PAWMLAI DI BY Maveni Hmar (Completed)

Episode nei ho a hlawm a dahkhawmna
Ngaia
Site Admin
Posts: 25813
Joined: April 30th, 2016, 4:07 pm

PAWMLAI DI BY Maveni Hmar (Completed)

Unread post by Ngaia » August 15th, 2021, 4:20 pm

fsetg.jpg
PAWMLAI DI
"Nula ràl tia mi zawng zawng sawi kha ka bumna thanga i awk hi ka lainat ngawt mai che! Hmeichhia tu pawh hian an duh vek che emaw tiin i inla lu hrat a nia'ng e! Kei zawng i hmelthatna leh zeina emaw hian min tibuai ve hlek lo ang." Ka ti khur dar dar a.
"Eng maw?" a ti tuarh a, a mitmeng buang thak chu a zim san a, a hmui sexy zet chu thinrim vangin a pet ruh tlat bawk." Min bum a ni tih chu i pha ta lo tiraw? Ka dama ka thawk theih chhung chuan tumah i nei tawp lo ang ; keimah tih chauh lo chu." a ti bur a.
Elsen zet hian ka nuih khum a,"Ka nei hauh lo ang che. Nang neih ai chuan Bronson neih chu ka thlang fo ang. Ka tan awmzia i nei lo, chhuat laia meizial bung tluk lek i ni!" Ka tih khum sak sak a.
Zander-a chu a rum nghut a, rum lutuk hian min rawn melh a, ka hmaiah tak chuan min rawn beng ta siah mai a,"Hmeichhia kutthlak hi ka thil duh loh ber a ni. Mahse, kutthlak hi i phu a, i cho chhuak a ni." a ti vawt ruih a.


PAWMLAI DI

BUNG _ KHATNA


Lalduhzuali chu thlan pakhat chungah thuin a indawm kun lap a. "Zander, engah nge tawn pawh ka lo tawn che ni ? Ka rilru tina tur mai atan chuan lo piang lo zawk law law la tha tur." tiin a phun sep sep a.

Thlanmual bul lawka awm an nih vangin a rilru hrehawm chang leh a khawhar ngawih ngawih changte hian thlanmualah kalin chu hmun reh raihah chuan a inngaihtuah veng veng thin. Thlanmual reh ruih mai chuan a rilru hrehawmnate chu a chhawk ber hian a hre thin.

Rilru beidawng leh thinrim tak chuan a kut chu a humruh ngawt ngawt a, a kut tinin a kutphah a chhun nat tak viauah chuan a thaw hawk a. Zahthlak taka lo hnawltu Alexander Lalhmingliana, 'Zander' tia koh thin laka phuba lak let chu a chak et et a. "Zander, thah daih mai che hi ka duh rum rum mai. Ka lo hmangaihna zawng zawng che kha tunah chuan huatnaah a inlet ta. Engtik hunah emaw chuan ka thinlung i tihnat man leh zak taka min hnawl man hi i la tuar ve khawp ang." tiin a phun mawlh mawlh a. Chu chu a ni a duhthusam chu : Zander laka phuba laka a thinlung tihnat let ve chu.

A rum kawk a, tun darkar hnih liam ta mai a Zander leh nula chhe lo tawk bike-a inphur a hmuh kha a mitthlaah a lo lang nawn leh awn awn a." Ka hua che a ni. Nang chauh tih loh chuan min la hnar ngai lo asin." a ti leh sap a. Tunah hian a bulah awm ve ni ngat se zawng kha a hmeltha ver vawr leh tawrh har zet kha a kuttin hriam tak hian a ham chhe vek duh ngei ang. Hmangaihna hi huatna ah a inlet a nih ngat chuan tawrhhlelhawm tak a ni e an lo tih thin reng kha.

Maduhi te ang nula hmeltha leh hausa, mahni indahsang larh tan chuan hnawl han nih ngawt mai chu tawrh har tak tur a ni reng a ni. A hmelthat zia chu amah tluka hre chiang an awm lo ang. "Mipa tu pawh, ka duh zawng mi a nih phawt chuan ka nei thei." lo ti ve ngat thei khawpa hmeltha leh zei kha a ni miau a. Mahse, Zander zawng a hmelthat, zei leh a hausakna hmangin a chhai tlu zo si lo. Hei vang tak hian Zander a huatna chu a zual sauh bawk.


A mit chu a chhing vang vang a, chiang takin Zander hmel chu a mitthlaah a rawn lang leh a. Mizo mipaah chuan sang pawl tak, feet ruk leh inches khat a sang niin infiammi tih hriat hliah hliah a, taksa inphut mawi leh fit zek zawk, mitmeng buang thang mai leh hnar ngul sang vah mai, khaberuh kual invuah nghet tlet tlawt, khabe phir thai mai leh hmui sexy zet mai nei a nih kha. Kha a hmui sexy leh fawh thiam hmui zaih mai kha vawi sang tam a lo fawp tawh lehnghal. A tan chuan theihnghilh rual a ni lo.

A pian tha tak, infiammi pian zaih leh inthazo zet khan a vawikhat hmuhna atangin a hip nghal a nih kha. A hmuh hmasak ber tum chuan an Volleyball khel lai a hmu a, an club jersey chu a inhmeh tak zet a ni. A bawp sei thlurh leh a banbul sek nalh zet chu a en kham thei lo. Inthazo lutuka a han zuan paha ball a vaw laite chu Keite inthazo taka chetla vel a tehkhin ber a. A thiannu Mary bulah chuan, "Karei! Saw mihring hmelthat leh nalh dan saw nep zawh rual a ni lo. Ka la nei dawn khawp. Saw mihring saw ka taah ka siam lo a nih chuan Lalduhzuali, Hminglianzuala Hnamte fanu ka ni lo ang." a ti ngat a.

" Tu maw? Zander-a saw maw?I chang tawh lo ang tih ka hlau khawp mai." Mary chuan a ti a.

" Wow..Zander maw a hming? A hmelthat ang bawkin a hming pawh a nalh a nih chu !"

" Aw..Zander, Alexander Lalhmingliana."

" I va hriatchian hmel ve a..Engtin nge saw tiang khawpa mipa hmeltha saw ka lo la hriat ngai loh?" tiin mahni inbia ni mai awm zawk hian a Maduhi chu a phun sap a.

Mary chu a kiai sak a, "Aizawl nula zingah Zander hre lo an awm dawn em ni? A hmelthat leh a pian nalh chu thuhran nise, Mizoram Judo champion a nih mai bakah Amanda Volleyball Club-a an spiker chhuanvawr leh National level Volleyball tournament-a Mizoram ai awha vawi tam tak lo kal tawh a nih saw. Nula zawng zawng deuhthawin atchilh mah se a bialnu Sangtei bak chu ngaihtuah a nei lo an ti alawm." hriatchian hmel tak hian Mary chuan a ti zat zat a.

Maduhi chu a nui hul hak a," Kei Lalduhzuali hi Hminglianzuala Hnamte fanu ka nih chhung chuan ka duh chu ka nei ang. Ka thil duh apiang ka nei thin. Zander sawn min hnar a nih chuan cheng sanghnih ka chawi ngam sak." chapo tak chuan a ti a.

" Kan la hria ang chu."

Maduhi tan chuan han enghelh vak tur awm hek lo.A hmelthat mai bakah a pa a hausain an fa neih chhun lo ni bawk nen a duh leh a ngen apiang chu an tihsak lo ngai lo. Lalfanu hi a ni ngawt alawm, fa mal duat sual leh hmeltha chu.

An bulah chuan an thiannu pakhat Azoi chu a rawn thu ve a,"Eng thu nge maw in sawi chiam a? Volleyball khel en tura kal inni emaw ka ti a, inkhel lam pawh in en lo." a rawn ti sawt sawt a.

" Saw lai Greek pathian tluk zeta pian thiam leh hmeltha Zander-a saw mawle.''

" Oh, hmeltha lerha saw maw? A hmelthat ang bawkin a lerh a ni.Mizo Don Juan a nih saw." Azoi chuan a ti bawrh bawrh a. " Maduh, nang lah hi kar tin ngaihzawng i thlak kur zut mai. Zander Casanova saw i lo beisei leh hman pek a nih chuan theihnghilh rawh. Hmeichhe ral diktak a nih saw."

" Mary lahin a bialnu Sangtei chiah a ngaihtuah a ti bawk sia."

" Awi, tih mai a nih chu tih mai! Mihring lerh a nih saw..!" a ti ta chiam chiam a.

A thu sawi chu a nuihsan mai a, " Ani saw nei thei ila chuan ka nui reng ang " a ti zauh a.

Inkhel an zawh chuan Zander chu a nghak deuh vang vang a, hun remchang a hmuh chuan a pan hnai vat a, a su lui deuh salh a,"Sorry!" tia nui saihin a melh ralh a.

Zander chuan a lo thlir vang vanga chutah nui sakin," A pawi lo e." a lo ti sup a. A aw chu a nalh phian mai lehnghal a.

Kha mi ni atang khan an inhmelhriat tan a, zak map loin Maduhi chuan a duh zia chu a hrilh a, Zander lah chuan engahmah ngai loin a nuih liamsan mai a. Hnar rual loha a zarbuai tak rengah chuan an inkawp chho ta a.


Zander chu tihtak zetin a atchilh, a tan chuan a neih engmah ui reng a nei lo - a nulat thianghlimna nen thlengin. A bula a awm chuan engmah ngaihtuah leh enghelh reng a nei ngai lo. Dik tak chuan hmeichhia zawng zawngte hmeltha tih rawn ngaihzawnga han neih chu hawi san larh a awl reng a ni.

Zander chu a bulah awm reng mah se a thinlung hian a hlat tlat nia hriat chang a ngah thin. Chu chuan a ngaih a titha loin a thla a phang thin. A thik atan leh a ngaihsak sauh a rin zawk vangin midang a kawpsan ta a, chu chuan an inkar khi kak chu a tizau lek fang si.

Midang a kawpsan atangin Zander chuan a thlauhthla nghal hmak a, hmeichhe dang a kawp ve nghal zat a. Beiseina tawp loin Zander-a thinlung chu neih let leh tumin a bei ngat ngat a ni.

Kha mi ni - a hming hliauna ni kha a theihnghilh leh thei tawh lo ang. Zander te volleyball khel chu court sirah a lo nghak ran a, an inkhelh zawh chuan midang awm ve pawh ngai pawimawh loin a banah a lo vuan chawt a," Zander, min thlahthlam ngawt thei lo ang. I fa ka pai a ni." a ti phawng mai a. Zander a neih let lehna tur a nih phawt chuan dawt sawi mai mai te chu a pawi sa lo em!

Khami tuma Zander hmel put dan kha a la hre chiang khawp mai. A mit a zim san a, chal chuar nangin a melh tlawk tlawk a nih kha. Kha a mitmeng buang thak khan a dawt sawi zia chu a rawn hre fiah vek ni hian a lang.

A thiante chuan, "Zander chu kar lohah fa i nei mai dawn a ni maw?" tiin an lo fiam nak nak hlawm a.

Zander chu a nui hauh lo, a rum nghut a,"Titipui lawk che ka duh." tiin dim fahran lo hian a banrekah manin an piah lawka a car lam pan chuan a kai phei dawr dawr a, car chhungah chuan a nam lut nawk a. " I thu sawi awmzia kha eng nge ni? Dawt leh inbumna hi ka ngaina lo a ni tih hi hre nawn leh ang che." a ti hriam hrak a.

A chil a lem khalh a, chu mitmeng buang thak leh fin hmel tak chu melh let ngam loin chhuat lam a bih ngar a. " Dawt ka sawi lo, i fa ka pai miau alawm. Min nei ngei tur a ni." harsa titak chuan a ti hram a.

Chutah za hauh lo hian Zander chu a nui hawk a,"Dawt i sawi dawn anih pawhin dawt awihawm deuh hlek sawi tur i hre thlawt lo em ni? Thla hnih deuh thaw kan inkawp tawh lo a, chumi chhung chuan Ruata nen in inkawp char char a. I fa pai chu ka fa a la ni thei cheu a maw? Ka chi a lo chak awm ngar ngar hi ka tia! Nuihzatthlak leh lutuk mai." a ti hmiah a.

Thinrim leh zak bawk si chuan Maduhi chu a thaw halh a, " I fa a ni alawm...hman zan khan kan mutdun kha." a ti tham chal a.

A mitah tak chuan melhin a bu nghat a, "Aw le, a tha alawm. Hawh le, Doctor-ah kalin i rai leh rai loh test phawt ila i lo rai tak tak a nih chuan DNA paternity test nei phawt ila, ka fa a ni ngei em tih ka finfiah hma chuan ka pawm dawn lo." a ti ta a. "Kal ang le." tiin a motor chu a ti nung ta a.

Hlauthawng tak hian steering wheel chu a dawm chawt a, "Khawiah nge min hruai i tum a?" a ti khur dar dar a.

" Doctor hnenah!"

"Eng nge kan tih ang? Kal ka duh hauh lo."

" I rai ngei em tih hriat phawt ka duh a ni. I lo rai chuan ka fa a ni reng em tih fiah nan paternity test kan nei ang." a ti leh nghut a.

A theih loh. Doctor hnen an kal chuan a rai loh chian zia a lang chhuak ngei dawn si. Aw le, an kal emaw kal lo emaw a rai loh zia chu man chhuah a ni ta ber e. Thinrim lutuk chuan a khur dar dar a, he pa huatna meipui chuan a kang hluah hluah a ni ber e."Ka kal dawn lo. Zander, ka va haw teh lul che em! Ka hming i tihchhiat nasat zia hi i hria em? Eng tik hunah emaw chuan ka la rul let khawp ang che." a ti hlawk hlawk a.

" Chu i rai leh lo tihna em ni?" tiin a darah chuan a man lawka a thing ta nawk a." Dawt muhluma min buma ka nupui nih theih i lo inbeisei a maw? Thudik ka hrilh ang che - nang ang hmeichhe lelo leh awmherh hi ka ten zawng tak in ni.Tun a chinah chuan ka mit hmuhah rawn inlar tawh lo la, hmuh leh che pawh ka duh tawh lo a ni."

" Min tihhmingchhiat man hi i la hmu mawlh ang."

" Ka tihmingchhia che maw, huh? Nangmah leh nangmah i intihmingchhia a nih hi." Zander chuan a ti chang fak a.

Motor atanga tlan chhuah pah chuan,"Zander, ka haw lutuk che. Thi daih pawh ni la pawi ka ti therte lo." tiin a au zui tuarh tuarh a, mittui tla zawih zawihin a tlan haw ta a nih kha.

Khang hun te kha thla tam liam ta thil thleng ni mah se Maduhi thinlungah chuan Zander chu a la thi thei lo a, a rilru natna leh phuba lak a chakna chu hunin a liampui ve lo a, a nunah hian 'Ngaidam la theihnghilh rawh' tih thu mal hian awmzia a nei pha ve lo.

" Zander, ka rilru i tihnat ang zet hian i thinlung ka la ti na ve ang." ti a phun sap sapin a thutna thlan atang chuan ding chhuakin a haw ta hna hna a. An in chhung a luh dawn chuan a nu u fanu, a thian tha tak ni bawk Saizikpuii chu a rilruah a rawn lut zawk a.

A mitthlaah chuan Zikpuii hmel nung sarh chu a rawn lang iai iai a, amah aiin kum thum ngawtin naupang zawk mah se an inkawm ngeihin an inngaina em em a ni. Nula kum 21 mi, feet nga leh inches ruk vel a sangngo veng vawng sa pan thlarh leh pian fuh zet mai, Champhai Miss pawh a lo ni tawh kha a mak lo - a hmel a thain a zei reuh em a ni.

Zikpuii pa Sailochhunga chu sorkar department pakhata officer lian tak niin English Medium School Primary atanga High School thleng zir theihna an din a, tah chuan a nu Lallianpuii chu Principal niin Zikpuii pawh BA a zawh hnu chuan a zir zawm ta bawk lo nen a nu school-ah chuan teacher an indaih loh changin a thawk ve zauh zauh thin tih mai lohah chuan hna thawh a nei bik lo a.

A ni khan a tanpui hreh hauh lo ang chu. A lo va hre chhuak har ve le. Phur zetin a phone chu a phawrh chhuak a, Saizikpuii chu a call ta nghal a.

*****

"Zikpui..."

Zikpuii chuan a pindan atang chuan a nuin a kohna chu hre pha vau vauin," Ka la hman lo, ka insiam zo tep." tiin a chhang let a.

" I u Maduhi'n a be duh che anih hi."

Sitting room-ah a phone a kalsan tih inhre chhuakin," Lo chhang mai rawh." tiin a au let a. pheikhawk chu a bun malh malh a. A bun zawh chuan darthlalangah chuan a inbih zauh a, a landan chuan a tilungawi tawk hle a ni. A sam chu a chhipah tawn sang vahin a sport dress chu a inhmeh hle a ni. A volleyball chu lain inthazo takin sitting room lamah chuan a tlan chhuak ta a.

Chhuata ball vawm sawh alh alh pah chuan," Ball benga chhuah ka tum mek a, tihtur a awm chuan ka rawn haw hunah ka rawn ti mai ang." a ti zang vah a.

" Tihtur lam ni loin hei i U Maduhi hian biak che a duh a nih hi." tiin a nu chuan a phone chu a rawn pe a.

Phone lak pah chuan,"Hello, Maduh! I va reh thei vang vang ve a." a ti liam puat a.

"Tunlai chu ka buai ve thei lutuk alawm. Enteh, Zikpui, rawn zin hram teh..ka mamawh tak zet che." Maduhi chuan a rawn ti a.

"A chakawm hle mai. Mahse, hei tournament a awm dawna kan club chhuah ve kan tum bawk sia" a ti nang nang a.

" In club-in a mamawh ai nasain ka mamawh che a ni. I tel lo pawhin an khel thei tho ang, rawn kal hram teh." Maduhi chuan a ti lawm lawm a. "He lamah pawh Volleyball tournament a awm dawn tho a, helamah khel mai rawh ."

Zikpuii chu a nui hak hak a, " Duh duha khelh ve ngawt theih a ni hleinem. Kha lam club-ah ka inziak lut ve ngawt loh hi." a tihsan mai a.

" Ka pa thianpa hian Volleyball Club a nei ve a, chutah chuan reinforcement player angin i khel mai dawn nia. An club thuam chak turin player pahnih theuh lak belh phalsak an ni alawm"

" Chutiang tur khawpa player tha ka ni hleinem"

" I ni emaw ni lo emaw ka sawi luhpui thei hrim hrim che."

Zikpuii chu a nui hak a, a nuih zawng chuan a biangsum chu a khuar kalh a"Eng nge chu titaka min mamawh chhan chu le? Min han hrilh teh." a ti lar lar a.

Maduhi chuan," Nui ringawt suh. A pawimawh lutuk, phone-a sawi chi pawh a ni lo. I rawn thlen ve leh ka hrilh vek ang che." a ti hmak hmak a.

" Eng nge maw i hriat le? I fiamthu chu a ni em lo maw?"

" Ka fiamthu lo teh mai a nia."

" Tournament-ah chuan tel ve ngei ka duh bawk sia...Oh! Ka rilru i tibuai vek tawh! Inkhelh thiam tak chu ka ni lo nain ka tui ve hrim hrim a ni."

" Thulh mai rawh..rawn zin hram teh ka mamawh em mai che...aw..." ngen ngawl tak hian Maduhi chuan a ti a.

" Aw le, ka lo inngaihtuah anga ka va inkhel phawt anga zan dar sawm hmain ka rawn be leh ang che. Bye!" tiin Zikpuii chuan a phone chu a dah ta a.

A nu chuan a lo en ha a, " Zuk zin thlak chu i tum em? A ngai ve hle tawh che a ni ngei ang, ka bulah pawh zintir tur chein ngen taktein a nia min ngen ni. I duh leh mass hman pahin zuk zin la." a lo ti dam diai a.

" Nia, ka chak lutuk. Inkhelh pahin ka lo inngaihtuah ang e. Nu, ka kal phawt aw..Bye!" tih leh tlan chhuah a rual a.

Pi Lianpuii chuan a fanu chu a en zui vang vang a," Naupang harh leh luhlul, thinchhia, duhawm tak chu i va ni em!" tiin a nuih zui var var a.

Zikpuii'n court a thlen chuan a thianteho chuan ball an lo beng dap dap tawh a. An indaih rih bawka khel ve ta nghal lo chuan a thiante inkhel chu a lo thlir ta zawk rih a. Ball beng a thlir pah chuan Maduhi nen an inbiakna chu a ngaihtuah zui rauh rauh a.

A rawn sawi hmangah khan a mamawh hle chu niin a lang a, eng kawng takin mamawh ang maw? Aizawl zinte chu a chak sakhai alawm, tournament hi awm dawn lo se chuan sawm nawn ngai hauh loin a zin nghal vang vang ang chu mawle. Mm, a tha e, chuti khawpa a mamawh chuan a zin anga tun tum tournament chu a miss mai ang. Maduhi lo chu laizawn dang a neih loh hi. A laizawn neihchhun tihlawm chu a tihtur ve alawm.

" Zikpuii, lo khel ve tawh rawh le."

Bawp khawkherh a khabe dawm meuhin a lo inngaihtuah veng veng ata langah Puii rawn kohna pawh chu a hre hauh lo a.

Puii chu rawn tlan pheiin a hnungzangah chuan a rawn beng thawr a, nui hawk hawk Chung hian," Hey,Zikpui, Darhminglinga i ngaihtuah leh ta pek em ni?" a ti a.

" Darhmingliana lam a lang pha lo." a lo ti vin hlar a." Chhungkaw lam buaina vangin Aizawlah zin ka ngaih hmel a, tournament pawh ka khel ve hman loh hmel." a ti halh a.

" Aw..tournament zawhah i kal anga ni mai lawm. A thuhrimah, Club Manager i hrilh tawh em?"

Lu thin mat mat pah chuan," Aih, hrilh lo." a ti sap a.

