ETERNAL LOVE BY Ruati Renthlei (Completed)

Episode nei ho a hlawm a dahkhawmna
Ngaia
Site Admin
Posts: 25813
Joined: April 30th, 2016, 4:07 pm

Re: ETERNAL LOVE BY Ruati Renthlei (Completed)

Unread post by Ngaia » September 26th, 2021, 2:21 pm

Eternal love


Chapter-31❤



Ka nu pawh Zoram lama a thiante bia in a nui leh uar uar tawh, Nora-i ka call a, a lo la vat,
"Hello"

"Hello, Nora ka lawm e aw" ka ti nghal tawng, a rawn nui a, "Lawmthu sawi nachang i hriat pawh ka lo ring hleinem" a ti a, "Ka lawm tak tak, mipa tha tak i tawh ka duhsak che" ka ti leh a, ka rilru tak tak ani bawk.





"I duhsak na kha tawk rawh se, nang aia tha ka nei dawn" a rawn tih chuan kan pahnihin ka nui ta vel mai mai, "Anih leh Mexico ah chuan i kal dawn tak tak em ni?" ka ti leh a, a ngawih vang vang hnu ah "Tak tak e, North America ram zawng zawng hi ka kal chhuak vek anga, ka duh ber pasal ah ka nei ang" a rawn ti.







Kan titi zel a, a tawngkam chu chapo deuh thin mahse thu tlukna dik min siam pui a vang erawh chuan a hma ai daihin ka ngaina.



****



"A ei duhlo a nih pawh in ei luih tir ang che, chaw tha a nih hi" tiin ka pi chuan Lawmi tana ei tur a siam sak chu tiffin ah a khung mawlh mawlh a, "Rawn hruai chhuah dan i ngaihtuah thei angem?" ka nu chuan a rawn ti, ka bulah a rawn ding nghal bawk.






"Ana-i maw?!" ka ti vat a, "Ni e, pangai taka kan in hmelhriat i duh lo em ni?" a tih chuan ka pi chu ka en a, ka hlim a ni, "I ti tak tak maw?" ka ti leh hram a, "Tlai ah zanriah ka lo siam kep ang" tiin a kal leh nghal.







Ka pi chu ka kuah a, ka lam lo chauh, vawiin chu station ah kallo in Lawmi bulah ka awm nileng ang ka tia, mahse kalloh ka tum chhan berin kal turin min ti tlat bawk sia.





Ina haw leh kher ngai lovin tiin ka pi ei tur siam chu ka keng lawk a, nidang aiin hnathawh pawh chu ka phur surh surh viau, mahse station ka thlen chuan garage bulah Jimmy leh Lawmi thiannu Lucy ni awm tak ding ka hmu a, ngaihtuah chiang lem lovin ka va zawm ve tawp.







"Nangni pahnih chu in in hria em ni?" ka ti a, Jimmy chuan "Ka û nupui tur anih hi" a lo ti, Lawmi chanchin a lo hre daih pawh kha a mak tawh lem lo ve, engpawh nise thil chu a tha lam zel a ni tawh a, buaina tur a awm in ka hrelo.







Hospital ka thlen hma in barber dawr ah ka lut kawi a, eng nge ka tih tih chu ngaihtuah ve tawh mai rawh u.





Ka pi tiffin min pek nen Lawmi cabin lam pan chuan ka pen hlawk hlawk a, khum ah thu mu titih in lehkha bu a lo chhiar, min hmu chu a meng deuh kawk in ka hria, a awm lo hran lo, a bulah kalin tiffin chu ka pe a.



"Tinge I sam kha?" a rawn tih chuan ka nui suk,a kut ah ka vuan a, "Sam i neih loh chuan ka nei peih biklo" tiin a kut chu ka fawp a, "Mos" a ti deuh tiau, a mittui a tling leh nghal ringawt.






"Aaa tap nghal zel suh, ka inhmeh em sawi teh" tiin ka lu chu ka khawih a, a bu nghauh nghauh, ka kuah a, ni e, ka hmangaih in sam a neilo a nih chuan lo put buk chhap ka duh bik reng reng lo.







Ka pi ei tur siam chu ka ei tir laiin doctor a rawn lut a, a tawng nghal bawrh bawrh, Lawmi nen an innel leh lutuk chu ka lo thik hman lek lek, keipawh hi a.







A chhuak chiah chu ka zui chhuak ve nghal a, "Doctor biak lawk che ka duh" ka tih chuan a office ah kan in zui phei a, "Englo ania, Ana-i hi vawiin chiah chu ka hruai chhuak thei angem?" pehhel lem lovin ka sawi hmiah.






A ngawi vang vang a, "Engpawh nise thil pakhat hrilh che ka duh a, i lo lan atangin hmuhtheih khawpin Ana-i hian hma a sawn a, nangpawh in i hriat ka ring, a tan chuan mi bik i ni tih a enkawl Tu tan pawh hai rual a ni lo va, chuvang chuan zanin chauh chu i hruai ka rem ti ang" a tih chuan ka in sangmar lutuk chu ka thlah dul deuh.







"Amaherawhchu, tun aia hma a sawn chak theih nan chuan uluk lehzual a enkawl a ngaidawn a, a ei leh in tur pawh i uluk sak viau angai ang" a ti leh a, "Anih leh cancer lak atang hian a dam leh thei angem?" ka ti leh thawr, min en run a, ka rilru a lo buai hman.









A thaw deuh hap a, "Dam chu a dam leh thei alawm, mahse chumi atan chuan kan enkawlna mai piah lamah rilru hrisel tak aneih tel angai ani" a ti a, ka chhan leh hma chuan "Dar 3 ah hian i chhuah pui thei anga,zan dar 9 aia tlai lovah i lo let pui leh dawn nia" a ti a, ka lu bu nghut in ka chhuak nghal.







Lawmi POV




"I ti tak tak em?" ka rinhlelh vang ni miah lovin ka zawt leh hram, a lu a bu nghat a, "Yesss pawn boruak ka hip chakna a rei tawh lutuk" ka ti deuh vak.







"Hrilh tur che pakhat ka la nei" a tih chuan ka melh vat, "In hualna a tawp fel a, Nora-i pawhin duhsakna min hlan asin" a rawn tih chuan ka en reng ringawt, "Karleh ah Mexico ah a kal dawn a, chuan nangmah nen kan innei ang" a tih chuan chhan ngaihna hre heklo, ka melh ngawt ngawt a ni mai.








A rawn nui a, "Dar 3 a ri dawn" tiin banga sana chu a thlek zauh a, mahse buaina pakhat a la awm, "Eng nge ka hak ang?" tiin ka tum bur a, "Hei" tih pahin paper bag a rawn keng kang a, a rawn ken luh lai ka hre miah lo.







Darthlalang ah te chuan ka in en ve bawk a, ka hmel da lutuk chuan Mos-a lakah min ti confi lo zo, ka ngaihtuah na hria ni awm fahranin "I tha ber tho a nia" a rawn ti sar sar a, ka chal ah a fawp zauh bawk.







Car ah kan lut a, hun reilo te chhung atan hospital chu kan tlan San ta vang vang, "Khawi ah nge kan kal dawn?"

"Kan in ah" a tih chuan ka melh zawk, "Maww" ka ti thawt a, "Ka nu leh pa ten an hmu ve duh che alawm" a nuih loh dan ah a ti tak tak tih ka hria.




