When we meet again By Apuii Tlau (Completed)

Episode nei ho a hlawm a dahkhawmna
Ngaia
Site Admin
Posts: 25813
Joined: April 30th, 2016, 4:07 pm

Re: When we meet again By Apuii Tlau (Completed)

Unread post by Ngaia » August 30th, 2021, 1:38 am

Chapter ~ 25





Pathian leh amite zar ah kan ti lo thei lo. A bik takin Pathian ah phei chuan harh leh zualna kan chang ani ber mai a, kan tawngkam tinah chuan a ri tel reng mai ani.
Kawng harsa tak pawh hi ani nen chuan tih theih lo alo awm lo tak zet e.









Kar khat leh tlem vel full check up nei a, kan awm hnu in hospital pawh kan chhuahsan ve thei ta a. Hah a dam leh zual a, rilru a muang ta hle bawk. A chhuah tuk lamah Pa Chama'n Malsawma dam leh pual leh Pathian hnena lawmthu sawina hun nei turin chhungkhat laina leh Kohhran hruaitu te tan chawhlui a buatsaih bawk a. Kan hlim tlang a, kan dam tlang bawk nen kan engkim tih chu kan phur harh mai. Keipawh Pathian zarah dam chuan naktuk lamah Lawngtlai lamah ka phei ve tawh dawn a, ka cham rei ve leh ta viau mai, kan buai a ta langin. In changtupa lah hian a phal lo mai bawk sia😂










" A mak thei, rawp viau lo teh...." tih hlak pah chuan ka hmui chu ka tuai thuak a. A thip hlur tawh. A chimawm ngaiin ala chimawm nilo a chimawm zual hle bawk a rawn dam tha ve hi chu. Mi hmuh loh kar lah hi remchang alo la hman ziah bawk nen a buaithlak.












" Ui kawm viau suh, a ral thei lo bakah ka ta tho tho " min chhuk melh run chunga a tih suk chuan ka lo melh nek a. Min chhaih thinrim lah hi a chak ve thei sia, a ti fuh thei phian leh nghal.










"I ta ni bawk lo, ka ta vek" ka tih chuan a hmui hnuai a rawn ti pawrh tarh a. In lak duhawm chawp lah hi angai lo ve chiang sia. Hetia a hlim hmel hmuh ringawt thei a ka la awm hi ka lawm tak zet. Fiam zeuh zeuh pawh ala nuam.










" Hei ka ta" tihpah chuan ka kut chu la kangin a fawp zauh a, "Hei pawh " tih leh pah chuan ka hmai vel chu a rawn fawp kual deuh nawk nawk a. A za bawk si, nuih zatthlak deuh bawk si chu ka lo tal laih laih thung. Ani lah chu ka nuih vang nge ala uar zual sauh lehnghal, ka nghawng vel a nul phei chuan ka awm hle hle thei lo ka tal nawk nawk a, a za lutuk.











"Malsawmdawngkim, a zà nia " nuam pawh ka ti tawh lo, ka mittui atling piau tawh. A tawp ve ta hram a, a lum lutuk ka tal hah zo vek bawk nen ka thlan hluam mai. Ani lah chuan ka thlan leh mittui hru vel chu nuih za in sum zet hian min lo melh a. Ka ngei bawk si chu a ban bulah chuan ka beng thlawp a, a lo la tè der vel zui. Ka beng na ve tham lo lutuk tlat.











" Sual viau zel suh, a zat zia kha aw" ka tih deuh hlak hlak pah chuan ka Jacket hak chu ka hlip deuh sawk sawk a. Min lo la nuih ru chur chur zui. Va han chhe tak tih tur hi chu ani bik lo mawle










" Hre reng tawh la, ka ta vek ini tawh ka property " ka hmai bula rawn kun thla a nuih suk paha a rawn tih chuan ka ngei lutuk, bakah bungrua pawh ka ni bawk lo chutia property tih ang em a sawi tur ka ni lo. A rin loh dan deuh chuan chet ka la ve ta thung. Chhaih buai ve kha ka chak ve hrim hrim a. A din that leh hma chuan a hmui ah am fe hian ka lo fawp thut a, a che zui lo a hamhaih deuh pawh ni mahna, ka duhthawh riau rual in ka rilru erawh a fim kar thung. Min fawh let ve a tum rual chiah chuan a hmui hnuai lam chu ka seh sak a, a inla hrang rang khawp mai. Lungawiloh hmel fe a min rawn melh chuan lei chhuah zauh in min dan leh hma hauh chuan room atang chuan ka tlan chhuah san ta daih a. Kawngka atanga mit ka va siai lai chuan rum fe hian min lo melh thung.











" Awii....A va mak thin tak, thusawite hi ngaithla chiang ta che u, bawngsa ka ti reng reng lo bawng hnute.....Ramnunpui, Lalchhanhim thusawi te hi ngaithla chiang ve ta che u va thleng leh nghal rawh u " Choka a ka luh lai chuan Nu Nuni chuan alo ti hlak hlak a. Tetei te unau lah chu insik zeuh zeuh in an bawngsa rawn lak emaw ni khai chuan an chhuak leh zal zal thung. A va han mak thin tak. Nuih lam aza!










" Ngaithla chiang lo thei lutuk, phone an bih reng zel bawk si kan thusawi a attention an pe hlawl lo lah tih hriat reng, hrem deuh hrak tur tiang ah chuan " ati zui hluk a. Nula awm ve dang te pawh chuan tawi zet zet in an lo nuih ringawt. Phone khawih ve vek hlawm hek......










••••••••••••••••





Sumo Fela leh Mala'n min chan pui a, Zothani erawh eng emaw vangin Haulawng lamah a haw rih thung. Dar 7 leh tlem chauh ala ni bawk nen thlasik a intan leh tep bawk sia, boruak pawh a vawt ve tan khawp mai.









Pakhat a lah hian mi hmuh vak theih loh tur siin ka kawr hnung ah a pawt leh run zel bawk si, ka melh lahin min chhan rawh ti melh emaw hian min melh in ka hria! Ka chhiar thiam hrep lo e a.











" Kal lo mai rawh, naktukah kan pahnihin kan kal dawn nia " Fela hriat loh tur deuh chuan ati lwh sur sur thin a. A buaithlak naupang chhia ang mai, a rawn dam leh hi a pangchang zual sawt in ka hria. Duat ve viau tum mahila amah hian abeisei lawk teh awr lutuk a, tibuai ka chak zawk tlat zel bawk si.











A thusawi pawh chu lu ka thinsan ringawt a, tawngvaih ila chuan kan inhnial leh hrep mai thei ani, luhlul ve dun thin sia. Eng eng emaw a buai leh vek palh ang.










Sumo alo thleng a, ka thawmhnaw te chu driver chuan a hlang chho zung zung bawk. Passenger erawh 6 chauh kan ni dawn ati bawk a, seat no. 6 ka hauh bawk nen anuam dawn kan thawl dawn tlat.










Ka awih thei lo! Malsawmdawngkima at zia hi, Sumo ka lut tur chu ka kawr hnungah a pawt deuh tang anih chu. A ruka thlah tura ka signal pawh chu zu hai der tlat a.Min melh run ringawt lehnghal.










