☆OKHEE☆ By Dingdi Pachuau (Completed)

[Dingdi Pachuau]

☆OKHEE☆ - 1 By Dingdi Pachuau


Khumah chuan ka bawk hlè hlé ringawt, ka che sawn peih ngang lo a ni, chaw ei tùra min rawn koh pawh chu mang lam hriatin ka hre ruai ruai, ka chau ngang a ni ang, chaw pawh ei ta lo chuan ka muhìl tlang ta daih a nih chu.


Zînga ka harh chuan ka kè pawh chu ka chêt țhat thei lo, a rawl lutuk ringawt, țah a chhuak zâwk! Ka han dah sawn dâwn pawh chuan a na lutuk chu ka țhen sak sak a, kan in chu ni se chuan țah hluam hluam ka chãk ngawt ang chu; mahse, nimin lam kha chuan nuam ka tih êm kha, kein luidung kha kan zawh thui ve êm bawk a ni, kalkhàn a rem bawk si lo. Pa Mawia remti lo chung kha ka zui ve ngawt bawk kha a nia, sawisêl thei dinhmunah ka ding hauh lo.


Ka rawl avàng chuan ka thawh tlai phah lutuk bîk lo, tûkțhuan pawh hma takah kan ei a," Vawiin chu i lo kal peih tawh lo ang tiraw? I rawl bawk si, kha kha ka hriat sa vàng a nia kal ka remtih loh ni," nui deuh sûng chung chuan Pa Mawia chuan a ti a, Anțam tui chu a hâwp ri khawlh a. Kei erawh chuan," Ka kal nawn leh sak ang, ka rawl tih-reh nân," tiin ka lo chhâng thung a, ina lo awm mai mai ka tum teuh lo, ina awm ka nin vàng alawm ka zin ni. Vawiinah ka kal leh ang a, naktük lamah chuan ka zia huai mai ang.


Chaw ei khamah chuan Pa Mawia zui leh tùr chuan ka insiam leh ta a, nimin lama ka pheikhawk bun kha a la ro hman loh avàngin Lunglei ka phei dâwna ka lei thar, ka la bun chhuah miah loh chu ka han bun a, a chhûnga chèn pawh a nuam viau e. Thawmhnaw erawh a ro hman a, a zia. Pa Mawia chemte țha zet chu ka kekawr kâwngah chuan ka thiat zân a, kawngah rûl ilo pawh ka hmu thut thei si a tiin ka pai a ni. Bike erawh ka melh peih țâwk a ni, khalh chhuah lam rilruah a lang tawh lo, Pa Mawia rickshaw-ah chuang ve tawp tawh mai teh ang.


Kan tlân leh ta vang vang a, Lunglei ațangin kan kalna tùr lui hi Km 34 vêl chiah chiah a ni. Pa Mawia hi JE a ni a, DAO-in Chite luikam zâwla leilet tùr laih mêk chu en fel tùrin a ti a, chu chu ka zui ve a ni. Khua a lum lehpek viau mai, ni a sain han hawi ila, ni sa tùr zet avàng chuan mit men pawh a nuam lêm lo, men pângngai pawhin a men theih loh. Laikîng bêl rawh pawh hmuh tùr a tam. A, a sa ve êm bawk a ni.


Kan tlân chak bawk a, kawng a mâm lêm lo nèn, kan insawh nasa khawpin ka hria. Pa Mawia chuan," Haw lam chu khalh ve chhin la? I thiam em kha?" tiin min zâwt a, awlsam zet hian," Aw; mahse... ka khalh duh lo," ka lo ti vat a. Ani chuan," Engah maw? Motor tam lohna chinah i khalh chhin dâwn nia," a ti thung a, chutah," Nang hi chu tlêm hian i pà deuhin ka hria, bialpa i nei ve tawh em kha?" a ti leh a, kawng bawl zetah chuan kan tlãn ri leh țawk țawk a.


Kawng chhe lai kan tlàn pelh hnu chuan, "Nei lo, bialpa neih loh hi pà deuh vàng tihna pawh a ni chuang lo," ka lo ti a, ani chuan," Nula kum 30 hnaih tawh tân chuan neih a hun viau tawh a ni. Ngawi lawk teh, bialpa mai ni lo vin pasal neih i hun tawh zâwk. Hmeichhia phei chu in vul lai a rei si lo va, pasal țha deuh nei ang che, i pasal chu a vànnei dâwn nasa mai si a," a ti leh bawrh bawrh a.


Khuaah pawh ding khawmuang lovin Chite lui chu kan pan ding nghâl a, kan zu thlen chuan nimin lama kan mi hmuh tawhte bawk kha kan zu hmu leh a, Pa Mawia chu an lo be nghâl sawk sawk a, kei erawh dàn ngai têin luiah Sangha leh Kaikuang chhaih buai leh tùr hrim hrimin ka chhuk leh nghâl a. Ka man thei lo, an ți lutuk, chuvàng tak chuan chhaih buai hi ka tih theih tâwk chu a ni.


"Làwmi, thingpui hâng i duh ve em?" Pa Mawia'n a rawn tih chuan ka duh loh thuin ka chhâng a, ka țawng ri chu a hria a ni ngei ang, Kaikuang ka veh ve ràn ràn chuan lung lian ve deuh hnuaiah chuan min luhsan ta daih a. Pa Mawia min rawn ko kher kher chuh, a hun lo ve khawp a ni. Ka man teuh tawh nèn, kha phei kha chu a lian ve riau asin, ka ui ru vawng vawng mai.


A chhak deuha Changêl hnah ro hnuai vêla an awm leh mai ring chuan ka pan chho leh dân dân a, muangchâng leh fîmkhur tak chuan hnah chu ka han hui kiang dè dé a, an lo awm nual niin, chutia an lo inphenna ber ka han khawih chêt tâkah chuan an lo tang nghâl hrâ a,an inrâlring ve reuh hlawm lutuk chuan ka nuih a tiza ru kher mai, hnung zâwngin an tawlh hârh hârh hlawm a, pakhat tal chu ka man khawp ang le.


Ka veh hnai hriau hriau a, Changel hnah lo la awm deuh nuai chu muangchâng hian ka keu phei zêl a, chutah, lung kâr deuha eng emaw hnânga tah bâwm ni àwm tak chu ka hmu ta a, ka en deuh reng a, Chakai a awm maithei a ni, a nih loh pawhin Kaikuang emaw Sangha emaw pawh a lo awm mial maithei. Ka thil ngaihtuah avàng chuan phûr fahran hian ka han pan hnai a, ka han la chhuak chhin a, Chakai ni awm tak ka hmuin ka hria!


"Ka aiâwt chiah a nih kha, en rûk i tum a ni maw?"


Ka phu zawk mai, chutih rual chuan ka thil ken lai pawh chu ka thlauh nghâl vat bawk. Inherin chu thu rawn sawitupa chu ka en vat a, zak ru deuh chem chem mah ila thu dik ka hrilh tho ang. En chu ka tum ngei; mahse, mi aiâwt chiah a ni tih ka hre hauh lo a ni, bâkah, khatiang bâwm kha aiâwt a ni tih pawh ka hre lo, ka lo hmuh ve tawh țhin aiâwt nèn a inang lo bawk.


"Aiâwt a ni tih ka hre miah lo," ka tih chuan chîk zet hian ka mitah chuan min rawn en a, kei pawhin ka en lêt ve kar tho.


"Hre si lovin engati nge i lâk chhuah si? Eng thil nge hmuh i beisei?"


Thâwk ka la ham ham phawt a. A khirh reuh zêkin ka ring, a dîlchhût si. A aiâwt chiah a ni tih hria ila ka en bîk tawp nâng, mi aiâwt chiah lo ensak duh tùr êm chuan ka hniam bîk lo asin.


"Aiâwt a ni tih ka hre lo ka tih chu, ka pu. Bâwm chhia mai mai a nih ka ring a, a chhûngah Sangha emaw Kaikuang emaw a lo awm tâk mialin ka ti a ni," tiin thu dik tak chuan ka chhâng a, hre thiam tak ang maw? Hawi sawn duh lovin ka en ve kar reng a, ani pawhin min en kur tho. A hmulphurh a chhe ve ropui si a, a thin a rim hlauh chuan a hlauhawm duh ngawt ang.


"Aiâwt hre lo rual chu i ni tawh lo maw le," a tih leh tâk supah chuan ka thaw hak a, hawi sawnin a hmuh loh tùr lamah chuan ka insehruh a, he putar zet chuh, hei aia a tar zual hnuah phei chuan a phunchiar zual ngawt ang chu, a tu leh fate nih ka peih loh zâwng tak a ni. A aiâwt ve lah kha, mi aiâwt tah nèn a inang lo bawk. Aiâwt chu ka hmu ve fo tawhin a thlalâk pawh Fb lamah ka hmu ve zing tawh viau, mi aiâwt tah lakah chuan a aiâwt ve kha, 'Bâwm chhia' mai a ni.


A 'Bâwm chhia' ațang chuan chakai pathum vêl hi a la chhuak a, a ip khai puar lai ve deuh nalh tawhah chuan a dah lût a, a 'Bâwm chhia' chu aiâwt atân a lo hmang țangkai viau a nih dâwn hi, kei lah khân mi aiâwt a ni ang tih ka lo ngaihtuah pha hauh si lo. Ka en reng tih hria ni àwm takin a rawn hawi leh thut a," I duh ve deuh em ni?" a la rawn ti zui a.


"Duh lo," ka ti mawihnai nain ka rilru chuan," Duh hlawl lo, khatiang bâwm chhe lutuk, aiâwt a ni ang tih pawh hriat hleih loh, bâwm chhia a nih kha bâwm chhia," ka ti țhuai țhuai thung a, putar chu ni lo se chuan chutiang chuan a rìin ka chhâng chiang ngawt ang chu; mahse, a tar ve tawh reuh sia, a rilru ka tihnatsak ang tih ka hlau a ni.


Chutih lai chuan kan chhak lam ațang chuan pa pakhat hi silai ak chung hian a rawn chhuk ve a, in lama ka roh êm êm ka miniature rifle ka hre chhuak zawk mai ka ti. Khaki kawr uk khak hain lukhum hi kun deuh hlek hian a khum bawk a, ka lo chîk khawp mai. A silai ah chu ulhbun niin, a hlui ve hmel tawh viau nain a hmang rim viau a nih ka ring, a vâk nasain a thawkrim bawk a niang, a vun pawh a sen uk khak alawm, a chèr reuh nèn, a pà ve reuh tlat.


"Kha, khawi lamah nge?" Putara'n a lo tih chuan ani chuan," Kan sawhthing hmun mawng lamah khuan ka zu vâk chhin teh ang, nimin lama a chêtna hnu an hmu a ni àwm a, naupanghovin min hrilh chùl mai a," tiin, chutah," Kha, a tla țha phian a ni maw?" a ti zui zat a. Putara chuan," Kâr hmasa lam ai chuan a zia ve viau tawh e,"lo ti vein," I rawn hlawhtling ngei dâwn nia," a ti zui ve zat bawk a.


Chakai chu, a bâwm chhiaah khân an tlâk țhat viau chuan hralh tùr a nei ngei ang, ngeiawm ru angreng viau mah se, Chakai chu ka ei châk tho, a manna hmun leh man dàn lah hei, hriat chian a ni bawk si a, thau pawh a lo thau phian maithei asin.


"Ka pu, Chakai chu hralh tùr i nei ang tiraw?"


Muangchânga rawn hawiin min rawn en a, a lukhum parh hlui ve zet tawh chu kuai dâk deuhin," I duh em ka tih khân 'Duh lo' ti khân min chhâng bawk si a, bâkah, ka aiâwt lo en rûk tum hnênah hian ka hralh duh dâwn em maw ni?" a ti leh ta nuah nuah a, a țawngkam kher kher chu, a ngeiawm ka ti tak zet a ni.


"Bâwm chhia emaw ka tih vàng a nih kha, khatiangin aiâwt pawh an tah ngai lo, mi aiâwt tah angin tah ve ta che, khatiang kha aiâwt pawh va ni suh, bâwm chhia a nih kha bâwm chhia," ka ti ta zêk a, min en kur mah se ka zak duh bîk lo, a thin pawh a rim maithei a ni; mahse, engah nge ani pawhin min puhchhiat viau mai mai ni? Ka thin a rim ru ve tho.


Ka rin loh deuhin a rawn nui ta huk a, chutah," Khawi lam naupang awm țha duh lo nge maw i nih le?" a ti leh a, chu thu chuan min tizak ve țêp a ni, ka ngawih rauh rauh phah hial.


"Eng zât man nge i duh?"


Chu thu a sawi hma lawka a thil sawi kha ka theihnghilh nghâl hmak. Min leitîr dâwn tihna a ni chiang," I phal zah zah a ni mai," phûr zet hian ka ti vat a, chakai ka hawn chuan thil dang, chawhmeh dang vak a ngai lo ang, chaw ka ei leh țeuh dâwn tihna a ni mai a.


Chawhnu lamah chuan keimah chauh chuan lui mawng lamah chuan ka tâp a, Pa Mawia a hman ve tawh si lo va; mahse, nuam ka tih loh phah chuang lo. Kaikuang pawh 10 vél zet chu ka man ve tawh a, mauthei sâtin chutah chuan ka dah ve rai mai. Pa Mawia ipte ka ahsakah pawh chuan Tumbu khailêng 6 vêl ka ak tawh bawk a, nuam ka ti tak zet a ni. Tuma puihna tel lovin chawhmeh ka han la khâwlve a nia, rilru a hlim veng veng mai.


Naupang lui kal ve pawh an awm a, an rawn ri chho nak nak a, ka bul an rawn thlen chuan min rawn en duh khawp mai lehnghâl a, an tân chuan hmel hriat loh kha ka ni miau si a, a àwm ve tho, kei pawhin anmahni chu ka hre bîk chuang hleinem; mahse, kei chu puitling ka ni tawh alawm, keimah chauhin ka ni sia, mak min ti pawh ni se a àwm tho.


Lungpui chungah chuan ka țhu dar dar a, ka Kaikuang man chu ka en leh țhìn a, nuam ka ti veng veng hi a ni tawp mai. Julian-a(Tatea) kha awm ve se nuam a ti ve ngawt ang chu, lui kal kha nuam a tih ve theih êm kha maw; mahse, tunah zawng nupui fanau neiin patling a ni tawh a, a teihawi mai mai hman tawh bîk lo, kei pawh hi pasal nei tawh ni ta ila chuan tuna ka awmnaah hian ka awm lo tawp ang le.


Umm, zawnglai nun hi chu a lo nuam ber a nih hi, kan free a, duh duhna lamah kan la teihawi thei a, duh duh zâwng kan la ti thei bawk, hun țha kan neih lai hian ãm takin hmang teh ang, kan hma hun lah kan hre lãwk thei hauh si lo.


Haw hun dâwn tak takah chauh Pa Mawiate chu ka han fin a, ani lah chuan," I kal bo daih a, i ril a țâm lo em ni?" a lo ti vat a, a țàm loh thu ka hrilh chuan a piaha lo țhu chuan," A âwihawm loh êm mai, lo țhu rawh, ka'n thlitsak ang che," a lo ti sawk sawk a, ka hnial hman hma chuan thingpui sen leh biscuits hi min rawn pe nghâl a, ka ril chu țâm viau lo mah se min rawn pe tawh miau si a, hnial ka duh ta bîk lo a ni.


"Sangha leh Kaikuang i man tam bawk em?" nui chung hian Pa Mawia chuan a ti leh a, chhâng lo chuan ka ipte ah lai chu ka pe a, nui vur vur chung hian a han en a," Hei, i man țeuh alawm, zanin chu i zârah kan tlai hle dâwn a nih hi," a ti a, thingpui min thlitsaktupa pawh chu a lo nui ve a.


"Luia vah vêl nuam i ti riauin ka hria, i rawn kal har mah mah a ni tiraw? Hei, leilet lah chu laih zawh a ni țêp tawh si a," a lo ti ve a, Pa Mawia chuan," A duh phawt chuan kan la rawn tlawh zauh zauh thei ang chu, a peih leh peih loh a ni mai," a lo ti thung a. Kei pawh chuan," Ka hman phawt chuan ka peih reng mai, bâkah, leileta buh leh thlai in chìnte pawh hmuh a châkawm alawm," ka lo ti ve a.


"Khîtah chhak lamah khian i kal chho em?" tia min zawh chuan ka lu ka lo thing mai a, thingpui min petu bawk chuan," Leilet leh huan țha deuh a awm a, Pu Lawmsiamte ta a nia, a nuam reuh khawp asin. Tih tak takin an ti ve a, engtiklai pawhin thlai hi an chîng reng mai a, khawpui lamah man man zâwkin an pe thla a, an taima bawk nèn, an awhawm tawh khawp mai, tui an nei țha bawk a, Sangha dîl zau pui mai nèn, sum pawh an la lût ve nual tawh asin, anni zawng an fing hmasa deuh a, a mãwlho hi chu kan fin hi a tlai raih mai a, mi hnukhâwiah kan han che ve țan chauh dâwn chu a nia," a ti leh bawrh bawrh a.


"A, tlai tak tak a awm hleinem, in han ti ve ang a, tui a harsa lo bawk a, kumtluanin in enkawl thei ang, buh ni se tlâng rama lo neih ngawt ai chuan a hlâwk a, thlai lah a țha duh dâwn si a," Pa Mawia chuan a ti ve a, kei erawh chu ka lo ngawi reng a, an titi erawh ka ngaithla kar thung.


"Ni e, han beisei chho ve ila... Tuna kan lo neih dàn angah hi chuan kâwla ni chhuak chhiara han thawh ve pawh hian a hlâwkna hi kan têl tam mawh viau mai si a, ei khawp deuh chauh hi kan thawk chhuak ve țâwk țâwk chu a ni a, leilet erawh hi chu chhawr ve viau tùrah inngai ve phawt ang," a ti leh bawrh bawrh a, a thil sawi chuan ka ngaihtuahna a tithui ve khawp mai.


Chite lui ațanga khua thleng chu Pa Mawia chuan Rickshaw chu a khalh leh a, chumi hnuah chuan min khalhtîr ve ta a, Pa Mawia khalh ngawt ai chuan ka khalh sawt lo deuh chuan ka hria, ka khalh muan deuh vàng pawh a ni mahna.


In kan thlen veleh Nu Siami, Pa Mawia nupui chuan ka thil hawn chu a lo phawrh a, Chakai leh Kaikuang a hmuh chuan a au ve chèl chûl mai. Chhum tùrin a siam nghâl a, thingpui min siam a tum chuan inbual ka duh zâwk thu sawiin ka room ka pan ta nghâl a. An inah hian 'Ka room' tia ka sawi țhin ka nei ve thlap a, ka zin apiangin ka chang chawt mai a ni. An fapa neihchhun room bulah chiah a ni a, mikhual an neih tam châng chuan an mikhualte pawh an riahtîr ve zauh zauh tho; mahse, ka awm chuan tu mahin an chang ngai lo.