" I khelh theih dawn loh chuan kan Club chu kan chhe duai dawn zu nia!" Puii chuan a ti hluai a.

Court chhungah tlan lutin ball chu a beng ve ta a, an ben rei tak deuh hnu phei chuan a biang chu a tai tek mai a. A nui sang a, a hmel chu nung sarhin hmuh a nuamin mit a titlai hliah hliah mai a ni.

An thiannu pakhat Biaki chuan, " Zikpui, saw i Darhmingliana a rawn kal. I Darhminglinga!'' a rawn ti sar sar a.

A hawi phei thuai a. An lam pana tlangval hmeltha tak leh sang tak mai nui sang a rawn phei chu a hmu ta a. A sam dum hlap leh enkawl ngun tihhriat taka fai tle siau mai, a dar thlenga a zuah chu hnung lamah a tawn khawm tawp a, en mai pawhin a sam chu uluk taka enkawl a ni tih hai rual a ni lo. He pa hi alawm Zikpuii duhlai, Champhai Beat Group No.1 Street Boiz -a an vocalist Bronson Darhmingliana, a thianten 'Darhminglinga' an lo tih fiam thin chu.

Biangsum khuar kalha nui sakin a ban chu a vai lap lap a, a ni pawh chuan a rawn vai let ve a.

An bul a lo thlen chuan thuthmun remin Zikpuii te inkhel chu hmuhnawm titak hian a thlir a, a thianteho chuan an lo fiam nak nak a. A ni pawh chuan a lo nuihpui hawk hawk hlawm a.

An game a zawh chuan Zikpuii chu Puii chuan a rawn thlak nghal vat a.A thlan chu romol-a hruk mawlh mawlh pah chuan Darhmingliana bulah chuan a thu nghal chat a," Eng tikin nge i lo haw a?" a ti hap a.

Duh leh hmangaih tihhriat taka thlir vawng vawng pah chuan, " Ka rawn thleng fel awrh chauh a ni." a ti sap a. Zikpuii kut chu tawk zauhin,"In inah ka rawn en che a, i lo awm bawk si loa ka rawn zawng che a nih hi."

" Zawng tih tawngkam han hman em em chuh..ka len hrat hmel e.." tiin a nui ar ar a.

" Ka ngai lutuk che a, hmuh hlan ka nghakhlel tawh lutuk che mawle. Nizan ka mumang tha lo nen ka ngaih hi a tha thei thlawt lo." tiin a kut chu a hum salh a.

" Eng mumang nge ni a?'

" Tlangval pakhat nen khumah in lo mu dun lai hi ka lo hmu a, ka lo au tuarh tuarh che a. Nang lah chuan min lo nuihsan mai mai a..."

" Awi, keimah ka nih loh tawp chu a! Hmeichhe dang a niang!" tiin a nui hak a. " A thuhrimah chutianga mi lo hmuh reng reng." tih pahin Darhmingliana darah chuan a chum taih a.

" Ka mumanga ka hmuh dan che a ni miau ah. Ngaihzawng dang min neihsan tawh a niang tiin rilru hrehawm tawkin ka awm reng a, tun thleng hian kha mumang rapthlak tak khan min la tham er er mai." thu tak zet chuan a ti a.

" Bronson, i ngaih titha lo duh suh. Nang lo chu tumah ka melh lo." a ti sap a.

Darhmingliana chuan a kut chu hmersak vawng vawngin," Midang awm ve pawh hi pawisa loin fawh vawng vawng mau che hi a nia ka duh ni." a ti sa sa a.

Nui ar ar chung hian, "Han tum chhin la.." tih leh tlanchhiat a rual a.

" Rawn kal rawh..engtin mah ka ti dawn lo che."

" I rilru kha thlak phawt la."

" Aw le, aw le, ka tiam a che. I thiante hmuh lai chuan ka fawp hauh lo ang che."

Zikpuii thiante chu an lo nui hawk hawk a, "Bronson, i duh leh fawp rawh. Beng kan lo hup mai ang." tiin an fiam laih laih a.

Nui ar ar chung chuan a bulah chuan a thu ve mai bawk a. "In concert chu eng nge a an a? Lunglei mipui chuan an lo hlut che u em?" a ti a.

Lu buk nghat pah chuan, "Kan concert neih tawh azawnga kan la hlawhtlin ber tum a ni awm e. Ka lucky charm i lo ni tak tak a ni e. Ka tawn atang che khan ka thil tih kawng engkimah ka hlawhtling zel a nih hi. Ka tan i hlut zia hi ka chhut chhuak phak lo." a ti a.

" Ka tan pawh hian i hlu lutuk a ni."

Inkhelh zawh vek hnu chuan Darhmingliana bike chuan an inphur haw ta a. Kawng tluan chuan Lungleia an concert chungchang chu a hrilh mawlh mawlh a, ngaihnawm titak hian a lo ngaithla dauh dauh a.

An in an thlen chuan an ding chat a." Ka rawn leng lut lo phawt ang , zan lam atan ka khek zawk ang e. Chuti lo zawng i nu leh pate mit ka tikham palh ang e." tiin a biang tai tek chu a piai zauh a.

" Ih, Bronson, naktuk tukleh khian Aizawl zin ka tum asin."

A rawn hnaih phei ruak a, hnaih taka indin chilhin an in melh ta tlawk tlawk a.

" I cham rei ang em?"

" Krismas ka hmang ang."

" A rei lutuk!" tiin Darhmingliana chuan a aw a san hluai a." Kar khat lai thang boin ka zin a, ka rawn haw ve leh min zin bosan leh daih te'n a fair lo em mai. Chuti chen chen min zin bosanin eng tin nge ka lo awm ang? Mas i hmang dawn a nih chuan a dawn tepah kal mai rawh." a ti ruai a.

" A tul miau alawm. Kalsan che chu ka hreh lutuk asin. Mahse, thil tihtur tul, chhungkaw la. thilah tihtur ka nei a, ka kal ngei a ngai a ni."

" I nu leh paten an tir che a ni tiraw? Nang nen kan inhmuh lohna tur a nih dawn phawt chuan eng pawh an ti duh ang chu. Tunah November kan kai dawn chauh a, mas hmang tura chhuah nghal mai chuh." thinrim ang reng tak hian Darhmingliana chuan a ti a.

Zikpuii chuan a kutah chuan a va tawk zauh a, "Chutin ka nu leh pa puh chhe lutuk teh suh. Nang nen kan inkar thu-ah hian engmah duh lohna thu an sawi ngai lo asin." a ti dam diai a.

" Engmah sawi lo mah se an mitmengah hian min lawm loh zia an lantir thin alawm. Min ngaih pawimawh loh vanga min zinsan tum i nih hi."

" Khawngaihin ngaih loh lamah ngai lo hram rawh. Chhungkaw buai avangin ka nutei ten ka puih an mamawh alawm." a ti malh malh a.

" Zin bo hi tul ka va ti ber lo em." la lungawi chiah lo tihhriat tak chuan a ti a.

" I duh leh Aizawlah chuan mas rawn hmang ve mai la."

" Tak zet? Ka phur sawt mai. I phal tak tak ang maw?"

Nui sen sen chungin a awmah chuan a nam a, " Aw le, kal phawt mai teh. Hetia ding chunga sawifel ngawt theih a ni lo. Zan i lo len hunah kan sawi fel dawn nia." tiin Zikpuii chuan a hnarah a piai zauh a, in chhungah chuan a tlan lut ta a.

In chhung a luh rual rual chuan a phone chu ban nghalin Maduhi chu a call ta a, "Aw le, naktuk tuklehah hian rawn chhuk ka rawn tum dawn a, min lo hmuah ngei chu a ngai ang aw. Ka inkhel zo chiah a vaivutin ka paw thur mai, tunah chuan inbual ka mamawh phawt. Kan inbe leh dawn nia." a ti zung zung a.

Maduhi chuan," Ka va lawm tak! Ka lo hmuak ngei ngei ang che. Awi, hrilh tur che hi ka ngah lutuk tlat.Min pui duh ang tih min tiam thei ang em?" a ti a, a aw ah chuan phurna hi a lang chiang hle.

" Eng ti kawngin?"

" Ka hrilh thei rih lo che."

" Hmp! Puih i ngaih chuan eng kawng pawh nise ka puih theihna che a nih phawt chuan ka pui em em ang che."

" Oh, Zikpui, ka lawm lutuk. Ka unaunu neih chhun leh ka hmangaih em em i ni. Ka lawm lutuk. Min hnar ngai lo ang tih hi ka chiang a ni." Maduhi chuan a ti chul a, a hlim hmel tak zet.

" Ka lawm e. Ka dah phawt aw...ka inbual dawn. Bye!"

*****

Bung hnihna atang chuan first person's point of view angin ka rawn dah tawh dawn, min chhiarsak vangin in chungah ka lawm tak zet a ni.

He thawnthu hi kum 1999 kum tawp lama Senhri Publication -a J Daniala'n min published sak tawh PAWMLAI DI kha tlem tlem tidanglam deuhin ka rawn dah nawn leh a ni e.

Ka tihbeidawn loh hram che u ka beisei..



Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » August 15th, 2021, 4:20 pm

𝔹𝕌ℕ𝔾 _ ℍℕ𝕀ℍℕ𝔸

ZIKPUII 'S P.O.V

𝕋ukhuma kut suihin ka mu zangthal ar ar a. Darkar eng emaw zat motor-ah chuanga vaivut khu rawn hak teuh 𝕜a nih vangin ka chau hnep hnawp hle. Tui lum sa ver vawra ka inbual hnu chuan harh deuh hawkin ka inhre nain nizan lamah Darhmingliana nen dar hnih deuh thaw thleng kan mengin mut ka kham lo nen motor chuan chauh nen muthilh bawrh bawrh chu ka thil mamawh ber niin ka hria.

Maduhi chuan," Muhil zet la, i harh hunah ka la hrilh vek ang che. Tui tak khan muhil phawt mai teh." tiin min nuih var var a, pindan chu a chhuahsan ta a.

Nizan khan kan meng reiin kan inhnial deuh bap bap reng a, a tawpah chuan kan inrem leh thei hram kha a ni a. Darhmingliana hmel ka mitthla a lo lang chungin, "Bronson.." tiin ka phun sep a, khumah chuan ka inlet thawk a, ka mit chu chhing vang vangin ka muhil zui chu a ni ta mai a.

Eng tianga rei chiah nge ka mut pawh ka hre lo, Maduhi chuan "Hey, mut duhnu, tho tawh teh." tia min rawn sawi nawk nawk chuan ka harh hlawl a. Ka mit chu nuai nak nakin ka thil hmuh hmasak ber chu Maduhi nui sang hmel leh ka khum bula coffee tui hmel tak, la khu veng veng chu a ni.

Ka sana chu bih zauhin ka thu chhuak nghal a, "Ka va mu tui kher ve le." tiin ka zi mar ar ar a. " I thu pawimawh chu min hrilh hlan i va nghakhlel awm ve." ka ti zui nang nang a.

" Nghakhlel tehreng mai. Ka rilru a ka up behna a rei tawh alawm."

Coffee no ban vat pah chuan, "A nih leh min han hrilh la ka lo ngaithla ang e." ka ti a.

Maduhi chuan thuthmun a han siam tha te te a, " Mipa pakhat hmangaih em em mai hi ka nei a.." a han ti tan phawt a.


A thu sawi lai chu pawtchatin " Chupa chu ka sawi luhpui dawn che tihna em ni?" ka lo ti hmanhmawh a.

Ka thu sawi chu haiderin Maduhi chuan, "Chupa chu tih takzetin ka hmangaih a, mahse a ni chuan zahthlak takin min hnawl a. Zikpui, hnawl nih hi na ka ti a ni. Chu pa chu tunah chuan ka huain min tihnat ang khan tihnat let ve ka duh ta a ni." a ti dap dap a.

Lu lo buk nghat pah hian, " Nia, chu chu i mize diktak alawm." ka lo ti zauh a.

" Ni, chu chu a dik. Chu mihring tihnat let vena tur a nih dawn phawt chuan eng pawh tih ka huam a ni. Zikpui, chu pa chu ngaizawng der la, ka rilru a tihnat vang hian tawrhtir ve la a rilru tihnatsak vein va thungrul rawh." a ti ta a. A tawng zawng te chuan a mitmeng chu thinrimna leh huatna ril tak hian a tilang rum al a.

" Kei hian maw??! " ka ti phawk hra a. " In lamah hmangaih ka nei alawm." ka tih zawm zat a.

" Min puih i tiam tawh kha.." mangan hmel tak chuan a ti a." Min pui ngei ang tiraw, Zikpui? In lama i bialpa chu i phatsan dawn chuang hlei nem. "

" Mahse, ka....."

" Mahse tih a ni lo. Chu pa sual zia chu i hre lo a nih kha. A tirah chuan ka ngeiin ka haw lutuk a, min zar buai char char hnu-ah ka lo duh ve ta a..ka duh satliah mai a ni lo, ka atchilh ngawih ngawih a ni. Ka nulat thianghlimna pawh ka hlan ta hialin a fa ka pai ta a. Ka phal lo chungin a fa chu min tihtlaktir lui a, hmeichhe dang min kawpsan hnuin a thiante hriat lai ngeiin mualpho takin min an khuma a laka inthiarfihlim turin min ti a nih chu. Ka zakin ka rilru hi a na ngawt ngawt a, nep ta riau leh tlawm ta hliah hliah a inhriatna ka neih phahin mahni nunna hial lak duhna ka neih phah a ni." tiin thiam tak chuan a sawi sap sap a, a tawp lamah phei chuan a tap ta hial a.

Ka unaunu hmel ngui riai chu melhin ka kuah vat a, chu pa huatna chuan min tuam hlup hlup a. Ka laizawn neih chhun thinlung chuti khawpa tikehsawmtu chu ka hua a, a phu tawk hremna pek ngei a duh ka ni. "Chuti khawpa tuarna thlensak tur chein chu mihring tlaktlai lo chuan dikna a nei lo reng reng. I tawrhna chu ka hrethiam khawp mai. Mi tlaktlai lo tak i lo hmangaih chu pawi ka tihpui lutuk che. Aw le, ka pui khawp ang che. Chu pa chu ka tuartir ve ang." ka ti ta charh charh a.

Maduhi chuan min rawn kuah let ve nghal zat a, "Ka lawm lutuk, Zikpui. Min puih duh ngei hi ka ring reng a ni. " a ti sap sap a.

" Le, eng tin nge chu pa chu ka hmelhriat anga eng tin nge ka chhai kual dawn min han hrilh teh. Chutiang mi tenawm lutuk rilru tihnat chu ka chak zawng tak alawm. I thinlung a tihkeh ang hian a thinlung dum muk tak chu ka tihkehsak ve ang. Mahse, ka Bronson-an a hriat loh hram beisei ila." ka ti rum al a.

" A hre hauh lo ang. Lo hria pawh ni se keiman ka lo hrilhfiah vek anga buaina a awm lo ang."

Ka nui sak a, " Ka lemchan tur chu a phurawm dawn viau e." ka ti sarh sarh a.

" A hming chu Alexander Lalmingliana a ni a, 'Zander' tiin an ko thin a. Volleyball player tha tak niin Mizoram aiawh paw'n vawi tam tak a lo khel tawh a ni. Infiamna lam chu eng pawh a thiamin a thei em em vek a ni. Music ri bur bur lam aia music nem leh country music lam ngaina mi niin lehkhabu chhiar ngaina tak a ni bawk. Kum 29 mi a ni a, Fishery Department-ah Fishery Officer a ni bawk. " tiin Maduhi chuan Zander chanchin chu min hrilh mawlh mawlh a.

" Wow! A phurawm dawn hle mai. A mizia chu ka mize milpui tak a nih dawn chu.." tiin coffee chu ka in khalh a. " Eng tin nge a hmel ka hriat theih ang?"

A phone chu phawrhin Zander thlalak chu min hmuhtir a. " A va hmeltha ve a...he ti khawpa mihring hmeltha hian thinlung setan-a a lo nei thei dawn a ni maw?" ka ti hluai a.

" A hmelthat nasat ang bawka rilru bawlhhlawh pu mi a ni. Nang nena kan inlaichin dan hi a hre tur a ni lo. A bulah chuan inhre ngai hauh lo angin kan awm tur a ni. "

Zander thlalak chu ka melh nawn leh ngat a, a pian nalh thlurh leh a mitmeng buang thak mai te chu khawi hmunah pawh hmu ila ka hai hauh lo ang. Awlsam taka theihnghilh leh mai tur chi hmel a pu lo tlat a ni. " A san hmel kher mai." ka ti leh sap a.

" Feet ruk leh inches khat a sang a ni."

" Oh, wow.."

" Mi thenkhat sawi dan chuan fa a nei tawh a ni awm e, mahse thu chiang chu ka hre bik lo. Ka hriat theih awm chhun chu nupui a la nei lo tih hi a ni. "

Ka rilruah chuan phurna riau hi a lo awm a, Zander Làlawma chu hmuh hlan ka nghakhlel ru riau mai pek a. Chutih rual erawh chuan hlauhthawn rukna ka nei tlat a. Zander te ang mipa hmeltha leh lerh, hmeichhe zeizia hre lutuk tawh tur chu kei ve teh lul hian eng tin nge ka chhai thluk theih ang? Mipa lerh leh kawplawr tak thinlung neihsak chu thil awlai a ni hauh lo ang tih ka chiang a ni. A eng apawh chu ni se ka laizawnnu rilru a tihnatsak a, mualpho taka a siam vang leh a fa pailai a tihtlaktir avang pawh hian theihtawp ka chhuah anga ka ti na let ve ngei bawk ang.

A tuk tlai lamah chuan bazar lamah thil lei paha len chhuah kan tum a, nalh taka incheiin kan insiam malh malh a. Maduhi chuan min rawn melh vang vangin, " I nalh hle mai." a ti halh a.

" Ka lawm e." tiin ka kiai sak a." I Zander chu eng tik nge min hmelhriattir dawn a?" ka ti zauh a.

" Tlai lam dar thum leh a chanve velah Volleyball court-ah i kal anga an inkhel lai i lo thlir anga i hmu mai ang. A ni pawn a rawn hmu nghal nalh mai ang che. Hmeichhe chhe lo deuh hi chu a nep thei hlawl lo. " Maduhi chuan uar zet hian a ti a." I inpeih chuan kal ila." a tih zawm zat a.

An driver, pa fel leh inngaitlawm tak mai chuan min hruai ta a. Bazarah kalin kan mamawh leh duh zawngte kan lei kual hnu chuan, " Lehkhabu dawrah hian lut ila." thatho tak chuan ka ti a.

" Lehkhabu ka ngainat loh zia chu i hriat kha. Lehkhabu rim allergy hi ka neiin ka inhria." tiin Maduhi chu a nui hak hak a."He lai thingpui dawrah hian ka lo chawl anga I lehkhabu duh zawng i lei zawhah min rawn zawm dawn nia." a ti a.

" Okey." ka ti zang vah a, lehkhabu dawrah chuan lutin lehkhabu hrang hrang ka hmuh chuan ka thaw hak a, lei tur ber pawh hre loin ka en kual dan dan a. Phone-a thawnthu chhiarte hi ka peih ve loa, lehkhabu ngei mai han keu a, lehkhabu thar rim nam ham ham te hi rimtui ka tiin lehkhabu hi chu ka hnar thei lo a ni. A tawpah chuan Sydney Sheldon leh James Hadley Chase lehkhabu ziah leh Comics bu thum ngawt chu ka thlang chhuak a.

A man ka pek fel hnu chuan ka chhuak leh ta nghal mai a. Kal pah chuan ka lehkhabu leite chu ka keu thuak thuak a, chutah ka hma a mi rawn kal chu ka su ta bur mai a. Ka lehkhabu ken te chu a tla darh phang a. " Oops..sorry!" tiin ka mi sut pa chu hamhaih tak hian ka melh chho ha a. Chu pa sang tak leh mitmeng buang thak mai chuan ka mitah tak a lo en ve reng chu niin ka zak leh lai chu ka sen ap ap a. Chutah a thinphu chu a rawn rang sauh a, ka mi sut chu Zander ngei kha a ni! A takah phei chuan thlalak aiin a la tha leh zual! A khabe phir thai leh a hmui mawlh chu a nalh a ni, a mitmeng buang thak nen chuan. Aw, he pa hi a ni lawm ni ka unaunu thinlung tikehchhetu Zander tenawma chu..huatna vang chuan ka tiril chu a khur der der a, sawi tur ber pawh hre lo chuan ka ding ngawi ran a.

Zander chuan," Ka tihpalh der a ni." a ti sup a. A aw chu ngaihno a beiin a pa hrak leh nghal a. Kun hniamin leia lehkhabu tla chu min chharsak ta nghal a, " Sydney Sheldon lehkhabu ziak hi i ngaina hle a ni maw?" tih pah chuan min pe let nghal a.

Harh chhuak phut ang mai hian ka thaw huai a, " Oh!" ka ti halh a. Ka lehkhabu laklet leh pah chuan, " Ka lawm e. " ka ti sap a." Kawng en hauh loin ka lo kal a ni, ka tihpalh." ka tihzawm leh zat a.

He pa sang zet hian min ti chiai chhe der alawm. 'Harh rawh,Zikpui. He mihring hi alawm Maduhi thinlung tikehchhetu leh i phuba lakna tur chu. A rilru hneh tumin zam map loin zei tak khan han chhai kual ta che.' tiin ka infuih ru mawlh mawlh a. Mahse khawr leh lai deuh tut hian ka inhria a, he mitmeng buang thak hian min tizam chhe mai tur a ni lo. Mi tenawm leh rilru chhe lutuk lakah hian ka zam hauh lo ang.

Zander chuan ka ban a rawn tawk zauh a," I lehkhabu ka tihtlaksak vang che a thupha chawi nan thingpui ka leisak ang che chu. Rem ti hram teh." tiin a mitmeng buang thak chuan chik zet hian min melh de sawr sawr a.

