NGHILH HAR DI BY Maveni Hmar (Completed)

Episode nei ho a hlawm a dahkhawmna
Ngaia
Site Admin
Posts: 25813
Joined: April 30th, 2016, 4:07 pm

Re: NGHILH HAR DI BY Maveni Hmar (Completed)

Unread post by Ngaia » May 16th, 2021, 3:32 pm

BUNG : 07

RICKY :

Ngawrh takin shooting chu kan neih zawm leh char char a , kan shoot zawh meuh chuan a lawm nan kut min ben sak dar dar a .Tunah chuan ka thawveng ve thei ta . Pangngai takin thawk ka la ve thei tawh dawn anih hi.


Vala chuan , " Awle ...in zavaiin in thawkrimin in thawk tha hlawm hle mai . Tunah chuan ' Hmelma Anka ' chu za ah za zawh fel ani ta !" tiin min rawn pan phei a , ka darah chuan beng thak thak in , " Hei meuh hi chuan i video hmasa ho kha chu a khum zak ngei ang . I thawkrimin hlawhtlin hi i phu tak zet ani ." min nuih var var pah chuan a rawn ti a .


" Ka lawm e . Nang mahni thawhrim leh thiam zarah hlawhtlinna kan hmu ve dawn anih hi ." tiin ka lo chhang vat a . Kimi coke min rawn pek chu banin ka in nghal zat a . Kan make up artist Hriati chu au in , " Hriati, ka make up hi rawn hru reh vat teh. Nuam ka ti lo teh mai ania ." tiin .


Nui her her chuan min rawn pan vat a , " Make -up nen hian i lang thain i lang Korean zaih mai asin ." a ti halh a . Min cheina make up chhah tak chu min tih fai sak nghal mawlh mawlh a .


" Korean ka ang maw ?"


" Aw. Ang tawp . "

" Tuai i ang min tihna anih chu ." ka tih chuan an lo nui dar dar a . Mipa hmeltha leh ngo deuh vang tawh hi chu 'Korean tuai i ang ' tih thlak zen hi an chin em vanga han sawi ve satliah mai chu ka ni .


Ka hmai a tih fai zawh chuan engthawl halhin Kimi nen chuan thil ei turin kan chhuak dun a . " Tunah chuan ka nunna lalnu hmu turin eng thil mahin min dang thei ta lo e ." ka ti phar phar a .


Kimi chuan a hmui chu a lo ner kual kawi vel nasa mai a ." Eng i sawi na nge ?" a ti ha a .

" Farkawn lamah ka Angel hmu turin ka ving chho dawn mawle . A aw hre lo leh a hmel hmu lova ka awmna hi thangkhatlian lai ni tawhin ka hria . Ka ngai lutuk hi ka aa lo chauh anih tawh hi ."


" Kal lo zawk la a that ka ring ."

" Eng vang chuan maw ? A tello chuan ka kim lova mi kim lo hnathawh pui i duh reng em ni ?" tiin ka nuih hawk hawk a .


" Ualau tak a ngaihzawng i neih hi ka duhlo ani .Mi zawng zawng mit fukna leh en bik i nia mi naran in ngaihzawng nei se tuman eng khaw kha ah mah an ngaih loh tur kha , nangin nei ve ta chiah la mi sawi , mi sel leh dem i hlawh nghal anga i larna hi a chuai nghal rawih rawih mai ang ."

" Ka nupui ni turin ka hruai haw nghal dawn mawle ."

Kimi chu a meng zau kawk a , thinrim tak hian min melh kawk a , " I aa ta em ni ?" a ti tuarh a .


Ka lo nuih san mai a ." Nie, ka aa tawh . Hmangaihna a bual at in ka awm tawh anih hi ." tiin ka dar chu ka san ak a .


" I hla thar kan release dawn a , nupui i neih zui mai chuan a nghawng tur chu a chhe hle ang aw . "


" Ka hla thar promote nan a tha phian zawk thei a sin ."

" A chang hi chuan phuar hlawm tawp che a vuak hrep mai che hi ka duh rum rum thin ."


" Min phuar hlawm in min vaw phal tawp nang . Nang hian min mamawh tlat a lawm __i sum siam nan ." tiin ka nui hawk hawk a .

" LALZAWMPUI !!"

" Hmun leh hmun ah kha tiang em em a ring kha chuan min ko vak vak kher lo la...ka ri hriatna hi a la chhe lo a nia ."

Kimi thinrim hmel chu a alh lo chauh hi a ni ber a , " Nupui i neih ni la la hian rimawi lama i career chu a chhe nghal vek tih i hre dawn nia ." a ti nghat a .


" Ka hringnun kawng ka zawh ve tan dawn tihna a nih Chu . Ka fans te duh dan ni lovin keima duh dan ngei a ka nun ka hman a hun ve tawh i ti lo em ni ? "

🧚🧚🧚🧚🧚🧚🧚🧚🧚🧚

LALRINZUALI :

Tunah chuan ka harh in ka zia tawh khawp mai a , doctor paw'n min chhuahtir har ka ring tawh lo ani . Damdawi in boruak chu hnein hrehawm ti viau mahila lo chhuak ta pawh ni ila pan tur ka neih miau loh vang chuan chhuah chu huphurh tak te in ka huphurh a ni .

U Mapuia chu ei tur eng eng emaw khai bawr lak hian a rawn lang leh nawlh a , a ei tur khai vel chu ka khum bul locker ah chuan a dah a , "Vawiin lam te eng nge ilo an a ?" hlim hmel pu sarh hian a ti a .


Khum atanga thoh chhuah pah chuan , ka lo nuih sak a , "Ka tha tawh lutuk . Nizan pawh khawsik ka nei tawh miah lo. " ka lo ti sawk sawk a .


" I dam tawh dawn anih chu ti raw ? Dam vat vat rawh . Ka thil rawn ken te hi theih anga tam ei tum ang che . Ka ei chaklo ti a chaw ei te hi thulh mai mai tawh lo ang che . I taksa leh i naute khan ei tur tha leh hrisel an mamawh ani ." tih pah chuan ka khum bulah a rawn thu nghal a .


" Ka lawm e . Min tanpui nasa in ka tan hian i tha tak zet ani . Ka laka i thatna zawng zawng hi ka rul seng tawh lo ang ."


" Lawmthu min hrilh suh . Thian kan nih tawh kha . Thian tha kar ah lawmthu an sawi ngai lo ." tiin a nui sak a .


" Mahse ka lawm miau si a lawm .''


" I lawm anih chuan i naute vang tal pawh khan thil ei tam ang che ."


" Ka tum ang e ." ka ti sap a .


" Chuti mai tur chu ani . Naupang fel tak i ni e ." tiin nui vur vur chung chuan thei ei tur min vel sak a .

Ka tana a thatna zozai hi eng tin nge ka rulh let zawh theih ang ? Ka damdawi in awmna senso lah a tam dawn nasa mai sia . Mi khawngaihna ngah tak leh ngilnei tak chu ani , keiin rul seng lo mahila Pathian hian a let tam takin a rulh ka ring tlat ani .


A thei vel chu a zawh chuan kan pahnihin kan ei dun a . Fiamthu eng eng emaw hi thawh in min ti nui nasa ngei mai . Kan khua ka rawn chhuahsan atanga ka nuih nasat ber ni a ni hial ang chu .


🧚🧚🧚🧚🧚🧚🧚🧚🧚🧚


RICKY :

Farkawn ka thlen dawn hnaih chuan ka car chu ka khalh zawi ta deuh a . Angel ka hmu chak tawh lutuk chu ka lungphu pawh a mumal thei tawh lo a , ka thawk te chu sak deuh talh hian ka hria a . Minute tlemte hnu ah chuan ka thlakhlelh em em chu ka hmu tawh dawn ani si a ..Ka hmuh huna ka biak dan tur vel suangtuah rilru chung chuan ka nui sak a .


Westlife ho hla sak ka duh tawp theih loh ' My Love ' tih chu play in an zai chu ka lo zawm ve bawk a . Kar lo ah hmangaih ber te lenna Farkawn chu ka in khalh thleng ta hlawl a . Ka hla play chu ti tawp in Angel-i te kawt ah chuan ka car chu ka ti ding ta a .


In chhung atang chuan Angel a rawn tlan chhuah mai beisei a ka thlir reng lai chuan nula pakhat hi a rawn chhuak nawlh a , mak tih hmel em em hian min rawn en ha mai a . Car atanga ka chhuak chiah chu " RICKY !!" tiin a te ta teng tung mai a . A zuang tawr tawr a , " Nu ! Pa! Lo chhuak teh u...Ricky Lalzawmpuia a lo kal !" a ti ta chiam chiam mai a . " Awi !! Nangmah ini tak tak maw !!? Sawmtei ka nia , hei hi kan in anih hi . " tiin min rawn chibai lawp lawp a .


A thawm hriain a nu leh pa leh an thenawm khawveng chu rawn chhuakin min rawn chibai lawp lawp hlawm a , min ngaihsan zia leh ka lam leh zai an duh zia te min hrilhin thla te min lak pui mawlh mawlh hlawm a .

Ka Angel chu a rawn lan ve mai beiseiin ka hawi kual ruai a , ka hmu ta mai silo chu ka beidawng hman hial a Mami ka hmuh takah chuan ka thaw a veng deuh huai a . Ka pan hnai nghal ruak a , "Mam, khawi ah nge Angel hi a awm a ?" ka ti sa sa a .


" Eng a ? Eng nge i sawi awmzia ? " a ti phawk hra a . Angeli te inah chuan min kai lut nawk nawk a , " Rinzuali chu i kiangah a awmlo i tihna em ni ?'' a ti ta hu mai a .


" Awm nang . He khua ka chhuahsan hnu khan a hmel ka la hmu leh lo reng reng." ka tih chuan a thaw hawk a .

"A va mak ve ....''


" Hetah a awmlo i tihna em ni ?" ka ti deuh hu a . Mak ka tiin ka rilru chu a buai ta map mai .


Angeli nutei emaw chu a rawn lut a , " Rinzuali chanchin em ni i sawi ? Eng tia in hria nge in nih a ?" a rawn ti he haw a .


" Ka hmangaih em em a , amah hmu tur a rawn kal ka ni ." tiin thudik chu ka hrilh ta vek a . Sawmtei chu rawn lut ve chiah in ka thu sawi chu a rawn hre ve hman chiah a , meng phawk hra hian min rawn melh ta kal mai a .


"U Rinzuali chuan pasal a um daih a lawm ."

Ka thu hriat chuan min thawng lutuk a , ka ding nghet zo thlawt lo . Thutthleng hnai ber ah chuan ka thu ta hnawk a . " Pasal a um maw ???!! Ka ring thei lo . Tu nge a um a ?" ka ti chuai raih a .


Sawmtei nu chuan " Aizawla a bialpa mawle." a lo ti hluk a .


sh*t ! Ka thawk te chu pik ut ut hian ka hria a , engkim hi dawt a lo ni . Ka Angel chuan pasal min um san duh maw ?? Ka rilru na , zak leh thinrim lutuk chu ka puak lo chauh ani . He mi te nufa hian dawt min hrilh a ni hrim hrim ang . Mami chu ka melh aa ruai a , " Mam, khawngaih in thu dik min hrilh teh ." ka ti ta thlawt a .


" Ka hre lo..eng emaw thil fello chu a awm chiang ani . Rinzuali kha nangmah nen in tlan dun emaw ka lo ti char char a ..."


Ka thaw hawk a , " Hmeichhe rinawmna hi a lo va derdep tak em ! " ka ti hluai a , ka tho thut a ka car lam pan chuan ka kal ta nul nul a . Thinlung tawt lutuk chuan ka car chu ka khalh a , Thangromawia hla ' Mitthla An A Lang ' tih chu play in ka thaw hawk a , ka tap lo chauh chu ani ber e . Angel nen kan inhmuh hmasak ber na hmunah chuan ka kal a , kan nunhlui zawng zawng chu ka mitthla ah a rawn lang uarh uarh a .

" Ka hua che ani. Ka hua che . Ka hmangaih ber che min ti ani lawm ni ? Eng vang in nge mipa dang min um san leh si ? " tiin ka phun mawlh mawlh a


A hma a kan lo thut dunna hmunah chuan thuin thingkung chu ka ngheng vang vang a ." Khawvel mihring zawng zawng zingah ka hmangaih ber che min ti ani lawm ni ? He ti khawp hian ani maw i hmangaihna hi a lo tlo loh ? Kei chuan ka hmangaih tak zet che a . Ka nupui ni tur in rawn hruai che ka tum a midang min lo um san thei maw ?? Bumtu nunrawng tak ilo ni e ."


Ka thinlung na lutuk chu motor khalh tur pawn ka inring zo rawh lo a . Ka thutna ngaiah chuan ka thu ngawt ngawt a . He na thei thinlung hi tih tak zet in a na ani . Thawm that leh rual loh in a puak keh chhe darh ta vek anih hi . Ka tawn loh tur di ka lo tawng a , ani chuan tawrh zawh rual loh khawp a na tawrh hrehawm min siam sak ta anih hi .

🧚🧚🧚🧚🧚🧚🧚🧚🧚🧚

LALRINZUALI :

U Mapuia chuan hlim hmel taka nui sang hian min rawn pan a , " Doctor chuan i chhuak thei tawh a ti che anih chu aw . A lawmawm ti raw ?" a ti phar phar a . Ka chhan tak lawk loh vang chuan chik zet hian min rawn melh a . " Eng nga ti nge i va hlim hmel vak si lo ve a ?. Hlim ta che , nui rawh ." a ti zangkhai vah a .


Ka nui lui sak a , " Chhuah pawh ka chak lo ...awm reng mai a nia ka duh ni ." ka ti sap a .


" Eng vang ngawt chuan ? Nang hi ... doctor star deuh i nei chiang !" tiin min la fiam zui a .


" Chhuak pawh ni ila khawiah nge ka kal chuan ang ? "


" Ka inah ka hruai dawn che a lawm ."


" Eng tin maw !!??"

" Ka in ah ka hruai haw dawn che ."


" Mahse ...i chhungte....."


Ka puan leh thil vel chu phur takin a khung fel zung zung a , " Ka nupui nen kan inthen tawh a , keimah chauhin in ka luah a . Ka chhungte venthawn tur pakhat mah an awm lo . Rilru nuam deuh khan awm rawh ." a ti leh zel a .


