LITTLE PIECE OF HEAVEN BY Zualtei B Zualtei (Completed)

Episode nei ho a hlawm a dahkhawmna
Ngaia
Site Admin
Posts: 25813
Joined: April 30th, 2016, 4:07 pm

LITTLE PIECE OF HEAVEN BY Zualtei B Zualtei (Completed)

Unread post by Ngaia » May 30th, 2021, 3:53 pm

LITTLE PIECE OF HEAVEN

"E, Rintluang, ilo harh tawh maw? " Kawngka atang chuan hmeichhe pakhat, a hmel en pawha naupang chhe zawk zawk tawh lo tih hriat tak hi a rawn lut a. Ka lu ka lo bu zeuh.

"Thil hrilh tur che ka nei a. " Tiin Mampuia bulah chuan a rawn ding a.

"Naute i chhiat a ni. " A tih chuan second reilote chhung chu ngaihtuah ber nei lovin chunu chu ka en reng a. Rilru fim ka put rualin Mampuia chu ka va melh zawk a, a ni paw'n min lo en let ve kar bawk.

"Harsatna em em chu i nei lo va, mahse damdawiinah kal la ka duh a.... " A tih lai mek chuan "Ka duh lo. " ka lo ti nghut. An pahnih chuan en tawh lovin ka puan sin lai chu ka melh ngawt ngawt a.


d5jqu133.jpg
LITTLE PIECE OF HEAVEN
Part 1

Zualtei B Zualtei








"Ka pum a na lutuk.... " Ka phone chu ka beng bulah ka dah hram hram a. Pawn lam a mi ten ka thawm an hria ang tih ka hlau bawk nen tui chu ka herh haw tawp a.

Lehlama miin "Ka rawn kal. Ilo chhuak thei ang em? " a rawn tih chuan ka pum dawm vang vangin harsa takin ka ding ngil lui a.

"Aw, thei ang. Hmanhmawh rawh aw... " Tiin phone chu ka hmet tawp a. Zan dar 10 vel a ni. Theihtawpa insangmar luiin ka ding a, ka phone chu ka kekawr ipteah ka dah lut a. Bathroom kawngka chu zawimuangin ka hawng a. Varandah reh ruihah chuan a tlang vawn chhan vuanin zawimuangin ka kal phei a, ka pum na lutuk chu ka dawm reng bawk.

Kawngkaah chuan thawm nei lo thei ang berin ka lut a, Sangpuii room a midang ho nui khek ri tuar tuar chu kal pelin kawngkapui hnaih bera awm pindan lam chu bang rinchhanin ka pan phei zel a. Ka pindanah chuan lutin ka bag tlaia ka siam lawk vek chu ka la a. Thawm dim thei ang berin ka pindan chu ka chhuahsan a, kawngkapui chu hawng them themin ka chhuak nghal.

"Rin, eng nge i an...? " Kan hostel piah lawka kawngkawiah chuan Mampuia ka lo nghak a. Kawngsira thutna an siamah chuan chau zetin ka thu a. A lo thlen rualin a car atanga rawn chhukin min rawn buaipui vat a.

"A na lutuk. " Ti zawi sapin ka mit ka chhing vang vang a.

"I ding thei ang em? Kan kal vat angai. " A tih chuan ka lu bu nghutin a kut ka vawn tura a rawn dah hnaih chu ka vuan a. Min kaihthawh rual chuan ka taksa chu a lum pup pup a, ka tai bawr vel chu a rawn na lutuk a. Ka che sawn thei tawh eih lo. Ka mittui a tling piau a. Thawm neih loh hram tumin ka hmui ka seh vak ringawt.

"Rin, tinge? Engtinnge i awm? " Mangan hmel taka a tih chuan ka chhang thei lo. Ka ding ngil thei lo va, min kuah ding lui hram hram zawk.

"A tha dawn lo tlat. " Ti nghutin min pawm kang nawlh a. Car hma lam kawngkhar chu hawngin min thut luh tir a.

"Tuar hram hram rawh aw... " A rawn luh ve rualin a ti sap a. Kan tlan chhuak nghal.
Hetiang em ema na leh tawrh hrehawm hi ka la nei ngai lo. Ka kap atanga thil lum pup pup rawn chhuak ka hriat rual chiah phei chuan na tak a ni ringawt. Ka kut ka hum ruh ngar ngar a.

"Kan thleng e... " Car a din rualin a chhuk a, ka thutna lam chu rawn hawng vatin min pawm chhuak nghal a.


"U Ate.... " Kawngpui ana inhnuaiah chuan lutin tu emaw hi a ko a. Ka mit pawh ka meng tha peih tawh lo.

"Ehe.! Mampui, eng nge a awmzia? Kha i thiannu chu tinge a? " Thutthlenga min mut rual chuan nula pakhat hian mak tih hmel takin min rawn en a.

"Aw, en vat rawh. " Mampuia.

"Aw, a kekawr hi phelh angai ang. " A tih rual chuan ka kekawr chu a hlip a. "Tui lum lo va la rawh. " Chu nu chuan Mampuia chu a tir nghal a. Ka mit chu nghet takin ka chhing tlat tawh.

Ka taksa a khawih vel lai chuan ka rilru a harh deuh ruai a, ka taksa erawh a na a, ka tiche thei eih lo. Reiloteah chuan engmah ka hre lo zui a.

Ka dang ro huam huamin min tiharh a. Ka mit chu harsa takin ka meng a, ka hma zawna sana lian chuan dar 2 a kawk va bawk. Ka mutna chu ka en a, khum a ni. Ka bula khuma khum lu lam bang nghenga thu muhil mipa chu ka en a. Thawh tumin ka han che deuh uai a, ka kap bawr vel na lutuk avang chuan ka ip zawk. Ka ke lam chu ka en a, kekawr ka lo ha tawh lo. Kawrfual khup khuh thawl hnek hnuk hi ka lo ha reng nia.

"Ilo harh elaw? " Mampuia. Thawh ka tum tih hrethiamin min kai tho a, khum lu lam bang ngheng chuan min thut tir a. Khum atang chuan chhukin tui intur khum sir dawhkana inchhawp chu min lo pe vat a. Tui no chu banin ka in khawlh khawlh a. Ka in zo vek.

"E, Rintluang, ilo harh tawh maw? " Kawngka atang chuan hmeichhe pakhat, a hmel en pawha naupang chhe zawk zawk tawh lo tih hriat tak hi a rawn lut a. Ka lu ka lo bu zeuh.

"Thil hrilh tur che ka nei a. " Tiin Mampuia bulah chuan a rawn ding a.

"Naute i chhiat a ni. " A tih chuan second reilote chhung chu ngaihtuah ber nei lovin chunu chu ka en reng a. Rilru fim ka put rualin Mampuia chu ka va melh zawk a, a ni paw'n min lo en let ve kar bawk.

"Harsatna em em chu i nei lo va, mahse damdawiinah kal la ka duh a.... " A tih lai mek chuan "Ka duh lo. " ka lo ti nghut. An pahnih chuan en tawh lovin ka puan sin lai chu ka melh ngawt ngawt a.

"I duh lo tak tak maw..? " A tih leh chuan ka lu ka thing a.

"U Ate, ka sawi tawh kha. " Mampuia'n a tih chuan chu hmeichhia chu a thaw ri hak a.

"A tha e. Mahse tun hnuah chuan fimkhur tawh r'u aw. Tleirawl hmalam hun eng tak nei in nih hi. Mu hahdam rawh aw... " Tiin pindan atang chuan a chhuak a. A chhuah hnu pawh chuan ka thut dan ngaiin ka thu reng a.

"A la na em? " Mampuia'n ka kut a rawn vawn chuan ka kut ka lo hum ruh hle tih ka hre ve chiah. Ka bulah a rawn thu a, min rawn kuahin a darah chuan ka lu min nghah tir a.

"Hrehawm i tawrh a ngai a pawi ka ti lutuk. " Ti leh sapin ka luah chuan a rawn fawp a. Kei erawh ka ngaihtuahnaah chuan ka cheng melh melh thung.




Karhnih a liam leh hnu chuan pangngai takin kan awm leh tawh. Nidang ang bawkin school ka kal a. Harsatna dang ka nei lem lo. Kan hostel-ah pawh chuan hman zana ka chhuah chhanah khan eng emaw ka phuahchawp tawp a. School ka chawl deuh char char bawk.


Lalrintluangi ka ni a, kum 17 a upa ka ni. Lunglei khua ka ni a, tunah hian Aizawlah lehkha zirin ka awm mek thung. Private hostel-ah ka awm a, single room-ah ka awm a ni. Kan hostel-ah hian mi 10 kan awm a. Mi 4 hi school kal lai kan ni a, a dang zawng hi chu puan thui zir leh hnathawk an ni thung. Kan hostel hi rin ai takin kan free reuh a, zan chhuah ruk a awlsam a, thenkhat chu an bialpa te pawh an rawn riak lut leh nawlh zel. Ka bialpa Rammuanpuia, Mampuia nen hian kum 1 kan inngaizawng ve tawh a. Kan induh ve hle. A ni hi chu Aizawl khua a ni a, an chhungkua pawh rin ai takin an che thei viau. A hmelchhe hran lo va, a sang a, tunlai tleirawl te chhe lo tih ang chi kha a ni tawp. Kei erawh chuan a hmel leh pian vel ai amahin a mizia, a nungchang leh tawngkam hi ka duh zawk.


"Vawiin chu minute 5 in i tlai. " Thaw hlawp hlawpin a bike bulah chuan ka va ding a. A bike ngheng ar arin min nuih suk.

"Thawh ka hai a... " Tiin ka sam chu ka kutin ka zut mam a, ka tawn tawp.

"Step 10 vel lekah i rawn tlan a, i la hah em em zui a. " A tih chuan kan hostel step lam chu ka hawi a. 10 ai chuan a tam hrim hrim.