" Malsawm, amak eeee, naupang chhia nute emaw ngen rual pawh ini lo, thla teh " mi hriat loh deuh tur chuan ka ti deuh hlak hlak a. Rei fe min melh leh hnu ah hreh hmel deuh hian a thlah ve ta hnu hnu a. Ka khawngaih leh lawi bawk si, min ngaih leh min thlakhleh ve zia ka hriat chian phah bawk, lo kal ve turin sawm ngat ila chuan min hnial ka ring hauh lo bawk.









Sumo ka luh hnu chuan Driver tukverh ah chuan rawn dak in ka chuan man tur a rawn pe a, "A ngai lo.." tih viau pawn awmzia awm lo. An inhlan fel ta tho. Kan tlan chhuah dawn te chuan kawng sir atang chuan min melh run a, a mitmenga khawhar rukna pawh chu ka hmu thiam ve chuan ka hre bawk. Mittui tling pamin ka bye bye a, ani pawn nui lui suk in vawikhat chauh a rawn vai ve zauh bawk.











Lungleng, khawhar viau mahila ka hawna kawng chu a that phah der silo, khawhar ru ve deuh chungin sumo lah chuan min sawh nghawng nghawng a, ka chau vek.









In pawh tluang takin ka thleng ve leh ta. Ka nu a hna ah kalin ka pa in min lo nghak thung a, chanchin vel mumal zawkin thingpui kan in lai chuan ka hrilh ve mawlh mawlh, ka sawi hmaih theih ngai loh tur Pathian hming pawh ka lam zing lo thei lo. Amah atanga engkim hi awm ani miau si a.











Kan inkawm zawh chuan intifaiin ka sumo chuanna chau lutuk chu ka mu nghal thlawp a. Mala pawh ka thlen thu ka text zawk tih bak chu ka mut san ta daih bawk.
Mahni in lum nge nge a vawt lo a, hah pawh a dam e.











Chiang zetin ka harh hlawl a, chu pawh kan kawm chhak Pitar bawk nui ri vang vek. Alo leng leh tawh aniang. Kawm tur hi a duh ve thin sia, ka nu pawh a duhsak lutuk nufa rual ti hian an in kawm an in kawm ve zel chu ni sia.











Zanlam pawh ka nu in bawng sa chek var tui zet min lo lei ve ngei a, a thau bawk nen chaw ei a tui zia mai chu! Lunglen pawh a bo vek thei mai ang.










Kan chaw ei kham hnu lawk ah min rawn bia, a khawhar viau aniang a aw pawh a dual ve ruih mai. Thil ho te te amah ti hlim tur lam chu ka sawi char char a, a tawp ah chuan kan nui dun leh thei ta nge nge e.











* Kimkim, Chanchin ka lo hre ve chiah a in tha zel maw? Enge Mala chu a an tak zet? * ka mut dawn chuan Ruatfeli message lo awm khar chu ka hawng a. A teh mial chuan, an lakah pawh hian ka inthlahrung ve bawk nen khatia Chhana nen kan inthen tak hnu khan kan inreh san hmiah kha nia.











* Umm, kan tha lawm Mala pawh a zia tawh lutuk Pathian zar ah, kan tha tawh viau e * ka va ti ve zat a. Ka reply anghak emaw tih mai tur in min la chhang rang em em zui.










*A that hlauh chu, ka phone a chhe char char a, Lalchhana nee lah in lo inthen sia, ka dil lahin min pe duh silo a * voice hian a rawn ti nang nang a. Min haw lo emaw henu hi?










* Nia, keima thiam loh zawk ania * ka va ti leh zat a.











*Nia, mahse midang tina reng chunga mahni hlim chuang bawk silo a awm reng ai chuan a tha zawk, hetiang vang te hi niang uire na te hi alo pian, taka Chhana kha Kolkata ah a chhuk daih a, traininh tur a nei ani awm e* a rawn ti ve zat a. A tawng chheh danah hi chuan min haw bik pawn ka hre lo.










● Muttui ule.......Sunday emaw monday lamah chuan kan zawh theih ka ring😂 te kha ti vel ila....🤣🤣💙💙💙💙



Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » August 30th, 2021, 1:38 am

Chapter - 26






Rei fe chu kan inbe ve leh ta reng e a. Phone mahnise kan chanchin vel chu kan hun tawn dan zawng zawng nen chuan ka sawi char char a, anin pawn alo ngaithla ve reng bawk. A hming ka lam tam ber erawh Pathian ropui zia ani lo thei lo. Amah khi awm lo ta se chuan mihringah kan inchan tawh lo hial ta ve ang, awm lo ata engkim siamtu lwh duangtu khawngaihna leh hmangaihna hi alo hlu em ani.









Kan inbiak zawh meuh chuan dar 12 a apel der tawh, Chhana pawh ngaihtuah awm lutuk in a awm lo bawk a, tlem chuan rilru pawh a zia ve ta deuh e. Mahse mahni mihringpui ngei infiam na ang maia hman hi chu ka ti leh tawh ngai hauh lo ang, a hlawkna awm lo kan inti na tawn mai ani.










Zing thawh ka la hai zui, ka pa in min lo au chuan dar 7 alo pel duai tawh. Eirawng ka nu leh Tetei tan an lo bawl vek a, engmah tih tur dang em em a awm rih lo bawk nen a pawi chuang lo aniang.😅










Class kal ka tum tawh loh em avangin addmission lam pawh ka ngaihsak vak lo. Mahse Ignou a zir erawh ka la duh ve ta tho hun hek loh nan mahse tun tut tut ah erawh ala har rih deuh dawn. B.ed addmission online in kan ti fel a, ka pa pawh min tawiawm tha viau ka nu erawh in alung ala si zan lo tih ka hria mahse duh lohna lam engmah min sawi sak tawh lo thung.









Tuesday zan chuan nidang ang bawk in dar 6 : 30 pm a Tottenham leh Arsenal inkhel en chuan kan thu ho leh khup a. Ka pa leh Tetei'n Arsenal an tan a, Kei leh Remruata'n Spurs kan tan thung. England fan ruh kawl ka ni bawk a, angai te bawk in Harry Kane ka tan leh hlur. A hmeltha chu ka ti lo nangin a pa ka ti viau. An counter attack a pui thei si kan au leh ruai thin. Ka nu erawh in ngawi rengin refree bak atan leh tawh lo aniang.










First haft zawh lai vel chuan kan kawngka an rawn kik kauh kauh a. Kawmchhak pitar te bak ani leh tawp lo ang tiin " Nangma lo lut la, keimahni'n phal vek e " Pai zet hian ka lo ti fiam a. Mahse ka fiamthu fuh ta chiah lo. Nui vur vur a patling pahnih lo lut te chu ka lo melh haw a, an rawn nuih nghal thu danah ka thil sawi kha! Ka zar lutuk chu ka sa nghal pup pup mai.











Ka pa chuan alo chhawn thuai a, an insawi hmangah chuan Mala te chhungte ni awm tak an ni. Ka nu chuan " Mami, inleng te hi thingpui han lum ta che, Mama nangni pawh room ah lo va awm rawh u" ati ru nghal sar sar a. Kan unau chuan bo fe in choka lamah kan inzui phei hnak hnak bawk.










