THE HOODIE GIRL

Episode nei ho a hlawm a dahkhawmna
SumMer Ralte
Posts: 104
Joined: September 6th, 2021, 11:35 pm

THE HOODIE GIRL

Unread post by SumMer Ralte » September 14th, 2021, 10:14 pm

CHAPTER-8



A awm dan pawh hi ka hrethiam lo, thinrim leh tihtauh hmang ka thleng thiam lo a ti zo chiah a tunah lem min thlem a tum leh bawk si a, ka thaw hak a "I hlawhchham dawn a nih hmel" ka lo ti bung nghut a "Lo mai thei bawk" mit ko tih san ralh pah chuan min chhang let veleh nghal zat a




Ei loh hmel lutuk a en in za lo zetin ka nui hak a "Mahse ka be peih si lo che a" ka lo tih chuan "Min be peih vat ang" a ti leh hram a, tinge maw a chimawm thiam em em mai le hahthlak zawk hian! "Enteh biak che hi ka phur teh chiam lo a nia, tunah chuan thian pawh kan ni leh tawh lo a min rawn thlem pawh a ngai lo ang" ka lo ti bak hlar a, engmah sawi lo in min en run reng a



Tiang te chuan min ti zam chhe vek thei mai dawn alawm maw le mawl thei lutuk mai! "Stella i ngaih ang kha ka ni lo" a thaw chhuak nghal hawk a "A ni maw" tih zawngin ka lo chhang thung a, van lam hawi chuan ka dak tlat bawk. A chhan chu he a hmeltha tak ka en chuan ka insum thei lo mai ang tih ka hlau a ni




A lam a hawi tur chuan min kuai her a, ka dar tawn tawn a vuan chung chuan "Tih zah che emaw i rilru tih nat hi ka tum lo, min ring rawh ka ti tak tak" a ti sup a, ka mit ka chhing sawk a "Stella vawiin ka chet dan vang kha chuan kan thian inkar hi chhiat tir lo hram rawh" a tih leh rual chuan mengin amah chu ka en a, amah pawh chuan min la en reng a, ka zam leh lek lek tawh



"Will.." Ka ti sap a "Immm..." Tiin rang takin min chhang ve bawk "Tinge ka thian nih i duh tlat nachhan hi, keimahah hian chhuanna tur engmah a awm lo mai pawh ni loin hmeichhe dang angin ka chhelo ve bawk si lo" ti hap in ka kun nghal lap a, amah en theih tur chuan rang takin ka khabe ah chuan vuanin min kuai dak a, engmah a sawi lo mahse min nuih sen sen thung




"Stella hmeichhe danglam tak i nih vangin maw le" a tih chuan phawk fe in ka lo en ha a "Danglamna ka nei lo, kei chu hmeichhia mahni pawh a in rintawkna nei lo leh natna in a bawh khah luk bak engmah ka ni lo" ka ti a, ka mittui a tling nghal pam bawk. Hetiang ka sawi chhuah apiang hian mahni in khawngaihna in ka khat leh thin, a tha lo tih chu hre mah i la midang ang a ka nun zalen tak a ka hman ve theih loh vang te pawh a ni ang



"Hey...shhh, min en teh" a tih chuan ka en ve vat a, a ngai ang bawkin min nuih leh sen sen tawh "Ka awm alawm, tap tawh suh le" a tih chuan a hma aiin ka tah a chhuak a, hetiang a Will an min thlem a duat tak leh min ngaihsak tak ang a a chet apiang hian ka rilru a no in ka hnuk a ulh tlat zel, ka muttui chu a luang ngiai ngiai a ka inhnit hraih hraih bawk




"I bulah ka awm reng dawn alawm, ka tan chuan hmeichhe danglam tak i ni" a tih leh chuan ka insum zo lo chu ka tap a, a awmah chuan min kuah bet a duat takin ka hnung min chul sak hliau hliau bawk a; chu chuan ka tah a tichhuak zual tulh tulh mai bawk si. A awma bei reng chung chuan a ban bulah chuan chum sak pahin "Misualpa, misual tak a ni" tiin ka la tap hluam hluam a, a lo nui ri hak a




