BOUND BY TEMPTATION by Puii Sailo (Completed)

Episode nei ho a hlawm a dahkhawmna
Ngaia
Site Admin
Posts: 25813
Joined: April 30th, 2016, 4:07 pm

BOUND BY TEMPTATION by Puii Sailo (Completed)

Unread post by Ngaia » September 5th, 2021, 1:41 pm

g0qgt8am.jpg

BOUND BY TEMPTATION
Translated by Puii Sailo.

Proloque:

LILIANA :

Ka thil tih hi a dik lo tih ka hria. Midangin an hrechhuak anih a, ka pain a hrechhuak anih chuan Chicago hi ka chhuahsan a phal tawh ngai lo ang. Nilo, kan in pawh hi chhuahsan min phal sak tawh lo dawn lo. Hmeichhe tan phei chuan a mawilo lehzual. Tun thlengin Gianna thil tih kha an la sawi peih a nia, sawi tur dang ka pe leh anih chuan, an lawm hlawm ngawt ta ve ang. Scuderi fanu chetsualna chu tunge ngawihbopui phal ang.

Mahse chhungrilah hian Gianna ang chiah ka ni tih ka hria, eng thlemna mah kan tlansan thei lo. Thil pawi turah pawh enge thleng hriat ka tum ve zel ṭhin. Romero room kawngkhar chu a inkalh lo a, thawm dim thei ber turin dingdihlipin ka lut a. Thawk pawh ka thaw ṭha ngam lo. Pindan chhung chu a lo ruak huai a, mahse bathroom kawngkhar chu a lo inkhar phui lo, ka bihthla zui nghal. Ka beisei ang ngeiin shower hnuaiah chuan a lo ding a, mahse ka awmna aṭang chuan ka hmu chiang thei lo. Kawngkhar chu nem hawngin ka lut a. A taksa khuhtu awm miah lo ka hmuh rual chuan ka thaw a tawp mai dawnin ka hria. Hnunglam hawia ding anih vang chuan chiang takin ka hmu thei a.

A sam uk kharh mai a nuai laite chuan a hnung leh, a dar leh a ban tihrawl che velte chu a hmuhnawm takzet. A dar pharh hlap aṭang chuan a kawng fek rat lam chu ka melh thla zel a, hetiang hian tu mipa mah ka la hmu ngai lo. Mahse Romero aia nalh hi an awm ka ring chuang lo. Ka suangtuahna a Romero ai pawh khan a nalh daih zawk. Muangchangin a rawn inher a, tlan chhuak tur ka ni tih ka hria, mahse ka thei lo. A taksa chu ka melh kual zel a. Phurna a nei deuh em le? Min hmuh rual chuan a ding chat a. Ka mutkawr pan leh chhing tak chu melh kualin, ka mal khuhtu awm lo chu a en vat a. Ka zawhna chhanna chu ka hmu ta. A thil hmuhg avanga a taksa danglam mek chu ka hmu nghal. A kap lian tual tual ka en reng lai chuan ka biang sa hat hat pawh chu ka hre thei.

Hmanhmawh chuang miah loin tui chu a herh tawp a, towel a veng nghal. Ka hmaah rawn dingin, “I hriat kha. Hetiang hian midangin min rawn hmu anih chuan ngaihdan ṭhalo tak an nei vek ang. Chu chu ka nunna atan a pawi theih bakah, i hmingchhiat phah dawn bawk,” a ti hul hak a.

Ka la che thei chuang lo. Lung ang mai ni mah ila ka kawchhung chu a alh pup pup ni maiin ka hria. Khawdang ka hawisawn thei lo, ka hawisawn phal lo.

A towel venna chin chu ka melh leh a, a taksa chu ka khawih chak tlat. Ka kut chu lek chhuakin Romero awm chu ka khawih chak, a vun leh tihrawlte chu ka khawih chak a ni. Mahse ka khawih fuh hmain ka banrekah a lo man a, a vawnna chu a na thei hial. A mit takah ka melh vat. Mak tihna leh zahna inpawlhin. Mahse Romero hmel chuan min ti khur thei hial.

Zawi muangin a rawn kunhniam a, min hnaih telh telh. Ka lo maimitchhing tawp. Min fawp dawn emaw ka ti a, mahse min fawp miah lo.

Kawngkhar inhawng ri ka hriat rual chuan rang lutukin ka hawi chhuak a. A kalna tur dala ka din vanga lo kunhniam mai mai a lo ni reng, min fawp tur ni loin. Ka zak lutuk chu ka sa pup pupin ka hria.

Engtinnge min duh ve mai tura ka lo beisei theih zawk le? “I chhuah a ngai,” a ti leh tawp a. Ka banrekah a la vuan reng bawk.
“Anih chuan min thlah ta che.” Ka ban chu thlahin rang fein a tawlh hnung nghal a. Ka din ngai chuan ka la ding reng a, min khawih se ka duh a sin.

“Chhuak rawh,” a ti leh sap a. “Ka thutiam ka bawhchhiat hmain chhuak rawh.” Ngenna leh thupek a ni.


CHAPTER – 1

Nula anga Romero ka fiam hmasak ṭum kha ka ngaihtuah chhuah apiangin engtin emaw tak ka awm ṭhin. Ka unaute bakah ka nu pawhin mipa fiam ziah lo turin min hrilh fo ṭhin. Mahse chona anga ngaiin ka zawm duh ngai lem lo. Khami ni a Romero awmdan kha ka ngaihtuah leh ṭhin a, a bulah khan him riaua ka inhriat bakah eng ang pawhin fiamin, a hmaah khan inti itawm vel mah ila, min khawih duh ka ring chuang lo. Ka la naupan bakah engmah tak tak ka la hrethiam lo a, mahse mipa leh hmeichhe kara thil thleng ṭhinte hi ka hrethiam ve vek tawh emaw ka ti ve tho. Mahse ka inthiam lo hran lo, kum 14 chauh ka la ni tlat a lawm.

Ka u Aria leh Luca-te inneih hma lawk khan Romero kha Aria veng turin kan bulah a rawn awm ve a. Nupui hual veng tura mipa dang thlan chhuah chu thil harsa tak a ni ngei ang. Mirinawm tak nih a ngai phawt a, chuvang chu anih ka ring Romero kha ka rin nghal em em.

Diktak chuan a kawrvar hak chunga jacket dum a hakte bakah, a silai pai lo langte kha a inhmehin a lang pa hliah hliah. Romero hi mipa hmelṭha leh pian nalh tak a ni ve hrim hrim bawk. A mitmeng uk dum lek lekte hian mipa a nihna a tilang chiang bik ngawih ngawih. Ka mipa hmuh ṭhinte anglo takin a zaidam hmel bakah, a ngilneih hmel bik lutuk. A lakah hian enge ka beisei a, engtia min chhanglet turin nge ka beisei ka hre bik chiah lo.

Khatia ka fiam ni khan a awm a nuam chiah lo tih chu ka hrethiam ve mai a, mahse a mitmenga ka thil hmuh, enge anih ka hriat siloh khan a zunah min uaitir ta a ni ber e. Ka pa sipaite pawh ka fiam fo a, ka pa vang chauhin an insum ṭhin tih ka hria. An zuna uai aiin an mahni huatna min siamsak hlauh thung ṭhin. Mahse Romero kha chu a danglam tlat. A lakah ka him tih inhriatna ka nei a, engtin pawh awm ila min zuam phah miah lo ang tih ka hria. A chhan leh vang ka hriat hauh si lohin ka ring em em a ni tawp mai. Mahse mafia mipate hi tumah rinawm an awm lo a, Romero pawh hi an zinga pakhat a ni tho a, a inthup thiam vang mai mai pawh a ni ve thei.

Thla engemaw zat a liam leh meuh chuan Romero pawh ka lo ngaih ang kha a ni hauh lo tih ka hrechhuak ve ta. Ni tura ka rin ni loin, a nihna dik tak ka hmu ta. Khami ni a ka thil tawn khan vawiin thlengin min la tihlau a, Romero ka duhna ṭhinte pawh kha bo vek tur hial khawpa rapthlak ka tawng tlat a ni.
Salvatore Vitiello vuina hun hmang tur chuan kan chhungin New York kan kal a. Luca leh Matteo-te pa mah nise ka hmelhriat ve lem lo. Aria ka hmu leh thei tur chu ka phur em em a, mahse mangchhia ang maiah a chang zo ta. Kan khawvel nihna tak tak leh a chhunga chen awmzia ka hriatna hmasa ber a ni bawk.

Russian hoin Vitiello mansion an rawn beih thut vangin Romero chuan Fabi nen pindan pakhatah min hruai daih a. Chutah chuan Luca leh midangte lo thlen hma loh chuan kan awm tlat a. Fabi chiai lutuk beng daih nan damdawiin an chiu a, a muhil zui ve mai bawk. Kan hriat theih tirh aṭanga kan bula awm chawt ṭhin, Umberto lu a an kap lai hmutu tan chuan hahdam taka awm theih pawh a ni lo ve bawk a ni.

Mak deuhin kei chu ka tal buai ve miah lo thung. Fabi bulah chuan ṭhuin, a kut chu ka vawn sak ran a. Ngawi rengin thawm chu ka ngaithla ngawt ngawt a ni mai. Kan awmna pindan bul vela pen thawm ka hriat apiangin ka lo ṭang ṭeuh ringawt a, min rawn kah ve hun tur ka nghak tawp ni maiin ka hria.
Mahse Gianna text a lo thleng a, kan awmna min rawn zawt a. Khatiang reng renga chet ran kha ka la nei ngai lo. Khum aṭanga ka zuan thlak chhung leh kawngkhar ka hawn chhung kha second 2 pawh a ni lo ang. Gianna chu sam hnawk nuaiin corridor-ah chuan a lo ding a, min rawn kuah takah chuan him sawtin ka inhria.

Aria pasal neih hnu khan Gianna hian a ai a awh vek a, ka nu a buai ṭhin avangin kan nu pakhat zawk ang maiin min ngaihtuah ṭhin.
Gianna chuan inhnuai enkual tura min kalsan a tum a, mahse mahni chauha awm ka duh tawh lo. Fabi lah a la harh mai hmel bawk si loh. Chuvang chuan zui ve ka tum bur a ni mai. Remti chiah lo mah se ka nawr luih tlat vang chuan min hruai ve ta nge nge a.

Inhnuai lamah chuan kan inzui thla a, ṭhutthleng leh chhuatte chu thisenin a kawi neih nuaih a. Hetiang reng renga thisen chhuak nasa hi ka la hmu ngai lo, hlauhna chuan ka thauah a man tlat lehnghal.
Thisen rim thang nghurte vang chuan ka pum a let but but a, ka luak mai dawnin ka hria. Gianna nen chuan kan kal kual zel a, mahse mipa na tuar au ri kan hre leh tlat. Engmah hre lo ang maia kalsawn daih chu ka duh a, mahse Gianna duhdan a ni ve leh tlat lo. Thir kawngkhar chu a hawng a, a lo thim deuh khup lehnghal.

Step, inhnuai chhukna a lo awm a, basement-ah chuan light eng lemlo tak a awm a, a bak ểng luhna tur engmah a awm lo. Ka khur der der tawh.

“Khutah khuan chhuk i tumlo ang ti raw?” ka ti sar sar a. A chhanna ka hriat sa reng zawhna ka zawt a ni. Ka bula mi hi tudang ni loin Gianna a ni tlat a, kan thawm hriat kha finfiah ngei ngei a duh dawn.

“Chhuk dawn. Mahse step-ah hian min lo nghak ang che.” Gianna chuan ka mit taka en chungin a ti a. “Aw le,” tiin chhang ve bawk mah ila zui ka tum tho.

Keipawh hi Gianna ang tho ka ni, thuawih mai hi harsa tih chang ka nei fo. Gianna kal tawh chu a rawn hawilet leh a. “Tah khan ilo awm ang tih min tiam rawh?” a ti leh ngat a. Hnial tuma ka an zuai lai chuan au ri bawk kha kan hre leh ta. Ka hmul thite chu an ding ur ur mai.

“Aw le, ka tiam e,” ka tichhuak thei hram. Gianna chu ka en reng a, ka hmu chiang thei vak lo. Mahse a thil hmuh vang chuan a phu dawrh tih erawh ka hre thei. Ka insum thei tawh lo chu thawk chhuah hawk pahin Gianna awmna lamah chuan ka tlan thla a. A thil hmuh kha ka hmuh ve a ngai. Gianna hi a huaisen a, awlsam taka tih hlauh theih chi a ni tlat lo.

Basement ka thlen thlak rual chuan pindan laia ka thil va hmuh vang chuan ka ding dat a, mahse enge thleng ka hrethiam mai lo. Let chho leh mai lo chuan ngun zetin ka melh kar a, kum tam tak liam hnu pawha ka thil hriatreng ni tawh tur chu ka hmu ve ta.

Chair-ah chuan Russian pahnih an lo phuarbet a, thisen hlir a ni mai. Matteo leh mi pakhat, ka hriat ngai lohte chuan an lo sawisa anih chu! Hlauhna chuan ka hrawk min hnawh nghal ut ut a, Romero mitmeng ka hriat ṭhin leh ka rin em em kha hmuh tur a awm tawh lo. Ka hmelhriat ngai loh Romero, tualthah chaka meng sen rum chiah hmuh tur a awm. Ka hrawk leh ka awm a min hnawhtu nasa lutuk vang chuan theihtawpa ringin ka ṭe chhuak a. An vai mai chuan tihsual nei ang maiin keimah ber chu min en ṭhap. Chumi hnu chuan enge thleng ka hre mumal tawh lo.

Tu emaw berin min pawmbet a, Matteo chiuna thip zek kha ka hre leh. Ka taksa chu a zawi riai riai a, ka chhunga hlauhna awm tlat erawh a reh ve chuang lo. Ka khawhmuh chu a vai deuh riai a, mahse ka bula Romero rawn ṭhingṭhi lai chu chiang takin ka hmu thung. An mi mante thisen chu a hmaiah leh kawrahte chuan a kai nuai a, ka hlauhna tilang tur pawhin chakna ka nei tawh lo. Ka taksa chu a zawi vek tawh.

ROMERO :

Mipa ka ni a, chaklo zawkte, naupang leh hmeichhiate venghim tura ka intiam ang ngeiin ka ti ang. Ka nunnain tuar dawn pawh nise. Ka thutiam tawh chu engvang mahin bawhchhiat ka tum lo tawp bawk. Kan hnaah hian rawng taka chet a ṭul chang a awm bakah, tual hial thah a ṭul chang pawh a awm ṭhin. Mahse midangte humhim ka duh tlat ṭhinna hian keimahah hian engemaw ṭhalai chu a a awm ve nitein min hriattir ṭhin a. Chu phei chu a pawimawh ber hran lo.

Luca hian ti tura min hrilh ang ang chu ka ti zel ang. Ka dam chhunga ka inchhirna tur thil pawh nise. Mafia member ni tura thutiam ka lak ni khan, ka nihna leh mizia chu phumbo a ni tawh a. A ṭul ang leh ti tura hrilh ka nih anga che mai turin mihring thar ka ni nghal tihna a ni. Ka duhdan leh ngaihdanin pawimawhna a nei tawh lo. Mahse Liliana mangang au ri khan ka mihring hlui chu a kaitho leh tlat. Russian ho na tuar ṭe ri kha chu a bengchheng ka ti satliah a, min tidanglam lem lo. Ka hriat fo tawh ṭhin an ni a, a aia nasa zawk pawh mawle…

Kha hmeichhe naupang, chhantu mamawh au ri khan ka thinlung hi a thleng pha chiang a ni. Vih ang maia na in min khawih tlat. A hmel leh a mitmeng kha min tibuai zualtu a ni. Mi ṭha tak ni ila, ka insiamṭhat phah hial duh ang, mahse ka hna hi ka nunna a ni tawh a. Chhuahna kawng dang a awm tawh lo. Kei chu mob mipa ka ni a, hmeichhe naupang hlau hmel leh mangang au ri vanga talbuai mai tur ka ni lo.

CHAPTER - 2

LILIANA :

Ka harh leh chuan khum dup nuam takah ka lo mu tawh a. Ka ngaihtuahna chu la buai deuh ruai mah se, ka thil hmuh leh hriatte kha ka theihnghilh hauh lo. Ka mit ka men rual chuan pindan kil lama tu emaw che chu ka hmu nghal a.

Romero chu bang nghengin a lo ding reng a, min veng a ni maithei. Ka awmna hi mikhual pindan a ni a, Romero nen chauh kan awm. Matteo min chiuna vang khan la zawi hle lo ila chuan, hlauhna vangin ka au chhuak leh ngei ngei ang. Ngawi rengin Romero min rawn pan hnai lai chu ka en reng a, engtin nge a bulah khan him anga ka lo inngaih theih zawk pawh ka hre tawh lo. Tunah chuan khawvela mi hlauhawm ber a ni tih ka hre tawh.

Khum bula a rawn din takah chuan ka lo inhum ruh ṭeuh ringawt a. Ka hmela hlauhna chu a hmu thiam a niang, a ding dat a. A mitmeng chu a dam leh thlup tawh a, mahse min bum tawh dawn lo. Khatiang thil ka hmuh hnu khan hepa hian min bum tawh dawn lo.

“Hlau suh. Engkim a ṭha vek a ni, i him tawh,” a ti sap a.

A hma zawng khan him loah ka inngai ngai lo. Tunah hian ka him lohzia ka hria, hepa bulah hian ka him lo. A thusawi chu engtin mah ka chhang lo. Khum bul dawhkana tui chu noah thliin min pe a, a kut chu ngun fein ka lo en vat. Mahse thisen kaite kha hmuh tur a awm tawh lo a, a tifai tawh pawh a ni mahna. A englaiah mah chuan thisen kaina hnuhma hmuh tur a awm tawh lo. Thisen kai tihfaite chu a thiam khawp ang chu. Ka ngaihtuahna vang chuan ka hrawkte chu a ro hulh hulh thei hial.

“Tui hi in rawh, naupang.”

Ka melh nghal kawk, “Naupang ka ni tawh bawk lo.”

A nuihza hmel chu ka ngei kher mai. “A dik a lawm, Liliana.” Basement-a ka hmuh, tualthat duh hmel kha hmuh tur a awm leh tawh lo a. Ngainatawm leh zaidam hmel tak kha a pu leh tawh.

Ṭhu chhuakin, a no min pek chu ka la a, ka kut khur nasa lutuk vang chuan ka tihbuak maite pawh ka hlau zawk hial. Tlem ka in hnu chuan ka pe kir leh mai a.

