NO ESCAPE FROM LOVE BY Maveni Hmar (Completed)

Episode nei ho a hlawm a dahkhawmna
Ngaia
Site Admin
Posts: 25813
Joined: April 30th, 2016, 4:07 pm

NO ESCAPE FROM LOVE BY Maveni Hmar (Completed)

Unread post by Ngaia » July 25th, 2021, 6:25 pm

vikjl7eq.jpg
CHAPTER : 1

Manila mi hausa inah kum khat chuang ka thawh hnuin eng eng emaw inhmuh thiamlohna vangin ka bang ta a. Mizoram lama haw mai ka rilruk lai chuan ka agency atangin phone call ka dawng a . Sagada khuaah hnathawh tur a awm thu min rawn hrilh ta a . Hnathawh tur a awm si chuan thawh ka duh thu hrilhin haw chu ka thulh leh ta a .

Sagada ber khera thawh chu ka hreh rilru deuh nain 'kutdawh chu duh thlang thei dinhmunah a dinglo' tih zawng zawng ka neih a , hreh teh mahila ka thawhna hmuh chhun anih vangin ka thawh a ngai miau mai si.

Sagada chu Manila atanga km 387.6 a hla niin motor chuan darkar 12 er awrh tlan a ni a . Phillipines' Shangri- La tia hriat lar niin a hmun a mawiin puk ropui leh nalh tak tak mai bakah buh hmun terrace awmze neia an siam mawi dangdai tak tak te vang chuan a hmingthangin khualzinmite pawn an tlawh nasa em em mai a ; ka awm hrehna ber zawk chu kuang inkhai an tih hi ka rap tawp a ni . He hanging coffins an tih hi hmanlai an pipute hunlai atanga an lo tih thin dan a ni a . An mi hmangaih fam ta te kuang chu kham sang takah an khai uai fur mai a , hei hi an tih chhan chu an thlarau khan vanram leh pathian a hnaih deuha an rin vang a ni . Mahse kum 2010 atang kha chuan an khai tawh lo a ni awm e .. Mitthi awmna kuang khama khai uai fur mai chu ka ngaihtuah ringawt paw'n ka tim sung sung thei hialin ka hria .


Ka va awmna turte chu nupa chauha awm an ni a , Mr & Mrs Mendoza te an ni . La valai tak leh mi tha tak niin an lang a . Mr Mendoza chuan 'Mendoza electronic' company neiin electronic lam thil siam leh zawrh chhuah hi an hna pui ber a ni a , a tlangval lai chuan tlangval hmeltha tak leh luck tak a ni ngei ang tunah pawh a hmel a la thain tlangval tam tak chuan an tluk lo nghal phawt mai.Amah hi Filipino leh Spanish thlahpawlh niin a meng hring nghalh mai a . A nupui Madam Mendoza chu nu hmeltha leh fel em em mai hi a ni a , kum thum kal ta khan accident a tawh avangin ke a kal thei loin wheelchair-a nawr ngai ta thung .


Inchhung khur enkawltu tur chuan Filipino nu upa lam hi an awmpui a , kei chu Madam Mendoza enkawl bik tura rawih ka ni .A duhna hmunah kal pui leh a ke vel massage thinte amah bik ngawr ngawr buaipui chu a ni deuh tawp mai a , a hahthlak lutuk lem lo .


Nu fel tak leh tawng duh tak anih vangin ka ngaina chawpchilh ve mai a . Phillipines tawng hi words tlem tlem chu ka hre sil ve nual nain han titi leh inkawm nan chuan ka la hmang thei loa , mahse English an thiam fur hlawm avangin tawng lamah chuan harsatna em em ka la tawk lo .


Fapa pakhat chu an nei ve a engineer a ni a , an company huang zauhin Manila-ah a inbengbel a ni awm a . Thla thum ka thawh hnu pawhin a nu leh pa chu ala rawn tlawh miah lo a , mahni a tlei ve tak anih dawn hi ka ti mai a .


Kar khatah ni hnih saturday leh sunday hi chawlh min pe thin a , chhungkhat leh thiante tlawha len khawthawn hun tiin Madam chuan , " Engtik lai mai pawha hna thawh ringawt chu taksa mai bakah rilru a hah tel a , depress a awl bik a nia . Kar khatah ni hnih hunawl neih hi i phu a ni ." a ti a .


Chhung leh khat han tlawh kual tur nei ta lo nafam chu inah bawk ka tap leh mai thin . Tlai khat chu Sagada khaw chhung fangin ka tei kualna lamah filipino nula chhelo tak mai Aliya Garcia ka tawng fu a , kan inkawm nel thei ta phian mai a . Phillipines ka awm atanga thian tia chhal tur ka neih vawi khatna a ni a , messagete inthawnin kan inbe reng thin a , ka ngaina ve em em mai a ni . Kar tawp chiah hi ka hun awl neih chhun anih vangin kar tawpah chiah kan inhmu thei thin .

Saturday a ni a , tukthuan kan ei kham chuan Aliya chuan min rawn call a , " Hey , Jojo, zanin chu party turin rawn inchei ang che aw ." a rawn ti lar lar a .


" Party a ?" ka ti ha a , Phillipines ka awm atangin party-naah ka la kal chhin ngai lo avangin ka phur ang reng phian a .


" Aw , ka thiante pawh ka hmelhriattir dawn che nia . Zanah haw loin ka bulah i riak nghal anga ." phur tak hian a ti sarh sarh a .


" Awle ." ka ti ta a .


Madame hnenah chuan ka thiannu thu min hrilh chu ka hrilh leh a , min lo phur pui phian mai a ." Nia, ila naupangin i hmelte a tha a ngaihzawng neih te pawh a hun ve tawh alawm ." tiin a nui hak hak a .


" Ngaihzawng lam ka sawi loh chu ..." tiin ka nui sang a .


" I sawi lo naa i la tawng em em ang . Ngaihzawng neihte hi hawi harhna chi khat a nia . Thawmhnaw hak tur i neih loh chuan ka ngah a nia aw .." a ti sarh sarh a .


" Ka lawm e . Mahse ka nei alawm " ka ti a . He hmun kan rawn pan dawna kawrfual pakhat ka lei ve kha ka hre rauh rauh a .

Ka hming chu Zorinsangi ani a , 'Zozo' tiin min ko thin a , hnam dangho hian lam thiam loin 'Jojo' tiin min ko ta thin a, chhungkaw harsa tak kar atanga seilian ka ni a , BA chu ka zir ve nain ka pass chhuak ta lo hlauh a . Chhungkaw khawsak harsat nen sum thawhchhuahna hi keini ang tan chuan a van em avangin Singapore lama maid hna thawk turin ka training ve ta a . Ka training chhuah a ka kal dawn meuh chuan Singapore aiin Phillipines kal chu ka duh leh ta zawk a . Ka hmelhriat then khat chuan , " Maid hna i thawh duh chuan ram dang kal angai hlei nem Mizoramah pawh thawh tur a tam alawm." min tih sak mai a . Nie, Mizoramah pawh mi inah hlawh neia awmna tur chu a awm na meuh mai . Mahse ram dang hlawh nen khaikhin chuan inthlau tak a ni . Maid theuh theuh hlawhsang zawk nanana chu tu pawhin an um lo thei lo .


Ka pa nu, ka pi hi Gorkhali anih vangin ka hmel leh mitmengah chuan Gorkhali thlah ka nihna chu hmuh tur ala tam hle a , hmelchhia min ti tu hi an la awm lo . Mi lerh ka nih loh vang leh ka duh zawng mipa ka la hmuh loh vang chauha ngaihzawng la nei lo ka ni mai zawk . Min duhtu leh min bemtu chu an tam , ka hnar zel thin vangin thian tha ah ka chhuah leh mai thin .


Ka pu mizia ka chhun a ka thin a chhiain ka duhloh zawngah chuan kawlh tak ka ni . Mahse a nazawngin ka thin a rim mai mai ngai lo thung . Tunah chuan ka thinchhiat pawh ka insum thiam ve tan tawhin ka inthunun thei tawh khawp mai . Maid hna ka thawh hnuah hian ka khua a harin Mizoram ka ngai ngawih ngawih a, social media ka khawih hnem phah a , Mizo tlangval min rawn chhaih lerhtu ka tawng hnem malh malh hle mai a. Facebook vela tawngkam bawlhhlawh tak taka infiam hi ka huat zawng tak anih vangin ka khak fak ta thin a . Chu chu huain " Maid mai mai , mi ek in tifai mai mai si chapo ve em em a . Engmah ini lo i pite ek in va tifai rawh ." tia hmusit tak taka tawng khum pawh ka tawk zing hle a ni.


Mizo tlangval , hei hi ka hrilh duh a che : Ka chhungkaw retheih luat vangin ram dangah inhlawhin hna tawp ber ber pawh ka thawk ang . Mahse min hmusit kher suh . Pawisa thawh chhuah nan hian ka thiamnain a phak tawk ka thawk a ni mai . Mi ek in tifai emaw mi chhiahhlawh pawh ni ila ka chhungte chawm nan pawisa ka thawn theih ahnu eng nge ka zah ang ? Engmah thawk loin chhungte thawh chhuahsa ringin nalh takin leng ziai ziai ila emaw ka taksa hralhin sum hmuchhuak ni ila ka zak zawk ngawt ang .Chhungte pui thei tura mi chhiahhlawh ka ni hi ka zak chhete eih lo . Diktak chuan ka inchhuang ru hle zawk asin.


Party tur chuan ka insiam malh malh a , ka kawrfual neih chhun taksa rem zaih mai rawng sen duk chu ka ha a , darthlalang hmaah chuan ka inchei mawlh mawlh a . Ka mascara inhnawih chuan ka mitmeng chu a ti lang lianin a ti lang fiah kak mai a , ka mithmulte chu siam chawp ang maiin a er sei sal mai a . Ka landan chuan ka duhthu a sam thlap hnuah ka chhuak ta a . Aliya nen kan inhmuhna thin Cafē Rust 'n Wood-ah chuan ka lo nghak a , lo nghah pahin in tur ka lam nghal a .


Minutes sawm vel zen zawn ka nghah hnu chuan nalh taka incheiin Aliya ngei mai chu a rawn kal zan zan a . A thawmhnaw tight leh chhing tak chuan a bawp sei thlarh chu a ti lang sei zual sawt a . "Hi , baby ! Min lo nghak rei tawh em ? " tiin a biang chuan ka biang chu a rawn nul thuak a .


" Rei hran lo e ."


" Kal mai ila ..."


Kan inzui chhuak ta nghal a . Kan party-na hmun tur chu Aliya secondhand car lei thar chuan kan pan ta a . A hmun kan thlen chuan Filipino zaithiam a ka duh ber mai Mathaios hla ' Binibini' chu an lo play a , ka tlangnel nghal sawt a . Aliya chuan a thiante chu min hmelhriattir hlawm a .

"Mabuhaya!"

" Magandang gabi."

" Kamusta ka ? "

" Ayos lang ako. Salamat . "

Nuam ka ti ta phianin ka tlangnel nghal hle mai a . Kan ei a , kan in a kan lam bawk a . Music nen kan ri hulh hulh hi a ni mai a , ka lo in hnem deuh nge ka duh aiin ka rui deuh tlat tawh mai a . Ka thian tharte chuan ka hnar hnu paw'n in tur min la pe reng tho a , ka rui lutuk tawh ka buai nuaih tawh mai a . He hmuna ka awm reng chuan ka mualpho mai dawna ka hriat vang chuan Aliya hnenah chuan min hruai haw turin ka ngen ta tawp mai a .


Ani lah party chu nuam a ti tan dawn chauh niin alang , "Haw i duh hma lutuk ."

" Ka rui lutuk tawh tlat ..heta awm reng chi ka ni lo ." ka ti lang lang a .


" Anih chuan ka va thlah ang che nga ka kal leh mai ang aw ." a ti a , ani pawh chu a kai ve hle tawh ni hian ka hria.


In lam pan chuan kan inkhalh haw ta a, ka rui bawk nen ka lo muhil ni tur a ni , thil ri bur leh kan car nghing lawih chuan min ti harh zawk a ."Eng thil nge thleng ?" tiin peih lo zet hian ka meng phi chiai a .


" Engkim a tha vek ,baby . Muhil leh rawh . Kan thlen ve leh ka kai tho ang che ."


Ka muhil ve leh nghal ta mai bawk a . Tu in emaw ka hmaiah tuia arawn theh thawt takah chuan chiang lutuk hian ka harh nghal kawk a . "Hrep taka ! Eng thil phiangsen nge i tih ? " ka ti tuarh a .


"Walang utak , mang-mang! "

Chu thinrim aw lo chhuahna lam chu ka hawi thuai a . Car kawngkhar bulah hian tui bottle keng hian mipa sang tak hi alo ding run mai a . A mitmeng chu thinrim tih hriat tak hian a dur khap mai a . A hmel leh incheina en chuan mi pangngai chunglam khawsa thei tak a ni tih a hriat hliah hliah mai a .


Ka hmai huh chu ka kutin ka hui puat a , thinrim zet hian ka seatbelt chu ka phelh mawlh mawlh a , car kawngkhar chu ka nam hawng sawk a , kawng dawm veng vawng chung chuan chu pa sang tak chu hmai zangthal ha hian ka melh thip khai mai a . "Eng vanga tuia min rawn theh nge i nih ? " ka ti thawt a .

"Hmeichhe laktlak loh ! Zu rui chunga motor khalh pawi zia i hria em ?" a ti khur khur a .

Tak deuh deuh chuan a ! Thinrim zet chuan a mitah tak chuan ka melh kal a , "Ha! Kei hian motor ka khalh a maw ? Zu chu ka rui ka pha lo , motor zawng ka khalh lul lo . " ka ti chiam a . Aliya pawh hi khawiah nge maw a awm le ?

Thinrim tih hriat tak hian a hmui nalh zet chu a pet ruh a, "Ngaihdam dil tur i nih laiin a thinrim zawkah ila tan khanglan chu le ! I thil tih pawi zia hi i hria em ?" a ti tuarh a , min beng duh mai tur hmel hi a pu a .

.Ka tawlh hnung hret a , "Zurui chatthlain motor an khalh ngai em ni ?" ka tih khum nghat a .


A lu um nalh zet chu a thing nak a , a mitmeng hring thim raih mai, lunghlu hring mi ang maia nalh chuan min melh ding ngut a ," Driving seat-ah thu chung hian i khalh anih loh thu i la sawi cheu dawn em ni ?" a ti nghut a .

Ka ding khawng nghal lah mai a , ni e driving seat-ah thuin seatbelt pawh ka hreng thlap a nih kha . Khawiah nge Aliya hi a awm tak le ? Pawi a khawih hnuah kei zurui chatthla chu a driving seat-ah min thuttir a , seatbelt pawh min hrentir thlap tihna em ni dawn ? " Lalpa ! " tiin ka rum hak a . Eng pawi nge Aliya chuan a khawih le ? Mi a su hlum nge a hliam zawk le ? Ka tha chu a khur dar dar a , ka pum chu a rawn ti deuh nghulh a , luak lo tur chuan ka insum teh nain ka insum tluantling zo ta lo . Kan piah luikawr lam pan chuan ka tlan phei a , ka va inbun ruak ta bawrh bawrh a .


Chu pa sanga chuan ka tlan chhiat a hlau nge ni min rawn zui phei thuai a , tui bottle chu ngawi rengin min rawn pe a , " I rui bawk a pentawng chu i pe na ve maw ." a ti nghut a .


Tui um chu lo banin ka kam ka thuah fai a , ka hmai te chu ka phih nghal bawk a . "Car hi ka khalh a ni lo . Ka thiannu Aliya khalh a ni ." tiin ka ding chhuak a .


Mit zim san hian min melh a , a nui ta huk a . A la nui mawi phian zui leh nghal a ." Tuna i lan dan kha inhmu ngat la chuan i duh hauh lo ang mawle ." a ti a .


Car lamah chuan tlan pheiin side glass-ah chuan ka inbih thuai a . Karei ! Ka hmaiah chuan ka mascara inhnawih kha ka lo nuai pherh vek a , alo dum neu nuau chu niin , zu thing rim ka la nam rum rum zui leh nghal "Sh**t !" ka ti hlak a , car chhunga ka sling bag chu dap rawk rawkin wipes chu ka phawrh a , ka hmai chu ka hru ta nawk nawk a . Aliya car hma chiah a car changkang tak mai ,kei ang mi mawl chuan a man to dan tur pawh ka chhut thiam phak loh leh eng nge a hming pawh ka hriat loh chu a hnung sawi bawihin alo ding reng mai a . He car changkang tak hi Aliya chuan a su a ni chiang mai ." Ka duh thei lo ! " ka ti thawt a , ka ding khur dar dar ta mai a .


" Kha kha i sut chhiat chu a nih kha .. i insurance company i call dawn nge a siam man i chawi zawk dawn ? "



" K _ ka khalh a ni lo . ! "


" Dawt ila sawi cheu dawn em ni ?"

" Ka ti tak tak ..hei hi ka car a ni lo a , ka khalh thiam lo a , driving license pawh ka nei hek lo . "

" Driving license nei loin zurui chung leh nghala motor khalh chu dan kalh a ni tih i hriat ngei ka ring , binibini . Dan i bawhchhiat hnuah pawh ka car ila su chhe zui bawk a . I case hi a rip khawp ang . Ka car siam nan hian peso tam tak i chawi ngei angai bawk ang ." a ti vawt ruih a , a aw ah chuan nelawmna reng a tel lo.


"He car hi ka thiannu Aliya car a ni a , party-ah kan kal a min thlah haw a, car-ah ka muhil kha a ni si a . Engtin nge kei motor khalh thiam lo hi driving seat-ah ka lo awm ngawt theih ka hrethiam lo a ni ." tiin ka phun mawlh mawlh a . Aliya call tum chuan ka phone ka phawrh a , a number leh kan in text-na te call history zawng zawng chu alo in-deleted vek mai a , mak ka ti tak zet ani . "Hudas! " tiin ka te that a .


" Eng thil nge ? I insurance company chu i be thei na nge ?" nuihzat hmel tak hian a rawn ti a .


" Ka car a ni lo !" ka ti vin tak a . " A neitu Aliya pawh ka be thei lo . A number leh kan inbiakna history pawh alo clear vek a nih hi . Phatsanin ka awm a ni ." ka ti a . Ka chung rip dan tur ka ngaihtuah chuan ka tah a chhuak rum rum mai . A car siamsakna tur pawisa ka nei loa jail min tan tir ngei dawn anih hi .

Za hauh lo hian a nui hul hak a , " Thil awihawm deuh hlek sawi tur i hre thlawt lo em ni ? " a ti hmuk a .


