BOUND BY TEMPTATION by Puii Sailo (Completed)

Episode nei ho a hlawm a dahkhawmna
Ngaia
Site Admin
Posts: 25813
Joined: April 30th, 2016, 4:07 pm

Re: BOUND BY TEMPTATION by Puii Sailo (Completed)

Unread post by Ngaia » September 5th, 2021, 1:45 pm

CHAPTER - 13

ROMERO :


Chokaah chuan ka tlan lut thuai a, coffee tak ngek ngawk ka mamawh. Thil engemaw dip darh khawpa pawhsawm tur ka mamawh ni berin ka hria. Ka hmuite chu kha naupang fawhna avang khan a ro deuh halh ni maiin ka hre hial a. Nilo, infawp pawh anih chiah loh kha.


Romero, kha kha infawp i ti theilo ang, a reilo lulai lutuk. Sipai rinawm tak ka nih angin ka ding mawl tawp anih kha. Hrep tak hian a! Coffee chu inthlitin ka thawk khat pawp mai a, dawhkana ka no ruak nghat ri pawh a ring viau mai.


Choka kawngkhar inhawn rual chuan Luca a rawn dak lut nghal a, a hmelah chuan zawhna min zawt hmel ka hmu.


“Hei hi i pa in a nilo tih i hria ang chu tiraw? Kha dawhkan marble man to taka siam kha i tikeh anih chuan kan Scuderi putara hi a lawm hauh lo ang.” A tih lai chuan a kiai pah suk a, a nuih a za tih ka hre mai.


Ka hmaa dawhkan chu bawhin, “Scuderi-a hian choka awmna a hriat pawh ka ring nek lo e. Khawnge a awm reng reng a? Inchhung reh lutuk hi a ngaihṭhat thlak lo zawk a lawm. Gianna nen khan an la inhnial reng ka ring a sin,” ka ti ve ta nge nge a.


Luca hmel chu a thim zual leh ta sawt mai. “Scuderi kha meeting nei turin chhuak hlauh lo se chuan an la inhau reng ang chu.


Keipawh chhuah lawk ka ngai, Dante-a nen Russian ho chungchang sawi dun tur kan nei. Italian restaurant engemaw berah kan kal dawn anih hmel.”


“Anih chuan hmeichhe ho lo veng turin inah ka awm dawn tihna em ni?” ka lo ti hmuk a. Zankhuaa Lily bula awm leh chu ka hreh ru tlat.


Luca chuan min rawn pan hnaiin, “Liliana nena coffee in tura in chhuah khan thil thleng ka hriat ve ngei tur a awm em? Nge, ka hriat duh loh tur thil a ni zawk?” a ti a. Ka lo en ve vat.


“Engmah a thleng lo. Luca, min hriatchian kha, sipai rinawm tak ka nia lawm.”


“Tlangval zahmawh nei i ni bawk. Liliana lah nula itawm tak a ni bawk a. Kum engemaw zat chu a ngaizawng tawh che tih pawh kan hre ve ve. Chu chuan chetsualna rapthlak tak a thlen thei tlat.” Eng danga chhang lo chuan ka thaw chhuak ham ham a.


“Hrep tak hian!” Luca chu a phun zui hluk a.


“Ka fiamthu anih kha. Ka hriat tur a awm anih chuan tunah hian min hrilh nghal rawh.”


“Liliana khan min fawp a, mahse fawp ti a sawi tham pawh a ni chiah lo. Kan hmui a insi hlek chauh a ni mai. Ka namsawn nghal. Engmah hlauhthawn tur a awm lo.”


“A ni maw? Mahse kan hmui a insi hlek chauh i tih laia i hmela inchhirna leh duhkhawplo hmel lo lang kha ka hmuh hmaih ring suh. I duh anih kha.”


“Aw, ka duh a lawm,” ka ti ve ta nge nge.


A thil min zawh dan hi ka ning riau. Luca bulah hi chuan engmah ka thup thei ngai lo. Luca hi nula pakhata lungawi ngailo kha a ni ṭhin a, tunah lah mithianghlim ang maiin min zilh vel a nih hi.


“Duh mah ila hmalak tumna ka nei lo. Ka inthunun thei a lawm. Familia tana pawi tur eng thil mah ka ti ngai lo ang,” ka tih takah chuan Luca chuan ka darah a beng thak thak a.


“Ka hria a lawm, i thluak aiin i kapa i thil neih khan a thunun zawk che anih hlauh pawhin, Liliana hian hun khirh tak a hmachhawn tih hria ang che. A rilru lakpenna chiah a mamawh. A la naupangin tihnat awl tak tur a ni a, a nun i tihchhiat sak duh chu ka ring lo.”


A ṭawngkam chu ka run kher mai. Ka ṭawng chhuak anih chuan ka Capo biak nana mawilo khawp ka sawi dawn tlat. Ka lu chu ka bu ta ringawt a.


Chutih lai chuan Aria pawh chokaah a lo lut ve chiah a, mahse Luca nen min hmuh rual chuan a ding leh chat a.


“Ka rawn tibuai che u em?” tih pah chuan min melh tawh sek a.


“Zanriah tur eirel ṭan tawh ila ka ti deuh a, kan boruak teh nuai vang hian ka pain eisiamtute chawlh a pe a. Keimahni hian rawng kan bawl mai a ngai dawn tihna a nih chu.”


“Pizza order mai ang u,” Luca chuan a lo ti mai a. A nupui chu pan hnaiin a kuah a, a luah chuan a fawp zui vang vang bawk.


Luca tan hian kum tamtak ka thawk tawh a, hetiang reng renga hmangaihna avanga hmeichhia a duat lai hi ka la hmu ngai lo. Aria hi chu a danglam tlat.


“Nichin khan Lily chanchin in lo sawi em ni?” Aria chuan pangngai takin a ti a. Pizza order theihna tur list a enkual pah mek bawk.


Engtin mah ka chhang lo a, Luca erawhin dar chhin ak pahin, “Chu chu tinge min zawh a?” a ti a.


Aria chuan lu a lo thing na na a, “Mitdel ka ni hleinem. Romero nena an chhuah hnu khan Lily awmdan hi a mak riau a. In pahnih chauha in awmdun hi ka duh miah lo a nia,” tiin chiang zet mai chuan min melh zui bawk a.


Luca chuan mak tih vangin mithmul a lo san ak a, keipawh chu ka bang bik lo.


“Khatiang khan min en hau suh, ka ngaina che tih i hria a lawm, Romero. Mahse Lily hian harsatna tamtak a tawng a, i tel ve tawh chuan engmah a ngaihtuah thei lo. Ani lehzel ngaihtuah ngaia a awm tur hi ka duh lo.”


“Tichuan a zahawmna venhim sak i tum ta tihna a ni maw?” Ngeiawm zet chuan ka lo ti a.


“Hey,” Luca chuan a lo ti deuh hrawk a.


“Khatiang khan be hlek suh,” a tih zawm leh a.


Aria chuan lu a lo thing mai a, “A ho lutuk. A zahawmna venhim sak ka tum reng reng lo. A rilru na tur hi ka duh lo, nangpawhin farnu i nei a, a theih ang angin venhim i tum ve dawn lawm ni?” a tih chuan, “Tum ngei ang. Chuan Lily natna thlen tur eng thil mah ka ti lo ang. Mahse i duhthusam chu ka zah sak ang che, tun aṭang chuan Lily hi a falin khawiah mah ka awmpui tawh lo ang,” ka ti leh ta tho a.


Luca lam chu hawiin ka buk khum zauh a, choka ka chhuahsan nghal. Aria thusawi khan ka awm a tinuam chiah lo. Luca hi Aria lakah chuan ramhuai ang maia thikthu chhia a ni a, chuti chung chuan a nupui venghim tur leh a bula awm tur hian min ring tawk em em bawk. Mahse Aria hian a nau bula awm tur chuan min ring zo hauh lo.


Dik tak chuan Aria hi ka boss nupui a nihna ang bakin ka en ngai lo, mitdel chu ka ni hauh lo. Hmeichhe hmelṭha leh mipa hipna ngah tak a ni ngei a lawm, mahse ka mut hmuna ka suangtuah a ni ngai lo. Luca ka hlauh vanga chutiang thil ti ngailo erawh ka ni hauh lo.


Lily ve thung chu a letling hlauh ti ila a dik ber ang. A thawmhnawin a khuhbo a taksate chu ka suangtuah ṭhin a, saruak ngal ngatin bangah nawrbetin, dimna tel hauh loa mipat hmeichhiatna hman pui ka chak ṭhin. Chu chu a buaithlak lai ber a ni bawk. Aria thupek khan kei leh Lily inhnaih lohna tura min daidan theih ngei beisei phawt ang.


LILIANA :


Tu emaw min rawn sawi dat datna avang chuan ka harh zawk a, mahse ka mit ka men chuan a phe deuh ruai mai.


“Lily, harh teh. Ka nu hi…..ka nu hi a thi dawnin ka hria.” Aria chuan mangan hmel zetin a ti a.


Ka ṭhu chhuak nghal zawt a, ka lu lah chu a hai muai muai lehnghal. Aria chhuak tur chu ka hmu hman, midang kaitho turin a kal dawn anih ka ring. Ka nu bulah kan in awm chhawk ṭhin a, a khawhar kan hlauh vangin amah chauhin kan awmtir ngai lo. Zanin hi Aria awmpui hun a ni.


Ka blanket chu thehhlimin, khum aṭang chuan ka zuang tho ve nghal a. Corridor tawp bera ka nu pindan pan tur chuan ka tlanchhuak nghal vat a.


Pindan chhung ka luh hma hauh aṭang chuan ka nu pindan tihfai nana an hman ṭhin damdawi rim chu ka hre thei a, ngaiah ka nei thei ngang lo a ni ber mai.


Gianna pawh a lo awm daih tawh a, ka nu khum tlanga bawkin ngun fein ka nu chu a lo en ran a. Ka nu chu a maimitchhing a, a thi tawh emaw ka ti hman hial. Mahse a thawk zawnga a awm zawitea in sep chu ka hmu thei a, a la thi lo e. Dimtein ka nu khum chu ka hnaih phei a, Gianna chu min hmu awm pawhin a awm lo. A bulah chuan ṭhuin, a darah chuan ka kuah a, sawi mai tur pawh ka hre lo.


CHAPTER - 14


Gianna chu ṭawng chhuak hmasa zawkah ṭangin, “He thil hi ka hua,” a ti sap a.


“Khawiah nge nurse hi?”


“Ka nu hi a hun tawp kan hmanpui theih nan min chhuahsan ta a nih kha. A chhuah hma khan morphine-in a chiu leh a, na hre loin kal se kan duh a.” A tih lai chuan Aria leh Fabi-te pawh an lo lut ve chiah a.


Fabi chu intihpachan a tum hle tih hriat takin a insehruh ṭeuh tih ka hre mai.


Phiangsen hian! Puitlingte pawh a ang ve tawh tak tak. A pumrua pawh a lian tawh, Aria ai pawhin a sang tawh zawk. Corridor-ah chuan Luca a ding a, pindan chhungah chuan a rawn lut ve lo thung. Kawngka a khar takah chuan, kan nufa ho a hun thawl hmang turin min duh tih ka hrethiam ve mai.


Ka nu thaw chu a zawiin, enchian loh phei chuan a thaw ta lo emaw tih mai tur a ni tawh a. A mit lah chu a phu deuh der der a, men a tum nge na a nei ka hre lo a, a hun tawp tak meuh meuh a hmang mek a ni tih erawh hai rual a ni lo.


Fabi chuan a kut chang a var pap thlengin khum tlang chu a hmer ngawt ngawt a. A mittui chu tling ve pam mah se a hmel chu lung ang maia chang a ni thung. A awmdan chu ka hrethiam lutuk, a tuar hle a ni. Mahse mipa a ni a, a tawrhna lantir chu a rem ve lo.
Keipawh chuan ka en reng duh ta bik lo.


Aria chu rawn kal hnaiin, “Enge a an?” a rawn ti sar sar a. Chhan mai dan tur ka hre lo.


Gianna chuan a lo en vat a. “Khawiah nge ka pa hi? Heta awm tur hi a nia sin!”


Ṭawng zawi viau mah se a lungawi lohna chu a thup bo thei chuang lo. Aria nen chuan ka nu chauh chu kan melh ran a, kan ṭawng hi a la hre thei em tih lah kan hre si lo a. A lungngaihna leh tawrhna hi belhchhah sak kan duh lo a ni.


Ka pum chu a na ta tlat, ka luak a chhuak nge inthiar ka ngai tih pawh ka hre lo. Mihringte hi thi vek tur kan ni a, kan khawvelah phei hi chuan thihna hi chhungkua ang maia kan chenpui a ni. Vawi tamtak mitthi vuinaah ka tel ve tawh ṭhin a, mahse ka hmelhriat vak lohte an ni hlawm a. Tawrhna emaw, lungngaihna emaw min thlen ngai lo.


“Ka pa awmna ka hre lo, a pindanah pawh ka va en, a awm lo. A khum pawh mutna hnu a ni lo, a la insiam fel thlap.” Aria chuan a tichhuak halh a, a thaw chhuak zui ham ham bawk.


Gianna nen chuan kan in en vat a. Engmah sawi lo mah ila thil awmzia kan hai lo ve ve. A mihur khawite bulah hun a hmang tihna a ni mai. Nimin aṭang khan ka nu hi a hniam zual em em a, zanin hi a tlaivar zo a ngem tih pawh hriat a ni tawh lo. Zanin tal hi chu inah a awm ve ka lo ring a sin. Ka nu vang tal pawhin, a nupui a nih vang tal pawhin.


Gianna chu a ding chhuak hluai a, Fabi chu melh ram chungin, “Khawiah nge a awm i hria em? Tunlai chu a ṭhian ṭha ber ang maiin i zui chawt a ni lawm ni?” a ti ta mai a. Fabi pawh a inhum ruh lehzual.


“A kalna tur min hrilh lo. Ṭhian ṭha ber pawh kan ni hek lo. Mahse a fapa neihchhun ka nih angin ka mawhphurhna ka hlen mai a ni.”


Gianna thinrim chu a sen deuh ap ap tawh a, bengdaih tumin awmzia a nei dawn lo tih ka hria. Inrawlh pawh ka tum buai peih lo.


“Hrep tak che hian, eng dawt phuahchawp nge i sawi kha? Ka awih theilo zawk hial!”
“Gianna!”


“A tawk. Tun hi inhnial hun a ni lo.” Aria chuan a ti dam thlap a.