"Aih Mos, hetiang chuan ka hmu theilo" ka tih rualin motor chu kawng sir ah a ti ding a, ka kut rawn vuanin "Ka awm hi, hlauthawng suh" a ti sap, mahse ka hahdam phah chuang derlo.






La in hmu miahlo ni ta ila ka awm a nuam mah zawk mai thei a ni, Mos-a
laka hmu hreh tak anga lan chu ka duh biklo, mahse a nu leh pa te nena kan boruak chu in hriat kha, keilah ka lo cancer leh zel bawk si,"Eng nge i ngaihtuah?" a rawn tih chuan ka phu zawk.






"Aaa engmah" ka ti sap a, "Engkim a tha ang, kal ang aw" a tih chuan ka bu nghat a, motor ti nungin a tlan chhuak leh nghal.








Inchhung kan lut chiah chu ka thinphu a rawn rang nghal dawt dawt hle, a nu leh pa leh pi te chu an lo awm thap a, Mos-an ka kut a rawn kai vat, an bula kan thut thlak rualin "Lalruatdik, i sam chu'h" a nu chuan a ti nghal hluk a, ka lo ip chawih.







"Hma i sawn chak hle mai bawihi" nui sangin a pi chuan a lo ti a, ka nui ve ringawt, Mos-a nu min melh dan rawm rawm hian awm ti nuam mawlh heklo.









"Ana-i maw I hming?" tiin a pa chuan min en ran a, "Aw ni e" ka ti sap, "I natna te kan lo hria a, a pawi khawp mai, dam leh vat turin duhsakna ka hlan a che" a ti a, ka rin ai tak chuan a fel.





"Min lo zui lawk ta che Ana" tiin a mu chu a ding hluai a, Mos-a ka melh vat, a lu a lo bu nghauh a, hlauhthawnna nen a kalna lam ah chuan ka zui ve ta poh.







An in hnung lam ah min chhuah pui a, dawhkan leh thutna tur pawh a awm, kan thu a, ka zam mai ni lovin ka hlau tel deuhin ka hria, "Thingpui i in duh em?" a tih chuan "Aih" ka ti vut.






"Kan in tawn dan kha a fuh tawh lo va, mahse ka fapa hian a hmangaih tlat si che a, i laka ka chet dan mawilo zawng zawng te kha min ngaihdam theih chuan ka lawm ngawt ang" a rawn ti, min en ran a, a thil sawi chu ka rinloh lutuk lam a nih avangin chhan mai ngaihna pawh ka hrelo.





Dar san ak in "Min ngaihdam theihloh pawhin ka hre thiam a nia" a ti leh a, "Nilo e, ka lawm e, ngaihdam min dil kher a ngai lo" ka ti vat a, "Aw le, tun atang chuan i nu ang in min en dawn nia" tiin a nui a, ka thinphu chu a hma aiin a rawn rang, mahse ka hlim tho.







Chutianga a monu atana min pawm tak avanga chuan ka ngai na thar riau a, a nuih phei chuan a hmaa nu rapthlak tak kha a ang miahlo, ka in enkawl dan te min zawt a, "Pawisa lamah buaina i neih chuan min hrilh zel ang che" a tih chu lawmawm viau mah se an puihna tello a in enkawl chu ka tum ruh hle.







"Eng em em nge in sawi a?" tiin Mos-a chu a rawn lang nghal a, a hmel ah min ngaihtuah tih a lang reng, "Tikhan lo awm rawh u, chaw ei ka lo siam ang" a tih chuan puih ka tum pawhin a duhlo tlat.






"Ka nu khan sawi a nei em?" tih pahin ka hmaah tak chuan a rawn thu a, "Sawi nei lo se hei chen kan thut i ring em ni?"

"Aaa ka nu hi chu'h" tiin a chal chu a dawm a, ka nuih suk.





"I awihlo hial zawk ang, i nu khan ngaihdam min dil asin" ka tih chuan a rawn meng phawk ngang mai, "Tun ah chuan a pawm thlap tawhin ka hria" dar san ak chuan ka ti leh a, a nui a, kan in kuah vawng vawng.







Chaw erawh ka ei tamlo, ka la zam ve em bawk ani, "Engtik ah nge inneih in tum reng reng?" living room a kan thut thap laiin Mos-a pa chuan a rawn ti a, Mos-a chu ka melh zawk.








"Inneih pangai tak chu a la hla deuh ang, Ana-i hi dam takin a in enkawl phawt anga" a ti a, ka tan a nuam leh ta hauhlo.





Theih chu nise ka taksa natna zawng zawng hi sawisak a, vuak darh vek ania ka duh, ka duh hun ah pawh pasal ka neih theihloh phah.






"A tha e, kha kha chu in pahnih thu thu ni rawh se" a tih chuan "Dar 9 rik hma in hospital ah let leh kan ngai a, kan chhuak nghal mai ang" tiin Mos-a chu a ding a, ka pi chuan "Mahse dar 7 chauh a la ni si a" a lo ti vat.






"Kalna tur kan la nei a, chuan zanin chu hospital ah ka riak ve nghal ang" tiin min kai chhuak nghal, "I lo riak dawn maw?" motor a khalh lai chuan ka ti a, min rawn melh zauhin "Ka sawi i hriat kha" a ti ringawt.







Ka ner sak a, "Anih leh khawi ah nge kan kal dawn?" ka ti leh, a thaw hap a, "I damloh atang hian i dil chhut leh zual anih hi, kan thleng tep" a ti leh ringawt, ka hmui ka ti pawrh vak a, a nui suk.








"Tah hian tinge kan kal a?" tiin car ngheng a a dinna bulah chuan ka va ding ve a, min lo kuah vat, "Helai hmun tluk a hmun hlu hi kan pahnih tan a awm tawh dawn em ni" tiin min rawn en a, a nui suk bawk.





Ni e, helai tuipui kam hi chu kan pahniha kan len chhuah na hmasa ber kha ania, kan in huat tak tak lai kha, "A hma khan i van sual thei tak" ka ti ringawt chu min rawn en in "Eng nge ka sual na?" a rawn ti vat.







"I sual, min care lo thei si" ka ti a, "Nangpawh i thinchhiat theih zia kha" a rawn ti leh, a hun laia kan natpui thin leh in hauhna zawng zawng te kha tun hnu ah chuan kan pahnih tana thawnthu ngaihnawm leh sawi nuam ber a ni tawh.







Ka kut chu nghet zetin a vuan a, "Lawmi, ka fawp dawn che ania" a rawn ti, a hma pawhin min dil ngai tawp silo, "Aaa chutiang an in zawt ngai ami?" ka tih chuan "A pawi ka hlau alawm, a pawi lovang tiraw" a ti a, ka nui ta ringawt, a chang hi chuan a che nawi ve thei.







Hmeichhia ni ve ta fam chu chapo na avang te pawh a ni mahna, chet lak hmasak ka duh ngailo, mahse engkim hian hun leh hmun a nei vek, thei leh thei lovin a nghawng ah ka kuah a, kan hmui a in deh rual chuan a duhthawh nghal hle.







"Ka ngai che, engtik lai pawh hian ka ngai che" a ti sap a, a thaw lum ham ham chu ka lo feel thei, "Kei pawhin ka ngai che" ka ti ve sup a, kan hlim dun vur vur viau.







