There She Goes BY Lalthapuii Ralte (Completed)

Episode nei ho a hlawm a dahkhawmna
Ngaia
Site Admin
Posts: 25813
Joined: April 30th, 2016, 4:07 pm

There She Goes BY Lalthapuii Ralte (Completed)

Unread post by Ngaia » August 15th, 2021, 4:16 pm

ikf3lw0p.jpg
Ka alarm ri chuan min ti harh a, khum sir dawhkan-a ka mobile dah chu meng mang lovin ka ban a, alarm chu ka off a. Peih lo tawkin ka meng a, ka piaha ka pasal muhil suk suk chu ka en reng a. Kum 10 dawn kan innei tawh a, fa kan la nei lo a, tun thleng hian ka pasal in nupui atana min neih chhan hi ka hre chhuak thei lo a, min hmangaih lo tih erawh chiang takin ka hre tawh thung.

Ka inphihfai a, choka-ah ka lut phei a, kan nula Maengi chuan thingpui min lo chhawp nghal a. Vawiin lama Delhi lam ka pan tur thu leh ka awm loh chhungin a pu lo enkawl tha turin ka chah mawlh mawlh a. Nidanga ka tih thin angin kan pa chawhmeh duhzawng ka siam zung zung a, Maengi chuan rawngbawl tho mahse, kan pa chawhmeh duh chi pakhat hi chu keiman ka siam ngei zel, ka phut ngai lo nangin lawmthu emaw, a tui thu emaw, fakna erawh a ka atangin a chhuak ngai lo thung.

Thlawhna ticket-a Zodinpuii tih inziak kalh chu ka en nawn leh a, hriatsual palh awm thei thu-ah kan chhuah hun tur chu ka bih chiang leh a, ticket chu thlep fel in ka suitcase nizan lama ka siam fel sa chungah chuan ka dah a. Ka inbual san ta a. Ka inbual chhungin pa ber pawh a lo tho ve em ang chu!

Kan pa, Thante-a hi Aizawl College Lecturer a ni a, History teacher a ni a, a subject hi a thiam in a student te pawn an zah thin hle. Tlangval senior tak a nih thlengin hmeichhe lam reng reng a ngaihsak lo a, kum 40 a kai kum chuan min rawn rim ve tluk tluk mai a, kei chu zirlai ka ni a, 6th Semester ka zir mek bawk a. Kan kum in upat hleih lutuk avang leh ka hmel duh zawng anih lem loh avangin ka rilru ka pe ngai lem lo a, a lo leng tur ka bihruk san chang lah a tam. Mahse, a beidawng duh lo a, kum khat a rawn len hnu-ah chuan ka chhungte pawn min zilh nan an hmang ve nak nak thin a. Ani ang baka mipa tha ka hmuh loh tur thu te, ka tan innghahna tlak anih thu te in thu rawn min pe fo thin. Keipawh ka inngaihtuah ve nasa a, hmeichhe ler lo tak mai ka ni a, ka hmel a chhe lo, min bem tu leh min duh dertu tam tak ka nei ve a, mahse inngaihzawnna lamah hian ka rilru ka pe em em ngai lo bawk a, ngaihzawng ka nei ngai lo. U Thante-a chu a thiamna vangin ka ngaisang em em a, ka zah bawk a. Sum meng a meng ni ila, min lo rim tirh khan ka tlu nghal rawk rawk ang, mahse, kan chhungkaw sum enkawl tur, sumdawnna lian nei sa, fanu mal neih chhun leh sum leh paia buaina nei lo, duh leh mamawh ang apiang lei thei kha ka ni ve tho a, amah ka ngaisanna leh ka zahna khan inneihna thuthlungah min hnuk lut ve chauh a ni.

Ka inbual zo a, U Thante-a pawh a rawn tho ve tual tual a, bathroom lamah a lut zui a. Makeup ka inhnawih zo a, zinkawnga hak nuam turin Kurta leh Palazo ka ha a, Chapal bun nuam zet ka inthawlh bawk a. U Thantea hak tur buaipuiin, a kawr, kekawr leh pheikhawk leh mawza te chu khumah chuan ka rem thap a. Chaw ei siam turin ka chhuak ta a.

Hmai phih fai hlim hlawl tih hriat takin pa ber pawn dawhkan a rawn kil a. “Vawiin chu ka thlah ang che, Class ka nei dawn lo a,” a rawn ti thum bul bul a. “A va lawmawm dawn ve, lo zin ve daih la,” ka tih zawm zat a. A nui hak ringawt, chu zawng chu, nidangah pawh a tih loh dan pawh a ni lem lo a, ka enliam ve mai bawk a.

Chaw kan eikham chuan muang changin Lengpui Airport lam panin kan in khalh thla ta a. Engmah sawi tur kan nei lem lo aniang, kan ngawi dun reng a, hei pawh kan ti ngai loh dan a nih chuang lo. Amahah hian rik bawrh bawrh te, fiamthu te, inchhaihna thu mai mai pawh besei tur a awm lo a ni.

Airport chhung lamah ka innawr lut fel a, mi an lo zi nuaih nuaih a, security-ah ka lut fel a, kan thlawhna tur a lo la tum loh avangin ka phone ka phawrh a, social media en kual pahin ka thu a. Sumdawng kan nih avangin hmelhriat hi ka ngah ve viau a, hetiang hunah hian hmelhriat hi ka hmu leh hlauh thin a, mahse, tun tum chu mahni a awm ka chak ngawih ngawih a. Ka phone ka khawih a, ka hawi chhuak lem lo.

Tunlai chu khawharna hian min tuam hlup hlup reng a, ka pasal lakah hian ka beiseina thi tawh hnu chu a lo nung thar leh a, nupa hlim tak, thu in hmu em em, a changa in hau bap bap a, in thlem lungawi leh thin ang kha ka awt ve em em a. Hetia roommate ang mai a khawsak mawl tawp hi ka hne tawh em em a ni. A chang chuan inthen chak ut ut na ten min tuam hlup hlup thin a, mahse, kan inneihna thutiam hi ka ngaihtuah fo thin. Tin, inthen chhan tur hi han sawi tur em em hi a awm lo a, ‘Khawharna’ hi a chhan tlingin tuman min ngaihsak theiin ka ring lo a ni. Hun rei tak chu amaha beiseina ka neih ve te chu ka dah bo a, hna ka thawk mawp mawp a, thian ka kawm a, ka duh dan angin ka khawsa a, min hau lem lo bawk a, min enliam mai a, mahse, chhungpuinu tiha mawi lo zawng erawhin ka khawsa ngai lo thung. Tunlai chu thian tha ten pasal an nei nak nak a, mi nupa thar hlim em em karah te ka awm a, ka thinlung mu hnu an kaitho a, ka pasal laka chhanlet loh hmangaihna chu ka lo beisei thar leh ta, chung chuan ka nun hi a tihlim lo ngawih ngawih a ni.

Instagram-ah ka lut a, ka thiannu Hmingthani pasal nei thar thlalak a lo awm chuai a, ka rilru in, “Hlim reng rawh u,” ka ti a, engin nge min mawlh ka hre lo, ka mittui ka khap per sak a. Anni zawng hun rei tak in duh tawn em em a in zui hnu a innei an ni bawk a, ka dinhmun ang hi an tawng ve lo turah ngai ang.

Ka hnunga mipa aw mawi zet vai tawng leh sap tawng in pawlha phone hmang chuan ka suangtuahna khawvel atang chuan min tiharh zawk a. A thusawi vela tang chuan sumdawng lian tak anih loh pawhin Corporate Office lian ve takah dinhmun sang tak a chelh ngei ka ring. A aw chuan min hipna riau a neih avangin ka hnung lam chu ka va hawi a. Ka hnunga pa lian pui phone hmang chung a lo thu run chuan min lo melh khui a. Lehlam ka hawi leh vat a, ka phone ka en chhunzawm leh nghal hmak a, min melh zam nghal mai dawn a lawm le.

Kan thlawhna tur pawh a rawn tum ruai ruai a, rei lote hnuah chuan thlawhtheihnaa lut turin kan intlar leh ta a. Ka seat a ka thut fel hnu chuan nidanga ka tih thin ang bawkin U Thantea ka call a, thlawhtheihna chhunga ka luh tawh thu te ka hrilh a, ka phone chu flight mode-ah ka dah a, tawitein ka tawngtai a, tukverh lam hawiin ka thu ta ran a. Midang pawh chu an rawn lut sang sang a, ka maimitchhinsan ta a.

Tunlai chu ka dik thei hlawl lo, in entir mai te hi ka duh rum rum a, mahni chauha ka awm chuan mahni inkhawngaihna thlarau hian min rawn luhchilh zung zung a, mittui hi a lo hnai leh mai thin. U Thantea kha lo nei lo ta ila, fa te tal hi nei ve thei ila, engatinge ka nu te khan ka duh em em lo tih hre reng chung khan min lo duhpui em em mai le, nula upa pawh ka la ni si lo a tih te chuan ka rilru-ah a lo lut leh a. Dik tak chuan Delhi pawh tluang takin kan thleng leh ang a, kar khat pawh thang ila, thla khat pawh thang ila, ka pasal hnen atang hian ngaihsakna ka dawng dawn lo a, ka dam tih a hriat a, keiman ka biak chuan a duh tawk leh em em dawn a ni. Family Counseling-a kal ka rawt tum a min chhanna khan ka beidawnna a ti zual em em a. “Hlim i tum lutuk anih kha, hei bak nupa nunah a awm chuang hleinem, i duh duh danin i awm ka phal sak che a, nang baka nu vannei an awm hleinem le,” min ti duh chauh a nih kha.

Dik tak chuan, induhsakna lantirna te, inkuah vawng vawng te, inhnaih taka thut a movie han en dun ve mai mai te, eng eng emaw thu sawi a han ti ti dun ve melh melh te, khawi emaw a han len khawthawn dun vel te hi ka chak ve thin, bazar dun te, thu inhmu lo in tihtauh khum bar bar a, han in thlem lungawi leh vel te hi ka chak ve thin. Ka inngaihtuah lungpuam a, ka mittui a rawn tla ngiai ngiai a, rang takin ka kutin ka hru a. Ka bula thu aw thum mawi zet chuan rawmawl min rawn pek pahin, “Tahbelh deuh ka thut pui peih lo a nia,” a rawn ti a. Aw lawi rutin, “Ka lawm e, ka mamawh lo,” tih pahin ka bag atangin ka rawmawl ka phawrh chhuak a, ka inhrufai mawlh mawlh a. Ka ngaihtuahna ka kawm chhungin kan aw mawi-a chu ka bulah a lo thu reng chu niin.

Delhi pawh zan dar 10:00 velah tluang takin kan thleng a, Kolkata-ah thlawhna kan thlak a, ka bula thu tlangval chhe lo zet, pa hrak mai leh mi uap na zet vang khan nuam pawn ka chuang thei lo, ka in veng run a, Kolkata to Delhi-ah chuan hahdam takin ka chuang ve thei hram anih kha.

Uber ka la a, ka hotel thlenna tur lamah ka tlan tlang nghal vang vang a. Hotel Gold Regency, Paharganj lam panin kan tlan ta vang vang a. Helai hmun hi ka bazar thinna hmun a hnaih avangin ka thlen fo na a ni a. Delhi Rail Station bul mai anih vangin khualzin an tam thin hle bawk. Rel Station bul anih avang hian hotel pawh a a bul hnaiah a tam hle a. Hotel KC Plaza an tih phei chu Mizoram sawrkarin Exhibitiona kal vel an hruaiin an thlenpuina thin hmun a ni a, Mizo pawh kan mikhual lo thin hle.

Ka room-a ka luh fel hnu chuan kan pa ka call a, ka thlen tawh thu te ka hrilh a, nidang ang lo takin, “Lo haw thuai thuai rawh aw, cham rei lo la,” a rawn ti ve sup a, ka hnuk te a ti ulh mai dawn a lawm le. Engemawni a hriat ve ni. Ka inbual fai a, naktuk lamah vahchhuahna tur ka ngah dawn avangin ka mu zui ta nghal a.

Ka phone ri ral ral chuan min kai tho a, zing dar 7 a lo pel der tawh mai. Phak tawk in phone ka pick up a.

“Hello”

“Good morning, beautiful”

Neha, High School ka kal laia ka thian kawm ber a ni a, Delhi ka kal hi chuan kan inkawp chawt zel. Ticket ka cut tirhin ka kal tur thu ka hrilh nghal a, a ni a lo la chhinchhiah thlap a nih lehpek hi. An ina ka thleng lo hi a thin a rim em em ziah a, tukin pawh a rawn phun leh nasa hle mai.

Tun tum chu pasal hual thar a neih avangin inhmuh a phur hle a, a pasal hual pawh ka hriat sa tho a ni na in, an inhual hnua ka hmuh hmasak berna tur a nih avangin inhual lawmnan party pui ngei min tum ruh em em a. An engagement party-ah ka tel loh avangin kei pawh zan khat na na na chu an pualin hun hman ngei ka tum bawk.

Breakfast te ka order fel hnu chuan breakfast an rawn dah hma ka lo in tifai zung zung a. Coffee tak tawk mai in chu ka chak zek zek tawh mai. Ka skin care routine te ka tih fel zawh hnu chuan doorbell a rawn ri ral ral a, room service chuan breakfast tur a rawn chawi lut a. Lawmthu ka sawi a, tips ka pe a, hlim takin min chhuahsan leh ta a.

Muangchangin coffee ka in a, bread omlette nen ka ei talh talh a, ka doorbell a rawn ri leh ral ral a, kawngkhar ka hawn chuan Neha-i a rawn lang leh der tawh. Sana ka en a, dar 8:30 a lo ri tawh a.

“ I inpeih hma hle mai, tun ang hunah eng dawr nge in hawng se i tih a?” tih pahin ka kuah a.

“Ka hmu chak tawh lutuk che alawm, zanin chu party ang aw”

“Oh, ka tihtur ka tih fel vek hunah, ka haw dawn hnaih lamah kan party turah ka lo ngai a”

“Come on, boring viau suh, lehkha zirlai pawh i nih loh hi, ka nulat hun chhung tawi te hi kan chen ang a, tun tum i haw chu zu hne hluiin I haw dawn a nia” min tih khum a.

“Breakfast ka chah sak ang che aw” ka ti a.

“Sure”

Breakfast te kan ei zawh hnu chuan insiam pahin kan ti ti a, tun tum ka zin chu sumdawnna thil ai mahin Neha-i pasal nei tur inbuatsaihna kan kal pui dawn a ang tlat mai. A tha vek tho ve. Auto kan la a, Sadar bazaar lamah kan inzui chhuak ta a.

Sumdawnna line hran hran ka buaipui a, tun tum ka zin hi chu Naute leh Nu mamawh vel dawr thar siam ka tum avangin Product tha deuh leh Agent rintlak deuh te zawn tum ka ni a. Chumi piah lamah chuan ka agent sa te ho tlawh kual thuak thuak ka tum bawk a. Engpawh nise, Neha-i pualin ka programme duan sa thenkhat te chu cancel mai a ngai dawn a ni. Ani pawh pasal ka neih dawna a buai zia te ka ngaihtuah chuan a phu ngawih ngawih.

Ka hna te kan thawh zawh chuan Uber kan ko a, Select City Walk lam panin kan tlan ta vang vang a, mall chhungah chuan kan lut a, ka dai ta sawng sawng mai. Tlai lam dar hnih a lo ri dawn tawh a, ei tur ei hmasak ka rawt a, kan in hnawh puar pengpawng hnu chuan kan bazar ta a.

Neha-i nu leh pa hi doctor an ni a, ani pawh hi lehkha thiam thei tak ni mahse, an fanu mal duat kha a ni a, eng hna mah a la thawk lo. Designing Degree Course zo vekin MBA a zo leh a, a sumdawng zui mai dawn em maw ni ka tih laiin, hei engmah thawk lovin ti hian a la tal ve mai mai a ni. Delhi Public School-ah High School leh Higher kan kal chhung in zui kha kan ni a, kan tui zawng engkim kan inhriatpui a, kan la in ngai em em reng mai.

ZARA show roomah kan lut leh a, kawr dumfual khup chen vel nalh zet lo inkhai chuan ka mit a la zar a, ka en lai chuan Neha-i chuan a rawn pawtthla nawk nawk a, “I inhmeh lutuk dawn, zan inah rawn ha ang che,” tih pahin a thawmhnaw ho zingah chuan a bill tel tir nghal a, ka pek a phal lo leh bur tawh.

Zan dar 8 velah hotelah mahniin zanriah ka kil a. Ka ei zawh chuan muang changin ka insiam a. Ka kawr lei thar, sexy zet chu ka ha a, ka in en vang vang a, heel sang ve deuh nena hak loh chu a uiawm ve det a ni. Ka pencil heel chu ka phawrh a, ka bun a, ka inhmeh tak zet in ka hria. Mit pawh smokey takin a inhmeh ang ti chungin ni dang aia dur hretin ka mit pawh kan thai kawi vel a, ka hmui erawh nude deuh lam ka hnawih a. Ka sam sei hniang nen chuan nalh ka in ti ve takzet.

Phone a rawn ri a, Neha-i anih ka ring a, mahse, mak tak maiin U Thantea a lo ni a, nidanga min call ngai hlei lo, enge mawni awmzia ni. Ka tluan leh tluan loh te min rawn zawt ve a, ka nui hak a. Chanchin ka hrilh hnuah Neha nen party tura kan chhuah tur thu ka hrilh a, phone ka dah zui ta a.

Neha-i call a rawn ri a, Hotel kawtah car nen awm tawh thu min rawn hrilh a, ka jacket chu ka ha a, inhnuai lam ka pan ta nghal a. Car chhung ka luh chuan ka jacket chu a lo phelh nawk nawk a, “Wow, i sexy tak zet,” a ti a, ka nui hak a.

Privee Night Club lam panin kan dawk chhuak ta zal zal a. Kal pah chuan Neha-i chuan Ranjit leh a thiante an lo tel tur thu leh, kan pahnih a lo ti ti mai mai a chak avanga min rawn sawm hma thu te a sawi zung zung a. Eng tak min sawipui tum ni maw?

Privee kan thleng a, he club zet hi chu mi hausa ho kalna a ni bawk a, a changkang tak zet. Kan luh chuan bar lamah chuan kan pahnih tan martini a lam a, lounge lamah chuan kan thu zui ta nghal a.

“Chuan, eng chu nge min sawi pui i tum a, inneih chungchang anih chuan, hei kum 10 lai experience ka nei tawh hi, min han zawt tak tak teh”

“Oh yes, Zodin, inneih chungchang chu ni teh meuh mai, mahse, keimah ni lovin, nangma chungchang a ni,”

“Ka van hrethiam lo em?”

“Min bum hi tum tawh suh, min bum ngai lo a, ka haider mai che a ni. I hlim lo a, i hlim ngai lo. I la hria em? Pasal i neih hlima in nupaa in rawn zin tum kha, khami tum bak kha chu i hlim hmel ka hmu leh tawh lo. Ka bulah i sawi lohvin tunge i hrilh chuang ang le? Khawngaihin, i thiana min la ngai anih chuan han sawi teh”, a rawn ti chhuak a.

Ka thiannu thu sawi chuan min ti sa hut hut a, ka lungphu te chu an in thum rawn tluk tluk a. Chhan dan pawh ka hre lo, ka ngawi reng a, ka Martini chu ka lem hlek a.

“Ngaihzawng dang a neih san che em ni? Nge kut a thlak thin zawk che?,” a rawn ti a, ka hawi chhuak a, min lo melh kal a.

A vawi khat nan kan Marriage Life hrehawm zet chu zanin hian ka sawi chhuak ngei dawn a ang. Ka mittui a rawn parawl a, ka biangah chuan a luang thla pap a. Neha-i chuan min kuah a.

“Hetia kuah hi i mamawhna a rei tawh tih ka hria asin, mahse, engmah i sawi duh ngai si lo,” tih pahin ka hnungah chuan a beng thek thek a.

“Ka sawi thiam lo a ni e. Bul tan ngaihna pawh ka hre lo. Midang harsatna nen a inang lo aniang, nge keimah hian ka zir lo zawk pawh ka hre lo. I hriat kha, inngaihzawnna awm em em lovin, aman min duh em avangin ka tana a that beiseiin ka nei a nih kha. Mahse, amah a zei lo ve hrim hrim nge, min duh tak tak loh vang nge ka hre lo a, kan nupa-ah hian nupa dangin nun an intawm thinna ang hi a awm ve lo. No chitchat, no outing, no jokes, nothing, kum li kan inneih hnu-a fa ka pai tak miah loh hnu-ah phei chuan, ka taksa a tawh lohna chin hi ka hre tawh lo a ni. Ka khua hi a har em em a ni. Sawipui tur ka hre lo. Ka nunah hian inngaihzawnna te, induatna te a awm lo a, chung dawng thin hmeichhia ka hmuh chuan ka khawharna a zual thin, nang pawh tiamin.

Nang chu Ranjit-an a duh em em che a, ka hmuh lai ngeiin i kut a vuan a, a kuah che a, ei tur i pekin lawmthu a hrilh che a, i ei duhzawng a siam sak che a, in hau thin mah ula, in inngaidam tawn a, in hlim dun leh thin. Chung chu ka nunah a thleng ngai lo. Engkim ka tih min phal sak a, ka duh tawkin ka bazar a, neih loh pawh ka nei lo, ka duh duh thian ka kawp a, a chang chuan zan tlai tak thleng a len chang ka nei thin, min hau ngai lo a, min en liam tawp mai zel. Engtinnge ka sawi ang, Neha, roommate mai chauh kan ni. Siam that tumin theihtawp ka chhuah a, a tan ka inchei a, nalh tih ka hlawh ngai lo, zanah amah hnai deuha mut a bul tan ka tum pawn, min hnar thin.

Thinrimna a neih leh neih loh ka zawt a, a neih loh thu in min chhang a. Sex lamah harsatna a neih ringin in entir ka rawt a, min hnial fithla thak bawk a. Inthen ka rawt a, a duh bawk si lo a. Ka hrethiam lo tak zet a ni.

Ka khua hi a har vawng vawng a, ka chhungte bulah ka sawi ngam si lo. Ka pa tan chuan makpa chhuanawm tak a ni a. Lehkhathiam, sualna nei lo, mi in vawng fel tak a ni, makpa tih tur a hre em em a, an mamawh hunah a awm reng thin a. Nupa nun tih lohah chuan sawiselna lai tur a awm si lo a, then mah ila, tumah ka chhungten min pawmpui chuang lo ang, makpa rangkachak kha a ni tlat a,” ka mittui chu ka hru zauh a, ka hmaa Martini tlem in chhawp chu ka lem zo ta vek a.