Zanriah kan ei chu ka puar tak zet a ni. Chakai chu chhum niin a thau reuh hlawm viau mai a, Kaikuang erawh chu kan ro a ni thung a, a tui ka ti tak zet a ni, Tumbu erawh chu naktûka siam atân Nu Siami chuan a ti thung a, chawhmeh dang a tam bawk nèn, bâkah, Tumbu hi chu ka ngaina fahran lo va, pawi ka ti lêm lo, khawrh erawh kha chu nuam ka ti viau thung.


"I rawl chu i zia phah deuhin i hria em?" Nu Siami'n a tih chuan nui chung hian," Tunah tak hi chuan ka la zia phah chuang pawhin ka hre lo, nakinah a la reh ve mai ang chu maw," ka ti ve mai a, ka rawl hian tûn kâr hi chu a daih thei hialin ka ring; mahse, ka inchhîr chuang lo, nuam ka hlêp ve tho.


Vawiin lama kan țuanna pic chu kan chhûngkaw group-ah ka han post a, Ațanate pahnih pawh ka thawn tel ve zat a, Chakai leh ka Kaikuang man ngei mai leh ka Tumbu khawrh pawh chu tilangin a nawmzia chu ka han tilang tel bawk a, ka cousin-teho chuan an rawn like sap sap bâkah khawiah nge ka kal tih leh kal ve an châk thu leh Chakai an ei châkzia thu chu an rawn sawi tliar tliar a, an comments chu chhiarin intithei tak hian ka nui sûng reng a, an kal ve châk dâwn tih ka hre reng si a, chuvànga post pawh chu ka ni rêng a ni.


Ka patea erawh chuan *Khatianga vâk vâk lo khân pasal tùr ngaihtuah rawh, i nautehoin an neih zawh khalh mai ang che. I rawn haw hunah erawh Chakai kha rawn hàwn țeuh ang che* a rawn ti thung a, ani pawh hian Chakai chu a ei châk ve chiang alawm, ka nui pût pût a.


Ațana'n min rawn chhâng a, kal ve a châk thu leh Chakai chu ei ve a châkzia a rawn sawi kûr nasa mai. Intithei deuh hian *Kan in-free hleih deuh chu a ni tiraw?* tih ngawt hi ka va thawn lêt a, a haw ngawt ang chu.


Julian-a(Tatea) ve thung chuan min rawn call a, min rawn chhuahchhàl deuh nghâl a ni mai. Rei vak lo chhûng chu ka han insawi fiah ve kha, ani min chhuahchhàl hi chu a hming mai a ni, a ti tak tak teuh lo.


"I rawn haw hunah Kaikuang leh Tumbu kha rawn hàwn țeuh rawh aw, Hlimhlimi hian thisen vár a mamawh nasa a, 'Tumbu a țha' an tih kha maw, bazârah hian a vâng thei si a," a rawn ti a, kei pawh chuan,"Ka lo tum dâwn nia," chu ka han ti ve nain ka hawnsak thei ngût ang em ka hre lo, bike-in ka kal si a, chubâkah, Chiteah khân kan kal leh kher ang em tih ka hre chiang lo a ni.


Pa Mawia ka zawh chuan," Min zui leh peih chuan kal leh dâwn e; mahse, naktûkah ni lovin a tûkleh lamah ve thung a niang, nang pawh naktûkte chu i awm hahdam ve tawh rih ang chu," a lo ti a.


Ațana message chu ka chhiar leh a, ka nuih a za ngang mai.


*I fate'n kan fate chu an ngam dâwn lo nasa mai si a, ka khawngaih lâwk che, pasal i neih hunah meuh chuan keini chu kan fate pawh an lo fel thluam tawh ang a, nangin kan sùlhnu i rawn chhui char char thung ang a, chutih hunah chuan ka rawn hmusit țha duh lo ngawt ang che* a rawn ti duah a ni. Ani pawh hian kumin kum tìr khân nupui a nei a, Lizzy, rei ve tak a lo kawp tawh a ni a, an inneihnaah pawh ka intihthu viau kha maw. Kan țhianhoah chuan Julian-a'n a nei hmasa ber a, ani phei chuan fa pahnihna an nei leh hnai tawh nghe nghe, a hmeichhia berin ka la nei lo va, kum lamah ni se naupang tak ka ni tawh lo nèn, pasal nei tùra min han ti sek hlawm țhin pawh hi hriat thiamna chen chu ka nei ve tho mai.


Mahse, tu nge ka neih ang? Ka pasal tùra duh ka la tawng lo miau alawm, kei aia pà tak leh luhlul deuh tak ka tawn hunah chuan ka nei ve tawh mahna...


*BEISEINA LEH INRINTÂWKNA TEL LO CHUAN HMA HUN THLÌR THIAM HI A HAR ȚHIN, CHUVÀNG TAK CHUAN PHÙRNA NÈN A ÊNG ZÂWNGIN NUN HMAN TUM HRÃM HRÃM ȚHIN ANG CHE*


(He story hi MAGDALENE-a a changtupa TATEA țhiannu hmel țha leh nula hausa Lawmkimi lanna ve thung aw)

[Dingdi Pachuau]

☆OKHEE☆ - 2 By Dingdi Pachuau



Fanu mal leh chhûngte duat rawn ni mah ila sum lamah hi chuan ka nu leh pate chungah a pâwng apuiin ka innghat tlur bîk lo va, ka mamawh leina tùr chu ka thawk chhuak ve a ni, lehkha ka zir chhuah pawhin khu lamah inhlawhin ka awm ve deuh reng a nih nghe nghe kha. Tuna ka bike hman lai mêk ka lei pawh khân ka nu leh pa sumtlâng ka tihek hauh lo, chutiangin ka maniature rifle pawh, ka thil duh leh awh zâwng ka lei dâwn hi chuan tihbuai ka tum ngai bîk lo. Ka duh ti tùrin ka zalèn ve tâwk bawk a, ka nu leh pa ațang hi chuan complain ka dawng khât; mahse, ka pi erawh hi chuan min hre thiam lo lek lek fo.


"Hmeichhia i ni a, hna mumal i neih loh tal pawhin hmeichhia angin awm tum teh, nakin lawkah pasal pawh i la duh ngei ang, tuna i awm dàn ang hi chuan tu mipa mah hian nupui atân an duh thei lo ang che, hmel țhat ringawt hi a ni lo, inngaihtuah harh ve teh, i rualpui i țhiante pawhin nupui pasal an nei deuh vek tawh ngei ang, engtikah nge mâkpa hmêl hi kan hmuh ve dâwn?" a ti țhìn, a langah hi chuan ka nuih liam mai mai a, a rûk tak erawh chuan ka ning lek lek a ni. Hetia zalèn taka awm hi nuam ka ti a, ka țhiante'n kawppui an neih tawh avànga nei ve tùra han intih ngawt zêl hi ka ngaih dàn a ni lo deuh țhin a ni.


A tûkah chuan Lunglei khawpui ka fang kual a, țhian nei hek lo i, tun atâna ka țhian neihchhun ka bike nèn chuan kan tlãn kual a ni ber ang chu, Theiriat tlâng lama lêng tùr pawhin ka'n tlàn chhoh pek kha, chutah pawh chuan awm rei lovin hmun dang dangah ka tlãn kual leh a. A mimir hian hmeichhe bike khalh hi an lo hmu duh a niang ka ti mai, min en duh hlawm khawp mai. Ka lo nù fahran lo bawk nèn, ka lo hmuhnawm te pawh a ni ang e.


A tûkah chuan Pa Mawia chuan ei tùr ken a rawt ta a, Nu Siami chuan," Ni dâwn tak e, engati nge a hma pawh khãn ka lo hriat chhuah loh ni? In ril a țâm thei ngawt tak ang chu maw le, ka va han ngaihtuah tlêm tak!" a ti vang vang a, khua a lum theih êm avàng chuan in tùr leh a hmeh tlêm bâk ngai ka lo ti lëm lo a nia; mahse, Nu Siami chuan eng eng emaw ni min kentîr nual mai, 'Pa Mawia'n a ei țeuh duh tâkah' tiin ka sawisêlsak duh chuang lo va.


Rickshaw bawk chu kan keng leh a, ka khalh leh bawk. A khalha chuan kha chu, min dìm lo thei êm mai. Ka khalh țhang lo bawk a, kawnga khuar deuh lo awmah chuan ka tlàn luhpui leh țhìn a, ka tlàn luhpui apiangin ani lah chuan," Khuara tlàn luh i huai hle mai," a ti ve ziah a, a nui zui huk huk bawk a, fiamthua min lâksak țhin avàng chuan tlêmin ka zak lo ve deuh ringawt a.


Chite lui kan thlen veleh kei chu lui lamah bawk chuan ka kal leh nghâl a, vawiin chu Tumbu khawrh țeuh ka tum a ni, Julian-a'n min chah bawk a, bâkah, ka nute'n ka chawhmeh hawn ngei mai ei ve se ka duh a ni. Vawiin phei chu sangha suahna tùr ka siamchawp ka keng bawk a, a tê pawh sawi lovin ka hmuh apiang chu ka suak hmiah hmiah bawk ang.


Tumbu khailêng ka zawng phawt a, ka lâk khâwm sa ka kheh mawlh mawlh lai chuan Pa Mawia chuan," Lawmi, lui mawng lamah kan chhuk lawk dâwn a, i lo kal ve dâwn em?" tiin min rawn ko a, Tumbu khawrh ka duh rih avàng chuan ka hnial a, ka kheh chhunzawm leh mawlh mawlh a, ka vawm khâwm ve nual hman asin, helai hnai khuaa mite hian an duh lutuk lo a ni maithei, kei takngial pawhin lâk tùr ka hmu tam ve êm mai.


"I la ringawt a, a neitute i dîl em?"


Chu aw thûm dût lo chhuahna lam hawi chuan ka inher vat a, mit khap hauh lova min lo en rùntu hmel leh a aw chu a inhmeh khawp mai, lukhum parh a khum a, hnathawh thuam inbelin ipte lian deuh tak a ak bawk a, a vun sen uk deuh khak ațang chuan hna a thawk nasa a nih ka'n ring ve deuh ngawt a, ka Tumbu kheh lai chu tàwpsanin ka ding chhuak ta nghâl a.


"Neitu an awm tih ka lo hre hauh lo va," ka ti ta ringawt. A ni thei ngei ang, a tam angreng si a, a neituin a lo humhalh vàng a lo nih dáwn chiah chu, kei lah chuan ka lo hre hauh si lo, ka lo la khâwm ve hmiah hmiah ringawt a.


"Awm e, nakinah a lo kal ang, thil awmzia i lo hrilh fiah ngei chu a ngaih hmèl," a tih leh chuan ka hawi kual a, Changel kung lah chu ka kit hnawk rum mai bawk si a, a neitupa chuan a hre lo thei lo ang. Nia, ka tih a nih miau chuan ka lo hrilh fiah ang a, ngaihdam pawh ka lo dîl mai a ni ang chu.


"Aw le," ka ti a, rilru nuam zân lo chuan ka ding reng a, ani pawh chu ka bul lawkah chuan a ding ve rùn bawk a, kan chhak deuha JCB-in leilet laia a khâwl a tiri vut vut bâk chu thãwm a awm lo. Ka melh zawk a, ani pawh chuan min lo la en rùn a, nui hmêl pu lovin a hmêlah chuan nèlawmna hmuh tùr a awm lo ve khawp mai, kan inang ngawtin ka ring.


"Eng atân nge i tih?" a rawn ti leh nghut a, Tumbu a sawina a nih ringin," Chawhmehah," ti ringawtin ka chhâng a, kan inchhâng tâwk khawp mai, ka hmui chu petin ka kut chu ka elh pah nep nep a, min kalsan tawh se ka ti tak zet a ni.


"Kan chhak deuhah khian a tam asin," a ti leh a, kei erawh chuan," Mi ram chin a ni leh tho ang," ka lo ti thung a, tuna ka lâk pawh hi tam lutuk chu ni lo mah se chhûngkhat ei chu a tling tawh hrim hrim a, la duh viau mah ila mi dìl kuala ngaihdam dìl leh ai chuan lâk tawh loh mai ka duh tawh zâwk.


"Tu tâ mah a ni lo," a tih leh tãk zêlah chuan ka en leh a, fiamthu hmêl pawh a put loh avàng chuan," Tak tak a ni em?"tiin mit khap hauh lo hian ka en a. Țawngkaa min chhâng lo chuan a lu a bu nghat a, chuti a nih chuan khawrh belh leh chu a pawi lo ang, Julian-ate pawh hawnsak ka ngaih kha maw, tam lua a awm nâng.


Ka zui chho ve ta a, ani zawng a lo khawrh țhang bawk a niang, la khâwmin a rawn theh khâwm zung zung mai a, kei angin a kheh ve lo, a tâwk àwma a rin angah chuan a tan hmawk hmawk a, kheh vak pawh ngai lo chuan a no chin chu a inkheh nghâl zêl mai. Mak ti ru takin a tih dàn chu ka en a, ka apply ve nghâl bawk a, a lo awlsam bîk viau a ni, kutah pawh a hnái a kai ta lo deuh. A kheh sa chu a ak mai dâwn emaw ka tih lai chuan," La rawh," a ti a, chhak lamah chuan min chhohsan nghâl daih a.


Tumbu ka iptea ka han khung chuan ka rin aiin a lo tam tawh a, khawrh belh pawh a ngai tawhin ka ring lo, ka duh tâwk ta deuh dèr. A chhohna lama chhoh ve chhin ka châk avàng chuan ipte chu kawng sîr deuha dah rihin sangha suahna ka ken nèn chuan lui hnâr lam pan chuan ka chho ta a, pên 20 vêl lek ka kal hnu chuan leilet zau deuh leh huan nawm hmèl zet hi ka han pawh zui ta nghâl a, ka hawi kual nasa mai, in ni àwm tak pawh ka hmu a, kawngka pawh a lo inhawng huai a, awm an awm a ni ngei ang.


A neitute chu chhûng rual tak an nih loh pawhin mi taima leh sum nei ve tak an nih ka ring, a chhan chu leilet chu a zau țha si a, chubâkah, huan zau deuh a la awm zui bawk a; mahse, mi pakhat chauh tâ a ni lo ve thei tho bawk. Huan chu fan kual chhin a châkawm ka ti kher mai, ka kâwlhrâwng viau nain hmel hriat pawh ni miah lote huana han vah kual chu ka ngam bîk dèr lo, ka thlîr kual ka thlîr kual ringawt a, a hnu deuhah erawh chuan luia sangha suah tum chuan lui chu ka pan ta zâwk a.


Luiah chuan sangha chu an lo tam ve mai a; mahse, an tê lulai êm a ni, Kaikuang pawh ka han bih ve deuh a; mahse, ka hmu lêm lo. Ka veh dân dân a, vawilehkhatah ka han suak thut mai a, pathum chu ka suak ve mai bawk a, tê viau mah se nuam ka ti ve tho. Changel hnah sâtin ka khãwr pum deuh a, chutah chuan ka sangha suah sa chu ka dah a, a dang suah leh tum chuan ka inring leh ta nghâl a.


Man khâwl tam erawh a har ve khawp mai. Sawmhnih dâwn ka suah hnuah pawh chuan a lang tam thei chuang lo va, chutih lai chuan thlang lam ațang chuan an rawn ri chho nak nak a, lui chu an rawn zawh chho ve a lo ni a, tleirãwl pathum lai hi an ni nghe nghe.


Min rawn hmuh chuan kei pawhin ka lo en ve reng tawh a, an zînga pakhat chuan," E, JE Pu Mawia ruala rawn kal ve, Bike khalh kha i ni tiraw?" a rawn ti ta hluai a, ka chhàn hma chuan ka melh kual tê tê a, țawngkaa chhâng lo chuan ka lu ka bu ringawt a, chu pa vêk chuan," Pà kan lo ti reuh khawp che a, mipa hi chuan kan khalh ve thei mai a, hmeichhe lam hi chu, kan lo ngaihtuah phâk miah lo. Hmeichhe tlãn hmasa ber i ni ngei ang, kan ngaisâng tawp che aw," nui chung hian a rawn ti leh a.


Kei pawh chu ka nui ve sak a," Ka lâwm e," ka ti a, an zînga chêr ber chuan," Sangha i suak elo? A vàn tehlul nèn! I man tam phian a," tiin sangha ka dah khâwmna chu a rawn bih a, mi dang pawh chuan an rawn en ve a, kei chuan," A vâng tho nain a nuam ve êm a," ka lo ti a.


Min be hmasa bertu chuan," Dîl sangha kan man dâwn asin, chutia man nuam i tih chuan lo kal ve la?" a rawn ti leh a, chutah, min rawn enin,"I lo kal ve peih phawt chuan a thlàwnin Kg 1 i hàwn dáwn nia, Bike i khalh thiam manah hrim hrim pawh pêk i phû," a ti leh a.


A thlàwna sangha hawn châk vàng ni lovin sangha man ve ka châk avàng chauh chuan ka zui chho ve leh ta ringawt a, sàwm chu ka awl an ti ve ngawt ang; mahse, chutiang chu ka ngaihtuah duh lo, nuam kha a ni ka duh zâwk chu.


Sangha dîl pawh chu an lo nei zâu khawp mai a, sangha pawh a tam khawpin ka ring. An țawng duhin min be pah reng a, kei pawh titipui tùr ka nei chu nuam ka ti khawp mai, chubâkah, sangha kan la man dâwn zui a, vànnei teu teu tak hi ka ni, min pe ve dâwn lo mah se sangha mannaa min sâwm chu ka lãwmin ka hlim tâwk viau tawh a ni.


Nuam ka ti lutuk a, hun pawh ka lo ngaihtuah hauh lo niin, Pa Mawia'n min rawn bia a, ka awmna min rawn zâwtin chhùn thil ei a hun tawh tih min rawn hrilh chuan ka dinhmun chu ka hre chhuak ta chauh a ni, ka awmna chu hrilhin," Aw, ka rawn chhuk thuai ang," ka ti a, chutia ka hmel hriat hauh lohte bula nuam ka lo ti lutuk chu ka inthiam lo leh hnuhnawh ta deuh a. Kan inbiakna chu lo hre ve vek hek le, min pêk tùr chu an han thlang nghâl a, hnial lui viau mah ila min hawntîr lui ta tlat tho a, man tam viau tho mah se min pêk ai hi han hralh ta se an hlâwk daih àwm si a tiin ka ngaihtuah nauh nauh a, an chunga ka làwm viau rualin zahthlâk ka ti lek lek a ni.


