Stella mut hnu rei lo teah Remmawia leh Zawma te pawh an rawn lut a, sawi mai tur kan hre lo tlang nge thut na awmah chuan ngawi rengin kan thu tlang hlawm a; ka hmaa hmeichhia chauh hmel tak leh dawldang zet muhil bam mai chu khawdang hawi lek loin ka en reng a
"Will, kan hawsan phawt ang che u aw, Stella pawh ngaihtuah awm lutuk a ni tawh loin ka hria" an thutna atanga thochhuakin Remmawia chuan a ti a, tawng ka a chhang loin lu ka buk khum nghat thung. An kal tur chu ka darah an rawn beng thak thak a, tichuan room chu min chhuahsan ve ta nghal a
Ka thut na atanga thochhuak ve lem loin an kal liam chu ka lo thlir mawl tawp thung; ka lo muhil ve ngei ni tur a ni ka lu a tawk tu an awm tih ka hriat chuan ka meng a, Stella chuan engmah pawh sawi loin min lo en reng a nuih sukin "Eng nge i an tawh?" Ka ti a, min lo nuih let ve sen sen pah chuan "Ka tha lutuk" a ti ve mai bawk a
Hetiang a ni chung pawhin na hmel put a duh ngai lo a, lungngai hmel vawikhat mah min la hmuh ngai lo bawk; a natna chuan a tibuai pha ve lo emaw tih mai turin a mizia leh a awmdan ah chuan a ti lang ngai lo a, a hming Lalnunhlimi tih chu a awmdan hian a tifiah chiang hle niin ka hre bawk
"Will...?"
"Immm.."
"Ihh... Ka ril a tam" inthlahrung taka min en paha a then sak chuan, insum zo loin ka lo nui chhuak hawk a; thu khun tak a sawi dawn emaw tih hian a riltam thu hi min hrilh daih zel, a fiamthu emaw tih laiin a thu tak leh ang lawi si a
"Eng nge i ei chak?" Ka ti a, eng ber hi nge a huat a a huat loh hre ve kil kelh lo mah i la ka hriat chhun leh ka hriat chian em em chu artui a ei thei lo tih zawng hi a ni "Artui" a tih rual deuh thaw chuan rum lutuk in ka melh a, nui hak hak chungin "Ka ti mai mai a nih kha, tunah tak chuan mushroom soup ka ei chak" a ti mauh mai a
A ril tam thu a sawi apiang hian Pizza emaw Kfc lam a ei chak ka ring thin a nia mahse thil ho lam te te, puar tham loh tur ang pui pui hi a ei chak leh daih ang lawi a, hriatthiam hi chu a har thin a ni
"Kan ei dawn nia, kan chah ange" ka tih chuan a mit meng dul raih te kha a rawn eng sawt sawt hian ka hria, a thil duh zawng hi a ho em em a chutih rualin a thil duh a neih chhunah a hlim thei em em thung; hmeichhia hian an ngaihzawng mek te hi an ngaihzawng hlui te nen an tehkhin thin an ti tlangpui a
Hmeichhia ang ni loin tunah tak hi chuan Thazuali nen ka tehkhin lo thei lo, he hmeichhe nun tlawm leh ngilnei lutuk hi a thil neih ho lam takah pawh a hlimpui a lawm thiam thin em em laiin Thazuali chuan a tha ber a duh thin thung
Kan inngaihzawn chhung zawng pawh khan ngen a nei reng a, a thil duh te a toin a duh ang a nei thei lo a nih chuan a lungawi lohna a lan tir thin mahse Stella ve thung chuan a thilduh chu sawi loh eitur ah pawh ni se man tlawm te te pawh a duhin a hlimpui thei zawk chu a nia
Ka sawisel a ni lo a, heng mite pahnih ka nun ai pawimawh thin tak leh tuna pawimawh chho zel te mize in ang lo lutuk hi mak ka tih vang zawk pawh a ni ang chu, nui sukin room ka chhuah san a Lala-i office chu panin mushroom soup min chah sak tur chuan ka ti a
Unau pahnih niin ka u chiah hi Priscilla Zomuankimi a ni a, ka u chiah hi a naupan laiin khawsik pui vangin min thihsan tawh thung; tunah chuan ka u nen chauh kan ni tawh tihna a nih chu, kan naupan lai chuan mi tu te mai pawh khan Lala tiin an ko thin a chuvanga Lala ti ve pawh chu ka ni
Û tiin ka ko ngai lo a, Lala tih bak lo chuan ko thiam miau hek lo amah pawhin a sawisel hran lo bawk a puitlin hnu thleng pawhin ka la koh chhunzawm ta reng chu a nih hi, Lala-i office atanga chhuak leh vatin Stella awmna lam chu ka pan leh ta nghal a
Ka luh chuan a lo muhil leh tawh a, ama taksa chaklo sa bawk nen nimin lam thil thleng vang khan a la hmet chau ve mi turah ka ngai a; a mutthilh theih phawt chuan a tam thei ang ber mu se ka duh pui zawk mah
Eitur lo thlen hma chiah chuan a rawn harh veleh mai bawk a, eitur rawn thleng chawpchilh ve mai bawk nen khawdang hawi lek loin mushroom soup chu a ei nghal mial mial a; hun rei tak chhung chaw nghei a ei leh thut te pawh hi ka chan ber chuti khawp chuan zu han ei buan buan a maw le, a theih hian engtin nge maw a theih zawk chu ni!