Ka va inthlahrung zo zai tak em . Mi thatna zarzo a , an tawngkam tha um reng hi ka zak ve tho . Mahse , midang thlazar hnuaiah lo chuan mahni ke a ding thei dinhmumah ka la ding bawk si lo . " I tan phurrit ka siam reng mai che anih hi ." ka ti halh a .


" I va han Γ‘ reuh tak . Ka tan phurrit i ni lo . Keimah chauh a awm ka nih vang hian ka indaihloin ka buai thei em em a , rawng min lo bawl sak tu tur leh inchhung sekrek min lo khawihsak tu tur ka mamawh ani . Ka bulah thla khat a cheng sangruk hlawhin rawn thawk ta che . I duh ang em ?" a ti ta a .


Ka phur lutuk chu ka zuang lo chauh ani ber e . Hlim tak chuan ka nui ta var var a , " I ti tak tak maw ? Awi..ka van lawm tak .!" ka ti ta chul a . Ka thawmhnaw neih ang ang chu ka khung nghal sawk sawk a . Tunah chuan hna ka nei ve dawn ta bawk a hmabak thlir tur ka nei ve ta a lawm .

Kan in siam peih hnu chuan ka bag chu zo takin a khai a , a car hunna lam pan chuan kan in zui ta hnak hnak a .Min ngaihven thiam takin a car kawngkhar chu min hawn sakin min thut tir thlap a , a in lam pan chuan kan tlan ta nghal a .


A in chu pawn lam atang a en mai pawn a zau in a changkang tih a hriat ngawih ngawih a . " Welcome home." a ti sap a .


" Wow...a nalh hle mai . Mahni Mai a awm nan chuan a lian mah mah anih hi ." ka ti ngawt a .


" Hei hi i in ani ve tawh ang . I duh chen chen i awm ve thei ang . "


" Ka lawm e ." ka ti sap a . Ka mitthla ah chuan Ricky chu a rawn lang zawk a , he in hi kan pahnih a chenna tur ni zawk se ka ti vawng vawng a . Mahse chu zawng ani dawn lo kumkhua tih ka chiang si .


U Mapuia chuan min rawn melh zawk a , " I hmel hlim loh danah naute pa i ngaihtuah leh tawh ani maw ? Duhlo a hnartu che chu ngaihtuah zui duh bik suh. Ti khan lo thu la in tur ka siam ang che ." a ti a .


Muangchangin ka thu riai riai a , nghenchhan chu nghengin ka chhing vang vang a . He ti khawp a min ti na duhtu hi ka hriatrengna atangin ka paih bo tur ani . Ka theihnghilh tur ani . Piang ve lo ang ah ka ngai tur ani ..


Thei tui hi rawn kengin min rawn pe a ," Enteh , i naute vang chauh tal pawh khan hlim taka awm i tum lui hram tur ani ." tiin lehkhapuan leh pen hi min rawn pe leh a , "Tah hian naute pa hming kha ziak khat vek rawh ." a ti a .


Thei tui ka in zawh chuan a sawi ang chuan Ricky hming chu lehkha ah chuan ka ziak khat tuarh a . " Ka ziak zo tawh e . Eng tin nge ka tih zel dawn ?" ka ti he haw a .


Lighter min pek pah chuan , "Hei hian hal ral rawh ." a ti leh a . A sawi ang chuan ka hal ral ta mai bawk a ." Awle, pawnah chhuakin a vap kha thli thaw va len bo tir rawh le ." a ti leh a . Verandah ah chuan chhuakin ka lehkha hal vap chu pharhin mitkhapkar lek ah thli chuan a len bo ta vek a . Kut a beng thak thak a , " Ti kha chuan naute pa chu i nun atang in i dah bo ta a , i theihnghilh thei tawh ang ." tiin min nuih var var a .


"Ka lawm e . Min pui nasa ngawt mai . Ka theihnghilh theih ngei ka beisei ." ka ti sap a .


" I thian ka nih tawh kha . Thian kar ah lawmthu an sawi ngai lo . I nunhlui leh i hlimlohna zawng zawng kha hal ral ani tawh a . Tun atang chuan a tharin nun bul i tan thei tawh anga , i hringnun bung thar chu nangmah ngeiin ziak rawh le . " tiin ka dar ah chuan a beng thak thak a .


Ka nui sak a , " Nie , nangma min puihna zar ah nun bul chu ka tan thar thei em em ang . " ka ti ve ta sap a . Min duhlotu ngai a tah reng hian awmzia a nei lo a , mahni in hremna mai ani . Chuvang chuan nunhlui chu hnuchhawnin ka fa lo piang tur tan hian theih tawp chhuahin nun ka tum tur ani .

Nie, ka nunah hian hrehawmna leh harsatna tam tak ka lo paltlang ve tawh a , tuna ka hrehawm tawrh mek pawh hi ka paltlang leh thei em em ang .



Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » May 16th, 2021, 3:33 pm

BUNG : 08


RICKY :

Kan in ka thlen leh chuan keimah ah hian phurna leh thathona chhete mah gmuh tur a awm loa , ka hlim loin ka zawi ngawih ngawih a , ka thinlung na chuan ka taksa peng tin chu a ti na vel vek hian ka hria a . Ka eng tih mah a phur lo mahni chauh a awm a rui hnep khawp a zu in chu ka mamawh ber niin ka hria .


In chhung ka lut chiah chu ka nu leh pa te chhuak tur nen kan in tawk chiah a ,chik zet hian min rawn melh a ; ka kal pelh hnu chuan ka nu chuan ka banah min rawn pawt ding chawt a . "I hmel landan a va diklo ve a . I chungah eng thil nge thleng a ? I kal dawna i phur teh reng nen." a ti chul a .

" Engkim a tawp vek tawh. Mahni a awm ka duh ...ka mu dawn ." tiin a kut chu ka thing thla a , ka bag khai chuan ka room lam ka pan a .

Ka nu chuan min rawn um zui a tum ani ngei ang , ka pa chuan , " Amah in awm tir rih rawh ." a tih ri chu ka hria a .


Ka nu chuan , " A hmel a rilru natna lo lang chhuak kha i hmu lo em ni ? Ka fapa hian hnemtu a mamawh anih hi ." a ti lang lang a .

Ka pa chuan , " A thianpa RKa leh Kimkimi ko zawk rawh , an nin an hnem thiam ber ang ." a ti leh a . Ka room ka thlen chuan an in biakna chu ka hre pha ta lo a .


Khumah chuan ka let thla nghal tawp a , ka thaw kawk a . He ti khawp hian thinlung hi a lo na thei a lo ni maw ? Kei aia a thlan mipa chu hmachhawn a hnek pawp pawp hi ka chak zek zek a . Rilru leh thinlung na chu khuareiah a dam ve mai an ti maw kha . Mahse khuarei chu eng tia rei nge ni ang le ?


Phur lo tak chuan inbual fai turin bual in ah ka lut a , ka inbual zo ka chhuah leh chuan Kimi chu khum bul chair ah lo thuin , RKa chu ka khum ah a lo mu duai tawh a . " Thianpa, eng nge thil awmzia ? Angel chu eng vanga rawn hruai haw lo nge i nih a ? " a lo ti nghal a .


" Ngaihzawng dang a lo nei a , an in ru daih a lawm . Ka hmangaihna chu duhloin lei ah a paih a , a la rap hrual zui a . Ka in chhuan ve tawkna zawng zawng Chu a ti chhe vek ani."


" A chhung ten dawt an hrilh che a ni khawp ang . Thu dik anih ka ring thei lo .A hmangaih che a , a nulat thianghlimna pawh hlan phaltu che khan chuti mai chuan a phatsan che ka ring lo . Chuloah , Ricky Lalzawmpuia hi tu hmeichhia mah in an hnawl phal ka la ring theilo cheu ani .


" Thu dik anih zia ka fiah a lawm . A thian tha ber Mami ngei pawn pasal a um thu a sawi ani . Hmeichhia hian rinawmna an lo nei hlawl lo anih hi ."


Kimi chuan , " Hmeichhia zawng zawng hi kan in ang vek lo ." a lo ti hlak a .

" Mipa i ni a i chhel tur ani . Angel hi khawvel a hmeichhe awmchhun ani lo tih hria la , nangmah atchilh ngawih ngawih tu Angel aia a let tama tha an awm teuh a nia . Pachang tak in aw ."


Kimi chuan , " Hmeichhe pakhat vang mai a lungngai a in dawm kun zawng a tlawm thlak lutuk in Ricky Lalzawmpuia tih dan tur ani lo . In ti pachang la nasa zawk in zai lamah i rilru pe zawk hlauh rawh . Naktukah i music video kan release dawn kha inthing harh deuh teh . Mi naran ni loin Ricky Lalzawmpuia ngat i nih kha ." tiin min lo hnem ve bawk a .


Ka thaw ham ham a , ka nui lui sak a , " Angel ka lo hmangaih thinna zawng zawng kha huatna ah a in let a , amah vanga nun ti chhe khawp a in dawm kun reng ka tum lo. Eng tianga na pawh nise ka tap lo ang , har hle mah se ka nui lui tho ang ." ka ti ve ngat a .


RKa chu a nui vur vur a , " Chu chu ka thianpa Ricky mize dik tak ani reng ani ." tiin a lo bu nghut nghut a .


Nie , chhel takin ka awm ang , min duhloa min hnawltu ngaia indawmkun hian awmzia a nei lo . Kal rawh se , ka umzui lo ang , ka tana Pathian ruat anih chuan ka hnenah a rawn kir leh mai ang . Rawn kir leh ta se...midang min um santu hi ka lo pawm leh duh dawn em ni ??


Hringnun hi rose par ringawt ani loa , hling zum tak mi chhun thi zawih zawih thei khawpa hriam a pai tel ani tih ka hre thar ve ta alawm .

🧚🧚🧚🧚🧚🧚🧚🧚🧚🧚🧚🧚🧚

LALRINZUALI :

Zanah ka mu hmain ka mu tui bawk a , ka tho hma kher mai . Ka thoh phat atangin rawngte bawlin ka che nghal char char a . Ka hna thar chu tlin taka thawh a , U Mapuia mit tlung ngei tur a thawh ka tum ani .

" Good morning ! I va tho hma awm ve a ." tia ham bai bai in Mapuia chu chokaah a rawn lut a .

" Morning !" tiin ka lo nuih var var a . " Zing ka tho hma thang a ngaiah ka nei tawh ani . Thingpui i duh em ?" ka tih zawm zat a .


" Aw , ka lo in ang e . Nizan lam te i mu tha maw ?"


Thingpui pek pah chuan ," Aw. Mu tha teh reng mai .Vawiin lam eng nge i tih dawn a?" ka ti a.


" Ka office phawt anga chawhnu lamah chuan music video release tur kan nei a , ka rawn haw tlai deuh mai thei ."


" Anih chu mawle.."


" E..hei phone pahnih ka nei a , pakhat zawk hi i nei dawn nia ." tiin min pe a .

Nuamlo ti zet chuan ka tawi hrat a , " Ka la ngawt thei lo ang . Ka lakah i thain i inseng hnem tawh ropui sia .." ka ti niah niah a .

" La mai rawh . Min rawn biak duh hun te ila nei anga chumi hunah chuan ila chhawr tangkai ngawt ang."

" Mahse ka __"

" La rawh ka tih chu ."

" Aw __anih ka lawm e aw . Ka lawm lutuk ." ka ti bah nuaih a .


" Sshh...lawmthu sawi a ngailo ka tih tawh kha ."

" Anih , lawmthu ka sawi lova mahse ka lawm tih ilo hre dawn nia aw ." tiin ka nuih ta var var a .

🧚🧚🧚🧚🧚🧚🧚🧚🧚🧚🧚🧚🧚🧚

RICKY :

' Hmelma Anka " music video mini album release inkhawm chu chawhnu lam dar 4:00 ah kan nei a , min tawiawmtu an tha hnemin a hlimawm phian a . Big screen ah kan thlir ho a , music rem a fuh in video a changkang hlawm bawk nen a fuh phian ani . Kei ngei pawh in ka chhuang ru veng veng mai .

A hmunah pawh copies tam tak kan hralh chhuah mai bak ah YouTube ah kan dah bawk a . Kan dah atanga minutes reilote ah views sing kan hawlh pha tep mai a .

Kimi chuan ka darah rawn beng thak thak in , " I che tha e, Ricky!" hlim tih hriat tak chuan a ti a .


Mavala lah in kut beng thuk thuk in , " A tha lawr lak e . !' a ti lung lung a .


Mapuia chuan nui vur vur hian min rawn melh a , " Nula ho in an atchilh leh mai mai ang chu aw..." a ti a .

Kimi chuan , "Nula ho rilru hneh hi kan tum ber chu ani . Ricky , he video ah hian a tak aiin i lang tha zawk daih anih hi ." tiin a nui har har a .

" Make up leh editing power anih kha ." tiin dar ka san ak a .


" Heti khawp a kan chet hit hnuah pawh a changtupa ber hi a hmel a va hlim lo ve ." Mavala chuan a rawn ti a .


" A hlim lutuk a awmdan tur leh lan chhuah tir dan a thiamlo anih hi ." RKa chuan alo ti zauh hman pek a .


" Ka hlim lutuk a lawm . He video siam tura min puihna kawng engkimah ka lawm ani
Nang ni zawng zawng tello chuan he video hian khaw eng a hmu dawn lo tih ka hria a , in za vai chungah ka lawm tak meuh meuh ani ." tiin ka thiam ang tawk chuan lawmthu ka sawi ve a .


🧚🧚🧚🧚🧚🧚🧚🧚🧚🧚🧚🧚🧚🧚

ZOMUANPUIA :


Tlaiah chuan haw tlang lo in ka bazar haw nghal a . in chhung mamawh chawhmeh ilo vel leh Rinzuali thawmhnaw tur ka lei sak nual bawk a . Chutia ka in khai bawr teuh a haw leh mai ka tum lai tak chuan ka car bul mai ah chuan Tetei chu a rawn ding chat a . Ka thil lei te chu chik zet hian a rawn melh a .