Ka cabin kan luh chuan Dr.Eric chu a lo awm reng tawh a, "I tha em?" tiin min rawn pan a, ka kut vuana Venflon a en dik laiin Mos-a chuan Dr.Eric kut chu a vai thlak sak pawp, ka melh vat a, a mit meng chu ka hre thiam lo.





"Min lo hre thiam la, ka endik a ngai alawm" tiin Dr.Eric chu a nui a, "Kan lo thleng chiah a, kan thut fel hun te lo nghak mai ta che" a la ti zui, "A ni tak e, va thu ta che u" dam zet chuan a ti leh mai a, Mos-a chuan ka dara min vuanin khum ah min thut tir a, a ruk tak chuan Dr.Eric lakah ka in thiam lo, hepa hian eng nge maw a hriat ni.



Injection min pek zawh ah Dr.Eric chu a chhuak nghal mai a, a chhuak fel ta tih ah "Tinge khatianga i tih kher a?" tiin Mos-a chu ka en a, "Kei aiin i tan zawk ami" a rawn ti, "Tan lam a nih loh chu, Dr.Eric i biak dan kha a mawi lo em alawm, ka chunga a fel teh reng nen" ka ti leh.






"Hospital dang ah awm ang" a rawn ti daih, "Engmaw?" ka ti sap a, "Kha Dr.Eric khan a ngaizawng chiang lutuk che" a rawn tih chuan ka insum hmanlo, ka nui chhuak hak a, mahse a nui ve duh derlo.







"I ti tak tak em ni?" ka tih chuan a lu a bu nghut, "Aaa eng nge i ngaihtuah thin a, Dr.Eric hian min ngaizawng lo" ka ti leh a, ka nuih a za bawk si, ka nui tha ngam chiah bawk silo.





"Khatiang em em a ngaihsak chhan tur che kha a neilo, a patient pakhat i ni ve mai" a ti bung deuh nghut, "Min ngaihtuah ang chu, heta ka awm tirh khan chhungte leh tlawhtu pawh ka nei ngailo a, kar tawp ah Lucy a rawn kal zeuh zeuh tih loh chu, chuvang chuan min khawngaih a, engkim ah min pui thin a lawm" ka ti leh a, hrethiam tak ang maw.








A thaw hawk a, lehlam hawia a lu dawm in "Doctor ka lo ni ve daih lo ani" a ti sup,ka nui chhuak leh ta nge nge, a hnung lam atang a kuah pah chuan "Ka tan chuan doctor tha ber leh damdawi tha ber i nia lawm" ka ti sap a, in herin ka mit ah tak min en.








"Police hna hi ka bansan anga, doctor ka zir tha leh dawn amawn le" a rawn tia nih chu, eng rilru hi nge maw a put thin le, a lu ah ka kuk a, "Doctor zir nan chuan a lo ber ah kum 5 a ngai, degree i neih meuh chuan i putar tawh ngawt ang" ka ti a, "Ka la naupang alawm" a la ti hram.








Heiham, phalsak vaih ila chuan a zir tha leh duh tak tak ang, "I zir kum 5 chhung chuan eng nge kan ei anga?" ka tih chuan "Short cut dan te hi awm se" a la ti ta deuh deuh, a awih awm tawh lo lutuk chu kan nui dun vur vur tawh.






Khum ah min thut pui a, ka chal dawm in "Na i nei em?" a ti a, ka lu ka lo thing vat, "Anih chuan mu ang" tih pahin mutna chu a siam nghal a, "Mahse khawi ah nge i mut ve ang?" Ka tih chuan min melh kawk.







" Khum pakhat chiah a awm hi, aaa mahse a chi leh lo, chhuat ah ka mu mai ang" tih pahin a tho a, "Aih" ka lo ti vut, "A chi lohna a awm lo, mu ang" ka ti sap a, tlemte chuan ka lai ve, "Mahse ka delh na palh ang che tih ka hlau alawm" a ti leh a, "Na lo ang, mu rawh" tih pahin khum ah ka nam mu thlawrh.







Ka in thawlh lut ve nghal a, ekhai, duh berte bulah chuan hospital pawh paradise ang mai alawm.






Sawi chhuak lem lo mah ila kan mut a chhuak lo tih chu kan in hre tawn ve ve tho, a ban ka kham a, a awm ah ka kuah bawk, "Ka tihpalh" tiin ka melh chho ha a, "Engvang in maw?" a rawn ti vat.






Ka thaw hap a, "I duhkhawp ka pe thei ngai dawn silo che a" ka ti ringawt, a awm dan chu siam remin hnai set sawt ah min rawn en a, "Ka duhkhawp chu nangmah ah hian a awm vek, inneih hun i ngaihtuah ani tiraw" a rawn ti sap a, ka lo bu nghat.






"I dam leh thuai dawn alawm" a ti a, "Mahse eng hun ah nge? Engtia rei nge? tih a hriat si loh alawm" ka ti ve leh, "Engtianga rei pawh ni se ka nghak thei che" a rawn ti, "Chutiang tur khawp chuan min hmangaih a maw?!" ka ti tial deuh ruai.







"Ka hmangaih che ka tih chuan ka hmangaih che ani mai, ka tan hian i tling tawk a, chu chu hre reng thin ang che" a ti sap a, a tawng ring hran lo, mahse ka beng ah chuan a fiah fel fai viau.







Ka kawr chhungah a kut zen lut in ka kawng ah min kuah a, a lam ah min pawt hnai sauh bawk, tichuan le, ka dam tha rih viau bawk a tiin duhthawh zet chuan kan in fawp leh a, a kut pawh a awm hle hle bik miahlo, ka taksa chu a zut kual a, a khât tawkin ka thaw leh hrawih thin.








Hmeichhia zawk ni mah ila a tawp thlen mai pawi tihna ka nei hauhlo, a ni pawh a thaw rang tan viau a, mahse a tawp kan thleng ngei dawn nia ka hriat hnu ah a in la hrang a, ka melh vat.





"A la hunlo" a ti tham tuak, a thaw chu la rang vet vet tak a ni, "Hun tha awm tawh lo ta se" ka tih chuan min melh zawk, "Mos, kan la innei dawn tho a lawm" ka ti leh a, a nui suk in ka hria.






Khum ah chuan a thu chhuak a, "Anih chuan inneih zan ah" tiin chiang zetin min en, ka zep lo, ka chhungril ah chuan hlauhthawnna a awm tlat, chu chu hria ni awm fahran in "Naute, i dam leh dawn alawm, kan innei anga, fa pawh kan nei ang, hlauthawng suh" a rawn ti sup a, ka ngaihtuah na a rawn sawi chhuak chiang lutuk chu ka nui ringawt.








"Mu leh tawh ang" tih pahin a rawn mu tha leh a, "Lo kal la" tiin a ban vei lam chu ka kham turin a beng thak thak bawk, kan mu leh ta poh chu a nia, "Mipa i ni tiraw" ka tih chuan nui chungin min rawn en a, "Tinge?" a ti zawi sup, "Tiang em em a i insum thei hi a mak" ka ti tawl.





A nui chhuak hak a, "Inneih zan atan ka dah tha a lawm, hei ai hian khum pawh a dup deuh tawh ang" a tih chuan ka nui ve suk, ni e, a insum theih vang ngawtin mipa a nih loh phah reng reng lo, min hmangaih vang zawka in sum thei chauh a ni.