Lala-i pawh rawn lut ve in vawiin a kan chhuah theih tur thu leh zankhat riah man chu amah in a pek tur thu a sawi chuan Stella chu a inthlahrun hmel khawp a "A van zia lo tak, ka fimkhur loh zarah nang leh Will ka tihbuai hrep chu a nih hi" a ti ve sap sap a "Tihbuai a zawngah chuan tibuai lo e, in enkawl tha la chuan fimkhur tawh bawk la" Lala-in a tih chuan a bu ve nghat nghat mai
Naupang thuawih ve ber ang hrim a Lala-i bula a awm chu ka nuih a ti za tlat pek a, ka lo nui huk a an pahnih chuan min rawn en rang teh e "Eng nge i lo nuih" min melh ram ram paha a tih chuan "Thu i lo awih ve theih hmel hle mai" tih pahin ka nui ruh ruh a, a lamw hmel tehchiam loh kher mai
"Chimawm" tih leh lehlam hawi a rual vei hmak a, chung te hlei hlei chuan nuih a tiza; thinchhe ve hlarh hlarh tak chu a ni ve chiang alawm "Inngeih deuhin awm ru" nuih insum zet a Lala-in a rawn tih chuan "Mi nghal deuh bula awm chuan inngeih a har" a lo ti leh hman pek a "Ka bula awm nuam i ti tho alawm" mit ko san khum ak ak pah a ka tih chuan sa tha tawh tak hi a ni
A thinchhiat mai bakah thinrim hi a sam ve a mahse a thinrim rei ngai chuang hlei lo a, a rilru chhiat vang ni loin a la naupan chhiat vangah ka ngaihsak thung, chhang tawh loin ka nui a Lala-i awm rei loin min chhuah san ve vat bawk a "Kan haw tlang dawn nge, class tlang i duh?" Tiin ka zawt a, thudang a ka pakai pui vat a nih loh chuan helai kan nu tê thinawrh zet mood hi nileng a a chhiat ka hlauh pui ve tho a tin ni
"Ka chau rih emai, vawiin chu in a mut mai mai pawh a nuam zawk ang chu" tha tak chuan min rawn chhang ve mai bawk a, insiam vatin in lam pan tur chuan kan haw ta a; kan inah pawh kawi hmasa loin Stella chu an in thleng ka thlah a,ina kan luh rualin Nu Mafaki chuan "Nizan lam te chu nuam in ti bawk em?" Tiin min lo zawt nghal var a
"A hahthlak hret tih loh chu sawiselna tur a awm lo" ka lo ti vat a, kan chhuanlam siam Lala-i pui tur ang a kan insawi chu Stella hian a hre ve lo tih ka hria a bakah a nu in a zawt dawn tih ka hriat vang pakhata kan inah pawh tlang lo a, Stella te in a tlang hmasa zawk pawh ka ni "Nang nuam i ti em ka naute" a pa chuan Stella chu a rawn ti ve vat bawk a
"Aw nuam lutuk mahse ka hah ve deuh" zo lo tih hriat lutuk leh ka chhanna atanga rawn sawi ve mai a nih avangin a nui tawi tak tak a "Hahchawl ru in hah dawn tih a hriat reng alawm, chaw te in ei tawh em" Nu Mafaki chuan a ti leh a "Ei tawh e, ka chau deuh bawk sia ka chhohsan ang che u" tih leh min rawn mitmei pah chuan inchung chhohna kailawnah chuan a chuang chho ta nghal a
Engmah pawh sawi loin ka zui ve mai bawk a, a pindan chhung ka luh rual in "Ekhai! U Lala-i nen chuan chhuanlam in van siam thiam hmel em em an hmelah khan pakhat mahin min ringhlel miah lo maw le" a lo ti nghal sat sat a, ka sawi tawh kha a tawngkam naupang chhia zet hi a lawmawm thin reng a ni
"Hrilh i duh si lo a, a aia tha chhuanlam kan siam mai loh chuan" dar chhin aka ka tih chuan min rawn kuah nghal chung chung a "Awi Will ka lawmzia hi, fawh chawrh che a nia ka chak ni" a tih chuan ka lo nui hak a, inla hrang vutin a thilsawi zawh tak chiah chu hrechhuak leh ni ang hrimin a hmui a hup nghal tharh a
"Aaa...ihh...ka...ka sawi tum pawh a ni miah lo, ni lo i lo ngai dik lo ang e ka lawm vang a nih kha aw" bah nuaiha a tih chuan insum hman loin ka nui ta hak hak a, henu bula awm hi chuan vitamin hlang hi kan ei reng emaw tih mai tur hian nuihna tur hi a tam thin a ni
"Min fawh chawrh i chak bawk sia, min han fawp chawrh teh mahse a nat loh hram ka beisei" nui ruh ruh leh ngeiawm zetin mitko ka san khum a, a ngei tawk a tling leh tawh a ni ngei ang min melh no lo leh tawh kher mai ka ban bula rawn chum pah chuan "A makk... Chutiang ka sawi tum a ni lo tih i hriat kha" a ti bak hlar a
A sam phir seng seng tuai sak zeuh pah chuan "Hahchawl rawh i chau lutuk ang, keipawh ka va haw phei ve ang e" ka ti ve ta nge nge a, lu buk nghat nghat pahin "Zanah lo leng la" a hma lama kut suiha insawi dat dat pah chuan a then thaw bawk a, kan nuih leh hram pek kha!