Hmel hmai a lungawilohna ti lang chuang hauhlo hian , "Hmeichhe thawmhnaw maw ?" a ti sap a . Chutah awki nelawm loh zawk hian , "Nang hian hmeichhe dang min neih san tihna em ni ? " a ti kha fak a .


" Lo nei ta pawh ni ila a pawina a awm hlei nem . Nang nen hian inzawmna kan nei tawhlo a , i duh dan ang ngei in sum i chhuah tawh a lawm ." ka tih khum ngat a . Ka car ah chuan lutin ka in khalh haw san ta a .


In ka thlen chuan Rinzuali chuan min lo en hau mai a , "I lo haw der tawh ani maw ? Eng eng nge i lei a , i va bawr em em ve .." a lo ti zung zung a ,ka thil khai te chu min lo lak sak nghal var a .

" Nia , chawhmeh leh i thawmhnaw thar tur ka rawn lei sak che a ..."


" Ka __"


" Shhh...Eng nge sawi loh tur ka tih thin kha ?" tiin ka nuih var var a .


" Lawmthu !"


" Chu chiah chu ! Tuna i hak lai deuh hlir mai kha i ha a , thawmhnaw thar i mamawh niin ka hria a , ka rawn lei mai ani . I nutapa in thawmhnaw thar a lei sak ah che ngai mai rawh." ka ti thuai a .

Inthiamlo hmel tak hian a meng kun lap a , " Kawr chu ka ngah a sin . I rawn lei duh kher ani ...ka tan hian i in sengso hnem tawh si nuam ka ti bik tawh lo ania ." a ti halh a .

" In chhungah i che hahin i buai thei sia i phu ve reng ani e ."

" Ka hna ania ka che tur a lawm. "


" Kha la la , han ha chhin teh ."


" Thil min tih sak hian ka inthlahrung telh telh zawk ania .."


" I unaupa ang in min en la ,in thlahrunna tur engmah a awm lo ."


A thawmhnaw ka lei sak chu a la ve ta mai bawk a , inchung lamah ha chhin tur chuan a khai bawr chho ta a . A hnunglam atang chuan melh in ka nuih zui sak a . Naupang fel leh inngaitlawm tak chu anih hi . Amah bum duhtu mipa chu mipa tha tak chu ani hauh lo ang mawle .


Tlai khat chu ka office ah ka buai malh malh hle a , rin loh deuh in ka nu a rawn lang teh hlawl mai a , mak ka ti ang reng hial zawk ani . Vawi khat mah ka office lamah chuan a la rawn kal ngai silo a eng emaw thil pawimawh tak a awm anih ka ring a . " Teh hlawl che chuan ! Eng nge ni ta ?" ka lo ti deuh hu a .


Chair ah chuan thu in min melh vang vang a , " I chanchin ka lo hria a min ti zak in zilh deuh chu i ngai ani." a ti nghal tlawng a .


" Eng ka chanchin maw i hriat a ?"


" Nupui ang reng deuh in hmeichhe pakhat chu i in chhungah thla hnih deuh thaw i kawl tawh tih thawm ka lo hria a . He thil hi ka duh lo reng reng . I khawsak dan hi a tenawm tlat . I duh anih chuan nupui ah nei mai rawh , kan dal hauh lo ang che . "


" Ka nu , thil in hre sual anih chu . Fahrah nula raipuar , a fa paina in a thlauhthlak , belh tur neilo chu chenna in leh inhlawhna ka lo pe mai chauh ani . Kan in kar ah engmah a awm lo . Ka farnu lainatawm tak puih ngai ngawih ngawih ang mai in ka en ani ." ka ti a .


" Mahse mi sawi dan leh hmuh dan hi a dang daih a , fimkhur a ngai em em ani ."


" Mi sawi dan leh ngaihdan ah ka buai lo , buai hman pawh ka nilo _ ka hna ah hian ka buai tawk em em ani . Hmeichhe fel leh nun tha tak ani a , engmah hre loin duh duh hi lo sawi vel thin teh suh se ." ka ti ta erh a .


Ka nu pawh chu a thaw deuh huai a , " Ka la rawn hmu ve ang . Nupa ni silo mipa leh hmeichhia in khat a chen hi a mawi lo ani. Kohhran beng te hial a thleng palh ang tih a hlauhawm a lawm." a ti a .


" Kohhran pawn hria se a pawina a awmlo . Eng thil sual mah kan ti lo miau a . Tul hauh lo ah ilo buai chung zel anih hi . Hahdam tak in awm tum hram teh ." ka ti a .

." Chutiang anih chuan a tha hlauh zawk anih chu . Ka rilru alo buaiin ka lo zak ngawih ngawih a , hauh hrep che tuma lo kal ka ni a . Ka thaw a veng ta huai e ."


" Thil hre chiang la chuan min chhuang zawk ngawt ang mawle . Tanpui ngaite tanpui thin tura i mi zirtirna kha ka zawm tha hle ani tih i hre bawk ang ." tiin ka nui huk huk a .


🧚🧚🧚🧚🧚🧚🧚🧚🧚🧚🧚🧚🧚🧚


LALRINZUALI :

In ka tih fel zawh vek hnu chuan ka insu a , ka puan suk ka pho zawh meuh chuan chhun thingpui in a lo hun der tawh a . Thingpui in pah chuan TV ka en kual mai mai e ka ti a , Ricky hla thar 'Hmelma Anka ' chu ka en fuh ta hlauh mai a . Ka tiril a fan nghal rawih a , ka kut te chu a khur nasa lutuk a thingpui no pawh ka dawm nghet zo lo thelh chu ani .

Aw Lalpa ! He mi nunrawng hi ka ngai ani ..ngaih ka duh lo..theihnghilh hmak ka duh a sin . A aw nalh em em te chuan min fan raih raih a , a hmel lah chu phat rual loh in a tha fuh em em mai si a . Ka dul puar deuh tan tawh chu ka zut hliau hliau a , "Bawihte, i pa aw nalh lutuk chu i hre thei em ? A zaithiam ani ti raw ? " tiin ka phun sep sep a .


Ka mitthla ah chuan kan hlim lai te , a nui hmel mawi tak , a nuih zawnga a ha uingho rawn lawr varh te chu a rawn lang uai uai a . Ka lungleng lutuk chunka mittui tih tlak loh tum in ka mit ka khap sak sak a . " Hmangaihna in a hmangaih nasat theih ang bera nasa in ka hmangaih che a sin.." tiin ka thaw hawk a .


Doorbell ri chuan ka ngaihtuahna kal ding lai chu rawn pawt chatin ka harh chhuak zawk a . Insut hraih chungin kawngkhar chu ka va hawng a . Nu upa lam tawh , nu hmeltha leh in uluk zaih mai chu kawngkhar bulah chuan alo ding ran a . Ka ke ler atanga lu chhip thleng chuan uluk leh chik zet hian min melh a .Min en chik em vang chuan ka zam rum rum thei hial a . " Lo leng lut rawh. U Mapuia chu inah a awm lova .." lai zet hian ka ti a .


" Rinzuali i ni ang chu maw ? Mapuia nu Muanzovi ka ni a . Ka rawn leng lut ve satliah mai ani e ." aw dam raih hian a ti a .

Ka nui sak a , " Anih tak chu . Chibai le . Hawh lo lut rawh." ka ti sawk sawk a .


Inchhung rawn luh pah chuan ," I awm ve takah chuan Mapuia pawh a hahdam ve deuh tawh ang chu ." tiin thut hmun a rem nghal a .

" Thingpui ka lo in zo chiah a , i duh ve em ?"


" Aih , duhlo mai ang . Ka rawn in zo deuh chiah a . Mapuia hi chuan kar tawp a piang hian min rawn tlawh thin a , i chanchin hi min hrilh ngai hauh lova ...mi ka atang in ka lo hria a ." a ti ban charh a .


Nelawm thei ang ber chuan ka nui var var a , " Ka chanchin sawi chhan tur a awm hlei nem ." ka ti mai a .


" A bialnu , a nula awmpui angin an sawi che a ...chu chu a dik em ?"


A thu sawi chu awm ang lo ka ti lutuk a mak pawh ka ti pha lo . Fiamthu a thawh ta emaw ti ni mai awm hian za em em hian ka nui ta hawk hawk a , " An va ti mak ve a ! Dawt an sawi anih chu . A in enkawl a rawng te bawl sak tur in thla hlawh nei in min chhawr alawm . Ka lak ah hian a fel in a tha em em a , a thatna hi eng tikah mah ka rul seng in ka ring lo ." ka ti a .


" Chuti zawk alo ni maw ? A lan danah chuan rai i ang hle mai ."


" Nia...thla li a tling ve tep tawh .."


" A pa nen in innei lo em ni ?"


Nuamlo ti zet hian thingpui no ruak chu ka tuai kual chhen a . " Innei lo e..." ka ti sap a .


Dil chhut zet hian , " Sawi nuamlo anih loh chuan ....eng vanga innei lo nge in nih a ?" a la ti leh zel a .


Ka chanchin chu Ricky -a hming tih chauh lo chu zep then awm hauh lo in ka hrilh ta vek a .


Min lainat tih hriat tak hian min melh vang vang a ," I vanduai hle mai . Ka lainat tak zet che ani . Pathian zarah kan dam anga i nau neih hunah pawh engmah lungkham buai reng reng suh ang che aw . Nangmah tanpui tur chein kan awm reng ania aw ." a ti a . Ka darah min rawn kuah in ka sam a chul hliau hliau a , " I nu ang chiah in min en dawn nia . Puih i ngai emaw nu hmangaihna leh thurawn i mamawh anih phawt chuan min rawn pan hreh reng reng suh ang che ." a ti malh malh a .


" Ka lawm e . U Mapuia lo fel em em chhan pawh hi ka hrethiam ta : a lo chhun che anih hi ."


" Keini kan awm chhung chuan nang leh i fa lo piang tur hi infahrah hauh lo ang . "


A va han thlamuanawm tak em ...an chhungkaw lakah hian ba ka neih belh leh ta . Lalpa, hmangaihtu chhungkaw tha tak min pek vangin lawmthu ka hrilh ache . Ka tan hian Vantirhkoh tha tak tak min pe a , min venghima min enkawl turin.

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » May 16th, 2021, 3:33 pm

BUNG : 09


RICKY :


RKa leh Kimi nen kan pathum chuan restaurant ah chawlin kan duh zawngte lamin kan ei nghal mawlh mawlh a .


" Sammy-an film siam a tum kha , i chang duhlo em ni ?" tiin RKa chuan min zawt a .

Lu ka lo thinsan mai a , "Music video hi ka duh tawk viau a ni . " ka ti a .

" Invawrh lar zual nan pawh a that fu ka lo ring asin ."

" Ka tupui lo e ."

Kimi chu a rawn inrawlh vat a , " Nie , film lam chu ngaihtuah hun a la ni rih lo . Zaiah insawrbing a la ngai a ni . Hmelma Anka hi tunah chuan no1 a ni rih a , no1 hauh thei tur hla dang kan ngaihtuah leh nghal char char a ngai a ni ." a ti a .


" Kimi hian min chhawr chauh hnep hi a tum berin ka hria . A chang hi chuan i cousin ni loin i sal ni mai te hian ka in hre thin ."


Chutih lai chian tleirawl rual khat hian min rawn hmu fuh a , au teng tung chungin min rawn pan a , thla te min lak puiin min chibai lawp lawp hlawm bawk a . Tawng inchuhin an ri le lu hlawm mai si a ngaihthlak ber tur pawh ka hre lo . Ka hriat chian em em chu min ngaihsan thu leh zaithiam min tih thu an sawi tih a ni . An bengchheng hlawm mai sia dawra lo chawl ve midang ho lakah chuan ka inthlahrung hial a ni .


Min kian san mai dawn emaw ka tih laiin an la rawn kal belh leh zel mai si a ,kan awm reng chuan a dik dawnin ka hre lova video shoot tur kan neih chhuanlamin ka relhruk san thei ta hram a .


RKa te in lamah chuan a birthday kan lawmna tur ruahmanin kan kal a , kan va buai nileng thak leh ta nghal a .

🧚🧚🧚🧚🧚🧚


LALRINZUALI :


U Mapuia office kal tur a liam hnu chuan in chhung ka ti fel zung zung a , chawhmeh leh in chhung mamawh ilo vel lei tur chuan ka chhuak ta a . Mamawh ang ang ka lei zawh hnu chuan muangchangin ka kal hnak hnak a , ka pum a puar lianin ka rit tawh ang reng si a ka tuan te hi muang tawh tak a ni .


Taxi koh mai ka tum lai chuan ka piah mai ah hian car hi a rawn ding chawt a . A chhung atang chuan Ricky ngei mai chu a rawn chhuak a nih chu ...nula pahnih hi an rawn chhuak tel bawk a . Ka thin chu a phu nghal zawih zawih a , ka zawi deuh hnawk mai a . A hmelte chu a la tha em em mai lehnghal...ka ngai a ni ...he pa hi ka la ngai em em reng a ni min phatsan a ni tih hre reng mah ila.

." Kan RKa chuan min lo nghak rei tawh ngawt ang . Hawh u i hmanhmawh ang u ." Ricky chuan a ti lang lang a .

" Nie , a lo thinrim leh hlur tawh ang chu . Sangte , hmanhmawh hi zir ve la ." nui ar ar hian hmeichhe pakhat zawk chuan a ti a .


" Ka hmanhmawh ve e."

Ka thlang mai kawng bul lawkah chuan an lut ta hlawm a . Che hauh lo hian ka thlir tlawk tlawk a , ka thinlung chu a na ngawih ngawih mai a ni . A tu emaw zawk kha chu a nupui hual chu a ni ngeiin ka ring a . An hmeltha dunin ka tluklo nasa mai si a...ka dul kawh luah chu ka chul a , " Bawihte , i pa kha i lo hmu em ? Kan tel lo pawhin a ni chu a hlim bik asin ." ka ti sep sep a .


In lam pan chuan ka tlan haw ta nghal a . In ka then chuan ka thu hnawk a , ka mittui chu dan rual loh hian a luang zung zung a . Eng nga ti nge ka tah ? Phatsan ka nih vang maw ? Ricky hlim hmel ka hmuh vang em ni ? Nge hmeichhe dang bula a awm vang zawk ? Ka tah chhan ber pawh ka hre bik lo .