"I ninawm. Kal ang, kan tlai i ti a ni lawm ni? "

"I tlai chuan lawmman min pek angaih kha aw.. " Ti lehin a nui suk a, ka biang a rawn piai zeuh bawk.

"Aw, aw, aw. School thleng phawt ang. I khalh dawn nge ka khalh dawn? " Ka tih chuan a nui hak a.

"I khalh chuan kan thleng hma lutuk palh ang. " Tia nui rah rahin bike-ah chuan a lawn a, a hnungah ka lawn ve nghal thak. A kawngah chuan nghet zetin ka kuah, kan tlan chhuah rualin ka sam chu thliin a rawn chhem thur nghal vek.


Kan classroom thleng min rawn thlah a, ka luh dawn chuan "Lawmman kha aw.. " ti sapin a mitko a san ak a, nui leh sukin an classroom lam panin a kal nghal.

"Rintluang, Eco assignment I ti em? " Ka thutnaa ka bag ka dah rual chiah chuan Fela ka bulah a rawn ding a. A ni hi kan class mipa ho zinga ka biak tam ve ber leh min nel bertu a ni. Tupawhin an nel vek ti ila a dik ber ang. A ngo deuh vang a, a hmel hi a nu lek lek tih ang chi hi. Mahse a tuai miah lo, bialnu pawh a kawp ngei ngei zel.!!

"Aw, I ti lo mi? " Tiin ka thu a. Ka bulah a rawn thu ve nghal.

"Ka ring che. " Tiin min nuihtlawn a. Ka melh vak. A mit te chu a khap ang zuk zuk a, Lalfela tak hi chu aw..! A tawpah chuan ka bag chu hawngin ka assignment chu ka pe leh nge nge a.

"Yes, I fel ber. I hmel pawh a tha ber. " Ti zung zungin a thutna lamah a tlan phei nghal.

"Lalfela lehpek chu... " Ka thiannu Dingi a rawn thlen chuan ka lo nuihsang a. Fela lam hawiin ei loh hmel zetin a melh a. Ka lo nui tawp.

"I melh hlum ang e.. " Ka tih chuan nui hak hakin a hawi sawn hram. A bag a dah fel hnuin toilet panin kan inzui chhuak a.


"Awi, enteh, Rin, I hre tawh em? " Darthlalanga a inen vang vang hnuin Dingi chuan min rawn zawt thut a.

"Eng maw..? "

"In pa mawle... " A tih chuan "Eng nge Mampuia chu. " Ka lo ti ve vat.

"In pa ka tih, Cindy zawk mawle. Mampuia hi a lo bem ve ngei a ni awm e.. " A tih chuan mak ti zetin Dingi chu ka melh a. Toilet-ah chuan midang kan thawm hre phak an awm em tih ka en kual a, kan bul hnaiah tumah an awm lo hlauh e.

"Cindy chu a ni dawn mi? " Ka tih chuan Dingi chuan a âw a thian karh karh a.

"Awi, ka hrilh ang che. A thiannu ngeiin a sawi alawm. Cindy chu a mak ve e ka ti, a fel hmel tehreng nen, ka rin ang a ni lo tawp. In chanchin a hre ve vek a, engtinnge a bem ngam zawk le... " Dingi'n a tih chuan ka ngaihtuahna atangin ka harh zawk.

"Engtikah khan nge..? "

"Eng chu maw? A bem hun lai vel maw? " A tih chuan ka lu ka bu a.

"Vawiin monday a nia, a nih chuan Friday kha tihna. Kha Mampuia ten Ground an tihfai ni a, kan haw san khan, tah khan Cindy ten Basketball court an tifai ve a. Chutiang vel chuan an sawi. Mahse i rilru tihah duh suh. Mampuia te chuan nang bak duh dang a nei lo tih i hriat chian kha. " Ka darah chuan a rawn beng thek thek a, ka rilru a hah lo a, ka thinrim zawk tih a hre lo a ni.

Mampuia hian Science a la a, keiin Arts ka la thung. Mampuia hi ka sawi tawh ang khan a all round ve reuh a, an class CR a ni a, Blue House Captain a ni bawk. Cindy nen hian an in classmate a, Blue House Vice Captain a ni ve bawk a, hmeichhe ngo ving veng, hmelchhe lo zet mai a ni. A mizia a nu zen bawk a, chutia Mampuia a bem ve ringawt pawh chu thilmak pakhat chu a ni ve reng, kan inngaizawng tih hre reng chung lehnghalin.



Lineup hnu chuan classroom lam panin kan kal sang sang a, vawikhat mah Mampuia te dinna lam ka hawi lo. Class-ah pawh chuan rilru bet lo zetin ka thu ngawi kar a, zirtirtu te tan chuan explanation ngaithla uluk tak angin ka langin ka ring mahse ka rilru erawh inrinni chhunah khan a awm daih thung.

Inrinni chhunah khan Mampuia nen kan chhuak dun a, a phone ka khawih khan Cindy msg a lo awm a, "Ka lo nghak reng ang che. " tih hi. Eng nge a awmzia ka zawh khan "Nizanah kan class group-ah kan nawi vak a, a rawn uang ve vel mai mai a nih hi. " a ti mai a, keipaw'n ka zawt zui tawh lem lo. Ka thinrim chhan ber chu dawt min hrilh vang a ni.


"I ril a tam tawh em? " Break-ah chuan kan classroom-ah rawn pheiin ka dawhkan hmaah chuan a rawn ding a, hei hi chu a tihthan a ni.

"Tam lo. " Ti nghutin ka lehkhabu chu ka khung fel a.

"Tinge a..." A rawn tih chuan ka thil tih lai chawlin tukverh lam chu ka hawi a, ka thaw chhuak vang vang a.

"Hey..... " A rawn tih leh rual chuan chiang em emin a mitah ka melh kal a. Ka thutna atang chuan ka ding a.

"Inbe lawk ang. " Ti nghatin classroom chu ka chhuahsan a, inchung lam panna step chu zawh chho zelin chhawng thumna ka thlen hma chu ka kal zel a, chhawng thumnaa classroom ruakah chuan ka lut a. Reiloteah Mampuia chu a rawn lut ve a. Ka kut kuangkuah atin ka lo melh rum ul.

"Tinge a? " Ka bula a rawn din rual chuan a ti sap a.

"Cindy chuan engtin maw a tih che a? " Ka tih chuan thaw hakin min en a.

"I lo hria maw..? "

"Hria e. Khawvel hranah kan cheng hleinem. "

"Chu chu maw hetia I awm chhan? " Tiin min en kur a.

"Chu chu ka thinrim chhan niin I hria em ni? " Zam lo thei ang ber chuan ka ti a. "Cindy in a bem che emaw bem lo che emaw ka ngai pawimawh lo. Dawt min hrilh vanga thinrim ka ni. " Ka tih zawm leh zat.

"Hetia I awm ka rin vang hi lawm ka hrilh duh loh che. " A tih chuan ka nui ve hak.

"A ni maw? Inrinni khan thudik min hrilh la chu ka thinrim lo ang, mahse dawt min hrilh a. " Ka tih chuan a lu hiatin thildang chu a melh kual a.

"Rin, thinrimna tur zawng lo la. Ka hrilh loh chhan che chu I thinrim ka hlauh vang alawm. Dawt hrilh che ka tum pawh a ni hran lo. " Tiin min rawn hnaih zuk a, ka lo tawlhsawn vat thung.

"Huh.. Takzetin. I thinrim chhan a ho lutuk. Mipa dangin an bem chein min hrilh ngai bik mi? " A tih chuan mak tiin ka melh deuh kawk a.

"Maw?? Tunah hian inbem chu kan buaina a ni lo. Dawt min hrilh vanga thinrim ka ni. Ka thinrim chhan hi ho i ti a maw..? "

"Aw, a ho. " A tih nghut rual chuan thinrim lutukin ka melh tawn tawn a, min pawisa lo tih hriat zet hian thlanglam tukverh chu ipte zen atin a en reng a.

"A tha e. Tawk rawh se. " Ti zawi sapin kawngka lam pan chuan ka kal a, ka chhuah dawn chuan a thusawi avangin ka ding chat.

"Eng nge sawi i tum? " A rawn tih leh phei chuan a cho chhuahah ka ngai nghet hmiah tawh. Ka lehhawi a, a mitah tak chuan melhin "Inthen ang. " ka ti sap.



Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » May 30th, 2021, 3:53 pm

LITLLE PIECE OF HEAVEN
CHAPTER 2

Zualtei B Zualtei








"Inthen ang. "

A ngawih vang vang hnu chuan "A tha e. I duh dan a nih chuan inthen ang" a rawn tichhuak sap a. Chu thu a sawi chuan ka chhungrilah hian eng emaw che dawt a awm. Kan inmelh reng lai chuan a thiam loh alawm tiin ka inhnem a, classroom chu ka chhuahsan nghal a.

"Rin, hei momo ka lo kei che. " Dingi leh Fela chu ka thutnaah an lo thu dun a, min hmuh rualin Fela chu a tho thak a.

"Thu rawh.. " Tiin ka nui a.

"Aih, dar a ri tep tawh. " Tiin a momo ei lai nen chuan a thutna lamah a kal nghal.

Ka thutnaah chuan thuin momo chu ka ei a, a tui ve chiang a ni.

"Eng nge in sawi a? " Dingi.

"Kan inthen. " Ka tih chuan min rawn hnaih nghal rawk rawk.

"Maw? Tinge? Ka awih lo. " A ti leh hram. Nui hul hakin Dingi chu ka en a "Dawt sawi hmel ka put loh hi. " ka tih chuan mak tih hmel lutukin a lu a thing a. Ka momo ei lai chu ka ei chhunzawm mial mial.

"Kum khat in ni tawh a, vawikhat mah in break zuai ang pawh in la nei ngai lo. Ngatinge? " A sawi zawh rual chiah chuan dar a ri a. Ka lo thaw huai.

