THE HOODIE GIRL

Episode nei ho a hlawm a dahkhawmna
SumMer Ralte
Posts: 104
Joined: September 6th, 2021, 11:35 pm

THE HOODIE GIRL

Unread post by SumMer Ralte » September 16th, 2021, 11:05 pm

CHAPTER-10

Will Pov


Ka man bet chung pawhin a la tal ve phat phat a, henu hi ka rin aiin a chak phian! A thinrim pawh a la in bengdai thei meuh lo tih a hriat a, ka in rin loh lai chuan min kherh pawp a leiah ka thal der mai; ding tha sauh sauhin Thazuali lam chu en in "I mi cho loh tur cho tawh ngai suh" a ti a, a aw chu a ring hauh lo mahse thinrimna a khat tih hriat lutuk leh tih luih ngam a ni tawh lo tih hriat lutuk in a sawi thung




A sam lem pawh chhar tum tawh lo tih hriat tak leh mi pawh en tawh eih lo chuan classroom lam a pan phei nghal hlawk hlawk a, a kal liam hnu chuan a sam leh chu chhar sakin ka nui suk ringawt. Hmeichhe huaisen tak leh a duh loh naah chuan tih luih ngam a nih loh zia ka hrechhuak bawk




Remmawia leh Zawma te pawh sawi tur hre lo tih hriat takin an lo ang phiau a "Kal ang" tih leh classroom lam pan chu ka rual a, min rawn zui ve vatin "Hey dude, kha kha eng nge awmzia?!" Mak ti tak a Remmawia'n min zawh chuan chhan ka tum hran lo, Stella nihna dik tak hi hre ve vek se a tulna a awm lo tun atan chuan an hmuh chin kha a tawk viau a ni




Class a kan lut tur chiah leh Stella bag nen a rawn chhuak tur chiah chu kan in tawk a, a banah lo vawn sak vatin "Khawnge i kal dawn?" Ka ti a, min chhang leh ta chuang lo tun a a awmdan hi chu kan inhriattirh a Stella hmeichhe nghal leh chimawm ang mai khan a awm leh tawh




Ka thiante pahnih pawh ngaihsak loin ka bag chu ka la rawk rawk a, Stella chu ka um ta nghal a; a hnungah chuan ngawi rengin ka zui a, a tap a ni ngei ang a mittui chu hru ni awm takin a awm leh thin a. Hetianga rilru na taka a awm leh a tah lai hmuh hi hrehawm ka ti thin, ka chhungril khawilai emaw hi a na ve zawk zel engvang nge ka hre lo



Basketball court chhak a waiting sheet ah chuan a thu a, a piah lawkah kei ka thu ve thung. A hmai hupin a tap khur dat dat a, va pan hnaihah a hnem pawh ka chak ve mah se mi thlem hi ka thiam thlawtlo, ka tum ve tak ngial pawhin he thilah kher kher hi chuan ka hlawhchham chiang hle



Rei tak hmai hup meuh a a tah hnu chuan a thu ngawi reng a, keipawhin ka pan ve ta nge nge a; sawi tur hre lo mah i la ngawi rengin a bulah chuan ka thu ve reng a, amah ka en chuan tap leh duh mai hmel a pu bawk




Stella lo luh tirh khan ka mit a la nghal em em a, a mize dang tak te, a hoodie hak reng thin te, a engkim kha hmeichhe dang nen an in ang lo tak zet; a nghal in a chimawm tel tlat bawk a mahse chu lai tak chu lawmawm ka tih na lai a ni lawi si, min be hmasa ngai lo a ka lakah nelawm takin a awm ngai lo



Mahse mak tak maiin ka nel nghal em em a, amah tihbuai te kha nuam ka ti thei hle thin; thawk khat lai atang khan kan thenawmah hmeichhia lungleng leh khawhar tih hriat taka a guitar nen a zai ri ka hre thin, ka room nen a in zawn chiah a nih avangin ngawi rengin ka room bathlarah chuan thu chhuakin chunu zai chu ka ngaithla thin




Hla hlui hi ka ngaina loa, ngainat a hnekin boring ka ti thin. Kei chuan rap leh music ri dum dum chi hi ka ngai na a, chu chauh chu ka ngaithla thin mahse khanu zai ka hriat hma kha chuan! A zai zawh apiangin van lam a thlir ziah bawk