Vin lemlo mah se warning a ni tlat. Lo inrawlh vein, “Ka pa awm leh awm loh hian awmzia a nei lo. A fate a bulah kan awm a, keini hi atana pawimawh ber kan ni. Ka pa hi atan engmah a ni lo,” ka lo ti vat a.


Chumi hnu chuan ka pa hming kan lam nawn leh tawh lo. Ka nu pawh chu ṭhat lam emaw hniam lam emaw pan chuang lo chuan rei tak a awm a. Mut chhuak chuan min rawn zem leh ta chiai chiai mai. Maimitchhin leh ka tum lai chuan ka nu chu ka melh leh zawk a, a thawk dan a diklo tlat.


Ṭhut ngil zawt pahin ka nu chu ka hnaih phei nghal ruak a, “Ka nu?” ka ko zui sap.


Aria chuan ka nu kut lehlam chu a lo vawn sak ran tawh a. Gianna erawh chu a ṭhut ngai rengin a lo la ṭhu thung. A ke chu hlangin a khupah chuan a khabe a nghat fel thak a. Fabi ve thung chu ka nu khumbawhin a muthlu thung. Fabi chu banin ka sawi harh a, a ṭhu ngil rang kher mai.


Ka nu mit vun chu men tum niawm takin a phu der der a, thawk pawh ka thaw ngam tawh lo. Rawn meng lehin vawikhat chauh tal min rawn en leh se ka duh lutuk chu ka lo ṭang ṭeuh ni maiin ka hria. A thaw erawh a zawi tial tial thung. Chutiang chuan engtia rei nge a awm pawh ka hre lo, a mit chauh chu ka melh ngar ngar a. Mahse a thaw zawi tial tial chu hai theih a ni lo, a awm pawh chu a che mang tawh lo. Ngawi reng chuan kan en ṭhap ringawt a. A thaw a tawp ta, a awm insep pawh hmuh tur a awm ta lo.


Fabi chu engmah sawi loin a tlanchhuak a, nurse a ko dawn anih ka ring. Mahse hrilhfiah ngai loin ka nu hi a kal tawh tih kan hre vek.
Nurse chu lo lutin ka nu chu a rawn endik that that a. Lungngaih hmel zeta min melh kual pahin a bu nghat a, a chhuak leh daih a.
Ka nu kut ka vawn lai chu thlahin ka tawlh hnung hrat a. Aria erawh chuan ka nu kut chu a la chelh reng thung. Ka nu hnuk chah chhung kha second khat bak a nilo ang, nunna hi a lo reilo em a ni. Engtik lai pawha kal mai thei vek kan lo ni. Ka nu khan hlim turin min duh a, mahse kan khawvelah hian awlsam takin a hlim theih si loh.


Aria chu ka nu khum tlanga bawkin a insut hlap hlap a, a ri chuan a ṭap bik lo. Fabi chu khum mawng lamah ngawi rengin a ding a, a hmelah engmah a lang lo. Gianna chu Aria bulah dingin a darah a vawn sak a, tunah chuan ka nu khum pawh a hnaih ve ta. Ka nu hmel chu a en reng a, ka hrethiam lutuk tlat.


Gianna leh ka nu hi nufa inngaina tak an ni ngai lo. Khatia a tlanbo tak hnu phei kha chuan biak pawh an inbe ngai tawh meuh lo. Ka pa thu chhuak chu ka nuin a zawm a ngai a, chu chu Gianna hian ka nu dem phah nan a hmang ta a ni. Gianna pawh hi ka pa ang chiah a luhlul a ni tlat a, awlsam taka a rilru sawhsawn mai thei chi a ni lo.


Pindan chu chhuahsanin corridor-ah chuan ngawi rengin ka kal mawp mawp a. Tlan chhuah a, khawvel tawp thlenga tlan mai ka duh. Ka bengte chu a chhet mup a, ka mitte pawh chu a thip hlur ringawt. Mahse mihring taksa ruangam lian leh nghet zet ka sut takah chuan ka ding chawt a, Romero a ni.


Ka darah chuan min vuan vat lo se chuan ka tlu thei hial ang. Thaw ka la kawk a, manganna chuan min tuam pup pup ni maiin ka hria.


“Hruai chhuak rawh,” titu chu Luca a ni. Ani pawh chu ka hmu miah lo.


“Aria thupek kha.”


“Chulam ka ngaihtuah lo,” Luca chuan a ti leh hmuk a.


Romero chuan ka hnungah kuahin inhnuai lamah chuan min hruai thla a. Kei lah boruak ṭha hip tumin ka thaw kawk kawk a, ka kete pawh chu a khur dar dar mai.


“Hey, hetah hian ṭhu phawt teh.” Romero chuan a ti dam thlap a. “Thaw la phawt teh, engkim a ṭha leh vek dawn a nia.”


Romero aw dam thlap chuan thim chhah mup, min dawlh tuma min hual tup tuptu lak aṭang chuan min phih chhuak riai riai ni maiin ka hria.


“A thi, a thi tawh.” Aw khur dar dar chuan ka ti chhuak thei hram.


Ka hnunga chul heuh heuh pah chuan, “Pawi ka ti khawp mai,” a ti dam leh thlup a. Ka mittui tla tur khap leh sak sak pah chuan ka bu nghat a.


“Ka pa a awm lo, khawnge a awm pawh ka hre lo. A hun tawp hmanpui tur chuan a awm ve tur a nia sin!” Ka lungngaihna chu thinrimnain a rawn thlak a, mahse ka zia sawtin ka hria.


“Ni e, awm ve ngei tur a ni. Mahse thil pawimawh a awm anga, Dante-an a ko pawh a ni maithei a sin.” A tih lai chuan ka lo melh hrawk a.


“Chutiang thil chu Dante-an a ti miah lo ang. Zanlai anih bakah ka nu dinhmun hi a hre ve reng a lawm. Nilo, ka pa hi ka nu bulah a awm duh lo, a thih laia awm a duh lo a ni mai. A nat zual hnu phei kha chuan tlawh pawh a tlawh ngai lo. Ramhuai ang maia tenawm leh mahni hmasial a ni. A mihur khawite bulah hun a hmang tih hriat reng reng.”


Romero chu a ṭhen sak a. “A chang chuan puitling i ni tawh a, thil engkim i hrethiam vek tawh tih ka theihnghilh ṭhin.”


“Theihnghilh tawh lo la a ṭhat dawn chu. I beisei aia thui ka hre mai thei a nia.”


“Ka ring chiah lo,” a ti sup a. Ngawi rengin kan inmelh tawp. Chutia titi dang kan sawi takah chuan keipawh ka thawveng huaiin ka hria.


“Ka lawm e,” ka ti leh hnuhnawh a. Romero chuan ka hnunga a kut a dah chu a lasawn a, lasawn lo se ka duh a sin, min thlamuan tlat. Min khawihna hian engtin emaw tak min tidanglam tlat ṭhin.



Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » September 5th, 2021, 1:45 pm

CHAPTER - 15


Ka hmaah chuan dingin ka vawn turin a kut chu a rawn phar chhuak a, ka lo vawn sak rual chuan min pawt tho vat. Inchung lamah bawk chuan min hruai chho leh a, ka nu pindan kawngkhar chu rawn inhawngin Aria a rawn pen chhuak a. Romero nen min hmuh rual chuan a ding chat a. Ka kut a vawnna pawh chu Romero chuan a thlah nghal a. Aria chuan min en chik dun kher mai.



Romero chuan min nuih sak a, Aria lam chu panin ka nu thihna avanga a tawrhpuinate chu a hrilh a, Aria chu a bu nghat a, mahse min la en reng tho. A ṭahna avang chuan a mitte chu a sen bui lak bawk. A dinna lam chu pan hnaiin ka kuah thlawp a. Romero chu kalsawn tum tih hriat takin a tawlh hnung hret a, a kal liam hma chuan rawn hawi letin min rawn en leh hram. Ka kawchhung chu a ruak hulh a, vawt ta sung sung ni maiin ka inhre hial.



He in hian min tithawipik a, a chhungah hian nunna reng reng a awm tawh lo pawh ti ila ka sawi suak kher lo ang.
Romero chu ka hmuh phak lohah a kal liam ta, umzui maite chu ka duh rum rum, mahse tunah chuan ka unaute hian min mamawh tlat. Kan hnunglama pen ri vang chuan ka inher vat a, Luca a lo ni. A phone a benga a chuktuah lai chu a la thla a.



“Phone a chhang thei lo em ni.. message i thawn em?” Aria chuan min kuahna aṭanga inlakhran pahin a ti a, a pasal dinna lam chu a pan nghal vat.



Luca chu a ṭhen sak a, “Aw, vawihnih message ka thawn tawh, mahse min la chhang lo. A phone pawh a la thei chuang lo, a lo haw vat pawh ka ring chiang lo.”



Ka nu pindanah bawk chuan ka lut leh ta a. Hreh viau mah ila Aria hi a pasal bula hun hman a mamawh ve bawk si. Ka awm ve reng chuan ka tibuai mai mai ang. Kawngka ka khar phui dawnah chuan Luca chuan ka u biangah chuan duat tih hriat takin a lo dawm sak a, a mitah a lo fawh sak mek bawk.



Ka thil hmuh chu hmangaihna leh inpumpekna a ni tih ka hai lo. Aria hi boral ve dawn ta se, Luca hian khawiah mah a kalsan hauh lo ang tih ka hrechiang. Mipa fel leh ṭha ti a sawi tur chu a ni hauh lo, mahse pasal ṭha tak chu a ni chiang a lawm. Ka u anga hmeichhe vannei hi ni ve hlauh ila ka ti hle mai. Ka nu anga min hmangaih miah lotu pasal neih chu ka thei dawn lo, ka nihphung leh mize bo vek khawpin tumah ka nei thei lo ang. Romero hi chu chutiang mi chu a ni ve miah lo ang. Mahse ka pa hian ka pasal atan a pawm dawn hauh lo thung.



Gianna chu a ṭhutna ngai chair-ah chuan a lo ṭhu leh tawh a. Zawite tein phone-ah tuemaw a lo be mek bawk. Matteo anih ka ring. Gianna pawhin a hmangaih a nei a, an vannei takzet.



Pindan chhungah chuan Fabi a awm miah lo. Mahse Gianna phone hmang lai chu tihbuai ka duh loh vangin engmah zawt ta lo chuan ka nau zawng tur chuan ka chhuak leh ta zawk a.



Fabi chu a pindanah ka va hmu a, chair-ah lo ṭhuin, a chemte tamtak zinga a duh ber ṭhin chu a lo hru fai hliau hliau mai. Hru fai lo pawh ni se a tle sar reng tho sia.



“Titi dun i duh em?” Min rawn en lo mah se a hmui a pet fan fan chu ka hmu thei. Min chhan mai loh avang chuan ka nghak vang vang a, mahse min chhan tum hmel pawh a la pu ta chuang lo.



“A ṭha e. Min mamawhna i neih chuan ka pindanah ka awm dawn a nia,” tih pahin ka chhuak ta nghal a.



Pawna Romero lo ding reng chu ka hmu a, “Ka lo be ve chhin dawn em ni? Chhungkaw mi leh sa nilo bulah awm se a zia zawk maithei a sin,” a lo ti sup a.



“Mipa a biak duh i ring a ni maw?” ka lo ti fak thung. Mahse ka lungawi lohna chu ka thunun leh vat a.



“Aw le, i sawi dik maithei. Mi hrang biak chu atan pawh a nuam zawk ang.”



Romero hmelah chuan sawi duh nei a la ang viau a, mahse engmah sawi ta lo chuan min kal pelin ka nau ṭhutna lam chu a pan ta daih a.



“I chemte lak khawm ho chu ka lo hrukfai pui ve dawn che em ni?” Romeo aw a hriat rual chuan Fabi chu hmai dang lầp chungin a lo dak chhuak thuai a.



A hmaa ding chu a ngaisang hle tih hai rual a ni lo. Engmah sawi loin chemte hrukfaina tur puan chu Romero a pe a. Romero chu dawhkanah chuan ṭhuin, ama chemte pai lai chu a pai aṭangin a phawi a.



Fabi chuan phur tih hriat zetin a lo en reng a, a mitmeng pawh a de sar mai. Chu chemte chu a seiin, en mai pawh chuan a hlauhawm hmel hliah hliah. Fabi chu a ṭhutna aṭanga ding chhuakin, chemte en reng chung chuan “Wow” a ti halh a. Mipa naupang a thil duhzawng tak hmu hi a ang ber.



“I chemtete hi chu an fai sa viauin ka hria, ka chemte hi hrufai hmasa ila a ṭhat ka ring a.”



“Min intih theih khum i tum vang anih kha. Mahse i chemte hi a nalh takzet. Kha khan mi nunna engzat nge i lak tawh?”



An thusawi chu ka ngaihthla zui duh tawh lo, rang tawkin kawngka chu ka khar nghal daih. Zanina thihna kan tawh mek hi a tawk, thihna dang ka hre duh tawh lo. Romero hian tual vawi engzat nge a thah tawh ka hre duh lo.



Ka nu ruang awmna pindan chu ka en reng a, lut ta lo chuan ka pindan lam ka pan ta zawk a. Aria chuan Luca a nei a, Gianna pawhin Matteo a nei a, Fabi pawh Romero bulah a awm bawk. Mahse kei chuan mal takin ka hmachhawn a ngai. Mal leh khawhar hi ka tan thil thar a nilo a, ka nu dam loh hnu aṭang khan ka nuna thil bet tlat a ni.



ROMERO :


Liliana bulah awm ka duh a, a lusunnate pawh hnem theih ka duh. Mahse Aria thusawi kha ka zah a, palzam mai mai ka duh bik lo. Ani pawh lusun mek a ni a, a nau a ngaihtuahna avanga a rilru hahna belhchhah sak chu ka duh bik lo.



Inthunun tum takin Fabiano bulah ka awm ta zawk a, a tuina ber ka chemte chu phawiin, a hman dante chu ka hrilh ta zawk a. A rilru lakpenna ṭha tak a ni bawk. Mahse ani bula awm hi ka chak lo a, min mamawhtu lah a ni hek lo. Phiangsen hian a! Min mamawhtu maw? Nilo, hetiang zawnga ka ngaihtuah vaih chuan ka inthunun thei lo mai dawn. Lily enkawl leh ngaihsak chu ka mawhphurhna a ni lo. Kei hi hmeichhe pakhat vang mai maiin buainaah ka inhnuklut tur a ni lo.