Kan ințhen dâwn chuan," Naktûkah lo kal leh la?" an ti sap sap a, kei erawh chuan," Pa Mawia hi a rawn kal tawh lo ang, bâkah, kei pawh ka haw phei a ngai tawh dâwn a," ka ti ve thung a, chêr ber chuan," A nih tak chu, lo la zin leh la tiraw? Chakai khawrhin Kaikuangte pawh kan hrût ang a, a nuam viau ang," a ti a. Min be hmasa bertu ve thung chuan," Kan lo inhre har deuh hlek a ni, i lo zin leh hunah chuan Kg 10 i hàwn tawh ang, kan lo vulh lian char char ang e," nui chung hian a lo ti ve thung a.


Tichuan, hming pawh inhrilh chuang miah lo chuan kan ințhen ta a, Pa Mawiate ka zuk fin chuan," E, dîl sangha i man elo?" a lo ti vat a, thil awm dàn ka sawi chuan," Lei tùr an nei ang a?" a ti leh nghâl vut a, a bula țhu Pu Țhuama chuan," Nei țeuh ang, kan dîl dâwn nia," a lo ti a.


Ei tùr kan kente kan ei zawh hnu chuan sangha lei tùr chuan kan chho leh ta dial a, an lo man zo tawh a, min lo hmuh chuan min lo be leh nghâl bawrh bawrh a, sangha chu lei tùr chu an lo nei na meuh mai. Pa Mawia chuan Kg 3 lai a lei a, an leilet leh huan vêl chu en kualin," A hmun a remin thawh pawh in thawk nasa hle mai maw? Chhawr pawh in chhawr dâwn hi le," a ti vang vang a. Min be hmasa bertu chuan," Thawk nasa ve e, chhawr pawh kan chhawr viau bawk a ni," a lo ti a.


Kan chhuk dâwn tawh ringin thlâm ațang chuan ka chhuak a, chutah, chawhma lama Tumbu min lâkpuitu kha chhak lam ațangin a rawn lang ve leh hlawl mai, thlâma a luh hma chuan chuan," Sêna, in man zo tawh maw?" tiin a zâwt nghâl a, thlâm chhûngah chuan a lût ve nghâl a, Sena'n a chhàn hnu chuan Pu Țhuama chuan," Hminga chu, i lo kal ve reng a ni maw? Khawiah nge in hna thawkte kha an awm tâk a?" tiin a zâwt a, a hming chu Hminga a lo nih àwm chu, pa a nih tawh loh tâkah, chutiang ni lova a la tlangvâl a nih ngat chuan a senior ve tawh ngawt ang chu, a nèlawm loh ve bawk si. Chutiang ka lo ngaihtuah kual lai chuan a aw thûm deuh dût chuan," Tunah tak hi chuan Lunglei lamah an awm ve rih a, kárleh lamah hi chuan an rawn chho ve mai tawh tùrah ka ngai," tiin a chhâng a.


Thlâm chhûng ațang chuan Pa Mawia chuan," Lawmi, lei belh i duh lo maw? Hawn phei atân i duh lo em ni?" a rawn ti a, kei chuan," Hawn phei tùr ka ngah tawh êm mai," ka lo ti thung a, bike chuan eng vak phurh theih hek loh le, Tumbu ka hawn chuan a tâwk a ni mai.


Kan kal dâwn chuan Senate chuan," Lo zin leh thuai rawh aw," an ti nak nak a, nui sak chung hian," Teh rêng mai," ka ti lêt ve a, Pu Țhuama chuan," Nula hmel țha hi chu in hre ve teh mang e!" tiin a fiam hlawm a, anni lah chuan fiamthu bawk hian," Kan mit a del bîk hleinem," an lo ti ve a, chutah, Sena ber chuan," Naktûka i haw tawh dâwn si chuan, mangțha le, tluang takin i haw dâwn nia," a rawn ti leh a, ka hawi lët a, thlâm bathlàrah chuan dingin min lo en țhap reuh a, ka kut chu vaiin," Aw le, ka lâwm e," ka ti a, ka kal ta nghâl a.


Kan chhuk thlâk lamah chuan Pu Țhuama hnênah chuan," Pa Țhuam, Tumbu ka lâkna, kan rickshaw dahna chhak deuh mai kha tu ram nge?" tiin ka zâwt a, ani chuan," Kha lai vêl kha chu Pu Zika ram a nia, tuna kan awmna lai vêl hi Pu Chhuana ram a ni leh thung a," a lo ti vat a.


"Pu Zika chu a lo kal ve em?" ka tih chuan," Lo kal ve lo'm ni? Ka hmuh ve ngei kha, eng thil nge ni ta a?" a lo ti leh vat a, kei chuan," Amah dîl hmasa lovin a Changel kha kitin, a ram chhûnga Tumbu kha ka la țeuh si a, amah a awm remchàn chuan thil awmzia sawia ngaihdam dìl ka duh deuh a," ka ti a.


"A ngai kher dâwn em ni? Tu ram pawh ni se Tumbu chu lain Changel pawh kan kit fo alawm, tu mah kan indîlin kan inhrilh hre ngai kher lo," a lo tih leh chuan," Nichina sangha kan leinaa Pu Hminga khân,'A neitute i dil em? Thil awmzia i sawi fiah a ngai ang' kha a ti sia, ka rilru a lo nuam lo deuh hlek a," ka ti ve thung a.


A rawn nui chhuak ta hawk hawk a,"A tihder che a nih chu, nangin i lo âwih ve bawk a," tiin a nui leh a, chutah," Hminga tihder theihin i awm ve tlat mai, nuam a tih viau dâwn chu," a ti leh a, Pa Mawia pawh chu za deuh hian a lo nui ve a, kei erawh chu za lo zetin ka țhen sak sak ringawt, ani tihder theiha ka awm chu ka hlim tehchiam lo.


Zanriah atân sangha min pêk leh ka man ve hlek chu Nu Siami chuan a chhùm a, a lian chu a thau țha bawk a, tui ka ti khawp mai. Vawiina kan hun hman dàn mitthlâa hmu rauh rauh pah chuan Nu Siami bulah chuan ka hrilh ve luam a, Pa Mawia chuan," Nuam a ti lutuk a, thil ei nachâng pawh a hre lo maw le, chutah, thingtlângpa tihder theihin a la awm zui a," tiin a nui zui hawk hawk a.


"A ti tak êm alawm, a sawi laiin a nui bawk si lo va," ka lo ti thung a, tlêmin ka lung a la awi lo deuh reng, kal leh hun a awm a nih ngai chuan min tihder tawh hauh lo ang maw le; mahse, ka kal leh tawh pawhin ka inring lo zâwk, kalna chhan tùr ka nei tawh tlat lo. Chakai khawrh leh Kaikuang hrùt kan tum tehlul nèn, Sênateho kha ka ngaihtuah chhuak fo ngei dâwn a nih hi, ka haw phei hunah chuan hna ka ngah tawh dâwn si, zin pawh ka zin hman tawh ngût lo ang.


A tûk tûkțhuan ei khamah chuan muangchângin haw tùr chuan ka chhuak a, Tumbu chu ka theih anga tam ka ak a, a rit duh khawp mai; mahse, ka ui ve bawk si a, Bike ka lo keng kher kher chu ka inchhîr ru khawp mai, tihngaihna lah chu a awm dèr mai si lo.


Tlàn reng na nâ nâ chuan ka thleng ve mai bawk a, ka nuin ka Tumbu hawn a hmuh chuan," E khai, a tui ngawt ang! Zanriah hmehah siamtîr nghâl ang," a lo ti vat a, ka pa erawh chu inah a lo la awm lo va, lo awm se chuan min han fak thiam leh dâwn teh asin le. Pa Mawia phone-in in ka thlen thu chu ka hrilh ve a, ani pawh chuan," A țhat hlauh chu, kan lo ngaihtuah khawp che a, i awm lo ta erawh a hriat, a reh khawp mai, i nu Siami'n a sawi reng che a," a rawn ti ve barh barh a.


Julian-a pawhin a Tumbu tùr chu a rawn lam nghâl a, a hlim hmêl hmuh a nuam khawp mai. Min nuih var var pah chuan," I tilàwmawm khawp mai; mahse, min hlêp nasa bîk e, a nuam ngawt lo maw?" a ti sar sar a.


Ka hun hman dàn tlângpui chu ka hrilh ve a, nui chung hian," Bialpa va chhar la a țhat tehlul nèn, nuam bâkah hlâwkna ropui i va chhar dâwn tihna a ni a," a ti leh a, kei chuan,"A khai a, thingtlânga awm tùrin min duh tihna a ni maw? Thingtlângnu ka ni daih dâwn tihna a ni asin, ka duh lo, ka chhûngte nèn kan inhlat lutuk palh ang," ka lo ti ve thung a.


A haw dâwn chuan," Ka lãwm lutuk aw, làwmman atân naute kan neih hunah a hming i sa dâwn nia," thutak zet hian a ti a, rang zet hian," Ka phuah loh vaih! I thu sawi i sût thei tawh lo, promise?" ka lo ti thung a, kan han nui leh rih a.


Zànah chuan ka chàu deuh bawk a, ka mu hma khawp mai. Ka muthilh hma zawng chuan Chite luia ka hun hman dàn zawng zawng kha ka ngaihtuah chhuak leh a, khatiang hun kha ka tawng leh ang em? Thingtlângah chuan khatiang hun kha an ni tin nuna bet tel tlat a ni àwm si a, nun kan inchen hleih bîk teh e. Helaiah chuan sum neih loh bîk hlau rêng rêngin mi tin deuhthaw hi kan phu dàwr dáwr mai a, ni sa hnuaiah thlansa phûl kaiin hna thawk ve lêm lo mah ila rilruin sum a chhût reng a, hlimna tak tak a vâng ka ti a ni. Sum neih țûn chauh hi hlimnaah kan ngai ni deuh ber maiin ka hria; mahse, ka ngaihtuah zêl a, Chite luia hun rei lo tê chhûnga hlim taka ka hun hman, leh nuam ka tihna thinlung kha sum tam tak hian a lei pha hauh lo tih ka hre chiang ta khawp mai.


Mumang lamah pawh ka hmu nawk nawk mai alawm, ka nuin min rawn kai tho a, ka lo mu tui bawk a niang, ka thawh chuan dâr 7 a pèl vah tawh mai. Vawiin ațangin hna ka thawk char char tawh dâwn, ka duhna lamah ka thêulêu kual nasa ve tawh a, eng mah sawisêl thei ka ni tawh lo.


Ka pa nèn a office-a kan awm laiin Hlimhlimi'n min rawn bia a, Tumbu ka hawnsak avàngin làwmthu a rawn sawi a, kei erawh chuan," In pain a sawi tawh kha, duh tâwk tawh teh ang," ka lo ti a.


"Kan inhmuhna a rei tawh sia, hmuh i châkawm tawh khawp mai, kan sawi kan sawi che a, i hman hmasak berah rawn lêng rawh aw, chaw i rawn ei nghâl bawk ang a," a rawn ti leh siam siam a, kei pawh chuan," Nia, tûn hnaia ka hman loh pawhin ka rawn tum lui tho tho ang E taka, naute lo pian hunah a hming ka sa dâwn, in pain min tiam vek tawh a nia," nui chung hian ka ti a.


"Nia, nizàn khân a sawi a, amah lah chuan,' Hming mawi lo deuh a phuah loh hrâm ka beisei,' a la ti zui a," tiin a rawn nui hak hak a, kei pawh chuan nui chung vêk hian,"A mawi vak lo ang, mipa a nih phei chuan ka sa duhdah khawp ang," ka ti ve a.


Nilêngin ka pa chu ka pui a, puitu dang awm tho mah se a thawhrim dàn tùr chu ka hriat thiampui ta ruak mai, a rûkin ka khawngaih a, theihtâwpa țanpui duhna thinlung ka neih phah ta bawk. Ka duhna lama ka thêulêu lai pawh khân eng mah sawisêl lovin min remtihpui vek kha a ni a, a dinhmun ka ngaihtuah hian ka zah tharin ka hmangaih zual ta sauhin ka hria.


*HLAWHTLINNA KAWNGAH HIAN THURÛK A AWM THEI LO, HÊNG - INBUATSAIHNA ȚHA, THAWHRIMNA LEH HLAWHCHHAMNA AȚANGA INZIRNA RAH CHHUAH NGEI HI HLAWHTLINNA CHU A NI*

[Dingdi Pachuau]

☆OKHEE☆ - 3 By Dingdi Pachuau


Mahse, zêp lovah chuan ka tui hlawl lo, free theih loh hi hrehawm ka ti a ni. Part-time ang zâwng te hian enkawl theih se ka ti, chawhma chhûng hi thawkin chawhnu lam erawh ãwl ve ta thung ila...


Kâr khat chhûng regular taka ka pa ka zui ve hnu phei chuan ka duh aiin ka ning mah mah tawh a ni; mahse, ka pa bulah chuan ka sawi lang duh mai bîk lo, a rilru ka tina ang tih ka hlau a ni. A neih chhun ka ni a, a hnung zui tùrin min beisei a, chuta kára keiin ka nin thu ka sawi hlauh chuan a rilru ka tihrehawm ang tih ka hre ve kar a ni. Dàwra ka awm lai kha chuan tlêmin a zia deuh, hun thâwl ka neih bâkah ka duh hun hunah ka chhuak thei a, tuna ka hun hman dàn nèn hi chuan inthlau tak a ni ringawt, Bawkbàwn leh vàn ram ang vél a ni!


Sunday chawhnu dâr 3 pelhah Julian-ate inah ka han lêng a, an nupa leh Bawihtei an lo awm a, Heidi awmna ka zawh chuan a pite bulah a kal ve a ni awm e. Hlimhlimi pawh a lo puar ve tawh khawp mai, ka han fiam leh hlak a, a tih dàn ngai téin a nui sen sen ringawt, a duhawm reuh asin, a inzo lo viau tawh a; mahse, amah tê hi a hlim thei reuh a, hlim takin min chhàwn ve ziah.


"Zanin chu chaw ei ve nghâl rawh aw," a tih chuan," Ei tùrin alawm a rawn chhoh le, kan chàr nghâl ang," tiin an pa Julian-a chu a lo inrawlh vat a, melh ralh pah hian," Ka nute bulah ka sawi sa si lo va, a tihchi loh ang," ka lo ti thung a; mahse, ka ei ngei dâwn tih chu ka hre sa vek tho, a mawiah ka hnial ve mai mai a ni.


A hnu deuhah chuan Julian-a nèn chuan kan titi a, a chângin Hlimhlimi a rawn inrawlh ve zauh zauh bawk a, kan hnathawh leh dàwr chungchâng kan sawi deuh ber. Julian-a'n,"Rilru nghet deuh hleka i thawk ve ta hi làwmawm ka lo ti khawp mai a, i pa pawh a rilru a hahdam tawh ngawt ang," a tih chuan ka thaw hak a.


"Nia...mahse, ka tui ve lo, dàwr lama awm kha ka duh zâwk a, ka pa rilru tihhrehawm ka duh loh vàngin ka sawi lo mai mai a ni, awmna ngaia awm tlawt tlawt hi ka ngaithei ve lo," ka tih chuan a nui hawk hawk a.


"A va buaithlâk dâwn ve...mahse, tih dàn ka hria, duh deuhtu che ka hria a, chu chu pasalah nei mai la, kawng engkimah a chhâwk thei ang che, a fel teh a nia," a tih leh chuan," Khai a, tlangvâl hi min zawh min zawrh lo teh u, nupui min neihsan hnu hian senior ta viauah min hmu tihna em ni? Nge hmu zo ve ta lo viauah min ruat zâwk?" ka ti ta bawrh bawrh a.


Ani lah chuan," Chutiang chuan ka ngai lo che; mahse, mipa lam hi chu ngaihven ve deuh la chu ka ti, mo kawr i'n ha tùr hi ka mitthla thiam hauh lo va, hmuh i châkawm tawh alawm," nui chunga a tih chuan ka ner khum sak a, chutih lai chuan Bawihtei chuan Theihai hmin zai sa, tui hmel zet hi kan hmaa dawhkànah chuan a rawn chhawp a," U Lawm, ei rawh, a tui teh a nia," a rawn ti a, kei chuan," Tui ngawt ang, ka ei zo vek dâwn," nui chung hian ka lo ti a.


A kal sawn hnu chuan zàwi tê hian," Mi zawng zawng 'U Lawmi' i nih hma hian pasal chu i neih a ngai," a rawn ti leh kher a, rum zeta melh hian theihai zai lèp chu lain ka hmawm ta daih a, a lo thlum tui kher lah tak a," Tui lutuk! Ka lei ka lem lo chauh a ni," tiin a dang chu ka la leh zat a.


"Ka ti fiam miah lo a nia, i hmel a țhain i tlâwntlai pawh a țha a, nula lehkha thiam i ni bawk, in chhûngkaw dinhmun sawi tel lo pawhin i mihring mihrinna ațang pawh hian i duh duh tlangvâl thing thei i ni, pasal i duh rih loh pawhin ngaihzâwng tal hi chu nei ve tawh la ka ti a ni," thutak zet hian a ti leh a, ka chhâng lêm lo, ani anga mipa țha ka tih leh ka duh hi chu hmu ila chuan ngaihzâwng pawh ka nei ve mahna le! Mahse, țhian kan ni a, sawi chi a ni hauh lo, tunah phei chuan nupui pawh țha tak neiin fa duhawm tak a nei tawh bawk a, ka duh ru reng țhin a ni tih hi a thâwi hlek pawhin a hre tùr a ni lo.


Chaw chu ka'n ei ve leh tâk ngawt kha. An chhúngkua an fel si a, an bula awm hi a hahdamthlâk țhìn a ni, Heidi nèn chuan inkàwmin, Nonoi pawh a serh zînga mei ang a ni, min han en vang vang a," U Lawmi chu i hmel țha e," a han ti leh khauh țhin mai hi chu, min tizak ve lek lek țhin, naupang mai chu a la ni na a, tlangvâl min chhaih ai mahin ka zak zâwk maw le!


Ina ka haw chuan a tlai ve tawh riau a, kei chu ka țawng duh êm avàng leh titipui tùr ka mamawh țhin avàng hian țhian leh țhenrual hi ka ngaina a, an bula awm hi ka kham lo țhìn a ni. In ka thlen chuan ka nute pawh chu an lo la mu bîk lo va, ka pa chuan,"I puar thei maw?" a lo ti vat a, ka nu ve thung chuan,"Mi ina chaw ei hi awlsam viau lo teh, i pa nèn chuan chaw ei tui a har thei si," a lo ti ve thung a.


