PAWMLAI DI BY Maveni Hmar (Completed)

Episode nei ho a hlawm a dahkhawmna
Ngaia
Site Admin
Posts: 25813
Joined: April 30th, 2016, 4:07 pm

Re: PAWMLAI DI BY Maveni Hmar (Completed)

Unread post by Ngaia » August 15th, 2021, 4:22 pm

BUNG _ SARIHNA

Zander-a Nite inah kan va leng chu an felin mikhual lo takin ka ngampa sarh mai a. A Ni tawng duh tak leh a Ni pasal Pa Khuma fiamthu duh tak mai leh an fanu neih chhun hmeltha leh fel em em nú zam mai Athu-i te chu ka vawi khat hmuhnah ka ngaina nghal sarh mai a.

Kan va thlen tirh chuan kan inruk thu Zander-an a hrilh loh avangin an vuia Zander chu an lo hau nghal mawlh mawlh a.

Zander chuan," Ka tihpalh der a ni. Ka nu leh pa an awm lo nen ka bangbo em a ni. " a ti a.

" Ni reng e. I nu leh pa an awm loa, an ai awhtu tur ber kan nih laiin engmah hre loa kan awm kha ka thinrim tep a ni. " a ni chuan a ti a.

Zander chuan engtin mah a chhang lo a.

" Hruaia sawi dan hmangah vawiin lam hian Zikpuii chhungte pawh an lo thleng dawn a nih hmel a, naktuk lamah hian i pa Khuma leh a thianpa va leng se a tha ang." tiin a ni chuan ro a rel zung zung a.

" A tha khawp ang chu."

A tuk zingah chuan Pa Khuma leh a thian pa Pa Rina chu ka nutei te inah chuan an va leng ta a, an thu haw lam hriat duh pah leh min rawn uap an duh avangin a nite chhung chu tukthuan an rawn ei pah bawk a.

Athu-i nen chuan Pi Mali chu rawng kan bawlpui malh malh a. Athu-i chuan kut zaizir hian thiam takin a be zaih zaih thei mai a, mak ka tiin ka ngaisang kher mai a. A bula awm a nuamin a nui duh si, a titi siam siam reng bawk a. Ngainat loh tum mahila ngainat loh theih loh ang mizia kha a nei a ni.

Kan palaite an rawn thlen chuan thingpui kan lo pe thuai a. Athu-i chuan,"Ka pa, in hmel a va hlim vak lo ve a, thu a kal fuh vak na nge?" a ti vat a.

Pa Khuma chuan,"Fuha fuh lo turin thu engmah a la chiang lo." tiin a fanu hmeltha tak chu a chhang a. Ka lam rawn hawi lehin,"I nutate pahnih an rawn kal a. " a tih zawm zat a.

"Oh.." ka thaw halh a, ka tiril a khur ru der der a. Ka u te an rawn thleng a nih chuan...naupang chhe ena en thin kha ka la ni sia pasal ka um ta mai chu an thin a ur ngawt ang chu. An duh loh zawnga awm hlauhawm zia lah a hai si lo, an thinrim lutuk chuan kut pawh an thlak duh mai thei a ni. A nih loh pawhin an hrethiam hle pawh a ni mai thei a ni.

" Ka nu te an lo kal ve em?" ka ti tham chal a.

" Aih, kal lo. I nutate pahnih Saitluanga leh Sailothanga te an rawn kal."

Mangang rilru tak chuan ka thaw ham ham a, ka awm a nuam lo ru tlat a ni. Ka ute chuan ka lakah eng rilru nge an put ka hre bawk si lo. Thil tih loh loh tur ka lo ti a ni, Zander hi lo zui ngawt lo ila chuan heti khawp hian ka chhungte hi ka tibuai lo tur. Ka chhungte ka tibuai chiai vek ta a nih hi. Aw, Pathian, eng pawi lian tham nge ka khawih tak le?

Athu-i nu chuan," Eng thu nge in rawh hawn reng reng a.?" a lo ti a.

Pa Khuma chuan, "Tunah mai chuan thu tawp an la sawi thei rih lo a, Zikpuii hi dah phawt a chhungkaw kima lo inrawn that an ti deuh a nih chu." a ti charh charh a.

Zander chuan, " Thu i pehhel deuh niin ka hria, engmah zep loin sawi vek teh. Thu chiangkuang hre hmasa lo chuan ka hawtir dawn reng reng lo." a ti nghet charh a.

Pa Rina chuan aw a lo thian kharh a, " Rin ai tak chuan an khirh zek hmelin ka hria a ni. Zikpuii nutei te nufa saw an khirh hmel phian a, kan va len pawh chuan a nutate aiin an ni nufa chu tawng nasa leh khirh berah an tang tlat a ni. " a ti a.

Zander chu a rum nghut a, " Tu khauh khauh kan ti anga a ni mai lawm. Min rem duh loh leh an farnu hi an hmu kir bik tawp lo ang. Ka hawtir dawn lo reng reng." a ti khauh fur mai a.

"Mi pawi khawihtu leh an farnu duat lai lo chhuhsaktu kan ni a, inphah hnuaia zawl dawh zawk tur kan ni asin." Pa Khuma chuan a lo ti vat a.

Ka thin tawt lutuk tireh tur chuan chokaah pheiin tui vawt ka va in ngawt a. Ka thaw dep dep a, ka u te bulah chuan haw leh ta ila min zilh erh anga Zander hmuh leh pawh an phal tawh lo emaw a ni ang a..

Ka la hre reng mai, tum khat chu ka ute min duat zia hre ranin an duh loh zawngin ka awm lui ngat a nih kha. Ka u Sailothanga zaidam thin thawk hlauhawm zia te, ka u Saitluanga luhlul leh tawng tlem hle e ti loa tihthinrim chi a nih loh zia leh ka u Sahmingliana aw zaidam tak leh kha faka mi hauh a thiam zia pawh ka hre chiang hle a nih kha. Kha ta tang khan ka ute chu tihthintim tawh loh hram ka tum thin.

Chaw te kan ei ta hlawm a, chaw ei khama Zander nite chhungkua leh Pa Rina haw tur chu Zander nen chuan gate thleng kan va thlah a.

An tlan liam hnu chuan in chhungah chuan ngawi rengin kan inzui lut a. Ka phone chu a rawn ri ta a, ka phu deuh zawk a, ka en vat a ka u Sailothanga hi a lo ni a, ka melh ta tlawk tlawk a.

" Bronson em ni? Chhang ta che." Zander chuan a ti vawt raih a, min kal nghal thuak a, a thinrim zia chu a mitmengah chuan a lang chiang hle mai a.

Aw khur dar dar chuan,"Hello..." ka ti sap a.

"Zikpui, tunah hian ka nutei te inah kan awm a, vawiinah rawn haw ngei ngei ang che. Kan haw chhoh vat loh chuan ka nu leh pa rilru a lo hrehawm lutuk ang. I thil tih pawi zia kha i hria em? I tlangval um mizia kha i hre hlawl lo a ni." a rawn ti hriam hrak a.

Ka thin chu a phu dawt dawt a,"Ka U Mam.."

"Ka nu leh pa rilru i ti nain i timualpho hneh kher mai. Rawn haw thuai rawh. Ka thin i tihur zia hi i hria em? Kan farnu neih chhun leh kan chhuan ve em em i ni a, chhungkaw hming tichhetu-ah i tang ta mai hi a mak ka ti a ni. Mi pangngai deuh hlek neih tur i hre hlawl lo em ni? Kha pa kha i nei dawn lo, i nei hauh lo ang. " tiin min lo tawng khalh nghal khur khur a.

Tap tiau hian," Ka U Mam, thil i hrethiam lo a ni." ka ti tiau a.

" Ka hrethiam lutuk mah mah a ni. Vawi sawm chuang pawh um la i nei chuang lo ang. Ka makpa atan ka duh hlawl lo a ni. Vawi eng zat chiah nge nupui a ruk tawh i hria em? Maduhi a ngaizawnga Maduhi'n a duh loh vangin a thungrulhnan a ru ta che a nih hi. Thil pawi lutuk i khawih a ni." a rawn la ti ta deuh deuh.

" A ni lo! A ni lo! " ka ti tuarh tuarh a, phone chu ka dah ta hmak a. Ka ke chu a sai hlawk hlawk a, ka ding zo ngang tawh lo, thutthlengah chuan ka thu hnawk a, hmai hupin ka tap ta hlawp hlawp a. Ka u tawngkam khan min ti nain Maduhi dawt sawi theih zia ka hriat phahin ka hria.

" Eng thil nge ni ta?" tiin Zander chuan ka darah chuan min rawn kuah a,

Zander awmah chuan ka bei thlawp a insum hauh lo chuan ka tap ta hlawp hlawp a."Zander, ka haw duh lo. Ka haw duh tawh lo...ka hmangaih che." ka ti chhuak ta phawng a.

Ka sam chu chul hliau hliauin thawk a la ham ham a," Ka naute, ka hawtir hauh lo ang che. Ka bulah i awm reng ang. I tel lo chuan ni khat lek pawh ka awm thei lo ang, ka hmangaih che, ka nunna ai pawhin ka hmangaih zawk che a ni." tiin duat takin ka mittui chu min hruk fai sakin min kuah ta hle hle a.

Amah bawk chuan," Min hmangaih ve tak tak maw? " a ti leh a.

"Aw, tehreng mai."

" A nih leh Bronson kha...?"

"Bronson chu hremhmunah kal rawh se! Amah ni loin nangmah alawm ka hmangaih chu..mahse nang chuan min haw em em si a. Hmangaihna kan chen dun hnu-ah phei kha chuan ka lo hmangaih nasat zia che hi ka inhre chiang zual sawt a ni. " ka ti malh malh a.

A thaw hawk a,"Lalpa leh! Ka haw lul lo che ka hmangaih em em zawk che asin. Hmangaihna kan chen tuk khan hlim em emin zing ka tho a, i hmel ka thlir reng lai chuan Bronson hming lamin i rawn au chhuak a, ka thinrim leh rilru na lutuk chu inkhel turin ka kal ta nghal a, ka rawn haw lahin i mittui hru lai ka rawn hmu leh chiah a. Ka thinrim zia leh rilru nat dan tur zia chu i hrethiam em?" tiin ka sam chu a chul hliau hliau a.

" Ka hlim luat vanga tap ka nih zia kha hria la tha tur!" ka ti sap sap a, " Kha mi tuk khan ka hlim lutuk vang leh ka hmangaih lutuk vang che a mittui tla ka ni asin."

Chutah a mitmeng buang thak chuan min melh vawng vawng a, lungchim takin ka hmuiah chuan min fawp ta vawng vawng a.

Thaw hlap hlap chungin Zander chu ka tawlh hnungsan a, "Zander, nupui eng zat fakau nge i ruk tawh a?" ka ti ta phawng a.

A nui hawk a," Nang nen chuan...sawm leh pakhat mah!" a ti a.

"oh, ka fiamthu hauh lo a nia." ka ti vin hlar a.

Min rawn en vang vang a, a nui hmel chu rehin, "Chu chu eng vanga min zawt nge i nih?" thu tak hmel tak hian a ti ta a.

" Tun mai khan ka U in min rawn bia a, nupui tam tak ru tawh angin a rawn sawi che a."

" Maduhi hnathawh a nih ngei dawn chu. Min ring rawh, nang lo chu tumah ka la ru ngai lo." a ti ta hmiah a.

A hmel ka han ena dawt a sawi loh zia chu ka hmu chiang a ni. "Maduhi nen hian eng ang chiahin nge inzawmna in lo neih a?" tiin Maduhi'n an chanchin min hrilh ang ang chu ka hrilh chhawng ta vek a.

Za em em hian a nui ta hawk hawk a, a awmdan chuan ka ngaih a titha lo thei hial alawm." Keiman ka zar buai char char a, ka fa a pai pawh ka tihtlaktir a maw?" tiin malpui beng meuhin a nui leh ta kiah kiah a.

" Nui ringawt teh suh."

" I unaunu chuan i thluak a lo su nasa em a nih chu mawle. Ka ngaizawng ngai lo, amah zawkin min zar buai hneh em avangin kan inkawp satliah mai a ni. Kan inkawp lai ngei pawhin mipa dang a kawp tel tho bawk. Chuti chung chuan min neih duh chhuanlamah ka fa pai angin a rawn insawi a, chu chu ka thiante nen Volleyball kan khelh laia a sawi a nih vangin midang zawng pawhin an hre vek a ni. A lo rai hauh si lo a..chutiang vel chu a ni e kan chanchin chu." a ti ta a. " I laizawnnu nge i rin dawn a keimah? Chu zawng i duhthlanna a ni e."

" A daw thei lutuka a khawngaihthlak zawk a nih chu mawle." ka lo ti zauh a.

" Nang nena kan inneih hi duh loin i nutei leh Maduhi chuan i U te hnenah ka chanchin chu a chhe thei ang ber leh a itawm lo ber angin an lo hrilh niin ka ngai." a ti leh hrak a.

Dimtein a kut chu ka hmersak neuh neuh a, "A pawi lo e, an duh tawkin lo rel chhia che rawh se. Keiin thu dik ka hria a, i laka ka rilru put dan a danglam phah chuang lo. An ni thusawi mai maiin ka rilru an sawhsawn dawn chuang lo." ka ti ta charh charh a.

"Chu tawngkam tluka min ti hlim chu a awm kher lo ang,Zikpui. I chhungten eng ang pawn min do mah se ka lam i tan tlat chuan engkim a fel leh mai ang. I tel loa nun ka zuam lo ka tih kha ka ti mai mai hauh lo a nia, i tel loa ka awm chuan ka chhe vek a ni mai. Ka hmangaih ngawih ngawih che a nih hi." a ti a.

A mitah tak chuan melhin,"Khawvel zawng zawng pawhin do che mah se i lam ka tang tlat ang. Ka chhungte hnenah pawh thudik chu ka hrilh ngei ang, ka ti tak tak." ka ti a.

"Ka hmangaih che Zikpui. Khawngaihin min ti na tawh suh aw, ka tuar chhuak zo tawh lo ang." tiin min kuah vawng vawng a.

"Melanie nu nen hian in..."

Ka sawi zawh hma chuan, "Melanie a pai lai hian tihtlakah min vau reng a, tihtlak ka phal bawk si lo a lehkha zirlai kan ni bawk sia inneih a rem lo nen a nu te inah chuan Melanie chu a nei ta a, Melanie hi thla hnih a tlin hmain mipa dang a um ta daih a, chu zawng chu a ni e." a ti vawt ruih a, a chanchin sawi pawh chu a duh lo tih ka hrethiam ta mai a.

Ka kuah a, a hmuiah chuan fawpin kan buaina leh harsatna tawn mek chu hriat reng loh ka duh hrih a ni. He khawvelah hian kan pahnih chauh a awm dun ni awm hrima am hian kan infawpin kan inchul kual vel a, a tawp atawpah chuan Zander chuan mut pindan lamah chuan zo takin min pawm chho ta vaw vaw a.



MADUHI'S P.O.V

Ka awm hle hle thei tawh lo, thin tawt lutuk chuan ka pindan chhuat dungah chuan ka vei tawn chhen tawh mai. Hlim taka Zander leh Zikpuii awm dun tur ka suangtuah chhin ringawt pawh chuan ka na tlawk tlawk mai a ni. Diktak chuan ka unaunu laka Zander ka hloh mai chu ka thangtlawm ngawih ngawih a ni.


Ka nei thei lo a nih chuan Zikpuii emaw hmeichhe dang reng reng paw'n an nei bik lo ang. Hmangaihtu thikthu chhiat theih zia leh hmangaihna chhan let loh nat zia hi kei tluka hre chiang hi an awm kherin ka ring lo.


Zikpuii U te pahnih an rawn thlen tirh pawh khan Zander chu an makpa a an pawm theih loh nan theih tawp chhuah a, ka sawi chhe chung pawh khan U Saitluanga chuan, "Kan farnu neihchhun a ni a, a hlimna hi kan duh ber a ni a. An lo inhmangaiha an in ru hmingchhe tawh bawk a innei mai se thain ka ring. A thu hrimah inrukte chu mi tih loh dan pawh a ni lo a, han thinrim vak chi ni pawhin ka hre lo." a la ti ta hram a nih kha. Mawl muk leh lutuk mai a!

Ka nu khan min rawn pui vat lo se chuan an inneihtir ngei ang. Ka nu chuan, " A pasal um mizia hi ka hre chianga neih chi a ni lo ka tih tawh kha. A hmel chu a thain an hausa a ni thei mahse lerh em em mai leh nula ral tia hriat thin kha a ni a. Zikpuii neih atan ka phal lo reng reng." a lo ti vat a.

" Nia, nupui pawh vawi tam tak a ru tawh a, sawn pawh a thlak nual tawh a ni awm e." ka lo ti vat a.

U Saitluanga chu a tho phat a, " Chutiang mizia pu chu ka farnu tan ka phal reng reng lo. A thuhrimah chutiang mize pu a ni tih inhriat chuan engah nge kawm pawh in phal a?" a ti khu khu mai a.

Ka nu chuan, " An inkawp tih pawh ka lo hre reng reng hleinem. An inru a ka hre ve chauh a nih hi. Ka hriat meuh chuan thurawn han pe turin a tlai tawh lutuk si a." a ti thuai a.

" Lo innei ta pawh nise an hlim chuang lo ang. Zander hian a duh tak tak lo, a tir chuan keimah min rawn ngaizawnga a mizia ka hriat chian em avangin ka lo hnar ta a. Min tihel nan leh ka laka phuba lak nan Zikpuii hi a ru ta a nih hi." uar zet hian ka lo ti ve a.

U Sailothanga chuan, "A tha lo hle mai a. Ka nu rilru a na hle dawn a nih chu. Zikpuii hi a duat bikin a chhuang ve si a, pasal a um tih in rawn sawi pawh khan a rilru a hrehawm tawh tehreng nen mi tlaktlai lo tak a um tih a hriat leh lek phei chuan a kehchhe thei hial ang." a lo ti ve a.

"Thla hnih khat a liam anga tuman pasal a um tih an hre tawh hauh lo ang. Amah a hmeltha bawk a hepa aia tha hi a hmu em em ang." ka lo tih khum a nih kha.

A u ten Zander an duh lo tih ka hriat hnu a ka hlim dan chu pui tak a ni. An inneih hi ka theih ang angin ka dal char char ang.

Darthlalang hmaah chuan dingin ka inen vang vang a. Ka hmel zawng a chhe lo chiang alawm, itawm tham khawp ka pa rosum ka nei bawk si. Heti chung hian Zander hian eng vanga min la hnawl thei cheu nge a nih ang? Zikpuii aiin ka hmel chhe bik lo asin mawle.