Tunah chuan a nupui hual nen hlim takin an awm bik awm si , ka va rethei bik tak em . Theihnghilh tumin ka bei ve thin mahse a chhan ka hre lo ka hriatrengna thinlungah hian a chiang tulh tulh mai si a . Heti khawpa min ti na tu hi haw ngawih ngawih zawk tur ka ni asin mawle . Ka thinlung pheka i hming ka ziah hi pencil-in lo ziak ila chuan nawhreh a awlsam deuh tur hi a ni a , engah nge reh leh thei tawh lo tur a ka lo ker kai kher kher ni ??

Tlai lamah chuan rawng ka bawl zo chu verandah ah ka thu a, Aizawl khawpui tlep tuarh chu ka thlir vang vang a . He ti khawp a in ding hnem zingah hian 'ka in' tia han chhal tur pakhat tΓ© mah ka nei ve lo a , in tam tak zinga pakhat chhungah khuan ka hmangaih chu a cheng mek a ni . Khaw khat ah pawh awm mahila kan va inhmu khat si em.Mahni inkhawngaihna sual chuan ka rilru a rawn luah a , ka tah leh hmain thildang tih a ngai a ni tiin ka inher a , in chhungah chuan ka lut ta a.


U Mapuia room zawnah chuan ka ding chat a , a hmaa guiter ka hmuh kha ka rilruah a lo lut zawk a . Tim deuh daiin a chhungah chuan ka lut a , guiter chu chul hliau hliauin ka kuah veng veng a . Ka rilru ah chuan hla thu leh thluk hi a rawn lut nghal zut zut a . Lehkhapuan leh pen lain ka ziak chhuak a , guiter a remin ka sa chhin ta nghal a .

NGHILH HAR DI

Mahriak awmkhaw har chang ni hian ,
Ka dawn vel kan nunhlui zawng te ;
I thai chang tura min tiam kha ,
Engvang nge i sut leh, di bawihte.


Min hrilh rawh Nghilh Har Di,
Suihlung i her chhan reng hi;
Hmelma anka leng vang nge,
Rairah ka rian luat vang zawk?


Lenna khua hmunloh vang maha ,
Suihlunglen mah tam tawh vei nen;
Biahthu hlan lova min then hi ,
Tuar a har em mai nghilh har di .

I lung her chhan min hrilh nila, Tuar pawh ka thiam ve deuh mahna;
Mahse biahthu pawh hlan lo ten,
Mual liamin tleidang i bel ta si.

Ka mit chhing meuhin ka sa ta vawng vawng a, ka mitthlaah chuan Ricky chu a rawn lang zut zut a , ka biangah chuan mittui a lo luang ngiai ngiai a . Ka zai zo ka mit ka men rual rual chuan ngawi renga min lo thlirtu u Mapuia ka hmuh chuan ka phu zawk a , ka mittui chu hru hul sawk sawkin guiter chu ka dah a .

" Ka tihpalh...i pindana lut lo tur ka ni asin." ka ti sap a.

A thaw hawk a , " I lo zaithiam hle mai .I aw leh i hla sak kha a inrem bawk si , a hla thu-ah i cheng bawk nen...a nalh lutuk mah mah a ni . " tiin a kut chu a beng thuk thuk a .


" K _ Ka lawm e ."


" Tu hla nge i sak a ? Hla nalh tak a nih kha . Aw nalh dangdai tak i nei bawk a ni ."


" Ka phuah a nia...Nghilh Har Di tih hla a nih kha."


Ka darah chuan min rawn vuan a , '' I lo mak reuh hle mai a . Hla phuah thiam leh zaithiam ka lo chenpui reng a lo nih hi . Naute han nei fel la album ka siam sak dawn che a nia ." a ti ta a .


Ka phur lutuk chu ka zuang lo chauh niin ka hria , " I ti tak tak em ? " ka ti ha a .

" Ti tak tak teh reng mai . Zoram khawvelah hian ka pho chhuak ang che . Tuna i hla sak ngei mai hi i sa hmasa ber bawk ang ."

." Awiii...ka va'n l___"

"Sshh ..eng thu nge sawi loh tur kan tih kha ? "


" " I sual reuh em mai a !" tiin phur tak chuan ka nui hawk hawk a .

Ka phur lutuk nge pawh ka hre lo zan ka mutna ah te chuan muhil theiloin ka let tawn chhen a . Ka mitthla ah chuan Ricky a rawn lang uar uar a . Mipui hriata ka zai ve a ka lo lar ve te anih chuan Ricky chuan min hre chhuak ve anga min lo then ta kha a la inchhir khawp ang . A ni'n min hriatchhuah theih dan kawng awm chhun chu ka zai leh hla tih lar a ni .


Ka zai kan ti chhuak a ka lo lar em em a , Ricky inchhir lutuk chuan min rawn pan leh ang ten ka suangtuah kual vel a . Chu ka suangtuahna chuan min tiphur ru phian mai a , naute neih vat vat a mipui hriata zai ve chu ka chak zek zek mai a ni .


************

RICKY :

RKa birthday lawm chuan kan ri hut hut a , birthday hla lam play ta lo chuan ka hla ringawt chu an play a . Ka hla rem chuan an lam su vei nghawng nghawng hlawm a . Kei chu kil khatah hian nula pathum nen zu in pahin eng eng emaw sawiin kan nui vak vak a .

Sammy chuan " Rema , LalRicky saw va kai chhuak teh ...nula bulah ringawt tawm chawt mai ." a ti lung lung a . A luruh a rin danah a kai leh hle tawh tih ka chiang a ni .

" Nulaho va kaih chhuah tir rawh ! " tiin Rema chuan a lo chhang a , " E...aw..ka va kai chhuak ang e ." amah vek chuan ti lehin min rawn pan nghal a . " Hey ,Rick ! Sammy'n lam tualah a mamawh che .'' tih leh ka ban rawn vawn chu a rual a .

" Ngawi teh thianpa , ka zu no tal hi mi han tlak tir ve phawt la mawle ." tih pah chuan ka no chu ka tlak pawp a .


" Nulaho hi i lawm lutuk lam harh i mamawh a ni ."

Sammy chuan min lo kuai zauh in , " I nula thutpui pakhat saw ka star teh mai a nia ...a bula i thut a thiang tawh lo ang ." a ti a.


Za em em chuan ka nui ta hawk hawk a , a star bula ka thut a phal loh vanga min lo ko anih chu ...naupan chhiat thlak in a ! " I sa hauh i va ti na ve a ." ka tih khum a .


" Keipui sahauh an tih ang vel hi mawle ."

Lam tual ah chuan rimawi remin kan lam ta hlawm a , a tu pawh mai chu kan kai deuh chha hlawm bawk a kan phur tlang ngang mai a .


" I sitar chu lam puiah i sawm ngamlo em ni a ?" ka ti zauh a .


" Sawm ngam se chuan a lampui daih tawh ang chu ." Rema chuan alo ti zauh a .

" I sawm ngam loh chuan keiman ka sawm anga ka lampui ang ." ka tih meuh chuan Sammy chu a teu nasa teh e . A kal thurh a Mellina chu lampuiah a va sawm ta nge nge a . An insawm hlawhtling ni ngei tur a ni fet zet hian lamtualah chuan an inthehthil dun ta hah hah a . Intithei zet hiam Sammy chuan min rawn siai suk a .

Lala chuan " Sammy hi chu fuihpawrh deuh a ngai thin a ni ." a lo ti zuk a .


*****************

ZOMUANPUIA :

Ka office dawhkana kiu nghata khabe dawm meuhin ka melh ngai ka melh reng a . Ka mitthlaah chuan mittui tla zawih zawiha Rinzuali zai lai kha lo langin a aw mawi dangdai takte chu ka bengah a cham tlat a . Kha tiang khawp a aw mawi nei kha chu a tan rimawi khawvelah hlawhtlin a huphurhawm hauh lo ang tih ka chiang a ni . Zoram mipui hriat hlawh lova kha aw nalh tak kha thamral tir ka phal lo a ni .


" Eng nga ti nge ka rilru i luah reng mai le ." tiin ka phun sup a .

" A tu chuan maw i rilru luah a , Mapui ? " ka thawhpuinu Dawngi chuan a lo ti zauh a .


Ka dar chhin akin ka nui sak a , " Ka farnu aw mawi dangdai tak mawle ." ka ti mai a .

" Farnu a ni tak tak dawn emaw ni le ? Ka tan beisei a bo niin a lang tlat ."

" Laldawngkim , uang uang lo mai teh !"

" Ka uang lo teh a nia ." tia a nuih ar ar lai chuan ka phone chu a rawn ri a . Rinzuali acni tih ka hmuh chuan rang takin ka chhang nghal vat a ."Rinzual, eng thil nge ni ta ?" ka ti thuai a .

" Lo haw mai teh...mawh..ka pum a na lutuk ! Nau ka vei niin ka hria ." tiin Rinzuali chu a rawn thaw hawk hawk a .


" Ka rawn tlan haw nghal ang . Ti khan lo awm hle hle rawh . Ka rawn thleng har lo ang ." ka ti nghal zung zung a . Dawngi hnenah chuan ,"Dawng , ka hna hi min lo hmui lawk mai teh aw . Ka farnuin nau a vei a hospital-ah ka hruai a ngai ." ka ti a.

" Ok..i tan te chuan..."

Hmamhmawh takin ka tlan haw nghal a , Rinzuali pumna thlanfim tla zawih zawih khawpa na tuar lo vial ngawih ngawih chu ka pawm lawk a damdawiin lam pan chuan ka vingpui ta nghal a . Kan thlen rual rual chuan nurse chuan a check nghal zung zung a .


" Nau chu a hnai tawh khawp mai ." tiin labour room ah an hruai lut nghal a .


Ka pian a hnulamah vawi te khat mah naunei la buaipui ngai hek lo , ka thla a phang ru ang reng nen ka nu chu ka call ta ngawt a . A rang a rangin ka nu pawh chu nau puan leh mamawh tur thil dang nen a rawn kal nghal a ka thaw a veng huai mai a ni .


Ka awm hle hle thei lo , damdawi in bathlarah chuan ka vei kual chhen a . A tawpah chuan ka ning deuh nen ka nu hnenah chuan, "Nu , i awm tho bawk a , ka'n vak chhuak thawveng lawk ang e aw ." ka ti a .


Thingpui dawrah te inhnawh puarin ka tei thawveng a , darkar khat hnu ah chuan damdawi in lamah ka let leh ta a . Ka nu chuan , " A la nei lo ." a lo ti ringawt a .


Tlai lam dar thum bawr velah chuan Nurse chuan , " Fapa duhawm tak kg 3:200 a rit i nei ta e . I nupui pawh a tha , ngaihtuahawm a ni lo e ." a rawn tih chuan kan thaw dun huai a .


Ka nu chuan, " A va lawmawm tak em . Naute nu chu a tha tak tak maw ?" a ti thuai a .


" Aw , a tha e , ka pi ."

." Kan lawm lutuk e." Ka nu chuan a ti a , ka lam hawi a rawn inher in , " Rinzuali hi a che thei mai dawn lova naute buaipuia in chhung sekrek khawih tur hi midang ngaihtuah vat a ngai a ni . " a ti a .


" An vang awm..."


" Kan nula awmpui Muani sawn lo pui hrih mai che sela a that dawn chu . A ni saw a viak a thain a fel phian a nia ."


" A that dawn nasat chu le . Naktuk zing atangin rawn insuan phei sela ..."


" Awle , ka rawn tir phei ang . A rintlakin a fel reuh nasa ania ."


************


LALRINZUALI :

Ka nau nei zo chu ka inhliam nasa ang reng si a chet vel har ka ti ngang mai . U Mapuia nuin min awmpui tura Muani a rawn tir chu ka lawm ngang mai . Kawng engkimah he mite nufa hi ka tan an hlu a ni , anni baka chhungkua hi ka nei chuanglo .

Ka fapa hmel chu ka en thin a , ka lung hi a awi hliah hliah mai a ni . A pian tirh atang rengin a hmelthain a hnar te chu a nalh nghal thliam reuh a . A kut tereuhte chu ka hum sak a , a lungte chu a phu ve det det a , " Ka hmangaih che , ka fapa . I pain hnawl che mah se kei chuan eng tikah mah ka hnawl ngai lo ang che . He khawvela i lo pian avang hian i nu hi a hlim tak zet a ni ." tiin ka phun sep sep a .

Ka biangah chuan mittui a rawn luang zawih zawih a , ka nu leh pa te khan an tupa hi han hmu ve se an lawm ngawt ang chu tih ngawt chuan ka rilru a luah a . Ricky pawhin a fapa hi hmu ve ta se a rilru a danglam phah ang em le ? He ka fapa neihchhun hi a pain duh loin hnawl mahse Pathianin min hriatpui a , min enkawl pui ang tih ka chiang a , a hming a tan ' Lalhriatpuia ' ka phuah ta a .

In lam a kan haw hnu te chuan inthlahrunawm khawp hian U Mapuiate chhungkua chuan min ngaihtuahin naute chu an ngaihven a . An fa leh an farnu ang tak takah min ngai ni mai hian ka hria a , lawmthu sawi dan pawh ka thiam lo -- ka lawm hi a ni tawp mai a ni . Muani lahin min pui nasain ka tan hian a va han tangkai lehzual tak em .


Inthlahrung tak hian , " Muani, nau ek vel han suk hi hrehawm i ti em ...nula ila ni bawk si a..." ka ti a .

Hlim hmel taka nui sang hian, " Aih , hrehawm ti lo e , ka pi .Ka Niteho nau nei hi ka awmpui ziah a nau ek suk te chu ka tih than a lawm ." a ti mai a .

" I lo awmlo ang tih ka hlau ..ilo awm a ka lawm lutuk a nia aw . 'Ka pi' ti chuan min ko lo la...kei pawh an awmpui ve thin tho ka ni a lawm . Pi lovin min U zawk la nuam ka ti daih zawk ang ."


" Awle , ka pi __oh __ U Rinzual ."

Ka nui hawk hawk a , "Ngaiah i la neih ve thei mai ang . Awmlo la chuan ka buai ngawt ang ." ka ti a .