Inhnuaiah pawh chhuk tawh loin a room bathlar atang chuan ka room ka pan ta zawk a, nizan lam ka mu tha vak lo bawk nen Stella in harsatna a nei tih hlau in ka veng tlaivar deuh thaw kha a nia zep thu cheng loin ka chau ve tak zet; ka kawr hlip in couch ah chuan ka theh phei a, bathroom ah in tifai turin ka lut nghal a
Tuilum nen a han in phuh tir seng seng hi chuan chauh pawh a ti zia ve hawk in ka hria, ka chhuah hnuah engmah dang pawh ti peih loin ka khumah chuan ka inthawlh nghal sat sat a; eng ang a chau pawh ni i la, ka mu leh vat thei dawn lo tih ka hriat avangin hla chu play in earphone chu ka bengah ka hnawh lut zui nghal a
Ka kawngkhar rawn ben rik dat dat thawmah chuan ka harh hlawl a "Mama i awm em, chaw ei a hun tawh lo chhuk dawn tawh la" ka nu in a tih chuan sana ka en ve nghal vut a, dar6 leh chanve a lo pel fel der tawh; ka mu chauh emaw ka tia dakar7 dawn ka lo muhil hman reng chu niin
Thochhuakin inhnuai lam chu ka pan ta nghal a, ka pa hna vangin hmundangah a awm a kar tawpa a rawn haw loh leh thla2 danah chauh te a rawn haw thin a, Lala-i damdawi ina a buai chang phei chuan ka nu nen chauh chaw kan ei dun thin mahse choka ka thlen rual a ka thil hmuh chuan min barakhaih chiang hle thung
"Eheee... Pa engtikin nge i lo haw a" phawk lutuk a melh reng chung chuan ka ti hluai a, nuih hak hak pahin "Nimin khan" tiin min lo chhang ve vat a "Ka va hre si lo ve" ka tih leh chuan "Nia, in buai lutuk a Stella damdawi inah i kalpui tih te ka lo hria a rawn hrilh buai che ka tum chiah lo a nih kha" a tih chuan ka hre veleh chiah
Nimin break atang khan Stella vangin mu leh mal pawh nei lek loin ka buai a nih kha, chuvanga min hrilh lo pawh chu a ni reng a; "Rawn thu la" an tih chuan engmah pawh sawi zawm tawh loin ka thu thla ve nghal a, tawngtaina kan neih zawh hnu lawkah Lala-i pawh a rawn thleng ve chiah bawk a zanin chu chhungkaw kimin zanriah kan kil tlang dawn a nih hmel e
Ka nu leh pa te hian chhung inkhawm chu sawi loh tawngtai hi an ngai pawimawh em em zel a, ka pa a hna lamah a awm daih emaw Lala-i damdawi in lamah a awm a nih pawhin ka nu nen chauh pawh ni i la, chhung inkhawm kan hmang thin. Hei vang hi a ni ngei ang kei ang khawvel mi ve tak pawh hi Pathian zarah accident lian tham ka la tawn ngai loh
A mi mal ang taka ka tawngtai peih ngai loh avangin, tawngtai ka dawn theihna chhun chhung inkhawm erawh sual ve hle mah i la ka thlahthlam ngai lo, ka la tel ve ziah tihna a nih chu; chhungkaw kima chawhlui han kil hi chu a nawmdan a dang bik thin a
Kan inkawm khawm ve theih na chhun a nih bakah kei min zilh nan tak hian an hmang hlawm a, huat enah pawh ka en tawh lo; an thusawi ang apiang ka aw liam puat a, han tih tak tak erawh ka nei ngai lo tih an hre reng chung hian ka chhungte lakah harsatna leh an rilru ti hrehawm tur hian ka awm ngai lo tih hi an hre ve bawk em a
Zanriah kil kham hnu chuan inchungah chho nghal vutin Stella room pan tur chuan ka in ruahman a, ka room bathlar a ka chhuah rualin guitar perh ri leh zai ri ka hre zawm nghal zat bawk; nui sukin ri ka hriatna lam chu phur takin bangah chuan ka lawn kai nghal a, zan dang lo ang tak leh a hma a mal thin ang tak khan amahin a lo awm a
