Mr. SPICY NOODLES BY Sandy Sweet (Completed)

Episode nei ho a hlawm a dahkhawmna
Ngaia
Site Admin
Posts: 25813
Joined: April 30th, 2016, 4:07 pm

Re: Mr. SPICY NOODLES BY Sandy Sweet (Completed)

Unread post by Ngaia » July 25th, 2021, 6:18 pm

Chapter-32( last chapter)






Zomuani leh ka pasal ka hmuh dun chuan ka na takzet a ni , ka bul an lo thlen chuan ka pasal chuan ten hmel deuh hian min en a , a ngaihna ka hre der lo mai lehnghal .



Inbe loin kan lut a , kan in lian leh ropuiah chuan tumah hmuh tur an awm leh tawh lo , chhungkaw hlim lo tak chu kan ni chiang e .



Zomuani chuan min be lo a , biak tinah ka tin bik hek lo , ka thiantha ber Zomuansangi kha a ni tawh lo , tun ami hi chu hmeichhe fingvervek 'Rul thlah' an tih thin dik tak kha a ni.



Kan room kan thlen chuan bathroom ah lutin tui ka herh haw a , a rukin ka tap faih faih . Inhnemna tur tumah ka nei lo ,ka nun hi tun thla rei lote chhung hian a va inthlak danglam nasa em ! Mipa vang hian ka la tap ang tih ka ring ngai lo bik hek lo , kei hian ka hmangaih theih loh tur ka hmangaih ta mai em ni?



•••••••••


Mut hmunah chuan ka inngaihtuah leh chut chut tawh a, ka muhil thei lo chu ka inlet sek bawk, ka bul a mu chu ngawi rengin a tho nulh a , thutthleng kan hunah chuan a mu hmak .



Titaka a danglam ta mai hi ka hrethiam tawh bik lo , a thiam lo zawk a ni a , min haw zawk daih bawk si , eng pawh nise ka pasal ka hmangaih kha a la ni reng a , ka tuar hram hram a ngai , engtik niah emaw chuan a hmangaihna ka la hlawh chhuak ve mahna.


••••••••••


Kartluan chuan kan nupa chuan kan inbe lo , biak ka tum pawh in min pehhel zel si a , nghah tawp mai chu tha ta berin ka hria .



Ka duty bang ka haw tur chu Jerome-an min biak a duh tlat avangin an in ah chuan ka kal ta nge nge a , in chhung ka luh chuan an lo cheimawi khawp mai , eng thil nge tih a tum ka hriat miau loh avangin in ring ran in ka lut a .




Thawk lehkhatah lo lang thutin , "Surprise , " A tih chuan ka awm dawm vawng vawngin ,
" Awi ! Setana s*wn , " Ka tichhuak thawt a .




Lungawi loh hmel tak hian , " I sual hle mai ! kei hi a s*wn ka nih chuan Israel tih awmzia pawh hre lo inla 'Israel ' ve em em pa saw chu 'Setana fapa' tihna, " Tiin a nui vak vak a , hepa han mawl dan em em hi chu, a ngaihna a awm thai lo.




"Enge min hrilh duh chu ? sawi vat mai teh ! Haw vat ka ngai , " Ka tih chuan , "Lo thu phawt la , " A la ti ta deuh deuh a , Ka ding talh tho , hepa bulah hi chuan ngaih ngam taka awm thiam a har , ka ke chu kham viau mahse thut ka tum lo bur .




"Engtinmah ka ti lo ang che , promise
ngaihngam deuh khan awm rawh , " Ka dar tawn tawnah chelhin choka lamah min nawr luta cake lianpui mai 'I ❤ U ' tih inziak hi a lo awm a , ka hlauthawng nghal , engthil chiah nge tih a tum leh tak hi.




Thutthlengah chuan min thut tirin , "hlauthawng suh ! Inthlahna party a nih hi , " A tih chuan a hmel chu ka en vat a , min nuihsang , " Tunah chuan Rachel i zalen tawh , "tiin ka kutah chuan a vuan a , " In mangthana cake a nih hi ,keima siam liau liau , " A ti zui bawk a .




"Enge i tih dawn ? I awmdan hian ka ngaih a ti tha lo . "


"Lungngai suh ! Hlim takin lo awm la ,..min hmangaih let thei lo mahla ,...kei chuan ka hmangaih reng ang che , " A ti nghet churh a , a thusawi tawp lamah chuan a inrin tawk zia ka hrethei.


"Kalbo i tum em ni? "

"Umm , tun bak hi chu kan inhmuh leh hmel tawh lo , a tawp nan han nuisang teh , " A tih chuan , ka thinlungah amah lainatna nasa tak ka nei a ka nui hleithei lo , thian kan lo ni tawh thin a , ka tan a inpe zo em em thin bawk , a kalbo tur chu ka ngai dawn hle ni.




" Ka hmuh hmasakber che atang khan ka thinlung hi i luah tawh a sin ,... mahse ka tlai hret a ni tiraw? (A nui suk a) ka unaupa nupui chu ni lo la , ka rubo daih tawh ang che ! " A nui leh hak hak a .




"Min haw viau mahla i fate bulah tal chuan an pate Jerome-a chanchin hi a tha lam zawnga i sawi ka beisei, " Amah zawk chu inthiam lo hmel a pu deuh .



"I rilru ka lo tihnat tawhna zawng zawng ah khan khawngaih takin min ngaidam hram rawh aw , hei tal hi chu ka beisei ngam ve dawn lawm ni? " Tiin beisei nei takin min melh reng a , ka mittui a hnam sawk mai , ka lu chu bu zeuhin , " Tehreng mai , " Tiin ka chhang a .


••••••••


Min thlah a tum tlat avang chuan ka hnial duh bik lo , tun bak hi chu kan inhmu leh tawh kher lo maithei a .




Kan tlan laklawh lai chuan ka pum chu ana riai riai a , " Ka sawi hmaih palh chu Israel-a an khinna kha an sut tawh aw , i lawm em ? " A tih mawlh mawlh lai pawh chuan lawm lam a lang thei tawh lo , ana hle a ni , ka thlan fim chu a bawl tiam tiam a , min bual huh vekin ka hria , "damdawi in , " Ka ti thei tawk.




Chetsawn ka tum hlekin a na si , tawngchhuah ka tum lahin san ka pe mai dawnin ka inhre bawk si , ka tang ngam tawh lo hrim hrim , a la hma mah mah ka hrin ala hun lo nasa .