"'Mi in' han tih tùr a ni chuang hlei nem, ka țhiante in alawm," ka tih chuan ka pa pawh chuan," Ni e, a in pakhat ang ve tho alawm, Julian-a leh Ațana hi chu Bawihtei țhiante an nih vàng hian fapa angin asin ka en, Bawihtei nuțate ang an ni a, nuțate ina chaw ei chu a pawina a awm lo," a lo ti ve leh a, ka nu chuan a sawi zawm tawh lo,ka pa hian min lo țan zâwnga thu a sawi tawh hi chuan ka nu hian hnial kalh zâwngin țawng a cheh tawh ngai lo. Hei vàng tak hian ka pa thu hnial leh a duh loh zâwng tih hi ka hreh țhìn a, tunah pawh a bulah hna ka thawk hrâm hrâm a nih hi.


Thla hnih zet rim taka ka thawh ve hnuah chuan ka tui lohzia ka pa chuan a hre chiang chêk a niang chu, dàwr lama awm tùr chuan min ti ta nge nge a, ka làwmzia mai chuh; mahse, ka hmëlah ka tilang ngam lo va, a rilru a nat ka rin avàngin. A bulah chuan," Nangmah chauh chuan i buaiin i hah àwm si a," ka ti ve ngial a, ani erawh chuan," E, ka buai chuan min pui tùr an tam alawm, tui lo chung chunga i thawk hmel ka hmuh hian ka khawngaih che a ni," dam duai hian a lo ti a.


"Pa, ka hmêlah a lo lang viau elo?" inthiam lo ru angreng taka ka tih chuan," A, i pa ka ni a, ka fanu chuan a rilru sawi chhuak kher lo mah se a rilru chu ka hre thei ve bawk ang chu," tiin duat tih hriat tak hian min en a, chutah," Min hnial miah lo leh hrehawm ti chung chunga i thawk peih hi ka lãwm tâwk tawh viau a ni, i hlimna hi ka duh ber a ni alawm," a ti leh charh charh a.


Ka làwm êm avàng chuan ka kuah châk châk a," Pa, ka lãwm e, puih i ngaihna chu sawi hreh chuang lo la aw, țha takin dàwrah pawh chuan ka thawk ang," ka ti ve a, pa min hre thiamtu leh min hmangaiha min duat êm êmtu neih hi a lo hlu tak zet a ni.

*******

Ruah a sùr avàng chuan nihliap khumin dàwr lam chu ka pan a, August thla a ral țêp tawh a, ruah erawh a la sûr duh tlak tlak khawp mai. Ka pa hnêna ka sawi tawh angin dàwrah chuan ka kal regular hle a, tlai pawh ka tlai ngai lo, thawk hi an awm ve nual a, min han zah der ve viau nain ka țawng duh bawrh bawrh bawk a, min nêl ta viau rêng a ni. Min zah tùrin ka duh lo va, anmahni ang chiahin min enin min kàwm thei se ka duh a ni.


Kawnga ka kal lai chuan ka hminga min ko ri ni àwm tak hi ka hria a, ka han hawi kual a, min rawn ko tùr àwm hmêl ka hmu si lo, chubâkah, ruah a la sûr zui a, ka hriat sual palh pawh a ni ve mahna, motor tlãn ri nèn, ka hming ang nei mi dang an kohna pawh a ni thei tho bawk a.


Ka ding leh ta dat a, a chhan chu ka hmel hriat tawh hnu ka hmu tlat a ni, ka hawi lêt leh a, ka en nawn leh ngat a, ani pawh chuan nui var var hian min lo en ve reng a, ka pan hnai ta vat a.


"Min rawn ko ri ang deuh kha ka hriain ka hre rêng a ni, eng nge i lo tih a? Engtikin nge i lo kal?" tiin Sêna chu ka be nghâl sawk sawk a, heta ka hmu hlawl mai hi mak ka ti ru viau a ni tih pawh thup ka tum lo, amah pawhin a hre ngei ang.


"Ka rawn ko che a; mahse, ka zak leh deuh a," tiin a nui leh sak a, chutah," Ka pu rawn entîr tumin nimin khân kan rawn kal a, U Lawm, nang a khaw neitu i nia, doctor țha deuh i hre ngeiin ka ring, min kawhhmuh teh," a ti leh a, beiseina mitmeng nèn chuan min en chho ràn a.


Car la tùrin ka haw leh rih a, ka pa hnênah pawh chuan thil awmzia chu ka hrilh nghâl bawk a. Sénate lama ka tlàn leh chuan tum loh deuhin an bulah chuan Hming-thingtlânga chu ka hmu tel ve a, mak ti ru viau mah ila eng mah ka sawi lang lo, an titi dàn ațang chuan Sêna putea a ni tih ka hre thei ta bawk. Ta mai mai chuan, an inchhùn kha chu ka ring ru sa hrim hrim a; mahse, chutianga an inhnaih chu ka lo ring miah lo. Sêna pu, Hming-thingtlânga pa ni bawk chu nilêngin ka buaipui ta a, hruai an ngaihnaah hruaiin thil țûlah ka tei kual zak zak a, ruah a lo sûr ve reng bawk nèn, chêt sâwt erawh a har ka ti. Sêna ka chunga a țhat êm avàng khân a țhatna chu țhatna vêka rulh lêt ngei ka duh, sangha a thlàwnin min pe a, ka va zin chhûngin hlim takin min kàwm a, kha ka hlimna kha sumin a lei thei lo tih ka hre chiang hle si a, theihtâwpa lo buaipui ve hi ka tih tùr chu a ni.


Sêna leh a pu chuan làwmthu min hrilh nasa khawp mai a, kei erawh chuan ka tih theih ve tâwk a nih thu hrilhin," Làwmthu sawi a ngai rêng rêng lo," ka ti thung a, Séna chuan," Nula hmël țha hi chu fel pawh an lo fel duh a nih chiah hi," tiin nui chung hian min fiam a, a pu pawh chuan a lu a lo bu nghat nghat a; Hming-thingtlânga erawh chu a ngawi kur reng thung.


An haw hun tùr ka zâwt a, Séna'n min chhàn hnu chuan," A nih chu tak chu, haw in tum hma hle mai maw, in haw hmain kan inah chaw rawn ei thei ula a țhat tehlul nèn! E, tih dàn ka hria, zaninah rawn ei ta che u, in riak nghâl bawk ang a? Séna, a țha dâwn lutuk tiraw?" ka'n ti nghâl zat a, ani erawh chuan," A, a tihchi loh ang, kan thlennaah chaw pawh min lo chhum kêp vek tawh ang, bâkah, a zahthlâk ve alawm le," a lo ti thung a.


"Zahthlâk lo ve," ka tih chuan a pu chuan," Kan rawn kal leh hunah ni mai rawh se, rawn kal leh a ngai tho alawm, tun atân chuan a ruaibut tawh êm mai," a lo ti ve chuar chuar a, kei pawh chuan,"Nia, a theih tho mai. Chutih hunah chuan min rawn hrilh ang a, ka rawn lam vang vang ang che u. E, ni leh lo, kan inah in rawn innghat tawh dâwn nia," ka ti ve sauh sauh a. Sêna chuan," Engtin nge kan inbiak ang? I number kan nei si lo va," a lo ti khauh a, kan han inhrilh leh rih bawk a.


A vawi khatna atân Hming-thingtlânga chuan," Khawpui mi nge nge chu in lo fel khawp mai, vawiina kan lehlàn hman ka rin loh nèn, a làwmawm e," a rawn ti ve dût dût a, min tihder avànga ka làwm loh rûkna chu dah țhain," Ka rin aiin test neuh neuh tùr a tam lo va, a tihzia khawp mai, nghah vang vangte hi a ninawm ve a," ka ti ve a, Sêna pek chuan,"Han chàm ve deuh hlek pawh a châkawm asin le, duh aiin kan haw hma thei dãwn si a, chàm hlek a pawi dâwn loh tehlul nèn," a lo ti nuah nuah a.


An innghahna thleng ka thlah a, khua pawh a tlai ve ruai tawh mai, kan ințhen dâwn chuan," U Lawm, i number ka nei ta bawk a, ka rawn be buai sek țhin dâwn che a nia," nui chung hian Séna chuan a ti a, car-a ka lût tùr pawh chu lût rih lo chuan ding meuhin ka en leh rih a.


"A lêt i tuar ngam leh ngam loh a ni mai," nui chung vêka ka tih chuan intihre thiam zet hian," Ni ve tho mai, i țhianpa bulah chuan,' Ka nau, min ngaisângtu,' tiin min lo sawi mai dâwn nia," a ti leh a, bialpa ka neiah a ngai a nih chiah chu, nuihzatthlâk zâwk hian a; mahse, ka neih loh thu sawi chhuah kher erawh ka tum lo.


Julian-a'n 'duh deuhtu che' a tih kha, min hmél hriattîr tâk hnu chuan ngaizâwng lêm lo mah ila min rawn be ve ta fo va, a hming chu Zorema a ni a, tlangvâl fel tak niin lehkha pawh a zir sâng viau mai. MBA niin ICFAI University-ah a thawk a, mi fel tak a ni ringawt mai, a hmel pawh a chhe lo. Min han duh ve êm êm mai chu mak ka ti a, eng ka nih loh tehlul nèn, kan inah pawh a rawn lêng ve ta zauh zauh a, ka pate pawhin chutia tlangvál inlêng ka nei ve chu an lãwm khawp mai; mahse, keimahah chuan eng hè hù-ah vak a thawk lo. A fel a, a țawng duh a, chu tak chu ka ngainatna a ni, țawng tùr a hriain a hawihhâwm a, over-in thil a ti ngai lo bawk, ka pate pawh a kàwm thiam khawp mai.


Min duh thu sawi lang dawt lo mah se a cheziaah chuan a tilang ve tho a, ka ngei hran loh avàng leh a polite-a, kawm a nawm êm avàng chuan hun ãwlah chuan kan inzui chhuak ve zawk zawk a, a țawng duh chu thuhran ni se, a bulah chuan ka awm dàn pângngaiin, inthup ngai hauh lovin ka awm thei a, eng mah a sawisêl ngai lo. Inthup deuh ngai bula awm hi hrehawm ka ti țhìn a, ka nihna ang mi thawveng helh hawlh leh țawng duh, duh huna nui leh vak vak mai ka nihna hi thup ka duh lo, min ngaithei lo a nih chuan ka kawm thei lo dâwn tihna a ni a; mahse, Zorema bulah chuan ka awm dàn pângngai chiahin ka awm, Julian-a hian a lo hrilh vek tawh a niang, ka nihna ang angin min pawm vek mai.


Julian-a berin min duhpui a ni bawk a, kan inzui ve chu a ni mai. A thla têl kan inzui ve hnuah pawh chuan vawi khat mah kan hmuiah kan la infâwp lo, mitmei ka hmuh hran lo va, ani lahin a tum hran chuang lo, inthlah nân bianga min chuk zoh erawh a ti ve zauh zauh. Zanriah ei tùrin vawi hnih kan chhuak dùn tawh a, chance neih pawh a tum chuang lo, kan titi a, kan nui a, khawvêl ram hrang hrang chanchinte kan sawi a, chu chu kan hun hman dàn chu a ni. Inzuia inkawp pawh kan ang lo, țhian inzui kan ang zâwkin ka hria, pawi tihna erawh ka nei lo.


Ka pi pawhin a lo hre ve ni ngei tùr a ni, ka va tlawh țumin," Tuna i țhianpa hi nei ngei ngei ang che, mi țha thlah kal zêl an ni a, a pu pu leh ațang pawhin an thlah zîngah mi sual an la awm lo, pasal neih hun i ni tawh a, i pu nèn kan boral hma ngei hian i pasal nei lai hmuh kan duh a ni," a lo ti barh barh a, ka nui mai mai ringawt. Ka pu ve thung chuan," Chutin ti ringawt suh, nupui pasala innei tùr chuan inhmangaihte pawh a ngai ve ang chu, bâkah, an la inzui rei lo êm mai. Mâte, chhûngte turna avàng ringawtin pasal neih tum lo la, i inpeiha i duh hunah tak chauh nei ang che, i nulât hmêl hmuh hi kei, ka la kham miah lo a nia," min ti ve thung a.


Ka pi chuan," Hmangaih tih mai mai te chu, inneih hnuah pawh hmangaihna chu a piang thei alawm, kan inneih pawh khân ka hmangaih che tih ka inhre bîk lo," a lo ti leh a, ka pu chuan," Keiin ka hmangaih thung che alawm, bâkah, min hmangaih a ni tih kha ka hre ràn tlat a," nui hai chung hian a lo ti leh a, ka pi chuan," I hriat tawp loh kha aw, min nawr tlut tlut avàng chauhin ka nei che a nih kha," a lo ti ve leh a, chutiang lam hlîr chu an sawi chho a, kei lahin ngaihnawm ti takin ka lo ngaithla bawk a, ka chanchin lam an sawi ta lo chu tihchi ka ti khawp mai.


Ina ka haw chuan Séna'n min rawn be teh tlat a! Min rawn text ve zauh zauh a, phone call tak hi chu a ti ngai lo thung, chuvàngin min rawn be tlat mai hi mak ka ti lo thei lo a ni.


"U Lawm, naktûk khian Aizâwl rawn phei kan tum a," a rawn tih chuan ka thin a rawn phu dap dap a, phûr zet hian," I pu checkup tùrin maw?" ka lo ti vat a, ani chuan," Ni deuh tho, thil lei ka duh pah a," a rawn ti leh a.


"A va țha àwm ve! Chuan, kan inah in rawn innghat ve tawh ang chu tiraw?" ka tih leh chuan," Àpu hi chuan a duh kher lo maithei; mahse... kei chuan ka duh deuh tho," a rawn ti ban deuh chat a, a țawng dàn chuan ka nuih a tiza khawp mai a, min lo hmutu awm se mi â emaw min ti maithei a ni.


"Rawn innghat rawh u, i pu nèn chauh maw in rawn kal dâwn a?" tiin ka zâwt leh a, Hming-thingtlânga kha a lo kal tel tawh dâwn lo a nih hmel, a sawi dànah hi chuan, chu chu ka hre chiang châk mai mai a. Ani kha vawi khat na reng reng chu tihder ve ka duh a, a chungah khân phubâ lâk ve ngei ka duh a ni.


"Aw, Putea chu a buai lutuk a, a rawn kal ve hman tawh dâwn lo, U Lawm, thil ka lei tùr chu min enpui ve rawh aw, kei chuan a țha ka hre àwm si lo va," a rawn ti leh niah niah a, kei pawh chuan," Teh rêng mai, ka hriat zâwng a nih phawt chuan," ka ti ve a, ka phurna erawh tlêmin a zuai deuh tih ka hria, a putea a rawn kal tel ve dâwn loh vàng chu em ni ang? Ka tihder thei dâwn ta rih si lo va.


Zàna Zorema a lo lèn pawh chuan ka rilru ka lo kalpui deuh a niang," Eng thil nge i ngaihtuah rùn rùn a? Ka haw leh mai dâwn em ni ang?" nui chung hian a ti a, nui hmêl a pu nain a rilru tak tak a sawi a nih ka ring nghâl mai.


"Thingtlâng ațangin ka hmel hriat ka nau, min ngaisangtu a pu nèn an rawn kal dâwn a," ka ti ve ta nge nge a, ani chuan a tarmit vuah chu nawr chhovin," Engtikah maw?" a lo ti ve vat a, kei chuan," Naktûk khian an rawn phei ang a, kan inah pawh an rawn innghat thut thei, a pu checkup ngai a rawn kalpui dâwn a nih chu," ka ti ve leh a.


A hnuah chuan Chite luia ka hun hman dàn leh Sênate nèna kan inhriat chhoh dàn chu ka hrilh ve a, ani pawh chuan dawhthei takin a lo ngaithla ve a, zawhna min zâwt zauh zauh bawk a, ka sawi zawh chuan," A nih tak chu, mi fel leh mi fel in intawng a nih deuh ber chu a. A thilphalna kha atân vànneihna a lo nih chiah chu, a mi tawn ber kher lah chu mi fel tak i lo ni hlauh si a," tiin min han fak pah zat a.


A haw dâwn chuan a vawi khat nân min fâwp ve zawk a, tlangvâl zei tak chu a ni bîk lo a ni. Nia, bialnu nei ngai lo leh hmeichhe mi tak a ni lo ve bawk a, ka hre thiam reng mai, han practice-na tùr a nei ngai bîk tlat lo, a ngaihțhatthlâk ti tawh mai ang.



*A CHÂNG CHUAN THIL ENG EMAWAH MAHNI CHAUHA DIN CHHUAH NGAIH CHÂNG A AWM VE ȚHÌN; MAHSE, HUPHURH SUH, MAHNI CHAUHA THLÂWK ȚHINTE HI THLA CHAK BER BER NEI AN NI FO A NIA*

[Dingdi Pachuau]

☆OKHEE☆ - 4 By Dingdi Pachuau


Ka chhûngte bulah pawh chuan mikhual kan neih mai theih tùr thu chu ka hrilh ve a, room ruaka khum pawh chu mut mai theih tùrin zîngkârah ka tifai vek bawk a, Sêna chauh a rawn riah pawhin a pawi lo, room a chang zau deuh dâwn tihna a ni mai.


Tlai lam dâr 2 pelhah an rawn thleng a, kan ina thlentîr ka tum êm avàng chuan an chhukna tùr nia a sawiah chuan ka lo nghâk a, Sêna pu chu ka hmuh tum aiin ka hmu țha daih mai, a damdawi ei a ngeih a nih ka ring. Sêna erawh tlêmin a thû belhin ka hre thung a; mahse, chutiang lam chu sawi chhuak lo chuan ka lo nghah chhan chu hrilhin a pu hnênah pawh chuan ka hrilh ve leh a, chuti na nâ nâ chu tiin Sêna pu pawh chuan min hnial lui duh ta bîk lo va, motor-ah an bag dah lûtin keini pawh chu kan lût ta nghâl a, in lam pan chuan ka tlànpui ta vang vang a. Favàng boruakin min chiah tawh a, boruak pawh a nuam tawh khawp mai, Sêna chuan motor a ruih deuh avàngin a nguai deuh hlek a, chu chu hriain a pu nèn chuan kan titi dùn a, an khaw lam boruakte ka zâwt ve a, ani pawh a țawng ve chuar chuar mai, a țawng a muang charh mai a, a thu sawi erawh a fiah fak thung.