Beidawng zet chuan ka thu hnawk a , " Pawisa pek tur che ka nei lo a ni ." ka ti chuai raih a . Aliya hrep chu ka haw ngawih ngawih mai a ni . Eng tin nge hetiang hi ka chungah a tih theih zawk le .? Ka thian emaw ka tih kha ka hmelma alo ni zawk anih hi . A thil tih sual man chu kei hian ka tuar dawn tihna em ni ?


A chek hluk a , " A siam man chu i tum ngei a ngai ang ." a ti a . " Zaninah hian workshop-ah ka dah anga ..."


" Nilo , khawngaihin ..Aliya tih vek a ni ."


" I phone kha unlock la min pe teh ."


Ngaihtuah chiang mang lo chuan ka pe ve mai a . Ka phone atang chuan ama number chu a call a , " I number hi ka save anga ka motor an siam zawh hunah ka rawn call ang che ."


Police siren ri ka hriat chuan ka meng phar awrh a , he pa hian Police chu a call a ni em lo ang chu tiraw ..ni , a call hauh lo ang , call-na hun ala awm lo tlat . Kan bulah chuan Police car chu a rawn dinga , a chhung atang chuan Police pahnih hi lo chhuakin Aliya car chu an rawn bel chiang a . Min man ngei dawn anih hi foreigner ka ni bawk nen ka tal buai khawp ang chu tia ngaihtuahin ka tap lo chauh a ni ber e . Ka bula ding pasang tak chu ka pan hnai ruak a , khawngaihna ngen mitmeng chuan ka thiam ang tawkin ka melh a .


" Eng thil nge ni ta , officer ?"


Police chu rawn ding ngil auhin ka bula ding pa chu a rawn melh a , a mitmeng chu danglam nghalin , a nui vur vur a , " Nang ini maw , Mr Mendoza , chibai le ! " a ti a . "He car hi a neitunuin darkar khat kal ta khan a bo thu a rawn report a . Party-na a kal hlanin an lo khalh bosak a ni awm a .Hei kan hmuhsak leh nghal thei a avanneih thlak hle a ni . Mahse a sut chhiat hi i car a ni maw ?" a ti a .


" Aw . Club-a ka kal hlanin a lo su chhia anih hmel , ka let leh chuan ti hian alo awm tawh ."


" A pawi hle mai . Car hi station lamah kan la anga , a neitu kut a thlen hunah insurance pawisa hmangin a siam theih mai ang chu maw ." Police pakhat zawk chuan a ti a , rinhlelh hmel tak hian min rawn melh ta a .


Ka hlau lutuk chu Mr Mendoza lamah ka tawlh hnai dawrh a , ani chuan ka kawngah min lo kuah thuai a , a huhang a nain a cologne rim tui tak chuan min zem chem chem mai a . " He banibani hi chu ka nula a ni e . " a ti ta a .


Police pa chuan a lukhum phawk zauhin duhsakna min hlan a , Aliya car chu khalhin an tlan sawn tak hnu chuan ka thaw huai a . "Ka lawm e ." ka ti sap a , a kuahna ata chu ka tal chhuak nghal a .



" Ka mantir mai che chuan ka car siam man chawitu tur i awm nang ."

" Ka car a ni lo tak tak .."


" Ani lo tih chu a chian khawp kha : Police-hoin an rawn la nalh mai alawm . "

" Ka ruk pawh a ni lo . Aliya khalh a ni ."


A dar a san ak a, " Eng tia awm nge i tum ? Motor siamna ah ka dah dawna ka rualin i haw dawn nge ?"


" Taxi ka la mai ang ."


" I tih dan dan le . Naktukah ka rawn bia ang che ." tiin a car , a hmaa car nalh chungchuang tak ni thin tuna sawi bawih ta chhungah chuan lutin a ban min rawn vai khum a, a ban a phar chhuah zawng chuan a rolex sana chu a lang sar kher leh nghal .


Khatiang car man to leh sana to lutuk bun thei chin tan chuan a car siam man chu eng tham a ni awm tawp silo a , engah nge a siam man ka chawi a phut tlat ni ? Ka tih a ni lo tih chiang takin ka hrilh tawh sia ...mi hausa uikawm an tih ang hi a ni thei ang em ?

Taxi ka hmuh hmasak ber chu phar dingin ka haw ta a . Aliya thil tih dan chu ka tenin ka haw tak zet a ni . Ka hmu leh ngaite anih chuan ala chaklo ve khawp ang . A thil sual tih thup nan kei foreigner mawlmang ve tak hi min hmatheh vela maw tiin ka insawh nghawng nghawng a . " Aliya, hei hi hre rawh, inhmuh hun chu kan la nei leh em em ang chutih hun chuan i sam kha pawtkawlhin ka nawp nasa hle ang che." tiin ka inhrosa tawn tawn a. Ka thin a rimin ka beidawng tak zet a ni. Pawisa neih loh naklaiin ka thil tihsual ni hauh lo man chu ka chawi ngei a ngai dawn ta a nih hi, hreptak chuan!


*****

Cover pic hi ka fanuin thing a'n ti laileng khawpah! Ka phone khan thlalak nalh tak tak leh ka thawnthu ziahsa a chhiatpui sia ka mood a off vek alawm. Ka google account ka lo chhinchhiah lo bawk nen a buaithlak vel vek a ni e.

Eng pawh nise chhiartui ule.❤



Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » July 25th, 2021, 6:25 pm

CHAPTER : 2



Zing ka tho chu ka lu hi namen loin ana tluk tluk a , ka thawka zu thing rim nam huam chu tawrh hrehawm ka ti ngang mai . Ka hate nawtin ka inbual nghal a , ummm..tunah chuan ka zia ta huai e . Awmhmun kawrfual mawlmang tak hi hain ka sam chu ka hnunglamah ka tawn khawm leh tawp a .


Ka phone chu enin tu miss call mah a awm loh vang chuan ka thaw deuh huai a . Kha pa car siam nan khan eng zat nge ka chawi ngai ang ? Engtin nge pawisa chu ka neih tak ang le ? Aliya huatna chuan ka khat a . Madame hnenah pawisa puk ka dil tawp mai dawn em ni ang ? Chu zawng ka thil hreh ber a ni bawk si ...Car siam man pawisa ka neih ngei chu a ngai a ni. Lalpa, engtin nge ka tih tak ang? Khawngaihin min pui hram teh.


Ka pum a rawn rik tak raih raihah chuan ka harh deuh zawk a , ka ril a tam hle tawh tih inhrechhuakin choka lam chu ka pan thuai a . Ei siamtu Mrs Torres chuan min lo nuih vur vur a , " Good morning , Jojo ! Nangman eng nge ei dawn ? " English pai tak leh bah nuai chuan a ti a .

" Morning ! " tiin ka nuih let sak a . " Coffee leh toast ka lo ei ang e . " tih leh thut chu ka rual nghal a .

Mrs Torres chu nu upa lam leh thau tawi bing luai mai hi niin , a hmel a tha viau lo nain a nelawmin nui hmel a pu sang reng mai chuan a hmelchhiat pawh a hriat loh hial a ni . Thau hle e ti lo hian a tuan a tha fu roh a . Ka thil ei tur min rawn pek chuan , "Ka lawm e ." ka lo ti sap a .


Ka inei puar hnu chuan Mrs Torres chuan , " Jojo, nangman Master Iñaki hnenah ei tur pe lawk aw ...pool-ah a cheng ." tiin a nui sang a .

"Tehreng mai . " ka tih chuan tray-a theitui leh chhang a rem am chu min pe a . "Master Iñaki chu Pu Mendoza fapa em ni ? " ka ti ha a .


" Aw . "

Tray chu chawiin swimming pool lam chu ka pan ta nghal a .Pool-ah chuan mipa pakhat hian tui a lo cheng mek a , en chiang lem hlei lo chuan , "Sir , hei theitui leh chhang ka dah aw . " tiin pool sira nihliap zar hnuaia dawhkan chungah chuan ka hung a , ka kal leh nghal mai a .


" I tlanchhe leh nghal dawn em ni ?"

Chu aw ril ruih mai ka hriat chuan ka ding chawt a , inherin ka va hawi let thuai a . Pool atang chuan chupa chu a rawn chhuak ve mek a , swim shorts chiah a inbel tih lohah chuan a taksa chu khuhtu reng awm loin a ruak kung mai a , a awmbawr thla , dul thuar leh mal sei thlurh mai te chu hmuhnawm tham khawpa nalh a ni . A taksa nalh tak chu hawisanin a hmel chu ka melh ta a , lunghlu hring mi ang maia mitmeng hring nghalh ka hmuh chuan ka phu deuh zawk a ,"N --nang maw...!?! " ka ti phawk hra a . Ka kachhungte chu ro deuh hulhin ka thawkte chu a chham lo chauh a ni .

" Kan inhmu leh ta chu a ni alawm tiraw , Babae Kasi ! " tiin a biangsum veilam khuar kak chuan a kiai suk a .

Ka mihring hmuh inbeisei loh ber mai ka hmu chu sawi mai tur pawh hre lo chuan ka ding ngawi reng ta ran mai . 'Babae Kasi ' tiin min la au zui . Hrep tak chuana ! An hnam tawng thiam lo mahila babae kasi chu hmeichhe driver koh nawmnahna emaw hmeichhe talhiar ve tak sawina a ni tih chu ka hre ve tho . A mi rinang ka nih loh zia hi eng tinnge ka hrilhfiah theih ang . Khuhtu pawh nei lo a taksa ruak kung mai chuan min ti laiin ka awm a ti nuam lo tel tlat bawk nen ka chil chu lem khalhin ka tawlh hnung hrat hrat a .

A emerald mitmeng chu a de sawr sawr a, ka mitah tak min rawn melhin min rawn pan hnai hret hret a , kei lah hlauthawng takin ka tawlh hnung zel bawk a . " Pawisa engmah ka la nei lo ..." ka ti bah niai a .

" Nizan lamah lah i tawng nasain i leili a that par par nen tunah lah dangawk ang maia i awm tak le . Nge Zawhtein i lei a dawlhsak daih zawk che em ni ?" tiin a meng de sawr sawr a .

A mi elsenna tawngkam chu haiderin , " Chuan Mr Mendoza fapa i lo ni reng a maw ?" ka ti lawi rat a .

Khap pawh khap eih lo hian a emerald mitmeng hring nghalh mai chuan min melh reng a , " I hre dik e . Iñaki Mendoza ka ni ." a ti nghet churh a .


Chil ka lem khawlh a , "Pawi ka ti lutuk , Mr Mendoza , i car siam man kha ka la nei hrih lo a ni . " ka ti hnual raih a .


" 'Nei lo ' tih leh ' ka hre lo ' tih hi thil sual tih thiam inchantirna'n chhuanlam a tling lo ." a ti hluk a .

He pa bula insawifiah tum leh lungbang sut tlang tum chu a inang reng a ni . Ni e , amah pawh hi lungpui ang maia nghet churh leh nelawm lo lutuk a ni ve hrim hrim . Thinrim tak hian ka thaw halh a , "Aliya Garcia zawng chhuak la , i dawp hnuah ama thil tih vek a nih zia i hre chhuak mai ang ." beidawng tak chuan ka ti halh a .


Za lo zet hian a nui hul huk a , " Eng vangin nge chu nu zawn chhuahna'n ka sum leh hun hlu tak chu ka khawhral kher ang ? " a ti hluk a .


" Thil sualtitu diktak leh i motor su chhetu diktak a nih vangin mawle ." beiseina tlem nei chung chuan ka ti leh hram a .


" I thu sawi ka rin chhan tur ka hre lo ."

" Khawngaihin min ring rawh ."

" Zan rei tak hnuah kawngpui dunga motor chhungah pawh zu rui chatthla thei khawpa nun tawp hi ka ring ngam ang che maw ? " elsen leh hmusit tak chuan min tih khum a .


" I rin ang kha ka ni hauh lo a nia ...."


" Ka nu i enkawl karlakah hian i inzuar thin tihna em ni ? "

Inzuar thin a ? Kei hi maw ? Ka thinrim lutuk chu ka insum zo ngang tawh lo , a hmaiah tak mai chuan ka beng ta sawk mai a . " I va ngam zawk ve a ! Engtin nge kei hi inzuar thin angah min puh theih zawk a ?" ka ti hlaih hlaih a .


" Hmeichhe kawlhsen leh huaisar tak i ni ." tiin ka dar tawn tawnah chuan min vuan a , a emerald mitmeng chuan min melh vawt ruih mai a. Min beng let ve mai duh hmel hi a pu a , min beng let ta lo chuan ka dar chu a hmer deuh salh a .


" Min thlah rawh ! Min ti na a nia ! " ka ti that a .


" Ka hmaia i benna kha a nat loh bik i ring em ni ? " a ti bung nghut a .

" Hmeichhe pangngai hnenah a taksa zuar thin anga i puh a nih chuan kha aia na a ben kha i phu hliah hliah a ni . " uar zet hian ka ti tawn tawn a .


A meng thim deuh raih a , "Zan rei hnuah kawngpui dunga motor chhunga rui chatthla thei hmeichhia chu hmeichhe pangngai , zahawm leh inchengvawng tak chu a ni thei lo hrim hrim, a ni lawm ni?" tiin za hauh lo hian a kiai suk a .

Thinrim tak chuan ka thaw ham ham a , "Huh ! I ngaih ngaihin ngai rawh ! Pawi ka ti nek lo e ! Ka duh leh kawngdungah chuan zu rui chatthlain lo inzuar thin pawh ni ila ka mimal nun a nia , i lo buaina tur a awm lo ." ka ti ram hmak hmak a .


" Ka buaina tur chu awm teh meuh e . Ka in chhungkhur atanga inzuar thin chhawr hi ka duh lo . Ka nu enkawl tur lek phei chuan hmeichhe tha tak leh nun zahawm ni ngei se ka duh a ni . " vur khawn ang maia awka vawt leh nelawmna chhete mah hmuh tur awm lo chuan a ti ta a .


A awka vawt lutuk chuan tui vawta leih ang mai chuan min tiharhchhuak zawk a. Hepa hian ka hna atanga min bantir hi a tum a ni chiang mai! Kei leh ka leili hriam lutuk hi ! Engah nge ka thinchhiat tertek ka lo chhuah leh mai ni ? Lo ngawi mai mai tur kha ka ni asin . Tawng tam lutuk pawi zia chu a lo lang ta . Inchhir mahila awmzia a awm tawh lo , pawi tur zawng zawng a pawi zo tawh . Zep lohah chuan , he tiang mipa chapo leh mahni thu duh , midang dinhmun hriatthiamna reng nei lo bulah hian ngaihdam dila min chhawr leh hram tura ngen chu thih hrehin ka hreh a, ka tih ngai loh tawp tur thil a ni.


Ka dar tawn tawna a vawnna chu theh sawn lawpin hriam hrak hian a emerald mitmeng hring nghalh chu ka melh let ve kha kha a . Ka tlawm a ni tih lantir chu ka thil duh loh ber a nih vangin khabe tipoh lah a hawi sang vah chung chuan , "Chuti a nih ahnu ka thawmhnawte pack felin ka chhuak mai ang e ." tiin ka inher ta hmak a .


A nui hul huk a , "Chu, hmeichhe nun tawp tak leh mahni taksa hralh thin i nihna chu i pha ta bik lo maw ?" a ti ta khauh mai a .


Ka thinrim lutuk chu ka ding chawt a , ka kut chu ka humruh ngawt ngawt a , kungfu thiam chu ni ila chuan ka vir let zawk anga a khabe kual invuah nghet tlet tlawt tak maiah chuan ka back kick chiang ngawt ang . "Miin ka nihna ni loa min puh chhiata ka insawifiah hnu pawha min la rin duh loh cheu chuan an laka insawifiah nawn tum reng kha ka bat a ni lo . I duh duh chuan min ngai rawh pawi ka ti hlawl lo . Nanga min ngaihdan khan ka cell pakhat pawh a tawk che eih lo . " ka tih khum bawih bawih a . Min ban a tum ta sa sa tawngkam insumkar ka tum buai peih bik tawh lo .


" Hmeichhe chaltlai leh nasa tak i nin reuh hi le ! "


" Ni , min dawrtute mizia ang hi ka pu thin . Ka lakah mi an that chuan an chungah ka tha ve mai . Mahse chaltlai leh zahpah lo zeta min biak chuan , an mi biak ang chiahin ka thungrul thin . " ka ti hmak a .


" I leiba i rulh hma chuan awlsamtéa kaltir che ka tum hauh hleinem . I chhuak dawn a nih chuan ka motor siamna man hi rul zo phawt la i chhuak dawn nia ." a ti rum ta ul a , a mitmengah chuan nelawmna chhete mah hmuh tur a awm lo , a taksa chu insangmarin a meng vawt ruih mai a .


" Hrep tak chuan !"

"Manila-ah min zui haw anga , i ba rulh nan thla khat chhung chu ka kiangah hna i thawk phawt ang . I duh taka leh ...ka la chhawr zawm duh tak che aleh ka la chhawr zawm leh zawk ang che . "

Ka thinrim lutuk chu ka puakkeh lo chauh a ni . Ka insum hle loh chuan buaina lian tham zawk ka hmachhawn dawn tih ka hrechiang a ni . Ka inpet ruh fan fan a , "Inbengdai rawh, khawngaihin , Zozo , inbengdai rawh . I nu pawh kha nu zaidam leh nunnem tak a nih kha ...amah anga zaidamna leh nunnemna tam tak i neih kha ..." tiin ka infuih ru mawlh mawlh a .

Hrep taka ! Aliya vang vek a ni ! Engkim hi amah vanga thleng vek a ni. Ani kha lo hmelhriat malek ila tha tur ! Hmelma paw'n an tih duh loh tur thil kha thian tha tia a koh lakah a ti duh a ni sia, ka haw ngawih ngawih a ni . Amah vanga buaina ka tawh zozai hi keimah chauh chuan ka tal chhuak thei ang ngem ?

" Ka thu sawi chu i hria em ? Eng nge i thu tlukna ni ta ? "


Huatna a khat mitmeng chuan ka melh hriam hrak a,"Mi zawng zawng chunga leng emaw inti hian ka thu tlukna min zawt a maw ? Thu tlukna siam thei dinhmunah min dintir em ni ? Aliya Garcia hi zawng hmu thei ngat ila chuan engkim hi a danglam vek mahna . " ka ti kha fak a .


" Vawiin atangin ka nu enkawltu tur hmeichhe fel leh tha tak ka zawng anga Wednesday-ah khian Manila-ah kan let ang. Chumi tur chuan lo inpuahchah ang che. A chiang tawk em ? "


" Awle , Mr Sadam Hussein !"


A nui hul huk a , "Chutiang em em zawng ka phu lo , Babae Kasi ! " a ti hluk a , dawhkana ka theitui dah chu pan pheiin noah chuan a thli chhuak a , a in nghal khawlh a .