"Nakinah ka hrilh ang che. " Mitmeng dul raiha ka tih chuan min hriatthiam hmel deuhin min en a. A lu a bu ve mai.

Afternoon class chu rei ka ti lutuk a, ka chau hluah hluah thei hial. Eng nge kan zir a, eng nge an sawifiah pawh ka hre lo. A changin an nui huah huah a, a changin an reh thuap a, a chhan erawh ka hre lo thung.




Zanah chuan ka khumah ka mu meng kar a. Sana inkhawng ri keuh keuh chu ring tak a ni. Ka phone chu ka hmet eng chhen a, a laka beiseina ka la nei talh chu ka duh lo. Tlaiah khan a bike bulah a lo ding reng a, ka kalpelh dawn pawh khan min en reng a mahse ka hawilet duh lo a nih kha. Inthen hlen tur anga ka inngaihtuah chuan ka rilru a na a, mahse vawiin chungchangah kher kha chuan ka dik lohna ka hre bawk si lo. Tinge ni dang anga a dik lohna kha a pawm theih mai loh. Pawm mai se la chuan tun dinhmun hi kan thleng kher lo ang.


"Kal rual ang aw. Taxi ka hmang dawn a, Kt store bulah ka lo nghak ang che. " Dingi msg a ni. "Awle, ka rawn chhuak nghal a ni mai. " tiin ka reply a. Ka sam ka tawn tha leh lawk a, ka bag akin ka chhuak nghal a. Kawngpuia Mampuia ka hmu lo chu engtin emaw ka awm leh zawk. Kha leh chen kha a ni ve a, a awm ve reng e.

Dingi nen chuan kan kal rual a, kan thlen chuan an lo ri leh nak nak tawh. Nizanah khan Dingi hi kan inthen chhan ka hrilh tawh a, a ni paw'n thiam min ti zawk. 'Mampuia chuan a thiam lohna pawmin ngaihdam dil mai che se la a fel vek tur nia. ' a ti. Ka ngaihdan chiah a ni ve bawk.


Class tan hmain Devotion kan nei phawt dawn a, hall lam panin dar rik rualin kan kal a. Vawiin hi kan devotion kaihhruai hun a ni chiah bawk.

"Rintluang, chho ila. " Hall kan thlen rual chuan ka hun hman pui tur Remdika chuan min rawn ko a. Stage-ah chuan kan inzui chho a, Sangi leh Diki an rawn chho ve nghal bawk. Kan pali hian vawiin chu devotion kan kaihruai dawn a, Remdika'n zai hruai vel leh kaihhruai a ti ang a, kei ka tawngtai ang a, Sangi sermon tawi, chuan Diki ban hla thlangtu a ni thung ang.

An thut fel vek hnu chuan Remdika chuan hla a han la a. Kan zai tan a. Mampuia mipa tlar hnunglama thu chu mi zawng zawng zingah chuan ka hmu fiah bik hle a. A ni paw'n min rawn en ve kar tih ka hre thei bawk. Ka hawi sawn a, ka hma zawn chu ka en daih a.

Hla pahnih kan sak zawh hnu chuan Remdika'n tawngtai turin min sawm a, ka bible nen chuan lecturn ka pan a. Bible ka chhiar dawn chuan mic chu a sang lutuk a, tihhniam tumin ka khawih a, ka tihniam thei lo. Chutia ka buai lai chuan Remdika rawn kal hnaiin min rawn tihhniam sak a. "Ka lawm e. " Ka tih zawi sap chuan min nuih sukin a dinna ngaiah a va ding leh a. Bible chang chu chhiarin ka tawngtai nghal a. Devotion chu kan tling tla ve leh mai.


"Lalrintluangi, Intensification of sex consciousness chu sawifiah rawh le. " Sir Rela'n a tih chuan ka thutna atangin ka ding a.

"'Intensification of sex consciousness' awmzia chu tleirawl emaw rawlthar, amaha tisa chakna emaw rawn sang/pung vak hi a ni. Hetih hun lai hian buaina a tam a, rilru a kal sual duh bik hle. Chu chu ka hriatthiam dan a ni mai. " Tiin ka nui a. Sir chuan thu turin min mitmei a.

"I sawi chu a dikna chen a awm ve tho a... " Tiin a sawifiah zawm a.

Dar a rik rual chuan kan 'yes' hluai a. "E, ka chhuak duh lo mai tur a nia. " Sir Rela'n a tih chuan kan nui hak hak hlawm a.

"Ok, thank you, class" Tiin a chhuak a.

Ka inzimar talh talh a, ka kawng na lutuk chu a hrehawm zawk.

"Eng nge kan ei ang.? " Dingi.

"Vawiin chu Egg roll ka ei chak. "

"Kal ila... " A tih chuan canteen lam panin kan inzui a. Canteen-ah chuan mi an tam leh ngei mai. Mi nawlpui nepnawi lei ho lo chhuah hun chu nghakin pawnah chuan kan ding a.

"Rin.... " Cindy nuisang hmel ka hmuh chuan ka ner ru sak.

"Eng nge a? " LalDingi pek chuan pawr ang reng takin a lo chhang a. Ti lo turin ka mitmei vat.

"Mampuia nena kan chungchang kha engmah a ni lo a nia aw. " A rawn tih chuan eng nge maw sawi i tum le tih melhin ka melh a.

"Keimah vangin in inthen tih ka lo hria a. " A tih chuan awih loh lutuk vangin ka nui chhuak hak.

"Nangmah vang a ni hleinem, inthiam lo duh suh. " Zaidam thei ang berin ka tilet ve kher.

"Nilo, pawi ka ti lutuk. Mampuia pawh ka lo hrilh ang. " A tih leh phei chuan Cindy hi ka ngaih ang a lo ni lo tawp tih ka hriat phah. Helai canteen kawt, mi tam lutuk naah hian Mampuia nena kan inthen thuah amah a rawn insawi lut a, pawi ti angin a rawn lang, pawi a tih hmel tak tak bawk si lo. Mihring rilru tak hi chu aw...

"Awle, i duh duh danin i ti dawn nia. " Tiin ka nuih a, hriatthiam loh hmel deuha min en chuan min tihlim ru riau, a beisei loh chhanna ka pe a ni mahna. Mampuia nen hian inthen mah ila awlsam takin hmalam a pan dawn lo va, Cindy ngat phei hi chu a ngaizawng dawn lo tih hi ka chiang ve em a ni. "Thil kan ei dawn a, i lo ei ve duh em? " Ka ti leh kher a. A lu a thin chuan "Nih kan lut aw... " tiin Dingi nen kan inzui lut a.

"I che hit lutuk. " Ka beng bulah chuan a rawn ti sar sar a, kan inen a, kan nui hak hak.

"Lawk, niminah kan inthen a, nang lo chu tumah ka hrilh lo. Mahse Cindy khan engtinnge a hriat le..? " Dingi chu ka en a.

"Cindy chauh lo paw'n kan school ho chuan an hre vek ang chu. Ngaihtuah la, kum khat kal ta chhung khan Mampuia nen in inphur a, school in rawn kal dun a, thil in ei dun a, in haw dun bawk a. I htethiam mai em? Mi hian thil hi an hrethiam hma lutuk... " a tih chuan "Aniang... " ka ti tawp. Mihring rilru chak zia hi!!


Kartawpah chuan ka thawmhnaw bal khawl ho ka su a, nilengin ka buai phah. Chawhnu dar 2 velah thingpui ka in ve hman hram. Ka inbual fai leh hnuin ka mu hmak.

"Chaw ei a hun e... " Dar 6-ah U Joicy-in min rawn kaitho a, harhvang lo zetin chokaah chuan ka chhuk a, chaw chu kil ta mai lo chuan varandah-ah ka va dak leh phawt a, kan hostel piah deuh lawka kawngsir thim deuh laia mihring ruangam ka hmuh chuan ka ding ngil nghal awt. Inchhungah ka tlan lut nghal a, kawngkapui chu hawngin inhnuai panin step chu ka zawh thla nghal. Kawngsirah chuan ka tlan a, chu mihring ruangam ka hmuhna hmun ka thlen chuan ka ding a, ka hma lawka ding mipa avang chuan ka lungphu chu a ri dawt dawt nghal. Min hmuh rual chuan min rawn enin a nui suk a. Min rawn panhnai nghal vat. Khua a thim tan tawh a, kan dinna chu street light in a rawn en pha bawk hek lo.

"Ka ngai lutuk che. " Ti sapin ka banah chuan min pawt dawr a, a awmah ka bei nghal thlap. A taksa ka deh rual chiah chuan ka lo thlakhlelh zia ka hre chhuak a. Min kuah ang chiah chuan nghet deuhin ka kuah let ve a. Ka maimitchhing vang vang bawk.

Karkhat chhung khan pumpelh tumin ka theihtawp ka chhuah a, theihnghilh erawh ka tum chhin hauh lo thung. Kan inkar chu tha leh turin ka duh a, mahse a pan hmasatu nih erawh ka hlau hle thung si.

"Min ngai ve em? " Tiin min kuahna chu a phelh a, amah ka en theihnan a inlahrang deuh hlek bawk. A mitah chuan enin "Aw, ngai lutuk. " ka ti sap a.

"Ka tihpalh. " ti leh sapin ka chalah chuan min fawp vang vang a.

"Hetah pawh... " A inlak hran rual chuan ka hmui khawihin ka lo ti vat a. Nui sukin ka hmuiah chuan a rawn fawp a.

"Ka hmangaih che. " Tiin min kuah leh vang vang a. Keipaw'n he mipa hi ka hmangaih a ni.

Hun chu a kal ve bek bek a, thla tharah term exam kan hmachhawn tawh dawn a, kan la serious lo hlawm em em bawk si. Zirtirtuten min hau mawlh mawlh reng mai.

"Tinge a? " Kan class CR Ricky-a chu kan en thap a.

"Afternoon-ah Awareness campaign kan school-ah an rawn nei dawn a, chair vel kan rem fel mawle. " A tih chuan mipa ho an 'Yes' dual nghal.