“Hmanah khan min hrilh tawh tur i ni asin”

“Engtin nge ka sawi chuan ang. Neha, kan pa nen chuan kan mudun ngai lo, min kuah ngai lo, min duat lo, min ngaihsak lo, ka ti dawn em ni?. Tu hnenah mah sawi tan ngaihna ka hre lo a ni.”

“Chuan, nangmah in i tuar tawp mai a maw, lo kal teh,” tih pahin min kuah vawng vawng a. “Hlim hi i phu a ni, hmangaih tawn ve te i phu a, hmangaihtu tawn ve te hi i phu tak zet. Haw la, then la, kan inneihnaah lo kal ang che, nangmah duat tur che kan zawng ang.”
“Neha” ka ti tuar a, nui sangin ka mittui chu a rawn hru hul a.

“sh*t, duh aiin an lo thleng hma a ni, i future tur ka la plan fel lo asin le,” tih pahin a ding hluai a, Ranjit-a te ho pawh chuan min rawn zawm ve nghal a. Ranjit-a thianpa Nikhil-a leh a bialnu an rawn tel ve. An hnunga rawn zui ve tu ka hmuh chuan ka sa deuh pup a, ka tahna mit pawh a la hnawm chap ang chu. Takzet chuan tahbelh min ti awm mang e.

“Zodin, Nikhil chu i hriat kha, a thiannu hi Sumita aw, chuan hei chu Ramsanga a nih hi, Ranjita business partner thar a ni a, Mahse, Mizo tawng hman bik awih loh,” Neha chuan a rawn ti lang lang a.

Neha leh Ranjit chuan ei leh in tur lam an buaipui a. Kawp nei lo ve ve leh Mizo ve ve kan ni bawk a, a rem bawk em a ni, Awmawia oh Ramsanga chu ka bulah a rawn thu a, a perfume hman pa hrak mai chu ka hip lut vang vang a, a pa lian in a hmeltha bawk a, a bula awm chuan ka inveng run mai a, ka hah ru tak zet. Ka lam a rawn hawi chhuk run a, min en deuh vang vang hnu chuan,
“Thlawhnaah khan i tap zo daih tawh emaw ka tia,” a rawn ti a. Ka ner nang a, a lo nui suk thung a.

“I kawr hak chu i inhmeh hle mai,” a rawn ti leh a, chhan let ngaihna ka hre lo a, ka melh kar a, ka ngawi reng a. Aw a rawn thian kharh a. Lehlam a hawi a, Nikhil-a te nen chuan an in titi chhunzawm ta a. A hawiher leh achetzia engim mai chu a zei thlup vek mai.

“Ka lawm e,” ka ti mai lo chu mawl ka in ti tak zet a. He pa bulah hian ngatinge ka kha a chih tlat zel ni, French tawnga biak ngai pawh ni lo, hrep tak chuan.

Lamtual lamah chuan music a ring tawh hle a. Neha chu ei leh in tur nen a rawn phei a. Ka piah chiah thutthlengah chuan a rawn thu a, in tur chu min rawn pek pahin ka beng bulah chuan, “Zanin chu engkim theihngilhin in ang hmiang, ka thu hi awi tawp teh, chuan no more tears, ok,” a rawn ti a, nuih var var pahin a no min rawn pek chu ka tlak pap a, Neha pawh chuan a no ami chu tlakpap pahin ka no-ah chuan a rawn thlit chhunzawm leh nghal a.

Ranjit-a chuan, “Baby, in ti hnem lutuk ang e aw,” a rawn ti a.

“Shhh, Zodini hian a mamawh a, keipawn ka mamawh, kan kiangah i awm a, mi paw haw thei dawn ni lawm ni, Korean movie-a tlangval ho ang khan” a ti zawm zat a, keimah vanga Korean movie uar kha a ni ve a. Midang chu an lo nui ham ham a, zan hun nuam zet chu kan hmang chhunzawm ta a.



Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » August 15th, 2021, 4:16 pm

Ramsanga Pov
Club chhung kan lut a, boruak a lo sang chho hle tawh a. Lounge-a Neha leh a thiannu inkuah vawng vawng chu ka va hmu a, Neha chuan a mittui a hruk sak mawlh mawlh a, kan va thlen hnai chuan thlawhnaa ka chuan pui nu bawk kha a ni tih ka va hre chawp chilh a. Eng tak chuan tibuai ni maw, ka hmuh apiang in mittui nen ka hmu ziah mai. Airport-ah khan thlawhna kan nghah laiin ka hmaah khan a thu kun ngel a, a sam kha a dar lehlamah a uai thlak tir a, a bengkawm leh lam lo lang leh a nghawng lo lang lai var ser khan min hip hle tawh a ni kha. A ruka a mittui a hru zeuh lai kha ka hmu a, ka en reng laiin hnung lam a lo hawi thut anih kha.

Thlawhna chhung ka luhin ka seat tur ka pan chu mittui nen bawk a lo thu a, a maimitchhing tlat a, rawmawl ka pek pawhin a la duh tawh lo a nih kha. Chuan tunah mittui nen a thiannu nen an lo in kuah leh vawng vawng tawh.

Zanina a kawr hak chu a inhmeh kher lehnghal a. Ama pual liau liau a an thui niawm tak a ni. Kawr dum khup chen a fual, ban nei lo a ha a, a vun rawng ngo ser mai nen chuan a inhmeh tak zet zet a. Hnamdang kara hak a tan chuan a chhing in a awm te chu a zau deuh em aw ka ti a, amah chu ka veng nghal deuh tun a, anihna takah chuan vai nula ho pawh an in fengchhing vek tho a. Mahse, amah te reuh chu ven ka duh ut ut a, a bulah kher chuan ka va thu a.

“Thlawhnaah khan i tap zo daih tawh emaw ka tia,” tih pahin ka nuih a, a rawn ner nang a. A kawr hak a inhmeh thu ka hrilh chuan a lai hle tih a hmelah ka hmu thei, min chhan mai ngaihna a hre lo a, min en kal a, a mitmengah chuan khawharna ka hmu thei, ka nu mitmenga ka hmuh thin ang kha. Ka nghing dawt thei hial in ka hria. A kut chu a khalh niap niap a, inneih zungbun a bun tih ka hre thei a, a pasal in a thihsan vanga khawhar nge ni ang a, ka nu ang bawka nun khawhar tuihal kha. Ka ngaihtuah zawm duh lo a, Nikhil-a te chu ka titi pui chhunzawm chho ta a.

Neha-i leh Zodini chuan zu an tlak pap pap reng a, Ranjita’n a hauh pawn an ngaithla duh lo dun reuh bawk si a. Ka rilru in Zodini chu buaipui turin ka in pe nghal tawp. An kai ta hle maw tihah chuan lamtual lamah an inkuah phei dun a. Ranjit-a chuan a ngaihna hriat hmel loh tak hian,

“Hetiang hian vawi khat mah ka la hmu dun ngai lo, kan party ho fo a, kawm nuam tawk chuan an in thin,” tih pahin anmahni ngaihtuah tur chuan a tho zui a.

“Ngaihtuah lutuk suh, nulat te pawh an thlah ve dawn aniang chu,” Sumita-i chuan a tih khum al al a. Keipawhin lamtual lam chu ka pan phei zui ve nghal a.

Kan Zodini zet chu a lo lamthiam ngang mai a, vai ho lah chuan lam pui chakin an lo hual deuh tuau tuau a, thikthu hian min rawn bual deuh thut a. Ranjit-a nen chuan an lam pan chuan kan phei a, Neha-i bulah engemaw a sawi hnu chuan kan thutna lamah kan phei pui thei ta a.

An hlim dun phian lehnghal a, an kuk leh deuh raih thin a. Neha-i chuan an inneih tur pualin vawikhat chu kan vaiin a ruala kan shot a ngai a ti deuh tlat a. Zodini chu a phur ber berah a tang reuh lehnghal a, a kai tawh hle tih a mitmengah chuan a lang reng a, in belh tawh lo se ka ti takzet. Neha-i chuan a rawn thli leh a. Kan vai chuan nupa tuak thar tur tan kan tlak leh ta pap a.

Inneih hun tur leh a lawmdan tur te sawiin kan titi chho luam a. Ka bula thu chu a ngawichawi chho ta hle mai a, ka’n enchian chuan a lo chatthla hmak tawh mai a. Ka nuih ta suk a, zanin chu ka buaipui ngei a tul dawn a ni.

Neha – i chuan an ina hawpui mai a duh a, keiin ka phal lo, ka hnampui nula vai inah chatthla in ka kalsan dawn lo hrim hrim. Zanin chu ka apartment lamah ka hruai haw mai aniang chu. Ka sira a muhil nget chu ka zuk en a, duat mamawh ngawih ngawih hian ka hmu tlat anih pek chu.

Neha-i phal lo chung chu ka motorah ka hlang a, engmah pawh a hre lo. Neha-i pawh a inthiam lo tak zet a, “Hetiang zat zat a in ngai lo, nidangah chuan a duhtawk chinah min hnial mai zel se sia, zanin chu min hnial lovin a in ve zel a, a pawi tak zet,” a ti chuai raih a.
Ka apartment garage kan thlen chuan a la muhil tui hle a, kaihthawh tur nge pawm chhoh mai tur aw tiin ka in khap kual a. A hmel chu ka zuk en a, Pub-a a mitmeng khawhar lutuk kha ka hre chhuak zawk a. Ka pa khan ka nu kha a uire san fo a, ka nu khan tumah a hrilh ngam ngai lo a, kei tak ngial pawh min hrilh ngai lo. A hlim der a, ka pa pawh a duat ngaiin a duat reng a, mahse, a mitmengah khan khawharna nasa tak ka hmu thin. Amah in a tuar a, tumah a hrilh lo a, a tawpah chuan a puak chhuak a, depression nasa tak neiin a awm a nih kha. Ka nu chunga thil thleng ang kha a chungah thleng ve lo se ka ti takzet, tu hmeichhe chungah mah hian thleng lo se ka ti.

Dim te in ka pawm a, elevator lam ka pan pui a. A rawn meng siar siar a, rei loteah a maimitchhing zui leh ta daih a, zawite hian, “Mi nupui duhlai ka nih hi aw,” a ti niah niah a. A chatthla zui leh ta daih a. A pasal chuan a la boral san lo chiang a, ka hlauhthawn ang chu thleng lo hram rawh se.

Mikhual room lamah chuan ka luh pui a, khumah chuan ka mut tir a, a muhil siai siai a. A hmeltha tak zet a, a mitmenga khawharna awm nghet tlat kha awm lo phei se lang chuan, a tha famkim hial thei ang chu. A zu ngam loh dan atangin in thang tak a ni lo tih chu ka hretiam thei a, eng thil teh hrep in nge khawharna siam sak ang. Airport-a ka lam a lo hawi thut khan ka hmuh tum loh lutuk ka hmu a, min tizam thelh a nih kha. Zanina a mittui nen ka hmuh leh khan amah tihlimtu nih ka chak takzet. A hmaia a sam in zam hnawk niaih chu ka hui fai a, ka kun hniam a, a rim nu chek te chuan min hip ngawih ngawih a, fawh chakna in min tuam vel a, mahse, nichin lawka a thusawi te kha ka hre chhuak zawk a, ka insum hram hram a. Pawmlai nei a nih tak kha maw, pawmlai nei fawp chut chut tur khawpa mamawh ka ni lo e.

Fridge a tui vawt bottle chu ka la, khum sir dawhkanah chuan ka hung a, a muhil lai chu ka en vang vang a, ka room lamah ka phei san ta a.

Ka lehkha zir lai atangin phai ah hian hun ka hmang tam zawk a, mizo nu, sumdawng tam tak ka hmu fo thin a, ka tleirawl lai chuan lo buaipui lawp lawp chang te pawh ka nei fo thin. Nu ho bazar awm ngaihna hre lo tam tak ka tawng fo bawk. Chhungkaw sum tam tak nen an lo kal a, nuam an rawn tawl a, mipa dang mutpui ta lawp lawp pawh ka hre fo mai. Ka mit an ti kham thin tak zet a, nupa te hian lo kal thei thin se ka ti tak zet a ni. Kan Zodini pawh hi enge maw a an ve ang aw, danglam bik ni lul rawh se.



Zodinpuii Pov

Ka luna lutuk avangin ka harh a, ka tui a hal huam huam bawk a, a mutna pindan chu ka enkual a, ka bo hle bawk. Ka sira tui vawt lo inchhawp ran ka hmuh chuan ka in pap pap a. ka in zawh chuan ka harh sawng sawng thei hial mai a. Tukverhah chuan ka dak chhuak a, ka awmna lai chu ka hre lo hlawm tawp. Neha-i te inah pawh ka kal fova, khalai hmun vel kha a ni lo. Bottle bulah chuan ka purse a lo let ngat a, ka mobile ka phawrh a, zing dar 10 a lo ri vung tawh a. Missed call 20 chuang lai a lo awm bawk.

Missed call ho kan en chuan Neha-i deuh vek a lo ni a, U Thantea missed call pahnih a lo awm ve ngat a. Enge maw a hriat ni, nidangah min call ngai miah lo kha, tun tum chu min lo be ve zeuh zeuh reng a, ka ngaih te lam lam a ti tha lo mai dawn alawm le.

Engpawh nise Neha-I call phawt teh ang, khawi laiah nge ka riah pawh a hre thei deuh ang, nizana ka awm dan lah ka ngaihtuah hleithei der lo. Phone chu a ring a, phak tawkin Neha-i chuan a rawn pick up a, “Hello, I lu te a na ut ut em?” a rawn ti a.

“Khawiah nge ka awm?”

“New Delhi-ah.”

“Hmelchhenu, ka uang lo a nia,”

“I mut pindan atang khan chhuak la, va zawng chhuak rawh, ka mut a chhuak lutuk, ka lo biak lai che a harh thei mang si lo, bye” tih pahin phone a hmet hlum daih a. ka ngei lutuk chu phone chhanah chuan ka chhiat khum ngheng ringawt. Khum bulah chuan mipa slipper a lo indah ngat a, ka bun a, ka tan chuan a lian lutuk lam hret a ni. Bathroom-ah chuan ka lut a, ka intifai a, room chu ka chhuahsan ta a.

Ka riahna in chu a lo felfai ngang mai a, mahse engkim mai chu a pa thuk mai a, a lian hran lo nain duhtawka design a ni tih hriat tak hian engkim mai chu a bu ang thlap mai hi a ni a. Bang chu a var leh a grey duk lam in a inchei a, a dam ruih mai a. Kawngkhar ka chhuah chiah chuan Living Room, Couch nuam zet mai inhunna a lo awm nghal a, Tv tarna chung lamah chuan thlalak tlem a lo in tar a, chulam pan chuan ka phei ta a. Thlalak in tar atang chuan Ramsanga in a ni tih ka hrethiam ta a.

A thlalak chu ka en vang vang a, a awmawi ang chiahin a hmel pawh a tha tak zet. He inah hian nula engzat nge a hruai luh tawh ang aw tih ka ngaihtuah a, ka ngaihtuahna chu duh lo zetin ka lu ka thing a, ka lo buai ve na tur a ni lo e. Ka hnung lam boruak awm dan atang chuan inneitupa chu ka hnungah a rawn ding tih ka hre thei nghal a, ka za chuai thei hial.

“Chhe lo min va ti awm ve, kha mah mah, ka in pose tha duh lo a nih kha,” a rawn ti dut a, ka maimitchhing sawk a. Amah en turin ka inher rem a.

“Hotel-ah room ka nei ve reng a, I inah min hruai haw zawk a.”

“Oh, hotel room khum khat chauh awmnaah chuan hruai haw a, I bula riak ve nghal turin min duh zawk tihna em ni?”

“Ramsang, chutiang lam hawi chuan ka sawi lo aw”

“Chutiang bak chuan ngaihthlak dan ka thiam lo” a rawn ti leh dut a, a aw chu a mawi takzet a ni.

“Hmela, ka hotelah khan min thlah felin min hawsan thei reng, hei tul lo puiah tlangval inah ka riak ringawt a, pasal nei lai ka nih hi, ho te a mualpho thei ka ni” tih pahin ka kut chu ka phar chhuak a, ka zungbun chu ka kawk va a.

“Nizan khan ka lo rui viau a ni maithei a, mahse, hmeichhe lepler tak ka ni tihna a ni hauh lo a nia, Neha-i pualin ka ti ve a ni mai,” ka ti leh duah, tul lo tawpah kan insawi fiah chiam chu a.

“I pentawng thinchhe mai mai anih kha, breakfast ei teh ang,” nui vur vur pahin a ti a, choka lam a pan ta daih a. A bula ka khawr tut thin leh tawng dan tur ka inhre lo thin lutuk chu ka in haw ngawih ngawih.

Choka lamah ka phei chuan Coffee leh Chhangthawp leh butter a lo inhung a, coffee ka in chak zia ka in hre chhuak. Ramsanga chu a lo thu run a, thutna tur min lo kawhhmuh a, ka thu phei ve ta a. Chhangthawpah chuan butter chu ka tat a, Ramsanga pawh ka tah kep ve a. Coffee chu ka in a, a tui kher lehnghal a.

“Awmpui i va nei fel ve, a siam tui hle mai,”

“Awmpui awm ang i hmu reng reng em ni? Ka siam anih kha,” a rawn ti deuh hmuk a.

“Takzet maw, Mizo mipa eisiam thiam ka hre khat em a, Uisa siam chiah hi an thiamin ka hria, i siam thiam hle mai” tih pahin coffee chu ka in a, ka luna pawh a zia huai huaiin ka hria. Kan ngawi dun reng a.

“Khawi veng nge kan awmna hi?”

“Mayfair Garden”

“Oh, hetiang lai hmunah te apartment i nei thei a ni maw?” ka tih pah chuan a pawisa lakluh dan tur te ka ngaihtuah neuh neuh a. Min chhang lem hlei lo a.

“Vawiin enge i tih dawn?”

“Karol Bagh lamah ka bazar ang.”

“Nangmahin maw?” min en run a, a zam awm lampang lek lek a ni.

“Ni mai e.”

“Ka kalpui ang che.”

“A ngai lo, ka tih fo dan alawm. Vawi tam ka kal tawh alawm,” ka tih bah nuaih a.

“Tih tur ka nei ve pawh a ni mai thei asin,” a ti thum bul bul a. He mihring hian Karol Bagh bazar tawtah tihtur nei lul lo ang. Tank Road bazaar lun laia a inhnawh vel tur hmel ka ngaihtuah phei chuan ka nui chhuak hawk lo chauh.

“Party dress nen mai hian ka ni a, khawngaihin ka thlenna hotel thleng min thlah la, ka lawm viau ang. Hetiang inbela chhun enga cab lak chu ka chak vak lova,” ka ti a.

Sumdawnna thil eng enge maw ni sawiin kan ti ti zawm luam a, a mi uap a nat ang hu in ti ti pui a nuam phian a, tin, ka pasal hnen atanga ka dawn ngai hauh loh ngaihsakna ka dawng tel a, nuam ka ti riau a nih chu. Ka sumdawn dan chanchin te uluk takin min ngaihthlak sak a, a khat tawkin suggestion tha deuh te a lo sawi ve hluai a. Dik tak chuan Mizorama kan sumdawn dan hi chu hnamdang siam sa lak luh a, hralh mai a ni a, thluak hmanna tur em em hi a awm lo a, customer te mamawh zawng neih tih te, bungraw lo thlen chin hriat vel mai mai bak hi kan buaipui em em lo a. Ramsanga erawh chu Export Company lian takah a thawk a, India ram thil siam te ram hrang hrangah an thawn chhuak a, dan leh dun paltlang tur pawh an ngahin, ngaihtuah kan in ngah hleih viau ang a, kan pawisa khawih pawh a in len hleih viau ang. Mahse, ka sumdawnna chungchang ho lam ve tak chu ngaihnawm ti awm takin min ngaihthlak sak a, ka chenpui, nitina chaw ka ei pui, ka kianga mu zan tin thin ka pasal nen ka tehkhin lo thei lo a, ani chuan a ngaithla peih hlawl lo a ni tawp mai.

“Zin kual reng ngai lo hian an rawn thawn thei lo che mi, tunlai khawvelah thlalak a in thawn theih reng a, hmeichhe tan mahnia zin veivah hi a him lo viau lo maw?” a rawn ti hluai a.

“Theih ve tho e, mahse, a chang chuan zin khawthawn te hi a ngaih ve chang a awm thin a lawm,” ka ti a, amah ka va en chuan min lo melh run a, ka hawi let leh vat a.

“Intifai ila, hotel lamah chuan kal ang hmiang,” a rawn tih chuan pawmpui nan ka lu ka bu nghat a, kan thil ei leh inna vel chu ka seng pah nghal a.

“Lo sil reng reng suh aw, sil tur chu an rawn kal mai ang,”

“A harsa hleinem, kan tleuh zuai ang,” ka ti liam puat a. Ka hnung lamah chuan taksa lum ham ham ka hre zui nghal a, ka kut chu rawn manin, “Ka thu awih a harsa lo, ka mikhual i ni a, ka hnathawk tura ka hruai hawn i ni lo,” a ti ram deuh hmuk a. Ka lung chu a phu deuh dawt dawt a. Ka kut chu a thlah riai riai a. Boruak tih zan nan ka aw ka thian kharh kharh a, “Ka va insiam fel ang e,” tih pahin ka riahna pindan lam chu ka pan zui ta nghal a. Khatiang thil mai maiah a thinrim pawh ka ring lo a, a hmel rum ang angin a thin pawh a chhia a nih dawn hi ka ti rilru phei nuah nuah a.

Ka taksa a danglamna a thlen dan hi ka hrethiam lo, min hnaih te hian ka mur chuai zel, ka hlauh vang nge mawni. Ka mit taka min lo en run phei hi chuan ka zam vek zel, a chungah thiltih sual pawh ka nei tawp si lo.

Ka pindan ka thlen chuan ka phone chu a lo eng pap a, ka en chuan missed call a lo awm a, U Thantea bawk. Ka call let a, ka tha em tih te, vawiina ka tih tur te min lo zawt ve luam a, mak ka ti takzet a ni. A piangthar nge a damlo aw tih ka ngaihtuah a, mitthi tur thenkhat te hi an boral dawnin hre lawk ni awm takin an lo khawsa thin tih te ka ngaihtuah thut a, phone ka dah vek tawh chu ka hmet eng leh a, ka call nawn leh a,

“Hello”

“I dam em? Nawm lohna i nei em ni?”

“Ka tha alawm, ngatinge?” a rawn ti let hu a.

“Ka hre bik chuang nang, nidanga ka zinin min lo call ngai si lo va,” ka ti let deuh thawng a.

Nuih hak hak pah hian, “Lo haw thuai mai rawh,” a rawn ti a. Phone chu ka dah a. Ka ngaih a tha chiah lo deuh, engemaw a chungah a thleng dawn tlata hriatna hian min thuam vel a.