"Misualpa hian i rilru a ti na leh tawh lo ang, ka tiam a che" tiin ka sam chu min zut sak a, a awm dan chuan ka lung a ti awi hliah hliah ka bialpa ni lo mah se min ngaihsak a min tih nat duh lo tu ka thian hi kei chuan thian angin ka en ve thei ngai dawn si lo, ka phu loh zia ka hria a mahse chutih rualin ka duh bawk si; a lak atang a in la hrang vatin leh lam chu ka hawi nghal a ka mittui chu ka hru nghal mawlh mawlh bawk




"Khawmaw kan nu tê thinawrh leh naute kha a la tap kan en teh ang" tiin min rawn fiam pah zeuh a, ka zak bawk si chu ka lo teu hlar a "Ka thin a awrh bawk lo" ka ti vin hlur a "Zaidam ve aw" min tih pah chuan a nui hak hak a, keipawh ka nui ve ta ringawt a, a nuih hian a hmeltha leh zualin ka hria ka hmuh ngun poh leh ka duh zual ting emaw tih mai turin ka awm leh nghal




Will nen pawh thla1 lai kan inkawm ve tawh a, ka chungah a tha in min ngaihtuah em em thin a; college ah pawh ka zahna turin eng thil mah a ti tawh ngai lo bawk a, miin min chhaih emaw pawh hian a chhan sawi tur em em awm lo mah se kei in ka lak huat ngai loh te hi a la haw leh vak thin a



A chang chuan kan in tih thiam loh phah fo zel, ka chhungte pawh in kan inkawm tih an hre tawh bawk a zanah a lo leng ziah a ka room bathlarah awm in hla kan ngaithla dun thin a; mahse kan mizia leh duh zawng a hrang hlak a, kei in hla hlui ka ngainat a chubak ka ngaihthlak peih loh laiin a ni chuan tunlai leh rap te, music ti dum dum chi te hi a ngainat zawng a ni thin a




Mahse tunah chuan amah vangin ka ngaihthlak ve zeuh zeuh phah tawh a, kan hla duh zawng te kan in play chhawk sak mai bakah a awmzia te kan duh chhan te kan in hrilh tawn thin, keimah ang bawkin amah pawhin hla hlui lam ngaihthlak a ching ve tawh bawk




College kan kal tih loh ah hi chuan kei tak chu ka chhuak ngai lo, zanin pawh ka tih dan ngai te in room ah ka awm a Will lo kal hun chu ka nghak a ni ber mai mahse a lo lang har hrep leh nghal dar11 a ri tawh dawn a, tun ang hunah te chuan bathlarah awmin kan titi leh daih tawh ang chu maw le




A lo kal dawn lo ang a ka hriat avangin mu turin ka in buatsaih a, khuma ka mu fel awrh tihah chuan ka bathlar lam chhuahna kawngkhar chu a rawn kik ri karh karh a, rang lutuk a khum atanga tho in kawgkhar chu ka va hawn sak a amah nuih sen sen pah chuan lut turin ka sawm a, engmah pawh sawi lo in a rawn lut ve mai bawk a




Ka khum bula couch ah chuan a thu nghal zat a, kawngkhar chu khar in a bulah chuan ka phei a "I lo kal tawh dawn lo a maw ka tia, mut ka lo tum chiah a" ka tih chuan a nui suk a, min chhang lo chu mak ka ti lutuk a "Thil tha lo thleng a awm a mi?" Tiin ngaihthat loh hmel zet chuan ka zawt a, a lu a thing a




"Lo kal ve la" tih zawngin min chhang a, tun ang hun tlai tawh lutuk ah leh nghal khawi a kal turin nge min sawm pawh ka hrethiam lo "Khawiah maw" ka lo ti he haw a, a aw then kharh kharh pah chuan "Kan rei lo ang, kan haw leh vat dawn nia" tih zawngin min chhang a "Mahse ka chhung te hi chhuah an phal pawh ka ring lo" zawi deuh tak a ka tih chuan "I dil dawn hleinem" a lo ti sam et a