"Ehe! Rachel ti nge ? Kha i thlan hluam a lawm! Engtin nge niang ? " A chiai lutuk chu doctor a ni hi amak zawk.




"Damdawi in , " Zawite in ka ti a , a inher pawp ni berin ka hria hmalamah ka bu lawp mai lawm , kan tlanchak hle a ni ngei ang reilote ah kan thleng thuai a , kan thlen lai pawh chu ka hre vek , ka fate tan chuan ka rilruin ka tawngtai tawp tawh , a hnu deuh chuan na ka hre tawh lo a , ka ral riai riaiin ka hria , reilote
ah engmah ka hre chhunzawm tawh lo.


••••••••


Ka harh leh chuan ka tui a hal kher mai , ka harh chian deuh chuan ka pum chu ka khawih vata , ka fate chu an la dam e ! Ka lawm zia chu sawi mai tur pawh ka hre lo , ka mittui chu a far zung zung a , ka rilru chuan lawmthu ka sawi mawlh mawlh bawk.




Kawngkhar chu lo inhawng in ka pi a lo lut a , ka pi hmel ka hmuh chuan ka thlamuanpui hliah hliah , lo kal hnaiin min kuah chawt a , ka insum thei lo ka mittui chu a far zawih zawih , kha leh chen rilru hreawm reng reng a ka lo awm tawhna kha ka upbet thei tawh lo a ni.


••••••••••

Nithum lai ka awm hnu chuan kan chhuak thei chauh a , ka pi chuan nikhaw hrelo a ka awm lai paw 'n ka pasal leh a chhungte chu vawikhat mah an lo kal loh thu leh haw tawh lo a , an hnena kir leh zawk turin min tia , ka ngaihtuahna chu a kal thui hle , kan naute kan chan lek lek a mahse vawikhat pawh a lo kal lo amaw? Midang chu ka hrethiam mahse engtin nge hetiang hian ka chungah a tih theih zawk , atan engmah kan ni lo em ni?




Ka rilru ka siam fel hnu chuan ka pi pawh a lungni vak bik loin ka hria , " Pi , engtin paw'n awm se ka pasal a nihna a bo chuang hleinem , a hman lo pawh a ni thei a , tunlai phei chu a buai thei lutuk a lawm , engpawh nise ka haw leh phawt zawk a nge . "



" I at em em zia hi chu , buaipui tlak pawh i nih loh hi , i naupan lai atang rengin i luhlul a,.... i duhthlanna ang chuan awm mawlh rawh , i tana thu tha sawi hi chuan awmzia a nei lo , " Ka pi chuti taka a ang chu ka la hre ngai lo , ka inthiam lo takzet a ni.


"Pi , harsatna a awm phawt chuan ka lo hrilh zel ang che , tun tum chauh chu ka'n haw rih phawt ange , i lungawi lo tih ka hria mahse Pi min then hmasa a nih ngawt loh chuan then ka tum lo , " Min melh sakhi teh e , tunah tak chuan Misual boss a ni ringawt .




" Engtin nge kan lo enkawl che le ? Hui ha ... Hei bak bak a inthenna chiang hi a awm thei dawn em ni? Nge ni a amah ngei lo kalin 'ka ma che ' a tih hun i nghak zawk ? " Thaw chhuak hawkin , " Hmangaihna chhingmitdel an sawi thin chu a nih ngei dawn hi , heiha insiam rawh ka thlah ang che ,tun atang chuan i hming pawh hi 'Hmangaihna Chhingmitdeli' ti tawh ila a tha ang , " A tih chuan , " A del hleinem a kalh zawk a lawm , "ka lo ti leh hman tawh ka ka tak hi chu aw .




" Fiamthu ka thawh emaw i tia law ?" Tiin a nui ve tawp tawh , a beidawng tawh pawh a ni mahna , a rilru a thlak leh hmain hmanhmawh takin ka insiam nghal .Kalkawnga kan tlan lai te chuan ka pasal ngawt chuan ka rilru a luah a, ka ngai tawh takzet a ni , min hmu tura a lo kal loh chhan chu a buai deuh a ni ngei ang , a hmel te chu ka mitthla vel a , kuah vawng vawng baka chak ka nei lo tunah tak hi chuan.


••••••••


In kan thlen chuan ka nu a lo awm ve teh mial a , ka pi nen chuan an inbe thuak thuak a , " in room thleng ka lo thlah ang che u , " A tih avangin kan pathum chuan kan inzui chho a , an pahnih chuan ka tluk mai an hlau nge ni ka banah min chelh ve ve .




Kan room kan thlen chuan ka nem hawng a , ka thil hmuh avang chuan ka sa pup pup thei, ka tha a thum hial , chakna nei lo ang mai ka ni , ka ban leh lam leh lamah min kai lo phei se chuan ka tlu hial ang , tawngkam khat mah ka chhakchhuak lo , tun ai hian ka na leh thei pawh in ka ring lo.


Ka pi lam chu hawiin , " Haw ang , " Ka ti chuai ruih a , ka aw te chu a tial ruai .

Muangchangin kan chukthla a , ka nu chuan thutkhawmna pindanah chuan thu phawt turin min ti a , kal mai ka duh zawk nain ka pi'n thut lawk chu tha a tih avangin kan thu leh rih a .



Ka nu chuan min khawngaih hmel takin , " Rachel pawi ka ti khawp mai hetiang dinhmuna din hreawm zia hi ka hre tawh a ,a nat dan tur ka hriatthiampui che , ka fapa hi ngaidam turin ka ti lo ang che , i tuar hnem tawk tawh , he thu ka sawi avang hian min haw lo la , i tana tha tur vek a ni , mipa chuan vawikhat a tih sual tawh chuan a tisual nawn leh fo thin , chuvang chuan kalsan mai hi tha ka ti ber , ka awm ang hian awm ve turin ka duh lo che , " Tiin min thlah a .

•••••••••••


In kan thlen chuan ka room hluiah ka chho nghal , tumah ka be chak lo a , hmuh pawh ka chak hek lo , chhuatah thuin ka tap nghal zawih zawih a , ka tlawm ngawih ngawih a ni , ka zak hle bawk hetianga phatsan ni tur hian eng thil nge ka tihsual le ?