“I unaute bulah i kal thei ṭep tawh a nia, mahse chumi hma chuan Luca nen in inbiak lawk a ngai dawn a, i thil hmuh vang khan.” A ti dam leh thlap a.

An vai mai hian ka hlau tawh. Kawngkhar kik ri ka hriat rual chuan khum aṭangin ka tho chhuak a, Luca a rawn pen lut zui nghal. Kawngka a nem khar rual chuan Romero ka melh vat a, hlauhna bawk chuan min man leh tawh. A hma anga talbuai leh kha chu ka duh bik lo, mahse ka inthunun zo dawn em ka hrethiam tawh lo. Keimah chauhin heng ho bulah hian ka awm ngai lo a, vawiina ka thil hmuh hnuah phei kha chuan an hmelte hian min tihlau vek tawh.

“Tuman an tina dawn lo che.” Luca chuan a ti thum chhur a. Ka hmel aṭangin ka hlauhzia a hrethiam a ni chiang mai. Aria hmangaih em em a ni a, misual tak chu a nilo maithei. Chubakah inhnuaiah khan Russian ho kha a sawisa lai ka hmu ve miah lo. Romero bawk chu ka melh leh a, ani pawhin min lo en ve reng.

Chhuat melh pahin, “Ka hria a lawm,” ka ti ve sap a, ka dawt sawi chu an awih pawh ka beisei bik chiah lo. Thawk ka la kawk a, inti huaisen lui viau mah ila Luca khabe bak chu ka melh ngam chuang lo.

“Min biak duhna i nei em ni?”

Luca chu a bu nghat a. Min rawn hnaih an tum bik lo, ka hlau tih an hriat vang anih ka ring. “Vawiina i thil hmuh kha Aria hrilh lo la ka duh. A rilru i tibuai mai mai ang.”

“Ka hrilh lo ang,” ka lo ti vat a. Hrilh ka tum lo sa ve hrim hrim. Thil thleng kha hriat reng pawh ka duh lo a, tute mahin hre reng lo se tih chu ka duhthusam a ni. Thei ngat ila chuan tunah la la hian theihnghilh daih ka duh a sin.

Luca chuan Romero chu a melh ralh hnuah kawngkhar a hawng a, “I unaunu Gianna aiin i biak tlak daih mai. Aria ang chiah i ni,” a tih chuan dawihzep riaua inhriatna ka nei tlat. Aria a dawihzep ka tihna a nilo. Ka ute hi an huaisen ve ve, mahse an huaisen dan a in ang lo thung.

Dawihzep riaua ka inhriat chhan chu, Luca min hrilh anga ngawih bopui ka remtih vang zawk a ni. Ka hma ka sial vangin ka sawi chhuak ngam lo miau a. Theihnghilh ka duh a, Aria venhim ka tum vang a ni lo. Aria hian thil thleng kha hria pawh nise, keimah ang khan a talbuai ve teuh lo mai.

“Gianna bulah i hruai thei tawh ang. Mahse khawiah mah an chhuak tawh tur a ni lo.” Romero melh pah chuan a ti a.
“Aria enge a an?” ka ti vat a.

“Tunah chuan a muhil a, nakinah i hmu thei ang.” A sawi zawh chuan a chhuak nghal a.

Nghet zetin ka inkuangkuah tlat a. “Thil thleng hi ka nu leh paten an hre tawh em?”

“Aw. Thil ṭul ang angte an buapui zawh veleh i pain a rawn hruai dawn che u. Chuan, Chicago-ah in haw nghal ang. Naktuk zing lamah pawh a ni zawk mai thei.”

Romero chuan min nghak tih hre reng mah ila, ka che mai thei lo. Amah hnaiha kal pawh chu ka hlau vek tawh. Hepa min fawh dan turte leh a kuahnate ka lo suangtuah ṭhin kha a ni a, kei hi ka mawl anih hi.

Kawngkhar chu hawng zauin a tawlh hnung leh hrat a, “I unaunu chuan a hmu chak tawh ngawt ang che.” Thaw ka lak leh ham ham hnuah a dinna lam pan tur chuan ka pen ve ta chauh a. A hahdam hmelin, ngilneih hmel deuh kha a la pu reng a, ka tiril chu amah hlauhna avangin la khur reng mah se, ka kal pelh paha ka sik zeuh rual chuan mak deuhin ka kawchhung chu a mur deuh chuai a, hlauhna vang a ni leh miah si lo. A thil tih ka hmuh hnu kha chuan ka duh theih tawh pawh ka ring lo.

LILIANA :

Thil engemaw vangin nikum September thlaa thil thleng kha hriatchhuah chang ka nei ṭhin. Ka pum a let nghal but but zel, chu erawh chu ka thunun theih piah lam a ni tawh.

Vawiin hian Gianna nen New York tlawh turin kan chhuak a. Airport-ah Matteo, Aria leh Luca-ten min lo hmuak a. Matteo hmel ka hmuh rualin thil thleng bawk kha ka hrechhuak leh a, ka awm a ti nuam lo tlat. Ka kum 15-na birthday hmang tura zin kan ni.

“I ṭha em?” Gianna chuan a ti sap a. Ka zamzia chu a hai bik lo. New York-ah Matteo leh Luca hmel ka hmuh leh meuh chuan thisen thang rim zawng zawng nen khan ka hrechhuak leh vek thei hialin ka hria. Mahse tihlan loh hram hram ka tum.

“Aw, ṭha e,” ka lo ti vat a. Hmeichhe naupang ute ngaihtuah reng ngai kha ka ni tawh bik lo. Aria chu rawn tlan vatin Gianna nen chuan min kuah nghal a. “Ka ngai lutuk tawh che u.”

Kan unau thuma kan awmkhawm leh thei chu ka hlim takzet. Ka unaute ka hmuh theihna kawng awmchhun ni dawn ta se, nikuma ka thil hmuh kha hmuh nawn leh ka thlang tho ang.

Aria chu inla hrangin min en vang vang a, “Min chen der tawh anih hi. Kaih kher loh chuan khawiah mah i kal duh loh ṭhin lai kha ka la reng a nia,” a tih chuan ka hawi kual nghal vat a, mahse a ṭawng chu tumah hria an awm lo anih hmel.

“Khatiang kha Romero hriatah sawi miah suh. Khawnge amah hi a awm reng reng a?” ka zawhna chu ka inrin hmaa sawi chhuak ka ni. Ka biang chu a sen nghal ṭan ṭan ang chu.
Aria chu a nui a, “A apartment-ah a nih ka ring.”

Dar ka lo chhin ak a, zak viau mah ila ka sawi zo vek tawh tho si. A thil tih kha ka theihnghilh ta a ni hauh lo, mahse mak deuh maiin Luca leh Matteo-te ka hlauhna aiin amah ka hlauhna hi a nep zawk tlat. Luca-te dinna lam kan pan lai chuan ka thin a phu dup dup a, hlauhna chuan min tuam nghal bawk. Hetiang tak hi chuan ka hlau tawh ngai lo a sin. Inthunun tumin ka insehruh ṭeuh ringawt.

“Kan birthday girl chu,” Matteo chuan nui var varin a ti a. Basement-a thisen nena ka hmuh kha engtin nge hetiang taka ngainatawm hmel hi a put leh theih zawk?

“A la ni lo deuh. Mahse present min pe dawn anih chuan ka dawng thei reng.” Matteo hi ka ngaih ang em em a hlauhawm pawh a lo ni lo a ni mai thei.

“I ngaihdan chu ka duhzawng tak a ni,” tih pahin ka suitcase chu a khai nghal daih a. Gianna melh vatin, “Gianna bungrua hi i khai sak zawk dawn lo em ni?” inthlahrung rilru deuh tak chuan ka ti a. “Luca khan a rawn khai sak mai ang.” Matteo chuan a tisam et thung.

Ka vawn tura a kut a rawn phar chhuah leh chuan Gianna chuan, “Kal rawh,” a lo ti ve mai a. Tinge Gianna hian a huat em em ka hre bik lo, a tir aṭang khan a ngei nghal ringawt ni maiin ka hria. Engkim min hrilh loh vang phei chuan ka vui hauh lo, naupang angah min la ngai tlat a lawm. Aria nen hi chuan engkim an inhrilh ṭhin tih ka hria. An ngaih anga naupang ka ni tawh lo tih erawh an hre hauh lo thung.

Darkar khat dawn kan tlan hnuah Luca-te apartment building chu kan thleng ve hram a. Elevator kan chuan lai chuan a bang darthlalang aṭang chuan ka landan leh ka makeup hnawihte chu ka endik a, ka ha karah engemaw kai a awm em tih thlengin ka endik vek. Thla engemaw zat hnuah Romero nen kan in hmu leh dawn a, nalh thei ang bera lan ka la duh reng tho.

Mahse apartment kan thlen chuan Romero chu a lo la awm lo a, ka hawi kual ruai chu hmuin Aria chuan min rawn hrilhru sar sar a. “Min veng turin Matteo leh Luca-te an awm tho a, Romero chu a lo kal rih lo ang.”

“Romero ka zawng hlei nem,” lo ti ve vat mah ila, a awih hmel chuang lo. Ka zak hmel thup tur chuan ka hawisawn daih a.

“Ka hria a lawm,” tih pahin a nui var var a. “Luca leh Matteo-te hi an chhuah vat a ngai dawn a, chutih hunah chuan a lo kal ang,” a la ti zui hram.

Aria thusawi vanga ka phurna leh ka zamna chu a inbuk tawk viau ang. Ka zam chhan ber hi a thil tih ka hmuh vang kha ni chiah pawhin ka hre lo. Romero hi ka fiam fo a, mahse engatan mah min ngai lo niin ka hria. Naupang angin min en satliah tawp. Tunah chuan naupang ka ni tawh bik lo a, min duh ve tawh maithei a sin. Tlemte tal pawhin. Kum 15 ka ni ve tawh a, ka pa sipaite pawhin nula angin min en tawh tih an mitmeng leh awmdanah aṭangin ka hre ve mai. Romero hmeichhe duhzawng ka ni lo ve hrim hrim pawh a ni mahna, ka kum vang hi chu a nih ka ring lo. Ngaihzawng dang a neih leh neih loh pawh ka hre hleinem.

Dinner kan ei lai chuan Aria leh Gianna-te inmehh sek chu ka hmu ru reng a, mahse a awmzia ka hrethiam chiah lo.

Ka chanchin an sawi emaw ni le? Elevator bell chu a ri ṭat ṭat a. “Romero a nih chu,” Aria chuan a ti vat a, Luca lahin mak tihmelh takin Aria chu a en hau ringawt. Danglam lo anga awm ka tum lui tlat thung, mahse ka danglam chiang a ni.



Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » September 5th, 2021, 1:41 pm

CHAPTER - 3


“Bathroom-ah kal lawk ka duh,” pangngai taka lan tum takin ka ti a. Gianna lah chu a lo meng kual ralh zui. Chhuata ka purse dah chu lain bathroom-ah chuan ka lut nghal daih a. Kawngka ka khar rual chuan elevator kawngkhar inhawng ri ka hre ve chiah bawk. Romero ṭawng ri chu ka hre thei a, thum lam deuh mah ni se a dam thlap thung. A aw hi a mawi ka ti.


Darthlalangah chuan inenin, ka makeup-te chu ka hnawih ṭha mawlh mawlh a. Ka sam ka zut mam lehnghal puat puat bawk a. Ka sam rawng hi a uk buang a ni a, Aria sam rawng anga mawi anih ve loh bakah, Gianna sam rawng sen anga mit la a ni ve lo bawk. Midangte chuan bathroom-ah kalin ka va inchei ṭha tih an hre ngei ngei dawn a, mahse pawh pawh ka ti lo. Romero hmuh tura mawi taka lan ka duh. Hahdam taka lan tumin thaw ka lak leh ham ham hnu chuan ka pen chhuak ve ta hram a.


Romero chuan dawhkan a lo kil ve mek a, thleng khat thurin kan thil ei bang Tiramisu leh Panna Cotta-te chu a lo insuah bawk a. Ka ṭhutna bul chiahah a lo la ṭhu zui. Aria chu ka melh ringawt a, mahse engmah sawi loin min lo nuih var var thung. Gianna erawh chuan a mak tihmel chu thup pawh a tum chuang lo. Midang hmaa zak taka ka awm loh nan engmah a sawi loh hram ka beisei. Ka chair-ah chuan ka ṭhu leh a. Puitling anga hahdam hmel taka ka lan hram ka beisei takzet.


Romero chuan hawihhawm chhuahin min nuih sak tih loh chu engmah a sawi lo. Ka lungawi lo lutuk a, ka pumte chu a ni deuh nghulh thei hialin ka hria. Tui chu ka in ta ringawt a, zahzel chu ni tho mah se ka tui in pawh a hal tak tak. Romero hian engah mah min ngai lo tak tak ni a ka hriatna chuan min tizak em em a, min duh ve mai tura ka lo ngai kha a atthlak hle a ni.


Matteo leh Luca-te chu hna ṭul vangin an chhuak a, ka rin lawk ang ngeiin Aria leh Gianna-te pawh engemaw sawi duh an neih vangin hun remchang an zawng nghal ruai mai. Keimah chauh chu ni ila kalsawn turin min hrilh mai anga, mahse Romero a awm ve miau avangin ruahmanna dang an siam a ngai.


Aria chu rawn kun hnaiin min hrilh ru a, “Romero kha i lo be buai thei a ngem? A pawimawh lutuk.” Hnialna hun emaw zawhna zawt tur pawhin hun min pe lo hrim hrim.


“Romero, Lily nen hian scrabble lo khel ula? Aria nen hian engemaw sawi lawk tur kan nei a, amah chauh a awm chu a ning lutuk ang.” Gianna chuan a ti nghal zung zung a.


Zah lutuk vangin ka hmaite chu a sa hum hum tawh. Gianna hi chuan min tihzah dan a thiam ve hrim hrim. Aria nen an titi dun laia min awm turin Romero a hrilh kher a, naupang awm ngai pawh ka ni tawh tawp si lo.


Romero phone khawih mawlh mawlh lai chu rawn hawi chhuakin choka lamah chuan a rawn phei a, ka bula a rawn din pawh chuan en pawh ka en ngam lo. Engtin nge min ngaih tak ang? A ruk thei ang berin ka melh dek dek a, ning hmel chu pu hran lo mah se, ka bula hun hman a chak tihna a ni kher lo. Nau awmtu ni loin bodyguard a ni tlat.


“I nau hian in bula awm a chak hmel daih zawk,” tih pahin Gianna chu a en a, engtinmah ka chhang lo. “Scrabble chu min khelhpui duh tak tak em?” a tih leh chuan ka lo nuih sak ringawt.


Ka thil duh leh chak zawng min zawttu tlemte zinga pakhat a ni. A chang chuan ka unaute pawh hian ka awm ve tih an theihnghilh fo a, ka duh ang ni loin an thu ang ka zawm a ngaih chang a tam bawk.


Aria leh Gianna-te chuan awmze nei zetin min melh a, a fala an inbiak theih nan Romero rilru lak pen sak turin min duh hle tih chu hai chi pawh a ni lo.


“Aw, scrabble chu min khelhpui la ka duh a lawm, a nuam ngawt ang. I peih chuan,” ka ti ve ta hram a. Ka nui var var bawk. Ka khelh lohna chin pawh ka hre tawh lo, kan chhungkua hi hetiang infiamna khel chi kan ni lo ve hrim hrim.


Romero chuan ka ute chu a melh leh a, a hmelah chuan ngaihṭhatlohna ka hmu thei.


“In duh chuan in lo tel ve thei a nia,” a tih lai mek chu pawt chatin, “Kan pahnih chuaha khelh ka duh zawk,” ka lo ti vat a.


Romero hawisawn laiin Gianna chuan mit min lo siai zauh.


“Ka unaute hian scrabble an khel ve peih lo, khelhpui tur pawh ka nei ngai lo. Nangmah hi ka beisei neih chhun i ni tawh,” ka tih leh chuan pangchang hmel zetin ka melh pah ralh a. Romero pawh ṭhen suk pahin a bu ve ta nghat a.

“Aw le, mahse ka khelh lohna a rei tawh a, i dawhtheih viau a ngai ang.”


Romero nena scrubble khelh dun chu a nuam phian a, pangngai taka kan pahnih chauha hun kan hman dun vawikhatna a ni bawk. Fawh thut mai ka chak rum rum.


“Bialnu i nei em?” ka hriat chak ngawih ngawih chu ka zawt ta tawp a, ka zep thei tawh lo. Mahse ka zak lutuk chu thih nghal daih ka chak. Min tizak turin Gianna ka lo mamawh reng reng lo, keimah leh keimah ka in tizak a nih hi.


Ka zawhna vang chuan Romero chuan min en vat a, mak tihmelte pawh a puin ka hria. Ka biang sat hat hat dan aṭang hian a sen nasa viau ang tih ka hre thei mai.


“I chak theih nan ka rilru lakpen i tum vanga min zawt i ni em?”


Ka nui ringawt a, mimal thil lutuk ka zawh vanga a thinrim lo chu ka lawm ru hle bawk. Kan thil khelh lam bawk chu a bih leh daih a, ka zawhna a chhang miah lo chu tlemin ka lunghnur phah deuh. Bialnu a nei tihna a ni thei mai a ngem? Ka zawh nawn leh chuan nawr lutuk angin ka lang tawh dawn bawk sia. Kan thil tih laiah hian rilru pawh ka pe thei tawh lo, ka ning ṭan tlat. Ka unaute lah chu an la titi tui hmel bawk si.


Aria leh Gianna-te hian engemaw tak tih an tum tih hrethiam mah ila, enge a nih tih lam chu ngaihdan pawh ka nei thiam lo. Romero ringawt hi ka ngaihtuah bik hleinem, an hmel aṭangin thil pawimawh tak an sawi tih ka hmu thiam ve vek. Mahse zawh tumna pawh ka nei chuang lo, min hrilh dawn chuang lo tih ka hria. A chang chuan ka lungawi loh phah fo ṭhin, thil tak tak hrilhna tlakah min ngai lo ṭhin hi. Naupang anga min ngaih tlat vang a ni tih pawh ka hria.


“I tih ve hun.” Romero aw thum deuh chhak chuan min tiphu zawk thei hial. Thil dang ka lo ngaihtuah daih vang a ni. Mahse ka rilru ka pe hleithei tawh der lo.