Tunah ka pum lam la dam lo mahse ka thinlnng na zawng zawng tih dam a ni tawh a, Pathian rin chhanin ka taksa natna chu in hneh tir ka tumlo bur bawk, ka stage chu engpawh lo ni sela, ka hmalam hun ka suangtuah na tur min dal chuang lo ve.


















~~~
Ka mit a na over😖ka chhungte ka hrilh ngam bawk silo a😂
Tichuan le, an innei tawh mai dawn a mawnle🤔eng nge in ngaih ve dan....



Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » September 26th, 2021, 2:21 pm

Eternal love




Chapter-32❤




After 1 month


Moses POV



"Sam lem tal chu in vuah dawnlo em ni?" Jimmy chuan a ti a, "Nun lem hi ka duhlo" ka lo ti ringawt, ni e, tunah hian Lawmi nen kan inneih na tur buaipuiin kan buai map map viau, a kut a Venflon tel lovin a natna a tuar thei tawh a, official takin la dam lo mahse kan inneihna tur a dal pha tawh chuanglo.






Biak in chhungah ka nupui tur nghakin ka ding a, kawngkhar chu a rawn inhawng a, ka hmangaih chu muangchangin a rawn pen lut, a lu a sam awmlo chu a nui hmel mawi tak chuan a hliah khuh a, a kawr fual var chuan angel ang maiin a cheimawi bawk.





A kut chu ka lo vuan a, 'tiam tlat e' tiin kan pahnih chuan thu kan tiam dun a, lunghlu zungbun ka bun tir lai te chuan a tah nuih hak in ka hria, thu chham laia a lai hmel mawlh kha a duhawm.







Inneih program chu kan hmang zo a, ka nu leh pa te pawh an khi ve vur vur mai, ka pi phei chuan a mittui a dang zo meuhlo.





***





"I â thei e, ka zak lutuk" motor a kan luh rual chuan a ti nghal hluk a, "A ho e, an au nasat em kha" tih pahin ka nui a, thiante lam atang khan kiss tura min titu an tam bawk nen, keia lo duhthawh deuh chuan pawm kan ka tum a, ka tluk pui pek alawm, an nui nasa dur dur viau in ka hria.






"Chupawh nise, min tluk pui leh mai mai tho sia, ka zak thlawt" a ti leh a, "Ka duh vanga tlu pawh ka nih loh kha, bak ah a nuam ve alawm" tih pahin a dar ah chuan a nek a, ka hmuh hlau zetin a khi suk.







Kan Honeymoon hmanna tur hotel kan pan mek a, decorations pawh a pui viau ang, kut in kai chungin hotel ah chuan kan lut a, miin 'lukawlh nupa' min lo ti anih pawhin zahna nin thlen pha lemlo.







Khua a thim tan tawh a, dinner pawh an lo peih fel thlap tawh, khum ah chuan rose sen a lo khat a, room chhung chu a rimtui viau bawk.






Thil kan ei zo a, kan in ti fai tawh bawk, bathrobe chauh a ha a, kei phei chuan kawr pawh ka ha lo, khuma a phone a kheuh mawlh mawlh chu laksak in a bulah chuan ka thu a, "Room decorate hi fak i tum miah lo ami? A romantic em?" tiin ka mit ko ka san zuk zuk a, chutah thaw hap in "Room chu a romantic, nangmah kha romantic tel phei la chuan a tha ngawt ang" a tia nih chu.








Tlai lama thil thleng kha a sawi chhan tih ka hre mai, ka awm dan chu siam remin a mal chungah chuan ka lu ka nghat a, "Anih leh romantic tak chuan ka che dawn em ni" ka ti a, confi hmel zetin "Ti ta che" a ti sup.







Khumah chuan ka bawh thlu a, duhthawh zetin a hmui ah ka fawp a, a nghawng vel chu ka nul kual nghal thuak thuak bawk, kan zauthau dun tawh viau a, a bawp chu ka kuai kak a..

*CENSOR**CENSOR*


Lawmi POV



Ka harh hlawl a, Mos-a chu ka bulah a lo awm tawh lo, chawp leh chilh in nizan lam ka hrechhuak nghal a, ngaihtuah chiang mang hlei lovin ka'n in hup ringawt a, engmah in bel tlat heklo.






Ka nui suk a, ka lai leh dawn nghal ringawt, ka hmangaih leh ka pasal ngeiin ka virginity min laksak thei chu tu hriat tlak lovah ka inchhuang ru viau.





Chuan nizan khan a zei viau bawk, min tihnat a hlauh luat ah khan a va han insiam rem thei tak, mahse a vawi khat na a ni miau a, ka na thum tho.





"I lo harh tawh alaw?" tiin Mos-a chu a rawn lang nghal a, towel a veng a, a taksa a tawk chiah a in phiar nalh em em ka hmuh chuan, awi karei, nizan lam kha chu a tir atanga a tawp thlengin ka hrechhuak nghal vawn vawn.







"Aw" ka ti ban chat a, chutah nui chungin "Eng nge i ngaihtuah?" a rawn ti, "Engmah" tih pahin thawh mai ka tum a, mahse kekawrte tak ngial pawh ka ha silo, "Ka thuamhnaw kha min lo pe" tiin sofa a ka kawr chu ka melh zauh a, "A ho e, ka hmu vek tawh tho" a la ti zui.








Ka thinrim dawn viau a, mahse ka pasal a ni tawh a, a sawi angin engkim a hmu vek tawh bawk, han zah leh tur chuang a awm in ka hrelo, bak ah a ngeiawm lutuk hi ka runluih chak hrim hrim, ka tho a, "Nia, i hmu vek tawh" tih pahin ka puan sin lai chu khum ah ka theh thla a, a meng phar chu ka hmuh hmaih lo nasa, a nui ri pawh chu ka hre thei.





Ruak ngal ngatin bathroom ah chuan ka tlan phei a, shower chu ka on nghal.





***






Ngawi rengin ka en tawp "Ka siam ka tih chu" a ti leh a, "Hetiang zo zai hi ka inbual chhung lek khan i siam zo hmanlo LALRUATDIK" ka tih chuan "Heyy" a rawn ti vak.





"Engtinnge ka hming i hriat?" a ti a, "Pasal te hming hriat loh te chu a" tih pahin body lotion chu ka in hnawih mawlh mawlh, "Mahse ka hrilh sir lo che a" a ti leh a, "Tun atang chuan Lalruatdik ka ti ziah tawh ang che"

"A tullo e, Mizoram ah pawh kan awmlo" a lo ti hmuk"Nang pawhin midang zawng zawng in Ana min tih laiin Lawmi min ti ziah tho alawm" ka ti ve leh thung a, inneih tuk atang in kan in hnial nghal hlak hlak reng, mahse chu chu kan hlim pui ang reng lawi.






Ka thutna tur chair a pawt chhuak a, ka inbual chhung leka a siam zawh hman chu ringlo mah ila ka siam a ti ve tlat bawk sia, breakfast chu kan ei a, Tu pasal mah ka awt biklo, ka pasal hi ka hmangaih a, a bulah hian ka hlimna tur tawk chu ka hmu.







"Englo, thla khat tal chu ka nu te nen kan chen ho a ngaih hmel" inthlahrung hmel zetin ka insiam lai chuan a rawn ti a, "Thla khat chauh maw" ka tih chuan min rawn en in "Ka nu te nena chen ho reng chu i duh ka ringlo a" a rawn ti.







"Lalruatdik, min va ngai sual ve" ka ti hmuk, a chhungte nena chen ho duhlo anga min ngai nghal ringawt chu ka lungawi lemlo, "Aaa chulam a nilo, hreawm i tih ka hlau alawm" a ti leh a, "Aw engpawh nise thla khat chu kan awm dawn nia" ka tia, a sawi zui tawh biklo.








Hun chu a kal ve zel a, keipawh mo ka nihna angin inchhung tih fai leh eirawng bawl chu ka kut ah ka dah ve bawk, mahse ka nu (Mos-a nu) hian a remti vaklo zawk, kan in hriat tirha a mizia te kha chu tun ami nen khaikhin chuan danglam tak a ni, a felin min duat thiam a, ka natna avangin tawngkam na min hman khum ngailo bawk, Mos-a pawhin a hma ai ngawt chuan a nu pawh a ngaina a, engkim chu a nuam a, chhungkaw dang ka awt ngai lo.







Kan pa office kal tur thlah leh a lo haw laia lo hmuah chu ka tih tur ah ka dah tawp, a lo haw hun awm ah veranda a thutthleng ah thu in ka lo hmuak mai zel.







"Khai aw,Mr,Wilbert" tiin ka thutna atang chuan ka ding nghal a, "Engtinnge in lo in zui haw daih theih a?" tiin Mos-a chu ka melh a, "Lut phawt ila" a tih chuan inchhungah kan in zui lut a.





Ka nu chu ka pa conference tawiawm turin a chhuak ve a, ka pi lah a thian hlui te hmu turin a chhuak bawk si, keimah tih loh chu an chhuak vek a nih chu.







"Mr.Wilbert nen hian restaurant ah kan in hmu fuh a, a mah hi bia la" tiin a melh zauh a, chutah a aw thian kharh kharh in "Englo ania, heta ka lo kal chhan tak chu nangnena kan contract chungchang vang kha a nia, tikhan a chhan pawh sawi lemlo khan kan contract kha i rawn ti tawp ta ringawt si a, a chhan tal sawi nila chuan kawng dang kan dap tur a nia, engpawh nise tunah chuan nangpawh i that lai tak a niin ka hria a, i duh anih phawt chuan contract kha chhunzawm leh kan duh ani" a ti charh charh a, Mos-a ka melh vat.