Ka hnute kawh lah chu a rawn melh a ni tih ka hriat chuan ka sa pup pup a, ka lehkhabu chu ka hnute hliah chuan ka pawm tat tat a. A sawmna chu hnial ka duh hle mai mahse Maduhi vang chuan ka hnial loh a ngai si, " Ka hnial loh zawng tak." tiin ka biangsum khuar kalh khawp chuan ka nui lui sak a.

Zander chu a thaw hawk a, " I nui mawi hle mai." a ti sup a. Mahni leh mahni inbia hi a ang zawk a.

Zakthei lo tak leh hmeichhe ral dik tak chu a va ni em..ka ngei lutuk chuan a khabe phir thaiah tak chuan ka lu chhipa han chhoh tauh bur mai chu ka chak zek zek a. Mahse chutia ti ta lo chuan ka dar ka san khum ta ak a.

Maduhi chawlhna thinpui dawrah ngei mai chuan kan inzui lut ta a. Ani chuan mak tih hmel tak hian min rawn melh a, a rukin mit ka lo siai khum sak a. Chutah rum nghatin rum em em hian a rawn melh a, a thutna ata thoin a chhuak ta nalh a.

A chhuah hnu chuan," A thinlung kha hneh ngei ang che. Fighting! Ka lo nghak dawn che nge ka lo hawsan dawn che?" tiin min rawn text a.

" Lo va haw mai rawh. Bus-in ka rawn haw mai ang." tiin ka chhang thuai a.

Ka thlir zui vang vang a, ka unaunu rilru tur awm ang chu ka hriatthiampuiin ka lainat kher mai. Chutah ja bula thu tlangval lian tak chu melh leh zauhin ka ner ru sak a. He pa hian ka huatthu sawi miah lo mah se ka haw ngawih ngawih a ni. Ka unaunu laka a chet duhdan avang ngawt pawh khan sawi mai aia nasain he pa ka huatna hi a ril niin ka hria.

Tunah chuan a lemchan chu ka tan tawh tur a ni. Bronson-an 'Zawlaidi' tia a lo sawi thin, ka biangsum khuar lang kalh chuan ka han nui a "Kan va lut fuh awm lo chaih chaih ve! Kha i thiannu ni awm tak kha kan luh ve leh a chhuak daih mai sia, min la melh rum em em zui lehnghal." ka ti zauh a.

Ngai pawimawh lo tih hriat tak hian Zander chuan a dar a san ak a, "Ani nen khan inthian thatna pawh kan nei hran lo. Min haw ve mai mai a nih kha." tiin a nui hul hak a, eng emaw nuihzat riau nei tih hriat zet hian a mitmeng buang thak chu a de sawr sawr a.


A la nuihsawh zui lehnghal a ni awm a..he pa huatna chuan ka ti sa up up thei hial a. Lainatna chhete mah nei loin hmeichhe rilru a tihkehsak hnu-ah a la nuihsawh zui cheu thei a nih chu. Hei hi a nih hi hmeltha nunrawng an lo tih chu..Ni, Zander chu a hmeltha chiang alawm, mahse mihring thatna leh duhawmna hi pawn lam landanah chauh a innghat lo. A pawimawh ber chu chhungril mawina thuruk hi a ni.

Kan thil ei duh zawng an order-te chu waitress in min rawn pek takah chuan ngawi rengin kan ei malh malh a.

Zander chuan, " Hming pawh kan la inhrilh hauh lo a..Ka hming chu Zander a ni e. Nang?" tiin mawi lutuk hian min nui suk a.

" Zikpuii...Saizikpuii."

" Saizikpuii. Zikpuii. " tiin a lam nawn sup a, a mitmeng buang thang chu meng zim deuh sanin " Chu hming chu hman atangin ka ngaina tawhin ka tan awmze thuk tak a nei tawh thin. " a ti sup sup a.

Ka hming a lam zawnga a hmel dam thluam leh cool raih danah chuan a ngaihzawng hlui hming ang a nih ka ring ve thla ngawt a. A rawn melh tak vung vungah chuan ka lai leh zo ta vek a, ka biangte chu a sa hat hat a, "Khawngaihin khati'n min melh reng teh suh. Ka awm i tinuam lo rum rum thei dawn alawm. " tiin za lo tak hian ka nui sak a.

Meng de sawr sawr a rawn melhin," Hmuh i nuam tlat a ni. Tu emaw talin i hmelthat zia hi an hrilh tawh che em?" a la ti tak deuh deuh a.

Ka sen tawn tawn, 'Hmeichhe ralin a zia a chhuah tan e. Chu thu chu nula eng zat bulah tak sawi tawh ang che maw? Mr Casanova, thlamuang takin chawl rawh. I ai awhtu tur hei Zander kan nei e.' ka ti rilru a. Miss hial lo ni tawh ka ni a, ka hmelthat leh nalh thu min hrilhtu chu an tam na meuh mai, lawm pawh ka lawm ve thin. Mahse he pa thu sawi dan hi chu ka duh zawng a ni tlat lo.

Min la rawn melh tak rengah chuan zahzelah lehkhabu chu ka keu kual ta vel mai mai a. Tun hma te kha chuan mipa hmaah ka zam mai mai ngai lo, mahni inring tawk takin ka zei harh thin a nih kha, mahse he pa hi chu a dan a dang tlat. A hmaah meuh chuan ka tawngkam thiamna leh ka zeina thinte chu chhuat chuan min dawlhsak daih ni hian ka hria.

Zander chu a nui suk a, " Lehkhabu chhiar i ngaina ve hle a ni maw?" tiin ka awm nawm lohna chu min hriatthiampui ni awm hrim hian thu dang min pakaipui ta a.

"Tehreng mai. Lehkhabu tel lo chuan ka nun hi ruak vekin ka hria." thawk huai pah chuan ka ti a.

" Nula fel tak i nih chu, i kum rualpui nula thenkhat chuan a hlutna hre tur pawhin an chhiar peih hlei nem. A chhiar chu sawi loh a keu tak ngial pawh an keu peih lo. Inchei, khawlai len chhuah, party leh Social media a sexy zet zeta in pose bak an ngaihtuah hleinem."

" Phone-a chhiar aiin a lehkhabu ngeia chhiar hi ka duh thin."

Ka lehkhabu pakhat chu min laksakin a keu dan dan a "Kei pawh lehkha chhiar hi ka ngaina thlawt a ni. Ni lenga hna thawh hah hnep hnu-ah in lamah haw ila, rimawi dam raih ngaihthlak paha lehkhabu chhiar veng veng hi nuam ka ti tlat. Chu lo liama hahchawlhna hahdamthlak ka hre lo a ni. Sydney Sheldon ziak ngat phei hi chu ngaihnawm loh a awm lo. Lehkhabu ziaktu-ah chuan he pa tluk tur hi ka la hmu lo a ni." a ti leh a.

Phur zet hian, " Sheldon hi i ngaina ve elaw? A ziah hi chu chhiar vek ka duh a ni. 'Nothing Lasts Forever' kha i chhiar tawh em? Kha kha a ziahah chuan ka la duh berin ka hria." ka ti sarh sarh a.

" He pa thawnthu ziah hi chhiar loh ka neih pawh ka hre lo. Ka nei nual asin, i duh phawt chuan ka hawhtir ang che."

Nui hawk hawk hian, "Lehkhabu hawh tur chuan mel khat pawh kein ka kal peih ang chu." ka ti a.

Zander chuan min rawn melh vang vang, " I hmel en aiin i hmanlai reuh." a ti tak ngal a.

Za em em hian ka nui hawk hawk a," Hmanlai min tih chuan thing min ti tihna a ni maw? " a ti a.

" Thing hauh si loin i hmanlai!"

" Ka awih hauh lo."

" I nalhin i tunlai lutuk, mahse i ngaihtuahna leh i duh zawng hi a un, a puitling ka tihna!"

In hrethiam tawn tak chuan kan nui dun ta hawk hawk a. Kan han titi zel chuan music lamah pakaiin kan titi a inrual theiin kan tawng tui dun ta phian a. Ka hma a thu pa lianpui mai chu ka huatna theihnghilh thakin ka titipui ta bawrh bawrh a. Thil kan ei zawh hnu-ah pawh chuan eng eng emaw sawiin reife chu kan inkawm a.

Han zik mar ar ar pah chuan ka sana chu ka bih zauh a,"A tlai tawh ang reng sia haw tawh ila a tha ang. Ei tur tui tak, puar taka min khilaia avangin ka lawm lutuk a nia." tiin ka nui sak a.

" In thleng ka va thlah ang che."

" Ah, ngai lo mai, ka lawm e." ka ti a, in thleng ka inthlahtir chuan Maduhi nen kan ruahmanna kha a fail vek dawn a ni.

" I kianga awm a nuamin hmuh leh che ka duh a ni, Zikpui. In in awmna min hrilh la zanah ka rawn len i remti ang em?" tiin ka mitah tak chuan a melh ngat a.

" A chi loh." ka ti halh a. "Ka nu leh pa ten inleng neih an remti lo a.." tiin lerh hmel zet hian ka nui ar ar.

" Inhnarna mawihnai tak a nih chu. Mahse hmuh leh che ka duh a ni."

" Kan la inhmu leh mawlh ang. " tiin ka meng kal ralh a. "Zander, kei paw'n hmuh leh che ka duh a ni." tiin ka rilru tak chu a sawi chhuak a. Nie, ka hmuh leh loh chuan a lakah phuba a la thei na'ng le.

A lo thaw hawk a, " Ka hming khan min han ko nawn leh teh, i aw nen khan a inrem lutuk tlat. I lam chhuah anga nalh khan tuman an la lam chhuak ngai lo. " tiin min melh vang vang a.

Ka nui deuh hawk a, "Zander...Xander.." ka ti sap a.

" Zikpui, i hmeltha lutuk.."

Nalh thei ang ber chuan ka'n nuih saih a, "Ka kal tawh ang e. I bula ka awm reng chuan i hmangaihna khurah ka tla lut palh mai ang." tih leh din chhuah chu ka rual a, ka lehkhabu chu ka la nghal zat a.

" Min hrilh teh, tuna i thusawi kha i ti tak tak em?" tih pahin ka banrekah chuan a rawn vuan chawt a.

Lu buk nghat pah chuan," Takzet e. Min ti à thei mai dawn alawm." tiin ka nuih a.

" Min ring rawh, Zikpui, hmeichhia ka vawi khat hmuhna a min hneh nghal em em tu awm chhun i la ni."

Ka nui chhuak hawk lo chauh a ni. Hmeichhe ral a che leh tan ta. A tha e, rilru inhnehsak tum chuan rilru game chu i han khel dun tak tak ang hmiang. Tu nge zei zawk a, nui rei zawk kan en ang chu..

Ka nuihza hmel insum chu a lo hmu ni tur a ni," I nuih ka tiza em ni? Ka fiamthu hauh lo a nia." a ti a, ti tak tak pawh a ang ve lek lek a." Ka car-in ka va thlah mai ang che.''

Lu thin mat mat pah hian, " Town Bus-a haw a fuh zawk ang. Ka sawi tawh kha - i bula awm hi a him hauh lo ang." ka ti a.

" A nih i number min pe phal em?'

Ka kutphah chu pharhin a phone chu ka dil a, a phone lock chu hawngin ka kutah chuan a rawn dah a. A phone atang chuan ka phone chu ka miss call zauh a, ka pe let leh nghal a.

Bus stand hnai berah chuan Bus lo thlen hun min nghahpui a. Rei pawh nghah ngai loin Bus chu a rawn ding ta chat a. A chhung atang chuan mi chuang an rawn chhuk sap sap a, a then an lawn kai bawk a. Ka lawn tur chu Zander chuan ka banah min man bet chat a, " I kal hmain kan inhmu leh ang min tiam zet rawh." a ti a.

" Kan la inhmu leh em em ang. "

" Ka lawm e. Zanah ka rawn bia ang che."

Nui har harin a mi vawnna lak ata tal chhuakin Bus chhungah chuan ka luhsan ta a. Bus tukverh atang chuan flying kiss ka hlan zauh a, kan tlan chhuak ta a.

Zander kan tlansan hnu chuan ka thaw huai a, ka mitthlaah chuan kha mihring hmeltha paa hliah hliah kha a lang rauh rauh a. Maduhi'n a lo hmangaih bur pawh kha ka dem ta hran lo, hmeichhe mizia a hriat chian hmelin a zei hmel teh hawrh em a ni.

Ka han chhaih kual vel dan kha tawk rih viauin ka hria a, min bum emaw i intih lai khan ka bum let tawp zawk dawn che alawm. Tu nge nui rei zawk i lo thlir teh ang.

In ka thlen ve leh Maduhi chuan phur em em hian thil awmdan min zawt nghal sawt sawt a. Kan inhmuh dan leh inbiak dan tlangpui chu ka hrilh zung zung a.

" A rilru hneh zawr zan tumin i bei ang a, a duh viau hunah che i thlauhthla ang a rilru na tawp khawkin siam ang che. Ka rilru a tihnat zatve tal chu i tawrhtir ngei tur a ni." a ti rum al a.

" Chu chu ka tum dan chu a ni alawm. Ka hmuh leh dan tur ruahman phawt rawh, he tah a rawn len a rem dawn si lo."

" Ka ngaihtuah fel vek tawh. " tiin a hawi deuh vah a.

" Eng tin?"

"Thla thar ni thum khian R. Dengthuama Stadium-ah Volleyball Khawmpui an nei dawn a, chutah chuan Pa Thlenga te Volleyball Club-ah chuan reinforcement player angin i khel dawn nia." a ti ta a.

Hlim takin ka faifuk raih a, "Ka khel ve thei ang maw?" ka ti hluai a.

" Yes.." hlim takin kan han high-five a, kan nui dun hawk hawk a.

Ka khel ve thei dawn a nih chuan lung pakhatin sava pahnih ka vawm thla tihna a ni mai dawn a ni. Maduhi phuba ka laksak theih mai bakah ka thil chak bet Volleyball khelh chu ka ti thei dawn bawk. Tunah chuan ka phur leh ta sarh sarh hle mai.

Sport dress engmah ka ken loh avangin Maduhi nen chuan a tlai a tlaiin kan va bazar leh rih a. A hna thawhsak tur ka ni bawk a min duatin ka duh leh mamawh chu min leisak zelin ka tan ui reng hi a nei lo.

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » August 15th, 2021, 4:20 pm

𝔹𝕌ℕ𝔾 _ 𝕋ℍ𝕌𝕄ℕ𝔸

Zanah chuan Pa Thlenga chu a rawn leng a, sitting room pakhatah chuan ka nutei te nupa leh an thiante chuan playing cards an khel a, keini pathum chu common room-ah kan inkawm khawm ve thung a.

Pa Thlenga chuan chik zet hian min melh vang vang a," Ka hmu tawh che a ni, khawiah nge ka hmuh che kha aw.." tiin a khabe chu a chul noh noh a," E! Ka hre chhuak leh si...Magazine-ah i thlalak ka hmu tawh a ni. Ni kum hmasa khan Champhai Miss i ni tawh tak e tiraw? I hming pawh Saizikpuii Sailo a ni bawk e. A dik em?" a ti ta.

" A dik alawm." ka ti ve mai. Pa Thlenga chu pate lam pang, hmul phurh chhe zet leh fiamthu duh zet hi a ni a, ka hmuh tirh atangin ka ngaina nghal hle a.

" Nang ang nula nu zim zem te chuan Volleyball i khel mi dawn em ni?" tiin min fiam zui hlak a.

Fiamthu vek chuan," Ka pawn lam landan avang hian min zuam ngawt suh aw. Court chhungah chuan Keite anga kawlh leh tuan tha ka nih hi. Ball ka khawih i hmuh hunah ngaihdan chu i siam dawn nia." tiin ka lo nui hak a.

Chu chu a dik reng a ni. Ka landan anga nu zim zem tia min zuamtu chuan min zuam sual chawk. Ka tih tawh loh lamah chuan mi luhlul leh thinchhia, kawlhsen leh mipa pawh insualpui hreh lo ka ni. Unau pali zinga hneichhe awmchhun ka ni bawk a, min awm lian a min chhawnchhaihtu te hi mipa hlir an ni bawk a ka rilru hi a pa in ka chhel hle bawk. " Rilru natna in nei a nih chuan i thinlungah khan vawng reng rawh. Midang i hrilh chuan i tawrhna kha i tlangaupui lek a ni mai. I sawi chhuah loh nana na chuan nang pawn i theihnghilh vat mai ang." tia zirtirna hnuaia seilian leh enkawl chhoh ka ni bawk a, pa ve hrek hrawk tur chu ka ni - ka chhungril nun chu.

Pa Thlenga chuan, "Chutiang mi chu alawm kan club mamawh chu. Tun tum chu champ ngei kan tum a, nauteho chuan camp neih an rawt a, mahse Coach berin tul lo a tih tlat vangin kan nei ta lo a ni." a ti a.

" A nih chuan naktuk tlai atangin maw ka rawn ka rawn practise ang?" phur tak hian ka ti a.

" Aw. Kawmchhak lawk khi kan in a ni a, dar thum hmain rawn kal la, i khelhpui turte pawh ka hmelhriattir ang che." a ti a.

Zan rei tak thleng chuan i fiamna khawvel chungchang sawiin kan titi dun a, Maduhi lah infiamna lama tui ve hek lo TV en pahin a phone a lo khawih mawlh mawlh a

Zan kan mut dawn a ka phone ka check chu Zander-a message hi a lo awm reng a, mut hma ka duh vangin chhan pawh ka chhang let ta lem hlei lo a. A pawi lo, ngaihsak lutuk anga ka lan chuan a induh lutuk palh anga ngaihsak vak lo anga ka lan chuan a thangtlawm anga min rawn pawh sauh zawkin ka ring a ni.

He tournament 'Volleyball Inkhawmpui' an tih hi Aizawl distric chhunga Volleyball Clubs hrang hrang inelna tur a ni dawn a. Professional club khelh ve theih a nih dawn loh avangin Zander chuan a khel ve thei dawn lo phawt. Mahse vanneihthlak takin Amanda Volleyball club hmeichhia chu pro volleyball-ah an inhlangkai zo ve loa, an ni chu he khawmpuiah hian an khel ve thei dawn mai bakah Zander chu assistant coach angin a awm a, inhmuhna chance chu kan ngah mai thei a ni.

A tuk hma takah ka tho a, hmaite phihin kawt tualah chuan thlan chhuak khawpin ka tlan kual a. Maduhi a rawn thoh ve meuh chuan ka lo inbual fai sar tawhin an awmpui nula thingpui min lumsak chu ka lo in zo hman der tawh.

Tukthuan ei hmain Champhai lam ka call a, ka nu leh pa ka biak zet hnu-ah Darhmingliana chu ka call ta a.

A muhil lai ka call harh a ni tih hriat tak hian a tho phang aw ngawih ngawih a, " Hello?" a rawn ti phak chap a.

Ka lo nui hak hak,"Morning, Darhmingling!" tiin ka thiante koh fiam thin dan chuan ka han ko a.

Harh nghal kawk ni awm tak hian, "Nangmah e law, Zikpui! " a rawn ti fiah kak a.

" Ni e, ni e. Tu nge call che tih pawh en loin i harh hlawlin i pick up a ni chiang mai." tiin ka nuih vel chiam a. " Ni chhuak hmu hman loa thoh chu i zak lo'm ni? Tho nghal rawh." ka ti lar lar a.

" Aw le, aw le, ka tho dawn..Morning erection hi a nasa lutuk a ka la tho chhuak ngam lo." tiin a nui hak a.

" Pen fawk rawh!'

" Ka ngai lutuk che hi rawn kal ve mai ka duh. Ka rawn lang thut a nih pawhin min lo hau miah suh." a ti ngeng ngal a.

" Ka hau lo ang che. Ka lawm zawk ngawt ang. Enteh, thil hrilh tur che ka nei a.." ka ti a. Zander chungchang ka hrilh loh chuan a rawn kal hunah a hrechhuak dawn tho a, ka hrilh hmasak kha tha zawkin ka rin vanga he tia ti hi ka ni.

" Eng nge ni? Han sawi ta che. Ka beng neih zawng zawngin ka lo ngaithla ang e." a ti halh a.

Maduhi leh Zander chungchang chu ka hrilh fai ta vek a, Maduhi'n phuba laksak tura min tih dante chu ka hrilh ta vek a.

Chu thu a hriat chuan Bronson chu thinrim lutuk hian," Eng tin maw?" tiin a au tuarh a. A khum atang chuan a zuang tho zawk hial ngeiin ka ring. " I inrawlh thuk hmain inhnukdawk leh vat rawh. I thil tih tum hi ka duh lo." a rawn ti nghut a.

" Ka unaunu hi puih ka intiam tawh alawm. Thunrim kher a tul lo, infiamna chikhat ang lekah ngai rawh." ka ti hlak a.

" Hmangaihna hi infiamna a ni ngai lo."

" Oh, Brinson, hei hi hmangaihna a ni hleinem."

" Zikpui, bansan nghal rawh. Min hmangaih a nih chuan bansan nghal rawh. Midang thinlung hmanga infiam hi a dik lo hul hual a ni. " a ti khur khur a.

" Aman ka unaunu thinlung chu infimna tualzawlah a hmang hmasa alawm. "

Thinrim tih hriat tak hian a thaw kawk a, "Tawpsan rawh. I tawpsan loh chuan kan pahnih tan hian a pawi zawk ang." a rawn la ti leh ngat a.

" Oh, chutin min vau kher suh! Ka va mutpui dawn pawh a ni lo a, engah nge i hriatthiam ve mai loh? Ka unaunu a ben vangin ka beng let ve dawnah ngai mai rawh." ka ti a.

" I à ta a ni lo maw?"

" Nih pawh a ni mahna." tiin thinrim takin phone chu ka dah tau hmak a. Hrep tak chuan a! Engmah hriatthiam tum lo mai, amah chiah a inngaihtuah a ni. A farnu chunga thil thleng ni se a thinrim leh phuba lak duh ber berah a tang awm si a.