Pindan atanga ka chhuah chuan a lo insiam fel diam tawh a, nidanga ka hmuh ngai loh ang takin tshirt var leh jeans a lo ha a, sneaker a lo bun bawk a, a inhmeh em em tho mai.

“Hnaah i kal dawn lo em ni?” ka ti liam puat a.

“Ka bazar pui dawn che ka tih kha,”

“Oh, I ti ve mai mai emaw ka ti asin, i buai awm si, a ngai lo tak tak a nia,” ka tih zawm zat a.

“I inpeih chuan kal ang aw, i inthlak duh tawh ang, bun sang ir er reuh si,” a rawn ti a.

Nizana ka inthuamna ang bak kha hak tur nei hek lo le. Ka nui let tawp a.

“Mahse, nizan kha chuan i hman thiam viau kha maw,” a rawn ti zuk a, lamtuala kan lam lai vel chu ka mitthla-ah a rawn lang zuai a.

“Sawi zawm thui a ngai lo ang, kal ang,” tih pahin kawngkhar lam ka pan nghal a, ka hnung lama a nui ri hawk ri ka hriat chuan ka ner sak a.

Traffic jam nen hotel kan thlen meuh chuan chhun dar 1 a ri vung tawh a, ka room lamah ka chho tlang a, lobby lamah min lo nghak thung a. Ka inbual zuai a, thawmhnaw ka inbel dawn chuan Ramsanga inchei dan kha mitthlaah a rawn lang a, inang deuh a inchei ka chak tlat a, nui rah rah chungin ka T-shirt var chu ka phawrh a, ka jeans ka inthawlh leh tawp a, sneaker bunin ka sam chu sang takah ka tawn a. Ka mit tlem ka line a, lip gloss ka inhnawih a, darthlalangah chuan ka in en vang vang a, ka phur riau lehnghal a. Ka ngaihtuahnaah chuan ka pasal a lo lang thut a, ka inthiam lo deuh a, ka bag ka la a, inhnuai lam ka pan thla ta nghal a.

Ka incheina a hmuh chuan Ramsanga chu a rawn nui var var a, “Min ngaisang hle mai, mahse, i inhmeh tak zet,” a rawn ti a. Ka nui let var var a.

“Bazar nan chuan khua a la lum tha sia, lunch te i ei phawt duh em?, nizana riahna tha tak min pek avang pawn treat che hi ka ba ve hrim hrim,” tih pahin a bulah chuan ka va ding a, a dar ka pel awrh chauh a ni.

“Kan in repay dawn anih chuan riahna bakah, lamtualah vai ho laka ka venhim vang che pawh khan, e, chuan, ka apartment thleng ka pawm chhoh man che, ka ban te hi a kham teh mai a nia,” a rawn ti deuh duah a.

A hmel ka han en chu a lo nui var var a. A nui hmel mawi tak avang ngawt pawh hian a hmaah hmeichhe tam tak an lo tlu tawh a ni thei, kei chu tlu ve thiang ka ni lo, pawmlai nei ka ni. “Fine, i restaurant duhna sawi rawh, ka rul vek ang che, kal ang lem,” tih pahin pawn lamah chuan ka chhuak ta a.

Phaia awm thang a ni bawk a, restaurant nuam deuh pawh a hre ngang mai. Karol bagh-ah chuan Chinese King Restaurant-ah chuan min luh pui a, a dawr a lian vak lo nangin an thil siam chu duhthusam a ni. Momo ka ei lai chuan U Thantea chu ka ngaihtuah chhuak a, ni danga min lo call ngai hlei lo, min rawn call ve reng mai chu ka ngaih a tha thei chiah lo a, ka hmelah chuan ka lo ti lang chhuak deuh nge ni, Ramsanga chuan, “Harsatna a awm em ni?” a rawn ti chhuak hlawl a.

Thil danga chhang ta lo chuan, “Miin an thih dawn hian an hre lawk deuh thin an tih ang chi hi i ring em?” ka ti a, hriatthiam loh hmel zet hian min rawn melh a.

“Englo a nia, kan pa hian ka zin vel hian ka biak loh chuan min be ngai miah lo a, tun tum ka zin chu zingah nen, zanah nen min lo be ve char char a, a chungah thil tha lo a thleng dawn tlatin ka hria a,” ka ti chhuak a.

“Eng a? A lo be ngai lo che a maw?” a rawn ti hluai a. “Engatinge, in inkar a tha lo em ni, chutia nupui te zin chhuak be ngai lo chu,” a ti zawm zat a.

“Sawi zawm lo ang, momo hi a tui si, a uiawm,” ka ti zui ta daih a.

“Sorry, ka lo inrawlhna tur a ni lo nangin mak ka ti ve deuh mai a ni. In pa chungah chuan engmah thil tha lo a thleng lo ang, nachang a hre thar ve a nih chu,” a rawn ti leh a, ka thaw ta huai a. Nachang chu hre thar se, hre zawm zel se, kan nupa tana ka theihtawp ka chhuahna te hian awmzia nei ve tawh se ka ti takzet a ni.

“Kum engzat nge in inneih tawh?” tia min rawn zawt tu lam chu ka en a, a mitmeng chu a thukin a ril tak zet.

“Kum 10, ka graduate hlim te in kan innei a,”

“Fa engzat nge inneih tawh?”

“Kan nei thei lo a,” ka ti zuai raih a.

“Ka tihpalh tak zet, i mimal nun zawh vak che ka tum lo a nia, titi a kal tluang em a,” inthiam lo takin a rawn ti a.

“A ho lutuk, kan zawhna dawn fo a nia, engah vak ka ngai tawh hleinem,” ka ti zui puat a.

Karol Bagh vel kher kher hi chu ka hrechiang ve tawh bawk a, ka bungraw lakna thin ho ah ka kal pui zar zar a, sample tur tlem te te, keima hawn tur ka lak bak chu transport-a thawn turin ka be fel zung zung a.

Kan bazar zawh meuh chuan tlai dar 5 a lo pel tawh a, ka inthlahrung ve reng mai. A hna kalsan in min rawn zui ve tawp a nia. “I hah tawh em?” ka ti a, nui var var hian, “Lassi in a chak awm khawp mai,” tiin min rawn chhang a. Ka bungrua lak ve ang ang te chu a khai bawr luk bawk a.

“Kalpui lo che ilang chuan heng hi nangmaha i khai tur a nia,” a rawn tia.

“Ka tih thin loh dan pawh a ni chuang hleinem,” ka lo ti sam et a.

Ngawi rengin kan inzui a, ka in rin loh lai takin a kut lian zet chuan ka kut chu a rawn kai thut a, ka phu zawk thei hial. A hmel ka han en chuan hla deuh a lo melh tlat a, kut lum thar thara min kaihna chu ka thlah phal mai bik lo a, kan piah lawka Bikanervala, vai chhang thlum dawr changkang zetah chuan Lassi tui lutuk in turin kan in kai lut ta a.

Dik tak chuan ngaihzawng pawh nei ngai lova pasal nei ka nia, inngaizawng in an tih thin ang hi engmah ka tawng ve lo. Pasal ka nei a, ka pasal hnen atangin inngaihzawnna nun ka dawng bawk si lo. Chutia Ramsanga'n min rawn kai thut pawh chu ka tan thil thar a ni a, a palian in a hmeltha em em bawk a, vawiin lama kan chhuah naah min care em em bawk a, ngaihzawng nei te nun thin dan tlem ka tawng ve in ka hria a, zauthauna hian min rawn zem chiai chiai a, ka hlim veng veng thei hial mawle.

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » August 15th, 2021, 4:17 pm

Ramsanga Pov

A sawi ang tak takin Zodini chuan Karol Bagh bazar vel chu a hre zek a, min kalpuina dawr lian ho pawh chuan an lo zah derin an lo welcome tha hle a, a kal fo tih a hriat hle bawk a. A duhtawka Hindi leh Sap tawng a hmang chu engemaw ka hriat ni, ka lo chhuang ve em em ringawt.

Hetiang bazarah amahin a kal fo thin tih a sawi te chu ka ngaihtuah a, a kal hmasak ber tum tur te thlengin ka ngaihtuah a, a pasal lahin kalpui chu sawi loh, a zin pawh a be ngai lo chu a ni bawk si, ka lainat tak zet a, ka bazar pui chu ka inchhir lo khawp mai. A innghahna mipa nih ka chak hle bawk. Kan inchei dan te a inang deuh reuh bawk si a, a kalna dawr chuan an fiam leh zauh thin a, “Tun tum chu nangmah chauh lo deuhin i ni maw, tunge kan tlangval vannei chu?” lo ti tawk te an awm a, a nuih liam mai mai zel.

Kan vak nasa bawk a, a biang chu a tai tek a. Dawr pakhata kan kalna-ah phei chuan an pi ang maiin an lo zahin an lo be tha a, mizo nu sawmdawng tam takte angin zuamawmin a awm ngai lo niin ka hria a, ka zah phah hle bawk.

Kan bazar zawh meuh chuan chhawl a hal ve thei hial mai. A bungraw lakte transport lamah thawn turin a ti fel nghal vek a, a sample then then erawh a hawn turin kan khai haw a, kan bawr ve luk tho a. Kal pui lo ila a bawr ve reuh dan tur te ka ngaihtuah neuh neuh a, a bula ka sawi lah chuan, a tihthan loh dan a nih loh thu in min chhang fel et lehnghal a. Hetiang bazaar tawt a amaha bawr taka an in khaikual vel tur ka ngaihtuah chuan ka lainat tak zet.

A inrin hman hmain ka thil khai ho chu ka kut lehlamah ka khaikhawm a, ka kut lehlam chuan a kut sin sei sal chu ka la kang a, ka hmer vang vang a, ka kai ta a. Ka rilru chuan, “Zodinpui, tang aih suh, min kai ang che,” ka ti mawlh mawlh a, mi nupui a ni a, mualpho a hlau hle bawk tih ka hre bawk, mahse, ka insum thei ngang lo a ni. Mak ti takin min rawn en chho ha a, ka en ngam lo a, hla tak ka melh san ta daih a, kan kalna kawng chu kai chungin ka cross pui a, Bikanervala lamah chuan ka kai lut ta a. A kut nel thep ka vawnna vanga ka lungphu dup dup chu room reh takah awm ilang chuan a ri chhuak thei hialin ka ring. He hmeichhia anga keimah a danglamna thlen thei hi ka la tawng ngai lo.

Dawr chhung kan luh chuan lassi kan order a, Zodini chuan Rasmalai a rawn order bawk a. A hah ve bawk a niang, a thu hle hle a. Rasmalai an rawn dah chuan Neha-i nen tui an tih dun zia leh an in ei siak thin thu te min hrilh a, ka thil tui tih zawng tak anih avangin in ei siakah chuan ka cho ve thut a, a rawn nui hawk hawk a.

“Naupang pawh kan nih tawh loh hi, chutiang ti rual pawh kan ni tawh lo,” a rawn ti a.

“Chutiangah kum bithliah a awm ngai lo,” ka ti ve tlat a.

“Anih leh enge kan in chawi ang,” a rawn ti a, ka phur thar deuh tlat.

“I chak loh zawk chuan ni khat chu hun min pe ang chu, ka chhuah duhnaah min chhuah pui ang,”

“Anih leh chak zawk ta ila”

“I duh duhnaah min hruai kawi ve thung ang chu, hei aia bawr pawh hi ngai se,” ka ti zui a, a engti zawng zawng pawh chuan ka tana nuam a ni mai, a bula awm hi ka la kham lo mai pawh a ni lo, nuam ka ti tan dawn chauh a ni.

“A ho em mai a, hna lamah in buai buai nen” a ti deuh tlat a. A in veng deuh tlat reng tih ka hriat chuan amah ka zahna a ti zual em em a, a pasal chuan eng ang pawn duat loh mahse a rinawm ve tlat tih a chiang reng mai. Dik tak chuan ka bula awm hi hrehawm a ti hauh lo tih ka hre thei a, keimah ang bawkin amahah danglamna ka thlen ve tih ka hre bawk.

Min hnialna chu ka hrethiam a, nawr luih pawh ka duh bik lo.

“Anih leh i ei duh zat chu ei reng reng teh, keipawh rasmalai kher kher chu ka ei thei teh mai a nia, mahse nikhat min chhuahpui ve chu i ba hrim hrim” ka ti ta zawk a.

“Yes, sir, i thu ang zelin le,” a rawn tia, dawhkana eitur in chhawp chu a ei ta a.

A hotel lam pana kan in khalh haw lai chuan car tape a music in play sa chu ka play chhunzawm a, Kimkima hla ‘Ka bialnu ni rawh’ tih nizan lama ka play chu a rawn in chhunzawm leh nghal a,

“ I hmeltha ka ti,
Ka bialnu ni rawh,”

a rawn ti tang tang a, ka bula thu chu ka sak khum vak tep a ni. Nidangah kha chuan ka ngaithla liam mai thin a, vawiin zet chu awmzia a nei raih raihin ka inhmeh deuh tlat hian ka hria a. Ka piaha thu chu ka va en a, thil ngaihtuah muk tak nei tih hriat tak hian pawn lam a lo en deuh deuh a, ka en reng lai chuan a rawn hawi phei ve a, kan mit leh kan mit chu a in tawk chiang kher mai, mahse, nu fimkhur tak a ni ka tih tawh kha, titi dang a rawn vawrh leh daih a, kan boruak tang lutuk tur pawh a rawn ti zia ta a.

“Ranjit-a nen hian in inkawp rei tawh em?’

“Kawp rei lo e, kum khat erh awrh chauh a ni ang,” ka ti let a.

“An fel asin, sumdawnna thilah pawh an fair viau ang,” a rawn ti a.

“A dik alawm, vai sual kan tih kan tih hi sumdawnna lian khawih chin hi chu kawp an nuam asin, Mizo bawk hi kan buaithlak ka ti thin, partnership fel fai taka rei tak kal pui thei pawh hi tumah kan awm lo a ni e, kan duham hlawm leh lutuk a,” ka ti duah a. A mimal nun zawh chian chakna in ka khat vel a, mahse, a mizia en hian eng vak a sawi dawn lo tih ka hria, Neha-i ka la zawt dawn khawp.

“Nupui neih te i tum hnai ve tawh em?” a rawn ti thut a.

A zawhna min zawh kher kher chuan min ti phu zawk lo chauh a ni. “Ka duhtui lutuk nge, ka duh ang hi ka la hmu lo a niang,” ka ti a.

“I hmangaih chiah nei ang che,” a rawn ti a.

“Sawi zau deuh theih em aw,” ka ti kher a.

“Engkim i tih pui theih tur, i hne theih hauh loh tur, i hna i sawipui theih tur, i duat chak ngawih ngawih reng tur, thu in hmuh loh changa i inhnial pui vak vak theih tur leh awlsam te a i ngaihdam leh mai theih tur,” a rawn ti duah a. A insawi thawl tih ka hrethiam, ka titawp phal lo a, ka la ngaithla chak tlat.

“Chuan”

“Chuan, nang te chu bawrtu is ngah awm sia, thlan a har ngawt ang a,” a rawn ti daih a, a sual reuh a nia, a mimal nun hi a sawi chhuak mai mai dawn lo tih ka hrethiam.

“I expert hmel riau, min la thlanpui dawn nia,” ka ti zauh a.

A rawn nui hak hak a, “Min zawt zel dawn nia,” a rawn ti a. A hmel chu a la upa lo, kum 30 a tlin pawn a tling awrh ang, a insawi dan a nih phei chuan graduate chiaha pasal nei a, kum 10 an innei tawh anih ngat chuan, kum 30 a la pel tam dawn hauh lo tih ka hrethiam. Tlangval senior an tih ang hi ka ni ve tawh a, kum 38 ka ni tawh, kei aiin kum 8 velin a naupang dawn tihna a ni. Mahse, pasal kum 10 lai lo nei tawh a ni bawk a, tawngkam puitling taka rawn chheh zauh hi a ching a.

A hotel thlenna chu kan thleng a, a bawr reuh sia, inthiam lo deuhin a pindan lamah chuan ka zui ve ta zel a. Bungrua te kan dah fel chuan bathroomah a hmai a va phih fai a, ka sira thutthlengah chuan a rawn thu ve a.

“I hah ngawt ang, coke te i induh em?” a rawn ti a. October thla a ni tawh a, chhunah chuan khua a la lum tha vut vut hle a. Beer inkhawlh khawlh ka chak takzet.

“Beer in ila pawi i ti em? Ka ti let e. Pawi a tih loh thu leh ani pawhin Bacardi Breezer a in chak thu a sawi a, Intercom-a chuan Reception lam a call a, a order zui nghal a.

“I hindi hi a mawi tak zet,” ka ti sup a.

“Nang deuh,” a rawn ti let a.

“Hindi a ka tawng lai I hre tawh em ni?” tih pahin a lam ka hawi phei a, a lai hle tih ka hre thei.

“Airport-ah khan ka hnungah i thut kha?” a rawn ti a, keiman ka lo chik tawh ang bawk khan nimin piah lama airport a ka hmaa a thut khan min lo chik ve tawh reng em maw ni le ka ti zui rauh rauh a. Kan thil chah a rawn thleng a, ka hawn sak a, a in tur chu ka pe phei a, a sip zeuh a.

“Zu hi tui ka ti thei hlawl lo, Breezer hi chu in a nuam ve tlat ka ti,” a rawn ti a. Room chu AC a on avangin a dai nuam tawh hle a, beer chu ka in khawlh khawlh a, ka nuam sawng sawng thei mai.

“Zu tui ti si lovah chuan in lui thei pawl tak i nih dawn chu,” tihin ka fiam zauh a.

“Nizan kha chu Neha-i vang liau liau ka tih kha,” a rawn ti a, a nui hak hak a.

“Ka thianpa pakhat hi Cruise-ah Bartender in a thawk a, min zirtir ve nual asin, I fel viau chuan ka la show ang che, tui deuh deuha mix dan ka thiam a nia,” ka ti a.

“Min hrai ruih tum reng reng suh aw,” a rawn ti khar khar a. Ka nui chhuak hawk ringawt. A phone a rawn ri ral ral a. “Min lo hrethiam lawk rawh aw” tih pahin min biak san ta a. Phone a dah hnu chuan meng buai deuh nak hian a rawn hawi chhuak a,

“A mak e, U Thantea hi, min lo call reng mai, zan mut dawnah biak ka tum reng sia, nidangah chuan min lo call ngai lo tak tak. Thlah tak ngial pawh min thlah ngai lo, tun tum chu airport thleng min thlah thlap a, ka hrethiam lo takzet,” a rawn ti a. Ka thin a lo rim leh ringawt tawh. U Thantea a tih ve hrep pawh hi, hetiang hmeichhe duhawm lutuk duat nachang hre lo khawpa mawl a han pian chu!

“Mipa chhe lo deuh in a bazaar pui che tih report a dawng a ni lo maw” tihin ka lo fiam let a, a lai hle lehnghal a.

“Kan pa tluk tur te chu an tlem ngawt ang,” tihin rawn fiamthu let ve hram a. Vawiin chu ka duat reuh bawk a, a mita khawharna deuh ka hmuh kha ka hmu mang hauh lo. Duatmamawhte-i a nih hi, ka duat phak han ni reuh mai se aw tih te ka ngaihtuah kual a. Kei hi ka beer in a thawk dik dawn lo tlat, ka ding vut a, “Ka kal ang e, nang pawh I chau ang, I awm hahdam duh ang,” tih pahin kawngkhar lam ka pan a.

“Tehthut che chuan a,” a rawn ti let a, kawngkhar lam chu a rawn pan ve a.

“I tih tlat si chuan le, ka lawm takzet, min bazaar pui a, nidang nise ka chau lehpek dawn lutuk, mahse, vawiin chu Mutia ka nei chhe lo bawk sia, hah nachhan tur pawh ka nei lo,” tih pahin min rawn en chho ha a.

Ka inring hman lo a ni e, a kawngah chuan ka kuah a, ka lamah ka pawt hnai a, ka fawp ta vawng vawng a. Rei lo te min rawn chhang let a, a zei lo hle bawk. A inngaihtuah fim vat a, a in la hrang a, ka en ngur a, a mitmengah chuan inthiamlohna nasa tak ka hmu nghal a, kei hian pawi thui tak ka khawih a ni.

“Mangtha le,” a rawn ti a, mangtha zui ve ta lo chuan ka kal zui ta vang vang a. Keimah leh keimah ka inhaw tak zet.


Zodinpuii PoV

Ramsanga kal liam tur chu thlir pawh ka thlir ngam tawh lo, kawngkhar ka khar a, ka thaw dep dep a. Eng thil pawi nge ka khawih tak ni.

Ka maimitchhing vang vang a, ka lungphu rang lutuk chu tih pangngai nan thawk ka la vang vang a. Ka men hnu chuan khumah ka phei a, zangthal arin ka mu a, vawiina kan hun hman dan te ka chhui kir neuh neuh a.

A apartmentah khan breakfast tui tak min siam sak a, ka ti ti a ngaithla a, ka sumdawnna min sawi pui a, chuan, min bazar pui a, e, bazar dawn khan ka inchei dan kha ka inhmeh thu min hrilh bawk. Ei tur min leisak a, ka duhzawng min ei pui a. Chuan, min kai bawk a, a kut lian pui, lum thur thur khan. chuan chuan chuan, nichin mai khan min fawp bawk. Mipa in hmeichhe tana an tihtur a ka lo suangtuah thin, ka pasal hnen atanga ka dawn ngai loh tam tak vawiin khan ka dawng a ni.

Ka let thawk a, "Aw Lalpa, uire nih ka duh lo, ka ngaihtuahna sual tak hi min lak bo sak rawh," ka ti mawlh mawlh a. Kha mihring kha ka be tawh tur a ni lo a, a hnaihah pawh ka awm tawh bawk tur a ni lo. Lalpa eng pawi nge ka khawih tak, ngaihdam tlak ka la ni em!! Huis, ka khum zau tawkah chuan ka let kual ka let kual a, ka chaw ei chakna zawng zawng pawh a reh vek.

Ka breezer in lai chu ka in khawlh khawlh a, he juice ve mai mai hi chuan ka rilru buai nuaih hi min theihnghilh tir hlei lo ang e. Ka hmui chu ka khawih a, zei zet a min fawhna chu kan ngaihtuah chhuak leh a. Ka bawkkhup a, lukhamin ka lu ka khuh a, kei hi ka a zo ta anih hi. "Zodinpui, Lalthantluanga nupui i nih kha, theihnghilh suh, inveng ang che," ka in ti mawlh mawlh a. Hun rei lo te nuam ti taka ka hman ve te chu mahni inthiamlohna chuan a rawn luahlan a, ka in haw tak zet a, ka inkhawngaih hle bawk.