Bronson biak a ngai a ni, ani khan enkim a tichhe thei maiin ka ring a ni. Ka insiam sawk sawk a, Bronson thlenna hotel lam pan chuan ka kal ta a. Ka thlen ve leh a room chu pan ding nghalin kawngkhar chu ka kik karh karh a. Amah ngei chuan min rawn hawnsak a.

A hmel chu a dawl dangin a lang pawr deuh fap mai a, Aizawl a rawn thlen hlima a hmel nen kha chuan danglam tak a ni tawh a ni.

" Lo leng ta che, eng nge i duh a?" tiin min lo melh khawh pak a.

" Biak che ka duh a ni."

" Ka rilru a buai em mai, biak tlak pawh ka awm lo ang." zawite hian a ti a.


Pindan chhunga pen luh pah chuan,"Rilru hah leh na tuar awm chhun i ni lo tih lo inhre hmasa phawt mai teh." tiin khum chungah chuan ka thu a, ka bawp sei thlarh chu ka khawkherh a.

" I hriat angin Zikpuii hi ka hmangaih a, pasal min han um san hi ka tuarin na ka ti em a ni." a ti a, khum bula Chair-ah chuan a thu nghal a.


Ka nui hak a, "Mipa i ni a, chhel takin i awm tur a ni. Zander ka hmangaihna hi Zikpuii i hmangaihna aiin a nep bik chuang lo ang. Damlai lu i suna kei pawhin ka sun a, kan dinhmun hi a inang chiah a ni. Rilru natah chuan min khum bik kher lo ang." tiin a lamah chuan ka kun hnai a, aw zawi thawp sat hian," Tih dan tur tha deuh ka hria asin." ka ti ta sap a.

"Eng lam pang? An pahnih kar thu tichhe thei thil a nih chuan ka duh miah lo a nia. Hlim takin awm se ka duh a ni." a ti a nih chu! Mi mawl pakhat leh bawk!

Meizial chu tanin ka pak talh talh a, chhuat dungah chuan ka vei tawn ta sek a" Mawl mawl teh suh! Hmangaihna leh indonaah chuan engkim a fair vek an tih kha. Nangin Zikpuii i hmangaih a, keiin Zander ka hmangaih bawk a, kan hmangaihte kan neih theih loh chhan tur ka hre lo a ni." mahni inring tawk tak chuan ka ti a.

Bronson chuan a sam fai siau chu a zut pawrh a," Lo inthentir thei ta pawh ni ta tehreng ila Zikpuii hian min pawm let duh tawh hauh lo ang tih ka chiang a ni. Chang lo ta rau rau a hmelma anga awm ai chuan a thian nih chu ka la thlang tal zawk a ni." a ti a.

" Mahni hmasial nachangte hi hre ve ta che, chhaw leh lutuk mai. Kan tibuai emaw buai lo emaw an innei dawn chuang lo. A nuta ten inneih an phal lo hrim hrim a ni. Chuvangin ka lo va inrawlh ta a nih pawhin inthiam lohna nei reng reng suh ang che." tiin a darah chuan ka va beng thak thak a.

Keimah bawk chuan, "Tih emah chuan i hmel a thain i zaithiam a i lar hle bawk a. Zikpuii te ang hnawl han nih chu a thangtlawmthlakin a phu hlawl lo che a ni. Zander hi tluk lohna i nei lo, engah nge Zikpuii ve mai hian a hnawl che ni?" tiin ka fuih a." Nang chu lo ni ta ila chuan ka uipui tui lian thlir mai mai lo tawp ang mawle. Harh ta che. Heti khawpa tina duhtu che hi thungrul ve ta che." ka ti ta erh a.

A inngaihtuah vung vung a, "I thusawi chu a dik a ni. Hrehawm taka ka awm lai hian an hlim bik anga maw? Hnai lo mai!" tiin a inpet ruh ta hle a.

" A tha! Chutiang chuan mipa rilru dik tak i pu tur a ni." tiin ka nuih var var a.

"A nih leh hmalak dan tur min lo hrilh teh."

"Aw le, Zikpuii hi i chhaih buai reng anga, Zander te ina va len chilh pawh tul se hreh suh ang che. Theih tawp chhuahin a rilru neih let i tum ang a, Zander hnenah pawh Zikpuii nen inla inthlah hauh lo angin rintir la, chuti a nih chuan rinhlelhna nen chuan an hlim reng thei tawp lo ang. Hun reilote hnu-ah an inthen thuai mai ang. An inthen hnu chuan kan mi duhte chu kan nei tawh mai dawn a ni." ka ti malh malh a.

Bronson chu a nui hul hak a, "Maduh, i sual thiamin i fing thiam kher mai." a ti a.

"Mahni tanghma chu hai thiam tak ka ni, kan hmangaihte kan neih let leh theihna tur a nih phawt chuan eng pawh tih huam mai tur." ka tih san mai a.

"Maduh, nang pawhin Zander chu i lo tum ve tur a ni ang. An inneih theih loh nan Zikpuii chhungte bulah pawh tan i lo lak fe a ngai ang aw. I thusawi chu an ring lo phal dawn si lo."

"Tehreng mai."

Inhrethiam tawn tak chuan kan innuih var var a, kut thingin chibai kan han inbuk tha leh a, "Hnehna chu kan ta a ni ngei ang." ka ti sap a.

ZIKPUII'S P.O.V :

Tlailam dar li a pel tawh a, Pi Mali chu rawngbawlin ka pui malh malh a. Zander erawh chu office ban pahin Amanda Volleyball Club-ho a practise pui thin avangin inah a awm lo a. Door bell a rawn rik ral ral chuan ka alu vel lai chu thawhsanin apron-ah chuan ka kut chu ka hru fai mawlh mawlh a.

Ka rin aiin Zander chu a rawn haw hma a ni, intihfaina hun pawh ka nei hman ta lo a nih hi. A lo haw laia nalh taka lo lan hi ka duh thin.

Kawngkhar chu hawn pahin,"I lo va haw hma ve a." tiin ka nuih var var a. Kawngkhar bula ding chu Zander ni loin Bronson zawk a ni tih ka hmuh rual rual chuan ka nui hmel chu a reh nghal hmak a,"Nang i ni maw?" ka ti vawt raih a.

"Zikpui, leng lut turin min sawm dawn lo em ni?" tiin a nui vei sawng a.

Hreh tak chung chuan, "Lo lut ta che..." ka ti sap a. Kawng chu lo kian pahin,"Eng nge i duh a?" ka ti ram hmak a.

Bronson chu a rawn lut, "I inleng hi tuisik emaw thingpui emaw tal pawh i hlui dawn lo em ni?" tiin a la nui zui reng a.

"Inleng ka mamawh loh lai tak a ni e. Eng nge i duh a? I rawn len thu hi Zander-an a hriat chuan a lawm hauh lo ang aw." ka ti chang fak a.

"Eng emaw sawipui che ka duh a ni."

"Nang nen hian sawi dun tur kan neih reng ka hre lo." ka ti hmak a, Bronson mitmeng phi chuai leh a zu in rim nam huam chu ka hre thei ta a. A awmdan chu ka duh zawng a ni hauh lo mai, zu a rui phura buaina siam choin a rawn kal a ni. "Min hawsan teh, khawngaihin. Zander a rawn haw hman chuan a tha lo ang aw." ka ti leh a.

"Zander, Zander, Zander tih reng mai. He mihring ka huat dan hi chu maw haw tak ka ni! Ka nula min chhuhsaktu-ah ka puh lo thei lo a ni."

"I nula ka nih lai reng ka hre hauh lo mai."

Za lo tak hian a nui hak a,"Zikpui, ka hmangaih zia che i hria a, ka lamah lo let leh mai rawh. Ka bula ilo let leh a nih chuan ka ngaidam vek ang che. He pa ai hian ka tihlim thei zawk daih ang che. Ani hi i kalsan chuan a pek theihloh che hlimna diktak chu ka pe ang che." tiin ka darah chuan min rawn kuah ta a.

Ka dar a kuahna kut chu paih sawn dawrhin, "Bronson, Zander hi ka hmangaih a ni. A chiang tawk em? Ka hmangaiha kalsan lah ka tum hek lo." ka ti khawl mai a.

"Mahse, keiin ka hmangaih che alawm." tiin min rawn kuaha min fawh chu a tum ta mai a.

Theihtawp chhuahin ka tal chiam a,"Bronson, min thlah rawh. Ka hua che a ni, ka duh lo che. Zander ka hmangaih a ni tih hre reng chung hian engah nge min rawn la tihbuai cheu ni? I tan hian ka zuamawm viau em ni?" ka ti that that a.

"Chu chu a dik! Ka nupui hi i kalsan thei ang." Zander -a aw ngei mai chuan a ti vawt raih a. Bronson chu rawn kuai her lawpin a hmaiah tak mai chuan a hnek ta bur mai a.

" Ka hrilh ang che tunchinah chuan ka nupui hi lo tibuai tawh suh. I lo la tibuai cheu a nih chuan ila inchhir khawp ang." Zander bawk chuan a ti leh a.

Khabe zut nauh nauh pahin," Zikpuii hi i nupui a nihna ka hre reng reng lo. Zan thum zan li i riahpui vang khan i nupui tihna a ni lo. Tih emah chuan i riahpui hma khan vawi engzat fakau nge ka riahpui i hria em? Ka chul hlui i rit a nih hi, ka lakah inchhuan theihna engmah i nei lo."a ti ta a.

Mak ti lutuk hian Bronson chu ka melh tlawk tlawk a, engtin nge dawt chiang lutuk hi a sawi theih zawk le?

Zander chu a insum zo ngang lo a niang e Bronson chu a hnek ta pawp pawp a, an insual chu a ni zui ta mai a. En pawh en ngam lo chuan ka hmai ka hup ta ringawt mai a.

Ka mit ka han men leh meuh chuan Bronson hnar leh ka vel chu a lo thi nuau a, a mit bulah chuan a kak ruak bawk a, Zander chuan a kawr awmah chuan thamin , "Tuna i thu sawi kha sut leh rawh. Zikpuii hi ka nupui a nih ang bawkin a mipa mutpui hmasa ber ka ni tih chu kei tluka chiang an awm lo." a ti rum ul a.

"Ka sut leh e, Zikpuii hi ka la mutpui hauh lo."

"Awle, i kal thei ang. Ka in chhungah leh zel chuan rawn umzui tawh lo la, i hmel hi Zikpuii kiang hnaiah hmuh tawh loh hram ka inbeisei."

A hnar chu romola hruk pahin Bronson chu a chhuak ta hnak hnak a tlem chuan ka rilru chu a tina ve deuh a ni. Keimah vanga hetia awm a nihna lai a awm bawk nen.

Zander chuan min rawn kuah a," Tun chinah chuan a tibuai tawh lo ang che." a ti sa sa a. "A sawi ang tak tak khan hetianga kan awmdun ringawt hian nupaah min siam lo a, i chhungte lahin inneih an phal lo bawk nen court-ah innei mai ila a that ka ring a ni. Mizo dan ni loin India sorkar dan hian ka nupui diktakah siam che ka duh a ni." a ti ta a.

"A pawi ka ti lo. Nang ka neih theihna tur a nih phawt chuan eng dan pawhin innei ila pawi ka ti lo." tiin ka chhang ta a.


******

Ka Sawi Lo Phal Lo :


Kimbawihi kha B.Sc Mathematics Distinction-ah a pass ka tih kha Top 8-ah a lang pha tih kan hre leh a kan va lawmin kan va chhuang kher em..hmeltha si, lehkha thiam si, thawnthu ziah thiam si...tunah hian thawnthu pakhat a letling mek a, a rawn dah thuai i beisei ang.

Sarry,Kim🙏 I thuruk ka puan vangin.🙏



Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » August 15th, 2021, 4:22 pm

BUNG _ RIATNA

Court-ah chuan sorkar danin kan innei ta a, kan inneih min hriatpuitu a tan chuan Nunsanga leh Athu-i kan hmang a. Tunah chuan nupa kan nih zia finfiah nan inneih certificate show tur kan nei ta alawm. Rinawmna thutiam kan chham zawh a nupaa puan kan nih hnu chuan kan thianho chuan inneih lawmnan hun hlimawm tak hmang tur chuan kan chhuak ta a.

Hun hlimawm tak hmanga hun kan hman liam hnu chuan zanriah chu hotel-ah kan ei ta a. puar taka kan ei kham meuh chuan zan dar riat a ri tep tawh mai a.

Kan haw kawngah chuan Nunsanga chuan, "Zander, i motor kha tiding lawk teh." a tih chuan a dintir ve mai bawk a." Muttuina damdawi ka zuk lam lawk ang e." a tih zawm zat a.

"Zu maw?" Athu-i chuan a lo ti hlak a.

Kei chuan," Zu ti reng mai! Zu hi chu i duh a ni." ka lo ti ve hlak a.

"À à teh suh! A ngawl em kan vei loh a hnu a pawi vak em ni? Diktak chuan kei aia in ngai lo hi i hmu tam vak lo ang aw. In inneih lawmnan ka in mai dawn chauh a nih hi." tia nui kur kurin car atang chuan a chhuak ta a.

Zander chuan ka kut chu rawn hmer salhin, "Hriatthiam tum hram rawh aw..tun bak kan in tawh hauh lo ang." a ti sup a.

" Zu hi in loh theih chuan in loh tluka tha a awm lo asin." ka ti sap a. "Kan ding ta sa sa ka va inthiar lawk ang e." tiin car atang chuan ka chhuak a, kan piah vantlang zuninah chuan ka lut ta a. Ka zung zo ka chhuak leh chu ka ding vang vang a, Aizawl khawpui pe un mai chu ka thlir vauh vauh a.

Chutia ka din vang vang lai chuan car pakhat hian min rawn tlanpel a, a number plate chu ka en thuai a, phat rual lohin ka u Saitluanga car a ni chiang mai. Ka dinna chu street light-in a chhun chian em avangin an rawn hawi a nih ngat chuan min rawn hmu chiang hle ang tih ka hriat avang chuan Zander-a car lamah chuan hmanhmawh zeta pan ka tum mek lai chuan ka u car chu a rawn back a, ka bulah tak chuan a rawn ding ta chawt mai a.

A chhung atang chuan ka u Saitluanga, ka u Sailothanga leh Maduhi chu an rawn chhuak nghal a. Ka u te pahnih chuan min rawn pan mek lai chuan Maduhi chu car kawngkhar ngheng chuan kutkuangkuah hian a ding peu al a, hmui ner deuh nang hian chewing gum a thial niau niau a.

Tlanchhiatnan a tlai lutuk tawh, "Ka rawn zui hauh lo ang che u." ka ti ta ngawt a.

"I rawn haw khawp ang." tiin ka u Sailothanga chuan min rawn man mai a tum a, ka tlan chhe ta nghal a.

Ka u Saitluanga chuan min man bet rang kher mai, ka tal laih laih a, ka talna lamah chuan ka phone ken lai chu kawngpui charah chuan ka thlauh keh ta chhuai a. Ka u chuan ka hmaiah tak chuan min beng ta thuai mai a.

" Min tihzah zia hi i hria em? Kan farnu neih chhun hian heti khawp hian min tizak ang tih hi ka ngaihtuah ngai lo a ni. I lo tenawm kher mai." a ti vawt ruih mai a.

"Min kaltir rawh u. Zander nupui ka ni tawh." ka ti hlar a. "Zander...Zander.." tiin ka au tuarh tuarh a.

Ka aw hria a car atanga Zander a rawn tlan chhuah chuan ka u chuan a car-ah min kai lut chiah a. Maduhi chuan leia ka phone tla chu chharin,"Zander, rawn inrawlh suh. Hei hi chhungkaw buaina a ni." a lo ti hmiah a.

Ka u chuan motor chu tinungin a tlan ta nghal a. "Ka u, thil in hrethiam lo a ni. Zander nen hian kan inhmangaih em em a, ka pasal a ni tawh a. A bula awm turin dikna ka nei a ni." ka ti tawk tawk a.

" I pasal a ni loa, i hmu leh tawh ngai bawk hek lo ang. Zanin la la hian Champhai lamah kan haw nghal dawn a ni." Ka u Saitluanga chuan a ti khauh fur mai a.

Eng ang pawhin ngen ila a sawt dawn lo tih ka hriat chian em avang chuan ka ngawi ta rauh rauh a, rum fe fe hian Maduhi chu ka melh a, an khum vak mai hi ka chak et et a. A kuta ka phone awm chu ka va phih thla lawp a. Ka han on dawn a, ka phone chu a eng thei ta hauh lo mai. He phone hrep hi! Engah nge ka mamawh lai bera min han chhiatsan mai le. Ka thinrim chu ka sa pup pup mai a.

Maduhi thlah pah chuan an inah minutes sawm vel zen zawn kan chawl a, chutah Champhai lam panin chawl hauh loin kan tlan ta a. Kawng tluan chuan ka tap hi a ni mai.

Ka pasal neih ni, ka lawi that zan chu ka pasal then ni a lo ni ta a ni. Zander hmel hmu tawh hauh lo tur anga ka han insuangtuah chuan ka rilru chu a na ngawih ngawih a, ka unaute hian ka rilru hi hrethiam ve se ka ti tak zet a ni.

'Zander, min hmangaih tak zeta min khawngaih i nih chuan rei min han rial suh ang che aw. I tel lo chuan ka nun khua hi hlimin ka hmang hauh lo ang. Min hruai turin rawn kal leh vat ang che.' ka ti rilru tlawk tlawk a.

ATHU-I'S P.O.V

Zander chu chair-ah a thu hnawk a, hmai hupin a kun ngal a. Chutah tho leh thutin chhuat dungah chuan a vei tawn chhen a. Tihngaihna tak pawh ka hriat loh vang chuan ka melh reng ringawt a.

"Ka nupui a ni tawh a, ka lak atangin an la bo thiang lo. Ka kal anga ka hruai let leh dawn." a ti nghut a.

"Zander, insum rawh. Ka nuin zawldawh zawka tan tur a tih kha aw. An hawpui a nih chuan palai nen kan umzui ang a tih kha. Maduhi ka call a, Champhai lam panin an chho tawh a ni awm e." ka lo ti zung zung a.

"Ka ring lo, an la awm em em ang. Lakduhzualite chhungkua saw ka ring hlawl lo a ni. Zikpuii nen kan inneih loh hi an duhber a ni alawm." Zander chuan a ti nghut nghut a.

Vawi tam tak Zikpuii chu call tumin kan bei tawh a, kan call tlang thei bawk si lo. A unauten a phone an chhuhsak a nih ka ring ta ber a.

ZIKPUII :

Tum deuh bar hian ka nu leh pa chu ka hmachhawn a, mitmeng hriam hrak chuan ka melh tawn ralh ralh a, ka zak buai peih vel tawh lo" Chutin min dem ngawt thei lo ang. Ka hmangaih em a ni. Ka hmangaih zia hi in hrethiam pha lo ang." ka ti tan tan a. Ka U te bulah ai chuan ka pangchang ngamin ka tawng huai ngam deuh zawk a ni.