" Apa thiante mawni le, ka la hmu ngai miah lo" Remruata zawk in a tih sup chuan ka ngaihtuah vang vang a, ka thil ngaihtuah chhuah avang chuan ka thin a phu nghal dawt dawt bawk.









"A va hun lo tak, inkhel kha ka la en chak asin mawle" Tetei zawk in atih nang nang chuan kei erawh chu zam na leh phurna mak deuh maiin min tuam a, ka ni deuh chhui mai.









" Computer ah en ila? Keipawh ka la en dawn " Remruata zawkin alo tih chuan
"Ngai lo thingpui lum ila kan pathum in kan en ho dawn nia" ka ti deuh tung a, mahni chauh a sitting room a va phei leh ka peih teuh lo mai.










Ka naute pawh chuan ning chung chungin min nghak ve leh ta reng a, Malsawma ka text lah chuan min la chhang thei lo zui, ala online hman lo aniang.











" Tete va pe rawh" ka thingpui siam chhawp paha ka tih chuan min melh ve khai a. A peih lo ve hmel tawp, kan in hi concreate building pangngai ani bawk nen room inhlat a hran deuh phei chu in hriat tawn a har hle a, an thu sawi pawh a thum deuh bul bul bak ka hre hleithei der lo.












" Ka peih lo asin le" ti nang nang pah chuan a chawi phei ve mai a, Remruata nen chuan room lamah in zui pheiin inkhel chu kan en ta daih a. Ka phone pawh ka bih pah zuk zuk bawk chhanna lah chu zan dang ang lo tak mamawh vel leh Malsawmdawngkima hi zu reh daih a. Tul lo lutuk.










" Thil lei min lo dil aniang, an sawi dan ah sawn, apa in api leh pu te pawh kan lo rawn anga te tia " Tetei chuan a rawn ti lut nghal a. Ka rin ang chiah, Malsawma lah hi biak theih reng reng loh tiang thil te chu sawi lawk ve tur ania. Hetiang teh thut te chu kan tan pawh a hrilh hai thlak lek lek alawm, ka nu leh pa lah ka zah ru tun











An leng rei hran lo,an haw hnu chuan ka pa chuan min rawn ko a, an room lamah ti ti nei turin kan in zui phei nghal bawk. An sawi tur ka hria mahse keipawn ka hre lawk bik tlat lo.










"Malsawma palai te an ni awm a kha , in sawi lawk lo a kan lo hrilh hai hman viau alawm " ka pa chuan alo ti sup a. Ka nu nen chuan min lo melh deuh run bawk.









"Ka hre lawk bik lo lawm, Malsawma lah ka be tlang hlei thei silo a" ka tih chuan tih vak ngaihna an hre bik lo aniang hauh pawh min hau em lo.










"Mi tihdan in kha chhungte kan la inrawn kual anga tiin kan inthlah ve kha chu nia " ka pa chuan alo ti leh charh charh a.










" I inpeih tawh hrim hrim ami, bakah i zirna lam te, hna nei inla ni bik silo" Ka nu zawkin alo tih chuan ka lo ngaihtuah chiang miah lo. Ni e, hna nei kan ni bawk silo chutia chawm hlawma han luh ringawt lah ka hreh ve dawn chiang, bakah B.ed addmission ka lo ti zo chiah bawk si.










"Aaa ka hre tawh bik lo, Mala ka lo bia ang" ka ti ta ringawt a.Ka nu lah chuan mawl min tih hmel bawk si nuih za hmel bawk si hian min la melh zui.










•••••••••••••••••




"Enge i tih em em a? Phone call la thei bawk silo, vawi eng zat nge lo biak che ka tum?" Dar 11 dawna ka call a rawn chhan chauh avang chuan ka lo ti hlar a, concreate tih takah ka room thawm engmah ka chhung ten an hre thei dawn lo tih ka hre bawk.









" Nia, Fela bialnu ka rim pui a, phone ka lo ken chhuah theihnghilh daih a" a rawn tih thluam chuan ngei zetin phone chu ka melh a. Dah khum hmak ania ka chak ni.









" Bial nu rim dawk dawk pawh angai ami, bakah tinge palai an rawn kal tur thu pawh min hrilh lawk loh, ka nu leh pa lakah pawh ka inthlahrung lutuk " ka lo ti leh nghat a. Hre lawk miah lo a palai lo dawn sawn kha chu a hrilh hai thlak ve viau ang tih ka hre bawk.










" Lunglei a i awm lai in kan sawi vek tawh kha " alo tih leh bui bui phei chuan ka inngaihtuah lungpum thinrim ru bawk si chuan ka reject ta daih a. Han tal buai ve hrim hrim teh se, ka rilru atih buai rei man ah.











Ka nghak rei lo a rawn call leh zat a, ngei awm chhuah in ka lo reject ve nghauh nghauh thung, vawikhat aringa ka ti tawp leh zel. A tawp ah ka lak sak leh ta nge nge a.









" Bawihte ka thiam loh anih kha, ka....a hma khan kan sawi tawh deuh sia engmah i sawi buai lo bawk nen ka lo ti ve hmiah anih kha " a rawn ti charh charh a. A aw ah chuan a inthiam chiah lo tih ka hre ve mai bawk.











" Mal, naupang chhia pawh kan ni tawh lo mahse hna pawh kan la nei bawk silo nghak ve deuh ila, chawm hlawm nih ringawt tur te chuan ka duh miah lo ania" ka tih chuan a rawn thaw deuh hawk a. Ni e, chawmhlawm mai mai tur a luh chu ka inthlahrung a, a mawi lo ka ti bawk.











" Ka hria lawm, kan result a chhuak tep a, M.com kha Nehu degree ka neih hnu chuan tihdan a awm thuai mai ang, bakah hmani khan banking lamah exam te ka pe a result pawh kar leh lamah chhuak tura ngaih ania, kan tling ve mai thei asin, anih loh leh hna te pawh kan zawng leh lawp lawp mai aniang chu" a rawn tih sup chuan thla chu tlem in amuang ve leh ta deuh. Fel in hawihhawm hlawm viau mahse nupa meuh a chawmhlawm a la awm chu khawtlangah pawh a zahthlak ve ang ka ring.










"Bakah B.Ed addmission te ka lo tia...." ka ti leh sap a. A thim lam hlir hian ka thlir hmasa a, nuam lo ti viau mahila ani lo thei bawk silo.










" Aww....i zir zel ang chu,mahse kei chuan nupui lehkhathiam leh fing tak aiin nungchang mawi tak leh zaidam, ka chhungte min hmangaihpui thei kha ka duh a nangmah ang chiah kha chuan min hmangaih bur tur " a rawn tih zui suk suk chuan mahni pawn kan then leh tha tawh.










" Nupui fel neih chu lei vanram an tia mi kha?" nui zui suk suk paha a rawn tih leh chuan ka lo nui ve hak a. " Lei vanram i duh chuan min duat viau phawt mai teh " ka tih deuh hlak chuan kan nui dun leh ta ringawt.











" Ka bulah awm la duat hlak che ka chak" a rawn ti leh pek. A ve lutuk hian! A mize phu lo hian ala zei zui te hi ka ringhlel rum rum zel. "Ka mu dawn" ka tih chuan "tui deuhin" alo tih zawm zat a. "Nangmah ngai em em tu che hi min lo hmu dawn nia i mumangah aw" a rawn tih leh zat bawk. Ka ngai a, a taksa lum veng veng pawh kha deh ka chak mahse kan inkar a hla ta em ani.