Ka phone a rawn ri ral ral a, Neha-i bawk a lo nia.

"Hello"

"Dinner i ei tawh em?"

"I hotel bul lawkah ka awm a, lo chhuak thla la, ei dun ila," a rawn ti a. Pawi ka ti lo khawp mai. Mahni chauha ka awm chuan ka a mai ang.

Ka hotel thlenna ah hian Restaurant nuam zet mai a awm a, Balcony Restaurant pawh an nei tel nghe nghe, hmundanga kal lovin Balcony Restaurant lamah chuan dinner chu kan ei ta a.

Paharganj hmun hi Railway station bul mai a nia, a lun hle a, kan hotel piah lawkah chuan bazar tenau pawh a awm ve a. Zan in chu intih thawven ka chak a, Neha-i chu bazar puiah ka sawm zui nghal a, a lo aw ve mai bawk a. Mahnia awm ka chak vak lo bawk a, chaw kan eikhawm chuan bazar lamah chuan kan in zui phei ta a.

Lei tur em em pawh chu kan hre chuang hlei lo a, mamawh em em kan nei lo dun bawk a. Leather dawr nuam zet hi a lo awm a, kan lut a, leather chapal,a ngalrek kaihna laia fringe awm siau siau te chu a inang in kan lei ringawt a. Kan high school kal lai pawh a ngaihawm alawm le, thil inang kha kan lei dun nasa vel thin tawp.

"Zodin, Naktuk zan chu kan inah zanriah i rawn kil ngei a ngai a nia, ka nu leh pa te order a nih chu aw,"

"Ok, inneih urlawkna vek a ni tawh ang chu maw?"

"Ni chiang e, Ranjita pawh a lo tel ang"

"Ok, boss, pasal i neih hma chu i thu thu hian an awm phawt mai ila, a dik a ni mai a lawm" ka ti a, ka rilru chuan Ramsanga an sawm ve leh ve loh chiah ka ngaihtuah anih chu.

"I hredik chiah, haw lovin awm tlang mai la, thla leh mai a ni tawh a, engkim min in buatsaih pui mai la"

"Ka chak khawp mai, mahse, nu ber tan chuan chu chen chen thang chu a theih loh alawm, nang pawh nu i ni ve tep tawh a nia, chuvangin i pasal neih hma chu i duh duh ti pawp pawp rawh, i tih chak tam tak hi i ti thei tawh dawn miah lo a nia"

"Chutiang chanchin tha lo chu min hrilh reng reng suh, Ranjit hian min han khuahkhirh teh se, a chak lo ang"

"A tak ram dai phawt loh chuan i hrethiam tak tak lo ang," ka ti a, hotel lam panin ke in kan kir leh ta a.

Neha-i nen kan inthlahfel hnu chuan ka phone ka phawrh chhuak a, number hriat ngai loh atang hian missed call a lo awm a, engtinnge ka phon ring ri te ka hriat loh theih ni. Thil pawimawh anih takin tiin ka call let ta.

"Pawm haw ngaiin i khawsa leh ta emaw ka lo ti hman asin," a rawn ti chhur chhur a. Ramsanga aw pa mawi lutuk, a hmel ka hmuh hma pawh a min hip tlattu ka benga ka hriat rual chuan ka sa pup pup thei hial. Vawiin tlaia kan khawsak dan te chu ka ngaihtuah chhuak nghal uaih uaih a.

"Chaw eiin kan chhuak lawk a"

"Kan?"

Ve ringawt chuan a, duh duh ka ei pui ang, rawn in ti thu ve em em ringawt.

"Ramsang, vawiin khan min bazar pui a, ka lawm lutuk, mahse, in be tawh lo zawk ila a that ka ring" tih pahin phone ka dah hmak a. Min rawn call nawn leh a, ka ring ral tir thak a A rawn tinawn ta lo. Mi pangngai a ni a, ka dinhmun tur hrethiam rual chu a ni in ka hria.

A tukah chuan keimahin ka chhuak a, naute thawmhnaw thenkhatah authorised dealership tihna tur agreement kan siam fel a. Tihian Delhi-a ka kal chhan te chu ka tifel zo thawkhat ta. Flight ticket pawh a cut fel theih dawn ta a nih hi. Vawiin hi friday a ni a, tun weekend chu Neha-i puala cham a, an inneih dawn karah chauh Delhi-a chhuk leh turin rilru ka siam fel a. U Thantea pawh ka sawm nawn ve leh reng reng ang chu, an innei dawn tih ka hriat tirh khan ka sawm tawh kha a nia, min hnial ngei mai a, sawm ve leh hrim hrim ang.

Rin aia ka zawh fel hma avang in ka awmna atanga hla vak lo Connaught Place lam panin auto ka la a. Neha-i te inah zanriah ka ei dawn si a, a nu leh pa thil tur enge maw lei ve ngei a tha ang chu. Neha-i nu tan chuan Pashmini shawl nalh zet mai ka lei sak a, aman pawh a mawi. Mahse, ka tana ui nei ngai lo an ni bawk a, an phu ve bawk a ni. A pa thil erawh lei tur ka hre lo hle, mipa present tur hi lei har ka ti thin tawp.

Louis Philippe show roomah ka lut a. Waist coat pawl duk nalh zet chuan ka mit a la chat a, Neha pa tan chuan ka lei ta a. Cash counterah billing ka tih lai chuan cash counter piah lawka necktie grey duk an tar chuan ka mit a la tlat a. Ramsanga inchhung rawng zawng zawngte chu ka mitthlaah a rawn lang a, amah Ramsanga pawh chuan a inhmeh hle dawn tih ka hria. Hmuh ka duh tawh lo viau nangin inhmu kher lo pawn, min puihna avanga lawmthu sawi nan te pawh pek dan a awm tho mai thei. Rilru insual deuh chungin ka bill tel tir ta nghal a. Tul lo ka inti tak zet. Ka pek tak loh leh ka kawl tha reng mai aniang chu.

Neha-i te in ka thlen chuan min lo lawm thiam khawp a. Ka thilpek te chu an ngaihlu thiam em em a. High School ka kal lai atangin an fanu ang maiin min en thin kha a nia. Rinlawk ang ngeiin Neha-i te inneih hma chu cham tlang mai turin min sawm a, mahse Neha-i ka hnial dan ang thovin ka hnial let a, mi pawh an hrethiam viau a, amaherawh chu inneih hmang tura ka kal hun chuan ka pasal hruai tel ve ngei ngei turin min chah uluk hle thung.

Ranjit-a pawh chaw ei dawn hnaih lamah a rawn thleng a, a hnung a rawn zui tu ka hmuh chuan ka lung chu a phu dawt dawt a, hna atanga rawn tlang an ni bawk a, business suit nen a rawn induang zar a, a inhmeh kher mai lehnghal a. An lam ena ka hawiphei lai chuan ka mitah tak min lo en sawr sawr a, ka zam chhe vek hi a ni ber.

Ranjit-a chuan, "Nangmah chauha hnamdang vek kara chaw ei ai chuan i awm a nawm deuh nan Ramsanga ka rawn hruai ve a," a ti a, ka awm a ti nuam lo nasa hle zawk a ni. Neha-i leh Ranjita chu kan inkar hre pha silovin an ti ti barh barh reng a. Zanriah ei an peih thu an rawn sawi chuan ka thaw huai thei hial mai.

Zanriah kilnaah chuan Ramsanga nen inep chiahin kan thu a, ka hawi chhuah ve zeuh chuan kan mit leh kan mit chu a intawng chat zel a, chu chu duh lovin ka inveng tlat reng a, ka hah takzet a ni.

Boruak tih zangkhai tumin titi dang vawrh dan ka zawng a. Neha-i nu hnenah chuan, "Aunty, Neha-i te inneih hmanga ka lo kal chuan Honeymoon hmang turin min zin san daih awm sia, Uncle nen min lo zui haw ve daih ula tha ang, Mizoram pawh in la hmu ve lo a, November thla a ni dawn a, a nawm hun lai ber a ni dawn asin," ka ti a.

"Ka chak zawng tak a ni, chuti lam chu ka lo ngaihtuah ngai reng reng lo, i uncle hian a peih phawt chuan kan tum dawn nia," a rawn ti ve a.

"North East te kan fang nghal ang a, a nuam phian dawn asin, Shillong pawh in la hmu lo a ni lawm ni?" ka tih chuan Neha-i pa chuan, "I pasal i rawn hruai phawt chuan kan zui haw ang che u, i pasal hi i thukru rei tawh lutuk, kan hmu veleh chak tawh a nia, tumah ruk sak tur che pawh kan awm loh hi," a rawn ti a. Midang chu an nui ham ham a, kei erawh Ramsanga hmaa ka pasal chungchang an sawi chu ka lo ip leh ringawt tawh. Min zinpui ngai lo tih a hriat khan a thinrim hle kha a ni a, chutia Neha-i pa in min zinpui ngai loh thu a rawn nemngheh takah chuan eng rilru nge a put ang tih ringawt ka ngaihtuah a, a lam ka va hawi chuan a lo meng rum ul a, engmah a hmelah chuan ka chhiar thiam lo.

Chaw ei khamah chuan an varendah nuam zetah chuan Neha te thiandun leh Ramsanga te nen kan ti ti tlang a, Neha-i chuan riak mai turin min sawm reng a, "Aw" mai ka duh, anih loh chuan Gentleman takin ka piaha mi renrun hian min hruai haw a tum leh ngei ang a, ka huphurh tak zet a ni. Anihna takah chuan a bula ka awm chakna leh ka hrehna hi a inbuk tawk viau ang.

Uluk takin an inneih ceremony tur chu min hrilh reng a, ka thlen ngei ngei tur ni te a sawi uluk nasa mai. Ramsanga pawh chuan chawh phur nan eng engmaw ni a lo sawi ve reng a, Indian deuhvin amah leh keimah pawh kan inchei ngei tur thu te a lo sawi ve duah reng a.

Ramsanga phone chu a rawn ri a, a phone chu kan melh ve hram a, Duati tih angin ka hmu thuak a, ka thin chu a rawn thip vang vang anih chu, kei hian ka thik ve ringawt emaw ni. Varenda hmawr lam deuhah chuan call chhang turin a kalsawn ta daih a, tu in nge lo call ang le, a bialnu a niang a, tih vel chuan ka rilru a rawn luah leh tlat tawh, a tul lo takzet a ni.

Neha-i chuan zawi tein min rawn hrilh ru a, "In inhmeh teh mai a nia aw, in pa thlak nan hmang daih teh, a en ngun danah che hian a duh chiang mai che," a rawn ti sar sar a. Ka melhrum nasa mai. "Tikhan min melhrum suh, nang pawn i duh ve deuh tih ka hre reng, tu hmeichhia in nge sawtiang tlangval smart lutuk, hmeltha bawk si, pa bawk si saw hnar thei ang," a rawn ti leh sa sa a. "Neha, inneih thu tiam tiam vek tawh ka nih kha," ka ti let a. "Khatiang nun khawhar lutuk khan pitar thak i tum em ni?" tiin min chhang a. "Maithei," tih zawngin ka chhang let. Ramsanga pawh a rawn kir leh chiah a.

Min rawn en ngur ngur pah chuan, "Neha-i'n riak tura a sawmna che chu i pawm dawn ta em? Hei haw ka ngai tlat mai a, i haw zawk dawn chuan ka rualin rawn haw mai la, ka thlah kual nghal ang che," a rawn ti a.

Chhan dan tur hre lo zetin ka en let a, "A, ka van hrethiam lo tak, riak tur in ka inring lo khawp mai, mahse, Neha-i'n min sawm nasa bawk sia," ka ti let a. Bakah a Duatin a rawn ko a ni awm sia, hnawksak mai mai ka nih ka hlau deuh bawk. Hnamdang kara awm kan nih avangin Sap tawngin kan in bia a. Neha-i phur zawng tak a lo ni ngei tur a ni, "Ka duh dan kan thlak lawk, tun weekend i la cham dawn a, anih chuan Sunday zanah ka bulah lo riak la, Monday zingah airport lamah ka thlah nghal ang che, tichuan a tha zawk ang," tih pahin Ramsanga hmuh hauh loh turin mit min rawn siai anih chu.

"A that hlauh chu, Neha-i leh Ranjit pawh chance pek a hun viau tawh alawm, insiam la, kan kal mai dawn em ni?" a rawn ti a.
Inchhunga ka bag dah te chu ka la fel a, inchhung lama thu Neha nu leh pa te pawh ka mangtha fel a, Ramsanga nen chuan kan inzui chhuak ta a. Neha-i keh Ranjit-a pawh Garage thleng min rawn thlah turin an rawn chhuak a. Kan in khalh chhuak fel ta a.
Sawi tur kan hre lo dun hle a, kan ngawi vang vang a. Zan dar 10 a lo ri dawn hnai tawh a.

"Min hruai haw ve ringawt a, a rawn kotu che tan hnawksak ka ni mai mai ang tih ka hlau hle mai," ka ti a.

A rawn nui hawk a, "Tunge min ko haw a i hriat a?"

"I phone kha ka hmu hman ve vek a nia, a lo call tu che hming kha," ka ti let a.

"I lo thik deuh tihna em ni?" a rawn ti let a, chhan ngaihna pawh ka hre lo, ka ngawi ta reng ringawt a.

"Zodin, thil min tihsak thei ang em? Ka inthlahrung viau nangin," a rawn ti a.

"Enge ni a?"

"Haw thut ka ngaihna chhan chu, ka nau, ka cousin hi naupaiin Delhi-ah hian a awm ve a, a nau neih a hnai tawh a, mahse, a pasal hna thila a zin a lo la haw thei lo a, beisei ang chuan kar leh lam hi a neih hun a ni a, mahse hei vei angin a awm tlat mai a, an in atanga va hruai a, damdawiin-a kal pui a ngai a. Keimaha ka tih theih mai ka ring a, mahse, ka huphurh ru riau mai, ka cousin lah a la naupang si a, chinchang a hre vak dawn lo a, zanin chiah chu min puih theih chuan ka lawm ngawt ang," a rawn ti duah a.

"Tihtur dang engmah ka nei hleinem, chutiang inthlahrunna tur pawh anih loh chu," ka ti let a.

Nui deuh hak pah hian, "Ka cousin hming chu Duati a nia, i la thik em?" a rawn ti kher a.

"Ka thik pawh ka tih loh kha, ka inthlahrung zawk alawm, i bialnu in a koh haw lai che a min han thlahkual hmasa tur ka ngaihtuah khan, bakah thik tur chein ka enge maw i nih le, mi nupui duhlai ka ni ka tih mawlh mawlh kha " ka ti nawi ta niah niah a. Ka lai lutuk chu ka sa pup pup thei hial.

"Nupui duhlai nge i nih, nupui ringawt?" a rawn ti kher a, ka ngei reuh hle mai. Chhan ngaihna pawh ka hre lo a, ka ngawi ta reng a. Ani pawh chu a ngawi ta vang vang a. Car tape chu a play a, Daduhi a rawn zai raih raih a,

"Min dem lul su, lenrualte u,
Tiang renga lungdumtu hi;
Ka tawng lo'ng vangkhuaan
Lungmawlin ka tawng tlai,
Sakhmelthachungchuanga"

Chu hla ka ngaithla chiah chu ka chhing sawk a, nuih tur nge tah tur pawh ka hre lo. Motor chu zawitein a ding a, kan thleng tawh a ni maithei. Ramsanga lam chu ka han hawi chho a, a hmel pa zet chuan min lo en run a, awm ngaihna pawh min ti hre lo.
"Kan thleng tawh ami?" ka ti tham chhalh a.

A rawn kun hniam a, "Zodin, min hnial suh," tih pahin min rawn fawp a. Chhanlet ngaihna pawh ka hre lo.

"Inthlahdul rawh, min hnial suh," a rawn ti leh a, duhthawh takin min rawn fawp leh a, ka thiam dan ang angin ka lo chhang let ve a.
Ka biang tawn tawnah a kut a rawn dah a, hawi pawh ka hawi chhuak ngam tawh lo.

"Min lo en lawk teh," a rawn ti a.

Zawi muangin ka hawi chho a, "Heng thil zawng zawng hi keima bul tan a ni, inthiam lo duh suh, nang chu i inveng hram hram tih ka hria, mi nupui i ni tih pawh ka hria, chuvangin i thiam loh pakhat mah a awm lo," a rawn ti a.

Motor chu a tinung a, muangchangin kan in khalh chhuak a, Ka kut chu a rawn la, motor khalh phah chuan a lamah a la phei a, a thin zawnah chuan a dah a, "Airport-a i mittui i hru lai ka hmuh atang che khan he ka thinlung hian awm ngaihna a hre tawh lo, khawngaih takin min hnial suh, i inchhirna tur engmah ka tihpui lo ang che, nang pawh ka kianga i awm changin i danglam ve thin tih ka hria, Zodin, i cham chhung ni reilote hi chu i kianga awm a, ka duat che min phal sak rawh, khawngaihin," a rawn ti a.
Tawng ngaihna pawh ka hre lo, amah chu ka en reng a, ka a zo vek dawnin ka hria.

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » August 15th, 2021, 4:17 pm

Ramsanga nau te in chu kan thleng a, a nau Duati chu Room lamah na tuarin a lo inhnit feih feih a, Ramsanga chuan, “Engkim a tha vek ang, insiam pui i ngai em? Damdawi inah kan kal nghal dawn nia,” tiin a kuah hlu hlu a.

“Ka insiam vek tawh, a kal theih,” a ti a, a nau vei chu a na a rawn chhuak leh chiah a ni ngei ang, a kun leh vang vang, Ramsanga kut chu a hmer ngawt ngawt a.

“A na hi a reh veleh kan kal dawn nia, Zodin, nangin lo chhuk thlakpui la, thawmhnaw hi ka rawn khai ang,” tiin ro a rel zung zung a.

A na a zia lai chuan dim tein ka kuah a, Garage lam panin kan inkuah chhuak ta a. Kan vawikhat inhmuhna a ni bawk a, hnem ngaihna pawh ka hre lo a, ngawi rengin kan in kuah chhuak a. Garage kan thlen chuan ka banah chuan a rawn hmer leh ta ngawt ngawt a, tihngaihna hre lo takin a kawng vel chu kan chul sak a.

“Khawi lai nge na ber?”

“Ka sawi thiam lo, ka kawng vel lai kha a ni ber mai,” a ti a.

“A na a chhuah chuan min hmer vak vak mai rawh, pawi ka ti miah lo a nia,” ka ti a. A kun vang vang a, a na pawh zia lam a pan leh ta aniang, a rawn ding chhuak leh ta. Ramsanga pawh a lo thleng ve chiah a, motor ah kan lut a, damdawiin lam panin kan tlan chhuak nghal a.

Duati chuan min rawn en pahin, “Zodini maw i hming, i lo tel ve chu ka lawm hle mai, nau neih dawna mipa chiahin min awmpui tur ka ngaihtuah khan ka lo huphurh lutuk a,” a rawn ti a.

“E, ka hman lai tak alawm, a tihzia hlauh anih hi, ka hna zawng zawng ka zo fel tawh a, haw chiah ka hma bak tawh alawm,” tiin ka lo chhang let ve a.

Damdawiin kan thlen chuan Duati pawh labour room lamah an nawr lut a, Doctor te pawn a hun tak a kan thlen thu leh a rei tawh loh tur thu an rawn sawi a. Ramsanga’n Cabin a book fel hnu chuan bungrua te kan dah fel a, Labour Room kawngkhar lamah kan inzui phei leh ta a. Sana ka en chuan zanlai dar 12 a lo ri fel vel chiah a. Naute nei maithei dinhmunah kan din avangin khawiah mah kan kal ngam lo a, ka mutchhuakin min rawn zem chiai chiai a. Minute engzat nge ka mutthluk pawh ka hre lo, doctor in “Fapa duhawm tak in nei e,” a rawn tih chuan ka harh zawk a. Ramsanga chu a hlim tak zet tih a hriat theih. Naute leh a nu pawh rei lo teah an rawn nawrhchhuah tur thu te an sawi a.

Ramsanga chuan Aizawl lam chhungte chanchin hrilhin a be kual nghal zung zung a, reilote hnuah chuan Duati leh naute pawh an rawn nawr chhuak ta a, naute chu nurse chuan min rawn pe a, ka lo pawm vat a, Cabin lam panin kan inzui phei ta a. Naute ka pawm chiah chu naute ka awhzia ka inhre thar leh a, ka en vawng vawng a.

Cabin kan thlen chuan Duati chu an mut that tir a, Duati bulah chuan naute pawh chu ka mut zui ve ta a, a meng ker reuh lehnghal a. Nurse chuan thil pawimawh chi hrang hrang min hrilh a, min chhuahsan ta a.

Ramsanga chuan naute chu thla a laksak a, tah pawh a tum lo, ngawi reng chuan a meng ker reng a. Hnute pek a that thu ka sawi chuan Duati pawh a rawn insiam rem a, keiin naute ka lo pawm rem bawk a, hnute kan fawh tir ta a, a hne nghal dek dek reuh a, a muhil fel ta a.

Zing dar 3 a lo hnai kuar tawh a, Duati chuan a ril a tam thu a rawn sawi chhuak a. Kei pawh ka mut chhuak avang chuan Coffee ka in chak takzet bawk a. Ramsanga chu eitur lei turin a ding ta vut a, a kal dawn pah chuan a rei loh tur thu min hrilh pahin ka chal-ah a rawn fawp zauh a, ka harh kawk in ka hria.

Naute a rawn tap raih raih a, Duati chu a chau bawk a niang, a lo muthlu diar diar a, ka tho vat a, kan en vel chuan naute chu a lo e a, hlam ek ban tak ang ngei mai kha, ka cousin te ho nau nei ka lo awmpui ve fo tawh avangin ka zei ve riau tawh a, ka thlak fel zung zung a, ka thlak lai chuan Duati chuan, “Zodin, ka hria che asin, Sir Thantea nupui kha i ni tiraw?” a rawn ti a. Ka zak lutuk chu ka sa pup pup thei.

“Aw, ni e,”

“Anih leh u Ramsanga nen hian enge in inkar?” a rawn ti leh a.

“Engti zawngin maw?” ka ti let ha a. A sawi tum awm ang erawh chu ka hrethiam deuh reuh, hrehawm ka ti hle bawk.

“U Ramsanga’n a en dan che hi hmeichhe dang a en dan nen a inang hauh lo tih ka hria a nia, pasal nei lai i ni tih chu a hre turah ka ngai a,” a rawn ti let a.