"Eng chungchangah? " Fela.

"Zirlaite leh Sex" Ricky-an a tih chuan thenkhat over zual deuh hoin "Chutiangte chu kan hre vek tawh. " an lo ti pek a, kan vai chuan kan ri hluai a, duh aiin kan bengchheng leh a, Miss Zbi classroom lehlama awm chuan min rawn hau leh ta nge nge e.

"....Awmdan mawi pawh hre lo, naupang chhia in nih tawh loh hi. " Tiin thinrim deuhin a tawp a khar a, rum lutuk tak maia min melh kual leh vek hnuin a let leh chauh.

"Miss Zbi hi chu aw, thinchhe viau mah se.... " Mipa pakhatin a tih chuan a bula thu chuan "A chhe lo a ni. " a lo ti hmanhmawh a. Kan khek leh tuar nghal.




Hall-ah chuan Dingi nen zawi zetin kan thu a. Stage a thu thap ho chu kan en kar a, an la naupan hmel hlawm nen an hmel lan dan erawh an confi hlawm phian. Tichuan kan tan nghal mawp mawp a. An thusawi vel chu ka bengkhawn vak lem lo. An zinga hmeichhe awmchhun chu a rawn ding chhuak a.


"A hmasa bera ka sawi duh chu eng vang pawh ni se, eng dinhmunah pawh ding ula, eng thil pawh ti ula, nupa nih hmaa tihluihna tel lo va sex hman hi sual a ni. Thil sual i ti a ni. Tunlaiah chuan Sex hi inngaihzawnna nena kalkawp anga ngai an tam tawh hle a, hei hi a dik lo chhia va tih hre phawt rawh u. Mihring insuihzawm tirtu leh mihring tikehdarhtu pakhat chu sex hi a ni." Tiin a sawi chhunzawm zel a. A thusawi tawp lama a tawngkam chuan keimahah dik lo a siam a, ka hrawk a rawn thip a, hnawhtu awm ang maiin thawk ka harsat nghal talh. Mampuia thutna lam ka va hawi chuan chunu thusawi chu uluk takin a lo en reng a, amahah danglamna a thlen ve hauh lo thung. Ka pum rawn let bulhin ka luak a chhuak ut ut a, insum zo lovin hall atang chuan ka tlan chhuak a, bathroom-ah ka va luak teuh.

Khanu thusawi kha "Sex i hmang a, chu chuan hrin chhuah a nei. Pathian thilpek ropui tak a keng tel a, chu chu a hun loah i tihluih sual avangin i pumah a rawn awm ta. Tichuan engtinnge i tih le? I inhmangaih lutuk luatah chu thilpek chu i paih mawle. I tihluih sual vanga lo awm, nakin lawka mihring rawn ni mai tur chu i that a, tichuan engmah thleng lo ang maiin i nun i hmang leh a. I inhre lo a ni, i nihna dik tak chu tualthattu tih hi. "

Ka mittui chu eng vanga rawn luang ringawt nge ka hre lo. Ka awm zawn na ta lutuk te hi ka hrethiam lo. Eng vanga inthiam lo nge ka nih? Eng vanga kha a thusawi vang mai maia hrehawm ti nge ka nih? Eng vang a... eng vanga tualthattua inngai nge ka nih????

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » May 30th, 2021, 3:53 pm

LITTLE PIECE OF HEAVEN
CHAPTER 3

Zualtei B Zualtei






"Engtinnge i awm? I eng nge na? " A tih chuan ka nui sen sen a.

"Ka engmah a na lo. Ka haw duh avangin ka tider a nih kha. " Ka tih chuan awih loh hmel deuhin min en vang vang a.

"I ti tak tak maw? " A tih chuan ka lu bu nghatin a kut chu ka va chelh a. A darah ka lu ka nghat a. Zan boruak pawh a vawt ve tan tawh a. Kan hostel thlang lawka step sei deuhah kan thu dun a, helai hmun hi zanah chuan a reh thei viau. Vawiin khan Zirtirtute hnenah dam lo anga insawiin ka haw hma a.

"Ih maw..... " Tiin ka en a. Ka sawi tur ngaichang tih hriat taka min en chuan sawi leh lovin a darah chuan ka lu ka nghat leh a. Ka lu chu a kut lehlamin a rawn chul heuh heuh a.



'Nu...... '

'Anu, a vawt lutuk. '

'Nu, ka awmna hi a vawt lutuk. '

'Nu, min kuah lum rawh. '


Mumang ram atanga ka harhchhuah rual chuan thaw hlawp hlawpin ka thu nghal awt. Ka taksa chu thlanin a bual hneh hle a, ka puan sin lai erawh chhuatah a lo tla daih thung. Ka mumangah khan naupang âw ka hria a, min lo ko ruai a nih kha. 'Nu' tiin min lo ko a, kha kha ka naute kha tihna em ni? Nilo, a ni lo ang. A theih loh. Vawiina ka thil ngaihthlak vel kha ka mangphan mai mai a ni ang. Mahni thiam inchan mawlh mawlhin ka puan chu ka chhar a, khumah chuan ka mu tha lehnghal vat. Kha naupang âw kha ngaihtuah loh tumin thildang ka ngaihtuah lui a, a tawpah chuan earphone ka vuah tawp a.




"Morning... " Ti sapin bike-ah chuan ka lawn a, kan tlan nghal. School kan thlen chuan a ngai te ang bawkin kan classroom thleng min thlah leh a. Kan school ho paw'n kan ni leh tawh tih an hre leh tawh ngei ang a, Cindy chu engtin tak awm ang maw.


"Lalrintluang, Mampuia leh Remdika an insual. " Canteen-ah Dingi nen kan thu fel chiah tihin kan class a mi Jenny-in min rawn hrilh a. Mak ka ti lutuk a, thawh nachang ka hre lawk lo lehnghal.

"Kal vat ang. " Dingi'n a tih chuan ka ding ve chiah. Dingi nen chuan kan classroom lam panin kan tlan chho a. Mampuia insual hi vawikhat mah ka la hre lo. Mi pawi a sawi awm ka hre ngai lo va, eng emaw hlekah pawh a inthunun thei viau thin a ni si a, eng vanga insual nge a nih tak ang..?

Classroom kan thlen chuan an lo thelh fel tawh aniang Remdika chu kan class mipa hoin an lo bawr deuh luai a, a hnar thi sung leh mit duk deuh run ka hmuh chuan Mampuia ka ngaihtuah zual sawt.

"Khawnge....? " Tiin Fela chu ka zawt a.

"A thianten an hruai phei tawh. " A tih chuan an classroom lamah chak deuhin ka tlan phei a. An classroom-ah chuan zah pawh dawn lovin ka tlan lut thuai. Ka hawi kual a, Mampuia ka hmu lo.

"Inchungah a awm. " A thianpa Sangzela'n a rawn tih chuan inchung lamah ka tlan chho lehnghal a.

"Awi, Lalpa! I tha em? " Class room ruakah chuan thaw deuh hlawp hlawpin ka lut a.

"Khawi maw... " Tiin a biangah ka kut pahnihin ka dawm a, a hmaiah hliam engmah a nei ve lo tih ka hmuh chuan ka thaw huai mai.

"Tinge in insual a..? "

"Ka pawi a sawi. " Ti nghutin lehlam a hawi a. Tuna a awmdan hi a cute reuh lutuk.

"Engti zawngin? " Ti lehin min en turin a khabe atang chuan ka kuai her a.

"Nangmah." A ti leh nghut.

"Maw? Tinge? Eng nge ka tih? "

"Khapain a en dan che kha ka duh lo. " A tih chuan awih lo lutukin ka melh a.

"I fiamthu tiraw? " Ka tih chuan "Ka fiamthu lo. Khatianga a melh leh che chuan tun aia nasain ka che ang. " a tih chuan ka nui tawp. An insual chhan chu vawihnih vel ka zawt nawn leh a, a chhan dang sawi tur a hre lo. Keimah vanga insual chu a ni tak tak tihna em ni? Hepa hi.....



"Mampuia kha a pa tawp.! " Class a ka let leh rual chuan kan hnunga thu Sentei'n a lo ti vat a. Ka nui tawp.

"Fel, tinge a...? " Fela chhuak tur chu ka lo ko a. Chhuak ta lo chuan kan thutnaah a rawn kal a.

"Ka hre lo. Mampuia kha a rawn kal a, Remdika nen sawn eng emaw an sawi a, chuan a hnek thut a, tikhan a khawih zui nghal a ni mai. Teacher te hriat hmain a thianten an rawn thelh thei hram a nih kha. " Ngaihtuah zui niawm fahranin ventilation lam chu a melh vung vung a.

"Mampuia chu... man rem rem hle mai. " Laldingi'n a tih chuan ka nui hak. Remdika thutna lam chu ka va melh zawk a, min lo en ve reng chu niin, ka hawi sawn leh nghal vat.

Ka riltam lutuk chu class-ah chuan ka pum a ri ruk ruk a, Dingi'n min rawn nuih leh thin. Chhunah khan engmah kan ei hman ta si lo a, tunah chuan tam tawh tak ka ni. Mi hi engtinnge nilengin thil ei miah lovin an awm theih zawk ni.

"Rintluang....? " Classroom ka chhuahsan dawn chuan Remdika'n min lo ko a.

"Aw... " Tiin ka ding a, "Pawnah ka lo nghak ang che. " tiin Dingi chu a chhuak hmasa a.

"Tihpalh." A tih zawih raih chuan hrethiam lo zetin ka melh a.

"Ka duh che a. Mampuia nen in inthen zuai khan mi bulah kan ni angin ka sawi a. " A tih chuan awih lo lutukin ka en a. Chutiang thu chu ka hre ve miah lo.