Ka chemte pai lai chu phelhin Fabi chu ka hawh tir a, chemte phawi leh thun dante chu ka zirtir a. Amah ang rual ka nih laia insual leh hriamhrei hman dan thiam ka chak ṭhin ziate chu ka ngaihtuah let a, lunglen thlak dawn dawnin ka hria. Fabi koah hian mawhphurhna lian tak a tla a, thil hoteah chesual thei anih vangin sawiselboa engkim thiam a nih a ngai. A kawng ala thui dawn khawp mai.



“Luca hmu tura ka kal a ngai,” ka tih chuan Fabi pawh chu a lo bu ve nghat a.



A ṭhutna ngaiah bawk chuan ṭhu thla lehin, puan chu lain a chemte ngai bawk chu a hru leh a. Zanin chauh ni lo, engemaw chen chu hetiang hian a awm ka ring.



Fabi pindan aṭang chuan chhuakin Liliana pindan zawnah chuan thawm ngaithlain ka ding dat a. A ṭap ri hriat ka duh, tichuan amah hnem turin ka lut thei ang. A tan pasalṭha leh fel ka ni mai dawn a ni. Mahse eng thawm mah hriat tur a awm loh takah chuan ka kalsawn veleh ta hram a.



CHAPTER - 16


LILIANA :


A tuk zingah chuan darthlalangah ka hmel chu ka en a, nunna neilo ang maia dầng ka ni ber tawh. Aria leh Gianna-te nen chuan kawr dum vek kan ha a, pheikhawk pawh a dum flat tawp kan bun. Kan sam chu felfai takin kan tukhumah kan zial tawm a, make up engmah ka inhnawih lo. Ka mut ṭhat loh vanga ka mit hnuai val kalh leh ka hmai dầng var lapte chu a hlauhawm thei lek lek.



Ka pa chuan ka nu vuina hun chu ropui takin a buatsaih sak a. Mi zawng zawng beisei angin pasal, nupui sun leh lungngai hmelte chu a pu ve a, lemchan thiam tak a ni. Ka nuin a mamawh ngawih ngawih lai khan a bula awm tur a nia sin. Ani ang sakawlh pawh hian a nupui kha chu a lainat ve tur a ni.



Mitthi vuina hi kan khawvelah chuan thil ropui tak a ni a, ka pa nihna avangin ka nu thihna phei chu inhmuhkhawmna ropui tham tak a ni deuh ber mai. Mi tamtakin ka nu chu an thlah liam a, an mittui lem tak takte pawh an tih tlak ve hlawm kha. Ka mittui erawh a hul hlauh thung. Ka nu ruang chunga ṭap turin min beisei tih ka hria, ka ṭah theih loh bakah ṭah ka tum lo hrim hrim. Heng mittui lem luantir ho hmaah hian ṭah ka tum lo a ni tawp mai.



Ka nu kha ngai leh ngaihsak ang takin lem an chang a, mahse a dam loh chhung khan tuman an rawn tlawh ngai hek lo. A thih hma daih khan heng mitenawm ho tan hi chuan mitthi a ni daih tawh. Nu zahawm tak a ni ṭhin a, mahse tuman an zah tak tak si lo. Ka ngaihtuahna avang chuan ka damlo thei mai dawnin ka hria.



Ka pa chuan Fabi nen chuan min kuahin ka nu kuang lam chu min panpui a. Ka dara min tawhna avang chuan ka inhum ruh nghal ṭeuh a. A kut paih thla lo tur leh chulai hmun aṭanga tlan chhuak lo tur chuan ka inthunun nasa hle.



Puithiam chuan ṭawngṭaina hmangin engemaw a chham mawlh mawlh a, engmah ka ngaithla lo thung. Chutih lai chuan kuang pawh chu thlan khurah chuan an thlak riai riai a, ka hawi chhuah rual chuan Romero min lo en reng lai chu ka hmu ve chiah. Luca leh Matteo-te chu thlan koah chuan an ding ve a, Romero erawh chu sipai satliah mai a nih vangin a ding hla deuh a. Romero hian min hel hram hram tih ka hai lo a, ka awm lohna lam apiangah awm a tum ni maiin ka hria. Ka bul hnaia awm a duh lo a, ṭawngkaa min hrilh hreh siin thil tihin a lantir tih a chiang reng.



Tute mai pawh chuan kei leh ka unaute chu min ngaihtuahin, min lainat hmel em em a, an lemchanna hi ka hne. Romero pawh hian thudik chu min hrilh mai se ka ti, ka tuar thei em em ang. Hetianga min hel hi ka ngaithei lo.



Ka pa chuan Fabi nen chuan min la kuah ta reng a, ka nu thlan chu kalsanin midangte lamah chuan min kuah phei a. A kut pawh a lasawn ve ta, kei ka lo thaw huai thung. Tunah chuan ka pa bulah ka awm reng a ngai tawh lo a, mi mit pawh ka chungah a fu ṭhup tawh lo ang chu.



Midangte pawh chu ka nu mangṭha turin thlan khur chu an rawn hnaih ve bawk a, chu chu remchanga lain ka kalsawn ta daih a. Tuman min dang lo a, min min ngaihven hmel pu lah an awm hek lo. An lemchan khawvelah chuan an buai lutuk tlat. Inherin ka nu thlan hlat zawng chuan ka kal zel a, khawi lam nge ka pan dawn erawh ka hre lo. Ka hma kawng awm chu ka zawh ve tawp mai a ni.



Thlanmual lian tak a ni a, khawiah emaw hahdam tak leh mahni chauha awm theihna hmun tur chu a awm em em ang. Mahse ka kalna lam chu a dik lo, ka nu an phumna hmun ai maha thlan lung leh thlan in tamna zawkah chuan ka chhuak ta daih mai. Chung thlan in gate-te lah chu a inkalh vek bawk si, mahse gate pakhat chu tlemin a kau deuh. Chulam pan chuan ka tlan ta vat a, min hmutu an awm leh awm loh hre turin ka hawikual leh zak zak a. Ka him nia ka hriat hnu chuan rang takin ka lut ta vat. A chhung chu a vawtin eng rim emaw a nam deuh chek bawk. A chhung chu marble vut buak rawng veka siam a ni a, mit a tihahdam phian mai. Bang vawt thlar mai ngheng chuan ka ṭhu hnawk a, ka thaw chhuak ham ham a.



Hetiang dinhmuna ka din tak hnu hian Gianna tlanbo chhan pawh kha ka hrethiam viau tawh. Tun ang tluk hian he nun leh khawvel hi tlanchhuah san ka la chak ngai lo a, mahse ka tan kawng a awm lo tih ka hria. Chuvang chuan ka tih theih chhun, hun reilote atan tal tlansan ka ngai. Reiloteah tuemaw chuan ka awm lo tih a hre dawn a, min rawn zawng har lo tawp ang. Mahse a pawi lo, duh leh ka pa chu thinrim mai mai rawh se.



Darkar khat em pawh a liam hmain ka hminga min ko ri ka hre ta mai reng a. Chhan mai tumin ka ang hman zuau a, mahse ka hmui ka chip leh daih. Bang ngheng bawk chuan ka ṭhu leh vang vang a, bar kar aṭang chuan pawnlam chu ka bih dek dek a. Chutia min zawng buai chu nuam ka ti tlat a, ka nui zui sak bawk. Gate-ah dingin vanlam hawiin thaw ka la leh te te a, boruak vawt var chuan min tiharh sawng sawng mai.



Pawnlamah chuan mipa taksa ruangam lian zet mai a rawn lang a, a hmel hmu lo mah ila tunge a nih ka hre chiang lutuk. Romero a ni. Ani chuan min la rawn hmu ve lo thung. A mit chuan hmuh hmaih neih hlau tih hriat takin a hawi kual ruai a. Midangte chuan ka bihrukna hmun chu an kal pel tawh a, Romero pawh kalsawn turin a inher ve mek. Helai hmunah hian ka lungngaihnate, ka lusunnate leh ka vanduainate lakah chuan ka biru reng thei a lawm, mahse nilo, engin emaw min mawlh tlat.



A chhan hre lo mah ila, Romero hian min zawng hmu se ka duh. Ani hi chuan mittui lem a ti tla ve lo a, chhungkaw zinga mi a ni hek lo. A bulah hi chuan ka him a ni. Ka aw chu zawitein ka thian a, mahse Romero ang mipa diktak leh beng fing lutuk hian a hriat hmaih thiang lo.



Hnunglam hawi chuan a rawn inher vat a, min hmu ta. Ka awmna lam a rawn pan nghal a, gate chu hawngin a rawn kun lut duk duk mai. A din ngil chuan a chung a tawng dawn tlat. A kut chu ka vawn theih turin a phar chhuak a, a hmel chu ka lo en reng thung. A mitmengah chuan min lainatna leh min ngaihtuahna ka hmu thei. Min ngaihsak ve tak takte pawh a ang a lawm. Hetiang hmel a put chuan ka bul hnaiah pawh awm duh loin min hel hram hram ṭhin kha a ni sia. A kut chu ka lo vuan ve mai bawk. Ka inrin hma chuan min pawt thut a, a awm ngheng dawt khawpin ka hnaih chilh ruak mai. Inla hrang tur ka ni tih ka hria, mahse a ban tha chak takin min kuahna chu nuam ka ti tlat. Ani pawh hi min namsawm tur a nia lawm, mahse tumah mah kan che lo. Ka hnaih taka a awm hian nuam ka ti a, a taksa lumna min ur ham hamtu hian min hip bet tlat.



Tun hnai deuh aṭang khan keimahah hian danglam a awm a, mahse chu chu enge a nih ka hre lo. Ka nu natna vanga ka lungngaiha emaw ka tih kha a ni miah lo tih chiah ka hria. Romero chu muangchanga inla hrangin pawnlamah chuan min kai chhuak a, amah si chetin min kai bet tlat.



“Darkar khat dawn kan zawng tawh che a sin,” a ti thum dut a.



Min ngaihtuah tak takte pawh a ang ve deuh. Mahse ka ngaihtuahna luahtu chu a hmui sexy lutuk leh a rim pa zet maite chu an ni. Min fawp ta se enge a an ang le?



“I him tih hi i pain a hriat hunah chuan a lawm khawp ang.”



Ka pa…. Ka nu chunga a thil tih vang khan ka thin a rim thar leh tlat. Thinrim hi ka ning a, ka thinrim vanga engmah ka ti thei lo hi ka haw lehzual. Romero ding dat chu remchangah lain dingdihlipin a hmuiah chuan ka fawp leh ta. Tun hi hetianga vawithum ka fawhna a ni tawh, kei hi hma ka sawn thei ngang lo a nih hi. Ka sim thei lo, min duh loin min hnar pawh nise pawi tihna ka nei hek lo. Ka thinlung hi a ruak a, eng thil mahin min tihnat belh thei tawh dawn chuang lo.



Romero chuan ka darah a rawn dawm a, min nemsawn dawn emaw ka tih laiin a kut chu a tiche zui miah lo. A kut lum ham ham leh chak tih hriat takin a tawhna chu ka hre chiang viau mai. Min fawp let lo a, kan hmui chu a insi a ni ringawt. Chu pawh chu reilote chhung chauh a ni. Ka biang rawn lum thla pap chu ka hre thei a, ka hmui a thlen chuan a al deuh pap mai. Ka first kiss tuina hi mittui al pap chauh a ni ang tih ka ring ngai lo. Din pangngaia ding ṭhain ka meng ve ta chauh a. Ka chau lutuk, lungngaiin ka thinrim bawk a, ka chetdan vanga zah pawh ka tum buai peih lo.



Romero chuan ngun fein min chhuk en run a, a mitmu rawng uk khak chu a inhmeh takzet.

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » September 5th, 2021, 1:45 pm

CHAPTER - 17


“Lily,” a tih takah chuan ka ṭap chhuak ta hawk a, ka insum thei tawh lo. Romero awmah chuan beiin ka inhnit zui ta hlawp hlawp a.


Min khap pawh a tum bik lo. Ka luah chuan dimtea dawmin min ṭah tir tawp mai. Romero ầng chhung thlamuanawm takah chuan ka lungngaihna zawng zawng ka leihbua a, sumkar nei lek loin ka inbunruak a ni ber mai.


Ani hi chuan a hrethiam ve kher lo ang. A tan chuan atthlak pawh a ni maithei. Mahse Romero bulah hian him tlata inhriatna ka nei a, eng thil pawh thleng se min venghim thei dawn tih ka hria. Theihnghilh ka tum tawh ṭhin a, a tello a nun bul ṭan pawh ka tum nasa ve tawh. Midang duh ka tum nasat poh leh ka hlawhchham zia ka hrechiang tawh hle bawk.


“Kan kal a ngai. I pain a ngaihtuah lutuk tawh ang che.”


“Min ngaihtuah tak tak lo. Ka thil tih vanga a hmingchhiatna tur chiah a ngaihtuah,” ka lo ti vat.


Inla hrangin ka hmai chu ka tuaifai thuak thuak a. Romero pawhin ka mittuiin a tihhuh ka samte chu a lo hui kiang ve bawk a. Inhnaih taka ding kan la ni a, ka chakna zawng zawng sawm khawmin ka inla hrang thei ta hram. Mahse ka chetdan avang khan ka zak thar leh thut a, Romero bawk chu ka din hnaih leh talh talh a. A ngaihtuahna ka hre thei lote chu ka lawm zawk, min ngaihdan tur hi hriat ka duh lo.


Chutih lai chuan Romero phone chu a ri a, inthiamlo hmel pu lek lekin a nui sak a, phone chu a chhang zui nghal.


“Aw, ka kutah a awm e. Kan lo thleng vat ang.”


Putar, thlan pakhat bula ding chu ka en reng a, a tiang hawl lai chu bawh titihin a ding a. Engemaw sawiin a phun sep sep bawk. A nupui boral tawh chu a bia a nih ka ring a, a telloa a hun hman dante hrilhin an awm dun leh hun tur a nghahhlelh ziate a sawi a ni mai thei.


Ka pa ve hi chuan hetiang thil hi a ti ve ngai hauh lo ang. Ka nu thi pawh hi a thawven phah huai mai thei a sin. Chutia ngaihtuahna kawm chunga ka hawi rauh rauh lai chuan Romero chuan ka darah a rawn khawih a, ka lo phu deuh zawk.


“Kal turin i inpeih tawh em?”


Inpeih a? Teuhlo mai. Ka pa leh khang milem ho kha hmuh chakna ka nei hlawl lo. Min lainat awm taka an ṭawngkam ṭha lem tak takte kha ka ngaihthla peih lo.