Naute chu ka thlak fel a, a lo muhil fel leh et tawh a. A nu bulah chuan ka mut tir a, “Ni e, engkim ka hrilh vek alawm, engtinnge mawni ka tih dawn ni, ka sawi thiam lo, kan in karah hian engmah a awm lo tih dawn chuan kan inngaina tawn hle tih ka hre bawk si a, mahse, pasal nei lai ka ni a, inbiak tawh loh a tha zawk ang tih thu ka hrilh pawn tun hi kan thleng chu a nia, kar khat em pawh kan la inhre lo a, engmah chanchin sawi tur kan la nei lo, mahse, ka chunga a thatna a lanchhuah tir dan te erawh dawnsawn dan ka thiam lo lam deuh chu a ni, hmeichhe dang chungah hetiang veka ngaihawm hian a khawsa ve tho thin nge maw ni dawn ni” ka ti ta duah a.

Duati chuan min en kar hian, “A van vanduai tak ve aw, a luck tehlul nen tumah hi a duh ngai lo. Ngaihzawng tia chhiar tur tumah a la nei lo a, amah ngaizawng a, zah hre map lova rawn pan tu hi chu a tawng fo mai. An reh veleh mai zel. Zanina a rawn hruai che khan mak ka ti hle a, a mitmeng a awmdan leh a care danah che a duh che tih ka hre bawk. Mahse, nang chu mipa dang ta i ni tawh si a, tlangval vanduai anih ber chu,” a rawn ti a.

“Duati, mualpho hi ka hlau tak zet a ni, karlehah ka haw tawh dawn a, engkim a fel vek mai ang,” ka ti sap a. “Tumah midangin hetah min rawn hruai ve tih pawh hi hre lo hram se ka ti khawp mai,” ka ti chuai raih a.

“I lo kal a, min pui a, ka lawm tak zet a nia, hetah i lo kal tih min an hria a nih pawhin U Ramsanga thiannu, remchanga min rawn puitu tih bakin tumahin an hre lo ang che, lungngai reng reng suh,” a rawn ti a. Ramsanga pawh eitur chi hrang hrang nen a rawn inkhai bawr lut tun a.

Ei tur te kan ei fel chuan naute pawh a rawn tap leh ta ngek ngek a. A diaper te kan thlak a, hnute kan hnek puar tir hnu chuan damlo riah puitu khumah chuan Ramsanga chuan ka duh lo chung min mut tir a, tlemte mut pawh a hlu a ti tlat a, ani chu naute bulah chair-ah a thu ran thung a. Ka mut a chhuak tawh bawk a, ka muhil nghal bawrh bawrh a.

Naute tap ri avangin ka harh a, khua chu a lo var uar tawh a. Ramsanga chuan zei lo fe hian naute diaper lo thlak ve a, a kut lianpui leh naute diaper tereuh te te chu a inmil lo em em mai a, nuih hak hak pawh chuan, “Naute kha i khawih na zawk ang tih a hlauhawm alawm le,” ka va ti fiam a, naute chu ka buaipui chhunzawm a, a hmaa diaper lo awmdan pawh chu Ramsanga’n amahin a lo buaipui tawh ni ngei tur a ni, a ni deuh niaih a. Ka thlak fel zung zung a. Duati chu ka kaitho a, hnute ka pek tir a, a chau hle ni tur a ni, hnute pek pah chuan a muthlu leh siar siar, naute chu hnute hnek rem tumin ka lo vawn sak a.

Naute a puar hnu chuan a mu leh ta siai siai a, Duati pawh a muhil chhunzawm leh nghal a. Zing dar 7 a rih tawh a, han mut leh mai a chi viau tawh lo a. Ramsanga chuan min rawn kuah a, a pangtilumin min deh rual chuan ka zam chhe leh viau tawh a.
“I chau em?”

“Chau lo ve, ka mu teuh alawm, nangmah zawk hi i mu mang si lova, i chau viau ang a”

A nui suk a, “Ei tur ka zuk la ang e, i duh leh lo intifai la,” a rawn ti a.

Bath room lamah chuan intifai turin ka lut ta a. Zin chhuah lai a ni hlauh bawk a, bag-ah engkim ka ah fel than hun lai a nia, tooth brush atanga makeup thlengin, a tihzia khawp mai.

Ka hmai ka phih zawh chuan ka mutna lam chu ka pan a, ka bag chu ka hai rak rak a, nimina necktie ka lei chu a lo awm ran a. Ka pe ngam ngang lo, tian ak kual vak vak mai ang, remchang a la awm em ang chu maw!

Ka hmaiah chuan moisturizer te ka hnawih fel hnuah ka mit chu sinte in ka line a, ka hmuiah chuan lipstick ka thai leh puat a, ka sam chu ka chhipah ka bawk tawm bawk a, ti hi chuan ka hmuh tlak deuh tawh ang chu.

Ramsanga pawh coffee leh biscuit nen a rawn inchawi lut ve chiah a. A chau ve tawh hle ang tih ka ring, nizan lamah a muhil miah lo tih a hriat a. A blazer kha chair nghenchhan- ah a bang than a, a shirt pawl dal riai chu a chung ber a phelh thawl a, necktie a pawt thawl bawk a, a shirt ban a thlep chhing bawk a, a che zung zung a.

Nizana motora a thusawi kha ngaihtuah nawn lehna hun pawh ka nei ta lo kha a nia. Chutia a che vel ka thlir chuan ka pasal nen ka lo khaikhin lo thei lo a. U Thantea chuan kumkhua atan min nei tawh a, min rim thin lai atangin min duatna emaw, min duhsakna a lantirna ka la hmu ngai hran lo. A lo leng a, ka pa nen an inkawm a, thingpui ka lo lum sak a, a changin tui a tih thu te a sawi ve luam thin, chung bak chu kan inneih hnuah phei chuan ka hre mang lo a ni e. Engkim hi a tur rengah a ngai a, thil awmdan tur sa-ah a ruat a, lawmthu leh inpek let ilo hi a awm ve lo. Ramsanga erawh chuan tun ni hnih lek ka la cham hun tur hi keimah min duat nan min dil a, nihnih chu sawi lo, zan khat ral ta chhung lek pawh khan min duatna leh min ngaihtuahna kawng hrang hrangin ka dawng nghal a, kei hi ka haw vat loh chuan a zunah hian ka luangral mai ang.Dawhkan a buatsaih lam chu ka pan hnai a. Coffee chu kan in dun a.

"Ka nutei leh a makpa pawh an lo thlawk chhuak dawn tawh a, an lo thlen veleh hotel-ah ka thlah che ang a, i mu hahchawl vang vang dawn nia," a rawn ti a.

"Chutiangin ka hah hleinem, kei chu zin nuam ti mi ka nia, ka taksa pawh hi chutiang tura duan chu a nia, men rei te, zanhnih khat tlaivar te mai mai chu ka hah pui ve hauh lo a nia" ka ti let a.

"Anih leh khawi ram nge i tlawh chak ber, i la tlawh loh zingah," a rawn ti a.

"Tlawh alawi pawh ka la nei hleinem, pasal ka nei hma lutuk a, kan pa lah chhuakvak chi a ni bawk si lo a. Mahse, Norway hi chu ka la tlawh dawn khawp, midnight sun te hi ka hmu chak tak zet,"

"Hmeichhia hi chu in vanduai, pasal in nei a, in dream te hi a thlawk bo vek anih ber hi," a rawn ti hmuk a.

"Pathian min siam dan a nia, ka vui hran lo, mahse, feminist deuha ngaihtuah chang chuan ka vui lek lek thin," ka ti let a.

"Norway-ah chuan ka la hruai dawn che nia," a rawn ti a. A rawn fiamthu ah ngaiin nuih hak hak pahin amah chu ka en a, thutak deuh mai hian min lo melh run a.

"Ka ti tak tak alawm," a rawn ti leh a.

"Mumang ram lamah te chuan kan la kal dun mahna" ka ti sap a.

Naute a rawn tap a, nurse in damdawi ei tur a rawn dah chiah bawk a. Kan rik tak deuh hak avang chuan Duati pawh a rawn harh ve bawk a. Naute diaper te kan thlak fel a, hnute te a pek fel hnu chuan Duati sam chu ka khuih mam sak a, ka phiar sak at a, a in eipuar zui ve ta a.

Duati nu te pawh dar 11 velah an rawn thleng a, Ramsanga nen damdawiin kan chhuahsan ta a. Duati pasal chuan lawmthu min hrilh nasa hle a, a nu erawhin Ramsanga bialnuah min ngai deuh nge, min en leh deuh hrak hrak thin a. Kan chhuahsan dawn chuan Duati pawhin lawmthu min hrilh mawlh mawlh a, ka haw hmain ka hman leh ka la tlawh leh ang chu.

Ka hotel thlenna lamah chuan kan tlan zui ta vang vang a, Neha pawh ka call a, zan lama kan chanchin te ka hrilh a. Ramsanga nen hun kan hmang dun tih a hriat chuan a rawn phur em em lehnghal a, bazarpui pawh a ngaih loh thu leh a nu nen chhuah an tum thu te min rawn hrilh mawlh mawlh a.

Phai ramah hi chuan khawi lai mai pawh hi kal dawn ila tlan vang vang zel hi a ngai mai hian ka hre thin. Ramsanga chuan AC a on a, ka maimitchhing siar siar a, a bula ka awm hian mak tak maiin ka thla hi a muang huai zel anih chu. Nizana a thusawi kha ka ngaihtuah nawn leh a, ka ngaihtuahna pakhatah chuan “Pasal nei lai i nih kha, engmah hmalam hun awm lo turah i nun tibuai kual suh,” ka in ti a, ka ngaihtuahna dang leh-ah chuan, “Ni hnih chiah alawm le i awm tawh dawn le, hmeichhia, hmangaih leh duat mamawh ve em em i nih kha, i tun hun chiah kha ngaihtuah rawh,” ka in ti mawlh mawlh bawk a. Min zahthiam em emtu ka bula motor khalh mek hi chuan eng thutlukna pawh siam ila, min hrethiam vek ang tih ka hrechiang khawp mai.

Motor chu a ding dat a, ka insiam rem a, pawn lam chu ka hawi chhuak a, ka hotel thlenna kan lo thleng der tawh a.“I muhil emaw ka ti a, ka inthlahrung hle mai, keimah vangin i hah ta hrep a nih kha,” a rawn ti a.

“Ka hah lo tak tak a nia, inthlahrung miah suh,” ka tia, engemaw sawi tumin a ang zuau a, mahse, a ngawi leh ta zawk a. Motor kawngkhar hawn tuma ka vawn lai chuan ka huaisenna zawng zawng ka sawm khawm a, ka inher let a, amah chu ka en ta ran a.

“Nizana i thusawi-ah khan i la ding em? Tun nihnih chhung ka kianga awm min dil kha, i ti tak tak em?” ka ti thut a. A hmelah chuan mak tihna leh phurna a rawn lang chhuak a.

“Ti tak tak dawn lawm ni, mahse, nizanah keimah vangin i tlaivar sia, nikhat tawp chu kan paih turah ka lo ngai a,” a rawn ti a, a nui var var a.

“Ni hnih chiah neih laia ni khat tawp mut bo te chu a uiawm alawm le, va haw vat la, lunch ei turin ka lo nghak ang che, i duhna berah kan kal dawn nia,” ka ti a. A hmela hlimna lo lang chhuak chu ka theihnghilh tawh ngai lo ang. Ka khabe-ah a rawn dawm a, min fawp ta vawng vawng a.

A hmela phurna lang ang chiah chu ka hmelah a lang chhuak ve lo anih chuan a mak hle ang. Duhthlanna ka siam fel ta a, ka siam sual dawn lo tih pawh ka hre bawk. Ani nen hian he leiah hian inhmu leh tawh ngai lo tur pawh ni ila, vawiin a ka thutlukna siam-ah hian ka inchhir ngai lo ang.

Ka room ka luhfel chuan AC ka on zui a, ka inbual fai a, tleirawl ngaihzawng te nena an leng chhuak tur ang hi ka in chan deuh a, ka innuihzat deuh a. Ani lah tak a, ngaihzawng la nei ngai tlat hek lo le, U Thantea nen khan min rawn rim thin lai kha chuan kan leng chhuak ve tawh ngei a, chu pawh innei mai tur kan nih hnuah a ni a, mahse, hetiang hian ka phur ngai lo, min rim thintu a nia, lenpuiah min sawm a, ka ‘aw’ liam ve mai zel a. A chang phei chuan ka ‘aw’ vek tawh hnu te hian ka chak lo lutuk a, ka biru kual vak vak zel anih kha.

Kawrdum, cotton puan, daidak mai leh Jeans pawdang zuih thla chu ka ha a, hmanzana Neha- nena chapel inang kan lei kha ka bun bawk a. Ka mit chu nasa vak lovin ka chei a, ka hmui pawh a sendang lam ka hnawih a, ka sam chu ka thlah hniang a. Ka hmela phurna leh hlimna lo lang chuan min ti lang tha zual tak zet a ni. Mi tam tak hian pasal ka neih hma vanga min ui thu min hrilh thin a, pasal ka nei tih hre reng a min be lui pawh ka tawng fo. Engah mah ka ngai ngai lo a, tin, ka ler lo ve hrim hrim nge, mipa hi min hiptu tak ka tawng ngai lo pawh ka hre lo, tu-ah mah hian beiseina ka siam sak ngai lo a, U Thantea tana nupui tha nih hi ka tum tawp zel. Tun tum ka zin erawh khawharna nasa lutuk nena inpu chhuak sa ka ni bawk a, Ramsanga min duatna te chu ka dawngsawng zo lo a ni ber e, mahse, ka inchhir ngai lo ang.

Ramsanga ka nghah lai a chuan U Thantea ka phone a, ka inthlahrung khawp mai. Monday atan ticket ka lak tawh thu te ka hrilh a. Min lo hmuah tur thu a rawn sawi leh a, ka ngaih hi a tha thei lo a ni, nidangah pawh min hmuak ngai hlei lo. In enkawl tha turin ka hrilh mawlh mawlh a, phone ka dah ta a.

Ramsanga pawh a rawn thleng rang khawp mai. Motorah kan chuan luh hnu chuan, “Vawiin chu kal duhna bik i neih loh chuan ka duhna apiangah ka kal pui tawp mai dawn che asin,” a rawn ti a. Ka pawmpui tih nan lu ka bu nghat a. A tlan chhuah pah chuan, “I chhe lo tak zet a ni,” a rawn ti a. Ka nui var var a.

Chanakyapuri lamah min tlan pui vang vang a, restaurant romantic zet mai, novel-a an ziah thin ang ni mai awma mawi, Digin tih-ah chuan min luhpui a, a restaurant leh a velah chuan Saron senduk leh a var a par a, plant mawi tak tak a mawi tawk te hian an hung bawk a. Menu ka en chuan Italian food deuh hlir a lo ni a.

“Wow, Italy a zin ang mai alawm kan nih dawn le,” ka ti chhuak hap a. “I kal ngun hmel zawk bawk a, i duh duh min chah kep rawh, thil tui chu i hre dawn chiang,” ka ti a. A bu nghat a, Waiter hnenah chuan a chah nghal zung zung a. Tunge mawni ber chu hetah hian a hruai tawh ngei ka ring nghet tlat ringawt, hetiang Restaurant romantic lutukah mipa lehnghal, thian ho chuan an kal lo tawp ang tihna rilru kan nei nghal ringawt a.

“Dik lo a awm em ni? Nuam i ti lo em ni?” a rawn ti a.

“Nuam ti e, hmeichhia engzat nge hetah hian i hruai tawh?” ka lo ti deuh nghal tawng a. A nui chhuak hak hak a. “Enge nuihna tur, hetiang restaurant-ah te chuan mahnia kalna chi pawh a nih chiah loh hi, mipa tan thian ho-a kalna chi lah a ni lo,” ka ti zui a.

“Kan chhiar ang aw,” tih pahin a kutzungtang chu a thliak nghut nghut a. Ka thin a rim deuh tlat tawh a. Ka nui peih tawh lo.

“Pasal nei lai ka ni tih i hre reng a, mualpho pawh huamin vawiin leh naktuk atan hun ka pe che a, hmeichhe dang ni hnih khat lek i lo kawp thin nen ang khata min ngai a, category khat a min dah anih chuan ka lung a awi lo viau ang,” ka ti a. Ka hawi chhuah chuan min lo en run a.

“Ka ti tak tak alawm, i lo lenchhuah pui ve zuai zuai tawh nen thuhmun a min dah a, ‘One of them’ ka nih chuan, min thlah haw nghal zawk mai rawh. Mipa ka duhthu ngei a ka vawikhat lenchhuah puina a ni a, ka tan chuan vawiin ni hi a special tak zet a ni,” ka ti a, a tawp lam phei chu a ri chhuak thei tawh meuh lo. Ka thin zawn hi a sa pup pup a, ka tah chhuah loh nan ka insum tang tang bawk.

Dawhkana ka kut dah chu a rawn la a, a hmer vang vang a. Ka tang deuh tung bawk a,

“Zodin, tun hi mipa vawi khat i lenchhuah puina maw?” a rawn ti a. Ka lu ka bu nghat a.

“I pasal neih hmain ngaihzawng dang pawh i nei ngai lo em ni?” a rawn ti leh a.

“Aih, U Thantea nen chuan vawi hnih khat chu kan chhuak dun ve, chu pawh ka rawt ni lovin, min rim thin tu a nia, min sawm ve thin a, ka pasal ni mai tur anih vangin ka ‘aw’ liam ve mai thin” ka ti let ha a.

“Inngaizawng in ni lovem ni?” a rawn ti leh a.

“Ni lem lo, min rawn rim thin tu a nia, kan lecturer a nia, ka chhungte zawng zawngin ka tan a tha anih thu min hrilh thin a. Mipa lehkhathiam a ni a, ka zah em em a, ka tana tha anih ringin nu leh pa te thuawihin ka nei ve tawp,” ka ti a.

Ngawi rengin a ding a, ka en reng a, ka thutna thutthleng lamah chuan a rawn phei a, ka bulah chuan a rawn thu a, min kuah a. “Khawvela mipa vannei ber ka niin ka hria. I duhthu ngei a i lenchhuah pui hmasa ber ka lo ni reng a," a rawn ti a. A ngawih vang vang hnu chuan, "He hmunah hian tumah ka la kal pui ngai bik lo, ka uang mai mai anih kha. Mahse, he restaurant nei tu hi ka thianpa nau a nia, a siam lai te, a hawn ni te leh a hawn hnu pawn ka kal fo a. A hmun romantic lutuk hi ka hmeichhe duh ber hruai nan ka it thin a, chuan, vawiin-ah ka hmeichhe duh ber ka kalpui ni hian, chu hmeichhia pawh chuan ama duhthu ngeia vawikhat mipa a chhuahpuina a lo ni chiah bawk a, ka vannei tak zet zet a ni,” a rawn ti a. A awmah chuan ka bei kak a, ka mittui rawn tla tur chu ka lo hru a.

Kan ei tur chah chu a rawn thleng a, a tui hmel hlawm hle bawk. Ka thinlung takin ka hlim thar leh vawng vawng a. A daih rei dawn lo tih ka hria, mahse, damchhung a khawhar taka hun hman ai chuan nikhat lek pawh min duh em em tu bula hun hman chu ka tan a hlu em em a ni.

“Eng music nge i ngaihthlak thin,” ka ti a.

“Ka hre lo, duh bik pawh ka nei lo, mahse, Motora zin hian Daduhi hi ngaihthlak nuam ka ti, ngatinge?”

“Ka zawt mai mai che, anih leh K.Hminga i ngaithla ngai em?” ka ti leh a.

“Nope, a zaithiam em?” a rawn ti hu a.

“A hla pakhatah inhmeh deuh kan nei a,”

“Chung te chu kan ngaithla ngam dawn em ni,” a rawn ti let a.

“I nutei khan mak min tih hmel tawp a,” ka ti leh daih a.

A rawn nui chhuak ta hawk a, “Topic thlak hi i master-na anih ber hi. Ka nutei chuan mo an duh tawh lutuk a, kei-in a hmeichhia ka hruai luh tawh te chu mo chei in an chei chak a, min zawt ngam si lo talbuai anih kha,” a rawn ti a.

“Nakinah an bulah i kal leh ngei dawn sia, zawt ta che sela, engtinnge i tih ang?” ka ti let ha a.

“Aw, in monu duat em em tur anih hi ka ti ang,” a rawn ti hmiah a.

“Ramsang”

“Enge?”

“Thutak ve deuh teh”

“Enge, ka thu tak alawm”

“An monu chu ka ni thei ngai dawn lo tih i hriat ve reng kha,” ka ti a.

Min en vang vang a, a thil eina fork chu a dahthla a, ka kut a rawn la kang a, nizana a tih ang bawk khan a thin zawnah a dah a. “He ka lungphu, nangmah ka hmuh leh i bula ka awm chang apianga a phut dan danglam thin hian, ka hnenah a la hruai thleng ngei ang che, engtikah nge ka hre lo, mahse, ka ta i la ni ngei ang,” a rawn ti a.

Amah chu ka en reng a, chhan ngaihna pawh ka hre lo. Ka ngawi reng a. “Le, ei zawm leh tawh rawh le, thil kan ei zawh khawnge kan kal ang?” a rawn ti a. Engmah pawh ka ei thei tawh lo.

“Bazar mai mai ila, Duati naute thil tur pawh ka leisak ve duh alawm,” ka ti chhuak thei hram.

Kan thil eina atanga hnai Shopping Mall-ah chuan kan lut a. Mothercare Show Roomah kan lut a, naute kawr leh mawza ka lei a, Ramsanga pawh tupa thar nei a ni bawk a, eng eng emaw a rawn thlang ve nual a, damdawiin lam panin kan kal ta a. Motor dahna lam kan pan lai chuan min rawn kai a, dik tak chuan ka lai ve det, nuam ka ti hle bawk.

Car-a kan luh fel hnu chuan car tape chu ka on a, ka Bluetooth nen connect ka duh thu ka hrilh chuan a phone Bluetooth chu a off a, ka connect zui a. K.Hminga hla, “Ka hringnun diary” tih chu ka play ta a.

“Fur khua leh ruah tui chu kawp tur a duan,
Pangpar leh khuaite pawh kawp tur a duan;
Vanzawl a chhum leh ni zung pawh kawp tur a duan,
Nang leh kei erawh hrang tura duan.”

a rawn ti raih raih a. Kan inhmeh hle hian ka hria a. Ka hawi chhuah chuan min lo en run a, a hmelpa zet chuan min ti zam leh pek hle. A thunawn a sak lai te chuan kan inhmeh ka ti tak tak a, heti khawpa thinlung in hmu si, pasal ka neih hnu chauha kan intawng hi hrang tura duansa kan nih vang te pawh a ni ang e.