Kan inah hian awmpui chu a hranpain kan nei miah lo va; mahse, kan in hnuai luahtute fanu, pasal neia rawn lêt leh tawh hi a hman chângin eirawng bâwl, in tifai leh insuin a rawn inhlawh zauh zauh a, fa enkawl tùr 2 lai a neih avàngin ka pate hian an khawngaih a, ni tin rawn inhlawh hman kher lo mah se thla khat hlawh tùr ang tawpin a hlawh tùr an siamsak a, ani pawh a lãwm viau a ni. Zanin tlai pawh mikhual kan neih dâwn avàngin a rawn chho a, in kan thlen lai chuan zanriah hmeh tùr a lo siam mêk a, a chawhmeh siam rim chuan ril a tițâm raih raih maiin ka hria, a rim a tui thei țhìn a, ei a châkawm thei êm êm a ni.


Sêna hnênah chuan an room tùr kawhhmuhin bathroom pawh ka kawhhmuh nghâl vek a," Tuna inbual in duh pawhin a inbual theih nghâl aw, tui lum pawh herh haw mai theihin a awm kha. E taka, chumi hma chuan ei tùr ka'n ngaihtuah ang e, in ril pawh a țâm viau tawh tak ang," ka ti a, in ațang chuan chhuakin thingpui hmeh tùr chhang tui ve tâwk tak ka lei a, ka haw leh nghâl vat a.


Ka pa lo haw hnuah chuan ka pu(ka pu ka ti mai, a tar ve reuh tawh si a) nèn chuan titiin an ri nghâl bawrh bawrh a, a hnu deuhah chuan lo inrawlhin," Pa, motor-ah a rawn chuang thui si a, a chau lutuk palh ang, titipui vak suh," ka lo ti sap a, ka pu erawh chuan,"Ka inbual tawh bawk a, ka chau tawh hauh lo," a lo ti a; mahse, ka pa pawh chuan hre thiamin a titipui chiam ta lo.


Zànah puitlingho chu TV room-ah țhuin an titi khâwm a, Sêna pawh a motor rui a harh țhat tawh avàngin ka room lamah games ka khelhpui a, tih dàn tùr ka hrilh pah zêl a, a thiam chian hnu chuan nuam hi a'n ti mai mai khawp a, tleirãwl chho mai a la ni bawk a, a tihsual palh châng chuan a ui ring thei vawng vawng khawp mai. A rûkin ka nuih leh char char țhìn, hlim taka kan inkhelh lai chuan ka nu a rawn dâk dêk dêk a," Bawihi, Zorema a lo lëng a," a rawn ti a, ka thaw hawk mai, kan inkhelh tui lai laiin, a va hun lo tak! Hei tak hi a ni bialpa neih ka peih loh chhan chu, thil tih tui lai taka kalsan a ngai țhìn hi.


"U Lawm, khi khi tu tâ nge?"


Ka en phei chuan ka miniature rifle chu a lo thlîr vung vung reng tawh niin," Keimah maw le," tia ka chhàn chuan âwih loh hmel tak hian min rawn en a, ka lo nui mai a, ît tih hriat tak hian a en chho leh vung vung a," A tâwk reuh asin, ka lo zin leh veleh ram chhuak ila?" ka ti leh zat a.


Zorema chu ka nute nèn an lo titi a, kan va fin pawh chuan a țhu sawn chuang lo; mahse, min rawn enin min rawn nuih sak a, a titi chhunzawm leh zui zat a, a țawng duh ka tih tawh kha. Sêna nèn pawh chuan an titi kotlângah chuan dâk ve mah ila kan lo inrawlh ve lêm lo va. Mi polite leh bengvâr a ni bawk a, a haw har hran lo, a haw chiah tihah chuan Sêna chuan," I țhianpa a ni maw?" a ti sap a, chhâng lo chuan ka mitko ka sàn khum ãk ringawt a.


"A fel hmel bawk a, in inhmeh khawp ang le," a tih leh chuan," Tak tak maw?" ka lo ti a, a lu a bu nghat a, ka ngawi ta vang vang a. Zorema hi chu a fel a, a hmel pawh a țha a, a nula mi fahran loh avàng chauha tûn thlenga nupui la nei lo mai niah ka ngai, nula mi ve deuh se chuan hmeichhe țha tak a nei daih tawh ang, kei hi chu hmel țha ka inti ngai lo hrim hrim. Hmel țha ni ila tlangvâl hian min ngaizâwng luai luai a nih loh pawhin min try luai luai ang chu ka ti ve tlat a ni, chuvàng chuan ka hmel hi a țha lo a ni tih hi ka pawm thlap. Hmel țha na nâ nâ chu an lãr a, mi sawi zui an hlawh a, an luck a, mipain an bàwr țhìn, chutiang chu ka tawng ve lo, chuvàngin ka țha lo tihna.


A tûkah chuan Sêna leh ka pu chu ka hruai kual leh ta a, ka pu chu doctor-in a han check leh pawh chuan a hmasâwnzia chu a hmel leh mitmeng ațang pawhin a hre mai a ni ang," I damdawi ngai kha thla hnih chhûng i ei leh ang a, i țhat belhchhah sawt sawt mai ang," a ti a, kan chhuah hma chuan doctor chu ka be fâl leh deuh a, ka chhuak chu pâwnah min lo nghâk dùn a.


"Damdawi kan lei ang a, kan haw thei a ni mai, nge bazàr kualte in duh ang em?" ka ti a, Séna chuan," Thil kan lei dâwn kha," a lo ti zauh a. Ni dâwn tak e, a thil lei tùr enpui tùr khân min sâwm tak. Damdawi lei zo phawt ila, ka pu hi ina kan dah leh zet hnuah chhuak țha leh ta zâwk ila...


Inah hawin ei tùr tui tâwk tâwk ka eipui hnuah, ka pu hnênah chuan Sêna nèn chhuah leh kan tum thu chu hrilhin," I lo kal ve peihin kan ring chiah tawh lo a, inah lo awm hahdam la, keini pawh kan rei vak lo ang, nge, i lo kal ve ang a, Aizawl khawpui hi kan fang chiam zâwk ang?" ka ti a, ani chuan," E khai! Chhuak tawh lo ve, inah ka lo awm ang e. Kan va tibuai tak che êm aw... Sêna lahin a chhaih buai chein inah lah kan rawn thlenchilh rup mai si che a--" a la tih lai mêk chuan,"A, ka pu, khatiang lam kha chu sawi lo ang, inthlahrung hauh lovin inah lo awm la, i duh leh TV ka on-sak che ang a, i duh leh i muhìl ang a, keini pawh kan rei lo tùrah ngai ila," ka tihsan daih a. Ka nu a awm si lo va, a khua a lo har viau ang tih chu ka hlau ve leh hnuhnawh a.


Mahse, lo mut hahdam a duh avàng chuan kan chhuahsan ta a, ka nu lo haw nghah chhuah ka duh viau nain eng êm a lo ti bík lo tùrah ka ngai a, bâkah, Sêna thil lei tùr chu ka hre fak bîk si lo va, zawn hrep ngai thil pawh a lo ni maithei a, chhuah tlai viau ringawt pawh kha a fuh ber lo thei ve tlat a ni.


Phone thar lei a lo tum niin, a hman lai chu a hlui ve deuh tawh a, a thar leina tùr tuakin a pute leilet leh huanah chuan a lo inhlawh ve char char a ni àwm e. A lei duh zâwng, a rawng, a model leh eng zât man chin nge a pawisa neih sa chuan a tlin ang tih zawng zawng chu ka zâwt hmasa vek a, ani chuan," To tak chu ka tlin lo hrim hrim a, tûnlai ve deuh leh battery țha kha ka duh chu a ni mai," a ti a.


Phone zawrhna dàwr hrang hrangah luhpuiin ka en pui a, han thlan fak tùr chu a hre bîk lo. Man to tak ka duhpui bîk lo va, a budget mil tâwk tùr battery țha leh camera pawh zia ve tâwk tak ka enpui deuh ber a, a duh a thlan hleih theih loh avàngin a tàwpah chuan," I duh tak thlan tùr i hre si lo va, i duh deuh deuhho kan dah khâwm ang a, chuta mi chu keiin ka lo thlanpui ve ang che aw," ka ti a.


Mahse, ka thlanpui a ngai ta lo. A duh zâwng tak a hmu fuh ta a, ka han enpui a, a battery pawh a țha a, a camera pawh a zia viau mai. A man an inhlan zawh meuh chuan phone lei nâna a pawisa khâwlah chuan chêng 50 chauh a bãng tawh.


"Han lèn kual riha i phone thar chu test a châkawm viau nain charge full phawt țha ka tihpui si che a, kan haw mai dâwn em niang?" ka tih chuan," U Lawm, i hman tho chuan lêng kual rih ila, naktûk tûk lawkah kan haw leh mai dâwn si a," a lo ti a. Ka en a, a lo nui nain a inthlahrung leh si hmêl chu ka hmuh hmaih hauh lo.


Kan dàwrah ka kalpui phawt a, zau hi a'n ti khawp a," U Lawm, in tâ vek a ni maw?! A va han zau ve! Bungrua a tam si, in hausa ngawt mai," a'n ti mai a! Ka nui sak ringawt a, a rilru tùr àwm chu ka ngaihtuah a, ka lo hmu tlangvâl ve riau tawh kha a ni a, han belhchian chuan tlangvâl ve ûr tawh mah se a rilru a la naupangin a la thianghlim tak zet a ni tih ka hriat chhuah thar phah a ni.


A hnuah chuan a kal duhna ka zâwt a, a sawi ve mai zêl a, a duhna apiangah ka tlàn kual zêl a, nuam a tiin a hlim hmel chu a hmuhnawm ka ti, naupangchhe hlim takin a hlim tlat si a, a chângin thla kan la a,"Ka lo kal khât tawh àwm si a, hriat reng atân pawh a țha," a ti a, a chângin a selfie bawk a, a hlim hmel chuan min tihlim ve bawk a, kan hun hman dàn chu ka ning miah lo nia.


An awm chhûng chuan hlim takin a duh zâwng ka tihpui a, kei ngei pawh hian an rawn thleng chu ka hlimpui tak zet a ni. An haw dâwn zàn chuan an haw tùr chu a huphurh ve khawp mai a, kei pawh ka bãng chuang lo; mahse, awm reng theih ni bîk lo le, an haw ni tùr a lo her chhuak a, an chuanna sumo dinna thleng ka va thlah a, an tlàn liam tùr chuan a kutin min rawn vai lauh lauh a, ka vai lêt ve nghâl a, ka ngai reuh khawp ang le.


Ka ngai reuh viau tak tak a! A chhan chu ka thil tih apiang phûr takin min tihpui zêl a, ka rualpuite khelh nhai loh leh ka țhiante pawh ka khelhpui ngam loh games ho tê tê pawh ani ngaih chuan a ho lo va, nuamti takin kan khèl dun mai thei zêl a, ka tân chuan a hlu êm a ni. Ka țhian neihchhun pahnihte lah ka kàwm thei tak tak tawh meuh si lo, hmeichhia niin kum tam ve ûl tawh e ti lo hian ka thil lawm zâwng leh duh zâwng hi a hmeichhia lovin a naupangchhia bawk si, ka piin min han zilh min han zilh pawh hi ka nin rual rualin a rilru tùr àwm ka han dàwn hian ka hre thiam ve viau tho, a tu hmuh hmasak ber ka ni a, min duat a, hmeichhe awma awmin, fel tak nia pasal țha tak nei tawh tùrin min duh tawh; mahse, kei hi zawng ka nù zêm ve lo va, ka thil lawm lah chuti bawk, ka nulátpuite nèn hian kan inang lo ve êm a ni.


Zorema pawh a lo la lêng ve zêl a, ani hi chuan ka awm ang ang hian min en liam vek ni maiin ka hria. Amah ka hmuh hian phùrna ka nei hran lo va, ka ngai viau chuang bawk lo. Ani erawh hi chuan min ngaihsak a, min duhna lantîr thiam viau lo mah se theihtâwp chu a chhuah ve chuan ka hria. Julian-a lahin min lo fuih ve sek a," Zorema i neih phawt chuan nuam i ti viau ang, a duat nasa dâwn mai si che a, mi țha tàwp a ni a, a dam thlup mai bawk si, mi vànneiah han insiam ve ve teh u," a ti ţhin.


Zan khat chu Zorema lo lèn laiin Sêna'n min rawn bia a," U Lawm, Àpu damdawi pakhat hi kan hre thiam lo va, doctor lehkhaah khân a inziak tel ve mang si lo va," a rawn ti a, a damdawi hming ka zawha a rawn sawi chuan," Vitamin țha lutuk a nih kha, ei ngei ngei rawh se," ka ti a. Ani chuan," A ei ngam lo alawm, nangmah zawh phawt che a duh a, putea pawhin a hrilh a hrilh pawhin a ei ngam tlat lo va, nangmah rawn zawh kher che a duh a," a rawn ti leh a, ka nui hak hak a.


"A lo chak zual deuh deuh theih nân leh chaw pawh a ei țeuh țeuha a hrisèl chhoh thûr thûr theih nân ka leisak a nih kha, i pu chuan lo ei ngam tawh rawh se aw, doctor pawh ka râwn vek a, a ei ngam a nia," ka ti a, Sêna chuan," Aw le, ka hrilh nghâl ang. Kan lãwm lutuk aw. E, lawk, Putea'n a be ve duh lawk che a nih chu," a ti a, phone chu a putea a pe a ni ngei ang, a reh deuh vang vang a.


"Lawmi, Sênate Aizawl rawn kal i lo buaipui avàngin làwmthu hrilh che bâin ka inhria a," a rawn tih thum dût chuan a hmêl chu ka mitthlaah ka hmu nghâl vat a, sawi zawm lehin," Ka pa Vitamin țha tak i lo leisak a, in inah nuamsa takin i lo thlentîr bawk a, làwmthu ka hrilh che," a rawn ti leh dût dût a.


"Eng mah a nih loh kha, Sêna chunga làwmthu ka sawi venaah ngai mai rawh," ka tih chuan,"I lo zin leh hunah Chakai tam deuh i hàwn dâwn nia, Tumbu pawh i duh duhnaah i khawrh ang a, tu phalna mah i dìl buai a ngai tawh lo ang," nui deuh hak chung chuan a rawn ti leh a, a thil rawn sawi dàn kher kher chu, a awmzia ka man thiam nghâl a, ka ner deuh sak a.


Zàn mut dâwnah Sêna chuan min rawn text a, *Àpu hian fel a tih thu che leh hmel țha a tih thu che a sawi reng a* a rawn tih chuan ka nui sak a, miin hmel țha min tiha thinrim viau thu awm hek lo le, chutah, *Ka țhianteho nèn pawh kan sawi țhìn che a, keini pawhin hmel țha kan ti vek che, kan pahniha ka phone-a kan thlalâkte kha kan en fo țhìn, i chanchin kan sawi ziah. Bike khalh i hnehsawh bawk si, in hausak nèn i fel leh êm êm tho bawk si* a rawn ti leh duah a.


A làwmawm thei a nia aw... Hmel țha min tia fel min ti tak tak a nih chuan ka lâwm tak tak ngawt ang chu, ka chhâng lêt ve zat a.


*Ka va lâwm tak! Ka rawn zin hunah Bike-in ka phur vâwk vâwk ang che u* ka tih chuan nui lai lem hi min rawn thawn țeuh a, chutah, *Putea erawh chuan 'Hmeichhia pawh a nih loh tawp kha, a inla pà si' a ti che a; mahse, i hmel chu țha a ti ve tho a ni ang, ka phone-a kan thlalâk dun pawh kha a en ve reng a* a rawn ti leh a.


Mak tih ka nei deuh tlat. A putea, Hming-thingtlânga chanchin hian eng emaw ti tak hian ka beng a verh ru tlat țhin a nih chu, nichîna kan inbiak pawh khân ka sawi thiam chiah lo, keimahah hian engtin emaw ka awm tlat, a aw ri ka hriat vàng khân em ni? A nih chuan, ka duh tihna em niang? Ka ngaizâwng ru deuh tihna maw? Ni lo, a ni lul lo ang, chutiangin ka en lo hrim hrim, ani pawhin nula melhin min melh hek lo, min la tihder zui. Kha, Sêna hnênah pawh 'Hmeichhia pawh ni lo, inla pà si' min tih kha, mipain hmeichhe pà deuh tak an duh ngai lo, hmeichhe nù zêm leh hmeichhia tak an duh țhìn.


November thla chawhnu lamah ka pa sumdàwnna kaihhnawih thilah Lungleiah pheiin, Pa Mawiate inah ka innghat a, rei erawh ka châm lo, ka haw lamah Sênate khaw lama kual a remchàn êm avàngin ka kual tùr thu chu ka hrilh lâwk a, a lo phûr nasa mai. An khaw thlen hmain a țhiante pahnih nèn khân min lo hmuak a, khua a vawh ve deuh tawh avàngin ka pain bike ken a phal lo kha a ni a, a zia khawp mai, an pathum chuan ka phur ta vek a.


"Ka puin an ina chaw ei ngei tùr chein a duh che a, âr tui lai pawh kan lo talhsak diam tawh che," a tih chuan," Tlaia chaw ka ei te chuan ka thim haw nasa dâwn asin," ka lo ti a, ani lah chuan," I thim dâwn chuan i riak ve daih ang a ni mai alawm, naktûk zîngah i haw ang a, a țha daih zâwk, kan inkawm theih hun a rei deuh hlek dâwn a," a lo ti awlsam thên thung a.


Sênate puin an chanchin min hrilh nual tawh avàngin an awm dàn hi chu ka hre thiam ve deuh ruak tawh a, Sêna pawhin an in lama min tlàntîr lovin a pute inah min hruai nghâl a, a pu chuan an veranda-ah chhuakin min lo hmuak ve a, Hming-thingtlânga erawh ka hmu hauh lo.


Boruak chu nuam reuh tak a ni, ka hawi kual nasa mai, an in chu lian fahran lo mah se a fel vei êt a, a hmun a remin a zâwl nuam a, an compound pawh a zau țha khawp mai, kawtah lah chuan Theihai leh Theibuhfai kûng a intlar țhât a, forget-me-not hnah cheh rual mawi zet hian an in chu a hual vêl a, far kûng lian lo tê tê awmze nei taka enkawl tìh hriat tak pawh kûng 4 lai ka hmu, an kawtah pawh phùl sîn tê tê a țo chhuak deuh vek bawk a, kalna lai tùrah erawh chuan lung an rem ve thung, han en mai chuan Mizoram in ni pawhin a lang lo, hmuhnawm ka ti reuh tak tak a ni.


In chhûngah kan lût a, ropui lua ni lo mah se a nuam reuh tho, nuam ka tihchi tak a ni tlat. Sêna pu chu a țawng charh charh a, ka tlawh kual dâwn tih ka hrilh vàng a ni ngei ang, an lo inbuatsaih ve nasa a, chhang an lo lei lâwk ve thlap a, Sêna'n thingpui siam nghâlin a țhiante pawhin thingpui hmeh tùr an lo chhawp nghâl a.


