☆OKHEE☆ By Dingdi Pachuau (Completed)

Episode nei ho a hlawm a dahkhawmna
Dingdi Pachuau
Posts: 493
Joined: March 15th, 2018, 11:55 am

Re: ☆OKHEE☆ 1- 35 By Dingdi Pachuau

Unread post by Dingdi Pachuau » September 12th, 2021, 6:24 pm

☆OKHEE☆ - 35 By Dingdi Pachuau


A tûk zîngah chuan Siamtei leh Sêna chhâng chiah Mawipuii chu nau awm tùrin an rawn lang nghâl vat a, a pain pawm thei tho mah se pawm châka rawn kal ve na nâ nâ chu a lo pawmtîr ve mai a, rawng ka bâwl chu min rawn pui nghâl vat a.

"Siamte, Mawipui, chaw ei ve nghâl r'u aw, nizàn lama sa kan ei bãng pawh kha a la tam viau si a," ka tih chuan Hminga chuan," Ei ve nghâl ang, chaw pawh kan chhum kêp che u a nia," a lo ti ve sup a, Mawipuii chuan," Pute, naute hian a ang che e tiraw? Mahse, Pitei ngo lamah a chhùn a, a hmel țha reuh bawk sia, a piang thiam ngawt mai," Daxton-a biang khawihsak pah chuan a ti a, Hminga chu ka melh nghâl ralh a, a nui suk chu ka hmu ru reng.

Chaw kan ei a, chaw ei kham hma deuh takah naute chu ka bual a, Siamtei'n a paw nghâl a, Hminga'n motor a sil a, thuamhnaw sûk ngai a la awm mang loh avàng chuan chhùn lama thingpui hmeh tùr chhang ka buaipui zui ta nghâl bawk a.

Țhenawm hnaite an rawn lêng lût ve țak țak a, thingpui hâng ka lo thlit ve thuai thuai hlawm a. Naute muhìl chu," Khawi maw, lo en ang hmiang," tiin Siamtei puak lai chu an en dan dan hlawm a, a nu ka awm ve reng vàng nge ni phei chu ka hre lo," A va han duhawm reuh ve! A hmel țha reuh hle mai, nu leh pa chhe lo na nâ nâ chu," an ti ve sap sap a, fak derna a ni emaw ni lo emaw a nuam ve hrim hrim, fakna ri hi chu ngaihthlâk hi a nuam riau a.

Ka nuin min rawn bia a, naute hmuh an duh vàng a lo ni a; mahse, a muhìl daih si a, a harh huna ka biak tùr thu ka hrilh chuan ka pa chuan," Ka ngai asin le aw, ka hmuh châk tawh nèn," a ti bal bal a, ka nui hak ringawt a. An tu hmuh chhun a la ni a, an ngai ang tih chu ka hre reng mai.

Chhûngte pawh an rawn lêng khâwm leh a, a țhenin chawhmeh min rawn pe a, a lawmawm tak tak a ni, a bîk takin U Mami baibîng rêp min pêk chuan min tilãwm zual, zanina hmeh atân siam nghâl teh ang.

"Inbual la, i hman lai hian?" Hminga'n a tih chuan," Nang?" ka lo ti vat a, ani chuan,"I inbual zawhah a ni mai," a ti a," Lût rual ila ni mai alawm," ka lo ti awlsam leh mai a.

"Kan rei palh ang!"

Ka va en lai chuan meng zîm deuh san chung hian min lo en a," I ngaihtuah ril lutuk a nih kha," nui chung hian ka ti a, ani lah chuan," Ril lo thei nâng, inbual rual i sawi kher a," a lo ti ve thung a.

Aizawl ai khân nuam ka ti mah zâwk em aw ka ti hial mai. A chhan chu inlêng kan nei ve neuh neuh reng a, chhûngte'n min tlawh reng bawk a, hei tak hi nuam ka ti a ni. Țhenrual ngaina tih takah, ka tân chuan a nuam êm asin, Daxton-a lah an làwmin ka chang ve hman mang lo va, ka duh duh ka ti thei a, Krismas nia kan inkhâwm phei chu," E, in lo hmang phei a ni maw?" tiin min chibaitu kan tawng nawlh nawlh mai a, naute lah chu," A va hmel țha reuh êm êm ve!" an ti vek bawk si a, Aizawlah khân hmang ni ta ila hetiang hi ka tawng pha teuh lo mai! Miin min lo hre ve chu nuam ka ti a, ngaih pawimawh ve nihna hmun leh min hretu an awm tamna hmun hi a lo nuam ber a nih hi ka ti rilru vawng vawng mai a ni.

A tûkah ruai chu kan țheh ve a, thingtlânga Krismas ka hman vawi khatna a nih avàng chuan țheh ve rêng rêng ka duh a, ka pate nèn kan chhuak ve a; mahse, kan haw hma viau thung. Zaikhâwm lam erawh kan thei lo a ni, ka pa pawh a tel lo," Ka zai thei chuang lo va, zai theih loh chuan a ho tlat," a ti a, nula chu la ni ila chuan ka zaikhâwm ve chhin châk reng tho mai.

Sêna leh a țhiante an rawn kal a; mahse, zaikhâwmnaah an kal dâwn avàngin an chhuak leh thuai a, anni pathum nèna Chite luia kan inhmuh laite kha ka ngaihtuah chhuak a, hmãnni lawk mai kha a ni a, khatih lai khân anni pawh râwlthar chhuak deuh hlawt kha an ni a, tunah chuan an lo tlangvâl ve tak tak tawh si a, kum kal chakzia chu ka ngaihtuah rauh rauh a. Naute hlim țê ri-ah chuan ka ngaihtuahna ațang chuan ka harh chhuak a, ka pate țhutna lam chu ka hawiin ka pan ta vat a.

Khua a vâwt a, ka pa chu ka ngaihtuah viau a; mahse, ka han zawh châng chuan ani chuan," Vâwt ka ti lo, kawrlum leh mawza lum ka nei a, mutna lum nèn, rizai lah a lum nuam si," a lo ti thung a, Hminga chuan," A vâwt a ti lo ang, i ngaihtuah lutuk a nih kha," a lo ti a.

Mutnaah chuan," AC hi la ngaihtuah ila a țha ang, khua a la lum chho leh ang a, ka pa a ngaihtuahawm tlat," ka ti a, ani chuan," I ngaihtuah lutuk ka tih tawh kha, kan tuar țhang a, kan taksa a chhel tawh alawm," a lo ti a, kei chuan," Nang chuan i tuar thei mai ang a, ka pa chu a kum a tam ve tawh a, a taksa pawh nang angin a chak tâwk tawh lo a, a ngaihtuah loh theih loh alawm," ka lo ti thung a.

"Nupui fel tak hi chu aw..." tiin min rawn fâwp zoh a, kei chuan,"Ka fel tak tak em?" ka lo ti vat a," Fel e, ka pa tân fanu fel tak niin ka chhûngte tân mo sawisèlbo i ni a, ka tân lah nupui fel leh hmel țha, fapa hmel țha min hrinsaktu i ni bawk a, ka lãwm hlê a ni," a ti deuh duah a.

Daxton-a pian ațanga a vawi khatna atân nupa nun kan chèn leh ta a, kan duhthawh dùn viau a ni. Min nghâk rei a, a fîmkhur êm avàng leh min ngaihtuah êm avàngin min mamawhnaah pawh a insûm hrâm hrâm țhin a, zanin erawh a insûm thei tawh bîk lo, kei lahin insawisèlna ka nei tawh lo bawk a, min mamawhna chu phûr takin ka lo chhâng lêt ve a ni.

31 zànah kan inah chuan Kumhlui thlahho an rêl a, phûr takin ka lo sawipui ve a, zàna ei tùr an lei nân pawisa pawh ka pe ve hlawm a, an lãwm thiam kher asin. An hlim hmel chuan làwmna min siam a, ka hlim ru veng veng mai.

Kum thar ni chuan ka pa leh Hminga chu kum thar thilpêk ka pe ve ve a, an lãwm thiam viau mai. Hminga chuan," Engtik laiin nge i lo lei hman a?"a ti a, kei chuan," I hriat loh lai tak khân maw le," nui chung hian ka lo ti a, min melh vang vang chung hnuah chuan," Eng mah ka pe ve si lo che a," a ti zawi deuh ta raih a.

"Fapa hmel țha tak min pe alawm," tiin ka pan hnai a, a hnung chu chùlsakin," Hei tluka thilpêk hlu hi ka la dawng ngai lo, chhûngkua min pe a, ka hmangaih êm êm che u a ni," ka ti sap sap a, rawn kûn hniamin min rawn fâwp vang vang a.

******

Kan nun hi hetiang reng hi ni thei se ka ti. Pasal țha tak neiin fapa hmel țha tak ka nei a, min hmangaihtu chhûngte ka neiin chhûngkua kan hlim a, kei aia vànnei hi an awm tawh kherin ka ring lo hial a ni.

Aizawla kan pheina pawh thla hnih zet a ni leh tawh a, Hminga pawh a buai leh tawh khawp mai. Kan nufa tân erawh hun a insiam thâwl ve hrâm hrâm țhìn a, ka theih ang china puih ka hreh loh tehlul nèn, thil dang han ti tùrin Daxton-a a la te deuh mah mah a ni, bâkah, Hminga'n a remti lo bur mai. Ni tin deuhthaw ka nu leh pate rawn kalin min rawn tlawh țhin a, chhawnchhaih nuam rual a ni ve tawh bawk nèn, hlim nui riin kan in chhûng chu a khat țhin.

Mahse, hringnunah hian hlimna hian thla a zâr reng bîk lo va, hlimna bulah hian lungngaihna a lo bawk ve reng țhìn a lo ni. Kan hlim êm êm lai chuan ka pa dam țhat loh thu kan han hria a, 'ngaihtuah a ngai vak lo' chu an rawn ti tak nain rilruin a ngaihtuah lo thei lo. Hminga chuan Aizawl lam rawn panpui tùrin U Mamite chu a hrilh a; mahse, ka pain a zuam tlat lo, motor-a chuan chu a zuam lo a ni. A pum chu nâ a ti ber a, amah pawhin chêt sawn harsa a ti a, chuvàng tak chuan motor-a phurh chu a ngam lo a ni. Nachháwknain an chiu tawp mai a, amah berin motor-a chuan a zuam loh tlat avàngin tihngaihna a vâng viau.

Ka pa chanchin min rawn hrilh ațanga ni hnihna Zirtàwpni chawhnu dâr 1-ah chuan Ralvawng lam panin kan tlãn phei ta chûk chûk a, Hminga pawh a hmanhmawh bawk a ni, kan tlân chak viau mai a, kan phei rum rum chhan pawh U Mami'n,"Ka pain a lam a lam che u a, lo phei mai teh u, a chau sâwt riau mai a, ka hlauthãwng tlat," a rawn tih vàng a ni. Hminga rilru tùr àwm chu ka ngaihtuah a, hrehawm ka ti tak zet, hnem vak ngaihna ka hre si lo," Eng êm a lo ti lo ang chu," tiin ka hnèm ve a; mahse, kei ngei pawh chuan kan thlen hmain min lo peih lohsan ang tih ka hlau ru viau si, min lam min lam phei chuan min ngai hle tihna a ni dâwn a, lo la chau viau lo se, a theih ang angin Aizawl lama inphurh phei dàn ngaihtuah thei zâwk ila...

Kan va thlen phei chuan kan inah chuan inlêng an lo awm țeuh tawh a, min lo peih lohsan ta mai em ni tih chu ka ngaihtuahnaah a awm hmasa ber a, ka hlauthãwng kher mai; mahse, U Mami hmel ka hmuh tâkah chuan a lo la kal êm bîk lo tih chu ka hre leh thei mai a.