“I khel peih tawh lo em ni?” Romero chuan min zawt ta nge nge a. Ani pawh hian a ning tawh a nih hmel, ka bula awm a nin vang a ni thei a ngem? Ka ngaihtuahna chuan min tilunghnur deuh tlat.


Thawh pahin, “Aw, ka room-ah lehkha chhiar ka duh,” ka ti a. Romero pawh chu a nui sak a, a phone chu lain message a check nghal daih. Hetiang game ninawm lutuk hmang lo hian hepa ka hip theih dan tur ngaihtuah chhuah vat a ngai.


Ka birthday lawmna tur chuan balloon leh thil dang hmangin apartment chu mawi takin an chei a. Naupang birthday lawmna turte pawh a ang a lawm le. Luca club pakhata min hruai zawk turin ka ngen a, mahse Aria-te nupa chuan an rem ti lo nasa mai.


Dawhkana an eitur chhawp zozaite en chuan mi tamtak telna tur party niawm tak a ni. Mahse keini ho bakah Romero naute, hmeichhe pahnih chauh kan ni thung. Aria hrilh angin a naute hi a lo hruai ve dawn a ni. Hmeichhe naupang, ṭhian tur pawh ute zawn chawp sak ngai ka ang leh tlat tawh. Chicago-ah awm ila chuan ka ṭhiante nen ka birthday kan lawm ngei awm sia.


Romero leh a unaute an lo thlen lai chuan hlim hmel takin ka lo nuih sang hlawm a. Romero chuan, “Happy birthday, Liliana,” tih pahin envelope min pe a. Lehkhabu dawr voucher a ni. “Lehkhabu chhiar nuam i ti tih ka hria a,” a ti leh sap a.


“A dik a lawm, ka lawm e.” Diktak chuan engemaw thil danglam deuh min pek ka lo beisei a sin mawle. Thil special deuh.


“Hei hi ka naute an nih hi.” A lian zawk leh sam kir zawk chu kawkin, “Hei hi Tamara a ni a, in inrual chiah, kum 15 a tling ve chiah,” a tih leh chuan Tamara nen chuan kan innuih var var a.


Mahse a zah hmel riauin ka hria. “Chuan, hei hi Keira a nih hi, kum 12 a ni ve tawh. In in kawmngeih ngawt ang.”


A tan chuan naupang ang lek ka nih vangin ka ṭhian tur a lo hruai a nih hi. Tamara leh Keira-te hi fel hmel riau mah se ka lungawi thei lo, an ngaih anga naupang ka ni tawh lo tih hi engtin nge ka hriattir ang? Romero hian nula angin min en tawh se ka ti. New York-ah hian inkhualtelem turin ka lo kal lo. Min nuih leh sak hnu chuan Luca leh Matteo-te awmna lamah a kal zui daih a. A naute pawh Aria leh Gianna-te awmna, choka lamah chuan ka hruai ve nghal a.


Hlim tak anga lan hram hram ka tum a, a bikin Romero naute nuam tih lohna tura awm chu ka duh bik lo. Mahse vawiin hian thil special deuh dawn ka beisei a sin, hun rei tak ka lo suangtuah tawh ṭhin ang kha.


Romero chu phone hmang turin terrace-ah a chhuak lai ka hmu a, a rukin ka zui chhuak ve nghal. Ka unaute hian ka awm lo tih an hrechhuak vat lo turah ngai ang. Romero chuan min hmu mai lo a, tunge a biak chu hre lo mah ila a pawimawh hmel viau.


Phone a dah hnu chuan, “Inchhungah i unaute leh mikhualte bula awm tur i ni lo em ni?” Nui var var chungin a ti a. A ngainatawm ṭhin lutuk tlat hepa hi chu. Mahse a ngaihtuahna ka hre thei ṭhin lo hi ka hua. A dinna lam chu pan hnaiin ka nuih let ve sang a.


“Boruak thianghlim ka mamawh a.” Romero mitmengah chuan ngaihṭhatlohna ka hmu tel.


“Inchhungah lut ila a ṭhat ka ring.”


“Ka birthday present atan thil dang phut ka nei,” ka ti sap. “Thil engemaw, nangmah chauhin min pek theih chi a nia.” He thil sawi tur hian vawi tamtak ka tichhin chung pawhin a ri a la dik thei chuang lo.


“Lily.” Romero chu a insangmar ṭeuhin ka hria. A sawi leh tur chu ka hre duh rih lo, dingdihlipin a hmuiah fawh ka tum a. Ka hmuiin a hmui a sik hma chuan ka darah a lo vuan a, mak tih hmel zetin min en tawp. Hrep tak hian!


“Eng thil nge i tih hi?” min thlah rual chuan a tawlh hnung zui nghal a. “Ka tan chuan naupang ila nih bakah, Familia sipai ka nih hi. I nin changa i infiampui theih tur toys ka ni lo.”


CHAPTER - 4


A thil sawi kher kher chu ka lo beisei loh tawp a ni. Mak ka ti lutuk, chuan ka thinrim em le? Aih, rim lo.


“Ka fawp duh che a lawm, eng infiamna mah ka khelhpui lo che. Ka duh lutuk che.”


Romero chuan a lu a thing a, darthlalang kawngkhar lam pan tur chuan a inher zui a.


“Inchhungah lut tawh rawh, i unauten an ngaihtuah ang che.”


Tunah tak hian ka u, mipa ang maiin a ṭawng a, chutiang chu nilo tura ka duh ber a ni thung. Inherin, rang fein inchhungah chuan ka lut nghal a. Ka thin chu a phu dawt dawt mai.


Khatianga chiang khan min hnawl ka lo beisei ngai hauh lo. Vawi tamtak kan infawh hun tur ka lo suangtuah ṭhin a nih kha. Hlim hmel put ka tum lui hram hram a, mahse harsa ka ti tak zet. Romero ka melh apiangin ka lungngaihna a zual bawk si. Chicago-a haw vat vat ka chak. Hun rei tak Romero nen kan inhmu lo leh anga, chumi chhung chuan midang duh ka nei hman ngei ngei tur a ni.


ROMERO :


Liliana hian min ngaizawng tih ka hre daih tawh, Aria pawhin ka bulah a sawi tawh bawk. Mahse hetianga a chet duh mai hi ka beisei ngai lo. Hmeichhe naupang hmelṭha tak a ni tih chu ka pha thei bik lo. Hmeichhe naupang!


Amah duhna leh ngaihzawn let tumna pakhatmah ka nei lo, chu chu a hriatthiam vat a ngai. Ka hnialna vang khan a na tih ka hria, mahse thlan tur dang ka nei tlat lo. Naupang nilo pawh ni se, ka infawh tir chuang lo ang.


Living room ka pen luh rual chuan Luca chuan min rawn pan vat a. “Eng thil nge thleng, engvangin nge Liliana khan a rawn zui chhuah che?”


Ni e, Luca hi chuan a hmu ngei ang, engmah a hmuh hmaih ngai hleinem.


“Min fawh a tum a.”


Luca chuan mithmul san ak chungin min en a.


“Chuan, i lo hnial ngei ka beisei…”


“Chu chu min zawh kher a ngei em ni? Ka nau rual chauh a nih hi.”


“A kum zat lam chu buaina tham a ni lo. A pa zawk hi a ni kan buaina tur chu.”


“Ka hria,” ka ti ve nghat a. Kei chu sipai satliah ve mai ka ni a, Liliana ang hmeichhia hi ka cho phak a ni lo hrim hrim. Luca chu a thaw chhuak halh a.


“He nau hi buaina tham a la ni dawn….. Gianna ang chiah hian. A aia nasa zawk pawh a ni maithei.” Luca ngaihdan hi ka pawmpui thlap.


LILIANA :


“Hmeichhe zak theilo tak a ni! A va ngam zawk reng reng ve. A pian hlim aṭangin buaina bak min thlen lo.”


Inchhunga ka pa thinrim inhrosa ri chu a khawk rum rum a. Fabiano chuan zawhna mitmengin min melh kar a, keipawhin zawhna tamtak ka nei a sin. Thil thlen dan chu hre chiah lo mah ila, ngaihdan ka nei deuh ruak tho. New York-ah Aria tlawh turin Gianna a kal a, a tlanbo daih a nih hmel. Tunah hian an zawng mek.


Romero vang khan New York kal chakna pawh ka nei tawh lo a, chuvanga amaha zin a ni. Mahse Aria leh Gianna-ten an ruahmanna engmah min hrilh ve lo chu ka rilru a na deuh tlat.


Zaizirin Fabi chu lo kal ve lo tura ka hrilh hnuah, inhnuaiah chuan ka chhuk a. Thil awmzia hrechiang turin ka pa office ka hnaih phei hret hret a. Ka nu pawh a awm ve a, a ṭap tih ka hre mai. Ka pa chu thinrim viau mah se, phonea a biak mek a boss, Cavallaro vang chuan a insum nasa hle tih hai rual a nilo. Cavallaro chauh hi khawvela ka pa zah awmchhun a ni.


Ka nuin min rawn hmuh rual chuan a lu min thin khum a, lut lo turin min duh tih ka hria. Mahse ka lut lui tho a. Ka pa thinrim lai chuan hnaih loh a ṭha ber tih ka hai bik lo. Gianna vanga thinrim mah nise, a thinrim hrikthlakna tur ber a awm tlat lo.


Ka pa chuan phone chu a dah a, mit zim san chungin min melh nghal. “Rawn lut turin phalna ka pe che em ni?” A aw ri vang chuan ka phu zawk a, mahse luhlul chhuahin ka la ding ve tlat tho.


“Gianna chungah eng thil nge thleng?”
Ka nu chuan ṭawng tawh suh tih melhin min rawn melh a.


“I u chu a tlanbo. Mi dukdaklo tak tak a kawp zui anga, a hming leh kan chhungkaw hming pawh a tichhe vek ang.”


“A lo haw leh vat maithei a sin.” Ka ti sap a.


Mahse chu chu ka beisei bik hauh lo. He thil hi thleng thut a nilo, engkim ruahman lawk vek a ni tlat. Aria nena an titi dun ṭum kha ka hrechhuak a. Tinge engmah min hrilh ve miah loh le. Ka pa bulah an thil tum ka sawi an hlauh vangin min hrilh duh lo a niang a?


Ngaihtuahna dang ka nei thut. Gianna tlanbo chuan Matteo nen an innei thei dawn lo tihna a nia, Matteo hi tunge nei ta ang? Ka unaute pahnih Familia remruat angin pasal an neih chuan, ka hmangaih ka neih theih ka lo ring ve ringawt ṭhin a. Ka pa hian Matteo hi min neih luih tir mai a ngem? Tun ang huna chutiang thil lo ngaihtuah chu hmasial thlak viau mah se, ka ngaihtuah lo thei si lo.


Romero thleng chuan ka ngaihtuah kual zel a, inneih thleng thlenga ka ngaihtuah kai ta mai chu atthlak ka ti rilru hle tho. Gianna chu lo kir lehin Matteo nen pawh innei ta tehreng mah se, sipai satliah ve mai min neih tir tura ka pa dil chu thil theih loh tawp tih tum nen a in ang reng ang. New York mi leh sa lehnghal.


Buaina dang a la awm cheu, Romero pawhin min duh ve reng reng lo. Amah theihnghilh turin ka intiam hial a nih kha.


Thil theih loh a ni tih hre reng mah ila, amah suangtuah leh beisei chu ka bansan thei chuang si lo. A bak tih theih ka nei chuang hleinem.


“Rawn kir leh pawh ni se, mipa engzat nge a mutpui tawh ang. Engmah hlutna a nei tawh dawn lo.” Ka pa chuan a ti leh ṭhat a. A fanu ngei chutianga a sawi thei chu a rapthlak ka ti lutuk, ka lo khap sawk sawk ringawt.


Hlutna nei tawh lo maw? Ka pa tan hian bungraw hralh theih ang chauh kan ni tihna a nih hi. Ka pa chuan ka darah nghet zetin a rawn hmer a, tawlh hnung vat mah ila min vawnna chu a thlah duh chuang lo.


“Ka sipaite i melh dan hi hmu lo emaw min ti miah suh. Gianna ang chiaha nep i ni tih pawh ka hria, Gianna ka chận hnuah nang hi chu ka chận tawh dawn lo che tih hria ang che. Min bum tawh dawn lo.”


“Ka bum lo ang che,” ka ti sap a. Hetianga thinrim hian ka pain min la be ngai lo. A thinrim mitmeng chu a sen rum a, min melh dan chu hlutna neilo leh tlawm ngawih ngawih ni maiin ka inhria. Bawlhhlawh hlawm lianpui ang mai ka ni.


“I sawi dik chiah, min bum lo ang. A ṭul anih chuan i zahawmna humhim tur hian i pasal neih hma chu i pindanah ka kalh khum mai ang che.”


Ka zahawmna a humhim duh vang a nilo, ama zahawmna leh hmingṭhatna a duh vang a ni. Chhungkaw zinga mipate zahawmna tur leh an duh an hmuh theihna tur hmanrua ang chauh kan ni.


“Rocco, Lily hi hmeichhe naupang fel tak a ni a, i duh loh thil engmah a ti lo ang.” Ka pa thinrimna beng daih tum takin ka nu chuan a lo ti ve a. Mahse ka pa hriat loh lai chuan min hau ziah, mipa laka fimkhur tur leh sipai hote pawh hnaih lo tura min hrilh ziahtu a ni.


Chutianga min lo chhan chu ka lawm rilru hle a, Gianna erawh chu a chhan ngai lo. A chhan ngamlo pawh a ni maithei.


Ka pa chuan min vawnna chu thlahin ka nu chu a melh a, “Hmeichhe ho enkawl hi chu i hna a ni. Tun ṭum chu ka ring ang che, Liliana hian Gianna hnung a zui loh ngei pawh ka beisei a, chutiang tur chuan enkawl ang che.”


Ka pa aw ki chuan min tikhur thei hial. Engtin nge a nupui hetiang hian a biak theih zawk le? Ramhuai ang mai a nih hi.


Ka nu chuan kal turin a mitmengin min hrilh a, rang zetin ka chhuak ve nghal a. Tumah min lo dan tum pawh an awm bik lo.


Inchungah chuan ka tlan chho nghal a. Step tawpah chuan thil hriatchian chak tih hriat tak, meng phawk deuh hra chungin Fabi chuan min lo en reng a.


“Enge thleng a?” a lo ti nghal var.


Ka lu ka thin khum ringawt a, engkim sawi chhawng leh turin chakna ka nei rih lo. Ka room-ah ka lut tlang nghal daih. Khatiang taka ka pa thinrim kha ka la hmachhawn ngai lo.


Tunah chuan Gianna a awm tawh lo a, a duhthusam ang fanu ka nih theih nan uluk lehzualin min veng tawh dawn a, ka zalen lo zual sauh dawn tihna a ni. Gianna leh Aria-te awm lai kha chuan duh duhin ka tal mai mai a, an chunga ka pa thinrim fo ṭhin pawh ka hrethiam ngai lo. Mahse tunah chuan ka chungah a tla ve ta, engkim a danglam tawh ang.


Gianna tlanbo hnu aṭang chuan inchhung boruak a nuamlo zual a. Chhan leh vang hotete vangin ka pa a thinrim fo a, thinrimna tur a zawng a ni zawk mah. Tun hnaiah ringawt pawh vawihnih lai min beng tawh a, vanneih thlak takin Fabi chu a la him hlauh. Chupawh chu ka thiamlohna a la ni lo lehnghal, rinhlelh vanga min beng a ni. Tunah hi chuan misual ber angin min enkawl ni maiin ka hria.

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » September 5th, 2021, 1:42 pm

CHAPTER - 5


Tunah chuan boruak pawh a ziaawm tawh ka beisei. Matteo khan Gianna a zawng hmu tawh a, Chicago panin an lo thlawk mek. Ka pa pawh a hlim leh deuh theih ka ring a, mahse a hmel kha a hma zawng aiin a thinrim hmelin ka hria. Enge thleng chiah chu hre lo mah ila, an sawi dan hmangin Gianna chu mipa dang nen an awmdun lai an man a nih hmel.


Chu chu kan khawvela thil ṭhalo ber a ni hial ang hmeichhe tan chuan. Gianna anga ka awm ve lohna tur a nih chuan ka pa hian kawl min buntir mai pawh a hreh hauh lo ang.


“Eng tikah nge an lo thlen dawn?” Fabiano chuan vawi za chuang min zawt tawh. A aw a phurna lang chhuakte chuan min tihah, vin hrep mai ka chak rum rum. Fabiano nen hian inchung step bulah minute 20 aia rei mah kan nghak tawh a, ka dawhtheihna a tlahniam viau tawh bawk.


“Ka hre bik lo, ṭawng tawh suh. Ka nuin room kan chhuah san tih a hriat vaih chuan kan chak dawn lo teh mai a nia,” ka tih chuan… “Mahse…….” A la ti ṭang ṭang a.


Inhnuai lamah chuan ṭawng thawm ka hria a, Luca aw a ni tih ka hre thei. A aw ri chuan inchhung chu a luahkhat ni maiin ka hria. A pa lian bawk a, a awm lo hran lo.


“An lo thleng..!” tih pahin Fabiano chu stepah chuan a tlan thla nghal a, a hnungah chak fein ka umzui ve nghal.


Gianna ka hmuh rual chuan a sam rawng a thlak tih ka hre nghal a, a chauh hmel ngawih ngawih bawk. Chumi tih loah chuan ka u, ka chhuan leh ka ngaih em em kha a la ni reng. Ka pa khan a lo kir leh a nih pawhin, mihrang leh hlutna nei tawh lo a ni tawh ang a ti ziah a, mahse ka tan chuan a hlut ngaiin a la hlu reng. Ka pa chuan Fabi nen chuan rum zetin min lo melh nghal a, mahse ka ngai pawimawh duh lo.


Gianna dinna lamah chuan tlanin ka kuah nghal chawt a. Ka ngai tawh lutuk. Mipa dang nena an awm lai Matteo-in a man tih ka hriat tirh khan a that duh mai ang tih ka hlau a, him piala ka hmu leh hi ka lawm em em bawk.


“Inchunga awmtir tlat turin ka hrilh che a ni lawm ni?” ka pa chuan a ti vin hlar a.


“Ka thiam loh a ni, ka tihpalh lutuk. An che rang lutuk a, ka man hman lo a lawm.” Hlau tih hriat takin ka nu chuan a lo ti vat a.


Gianna vang hian ka nu pawhin ka pa thinrim a tuar nasa tih ka hria a, inthiamlo zetin ka nu chu ka melh ringawt.