Rin loh leh hriatloh karin hun te chu a kal ve zung zung a , Bawihpuia pawhin thla sarihna hmel a lo hmu ve ta reng mai a . A than chhoh angin Ricky chu a ang tulh tulh hian ka hre mai a . A mitmeng leh a hmui hmai vel chu a pa chiah chiah hi a ni mai a .


Ricky lah a lar chho tulh tulh mai a , a hla chu hmun tinah an play emaw tih mai tur hi a ni a , hriatreng loh pawh tum ila thil theih ani lo . He ka hriatrengna hian min phatsan harsa a ti tang tang em a ni .


Zan khat chu News en pah in sitting room-ah kan thu a , Muani chuan naute chu walker ah nawr kual pahin a chhaih nui ar ar reng a . Ka fapa nui hmel leh nui ri mawi tak chu ka en ning thei lova ngaihthlak nuam hi ka ti em em mai a ni .

" Bawihpuia pawh thla sarih a lo ni ve ta reng mai a . Amah awmpui turin Muani a awm bawk a, i zai record chu a hun tawh hlein i hre lo maw? " U Mapuia chuan a ti a .


" I tih dan dan chu ka pawm thlap ."

" Mipui mit la tur leh tihlim tur hian zai mawl tawp mai hi an duhkhawp tawh lo a . Entertainer tha tak tak an tam tawhin inelna hi a sang tawh bawk nen tunah chuan zai mai ni lovin lam thiam tel hi a pawimawh tak zet tawh a , chuvangiin Benji bulah lam zir hmasa la ka duh deuh a ni . "

" A phurawm khawp ang chu ."

A nui suk a , " Chuti anih chuan Bena chu ka lo bia anga a rang lamin class tan nghal la ka duh a ni ." a ti a . Min rawn melh kawk a , "Lawmthu sawi loh tur ka tih kha ." a ti nghat a .

Ka nui ar ar a , " Lawmthu hrilh che ka tum miah lo ..ka ti tak tak ." ka han ti a .

" Sawi tuma i ka i ang ziau kha ka hmu hman aw .."

" I ngaihdan Mai anih chu a ." tiin ka nui ar ar a

Ricky , ka rawn zai ve tawh dawn ...i hria maw..min then kha ila inchhir ve khawp ang .

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » May 16th, 2021, 3:33 pm

BUNG : 10

LALRINZUALI :

U Mapuia chuan a phone chu phawrhin tu emaw hi a dial a , ka hriat turin a duh a niang chu loudspeaker-ah a dah a "Hey , Benji ! " a ti lang lang a .

" Mapui , eng thil nge ni ta ? "

" Ka nau pakhat hi hrual ve la ka duh deuh a ."

" Lutuk mai . Rawn tir la lam thiam takah ka lo chhuah ang ."

" A hun tur min lo hrilh la ."

" Naktuk atangin rawn kaltir rawh . "

" Dar 10 _ 4 thleng in aw ."

" Wow...i nau chu khawl a nih ngawt loh chuan chutiang em em a ngawrh chuan a tlin lo ang ."

Ka lu ka lo thing nak a , " Ka tlin ang ." tiin ka lo phun sap a .

" Khawl chu ani lo nain mi tumruh leh tuarchhel a ni a , a tlin em em ang tih ka chiang a ni . Chuloah lam hi thiamtir vat kha ka duh ber a ni . A thiam hma leh a hla kan ti chhuak hma dawn tihna a nia ."


" A zir tur in a inhuam phawt chuan keima lamah chuan harsatna a awmlo ."

" A that nasat chu . Naktukah kan rawn tan nghal ang . .A nih phawt mai aw . " An inbiak zoh hnu chuan min rawn melh a , " I rin aiin lam zir hi a hautak daih dawn a nia aw . Chhelna , tumruhna leh dawhtheihna i ngah a ngai dawn a . Benji hi mi zaidam zawk zawk a ni lova a hau che a nih pawh in i dawhtheih hle a ngai ang . " a ti a .


" Ka thiam hma chu ka chawlhsan hauh lo ang . Bawihpuia pa vang hian lar ka chak a , ka lar a , hriat ka lo hlawh ve hunah chuan min hnawl hi ala inchhir ve ngei ka beisei a , chuvanga lar chak chu ka ni ."

" I duhthusam chu thlen diktir ka chak tak zet a ni ."

A tuk atangin Benjamin Dancing School ah chuan lam ka zir ve tan a . A tir chuan ka thiam loin ka tlaw tak zet a ni , Ka taksa peng tin chu a silin a rawl them thum mai a , bansan leh daih ka chak deuh ut ut hman hial a ni . Mahse ka tum a ruhin thiam ngei chu ka tum ruh bawk a , hma ka sawn chakin nuam pawh ka ti ve ta telh telh a . Lam thiam deuh pawh ka ang ve deuh ta a lawm .


Tuk khat chu Bawihpuia hi chaw ka pek malh malh laiin U Mapuia a rawn lut a , "Morning , Runzual ! " ham bai bai chung hian a rawn ti a .


" Morning ! "

Bawihpuia bulah chuan rawn thingthi hniamin a biang a piai sak zauh zauh a , " Ka Bawihpuia hian chaw a lo ei der tawh a ni maw ? Apa Puia hi maw zanah a meng rei lutuk a , thoh a hai palh a nih hi aw . " a ti a , Bawihpuia lah a lo nui hawk iarh iarh a . " Muani , thingpui min lo siam teh aw khawngaihin ." a ti zui zat a .


" Awle , ka pu ."

" Vawiin chu studio lamah rawn leng la , music famkim nen zai chhin la ka duh a ni ."

" A nih chuan ka lam zir hun hi ka pawt tawi mai dawn em ni ? "

" Aw , pawt tawi mai la , vawiin office kan chawl bawk a studio ah ka tal nileng hman dawn a ." tih pah chuan ka nau chaw pekna fian chu min lak sak a , zeilo uluk tawk hian a barh a , "Bawihpui , ang rawh le ." a ti a .


" Pu , hei aw thingpui chu ."

" Ka lawm e , ti khan lo hung lawk rawh aw ."

A fian ken lai chu ka chhuhsak vat a , " I pe thiam lo em mai . Khawi keiman ka lo barh ang ...Kha a hmai zawng zawng i ti berh vek a lawm ." ka ti nang nang a . " I thingpui saw a daih hmain va in zawk rawh ."

" Fa ka neih ve hun atan ka lo inzir ve em em a ." ti a nui hak hakin thingpui chu a ban ve mai bawk a . " Hun ka ngah bawk a duh leh vawiin chu i lam zir ka lo nghak ang che nga , darkar hnih vel i zir anga studio lamah kan phei dun mai anga .."


" Nia , pawi ka ti hran lo . Tunlai hna in ngah em ? "

" Vanlala sawi dan kha chuan tun lai tak hi chu an buai vaklo anih hmel e ."


Benji lam zirna sikulah chuan u Mapuia chuan min hruai a , ka lam zir lai chu uluk leh chik zet hian min lo thlir reng a , video ten alo cover a ka zak tep zawk a ni . Lam kan zir zawh chuan hah vanga thaw ham ham leh thlan tla phung chuan ka pan vat a , "Eng nge ka an hmel ?" ka ti chawt a .


" Tha lutuk . Hma i sawn chak khawp mai . I taksa siksawi vel dan pawh a dik lutuk tawh a nia ." min nuih var var pah chuan a ti a .


Ka bag atang chuan towel leh thawmhnaw hak thlak chu ka phawrh a ," Music video siam turin ka inpeih tawh i tihna em ni ? " ka ti deuh ha a .


U Mapuia chu buk nghat pah hian a nui var var a . Ka lawm lutuk chu ka zuang tawr tawr a , " Wow...a va nuam em ! Ka lawm __"

Ka tawng zawh hma hma chuan a kut zungchal chu a hmui bulah lek chho in "Sshhh...! " a ti vat a .


Ka dar chu ka san ak a , "Anih ka lawm leh lo ! Ka va inbual lawk ang e min lo nghak reng ang che ." tiin bual in ah chuan ka luh san ta a . Ka inbual nghal sawk sawk a , dik tak chuan music nen a han zai chhin chu ka chak tak zet a ni .Ka inbual zo chu ramhuai nau speed-in ka inthlak zung zung a , ka chhuak ta a .


" U Ben , kan kal mai a nia ." tiin ka au lang lang a .

Ban min rawn vai zauh a , "Good luck ,baby ." a rawn ti a.

" Ka lawm e , vanneihna ka mamawh ber lai alawm ." ka ti a . U Mapuia nen chuan a studio lam kan let ta a . Eng eng emaw sawi chuan ka phul hlut a .

." I phur hmel hle mai ."


" Phur teh reng mai . Ka naupan tet atanga ka thil chak ber chu zaithiam lar tak nih hi a ni thin a . Ka zai video kan tih chhuah hunah chuan ka thiannu Mami khan a lo en ve ngei anga min lawmpui dawn em asin ."


A studio chhungah chuan min kai lut a , " Hei hi i khawvel lo intanna bul tur chu a nih hi . I khawvel tharah hian ka lo lawm a che ." hlim hmel pu tak chuan a ti a .

" Ka lawm __lawmthu sawi ka tum miah lo ania aw ." tiin ka nui ar ar a .


" Hawh , an hla record mek chu va thlir phawt ang ."


Ricky lo zai mek ka hmuh chuan ka ding khawng nghal awt mai a , ka thin chu nasa mangkhen hian a su nghal dup dup mai a . Ka lungphu chu a tawp mai dawnin ka hria ," Lalpa ! " tiin ka rum chhuak hak a .


" Eng nge ni ta ?"


" Ah...engmah a ni lo ...ka inchhuih palh alawm..."

Ricky chuan min rawn melh a , kan mit leh mit chu a in tawng a , ka tek sawk hian ka hria . Ka lungphu chu a pangngai leh thei tawh lo . Ricky pawh chu tlem chuan a chiai ve deuh ni ngei tur a ni , a zai lai chu tawp chawtin min rawn melh ta tlawk tlawk a .


" Eng nge dik lo a awm em ni , Ricky ? "

" Aw..hahchawlh lawk ka duh ."

Kimkimi chuan , " He pa hi chu a che maksak thei ve ngawt mai ." a lo ti hak a .

U Mapuia chuan , " I zai that teh reng nen..." alo ti bawk a .


Kimkimi chuan , " Minute reilote han hahchawl lawk sela __" tiin a rawn inher a , min hmu chu mak a tih hmel ngang mai .

U Mapuia chuan , " Kimkim , hei ka nau thar Rinzuali a nih hi . A aw a nalhin a dangdai reuh lutuk ti a ka hrilh che kha a nia . Ricky nen hian zai dun ta sela mipui paw'n an lawm ka ring tlat a ni . Zai dun se tha i ti em ? " a ti a .


" K _ Ka hre lo le ..."

Ricky chuan , " Kim , ka awm a nuam lo ..haw mai ka duh a nia ." a ti a , melh pawh min melh chhin eih lo .


" A va zialo ve aw...va hahchawl la , i zia ve leh mai ang . E ..taka , hei hi Rinzuali a nia , aw nalh dangdai tak a nei a , zai dun ula ka duh riau mai ." U Mapuia chuan a ti zung zung a .


Ricky chuan , " Ka theilo ang ." a ti hmuk a , a chhuak ta nghal nulh a .


Dar san ak in u Mapuia chuan , " A zia hi ka hrethiam thei lo ." a ti halh a .


Kimkimi chuan , " A damsam lo deuh a , lo hrethiam hram teh u ." tiin a zui chhuak ta nghal a .


" Ka hrethiam e . Awle , Rinzual , i hla NGHILH HAR DI tih kha han rem chhin ula ka lo ngaithla ang e ." U Mapuia chuan a ti a .

Studio chhunga han zai vel ka chakin ka phur teh reng nen Ricky khan ka phurna zawng zawng a rawn tichhe vek a ni . Music chikim nen ka hla chu kan han zir chhin tan ta a , ka ngaihtuahna atang chuan Ricky chu dahbo ka tum nasat poh leh min luah hneh ting mai si a .


RICKY :

Steering wheel chu ka hmer ngawt ngawt a , ka kutchang te chu a var pap thei hial a . Ka rilru chu a na vin tuk mai a ni . Kei min phatsana mipa dang min um santu ngei mai kha ka hmai hmaah a rawn inlan ngam a nih chu . Min hmuhte khan inthiamlohna chhete tal a nei lo em ni ? Ka thinlung mu hnu chu rawn harh thar leh in a nat hian a na vawng vawng mai a . Chak takin ka car chu ka khalh pur pur a , tunah tak hian ka chungah eng pawh lo thleng se ka pawi sa lo he thinlung na hi a ni min ti hrehawm ber tu chu .


Kimi chuan , " Ricky , i khalh chak lutuk ...kan che sual palh hlauh ang e , khalh muang deuh teh . I chungah hian eng thil diklo nge thleng a ? " a ti chul a .

" Kha hmeichhia kha Angel a nih kha . Ka nun zawng zawng ti chhiaa pasal min um santu kha . Ka hua a ni . A hmel ka hmuh khan ka insum zo lo palh ang tih ka hlau a , ka pumpelh a nih hi ." ka ti a .


" A nih chu mawle .."

" A hmel ka hmuh khan ka thinur a ti zual a , ka rilru a ti na thar leh a ni . He ka thinlung keh sawm vek tawh hnu hi a dam tan mek a , engah nge min ti na zual tura ka hmaah a rawn inlar leh ni ? " ka ti a , keimah leh keimah ka inbia a ni mah zawk .

" Empey Studio nen khan thawhho an tum hmel nasa mai sia . Kei ni hi hmun dangah kan insawn daih mai dawn em ni ang ? Nitin in in hmuh a ngai anga i tan a hrehawm dawn lutuk a ni ." Kimi chuan min ngaihtuah hmel tak chuan a ti a .

A sawi chu tha ka tiin studio hrana insuan daih mai chu ka duh hman a , mahse ka han ngaihtuah chiang a min phatsantu zawk a ni a , nuam lo tia insawn tur zawk chu amah alawm ka ti leh ta zawk a . " Hrep tak chuan ! Mipa ka nih hi hmeichhe pakhat vangin ka tlanchhe hauh lo ang . A duh leh amah kha chhuak zawk rawh se_kei ni lovin ." ka ti nghut a .