Ka pa chu a khumah lo muin a lo muhìl a ni ngei ang, a maimichhîng a, in chhûngah chuan țawng ri a awm mang lo va, a bulah chuan kan țhu nghâl a, a kut chu kan vawnsak a.

"Ka pa, Lawmite pawh an lo thleng tawh a nia, hmuh châka i lam i lam țhin kha, hei Hruaitea pawh a lo thleng tawh, han meng tawh la?" U Mami'n a tih chuan a lo muhìl lo a ni chêk ang chu, vài riai hian a rawn meng lap lap a, a chàu tih a mitmeng ațang pawh chuan a hriat ngawih ngawih. A kut chu a hma aia nghet chuan ka vawnsak a, a pum nâ chu a lo na viau a ni ang, a hmêl pawh a tla dâk mai a, a mit khur pawh a thûk viau hman mai, mittui pawnláng tih takah ka pa hmel chuan ka mittui chu a titling leh piau tawh a.

Zawi tê, hriat theih chang chang hian,"Ka lo nghâk fan fan che u a, Lawmi, ka fanu, ka lâwm e, Bawiha hi lo hmangaih tlat reng rawh aw," tiin a chàwl deuh vang vang a, ka mittui chu a far koh a,"Ka pa, tuar fan fan rawh aw, min kalsan tum miah suh," ka ti sap a, U Mami chuan ka dàr rawn dawmin, ani pawh chu a insûm nasa viau a ni ngei ang, a hmui chu a hup tlat a.

"Bawiha, i nu kha ngaidam hrâm rawh aw, i thinlunga khâkna kha paih bo daih ang che, kei pawhin ka ngaidam vek a nia," a rawn ti leh sep sep a, a țawng chu a zàwi khawp mai a, a bul chêta țhute bâkin kan hre thei lo ang tih tùr khawpa zàwi a ni. A sawi zo deuh chiah tihah chuan a thâwk dàn chu a rawn dik lo chho țan a, a âwm a rawn sêp a, kan buai chho lat mai, a kut chu min peih lohsan hlau tak chuan ka chelh tlat a; mahse, mihringte dan rual loh thihna kut vâwt chuan ka pa chu a rawn man ta, ţapin au rawng rawng mah ila a nunna kan chelh thei lo, in chhûng chu lungngaia țahna riin a khat zui ta nghâl a.

Engkim mai chu mumang ang ruai ni maiin ka hria. Hmeichhia ka ni a, ka țap rawng rawng mai, Hminga erawh a ngawi reng a, a rilru nat dàn tùr leh hrehawm a tih dàn tùr chu ka ngaihtuah thiam phâk lo zâwkin ka ring, amah hringtupa ngei mai chu a enkawl hman lohin thihna nunrâwng zet chuan a nunna a lâksak ta si a, ka pain hrehawm leh na ti taka a pum nâ a lo tuar chu ka khawngaih a, a pa na tuar enkawl hman miah lova thlah liamtu ka pasal Hminga hi ka khawngaih tak zet bawk, engtiang taka nain nge hrehawm a tih ang le?

Hminga leh ka pa chu kalsan hreh viau mah ila Daxton-a ngaihtuah a ngai bawk si, ka tlaivâr ve ta lo a ni. Tlaivár lo ti ila mut hmunah ka meng tlaivâr tho, ka mittui a tla reng mai a, ka pa kal thut chuan inrinna hun min pe tlêm lutuk a, hriat thiam a har ka ti. Text message-in kan chanchin chu kan țhiante ka hrilh kual zung zung a, biak chu ka ngam chiah lo, a tlai tawh ropui si a.

Mang țha lo mang ang mai niin ka inhria, ni dang ang lo takin Daxton-a lah chu zîng a thawh a țangin a'n dik lo nghâl a, a tlei țha duh miah lo, chu chuan rilru a ti-ipik zual a, Hminga bula awm pawh duh viau mah ila, mi zînga awm ve a inthlahrunawm lutuk.

Julian-a, Ațana leh Sawmkima hmel kan han hmu a, ka nu leh pa leh Hminga thawhpuite kan han hmu tel bawk a, an tilàwmawm ka ti a, an buai àwm tehlul hlawm nèn, kan inhmuh khâwm dàn erawh chuan lung a tiáwi lo viau thung.

Sêna pawhin a pu thi chu a tuar khawp mai a, mipa mah ni se a pu ruang bulah chuan țhuin a țap reng mai a, a țhiante pahnih pawhin an kalsan lo. A demawm lêm lo, a pu chu a awmpui nasain an pahnih chuan an inhrawn ve nasa êm mai a, an inawmpui nasatzia ngaihtuah chuan a tupa pawh ni lova a fapa naupang zâwk ni àwm tak a ni.

Mi dang chu mi dang lo ni ta se, Hminga ber chu a ni ka ngaihtuah ni. A rilru a phîr ngawt ang, Aizawla phei leh ngei chu kan ngaiin ka ring a, heta a pa hmun ruak han kalsana han awm bo daih pawh chu àwm lo a ti viau ang a, lehlamah lah hnain a lo hmuak kuh țul bawk ang a, a rilru a hahin a hrehawm ngawt ang chu, a pa a neih chhunin na tak tuarin a kalsan a ni a, a tuar na dâwn bawk si.

Hrehawm ka ti ve tak zet a ni. Ka pa chu a kal tawh a, ngaihtuah zui a ngai tawh lo; mahse, a kalsan tâk a fapa ber hi a ni, țawng tlèm tawh nâklaiin, a pa boral chuan a țawng tlèmtîr zual a, tuar lo ang deuhin lang mah se ka chîk cheuh cheuh hian a thinlung a hrehawmin a tuar na tak zet tih ka hre reng mai si a, hnem ka duh; mahse, engtin nge ka hnem chuan ang?

Aizawlah kan phei leh lo thei si lo va, kan phei leh ta nge nge a. Kan fapa Daxton-a'n a nun nguina a chhâwk êm zâwk a, chau hnêpa nilénga hna a thawh pawhin a fapa hi chu a lawm loh phah lo, a pawm a, a kuah a, duat takin a pawm hlù hlú a," I pu chu i hre hman ve ta si lo, a duh tehlul che nèn," a ti sup sup a, a chângin," I hming hi i pu phuah a ni asin," a ti leh bawk a. A ni rêng bawk a, ka pa khân,"Vanlalhruaia tih ni rawh se, Pathian hi Lei leh vàn lal a ni a, min hruaina hi a ropui êm asin, tûn dinhmun kan thlen theih chhan pawh hi Ami hruaina vàng chauh a ni," tiin, 'Vanlalhruaia' tiin a hming kan sa ta a nih kha.

"I pi erawh ka ngaidam thei lo ang, khati khawpa i pu tihrehawma keini thleng pawha hrehawma min kalsantu i pi kha chu ka ngaidam lo ang. Ka fapa, i pu min enkawl chhoh ang khân a țha thei ang berin ka enkawl chho ve ang che, ka hmangaih che a; mahse, ka thinlunga khâkna, i pi huatna awm hi chu a reh mai mai thei lo ang, chu chu rawn nei ve lul suh aw," tiin a be sup sup reng a, ka lo ngaithla ru reng tih pawh a hre kher lo ang.

A nu chu a lo la haw reng a nih chiah hi. A pa boral a tuar bawk nèn, chu chuan nunhlui ngaihtuah léttîrin a nu a huatna dai tawh nia a ngaih kha a zu chhêm alh țha leh a ni ngei ang, a thinlunga khâkna hi a pa khân a lo hmuh hmaih lo nasa a lo nih chiah hi.


*A CHÂNG CHUAN HRINGNUN HIAN KAN NGAIHTUAH NGAI LOH LEH SUANGTUAH PHÂK LOH RAM MIN DAITÎRIN DUH TÂWKA MIN NGHAISAIN BEIDAWNNA KHURAH MIN LÈN LÛT FO ȚHIN*



Link:
BBcode:
HTML:
Hide post links
Show post links

Dingdi Pachuau
Posts: 493
Joined: March 15th, 2018, 11:55 am

Unread post by Dingdi Pachuau » September 12th, 2021, 6:25 pm

☆OKHEE☆ - 37 By Dingdi Pachuau

A rawn lêt chuan kan pathuma inkim tùr ei tùr pack chu dawhkàna rawn dah pahin," Ka duh aiin ka rei a, i ril a lo țâm tawh em?"a rawn ti nghâl a, rinhlelhna mitmenga en ka duh loh avàng chuan Latei melh pah chuan," Țâm lo ve; mahse, tu emaw hi chu a țâm tawh maithei a ni," ka ti a, Latei chu a rawn hawi chhuak ve vat a, nui chung hian," Țâm lo, ka lo chhiar tui mah mah lehnghâl a, rilțàm lam rêng rêng ka lo ngaihtuah lo," a lo ti ve a.

A chhuah lawk chhan kha a sawi lo va, ka zâwt bîk lo. Thil kan ei lai chuan Daxton-a a rawn harh a, a pain a va la vat a, a pawm nghâl hlù hlú a, Latei chuan," He naute han fel êm êmzia hi chu, a țap khât si, ka awm hmasak zâwk kha chu a fel ve tho nain a mut thawh hian a țap ziah a," a ti barh barh a, kei chuan," Nia, kan fapa mah ni se a fel hi kan ti ve a nia," ka lo ti ve a, a hnu deuhah a pa chuan min rawn pein hnute ka pe nghâl a. Tunah hian thla kaw hmel a hmu ve ta a, hnute tui ka ngah ve bawk a, khamkhawp a hmuh vàng ni hmiang ka ti mai, a rit ve nulh tawh a, ama tâwkah a chak ve viau bawk a, a chum fahran lo nain a duhawm kan ti ve hle a ni. A chum lo hi ka nu chuan," A țha zâwk, hah lovin ka paw ve thei a," a ti hlauh a, ka pa pawhin," A chum lutuk chuan i hah phah dâwn asin, a chum loh poh leh i zo ting tihna a ni mai," a ti ve bawk a, a hrisêl lo hran lo bawk a, kan lãwm tâwk viau mai.

Ka rilru kamtu pakhat chu awm lo se chuan hlim takin hun ka hmang leh ngei ang, Hminga'n Daxton-a a chhaih a, Latei nèn an nuihpui hawk hawk reng a, kei pawh ka lo nui ka lo nui ve tak nain rilru chhûngrilah 'eng emaw' a awm deuh tlat mai a, rilru zawng zawngin ka nui thei lo a ni; mahse, eng mah a sawi chhuak lo va, ka zâwt lo ang, ka hmu dùn tih pawh a hre tawp nâng.

Mahse, han ngaihțhat loh chhunzawm zêl tùrin ni dangah chuan a chhuak ta miah lo, hmeichhe chhiat loh hmel zetin a bân a vawnsak vàng mai khân kei pawh hian ka lo ringhlel mai mai a ni ngei ang, tu emaw a hmel hriat hnai tak a nih loh chuan tu emaw ka hriat ve loh , amah hretu ni si a ni ang, eng mah pawh a sawi miah loh hi. A rûk tak chuan hetiang kawnga ka pasal ka lo ringhlel ru kha ka inthiam lo hnuhnawh viau mai. Min hmangaihin min duh ve ngawih ngawih a ni tih ka hre reng si a.

Ațanate pawhin naute an nei thar leh tawh a, lo inkàwm nasain lo inzui kual nasa ve țhin mah ila nupui pasal neih tawh hnu hi chuan inkawm chu sawi loh, inbiak takngial pawh hi a lo har tawh chu a nih àwm hi. Duh duhnaah a kal theih tawh si loh a, an naute kâr hnih tling tawh ensak erawh kan tih tùr ngawih ngawih a ni thung.

