lai chu hmuhnawm ti tak hian ka thlir vawng vawng a . A hlim leh a phur zawng thil a tawna a mitmeng de sawr sawr thin te chuan Devin kha ava han chhun fu tak em . Ani kha eng tin nge a awm ve ang le ? Ka hmuh hnuhnun ber pawh kum riat kal ta daih kha a ni a ...nupui fanau nei in hlim tak in a awm ve ngei tawh awm si a...chu ka ngaihtuahna chuan ka thinlung chu a vit zawr mai a .
Reilote chhung chu khawharna leh lunglenna chuan min rawn tuam a thawk leh khatah reh leh nghal in min tih nat dan zawng zawng kha ka hrechhuak thar leh a ka heh chu pet in ka lu ka thing nawk a .


********************************

DEVIN :

Ka hma a mipa naupang cycle khalh kawi zawr zawr chu hel tum in ka car chu ka herh kawi a , ka kawina lamah chuan ala rawn kawi leh ta cheu a , " sh*t! " ka ti tuarh a , ka car chu ka ti ding chawt a . Car atang a chhuak in naupang chu ka kai tho a , a thirsakawr chu ka tun that sak nghal a , " I na em , Vala ? Na i nei em ? " tiin a taksa chu ka en kual vel a. A kiu pilh nin nian bak engmah hliam ka hmu lova .

" Ka na lo ."

A hmel ka han en chiang chu eng nge a chhan ka hre lo ka thinlung ah hian tawk dawt tu hi a awm ani .A mitmeng leh a hmui hmai zawng zawng kha ka thisen a tel ni hian ka hre tlat a . He ti khawp a min chhun tur chuan kan chhungkaw tu emaw ber thlah ani khawp ang .

" Vala, kum eng zat nge i nih tawh ?"


" Kum riat..."

Ka fa chu ani lo chiang ..kum riat kal ta a Zampuiin pasal min neih san atang khan hmeichhe dang reng reng ka la kawp leh lo tlat ani . Thinlung na lutuka min kalsan hnu khan hmeichhia ka mamawhna hi a bo nge ni ka rinna a bo zawk hmeichhia reng reng ka ngaihven lova min ngaihventu tam hle mah se ka hnar fithla thak thei zel ani .

Zampuii ka tih hrehawmna khan min vaw let a kha hmeichhia ka hmangaihna kha tun thleng in ala reh thei lova eng tik lai mai pawh hian ka rilru leh ngaihtuahna ah a cham reng a , hmuh chak ngawih ngawih mahila hmu tur in ka zawng chhuak ngam ngang lo ani . Tunah chuan fate nei in hlim tak in kha Damien nen khan an awm ngei dawn sia , ka tan lo hmuh emaw ka ngaih thu lo hrilh emaw kha a rem tawh teuh silo .

" Na dang i nei lo tak tak maw ? Damdawiinah ka hruai ang che aw .?" zaidam tak chuan ka ti a .


" Aih , ka na miah lo tak tak ."

" Danyal ! "


Chu aw ri ka hriat chuan ka ding khawng nghal lawh mai a . Kum tam tak ka lo hriat chak leh hmuh chak Zampuii aw ngei kha a ni ..A hmel chu hmu chak teh mahila hmachhawn tur in ka inher ngam thlawt lo , ka lungphu te chu a zuan hian a zuang dawt dawt ani ber mai.


Mipa naupang chu a rawn kuah a , " Eng thil nge thleng ? I inhliam em ni ?" a ti nghal chul a .

" Amma , ka tha . Ka na lo ."

He naupang hi Zampuii fa anih chuan eng vanga min ang em em nge a nih le ? Kei ni lovin Damien a ang zawk tur ani lo em ni ? Ni e , he nau hi Damien fa ni lovin ka fa ka thisen ani ngei ang . Ka fa pai chung in Zampuii khan Damien kha alo nei ani . Ka kut chu ka hum ruh ngawt ngawt a . He ti khawp hian ani maw Zampuii min huatna hi lo thuk le ?

" Ka fapa hi i__" min rawn hmu chiah chu a tawng lai a tawp chiang kher mai . A hmai chu a dang nghal lawp lawp a ." N...Nang m...maw..!!??" aw khur dar dar hian a ti a .

" I lo dam thin maw ? " ka ti sup a .

Min chhanglo . A fapa chu a hnung lamah a nawr in a hliah tat tat a , " Danyal , inchhungah .." tiin a fapa chu a kai a a kal ta hlawk hlawk a .


Lungphu in thum rawn tluk tluk chung in ka thlir zui vawng vawng a , kha naupang kha ka fa ani tih ka thinlung hian min hrilh ani . Ka fa , ka thisen ngei ani .
Ka car ah lut in ka thu hnawk a , thaw ka han la vang vang a ..an tlan luhna in chu melh vang vang in kum tam tak ka thinlung na dam hnu kha a rawn na thar leh ta a .