"Ka tihpalh lutuk. " A tih leh chuan chhan dan tur pawh ka hre lo. "Ka kal ang e.... " tiin min melh zawk a, kun leh nghalin min kalpel a. Ka awm a nuam lo zo vek. Remdika dawt sawi vel avang chuan Mampuia'n a lo khawih hrep tihna a ni ang a, a va han mak thei tak!!



"Vawiin chu Jeru-ah chawl ila... " Midang chhuah thawl tawh hnuah chuan ka chhuak ve a, Mampuia leh a thianpa Sangzela leh Dingi chu an lo ding khawm laih a, Dingi'n Jeru Dine a chawlh a rawt leh nghal zat.

"I duh em? " Mampuia'n a tih chuan "Aw, kal ang u. Ka ril a tam over. " uar thei ang bera sawiin ka pum chu ka chul a.

"Nihchuan kal ila... " A tih chuan kan inphur nghal a.

"Lalsangzel, han tlan chak vaih teh. " Dingi'n Sangzela chu a vau lawk leh thlap. Sangzela chuan nui rah rahin "Boss, samuang speed in kan tlan dawn nia. " a ti a. Sangzela leh Dingi hi keimahni vangin an inhmelhriat a, an inphur ve zeuh zeuh bawk.

Mampuia nen chuan kan tlan hmasa a, kan hnungah Sangzela te an rawn tlan thung. Kawi hnih vel kan tlan hnu chuan Sangzela chuan chak deuhin min rawn tlan pel a, Dingi a sa teh ang chu aw....


Rin ang ngeiin Jeru Dine hnuaia bike kan hun fel lai chuan Dingi'n Sangzela a hau hrep. "Boss, ka ril a tam tawh. Chho phawt ang u.. " tiin Dingi chu a kuah a, step-ah a pen chhoh pui hmawk hmawk. A hnungah Mampuia nen nui rah rahin kan zui ve a.


"Beef Fried Rice.. " Tiin ka ei duh chu ka sawi a, midang paw'n an duhzawng theuh an chah a. Kan ei zawh meuh chuan ka puar ul mai.

"Bye aw.... " Kan hostel thlang kawngpuiah chuan ka chhuk a. "E, Remdika'n ngaihdam min dil a. " Kal mai ka tum hnuin ka hrechhuak a, lehhawiin ka sawi a.

"A that chu. " a ti nghut.

"Mahse engtinnge nge Remdika khan kan inngaizawng angin mi bulah a sawi tih i hriat a? Keipaw'n ka hre si lo. "

"Cindy-in min hrilh a. " A tih chuan "E.. A nih chu. " Ka ti zawi sap a.

"Hey, chutiangin kan inbe lo. Min rawn text a, Remdika nen kan inthen ruala ni nghal angin a rawn sawi che u a, mahse in ni lo tih ka hrechiang a, chuvang chuan ka hrilh duh lo che a nih kha. A bak kan inbe lo.. "

"Um, ka hrethiam alawm. Ka kal ang aw.. " Tiin ka nuih a, a lu a buk zeuh chuan "Bye... " tiin kawng ka kan a, stepah chuan ka chho nghal a.


Ka harh hlawl chuan ka phone ka ban vat a, zing dar 1 a ni. Ka awm chu a insep dawr dawr a, ka tiril a khur a, ka taksa chu hlauhna namen lovin a rawn tuam a, ka pindan reh thuap chu ring ka ti zawk hial. Khur der derin ka khum atang chuan ka tho a, chapal thawlh nghalin zawitein kawngkhar chu ka hawng a, varandah lamah kalin bathroom-ah chuan ka lut a, ka kalh fel rual chiahin bathroom chhuatah chuan ka thu nghal hnawk.

Ka mit chu a rawn lum pap a, ka biang pawh chu a rawn sa hat hat nghal. Reiloteah chuan ka tah a chhuak lutuk a, ka kâ hupin ka tap khur nghal hlawk hlawk. Ka phone chu ka kâ ka hup lohna lam kut chuan ka hmet eng a, Mampuia ka call nghal.


"Hello.... " Mutchhuak tih hriat taka lehlama miin a rawn tih chuan ka tah a chhuak zual sauh a. Ka inhnit nghal hlap hlap.

"Rin, i tap a mi? "

"Rin..... " Âw fiah taka a rawn tih chuan tawng ka tum a.

"Ka naute...... " Tiin ka sawi zawm thei lo.

"Eng nge a awmzia? Engtinnge i awm? Na i nei em ni? " A rawn ti zung zung a.

"Ka naute kha.... Mam, ka naute kha. " Sawi zawm thei lovin ka tap khur zawih zawih a, ka mumangah ka naute ka hmu a nih kha.

Ka mumangah chuan phaizawl hring dupah hian keimahin ka lo awm a, ka hmuh theih chin chu hnim hring dup vek an ni. A boruak a nuam hle a, boruak thaw heuh heuhin ka sam a rawn chhem chuan nuam ti takin ka lo awm a. Vawilehkhatah ka awmna phul hring dup chu a rawn ro vek a, van eng tak pawh chu a rawn thim nghal khup a. Chutah chuan naute tap thawm ka hria a.

'Nu, tinge hetianga min tih a? Tinge min duh loh a? I pawi ka sawi em ni? ' naupang âw chu kil tin atangin ka hria a, zawhna chi hrang hrang min zawt mawlh mawlh a, ka beng ka lo hup a, mangang takin ka lo au a.

'Nu, nang hian min that a ni. ' a tih chuan mumang ram mah nise ka thinlung chu a tak ram ang maiin a na a, a tap ri mawlh mai chu tuar har ka ti.



"Rin, tap tawh suh le. I mumang a nih kha. A tak a ni lo aw.. Bang rawh le... " Lehlama miin zaidam taka a rawn tih chuan tah tawh loh tumin theihtawp ka chhuah a, mahse ka thinlung erawh a na reng tho si. Mahni inthiam lohnain ka pum hian min fan chhuak a, mumang ram mai a ni lo tih ka hria a ni. Kei hian ka naute kha ka that alawm. Kei hi tualthattu ka ni chiang alawm, ka fa, ka thisen ngei mai chu ka that a ni.

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » May 30th, 2021, 3:54 pm

LITTLE PIECE OF HEAVEN
CHAPTER 4

Zualtei B Zualtei









Mampuia birthday kan lawm ni khan kan pahnih chauhin a pindanah kan awm a, a chhungte an chhuah vek avangin kan free ang reng hle. A khumah chuan kan mu dun rial a, chutia tleirawl thisen lum, inhmangaih tawn ve hlea inhria chu kan taksa kan thunun thei lo va, ni lo, thunun kan tum lo zawk. Kan chesual ta a. Thil sual tia inngaihna kan nei hran lo. Kan pahnih khan a hmasa ber kan nih ve ve avangin kan lawm zawk emaa tih turin kan hlim a. Kum khat vel kan lo inkawp ve tawh avangin thil thleng ve tur rengah kan ngai bawk.

Tichuan hun a liam leh hnuin ka rai tih kan hrechhuak a. Tleirawl hmalam hun eng tak nei kan ni a, kan chhungte paw'n kan lakah beiseina an nei sang a, chuvang chuan awlsam tein thutlukna kan siam. Kan thutlukna s"leiam chu a awlsam lutuk, naute tihtlak chu a ni mai. Mampuia chuan ruahmanna a siam vek a, damdawi lei atanga U Atei ina nau chhiat anga awm thleng khan, engkim kha a ruahmanna vek a ni. U Atei hi hmeichhe doctor a ni a, a ina kal kha kan tum lawk dan a ni. Engkim kha kan ruahmanna vek.




"Le, min en rawh. " School lam pan lovin hmun dangah min hruai a, kan thlen chuan Vengsang lama Park thlen hmaah kan lo awm reng tawh. Ka taksa a zawi a, ka nguai hle bawk.

"Hun kal tawh ngaihtuah lo la, a bik takin naute phei chu ngaihtuah suh. Sawi pawh sawi tawh suh. I hrethiam tiraw? Nang leh kei hian naute kan nei lo. Engkim kha a thleng lo ang vekin ngai rawh aw.. Chuti chuan ti rawh. " Ka kut pahnih chelhin ka mitah min en a, a thusawi chu zawm turin min duh tih a mitmengah chuan a hriat hle a, ka mit sen ram chu uluk takin a en reng a.

"Rin..... " Tawng lo va ka en reng lai chuan a rawn ti leh sap a. Ka ngaihtuahna atang chuan harh zawkin ka hawi sawn a.

"Ka thei lo. " Ka ti sap.

"Rin, i theih a ngai. Enteh, kan hria a ni lawm ni? Kan la naupang a, tihtur tam tak kan la nei. I nu leh pate ngaihtuah la, i tithei ngei tur a ni. Hei leh chen engmah thleng lo angin kan awm tawh a, chutiang chuan kan awm chhunzawm zel ang.. Aw... Ka hmangaih che... " Zaidam taka ti lehin a taksaah chuan min kuah bet a, ka lu a chul heuh heuh a. "A tha vek ang.... " a ti mawlh mawlh bawk.


Class-ah chuan zawi ngiaiin ka awm a, ka dawhkanah chuan ka bawk a, ka mit ka chhin apiangin ka naute âw kha ka thluakah hian a rawn lut a, a tap ri kha ka hre nawn zel. School kan thlen khan Mampuia'n Dingi hnenah dam tha lo angin min sawi a, tawng miah lovin ka thutnaah chuan ka bawk char char.

Ka rilru chu ka kawm melh melh a, mahni inthiam lohnain min tuam a, naute tap ri khan min chenchilh khat tlat bawk. Nilengin eng nge kan zir ka hre lo. Chhunah pawh chuan thil ei turin ka chhuak peih lo va, Mampuia a rawn kal a, inchungah min hruai chho a.

"Rin, ngaihtuah loh tum rawh... " Bang nghengin ka ding a, a ni ka hmaah a ding thung.

Ka mittui a rawn luan chuan hruk tum lem lovin hnuai lam ka bih ngur ngur a.