Aizawl atanga kan haw kha ka chhungte chuan thinrim leh awka vinin min hau lo a, awka zaidam tak hian tha te tein min zilh a, Zander that loh zia chu min hrilh mawlh mawlh ringawt a. Ka ngaithla peih lo chu ka pindanah tlan lutin ka inkalh hnan hmak a. Ngaihtha lo leh hlauthawng tak chuan min rawn ko chhen mai leh nghal a.

Ka pindana ka inkalh hnan chu ka riltam chuan zan reiah emaw an hmuh loh hlanin emaw ka chhuak ru mai thin a, tunah hian ka chhuak ru lai ka nu leh pa ten min hmufuh palh ta hlauh a, thil ka ei laiin ka nu leh pa chuan min zilh mek a ni.

" I hmangaih emaw hmangaih lo emaw i tan neih a rem lo kan tih chuan zawm la rilru dam takin awm tum mai rawh." ka nu chuan aw zaidam tak chuan a ti a." Tunah i hmangaih emaw i inti mai mai a ni. A mizia i hriat chian hunah meuh chuan i hmangaih tawh tawp lo ang. Lo inneiin fate in neih duah hnu-ah ang aia duh dang hmeichhia tawng leh ta se tun ai hian i thinlung kha a na zawk ang. Chuvangin a tlai luat hma hian thlah fel la a tha zawk a ni." a tih zawm malh malh a.

Thinrim tak hian ka ding ta phat a," A mizia enge hriat in neih? Amah pawh in la hmu loa, Maduhite chhungkua thusawi vang maia duhlo in nih chuan an ni chhungkua baka huat ka nei lo. Mi dawheh leh rintlak loh tak an ni." ka ti ta phiar phiar a.

" I nutei te chhung chuan an hmangaih chein i tana tha lo tur chu an duh lo a ni mai. I hmakhua an ngaih vang a ni tih hriain an laka i rilru put hmang kha thlak nghal rawh." ka pa chuan a lo ti hrawk a. "A mize dik tak an hrilh che chu lawm tak a ruangin i la huat phah leh ta nghal a, zahthlak zawkin. I hria alawm, Mambawih, i nutei hian a hmangaih vang zawk che a hetia ti hi alawm a nih." awka dam zawk chuan a ti leh a.

Mit khap hauh lo hian ka pa chu ka melh kal a,"Diktakin ka hrilh ang che u. Ka nutei te chhungkua baka rilru chhia leh mahni hmasial an awm lo. Zander hi Maduhin a duh em em a, a chhungte pawhin an duhpui bawk. Mahse, Zander chuan a duh si loh vangin Maduhi chuan Zander a fa pai anga insawiin neih luih talh a tum a ni. Chuti chung pawh chuan Zander chuan a la duh chuang lo a, a fa a pai lo tih a hriat hnu chuan a zilh ta hrep a. Maduhi thangtlawm lutuk leh thinrim chuan tihnat let ve duhin Zander-a ngaizawng dera, a rilru tihnat letsak ve turin min duh a zin turin min rawn chah a nih kha. A rilru tihnatsak tum chuan ka ngaizawng der ta a, ka lo hmangaih ta tak tak a nih hi." tiin thudik engkim chu ka hrilh ta vek a.

Ka pa chuan, "Thil ni thei a ni dawn em ni?" a lo ti boh a.

Ka nu erawh chuan," Ka ring hauh lo mai." a lo ti hlar a.

" In ring emaw ring lo emaw thudik a ni miau hek. Zander nen kan innei tur hi min thik tlat a, chuvangin kan inneih theih lohna tur ngawt an ngaihtuah a ni. Mahse an ni chhung khan engmah an tidanglam thei tawh lo. Tunah chuan Zander nupui ka ni tawh tlat. Dan ang thlapa a nupui." ka ti sak sak a.

Ka nu leh pa chuan, "Eng tin maw?!" an lo ti rual thawt a.

"Sorkar hriatpuina leh remtihnain Court-ah kan innei tawh a, tunah chuan dan ang thlapa a nupui ka ni a, a lak atanga min hruai bo ngawt te hi in tidik lo hulhual a ni." ka ti a.

" Ka ring thei lo! Chutin atthlak taka i chet duh chu ka ring thei lo a ni. Inthen phalna dila then leh nghal chi a nih chu." ka nu chuan a ti ruai a.

" Chutia then leh mai tur khawpin ka hmangaihna hi a derthawng lo."

" Zander-an a hmangaih ve loh zia che hi i hrethiam duh hlawl lo em ni? Hmangaih ve che nise chuan a rawn lam leh em em tawh ang che. Ngaihtuah rawh hei kar khat dawn lai i awm tawh a, a rawn lam che chu sawi loh a palai hmel pawh kan la hmuh loh hi." ka nu chuan a ti vin tak a.

Ni e, ka u ten min hruai haw atang khan kar khat a liam tep tawh a, Zander emaw a palai hmel emaw pawh ka la hmu lo chu a ni a. Mahse chu chuan Zander hmangaihna chu min rinhlelhtir chuang lo. Eng emaw chhan tha tak vanga rawn kal thei lo a ni tih ka ringin ka pawm thlap a ni.

Ka nu chu chhan mai ngaihna ka hriat loh avang chuan," Min hmangaih a ni tih hi ka chiang a ni." ka ti fiah fak a. Ka nu leh pa rilru hneh tum chuan theih tawp chhuahin Zander chu ka fak mawlh mawlh a. Ka thusawi an rin duh miau tak loh ah chuan,"Aw le, in fanu thusawi nge in rin dawn a ka nutei te thusawi chu?" beidawng zet hian ka ti ta a.

Ka nu leh pa chu an inmelh tawn zawk a, ka pa chuan," I nu leh pa chuan i tana tha leh tha lo tur chu kan hria. " a ti vawt raih a.

Ka rilru chu a nain ka beidawng kher mai, ka mittui chu ka hru zauh a. Ka nu leh pa tal hian min ring sela Zander hi mi tha lo tak angah ngai lo hram se ka ti tak zet a. Pathian hnenah pawh an rilru khauh tak tinem turin ka dil thin reng a ni. Ka pa chu melhin," Ka phone a chhia a, phone thar min leisak ang che u." ka ti ram hmak a, min chhan letna pawh ngaihsak zui loin ka pindan lamah chuan ka tlan chho nghal a.

Ka pindan ka thlen chua khumah ka thu hnawk a, ka mittui chu a rawn hnam tiam tiam a. Zander, eng ti zia nge ni ta le? Eng buaina leh harsatna nge i neih le? I nupui lam tur hian i va thang rei ta ve?? Khawnge i awm? Ka ngai tawh lutuk che tih hi i hre lo em ni?

Ka rilruah chuan Zander rinhlelhna chu a rawn lut nghal zut zut a. A mi hmangaihna kha thawklehkhatah a reh ta thut tihna em ni ang? Kan inhmuh loh kar chhung hian hmeichhe dang a lo tawng hman em ni ang? Chhailawr leh nula ral an lo tih kha a dik tak tak em ni ang? Amah ka lo tawng hi ka thil tihsual lian ber a lo ni mai ang em?

Keimahah chuan zawhna tam tak a chhhanna ka hriat mai si loh chu a rawn lut zut zut reng a. Rilru tawt up up hian pindan chhuatah chuan ka vei tawn chhen a, Zander hming lamin ka phun sep sep a, chhangtu reng a awm si lo. Boruak reh ruih leh vawt vin tuk mai chu ka chhanna dawn chhun a ni ta mai si a.

Nilo, ka ringhlel tur a ni lo asin. Ka nu leh paten amah an rin theih nan theihtawp ka chhuah a, rintir tumtu berin rinhlelhna thinlung ka nei leh si anga maw? Zander, ka rin tawk loh che avangin min ngaidam lul rawh aw.

Ka zan muhil chu mumang tha lo puipuiin min bawh buaia, a chang leh Zander na tuar hmel leh Maduhi thinrim lutuk hmel chuan min tibuai reng a, ka thangharh leh thin. Zing lamah chuan mang bo thakin ka muhil thei ta thung a.

Ka thanharh meuh chuan ni a lo tlangsang fe tawh mai a, blanket hnuaia mu kawm chal chung chuan ka tukverh darthlalang niin a rawn chhun en sur chu ka thlir vauh vauh a. Ni chhuak eng mawi tak leh ni thar duhawm tak chu a ni e, mahse ka thinlung a lungngaihna chhumpui zing chu a chhun eng tlang pha mawlh si lo. Zander tel loa nun hrehawm zia chu ka hre tan dawn chauh niin a lang. Tukin zing ni chhuakte hi Zander awm ngheng a thlir chu ni ila a mawi dan a mawi leh zual ngawt ang.

"Zander, khawiah nge i awm? Tunah te hian min rawn ngaihtuah ve ang em? Zan, ka ngaih ang che hian min rawn ngai ve em?" tiin keima hriat tham lek chuan ka phun sep sep a.

Chutia ka phun sep sep lai chuan ka pindan kawngkhar chu tu emaw hian a rawn kik kauh kauh a, " Rawn lut rawh. Ka kalh lo." ka ti bak hlar a.

Ka nu hi rawn lutin thingpui leh chhang hi a rawn chawi lut a, "Nula pui tawh si khuma mut reng hi a nalh dawn em ni? Sana khi en teh a hma lutuk hran tawh lo a nia." a rawn ti lut a.

" A tlai tawh tih chu ka hria alawm, mahse ka lu hi a na tluk tluk mai a, ka tho chhuak peih hlawl lo a ni."

" Lehkhabu i chhiar nasa lutuk thin a ni. Ti kha lo awm la, nachhawkna ka va la ang e." tiin a chhuak a, a hnu reiloteah damdawi nen a rawn lut leh a. " Hei hi ei la, i zia mai ang." tiin damdawi chu min pe a.

Inthlahrung ang reng tak chuan," Ka nu, nang tal chuan ka rilru hi min hriatthiampui la ka ti ngawt mai. Maduhi'n Zander chungchang a sawi kha thudik a ni lo asin. Zander hi ka hmangaih nasat ang bawkin ani paw'n min hmangaih a ni tih hi rin tum hram teh." ka ti lawm lawm a.

Khum tlanga rawn thut thlak pah chuan duat takin ka sam chu a rawn chul hliau hliau a, aw zaidam tak chuan,"Bawihte, ka hrethiam alawm. Nizan i pindan i chhoh hnu khan i pa nen kan titi dun a, i chan hi kan hrethiam khawp asin." a ti ta a.

"Chuti si enga ti nge hetia ka la awm reng a? Ka pasal bulah chuan min awmtir ta che u." ka ti a.

"Tunah chuan tihtheih engmah kan nei rih lo a nih hi. Zander-an a raqn lam che a nih loh chuan keinin a bula kan zuk dah che a nih chuan a tlawm thlak dawn lutuk mai bakah thil mawi a ni hek lo. Dan ang thlapa innei in ni tawh a nih si chuan a nupui i ni a, a rawn lam che a nih pawhin kan lo dang hauh lo ang. I tihsual leh i tisual a ni mai a, i hmakhua vek a ni alawm." tiin mobile phone thar chu min pe ta a.

Blanket chu theh hlimin khum atang chuan ka zuang tho nghal a, ka nu chu ka kuah chuk chuk a," Nu, ka va lawm em! Ka hmangaih che.Ka hmangaih lutuk che." ka ti mawlh mawlh a.

Ka nu chu a nui sak a, min kuah letin ka hnungzangah chuan a beng thap thap a," Kei pawn ka hmangaih lutuk che a ni. I duhthlan mipa hi i thlan sual loh hram ka beisei." a ti a. " I pasal chu be ta che, ka lo tibuai lo ang che." tiin ka pindan chu a chhuahsan ta nghal a.

Ka nu phone min pekah chuan ka sim card chu vuahin a nun rual rual chuan engmah set that pawh nghak hman loin Zander number chu ka call ta nghal a.

A pick up rual rual chuan," Zander?" ka ti nghal sap a.

Lehlam atang chuan hmeichhe naupang aw hian, " Zander chu apa asin. Kei chu Melanie ka ni." a rawn ti a.

Aw, he naupang tawngthei zet hi ka lo theihnghilh hmin der a ni. He naupang chaltlai zet hi ka hrawn theih pawh ka ring lo, a pa nupui atan min duh loh zia pawh a tihlan thiam em kha. Mahse Zander ka hmangaih em vang vang hian a fanu duat rangkachak chu ka hmangaihpui thei em em ang. Tum chuan kawng a awm an lo tih kha, ka tum phawt chuan ka thei hrim hrim ang tih ka chiang a ni.

" Melanie, i pa chu ka lo be lawk thei ang em?" aw dam thei ang ber chuan ka ti a.

" Aih, thei lo ang. Apa chu a zin daih a ni." a rawn tih chuan ka thin a tawt tun tawh mai a.

" I pa a zin a maw? Khawiah nge a zin a ?" ka ti deuh ha a. Ngaihthat lohna lian tak chuan min tuam hlup hlup a, puitling biak tur awm se ka ti tak zet a ni. Phone chu dah hmakin Athu-i number chu ka dial ta nghal a.

A rawn chhang rang kher mai a, "Hello, Zikpui, biak i va har ngang ngang ve le aw.." a rawn ti nghal a.

" Ka phone a chhia alawm. Enteh, Athu, Zander ka call a, a fanuin a lo la a. Zander chu a zin niin min hrilh a, eng nge thil awmzia?" ka ti nghal chul a.

" Kan Val lunglenga hian i kalsan tuk atang khan lunglen a la na zual lutuk a, lunglen damnan chawlhtui ning zu an rui a, motor accident an tawk palh alawm mawle. Mahse, amah chu a tha a, Hruaia a na deuh hlek a. Phai lamah refer a ni a, aman a zui ve nghal a, a hmanhmawh a ta langin a phone a theihnghilh ta a nih kha. Tunah chuan Hruaia pawh a zia tawh a, kar leh lamah an rawn haw chhoh theih hmel e ." a rawn ti ta a.

" Aw Lalpa! Ka va lawm em! Hruaia chu a eng nge na a?" ka ti phawk hra a.

" A ke dinglam ruh leh a nak ruh a titliak a, a kaw chhungah thi a tling bawk a ni awm a. Tunah chuan a zia tawh lutuk. A ngaihtuahawm tawh loh a nia."

" Anih chuan a lawmawm nasa a nih chu. " ka ti sap a, ka rilru chu a dam huai huai mai a.

" I reh lutuk a i chhungten i rilru an sawi danglam tawh a nih kan rik vek asin. I phone a chhia tih kan hre si lo a, kan call tlang thei bawk si lo che a, biak i duh lo anga i off luiah te kan ngai tawh mawle."

" Athu, ka chhungte chuan min hrethiam vek tawh asin, Zander-an min rawn hruai hun chauh an nghak tawh." rilru thawveng tak chuan ka ti a.

" A nih chuan Zander-a nu nen kan rawn hruai ang che. A lungleng awm ngaihna hre lo hi a nu leh pa te hian an mangan puiin hmuh che an chak em em a ni." Athu-i chuan a rawn ti zar zar a.

" Ka lawm e."

" Vawiinah kan rawn chhuah hman loh chuan naktukah kan rawn chhuak ang. I chhungte pawh lo hrilh lawk ve ang che aw. Tun tum chu vawi khatmah haw leh tawh lo turin kan rawn hruai ang che."

" A pawi hlek lo e." tiin ka nui ar ar a.

" Kan rawn hruai hunah che pawh i chanchin hi kan hrilh hauh lo anga, a lo haw hunah tihphut zawk nan a tha dawn em asin. Ngaihtuah teh, rin loh taka ina i lo awm a hmuha a hlim dan tur zia chu.." tiin a nui kar kar a.

" I sual thiam em mai a."

"Ka pi leh pu te hnenah kan inbiakna thu hi ka hrilh chak tawh lutuk. An lawm dawn em asin. I nutei te lah kha i chhungte phone number kan dil leh min pe duh thak lo nia...an sual hi ka ti a nia." a ti nang nang a.

"Ka la hau nek hlawm ang mawle." tiin hlim tak chuan ka nui hak hak a.

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » August 15th, 2021, 4:22 pm

BUNG _ KUANA

Athu-i lo sawi ang ngeiin kan inbiak atanga ni hnihnaah chuan Zander-a nu leh pa nen an rawn thleng ta rup mai. An rawn kal dawn tih hre lawk vek mahila an hmel ka hmu chiah chu ka hamhaihin lo biak mai nachang pawh ka hre lo a, lai tawk hian ka lo nuih ringawt.

Ka hamhaih zia chu Athu-i chuan min hriatpui ni awm tak hian tawng a chuh zung zung a. Inhmelhriattirna min neih zawh hnu chuan nui sang hian," Zikpui, i lo lungleng hman viau lo maw? " a ti phar phar a.

Athu-i chu ka nuihsak a,"Ka chhungte nen khan lo inkawm ula thingpui ka va lum ang che u." tiin kal mai tum chuan ka ding uaih a.

Zander-a pa chuan,"Zikpui, pawi i tih lem loh chuan kan bulah hian lo thu ve rih la ka duh a ni. He kan thusawi tur hi i chungchang a nih vangin awm ve ngei la ka duh." tiin min lo chelh a.

"Pawi ti hran lo e." ka ti sapa thinphu dep dep chuan ka thu thla leh ta a.

Zander-a pa chu pa lianpui leh sar vung mai hi a ni a, han en mai pawhin pa invawng up tak leh zahawm tak a ni tih a lang reng mai. A nu pawh chu nu lian leh ngo suah mai, hmel ngainatawm leh ngilneih hmel taka lang dam raih mai hi a ni a. A rawn luh tirh atanga min en chik em vanga lai ru tlat kha ka ni. Chik zeta miin min en hi chuan ka awm a nuam loin ka lai huih zel mai a ni.

Aw han then khuk khuk pah chuan ka pa, Sailochhunga chuan, "Le, in rawn kal chhan ber chu sawi ula mawle, kan lo ngaithla ang e. Mi in bengngawntir rei lutuk alawm mawle." a ti dam duai a.

Zander-a pa chuan,"In fanu, kan fanu ni bawk Zikpuii rawn hruai tuma lo kal kan ni e." pehhel kual hauh lo hian a ti nghal a. "In hriat angin Zikpuii hi kan fapa nen an lo innei tawh a, hei an inneih certificate pawh inhmuh duh takin tiin kan rawn keng a." tiin certificate chu ka pa kutah a hlan a. "Hetia an ni pahnih ber nupa a an lo insiam tawh chuan a pasal hnena haw chu in phal loh bur ka ring bik lo a." a tih zawm leh a.