Mahse ka ngaihtuahna chu sawi chhuak loin, “Aw,” tiin ka chhang a.


Ka nu thlan lam pana kan kal lai chuan tumah mahin kan infawh chungchang kha kan sawi chhuak lo a. Romero khan min hnar lo a, mahse ka lusun rilru na min lainat vanga engmah ti lo pawh a ni mai thei. Luca leh Aria chauh chuan min lo nghak tawh a. Aria chu min hmuh rualin a rawn tlan vat a, min kuah nghal thlawp.


“I ṭha em?” min ngaihtuah tih hriat taka a tih lai chuan ka inthiam lo takzet.


Ani pawhin nu a chan ve tho a, a lungngai ve lutuk. Tunah lah rilru hahna tur ka pek belh leh ta si.


“Aw, ka ṭha. Mahni chauha awm ka duh vang a nia.”


Aria chuan a hrethiam tih lantir nan a lo bu nghat nghat a. “Ka pa leh midangte chu in lamah an kir leh tawh a, keini pawh kal tawh ang u. Anih loh chuan ka pa kan chhaih kawlh zual mai mai ang.” A tih chuan ka lo bu ve nghat a.


Aria chuan Romero chu a melh zauh a, a awmzia hre chiah lo mah ila ngaihṭhat lohna ka nei. Ka darah kuahin car dahna lam pan chuan min kalpui a. Luca leh Romero-te pawh chuan min rawn zui ve nghal. Ka nu thlan chu ka melh zui duh tawh lo, anih loh chuan ka kehchhe leh thei mai dawn.


Car seat hnunga kan ṭhut luh hnu chuan, “Romero i melh dan kha enge a awmzia?” tiin ka zawt ta nge nge a. Aria chuan hriatthiam loh hmel takin min en a, mahse min hmin hauh lo thung.


Ka u hi ka hrechiang mah mah a ni. A hma ang em em khan inhnaih tawh lo mah ila, a la danglam teh chiam lo. Aria chu a thaw hak a, “Hnaih lo tur chein ka hrilh.”


“Eng thil maw i tih?” thaw ka la zui kawk.


Luca chu a rawn hawi zauh a, mahse engmah a sawi lem lo. Keipawh chuan ka aw ki ka tihniam lehzual a. Romero phei chu kan thusawi hria awm pawhin a awm lo.


“Engvangin nge chutiang chuan i tih?” tiin ka zawt leh sar sar a.


“Lily, i nat ka hlauh vang a ni. Romero hian a pui thei chein, i lungngaihna hi a hnem thei dawn che emaw i ti a, mahse a ni lo. I natna belhchhahtu tur mai a ni. I duh emaw i tih pawh hi a dik lo, i khawhar vang mai mai anih kha.”


Mak tizetin ka u chu ka melh kawk a. “Mi ầ ka ni lo, ka chunga thil thleng mek hi keiman ka hrechiang ber.”


Aria chuan ka kut a rawn chelh vat a. “Khawngaihin thinrim suh, Lily. Venhim che ka duh vang a ni.”


An vai mai hian min venhim an duh a, eng thil lakah nge min venhim an tum? Hringnun lakah hian maw????


Ni hnih hnuah chuan Aria, Luca, Gianna leh Matteo-te bakah Romero chu New York lam panin an kir leh ta a. Engtikah nge kan inhmuh leh ang pawh ka hre hek lo. Aria chuan ka pa bulah New York-a nipui hmang turin min dilsak chiam a, mahse Gianna melh ngur chungin a phalloh thu a sawi hmiah. Inti huaisen luiin ka ṭhiante nen kan buai dan tur leh Fabi ka ngaihtuah vanga zin hman lo angin ka lo insawi ve bawk.


Romero chuan min mangṭha nan kuah pawh min kuah lo a, a hranga inbiakna hun lah kan nei tawh hek lo. Ka fawh chhan leh min hnial loh chhan kha ka zawt thei ta lo chu a ṭha zawk pawh a ni mahna.


Tlai lamah Aria chuan min rawn bia a, enge ka an a hre duh a ni ber. Ka ṭha hauh lo, mahse chu chu hrilh kher ka tum lo. Ka lungngaihnate chu haiderin engkim ṭha leh mai tur ang chuan ka awm lui ve tlat.


Ka ṭhiante chu chhungkaw thilah leh chawlh hmangin an buai vek hlawm a. Kei chu he in lianpuiah hian khawhar takin kan awmpuite nen chauh ka awm leh ta. Ka bodyguard-te chu ka hnaih berte an ni mai.


Ka pa leh Fabi-te chu inah an awm ngai meuh lo a, an awm ve chhunah pawh thuruk ka hriat ve loh tur thil sawiin an inkhung bo daih ṭhin. An awm vena chuan ka khawhar a tizual ting a ni mai. Ka bula awmte chuan mal ngawih ngawihin min siam ta zawk a ni.


Ka hun tam zawk chu ka nu thihna khum bulah chuan ṭhuin, ka ngaihtuahna ka kawm ṭhin a. A thih hma lawka a thusawi leh, ka hlimna tur kawng zawh tura min intiam tirte kha ka ngaihtuah let fo ṭhin.


Ka pa hian college kal emaw, New York-a zin pawh min phal sak lo a, ka ṭhiante nena party phei chu dil enah pawh ka en tawh ngai lo. Ka tih theih awmchhun chu thil engemaw lo thleng tur nghah a ni deuh tawp. Chu lah chu enge a nih ka hre der si lo.


Ka nu kha boral lo se chuan ka pa hian pasal tur min zawn sak tawh anga, pasal nei mai tur ka ni ve reng tawh ngei ang. Beisei leh hma thlir ka nei lo lutuk chu chutiang thilte chu thleng mai se ka ti rum rum ṭhin.


CHAPTER - 18


ROMERO :
Aria phone rik lai chuan Luca leh Matteo-te nen card kan khel a. Aria leh Gianna-te pawh wine in pahin sofa-ah ṭhuin an nui dun ar ar mai. Aria ṭawng danah chuan thil diklo a awm tih ka hre mai a, Luca pawhin a card ken lai chu dawhkanah a dah thla ve chiah.


“Tinge a hmain min hrilh loh? Chutiang anihte chuan New York-ah rawn thawn vat ta che!” Luca chu a ṭhutna a ṭangin a tho chhuak nghal.


“Keipawh min hrilh thei reng a lawm.” Aria chuan a ti leh hrawk a.


A bula ding Luca chu a melh nghal vat. “Ka pain a be duh che,” tih pahin phone chu a pe a. A nupui chu ngaih ṭhat loh hmel zeta en pahin phone chu a la ve mai bawk a.


Gianna chuan Aria chu a rawn pan hnai nghal ruak a. “Eng thil nge thleng a?” a ti zui sar sar bawk. Keimah tak pawh chu ka ngaih a ṭha lo.


“Vawiinah nikhaw hreloin Lily a tlu a, ka nu boral hnu khan engmah a ei mumal ta lo anih hmel.”


Din chhuah hluai pahin, “Lily chu a ṭha em?” ka ti ve ta nge nge a.


Aria chu a bu nghat a. “Aw, ṭha e. Ka pain doctor a ko a, thil ei tam a mamawh bakah, mut tam a mamawh bawk a ti. Mahse chu chauh chu a ni lo. Kan haw hnu khan Lily chu amah chauhin a awm rek rek ṭhin a, tumah ngaihsaktu pawh a nei dawn lo tihna a ni. Engtin nge ka pa thusawi kha ka lo pawm ve mai theih? Kan rual khan lo hruai ve nghal daih tur a nia.”


“Ka zahawmna chhalin ka tiam che, heta a cham chhungin Liliana chungah eng thil ṭhalo mah a thleng lo ang. Uluk taka ven reng a ni ang tih ka tiam che.” Luca chuan a ti nghet charh a.


Lehlama Scuderi ṭawng ngaithla chuan a ngawi leh vang vang a.


“Chu chu ka hria a lawm, min ring rawh. Liliana chu Chicago-a a him ang tho khan hetah pawh a him ang,” a tih hnu chuan lehlama mi ṭawng chu a ngaithla leh a, phone chu a dah a.


Aria chuan a pasal chu a pan hnai vat a, “Chuan, a lo kal chu a remti ta em?” a ti nghal var a. Luca chu a lo ṭhen sak a.


“Hetah nipui chhung zawng a lo awm thei dawn e, chu aia rei pawh a ni maithei. I pa pawhin a ngaihtuah hmel khawp mai.”


“Tak tak maw? Ṭha lutuk!” Aria chuan lawm tih hriat takin a ti chhuak hliai a.


“A ngaihtuah tak tak vang a nih pawh ka ring nek lo e a. Engpawh chu ni se kan bula a awm thei tur chu a ṭha tho.” Gianna chuan a lo ti fak a.


“Engtikah nge a lo thlen ang?” pangngai thei ang bera lan tum chuan ka lo ti ve a.


Sipai ka nih angin ka hna ṭha taka thawh tum anga lan hram hram ka tum hle. Luca hmelah erawh chuan ka lemchan chuan a thawk ṭha viau lo tih ka hre mai. Mahse Aria ve thung chu min ngaihven hmel pawh a pu lo.


“Naktuk chawhnu lamah.” Luca chuan a lo ti ve mai a.


“Kan apartment-ah hian a awm ve thei ang tiraw?” Beisei nei taka a pasal en ran chungin Aria chuan a ti a.


Luca chu a bu nghat a. “I pa bulah khan thu ka tiam a, a him ngeina turin ka hmuh phakah a awm reng a ngai.”


“Inti thawveng tur pawhin khawiah mah a kal chhuak thei lo anga, inah hian tầng ang maiin i khungbet reng ang maw?” Gianna chuan mei nei zetin a lo ti kha leh fak a.


“Aw, chutiang chuan. Outfit ho nen kan inkarah hian buaina chhuak mai thei a inṭham reng a, indona chhuah thei tur eng thil mah ka tilo ang. A ṭul anih chuan Liliana chu inah hian ka kalh khum mai ang.” Luca chuan a ti sam et a.


A ti tak tak duh dawn tih erawh hai rual a ni lo. Min rawn melh dan chu warning a ni tih ka hria, anchhia lawh mai ka chak et et.


Thlanmualah khan Lily nen kan infawp leh tih a hre hauh lo a, hre ngat phei se chuan enge thleng ang pawh ka ngaihtuah peih lo.


“Nipui chu Hamptons-ah kan hmang thei a lawm. Khawpui chhung hi chu a lumin boruak a nuam lo ṭhin bawk sia. Bakah mansion pawh kan tlawh khat lutuk reng reng. Khawngaih, Luca?” tih pahin Aria chuan Luca ban chu a chul sak heuh heuh a.


Hetianga a tih tawh hi chuan Luca pawh a ṭang rei thei ngai lo.


“He apartment chhungah chauh hi chuan Lily hian hma a sawn thei dawn lo. Hamptons-ah chuan pool leh beach-te pawh a awm a, lawngte pawh kan chuang thei dawn a sin,” a tih zawm leh a.


“Aw le, aw le. Mahse Matteo nen chuan kan awm ve reng thei dawn lo a, tunlai chu hna kan ngah lutuk. Romero leh Sandro erawhin an vil chawt ang che u.” Luca chuan a ti a.


Aria chuan min rawn melh vat. A nau venghim tur chuan ka rintlak dawn em tihte pawh a ngaihtuah a ni mahna. Dik tak chuan keipawh hi ka chiang ngam bik hauh lo.


LILIANA :


Ka nu kan vuina pawh karhnih lai a ni tawh. Mahse hmasawn lam aiin ka chau telh telh a ni ber mai. Ka rilṭam ngai loh bakah ka tui takngial pawh a hal ngailo. Chuvang chuan thil ka ei tlem em em a, ngaihtuahna kawm chunga mahnia awm chu nuam ka ti ber.


Nikhaw hreloa ka tlu khan ka pa rilru a thlak sak a, kei erawh ka lawm hle thung. New York-a min thawn hi ka tana a thil min pek hlu ber a ni ringawt. Karhnih liam ta chhung khan he in chhuahsan tluka thil chak leh thlakhlelh hi ka nei lo.


New York ka thlen chuan Aria leh Luca-te chuan min lo hmuak a. Romero a rawn telve loh vang chuan ka lungnur hman deuh a, mahse New York-a ka awm thei chu lawmawm ka tiin, chulamah chuan ka rilru ka dah tlat.


Aria chuan nghet zetin min kuah thlawp a. A inlak hran rual chuan min en chik kher mai. “Hetiang khawp hian i cher a, engtin nge ka pa chuan engmah a hriat loh theih? Karei leh Lily, ruhkawl i ni ringawt a lawm!”


“Tlemte chauh a lawm. Heta ka awm chhungin ka thau leh hman vek ang,” nui sang chungin ka lo ti ve thung.


“Chutiang tur chu a ni. A ṭul anih chuan ka barh lui mai ang che. Ṭha takin ka enkawl ang che, tiin i pa ka tiam a nia.” Ka dara rawn kuah pahin Luca chuan a ti a.


Men kual ralh pahin, “Chu chu ka pa lo ngaihven ve tur pawh a ni lo. Kha leh chen kha ka ei leh in loh pawh a hre hleinem. Tinge tuna takah a lo buai leh em em si?” ka ti ve hmak.


Aria hmel danglam zawk chu ka hmu hman a, mahse zawhna ka zawh hmain Luca a lo inrawlh vat a. “Kal phawt ang u, helai hmun hi ka ngaina lo a nia,” a ti nghut.


An car dahna kan pan lai chuan, “Vawiin chu enge kan tih ang?” ka ti a.


Ka nu dam lo ka enkawl chhung leh ka nu vui anih hnu khan, ka nun leh ka rilru a ruak vek a. Nunna nei tawh lo, mahse la thi si lo ang hi ni maiin ka inhria. Chuvang chuan engemaw ka tih a ngai a, minungte thil tih ṭhin ang tih ve ka duh.


“Engmah.” Aria chuan inthiamlo hmel pu lek lekin a lo ti a. Ka hmel chu a ngui nghal ruai ruai tih ka hre thei.


Aria chu a rawn inrawlh leh vat a, “A chhan chu Hamptons lam pan tura kan chhuah vat a ngai a. Tuifinriat kamah nipui hun kan hmang dawn nia.”


“Tak tak maw?” ka phur zia chu thup pawh ka tum buai peih lo.