Ka tap muhil a ni ngei ang , ka phone ri ka hriat chuan peih lo deuhin ka en a , chu hming ka hmuh chuan vawm darh vek mai ka duh , ka off hmak nghal a , ka taksa a kham em avang chuan bathroom ah kalin ka inphihfai a , darthlalang a ka inen chuan ka hmel chu hmana keimah tho kha ni mahse ka ngei ngawih ngawih .


Ka hmel , ka pian leh ka vun rawng ah te hian ka insit ngai lo , midang ka awt ngai bawk hek lo mahse tuna thil thleng ah hi chuan ka induh khawp lo takzet a ni , ka hmangaih ber pawh in a hmangaih theih loh tur khawp a chhia mai ka lo ni .


•••••••••


Zanriah ei tur a chhuk takngial pawh chu ka hreh a ni , ka chhungte hmuh chu ka hreh takzet ,a kan inneih hma pawhin ka timualpho tawh a tunah hetiang hi kan ni leh a , an rilru ava na dawm em , an mualphona thlentu mai ka ni hi ka inthiamlo takzet.




Ka room kawngkhar kik kerh kerh thawm ka hriat chuan chhang lo inka ngawi reng a , "Bawihte lo chhuk la , zanriah ei tawh ang , kan nghak che , " Ka pi'n a tih chuan ka la ngawi reng tho , rei vak loah chuan pen thawnm ka hria a , "Bawihte , i piin artui i duh deuh dan ang khan a kan sak che a nia , " Ka pu'n a lo tih leh chuan ka insum thei tawh lo , ka tap chhuak hawk a , rei ngial ka tah hnu chuan tho chhuakin kawngkhar chu ka va hawng a , an lo la ding reng , an pahnih chuan min kuaha ka pu chuan ka mittui chu min hruk hul saak in , kan pathum chuan in hnuaiah kan chhukthla hlawm a .




Zanriah pawh chu ka ei hleithei lo , tam dalah ka bar ve mai mai a ni , ka pu chuan engmah a la sawi lo , eng eng emaw an pahnih chuan an sawi a , ka ngaithla ve kur takna in engmah ka hre mumal chuang hlei lo a .




Ka mut hnu chuan ka phone chu a ri leh tluk tluk a , ka en chuan lak ka tum lo zet a mahse a insawi fiahna tal chu ka ngaithla tur a ni dawn lawm ni .tiin ka chhang ve hram a , "Sawi zung zung rawh ! " Ka ti nghal vat.


" Min hua ang tih ka hria , lo biak che pawh hi ka inthlahrung lutuk mahse ka thusawi tur hi ngun takin lo ngaithla rawh , insawi fiah ka tumna a ni hauh lo a nia . "

" Pehhel kual vak suh ! Ka mu duh a nia . "

" Min ti lui a ni ! Ka hnar thei lo a lawm , " Tiin a insut hlap hlap a , ka nui chhuak hak nghal , eng tactic nge a rawn hman hi , 'hnar hnuiah phatna a bo lo ' an tih kha maw .


" Ok .... chuan enge thil dang sawi duh i la nei em ? " Ngeiawm taka nui chungin ka ti chhuak ve hmak , engthil pawh sawi se ka awih therte lo , ka pasal nen an awmdan hi ka hre lo emaw a ti a niange , bengngawg , tawngtheilo leh mitdel emaw ka ni bik lo .


" I lo va danglam sawt ta ve , hmana ka thiantha ber kha chu i ang tawh lo tawp mai . "


"Danglam i sawi dawn chuan nang bak bak a danglam , thiantha chuan an thiante pasal damdawi in a an awm hlanin an khum laizawl ah ngei an mutpui thin i tihna em ni ? " Ka vin tawh kher mai , ka insum reng chhan tur ka hre bik lo.



"Ka sawi tawh kha min tilui a lawm . "

"Wow!.. Wow!.... a ropui e ! Kut ka ben i beisei em lo ang chu ti raw? Nang anga nulian kha ka pasal khan a phuarbet che em ni? Eng ang a tilui nge i sawi ve chhen chu ni ang aw ? Ka nu leh Rini pawh in hnuaiah an awm reng duh lo tak tak chu ni la , nge ni a nang hian i lo thlem vel zawk . "


"Lalduhzual , " A rawn ti vin thawt nghal , za lo taka nui chungin , " Aw..... enge ni ? Sawi ta che , ka hmingpum hiala min koh tak vak ah chuan , lungphu tha lo ka nei hman tep a lawm. "


"Eng mah kan sawi fel thei dawn lo a nih hi . "

"Sawi rawh ka tih mawlh mawlh chu . "


Thaw chhuak hawkin , " Apa ten an hre tawh a , an lo haw nghal dawn , apa chu i hriatchian kha a tu ve ve pawhin kan tuar thei , chuvang chuan ka lam tang hram rawh aw , thian kan nih kha , " A thusawi tum chu ka man lo bakah engvangin nge a lam chu ka tan teh lul ang ?


" Ka lam i tang lo a nih chuan apa chuan ka chhuah leh hi a phal tawh ngai lo ang , min khungbet reng a ni mai . "


"I lam tang ta ila?"

"Israel-a hi jail ah atang ang , thu buai a siamsak hreh hauh lo ang . "


" In buaina chu nangmah nin ching fel ve tawh mai rawh u , min lo be tawh suh ang che , " Tiin ka phone chu ka off nghal hmak a ,duhthlanna ka lo siam ve tur ni pawhin ka hre lo, an awm awm chuan awm vel mai mai teh se.

Chutiang thil vel mai mai avanga min tibuai chu ka lawm hauh lo mai mahse ka ngaihtuah chian chuan PaZosanga mizia ka hria a buaina kan tawk vek ngei ang , duhthlanna chu ka siam fel ngei a ngai a ni .



Ka rilru ka siam fel hnu chuan ka chhungte chu ka hrilh nghal thuai a , ka pu pawhin a sawisel bik lo , inthen chu kan vai atan tha ber tur a ni.
•••••••••••


Kar khat hnu chuan ka bungrua chu kan la a , ka pasal chu hmuh tur pawh a awm lo , ka pa chuan , " In enkawl tha la , ka lo tlawh thin ang che , " Tiin min thlah a , Rini chu a tap faih faih a , min kuah thlawpin , " Naute te tan room ka tifai zo chiah a sin le , " Tiin a tap leh hliam hliam a , ka nui suk thei , a la ngai reng e , " Ka ngai ngawt ang che , ka lo kal ziah ang , in inah pawh ka lo la awm maithei a ni , " A ti chhunzawm leh mawlh mawlh tawh.


