FIRST LOVE AFTER 30 YEARS BY Sandy Sweet (Completed)

Episode nei ho a hlawm a dahkhawmna
Ngaia
Site Admin
Posts: 25813
Joined: April 30th, 2016, 4:07 pm

Re: FIRST LOVE AFTER 30 YEARS BY Sandy Sweet (Completed)

Unread post by Ngaia » July 4th, 2021, 2:55 pm

_________________________________Chapter 14:



Ka pasal chu a zan zan in a lo haw hi alo nia , mahse kal kawngah leimin a awma , ka pasal pawh chun leimin chuan a dang a .....kir leh mai a tum laiin , a inturn tur chu lei a lo nal tawh bawk si nen kawng thlang lamah a tlanliam ta zawk a......

Tanpuitu koh ai chuan kei min lo be zawk a ,mahse kei lah chuan ka la tihtauh khum zui a , eng ang nupui nge maw ka nih le; mahni pasal te pawh zahthiam lo leh mimawl tak ka ni.....


Min lo biak pawh khan a thawk kha a sak deuh in ka hria a , lo chik deuh ila chu tun dinhmun hi kan thleng kher angem??....


°Ka phili buai lutuk a engtin nge damdawi in ka thlen pawh ka hre lo , ka va thlen chuan an lo nawrchhuak tawh a.....



Ka pasal nunna nei tawh lo tih hriat tak chu ,ka en vawng vawng a , a biang vawt thler ah chuan ka khawih a mahse, ache eih lo .....ka pasal ngei kha a ni si ...

Ka la ring phal chuang lo a, a biang ah chuan dawmin ka beng thek thek a , a hming chuan ko in ,"lo tho tawh la ," ka ti a mahse, thawh chu sawi loh a mit takngial pawh a meng lo ....

A ai nasa in ka ko leh a , min chhang chuang lo , he khawvela mihring awm zawng zawng te leh tawng awm zawng zawng te pawh in ko ko mah ila min chhang ngai tawh dawn si lo......

Ka thin chu a tawt up up a , nikhaw hre lo in ka awm ta hial a , ka harh leh chuan kan upa ber chuan ka kut chu a lo vuan a , thawh thut ka tum chuan ka lu a la hai muai muai .......

Chutiang mai mai a mu hman ka ni lo ,ka kal a ngai ,Ka bana drip an khai chu ka phawi sawk sawk a , khum a tang chuan chhuk in tlanchhuah ka tum a mahse , ka u chuan min lo dang a , ''pan lam tur i hria a mi?'' a ti a ....vin thrawt in , "khawiah nge a awm?'' ka ti a .....min hruai tur thu chu sawi mahse ,ka nghak hman tawh lo ....

Damdawiin a tang chuan ka tlan chhuak a, ka car pawh ka la chhuak hman tawh lo , taxi min hnaih ber tu chu ka be nghal a ......

Kal kawngah pawh chuan eng dang ka ngaihtuah thei tawh lo , driver pawh chu hman hmawh turin ka nawr sek a .....

ka pasalte in kan thlen chuan .... Hmanhmawh tak in ka chhuk a ,pawisa kir pawh ka nghak hman tawh lo eng zat chiah nge ka pek pawh ka hre bawk hek lo....

An inah chuan mipui an lo tam hle a , ka lut zel a , mite chu ka su phei buan buan ,ka hmanhmawh lutuk a .......

Ka pasal chu khum ah an lo muttir a , a bulah chuan kal phei mai ka tum a mahse , anu(ka pasal nu) chuan min lo dang a , min kawk sawk sawk a , ''engtin nge i la rawn kal ngam zawk a , nangmah vang a nih hi , i hre lo em ni ?nanghi awm lo la ka fapa hi a la awm ve tur , nang hian min laksak a ni ,min pe kir leh rawh ,'' a ti a .....

A pa chuan lo kuah sawnin , '' va kal hnai rawh," min ti a.....