Mak ti zetin ka lo en ha a "Eng nge i sawi awmzia" ka ti leh a "Rei lo te tak tak chauh a ni ang" a ti leh a, han hnial em chu ka hreh ve bawk sia bakah ka chhuah ngai loh vang hrim hrim pawhin han sneak out chu ka chak ve hranpa hrim hrim bawk "A nih rei lo ang aw" ka tih chuan a lo khi ver ver a lu a bu nghut bawk




Ka sam lem chu khum in a chungah lukhum pangngai chu ka khum leh a, zan a nih avangin mi min hmuh ring chiah lo mah i la ka hoodie lian tha zet chu ka ha nghal sawk sawk a, a lama in her leh vatin "Ka inpeih e" tiin ka nuih ver ver a, ka hmaah chuan rawn dingin ka lukhum min siam that sak pah chuan "I hmeltha lutuk" a ti sup a, min nuih ve ver ver bawk, phawk fe a melhin sen sawn mai nachang pawh ka hre lo




Ka chil ka lem khalh a, ka lai lutuk leh zak lutuk chu ka hmai sen sa pawh a sen belh leh tawn tawn tawh ngei ang chu! "Kal ang le" tih leh ka banah chuan min kai a, bathlar lam atang chuan min chhuah pui ta nghal a, ka awm dan te chu ka khawr vel vekin ka hria Will hian vawikhat mah khatiang khan min la ti ngai lo a, a rawn sawi chhuah pawh khan mak ka ti hle a nih kha




Ka room leh a room hi inhnaih te a awm a nih avangin in a rawn len dawn pawhin a rawn lawn mai zel a, tunah pawh amah zawk chu a room bathlar lamah chuan a lawn phei hmasa te te phawtah chutah min rawn banin "Ka lo veng ang che, i rawn lawn kai thei ang tiraw" a tih chuan bu khum nghauh pahin ban inkham phei ah chuan ka lawn a, ka tlak mai loh nan amah pawh chuan min lo veng ve kar bawk




A room bathlar ban ka rah dawn chuan ka ke ah min vuan chiah si lo hian min lo veng a, a bulah thuthlengah chuan rawn lawn sangin "Lo kal rawh le" tih leh ka zak pahnih ah chuan dawmin min hlan thlak a tum a, eng nge maw hi rap sualin min hlan thlak hma chuan amah chu ka va bawhthlu tawp a



A lo in ring chiah bik si lo nen chhuatah chuan ka tlu dawn a, a awmah min kuah bet a ka hlau lutuk chu ka thi dawn a maw ka ti hman hial ka meng ngam lawk lo a "A tha vek tawh e" a rawn tih chuan min kuahna atanga tal hrangin ka meng a, amah ka en chiah chu min lo en ve chiah bawk nen kan mit leh mit chu a in tawng chiang kher mai




Awm sawn mai nachang pawh hre loin kan in en reng a, ka biang chu rawn dawmin min kuai hnai a eng nge a tih dawn tih ka hrethiam mai lo chutah rawn awn chho in min fawh a tum a ka chil ka lo lem khalh, ka maimitchhing nghal vat bawk a mahse kan bulah zawhte a rawn hram avang chuan ka phu chiam pek a




In la hrang vatin ka tho chhuak nghal a, amah pawh chu a rawn tho ve ta nghal a min nuih vur vur pahin ka darah chuan a dawm a min kuai herin a hmaah chuan min kaltir in min nawr kal dat dat a, a room ah kan lut a couch ah chuan thu in ka lo nghak a; nichin kan awm dan avang khan ka la mumal thei meuh lo ka sa pap pap reng a, ka hmai te chu a sen leh nasa tawh kher ang chu ka lungphu thleng chuan a la dik thei lo a