" Mi nunrawng , mahni duhdan chiaha kal tum leh mahni thu duh lutuk , mahni ngaihdan chiah dik emaw ti , chapo leh luhlul ! "

" Eng tin maw ?? "


Oops ! Ka rilruin ka sawi emaw ka tih kha ka lo sawi chhuak pek a nih chu ! Ka hmui ka hup leh hnuhnawh nain ka sawi tur ang ang chu a ri chhuak vek tawha , a hre lo turin a hre vek tawh . Hria pawh nise eng nge pawi ? A nihna dik tak a ni miau alawm .


" Eng ang fakaua nunrawng leh luhlul nge ka nih chu kan chen dun hunah i la hre chhawm mai ang." a ti nghut a .


" Ni e , lung milim ang maia lumna nei lo , nelawm lo leh ngeng i ni ." tiin ka inher hmak a , in chhung lamah chuan ka pen lut ta hmawk hmawk a . In chhung ka luh chuan Mr Mendoza leh Madam Mendoza te pawh chu an lo tho chhuak tawh a . Hmel hlim pu lui hramin , "Good morning Mr and Madam Mendoza ." zangkhai thei ang ber chuan ka ti a .


" Good morning !"


" Morning !"


Madam chuan , "Nizan in-party chu a nuam bawk emaw chu ? Mipa hmelhriatte i tawng thar em ? " a ti siam siam a .


" Ah....nuam fahran lo ...hmelhriat pawh ka nei lem lo . "


" A nih chu mawle ... vawiin lamte len chhuah leh i tum em? Nizan lamah i thiannu bulah riah i tum emaw ka ti a ..."


" Nia ...ka riak leh ta lo mai a ni ."


Chutih lai chuan Iñaki Mendoza ruangam sang leh lianpui mai chu bathrobe hain a rawn pen lut thauh thauh a . "Magandang umaga, tatay , nanay ! " tiin a nui sang a , an hnam tawng a hmang chu a nalhin a inhmeh tak zet a ni .


Mr & Mrs Mendoza mitmeng atang chuan an fapa neihchhun chu an chhuangin an duat ngawih ngawih a ni tih hi a hmuh theih a . A fapa kuah tura ban pharin Madam chuan , " Tun aia zing hian min tlawh thei hlawl lo em ni , Aki ? " a ti chul a .


Iñaki chuan a nu chu kuahin a hnungzang chu a bensak thap thap a , " Ka buai zia chu i hriat kha , nanay . Tun atang chuan zing thei ang bera rawn kal ka tum tawh ang . " awka dam thluam chuan a tih chuan Madam hlim hmel chu hmuhnawm tham a ni .


" I thu sawi i rawn tihhlawhtlin theih chuan a lawmawm ber ang . E , taka Jojo , hei hi ka fapa Iñaki a nih hi . Aki , min duat em em tu leh ka kut ke ber nula fel Jojo a nih hi . " tiin min hmelhriattir a .


Iñaki chuan a aw a han thian khurh a , "Nula fel tak maw ? " a'n ti nawn leh deuh ngat a . " Ka nanay tan nula fel tak i ni chu ka lawm khawp mai ." tiin a emerald mitmeng chu a de sawr mai a .

Za lo zet hian ka nui lui hak a , " Ka lawm e , Mr Mendoza junior . " ka ti sap a .

" Iñaki tiin min ko thei ang . Mr Mendoza han tih deuh duah hi chuan ka tar ruih hian ka hria ." tiin a nui huk a .


" Ka lawm e , Mr Mendo..... Iñaki..."


Mr Mendoza senior chu a lo nui huk a , a fapa chu an mahni tawng chuan biain eng eng emaw hi an sawi dun mawlh mawlh a . Ka chanchin te an lo sawi takin ka tia ka awm hi a nuam lo ru hle mai a . "Min lo hrethiam lawk mai aw , Madam . Vawiin chu ka chawlh ni a ni bawk a , chhuah lawk ka duh a . " tiin chhuanlam siama chhuah bo mai ka rilruk a .


" I day off ni chuan i duhna hmun hmunah i kal thei alawm ...min dil kher a ngai hleinem . "


" Ka lawm e . " tiin ka pindan lamah chuan ka phei nghal hlawk hlawk a . Diktak chuan ka zu rui chahthlak chungchang te kha an sawi palh ka hlau a ni . An tawng chu hre lo mahila ka awm laia an sawi aiin ka awm loh laiin ka chanchin chu sawi zawk se ka duh a ni .


Ka room ka thlen chuan ka thawmhnaw thlakin jeans hlui tawh lam leh Tee puan deh nuam tak chu hain chhuahvah ka inpeih chu a ni ta der mai . Len chhuahna tur nei hauh lo mahila Iñaki nen in khata awm reng ai chuan park vela teihawi mai mai pawh ka thlang zawk a ni .


Ka room kawngkhar chu tu emaw hian a rawn kik dat dat a , "Lo lut rawh ." ka sam tawn that mawlh mawlh pah chuan ka ti a .


Iñaki chu a rawn lut ta hlawl mai a . Mak ti tak hian ka lo en hau a , "Eng nge i duh a ?" nelawm fahran lo hian ka ti a .


" Tlan bo tumna rilru i pu a ni ti raw ? Ka mit hmuh ata i kal bo hi ka rem ti hauh lo . Ka tel lo chuan he in hi i chhuahsan dawn reng reng lo . " a ti nghal tawl mai a .


Beidawng tak hian ka thaw hak a ., " Kei hian tlan bo tumna emaw tlan bona tur reng reng ka nei lo tih hi lo hre ve mai mai teh ." ka ti hrawk a .


He ti khawpa hausa si hian eng vanga ka tlan bo hlau em em nge a nih le ? Ka thin a rim thar leh thut a , " Enteh, Mr Iñaki , sum tam tak i nei a , i car chhia siamna tur chu eng vanga chuti taka chán hlau nge maw i nih le ? I car chhia siamna tur chu nang chuan eng tham mah a ni dawn si loa , minute khat chhung pawh tling loah i la lut em em dawn si a .. Mi hausa uikawm an tih diktak i ni . Sum tlemte um a hetia han phet buai em em mai . " ka ti ta khawl mai a .


" Peso ( Phillipines pawisa ) pakhat tel loin peso sangkhat a tling thei hleinem . Sum hlutna i hriat phawt loh chuan i hausa thei ngai lo ang . " tiin ka room chhung chu chik lutuk mai chuan a melh kual a .


Banga thawmhnaw khainaah chuan ka bra leh kekawrte ka khai chu puanin ka va khuh tha sawk sawk a , "Nula pindanah mipa an lut mai mai ngai lo aw ." ka ti nghat a .


" Chuti si eng vanga lut tura min ko nge i nih ? "

" Nangmah i nih ka ring hleinem !" ka ti hlar a .


" Ka nu kha chuan hmeichhe fel tak hmuhin a hmu che a nih kha ti raw ? Mi rilru hneh thei tak leh mi inthup thiam tak chu i ni chiang bal . "


" Min elsen tura rawn kal i nih chuan chhuak lehnghal rawh ."


" I tlan bo mai loh nana veng tur chea rawn kal ka ni . "


Thinrim tak chuan ka melh tur khai mai a , "Ka tlan bo dawn lo ka tih tawh kha . Aliya thil tih mah nise i car siam man chu ka tum em em ang . Mizo hnam hi hnam rinawm leh dikna ngaina hnam kan ni asin . I awih lo pawh a ni thei kan ramah chuan nghah loh dawr pawh kan nei thluah asin ." ka ti vei lar lar a .


" Nghah loh dawr chu eng nge ? "


" Kan ramah chuan lonei mite chuan kawngkamah bukte sain an thlai thar chhuahte chu an zuar thin a , hna thawh an ngaih vangin an dawr pawh chu an nghak hman lo a , an thlaiah chuan a man zat ziakin pawisa dahna tur bawm an dah bawk a . Chung thil lei duhte chuan an lei a , a man chu bawmah chuan an dahsak mai a , a nawi inkir a ngaih leh an inkir mai thin . Chutiang hnam chu ka ni a , ka tlan bo lo ang tih ka hrilh a che ."


" Wow ! Ropui hle mai ! Chutiang khawpa hnam rinawm chu hriat tur an vang khawp mai . Mizo hnam chu khawi ramah nge in chen ? "


" India ram hmarchhak state pakhat Mizoramah ."


" Indian hmel i pu lo hle mai ."

Ka dar ka chhinsan ak a , "Kan thlahtu kan pipute kha Myanmar ram Chin Sate atanga thlang tla zela India ram hmarchhak state lo ni ta Mizoram a inbengbel an ni a , chuvangin Indian dang nen chuan kan hmel pawh a dang alawm . " tiin ka hriat ve dan chu ka hrilh ta a

" Indian ka hriat ho ai chuan Burmese chu i ang zawk daih ." tia nui sukin , "Khawiah nge chhuah i tum a ? " awki dang daih chuan a ti a .


Ka dar ka san ak a , "Ka hre lo . Nang nena boruak thuhmun kan thaw lut ringawt pawh hian ka thawk a tichham thei mai dawnin ka hria a , vah harh ka mamawh a ni . " ka ti mawl tawp a .

A nui suk a , " I frank hle mai . Ka boruak hip ang hi i la hip chhunzawm ve zel dawn niin a lang bawk sia i thawk chu a chham mawlh mawlh dawn a nih hmel ." tiin a kiai suk a.


Ka sam ka tawn zawh chuan lip gloss ka intat leh nawk nawk a chhuak turin ka inpeih a ni ta der mai . " Ka chhuak dawn a nia , a neitu awm loa pindana i tawm duh reng a nih loh chuan i chhuak ve nghal thei ang . " ka ti vawt raih a .

" I kalna tur hmunah chuan ka thlah ang che . "


" Tlansan ka tum berin min zui zel a nih chuan eng nge awmzia a neih ang ? "


" I tlan bo mai loh nan ka ven che angai alawm ."

A tha alawm ! Amah ber a inhuam a hnu taxi fare ka save a ni mai lawm . Aliya nen kan kalna thin Rust 'n Wood-ah chuan ka kal leh a , Iñaki-a ruangam sang pui mai chuan min zui ve zel avang chuan a mi uap a nain mi a dip run mai a.

Kan ei tur duh zawng min zawt tura waitress rawn kal chuan Iñaki lak atang chuan a mit reng a la sawn phal lo emaw tih mai turin nui ver verin a melh vang vang reng a , " Eng nge induh ang , sir ?" aw ngaihno bei tawp hian a ti a .

" Torta leh Longganisa ka lo ei ang e ."

Kei chuan , " French fries ka lo duh ang . Enteh miss , heta ka lo kalpui ve thin Miss Aliya kha i hria em ? " tiin ka zawt ta chawt a .


Iñaki lak atanga mit la sawnin min rawn melh ve ta hram a ."A hmel chu hria e , a hming erawh chu i sawia ka hre chiah ." hlim hmel pu sarh hian a ti a .


" Oh ...a nih chu . I lo hriat takin a in awmna zawh che ka lo rilruk deuh a ..." beidawng tak chuan ka ti a .


" A pawi ka ti lutuk ka hre lo hlauh mai . "

Kan ei tur min rawn pek hnu chuan inbe hauh lo chuan kan ei mawlh mawlh a , "Aliya awmna hria ila chuan engkim a fel vek mai tur . " ka ti ta halh a .

" Theihnghilh rawh ! "

Iñaki chu ka melh deuh ram a , " I tan chuan sum tlemté a niin buaina thamah i ngai lo a ni mahna ka tan erawh a ni ve lo . Chu loah ka tih ni hauh lo kha ka tih anga lang ta tlat hi a na ka ti . " ka ti chiam a .


" A nih chuan thla khatah min rul zo nghal loin thla khatah tlem tlemin min rul mai dawn nia . "


" I ti tak tak maw ?? "


" Aw , ka fiamthu lo ."

" Ka lawm hle mai . Tlem tlema ka rulh theih che chuan ka tan pawh a ziaawm phah nasa dawn a . "

" Wednesday-ah Manila-a chhuk tur kan nih kha hre reng ang che . "

" Aw le ."

" A nih leh he Sagada khaw chhehvel hmun mawi lutuk hi i fang tawh em ? "

" Aih , la kal tawp nang ! Hun ka nei lo thin em a ."

" Ei zo la ka fan kualpui ang che . He ti khawpa hmun mawi leh nuam hi engtin nge i la fan kual loh theih ka ti a ni . A hmu tur ringawt paw'n khawvel hmun hran hran atangin an rawn tlawh ruih ruih reng a . Kan ram rohlu hi i ngaisang lo ve thlawt niin ka ngai ."


" Chutiang a ni lo - hunawl ka nei lo alawm ."

" Echo Valley , hanging coffins leh Underground river te ka tlawh kualpui ang che . "

" Hanging Coffins chu ka rap tlat . "


" Eng vang chuan ? Hmuhnawm leh dangdai tak a ni asin ."

" Kuang inkhai uai fur mai chu a rapawm alawm . Kuang ruak ringawt pawh ka rap tawh nen ." ka ti hlak a .


" Min tina thei hauh lo tur mitthi tawh aiin min tina thei mi nung lai ngeiin an hlauhawmin an lakah fimkhur a ngai zawk tih hre reng ang che . "


" Ka hlau pawh a ni em em lo ...ka rap ! "

A nui hawk a , " Chu bak bak ! Thuhmun reng a nih chu . A hmun ngeiah hmu la i rapna chu lakboin a awm mai ang . A mawina leh a dangdaina chuan a hneh hle zawk ang che ."

" Ka beisei." ka ti ta sap a.

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » July 25th, 2021, 6:26 pm

CHAPTER : 3


Sagada hi Phillipines rama Mountain Province a awm niin 83.32 Km² a zau a ni a . Kum 2015 census-a a landan chuan mihring 11,127 leh chhungkaw 2641 chauh a ni nain a hmunhma mawi tak vang hian khualzinmi a hipin mikhual an awm deuh reng mai a ni . Ampacoa tlang dungah phei chuan trekking hi an awm zut mai bakah ramdangmi thahnem tak hian an tlawh reng bawk a , khualzin an tam vang hian eizawn pawh a har lo hle .


He ti khawpa khualzinhoin an tlawh nasat leh hmun hmingthang tak tak tam mah se ka la kal hlawm ve hauh lo mai . Iñaki-an fanpui min sawm pawh chuan ka phur ru phian a ni . Ka inthuamna chu ramhnuai han vahpuina'n pawh samkhai tak anih vangin ka inthlak buai duh lo a . Dawrah chuan tui thianghlim um eng emaw zat , theitui leh ei tur hi a lei teuh a , a backpack-ah thunin a ak nawlh a , nisa lutuk laka invenna'n lukhum hmathlawk hi kan pahnih khum tur a lei a , kan inpeih chu a ni der .

" A hla viau em ? " tiin ka zawt a .

" Hla lo e . Town centre atanga minutes sawmhnih sawmthum kal vel lek alawm . I huphurh nghal mai elaw ?" tiin a biangsum veilam khuar kak chuan a nui a , a lukhum hmathlawk khum chu a inhmeh hrep leh nghal a .


Ka khabe chu tipoh lahin ka dak vah a , "Huphurh lo e . Mizoram hi tlangram a ni a , keini tlangmi tan chuan chhukchho kal leh kea kal tih vel chu hneh tak kan ni . Trekking leh rock climbing-te hi kan misa phian asin ." intithei taka ka tih chuan a nui sak a .


Church of Saint Mary The Virgin bul thlan mual chhak atanga kal tanin kawng chep tak chu kan zawh thla tan ta a . Echo Valley pan tur leh haw lam chu kan insulpel zut mai a . Rei pawh kan kal hmain Echo Valley chu kan lut tan der mai , a hmun a nalhin lung inthuahthip dante chu a mawi dangdai raih mai a . " I duh tawka ringin au rawh , i aw thangkhawk khan a rawn chhawn vat mai ang che . " Iñaki chuan a ti a .


Ka kut pahnih chu khawrin "Zozo , vanneihna zawng zawng nei vek ang che ." tiin ka awrawl tawp chuan ka au a , ka aw thangkhawk chuan ," Vanneihna zawng zawng nei ang che che che che.." tiin min rawn chhawn raih raih chuan ka nui ta hawk hawk a .

"In hnam tawng em ni ? "

" Aw . duhsakna ka inhlan a nih kha . Aw thangkhawk riin vanneihna min hlan let kha ka duh alawm . " ka ti et a .


" Ni e , tawngkam mawi tak kan hman chuan thangkhawk ri chuan tawngkam mawi takin min rawn chhawn let a , tawngkam chhia kan hman chuan tawngkam mawi lo tak kan dawng let ve mai a ni . Chutiang bawk chuan hringnun pawh hi a ni , kan hawihhawm viau chuan midang pawh kan lakah an hawihhawm mai thin ." a ti ril raih a .

Dik ka tih em vang chuan ka lo bu nghat a .

Tui han in khawlh pah chuan ," Ka naupan deuh lai kha chuan ka hlim em em leh ka thinrim chang hian he hmunah hian awrawl tawp tawp a au turin ka kal thin ." a tih chuan ka lo nuih hawk hawk a .


Hanging coffins kan thlen chuan ka phone camera chu ka hmet mawlh mawlh a . Kham panga kuang inkhai fur mai han hmuh chu a mak danglamin eng emaw kawng tak chuan a rapawmin tirilah min tham sung sung thei hial a ni . Mahse a taka ka hmuh hma ai khan a taka han hmuh meuh chuan tlemin ka rapna pawh a zia deuh zawkin hmuhnawm lamah a kal ta mah zawk . "Kuang chhungah khian mi ruang a awm tak tak em ?" ka ti he haw a .

" Awm tak tak e . Mi thenkhat chuan rohlu awm ang ten an sawi thin a , mahse rohlu engmah a awm lo - ruang tih chauh lo chu."

" Tunlaiah hian khitianga inphum khi la ching ta se i duh ve ang em ?" mawl hmel zet chuan ka ti a .

" Nupui pasal nei chauh lo chu khitiang khian an invui ngai lo . "


" A nih chu ..."

Duh tawka thla ka lak zawh hnu chuan kawngtum zimté chu kan zawh thla zel a , Pine thing hnah ro tla vang chuan kawng chu a nal reuh hle lehnghal a , hnah thel ro nal tak chu rap leuin ka tlu thelh a, Iñaki chuan min lo kuah hman lo se chuan ka tlu chiang ngawt ang chu . Thing hmanga pal hung chu kal kanin kawng zim tak chu kan zawh leh mawp mawp a , kar loah Tui khawhthla mawi em em mai Bokong Falls chu kan thleng ta . Bokong Falls hnuaiah chuan dil fim mangkheng mai hi a tling hring nghalh mai a , kan han inphih dai vel a . A tui lah chu a vawt thiang em em mai leh nghal . Hei ngei hi a nih hi Sagada mawina thuruk chu ka ti rilru hial a .