Ka pan phei mai dawn a mahse ka tim leh deuh ,... Keimah chu ka indem a , ka inthiam thei lo a mahse , ka hmangaih chu ka thlahliam ngei a ngai si.... Intipachang luiin a bulah chuan ka kal hnai a.....

A biangah chuan ka dawm a ,ka thlir vawng vawng a ,ka hmuh hnuhnun ber na ni tur chuan ka la phal thei lo ......min kalsan tur pawhin ka la phal hek lo ....ka mittui chu a luang ngiai ngiai a.....

A hmui ah chuan ka zuk fawp vawng vawng a, zawite in ka phun a ,ka aw te hi a chau zo a tha pawh ka nei lo, tawng ring tur pawh in ....,"ka duatte ka lo thleng a nia," (ka thusawi duh chu ka sawi mai thei lo mahse ka sawi a ngai ) ka nuna a vawikhatna atan ka hmangaih chu Ka hmangaih ani tih ka hrilh a mahse, chu ni vek chuan kumkhua atan ka mangtha a ngai leh ta si......

A bulah chuan ka mu ve a, a biang a dawm reng chung chuan a beng bulah, ''KA HMANGAIH CHE, KA HMANGAIH LUTUK CHE, "tiin ka phun sep sep a , mahse min chhang thei lo ..... Vawitam sawi mah ila min chhang tawh dawn lo ....

Ngatinge hun tha ka neih lai khan ka lo hrilh loh a , engtin nge ka hmangaih chu ka hmangaih a ni tih tak ngial pawh hrilh hman lova ka kaltir theih zawk ....ka inchhirna chuan van a tawng hial ta ve ang teh thei ngat ila chu......

Ni e , "LALTLAWMLOVA" Kan nu leh pate dodalna karah leh, mitam tak sawichhiatna karah pawh ,a hmangaih venhim nan a tlawm ngai lo leh ,beidawnna leh lungngaihna lo thlen chang pawh a ,ka hmaa ding tlat thin , tlawm ve ngai lo kha ani ngei kha "A TLAWM TA" Ni e , a hringnunah a tlawm ta .... Na ka va ti tak em .....

Mangtha tih takngial pawh ka sawi ve hman hma a min kalsan mai chu na ka ti hle a , ka inngaidam thei lo a, ka inhaw ngawih ngawih ....

Thlan an panpui dawn chuan ka tap nasa lutuk a , kal ve an phal lo mahse, ka kal lui ta tho a .....

An phum dawn chuan ka la phal mai lo a, a kuang chu ka kuah a, "Min kalsan hi i hmanhmawh hle mai, 'Ka hmangaih che' tih ka sawi chhuah hun tal i nghak hman lo amaw? Hmanah khan 'hmangaihna hi a awm ngei a ni tih ka fin fiah ang' i tih kha, tunah chuan ka ring tawh a sin, ka ring mai ni lo in , ka hria a chuan 'KA HMANGAIH LUTUK LUTUK BAWK CHE' Duatte , ka duatte , vawikhat , aih ni lo damchhung atan i mit kha lo meng leh rawh aw! " tiin ka awrawl tawp in ka te teng tung a......

Mahse min chhang lo a, a hmel pawh chu ka hmu thei tawh bawk hek lo, an phum dawn chuan zuan thlak ve mai ka tum a , mahse min chelhbet hlawm a, ka ruak vek a ,"enge i ngaihtuah? " tiin min zawt ta se, ka chhanna tur chu "engmah" a ni .....

Ka rilru ah hian engmah ka ngaihtuah lo a, ka ngaihtuahna chu a ruak vek , hmalam hun ka ngaihtuah lo a, hun kal tawh ka ngaihtuah hek lo , ka ngaihtuahna chu a ruak vek a ni mai.....

An chhilh hnu pawh chuan ka la ding renga, ka che sawn mai thei lo .....