Kan àwl ve ber ni Sunday chawhnu lamah kan chhuak a, Julian-ate nèn kan intiamrual a, anni pawhin an lo la en bîk lo. An inah chuan Ațana chhûngte pawh an lo awm ve nual a, a nupui Lizzie țhiante pawhin an lo ensak ve ngei a lo ni, kan intâwk khâwm hlawm a nih ber chu.

Naute chu mipa a ni a, a ngo reuh khawp mai a, Ațana chhùn tho siin Lizzie pawh a chhùn tel tho reuh a, an siam thiam khawp mai. Kan en lai tak chuan a lo meng kar reuh a, a biangsum a lang kêlh kêlh lehnghâl a, a duhawm reuh lutuk ringawt. Lizzie pawh a țha viau mai a; mahse, a chhûngte'n chêt an lo la phal loh thu chu a sawi niap niap a, Hlimhlimi nèn chuan," E, che lova an àwl theih phawt che chuan a țha alawm, chêt tam rih loh hi a him ber," kan ti ve a, ani pawh chuan," Nia, min àwl hneh khawp mai, naute zàn a mut țhat loh pawh hian pa ber pawh hi phunnawi hauh lovin a tho zak zak mai a ni," tiin a nui var var a.

Kan awm chhûng zawng chuan Hminga chu a țawng tam lo khawp mai, Daxton-a a pawm char char a ni deuh tawp; mahse, Julian-a leh Ațana an bengvâr a, an bia an be zâwk a, țawng tlèm tawh nâklaia hriat ngai lêm lohte bula awm chu ani, patling tawh tân pawh han titi chiam chu a har ve khawp ang tih chu ka hre reng a, ka țawng kêp a ni mai ang chu, kan titi lah chu fa neih chungchâng lam a lo ni bawk nèn, mipa tân zawng sawi tùr a vâng deuh a ni ang e.

Haw tùra kan chhuah chuan in lam pan nghâl mai lovin 'Hman ve hun' tiin kan tlãn kual a, chhûngkua hian khawpui chhûng fang hian kan tlãn kual khât êm asin.

"Nuam i ti lo riauin ka hria," ka tih chuan," Engah ngawt maw?" a lo ti sup a, kei chuan," I țawng lo êm a," ka ti teh ngawt a, ani lah chuan," Nang i țawng tho alawm, nang i awm hi chuan lo țawng ve chiam kha țûl ka ti lêm lo va," a lo ti leh mai a.

"Ka țawng theih hmel e..."

A nui hawk a, min rawn en a, kawng lam en leh nghâlin," Chutiangin ka sawi lo, i țawng duh a, in titi lah kha mipa lo inrawlh vena chi ni hran lo chuan," a ti leh a, dik chu ka ti viau mai, a han sawi hi chuan a dik leh thluam țhin.

"Naute kha a duhawm reuh tiraw? A biangsum te reuh kha?"" ka ti leh a, ani chuan," Um... duhawm reuh; mahse, Bawihtea ka duh zâwk," tiin min chhâng deuh kher a, ka va en lai chuan a nui deuh suk suk a, ka mal chunga Daxton-a țhu chu a rawn en leh a.

"Kan neih leh hunah chuan nangmah ang tak, hmeichhia ngei aw ni ang?" a rawn tih leh chuan ka nui ve hak ta thung a," Teh ngawt chuan a... Nia; mahse, kan thu lo ve êm mai
a, a lo piang apiang hi lãwm taka kan lo pawm thiam mai a ngai a," ka ti a, ani chuan," Tih dàn ka hria alawm, kan neih tùr chu hmeichhia niin nangmah ang tak a ni tawh ang," mahni inrintâwk hmel zet hian a lo ti leh a. Daxton-a beng hup pah chuan," Apa thu sawi i lo hre ve palh ang," ka ti a, ani lah chuan hre thiam ve ni ang maiin min rawn en chho ve tak ang hâ hâ a.

A nui leh hawk a," Eng thil pawi mah ka sawi hleinem--...." ka țhutna lam kawng sîra nu pakhat ka hmuh avàng chuan a thil sawi ngaihtuah lo chuan ka thlîr zui deuh reng a, ani pawh chuan min rawn hmu ve mai niin, min rawn nuih zui a! Ka hmuh tawh hnu ang ka ti, ani pawhin min hria a ni ngei ang, min rawn nuih tlat, ka hmuhna tùr àwm ka han ngaihtuah a, ka hre chhuak thei mai lo, ngaihtuahna sâwrbingin ka han maimichhîng vang vang a, ka hmuh tawh hnu ni tlata ka hriat avàng chuan ngaihtuah chhuah ka tum a ni.

"I lu a hai deuh em ni?"

Zia lo thei. Ka thil ngaihtuah vàng vek.

"Hmel hriat hnu hmuin ka inhria a, ani pawhin min hria a niang, min rawn nuih a, ka hriatna àwm ka ngaihtuah a, ka hre chhuak zo thei lo a ni," tiin ka han chhâng a, ani chuan," Buaithlâk thei mang tak e aw...!" tiin a han nui leh hawk a," Fa pakhat i han nei dêk dêk a, i hriat rengnain a han tuar nghâl a..." tiin a han chek tlak tlak zui a, a fiamthu a ni tih hriain,"Chu rêng, fa dang neih belh chu min sawipui tawh miah suh, ka nei leh a nih chuan ka hming mai ni lovin in pahnih pawh hian ka theihnghilh hial maithei che u a ni," ka ti ve a, ka nui zui hak hak a.

Mahse, a hnu daihah ka hre chhuak ta tho. Kan ina rawn kal, ka nu rual vêl zet kha a ni tih ka hria a, khalai Khatla bàwr vêlah khân an awm hnai a ni ngei ang, ka hriat rengna han thawh muanzia hi chu aw...

Hun remchâng hmasa berah Hminga chu ka pa thlànlung chungchâng ka sawipui chhin a, ka nu min hrilh rûk a nia, kan ngaihthah ang tih a hlauh vàng a ni. Kan ngaihthah rei chuan mi ngaihah a mawi dâwn lo va, bâkah, ngaihsak lo chan kan chang mai dâwn a ni, a fapa neih chhun leh an unau zînga harsa lo ve ber a nih avàngin keiniin kan buaipui hi tih àwm hliah hliah a ni. U Mami leh U Lianpuiite pawhin an ngaihtuah ru viau ang; mahse, thingtlâng ațang chuan thil tih zung zung a harsa a, bâkah, sum lamah pawh an harsa thei a ni.

"A dik alawm, i beng i vâr reuh țhìn mang e!" tiin min han fak hlak phawt a, sawi zawm lehin,"Ka duh dàn chuan kumin ngeia phun hi țha ka ti a; mahse, kan phun thei ta lo a nih chuan, a boral chamah ngei tal ka la ti fan ang, kan rial rei zawngin a fuh lo ang," a ti ve sup sup a, kei pawh chuan," Ni e, Favàng lamah te hian boruak a nuam deuh tawh ang a, bâkah, U Mami leh U Lianpuiite pawh râwn chhin la, tiraw? An lo ngaichang reng tawh zâwk maithei che a ni, thil tihah phût ve chi miah loh, keini nupa kan awm chhûng chuan," ka ti ve leh a.

Fùr khawchèn hun hi hrehawm ka tih ber hun lai a ni țhìn a, khêl lovin kum tin a rawn inher ziah lehnghâl a, ka huphurh ngawih ngawih țhin. A chhan chu ruah sûr sung sung leh chhûm han zîng chuaite hian ka lung a tizîng țhìn a, ka thaw a ti-ipik tlat hian ka hre țhìn a ni.

"Fùr hunpui hi chu aw...!" ka ti vang vang a, tukverh ațangin pâwn lam ka thlîr a, chhûm a lo zîng leh chuai țan tawh niin, ka thaw hak a, ka têt laia ka chìn țhin chu ti lehin dârthlalang chu ka'n thâwk khum a, a paw leh ta ruai mai. Chutah chuan Hmingate pafa hming chu ka'n ziak a, ka en deuh vang vang a.

"I va naupang chhia tak!"

Ka thil ti lai chu min lo en reng a ni ngei ang chu, ka va en chuan a lo nui deuh a, kei chuan," Eng nge, a nuam ve alawm, ka tihna a rei tawh e..." uar zet hian ka lo ti a, Daxton-a chu pawmin," Lo nâwt reh miah suh," tiin room lamah a lût ta vat a, hre thiam lo zet chuan ka lo ding reng ringawt a.

Camera nèn rawn chhuak lehin," A bulah khân han ding teh," tiin Daxton-a chu min rawn pe bawk a," A va ho tak!" ti nang nang chung chuan Daxton-a pawm chung chuan ka thil ziahna bulah chuan ka va ding ta tho a, camera vawi hnih vawi thum vêl a hmeh hnu chuan,"I che cute reuh êm alawm, han liamtîr mai mai atân chuan a uiawm," a ti leh sup sup a.

"Ka lo en ve teh ang," ka tih chuan," Mawi reuh lutuk! Kan chhûngkaw hming i lo ziak law law lo a ni," a la ti zui a, naupang chhia min ti viau na a, ka thil tih chu cute tiin thla hial a la ve tho chu a nia, ani pawh hi, a chêt dan hi naupan chhiat châng a nei ve tho ka ti lo thei lo.

Thlalâk ka en lai chuan," Fùr khawchêng nawmzia i la hre nange? Nuam i tih dàn tùr ka hria! Mahse, Bawihtea tihmut phawt a ngai ang," a ti a, ka melh ralh a, awmze nei zeta min lo en ka hmuh chuan," I thil ngaihtuah ka hria," ka han ti ve leh a, ani lah chuan,"Nangin i hriat loh te'n, ka nupui i nia, ka duh leh mamawh, ka ngaihtuahna zawng zawng pawh i hre thei vek ang chu. A nih, ka ngaihtuahna ang chu kan ti țan tawh mai dâwn em ni ang?" a'n ti zui zat a, a inla zei ve chiang a nia.

Nui hak chung hian," Bawihtea a la muthilh loh hi," ka ti a, ani lah chuan," Kum a tlin hma hian a chhang tùr hi han pai leh ta mai la," a lo ti leh daih a, ka meng phâwk vak a, chu chu min hmuh chuan," Chutiang chu an awm ve châwk a nia, thil nih loh dàn pawh a ni chuang lo," a ti leh sup a.

Ni e, vawiin chu khua a nuam lovin chhûm zîng chuai mah se fûr khawchêng hun hman nawm dàn chu min hrilh a, a mawina ka hre fiah thiamin a hlutzia pawh ka man thiam ve ta, vawiin hian chhûm zîng lovin khua hi nuam ta viau se chuan hetiang hun hlimawm hi ka tawng hauh lo ang, a bulah hi zawng thil engkim mai hi a lo nuam vêl vek a nih àwm hi.

Mu chung chuan pâwn lam tukverh dârthlalang ruahin a rawn theh leh deuh țhat țhat țhin chu kan thlîr a, ka beng bulah chuan," Tun ațang chuan fùr khawchêng hi nuam i ti viau tawh ang," a rawn ti sup a, nghet angreng tak hian min kuah hlûn bawk a, nui sak chung hian,"I bula ka awm chauhin," ka lo ti thung a, ani lah chuan," Kan vawiin hun hman dàn hi i hriat chhuah ziah chuan," a lo ti ve thung a. Ni e, ka hriat chhuah ziah tawh ka ring, fùr khawchêng hi a lo hrehawm hauh lo tih hi.