Hmeichhe khawhar tak leh thinlung vawt tak kha tudang ni loin Stella a ni tih ka hriat khan mak ka ti a, kan thenawma an awm tih ka hriatna pawh khami ni tlaia ka zui haw tum kha a ni nghe nghe bawk, chu chuan amah min hriatchian tir chak leh zual a henu hi eng nge maw tak chu a ni ve in ka hria



Min ning tih hre reng mah i la, amah tihbuai ka thulh phah lo a chutih rual chiah chuan mi thungrulh let dan pawh a hre hle ka sawi tawh kha hmeichhe chimawm ve tak chu a ni. Khami zan sam a nei lo tih ka hriat zan a, a mitmeng a hrehawm tihna leh rilru natna kha ka hmuh hmaih hauh lo




A tuka college kan kal pawh khan biak a tihbuai chu chak viau mah i la, a hma zana ka chet dan vang khan ka inthiam lo a; amah ka biak a, ka tibuai a nih chuan hrehawm a ti leh zual ang tih ka hlauh avanga be lo chauh ka ni mahse khami tuk atang khan a reh ta hmak a, a zai hriat tur a awm loh mai bakah college ah tak ngial pawh hmuh tur a awm lo




A hming ka hriat loh lam chu thuhran ni se, amah han biak pawh na tur ka nei lo a; chutianga a awm chhan chu keimah vangah ka ngai a, hrehawm ka tiin ka inthiam lo hle bawk mahse thla1 hnuah mak tak maiin college a rawn zawm veleh ta hlauh a, a chhan sawi tur hriat si loin ka lo hlim ve em em ringawt bawk



Mahse le, eng a hria chu nimaw ka bike ke min tih thep sak ringawt leh nghal, kha kher kher kha chu ka pal zam thei meuh lo. Ka bike ka duat leh ka uluk em em a ran hlek pawh ka duh loh laiin a ke min tih thep sak a nih chu! A mize danglam tak leh mak tak mai a a chet thinna te hian amah hnaih min chak tir zual mai bakah hriatchian chakna in ka khat tulh tulh bawk




Tuk khat ka exer la tur in atanga ka chhuak chu exer la tur a a chhuak lai ka hmuh chuan tihbuai ka chak leh tlat pek a, amah chu zuiin engtin mah tih tum lo mah i la tih hlauhthawn ka chak vanga zui ve hrim hrim pawh ka ni mahse ka tum ang erawhin thil a kal lo thung



Sam a nei lo tih ka hriat hnu lawkah a taksa bel kang ang mai a sen tut leh phuhlip nuaih ka hmuh khan mak ka tiin min thawng hle bawk, chutah keimah vangin a thaw a hah phah bawk a; hmeichhe luhlul leh ngeng tak ang a lang kha chumi ni chuan a tap asin!




Ka duh em tih hi chiang thei rih lo mah i la, tunah chuan ka rilru zawng zawng hi amahah hian a awm tawh tih erawh ka chiang viau thung; kan in hriat tirh atang khami ni a thawhhah ni leh vawiin hi a tah vawi2 ka hmuhna chiah a ni bawk, hmeichhe tawrhchhel tak leh paukhauh tak a ni




"Will?" Kan ngawih rei dun tak em avang chuan a tawng hmasa zawkah a tang a


"Immm"

"Nichin avang khan ka tihpalh"

"Engvangin maw?"

"Ka kherh tluk che kha" inthlahrun hmel taka ka lam lo hawiin a then nghal sak bawk "I chak hle mai" min ko san ralh pah a ka tih chuan, a nui hak hak a "A ni daih ang, ka taekwondo black belt nihna ka han show ve mai mai a nih kha" a tih chuan mak ti fe in ka lo en a, in tih theih hmel fe in min lo en thung



Hmeichhe derdep leh chak lo tak ang a ka hriat thin kha a inthlak nghal hlawk in ka hria, hmeichhe pakhat hi chu a ni ve chiang alawm! Mak reuh lutuk mai! "Mahse i bialnu ka ti na erawh ngaihdam ka dil leh hram aw" ngeiawm zet chuan min rawn siai pek a "Bialnu ahh!!" Ka ti ha a