Zingkara ka phone dawn erawh in min ti phu nasa ngei mai. Engtin nge anih theih? Hetiang thil a awm tih ka hre miah lo.









Chu chu maw....... Zothani'n min lo bia a, Dinsanga nen an inruk thu a rawn sawi anih chu! A sawi dan hmangah nau apai ni awm tak ani mahse khatiang chen awm ho khan ka hriat pui miah lo engtin nge ka lakah a zep theih!










Tunah pawh an la haw lo Lunglei lamah an la awm ani awm e!










Bakah Dinsanga nen chuan engtin nge an lo inzui ve theih hrim hrim?










● Muttui leh vek u le🤗💙

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » August 30th, 2021, 1:38 am

Chapter - 27






Kan buai zo ani ber e, Zothani nu a lungawi lo nasa rilru buai ve zetin min lo be tawp a, lo sawi pui vak dan ka hre silo, ka lo be dawn nia tiin kan inthlah ta ringawt. Mala ka hrilh lah chuan ka ngaihtuah loh lam daih zu sawi pek a. "Keini aiin naute an nei hma dawn ani maw?" a rawn ti deuh nghut ringawt. A va hah chhah ve thin tak










Tlai lam deuh ah chuan Zothani chu ka han be leh ta ngei a. Chinchang kan hre lo dun si buaithlak.








"Tunah khawi ah maw in awm reng reng a?" ka tih chuan U Dinsanga thianpa te inah an lo tlan ve tawp tih a sawi a. A aw ah nuam ati vak lo tih lah a hriat reng, a rilru a hah ve ngawt ang tih ka hriat thiam pui.










"Anih engtin nge min hrilh miah loh theih? Bakah engtik laiin nge in lo inzui a?" Thawk lak hawk paha ka tih chuan a ngawi deuh rauh rauh a.









"Ih....Ka duh lutuk ka tih kha ka hrethiam bik lo a tir kha chuan amah kha beinawn nan tiin ka be ve ta tawp a, a tirah chuan min chhang vak ngai lo a hnu deuh ah chuan bia be ta chu min hnar bik vak lo in ka hria a ka huang tau lui ve tlat a, i hriat kha ka duhna ah chuan mahni in hai kaw thei khawp in ka zak lo thei tih chu " a rawn tih leh sak chuan ka nui ve ta ngawt. A ni hi zawng thil reng reng ah a tum hma chauh a harsa ti angin a bansan ve ngai hauh lo kha ani reng a. " Mahse maw Kim, ka zak ve tho hmun fal kan awm hmasa berin ka do zo tlat lo, hrehawm ka tia chumi zan phei chuan ka tap tlaivar ti tih kohhranah lah ka inthlahrunga miin an hria ang tih hlau reng rengin ka awm a, mahse chumi hnu atang erawh chuan kan inkar a nghet ni maiin ka hria, min ta chei ve tan a keiin nuam ka lo ti ve tum hrang bawk nen mahse pawi ta ber chu sex ah kan insum zo ta lo a, vawikhatin vawihnih a hring an tih ang tak tak hi ani mai, Kohhran upa fanu tih ah erawh kan chhungkaw hmel ka tih hem nasat zia ka hria a ka nu leh pa leh ka chhungte zawng zawng chen in zahna khur ah ka hruai lut a, a hunlai kha chuan hetiang hi kan ngaihtuah thleng pha lo mahse kan hmangaih te hrehawm ti tak leh mi hma a thinlung hliam nei chunga an awm tur ka ngaihtuah let hian ka zak a, engmah erawh siam that theih ani silo, engkim a thleng vek tawh tlat ani" a ti hap a, a insut deuh hraih ka hriat chuan a tap ani tih ka ring thiam nghal bawk. Hmalam hun thui tak thlir a nun uluk hman hi angai tak meuh asin, ni e heng kan hming chhiatna hi rei lo te ah mi nawl pui chuan theihnghilh ve mahse chhungte thinlungah erawh a reh tawh lo ang, khawilai ah emaw mi chumi rai tih ang te lo thang leh ta se chumi fa pawh chumi pawh anih tho kha tih nen a chhungkua hmeh bel kan nih tawh na tur te kha ani zel ta si a. A pawi vawng vawng ani ber e.











" Chuan inneih chu in duh tihna mi?" ka tih chuan " Umm, naute a fahrah dawn asin kan tih mai loh ten " a ti leh sap a.A awm pawh a tham deuh chhal mai. Ka lainat ani ka thiannu hi.









"A hrim hrim in thla engzat nge ni tawh reng reng a? " ka ti ta daih a.A rilru lak pen ve ka duh hahdam a mamawh ve tlat ani.











"Thla 1 leh a chanve " a rawn ti leh sap a. Tawng leh ka tum lai tak a " Bawihi, thei ka lo lei a " rawn ti thum dut tu avang chuan ka ngawi chiang hle! Awi leh! Bawihi te ti....... An mahni ai chuan ka phur ta daih zawk mai thei induh vak lo rai palh tih vang emaw ka ti deuh a mahse an inngeih leh hmel viau sia.










"Kimkimi ka lo bia a, ka lawm aw..." Zothani chuan ati leh sap a. A chhang lo nge a sawi erawh ka hre thei lo chumi hnu deuh ah " Lawks Kim inbualna tur kan siam pui lawk ange " a rawn tih leh chuan nui hak in ka lo chhaih a, min la chhang duh miah lo zui kan dah ta hram.











Taka kan tawngtui ta langin Palai lo kal thu pawh ka hrilh hman lo, aaaa....pawilo kinah hre ve tawh mai rawh se. Tlai eirawngbawl lai chuan ka nu bulah chuan Mala ruahmanna vel chu ka hrilh ve zat zat a. Ani pawh a lungawi ve deuh aniang engmah a sawi buai lutuk hran lo.










Ka pa in ka pu te ho a be kuala , Palai ka hmuh thu a sawi lai vel phei chuan be ve hawt lo pawn ka lo lai chhe ve em em ringawt. Chanchin vel an han inhrilh tawn chuan an hnial hran hlawm lo tih pawh ka hre thiam ve an tawng dan atangin. Ka cousin leh ka nite ho in min rawn fiam nasa zan lamah chhan ngaihna pawh ka hre tawh lo, family group ah lah an rak nasa luh pawh ka lut ve ngam tawh lo min chhaih reng sia!










Zirtawp zanah palai te pawh an rawn kal leh a, an sawi ho nak nak hnu ah rem te pawh an ruat ho ta a an lawm hmel khawp mai. A ni tur ah erawh thla leh kar tir lamah an duh deuh tut tut mai a, ka nu erawh in chu em em chu ati deuh si, an rel ve hrep hnu ah thla leh kar hnihna lam ah an ti tlu ta niin ka hria.











Phurna mak takin min tuam ka huphurh deuh bawk zam deuh bawk si. Suangtuahna ho deuh deuh te nen mut pawh ka mu tha thei lo, Malsawma lah chuan " thla leh tunah hunah chuan ka bulah i mu tawh dawn sia, lo thleng vat vat se" a rawn ti deuh reng. Nov thla ani tawh dawn bawk nen a nuam tawk viau ang! Ka hlima ka phur a engkim mai tih chu a nuam veng veng mai.