"Zanin chu i riah ve ngei ka beisei a nia, zanriah hmeh tùrah pawh Ârpui tui lai ngat a nia kan talh ni, i naute buaipui vek hi a nia, siam pawh an siam tui khawp ang, an uluk ve a," a tih chuan Sêna chuan," Nia, a tui viau ang, khawpui mi hi chuan Ârpui tui lai ngat hi tui in ti si a, i ei ngei chu a ngai ang," a lo ti ve a.


Ei hrim hrim chu pawi ka ti hauh lo; mahse, ka ei chuan ka chhuak tlai dâwn lutuk a ni, tunah hian chhùn dàr 12 vél chauh a la ni a, zanriah hma deuh hlekah pawh ei mah ila ka thleng tlai viau ang, ka pate'n min lo ngaihtuah viau ang chu.


"Min lo tlawh vawi khatna a ni a, naktûk lah Inrinni a lo ni leh hlauh bawk a, zanin chu riak mai la ka ti viau a ni, in lama in buai viau i ring em?" ka puin a tih chuan," Ka hre lo le, buai viauna tùr chu a awm hran lo ang; mahse..." ka tih lai mêk chuan Sêna chuan," U Lawm, riak ve rawh, zanin chauhte chu, i rawn kal har leh tawh dâwn asin," a lo ti ve a.


Riah chu ka châk ve tho. Eng nge zànah an tih țhin tih leh an hun hman dàn chu ka hre chhin châk a ni, thingtlângah zàn ka la riak ngai si lo va.


"Ka tibuai mai mai zâwk ang che u, chaw ei mai chu ka hnial pawh a ni lo va, zàn han riah êm chu a," tiin ka han țang ve deuh a, vawi khat min sàwmnaa 'aw' han pawh nghâl mai chu, 'Thlèmsami' ka ni ringawt dâwn asin.


"Nangmahin i hreh viau a nih chuan tihluih che chu ka duh miah lo, keini lamah chuan vènthàwn tùr a awm lo va, kan lãwm viau zâwk ang tih hria la. I pate thu vàng a nih pawhin ka dîl hreh hauh lo a nia, zan khat na nâ nâ chu," a tih leh tâk zêlah erawh chuan ka hnial duh tawh lo, riak tùra min sâwm ve ngawih ngawih chu, ka riak mai ang, ka pate erawh hrilh an ngai thung ang.


Chawhnu dâr 2 vêlah hna thawh kawr hain Hming-thingtlanga chu a rawn haw a, min rawn hmuh chuan makti hmel pawh a pu lo, en erawh min en vung vung thung. Ka pu chuan ka riah dâwn thu hrilh charh charhin Sêna hnénah chuan a putea chu thingpui siam nghâl turin a hrilh bawk a.


"Tumbu i lo khawrh leh dâwn em ni?" thingpui a in lai chuan a ti a, chu chu a țawng chhuah hmasak ber a ni. Ka melh rawlh a; mahse, min lo en lêm lo va, min en duh lo lui a ni chiang mai.


"Tumbu ka ei ngai bawk lo."


"Ei ngai lo si, mi ram chinah an phalna la hmasa lovin engah nge i khawrh dûk dûk si?"


Ka chek tlak a," Ka khawrh dûk dûk lo, ka la khâwm mai a nih kha,bâkah, an indîl ngai lo, Pu Țhuama'n a sawi vek," ka tih chuan a pa chu a lo nui a,"Țhuama khân tlêm lai deuh khân a sawi tak asin, a nuih lah kha a za khawp a, nangmah i ni tih rêng rêng ka lo hre lo," a ti chuar chuar a.


"Min tihder a, ka hre chhuak leh a, ka ngeizia chu a, ka rilru a hrehawm viau hman tawh a nia," ka ti nang nang a, Sêna chuan," Pu, eng thil nge Pu Țhiama sawi chu?" a lo ti ve a, an țhian thum chuan an phone khawih lai chu dahin an rawn hawi țhap a.


*MAHNI DUH DÀN LEH NUAM TIH ANG RINGAWTA AWM HIAN MI DANG TÂN MALSÀWMNA NIH A HAR*

[Dingdi Pachuau]

☆OKHEE☆ - 5 By Dingdi Pachuau


"I putea hian Lawmi hi a lo tihder deuh em maw ni le?" tiin ka pu chu a nui a, Hming-thingtlánga chu ka en a, ani erawh chuan a pa thil sawi leh Sêna zawhna chu hre lo ang hmakin a thil ei lai chu a ei mual mual a.


"I putea hian min tihder a," ka tih chuan Sêna chuan," A ni maw? Tak tak maw? Engtin?" a lo ti leh vat a, hre châk tih hriat tak hian min rawn hnaih a, kei erawh chuan,"Nakinah ka hrilh ang che," tiin, a lamah chuan ka kûn hnai deuh a,"Phubâ pawh ka la la ve ang," ka ti leh sap a. Ani chuan min en vang vang phawt a, chutah, a nui ta sak a.


A hnu deuhah chuan,"Ka țhiante bulah hian i silai nalh reuhzia leh țhatzia kha ka lo hrilh ve a, rawn keng la chuan, zaninah sa kan han chãng tùr a nia," a ti leh daih a, a țhiante pahnih Dinpuia leh Țhakima pawh chuan," A rawn haw veleh khân i silai țha a tihzia hahîpin a rawn sawi kûr a, hmuh ve kan châk khawp a," an lo ti ve a, kei erawh chuan nuam lo ti ru deuh tak chuan,"A țha hran lo, miniature pângngai ve mai alawm a nih," ka lo ti thung a.


Ka pu chuan," Silai i nei maw?!!" tiin mak tih hmel tak hian min rawn en a, ka chhàn hma chuan Sêna chuan," Aw, nei e, a room-ah khân a dah kha, i lo hmu ve nange?" te chu a ti hê hâw a, ani chuan," Engah nge ka hmuh ve ngawt ang? Mi pindanah ka lût chhuak ve sek ngai lo," a lo ti vut a, chutah, Séna chu thovin," Hei, en la, a thla pawh ka la alawm, nakina ka la lei ve duh tâkin ka tia," nui chung hian a ti a, a pu chu phone-a thlalâk chu a entîr ta nghâl a, a pu lah chuan,"I ho mai mai e a," a lo ti leh a, an inchhàn dàn chuan ka nuih a tiza angreng khawp mai.


Ka puin an chanchin min hrilh nual tawh avàngin an inah hian hmeichhe chêng an awm lo a ni tih ka hre tawh a, tin, Hming-thingtlânga hi tlangvâl senior a ni tih pawh ka hria, tlangvâl senior kum 35 pèl vang vang tawh a ni tih thlengin maw le! An ina hmeichhia an awm tawh loh avàng hian a pa hian nupui nei tawh tùrin a duh viau bawk a, ani lah hian nupui neih lam chu a la hmanhmawh tehchiam lo ni àwm a ni.


Ka nute chu thil awmzia hrilhin Sênate khua Râlvàwnga ka riah tùr thu chu ka hrilh nghâl a, anni pawh chuan zàna hmeichhia lehnghâl mahni chauha inkhalh haw tùr chuan min lo ngaihtuah a, riah mai pawh chu țha zâwka an hriat thu chu an lo sawi ve a, ka nu chuan,"Nula i nih kha theihnghilh lo la aw," a rawn ti hrãm a, ka nui sak ringawt. Nula puitling ka ni tawh a, hetiang thil min hrilh tùr hi chu a ni tawh lo tih pawh ka hria; mahse, a fanu hian ka zir ngang si lo va, ka nu hi ka dem hauh lo, thingtlângah ka riak dâwn si a, min ngaihtuah ve a ni mai.


Hming-thingtlânga inbual hlàn chuan," Eirawng kan bâwl țan dâwn em niang?" ka han ti a, Sêna chuan," A la hma lutuk! Chawhmeh tùr lah kan siam sa vek lehnghâl a, chaw chhum deuh chauh a ni tawh. Chaw chhum nân lah a la hma si, kan khua hi kan fan kualpui zâwk ang che, chuan, kan in lamahte pawh kan kual ve ang a," a lo ti zung zung a, a țhiante pahnih lah chuan pawmpui tih hriat tak hian an lu an lo bu nghat nghat a, kei pawhin hnialna ka nei lo.


Kan chhuak ta țhâm țhâm a, motor kan keng lo, ke ngatin an khua chu min fanpui a, ka rin aiin in a lo tam reuh a, lang lo lamah an lo awm ve nual niin, nuam ka tih deuh lai leh hmuhnawm ka tih lai chu thla ka lâksak a, anni pathum lah chu an han phawk hlawm khawp mai a, an infiam a, Sêna phone camera pawh an lek kual ve nasa khawp mai.


Sênate in leh Dinmawiate in chu a lo inhnaih viau a, an in inkârah in pakhat chiah a tla a, Țhakimate in erawh tlêmin a fál deuh thung. Thingtlâng khaw lian lo tak ni mah se a tlângpui thuin in a țha hlawm viau a, kan luhna in chhûng pawh a fai hlawm viau bawk. Ami chêngte pawh an fel hmel hlawm khawp mai a; mahse, min lo en duh thei hlawm lutuk erawh chu nuam lo ka ti lek lek thung.


Sêna pute in kan thlen leh meuh chuan nî pawh a pil ţêp tawh a, kan thlen veleh chuan a pu chuan," Eng nge kan khua chu ang i tih?" tiin min lo zâwt vat a," A nuam reuh khawp mai, in pawh a țha tlâng khawpin ka hria; mahse..." ka ti a, Sêna chuan rang zet hian," Zâwlkhawpui nula hmel țha a ni bawk a, min lo en duh hlawm lutuk ringawt; mahse, a nuam ka ti a nia aw..!" a lo ti pek a, a bânah ka va chumsak zawt kha.


"Ni ve bawk ang chu, thlìr vawng vawng tham kha a ni miau a," a puin a lo tih chuan Sêna chuan,"Ka pu zeizia chu a!" a lo ti leh vat a, kan nui zo vek, amah lah chu a nui ring ber berah a țang a, sawisa chhovin," I tlangvàl lai khân i zei phianin a nia ka rin ni," a ti zui a, engtin tin emaw inchhâng chhovin fiamthu an thawh a, kan nui leh ta dar dar a.


Chaw chhùmin keiin salad ka lo siam a, ka pheikhawk bun chu ka nin deuh avàngin motor-a slipper ka dah chu ka la chhuak a, ka inthlâkna tùr leh thil țûl dang dang pawh chu ka la chhuak tel bawk a, hmeichhia ka nih avàngin Hming-thingtlânga room chu ka pu chuan luah rih tùrin min ti a; mahse, ka lo hnial a.


"Min en hrang lutuk a nih kha, Sênate nèn chhuatah hian kan mu ho mai mai thei alawm," ka tih chuan,"Hmeichhia i ni a, mipaho nèn a mut khâwm theih loh, Hminga chu Sênate bulah mu ve mai rawh se," a lo ti deuh bur mai a, ka sawi zui tarih lo.


Chaw kan ei a, hmeichhe awmchhun ka nih avàngin chaw bêl bulah min țhuttîr ve ngei a, pawi ka ti lo nasa. Zanin chu phubâ ka la ngei ang, Hming-thingtlânga hian a duh aia tam chaw a ei ngei dâwn, ka thil ngaihtuah avàng chuan ka nui ru sak sak a. Chaw chu ka han khawrh nawn hlawm ta ngei a, mi dang chu lian vak lovin ka khawrh mai a, ani erawh chu lian țha lèng làwngin ka han khawrh hnûr mai a, sawisêl chuang lova min rawn melh chu ka hmu hman zawk; mahse, ngaihsak lo ang deuh chuan Sêna chu thil ka zâwt nghâl daih a, a rûk tak erawh chuan ka mitsìr reng a, ka nui ru var var bawk.


Tlangvâl chho chaw heh rual an ni bawk a, ei pawh an thei viau hlawm mai. Thingtlânga awm niin hna an thawk nasa a, a àwm viau a ni, hna hrâm thawk ve ngai lêm lo tân chuan chaw ei tam hi a har a, khawpui chhûnga chêng leh thingtlâng mite kan inan lohna tak pawh a ni ngei ang.


Chaw ei khama kan țhutmuan vang vang hnuah chuan Sêna chuan," Zanin chu pâwnah mei chhëm ila, Krismas rim a lo nam ve tawh țan bawk nèn, kan zai pah ang a, a nuam ngawt ang," phûr tih hriat zet hian a ti sar sar a, kei pawh chu ka lo inpeih nghâl zat mai. "A nuam viau ang chu," ka tih chuan Dinmawia chuan,"Khawnge Guitar kha?" a lo ti vat a, Țhakima chuan," I perh hnuhnung ber a," a lo ti thung a. Ka pu leh Hming-thingtlânga erawh chuan thingpui sen hâng an dawm a, an lo inrawlh ve lo, an chaw ei kha an puar ve lo em maw ni? Phubâ ka lâkna-pa phei saw chuan chaw kha a ei zo vek si a, a puar over ka lo ring a nia, a pumah a leng tam àwm bík hle mai.


Pâwnah chuan mei chu chhëmin chair kan la chhuak a, guitar perhin kan zai a, kei erawh chu ka zai ve vak lo, an hla sak chu ka thiam vak loh bâkah a hlathu ka hre chiang hlawm lo; mahse, a boruak chu nuam ka lo ti ve êm êm thung, an awm dàn zawng zawng chu video-in ka lo capture char char a, nakina en lêt leh atân ka ti a ni, hetiang boruak hi ka tawng khât mai bawk si a. Zai vak vak lo mah ila ka bula mite an hlim a, meilum lah ai a lo nuam bawk a, a boruak hrim hrim chu nuam ka ti ve êm a ni.


Hming-thingtlânga chuan a room chu min kian ta ngei a, a mutphah zawng zawng, blanket leh rizai thlengin an sin phal loh a thar diai min dahsak vek a, sûk fai sa vek a ni tawh bawk a, fai sar rim a nam vang vang mai. A room chhûng pawh a bàl miah lo, tlangvâl senior che fel, duh kherkhiap tawh chin a nih chiah hi, ka hawi kual ve nasa a nia, bungraw changkâng zet zet hmuh tùr awm lo mah se, a room chhûnga bungrua chu a inrem a fel fai a, bàl pawh ka hmu lo.


Bathroom-ah intifai turin ka lût a, ka ha ka nawh dâwn chuan toothbrush ka theihnghilh a ni tih ka hre chhuak chiah, toothpaste chu ka keng reng, face wash pawh, nail cutter thlengin a la kim thlap si, ka han ching let ngial a; mahse, toothbrush ber chu ka hmu zo ve tlat lo. Motor-ah ka dah ang em le? Ka en chhin leh ngawt mai loh chuan, ha nâwt lovin ka mu ngai si lo.


Ka chhuak leh ta nge nge a, an lo mu țhap tawh a, light erawh pakhat a lo la êng a, Sêna chuan," U Lawm, khawnge i kal dâwn?" a lo ti vat a, ka hrilh ve mai bawk a," Kalpui i ngai em?" a rawn ti leh hrãm a.


Motor-ah pawh ka hmu chuang lo, ka hman zawh lai ka hre miah lo chu mak ka ti hle mai. Pa Mawiate inah khân ka hnutchhiah vek a ni ngei ang, a va buaithlâk tak!


In chhûnga ka luh leh hnu chuan," I hmu em?" Hming-thingtlânga chuan a lo ti thûm dût a," Hmu lo, ka hmang zo tawh a niang," tiin kawngka chu ka kalh a, a rawn thawh lai pawh ka hre miah lo, cupboard inhawng ri avàng chuan ka hawi phei a, toothbrush thar hlak hi a rawn phawrh ta mai a. "Hei hi hmang rawh," tiin ka kutah chuan a rawn hmeh bel a, a mutna lam chu a pan leh nghâl vut a, hnial pawh ka tum lo, ka mamawh viau mai si a, ha fai taka nâwtin tui takin ka ka mut vang vang theih phah dâwn asin.


Ka mu tui viau a ni, zîngah pawh ka harh har, ka mutna ka hriat chian hnuah rang zetin ka inperh tho nghâl a, ka va thawh chhuah chuan ka pu a lo tho tawh niin, Sênate erawh an lo la mu thung a, tlangvâl senior-a erawh ka hmu tawh lo, a mutna min kian si a, a mu țha thei lo ang a, a thawh hma phah a ni ngei ang.


"I mu thei meuh nange?" ka puin a lo tih chuan," Thei teh rêng mai, ka mu tui lutuk a, ka tho thei lo țêp a ni," nui chung hian ka ti a, kan in chu ni se ka la tho kher lo ang, hma takah ka tho ngai meuh si lo, helai chu ka mutna room-ah a neitupa lo luh duh ta se kei ka lo la mut vùm thûr chuan lo luh a hreh phah palh ang.


"I puan sin a lum țha maw? Khua hi a vâwt ve riau tawh a, i mu țha thei meuh maw?" a ti nawn leh a, ka mu țha theiin ka puan sin pawh a lum nuam hle a ni tih ka hrilh hnu chuan," Thingpui i duh em?" a ti leh a.


"A ngai lo ve, ka in ngai lutuk lo va," ka ti a, filter-a tui chu ka in țeuh a, ka duh tâwk mai. Zînga thingpui ka in ve chuan chaw ka ei țha thei lo, ka ril a ţâm ngai lo ka ti mai, chuvàng chuan ka in ngai meuh lo. Ka pu erawh chuan thingpui sen hâng a dawm a, a no lah chu no an neih zînga a lian ber a thlâng a ni ngei ang chu, a puar phah ngawt ang.


Pâwna ka chhuaha ka hawi kual vêl laiin Senior-a pawh a rawn haw a, polythene dum hian eng emaw ni hi a rawn khai lehnghâl a, min rawn hmuh chuan," I mu tui em?" a rawn ti ve ngial a. Kei ve thung chuan," Aw. I mutna ka luah daih sia, i mu țha thei lo a ni maw?" tiin a zawhna chu zawhnain ka chhâng lêt nghâl zat a.


"Ka mu țha," a ti ve mai a, kan inbe chhunzawm lo, in chhûnga a lût tùr, a hnunglam chu ka chhiah khum vak a, Senior tak nih avànga a han țawng țha duh lo vêl chu ka ngei ru roh tlat, Sêna leh ka pu an han țawng duh teh rêng nèn, ani hi chu an chhûng zînga mi ni ve lo àwma mawi a ni. Nizàn lama Zorema WhatsApp message chu reply-in zîng boruak tam tâwk tâwk duhthawh taka ka hìp kâwk kâwk hnuah chuan in chhûngah chuan ka lût ve ta chauh a.