U Mami leh U Lianpuiite chuan ka pa boral cham chiaha lung phun chu țha an lo ti viau mai a, a ute pahnih duh dàn a nih avàng chuan Hminga pawh chuan a duh dàn chu sawh sawnin kum thar lama phun mai chu a titlu ve ta a; mahse, lung erawh U Mamite chuan amah Hminga duh dàn anga ziahtîr tùrin an rawn ti ve thung a, a man lam pawh an rawn inhuam ve viau nain Hminga chuan," A ngai lo," a ti tlat thung a.

Bawihtea piannî leh a pa piannî hi a inhnaih phian a, an pian thla a inang a, a pa erawh a nî a hmasa hret thung. A hriat miah lohvin a rûkin a piancham lawmsak ve ka tum a, mi dang ka sâwm phei chu a ni lo; mahse, a piancham, a dam chhûnga a hriat reng tawh tùr lawmsak ka duh a ni.

Chhùn lamah chhuanlam siamin hnaah ka kal ve ta lo va, a hma nîin cake tui tak leh 'cial' tak ka order diam tawh a, birthday gift pawh ka chahsak diam tawh bawk. Cake lamin ka chhuak lawk a, in ka thlen hnu rei vak lovah chuan Bawihtea a muhìl a, a mut hlàn chuan a pa birthday ka lawmsaknaa thil pawimawh tùr chu ka ti leh zung zung a.

Inlêng ka nei leh ta tlat mai. Kan in luah hmaa he in lo luah tawhtu bawk kha niin, nui sâng hian," In in bul lawkah hian thil pawimawh tiin ka rawn kal a, a remchâng êm mai tiin ka rawn pêng leh lawk a ni, ka tihbuai loh che ka beisei,"hawihhâwm zet hian a ti a. Kei pawh chuan," Buai lo ve, lo kal rawh khai, lo țhu la," ka lo ti ve zung zung a.

Keimah ang mai a ni, a titi ve barh barh reng a, a châng leh a ngawi lej vang vang a, an pa chu a ngaiin a ngaihtuah ve țhìn viau a nih ka ring, a hawi kual leh riai riai țhìn a, ka khawngaih ru reuh khawp mai. Pasal sûn niin khawhar takin a hun a hmang ve tawh ngei àwm si a, fate a awmpui lo a nih phei chuan...

"Birthday in làwm dâwn a ni maw?" a tih chuan ka nui sak a," Aw, vawiin hi ka pasal birthday a nia, surprise ka tum a," ka ti a, ani chuan," A ni maw? Nupa hlim dùn tak in ni ngeiin ka ring," a ti a, ngawi vang vang chuan min en deuh reng a. Kei chuan," Aw, hlim dùn khawp mai, kan hma lam hun chu kan hre lo nain tunah hi chuan kan hlim viau a ni," ka ti leh a.

"Hlim reng ang che u, in pa chu mipa vànnei tak a niin ka hria, nang ang nupui fel leh hmel țha a nei che a nia, tûn laiah chuan hmei chhe fel tak hi an vâng tawh asin, ka lawmpui khawp mai," a ti deuh duah a, min fakna avàng chuan ka nui sak a," Ka lãwm e," ka ti phawt a, chutah," Kei pawh hi hmeichhe vànnei tak niin ka inhre ve tho asin, a chhan chu ka pasal hi mipa azawnga mipa țha leh pasal nih tling zet mai a nia, a nupui ka ni hi vànnei ka inti tak zet a ni, kan inhmangaih bawk a," ka ti ve ta a. Ka hmel hriat țhin pawh ni lêm lo mah se a bula ka pasal fak hi ka inthlahrung chuang lo.

"In vànnei dùn a nih ber chu. Ka awm rei ta, i thil ti lai pawh ka tihbahlahtîr rei tawh che a, ka haw tawh ang e, țha takin min lo chhàwn țhìn a, ka lãwm hlê a ni," a ti ve koh koh a," E, i duh hun hunah rawn kal ziah rawh khai, ina awm hun hi kan nei tlêm êm mai zâwk a, kan awm hun laia i rawn kal fuh chuan min rawn tlawh ziah dâwn nia," ka ti ve a. A chhuah dâwn chuan," Birthday hlimawm takin in hmang dâwn nia, in pa pawh chu ka lawmpuina thu i han hrilh ve ang a," tiin a hming chu min han hrilh ve leh rih a, nui var var chung chuan kan in-bye bye ta a.

Hminga chu ka surprise fuh khawp mai! A hlim a ni tih a mitmeng ațangin ka chhiar thei a, min kuah vawng vawng pahin," Hetiang hun hi ka nuna ka vawi khat tawnna a ni a, ka birthday hi lawmsak ka ni ang tih ka la ngaihtuah ngai hauh lo bawk, ka lãwm e, ka lãwm tak zet, ka làwmna tikimtu chu nang ngei hi i lo nih hi," a ti sup sup a, chumi hnuah chuan kan infâwp zui vawng vawng a.

Zàn mut dâwnah chuan," Kan intleuh lawk aw," tiin bathroom chu ka pan nghâl a, ani phei chu khumah a țhu tawh nghe nghe a, Bawihtea a muhil tawh bawk a, ka chance neih chu hlah ka tum hauh lo.

"Tuilum kha hmang rawh aw, i hritlâng ang e," tiin min rawn au zui a, ka nui sak sak a, ka thil tum a hre hauh si lo. Ka intleuh sawk sawk a, ka hmai leh ka ha ka nawhfai hnu chuan zanin atân liau liaua ka hâk tùr underwear dum sexy ru angreng tak chu ka ha nghâl a, dârthlalangah chuan ka inthlêk leh vang vang phawt a, ka sam vawiin lama ka phiar, kir nalh tak chu ka thlah hniang bawk a, inringtâwk tak chuan bathroom ațang chuan ka pên chhuak ta chhak chhak a.

Min rawn en ve nghâl mai bawk a, kei pawhin ka en ve reng, a chhan chu min hmuha a awm dàn chu ka hriat duh vàng a ni. Mit khap hauh lovin min rawn en reng a, chêt pawh a che sawn lo, kei lah chuan zahna nei hauh lo chuan khum lam chu muangchâng lui deuh ngat hian ka pan phei chhat chhat zêl a.

A hnu lam boruak chu ka duhthusàm chiah chiah a ni. A birthday danglam taka lawmsak tum ka ni bawk a, ka hlawhtling ve chiang khawp chuan ka hria.

A âwma ka bei thlar tâkah chuan a nui hawk a," Birthday ka theihnghilh theih tawh hauh loh tùr, vawiin zet chu mak tihna leh hlimna hlîrin ka khat a ni ber mai," a ti sup sup a, a hlim tih hriat chu nuam ka ti; mahse, ka țawng ve peih lo, a âwm chu ka chûl peih țâwk a ni!

Kan mut țhat hnuah erawh chuan," Vawiin chu inlêng ka nei a, ani pawhin duhsakna a hlàn nghe nghe che asin," ka ti a, ani chuan," A va làwmawm ve! Ka hriat zâwng mi a ni àwm em?" a lo ti ve vat a, ka inlêngnu hming leh vêng ka hrilh chuan a taksa awm dàn rawn danglam nghâl chu ka hre thei mai a.

"Engtizia nge...?!!"

Insehruh țeuh chung hian,"A va lo kal ngam zâwk ve!" țawng chhuah harsa tih hmêl zet hian a rawn ti chhuak ta khawl mai a! Makti zet hian ka en reng ringawt a!


*NATNA HIAN MI A TIDANGLAM ȚHIN A, MI CHAK ZÂWKAH A SIAM ȚHIN BAWK*

Link:
BBcode:
HTML:
Hide post links
Show post links

Dingdi Pachuau
Posts: 493
Joined: March 15th, 2018, 11:55 am

Unread post by Dingdi Pachuau » September 13th, 2021, 6:55 pm

☆OKHEE☆ - 38 By Dingdi Pachuau


"A zak lo hle mai!" a ti leh sup a, a awka chhuak ațang chuan a tider hauh lo tih a hriat êm avang chuan a ngaihna ka hre lo kher mai, ka inléngnu chu zak lo a ti a nih chu, a hriat zâwng mi a ni tihna em ni? A țawngkam chhuak atân chuan mak ka ti, bâkah, a thinrim hmel bawk si a, inhmêl hriatin inhmuh thiam lohna an lo nei tawh a ni ngei ang.

"Kan boruak ka tichhe vek a ni tiraw?" ka ti sap a, ka lo sawi chhuak ta kher kher chu ka inchhîr kher mai; mahse, awmzia a awm tawh si lo," A ni leh lo," han tih chi lah chu a ni tawh bawk si lo nèn, sawi chhuak fuh lo tak chu ka ni.

"Tûn ațang chuan kan ina a rawn kal hi ka rêmti tawh hauh lo. Ka tét laia kan lak ațanga a kal bo chiah khân kan inzawmna a tichat tawh a ni, inzawmna kan neih tawh loh bâkah kan chunga a thil tih vàng khân kei chuan ka ngaidam thei tawh ngai lo vang. Ka pa dam lai kha chuan ka pa vàng liau liau khân huatna rilru put loh ka tum ve hrâm hrâm țhìn a; mahse, tunah hi chuan..." tiin a thaw hawk a, a awka chhuak ațang ringawt pawh chuan a thin a rim tih a hriat theih viau, a vîn hauh lo; mahse, a thinlung chhûngrilah a nu huat ngawih ngawihna chuan bu a khuar nghet thawkhat tih a hriat a, a thil sawi pawh kha sawi zo vek lo mah se a sawi tum chu a chiang viau tho a ni.

Mahse, zanin atân chuan hetiang boruak neih hi ka duh lo, a birthday a ni a, hlim taka hmangin a hriat reng tawh tùr hun hlû siamsak ka duh a nih kha.

"Ka thil sawi kha theihnghilh vek ang aw, huatna thinlung pua muthilhpui tùrin ka duh lo che, i thei ang tiraw? I thei ang tih ka hria a ni," tiin a thinrim avànga a taksa insangmar țeuh chu ka khawih de de a; mahse, hria ang pawhin a awm lo. A thaw leh hawk a, a biangah chuan dawmin a mitah chuan ka en chho a, a rilru a na thar leh tak zet a ni tih chu ka hre chiang ngang mai. Ka inthiam lo viau a ni.

"A pawi ka ti, sawi loh tawp tùr ka sawi a, i rilru pawh ka tihrehawm leh ta vek si a; mahse, ka hmangaih che, ka hmangaihna che hian i lo nat tawhna zawng zawng chu tuam dam leh vek ka tum ang, min remtihsak phawt chuan," ka ti sap sap a, dìm takin a hmuiah chuan ka fawhsak a, a taksa insangmar viau pawh chu zàwi záwiin a inthlah dul ve ta hret hret a.

Min kuah chial chunga a muhìl thaw ri sâk sâk ri chu ka ngaithla reng a, a muthilh lai hi chuan a thinlungah huatnain hmun chang lo se ka ti, thlamuang takin muhìl se, naktûk lamah chuan zanin boruak hrehawm kha chu paih bo hmak ni se.

Ka muthilh theih loh avàng chuan thil ka ngaihtuah kual leh ta a, ka inlêngnu kha Hminga nu a lo ni reng mai a nia! Mak ka ti a ni, Hminga nu a ni tih engtin nge ka lo hriat loh theih ni? A hmel ka han mitthlà lêt a, U Lianpuii nèn an inang viau lehnghâl sia, a nu ni tùra ka lo ngaihtuah chhin loh vàng a ni ngei ang chu.