"Hei... A tha vek mai ang. " Tiin ka mittui ka bianga luang chu a kutin a rawn hru hul a. Ka dak chhuak a, Mampuia chu ka en a, ka kuah nghal thlawp. Mampuia chu nghet zeta kuahin ka tap chhuak hawm hawm a, min kuah let vein ka tah chhung zawng chuan ka hnung a chul reng a.

"I tha tiraw...? " Kan classroom kawt kan thlen chuan min zawt sap a.

"Um" Tia ka nuih chuan thaw huai hmel a pu.

"Kal tawh rawh.. "

"Aw, lut la.. " A tih chuan ka lut a.



"Awi, Lalrin, enteh... " Classroom a ka luh rual chuan Dingi'n phur fahranin min pawt thu nghal a. Taksa chauh nen eng tak chu sawi ang maw...

"Commerce a mi Nancy kha i hria em? Hmeltha deuh, nu deuh kha. " A tih chuan ka hria tih lantirnan ka lu ka bu a, Nancy chu kan school-ah a hmeltha ber ti ila ka sawi sual lo ang. Hmeichhia paw'n hmeltha kan ti vek. A nungchang tha lutuk leh nu zen te chuan a hmelthatna a tizual ka ti thin.

"A rai..... " Ka beng bulah chuan a rawn ti sap. Ka awih loh em avangin Dingi chu ka melh deuh kawk a.

"A ni alawm. Mi zawng zawngin mak an ti vek. Amah nen a inhmeh hlawl lo. " A tih chuan mak ka ti lutuk a, Nancy ka mitthla a, a awm lo ngawih ngawihin ka hria.

"Chuan engtin...? " Ka ti zawi sap.

"An innei dawn an ti. A fa paina pa chu Govt.-ah sawn a lut a, an chhungte an inbe rem a, an innei vat ang. A lo rai reng vang aniang karhmasaah pawh khan school a rawn kal miah lo. " Dingi thusawi chu hla tak atanga hria ang maiin ka chhehvel chu a reh dukin ka hria a. Ka ngawi reng a, Dingi chuan a sawi zawm mawlh mawlh a, a thusawi chu a ri chhuak em tih pawh ka hre lo.



"Fel, Nancy Commerce number min lo pe. " Zanah chuan rei fe ka inngaihtuah hnuin Fela ka va text a.

"Aw, ka nei lo va, ka thianpa ka lo dil ang. " A tih atanga minute 5 velah chuan Nancy number chu min rawn thawn a.

Ka phone nen chuan Varandah-ah ka kal a, kawngkhar tha taka khar lehin thlang lam hawi chuan Nancy number chu ka dial a, a ring rual chuan ka thin a phu dut dut nghal.

"Hello.... " A rawn tih chuan ka thaw a chham mai dawnin ka hria, ka sawi duh hi ka sawi ang em, ka zawt ang em..

"He... Hello" Ka ti bah nuai a.

"Aw, tunge aw..? " Zaidam taka a rawn tih chuan boruak hip lut teuhin ka insangmar a.

"Nancy, Rintluangi 12 Arts B a mi ka nia. Biak lawk che ka duh a, i remchang em? " Pangngai thei ang bera ka tih chuan "Aw, eng nge ni a..? " a rawn ti thuai a.

"Ih.. Miin i.. I rai an tia, a ni mi? "

"Aw, ni e. " A tizawi raih a. Ka zawhna chu zawh awm a ni lo tih ka hria mahse zawh ngei ka duh bawk si.

"Chuan, naute chu I pai tlang dawn a mi? " Ka ti leh a.

"Aw, dawn e. Inneih kan tum a. " A tih chuan ka hmui hnuai lam seh vakin ka kut ka hum ruh vak bawk.

"A hrehawm em? " Ka âw chu a chhuak chang chang chauh.

"Aw, hrehawm lutuk. Ka zak lutuk bawk.. " A âw atang pawh chuan hrehawm a ti tih a hriat theih.

"Chuti si tinge hetia i mualpho a, pai tlang i tum kher a? " Ka tih chuan a thaw vang vang ri ka hria a.

"Keipaw'n a tirah kha chuan thil tam tak ka ngaihtuah alawm. Rintluang, ka hrilh ang che, tihtlak dan tur te thlengin ka ngaihtuah ve vek a, mahse ka thei ngang lo a ni. Ka pum chhunga awm ka fa hi ka hmangaih a, a tan chuan mualpho leh hrehawm te mai mai chu ka tuar thei vek ang. "

"Ka lawmpui che... " Ti sapin phone chu ka hmet tawp a. Ka maimitchhing vang vang a, boruak thaw heuh heuhin ka hmai a rawn chhem chuan ka vawt sung sung a, ka mit ka meng a, ka pindan panin ka phei a. Nancy chuan a naute tan engkim tuar a huam a, keichuan kawng awlsam ber ka thlang thung.


Ka khumah chuan ka thu reng a, ka melh ngai ka melh rawng bawk. Zan rei a nih tawh avangin a reh thuap tawh a. Tlai chaw ka ei loh vanga ka pum ri ruk ruk chu ngai pawimawh lo zetin ka thu reng a. Ka mittui luanna hnu ka biang sa hat hat pawh chu ka ngai pawimawh lo. Khami niah khan ka rilru chu a awm a, kha damdawi ka ei ni kha. Ka pum na te kha, ka taksa atanga thisen hlawm chhuak kha, ka taksa na te kha, kha thil kha vawiina thleng ang maiin keimahah a rawn lang chiang a.

Nancy chu huaisen ka ti a, ka ngaisang takzet. A naute chu a mualpho pui ngam bik a, kei chu mi dawizep, engmah ni lo, pawn lama tha tak anga lang chauh ka ni.

"Naute, ka tihpalh..... " Rei tawk fang hnuah chuan ka rilruin ka ti sap a.

"Ka tihpalh lutuk. Pawi ka ti, ka ti takzet... " Ka rizai chuan ka kâ hup betin ka tap hawm hawm a. Ka na a ni. Ka naute thattu ka ni tih ka ngaihtuah chhuah chang apiang hian ka na a ni. Kei hi eng ang mihring nge maw ka nih le... Hmeichhia ni siin ka puma naute chu ka that duh a, pawi sawi lo awm fahranin ka la awm zui zel a, ka va tenawm tehlul em...!!!





Ka khua a sik avangin school ka chawl a, ka khumah chuan ka mu kawm ngal mai. Zing chaw pawh chu ka la ei thei chuang lo, keimahah hian chaw chakna a awm loh bakah ei luih tumna ka nei hek lo. U Joicy-in a hnaa a kal hmain ORS min fawh luih tir a, chu chauh chu nimin atang khan ka kâah a la lut. Ka muhil thei lo va, mu reng mah ila ka mit chu ka meng kar thung. Nancy nen chuan ka intehkhin reng a, ka inngainep ngawih ngawih bawk.



"Rin, tinge hetia i awm tlat le? " Min tih chuan chhan ka tum lo. Ka phone ka off tlat avangin U Joicy a rawn bia a, kan hostel thlanga step-ah khan min nghah thu a rawn sawi a, kal loh ka tum naa U Joicy-in "A ngaihtuah viau ang che. Zu hmu lawk la, i rawn chho leh nghal dawn nia. " tiin min tir lui a.

"Mawh..? A hrehawm a nia. " Ka la tawng chuang lo, van boruak thiang kaka thla leh arsi de sep sep chu ka en a.

"Chaw I ei thei lo tih ka lo hria a, hei hi i ei thei ang em? " Tiin a polythene khai atang chuan eng eng emaw ei tur hi a rawn phawrh a, ka la bengkhawn duh lo.

"Le.. ORS hi fawp rawh aw. " Tia ka hmui bula a rawn dah chuan ka lu ka thing hmak.

"Nancy kha i hria em? Rai kha? " Ka tih chuan min chhang lovin min en reng a. "Ka va bia a... "

"Maw? Engngatinge i biak a? " Ti vatin min rawn hnaih ruak a. A âw pawh a nem hran lo.

"An innei dawn a, a ni chu a mualpho ngam bik a, a huaisen asin. "

"Lalrintluang, engmah i hrilh lo tiraw? " A tih chan fak rual chuan ka melh ve kawk a.

"Keipawh ka lo rai ve tawh a mahse keichuan ka titla a tih maw..? Keichu nang angin ka huaisen ve lo va, ka naute chu ka tihlum a. Chu chu ka hrilh i hlau em ni? "

"Kha thu kha sawi tawh suh. Theihnghilh rawh ka ti a ni lawm ni? " A âwki sang lutuk avang chuan ka thutna atanga dingin ka melh chhuk run a.

"Rammuanpui, inthiam lohna te, inchhirna te, hrehawm tihna te i nei ve miah lo a mi? " Zawi chang faka ka tih chuan a thutna atangin a rawn ding a, step khatin a pen thla a, kan inchen tawk vel chiah.

"Chutiang a ni lo. Mahse tuna hetianga awm hi awmzia a awm lo. Rintluang, hmeichhia i nih hi. Miin an hria a nih chuan eng nge thleng tur kan hriat kha. "

"Nia, keichu hmeichhia ka nia, ka mualpho ang a, miin min sawi zui ang a, tiraw? "

"Hetianga I awm tlat hi ka hrethiam lo. " Beidawn hmel taka a tih chuan ka hawi sawn a.

"Mahni fa pawh venghim duh lo va, tihlum duh mihring kan ni tih i pawm ve hunah i hrethiam mai ang." Ti nghatin step-ah chuan ka pen chho hmawk hmawk a.

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » May 30th, 2021, 3:54 pm

LITTLE PIECE OF HEAVEN
CHAPTER 5
(Last chapter)

Zualtei B Zualtei







Nu Marami ka dairy ka sign tir lai chuan a en deuh vung vung a, a hnuah a sign ve mai a. "I nuin min rawn bia a, I phone i off tlat an tia. An ngaihtuah che a nia. " a sign zawh hnu chuan tiin min en a, a ni hi kan hostel neitunu a ni.