A bula ka thut thlak rual chuan a phu chiam mai leh nghal a "Mawla! Min ti phu nasa lutuk" a ti nghek a "I zai tui lutuk a i hre lo a nih kha" ka tih chuan "Nia zanin chu ka lung a leng ve deuh a" tha tak chuan a sawi leh ang reuh a, ngun lutuk in amah chu ka melh run a min rawn melh zawkin a hawisawn lwh nghal vat a
Van lam chu thlirin thawk a la leh huai a "Nimin khan Sabengtunga hostel a lo lut leh hman daih a lawm" a ti a, a nau hi a ngai tih ka hria a chutih rual chiahin a nau hian a chhaih peihin a fiam peih bawk a, an unau pahnih a an awm dun tawh hi chuan thian dang an ngai ngai lo chutih rualin a awm lo thut erawh a ngai ve hle a ni ang, a thlah hman ta si lo a
"Eng hla nge kan ngaihthlak ang" sawi zawm pui duh loin thudang ka sawi a, a nih loh chuan helai kan nu tê thinawrh zet leh naupangchhia tak mai hi lunglen vangin a tap nghek duh mai ang tih pawh ka hlau hlel lo ve "Ka van hre mai lo, nangman ngaihtuah la" a ti a, hla ah pawh a rilru a la bet zan lo a nih hmel
Ka rilru a lang hmasa ber 'Michael Learns to Rock' in 'Take Me to Your heart' tih hla an sak chu ka play a, he hla hi a nalh a feel a awl ka ti tunah tak phei hi chuan Stella hi ka duh tawh tih ka hria mahse a bula hrilh chi a ni em tih erawh ka hre lo
Ka bialnu ni turin ka duh a, a natna te hrehawm a tawrhna te a khawhar ruk riau na te hi tawm pui a hnem ve hi ka duh a nakin zelah pawh ka nun a mi pawimawh tak ni turin ka duh bawk, amah hnemtu ni i la ka nun tan a min hruaitu tha tak ni tel bawk se ka ti; a rilru chhungril hre chiah lo mah i la kei chuan ka hriat loh karin ka duh hle tawh tih ka hria tuna kan hla ngaihthlak a thunawn lai hi ka duh zual bik a
Take me to your heart, take me to your soul
Give me your hand before I'm old, show me what love is haven't got a clue
Show me that wonders can be true, they say nothing last forerver
We're only here today, love is now or never, bring me far away
Take me to your heart, take me to your soul
Give me your hand and hold me, show me what love is be my guiding star, its easy
Take me to your heart
Amah ka va en chuan thil ngaihtuah ni awm takin a awm a, eng a ngaihtuah phei chu hre lo mah i la tuna ka ngaihtuahna ang tho hi a ngaihtuah ve tho chu ka ring; a lama hawi remin a mitah chiang kek kawk in ka en a "Stella"
"Hmmm"
"Min en teh" ka lama rawn hawiin a thut dan chu a siam tha nghal sat sat a, ka nuih suk thung
"Will, i hmel kha tinge i nuamsam lo ami?" A tih chuan lu ka thing a chutah thawk lak hak pahin van lam chu ka thlir leh vawng vawng phawt a, muangchanga hawi thla in amah chu ka en a
"Stella, ka duh che!" A mak tihna leh a thawn zia lantir nan min en kawk kawk ni berin ka hria "Ka bialnu ni rawh" ka tih chuan che chang loin a thu reng a, mit khap fak fak chung chuan min en reng a chutah harhchhuak ni awm ang hrimin ka ding thut a
"Ihh....ihhh, aih ka thei lo" bah deuh taka a tih chuan min thawng let veleh chhawng niin ka hria "Ngati maw? Engvangin nge i theih loh?" Hrilhai taka ka tih chuan "Ka thei lo Will, buaina tam tak ka siam sak tawh che a tihbuai belh che ka duh tawh lo" a tih chuan a ngaihna ka hre lo tak zet