Zothani te pawh tih ngaihna awm hek lo Palai te tirin an inneih ve dawn ani awm e, ka lawmpui viau mai. Fela sawi hmangah Dinsanga nu leh pa te phei chu an phur zawk hial ani awm e, chutia beisei loh lamah tu an han nei mai tur chu! Nia a awm ve reng an fapa lusun khawhar nupui a nei leh duh mai pawh an rin loh senior ve lamin sawn a han thlak chu nia, hmeichhia lah chhe zawk zawk lo ni bawk silo, a thatna mual mual pawh alo awm tho anih hi.










Kan inneih hma karin zingah an invuan dawn a, keini pawh min rawn chah uluk hle, mo thian ka ni dawn lehnghal ka buaipui hman vak ka ring bik lo asin le, mahse chhungte leh thenrual te an fel a, an inneih hma niin in rawn kal chuan a tawk mai ang an tih deuh avang chuan chutiang hun nen chuan ruahmanna kan siam ta mai.










Hlim phawt a nun a kaltluang hi chuan hun te hi an rei lo duh khawp mai, Zothani te pawh an inneih fel chu ani ta ber Mala nen kan han tawiawm ve zan a, Fela pawh. A mawi tak zet, ni e ka thiannu pawh nise ka fak der hauh lo a mawi lutuk tlat ani.











Kan awm ho emaw deuh chuan Dinsanga zawk chu ka chik viau thin ka thiannu tan a tha chiah angem? tih ah ka la hlauthawng ve deuh ani. Mahse a mitmenga Malsawma min en dan ang ka hmuh chiah chuan ka fiah a rilru a thlamuang ta bawk.












••••••••••••••










" Vawiin atang chuan nang leh kei kan ni tawh dawn lo Kan tih ani zel tawh dawn " a rawn tih sup chuan ka lo nui hak a. Min chei tute pawh chuan an hre ve thei emaw ni darthlalanga an thla langa an lo nui ve suk suk chu ka hmu ru reng.











" I inpeih tawh mi?" ka ti ve sap a.Midang awm laia khatiang sawi chu a nuam teh vak lo, ka la zak deuh tlat.










" Umm...nang, i mawi em?" a rawn tih leh zat chuan ka sam khawih mek tu chu a rawn nui chhuak hak a. An hre thei chiang alawm, lai deuh in ka lo nui ve ringawt. A tawng naupang chhia thei si!











" I ring em? " ka ti leh daih a. Hetiang lam sawi vak hi ka duh lo an hre ve kur bawk sia, hang up san ila a rawn kal leh duh mai dawn bawk sia.










" Ring lo pawh ni ila i mawi dawn tih ka hria lawm, bow tie nge i duh tie pangngai ?" a rawn ti leh zat a.









"Tie pangngai" ka ti ve sap a. " Ka ring reng a" nui suk pah chuan a rawn ti leh zat a. Ka hmai an khawih dawn avang chuan ka dah san leh ta rih.












Dar ri kan tan liau liau a an khawng rik lai chuan ka zam tak zet. Ka nau Remruata'n nui sang chunga a ban min rawn pek chuan zam zet hian ka lo vuan a. Suit nen zaih a a han inthuam ve chuan a lang tlangval sawt mai. Class - xii lai ani ve tawh bawk a, ft.5'8 vel a mit ah chuan min hmangaih zia ka hmu bawk. Ni e, nakin lawk ah chuan chhungkaw thar neiin ka awm tawh dawn a, kan in tlawh pawh zen zen thei tawh dawn silo a, ka khua pawh a har ve khawp ang.











Biak in chhunga kan luh lai chuan mipuiin ding chungin hla an lo sa a, ka zam bawk nen khaw vawh lai pawh ni mahse ka thlan dap mai. Ka lam hawi a, nui sanga lungchhe lek lek a min lo en tu bul kan thlen chuan ka zamna zawng zawng te chu lak kian ang mai an ni. A suit dum dak nalh zet leh leh a kamis var nalh zet te, a neck tie a pawl spot te nen lam chuan a tha thlawt. Zothani rai lai ani bawk nen ka dinpui turin Ruatfeli kan chah phei ta tawp a, ani lah lo phur nasa mai, Mala erawh in Fela a din pui thung.











Inneih hunserh azo a, a borual hahthlak lai nuam bawk si kan tawng chho. Mipui ri nuai nuai te chu ka beng an luh ngut ngut ka ti lo thei lo, hlim viau mahila a hahthlak lam mah ani. Zan thleng mai chuan tlan bo na awm nghal loh nu leh pa mai bakah thenrual tha te nen lam kan la ri nuai nuai a, ni e, nuam chu ka ti lawm mahse taksa erawh a hah ve lam mah ani tawh.










Dar 10 pel lamah chuan kan in thlah kim thei ta hram a, zahlam ka ngaihtuah thei tawh lo Mala room an lo chei mawi vut leh kan mo chhawm leh thawmhnaw te nen a let rem rum kara khum ah chuan inthlak pawh in thlak lo in ka let thla tawp hi ani mai. Ka chak ber chu harh miah lo a, naktuk pum nena mut char char chu ani. Mahse chu erawh a theih bik em em si loh.












" I chau viau alaw " room a rawn luh ve paha a rawn tih sup chuan ka lo "Umm" peih tawk ani. A inthlak nge mawni a ri deuh sat sat a. Chumi hnu lawk ah khum lam rawn panin ka pheikhawk chu a rawn phelh nghal a. A van fel thin tak.











" Tui lum a awm sa a, in tleuh zawk ila" a rawn tih leh sap chuan ka lu "umm" leh tawp a. Ka chauh zia a hria ni ngei ang min nuih ringawt a. A hnu lawkah ka kaw har leh ka puan bih chu a rawn phel deuh sawk sawk a, mahni chuan ka che peih meuh lo. Kawr bah pan te leh kekawr bul nen chauh chuan ka awm ta teu a. Mahse ka zak lo lui ve tlat chhungril ah erawh nuam ka ti teh chiam lo, ka pasal bul anih tawh avang erawhin awm leh mawi lo anihna ka hre lo a, ka palzam lui ani ve mai.











Ani pawh kekawr bul chauh alo ha tawh, bathroom lamah min pawm phei leh hnak hnak a. A chau ve lo emaw ni chau hmel a put pawh ka hre lo.










" I nalh lutuk " ka dara rawn fawp zauh paha atih chuan ka lo nui hak a. Ani pawh a nui che ve dawt tho. Chuzan mawlh chu kan tan hriat reng tlak ani ngei ang. Ka neih zawng zawng chu ata ani ta a , chutiangin keipawh, pum khat niin 'kan' tih thumal pawh kan tan ani ve reng tawh ang.












Zingah thawh ka la hai zui. Ka harh meuh chuan dar 7 alo ri duai tawh. Ka inthlahrung bawk si zak deuh bawk si chu ka chhuak ngam tawh lo, Malsawma erawh an lo tho daih tawh min kaih thawh ve mai tur ania. Ka zak lutuk leh nuam lo ti lutuk chu ka tap lek lek hial ani. Malsawma ka call ta tawp, tap lek lek in "Min lo hruai rawh " ka ti tuau a. Room chhung alo luh lai chuan mittui tling pamin ka lo en.