Ka pa thinrim au ri vanga zanlaia harh pawh ka nei fo a, chung zawng zawng chu ka nu hian ngawi rengin a tuar ṭhin. Mahse kut thlak a hrat ta lutuk hi ka hrethiam thei lo. Kan naupan zual deuh lai kha hetiang hi a nih ngai awm ka hre silo a, thil awmzia kan la hriatthiam loh vangte pawh a ni mai thei.


“Lily, Fabi, in room-ah chho nghal rawh u,” ka pa thupek a ni. Gianna ka kuahna chu thlahin ka pa chu hnial ka tum a, mahse Fabi a ṭawng chhuak hmasa zawk tlat.


“Mahse ka pa, Gianna hi kan hmuh lohna a rei tawh a, kan ngai tawh a lawm.” Ka pa kan bula a rawn din takah chuan ka khawng vek ni maiin ka hria.


Fabi nen chuan min hnuk sawn dawrh a, step lamah chuan min nawr pheiin, “Inchungah chho nghal rawh u, tunah!” a ti leh tuarh a.


Min nemna vang chuan ka pai deuh chawn chawn a, mahse ka tlu bik em lo e. Gianna kan biak ringawt pawh a phallo chu mak ka ti.


“Engkim a ṭha vek e, min ngaihtuah suh u,” Gianna chuan a ti a, mahse a hmelah chuan engkim a ṭhalo vek tih hai chi pawh a ni lo. Rilru na leh lungngai hmel a pu a, Gianna hi awlsam taka tih lungngaih theih a nilo tih ka hrechiang.


“Nakinah kan inbe dawn nia,” a ti leh sap a.


A hnunga ding chu ka hmuh hmaih hauh lo. Romero, pa lian leh chak tih hriat tak, inring tawk tih hirat taka ka pa melh kartu chu a ni. Thla 7 lai kan inhmu tawh lo a, ka duhnate kha a bo tawh emaw ka ti ṭhin. Mahse ka hmuh leh takah chuan ka tisual hle tih ka hrechhuak chiah. Ka pumte chu phurna vangin a za chuai chuai a, ka thin a phu nghal dup dup bawk.


Ka pa thinrim aw ki vịn zet chuan ka ngaihtuahna aṭang chuan min tiharh zawk a.


“In inbe dawn lo. A bul hnaia awm tur pawhin ka duh lo che, ka fanu i ni tawh lo. I nungchang tenawm zet hi Liliana entawn turin ka duh hek lo,” a ti tuar tuar a.


Gianna hi a that chak zek zek ni maiin ka hria, chu chuan min tihlau. A fate kan ni a, eng thil pawh thleng se, min hmangaihtu tur a ni lo em ni? A duh loh zawng kan tih vangin pain a fate hetiang tak hian engtin nge a huat theih?


“A nuihzatthlak hle mai. “Matteo chuan a lo ti vat a.


“Matteo, hei hi i inrawlhna tur a ni lo.” Luca aw vawt ruih chu a hlauhawm kher mai. An pahnih chuan ka melh tawn zak zak a, chutah Romero bawk chu ka en leh a, a vest chhung a zen tlat danah buaina chhuak thut thei a ni tih ka hrethiam ve mai. Silai leh chemte nena a che vel chu ka hmu chak ru viau. Insual a thiam dawn lutuk tih ka hre reng. Diktak chuan ka pa hi awm lo ta se kan vai hian kan hlim zawk ka ring ṭhin, ka nu pawh.


Ka nu chuan Fabi nen chuan min kai a, “Kal ang u,” tih pahin step-ah chuan min chhoh pui dawr dawr a.


“Luca hian a sawi dik chiah. Gianna hi ka rorelna hnuaia awm a la ni reng, chu chu theihnghilh hauh suh.” Ka pa chuan a ti leh nghut a.


“I fanu ka ni tawh lo emaw ka tia, engvangin nge i thusawi chu ka ngaihthlak kher ang?”


Gianna ṭawng vang chuan ka hawi let vat a, chutianga ka pa a la chhang ngam chu mak tih vangin ka khawng awt thei hial.


“Fimkhur rawh. Outfit thuneihna hnuaia awm ila ni reng.”


Matteo chuan Gianna banah vawn sak tlat lo se chuan ka pa khuan a beng em em ang. Ka nu chuan min kaihsawn a tum a, Romero mit leh ka mit a intawng sak mai. Ka birthday kan lawm zana min hnarna kha ka la theihnghilh hauh lo, mahse ka fawh chakna a la reh chuang lo. Tinge ka thil duh ngawih ngawih hi ka tan neih theih loh a nih bik? Ka natna tur a nih vang zawk a ni em?


A chang chuan ka pa hian Gianna anga ka awm hun a nghak ni maiin ka hre thin. Duh ta tehreng pawh ni ila hun remchang min siamsak lo hrim hrim. Ka bodyguard zinga pakhat ka mutpui a nih ngawt loh chuan ka hming chhiatna tur leh ka zahawmna tichhe turin eng thil mah ka ti thei lo tawp ang. Tun thlengin ka pain Gianna a la ngaidam chuang lo a, chuvang chuan kum hnih dawn kan inhmu lo tawh. Chicago-a a lo kal phal sak a nilo a, kei lah New York kal min phalsak lo bur bawk si. A rukin Aria kal tlangin kan inbe zeuh zeuh thei ṭawk.


A chang chuan Gianna pawh ka haw lek lek ṭhin, a chhan pawh a thil tih vang khan kei hian ka tuar a, hremhmunah min hnutchhiah a ni ber tawh. Gianna kha tlanbo lo se chuan hetiang em em hian ka pa pawh a strict lo maithei. Mahse, a huaisenna avangin ka unaunu hi ka ngaisang viau thung a, amah anga huaisen nih ve ka chak ṭhin.


Inhnuai lama thil keh ri chuai ka hriat vang chuan ka ngaihtuahna aṭang chuan ka harh zawk a. Khum aṭang chuan zuang thoin, inhnuaiah ka tlan thla nghal a. “Ka nu..?” ka ko nghal chul bawk. Tuk pumin a chhuak bo daih a, tuman min chhang lo, mahse choka lamah chuan thawm ka hria.


Choka ka luh dawnah ka au leh a, “Ka nu?” min la chhang chuang lo. Kawngkhar chu nam hawngin, ka lut a. Chhuatah chuan wine um keh a lo let bal a, a luang sen nguai bawk. Ka nu chu a lo ṭhingṭhi a, a pawnfen, wine a inchiah chu hria awm pawhin a awm lo. A kut phahah chuan engemaw hmuh beisei niawm takin a melh ngawt ngawt ringawt. Hetiang hian ka nu hi ka la hmu ngai lo. Rang takin a bulah chuan ka ṭhu vat a.


“Nu..?” ka tih leh chuan mittui tling pam chungin min en a. “Oh, inah i awm a ni maw?” a ti sap a.


‘Inah lo khawnge ka awm ang? Tih chu chak viau mah ila chutiang sawi hun a nilo tih ka hre thiam ve tlat.


“Eng thil nge thleng a, i ṭha em?” ka ti ta zawk a.


No keh a ken lai chu a en reng a, muangchanga chhuatah a dah leh te te hnu chuan ka kai tho a. Zu rim a nam hum hum bakah a ding nghet thei lo. Zu in nan chuan a la hma bakah, ka nu hi zu heh tia sawi tur chi a ni lo.


“Doctor hmu turin ka kal a.”


“I damlo em ni, enge thil awmzia?” ka khawng deuh awt mai.


“Chuap cancer,” dar chhin ak pahin a ti sap a.


“Stage 3 a ni tawh.”


“Mahse meizial i zu ngai bawk silo a, engtin nge chuap cancer a nih theih?”


“A ni thei tho a lawm, chemotherapy ka lak vat a ngai dawn a.”


Ka nu chu ka kuah thlawp a. Ka thu hriat avang chuan ka te rawih rawih hian ka inhria a.


“Ka pain a hre tawh em?”


“Ka be tlang thei lo, a phone a chhang thei bawk silo a.”


A dik chiah…engvangin nge a nupui call chu a chhan ang? A hmei tuemaw ber bulah a awm tih a hriat reng.


“Aria leh Gianna-te kan hrilh vat a ngai ang, an hriat ve a ngai a nia.”


Ka nu chuan ka banah a chelh vat a. “Nilo… Min ngaihtuah vangin an Christmas hman a tibuai mai mai ang. Tunah chuan hre rih lo se ka duh. Anni tihbuai kha ṭangkaina a awm lo. Gianna lah kan inbiak lohna a rei tawh a, Aria pawhin thil tamtak buaipui tur a nei. Capo nupui a ni tlat.”


“Mahse nu….an hriat vat loh chuan an lawm miah lo ang.”


“I hrilh lo ang tih min tiam rawh,” a tih tak tlatah chuan ka bu ve ta nghat a. Ka ngaihdan ni lo viau mah se thlan tur dang ka nei tlat lo.


Darkar hnih hnuah ka pa lo haw thawm ka hria a, a hnu deuhah chuan step-a ka nu pen thawm ka hre leh a. Master bedroom kawngkhar inkhar riin a zui nghal. Ka nu chu amah chauhin a awm tih ka hre mai. Khawnge ka pa, inhnuaiah a la awm reng emaw ni le? Ka room aṭang chuan ka chhuak a, ka pa office-ah ka kal dawn. Ka biak a ngai.


CHAPTER - 6


Ka pa office kawngkhar chu ka kik a, “Lo lut rawh,” ka pa aw a ni.


Kawngkhar chu hawngin ka dak lut a, rilru hah leh ṭap chunga hmuh ka beisei deuh vang chuan thawm ka dim hle. Christmas party kan hmanna tur chawlhkar hnih chiahin a dang tawh. Gianna kan sawm a ngai, ka nu a damlo a, an pahniha hun an hman dun theih dan tur kawng ka ngaihtuah a ṭul tlat.


Ka pa chu ka nu damlohna avanga danglamna nei hmel a pu lo. A la hrelo zawk emawni le? Hna a lo thawk mek tih ka hmu nghal a. Min tihamhaih lek lek zawk.


“Ka nu nen in inbe tawh em?”


Rawn hawi chhuah pahin, “Aw, be tawh e. Karleh aṭangin Chicago doctor ṭha berin a enkawl ang,” a ti a.


“Oh, a ṭhat chu,” ka ti sap a. Engemaw a sawi belh beiseiin ka chawl dat a. Mahse ka pa hmelah chuan sawi belh tur nei hmel pawh ka hmu chuang lo.


“Ka ngaihdan chuan…..ka nu hian a chhungte a mamawhin ka hria. A chhungte ngaihsakna hi thil dang zawng zawng aia a mamawh a ni.”


Ka pa chuan mithmul san ak pahin, “Chuan…?” a lo ti a.


“Chuan, Christmas party kan hman turah hian Gianna pawh sawm ve ila a ṭhat ka ring. Ka nu nen an inhmuh lohna a rei tawh bawk sia, ka nu pawh a hlim ngawt ang.” Ka pa hmel chu a rum ul mai.


“Kha mihur kha ka inah hian a lo lut tawh dawn lo. Matteo chuan a ngaidam a, nupui atan a nei pawh a ni maithei. Mahse kei chuan ka ngaidam ve dawn lo, rilru thlak mai mai chi ka ni ve lo.”


Nilo, ka pa hi chuan a ngaidam ve hauh lo ang. Mahse ka nu, a nupui tana sawi ka ni tlat.


“Mahse ka nu hi chak taka a awm theih nan a chhungte min mamawh a lawm.”


“A theih loh. Hei hi thu tawp a ni.” Tih pah chuan a rum nghut a.


“Chuan, i nu pawhin a damlohna hi midang hriat a duh lo. Gianna kan sawm ve dawn em tih vel mai mai an buaipui dawn a, engmah thleng lo ang chiahin kan awm ang. I unaute emaw, tumah i hrilh tur a ni lo. Chu chu i hrethiam em?”


Ka bu nghat a, mahse hetiang thil hi engtin nge ka zep reng theih ang?


Christmas party neihna tur, kan in leh a vel chu mawi takin an chei a. Engkim chu duhthusam ang thlap a ni. An eitur siam rimte chu a nam chek chek a, mahse ka hlim ve thei lo.


Ka nu pawh treatment a la ṭan tawh a, nimin kha chu a luak nileng a ni deuh mai. A chau tih pawh ka hre reng. Makeup tamfe an bel hnuah chuan a lang pangngai ve viau a, mahse kei chu bum chi ka ni tlat lo. A natna hi ka pa nen chauh kan hria. Fabi pawh engmah kan hrilh lo. Kan misawmte lo thlen hma deuhin Aria leh Luca pawh an lo thleng a. Hotel-a an innghah vangin ka nu awmdan danglam an hre lo pawh hi a awm tho.


Min hmuh veleh Aria chuan nui sang chungin min kuah nghal a. “Karei Lily, i van nalh em em ve.” Ka nui lui ve hram.


Vawiina ka thawmhnaw hak hi kan lei ni kha chuan ka phurin, ka hlim zia kha. Mahse tunah chuan ka tan engmah a ni tawh lo. Thawmhnaw mawi tak satliah ve mai a ni.


Aria chu inla hrangin min en vang vang a, “Engkim a ṭha vek maw?” a tih chuan rang zetin ka bu nghat a. A hnunga Luca, min chibai hun nghaka ding chu ka ngaihven san daih a. Luca pawh chuan min kuah ve mai a, chutia min kuah ve mai chu mak ka ti ru deuh a.


“Ka pa chu office-ah a la awm a, ka nu chu choka lamah a awm ang,” ka ti leh zung zung a.


Ka nu chu bathroom-ah a luak leh mek angem, a nih loh hram ka beisei. Luca kalsawn hnu chuan a hnunga Romero ding chu ka hmu ve chauh a. Ka hmuh thut vang chuan mak tiin ka meng bial kawk tih ka hria. A lo kal ve ka lo beisei miah lo, Aria veng turin Luca a awm tho sia. Luca awm chuan Aria hian vengtu dang a mamawh lo.


“Chibai le,” pangngai taka lan tum tak chungin ka ti ve sap a. Romero ka duhna kha a la bo hauh lo, mahse a hma anga ka talbuai tawh lo chu ka lawm rilru lutuk. Hun hian min lo tidanglam thei tak tak a nih dawn hi.


ROMERO:


Luca hian Scuderi leh Dante Cavallaro-te nen sumdawnna thil buaipui tur a nei a, chuvang chauha Chicaho kal ve ka ni. Tunah hian Scuderi kawngkhar bulah dingin, Liliana ka thlir mek a. Chhuanlam siamin ka kalsawn mai dawn em ni ang tih ka ngaihtuah hial.


Ka hmuh hnuhnun ber ṭum khan hmeichhe naupang a la ni a, tunah hi chuan puitling la ni chiah lo mah se naupang tih tur chu a ni tawh lo. A hmelṭha takzet, hmuh loh der theih a ni lo. Ka tan chuan a la naupan bakah, ka cho rual a nilo tih pawh ka theihnghilh thei mai dawn a lawm le.


Min buk khum zauh hnu chuan a kalsawn zui nghal daih a. Khawiah nge hmeichhe naupang zah vanga biang tai tek leh min fiam ṭhintu kha a awm tak? A hma kha chuan min fiamna khan min tibuai ṭhin a, min fiam tak loah chuan ka lungawi leh der silo. Kei teh hrep pawh hi a.


Luca leh Aria-te chu inchhung lamah ka zui lut a, ka hnung lawkah Lily chu a rawn kal tih ka hre thei. A perfume rimtui zet kha ka hnar hian hre tlat.


Hawi let lo tur chuan ka inthunun nasa hle. Aria veng ang taka lang siin, Liliana chu ka melh ru reng bawk a. Mahse engemaw diklo awm tlata hriatna ka nei, Liliana hian thup a nei tih ka hria. Midang hmuh loh lai chuan a chauh hmelin, a nui hmelte chu an ral riai riai ni maiin ka hmu. Lemchan thiam tak a ni, mahse kei hi chu min bum thei lo ang.


Bodyguard ka ni a, thil diklo hlek pawh hre thei tur ka ni tlat.


Living room a chhuahsan a, a lo kir leh mai lo. Ka ngaih a ṭha thei tawh lo, mahse Liliana buaipui chu ka hna leh mawhphurhna a ni lo. Aria ven hi a ni ka hna chu. Luca nupui chu ka en vat a, a nu leh Valentina-te nen an la titi tui khawp mai. Ngaihṭhatlohna tur engmah a awm awm ka hre lo. Luca lah pindan kil lamah Dante leh Scuderi-te nen an awm ve reng tho a.


Liliana awmdan kha ka ngaih a ti ṭha tlat lo, living room aṭang chuan ka chhuak a. Lobby ka thlen chuan ka tim leh deuh a, Liliana lah kha khawi lamah nge a kal ka hre der bawk si lo, inchhung dunga zawn tawp chu thil theih loh tluk a ni.


Midangin min rawn hmuh hlauh chuan Luca tan ka spy vel emaw an ti thei bawk. Ka ding lam corridor-ah chuan thawm awm tlatin ka hria, min hmu an awm leh awm loh ka melh kual zak zak hnuah chu lam pan chuan ka kal a.


Liliana chu bang nghengin, maimitchhing chungin a lo ding a. Engemaw thilah inthunun a tum tih ka hre mai. Mahse hmuhnawm ka ti tlat si. A duhawm thlawt a ni. Nupui atana neitu mihring chu a vannei lellawl khawp ang. Ka ngaihtuahna chuan min tithinrim thei mai dawn, mahse chutiang thleng thlenga ka ngaihtuah duah chhan chu ka hre hauh si lo.


A dinna lam pan chuan ka kal zel a, amah chauhin a awm lo tih a hriat theih nan ka pen ring lui deuh a. Ani pawh chu a rawn meng nghal a, mahse min hmuh rual chuan a hahdam leh deuh tih pawh ka hre thei. A hawisawn nghal daih a, engtia awm turin nge ka beisei phei chu ka hre lo. A bawp sei thlarh aṭanga melh chhoin a mitah tak chuan ka en leh a.


“I ṭha em, Liliana? Living room-ah khan i lo kir leh mai si lo a,”ka ti ta ringawt a.


“Tinge Liliana min tih bik kher a, midang pawhin Lily tiin min ko mai a lawm,” tih pah chuan a nui lui sak a. A mitmeng pawl ram hi a mawi takzet.


“Aria khan min zawng turin a rawn tir che em ni?” min chhuahchhal a ang zawk mah.