"Ka pasal thu thu hi a ni mai" tiin Mos-a chu ka en ran a, chutah rawn nuiin "A thawk Tu tur thu ni rawh se" a rawn ti ve leh thung, chuan contract chu chhunzawm kan remti ta ani.






Moses POV





Shower zo darthlalang hmaa ka din lai chuan ka hnung lam atanga min rawn kuah in"Ka lawm e" a rawn ti ringawt.





"Engvangin maw?" ka tih chuan "Contract kha" arawn ti, ka nui a, "Nangma contract tur a nia, keimah duh min thlan tir daih a" ka tih chuan "Nupui te chuan pasal te an rawn thin a lawm" a rawn ti khauh, ka chhan leh hma in "Chaw ei ka lo siam ang, lo kal vat la" ati leh a, a chhuak zui nghal.







A kal liam hnu chuan ka nui suk ringawt, cancer tih ah ka buai lo, ka tan chuan nupui tha ber a ni chiang ani, engpawh ti dawn sela min rawn der thlap thlap zel a, chu chuan a hriat miah lohin min ti hlim vur vur thin viau, dam sam lo chung chung pawha ka thuamhnaw bal min suk sak te hian midang suk ngawt ai chuan hak a nuam deuh, a coffee siam te hi dawr ami ai chuan ka pumpui hian a ngeih daih zawk hian ka hre thin.







After 2 Months




A chal chu dawmin a hnung zâng ah ka chul a, kanu mangang chuan hospital a sawi ri chhen tawh bawk.





Lawmi chu tih tak zetin a luak a, kan chhungkua in bathroom ah chuan kan din hual thap, a hma pawh in han uak zauh hi a nei thin a, mahse tun ang em em hi a ni ngailo.






Tui ka pek rual chuan a in nghal khawlh khawl a, "Na i nei em?" tiin a pum chu ka dawm vat, a lu a thing a, "Ka pum lam a nilo" a ti tlat lawi si.





Chutah ka nu chuan "Ngawi teh Ana, tun thla ah i period tawh em?" a rawn ti a, Lawmi chu kan en thap, a ngawih vang vang hnu ah a lu a rawn thing.






Ka nu chu a tlan chhuak nghal a, Lawmi kuah a bathroom atang kan chhuak chiah tih ah ka nu chu rawn let in "Bawihi, va test rawh" tiin pregnancy test kit chu a rawn pe a, Lawmi pawh chu a let leh.






Living room ah thu in kan nghak thup a, ka thin phu chu a rang dawt dawt viau, minute 5 hnu vel ah a rawn chhuak a, ka thutna atang chuan ka lo ding luai.






Mahse min rawn pan lovin ka nu bulah chuan a kal a, test kit a pek ruala ka nu reaction atang chuan result ka hre thiam nghal.





Test kit chu ka ban vat a, rin pahnih a lo awm ran, Lawmi chu en in "Hei hi a tak maw?" ka ti sap a, nui sen sen chungin a lu a but nghat.





Engmah sawi lovin ka kuah vawng vawng ringawt, kei hi pa ka ni ve tawh dawn anih chu, ka nu leh pa te pawh an hlim a, ka pi phei chu sawi loha liam.






Chutianga Lawmi'n nau a pai tak ah chuan kei pawhin a hma aia duat leh ngaihsak ka tum a, hna thil vang a nih loh chuan ka chhuah San ngai meuhlo.






A hriat lohin doctor ka rawn ru fo a, natna benvawn nei sa anih avangin a man a tuar theih tur thil chu engmah ka dihlo a ni tawp,mahse a natna in a naupai a tihbuai loh thu min hrilh a, chuclvang chuan a mah pawh ka hrilh lemlo.





**



Ka phone ri chu thei leh thei lovin ka ban a, Jimmy a lo ni, tun ang huna min lo call dan ah a chhan chu ka ring thiam mai, "Hello sir, city town bulah in thahna a thleng a, i lo kal nghal a ngai" a rawn ti a, thil dang ka sawi ve hma in a off leh nghal.






Lawmi chu ka melh zawk a, a lo la thaw sak sak, thawm dim zetin ka insiam a, ka chhuah dawn ah "Khawi ah nge i kal dawn?" a rawn ti tham chal, ka in her a, a mit meng fiah kel kawl zet chuan min lo en reng.





A bulah chuan let lehin a chal ah ka fawp a, "Jimmy-an min lo call a, ka kal angai" ka tih chuan min chhang lovin hnuai lam a melh daih, nau a pai atang hian ka lakah a pangchang zual a, chu chu ka hriatthiam pui viau.





"Ka kal ngei ngei a ngai alawm, ka lo let leh vat ang, ummm" ka tih chuan a bu nghut a, ka hmanhmawh tawh bawk nen ka kalsan nghal ringawt.







A hmun ka thlen chuan an lo awm deuh laih laih tawh, ruang chu postmortem turin an kal pui nghal a, tunge anih hriat theih na turin a hmel hmuh tlak a awm lo va, credit engmah an hmu bawk silo, a thi a ber pawh hriat loh chuan a that Tu hriat chu a la hla deuh.






Khawi lai dawr rawktu Tu Tu te emaw zawn nen ngawt chuan a in khirh hleih deuh, neuh neuh a tam viau a, station ami Tu te mah chu kan thu hle hle hmanlo, khua a var chuan postmortem result pawh a rawn thleng a, ka rin ang in a hmai chu acid a theh ngei a ni bawk.





Breakfast pawh ei lovin kan bawhzui nghal char char a, ni tlak thlengin a hming leh chhungte bak hriat zui kan nei lo, thingpui in a kan thut khawm laiin Lawmi ka hrechhuak a, ka call nghal.






A pick up lova, ka call nawn biklo, ka haw hun ah a fel leh vek mai ang, ruang chu tunge a nih tih leh engtianga thi nge tih kan hre tawh a, hna khat chu a fel duak ah ka ngai.





Jimmy leh Nicky ten haw tura min tih avangin ka haw san a, an pahnih pawhin an tha tawk tih ka hria a, ka ngaihtuah lemlo.







In ka thlen chuan zan dar 9 a pel tawh, ka nu chu Living room ah a lo awm a, "In hlawhtling em?" min lo ti vut, kan buai mek thu hrilh in room ah ka lut nghal a, ka rin ang chiah in Lawmi chuan art bawk a lo buaipui.





Ka thawm hrelo ang maiin en pawh min en lova, a chhan chu ka hria in ka hria, "A hmai ah acid in an theh a, a chhungte an khawngaihthlak khawp mai" ka ti ve ngawt a, chhanna ka hmu lemlo.






A bulah kalin "Titeh, ka chau ania, eitur min siam la" nuih tlawn deuh chuan ka ti a, "Hna ka thawh hi" a ti duh lek chauh, a thutna sira thingthiin a pum chu ka khawih a, "Naute, a nu hian min duat lo e tiraw" ka ti sup a, min rawn en in a ner sak.






A paint brush chu a dah ri chawrh a, min melh rawm rawm chungin a chhuak daih, han tau ve bawk thin mahse a tlin reiloh zia ka hre ve kar sia.





Chaw ka ei a, ka in tihfai zawh meuh chuan a lo tlai leh duai tawh, Jimmy ka call a, ka kal leh kher angai emtih ka zawh chuan "Aih, zanin chu lo kallo mai rawh, in nu i hlau si" a rawn ti daih, a duh hi chuan a ngeiawm.






Kan nu hi ka hlau hranlo, mahse ka zah a, tun hnai te hian a mood a chhe deuh tih loh ah chuan a ni pawhin min zah thiam viau, engpawh nise zan in chu hahdam deuha mut siai siai ka duh.







Khum ah thu in lehkha bu a lo chhiar malh malh a, khum mawng atanga inthawlh lut in ka kuah a, chupawh chu hrelo ang hmak in a la awm, ka tawng char char a, pakhat mahin min chhanglo.






A lehkhabu chu laksak in chhuat ah ka paih a, min rawn melh zawk, "I ngawi reng dawn ami? Ka tawng char char kha" lungawi lo deuh chuan ka ti a, min chhang lovin a tho a, lehkhabu chu a zu chhar leh ngat anih chu, nidang ah chuan min vin vak zel sia.





Mipa ni mah ila chutianga ka nupuiin min be duhlo tlat chu ka lung te a chhe lek lek, khumah rawn lawn leh in lekhabu chu a keu leh a, ka thaw hawk.







'Ka hre rei ve viau ang' ti rilru nauh nauh in puan chu ka sin tha a, lehlam ka hawi hmak, chau viau mah ila ka muhil thei chuanglo, in leh in leh chu ka duh bawk silo, nupui nei ve tawh, fa pawh nei tep tawh si chutianga ka duh ang pawha ka mu thei lo chu ka nuih te lam lam a za.







Chutah ka in rinloh laiin ka hnung lam atang in ka nupui chuan min rawn kuah a, a rawn tawlh hnai sat sat bawk, ka in her a, muhil tawh ang maiin a mit a lo chhing hmak, ka nuih suk ringawt, ka pang lum ngheng lo chuan a mu ngai bik tlat lo, ka hnaih ve sauh a, a nui suk chu ka hmu reng, a chal ah ka fawp a, ka muhil ve nghal.
