"Eng buaina nge min thlen?" Ka tih chuan "Buaina a tam ka thei lo, min hrethiam rawh ka mutsan ang che" tih leh kal mai a tum chu a banrekah lo man beh sakin ka lamah ka kuai her a "Min en teh" ka tih chuan min en duh loin a kun ngal a "Stella min en rawh ka tih che chu" a aia vin deuh zawk a ka tih leh chuan muangchangin a rawn hawi chho riai riai a
"Theih lohna tur a awm lo, i duh phawt chuan kan thei reng a nia" zaidam deuh zawk a ka tih leh chuan lu a thing nar nar a "Ka thei lo, rilru natna leh buaina bak ka thlen dawn lo che" tih leh ka vawnna chu thing thla hnawkin inchhung lam min pansan nal nal a
CHAPTER-13
A luh hnuah ka dinna ngaia la ding reng chung chuan ka inhum ruh nghal nghek a, a theih loh thu a sawi a maw? Engvangin nge a theih loh? Tinge buaina min siamsak ang a a ngaih nge ni a min duh ve loh vang zawk a min hnawlna ni thei ang? Ka thinrim rualin ka nuih te lam lam a za leh reuh a
Za lo zet a nui hawkin ka room lam ka pan ve ta nge nge a, khuma ka mut hnuah "Lalnunhlim, ka beidawn i ring reng reng a mi lo nghak rawh tunah min duh lo mah la min duh let turin ka siam dawn khawp che" ka ti sap a
Stella Pov
Kan hla ngaihthlak chuan tam takin ka ngaihtuahna a ti kal thui a, Will ka duh rualin alakah inthlahrunna tam tak ka neih phah a; kei ang hmeichhe hrisel lo leh ka phu lo tih hre lutuk hian a ni ang tlangval hmeltha leh piannalh hi ka duh ve ngar ngar chu a ni sia
Min duhthu a sawi rual khan ka hre lo, "aw" ti a chhan kha ka duh ve lutuk alawm mahse ka thei lo, buaina ka siam sak hnem tawh lutuk; a hma pawhin ka thawhah min buaipui naah rilru hrehawm takin ka siam a, nimin ah lah ka fimkhur loh zarah rilru hah bawkin ka siam leh a
Zanah pawh mu loin ka muhil min veng tlaivar tih pawh ka hria, chuti chung chuan engtin nge "aw" tih a ka chhan theih ang; ka hma sialin ka duh ve na avang ngawt khan lo chhang ta i la, nakinah buaipui ngaiin ka awm leh ang a, keimah vangin a rilru a hah leh ang a hrehawm tak a a awm leh tur ka ngaihtuah hian ka chhang thei lo a ni
Keimah ni lo, kei aia tha leh chhelo a hmu leh vat dawn tih ka hria Thazuali nen pawh khan inngaizawng se an inhmeh ngawt ang; kei nen chuan kan thei ve lo ang, kan hlim ang a mahse kan hlim dun rei thei dawn lo tih ka hriat avangin min duhthu a sawi rual khan keimahah insitna lian tak ka neih phah a
Keimah vanga a hlim lo lai hmel hmuh la duh lo! Hlim se, kei min tawn hma ang khan a nun nuam takin hmang se ka duh; hlimna tam tak ka duhsak a, ka tel lo a a hlimna kha ka tan chuan a tha zawk ang, kei chuan tahna bak ka thlen sak dawn lo tih ka hriat hian hrehawm ka ti tak zet bawk
Ka hnaih tawh lo ang a, a tam thei ang ber a bula hun hman loh hram ka tum tawh bawk ang; hrehawmin na ti dawn pawh ni i la kan pahnih tan a tha tur ang a ka ngaih zawk vang a hetiang tih tum hi ka ni bawk "Will ka tihpalh, min ngaidam rawh" ka ti ta sep a
Ka harh leh chuan a hma vak tawh lo kher mai, thochhuakin ka in tihfai hnuah phur lo zetin class kal turin ka insiam ta nghal a; class pawh ka phur lo, Will chungah ka inthlahrung a chutih rualin nizanah ka hnawl tak vang khan engtin nge ka hmuh ngam leh tawh ang?