"Aw" tih zawngin min chhang, thinrim a hnekin min ka nuih a za zawk ka bialnu ang a a ngai chu mahse a awm lo hran lo e a chhan chu hmanah kha chuan ka bialnu chu a ni ve tawh ngei thin alawm, min kawp hma zawng kha chu! "Chu bialnu nei turah min ngai tihna mi?" Ti a ka zawh chuan "Ngai pawh ni loin a chiang reng alawm, khati em em a hauhna tu che i nei chu" a tih chuan ka nuih a za vak tawh lo kher mai




Thazuali nen school kan kal lai atanga inzui tawh kan ni a, ka hmeichhe duh ber a ni thin; midang biaksan leh melh san chu sawi loh atan ka rinawm ve hle thin. A mipa pawh rinawm taka ka awm laiin a ni chuan min phatsan a, ngaidamin a tlawm zawkah ka tang zela a chhan chu mi ka atanga hria ka ni a, hriatsual a awm palh ka rin vang pawh a ni pakhat



Mahse ka ngaihdam hnuah kha min kawp tu pa nen an awm dun a an infawh lai ka phawk tak meuhah chuan ka tawp chiang hle thung, a hnuah inchhir in lo let leh te pawh a tum ve ngei alawm mahse lo ngaidam leh ta i la, min kawp leh duh mai ang tih tunge hre thei?




"Sawi tawh lo ang" ram hmuk a ka tih chuan "Ngati maw, a la nuam ve alawm" nui kur kur in a ti a "A hmelchhe emai, ka bialnu atan pawh ka duh lo" ka tih fiam takah chuan a ai nasa in a nui a "I hria em Will, fiamthu thawh pawh i lo thiam ve tho a nih hi" a tih chuan ka lo rum nghut a




"Ka lawm e" thu tak deuh a a rawn tih leh chuan "Engvangin maw" ka ti a "Hrehawm ka tih laia ka kianga i awm vangin maw le" a ti leh a, ka chhang lo amah chu ngun takin ka en a a hnuk a ulh leh tawh niin ka hria "I hria em?" A ti nawn leh a "Eng chu maw?" Tiin ka lo zawt let ve vat bawk



"Thian ka lama tang tur hi ka neih leh pawh ka ring tawh lo asin" a tih chuan a hnit hrawih a, han chhan mai dan tur pawh ka hre lo; a vawi3 nan ka hmuhah a tap leh ta! A tah apiang hian hrehawm ka ti a, ka chhungril khawi emaw lai hi a lo na ve vawng vawng zel




"Ka awm tawh alawm" ka tih chuan "Imm... I lakah hian lawmthu sawisen loh tur ka ba nasa tak zet, mi ka nihna ang ang a min kawm hmasa ber tu i nih avang pawhin" a ti leh a, chutianga hrehawm ti tak a a awm chu ka duh lo tak zet "Hmeichhe huaisen leh chak tak i ni tih ka hria" tih pahin ka va kuah a, a lo inhnit nghal hrawih hrawih bawk



"Will?" A rawn ti leh a "Immm.." Tih zawngin ka lo chhang thung "Ihh... Ka ril a tam" a tih chuan ka insum hman lo ka nui chhuak huk a, ka kuahna atanga in la hrang vutin thip zetin min melh nghal ram ram bawk, ka dar ka san khum ak a "Ka energy khanu lakah khan ka hmang zo vek a, ka ril a tam alawm" a rawn tih leh chuan "Ok.. Eng nge i ei duh?" Tiin ka zawt a




"Ka hre lo" a ti leh ang lawi a "Engpawh i ei chak ka lei ang che, sawi la" ka tih chuan "Nitin min lei la" min tlawn deuh pahin a ti leh a "I tah tawh dawn loh chuan" ti a ka chhan chuan "Ka tap bawk lo aw, ka mit a thlan alawm" rang fe a ti lehin min melhrum leh nghal vak a, mi melhrum hi chu a sam thin teh e



"Kal ang, kan nu tê thinawrh hi a in awrh leh tak tak hmain in ei puar vat angai" nui ruh ruh chung a ka tih chuan "Chimawm" tih zawngin min chhang a, heipawh a tih dan tho, chimawm hi min ti let zawk khauh zel a; chhang loin ka kal a, ka hnungah min lo zui ve dat dat bawk