Eirawng bâwlin chaw ka chhùm ve a, chaw nêm deuh lam aiin a rum lam deuh an duh tih ka hriat avàng chuan tui pawh ka leih tam duh lo va, Sênate rawn tho chuan min rawn pui nghâl a, thingpuite chu ka lo siamsak ve a, anni zawng hna thawk țhang an ni bawk a, thlum tui hlê tùrin an thingpui pawh ka siamsak vek a ni.


"Vawiinah i haw phei tawh dâwn chu a ni sia, i ngaihawm dâwn e'," Séna'n a tih chuan," Nia, kan inhmu khât leh râih tawh dâwn a ni. E taka, Krismas dâwnah rawn bazâr ula, Dinmawi, Țhakim, rawn intiam rual ula, kan inah in rawn innghat ang a," ka ti sauh sauh a.


"Krismas bazàr nân chuan a hla êm alawm, Lunglei lama kal
thlâk mai hi a awlsamin sum pawh a hek lo deuh nge nge a. Aizawl lama bazàr chu, kal lam leh haw lam sumo fare a uiawm duh lutuk a," Țhakima chuan a lo ti ve a, a sawi dik reng mai. Sumo fare bâkah chawlh man emaw chaw ei man emaw a ngai tel zêl a, Lungleia bazàr mai chu a hlâwk ngei ang.


Tukin chu Senior-a'n chaw bêl a chang ve ta thung a, nizàn lama kan chawhmehte a la tam bawk a, chawhmeh siam vak a ngaih loh avàngin tûkțhuan kan ei hma viau a ni.


Nizàna phubá ka lâk ang chiah kha ani pawhin apply a tum ve a niang, min en kur mai zêl bawk si a, chu achhapah, ka hmaah inhmachhawn zâwngin kan țhu a, min en tawh hi chuan engtin emaw tak hian ka awm ziah zui a. Zorema min en dàn nèn a inang ka ti thei lo, he pa hi chuan min en hian ka taksaah hna thawktu a awm ka ti deuh tawp mai. Julian-a hnua min melha min tidanglam leh theitu mipa a ni ve tlat; mahse, eng vàng nge chu ka hre chuang lo. Min en duh viau vàng pawh hi a ni mahna le.


Chaw chu lian puiin min rawn khawrh ve ta a, ka duh loh thu ka sawi dâwn chuan dawhkàn hnuai ka ke dah chu a la rawn tawk zui a, ka en vat a, ani pawhin min lo en ve tho nain min tawk palh a ni ang, a ngaihven zui lo. Kei erawh chu ka țhu țha lutuk tawh a, tu mahin min deh theih loh nân a tawm tê thei ang berin ka țhu a, min rawn tawk palh zauh a nih pawhin ka en kher tawh lo ang.


Ka ei zo thei ngang lo," Chaw min khawrh lian lutuk a, ka ei zo thei lo," ka ti hlawl mai a, Sêna chuan," A pawi lo, vawkin a duh tho a, ka n ningnawi hi chu ka lo hàwn ang e," a ri ta hlauh a.


Haw tùra ka insiam hma chuan ka pu chuan thla lâkho a rawt a, Sêna nèn chuan a phûr ber berah kan țang a, kan ţhutna tùr remin a buai leh a, minute 3 vêl zet a ral hnuah chauh kan click thei ta a, ka en leh nasa khawp ang.


Kan inbe lo leh takngial dâwna ka hriat avàngin," Toothbrush vàng khân ka lãwm e," ka ti a, nizàn khân làwmthu pawh kha ka hrilh hman lo hrim hrim bawk a, hrilhna hun remchâng tak a ni.


"I lo zin leh hunah chuan i rawn intodelh thlap tawh dâwn nia," a lo ti thung a, ka zak lek lek a ni; mahse, mi dang awm hnaih loh lai a ni a, azia deuh zâwk. A rûkin ka insehruh a, toothbrush pakhat vàng mai maiin min han tizak duh a nia, ka kal leh ngai a nih chuan 10 ka kensak ang! Senior thil kawm chin tawh a nih leh chiah hi.


Motor thleng chu min thlah hlawm a, min chibai dan dan hlawm a, Senior-a lehpek chuan," Inchibai kher lo ang, kei chuan ka duh ve lo," a ti leh tlat mai a, chibai ka tum hmasa lo chu ka lãwm hnuhnawh viau a ni. Tum hmasa ila chuan zak ru takin ka kut ka la lêt zàl zál àwm si a.


Ka thinrim deuh avàng chuan mi dang nui sânga ka en dan dan hnuah pawh amah chu ka en ve duh lo va, bân pawh ka vai duh hek lo, ka melh duh lo hrim hrim. Sêna'n," Rawn zin tum leh thuai rawh aw," a tih vau vau pawh chuan ka chhâng lo va, ka nuih lui sak ringawt.


Thinrimna rilru chu pu lo ila chuan ka khua a har phei vawng vawng ang chu, keimah chauhin ka ni zui a! Mahse, Hming-thingtlânga awm dàn leh țawngkam khân min tilãwm lo tlat mai a, khawharna lam kha ka rilruah a awm thei vak lo.


Thênzâwl ka thlenin ka nute ka chin ka hrilh a, chutiangin Sêna pawh ka hrilh ve tho. Ani hi chu ka pu nèn ka ngei ve lo, kha tlangvâl senior zet tawhkhirh hmel zet erawh kha chu, ngaihtuah pawh ka ngaihtuah chhunzawm peih lo, ka ngei ru tlat.


Zai ka play pah a, ka khua a har lo lehzual sawt. Zai chu zàwm ve rât râtin muang tak ni lovin, chak vut ni chuang si lo chuan ka khalh par par a, mi phurh tùr awm se ka tih viauna rilru pawh a kiang sâwt ta viau mai, mahni hian inthurual a awlin kan inhnial buai ngai lo ber a, awlsam pawh kan awlsam, kan inhre chiang ber bawk.


In ka thlen chuan ka pa pawh a lo haw tawh a, min lo làwm thiam leh khawp mai. Holam taka teihawi kual ka ni lo bawk a, min fak der thiam asin, a hnuaia thawkte pawh hian an ngaizsâng thei ngawtin ka ring, ka pa hi chu a fel ve êm a ni, ka nu pawh a ni tho a; mahse, ka pa ang êm chuan a țawng ve duh loh bâkah țhenrual a nei tlêm deuh.


Tuiluma ka intleuh thuak thuak laiin phone call a lo kal a, hmanhmawh takin ka intleuh sawk sawk a, ka han en chuan ka cousin Martha a lo ni a, ka video-call back ta nghâl a.
Wedding Hall chungchâng min sawipui a duh vàng a lo ni a. Wedding Hall ka siam ve kha ani hian a enkawl ta daih a, kei chu ka buai bâkah Julian-ate'n inneih nân an hmang tawh a, ka thil tum ka tihlawhtling chiangah ngai tawhin Martha hnênah hian ka hlàn ta rih a ni.


"Monday tlaiah chuan min rawn enpui ve hrim hrim la, i rawn tlawh khât ve tawh bawk alawm le," a rawn tih chuan dik ka tih êm avàng chuan ka lu ka bu nghat a," Hun ka neih loh pawh hian ka hre ve rauh rauh țhìn a nia; mahse, i kutah chuan engkimah a țha ber zêl ang tih ka ring nghet bur a," ka tih chuan," Mi fak der leh mi rilru dèk dàn hi chu i hre ve ngawt mai," a rawn tih leh chuan ka nui hak a.


"Ka fak der lo che, i hnaah i țha tih ka hria alawm, pawisa pawh tam tak lo khâwl ang che, pasal i neih hunah pawh duhthusàm ang zânin kan chei nalh ang a, a mawi leh ngawt ang," ka ti a, a hmel ațang chuan a hlim a ni tih hriat a har lo khawp mai.


Zànah Zorema a rawn lêng a, a hmel ka hmuh chiah chuan amah ka thlâkhlelh hran lohzia ka hre chhuak nghâl ram ram mai. A hmel hmuh erawh a nuam pângngai reng a, a nui leh sâng a, mi fel ngang a ni a, ka phù loh tehlul nèn, a eng lai hi nge ka thlâkhlelh loh ni ang? Ka nu leh pate lahin chance min pe ve daih bawk si a, kan țhu dùn a, min biak loh leh eng eng emaw sawi chhuakin a titi a, țawngpui vak pawh a ngai lo, kei chu ka nguai riau, ka intiharh lui mai mai a ni, ka tlãn chau a ni mahna, mut diai diai ka châk tak zet a ni.


"I hmêl han hmuh leh zet chuan khawharna pawh a kiang rawk rawk alawm, khawhar lunglèn damdawi țha tak i lo nih hi."


Ka nui sak ringawt a, a rilru leh ka rilru chu a inang fahran lo a ni; mahse, a bula awm hi hrehawm ka ti hran lo, bialpa angin ka thlahlel hran lo tih chauh mai a ni.


*DÂWT KAN TIH HI HRIAT CHHUAHA FINFIAHA LAIHLAN A NIH ZET LOH CHUAN DÂWT A NI RINGAWT THEI LO*

[Dingdi Pachuau]

☆OKHEE☆ - 6 By Dingdi Pachuau


Ka intiam ang ngeiin Thawhțanni a lo inher chhuah chuan Wedding Hall chu ka va tlawh ve ta a, Martha hi zawng thil mawi leh changkâng hre tak a ni a, bâkah, interior design lam zir kha a ni ve bawk a, a àwm viau tho, a lo tidanglam hneh viau tawh a ni.

Kan țhut dun lai chuan," In pa pawh ka la hmu lo, engtikah nge min hmuhtîr ve dâwn?" a rawn ti chhuak a, ka en nghâl vat a, a lo nui sak thung, engtin nge Zorema chanchin chu a lo hriat leh hman tawh ni tih ka ngaihtuah a ni. E, ka pi hnên ațangin a ni ngei ang, a zêp thei tawp nâng.

"'Kan pa' tih lêmah kan inkàwm ve a, chu zawng chu a ni mai, min duhtu ka hmuh ve chhun a nia, bâkah, amah hi mi fel tak niin, kawm tùr ka lo duh ve tho bawk si a," ka tih chuan," I duh ve deuh tho a nih chu a, duh lo bur chu ni la i nihpui lo tawp ang," a lo ti ve thung a, kei erawh chuan," Kawm a nuam alawm, ka țhiante pahnih ka kawm ve berte'n nupui min neihsan ve ve tawh si a, bâkah, ka pi hian a sawi peih ve bawk sia maw, tihhlim ve ka duh pah bawk a," ka ti leh thung a. A dik chiah a ni, tlawh tawh hlek chuan a lo sawi ve ziah a, ka ning ve paķhat bawk, kei hi chuan Julian-a min hmel hriattîr chu ni kher lo se chuan ka kàwm kherin ka ring lo, hriat pawh ka hre nâng, a fel erawh ka ti thlâwt a ni, fel mah mah ' A fel over' kan tih ang chi kha a ni lo bawk a, a bula awm hi a hahdam ka ti ve tlat.

"A ţhat tho chu, tûnlaiah chuan mi fel hi an țha alawm," a ti a, kei chuan," A nih, nangni hi, engtikah nge in tih huk dâwn?" ka ti lêt ve a, ani pawh chuan," Kan ti har vak tawh lo ang, ka nghâk rei ve ta bawk a," a lo ti ve mai bawk a, chutah, sawi zawm lehin," Nangni pawh hi ti ve thuai r'u aw; mahse, min tihkhalh erawh tum lo ula," a ti leh a.

"Keini chu, kan inkawmna a la rei lo êm mai, bâkah, pasal tùr ang phei chuan ka la en chhin hauh lo," ka ti leh mai a, ka hmangaih em tih pawh hre hauh lova pasal atâna han neih ngawt mai chu a risky ka ti mah mah a ni, bâkah, tuna ka awm dàn nèn hi chuan a inmil lo, pasal mamawh ka la inti lo pawh a ni mahna. Kum lam lo tam chho ve deuh mah se pasal han neih ngawt chu, ka zalèn thei tawh dâwn lo asin, hetia awm mai mai hi nuam ka la ti ve nasa mai si a.

Mahse, mahni chauh inngaihtuah thei ka ni bîk lo. Ka nu leh pate an upa chho ve zêl a, an fa neihchhun tak meuh ka ni bawk si, ka nu phei hi chuan pasal nei tùr hian min duh tawh tih ka hre reng mai, an upat tak tak hma hian tu mawng ben tùr an duh a, tu hmuh an châk tawh a, min nawr luih erawh an hreh chauh ni maiin ka hria. Ka pi lahin ka tlawh azãtin Zorema chanchin min zâwtin pasala nei thuai tùrin min ràwn reng a, tlawh pawh ka hreh phah fo.

Krismas hlim leh dam takin kan hmang a, Zorema nèn pawh kan inzui nasa ve ta khawp mai. A nungchang ka hre chiang deuh deuh a, a felzia, hawihhàwmzia leh nèl loh theih loh a nihna chu ka hmu fiah deuh deuh bawk a, a rûk tak chuan vànnei ka inti viau țhin, eng mah ka nih loh tehlul nèn, min duh ve tlat mai si a, tih takzeta duh lêta hmangaih ve pawh ka tum viau a ni.

Julian-a leh Hlimhlimi pawhin fapa duhawm zet an nei tawh a, min tiam tawh ang ngeiin a hming hmasa zâwk tùr ka sa ve a, 'Gordon' tiin, kan hman chângin kan tlawh ve fo, a pa a'n chhùn mai mai khawp a, a hmel a țha reuh tak zet a ni. Heidi pawh a inla u ve tawhin a fel khawp a, han chhawnchhaih pawhin fel tak takin min chhâng țhin a, min nêl ve bawk si nen, an ina ka lèn chhoh hi chuan a làwm tùr keng lo hian ka kal ngai lo.

Sêna pawhin min rawn text zauh zauh a, min rawn text chhunah lah chuan hun âwla zin leh tùrin min sâwm ziah bawk. Zin leh chu ka châk a; mahse, hun ãwl neih laia Zorema bula hun hman tam ve rih hi ka duh a ni. Ani lahin min thlahlelin min duh ve êm êm mai si a, zan tin deuhthaw a rawn kal a, duh lo viau ila chuan ning hlê tùr chu ka ni; mahse, nin theih tùr hian a awm bîk miah si lo va, ka inhre thiam bîk lo. A lo lan loh hi chuan ngaihțhat lohna emaw amah han ngaih ve deuh veng vengna emaw ka nei ve ta tlat a, ka duh ve ta viau a nih ka ring ta hial mai.

Kum thar a lo inher a, class țan a lo nih leh tâk hnu chuan a buai ta deuh a ni ang, a rawn lang khât ta deuh. A hmaa zan tin deuhthawa rawn lang țhin a ni bawk a, a rawn lan loh zàn chuan khua a har ve ruih mai, mahni chauha games khelh ruk ruk chu a nuam ta miah lo. A rawn lêng thei dâwn lo tih min rawn hrilh zàn hi chuan hma taka ka mut loh leh ka lêng chhuak a; mahse, ka nuin a remtih vak țhin loh avàng erawh chuan ka chhuak rei ngai lo thung.

Julian-a nau Bawihtei'n pasal a nei dâwn tih sàwmna ka hmuh chuan ka thaw huai a, ka lawmpui khawp mai. Doctor hial a nei dâwn a nia, a nei vànnei dâwn khawp e. Mi fate hi zawng, an huaisen bîk ngawt mai, pasal hi an nei ngam mai zël a, an hmangaih tak takte an ni ngei ang chu maw, Pathianin an tâna a ruat an nih ngei pawh ka rinsak e, Ațana leh Julian-a pawh an la hlim dùn êm mai, nupui pasal neih hi hlimna bul țanna pawh chu a lo ni mahna...

Julian-a pawhin Zorema chu a lo sâwm ve a ni ngei ang, zàna a rawn lèn chuan," Kan kal ve ang chu tiraw?" a ti a, kei pawh chuan," Kal ang chu, Bawihtei hi chu ka nau ang tho alawm a nih, a thû ber pâwlah kan țang ang chu," ka ti ve a.

"Engtikah nge kan tih ve ang?" a rawn tih chuan ka en vat a, mak ka ti a, a fiamthu em tih ka hriat duh vàng a ni; mahse, a hmel leh mitmengah chuan fiamthuna a lang miah lo, thutak zet hian min lo en a.

"A la hma i ti lo maw? Kan inzuina a la rei lo bawk si," ka tih chuan," Inzui rei kher a ngai hleinem, ka hre chiang tâwk tawh che alawm," a lo ti mai a, țawng leh tùr hre mai lo chuan ka ngawi leh rih a. Amah vêk chuan," Pasal nei rual i ni ve tawh tho a, kei lah nupui neih hun ve tawh tak ka ni bawk, ka chhûngte pawhin min sawipui fo tawh a ni," a ti leh a.

An inah vawi hnih min hruai tawh a, a chhûngteho, a chènpuite pawh ka hmu kim vek tawh, an fel hlawm khawp mai a, chhûngkaw zahawm tak an ni. An chhûng an rual a, an tê chhe lo bawk nèn, an zahawm khup mai a, a zahthlâk ve lek lek thei hial a ni. Zorema hi an unau zînga upa ber a ni a, nupui nei tùra an sawipui fo pawh chu a àwm ve tho mai.

"Ka duh che a, nang pawhin min duh lo ni chuan ka hre bîk lo a ni, mipa zei tak chu ka ni hauh lo; mahse, nupui fanau chãwm thei dinhmunah ka ding ve tawh a, kan innei a nih phawt chuan kan inah pawh i awm rei lo ang, kan in dang nghâl bawk ang, hrehawm tiru taka hun i hman ka phal dâwn lo, nau hmeichhia ka nei ve diah si a, hmeichhia chuan an làwi luhna chhûngkuaa hmeichhia an tam hian hrehawm an ti țhin tih ka hre ve kar a nia aw, " a tih leh zêl phei chuan sawi tùr rêng rêng ka hre tawh lo, ka en tawp ringawt. Chutiang thleng thleng phei chu ka la ngaihtuah chhin lo rêng rêng a nia, a lo ngaihtuah thui ka ti khawp mai.

Mumalin ka chhâng lo, nupuia min nei duh ka vawi khat tawnna a ni ve a, chhûngril lamah làwm rûkna riau ka nei ve tlat. Hmeichhe nù tak ka ni lo va, chutiangin mi fel tak pawh ka ni hek lo, bâkah, nungchang ti dêm dêm ka ni lo va, min ngei deuhtu ka neih pawh ka ring deuh hial, ka ngaihtuah hran lo mai pawh a; mahse, min nei duhtu ka hmu ve tlat, a làwmawm tih loh rual a ni lo; mahse, ka chhûngte bulah chuan ka sawi chhuak duh rih lo, an phûr lutuk palh ang.