Kan chhuah dawn chuan ka hawi kir leh a , he in chhunga ka luh hmasak ber ni te kha ka hrechhuak uai uai a , heti mai hian kan inneihna hi kan titawp ang tih ka ring pha bik hauh lo nupa kan nih chhungin kan hlim reng lo pawh a ni thei e mahse kan hlim lai ni te kha ka hre reng tawh ang .





Kan chhuah dawn tak tak chuan ka pasal chu kawngkhar bulah a lo lang hlawl a ,ka mittui tih tlak loh tuma ka beihna zawng zawng chu a thlawn vek a ni , a hmel ka hmuh chiah chuan ka natna te kha a lo thar leh a , a kianga kal hnaiha kuah vawng vawng ka chak ber mahse chutiang tih theihna dan chu ka nei tawh si lo , a kut ka en chuan kan inneih zungbun kha a bun tawh hauh lo chuchuan kan inthenna chu a tichiang viau bawk.




Ka mittui chu hru zeuhin muangchangin ka pan hnai a , ka kut phar chhuakin , " I lo inenkawl tha dawn nia , " Ka ti a , min vawn mai loh avang chuan keimah zawk chuan a kut chu lain ka vuan a , " Mangtha , " Tiin ka kalsan a .


Ka kal hlat hma chuan ka ding leh nghal , ka hawilet chuan , " Min hmangaih tiin dawt min hrilh i la tum tho em ? " a thiam lo zawkin thiam loh min chantir zawk tlat chu le , ka hmangaihna hi a ringhlel bawk a , hawi sang vahin , " Nang hmangaih che hi ka inchhir ngai lo ang , " Ti let zawkin ka chhuahsan nghal.



Kan haw kawng tluan chuan ABBA ho hla 'The Winners Take it All' khan ka rilru a luah , kha hla kha ka lo ngaithla liam mai mai thin a , a taka han tawn ve takah chuan ava dik em ,inthenna hi chu thian leh thian inkarah emaw nupa inkarah emaw pawh nise , thilte tham emaw a lian tham avang pawh nise a lo na tho a nih hi, tun ai bak hian ka na leh thei angem le ?


Mihring ve tho ka ni a , ka pasal nen kan intawn hma pawh khan kha leh chen kha ka lo nung tawh alawm , Zomuani nen kan inhriat hma daih pawh khan ka nui thei tho a ni lawm ni ? , " Kei Rachel Lalduhzuali hi Lalrinmawii tunu tho kha ka la ni e, ka nung thei em em ang , midang ka mamawh lo e , thian emaw pasal pawh , " Tiin ka dul chu ka chul heuh heuh a , " Fate u ,tun atang chuan intan ka nung tawh ang , kan pathum hian kan hlim thei em em ang ,midang kan mamawh lo a ni lawm ni ? "
Tiin kan inneih zungbun chu ka phelh ve nghal a .......
:
:
:
:
:
:

Kum ruk hnu ah chuan.............





Ka fate nen New Saiha bazarah kan kal a , an hlei em avang chuan bazar pawh sawi loin kan in khak leh rih thin , ka nun hi chu an va tihlim tak em ! Harh viau mahse thu an awih a , ka tan buaina an siam ngai lo, ka fate mah nise ka mitah chuan an tha ber tlat miau a , ka fak ve mai loh nakah.



Zikhlum ka thlan mawlh mawlh lai chuan ka sirah dingin min lo nghak a , an unau chuan an nui hak hak a , eng chu an hria ni maw ? Mazualtei zawk chuan ka kawrah a pawt tlat a , ka thil thlan reng reng hi ka duh uluk bik thin avang hian ka en rei thin a , an ning aniang chu tiin ka ngaihsak lem lo a , Hluhlutei zawk chuan min pawt ve leh a , an lam chu hawiin , " Nu te thil tih laiin tihbuai loh tur......., " Ka sawi zo hman lo.


Hluhlutei zawk chuan zawite hian , " Anu apa kha a ang e , " A lo ti ve nghal a , hawilet nachang pawh ka hre tawh lo hial .


Kan zawn a lo thlen chuan chik takin min en a , ka hmuh hmasak ber a ka awm ang chiah khan ka awm , fanu pahnih lai nei ve tawh mah ila ka lai chhe hle a ni .



Ka fate chuan min pawt teng tung a , ka en chuan an zah hmel reuh lutuk , ka hnung ah an biru tlat a , Hluhlutei zawk chu dak dek dekin , a ka a ang deuh zuai a , a ngawi leh daih.


Ka fate chu melh zeuhin , "ka thlah ang che u , " Tiin a kal sawn daih a , zui mai ka tum lo , ka zikhlum thlan sa chu buk tirin , aman te kan inpek fel hnu chuan bawr takin kan inkhai phei a , ka fate ka hmaah an kal bawk a , taxi kan nghah lai chuan kan hmaah a lo ding a .


Ka fate hmuh a hnial vak ka duh loh avangin kan chuang ta nge nge a , nuam lo duh ve tak chu a ni.


Ka thawhna Nursing home atang a veng hnai berah kan awm a , reilo te ah kan thleng thuai , chhuk nghal vatin ka fate chu lut hmasa turin ka tia , ka bungrua ka lakthlak hnu chuan engmah sawi loin ka kalsan hmak.


In chhung ka luh chuan ka fate chuan beisei nei takin min en a , ngawi rengin choka lamah ka luhsan ta zawk a, Mazualtei zawk chu a piang hnuhnung zawk mah nise a fing reuh hle a , zawhna tam tak min zawt leh ngei ang le .


••••••••


Zanriah kan ei lai chuan rin ang ngei ngeiin zawhna min zawt leh ta , ka fate hian an pa an hriat loh hi ka duh dan a ni lo a , pa an neia , a la dam bawk a , hriat ve hi an phu a ni . Chuvang chuan kum khat an nih lai atang tawhin an pa thlalak ka entir thin a , tawng an thiam hmasak ber a an sawi pawh , "apa, " Tih a ni.



"Anu apa kha a takin kan hmu tawh sia , kan bulah a lo awm angem? " A ti leh ta , chhanna dik pek loh hi ka duh thin si loa , an zawhna hi pumpelh hram ka tum thin.