Aria pawh chu a lo nui var var a. Mahse lungngaihna chhum dum bawk chuan min rawn tuam leh ta, chu erawh sawi chhuah kher ka tum lem lo.

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » September 5th, 2021, 1:46 pm

CHAPTER - 19


ROMERO :


Hun khirh leh harsa kan tawh lai pawhin chiai hmel put loh hram hram ka tum ṭhin a. Mahse penthouse a Lily lo pen lut lai ka hmuh chiah chuan ka thinrim hmel chu thup ngaihna a awm tawh lo.


Scuderi putara ka hua. Outfit a dinhmun ṭha chanloh a hlauh vang leh, a fapa hnimphum tum reng renga a buai vangin a fanu hetiang khawpa a ngaihthah thei hi ka hua. Ka tih theih chu ni ngat se chuan a nung chungin ka pawt darh vek duh hial ang.


Lily chu thil a ei ṭha lo tih hriat takin a dar ruhte chu a bawk fer fur a, mahse a hmelṭhatna erawh a tichhe pha hauh lo. Kawng engkima venhim ka duhna chuan min tuam hlup hlup a, a pa bulah ngei pawh venhim theih ka duh takzet.


Chutia ka en reng lai chuan min rawn melh ve chiah a. Ka lainat lutuk chu va tlan phei a kuah chawt mai ka chak ber. Mahse chutianga tilo tur chuan ka inthunun thei hram a. Ka dinna hmunah chuan ka inhum ruh ngawt ngawt a ni ber.


Aria chuan min en ve reng tih ka hria a, chu phei chu ka ngaih pawimawh ber a ni lo. Luca khan Scuderi putara lakah thu a tiam a, chu chu ka zah sak a ngai. Keini, familia-te hian Lily kan venhim a ngai a, a zahawmna leh thianghlimna pawh kan vawnhim sak a ngai dawn tih ka hria. Keia suangtuahna ve lah chu Lily thawmhnaw ka phelh sak laite, a saruak laite suangtuahin ka chul kual ruai ṭhin a ni si a. Chutak chu amah hlata ka awm chhan tur a ni a, ka ti ngei bawk ang.


Nula hrang hrang ka mutpui a. Ka thluaka cham reng Lily ruangam leh hmelṭha takte bakah, mipat hmeichhiatna kawnga min tihphur theih ziate chu an nawhreh theih ka beisei vang a ni. Mahse anni ho chuan engmah tih theih an neilo tih ka hrechiang tawh hle thung. Nula dang ka mutpui lai mek pawhin Lily chauh ka suangtuah ṭhin tih lah chu an hre ve der si lo.


Hrep tak hian a! Kei hi ka diklo tawp mai. Chu erawh ka siamṭhat theih a ni si lo.


Choka counter bawh chunga ka din lai chuan ka lam panin Luca a rawn kal a. Kei erawh chuan unau pathumte inkawm leh titi chauh chu ka lo en thung.


“Hmeichhe ho veng tura mansiaon-a i awm a ngai dawn a, chu chuan buaina a siam dawn em?”


“Aih,” ka lo ti vat.


“I chiang chiah maw? Nichina Liliana i en dan kha chuan thawnthu hran daih a sawi a nia.”


“Ka chiang a lawm. I sawi ang khan Liliana hi hmeichhe duhawm tak ani a, mahse nula hmelṭha tak tak kawp ka ngah a lawm. Scuderi putara thinrimna tur tih luih kher chu ka duh lem lo.” Ka tih lai chuan dawt chiang takin ka sawi tih ka hrechiang viau.


Khang hmeichhe ho kha Lily nena tehkhin tlak tumah an awm lo. Luca hian ka ngaihtuahna a hmu thei lo hi ka lawm takzet. A fin em avang hian sipai mawl tak takte chuan an ngaihtuahna thlengin a hriatsak vek emaw an ti ṭhin a. A hmaah dawt an sawi rei ngam ngai lo.


“Scuderi thinrim hlauh vang chauh a ni lo. Thil pawi tak, indona thlengin a kangkai thei. Fimkhur hle rawh, Romero.”


Luca hian min vau zawk emawni le? Hetianga a ti dawn anih chuan a ṭhalo thei dawn tlat. Ani hi ka capo a nih angin a thupek zawm kawngah harsatna ka nei ngai lo, mahse tun ṭum chu a danglam tlat.


Zanriah ei laite chuan Lily chuan ka mit lak a tum tih ka hre reng a, mahse Luca leh Matteo-te ngaihmawh theih tura awm ka tum lo. Lily pawhin ka lakah beiseina nei lo se ka duh. Chu ai maha pawimawh zawk chu, ka tisa chakna thunun thei tur hian engemaw ka tih a ngai fo dawn a ni.


LILIANA :


Romero hian min pehhel a la tum reng tih ka hria. Pehhel tih chu a dik chiah lo maithei a, a boss nupui nau ka nihna angin polite takin min be satliah mai a ni zawk mah. Aria khan min hnaih lo turin a hrilh tih hre lo ila chuan ka lungawi lo viau ang. Mahse chutianga hrilh ngaia a awm anih chuan min duh ve tho tihna a ni mai tih chu ka inhnemna a ni.


Mansion kan thlen ni chuan khua a ṭhain boruak pawh a nuam khawp mai. Tuifinriat kamah chuan dawhkante dawhin chaw ei kan tum a. Cotton kawrfual thelep deuh, a senno chu ka ha a. A nghawng a zauin a hnunglam khuhtu a awm lo bawk a, ka pian rem thlapa ṭhui a ni bawk. Tlem chuan thawl deuh mah ila ka nalhpui viau thoin ka hria.


Mipa hoin eitur an chhawpna lam chu kan unau thum chuan kan pan phei a. Romero sa hem mek chu a rawn hawi chhuak a, min hmuh ruala a mitmeng danglam zawk chu ka hmuh hmaih lo chiang hle. Chu erawh chuan ka awm a tinuam sawt a, huaisenna min siamsak chu ka tan a tawk lutuk tlat. Darkar 24 liam ta a min melh dan kha ni mawlh hek lo. Tlangvalin nula a melh angin min melh tlat.


Romero chuan a mit lasawnin a sa hem lam chu a ngaihven leh daih a, ani pawh a lang nalh viau. Ni tla tur chuan a sam buang uk khak mai chu a chhun chiah a, rangkachak rawngte pawh a pawl lek lek mai. A kawr kilh chung lam pahnih chu a hawng a, a kawrban chu kiu thlengin a thlep thung. A chet zawnga a ban thahrui puar ṭalh ṭalhte chu ka hmuh hmaih bik miah lo. Italian a ni a, a vun rawng uk khakte chuan a tilang pa takzet.


“I mit kha a tla a nge.” Gianna chuan a rawn ti sap a.


Ka mit chu ka lasawn rang kher mai, ka biang chu a sa nghal hat hat bawk. A sen leh hlar tawh ngei ang. Gianna bula chair ruak chu pawt hnaiin ka ṭhu ve nghal vat a.


“Nangpawhin Romero hi min hnaih lo turin ilo hrilh ve em?” ka ti a. Gianna chuan min chhang mai lo, white wine bur chu lain kan no chu a thli khat te te a.


“Keimah hi maw? Teuh lo mai. Min hriatchian kha, dan kalh zawnga chet leh phalloh thil tihte chu nuam ka tih ber a nia lawm. Romero hi i duh anih chuan bawhzui mai rawh. Hringnun hi a tawi lutuk. Tu emaw vangin i duhzawng kalsan reng reng suh.”


Wine in tuma no leh ka hmui ka chuktuah mek chu ka chawl dat. Ka nu thusawi kha ka hrechhuak zawk. Gianna thusawi nen hian a in ang chiah.


“Aria ngaihdan erawh a ni ve miah lo,” ka tih sap hnu chuan ka no chu a chanve pawp ka in nghal a.


“Aria hi chu i hriat kha. Hman aṭang tawhin kan nu emaw a inti ṭhin a lawm. Min thunun a tum a, nungchang mawi min hrilh tum reng rengin a hman hlel ṭhin. Mahse engah mah ngai suh, i duhzawng chu ti mai rawh.”


“Buainaah min tal awhtir i tum em ni?” tiin ka zawt a. Ka wine in khan hna a thawk ṭan, ka pum chu a sa ham ham mai. Ka wine la bang chu ka thawk khat leh pawp a.


“Diktaka sawi chuan buainaah chuan ka tal awhtir kher i ngaih ka ring lo.” Gianna chuan mithmul kan ak chungin min en a.


“Hlim turin min duh emaw ka tia.”


“A dik a lawm. Mahse i duh tak leh i hlimna tur hrechiang hmasa turin in ngaihtuah chiang la ka duh a, tawrh pawh i inhuam tel tur a ni. Chuan, Romero hi chuan thu tak hla taka a lak che ka ring chiah lo.”


“I sawi dik chiah. Hmeichhe zu rui laka remchang la duh tur chi a ni lo,” ka tih chuan Gianna chuan hnar a lo tum dat a.


“Wow, Aria-in a ngaihtuah em em chhan che ka hrethiam ta.”


Romero chu a melh nghal vang vang a, keipawh Gianna hawina lam chu ka en ve ta daih a. Romero chu Matteo thusawi ngaithlain a lo nui var var mai.


“Kei chu ni ila, mipa diktak a nihnaah ringawt hi chuan rinna ka nghat hauh lo ang. A bula i awm pawhin inthunun tum tlat ang che. Mafia mipa a nih hi. Ani an thah ngai kher turin eng thilmah ti suh, i hrethiam em?”


“Aria kha i dem viau a, nangpawh hian ka nu emaw intiin min zilh mek chu a ni lawm ni?”


“Ni chiah lo. A tina che a nih vaih chuan, a mipatna ka pawhthlak sak a ni mai,” a tih takah chuan ka nui chhuak hawk a.


Aria pawh kan bulah a rawn ṭhu ve tawh a, kan titi a rawn pha chiah si lo a. Ngaihṭhat loh hmel zetin min melh tawn sek bawk.


“Nangni pahnih awm dun hian ka ngaih inti ṭha miah lo a nia, buaina rim a nam tlat.”


“Tuma bula awm lo turin min duh ni berin ka hria,” ner deuh nang chungin ka lo ti a. Ka fiamthu tih chu an hrethiam tho ang. Aria chu a lo rum hak a, a no tur pawh a ban ve nghal zat.


“Ka chungah ila lungawi lo reng em ni?”


“Ka lungawilo hleinem,” ka lo ti mai a.


Romero hnaih lo tura min hrilh kha zawm tumna ka nei hek lo. Romero pawh ka unaute thusawi hi engah mah ngai lo tura hmin tumin theihtawp chhuah ka tum mek zawk chu a ni sia.


CHAPTER - 20


Aria chuan pawi khawih lo hmel taka hawi kual vel Gianna chu a melh zawk a, chumi hnuah kei.


“In awmdan hi ka duh miah lo. Eng buaina mah in siam lo ang tih min tiam rawh u.”


“Ka siam ni lo buaina ka ngah tawk tawh, thil dang ka mamawh belh lo, ka lawm e.” Gianna chuan a lo ti nghat. Aria chuan min melh leh ta ran mai.


“Ṭha deuhin ka awm dawn, ka tiam che.” Ka ti ve ta nge nge a.


Ka no chu thli khat lehin ka en ngar mai. Romero bula ka awm theih dan tur kawng ka zawn a ngai. Aria hi chuan ka hlimthla ang maiin khawiah pawh min zui thei dawn lo tih ka hria.


Chhun lamah chuan Aria hnawh bo tum chu thil theih loh tluk a ni. Min en reng a, Romero pawh a veng tel reng tho. Engtik aṭang khan nge spy ang maia mit fing hi a lo neih tak pawh ka hre hrep lo ve.


Zan rei hnu leh zingkar chiah chetna hun ka nei. Ka muhil meuh lo a, ka tan chuan harsatna a tling pha lo. A chhan ka hre lo, mahse engtik lai emaw aṭang khan thima mut hi ka hlau deuh tlat a, zan thim hnuai chu Romero suangtuah nan leh a khum ṭawmpui theih dan tur ngaihtuah nan hun ka hmang mai a. Chawhnu lamah ka ute nen nilumah kan inpho ṭhin a, chu chu remchangah lain ka muhil hlauh ṭhin.


Ka huaisenna sawm khawm a, ka suangtuah angte tipuitling tur chuan nithum lai hun ka hmang. Huaisen tak anga lang tura ka hlauhna thup dan chu ka hre lutuk a, mahse ka thil tih tur hi chu a vawikhatna a nih vangin hmachhawn dan tur pawh ka hre chiah lo. Ka pa sipaite ka chhaih ṭhin tih mai loh chu. Lerh hmel ang takin lang mah ila, ngaihzawng pawh ka la nei miah lo.


A hma ang em em kha chuan Romero hian min duh lo mai ang tih hlauhna ka nei tawh hran lo. Midangin an ngaihven vak lo ni a a hriat apiangin min lo melh ve ziah a, kei erawhin amah ka en deuh reng avangin chu chu ka hmuh hmaih ngai lo.


Ni a chhuah rual chuan tukverh bulah dingin, tuifinriat kama tlangval pakhat tlan lauh lauh chu ka en reng a. Kawr a ha lo a, kekawrbul a ha thung. Engtin nge Romero hi hetiang em em a mihring inthunun thei a nih bik? Ka bula a awmlai hi chuan inthunun miah lo se ka duh zawk a sin.


In lam panin a rawn tlan chho zel a, bang phenah ka pil nghal daih. Ka enthla ṭhin a ni tih hi hre lo se ka duh. Ka hmuh theih loh turin a kal liam ta. Ka pindan ka chhuahsan hma chuan minute 5 ka nghak leh a, tun ang hunah hi chuan eng thawm mah hriat tur a awm ngai lo. Dar 6 em pawh a la ri lo tlat. Ka ute pawh an la muhil tui khawp ang, an tho hmai ngai lo.


Matteo leh Luca lah nimin khan New York lamah an kal daih bawk a, hna pawimawh a awm a ni maithei. An tum anga an awm anih chuan tun ang huna tho tur awmchhun leh ka kawng dal thei awmchhun chu bodyguard pakhat zawk Sandro a ni mai.


Sandro pindan ka kal pelh lai chuan thawm ka dim lehzual a, a la mu pawh a ni maithei a reh ṭhap mai. Thaw la hapin Romero pindan lam pan tur chuan ka kal chak zual sauh a. Ka thil tih hi a dik lo tih ka hria, midangin an hria emaw, ka pain a hrechhuak emaw a nih vaih chuan ka damchhungin Chicago ka chhuahsan a phal leh tawh ngai lo ang. Chu chauh pawh chu a ni lo, in pawh ka chhuahsan thei tawh lo ang.