Eng ang pawn min hua nise ka fa chungchang hre tur hian chanvo ka nei a sin . Kei chauh min bum a ni lo ama fapa ngei pawh a bum tel ani . Kei chuan thil lo ti sual mahila kha naupang khan engmah tih sual a nei ve lova a pa dik tak hre tur hian dikna a nei a sin . A pa ni hauh lo pa anga pawm tir hi a nunrawn thlak lua lo em ni ? Ka seat nghenchhan chu ka tukhum chuan ka tauh sawk sawk a ,"Hrep tak chuan !" tiin ka rum nghut a .

An thenawm hnai ber in ah chuan lut tawp in Zampuii te chungchang chu ka zawt ta phawng mai a . " Ka pi , ka lo ti buai lawk che . Hei in thenawm Zampuii te inah hian kal ka tum a an lo awm si lo a...ka .." tiin.


Chunu chu nelawm tak hian a nui ver ver a , " Damien nu te in lamah an kal anih dawn chu . An nufa chauh a awm saw an ni bawk a , Damien boral hnu kha chuan a nu te in lamah an tal tam zawk mah a ." a ti ta a.

Damien boral thu chuan min thawng tak zet ani . Ka tha te chu a ti khur ru thei hial a , " Pasal sun tur chuan ala naupang sia ka lainat tak tak ani . Damien kha pa tha tak anih vei nen ka ui khawp mai . A boral kha eng tik nge kha ka va chiang ta lo e. " pangngai taka lan tum chung chuan ka ti a .


" Kum nga kum ruk lai ani tawh lo maw ?"

"A la rei vaklo emaw ka tih lai chu alo rei ve leh ta hle mai a." ka ti a . Ka car a ka let leh hnu chuan ka rum nghut a . "Ka fapa chu fahrah in kum khati chhung zawng kha alo awm anih chu..nu leh pa la dam reng chung in a fahrah a..."


***********************


ZAMPUII :

Ka fapa muhil hmel chu ka thlir tlawk tlawk a , " Bawihte , Devin i ang lutuk hi a pawi ani .." tiin keima hriat tham lek chuan ka phun sep sep a .

Vawiin ka hmu thut kha ka hamhaih chhe lo chauh anih kha . Ka theihnghilh in ka hmangaihna te kha a reh hlen tawh ah ka lo ngai a . Mahse a hmel ka hmuh chiah kha ka hriatrengna ah a lo la nung reng in ka lo la hmangaih reng ani tih ka hre fiah uaih uaih a . Huat ka duh ngawih ngawih te hi engah nge kan huat theih loh a , hmangaih kan duh ngawih ngawih te hi eng ah nge kan hmangaih theih loh le ? Theihnghilh kan duhte hi engah kan hriat reng a , hriatreng kan duh te hian engah nge kan hriatrengna hi an luah si loh ?? Vawiin te khan Danyal a hmu sia ...a fa anih rinna a nei ang em ?


Kawngkhar kik ri ka hriat chuan muangchang in ka tho chhuak a , kawngkhar ka va hawn chuan Devina ruangam sang tak chu a lo ding run a . Ka beisei loh em avang chuan ka phu chiang kher mai . Kawngkhar chu khar hnan leh nghal mai ka tum a , a ke chuan a rawn dang vat a , " Khawngaih in Zampui..."


A mitmeng dum thuk taka tawrhna leh natna lo lang chuan min ti tim sawk thei hial a , " Sawi dun tur kan neih ka hre lo ." ka aw khur nasa lutuk thunun tum chuan ka tawng muang lui deuh a .


" Danyal chungchang hi sawi dun a ngai ani . "


" Khawngaih in kal bo rawh ."


Min rawn nek sawn a inchhungah chuan a rawn lut ta a . Reilote chhung mah nise ka taksa a rawn nawk ringawt pawh chuan ka lum pup hman ani . In chhungah ber a rawn lut ta bawk sia tih theih dang nei hek lo ka ding zum reng mai a .


" Danyal hi ..."

" Damien fa a sin . A birth certificate pawh ka hmuh thei ang che ."


A then sawk a .." Damien khan a fa a nilo tih a hria em ? " a ti vawt raih a . "Damien boral thu ka lo hre ve chauh a ...pawi ka ti in ka tuarpui tak zet che ani ."


" Damien fa a lawm." ka ti vin tuarh a , ka duh aiin ka aw chu a ring ani ." A finfiahna certificate pawh ka nei ." aw zawi deuh zawk chuan ka ti a . He mipa huhang na tak hma ah hian ka inthunun theihna te chu tih keh chhiat in a awm ani . Eng nga ti nge ka lak ah hian huhang a la ngah em em fo ni ?