Bronson chuan a ngaih ngaihin lo ngai rawh se, Zander chu a tibuai dawn tho tho. Maduhi a tihnat em avang khan tihnat let ve chu a phu a ni. A rilru ka tihnatsak thei lo a nih pawhin a chapona tal ka tihtlawmsak ang chu. Hmeichhia zawng zawng hian an àtchilh vek lo a ni tih hi ka hriattir khawp ang.

A thuhrimah, ka va ngaizawng tak takin pasalah ka va nei dawn pawh a ni lo a engah nge Bronson chuan a ngaih kawih luih tlat mai le? Ka thlirna tlang atang hian rawn thlir ve se chuan thil a hrethiam kuarh mai tur hi a ni a, mahse engmah a hrethiam duh thak si lo.

Ka han inngaihtuah let leh a, khatia a hmaichhanah phone ka dah tau hmak mai kha atthlak ka tiin ka inchhir leh hnuhnawh hle a. Call leh tuma ka phone ka lek mek lai chuan amah zawk chuan min rawn call ta a.

" Aw..nichin ka chet danah khan thupha ka chawi e. Naupang chhia leh atthlak taka ka chet vang khan min ngaidam ang che. " ka ti a.

" Ka hmangaih vang chein midang i kawp tur hi ka phal lo a ni. A der maia kawp tur pawh ni la." a rawn ti dam dap a.

" Kei pawn ka hmangaih che a, heng thil avang hian kan inkar hmangaihna hi a derthawn phah dawn hleinem." ka ti ve a.

Rilru nat hmel tak hian, "Mahse chu pa chu i kuahin i fawp dawn tho alawm. Chu chu lemchan thil pawh ni dawn se ka tan chuan a thikawmin a na tak zet asin." a ti halh a.

" Ka hrethiam alawm..."

" I hriatthiam chuan thulh leh rawh."

" Ka thu lo tiam tawh bawhchhe tur chuan min thlem suh."

A tawp atawpah chuan ka rilru min thlaktir thei dawn lo tih a hrethiam ta a niang chu," A nih leh...i rilru chu pe tel lo la, i thianghlimna kha vawng tlat ang che aw." beidawng aw tak hian a ti ta a.

Uar zet hian, " Tehreng mai. Ka rilru, ngaihtuahna leh thinlung chu i hnenah alawm a awm. Ka hmangaih che, Bronson." ka ti a.

Kan inbiak zawh hnu chuan ka thu ngawi vang vang a, Darhmingliana chan chu ka han inchantir chhin vel a. A hrehawm hle ang tih chu ka hrethiam teh meuh mai. Mahse Maduhi hnenah puih ka lo tiam tawh si a.

Ka nutei chuan,"Zikpui, chaw ei tawh ila." a rawn ti a.

Riltam lo hle mahila, "Aw le, ka lo kal." tiin ka tho tharh a.

" I lung a leng ta mai elaw?" tiin min rawn fiam zauh a.

" Ka nutei hi i ti ang lo e! Lungleng rual pawh ka nih tawh loh hi." ka ti hlak a.

" Lunglen hian upat leh naupan a sawi lo, a hrut rual vek a ni." a la ti hram zui.

Chhang let zel duh ta lo chuan choka lamah chuan ka zui ta nghal a. Kut te silfaiin dawhkana an chaw khawrh sa diam chu ka kil ve nghal chat a. Ka riltam loh ngaihtuahin ka la ei hnem phian zui a.

Tlai lamah chuan Volleyball beng tur chuan ka insiam malh malh a, ka bulah chuan Maduhi chu a thu ve ran bawk a, phur tak leh ka lan mawi loh hlau reng reng chuan min lo pui mawlh mawlh a. Ka sam chu inkhelh tibuai lo thei tur berin ka chhipah chuan ka tawn sang vah a, nimin tlaia infiamna a chetpui nuam tur thawmhnaw kan lei chu ka han inbel chhin a. Darthlalang hma ah dingin ka in melh vang vang a. "Duh aiin ka kekawrbul hi a chhing tep a nih hi." ka ti hram a.

" A pawi hlawl lo. I nalhpui lutuk ringawt. "

" Ka lawm e."

" I vun rawng leh i pian hi ka awt thlawt a ni. " Maduhi chuan a ti halh a, ka lo nuih hak a. Chik zeta min melhin, "Ti kha chuan mipa naupang thothang tha tak i ang zawk alawm." a ti rai a.

Ka nui hawk a , "Mipa naupang maw ka an a? Mipa naupang ang chung chuan Zander chhai tluk chu a va har duh dawn ve aw." ka ti hlak a.

" I che zia alawm ka sawi, hmeli! I nalhin i hmeltha lutuk ringawt. Tuna i landan hi chu maw 'better than best' an tih ang kha a ni."

" Kha tin min lo tlawnin min lo fak der chiam teh suh! I Zander chu ka chhai dawn reng!"

" Fak derah che min ngai a maw? I nihna dik tak ka sawi zia chu darthlalanga i thla lo langah khan i inhmu vek lo em ni? Nge, tarmit i mamawh zawk?" tiin a tarmit hlui chu min rawn vuah fiamtir a.

Maduhi chuan Pa Thlenga te inah chuan min han hruai a. Betsy Volleyball Club players thenkhat chuan min lo en ha hlawm a. Pa Thlenga chuan min inhmelhriattir hlawm hnu chuan Coach Miss Siammawii leh amah Pa Thlenga ho chuan kan practise-na hmun tur lamah chuan kan inphur chhuak ta hlawm a.

Ka thian thar turte chu an zauin fiamthu an duh hmel hlawm khawp mai a, nu lian fal bik pawh awm loin kan intiat tlang ang reng hle a, tlemin ka lawr deuh e tih mai a ni. Kawng tluan chuan fiamthu thawhin an nui ham ham hlawm a, inen hranna pawh awm loin kan inpawh nghal sarh vekin inbe nghal bawrh bawrh thei a.

Court kan thlen chuan body stretching kan ti te te a Miss Siami chuan ball khawih leh chan dante min zirtirin kan inkhel ho a, Pa Thlenga chuan Court sir atang chuan min lo thlir vung vung a.

Rei pawh kan khelh hmain Club dang chu an rawn thleng ve nghal a. Mawii chuan, "Amand-ho an rawn thleng e. " a ti zauh a.

" Awi, Zander a rawn tel nia! He pa hi chu lum hlumah pawh ka hlawh ngam sak." Anuni chuan a lo ti bawk a.

Ka thlir phei thuai a, hmeichhia infiammi zingah chuan Zander ngei mai chu sport dress nen inzo tak hian a rawn kal a, a thuam chu a inhmehin a bawp sei sek phiar fat te chu sexy tak a ni. A thlan tla a mita luang lut tur vennan headband Nike company siam chu a hreng bawk a, chhe lo tak a ni chhe lo tak.

Ka ball khawih lam chu ngaihtuahin Zander lak atang chuan ka mit chu la sawnin inkhelh lamah chuan ka insawrbing leh ta a. Min en rengtu an awm hian eng emaw hriatna mak tak kan neih thin hi, chutiang chuan min melh rengtu awm tlata hriatna ka neih vangin ka hawi kual a, Zander-a mitmeng buang thak mai hian chik zet hian min lo melh de sawr sawr chu niin.

A rawn melhna chu hmu lo derin lehlam ka hawi leh vat a, ka ball khawih lai chiah chu ngaihsak angin ka awm leh hmiah. Kan game a zawh chuan court sirah chuan ball kan sep zui a. Zander chuan min rawn pan phei a, ka ball sep lai chu rawn lain,"Eng nge hetah i tih ve a?'' mak tihhmel tak chuan a rawn ti a.

" Ball kan beng a nih hi." tiin ka lo nuih mai a.

Ka thian thar te chuan, "Zikpui, Zander nen hian in lo inhria a ni maw?" an ti he haw a.

" Ah, hria tih lemah inkalpah hmelhriat." ka tih chuan an lo nui dar dar a.

Chik zeta min rawn thlekin," Volleyball i lo khel ve thin reng a ni maw? " a ti deuh hu a. "Eng vangin nge nizanah ka message min reply duh loh a?" a ti zui sap a.


" Ka mut a chhuak lutuk a, ka muhil nghal daih alawm. " ka ti a. Ka lu buk nghat pah chuan,"Ball kha lo vawrh phei la ka lo hlap ang." ka tih chuan a ball ken lai chu rawn vawrh pheiin ka lo hlap ve pap a, nalh lutuk hian a lo la a. Kan pahnih chuan kan beng dun ta a.

Amanda Club players ho chuan," Sir, lehlam club ni loin kan club hi min lo zirtir zawk rawh." tiin an rawn au fiam vel a.

" Hmeichhe chhe lo hi chu a hre teh mai a nia."

Zander lah chuan engah mah ngai lo chuan ball chu min la benpui reng a, a club-ho lakah ka inthlahrung lek lek zawk a.

" I fingering a nalhin a chak tha khawp mai. " tiin ka bulah a rawn phei a, " Mahse i underarm hi ka duhthu a la sam lo deuh." tih pahin ka hnungah chuan a rawn ding a, min rawn kuah pahin ka underarm hman dan chu min rawn hrilh mawlh mawlh a.

Ka dar velah Zander-a awm bawrin min rawn nek chuan ka lo mur deuh uai uai a. A rimtuiin a huhang a na kher mai. Saphaiin a sa dawlh tur a aikaih ang mai hian min aikaih tlat ni ber hian ka hria a.

" Eng nge i ngaihtuah veng veng a? I mit de sawr sawr khan thil hlimawm tak i ngaihtuah ni ngeiin ka ring." ka beng bulah chuan a ti sa sa a.

Ngaih la thei ang bera lo melh ralh pah chuan, " I tang chhunga bei a nawm dan tur ka suangtuah ani. " ka ti halh a.

"Tak zet?"

" Mmm, tak zet."

" I la hre mawlh ang." tiin ka hmui chu a rawn tawk zauh a, "Kei pawh he hmui nalh zet hi eng tiang fakaua fawh nuam nge a nih ka fiah chak a ni." a ti sup a.

A tawngkam chuan min fan raih mai, ka zak chu ka sen deuh ap ap a. Ka zak tur a ni lo, he pa hmaah hian ka zak hauh lo ang. Zak map loin ka chhawnchhaih tur a ni. Intipaukhauhin thawk ka han la ham ham a, ka hmui chu sexy taka ti pawrhin, " I ngam leh fiah chiah la!" ka ti ve ngat a.

"I ngam chiah maw? Kei chuan midang awm ve hi ka pawisa dawn hauh lo a nia." tiin a rawn kun hniam ta mai a.

Ka fiamthu mai kha a ni si a, min rawn fawp duh tak tak mai dawna ka hriat avang chuan a khabe chu lo nam sawnin ka thiante awmna lamah chuan ka tlan phei ta dawr dawr a.

Zander chuan za em em hian min rawn nuih zui hawk hawk a, kei chuan ka lei ka va chhuah khum zauh a.

Amanda Club nen chuan kan inkhel ta a, Zander awm vang nge ni ni dang zawng aiin ka khel tha zawk in ka hria a, nuam pawh ka ti hle a ni. Pa Thlenga pawh chuan min lo fak ve hluai a.

Game khat kan khelh zawh chuan la khel lo ho chu lut ve thungin an khel ve leh a. Zander leh Miss Siami pawh chu court chhungah lutin an khel ve a. Thuthmun remin ka thlan huh hlap chu ka inhru mawlh mawlh a.

" I lo thiam hle mai, Zikpui. Nizan i thu sawi kha a lo dik a nih hi. I hmel en ang ngawt zawng i lo nih loh tawp kha." tiin ka darah a rawn beng thuk thuk a.

" Ka lawm e. Ka khel fu ve bawk a ni."

Zander-a thianpa a niang chu ka ti mai a, an rawn kal rual sia, tlangval sa pan thlarh mai zuan san hmel tak hian min rawn pan a, ka bulah rawn thu vein, "Zikpui, i khel tha khawp mai. " a rawn ti a.

Ka thiam a tih vang ai mahin min biak lumlam a chak vang a ni tih hre reng chung chuan,"Ka lawm e." ka ti ta tho a. "Eng tin nge ka hming i hriat a?" tiin ka nuih hak a.

" I thiante ka zawt mawle. Kei ka hming chu Nunsanga a ni." a ti a. " Lum i ti a nih kha i biangte pawh a tai tek alawm. Hawh cold drink ka va leipui ang che." a tih zawm zat a.

Cold drink chu tuna ka mamawh ber niin ka hria a, ka tui a hal bawk nen. Pa Thlenga hnenah chuan,"Sir, eng nge i ngaihdan? Cold drink chu kan va lei lawk ang e aw." ka ti a.

Ani chu a nui sun sun a," Va kal rawh." a ti a.

Nunsanga chuan a kut chu min rawn pein min kaitho a, dawr lam pan chuan kan inzui chhuak ta a. Zander chuan mit vun chuar nang hian min rawn melh tih ka hmuh chuan ka khi sak a. Kan thiana chu ka thangkamah a awk dawn chiang e.

cold drinks kan va leia kan let leh hnu chuan inkhel en pahin kan thu dun a, Nunsanga fiamthu thawh chu ka nuihpui bawk bawk a. Zander chu a rawn hawi zing hle a ni tih ka hmuh chuan ka lawm veng veng mai a.

A tawpah chuan a ke nat chhuanlamin Zander chu court atang chuan rawn chhuakin kan bulah chuan a rawn phei a." Nunsang, ka sa pel lai a nih hi aw, fimkhur rawh." fiamthu titak deuh hian a rawn ti a.

" Mi sa pel lai leh sa hliam ka veh ngai lo. Ka bulah chuan a himah ngai rawh. Sapeltu dang lakah ka venhimsakah che i ngai thei ang." tiin Nunsanga chu a nui hawk hawk a.

Ka cold drink in lai chu la lawkin a in khawlh khawlh a, inkhel tur chuan court chhungah a tlan lut leh ta nghal a. A chet dan chu mak ti takin ka thlir zui vang vang a.

" Kan thiana khan a Keipui Sa hauh bur che a nih hmel! Zander hi ka hre chiang ve hle emaw ka ti a, mahse thiante leh zel a thik kja ka la hre ngai lo. A ta tur i nih zia chu a tilang chiang hle mai maw?" Nunsanga chuan a ti a.

Za hauh lo hian ka nui sak a, " A fiamthu a ni hrim hrim ang." ka lo tihsak mai a.

" Kei pawn a tir kha chuan a fiamthu emaw ka ti a, a mitmengah khan a fiamthu loh zia chu a lang chiang hle a nih kha." a ti a.

Zahzelah chuan," Hawh, ball saw i sep mai mai ang hmiang." tiin ka tho nalh a, Pa Thlenga bula ball chu lain court sirah chuan kan lo khawih mai mai a. Inkhel ve lo ho chuan min rawn pan khawm a, kan lo beng ve ta hlawm a.

Kan club a mi Hruaii chuan, " Nunsang, i thianpa Zander hi min lo tihpui teh. Ka duh teh mai a nia." fiamthu titak deuh hian a ti a.

Nunsanga chu ball ben pahin a nui hawk a, "Vacancy a awm tawh lo ang tih ka hlau khawp mai. Zikpuii hian kei aiin a hre chiang zawk daihin ka ring. Zander-a thinlung chabi kawltu a ni alawm." tiin min rawn siai zauh a.

Ka lo zak ang reng khawp mai a, mahse kei aiin Hruaii chu a la zah hmel ta zawk a. Zah hmel taka heh pet zauhin, " Ka tihpalh aw, Zikpui. La run lutuk suh. Ka fiamthu mai a nih kha." a ti thuai a.

"Pawi ti reng reng suh. Keia lo lak run vak chhan tur a awm hleinem. Nimin maia inhmelhriat ve chauh alawm kan nih." ka lo ti thuai a.

Thawveng ta huai ang hian Hruaii chu a thaw huai a, " Zander hi kei chauhin hmeltha ka ti lo a, hmeichhia tu pawhin hmeltha an tiin a bialnu nih an chak vek alawm." a ti lang lang a.

Hmeichhia tu pawhin a bialnu nih an chak vek maw? Chuti a nih chuan hmeichhia ka ni ve lo a ni mahna a bialnu nih chakna chhete mah ka nei ve si lo.

Khua a lo tlai ta deuh bawk a Miss Siami chuan a nauteho chu min ko khawm a, kan han stretching kual leh te te a, " Naktuk zing dar ngaah kim leh tur aw. " tiin player mal tin chu kan chak lohna lai leh insiam that kan ngaihna laite min hrilh mawlh mawlh hlawm a. Haw kan inpeih chu a ni ta der a.

Zander chu a la inkhelh laklawh avang chuan kan haw tur thu pawh hrilh loa ka kalsan chubka inthiam lo ve lek lek a. Motor lam pana kan kal mek lai chuan Zander-a aw chuan min rawn au ta a.

" Hey, Zikpui, lo ding lawk teh."

A aw ka hriat chuan ka lehhawi thuai a, hmanhmawh tak leh inthazo fahrana kan lam pana Zander rawn kal ka hmuh chuan ka ding chat a. Ka thianteho chuan min fiam nghal nak nak hlawm a.

Kan bul a lo thlen chuan kei ni loin Miss Siami chu melhin nalh fahran hian a nuih var var a, " Miss, Zikpuii hi chu keiman ka rawn thlah mai ang, lo va hawsan mai ula." a ti ta a.

Hnial tuma ka ka an ziau lai chuan," E, teh reng mai. Mahse chelh rei lutuk lo la." tiin min kalsan ta hlawm a.

" Engmah sawi loa min kal san ngawt i tum em ni a? 'A nih leh aw' tih tawngkam tal chu ka phu vein ka lo inhria a." a ti nghal tawl a.

" I inkhelh tui hmel em alawm."

Ka beng bulah chuan rawn kun hniamin, "Fawh kha i la cho em?" a rawn ti sa sa a.

"Aih, cho lo." ka ti hmak a.

A nui ta hawk hawk a, "Min hlau em ni?" a ti ta a.

Uar fahran hian, " A teuh lo mai!" ka ti hlak a.

" A nih leh hun remchang min siamsak rawh. Zanin chu ka rawn leng ang aw? Remti hram teh." a ti thawp sat a.

" Aih !" Ka duh aiin ka aw chu a ring a.

Ka banah chuan min man betin a lamah chuan min phih hnai dawrh a, a awmah chuan min pawm bei chialin "Engah nge ka rawn len hi i phal hauh loh a?" tiin min fawh mai tum ni mai awm hian a rawn kun hniam a.

Ka tal phut a, " Nilo, ni lo, ti suh, Zander! " ka ti fak a.

" Tunah fawh i duh loh chuan hun min siamsak rawh, ka rawn leng ang aw." tiin a mitmeng buang thak chuan min melh ran a.

" Aih."

" I luhlul reuh ngawt mai. Mahse ka duh zawng tak a ni. In ina len i phal si loh chuan nangmah hi rawn leng zawk rawh aw. Ka chhungte chu Singapore-ah krismas bazar-in an kal a, keimah chauhin ka awm a ni. Zan riah i ei ve nghal anga, dar riat velah ka thlah haw ang che." a ti a.

Ka chhan hman hma chuan car kawngkhar chu hawngin min nawr lut hi a ni ber a, a thiante chu auin," Ka lo va hawsan mai ang che u." tiin a rawn lut a, motor chu tinungin kan tlan chhuak ta nghal a.

Thinrim tak hian ka melh hrawk a, " Ka duh leh duh loh pawh hre loin hetin min hruai ngawt thei lo ang." ka ti that that a.

" I ina len i phal bawk si lo a duhthlan tur dang ka nei hek lo." tia nui sukin chak tak hian car chu a khalh par par a.Lei rawhchan in lian leh nalh lutuk mai kawtah chuan a ding ta chat a." Le, kan thleng ta e! Zikpui, nakina i in la ni mai turah hian ka lo lawm a che. " tiin ka darah chuan min rawn kuah a.

" Nakina i in tur a? Eng nge i sawi awmzia le?" ka ti bak hlar a.

" Kan inneih huna i in tur mawle! Ka nupuiah ka duh che a ni."

Za em ema nuih chhuah vak mai chu ka chak."Inneih maw? Hriat pawh min la hriat chian loh hi! Chu lo rengah pawh, ka neih duh leh duh loh che i hre ngawt em ni?" ka ti kha kha a.

" Aw. Min nei duh a ni tih ka hria a ni. Hmangaihna hi inhmelhriat rei leh rei lohah a innghat lo a, minute khat chhung lek paw'n hmangaihna hi a thleng thei a ni tih ka chiang."

Ka dar ka san ak a, kan la hria ang chu, Mr Casanova!

In chhung kan luh rual chuan an awmpui nu hnenah chuan rawng min bawl kep turin a hrilh nghal zung zung a.

" Chaw ka ei nghal dawn a nih chuan ka chhungte hnenah chanchin ka'n hrilh ve lawk ang e." tiin varanda-ah chuan ka chhuak a, Maduhi number chu ka dial ta a." Hei Zander-a te inah ka awm mek a, zanriah eiah min sawm a, ka ei nghal dawn a nih hmel. Chaw eiah min lo nghak suh u." ka ti nghal zung zung a.

" Engkim a fel vek maw?"

" Fel vek e. Min ngaihtuah suh. Dar kua rik hmain ka rawn haw ang." ka ti a.

" Ka rawn lamtir ang che. Dik thlapin che ang che aw." min ngaihtuah hmel tak hian a rawn ti a.

" Teh reng mai. I tan ral ka do mek e. "

" Good luck!"

" Chu chu ka mamawh khawp ang."