Kan insil thlandaih hnu chuan buh hmun kan zawh leh char chara minutes sawmhnih hnu velah chuan Sagada Underground River luhna chu kan thleng ta mai a . Puk chhung thim ruih mai kan luh chuan a dai raih mai a , puk chhunga lui tui luang ri her her chu a mawiin a muanawm hliah hliah hian a hriat a .

Ka phone flashlight chu ka hmet eng a , puk chhung chu ka en kual vel a thla ka la mawlh mawlh bawk a . Lungte chu chharin luiah chuan ka vawm lut a , "Ka kal ve tawh ngei a ni tih hriatnan " ka ti sap a .

Puk chhunga lui dung chu kan zawh zela , a tawpah chuan puk chu zawh chhuakin pawn boruak eng uarh chu kan chhuak ta hlawl a ." A ropui hle mai !" ka ti chhuak hial a .


" Ram hrang hrang atangin heng lai hmun tlawh tur hian an rawn kal thin a , a hmuna awmchilh phei chuan tlawh ngei ngei tur . " a ti boh a .


" Ka hmuh ngai reng reng loh tur min tlawhpuia ka lawm lutuk ." tiin ka thaw ham ham a .


" Mipa ang maia inzo leh kawng kal thei i nih reuh hi , kawng nal leh awih chhengchhe deuhah pawh buaipui ngai hauh loin i awm thei a . " tia min fak zauh chuan ka lawm rilru hle a .


" Mizo , tlang mi , tlangrama cheng thin hnam ka ni ka tih tawh kha ." ka ti zang vah a .

Echo Valley kan thleng tih chuan warning pawh awm hlek lo hian thawklehkhatah ruah chu a rawn sur ta thut mai a , lung puk chheteah chuan min tlan luhpui a . Ruah han hun nghah pah chuan theitui leh ei tur a paiho chu kan eiin kan in ta a .


Ruah lah chuan ban mai a tum lo nen ka ning tan ta hle mai a , ka sana chu ka bih deuh chhen tawh mai . Iñaki chuan min lo thlir reng chu niin , " A sur bang vat mai ang . Thil reng reng hi kan nghahhlelh viau chuan a rei bik riau hian a hriat thin a nia . " a lo ti dam dap a .


Ka va melh vata a lukhum a phelhna lamah a sam dum hlap chu a hnawk deuh nuai a , a eng emaw ti inhmeh phian lehnghal . A emerald green mitmeng leh ka mit chu a intawng sak a , sen ap apin ka mit chu ka la sawn zal zal a .


" Hetia nghah chawrh chawrh ringawt chu a ninawm duh em a ..."


" India ram leh Phillipines chu kan dinhmun a inang deuh rengin International market-ah pawh kan pawisa hlut zawng a inang deuh reng a ni sia a , eng vanga kan ramah ber kher inhlawh duh nge i nih a ? Ram hausa zawkah pawh kal la hlawh a sang daih zawk dawn asin ." tiin min zawt deuh thut a .


" Ka rilru hian a pawh deuh pawh a ni mahna ." tiin ka dar ka san ak a . Ka kal chak chhan diktak chu BL actor ka duh em em Miko Gallardo vang a ni. Ram khata kan awm chuan hmuhfuh tum ka nei hlauh mahna tiin Singapore aia Philippines-a hna thawh thlang ta zawk kha ka ni. Miko aia hmeltha leh ngaihsanawm tak tak an tam nen i ti a ni thei, film-te hi ka en tam lo hle a, ka en chhun chu BL series a ni mai a ka tan chuan Miko hi ngaihsan loh rual a ni lo.

" Hmeichhe tan chuan mahni in leh lo kalsana ram hran daiha hnathawh chu a hrehawm ngawt hian ka ring."


" Tuarchhel a ngai alawm ."


Eng eng emaw min sawipuia ka rilru a lakpen chhung chuan ruahsur pawh a lo bang ve tain kan haw thei ta mai a .Kal lam ai chuan kan kal sawt thei lo deuh , ruahsurin kawng a lo nan nal deuh tak avangin .

In kan thlen chuan khua a thim dawn ruai tawh mai a , tui lumin ka inbual a , ka sil leh rawl lutuk tur min ven deuh ka ring a ni .


IÑAKI ' S P.O.V :

Ka inbual lai chuan ka rilruah Jojo-i ringawt chu a cham a , buaipui ngai hauh loa inthazo taka a kawng kal lai leh nisa em vanga a biang taitek mai te chuan ka thluak bur chu a luah ngut ngut mai . Khati khawpa mitmeng fiah kelkawl leh tlang rang mai khan dawt a sawi theih hi ka ring lo a ni .

A thiannu nia a sawi Aliya chungchang pawh kha dawt a nih ka ring lo . Eng tin emaw thudik chu ka hai chhuah a ngai a ni tih ka hria . Ka inbual zawh chuan ka insiam sawk sawk a , Police station lam pan chuan ka chhuak ta nghal a . Nizan lama ka car a sutna lai hmunah chuan dingin chiang zawk hian ka thlithlai kual vel a , CCTV hmuh tur reng reng a awm loh vang chuan Police chu ka innghahna awmchhun a ni tih ka hre ta a . Peng kawi tawh lo chuan station lam chu ka pan ding nghal a .


Station ka thlen chuan a hmun lo nghak officer chu ka naupan lai atanga ka sikul kalpui thin Dean-a a lo ni hlauh a , " I rawn lan ve khiah a . " tiin min lo bia a .

" Nizan lama car bo nia report inhmuh leh tak chungchang kha ka rawn hre duh a . " tiin a thutna min pekah chuan ka thu nghal a .

" A neitunuin a rawn la let leh tawh a nih kha . Kha nula chhe lo tak kha i kawplai a ni leh pek tawh em ni ? Khawi hmunah pawh hian nula hi i hung thleh thluah reng mai a nih hi maw . Kum a lo upat ve deuh tawh chuan i lerh pawh i bansan ve ka lo ring thla ngawt a ." nui huk huk chung hian a ti a .


" Kha car khan ka car a su chhia alawm mawle ..a neitunu phone number chu ka duh a nia , min lo pe teh ." ka ti a .


" Inbiak pawhna kawng tha tak a nih chu mawle ." la nui huah huah chung chuan a ti a . " Mipa KS an tih diktak chu i ni , Aki !"

" Tleirawl luck lai hun kan pel tawh a , lerh pawh ka peih tawh loh hi ." ka ti hluk a .

" Tak takin i car chu a su chhe nasa viau em ni ? " tih pah chuan Aliya phone number chu min pe a .


" Nasa lo e . " tiin a kuta lehkha them chu ka phawtthla nghal a , " Ka hmanhmawh deuh a , ka kal leh mai ang e . "


" Manila-a i chhuk hmain no dawm dun ila ? "

" Hun ka neih chuan le ."


" Mi hausapa i lo ni ta bawka kawm pawh kan kawm pha tawh meuh lo che a ang khawp mai , a dik em ?" vui hmel lek lek hian a ti nung nung a .

" Ka buai lutuk a hun hian min daih lo a nih ber zawk hi . A nih phawt aw .. hun ka neih chuan ka rawn call ang che ." tiin ka chhuahsan ta a . Diktak chuan Dean hi pumpelh hram ka duh chi a ni . Mipa ni chung hian hmeichhia aiin mipa bawk hi a duh zawk vangin min biak that a tum viau pawha ka pehhel hram hram thin kha a ni a , tunah pawh a laka ka rilru put dan chu ala pangngai reng vangin ka be chak teh hawrh hran lo .


The Sagada Lemond Pie House chu kan dawr Mendoza Electronics nen inhnaih tea awm a nih vangin ka chawlh ngunna ber a ni thin a . Chu hmunah chuan lutin Aliya number chu ka call ta a . Min rawn chhang rang hle leh nghal a . " Hello ?" a rawn ti zang vah a .


" Aliya Garcia i ni em ?"

" Ummm...aw...ni e ...eng thil nge ni ta ?" a awah chuan ngaihthat lohna tel chu hriat hmaih chi rual a ni lo .

" Iñaki Mendoza ka nia , ni zan lama i motor sut chhiat kha ka motor a ni a ,..."

Ka sawi zawh hma hma chuan , " Ka sut chhiat a ni hauh lo . Ka car kha mi sualin min ruksak a , an mahni thiltih a ni ngei ang ." a rawn ti nghal zung zung a .


Ka nui hul huk a , " I hriat angin kha accident tawhna bulah khan CCTV a awm a , chiang takin i chet dan zawng zawng kha a in-record vek asin ." tiin dawt ka hrilh ta a .


A insut ta hlap hlap a , "Ka tihpalh a ni e . Khawngaihin min ngaidam rawh . I motor siamna man chu ka tum vek ang ." a rawn ti nghal mawlh mawlh a .


" Mahni thil tihsual ngei pawh tlanchhiatsana mahni thiante tawrhtir duh mihring hi engtin nge ka rin theih ang che ?" ka ti khawl a . " Tunah hian Lemon Pie House-ah ka awm mek a min rawn hmu lo a nih chuan police-ah report nghal i ni ang . Report i nih chuan i chung chu a rip mai thei a ni . Zu rui chunga motor khalh , mi car sut chhiat , evidence ti chhiaa mi dang mawhpuh leh dawt hmanga i car bo thu i report vangin ." ka ti ngat a .


" Aw le , sir ...minutes sawmpanga hmain ka rawn thleng ang min lo nghak tawh aw khawngaih takin ." a rawn ti chul a .


Minutes sawmpanga pawh tling loah chuan a rawn lang nghal mai reng a . A hmel chu a tha reuh phianin a pian lah a fuh zek reuh lehnghal a . Ka bulah rawn thu chatin min rawn nuih tlawn nghal hle mai a. " Mahni thil tihsual pawm duh loa midang la mawhpuh zui hi ka huat zawng tak a ni ." ka lo ti nghal khawl a .


" Pawi ka ti lutuk , min ngaidam rawh . Kha tia tih kha ka tum pawh a ni lo a , pawisa ka nei lo nen ka rilru a buai lutukin ka ti ta mai a nih kha . "


A mitah tak chuan melhin ," I thiannu zu rui chatthla chu driving seat-ah i thuttirin seatbelt pawh i hrentir thlap a , inin biakna history zawng zawng leh i phone number nen lam i deleted bawk a , chu chu rilru buai thiltih a ni thei dawn em ni ? Rilru fim leh thluak phakar taka thiltih a ni zawk ." ka ti chang fak a .

" Chu chu a hrilhdan che em ni ?"

" CCTV-a ka hmuh dan ." tia dawt ka hrilh chuan a dang nghal sawp sawp a , Jojo khan thudik a sawi tih ka hriat phah ta bawk .


" Ka....ka...I motor siam man chu engzat nge ? Ka pe vek ang che ." tiin min rawn thut hnaihin ka mit lak tum tak hian min rawn nawk ta a .


" Ka motor siam man chu ka tum thei ." nelawm lo tak chuan ka ti a .


" Ka va lawm em , Sir Mendoza! Ka lawm lutuk . Eng tin nge ka rulh let ang che ? I duh phawt chuan zan hnih zan thum pawh i bulah ka riak thei ang ." sexy taka meng chung chuan a ti a .


" Hmeichhia mutpui tur ka mamawh a nih chuan ka mamawh ai tam ka hmu e . "

" Anih leh eng tin nge ka rulh let ang che ?"

" Min rulh let a ngai lo ang . Jojo hmaah hian i hmel hi inlan tawh lo la, biak emaw hmuh emaw pawh tum tawh suh ." ka ti ta hmuk a .

" Aw le , aw le ...ka theih zawng tak a ni ngei ang ." a ti chul a. "Chu loah min hmuh leh pawh duh se ka hmu ngam tawh lo hrim hrim ang . Ka thil lo tihah khan pawi ka tiin ka inthiam lo tak zet a ni."


" A tha e . I kal thei tawh ang . "

Lawm takin ka hmaah chuan a kun ngaih a , "Ka lawm lutuk , Sir Mendoza . Ka laka i thatna hi ka theihnghilh ngai tawh lo ang ." tiin a chhuak ta nal nal a .

Manila lama ka in min enkawlsaktu Pi Lucy chu ka nu enkawl turin Sagada-ah naktuka rawn chho turin ka chah fel hnu chuan in lam pan chuan ka haw ta a . In ka thlen chuan ka nu leh pa pindanah lut tlang nghal a .

" I chhuak emaw ka ti a ." tiin a lehkhabu chhiar lai chu dahin ka nu chuan min lo melh ha a .


" Ka rawn haw deuh chiah a ni . Enteh nanay (nu) , Joja hi Manila lamah hruai haw ka lo rilruk deuh a ...ka secretary emaw ka assistant angin awm ta sela ka chhawr tangkai hlein ka ring a ni ." ka ti ta phawng a .

" A tel loin engtin nge ka awm ang ? "


" Nangmah enkawltu tur chu nu fel lutuk nurse hna atanga bang tawh Pi Lucy ka chah mek a , naktuk hian a rawn thleng ang . "

Ka pa chuan min melh vung vung a , chutah nui sukin ,"A that nasat chu . Jojo tan pawh Manila chu a nuam zawk daih ang chu . Hmeichhe fel leh tha tak a ni a i chhawr tangkai thei khawp ang chu ." a ti ta a .

" Ka lawm e ,tatay (pa)"

" Engtik nge haw i tum a ?"

" Wednesday-ah khian a niang ."

" I chhuk leh hmain i lola leh lolo thlan i tlawh dawn lo em ni ? I tlawh khat tawh si a ..an thlan tlawh loa kir leh tum miah suh ." ( Lola = Phillipines tawnga 'Pi' grandmother sawina , Lolo = Pu)

" Naktukah ka tlawh ang e , tatay .A nih , mangtha phawt u le ." ka ti a .

" Mangtha le .''

" Ka kiangah hian lo kal hnai phawt teh ." tiin ka nu chuan min huia, a bul ka va pan chuan min lo kuahin ka chalah chuan min fawp zauh a , " Tui takin mu rawh aw, Aki . Mangtha le ." a ti a ."Nanay leh tatay hian an hmangaih em em che tih hi theihnghilh ngai suh ang che aw ."


" Kei pawhin ka hmangaih che u alawm ." tiin an pindan chu ka chhuahsan ta a .

Ka khumah chuan ka mu meng kur reng mai a , eng vanga Jojo hi Manila-a hruai phet tum nge ka nih ka inhrethiam bik chiah lo . Diktak chuan amah ai tha secretary pawh ka nei a , in chhung min enkawlsak tur lahin Pi Lucy a awm bawk a , eng vanga thlak duh tlat nge ka nih ?

Ka tlangval tirh vela nula ka kawp kual nasa lutuk ka nuin min hauh tuma lola thu sawi kha ka bengah a rawn ri nawn leh a , " Hengte chu tleirawl lai dan alawm , a upa ve deuh anga a reh mai ang . A ni ang mipa hmeltha hi chu hmeichhia pawhin an zar buai peihin an chhaih ler vat zel a nia ." tiin min lo chhan a nih kha .

Lola nen kan pahnih chauha kan awm hnuin , " Lola, kei chu hmeichhia hi duh tak tak ka neih pawh ka inring lo . Nuam ka tia ka kawp kual mai mai ani , ka thinlung tak taka duh hi ka nei a nih chuan eng tin nge ka hriat ang ?" ka ti a .


" I hmeichhe duh tak i tawn hunah chuan nangma'n i duh a ni tih inhre lo mahla i thinlungin a thlang nalh mai ang . Eng anga nasa pawn kalsan che a tum a nih pawhin i kianga awmtir dan tur ngaihtuahin i phi ruai mai ang . Chhuanlam eng eng emaw siamin uaibeh dan ngawt ngaihtuahin i hmanhlelh mai ang . Chutih hunah chuan i thinlung kha ngaithla thin ang che ." tiin ka samah chulin min nuih hawk hawk a .

A nih chuan lola thu sawi kha a dik tak tak a nih ngai chuan Jojo hi ka thinlungin a thlan hmeichhia chu a ni dawn tihna em ni ang ? A ni thei lo ang . Zuruih ching mi a nih vangin ka nu enkawltu atan ka ring zo loa lak hran ka duh tihna a ni zawk mai lo maw ? Chu ti si engah nge he ka thinlung phekah hian kha a mitmeng dum fiah kelkawl kha a cham tlat a ??

Ka muthilh theih tak lawk lohah chuan ka tho chhuak a , pool lamah chuan chhukthlain mei zuk pah chuan van sang taka boruak thiang kuarh mai leh arsi pe tuarh chu ka thlir voh voh a .

Chutah ka beng chuan hmeichhe tawng thawm ka hre ta a , kan hnam tawng emaw English emaw pawh hmang loin ka tawng hriat ngai loh a hman danah Jojo a ni tih ka hre mai a . He lai hmunah an hnam tawnga biak tur tumah an awm bawk si loa phone a hmang a nih ka ring thiam ta mai a . Ka meizial chu ka hip kawk kawk a , tunang hunah tu nge maw a biak ang le ? A bialpa a ni mai ang em ? A chhan ka hre lo ka thin a rim thut a , thawm lo chhuahna lam pan chuan ka pen phei buan buan a .

Ka thawm hria a lo hawiin a eng emaw hi a sawia a phone hman lai chu a dah ta nghal a . Mut kawr dahlau tak hi hain a sam dum hlap leh ngil siau mai chu a hmai hual velah a uai thla hniang mai a , electric eng paw ruai hnuaiah chuan lasi nula ni mai awm hian a lang duhawmin a lang no serh mai a , ka va pan hnai ruak a , " Tunang zan reiah tunge i biak a ?" ka ti nghut a .

" Ka chhungte ."


" Tun ang zan dar 12:12-ah hian maw ?? "

Min rawn melh he haw a , "Kan ramah chuan zan dar 9 : 42 chauh alawm ala nih. Zan rei pawh ni se ka be thei tho alawm ." a ti sak a .

" Tunang zan reiah chuan mipa bak i biak ka ring lo a ." ka ti ta ngawt a .


" I ring dik a nih chu."

A thu sawi chuan min deng deuh dawt a , "Engtin maw ?" ka ti nghut a .

A nui sak a , " Ka pa ka bia alawm ." a tih chuan ka thaw deuh huai a .


" Naktuk hian nangmah thlaktu tur a rawn thleng tawh dawn a . " ka sawi tur hre lo chuan ka ti leh ngawt a .


" A that nasat chu ..."


" In tur i duh em ?"


" Aih , ka lawm e . Mut mai ka duh tawh zawk ."


" A nih chuan ...muttui mangtha le."

" Mangtha ." tia inherin in chhungah chuan a lut ta nghal a .