Ka pa chuan," Zikpuii hi kan fanu neih chhun liau liu a ni a, a tel lo chuan kan khua a har ngawt ang. Fa tlum ber a nihna laiah keini chuan naupang chhe en tak hian kan la en a, pasal neih duhna rilru a pu ang tih pawh kan la rin phak loh laiin heti hi an lo ni ta si a. Dan ang thlapa innei an ni bawk si, han hnial buai theihna che u kan nei hauh lo. Amaherawhchu, chuti tut tuta in hruai chu ka remti hauh lo mai. Kan Mizo dan angin man leh mual te pawh kan la inhlan anga muangchangin in la hruai zawk turah ka ngai." a ti muang ban churh a.

"Tuna kan fapa lungleng hrehawmti hmel hi rawn hmu ve ula chuan kan rawn nawr tut tut che u pawh hi min dem hauh lo ang. In fanu hi kan duh a, kan hruai haw in remtih dawn phawt chuan eng pawh tih kan huamin in khawngaihna kan ngen tak meuh meuh a ni. Zep thu a cheng lo, an ni ber an innei tawh a, chhungkhatah kan insiam tawh a, in phal phawt chuan tuna hruai haw rum rum mai duh nghalin man leh mual tur pawh kan rawn inring nghal a ni." Zander-a pa chuan a ti dap dap a.

Ka pa chuan awki san lek lek hian," Chutia hmanhmawh tut tur tur si chu tun aia rawn kal hma deuh tur alawm. Kan hruai haw atang pawhin Zikpuii hi kan hnenah kar hnih tal tawp a awm tawh a, kha tih chhung khan in chanchin kan hre reng reng hleinem. Ka ngaihdan dik takah chuan kan fanu hi in duh tawk loah ka ngai a ni." a ti ta mai a.


Ka lo ip ru chawih chawih a. Hrehawm ka tiin Zander-a nu leh pa chu ka zah tak zet a ni.

Zander-a nu chuan,"Kan ngawi rei lutuk tih kan inhria a, pawi kan tiin kan thiam lo tak zet a ni. Hemi kawngah hi chuan in mi ngaihthiamna kan ngen tak meuh a ni. A chhan dik tak chu Zikpuii ber kan phone tlang thei bawk si lo a, engmah sawi loin a ngawi hmiah mai sia a rilru inthlaksak tawh a nih ringin kan naua pawhin a tuar em em a ni." awka dam riai chuan a ti a.

Ka pa chuan," Rawn be duh tak tak ni ula chuan Aizawlah ka nuphal pa ngei pawh a awm a, kan chhungkaw zinga tu emaw ber biak pawh theihna number chu in dil thei reng alawm." a lo ti leh hmuk a.

" In awih emaw awih lo emaw vawi duai lo kan va lengin nangni biak pawhna tur hi kan va dil thin a, min pe duh tlat lo a ni. Nimin piah khan Zikpuii hian Athu-i a rawn call a, kan hre ta chauh a ni zawk e." Zander-a nu chuan a ti a.

Ka nu leh pa chu an in melh tawn he haw a, engmah sawi tur hre loin an ngawi dun ta rauh rauh a. Ka thin chu a lo phu hlawp hlawp a, ka nu leh pa chuan ka nutei te chhungkaw rilru diktak chu hrethiam se ka lo ti ngawih ngawih a.


" Eng pawh nise, hruai chu in hruai haw ang chu, mahse tunah mai chuan kan la tifel nghal thei lo ang. A hmingin nuta pathum a nei ve a, kan lo inrawn khawm ve phawt anga naktuk lamah rawn leng leh zawk dawn nia." tiin ka pa chuan a hrilh a.

Thingpuite lumin kan in ho pah chuan kan titi nak nak hlawm a. Thingpui in zawh chuan an ni chu an thlenna hotel lam pan chuan kir leh mai an tum a. Athu-i chuan,"Zikpui, bazar ka duh bawk sia hmunhma ka hre lo nen min bazarpui teh a." a ti a.

" Pa, in phal em?" ka lo ti ve zat a.

" Aw le, kalpui ta che, mahse rawn rei lutuk lo la." ka pa chuan a lo ti thuai a.

An rualin an motor-ah chuan ka chuang ve ta nghal a. Zander-a nu leh pa chu ka la hriat chian loh em avangin ka la nel loin ka zah ru deuh tut pek a. Min biakna pawh a rul tawk chauhin ka chhang thei tawk a, han biak vela nel taka biak bawrh bawrh ka chak lutuk mahse biakna tur tawngkam ka haihchham tlat pek a ni.

Zander-a nu chuan, "Zikpui, i ngaihdan pawh kan lo zawt hauh lo che a. Kan ruala rawn haw ve nghal nge i duh a, Zander-a rawn hruai kher i phut le?" a ti a.

Hamhaih tak chuan ka nui ngawt a, " Ka hre lo le...Zander bula ka awm theihna a nih dawn phawt chuan engmah pawi ka ti lo." ka ti ta a.

Athu-i chu a lo nui hak a," Kan rualin i rawn haw ve ngei tur a ni. Zander a rawn haw hunah i hmel a hmu thut anga a mak ti leh lawm bawk si hmel landan tur ka hmu chak a ni. Chu lo rengah, in innei tawh a, i awmna tur chu i nu leh pate in ni loin i pasal a in chhungah a ni." a ti a.

Zander-a nu chuan,"Chu chu a dik khawp mai. " a lo ti zauh a. Amah vek chuan," Zander-an nupui a neih thu min hrilh khan ka mo hmel chu ka hmu chak em em a, a tir atang reng khan hmeichhe hmeltha tak i nih chu ka ring sa nghal nain he ti em em a hmeltha i nih erawh ka ring pha hauh lo." a ti a.

" Ka lawm e.." sen tan tan chung chuan ka ti a.

An in nghahna hotel kan thlen chuan Athu-i chu a inthlak sawk sawk a , bazar tur chuan kan chhuak leh ta nghal a.

"Zander-a nu leh pa hi an hmeltha si an fel hmel bawk si, biak bawrh bawrh ka chak hle nain biakna tur ka hre bawk si lo a, mawl min ti rilru ngawt ang tiraw?'' ka han ti a.

" Pawi ti duh suh, an hrethiam lutuk ang che. Kei pawh i dinhmunah hian ding ve ta ila nang aiin sawi tur ka haihchham zawk daih in ka ring a ni. In inhrawn rei deuh hunah i tawng duh zia leh i harh zia an la hre ve mai ang." tiin Athu-i chu a nui hawk hawk a.

Amah bawk chuan, "Maduhi khan ngaihzawng thar a nei tawh asin." a ti ta a.

"A tha nasa a nih chu. Chutia ngaihzawng thar a neih chuan Zander pawh a theihnghilh anga, kei pawh min haw reng peih tawh lo ang. Tu nge a ngaihzawng thar chu ni reng reng a.?" ka ti ta a.

"Bronson a ni awm e. In khaw mi leh nghal mawle, a hriat pawh i hre mai thei. A hmelchhe lo zek lehnghal."

"Bronson maw? Ka hria chuan ka inhria." ka ti hak a. Maduhi leh Bronson maw? Thil ni thei pawh va ni suh! An ni pahnih ber kher an han inkawp chu mak ka ti hle a, mahse an nun han khaikhin dun chuan an inawm hle hian ka hre leh hnuhnawh ta a. Kan khawvel hi a lo zim a ni. Kan duh loha kan hnawl hnu kha mi thenkhatin duh takin an lo pawm a, mi thenkhatin engah mah an tih loha an hnawl hnu kha duhtakin keinin kan lo pawm ve leh a. Chu chu khawvel kal phung ani.I ngaihzawng hlui kha midangin an ngaizawng a, midang ngaihzawng hlui kha nangin i lo ngaizawng ve bawk thin.

Ka thinlung chhungril ber atangin duhsakna ka hlan a, hlim taka fanau maltluan chawi turin ka duhsak a ni. Bronson-an Maduhi a tawng chu ka thaw a veng huaiin ka inthiam lohna pawh kha a reh ta huai bawk. Tunah chuan keimah vanga a rilru natna te kha a reh tawh ngei ang chu.

Thawmhnaw zawrhna dawrah lutin kawr nalh tak tak chu kan en kual dan dan a. Athu-i chu a ri deuh hlut reng a."Hei hi a nalh thlawt a ni tiraw?' tiin kawr pakhat hi khai chhuakin a han inteh chhin vel a.

"I inhmeh ngawt ang."

A man to leh to loh lam pawh ngaihtuah loin a lei nghal hmiah a. "Thawmhnaw nalh leh mawi hi ka pel thei ngang lo a ni ber e. Pawisa ka neih chuan lei zel mai hi ka duh mai thin." tiin Athu-i chuan a thawmhnaw lei thar chu a bag-ah a khung malh malh a.

" Chutiang chiah chuan kei pawh lehkhabu ka hmuh hian lei loh hi har ka ti thin.Ka chhiar chak vak loh pawh nise chhiar duh hun a la awm ang tih rilru pu chungin ka lei hram thin." ka ti a.

Dawr atanga kan chhuah hnu chuan kan in lam panin kan haw ta nghal a. Zander chungchang hlir sawia kan titi avang chuan ka lung a leng tharin ka ngai em em mai a, tunah te hian ka bulah awm ve se ka ti ngawih ngawih a ni.

Ka hmelah ka lunglen zia ka lantir a ni ngei ang,"Zander pawhin a ngai em em che a ni tih hria ang che aw. Naupan tet atanga inkawp chho kan ni bawk a, a zia hi ka hre chiang a ni. Heti khawpa hmangaihna a lak nat pawh hi ka la hre ngai lo. Nang a tawn hma che a nungchang leh a tawn hnu che a nungchang chu inthlau tak a ni." Athu-i chuan a ti malh malh a.

A ban tha chak takin min kuah lai te kha..ka ngai a ni,"Ka ngai lutuka ka tap mai dawnin ka hria." ka ti sap a.

"Hun reilote hnu-ah i hmangaih chu i hmu mai dawn alawm. Lungleng lutuk teh suh. Kar hlat leh inhmuh khat hian hmangaihna a tipungin a tichak sauh thin an tih kha. Lunglenga inngaihtuah lungpuam loin in inhmuh huna i hlim dan tur kha suangtuah lawkin hlim takin nuih tum zawk rawh." tiin min hnem malh malh a.

"Ka ngai em a ni." ka ti halh a, ka ngaih zia chi ka zep buai peih lo, zep lahin awmzia a nei dawn hek lo." Ka nghakhlel lutuk hian kan inhmuh hun tur hi ka nghak chhuak zo lo ang tih ka hlau lek lek hial a ni." tiin ka nui tawi tak a.

Fiamthu titih hian, "Nangni pahnih lungleng lutuk vang hian hmangaihna khura tluk luh pawh min tihlau vek alawm." tiin a nui hak hak a.

"Kei pawh hmangaihna khura tluk luhte chu ka duhthusam a ni bik lo asin, mahse kan duha duh loh theih ngawt lah a ni si lo." ka lo ti a.

Kal pah chuan titi dun zelin Maduhi chungchangah bawk kan pakai leh a, "I unaunu ni si heti khawpa i lakah rilru herh a pu thei hi mak ka ti ngawt mai." Athu-in a tih chuan dar ka lo san ak a.

"Maduhi chu a mizia hi a danglam em alawm. Amah bak tumah ngaihtuah a nei lo a, a hlimna tur a nih dawn phawt chu midangin tuar mah se pawi tihna a nei ngai lo ang." ka ti halh a. Chutah," Hawh, Maduhi chanchin sawi nan kan chilper i seng thlawn lo teh ang. Ka hmangaih ber chanchin sawi dun zawk teh ang." tiin ka nui hak a.

"Engtin nge kan sawi ang? I Zander chuan a hmangaih chein a àtchilh che...ni lo, a finchilh bur zawk che a, tunah te hian i hmel hmu chakin Vairampurah chuan a hawi lawl lawl ta ve ang." nui bawk bawk chung hian a ti a.

"Fiamthu nan hmang suh." tiin ka lo nui ar ar a.

" Ka fiamthu hleinem. A nihna dik tak alawm ka sawi."

*****

THIRD PERSON P.O.V

Pu Sailochhunga leh a nupui Pi Lallianpuii chuan an fanu chanchin chu khunkhan takin an sawi dun a, an ngaihdan a inhmuh loh chang chuan an inhnial leh bap bap thin a.

"A nu leh pa te kha mi zahawm leh mi invawng fel tak an nih hmel a, khatiang nu leh pa karah khan fapa sual lutuk a chhuah theih ka ring lo a ni. Zander pawh chu ka hriat ang em ema sual leh laktlak loh chu a lo ni lo mai thei a ni." Pi Lianpuii chuan a ti a.

Amah Pi Lianpuii vek chuan, " Ka laizawnnu ngei maiin Zander a do em em a, kan phone number pawh a lo pe duh lo hi ka hrethiam thei lo a ni. Zikpuii thusawi zawng zawng kha thudik vek a nih ka ringhlel ta lo." a ti a.

"Eng a thusawi maw?"

"Zander-a hi Maduhi hian a ngaizawng a, Zander-an a duh lo kha tuarnatpuiin a sawi chhiatah an ram tang ta a ni awm e. Zikpuii pawh a fanu ang tho a ni a, heti khawpa a lakah rilru tha lo a pu thei mai hi ka unaunu ngei mah nise ka hrethiam seng lo a ni." a ti bawrh bawrh a.

Pu Sailoa chu a ngawi vung vung a, muangchanga meizial tan pah chuan, "An ni pahnih lah an lo innei tawh bawk sia hruai hawtir phal lo thei ngawt ni pawhin ka inhre lo. Hruai haw mai sela, a duhthlanna a lo siam fuh lo ta a nih leh a rawn haw leh anga a ni mai." a ti churh a.

" Hruai chu an hruai haw tur alawm, mahse engtin nge ni ang? Thenrual thate sawm khawmin chawhlui nen kan thlah ve dawn lo'm ni?"

" Chutiang chu ngai pawhin ka hre lo. Tlan kohin inhruai mai sela a tha berin ka hria. Hei chrismas te a hnai ta bawk a, an nupain kan bula mas hmang turin kan chah anga. Chumi hunah chuan an inneih lawmna ruai te chu kan siamsak mai ang chu."

"Hruai haw nghal chung chung kha an duhdan a nih hmel a, a thuam chhawm ilo vel pawh kan leisak a ngai ang chu, a ni lawm ni?"

"Nia, chu chu ngaihtuah a ngai khawp mai."

Chutia an sawi mawlh mawlh lai chuan an fapate pathum chu an rawn haw ta a. Pi Lianpuii chuan thingpui lo thlitsak pah chuan, "Zander-a chhungte an rawn kala in farnu hi hruai haw an rawn tum a. I pa nen kan lo sawi dun mek a, kan ngaihdanah chuan hruai haw mai se thain kan lo hria a. Eng nge in ngaih ve dan?" a lo ti nghal zung zung a.

Saihmingliana, tlangval ngawichawi tak chu rawn tawng chhuakin, "A tirte atanga ka ngaihdan chu in hriat vek tawh kha. Kan farnu hian a hmangaiha a lo um hmingchhe tawh a, eng ang mizia pawh pu se a nei ngei tur a ni. A tirah pawh, 'dang dang suh u. A neitu tur berin a duh ahnu nei ang hmiang, in neih tur a ni lo a, nangni duh leh duh lohin kawngro a su lo' ka tih tawh kha. " a lo ti mai a.

An unau zinga zaidam thin thawk na ber leh hmeltha ber Saitluanga chuan," Ka nutei khan mi tha lo tak niin a sawi a, chutiang mi tha lo hnenah chuan kan farnu hi kan kaltir thei ngawt lovang. Mi sual, lerh tak leh hmeichhe kutthlak hmang bula cheng turin ka farnu hi ka phal lo a ni. An hmingchhe tawh emaw hmingchhe lo emaw ka ngaihtuah lo. Nupui pasal inneihna hi kar hnih khat chhung lek thil a ni lo a, kumkhua atan a ni a, kan fimkhur hle tur a ni." a ti chang fak mai a.

"Dan ang thlapin nupa an ni tawh a...''

" Chu chu eng nge a awmzia?"

"Sorkar danah an lo innei fel der tawh alawm."

"An inneih loh hlau lutuk hian dawt an sawi a ni mai lo maw?"

"An inneih certificate pawh mit ngeiin kan hmu a ni - i pa nen hian."

"Inthentir dan ngaihtuah a that zawk ka ring. Hmeichhia kutthlak hrat leh lerh lutuk nupui ni tur hian ka phal lo hul hual."

"Chutiang mizia chu Zander-an a pu hauh lo."

Aw lo chhuahna kawngkhar lam chu an hawi rual thap a, kawngkhar bulah chuan Zikpuii leh Athu-i chu an lo ding reng mai a.

"Ka u Mam, Zander, i hmuha i hriat chian hunah chuan i ngaihdan dik loh zia kha i hre chhuak ngei ang." tiin Zikpuii chu a rawn pen lut nghal a, a hnungah Athu-i chuan a rawn zui bawk a.

Saitluanga chuan Athu-i chu chik zet hian a lo en a, an mit leh mit chu a intawng sak a, an thinlungah chuan lir nghing detin an thinlung chu a sawi che ta a ni. Athu-i chuan zah hmel takin a mit a la sawn zauh a, a sen zui ap ap a. A rilru chuan, " Heti khawpa nuta hmeltha nei si hian Zikpuii hi a lo va insawi thei lo zawk!" a ti nep nep a.

Saitluanga thung chuan, " Karei! Helai angel ang maia hmeichhe hmeltha chungchuang hi khawi lam mi nge ni ta ngai?" a lo ti rilru ve bawk a.

Zikpuii chuan," Ka U, ka pasal bula awm tur hian dikna ka nei a ni. Kha chen kha min dang tawh a, tunah chuan min dang thei tawh lo ang." huaisen tak chuan a ti ta sak sak a. Zander a ngaihna leh a bula awm a thlakhlelhna chuan huaisenna a pe a ni.

Pi Lianpuii chuan Athu-i chu a lo nuih var var a, "Athu, hetah zanriah ei ve la, zanah pawh i thiannu bulah hian i riak ve nghal anga. A tul chuan i pi leh pu hnenah ka dil mai ang." a lo ti thuai thuai a.


Athu-i chu a nui sak a, "Zikpuii'n min sawm ngawrh bawk sia, chaw ei a riah nghal chu ka lo tum tawh sa alawm." a ti a.

Zikpuii chuan, "Athu, hei hi kan unau zinga upa ber Sailothanga a ni a, a ni hi Saihmingliana, chuan hei hi Saitluanga a nih hi.Ka u, ani hi Athu-i, Zander-a cousin, a Ni fanu a nih hi." tiin a inhmelhriattir hlawm a, an han inchibai leh ang lawp lawp hlawm a.