"Um, ka lo be dawn nia. " Ka ti sap.

"I tha deuh tawh hrim hrim em? Inentir te I duh em? " A tih chuan ka lu ka thing a.

School kal turin ka insiam a, chaw pawh ei lovin dar 8 velah ka chhuak daih. Tukinah ka phone ka on zuai a, Mampuia missed call leh msg a lo awm teuh. Ka nu leh pa call pawh. Ka nu leh pa hnenah chuan dam lo angin ka insawi a, a hnuah ka phone ka off char char bawk sia, mi an ngaihtuah ang tih chu ka hre tho a mahse be turin huaisenna ka la nei rih lo a ni. Kan class teacher Miss Puii msg a lo awm a, "I attendance hi a tha vak lo va, dam vat la, rawn kal leh vat rawh aw.. " tih mai hi.
Ni e, a hma khan rei tawk ka chawl tawh bawk a nih kha.


School ka thlen chuan gate an lo hawng fel chiah a, kan classroom-ah lut zawkin ka bag ka dah a, ka chhuak lehnghal. School piah lawka thingkung lian deuh hnuaiah chuan kal pheiin ka thu a. Tuna ka rilru puthmang leh ka awmdan hrim hrim hi ka hne hluah hluah.

Reiloteah school chu bengchhengin a rawn khat nghal a. Ka awmna thingkung bul velah chuan mipa ho an rawn phei avangin kan classroom lam panin ka kal a.

"Rintluang, i dam tawh maw? " Dingi chu ka nuih suk a, a bulah ka thu ve nghal a.

"Aw, tha tawh a ni mai. "

"I cher lutuk. Thil I ei tha thei lo a mi? " A tih chuan ka lu ka bu mai a.

"I eng nge na ber a..? " A tih leh chuan sawi tur pawh ka hre lo.

"A na deuh vek. " Ka ti tawp.

"Rintluang....? " Mampuia hmel a rawn lang nghal a. Ka thutnaah rawn kal pheiin lawm hmel tak hian min en a.

"U Joicy-in school kal tura i chhuah tawh thu min hrilh a, ka rawn tlang ve nghal. " Tiin a khi ve deuh sak a.

"Mampuia hi a lungleng thei teh mai a nia. " Dingi chuan uar tawkin a lo ti vak. Ka nui mawl ve tawp.

"Ding, kan va inbe lawk ang aw.. " Tiin ka ding a "Aw, in inngai ve tawh ang. " Inla hrethiam lutuka a tih chuan Mampuia chu ka mitmei a. Classroom atang chuan kan inzui chhuak a. Engmah sawi lovin inchung chhohna step-ah chuan ka chho a, ka hnungah min rawn zui ve zel a. Kawngka insawhkalh chu hawngin classroom ruakah chuan ka lut a.

"Ka ngai lutuk che... " Tih leh ka hnunglam atanga min rawn kuah chu a rual a. Ka lo ip chawih thung.

"Hman zan kha tihpalh aw.. " A tih leh sup chuan ka inthlahdul deuh a, min kuahna kut nghet taka a suih chu ka phelh a, ka kal sawn nghal a.

Thlang lam tukverh bulah chuan ka ding a, Mampuia ding khawng reng chu enin boruak ka hip lut vang vang a.

"Mam, chawl rih ang. " Ka ti chhuak sap.

"Eng nge maw sawi i tum le..? " Tiin a dinna ngaiah chuan ding rengin a ipte a zen a, a mit tizimin min en deuh vang vang bawk.

"Kan pahnih, kan inkar hi, chawl rih ang. "

"Engvangin? " A ti chang fak a. Amah en lovin thil dang ka melh kual a, ka kut zungtang chu ka sik neuh neuh bawk.

"Min duh tawh loh vang nge ni a, thil thleng vang zawk khan? " A tih chuan "Ka hre lo. Sawi tur ber pawh ka hre lo, mahse ka thei tawh lo. Hetianga awm reng hi ka thei lo. "

"Min en rawh. " Ka hmaah tak rawn dingin min ti a.

"Min hmangaih em? " A tih chuan chhan ngaihna ka hre lo. Ka kun tlat a, ka en duh lo.

"Mawh? Min hmangaih em? " A tih nawn leh chuan ka lu ka thing a. A thaw hak ri ka hre chhunzawm nghal. Hmangaihna hi eng chiah nge tih ka hrethiam lo a ni.

"Ka thlah thei lo che.... " Ti nghutin a inher a, classroom atang chuan chhuakin na zetin kawngkhar chu a rawn khar ri thuai a. Ka phut lutuk avangin ka awm chu ka dawm vang vang a.



Ka nitin hun hman dan chu a ngai reng. Ni thar ka hmang naa, ka hun hman dan erawh a danglam tehchiam lo. Ka tawng lo va, ka nui hek lo. Mampuia chuan kan inkar tawp chu pawm a tum lo hle a, min biak a la tum ngar ngar bawk. Keipaw'n ka la pehhel zel a, ka hmu duh lo va, ka be duh hek lo. Zingah hma takah school kal turin ka chhuak a, school-ah pawh dar rik hma chu keimaha ka awm theihna tur hmun ka zawng ngar ngar zel a. Dingi nen pawh tunhma angin kan inpawh thei lo, keimah hi ka inhawng thei lo. Ka awm tawp a, ei hunah tlem te ka ei lui ve hram a, ka in a, ka mu leh a. Zan mut hmunah keimah ka indem a, ka tap zantin a, ka khawvel chu a thim zawng hlirin a ni ringawt mai.




"Hello" Hmeichhe âw ka hriat rual chuan ka inhumruh vak a.

"Hello" A rawn tihnawn leh chuan "Kei hi tualthattu ka ni tak tak em? " ka ti sap. Vawt tih vang ni hauh lovin ka chhungril chu a khur ru der der a.

"Min lo hrethiam la, tunge aw? " A rawn tih leh chuan ka thin a rawn so bulh bulh a.

"Hmanni khan tualthattu min ti a, kei hi ka ni tak tak em? Ka ni lo tih min hrilh hram rawh. Ka naute kha ka thah a ni lo tih min hrilh rawh. " Tap tuau chung chuan ka vin deuh hrawk a. Ka naute ka that tih hi awih loh hram ka la duh fan a. Ka ngaihtuah chian poh leh ka ni lo tih min hriattirtu awm se tih ka beisei a. Kha hmeichhe number kha neih dan ka zawng a, a tawpah ka nei thei hram a, a ni ngei hian ka naute thattu ka ni lo tih min hrilh turin ka duh.

"Ka naute kha ka thah a ni lo tih min hrilh hram rawh... " Tiin ka tap khur zawih zawih a.

"Awle, thiannu, intipachang la, tap lovin thil awmzia min han hrilh teh le. I naute chunga thil thleng min hrilh thei ang em? Tichuan tanpui theih dan tur che ka hria ang a. " Tawngkam nem taka a rawn tih chuan inhnit hlap hlapin "Ka naute kha ka thah a ni lo tih min hrilh rawh. " Ka âw chu a chhuak thei chang chang chauh a ni. Ka mittui luang chuan ka khaw hmuh a tifiah lo ruai a.

"Le, ka thusawi tur hi uluk deuhin lo ngaithla rawh aw. " Ka chunga thil thleng zawng zawng chu harsa leh mahni inthiam lo tak chungin ka hrilh fai ta vek a. Ka sawi zawh hnuin a âw a thian karh a, a thusawi ngaithla tura min tih chuan ka mittui hru hulin ka beng chu ka phone atanga rawn chhuak tur âw ngaithla tur chuan ka chhi ran a.

"Tunah hian kum 17 a upa i ni a, adolescence period-ah i awm mek tih i hria ang a. Tunah khan i rilru leh i taksa a danglam nasa hle a, thil thar tihchakna nangmahah a rawn awm a, engkim mai chu tihchhin i chak a. Nangmaha tisa chakna pawh a san lai ber a ni. I tana awlsam lehzual turin ngaihzawng nghet ve deuh mai ilo nei kher bawk nen, tichuan pawisak em em nei lovin in rilrua in duhna te chu in tihlawhtling ta tawp a. I hrethiam tiraw..?" Tiin a chawl det a. Ka hmui hnuai lam seh ngar ngarin ka lu ka bu a.

A rawn sawi zawm leh nghal a "In rilruin a hruai ang ang che u khan do let pawh tum lovin in awm tawp. Ka sawi awmzia chu i thil tih avang khan in dik e tihna a ni lo. I taksa leh rilru danglamna kha I sex hman chhuanlamah I hmang thei chuang lo. A nihna dik takah chuan I dik lo a ni. Tichuan thil lian tham tak, lian tak ni pawha I hriat lem loh, sual ni pawha I ngaih lem loh thil chu I ti ta a. I tihsualin a hrin chu awlsam takin I dah bo leh zel a. Thil pawi tak I tih tawh chu a dangin I belhchhah leh a. I hre thiam tiraw? Kristianna kawngah chuan I dik lo nghal pang mai. " A tih chuan ngawi rengin ka thu a, ka khup tawmin ka mittui rawn luang ngiai ngiai chu ka kawr banin ka hru hul a.

"Mahse, engkimah 'mahse' a awm tih hria la aw.... I beidawng tur a ni lo. Tunah khan I inchhir tawh tiraw? I thil tihah khan I inchhirin pawi I ti takzet tiraw? " A tih chuan khur beuh beuhin "Um.. " ka tichhuak hram a.