"Heti khawpa huatna leh natna nei tùra nangmah hringtu ngei che i nu hian engtiang fakaua nâin nge a siam che le? Heti khawpa i nu ngèi pawh huaa i thinrim thei a nih chuan kei chuan i natna tùrin eng thil mah ka ti lo ang," ti sep sepin a kut chu zàwi tê têin ka chûl hliau hliau a, he khawvêlah hian mipa tam tak an awm ngei a; mahse, chûng chu ka mamawh lo, amah ngei hi ka pasal tùra ka mipa thlan chu a ni a, a hming hian min muanin chakna min pe a, ka tân chuan a hming hian awmzia a nei tak zet bawk. Ka kalsan ngai lo ang a, a duh loh záwngin ka awm hek lo ang.

Ka pa ka ngaihtuah chhuak leh a, ani khân a fapa hi a lo hre chiang hlê a lo ni, a nu huatna kha a la pai reng tih a hria a, a boral dâwn minute-ah pawh a nu chu ngaidam turin a la ngèn hrâm hrâm a nih kha, ka pa pawh kha a hun lai kha chuan a rilru chu a nâin hrehawm a ti ang a, a zak viau bawk ang chu. A lo puitling àwm hi ka tia, a fate pathum chu țùlpuiin a enkawl chho a, nupui dang pawh a nei zui miah lo a nia, a thih ni thlengin. An nuin a chhuahsan khân a kum a la upa vak miah lo ang, 'Hminga pawh a la tê' ka pa khân a ti a nia, la țhalai zek zawk leh lunglêng rual a la ni ngei ang a, chuti chung chung chuan a fate țùlpuiin an nu chu a ngaidam hmak thei a ni a, a ngaihsànawm ka ti hnuhnawh kher asin, a nun chu entawn tlâk ka ti, kei ni ve ta ila tuna Hminga rilru ang tho hi ka pu ve hialin ka ring. Ka pa boral hma khân Hminga rilru hriat nân a nu chungchâng ka zawh ve tawh tak kha, khâng hun lai kha chuan ka pa a la boral lo va, a nu a huatna kha tûn ang êm hi chu a ni tawh lo maw le; mahse, tunah chuan a huatna mei de sët sët tawh kha a pa boral avànga a rilru nâ chuan a rawn chhêm alh leh ta tlat si a, a pa ngenna, a thu chah hnuhnung pawh kha hlen chhuahin a awm thei lo ang tih pawh a hlauhawm ta khawp mai.

A tûkah chuan kan boruak a pângngai thlap. Nizàn lam chanchin a sawi chhuak lo va, kei pawhin ka sawi chhuak hek lo, ka be bawrh bawrh reng a, a nu a huat avàngin ka dem lo va, dimdâwih tak leh hmangaih taka enkawl ka tum ruh sauh a ni.

A birthday kan lawm zànah Bawihtea chu a kal thei ta leu leu mai le! Mak kan ti kher asin, a loh theih loh, a chhan chu a hmain kal a tum chhin ngai tlat lo va, din erawh a ding ve zauh zauh tawh thung. Kan làwm lutuk chuan kan kîl bial luih a, kan kaltîr deuh chhên a, ka pa pekin a lo khawngaih a," A ke kha a kham lutuk ang," a lo ti nghut a, ka nu pawh chuan," Ni e, zànah a muhìl țha thei lo palh ang e," a lo ti ve bawk a, mi dang, birthday lawmnaa kan sàwmte chu an lo nui țhâ hlawm a, kei pawh ka nui ve tawp tho. Tûte duat hi an pe na ve thei a nia, an fa neih chhunin an tupa ka han hrinsak a, an duat hlum lo chauh pawh hi an demawm tehchiam bîk lo.

A tûk zînga ka kaltîr pawh chuan a pa chuan," A kal nasa lutuk tawh," a rawn ti ve sup a, a rawn pawm zui nghâl a, kei chuan," A kal nasat khân a kal nghet hma thei dâwn alawm," tiin kawngkaa an chhuak tùr chu kan han chhâng zui a, ani lah chuan,"Kal nghehtîr i tum hma lutuk a nih kha, a kal thei ve țan chauh a," a rawn ti leh a, chhâng tawh lovin ka nui hawk ringawt. Ani pawh hian a duat ve têk têk khawp a, a hauh thei bawk si nèn, senior lama fapa nei a nih avàng hian hriat thiamna chin ka nei a, a châng phei chuan a fapa a awm lai hi ka thlîr reng țhìn a ni.

Bawihtea kal thei chu rin ang a ni miah lo, a kal nghet viau mai a, pai deuh uan uan leh han petek deuha balance hloh ang kha a nei mang lo, kal mai mai lah chu a duh mang dêr lo lehnghâl a, a tlãn deuh dat dat reng zâwk a ni. A pa hian a ti peih a, zîng tin hian kawtah chuan kalpuiin 'exer ka lâkpui e' a ti a, an pafa tân tracksuit inang a duh thu a han sawi chhuah phei chuan a sawi ni la lain ka lei nghâl a, a duh hi a sawi mai mai ngai si lo va, ka phùr zâwng tak a lo ni nèn, pasalte'n duh zâwng an sawi leisak chu nupuite tih tùr a ni rêng a ni.

An pafain tracksuit inang an han ha chu an hmuhnawm asin, an inhmeh dùn si, ka thlîr ning thei lo, nupui leh nu mit ațang chuan anni tluka hmuhnawm hi an awm thei ngai lo ang, mi tihlimtu ka hmangaih êm êm ka pasal leh ka fapa an ni si a.

Hminga nu pawh a rawn lang leh tawh rih lo, pawi erawh ka ti lo khawp mai. A rawn lêng leh nulh ang a, Hminga awm lai tak te hian rawn kalin an inmelh rum viau ang tih ka hlau a ni; mahse, a chanchin dik tak erawh ka hre chiang châk khawp mai thung, a pasal fanaute chhuahsana an in a chhuahsan chhante, a... ka hre vek châk a ni mai, Hminga hi chu ka zâwt duh lo, hriat pawh a hre bîk kher lo ang; mahse, a nu kha chuan a hre chiang dâwn lutuk tlat.

Latei kha kan la chhawr reng a; mahse, in lamah Hminga chu ka pui ve tawh thung, a chhan chu Bawihtea a lian ve tawh a, a kal thei tawh bawk a, enkawl a ngai ve viau tawh si a, mi kuta dah ringawt ka duh tawh bîk lo a ni. Hna chu ka thlahthlam hlauh bîk chuang lo va, in lamah ka theih ang angin ka pui ve tho a, ka inthiam lo lêm lo, ani phei chuan in lamah pawh thawk lova Bawihtea lo awmpui mai mai tùr chuan min ti a; mahse, a hma a ko ve si a, tlêma lo chhâwk ve hlek hlek kha țha ka ti si a ni.

Krismas dâwnah ka pa thlànlung tùr pawh chu peih vek a ni tawh a; mahse, a boral chama phuna hun hman ve kan tih avàngin kan la phur phei duh rih lo, Krismas hmang tùra kan phei hunah kan phur phei mai ang chu. A rûk tak chuan hman phei chu ka huphurh viau mai, min lo chhàwntu ber tùr leh in pui lo nghâk tùr ber ka pa a awm tawh dâwn si lo va, khua a har dâwn êm a ni.

Hminga hnaah a kal a, inah awmin hna ka thawh zawhah chuan Ralvawng kan phei huna mi tùr thuamhnaw ka siam țan deuh a, Latei'n Bawihtea chhuahpuiin kawtah chuan a awmpui a, an nui ri rai rai pawh ka hre pha hial a, ka fapa hlim nui ri chu hriat nuam ka va ti tak êm! Ani hi zawng duat rawn ngang a ni a, a nakin hun tùr ka ngaihtuahpui hian kan duat sual mai ang tih ka hlau hial mai.

Chawhnu dâr 3 vêlah chuan zanriah ei tùr ka buatsaih țan a, Latei chuan kawngah Bawihtea a chhuahpui leh tawh a, an kal hlâ ang tih hlauin tukverh aţang chuan ka bih a, ka hmuh phâk avàng chuan ka lût leh a.

"I awm maw?" tih ri ka hriat avàng chuan ka hawi chhuak vat a, Hminga nu ka hmuh chuan ka phu deuh zawk mai a, ani lah chu a lo nui sâng thung a, inhre chhuak vatin," E, nang i ni maw? Lo țhu rawh khai," tiin ka lo be sawk sawk a. Hminga thil sawi kha chu ka ngaihtuah chhuak rauh rauh nain thil tihchi a ni lo va, hlim taka lo biak hi ka tih tùr chu a ni, tuin nge mi lo lêng tùr," Lo lêng suh," ti ang? Bâkah, a fapa in a ni tih a hre kher dâwn em ni? An in luah hlui a rawn hmu ve châk a, chutah, a pasal la dam laia an luah ngei a ni bawk si, a lung a lêng a, a rawn kal ve a ni mai.

Thingpui ka pe vat a, eng eng emaw sawiin kan titi a, kan nui bawk a, chutih lai chuan Hminga chu Bawihtea pawmin a rawn lût ta chhak chhak mai le! A nu chu vawi khat a melh zawk tih ka hria, a hmêl lan dàn zawng zawng chu a inthlâk nghâl vek tih ka hmu reng, nuam lo tihna ka nei nghâl nain a nu ka lo țhutpui avàng erawh chuan inthiam lohna ka nei hran lo, a rawn lêng ve a ni mai a, inlëng lo hnar tùr khawpin ka hawihhâwm lo bîk lo.

Ka lo be vat a," I lo haw hma hle mai, hnain ngah lo a ni maw?" tiin ka nuih a," Umm..." ti ringawtin min chhâng a, room lama luh nghâl a tum lai chuan a nu chuan," Hminga...?" a rawn ti chhuak ve ta a, a ding chawt a; mahse, a rawn hawi lêt chuang lo.

Kan ngawih deuh reng hnuah chuan,"Patling tak tak i lo ni ve ta, nupui fel tak leh fapa hmel țha tak i neih avàngin ka lawmpui che," a nu vêk chuan a rawn ti leh a, Hminga chu a ngawih reng avàng chuan kei chuan," Ka lãwm e," ka lo ti sap a.

"I fel ka ti tak tak a ni, nupui fel tak ni chhunzawm zêl ang che," tiin min rawn nuih sak a, rawn inher miah lo hian Hminga chuan," Ka nupui leh ka fapa nunah hian rawn inrawlh tum suh, nang nèn hian inzawmna pakhat mah kan nei lo bawk," zàwi dap si, thinrim tih hriat taka țawng sehchilh deuh nak si hian a rawn ti chhuak ve ta a.

Hrehawm ka lo ti ru khawp mai a; mahse, lo inrawlh erawh ka tum lo, an nufa inkâr a ni a, an inhmuhna hmasa berah hian lo inrawlh ve ngai ka ti lo, Hminga hian a duh duh han sawi phawt teh se, a thâwl hawk mahna.

"Rawn inrawlh ka tum lo asin, thil nih dàn ka han sawi ve mai a nia, min hua ang tih chu ka ngaihtuah sa vek tawh alawm, min haw rêng bawk a; mahse, thil awmzia i hriat loh vàng a ni, hre tùr khân i la naupang ve êm bawk a," a nuin a tih leh chuan," Sawi tawh suh! Insawi fiahna tenawm ka ngaithla duh lo, khawngaihin, kan in ațang hian i chhuak thei ang em?" a rawn ti chhuak leh ta khawl khawl mai a.