~~~
Afterwards hmiah² tawh mai dawn😂
Like, comment leh click kha aw😘

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » September 26th, 2021, 2:21 pm

Eternal love



Chapter-33❤(Last)



Afterwards deuh tawp² dawn ka tih kha aw😁



Lawmi POV




Zinga ka harh chuan a lo la mutui ngang mai, ka nui suk a, nizan vang erawh kha chuan ka in thiamlo deuh, tunlai ka mood in thlak chak lutuk hi keipawh in ka hrethiam biklo, ka naupai vang ah ka ngai ve hmiah.





A hmui ah ka fawp zauh a, a rawn meng nghal kuau anih chu, ka tihngaihna hrelo chuan "Tihpalh" ka ti ringawt a, min en ran chung chuan a nui duh miah lo leh nghal.






Hrilh hai ang reng deuhin ka tho a, ha ka nawh laiin bathroom ah chuan a rawn lut ve a, ngawi rengin bang ah min nawr bet nghal rawk, ka chhoh en ha a"Tinge?" ka ti sup.






A thaw hap a "Nizan ang khan awm tawh suh" a tih chuan ka nui suk, "Lawmi a nuihzat thlak loh ania, min biak duhloh khan a hreawm lutuk" a ti leh a, a hmel chu a thu tak viau bawk.






A nghawng ah kuah in a hmui ah chuan ka fawp leh zauh a, "Anih leh tihpalh" ka ti sap, min en reng avang chuan alak atanga in la hrangin ka kut sil mawlh mawlh pah chuan "Nau pai te chuan mood a inthlak thut thut zel alawm, a then phei chuan an pasal te hi an ten tlat zel" tih pahin ka melh a, a lo ner sak.






"Chuvang chuan ka ten ve lo che hi chu lawm ringawt rawh" tih pahin a hmai ah chuan sahbawn ka tat a, a tawng ve hma in ka tlan chhuak daih.







Ka nu chu a lo tho tawh a, ka pa pawhin thingpui in pahin chanchin bu a lo chhiar leh malh malh tawh, ei rawng chu ka bawl pui nghal sawk sawk a, kan inneih hnu thla khat vel ah khan Mos-an in sawn chhuah ka duh leh duh loh kha min zawt a, duh chu ka duh zawk ngei a, mahse ka pi ka rawn khan 'Moses-a nu leh pa te pawhin an pawm thlap tawh che a, hreawm i ti lutuk te anih loh chuan in hrang chan kher tul ka tilo' a tih avangin in sawn chhuah chu kan tum ta lo law law, ka nu te nen hian hreawm tihna ka nei lemlo a, Mos-a ka ngaihtuah tel bawk nen a tha zawkin ka hria a ni.