Diktak chuan a lak aṭang hian ka mit ka la sawn thei meuh lo zawk a, a awm lo tih chu tuma hrilh ka ngai lo.


“Aih, tir lo e,” ka ti ve mai a. Mak tihmel a pu deuh. A thlek sawn takah chuan chiang takin ka hmuh theih phah a. He nau hian engemaw vei a nei, engemaw zep a nei tlat.


“Aria ven a ngai lo em ni?”


“Luca a awm a lawm,” tih pah chuan ka pan hnai a, ka hnaih lutuk mah mah. A rimtui inhnawih rim pawhin ka hnar a verh leh var tawh. Karei leh! He nau hian ka ngaihtuahna a tibuai tlat.


“Thil diklo a awm tih ka hria, tinge min hrilh mai loh?” Lily chuan min melh ram ram a.


“Engvangin maw? I ven tur leh i mawhphurhna ka ni hleinem. Chubakah kan inhmuh hnuhnung ber ṭum khan min ngainat hmel vak loh kha.”


Kum hnih liam taa a fawh ka duh loh vang khan a la thinrim reng tihna em ni?


“Ka pui thei maithei che a sin,” ka ti ta tho a.


Thawpik tih hriat zetin a thaw chhuak leh halh a, a mitmeng ngui riai chuan engtin emaw tak a tilang puitling sawtin ka hria. Nula puitlingte pawh a ang rum rum zawk. Ka rilru chuan ka thutiam tawh kha ka sawi nawn mawlh mawlh a. A rawn hawi chhuah leh chuan a mittui chu a tling pam tawh a.


“Hey,” ka lo tidam thlap a. Ka khawih chak. A biangah chuan dawm sakin, a hmaia a sam lo uai thlate chu chul sak ka chak. Hrep tak hian! Chu aia nasa chuan khawih ka chak a, mahse ka che dawn hauh lo. Ka tih loh tawp tur thil engmah ka ti lo ang. Outfit pawl hruaitu pakhat fanu hi ka khawih thei lo. A bula awm tur pawh hi ka nilo, kan pahnih chauh lehnghalin.


“Tu hnenah mah i sawi chhuak thei lo a nia,” a ti sap a.


Luca hi ka Capo a ni a, thil ṭhenkhat chu a laka ka zep theih loh tur a awm ṭhin. “I thil min hrilh tur chu enge a nih ka hriat hmasak phawt loh chuan, sawi chhuak lo turin ka intiam ringawt thei lo.” Ka tih lai mek chuan a rai emaw, a rilru tinatu an awm a ni thei mai angem tihte chu ka ngaihtuah a, ka inhum ruh nghal ṭeuh mai. Lily hi duh tur ka nilo, ka duh thei lo. Mahse……….


“Ka hria a lawm, mahse Outfit leh Familia-te chungchang a ni lo. Englo….” Tih pahin a kun a, a thaw chhuak leh halh. A sawi hreh hle a nih dawn hi.


“Tuma hnenah sawi chhuak lo tur ka nia, hrehawm ka ti…hetiang a ni tawh chung pawha ka sawi chhuak theilo hi.”


Dawhthei takin a inpeih hun chu ka nghak tawp, tun hi nawr hun a nilo tih ka hria. A dar chu a khur deuh dar dar a, mahse a ṭap chhuak duh bik hauh lo.


“Ka nu hi a cancer a.”


Ka thu hriat chu ka beisei loh ber a ni. Ka ngaihtuah chiang a, makeup hnawih viau mah se a hmel kha a dang deuh tlata hriatna ka nei reng a ni. Lily dar ruak kangah chuan ka vuan a, a vun mam han mai, khawih nawmzia chu ngaihtuah loh hram hram ka tum.


“A pawi ka ti hle mai. Tinge Aria tal chu i hrilh mai loh? Ani nen chuan engkim in sawi dun ṭhin emaw ka tia.”


“Aria leh Gianna-te chuan engkim an inhrilh ṭhin a, kei chu ka naupan deuh vangin engmah min hrilh ve ngai hleinem.” A aw aṭang chuan a rilru a na tih ka hre thei.


“A pawi hle mai,” ka ti leh ringawt a. Inthunun tum tih hriat takin thaw a la leh ham ham a.


“Ka pain tumah hrilh a phal lo a, Aria pawh. Tunah hian ka hrilh ta che a nih hi.”


“Tumah ka hrilh dawn hleinem.” Ngaihtuah chiang mang lo chuan ka intiam ve ta ringawt a.


Hetiang thil sawi chhuak lo tura intiam hi thil ṭha ber pawh a ni dawn em ni, tinge Lily hmaah hian ka danglam tak tlat…? Ka nuna pawimawh ber chu Luca leh Familia chauh hi an ni. Ka thil hriat hi sawi chhuak ta ila, Outfit ho pawi ka sawi thei a ngem? Ka zep chuan Luca ngaihdan a ni hauh lo ang. Chu chauh pawh a la nilo, Aria hi ka venhim tur a ni a, a nu dam lohna ka zep vang hian min haw ngei ang. Tunah hi chuan rilru ka siam fel mai thei bik tlat lo.

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » September 5th, 2021, 1:44 pm

CHAPTER - 7


Lily chuan min ring ngam dawn em tih a ngaihtuah ve mek a nih ka ring. “Tumah i hrilh lo tak tak ang maw?” a ti leh sap a. A bulah chuan bang nghengin ka ding ve a, he buaina hi engtin nge ka pumpelh theih ang tih chu ka ngaihtuahna luahtu a ni.


“Mahse i u chu hrilh a ṭha lo maw? A nu a ni tlat. Thudik hriat a phu ve bawk a lawm.”


“Chu chu ka hriat loh i ring em ni?” a ti leh halh a.


“Hrilh chu ka duh a lawm, he thil a laka ka zep vang hian ka inthiam bik hleinem. Engvanga helaia biru hi nge ka nih i hria em?"


“Hrilh rawh.”


“Mahse ka pa a thinrim dawn a sin. Hun rei tak chu thinrimna tur hlir a zawng emaw tih mai turin a awm tawh bawk sia. A chang phei chuan engemaw tisual palh vaih ila chuan min kah hlum duh maite ka ring ṭhin.”


A pa a hlauhzia chu hai rual a nilo, a hlauhawm reng bawk a.


A kuta vawn sak pahin, “I pa chuan i chungah thil ṭhalo tih a nei tawh em? Luca hian i himna tur engemaw a ngaihtuah sak theih che ka ring,” ka ti a.


Kei hian eng thil tehhrep nge maw ka ngaihtuah le???


Luca hian a fanu naupang ber hi a laksak a nih vaih chuan, Scuderi hian Dante a fuihpawrh anga, indo a puang duh hial ang. Midang chhungkaw rorel dana inrawlh tur a nilo, chu chu kan khawvel dan pawimawh ber pakhat a ni.


“Ka pa hian a remti dawn chuang lo.” Lily chuan thil awmzia hrethiam takin a lo ti vat a. Ka hmuh ṭhin hmeichhe naupang kha chu a ni tawh lo tih ka hre mai. He khawvel hian a thinlung thianghlim tak hi a la tihchhiat sak ve vat dawn.


“Ka chungah eng thil ṭhalo mah a la ti lo, mahse a thusawi ka zawm lo anih chuan a thinrim hle dawn a. Eng thil pawh a ti duh mai ang.”


“Aria hi i hrechiang a lawm, tu hnenah mah i sawi tih a sawi chhuak lo ang.”


“Thudik chu lo hrilh pawh ni ila, hria ang pawhin a awm thei dawn chuang hleinem. Tinge engkim hi a buai nuai mai le…tinge chhungkua anga pangngai taka kan nun ve mai theih loh le?”


“Kan chhungte hi kan thlan theih an ni hleinem, kan chunga thil thleng tur pawh.”


“Eng thil mah kan thlang thei lo, kan pasal tur pawh,” tih pahin a lu a thing na na a. “Chu chu engvanga sawi chhuak nge ka nih pawh ka hre lo, eng thil dang mah ngaihtuah thei ka nih loh hi.”


A kut ka la vawn sak reng chu a en a, ka thlah nghal. Kan awmdan hi Scuderi emaw, a naute emaw pawhin min rawn hmuh vaih chuan buaina a chhuak nghal ang.


“En teh, Aria chu hrilh ila a ṭhat ka ring. Ka hrilh ang.” Lily chuan a ti leh a. Ding ngilin min nuih zui var var a.


“I sawi dik chiah. Aria hian thudik hriat a phu.” Bang nghengin a ding tawh lo a, kan inhnaih zual sauh. Tawlhsawn vat tur ka ni tih inhre reng mah ila, ka che sawn phal lo. A hmui thianghlim leh fawh chakawm zet chu ka en a.


“Min puih avangin ka lawm e,” tih pah chuan min kalsan ta daih a. Mak tizetin a kal liam lai chu ka thlir ta ringawt.


LILIANA :


Ka thin chu a phu dawt dawt a, Romero nen chauha kan awm dun bakah, fawp lo tura ka insum hram hram vang a ni. Ka pa thupek ka bawhchhiat dawn vang a ni bawk. Romero khan Aria leh Luca-te pawh hrilh lo turin a intiam a, mahse ka hrethiam lo. Nupa leh inngaizawng pawh kan nilo a, tinge ka thuruk chu min thuppui ve kher ang? Ṭhian pawh kan ni hleinem. Ka thil ngaihtuah chuan engtin emaw tak min tilungngai deuh tlat lehnghal.


Aria chu hrilh vat ila a ṭha ber ang. Nakinah hriat hun a la nei dawn tho a, keima hnen aṭang ngeiin hria se ka duh.


Aria chu living room-ah a lo la awm reng a, Valentina nen an lo titi dun mek. A lam pana ka kal lai chuan Valentina chuan min lo hmu hmasa zawk a, a mitmengah chuan min lainatna ka hmu thei. Mahse min nuih sang reng tho a. Ka nu chanchin hi a hre tawh tihna a ni thei em? Ni e, a hre ngei ang chu, ka pain a pasal Dante a hrilh anga, Dante hnen aṭangin a hre leh tihna a ni mai. Anih chuan ka pa pawhin midang a hrilh ve tho tihna a ni maw? A chhungkua aia thudik hriat phu zawk a tihte hnenah maw?


“Hi Val, Aria hi biak lawk ka duh a, ka lo ru lawk ang chu?” ka ti a.


Aria chuan mak tihmel takin min lo en deuh hau a. Valentina erawh chu a lo bu nghat thung. Living room aṭanga ka hruai chhuah hma chuan ka hawi kual leh phawt a, ka nu leh pate ngaihṭhat lohna tura awm ka duh lo.
Romero min lo en reng lai chu ka hmu a, Luca leh Dante-te bulah a lo ding leh reng tawh. Ka thil tih tur chu ti ngei turin min duh tih hriat takin min rawn buk khum zauh a, thil hote mah nise, huaisenna min pek bakah ka hahdam phah tlat. Kum hnih chhung khan Romero laka ka rilru put kha engmah a nilo, hmeichhe naupang ngaihtuahna mai mai a ni tiin ka inhrilh ṭhin a, mahse tunah hi chuan ka chiang leh tawh miah lo.


“Lily, enge thil awmzia? Kan lo thlen tirh aṭang tawh khan i awmdan hi a dik miah lo a nia.” Lobby kan kal laiin Aria chuan a ti sar sar a.


“Ka hrilh dawn che a lawm, mahse midangin an hriat ve ka duh lo.”


Aria hmelah chuan min ngaihtuahzia ka hmu thei a. “Thil thleng a awm em ni? Ṭanpui i mamawh tihna em ni?” Ka chhang lo.


Inchungah chhoh puiin, ka pindanah ka hruai lut a. Aria ban ka vawnna chu thlahin, khumah chuan ka ṭhu hnawk a, ka bulah a rawn ṭhu ve nghal.


“Ka nu hi a nia, a chuap a cancer.” Pehhel deuh hleka hrilh chu duh viau mah ila, engmah a danglam phah dawn chuang lo.


Aria mak ti lutuk chuan phawk fein min en ringawt a. Beidawng tih hriat zetin a thaw chhuak leh ham ham a.


“A chauh hmel riauin ka hria a, mahse ka pa nen an in hauh vang anih ka lo ring ringawt a.”


“An la in hau reng tho a lawm, chu chuan boruak a tichhe zual bawk.” Aria nen chuan engmah sawi loin kan inkuah vang vang a.


“Tinge ka nu khan engmah min hrilh loh?”


“Ka pain sawi chhuah a phal lo a lawm. Nangpawh hi hrilh lo tur chein min ti zawk a sin, a hriat chuan ka chungah a thinrim ngawt ang.”


Aria chu in lahrangin min en vang vang a, “A thinrim ang maw?”


“Ka nu dam lohna hi a zahpui niin ka hria, mi hmuha lan mawi a duh vang a lawm. Chuvang chu a nia ka hrilh nghal theih loh che. Mahse Romero nen kan inbia a, i bula sawi chhuak turin min ti a.”


Aria chuan chik zetin min melh leh a.


“Romero nen maw?” Dar ka lo chhin khum ak a.


“New York-a in haw hunah Gianna i hrilh ve dawn em?”


“Hrilh dawn e. A lo kal ve thei lo hi a pawi ka ti,” tih pahin a thaw halh a.


“Ka nu chu biak ka duh. Amah ṭanpui turin kan awm a ni tih a hriat a ngai, mahse kan sawi chhuah a ngai dawn tihna a nia.”


“Aria, ka pa awmdan hi ka hua. Ka nu hi khawngaih awm pawhin a awm lo, nangmah ngaihsak em emtu Luca i nei hi i vannei bik ngawt mai.”


“Ka hria a lawm. Nangpawhin engtikah emaw nangmah hmangaihtu i la tawng ve em em ang.” Aria hian sawi dik ngei se ka ti.


Ka pa ang mihring hi ka nei anih chuan, hremhmuna awm ang chauh ka ni dawn.


Ka nu chu a ni telin a tlahniam tawlh tawlh a. Tih theih ka nei bawk silo, a taksa cher chak lutuk leh a vun dang var papte chuan ka rilru an tina ngawih ngawih a. A chang chuan ka thlir ral tawp dawn nite hian ka hre ṭhin. A sam mawi tak ṭhinte kha a tla kawlh zo tawh a, tunah chuan a dam lohna pawh thup theih a ni tawh lo.


Midangte hmuhah chuan ka pa pawh nupuite dam lohna vanga lungngaite pawh a ang ve ṭhin, mahse inchhungah thung erawh chuan a zia a dang daih a. Ka nu bulah pawh a awm duh ngai lo. Ka nu natna chu a kai ve mai hlau a ang ka ti ṭhin.


Ka nu enkawl a ngaih bakah, ka zirlaiah final kum a lo ni ve kher bawk si a, buai ve thei tak ka ni. Aria leh Gianna-te nen nitin deuh thaw kan inbe ṭhin a, anni hi awm lo se chuan ka tuar thei tawh hauh lo ang. Zanah lah thil tamtak ka ngaihtuah ṭhin vangin ka muhil thei bawk silo.


Christmas party kan neih laia Romero min en dan kha ka ngaihtuah let ṭhin a, enge anih hrethiam chiah lo mah ila, khatiang khan min la en ngai lo. Hmeichhe naupang ang ni loin nula angin min en tawh ni berin ka hria. Ka hriatrengna a cham mai mai mah nise, chakna min petu anih bakah ka awm a ti nuam veng veng zel.


CHAPTER - 8


Ka room kawngkhar kik ri dat dat vang chuan ka ṭhu chhuak zawt a. “Enge?” ka ti nghal vat. Ka nu hi luak tawh lo se ka va ti tak, a taksa hian a zo lo mai ang. Chubakah, zankhat tal chu luak rim hre loa awm ve ka chak. Ka ngaihtuahna mai mai chu leh! Kei hi enge maw ka hriat le…?


Kawngkhar chu dimtein a rawn inhawng a, Fabi a rawn dak lut nghal. A sam chu a thur bam a, a muhil theilo a ni ngei ang. A mit sen deuh ram aṭang chuan a ṭap tih ka hre mai, mahse engmah ka sawi chhuak duh bik lo. Fabi hi kum 12 a tling ve tawh a, a inti pa ve thei reuh lutuk. A ṭap tih chu a sawi duh dawn chuang lo.


“I muhil tawh em?”


“Muhil tawh ang min ti em?” ka tih chuan lu thin na na pahin a pyjama kekawr ipte chu a zen ṭat a.


Hlauh vanga ka bula mu tur chuan a upa tawh mah mah. Hetianga mittui tling pam chunga Fabi ding lai hi ka pa chuan rawn hmu se, a lu hi a ṭhuai chum sak duh hial ang. A fapa hmela dawihzepna lang chhuak hi ka pa palzam tur chi a ni lul lo, tu lakah man hetiang thil hi hmuh a duh hek lo.


Khum sir lama tawlh sawn pah chuan, “Movie en i duh em? Keipawh ka muhil thei bik chuang lo a,” ka ti sap a.


“Hmeichhe en duh chi hlir a lawm i neih, i film neih a pa lo hlawm si,” tih pah chuan a ner nang a. Mahse DVD player dahna lam chu panin a duh ber chu a va play ta tho a.


Khumah chuan rawn lawnin, ka bulah chuan a rawn ṭhu a. Ngawi rengin movie chu kan en ran a, kan thil enah chuan kan rilru a awm lem lo tih erawh kan hrechiang dun viau ang.


Engemaw chen kan ngawih reng hnu chuan, “Ka nu hi a thih i ring em?” Fabi chuan a ti chhuak hluai a. Ka chhan hmain a hmel chu ka en zawk a. Ding takin TV hmai chauh chu a lo la melh ngar tho a.


“A teuh lo mai, a thi dawn lo,” tiin chhang ve bawk mah ila, dawt sawi anga inngaihna ka nei tlat thung.


Vawiin hi ka kum 18-na pianchampha a ni a, mahse lawmna leh party engmah buatsaih a nilo thung. Ka nu damlo nen, he inchhungah hian hlimna leh birthday lawmna tih velin hmun a chang ngang lo a ni ber mai.


Ka pa lah inah a awm tlem em em a, sumdawnna thil vangin a zin chhuak fo a, Fabi pawhin a pui nasa ṭan viau tawh bawk. Chutiangte anih vang chuan ka nu damlo enkawl chu ka kut a ni vek mai a. Nurse leh awmpui nulate chu nei ve mah ila, chhungkaw mi leh sa an nilo a, nufa karah chuan tih tur leh ngaihtuah tur tamtak a awm tlat a ni. Ka nu lahin anni ho enkawl chu a duh meuh lo a, school banah ka nu bulah ṭhuin a lehkhabu ngainat zawngte ka chhiar sak ṭhin a. Chu pindan chhungah chuan thihna nunrawng takin thla a zar mek tih chu hriat loh der tumin theih tawp ka chhuah ṭhin.