A kal liam tur chu ka thlir zui vang vang a , zan boruak chu vawt ta sawng sawng leh reh ta vawng vawng hian ka hria a, ka mal ta riau a inhriatna chuan min ti khawhar nghal rawih mai.

*****

Ka phone chhia khan ka thawnthu ziah zawhsa pakhat leh ka la ziah zawh loh thawnthu pathum chapter eng emaw zat a chhiatpui a, ka ui lutuk kha nutling mittui a tla thei alawm.

Phone leh computer te hi khawl thil niin kumkhua daih tura siam a ni loa chhe thut thut thei a ni tihhriain i thil pawimawhte kha google account-ah i save a nih pawhin i google account leh password kha chhinchhiah hram rawh aw. Chuti lo chu keimah ang hian i mawl leh àtman i tel ve mai ang. Fimkhur loh leh ngaihsam lutukte hi a tha lo, pawi tur zawng zawng a pawi hnua inchhir leh hian awmzia a nei silo.

Chhiar nuam vek u..chuan chuan..invaiin Mahal na mahal kita❤❤❤


Thil pakhat leh chiah aw...naktukah thawnthu ka rawn dah dawn lo a nia. Sunday tlai lamah ka rawn dah ang. Hmangaih vek che u...Mahal kita @ All😘😘

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » July 25th, 2021, 6:26 pm

CHAPTER : 4


Vawiin lam ka kal hah lutuk vang nge ni ka muhil hleithei tawp lo mai a , khumah ka mu thla chiah tih chuan ka harh tulh tulh emaw tih mai tur hian mutchhuak rau chuan min thlawh bosan chiang kher mai . Ka muthilh theih tak lohah chuan fb-ah lutin eng eng emaw ka chhiar kualna lamah chuan group pakhatah hian khawchhak lam , a bikin Singapore-a Mizo hmeichhia inhlawha kalte deusawhna lam hawia thu post ka hmuh chuan ka sa deuh zak mai a . Engtin emaw tak khak deuh fak paha na taka chhanlet tum chuan ka type zaih zaih a , ngaihsak duh leh phut vanga post siam mai mai tih hi ka rilruah lo lutin ka thu type sa pawh chu ka delete leh ta zawk a . Ka va comment anih chuan a duhthusam ka tihpuitlinsak a ni dawn sia, ka mi ngei zawng duhthusam tipuitlingtu nih ka duh tak loh avang chuan ka chhanglet buai peih ta lo a . Hetiang post siamho hi chu tuman chhanglet lo ila an post an post peih lo .


Ram danga maid-a kal hmusit em emte hian eng rilru nge an put ang le tiin ka ngaihtuah zui rauh rauh a .Kan ram hi indodelh ni ila chuan maw mahni hmangaihte kalsana mi rama chhiahhlawha tan chu tuman kan chak zawk zawk bikin ka ring lo . Mi ek in tifai emaw mi hnawmhnawk phiat emaw mi thawmhnaw bal su pawhin inhlawh ila eng nge pawi ? Pawisa hlawh chhuak tur hian hna hniam leh zahpuiawm a awm lo : kan zahawmna kan hralh a nih ngawt loh chuan tiin ka inngaihtuah rauh rauh reng a . Hetianga social media lama midang hmuhsit chingho hi a takah inhmu ta ila khaw khat chu sawi loh veng khat pa rawnkai leh mi pangngai tak an awm ka ring lo.


Zing khawvar lamah chuan ka muhil ve thei ta chauh a . Ka meng rei bawka zahthlak khawpin ka la tho tlai zui mawle .


Inthiam lo tak hian Madam Mendoza room-ah chuan ka tlan lut nghal a , a lo awm tawh loh danah chuan a tho daih tawh tih ka hrethiam nghalin ka inthiam lohna chu a nasa sauh a, thawk la halhin ka sam chu ka tham tawn tawn a . Choka lamah lutin Mrs Torres chu ka melh zauh a , " Thoh ka hai chiang hle mai . Khawiah nge Madam hi a awm a ?" ka ti nghal zung zung a .


Ka inthiam lo tih chu hrethiamin ka hnungah a rawn beng thak thak a ,"A pawi lo, a pawi lo .Huanah Pi Lucy'n a nawr chhuak tawh alawm . Mr Mendoza chu dawrah kal tawh , Master Iñaki chu a lola leh lolo thlanah a kal." tiin min hrilh a .


" Pi Lucy chu tu nge ?"

" Madam enkawltu tur nurse ."

Ka thawveng huai mai , Iñaki-an a nu enkawltu tur a chah chu a lo thleng tawh a nih chuan ka tan buai chiai viau chhan tur a awm lo e. Amaherawh chu zing dar 10 hnu lama thoh chher chher mai chu a zahthlakin a inthlahrunawm pah reng .


Breakfast chu ka ei nghal mawlh mawlh a, ka inhnawh puar hnu chuan Madam hmu tur chuan huanah chuan ka chhuak ve ta nghal a . Ka hmel alo hmuh ve leh Madam chuan min lo nuih var var a,"Morning, Jojo ." aw zangkhai vah hian a ti a .


"Morning !"

" Hei nangmah thlaktu tur Pi Lucy a nih hi ."


Nu valai hmel vantlang tak leh ngilneih hmel tak lam chu hawiin, "Ah..good morning ,Pi Lucy ! Jojo ka nia ." nui sang hian ka ti a .

" Morning ! Kan awmna hmun kan inthlak dawn a ni awm a , Aki bula i awm chuan artui siamsak ngai miah suh ang che ." a ti nghal seuh seuh a .


" Oh , engnga ti ? "

" Allergy a nei a , artui a ei chuan a vualin a thak vak zel a ."

" Aw , a nih chu mawle . Hriat reng tur a nih chu ." ka ti sap a .


"Vawksa leh bawngsa hi a ngaina em em a, thingpui leh coffee aiin bawnghnute leh theitui in a duh zawk ziah bawk ."

" Min hrilh lawk avangin ka lawm lutuk , ka tangkaipui viau ka ring a ni ." ka ti sap a .

Chutih lai chuan Iñaki chu a rawn lang ve hlawl a ," I tho ve thei hram maw !" a ti a .


Inthiam lo tak chuan,"Nia, nizan lamah ka muhil thei lawk loa thoh ka hai phah a nih hi . Pawi ka ti tak zet a ni , hetiang hi a thleng nawn tawh ngai lo ang ." ka ti niah niah a .


A nui suk a , " Nimin lamah ka vah chuahpui lutuk vang che kha a ni ngei ang . Hah lutuk leh taksa a chauh lutuk hian muthilh bawrh bawrh zawk awm tak a nihlaiin muthilh hi a harsa zawk thin asin ." ka rin loh deuh chuan a ti ta thluam roh a . "Breakfast i ei tawh maw ?"


" Aw, ei tawh e ."


" Tho hma la chuan Kiltepan view point-ah kalin ni chhuak ka thlirpui ang che ka ti a nia ."

" Heta tang pawn zing ni chhuak chu kan thlir tuktin tho alawm ." ka lo ti zauh a .


" Kiltepan atang khian zing ni chhuak hi a mawi danglam bik asin . 'Kiltepan atanga zing ni chhuak i la hmu lo a nih chuan khawvel thil mawi ber ber ka hmu kim tawh ti miah suh ' tiin an sawi thin a ni . " tiin uar thiam tak hian a han fak a .

" Oh , ka chan ropui hle mai ."


" Eng tik hunah emaw chuan ka la kalpui ang che . "

" Naktuk zingah ti ila ?"

" Pi Lucy-i a rawn thleng tawh bawk a vawiin tlailama chhuah mai ka lo rilruk deuh a ." tiin a nu chu melhin "Nanay , vawiina haw mai ka tum asin . Hna ka ngahin ka awm bo rei lutuk chuan a dik lo zawk ang ." a nu bul chair-a thut pah chuan a ti a .


Madam chuan a kut chu lain a chul hliau hliau a ," Tatay i hrilh tawh em ?" a ti thuai a .


" Aw , Lola leh Lolo thlana ka awm lai khan kan inbia a, ani paw'n rem a ti a ."


" Min hawsan daih chuan ka va ngai dawn che ve a ."


" Kei pawhin ka ngai che alawm. Theih anga ranga rawn kal ziah ka tum tawh ang ."

" Manila i thleng anga i tui leh tlut anga thla eng emaw zat hnu lamah bak i hmel hmuh tur a awm pawh ka ring lo e ." Madam chuan vui hmuipu lek lek hian a ti a .


" Teuh lo mai , nanay , min ring rawh , ka rawn tlawh leh thuai ang che u ." tiin a nu darah chuan kuahin a biang chu a nul thuak a .


" Chu chu i tiam chiah maw ?" tia nui har harin a fapa neihchhun biangah chuan a chulsak hliau hliau a .

" Tiam chiang e ." a ti a , ka lam rawn hawi pahin ," Jojo, nang pawh i thawmhnawte lo va in-pack fel la , kan chhuak mai dawn nia ." a ti sup a .

" Yes , Sir ." tia inher vatin in chhung lam chu ka pan ta nghal mai ka tum lai chuan Madam Mendoza chuan min lo au a, ka pan phei vat a.

Min lo kuahin," Ka ngai dawn ngawt mai che. Ka hnena i rawn thawh chhung hi la rei lo mah se kan chhungkaw zinga tel ang maiin ka ngaina hman che a ni." a ti dam raih a.

" Ka lawm e, ma'am. Kei pawn ka ngai ngawt ang che."

" Ka fapa hi tha takin min lo enkawlsak dawn nia aw. A hmel en leh pawnlam landan ang lo takin naupan chhiat rukna a ngahin enkawl leh kaihhruai la ngai tak a ni. Secretary-te hian an pute-ah hian mawhphurhna leh chanvo sang tak an nei a. A hlawhtlinna pawh i kuta innghahna chen a tam dawn nia. " tiin min chah malh malh a.

" Ka lo hre reng anga theihtawp ka lo chhuah ang." ka ti a.

" Nanay, naupangchhia ka ni tawh lo, naupang chhe chhuahin min chhuah lo la. Jojo hi ka nany emaw ka babysitter tur ni loin ka secretary tur a nih hi." tiin a lo nui huk huk a.

" Jojo bulah chuan ngaihngam takin ka dah thei dawn che a ni." a tih chuan ka lo lawm ru veng veng a, a mi rin ang ngeia tha leh fela awm theih ngei ka duh a ni.

Ka thawmhnaw neih zawng zawng chu suitcase pakhatah a khung zawh theih vek avangin ka inremfel chhung a rei lo . Ka inkhung fel hnu chuan ka pindan chu fai thei ang ber turin ka hru chhuak vek a . Ka luah hnu pindan bal leh tawp taka chhuahsan chu ka thil duh loh ber a ni .


Lunch ei kham chuan Iñaki car nalh tak chuan Manila lam pan chuan kan inkhalh chhuak ta a ." I car siam nan chuan i seng hnem em ? " ka ti sap a .


Nuih deuh hawk pah chuan ,"Thla tin peso sangkhata kan cut chuan kum khat chhung ka kiangah i thawh a ngaih hmel ." a ti a .


" Peso sing chuang maw i sen a !? Aliya kha hmu leh thei ila chuan engkim a fel vek tura " tiin ka chek tlak a . "Amah vangin cheng tam tak ka chawi phah dawn anih hi ." ka ti nang nang a . Ka thla khat hlawh zat deuh thaw chu motor siam manah a kalral dawn a ni a , Aliya ka huatna chu a zual thar leh sawt a .


" Lungngai suh . Ka bula i rawn thawh chuan thla tin bonus peso 500 ka pe ziah dawn che a , i tan chuan engmah chawi lo ang i ni ang ."


" Maw ? I ti tak tak maw ? Awi ,,ka lawm lutuk ." ka ti hlut a . Ni e , bonus min pek reng chuan ka hlawh atanga hek awm loin ka inrul thei mai dawn tihna a nia , ka thawveng hawk hawk hian ka hria a .


" Dawt ka hrilh che i ring emaw le ." a ti deuh nghut a .


" A nih ka lawm e ."


A chenna hmun Roxas Boulevard-a a in mawi lutuk ka hmuh chuan ka thaw hawk hial a, " He inah hian nangmah chauhin i cheng a maw ?" ka ti chhuak hial a . Hetiang in lian leh ropuiah hian mahni chauha chen chu a thawl duh awm ruk ruk mange tih ngawt chu ka ngaihtuah a .


" Keimaha ka chen mai loh nakah ka nu leh pa lahin Sagada awm an thlang zawk a , nupui ka la nei lo bawk a khawsakpui neih thu awm lo ."

A in mawina ti zual em em tu chu a in kawtzawl nuam lutuk
leh han hawi thla ila Manila Bay lo lang raihte chuan a ti romantic-in duhthu hi a sam hliah hliah mai a ni . Mahni maia han enkawl fai atan chuan a lian lutuk lam hrat niin ka hria a ka huphurh ru ang reng hial a ni .


Ka mitmeng atang chuan ka ngaihtuahna alo hre thei ni ngei tur a ni ," In chhung leh a vel tifai tur hian kar tawp apianga lo kal thin turin mi ka be fel tawh a ni ." a lo ti zauh a .


Ka mit vun chu ka chuar nang a , kar tawp apianga tifaitu a lo kal si chuan thawh tur ka nei dawn lo tihna a ni mai dawn a ni maw ? Thawh tur ka neih loh nanana chuan min ruai reng duh dawn em ni ? Ka rilruah chuan ngaihthat lohna hi a rawn lut nghal a , " A nih chuan eng nge ka thawh ve ang ?" ka lo ti thuai a .


" Ka assistant i ni anga , ka kalna apiangah kalin ka rawng min bawlsak ang ."


Wow! Maid atangin Company neitu assistant ka kaisang dawn a nih chu ! Ropui hle mai !

Ka pindan tur min kawhhmuh chu a zau nuamin a thianghlim sar mai a , khawi 5* hotel room emaw hi a ang mah zawk . Bathlarah han dak chhuak ila Manila Bay a lo lang paw nghualte chu a hmuh a hahdamthlakin a muanawm ruih mai a ni . Ka thawmhnawte ka rem fel hnu chuan ka inbualfai zet a huan leh kawt zawl vel chu ka fang kual ta a .


Pangpar mawi tak tak te chu khawihin ka hnim kual vel a , " A mawi tak zet a ni ." ka ti sap a . Aliya zara ka leiba tlak tura awm ni mahila vannei hle hian ka inhria a . Tlailam ni tla tur chuan a rawn kap no raih mai bawk nen a hmun hma leh boruak chu a ngaihawm hliah hliah mai a ni .


Zanriah tur buatsaih a hun tawh ange tiin in chhungah chuan ka lut a , Iñaki chu sofa chungah chuan thatchhiat hmel tak hian a lo thu awn deuh duai a , " Huan vel ka en kual a ..." ka ti ngawt a .


" Eng nge i hmuh dan ?"

" Nalh leh nuam tak a ni . Rawng ka bawl dawn a , eng nge siam tura min duh ?"


"Lei chawp phawt loh chuan engmah siam tur a awm lo ang . In lama ei ai hian ei chhuah mai hi a awlin a hautak lo zawk bawk nen ka ei chhuak mai zel thin a . " a ti mai a .


" A nih chuan kan lei chawp mai dawn em ni ?"


" Kan ei chhuak dawn nia .."

" Aw le ."


Ani ang company neitu meuh chuan Restaurant changkang takah lo chuan min hruai ka ring lo a , mahse thawmhnaw hak tur ka neih loh zia chu ka rilruin a hre rauh rauh mai a . A pawi lo , ka neih ang ang ka ha ang , mi hausa ka ni loa eng ang pawn inchei ila ka neih chhun a nih miau vangin zahna chhan tur ka nei hlei nem . Jeans leh t shirt ka ha leh tawp a ka inpeih chu a ni der a .


Iñaki chenna in atanga hla lutuk lo The Aristocrat Restaurant-ah chuan zanriah chu kan kil dun ta a . Mi dang chaw ei ve ho chu ka en kual deuh zak zak a, ka inthuam ang maia holam taka inthuam an awm teuh tih ka hmuh chuan ka awm a nuam deuh huaiin ka tang ru teuh chu ka inthlahdul ve thei ta a . Chicken BBQ with java rice chu eiin ka puar kher mai a .

Zanriah ei pah chuan ka rilrua awm reng chu ka zawt ta a," Manila leh Metro Manila hi an sawi ziah a, eng nge a danglamna?" ka ti he haw a.

"National Capital Region (NCR) emaw Metro Manila tia hriat hi khawpui hrang hrang sawmparuk Manila, Makati, Quezon city, Parañaque, Pasay leh Taquig,Caloocan, Las Piñas, Malabon, Mandaluyong, Manikina, Muntinlupa,Navotas, Pasig, San Juan leh Valenzuela infinkhawmin a siam niin kan ram khawpui ber chu Manila a ni. " a ti charh charh a.

"Ka hrethiam e." ka ti sap a. Metro Manila leh Manila an tih hian ka buai mapin ka lo hrethiam thin lo a, tunah chuan ka fiah tawh e, ka buai bik tawh lo ang.


Chaw te kan ei kham hnu chuan Manila khawpui chhung min fan kualpuia mit a tlaiin a nuam hi ka ti ngang mai a . Philippines rama shopping mall lian berte zinga mi SM Mall of Asia -ah chuan min bazar-pui ta a . Thawmhnaw zawrhna dawrah min luhpuiin thawmhnaw chi hrang hrang chu min hak chhintir ta a ,"Thawmhnaw lei tumna pawh ka nei hleinem ." ka ti a .


" Khawi hmunah pawh ka hnung i zui zel tawh dawn avangin thawmhnaw thar chu i mamawh a ni . "


" Ka neihsa hi a tawk mai lo em ni ?"

" Business lam kaihhnawih thil hlir a nih dawn avangin mi mit la leh mit tlunga inchei a ngai a ni ."


Ka thawmhnaw neih loh zia chu ka hre rauh rauh a ,"Mahse , thawmhnaw leina tur pawisa ka .."

Ka sawi zawh hma hma chuan min lo pawtchat vat a ,"Sumdawnna nena inkaihhnawih thil a nih vangin i mimal pawisaa i lei a ngai lo ang ." tiin mi lo tawng khalh thuai a .

" A nuam hran miah lo a nia ..." ka ti nang nang a .

"Nuam lo tih chhan tur a awm lo . Ka mimal sum pawh a ni bik lo Company sum atangin alawm ka lei ." a ti ngial a . Company neitu chu amah a ni a , company sum chu ama sum tho a ni alawm . Ka hnial buai ta lo a , kawr pawh chu hak eng emaw zah min leisak a , ka rilru a nawm loh dawn em avangin a man zat chu ka hriatpui duh lo law law a .