A nu hmel danglam chu ka hmu thiam mai a, a fapa thil sawi chuan a dêng na ve thawkhat a ni; mahse, min rawn enin min nuih lui sak a, min hnem ve a tum a niang ka ti mai," In chanchin hi ka lo chhui ve char char țhin a, in hlim tih ka hriat hian ka lãwm a ni. Țha takin i pasal hi lo enkawl zêl rawh aw, hetia a awm chhan hi keimah vàng a ni tih ka hria a nia, ka thil tih kha thil dik lo a ni ngei mai; mahse--" tiin a ngawi dat a, chutih lai chuan Hminga vêk chuan," Min lo chhui tawh suh, min hringtu chu i ni mahna; mahse, i fapa ka ni lo, ka pa fapa chauh ka ni, hrehawm theihtàwpa ka pa i siam hnuah ka lo lawm che hi ring ngai suh ang che," sehchilh nak chuan a rawn ti leh a.

Chutih lai chuan Bawihtea chuan a pa pawmna ațang chuan chhuk a lo ngèn ve mêk a, ani pawh chuan muangchânga chhuktîrin a rawn inher ve nghâl bawk a, a mitmeng thinrimna avànga sen râm mai chu hmuh a nuam lovin a hmel insehruh țeuh pawh chuan a tilang hlauhawm thei hial mai.

"Min lo lawm chu ka ring bîk lo asin. Ni e, ka tihsual a ni, thiamthu sawi ka tum lo; mahse, ka hmu châk țhin che a, hna thawka i chhuak pawh hi ka hmu fo, in in awmna thlengin ka hre vek, min hmuh duh ka rin ngai loh avàng leh inthiam lohna ka neih avàngin kei pawh i mit hmuhah ka rawn inlâr ngai hek lo, i pa pawh--" a la tih lai chuan vîn deuh țhat hian Hminga chuan," Ka pa sawi chhuak suh! Nangmah vànga zahna leh hrehawmna a tawrh zozai te kha eng thil mahin a tidanglam thei tawh lo, a thih ni thlengin kan unau thumin min enkawl a, nang hian ka pa chungchâng sawi tùrin eng dikna mah i nei lo!" a ti leh țhat țhat mai a, chutianga a vîn chu ka la hriat ngai loh avàng chuan ka phu zawk nghe nghe a, Bawihtea pawhin a hlau a ni ngei ang, min rawn panin a țap zui ta nghâl a, khùr dar darin ka lo pawm vat a.

"A pawi ka ti hle mai," ti sapin a nu chuan min rawn en a, tho vatin," Ka tihpalh a ni e, min ngaidam rawh," tiin kawngka lam pan chuan a kal ta nghâl a, țawngkam țhaa thlah ka duh viau nain Bawihtea țap chuan min tibuai a, thlah lohvin a chhuak zui ta a ni.

Bawihtea țap ka hnem malh malh lai chuan thâwk a la hawk hawk a, room-ah chuan a lût zui ta nghâl a, ka zui duh rih lo. A thinrimna han zuai deuh phawt se ka lût chauh ang. Amah pawhin khatianga a han vîn kha hrehawm a ti viau tawh ang, Bawihtea'n a țah phah lehnghâl a.

Bawihtea țap a bàn hnu chuan room-ah chuan kan lût ve ta chauh a, khumah bang lam hawiin a lo țhu ngût a, a thuamhnaw pawh a lo la thlâk lo. Bawihtea chu a duhnaah kaltîrin kei chu a bulah chuan ka va țhu a, a hnungah chuan ka va chùlsak a, a rawn hawi chuan a thinrim mitmeng pawh kha a lo reh tawh a, a hmel rum leh hlauhawm zet pawh kha hmuh tùr a lo awm tawh lo.

"A pawi ka ti, khatianga vìn kha ka tum hauh lo asin; mahse, ka pa a rawn sawi chhuah khân--" tiin a ngawi leh ta daih a, kei chuan," Ka hre thiam che asin, i thin kha a rim êm êm mai si a, ka thiam lo miah lo che," ka lo ti ve sap sap a, a hnung ka chùlna kut chuan ka kuah zui nghâl zat a, ani pawh chuan nghet zet hian ka kut chu a lo chelh a.

"Bawihtea ka tihțah phah kha a zia lo tak zet!" inthiam lo zeta a tih leh chuan," A pa țawngka vîn a la hre ngai lo tlat a, chutiangin kei pawhin," tiin ka nui lui sak a, chutah," Ka hre thiam che ka tih kha, Bawihtea pawhin a hre chhunzawm tawh teuh lo mai, a chunga thinrima vîn i ni lo tlat a," tiin ka hnèm leh malh malh a.

Zanriah kan ei chuan a pângngai leh vek tawh a, kei pawhin boruak chu theihnghilh luiin ka titi leh bawrh bawrh a, Bawihtea pawh tlãn kualin a ţê leh rai rai tawh a, kan in chhûng pawh in tak tak a ang ve viau tawh a ni. Puitling țawng kârah naupang țê ri hriat tùr a awm ve tlat tawh mai a, chhûngkua tak tak kan ni ve tawh e.

Krismas hmang tùr chuan Ralvawngah chuan kan phei ta ngei a, ka pa thlàn cheina tùr mawi tak leiin thlànlung pawh chu kan phur phei nghâl a, kan thleng hnai telh telh a, thlen erawh ka huphurh telh telh thung, Bawihtea a hlim êm zâwk a, chu chuan kan boruak pawh tlêmin a tizãng deuh zâwk a, chuti ni lo se chuan kan ngui dùn lap ang chu.

In kan han thleng a, ka pa awm tawh loh vàng nge ni, a lo chul riapin ka hria. U Mamite chhûngin an lo enkawl fai ve reng tho a; mahse, luahlumtu awm lo chu enkawl fai tho mah se a dik thei tak tak lo. Sêna pawh ka hmu puitling ve ta riau mai ka ti, hlim hmel takin min lo làwm a, mi dang pawhin chutiang tho chuan min lo chhàwn a; mahse, kan hlim hmêl phènah chuan lunglènna, khawharna thûk tak a awm tih kan inhriatsak vek ni maiin ka hria.

Naupangho erawh chu an ri nak nak reng a, Bawihtea a hlim bawk nèn, an han chhaih a, ani lah a lo uang ve ráwl bawk nèn, an nuih dar dar reng mai. A uteho vek an ni si a, an làwm bawk si nèn, nuam hi a'n ti mai mai khawp a, a uang thei lutuk chuan nuih a tizä a, a țha phian mai ka ti, puitlingho pawh kan nui kan nui mai.

A tûkah chuan chawhnu lamah ka pa thlàn chu kan chei a, an thlanmual chu a fai bawk si a, a thawveng bawk nèn, Bawihtea chuan nuam a ti lehpek khawp mai. Mi dang thlàn chei pawh an lo kal ve bawk a, țap râwih râwih ri hriat tùr erawh a awm lo va, a zia khawp. Ka pa thlàn duhthusàma mawia kan chei hnu chuan thlate kan la a, Bawihtea pawh a pu thlàn bulah chuan dintîrin thla ka lâksak a, kan che vêl chu ka pa chuan thlarau khawvêl ațanga min lo thlìr reng ka ring ve tawp. A tupa, a hming pawh a sak ngat hi a rawn thlîr ve a nih chuan duhawm a tiin hmel țha a ti ve ngawt ang chu, duh tâwkin a kal thei tawh lehnghâl si a, la dam ve se chuan làwm ber bertu a ni dâwn tih ka hre si a.

Krismas chu hlim àwm taka langin; mahse, a rûka khawhar tak chung siin kan hmang liam ve mai a, chhûngkat lainate an fel êm mai a, an khua har ve tho mah se kan khawhar hlauin min rawn tlawh reng a, naupangho lahin Bawijtea an rawn awmpui reng reng a, an inah an hruai haw thùl, kei pawhin ka hauh hlur bîk lo, a ute bula awm chu nuam a ti êm êm si a, an duatin a tih ang angin an awm peih a, an nuihpui uar uar reng mai a ni.

Zan khat chu a nu chanchin chu ka sawi chhuak zauh a, chu pawh chu ka pa chanchin kan sawi ațangin a ni. A pasal fanaute a chhuahsan chhan ber chu eng vàng nge ni ang tih ka ngaihtuah țhin thu chu ka sawi chhuah chuan ani chuan," Ngaihtuah duh suh, ngaihtuah tlâk pawh a ni lo," a lo ti mai a, kei erawh chuan," Chhan chu a awm ngei ang, amah pawhin,' Thil awmzia i hriat loh vàng a ni,' a tih che kha, eng emaw chu a awm ngei alawm," ka ti leh thung a.

"Min duh tawh loh vàng a ni mai alawm, hmeichhe pângngai takin a pasal leh fanaute a chhuahsan ngai lo ang, pasal dang a ûm duh vàng maw le, tenawm lutuk!" a tih leh sup chuan ka ngawi vang vang a, a nu insawi fiahna kha ka hre châk tak zet a ni, engkim hian chhan a nei vek a, side A lam ka hre tawh a, side B lam hriat a châkawm ka ti, a nu chu thiam lo hulhual pawh ni se mi sual thi tùr pawhin thiamthu sawi tùr neiin sawina hun pêk a ni țhin alawm le.

Kum thar kan hmang leh bawk a; mahse, a hma ang khân kan châm rei tawh lo, ka pa ber a awm tawh lo bawk nèn, Hminga pawhin nuam ati vak lo tih ka hre reng a, phei thuai a ti pawh chu ka hnial duh lo.

January thla tàwp lamah chuan ka thla tin hunbi chhiar chu a buai leh ta tlat mai, kei hi ka ruak lo a ni ngei ang, Hminga erawh ka la hrilh duh lo va, pregnancy test kit ka lei hnuah, ka ruak lo ngei a ni tih ka chian var hnuah chauh ka hrilh ang.

A tûka ka in-test chuan ka lo ruak lo tak tak a! Test kit chu ka en nawn chhên a; mahse, a lan dàn a ngai reng, ka ruak lo ngei e. Bawihtea ka pai țantirh ang hun tho kha a ni si a, an birthday a inrual khawp ang le.

A tûka tûkțhuan kan kîl lai chuan," Vawiin chu inentîr ka duh a," ka han ti sap a, chaw bàr chàwl meuhin min rawn en a, a mitmengah chuan mak tihna lam aiin hlauhthàwnna ka hmuin ka hria, nui sak chung hian," Ka ruak lo niin ka hria a," ka ti ta sap a.

"A ni maw!!!" A awah chuan mak tihna, lawmna leh âwih ngam zân lohna a inpawlh nawk mai.

"Aw, ka inringhlel a, ka in-test a," ka tih chuan min la en reng tho a, chutah, nui hawkin," Yes, a va làwmawm tehlul êm! Ka lãwm tak tak a ni," a ti chhuak hluai a. A hlim hmel hmuh chu nuam ka ti, heti khawp hian a hlim hmel hi a lo țha a ni tih ka hre chiang thar leh bawk.


*THIL THLENG THEI LO, LO THLENG TÙRA BEISEI TLAT THINLUNG INKHÀRKHIPNA HI TIHTÀWP A NGAIH CHÂNG A AWM VE NGAI A NIA*

Link:
BBcode:
HTML:
Hide post links
Show post links

Dingdi Pachuau
Posts: 493
Joined: March 15th, 2018, 11:55 am

Unread post by Dingdi Pachuau » September 13th, 2021, 6:57 pm

☆OKHEE☆ - 39 By Dingdi Pachuau


Inentîr tùr chuan min hruai a, ka lo rai ngei bawk a, a làwm êm avàng chuan," Vawiin chu làwm teh ang," a ti a, hnaah pawh a va kal zawk ringawt a, rawn haw leh thuaiin," Naktûk chu chawlh ka rawn pe vek mai asin," a rawn ti heu mai! A láwm ve êm mai a, hotupa ber niin a thu thu a ni bawk a, ka sawisèlsak teuh lo mai.