"Kha tak kha thil tha a ni. Mihring kan ni a, kan tisual a nih chuan kan tihsual rah chu kan seng ngei tur a ni. Tunah khan I tuar mek a, tun hun hi I tuar chhuak ngei ngei tur a ni a, chutianga I tih hunah chuan I chak zual sawt ang. Nang chauh nilo, sex hmang sual hi an tam a, mahse mi tam zawk chuan an thil tih chu an hre reng lo va, sex hmang sual lo ang takin an awm zui reng thin. Chu chuan anmahniah vuak let a nei ngei ngei a nia. Le, a pawimawh ber sawi ang aw. I tisual tawh pawh a ni thei e, I naute kha I that pawh a ni thei e, mahse ngaihdamna phu lo I ni lo. I tihsual tawh chu siamthat theih a ni tawh lo va, mahse I hmalam hun lo kal lehzel tur erawh I kutah a awm tih hria la. Chak takin, huaisen takin I hmachhawn zawk tur a ni. Chuti chuan I tithei ang tiraw? "

Ka ngawih vang vang hnu pawh chuan ka chhanna nghak tih hriat takin phone chu a hmet tawp lo va. A tawpah ka kâ angin "Ka hre lo, mahse...... " ka ti sap a. Ka chawl phawt a, boruak hip lut leh vang vangin "tum chhin ka duh. "

"A tha lutuk e. Min mamawh hunah ka awm reng tih hria la aw... " Tiin kan inbiakna chu a titawp a.




Ka nu leh pate ka bia a, an fanu duat, beiseina sang tak neia hmun danga lehkha zira an dah hian thil pawi tak ka tih thu ka hrilh chuan sawi tur an hre lo. A reh ngawih ngawih a. Tawngkam na leh dengkhawng tak paw'n min hau mah se engkim tawrh ka huam a nia. Mahse ka nu tawngkam zawi leh fiah tak si chuan ka beisei loh ang takin min vel letling zawk a.

"Ka thiam loh vek a ni. Ka fanu, keima thiam loh a ni. I nu hian ka thu tha hrilh ve thin che kha I beng chauh a thleng phak a, I thinlung a thleng pha lo tih ka lo hre lo a ni. Bawihte, min ngaidam rawh aw.. I nu hi ngaidam rawh aw. " tia tap zawih zawih ka nu chu ka zah ngawih ngawih a. Kei ang fanu an nei hi a vawikhat nan pawi ka ti hial.



"Rintluang, lo dam tha zel rawh aw. " Tia Miss Puii'n min thlah chuan ka nuih sen sen a. Ka bag akin school gate chu ka chhuahsan a.

"Lalrintluang, ka thu hriat hi a dik lo tiraw? School chawlh I tum tih hi eng nge a awmzia? " Mampuia mangang hmel taka min rawn pan mek ka hmuh chuan kawngsira Forget-me-not kung buk laih bulah chuan ka ding a. Kan school hi khawpui lun lai atang hla deuha awm a nih vangin a reh ruih a.

"Sawi rawh. I chawl dawn lo tiraw? " Ka bula a rawn din rual chuan a vin deuh hrawk a. Miss Puii hi a cousin a ni a, a hnen atangin a hria a nih ka ring. Tunah hian school hour a la ni a, engtin tak rawn chhuak ang maw.

"A dik alawm. Ka chawl dawn. " Ka tih rual chuan vanvadakin a hmai a hup a, a thaw vang vang a.

"Mampui, kan tawp tawh. Chu chu pawm rawh. " A mita melh kar chung chuan ka ti a. A nui hak duh chauh.

"I tan kei hi engmah ka ni ve miah lo em ni? Ka tana i hlut ang hian ka hlu ve lo a mi? Mawh.. Lalrintluang? " A mita hrehawm tihna leh natna ka hmuh chuan keipaw'n ka tuar ve tho. En rei ngam lovin thil dang ka melh a.

"Hunin thil thleng kha chu a liam pui ve mai dawn alawm. Kan upa ang a, chhungkua kan din ang a, fa kan nei leh dawn alawm. Kan pahnihin fa duhawm tak tak kan nei dawn alawm. " A mitmeng buai deuh nuai chuan beisei lutukin min melh a. A beidawng leh na hmel avang chuan tihngaihna hre lovin ka melh ngawt ngawt thung.

Kan ngawih vang vang hnu chuan ka tawng chhuak a. "Mam, engtia rei nge kan inzui tawh? Kum 1 aia rei a ni tawh tiraw? " Tawngkam dam thlupa ka tih chuan eng nge sawi i tum tih melhin min melh reng a.

"Kan hlim a, naupang te ni mah ila kan serious ve viau thin a nih kha. " Tiin kan hun hman dun tawh te kha ka ngaihtuah let a, ka nui suk.

"Eng nge sawi i tum? " A tih chuan a mitah tak en turin ka dak chho vah a.

"Inlaichinna zawng zawng hian tawp dan hlimawm an nei vek thei lo. Keini pawh kan hlim a, kan nui a, thil tam tak kan ti a, kan damchhunga kan hriat reng tawh tur thil kan ti bawk a. Khawi hmunah pawh awm mah ila, khawvel hranah pawh cheng mah ila keimahniah chu ser chu a awm reng dawn. " Tiin ka chawl dat a.

"Chhungkaw din maw? Keini hian chhungkua kan din theiin i ring em ni? Kan fa kan tihlum a, chuti chung chuan chhungkaw hlim leh fa duhawm tak kan nei leh theiin i ring em ni? Keichuan ka ring lo. Beisei pawh ka beisei ngam lo asin. Ka puma naute ka tihlum tih ka ngaihtuah nawn apiang hian ka inten hluah hluah asin. Ka inhaw lutuk ringawt. Vawiin thlenga ka la dam ve chhan pawh thil sual dang ka tihngam tawh loh vang chauh asin. " Ka sawi zawh rual chuan ka thawl hawk a.

"I hrethiam tiraw? Beisei tur kan nei tawh lo. " Eng emaw sawi tumin a kâ a âng a, sawi tur ber hre si lovin a lu a thing leh a. "Nilo.. Nilo... " Tiin a lu a thing a. A lan dan chu amah Mampuia kha a ang lo.

"Mam..... " Tiin a lu thing buai nuai tawp tir tumin a kutah ka va vuan a, a tawp nghal chat. Mittui tling pama min melh chuan keipaw'n mittui vanga khaw hmuh fiah lo ruaiin ka en let ve a. "Ka kal dawn aw.... Mangtha le. " Tiin ka nuih suk a, a kut ka vawn chu thlah riai riaiin ka kal pel a.

Ka thinlungin ti tura min hrilh ka tih meuh chuan ka na te kha a zia deuh huaiin ka hria a. Vana ka naute pawh khian engtik niah emaw chuan min la ngaihdam theih ngei ka beisei tlat a ni.

Zanah chuan ka thawmhnaw ka rem fel a. Kan hostel a awm ve hote chuan min rawn rem fel pui ve bawk a, anni pawh chu hun rei tak hnua ka nui hmel ka hmuh leh a. Min ngaih tur thu an sawi reng a, a tak a ni em tih hre lo mah ila ka awm erawh a tinuam viau thung si.

"Ka lawm e aw... " U Joicy chu engkim avangin lawmthu ka hrilh a.

"Lawmthu inhrilh angai lo. Mihring chu inmamawh tawn vek kan ni alawm.. " Tiin a nui ver ver a. Tun ang em em hian U Joicy ka la hmu tha ngai lo. Ka tan chuan Vantirhkoh a ni ringawt.

Midang mut reh vek hnu chuan ka inpeih fel ve chauh a. Ka mutna puan thuah vel erawh chu naktuka zinga khung turin ka dah a. Mut tuma ka inbuatsaih lai chuan ka phone ka khum bul dawhkana ka dah chu a rawn ri ral ral a. Caller ID ka hmuh chuan lak loh ka tum zet a, mahse a tawp nan tiin ka pick up a.


"Hello.... "

"Rintluang, engkim hi ka thiam loh vek a ni. Keimah vanga hetiang thil hi thleng a ni. Pawi ka ti lutuk, ka ti takzet. " Mampuia âw ka hriat chuan awmhmunah ka lu thingin "Mam.. Chutiang sawi suh. " ka ti sap a.

"Aih, keimah ka ni. I rai tih kan hriat khan lo huaisen tawk ila, nilo, mawhphurhna lo la ngam ni ta ila chuan tunah hian hetiang hian kan awm lo ang. Na i tuar lo ang a, I damchhunga i inthiam lohna tur thil i ti hek lo ang. Mahni i indem lo ang a, I tap hek lo ang. Engkim, engkim hi ka thiam loh vek a ni. " Tiin a insut ri raih a. Ka kâ ka hup chawt a, ka mittuiin ka biang chu a rawn tilum pap a. Ka beng bula ka phone dah reng chung chuan ka maimitchhing a.

"Chuvang chuan, mahni inthiam loh kha bansan tum hram la. Nangmah indem lovin keimah min dem la. Nangmah inhaw lovin keimah min hua la. Nangmah inten loin kei, mipa nih tling lo tak hi min ten rawh. I hrethiam tiraw? Ka sawi ang chuan ti rawh. " A thusawi chu thinlung rum vawng vawngin ka ngaithla a.

"Mahse.. Mahse.... Hei erawh hre rawh. Ka theihnghilh thei lo che a, ka thlah thei hek lo che. Engtik hunah pawh, eng hmunah pawh i tan ka awm zel dawn a. Tun hun hi kan paltlang hunah ka hnena i rawn let leh ka la beisei fan a nia. Mangtha le... " Tiin phone chu a hmet tawp a.


Engtikah emaw, keimah hi ka inngaidam thei te a nih ngai chuan ka rawn let mahna.





A Tawp Ta.

*** KAN WEBSITE A FAKNA LAM THIL MILEM LANG THIN I LO HMEH ZEUH HIAN KAN WRITER TE HLAWH KAN TUMSAK ZEL TIH KAN HRE THEUH DAWN NIA, KAN LAWM E***

Website story link ho awlsam zawka in zawn hmuh zung zung theih nan STORY FB group siam a ni a. Whatsapp group pawh siam a ni e. Complete tawh ho zawng zawng leh story kallai kan dah vek avangin avangin in lo join theuh dawn nia..
Group link : https://www.facebook.com/groups/991354610918230/

Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)