Tun thlengin Gianna thil tih kha an la sawi peih a, kei leh zelin dan ka bawhchhe lui leh ngat tih a hriat vaih chuan min that ngei ngei ang. Scuderi chhungkaw fanu naupang ber ka ni a, sipai satliah mai mai lakah ka mualpho thiang lo. Mahse Gianna ang tho kha ka ni tih ka inhrechiang hle thung. Ka hmaa thlemna awm mek hi ka tuar chhuak zo dawn lo. Ka thei lo a ni tawp mai.


Romero kawngkhar chu a inkalh lo.

Dingdihlip chungin a room-ah chuan ka lut a, thawk pawh ka thaw ngam lo. A pindan chu a lo ruak huai a, mahse bathroom lamah tui herh haw ri ka hria. Chu lam pan chuan ka kal leh ta ṭham ṭham a. Kawngkhar pawh chu a inkhar phui lo, bathroom chhung chu ka bih dak dak a.


Romero hi zingah a inbual ṭhin tih ka hre tawh a, shower hnuaia a ding ka hmuh pawh chuan mak ka tihran lo. Mahse ka awmna aṭang chuan ka hmu tam thei lo viau.


Kawngka chu hawng zauin ka pen lut ve ta rawih a. Ani chu min hnungchhawn zawngin a ding a, a taksa, thahrui ngah lutuk ka hmuh rual chuan ka thaw a tawp mai dawnin ka hria. Thil hmuhnawm tak chu a ni chiang a lawm. A hnungzang ruh zui chiah chuan thir hling nei tattoo-in a chhut tir a, a chhip aṭanga a keler thleng chuan sawiselna tur ka a hre lo a ni tawp mai a. Pathian thilsiam mawi tak chu a ni ve chiang a lawm.


Tu mipa mah heetiang hian la hmu ngai lo mah ila, a aia nalh leh sexy zawk an awm tawh chuang lo ang tih erawh ka chiang viau. Amah ka lo suangtuaha ṭhinna pawh khan a tluk pha hauh lo.


Muangchangin a rawn inher a, tlan chhuak tur ka ni tih ka hria. Mahse a hma zawngin ka hmu chak, a mipatna ka hmu duh tlat.
Min rawn hmuh takah chuan a phu ve deuh zawkin ka hria. A awm zawnah chuan tattoo dang ka hmu leh a, chu erawh chu Familia ho thuvawn kha a ni tih ka hre mai. Engmah sawi lo chuan kan in en reng ringawt a, sawi mai tur a hre bik lo anih ka ring.


Romero chuan ka taksa chu a melh kual tih ka hai lo, a melhna apiang chu a sa hut hut ni maiin ka hria. Ka zawhna chhanna chu ka hmu ta. A tirah kha chuan a mipatna kha a danglam lo a, mahse tunah chuan hmuh loh der theih rual a ni tawh lo. Ani pawh ka mutkawr sir lam kak aṭanga ka mal lang chu a melh ve reng tho.


A taksa peng pakhat danglam lai mek ka en reng lai chuan ka biang a sa hat hat thei. Kal hnaiin a taksa khauh ṭang mai chu khawih chhin ka chak tlat. Mahse a chhan ka hre lo, ka che thei tlat lo. Amah hi a ni ka mamawh chu. Hetiang taka thil mamawh hi ka neih awm pawh ka la hre ngai lo.


Romero chuan shower chu a off a, towel chu lain a veng a. Shower aṭang chuan a rawn pen chhuak ta. Ka thin phu nasa lutuk chu a ri a hre thei hial maithei. A shower gel hman rimte chuan ka hnar a verh zar mai. Ka hmaah chuan rawn dingin, ka mitah tak min en kal a.


Aw thum leh dam thlup chuan, “I hre vek. Hetiang hian midangin min rawn hmu anih chuan ngaihdan diklo tak an nei vek ang. Chu ngaihdan diklo tak vang chuan ka nunna hial pawh ka chan thei. Chuan i hmingchhiat phah bawk anga,” a ti sup a.


Ka la che thei chuang lo. Lung tum ang maiin ding khawng reng mah ila, ka kawchhung ve thung chu a alh pup pup a ni mai. Ka mit chu ka lasawn thei lo a, kha leh chen a bula ka awm hunah ka sawi ang ka tih vete kha chuan min thlawh bo san vek tawh.


Ka thunun thei lo nge ka tilui pawh ka hre chiah lo. Ka kut chu phar chhuakin, a awm ruak kang leh khauh ṭang mai chu khawih ka tum a. A taksa hi ka khawih duh tlat. A bulah hi chuan insumin awmzia a nei lo a, insum tumna lah ka nei hek lo. Mahse ka zam hle thung. Hetiang hi nula awmdan tur a ni lo.
Mahse Romero chuan ka kut a lo man chat mai. Ka banrek a vawnna chu a na thei hial.


Ka mit chu lasawin a mitah tak ka melh ve ta ran mai a, ka zahna leh mak tihna chu a inzat vel viau ang. Chu ai maha mak zawk chu, Romero hmel chu a ni. Min tikhur thei hial.
A rawn kun hniam deuh a, min hnaih tial tial.


Min fawp ngei dawn niin ka hria a, ka lo maimitchhing ta ringawt a. Mahse ka beisei ang erawh chu a thleng hauh lo, min fawp lo. Kanwgkhar inhawng ri niawm tak ka hriat chuan ka meng siar siar a, Romero chuan bathroom kawngkhar chu a lo hawng zau chu niin. Chuvanga min lo din hnaih chu niin, min fawh a tum vang a ni lo. Zahna chuan min tuam nghal hlup hlup a, engtin nge min duh ve mai ka lo rin theih zawk le?


Din ngil pah chuan, “I chhuah a ngai,” a ti sap a. Ka banreka a vawnna pawh chu a la thlah chuang lo.


“Anih chuan min thlah ta che,” ka tih chuan hrechhuak thut niawm takin min thlah vat.


A ruk tak chuan khawih ka chak a, ani pawhin min khawih let ve se ka ti. Min rawn din hnaih zual sauh a, dak chho ar chungin ka en ve reng bawk. Kan taksa chu a insi a ni ber tawh a, kan hmui pawh. A thaw lum ham hamte chuan ka thluak an tibuai pha tlat.

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » September 5th, 2021, 1:47 pm

CHAPTER - 21


“Chhuak rawh. Ka thutiam ka bawhchhiat hmain chhuak rawh,” a ti leh sap a.


A awki aṭang chuan thupek a ang mah tawh zawk. A thutiam chu bawhchhia se ka duh, chu aia duh chu eng thil mah ka nei lo. Mahse engin nge min mawlh ka hre lo, amah hlat tur chuan ka tawlh hnung hret a. Hmeichhe huaisen tak ka ni, mahse chuvang chuan atthlak taka chet erawh ka tum bik lo.



A chhip aṭanga a keler thleng chuan ka en kual leh a, engmah sawi loin bathroom chu ka chhuahsan zui nghal. A pindan kawngkhar chu hawngin, corridor-ah chuan min hmu tur an awm em tiin ka thlek hmasa phawt a, mahse tumah an awm lo. Ka pindan lam pan chuan chak takin ka pen zui dawr dawr a. Ka pindan ka thleng ṭep tihah Gianna a lo lang hlawl mai. A mutkawr a la hak bakah, chocolate no khu hlat hlat chu a keng bawk a. Min hmuh rual chuan a ding chat a, ngaihṭhat loh hmel fein min melh ram ram bawk.



“Mutkawr pan tak nen chauh khan khawiah nge i kal a?” a ti zui nghal. Tinge tukin kher kher hian Gianna hi a thawh hma em em le?



“Khawiah mah.” Ka chhang rang mah mah. Ka hmai sat hat hat danah chuan a tai leh hlar dawn tih ka hria. Engvangin nge he ka taksa hi ka lamah a ṭan duh miah loh?



“Khawiah mah.” Gianna chuan a tinawn leh ngat a. A chocolate chu a lem hlek a, kuangkuahin a ding nghal than mai.



“A dik ang. Romero pindan lam aṭanga lo kal i ni lo em ni?” a tih chuan dar chhin ak pahin, “Nih pawh a ni maithei. Mahse a pindana leng turin min sawm pawh a ni chuang hleinem.”



“A sawm loh che avang chuan a pindanah i kallo tihna pawh a ni chuang hleinem.”



“Khatia min dawp vel kha i duhtawk thei tawh em? Nang hian ka pa chu i lo chhun ber zawk a nih hi. Nang pawh dan leh thupek zawm chi i nih bik loh kha.”



“Inbengdai teh, sakei note. Ka hrechiang chak mai mai a nia. I duh phawt chuan Romero a ni emaw, i mipa duhzawngte chu i kal chilh thei reng a lawm. Mahse thil awmzia chu i hirat ve vek kha. Helaia hnathawkte hian an hmu che anih chuan buaina i pumpelh hauh lo ang. Fing taka i chet a ngai dawn a nia. Ar lu tan sak ang maia khatia i tlan kual reng dawn a nih chuan i him rei lo ang. Tuna hmutu che hi kei ni loin, Aria ni vaih se chuan zawhna chhan tur i ngah ve viau ang.”



“Mahse engmah tihsual ka nei hleinem.” Luhlul tak chuan ka ti ve leh hram a.



Gianna chu a nui sak. “Ka hria a lawm, mahse hremna erawh i pumpelh chuang lo ang. Engpawh ni se fimkhur hle la a ni mai.”


A chocolate no ken lai chu min pek pahin, “Kha hei hi in rawh, kei aiin i mamawh zawkin ka hria,” nuihza insum tih hriat tak chuan a ti a.



Theihtawpin ka fimkhur ve emaw ka tia, mahse ka ute lakah hi chuan engmah ka thup thei ngai dawn lo niin a lang. Zepin awmzia a nei lo tih ka hre tawh a, tuna ka duh ber chu an pasalte lakah ka thuruk hi min zep sak hram se tih a ni ber tawh. Romero nena kan inkarah hian eng thil mah la thleng lo mah se, an mi rinhlelhna vang ringawt pawh hian buaina lian tak kan tawk thei dawn tih ka hai bik lo. Romero tan phei chuan nunna chan theihna tur hial a ni tlat.



Tumah lahin thudik zawn chhuah an tum dawn lo bawk a. Thil engemaw tal sawi tur lo nei tawh ila ka ti. Ka suangtuahna ṭhin ang tal khan min lo fawp tawh se, nilo……a duhthu rengin min fawp tawh se ka ti.



ROMERO :


Liliana chhuak tur kha pawt kir lo turin ka inthunun nasa takzet. Ka khumah ngei mai hian a tawp thlenpui mai ka duh a sin. Phiangsen hian! Nileng mai chuan ka rilruah a awm a, chiang taka min entu chu awm ngat se chuan ka thil ngaihtuah chu an hai bik hauh lo ang. Ka bathroom chhunga a mitmeng pawl riai ka hmu thut kha ka suangtuahna mai mai emaw ka ti hman hial a. Ka inbual lai mek pawha ka ngaihtuah kha amah a ni tlat.


Diktaka sawi chuan tunlai phei chu ka ngaihtuah deuh reng a ni ber mah zawk. Hetiang tak hian ka hnaah rilru ka pe lo tih Luca hian hria se chuan, Aria veng tur hian midang a dah ngei ang a, kei hi chu New York-ah min thawn let daih tawh ang. Lily hlat thei ang bera awm turin.



Min ngaih anga sipai ṭha leh rinawm hi ni ila chuan New York-a min thawn kir tura ngen tur zawk ka ni. Mahse ka ti dawn teuh lo, khawiah mah ka kal dawn lo. Lily bul hnaia awm hi ka duh.



Ka sam chu ka tuai puat a, bathroom kawngkhar chu ka melh leh tlawk tlawk ṭhin. Engvangin nge ka lo kal tir kher kher le? Amah fawp tur khan min beisei a, infawh aia nasa a duh tih ka hria. Engvangin nge ka thinlung ngaithla loin ka thluak mawl zet hi ka ngaihthlak? Lily fawp lo tura min khapbettu chu ka thutiam leh ka duty-te ka ngaih pawimawh vang lah a ni der si lo. Ani venhim hi ka hna a ni hauh lo tih hre mah ila, humhim chu ka duh miau mai si. Khatianga min chhaih vang khan eng buainaah nge a inhnuhluh theih lah chu a hre der si lo.



Kan khawvelah hian hmeichhiate hian zahawmna an neih chhun chu an thianghlimna leh, an nungchang mawina chauh a ni. Chu chu Mafia mipate tana hmeichhe zahawm awmchhun an ni tlat. Mahse a tute mah hian kan duhzawng leh, kan thlan nupui pasal atan kan nei ngai meuh lo. Kan hmanlai dan kha vawiin thlengin kan la chhawm ta reng a, chuti maia tih danglam a nih mai pawh ka ring lem lo.
Lily nen kan inkara thil awm hi ka kaltlang pui a, ka duh anga a chungah ka che a nih chuan kan khawvel mithmuhah hian a zahawmna ka tihchhiat sak tihna a ni dawn a ni. Mahse a thianghlimna tichhe lo turin thil tamtak tih theih kan nei a lawm. A tam lutuk tlat. Hrep tak hian a!



Hetiang thleng hian ka ngaihtuah kai ta mai chu a ni sia, a thianghlimna tibawrhbang lo tawk tura chet theih dan kawng chu a awm na meuh mai. Mahse kei hi a tawp thleng lo turin ka inthunun thei dawn em ni? Ka tisa chakna sosan lai bera a tawp thleng kal lo tura ka tawp theih ka ring chiah lo. Mahse Lily hian a tawp thlenpui turin min ngen lo maithei a, chu chauh pawh chu ka innghahna neihchhun a ni rih mai. Ka va nep ta ve mawle! Nilo, Lily chuan tawp turin min ngen hauh lo ang. A theih loh.



Breakfast ei lai chuan engmah thleng lo ang maiin ka awm lui ve tlat a, Aria chuan a mit leh beng a chhi kar tih ka hria a. Gianna lah hi a hriat tur aia tam a hria tih hai rual a ni lo. Min en dan a diklo tlat.