Damdawiin kan thlen chuan Duati nu hmuh chu ka hreh hle mai a. Ramsanga bulah chuan motorah ka lo nghah tur thu ka hrilh ta tawp a. Ka thil lei sa te chu ka pe a, ani pawh chuan min nawr lui ta bik lo a, a rei loh tur thu min hrilh hnu chuan min kalsan ta a. Hnung lam atang chuan ka thlir reng a,a pian nalh zet, inkhaithli thlerh thlawrh, thau chuangbang awm hauh lo leh casual taka a incheina chu a inrem lutuk a, a ti pa hliah hliahin ka hria.

Ramsanga kal liam hnu lawk chuan ka phone a rawn ri a, ka nu a lo ni a. Ka pick up var a,

"Hello"

"Bawihi, buaina kan tawk tlat mai"

"Nu, enge ni ta?"

"Hei Thantea a heart attack hlauh mai a, damdawiin kan thlenpui tawh a, tunah chuan a thawk pawh a zia leh tawh a, Icu-ah a awm mek," a rawn ti a.

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » August 15th, 2021, 4:17 pm

Ramsanga Pov

Motora ka thlen thlak leh chuan Zodini chu a lo kun ngal a, a muhil anih ringin ka ko harh lo a, motor chu ka kal hual a, driver seat ka hawng a, ka thutfel hnu chuan a tap tih ka hrethiam chiah.

"Zodin"

"Um"

"Enge thil awmzia?"

"Ramsang, U Thantea kha, ka hlauhthawn ang ngei khan a awm a, heart attack in a lo buai a, tunah ICU ah an dah, " a rawn ti a.
Lalpa leh, ka kut a vawn chauh pawha zam thin kha mipa dang kianga a awm laia a pasal chutiang dinhmuna a lo awm chu a va han inthiamlo nasa dawn tak em!

"Chuan, naktuk flight engmah a awm tawh lo," a rawn ti halh a.

"Zodin, lo hawi chhuak teh, " ka tia. Zawimuangin min rawn en a. Ka hmuh hreh ber a inthiam lo hmel hmu tur chuan ka insiam rem a. A mitmeng chu a buai niaih a.

"Zodin, thaw rawh le, engkim a fel vek mai ang," ka ti a, a rawn thaw chhuak halh a.

"Thlawhnaah chuan buai lo la, a thawk tam tak hriat ka nei, naktukah chuan i haw thei ang, dam takin Aizawl i thleng ang a, i pasal pawh engtin mah a awm lo ang," ka ti a. Min chhang lem hlei lo a.

"Chuan, min hnar buai lo la, hetiang dinhmunah hian nangmah chauha riak turin ka kalsan thei lo che, chuvangin tunah hian hotelah kan kir ang a, kan check out ang a, ka inah zanin chu i riak ang, chuan naktukah airport thleng ka thlah dawn che nia" ka tia.

"Mahse, i ina lo riah chu," a ti ban chalh a.

"Min hnial suh ka tih kha," ka ti let hmuk a. Motor ka start a, hotel lam pan chuan ka tlanchhuak ta nghal a.

Hotel pan pah chuan airlines lam ka thiante ka be kual zung zung a. Zodini erawh engmah ngaihsak awm pawn a awm lo, a maimitchhing vang vang a, a tawngtai pawh a ni mahna. Thlawhna ticket chu harsa vak lo vin ka hmu thei mai a, in thlen hunah details inthawn turin ka tifel ta a.

Hotel kan thleng a, Zodini pawh roomah a chho nghal a, chumi chhungin checkout engkim ka lo ti fel a, a signature leh payment chauh ngai turin engkim ka lo tifel a, pek sak ka duh viau nangin, a lung a awi dawn hauh lo tih ka hriat chian sa avangin leh inhnial buaina hun a ni lo tih ka hriat chian em avang a pe lo mai ka ni.

Reilote hnuah room service nen an rawn inzui thla a, a hmel chu a hlim mawlh lo a, vawiin hun kan hman dun avang hian inthiam lo hle lo se ka ti ngawih ngawih ringawt.

Ka in lam pan chuan kan in khalh chhuak leh ta a. Motor khalh pah chuan Neha-i ka call a, chanchin ka hrilh thuak thuak a, kan in lama kan phei thu pawh ka hrilh bawk a. A rawn kal ve thuai tur thu a rawn sawi a. In kan thlen chuan a suitcase chu mikhual room lamah ka dah a. Ngawi rengin room chhungah chuan min rawn zui lut a, sawi tur a hre hlawl lo a niang. Tlai dar 5 a lo ri tawh a.

"In tifai la, coffee tui deuh ka lo siam ang, ka lo nghak dawn che a nia," ka ti a, lu a bu nghat a.

Choka lamah ka luhphei san ta a. Coffee ka siam a, cookies ka phawrh chhuak bawk a, dawhkana ka hung fel zo chiah tihah chuan chokaah a rawn lut ve chiah a. A thutna tur a remfel pah chuan, "Ka tibuai hle mai che," a ti sap a. Coffee chu a in a. "A tui hle mai, min ti harh sawng sawng thei alawm," a rawn ti a. A harh deuh hmel ka hmuh leh takah chuan ka thaw huai thei mai.

Door bell a rawn ri ral ral a, Neha-i a ni ngei ang. Kawngka ka hawn chuan ka sawi dik thlap, Neha-i ngei a ni.

"Khawnge a awm?" a rawn ti deuh nghal tawng a. Choka lam ka kawk a, choka a pan zui ve nghal a. A hnunga zui pah chuan Coffee a duh em tih ka zawt nghal a. A duh ve thu in min chhang zawm zat a.

Choka kan thlen phei chuan Zodini chu a lo ding a, Neha-i chuan a kuah vang vang a. Zodini pawh a thiannu ngei bulah chuan ka bul ngawt ai chuan a hahdam ta in ka hria. Neha-i in tur lam chu ka buaipui a.

"Zodin, engmah hlauthawng suh, in pa pawh a tha leh vek ang, tunlai thiamna a sang tawh alawm, ka pa pawh ka be tawh a, a dinhmun a that tawh chuan indim se, nakinah muangchangin khawl hmangin an enkawl ang a, a tha mai ang a ti a nia" tiin Neha-i chuan a lo hnem mawlh mawlh a.

Sum leh paia buaina nei lo Zodini chu a pasal enkawlna turah buaina a nei lo tih ka chiang a, a pasal thichhawnga a awm laia phatsantu nia a inngaihna zawk chu a hrehawmna a ni zawk mahin ka hria. Nge ka hre dik lo zawk? GOD, vawiin a hun hlimawm tak kan hman avang khan inchhir lul suh se!

Zodini pawh a thiannu ber a lo kal takah chuan a zangkhai sawt hle a, a tawng ve barh barh a, ven khatin ka veng ta. Neha-i bula awm hi chu a hahdam thlak ve hrim hrim a, engmah harsatna leh buaina hi a nei ve ngai lo ni mai hian ka hre thin.

Thingpui in zawhah chuan ka ding hluai a, "Zodin, i ID min lo pe la, flight ticket chu ka lo tifel ang e," ka ti a, a purse atang chuan a rawn phawrh nghal mai a. "Ti khan lo inkawm rawh u, room lamah call pawimawh kan siam lawk ang e," ka ti a. An thianduna titi tur chuan ka kalsan ta a, Zodini pawn ka hnena a sawi ngamloh tam tak sawi tur a nei teuh maithei asin.

Air India lama hnathawk kan thianpa number chu ka hmet chhuak a, a ring ral ral a. "Praveen, documents thlalak chu ka rawn thawn tawh che a, ticket chu lo ti fel ta che."

"Yes sir,ka tihfel hunah ka rawn mail dawn che nia," a rawn ti let a.

"Ka lawm takzet a ni, a nih leh phawt le," ka ti a. Ka phone ka hmet hlum a. Ka inngaihtuah vang vang a, minute pawh a ral hma chuan a ngai bawk chu ka call leh a.

"Enge ni sir? Ka buaipui mek a," a rawn ti a.

"Ticket kha pakhat dang a la awm thei ang em? Kolkata thleng chauh," ka ti a.

"Awm thei e, Sir"

"Ka hmingin lo ti tel ta che, mahse ticket hranin aw,"ka ti let a.

"Yes, sir"

Phone ka dah fel ta a. Ka duat chak em em nu hnenah khan ni hnih alawm ka dil le, a mualpho lohna chin tur thleng chu ni hnih a ral hma chuan hun ka hman pui aniang chu!

Choka-a ka let leh chuan 111an lo awm tawh lo a, an thiandun chuan sitting room lamah an lo insawn tawh a, an lo la ti ti malh malh a. Hmeichhia hi chuan sawi tur hi an ngah bik thin teh e.

"Ticket chu ka tifel e," tih pahin a ID chu ka pe let a.

"Neha, Ranjit-a phone la, chaw ei ve nghal rawh u" ka ti zawm zat a. Kan pahnih chauha kan awm ai chuan Zodini awm pawh a nuam zawk deuh ang. Hetiang hi ni lo se chu he inah ngei hian zanin hian zanriah kan pahnih chuah a kil kha ka tum dan a nia, mahse, mi pawisawi hlau Zodini thisen hian a ngam tawh hauh lo ang.

"Min sawm har ka ti lutuk a, i rawngbawl ka ei chak zia chu, mipa ka hriat tawhah chuan rawng i la bawl thiam ber," a rawn ti deuh duah a. Kan inah vawikhat chaw ka ei pui tawh a, Ranjita nen, tui a ti der ve khawp a nih tak kha. A phone a phawrh a, varenda lamah Ranjit-a be turin a chhuak ta a.

"I tha em?" ka ti a, Zodini bulah chuan ka thu a. Ka rin dan lo lutuk maiin ka banah chuan a kut a rawn zen lut a, ka darah a lu a rawn nghat a, a thaw ta siai siai a. Ka lo hahdam nghal sawng sawng thei nia. Keimah hi min ring tlat thei se ka duh a, ka bulah hian hahdam vawng vawng se ka ti takzet a ni.

"Ka lawm lutuk aw, min buaipui a, chuan, ka tihpalh tak zet zet bawk," a rawn ti a. A taksa in min tawhna avang chuan ka hlim veng veng thei hial a nih chu.

"Engvangin maw?" Ka ti let a.

"Kan haw kawnga ka awm dan vang khan. Dik tak chuan pasal te thichhawnga awm laia mipa bula ka lo awm kha ka inthiam lo a," a rawn ti a, ka rin ang chiah a ni.

"Mahse," a rawn ti halh a.

"Enge mahse?" Ka lo ti vut a.

"Nang nena hun hmang dun tura thutlukna ka lo siam fel kha ka inchhir ngai lo ang. Chuan, vawiin a kan lunch kha ka damchhunga ka tana lunch special ber a ni tawh ang," a rawn ti a. Ka thu hriat avang chuan ka thlawk chhuak lo chauh a ni. Amah fawp nghal nawk nawk lo turin ka insum fe a ngai bawk.

"Ramsang, vawiin ni hi theihnghilh ngai miah suh aw, chuan, ngaihzawng i neih a, nupui i neih hunah pawh, kha lai restaurant-ah khan tumah kalpui tawh suh, a chhan chu, khalai kha chu kan pahnih tan chauh a ni," a rawn ti leh a, ka puak keh mai dawnin ka hria.

"Zodinpui, tawng tawh suh, nangmah lo chu tumah ka nei dawn lo, chuan, a theih dawn ngai loh chuan ka leng tar mai ang," ka ti let hrawk a.

A rawn nui hak a, "Ngawi teh, chi thlah miah lo tur atan chuan i hmeltha tak hi a uiawm mah mah," a rawn ti a, a nui hak hak a. Ka melhrum hle ringawt. Neha-i hian thluak ti zangkhai thei thil lam te a lo pe reuh emaw ni. A phone a rawn ri ral ral a, a nu a lo ni a, ka kut a suihna chu lak chhuah a tum a, ka lo man bet a, "Tikhan be rawh" ka lo ti bul hmuk a.

Ner nang chungin phone chu a bia a. An pa stable thu te, hlauhthawn awm chin a pelh rih tawh thu te an rawn hrilh a, ani pawhin ticket a tihfel tawh thu te a hrilh let ve bawk a. An in be rei lem lo a, an inbiak chhungin Neha-i pawh a rawn lut ve ta bawk a. Kan lo thutdun dan a hmuh chuan a nui sak a, Ranjit-a lo kal ve tur thu sawi pahin kan kiangah chuan a rawn thu ve ta a.

Rei lo te hnuah Ranjit-a chu a rawn thleng zui ve a. Zodini chuan rawng min rawn bawl pui a, ka mamawh tur apiang a lo siam fel zung zung a. Ranjit leh Neha-i erawh TV enin an inhnial char char a. An inhnialnaah chuan kan lo nui ve hak hak reng ringawt.

Zanriah ka ei kham meuh chuan zan dar 11 a lo pel tawh a. Neha leh Ranjit pawh an haw zui ve ta a. Kan thlawhna tur kha dar 7 chhuak tur a nia, dar 5 velah airport kan thlen ngei a tul dawn a, mutna hun kan nei tlem tawh hle.

Zanin hian ka hmuh phak lova riah tir ka tum lo a, ka pindan min tawmpui duh dawn lo tih ka hre chiang bawk. Chuvangin, thluak vawrh ve hret a ngai ang. He khawvelah hian kan intawng leh tawh lo maithei a, anih loh vek pawhin kan inkalsan hnuah kan Zodini hian ka phone a pick up zui zel dawn em pawh ka chiang ngam si lo, chuvangin, zanin chuan ka hmuh phak lovah a awm lo tur a ni tawp mai a ni. A hriat ve mang si lohvin ka lo am ru ve em em ringawt mai.

Sin tur puan pan ka la chhuak a, ka pe a. "Movie en ang hmiang, mutna hun kan nei tam tawh chuang si lo va," ka ti a, a lo aw ve mai bawk a.

Couch-ah chuan a bulah ka thu hnai a, remote ka pe a, “Kha i duh duh lo en la, hna tlem thawh ka ngai a, kan tifel lawk ang,” tih pahin laptop chu ka on a. Office work tlem ka khawih a, Zodini chuan min rawn ngheng talh talh a, ka nuam tihzawng tak a ni.

Darkar chanve vel hna ka thawh hnu chuan Laptop ka khup fel a, thutthleng sir a dawhkan teah chuan ka dah phei a. Zodini chu min ngheng chung chuan lo muhil a. Aizawl lam ngaihtuah awm viau mahse, Delhi lamah chuan ka duhthusamin thil a thleng a ni. Ka nui suk a, ka kuah nghet deuh a, a movie en lai chu ka enchiang a, “Dear John” tih kha a lo en a. Nicholas Sparks thawnthu ziah ho hi chu ka cousin nula ho hian an duh hlawm em avang hian ka hre ve nual hlawm a. He thawnthu pawh hi a sipai tan laia a bialnuin pasal a lo neihsan vel kha a nia, kha mi khawngaih thei tak nula khan kha pathlawi, cancer natna vei lai, a fapa autism bawk si kha a khawngaih a vangin a lo neih san a. Chawlh la a a lo haw chuan hmangaih tak te kha an inhmangaih a rem tawh lo a nih tak kha. TV chu ka en zawm duh lo a, ka off a. Zodini chu ka thlir ta vang vang a.


Zodini POV

Ka muhil ka harh chuan Ramsanga awmah ka lo bei a, ani pawh a lo muhil sak sak a. Ka thlir reng a, a hmeltha takzet a ni. A rim pa hrak chu ka hip lut vang vang a, hetianga min duat em em tu bulah hian awm hlen ka chak tak zet.

A ni khatna pawh kan hman mumal tawh loh nen, a ni hnihna phei chu inthen nan kan hmang dawn a ni lehnghal si a. Ka en reng a, a hmuiah chuan dimtein ka fawp ta a. Ka zam lutuk a, ka sa pup pup a, ka lungphu te chu an inthum rawn tluk tluk a. Ka hmui ka laksawn dawn chiah chuan, ka kawngah a rawn man nghet a, a lamah min kuah hnai sauh a,

“Han ti nawn leh teh, mawh, Zodinpui,” a rawn ti a. A lo harh anih chu! Chet pawh ka che ngam tawh lo. A rawn nui suk a, ka thawk ka chelh tlat, ka thaw a chham dawnin ka hria. “Le, c’mon Zodin,” a rawn ti a, min en run a. Ka maimitchhing a, thawk ka la a, zawimuangin ka hmui chuan a hmui chu ka si de de a, min kuah ngheh sauh pahin duhthawh takin min rawn fawp zui a. Zak kual vel thei ka ni tawh lo, ka thiam ang tawkin ka chhang let ve ta a.

Ramsanga ka ngaihsanna deuh pakhat chu, mi nupui ka ni tih a hria, chuvangin, infawh bak hi engmah a aia thui min thlenpui duh lo. A inveng nasa em em a, hotelah pawh khan min fawh zawh khan engmah sawi lovin a haw tlang nal nal anih kha.

“Zodin” a rawn ti a. A awmah ka la bei reng a, “Umm” tih ringawt in ka chhang a.

“Ka ngai thei ngawt ang che,” a rawn ti a. Ka tim sawk thei.

“Keimah vang chuan i pasal chu rawn then hlek suh ang che. Natna nei enkawl ngai a ni tawh a, enkawl tlat rawh aw, chu chu ka Zodini, ka thinlung lalnu awmdan tur a ni,” a rawn ti a. Ka mittui a rawn tla a.

“Kei chu min ngaihtuah suh, hna ka ngah lutuk a nia, ka buaina tawk,” a ti a, a nui sak a. Engmah pawh ka sawi thei lo, ka tah a chhuak tun ringawt. Hetiang ringawt lo inlaichinna hi nei ve thei ila ka va’n ti tak em!

“I mualphona tur pawh hre vek a ka tana hun min pek avangte, zanin hun min hmanpui a vang te, i mipa date hmasa ber ka nih avang te hian ka hlim em em a, min pek theih china min pek theih zawng zawng min pe a, i chungah hian ka lawm reng fo ang,” a rawn ti leh a.

“Ramsang” tih zawng sawi tur ka nei.

Ka chalah a rawn fawp vawng vawng a, “He i chala ka fawh thinna che hi, harsatna i neih chang leh khawhar taka i awm chang ten rawn ngaihtuah chhuak thin la, ‘tuemaw chu ka tan a awm reng a ni’ tiin rawn ngaihtuah chhuak thin ang che,” a ti leh a. Ka insum thei tawh lo.

“Ramsang” tiin a awmah chuan ka bei a, ka tap ta a. “Khawngaih takin engmah sawi belh tawh rih suh,” ka ti sap a. Kan ngawi dun ta reng a.

Ka huaisenna zawng zawng sawm khawmin ka tho kang a, a mal chungah chuan ama lam hawi zawngin ka inpawm tir a, mak titakin min rawn melh a, a darah ka kut chu ka bang liam a, a hmel chu mak tihna hlirin a khat a.

A chalah chuan dimtein ka fawp a, “I khawhar changin hei hi lo hre chhuak ziah la,” ka ti let ve a, a rawn nui suk a, ka la duhtawk lo, a hnar hmawr teah chuan fawh pahin “I hah deuh changing hei hi lo hre chhuak leh la,” ka ti leh a, min en run tawh a. “Chuan maw, min ngaih changing hei hi lo ngaihtuah chhuak vang vang thin ang che,” tih pahin a hmuiah chuan ka fawp ta vawng vawng a.

Rei tak chu engmah sawi lovin kan thu dun a. A awmah ka bei a, a reh tlawk tlawk a ni ber. Zing dar 4 a lo ri dawn tawh a.

“I ril a tam em?” a rawn ti a.

“Doughnut tui tawk ka ei chak,” ka lo ti a, a rawn nui hak hak a.

“Insiam ang le, airport pan ang, thlawhna missed palh a hlauhawm,” a rawn ti a. Ka bu nghat a, mikhual room lam chu ka pan ve ta a.
Vawiin khan Neha-i hnenah khan kan chanchin ka hrilh a. Keimah ringawta pai ai chuan ka veng hawk bawk. Ka hlim a duh ber thu min hrilh a, eng pawh thutlukna siam ila, ka lamah a tang reng dawn tih min hrilh a. Ka insiam zung zung a, ka necktie lei erawh ka pe ngam ngang lo a, ka suitcase mawngah ka rem tha a, ka in nawr chhuak ta a. Ramsanga pawh a lo inpeih vang tawh a, Jacket dum nalh zet a ha a, kekawr uk buang a ha a, a inhmeh thlup zel. Min lo nuih suk a, Ka ticket nizan lama a print tawh chu min rawn pek pahin, “Kal ang aw,” a rawn ti a. Ka bu nghat a, kan chhuak zui ta a.

Airport kan thlen chuan mi an lo zi hut hut a, zingkar ani tih pawh a hriat loh. Suitcase pakhat chiah anih avangin trolley la lovin departure gate lam pan chuan kan innawr phei a. Min rawn zui ve zel a, in line naah pawh chuan rawn in line ve zel a.

“Ramsang, kal tawh rawh, rawn luh kher a ngai lo,” ka ti a.

Nuih rah rah pah chuan a jacket ipte chu a zen a, a ticket rawn lak chhuah pahin, ni hnihna kan la hmang tan dawn chauh alawm,” a rawn ti a. A â zo tawh anih dawn hi. “Kan ni hnihna chu vansangah kan hmang dawn a nih hi, are u ready?” a rawn ti a.

“A tul lo hle mai,” ka ti hap a, ka lawm ru hle thung. A nui suk a, gate duty hnenah chuan ticket leh ID kan pe a, airport chhung lamah chuan kan lut ta a. Booking an lo hawng chiah bawk a, ka bungrua chu kan booked fel a, security kan paltlang zui ta bawk a.

Kan thlawhchhuahna tur gate lam kan pan lai chuan, “Tunge Doughnut ei chak kha?” tih pahin kan piah lawka café chu kawk zauh a.

“Aw, Ramsang, min duat sual zo dawn, tiang te chuan i awm loh hunah min duat tur ka nei dawn si lo a, ka talbuai vek ang,” ka ti a.

“Ka duat rei thei tawh dawn si lo che a, i sual hman lo ang. Ka va lei dawn nge a hmunah sawn kan va ei dawn?” a rawn ti a. A hmuna ei ka rawt a, kan inzui phei ta a. Mizo an awm ve pheuh pheuh tawh avangin Ramsanga pawh a fimkhur ve hle a, min kai miah lo, ka lung a leng nghal hle bawk.

Doughnut kan ei zawh chuan dar zat a en zuk a, “Hun kan la nei tam hle mai. Saw lamah sawn va kal kual lawk ang hmiang, hun paih nan,” a rawn ti a. Thui deuh mai kan kal dun a, mi state airport te hi chu fan fe tham a ni bik tlat zel, keini kan neih chhun tereuh te pawh kan cheimawi hleithei si lo a, rualawh a na thin.