Breakfast kan ei kham a, ka pasal chu a insiam leh nghal mawlh mawlh, an case khawih tur hi a khirh viau ani tih nizana a sawi dan atang khan ka lo hriat pui, "I lo haw har dawn em?" a bula din pah chuan ka ti a, "Ka hrelo, mai thei" a tih chuan ka bu nghut.








Vawiin hi ka in check up ni tih a theihnghilh a ni ngei ngei ang, ka hnual deuh rawih a, mahse a hna ti khawlhkham Tu nih chu ka duh biklo, a tlan liam thlengin ka thlir a, inchhungah lutin hospital a kal turin ka insiam ve nghal mawlh mawlh.









Ka hmeichhe doctor rawn thin hi New York ah chuan a lar ber pawl a ni a, rin pawh ka ring viau, ka cancer natna chu zahpui thei nilo mah ila sam tel miah lova hmeichhia ve lem si khawlaia han kal chu a nuam falua lo, nidang ang chu nise ka bulah ka pasal a awm ve anga, inchhuang deuhin ka hawi vah mai tur.





Engkim mai chu a boring vek mai hian ka hria, ka naute chungchang ah chuan harsat na a la awm lem lova, a khât tawk erawh chuan Dr.Eric ka la pan fo tho.




Hun chu a kal ve bek bek zel a, Mos-a chu an case kal lai a la tawp hlei thei lo, in ah a rawn haw zeuh zeuh a, mahse a mu mang ngailo tih ka hria, chuta kara lo thinrim khum ve chhen chu ka tih tur niin ka hrelo a, ka duh bawk heklo.





Mos-a awmlo mahse painting demand a awm ve reng avangin keima tawk ah chuan ka buai ve thei viau a, chu chuan ka in ngaihtuah lung puam tur pawh min hnem viau.



***


Thleng ka sil mawlh mawlh a, Mos-a tawng ri ka hriat rualin ka tlan phei vat, min hmuh ruala min rawn panin ka chal ah a fawp zauh a, a hmel chu hlim riau a ka hriat avangin "Case a tawp ami?" ka ti a, a bu nghauh nghauh.






'Chaw ei ka lo siam ang che' ka tih chuan ka ei tawh a ti tlat a, a inbual na tur chu ka siam sak leh nghal, shower zo a rawn chhuak a a mitmeng dul raih chu ka hmuh hmaih lo.




"I mu nghal duh em?" tiin mutna tur chu ka siam leh nghal sawk sawk a, khuma thu hnawk pah chuan ka dul puar ve deuh tawh chu chul hliau hliau in "Bawihte, a pa hi a buai thei lutuk a, tihpalh aw" a ti sap a, ka lo nui suk.






"I chau awm sia, mu nghal daih rawh" ka tih chuan min en run chungin "I lo mu ve dawn lo ami?" a ti hmuk, ka nui a, "imm mu ang" ka tih chuan a khi ve suk.






A chau ngang a niang, kan mu fel chiah tih ah a thaw nghal sak sak, hnai zet ah a hmel chu ka en a, pasal tha tak zawng a va han ni tak, ka lo suangtuah ve thin kha chu pasal neih a naute duhawm deuh neih leh chhungkaw hlim deuh nih kha a nia, ka pum chu ka khawih a, ka nui ringawt, ka suangtuahna chu Mos-a nen hian a famkim ang tih ka hre bawk.







Moses POV




Kan chhungkua in Lawmi result kan nghak thap a, kei phei chu ka thu hle hle theilo, bathroom a awm laiin a pum a na thut a, naute vang ni dawn se thla 7 chauh a la ni bawk si, ngaih chu a tha mawlh lo.





Cancer vang lo ni ta se, naute hi paih ngai thut ta se tiin a chhe ber thleng chuan ka lo ngaihtuah leh hman tawh.






Rilru nuam lo deuha kan tei kawi sek laiin naute tap ri ni awm tak kan hria a, kan phawk nghal hra hlawm mai, kawngkhar bulah chuan kan ding thup a, minute 10 hnu vel ah doctor chu a rawn chhuak.





"Naute tap kha" ka ti nghal ringawt a, "Fapa duhawm deuh in nei a, mahse a nu chu a la harhlo" ka nui tur ka ha pawh a la lang hmanlo ang, a tawp leh nghal rawih.




"Tinge a la harh loh a? Engtinnge a awm?" ka ti leh a, "A taksa a chak lova, mahse a hlauhthawn awm loh, a harh vat mai ang" tiin a kal a, nau neihna room a luh ve mai te chu ka duh rum rum tawh.





Bawihtea thla kim lova piang anih avangin hospital ah kar hnih dawn kan awm angai a, Lawmi pawhin hma a sawn chak viau, mahni thisen ngei a nih vang nge bawihtea chu ka hmu tha phuk roh a, a mitmeng ah chuan min chhun viau bawk in ka hria.

Ka pi in Lucas tiin a hming a phuah a, kan pawm tlang viau.



Naute kan neih atangin thla khat a ni leh tawh, ka pi chu US a ka patea ten an rawn chah chhen tawh a, ui viau mah ila chelh hleih theih a ni chiang silo a, lo let leh vat in tiam in US lamah chuan a kal leh ta phawt a.






Thla kim lova piang mah nise Lucas chu a pian rual pui te aiin a sawngnawi bik chuang lova, a ngo in a sam chu a nu sam ang mai khan a buang thang bawk.




Naute kan neih chin ah Lawmi pawhin painting chu a chhunzawm thei ta rih lova, mahse a pawi ka ti hran lo, ka hlawh pawh hian ka chawm zo ve rih emai.




After 1 year


"A tullo ka tih kha" ka ti thawt a, bawihtea hmuha tawngkam vin deuh hman ka duhloh avangin room ah ka kai lut nghal bawk, "Nanga tul tih leh tih loh lam a nilo, Lucas hi ngaihtuah ta che" a tih chuan ka thaw hawk.






"A lo thang lian zel anga, keimah vanga an chhaih nawmnah ka duh reng reng hleinem" a ti leh a, a mittui chu a tling pam tih ka hria, ni e, ka nupui hian min rawn miah lovin sam lem a rawn lei anih chu.





Khumah a thu hnawk a, "Bawihtea hi ngaihtuah la, midang pawh in an hmang ve tho alawm, sam lem ka vuah avangin nun lem tak ka nei tih na a ni kherlo" a ti sup, engpawh nise a sawi dik in ka hria, school te a la kal ve anga, chutih hunah chuan nu leh pa lukawlh a neih avangin an chhaih lovang tih tunge sawi thei.






Lawmi ka vin vak avang chuan ka in thiamlo leh hnuhnawh, kei aiin hreawm a ti daih zawk dawn si a, ka awm ah ka bei tir a, "Aw le, ka tihpalh anih kha, wig chu hmang la, kei pawhin ka lu ka met tawh rih lovang" tiin a chal ah chuan ka fawp a, a mittui tling pam karah chuan a rawn nui suk.








Bawihtea kum khat tlinna chiah ani a, a pi leh pu te chu a phur ber ber te an ni, cake chu a nu in a cut pui a, chhungkhat te kan sawm ve nual bawk nen kan ri mup mup a ni ber, mahse a hlimawm viau tho mai.