A unauten an en loh laiin Lily chuan min rawn melh ralh a, a mi en dan chuan ka ṭhianpa hi a tiche pha tlat. Tukin khan ka taksa a tih danglam theih dan a hmu tawh a, ka mamawhna hi a hai tawh bik lo.



Midangte tana nung ka nih angin ka mamawh leh ka duhte hi ka ngai pawimawh chiam ngai lo. Ka la tih ngai loh chu tiin ka duh leh mamawh hi dah hmasa ta ila a pawi dawn em ni? Ka hmaa ṭhu nula ka mamawh ang hian eng thil mah ka la mamawh ngai lo.
Engvangin nge ka thil duh leh mamawh hi ka haider luih reng ang?



CHAPTER - 22


LILIANA :


Thim zingah chuan ka mu meng kar a, a thimzia chu ai mit thlawn sawi ang hlauh a ni. Ka hmai zawna ka kut ka dah pawh chu ka hmu thei der lo. A chang chuan thim hi ka nun nena inzawm tlat niin ka hre ṭhin. Khuarkhurum mawng neilo a tla ni maia inhriat changte pawh ka nei ṭhin. A bikin zanah hian ka nuin ka hlimna tur kawng zawh tura min chah kha ka hrechhuak fo ṭhin a, mahse chu kawng zawh dan tur chu ka hre si lo. Ka nu boral hnu khan mal ngawih ngawih leh khawhar em em a inhriatna ka nei nasa zual a.



Ka sawi tawh ang khan nufa inpawh ber chu ni lemlo mah ila, ka mamawh huna biak theih turin a awm reng ṭhin. Mahse tunah chuan keimah chauh ka ni tawh. Ni e, Fabi chu a awm ngei a,mahse nakin lawkah mafia khawvelah hian hnimphumin a awm tawh dawn. Chuan….. ka pa pawh. Mahse ani hi chu awm lo tluk chauh a ni. A awm hian ka tan engmah awmzia a nei lo, ka phurrit belhchhahtu mai a ni pawh ti ila a dik tho. Mahse tunah chuan Hamptons-ah ka awm rih a, ka hlim rih viau. Romero bul hnaiah ka awm theih phah bawk a.



Ka ute pahnih hi ka tan an awm reng a, mahse pasal nei tawh an ni a, buaipui tur tamtak an nei. Pasal an nei tawh a, nakin lawkah chuan chhungkua dinin min ngaihsak hman tawh kher lo ang. Min hmangaih reng anga, a theih phawt chuan min puih pawh an hreh hauh lo ang. Mahse an telloa hlim theih ka duh. An neih ang hi neih ve ka duh a, an hlimna ang hi ka duh ve. Chuan, chu ka hlimna min ṭawmpui tur chuan mi pakhat chiah duh ka nei a, chu chu Romero a ni.



Tunah hi chuan a hmaa min en ṭhin dan ang ngawt kha chuan min en tawh bik lo tih ka hria. Hmeichhe naupang nghal leh venhim ngai si ang khan min en liam mai ṭhin a, mahse tun hnaiah hian thil danglam a awm tlat. Mipa mizia leh awmdan phei chu ka hre tam hauh lo, mahse, a mitmengah hian Luca-in Aria a melh ṭhin dan kha ka hmu tel ṭhin. Chu chu ka hrethiam ve tlat. Ka rizai theh hlimin ka ṭhu chhuak nghal a.



Thim ka hlauhna a bo a, kawngkhar awmna pan turin light on kher lah a ngai hek lo. Ka pindan chhuahsan tura min hiptu chu a chak lutuk pawh a ni mahna. Kawngka chu hawngin corridor-ah chuan ka pen chhuak nghal a, a thimin a reh ṭhup mai. Mahse a ṭha zawk, ka tum ram ka thleng thei dawn tihna a ni mai. Romero pindan awmna hre turin midang zawh chawp a ngai lah a ni hek lo. Chu kher chu ka hrechiang lutuk mah mah. Hun rei tak chu chhan dang dangte avangin ka lo inthup ve tawh ṭhin a, mahse zanin chu inthup tumna ka nei hauh lo. Fimkhur takin corridor chu ka zawh thla zel a, thawm pawh ka dim kher mai.



Romero pindan zawn ka thlen chuan thaw ka la halh a, lut mai loin ka ding leh vang vang bawk. Chhunglam thawm chu ka ngaithla a, mahse a reh khawp mai. Tunah hian zanlai a pel tawh a, muhil pawh nise a awm viau mai. Zingah lah a tho hma thei bawk si.
Ka zam thar leh deuh tlat, ka kutte chu a khur thei hial a lawm le.



Kawngkhar herhna chu vuanin dimtein ka hawng a, pen lut zuiin kawngkhar chu ka nam khar lehnghal. Khuma Romero mu lai chu ka thlir leh te te a, ka che nghal mai thei lo. Inthlah dul vat ka ngai. Pindan chhungah chuan ểng engmah awm lo mah se, tukverh aṭanga thla eng lo lut chuan ka hmuh duh chu a chhun chiang viau thung. Min hnungchhawn zawngin a mu a, a puan sin chuan a kawng thleng chauh a khuh. A dar pharh hlap leh a ban, thahrui ngah tih hriat tak chu ka melh kual dan dan a. Khum lam chu ka hnaih phei hrat a, mahse ka zam ru hle thung.



Romero pindanah hian ka lut tawh a, a inbual lai thlengin ka hmu tawh a nih kha. Mahse zanin boruak chu a dang tlat. Ka zam tih loh chi pawh a ni lo. Khuma mu a ni a, a bula mut ve hi ka tum vang pawh a ni maithei.



Min chhuahtir leh mai a ngem? Nilo, thinrim ta se, Luca a hrilh mai a ngem? Chutiang a nih vaih chuan Chicago-ah, ka pa inchhung hrehawm leh thawpik thlak zetah khan min thawn kir leh duh mai a ngem?



Ka ngaihtuahna vang chuan ka thinphu pawh a rang sawt mai. He thil hi ka nu, thi turin min duh ngei kha a ni tiin ka inhrilh nawn lui tlat a, ka nu duhthusam kha ka ti hlawhtling ngei tur a ni. Mahse chu chuan min tihuaisen zo meuh lo chu a ni ber e, ka nu thusawi kha chhuanlama hmangin nawmchenna kawng ka zawk mek nite chuan ka hre leh deuh bawk a. Kei hi ka ầ tak tak dawn niin ka hria. Ka nu damloh hma daih aṭang khan Romero hi ka duh tawh a, New York-ah pawh khan fawh ka tum daih tawh a nih kha.



Ka lu ka thing a, chutia ngaihtuahna kawm vak vak hun chu a nilo tih ka hria. Ka duhzawng ti turin puitling ka ni tawh a, tun hi ngaihtuahna kawm hun a ni lo. Khum lam pan chuan ka pen leh a, mahse ka tawp leh chawt. Romero thawk dan a danglam tlat. A taksa ṭang nghal ṭeuh pawh chu ka hmu thei a, a harh chiang lutuk. Mahse tlan chhuak turin hun ka nei tawh lo.



A rawn inher thut a, kan inmelh leh ta ran mai le. Hahdam huai hmel a pu zawk a, mahse a rei lo kher mai. “Liliana?” a tih chuan a awah mak tihna a lang tel. Kei erawh chuan ka chhang lo. Ka lei chu ka dangah a bet ni maiin ka hria, eng thil nge maw ka tih leh tak hi le?



Romero chu rawn thoin, khum tlangah chuan a ṭhu a. Ngawi rengin min melh reng bawk. Ka hmel hi a hmu chiang thei a ngem le? Sazu thanga awk mek hmelte pawh ka an ka ring, mahse hlau erawh ka ni miah si lo. Ka zah bakah ka phur zawk tlat. Romero chu a ding a, a taksa khauh ṭang chu ka lo enkual nghal vat. Boxer chauh a ha a, Greek pathian niawma nalh a ni chiang a ni. Khum laizawla ka lo suangtuah ṭhin dante chu ngaihtuahin, zah vangin ka hmaite chu a sa hat hat thei hial.



“Lily, hetah enge i rawn tih? Thil ṭhalo thleng a awm em ni?”



A awah chuan ngaihṭhat lohna a lang tel a, thildang pawh a lang tel. Chu chuan phurna min pe tlat lehnghal. Ka kawchhung chu a za chuai chuai thei hial a, Romero dinna lam chu ka hnaih phei leh hrat. Amah chu pawm chawt a, fawh nghal mawlh mawlh mai ka duh. Chu aia thui pawh chu.



“I bulah ka lo mu thei a ngem?” ka ti chhuak ta hlawl mai. Mahse ka thusawi chu keipawhin ka awih thei lo hial. Lak kawih theih mai a nih vanga mak ti ka ni.



Romero chu a khawng deuh awt a. Engemaw chen chu kan ngawi dun ran a, min nawr chhuak duh mai ang tih hlau viau mah ila a dinna lam chu ka pan hnai lui leh ngat. Tunah chuan ban phak maiah ka ding ta. A thaw ri leh a ầwm insep deuh dat datte chu ka hmu thei a. A thinrim tihna a ni thei a ngem?



“Hetiang hi fiamthu thawhna chi a ni lo, Lily,” a ti sap a.



Thaw la leh halhin, “A nuihzathlak loh,” a tihzawm leh a.



Ka ring dik chiah. A thinrim chiang mai. Chu chu remchangah lain chhuahsan daih tur ka ni. Mahse hetiang hunah hian tih ầtin ka awm tlat zel. Gianna pawhin a sawi tawh kha, buaina laka inchinfel dan ka thiam lo.



“Fiamthu ka thawh hleinem, ka ti tak tak a lawm,” ka ti ve ta sap a.



“I bulah ka mu duh. Mut chauh a ni mai,” ka tih leh chuan dawt ka sawi tih ka inhrechiang hle.



“Liliana…..i ầ ta em ni…? Eng thil nge i tih hi i hria em?” Romero chuan a ti a, ṭawng ring hauh lo mah se a thutak hle thung.



Ka zamna leh zahna chu thinrimnain a rawn thlak ta daih mai. Tupawhin ka duhzawng ti turin ka la naupan bakah, ka mawl lutuk an ti zel a, ka hne tawh. Puitling ka ni tawh a, ka duh ang che turin dikna ka nei.



“Ka thusawi hi ka hrechiang lutuk tlat,” ka ti a.



“Ka ring chiang lo,” tiin min lo chhang vat.



Romero chu ka din hnaih zual sauh a, kan insi lek lek tawh. Ani pawh chu inlakhran a tum bik lo a niang, a dinna ngaiah a ding ve reng.

Link:
BBcode:
HTML:
Hide post links
Show post links

Local Advertisement

MOBILE SIAM ZIR DUH TAN!!!

Tech-Inn Mobile Repairing Traning Centre, Bazar bungkawn

Kum tin mi za chuang eizawnna kan siamsak a, Eizawnna tlaka thiam turin kan zirtir thin

Mizorama mobile siam zirna hmasa ber changtlung ber kan ni. Hrechiang duh tan Contact : 9612099411 / 9862016122


Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » September 5th, 2021, 1:47 pm

CHAPTER - 23


“Zantin mai hian zan khaw thim hian min dawlh mai dawna hriatna ka nei ṭhin a, ka nunah hian eng thil ṭha mah a thleng ve ngai dawn loa hriatna ka nei ṭhin. Mahse nangmah ka ngaihtuah apiangin chu ka buaina chu lakboin a awm ṭhin. I bulah hian him riaua inhriatna ka nei a ni.”



“Chutiang chuan ngai suh. Mi ṭha ka ni lo, i mipa kawp theih tur chi lah ka ni hek lo.”



“I fel leh felloh lam ka ngaihtuah lo. He khawvela seilian ka ni a, i nihna hian engmah a tidanglam lo.”



“A chanve pawh i hre lo. Engkim hria chu ni la, tunah hian ka pindanah i awm hauh lo ang.”



“Ka tih loh tur ngaihthlak hi ka hne lutuk. Ka thil duh ti turin dikna ka nei lo em ni? Hei hi ka nun a ni a, engvangin nge ka duhzawng ti turin dikna ka neih loh bik?”



Romero chu a ngawi vang vang a, chutah rawn ṭawng chhuak lehin, “Ni e, i nun chu a ni ngei a lawm. Mahse i pa hian i lakah beisei tamtak a nei a, chu chauh pawh chu a ni lo, Luca hian a venghim ngei ang che tiin Dante Cavallaro hnenah thu a tiam a, i taksa himna bakah i zahawmna thlenga humhim sakna a tel nghal. Ka pindana i awm thu hi an hria a nih vaih chuan Outfit leh New York familia-te karah hian indona a chhuak thei a sin. He thil hi infiamna chi a ni lo a, naupang infiam nan chuan a hlauhawm mah mah a ni,” a ti a.



“Eng infiamna mah ka khel lo, ka khua a har a lawm, Romero. Chuan ka duh che, ka duh lutuk che,” ka ti sap a. Ka duh tih erawh hi chu a hre daih tawh. Chutah sawi zawm lehin, “I bula awm reng theih hi ka duh a, min fawp let ve turin ka duh che. Nang pawhin min melh ṭhin dan hi ka hai bik lo, min duh ve tho tih ka hria,” ka tih chuan engtin mah min chhang lo.



Rinhlelhna chuan min tuam nghal hlup hlup a, min endan leh min duh ve emaw ka lo tih ṭhinte kha ka suangtuahna mai mai em ni?



“Min duh lo anih chuan min hrilh tawp rawh, a pawilo a nia. Ka hrethiam lutuk ang,” ti mah ila dawt ka sawi. Ka kehchhe vek ang. Mahse chu chu a ṭha zawk pawh a ni maithei. Ka thi lo anih hlauh chuan nakin lawkah ka la theihnghilh chhawm ve mai ang.



“Hrep tak hian!” tiin a phun sup a. A inher a, min hnungchhawn zawngin a ding ta daih.



“Mi ṭha leh dik chu ni ila, i thusawi kha a dik tiin ka pawm ngei ang. I tana ṭha tur anih vangin dawt ka hrilh che a ngai. Mahse i tan ka ṭha tawk lo a, mifel ka ni hek lo, Lily.”



Kei erawh chu ka thawveng hawk mai. Min duh loh thu a sawi lo tlat a. Ka lo ring dik chiah a nih hmel. Karei leh! Lawm vanga au chhuah mai ka duh.


A dar ruak kang mai chu ka khawih a, a hnung velah chuan ser a awm nual a mahse ka beisei ai daihin a vun a mam. Chung a serte chuan a tilang pa hliah hliah hian ka hria a, ka khawihna aṭang chuan kalsawn a tum bik lo.