Hmeichhe ngeng leh nghal tak anga lang si hian, a lawmawm leh riau thin; college canteen kan thlen chuan a ei duh zawng chu chah turin ka ti a, egg roll leh coffee teh tlawng zu han chah a maw le! "Ka ril a tam i ti maw ka tia?" Ka tih chuan "Tam e" te chu a ti ve mai bawk a




"I va chah tlem leh si ve?" Ti a ka zawh chuan "Nitin min treat dawn bawk sia, ka chah teuh chuan nidang zelah min treat na tur i nei tawh lo ang tih ka hlau a" a ti reuh a "Nitin in treat na tur te chu ka nei alawm, i duh duh chah rawh" ka tih chuan "Aih ka duh lo" a ti veleh tlat bawk a




Kan eitur chah a lo thlen chuan a ei nghal tan tan a, a thil ei lai chu a hmuhnawm phian mai leh nghal; ka en char char tih a hria a ni ngei ang, a lai leh tawh kher mai a hmai pawh strawberry ang maiin a tai leh hlar tawh, duhawm thin lutuk hian!



Kan ei zawh chuan "Kan kal dawn nge, kan haw dawn?" Amah ngaichang deuh a ka zawh chuan "Kal ang" a ti a, a in rintawk zia chu mak tak a ni. Khati zo zai hmaah Thazuali khan zak takin a siam a, class kal leh ai chuan haw a duh zawk ka rin teh reng nen



Ka rin loh dan angin a la awm chho zel zawng chu a nih hi! "I haw duh ka ring a" ka tih chuan "Ka nihna hi thup hlen theih a ni dawn lo ka tih tawh kha, nichin vang mai mai a tlanchhiat san ka tum a nih chuan nakinah pawh ka tum zel ang a engtikah mah ka paltlang thei nang" a ti leh khauh a, a puitling ka ti tak zet




"Ok... Nih chuan kal i la" ka ti ve ta nge nge a, corridor a kan phei lai te chuan midang ho chuan an en hrek hrek reng a, a ni erawh chuan an en a ni tih hria ang pawhin a awm lo; a awmdan ngai chuan a awm a, a hma a Stella hmeichhe nghal leh chimawm tak khan a lang leh tawh



Miss Zotei class a ni a, a dan ngai te ang bawk in a muthlu leh bak bak tawh; class danga muthlu ngai mang hlei lo hi Miss Zotei class ah hian tih tak zetin a mutlu thin, dik tak a sawi chuan a explain thiam loh mai chu thuhran topic chhung a lut tak tak si lo hian a lehkha zirna hmun te leh eng eng emaw hi a sawi hmasa kual duah thin a




Ninawm lamah a kal lek lek thin reng a ni "Will min lo kaitho rawh aw" tih leh a thutna chu siam tha sauh sauh in dawhkan a bawh zui zawm nghal a, ka lo nui suk thung; hmeichhe enghelh nei lo ve tak chu a niin ka hria



Class kan ban chuan basketball team ho inhmuh khawm a ngaih avangin Stella chu ka hrilh a, mahse min lo nghah tur thu in min chhang let khauh; "Kan rei mai thei asin" ka tih pawh chuan "A ho lutuk" ti ve mai a, sports a hnaih tawh avangin practice leh tan a ngai tawh a tlai tin min nghak anih chuan a haw tlai phah hrep dawn a nih hi




Tlaiah chuan min nghak ta ngei a, eng eng emaw kan sawi hnu chuan rei lo te practice tur a an tih avangin basketball court lamah chuan kan kal leh a, kan piah lawk ah chuan thu in kan khel lai chu min lo en ve reng a, ning hmel pawh a pu hran loin ka hria; practice mai maiah te chuan a tan hmel zawk a




"Will tang rawh" tiin min lo au chhen bawk nen, thian te ho chuan engmah sawi lo mah se min en in a nui leh thin a; ka zak ve lek lek "I haw chak tawh em?" Break kan neih lai chuan a bulah pheiin tui in pah chuan ka zawt a "Aih chak lo" a ti ve mai a, kal leh nghal mai ka tum chu "Entehhh..." A ti hluai a