SM Mall hi lian tak a ni , a chhuat thut zau zawng ringawt pawh 40 hectares a ni hem mai a . A chhungah hian fashion boutiques, Restaurants, bars, concert ground, science centre, convention centre leh Movie theatres pathum ngawt a awm a , a chhung hi ni leng pawn a fan tham zan a ni . Tin, a pawnah hian amusement park nuam lutuk mai hi a awm bawk a . Picnic nan leh han hawi thawvena tuipui atanga thli vawt lo thaw heuh heuh mai han dawn khawthawn nan a remchang eltiang hi a ni .Pawisa nei ten tawna fan kual vel ka chak takzet.

Mall chu zan dar 10: 30-ah an khar thin avangin kham lo tak chuan ka chhuahsan a tul ta si a . He amusement park-ah hian vawi khat tal chu ka la kal leh khawp ang mawle : ka dama Pathianin rem A tih chuan . A hmunhma leh boruak thengthaw nuam lutukte chuan kal nawn leh turin min ko lawm lawm hian ka hria .


Amusement park atanga kan chhuah chuan rin loh leh beisei loh lutukin Miko Gallardo leh mipa pakhat car chhunga lut tur ka hnu fuh chiah mai chu ka inrin hman hmain ka au chhuak thawt mai a .

" Eng thil nge ni ta ?" ngaihna hriat loh hmel zet hian Iñaki chuan a ti hu a .


" Miko Gallardo ka hmu ! Aw Lalpa , ka mitvai a ni miah lo ! Amah tak tak a ni !" ka ti chul a.

" Tiktoker kha maw ?"

" BL Actor ...tiktok pawh a khawih nasa . Awi...a hmelthat zia kha ! " tiin ka thin phu hlawk hlawk chu ka dawm vawng vawng a .


A rum nghut a , " Mipa pakhat hmuh vang maia kha ti khawpa buai chiai vak a ngai em ni ? " a ti hluk a .

" A hmeltha ka tiin ka ngaisang alawm ."


" Chuti khawpa i ngaihsan aleh va umzuiin va inhmelhriattir la ti nia . "


" Ka chak rapthlak !"

" Va kal nghal rawh . Tuma'n an dang lo a che ."

" Oh , chutia i thinrim mai ka lo ring lo a ."

" Ka thinrim ka ti em ni ?"

" Aih, i ti hauh lo, mahse i mitmeng leh awka atangin a hriat vek alawm." ka ti a . Han thinrim chhan tur ka hriat loh em avang chuan mak hi ka ti ang reng hle a .


"Chutiangin ka lo lang a ni maw ? Ka tihpalh a nih chu ." tiin a nui deuh suk a . " I duh phawt chuan ka hmelhriattir ang che . " a ti ta a .


" I ti tak tak em ni ?" ka ri hluai a .

" Umm. Miko Gallardo chu ka thian hlui leh High school ka kalpui thin a ni alawm ."

Ka phur lutuk chu ka thaw hawlh hawlh a , "Wow! Ka lawm lutuk . Amah vang hian alawm Phillipines-ah hna thawka ka rawn kal ni . Amah hmuh chak vang hrim hrim a lo kal ka ni ." ka ti chung chung a .


A emerald green mitmeng chu a meng zim deuh sanin a rum deuh nghut a . Vung fein Miko car lamah chuan a phei nghal nul nul a . Car darthlalang chu kik kauh kauhin an hnam tawng hian eng emaw hi a sawi zung zung a . Miko chu car atanga rawn chhuakin Iñaki chu nui var var hian a kuah thuak thuak a . Chutah ka lam hawia nui sang hian a ban pharin min rawn hui a nih chu ! Ka lawm lutuk chu ka thinte chu a su dup dup mai a, hmanhmawh baklengin ka pan nghal ruak ruak a .


" Hi, Jojo maw i nih ?"

" Aw , Jojo ka ni e. Miko, ka ngaisang lutuk che a . I film channa 'My Day The Series' kha vawi sawm chuang ka en tawh asin." ka ti nghal zung zung a," Khawngaihin thla min lakpui thei ang em ?" ka tih zawm leh zat a .

"Thei tehreng mai." tia nui sangin ka darah chuan a rawn kuah a , hmai insi deuh thaw hian thla kan la dun mawlh mawlh a.

Iñaki chu ka bulah a lo ding ve reng emaw ka tih laiin a lo awm tawh miah lo mai a ."Khawiah nge Iñaki kha ?" ka ti ha a .

"A car-ah a lut tain ka hria . I dara ka kuah che kha a thik deuh niin ka ngai. Aki hi mi thikthu chhia a ni ngai hauh si loa , i laka a thikthu chhiat danah hian a duh tak tak che niin ka hria. In hmalam hun tan duhsakna sang ber tinreng ka hlan a che u. " tiin min min siai zauh a .


" Ka lawm lutuk, mahse Iñaki hi ka bialpa a ni lo ,min ruaitu alawm a nih ." ka ti a .


Nalh lutuk hian a nui suk a ,"I ven that hle loh chuan i chán palh mai ang aw. Manila tlangval to berte zinga mi leh nu leh pa ten makpa a tan an awh rawn a nih hi aw ." a ti a .


Insawifiah vakin awmzia a nei dawn chuang lo tih ka chian em avang chuan ka nuih liampui ta mai mai a . "Ka hmu thei che hi ka lawmin vannei ka inti lutuk a ni . Tunah chuan ka duhthusam a thleng dik ta a nih hi . I hun hlu tak min pe theia ka lawm tak tak a ni ." ka ti ta a .


"Kei pawh ka hmelhriat thei che hi ka lawm. Aki thinlung neihsak theitu hmeichhia chu hmeichhe danglam leh eng emaw tak zawng i ni ngei ang."


" Ah, teuh lo mai. Ka lan ang tawp hi ka ni mai e ."

" Eng Company hnuaiah nge i sign a ?"

" I sawi awmzia ka va'n hrethiam lo ."

" Model i ni lo em ni ?"


Model hmuhin min hmu a nih chu ! Ka lawm lutuk chu ka tah a chhuak hial thei nia . "Aih, Iñaki Mendoza hnuaia thawk ka ni e ." ka ti ta a .

" Oh..., Model ang maia nalh leh hmeltha i ni sia model ni turah ka lo ruat ve tawp che a ."

Ka actor ngaihsan em em chuan nalh leh hmeltha min ti a nih chu . Ka lawm lutuk chu ka biangte chu a sa hat hat thei hial a ."Ka lawm e." ka ti ta sap a .

." In inneih hunah chuan sawmna card ka hmuh ngei ka beisei a nia aw ." tiin a nui var var a . Chhan let tuma ka ka an ziau lai chuan Iñaki chuan car horn chu a rawn hmet ri tuarh tuarh a.

"Kan Aki chu a thunrim hle tawh niin a lang . Ka chelh khawtlai tawh lo ang che . Palaam!"

"Ok,bye ." tiin Iñaki car lamah chuan rilru hlim leh thawveng halh hian ka phei ta a . Miko nen kan thlalak chu ka thiannu Angela ka thawn hun chuan ka insawi thei ngawt ang . Min awh dan tur zia lah ka hre chiang !


Car ka thlen chuan kawngkhar hawna luh mai ka tum chu a lo inkalh tlat mai a . Glass chu kik karh karhin "iñaki ...Mr Mendoza ! Kawngkhar hi a inkalh a nia." ka ti chul a . Hre lo ang hmiaha awmin minute sawm chhung chu a chechang duh hauh lo a , ka kik nawn leh chuan min rawn hawn ta hram a . " Miko Gallardo kha i inthlahtir dawn emaw ka ti a ." a ti deuh nghut a.

Mak ti tak chuan ka melh ha a , a mitmeng hring nghalh chu a meng thim deuh raihin a hmui chu a chip hmak bawk a ." A fans-te zinga pakhat ve mai ka ni a , min thlah ngawt chhan tur a awm lo e ." ti bai baiin seatbelt chu ka hreng nghal mawlh mawlh a .


" Mitdel ka ni lo . A melh dan atang che khan khumpui kaipui mai che pawh a hreh hauh lo tih a lang reng alawm."

A tawng duh dan chu ka ngei deuh hlek a , "Oh, chuti maw ?Khumpui kaipuiah chuan ka lo sawm chhin lo a nih chu mawle." ka ti ve deuh ngat a .

Hmui chip hmakin min rawn melh vawt raih a ,"Ti ta che i ngam chuan." vur khawn ni mai awma vawt leh nelawm lo chuan a ti hmak a . " Ka hnuaiah i thawk dawn a nih chuan i nungchang i uluk hle a ngai ang aw . Ka mit kham zawnga i awm chuan ka ban ang che nga i pawisa ba pawh kha min rulh nghal a ngai ang aw." a ti vawt leh raih a .


" Ka hre reng ang e, Mr Mendoza!"

"Ka personal assistant tur hian mipa laka hming hliauna nei hi ka duh hauh lo tih i hre tel bawk dawn nia." a ti khauh fur a.


" Aw le, boss. Ka fimkhur hle ang." aw pangngai thei ang ber chuan ka ti a . Ka mi ngaihsan leh hmuh chak em em ka hmu a , ka hlim dan tur zia leh phur dan tur zia chu hrethiam awm tak a nih laia hetianga a awm hi ka ngei tak zet a, a hmeltha tak chu va ham chhiat vek mai ka duh rum rum a .


" Kei chu ni ila ka ti hauh lo ang ."


" Eng maw ?"


" Tuna i rilru put hmang kha ."
.
"Eng rilru nge ka put a ?"


" Min khawih mai chaka i kuttum i hum ruh ngawt ngawt kha ka hmuh hmaih hauh lo ."


" Oh, tihpalh!" tiin ka thaw ham ham a , ka inthlahdul ve ta a. Mi hnuaia thawk tur ka nih angin ka thinchhiat hi thununa ka insum hle a ngai dawn a ni, chuti lo chu kan inban leh rang lutuk palh ang.

Ka nu anga hmeichhe nunnem leh zaidam tak ka lo ni lo hi pawi ka ti thin..engah nge ka pu thinchhiat kha ka lo chhun kher mai le aw..

*****

THU NAWI MAI MAI😂

kei chu thil tui tih tawh hi chu ka hne hma a ei char char duh chi hi ka ni sia chawhmeh eitui deuh ka neihte hian ka fate chuan, " A huphurhawm leh dawn eee." an lo tiziah thin!😂

Tunlai chu Berul hi tel hneh deuha kan zawr hnup hian tui ka ti lutuk a, ka hmehpui leh tlek tlek mai a. Tukin kan chaw ei dawn chuan Buangpuii chuan, "Maa, khawngaih takin Berul hi hmeh tawh lo ang u. Ei lo mahila dawhkana a awm ringawt pawh hi ka ngei tawh!" a ti ta mai. Ka nuih a zain ka nui hnem tiah tiah khawp mai.Ka tuitih hi midangin tui an lo ti vek lo a nih hi.

Nang, i hmeh ngainat zawng eng nge??

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » July 25th, 2021, 6:26 pm

CHAPTER : 5



Zing hma takah thoin rawngbawl ka'n tum ve ngawt a, engmah siam tur a lo awm hauh lo chu niin. Fridge chhungah chuan theitui um eng emaw zat leh bawnghnute bawm a inhung dul ringawt a, chhang lam chi emaw han inhnawh puarna tur chi engmah hmuh tur a awm thak lo. ka pum ruak hnawhkhah nan chuan bawnghnute litre chanve chu ka in zo ta a. Zingkar riltam hi ka neia, eng emaw tal ka ei loh chuan hrehawm hi ka ti ngawih ngawih thin. Iñaki kiangah chuan engmah eitur awm loin ka awm dawn a nih chuan ngaia neih tura inzir fe chu ka la ngai dawn a nih hmel.



Ka in zawh chuan Iñaki pindan lam chu ka pan ta a, a pindan kawngkhar chu kik dat datin ka ding ran a. Chhunglam atang chuan, " Lo lut rawh." tiin min rawn chhang thuai a. Kawngkhar chu pawt hawngin ka lut ta nghal a. Ani chu khum atanga lo tho chhuak mekin pyjamas takngial pawh ha loin a taksa chu a ruak kung mai a.


A taksa ruak kung chuan min ti tim deuh dai a, nuam lo hi ka tiin mi thu sual lai hmu ru ang maiah ka inchan a,"Oops, ka tihpalh! Nakin deuhah ka rawn kal leh zawk ang e. Ka sawi awmzia chu i thawmhnaw hak zawhah..." tih leh lehlam hawi chu ka rual nghal a.


"Sagada-ah pawh khan ka saruak lai chu i hmu vek tawh a, tuna taka han zah thar leh vak chhan tur a awm em ni?" tiin a nui deuh huk a.


"Ka zah vang a ni lo aw!" ka duh aia awki sang chuan ka ti a. "Ih..ih...ei siam dan tur hi ka hrethiam lo a. Engmah siam tur a awm bawk si lo a, engtin nge ka tih dawn tih rawn zawh che ka tum a." ka tih zawm zat a.


"Rawngbawl buai a ngai lo. Restaurant-ah kan ei mai dawn nia. I siam ai chuan a tui zawk ka ring." tiin a nui huk huk a.


"Rawngbawl thiam lo viau turah min ngai a ni maw?"


"Aih, office kal paha ei mai kha a awlsam zawk alawm."

"Vawiin atangin i office-ah chuan ka rawn thawk ve tan tawh dawn tihna em ni?'


" Aw, ka bul hnaiah tul tula tirh theih mai turin i awm ve reng tur a ni."


Personal assistant a ti taknain a sawi danah chuan chawkidar emaw pion emaw ka an hmel zawk dawnin ka hria. A enga pawh chu lo ni se in chhung sekrek khawiha buai nilen thak thak ai chuan a zia zawk em ang chu . "Dar eng zatah nge kan kal ang?" ka ti leh hram a.


"Dar 8:30-ah chhuah hman kan tum dawn nia."

" Aw le...a nih leh zing thoh hlim hian thingpui leh chhang takngial pawh ei loa awm hi hrehawm i ti lo em ni?"

" Ah, ka tih than tawh a nih vangin eng vakah mah ka lo ngai hleinem. Nang hian hrehawm i ti a ni chiang mai, a ni tiraw? Vawiin office ban pahin ei leh in tur chu kan lei dawn nia." a tih chuan ka thaw a veng deuh huai a.

" A tihzia nasat chu. Diktak chuan zing thoh hlima eng emaw tak eitur a awm loh chuan a hrilhhaithlak ka ti deuh thin a."

" Duh leh mamawh eng emaw i nei a nih chuan sawi hreh reng reng suh ang che. Khawsak phung leh tihdan inang lo hi chu kan inhrilhhriat zel loh chuan hriat ngaihna a awm thin lo a nia." tiin faifuk rut rut chung chuan bual inah chuan a lut ta nulh a.


"Aw le." tia inherin ka kalsawn ta nghal a. A pian nalh thlurh mai leh ruak kung mai chu ka mitthlah a cham zui reng mai chu ka inhua a, ka lu chu beng dawtin," Zozo, tenawm suh! I ngaihtuahna kha tawp nghal rawh." tiin ka inhau hlak a.

Iñaki hi ka lo ngaih ang em em a uikawm , khawngaihna nei lo leh midang hriatthiamna nei lo a lo ni miah dawn lo a nih hi tiin ka ngaihtuah rauh rauh a. A nu leh pa ang maia mi khawngaihna ngah leh ngilnei tak nihna lai chu a nei ve ngei ngei ang, khati khawpa nu leh pa tha khan fa sual lutuk chu an nei hauh lo ang.


Office ka vawi khat kaina tur a ni bawka ka phurin ka helhhawlh deuh titih hial a. Inchei dan tur chu ka thiam lo ang reng hle mai a, office hna thawk tur anga nalh taka inchei tur nge ni ang duh duh huna tirhkah mai theih tur angin ka inchei tak ang? Ka inngaihtuah vang vang hnu chuan chetpui vel awlsam leh zangkhai tur chi cotton jeans dum leh t-shirt grey colour chu hain running shoe ka bun ta bawk a. Dar riat pelh hret atang chuan thutkhawmna pindanah chuan inpeih atin ka lo nghak hman der tawh a.


Business coat suit nen induang zuihin a rawn chhuk chuan ka lo melh ha a, a inthuam dan chu a inhmehin a nalh thlurh mai a, a lang zahawm zuih mai bawk nen ka mit chu ka la sawn hlei thei lo chu a ni ber e. A emerald green mitmeng de sawr sawra min rawn melhin," I inpeih chuan kal nghal ila." a ti sup a.


"Yes, boss!" tiin ka nui saih a, ka hmaa kal pa sang leh hmeltha zet chu ka zui ve ta a. A car-ah chuan a briefcase khai tetakte chu theh lutin car kawngkhar chu a hawng nghal a. Ani ang pa hausa leh sum ngahin driver hranpa a chhawr lo chu mak ka ti ang reng hle a, pa inren leh uikawm tak hi a ni thei mai ang em tiin ka ngaihtuah a. Car chhunga thut luh pah chuan," Nga tinge driver i chhawr mai loh a?" ka ti ta a.


A nui suk a," Ka motor khalhah i chuang ngam lo tih min hrilh i tum em ni?" a ti a.

"Aih, chu tiang a ni lo. Driver hran chhawr loa nangman i khalh hi mak ka ti deuh mai mai mawle."


"Tum thum ngawt chu motor accident ka tawk tawh a, kha ta tang khan midang motor khalhah ka chuang ngam tawh lo a ni ber ang chu. Motor khalh tur hian tumah ka ring zo lo a ni ber mai."


Ka thaw hak a," Oh, a nih chu mawle." ka ti sap a. Vanneihthlak takin vengtu angel a nei thaa a him hlauh zel chu ka lo lawm ru veng veng ve ringawt a.


Harbor View Restaurant-ah chuan breakfast chu kan ei a, lui lam sa tui tak tak chu ka ei teuh mai a, duhthusama tui a ni bawk nen duhaiin ka ei hnem zui! kan ei puar hnu chuan Mendoza company building chawng sang leh lian lutuk lam pan chuan kan inkhalh chhuak leh ta a.


A company building kan thlen chuan ka thaw hawk thei hial a, building chu a lianin thawktu lah an tamin mahni hna theuhah tlin takin an bur ngar ngar hlawm a. Heti chung hian Philippines khaw hrang hrangah branch thar hawn belh zel ala tum mai bakah company tenau leh beiseiawm deuh hlekah te chuan investment tiin share a nei thluah bawk a, hepa hian hausak belh zel chu a tum chiang a ni.