Tuk thuan kil lai te chuan chaw pawh ei loin ka thleng chu ka hawl kual sek a "Stella dik lo a awm em?" Ka nu chuan min rawn ti ta reng a, za vak lo a nuih sukin "Awm lo e, ka tha vek" ka ti tak na a ka tha mawlh lo chu a nih hi
Ka tana mipa tha lutuk leh ka duh ve ngawih ngawih, amah ngei pawhin min duhthu sawi a a bialnu hial atana min duh thu sawi kha he ka natna avanga ka hnawl a ngai ta si chu engtin nge ka that teh lul ang "Tukin chu i hmel a bui riau a, na i nei te chu a ni em lo maw?" Ka nu bawk chuan a rawn ti leh a
"Nimin ka mu nasa lutuk a, zan lam ka pen phah hrep a chumi vang a nih dawn chu" harsa lutukin ka nuih lui leh sak a, chaw pawh ei chhunzawm tawh loin ka kham nghal vat a; ka nu leh pa te bul a ka awm reng a nih chuan ka hmel vanga an ngaihthat lohna hian min dawt chhuak thei tak ngial mai ang
Pawn ka chhuah chuan Will gate bulah chuan a dan ngai te ang bawkin a lo ding leh vang tawh a, min hmuh rual chuan ban vai zeuhin min lo nuih sen sen a; tunah tak chuan nuih let ve a har ka ti tak zet, phur lo lutukin a lam chu ka pan a
"Tukin chu i tlai lo ve hlauh, rawn chuang la" a tih chuan che chang loin amah chu ka en mawl tawp a, chhan tumna pawh ka nei lo ni lo chhan ka hreh tak zet zawk chutah a thutna hnung chu rawn beng leh thak thakin "Khatia min en reng a nih chuan kan tlai leh tak ngial dawn nia, rawn chuang vat rawh" a ti leh a
Thaw la kawk in "Will..." Ka ti dek dek chu "Tunah chuan engmah sawi loang rawn chuang phawt rawh" tiin hma lam chu min hawisan daih a, tihngaihna ka hriat loh vang chuan ngawi rengin ka chuang veleh ta nge nge a, engmah pawh sawi zawm loin college lam pan chuan a inkhalh chhuak zui ta nghal a
Kal lamah te chuan nidang zawng aiin kan boruak chu a rit churh ni mai hian ka hria, a tu a mah mah chu kan inbe lo a; ngawi rengin a khalh mawl tawp a, keipawh chutiang tho chuan a hnungah ngawi rengin ka chuang ve thung
College kan thlenin a ding dat a, bike atanga chhuk tharh a kal mai ka tum chu "Lalnunhlim min nghah i tum nange?" Chang lutukin a rawn ti a, hnial leh ngak tawh hek lo chu ka ding leh ren rawn a; bike a park that hnuah ka lama rawn phei vatin classroom lam chu kan pan leh ta nghal a
Sawi tur kan hre lo nge, nizan vang zawk pawh ka hre lo classroom lam kan pan lai pawh chuan kan la inbe ta chuang lo; tun hma zawng aiin a lakah inthlahrunna lian tak ka nei a, a be hmasa tu a tan zawk pawh chu ka hreh tak zet tawh
Classroom kan thlen chuan ngawi rengin kan thutna lam kan pan dun ve ve a, class lak chhung zawng pawhin kan inbe ta chuang lo; breakah Remmawia chu lo kal in "Kha kan va that tawh hmel ve" nui sangin a rawn ti luam a, nuih ve sukin "Ka tha tawh lutuk" ka lo ti ve mai bawk a "A tha, in enkawl tha tawh la" a tih leh zet hnuah Will lam chu hawiin canteen ah chawlh a rawt a
Will chu ka lam rawn hawiin min ngaichang tih ka hria mahse kan inzui leh reng a nih chuan nizana a thusawi kha zawmin ka chhang duh mai ang tih ka hlauh avangin ka hnial ta zawk a "Vawiin chu library a kal ka ngai a, induh leh lo va chawl mai ru" ka tih chuan min sawm luih ve ka ring a nia, tho tharhin kal a rawt chu mak tih lutuk zawk vangin ka hau in an kal liam thleng chuan ka en leh ang lawi a
An bula kal ka duh loh thu in ka hnial zo chiah a, min sawm ka beisei leh zawk si a maw? Mawl ka in ti tak zet, keipawh chu thochhuak ve nghalin library lam chu ka pan ta zawk a; class neih leh hma chu ka awm ta reng a, class a tan leh dawn chuan ka phur tawh lo tak zet
Engtianga rei nge ka pehhel theih ang, nge ni a ka hlimna tur kawng hi keimah zawkin ka lo dang bet reng zawk tih te chu ka ngaihtuah leh hnuhnawh ang reuh a mahse ka ti tawh ta sa sa ka theih ang a rei chu peh hel ka la tum ta fan tho chu a nih hi
A hmel hmuh ka inthlahrun tawh vangin class ka luh rual chuan ka thutna chu ka thlak nghal bawk a, an rawn luh in tlar hmasa bera ka thu tih min hmuh rual chuan mak ti hmel a pu ve zawkin ka hria mahse engmah sawi loin a thutna lam chu a pan nghal nal nal a