Saitluanga chuan, "Zikpuii chu hruai haw in tum ruh hle mai maw?" a lo ti boh a.

"Tehreng mai, a tel loa haw kan tum reng reng lo." tiin Athu-i chu a lo kiai sak a.

Pu Sailochhunga chuan,"Chuti a nih chuan in thil tum chu in hlawhtling dawn a ang khawp mai. Naktuk zing chu i Pute nupa nen chawhlui kilho ila, in hruai haw dan tur chungchang sawi khawm ila a tha ang." tiin thutlukna chu a siam ta a.

Zikpuii leh Athu-i lawm lutuk chu an inmelh ralh a, thawveng ta huai ni awm hrim hian an thaw dun huai a.

Zikpuii chuan,"Pa, ka kal ve nghal chu in phal tak tak maw?" a ti chul a.

"In lo innei tawh bawk nen remtih loh theih ngawt lah ni si lo. U pathum i nei a, kawppui i neih khalh ta vek a nih hi." a ti a, a nui deuh tut tut a.

Fiamthu titak deuh hian Pi Lianpuii chuan, "Zikpuii a awm bo daih tawh dawn si a, Athu-i hi ka monu atan awm ve nghal mai rawh se. Athu, fapa pathum ka nei a, i duh ber thlang rawh le." a rawn tih takah chuan an nui ham ham hlawm a.

Zanriah chhum hun chuan Zikpuiite thian dun chuan ei rawng an bawl dun mawlh mawlh a. Saitluanga chuan tul mang hlei loah hian a rawn pui ve tal thin a, Athu-i chu zei tak hian a fiam vel reng a, Athu-i pawh nuam a tih hmelin a nui deuh sang reng a.

"Ni dangah ka rawngbawl min pui ngai miah si lo, tuna taka min rawn tihpui tlat chu eng nge awmzia?" tiin a U chu a lo fiam a.

"Ni dangah te chuan Athu-i tel ve ngai hek lo."

Zikpuii chuan,"Chaw ei khamah chhan Athu-i nen zalen takin titina hun kan nei tawh ang chu." a ti rilru a, a rilru ang chuan thil a kal ta hauh lo mai. Athu-i leh Saitluanga chu leng turin bike-in an inphur chhuak ta daih a.

An chhuah dawn chuan, "I thil tih dan chu a fair lo hle mai, ka u Mam. Ka thiannu min ruksak a ni ringawt alawm." rilru hlim tak hian a ti a.

"Pawi ti suh, Zander i nei dawn tho alawm."

A tukah chuan Zander-a nu leh pate nen chawhlui an kilhoin an in hruai dan tur chungchang chu an sawiho laih laih a.

In thlahna hranpa pawh awm chuang loa tlan koha hruai haw ohawt an rel tlu ta a. An hruai haw ni atan a tuk ni chu an ruat fel ta bawk a.

"Kan fanu neih chhun min hruai haw sak dawn ta chu a ni a, kan khua a har ngawt ang chu.Kan khawhar hnemah an ni nupa hian ktismas min rawn hmanpui se a tha ang. Chu chu in phal dawn lo a nih chuan in hruai haw ka phal lo mai ang." nui vur vur hian Pu Sailochhunga chuan a ti a.

"Chuti a nih chuan kan rawn chhung hman mai ta lawng."

Inpawh leh rilru inhmu takin chhungkaw insuihkhawm tharte chuan tukthuan chu puar takin an kilho ta a. Midangho hlim taka an nuih bawk bawk lai chuan Athu-i leh Saitluanga chu an hlim ve hauh lo thung a. A tuk lawkah an tan thenna kawl a eng mai dawn sia, engtikah nge an inhmuh leh ang tuman an hre si lo...

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » August 15th, 2021, 4:22 pm

BUNG _ SAWMNA

ZIKPUII :

Hmana Zander nen hlim taka hun reilote chhung kan lo chen dunna inah chuan tim deuh dai hian ka pen lut a, kei min lo lawm turin ka pasal chu awm ve nise chuan a dan a dang deuh tur hi a ni a. In chhung ka pen lut chiah chu he ina karta lo khawsak ve lai kha ka mitthlaah chuan rawn lang uai uaiin Zander chu ka ngai zual sauh a.

Ka awmdan chu min hrethiam takin Athu-i chuan ka kut chu a rawn hmer salh a,"Zikpui, a rei lo ang, a rawn haw ve thuai dawn alawm." a rawn ti sa sa a.

"A awm loh laia ka lut mai hi a inawm lo deuh huin ka hria." nuih sak pah chuan ka ti sar sar a.

Zander-a nu chuan ka darah kut nghatin min en vang vang a,"Zikpui, ka fanu, in kan thleng ta. He in chhung leh he chhungkuaah hian kan lo lawm a che." tiin mitmeng hlimna a khat chuan min melh vawng vawng a.

"Tunah chuan i in diktak i thleng ta."

Ka thawmhnaw chu Athu-i leh ka pa (Zander-a pa. Tun atang chuan 'ka nu' 'ka pa' tiin la sawi tawh mai ang.) chuan ka thawmhnaw chu kan pindanah min dah chhohpui a, Athu-i nen chuan kan khai thain kan rem fel nghal malh malh a.

Kan thlen atanga minutes sawmhnih hnu vel chuan Athu-i nu leh pa pawh an rawn thleng ve nghal a. "Khawiah nge kan mo thar chu? Han inchibai ila." tiin min rawn fiam bawrh bawrh a. Kan han inchibai kual tha leh vel a

Ka zakin ka lai ru em em mai a, ka rilru chuan Zander ka au mawlh mawlh a. Tunahte hian ka bulah awm ve nise chuan heti khawp hian ka malin ka zak bik lo ang mawle, Zander, khawngaihin rawn haw hram teh. Zak teh mahila zak lo ang taka lan tum hram hramin an titite chu a mawi tawkin ka lo zawm ve hram hram a. Pi Malin thingpui leh a hmeh a rawn chhawp takah chuan ka lo pui var a.

Mo thar ngang ka la ni bawk a, Zander awm lo nen fiam takah min neihin an thusawi karlakah chuan min fiam thla zen a. Min fiam changte chuan chhan ngaihna hre loin ka sen ap ap thin. Min fiamna chu tlansan duhin Pi Mali pui tur chuan Athu-i nen chuan choka lamah kan luhsan ta hmiah a.

Chhungkaw hnih eitur chu siamin kan buai nghal zar zar a. ,"Awi, Athu, Zander awm ve nise chuan heti khawp hian ka zam chhe bik lo ang mawle. Tunah te hian ka bulah awm se ka ti tak zet a ni.Pasal te tel loa lawithat zan hman chu a mak em alawm." ka ti nang nang a.

Athu-i chu a nui ar ar a, "I awmdan hi a mak dangdai ve thlawt! In inneih zanah i u ten an hruai hrang nghal che a, tunah an in i rawn lawi zanah lah i pasal berin a zin bosan che a ni a..I tan hian lawithat zan hi a awm ve thei dawn lo a nih hi." a ti a.

"A dik chiah, a mak ve ngawt mai tiraw."

"Hetah i awm tih hre ngat se chuan a thianpa pawh ngaihven loin a rawn thlawk haw nghal chuk chuk duh ta ve ang. Rawn haw lawk lo mah se a pawi hleinem..lunglen tuar i zir lawk a ni mai alawm." tiin Athu-i chuan chimawm zet hian min rawn melh ralh a. "Tak tak a na, naktuk tukleh khian a rawn haw dawn alawm, ni khat bak lunglen i tuar hman dawn lo a nih chu." a ti a.

Naktuk tukleh! Hlim tak chuan ka nui ta var var a."Mahse, ni khat pawh a rei vei nen..tuna hmu chak tawh a, ni hnih dang la nghah leh chuh."

"Ti khan awm tawp la i hriat loh karin ni hnih chu a ral ve vat mai ang. Hun khawhral nan Maduhite inah kan va leng dawn em ni?" tiin a nui hawk hawk a.

"A teuh lo mai." ka lo ti hlar a."Hmuh leh pawh ka duh tawh hleinem. Ka Zander hi min chhuh leh ang tih a nia ka hlauh ni." tiin ka nui zui hak hak a.

Maduhi chu a theih chhung chuan hmuh loh ka duh a ni. Hmuh leh chakna pawh ka nei hek lo. Hmana ka ngaih thin tehlul nen tunah chuan han ngaih chhinna pawh ka nei loa a der pawhin ka ngai peih tawh lo. "Ka hmu chak lo tawp a ni mai, min hmu turin rawn kal ta se chuan ka lo hmu ve thei mai ang tih chauh a ni." ka ti leh hak a.

Zan dar sawm hnu lamah zanriah chu kan ei ve ta chauh a. Chaw ei chhung chuan inpawh takin kan titi tlang hlawma kan nui leh dar dar thin a.

Ka nu chuan,"Zikpui, Melanie hi i hre tawh ang tiraw ? Zander fanu.." a ti a.

Kha hmeichhe naupang chimawm zet kha maw? Ka lo hre chang leh pek tawh lo, phur lo zet chuan," Aw, hre tawh e. Mahse ka la hmu lo a. " ka ti a.

"Naupang duhawm leh hmeltha tak a ni asin. Naktukah a rawn haw dawn a, a hmel i hmuh hunah chuan i ngaina reuh ngawt ang. " ka nu chuan a ti mawlh mawlh a. "Zander awm loh chhung phei chuan i khawhar a hnem ngawt ang."

" Naktukah maw a rawn haw dawn?"

"Aw, a nu bulah a awm a. A nu bula awmtir hi ka duh lo hle nain in khua kan rawn kal dawn khan a nuin awmpui min dil tlat mai a, kan zin chhung chu tiin a bulah ka lo awmtir ta mai a. " a ti a. A aw atang chuan Melanie-i nu a ngainat loh zia chu a hriat theih hial a ni.

Zander hian Melanie-i nu chanchin hi min hrilh tam lo hle mai a, chiang deuh zawk a hriat chu chak mahila ka zawt dawt ngam bawk si lo." Melanie chu ka hmu chak ngawt mai. Naupang duhawm leh hmeltha tak a nih ka beisei." ka ti sap a.


Chaw kan ei kham hnu chuan kan chawi eina hnawk seng hawiin Pi Mali kan pui dun leh malh malh a.

Zanah chuan Athu-i nen kan riak dun a, ka khawhar min hnemin ka lawm em em a ni. Mut hmunah chuan eng eng emaw sawiin kan titi dun malh malh a.

"I u Saitluanga kha hmeltha ka tiin hmuh leh ka chak tak zet a ni. Ka rin phak bakin ka ngai a, Saitluanga vang hian hmangaihna awmzia ka hre ve tan dawnin ka hria. " Athu-i chuan a ti sap sap a.

Mak ti tak chuan ka melh ha a, "Chutin in lo inkawm nel hman a ni maw?" ka ti a.

"Teh reng mai..a zei teh hawrh em a nih kha!'' tiin a nui kar kar a . "Mas hmanga in chhoh hunah in rualin ka rawn chho ve dawn a nia, min hnial miah suh ang che."

Ka lawm lutuk chu ka hnuk a ulh tep hial a ni. Ka u nupui atan chuan Athu-i tluka duh hi ka nei lo. Laizawn thar nei ta ang mai hian ka inngai a, hlim tak chuan ka kuah chuk chuk a,"Ka lawm lutuk ka lawm lutuk." ka ti mawlh mawlh a. "Innei ula ka va'n titak! Diktak chuan kan monuah ka it ru lutuk che a, mahse i duh ve tak tak ka rin loh avangin ka sawi ngam lo a nih kha." ka ti a.

" Oh, ka duh lutuk alawm, ka atchilh lo chauh zawk mawle."

Kan inmelh a, kan nui dun har har a. Zing ka han thanharh meuh chuan ni chu a lo chhuak sang tawh kher mai a, mothar tuka thawh hai nghal chu a chi viau loh khawp mai. Athu-i mutna chu ka en a, a lo ruak huai tawh. A thawh rualin min kaih thoh ve awm tak hi a ni ah.

Rang takin ka puan sin lai chu theh hlimin ka tho chhuak ta nghal a. In hnuai lama chhuk thlak pah chuan ka nu leh pa thar bula thupha chawi dan tur ka ngaihtuah neuh neuh a.

Hmeichhe naupang hlim taka nui ri hak hak thawm ka hriat chuan ka ding chawt a, ka heh ka pet fan fan a. Ka muthilh lai khan a lo thleng hman der tawh a lo nih chu. Eng tin nge a lakah ngaihawm taka ka inlantir ang le? Zander ka hmangaih a, a fanu pawh hi ka hmangaih tur a ni.

Inthiam lo tak chuan, "A pawi ka ti lutuk, ka nu. Thawh ka hai chiang hle mai." ka ti sap a.

Hlim taka min rawn nuih var varin, "Pawi ti suh. Nizan lam in men rei thu Athu-in min hrilh alawm." a lo ti a. "Melanie pawh a rawn haw tawh asin." phur hmel tak chuan a ti a. "Melanie bawihte, i nu hi i rawn chibai dawn lawm ni?" tiin choka lama awm Melanie chu a ko nghal a.

Choka kawngkharah hian hmeichhe naupang kum 7 - 8 tur hi a rawn dak lut thuai a. Naupang hmeltha tak mai chu a ni chiang a ni. A vun chu bawnghnute ang hian a paw phiang a, a sam dum hlep leh tle siau chu a dar velah a kir vial chap a, mitmeng lian ke kaw leh fiah kak hi a nei a, a mitmeng erawh a rum ngang mai.

Harsa ti tak chuan, "Melanie." ka ti sap a. He hmeichhe naupang duhawm lutuk hi ka haw thei lo tih ka inhre nghal a, kuah mai tum chuan ka kut ka phar chhuak a.

Melanie chuan ka kut chu lo nam per lawpin, "Min khawih suh! Ka hua che! Ka nu i ni lo, ka nu atan ka duh lo che." a ti that that a.

Ka ding khawng nghal lah a, ka mitah chuan mittui a tling nghal pam a, rilru na em em hian, "Melanie..." ka ti tham chal a.

"Ka duh lo che!" tiin Melanie chu a te leh that a.

Mak ti zet hian ka nu chu a rawn tlan phei a, Melanie chu a rawn kuah nghal a,"Bawihte, kha ti'n i nu i be tur a ni lo, i hria em?" a ti khauh far a. Chutah min raqn melhin," A pawi ka ti lutuk Zikpui, hetiang hian vawi khat mah a la nung ngai lo asin mawle." tiin thupha a chawisak mawlh mawlh a.

"Ka nu a ni bawk lo." Melanie chuan a ti leh that a.

"Melanie!" tiin ka nu chuan a vin that a."Kha tiang khan i tawng leh tur a ni lo." a ti chang bal a.

Melanie chu a pi awka vin avang chuan a tap deuh par a, "He hmeichhia hi a tha lo a ni. A nu pawhin a pa nupui thar chu mi sual deuh mi vuak hrat deuh a ni a, dawithiam pitar rawn indawi nula leh a ni a ti vek. Snow White-i dawithiam pitarin a dawi ang khan min dawi ve a tum a ni, ka hre vek. Chuvangin a nu pawhin ka haw tur a ni a ti vek. He nu hi ka duh lo." a ti zat zat mai a.

"Karei! Hmeichhe sualin naupang rilru thianghlimah sual a lo tuh ta!" tiin ka nu chu a rum kawk a. " Aw le, Melanie, i pu bulah lo va kal leh la, i nu hi titipui lawk ka duh." a ti a.

"Ka nu a ni ziah lo." la ti hram chungin Melanie chu a pu awmna, tual zawl lamah a tlan ta nghal a.

"Zikpui, min ring rawh. Tun hmain ka tunu khan khatiang mize mawi lo kha a la pu ngai lo asin. A nu bulah kan awmtir kha kan tih sual a ni, a nu rilru chhe lutukin a lo fuih khaw lo hman a nih kha. A pawi ka ti tak zet a ni. Dawhtheihna nen kan enkawl chuan a rawn ziawm leh em em ang. Kei pawhin ka lo zilh dawn nia." rilru nat hmel tak chuan a ti a.

"Ka nu, ka hrethiam alawm." ka ti sap a. "Naupang fel tak a ni ngei ang. In kawm nwl pawh awm hauh loin a pa nupui ka ni thut mai chu a tan pawh hriatthiam a har viau anga a la shock ve hrih a ni ngei ang. Kan inhrawn rei anga min la ngaina chhawm em em ang." beidawng rilru tak chuan ka ti a.

Ka nu chu thawveng huai tih hriat tak hian a nui var var a,"Zikpui, ka hmuh tirh atang che khan hmeichhe fel leh tha, mi hriatthiamna ngah mi tak i ni dawn tih ka hre tawh asin." tiin ka darah min beng thak thak a,"Hawh teh chokaah lutin thingpui tui tak ka siam ang che." a ti a, chokaah chuan min kai lut ta a.

Athu-i chuan,"Good morning!" lo ti zang vahin min lo nuih san san a.

Engmah thleng lo ang maiin ka nui lui sak a, "Morning. Awi, Athu, ka thin i tihrim zia hi..i thoh pahin ngah nge min kaih thoh ve loh a? Nangmah vangin thoh ka hai phah." ka ti hlak a.

A nui hawk hawk a," Zander-an mut i duh zia min hrilh kha ka la hre reng a, mut i kham loh leh ka hlauh vangin ka tiharh duh lo che a nih kha." a ti a.

" Oh, khang te chu a fiamthu a ni tih i hriat reng kha."

Ka nu chu a lo nui kar kar a," Bawihi, hei i thingpui tur pawh ka siam zo tawh aw. Athu-i khan tihzah che a tum a nih kha, engah mah ngai suh." a lo ti a.

Thawh tlai tawh tawh nak laiin pasala nute thingpui siam han in chu a inthlahrunawm ang reng khawp mai. Ka rilru chuan Melanie awmdan vel kha ka ngaihtuah zawm ta zel a, khatiang khawpa naupang hmeltha leh duhawm thinlunga amah huatna tuhsaktu a nu chu a dem lo thei lo a ni. A fanu rilru thianghlim taka huatna tuhsak duhtu nu chuan a fanu chu a hmangaih lo hul hual ang.

Melanie han en hian a nu chu nu hmelchhe zawk zawk chu a ni thei lo hrim hrim. A hmel chu eng anga tha pawh ni se a rilru chu chhe tak a ni hrim hrim nghal phawt.

Tunah rih chuan Melanie hi a lakah chimawm hrih hle mah se kan han inhrawn rei anga min ngaina chhawm ve thei maiin ka ring a ni. Tin, a pa a lo haw hunah chuan a zia pawh a la thlak ve mahna.