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » August 15th, 2021, 4:21 pm

BUNG _ LINA

Ka bengah chuan Bronson-a aw a lo ri nawn tluk tluk a,"Zikpui, ka tan chauh rinawmin awm reng rawh aw." a tih kha. Mahse tunah chuan Zander hnenah hmangaihna der hlan turin a ang chhungah a tlu lut ta chu a ni ta mai sia. Veranda hungna chu bawhin Aizawl khawpui pe un mai chu ka thlir vang vang a

Chutia ka lo inngaihtuah veng veng lai chuan theitui hi tray a chawiin Zander chu a rawn chhuak a,"Ka Lasi nula chu eng nge maw i ngaihtuah veng veng le." tiin a rawn nui sang a , tray chu nghatin theitui no pakhat zawk chu min pe a.

No lo lak pah chuan, "Eng emaw vel mai mai ka ngaihtuah a ni. " ka ti a. No lo ban vat pah chuan," Damdawi i telh loh hram beisei ang." ka tifiam hlut a.

A nui hak a," Zawlaidi far thum ka telh, i in ni la lain ka zunah i uai nghal ang." a ti a.

" Ka uai tan der tawh chu a nih hi." ka ti zauh a.

Min si cheta rawn dingin a no chu a lek kang zauh a, " Kan hmalam hun atan cheers!" tiin ka no nen a rawn siktir zauh a. "Hetia din reng chu ke a kham duh em mai, i thu teh ang." tiin kan bul maia thutthlengah chuan min kai thu a.

Engmah sawi buai lo chuan ka thu ve mai bawk a.

" Khawngaihin mipa dang tumah ngaihtuah suh ang che. Keimah chauh lo chu kha i thluak bur tetakteah khan a awm tur a ni lo." tiin a lamah min kuai her a, a mitmeng buang thak chuan min melh ran a, ka lo sen deuh ap ap a." Zikpui, hmeichhe danglam tak i ni." a ti sup a.

Hetiang em em a hnaia chiang lutuka inen chu nuam ka ti chiah lo, ka mit chu la sawnin hnuai lam ka melh ta daih a, "Nilo, khatin min melh reng teh suh." ka ti sap a.

A rum nghat a, ka inrin hman hma chuan min kuah lawk a, min rawn fawp ta mai a. A tirah chuan dimtein min rawn fawpa a duham telh telh a, min fawp ta bawrh bawrh a.

Lo tan emaw lo tal chhuah emaw pawh tum lo chuan ka lo indawh tawp mai a. Uar leh zuala min fawh tak zelah chuan ka awm mai mai thei bik tawh lo. A nghawngah kuahin duhthawh zet hian ka chhanglet ve ta a. A mi fawhna chuan ka kawchhungte chu kang huam huamin phurna nasa mangkheng mai min pe a ni.

Bronson Darhmingliana fawh nen chuan danglam tak a ni. Ani kha chuan phurna engmah min pe chhuak ngai lo a, tun ang hian ka thinphu lah a rang ngai hek lo. Zander fawh chu a thawh dan a danglam tak zet a ni. Thawkdan raih thleng kan infawp a, chutah thaw halh halhin Zander awmah chuan ka hmai ka phum tlat a, a hmel ka en ngam lo a ni.

Zander chuan nghet takin min lo kuah bei chial a,"Duhtawka fawh che a hrawm bawrh bawrh che hi engtik lai pawn ka duh a ni. Zikpui, min ti à thei tak ngial dawn a ni." a ti tham tuak a.

Ka thinphu te chu a inthum rawn tluk tluk mai a, ni danga ka la hriat ngai reng reng loh nawmna leh thlamuanna mak tak chuan min zem chiai chiai a, Zander tang chhunga bei thlamuanthlak zia chu ka hre ta alawm. A bula awm a nuamin a hahdamthlak a, hmeichhiate duhthusam chu he paah hian a kim thlap a ni.

Chutiang ngaihtuah tur ka ni lo, he hmuna ka awm chhan chu Maduhi phuba la tur ka nih vang a nih kha tiin ka inthing harh a, ka nam sawn a, " Theitui hi in phawt teh ang " tiin pangngai thei ang ber chuan ka tawng a, ka aw zauthauna vanga lawi rat erawh ka thup zo lo.

Min hmachhawn zawnga thuthmun rem pah chuan a theitui chu a in leh khalh a,"Zikpui, kan la inhre chiang lo dun hle mai sia, i chanchin min lo hrilh teh." pangngai tak hian a ti a.

Zander-a inthunun theihna chu ka ngaisangin puitling ka ti kher mai a. "Chanchin teh vak pawh ka nei lo." ka ti sap a. "Unau pali zinga naupang ber leh hmeichhe awmchhun ka ni a, tunah hian kum sawmhnih pakhatna ka hmang mek." tiin tawi thei ang ber chuan ka hrilh a.

A mithmul dum buk tak chu san akin , " Ka lakah hian i inhawng loin i chhungkaw chanchin hi i zep tlat mai a, ka lakah hian eng nge zep ruk i neih le?" a ti ta mai a.

"Zep ruk ka nei em ni?" ka lo ti let deuh ha a.

"Sawi duh loh leh ka hriat ve atan i duh loh eng emaw awm tlata hriatna ka nei a ni."

Chutah ka zahzelah uar zet hian ka nui lui hawk hawk a " I hriat ve atan ka duh loh nia ring chung siin eng vanga hriat tum tlat si nge i nih?" ka han ti a. "Engmah zep ka nei lo, chanchin sawi tlak ka nei lo mai chauh a ni e." ka tih zawm zat a.

Min en vang vang a, aw ril raih hian,"Zikpui, ka thinlung zawng zawngin ka duh che a, kan inhriatna hi la rei lo hle mah se kei chuan kum tam tak lo hre tawh che ni maiin ka inhria a, nupuia neih duh hialna che thinlung ka pu hman a ni. Diktak chuan ka hmuhtirh atang che khan ka mit i la nghal zar mai a, chuvanga rawn su lui che pawh kha ka ni reng a..." a ti dap dap a.

A sawi tur a sawi zawh hma chuan, "Min su lui maw?! I va'n sual tak!" tiin ka chum taih a.

A nui ve hauh lo,"Ni, ka su lui che alawm. Ka nunhlui liam taah khan hmeuchhe hrang hrang ka lo kawp kual thin a, mi thenkhat chuan lerh leh nula ral ti hialin min sawi thin tih pawh ka hria. A nihna takah chuan ka lerh vang ni loin ka hmeichhe duh tak ka la tawn loh vang mai a ni. Nang hi lo tawng hma che ila chuan nula hran hran ka kawp kual hauh lo ang tih ka chiang a ni. Heng zawng zawng ka hrilh nachhan che chu nakin maiah miin ka chanchin hi an la hrilh leh tho chein ka ring a. Chutih huna i rilru a tihbuai ka duh loh vang a ni."

Ka nui ru sak a, ani chungchang avang chuan ka buai hauh lo ang. He tianga aw dam leh zei hian Maduhi rilru chu a lo tihnatsak chu a ni awm si a. Maduhi chang ni lo, nula tam tak thinlung chu a tihnatsak tawh ngei ang tih ka chiang a ni. Mahse kei zawng min ti na ve hauh lo ang, ka intihnattir ve phal dawn lo, keimah ngei hian ka tina let zawk dawn a ni.

Chutah a theitui chu in zoin min rawn kuah chawt a, zei tak hian a kut chuan min chul lawr dan dan a, ka hmuiah chuan a rawn fawp leh ta. Diktak chuan he pa khawih leh fawh vel hi nuam ka ti thlawt a ni. Ka pha lo. Mahse ka thinlung chhungril tak chuan ka hua a ni, ka unaunu rilru namen loa a lo tihnatsak tawh avangin.

A mi khawihna chu lo dawh mawl tawp ka tum bik lo, zei taka lo chhang let ve in ka lungphute chu a inthum rawn tluk tluk tawh mai a. He pa hi ka rilruah ka dah tur a ni lo, Bronson, ka Darhmingliana chaub kha ka ngaihtuah tur a ni ka ti ru mawlh mawlh a, ka mitthlaah chuan Bronson ka dah lui tlat a. A hmui sexy zeta min rawn fawhnate chu Bronson-a fawh angah ka suangtuah lui hram hram a.

A nghawngah kuahin a tukkhum samah chuan ka tham tawn tawn a, "Oh, Bronson, ka hmangaih lutuk che.!" tiin ka phun sep sep a

Zander chu thawklehkhatah a inla khawng nghal auh a, min nam sawn lawpin, rum em em a min melhin,"Bronson chu ka ni hauh lo mai." a ti vawt raih a.

Ka harh chhuak nghak zawk a, ka taksa a phurna nasa tak mai chu chawplehchilhin a bo nghal duak a. Pawi lutuk! Pawi lutuk! Bronson hming ka lo lam chhuak palh a nih chu. Eng tin nge he kan inkar boruak hi ka tih pangngai leh theih tak ang? Ka meng hnual nghal rawih a," Zander, pawi ka ti lutuk. Chu hming chuan ka lo ko palh che a nih pawhin min ngaidam rawh." ka ti ta ngawt a.

A hmelah chuan eng nge a ngaihtuah pawh ka hre thei lo, a ding chhuak a," chaw ei tawh ila a tha ang." a ti vawt raih a, in chhungah chuan a lut ta nghal a.

Maduhi phuba laksak duh lo ila chuan ka haw nal nal ang chu mawle. Rang takin ka um zui nghal a, a banah chuan man chawtin,"Zander, khawngaihin min ring rawh. Ka duh lutuk che a ni. " ka ti ta a. Aw, ka unaunu vang chuan a tul ta a nih leh thingthiin a khawngaihna ka dil mai ang chu.

"Bumna thanga awh leh hi ka duh tawh lo a ni."

" Ka bum lo che." Dawt ka sawi chian em avangin ka rilru chuan Pathian hnenah ngaihdam ka dil ru mawlh mawlh a.

" Ka naupan tet atanga ka hmangaih hian nasa takin min tina tawh a, chuta tang chuan buma awm nawn leh hi ka thil hlauh ber a ni. Chu ka hmangaih hmasa ber ka thinlung tikehtu chu Saizikpuii ve tho a ni." tiin kei min hrilh ai mahin amah leh mah inbia a ang zawk mah a.

Chu ngei chu a lo nih chu an inhmuh tirha a hmingin a tan awmze thuk tak a lo neih thin thu a sawi chhan kha. Ka hmingpui ngei chuan nasa takin a lo tina tawh a lo nih chu. Ka thin chu a rawn phu rang zawih zawih a, mak tak maiin Zander chan mai hlauhna chuan min rawn ti na zawk a. A chhan pawh ka hre lo ka thinlung chu a na vawng vawng mai a,"Zander, ka..." sawi tur ber pawh hre lo chuan ka nene ral ta vel mai mai a.

An awmpuinu chuan rawng ala bawl peih loh avang chuan TV thlir pahin kan thu leh ta a. Zander hmel chu a nelawm loin a lang vawt ruih mai a. Thil zawng zawng tikhaw lo turin engah nge maw Bronson hming ka lo lam rik kher ni? Engkim kha a kal tluang tan dawn viau asin mawle Theih tawp chhuahin a rilru hi hmin a ngai a ni chuti lo zawng Maduhi phuba a laksak thei nang le.

" Zander?"

" Mmm.." hawi pawh a rawn hawi lo a, a phone chu a bih ngur mai a.

" Min ring rawh, khawngaihin. Bronson hming khan ka tan awmzia a nei hauh lo."

Chutah rawn hawi pheiin chik zet hian a mitmeng buangthak chuan min rawn melh vang vang a," I ti takzet maw?" a ti boh a.

" Ka ti takzet. Zander tih hming chiah hi ka tan awmze nei chu a ni." tiin ka zawlaidi nuih chu ka han chhuah saih a.

Zander chu rawn tawlh hnai ruakin a thaw halh a," Kha nui mawi lutuk kha chuan vur pawh a tialh thei ang chu." tiin ka hmui chu a rawn tawk zauh a.

Thlahlel ber ang mai hian ka lo kuah nghal chung chung a,"Zander, ka bum hauh lo ang che." pangchang aw tak hian ka ti nai nai a.

Zander chu a nui ta hak a," Mi hneh theuhna riau i nei a ni. Nang ang renga min hneh hi an la awm lo. " ti tham tuakin a lei chuan ka hmui chu rawn nawr kauin min fawp ta hlawih hlawih a. Ka bengkawmah rawn seh ner nerin, "Min bum suh aw, Zikpui. Dawt hi ka hua a ni." a ti sa sa a.

" Ka bum hauh lo ang che." dawt chiang bal han sawi chu nuam ka ti bik lo.Mahse hmeichhe tam tak lo bum tawh tu a nih vangin a laka dawt sawi pawh chu ka hreh loh phah a ni.

Chaw te kan ei kham hnu chuan zai ngaihthlak pahin zaithiam kan tih ho chung chang kan sawi dun malh malh a, kan rilru a inhmuin nuam ka ti ta phian a.

"Zikpui, min nei duh ang em?" a rawn ti chhuak ta phut mai a.

Chu zawhna dengkhawng tak chuan min tiphu zawk mai a, eng tin nge ka chhan tak ang? "Ka...uhh..Zander, kan la inhriat chian loh em hi. Nimin maia inhria kan ni a, inneih hial sawi nan chuan a la hma deuh lo maw? Ka mizia i hriat chian hunah chuan nupui atan i duh loh ber ang mizia pawh ka lo pu mai thei asin." tiin ka chhang ta a.

" Ni khat ka hriat che hi a tawk. Kum tam tak lo hre tawh ang maiin ka thinlung hian a pawh che a ni. Min chhang teh, min nei duh em?"

" Inngaihtuahna hun min pe rawh."

" Inngaihtuahna'n chuan ni eng zat nge i mamawh ang?"

" Ka hre lo...ka..."

" Aw le, a tha alawm. I rilru i siam fel ve leh min hrilh hre vat dawn nia." tiin min kuah chial a.

"Tehreng mai." tiin ka sana chu ka'n bih zauh a, dar kua a lo ri tep tawh mai a."Lalpa leh! A tlai lutuk tawh. Ka chhungte hnenah dar kua rik hmaa haw ka intiam asin." tiin ka ding chhuak nghal a.

Zander pawh chu a ding chhuak ve nghal a,"Ka rawn thlah ang che." tiin ka banah a rawn vuan chawt a.

" Ni lo e, taxi-in ka haw mai ang. Chuti lo zawng ka chhungten min lo ringhlel palh ang." ka ti thuai a.

Taxi stand thleng min rawn thlah a, " In i thlen ve leh min rawn text ang che aw. Him takin i thleng a ni tih ka hriat theih nan." a ti sup a.

" Aw le, a nih...mangtha phawt mai aw." tiin taxi-ah chuan lutin kan tlan ta nghal a.

In ka thlen chuan dan pangngaiin ka nuteite nupa chu an thiante nen card an lo deng leh laih laih tawh a, Maduhi chu a lo awm lo bawk a. Ka nutei hnenah a awmna ka zawh chuan, " A thianpa nen an leng chhuak a nih kha. E! Min lo nghak rawh se a tih tak che kha." tiin min chhang a.

Ka inbual fai hnu chuam mu chungin lehkhabu chu ka chhiar ta veng veng a, mahse ka lehkhabu chhiar chu ka rilruah a lut thei meuh lo , Zander hmel mawlh chu ka rilruah a cham tlat mai a. Kan inkawm dan te chu chhutkir lehin ka thinlungah chuan a khat liam tak meuh a ni. A tawpah phei chuan ka lehkhabu chhiar lai chu dahin ka phone chu ka la a," In ka thleng tawh e. Ka muhil nghal dawn." tiiin ka text ta a.

Min rawn chhang let thuai a, " Him dam taka i thleng chu ka lawm e. Min kalsan chiah a ka ngai nghal ngawih ngawih mai che a ni." a rawn ti a.

" I over a nih chu🤣"

" Ni e, ka thinlung hi i lakah hi chuan a luangliam overflow reng mai dawn a nih hi."

Kan inmangtha hnu chuan ka khua hi har ta riau hian ka hria a, a chhan ka hre lo Zander chu ka ngai veng veng mai ani. Ngaihtuah loh ka tum pawhin ka rilru chu a luah ngut ngut mai a. He ti em em a a ngaihtuahna luahtu mipa hi a la tawng ngai lo a ni.

Zing leh tlai tin Volleyball kan khelho a, kan khelh zawhah kan leng chhuak dun a, kan inhmuh loh kar lahin phone-a kan inbiak loh leh kan in text reng bawk a, Zander thinlung chu ka hneh hle tawh a ni tih ka hre chiang. Mahse pawi ta ber chu-- a thinlung ka hneh chauh a ni lo. Ani chuan kq thinlung a hneh tel ta tlat hi a ni. A hmel ka hmuh loh chuan ka ngai veng veng zel mai si.

Zander zunah ka uai ta tihna em ni ang le? Lalpa, a ni thei lo ang! He pa zuna uai tur hi ka ni lo asin. Tihnat ka va tumna lamah keimah leh keimah hi ka intina tel dawn a nih tak hmel hle mai. Lalpa, he thil hi thlentir suh.

Maduhi hian he thil hi hria se a lawm ka ring hauh lo. Keima thangkamah ngei chuan ka inpal awk ta a nih hi. Bronson hlauhthawn ang ngeiin thil a lo thleng ta : thla kua kan inhmangaihna chu he Zander vang hian a tluchhe dawn ta a nih hi.

He pa zuna uai hi ka tum lo asin, mahse tum ang vekin kan awm thei lo a ni si. Zander te ang mipa lerh leh kawplawr chuan a thinlung takin min duh ve ang em ? Ka ring chiah lo. Ka laka a thu sawi ang kha chu nula dang lakah pawh a sawi foin ka ring. Ka hmabak chu Maduhi anga buma awma rilru nat chiah chu a ni mai ang em? Mmm, ka duha ka cho chhuah a ni a, a tawrh pawh ka huam tur alawm.

Tum khat chu Maduhi nen chawhmeh ilo vel leiin kan bazar dun a, min lo nghak rengtu car lam pana inkhai bawr laka kan kal lai chuan min rawn nghawk zauh a," Eng nge?" ka lo ti ha a.

" Enteh, saw..la tin chhailawra chuan nula dang a kawp leh tak saw." tiin min kawhhmuh a.

Ka va hawi phei nak chuan Zander leh nula hmeltha fahran mai hi kut inkai riala kal dunin an lo nui dun hawk hawk a. Ka thil hmuh chuan ka thinlung a chhun na hit zawk mai a. Ka bum emaw ka lo intih kha ani sawn min lo bum zawkin keimah leh keimah ka lo inbum hman hle a lo nih hi. Ngawi rengin car bulah chuan ka ding ngal a.

Maduhi chuan hmui ner nang hian min lo thlir reng hi a lo ni a," Zikpui, i tha maw? " a ti halh a.

" Eng nge ka that loh ngawt ang?" tiin ka nui lui hak a.

" Karei! I thik a ni! I thik a ni tiraw? Thil kal dan hi a dik dawn hauh lo mai." a ti ruai a.

" Kei hian maw ? Thik i ti em ni?" tiin ka la nui lui cheu a," Kan lemchan thawnthu-ah hian thikna a tel loh kha." ka ti hram a.

" I zep a ni. I hmelah khan a lang reng alawm,Zikpui. He pa chanchin hi ka hrilh fai vek tawh che kha ; ngaihzawn chi a ni lo. Nupui pawh nei se a nula lawm hi a reh chuang hauh lo ang. A lakah i rilru a lo nem deuh a nih pawhin tikhawng vat rawh." a ti bawrh bawrh a. A hmel chu a nelawm loin Zander zuna ka uai chu a duh hauh lo tih a chiang kher mai.

Harsa ti tak chuan ka nui lui hram a," I ngaihdan kha thlak vat rawh. " ka ti nghat a.


"Zikpui, Zander hi i hmangaih thei lo ang. I hmangaih tur a ni lo. I U ka ni a, kha ti khawpa min tina duhtu kha i hmangaih tur a ni lo. I tina let ve zawk tur a ni." a ti nghal bawrh bawrh a.

Rilru nuam lo tak chuan ka va melh kawk a,"Aw le, i ngawi thei hram lo'm ni?" ka ti vawt raih a." Maduh, ka ...."

Ka sawi tur ka sawi zawh hma hma chuan ka darah min vuan a, min sawi ta nawk nawk mai a,"Min hrilh teh, Pathian hming chhalin ka ngen a che. He pa Zander-a hi i hmangaih em?" a ti ta tuarh tuarh mai a, amah lah chu a tap lo chauh a ni.

Ka tawtin ka pik mup mup mai a, zawitein ka lu ka bu ta nghat a,"Pawi ka ti khawp mai. A tihnat vang che a tihnat let ve chu ka tum a, hmangaih erawh ka tum hauh lo asin. Nie, he pa hi ka duh a ni." ka ti chhuak ta hlawl a.

Maduhi chu hmai hup chuan a thaw ta hawk a,"Nilo, a theih loh. Kan lemchan thawnthu-ah khan hmangaih tur tih a tel loh kha." a ti tlawk tlawk a.

Za hauh lo hian ka beidawng nuih ta ngawt a, " Kan ziak chawp leh mai a niang chu. " ka ti halh a. " He pa hmelthat leh zei zia hre sa rengin va ngaizawng der turin min tir a. Nilo, min tir mai a ni lo, ka duh lo chung min nawrlui a nih zawk kha. He tia ka lo duh tak avang hian min dem ngawt thei lo ang. Amah pawhin nupui atan min sawm nghe nghe asin." ka ti ve ta a.

" Zander hi i ring a maw? A piang ve a ni tih i hriat hma khan ka lo hrechiang fe tawh asin. Ani sawn a hmangaih lul lo ang che. Amah leh amah bak hmangaih a nei lo a, tin, nupui atan leh lek phei chuan a duh lo hulhual ang che." tiin thinrim tak hian chhuatah chuan a vei tawn ngat ngat a.