." I ti leh lawi bawk si ...a hmel hmuh i duh lo emaw ka ti a ."


" Thil ti sualtu zawk ang hrima tlan chhiat kha ka thangtlawm tlat . Ka hmuh lai ngeiin Mapuia nen khan an inkai a ...hlim hmel takin a la nui zui a nih kha . A hrawkah khan reh bawrh bawrh mai ka duh a ni .'' ka ti bawrh bawrh a .


" Insum rawh ...insum rawh..mipa i nih kha . Hmeichhia kut thlak te chu a chi loh em mai ."

" Hmeichhia pawh nise kut thlak phu hi an awm ve hrim hrim a ..." ka ti nghat a . Ka mitthlaah chuan Mapuia nen an inkai lai kha lo lang lehin ka na nawn awn awn mai a ni .


πŸ’žπŸ’žπŸ’žπŸ’ž

LALRINZUALI :

Ka zai zawh chuan kan inhnawh puar a , studio thawkte chuan mi an fak laih laih a , nuam hi ka lo ti ru hle a . Eng eng emaw sawiin an phul hlut hlawm a , kei chu ka lo ngawi rauh rauh a . " Kal lama i phur teh reng nen haw lam nen chuan a va inang ta lo ve a ." tiin u Mapuia chuan min fiam zauh a .


" Ka chau deuh a ..."


" Ricky vang kha a ni ti raw ? "


" Eng tin maw ?"

" A zai pui duh loh vang che khan i mood a off vek niin ka hria ."


" Aih , a mah vang kha a ni lo ..ka lam zir kha ka chau deuh a ni ka tih kha .."


Vanlala chuan , " Engkimah i perfect tawp a ni . I aw lah chu angel aw ang maia nalh a ni alawm le . Naktuk atang hian i aw record nghal mai ka duh a nia ." a ti chul a .


"Ricky nen kha hla kha sa dun ngei se ka duh a ni. An aw a inmil dun dawn si a , a nalh ngawt ang ." U Mapuia chuan a ti a .

" Ricky berin a duh loh kha ..."


" A duh em em ang . Ka lo be tha leh ang ."

Ka zaipui chak bik em em hran hleinem mawle . Dik tak chuan a hmel hmu phaa awm ngawt pawh ka huphurh tak zet a ni . Ka hmangaih zia leh duh ziate hi ka thup zawh loh mawlh ka hlau a ni .


πŸ’πŸ’πŸ’


RICKY :

RKa pindanah zu kan in dun a , rui hnep khawpa in chu ka thil tum ber a ni . He thinlung na lutuk leh Angeli hriatrengna la chambang hi tleuh fai leng ka duh a ni .


" Thianpa , duh tawk tawh teh . Ni dang i anglo tlat . Ruih chhum hmawk i tum em maw ni le ? " RKa chuan a ti nang nang a .


" He ka thinlung hliam hi zu hian ka chiah dam dawn a lawm . " ka ti bah deuh nuaih a .


" Tu chuan nge i thinlung hliam dam tan mek chu lo hliam nawn leh a ? ''


" Angel ...kha ka Angel thin kha mawle ."


" Ani chu i theihnghilh tawh emaw ka tia..."


" Vawiinah ka hmu a lawm . Mipa dang kut vuan chungin hlim takin a la nui zui a nih chu . ." tiin zu chu ka tlak leh pawp a . " He ti khawp hian thinlung hi a lo na thei a nih hi .."


" Angel chu hetah a awm maw ? "

" Awm e...he ti khawp hian ka thinlung min tih nat sak a , inthiamlohna chhete pawh nei lovin ka hmaah a rawn lang ngam a nih kha .'khawvelah ka hmangaih ber che' min ti tu khan kei aia hmangaih zawk a lo nei a , rinawmna min tiamtu khan min phatsan a ...."


" Kumtluang par meuh paw'n kumtluang a daih ngai lova chuailo par pawh achuai thinna khawvelah kan cheng miau alawm ." tiin Rka chuan min hnem a'n tum vei ngial a .


" Hmeichhia reng reng hi ka ring leh tawh ngai lo ang ." Ka ti sup a .


" Ni e ,hmeichhia chuan a hmangaih thu a hrilh ngun zawh poh che leh a phatsan ngun che a ni mai tih hi ring nghet bur rawh ." tiin ka dar a rawn beng thuk thuk a .


Ka rui tawhin ka buh deuh nuaih mai a , " Ricky Lalzawmpuia hi hmeichhe pakhat vangin a tap lo ang ." ka ti lawng lawng a .


" Ni e , hmeichhe dang an tam lutuk . Rilru na a indawm kun tur i ni lo . Mizoram mipa luck ber leh nula zawng zawngte ngaihzawn rawn hi hmeichhe pakhat ve mai ngaiin a lungleng tur a ni lo ." RKa chuan a ti mawlh mawlh a .



πŸ’žπŸ’žπŸ’ž

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » May 16th, 2021, 3:33 pm

BUNG : 11

ZOMUANPUIA :


Ka khum bul chair-ah chuan ka thu a , guiter chu ka zut mai mai lai chuan vawiin a Ricky leh Rinzuali inmelh vawng vawng lai kha ka mitthlaah a rawn lang zawk a . Ricky mizia dang ta daih leh a chhuak tau ta nghut te kha mak ka tiin eng emaw inzawmna nei hian ka hre deuh tlat a . An inmelh dan kha inmelh satliah mai an ni lo , huatna , tawrhna leh mak tihna a inpawlh vek a ni .


Vanlala'n , " Angel aw ang mai a aw mawi i nei a ni " a tih kha ka bengah a rawn ri nawn leh a , Angel aw ang mai ..Angel.. Angel . A sawi fo thin Angel kha Rinzuali hi a ni thei mai ang em ? Ka tho tharh a , Rinzuali pindanah chuan lutin Bawihpuia muhil hmel chu ka thlir vawng vawng a , Ricky hmel nen ka khaikhin chhin vel a . A inan chu an inang ngang mai . Ka rinhlelhna chu a lian telh telh a .Naute birth certificate zawngin ka hai vel chiam a , a tawpah chuan ka hmu ta hlauh a . Naute pa hming chu ka en hmasa ber a , Ricky Lalzawmpuia tih a lo chuang kalh ka hmuh chuan ka thaw halh a , a awmna ngaiah chuan ka dah leh ta nghal a .


Ricky va titi pui tur chuan an inah ka va kal a , a nu leh an awmpui nula chu an lo awm a . " E khai , Mapui , lo leng rawh . Zing kar karahte i rawn lan ve hlawl mai ni . A va pawimawh awm ve " a lo ti seuh seuh a . Ricky nu hi chu nu fel leh kawm nuam deuh hi a ni a , a ngainatawm reng a ni .


" Ricky rawn hmuh ka duh a , kan hla siam tur chungchang ah biak lawk ka duh deuh a . " ka ti a .


" A thianpa RKa te inah a riak a , ka va kohtir mai dawn em ni ang ? "

" Ngai lo mai rawh se . Keiman ka va pan mai ang e ." ka ti thuai a .


" Kan in piah mai saw a nia ..kan in atanga chhiar a in thumna chiah saw a nih saw ."


" Awle , awle.., ka va kal nghal ang e ."

" Aw..thingpui te pawh in ve phawt la mawle . "


" Ka rawn in tawh a , ka in lo mai ang e . Ka va hmu vat zawk ang e ." tiin ka chhuak a . RKa te in ka thlen chuan kawngkhar chu ka kik a , a nu chuan min lo hawn sak a ,"Ka pi , Ricky-a a rawn riak em ni ? " ka ti a .


" Aw , rawn riak e . Hawh lo lut la . Hei RKa pawh a rawn tho ve chiah alawm . Bawiha , i thianpa chu a la tho ve lo em ni a ? Hei an hmu duh a nih hi ." a ti a .


RKa chuan a mit a nuai nauh nauh a , " Aw , a la muhil a . E he ...Mapuia chuh eng nge i lo tih ve khiah a ? " a ti hluai a .


" A hla sak tur chungchangah Ricky biak lawk ka duh a ...."


" Hawh , thingpui in phawt ila kan kai tho dawn nia . Lo thu phawt rawh . Nu , thingpui kan lo in dun ang chu ." tiin a nu chu a au a .

Thingpui in pah chuan kan ti ti dun a ," Ricky thian tha ber i ni bawk a , nang aia amah hrechiangtu hi an awm lo ang ti raw ?" ka han ti a .

" Ka hre chiang ve thawkhat chuan ka inhria ."


" Angel nen an chungchang hi hriat i nei em ? " ka ti leh a .

" Hre teh reng mai . Farkawn kan han zin laia intawng an ni a . Ricky hian a atchilh tak meuh a ni ber mai . Kan haw thlak atanga thla hnih hnuah han hruai turin a han kal a , pasal dang a lo um san daih mai a . A rilru na lutuk chu a Γ‘ lo chauh a ni ber mai ." a ti charh charh a .


Mak ti zet hian ka en hu a , "Angel-i chuan pasal a um san maw ?? " ka ti hu a .

." Aw . A chhungte chuan Aizawla a bialpa a um tiin Ricky an lo hrilh alawm "


Ka thaw deuh hak a , " A tawrh hle dawn chu " ka ti ringawt a .


" Tuar tak a ni . Angel kha chu a hmangaih ve em a ni . Niminah Angel a hmu a ni awm a , a rilru na thar lehin zu hmanga a rilru na thawi dam tumin zuah a liluh a , a rui lutuk haw theilo a riak ta nghal a nih saw "

." Nizan lam chu tia a ruih viau chuan kaih thoh chi pawh a nih dawn loh chu a . A harh ve leh ka rawn kal thu hi lo hrilh la , studio-ah min rawn hmu mai teh se aw." ka ti ta a .


RKa chuan , " Ka lo hrilh lutuk ang ." a ti a .

In lamah ka haw san ta rih a , in ka thlen chuan rawng an lo bawl peih diam tawh a . Chaw te kan han ei fel a , hna lamah chhuak tura ka inpeih hnu chuan Bawihpuia chu ka la fiam zuk zuk a . Ricky chu a ang thlawt a ni tiin ka inngaihtuah rauh rauh a .


Rinzuali chu lam zirna kal tur chuan a rawn inpeih thlap tawh a , "Bawihpui , anu kha maw lam zira a chhuah leh a ngai si a , a nute Muani thu lo awih hle la fel takin lo awm rawh aw ." tiin a fapa biang chu a piai a fawp zauh a .


" I lam zirna hmun thleng ka va thlah ang che nga i zir zawh hunah studio-ah min lo nghak dawn nia aw. Kei pawh ka office ban ve leh ka rawn tlang nghal ang ." ka ti a .


Car-ah kan luh hnu chuan , "Bawihpuia pa hian a fa i pai tih a hre tak tak em ? " ti a zawh pah chuan car chu ka ti nung ta nghal a .


Min rawn melh ha pah chuan , " Maw ?! " a ti deuh hu a .

." I fa pai thu kha naute pain a hria em ?"


" Hria e . Ka hrilh a , ti tla turin min ti a lawm ."


Ricky chuan titla turin a ti dawn em ni ? A ni lahin mi dang a neih san ah ngaiin a rilru a na em em a ni si a . An ni pahnih karah hian eng emaw thil diklo leh ngaihhai palh a awm chiang a ni . "Titla turin a ti tak tak che maw ? A mah ngeiin i hmai chhan ah a hrilh che em ni ?" ka ti leh kher a .

A mitmeng chu a ngui nghal raih a , a hun kal tawh chu sawi nuam a ti teh chiam loin a sawi hreh tih ka hmu thiam mai a ." Ka va phone a ...a cousin hmeichhiain min lo chhang a , thil engkim ka hrilh vek a . Ka damlo bawk si pan mai tur ka hre bawk silova min rawn hruai rawh se tiin ka Chah a ." a ti sap sap a .


" Chuan ...a rawn kal ta a ?"

Lu a thing na na a . " Aih , a rawn kal duhlo . A cousin chiah chu a rawn kal a . "Nupui hual nei lai a ni a , hmuh che a duh lo a , naute pawh kha titla turin a duh che a ni ." a rawn ti a ." a mitmeng ngui riaiah chuan mittui a rawn tling pam a .


Kimkimi zet chuh ! " Chu nu thu sawi chu i awih ve mai a maw ? Dawt pawh a hrilh thei che asin . A thu sawi chu thu dik a ni ngei em tih finfiah tumna i nei em ?" ka ti mawlh mawlh a .


" A cousin zawk chuan a thu sawi chu ka awih loh chuan amah ngei va zawt fiah a va call turin min ti alawm ."


" I va call ta a ?'
.

" Aih , call ta lo .Biak leh chakna reng ka nei tawh lo a ni ."


Ka dar ka san ak a , ka bengah chuan Kimkimi'n Ricky bula a thu sawi kha a rawn ri nawn leh a . "Lar leh hlawhtlin hi i khel tak tak a nih chuan ngaihzawng tih vel chu i dahtha thei ang . I bialnu ni lovin i hna chiah ngaihtuah ang che ." a tih kha . Ricky a hmingthanna dal theitu niah ngaiin Rinzuali chu dawt a hrilh a , Ricky hnenah pawh Rinzuali leh a fa chungchang chu engmah a hrilh lo a ni tih ka hrethiam ta mai a .


" Heyyy...ka kalna tur i tlan pel tawh a nia . Eng nge i ngaihtuah le ? ." Rinzuali'n a tih chuan ka ding nghal chawt a .

.Nui sang hian , " Ka tih palh a ni e . Tha deuh khan han zir la aw . Bye ! " tiin kei pawh chu studio-ah ka lut kawi leh phawt a . Kimkimi hian inhmangaih pahnih te inkarah game tenawm tak a khel a ni . A thil tih pawi zia hi a hria ang em le ?


Vanlala chuan , " Ricky pawh a rawn thleng deuh chiah a , a lo nghak che a nia ." a ti a .



" Ka va hmu phawt ang e ." tih pah chuan thut khawmna pindan lam chu ka pan nghal a .

Ricky chuan nelawmloh zet hian min lo melh a , " RKa khan min hmu tura i rawn kal thu min hrilh a ." a ti vawt raih a .