Chutia ka inngaihtuah rauh rauh lai chuan ka nu chuan," Vawiin chu Athu-in hawsan che a tum sia i huphurh awm mang e." a lo ti zauh a.

"Zander-a rawn haw hma chu la awm ve se ka tih nen nen." ka ti a.

Athu-i chuan," Kei pawh chu chu ka duh dan a ni alawm. Ka nu hi bungrua lain zin a duh si a, a dawr ka nghahsak a ngai ta a nih hi. Naktukah Zander a rawn haw dawn tho a, zan khat lekah te chuan lunglengin i thi hman hauh lo ang ka ti ngam sak." a lo ti vat a.

Lo ner khum nang pah chuan, " Lungleng chuan ka thi lo ang." ka lo tih khum ve ngat a.

Ka nu chuan, "Lunglenna hun i nei dawn lo, vawiin atangin i pa nen office kan kal anga Melanie nen in innghah a ngai dawn a. " a tih chuan ka tim deuh sawk hian ka hria.

A thu sawi chuan ka thingpui in lai chu min tihak thelh a,Melanie nen nilenga awm dun chuh..Lalpa, thil phurawm zawk zawk chu a va ni lo chiang ve! Ka huphurh zia tilang lo tur chuan ka insum hram hram a, "Nilenga kan in awm chuan a nu atan min pawm ve mahna." tiin ka nui lui hak a.


"Ka beisei." tiin Athu-i chu a lo nui var var a.

Ka rilru chuan," Lalpa, he ramhuai note thinlung hi tinem la, ka tan tawhkhirh lutukin awmtir suh ang che." tiin ka tawngtai ru mawlh mawlh a.

Tukthuan kan ei kham hnu chuan ka nu leh pa chu an hna lama kal tur chuan an chhuak ta a, an rualin Athu-i pawh chu a haw ve nghalin, Pi Mali pawh a chhungte dam lo tlawh paha chawhmeh ilo vel lei turin a chhuak ve pah nghal a. "Zikpui, kan kal mai ang e. Melanie kha a lo sual deuh a nih chuan hau hreh hauh suh ang che aw." a ti a.

Engmah sawi lo chuan ka nui sak ringawt a, ka thlah fel hnu chuan inchhungah lutin Melanie TV enna bulah chuan ka thu a, Barbie film Island Princess hi a lo en mek a. Nelawm thei ang bera nuih pah chuan,"Melanie, Rosalind leh Tika te khian eng nge an sawi i hre duh em? Ka lehsak ang che aw.?" ka ti a.

A mitmeng lian kekaw chuan min melh hriam hrak a, " A nuin nang hi biak a phal lo che. Nangma min lehsak pawh ka duh lo." a vin hlar a. Remote control chu dah tau deuh hmakin a pindan lamah chuan a chho tau ta nghawng nghawng a.

Rilru na tak chuan ka thlir zui vang vang a. Ka Zander-a fanu hi hmangaih tak leh duat taka enkawl chu ka duhin ka tum ve asin. A step khatna chu huatnain min thungrul ta phawt a mai. He hmeichhe naupang hmeltha zet hi ka hneh ngei ang.

Kei pawh chu ka pindanah chhoin Sheldon lehkhabu ziak chu ka chhiar ta daih a. Ka rin ai daiha ka chhiar tui takah chuan Melani emaw amah vanga ka rilru nat lam reng ka hre chang tawh lo, thawnthubu chhungah chuan ka cheng veng veng mai a ni.

Chhiar tur tlemte chaunh ka hmabak tawh tih chuan pindan kawngkhar chu a rawn inhawng talh talh a, Melanie hmeltha tak leh nelawm lo tak chu a rawn dak paw heu mai a." Hey, chhun thingpui min siamsak rawh. A nu pawhin min siamsak ziah ." a rawn ti fak fak a.

Ka nui lui hram a, ka lehkhabu chhiar lai chu dahin ka tho nghal thuai a. Choka lamah chhukthla nghalin Melanie chuan ka hnungah min rawn zui ve dat dat a.

Thingpui ka chhuan chhung chuan," Naktukah i pa a lo haw anga kawr mawi a rawn hawn dawn che em aw.." ka ti a.

Ka tawng chu hre lo ang maiin Melanie chu a ngawi hmak a, a hmui a chip hmak bawk.

"Enteh, Melanie, i nu chuan hmeichhe sual tak angin min sawi a ni thei, mahse ka sual miah lo a nia aw. I pa, i pi leh i puten an duat ang thoin ka duat dawn che alawm. Tumah pawh ka vaw ngai lo a, nang lek phei chu i hmelthain i fel ropui si a ka vaw phal teuh lo mai che."

A mitmeng nelawm lo tak chu chhete mahin a danglam lo, a hmui chu a chip ngaiin a la chip hmak bawk.

" Min ngei tawh lo la, ka ngainat ang che hian min ngaina ve la thian tha tak kan ni dawn alawm. I pa lo haw hunah thian tha tak kan ni tih a rawn hmuh chuan a lawm dawn em asin. Sahuanah kalin Zebra te, Sakei te kan en anga, Zawngte te balhla kan pe bawk anga, a nuam ngawt ang. " tia tawng mawlh mawlh pah chuan ka thingpui chhuan so chu ka suan a, ka siam nghal rak rak a.

" Naupang special tan thingpui special siam a ni eeee.." tia nui var varin a hma dawhkanah chuan ka va hunsak a.

" Chhang ka duh."

Chhang dahna bawma chhangthawp chu la chhuakin lepli leh butter chu ka chhawpsak nghal a.

Lungawi lo tih hriat tak hian a tum deuh bar a. "A nu chuan ka chhangah butter min tahsak vek thin." a ti deuh nghat a.

" Oh, Melanie, nula i ni tawh a, chung thil te chu i ti thei vek tawh tho ang chu tiraw? I theih loh chuan ka lo zirtir ang che aw.." aw dam thei ang ber chuan ka ti a.

"Ka sual lo i ti a, i sual hle si. ..thianah pawh ka duh lo che." tiin a tho phat a, thingpui chu chhuatah a leihbaw vek a, rum fahrana min melhin a tlan chhuak ta nghal a.

" Chimawmnu. " tiin ka thaw hak a, chair-ah chuan ka thu hnawk a, ka tah te a chhuak rum rumin ka hria. Phur lo zet chuan chhuata thingpui bua chu ka tifai sawk sawk a. Ka sikul naupang chu nise chuan vawi sanghnih vel beng pawtin ka suktir tawh ang mawle. Keia pawh hi kha tia lo chhang lo khan ngawi rengin butter kha lo tahsak mai ila tha tur.

Chhun thingpui ngheitir ngawt chu dikin ka hre si lo, a tawng thei ve reuh nasa mai sia a pite bulah khan min hek zet zet ang tih ka hlauh avang chuan thingpui dang chu siamsak lehin chhangah chuan butter ka tat nghal vek bawk.

Chhang leh thingpui chu tray-ah dahin Melanie pindan lamah chuan ka chawi chho ta a,"Naupang hlaua ka'n phi buai chiam chu le." tiin ka phun sap a, za lo tak chuan ka nui sak a.

Nui lui hram hram chung chuan, "I thingpui leh chhang ei tur ka rawn ken che asin, butter pawh ka tat vek tawh a, puar deuhin i ei dawn nia aw. I ei khamah i ni Athu-i dawrah kan leng daih dawn nia." tiin tray chu a khumah ka dah a.

Rang takin chhang chu a lo ban thuai a, tui tihhmel tak hian a keih hmak hmak a, a thial zui niau niau a. A thingpui lem khalh pah chuan," Khawiah mah i bulah ka leng duh lo. A nu leh a pa leh a pi leh a pu bak ka lenpui ngai lo." a ti lalh lalh a.

"Zet zawt che hian a!" tia ben fawlh mai hi ka chak zek zek mai, mahse beng ta lo chuan ka thaw halh ta zawk a. " Aw le, kan len loh pawhin Pi Mali a rawn haw hman loh chuan rawng kan bawlpui ang a, tlaia kan ei tur tui tawkin kan siam dawn alawm. Chawhmeh siam dante ka zirtir ang che a, i pa eitur tui deuh deuhin i la siamsak thin dawn alawm." tiin chawh phur tum tak chuan ka thlem hliau hliau a.

Luhlul takin ani chu a thu ngawi ngal reng a, chhan pawh min chhang loa melh lah min melh hek lo. Tihhar hmel tak hian a thingpui chu a in a.

"Aw le, Melanie, min bawlpui peih lo a nih pawhin ka bulah tal i lo thu ve anga tiraw?" ka la ti hram a.

"Aih, a nuin kawm che a phal lo."

"Ka..." ka sawi tur ka sawi zawh hma chuan door bell a rawn ri a. Ka nu leh pate chu rin ai takin an rawn haw hma a nih dawn chu mawle. Kawngkhar hawng tur chuan ka chhuak ta a.


******

💞I💞NEED💞YOUR💞LOVE💞MORE💞THAN💞I💞THOUGHT 💞

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » August 15th, 2021, 4:22 pm

BUNG _ SAWMPAKHATNA

Kawngkhar ka hawn chuan ka nui var var a, "Ka rin aiin in rawn haw hma..." keimah min hmachhawn zawnga hmeichhe hmeltha fuh lutuk leh nalh chungchuang tak lo ding ka hmuh chuan ka tawng lai chu ka tawp chawt a."Ah, lo leng rawh. Eng nge ni ta? Puih theihna che ka nei em?" hawihhawm tak chuan ka ti thuai a.

Chu nu chu a nalhin a hmeltha kher mai a, a ria thlarh a, a vun chu a noin a man nalh hle. A sam uk khak chu a mawi tawk chauh hian a kir, khabe phir thai leh hmui pan lam hi neiin a hnar ngul chu a nalhin a meng mawi kel kawl hle bawk. Mizo hmeichhia ka hmuh tawh azawngah chuan a la hmeltha ber awm e ka ti.

Za lo taka then sak chung chuan," Zander-a nupui thar em ni i nih? Nge an awmpui nula zawk?" a ti a. A aw chu a changin a kha fak mai.

" A nupui ka ni e." aw nelawm loh theih tawp chuan ka ti a. He hmeichhe nalh tak lakah hian chhiahhlawh nula tluk lek ni maiin ka inhria, ka landan nalh lem lo tak avang chuan ka tim deuh hlekin ka hria.

Chik zet hian chu nu chuan ka lu chhip atanga ke ler thleng chuan min thlek vei ngial a, a heh pan hlang chu sexy zet hian a han pet sawi a," Zander hian nangmahah hian eng nge a hmuh le? A neih chhan che hi ka ngaihtuah chhuak zo lo." hnehsawh zet hian min tihkhum a.

A mi hmuhsitna awka chu paidaih har ka ti ngang mai a, awka nelawm lo leh vawt raih chuan, " Ka pi, tu nge maw i nih a eng nge i duh a? Min rawn elsen tur ngawta rawn kal chu i nih ka ring lo." ka ti ve ta a.

Min tham lo zet hian a hmui chu min ner khum a, a nui deuh sawng a. "Tu nge ka nih i hre lo maw? Melanie nu ka nih hi. Ka fanu rawn hmu tur leh Zander-a nupui chu eng ang mi nge anih hre tura rawn kal ka ni a. Zander hian hmeichhe hmeltha leh changkang deuh hlek a thlan ka lo rin nen, an awmpui nula nupuiah a nei duh ang tih rin ngaihna reng ka hre lo a." a ti lang lang a.

Nie, Melanie thingpui tur ka siamsakna lama ka apron awrh kha ka lo la awrh reng a ni tih ka inhre chhuak chiah a. Melanie nu ni awm reng a ni alawm, nufa dik tak an lo ni chiang e.

" Aw le, Zander-a nupui duhawm tak chu i hmu ta alawm. I fanu hmu tur chuan rawn lut ta che." tiin ka nuih sak a. " Pi Mal, hei inleng kan nei dawn a, in chhunga thil hlu te kha a bo loh nan lo mitmei deuh ang che." tiin ka au lang lang a. " Oops! Pi Mali a bazar tak e. " tiin ka nuih sak a.

" Rukru emaw min ti em ni?" thinrim hmel lutuk chuan a ti a." Zander hian ka chanchin a hrilh ngei ang che maw?" a ti leh ngat a. Ke chheh zei zet chuan in chhungah chuan a rawn pen lut ta a.

Ka dar ka san ak a."Ah, sawi tlakah a ngai lo a nih ka ring min hrilh ngai hauh lo. Melanie nu chu a thi tawh turah ka lo ngai ve ngawt a...mitthi tawh chanchin sawi nuam an ti loah ngaiin zawh enah pawh ka lo en hleinem." ka ti sak a.


Mitmeng thip tak chuan min rawn melh kawk a, "I chaltlai reuh hle mai. Nang ang mihringin Zander i nei thei hi thil mak a ni. Zander hi a à ni hialin ka ring." a ti ram hmak a.


" I fanu hmu tura rawn kal nge i nih a min rawn elsen khum turin?" ka ti vawt raih a." Ka ngaihdan chuan Zander nen kan inkar hi i sawi tur awmin ka hre lo. Mi à zawk chu Zander ni loin nangmah zawk hi i niin ka hria. I fanu rilru thianghlim takah chuan huatna tha lo tak i tuhsak a, hei hi mi pangngai tihchi ni loin mi à leh rilru lama harsatna nei tih chi niin ka hria." ka ti ve salh a.

Ani chu a nui ta hawk hawk a," Ka fanuin a duh lo bur mai che chu i la na hle mai maw? Zander hian a fanu hi thil dang zawng aiin a ngai pawimawh a, a fanu berin a ngainat theih loh che a a huat bur mai che chuan i laka a rilru put dan pawh a thlak danglam vat dawn tih ka chiang a ni, my dear." a ti a.

Chutih lai chuan Melanie chu a rawn chhuk ve a, a nu a hmuh chuan hlim zet hian a rawn be nghal siam siam a. A hlim hmel chu a thain a eng set mai a. Chu mite nuga inbe lai chu thik rilru takin ka lo en vawng vawng a. Melanie hian a nu angin min en ve thei se ka ti ngawih ngawih a.

Ngai tih hriat tak hian Melanie chuan a nu chu a bawh nghal cheng cheng a," A nu, i bulah min hruai ve daih rawh. He nu rawn awm atang hian a pi pawhin min hau nghal ringawt a nia." tiin min rawn melh ram ram a.

Melanie nu chuan Melanie chu a nam sawn nghal dawrh a, "Melanie, ka kawr i tichuar khaw lo zo dawn. Kha tin min bawh huam huam teh suh." tiin a vin hlara, a kawr chuar lai chu a zut mam nghal mawlh mawlh a.

A tawngkam atang chuan a fanu aiin incheina a ngai pawimawh zawk tih ka hrethiam nghal mai a. Melanie inthlahrung hmel ti dek chu ka lo lainat rilru khawp mai a. He hmeichhe rilru chhe tak hian a fanu hmuh tuma lo kal ni loin keimah min rawn thlithlai tuma rawn kal a ni tih ka hrethiam nghal uarh uarh mai. A fanuin a lo ngaih tehlul nen lo biak lumlam emaw lo chhawnchhaih emaw pawh a tum chuang hek lo.

Tlai lamah Pi Mali a rawn haw chuan ka thaw a veng huai mai a, kan nufa-i te chu kalsanin Pi Mali chu ka pui ta daih a. Ka nu leh pate rawn haw thleng chuan a la awm ta char char a, hnawk ka ti ru ang reng hle a ni.

Ka pa chuan nui suk chung chuan,"I rawn leng a ni maw, Saii?" tiin Melanie nu chu a bia a. Ka nu erawh chuan biak pawh be loin Melanie chu a chhawnchhaih daih thung a.

Rei vak lo hnu-ah chuan Melanie chuan chhuanlam eng emaw siamin a haw ta daih a, a haw dawn chuan a fanu biang chu a piai vei zauh a.

Pi Mali thingpui siam sa chu ka nu leh pa ka va pe thuai a," Vawiin office lam hna in tluang maw?" ka'n ti ve ngawt a.

" Aw lutuk mai. Nang i nau awm eng nge a an?" tiin ka nu chu a nui sak a.

Melanie chu ka va melh zauh a," Naupang fel tak a ni e." ka ti ta ngawt a.

Thingpui in zawh chuan ka pa chu a tho nulh a, "Ka'n inbual hmasa ang e aw." tiin pindan lamah chuan a chho ta a.

Kan pahnih chauha kan awm hnu chuan," Saii khan eng nge a rawn tih a?" tiin min zawt a.

"A fanu rawn hmuh a duh niin a sawi a."

"Dawt a nih chu, a fanu hi chhete pawhin a ngaihsak ngai lo a, tun ataka rawn ngaihsak der vel hi a peih ngawt mai. Diktak chuan nang do tura a fanu a fuih a duh mai niah ka ngai. Ka hmu nikhua lo lak lawh tawh a, ka hmu pangngai thei tawh lo reng reng."

"Kei min do tura a fanu a fuih chuan eng hlawkna nge hmuh a inbeisei le?"


"A suahsual tukhum pawn vang mawle. Melanie a pai lai hian lehkha an la zir laklawh nen inneih mai a la rem si lo a, an inneih dawn loh chuan naute chu tihtlakah Zander chu a vau nasa mai a, keimah ngei pawh min rawn vau a ni. Naute a tihtlak ai chuan tiin kan inneihtir ta a, kan kiangah chuan thla hnih pawh a awm duh loa, a nu te hnen lamah haw lehin naupai chung chuan mipa hrang hrang a kawp kual a. Zander-a run luih nan a hmang niin ka ngai a, Zander lah a rilru a na em em mai a, a zirlai pawh a zir tha thei lo hial a ni. A nu te in lamah chuan Melanie chu a hring ta a, thla hnih pawh a tlin hmain pasal dang a umsan ta a. Hmeichhe rapthlak leh mahni fate pawh hmangaihna nei lo a nih hi." tiin min hrilh ta malh malh a.

"Oh, thla hnih a tlin hmain mipa dang a umsan thei maw?" ka lo ti ha a.

" Umsan e mawle. Naute chu kan la a, kan enkawl chho ta a ni."

Rapthlak ka ti kher mai. Fa lo nei ve ta ila chutiang chuan ka tih ve theih ka inring lo a ni."A mak hle mai." ka ti sap a." A nih leh tunah pasal a nei lo em ni?" tiin Melanie nu, hmeichhe hmeltha lutuk chu ka mitthlaah a lo lang uar uar a.