Ka chhan hma chuan ka phone a lo ri hlauh a , ka tho chhuak vat an zawhna chhan ka pumpelh hlau e , nui ver verin ka phone chu ka en a number hriat loh a ni . Ka chhan chuan leh lam ami chu a ngawi reng a , dah ka tum vel ah chuan , " Duhzual , pasal ka nei dawn ! "


Chu aw chu ka hrechiang hle , thil dang sawi hmasa lo a , chuti teh thlawra min han hrilh nghal mai chu , ka nuih te pawh aza mah zawk e a , hun reitak hnuah pawh a la ngai reng e .


" Tu nen maw? " Ka ti lui ve ngat a , " Doctor Abraham-a nen , " Zam map lo hian a ti a , ka nu kha a la ni ngei e , mahni inring tawk leh hmeichhe lu zo veh vawh tak kha , ka piin kar liam ta khan min hrilh daih tawh a , sawichhuak ve hrim hrim se ka tih vang zawk a zawt mai chauh ka ni.


Kawng leh lamah chuan ka lawmpui phian zawk ,a first love nen an innei tur chu , keipaw'n ka hriat tirh chuan mak ka ti ve lutuk mahse khuanu ruat dik tak an nia nge , hun reitak hnuah an awm dun ve dawn ta a lawm . Kum te mai mai hi chu engmah a lo ni lo tak tak a nih hi.



Kan kawngkhar chu a rik avangin Rini chuan ava hawna , a lo luh chuan ka fate chu an dawhkan atang tho in , an insil sawk sawk a , kawngkhar lam chu panin , "AuRin , apa a lo haw tawh em ni ? " Hluhlutei zawk chuan a ti a , Rini chu a bu zeuh a , a lo tap leh hman tawh em ni? A insut leh hlap hlap tawh.


Apa zawk chuan an pahnih chuan , " Apa ka lo haw tawh e , lo kal teh u , " Tiin a thu hniam a , an inbiakna ka ngaihthlak reng lai chuan ka phone chu a lo ri leh a , ka tih tawp lai reng ka lo hre lo .



Ka fate leh an pa hun rei tak hnua an inhmu chu ka lung te pawh a chhe deuh a lawm le , kei ngei pawh chu ka mittui a lo tla hman , sawi fel tur tam tak kan la nei a ni.


Ka phone a rik nawn leh takah chuan , ka mittui chu hru zeuhin ,ka chhang vat a .


"Hello . "


" Duhzual ,...... I pa kha , " Naupang ho khek thawmah ka hre tha thei lo , kalsawn deuhin , "ka pa chu eng tin maw? "


" I pa i hre duh ti ... " Ka la hre hleithei lo , "eng tin....? " Ka ti hman tawk , a thusawi avang chuan ka a lo chauh a ni , ka phone chu chhuatah ka thlauh nghal a .




Israel-a chu lo kal hnaiin , " Enge thleng ? Ti nge a ? " A tih pawh chuan ka mittui chu a luang zung zung a , hru pawk pawkin , "ka pa .... Ka pa chu .... "Ka tap chhuak hawk ,min kuahin ka hnungah chuan a chul heuh heuh a .


Dak chhuakin , " Tih sual ka nei em ni ? Zosangliana fanu ni tur hian , " Ka tichhuak thei hram ...........






A tawp ta ....



Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » July 25th, 2021, 6:19 pm

Real last.......


Mr. Spicy Noodles-a (p.o.v)


Ka nupuiin , " Tih sual ka nei em ni ? Zosangliana fanu ni tur hian , " A tih chuan inthiam lohna hlirin ka khat ,naupangin min en avang chuan , ka kaitho a , " Naupangin min en reng a nia , " Zawitein ka ti a .



Thinrim hmel taka min melh run runin , " Mipa hi in inang vek , hmeichhiate hi infiam nan bak inti lo , ka hmu duh lo che haw rawh ! " A ti vin hlar a , naupang chu ka en thuai , an pahnih chuan min enkar a , insum deuh tura ka tih chuan a thinrim zual sauhin ka hria , haw mai chu tha zawka ka hriat avangin kawngkhar lam chu ka pana , naupangin zawhna an zawh pawh chu ka hrephak reng mahse ka kalsan ta zawk a .



••••••••


Nithum lai a liam leh tawh , Ka kal reng reng hian naupang leh Rini bak an awm ngai lo . Rini han sawi takah chuan ka nupuiin min kalsan hnu lawk khan ban a duh thut a , ka nu phei chu a thin arim viau a nih nghe nghe kha , helai hmuna ka hmu chu a mak vak hran lo e .



Ka duty zawha in a ka haw chuan ka lung a leng riau mai a ,kim lo riauin ka inhria naupang ho chu ka hmu chak takzet a ni , ka mitthlaah an cham renga ka maimitchhin mai mai pawh hian ka hmu leh thin , an inan em avang chuan ka la hre hrang thei chiah lo deuh mai pawh a.



Zan hnih a zawnin ka tlaivar tawh a mahse ka hmuh chak em avang chuan hah pawh sawi thei loin hmanhmawh taka ka motor chu tinungin , an chenna lam ka pan ta nge nge a .


Damdawi in tlangah quarters ka luaha anni New Coloney ah an awm thung a, veng inhnaih tak kan nih avangin motor nen phei chuan reilo teah ka thleng thuai a.


Engmah ka ken sak loh avangin eng emaw tal leisak thain ka hria a , dawr lam pana ka kir leh tur chu ka nupui leh mipa pakhat bike-a an lo inphur ka hmu fuh a , an inkuah nghet khawp mai ,ka en renga ,ka nupui chu a danglam tawh takzet a ni.


Dawra kal ta lo chuan motor chu hung thain in chhungah chuan ka lut vata ka faten min lo hmuh chuan , " Apa , " tiin
min lo lawm nghal thuai a ,ngai viau mah ila an mahni ka hmuh hian ka zam chhe thei hle , min kuah chung chung phei chuan ka thaw tha ngam lo hialin ka inhria .


Naupang infiamna bulah chuan ka thu ran mai a , kawngkaa a lo luh rual chiah a , ka lo khen pawp dan tur chu ka ngaihtuah chet chet a , naupangin min biakna pawh chu ka hre mumal lo .