Ami tawng khum dan chu ka duh loin ka thin a tirim tep a ni,"Nangin i hmangaih tawh loa, i hua a tihnat let i duh laiin ka lo hmangaih a nih chuan i tan pawina a awm em ni?" ka ti ve deuh hmak a.

" Pawi tehreng mai. He pa hi tuman an neih ka phal lo. Ka hmangaih asin. Tuman, tumah rengin an nei tawp lo ang : kei chauh lo chuan." Maduhi chuan a ti tuarh tuarh a.

A thu sawi chuan min nghawng kher mai, ka khur ru der der a. Maduhi hian Zander chu a lo la hmangaih reng a nih chu. Ka unaunu mipa duhlai ka lo chuhpui ve tihna em ni le? Sawi mai tur pawh hre lo chuan ka kuttin chu ka seh neuh neuh a, chutah thaw hawkin," I haw hle emaw ka ti a." ka ti ta sap a.

" Ka haw ngai lo ang..."

" Mahse tihnat kha i duh a ni si a..."

" Tihnat chu ka duh. Mahse, midang tan ka phal tihna a ni lo aw."

Ka hmai chu ka hup vang vang a, " Zander lakah hian ka rilru ka lo pe thuk lutuk hman a ni." ka ti halh a.

" Ani sawn a hmangaih ve chuang lo ang che. A rilru chhete pawh hi i lakah a pe bawk lo ang. Tin, Bronson..."

" Sawi suh!" ka lo ti hlur a. " Rawn zin lo tawp ila tha tur. Buainah ka rawn intat lut mai a ni e." ka ti tlawk tlawk a.

Maduhi chuan min rawn su leng lawp a, "Saw, Zander a rawn lang leh tawh. Min hmuh hmain car-ah hian lut vat ang." a ti chul a, car-a luh a rual a.

" Ka kal sawn dawn lo. I duh leh kal rawh. Min rawn hmu rawh se." ka ti ve ta ngat a.

Thinrim hmel takin Maduhi chuan min rawn melh a, ka chawhmeh khai bawr chu motor-ah dah lutin, "Lo va haw mai rawh." ka ti a, an tlan ta nghal a.

Hmeichhe ral pawh lo niin hmeichhe zahnih rual pawh lo kawp rawh se, ka kiansan bik dawn lo. A ruhno no chhuakah a ni tawp mai a ni. Kei chu a chhuak pawlah ka tang hauh lo ang, hmeichhe dang chu ka tlawmban dawn khawp.

Ka duhthusam ang ngeiin Zander chuan min rawn hmu ta a, nui var vara ban rawn vaiin min rawn pan ta a.

" Zander, ..." engmah ka sawi thei lo, ka hnuk a ulh deuh tlat mai a.

" I tha maw? I hmel landan kha a dik lo tlat mai."

" Zander, nang hian kei hi min hmangaih tak tak em?"

" Zawhna atthlak tak a nih chu. " tiin a mitmeng buang thak chuan min melh vang vang a, " Ka hmangaih che tih i hriat vek kha. Hawh teh, saw laiah sawn lut lawk teh ang." tiin kan piah mai thawmhnaw changkang tak tak an zawrhna dawrah chuan min kai lut ta a.


Dawr lo nghaktu nu upa lam hmel ngainatawm tak chuan min lo melh tawnin min lo nuih var var a,"Ka ni, hei ka nupui duhthlan Zikpuii a nih hi. Biak fal lawk ka duh a." Zander chuan a ti a.

Nelawm taka nui vur vurin," Va inbe fal teh u khai." a ti ve mai a.

Pindan te ren rawn leh fel thlarhah chuan min kai lut a, thutthleng sei pakhatah cbuan insi riin kan thu dun a."Le, eng chuan nge i rilru tibuai min hrilh teh le." a ti ta a.

" Mi zawng zawng hian i lerh zia thu hlir min hrilh a, nang hian min duh ve tak tak pawh ka ring lo a ni." ka ti sap sap a.

A nui hawk a, min kuah nghal chawt a.

" Nui mai teh suh! Min nuihzat em ni?" ka ti hlak a.

Chutah a nui lai chu a tawp hmak a," Ka nuihzat hauh lo che. A hma pawh khan heng tawngkam chu i la hria anga lo ring suh ka tih tawh che kha. Mi chu a nunhlui hmangin i teh thei lo ang, nunhlui chu kan kalsan tawh thil hlui a ni . I naupan deuh laia i thawmhnaw hak thin hmang khan i pumrua hi tunah lo chhut ta ila a dik thei dawn em ni? Ka hmangaih tak zet che a neih ngei che pawh ka tum a ni."

" Mahse tun lawk pawh khan nula pakhat kut kaia i kalpui lai ka hmu alawm. Rin che hi chu ka duh a, mahse a har lam mah a ni." ka ti a.

" Min ring rawh, ka rinawm tawk a ni. Nichina ka nula kalpui kha chu ka ni fanu hi alawm. I lo thik a nih chuan i rilru thlak thuai rawh, i thik tham a ni lo. Nang ka tawn hma che kha chuan ka lo lerh pawh a ni thei, tunah chuan ka tawng ta che a, i tan chauh ka nung tawh ang." a ti a, ka beng chu min khalhsak neuh neuh a.

Ka thinlung chu sawi thiam bakin a hlim a ni.A awmah chuan ka bei thlap a, " Ka lawm e,Zander." ka ti sap a.

Chutah Zander chuan min kuai daka, ka hmuiah chuan min fawp ta vawng vawng a. Lungchim tak chuan kan infawp vawng vawnga engmah dang reng kan hre chang tawh lo.

" Zikpui, min ring rawh, ka hmangaih che. Ka hmangaih ber che." a ti mawlh mawlh a.

" Kei pawn...ka hmangaih che."

Ka mitah tak chuan min melh vang vang a," ka nupui nih chu i duh ang em? Min chhang teh, min nei duh ang em?" a ti a.

Ka nui sak a," Aw, ka nei ang che." ka ti ta a.

" Tuna i thu sawi hi hre reng ang che. Min phatsan leh si vaih chuan a pawi khawp ang. Inbumna hi ka hua a ni. Rinawm takin ka tan awm ang che."

Maduhi nen tihnat kan tum dan chu ka ngaihtuah kir a, ka zakin ka inthiam lo ru ngawih ngawih mai a. Khangte kha hria se engtin nge a ngaih ang le? Nakina a hriat leh ai chuan tunah hrilh hre nghal ila a that zawk ringin,"Zander, enteh thil hrilh tur che ka nei a...''

Min rawn kuahin min fawp nawk nawk a," ka hmangaih che a, min hmangaih bawk chuan a tawk. Kan inneih hun tur chu ka sawi mai theilo nain kei lo chu pasalah midang i nei dawn lo." tiin hlim tak hian a nui hawk hawk a.

Zander hmui lum ham ham leh zei fahranin ka hmui a rawn tawh fuh chuan ka sawi tum ber pawh ka hre leh ta lo, a mi fawhna chu duhthawh deuhin ka lo chhang let ve ta zawk a.

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » August 15th, 2021, 4:21 pm

BUNG _ NGANA

Dan pangngaiin court chhungah chuan ball kan beng leh tak tak tawh a. Thlan chhuak khawpa kan ben hnu chuan kan coach pawh chuan hma kan sawn chak em avang chuan min fak luam a, chu fakna chuan players-ah phurna leh thathona nasa tak min siamsak a.

Amanda player Zuali chuan rawn sevice pah hian," Kha Zikpui, Zander hmingin aw!" tia rawn au lauhin min rawn pass chat a.

Thiante ho lo nuih ham ham karah chuan nakh lutuka lo lain," A hming ngeiin." ka lo ti that a.

Court sir atang chuan Zander.chuan kut a lo beng thuk thuk a," A nalh lutuk!" a lo ti a.

Chutia kan inkhelh lai chuan court lam pana Bronson leh Maduhi rawn kal ka hmuh chuan ka phu zawk a. Thil engkim a buai zo dawn a nih hi. Maduhi pawh hi a à ta em ni le? Engah nge Bronson a rawn hruai reng reng le?

Kan inkhelh chhung zawng chuan min lo thlir ve reng chuan ka awm a ti nuam loin ka inkhelh phurna pawh a bo vek a, ka khel fuh hlei thei lo. Coach pawh chuan,"Zikpuii, eng nga ti nge ni? I rilru kha game-ah dah rawh." a rawn ti that that a.

Game khat kan khelh zawh rual rual chuan ka tlan chhuak nghal a, Maduhite thutnaah chuan ka tlan phei thuai a," Bronson, eng nge hetah i rawn tih?" ka ti nghal tawng a.

I hmel ka hmu chaka ka rawn kal a ni. Min lo lawmna tawngkam chu a va mak ve a." a ti a.

" Lo va haw ula inkhelh zawhah kan inhmu dawn nia." ka ti a, kal mai an tum loh vang chuan ka mangang rilru tawh hle a, ka hawi kual ruai a. Ngaihthat loh hmel taka Zander rawn hawi phei ka hmuh chuan," Khawngaihin Bronson..." ka ti tawk tawk a.

Bronson hmel chu a dur ta khap mai a," Min hmu hi i lawm lo a ni tiraw? Min lo ngaih ve a ka hmel i hmuh chuan i lo lawm ve ka ring em em a, mawi hnai deuh hleka min lo dawnsawn ka beisei asin." a ti chang bang mai a.

" I hmuh angin kan inkhel mek a..."

"I ball beng lai chu ka lo en ve mai dawn alawm."

Thinrim zet hian Maduhi lam chu ka hawi a," Maduh, eng rilru pu a hetah rawn kal nge maw in nih le? Thil engkim i tikhaw lo zo vek dawn tih i inhria ang chu maw? Min hrethiam ula min lo va hawsan mai teh u." ka ti hmak a.

Ngeiawm zet hian a nui sawng a, " Ka haw dawn hlek lo. Kan lemchan thu hi Zander hian a hriat a hun tawh a ni. Hei i hmangaih Bronson pawh a rawn thleng tawh a, i lemchan chu i tawpsan thei tawh ang." a ti ta a.

" Chutin i ti thei hauh lo ang."

" Ka thei khawp mai. Zander hi ka hmangaih a, keiin ka neih theih loh chuan tuma'n an nei bik lo ang."

" Mahse..."

" Saw, Zander pawh a rawn phei saw. Keiman ka lo dawr ang e. "

" Khawngaihin kal zawk mai teh u. A rawn hmuh che u chuan a tha lo zawk ang. " mangang tak chuan ka ti lawm lawm a.

Bronson chuan ka banah manin a lamah chuan min pawt hnai dawrh a, hnaih chilh zet hian min en ta tlawk tlawk a," Zikpui, min hmangaihna kha khawiah nge a awm tak?" a ti vawt ruih a.

" Bronson, khawngaihin."

" Bronson maw!"

Chu aw ril ruih leh vur ang maia vawt lo chhuahna lam chu ka hawi thuai a, kan bul maiah chuan Zander chu mitmeng nelawm loh tawp khawk hian a lo ding reng tawh chu niin," Eng nge thil awmzia?" a ti tuarh a.

Maduhi chu a lo nui vei har har a, " A awmzia chu maw, hei Bronson hian a hmangaih Zikpuii chu hruai haw a lo tum mek a ni. Zikpuii pasal hual Bronson Darhmingliana hi han hmelhriat ve ta che." a ti ta a.

Ka tiril a khur der der a, ka à deuh muih hian ka hria a, eng emaw chu han sawi chhuah ka tum tak nain ka hrawk atang chuan ri reng a chhuak thei lo. Theih nise aw rawl tawpa au chhuah rawng rawng chu ka chak ber.

Zander hmel chu a dur khup mai a," Bronson maw? A hming chu Zikpuii ka ngei atangin ka hre tawh a ni. Mahse, Zikpuii hi Bronson-a nupui hual a ni tawh lo. A chhan maw keimah ngeiin ka neih dawn miau vangin." tiin a nui a, a nui lui a ni tih ka hai lo. Ka darah min kuahin na zet hian ka dar chu a rawn hmer a, te chhuak thawt lo tur chuan ka insum fan fan a.

" I hre sual a nih chu." Maduhi chuan a lo ti hmak a.

" Ka hre sual a? Zikpuii hian min hmangaiha kei paw'n ka hmangaih bawk a kan inneih lohna chhan tur ka hre lo reng reng." Zander chuan a ti nghat a.

" Zikpuii hian nangmah ni loin Bronson hi a ni a hmangaih chu."

Zander chuan min rawn kuah nghet zual sauh a,"Ka naute, he hmeichhe thu sawi hi a dik loh zia han hrilh teh." a ti a.

" Ka...ka..." ka hrawkah hnawhtu a awm tlat avangin engmah ka sawi thei tlat lo, sawi mai tur lah ka hre hek lo.

Elsen zet hian Maduhi chuan," Engmah sawi tur a nei hauh lo ang, thudik ka sawi miau avangin." a ti hlawi hlawi a.

" Nang hian eng nge hriat i neih?" a ti vawt raih a.

" Engkim! Zander, ka hrilh vek ang che."

Nilo, Maduh, khawngaihin engmah sawi lo hram rawh...khawngaihin.

" Zikpuii hi ka nu laizawnnu fanu a ni a. Nangman min then vanga ka rilru a nat em avangin ka phuba la a, tina let ve tur chein ka tir a ni. Min tihnat thungrul turin Zikpuii hian a ngaizawng der che a, i hmangaih ve ta maw tih veleha thlauhthla leh tur chein. Tunah chuan kan lemchan chu a tawp ta a, hei amah hruai turin a pasal hual pawh a rawn thlen tawh hi." a ti hmiah hmiah a.

Zander chu a rum kawk a, "My God, Zikpui, he nu thu sawi hi a dik em?" a ti ta a.

Lei hi rawn khi chat se la min rawn dawlh thut se ka ti kher mai. Maduhi thu sawi chu a dik miau mai si a," A dik alawm, Zander. Mahse..."

" I lo va tenawm tehreng em, Zikpui. Thah hial mai che hi ka duh a ni. " tiin min rawn man beh mai hi a tum a.

" Nilo!" ka ti thawt a, ka tlan sawn ta hlawk hlawk a. Taxi lo kal remchang hmasa ber chu phar dingin ka lut ta nghal a, ka thu hnawk a hmai hupin thawk ka la ham ham a. Ka tap tur a ni lo, ka tap hauh lo ang. Ka thinlung natna hi tuma'n an hmu tur a ni lo.

Ka laka Maduhi chet lak duh dan kha ka haw tawp thei lo a ni. Tunah chuan Zander chuan min haw tawh ngawt ang chu, ka hmangaihna pawh hi min rinsak tawh miah lo ang. Khati khan Maduhi leh Bronson kha rawn lang thut lo sela chuan keimah ngeiin ka hrilh anga hriat pawh a hrethiam mahna. Mahse tunah chuan thil zawng zawng a khaw lo zo vek tawh a, chinfel rual a ni tawh si lo.

Tunah chuan Zander chu a hloh a ni ta der mai si a, chu chu na ka ti ber a ni. Bum a duh loh zia sawiin vaukhanna pawh min lo pe lawk a ni si a. Tuna min ngaihdan tur chhe tak aia chhe leh chhawng a ni ngei ang.

Zander, thu dik hi hriain ka hmangaih che a ni tih hi hrethiam hram teh ka ti ru vawng vawng a.

Tunhmain ka hmingpui ngeiin lo bum tawhin a rilru tihnatsakin a lo awm tawh a, tunah lah keiin ka bum niin a ngai bawk si. A tan chuan Saizikpuii tih hming pu hrim hrim chu a huatthlala vek tawh ngei ang. Min huatna a thuah hnih tawh ngei ang. A hmel dur khup leh a mitmeng buang thaka huatna meipui alh kha ka mitthlaah chuan a cham zui reng a.

In ka thlen veleh ka mut pindanah lut tlang nghalin ka thawmhnaw chu ka khung fel sawk sawk a, he in hi ka chhuahsan tur a ni. Maduhi hmel kha ka hmu leh duh tawh lo, Zander lek phei kha chu ka hmu ngam tawh lo ang.

Chutia ka inkhung mawlh mawlh lai chuan Maduhi chu a rawn lut a,"Eheu! Khawiah nge kal i tum a?" a rawn ti lut hlut a.

Melh pawh ka melh chhin eih peih lo," He inah hian ka leng ve lo." ka ti hmak a. " I duh ang ngei chuan Zander nen kan inkar chu i rawn tichhe ta alawm, i hlim hle tawh ang chu tiraw?" ka ti leh ngat a.

" Zander hi ka nei thei lo a nih rau rau chuan nang pawn i nei dawn bik lo.A thu hrimah Bronson ani lawm ni i hmangaih kha? Sitting room-ah a lo nghak reng che a nia. Nangmah hmu chak leh ngai em em chein khual khua atangin a rawn kal ve em em a, i lo biak dan leh i lo welcome dan kha ngaihtuah let teh, a khawngaihthlak asin."

Nie, Bronson laka ka chet dan kha ka chhuang lo khawp mai. A rilru ka tihnatsak chu ka inthiam bik lo. Mahse Zander-an a hmuh ka hlauh em vanga kha tia ti ta kha ka ni a. Tunah min lo nghak reng a nih chuan ka hmuh ngei a ngai a ni, pangngai taka kan inkar hi tihtawp a ngai a ni.

" Eng tin nge a ni nen khan in rawn inthurual theih?"

" I phone atangin a number ka la a, ka chah thla a nih kha. "

" Zander ka duh zia i hre vek tawh a, kha tianga min ti duh kha i mak ka ti a ni. " ka ti hriam hrak a.

"Zander hian a hmangaih hauh lo che."

" Min hmangaih a ni." ka ti let ngat a.

"Aw le, a hma kha chuan a hmangaih che pawh a ni mahna, mahse tunah chuan a haw hle tawh ang che. " hnehtu chan chang inti fahrana hawi sang larh hian a ti a.

Ka inseh ruh teuh a, thinrim insum kar ka tum peih tawh lo," Ka laka i thil tih hi ka theihnghilh tawh lo ang. Tun atang chuan i thian nih pawh ka duh tawh bawk lo." ka ti kha fak fak a.

A nui mai a," Pawi ka ti lul lo, nang lo pawh thian ka ngah lutuk tlat. Mahse, zanin chu riak la, naktukah i haw dawn nia." a ti a.

Ka inher hmak a pindan chu chhuahsanin sitting room lamah chuan ka kal ta nghal a. Tunah hian ka mamawh ber chu mahni chauha awma inngaihtuah fim hi niin ka hria. Ka haw hma ngeia Zander hnena thu dik hrilh ka duh a ni, ka call lahin min block tlat mai si amah hmuha hmaichhan ngeia hrilh chu a ngai dawn niin a lang. Thudik hre loa mi tenawm tak anga min ngai tur chu ka ngaingam bawk si lo..mahse thiamthu han sawi vak tur chu ka nei lo hle a ni, rilru chhia leh tenawm tak pu chunga amah tihnat tum kha ka ni miau mai si.

Thutkhawmna pindanah chuan Bronson chu amah chauha lo awmin tukverh bula dingin a dak chhuak vauh vauh a. Thawm ri a hriat chuan rawn inherin za lo zet hian min lo nuih sak a.

" Bronson..."

"Zikpuii, a tira Zander ngaihzawn der i tum thu min hrilh laia ka phal loh zia kha i hria ang tiraw? Kha tih lai khan he pa hi a der maia ngaizawng tur i nih thu leh min hmangaih reng tur thu min hrilh a nih kha." tiin a inseh ruh teuh a.

Ka dang ro lutuk tihhnawn nan chil ka lem khawlh a," A pawi ka ti khawp mai, tihnat che hi ka duh ngai lo asin. Mahse mi tupawh hian rilru ngai hi kan pu reng loa, rilru hi kan thlak chhen a ni tih i hriat vek kha." ka ti a.

" A nih chuan i rilru hi thlakin ka lamah i lo let leh thei mai lo em ni?"

Lu ka thing nak a, "Bronson, pawi ka ti khawp mai." ka ti sap a.


" Ka hmangaih che tih i hria a, ni, ka hmangaih mah mah che a nih hi. He ti ngawt chuan min kalsan thei lo ang. Ka hmangaih em che vang hian min hmusit a ni tiraw?" a ti leh khawl mai a.

" Ni lo, chutiang a ni hauh lo. Tun hmate kha chuan kei pawhin ka hmangaih em em thin che a, mahse tunah chuan ka rilru lo danglam tain ka rilru ka thlak a ni mai a, hriatthiam tum hram teh."

Bronson chu a meng dur khap a," Midang min neihsan hnuah leh min phatsan hnu-ah pawh hian ka la hrethiam cheu ang che maw? Ka rilru nat dan tur zia hi i hrethiam lo a ni. Inthen fel pawh awm loin midang min lo neihsan hmak mai hi ka tan chuan a nain a tlawm thlak ngawih ngawih asin. Thenna thu tal min rawn hrilh ni la chuan ka tuar hi tlem chuan a ziaawm deuh mahna. Mi tu pawhin ka chan ang hi chang se chuan an rilru a na vek ang." a ti bawrh bawrh.

" I rilru chu a na ang tih chu ka hria alawm, mahse a reh ve leh mai ang. Kei pawh thiam ka inti bik lo, i mi hmangaihna hi ka phu hlawl lo a ni. Kei aia tha leh tling zawk i la tawng em em ang." ka ti a.

" Nilo, i hre sual a ni. Ka rilru natna hi awlsam tak chuan a reh mai dawn lo a, nang ang renga hmangaih hi ka tawng leh tawh bawk hek lo ang."

Hrehawm ka tiin ka inthiam bik hauh lo. Zander hi hmangaih ka tum lo a, mahse kan duh dana angin thil engkim hi a kal si lo.

Bronson chuan min rawn pan phei a, "Chutiang maia awlsama ka theihnghilh theih che i ring a maw? A teuh lo mai. Ka nupui ni turin ka lo suangtuah thin che a, chu ka suangtuahna hlimawm tak chu beidawnna meikhu zamah i chantir ta a nih hi." tiin ka darah manin min sawi ta nawk nawk mai a.