Ramsanga chu a ding dat a. Ka kut chu a rawn la a, ka en reng a, “Helai-ah chuan tuman min hmu lo ang,” tih pahin mit min rawn siai a, a fimkhur lutuk chu ka khawngaih ve reng.

“Zodin, ka ngai dawn lutuk che,” a ti leh vang vang a. Ka en reng ringawt. A jacket chu a zen a, bawm tereuh te nalh zet hi a rawn phawrh a. “Hei hi lo kawl him ang che, he khawvelah kan intawng leh tawh lo anih pawh in, hrang tura siam kan nih lohna, inkawp tura siam kan nih ve na khawvelah, he thi hi rawn awrh la, awlsam takin ka rawn zawng hmu ang che,” a rawn ti a. Ka mittui a parawl leh ringawt tawh. Suitcase chhunga necktie ka dah kha ka in ngei hle bawk, ka booked fel vek tawh bawk si. Bawm chu a hawng a, rangkachak thi mawi zet a rawn phawrh chhuak a, min awrh tir a, a bawm chu ka kutah min hum tir a.

“Awrh reng rawh ka ti miah lo a nia, i thinlungin tul atih hunah i awrh thin dawn nia, i inhmeh ltk, i ta tur dik tak a ni,” a ti sup a. Ka hnung lam atang chuan min kuah vawng vawng a.

“He thi hi ka pi in min pek a ni a, ka hmeichhe duh ber hnena pe turin min ti thin. i awih lo maithei, hmannia Lengpui airport a, i sam i dar lehlam a i uaithlak tir a, i nghawng vel ringawt hmua i hnunga ka thut khan, he thi hi ka rilru in ka lo awrhtir chhin vel che a,” tih pahin ka beng kawmah a rawn fawp zeuh a, ka mur chuai chuai mai.

Nizan lamah kan mu lo nangin thlawhnaah pawh chuan ka muhil phal lo a, minute tin, darkar tin chu ka chhiar a, ka thinlung hi a na vawng vawng thei hial a ni. Thlawhnaah chuan mi hmuh loh theih ang ber turin a kut chu ka vuan a, ka thlah phal lo.

Kolkata kan thleng a, direct booking kan tih avangin ka suitcase pawh nghah a ngai lem lo a, security lama lut tlang leh nghal mai tur ka ni a. Kan hun neih chhun chu a zo dawn tak tak ta. Ka thawk hi a tawt deuh tun a, ka mittui ka dang zo meuh lo chu ni e.

Zawi te hian, “Tikhan ka hmu duh lo che, i mittui tla lai hmel hi ka mitthla a cham reng turin ka duh lo, in ti chak la,” a rawn ti a. Ka mittui chu ka hru mawlh mawlh a. “Lalpa, engatinge he kawng hi u Thantea nen kan inneih hma khan min zawh tir loh le,” ka ti sep a.
“Ramsang, kal hmasa la, ka lo thlir liam ang che,” ka ti a.

“Plan tha deuh ka nei alawm,” tih pahin a phone a khawih a.

“Praveen, Kolkata kan rawn thleng, Aizawl flight turin darkar khat ka thiannu hian a la nghah a ngai a, Security chhung lamah ka luh ve a ngai,” thu pe aw tak hian a ti a.

“Khawiah nge in awm?” a rawn ti let a.

Ramsanga chuan kan awmna lai chu a sawi zung zung a. A hnu lawkah chuan Praveena ni ngei tur chuan “Sir” a rawn ti lauh lauh a, awlsam te in security lamah chuan Ramsanga pawh a rawn lut tlang a. Praveen-a hnenah chuan lawmthu a sawi mawlh mawlh a, thlawhtheihnaa ka luh fel hnua a office lama a kal tur thu a hrilh bawk a.

Darkar khat chhung chu kan thu dun ta ren rawn a,ka nu te ka call zeuh zeuh bak chu kan ngawi deuh reng a, engmah sawi tur kan hre tawh lo. Mizo deuh hlir kan thutkhawm tawh avangin mi mitkham tur zawngin a awm lo a, ka dinhmun min hriatthiam pui a, a chungah ka lawm hle bawk.

Announcement puangtu lam an rawn au lauh lauh a, Aizawl kal tur boarding tih hun an rawn sawi chuan ka la thu reng a, a nui suk a, “Kan rilru a inang in ka hria, midang ho zawng an luh hnu-ah lut ang che aw,” a rawn ti a. Mizo haw tur ho chu an intlar thap a. Kan pahnih chuan ngawi rengin kan thu dun a, kan thinlung erawh chuan thu tam tak kan inchah mawlh mawlh thung. Intlar ho an luh fel pawh chuan ka la ding lawk lo a. Final call an rawn puan hun ka nghak tlat a.

“Hei hi Aizawl flight a kal tur tan final call a ni, Aizawl a thlawk tur Flight no…” an rawn tih chuan tumah an awm tawh lo bawk a, a kut ka la a, ka hmer vang vang a, “Lo fimkhur hle la, damlo ngai suh ang che,” ka ti sap a.

“Ka thinlungah i awm reng ang, ka Thinlung Lalnu” a rawn ti let a. Kan inthlah a, gate ah chuan ka lut ve ta. Min en zui reng tih ka hria, ka enlet ve ngam tawh lo a, ka mittui chu ka hru zauh a.

Link:
BBcode:
HTML:
Hide post links
Show post links

Local Advertisement

MOBILE SIAM ZIR DUH TAN!!!

Tech-Inn Mobile Repairing Traning Centre, Bazar bungkawn

Kum tin mi za chuang eizawnna kan siamsak a, Eizawnna tlaka thiam turin kan zirtir thin

Mizorama mobile siam zirna hmasa ber changtlung ber kan ni. Hrechiang duh tan Contact : 9612099411 / 9862016122


Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » August 15th, 2021, 4:17 pm

Lengpui Airport-ah kan tum a. Airport chhung lamah kan in zui lut hnak hnak hlawm a. Ka rilru leh thlarau zawng zawng hi Ramsanga kiangah khan ka kalsan ni maiin ka hria a, ka mal ngawih ngawih a, ka ruak vek ringawt mai. Bungrua an rawn dah chhuah tan hma chuan ka phone chu ka la chhuak a, Ramsanga chu ka call a, a ring hman hma in ka dah leh a, a aw mawi zet kha ka ngaithla ngam tawh lo a ni. Ka khawvel pangngaiah ka let leh tawh bawk a, biak loh zawk chu a himin ka hria a. Whatsapp message ka thawn ta zawk a.

"Lengpuiah kan tum fel e. Thanks for everything” tiin tawi te in ka thawn ta a. A in blue tick rang kher mai. Message a rawn lut zui a.

"Hlim takin awm la, i chanchin chhia engmah ka hre duh lo. Dam tak takin le" tih zawng a rawn thawn let ve a. A aia thui ka beisei ngam lo nang a, a tawi ka ti ngang mai. Vawi nga vel ka chhiar nawnin ka hria.

“Ka ngai lutuk che” tih ka type leh a, mahse, ka inngaihtuah chiang a, kan pahnih thawnthu chu tikhan tawp zawk se tha in ka hria a, ka delete leh ta zawk a.

Ka nu ka call zui a, ka thlen tawh thu te ka hrilh a. Ka bungrua a lo thlen chuan ka la nawlh a, exit lam ka pan nghal vang vang a.
Taxi lo awm hmasa ber ka la a, Ebenezer Hospital lam panin kan tlan zui ta nghal a. Ka suitcase chu a hnawk dawna ka hriat avangin Vaivakawn-a a kan dawrah dah mai a tha in ka hria a. Driver chu ka kal duh dan chu ka hrilh zung zung a, ka lo muthlu palh anih pawhin Company peng kan thlen vel a min kaitho turin ka chah bawk a.

Ramsanga thi min pek chu ka khal nauh nauh a, dahthat a him ber zawk dawn a ka hriat avangin ka phelh a, ka hum vang vang a, a bawmah te khan ka khung a, ka bag-ah ka dah lut a, min pe tupa zawng zawng nen chuan ka thinlung chhungril berah ka dah tha rih ta a.

Pawn lam chu ka hawi chhuak a, engkim mai hi a chul rup mai hian ka hria. Nizan kan mu tlem bawk a, ka lo chhing sek a ni ngei ang, driver chuan min rawn kaitho a, Company peng kan thlen tawh thu min rawn hrilh a. Ka inti harh a, kan dawr nghak te ka call a, dawr kawta min lo nghak turin ka ti zui a. Vaivakawn-ah chuan ka suitcase chu dawrah ka dah a, Kanan veng lamah kan inkhalh liam zui leh ta a.

October thla chanve a ni tawh a, boruak pawh a nuam tawh khawp mai. A lungleng zawng a ngaihtuah dawn chuan lunglenna tur hlir a ni mai dawn a lawm e. Kei ve hi ka pasal, ICU a awm hmu tur a kal ka ni a, nichin darkar hnih thum vel liam ta a thil thleng zawng zawng kha ka ngaihtuah loh a tul a ni tawp mai.

Ebenezer kan thlen chuan visiting hour a lo intan chiah a, ICU lamah ka lut chho nghal a. Ka nu in min hmu chiah chu min lo kuah nghal vawng vawng a. Ka dam sawng sawngin ka hria. Thlang lamah chuan U Thantea nu leh pa leh U Thantea farnu neih chhun U Mahlimi te an lo thu a, an lam pan chuan ka kal nghal a. Ka chauh leh chauh loh te min lo zawt zung zung hlawm a.

"Engtikah nge luh an phal dawn?" ka ti chhuak hlawl a.

"An phal tep ang, hlauthawng lutuk suh, a fel khawp mai, amah pawh a biak theih reng a, mahse, a la chau deuh a," tiin U Mahlimi chuan min lo chhang a. Kan sawi hnu lawkah chuan, "Pu Lalthantluanga chhungte pakhat a luh theih e," an rawn ti a.

"Va lut rawh le," an rawn ti sap sap a. Keipawh chu ka ding a, ICU room lam pan chuan ka kal ta a. U Thantea chu ka rin ai daihin a lo harh a, ka thawveng huai mai. Min lo nuih suk a.

"I lo thlenna a rei tawh em?" a rawn ti a.

"Ka lo thleng chiah a ni, na i nei em?" Ka ti let a.

A lu a rawn thing a. " Engmah na ka nei lo, mahse, min khawih chau ve hle aniang, rei lo teah hian ka muhil leh mai thin,"a rawn ti a.

"Ei chak i nei em?" Ka tih chuan a lo nui tha a.

"Ka ngah mai a, mahse, ka ei chak apiang hi ei an phal tawh dawn lo a ang khawp mai," a rawn ti a. Kei pawh ka nui chhuak ta hak hak a.

Sawi vak tur pawh kan hre chhunzawm leh tawh lo, kan nupa dan ngai te in kan ngawi dun leh vang vang tawh a. A aw a rawn thian a, "Tun tum i zin chu hetianga ka awm dawn vang hi niang, ka ngai khawp mai che a, ka zinpui lo che kha ka inchhir ru vawng vawng asin," a rawn ti a.

"Aw, mahnia zin a hrehawm nen, min lo kal pui la tha tur a nia, nidangah min zinpui ziah tawh dawn nia," ka ti let a. Min zinpui lo chu a tha nge tha lo pawh ka hrethiam chiah ta lo.

A insawi ang deuh chuan kan ngawih deuh chuan a muhil leh deuh siar siar nghal mai a, ka be buai duh bik lo a, chawlh hahdam a mamawh te pawh a ni ang. A bulah chuan ka thu ngawi reng a, ka hmu cher ve kuam mai. Nurse pakhat hi syringe nen a rawn kal a, a kuta venflon an vuah saah chuan damdawi a rawn thun a. "An nu em ni i nih?" a rawn ti a, ka lu ka lo bu nghat a.

"E, i lo thleng ta bawk a,a dam sawt sawt mai ang," nui tha hian a rawn ti a. Ka nui let ve sak a.

Darkar chanve chauh awmpui an phal avangin darkar chanve a ral hnu chuan ka chhuak ve ta a. A muhil lai han chhuahsan em chu ka hreh deuh a, ka kalsan dawn chuan ka kaitho a, ka chhuah tur thu ka hrilh a, ngaihtuah a ngaih loh thu te a rawn sawi ve luam a, ka chhuahsan ta a.

Ka zin hah deuh avangin zanin chu min la awl theih tur thu min hrilh chamchi hlawm a. Mahse, ka tang ve tlat a. Inah ka haw ang a, ka inbual fai ang a, chaw ei khama kal leh turin kan in tifel a, ka nu (U Thantea nu) pawh a awm ve tho avangin keima nu chu ka ruala haw turin ka ti a, tin, u Mahlimi pawh zan lama damdawiina awm ve tur tho anih avangin kan pathum chuan kan haw ta rih a. Ka nu chu kan thlah fel hmasa a, U Mahlimi kan thlah leh a, in lam panin ka tlan zui ta vang vang a.

In ka thlen chuan kan nula chuan min lo chiau au zung zung a, ka suitcase te pawh in a thlen tawh thu min lo hrilh a. Tlai lam dar 5 a ri tawh a, mutna hun ka nei tawh lo a, Maengi bulah chuan ka inbual tur thu leh chaw ei khama damdawiin ka pan leh nghal tur thu ka hrilh a, mut pindan lam ka pan zui ta nghal a.

Tui sa ver vawrin ka inbual a, ka harh sawng sawngin ka hria. Ka inbual zawh chuan Hospital lama ka ah tur bag ka siam a, ka zin bag-ah khan engkim a awmsa a, ken mai a tha in ka hria a. Ramsanga thi min pek chu ka la chhuak a, ka dressing table a ka tlereuh ho dahna chu ka hawng a, ka dahtha ta a.

Maengi chuan chaw ei min siam sak a, ka ruala kil ve nghal mai turin ka hrilh a, kan pahnih chuan chaw kan ei dun a. “E, ka pi, U Thantea phone kha ka kawl a, a na a rawn chhuah vak khan phone kha min pe a, a nu call turin min ti a. An lo thlen khan an kalsan zui a, phone ka switch off a, ka dahtha ta daih a,” a rawn ti a. “Chaw ei kham lamah min lo pe la, message pawimawh te pawh a awm palh ang e,” ka ti a. Chaw ka ei kham chuan phone chu min rawn pe a, damdawi in lam panin ka chhuak leh ta nghal a.

Damdawiin ka thlen chuan U Mahlimi chu a lo thleng vang tawh a, ka nu leh pa pawh an lo haw dawn chiah a, tha takin kan inthlah a. Kan khum tur chhuata kan phahah chuan kan thu dun ta ran a. Doctor hmuh nghal ka duh viau nang a, ka thlen hun nen a inmil lo bawk a, naktuk ward a rawn fan kual hunah ka lo be thei mai turah ka ngai a. ICU chhunga luh theih hunah chuan ka lut veleh zawk thin a. Chubak chu tih theih a vang khawp mai.

Nizan leh zan hmasa ka mut mumal tawh loh avangin ka chau ngang a ni ang, U Mahlimi pawh ka lo muthilh san daih a. Ka mumangah chuan Ramsanga ka lo hmu a, Duati te cabin-a a kal tur motor atanga ka thlir liam lai ang chiah khan a hnung lam chiah ka lo hmu a, min hlat zawngin a lo kal a, ka lo ko vak a, min chhang thei lo a, ka harh hlawl a. Ka lunglen dan chu sawifiah thiam rual a ni lo, ka mittui chu a rawn luang a. Pasal te ICU a mut laia chutiang kher kher mumang neih pawh chu, kha mumang kher kha chu thlarau sual rawn siam a ni ngei ang.

Dar zat ka en a, zing lam dar 3 a lo ri tawh a, kan bul vel ami te pawh zanin chu serious over an awm lo bawk a, an muhil ve sak sak hlawm a. Muthilh leh ngial ka tum a, ka thei tawh ngang lo a, ka phone chu ka en kual mai mai a. Whatsapp status chu ka enkual a, Ramsanga status a lo awm kalh a, thinphu dep depin ka hawng a.

A awm bei a ka muhil lai thlalak a lo hmang anih chu! Kan thawmhnaw hak ka en chuan Duati naute nei tur labour room kawta kan nghah lai ngei kha a ni, ka kun avang leh ka samin ka hmai a hliah then avangin tuman keimah ka ni tih chu an hre kher lo ang. Ka thin chu a rawn sa vawng vawng a, ngam leh ngam lovin, a status dawt leh chu ka hawng leh a.

“Baby, you’re all that I want,
When you’re lying in my arms
I’m finding it hard to believe,
We’re in HEAVEN”
tih hi a lo ziak kulh a, ka insum zo thlawt lo. Ka inlukhup a, ka inhnit feih feih a. Lalpa, engatinge Ramsanga hi ka kawng i rawn kaltlang tir le?!

Ka bula mu U Mahlimi chu a rawn che tual tual a, min rawn kuah thuk a, “Zodin, tap suh, U Thantea chu a tha lutuk tawh alawm, han chawl hahdam se, phaiah kan kalpui vat ang a, engkim a tha vek mai ang,” a rawn ti a, ka hnung a rawn beng thek thek a. Ka zak lutuk bawk si chu ka tah a chhuak telh telh a, ka insut ri leh hrak thin a, ka inlukhupna pawh ka hawng duh lo a.

Ka mittui ka hru hul a, “U Mahlim, kan hawi harh lawk ang aw, hei phone ka keng a nia, thil pawimawh a awm chuan min lo call mai rawh, ka rei lo ang, muhil leh rawh,” ka ti a, kan mutna chu ka chhuahsan a, inchung sang lamah chuan ka han chho a.

Khua a la var lo a, tlang leh leilung te chu a lang dum vek a, chung lamah van lam erawh a dumpawl duk raih a, an inkarah tak chuan ni lo chhuak tur chuan kawl a ti sen ruih a, a mawi tak zet a ni. Ka lung chu a leng vawng vawng a, au vak theihna hmun ram reh ni se, au vak vak mai ka chak tak zet a ni.

Ka phone chu ka en vang vang a. "Ramsang, min ngaidam rawh aw, i bula awm thei si lovin i chanchin te, i thiltih te ka hre reng anih chuan atthlak takin ka che mai ang. Engkim hi ka chhu chat ang a, i thinlung lalnu ka nih takzet chuan ka hmaah hian i la rawn ding leh tho tho ang," tih mawlh mawlh pahin a phone number chu ka delete ta a. A status thlir theih ringawt pawh ka tan chuan a rit lutuk, chu ai chuan ka rilru-a amah a rawn lan theihna zawng zawng hi nuai reh vek a tha ber ang.

Zingkar khua chu a vawt surh tawh a, ka shawl chuan ka in khuh tha sat sat a. Inhnuai lam panin ka chhuk leh ta a. U Thantea phone kha ka hre chhuak a, ka on a, message pawimawh a awm takin tiin ka hai a, pawimawh em em ka hmu lo a, dam vat tura duhsakna te a lo awm nual a, number ringawt pakhat atang hian, “I tha tiraw? Dam vat rawh aw” tih zawng hi a lo awm a, ka en vang vang a, engtin emaw ni tak hian mit hi a la tlat a. Ka en reng lai chuan, "Phone i khawih peih tawh em ni?" a rawn in ti leh zat a. Ka en vang vang a, rilru kawi ka put hma in phone chu ka off leh ta daih a.

Doctor in ward a rawn fan chuan min rawn ko a, ka lut ve nghal a. A dinhmun chu a that rih thu min hrilh a, mahse, phaia kal a, a dinhmun dik tak khawla enfiah a that thu min hrilh a, in refer ka duh chuan min refer theih reng thu min hrilh bawk a. Inngaihtuah nawn hauh lovin ka duh thu ka hrilh nghal bawk a. Ka haw atanga ni thum hnuah damdawi in atangin kan chhuak a. Birla Hospital, Kolkata ah min refer a, karleh lama kal turin kan inbuatsaih ta a.

Kolkata chu tluang takin kan thleng thla a, U Thantea thianpa, U Mavala chu Kolkata Mizoram House-ah L.O-a a awm lai a ni a, min duhsak em em a, Room tha lai ber min lo dah sak a. Damlo ten room hi an indaihloh thin em avangin Hotela awm pawh pawi ka ti lo viau a, mahse, U Mavala hian a phal lo bur, “Room indaihlohna a awm pawhin kan in lamah in riak mai ang,” a ti bur a. Kolkata Mizoram House Ballygunge lamah chuan kan thleng ta a, tin, Birla Hospital nen a inhlat lo bawk a, a zia phian mai.

U Mavala hi kan pa nen high school an kal lai atanga inkawp an ni a, an hnathawh a inan loh avangin hna an neih hnu erawh in an inhmu khat hle a, kan inneih ni erawh in amah lo midang Best a hman a tum lo bur a, chung hun lai chuan Delhi lama a thawh hun lai a nia, kan chah haw vang vang a ni. Kolkata kan thleng thla pawh chu kan mikhual lo phah hle a ni.

Appointment nei sa kan nih avang in, Kolkata kan thlen ni tuk leh maiah chuan damdawiin lam kan pan ta nghal a. Doctor hmu tur pawh an lo tam khawp a, thutna pawh a indaih thei meuh lo, U Thantea chu thutna ka kian a, amah a la chau ve reuh hle bawk. Doctor kan hmuh chuan, min admit nghal tur thu a lo sawi a, in admit-na tur lehkhate a tihfel hnu chuan Ward Boy a ko a, wheelchair nen a rawn lut nghal a. Lung damdawiin a ni bawk a, damlo te an duat hle a, hah thiang lo an ni tawp a, in admit atanga chhuah ni thlengin wheelchair-in an nawr kual zel tawh dawn a ni.

Wheelchair a han innawr vel chu U Thantea chu a tlawmngai ve khawp a, mahse, an hospital dan a ni ve tlat si a, nuam lo ti zetin kan room tur lam kan pan ta. Cabin room-ah kan lut a, a lo fel fai at a, riahpui tu mutna ka hmu lo a, sofa erawh pakhat an dah a. Kan luhfel hnu chuan nurse naupangte te pahnih hi an rawn lut a, thil awmzia min rawn hrilh a.

Hospital-ah damlo riahpui phal a ni lo a, lung natna nei te chu tlu thut thei reng dinhmuna ding an nih avangin kawngkhar reng rengah kalhna a awm lo. Chawhnu lama lut kan nih avangin visiting hour a zawh hunah keipawh ka haw leh mai a ngai dawn a ni tih thu te an rawn sawi a.

A hnu leh deuhah chuan chart nen nurse pakhat a rawn lut leh a, lung thlalak a ni a, heart attack awmna chhan te a rawn sawi fiah a. Naktuk lamah U Thantea chu angiography (lunga vein in block dan enna) tih tur a ni a, chumi result chuan enkawl dan zel tur pawh a hriat tur thu te min rawn hrilh a.