Naupangin min biak mawlh mawlh lai chuan kawngka a a lo lut mek ka hmuh chuan ring leng lawngin , " Hluhlute , ka hnenah lo awm tawh mai ta che u , inu hian pasal neihsan vat che u a tum hmel sia, " Tih pahin , kawrsen ha zawk lam chu ka hawi a , a hmel chu a nur suk mai ni .



Ka nupui lah chuan , " Mazualtei zawk aw , i au ring lutuk a , naupangin mak an tih em che kha , " Kal pah luk lak hian a ti a , khen pawp ka tum vei nen a bam leh vek ta .🤦‍♂️
Hluhlutei zawk lah chuan , " Anu in ' ipa in a hai tawh loh nan che u , kawr inang ha tawh suh u ' mahse apa min hai tho sia amak e! " A lo ti ve chiah bawk a , thil dang sawi leh pawh chu ka tim zo vek , mahni fate pawh han hriat hran loh mai chu .


An pahnih chuan , "apa , min lo nghak lawk rawh aw , anu kan hmuak lawk ang , " Tiin min kalsan daih bawk a , a lo thlen tawh ber chuan eng ang hmuah nge mawni an sawi ni , a Lal mah mah a nih dawn hi .


Naupang chu ka bulah an lo thu leh a , min be leh siam siam tawh , an thusawi vel dan chu an cute reuh lutuk , an biang puar deuh pap leh an kut leh ke te deuh te chuan a ti cute zual reuh hle, ka en reng lai chuan ka Duhzuali chu kan hmaah a lo ding a .


Ka hawi chhoh chuan mit ka khap fak fak ringawt , tunhma ang kha a ni tawh lo , a samte chu a sei hniang tawh a , a thlah hnap bawk , thawmhnaw lian pui pui kha ha tawh lo in , tunah chuan a pian mil zaih thawmhnaw a ha ve ta a lawm .


Alak atang chuan ka mit ka lasawn thei meuh lo a ni , a hmel chu a tha hliah hliah a ni. Hmaibial hmeltha ka tih chhun a la ni hial ang , ahma ai khan a khal zawk daih lehnghal , aaa..... ka ngaihtuah thui duh lo , chi loh lutuk.


" Min en reng lo khan , naupang kha ngaihsak rawh ! I hmuh ve ka phalsak lai che hian , " Tiin choka lam chu a pan daih a , a thusawi avang chuan ka thinrim hle , ka fate hmu tur hian a phalna ka mamawh a maw ? Het sala! Sala!


Zanriah ei dawn chuan choka atang lo chhuakin naupangte chu , " Chaw ei a hun e , in inkhualte lemna hmanrua kha dah fel zung zung ula , lo kal ru le , " Tiin a lut lehnghal daih a , zanriah ka la ei lo ve tho a , min ko tel ve bawk si lo , ka ril a tam ve tho sia , ka pum chu a ri ruih ruih nghalin ka hria .


Naupangte chuan , "apa lo kal rawh , chaw ei ang u , " Tiin min pawt tlat a ka tang buai duh lo , ka ril chu a tam ve tho sia .


An kut silna hnungah dingin puih ka tum a mahse an che fel reuh lutuk buaipui an ngai miah lo , an sil zawh chuan hru hul leh thlapin dawhkan chu an kil chauh , ka kut chu sil ve nghalin ka hru hul thuak thuak a , dawhkan ka va kil ve chuan ka chawthleng tur an dah tel ve lo tih ka hrechhuak chiah .


Rini chu ka melh hrek hrek a , "Chawthleng ka'n lak ang che , " Tia thawh a tum chuan , ka Duhzuali chuan , "Rini a ngai lo , amahin inlak ve mai rawh se , " Tiin a bar zui mial mial a , a melh pawh min melh chhin eih lo .


Tho chhuakin thleng chu ka inlak a ngawi rengin ka ei mial mial , naupangte ka en chuan an kum phu loin an che fel fai , an ti baw miah lo ang tluk vel a ni , engtin nge a enkawl ni?


•••••••••••••


Naupang chu dar riat velah an mut a chhuak thuai a , Hluhlutei zawk chuan anu chu panin , " Anu min pua , ka mut a chhuak , " Tiin anu chungah chuan a lawn kai a .

" Aw le , puak rual chu i ni tawh lo mawle , a pawi lo e puak puan va la phawt la , " A tih chuan ka lungawi lo hle ni , chutianga chhang lo chuan puak ve mai tur a nia , ka fate hi ka laksak daih ang .


Mazualtei chuan , " Apa puak ka duh ve e , " Mit nuai chhat chhat chung hian a ti a , " I puak puan khawiah nge ? La phawt ila , ka paw dawn che nia , " Ka tih chuan , ham bai bai chung hian room lam chu a pana , zui ve nghalin room kawngkhar bulah chuan ka nghak a .



Ka puak tirh chuan a zang reuh lutuk , a rei tulh tulh a ka dar chu natawh tak a ni , piantirh ata nau la paw ve ngai hek lo i , awih te chu ka thiam lo a bakah a lian ve deuh tawh hrim hrim bawk nen , " Apa a hmalamah min pua , " A tih phei chuan hmathlak dan tur chu ka hriat loh avangin ka buai hle a .


Rini chu lo kalin , " Uhruai ka lo mutpui zawk mai dawm em ni ? " A tih chuan ka tlawm ngai ve deuh bawk nen , "naupangte na nih lai pawh in ka paw hman lo a ka'n paw ve reng reng a nge , " Ka ti ve talh a .


Ka awih thiam loh avang chuan Rachel-i nau puak dan chu ka melh leh zeuh zeuh thin a zei bik hliah hliah , a nau puak chu a muhil tawh nghe nghein ka hria .


Darkar chanve dawn kan inpuak hnuah Rachel-i chuan , "khawi ka lo muttir ang , " Tiin rawn ban mai a tum a , a hnungah pakhat a pua a , a hmalama a pawm leh tur chu ka ngai ngam lo , " Keiman ka lo mut ang , " Tiin ka chhanglet a .


Min chhang loin room lamah chuan a phei a , ka zui ve nghal a , ani chuan zei takin a muttir mai a , ka muttir ve dawn chuan ka che buai hle , puak puan chu ka phelh hmasa a , a mawng dawm nachang ka lo hre leh pek lo a , ka thlauh tep a lawm , Racheli'n lo dawm hman lo se chu ana khawp ang .