" Bronson, min thlah teh. Min tina alawm. I à ta em ni le?" ka ti that that a.

Beidawn hmel tak chuan min en tlawk tlawk a," Nangmah vang hian ka à ta a nih ber hi." tia hmai hupin a thu hnawk a.

Rilru nuam lo takin ka melh vawng vawng a, heti khawp hian ka tina hi hrehawm ka tiin ka inhua a ni. A bula thut ve pah chuan, "Min ngaidam rawh, pawi ka ti lutuk. Zander hmangaih hi ka tum loa, duh pawh ka duh lo asin. Mahse ka thinlung hi ka thunun phak bak piahlam a ni si. He tiang hi lo ni mahila tun hma ang khan ka la ngaina reng che a, ka thian tha la ni reng la ka duh a ni. Khawngaihin min huat phah lo la, i thian thaah min la pawm tho rawh aw." ka ti ngui raih a.

A nui lui hram a," Ka haw reng reng lo che. Ka lamah i rawn let leh duh tawh lo a nih chuan hlim taka i awm ka duhsak che a ni. Min mamawh hun te i nei a nih chuan engtik lai pawhin tanpui che ka inpeih reng a,i rilru i thlak leh duhte a nih phei chuan eng lai pawhin i tan ka inhawng reng tih i hre dawn nia." a ti ta a.

" Min hriatthiam vangin ka lawm tak zet a ni. " tiin a darah chuan ka kuah a.

"Mite pawhin an hmangaih berte nupuiah an nei vek hleinem." tiin beidawng tak hian a nui hak a.

Chutih lai chuan tu emaw hian kawngkhar chu a rawn kik dawt dawt a, ka thutna atang chuan tho thuaiin kawngkhar chu ka va hawng a. Zander-a inkhelh thawmhnaw nen lo ding ka hmuh chuan ka phu zawk a, "Nang maw...." ka ti tham chal a.

" Ni, keimah ngei ka ni. Mualpho taka min bum hnu-ah he ti maia awlsam hian min kiansan mai dawn lo. " a ti nghut a.

In chhungah a rawn pen lut nghal a, Bronson-a hmel a hmuh chuan a hmel dur sa chu a dur zual sauh a, " In hlim lai ka rawn tibuai che u a ang khawp mai." a ti vawt raih a.

Bronson-a chu a tho thuai a, "Zikpui, ka kal mai ang. Zan lamah rawn len ka tum ang." tiin a chhuak nghal a.

Bronson chhuah hnu chuan Zander lam chu ka hawi a," Aw le, eng nge i duh?" ka ti khur dar dar a. Ka thinte chu a inthum rawn tlut tlut a, duh aiin a ring mah mah a ni.

" Sawi dun tur a tam khawp mai." a ti hmuk a. Thutthlengah chuan thut pahin," Chuan, Maduhi ka hnawl vangin phuba lakna'n min lo ngaizawng der ta a maw ? Duh taka ka fawh lai che leh hmangaih thu min hrilh lai te khan i lo tider vek a lo ni a, kha tih lai te khan Bronson chu i lo suangtuah reng a ni awm si." muang ban chat hian a ti a.

Sawi tur ber pawh hre loin ka ding khur dar dar a, ka hmui chu ka liak huh hlap hlap a, a hmel dur khup leh a mitmeng rum lutuk chu en ngam loin hnuai lam ka bih ngar a.

" Min hrilh teh, Maduhi ka hnawl vangin maw min hrem let ve i lo duh a? I bum ka duh loh zia chu ka hrilh tawh che kha. Awlsam tak chuan min kalsan dawn tawp lo."

Ka thaw hawk a, tun hun hi a ni insawifiahna hun tha tak chu, ka bawhpelh tur a ni lo,"Zander, min ring hram rawh. Ka hmangaih tak tak che a ni." ka ti chul a.

"Dawt sawi zawng i lo thiam khawp mai. Ka fawh lai ngei che khan,'Bronson' tiin min ko a, chu hming chuan i tan awmzia a neih loh zia min hrilh khan ka lo ring ve mai che a, tunah i thusawi kha dawt mai a lo nih zia ka hre leh ta a. Chuti chung chuan tuna i thusawi hi ka la ring cheu ang maw? Hnai lo mai. Rinna chhete mah ka nei lo che." a ti ta zek a.

A thusawi chuan min deng na kher mai a, ka hmangaih zia hi eng tin nge ka hrilhfiah theih ang le? " A tir kha chuan ngaihzawn der che kha chu ka tum ngei alawm, mahse ka lemchan tumna lamah ka lo hmangaih tak tak ta che a ni." tiin ka thiam tawk chuan ka hrilhfiah a.

Zander chu a nui hawk a," Lemchan zei lutuk!" a ti hluk a. Tun maiah pawh Bronson nen in awmdun reng a, ka ring hlawl lo che a ni. Kei erawh chuan i hmangaihna der kha a tak emaw tiin tihtak zetin ka lo hmangaih hman che a, ka lo va à tehlul em! Zikpuii tih hming pu hi mi rintlak an lo awm lo, min tina tu mai an ni. Mahse min tihnat man chu i hmu ve khawp ang." nelawm lo lutuk hian tiin min rawn kuah lawk a dim lo baksak hian min fawp ta bawrh bawrh a.

Ka hmangaihna a thunhrulh dan ve teh lam hi a va na teh lul ve. Ka rilru chu a na vawng vawng a, ka mittui titla lo tur chuan ka insum fan fan a. A mi kuahna ata tal chhuah tuma tal laih laih pah chuan,"Zander, khawngaihin." tiin ka ngen lawm lawm a.

Ka hmui a seh fawhna avang chuan ka hmui chu a thi zaih zaih a, thisen chu ka ka chhungah a rawn al lum pap pap a. Ka thaw hawk a, "Khawngaihin, Zander..." ka ti nawn leh sap a.

Chutah min thlah ve ta mai bawk a, chiang kek kawk a min melhin,"I mi bumna hi a thlawn mai bik lo ang. Min tihnat ang let hnih talin i na ve tur a ni. I hria em, Zikpui, min nei dawn khawp mai. I duh emaw duh lo emaw ka nupui i ni khawp ang.. I cho a, i rim a, i rim tlu taah inngai rawh." a ti nghet bur mai a.

Rilru na em em chuan ka kun tlawk tlawk a, Zander hi ka hmangaih a, a nupui nih pawh ka duh alawm. Mahse heti teh hrep hi chuan ka nei thei lul lo ang. A hmangaih a ni tih hi ringin hria se la a hmangaih vang zawkin nupuiah sawm ni sela chuan ihe loin a pawm thlap zawk ngei ang. Mahse phuba lak duh vang maia nupuia neih tum zawng a nunrawn thlak em mai, a pawm thei lo hul hual ang.


" Aih," ka ti chuai raih a, "Ka nei thei lo ang che. Ka hmangaihna ringhlel chung hian min la nei duh cheu a maw? Hmangaihna tello phuba lak duh vanga nupui pasal inneihna hi ka pawm zawng a ni ve lo." ka ti hria hrak a.

Zander chu a nui hawk a, a nui ri leh a hmelah chuan elsenna hi a lang chiang kher mai. "Hmangaihna te chu i la sawi ri ngam cheu a ni maw? Heti khawpa ka hmangaihna i sawisak hnu-ah hian ka la hmangaih che i la ring cheu a maw? Tuna ka rilru puthmang diktak ka hrilh ang che : min bum vang hian ka thangtlawma ka haw tel bawk che a ni. Maduhi phuba laksak i duh ang zet khan i laka phuba lak hi ka duh a ni." nunrawng tak chuan min tihkhum bawih bawih a.

Ka hmangaih chuan min haw em em in ka lakah phuba lak a duh a ni sia, engtin nge ka tawrh chhuah ang? Maduhin thil a rawn tihkhawloh hma daih khan engkim lo hrilh vek ila chuan tun dinhmun hi kan thleng lo tur. Mahse inchhir hian awmzia a nei lo, a sawt tawh hek lo.

Mahse...ni e mahse ka ti leh tho dawn..ani paw'n Maduhi a buma, mualpho taka hnarin a fa a tihthlaktir ve tho a ni lawm ni? Chuti chung chuan dawt ka hua ti thei a ni bik chai hleinem le. Hreptaka!

Hawi chhuakin hriam hrak chuan ka melh ve ta khai a," Maduhi i hnawl dan kha ngaihtuah let ve ta che. Phuba laksak duh khawpa ka lo thinrimpui chu a awm veng vawng hle lo maw? " ka ti ve ta hrak a.

Chutah vawt lutuk tak mai hian min rawn melh a," Eng angin nge ka hnawl a? Kan pahniha chanchin engmah hre loin i lo thinrimpui ve ngawt a nih chu mawle. Nang pawh i unaunu ang leka tlaktlai lo leh leplerh i lo ni." min tihkhum ta sak sak mai a.

Maduhi anga tlaktlai lo leh leplerh ka ni maw, huh? Chu thu kher zawng pai dam har ka ti ngang mai. Thinrim lutuk hian ka melh kawk a,"Nang anga leplerh an awm dawn em ni? I duh ang ang chuan min puh rawh pawi ka ti chhete lo. Mi zawng zawngin nula ràl tia an sawi hial i ni alawm. He nula ràl hi ka bumna thangah i lo awk thei kha ka lainat ngawt mai che! Hmeichhia tu pawhin an duh vek che emaw tiin i lo inla lu hrat a nih hi. Kei zawng i hmelthatna emaw i zeina emaw khan min tibuai ve hlek lo ang." ka ti khur dar dar a.

Ka thinrim em vanga chu thu chu sawi chhuak ka ni, thudik a nih loh zia chu kei aia hrechiang an awm lo. Maduhi nen ang khata min chhuah kha ka digest thei bau lo a ni. Zander hmel topui rawn thawk tur ang maia dur khup mai ka hmuh meuh chuan ka thusawi kha ka lo sawi ta kher chu ka inchhir leh rang kher mai.

" Eng maw?" a ti tuarh a, a mit chu a zim san a, a hmui sexy zet chu thinrim vangin a pet ruh hle a, tualthat duh mai tur hmel hi a pu hial a ni." Min lo bum zia chu i pha lo tiraw? Ka dama ka thawk theih chhung chuan tumah i nei dawn lo; keimah tih chiah lo chu . Nangma thangkam ngeiah chuan i tang kawlawk dawn chiang khawp." a ti bur mai a.

Elsen zet hian ka lo nuih khum ve ngat a, "Ka nei tawp lo ang che. Nang neih ai chuan Bronson neih ka thlang fo ang. Ka tan hian awmzia i nei lo. Chhuatlaia meizial bung tla tluk lek i ni." ka ti ta bawih bawih a. Engtin nge chung thu chu ka sawi chhuah theih pawh ka inhre bik lo.

Zander chu a rum nghut a, thinrim mitmeng dur khup chuan min melh, ka hmaiah tak mai chuan min rawn beng ta siah mai a,"Hmeichhia kutthlak hi ka thil duh loh ber a ni , hei erawh i cho chhuak chiangin i phu em a ni." a ti vawt ruih a.

Min benna ka hmai chu ka hup vang vang a, tah hlawp hlawp mai chu ka chak a ni, mahse he mihring lawmna siama tah chu ka duh lo, ka mittui titla lo tur chuan ka insuma ka mittui chu ka khap per sak sak a," Ka hua che, Zander." ka ti that a. Tunah tak hi chuan ka hmangaihna nasat tluk zet khan ka hua niin ka inhria.

Min rawn pan phei takah chuan ka lo tawlh hnung dawrh a,"Zander, min rawn khawih hlek suh aw." ka ti nghat a. "Min rawn khawih i tum leh vaih chuan...karate pawh ka zir ve nual a nia." ka ti thla ngawt a.

Zander chu za tak hian a nui hawk hawk a," Min tihlau hlum dawn alawm , duhtak." tiin min rawn pan phei ruak ruak a, hneh zet hian min kuah beta ka khabe chu chawi dakin dimna tel hauh lo hian min fawp ta bawrh bawrh a. Theih tawpa lo dan chu ka tum ve alawm, mahse Zander te ang pa lian leh thahrui ngah lakah chuan ka inveng hman ngang lo a ni.

" Min thlah rawh!" tiin ka chum arh arh a.

" Nie, Zander, ka laizawnnu kha thlah rawh!" Maduhi aw fiak thak chuan a rawn ti ta a. " Nang ni loin Bronson alawm a hmangaih chu." a tih zawm nghal zat a.

Zander chuan min thlah ve mai bawk a. Maduhi hmel nui sawng chu melhin," I hre sual anih chu. Zikpuii hi Bronson ni loin keimah min hmangaih thu min lo hrilh zo chiah asin." a ti ban chat a.

Maduhi thinrim chu a meng de sawr sawr a, "Chu chu a hrilh che a nih pawhin dawt vek a ni ang. I rawn lan hma mai pawh khan Bronson nen chuan inkuahin an infawp asin. Nang pawn Zikpuii hi i hmangaih tak tak hauh lo ang." a ti hlai hlai a.

" I hre sual leh ta pek! Ka hmangaiha nupuiah pawh ka nei duh asin, neih ngei pawh ka tum."

" I nei thei lo ang."

" Tunah hian ka hruai haw dawn a ni. Ti rawh le,Zikpui, i thawmhnaw la ang le." tiin ka banah min rawn kai ta a.

Engin nge min mawlh ka hre hauh lo tihàtin ka awm nge ka pindan lam pan chuan ka kalpui a, ka thawmhnaw ka khungfel sa thlap chu khai nawlhin Maduhi awmna lamah kan inzui thla leh nghal a. A hnu ka ngaihtuah leh hian Maduhi ka ngei luat vanga hetia ti ta mai hi ka nih ka inring.

Zander chuan,"Aw le, Maduh, hei ka hruai haw a nia. I chhungte hnenah kan chanchin hi lo thlen mai rawh aw." a ti a.

" In innei rei thei chuang lo ang. Ka haw dun lutuk che u. Hremhmunah kang ral thak rawh u." tiin Maduhi chu a te tuarh tuarh a.

" Chutiang tawngkam mawi lo chuan min thlah tur i ni lo asin. Duhsakna leh tawngkam malsawm takin min thlah tur i ni zawk dawn lo em ni?" tiin Zander chu a nui huk a. " Kal ang le, ka naute." tiin ka ban chu vuanin min kai chhuak ta a.


******

Nepnawi :

Mi dang aia nep ta riau leh tling lo bik hliah hliah a inhriat chang i nei ve thin em? Chutiang hun a lo thlen chuan kan thil tih engkim hi a dik thei lo hul hual veka ngaiin beidawng ngawih ngawih a tawp san hmak mai duh chang i nei ve thin em? I nei ngei ang, mihring i ni alawm.

Chhelna tel loin hlawhtlinna a awm ngai lo tih hre rengin chhel turin infuih sauh sauh zawk rawh.

Link:
BBcode:
HTML:
Hide post links
Show post links

Local Advertisement

MOBILE SIAM ZIR DUH TAN!!!

Tech-Inn Mobile Repairing Traning Centre, Bazar bungkawn

Kum tin mi za chuang eizawnna kan siamsak a, Eizawnna tlaka thiam turin kan zirtir thin

Mizorama mobile siam zirna hmasa ber changtlung ber kan ni. Hrechiang duh tan Contact : 9612099411 / 9862016122


Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » August 15th, 2021, 4:21 pm

BUNG _ RUKNA

Zander-a car kan lut a, a han ti nung a kan tlan dawn chiah tih chuan ka harh deuh kawk mai a, eng vanga lo pawngpaw zui ve ngawt nge maw ka nih le? "Ka zui thei lo ang che." ka ti chhuak sap a, motor atanga chhuah chu ka tum a.

Min lo dangin hnai set sawtah hian min melh run a," Eng maw i sawi a?" a ti vawt raih a.

" Ka zui thei lo che."

A nui suk a," I duhthlanna zawt che hi ang ka inti! I duh emaw duh lo emaw min zui tho dawn. Bronson kha i ngaihtuah a nih chuan theihnghilh nghal rawh. I unaunu tawngthei zet khan a lo sawi fel vek mai ang." tiin a car chu a khalh ta nghal a.

Beidawng zet chuan nghenchhan chu nghengin ka chhing vang vang a, ka va han à tehlul em! Eng vanga lo zui ngawt nge maw ka nih le? A tir khan eng vanga lo hnial lo nge ka nih? Nie, eng vanga lo zui ngawt nge ka nih ka hrethiam bik lo Maduhi elsenna'na zui ka ni ta berin ka inhria. Ka lo zui ngawt vang chuan keimah leh keimah chu ka inhaw ngawih ngawih a ni. Ka kut chu hum ruh ngawt ngawtin, " A theih loh. Ka nei thei lo ang che. Motor hi tiding rawh." ka ti that that a.

A nui suk a," I thlenin atangin ka hruai chhuak tawh che a, kir leh chi i ni tawh lo. Tunah chuan Maduhi chuan i chhungte a call mek anga pasal i um tiin ahrilh ngei ang. Tunah haw leh mahla i chhungte ngaihdanah chuan pasal um i ni tawh tho tho ang, chuvang chuan lungawi takin awm tum phawt mai teh." hnehsawh zet hian a ti a.

" Ka hua che a ni." ka ti that a. " Heti ngawt chuan min hruai haw thei lo ang." ka ti khar khar a.

"Ka thei a, hei ka hruai haw der tawh che alawm,naute. Phun nawi lo khan awm hle hle teh." tiin chak zet hian a car chu a khalh zar zar a.

An in kan thlen chuan an kawtah chuan car chu a tiding chat a, seat hnung lama suitcase leh bag chu lain a kal ta hmawk hmawk a. Car chhungah chuan ka la thu lui tlat a. Eng tin nge ka awm zel dawn? Ka zui ve dawn nge ka tlan vak anga taxi pharin Maduhite inah ka let leh dawn?

Zander chu ding chawtin a rawn inher a, "Car chhunga thu reng lo khan min rawn zui ta che. Tlan bo tumna rilru i pu a nih chuan i tisual chhiava ang. I thawmhnaw zawng zawng ka keng vek sia, thawmhnaw tel lo chuan khawi hmun mah i thleng tawp lo ang." a ti dam raih a.

Thinrim tak chuan ka insawh tau nghawng nghawng a, ni e, zui mai loh chu duhthlan tur ka nei si lo. Car atang chuan tum barin ka chhuak a, car kawngkhar chu ka khar ri zui thuai a." Hreptak hian!" ka ti hlak a. Thinrim eng phiar chuan ka zui ve ta hnak hnak a.

Thutthlengah chuan ka thu hnawk a, "He tia intih luihna hian hlimna a pek che ka ring hlawl lo. He tia min nawr luih vang hian ka hmangaih phah bawk hek lo ang che, ka hmangaih phah lo che a, ka huat phah sauh zawk che." ka ti hlaih hlaih a.

"Min haw ta che, i mi huatna nen pawh ka dam zo e." a ti zang vah a. Mitmeng zim sana min rawn melhin,"He tia chan chhe zawk changa i awma i beidawng hmel ka hmuh hian min tihlim tlat zu nia." ngeiawm fahran hian a han ti a.

Thinrim zet hian ka thaw hawk a, "Kei aia i len leh thahrui ngah vang hian min hneh a ni thei e, mahse ka thinlung leh rilru erawh i hneh ngai lo ang. Mimal zalenna leh dikna pawh ngai pawimawh loa hetia min ti hi ka duh lo, ka hua a ni. Diktak chuan ka remtihna tel hauh loa min hruai lui tur hian dikna pakhatmah i nei lo." ka tihkhum sak sak a.

" Ka hruai lui che em ni? I duhthua min rawn zui i nih kha." a ti sam et a.

Ka thinrim chu ka sa puo pup thei hial a ni. "Khatih lai khan rilru mumal pu thei lo lekin min siam a nih kha." ka ti hlar a.

" Tak zet?" tiin a mitmeng buang thak chu min siai khum sak a." Hmeichhe tam tak chuan ka nupui nih chakin min zarbuai sek asin." tiin a nui zui hawk hawk a.

" Chapo pa, kei zawngin i nupui nih ka chak lul lo." ka ti that a, ka thinrim lutuk chu ka hmaite chu a sa hut hut tawh a. Dawhkana ash tray chu ka la lawk a, Zander lo nui sawng lai vawm nan chuan ka hmang ta hmiah a.

Zander chu a lo thle sawn zauh a, ash tray chuan tukverh darthlalang chu a va deng keh ta chuai mai a. Darthlalang keh thawm ka hriat chuan ka ding khawng nghal lah a, ka thil tih pawi zia ka hre chawpchilh ta nghal, " Lalpa! Darthlalang vawm keh hi ka tum hauh lo asin." ka ti sap a, ka inthiam lo lutuk chu ka ni deuh nghulh hian ka hria.

"Thinchhe leh lutuk mai.' a ti nghut a. " I thinchhiat man chu i hmu chiang ngawt ang." tiin min rawn pan phei ta a.

Ka khabeah chawi dakin hnai set sawtah hian rum lutuk hian min melh a, " Hmeichhia, ka zaidamna hi fiah nawn tawh suh." a ti nghut a, a chhuak ta nulh a.

Ka lo insangmar nasa lutuk chu ka na hman vekin ka hria, a kal sawn takah chuan ka thaw huai a. Dawhkana a phone dah chu a rawn ri ta a, a ringtone-ah chuan ka hla duh em em mai 'Closer" Chain Smoker hla a la hmang zui a. Tu nge lo call reng reng tih hriat tumin ka va bih dak dak a "SHE" ti hian a save a, hriat chian ka chak em vang chuan ka pick up ta a.

" Hello?" ka aw khur dar dar chu thup tum hle mahila ka hlawhtling hran lo. Phone chu ka chhang tur a ni lo tih chu ka hria mah se ka dilchhutna hian min chhantir si a.