A ni lah alo hlauthawng nasa, ka dam lo emaw te ti. A chhan vel kan sawi fel hnu chuan nuih zat hmel si, khawngaih ve hmel tho si hian min melh run ringawt a. A hnu deuh ah min kai thla ta dat dat ta a.









Choka kan va luh chuan U Atei leh Tetei te unau bawk an lo awm leh a, Nu Muanteii alo awm tel bawk. Ka tho nuam em? tih min lo zawt nghal thuai thuai a, ka zam lutuk nge ka chhang bah deuh nuai mai. Ka awmdan ah an hrethiam nge min be sawk sawk a, min hau duh emaw mit mei kawi min hmuh hran lo bawk nen tlem chuan ka thla a muang ve leh ta deuh.











" Zak reng reng suh, kan inneih tukah kei te chu ka tho thei reng reng hleinem.....dar 9 velah i U Davida hian inthlahrung deuh in min lo kai tho a, ' chaw ei ila chaw ei khamah i mu leh dawn nia ' te rawn tia lawm " Tih pah in U Atei chu a nui hak hak a. Nu Muanteii lahin " Ni e, Mizo te inneih dan hi a hautak deuh hlek a, a awm lutuk ania zah angai reng reng lo, in chau ve deuh anih kha, I u Atei erawh kha chu min ti mangang tep zawk alawm, damdawi te a mamawh em tih te ka han zawt hman tep ani " tih pahin a nui hak hak a. Thla a muang leh zual.











Mo en turin an lo leng sap sap a, sitting room lamah min ko phei awl lo bawk nen kan tei kual leh ta zak zak mai. U Atei lah in fiamthu in " Tete mo thar en an lo tih leh hunah Kimkimi ai awh in ka lo kal ti la, va phei ve thung la tha ang " alo ti leh pek a. Nuihna tur a tam thei khawp mai, a hlahthlak dan pawh a zia ta deuh alawm.











Chaw ei kham lamah Ruatfeli leh Fela pawh an rawn lang leh vat a, chaw ei ah kan sawm na in eng emaw vangin an lo hman lo thut ve ve a. Chhun lamah bungrua leh thil chhawm vel chu kan dah fel mawlh mawlh a, Fela leh Mala'n min lo pui ve bawk. Inleng bawk an lo lut renga miin duhsak takin lawmpuina min lo hlan ve han nin ngawt mai chu a zia lo thin, hlim hmel pu in ka lo chhawm ve vat zel a, ngaihtuahna a zir hian hah te pawh alo dam ta deuh aniang a zia ta phian e.











Mala phone a rawn rik chuan be turin a chhuak vut a, keini erawh ka thawmhnaw vel kan la in chhawp hnawk rem rum khawp mai. A hnu lawkah hlim hmel zet hian a rawn lut leh a, " Ka hmu nia, hna ka nei ve ta " a rawn ti deuh hlut a. Ka lo meng phar nasa. Ni tak! Banking lam ah exam a pek thu a sawi tak kha. Hlim zet chuan kan han inkuah leh chuk chuk a.










Inhnuai lamah chhuk vatin ka nu leh pa te kan hrilh nghal bawk. An ni hlei hlei an lo lawm thiam nasa mai, hlimna leh malsawmna in ka chungah thla azar ka ti lo thei lo, Pathian vang vek ani e.









•☆ Naktuk ah last aw ☆ Tui deuh khan lo mu vek ula, 😘💙💙

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » August 30th, 2021, 1:39 am

~Note~

In fel sang sang thin hi ka tia, kum ah phei chuan ka rual u vek tur inni hlawm a, a naupang deuh chu tlem tlem chauh in ni zawk mah ang. Min duhsak em em tute, comment lama rawn hlah ngai lo, min fuih a, min support na tin reng avangin ka lawm em em e 💙.
Love u all😘







Chapter - 28 (Last)







" Traininh ve zawk chu angai dawn a, mahse Lunglei tho hian ani dawn in ka hria, mahse training chhung erawh pay a awm thei dawn lo ani awm e " Chaw ei lai chuan Mala chuan a ti sup a. Kar 2 lai kan inneih ve tawh bawk. Engkimah ka lawina in ka in ni ve ta chu a nuam ka ti, ka tihdik loh ah tha takin min hrilh a, min hauh ngai laiah lah min hau mai bawk mahse tumah rilru kawi leh herh pu kan awm lo bawk nen han hrehawmna tur em em a awm lo, kan inhauh hnu lawk ah kan nui dun leh hawk hawk a tiang reng reng a hringnun hman hi kan hmang anih chuan ahrehawm hauh lo ang











" Ni e, nangni tal in awm loh chuan i u te lah an kal a ngai leh thuai tawh dawn si a" tiin ka nu Nu muanteii chuan alo tui hnih vat a.










" Ka nu leh pa hi kan bulah lo chhuk ve zawk teh u a, a nuam ve teh mai nia, mi an tha sia kan ram aiin ala in develop lo nangin nuam ve tak ani " U Atei chuan alo tih zawm zat a. " A khai ni dawn tak e, kan la hmuh pui miah lo che u bial thar inneih hnu hian " tiin ka nu chu alo phul nghal hlut a. U Ateii chuan an awmna lai bawr vel chu a nawm zia an sawi tak tak mai a, tawngkam a thiam bawk a chaw barh thulh thak in kan ngaithla lo chauh ani.









" Ei teuh rawh aw..." tihpah chuan Mala chuan ka thlengah chak ai bawppui lian zet mai chu a rawn suak a. Ka lo nuih var var thung. Chakai sa ah hi chuan a bawppui lai hi ka duh ber lai ani ve tlat.










" Ekhai a bawp chauh pe mah ta che , kha a kawr te kha kheh ve mawlh mawlh rawh, mipa ho hian an ei khalh vek palh ang che" ka nu chuan alo ti leh nghal sawk sawk a. Mipa ho lah chu an lo nui heu ringawt.










"Nu a kawr aiin a bawp a duh zawk alawm" Malsawma'n alo tih nghut chuan ka nghawk deuh salh a. Mi'n min duhsak ve a, chutia lo tih kher kha angai ka ti miah lo, nuam lo te pawh an lo ti thei a.










" E...alo ni maw, Kha ka lak ami hi lian ania, atang hi Ateiin a duh bawk a, insem ila keiin a kawr " ati leh zung zung a. Chutiang khawp a min duhsak chu ka lawm a, lungawi takin ka lo dawn sak bawk. U Ateii pawh atàng hlir a ei kha mak ka lo tia a duh ber lai alo nih vang lek niin.











" Kei chu lui lamah ro ro hi chuan Kaikuang ka duh ber a, mahse tunlai chu avang lutuk a" U Ateii bawk in a rawn tih leh chuan "Keipawh" ka lo ti vat a. Kan inmil lutuk chu a mak zawk. Kan duh zaeng kan sawi chho a, in an na lai fe fe kan lo ngah mai. A tawp ah kaikuang hming kan lam zing deuh nge ka pa in "Naktuk lamah in pasal te hian lei tur zu zawng rawh se " ati ta tawp a. Ka nu ho in kan han nuih tak tawp kha.