Building chhung kan han lut chiah chu a len lutuk vang chuan kan lang te chem chem thei hial a ni. A hnuai ber chu motor park-na'n hmangin company thawkte motor chi hrang hrang chu a inhung dul mai a, floor hnuai ber chu company product hrang hrang pho chhuah leh hralh chhuahnan hmangin an lun luih luih kher mai a. Kan lut chiah chu thawktute chuan zah takin an lo chibai sap sap hlawm a, a office chu chhawng thumnaah awmin khawthlir a nuamin a thengthaw nuam em em mai lehnghal a.


" Mi eng zat nge i chhawr a?"


" He hmunah hi chuan mi 150 atanga 200 bawr vel a niang."


"Wow!" ka ti hluai a.


"Mak i va ti awm ve a." a ti hu a.


" Ti hran lo e...an thahnem ka ti deuh mai chauh a ni."


Chawhma chhung zawng chuan a office chhung lehkhabu hlui un tawh tak takte chu tifaiin ka rem tha char char a, ka dar kar velte chu na deuh thum hian ka hria a. A office kawngkhar bulah chuan amah ep zawng hian ka dawhkan tur hi a awm ve ran a, ka inremfel zawh chuan ka dawhkan chu belin thut hmun remin computer chu ka khawih mai mai a. Iñaki chu ka va melh leh zauh thin a, computer hmaah chuan hna a thawk mawlh mawlh a, eng plan plan emaw a siam ni ngeiin ka ring. A chang chuan a sam fai tle siau chu hai thur chhapin a mitmeng hring nghalh chu a meng dur leh khap thin a. A hnathawk lai hmel ngawt pawh chu hmuhnawm tham niin ka hria.


Chutih lai chuan hmeichhe hmeltha eltiang leh model ni mai awma nalh hi thawmhnaw chhing lutuk hain a rawn pen lut thlarh thlarh mai a. Iñaki chu rawn kuahin a biang leh biang chu a nultir zauh a,"Ka rawn thleng ve chiah e, baby. I buai em?" aw no nalh tak hian a ti a.


Nalh lutuk hian a biangsum veilam khuar kaka nuih suk pah chuan, "Welcome back." a ti zauh a. " He office hian a la mamawh che asin mawle. Mahse branch thar enkawl tur chuan nang tluka rin ka nei si lo." a ti hak a.


"Bangued khuaah pawh awm ila i tan ka awm reng dawn tho alawm. Kar thar atang chuan kan inpeih hman mai dawn a, tun kar chu i kiangah ka la thawk thei dawn a nih hmel."


Iñaki chuan computer chu hawisawn sanin,"Moira, enteh, hei Jojo-i hi tunkar chhung chu training lo pe la ka ti deuh. I ai awhtu tur a ni dawn bawk a, engkim i thiam hmantir ngei ka beisei." a ti a.


Moira chu ka lam rawn hawiin min rawn melh vang vang a, chutah nelawm taka nui saiin,"Hi, Jojo! Aki naute thar tur maw i nih?" a ti zang vah a.


Ka ner ru sak a , hmeichhe kawm nuam leh a bula awm nuam tak a ni ngei ang, engto vak nei lo leh thawveng halh mai a nih hmel hle. An inpawh dan em em chu thian satliah mai aia thuk a nih ngei ka ring, chuti a nih chuan a bialnu emaw a nupui hual emaw a ni mai lo maw? Chu thil ka ngaihtuahna chuan ka thinlung chu khei zawkin thikna hian min tuam nghal hlup mai a. Ah, thikna maw? Lo thik ve ngawt turin tu nge maw ka nih le?? Hreptaka!! " A naute thar tur ni loin a hnuaia thawk thar tur zawk alawm ka nih." ka ti ve deuh ngat a.


" Oh baby, la run lutuk suh. Fiamthu mai a nih kha!" Moira chuan a ti lar lar a.

Ka nui lui sak a," Ka hria alawm. Kei pawh ka fiamthu a nih kha." ka ti ve ta a.


Iñaki chuan, " Jojo, ani hi Miss Moira de Santos a nih hi. Ka thian tha tak leh ka secretary nilai mek a ni a, branch thar lamah manager tur a nih dawn avangin nangin a hmun ruak chu i chang dawn a ni. Tun kar chhung chu a bulah inzirnan hun i hmang dawn nia." a rawn ti ta a.


"Aw le, boss."


Chumi kar tluan chuan Moira bulah chetlain ka hun tam zawk chu ka hriatthiam loh thil zir nan ka hmang a. A bula awm a nuamin a zangkhai vah reng mai a, eng emaw ti kawng tak chuan ka ngaina ta phian reuh lawi a. Secretary hna chu thu pawimawh lo ziah luh leh chhinchhiah mai tur niin ka lo ngai ngawt mai chu a lo ni lo nasa mai chu niin. Pu ber nitin nun buaipui leh a hun hman dan turte set fel sak thlap a, a ei leh in tur ngainat zawng hriatsaka buaipui vek a ngaih mai bakah a hriselna nen lam ka ngaihvensak vek a lo ngai a nih chu. Secretary hna hi a lo khirh zia ka hre chhuak uaih uaih mai. " Rin ai daihin a lo khirh dawn a nih hi." ka ti sap a.


Moira chuan min nuih sak a, " Secretary hna hi hna hautak leh khirh tak a ni reng a sin.Diktak chuan nupuite dinhmun kan chhuhsak hi a ni ber mai, an nupuite dinhmun aiin a pawimawh zawk pawh ti ila kan tisual tampui lo hle ang. Hei vang tak hian pawmlai nei secretary a tan chu thil hrehawm tak a ni reng a ni. An nupui ten min thikin min haw ngawih ngawih thin." tiin a nui ar ar a. " Office lamah an pasalte kan lo duatin kan lo buaipui chu lawm zawk awm tak a nih laiin huat kan hlawh daih thung si."

" Secretary hna chu i lo thawk kual nual tawh a ni maw?"


" Pawmlai nei mi pali ka hrawn tawh."


" Pute nupui hmaisa i tawng hnem hle tawh dawn a nih chu."


" Min bakkaih lo chauh chauh thin mawle." tiin Iñaku coffee ngainat zawng chu a siam malh malh a.


Iñaki hun hman dan tur Moira nen kan duan lawk chu ka en nawn leh chhin a, hun awl a neih loh zia leh a buai zia chu ka hmu thiamin a nu leh pa a tlawh zen zen hman lo pawh chu ka dem hran ta lo. Mi hausa chu eng tik lai pawha nuamtawla duh duha awm thin turah ka lo ngaih thinna chu ka sawhsawn chiang kher mai. Hunawl nei lek loa hnathawk buai mawp mawp reng mai an nih vang hian hausak chu an lo phu ber hian ka hre leh hnuhnawh a.


Bangued khua a branch thar hawnnaah chuan kan va tel ve a. An company building thar hall zau nuam takah chuan hawnna programme neih a ni a, thawktu mi eng emaw zat leh chhimtu mipui eng emaw zat hmaa hneh leh zei tak maia Iñaki thu sawi vel chu hmuhnawm ka lo ti fal hle mai a, en nin har ka ti hliah hliah mai a ni. Programme kan hman zawh chuan tlai lamah chuan ei leh in nen ruai buatsaih a nih zawh hnuin sawm bik mi pawimawh chin nen party buatsaih chhunzawm a ni leh bawk a. Rin ai takin nuam ka tiin ka tlangnel phian lawi a.


"Hi, i bulah ka lo thu ve thei ang em?"


Min rawn betu aw tham mawi tak lam chu ka hawi chhuak thuai a, mipa sang thlerh thlawrh leh mitmeng lian ke kaw, sam kir deuh chiat mai min lo nuih var vartu chu ka nuih let sak a." Lo thu ve ta che." ka ti ta a.


Ka bula lo thut ve pah chuan," Kokoy Alkantraz ka nia, A&M group tupa neihchhun leh rochungtu tur ka ni e." tiin lerh hmel zet hian min melh a.


Hmeichhe lawm leh lerh, chapo leh mahni neih chhuang tak mi a ni tih ka hrethiam nghalin ka ngainat zawng mi a ni lo nghal. " Jojo ka nia." a mawiah chuan ka ti liam ve satliah mai a.


" Nang ang nula hmeltha ka hmelhriat che hi ka lawm hle mai, Jojo."


" Kei pawh le, Mr Alkantraz!"

" Kokoy tiin min ko la ka lawm zawk ang."

" Ok....Ko...koy!"

" Ka hming i lam rik chiah khan ka hming hi nalh thar ta riauin ka hria. I lamrik dan kha a nalh ka ti riau." tiin a nui hawk hawk a.


Hetiang mipa lerh lutukin hmeichhia an chhai kual dan vel hi ka hriat than tawh em avangin ka nuih a ti za zawk hial a, insum buai peih lo chuan ka nui hak a. Ka nuih zawng chuan ka hawi sawn tel kher chuan kan piah deuh mai a mi pawimawh hmel tak takte nena no dawmho mek Iñaki chu ka va hmu fuh chat a. Mitmeng thip lutuk chuan min rawn melh reng chu niin. Eng thil tihsual nge ka neih leh taka chuti khawpa huatna mitmeng thip a min rawn melh chu le. Chuti khawpa thipa min melh chuan thil tisual lopui pawh thil sual ber ti ang hialin mahni inthiam lohna min siamsak thei alawm le. Ka mit chu la sawnin Kokoy lam chu ka hawi a, " I nupui i rawn hruai tel ve lo em ni a, Mr Alkan----oh ---Kokoy?" ka ti ta a.


Khup beng meuh a nui hawk hawkin, " Nupui nei tawh hmel ka pu em ni? " a ti chiam a. Ka thu sawiah khan nuihzatthlak engmah kei chuan telin ka hre ve loh avang chuan ka hmui ka chip hmak a.


" Ka'n zawt satliah mai mai che mawle."


" Nupui ka la nei lo tlat. Sava thlawk lai perhthlak mai theih reng ka ni e. "


" A nih tak chu." a bula awm ka nin zia chu ka awka chhuakah chuan ti lang chiang hle mahila a hre tha duh hauh lo mai lehnghal a.


" Min lampui la....?"


" Ah, ka lam ve ngai loh mai bakah ka thiam thak lo."


"Ka zirtir ang che." tia ding chhuakin a kut chu ka vawn atan min rawn pe a.


A kut chu lo ben persak lawp mai ka duh rum rum a thil mawi nia ka hriat loh mai bakah Iñaki leh hmeichhe nalh tak tak nui ho bawk bawk chu ka va hmu fuh kher bawk nen a kut chu vuanin lamtualah chuan kan inkai chhuak ta a. Mipui lam zingah chuan kan inthawlh lut ve ta a. Music rem chuan Kokoy chu a lam hah hah a, phat rual lohin lam zawng a thiam nangian mai. A bulah chuan khawr deuh tut hian ka inhria a, tum loh lutukin a ke ka la rahsak zui! Ka inthiam lo lutuk chu ka nui hawk a, "Ka tihpalh." ka ti sap a.



" Oh, engah mah ngai suh,baby."


" Ka lam ngai lo ka tih kha ka ti tak tak alawm.""


" I thiam lutuk alawm." Chu zawng dawt chiang bal a ni.


Music a tawp rual chuan Iñaki chu ka va melh leh kher a, thinrim tih hriat tak hian rum lutukin min rawn melh ding ngut mai a. A mitmeng rum lutuk chuan min ti tim sung sung thei hial a ni. Thut hmun kan rem fel chiah tih chuan Iñaki chuan min rawn pan ding nghal a. Kokoy bulah chuan an hnam tawng hian eng emaw hi a sawi nghut a.


"Sorry!" tiin Kokoy chu hmun dangah a kal ta nghal a.

Kei chuan," Kokoy bulah khan eng nge i sawi a?" ka lo ti ha a.

Dim lo baksak hian ka darah min rawn vuan a,"Ka secretary i nih angin ka kiangah awm tur i ni tih i inhria em? Mipa dang bula va inthehthil a va intiitawm kual vel loin eng nge ka duh leh ka mamawh ngaihvena min vil tur i ni asin." a ti vawt ruih a, a aw ah chuan nelawmna pakhatmah hriat tur a awm lo.


" Sorry, boss" tiin dar ka chhin ak a, a thusawi chu a dik ka tih ve bawk vang chuan engmah ka sawi zui ta lo a.


" I boss ka nih angin ka thu i zawm bawk tur a ni."


" Aw le, boss."


" 'Sorry, boss ' 'yes, boss' tih a zawm chuan si loh chuan awmzia pakhatmah a nei lo." a ti vawt ruih a.


" Ka zawm dawn lo ka tih loh kha."


" I zawm dawn a nih chuan min rawn zui ta che."

Hreh tak chuan ka ding chhuak talh talh a, vur ang maia vawt leh nelawm lo pa sangpui mai , mihring ruangam anga din vur milim ni mai awma lang chu ka zui ve ta a. A thiante chu min hmelhriattirin an bulah chuan ka thu ve ran a. Mi hausa leh changkang tak tak kara awm chu ka khawrin ka thing bik ngawih ngawih hian ka hria a. Nichin maia Iñaki mitmeng nelawm lo tak leh thinrim hmel kha bo vek tawhin chung nula hmeltha leh changkang tak tak zingah chuan nelawm tak hian eng eng emaw sawiin a nui vel hawk hawk a. Ka ngei ru ang reng hle mai a, ka beer in lai chuan a hmaia va theh thawt mai chu ka chak rum rum hial a. Ka bulah ve lem nelawmnlo leh biak pawh huphurhawm ngawih ngawihin a awm a, heng nula hmeltha bulah ve thung chuan nelawm ber leh a ka pawh zen ila min seh lo ang tih turin a awm leh lawi si a, ka ngei tak zet a ni.



Nula sam buang thang mai Philippines leh Italian thlah pawlh Ombretta chuan Iñaki banah chuan kuah hnapin, " Lam ang le, darling." a ti no nghal a.


Iñaki chuan min rawn melh zauh a, ka lo ner khum sak chuan a nui hul hak a," Aw le, baby." tiin lamtual lamah chuan an inkuah chhuak ta a. Music rem chuan thiam leh fet takin an lam dun ta a, hmuh hrehawm ka tiin ka thik ru ngawih ngawih a ni. An hmeltha dunin an inhmeh ngawih ngawih mai a, a thiktu lo nih ve ngawt pawh chu a inthlahrunawm rum rum thei hial a ni.


Ka en reng lai chuan Ombretta chuan Iñaki chu kuai kunin a hmuiah chuan a fawp ta a, ka thinlung chu a nghawr nghing nghal dawt mai a, ka na nghal vawng vawng mai. Wash room lamah tlan lut nghalin ka inphihfai nghal mawlh mawlh a, ka mitthlah chuan an infawp lai chu a cham reng mai a. Lo thik ve ngawt turin tumah ka ni hleinem engah nge ka lo thik ve em em ringawt a? Ani nen kan inzawmna chu hna chiah a ni asin. Chhiahhlawh hnuaihnung ber hian a chhawrtu a pu chu a lo star emaw a lo ngaihzawna a laka thikthu lo tihchhiat ve ngawt phak pawh a ni hleinem tia inngaihtuahin ka inthingharh a.

Ka awm rei lutuk chuan dik dawna ka hriat loh avangin ka hmai chu chei tha sawk sawkin ka let leh ta a. Iñaki leh Ombreta chu inkuah rialin an lo la lam dun a, hmuh hrehawm ka tih em vang chuan zu chu ka in pawp a, ka beng chu sa nghal hat hatin ka pum chu a sa thla hut hut mai a. Melh loh ka tum pawhin an ni pahnih lak atang chuan mit laksawn har ka ti ngang mai.

Thikna chuan min kang alh pup pup lo chauh a ni. Zu no chu ban leh nghal zatin ka in leh pawp a, tunah chuan zang deuh hawk chuan ka inhre nain thikna meipui alh mek chu zu no hnih khat lek chuan a leih mit zo hauh lo chu niin . Ka thikna thinlung a reh hma chuan ka lem nawn ta sek a.

Filipino nula Tanya chuan min lo nuih hak a, " I thik deuh em ni,Miss Jojo?" tiin min rawn zawt sa sa a.

" Ah - teuh lo mai a!"

" I thlir ngun ema i thik a nih ka lo ring thla ngawt a. Aki te ang mipa hmeltha zunah hian lo uai pawh nila tuman an dem thei hauh lo ang che. Ani ang hi chu ngaihzawn loh an har em a ni." a tih chuan zu no dang chu ka ban leh nghal chat a.

" Aih, ka ngaizawng miah lo. A duh duh chu a lampuiin a kawp thiang alawm thik chhan tur ka nei lo. Kei chu a hnuaia thawk pakhat ka ni ve satliah mai a ni. " ka ti khauh far a.

Ka darah chuan min rawn beng thak thak a, " Secretary leh a pu inkarah hi chuan affair hi a awm ngei ngei thin tih ka chiang khawp mai, an serious leh serious loh chu thuhran. Secretary hi chu pute hmei pakhat an ni ber alawm." tiin a nui hak hak a, ka mitmenga thinrimna chu a hmu ni ngei tur a ni dar san aka min rawn melhin,"Nangni ka sawina a ni lo a nia." a ti leh zat a.

" Ni, keini chanchin chu i sawi lo chiang bal. Iñaki hmei emaw ka ni ve tlat lo." tiin ka lem leh khalh a.

Min rawn melh vang vang a, " I la naupangin hun ila ngah alawm Aki ang mihring luck lutuk zunah chuan tal buai duh miah suh. Mipa luck lutuk ngaihzawn chu mahni kan intina mai mai thin a nia." a ti leh ngat a. A tawng vel danah chuan Iñaki hi a ngaizawng ve zawk a nih ka ring ta rum rum a.

Tlemin ka kai deuh tawh nen chu nu tawng dan chu ka ngei deuh thut a," Ah Miss Tanya, ka ngaihdan chuan kei ni loin nangmah zawk hian i thik niin ka hria. An ni pahnih lam sawn min tibuai lo, nangmah an tibuai che a ni tiraw?" ka ti chhar chhar a.

Tanya chu a rum nghat a," A teuh lo." a ti hlar a, zu chu a lem ta pawp pawp a.

Inaki lam zo rawn phei chu ka bulah rawn thuin min rawn melh vang vang a," Jojo, eng zat fakau nge i in tawh a?" a rawn ti vawt raih a.

" Ka thinlung vawt tak chiah lum tham chauh mawle." tih leh no dang ban chu ka rual leh zat a.

" Duh tawk rawh. I kai mah mah tawh a nih kha." tiin ka no chu min laksak nghal a.

" Min pe let rawh."

" I taksa zawh tawk bak chu in suh."

" Ka taksa hian a la mamawh alawm." tiin no chu banin ka tlak leh ta pawp a. Ka rui a ni, ka rui ta mah mah eeee....

Link:
BBcode:
HTML:
Hide post links
Show post links

Local Advertisement

MOBILE SIAM ZIR DUH TAN!!!