An chhuah fel hnu chuan, “U Thante, nangmaha riah chu i hreh em?” ka ti a.

“Hreh lo ve, visiting hour anih veleh i rawn kal vat ang a,” a lo ti a.

“In duat hleihtheih pawh a ni lo anih hi, i riahna apiangah riahpui che a theih loh zel a,” ka ti a, a nui ve hak hak a.

“House a mahni chauha awm te pawh a hrehawm ang chu, teihawi te kha damlo a kal kan ni sia, i lo hreh ang e, pawi ti reng reng suh,” a rawn ti ve ngial a.

“Nia, new market lamah te pawh ka lo va kal kual ang, tihtur awm si lo a, lo bazar ham ham ila ni mai,” ka ti let a.

Kan ngawi dun ta reng a, a phone chu a khawih mual mual a, hmanni ami kha a be zawm ang em aw tih te ka lo ngaihtuah mai mai a. Reilote hnuah chuan visiting hour a zawh tawh thu te an rawn sawi a, haw turin ka insiam a, mamawh a awm chuan min rawn call zung zung turin ka hrilh a, ka chhuah san ta a.

Mizoram House lam pan a taxi a ka chuan lai chuan ka ngaihtuahna a vak kual nasa hle a. Mizoramah Doctor tha tak tak kan nei a, khawl tha kan neih loh avangin an thiam ngei ngei pawh an ti thei lo a, phai lamah min tir liam a, Mizoram pawisa tam tak kha phaiah kan zuk vawm ta thin a, a uiawm ka ti ngawih ngawih. Hruaitu tha nei ila chu heng te hi an ngaihtuah vat vat tur hi a nia, contract leh eng eng development hna, an hlep then theih loh tur hi chu an ngaihtuah tel peih lo ni mai te hian ka hre thin.

Room-ah ka thlen chuan ka inbual thlan dai a, Kolkata hi chu a vawt hleithei lo chu ni ber e. Ka inbual zawh chuan Coffee ka lam a, rei lote hnuah an rawn dah a. Ka in zawng chuan Ramsanga min siam sak kha ka hre chhuak vawng vawng a. A in felfai tak, pa thak mai a inchei te kha ka mitthlaah a lo lang a. “Zodinpui, hetiang hi ngaihtuah suh,” ka inti mawlh mawlh a.

Neha-i te inneih pawh karleh lam mai a nih tawh hmel a, ka kal theih hmel bawk si lo. Chungte tal chu hrilh tha in ka hria a, Neha-i chu ka call ta a.

“Hello, enge in an zel?” a rawn ti nghal a.

“Hei, Birla Hospitalah kan in admit fel e, naktuk lamah angiography an ti ang a, kan chanchin tur kan hria ang chu. Neha, inneih chu ka va rawn kal theih hmel loh ta ve,” ka ti sap a.

“E, chutiang ngaihtuah a ngai lo, i rawn kal tlukin ka ngai vek tawh e, i pasal kha tha takin enkawl la, helama tlangval lungleng chu tha deuhin kan lo enkawl ang,” a rawn ti let a, a nui hak hak a, ka ngei reuh kher mai.

“Neha,” ka ti tuar a.

“Tak takin, hei kan inah a awm asin, i be duh em? Ama thu chuan a lo call dawn miah lo che tih ka hria, pa fair lutuk a nia, nang pawn i call hauh dawn lo tih ka hre bawk a,” a rawn ti a.

“Neha, ka biak loh hi ka tan a tha ber,” ka ti a.

“Saw pui, nangmah ka bia che tih a hrethiam aniang, min melh run mai,” a rawn ti, a mitmeng awm dan tur te chu ka hmu ve thei hialin ka hria.

“Neha, khawngaihin ka rilru hi lo tibuai suh, thiannu mi a i duh te anih loh chuan,” ka ti a.

“Ok ok, my bad,” a rawn ti a. “Mahse, in dam veleh Party kan nei ang, Honeymoon kan kal ang a, kan lo haw veleh,” a rawn ti a. “And, aih i ti thiang lo bawk,” a rawn ti a.

“Ok, boss,” ka ti a, phone chu ka dah ta a.

Tihtur a awm lo tak zet a ni. Visiting hour kha tlai dar 5 atanga dar 6 chauh kha a nia. Naktuk tlai dar 5 ka nghak vang vang dawn a ni ber mai. Ka room an rawn kik karh karh a, U Mavala a lo ni a.

“Enge in chanchin le, in in admit fel ta em ni?” a rawn ti a.

“Nia, in riahpui an phal bawk si lo a, tian naktuk visiting hour kan nghak vang vang mai dawn a nih hi,” ka lo ti a.

“Nia mawle, Birla chu an heti tlat a. Zanriah chu kan inah lo kil ta mai che, kan nu nen pawh in la in hre mumal hleinem le,” a rawn ti a. Pawi pawh ka ti lo. Nupui hmeltha zet Priscilla-i a nei a, fa pawh pathum lai an nei tawh anih tak kha.

“A pawi loh tawp chu, ka rawn chho dawn nia, naupang ho an awm lai a ni em?” ka ti zawm zat a.

“Delhi lamah a u te pahnih chu an la awm a, a te ber chauh kan bulah a awm, An zirlai a laklawh deuh a, nakum lamah chuan helamah an rawn insawn ve tawh ang chu,” a ti a.

“Anih chu a, chanchin hi kan inhrilh tlem lutuk a, Delhi atang chuan ka lo haw chiah asin le, an awm tih hria ila, ka rawn tlawh tur a nia,” te ka ti ve luam a.

Priscilla-i chuan rawngbawl a thiam ngang mai a, an nupa chu an in duh hmelin hmuh an nuam tak zet bawk. U Mavala chuan Thantea nen an tlangval lai te a sawi ve luam a. “Awi, U Maval, U Thantea chu a tawng duh lo lutuk a, an tlangval lai te chu a sawi ngai reng reng hleinem,” ka ti duah a.

“Hei chen chen Thantea hi i neih theih ka ring hleinem, ngawi reng mai bawk si hi maw, i hne ang a i chhuahsan vat ka lo ring asin,” a rawn ti fiamthu hluai a, kan nui ham ham a, ka chhungril erawh chu a hlim lo hle, mi nupa inngeih tak hi ka thik thin.

A tukah chuan nilengin House-ah ka awm a, bazar lam chu ka rilru ah a lang thei lo a. Kindle ka chhiar a, ka mu nileng a ni ber. Tlai dar 4 a rik chuan visiting hour tan veleh a thleng hman turin ka insiam a, damdawiin lamah ka liam veleh ta a.

Hospital ground floor-ah chuan chhungte kan tum an lo awm ve nak nak a, thenkhat phei chuan an nurse hmelhriat te an hmuh chuan an chhungte awmdan te an lo zawt kual ve a. He hospitalah hian mizo thawk pawh an awm ve nual a, mahse, ka la hmu ve chiah lo.
Room ka han thlen chuan U Thantea chu a lo muhil a, a phone chu awmah a lo dah a, number chauh nena an inbiakna niawm tak hi a lo inhawng sa a, chat erawh a in clear vek tawh thung a. Tiharh hlau takin phone number chu ka enchiang a, hmanni ami tho kha a ni. Ngaihtuah zawm duh lovin phone chu a lukham bulah ka dahsak a. Hei chen min nei tawh a, min rim lai atang pawha tawngka thlum pawh a min biak dan hre lo khan midang chu thlum takin a be lo turah ngai phawt ang.

Rei lote hnuah chuan nurse a rawn kal a, tukin zinga angiography an tih result te chu a rawn sawi a. U Thantea lunga vein chu hmun hnih-ah in block a awm thu te, zai ngai lovin angioplasty in a la siam that theih tur thu te, naktuk lamah angioplasty tih a ngaih tur thu te a rawn sawi a. (Angioplasty chu lunga vein block-a thisen kal a pangngai leh theih nan thisen zam block laiah khan stent an vuah thin). Nurse chhuah hnu lawkah chuan nurse senior zawk a rawn lut leh a.

“Madam, naktuk dar 11 ah i pasal hi theatre-ah kan nawr lut dawn a, document tih fel ngai te a awm dawn a, zanin chu i riak thei ang. Angioplasty tih zawh hnu hian damlo chu ICCU (Intensive Coronary Care Unit)-ah kan dah nghal dawn a, visiting hour chhung chauh in hmuh phalsak in ni ang, zanin chiah i riak thei tihna anih chu,” a rawn ti a.

Aizawl lam chhungte chanchin hrilhin ka phone kual nghal zung zung a, Neha-i pawh ka hrilh hre nghal a, a nu leh pa te doctor an ni bawk a, thil pawh a lo hrethiam nghal zung zung a. Aizawl lam erawh hrilhfiah an ngai nasa thei hle.

A tuk zing dar 10 a rik chuan zai kawr an rawn hak tir a, kan doctor ber pawh a rawn lut hlawl a. “In lo hlau lutuk ang e, engmah hlauhawm a awm lo a nia, a vein pui-ah, a kap tangin hriauin kan nawr lut ang a, kan han siam tha dawn a nia, zaipui tawrh ai chuan a tha daih zawk a nia. Lo tawngtai la, a bak chu Pathian kutah lo nghat tawp rawh” a rawn ti a.

Dar 11 a rik chuan a nawr tur ho an rawn kal a, an nawr liam tur chu chhungkaw group a post atan thla ka laksak a. U Thantea pawh a rawn nui ve suk a. A lan theih thleng ka thlir a.

Nurse naupangte hi a lo kal a, “Ka pi, an khawih zawhah i hmuh an phal dawn chuang lo a, mahse, doctor biak i duh chuan a nghah theih vek a nia, i haw dawn hunah thil bo thei chu hawn vek rawh aw, palh thil thu-ah a rawn ti a. Ka hrethiam tih hrilh nan ka lu ka bu nghat a.

Roomah chuan ka lo nghak a, U Thantea wallet leh mobile chu ka bag-ah ka dah a, rilru tawngtaina neiin ka nghak ta vang a. Aizawl lam atangin call a lo kal reng a. U Thantea phone pawh a ri awl lo a, amah berin a biak theih chuang loh avangin switch off mai ka tum lai tak chuan number in save lo tak mai khan a rawn call ve chiah a. Lak loh ka tum zet nangin a aw atang pawn tunge a nih ka hriat theih takin phone chu ka la ta a.

“Hello” a reh vang vang a, “Hello” ka ti nawn leh a. Hmeichhe aw, naupan hmel vak lo hian, “Thantea chu an nawr lut ta em ni?” a rawn ti a.

“Aw, darkar chanve vel liam ta khan, tunge aw?” ka ti let a.

“Zodini em ni? Amah a tha em?”

“Tunge aw, i number hi a in save si lo a,” ka ti leh a, a nui hak a, phone chu a dah ta daih a. Ka ngei kher mai.

Darkar hnih hnu velah chuan nurse kha a lo lut leh a, “Madam, I pasal kha an khawih zo tawh a, doctor I hmuh duh chuan theatre kawtah lo zuk nghak la, 3rd floorah” a rawn ti a.

“Awle, ka lawm lutuk e,” tih pahin ka bag te chu ka ak a, inhnuai lam chu ka pan ta a. Theatre kawtah chuan ka ding ren rawn a, reilote hnuah chuan doctor chu a rawn chhuak a.

“Hlawhtling takin kan khawih e aw, engmah hlauhthawn tur a awm lo. Zanah tui deuhin mu la, naktukah visiting hour-ah a hmuh theih ang, engkim a tha vek a nia,” a rawn ti dam dap a.

“Doctor, ka lawm e aw,” ka ti sap a.

“Pathian hnenah lawmthu i sawi zawk dawn nia,” a rawn ti a. Ka nui sak a. Ground floor lam panin ka kal ta a.

Ka hnung lamah chuan Mizo nurse ni ngei tur hi an ti ti nak nak a. Pakhat hian “Thiannu, tunlai chu U Ramsanga’n status a nei turu thei rap, nula thlalak a hmang ziah, a hmel a tilang chiang duh ngai si lo, U Ramsanga chu i chang dawn ta lo a ang hle mai,” a ti lang lang a.

‘U Ramsanga’, ‘A hmel a tilang chiang duh ngai lo’ an thusawi chu ka ngaihtuah a, Keima Ramsanga chungchang ngei a ni.

“Nia, ka lo hmu thin alawm, U Ramsanga chu aw, a chhe lo si, ka van ui tak, engtik nge Kolkata lamah a rawn kal leh ang aw, rawn kal dun se, lo tibuai ila tha ang,” a tia, an nui hak hak a.

“Awi awi awi, i tibuai ngam leh awm lo em mai, i star rei tawh tehreng nen, in innel ve tawh hnuah pawh a bulah i dang a awk vek zel kha,” tiin an fiam let bawk a, hmeichhe dang pawh a bulah chuan an lo buai vek tho anih dawn hi.

“A rawn status nu te kha a duh hle aniang, a hmel pawh a tihlan phal loh danah, an inkai lai kut chauh te a hmang a, hla thu te chu rawn bei un ve nasa thei tawp, a inhmeh lo e,” a rawn ti leh a. Ka sa pup pup tawh a. “Hei enteh, tuna a thu rawn ziah te hi, enteh, a over zia hi,

‘I found a woman, stronger than anyone I know,
She shares my dreams, I hope that someday I’ll share her home’
a tih leh chhak tawh hi, kan va chang lo nasa ta ve,” an tia, an nui har har hlawm a. An thu chhiar chhuah chu ka ngaihtuah vang avang a, ka sa pup pup mai.

House ka let leh chuan ka inbual zung zung a, khumah ka thu a, ka tawngtai a. U Thantea kha ka hmu thei bawk si lo a, rilru a nuam lo duh ve reng mai. Chutih laiin kha phone call ka lo lak khanglang khan ka rilru a tibuai hle bawk a, chumi piaha ka hnunga mizo nula ho titi khan ka boruak a chawk buai hle bawk. Ka buai nuai nuai a ni ber. Khumah chuan ka mu zangthal a, inchung lam ka en reng a, U Thantea hian ngaihzawng min lo neih san reng em maw ni le, tak tak ni ta se, engtinnge ka awm ang? Thinrim thei dinhmunah ka ding em le, Ramsanga kha ka lenpui ve tho a tih te ka ngaihtuah a.

Kum 10 kan inneih tawh a, nupa nun kan hmang khat hle a, nau ka pai theih loh hnu phei chuan kan hmang khat leh zual a, ka ngaihtuah chhuak thut, tun kum 3 chhung hi, kan hmang ngai lo, a bul hnaia ka mut pawn min hlat hrut thin anih kha, in entir ka rawt a, a duh lo nasa mai bawk sia. Ehe, kum thum kal ta atang khan a lo rinawm lo tawh em ni le? Khawhar em em khan kan nupa hlim lo kha ka tuar hram hram a, rinhlelhna ka nei ngai hek lo, keimah zawk ka zei loh vangah ka ngai a theihtawp ka chhuah a, mahse, a lo rinawm loh vang zawk em ni le?!

Kan kawngkhar chu a rawn inkik dat dat a, ka va hawn chuan U Mavala a lo ni a. Vawiin lam chanchinte kan inhrilh tawn a. Kan titi fe hnu chuan, "Zodin, in nupa inkar hi enge a an?" a rawn ti thut a.

Ka en let ha a, "Engti zawngin maw?" ka ti a.

"A tha em? Ka ngaihtuah che a ni, nizana chaw einaa ka sawi kha ka ti tak tak a nia, i neih rei theih hi ka ring ngai lo, ka thianpa mizia hi kei tluka hria an awm lo ang," a rawn ti chhuak a. Ka ngawi reng a.

"Zodin, harsatna in nei em?" a rawn ti leh a, "Ka zawhna chhan che chu maw, in nupa ka hmuh che u hian inpawhna ka hmu ngai lo, chuan, chu aia min ti buai leh tu chu maw, tun hnai hian Thantea bialnu hlui in a chanchin hre duhin vawi thum ngawt min rawn call tawh bawk, ngaihzawng a neih san che em ni?" a rawn ti a, ka rilru buai tawh sa chu a rawn chawk buai zo vek.

"U Maval, min ti a zo vek dawn, U Thantea nen kan inneih khan kei aiin a upa lutuk a, inkawm hlim bawrh bawrh kan nei khat viau a, mahse, kan inngeih ve thawkhat tho a. Kum a vei a, nau ka pai theih miah lo takah khan kan inkawm tlem tial tial a, theihtawp ka chhuah chung pawn kan in pawh lo tial tial a ni ber. Chuan tun kum 3 chhung phei hi chu roommate satliah kan ni e. Hmeichhe lakah chuan rinhlelh ngaihna pawh ka hre ngai lo hrim hrim a. Mahse, heti em em a inpawh lohna nun hi hrehawm ka ti tak zet a, ka khua a har thin lutuk, tih ngaihna ka hre lo tak zet a ni," ka ti a.

"Anih leh a tun hma nun te i hria em? In inneih khan phaia ka awm tawh hnu a ni sia, in kawmna hun pawh kan nei ngai si lo a, amah hi i hrechiang em?" min ti leh a.

"Kum khat chuang min rim a, mi lehkha thiam, mi in zir peih tak a ni tih ka hria a, kan inneih hnuah chuan sum enkawl thiam, mi fimkhur tak a ni tih ka hre leh a, ìnnghahna tlak tak niin ka hria, lehkhabu chhiar leh inzir belh bak hi tuina a neih ve pawh ka hre lo," ka ti hap a.

"Zodin, thiantha i nihna angin tunah hian thil hrilh duh che ka nei. Ka thianpa hi pa maksak deuh a nia, hei chen i nei thei hi a hmasa in lawmthu ka hrilh duh che," a ti a, a ngawi leh vang vang a.

"High school atangin kan inkawm a, ngaihzawng a nei ngai lo. Amah hi mi in open lo lutuk, thian tha te hnenah pawh engmah chanchin chhia a tha thlen ngai lo a ni a. A pu boral lai pawn hostel-a kan awm ho lai a nia, engmah kan hre lo, chutiang vel chu a ni. Tin, pawn lama lan mawi duh mi ti ila, ka sawi sual lo ang. A pa hi peon in school pakhatah a thawk a, MA kan zir thleng khan zirtirtu emaw ka ti. Chuan, MA kan zir zo a, NET a hmu a, lecture hna a hmu leh a. Lecture hna a chelh tir hian ngaihzawng a nei ve a, chu pawh tuman kan hre leh chuang lo. Kei chu Aizawla ka la awm lai a nia, zantin a chhuak thin a, ka ringhlel a, ka zui ru a, a ngaihzawng chu nuthlawi, zu zuar fanu lehnghal a lo nih chu. Tuman an hre lo, a hmeichhia pawh a control hneh a, an chhungte ho bakin tuman an hre chuang lo. Ka hriatchhuah hnu chuan a roomah ka len chilh a, engkim ka hriat thu ka hrilh a, nupui nei rual kan nih tawh thu te, a duh ang apiang chu tu pawh an tha ka tih thu te ka hrilh a. Chuta min chhanna chu, ka hmangaih lutuk, mahse, nupui atan chuan ka hmai a tibal lutuk ang, ka ngaizawng ti pawh hi min an hria ang tih ka hlau a ni, a lo ti daih a nih chu. Kan inhau zui hrep a, a zah pui leh tur si chu kawp tawh lo turin ka ti a. Ka thianpa mizia kha mak ka ti tak zet a, a ngaihzawng a hmangaih ngei a zahpui kha ka hrethiam thei ngai lo ang." Ka thu hriat chu mak ka ti lutuk a, ka ka ho ringawt.

"Chuan kum 2 hnuah nupui a neih tur thu leh thian atan min hman duh thu min rawn hrilh a, ka rawn haw chho a, kan rawn rim dun zan che khan a neih duh chhan awm ang che ka hrethiam nghal a. Inchhungkua mi pangngai chunglam ni khawp a sumdawnna lama tluang in ni a, chuan,i hmel kha a tha em em a, i la tha reng bawk a nia," a rawn ti tel zeuh a. "Tichuan, amah ti hmelmawi thei tu atana duhawm ber kha i ni tlat a ni. I tan khan ka hlauthawng em em a. Kawm fal che kha ka duh a, kan biak vel che khan kum khat chuang in lo inkawm ve tawh reng tih te ka hria a, anih chuan inngaizawng pangngai tak in nih ka ring ta a, ka lawmpui ta hle a," a rawn ti dap dap a.

"Kum chanve aia rei lo inkawp emaw, nu leh pa sawi rem chawp ni ulang chuan khami hun lai khan heng hi ka hrilh ang che. Kan hna lam vangin kan inhmu khat hle a, kan inhmuh apiang hian i khua hi a har hmel ka ti thin a, mahse, kawm falna hun che hi ka nei ngai lo a," a ti zawm zat a.

"Tun tuma min tibuai tu chu, hmana a bialnu ka tih khan vawi thum lai min lo bia hi, an lo la inbe reng thin em ni? tih hi ka rilruah a awm a ni. Tunah hian a fala ka hmuh theih lai che hian heng zawng zawng hi ka hrilh che a. Ka hlauhthawn ang zawng zawng hi a dik lo anih chuan a lawmawm a, a lo ni anih erawh chuan ka hrilh hriat loh avang a mi nun chhe tur hi ka hmu thei lo a ni," a rawn ti tawl mai a.

Ka ngawi reng a, ka mittui a rawn far fap fap a. "U Maval, ka zawhna ni reng fo, chhanna ka zawn chhuah theih loh chu tunah hian a chhanna ka hre ta chiah in ka hria,"ka ti a.

"U Thantea awm danah hian min hmangaih lo tih chu ka hria, mahse, enga tinge ka ngaizawng lo chung chung kha min rim tluk tluk a, nupuia min neihna chhan hi ka in hre lo tak zet a.

"Mi mithmuha dinhmun zahawm tak a neih theih nan chauh min lo nei a nih hi. U Maval, min va hrilh harin, ka va lo a rei tak em! Ka nun hi a hrehawm tak zet a, mahse tumah ka hrilh ngam ngai lo a, then ka tum lahin a chhan tur tha tawk engmah sawi chhuah tur ka nei ngai si lo," ka ti chuai raih a. U Thantea phone lock chu ka hawng a, "Hei hi a bialnu number chu a ni em?" tiin phone chu ka pe a. A phone nen chuan a en mil a, a nih thu in min chhang ta a.

"Zodin, an la inngaizawng ngei em tih pawh ka hre chuang lo a, then rawh pawh ka ti lo che. Ka thianpa a nia, tuna natna khuma a mut lai phei chuan kalsan turin ka duh lo bur che. Mahse, inngaihtuah tha tur chuan ka duh che a ni" a ti ta a.

Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)