Inleng te an haw zawh meuh chuan dar 10 a pel tawh a, bawihtea phei chu a mutui tawh viau, "Mos" bathroom atanga ka chhuak chiah chu a lo ti nghal a, a phone kheuh mawlh mawlh pah chuan "Contract kha a tawp a ni mai tawh si a, ka ngaihtuah a, dawr hi ka siam ve tawp mai dawn a mawnle" a tih chuan ka melh zawk a, min lo en reng.







"Chungte chu i duh leh duhloh a ni mai alawm, mahse bawihtea hi" ka tih chuan a thaw hap a, "Nia, a lo chhun fuh lutuk che hi a buaithlak ber" a rawn ti daih, "Eng nge? Min chhun a, a hmelthat em hi" ka tih chuan "Mahse a harh alawm" a rawn ti khauh, ka tetlai chuan harh ve tak ka ni, chu chu hria in ka nupui hian fiam nan tak min hmang ziah.







Mu phawt ang" tiin a ban ah chuan ka kai a, bawihtea rawn tal deuh avang chuan ka kut chu thing thla in a mut pui nghal rawk rawk, heiham, fapa te pawh kan thik lo chauh tawh a nih hi a.




**



Lawmi POV




"Lo kal ve kher chu a ngai ami?" thleng ka sil zo a bula thu pah chuan ka tia, "Ka thawh puiten an hmu ve chak tawh cheu a lawm, tiraw" tiin a fapa chu a melh zauh a, a lo nui hui mai.





Ka tawng leh hma chuan "insiam ang u" tiin room ah an in pawm phei a, zui ve mai loh chu tih ngaihna awm heklo, bawihtea chu ka siam sawk sawk a, ka insiam laiin ka pasal chuan ka hnung lam atanga min rawn kuah in "I hmelthat zia kha" a rawn ti ringawt, "I naupang chhia emai" ka lo ti hluk a, "Naute siam leh tawh ka chak e" a tih chuan ka melh kawk a, a lo la nui vur vur zui.




"Kal mai teh" tih pahin ka nghawk pawp a, bawihtea chu rawn kal chhat chhat in "Maaa" tih pahin ka kekawr chu a rawn pawt leh tawh, chhuah dawn hi chuan a lo hre ve kar zel, "I pa hi alawm" tiin ka melh rum vak a, dar san ak in bawihtea chu a pawm a, a chhuah pui daih.






Lucas hi thla kim lova piang ni mahse a taksa ah a hriat lem lova, kum khat a tlin hma in a kal thei bawk, a chen pui te sap thlah vek kan nih avangin sap tawng hlirin a pi leh pu te chuan an chhaih thin a, mizo tawng thiam heklo, kei leh Mos-a erawh chuan mizo tawngin kan be lui hram hram zel, hriatthiam chin pawh a nei ve.







Station ah chuan kan inzui phei a, Jimmy chuan bawihtea a hmuh rualin a lo pawm vat, "Hei hi ka nupui duh tak chu a nih hi" tiin ka kawng ah min kuah a, a nui suk bawk.






A thawh puite chuan kut an lo beng dar dar a, ka lai lek lek, kan inneih hnu ah station hi ka kal leh pawh ka la hrelo, chuvang chuan Jimmy leh pu Alex-a tih loh chu hriat pawh ka nei lem lo.







Chutianga nupui fanau te nena kal ta chu han pawh a thawk biklo, Lucas lah a kal thei tawh bawk nen ven a ngai viau a "In in tawn dan hi a romantic lo ve e" Jimmy chuan a rawn ti pek, kan intawn dan chu min zawt ta chhen hlawm a, a tawp ah ka pasal mawl lutuk chuan a tir te atangin a sawi ta vek, a khat tawkin an nui leh hak thin a, kei ka lo ip chawih chawih thung.







In a kan haw hnu ah Lucy nen kan in video call a, kan inneih nikhan a lo kal ve thei ta silo a, tunah a pasal nen Germany ah an awm daih a, fa pawh phir an nei nghe nghe.







Kan in be khat bawk nen sawi tur kan ngah duh viau a, an pa chu a rawn ti lang ve bawk, lian thelh thawlh, hmui hmul a la nei zui, ka pasal in a neih loh vang nge hmui hmul nei ho hi chuan ka mit an la lemlo.






A hmel en aiin a tawng duh a, Germany ah awm mahse American english chu a hnehsawh viau tho, an in hmangaih hmel viau a, Mos-a inbual zo chu rawn lang ve in Lucy nen an lo in hre sa tawh bawk nen an in be nghal luam mai.







Bawihtea a pi leh puten riah pui an tum tlat pek a, hnute tui ka neih loh avangin a lem hlir kan pe bawk nen a vawi khat nan an in pawm phei ta poh chu a nia, 'zan laia a tah chuan min lo kai tho mai dawn nia' tiin kan in thlah a, ala riah hran ngailoh avang erawh chuan ka ngaihtuah deuh tho.







Khuma lehkhabu ka chhiar laiin min rawn bawh rawk a, "Eng nge?" ka lo ti hluk, "Bawihtea hian nau a awt tawh ang" tih pahin a mit ko a rawn san zuk zuk a, "I tenawm" tih paha nam sawn ka tum chu ka hlawhchham nasa.







Ka thaw hap a, "Ka peih lo tak tak,Lucas pawh in nau a la awt lo" ka ti leh, khum ah thu in tum burin min en a, naupang ti tau nen thu hmun reng, "Mu ang" tih pahin a ban ah ka pawt a, a rawn mu ve leh mai.







Ka kuah a a hmui ah chuan ka fawp zauh bawk, a ni pawh a lungawi lo rei chuanglo, ka kawngah min kuah a, hnai set sawt ah chiang zeta min en in "Ka nei che hi ka lawm ani" a ti sup ringawt.






Tawi deuhin ka nuih suk a, "Keipawh" ka ti tawp, "I hria em? Rei deuh kan dam dun anga, Lucas-an tu a neih thlengin" arawn tih leh chuan ka nui chhuak hak, "Cancer... " tih chauh ka sawi hman, ka hmui a rawn hup a, "Cancer tih kha sawi tawh suh, kan nunna hi chu Pathian kutah chuah a awm, chuvang chuan thih hma lutuk kha tum suh" a ti a, ka en kar mai.








Chutah a thaw hap a, "Naute siam i duh bawk silo, muhil ang" tih pahin min kuah nghet sauh a, a mit a chhing zui hmak bawk.







Ka pasal hmel chu ka en vang vang a, ni e, ka lungawi ani tawp mai, ka naupan laia ka lo dream ve zawng zawng te kha tuna ka pasal ah hian a kim a, ani nen chuan hringnun hi ka hmu famkim thin.






Ka hun kal tawha ka vanduaina zawng zawng te kha lo tawk miah lo ta ila Mos-a nen hian kan in tawng kher lovang, ruah a sur phawt loh chuan chhimbal a rawn zam ngailo reng ani.







Khawvela pasal tha ber leh fapa tha ber ka nei a, ka taksa lo chak lovin lo awngrawp deuh mahse ka khawvel te ka bula an awm chhung chuan vuina tur ka neiin ka hrelo.








A TAWP TA




A ending chu a va nawi ve in tih ka ring deuh🙊😂thiam thu sawi tur ka neilo, karleh ah kan exam dawn a, zawh ngei² a ngai tawh si,in duhthu sam lohna ah ngaihdam ka dil cheu a, ka story min lo chhiar sak ve thin avangin ka lawm lutuk e❤❤❤

Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)