Mitam tak chuan khawngaih hmel deuhin min en a, chung tak ngial pawh chu ka hua , ka thin a rim em em tawh zawk , an mi khawngaihna chu ka mamawh lo, a hrim hrim in an mi khawngaihna chuan ka pasal kha a ko kir dawn hek lo.....


Kan inneih zungbun chu ka tuai ka tuai a .... Ka mittui chu a lo luang leh ngia ngia a.....

Entin nge in ka thlen pawh ka hre chiang tawh lo...
.
.

He khawvel ah hian hmun tin kil tin pawh fang chhuak vek in , a kil khawr lai ber ah pawh zawng zawng mah ila ,ka hmu leh ngai dawn tawh si lo....chu thil ka ngaihtuah chuan ava na em.....ana lutuk hi keimah ah hian thil puak keh tur hi a awm a ,chuthil chu a puakkeh dawn tlatin ka hria.....

Kan in tawn ni te chu ka la hre chiang hle a , engtikah mah ka theihnghilh leh tawh ngai lo vang ... Ka tawngtai thei lo a, midang ten min hnemna pawh chu ka tan chuan bengchheng mai a ni...midang biak ka peih lo a .. Mahnia awm chawt chawt chu ka duh ber ....

A hla duh ber 'If tomorrow never come' tih hla chu ka ngaithla tluk tluk a ...

Ka pasal khan hla a ngaihthlak reng reng hian a sakpui ngai lo a , keiin ka lo sakpui thung thin.


A ni chuan , " ngaihthlak atan kan play a lo sakpui te chu, play lo law law in zai zawk ila a tha daih zawk ang ," a ti mai thin....

Ani nena kan hun hman zawng zawng kha ka theihnghilh ngai lo a, kan hlim laini te , kan lungngaih lai ni te leh beidawng tak a kan awmlai te thleng khan.....

A hla duhber kan ngaihthlak a piang hian, " ka hmangaih zia che hi hrilh hman lo che in ka awm ang tih ka hlau ber,"tiin min hmangaih thu min hrilh nawn fo thin .......

Ho ka ti thin a mahse ,a dik zawk ani ,englai pawh in ani kha a dik zawk ,kei hi ka dik lo zawk ani ...... Ka hmangaih khan 'KA HMANGAIH ' ve a ni tih hi hriatve a phu a sin....

__________+________

Engvangin nge engkim ah hian ka tlai bik ziah , kan unau zing ah a piang tlai ber ka ni a , miten pasal hmuzo lo mintih laiin kum sawmthum hnuah pasal ka nei ve chauh a ,ka hmangaih chu ka hmangaih thu hrilh turin ka tlai leh a.... Engkimah hian ka tlai bik ziah....

Ka pasal chuan min kalsan ta , keimah chauh a awm turin ,keimah a hringnun zawh chhunzawm zel chu ka zuam lo a , amah ah khan ka innghat thuk lutuk ani......


Chutia hreawm tak a awm reng ai chuan ,"fa pawh kan nei chuang lo a , ka tan nun ve reng hi a tulna a awm lo, thi ve daih ila "tiin ka inngaihtuah a....

Blade hriam tak ka la a ,ka banrek ah chuan ka zai a.....
°
°
°
Ka harh chhuah leh chuan damdawiin ah ka lo awm tawh a , min chhanchhuaktu chungah pawh ka lawm lo hle zawk , thihkha khatih lai hunah kha chuan ka duh ber a ni.......

Doctor lokal hnu chuan , thil hrang hrang a sawi a .....a thusawi tawp lamah chuan "Naute vang tal pawh in tiang thil hi chu ti tawh suh ang che "ati a .... Ka hresual emaw ka ti a, ka zawt tha leh ngat a , nau thla thum mi ka lo pai reng chu niin ....




____________________________






Nau ka pai tih ka inhriat chuan ka lawm em em a , mahse ka rilru natna te chu a lo thar leh a , ka pasal khan fa a awt hle thin a nih kha hre ve ta se engtin nge a awm ang ...