Lehlam atang chuan, "Hello...tu nge i nih a?" hmeichhe naupang aw sin leh cute tak chuan a rawn ti ta a.

" Zikpuii ka ni e." ka ti sap a, Zander rawn lut chu ka mitsir chuan ka hmu thei a.

" E..Melanie ka ni a, apa biak ka duh a. .." a ti a. Chutah thinrim aw rawl hian," Apa bialnu thar i ni chiang mai, i ni tiraw?" a rawn ti leh a.

Ngaihna hre lo zet hian, "Tu nge i pa chu?" ka ti sap a.

Naupang chuan, "Zander-a. " a rawn ti hlak a. " Min biaktir dawn em?" a rawn ti bak hlar a.

" Oh.." ka ti sap a. Zander hian fa a lo nei reng a nih chu. A fa neih thu pawh min hrilh miah lo a, a mak ka ti tak zet a ni. " I fanu.." tiin phone chu ka pe ta a.

Phone chu lain a fanu chu a be ta a. An pafa inbe lai chu chair-ah thuin ka lo thlir veng veng a. A fanu aw vanga Zander hmel lo dam ta thluam leh a aw dam dup mai te avang chuan a fanu chu a duat hle a ni tih ka ring mai a. A aw atang kha chuan Melanie chu kum 9 bawr vel a nih ka ring deuh a, chutiang rual fa a lo nei tawh a nih chuan eng vanga hrilh lo nge a nih le? A fa neihna nu nen pawh chuan eng vanga innei lo nge an nih ang le?

" Eng nge maw i ngaihtuah veng veng le? Ka thusawi i hre lo em ni?" tia Zander-an ka darah a rawn kuah chuan ka inngaihtuah ding lai chu a tawp chawt a.

" Oh, eng maw...?" ka lo ti ha a.

" Ka fanuin a be duh che a nih chu." tiin phone chu min pe a.

Phur lo zet hian phone chu ka la a, "Hello..." ka ti halh a.

Melanie chuan," Apa kha neih i tum tiraw? Anu lo chu neih ka phal lo reng reng. I neih ka phal lo a nia aw." a rawn ti ta hlak hlak mai a.

" Eng maw i sawi a?"

" Apa nupuiah ka duh lo che. Naktukah anu nen Kolkata-ah kan kal dawn a, ka lo haw hunah i lo la awm vaih chuan..."

Phone chu ka hmet tawp hmak a, naupang tawngthei leh sual tak a ni chiang ang. A kum phu loin a tawngkam a fel fai mai sia ..nge a nuin a fuihin a zirtir thin zawk ni ang?Zander chu rum fahran hian ka melh a," Aw le, eng vanga fanu i neih thu hi min hrilh lo nge i nih?" ka ti fak a.

"Tunah i hre ta alawm." ti chauhin min chhang a. Melanie chu naupang duhawm tak a ni asin, skul chawlh chhung chu a nu bulah a awm hrih a, a nu bula a awm hi ka remti vak lo nain a nu hi a ngai ve bawk thin si a." a ti ta deuh duah a, a hmelah chuan a fanu a hmangaih zia chu a hmuh theih a ni.

Eng vanga naute nu nena innei lo nge an nih zawh chu chak hle mahila ka ngam bawk si lo. A tawngkam kha fak atang khan naupang duhawm tak tia sawi tur niin ka hre lo. A pa nupui atan min duh loh zia leh min lawm loh zia chu a rawn tilang chiang hle a nih kha . Naupang zirtirtua ka tan thin avangin naupang zia chu ka hre ve thawkhat chuan ka inhria, naupang duat sual chimawm theih zia pawh ka hai hek lo.

Zander chuan min rawn en vang vang a, ka ngauhtuahna chu hria ni awm tak hian, " In inbe fuh vak lo a nih pawhin a hmel i hmuh hunah i ngaina em em ang. Naupang hmeltha leh duhawm tak a ni asin." a ti a.

Amah bawk chuan an awmpui nu chu auin," Pi Mal, ka thiante pahnih chaw eiah ka sawm dawn bawk a, mi pathum bawl kep a ngai a nia aw." tiin a au lang lang a.

Ka bungruate chu mut pindan lamah a khai lut a, " Min rawn zui rawh. Intihfai pawh i duh ang." a ti dam thluam a.

Zui loh mai ka tum deuh uk nain inbual fai ka mamawh tak zet bakah Melanie min tawng khum dan avang khan he pa kianga awm ngheh chu ka thlang ta a.

Ka thawmhnawte ka khai that zawh chuan ka inbual ta nghal a. Tunah chuan ka chhungte chuan pasal um angah min ngai vek tawh ang a, ka lakah an lungni lo hle pawh a ni thei a ni. Tlan chhuahna hun remchang hmuin haw leh ta pawh ni ila pasal umah min ngai tawh tho tho dawn . Zander sawi ang khan ka duh emaw duh lo emaw a kianga ka awm chu a ngai ta tho a nih hmel. Diktak chuan Maduhi kianga va let leh pawh ka chak chhete eih lo.

A bulah awm pawh ni ila awlsam tak chuan ka inhnehtir hauh lo ang. Min tihnat chu a duhthusam leh a tum ber a nih vangin a tum chu ka hlentir hauh lo ang. Min hmuhsitna leh deusawhna tipunlun tur ting chuan ka hmangaih zia hi ka lantir lo anga ka zep tlat tur a ni. Ni, ka thei khawp ang.

Ka inbual zawh chuan Zander pumpelh dan kawng ka dap char char a, choka lamah Pi Mali chu puiin ka inti buai lui ve ngat a. Pi Mali chu tawng thei lo a nih vangin be mahila kut zaizir baka min chhan theih loh avangin ka be ta lo law law a.


Chutia choka a Pi Mali ka puih mawlh mawlh lai chuan Zander chu inbual fai sarin a rawn lut a, a sam dum hlap mai chu a la hnawng deuh chap a, sweater dum leh jeans dumpawl hi hain a lang pa hliah hliah mai a.

Aw ngaihno bei fahran lo hian, " Nunsanga leh Hruaia te chaw an rawn ei dawn bawk sia in tur lam an duh dawn a ka va lamsak lawk dawn a nia." a rawn ti a. Ka bulah rawn kal hnaiin ka beng bulah chuan, "Ka awm loh hlana lo tlan chhuah i tum vaih chuan i inchhir hle ang. Khawiah pawh tlan bo la ka zawng hmu tho ang che." a ti vawt ruih a, a chhuak ta nghal a.

Ka dar chu san akin ka nui lui sak a. Pi Mali chuan min en reng avang chuan ka rilru natna leh thunrimna chu ka thup a ngai a ni. Ka thinlung natna hi tuman an hmu hauh tur a ni lo.

A tira Maduhin zin tura min sawm lai khan lo hnial ni ila chuan Zander hi ka tawng lo anga ka hmangaih hek lo ang, hmangaih chu sawi loh a piang ve a ni tih pawh hre loin hlim takin ka thiante nen khan kan la inkhel awm si a. Pathianin intawng tura min ruat hi chu mak takin kan intawng mai thin a nih dawn hi.

Ka phone-ah chuan Sam Smith hla play-in ka ngaithla pah a chu chuan min tizangkhai sawt hian ka hria a. Dar sarih a rik chuan Zander a la rawn thleng loa, Hruaia leh Nunsanga pawh an la rawn thleng hek lo. Rawng kan bawl zo tawh bawka ka thawmhnaw ka la rem zawh loh kha rem that leh tumin mut pindan lam chu ka pan a, pindan kawngkhar chu ka han pawt a, ka hawng thei ta hauh lo mai a. Zander khan ka thawmhnaw lain ka tlan bo a hlau anga a kalh a ni tih ka hrethiam ta a, thinrim tak chuan ka phun nang nang a.

Kawta motor inhung thawm ka hriat chuan thinrim zetin ka inhum ruh ngat ngat a, amah lo hmuak tura chhuah pawh tum lo chuan pindan kawngkhar bulah chuan ka thu lui tlat a. Rei pawh nghah a ngai lo Zander chu a rawn lang rang kher mai.

" Hetah i lo awm reng a ni maw? I tlan bo daih emaw ka ti hman a." tiin a nui sang a. " Ka thiante pawh an lo thleng tawh a nia."

Ka rum nghat a, "Ramhuai pa, khawiah nge pindan chabi i dah?" ka ti ngal ngal a.

A kekawr ipte atang chuan chabi rawn phawrhin a khai then nalh nalh a," I tlan bo mai loh nan ka kawl tha a ni." a ti a.

Rang lutuka pawhthlak pah chuan,"Ka va haw tak che em." ka ti halh a. " I thiante bulah chuan lo zuk chhuk rawh. " tiin pindan kawngkhar chu ka hawng a.

" Aw le, ka lalber!" tia nui hakin a inhera a chhuk ta a.

A nui hmel chu ka haw kher mai, eng emaw taka a hmaia vawm bur mai chu ka chak et et mai a. Tih tur em em pawh nei chuang lo hian pindanah chuan ka lut a, ka thut vang vang hnu chuan ka chhuk thla ve ta a. Zander te thianho zu lo in mek ka hmuh chuan ka nur nasa kher mai.

Nunsanga chuan, "Zikpui, lo kal teh, lo kal teh, heti teh thuta intih chuk chuk ka lo ring hauh lo a." a lo ti chul a.

Ka nui lui sak a," Kei pawn ka ring bik hleinem. " ka ti sap a. "Pasal neih ka la duh rih lo a, ka nulat lai hun la chen ka la kham lo a, mahse..." tiin Zander chu ka va melh lui ngat a.

Hruaia chuan,"Duhber te neih tluka hlu a awm hleinem. Zander, i nu leh pa hnenah in inruk thu hi i hrilh tawh em?" a ti a.

"Hrilh lo. " a ti ban chat a.

"Chaw ei ka lo siam dawn em ni?" zahzelah chuan ka ti a.

" Nia, a pawi lo tawp ang, hei kan in zo tep tawh chu a nih hi. I siam zawh rual chuan kan rawn kil ve hman mai ang." Nunsanga chuan a lo ti vat vat a.

Choka lamah luhsanin chaw ei chu Pi Mali nen chuan kan siam ta malh malh a. Chaw ei siam pah chuan ka ngaihtuahna chu ka kawm neuh neuh a. Zander vanga miin 'nuthlawi' tia min sawi tur leh ka hmingchhiat dan tur ngaihtuah chuan ka thinrim ru hle mai a. Mi pasal um te chu kei ang hian an hlim lo ngai lo asin mawle. Zander hian min hmangaih vanga min nei ni ta se chuan tuar pawh a ziaawm tur hi a ni a, huatna leh phuba lak duh vanga inneihna chu a dan a dang tlat a ni.

Chaw ei chhung zawng chuan Hruaia leh Nunsanga chuan an fiam chul reng a, Zander erawh inla thutak zet hian a ngawi ngal reng a, a chang leh an thusawi chu a lo nuihpui ve leh suk thin a. Eng emaw tak muk zeta ngaihtuah hi a ang ka ti ber. Eng tak chu ngaihtuah ni ang maw??

Hruaia chuan,"I nu leh pate rawn haw kan nghak dawn nge ni a...eng tia han tih nge i rilruk?" chaw bar malh malh pah chuan a ti a.

" Chu chu a nia ka lo ngaihtuah mek chu. Naktuk zingah in pahnih hian Maduhi te inah in kal anga an fanu ka hruai avang hian thupha in chawi dawn nia." Zander chuan a ti a.

"Maduhi a? I fa pai anga in sawi kha maw?" Nunsanga rui phur chuan a lo ti zung zung a.

Nunsanga thusawi chu mak ka tiin ka hrethiam lo hle mai a, Maduhi chuan Zander fa paiin a tihtlak luihtir niin ka lo hre si a.

"Aw.. Zikpuii cousin anih kha."

"Oops..."

Chaw ei kham hnu chuan YouTube-ah film en pahin kan inkawm khawm mai mai a. Nunsanga pek lah chuan mo thar lawmnan tiin Zu a lam chhen mai a, an kai deuh chhah hlawm nen ka lung chu a awi zan lo hle. " Eng zat fakau nge maw in intum le?" ka ti hlak a.

" I Zander hi che thei lo leka hrai ruih hnep kan tum mawle."

"Aw, a nih chuan zu in pah khan lo inkawm khawm ula mut hahdam ka mamawhin ka hria." tiin ka tho nghal uaih a.

Zander chuan,"Naute, zanin chu i muhil lo tawp ang, muthilh aia tul tihtur ka ngah dawn nia." tiin min siai sak a.


Ka thinrim chu ka sen awp awp a, va ben chawrh baka chak ka nei lo. A thiante ka hmaizah vang chuan ka thinrim chu tihlan loh hram tumin ka rilru chuan number ka chhiar mawlh mawlh a. He pa ka huatna leh ka hmangaihna hi a inzat thuakin ka ring. "Mangtha u." tiin ka inher hmaka mut pindan lamah chuan ka chho ta a.

Khumah chuan ka bawk thlawp a, kan nundan hnawk nuaih hi ka duhdan a ni lo. Awlsam taka chinfel mai theih lah a ni si lo. Ka mutkawr satin puan hring nghalh chu hain blanket hnuaiah chuan ka inthawlh ta kak a. Sam Smith hla chuan ka inawimu ta a.

Ka muhil chu tu emaw ka bula rawn mu thawm chuan min tiharh zawk a. Ka thu chhuak hlawl a, hlauthawng taka ka han en chuan Zander mitmeng buang thak nen chuan kan inmelh ta ran a.


"Ka bulah mut i tum em ni? I mu thei lo ang. Khawngaihin min chhuahsan rawh." ka ti that that a.

" Nupui ka ru ve a, chu ka nupui ruk bula ka mut loh chuan mi à ka ni dawn asin. I kiangah lo khawiah nge mu se min tih a?" tiin min kuai mu ta nghal a.

" Min khawih hlek suh!" ka ti that a, a mi kuahna ata tal chhuah tumin ka bei ngial a. "I khawih ka duh lo, ka bula mu tur paw'n ka duh hek lo che."

" Hei hi ka pindan a ni a, ka pindanah chuan riah ngei pawh ka tum." a ti nghat a, a thawkah chuan Zu leh Ciggarette rim inpawlh hi a nam ram ram a, a rimtui hrep leh nghal a. "Ka inchhungah ka hruai lut tawh che a, hmangaihna chenpui lo che a chhuah che hi ka tum lo bur." tiin min kuah a, min fawp ta nawk nawk a.

A kut chuan zei lutuk mai hian ka taksa peng hrang hrang chu a chul lawr dan dan a, a hmui chuan min fawp nghal zel bawk a. He mihring hmeltha leh zei lutuk lak atang hian tal chhuah ka duh a ni, mahse ka taksa chuan ka rilru chu a ngaithla duh si lo.

A mi khawihna leh fawhna chuan keimahah nasa takin phurna min siam a, lo dan a hnekin uar takin ka lo chhang let ta zawk a.A thawka Zu leh cigarette rim inpawlh nam chak mai te chuan zûn ang mai hian min zem chiai chiai ni ber hian ka hria.

Zander chu kuah letin duhthawh zet hian ka fawp let mial mial a. He pa min khawih vel hi nuam ka tih zia ka pha lo, ka taksa a hna a thawh nasat zia lah ka hai hek lo. A mi khawihna leh chul velna avanga ka taksa mei kan ang maia sa hiam hiam mai te chu haider chi a ni tawh hek lo. " Oh,Zander, ka mamawh che a ni." ka ti nghar nghar a.

A mitmeng buang thak chu tisa chakna vangin a phi chia tawh a, "Ka naute," tia phun supin ka hmuiah chuan a rawn fawp leh hlawih hlawih a,muangchangin ka mutkawr chu min phelhsak tan ta a,"I nalh takzet a ni." tiin a rum halh a.

Zing ka han thanharh meuh chuan dar riat a lo pel fel vang tawh a. Zan lama thil thleng ngaihtuah chuan ka nui seih a, Zander mutna lam chu ka hawi phei thuai a, a lo mu tawh hauh lo tih ka hmuh chuan ka tho chhuak thuai a,"Zander?" ka ti lang lang a.

Chhanna ka hriat loh avang chuan ka tho chhuak thuai a. Choka lamah chhuk thlain Pi Mali chuan thingpui min lo thlit thuai a. Muangchanga thingpui in khalh khalh pah chuan ka mit ka chhing vang vang a, nizana Zander nen kan chet dan chu chhui kirin ka thinphu chu a rawn rang leh hle tawh mai a. Ka nulat thianghlimna chu a hnenah ka hlan ta tih ka ngaihtuah ringawt pawh chuan min tihlim sarh mai a. Duat tak leh dimdawi takin hmangaihna min chenpui a nih kha. Ka ngaihtuahna chuan ka kawchhungte chu a ti sa ham ham thei hial mai."Zander, ka ta i ni, i ta ka ni si." tiin ka phun sep sep a. Ka hmangaihnate chu pung ta sawt hian ka hria a, ka hlim lutuk chu ka mittui a tla ta hial a nih chu.

Thawm ka hriat avang chuan ka hawi chhuak thuai a, sport dress nen chawhmeh ilo khai bawr laka Zander lo ding reng chu ka hmu ta a. Volleyball practise pahin a rawn bazar haw a ni tih ka hrethiam mai a. Ka mittui hruk hul sawk sawk pah chuan,"I bazar nghal a ni maw?" tiin ka nuih sak a.

"Aw." a ti bung vut a. "Bronson chu i la vei zuiin i la ngaihtuah zui zel a ni maw?" nelawm fahran lo hian a ti vawt ruih a.

A awka chhuak nelawm lo lutuk leh a thusawi vang chuan phawk hra hian ka melh a, a hmel tur ngan leh a mitmeng hriam hrak ka hmuh chuan ka hlimna chu chawp leh chilhin a chuai nghal rawih rawih a. Rilru na takin ka heh chu ka pet fan fan a, nizanah khati khawp khan kan hlim dun a, tunah lah a nelawm loh theihtawpin hmelhriat loh ang maiin ka lakah a che leh si chu ka hrethiam lo a ni.

" I tho hma awm hle mai." ka ti sap a.

"Hma thawkhat."

A mi chhanna nelawm lo khat tlat chuan min ti na zawk a, mahse eng ang pawn na mahila ka tilang hauh lo ang, chhel takin ka intipachang zel ang. Thinpui ka in zawh chuan chapo hmel taka khabe poh lahin choka chu ka chhuahsan a, pindanah ka chho ta hmak a.


Zander hian min lo haw takzetin ka lakah phuba lak chu a lo tumruh hle a lo nih hi. Nizana hmangaihna kan chen dun kha a tan awmzia a nei ve hauh lo tihna em ni dawn? Min hmuhsit zia tur ngaihtuah lek loin ka thianghlimna ka lo hlan a, a lakah ka lo tlawm ta si. Chawh min tiin min va nuihzat dawn teh lul em! Tunah chuan chawh min tiin min hmusit ngawt ang chu.

Khatia a laka ka tlawm ta mai kha pawi ka tiin ka inhaw leh hnuhnawh kher mai a. Tun chinah chuan awlsam takin alakah ka inpe mai mai tawh lo chiang ngawt ang. Mahse zei taka min khawih velna chu ka lo hnar zo ang em? Hmeichhe zeizia a hriain a chawhphur dan a hre ropui sia a hnar thei tawp lo ang. Chuvangin inkhawihtir loha a hlat thei ang bera awm chu a pumpelh dan kawng awmchhun a ni.

Ka mutkawr chu thlakin jumper suit thawl hnek hnawk hak nuam tak chu hain make up tlem ka han inhnawih hnu chuan ka hmai dang bai pawh chu a tilang ziaawm ta deuh e.

Hruaia leh Nunsangate thupha chawi tura kal an rawn kir leh meuh chuan chaw ei kan peih fel vek tawh a. Zander chuan chanchin a lo zawt nghal thuai thuai a.

"An lo lawm lo chhungkua khawp mai, min lo hau erh a ni ber zawk. Tawng ve ngaihna pawh hre loin kan Tukloh chhum zin hnan hawi lawlh lawlh mai mawle." tiin Hruaia chu a nui huk a.


Zander chuan,"Nia, an lawm hauh lo ang. Maduhi nen innei turin min duh em a ni." a lo ti zauh a.

" Zikpuii chhungte pawh vawiin lamah an rawn thleng dawn a, an hnenah ni loin naktuk zingah Zikpuii chhungte hnenah thupha chawia rawn kal leh turin min ti a ni."

" Chutia an tih chuan in kal leh anga a ni mai lawm."

Hruaia chuan," Palai hna hi hna namai a ni dawn loa, upa lam leh thluak nem deuh tihchi niin ka hria. Tukinah i Nite nupa hnenah thil awmzia ka hrilh a, engmah i lo la hrilh lo lehnghal emaw ni, an lungawi lo lek lek a ni. Mo thar ena rawn kal pawh an tum kha." Hruaia chuan a ti zung zung a.


" Anih chuan ka Ni pasal nen in pathumin in kal anga a ni mai lawm." Zander chuan a ti sam et a. " Zikpui, chaw ei khamah ka Nite ina va leng turin lo inruahman ang che aw." a tih zawm zat a.

*****

LAWMPUINA :

Vawiin khan College lam result a chhuak a, Rodingliani Vanchhawng chu BA( Political Science) first -ah pass in Story FB Competition-a 'Purpose' ziaktu Kimbawihi chu Bsc (Mathematics) distinction-ah a pass bawk a, ka lawmpuiin ka chhuang em em a ni. Ruai nena han lawm hupz a chakawm nen pawisa neih loh chu thuhran, Covid hri leng bawk nen kan thei ta ngang loooo. He tia lawmpuina ka hlan che u hi Lalber ruai ropui tak angah min lo ngaihsak dawn nia...

💞💞💞💞💞💞💞💞Ka hmangaih dun dun che u💞💞💞💞💞💞💞💞💞💞💞💞💞💞

Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)