Zing lamah khan ka unaute pahnih, Gianna leh Aria-te chuan ka piancham min lawmpui turin min rawn bia a, rawn zin chu duh viau mah se ka pain a remti tlat lo. Ka pianchamah pawh ka chungah ṭhat a chhuah thei chuang miah lo anih hi.


Ka nu muhil chu ka melh zawk a, ka lehkhabu chhiar pawh chu ka dah ve thei ta. Thawk a awlsamna tura a hnara oxygen mask an vuah leh khawl dang ri ṭut ṭut tih loh chu engmah thawm dang hriat tur a awm lo a. Ka din rual chuan ka ṭhut rei lutuk vanga ka ke mu chuah chuah chu ka hre chauh.


Tukverh bulah chuan dingin pawnlam chu ka thlir a. Min hualtu khawvel leh mihringte hi chu an hlim bik ngawt mai…Ka iptea ka phone ah lai nghawr dar dar chuan suangtuahna ram aṭangin min kai harh ta hlauh e. Ka phone ka en chuan number hlang chauh a lo lang a, tunge anih hre lo mah ila ka chhang ta tho.


“Hello?” tih pah chuan ka nu tih harh hlau tak chungin corridor lamah chuan ka kal vat a.


“Hello, Liliana.”


Aw ka hriat rual chuan ka khawng nghal awt a, ka thisente chu a khang zo ta vek ni maiin ka hria.


“Romero..?”


Min lo call hi mak ti em a ni. Nilo, thil ṭhalo thleng a awm vang a ni ngei ang. Ka ngaihtuahna vang chuan ka thin a phu nghal zawih zawih a.


“Ka ute chungah thil ṭhalo a thleng em ni?” ka tih chuan zamna avanga ka aw tham ṭiak pawh chu a hriat hmaih hauh lo ang.


“Aih, aih. Ka tihpalh lutuk, rawn tih hlauh che ka tum miah lo. I piancham rawn lawmpui che ka tum a,” a tih takah chuan ka thaw hawk a.


A aw ril ruih leh dam thlup chuan engtin emaw tak min tihahdam tlat. Ka lungphu rang lutuk tlahniam leh mek vang chuan keipawh ka inthlahdul ve thei ta deuh.


“Ka lawm e. Ka uin ka birthday a ni tih a hrilh che em ni?” tih pah chuan ka nui var var a.


Ka hmel hmu theilo mah se, ka hlimna chu ka nuihpui lo thei lo. Ka hlimna tur a nih beiseiin Aria-in a lo hrilh ngei anih ka ring. Sawi lemlo mah se Romero hi ka la duh reng a ni tih a hria pawh a ni maithei.


“Min hrilh kher a ngai hleinem, i birthday chu ka hre reng a lawm.” A tih chua engtinmah ka chhang lo. Sawi mai tur ka hriat loh vang a ni. Romero hian ka birthday a lo hre reng a maw?


“A lawmna tur ruahmanna i siam tawh em?”


“Aih, lawm dawn lo. Inah ka awm ang, ka nu damlo enkawl ka ngai a lawm.” Chauh hmel zet chuan ka ti halh a.


Tui tak leh thlamuang taka ka mut lohna chin pawh ka hre tawh lo. Ka nu na tuar thawm leh luak riin min tiharh lo anih pawhin, ngaihtuahna kawmin zan rei tak tak ka meng ṭhin. Romero pawh chu a ngawi vang vang a, enge a ngaihtuah ang tih phei chu ka hrethiam hauh lo.


“Engkim a ṭha leh vek dawn a lawm. Tunah kha chuan beisei a bo viau niin a lang ngei ang a, mahse beidawng reng reng suh.” A rawn ti ril leh ruih a.


“Thihna vawi tamtak i hmuin i hmachhawn tawh a. Engtin nge i tawrh ṭhin?”


“I chhungte leh i hmangaihte an nih chuan a dang hle anga, mahse keiina ka hmuh ṭhinte chu sumdawnna vang an ni hlawm. Chu chu thil dang daih a ni.”


Fimkhur takin min chhang tih ka hria, ka thil zawh chu ṭullo ti hnuhnawh viau mah ila ka sawi zo vek tawh si. Romero aw pa leh ril ruih hian zep rual lohin min thlamuan tlat a ni.


“Kum 14 ka nih laiin ka pain min boral san a, pafa inngai tak ni lemlo mah ila kha thihna khan min deng na khawp mai. Kha bak kha chu thihna avanga tawrhna ka la nei leh lo.”


“Ka nu nen pawh hian nufa inpawh ber kan ni hauh lo, mahse tunah hian natna khirh tak a tuar a, hrehawm ka ti lutuk tho.”


“A thi mai dawn hleinem. I beisei aia rei kha a dam thei a sin.” A thusawi hi dik ngei se ka ti, mahse ka thinlung hian hriatna a nei tlat. Kar loah he natna hian a nunna a chhah sak dawn tih hai rual a nilo.


“Ka lawm e, Romero,” ka ti ve ta sap tho a. Tunah tak hian a hmel hmuh theih a, a rim pa lutukte kha hip vang vang theih ka chak takzet.


“I hlimna tur engemaw tal ti rawh. Thil hote pawh nise i rilru lak penna tur thil ti rawh.”


“Min rawn bia hian min tihlim a lawm,” ka ti ve ta nge nge a.


“A ṭhat chu,” a ti sap a. A ngawi zui leh daih.


Ka thil sawi khan a tilungawilo a ni maithei. A ngawi ta daih bawk si, kei hi ka mawl takzet. Engvangin nge awlsam takin khatiang khan ka sawi mai theih, zahthlak thei lutuk. Chhuanlam siamin kan inbiakna hi ka tih tawp vat a ngai. Ka inhaw lutuk.


“Tih tur ka nei tlat, Romero,” tiin dawt ka sawi ta ringawt a.


Ani pawh chuan min chelh a tum bik lo. “Anih phawt le,” a ti ve ta mai a.


Ka phone chu hmet hlumin ngawi reng chuan ka melh ta reng a. Romero min lo call vang khan beisei ka lo nei sang lutuk em ni? A boss nupui hi ka u a ni a, a mark tih ṭhat a beisei vangin ka birthday chhuanlamin min lo bia pawh a ni maithei. Mahse Romero hi ama hamṭhatna um vangin midangte tlawn chi a ni lullo. Anih chuan engvangin nge min lo biak si? Christmas party kan neih ṭuma min en dan nen khan inzawmna a nei angem, ka duh tih a hria a, min duh let ve ta tihna a ni thei a ngem?

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » September 5th, 2021, 1:44 pm

CHAPTER - 9


Ka birthday aṭang khan karhnih a liam leh ta, ka nu lah hmasawn aiin hniam lam a pan zel bawk si. A vunte chu a dangin a vawt thler a, a nachhawknain a chhawk tih hriat takin a mitmeng chu a dava vual deuh tap bawk. A banah chuan dimtein ka vuan a, tihnat mai hlauhawm khawpa derthawng a ni tawh. Rei a dam tawh dawn lo tih hre reng mah ila, thil mak a thleng thei tih erawh ka beisei lo phal silo. Mahse chu beiseina hlimpui tur khawpa hmeichhe naupang ậ chu ka ni tawh silo.


“Aria?” ka nu chuan a rawn ti tham ṭiak a. Ka ṭhutna aṭang chuan tho vatin ka nu chu ka hnaih pheih vat a.


“Nu, keimah Liliana zawk.” Ka nu chuan min rawn enin, chau tih hriat zetin a nui sak a. Mahse a nui hmel chuan a natna avanga a hmai cher tawh tak mai chu a chei mawi zo ngang lo. Midang tan chuan rapthlak pawh a tih theih ang. Tunah chuan nu hmelṭha tak ni ṭhin kha, ruh vunin a tuam ang chauh a ni tawh.


“Ka fanu duat Lily,” a ti leh sap a.


Ka hmui chu ka pet fan fan a, ka nu hi fate pawh duat hluak chi a ni tlat lo. A thiam ang tawk chuan nu ṭha nih tumin a bei ve ngei ṭhin. Min kuah a, kan mut dawnah lehkhabute min chhiar sak ṭhin bawk. Mahse nu dangte anga fate duat deuh hluak chi a ni lo a, kan hming pangngai tih loh chu koh duatna eng hming mah min phuah sak ngai lo.


“Ka nu, i bulah ka awm a nia,” ka tih lai chuan, ka pain min hnawt bo anih loh chuan i bulah ka awm reng ang ka ti rilru bawk.


Ka pa, ramsa ang maia khawngaihna leh lainatna neilo hi chuan pindan pakhatah khungin, nurse enkawl turin a dah anga, a thih hma loh chuan a fate pawh hian hmu miah lo ila a duh zawk hial ta ve ang. Ka pa chuan hmeichhe huaisen tak anga lantir a duh vang angin a ngai ngei ang, mahse ka pawm zawng a ni ve lo. Thil zahthlak angah a ngai niin ka hria.


“Khawiah nge i ute, Fabi pawh?” tih pahin beisei nei tih hriat takin ka hnunglam chu a melh kual a. Hetiang dinhmuna a din mek lai hian a hmangaihte hmel hmuh a in ring a ni ngei ang.


A mitah tak pawh ka en ngam tawh lo, a khabe cher tawh tak chu ka melh ta ringawt a. “Fabi chu school-ah a awm a,” ka ti a.


Hetiang hunah pawh dawt ka la hrilh hi hrehawm ka ti. Ka pain Mafia khawvelah hnim phum tumin eng eng emaw a tih tir tih lah ka hre reng si. Chuvanga ka nu bulah pawh hun hmang theilo chu a ni. Ka nu hi a thi mek a, a fapa neih chhun chu ka pa hian a laksak a ni.


“Aria leh Gianna-te pawh an lo thleng ṭep ang, an hmu chak tawh lutuk che a sin,” ka tih chuan mak tihmel a pu deuh a.
“I ute chu i pain a bia em ni?” a ti a.


Dawt hrilh leh ka duh tawh lo. Mahse a pasalin a fate hmuh a phallo tih chu engtin nge ka hrilh theih ang? An nu hi a thi mai dawn a ni tih lah an hre der silo. Khum bul dawhkana a no chu thli khatin, tui ka in tir ta ringawt a.


“Ka nu, tui hi in rawh, i chau palh ange.” Tlemte chu a lem sek a, mahse lehlam a hawi ta daih.


“Ka tui a hal lo,” a ti sep a. No ka dah kir leh lai chuan ka thinlung na chuan ka awm a hnawh thei hial. A rilru lak pen nan engemaw sawipui ka duh, mahse sawi mai tur ka hre lo. Ka thuruk hi hrilh ila, a dawngsawng thei a ngem? Romero ka duhna hi min pawmpui thei a ngem?


“Ka nu, mamawh i nei em, enge i ei chak? I duh chuan soup ka siam sak thei che a nia.” A lu chu zawitein a thing a. Min melh dan chu a danglam tlat, chu chuan ka awm a tinuam thei miah lo. Ka thlarau thlengin a hmu tlang vek ni maiin ka hria.


“Karei leh! Tleirawl nun leh zalenna awmzia pawh ka hrethiam tawh lo hial a nih hi,” a tih chuan mak tih vangin ka meng phar awk ngei ang. Zalenna maw? Chu nun chu engtia rei nge ka kalsan tawh pawh ka hre lo.


“Thil tamtak tih duh ka nei a, suangtuahna tamtak ka nei ve ṭhin. Khatih lai kha chuan engkim ti thei ang maiah ka inngai ve ṭhin a sin,” a tih lai chuan chak thar ta sawt ang maiin a awte pawh chu a fiah viau a. Kum tamtak liam taah khan a kir leh tih hai rual a nilo.


“Ka nu, in ropui tak i nei a, ṭhiante leh fate, nangmah hmangaih em emtu che i nei a lawm,” ti ve mah ila dawt sawi anga inhriatna chuan inthiam lohna min siam nasa hle thung. Mahse hahdam taka awm turin ka duh a, a hlimna tur ni a ka hriat ang chu ka sawi ve a ni mai, tiin inthiam chawp ka tum tlat a.


“A dik a lawm,” tiin a nui lui sak a. Sawi zawm lehin, “Ṭhiante min rawn tlawh ngai miah lo ka nei,” a ti a.


Chu kher chu phat mar ngaihna ka hre bik hauh lo. Tinge ka nu hi a ṭhian ṭhate ni ṭhin khan an rawn tlawh ngai loh a, a pasal ngei pawh hian tinge a ngaihsak miah loh ka hrethiam bik lo. Dawt dang hrilh leh tumin ka ka ka ang zua a, mahse a sawizawm leh takah chuan ka ngawi ta zawk a.


“In ropui tak, thisen hmanga leiah ka cheng bawk a,” a ti leh a. Ka nu hian ka pa sum lakluh dan tenawm tak hi a sawisel ngai lo a, a pawisa vaklo emaw ka lo ti mai ṭhin. Sum leh ropuina chauh hi ka pa chuan a nupui fanaute tana ui hauh loa min pek chhun a ni tlat. Rapthlak tih vang leh, ka nu thusawi leh tur hre chak tak chung chuan ka ip chawih chawih a. Fa a lo nei hi a inchhir angem, a lungngaihna belhchhahtu mai kan lo ni reng lo maw?


A kut cher riak tawh chuan ka kut chu a rawn beng thak thak a. “Chuan nangni……ka fate hi, ka venhim tur in ni tih ka hria. Mahse inthlavang takngial pawh ka hauh ngam ngai lo a, in nu hi ka nep em a ni.”


“Ka nu, theih tawp i chhuah a lawm. Eng pawh sawi mah la ka pa chuan a ngaithla ngai lo che tih i hriat kha.”
“Ni e, min ngaithla ngai lo,” a ti chuai raih a.


“Mahse, kha aia nasa a bei let tur kha ka ni. Chu chu vawiin thlenga ka inchhirna ber pawh a nia sin.”


Ka nu thusawi chu ka thinlung takin ka pawm hle thung. Kan thlavang hauh turin ka beisei ṭhin hle anih kha, a bik takin Gianna chunga ka pa thil tih vang khan ka nu hi ka dem ṭhin. Mahse engmah tihdanglam theih a ni tawh lo a, ka nu tawrhna belhchhah sak kher chu a ṭulna pawh ka hre lo.


“Lily, nunna dang i nei tawh dawn lo a, a ṭha thei ang berin i nun hmang ang che. Hun liam tawhte kha ko kir lehin siamṭha thei ila ka ti, mahse a tlai zo tawh. Keimah anga nunhlui leh hun liam tawhte, inchhir ngawih ngawih chunga chhui kir turin ka duh lo che. I nun hi holam takin hmang liam suh. Kei aiin i huaisen zawk a, i hlimna tura bei turin i chak tawk tih ka hria.”


Ka nu thusawi vang chuan chil ka lem khawlh a, a thil sawi chu a hrechiang hle a ni tih hrilh chawp ka ngailo chiang hle bawk. Mahse chiang leh zuala hriat ka duh tlat.


“Enge i sawi awmzia chu?” ka ti ro halh a.


“I pa nen kan inneih hma khan tlangval pakhat, ka pa restaurant-a thawk ṭhin nen kan inhmangaih em em a. Tlangval fel leh ngainatawm tak a ni, mahse ani chu kan khawvela mi hi a ni ve tlat lo,” a tih lai chuan kawngkhar lam ka melh vat a. Ka pa lo luh thut ka hlauh vang a ni. He pindanah hian a lo lut dawn lo tih hrechiang viau mah ila, zalenna tem ngailo kan nih miau avangin kawng engkimah fimkhur kan zir tel tlat a ni.


“Chu tlangval chu i hmangaih a maw?” ka ti leh ta he haw a.


“Mahse kan khawvela mihringte tan hi chuan, hmangaihna hian awmzia a neih loh ang bawkin hmun a chang hek lo. Khatih lai khan ka hmangaih hle a ni tih ka hrechiang a, vawikhat phei chu bawlhhlawh bawm phenah kan infawp nghe nghe anih kha. Pawn boruak chu a vawh mai bakah, bawlhhlawh bawm rimchhe tak bula ding mah ni ila, khatiang tluka thil romatic kha ka tawng tawh ngai lo.” Tih pah chuan a nui var var a.


A hmel a hlimna lang chhuak chu ka la hmuh ngai loh a ni. Ka thinlung erawh chu a na hle thung a, ka pa hian eng thil romatic mah a tih sak ngai lo tihna em ni? Ka ngaihtuahna chu ka sawi chhuak ta nge nge a.


“Anih leh ka pa ve thung hi?”


“I pa hi chu……….” Sawi zawm ta lo chuan thaw a la leh vang vang phawt a.


Oxygen bur hmanga thawk tir a ni chung pawhin a harsatzia chu hai theih a ni lo.


“Ka laka romantic turin hun a nei lo, a nei ngai bawk hek lo,” a ti chhuak hrawk a.


Mahse a mihur khawite tan chuan hun a nei a lawm. Kei, eng thil pawh hre har ber ṭhin pawhin ka hria anih chuan, ka nu hian ka pa khawsak dan hi a hre em em ang. Ka nu a duatna emaw, ka nu chunga a ṭhat chhuah lai ka hmu ngai lo a, mahse pindan chhungah kan hmuh loh lamah a lantir ni maiah ka ngai ṭhin. Ka nu thusawi ka hriat tak hnu hian ka ngaihdan chu a diklo tawp tih ka hrethiam ve chiah. Ka nu chunga a ṭhatna a lantir ve dan awmchhun chu tlereuh man to tak tak a lei sak hi a ni mai.


“Ngaih loh lamah i lo ngai a nge. I pa hi ka zah lutuk a nia,” a ti leh sap a.


Thawk halh pah chuan, “Mahse, i hmangaih hleinem,” ka ti a.


Heti khawpa ka pain a ngaihsaklo chung pawh hian a phunnawi ngai hauh lo a, ka nu hi chuan a hmangaih hle anih ka ring mai ṭhin. Kan khawvel dan anga inneihna an buatsaih dan hi, mi tamtakte tan chuan hremhmun ang mai a ni dawn anih hi. Aria leh Gianna-te erawh hi chu an vannei takzet. Kan khawvela hmeichhiate hi hmangaihna tello inneihnaah sal anga phuar an ni a, pasal ṭhenkhatte phei chu nupui kut thlak ching leh, hmeichhe dang kawp sawn ching tak an ni hlawm.