A phur dawn sia , hmangaih takin min enkawl ang a ,naute hmeltha tak kan nei bawk ang a......

Ka pasal chhung te lam pawh chu ka hrilh hriat thuai a , ka pasal nu chu a tap nasa hle a , afarnu pawh chu a bang bik lo......an mahni chu fin ve mai turin min tia mahse ka duh lo ....

Ka pasal boralna chuan rah tha a chhuah a , anu leh paten min pawm tawh a ,a tlawh pawh min lo tlawh ziah ....

ka nu leh pate pawn min rawn awmpui nghe nghe a... Ka naupai chu a chak lo a , ka tan a hlauhawm theih mai bak ah naute pawh chu lo piang tase natna neisa in emaw ,thisa pawhin a lo piang thei bawk .... Kan nun chu a derthawng dun hle a......

Mahse ka pasal nena kan inzawmna awmchhun tur a nih avangin paitlang chu ka thlang ta zawk a , ka naupai chhung zawng hian vawi riat lai damdawiin ah ka lut hman .... Min bedrest a ka mu deuh chawt bawk a ....

Damdawiin pan a awlsam zawk nan tiin damdawiin bul hnai ah chuan in kan luah a , ka nu leh pate chuan min awmpui zel a ,ka pasal chhungte pawh an lo kal fova ...


Engkim chu kan duhthusam ang in a awm vek mahse ,chu duhthusam neitu pakhat zawk chu a awm ve ta si lo ...

Ka intih chak hram hram a ngai a, ka ei theih loh te pawh ei ka zir a , theihtawp tak meuh ka chhuah , a hma zawng a mi khirh lutuk ka nih thinna te chu dahtha in, tunah chuan awmpui pawh pahnih lai kan la a, engpawh siam se , engpawh ti se ka sawisel lo a, ka inrawlh ngai bawk hek lo......


Ka naupai chu hrin hlan ka nghakhlel a, tu zawk nge a chhun ang a , apa a chhun chuan a hmeltha dawn si a, hmangaihna zawng zawng in ka hmangaih anga , tumah in an tihnat ka phal ngai lo ang....


A ruk in ka la tap fova mahse, chhel taka awmdan chu ka zir zawk a , midang mithmuhah chuan ka nui lui hram hram thin.....

Nau ka neih dawn hnaih chuan Doctor-in ka nau neih ni tur chu thlang turin min ti a , kan inneih champha November ni 29 chu ka thlang a ... Mahse ka neih dawn thla alo thlen meuh chuan, chuni chu kan nghah hman a rin loh thu doctor -in a sawi a , chumi ni ngei a neih chu ka duh tlat bawk sia ...

Kan han nghak leh rih deuh a , November ni 29 zing dar sawmpahnih leh minute sawmah chiah ka fapa chu a piang a.... Kan inneih kum lina chiah chiah a ni nghe nghe bawk......


Min zai zawh chuan room ah min nawr lut a, ka fapa tap ri chu ka hria a , mumal lo zet hian .....

A tuka ka harh chuan ka fapa chu an lo pawm phei a hnute ka pe a , a kut te takte leh a ke te takte te chu ka en ning thei lo , a kim ve biai reuh sia...ka hmangaih ngawih ngawih nghal...ka mittui chu a luang zawih zawih a, insum ka tum poh leh ka tap nasa zual ting a ni mai .... Ka nute pahnih pawh chu an tap ve hlap hlap a ,in hnem tur chuang bik pawh kan awm lo.......

Dictor chuan mak a ti a, "Risk kan lak tawh ah chuan ala sang ber ang , chuan kan hlawhtling thei hi a lawmawm lutuk , i tawrhchhelna vang leh Pathian kaihhruaina vang liau liau a ni e, nanpawn lawmthu sawi mawlh mawlh rawh ," min ti nghe nghe.....

2 YEARS LATER

Kan fapa chu a fel a, a tlei bawk a ka tan pawh harsatna a siam ngai lo ... Tawng a thiam har a , a kal hma thung ....