Ka awm chu ka dawm leh vang vang thin a, chutia ka awm dawm paha amah ka thlir reng lai chuan a lo hawi a, kan in melh fu leh ta chiah e rang lutukin ka hawisawn vat a; a la nui ri hak thung, aw then kharh kharh pahin "Khawnge kan kal dawn?" Tiin ka zawt ta ringawt a, kawrlum hak mawlh mawlh pah chuan "Kan thlen hunah i hre mai ang" a ti awlsam et a, sawi leh tur mai ka hriat tawh loh avangin ngawi rengin a che lai chu ka en ta reng a




"Kan kal thei e" tih leh min kaih a rual a, a room atanga kan chhuah chuan ka zam lutuk chu ka pawt ding leh rih a "I...i chhungten min hmu ang e" ka ti a "Tuman min hmu lo ang" tih leh kal leh mai a tum chu ka pawt ding leh "I chiang chiah a maw" ka ti leh hram a, a chhungte min hmuh mawlh chu ka hlau a "Ka nu leh pa te an mu tawh a, Lala-i chu a duty bawk a chuan kan kal thei tawh em" min nuih ver ver pah chuan a ti leh ka lo bu nghauh a inhnuai lam pan chuan a dim thei ang berin kan kal a




Lala-i a tih chu a û a ni a, doctor niin min enkawl tu ber pawh a ni bawk; kawngkhar chu dim te in a hawng a chhuak hmasa tur a min tih zet hnuah amah pawh chu rawn chhuakin dim te in kawngkhar chu a khar tha leh thlap a, an in bul maiah a bike a dah dawn a maw ka tih laiin kawngah chuan min kal phei pui a, mak ti fe in ka lo en ha a




Kawngchhak maiah chuan a bike chu tha takin a lo hung a, chuang nghal in a ti nung vut vut a chuang tura min tih hnuah ka chuang ve ta a; kan kal na tur hmun a sawi duh loh avang chuan a tih ang ang chuan ka awm a kal lamah chuan "Tinge khatah daih daih khan i bike i dah a?" Ka ti a "In kawta ka dah chuan ka chhungten kan thawm hria in an lo tho ang tih a hlauhawm" a ti tha ve mai a ka chhang tawh lem lo




A tlan chak si a ka tlak hlau chu a kawngah chuan ka kuah bet a, a hnungah chuan ka bei bawk a; tiang hi ka la tih ngai loh a nih avangin nuam ka ti hle a, thli thaw heuh heuh dawn te chu a nuam tak zet maimitchhingin eng eng emaw te chu ka ngaihtuah a, ka duh ve tih hi hria se engtin nge a tih ang le tih mai mai te chu ka ngaihtuah a




Ka phu lo ka tih tawh kha, ka tan chuan a sang lutuk mah mah mahse hetianga kan awm reng chuan min la hrechhuak vat ang tih pawh ka hlau hlel lo; a chhan chu thian angin ka en theih loh chang a tam a, a mipa zawkin thian ang a min en laiin a hmeichhia zawkin ka thei lo lek lek zel thin chu nep ka in ti ru tak zet a mahse ka in control theih piah lam thil a nih avangin ka tan tih ngaihna a awm si lo chu a nih hi!




Kan thleng e a tih chuan ka meng chhuak a, kan awmna hmun chu ka hre mai lo kan bul velah te chuan bike dang a lo awm teuh bawk a, hmeichhia te pawh an awm nawk bawk. Bike atanga ka chhuk thla chiah chu kan lam panin Remmawia leh Zawma te chu an lo kal a min hmuh rualin Remmawia chuan "Ehhh! I lo kal ve a nimaw" a lo ti luam a, chhang lo in ka lo nuih ringawt thung