“Chuan min haw lo tiraw, min duh ve tiraw?” Ka tih chuan Romero chu a nui hawk a. “Thil atthlak tak a nih hi.”



“Min hrilh rawh. I nula duhzawng ka ni em?”



A rawn inher thut a, tunah chuan a ầwmah ka kut ka nghat ta ran mai. Kei lah chuan nuam ka tisawt thung. A taksaa ka kut vak kual ruai chu ti tawp tur ka ni, mahse hei hi ka thlakhlelh em em kha a ni si.



A mitmeng thim deuh runah chuan phurna nasa tak ka hmu thei a, ka keler aṭanga ka chhip thleng mai chuan ngun takin min thlek vek bawk. Kekawrbul leh mutkawr chhingte ka ha a, mahse ka zak duh bik miah lo.



Hetianga min hmu tur hian Romero hi ka duh a, ka landan leh ka khawihnate avanga a danglam dan hi hriat vek ka duh bawk.



“Lily, i nalh takzet. Ni e, i duhawm ka ti a ni. In en ta che, i hmelṭhatna hi thu hian a sawifiah zo lo zawk a ni,” a tih chuan ka deuh hau chungin ka lo en a. Ka beisei ngam loh thil a sawi tlat. Din hnaih zual sauh chungin ka chho melh ran bawk a.



“A nih chuan tinge min hnar luih tlat?”



“A chhan chu thil dik a nih bakah, thil thleng thei ṭha lo tak tak a awm vang a ni.”



“Chutiang zawng zawng huam chuan min pawm ngam lo em ni?”



Romero chuan mitmeng thuk tak chuan min melh chhuk run a, a mitmeng chuan min tikhur thei hial. Engmah sawi lo chuan ka khelah a vuan a, a taksa si cheta min pawt betin, duhthawh zet chuan min fawp nghal.



Ka lo chhanglet rang kher mai. Hei ngei hi a ni ka suangtuah ṭhin leh ka thlakhlelh em em kha. Tun ṭuma kan infawh dan hi chu a dang daih. Tumah mah kan insum hek lo. Ka tukhumah chuan vuanin dim deuh zawkin min fawp leh a, mahse a duhtawh viau tho.



Nilo, Romero hian a duh anga fawp let turin min zirtir a ni. Keipawh chuan ka man har lo chiang kher mai. Dingdihlip ak akin a darah chuan ka vuan tlat a, min fawhna avanga ka tha khur der der chu thunun theih chi pawh a ni lo. Ka tluk mai loh nan invawnna tur ka mamawh a lawm…!



A mi fawhna chuan min dawlh riai riai ni maiin ka hria. Mahse Romero chu a inla hrang thut a, din hnaih leh mai ka tum lai chuan min dawm ding chat a. A thaw a rangin, a mitmengte chu a rum deuh ul a.



“Hun min pe lawk rawh,” a ti chhuak hap.
Na nei niawm tak chuan a maimitchhing tlat a, kei lahin fawh leh vat vat ka duh.



Tun dinhmunah hi chuan a aia duh zawk eng thil mah ka nei lo. Mahse min ngen ang chuan hun ka pe ta zawk a. Rei vaklo hnu chuan a rawn meng ve ta. A mitmeng tisa chakna avanga rum deuh ul kha hmuh tur a awm tawh lo a, inthunun thei tak hmel a pu leh tawh. Ka dara a vawnna pawh chu a thlah dul tawh a, a kutzungpui chuan dimtein a tuai neuh neuh thung. A ṭawng chhuah hun chu ka nghak a, mahse a sawi tur erawh ka ngaithla huphurh viau.



Ka bianga rawn vawn pah chuan, “I kal a ngai tawh,” a ti sup a. Kei lah ka lo khawng deuh awt.



“Min chhuahtir ang maw?” ka ti he haw a.



A hmelah chuan inthiam lohna ka hmu thei. “Thil ṭha ber a nih vang a ni, Lily. Min ring rawh,” a tih chuan ka tawlh hnung dat a.



A bula min awmtir tur chuan ngen ka tum bik hauh lo. A bula ka riah a phallo anih chuan, ka pawm mai tur a ni.



“A ṭha a lawm, muttui le,” tia inherin a pindan chu ka chhuahsan nghal a.



Min lo hmute an awm em tih lam pawh ngaihtuah buai duh loin ka pindan chu ka pan ding nghal a.



Ka zahawm lohna tur a ni tih hre reng chungin khatiang khan ka che a, mahse hnawlin ka awm leh ta si. Ka tinawn leh tawh ngai lo ang. Romero hi ka duh em em a, mahse keipawh hian chapona ka nei ve tho. Ka tan engmah a risk ngam lo anih chuan keipawhin ka risk tawh bik tur a ni lo. A thutlukna chu ka pawm ve mai tur a ni.



Kawngka chu kharin ka khumah chuan ka inthawlh nghal a. Thim leh thawpikna bawk chuan a hma ang chiahin min khuh leh nghal. Ka pindan chhung chu a rehin a khawhar thlak ngawih ngawih. A hma lawka Romero nena kan infawhna pawh khan min tihlim zo meuh lo a ni ber e. Kan infawp leh tawh ngai lo maithei a, han hlimpui viau chhan tur ka nei tlat lo a ni. Chutiang thil ngaihtuah chung chuan harsa zetin ka muhil va ta a, mahse ka mumangah chuan ka nu boral hmaa a hmai cher leh dang lap mai kha ka hmu a, ka harh leh chiang kher mai.



A tuk zingah chuan Romero pawh ka melh duh vak lo. Nidang angin amah hnaih tumin ka buai duh ta lo bawk a. Theih tawp chhuahin amah chu melh duh lo viau mah ila, vawi engemaw zat chu kan mit a intawng ta tho. Enge a ngaihtuah hriatpui hauh lo mah ila, kan pahnih chauha kan awmdun lo chu ka lawm ru viau bawk. Ka unaute chu a bodyguard-te chuan an zui reng a, chuvang chuan Romero pawh kan bul hnaiah a awm lo thei bik lo.



CHAPTER - 24


ROMERO :


Ka pindan ka pan lai chuan zanlai a ni ruai tawh. Luca leh Matteo nen kan pathumin card kan khel a, a zia phian. Ka rilru lakpenna tur ka mamawh miau a ni. Mahse an nupuite bula mu tura min kalsan rual chuan ka buaina ngai bawk chuan min rawn luahkhat kim leh ṭhap tho si. Engvangin nge anni pahnih ang hian ka awm ve mai theih loh ang?



Thawm ka hriat rual chuan ka ding chat a, thawm lo chhuahna chu Lily pindan ni tlatin ka hria. Ka silai hum ran chung chuan chu lam chu ka pan ṭham ṭham a. Ṭap ri leh engemaw sawia phun sep sep ri ni maiin ka hria. Midangte chu an muhil tawh a nih loh vek pawhin, khum laizawl hnathawkin an buai a ni ngei ang.



Kawngka chu hawngin ka pen lut nghal a, pindan chhung thim lutuk chu engmah ka hmu mai thei lo. Parda a inzar phui vek a, midum kawchhung ang maia thim a ni.




Kawngka chu tlemin ka khar phui lo deuh a, pindan chhungah chuan ka lut zui a. Ka tih tur ka hria, chung zinga ka hriat chhuah hmasak ber chu Lily pindanah hian kan pahnih chauha awmdun tur kan ni lo tih a ni. Mahse chu chu ka tih mek leh ka tih chak ber a ni miau mai si a.



Lily chuan mangchhia a mang tih ka hre mai a, kei hian amah venghim tlat turin thu ka tiam tawh a, a ṭul a nih chuan mangchhia lakah pawh ka venghim ngei tur a ni dawn lawm mi? Nilo, helai hi ka awmna hmun tur a ni lo a, amah pui turin Aria emaw Gianna emaw pawh kaitho mai tur ka ni. Mahse he nau hian min ti ầ zo tawh a, amah vanga mi ầ nih lah chu ka hreh der si lo.



Zan hnih liam taa ka pindana a lo kal khan, ka huaisenna zawng zawng sawmkhawmin ka chhuahtir a nih kha. Kei hi tualthah hmang leh misual ka ni a, thihna leh thisen pawhin a tihbuai theih loh khawpa pawisak nei lo ni mah ila, he nula Liliana hnar tur hi chuan huaisenna ka mamawh fo ṭhin.



Khami zan khan ka khum min ṭawmpui turin ka duh a, mahse mu mai mai tur chuan a ni hauh lo thung. Ka bula mut min dil lai khan, ka kapa pangtichawr hi a che dat a sin. Ani kha chuan pawisawilo leh rilru thianghlim takin ka bula mut min dil a, kei erawh chuan ngaihtuahna tenawm tak ka lo pu hman der chu a nih si kha.



Ka thil tih hi a dik lo. Ka hna leh familia hi ka nunna ai pawha ka dah hmasak tur a ni. Ka nula kawp ṭhinte pawh khan ka hna chu tibuai ve fo tawh ṭhin mah se, harsatna min siamsak pha ngai lo. Lily hi chu a danglam tlat. Ka chungah hian eng thil nge a tih ka hre hauh lo, mahse ka thluak bur hi a chhuahsan thei si lo.



Rilru buai tak chung chuan kawngkhar leh Lily khum chu ka melh tawn sek a, khum lam chu ka pan hnai a. Kawngka kha kharphui duh viau mah ila, hawn mai theihin ka dah lui anih kha. Ka thutiam ang khan tih ngei ka duh a nih si chuan, midangin min rawn hmu ta anih pawhin ka himna tur ka ngaihtuah a ngai ve tlat.



Lily khum bulah chuan dingin ka en ta reng a. A sam buang sei tak chu lukhamah chuan a inzam hnawk niai a, mangṭhalo a mang tih hriat taka a mithmul chuar nang chung pawh chuan a lang duhawm takzet. Hrep hian! Eng thil nge ka ngaihtuah leh tak hi…?



A darah chuan ka khawih a, kawr dar bah chauh ha anih vang chuan a vun mam tak chu hai theih pawh a ni lo. Ka khawihna avang chuan ka taksa peng pakhat chu a lo harh leh ta tlat. A ầwm bawr leh a kap bawr pawh ni loin, a dar chauh anih hi ka khawih ni! A dar chauh pawh hian min tidanglam thei chu a ni mai si a. Hetiang thil hi ka la tawng ngai bik tlat lo.



“Liliana?” A hming pangngaia ka koh chuan him deuh dawna inhriatna ka nei tlat nia.



Men tum niawm tak chuan a mit chu a che dar dar a, mahse a muhil zawm leh daih mai.


A nghawng chu dimtein ka khawih a, a marphu at at pawh ka hre thei. “Lily,” tiin a aia ring zawk chuan ka ko leh a.



Harh zawk tih hriat zetin a rawn meng nghal zat bawk a, min melh let ve ta kar mai.



“Romero?” thophang aw tak chuan a ti tham deuh ṭiak a. Ka fawh chak zia chu vante khian min hriatpui chiang a lawm.



LILIANA :


Ka nghawnga khawihtu an awm vang chuan ka harh zawk a. Ka bula ding chu tunge hriat tumin ka en a, Romero a ni.



“Romero?” ka ti sap a. Ka mumang pawh a ni maithei. Ka nu damlo hmel cher leh dang lap tawh hmuh fo ai chuan a zia khawp mai.



“Engkim a ṭha vek e.” Romero chuan a ti dut a. Ka mumang a ni lo tih ka hriat rual chuan ka hawi kual nghal ruai bawk.



“I awmna hi ka pindan a nih hi.” Ka thil sawi atthlak zia chu ka hrechhuak leh hnuhnawh, mahse ka sawi zo vek tawh si.



Mak ka ti, nihnih liam taah khan a pindan aṭangin min chhuahtir kha a ni si a, tunah lah ka pindanah hial a rawn kal leh ta si. Hetiang kher kher hi chu ka lo beisei ngam miah lo a sin.



Romero chu nui hmel a pu lek lek a, mahse a rei lo. Tunah chuan thutak hmel a pu leh tawh. A nui hmel avang chuan beiseina ka neih a hlaute pawh a ni mah na.



“Mangchhia i mang a, ka kaitho ta mai che a nih kha,” a tih chuan ka bu nghat ringawt.



Ka khum bula ding chunga rawn kun hniam a ni a, a nghawngah kuahin min fawp turin ka kuah hniam thei mai ang. Mahse chutianga tilo tur chuan ka inhum ruh ṭang mai. Min duh lo a, min hnawltu a ni tih ka hriat reng a ngai. A duh a nih chuan amah hian chet a la hmasa ve tawh tur a ni tawp mai. Mahse tuna ka pindana a lo kal hi a chet lak dan chu a ni thei mai a ngem? Ni hlauh se ka ti.



Ka ṭhut chhuah leh chuan ka puan sin lai chuan ka mal thleng chauhin a khuh a. Ka mut kawr pan tak hak chuan a khuh bo tam lo kher mai. Romero mit pawh chuan ka awm bawr chu a melh nghal kal a, ka zak duh bik miah lo.



“Min kaihthawh vangin ka lawm e. Ka mumangah ka nu ka hmu a.”



Sawi mai tur hre lo chuan ka ti chhuak sap a. Ka mumang hi hriatreng ka duh ngai lo a, tu hnenah mah ka sawi chhuak ngai lo. Romero chuan a mit lasawnin ka mitah tak min en leh tawh a. He a mitmeng thim leh thuk lutuk hian min ei zo thei mai dawnin ka hre ṭhin.



Ka bul hnaia a awm hi chuan ka hlimin, engkim mai hi a mawi zual ṭhin a, ani hi ka mamawh leh ka tana khuanu ruat ngei mai chu a ni tih hriatna ka nei ṭhin. Chu chu a tirte aṭang khan ka hre tawh a, mahse bawhzui ngaihna ka hre lo mai chauh a ni.



Romero chuan ka hmai hliahtu ka sam chu a hui kiang a, chet mai ngaihna pawh ka hre lo. Chutia a tih takah chuan kan inhnaih sauh a.



“I ngaih vang a nih chu,” dam thlap chuan a ti a.



Lu ka lo bu nghat. Ka ngai a lawm, mahse a thu min hrilh mawlh mai kha min tibuaitu zawk tak chu a ni. A thil tih chak leh tih theih tak si lohte avanga a mitmenga natna lang chhuakte kha………..engtikah mah ka theihnghilh theih ka ring tawh lo.

Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)