Thawk a lak leh halh hnu chuan a mit chu a chhing riai riai a, a vunte chu a dang zual sawt ni maiin ka hria.



CHAPTER - 10


“Ka duhzawng ti turin hun ka la nei dawn a lawm, tiin ka inhnem fo ṭhin a,mahse enge thleng ta hi? A tlai tawh lutuk,” a tih laia a thinlung na chu thup theih a nilo. Ka nu hian dam a thlahlel tawh lo nge, a beidawng lutuk ṭawng mai mai zawk.


“Nilo. A ni thei lo. I beidawng thei lo ang,” ka lo ti hrawk a. Beidawn hmel takin a nui lui sak a.


“Hun ka ngah tawh lo, ka tan inchhirin awmzia a nei lo. Mahse nang chuan bul i ṭan dawn chauh Liliana. Min tiam rawh, i duhzawng anga nung turin i bei tur a ni. I hlim ang tih min tiam rawh.” Chil ka lo lem khawlh ringawt.


Ka nu hian thuawih turte, ka hmaa tih tur awm ang chu huaisen taka hmachhawn zel turin min fuih ṭhin.


“Ka hmangaih chauh pasala neih ka duh,” ka ti chhuak ve ta nge nge a.


“I hmangaih chu nei ang che,” a ti leh sap. A ṭawng chu zawi viau mah se ka hrechiang viau thung.


“Mahse ka pain a remti lo ang. Ka pasal tur chu min zawn sak dawn lo’m ni?”


“Inremna atan Aria leh Gianna-ten pasal an nei tawh. Nang chuan i hmangaih nei ang che. I hmangaih, tlangvalte zinga vannei ber tur chu nei ang che.”


Ka mitthlaah chuan Romero a rawn lang nghal a, phurna leh zamna vangin ka pumte chu a let but but thei hialin ka hria.


“I hmel danglam kha ka hmuh hmaih hauh lo a nia, duh i nei chiang mai. A dik em?” Ka nu chuan zawitein a ti a. Ka hmai chu a sa nghal hat hat mai.


“A ho lutuk, amah pawhin min duh ve chuang hleinem,” hnuailam melh pah chuan ka ti ta daih a.


“Engtin nge a duh loh theih che? I hmelṭhain i fing bawk a, chhungkaw zahawm tak aṭanga sei lian i ni bawk. A duh let ve lo che anih chuan mipa ầ tak a ni ngei ang.”


Hetiang thil hi ka nu nen hian kan la sawi dun ngai lo. Nufa inkar hmangaihna leh inpawhna siamṭha tura cancer natna rapthlak zet a lo tel ve a ngai erawh pawi ka ti hle thung.


“Ka pa hian eng tikah mah a pawm thei ngai dawn lo. Ani chu sipai naran ve mai a nia.” Ka awah chuan beidawnna a lang tel tih hre mah ila ka thup thei bik lo.


“A ni maw..” ka nu chuan a ti sap a, a mit pawh chu a meng peih tawh meuh lo.


“I hlimna tur hlawh chhuak turin eng thil mah indan tir suh,” a aw chu a zawi kher mai, a tawp lam phei chu a hriat theih chang chang chauh a ni mai.


A muhil a ni tih hriat takin a thaw sak sak a. Dimtea a ka kut a vawn lai chu lasawnin ka ding chhuak vat a. A thaw chu a zawiin, engtik hunah pawh a kal mai thei tih chu hrilhfiah kher ka ngai lo. Kawngkhar chu hawngin pindan chu ka chhuahsan a, mahse kawngka erawh ka khar phui duh lo. Ka nu min auh ka hriat loh mai ka hlau.


Ngaihtuah mumal pawh nei loin inhnuai lam ka pan a, ka pa nen kan insu lo chauh.


“Ka nu khian a hmu chak ngawt ang che, mahse tunah chuan a muhil a. I nghah deuh a ngai maithei,” ka ti ta ringawt a. Ka pa awmdanah hian ka lung a awi thei lo a ni.


A necktie chu pawh thawl pahin, “I nu hmuh ka tum lo, meeting pawimawh dang ka la nei,” a ti hmuk a.


“Aw, a nih tak chu,” ka tih lai chuan hmeichhe perfume rim a nam tih leh, a thawmhnawte chu a chuar hle a ni tih ka hmuh hmaih hauh lo. Chawhma lamah a nula khawi pakhat bulah hun a hmang tawh a, tunah pawh hian nula dang hmu turin a kal leh dawn pawh a ni mahna.


Mahse luhlul chhuahin, “Mahse ka nu chuan a hmu chak tawh ngawt ang che,” ka ti leh hram a.


Ka pa chuan mit zim zan chungin min melh a, “I u i bia em ni? Luca-in min rawn bia a, Aria nen Chicago-ah i nu rawn tlawh turin lo kal an tum anih hmel.”


“An nu a ni a, mangṭha turin dikna an nei a lawm.”


“Hetiang dinhmuna i nu dinglai hi an hmuh chak i ring em ni? I nu hi hmeichhe induhtawk tak a ni ṭhin, chu chu tun thlenga a nih dan pawh a la ni. Chaklo tak anga midangte lainatna dawn chu a duh hauh lo ang.”


Au chhuak mai lo turin ka hmui chu ka pet fan fan a. “I zahpui vang a nih kha, chhuanlam zawng suh!” ka ti hmak a.


Ṭawng ring lem lo mah ila ka lungawi lohna chu thup theih a ni lo. Min warning nan a kut zungṭang chu a lek kang va a. “Fimkhur rawh. Khatiang aw ki khan min be hlek suh. Boruak rit tak hnuaiah i awm tih ka hria a, chuvang chuan keipawh ka dawhtheihna a pan viau tih hria ang che,” a tih chuan ka inhum ruh hle ringawt a.


“Aria leh Luca-te chu an lo kal dawn em? Nge lo kallo turin i hrilh zawk?” Gianna pawh a lo tel dawn tih erawh ka sawi lang kher duh bik lo, a lo thlen hunah inhmachhawn mai rawh se. Mahse Luca a lo tel dawn a, a thinrimna pawh a thunun thei ngei ang.


“Chawhnu lamah an lo thleng ang. Luca leh Dante pawhin sumdawnna thil an sawi dun thei ang a,” a ti leh mai a. Ka nu a ngaihtuahna thu vawikhat pawh a la sawi lang chuang lo.


Hei chauh hi em ni a ngaihtuah…sumdawnna chauh hi maw? A nupui thi lek lekin natna khumah a mu a, enga tan mah a ngailo tawp a nih hi. Engmah sawi ta lo chuan ka bu nghat a, ka kalsan ta daih a.


Darkar chanve hnu a ka pa chhuak lai chu ka en reng a. Hmanah kha chuan ka ngaisang em em ṭhin a nih kha. Suit dum dak hlarh a ha a, khawvela mipa ropui ber leh thiltithei ber ni maiin ka hre ṭhin. Mahse kha hun kha chu a liam tawh. Ka nu kut a thlak lai ka hmuh hmasak ber ni aṭang khan ka pa ka ngaihdan chu tih danglam a ni ta a ni.


Aria, Gianna leh Luca-te chu darkar hnih hnuah an lo thleng a, Matteo erawh sumdawnna enkawl turin New York-ah a awm thung. Luca rin ngam ngeiin New York mafia-te a enkawl chu ṭul viau mah se, Gianna leh ka pa inhauh hunah a ti punluntu tur Matteo awm lo tur chu a ṭha zawkin ka hria. Matteo lah a thinchhe ve bawk nen, buaina a chhuak anga nunna chan phahte pawh an awm zawk hial maithei.


Aria leh Gianna-te chuan min hmuh rualin nghet takin min kuah nghal thlawp a. “I ṭha em?” Aria chuan a ti sap a. Insangmar ṭeuh chungin, “Ka hre bik lo, ka nu hi hmuh hrehawm ka ti em a ni,” ka ti a.


“Ka pa lahin a pui dawn der silo che a, kan mimawla kha a mawl ngai rengin a la mawl tlat a lawm.” Gianna chuan a lo ti ro halh a.


Luca chuan min buk khum zauh a, “Chokaah ka lo va awm a nge, phone hman lawk ka ngai,” a ti thum dut a. Kan unau thum hian hun thawl min pek a duh vang a nih ka ring. Romero chanchin zawh chak viau mah ila ka inthunun thei hram.


Ka ute nen chuan inchung lamah kan chho a, ka nu mutna pindan kan luh rual chuan an hmel a mak tihna lang chhuak chu ka hmu thiam vek. Thup pawh an tum bik hek lo. Kei, nitina awmpui ṭhintu pawh hian ka nu tla chak lutuk hi tuk tin mak ka ti a nih si hi! A taksa thi mek avanga pindan chhung rimchhe ṭhin lutukte pawh hi mak ka ti. Nurse hoin nikhatah vawihnih damdawiin chhuat leh bungraw awm zawng zawngte hi an hrufai vek ṭhin a. Mahse a rimtui rei ngai chuang lo. Ka thawmhnaw leh ka vunahte hian chu thil rimchhe tak chu a nam vek ni maiin ka hre ṭhin a. Nilo, ka hnarah hian a cham reng a, a chang chuan ka mut theih loh phah fo ṭhin.
Ka nu muhil chu a rawn harh a, mahse a bula dingte chu a hre mai lo niin a lang. A hnar leh a bana pipe invuah ṭupte vang chuan mitthi a la nilo tih a hriat theih ni mai chauhin ka hria.


Aria chu ka nu khum lam pan chuan a kal vat a, dimtein ka nu chu a kuah a. Gianna erawh chet mai nachang hrelo tih hriat takin ka bulah chuan a ding khawng tlat thung. Ka nu nen hian hun rei tak an inhmu tawh lo a, mahse nufa inngai tak an ni ngai lem lo. Aria inlakhran hnu chuan ka nu chuan Gianna chu a melh vang vang a, a biang thep deuh sat tawhah chuan mittui a luang ngiai ngiai bawk.


“Aw, Gianna,” a ti tham ṭiak a.


Gianna pawh chu a insum thei ta bik lo. Ka nu lamah chuan tlanin a kuah ve ta thlawp a. Natna rapthlak tak hmanga kan nufa ho inpawhna siamṭhat a ni ta erawh a na ka ti. Hun liam tate kha ka ui a, kohkir leh theih nise ka ti takzet. Chair pahnih chu pawt hnaiin, nileng zankhuaa ka ṭhut ṭhinna chair pakhat bulah chuan ka hung a. Ka nu khum bulah chuan kan ṭhu ṭhap a, a vawikhatna atan liau liau ka nu thlamuang leh hahdam hmel pawh ka hmu ve ta. Gianna leh Aria-te titi ka ngaithla a, kei erawh engmah ka sawi ve lo thung.

Link:
BBcode:
HTML:
Hide post links
Show post links

Local Advertisement

MOBILE SIAM ZIR DUH TAN!!!

Tech-Inn Mobile Repairing Traning Centre, Bazar bungkawn

Kum tin mi za chuang eizawnna kan siamsak a, Eizawnna tlaka thiam turin kan zirtir thin

Mizorama mobile siam zirna hmasa ber changtlung ber kan ni. Hrechiang duh tan Contact : 9612099411 / 9862016122


Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » September 5th, 2021, 1:44 pm

CHAPTER - 11


Aria chuan New York lam chanchinte hrilhin ka nu hnaih tur chuan a kun hniam a. Gianna chu ka lam rawn hawiin, “Khawnge Fabi hi, tun ang hunahte chuan ina awm tur a ni lo em ni?” a ti sar sar a.


“A school kal leh haw tur pawh midangin an hruai a, ka pain a hrual ṭan tawh a niang. Zanriah ei lai bakin kan inhmu ngai lo,” ka ti ve mai a.


“Fabi chu hnathawk turin a chhawr tawh a maw? Hna tenawm lutuk thawk tur chuan a la naupang lutuk.”


“Ka hre bik lo. Fabi lah hi engmah sawipui theih a ni bawk si lo. Hman ang khan engkim min hrilh tawh ngai lo. Ka nu damloh hnu phei hi chuan a danglam tawh takzet. A chang chuan hmelhriat loh ang mai a ni ṭhin."


“Mafia nun hian a thlak danglam vek ṭhin a lawm. An mahnia ṭhatna awm chu a ei zo a, sakawlh ang mai an ni ṭhin.”


“Mahse Luca leh Matteo bakah, Romero pawh hi en ta che…sakawlh ang maia hlauhawm an nih loh hi.”


Gianna chu a thaw halh a. “Mifel an ni bik chuang hleinem, a teuh lo mai. Fabi pawh ka hrechiang a, sualna chuan amahah kua a hreuh mek a nih chu. Luca leh Matteo-te hi chu chher hriam tawh an ni a, an danglam deuh bik a ni mai.” Gianna chuan min melh pah ram ram a.


“Romero hi i la duh reng a ni maw? Rilru dang i pu daih tawh ang chu tih nak laiin,” a ti leh sap a.


Ka sen deuh ṭan ṭan tih ka hria, mahse ka chhang buai duh ta lo. Vanneihthlak takin Aria chuan a be buai ta hlauh a, ka thaw huai thei hialin ka hria.


Ka nu ber a mutthilh takah chuan kan unau thum chuan kan ṭhutna hmunah chuan kan muhil ve ta vek a. Darkar hnih hnuah chuan ka pa thinrim aw ki ring tak vangin ka harh zawk mai.


“Hetah hian enge a rawn tih?” a tih chu tudang ni loin Gianna ngei a ni.


In beng kangin thaw ka la leh te te a. Ka pa chu kawngkhar bulah dingin, Gianna chu a melh ding ngar a. A thil tih vang khan a la ngaidam hauh lo a nih hmel. A thinrimna hi thlan thlengin a chhawm zel dawn a nih ka ring.


“Nangmah hmu tura lo kal ka ni lo, min ring rawh.” Gianna chuan a lo ti ve hrawk bawk.


Gianna hi chuan ka pa hi a hlau ngailo reng reng. Aria chu thoin ka pa dinna lam chu a pan phei a, fanute tihdan tur niawm takin ka pa chu a kuah zauh a.


Hetianga a tih tawh hi chuan ka pa thinrim pawh a bengdai fo ṭhin a nih kha, mahse tun ṭum chu awmzia a nei thui viau lo a nih hmel.


“Ka ina awm ve tur hian ka duh lo che.” Ka pa chuan Gianna la melh reng chung chuan a ti a.


Ka hawi chhuah leh chuan ka pa hnung a Fabi ding reng chu ka va hmu a, a hmel aṭang chuan tih mai tur a hre bik lo a nih hmel.
Gianna hi a ngai lutuk tih ka hria, phone-ah pawn biak a chak thei hle a nih kha. Mahse a thluak ka pain a suk sak mek a, tu lamah nge a ṭan dawn pawh a hrethiam tawh lo a nih hmel.


A ngaihna hrelo zeta ka nu meng a ruai chu ka en vat a, nachhawknain a la chhawk tih ka hrethiam mai a, a rilru tihbuai sak kher chu ṭha ka tih loh vangin, “Pawnlamah sawi ho ang u, khawngaihin,” ka ti sap a.


Ka pa pawh chu engmah sawi loin a inher ve ta nghut a, ka nu chu vawikhat pawh a melh lo.


Midang ho pawh chuan kan zui chhuak ta nghal a. Gianna chuan engah mah ngailo niawm takin Fabi chu a kuah a, a hnu deuhah Fabi pawhin a kuah let ve mai bawk. Ka pa chuan ngaihnobei lo fein a lo melh nghek a, hetiang hunah pawh a chapona dah ṭhain, chhungkua anga awm a duh miah lo chu ka awih theilo hial a ni. Ka nu tan a hun tawp a ni tawh a, a chhungte hi min mamawh a sin. Kawngka ka khar phui hun pawh nghak loin ka pa chu a rawn vin leh nghal ṭhak a.


“He inchhungah hian i ke kha rawn pen lut tawh suh.” Kawngkhar chu rang fe a pawt kharin ka ngheng ta ringawt a. Ka pa ṭawng ri chu ka nuin a hriat loh ka beisei vanga ngheng ka ni ber. Ka thate chu a khur thei hial.


“Hei hi ka nu in ve tho a nih hi. Min hmuh a duh vanga min rawn ko a ni.” Gianna chuan zam hauh lovin a chhang let a, mahse thudik a sawi thung. Ka nuin vawi engzat nge Gianna hming a lam pawh ka hre seng lo zawk.


“He in hi ka lei a ni a, ka thusawi chu dan a ni mai.”


“I nupui thi mek duhthusam hi enga tan mah i ngai lo em ni?” tih pahin Gianna chu a thaw halh a.


Gianna hi Matteo nupui ni tawh mah se ka pa hian a beng hreh hauh lo tih ka hria. Mahse chutih lai tak chuan Luca chu inchung kailawnah chuan a rawn chho ve mek a. Kut em chu thlak lo mah se ṭawngkam chhe tinrengin ka pa chuan a ần khum a. Gianna lah duai bik hek suh, kan boruak chu ka tuar thei tawh lo, boruak hip turin inhnuai lamah chuan ka tlan chhuak ta ringawt a. An ṭawngkam chhe tak tak hriat zui ka duh loh vang chuan choka kawngka chu kharin, hmai hupin ka ding ta reng a.


Hun rei tak ka lo sȗm tawh ka mittui chu a luang nghal zawih zawih mai. Hetia ṭah hi ka thlahlel ṭhin hle a nih kha. Dinhmun a chhiat tak tak chuan ṭah pawh kan ṭap ngam lo a nih ber hi.


Insum leklo chuan ka ṭap chhuak ta hawk hawk a. Mahse thawm ka hre ta tlat. Ka hawi chhuah meuh chuan dawhkan bula Romero lo ding reng chu ka hmu ve ta chauh a. A coffee no leh a hmui chuktuah chung chuan min lo melh run zui. Mahni chauha awm emaw ka intih vanga ṭap chhuak ka ni a, mahse chutia min lo en rengtu an awm tih ka hriat takah chuan ka zak leh hnuhnawh hle mai. Ka mittui chu rang tawkin ka tuai fai nawk nawk a.


“Ka tihpalh. Tumah an awm lo emaw ka tia,” ka ti ta ringawt a.