" Rimtui ve...." Bathroom atanga inbual zo hlim tih hriat taka sam huh hlap a arawn chhuah paha atih chuan ka dressing table darthlalang atanga melh zeuh pah chuan ka nui hak a. Che cute thei sia.









" Taka, tihdan tha deuh ka hria sin nimin khan min lo bia a" ka tih chuan Wardrobe bula a sam huh chham hru mawlh mawlh pah chuan mit ko san ak hian min rawn melh a. " Ih...hetia awm mai mai ai chuan tuition pek ka duh deuh a,ka thiannu pakhatin min lo bia a, an school naupang thenkhat maths lamah an tla hniam viau ani awm e, an nu leh pa te mangang in tutor tur zawn sak turin an lo ngen tawp a min lo bia a an tan malsawmna kan nih ve theih bakah pawisa tlem tlem kan lakluh belh thei anga, i rem tih chuan?" Toner ka hmai a hru mawlh mawlh paha ka tih chuan hawi sawn in Wardrobe a a thawmhnaw chu a ban nghal zat a. A hawisawn rual a abiang ki che erawh ka hmu hman.










" Chuan....ka rem ti dawn em?" ka ti leh chuan a rawn nui chhuak ta suk a. Ka rawn der ve chu nge maw ni a nuih a zat viau le, nupa kan nia ka thu thlukna ringawt a ka tih tawh chuan eng eng emaw palh a awm thei a chuvangin a theih hram chuan inrawn tawn hi a tha ve ka ti.










" I pasal hi han duat viau phawt mai la, kan ngaihtuah tha ang chu.." tih suk paha kekawr bul nen chauh a min rawn pan phei chuan ka lo nui ve hak a. Kum 23 ka nia ani 25 duh ai chuan kan la naupang deuh viau na in rilru hian kum mai mai te chu alo ngaipawimawh hran miah lo.










" Hey....a vawt ania...." ka dar a rawn chelh rual chuan ka lo ti vut a. Thlasik lai ani tawh bawk nen vawt lo chu ani lul lo, a kut lah chu tui khawih zo hlim tih takah a vawt var var khawp mai.











" Tih lum dan ka hria lawm..." tih sup pah chuan min pawm nawlh a. Ka lo khek raih chu a pen tur chawl datin min nuih hak bawk. Kan pahnih ah kan hlim tawk a, tumaha dang ngai lo in hmangaihna lipui an tih ngei mai ah chuan kan cheng dun leh va vang vang a.










" A lum tawh em...?" Ngei zet in a hmel chu ka melh a. Min lo melh run zui. A awm ruak kangah chuan beng dawt in ani alo nui suk a. Mi kan thlan hluam a, alum tawh em tih kher pawh ngai lo....Chimawm lutuk!








"Tution chu...." ka tih leh nang nang chu nui suk hian min rawn fawp zauh a. Chawm hlawm nih ringawt ai ah a theih ang ang in inchhungkhur hna ngaihthah silo a sum thawh chhuah ve ka duh ani. Kan mamawh viau e ka tihna lam nilo in nakinah engnge kan tawn dawn kan hre lo silo a.









" Awle, mikhual room khu naktukah tifai ila tah khuan class i la mai anga, ka nu te pawh naktuk ah kan be dawn nia" a tih ve tak sup ah chuan ka lo nui var var a. Lawmthu sawi nan kan han in dut leh hlak kha....










Hun pawh dam tlan chuan a lo liam ve zung zung mai, U Davida te chhung pawh an awmna missionary field lamah an kal leh tawh a. Keipawh tluang takin tuition ka pe ve ta bawk. A tir kha chuan ka nu khan hnathawh hran angai lo ati nang in nuam ka tih zawng anih ve miau vang leh ka chak zawng tak anih vangin fate na na na chu min hnial zui ta bik lo. Ka thlakhat hlawh pawh naupang 20 dawn an nih ve a, private zirtirtu thenkhat ai chuan ka la lut tam ve zawk mai thei ani. Ka hlawh te ka nu leh pa ka pe thlap thlap a, anni erawh in khawl zawk turin min ti nangin chhungkaw lu ten pawisa an kawl hi mawi ka ti ve tlat ani.







Thla hnih dawn lai kan inneih ve ta reng mai, Christmas pawh kan hmang ho vek a, U Davida te erawh an awmna field lamin an ui beh ve tlat avangin khu lamah an hmang thung.Kum thar erawh an rawn hmang chho a, keini erawh Lawngtlai lamah kan phei ve thung.










"Bawihte.."





"Umm.."







"Bawihte..."








"Aww.." naupang ho zirtur en sak lai lai in khum atang chuan min lo ko ve chhen a. Eng a hria chu ni maw.









" Malsawma bawihte...." ka thil ziah lai chawl hmak chuan rum zet in ka va en a. Min ti buai lo hian a awm thei thlawt lo emaw tih tur ang vel ani.









" Ka ngai tawh che lawm....." alo ti bui bui chu naupang a ang leh tawh. Min duat a min thlahlel bawk, a kiang aia tun hunah kher hi chuan hlimna hi ka hmuh tawh pawh ka ring lo kan khawvel ah hi chuan.










" Ka bul lawkah i awm reng kha.... bakah hna ka la thawk kan zo ve lawk ange..." han hauh tum deuh mahila a mitmeng avang chuan aw ka vin ka hmang thei hauh lo. A inthlahrun ve hmel tho sia.











" Mahse ka dek thei lo che lawm..." buaithlak thin. Midang bula kan awm in a patling em em a, a fel in engah mah sawiselna ka nei ngai lo, mahse tun hnai deuh hian kan pahnih chauh a kan awm ve hi chuan ka fapa ni awm ang vel hian a awm thiam leh lawi a, mahse ka ning chuang hauh lo han hau ve bawrh bawrh mahila a pangchang lo ang tih hi ka hlau tho zel, min thlahlel miah lo a a awm te chuan ngaih a tha lo zawk daih dawn asin.











" Umm...ka zo tep " tih sap pah chuan ka chawk leh mawlh mawlh a. Ka mit sir erawh in khum atanga rawn tho chhuak paha min rawn en chu ka hmu ru reng mahse ka melh duh lo lui ve ngat..











" Ka dek duh che...." ka bula rawn din paha a tih sup chuan thaw hawk hian ka melh chho a, tun hnai hi apangchang zual ka ti dawn nge ei duh loh angah si, a mood a inthlak deuh reng bawk nen a dam lo emaw ni hial ni.










" I dam tiraw? Khawi maw i pang " ka tih vut chuan a rawn kun hniam ve mai a, apang chu alum ve detin ka hria. Thla ala sik deuh ruih bawk nen engpawh nise tiin damdawi ka va laksak vat a, ka thutna ah chuan lo thu in ka va let lai chuan ngun zetin min lo melh kiau a.










"Kha le, ka zo tep tak tak solve tur pahnih chiah ka nei tawh " tih pah a tui leh damdawi ka pek chu tha deuh chuan lo ban in a ei ve mai a. No min rawn pek leh chuan dawhkan ah ka dah leh te te a. Chumi hnu ka ding mar leh chu ka kawngah a rawn kuah deuh teh thlawp a, ka pum ah hmai a phum vang vang bawk, a thaw lum ham ham pawh chu ka feel thei hial. A samah chuan tuai in alu ah ka chul sak a.