A mut that tir hnu chuan , "ka ring reng a ni , i zei loh dan em em chu battery tui ek ai paw'n i lak tlak lo zawk , " Tiin pum dawm meuhin a nui a .


A nui hmel ka hmu leh thei chu engtin emaw riau hian ka awm , nui ve hak hakin , " Teh khinna awm ang lo deuh deuh hi hmang thin suh , khawi atang hian nge i tawngkam te hi i hriat thin bik ni ? " Tiin a kut ah chuan ka va vuan a .


" Aw ..... nangma'n kan infawh hmasak ber tum khan , ka zei lo i ti lutuk kha , 'battery fawh ang vel i ni , ' min tih tawh kha , " Kun chungin a la nui char char tho , sawi sual a neiin a in hria a niang chu , lo dakchhuakin a ka a hup chawih a kan pahnih chuan kan inen reng .


A kut ka vawnna chu tinghet sawtin ka va hnaih deuh a , kun hniam deuhin ka hmui chuan a hmui chu ka va si a , tek chuai a awmin ka hria , dimte in ka fawp phawt a , a hnungah chuan kuahin a hma ai uarin ka hmui chu ka ti che leh a min hnar bik lo , a kawr ka hlim chho pawkin ka fawp bawrh bawrh tawh a , ka insum theihna chu ka hlauh vek a ni ,ani pawh a bang bik lo kan che reng reng chu kan hmanhmawh dun lutuk .


Kan in fawh bawrh bawrh lai chuan , " Naupang an awm sia , hmun dangah kal ang , " Tiin ka thlah deuh a , min chhang loin min nam sawn deuha , " Tenawm lutuk ! " Tiin a phun sep a , a thawmhnaw chu siam tha sawk sawkin kawngkhar lam chu a pan nghal a .


Ka ding khawng reng ringawt , a chunga ka chetdan te kha ka ngaihtuah let a , thu dik hre hmasa hauh lo a , thuthlukna ka lo siam hma lutuk te kha ka inchhir takzet tih engtin nge ka hrilhfiah tak ang ?

Ka fate muhil lai hmel ka en chuan ka lainat takzet , ka mawl em avangin kha chen kha pa nei lo ang maiin an lo awm tawh a , tun atang chuan ka fate kiangah hian awm reng ka duh tawh a ni . An biangah chuan fawp zeuhin , " Ka Hmangaih che u , " Ka tichhuak sep a.


Room atang ka chhuah chuan Rachel-i chu thutthlengah a lo thu kun ngul a , a bul ka thlen chuan , " Sawi dun tur kan ngah hle a ni , " Ka ti a.


Lo dak chhuakin , " I insawi fiahna kum tam tak chhung ka lo nghak tawh a sin .....hei... (a nui sak a ) tunah chuan i insawifiah ve dawn ta a lawm.......mahse ka ngaih danah chuan i tlai tawh a ni . "


Thil sawi tuma ka an zuai chuan min lo sawi khalhin , " Israel, (ka biangah chuan dawmin ) eng thu mah hian kan inkar hi a siamthat theih tawh ka ring lo (a mittui chu a far zung zung a ) a khi thuk tawh lutuk a ni , " A ti chhuak sup a.


A mitah en in , " Rachel.... min hmangaih kha ......... Khawngaihin tun chauh chu min ngaithla hram rawh aw , " A mittui chu ka hruk hul sak a , a hma ah chuan thing thiin a khupah chuan ka chelh a , " Rachel,........ vawiin ah emaw naktukah pawh he khawvel hi chhuahsan thut thei din hmunah kan ding reng a . "


A tap chhuak hawka ka taksa chu kuah thlawpin , " Chutiang chu sawi suh , eng tin nge ka fate nen kan awm ang , ka fate'n pa an neih loh ka duh lo a nia ( in sut hlap hlap chung chuan lo dak chhoin ) damdawi in kal nghal ang aw , eng tin nge i awm? , " A ti chul a , ka chhang mai lo , ka biang tawn tawnah chuan dawmin , " Min chhang rawh ! Na te i nei em ? Kal ang damdawi in ah chuan , " A phi chung a ni tawh mai .


Min kaih thawh a tum chuan ka nui chhuak hak , " Eng tin mah ka awm ka hre lo , naktukah enge thleng dawn kan hre si lo a , tih ka tum mai chauh a lawm , " Min en run run in , ka darah a beng thlawp nghal , " I sual dan hi chu Jerome-a khan a sawi dik chiah a ni ' Setana Fapa ' dik tak i nih hi , " Tap tuau chung chuan a ti a .


Kuah vawng vawngin , " Ka ngai thei lutuk che chuan 'Anga Nangna Ka Sera ' ! " Ka ti chhuak sup a.

A nui chhuak hak mai , " Eng thil chiah nge thleng chu sawi tawh rawh , fiamthu thawhna hun pawh a ni lo . "

" Fiamthu ka thawh lo .... "

" Sawi vat rawh ! I hawna tur a la hlat kha . "

" Ka ruala in haw ve dawn chuan ka sawi ang , " Min melh rum leh hle tawh.

" 1,2,3 ka chhiar anga i sawi loh chuan i haw vang vang ang . "


" I sual thiam reuh hle mai ! (123, i hun a zo ) ka sawi ang ka sawi ang , " Ka ti chul mai alawm.


"I pk hle mai , 1,2,3 ti lovin 123 i ti nghal pawp a , " min melh leh rawm rawm tawh , a mit hi thal ni tase zanin ah ringawt pawh hian zamual ka liam zing tawh ngawt ang .


"Rilru hah leh buai taka ka awm lai khan Jerome-a bulah i kal a, ka thin arim ve a lawm (a ka a ang zuai hman , ka kut chuan ka hup sak a ) mahse ka mawl zia ka hrechhuak tawh , ka lo dik lo a ni , Zomuani kha a lo awm remchang hlauh bawk nen tih el che ka tum a nih kha mahse rin loh lam daihin thil a kal ta sia . "


" Khami ni damdawi in atang ka lo chhuah ni a thil thleng kha . "


"Nghak ve thin rawh , i lo tawng ve zuah zuah hman ziah mai . "

Ding zawkin , " Ka ngaithla duh mah hi lawm zawk ta che , khatiang te a min tih chu le ! " Thupha chawi ka ngai le ta ...