Romero hi a lo kal ve tih reng reng ka hre lo. Mahse thil mak a ni hran lo. Matteo New York-ah a awm a, Luca hian ka unaute veng turin Romero hi a mamawh tlat.


“Hei hi i in a lawm,” Romero chuan a lo ti sam et a. Mitmeng ngilnei leh min hrethiam tih hriat zet chuan min en reng bawk. Ka en let ve reng chuan ka ṭap leh mai dawn tih ka hria, chu lah chu ka thil tih duh loh ber a ni zui.


“Hmanah chuan a ni ṭhin, mahse tunah chuan mi tầng ang mai ka nih tak hi,” ka ti leh hram a.


Ka hmui hi ka chip vat a ngai, anih loh chuan thil ṭullo fe fe ka sawi ṭeuh mai ang. Romero chuan min la en reng chungin a coffee in lai chu dawhkanah a nghat a.


“Engtia rei nge in hi i chhuahsan tawh loh?”
A zawhna chu chhan mai ngaihna ka hriat loh vangin dar ka chhin khum ak ringawt a.


“Va vak harh ang hmiang, coffee-te kan in anga. Pawnlam boruak pawh a nuam viau a nia.” Chhum dum takin min delh tlat ni maia ka hriatna chuan ka ngaihtuahnate chu a ti ầ mup tawh ni hian ka hre ṭhin.


“Chutiangte chu a tih chi dawn em ni?” tiin atthlak takin ka zawt let hu a.


“Luca phalna kan la hmasa dawn nia. Mahse a rem loh chhan tur phei chu ka hre lo, min lo nghak lawk rawh.” A tih chuan a kalna tur kianin ka lo tawlh sawn vat a.


Min kal pelh paha a rimtui inhnawih rim chuan ka hnar a verh var mai. A hnunglam chu ka thlir zui reng a, a dar pharh hlap leh a kawng fểk ratte chuan a ti pa hliah hliah. Chutia ka en reng lai chuan ka nu thusawi kha ka hrechhuak a, ka hlimna tur chuan min hnaih hle ni maiin ka hria.


ROMERO:


Lily nen chauha awm tur hi kan ni lo. Tunah a ni emaw, engtik hunah pawh. Tunah chuan nula a ni ve tawh, ka hmuh tirha hmeichhe naupang ang mai a ka en ṭhin ang khan ka en tawh lo tih hre chiang bertu ka ni bawk. Nula puitling, pasal nei rual chu ni tawh mah se ka cho rual a ni si lo. A pa hian engtikah mah a makpa atan min pawm dawn lo.


New York mafia zingah kei aia insual thiam an awm bik lo a. Chemte leh silai hmanah erawh Luca leh Matteo ka tluk lo deuh chauh a ni. Anni chu khȗm ka tum ngai lo a, ka dinhmunah hian ka lungawi tawk viau.


Mahse Luca-te anga miṭha fa ka ni ve lo a, anni anga penthouse ropui taka khawsa ka ni hek lo. Chutiang thil chu engvang teh hrepa ngaihtuah nge ka nih pawh ka hre hrep love.


Lily hi neih ka tum pawh a ni lo a, engtikah mah ka tum ngai hek lo ang. Chubakah, tunah hian thil pawimawh buaipui tur ka ngah, ngaihtuahna ho mai maia seng hman ka ni lo.


Inchunga inhau thawm ka hriatna lam pan chuan ka chho a, Gianna leh a pa bawk an ni. Luca chuan an lu an inpawh thlawn sak mai loh nan bengdaih a tum mek a nih hmel. Mahse ani pawh chuan tih theih a nei tam lo viau tih erawh an thawm aṭang chuan a hriat theih mai thung.


An lam pana ka kal lai chuan Luca chuan min lo melh rum deuh ul a. Scuderi hi mihring chimawm zet mai a ni a, Luca lah dawhthei hmingthang a ni bik lo. A meng rum ulte pawh chu ka hrethiam viau.


Ka bulah chuan rawn dingin, “Gianna leh kan putara hi an ngawi vat lo a nih chuan ka dawhtheihna hian a tlin lo mai dawn,” a ti nghut a.



“Lily pawh chokaah a ṭap a, a nu damlo enkawlin a inkhung rei tawh bawk nen, boruak thar hip pahin coffee in tura hruai chhuah ka duh a.”


Luca chuan nelawm loh zetin min melh khai khai a. Min melh dan chu ka duh lo kher mai, mahse engmah ka sawi buai duh lo, ka thil tum chu tih ngei ka tum tlat.


“A ṭha a lawm. Mahse eng buaina dang mah neih belh ka duh lo a nia. Chicago leh New York karah hian thil tam tak a awm tih i hriat kha.”


“Lungngai suh, boruak tichhe turin eng thil mah ka ti lo ang.” Inring tawk tak chuan ka ti ve a. Luca chu bu nghut mah se min rin hmel sawt chuang hauh lo.


Scuderi leh a fanu pahnihte indinchilh lai chu enin, “Ka va inrawlh leh vat a ngai. Zanriah ei hmain lo kir hman ang che u. Scuderi putara sawn Liliana-in in a chhuahsan tih a hriat kher a ngai lo.Saw putar sawn a fanute awmdan leh thil tih a ngaihven viau a ni,” a ti leh hmuk a.



Eng danga chhang ta lo chuan inherin Luca leh Scuderi-te pafa buaina chu ka kalsan ta thuai a.


Choka ka luh leh lai chuan Lily chu dawhkan kilin a lo ṭhu a, mahse ka thawm a hriat rualin a lo ding vat. A hmelṭha zeta beiseina lang chhuak chu ka hmuh hmaih phal der lo. Hmelṭha a? Romero, eng thil nge maw i ngaihtuah tak hi le? A bula ka awm lai ngat phei chuan hetiang hi ngaihtuah tur ka ni lo. Mahse, ka thluak a luh miau bawk si. Luca khan a sawi dik, buaina dang kan mamawh belh lo.



“Chuan……..kan chhuak thei dawn ta em?”


Lily chuan beisei nei tih hriat zeta nui sang chungin min zawt ta nge nge a. Amah ep zawng, mahse khawih pha lo tawk vel chiahin ka ding a.


“Aw, mahse zanriah ei hmaa kan haw leh hman a ngai,” ka ti a. Darkar hnih vel hun kan nei tihna a ni. A mitmengah chuan lungawilo hmel ka hmu zawk a, mahse a rei lo.


“A nih chuan kal vat ang,” a ti leh ta zawk a.


Pawn kan chhuah takah chuan Lily chu a ding dat a, van lam hawiin thaw a la leh ham ham a. Niin a hmai vun mam leh no tak a chhun en phet chu hmuhnawm tizetin ka lo en reng a. “A nuam takzet,” tiin a phun sap bawk.


Hei aia nuam hi thil tam tak ka hria. Engvangin nge hetiang thil hi ka ngaihtuah tak fo mai le? Mahse engmah ka sawi lo, ka bula nula ding hi a hmuhnawm lutuk.


A mit vai khap fiah tum tih hriat tak leh zah vanga sen deuh ṭan ṭan chung chuan a khap sak sak a. “Ka tih palh. Hun kan ngah loh tehlul nen, kei lah ka lo ding veng veng sia. Coffee in tura kal kan nih kha,” a ti a.



“Nangmah vanga chhuak kan nia, i duh phawt chuan hetah pawh hian kan awm reng thei a lawm. Min veng thawng suh,” ka ti sam et a.


Pawi ka ti teuh lo. Lily hlim hmel hi nileng pawhin ka thlir peih tih ka hria. A lu chu a thing mat mat a, a sam buang tle siau mai chuan a dar a vaw siau siau a. A sam chu hui kian sakin a rimte chu ka hnim chak takzet. Nilo, Lily hi ka kuah chak a ni. Ani pawhin min kuah let ve anga, a hmui fawh chakawm tak pho ar chungin min melh kiau bawk se……..Hrep tak hian! Eng thil nge maw ka ngaihtuah leh tak hi! Kawngah chuan kan inzui thla zel a.


“Coffee dawr nuam deuh i hria em? Chicago hi kal fo mah ila, coffee dawr kher kher chu ka hre hauh lo.”


“Minute 10 kal vel a niang, chutah chuan coffee dawr lian vaklo mahse nuam deuh mai a awm. Cupcake pawh an siam tui lutuk. Kal paha order siam ṭhin kan nia, mahse a chhungah chuan ṭhutna tur a awm tho, i duh chuan,” a ti a.


Thil tam tak tihpui duh che ka nei a, chung zinga a tam zawk chu saruaka tih chi a nia….Ka ngaihtuahna teivet chu!


“Ka ngainat tlat chhan che hi i hria em? Mi khirh i nih loh bakah, hahdam hmel i pu thei reng a, mi pangngai ang maiin i awm thei zel bawk si. I fel a, i ngilnei bawk si.”


“Lily, mafia mi leh sa ka nih hi. Ka nih loh tawpna hero ang mai chuan min chhuah suh. Mifel leh ngilnei ka ni lo.”


“Ka tan chuan i ni sia lawm.” A lo ti zang vah thung.


A mitmeng pawl riai chuan a rilru a awm ang ang a chhuak mai a ni tih a lantir chiang hle ni mai hian ka hria. Min ring hle a ni tih pawh ka hai lo. Amah vanga ka suangtuahna tenawm tak takte kha min hriatpui lo hlauh chu ka lawm ru hle a, thil tenawm tak tak ti turin ka duh a sin. Ani ang rilru thianghlim lutuk leh mipa la kawp ngailo hi chuan a hrethiam pha hauh lo ang. Chuvang chuan he nula, vantirhkoh ang maia thianghlim leh pawisawilo hi ka hnaih tur a ni lo. A pumruaah chuan hmeichhe puitling ni tawh mah se, hmeichhe naupang sualnain a la tih bawlhhlawh loh ang mai a ni.


Thil dang ngaihtuah tum tak chung chuan ka nui lui sak a, “I lakah hian ṭhat chhuah ka tum mai chauh a nia,” ka ti ta ringawt a.


“I ti ṭha lutuk a nia.” Ka aw ki ang chiah leh min chhaih tih hriat taka min melh zuk zuk pah chuan a ti a.


A lungngai hmel leh beidawng hmel kha chu hmuh tur a awm tawh lo a, chu chu ka tan a tawk lutuk tlat.


CHAPTER - 12


LILIANA :


Romero chu a ṭhen suk a, “Ka lawm e,” a ti ve mai. Fawh thut maite chu ka chak a, a hmelṭhain a sexy lutuk.


“Keipawh ka lawm e,” tih pah chuan kan hma deuha coffee dawr lo lang lam pan chuan kan kal ta zel a.


Kawng tluan mai chuan kut insuih rialin kan kal a, inngaizawngte pawh kan ang viauin ka ring. Ka pa bodyguard patling pui puite nen nilo, tlangval pangngai tak nena chutia khawlaia kan kal dun ta mai chu thil mak tak a ni tawh reng reng. Dawr kan thlen dawnah chuan ka kut a vawnna chu a thlah ta chauh a. Min venhim a tum vang chauha min kai a ni tih hre reng mah ila, thil dang ka lo suangtuah hman. Ka bialpa ni se, hetianga inkai rial hian khawlaiah leng dun ṭhin ila enge a an ang le, a nuam viau a ngem?


Ka ngaihtuahna kawma ka ngawih veng veng vang chuan, “Engkim a ṭha em?” zawi deuh sap hian a ti a. Harh chhuak thut niawm takin ka hmaa dawr nghaktu nula ding chuan min lo en reng tawh tih ka hmu ve chiah.


“Cappucino leh red velvet cupcake ka duh,” ka ti bah niai a. Chu chu nidangah pawh ka ei ṭhin a ni a, vawiin atana an thil siam special an tarchhuahte pawh chu ka en kual hman ta lo.


“Keipawh chutiang chu a ni mai,” tih pahin Romero chuan a wallet phawrhin kan thil order man chu a pe nghal a.


Dawhkan awl kil tura ṭhutna lam kan pan lai chuan, “Min pek kep kher a ngai hleinem,” ka ti a. Romero chuan a mithmul buk lam lek lek, dum hlap mai chu kần ak pahin, “Ka nula chhuahpuiten pawisa an pe ve ngai lo,” a ti hmak a.


“A ni maw?” hriat belh chak fe chuan ka lo ti var thung. Romero chu ṭawng sual hmel a pu deuh a, mahse a sawi zo vek tawh. A thil sawi vang khan zawhna ka zawh belh dawn tih a hria a ni mah na.


“Bialnu engzat nge i neih tawh?” Mimal thil viau mah se ka hre chak tlat.


Romero chu a nui huk a, “Chu chu ka hrilh dawn lo che.”


“Anih chuan i ngah tawh hle a nih chu.” Nui chung chuan ka lo ti let ve thung. Waiter chuan kan thil order chu min rawn pe a, engmah ka sawi zui duh rih lo. Waiter kalsawn hnu chuan ka sawi chhun zawm lehnghal a.


“Nangni ang mipa ho hi chu ka hre ve a lawm. Nula kawp in ngah thei lutuk.”


“Tute pawh i hrechiang viau a ni maw?” Pawisak neih loh hmel deuhin a chair hnung ngheng chuan hahdam hmel takin a ṭhu a.


Ka cappuccino chu ka lem khalh hnuah, “Hmeichhe ho titi ka hre tawh ṭhin a lawm, tu mipa mahin nula an hnawl ngai lo. Mipa tam zawk tan phei chuan hmeichhe tam tak kawp chu dan pangngai a nia lawm.”


“Mipa tam tak chu an ni ngei ang, mahse an vai chuan a ni lo.”


“Chuan, mipa tam tak ang chu i nilo a mi?” Awih hmel chiah lo chung chuan ka ti a. Thu dik ni se ti viau mah ila, ka ring ngam chiah bawk si lo.


Romero chuan a cupcake chu a ei leh te te a, min chhanna tur chu ka hre chak tawh zek zek.


“Ka naupan deuh lai kha chuan ka che nawi ve ṭhin ngei a lawm. Kum 18, 19 vel ka nih lai a ni maithei.”


“Anih tunah? Bialnu i nei em, nge a rem rem kawp chi zawk?” Ka rilrua awm ang chu ka sawi chhuak leh ta vek mai.


Zahzelah ka coffee bawk chu ka lem leh hlak a. Ka coffee no sa var mai chuan min tiharh huaiin ka hria. Ka ngaihtuah ang ang sawi chhuak lo tur chuan inthunun theihnate pawh min siamsak hialin ka hria. Romero chuan mitmeng hriatthiam har tak chuan min en reng a.


“Aih, kum kalta lamah kha chuan bialnu ka nei ṭhin a. Mahse kan hnathawhte avang hian bialnu nghet neih theih pawh a ni lo. Ka mimal nun aiin ka hna hi a pawimawh hmasa zawk tlat. Sipai ka ni a, ka tan chuan familia hi a pawimawh ber. Tu hmeichhia mahin an tuar thei lo.”


“Hetiang nun hi an tawrh theih leh theih loh chu tu hmeihchia mah an zawt ngai lo. Anih leh, inremsiamna avanga inneihna hi engtin nge i chhần dawn?” ka tih chuan Romero chu a ṭhen suk a.


“Ka nupui tur chu midangin min thlan sak tur a nilo.”


“I chhungte pawhin i nupui tur an zawn sak lo che a maw?”


Romero chu a nui leh sak a. Kan inkara dawhkan chu zuan khumin a malchunga va ṭhut mai ka duh.


“Zawn sak e. Italian kan ni a, fate nuna inrawlh turin kan Italian thisen hian min nawr tlat ṭhin. Chutiang chu ka nu leh pate pawh an ni tho.”


“Mahse chung nula ho chu tumah i duh lo tihna em ni?”


“Duhzawngte chu nei ve a. Mahse min duh ve loh bakah ka damchhung hun hmanpui tur chi an ni hlawm lo.”


“Chuan, tuman nupui nei turin an nawrlui lo che a maw?”


“Engtin nge min nawr theih ang?” a tih chuan ka lo bu nghat a. Ni e, engtin nge an nawr luih theih ang…?


“I sawi dik chiah, thutlukna chu nangmah ngeiin i siam tur a nia lawm.”


Romero chuan a no chu dawhkana nghah pahin, “Luca hi chuan engemaw vangin min nawr lui thei ang. Eng thilah mah a thu hi ka hnial dawn lo.”


“Mahse Luca chuan a nawrlui miah lo ang che.”


“Nangpawhin i kawppui tur chu thlang ang che. Tlangval fel tak i tawng anga, i pa pawhin a lo pawmpui hlauh maithei che a sin.”


Tlangval fel leh ka tana ṭha tur chu ka hmaah hian a ṭhu a, ani lah chuan tlangval dang tawng turin min la rầwn zui a ni sia. Kha leh chen kha ka duh tawh a, tunah pawh hian ka la duh reng tih hi a hrethiam lo nge, min duh loh vangin a hrethiam lo der? Ka pa min pawmpui tur tlangval ka duh lo a, ka hmaa tlangval ṭhu hi a ni ka duh chu.


Chumi hnu chuan thil ho te te sawiin kan titi chhunzawm leh a, kan haw a lo hun ta reng mai. Haw lamah chuan kut invuanin kan kal tawh lo a, beiseina awmze neilo insiam ka duh loh vang a ni. Mahse thil awlsam tak zawng a ni hauh lo.


In kan thlena kawngkhar kan luh leh rual chuan, thawpikna leh lungngaihna chuan a ngaite bawkin min bawh leh nghal churh mai.
Romero chuan satliah deuhin ka banah chuan a rawn tawk zauh a, rang fein a khabe ruh nghet charh maite leh a mitmeng thim deuh run, min ngaihtuahna lang chhuak tlat si chu ka melh nghal vat a.


Haw lamah kha chuan a zuna uai tawh lo turin ka intiam ru ve mawlh mawlh kha a nia, mahse tunah chuan sawi chhiat a ni leh vek tawh. He in, lungngaihnaa khatah hian ka tana eng leh hlimna awmchhun a ni tlat. Dingdihlip ak akin a hmuiah chuan dimtein ka fawp ta ringawt a. Mahse a aia nasa ka duh tih min hriattirtu mai a ni. Romero chuan ka ban bulah vuanin min nemsawn a.


“Liliana, ti suh,” a ti hul deuh hak.


Min vawnna chu talchhuakin engmah sawi tawh lo chuan ka kalsan ta daih a. Ka nu khan ka hlimna tur kawng zawh turin min hrilh a, a thurawn ang chuan ka ti ta a nih kha.

Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)