Tech-Inn Mobile Repairing Traning Centre, Bazar bungkawn

Kum tin mi za chuang eizawnna kan siamsak a, Eizawnna tlaka thiam turin kan zirtir thin

Mizorama mobile siam zirna hmasa ber changtlung ber kan ni. Hrechiang duh tan Contact : 9612099411 / 9862016122


Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » July 25th, 2021, 6:26 pm

CHAPTER : 6


IÑAKI MENDOZA'S P.O.V


Jojo-i rui lutuk hmel biang tai tak mai chu melhin ka thin a rim ru hle a ni. A bulah ka awm renga a taksain a zawh tawk bak in lo tura thununa vengtu tur ka nih laia ka mawhphurhna ka zo lo lutuk chu ka inhua a ni. Zu rui chi a ni lo tih ka hria a, rui khawpa zu intir lo tur ka ni asin mawle. Nge kan lam hlan khan he Tanya hian a lo in ruihtir zawk ni ang? He hmeichhia hi chu hmeichhia ka hnaih deuh tawh phawt chu thika haw nghal ngawt zel mi kha a ni tlat mai a. Ani nen hian thla hnih khat chu kan lo inkawp ve tawh a, a thikthu chhiat uchuak lutuk vang leh min intitatu over mah mah vangin ka then a. Kan inkawp tawh loh hnuah pawh ka laka thikthu la pe chhe em em reng leh min la ta chei reng kha a ni a, kan inkarah engmah inzawmna a awm lo tih ka tihchian hle hnuah pawh a thikthu chhiat a la bansan thei chuang lo. Ani ang hmeichhia hi chi hnaih loh leh ngaihzawn loh a him ber.

Moira hnenah chuan, "Jojo hi hotel-ah ka letpui mai loh chuan a fuh dawnin ka hre lo." ka ti a.

" Nia, va kirpui rawh. A tisual ve deuh niin a lang." tiin a nui sak a.

" Zu a ruih chuan engmah hre loa chatthla tawp chi kha a nia, a chahthlak hmaa hawpui vat loh chuan a chi dawn loh tlat."

"I naute chu i veng hle mai. Keini ta ila ka hna atangin min ban lawng lawng tawh awm si." fiamthu titak deuh chuan a ti a.

" Mi special tak chu special taka enkawl tur alawm." tiin ka mit ka siai zauh a.

Moira chu a nui hawk hawk a, " I nula special chu hawpui vat mai teh khai." tiin ka darah chuan min nam dat dat a.

" Hnawk min tihdanah hian ka awm loh hlana nuam tawl i tum chiang!" tiin ka fiam zauh a.

" Nia, i mi dip a na em alawm." tiin a nui hawk hawk a.


Kan thlenna hotel lam pana kan tlan lai chuan car seat nghenchhan chu nghenga Jojo-i mit chhing chial chu ka va melh zawk a , nelawm lo takin a hmui nalh tak chu a chip hmak a biak huphurhawm tak hi a ni . Mipa dang bulah nelawm taka nui hmel pu sangin ka bulah chuan nelawm lo khat tlata a awm leh si chuan ka thin a ti ur lek lek hial a ni .


" Kokoy bulah kha chuan i hlimin i nui reng kha a ni a , ka bulah lah hmui thui pin ang hmiahin i awm leh a ." ka ti nang nang a .

Min rawn melh thip ram a , "I chungchang i sawi a ni zawk lo maw , sir ?" a ti ram hmak a . A mitmeng leh aw chhuakah chuan duh aiin a rui deuh niin a lang .


"Ka chungchang ni loin i chungchang alawm ka sawi." Ka ti let leh ngat a .


"A va mak awm ve a !"

"Kokoy Alkantraz kha hnaih tam chi a ni lo , hmeichhe ral a nih kha ."


Ngaihsam hmel zet hian," Ka lampui satliah mai a nih kha ." a ti liam puat a .


"A hmelthat ang bawk a lerh leh nula misa lutuk a nih kha , hmeichhe tan chuan mel tam dana hla a hel hram hram chi a ni ." ka ti leh hram a .


" Ka lo hre reng ang e , boss."

A awki chu ka duh loh em avang chuan ka va melh hrawk nain min lo melh let ve lem hlei lo a ,"Kokoy-te ang hi i be tawh tur a ni lo ." nelawm loh thei ang ber chuan ka ti deuh hmuk a .

A hmui nalh tak chu ner deuh sakin ," Kokoy-te ang mipa chauh i tihna nge mipa zawng zawng i tihna zawk ?" a ti pawr hle a .


Ka thaw hawk a , " Aw, mipa tawh phawt chu i biak loh a him zawk ang ." ka ti vawt ruih a .


A biang chu sen ap apin ," Eng vang chuan maw ?" a ti deuh ha a .


"A chhan chu maw mipa tawh phawt chuan khumpui kaipui che an duh zel vangin ."

"Oh, chutiang a ni teuh lo mai aw! Lo ni ta tehreng pawh nise hmeichhe puitling leh mahni inenkawl thei rual ka ni tawh alawm . Khawngaihin naupangchhia ven ngai rual lek ang chuan min en lo hram teh ." sehchilh niaih chuan a ti a .


" Mipa chinchang i la hre tlemin daihriat ila neih tam hmel loh nasa mai si a an bum thlu mai ang che ." ka ti hak a .

" A teuh lo mai ! Tuma'n min bum lo ang !" a ti vin hlar a .


" Tawnhriat ngah zawk leh daihriat tam zawk thu sawi chu awih mai rawh ." ka ti chang fak a .

Ngawi rengin car chu ka khalh mawp mawp a , he hmeichhe laka ka thikthuchhe lutuk hi ka inhrethiam bik lo a ni . Dik tak chuan ka ta pawh a ni loa a laka thikthu lo tichhe ve ngawt tur pawhin dikna ka nei lo a ni . Dikna ka nei lo tih hre chung hian ka thik lo thei chuang bawk si lo a nih hi .


"Pasal pawmlai nei ka ni loa ka mipa duh zawng ka kawp chu a thiang vek ." a rawn ti tak deuh deuh a .


A thu sawi chuan ka thin a khei zawr mai a , mipa dang a kawp chu ka phalsak teuh lo mai . Thinrim tak chuan ka rum nghut a , ka car khalh lai chu kawngsirah ka tiding dawt a ,"Eng maw i sawi a ? Sawi nawn leh teh." ka ti tuarh a , ka thinrim awrawl chu ka thunun zo ngang lo a ni .


"Mipa ka duh zawng ang ang chu kawp turin zalenna ka nei a ni . Kokoy Alkantraz tiamin ka duh a nih phawt chuan ka kawp mai ang ."a ti deuh sak a .


Ka thin chu a rim tak zet a ni . Kokoy ang mihring chu a kawp hauh lo ang ," I ngam chuan kawp ta che . Min fiah ngam chuan min fiah rawh ." ka ti vawt ruih a . Ka hriat lai chuan mipa dang chu a kawp lo chiang khawp ang , theih ang angin ka dang ngei bawk ang .


"Ha! Ka hna atangin min ban anga ka pawisa bat kha a hlawma rulh nghal a ngai tiin min vau leh dawn em ni ?" tia min melh kalin a chimawm zet hian a nui vei sang a , a ruih em avang chuan ka lu ka thinsan nawk a .


"Ka ti duh mahna." ti chauhin ka chhang a .


"Ti ta che ! Min ban rawh!" tiin a au that that a , "I pawisa ba kha ka rulh theih loh che ring duh suh . A tul a nih phawt chuan ka taksa hi ka hralh anga ba chu ka rul mai ang che ."


A ti duh tak tak dawn lo tih hre mahila chutiang tawngkam bawlhhlawh lutuk a hmang chuan ka thin a khei zawk mai a , min ti na nghal vawng vawng mai a ni . Ka insum hman hma chuan a hmaiah tak chuan ka beng ta thuai mai a , a te nghal that a , a hmai ka benna chu a sen vual nghal tawt a ka inchhir chawpchilh nghal bawk .


An hnam tawnga rak tuarh tuarhin min rawn ham tum chuan min rawn bei let nghal a , lo indang vein a kut pahnih chu man behsakin ka awm si thlap chuan ka pawm bet ta chial a ," I inzuar dawn maw ? Kokoy bulah maw ? Nge Miko bulah zawk ? " ka ti vin tuk a.

" Aw, Miko bula inzawrh chu ka thil hreh loh berte zinga mi a niang! A tul phawt chuan Kokoy pawh ka pan mai ang."

A tawngkam tinin min tihnat dan chu hria se chuan a ngawi hmak duh ang mawle. "An ngam zat aia toin ka lo lei ang che chu ." elsen zeta tihkhumin ka nuih zui huk a . Hetia ka tawng khum mai loh chuan kan taksa insi chial chuan phurna leh zauthauna min siamsak tlat chu ka inthunun zo dawna ka inhriat loh vang a ni .


Tal chhuah tuma tal laih laih pahin, "Zawnga, eng ngaihin nge i inngaih a ? Ka hmuh lai ngei a hmeichhia i fawpte kha engahmah ka ngai lo --i hria em ? Nang paw'n hmeichhe dang i fawh theih chuan kei paw'n mipa dang ka mutpui thei tih i hria em ?'' min tihkhum bawih bawih a .


Ka thinrim chu ka insum hram hram a, "Chuti khawpa mipa mutpui tur i mamawh a nih chuan kei hi min mutpui ta mai che . Ka ngam huai khawp ang ka tih tawh kha ." ka tihel khum ngat a .


"Ka hua che ! Ka ten lutuk che ! Kal bo rawh !" a ti that that a .


A zu rui tawng mai a ni tih ka hriatsak avang chuan ka kuah nghet zual sauh a , a hmai ka benna vual sen tat chu chulsak hliau hliauin, "Ka tihnat che vang khan pawi ka ti lutuk a ni . Kut thlak lo thei lo tur chein min cho chhuak si a nih kha ." ka ti dam thluam a .

Ka awka dam chuan a lung a ti chhia nge a rui lungpuam zawk pawh ka hre lo ka awmah chuan hmai phumin a tap ta hlawp hlawp mai a . "Nang chuan na mahila pawi i ti hleinem . Na ila i duh zawk a nih kha . Chuti ni lo se ka hmuh laiin hmeichhia i fawp lo ang. " tiin a ai uar zawk chuan a tap ta hliam hliam mai a .

A samah chuan duat taka chulsak hliau hliauin ka nui ru sak a , Ombretta kha a lo thik ve tihna em ni ang ? Ka thinlung chu a lawm veng veng mai a . " I kai deuh hlek a nih hi ." ka ti sap a .


Pawr zet hian, " Kai e ! Kha nu i fawh vang khan zu ka rui tih i hria em ?" tiin min chum dawt dawt a .


" Chiang deuh hlekin lo en la chuan aman min rawn fawp a , ka fawp let ve hauh lo tih i hmu thiam ngei ang ." ka ti sup a . "Min fawh a tum tih hre lawk ila chuan ka lo dang ngei ang ." ka tihzawm leh zat a .


"I fawp let chiang !"


"Aih, ka fawp let hauh lo . I rui deuh hlek a nih kha , muhil la hotel thlen hunah ka kai tho ang che ." tiin ka kuahna chu phelhin ka tawlhsawn a motor chu ka ti nung ta nghal a .


" Motor kha la ti nung suh ! Ka sawi tur ka la sawi zo lo !" a ti tuarh a .


Mak ti zetin mit zim san hian ka melh deuh hu a , " I harhfim hunah kan sawi dun dawn nia ." ka ti tak nain motor chu ka tihlum leh ta tho a .


"Ka thu sawi i ngaithla duh lo a nih chuan i car-a ka chuan chhan tur ka hre bik lo ." ti nang nangin a seatbelt chu a phelh mawlh mawlh a , car kawngkhar chu nam hawngin a pai chhuak dat dat a . A phone chu phawrhin a hmet mawlh mawlh a ," Min thlah turin Kokoy ka Call dawn ." a ti a .


Ka thaw hrawk a , rang taka chhuak nghalin a phone ken lai chu ka phih thlaksak thuai a , "Kokoy bulah khan i him i ring a maw ?" Ka ti Chang fak a .

Hmai zangthal ha hian min melh a , a mitmeng lian ke kaw chu a ruih vangin a meng phi chiai a , a eng emaw nalh phian lawi a ." I thik em ni ? I thik a ni ti raw ?" a ti pawr hle mai a .


Ka kut chu ka humruh ngawt ngawt a, ni e , ka thik alawm. Kokoy chauh ni lo mipa reng reng amah hnaih deuh hlektu tawh phawt chu ka thik em em zel a ni. A darah chuan kuahin, "Hawh lut teh ang." tiin car chhunga nawr luh mai hi ka tum a.

A tal laih laih a, ka hmaiah chuan min rawn beng ta thuai mai a, zurui tha zawi kutthlak mah nise a na phian leh nghal a. " Min chhang rawh. I thik a ni tiraw?" a ti chhar chhar a.

"Aw." ka ti sup a.

" 'Aw' chu eng tihna nge?"


" Kokoy kha ka thik a ni." tiin a beng bulah chuan ka phun sup a.

Chutah mumal lo zet hian a nui ta hawk hawk a, a zurui chu a cute reuh hi ka ti tlat mai a, a chet vel dan leh tawng dan velte chu a hmuhnawm riau mai. A darah chuan kuahin car chhungah chuan ka thut luhtir a, seatbelt hrentir tuma ka kun mek lai chuan a hmui nel thep leh lum hiam mai chuan min rawn fawp ta a nih chu. Ka thisen kal lai chu a tawp ta emaw tih mai turin ka khawvel chu thawklehkhatah a chawl ta thup mai. A hmuia min tawhna chuan ka lungphu chu ti rang nghal zawih zawihin ka taksa chhungril chu min fan nghal chiai chiai a.Fawh let ve bawrh bawrh mai chu ka chak et et a, mahse zurui chhia leh tha pawh thliar hrang thei lo a nih vang chuan fawp let lo tur chuan ka insum fan fan a, harsa chu ka va ti talh talh si em.


Min fawhna chu a uar tulh tulhin a lei chu ka ka chhungah rawn rawlh lutin a rawn hawl kual vel ruai a. "Khawngaihin,Jojo, i harhfim huna i inchhir lehna tur thil engmah ti suh." tiin ka nam sawn a, seatbelt chu ka hrentir mawlh mawlh a. Ka hrentir zo ka'n melh leh chu seat nghenchhan nghengin a lo muhil bawrh bawrh hman tawh a. A muhil lai hmeltha lutuk chu thinphu hlawp hlawpin ka en vawng vawng a. He hmeichhia hi ka thinlung zawng zawngin ka hmangaih tih ka chian tluk zetin mipa dang tan ka phal lo tih ka hre chiang a ni.


A mi fawhna vanga ka lungphu pangngai lo chu tipangngai leh turin muangchangin thawk ka han la ham ham phawt a, cigarette chu tanin ka han hip vang vang a. A mithmul kual nalh tak hnuaia a mithmul er sei sal mai chu dimtein ka khawih de de a, chutah a hmui nalh tak leh sen sak mai chu tawkin, " I harhfim laia min fawp ni la ka hlimpui dawn tehlul nen." tiin ka phun sup a. " Mahal kita, Jojo.''

Ka lungphu tlema a ziaawm takah chuan muangchangin kan thlenna Hotel lam pan chuan ka car chu ka tlantir ta a.

Hotel kan thlen chuan a room-ah ka pawm lut a, khumah muttirin chhuahsan leh nghal mai ka tum uk naiin party dress nena muttir tawp chu dik chiahin ka hre si loa," Hey Jojo, harh teh. Hotel kan thleng tawh a nia, i thawmhnaw i thlak dawn lo em ni?" tiin ka sawi nawk nawk a.


Chiang lo riaia rawn mengin, " Ka peih thlawt lo. Khawngaihin min lo thlaksak rawh." a rawn ti niah niah a.

Tim deuh dui leh inthiam lo tak chung chuan a thawmhnaw chu phelhsakin mutkawr ka haktir ta a. A taksa nalh lutuk chuan ka thawkte tirangin ka mipatna a kaitho thei hial a ni. Puan sin thattirin thinphu inthum rawn tluk tlukin pindan chu ka chhuahsan ta tham tham a.


Ka room ka thlen chuan ka inbual fai ser sawr a, zu lem leh hlak pahin cigarette chu ka zu vang vang a. Jojo-i taksa nalh zet leh itawm lutuk chu ka mitthlaah lo langin a fawhna ka hmui chu ka kut zungtang chuan ka tawk zauh a," Ka taah ka la siam ngei ang che. Mipa dang rengin an ngaihmelh theih loh nan che leh ka ta i nih zia lantir nan i kawr hnung leh hmaah ' Iñaki ta' tih ka chhutkaitir vek duh maithei a ni." tiin ka phun sup a. Ni e, chutiang chuan ka ti duh tak tak mai thei a ni! Mipa dang reng rengin an hnaih emaw hlek paw'n ka lo thikin ka na em em zel mai si a.

Muthilh ka tum ngial paw'n ka harh tulh tulh zawk emaw tih tur hi a ni a, ka mitthlaah chuan a taksa ruak kang mai nalh lutuk mai leh ka hmuia a rawn fawh lai chu a rawn lang nawn uarh uarh a. Chung thil ka ngaihtuah zawng ngawt pawh chuan ka thawkte rangin tisa chakna chuan min tuam hlup hlup a. Mipa luck lo ber leh hmeichhe mutpui tur hmu zo lo ang hrimin Jojo suangtuah chung chuan ka in-jerk off ta hial a nih chu! Tenawm zawkin!

Jojo ka tawn atangin ka hringnun hi a inlinglet thawk a ni ber mai. Hmeichhia duh duh thing thei leh ka duh apiang ka nei thei inti ve ngat kha chhiahhlawh nula pakhat vang maiin heti khawp hian ka tal buai ta a nih ber hi. Hei ngei hi a lo nih dawn hi hmangaihna dik an lo tih chu.

Jojo hi ka nei lo a nih chuan ka na ngawih ngawih anga ka tuar zo lo ang. Ka nunah a tel lo a nih chuan ka famkim thei ngai lo ang. Eve-i tel lo chuan Adam nun chu nun khawhar leh ruak a nih ang bawk khan he lei Eden-ah hian Jojo tel lo chuan Iñaki hringnun hi a kim thei lo a, chenpuitu awm lo khawvel ruak vek ang a ni.

**

Ka thawnthu min chhiarsak ve avangin i chungah ka lawm tak zet a ni. Khawngaihin Ads click kha min ngaih pawimawhsak hram teh aw. Chuan like leh comments pawh ( comment hi chu ka ngen ngawl ngam lutuk lo che u...In comments-te ka reply vek loh vang che u hian. Ka sawi nawn leh dawn : ka induh vang a ni lo a nia aw.

Ka hmangaih vek che u😘😍

Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)