"Immm sawi la" ka ti a "Vawikhat chauh ka lo khel ve" a tih chuan ka nui hak, a thiam ka rin loh lutuk vang zawk pawh a ni ang "Kan ban hunah aw" ka tih chuan, a hmui a ti pawrh a "Tunah in rualin ka tel ve chak alawm" a ti leh a, ngen ngawl zet a min dil avangin han hnial tun chu ka hreh ve tho bawk nen ka rem ti ve ta nge nge a



Thiante ho awmna a kan phei lai te chuan midang ho chuan min lo en he haw hlawm a "Stella hi a lo tel ve dawn a" inthlahrung deuh tak a ka tih chuan an lo nui huk hlawm a "Han tel ve se" midangin an lo tih ve takah chuan a phur hmel leh zualin ka hria, a then thaw reng a



Kan khelh leh hma chuan "Ball in lo per palh ta che se la, i hlau lo a mi" ka sawi thaih ve deuh a "A teuh lo, hlauh loh dan chu pui tak a ni" a lo ti sam et a, a khelh chak lutuk leh phur lutuk hmel ka hmuh chuan tihngaihna tak pawh ka hre lo, ka thaw hawk a "A nih lo kal mai teh" ka ti ta ringawt a




"Min lo ngaithla lawk teh u, eng e maw ka ti dawn a tumah in sawi zui awih loh" te chu a la ti tak ang deuh deuh a "Aw le, miss" midang ho chuan an lo ti ve bawk, a thutna lamah phei leh hnak hnakin a hoodie chu a va phelh ta mai! Henu hian eng nge maw a hriat teh hrep ni!



Midang ho pawh chuan mak ti fe in an lo en a, a confi hmel lutuk te chu mak ka ti zawk; nichin lawk a, rilru na leh hrehawm ti takin a awm zo chiah a tunah lem a confi leh hle tawh chu a nih si hi, kan bul a lo thlen chuan "Ka hman e" te chu a la ti tak deuh deuh a "Yoo bro, tikhan a tha zawk" midang chuan an lo ti a



Amah lah chu a nui ang hawk hawk a! Inkhelh kan tan chuan ball hlauh te chu sawi loh, a thiam em em mai leh nghal a; a vawikhat khelhna a ni lo tih chu he laia awm ho pawh hian kan hre vek thei hial ang chu maw le, mi chhuh sak dan leh bum dan te chu a thiam reuh phian a




Duh tak tak se zawng, an chhuh hneh dawn lutuk mahse hmeichhia a nihna angin an dim mai pawh a! Midang ho pawh chuan mak an ti ve tih an hmel atangin a hriat theih a, practice tawh loin kan khel ho mai mai tawh a ni ber



Kan zawh chuan midang ho pawh chuan a hman apianga lo tel ve tur tein an sawm a, min rawn deuh tih hriat tak a min en chuan chhang loin ka lo nuih ringawt a, a nihna takah chuan ka phal chiah lo bawk a chhan chu heng mi te ho en dan hi dik miau hek hlawm lo i




Ka mak tihna a la reh chiah lo bawk nen, ka rin loh dan leh awm tur ang a ka rin loh apianga a awm zel chu mak ka ti a, kan thutna lam kan pan lai chuan ka lo en leh vung vung thin a; kan inthlak mawlh mawlh lai chuan "Nang hi patil a mi i nih?" Ka ti ta ringawt a, a ni lah chu a nui nasa em em mai leh nghal a




Ka rilru zawng zawng ka sen ral thinna, duh deuh ang a ka inhriatna hmeichhia hi hmeichhia ni loin Patil maw a nih?! Kei hian Patil ka lo ngaizawng reng tihna em maw ni dawn le? Ka ring chiah bawk si lo mahse... Mah se tih a awm tlat "Patil maw i nih?!" Ka ti nawn leh hap a "I la hre mai ang" tih zawngin min chhang thung!




[Ads click kha theihnghilh lo hram i la chua ka story te ngaihnawm i lo tih a, i chhiar duh zawng a nih chuan like leh comment kha thahnem ngai takin han ti leh hram i la hmeltha lutuk ho😚]



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)