" Nei leh hrih tawh lo a niang. Pasal nghet hi kum khat chhung pawh a nei thei lo a ni ber e, a nei a, a then leh chutiang reng reng a khawsa chu a ni.Zander nen an inthen hnu pawhin pasal pali ngawt a nei tawh a, miin a chanchin an sawi a min zawh changte hian Melanie nu a lo ni kher kher hi hrehawm ka ti thin. Mite lah chuan a chanchin chhe lai hi min hrilh chak zawng tak a lo ni nen."

Ka nu bawk chuan, " A nunchang leh a rilru hian zir se chuan pasal tha tak a nei thei tur hi a ni a, a hmelthat tehlul nen a nun hian a zir mawlh si lo a. A nungchangin a zir loh em vang hian Melanie hmuhtir vak pawh ka phal lo a, Zander rilru neih let leh a tum chang hian a fanu hi a rawn ti tha huam a, a fanu lahin a lo ngai thei phian bawk si." a ti a.

Ka nu chuan Melanie nu chungchang chu zep awm hauh loin min hrilh fai ta vek a, a huat zia lah thup a tum buai hek lo. Chutia a tunhma hun hlimawm lo tak min hrilh ta vek mai chu Zander chu a lawm vakin ka ring lo naiin ka nu bulah chuan engmah ka sawi chhuak lem lo.

Zanriah ei kham chuan sitting room-ah TV kan thlirho a . America Got Talent Show kan en a hmuhnawm kan ti hlawm phian a.

"Naktuka Zander rawn haw hunah i lo awm reng tih hria a a hmuhthut hunah che chuan mak a ti ngawt ang mawle." ka pa chuan a rawn ti zauh a.

Ka nui sak a, "Ni e..." ka ti a. Naktuk, ni e naktuk mai khi ka pasal lo haw hun tur chu a ni ta. Ka va nghakhlel si em.

Ka piah lawka a pu mal bawha mu Melanie chu ham bai baiin a mit a nuai chat chat reng a, a mut a chhuak tawh a ni tih ka hrethiam mai."Melanie, hawh i pindanah chho ila Snow White thawnthu ka hrilh dawn che a nia.'' ka ti a.

Min hnial tumin ka a an ziau lai chuan ka nu chuan a lo melh kawk a, "I nu thusawi ang chuan awm rawh aw,Mel." a tih chan fak takah chuan a hmui chu chip leh hmakin min rawn zui ta hna hna a.

A pindan kan thlen ve leh khumah chuan a mu hlawm tal a, "I thawnthu sawi kha ka ngaithla duh lo, kal bo rawh." a ti bak hlak a.

A thu sawi chu hre lo derin a sam dum hlep mai chu ka chul a, aw zaidam thei ang ber hian, "Hman lai hian maw..lalfanu hmeltha em em mai..."

Melanie chuan ka kut chu a beng per lawp a, "Sawi tawh suh, a bengchheng. I thawnthu sawi pawh kha ka ngaithla lo bawk.Khawih pawh min khawih tawh bawk suh. I room-ah kal daih rawh, ka duh lo che." tiin a mitmeng dum fiah kal mai chuan min melh ran mai a.

Thinlung rit tak leh hlim lo zet chuan ka melh a,"Melanie, i eng pawi mah ka sawi si loa, enga ti nge min huat em em a? Thian tha kan ni thei lo em ni?" ka ti sap a.

"A pa nupui i nih vangin ka duh lo che. A nu pawhin min hrilh vek a ni A pa i neih chhan chu a pawisa i duh vang leh keimah min vuaka min hauh hrep hrep i duh vang a ni. In khuaah haw leh daih rawh. Nu hrawn sual tak i ni."

Ka rilru na lutuk chu muangchangin thawk ka la ham ham a, ka mit chhingin ka inhum ruh ngawt ngawt a. Melanie nu ka huatna chu a zual sauh mai. Tunah hian ka bul hnaiah awm se chuan keh(kek) bawrh bawrh mai ka duh hial ang. A fanu bula a thusawi hi a hre chiang loin a nghawng tur pawh a dawn thleng pha lo a ni ang e. Ama fanu nun ngei chu a tihchhiatsak a nih tak hi.

Chutah ka mit chu mengin Melanie chu ka melh vawng vawng a, harsa ti tak hian,"I nu chuan engmah hre chiang loin a sawi ve tawp a nih chu. Nangmah hmangaih tur leh duat tura rawn awm ka ni alawm." ka ti a.

"Kal bo rawh. I bula awm ka duh lo."

"Mangtha." tiin ka inher nghat a, ka pindanah chuan ka phei ta nghal a. Khumah chuan bawk thlawpin lukhamah chuan hmai ka phum vang vang a, "Zander, ka bulah hian awm la,i fanuin min tawngkhum dante hi hre ve la ka va ti tak." ka ti rilru mawlh mawlh a. Ka rilru natna min chhawk turin ka kianga awm turin ka mamawh a ni. Rawn haw sela engkim a fel duak mahna, chu chu ka innghahna awmchhun a ni.

Melanie tawngkam huatthla la tak tak avang khan ka amah ka huat phah lo, kha tiang tawngkam tha lo zirtirtu a nu chu ka haw zawk a ni. Eng vanga a fanu thunlunga keimah huatna nasa tak lo tuh nge a nih tih hi hriatthiam ka tum buai peih lo.

Chutiang vel ngaihtuah chung chuan ka lo muhil ve ta mai a. Ka mumangah chuan Melanie hmel hlim sarh mai hi hmuin hlim leh inngeih tlang takin kan lo nui dun hawk hawk a. Naute lem nalh lutuk hi krismas present atan la lo pe a, Melanie chuan hlim lutuk hian min lo kuah cheng cheng a," A nu, ka lawm lutuk. Khawvel nu zawng zawngah i fel ber. Nu, ka hmangaih che." min lo ti a.

Kan piah deuhah chuan hlim vanga meng de sawr sawrin Zander chuan min lo melh a, "Zander, lo kal rawh." tiin ka lo hui a, ani chu a rawn phei thuai a. Kan bulah thingthiin min lo kuah dun a,"Tunah chuan kan chhungkua ka hlim ta tak zet e." a lo ti a.

Ka thanharh chuan ka mumang chu ka ngaihtuah zui nauh nauh a, a tak tak ni thei se ka ti ngawih ngawih a ni. Eng tikah nge Melanie hian, 'nu' tiin min koh ve ang? Zander a rawn haw hunah chuan kan inkar boruak pawh hi a tha chhawm ve dawn a ni mahna, chu chu ka mumangin min hrilh a tum chu a ni thei ang em?

Muthil zawm leh mai ka tum chhung chuan khua a lo var tan der tawh a. Rang takin ka tho thuai a, tukin chu thoh ka hai tawh lo chiang khawp ang chu.

Hmaite ka phih harh a, ka inthlak zawh chuan choka lamah ka chhuk thla a. Pi Mali meuh pawh ka thoh khalh a ni. Ka nu leh pa an rawn thoh ve meuh chuan thingpui ka lo chhawpsak thei nghal thlap a.

"I va tho hma awm ve a, Zander a rawn haw dawn vangin i mu tha thei mang nange." tiin ka pa chuan min lo fiam zauh a.

Hlim taka nui var var chung chuan," A lo haw dawn tih pawh ka lo hre tawh miah lo a." tiin ka meng ralh ralh a.

Ke han thluan mar paha zi mar ar ar chungin ka nu chuan, "Vawiin chu chhungkua kan kimna ni tur a ni bawk a ni chhuak pawh hi a mawi danglam riauin ka hria. A pa a rawn haw meuh chuan Melanie pawhin a zia a thlak ve tawh em ang chu." ka nu chuan a ti a.

"Kei pawh chu chu ka beisei a ni."

Kan tawng hre pha chiahin Melanie chu a rawn lut a, a rawn tum lut nghal hle ringawt a. Tum bar chung chuan dawhkan chu a rawn kil a, " Thingpui ka duh ve." a ti bung nghat a.

Thingpui leh chhang chu ka lo chhawpsak thuai a, hlim taka nui var var chung chuan, "Melanie, vawiinah i pa a lo haw dawn sia in chhung lo tifai dun ang aw? In chhung i tifai tih a hriat chuan i pa chu a lawm ngawtin ka ring a ni." ka ti sarh sarh a.

Melanie chuan ka tawng chu hria awm pawhin a awm duh lo a, thingpui chu ngawih rengin a in malh malh a Min chhang dawn ta lo emaw ka tih hnu chuan,"Ka duh lo." a ti a.

Min chhanna chu haider luiin ka be lui zel a. Ka rilru a hlim em avang chuan Melanie hmel tum bar pawh chu ka ngai pawimawh zo tawh lo. Engkim mai chuan ka rilru hlimna chu min tawmpui ve ni mai hian ka hria a, ka zangkhaiin ka phur sarh mai a ni.

Chaw kan ei thleng chuan eng eng emaw sawiin ka ri bawrh bawrh reng a. Ka nu leh pa lah chuan ka phur vel lutuk chu min lo nuihpuiin min fiam nan tak an hmang a.

Ka nu leh pate hna lama an kal hnu chuan in chhung tifelin ka buai nghal malh malh a. Chhuat ka nawh lai chuan Melanie chu thutthlengah thuin min lo melh ran a.

" I pa a lo haw dawn sia chhuat ka nawh chhung hian i pindanah lo han chhoin i thawmhnaw kha lo han thlak la, lo inchei ve la aw..." tiin ka nuih sak a.

"A piin min chei thin."

"Nula i ni tawh a, nangmah pawhin i inchei thei hrim hrim ang tih ka hria a ni. Tunah chuan ka la buai a ka la chei hman rih lo che a." dam thei ang ber chuan ka ti a.

"Keimahin ka inchei dawn lo."

Melanie chu ka va melh kawk a," Ka la buai hrih lutuk a, ka la chei hman lo che a nih hi." ka ti a.

Ani chuan min rawn melh let kal mai a,"Ka intifai chuang lo ang." a ti hmak a. A thutna atanga thawh pah chuan dawhkana ashtray chu a su tla lut deuh ngat a, in chung lamah chuan a chho tau ta nghawng nghawng a .

Ngawi rengin ashtray chu ka dah tha leh mai a, ka rilru chu a na ang reng hle mai a. "Melanie, hetia inrunluih hian kan karah eng thil tha mah a thlen lo ang." ka ti sap a.

In chhung sekrek ka khawih zawh hnu chuan ka inbual fai nghal sar a, thawmhnaw faia ka inthlak hnu chuan ka sam ka khuih anga Melanie ka va ngaihsak chauh ang ti rilruin samkhuih ka lek kang chiah tih chuan kan kawta motor inhung thawm chu ka hre ta a. Phur lutuk hian ka samkhuih ken lai chu dahin ka tlan thla nghal hlawk hlawk a.

Kawngkhar ka nam hawng rawkin pawnah chuan ka tlan chhuak nghal a.Ka lungphu chu a rangin a inthum rawn tluk tluk mai a. Hlim luat vanga mittui parawk kiangin,"Zander! " tiin ka au that a.

Zander chu a rawn hawi chhuak vat a, mak ti lutuk hian min melh tlawk tlawk a. A chu a that ngaiin a la hmeltha reng mai. Tlemin a cher deuh leh mut hmu tlem tih hriat taka a hmel pawr deuh fap tih mai loh chu a la danglam lo hle a ni.

Rin harsa tih hmel tak chuan a thaw kawk a, chutah aw lawi rut hian, " Karei! Zikpui! Ka mumang nge ka mitvai zawk?" tiin a mit chu a nuai nawk nawk a. Ka lamah chuan a rawn tlan phei a min kuah chawt a," Zikpui, ka ngaih zia che hi Pathian chauhin a hria a ni." a ti tham tuak a.

Kan lawm lutuk chu kan tah nuih hi a ni thawthang a. Hun rei tak inhmu tawh lo chu inthlahlel em em in kan infawp ta ngawih ngawih a.


"Ka hloh hlen tawh dawn che emaw ka tih hnu-ah he tia ka han hmu leh thut che hi rin harsa ka ti a ni. Ka ngaih ang che hian min ngaih ve pawh ka ring lo." tiin uluk em em hian min thlek vang vang a, min fawp leh ta mawlh mawlh a.

Ka hlim lutuk chu engmah pawh ka sawi hlei thei lo, a awmah chuan hmai phumin, "Ka hmangaih che,Zander." tiin ka phun sep sep a.

Ani chuan ka sam hnawk niaih chu duat takin a chul hliau hliau a,"Ka hmangaih che,Zikpui. Tunah chuan engkim a tha tawh alawm. Ka hnen atang hian tuman an la bo tawh lo ang che. I tel lo chuan ka thi lo chauh a ni ber mai. Zikpui, min ring rawh, ka nunna ai pawhin ka hmangaih zawk che a ni." a ti mawlh mawlh a.

"Thihna chauh lo chuan i hnen ata min la bo thei lo ang. I tel loa minute khat lek pawh nun leh hi ka zuam tawh lo a ni. Ka ngaih zia che hi ka sawi fiah thiam lo, ka ngai em em em em em lutuk che a ni tawp mai."

Zander chu a thaw hawk a, "Ka addicted tawh che a ni, i tel lo chuan ka nung thiam lo, i hmel hmu phak lo mahila ka ngaihtuahnaah i cham reng a, ka thlahthlam ngai lo che a ni. Mipa tiha mawi lo mahni se ka ngaih lutuk avang che hian zan eng emaw zat chu ka tap tlaivar asin." tiin min kuah nghet sauh a.

Ka tah nuih titih hi a ni berin ka hria, thlamuang takin a awmah chuan ka bei hle hle a, "Tunah chuan i bula awm hlen turin ka rawn kal tawh a, tuman min pawt then tawh lo ang." ka ti sap sap a.

" I nutate pawhin maw?"

"Aw. Ka nutate emaw ka nu leh pate emaw pawhin min pawt hrang dawn tawh lo. An phalna leh remtihna nen thlapa rawn kir ka nih hi.

" Chuti..." a ngawi deuh vang vang a, chutah a nui ta sak a. " Sawi dun tur kan ngah lutuk tawh tlat. He tia ding chunga sawi zawh mai chi pawh a ni lo. Hawh in chhungah i lut phawt ang." tiin Zander chuan min pawm lut ta vaw vaw a.

Ka nui ar ar a, in chung varanda atang chuan Melanie chuan meng dur khapin min lo thlir reng a ni tih ka hmuh chuan ka nui lai chu tawp chawtin a awmah chuan ka hmai chu ka thukru ta a.

Melanie chu thinrim lutuk vanga mittui tla parin a pilbo ta a.

In chhung kan luh veleh chuan min nghat nghal a," Thingpui i duh em? Nge coffee? " ka ti a.

" Thingpui emaw coffee emaw ka mamawh lo. Nangmah alawm k mamawh chu. Ka nun khawhar leh ruak tak hi i hmangaihnain han chhung khat teh." ka beng bulah chuan a ti sa sa a, min kalsawntir phal lo chuan min kuah bet leh ta hle hle a.


Hnial pawh hnial der eih lo chuan Zander awm ngheng chuan ka thu ve leh mai a. A nu leh pa ten min rawn hruai dan vel chu chiang takin ka hrilh vek a, mahse Melanie nen kan inmil loh thu erawh ka hrilh ta lo.

Ka sawi zawh chuan a thaw huai a, la ring zo lo ni awm tak hian, "I nu leh pate chuan kan inneihna chu an pawm tak tak maw? Ka hnen atanga an lakbo hnu che a ka tal buai zia kha hre ve la chuan min khawngaih loh pawhin min hmusit zawk tal ang. I nutei te lah khan i chhungte phone number min pe duh bawk si lo a, ka buai a ka buai zia mai kha."

" Ka chhungte pawhin ka nutei te chhung rilru that loh zia chu an hrethiam ve tawh ngei ang. " ka ti halh a. "Kan hun hrehawm chu kan pel tawh a, tun atang chuan hun hlimawmin min hmuak tawh ang. Ka chhungte chuan an bula mas hmang turin min duh a, an makpa hmel leh mizia hmuha hriat an duh a ni." ka ti leh a.

"Kar thar khian kal kan tum dawn nia, min hmuh hunah chuan an fanu hi ka hmangaih a, ka atchilh bawk a pathian biakin ka be lo chauh a ni tih an hrethiam ve ngei ang." tiin a nui hak hak a.

"A paa.."

Aw lo chhuahna lam chu kan hawi rual thawt a, step tawpah chuan Melanie chu tahna vanga mit sen ramin a lo ding ran a.

Zander chu a fanu pawm turin a tho thuai a, "Ka naute, hetah i lo awm ve reng si a, enga tinge ka lo thlen tirh khan min lo hmuah v loh?" tiin a fanu chu a pawm a, a biang tawn tawnah chuan a fawhsak a. "Teddy bear lian tawk, nangmah ang tiat ka rawn hawnsak che asin." a tih chuan Melanie hmel chu a lo hlim ta viau a.

"A nu hian a lo duat che em, ka naute?"

Melanie hmel chu a rawn dur nghal khap a, "He hmeichhia hi ka nu a ni lo...ka duh lo. Amah pawhin min duh lo. A pa, he nu hi hawtir daih rawh. " a ti ngal ngal a.

Link:
BBcode:
HTML:
Hide post links
Show post links

Local Advertisement

MOBILE SIAM ZIR DUH TAN!!!

Tech-Inn Mobile Repairing Traning Centre, Bazar bungkawn

Kum tin mi za chuang eizawnna kan siamsak a, Eizawnna tlaka thiam turin kan zirtir thin

Mizorama mobile siam zirna hmasa ber changtlung ber kan ni. Hrechiang duh tan Contact : 9612099411 / 9862016122


Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » August 15th, 2021, 4:23 pm

BUNG_ SAWMPAHNIHNA

Zander chu a meng zim san a,"Melanie, i nu hi 'he nu' i ti tur a ni lo, i zahin i hmangaih hle tur a ni. Tawngkam mawi lo tak i hman leh chuan a tha lo ang." a ti vawt raih a.

"Ka nu a ni lo. Ka hua a ni."

" KHATI'N TAWNG SUH !"

Melanie chu a pa awki sang avang chuan a tap ta a. Zander chuan thlem pahin a samah a chul hliau hliau a, "I nu hi ka hmangaih a, nang pawhin i hmangaih ve tur a ni. Ka motor-ah i Teddy Bear tur chu a awm a Pi Mali nen lo va la rawh u." a tih chuan a tap chu bangin choka lamah a tlan lut a, Pi Mali chu rawn kai chhuakin pawn lamah chuan an chhuak dun ta a.

Nuam lo ti tak hian Zander chu ka melh a, "Pawi ka ti lutuk, Zander. Inngainattir tum chuan theih tawp chu ka chhuah ve alawm...mahse a theih ngang rih lo a ni. " ka ti a.

Ani chuan min rawn kuahin ka sam hnawk niai chu a hmuiin a nawk na na a. "Engkim hi a la tha vek mai ang. Melanie hian a haw hauh lo ang che, a nuin a huat chawptir a ni ngat ang."