Țhenrual lainate pawhin min lawmpui khawp mai a, Ațana leh Martha-i an rawn tawrhhlelhawm lehpek." In senior dùn tawhin in chi lah a chang țha dùn tawh bawk a, in kûi țiak nghâl zut zut mai alawm," an ti a, Martha-i phei chuan," Insûm deuh teh u, in pa lah hian a awm zât zât hàwl chhuah a tum em ni?" a ti a, fiamthu tho mah ni se ka ngei reuh khawp mai, chhang zing takin kan nei dáwn pawh a ni lo va, ka rai hun anga rai hi an tam ve tih ka hre chiang ve êm!

Hminga'n lo chhângin," E, eng zât nge a lo pài chiah tih kan test ang chu, kei phei hi chuan kumchhirin a nia neih ka duh ni," a lo ti hlauh a, Sawmkima pawh chuan," E, chàwm zawh loh tih a awm thei hleinem, neih țeuh mai tùr, an puitlin hunah an zahawm țhuau ang a, awhawm deuh tùr asin," a lo ti ve a.

Ka rai no chuan huat ka nei lo va, thei thùr lam ka châk reng thung. Thil ka ei thei a, ka ngaihtuahawm loh tehlul nèn, Hminga chuan Latei bawk kha a be leh a, Krismas dâwn khân kan inthlah fel tawh kha a ni a, vànneihthlâk takin a lo remchâng leh hlauh a, min awmpui leh ta a ni. Ka nu leh pa an rawn lawr reng tho bawk a, ka ãwl khawp mai. Hminga'n chêt a phal mang lo va, a hmuh loh leh awm loh lai chauhin chêt ka chuh țhin. Tûn țum chu hmeichhia ni ve hlauh se ka ti rilru khawp mai, a bulah erawh ka sawi lang duh chuang lo va, ani phei chuan," Hmeichhe naupang, nangmah ang zet mai kan nei ang," a ti ziah a, hmeichhia ni ngei se ka tih phah a ni.

Ni khat chu Bawihtea ka bual zo, a thuamhnaw ka sûk lai mêk chuan phone a rawn ri a, ka kut hru hulin ka han en vat a, number ka save loh ațangin a lo ni a," Tu tak ni ang maw?" ti rilru chung chuan ka han chhâng a.

"Lawmi, in dam țha em? Hminga nu ka nia," a rawn ti a, ka meng phar deuh ãk a, min rawn hmu thei lo mah se mak ka tihzia ka thup thei lo a ni.

"Aw, dam țha e, kan dam ţha e. Nangni in dam țha em?" ka han ti ve zat a, 'nangni' ka tih chhan chu a pasalin boralsan tawh mah se fate pawh an nei ngei ang a, an la chêng tlâng ngei ang chu ka tih vàng a ni.

Ani chuan," Aw, dam e, ka țha ve reng mai," a rawn ti phawt a, aw a han thian leh tê tê a, chutah," Ka rawn lèn hnuhnun ber țuma kan ințhen dàn kha a fuh ta chiah si lo va, ka rawn lêng ngam ta rih lo a ni. Hun remchâng awm se hmuh che ka duh ngawt mai, i pasal chuan min hmuh hi a phal lo ngei ang tih chu ka hre sa tho a; mahse, hmuh chea thil hrilh vek che ka duh a ni," a rawn ti leh charh charh a.

Remchâng hmasa berah chuan kan inhmu ta ngei a, kan inah erawh a ni lo, ka pasalin kan ina rawn kal a phalsak tawh si lo va, amah pawhin a duh loh bâkah kei pawhin ka duh bîk lo, chuvàng chuan, kan in ațanga hla vak lovah, restaurant-ah kan inhmu ta a ni.

A hmêl a lo dang deuh hlek, a chêr deuh ta bawk a, tlêmin a ha pawh a lang kuh ta lek lek mai, a chèr vàng chu a ni ngei ang, khua a la vawt ve deuh bawk a, shawl a bât hlãn reuh a, a dam țha lo em maw ni chu aw ka ti rilru hial a ni.

"A pain a boralsan tawh tih kha ka lo hre hauh lo va, i ãwih chiah lo maithei; mahse, a boral thu a sawi khân min țhâwng tak zet a ni, mi țha lutuk a ni si a, ka ui tak tak a ni," a ti chhuak ta sep sep a.

"Nia, ka pa kha chu mi țha tak chu a ni chiang alawm, kei pawhin ka ui asin," ka ti ve a, ka pa hmel kha ka han mitthlà lêt a, ani pawh khân min ngaina ve viau a nih kha.

"Hminga'n min haw tlat mai hi ka hre thiam reng a nia, ka hre ve alawm, a têt lai pawha luhlul zet kha a ni ve a, a rilru hi a sawhsawn mai mai lo ang tih pawh ka hria; mahse, i bulah hian thil engkim hrilh vek che ka duh tlat a," a ti sap sap a, table danga mite ri nuai nuai mah se a lamah beng ka chhi kar a, kan inhnaih bawk nèn, a țawng ri chu ka hre chiang thei viau.

"A țha alawm, i sawi duh apiang chu sawi hmiah hmiah rawh," ka ti ve a, ei tùr a rawn thleng a, kan ril chu a la țâm lêm lo nain ei tùr order lova dàwr chhûnga țhut ve reng ringawt theih ni hek suh, kan hmaah chuan kan hûng ve ràn a.

"Kan chanchin kha chu i hre deuh vek tawh ang tiraw?" a rawn tih leh chuan," Hre nial nual," ti chauhin ka chhâng a, ka hre vek tlat lo alawm.

Thâwk lain a han ngawi leh vang vang phawt a, keiin dawhthei takin ka lo nghâk reng thung a, chutah," Ka pasal fanaute ka chhuahsan chhan kha eng vàng nge ni a i rin?" a rawn ti chhuak ta daih a, chhâng lovin ka en reng phawt a," Ka hre lo le, mipa dang vàng a ni em?" ka ti lêt ta thung a.

Za lo tih hriat tak hian a nui hak a," Chu chu mi zawng zawng rin dàn a ni ngei ang," a ti sap a, thâwk a la leh vak phawt a, chutah," Ka unaupa sual tawrawt lutuk vàngin loh theih lohin ka chhuahsan a ni, ka chhuahsan chhan kha ka hrilh hman lo, khatih hun laia hrehawm ka tihzia leh ka țah nasat țhinzia kha..." a ti chhuak ta dap dap a. Kei chuan mit pawh khap phal lovin ngun zetin ka lo ngaithla a, ka en kar bawk, thâwk pawh ka thaw ring ngam lo, a țawng chu hriat hmaih ka nei ang tih ka hlau a ni.

"Ka sawi thui deuh hlek dâwn a, i lo dawhthei hrâm dâwn nia," a yih chuan ka lo bu nghat a, sawi zawm leh nghâlin," Ka nu leh pa an boral hma viau a, ka unaupa neih chhun nèn chuan kan chëng dùn rak rak a, ka thisen zawmpui ngei a nih vàngin ka hmangaih a, sual viau mah se ka dawh hrâm hrâm țhìn. A chhan chu min enkawltu tùr ber ka nu leh pate an boral hma êm avàng chuan kawng engkima hruai țha tùrin ka inpe ve a, ka nu leh pa ai ka awh ve tihna a nih ber chu; mahse, zu leh sa, nula leh damdawi lam nèn a tikual vek a, ka zilh a, țha taka a awm theih nân kei ngei pawh a entawn theih tùrin ka invawng ve êm êm a; mahse, ka hlawhchham țhak. Nula tlangvâl chho kan ni ve a, chutianga a awm reng mai chu hrehawm ka ti a, thih daih maite ka châk rum rum țhin, ka țawngțaina chhàna a awm thei lo chuan min tibeidawng zual a ni."

"Tlai khat rùi zeta ina a rawn haw chuan kan inhau ta a, min thah a tum ta mai a, a hmaa ka zilh châng pawhin kut chu min thlâk fo va; mahse, ka tuar mai țhìn; mahse, chumi țum chuan ka hlau tak zet a, ka mangang au ri chu țhenawmte'n hriain police an lo pun ta a, police-in an lâk dâwn pawh chuan,' Ka rawn chhuah veleh ka rawn zawng chhuak ang che a, ka rawn that ang che,' min ti hial a ni."

"Kut min thlâk a tum vàng chauh ni lovin rûkrûk leh thil dangah mi dangin thu buai an lo theh lût ve tho lo niin, jail chu a tâng ta reng a, khawngaih viau mah ila ka hlauh êm avàng chuan rawn chhuak tawh lo se ka ti țhìn. Chûng hunlai chuan Lungleia kan la awm lai a nia, ni tin mi hnuaiah ka inhlawh ve țhìn a, dawr ka nghâk țhìn a ni, chuta țang chuan Hminga pa nèn hian kan intawng ta a, ka duh ngam lo zâwk a; mahse, min duh ve êm mai a, rei pawh rial lovin kan innei ta mai rêng a, ka nun chu a hlimin ka thla a muang tak zet tawh a, ka unaupa chu ka hre chhuak ngai ta lo a ni, bâkah, min rawn zawn chhuah theih ka ring lo hrim hrim bawk."

A ngawi ta rih a, tui chu inthlitin a han in khalh khalh phawt a, ka lo nghâk reng a, a in zawh chuan a sawi chhunzawm leh ta a.

"Mahse, min rawn zawng chhuak tho, kum 10 vêl zet hnuah a nih chu, a hmel ka han hmu leh chiah chu hlauhna mak tak hian min țhãm a, ka pasal fanaute chu chhuahsan vat tùra min hrilhin ka chhuahsan lo a nih chuan a thah chimih vek tùr leh kei ngei pawh min thah a tum thuchu a sawi chhuak leh ta a, khatih lai khân eng thil dang mah ka ngaihtuah thei lo, amah hlauhna khân ka khat tlat a, ka chhûngkua, ka pasal leh fate zawng zawng thih ai chuan tiin amah kha ka zui nghâl tawp mai a ni, a hrehawm asin, hrehawm ka tih theihzia kha, ka ã lo hi mak ka ti țhin hial zâwk a ni," a ti leh sep sep a, a ngawi ta dat a, a bianga a mittui rawn luang thla chu ka hmu vat a, amah chuan dìm tê hian a han hru a.

"Kum chanve zet chu ka awmpui ang chu, min vau reng a, ka hlauh êm avàngin tlàn bosan lam kha chu ka ngaihtuahnaah a awm phâk ngai lo; mahse, tlai khat chu a rui leh viau mai a, ka inngaihtuah ta a, kan kawmthlanga pik-up chu Aizawl panin a chhuak dâwn a, Aizawl lama tlàn bosan daih tumna rilru ka pu ta a nih chu. Ka pasal fanaute ka pan chuan min rawn zawng chhuak leh ang tih ka hre sa vek a, bâkah, anni chu pan chi-ah ka ngai tawh lo, ka chhuahsan tawh si a, mipa vànga tlãn boah min ngai vek tawh bawk ang, chuvàng chuan, Aizawl lam ka pan ta ringawt a ni. Ni tin biru rêng rêngin hun ka hmang a; mahse, dam tlat chuan ei tùr chu ka hmu ve mai zêl. Khatih hunlai kha chu ka ngai lo tak zet a ni, mite hi an lo țha hi ka tia, an inah min awmtîr a, ka awm ve tawp mai a, ka inhlawh a, pawisa ka khâwl ve zêl a, pasal nei tawh lovin tûn hun hi ka thleng ta a ni," a ti dap dap a.