A mah ep takah chuan ka thu a , " Rinzuali hi music video ka siam sak dawn a , i puihna a mamawh a ni ." ka ti nghal tawng mai a .

" Ka tuipui zawng a ni love .'' a ti deuh hmak a .


" Khawngaihin ."


" Kei kher lo pawh pui duhtu an tam ang chu "


" In aw hi a inrem riau dawnin ka hria a , chu loah i tel ve chuan mi ngaihven a hlawh nghal dawn a ." ka ti a . Chuta min chhanna chuan ka nuih a ti za ang reng phian a .


" I va ngaihven ve a ..i nupui em ni ?"

.Ka nui ta hawk hawk a , "Nupui a?? I ti awm ang lo lutuk . Ka farnu ang chiah a ni . Eng vanga he nu hi ngaina lo em em nge i nih a ? " ka ti ta a .


" Amah hrim hrim hi ka huat zawng hmel a pu pawh a ni ta ve ang ."


" Amah vang ni loin keimah vang chauh tal chuan pui hram teh __khawngaihin ." ngenngawl tak chuan ka ti leh hram a .

A dar a san ak a , " Eng hla nge a sak dawn a ?" a ti ve ta a .


" NGHILH HAR DI tih hla a nia ." tiin headphone chu ka pe a Rinzuali zai chu ka ngaihthlak tir ta a . " A ma phuah a ni a . A hla thu leh a thluk hian mi a khawih reuh tlat a ni . A chang hnihna hi i lo sak pui ve anga , thunawn ah hian insa dun anga in aw a inpawlh dun tur hi a nalh dangdai dawn lutuk a ni ." ka ti mawlh mawlh a .


" Kimi ka lo rawn phawt ang e . Thla thar khian Myanmar ah zai turin ka kal dawn a , hun ka neih pawh ka inring lo ." tiin pehhelna chu a la zawng ta cheu a .


" In kal hmain hun a la tam tho bawk a Kimkimi chu keiman ka lo be mai ang . A rem ti hrim hrim ang . Vala nen hian a chang hnihna leh a thu nawn lo zir chhin ula aw." thlem ti tih tlawn ti tih hian ka aw ka'n ti danglam kual kawi vel a .


Vala chuan , " Ni e , enchhin ila " a lo ti vat a . An han ti chhin dun vel a , a aw nen pawh a lo inhmeh ngang reng lah tak a . Hla an zir chhung chuan office lamah kal turin ka liam san ta a .


πŸ€”πŸ€”πŸ€”πŸ€”πŸ€”

LALRINZUALI :


Lam ka zir zoh ve leh studio-ah ka kal nghal a . Ricky zai ka hriat chuan ka ding nghal chawt a . Ka thin chu a su leh dup dup tawh a . Kan zai dun dawn a nih chuan kan inhmuh deuh reng a ngai anga ka tuar chhuak zo dawn em ni ? U Mapuia chu ka pan vat a , " Eng nga ti nge ka hla i saktir ve ngawt a ? '' ka ti ringawt a .


U Mapuia chuan min melh vang vang a ," I tana tha tur chiah ka ngaihtuah a ni . Va lut la va sa dun chhin teh u ." a ti a . " Vanlal , in rimawi kha lo ti tawp lawk teh u ." a tih zawm zat a . Rimawi chu an ti tawp a ," Rinzuali nen hian han zai dun chhin teh se ."


Kan zai dun ta a , sak harsa ka ti ngang mai . Ka thinlung na chu a rawn inthual thar leh a mittui tla lo a sak chu harsa ka ti ngang a ni . Ka zai tha vak lo emaw ka tih lai chuan kut an ben tak dar darah chuan ka lo zai tha ve tho a niang a ka ti leh hnuhnawh a .


Darkar chanve chhung vel chu ei leh in nan chawlh kan nei a . Kan chawlh chhung chuan hawi thawveng turin bathlarah ka chhuak a , Aizawl khawpui pe un mai chu ka thlir vawng vawng a . Ricky chu rawn chhuak ve nghalin ka bulah chuan a rawn ding a . Ka lungphu chu a tlan hian a tlan lim puat puat ni ber hian ka hria a , ka thawk lak te chu a ti harsa thei hial a ni


" I lo dam thin maw ? "


Ka tawlh hlat san hret a , ka thinphu nasa lutuk thunun tum chuan ka mit chu ka chhing vang vang a , muangchang chuan thawk ka han la raih raih a . Ka rilru chuan ," Aih , ka dam lo . Ka dam hlawl lo . Nangmah vang hian ka thi lo chauh a ni ." ka ti mawlh mawlh a .


" I tawng thei lo em ni ?"


" Kei a dam leh dam loh chuan i tan eng nge awmzia a neih ?" ka ti deuh hmak a .


" Nie, awmzia chu a nei hran lo e .Ka zawt satliah mai che a ni ."


" Khawngaihin min be tawh suh . I hmelhriat ngai loh angin min en liam mai mai zawk rawg ." ka ti deuh fak a .


" Chu chu i duh dan a nih chuan a tha alawm ." tiin a in her hmak a , in chhung ah chuan a lut ta nghal a .


Ka tah chhuah mai loh nan ka heh chu pet fan fanin ka mit ka khap fak fak a . Mi rinawmlo leh bum hmang zawk pawh pangngai taka a lan theih chuan eng vangin nge ka tah bik ang . Ni e , ka tap hauh lo ang . A ni ang mi lawi lo tan sawn ka mittui ka seng tawh lo ang , ka mittui far khat pawh hi a phu hlawl lo ani .


πŸ’›πŸ’›πŸ’›πŸ’›πŸ’›

ZOMUANPUIA :

Kumkimi nen chuan restaurant pakhatah kan inhmu dun a . A hmel chu hmuh a nuamloin a lungawi chiahlo tih hi a hriat hle mai a .


" Min rawn hmasa lo leh ka hriat hauh lohin Ricky leh Rinzuali zai tih chhuah i lo tum hi a mak ka tiin ka lungawi lo khawp mai . A manager pawh i ni lova he tia i lo ti ringawt hi a fuh ber lo ." tiin a thil ei lai chu a thial sawk sawk a .


Ka nuih san mai a . " Nula hmeltha an thinrim ngailo . Hmanni khan hrilh chu ka hrilh ngei che kha . Min chhang tha duhlo a nih kha ." ka ti a .


" Ka chhang tha duhlo che a nih chuan ka remti lo tihna a ni mai dawn lo em ni ? " a ti hlar mai a .


" Rinzuali hi huat rukna riau i nei a ni zawk lo maw ? " ka ti deuh salh a .


A hmel a mak tihna lo lang chu a thup leh thuai a , " Eng vangin nge ka huat ngawt ang ? Huat chhan tur ka nei lo ." a ti thuai a .


" Ahh...ka sawi satliah mai mai a nih kha . Rinzualite ang rimawi khawvela rawn zuang lut thar tir tan chuan mi ngaihven a hlawh theihna kawng tha ber chu mi hriat hlawh sa Rickyte ang zai pui hi a ni . " ka ti a .


" A dik alawm . Ka phallo pawh a ni hran lo . Min rawn hmasak ka phut vang zawk a nia . Zai thiam thar kan lo promote ve theih chuan chu tluka hlu a awm hlei nem ." tiin a nui ta har har a , a mit meng erawh a nui hauh lo .


" Kha ti mai tur kha a lawm. Mite tan malsawmna nih tluka hlu leh tha a awm hlei nem . Chu loah a thlawnin a pui dawn pawh a ni lova , a zaipui man chu ka pe dawn alawm ."


" Pawisa kan phut hauh lo ." tiin min rawn melh fiah fak a "Rinzuali hi i eng tur nge ni ? I ngaihvenin i duhsak bik riau lo maw ?" nui sang hian a ti a .


"Ka farnu ang chiah a ka en leh ka artist thar pakhat a ni e . Chu bak engmah inzawmna kan nei lo . A rawn lar chhuah hunah chuan Ricky zaipuiah nang meuh pawh hian min la rawn dil thin ang mawle ." ka tih chuan a nui tha duh mang hauh lo a .


" Eng tikah nge recording chu tih i rilruk deuh a .?"


" Monday-ah khian ka tum ..duhthusamin han bel dun phawt sela ka ti deuh . An hla kan record ni chuan i rawn tawiawm thei ve ang chu ti raw ?" ka ti a .


" Ka rawn tum dawn nia ."


"Tum ringawt loin i rawn kal ngei tur a ni ." tiin ka nuih sak a .


A thaw deuh huai a , " Awle...awle...big boss i ni alawm ! I thu chu ka'n hnial ngam nang." tiin a nui ve ta a .

Link:
BBcode:
HTML:
Hide post links
Show post links

Local Advertisement

MOBILE SIAM ZIR DUH TAN!!!

Tech-Inn Mobile Repairing Traning Centre, Bazar bungkawn

Kum tin mi za chuang eizawnna kan siamsak a, Eizawnna tlaka thiam turin kan zirtir thin

Mizorama mobile siam zirna hmasa ber changtlung ber kan ni. Hrechiang duh tan Contact : 9612099411 / 9862016122


Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » May 16th, 2021, 3:33 pm

BUNG : 12


RICKY :

Angel nena hla zir dun chu hrehawm ka ti a ni ..a hmeltha tak chu ka hriat loh karin ka lo melh leh vawng vawng thin a . Phatsantu nunrawng hi huat ka duh a , tum pawh ka tum mahse ka hlawhtling thei si lo a nih hi . Min ngai leh min thlahlel ngawih ngawiha ka bula a awm thin ang khan a pasal um bulah chuan a awm anga , hmangaihna kan Chen dun lai a ka bula a khawsak ang khan a khawsa anga tih ringawt ngaihtuahin ka na vawng vawng a thikna chuan min ti na ngawih ngawih a ni .


Studio-a thawk mipa ho nen an han nui ka hmuh te chuan ka thik lutuk chu ka alh lo chauh hi a ni ber mai a . "Mipa bula awm reng lo khan i hla zir lai hi rawn ngaihtuah ta che ." ka va ti thawr a .


A nui hmel chu reh hmakin min rawn melh vawt raih a ,"Kei ni lovin nangman a lawm zir ngai . Kei chuan ka thiam vek tawh ." a lo ti hmak a .


" He hla hi sa dun tur kan ni a , ka la thiam miau loh chuan min zirpui tur i ni lo em ni ? Nangin thiam ngawt mahla ka la thiam si loh chuan a nalh thei chuang lo ang . " ka tih chuan min rawn zui a , kan han zir dun leh ta a .


A hla thu te chu keima phuah ni mai awm hian ka chan nen a inrem thlap mai si . Ka sak lai te chuan ka thin hi a rim tun mai a . Eng vanga he tiang hla hi phuah chhuak nge a nih ? A pasal um nen chuan an inthen anga a phuah chhan a ni thei ang em ? Min phatsan ang bawk khan phatsanin a awm ve tihna a nih chu .


Vanlala chuan , " Ricky , i rilru khawiah nge i dah ? I zai i ngaihtuah miah lo a nia ." a rawn tih chuan ka khi sak a .


ZOMUANPUIA :

Ka office bang chu rin loh deuhin Ricky nu nen kan intawk hlauh mai a . A remchang bawk a naktuka Ricky leh Rinzuali hla record kan ti lai rawn tawiawm ve turin ka sawm ta a .


" Naktuk hian i fapa hla thar nalh lutuk chu recording kan ti dawn a , in nupain rawn ngaithla ve ula ka duh hle mai ."


" A va pawimawh awm ve a ...nang meuh in min sawm ve tak chu ." tiin a nui hak hak a .


" Nia , fate hna bul tanni a nu leh pa ten an tawiawma mal an sawm hian a tluang duh bikin malsawmna a dawng duh nge nge thin a ni .In rawn tel pui ve thei ang chu ti raw ? " ka ti a .


" A dik khawp mai . Nia , kei chu kan nula ten dawr chu an lo enkawl thei mai anga ka rawn kal ang . Mahse i pa Tlanga hi chu a hman ka ring lo , tunlai hna an tul em mai ."

." Nang mah i rawn tel theih chuan a lawmawm ngawt ang . Ka lo beisei dawn che a nia ."


" Awle, ka rawn kal ngei ang ."


" A lawmawm e . I rawn tel chuan he hla thar hi a hlawhtlin ngei Ka ring tlat a ni ." ka ti a .


A tukah chuan Ricky leh Rinzuali zai chu uluk leh rilru pe takin kan ngaithla thap hlawm a . A hla thu ah an cheng dunin an zai thiam dun mai bawk sia beng chu a tlai chiang hle a ni .


Ricky nu chuan mit chhing chialin a lo ngaithla a , " Ka fapa hi a lo zaithiam tak zet a nih hi ." a ti halh a .


" A nih a zai pui nu ve hi ? " ka lo ti zauh a .


" A zai thiamin a hmel pawh a tha ngang mai . An aw pawh a inchawih mawi dun khawpin ka hria , a ni lawm ni ,Kimbawih ? " tiin Kimkimi chu a va melh a .


" A....aw...ni e . I sawi dik e ." Kimkimi chuan a ti a , Ricky te an zai zawh rual chuan a thaw halh a .


" A lawmawm e. An zai tha thlawt a ni . Vala leh a nau ten music arrangement an bei uluk bawk a , a ropui tak zet a ni . Kan hna zawh lawm nan ei tur kan Chah ang e ." ka ti a .


Ricky-a nu chuan , " Kei chu min chah kep lo mai teh u . Dawr lamah ka phei thuai loh zawngin an lo buai lutuk palh ang e ." a ti thuai a .


" Kan order kep vek tawh che a , la kal bik suh ."

" A nih leh le !" tiin a bula a fapa rawn phei chu hlim tak hian a lo nuih var var a , " Ka chhuang lutuk che , ka fapa." a lo ti a .


Ricky chu a nui sak a , " I rawn kal ve elaw...?" a ti deuh hu a . " Kimi chuan a phut chhuak thei ve ta che a ni maw ?" a han tih zawm leh a .


A nu chu a nui var var a , "Mapuia hian min rawn phut chhuak zawk alawm . Ka rawn kal ve hi a inchhirawm loh khawp mai ." a ti a .