" Le kan ti zo lawk ange 5mins aw, khumah lo va mu lum la, ka lo phei vat ang " ka tih chuan a che lawk lo a. A hnu deuh ah ka pum a a hmai phum chu rawn hawi chhuak in a mal chungah min pawt thu nghal vut a, ka kawngah a kut rawn rawlh nghal in min kuah ta hlu hlu a, ka hnung ah a bei deuh hlan bawk.










" Ti khan ti mai rawh, zo thuai thuai la aw" a rawn tih leh sup chuan hnial duh tawh lo in ka chawh zawm leh nghal malh malh a. Ka tum em vang nge ka zo rang khawp mai.








" Kan mu thei ta..." ka tih sup chuan min kuahna chu min thlah ve thuai a, khum lam pan chuan min phei pui nghal dat dat bawk.









" Tinge hetia i awm thin le aw..." min kuah hlu hlu tu samah chuan chul in ka ti sap sap a. A thaw hle hle a, a awm anawm hmel ve ta deuh bawk chuan ka hria.










" Ka lu hai deuh mai mai mawle " a ti leh sup ringawt. Rei lo te ah kan muhil ve ta mai a. Ngaihtuah loh loh ka ngaihtuah kual leh nasa. Google lamah a natna lo neih tawh mil in a chhan vel ka en kual ngial a mahse chutiang lam an sawi vak pawh ka hmu chuang lo.








A tuk zingah chuan a dam leh var tawh. A pang ka deh sak pawh chuan a lum hran tawh lo a , thawk pawh a nuam ve leh ta deuh e. Eng em kan ti lo turah ka ngai.










Chaw ei lai chuan artui kan a hma mi chu a sawn nawlh a, ka lo chik ngai vak lo nge thil bai leh hang lam hlir chu a ei zel a, a vawikhatna nge tih pawh ka hre chiah lo.









" Tinge a, sangha kan te hi i va ei lo ve ka lo suah ang che aw..." tihpaha suah a a thlenga ka va dah chuan a lo uar nghal zuau a. A ti lui chu nise ka ngei viau ang mahse a mittui a tling pam mai. Pek chi pawh ni nghal loh ka la sawn nghal vat a.











"Eng nga tinge i duh hle emaw tih a?" ka nu in alo tih vat chuan inthiam loh hmel apu deuh.









" Tunlai chu ka chak vak lo a?" alo ti mai a. Mahse nizan a khawsik te nen ngaih thah mai chi ah ka hre ta lo, damdawiin kal chu ka rawt ta tawp a. Min hnial viau nangin nizan lama a khawisk ka sawi takah chuan ka nu leh pa pawh an lo in rawlh ve vat. Natna in a tuam tawh taksa nei tu kha ani miau a, fimkhurh loh a har ani, khatiang thil kha kan tawng leh lo ang tih pawh.....Mahse Lalpa khawngaihin min tanpui teh tiin ka au leh ta tawp a.










Chaw ei kham chuan kan pahnih in damdawiin lam pan chuan kan chhuak ta nghal. A hna lam pawh chawlh ava la tawp a, a tan ani tlat a, duh lo viau mahse tur ve angai.









" Engpawh tawk ila ka hmangaih reng ang che" a rawn tih sup chuan ka melh vat a. Kha tawngkam kha ka duh hauh lo. Thil tha lo thleng tur ang mai kha.









" Chutianh te chu chiang sa, i tha leh vat dawn alawm " tih sap pah chuan ka melh chho a. Kun hniam in thawk alak leh te te hnu chuan ka bek ah chuan a rawn fawp vang vang a. Thil tha lo thleng tur ang maia ka lungphu danglam hi ka ngaithla duh lo......








Doctor nghak a kan thut lai te chuan ka kut chu a hum run reng a, kalsan hlau ang mai ani. Khawi ah mah ka kalsan hauh lo ang.









Nurse in kan hming a rawn lam chuan kan lut vat a. Doctor nutling lam kum 50 bawr vel hian thutna tur min lo kawh hmuh thuai a. Kan kal chhan te ka han sawi mawlh mawlh chuan ngun zet hian alo ngaithla a, Mala pawh thil a zawt ve zauh zauh bawk.










" Kum engzat nge i nih?" tia min rawn en chuan " 24 ka hmang chho dawn chiah " ka tih chuan a nui vur vur a. Mi hlauhthawn ruk nak laia a nui hmel chu ka run kher mai.










" Tan va zung lawk ta che..." tih paha test kit min rawn pek chuan mak ti zet hian kan melh dun a. A in entir lo zawk min lo enkawl tlat a tum chu mak ka ti.









" Doctor keimah nilo in ka psal hi nia dam lo chu.." ka tih pawh chuan min tir lui ta tho a, ka duh lo tih tun reng chi lah ni hek lo, lungsi zan lo chuan ka zun chu ka va test ve ta mai a.








Bathroom atanga ka chhuah chuan min lo melh dun ha mai. Test kit ka pek chuan alo ban vat a. A dam lo zawk pawh buaipui lo a keimah hlir min buaipui chu ka ngei lek lek zawk.









" Awle....Daddy leh Mama in ni tawh dawn tihna ava ang ve " a rawn tih chuan phawk zet hian kan in melh nghal vut a. Chutah rawn sawi zawm leh in " I pasal zawk hian nu hah anei anih dawn hi, ka lawmpui a che u " a tih chuan sawi mai tur pawh kan hre lo.











" Doctor i sawi awmzia chu keini hian naute kan nei dawn maw?" Mala zawk in a rawn tih sup chuan doctor chu alo bu nghat a. " Khai le! " tih vut pah chuan min rawn kuah nghal thlawp a. Mittui tling pamin ka lo kuah let ve bawk. Kan ta tur bik liau liau naute kan nei ve tawh dawn.....ni e, Malsawmdawngkima leh Lawmsangkimi te fa tur.....











" Ka lawm e, ka lawm lutuk e " a ti mawlh mawlh a, damdawiin kan chhuahsan hnu lawk chuan kan chhungte a phone kual nghal mawlh mawlh a, a phur lutuk ka hmuh chuan ka hlimna a belh chhah hial ani.









" Ka lawm e aw, Lalpa.....Bawihte Ka hmangaih che naute pawh " tihpah chuan ka kut chu a hum vang vang a. A hmui chuan a nawr leh nghal zat bawk.









" Keipawn ka hmangaih che, min rawn zawngin intawng leh lo ila chuan hetiang hun hi kan thleng kher lo ang, engkim hi nang leh Pathian vang chauh ani, Dear Daddy keini pawn ka hmangaih che " Ka hmui ah chuan a rawn fawp nghal zat a. A vawikhat nan ni e a vawikhat nan tak meuh meuh a hlim lutuk vanga Malsawma mit atanga mittui luang chhuak chu ka hmuh vawikhatna ani.










* Siamtu, atana min siam avang hian ka lawm e aw * ♡










• A Tawp ta mai •




Comment lamah kan inhmuh theuh ka beisei....a tawpna te ani ta ang reng sia, inzavai chungah ka lawm nawn leh em em e💙

Request rawn siam ula a tam ber character in duh angin story thar kan ziak ang🤗 Zam reng reng suh u rawn sawi mawlh mawlh ang che u😂

Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)