" Aw...... ka thiam loh a ni , " Pawt thuin , " Ngaithla zo phawt la min la hau zawk dawn nia . "

" Kha thil thleng ah kha chuan damdawi in i awm hma khan Jerome-a car ah tho i chuan vang a lawm bakah Zomuani kha a zei em a ka hnar thei lo a lawm . "


" I tenawm hle mai , mipa insum theihna nei lo hi ka ten zawng tak ! "


"Ka hria e , nakinah min la ten zawk dawn nia , ka insawifiahna chu ngaithla phawt rawh , " Ka mit ah tak chuan en in , " Ka mitthlaah a cham renga , kha thil khan min tih nat zia hi hria la khatiang kha i sawi ngam hauh lo ang . "


A mittui far chu hru pawk pawk in , " Tha lo bik , pasalte paw'n enga tan mah an tih loh mi zawng zawng en san ..... (😭😢) en san niin ka in hria a , a nat dan kha ka sawi thiam lo , ana takzet a ni khatiang kha tawn leh ka duh tawh lo a ni , " Kuah vawng vawng a , 'ka tina tawh ngai lo ang che , min ngaidam rawh , 'tih chu ka chak takzet .


" Chutiang chuan ka en ngai lo che , ka tan i that lohna ka hre lo , " Tiin a kutah chuan ka vuan a , " Khathil thlen hnu khan then che kha ka duh lo , min kalsan lo tura ngen che pawh ka duh lutuk mahse ka nu'n Jerome-a nen in kal bo dawn tih min hrilh khan ka haw lutuk che , thah mai che kha pawi ka ti lo a sin . "


"Eng.... engtin nge chutiang chuan min ngaih theih zawk, " A ti tial ruai a .

" Kan inthen hma khan Jerome-a khan a hna bansanin ka pa bulah engkim a kalsan tur thu a sawi a ,ka tan chuan ka nu thusawi kha rin loh ngaihna a awm lo a lawm , in in a ka lo kal in i lo awm tawh lo bawk a , i chhungte lahin i awmna an sawi duh bawk si lo a , ka nu thurawn pawm in Zomuani chu nupui ah ka nei bawk a . "

"Zomuani nen in in nei a maw ? "

" Aw... kum hnih kan in nei hman mahse Jerome-a a lo let khan thu dik engkim ka hriat chhuah phah ta a ni . "

" Tunah Zomuani chu khaw nge ? In inthen leh a maw ? "


" Aw .... pasal dang min neihsan a lawm , tunah chuan an inthen leh tawh . "


" Ka awih thei lo ! .... dawt i sawi em lo maw? A .... Ti nge i chelh hram hram loh a? lo intawng hmasa zawk ula tha tur , a hmangaih zia che kha ka hria a sin , " Amah a inthiam lo leh ringawt dawn huiha.


" A chanchin chu sawi tawh lo ang , kan chungchang hi sawi fel phawt a ngai , kan inhmuh loh chhung khan ka ngai thei lutuk che a sin , ka awm dan kha ngaihdam tlak pawh a ni lo tih ka hria mahse i tello a ka ruak zia leh eng mah ka nih loh zia ka hre thar tulh tulh a sin . "


" Chulam chu sawi lo ang , eng tin nge he lai hmunah hian i lo awm ve daih theih dan . "


" Engkim ka kalsan vek a lawm ! Kan chhungkaw rosum chhawm tumna ka nei lo , ka tan chuan in hlu zawk ka nupui leh fate hi . "

" I nupui ka ni tawh lo . "

" Inthenna lehkha pawh i la sign hleinem . "

" Mizoin inthenna lehkha kan sign ngai lo , zirsang viau si hian kan Mizo dan leh dun pawh i hre lo a nia , 'Sum ka chhuah tawh chuan kan inthen chiang hle tihna . "

" Lo haw leh mai rawh ! I tello a awm chu a hreawm em mai , nung reng chunga mitthi ang mai ka ni , hmuh leh che hi ka chak em em thin a sin , nangmah vang chauha la nung ve tawk tawk ka ni a sin . "

" Chutiang lam chu sawi tawh suh ka ngaithla peih lo , kan inmil loh zia chu keiai i hre zawk daih a lawm , i chhungte paw'n min duh loh zia engkim i hre vek , kan pahnih hian awm dunin lo innei leh ta pawh ni ila rilru natna bak kan inthlen ka ring lo , sawi tlang dawtah chuan ka ring thei tawh lo che a ni . "


" Kan inmil lohna ka hre hauh lo , ka chhungte lamah chuan ka nu khan Zomuani kha a mo atan a duh em a , chuvang chuan khang thil zawng zawngte kha a thleng a ni , kan fate pawh kan chan tep a nih kha . "

"Kan fate kan chan tep a maw ? Damdawi in a ka awm chhan kha an mahni vang em ni ? "

" Anni chungchang chu ni dang ah le , a pawimawh berah chuan kan fate tan kan pahnih hian kan awmdun leh a ngai a ni . "



" Min kalsan rih zawk mai teh ! Ka fate'n an hmu che chu ka lawm lutuk mahse tunah rih chuan .... "


Ka fawp thuta , " Ka hmangaih che , Rachel ka hmangaih che , ka tlai lo ti raw? Khawngaihin min hnar lo hram rawh , " Ka tih chuan mittui tla chungin , " Keipaw'n ka hmangaih che , kum tam tak pawh ral se nang hmangaih che hi ka inchhir ngai lo ang . "

" Ka lawm e , ka lawm lutuk . "

" Hmangaih che mah ila awm dun leh chu ka thei tawh lo a ni tunah rih chuan , khua reiah ka rilru ka la thlak mahna , " Tiin min kuah vawng vawng a , " Naupang i lo hmuh pawh ka phal vek mahse inneih leh lam chu sawi tawh lo hram rawh . "


" Nitinin i rilru i thlak theihnan ka bei ang hun rei ka nghah tir lo ang che , min pawm thuai mai ang , vawiin mai ni lo nitinin ' ka hmangaih che' tih thu ka hrilh fo ang che , " Tiin a biangah chuan fawp zeuhin ka chhuahsan ta a , sawifel tur tamtak kan la nei a ni , a rilru ka hneh theihna tur a nih phawt chuan tlangsang tak te leh lui thuk tak te pawh ka dai ve mai ang ........


" Israel-a nupui Rachel-i i ni leh ngei ang ka Duhzual . "















A tawp tak tak tawh ....

Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)