Remmawia leh Zawma chu ka thutna a lo kal in Will nen kan inkar a that leh that loh thu min zawt a, engkim a that thu ka hrilh ve bawk a an awih hmel viau loin ka hria "Break lai pawhin kan be tawng thei reng reng hleinem, nangni pahnih hi in inhau ve deuh a mi?" Zawma chuan a hma aia chik zawk a min rawn pah chuan min zawt leh a
"Chutiang engmah a awm lo, ka muthlu nasa thei lutuk a engmah ka hre thei ngai lo a chuvangin ka in sawn hma mai mai a nih hi" za lo lutuka nuih hak pah chuan ka ti leh a, an awih leh awih loh chu ka hre tawh lo lu te chu min buk khum ve nghatin an thutna lam min pan san vat a
Class lak leh chhung zawng pawhin zirlaiah rilru ka pe thei hlawl lo, Miss Zotei class ah pawh ka mutthluk loh vawikhatna a ni hial ang chu maw le; class ban chuan a tu a te mah be loin ka chhuak nghal vut a, min rawn hmuh hman hlau ni awm ang hrimin chak lutukin ka pen nghal hlawk hlawk bawk
Mahse le, hmeichhe tuan leh mipa tuan chu in ang miau hek lo gate ka thlen rualin min rawn um phak leh ta tho a, ka chhuak tur chiah chu ka banrekah rawn manin a lamah chuan min kuai her a "Min lo nghak rawh, haw rual ang" a tih chuan amah chu ka en vang vang a
Chutah thawk la hawkin amah la en reng chung chuan "Will, inkawm tawh lo mai ang a hma ang khan in hre lo angin awm leh tawh zawk ang" ka ti ve ta nge nge a, mak tih vangin a ni lah a meng ohar awn awn a ni ber "Eee...engvangin maw" a tih bah nuaih a
Hetiang a kan awm dun reng a nih chuan kan tan a tha dawn lo, chuvang chuan keimah talin ka hlat a ngai alawm! "Ka sawi ang chuan awm tawh zawk ang" tiin min vawnna kut chu phelhin ka in her leh nghal vut a, hnung lam pawh hawi let leh tawh loin ka hma lam ka ding ngal a
Rei lo teah chak lutuk in min rawn tlan pel fua a, ka lo phu leh hman chiam pek a ka awm chu dawm vang vangin thawk ka han la leh hawk a; ka kal ngai chuan ka kal chhunzawm mawp mawp thung, ka ngaihtuah a ka thil tih dan hi a tha ber em tih erawh ka hre lo
Ka hmasial lutuk vang leh ka hlimna chauh ka duh lutuk luatah midang ka ti na angem tih te chu ka ngaihtuah leh ang reuh a, ka rilru chu a tibuai tak zet mahse ka tih ngei a ngaiin ka hre bawk si chu chuan rilru nuam lo takin min siam phah thung
Chuta tang chuan Will nen kan inbe leh tawh ngai lo a, in chu sawi loh college ah pawh class neih lai bakin kan inhmu tawh ngai lo; keimah zawk chuan hrehawm ka ti a, ka inchhir hle bawk mahse ka tih chu ka tih a ni tawh a ka sut leh a nih chuan hmeichhe nep tak ka ni dawn
Chuvang chuan ka tuar a ngai thung, inbiak chu sawi loh ka awm ve tih hre lo ang hmaka min en map lo a min kal pel thin te chuan ka rirlu a ti na a chutih rualin dem thei ka nih loh zia ka hre ve kar bawk, ka thiam loh hmasa zawk a ni a chuvangin ka tuar ve tur rengah ka ngai bawk
Rei lo teah ka Thazuali nen an inzui lai ka hmu ta fo a, class khata awm tih takah thu dunin an awm dun reng thin a; Will an Thazuali duh hmel tak a a en teh leh a nuih te chuan ka tha a lo na veng veng zel, ka tah a chhuak a mahse helai hmun a ka tap a nih chuan a mualpho tur chu keimah bak ka ni dawn lo tih ka in hriat avangin ka insum hram hram thin
Remmawia leh Zawma te pawh thil awmzia hriat chak vangin min biak an rawn tum fo a mahse an ni pawh ka peh hel hram hram thin; break ah chuan library ah hun ka hmang chawt a, class neih leh hma chu chutah chuan ka awm a class neih dawnah chauh ka chhuahsan thin
Tlaiah pawh a hma ang bawkin ka haw thin a, gate ka thlen apianga Thazuali'n duh hmel tak a Will bike a chuang chung a a kuah lai ka hmuh te chuan ka chhungril khawi emaw lai hi a na zawk zel a en rei duh loin ka hawisawn vat a ngaih phah fo bawk
Ka tihdan ngai te in zanriah eikham hnuah room bathlarah chuan thu chhuakin hla play pah in van lam ka thlir reng a, hriat loh karin ka mittui a rawn hnap sawkin ka in rin hma hauh chuan ka mittui chu a rawn luang a; ni e, hmeichhe chak tak leh hun rei tak tah insum reng thin kha ka insum thei tawh thlawt lo a ni
Midangin an hria ang tih hlau in ka hmui chu ka hup vat a, chhuak lutukin ka tap vak vak a mahse ka thinlung na lutuk leh tawt lutuk pawh a thawl phah chuang lo; tunah tak chuan chunglama rorel tu khi ka dem a ka dem tak zet bawk