Kimkimi chuan , " In zai tha khawp mai . Nang phei chu ni dang zawng aiin i zai tha zawk a ni ." a han tih chuan kan lo nui dar dar a .


" Rinzual , lo kal lawk teh .'' tiin Rinzuali darah chuan ka lo kuah a Ricky chu a lo meng rum hman kher mai a ."Hei hi Ricky-a nu Nu Rami a nia , hei hi a unaunu Kimkimi a nih hi . Han inhmelhriat tlang teh u ." tiin ka inhmelhriat tir ta hlawm a .


Rinzuali chu a nui sang a , a kut chu phar chhuakin a chibai dun a , " Ka hmu che u hi ka lawm lutuk e ." a ti sap sap a .


Nelawm taka nui var varin nu Rami chuan , " I zaithiam bawk si i hmeltha bawk si ...i vannei hle mai , Rinzual ." a ti a .


Ei tur kan chah te chu a lo thleng ta bawk a , hlim tlang takin kan ei tlang ta a . "Ricky, Myanmar a inzin hmain music video hi kan shoot hman ang em ?" tiin ka zawt a .


Kimkimi chuan , " Myanmar lam kha chu ka cancel leh hrih a . In duh phawt chuan in shoot nghal thei ang ." a lo tih chuan ka thaw huai a . " A nih chuan tun kar hian shoot tan ila ni mai lawm . A script pawh kha i ziak zo tawh a ni lawm ni , Rose ?" ka tih zawm zat a .


Rose chu a lo bu nghat nghat a ." Zo fel daih tawh e ." a ti a.

Chutih lai tak chuan Muani chu Bawihpuia hruaiin a rawn lut ve chiah a . Rinzuali chuan a fapa a hmuh chuan a ding khawng nghal lah a ,"Eng nga ti nge ilo hruai a ?" a ti ha a .


" Kei man lo hruai turin ka ti a nih kha . Lo kal teh , Bawihpui ." tiin naute chu ka laksak nghal a . Bawihpuia chuan rak chul chung hian ka hmai chu a chul ruai a ."Muani , lo va haw mai la ,Bawihpuia hi chu kan lo awm anga kan rawn haw pui Mai ang ." ka ti leh a .


" Awle , ka pu ." tiin a chhuak nghal a .


🧑🧑🧑🧑


RICKY :

Angel chuan chu naute hmeltha leh chum buang mai chu Mapuia kut atang chuan lain a pawm vawng vawng a , tap mai tur hmel pu hian Mapuia chu a melh a ,"Nga ti nge i rawn hruai tir kher a ? " a ti tham tiak a .


Mak ka tih em avang chuan naute leh Angel chu ka melh tawn chhen a . Ka tiril hi a khur ru der der a , ka awm dan chu ka sawi fiah thiamlo ka ni deuh chhulh hian ka hria a , " I fa maw ? " ka ti chhuak thei hram a .


" Aw...."

Ka thinlung chu sawi fiah thiam rual loh khawp a nasa hian a nghawr nghing lawih a , ka na nghal vawng vawng mai a . Midang min um san pawh tih tawh nen midang fa a la pawm chuan namen lovin min ti na a ni .Pawn a tlan chhuah vang vang a rawn kir tawh loh tawp mai chu ka chak hial a .


Ka nu chuan , " A va duhawm tak em ! He naute hi i fa maw ni a ? Tleirawl te emaw ka ti che a fa ilo nei reng a ni maw ? Khawi maw ka lo pawm ve chhin teh ang . Nau hi ka duhin ka lawm ve hrim hrim a , fa tam tak duh laiin pakhat chiah ka nei thei a . Ka fa awh hi a bang thei lo a ni ." a ti chul a .


Angel chuan hreh hmel takin naute chu ka nu kutah a hlan a .


" Bawihpuia maw i hming ? I va duhawm turh turh ve le ...Awii..!! Kimbawih , lo en chiang teh ! He naute hi Ricky nausen lai kha a ang lutuk ...ang tak a ni .!" ka nu chuan a ti ta chul mai a .

Kimi chu ka va melh vat a , a hmel chu a dang sawp sawp a nuamlo ti em em hmel hi a pu a , naute chu ka va melh leh a ka fa ni ta mai se tihna rilru chu ka pu zawk hman a .


Mapuia chuan , " Fa chuan a pa chu a chhun ang chu !" a lo ti zauh a .


Angel chuan , " Nilo..u Mapui!" a lo ti that a .

Ka nu chuan , " Eng tin maw i sawi a ?! " a lo ti ha bawk a .

Kimi chu a meng phelh phang a , "Eng a !!?" a lo ti phawk hra bawk a .


" I thu sawi kha eng nge a awmzia ? Hriatthiam theihin i sawi thei em ?" ka ti nghat bawk a .

Mapuia chuan , " Rinzual , engkim hrilhfiah ta che ." a ti mai a .


Ka nu lah a lo phur fal a , " He naute hi ka tupa maw ni a ? Ricky fa maw ? Ni e , a ni ngei tur a ni . Ka thisen chu ka hria a ni ." tiin Bawihpuia chu a kuah vawng vawng a , a fawp bawk a , a mittui chu a parawl kuang mai a .


Nuamlo tih hmel taka Angel ding khawng reng chu va pan hnaiin a darah ka sawi nawk nawk a ," Thil awmzia hi eng nge ? He naute hi eng tin nge ka fa a lo nih theih ? Rinawmna vawng zo lova min um san tak i bialpa fa chu ka faah puh i tum a maw ? Mi dawheh tak i ni , Angel !" ka ti thawt a .


Ka nu chu a meng phawk hra mai a , " Rinzuali hi Angel kha maw lo ni . Ka fapa rilru ti na em em tu kha ...." a lo ti phawk hra a .


Kimi chuan ka nu banah vuan in ," Ka nute , hawh i haw san daih teh ang ." a lo ti a .

Ka nu chuan , " Haw mai love , engkim hi ka hre fiah tur a ni ." a ti tlat a .

Angel chuan thinrim lutuk vanga mittui tling pam hian min rawn melh rum hle mai a , a thinrim meng sen ram leh mittui parawl kiang chu a inhmeh thlawtin a hmel a tha chiang ngang mai ." Mi dawheh ti chuan min ko suh aw . He naute hi a tih tlakna tur pawisa i rawn thawn rual khan a pa i nihna a bo tawh . Bawihpuia hi keima fa chauh a ni . I fa a ni ve lo ." a ti khur dar dar a .


A thu sawi chu a awmzia ka hre lo lutuk chu ka nuih hial a za zawk a ni . Kei hian Angel hnenah nau tihtlakna tur pawisa ka pek loh zia chu Pathian khian a hre chiang hle a ni . " Kei hian nau tihtlakna tur pawisa ka rawn thawn che maw ?!? " tiin za tak chuan ka nui ta hawk hawk a . " I lem chan hi duhtawk teh , Angel " ka ti hrawk a .


" Lem chan maw ? I tenawm zia hi midang hriat i hlauh vangin eng mah hrelo angin lang lo mai teh .I fa ka pai tih ka hriat khan ka rawn pan che a , mahse nang chuan nupui hual ka nei tiin nau tihtlakna tur cheng singkhat sangnga i rawn thawn a nih kha ." tiin dawt chiang lutuk chu a sawi ta a .

" Karei !! Ricky , eng pawi rapthlak nge i khawih tak le !" ka nu chuan a lo ti tlawk tlawk a .

Ka thinrim lutuk chu ka insum zo ngang tawh lo Angel hmaiah chuan ka beng ta thuai mai a ." Dawt i sawi a ni . Nangmah hruai turin ka rawn kal a , i chhungte leh i thiannu ngei pawn Aizawl a i bialpa i um thu min hrilh asin ." ka ti a .

Mittui tla zawih zawih in ka benna a biang chu a dawm vawng vawng a ," Dawt ka sawi lo ." a la ti ngam cheu a .


Ka thinrim lutuk chu ka khur ti tih hial a , " Ka nu hming chhalin ka sawi e . Kei hian ka fa i pai tih ka hre lova pawisa ka thawn hek lo che ." ka ti rum ul a .


" Aizawl ka rawn thlen tirh khan ka khua a sik nasa em em a , pan tur ka hre bawk silo . Mi dang phone atangin ka rawn call che a , u Kimkimi hian phone a lo la a ,ka rai thu leh ka damloh thu ka hrilh a min rawn hruai turin ka Chah bawk a . Chuan , u Kimkimi chu amah chauhin a rawn kal a , "Ricky chuan a hmu duh lo che a , a rawn kal duhlo a ni . Nupui hual a nei mek bawk a , he pawisa hian i fa chu lo titla mai rawh a ti che a " tiin min rawn hrilh a ni ."


Angel thu sawi ka hriat chuan ka nghing lawih a , Kimi chu ka va melh a , a hmel chu alo dang var pap mai a ," Kim, Angel-i thu sawi hi a dik vek em ? " ka ti thawt a . Ka thinrim lutuk chu ka aa lo chauh a ni . Kimi chu hnek bur mai ka duh hial a .


" Karei ! A va rapthlak ngai em !" tiin ka nu chu a rum hawk a .

Khur zawih zawih chungin ,"I tana tha tur nia ka hriat vanga kha tia ti kha ka ni asin . Mahse ka lo ti sual hle a ni tih ka inhria a , ka inchhir tak zet a ni ." Kimi chuan a ti a .


" Keima fa ngei tihlum turin i ti a , chu chu ka tan a tha tur niin i ring a maw ? Mihring rilru pawh i pu lo a nih hi . Nang hi ka ngaidam ngai lo ang che ." ka ti vawt raih a .


" Rick , pawi ka ti lutuk . Kha tia ti tur kha ka ni lo asin."

Ka nu chuan , " Kimi , nangma thisen zawmpui ngei mai chu tihboraltir i tum hi ka hrethiam thei lo a ni ." a lo ti vawng vawng a .


" Ka nute , ka thiam loh vek ani . Ricky an Angeli a rai tih a hriat chuan nupuiah a nei ngei dawn tih ka hre si a , a lar vanglai tak lo ni bawk nen . Nupui a neih chuan a larna hi a chuai mai ka hlauh vanga kha tia ti kha ka ni . Ka tih palh tak tak a ni ."

" I duhamna thinlung vanga he tia ti hi i ni a , insiam that i ngai hle a ni . I pawi khawih nasat zia leh a nghawng pawi thui zia hi ngaihtuah la he tiang rilru hi pu tawh hauh suh ang che ." ka nu chuan a tih chuan Kimi chu a mittui a tla zawih zawih a .

" Angel , min ngaidam rawh . Keimah vangin hrehawmna nasa tak i paltlang a ni si a ..ka thiamloh liau liau a ni ." Kimi chuan a ti a.

Angel chu a nui ta sak a Kimi kut chu humin, " Ka ngaidam che alawm . Tu pawh hi thil tisual vek thei kan ni alawm . Dinhmun chhe taka ka awm vang khan min hmangaihtu nuta leh chhungkua tha tak ka chhar chhuah phah asin ."
a ti a . A fel ka tiin tha famkim hi ka va ti hliah hliah tak . Angel chu ka han en thin ka hmangaih mai a ni lo ka star ngawih ngawih a ni .

Mapuia chuan , " Hawh u , i chhuahsan vek ang u , sawi dun tur tam tak an nei dawn si a ." a ti a .

Ka nu chuan , " Ni e, Bawihpui , ka tupa duat hmelthate , i pu bulah kal daih ang aw .I puin a hmu chak dawn chein a hmuh hunah che chuan a lo lawm dawn em asin . I nu leh i pa hi chu lo insawi fel teh se ." a ti mawlh mawlh a . Ka fapa chu ka melh vawng vawng a , ka thinlung zawng zawngin ka pawm thlap a ka hmangaih nghal ngawih ngawih a ni .

An zavai chuan min chhuah san ta diak a , ka hmangaih leh ka thlakhlelh ngawih ngawih nen chauh chuan kan awm ta a .


πŸ’™πŸ’™πŸ’™πŸ’™πŸ’™

LALRINZUALI :

Ricky chuan min rawn hnaih a , ka kut chu rawn hum vawng vawngin ," Min ngaidam rawh aw , Angel . Kut ka thlak ngawt che kha ka tihpalh lutuk .Tun chinah chuan a thleng leh tawh ngai lo ang ." a ti sap sap a .


A mitah tak lo melhin ka nuih sak a , tunah chuan ka hlim em em tawh a ni . Ka hmangaih ber leh ka fapa pa ngei chuan min lo phatsan ngailo a min lo la hmangaih reng a ni tih ka hre tawh a ka hlim em em a ni . " Engmah tihsual i nei hlei nem . " ka ti sap a .


Min kuah chawt a , thlamuang takin a awm ah chuan ka bei hle hle a . " Ka hmangaih che , Angel . Pasal min um san emaw ka tih lai a ka rilru nat zia kha ...ka keh sawm vek ni mai hian ka inhria a . Ka lak ata hi ka kal bo tir ngai tawh lo ang che ." a ti tham tuak a .


" Ka nunna ai pawn ka hmangaih zawk che a ni tih hi ringhlel tawh suh ang che aw .''

" Min nei duh ang em ? Angel , ka nupui nih i duh em ?"


" Aw...aw...teh reng mai . Ka nei duh che . I nupui nih ka duh a ni ."

" Nang , Bawihpuia leh kei , chhungkua kan ni a , thihna chauh lo chuan min then hrang tawh ngai lo ang . Ka hmangaih che a , ka hmangaih reng ang che _ tun ah leh kumkhua chatuanin ."


" I ta ka ni ang ...i ta chauh ka ni kumkhua ang ."



πŸ’“ EnDπŸ’“

*** KAN WEBSITE A FAKNA LAM THIL MILEM LANG THIN I LO HMEH ZEUH HIAN KAN WRITER TE HLAWH KAN TUMSAK ZEL TIH KAN HRE THEUH DAWN NIA, KAN LAWM E***

Website story link ho awlsam zawka in zawn hmuh zung zung theih nan STORY FB group siam a ni a. Whatsapp group pawh siam a ni e. Complete tawh ho zawng zawng leh story kallai kan dah vek avangin avangin in lo join theuh dawn nia..
Group link : https://www.facebook.com/groups/991354610918230/

Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)