Kan fapa in tawng a thiam hmasak ber a athu chhakchhuah chuan min va tina tehlul em ... ...

"PA" fiah lo deuha a tih chuan ,min va vel chiang em , ka tap leh vak a ... Hmalam pan chu ka tan chuan a la har talh , amah ngaiin ka la tap fova .... Khuarei hian min hnem ve lo .....

Vawikhat chu ka pasal thil ka haina lamah ka pasal dairy ka hmu hlauh a , ka pasal dairy mah nise chhiar chu ka tim ru a ,mahse inthiam lo tak chung chuan ka keu a , thlalak pakhat hi a lo tlathla a ka han en nak chuan ka thlalak hi a lo nia nurse form ka ha lai , a hnunglam ah chuan 'KA FIRST LOVE ' tih hi a lo inziak a...

A dairy chu keu in ka chhiar a ,chutah chuan ka pasal chuan ka hriat ve hma daihin min lo hre tawh a , min lo ngaizawng daih tawh a ni tih ka hrechhuak a , a thil ziah ka chhiar atang chuan....

A dairy ah chuan kan hlim lai ni te leh min hmangaihzia chungchang hlir hi a lo inziak a .... Hmangaihna awmzia min hriattirtu leh hmangaih ka nei ve thei a , hmangaih ka ni ve thei a ni tih min pawm tir thei hi thil mak ani ta hauh lo ......

Ka tan ka hmangaih hmasak ber kum sawmthum hnu a ka tawn ngei mai kha, a tan pawh a hmangaih hmasa ber ka lo ni ve reng a . ..
°
°
°
Tunah chuan ka hlim tawh a ,ka thil tawn engkim ah chuan lungawi ka zir a, kan fapa avang chuan nunthar ka nei a , ka pasalin ka tana thil pek a zawnga thil pek hluber min hnuchhiah ngei mai chu ...

Rinna chhete ka neih ve chhun chuan engtikni ah emaw kan la intawn leh ngei ka ring tlat a , kan intawn leh hun chuan ka hmangaih zia ka hrilh anga engtikah mah min kalsan leh hi ka remti tawh ngai lo ang. Ani chuan min lo pawmin ''engtikah mah ka kalsan tawh ngai lo ang che'' a ti ve bawk anga.....

Chuni lo thlen hun tur chu nitinin ka thlir thin a ....... Hun leh nite chu ral zung zung mahse ,ka pawisa lo ka tan chuan hun hian awmzia a nei lo.......

In tawng leh tak ang maw??




A TAWP TA




Note::::: He thawnthu a ziah lan ka tum ber chu hmangaihna hi a awm tak tak a, eng hnam pawh eng sakhua pawh , kan rethei emaw kan hausa emaw kan hmelchhia emaw kan hmeltha emaw pawh nise tu te pawh hian hmangaih na chu kan phu vek a, hmangaih tlak loh nia inhria te pawh hi hmangaih an ni thei a, hmngaihna nei ve lo nia inhria te pawh in hmangaihna an nei ve thova..... Mahse kan hmangaihna kan tih lan dan erawh a dang theuh thung..... Mi tupawh i hmangaih a nih chuan nakin nghak suh i hmangaih tih hrilh ngei ngei ang che , naktuk ah enge thleng dawn kan hre silo a.....

Ka tum ang takin ka ziak chhuak thiam lo a ... Mi dangin he thupui hmang tho hian( tum inang rengin) ziak ta se an thiam zawk daih in ka ring bawk , ka tumah tak ka lut lo tih pawh ka hria a, ka inthlahrung hle ......


Mahse min lo chhiarsak ve hrim hrim avangin ka lawm ee.....
Hei hi ka story ziah vawikhatna a ni a, ahar hle in ka hria a , an tawngkam hman tur han ziah chhuah mai te hi.....
Writers dang te hi ka ngaisang zual sawt.....



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)