A hma in ka duh ve thin ngawih ngawihin he natna vang hian khawih thiang tawh lo ang mai a min enin min kalsan a, rei tak hnuah ka thinlung khawih che leh hmasa ber tu tunah chuan ka duh leh ka rilru zawng zawng ka pekna in min duhthu a sawi a mahse ka duh vang ni hauh tawh si loin he ka natna vang bawk hian ka hnawl a ngai leh si
A fair lo, a fair hlawllo nun hi a fair ka ti thei lo, tinge ka hlim ve dawn apiangin tahna in hmun a chan leh zel si? Tinge ka hlim ve thei lo a mi? Ka hmui ka hup na atangin ka awm na... Ni lo, ka thinlung na lutuk chu ka kut pahnihin ka dawm a, tap ring ngam si loin hmui pet fan fan chungin ka tap a
"I eng pawi nge ka sawi, ngati nge ti em em a na hian min siam thin; hlim hi ka phu i ti ve lo em ni? I duh loh zawngin vawikhat mah ka awm ngai lo tih i hriat kha..! A hma mi kha chu ka pal dai thei mah se tunah tinge ka hmangaih em em hi kalsan tura min tih leh si mawhhh... Ka hlim hi i phal ve thlawt lo ami, a na helai hi a na ka thinlung hi a na lutuk, hrehawm...hrehawm ka ti tak zet, ka na ngawih ngawih" tiin chunglam rorel tu chu ka dem a
Ka tah nasat lutuk vang leh midangin an hria ang tih hlauh vanga ka tah chhuah ngam loh vangin ka hrawk te chu a na kham urh a, mahse chuti chung pawh in ka thawven phah chuang si lo; ka nunah hlimna hian hmun a chang ve lo ang a ka hriat avangin ka na zual a
Ka thinlung hi sakawlh thinrim in a pawhsawm ang maiin a na ngut ngut a, chung ka insum lutuk luatah ka thawhah in a rawn chhunzawm nghal bawk a; mahse tho duh loin runluih ka duh avangin ka thawhah pawh chu ka ngaihven duh lo lui a, mahse a na tak zet
Ka awmdan dik tawh loh lutuk vangin, ka awm dawm pah chuan thei leh thei loin inchhung ka pan a; mahni pawh a ka kal that theih tawh loh avangin vawn chhan tur ka dap nghal ruai bawk a, ka khum lam chu panin ka lukham hnuaia inhaler ka dah chu ka la nghal rawk rawk a
Ka ka chhunga ka kah luh rualin a zo tawh tih ka hre zawm nghal zat bawk, thinrim lutukin ka vawm pawp bawk a; a drawer awmna lam chu thei leh thei lo a panin a bul ka thlen chuan hawn ka tum a, ka awmna tawh leh ka khawng tan tawh avangin ka chet lah chu a sak talh leh nghal a
Thinrim luatah ka drawer chu ka beng leh rih a, pawh hawn ka tum leh chuan harsa fe in ka thei ta hram a; inhaler thar hlak a bawm pawh la hawn loh chu ka hawng a, ka ka chhungah rang lutukin ka kap lut nghal a
Thawk la leh ham hamin a vawihnih nan ka kap nawn leh a, tlem a tlemah ka buai chhe hman lo chauh a ni ber e; chhuatah chuan ka thu thla nghal hnawk a, ka khum lamah ka bawk vak phei a ni ber ang chu ka khum tlang nghengin ka awm chu ka dawm leh vang vang a
Mu leh mal pawh nei lo a rei tak ka thut hnuah tahchhuahna bawk chuan min rawn tur leh a, mahni inkhawngaihna in ka khat a; ka duh ang ti ve thei lo a ka awm chu hrehawm ka ti a, mahni inkhawngaihna piah lamah mahni insitna lian takin ka khat nghal bawk a
Ka in rin leh hma hauh chuan ka tap leh nghal a, ka na ve bawk em a tin ni; ka thawk a hah leh ang tih hlauin tah pawh ka tap tha ngam lo a, ka awm chu dawmin khum tlangah chuan hmai chu phumin rilru nat lutuk vang leh bawkin ka tap a
Nu leh pa, chhungte rilru hahna thlen tu leh hrehawm tihna thlen tu nih tawh nak alaiin Will leh zel pawh ka ti na a; ka duh angin awm thei i la chu hetiang thil hi an hmanchhawn a tul lo ni mai tur mahse ka nunah hian thuneihna pakhat mah ka nei lo a
Ka nun a thunei tu berin ka chunga thleng tur a a duh chu kei chuan ka tih ve theih chhun chu lawm tak a lo pawm hi a ni mahse chu erawh a har lam hret chu a nih ber mai hi "Ka dem che a, i rorelna hi hriatthiam a har ka ti tak zet; vawikhat leh dang ka nunah hian khawngaihna rawn lan tir leh hram rawh khawngaih takin ka ngen a che, ka ngen ngawih ngawih a che" tiin chunglam rorel tu chu dem tawh loin a ngen in ka ngen a
[Ads kha cilck theihnghilh lo i la, vawiin ah thil lawmawm tak ka tawn vangin zanin ah ka rawn bonus tawk bawk che u a chuvangin like leh comment kha min theihnghilh sak lo hram bawk u la, ka hmangaih te ho
]