" Ka fa a ni lo tih finfiahna sawm i rawn phawrh theih chuan ka fa ani tih fimfiahna sawmhnih ka phawrh thei ang . Birth certificate aiin DNA test hi thu tling a nih zawk ngei ka beisei . Tunah hian Danyal DNA leh ka DNA hi ka test tir dawn ani ." mahni in rin tawkna a khat chuan a ti a .


Beidawng tak chuan ka thu hnawk a , DNA a test chuan a fa anih zia phat rual ani dawn si lo . Ka thaw hawk a , "Damien khawngaihthlak ! A boral ni thleng pawn Danyal hi a fa ani lo tih a hre awm tawp si lo a..." tiin ka mit ah tak chuan min rawn melh run a .


A mit leh ka mit a in tawn chuan ka tek sawk a , tleirawl mahni crush te bula awm ang mai hian ka lai in ka thin chu a phu dawt dawt a , " A hre vek e aw . Aman i fa ka pai tih a hre chung pawh khan min neih a ama fa anga pawm a huam vang chauh a nei ka ni ." ka ti chhuak thawt a . Ka sawi zo chiah chu ka tawng sual zia ka in hrechhuak leh hnuhnawh a. Ka ka chu hup vat mahila ka sawi tur ang chu ka sawi zo hman vek tawh ..thil pawi chu a thleng fel vek tawh si . Mi mawl tak ka nih hi ...Zampui , i mawl lutuk .'.Buichhia chu laih lohvin a inpuang' tih zawng zawng i neih ta . In chum nawk nawk mai hi ka duh ani .

.A nui suk a , " Ka lawm e . Ka fapa ngei anih zia i pha ta lo ." a ti hmuk a . A hmel chu a nelawm loh in a vawt ruih mai a , " I laka ka thil tih zawng zawng kha pawi ka ti a , min haw ngawih ngawih tur pawh i ni . Mahse ka fa chungchang hi chu hre ve tur ka ni a sin ." a ti ta a.

Tun hma ka rilru natna leh thirimna ka lo up beh tawh chu rawn nung thar leh in , "pasal nei ila pawi i ti ang em ? tiin ka rawn zawt che a . A rual in pathum pawh nei ila pawi i tih loh thu min lo hrilh tu kha nang Devin Ramhmachhuana ngei hi i ni lo em ni ? Kha tih lai khan chhete pawn min lo ui der ve nila ka fa chungchang chu ka hrilh em em ang che . Mahse i mi hmuhsitna leh nuihsawhna ti tam tu mai atan i fa ka pai thu kha ka hrilh ta lo che anih kha . Ka nihn ang ang a min pawm duhtu Damien kha alo awm bawk nen . Ka tan chuan Damien kha neih loh theih loh ani a sin ." thinrim tak chuan ka ti ta phiar phiar a .


" Ka Pathian ! " tiin a rum kawk a ." Ka lo tawrh tir hnem che em ani . I laka ka chet dan nunrawng tak khan min vaw let a , tun kum riat chhung khan rilru na leh mahni inthiamlo reng reng in hun ka hmanga ni khat te pawh hi ka theihnghilh ngai lo che a sin . " a ti tham tuak a .


A tawngkam leh a mitmeng chuan min khei zawr mai a ,.kei pawn ka la hmangaih reng che a ka la theihnghilh biklo che tia au chhuah piap mai chu ka chak ani . Thunun rual loh in ka thin chu a phu hlawp hlawp a , eng nge a chhan ka hre lo ka mittui chu rawn luang in ka in sut ta hlawp hlawp a .


Tim deuh dai hian min rawn kuah a , a mi tawhna chuan ka tiril a fan er er a ka thisen chu a luan ran tir sauh a . "Sshh...' tiin ka sam ah chuan duat tak in a chul hliau hliau a , " Kha i tawrhna zawng zawng kha hlimna a thlak vek ka duh ani . I hriatrengna a cham reng ka sulhnu hliam kha nawhreh sak vek che a , hriatrengna hlimawm taka thlak hi min phalsak rawh . Khawngaih in Zampui , chance min pe leh rawh....vawi khat chiah ..." ti tham tuak in min kuah bet thlawp a .

A mitmeng dum muk tak chu ngui ruai in mittui hi a tling pam mai a , dawt a sawi lova a rin tlak ani tih ka hria ..He hun hi ka lo nghah reng chu ani thei mai ang em ?


" Danyal-a tan pa tha tak ka nih theih nan leh hlim taka ka siam theih nan che vawi khat chiah chance min pe hram rawh ." tap mai tur aw rawl hian a ti a . " Min phut anih chuan i hma ah thingthi leh bawkkhup pawn ka ngen mai ang che ."


Thingthit a tum tak tak takah chuan ka kuai tho vat a , " Nilo ,Devin , ti suh . Min hlat la ka duh zawk ani ." ka ti a .