Zawma chuan "Mi thar...." A ti chiah chu lo pawt chat vatin "Stella" ka lo ti nghal a, nuih suk pahin "Zanin chu nuam i ti ngawt ang" a lo ti ve nghal luam bawk a, kan awmna hmun chu ka hriat loh mai bakah helai hmunah hian engti tura kal nge kan nih pawh ka hre lo "Hei hi khawilai hmun nge?" Ti a Will lam hawi a ka zawh chuan "bike in tlansiak kan en dawn mawle" Remmawia zawk chuan min lo chhang a, ka hau in Will ka lo en thung




Min chhang lo in Will chuan min nuih ringawt a "Min hrilh lo a" ka tih chuan "I lo kal duh ka ring lo a" a lo ti mai a, nia hre ngat i la chu ka kal duh ka ring lo mahse ka kal tawh a lungawi vak lo mah i la lungawi lo hmel hmuh kher ka tum lo. A awmdan te hian min thawng thut thut reng mai dawn chu a nih hi!



"An tan tep kal i la" Zawma'n a lo tih chuan "Lo va kal ru" Will chuan a lo ti a, kal mai ta lo chuan amah chu ka en reng a "I lo kal ve dawn lo a mi" tiin ka zawt a "Kal dawn e, lo va kal hmasa rawh ru" tih pah chuan ka lukhum khum lai chu min siamthat sak mawlh mawlh a "Rei suh aw" ka ti leh hram a, min chhang lo in buk nghauh pah chuan min nuih ta zawk a




Zawma nen a kan phei lai chuan "Hetiang hi a hlauhawm em?" Tiin ka zawt a "Hlauhawm ve tho e" sam zet hian min chhang a "Will kha a tel ve dawn a mi?" Ka zawt leh a "Tel lo thei nang, a ni te chu a pawimawh ber alawm a nih" a ti leh a, ka hrethiam lo lutuk chu ka en haw a "Engti zawngin maw" ka ti leh a "Engkimah" tih zawngin min chhang thung




"Kan thleng e, hetah hian thu ang aw" a tih chuan a hma lamah chuan min kal pui a "Remmawia kha a tel ve dawn a mi?" Ka ti leh a "An pahnihin an tel ang" tha tak chuan min chhang ve zel a "I tel ve dawn lo a mi?" Kan thut fel hnu chuan ka zawt leh a "Vanduai thlak takin ka tel dawn lo" min nuih pah chuan a ti a "Tinge?" Ka lo ti leh hman hram pek





"Khalh turin ka chak tawk lo a" a ti leh mai a "Engti zawngin" ka ti leh a "Ka ke ruh a tliak tawh a" a tih chuan ka lo en haw a, zawhna zawh tum a ka ang leh chu "En tawp la i hre mai ang" min lo tih khalh a, zawhna pawh zawt tawh lem loin ka ngawi ta zawk a; zawhna ka ngah lutuk a, a lo ning hman pawh a ni mai thei a ni





Bike in tlansiak naa a tel hi ka ring ngai lo reng reng, ka rin loh dan zelin a awm a; min thawng reng mai chu a nih hi! Mahse ka duhna a nep phah chuang si lo. Rei lo teah bike chu an rawn tlan khawm a, line ah chuan an in tlar a Will chu kan lam lo hawiin kut a rawn vai zauh a, a hawi let leh nghal vat thung. An tlan chhuah hma hma chuan tlan chhuah hmasak chak ni awm ang hrimin a hma lamah chuan bike chu a in lawr tawn sek a





A tlan theih chiah tih chuan chak lutuk in an tlan chhuak nghal a, hmuh pawh ka hmu hman lo an phe fua ni mai hian ka hria; ka hlauthawng lutuk chu ka awm ka dawm vang vang a, Will chu a chesual ang tih mawlh ka hlau a thinphu dep dep in ka lo thlir reng a, an rawn lang har bawk si chu ka ngaih te pawh a ti tha lo rum rum tawh a