"A nu tih a ni tih engtin nge i hriat zawk?"'

" A nu mizia hre chiang tan chuan rinhlelh rual a ni hleinem." tiin ka chalah chuan min fawp zauh a. "Tuna ka mamawh ber chu tuma chimbuai phak lohna hmun falah kan pahnih chauh a awm hi a ni. Melanie chu theihnghilh hrih la, keimah chiah min ngaihsak hrih rawh. Ka ngaiin ka thlahlel ngawih ngawih che a ni." a ti tham chal a.

A awmah chuan hmai ka phum kak a,"Oh, Zander, engtik lai pawhin ka ngaihtuah che alawm. Ka ngaihtuahna ata hi i pengbo ngai lo asin. I hmel hmu loa ka awm khan ka ngai em em che a, tunah i bulah ka awm a, ka lo ngaih zia che kha ka inhrechhuak zual a ni."

Chutih lai chuan Pi Mali leh Melanie chu an rawn lut leh a, amah ang tiat vel teddy bear hi a rawn pawm tatin a rawn nui lut ver ver a. A pa nen insi chiala kan thu a hmuh chuan a nui hmel chu a reh nghal hmak a, hriam hrak hian min rawn melh a

"Melanie, i room-ah lo han chho la i teddy bear kha lo han infiampui rawh aw. I nu hi thil pawimawh ka'n sawipui lawk ang e."

"Apa, he nu awm hma kha chuan min duat hle sia tunah chuan amah chiah i duat tawh."

Zander chuan a heh a pet zauh a, " Tunah pawh ka la duat reng che alawm."

Tum bar chungin a pindan lamah chuan a chho ta nghang nghang a. A liam dawn chuan rawn hawi let lehin rum lutuk hian min rawn melh ta khai a.

"Zander.."

"Ni lo, bawihte, engmah sawi hrih suh. Thilndang zawng zawng chu theihnghilhin kan pahnih chauha khawvelah hian i cheng dun rih ang. Kan tuar hnem tawk tawh a, hlimna hi kan phu ve tawh a ni." tiin min fawp zauh a, ka inrin hman hma chuan min pawm kang nawlh amut pindan lamah chuan zo zet hian min pawm chho ta vaw vaw a.

Hlim tak chuan ka nui ar ar a, "Zander, min nghat rawh. Keimahin ka kal thei reng alawm." ka ti chung chuan ka kuah nghet sauh sauh lawi si a.

****

Mumang hlimawm tak atanga ka harh chhuah chuan ka nui var var a. Zander-a va kuah mai tum chuan ka inlet thak a, a mutna chu a lo ruak huai tawh a. Min thohsan tawh a ni tih ka hriat chuan ka tho chhuak ve vat a. Zander-a lukham delhna khuar kak chu ka chul a, ka hlimna leh lawmna ber chu a va ni tehlul em.

Ka thoh atanga minutes sawm hnu chuan choka lamah chuan ka chhuk thla ta a. Step tawp atang chuan Zander-ate pafa nui ri hawk hawk ka hre ta a, ngaihthlak nuam ka tiin ka nui ta sak a. Choka kawngkhar atang chuan an pafa infiam lai chu nui sangin ka lo thlir a.

Engtik hunah emaw chuan Melanie anga hmeltha hi fa ka la nei ve ang a hlim takin Zander hian a la infiampui ve anga...ka suangtuahna chuan min tih hlim em avang chuan ka nui ta sak a.

"Good morning, darling. I mitmeng det sar sar danah thil eng emaw hlimawm tak i ngaihtuah tih ka chiang a ni."

La nui var var chung chuan," Good morning." ka ti sap a. Melanie lo tum bar chu haider luiin ka nuih sak a," Morning, Melanie hmeltha." ka ti sap a.

Melanie chu nuih pawh a nui ve hauh lo, a hmui chu chip hmakin engmah sawi lo chuan min melh ram ram a, choka atang chuan a chhuak ta daih a.

Awm nuam lo deuh chuan dar ka san ak a,"Ka nu te hi an la tho lo em ni?" tiin Melanie awm dan vel chu ngaihtuah loh hram hram ka tum a. Pi Mali chuan thingpui min lo thlit ta nghal a.

" An bazar a an lo haw tep tawh ang. Vawiin chu nilengin i bulah hun hman ka duh dawn a, khawiah emaw len chhuah tumna rilru i lo nei a nih chuan theihnghilh ang che." mit min siai khum sak pah chuan a ti a.

"Chimawm pa!" ti hlakin thingpui chu ka in khalh a. "Melanie hi sahuan lenpui ka lo tiam tawh sia kalpui ila ka lo ti deuh a. Hman phei chuan Hruaia tlawh ila."

"Sahuan tlawhnan khua a la tlai hleinem. Tunah rih chuan darkar tin minute tin hi i bulah awm a, tam thei ang ber i bula hun hman ka duh a ni. " ka hnar a rawn fawp zauh a. "Hruaia chu tlawh a ngai lo. A tha tawh lutuk ringawt. Amah zawk a rawn lang leh tep tawh ang chu mawle." tiin a nui hak a.

Chu mi nileng chuan kan inawm dun a. Hun rei tak lo inhmu tawh lo kan ni bawk a kan inthlakhlelhna chu a sang hle tawh a ni. Sahuana kan kal leh lo chu inchhirna reng ka nei lo, ka hlim lutuk...ka hlim mah mah a ni.


Tlai lamah chuan bazar pahin Athu-i dawrah chuan kan leng a. Min lo ngai der ve hle a, thil ei tur te min chahsak nghal sawk sawk a. "Surprise che kan duh vangin Zikpuii rawn haw thu pawh kha kan hrilh duh lo che a nih kha." tiin a nui hak hak a.


Ani chu a nui suk duh chauh a. " In ka thlen hlima a hmel ka hmu chiah kha chu ka lawm lutuk a ka phu hlum lo chauh mawle." a ti a. "Kar leh khian Champhai lamah chhoh kan tum a, Saitluanga hmu tura rawn kal ve i duh em?" a tih zawm zat a.

Athu-i chu a te that a, "Awii..Zikpui, i lo hrilh vek hman a ni maw? Unaunu tawngthei tak ka nei dawn a ni maw?" a ti hlak hlak a. "Zander-a ngaia ka bula i tah thu te kha ka zeppui lo tawp mai tur che asin.." tiin a nui har har a.

"Ka u nupui i ni tur hi ka chhuang em mai che a sawi lo thei ka ni hleinem. Kan rual chuan i rawn kal ve hman ang em?"

"Ka hman emaw hman lo emaw ka rawn kal ve dawn hrim hrim a ni tawp mai. Nang ni pahnih anga lunglen tuar huai ka ni ve si lo a, ka hun remchang hmuh hmasak ber chu a umin ka um chung chung dawn."

" Mipa hi i ngaihtuah vak lo emaw ka ti a, hetia awlsam taka i tlu leh mai hi chu mak ka ti ve deuh." tiin Zander chuan a fiam zauh a.

"A hmel hmu la chuan mak i ti rei hauh lo ang mawle. A hmeltha danglam bik em a ni."

Za tak hian ka lo nui hawk hawk a, ka lo nui chu Athu-i chuan a run kher mai, "I Zander ai hian kei chuan a letin tha ka ti zawk asin." a ti hmak a.

" Ka hnial hauh lo mai che. Hmelthate chu a thlirtu mit a zir a ni mai."

Champhai zin hun turte sawi hoin kan phul vel chul a. Bazar zawha tlawh leh intiamin bazar tur chuan kan chhuak ta a.

Kut inkai riala kalin eng eng emaw sawiin kan nui dun hawk hawk a. Kan mi tawhte lah chuan min kal pelh hnu pawh chuan min la rawn thlir zui leh hram thin a. "Kut inkaia kan kal hi mak an ti a niang min wn duh em mai, a zahthlak." tiin ka kut chu laksawn ka tum a.

"Hmeltha an tih vang che a enduh em em hlawm che an nih kha." tiin ka kut chu a vuan bet lui ngat a.

Naupang pheikhawk chuan ka mit a la tlat mai a. Melanie bun turin a ke artui sang nalh zet mai chu ka awt ta tlat mai a, kal pelh mai chu har ka ti deuh a," Enteh, Zander, he pheikhawk hi Melanie bun atan ka awt lutuk. pakhat hi leisak ang." ka ti chul a.

Ani chu a nui sak a,"I duhawm hle mai, Zikpui. " a ti sup a. Hmangaihna a khat mitmeng chuan min melh vawng vawng a. "He ti khawp hian i ngaihsak a ni tih hria se chuan Melanie pawh hian a hmangaih lo thei lo ang che."

Pheikhawk man te chu ka han zawt vel chhin a a nalh leh mit a lak ang bawkin a man pawh a to thawkhat e. To ka tih deuh avang chuan ka tlak karh karh a, "Ka pi, hei aia tlawm deuh hlek hian min pe thei lo'm ni?" ka han ti a.

A zuartunu chuan a tir chuan a remti lo hle a,a hnu deuhah chuan "Ka lakna man ngaiin ka pe mai ang che u. Ti kha chuan lap pakhatmah kan nei lo." a ti a.

Ka fun thattir hnu chuan hmun dangah kan kal sawn ta a."Sumdawngho zet hi chu a. Ka lakna ngaiin ka pe ang che an tih pawh hian cheng fe chu an la lap tho thin." tiin a phun zui nang nang a.

"Phunchiarpa, phun phun teh suh. Mizoramah hian hei aia tlawma leina i hmuh chuan a mak ngawt ang. Kan vanneia kan hmu tlawm mai chauh zawk a nih hi." tiin la lo nuih rah rah a.

Inkai riala kan kal lai chuan kan lam pana Maduhi rawn kal chu ka hmu ta a. Ka nui lai hmel chu ka hmel hmai atang chuan a reh nghal hmak a."Zander, saw nu saw biak chakna reng ka nei lo. Kan bul a lo thlen hmain pen bosan daih teh ang. Kan laka a thil tih avang khan ka ngaidam thei lo a ni." ka ti a.

Nuih suk pah chuan, "Ngaidam la theihnghilh rawh tih kha i hre ngai lo em ni? Thil tisualtu zawk ang hrima bihruk chu a dik nang." a ti awlsam et a.


Maduhi chuan min rawn hmuh chuan hmanhmawh deuhin min rawn pan dawr dawr a, kan bul a rawn thlen chuan a nui sang a, " Zikpui, ka lawmpui lutuk che u. Hlim takin dam chhung hun in hman ka duhpui a che u." a rawn ti sawt sawt a.

Zander chu a nui sang a, chhan let tuma ka a an ziau lai chuan ka va nghawk deuh salh a, a ngawi leh ta zawk a.

"Unaunu, i mi lawmpuina hi ka phut hran lo asin." ka lo ti vawt raih a.

Maduhi chu a thaw halh a, "Zikpui, min haw hle tih ka hria, ka dem hran lo a che. In pahnih kara buaina ka siam hnem zia pawh kha ka hria a, ka inchhir tak zet a ni. In pahnih lakah hian ngaihdam ka dil tak meuh meuh e." a ti dam raih a.

"Inbum nana i thang kam chikhat leh bawk em ni?" ka lo ti let leh salh a.

"Ni lo, unbumna lam thil a ni lo. I chhungte hnenah dawt bawlhhlawh tak tak sawiin Zander hi ka lo hek a, in hlimna daltu lian ber ka lo ni thin a, mahse Bronson-a ka hmangaih atang khan ka thil lo tihsual nghawng pawi zia kha ka hrechhuak leh hnuhnawh a. Khang ka dawt sawi te khan tun thleng hian min la vaw let a ni."

Maduhi hmel chu ka en a, a tider miah lo a ni tih chu ka hre thei a, chu chuan tlemin min tidam ve deuh hlek. "Hrehawm tinreng paltlang hnu a inchhir thu sawi leh chauh chu a tlai lu hrat lo maw..mahse i ngaihdam dilna chu ka pawmsak a che. Tunah hian lo inhmu fuh remchang lo ila chuan ngaihdam min dil chu i tum dawn miah lo tihna a ni maw? Kan inhmuh remchan vanga sawi mai chu i ang ka ti deuh. Chu loah keima bulah ai mahin ka chhungte hnena zawk ngaihdam chu in dil tur niin ka hria. " nelawmna pakhatmah tel lo chuan ka ti a.

" Rawn call che ka tum thin a, ka ngam ngang lo a ni. Zaninah i nu leh pa te chu ka nu nen kan lo han bia ang. Khawngaihin min huat hi bansan hram la tun hma anga unau inngeih leh inngaina tak nih leh kha ka duh a ni." a ti malh malh a.

Ka rum nghat a, tun hma ang kha chuan ka ngaina leh thei ngai tawh lo ang tih chu chiang takin ka hria a ni. Tun hma ka lo ngainat ve thin pawh kha a mizia ka lo hriat chian loh vang lek alawm, tunah chuan ka hre chiang tawh a, ka ngaina leh ngai tawh lo ang.. Ka nui lui sak a,"Kan tum dawn nia." ti chauhin ka chhang a.

Maduhin thingpui inpuia min sawmna chu a tlai tawh thu chhuanlamah hmangin ka lo hnar a, kan kalsan thei ta hram a. "Inkawmna hun remchang nei thei ila ka ti ngawt mai." tiin min rawn au a.

"I hman hun hunah i lo leng dawn nia." tiin ka au let a.

In kan thlen ve leh,"Hey Melanie, eng nge ka rawn hawnsak che ring dik thei rawh." ka ti lut lar lar a.

Sitting room-ah chuan Melanie ka hmuh mai tak loh ah chuan ka hawi he haw a, "Nu, khawiah nge Melanie hi?" tiin ka zawt a

"A pindanah a in khual lem a nih kha."

"Ka han hmu lawk teh ang." tih leh tlan chhoh chu ka rual a. Phur takin Melanie pindanah chuan ka lut a, khum chungah hian a naute lem hmang chuan a lo infiam malh malh a, "Eng emaw ka rawn hawnsak che asin, Mel." tiin a bulah chuan ka pheikhawk leisak chu ka dah a," A tuamna kha phelhin eng nge a nih i en dawn lo em ni?" ka ti sap a.

Hmui chip hmakin ka thil pek chu a melh ran a, chutah a la lawk a, a tuamna chu pawtchhe nghal bawrh bawrhin, "I thil pek ka duh lo..ka hua che a ni..ka duh lo che." tia te tuarh tuarhin pheikhawk chu a vawm ta fur fur mai a.

Mak ti zeta a chet dan phawk hra a ka thlir lai chuan ka rilru chu a na vawng vawng a, lo leisak lo tawp ila tha tur. Ka leisak dawna ka phur zia leh hlim zia ka ngaihtuah let chuan ka na tak zet a ni. Chutih lai chuan pheikhawk khing khat chuan ka mitkoah tak chuan a rawn fuh ta siah mai a.

Thutthlengah chuan ka thu hnawk a, rilru na em emin hmai ka hup tlawk tlawk a." Lalpa, ka tuar zo tawh ngang lo a ni. Theihtawp chhuahin tihlawm tumin ka beia a thlawn mai a nih tak hi. A lakah eng ti pawn lo nung ila tuman min dem thei tawh lo ang." ka ti rilru tlawk tlawk a.

Tu emaw hian ka sam a rawn khawih a, Zander-a a nih ringin hetianga ka awm lai hi hmuhtir ka duh loh em vang chuan ka intipachanga ka hawi chhuak thuai a. Ka sam rawn chultu chu Zander ni loin Melanie zawk a lo ni reng a. Mak ti lutuk chuan ka melh phawk hra a.

Melanie mitah chuan mittui a tling pam a, a hmui chu a seh neuh neuh a, a kut te tak te chuan ka mitko a vawm fuhna chu a rawn khawih de de a," Ka tihpalh a ni. Ka tina tawh ngai lo ang che.Min ngaidam rawh, a nu." a ti tiau a.

Ka thin chu a phu hlawk hlawk mai a, Melanie hian 'a nu' tiin min ko a nih chu! Ka bengchhe ri mai pawh a ni si lo. Hlim lutuk chuan ka te chhuak rawi a, Melanie chu ka kuah ta chuk chuk a, "Melanie, min haw tawh lo tiraw?" ka ti tiau a, ka hlim lutuk chu ka tap lo chauh a ni.

A ban tetaktea min lo kuah let ve pah chuan,"Tap tawh suh aw, nu. Ka tina tawh miah lo ang che." a ti mawlh mawlh a, a tah changa a pain a thlem dan angin ka sam chu a chul vei hliau hliau a.

Ka nui chhuak hawk hawk a, "Tun atang chuan thian tha kan ni thei tawh ang tiraw?" ka ti a.

A lu bu nghat nghatin, "Aw, i thian ka ni tawh ang. I duh chuan a pa teddy bear lo hawn pawh hi i nei daih dawn nia." a ti reuh a.

Kuah betin a biangah leh a samah te chuan ka fawp mawlh mawlh a," Teddy bear ai chuan he lai naute hmeltha tak hi ka duh zawk." ka ti mawlh mawlh a.

A nui ar ar a, " A nu, ka tina tawh lo ang che. Ka hmangaih che." tiin ka biangah chuan a rawn fawp ta reuh a.

Mittui parawl par chung chuan," Kei pawn ka hmangaih che, Melanie. Tunah chuan ka thian i ni tawh anga ka fanu i ni tawh bawk ang tiraw?" ka ti a.

"Aw..a nu."

Ka malchungah thuttirin ka kuah hle hle a, he naupang hi ka hmangaih lo thei lo a ni. Tun chinah chuan a nu rilru sual tak lak atangin ka humhim tlat tawh ang. Thawm ri ka hriat chuan ka hawi chhuak thuai a. Zander chu pindan kawngkhar ngheng chuan a lo ding reng chu niin a mitmeng chu hlimna vangin a de sar sar a.

"Tuna ka thil hmuh tluka mawi leh nalh hi a awm dawn em ni?" tiin a rawn kal a kan pahnih chuan min kuah dun a. "Tun atang chuan chhungkaw hlim tak kan ni tawh ang." tia phun supin kan biang tawn tawnah chuan min fawhsak dun a.

Melanie chuan, "A pa, a nu hi ka tina dawn tawh miah lo." lo tiin ka mitko vung bar chu a chul hliau hliau a.

Ka mumang hlimawm tak kha ka hre chhuak uar uar a. Tun atang chuan Melanie tan nu tha tak ka ni anga Zander tan nupui tha tak, ka nu leh pa tan mo tha tak nih ka tum tawh ang. Hengte hi ka khawvel, ka chhungkua leh ka innghahnate chu an ni.


💞
A❤T❤AW❤P❤T❤A 💞

Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)