" Eng vang chuan maw ? Ka hmangaih che a , kum riat chhung ka lo tuar tawh a ka kal san thei lo che ani ."


" Kei hi i tan mi hlauhawm ka ni . Min hmangaihtu a piang chu an thi zel a sin . Luke leh Damien ka chan tawh a , nang leh zel ka Chan leh che chuan he thinlung hian a tuar chhuak zo tawh lo ang ."

" Chutiang puithuna atthlak tak chu paih bo nghal rawh. Pathian hian kan chanvo hi a lo duang lawk dim diam tawh a , chu chu mihringte tih danglam theih ani hlei nem . Kei hi Pathian in thi tura min lo ruat anih chuan ka neih loh vang che khan ka dam phah dawn lo . Chulo ah mihring tan vawi khat thih ruat ani a , tu pawh hi nung hlen tur kan awm hlei nem . I tello a damchhung nun hman ai chuan kar khat lek pawh i kianga awm a thih pawh ka thlang zawk ani . Ka hmangaih ngawih ngawih che a , ka nunna ai pawn ka hmangaih zawk che ani tih hi eng tin nge ka hrilhfiah ang che ?"


Ka kuah chawt a , a awmah chuan ka bei thlawp a , "Devin, ka hmangaih lutuk che ani . Khawngaih in min kalsan tawh suh ." ka ti mawlh mawlh a .

Devin mitmeng chu hlimna vang in a de sawr sawr a , " Ka lawm e . Ka fapa nen hian hlim tak in ka siam ang che u . In tan ka awm reng ang eng tik lai pawn ." tiin min fawp ta vawng vawng a .


Tunah chuan ka hlim tak zet ani , ka hlimna hi engmah in a tih chhiat ka phal tawh lo . Devin hian min hmangaih a , min ti na ngai dawn tawh lo tih hi ka chiang a
Danyal pawh a pa dik tak bulah chuan thlamuang tak in a awm thei dawn a . Damien thlarau pawn min lawmpui ngawt in ka ring . Nupa kan nih chhung khan a tan ka theih tawp ka chhuah a mipa leh hmeichhia inkar hmangaihna nilo thiantha in hmangaihna ang chauh in ka hmangaih a ka hmangaih dik tak chu Devin ani tih kha a hrechiang ber tu pawh amah Damien kha ani .

Tunah chuan nun bul kan tan thar leh ta a Kei , Danyal leh Devin __ chhungkaw dik tak chu .

🖐️🖐️🖐️🖐️🖐️🖐️🖐️🖐️🖐️🖐️🖐️🖐️🖐️🖐️🖐️


HMUN AWL :

A TAWP TA TAK TAK TA !!🤗

He thawnthu BITTERSWEET REVENGE hi ka script 'Thinlung Keh Chhia' tih behchhana ka rawn ziah ani a . In duh dan inruallo nuaih nen ka rawn ti danglam ta chiam mai a . Ngaihnawm ti in lo ti ula , ngaihnawm tilo chuan lo ti lo mai teh un..😂😂

Sequel a rawn tih kan rilruk uk a...thawnthu ziah lai ka nei nual bawk sia ka indaih dawnlo lutuk a , ti hian bonus ang in ka rawn dah leh ta zawk mai .

Ka thawnthu min lo ngaihhlut sak a min lo chhiar saktu te in vai chungah ka lawm tak meuh meuh e. "Ka lawm e." tih ringawt aiia thuk zawk a lawmthu sawi dan hi a awm em ? Min lo hrilh teh u...

A tawpna ani tawh bawka ka tlak duah dawn 🤣 Chapter tawp ah hian hmun awl ka rawn hnawh khat thin a . Thil eng eng emaw ka rawn thai rang thin a , ADS CLICK chungchang ka lo ziak lang ve ngai hauh lo tih ka hre chhuak ! Kan hriat tlan sa vek anih ka rin vanga rawn ziaklo mai chauh ka ni . Thawnthu chhiar mana kan bat chu advertisement click kha ani a ..Khawngaih in i click theuh ang u aw.


"I'LL BE BACK with NGHILH HAR DI " Arnold Schwarzenegger aw anga thum leh rum khan lo chhiar r' u aw...😂😂😂😂😂

*** KAN WEBSITE A FAKNA LAM THIL MILEM LANG THIN I LO HMEH ZEUH HIAN KAN WRITER TE HLAWH KAN TUMSAK ZEL TIH KAN HRE THEUH DAWN NIA, KAN LAWM E***

Website story link ho awlsam zawka in zawn hmuh zung zung theih nan STORY FB group siam a ni a. Whatsapp group pawh siam a ni e. Complete tawh ho zawng zawng leh story kallai kan dah vek avangin avangin in lo join theuh dawn nia..
Group link : https://www.facebook.com/groups/991354610918230/

Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)