Ka awmdan atangin Zawma chuan ka hlauthawng tih a hria a ni ngei ang "Hahdam tak khan awm rawh Stella, Will te chu a ngaihtuah awm loh" a rawn ti a "Mahse chesual palh ta se" ka lo ti vat a "A chesual lo ang, a ni te chu he race ah hian champion lai mek a nia tuman an hneh thei ngai lo" a lo ti vat a "Chupawh chu nise" ka ti leh hram a, ka hnung ben thak thak pahin "Ring tawp rawh" a ti leh a




Ka thin te pawh a ti rim dawn dawn mai, hetiang thil lo tih reng reng; chesual palh ta se nunna chan theih hialna a ni asin maw le, tinge maw a mawl em em mai le! "Saw an lo lang e" phur zetin Zawma chuan a lo ti a, a hawina lam chu ka hawi ve nghal vat a Will chuan hma a rawn hruai a, a hnungah Remmawia'n a rawn zui ve bawk




Rei lo teah chuan an rawn thleng a "Ka rin dan chiah a ni" Zawma lawm tih hriat zet hian a ti a "Eng nge awmzia?" Ka lo ti leh he haw a "Will pakhatna a ni leh tawh" tih leh "Kal ve ang" tiin min kai thla nghal dawr dawr a, an bul kan thlen chuan Zawma chuan "Hey dude, congrats" tih pahin a ban bulah na lo te a hnek in an in kuah nghal a




Ka hlauhthawnna a la reh chiah bawk si lo nen chuan Will chu ngawi rengin ka lo en a, a hmeltha telh telh ni mai hian ka hria; tuna a awm dan leh ngat phei hi chuan a ti lang pa leh zual, ka lam a lo hawi chuan min nuih sen sen a "Ka lawmpui a che" tha tak chuan ka lo ti ve a



"Ka lawm e" a ti a mahse a mit a la sawn lo min reng avangin ka lai leh tawh tak zet, ka hmai te chu a sa leh hat hat tawh a, a sen leh tawl tawl tawh ang chu! Ka hawisawn vat a, a nui huk ri chu ka hre zawm nghal zat



"Lo kal teh" tih leh bike atanga lo chhukin min kai a, min kalpui nghal dawr dawr a tlema thim deuh lai leh tuma awm lohna kan thlen chuan "I lungawi lo em?" Te chu a ti ve ngei a "Lungawi lohna chhan tur a awm em ni" ka lo ti a "Hetianga ka tel ve hi maw le" a tih chuan ka lo nui suk a "I thu vek alawm, ka sawi theih a awm hleinem" tha tak chuan ka ti a




Nih pawh a ni reng a, thuneihna ka neih loh mai bakah a tih leh tih loh tur hrilh tur hian a bialnu pawh ka ni lo a, a thian mai chauh ka nia chuvang chuan engpawh ti mahsela ka tih theih tawk chu amah lo tawiawm kha a ni mai a "Min lo en teh" a lam a min kuai dak pah chuan a ti a, ka en ve mai a "I hmeltha tak zet" a ti sup a, ka lo lai chhe leh hle tawh



Zanin ah hian hmeltha min tih thu vawihnih lai a sawi tawh! A kut pahnih a ka biang tawn tawna dawm pahin a rawn kun hniam a, eng nge a tih tum chu ka hai tawh bik lo; a chhan chu tuna kan awmdan hi nichin a kan awmdan ang chiah kha a ni tih ka hriat chian em avangin ka lo maimitchhing vat a, men pawh ka meng ngam tawh lo




Chutah ka hmuiah chuan min rawn fawp ta mai! Phawk zetin ka meng chhuak a a kawngah chuan nghet zetin ka lo tham sak bawk a, Will chuan min fawh pah chuan min nuih ver ver a; chutah a kut pakhat chuan ka mit chu rawn hupin min fawh chhunzawm leh nghal zat a, a duh tawk mai dawn emaw ka tih laiin a aia na leh uar zawk chuan min rawn fawp leh ta zawk a!




[Ads click kha theihnghilh lo hram ila, ka story te i ngaihnawm i tih a i ngaihnat zawng a nih chuan like leh comment kha min lo pe ve hram la😚🤗]



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)