A ni tèlin Zorema chu ka duh chho ve telh telh a, min duatin min thlahlel thiam bawk a, ka ngaina ve tak zet tawh a ni. Julian-a hre chhuakin ngaihtuah chhuak fo mah ila ani chu engtikah mah ka tân a rem ngai dâwn loh avàngin Zorema-ah hian innghah tawp mai țha ka ti a, a rilru a tluang purh bawk a, pasal țha tak a nih ngei pawh ka ring, ka hmangaih chiah em tih chu hre lo mah ila ka duh ve tho a, ka hmangaih lo a nih pawhin ka hmangaih chhunzawm ve thei ngeiin ka ring.

Bawihteite inneihnaah pawh chuan kan kal dùn a, Aţana leh Julian-a pawhin min fiam nasa," Engtikah nge in tihve dáwn? Nangni hi next tùr in ni, kan nghah rei in ngaih loh kan beisei," an ti a, min lawmpui ve hlein ka hria. A ni lah tak a, mipa ka ngaihtuah lo ve êm êm mai si a, kum kha leh chen kha ngaihzâwng ka nei ngai lo a nia, hetia zui ka han nei ve ta mai hi ka țhian țhate tân chuan lawmpui loh rual ka ni lo rêng a ni.

Mahse, pasal neih thuai erawh ka duh lo, Martha khân ka neih khalh a hlau viau kha a ni a, ni e, ani'n nei phawt se, kei chuan muangchângin, ka nulât zalenna hi ka hmang phawt rih ang, chumi rualin, pasal neih dâwn chuan inkhâwl ve deuh hlek pawh ka duh, hna thawh mumal ka nei si lo va, Zorema chhûngte tân chawmhlàwm tùr chauha làwi luh chu a fuh vak bîk lo ang. Zorema pawhin kumin chu min nghâk ve thei tho ang chu maw, a senior phah viau lo tùrah ngai bawk ang, inneih rilru puin ka inbuatsaih ru tih erawh a bulah sawi kher ka tum rih lo, bâkah, a tân a thangtlàwmthlâk ve duh ang a, duh lovin kumina nei ngei tùrin min nawr tut tut palh ang.

Rilru danglam pu ka ni ta bawk a, țhahnem ka ngaiin pawisa ka khâwl ve theihna tùr a nih chuan engkimah ka insûm ve a ni, nu leh pa thawh chhuah ațang chuan sum tam tak chu ka nei ve a ni mahna; mahse, mahnia thawh chhuah ve ngei hi a hlû ka ti a, pùr buai loh theihnaah chuan pùr loh hi ka tum ve hrâm hrâm țhin, ka bike leh maniature pawh keima thawh chhuah ațanga ka lei ve a nia, pasal ka neihsan daih chuan ka ngai ngawt ang! Bike hi ka la chhawm ve thei a ni maithei a; mahse, miniature erawh ui tak chungin ka tihral mai a ngaih hmel, Sêna khân a awt viau mai kha a ni a, ka pe tawp mai dâwn em ni ang? Kei chuan pasal ka neihsan daih dáwn si a.

Ka ngaihtuah thuiin ka rilru a va danglam sâwt tak! Pasal neih ka han tintuah ve ta a nia, kei hi ka lo phûr mah mah a ni, ka thil ngaihtuah avàng chuan ka han innuih leh rih a, nikum lama ka rilru leh tuna ka rilru hi chu inpèrsan tawh tak a ni.

Kum chanve dâwn kan lo thleng leh ta dèr mai, tunah chuan Zorema pawh ka thil ngaihtuah kha ka hrilh ve tawh a, ka inkhâwl ve chu ngai lo a ti viau nain min sawisêlsak duh bîk lo, ka duh dàn chiah, ka thutlûkna a ni a, min zahsak kha ka duh ve tlat a ni. Ka nute pawh ka hrilh ve thuak tawh a, an lo phûr nasa mai a, ka nu chuan," In induhtawn phawt chuan keini lamah chuan hnialna kan nei hauh lo, kan lâwm êm êm zâwk ang. Kan sumdàwnna pawh hi in ta vek tùr a nia, ani lo enkawltu tùr fapa kan nei dâwn chuang hleinem, tiraw Paa? Zorema hi zawng a rilru a thlâk ta viau a nih loh chuan a sual ka ring hauh lo," a ti ve sárh sárh a. Ka pa pawh chuan," Ni tehlul mai, kan fa neihchhun tân chuan kan neih zawng zawng hi a tâ vek tùr alawm, keini chu nakin lawkah, tûn ațanga kum sàwm vêl a ral leh hunah meuh chuan kan upa ang a, thawh pawh kan thawk peih tawh kher lo ang," a lo ti ve charh charh a.

Thu làwmawm dang kan hre leh ta, Martha-i chuan pasal a nei dâwn tak tak e, dinpui atân min duh viau nain ka hnial a rin avàngin min rawn sâwm ngam lo tih a hnua min hrilh chuan," Nia, a pawi lo, dinpui dâwn lo che mah ila chhûngril lamah ka dinpui dâwn che angah ngai tho rawh, engkimah ka buaipui vek tho dâwn che alawm," ka ti a, ka cousin zînga ka kawm ngeih ber a ni a, ka duhsak ber a ni bawk, ani pawh hian chu chu a hre chiang khawp ang.

Zorema ka hrilh ve zat a; mahse, a pa hrisèlna checkup tùra Vellore an pan tùr ni a lo ni a, a hman dâwn lo a ni. A pa hi hrisèl hmel viau angin lang mah se a rûkin a hrisêl lo va, an entîr ve fo tih pawh ka hria, chuvàng chuan Zorema hi nupui nei thuai tùrin an tur ve fo bawk a ni àwm e.

Martha chu buaipui vak a ngai lêm lo nain ka theih ang tâwk chuan ka ngaihven ve a, mahni intodelh ve tak ni mah se ka puih theihna ang angah chuan ka pui a, ui ka nei bîk lo. Thil changkãng leh thil țha tak tak hria ni mah se thil țûl lova insêng ral mai mai chi a ni lo va, a mamawh chin chauh a lei țhin. Ani nèn pawh hian inanna tak kan nei ve a, nu leh pa thawh chhuah saa inchhek arbàwm viau hi kan duh lo ve ve a, kan theih tâwpa nasain sum thawh chhuaha intodelh kan tum ve țàng țáng țhin a ni.

An inneihni chuan ka inchei uluk ve khawp mai a, mahnia inchei pawh duh lovin Martha cheitu makeup artist lãr ve zet chu ka incheitîr ve a, dârthlalanga ka han inhmu zet chu ka inhai ve lek lek hial a ni, makeup ka hmang ngai vak si lo va, ka nalhpui em tih chu ka hre chiah lo nain ka inrintâwk phah ve khawp mai thung, ka thawmhnaw hâk rawng leh ka makeup hman chu a inchawih nalh êm a ni, ka sam pawh a kàwi nalh khawp mai.

Martha-i'n min hmuh chuan," Wow..!! Va chhe lo tak! Ti kha chuan tlangvál tam tak mit i la dáwn chiang, Zorema lo kal lo chu chân nasa a inti ngawt ang chu!" a ti a, a nui sáng a. Ani pawh duhthâla chei mawi a ni bawk a, a chhe lo tak zet a ni, a hmel hmuh pawh a nuam, a hlim êm êm si a.

Inneihnaah chuan mi pawh an tam khawp mai, biak in chhûng chu a zau viau a nia, kan khat hneh lutuk ringawt, hetiang hian Zorema nèna kan inneih ve hunah min lawmpuitu an tam ve ang em? Tam ve tho ang, keini lam chhûngkaw hung tak ni hlawm lo mah ila Zoremate lam an hung hlawm alawm, bákah, țhenrual țha tak takte pawh kan nei ve tho a...

Ka thil ngaihtuah avàng chuan inkhâwm pawh chu rei lo riauin ka hria, chumi hnu lamah chuan pâwn lamah thlâ lain kan buai leh a, cameraman pawh an tam bawk e, Martha chu a nui sâng reng a, mo nih a inhmeh ngawih ngawihin ka hria, a pasal pawh a chhe hran lo, a chêr mah mah em aw ka ti; mahse, Martha pawh a thau bîk chuang hleinem.

Hming-thingtlânga ka hmu thânin ka hria!! Eng nge a lo tih ve ni? Ka en nawn leh ngat a, amah a lo ni tak tak! Sîr zâwnga dingin nula pakhat nen hian an inbia a, ngun deuhin ka en a, a inmêt faiin a lang thar riau maiin ka hria, sawtianga a inchei saw ka la hmu miah lo, amah a palian bawk a, a inhmeh zuih mai ka ti, inneihnaa a lo kal dâwn vàng hi a ni ngei ang, a inmeh fai vek ni. Mipa lam nèn hian an inchhûng tihna a ni thei ang em? Nge a hmel hriatte a rawn zui ve tawp? Mahse, an khua ațanga rawn kal vang vang tùr khawp chuan hmel hriat satliah chu a rawn kal chhan lo tawp ang le.

A rawn inher a, ka lo en reng a ni tih hria ang hriminin min rawn en ve ta siah mai, a hmaa min en țhina ka awm dàn ang khân ka awm leh tawh; mahse, chutiang duh lo chuan ka insehruh a, engah mah ngai lo ang mai chuan ka en lui ve tlat a. Ani pawh chuan min hmuh a inring vak bîk lo a ni maithei, a awm dàn ațang chuan ka hre thiam mai. A hmeichhe biak lam chu hawiin eng emaw hi a sawi sap a, chutah, ka lam a rawn pan zui ta a, kei ka inher ve ta hlauh thung.

Biak ka duh lo, a chungah hian ka la thinrim reng a ni. A toothbrush pakhat min hmantîr laia mahni intodelh tùra min tih kha, chutah, ka haw phei tùr pawh min chibai duh loh thu a sawi bawk kha, kha khân min tizak ngawih ngawih, ka han ngaihtuah lêt leh phei hi chuan ka thin a rim leh tut tut a, a hmêl hmuh leh pawh hi ka duh tawh lo.

"Lawmkim...??"

Ka ding dawt! Chutiang chuan tu mahin min ko ngai tawh lo, 'Lawmi' min ti vek. Eng nge a hriat ni, chutiang tea min koh ni? Ka inher a, kan inhmachhawn ta ràn mai; mahse, kan bul vêlah mi an la awm ve nuai nuai tho a, àn khum erawh ka tum hauh lo.

"Helaiah hian hmuh che ka lo inring hauh lo asin," ti sup pah hian ngun zet hian min en a, ka chhîp ațangin ka ke lèr thlengin min en chhuak dap, ka va ngei ru tak, mit nghal lutuk mai!

"Kei deuh!" ka ti lêt ve ngat a. Phûr taka ka lo biak hluai a ring a nih na chuan a ring sual ve khawp ang le.

"Mo hi in lamhnai a ni ngei ang maw?" a ti leh a, țawngkaa chhâng lo chuan ka lu ka bu deuh nghat ringawt a, thla pawh ka la lâkpui lo tih ngaihtuah chhuakin an lam chu ka hawi vat a; mahse, innei tharte thla lâkpui tum chu an la kiam hran lo khawp mai.

"An la tam lutuk, nakin deuhah kan lâkpui ve dâwn nia," tiin a kekawr ipte zen chuan a ding a,"Mo aiin ka mitah chuan i nalh zâwk mahin ka hria?" a rawn ti leh a, chu zet chuan min țhâwng khawp mai, biang sa ham ham chung chuan a mitah ka en chho nghâl vat a, fiamthu a lo thiam ve a nih àwm hi.

"Engtikin nge i rawn phei? Engtikah nge i haw phei leh dâwn?" tiin thil dang chu ka sawipui ta daih a. Ka biang sa ham ham chu a sen chhuah loh hrâm ka beisei, a thil sawiin keimahah effect a nei tih hmu lo se ka duh hle si a.

"Nimin khân ka rawn phei a, naktipah ka haw phei leh ang," tiin min rawn din hnaih sauh a, chutah," Sêna chanchin pawh min zâwt dâwn nange?" a rawn ti leh a, kei erawh chu min rawn din hnaih ang chiaha tawlh hnung vein,"Kan in-text zauh zauh a, ka hria alawm," ka ti ve thung a.

A bula awm rei loh ka duh avàng chuan tuak tharte lam hawi lehin," Kan phei ve tawh dâwn em ni ang?" ka ti a, zâwt angin ka lang na a, a chhànna pawh ngaichang lo chuan ka pên zui ta nghâl a, ka hawi lêt lo nain min rawn zui chu ka ring tho.

Moneitu Sawmkima nèn chuan an lo inhria a nih chiah chu, rin loh deuhin Martha nèn pawh chuan an lo inhria niin! An inbia ka hmuh chuan makti deuhin ka en ringawt a! Thil hi a lo va hriat loh theih ve aw ka ti rilru vawng vawng ringawt mai.

*******

Kum 2 hnuah chuan
~~~~~~~~~~~~~~~

Lengpui Airport ațang chuan taxi min lo nghâk rengtu-ah chuan chuangin kan tlãn ta vang vang a, ka pain min rawn hruai tùra motor rawn tirh a tum viau nain ka hnial a, hnathawh tu emaw ber tihbuai kha a ngai dâwn a, chu chu ka duh lo a ni, ka duh dàn angin taxi erawh a rawn tîr ta tho thung.

Kum hnih chhûng zet chu Mizoram ka hmu lo a nia, boruak thiang tak mai chu ka han hîp vang vang a, ka rilru pawh ka siam pah sauh sauh bawk. Tunah chuan a hma aiin kum hnihin ka upat belh bâkah ka rilru pawh a lo puitlin belh ve bawk a, hnunglam hawi kîr lova hmalam pan tùr ka nihzia pawh ka hre chiang, ka infuih ru sauh sauh rêng bawk a ni.

In ka thlena ka nu leh pate nèn kan han inhmuh leh zet chuan ka lung a chhe thar leh a; mahse, mittui tlâktîr ka tum lo, hlimna vàng pawh ni se. Anni pawhin min hre thiam takin min lo làwm a, ka neihchhun liau liau an ni a, ka awm loh chhûngin an lo upat sawt ka rin nèn ka hmu țha dùn lutuk chuan ka rilru a tihlim viau a, ka lãwm viau bawk a ni. Phone-ah inbiain inhmu zauh zauh mah ila a tak nèn hi chuan a inang tak tak thei si lo va, hlim leh dam taka kan inhmu thei ka làwmna chu thuhran, ka hmu țha dùn lutuk chuan min tihlim zual a ni.

"Zanin chu i rawn haw lawm nân chawhlui buatsaih kan tum deuh a nia; mahse, i chauh kan rin avàngin naktûk tlai lam atân kan sawn leh ta zâwk a," ka pain a tih chuan," A ngai hran hleinem, pa; mahse, in tih tlat chuan ka hnial chuang lo va," tiin a kut chu ka khalhsak niap niap a, a kutte hi ka khawihna a rei tawh lutuk a, ka ngai tak zet a ni.

"I cousin duh ber Martha-ite chhûng leh in hnuaite nèn eiho ila a tâwk mai ang em?" ka nuin a tih chuan," In tih dàn dán a ni mai, kei chuan thu neih ka tum lo," nui chung hian ka lo ti a, ka pa chuan,"I duh chuan Ațana leh Julian-a pawh kan sâwm ve ang chu," a lo ti ve a. Anni pahnih hming a rawn sawi chhuah tâkah chuan," Pa, ka awm loh chhûng khân an rawn kal ngai em?" tiin ka zâwt nghâl vat a.

Ka pa chuan ka nu a melh zawk chu ka hmu hman reng, chutah, muangchâng hian,"Kal e, biak che an duh a, an be tlang thei si lo che a, rawn hmuh che an tum țhin a ni," a ti ta a, phone-a kan inbiakin Ațana leh Julian-a chanchin ka zâwt ngai hauh lo, a bîk takin Julian-a phei hi chu hriat ka duh lo tawp a ni mai, anni pawhin min rawn hrilh ngai chuang lo a nih kha.

"Julian-a chu a inthiam lo lutuk a, i chunga thil thleng hi a thiam lohah a ngai tlat a," a tih leh chuan chhâng lovin ka en ngai chu ka en vang vang phawt a, chutah,"Theihnghilh rih teh ang, sawi chhuah ka duh rih lo ve," ka ti ta a, a hnu lamah chuan kan sawi ri ta lo.

A tûk tlaiah chuan chawhlui chu kan buatsaih a, in hnuai lama mite zawng zawng leh Martha-ite chhûng kan sâwm a, kan ri ve nuai nuai mai a, bengchheng deuh angin lang mah se a nuam ka ti angreng. Martha-i fanu Harriet, sam buang thâng leh kir mawi êm êm mai chu ka làwm reuh khawp mai a, kum khat a tling ve chiah nain a chum a la reh lo a ni ber ang chu, a kal ve thei tawh bawk a, a kal tarh tarh chu a duhawm tarh tarh reuh lutuk!

Chaw kan ei dáwn hnaih chuan ka pa chuan," Kan kim țêp e, pakhat chauh nghâk leh lawk ang, ka kutke ang maia ka tâna țangkai a la rawn thleng lo va, a rawn thleng țêp ang," a ti a, hna thawka chhawr thar a neih thu kha chu ka awm bo dâwn khân a sawi ngei mai a, kan inbiaknaah pawh a rawn sawi lang zauh zauh tak e, a hming kha Halan-a a ti em ni kha? Kha kha a ni ngei ang, 'Ka kutke ber' a tih ziah kha.

Harriet-i pawma ka room lama ka luh hlàn chuan Halan-a chu a lo thleng tawh a ni ngei ang, kan va chhuah chuan chaw ei chu an lo siam tawh a, an lo ri chùl mai a, Harriet-i pawh chu a pa hnênah dahin ka siampui chhunzawm ve ta nghâl a.

"I dam țha maw?"

Ka en chho vat, Hming-thingtlânga ka hmuh chuan makti zet hian țawng nachâng pawh hre lo chuan ka en ta reng ringawt a.

"In lo inhmu tawh maw? Bawihte, ka sawi ve ziah, ka kutke ber ka tih ziah țhin 'Halan-a' a nih kha," ka pain a rawn tih chuan mak ka ti lehzual. Hming-thingtlãnga hi Halan-a maw? Engtin nge Hming-thingtlânga chu Halan-a a lo nih tâk daih theih a?!


*MAHNI KAN INHRIAT DÀN AI HIAN A TLÂNGPUIIN CHHÛNGRIL LAMAH HIAN KAN LO CHAK DAIH ZÂWK A NI, KAN INRING LO MAI MAI A NI ZÂWK*