"Pasal neia boralsan che ang khân i insawiin ka hria a?" ka lo ti vat a, a lo nui sak a," Chhuanlam a nih kha, i lo âwih viau a ni maw? Tûnlaiah hi chuan chanchin a inhriat zung zung theih tawh a, ka chhui ve reng țhin alawm, bâkah, Hminga hi chuan a pa hmel a chhùn fuh ve a, ka vawi khat hmuhna ațang khân ka hre nghâl vat a ni, nupui a lo nei țha viau mai lehnghâl a, ka lawmpui viau a ni," a ti leh dap dap a.

Zàna ka mutnaah chuan ka ngaihtuah zui vang vang a, pasal nei miah lovin ani pawh a awm tluan ve țhak mai a nia, a thil tawn chu han ngaihtuah chhunzawmpui chuan a khawngaihthlâk ka ti, ka dem hauh lo mai. Hlauhnain mi a thunun tawh chuan thil a postive zâwngin thlìr a har a, khatih hunlai khân ani pawh a la naupang ve tho si a, thil a ngaihtuah thui thiam bîk lo tawp ang le. Kan ina a rawn kal lah khân a pasal nèna an chènna hmun hlui a hmuh duh vàngah ka lo ngai ve char char a nia, ka lo ngai sual ve khawp mai. A fapa a rawn hmuh duh vàng leh a khawsak phung, a chhûngkua te min rawn hmuh duh vàng lek a lo ni si a.

Kan inhmu lo leh ta vang vang a; mahse, a dam țhat leh dam țhat loh zâwtin ka be zauh zauh thung. A chanchin ka hre chiang tawh a, Hminga nu dik tak a ni bawk a, fa dang ngaihtuahtu tùr a nei bawk lo nèn, ka ngaihtuah lo thei lo a ni. Ka khawngaih a, a tihsual ni miah lovah a tuar hrep mai si a, Hminga pawh sawipui ka tum; mahse, hun remchâng ka la hmu rih lo a ni.

Tlai khat a chanchin ka va zâwt leh chu, a nawmsam meuh loh thu min lo hrilh a, ka ngaihtuah rilru ta khawp mai. Inenkawl țha tùra hrilhin a damdawi ei tùrte chu ka hrilh tel bawk a, kan inbiak zawh hnu pawh chuan ka ngaihtuahna a luah zui vang vang mai.

Zànah mutnaah chuan intihuai luiin Hminga chu a nu chanchin ka sawipui chhin ta a, ani lah chuan," A ho êm mai, theihnghilh daih rawh," a lo ti hmuk thung a, a beidawnthlâk chu ka ti viau nain ka tuang ka tichhah lui a," Kâr hmasa hmasa lawk khãn inhmuhpuiah min rawn sâwm a, thinrim suh aw, kan inah a rawn kal lo a nia," ka ti tê tê a, a ngawih reng avàng chuan sawi zawmin," In a chhuahsan chhante kha min hrilh a, bâkah, tunah hian a damsam lo mêk a ni àwm e," ka ti leh a.

"A chhuanlam a nih chu, i hmu tawh a, ka sawisêl lo mai ang; mahse, hmu nawn tawh lo tùrin ka duh thung che a ni, a thil sawi chu eng pawh ni rawh se, ka rilru hi chu a la ngai reng, a tâwk em?" a tih tâk hmukah chuan kei pawhin sawi zui ka tum ta bîk lo.

Ka pa lung phun tùr chuan kan chhûngkuain kan phei leh ta a, Hminga rilru a insual nasa khawp mai a, nau ka pai țan mêk si a, motor-a chuanpui chu naute insiam chho țan mêk tân a țha lo ang tih a ring si; mahse, ka tel lova kal chu a zuam bawk si lo, a rilru a inkhâp a inkhâp a, a tàwpah chuan muangchânga motor khalha phei vek chu kan titlu ta a ni. Chhûngkhat laina kan sâwm ve tho nain kâr a hla si a, ngaipawimawh ve viau mah se tihngaihna a awm ngang lo a ni, kan hre thiam vek tho mai.

Tluang takin hun chu kan hmang a, ka pa puala hun hman tàwp ang a nih tawh avàngin kan theihtâwp kan chhuah ve a, khawtlângin ruai kan țheh a, kan inah chuan nilêngin kan zai khâwm a ni.

Thlànah kalin ka pa lung an phun chu kan en ve a, a mawi viau mai. Lung erawh a lêng thar a ni, tunah chuan ka pa hmel ngainatawm tak kha leilungah a luang ral ve ngei tawh àwm si a, hei hi kan la chan ve vek tùr chu a ni tak si a.

"Ka pa, min lo thlîr reng em? Kan ngai lutuk che asin, i tel lo chuan ina awm pawh a nuam tawh lo; mahse, hrehawm réng réng awm tawh lohnaah i kal tawh a, a nuam tawh ngawt ang chu tiraw? Pum nâ pawh kha i tuar tawh lo ang a, a dik tiraw? En teh, Bawihtea pawhin chhang a nei ve tawh dâwn asin, min lawmpui em? I hmu châk ve ngawt ang tiraw? E, chuan, ka nu pawh kha kan hmu tawh asin, a kalsan chhan che kha i hre vek tawh ang tiraw? I khawngaih em? I khawngaih viauin ka ring, i hmangaih êm êm si a, pasal nei tawh bîk hauh lovin ani pawh a lêng tar ve țhak asin, i chunga a thiltih zawng zawngah i ngaidam vek a ni tih ka hrilh lai phei kha chuan a mittui a tla zawih zawih asin," tiin ka phun sap sap a, ka pa thlànlung chu ka vuan reng bawk a.

"Eng maw?! Han sawi țha leh teh!"

A nu inpuanna zawng zawng chu Hminga hnênah chuan tãwi kim tak siin ka hrilh ta vek a, a ngawi reng a, a pa thlànlung chu a en ngut ngut mai a, a rilru ngaihtuahna hre vek lo mah ila a rilru ngaihtuahna erawh a buai ve hlak ang tih chu ka hre tho.

A ngawi reng a, miin an biakin a rùl tâwk chauhin a chhâng a, zan mutnaah pawh chuan ngawi rengin zangthalin a mu a, ka thil hrilh hnathawh vek kha a ni tih ka hria a, biak buai ka tum lo; mahse, a kut chelhin duat takin ka kuah a, țawng kher pawh a ngai ka ti chuang lo.

U Lianpuii leh U Mami pawh a nu kan hmuh chungchâng chu ka hrilh lëm lo, țûl a tih hunah Hminga'n a hrilh mai ang chu, tûn atân chuan lo inrawlh rih lo phawt ila a țha ang.

Aizawl kan phei chu Sêna'n min zui thla a, kawng tluanin Bawihtea a pawm a, a zia khawp mai. An pahnihin an ri lê lû reng a, khua an tihar lo khawp mai.

A tûk chhùnah Hminga nuin min rawn be hmasa ve ta tlat mai a, ka biak hmasak zêl a ni si a, mak ka ti ru khawp mai.

"In zin tih ka lo hria a."

A hre ngei ang, ni e, a fapa chanchin chu a chhui hneh viau ang chu. A rawn inlan duh lo mai pawh a, kan chanchin chu a hre reng tho ngei ang.

Kan zin chanchin leh kan zin chhan ka hrilh chu ka hrilh ve a, a ngawi vang vang reng a, chutah," I lo dam țha em?" tiin ka han zâwt leh hnuhnawh a.

"A, țha a ni mai, min ngaihtuah suh," a rawn tih chuan ka ngaih a tițha chiah lo va,"I la dam chiangkuang thei nange?" tiin ka zâwt ta vat rêng a, ani lah chuan," Ka țha, ka lo upa ve ta a ni ang e," ti ringawtin min chhâng a.

Ka thil sawi kha Hminga pawhin a lo ngaihtuah ve reng a ni ngei ang chu, mutnaah chuan," Pasal chu a nei lo tak tak em ni le?" a rawn ti chhuak sup a, a ngaihna ka hriat loh avàng chuan," Tuin maw?" ka lo ti vat a. A ngawih leh daih avàng chuan ka han ngaihtuah a, a nu a sawina a nih ka ring ta ringawt a.

"En teh maw, Duhtak, ka dem lo che ka tih tawh kha. A chanchin min hrilh vek tawh a, kei chuan a hmel leh mitmeng ațang khân dâwt a sawiin ka ring thei lo va, chuvàng chuan a thil min hrilh kha ka âwih a ni, i âwih thei rih lo a ni maithei; mahse, i thinlunga huatna awm tlat erawh kha chu khawngaihin, paih bo hret hret tum hrâm teh aw, ka pa pawhin a chah dâwn țêpah pawh a ngen țâwk țâwk che kha, ka pa thinlung kha a ropui ka ti asin, ngaihdamna thinlung a nei thei tlat mai a, nang pawh hi sawisèlna tùr che ka hre lo, ka pasal ka hmangaih êm êm i ni a; mahse, vawi khat tal chu ka pa ngenna che kha ngaihtuah nawn hrâm la ka ti a ni," ka ti duah a.

Thla thum hnuah chuan

"Bawihte, lo kal teh, ka lo bual thuai thuai ang che, vawiinah i pi tlawhin kan kal dâwn asin," tiin Daxton-a tlãn kawi zar zar chu ka man a, ka be mawlh mawlh a. Ani pawh chu thu âwih takin a awm chhunzawm ve mai bawk a, ka bual a, Latei'n a thuamhnaw a lo su bawk a, tlêmin ka hmanhmawh ve deuh tawh a ni.

A thuamhnaw ka hâk feltîr hnuah chuan kei pawh ka intuai thuak thuak a, Hminga hna ațangin a rawn haw ang a, a nu chu a chènnah kan va tlawh ve dâwn a ni. Kan inah erawh a rawn kal ta rih lo, a ina tlawh hmasa tùrin min phût tlat a, Hminga chuan hreh ru viau mah se ka tilui ve tlat a, a thinlungin a pa thuchah kha a hre ve reng si a, min hnial duh bîk lo a ni. Kei lahin ngen tak têin ka ngèn reng bawk a, a nu lah a lo la dam țha lo ve bawk nèn, chu chuan a thinlung pawh a tinêm ve tawh viau rêng a ni.

Hminga rawn haw chuan kan lo inpeih vek tawh a, kawnga kan tlàn lai chuan," I ti țha ka tiin ka chhuang lutuk che a nia aw, tunah chuan ka pa pawh a hlim tawh ngawt ang chu," ka ti sap sap a, ani erawh chu a ngawi reng a, Daxton-a erawh ama riat riatin a lo riat ve nawk nawk thung a.

Kan sawi lâwk vek tawh a, kan tlawh ang a, kan tlawh hnuah a nu chanchin hi U Lianpuii leh U Mami kan hrilh ve nghâl ang tiin. A nu phei chuan eng mah a la hre lo ang, tuna kan tlawh tùr pawh hi a lo phûr viau mai a, damkawr chung chungin a lo inpuahchah ve tho a ni.

Motor a din dat tâkah chuan a lam chu ka hawi a, a bân chu chùlsak hoh hoh pah hian," Ka chhuang che ka tih kha aw, țha takin aw ni ang," tiin ka nuih sak a, ani pawh chu a nui ve suk a, motor ațanga chhuakin kan hma lawka in, Assam Type lian vak lo, a nu chènna lam pan chuan kan inchhawm phei ta nghâl a.


*CHONA ȚHA HIAN HRINGNUN A TIHLIMAWMIN A TINUAM A, CHU CHONA ȚHA CHU HNEHA A AWM HIAN HRINGNUN CHUAN AWMZIA A LO NEI ȚHIN*


~~~~A TÀWP TA~~~~

Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)